ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦆꦧꦿꦤꦶ

꧁꧋ꦭꦪꦁꦩꦫꦁꦧꦁꦱꦆꦧꦿꦤꦶ
ꦱꦶꦁꦤꦸꦫꦸꦠ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​꧂


ꦥꦱꦭ꧀ ꧇​꧑꧇​ ꧇​꧒꧇​ ꧇​꧓꧇​ ꧇​꧔꧇​ ꧇​꧕꧇​ ꧇​꧖꧇​ ꧇​꧗꧇​ ꧇​꧘꧇​ ꧇​꧙꧇​ ꧇​꧑꧐꧇​ ꧇​꧑꧑꧇​ ꧇​꧑꧒꧇​ ꧇​꧑꧓꧇​

꧋ꦒꦸꦱ꧀ꦠꦶꦄꦭ꧀ꦭꦃꦔꦼꦠꦺꦴꦏ꧀ꦏꦏꦺꦥꦶꦠꦸꦠꦸꦂꦫꦺꦭꦤ꧀ꦠꦂꦫꦤ꧀ꦲꦤꦏ꧀ꦏꦺ꧉​

꧇​꧑꧇​

1꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦧꦺꦃ​ꦮꦶꦱ꧀ꦔꦼꦂꦠꦶ​ꦤꦺꦏ꧀ꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦥꦶꦁ​ꦲꦺꦴꦏꦺꦃꦔꦼꦠꦺꦴꦏ꧀ꦏꦏꦺꦥꦶꦠꦸꦠꦸꦂꦫꦺ​ꦩꦫꦁ​ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦭꦶꦮꦠ꧀ꦥꦫ​ꦤꦧꦶ​ꦭꦤ꧀ꦔꦁꦒꦺꦴ​ꦥꦠꦿꦥ꧀ꦱꦶꦁ​ꦮꦼꦂꦤꦮꦼꦂꦤ​꧉​ 2ꦤꦁꦔꦶꦁ​ꦲꦶꦁ​ꦗꦩꦤ꧀ꦲꦚꦂ​ꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦥꦶꦠꦸꦠꦸꦂꦫꦺ​ꦭꦶꦮꦠ꧀ꦲꦤꦏ꧀ꦏꦺ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦪ​ꦭꦤ꧀ꦠꦂꦫꦤ꧀ꦲꦤꦏ꧀ꦏꦺ​ꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦒꦮꦺ​ꦭꦔꦶꦠ꧀ꦭꦤ꧀ꦧꦸꦩꦶ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦼꦠꦼꦥ꧀ꦥꦏꦺꦲꦤꦏ꧀ꦏꦺ​ꦩꦲꦸ​꧈​ꦱꦸꦥꦪ​ꦤ꧀ꦢꦸꦮꦺꦤ꧀ꦤꦶ​ꦭꦤ꧀ꦔ꧀ꦮꦱꦤꦶ​ꦱꦼꦩ꧀ꦧꦫꦁ​ꦱꦶꦁ​ꦲꦺꦤꦺꦁ꧉​ 3ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦱ꧀ꦭꦺꦴꦫꦺꦴꦠ꧀ꦠꦺꦏꦩꦸꦭꦾꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦕꦥ꧀ꦒꦩ꧀ꦧꦂꦫꦺ​ꦏꦼꦚꦠꦲꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦪ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦏꦶ​ꦱꦶꦁ​ꦔꦿꦸꦩꦠ꧀ꦠꦶ​ꦱꦼꦩ꧀ꦧꦫꦁ​ꦔꦁꦒꦺꦴ​ꦠꦼꦩ꧀ꦧꦸꦁꦔꦺ​ꦱꦶꦁ​ꦏꦼꦧꦼꦏ꧀ꦏꦫꦺꦴ​ꦥꦔ꧀ꦮꦱ​꧉​ꦱꦏ꧀ꦮꦶꦱ꧀ꦱꦺ​ꦫꦩ꧀ꦥꦸꦁ​ꦔꦽꦱꦶꦏ꧀ꦏꦶ​ꦩꦤꦸꦁꦱ​ꦱꦁꦏꦢꦺꦴꦱꦤꦺ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦚ꧀ꦗꦒꦺꦴꦁꦤꦁꦱ꧀ꦮꦂꦒ​ꦤꦁꦠꦼꦔꦼꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧉​

꧋ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦸꦁꦏꦸꦭ꧀ꦭꦶ​ꦥꦫ​ꦩꦸꦭꦺꦏꦠ꧀꧈​

4꧋ꦩꦸꦭꦤꦺ​ꦱꦲꦶꦏꦶ​ꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦢꦸꦮꦸꦂꦧꦔꦼꦠ꧀ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦥꦔ꧀ꦮꦱꦤꦺ​ꦥꦫ​ꦩꦸꦭꦺꦏꦠ꧀ ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦗꦼꦤꦼꦁꦔꦺ​꧈​ꦱꦶꦁ​ꦒꦼꦢꦺꦤꦺꦔꦸꦁꦏꦸꦭ꧀ꦭꦶ​ꦥꦫ​ꦩꦸꦭꦺꦏꦠ꧀ꦱꦶꦁ​ꦤꦩꦸꦁ​ꦔ꧀ꦭꦢꦺꦤ꧀ꦤꦶ​꧉​ 5ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦠꦲꦸ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦩꦸꦭꦺꦏꦠ꧀ꦱꦥ​ꦮꦲꦺ​:

“ꦏꦺꦴꦮꦺ​ꦭꦤ꧀ꦏꦺꦴꦮꦺ​ꦢꦺꦮꦺꦢꦢꦶ​ꦲꦤꦏ꧀ꦏꦸ​꧉​
ꦲꦶꦁ​ꦢꦶꦤ​ꦲꦶꦏꦶ​ꦲꦏꦸ​ꦤꦼꦠꦼꦥ꧀ꦥꦏꦺꦤꦁꦔꦉꦥ꧀ꦥꦺ​ꦗꦒꦠ꧀
ꦤꦺꦏ꧀ꦏꦺꦴꦮꦺ​ꦢꦢꦶ​ꦲꦤꦏ꧀ꦏꦸ​ꦱꦶꦁ​ꦔ꧀ꦮꦱꦤꦶ​ꦱꦼꦩ꧀ꦧꦫꦁ​꧉​”

ꦭꦤ꧀ꦲꦸꦒ​:

“ꦲꦏꦸ​ꦱ꧀ꦭꦮꦱ꧀ꦱꦺꦧꦏꦭ꧀ꦢꦢꦶ​ꦧꦥꦏ꧀ꦩꦸ​
ꦭꦤ꧀ꦏꦺꦴꦮꦺ​ꦱ꧀ꦭꦮꦱ꧀ꦱꦺꦧꦏꦭ꧀ꦢꦢꦶ​ꦲꦤꦏ꧀ꦏꦸ​꧉​”

6ꦢꦺꦴꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦲꦉꦥ꧀ꦔꦺꦴꦁꦏꦺꦴꦤ꧀ꦲꦤꦏ꧀ꦏꦺ​ꦲꦩ꧀ꦧꦉꦥ꧀ꦠꦼꦏ​ꦤꦁꦗꦒꦠ꧀ ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦤꦺ​:

“ꦩꦸꦭꦺꦏꦠ꧀ꦏꦧꦺꦃ​ꦏꦸꦢꦸ​ꦚꦼꦩ꧀ꦧꦃ​ꦢꦺꦏ꧀ꦤꦺ!”

7ꦧꦧ꧀ꦥꦫ​ꦩꦸꦭꦺꦏꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​:

“ꦏꦪ​ꦲꦔꦶꦤ꧀ꦭꦤ꧀ꦒꦼꦤꦶ​ꦭꦸꦔꦠꦼꦏ​꧈​
ꦩꦼꦁꦏꦺꦴꦤꦺꦴ​ꦲꦸꦒ​ꦥꦫ​ꦩꦸꦭꦺꦏꦠ꧀ꦭꦸꦔꦠꦼꦏ​ꦩꦤꦸꦠ꧀ꦠꦼꦩ꧀ꦧꦸꦁꦏꦸ​꧉​”

8ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​ꦧꦧ꧀ꦲꦤꦏ꧀ꦏꦺ​:

“ꦏꦺꦴꦮꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦏꦺꦴꦮꦺ​ꦱꦶꦁ​ꦢꦢꦶ​ꦫꦠꦸ​ꦱ꧀ꦭꦮꦱ꧀ꦭꦮꦱ꧀ꦱꦺ꧉​
ꦏꦺꦴꦮꦺ​ꦔ꧀ꦮꦱꦤꦶ​ꦔꦁꦒꦺꦴ​ꦏꦧꦼꦤꦼꦂꦫꦤ꧀꧈​
9ꦏꦺꦴꦮꦺ​ꦱꦼꦤꦼꦁ​ꦩꦫꦁ​ꦧꦫꦁ​ꦱꦶꦁ​ꦧꦼꦤꦼꦂ​
ꦭꦤ꧀ꦱꦼꦔꦶꦠ꧀ꦩꦫꦁ​ꦧꦫꦁ​ꦱꦶꦁ​ꦲꦭ​꧉​
ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦒꦸꦱ꧀ꦠꦶ​ꦄꦭ꧀ꦭꦃꦩꦸꦩꦶꦗꦶ​ꦏꦺꦴꦮꦺ​ꦢꦶꦏꦺꦏ꧀ꦏꦶꦥꦁꦏꦠ꧀ꦱꦶꦁ​ꦢꦸꦮꦸꦂꦢꦺꦮꦺ꧈​
ꦔꦸꦁꦏꦸꦭ꧀ꦭꦶ​ꦭꦶꦪꦭꦶꦪꦤꦺ​ꦤꦁꦱ꧀ꦮꦂꦒ​꧉​
ꦩꦼꦁꦏꦺꦴꦤꦺꦴ​ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦏ꧀ꦏꦏꦺꦏꦺꦴꦮꦺ​ꦧꦸꦔꦃ​꧉​”

10ꦲꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦲꦤꦏ꧀ꦏꦺ​:

“ꦏꦺꦴꦮꦺ​ꦒꦸꦱ꧀ꦠꦶ​꧈​
ꦏꦺꦴꦮꦺ​ꦱꦶꦁ​ꦔ꧀ꦒꦮꦺ​ꦧꦸꦩꦶ​ꦏꦮꦶꦠ꧀ꦮꦶꦮꦶꦠ꧀ꦠꦤ꧀ꦤꦺ​
ꦭꦤ꧀ꦭꦔꦶꦠ꧀ꦲꦸꦒ​ꦒꦮꦺꦪꦤ꧀ꦩꦸ​꧉​
11ꦏꦧꦺꦃ​ꦏꦸꦮꦶ​ꦧꦏꦭ꧀ꦲꦩ꧀ꦧꦿꦸꦏ꧀
ꦧꦏꦭ꧀ꦭꦸꦁꦱꦼꦠ꧀ꦭꦤ꧀ꦱꦸꦮꦺꦏ꧀ꦏꦪ​ꦱꦭꦶꦤ꧀ꦭꦮꦱ꧀꧈​
ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦩꦭꦶꦃ​꧈​ꦏꦺꦴꦮꦺ​ꦲꦺꦤꦺꦁꦠꦼꦫꦸꦱ꧀꧈​
12ꦏꦪ​ꦲꦼꦁꦒꦺꦴꦤꦺ​ꦏꦺꦴꦮꦺ​ꦔ꧀ꦊꦩ꧀ꦥꦶꦠ꧀
ꦱꦭꦶꦤ꧀ꦱꦶꦁ​ꦭꦮꦱ꧀ꦢꦶꦧꦸꦮꦁ​
ꦭꦤ꧀ꦢꦶꦒꦤ꧀ꦠꦶ​ꦏꦫꦺꦴ​ꦱꦶꦁ​ꦲꦚꦂ​꧈​
ꦩꦼꦁꦏꦺꦴꦤꦺꦴ​ꦲꦸꦒ​ꦧꦏꦭ꧀ꦭꦺ​ꦭꦔꦶꦠ꧀ꦭꦤ꧀ꦧꦸꦩꦶ​꧉​
ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦩꦭꦶꦃ​꧈​
ꦏꦺꦴꦮꦺ​ꦲꦺꦤꦺꦁꦠꦼꦫꦸꦱ꧀ ꦱꦭꦮꦱ꧀ꦭꦮꦱ꧀ꦱꦺ​꧉​”

13ꦒꦸꦱ꧀ꦠꦶ​ꦄꦭ꧀ꦭꦃ​ꦠꦲꦸ​ꦔꦺꦴꦩꦺꦴꦁꦩꦫꦁ​ꦩꦸꦭꦺꦏꦠ꧀ꦠꦺꦔꦺꦤꦺ​:

“ꦏꦺꦤꦺ​ꦚ꧀ꦗꦒꦺꦴꦁꦤꦁꦠꦼꦔꦼꦤ꧀ꦏꦸ​꧈​
ꦩꦸꦁꦱꦸꦃꦩꦸ​ꦏꦧꦺꦃ​ꦧꦏꦭ꧀ꦠꦏ꧀ꦢꦢꦺꦏ꧀ꦏꦏꦺ
ꦲꦚ꧀ꦕꦶꦏ꧀ꦲꦚ꧀ꦕꦶꦏ꧀ꦏꦤꦺ​ꦱꦶꦏꦶꦭ꧀ꦩꦸ​꧉​”

14꧋ꦢꦢꦶꦤꦺ​ꦱꦲꦶꦏꦶ​ꦕꦼꦠ​ꦧꦔꦼꦠ꧀ꦤꦺꦏ꧀ꦩꦸꦭꦺꦏꦠ꧀ꦩꦸꦭꦺꦏꦠ꧀​ꦏꦸꦮꦶ​ꦏꦧꦺꦃ​ꦤꦩꦸꦁ​ꦫꦺꦴꦃꦫꦺꦴꦃ​ꦱꦶꦁ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦢꦶꦏꦺꦴꦁꦏꦺꦴꦤ꧀​ꦔ꧀ꦭꦢꦺꦤ꧀ꦤꦶ​ꦮꦺꦴꦁꦮꦺꦴꦁ​ꦱꦶꦁ​ꦧꦏꦭ꧀ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀꧈​

↑ ↑ ↑


꧋ꦏꦼꦱ꧀ꦭꦩꦼꦠ꧀ꦠꦤ꧀ꦱꦶꦁ​ꦒꦼꦢꦺ​꧉​

꧇​꧒꧇​ 1꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦱꦏ꧀ꦮꦶꦱ꧀ꦱꦺ​ꦲꦮꦏ꧀ꦏꦺ​ꦢꦺꦮꦺꦢꦸꦤꦸꦁꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦸꦮꦶ​ꦢꦸꦮꦸꦂꦫꦺꦔꦸꦁꦏꦸꦭ꧀ꦭꦶ​ꦩꦸꦭꦺꦏꦠ꧀ꦩꦸꦭꦺꦏꦠ꧀ ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦒꦺꦴꦤ꧀ꦢꦺꦭ꧀ꦭꦤ꧀ꦭꦸꦮꦶꦃ​ꦏꦼꦚ꧀ꦕꦼꦁ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦢꦶꦮꦸꦭꦁꦔꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦏꦠꦸꦠ꧀ꦏꦶꦤ꧀ꦠꦶꦂ꧉​ 2ꦥꦶꦠꦸꦠꦸꦂ​ꦱꦶꦁ​ꦠꦼꦏꦤꦺ​ꦱꦁꦏꦩꦸꦭꦺꦏꦠ꧀ꦮꦲꦺ​ꦮꦶꦱ꧀ꦚꦠ​ꦠꦼꦤꦤ꧀ꦭꦤ꧀ꦱꦥ​ꦱꦶꦁ​ꦲꦺꦴꦫ​ꦩꦤꦸꦠ꧀ꦩꦫꦁ​ꦏꦸꦮꦶ​ꦩꦼꦱ꧀ꦠꦶꦧꦏꦭ꧀ꦢꦶꦱꦼꦠꦿꦥ꧀ꦱꦶꦁ​ꦱꦏ꧀ꦩꦼꦱ꧀ꦠꦶꦤꦺ꧉​ 3ꦭꦃ​ꦏꦼꦥꦿꦶꦪꦺ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦧꦶꦱꦤꦺ​ꦔ꧀ꦭꦶꦮꦠ꧀ꦠꦶ​ꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦚꦼꦥꦺꦭꦺꦏ꧀ꦏꦏꦺꦥꦶꦠꦸꦠꦸꦂ​ꦱꦶꦁ​ꦤꦼꦏꦏ꧀ꦏꦏꦺꦏꦼꦱ꧀ꦭꦩꦼꦠ꧀ꦠꦤ꧀ꦱꦶꦁ​ꦱꦼꦩꦺꦴꦤꦺꦴ​ꦒꦼꦢꦺꦤꦺ꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺꦮꦶꦱ꧀ꦔꦧꦂꦫꦏꦺꦧꦧ꧀ꦏꦼꦱ꧀ꦭꦩꦼꦠ꧀ꦠꦤ꧀ꦲꦶꦏꦶ​ꦭꦤ꧀ꦮꦺꦴꦁꦮꦺꦴꦁ​ꦱꦶꦁ​ꦏꦿꦸꦔꦸ​ꦥꦢ​ꦔꦼꦏꦺꦏ꧀ꦏꦶꦥꦱꦼꦏ꧀ꦱꦶ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦤꦺꦏ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦥꦚ꧀ꦕꦺꦤ꧀ꦚꦠ​ꦠꦼꦤꦤ꧀꧈​ 4ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦪ​ꦔꦸꦗꦸꦠ꧀ꦠꦏꦺꦔꦁꦒꦺꦴ​ꦠꦤ꧀ꦢꦠꦤ꧀ꦢꦭꦤ꧀ꦩꦸꦗꦶꦗꦠ꧀ꦩꦸꦗꦶꦗꦠ꧀ꦭꦤ꧀ꦲꦸꦒ​ꦥꦔꦺꦠꦺꦴꦏꦤ꧀ꦤꦺꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦒꦼꦢꦺ꧈​ꦤꦺꦏ꧀ꦥꦱꦼꦏ꧀ꦱꦶꦥꦱꦼꦏ꧀ꦱꦶ​ꦏꦸꦮꦶ​ꦧꦼꦤꦼꦂ​꧉​ꦢꦺꦏ꧀ꦤꦺꦢꦺꦮꦺꦲꦸꦒ​ꦔꦼꦢꦸꦩ꧀ꦏꦥꦶꦤ꧀ꦠꦼꦫꦤ꧀ꦏꦥꦶꦤ꧀ꦠꦼꦂꦫꦤ꧀ꦱꦁꦏꦏꦼꦏꦸꦮꦠ꧀ꦠꦤ꧀ꦤꦺ​ꦫꦺꦴꦃ​ꦱꦸꦕꦶ​꧈​ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦢꦺꦏ꧀ꦤꦺꦢꦺꦮꦺ꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦸꦤ꧀ꦠꦸꦤ꧀ꦩꦤꦸꦁꦱ​ꦲꦶꦁ​ꦏꦼꦱ꧀ꦭꦩꦼꦠ꧀ꦠꦤ꧀꧈​

5꧋ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦔꦺꦴꦁꦏꦺꦴꦤ꧀ꦩꦸꦭꦺꦏꦠ꧀ꦩꦸꦭꦺꦏꦠ꧀ꦏꦺꦴꦁꦏꦺꦴꦤ꧀ꦔ꧀ꦮꦱꦤꦶ​ꦗꦒꦠ꧀ꦱꦶꦁ​ꦏꦸꦢꦸ​ꦠꦼꦏ​꧈​ꦪ​ꦗꦒꦠ꧀ꦱꦶꦁ​ꦢꦶꦉꦩ꧀ꦧꦸꦏ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧉​ 6-8ꦤꦁꦏꦶꦠꦧ꧀ꦱꦸꦕꦶ​ꦩꦭꦃ​ꦏꦼꦠꦸꦭꦶꦱ꧀ꦔꦺꦤꦺ​:

“ꦢꦸꦃꦒꦸꦱ꧀ꦠꦶ​꧈​ꦩꦤꦸꦁꦱ​ꦏꦸꦮꦶ​
ꦲꦥ​ꦏꦺꦴꦏ꧀ꦲꦩ꧀ꦧꦺꦴꦏ꧀ꦒꦠꦺꦏ꧀ꦏꦏꦺꦭꦤ꧀ꦲꦩ꧀ꦧꦺꦴꦏ꧀ꦲꦺꦩꦤ꧀ꦠꦼꦤꦤ꧀?ꦲꦥ​ꦲꦺꦴꦫ​ꦤꦩꦸꦁ​ꦮꦺꦴꦁ​ꦲꦸꦫꦶꦥ꧀?ꦤꦩꦸꦁ​ꦱꦼꦢꦶꦭꦸꦠ꧀ꦩꦤꦸꦁꦱ​ꦲꦩ꧀ꦧꦺꦴꦏ꧀ꦢꦢꦺꦏ꧀ꦏꦏꦺ
ꦱꦏ꧀ꦔꦶꦱꦺꦴꦂꦫꦺ​ꦥꦫ​ꦩꦸꦭꦺꦏꦠ꧀
ꦤꦁꦔꦶꦁ​ꦠꦼꦫꦸꦱ꧀ꦲꦩ꧀ꦧꦺꦴꦏ꧀ꦲꦁꦏꦠ꧀ꦩꦸꦁꦒꦃ​
ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦢꦸꦮꦸꦂ
ꦭꦤ꧀ꦲꦩ꧀ꦧꦺꦴꦏ꧀ꦥꦱꦿꦃꦲꦶ​ꦱꦼꦩ꧀ꦧꦫꦁ​꧈​
ꦱꦸꦥꦪ​ꦱꦼꦩ꧀ꦧꦫꦁ​ꦠꦶꦧ​
ꦲꦶꦁ​ꦱꦏ꧀ꦔꦶꦱꦺꦴꦂꦫꦺ​ꦥꦔ꧀ꦮꦱꦤꦺ​꧉​”

ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦤꦺꦏ꧀“ꦱꦼꦩ꧀ꦧꦫꦁ​ꦮꦶꦱ꧀ꦢꦶꦠꦶꦧꦏ꧀ꦏꦏꦺꦲꦶꦁ​ꦱꦏ꧀ꦔꦶꦱꦺꦴꦂꦫꦺ​ꦥꦔ꧀ꦮꦱꦤꦺ​”꧈​ꦲꦺꦴꦫ​ꦲꦺꦤꦺꦁꦥꦽꦏꦫ​ꦲꦥ​ꦮꦲꦺ​ꦱꦶꦁ​ꦲꦺꦴꦫ​ꦏꦠꦸꦠ꧀ꦠꦶꦧ​ꦲꦶꦁ​ꦱꦏ꧀ꦔꦶꦱꦺꦴꦂꦫꦺ​ꦥꦔ꧀ꦮꦱ​ꦏꦸꦮꦶ​꧉​ꦤꦁꦔꦶꦁ​ꦮꦸꦗꦸꦠ꧀ꦠꦺꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦮꦼꦫꦸꦃ​ꦤꦺꦏ꧀ꦩꦤꦸꦁꦱ​ꦲꦺꦴꦫ​ꦔ꧀ꦮꦱꦤꦶ​ꦱꦼꦩ꧀ꦧꦫꦁ​ꦏꦧꦺꦃ​꧉​

9꧋ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦲꦺꦤꦺꦁꦮꦺꦴꦁ​ꦱꦶꦗꦶ​ꦱꦶꦁ​ꦔ꧀ꦮꦱꦤꦶ​ꦱꦼꦩ꧀ꦧꦫꦁ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺ꧉​ꦱꦼꦢꦶꦭꦸꦠ꧀ꦢꦺꦏ꧀ꦤꦺꦢꦶꦲꦼꦢꦸꦤ꧀ꦤꦏꦺꦔꦤ꧀ꦠꦶ​ꦤꦩꦸꦁ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦏꦕꦺꦏ꧀ꦏꦺ​ꦏꦫꦺꦴ​ꦥꦫ​ꦩꦸꦭꦺꦏꦠ꧀ ꦱꦸꦥꦪ​ꦱꦁꦏꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦏ꧀ꦤꦺꦧꦶꦱ​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦔ꧀ꦭꦧꦸꦃꦲꦶ​ꦏꦧꦺꦃ​ꦩꦤꦸꦁꦱ​꧉​ꦭꦤ꧀ꦗꦭꦂꦫꦤ꧀ꦢꦺꦏ꧀ꦤꦺꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦏꦸꦮꦶ​꧈​ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦏꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦢꦶꦏꦺꦏ꧀ꦏꦶꦥꦔ꧀ꦮꦱ​ꦱꦶꦁ​ꦢꦸꦮꦸꦂꦭꦤ꧀ꦒꦼꦢꦺꦢꦺꦮꦺ꧉​ 10ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔ꧀ꦒꦮꦺ​ꦱꦼꦩ꧀ꦧꦫꦁ​ꦭꦤ꧀ꦢꦺꦏ꧀ꦤꦺꦔ꧀ꦒꦮꦺ​ꦱꦼꦩ꧀ꦧꦫꦁ​ꦏꦸꦮꦶ​ꦪ​ꦏꦁꦒꦺꦴ​ꦢꦺꦏ꧀ꦤꦺꦢꦺꦮꦺ꧉​ꦩꦸꦭꦤꦺ​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦧꦼꦤꦼꦂ​ꦭꦤ꧀ꦲꦥꦶꦏ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀꧈​ꦲꦮꦶꦠ꧀ꦩꦼꦁꦏꦺꦴꦤꦺꦴ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦢꦶ​ꦥꦤ꧀ꦠꦼꦱ꧀ꦤꦸꦤ꧀ꦠꦸꦤ꧀ꦲꦤꦏ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦢꦭꦤ꧀ꦏꦼꦱ꧀ꦭꦩꦼꦠ꧀ꦠꦤ꧀꧈​

11꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦔꦽꦱꦶꦏ꧀ꦏꦶ​ꦩꦤꦸꦁꦱ​ꦱꦁꦏꦢꦺꦴꦱꦢꦺꦴꦱꦤꦺ​꧉​ꦢꦺꦏ꧀ꦤꦺꦭꦤ꧀ꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦢꦶꦉꦱꦶꦏ꧀ꦏꦶ​ꦲꦸꦫꦶꦥ꧀ꦥꦺꦏꦸꦮꦶ​ꦠꦸꦁꦒꦭ꧀ꦧꦥꦏ꧀ꦏꦺ꧉​ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦲꦶꦱꦶꦤ꧀ꦔꦏꦸ​ꦮꦺꦴꦁꦮꦺꦴꦁ​ꦩꦲꦸ​ꦱꦼꦢꦸꦭꦸꦂꦫꦺ​꧉​ 12ꦧꦧ꧀ꦲꦶꦏꦶ​ꦤꦁꦏꦶꦠꦧ꧀ꦱꦸꦕꦶ​ꦏꦼꦠꦸꦭꦶꦱ꧀ꦔꦺꦤꦺ​:

“ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​꧈​
ꦲꦏꦸ​ꦧꦏꦭ꧀ꦔꦧꦂꦫꦏꦺꦗꦼꦤꦼꦁꦩꦸ​
ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦭꦤ꧀ꦤꦁꦠꦼꦔꦃꦲꦺ​ꦥꦱꦩꦸꦮꦤ꧀
ꦲꦏꦸ​ꦧꦏꦭ꧀​ꦔ꧀ꦭꦸꦲꦸꦂꦫꦏꦺꦗꦼꦤꦼꦁꦩꦸ​!”

13ꦤꦁꦲꦪꦠ꧀ꦭꦶꦪꦤꦺ​ꦲꦸꦒ​ꦏꦼꦠꦸꦭꦶꦱ꧀ꦔꦺꦤꦺ​:“ꦲꦏꦸ​ꦧꦏꦭ꧀​ꦚ꧀ꦗꦒꦏ꧀ꦏꦏꦺꦩꦫꦁ​ꦢꦺꦏ꧀ꦤꦺ꧉”ꦭꦤ꧀ꦤꦁꦲꦪꦠ꧀ꦭꦶꦪꦤꦺ​ꦩꦼꦤꦺꦃ​ꦏꦼꦠꦸꦭꦶꦱ꧀ꦔꦺꦤꦺ​:“ꦭꦃ​ꦲꦶꦏꦶ​ꦲꦏꦸ​ꦭꦤ꧀ꦲꦤꦏ꧀ꦲꦤꦏ꧀ꦩꦸ​ꦱꦶꦁ​ꦮꦶꦱ꧀ꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁ​ꦲꦏꦸ​꧉​” 14ꦗꦭꦂꦫꦤ꧀ꦱꦶꦁ​ꦢꦶꦲꦫꦤ꧀ꦤꦶ​ꦲꦤꦏ꧀ꦲꦤꦏ꧀ꦏꦸꦮꦶ​ꦮꦺꦴꦁꦮꦺꦴꦁ​ꦱꦶꦁ​ꦮꦸꦗꦸꦠ꧀ꦢꦒꦶꦁ​ꦭꦤ꧀ꦒꦼꦠꦶꦃ​꧈​ꦠꦼꦒꦼꦱ꧀ꦱꦺ​ꦧꦢꦤ꧀ꦏꦢꦺꦴꦚꦃꦲꦤ꧀ ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦪ​ꦠꦼꦫꦸꦱ꧀ꦢꦢꦶ​ꦩꦤꦸꦁꦱ​ꦱꦶꦁ​ꦮꦸꦗꦸꦠ꧀ꦢꦒꦶꦁ​ꦭꦤ꧀ꦒꦼꦠꦶꦃ​ꦭꦤ꧀ꦢꦺꦏ꧀ꦤꦺꦱꦒꦸꦃ​ꦔꦭꦩ꧀ꦩꦶ​ꦏꦲꦸꦫꦶꦥ꧀ꦥꦤ꧀ꦠꦸꦁꦒꦭ꧀ꦭꦺ​ꦏꦫꦺꦴ​ꦮꦺꦴꦁꦮꦺꦴꦁ​ꦩꦲꦸ​꧉​ꦠꦸꦗꦸꦮꦤ꧀ꦤꦺ꧈​ꦱꦸꦥꦪ​ꦭꦶꦮꦠ꧀ꦥꦠꦶꦤꦺ​꧈​ꦢꦺꦏ꧀ꦤꦺꦧꦶꦱ​ꦔꦿꦸꦱꦏ꧀ꦥꦼꦁꦒꦮꦺꦪꦤ꧀ꦏꦸꦱꦺꦠꦤ꧀ꦱꦶꦁ​ꦔ꧀ꦮꦱꦤꦶ​ꦥꦠꦶ​꧉​ 15ꦩꦼꦁꦏꦺꦴꦤꦺꦴ​ꦲꦸꦒ​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦶꦱ​ꦔ꧀ꦭꦸꦮꦂꦫꦶ​ꦮꦺꦴꦁꦮꦺꦴꦁ​ꦱꦶꦁ​ꦱꦸꦮꦺꦤꦺ​ꦲꦸꦫꦶꦥ꧀ꦥꦺꦢꦶꦏ꧀ꦮꦱꦤꦶ​ꦏꦫꦺꦴ​ꦫꦱ​ꦮꦼꦢꦶ​ꦩꦫꦁ​ꦥꦠꦶ​꧉​ 16ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦕꦼꦠ​ꦧꦔꦼꦠ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦠꦼꦏ​ꦤꦁꦗꦒꦠ꧀ꦔꦸꦫꦸꦱ꧀ꦱꦶ​ꦥꦫ​ꦩꦸꦭꦺꦏꦠ꧀ ꦲꦺꦴꦫ​꧈​ꦤꦁꦔꦶꦁ​ꦢꦺꦏ꧀ꦤꦺꦠꦼꦏ​ꦤꦸꦭꦸꦁꦔꦶ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀꧈​ 17ꦗꦭꦂꦫꦤ꧀ꦱꦁꦏꦏꦸꦮꦶ​ꦢꦺꦏ꧀ꦤꦺꦏꦸꦢꦸ​ꦢꦢꦶ​ꦩꦤꦸꦁꦱ​ꦱꦏ꧀ꦏꦧꦺꦃꦲꦺꦏꦪ​ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​꧉​ꦲꦮꦶꦠ꧀ꦤꦩꦸꦁ​ꦩꦼꦁꦏꦺꦴꦤꦺꦴ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦶꦱ​ꦢꦢꦶ​ꦲꦶꦩꦩ꧀ꦒꦼꦢꦺ꧈​ꦠꦼꦒꦼꦱ꧀ꦱꦺ​ꦢꦢꦶ​ꦮꦏꦶꦭ꧀ꦭꦺ​ꦩꦤꦸꦁꦱ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦢꦶ​ꦲꦶꦩꦩ꧀ꦒꦼꦢꦺꦱꦶꦁ​ꦒꦼꦢꦺꦏꦮꦼꦭꦱ꧀ꦱꦤ꧀ꦤꦺ​ꦭꦤ꧀ꦏꦠꦼꦩꦼꦤ꧀ꦤꦤ꧀ꦤꦺ​꧈​ꦩꦸꦭꦤꦺ​ꦢꦺꦏ꧀ꦤꦺꦧꦶꦱ​ꦤꦼꦏꦏ꧀ꦏꦏꦺꦥꦔꦥꦸꦫ​ꦏꦁꦒꦺꦴ​ꦩꦤꦸꦁꦱ​ꦱꦁꦏꦢꦺꦴꦱꦢꦺꦴꦱꦤꦺ​꧈​ꦱꦸꦥꦪ​ꦩꦤꦸꦁꦱ​ꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​ 18ꦱꦲꦶꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦶꦱ​ꦤꦸꦭꦸꦁꦔꦶ​ꦮꦺꦴꦁꦮꦺꦴꦁ​ꦱꦶꦁ​ꦏꦼꦤꦺꦁꦥꦁꦒꦺꦴꦢ꧈​ꦲꦮꦶꦠ꧀ꦢꦺꦏ꧀ꦤꦺꦢꦺꦮꦺꦮꦶꦱ꧀ꦔꦭꦩ꧀ꦩꦶ​ꦥꦁꦒꦺꦴꦢꦭꦤ꧀ꦱꦁꦱꦫ​꧉​

↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦸꦁꦏꦸꦭ꧀ꦭꦶ​ꦤꦧꦶ​ꦩꦺꦴꦱꦼꦱ꧀꧈​

꧇​꧓꧇​ 1꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦮꦶꦱ꧀ꦢꦢꦶ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦶꦁ​ꦮꦶꦱ꧀ꦢꦶꦥꦁꦒꦶꦭ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩ꧀ꦥ​ꦥꦤ꧀ꦢꦸꦩ꧀ꦩꦤ꧀ꦒꦼꦢꦺꦤꦁꦱ꧀ꦮꦂꦒ​!ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦱꦥ​ꦠ​?ꦪ​ꦢꦺꦏ꧀ꦤꦺꦱꦶꦁ​ꦢꦶꦏꦺꦴꦁꦏꦺꦴꦤ꧀​ꦔ꧀ꦭꦏꦺꦴꦏ꧀ꦏꦏꦺꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦚꦂ​꧉​ꦢꦺꦏ꧀ꦤꦺꦱꦶꦁ​ꦔ꧀ꦒꦮ​ꦥꦶꦠꦸꦠꦸꦂ​ꦱꦶꦁ​ꦲꦚꦂ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦪ​ꦥꦶꦠꦸꦠꦸꦂ​ꦲꦶꦏꦶ​ꦱꦶꦁ​ꦢꦶꦲꦏꦺꦴꦤ꧀ꦤꦶ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦒ​ꦱꦶꦁ​ꦢꦢꦶ​ꦲꦶꦩꦩ꧀ꦒꦼꦢꦺ꧈​ꦱꦶꦁ​ꦢꦢꦶ​ꦮꦏꦶꦭ꧀ꦭꦺ​ꦲꦮꦏ꧀ꦏꦺ​ꦢꦺꦮꦺꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 2ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦠꦼꦩꦼꦤ꧀ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦮꦶꦱ꧀ꦩꦶꦗꦶ​ꦢꦺꦏ꧀ꦤꦺꦱꦸꦥꦪ​ꦔꦼꦂꦗꦤ꧀ꦤꦶꦥꦼꦁꦒꦮꦺꦏꦸꦏꦸꦮꦶ​꧈​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦤꦧꦶ​ꦩꦺꦴꦱꦼꦱ꧀ꦱꦶꦁ​ꦩ꧀ꦧꦶꦪꦺꦤ꧀ꦪ​ꦠꦼꦩꦼꦤ꧀ꦔꦸꦫꦸꦱ꧀ꦱꦶ​ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 3ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦤꦺꦏ꧀ꦮꦺꦴꦁ​ꦱꦶꦁ​ꦔꦼꦢꦼꦏ꧀ꦏꦏꦺꦧꦿꦪꦠ꧀ꦏꦸꦮꦶ​ꦭꦸꦮꦶꦃ​ꦥꦼꦤ꧀ꦠꦶꦁ​ꦠꦼꦤꦶꦩ꧀ꦧꦁꦮꦺꦴꦁ​ꦭꦶꦪꦭꦶꦪꦤꦺ​꧉​ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦒꦼꦢꦺꦤꦺꦪ​ꦔꦸꦁꦏꦸꦭ꧀ꦭꦶ​ꦤꦧꦶ​ꦩꦺꦴꦱꦼꦱ꧀ ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦔꦼꦢꦼꦏ꧀ꦏꦏꦺꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦤꦧꦶ​ꦩꦺꦴꦱꦼꦱ꧀ꦤꦩꦸꦁ​ꦢꦢꦶ​ꦮꦂꦒꦤꦺ​ꦧꦿꦪꦠ꧀ꦏꦸꦮꦶ​꧉​ 4ꦥꦚ꧀ꦕꦺꦤ꧀ ꦱꦧꦼꦤ꧀ꦧꦿꦪꦠ꧀ꦩꦼꦱ꧀ꦠꦶꦲꦺꦤꦺꦁꦱꦶꦁ​ꦔꦼꦢꦼꦏ꧀ꦏꦏꦺ꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦼꦢꦼꦏ꧀ꦏꦏꦺꦱꦼꦩ꧀ꦧꦫꦁ​꧉​ 5ꦧꦼꦤꦼꦂ​꧈​ꦱꦼꦤꦗꦤ꧀ꦤꦧꦶ​ꦩꦺꦴꦱꦼꦱ꧀ꦏꦸꦮꦶ​ꦤꦩꦸꦁ​ꦮꦂꦒ​ꦲꦶꦁ​ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦢꦺꦏ꧀ꦤꦺꦏꦸꦮꦶ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏꦼꦤꦺꦁꦢꦶꦥꦽꦕꦪ​ꦠꦼꦤꦤ꧀ ꦲꦮꦶꦠ꧀ꦢꦺꦏ꧀ꦤꦺꦩꦸꦭꦁꦔꦶꦮꦺꦴꦁꦮꦺꦴꦁ​ꦏꦼꦥꦿꦶꦪꦺ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦥꦶꦠꦸꦠꦸꦂꦫꦺ​ꦲꦶꦁ​ꦲꦩ꧀ꦧꦺꦱꦸꦏ꧀ꦏꦺ​꧉​ 6ꦤꦁꦔꦶꦁ​ꦏꦿꦶꦱ꧀ꦡꦸꦱ꧀ꦏꦸꦮꦶ​ꦔꦸꦁꦏꦸꦭ꧀ꦭꦶ​ꦤꦧꦶ​ꦩꦺꦴꦱꦼꦱ꧀ ꦲꦮꦶꦠ꧀ꦢꦺꦏ꧀ꦤꦺꦢꦢꦶ​ꦲꦤꦏ꧀ꦱꦶꦁ​ꦚꦁꦒ​ꦥꦼꦚ꧀ꦗꦮꦧ꧀ꦲꦶꦁ​ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦤ꧀ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦪ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦩꦤ꧀ꦠꦼꦥ꧀ꦠꦼꦫꦸꦱ꧀ꦥꦽꦕꦪ​ꦭꦤ꧀ꦔꦏꦺꦴꦤ꧀ꦤꦶ​ꦏꦫꦺꦴ​ꦏꦼꦤ꧀ꦢꦼꦭ꧀ꦲꦶꦁ​ꦥꦼꦔꦉꦥ꧀ꦲꦉꦥ꧀ꦥꦺ​ꦲꦮꦏ꧀ꦏꦺ​ꦢꦺꦮꦺ꧉​ 7-8ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦫꦺꦴꦃ​ꦱꦸꦕꦶ​ꦪ​ꦮꦶꦱ꧀ꦔꦺꦴꦩꦺꦴꦁꦔꦺꦤꦺ​:

“ꦲꦶꦁ​ꦢꦶꦤ​ꦲꦶꦏꦶ​꧈​
ꦤꦺꦏ꧀ꦏꦺꦴꦮꦺ​ꦏꦿꦸꦔꦸ​ꦱ꧀ꦮꦫꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦏꦺꦴꦮꦺ​ꦲꦗ​ꦥꦢ​ꦤ꧀ꦢꦧ꧀ꦊꦏ꧀ꦏꦪ​ꦩ꧀ꦧꦃꦩ꧀ꦧꦲꦤ꧀ꦩꦸꦢꦺꦏ꧀​ꦩ꧀ꦧꦶꦪꦺꦤ꧀
ꦱꦶꦁ​ꦥꦢ​ꦔ꧀ꦭꦮꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​
ꦭꦤ꧀ꦢꦺꦴꦁꦔꦺꦤꦁꦮꦸꦱ꧀ꦠꦺꦤ꧀
ꦥꦢ​ꦚ꧀ꦗꦗꦭ꧀ꦏꦼꦱꦧꦂꦫꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

9ꦫꦺꦴꦃ​ꦱꦸꦕꦶ​ꦲꦸꦒ​ꦔꦺꦴꦩꦺꦴꦁꦔꦺꦤꦺ​:

“ꦪ​ꦤꦁꦮꦸꦱ꧀ꦠꦺꦤ꧀ꦏꦺꦴꦤꦺꦴ​
ꦩ꧀ꦧꦃꦩ꧀ꦧꦲꦤ꧀ꦩꦸꦥꦢ​ꦮꦼꦫꦸꦃ​ꦢꦺꦮꦺꦲꦼꦁꦒꦺꦴꦤ꧀ꦏꦸ​
ꦤꦶꦤ꧀ꦢꦏ꧀ꦏꦏꦺꦥꦽꦏꦫꦥꦽꦏꦫ​ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧈​
ꦥꦠꦁ​ꦥꦸꦭꦸꦃ​ꦠꦲꦸꦤ꧀ꦱꦸꦮꦺꦤꦺ​꧉​
ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​
ꦩꦼꦏ꧀ꦱ​ꦲꦶꦗꦶꦏ꧀​ꦚ꧀ꦗꦗꦭ꧀ꦏꦼꦱꦧꦂꦫꦤ꧀ꦏꦸ​
ꦭꦤ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦲꦭ​꧈​
ꦏꦼꦥꦺꦔꦶꦤ꧀ꦔꦼꦂꦠꦶ​ꦠꦏ꧀ꦲꦗꦂ​ꦲꦥ​ꦲꦺꦴꦫ​꧉​
10ꦩꦸꦭꦤꦺ​ꦲꦏꦸ​ꦗꦺꦁꦏꦺꦭ꧀ꦠꦼꦤꦤ꧀ꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​
ꦭꦤ꧀ꦲꦏꦸ​ꦔꦺꦴꦩꦺꦴꦁ:
‘ꦮꦺꦴꦁꦮꦺꦴꦁ​ꦏꦸꦮꦶ​ꦤꦩꦸꦁ​ꦔ꧀ꦒꦮꦺ​ꦲꦭ​꧈​
ꦩꦸꦭꦤꦺ​ꦧ꧀ꦭꦱ꧀ꦲꦺꦴꦫ​ꦧꦏꦭ꧀ꦢꦸꦤꦸꦁꦲꦥ​ꦱꦶꦁ​ꦠꦏ꧀ꦠꦶꦤ꧀ꦢꦏ꧀ꦏꦏꦺ꧉'​
11ꦲꦏꦸ​ꦠꦼꦫꦸꦱ꧀ꦤꦼꦱꦸ​ꦠꦼꦤꦤ꧀ꦭꦤ꧀ꦔꦺꦴꦩꦺꦴꦁ:
‘ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦴꦫ​ꦥꦶꦱꦤ꧀ꦥꦶꦱꦤ꧀
ꦧꦏꦭ꧀ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦏꦸ꧉​’”

12꧋ꦥꦫ​ꦱꦼꦢꦸꦭꦸꦂ​꧈​ꦩꦸꦭꦤꦺ​ꦲꦏꦸ​ꦔꦺꦭꦶꦁꦔꦏꦺꦠꦼꦤꦤ꧀ꦤꦤ꧀ꦩꦫꦁ​ꦏꦺꦴꦮꦺ​꧈​ꦥꦢ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦱꦁꦏꦠꦼꦔꦃꦩꦸ​ꦤ꧀ꦢꦸꦮꦺꦤ꧀ꦤꦶ​ꦒꦒꦱ꧀ꦱꦤ꧀ꦱꦶꦁ​ꦲꦭ​꧈​ꦱꦩ꧀ꦥꦺꦏ꧀ꦠꦼꦫꦸꦱ꧀ꦲꦩ꧀ꦧꦭꦶꦏ꧀ꦢꦭꦤ꧀ꦤꦶꦁꦒꦭ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀ ꦱꦶꦁ​ꦩꦼꦱ꧀ꦠꦶꦧꦏꦭ꧀ꦠꦸꦩꦤ꧀ꦢꦁ​꧉​ 13ꦲꦗ​ꦱꦩ꧀ꦥꦺꦏ꧀ꦏꦪ​ꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​꧈​ꦤꦁꦔꦶꦁ​ꦩꦭꦃ​ꦥꦢ​ꦠꦤ꧀ꦱꦃ​ꦔꦤ꧀ꦠꦼꦥ꧀ꦥꦏꦺꦥꦼꦔꦤ꧀ꦢꦼꦭ꧀ꦭꦺ​ꦱꦏ꧀ꦥꦢꦥꦢ꧈​ꦱꦸꦮꦺꦤꦺ​ꦲꦮꦏ꧀ꦏꦺ​ꦢꦺꦮꦺꦲꦶꦗꦶꦏ꧀ꦢꦶꦭꦶꦭꦤꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦫꦶꦥ꧀ꦲꦶꦁ​ꦗꦩꦤ꧀ꦱꦶꦁ​ꦤꦁꦏꦶꦠꦧ꧀ꦱꦸꦕꦶ​ꦢꦶꦲꦫꦤ꧀ꦤꦶ​“ꦢꦶꦤ​ꦲꦶꦏꦶ​”꧉​ꦲ꦳ꦪꦸꦏ꧀ꦲꦗ​ꦱꦩ꧀ꦥꦺꦏ꧀ꦏꦠꦸꦠ꧀ꦢꦺꦴꦱ​꧈​ꦠꦼꦫꦸꦱ꧀ꦲꦺꦴꦫ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦼꦱ꧀ꦠꦶꦧꦏꦭ꧀ꦠꦸꦩꦤ꧀ꦢꦁ​꧉​ 14ꦲꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦲꦮꦶꦠ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦩꦤ꧀ꦠꦼꦥ꧀ꦠꦼꦫꦸꦱ꧀ꦏꦪ​ꦩꦲꦸꦤꦺ​ꦭꦤ꧀ꦩꦤ꧀ꦠꦼꦥ꧀ꦠꦼꦫꦸꦱ꧀ꦠꦼꦏꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧈​ꦲꦮꦏ꧀ꦏꦺ​ꦢꦺꦮꦺꦩꦼꦱ꧀ꦠꦶꦧꦏꦭ꧀ꦩꦺꦭꦸ​ꦤꦩ꧀ꦥ​ꦥꦤ꧀ꦢꦸꦩ꧀ꦩꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦉꦁ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ 15ꦲꦺꦭꦶꦁꦔ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦱꦸꦕꦶ​:

“ꦲꦶꦁ​ꦢꦶꦤ​ꦲꦶꦏꦶ​ꦤꦺꦏ꧀ꦏꦺꦴꦮꦺ​ꦏꦿꦸꦔꦸ​ꦱ꧀ꦮꦫꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦲꦗ​ꦥꦢ​ꦮꦁꦏꦺꦴꦠ꧀ꦲꦠꦶꦩꦸ​ꦏꦪ​ꦩ꧀ꦧꦃꦩ꧀ꦧꦲꦤ꧀ꦩꦸꦢꦺꦏ꧀​ꦩ꧀ꦧꦶꦪꦺꦤ꧀
ꦱꦶꦁ​ꦥꦢ​ꦔ꧀ꦭꦮꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

16꧋ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦴꦏ꧀ꦢꦶꦥꦶꦏꦶꦂ​ꦊꦭꦏꦺꦴꦤꦺ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧈​ꦢꦺꦴꦁꦔꦺꦲꦺꦴꦫ​ꦒꦼꦊꦩ꧀ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦼꦤꦗꦤ꧀ꦢꦶꦠꦸꦤ꧀ꦠꦸꦤ꧀ꦏꦫꦺꦴ​ꦤꦧꦶ​ꦩꦺꦴꦱꦼꦱ꧀ꦭꦸꦔ​ꦱꦁꦏꦤꦼꦒꦫ​ꦌꦒꦶꦥ꧀ꦠꦼꦭꦤ꧀ꦮꦺꦴꦁꦮꦺꦴꦁ​ꦥꦢ​ꦏꦿꦸꦔꦸ​ꦱ꧀ꦮꦫꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧈​ꦩꦼꦏ꧀ꦱ​ꦲꦶꦗꦶꦏ꧀ꦥꦢ​ꦮꦤꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 17ꦥꦠꦁ​ꦥꦸꦭꦸꦃ​ꦠꦲꦸꦤ꧀ꦱꦸꦮꦺꦤꦺ​ꦮꦺꦴꦁꦮꦺꦴꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦭꦤ꧀ꦩꦫꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦤꦼꦱꦸ​ꦠꦼꦤꦤ꧀꧈​ꦭꦃ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦏꦼꦥꦿꦶꦪꦺ​?ꦏꦧꦺꦃ​ꦥꦢ​ꦩꦠꦶ​ꦤꦁꦮꦸꦱ꧀ꦠꦺꦤ꧀꧈​ 18ꦱꦩ꧀ꦥꦺꦏ꧀ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦤꦺ​:“ꦲꦏꦸ​ꦲꦺꦴꦫ​ꦧꦏꦭ꧀​ꦔ꧀ꦭꦶꦭꦤꦶ​ꦮꦺꦴꦁꦮꦺꦴꦁ​ꦲꦶꦏꦶ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦏꦸ꧉”ꦭꦃ​ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦏꦫꦺꦴ​ꦱꦥ​ꦥꦫ​ꦱꦼꦢꦸꦭꦸꦂ​?ꦲꦥ​ꦲꦺꦴꦫ​ꦔꦺꦴꦩꦺꦴꦁꦏꦫꦺꦴ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦩ꧀ꦧꦶꦪꦺꦤ꧀ꦱꦶꦁ​ꦲꦺꦴꦫ​ꦒꦼꦊꦩ꧀ꦩꦤꦸꦠ꧀?ꦥꦚ꧀ꦕꦺꦤ꧀! 19ꦩꦸꦭꦤꦺ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦢꦸꦤꦸꦁꦏꦼꦤꦺꦁꦲꦥ​ꦮꦺꦴꦁꦮꦺꦴꦁ​ꦲꦺꦴꦫ​ꦧꦶꦱ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​꧈​ꦗꦭꦂꦫꦤ꧀ꦲꦺꦴꦫ​ꦥꦢ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦲꦼꦁꦒꦺꦴꦤꦺ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

↑ ↑ ↑


꧋ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦧ꧀ꦏꦠꦼꦤ꧀ꦠꦽꦩ꧀ꦩꦤ꧀꧈​

꧇​꧔꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦢꦶꦭꦶꦭꦤꦶ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦤꦺ꧈​ꦲꦶꦗꦶꦏ꧀ꦏꦁꦒꦺꦴ​꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦱꦸꦥꦪ​ꦤꦁꦠꦼꦔꦃꦩꦸ​ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦱꦩ꧀ꦥꦺꦏ꧀ꦲꦺꦴꦫ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ 2ꦲꦮꦶꦠ꧀ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦲꦮꦏ꧀ꦏꦺ​ꦢꦺꦮꦺꦪ​ꦮꦶꦱ꧀ꦏꦿꦸꦔꦸ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦤꦁꦔꦶꦁ​ꦲꦶꦏꦸ​ꦲꦺꦴꦫ​ꦤꦼꦏꦏ꧀ꦏꦏꦺꦧꦼꦕꦶꦏ꧀​ꦧ꧀ꦭꦱ꧀ꦏꦁꦒꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧉​ꦲꦮꦶꦠ꧀ꦱꦼꦤꦗꦤ꧀ꦏꦿꦸꦔꦸ​꧈​ꦤꦁꦔꦶꦁ​ꦩꦼꦏ꧀ꦱ​ꦲꦺꦴꦫ​ꦒꦼꦊꦩ꧀ꦥꦽꦕꦪ​꧉​ 3ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦥꦽꦕꦪ​꧈​ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦤꦶꦤꦺ​ꦔꦺꦤꦺ​:

“ꦗꦭꦂꦫꦤ꧀ꦲꦏꦸ​ꦤꦼꦱꦸ​ꦠꦼꦤꦤ꧀ꦩꦫꦁ​ꦧꦁꦱ​ꦲꦶꦏꦶ​꧈​
ꦩꦸꦭꦤꦺ​ꦲꦏꦸ​ꦔꦺꦴꦩꦺꦴꦁꦤꦺꦏ꧀ꦲꦏꦸ​ꦲꦺꦴꦫ​ꦧꦏꦭ꧀
ꦔ꧀ꦭꦶꦭꦤꦶ​ꦧꦁꦱ​ꦲꦶꦏꦶ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦏꦸ꧉​”

ꦱꦼꦤꦗꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦫꦩ꧀ꦥꦸꦁ​ꦏꦫꦺꦴ​ꦥꦼꦁꦒꦮꦺꦪꦤ꧀ꦏꦸꦏꦮꦶꦠ꧀​ꦩ꧀ꦧꦶꦪꦺꦤ꧀ꦢꦺꦴꦁꦔꦺꦢꦺꦏ꧀ꦤꦺꦔ꧀ꦒꦮꦺ​ꦗꦒꦠ꧀ ꦩꦼꦏ꧀ꦱ​ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦩꦲꦸ​꧉​ 4ꦧꦧ꧀ꦢꦶꦤ​ꦱꦶꦁ​ꦤꦺꦴꦩꦼꦂ​ꦥꦶꦠꦸ​ꦤꦁꦏꦶꦠꦧ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦲꦶꦁ​ꦥꦶꦠꦸꦁ​ꦢꦶꦤꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦺꦫꦺꦤ꧀ꦱꦏ꧀ꦮꦶꦱ꧀ꦱꦺ​ꦏꦼꦂꦗꦤꦤ꧀ꦤꦺꦏꦧꦺꦃ​ꦫꦩ꧀ꦥꦸꦁ​꧉​” 5ꦲꦸꦒ​ꦲꦺꦤꦺꦁꦲꦪꦠ꧀ꦭꦶꦪꦤꦺ​ꦤꦁꦏꦶꦠꦧ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦲꦏꦸ​ꦲꦺꦴꦫ​ꦧꦏꦭ꧀​ꦔ꧀ꦭꦶꦭꦤꦶ​ꦮꦺꦴꦁꦮꦺꦴꦁ​ꦲꦶꦏꦶ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦏꦸ꧉​” 6ꦮꦺꦴꦁꦮꦺꦴꦁ​ꦱꦶꦁ​ꦏꦿꦸꦔꦸ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦩꦭꦃ​ꦲꦺꦴꦫ​ꦥꦢ​ꦤꦩ꧀ꦥ​ ꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦲꦺꦴꦫ​ꦥꦢ​ꦥꦽꦕꦪ​꧉​ꦤꦁꦔꦶꦁ​ꦲꦺꦤꦺꦁꦮꦺꦴꦁ​ꦭꦶꦪꦭꦶꦪꦤꦺ​ꦱꦶꦁ​ꦢꦶꦭꦶꦭꦤꦶ​ꦤꦩ꧀ꦥ​ꦏꦠꦼꦤ꧀ꦠꦽꦩ꧀ꦩꦤ꧀ꦏꦸꦮꦶ​꧉​ 7ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦚꦮꦶꦱ꧀ꦱꦏꦺꦢꦶꦤ​ꦭꦶꦪꦤꦺ​꧈​ꦪꦏꦸꦮꦶ​ꦢꦶꦤ​ꦱꦶꦁ​ꦢꦶꦲꦫꦤ꧀ꦤꦶ​“ꦢꦶꦤ​ꦲꦶꦏꦶ​꧈​”ꦏꦁꦒꦺꦴ​ꦮꦺꦴꦁꦮꦺꦴꦁ​꧈​ꦱꦸꦥꦪ​ꦧꦶꦱ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦤꦺ꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦏꦸꦮꦶ​ꦩꦫꦁ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦢꦺꦏ꧀​ꦩ꧀ꦧꦶꦪꦺꦤ꧀ ꦤꦁꦔꦶꦁ​ꦊꦠ꧀ꦥꦶꦫꦁꦥꦶꦫꦁ​ꦠꦲꦸꦤ꧀ꦱꦏ꧀ꦮꦶꦱ꧀ꦱꦺ​ꦏꦸꦮꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦏꦺꦧꦧ꧀ꦲꦶꦏꦶ​ꦩꦼꦤꦺꦃ​ꦭꦤ꧀ꦠꦂꦫꦤ꧀ꦫꦠꦸ​ꦣꦮ꦳ꦼꦢ꧀ ꦱꦶꦁ​ꦲꦸꦤꦶꦤꦺ​ꦏꦪ​ꦱꦶꦁ​ꦤ꧀ꦢꦶꦱꦶꦏ꧀ꦩꦲꦸ​:

“ꦲꦶꦁ​ꦢꦶꦤ​ꦲꦶꦏꦶ​꧈​
ꦤꦺꦏ꧀ꦏꦺꦴꦮꦺ​ꦏꦿꦸꦔꦸ​ꦱ꧀ꦮꦫꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦏꦺꦴꦮꦺ​ꦲꦗ​ꦥꦢ​ꦮꦁꦏꦺꦴꦠ꧀ꦲꦠꦶꦩꦸ​꧉​”

8꧋ꦥꦫ​ꦱꦼꦢꦸꦭꦸꦂ​꧈​ꦱꦼꦩꦸꦁꦒꦺꦴꦤ꧀ꦤꦺꦲꦺꦴꦫ​ꦲꦺꦤꦺꦁꦢꦶꦤ​ꦭꦶꦪꦤꦺ​ꦩꦼꦤꦺꦃ​꧈​ꦩꦼꦱ꧀ꦠꦶꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦲꦺꦴꦫ​ꦔꦺꦴꦩꦺꦴꦁꦔꦏꦺꦩꦼꦤꦺꦃ​ꦱꦏ꧀ꦮꦶꦱ꧀ꦱꦺ​ꦪꦺꦴꦱꦸꦮ​ꦮꦶꦱ꧀ꦤꦸꦤ꧀ꦠꦸꦤ꧀​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦩ꧀ꦊꦧꦸ​ꦤꦁꦤꦼꦒꦫ​ꦱꦶꦁ​ꦢꦶꦕꦮꦶꦱ꧀ꦱꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦭꦺꦫꦺꦤ꧀꧈​ 9ꦤꦁꦔꦶꦁ​ꦮꦸꦗꦸꦠ꧀ꦠꦺꦱꦲꦶꦏꦶ​ꦲꦶꦗꦶꦏ꧀ꦲꦺꦤꦺꦁꦢꦶꦤ​ꦭꦶꦪꦤꦺ​ꦩꦼꦤꦺꦃ​ꦏꦁꦒꦺꦴ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦸꦥꦪ​ꦧꦶꦱ​ꦤꦩ꧀ꦥ​ꦏꦠꦼꦤ꧀ꦠꦽꦩ꧀ꦩꦤ꧀ꦲꦶꦏꦶ​꧈​ꦥꦢ​ꦮꦲꦺ​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦿꦱꦏ꧀ꦏꦏꦺꦏꦠꦼꦤ꧀ꦠꦽꦩ꧀ꦩꦤ꧀ꦱꦏ꧀ꦧꦉꦁꦔꦺꦭꦺꦫꦺꦤ꧀ꦲꦶꦁ​ꦥꦶꦠꦸꦁ​ꦢꦶꦤꦤꦺ​꧈​ꦱꦏ꧀ꦮꦶꦱ꧀ꦱꦺ​ꦫꦩ꧀ꦥꦸꦁ​ꦏꦫꦺꦴ​ꦥꦼꦁꦒꦮꦺꦪꦤ꧀ꦏꦸ꧉​ 10ꦲꦮꦶꦠ꧀ꦱꦥ​ꦮꦲꦺ​ꦱꦶꦁ​ꦢꦶꦭꦶꦭꦤꦶ​ꦤꦩ꧀ꦥ​ꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁ​ꦏꦸꦮꦶ​ꦲꦸꦒ​ꦭꦺꦫꦺꦤ꧀ꦱꦁꦏꦥꦼꦁꦒꦮꦺꦪꦤ꧀ꦏꦸ꧈​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦺꦫꦺꦤ꧀ꦱꦏ꧀ꦮꦶꦱ꧀ꦱꦺ​ꦫꦩ꧀ꦥꦸꦁ​ꦏꦫꦺꦴ​ꦥꦼꦁꦒꦮꦺꦪꦤ꧀ꦏꦸ꧉​ 11ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦔ꧀ꦭꦸꦩꦸꦃꦲꦶꦠꦼꦤꦤ꧀ꦱꦏ꧀ꦏꦸꦮꦠ꧀ꦏꦸꦮꦠ꧀ꦠꦺ꧈​ꦱꦸꦥꦪ​ꦧꦶꦱ​ꦤꦩ꧀ꦥ​ꦏꦠꦼꦤ꧀ꦠꦽꦩ꧀ꦩꦤ꧀ꦲꦶꦏꦶ​ꦭꦤ꧀ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦱꦶꦗꦶ​ꦮꦲꦺ​ꦤꦁꦠꦼꦔꦃꦩꦸ​ꦲꦺꦴꦫ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦏꦺꦭꦁꦔꦤ꧀ꦏꦠꦼꦤ꧀ꦠꦽꦩ꧀ꦩꦤ꧀ꦲꦶꦏꦶ​꧈​ꦏꦪ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦢꦺꦏ꧀​ꦩ꧀ꦧꦶꦪꦺꦤ꧀꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦩꦤꦸꦠ꧀ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

12꧋ꦲꦮꦶꦠ꧀ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦸꦫꦶꦥ꧀ꦭꦤ꧀ꦒꦼꦢꦺ​ꦏ꧀ꦮꦱꦤꦺ​ꦭꦤ꧀ꦭꦤꦁꦮꦺꦢꦺꦴꦏ꧀ꦔꦸꦁꦏꦸꦭ꧀ꦭꦶ​ꦥꦼꦢꦁꦱꦶꦁ​ꦭꦤꦁꦏꦶꦮꦠꦼꦔꦼꦤ꧀꧈​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦩ꧀ꦊꦧꦸ​ꦗꦼꦫꦸꦲꦶꦁ​ꦲꦠꦶꦤꦺ​ꦩꦤꦸꦁꦱ​꧈​ꦩꦶꦱꦃ​ꦫꦺꦴꦃ​ꦭꦤ꧀ꦚꦮ​꧈​ꦧꦭꦸꦁ​ꦭꦤ꧀ꦱꦸꦁꦱꦸꦩ꧀꧈​ꦩꦸꦭꦤꦺ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦔꦼꦠꦺꦴꦏ꧀ꦏꦏꦺꦲꦭꦧꦼꦕꦶꦏ꧀ꦏꦺ​ꦥꦶꦏꦶꦂꦫꦤ꧀ꦭꦤ꧀ꦏꦼꦏꦉꦥ꧀ꦥꦤ꧀ꦤꦺ​ꦩꦤꦸꦁꦱ​꧉​ 13ꦥꦫ​ꦱꦼꦢꦸꦭꦸꦂ​꧈​ꦲꦺꦴꦫ​ꦲꦺꦤꦺꦁꦥꦽꦏꦫ​ꦱꦶꦗꦶ​ꦮꦲꦺ​ꦤꦁꦗꦒꦠ꧀ꦏꦺꦤꦺ​ꦱꦶꦁ​ꦢꦶꦢꦼꦭꦶꦏ꧀ꦏꦏꦺꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​꧉​ꦢꦺꦏ꧀ꦤꦺꦔꦼꦂꦠꦶ​ꦭꦤ꧀ꦮꦼꦫꦸꦃ​ꦱꦼꦩ꧀ꦧꦫꦁ​ꦲꦶꦁ​ꦲꦠꦶꦤꦺ​ꦩꦤꦸꦁꦱ​꧉​ꦩꦸꦭꦤꦺ​꧈​ꦲꦩ꧀ꦧꦺꦱꦸꦏ꧀ꦏꦧꦺꦃ​ꦮꦺꦴꦁ​ꦧꦏꦭ꧀ꦲꦱꦺꦴꦏ꧀ꦥꦼꦚ꧀ꦗꦮꦧ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦩꦩ꧀ꦒꦼꦢꦺ꧉​

14꧋ꦗꦭꦂꦫꦤ꧀ꦱꦁꦏꦏꦸꦮꦶ​ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦔ꧀ꦒꦺꦴꦤ꧀ꦢꦺꦭ꧀ꦭꦶꦱꦶꦁ​ꦏꦼꦚ꧀ꦕꦼꦁ​ꦩꦫꦁ​ꦥꦼꦔꦤ꧀ꦢꦼꦭ꧀ꦱꦶꦁ​ꦢꦶꦲꦏꦺꦴꦤ꧀ꦤꦶ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦏꦸꦮꦶ​?ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦤ꧀ꦢꦸꦮꦺꦲꦶꦩꦩ꧀ꦒꦼꦢꦺ​ꦱꦶꦁ​ꦮꦶꦱ꧀​ꦩ꧀ꦊꦧꦸ​ꦱ꧀ꦮꦂꦒ​ꦭꦤ꧀ꦠꦼꦏ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 15ꦲꦶꦩꦩ꧀ꦒꦼꦢꦺꦲꦶꦏꦶ​ꦢꦸꦢꦸ​ꦱꦏ꧀ꦮꦶꦗꦶꦤꦺꦮꦺꦴꦁ​ꦱꦶꦁ​ꦲꦺꦴꦫ​ꦧꦶꦱ​ꦔꦿꦱꦏ꧀ꦏꦏꦺꦏꦔꦺꦭ꧀ꦭꦤ꧀ꦤꦺ​ꦭꦤ꧀ꦏꦫꦶꦁꦏꦶꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧈​ꦤꦁꦔꦶꦁ​ꦢꦺꦏ꧀ꦤꦺꦩꦭꦃ​ꦮꦶꦱ꧀ꦏꦒꦺꦴꦢꦲꦶꦁ​ꦥꦽꦏꦫ​ꦲꦥ​ꦮꦲꦺ​꧈​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦧꦺꦢꦤꦺ​ꦤꦩꦸꦁ​ꦲꦶꦏꦶ​:ꦢꦺꦏ꧀ꦤꦺꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦠꦶꦧ​ꦲꦶꦁ​ꦢꦺꦴꦱ​꧉​ 16ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦩꦫ​ꦏꦫꦺꦴ​ꦏꦼꦤ꧀ꦢꦼꦭ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦏ꧀ꦤꦺꦥꦚ꧀ꦕꦺꦤ꧀ꦒꦼꦢꦺꦏ꧀ꦮꦱꦤꦺ​ꦭꦤ꧀ꦧꦶꦱ​ꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦏ꧀ꦤꦺꦠꦿꦺꦱ꧀ꦤꦭꦤ꧀ꦒꦼꦊꦩ꧀ꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦏ꧀ꦤꦺꦒꦼꦢꦺꦏꦮꦼꦭꦱ꧀ꦱꦤ꧀ꦤꦺ​ꦭꦤ꧀ꦲꦶꦁ​ꦮꦏ꧀ꦠꦸ​ꦏꦔꦺꦭ꧀ꦭꦤ꧀ꦲꦥ​ꦮꦲꦺ​꧈​ꦢꦺꦏ꧀ꦤꦺꦩꦼꦱ꧀ꦠꦶꦧꦏꦭ꧀ꦤꦼꦏꦏ꧀ꦏꦏꦺꦥꦶꦠꦸꦭꦸꦁꦔꦤ꧀꧈​

↑ ↑ ↑


 

꧇​꧕꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦶꦩꦩ꧀ꦒꦼꦢꦺꦏꦸꦮꦶ​ꦏꦥꦶꦭꦶꦃ​ꦱꦁꦏꦠꦼꦔꦃꦲꦺ​ꦩꦤꦸꦁꦱ​꧈​ꦱꦸꦥꦪ​ꦢꦢꦶ​ꦮꦏꦶꦭ꧀ꦭꦺ​ꦩꦤꦸꦁꦱ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦏ꧀ꦤꦺꦱꦶꦁ​ꦏꦸꦢꦸ​ꦩꦱꦿꦃꦲꦏꦺꦥꦮꦺꦃꦲꦺ​ꦭꦤ꧀ꦲꦸꦒ​ꦏꦸꦂꦧꦤ꧀ꦏꦺꦮꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦁꦒꦺꦴ​ꦥꦔꦥꦸꦫꦤꦺ​ꦢꦺꦴꦱ​꧉​ 2ꦭꦤ꧀ꦗꦭꦂꦫꦤ꧀ꦢꦺꦏ꧀ꦤꦺꦢꦺꦮꦺꦔꦭꦩ꧀ꦩꦶ​ꦱꦏ꧀ꦮꦼꦂꦤꦤꦺ​ꦏꦫꦶꦁꦏꦶꦃꦲꦤ꧀ ꦢꦺꦏ꧀ꦤꦺꦪ​ꦧꦶꦱ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦭꦱ꧀ꦱꦤ꧀ꦭꦤ꧀ꦏꦼꦱꦧꦂꦫꦤ꧀ꦩꦫꦁ​ꦮꦺꦴꦁ​ꦱꦶꦁ​ꦏ꧀ꦭꦺꦫꦸ​ꦭꦤ꧀ꦢꦸꦫꦸꦁ​ꦢꦸꦤꦸꦁ꧉​ 3ꦲꦸꦒ​꧈​ꦗꦭꦂꦫꦤ꧀ꦢꦺꦏ꧀ꦤꦺꦢꦺꦮꦺꦲꦺꦴꦏꦺꦃꦏꦫꦶꦁꦏꦶꦲꦤ꧀ꦤꦺ꧈​ꦩꦸꦭꦤꦺ​꧈​ꦤꦺꦏ꧀ꦢꦺꦏ꧀ꦤꦺꦩꦱꦿꦃꦲꦏꦺꦏꦸꦂꦧꦤ꧀ꦏꦺꦮꦤ꧀ ꦏꦸꦮꦶ​ꦲꦺꦴꦫ​ꦤꦩꦸꦁ​ꦏꦁꦒꦺꦴ​ꦥꦔꦥꦸꦫꦤꦺ​ꦢꦺꦴꦱꦤꦺ​ꦧꦁꦱꦤꦺ​꧈​ꦤꦁꦔꦶꦁ​ꦲꦸꦒ​ꦏꦁꦒꦺꦴ​ꦥꦔꦥꦸꦫꦤꦺ​ꦢꦺꦴꦱꦤꦺ​ꦢꦺꦏ꧀ꦤꦺꦢꦺꦮꦺꦲꦩ꧀ꦧꦫꦁ​꧉​ 4ꦏꦼꦗꦧ​ꦱꦁꦏꦏꦸꦮꦶ​꧈​ ꦲꦺꦴꦫ​ꦲꦺꦤꦺꦁꦮꦺꦴꦁ​ꦧꦶꦱ​ꦢꦢꦶ​ꦲꦶꦩꦩ꧀ꦒꦼꦢꦺꦱꦁꦏꦏꦼꦏꦉꦥ꧀ꦥꦤ꧀ꦤꦺ​ꦢꦺꦮꦺ꧈​ꦲꦺꦴꦫ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦶꦭꦶꦃ​ꦭꦤ꧀ꦩꦁꦒꦶꦭ꧀ꦮꦺꦴꦁ​ꦩꦸꦁꦒꦃ​ꦥꦁꦏꦠ꧀ꦏꦸꦮꦶ​꧈​ꦲꦺꦴꦫ​ꦧꦺꦢ​ꦏꦪ​ꦲꦶꦩꦩ꧀ꦒꦼꦢꦺꦄꦫꦺꦴꦤ꧀꧈​

5꧋ꦩꦼꦁꦏꦺꦴꦤꦺꦴ​ꦲꦸꦒ​ꦏꦿꦶꦱ꧀ꦡꦸꦱ꧀ ꦢꦺꦏ꧀ꦤꦺꦲꦺꦴꦫ​ꦔꦁꦏꦠ꧀ꦢꦺꦏ꧀ꦤꦺꦢꦺꦮꦺꦢꦢꦶ​ꦲꦶꦩꦩ꧀ꦒꦼꦢꦺ꧈​ꦲꦺꦴꦫ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦶꦭꦶꦃ​ꦢꦺꦏ꧀ꦤꦺ꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​:

“ꦏꦺꦴꦮꦺ​ꦭꦤ꧀ꦏꦺꦴꦮꦺ​ꦢꦺꦮꦺꦢꦢꦶ​ꦲꦤꦏ꧀ꦏꦸ​꧉​
ꦲꦶꦁ​ꦢꦶꦤ​ꦲꦶꦏꦶ​ꦲꦏꦸ​ꦤꦼꦠꦼꦥ꧀ꦥꦏꦺꦤꦁꦔꦉꦥ꧀ꦥꦺ​ꦗꦒꦠ꧀
ꦤꦺꦏ꧀ꦏꦺꦴꦮꦺ​ꦢꦢꦶ​ꦲꦤꦏ꧀ꦏꦸ​ꦱꦶꦁ​ꦔ꧀ꦮꦱꦤꦶ​ꦱꦼꦩ꧀ꦧꦫꦁ​꧉​”

6ꦭꦤ꧀ꦤꦁꦲꦪꦠ꧀ꦭꦶꦪꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​:

“ꦏꦺꦴꦮꦺ​ꦱ꧀ꦭꦮꦱ꧀ꦭꦮꦱ꧀ꦱꦺꦧꦏꦭ꧀ꦢꦢꦶ​ꦲꦶꦩꦩ꧀
ꦠꦸꦁꦒꦭ꧀ꦭꦺ​ꦏꦫꦺꦴ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀꧈​”

7꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ ꦢꦺꦴꦁꦔꦺꦢꦺꦏ꧀ꦤꦺꦲꦶꦗꦶꦏ꧀ꦤꦁꦗꦒꦠ꧀ꦏꦺꦤꦺ​꧈​ꦤ꧀ꦢꦺꦴꦁꦔꦭꦤ꧀ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦱꦩ꧀ꦧꦠ꧀ꦭꦤ꧀ꦤꦔꦶꦱ꧀ ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦔ꧀ꦭꦸꦮꦂꦫꦶ​ꦢꦺꦏ꧀ꦤꦺꦱꦁꦏꦠꦔꦤ꧀ꦤꦺ​ꦮꦺꦴꦁꦮꦺꦴꦁ​ꦱꦶꦁ​ꦲꦉꦥ꧀ꦩꦠꦺꦤ꧀ꦤꦶ​ꦢꦺꦏ꧀ꦤꦺ꧉​ꦭꦤ꧀ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦔꦗꦺꦤ꧀ꦤꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦱꦏ꧀ꦏꦧꦺꦃꦲꦺꦏꦁꦒꦺꦴ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦤꦩ꧀ꦥ​ꦥꦤ꧀ꦢꦺꦴꦔꦤꦺ​ꦢꦺꦏ꧀ꦤꦺ꧉​ꦩꦸꦁ​ꦮꦲꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦔꦭꦁꦔꦭꦁꦔꦶꦢꦺꦏ꧀ꦤꦺꦢꦶꦥꦠꦺꦤ꧀ꦤꦶ​ꦮꦺꦴꦁ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦢꦺꦏ꧀ꦤꦺ꧈​ꦱꦸꦥꦪ​ꦏꦸꦮꦠ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ 8ꦥꦚ꧀ꦕꦺꦤ꧀ꦧꦼꦤꦼꦂ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦢꦺꦏ꧀ꦤꦺꦩꦭꦃ​ꦩꦶꦭꦶꦃ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦭꦤ꧀ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦧꦶꦱ​ꦚ꧀ꦭꦩꦼꦠ꧀ꦠꦏꦺꦲꦮꦏ꧀ꦏꦺ​ꦢꦺꦮꦺ꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦢꦺꦏ꧀ꦤꦺꦧꦶꦱ​ꦔꦿꦱꦏ꧀ꦏꦏꦺꦲꦥ​ꦠꦼꦒꦼꦱ꧀ꦱꦺ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦢꦺꦏ꧀ꦤꦺꦪ​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀ꦠꦼꦤꦤ꧀꧈​ 9ꦩꦸꦭꦤꦺ​꧈​ꦱꦏ꧀ꦮꦶꦱ꧀ꦱꦺ​ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦭꦏꦺꦴꦤ꧀ꦤꦶ​ꦏꦸꦮꦶ​ꦏꦧꦺꦃ​꧈​ꦢꦺꦏ꧀ꦤꦺꦢꦢꦶ​ꦱꦩ꧀ꦥꦸꦂꦤ​꧈​ꦲꦺꦴꦫ​ꦲꦺꦤꦺꦁꦏꦼꦏꦸꦫꦁꦔꦤ꧀ꦤꦺ​ꦲꦥꦲꦥ​꧉​ꦩꦸꦭꦤꦺ​ꦢꦺꦏ꧀ꦤꦺꦧꦶꦱ​ꦔꦼꦏꦺꦏ꧀ꦏꦶꦏꦼꦱ꧀ꦭꦩꦼꦠ꧀ꦠꦤ꧀ꦭꦁꦒꦼꦁ​ꦩꦫꦁ​ꦏꦧꦺꦃ​ꦮꦺꦴꦁ​ꦱꦶꦁ​ꦥꦢ​ꦩꦤꦸꦠ꧀ꦩꦫꦁ​ꦢꦺꦏ꧀ꦤꦺ꧉​ 10ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦏꦸꦮꦶ​꧈​ꦲꦮꦶꦠ꧀ꦢꦺꦏ꧀ꦤꦺꦢꦶꦢꦢꦺꦏ꧀ꦏꦏꦺꦲꦶꦩꦩ꧀ꦒꦼꦢꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦲꦶꦩꦩ꧀ꦒꦼꦢꦺꦩꦺꦭ꧀ꦏꦶꦱꦼꦢꦺꦏ꧀꧈​

꧋ꦥꦼꦁꦔꦺꦭꦶꦁꦔꦺꦭꦶꦁ​ꦱꦸꦥꦪ​ꦲꦗ​ꦱꦩ꧀ꦥꦺꦏ꧀ꦧꦭꦶꦏ꧀ꦩꦼꦤꦺꦃ​ꦲꦶꦁ​ꦢꦺꦴꦱ​꧉​

11꧋ꦥꦫ​ꦱꦼꦢꦸꦭꦸꦂ​꧈​ꦥꦚ꧀ꦕꦺꦤ꧀ ꦧꦧ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦢꦢꦶ​ꦲꦶꦩꦩ꧀ꦒꦼꦢꦺ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦏꦸꦮꦶ​ꦲꦶꦗꦶꦏ꧀ꦲꦺꦴꦏꦺꦃꦱꦶꦁ​ꦏꦸꦢꦸ​ꦠꦏ꧀ꦉꦩ꧀ꦧꦸꦏ꧀ꦏꦫꦺꦴ​ꦏꦺꦴꦮꦺ​꧉​ꦤꦁꦔꦶꦁ​ꦏꦔꦺꦭ꧀ꦭꦤ꧀ꦧꦔꦼꦠ꧀ꦲꦼꦁꦒꦺꦴꦤ꧀ꦏꦸ​ꦲꦉꦥ꧀​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦩꦫꦁ​ꦏꦺꦴꦮꦺ​꧉​ꦲꦥ​ꦠ​ꦱꦶꦁ​ꦩꦫꦏ꧀ꦏꦏꦺꦲꦔꦺꦭ꧀?ꦗꦭꦂꦫꦤ꧀ꦏꦺꦴꦮꦺ​ꦩꦭꦶꦃ​ꦩꦊꦱ꧀ꦭꦤ꧀​ꦔ꧀ꦊꦩꦼꦂꦲꦶꦁ​ꦥꦩꦶꦏꦶꦂ꧈​ꦲꦺꦴꦫ​ꦕꦼꦥꦼꦠ꧀꧈​ 12ꦤꦺꦏ꧀ꦢꦶꦥꦶꦏꦶꦂ​꧈​ꦱꦏ꧀ꦗꦤꦺꦭꦲꦸꦠ꧀ꦪ​ꦮꦶꦱ꧀ꦱꦸꦮꦶꦠ​ꦲꦼꦁꦒꦺꦴꦤ꧀ꦩꦸ​ꦢꦢꦶ​ꦮꦺꦴꦁ​ꦥꦽꦕꦪ​ꦭꦤ꧀ꦪ​ꦥꦤ꧀ꦠꦼꦱ꧀ꦱꦺ​ꦏꦺꦴꦮꦺ​ꦱꦲꦶꦏꦶ​ꦧꦶꦱ​ꦩꦸꦭꦁꦔꦶꦭꦶꦪꦤꦺ​꧉​ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦺꦴꦫ​ꦔꦺꦴꦤꦺꦴ​꧈​ꦲꦮꦶꦠ꧀ꦠꦼꦏꦤ꧀ꦱꦼꦥꦿꦺꦤꦺ​ꦏꦺꦴꦮꦺ​ꦲꦶꦗꦶꦏ꧀ꦏꦸꦢꦸ​ꦢꦶꦧ꧀ꦭꦗꦂꦫꦶꦥꦶꦮꦸꦭꦁ​ꦱꦶꦁ​ꦮꦶꦮꦶꦠ꧀ꦠꦤ꧀꧈​ꦏꦺꦴꦮꦺ​ꦲꦶꦗꦶꦏ꧀ꦏꦪ​ꦧꦺꦴꦕꦃ​ꦕꦶꦭꦶꦏ꧀ꦔꦺꦴꦤꦺꦴ​꧈​ꦱꦶꦁ​ꦔꦺꦴꦩ꧀ꦧꦺ​ꦩꦺꦂꦏꦶ꧈​ꦢꦸꦫꦸꦁ​ꦏꦸꦮꦠ꧀ꦏꦫꦺꦴ​ꦥꦔꦤ꧀ꦱꦶꦁ​ꦲꦠꦺꦴꦱ꧀꧈​ 13ꦥꦫ​ꦱꦼꦢꦸꦭꦸꦂ​꧈​ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦠꦏ꧀ꦥꦢꦏ꧀ꦏꦏꦺꦏꦫꦺꦴ​ꦧꦺꦴꦕꦃ​ꦕꦶꦭꦶꦏ꧀?ꦗꦭꦂꦫꦤ꧀ꦏꦺꦴꦮꦺ​ꦢꦸꦫꦸꦁ​ꦔꦼꦂꦠꦶ​ꦧꦺꦢꦤꦺ​ꦧꦼꦤꦼꦂꦏ꧀ꦭꦺꦫꦸ꧈​ꦲꦭ​ꦭꦤ꧀ꦧꦼꦕꦶꦏ꧀꧈​ꦢꦢꦶꦤꦺ​ꦲꦶꦗꦶꦏ꧀ꦏꦪ​ꦧꦺꦴꦕꦃ​ꦕꦶꦭꦶꦏ꧀ꦱꦶꦁ​ꦲꦶꦗꦶꦏ꧀ꦔꦺꦴꦩ꧀ꦧꦺ​ꦩꦺꦂꦏꦶ꧈​ꦢꦸꦫꦸꦁ​ꦔꦼꦂꦠꦶ​ꦲꦥ​ꦱꦶꦁ​ꦢꦶꦲꦫꦤ꧀ꦤꦶ​ꦲꦭ​ꦭꦤ꧀ꦧꦼꦕꦶꦏ꧀꧈​ 14ꦤꦁꦔꦶꦁ​ꦮꦺꦴꦁ​ꦱꦶꦁ​ꦮꦶꦱ꧀ꦢꦶꦮꦱ​ꦏꦸꦮꦶ​ꦏꦸꦮꦠ꧀ꦏꦫꦺꦴ​ꦥꦔꦤ꧀ꦱꦶꦁ​ꦲꦠꦺꦴꦱ꧀ ꦠꦼꦒꦼꦱ꧀ꦱꦺ​꧈​ꦮꦶꦱ꧀ꦔꦿꦱꦏ꧀ꦏꦏꦺꦭꦤ꧀ꦧꦶꦱ​ꦩ꧀ꦧꦺꦢꦏ꧀​ꦩ꧀ꦧꦺꦢꦏ꧀ꦏꦏꦺꦲꦭ​ꦭꦤ꧀ꦧꦼꦕꦶꦏ꧀꧈​

↑ ↑ ↑


 

꧇​꧖꧇​ 1-2ꦩꦸꦭꦤꦺꦥꦫꦱꦼꦢꦸꦭꦸꦂ꧈​ꦲ꦳ꦪꦸꦏ꧀ꦱꦲꦶꦏꦶꦲꦮꦏ꧀ꦏꦺꦢꦺꦮꦺꦥꦢꦤꦶꦁꦒꦭ꧀ꦥꦶꦮꦸꦭꦁꦱꦶꦁꦮꦶꦮꦶꦠ꧀ꦠꦤ꧀꧈​ꦲ꦳ꦪꦸꦏ꧀ꦲꦗꦲꦩ꧀ꦧꦺꦴꦭꦤ꧀​ꦩ꧀ꦧꦭꦺꦤ꧀ꦤꦶꦥꦶꦮꦸꦭꦁꦧꦧ꧀ꦤꦶꦁꦒꦭ꧀​ꦏ꧀ꦭꦏꦸꦮꦤ꧀ꦲꦭ꧈​ꦧꦧ꧀ꦤꦸꦫꦸꦠ꧀ꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦧꦧ꧀​ꦏ꧀ꦭꦏꦸꦮꦤ꧀ꦱꦶꦁꦲꦭꦱꦶꦁꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺꦤꦼꦏꦏ꧀ꦏꦏꦺꦥꦠꦶ꧉​ꦲꦸꦒꦥꦶꦮꦸꦭꦁꦧꦧ꧀ꦥꦼꦔꦤ꧀ꦢꦼꦭ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ꧈​ꦧꦧ꧀ꦥꦼꦩ꧀ꦧꦥ꧀ꦠꦶꦱ꧀ꦱꦤ꧀ ꦧꦧ꧀​ꦤ꧀ꦢꦺꦴꦁꦔꦔꦁꦒꦺꦴꦠꦸꦩ꧀ꦥꦁꦔꦤ꧀ꦠꦔꦤ꧀ ꦧꦧ꧀ꦠꦔꦶꦱꦁꦏꦥꦠꦶꦭꦤ꧀ꦧꦧ꧀ꦱꦼꦠꦿꦥꦤ꧀ꦱꦶꦁꦭꦁꦒꦼꦁꦱꦁꦏꦒꦸꦱ꧀ꦠꦶꦄꦭ꧀ꦭꦃ꧉​ꦲ꦳ꦪꦸꦏ꧀ꦥꦶꦮꦸꦭꦁꦥꦶꦮꦸꦭꦁꦏꦸꦮꦶꦢꦶꦭꦶꦮꦠ꧀ꦠꦶꦭꦤ꧀ꦲ꦳ꦪꦸꦏ꧀ꦥꦢꦔꦚ꧀ꦕꦶꦏ꧀ꦏꦶꦥꦶꦮꦸꦭꦁꦱꦶꦁꦭꦸꦮꦶꦃꦢꦸꦮꦸꦂ꧈​ꦥꦶꦮꦸꦭꦁꦏꦁꦒꦺꦴꦮꦺꦴꦁꦱꦶꦁꦢꦶꦮꦱ꧉​ 3ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦩꦗꦸ​ꦠꦼꦤꦤ꧀ꦭꦤ꧀ꦤꦶꦤ꧀ꦢꦏ꧀ꦏꦏꦺꦏꦸꦮꦶ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦗꦶꦏ꧀ꦒꦼꦊꦩ꧀​ꦔ꧀ꦭꦶꦭꦤꦶ​ꦲꦮꦏ꧀ꦏꦺ​ꦢꦺꦮꦺ꧉​

4꧋ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦩꦺꦴꦱꦺꦴꦏ꧀ꦮꦺꦴꦁ​ꦱꦶꦁ​ꦮꦶꦱ꧀ꦚꦶꦁꦏꦶꦂꦫꦏꦺꦭꦤ꧀ꦤꦶꦁꦒꦭ꧀ꦥꦼꦔꦏꦸꦤꦺꦧꦶꦱ​ꦧꦭꦶꦏ꧀ꦩꦼꦤꦺꦃ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​?ꦠꦏ꧀ꦏꦶꦫꦲꦺꦴꦫ​!ꦲꦮꦶꦠ꧀ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦏꦥꦶꦁ​ꦥꦶꦱꦤ꧀ꦮꦶꦱ꧀ꦠꦲꦸ​ꦤꦩ꧀ꦥ​ꦥꦼꦥꦢꦁꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦲꦠꦶꦤꦺ​꧉​ꦏꦥꦶꦁ​ꦥꦶꦤ꧀ꦢꦺꦴꦤꦺ꧈​ꦮꦺꦴꦁꦔꦺ​ꦮꦶꦱ꧀ꦔꦿꦱꦏ꧀ꦏꦏꦺꦧꦼꦂꦏꦃ​ꦏꦱ꧀ꦮꦂꦒꦤ꧀ꦥꦮꦺꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦏꦥꦶꦁ​ꦠꦼꦭꦸꦤꦺ​ꦮꦺꦴꦁ​ꦏꦸꦮꦶ​ꦮꦶꦱ꧀ꦤꦩ꧀ꦥ​ꦫꦺꦴꦃ​ꦱꦸꦕꦶ​꧉​ 5ꦏꦥꦶꦁ​ꦥꦥꦠ꧀ꦠꦺꦥꦫ​ꦱꦼꦢꦸꦭꦸꦂ​꧈​ꦮꦺꦴꦁꦔꦺ​ꦮꦶꦱ꧀ꦔꦼꦂꦠꦶ​ꦤꦺꦏ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦤꦺꦁꦮꦸꦗꦸꦠ꧀ꦠꦺꦭꦤ꧀ꦏꦥꦶꦁ​ꦭꦶꦩꦤꦺ​꧈​ꦮꦺꦴꦁꦔꦺ​ꦮꦶꦱ꧀ꦔꦿꦱꦏ꧀ꦏꦏꦺꦏꦼꦏꦸꦮꦠ꧀ꦠꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺꦭꦤ꧀ꦱꦶꦁ​ꦧꦏꦭ꧀ꦢꦶꦏꦁꦒꦺꦴꦏ꧀ꦏꦏꦺꦲꦸꦒ​ꦲꦶꦁ​ꦗꦩꦤ꧀ꦱꦶꦁ​ꦧꦏꦭ꧀ꦠꦼꦏ​꧉​ 6ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦩꦼꦏ꧀ꦱ​ꦮꦺꦴꦁꦔꦺ​ꦮꦤꦶ​ꦤꦶꦁꦒꦭ꧀ꦥꦼꦔꦤ꧀ꦢꦼꦭ꧀ꦭꦺ​꧈​ꦩꦸꦭꦤꦺ​꧈​ꦲꦺꦴꦫ​ꦧꦏꦭ꧀ꦤꦺꦏ꧀ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦧꦶꦱ​ꦔꦏꦺꦴꦤ꧀ꦤꦶ​ꦱꦭꦃꦲꦺ​ꦭꦤ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦼꦤꦺꦃ​꧉​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦏꦼꦤꦺꦁꦢꦶꦲꦫꦤ꧀ꦤꦶ​ꦩꦼꦤ꧀ꦠꦺꦁꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦼꦥꦶꦱ꧀ꦱꦤ꧀ꦩꦼꦤꦺꦃ​ꦭꦤ꧀ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦢꦺꦏ꧀ꦤꦺꦤꦁꦔꦉꦥ꧀ꦥꦺ​ꦮꦺꦴꦁ​ꦲꦺꦴꦏꦺꦃ꧉​

7꧋ꦥꦫ​ꦱꦼꦢꦸꦭꦸꦂ​꧈​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦏꦼꦧꦺꦴꦤ꧀ꦏꦲꦺ​꧉​ꦤꦺꦏ꧀ꦢꦶꦥꦶꦏꦶꦂ​꧈​ꦮꦸꦗꦸꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦲꦩ꧀ꦧꦼꦂꦏꦃꦲꦶ​ꦊꦩꦃ​ꦱꦶꦁ​ꦤꦼꦱꦼꦥ꧀ꦧꦚꦸ​ꦲꦸꦢꦤ꧀ ꦱꦩ꧀ꦥꦺꦏ꧀ꦔꦼꦠꦺꦴꦏ꧀ꦏꦏꦺꦠꦤ꧀ꦢꦸꦂꦫꦤ꧀ꦱꦶꦁ​ꦏꦼꦤꦺꦁꦢꦶꦥꦔꦤ꧀ꦏꦫꦺꦴ​ꦱꦶꦁ​ꦔ꧀ꦒꦫꦥ꧀ꦏꦼꦧꦺꦴꦤ꧀ꦩꦲꦸ​꧉​ 8ꦤꦁꦔꦶꦁ​ꦤꦺꦏ꧀ꦏꦼꦧꦺꦴꦤꦺ​ꦤꦩꦸꦁ​ꦤꦸꦏꦸꦭ꧀ꦭꦏꦺꦲꦼꦫꦶ​ꦭꦤ꧀ꦫꦸꦁꦏꦸꦠ꧀ꦠꦤ꧀ ꦏꦼꦧꦺꦴꦤ꧀ꦩꦲꦸ​ꦲꦺꦴꦫ​ꦏꦁꦒꦺꦴ​ꦲꦥꦲꦥ​ꦧ꧀ꦭꦱ꧀ꦭꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦧꦏꦭ꧀ꦧꦺꦴꦁꦏꦺꦴꦂ꧉​

9꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ!ꦱꦼꦤꦗꦤ꧀ꦲꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦩꦲꦸ​꧈​ꦲꦏꦸ​ꦲꦺꦴꦫ​ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦏꦸꦮꦶ​ꦏꦪ​ꦔꦺꦴꦤꦺꦴ​꧈​ꦲꦺꦴꦫ​꧉​ꦲꦏꦸ​ꦥꦚ꧀ꦕꦺꦤ꧀ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦥꦽꦕꦪ​ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​꧉​ꦲꦮꦶꦠ꧀ꦲꦏꦸ​ꦮꦼꦫꦸꦃ​ꦤꦺꦏ꧀ꦏꦺꦴꦮꦺ​ꦥꦢ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦕꦶꦏ꧀ꦩꦫꦁ​ꦮꦺꦴꦁ​ꦭꦶꦪꦤꦺ​꧈​ꦱꦸꦥꦪ​ꦏꦼꦠꦫ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦔ꧀ꦭꦸꦮꦂꦫꦶ​ꦏꦺꦴꦮꦺ​ꦱꦁꦏꦥꦔ꧀ꦮꦱꦤꦺ​ꦲꦭ​ꦭꦤ꧀ꦱꦲꦶꦏꦶ​ꦮꦶꦱ꧀ꦢꦶꦢꦢꦺꦏ꧀ꦏꦏꦺꦱꦶꦗꦶ​ꦏꦫꦺꦴ​ꦢꦺꦏ꧀ꦤꦺꦢꦺꦮꦺ꧉​ 10ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦥꦽꦕꦪ​ꦠꦼꦤꦤ꧀ ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦴꦫ​ꦠꦲꦸ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦲꦺꦴꦫ​ꦲꦥꦶꦏ꧀꧈​ꦩꦸꦭꦤꦺ​ꦲꦏꦸ​ꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦲꦺꦴꦫ​ꦧꦏꦭ꧀ꦭꦭꦶ​ꦩꦫꦁ​ꦥꦼꦁꦒꦮꦺꦪꦤ꧀ꦏꦁꦒꦺꦴ​ꦢꦺꦏ꧀ꦤꦺ꧈​ꦲꦸꦒ​ꦲꦼꦁꦒꦺꦴꦤ꧀ꦩꦸ​ꦥꦢ​ꦤꦶꦤ꧀ꦢꦏ꧀ꦏꦏꦺꦏꦠꦿꦺꦱ꧀ꦤꦤ꧀ꦗꦭꦂꦫꦤ꧀​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​ꦭꦤ꧀ꦲꦸꦒ​ꦲꦼꦁꦒꦺꦴꦤ꧀ꦩꦸ​ꦥꦢ​ꦤꦸꦭꦸꦁꦔꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦠꦸꦁꦒꦭ꧀ꦥꦽꦕꦪ​꧉​ꦮꦸꦗꦸꦠ꧀ꦠꦺꦠꦼꦏꦤꦺ​ꦱꦲꦶꦏꦶ​ꦏꦺꦴꦮꦺ​ꦏꦧꦺꦃ​ꦪ​ꦲꦶꦗꦶꦏ꧀ꦥꦢ​ꦠꦸꦭꦸꦁꦠꦶꦤꦸꦭꦸꦁ​꧉​ 11ꦭꦤ꧀ꦱꦶꦁ​ꦠꦏ꧀ꦗꦭꦸꦏ꧀ꦠꦼꦤꦤ꧀ꦪ​ꦲꦶꦏꦶ​꧈​ꦧꦶꦱꦲ​ꦏꦺꦴꦮꦺ​ꦱꦶꦗꦶꦱꦶꦗꦶꦤꦺ​ꦠꦼꦠꦼꦥ꧀ꦩꦤ꧀ꦠꦼꦥ꧀ꦠꦼꦫꦸꦱ꧀ꦱꦸꦮꦺꦤꦺ​ꦏꦺꦴꦮꦺ​ꦲꦸꦫꦶꦥ꧀ꦲꦶꦁ​ꦢꦺꦴꦚ​ꦏꦺꦤꦺ​꧉​ꦢꦢꦶꦤꦺ​ꦲꦩ꧀ꦧꦺꦱꦸꦏ꧀ꦏꦺꦴꦮꦺ​ꦩꦼꦱ꧀ꦠꦶꦧꦏꦭ꧀ꦤꦩ꧀ꦥ​ꦱꦏ꧀ꦲꦺꦤꦺꦁꦔꦺꦏꦧꦼꦕꦶꦏ꧀ꦏꦤ꧀ꦱꦶꦁ​ꦏꦼꦤꦺꦁꦲꦩ꧀ꦧꦺꦴꦏ꧀ꦲꦉꦥ꧀ꦲꦉꦥ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ 12ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦗ​ꦥꦢ​ꦩꦊꦱ꧀ꦔꦺꦴꦤꦺꦴ​ꦲꦶꦁ​ꦥꦶꦏꦶꦂꦫꦤ꧀ ꦲꦗ​꧈​ꦤꦁꦔꦶꦁ​ꦭꦸꦮꦸꦁꦥꦢ​ꦤꦶꦫꦸ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦥꦽꦕꦪ​ꦭꦤ꧀ꦱꦧꦂ​ꦢꦺꦏ꧀ꦗꦩꦤ꧀​ꦩ꧀ꦧꦶꦪꦺꦤ꧀꧈​ꦱꦲꦶꦏꦶ​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦤꦩ꧀ꦥ​ꦏꦧꦼꦕꦶꦏ꧀ꦏꦤ꧀ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

13꧋ꦥꦫ​ꦱꦼꦢꦸꦭꦸꦂ​꧈​ꦢꦺꦴꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦗꦚ꧀ꦗꦶꦤꦺ​ꦩꦫꦁ​ꦧꦥ​ꦄꦨꦿꦲꦩ꧀ ꦢꦺꦏ꧀ꦤꦺꦱꦸꦩ꧀ꦥꦃ​ꦤꦺꦏ꧀ꦧꦏꦭ꧀ꦤꦸꦫꦸꦠ꧀ꦠꦶ​ꦲꦥ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶ꧉​ꦭꦤ꧀ꦗꦭꦂꦫꦤ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦏ꧀ꦮꦱꦤꦺ​ꦔꦸꦁꦏꦸꦭ꧀ꦭꦶ​ꦢꦺꦏ꧀ꦤꦺ꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦱꦸꦩ꧀ꦥꦃ​ꦔꦁꦒꦺꦴ​ꦗꦼꦤꦼꦁꦔꦺ​ꦢꦺꦮꦺꦢꦺꦴꦁꦔꦺꦢꦺꦏ꧀ꦤꦺꦔꦼꦏꦺꦏ꧀ꦏꦶꦗꦚ꧀ꦗꦶ​ꦏꦸꦮꦶ​꧉​ 14ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​:“ꦲꦏꦸ​ꦗꦚ꧀ꦗꦶ​ꦤꦺꦏ꧀ꦧꦏꦭ꧀ꦲꦩ꧀ꦧꦼꦂꦏꦃꦲꦶ​ꦏꦺꦴꦮꦺ​ꦭꦤ꧀ꦧꦏꦭ꧀ꦔꦼꦏꦺꦏ꧀ꦏꦶꦠꦸꦫꦸꦤ꧀ꦤꦤ꧀ꦲꦺꦴꦏꦺꦃꦧꦔꦼꦠ꧀ꦩꦫꦁ​ꦏꦺꦴꦮꦺ​꧉​” 15ꦭꦤ꧀ꦗꦭꦂꦫꦤ꧀ꦧꦥ​ꦄꦨꦿꦲꦩ꧀ꦱꦧꦂ​ꦔꦼꦤ꧀ꦠꦺꦤ꧀ꦤꦶ​꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦧꦶꦱ​ꦤꦩ꧀ꦥ​ꦲꦥ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 16ꦩꦤꦸꦁꦱ​ꦤꦺꦏ꧀ꦱꦸꦩ꧀ꦥꦃ​ꦏꦸꦮꦶ​ꦩꦼꦱ꧀ꦠꦶꦔꦁꦒꦺꦴ​ꦗꦼꦤꦼꦁꦔꦺ​ꦮꦺꦴꦁ​ꦭꦶꦪ​ꦱꦶꦁ​ꦭꦸꦮꦶꦃ​ꦢꦸꦮꦸꦂꦥꦁꦏꦠ꧀ꦠꦺ​ꦭꦤ꧀ꦲꦼꦁꦒꦺꦴꦤꦺ​ꦱꦸꦩ꧀ꦥꦃ​ꦏꦸꦮꦶ​ꦏꦁꦒꦺꦴ​ꦤꦼꦠꦼꦥ꧀ꦥꦏꦺꦤꦺꦏ꧀ꦱꦶꦁ​ꦢꦶꦲꦺꦴꦩꦺꦴꦁꦏꦸꦮꦶ​ꦧꦏꦭ꧀ꦢꦶꦠꦸꦫꦸꦠ꧀ꦠꦶ​ꦠꦼꦤꦤ꧀ ꦲꦺꦴꦫ​ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦤ꧀꧈​

17꧋ꦩꦸꦭꦤꦺ​꧈​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦱꦸꦥꦪ​ꦮꦺꦴꦁꦮꦺꦴꦁ​ꦱꦶꦁ​ꦧꦏꦭ꧀ꦤꦩ꧀ꦥꦤꦶ​ꦗꦚ꧀ꦗꦶ​ꦩꦲꦸ​ꦥꦢ​ꦔꦼꦂꦠꦶ​ꦠꦼꦤꦤ꧀ꦤꦺꦏ꧀ꦢꦺꦏ꧀ꦤꦺꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦧꦏꦭ꧀ꦚꦺꦭꦏ꧀ꦏꦶ​ꦗꦚ꧀ꦗꦶ​ꦏꦸꦮꦶ​꧉​ꦪꦏꦸꦮꦶ​ꦗꦭꦂꦫꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦤ꧀ꦠꦼꦥ꧀ꦥꦏꦺꦗꦚ꧀ꦗꦶꦤꦺ​ꦩꦫꦁ​ꦧꦥ​ꦄꦨꦿꦲꦩ꧀ꦔꦁꦒꦺꦴ​ꦱꦸꦩ꧀ꦥꦃ​꧉​ 18ꦪ​ꦫꦺꦴꦁ​ꦥꦽꦏꦫ​ꦲꦶꦏꦶ​ꦱꦶꦁ​ꦩꦫꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦧꦶꦱ​ꦱꦺꦭꦏ꧀ ꦪꦏꦸꦮꦶ​꧈​ꦢꦺꦏ꧀ꦤꦺꦗꦚ꧀ꦗꦶ​ꦭꦤ꧀ꦢꦺꦏ꧀ꦤꦺꦱꦸꦩ꧀ꦥꦃ​꧉​ꦭꦤ꧀ꦗꦭꦂꦫꦤ꧀ꦱꦁꦏꦏꦸꦮꦶ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦁ​ꦮꦶꦱ꧀ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦢ​ꦠꦤ꧀ꦱꦃ​ꦢꦶꦲꦺꦭꦶꦁꦔꦏꦺ꧈​ꦱꦸꦥꦪ​ꦥꦢ​ꦏꦼꦚ꧀ꦕꦼꦁ​ꦔ꧀ꦒꦺꦴꦤ꧀ꦢꦺꦭ꧀ꦭꦶꦥꦼꦔꦉꦥ꧀ꦲꦉꦥ꧀ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶ ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ 19ꦥꦼꦔꦉꦥ꧀ꦲꦉꦥ꧀ꦏꦸꦮꦶ​ꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦱ꧀ꦭꦩꦼꦠ꧀ ꦱꦼꦤꦗꦤ꧀ꦲꦸꦫꦶꦥ꧀ꦲꦶꦁ​ꦢꦺꦴꦚ​ꦏꦺꦤꦺ​ꦏꦼꦧꦼꦏ꧀ꦏꦫꦺꦴ​ꦥꦽꦏꦫꦥꦽꦏꦫ​ꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦗꦒꦏ꧀ꦏꦏꦺ꧉​ꦤꦁꦔꦶꦁ​ꦥꦼꦔꦉꦥ꧀ꦲꦉꦥ꧀ꦏꦸꦮꦶ​ꦩꦭꦃ​ꦔꦼꦏꦺꦏ꧀ꦏꦶꦔꦼꦂꦠꦶ​꧈​ꦤꦺꦏ꧀ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​꧈​ꦲꦮꦶꦠ꧀ꦱꦲꦶꦏꦶ​ꦮꦶꦱ꧀​ꦧ꧀ꦭꦱ꧀ꦲꦺꦴꦫ​ꦲꦺꦤꦺꦁꦲꦭꦁꦔꦭꦔꦤ꧀ꦤꦺꦩꦼꦤꦺꦃ​꧉​ 20ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺꦮꦶꦱ꧀​ꦩ꧀ꦊꦧꦸ​ꦤꦁꦏꦤ​ꦔ꧀ꦒꦮꦺꦏ꧀ꦏꦏꦺꦢꦭꦤ꧀ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦏ꧀ꦤꦺꦱꦶꦁ​ꦢꦢꦶ​ꦲꦶꦩꦩ꧀ꦒꦼꦢꦺ​ꦱꦶꦁ​ꦭꦁꦒꦼꦁ​꧈​ꦠꦸꦁꦒꦭ꧀ꦭꦺ​ꦏꦫꦺꦴ​ꦩꦺꦭ꧀ꦏꦶꦱꦼꦢꦺꦏ꧀꧈​

↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦲꦶꦩꦩ꧀ꦒꦼꦢꦺ​ꦩꦺꦭ꧀ꦏꦶꦱꦼꦢꦺꦏ꧀꧈​

꧇​꧗꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦠꦏ꧀ꦏꦶꦫꦏꦺꦴꦮꦺ​ꦏꦧꦺꦃ​ꦔꦼꦂꦠꦶ​ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦱꦥ​꧉​ꦢꦺꦏ꧀ꦤꦺꦱꦶꦁ​ꦢꦢꦶ​ꦫꦠꦸꦤꦺ​ꦏꦸꦠꦱꦭꦺꦩ꧀ꦭꦤ꧀ꦲꦸꦒ​ꦢꦢꦶ​ꦲꦶꦩꦩ꧀ꦩꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧉​ꦢꦺꦴꦁꦔꦺꦧꦥ​ꦄꦨꦿꦲꦩ꧀ꦩꦸꦭꦶꦃ​ꦱꦁꦏꦥꦺꦫꦁꦔꦤ꧀ꦭꦤ꧀ꦮꦶꦱ꧀ꦩꦼꦤꦁꦔꦏꦺꦫꦠꦸꦫꦠꦸ​꧈​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦩꦼꦠꦸꦮꦢꦺꦏ꧀ꦤꦺꦠꦼꦫꦸꦱ꧀ꦤꦸꦩ꧀ꦥꦁꦔꦶ​ꦠꦔꦤ꧀ꦲꦩ꧀ꦧꦼꦂꦏꦃꦲꦶ​ꦢꦺꦏ꧀ꦤꦺ꧉​ 2ꦧꦥ​ꦄꦨꦿꦲꦩ꧀ꦠꦼꦫꦸꦱ꧀ꦔꦼꦏꦺꦏ꧀ꦏꦶꦱꦏ꧀ꦥꦿꦱꦼꦥꦸꦭꦸꦃꦲꦤ꧀ꦤꦺ​ꦒꦮꦤꦺ​ꦱꦁꦏꦥꦼꦥꦼꦫꦁꦔꦤ꧀ꦩꦫꦁ​ꦩꦺꦭ꧀ꦏꦶꦱꦼꦢꦺꦏ꧀꧈​ꦠꦼꦩ꧀ꦧꦸꦁ​ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦠꦼꦒꦼꦱ꧀ꦱꦺ​“ꦫꦠꦸꦤꦺ​ꦏꦧꦼꦤꦼꦂꦫꦤ꧀”ꦭꦤ꧀ꦗꦭꦂꦫꦤ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦫꦠꦸꦤꦺ​ꦏꦸꦠꦱꦭꦺꦩ꧀ꦭꦤ꧀ꦠꦼꦩ꧀ꦧꦸꦁ​ꦱꦭꦺꦩ꧀ꦏꦸꦮꦶ​ꦠꦼꦒꦼꦱ꧀ꦱꦺ​“ꦏꦠꦼꦤ꧀ꦠꦽꦩ꧀ꦩꦤ꧀”꧈​ꦢꦢꦶꦤꦺ​ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦲꦸꦒ​ꦠꦼꦒꦼꦱ꧀ꦱꦺ​“ꦫꦠꦸꦤꦺ​ꦏꦠꦼꦤ꧀ꦠꦽꦩ꧀ꦩꦤ꧀”꧉​ 3ꦧꦧ꧀ꦧꦥꦧꦶꦪꦸꦁꦔꦺ​ꦭꦤ꧀ꦱꦥ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦲꦺꦴꦫ​ꦏꦼꦠꦸꦭꦶꦱ꧀​ꦧ꧀ꦭꦱ꧀ꦤꦁꦏꦶꦠꦧ꧀ ꦱꦼꦩꦺꦴꦤꦺꦴ​ꦲꦸꦒ​ꦧꦧ꧀ꦭꦲꦶꦂꦫꦺ​ꦭꦤ꧀ꦥꦠꦶꦤꦺ​꧉​ꦲꦸꦒ​ꦲꦺꦴꦫ​ꦏꦼꦠꦸꦭꦶꦱ꧀​ꦧ꧀ꦭꦱ꧀ꦤꦺꦏ꧀ꦢꦺꦏ꧀ꦤꦺꦭꦺꦫꦺꦤ꧀ꦢꦢꦶ​ꦲꦶꦩꦩ꧀ꦒꦼꦢꦺ꧉​ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦩ꧀ꦧꦺꦴꦏ꧀ꦥꦶꦏꦶꦂ​ꦱꦶꦁ​ꦲꦥꦶꦏ꧀ ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦏꦪ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦢꦢꦶ​ꦲꦶꦩꦩ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​

4꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦢꦶꦥꦶꦏꦶꦂ​ꦩꦺꦭ꧀ꦏꦶꦱꦼꦢꦺꦏ꧀ꦪ​ꦗꦤ꧀ꦒꦼꦢꦺꦠꦼꦤꦤ꧀ ꦔꦸꦁꦏꦸꦭ꧀ꦭꦶ​ꦧꦥ​ꦄꦨꦿꦲꦩ꧀꧈​ꦭꦃ​ꦧꦥ​ꦄꦨꦿꦲꦩ꧀ꦏꦸꦮꦶ​ꦭꦲꦸꦠ꧀​ꦩ꧀ꦧꦃꦩ꧀ꦧꦲꦤ꧀ꦤꦺꦧꦁꦱꦤꦺ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦠ​!ꦭꦃ​ꦤꦁꦔꦶꦁ​ꦢꦺꦏ꧀ꦤꦺꦏꦺꦴꦏ꧀ꦔꦼꦏꦺꦏ꧀ꦏꦶꦥꦿꦱꦼꦥꦸꦭꦸꦃꦲꦤ꧀ꦤꦺ​ꦒꦮꦤꦺ​ꦱꦁꦏꦥꦼꦥꦼꦫꦁꦔꦤ꧀ꦩꦫꦁ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀꧈​ 5ꦧꦁꦱ​ꦆꦱꦿꦌꦭ꧀ꦏꦸꦮꦶ​ꦭꦲꦸꦠ꧀ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦠ​?ꦭꦃ​ꦤꦁꦔꦶꦁ​ꦮꦺꦴꦁꦮꦺꦴꦁ​ꦆꦱꦿꦌꦭ꧀ ꦱꦼꦤꦗꦤ꧀ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ ꦏꦸꦢꦸ​ꦲꦩ꧀ꦧꦪꦂ​ꦧꦼꦭꦱ꧀ꦠꦶꦁꦩꦫꦁ​ꦥꦫ​ꦲꦶꦩꦩ꧀ꦠꦸꦫꦸꦤ꧀ꦤꦤ꧀ꦤꦺ​ꦲꦶꦩꦩ꧀ꦭꦺꦮ꦳ꦶ꧈​ꦱꦶꦁ​ꦲꦸꦒ​ꦠꦸꦁꦒꦭ꧀ꦧꦁꦱ​ꦆꦱꦿꦌꦭ꧀꧈​ꦏꦸꦮꦶ​ꦥꦼꦂꦤꦠꦤ꧀ꦤꦺꦏꦶꦠꦧ꧀ꦭꦤ꧀ꦏꦸꦮꦶ​ꦱꦶꦁ​ꦢꦶꦲꦫꦤ꧀ꦤꦶ​ꦥꦿꦱꦼꦥꦸꦭꦸꦃꦲꦤ꧀꧈​ 6ꦭꦃ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦢꦸꦢꦸ​ꦠꦸꦫꦸꦤ꧀ꦤꦤ꧀ꦤꦺ​ꦲꦶꦩꦩ꧀ꦭꦺꦮ꦳ꦶ꧈​ꦢꦢꦶꦤꦺ​ꦢꦺꦏ꧀ꦤꦺꦪ​ꦲꦺꦴꦫ​ꦲꦺꦤ꧀ꦠꦸꦏ꧀​ꦚ꧀ꦗꦭꦸꦏ꧀ꦧꦼꦭꦱ꧀ꦠꦶꦁꦱꦁꦏꦧꦁꦱ​ꦆꦱꦿꦌꦭ꧀꧈​ꦤꦁꦔꦶꦁ​ꦮꦸꦗꦸꦠ꧀ꦠꦺꦏꦼꦥꦿꦶꦪꦺ​?ꦩꦭꦃ​ꦧꦥ​ꦄꦨꦿꦲꦩ꧀ꦢꦺꦮꦺꦱꦶꦁ​ꦔꦼꦏꦺꦏ꧀ꦏꦶꦥꦿꦱꦼꦥꦸꦭꦸꦃꦲꦤ꧀ꦩꦫꦁ​ꦢꦺꦏ꧀ꦤꦺ꧉​ꦏꦼꦗꦧ​ꦱꦁꦏꦏꦸꦮꦶ​꧈​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦤꦸꦩ꧀ꦥꦁꦔꦶ​ꦠꦔꦤ꧀ꦲꦩ꧀ꦧꦼꦂꦏꦃꦲꦶ​ꦧꦥ​ꦄꦨꦿꦲꦩ꧀ ꦱꦼꦤꦗꦤ꧀ꦧꦥ​ꦄꦨꦿꦲꦩ꧀ꦱꦶꦁ​ꦤꦩ꧀ꦥ​ꦥꦽꦗꦚ꧀ꦗꦶꦪꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ 7ꦢꦢꦶꦤꦺ​ꦪ​ꦮꦶꦱ꧀ꦕꦼꦠ​ꦧꦔꦼꦠ꧀ꦤꦺꦏ꧀ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦸꦮꦶ​ꦒꦼꦢꦺꦤꦺꦔꦸꦁꦏꦸꦭ꧀ꦭꦶ​ꦧꦥ​ꦄꦨꦿꦲꦩ꧀ ꦲꦮꦶꦠ꧀ꦮꦺꦴꦁ​ꦱꦶꦁ​ꦤꦸꦩ꧀ꦥꦁꦔꦶ​ꦠꦔꦤ꧀ꦲꦩ꧀ꦧꦼꦂꦏꦃꦲꦶ​ꦮꦺꦴꦁ​ꦭꦶꦪꦤꦺ​ꦏꦸꦮꦶ​ꦒꦼꦢꦺꦤꦺꦔꦸꦁꦏꦸꦭ꧀ꦭꦶ​ꦮꦺꦴꦁ​ꦱꦶꦁ​ꦢꦶꦠꦸꦩ꧀ꦥꦁꦔꦶ​ꦠꦔꦤ꧀꧈​

8꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦔꦼꦂꦠꦶ​ꦤꦺꦏ꧀ꦲꦶꦩꦩ꧀ꦲꦶꦩꦩ꧀ꦱꦶꦁ​ꦤꦩ꧀ꦥ​ꦥꦿꦱꦼꦥꦸꦭꦸꦃꦲꦤ꧀ꦏꦸꦮꦶ​ꦤꦩꦸꦁ​ꦮꦺꦴꦁ​ꦲꦸꦫꦶꦥ꧀ꦱꦶꦁ​ꦭꦸꦩꦿꦃ​꧈​ꦱꦶꦁ​ꦲꦸꦒ​ꦩꦠꦶ​꧉​ꦤꦁꦔꦶꦁ​ꦧꦧ꧀ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ꦏꦶꦠꦧ꧀ꦱꦸꦕꦶ​ꦔꦺꦴꦩꦺꦴꦁꦔꦏꦺꦤꦺꦏ꧀ꦢꦺꦏ꧀ꦤꦺꦏꦸꦮꦶ​ꦲꦸꦫꦶꦥ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​ 9ꦩꦭꦃ​ꦤꦺꦏ꧀ꦢꦶꦥꦶꦏꦶꦂ​ꦥꦫ​ꦱꦼꦢꦸꦭꦸꦂ​꧈​ꦱꦏ꧀ꦗꦤꦺꦲꦶꦩꦩ꧀ꦭꦺꦮ꦳ꦶꦏꦸꦮꦶ​ꦲꦩ꧀ꦧꦪꦂ​ꦥꦿꦱꦼꦥꦸꦭꦸꦃꦲꦤ꧀ꦩꦫꦁ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ ꦱꦼꦤꦗꦤ꧀ꦭꦸꦩꦿꦃꦲꦺ​ꦲꦶꦩꦩ꧀ꦭꦺꦮ꦳ꦶꦱꦶꦁ​ꦏꦸꦢꦸ​ꦤꦩ꧀ꦥ​ꦥꦿꦱꦼꦥꦸꦭꦸꦃꦲꦤ꧀꧈​ꦲꦥ​ꦗꦭꦂꦫꦤ꧀ꦤꦺ​ꦏꦺꦴꦏ꧀ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔꦺꦴꦩꦺꦴꦁꦔꦺꦴꦤꦺꦴ​?ꦗꦭꦂꦫꦤ꧀ꦢꦺꦴꦁꦔꦺꦧꦥ​ꦄꦨꦿꦲꦩ꧀ꦔꦼꦏꦺꦏ꧀ꦏꦶꦥꦿꦱꦼꦥꦸꦭꦸꦃꦲꦤ꧀ꦩꦫꦁ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀ ꦲꦸꦒ​ꦲꦶꦩꦩ꧀ꦭꦺꦮ꦳ꦶ꧈​ꦱꦶꦁ​ꦢꦢꦶ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ ꦏꦼꦤꦺꦁꦢꦶꦲꦫꦤ꧀ꦤꦶ​ꦏꦠꦸꦠ꧀ꦩꦺꦭꦸ​ꦔꦼꦏꦺꦏ꧀ꦏꦶꦥꦿꦱꦼꦥꦸꦭꦸꦃꦲꦤ꧀ꦏꦸꦮꦶ​ꦩꦫꦁ​ꦩꦺꦭ꧀ꦏꦶꦱꦼꦢꦺꦏ꧀꧈​ 10ꦱꦼꦤꦗꦤ꧀ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦲꦶꦩꦩ꧀ꦭꦺꦮ꦳ꦶꦢꦸꦫꦸꦁ​ꦭꦲꦶꦂ​꧈​ꦤꦁꦔꦶꦁ​ꦢꦺꦴꦁꦔꦺꦩꦺꦭ꧀ꦏꦶꦱꦼꦢꦺꦏ꧀ꦩꦼꦠꦸꦮꦧꦥ​ꦄꦨꦿꦲꦩ꧀ꦭꦤ꧀ꦧꦥ​ꦄꦨꦿꦲꦩ꧀ꦔꦼꦏꦺꦏ꧀ꦏꦶꦥꦿꦱꦼꦥꦸꦭꦸꦃꦲꦤ꧀ꦤꦺ​ꦩꦫꦁ​ꦩꦺꦭ꧀ꦏꦶꦱꦼꦢꦺꦏ꧀ ꦏꦼꦤꦺꦁꦢꦶꦲꦫꦤ꧀ꦤꦶ​ꦤꦺꦏ꧀ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦭꦺꦮ꦳ꦶꦲꦶꦗꦶꦏ꧀ꦤꦁꦲꦮꦏ꧀ꦏꦺ​ꦩ꧀ꦧꦃꦩ꧀ꦧꦲꦤ꧀ꦤꦺ꧈​ꦪꦏꦸꦮꦶ​ꦧꦥ​ꦄꦨꦿꦲꦩ꧀꧈​

꧋ꦏꦿꦶꦱ꧀ꦡꦸꦱ꧀ꦏꦸꦮꦶ​ꦲꦶꦩꦩ꧀ꦱꦶꦁ​ꦒꦼꦢꦺꦤꦺꦔꦸꦁꦏꦸꦭ꧀ꦭꦶ​ꦄꦫꦺꦴꦤ꧀꧈​

11꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲ꦳ꦪꦸꦏ꧀ꦥꦢ​ꦩꦶꦏꦶꦂ​ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ ꦢꦢꦶ​ꦲꦶꦩꦩ꧀ꦒꦼꦢꦺꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦩꦼꦤꦮ​ꦏꦺꦴꦮꦺ​ꦠꦏꦺꦴꦤ꧀:“ꦏꦼꦤꦺꦁꦲꦥ​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦏꦺꦴꦏ꧀​ꦩ꧀ꦧꦸꦠꦸꦃꦲꦏꦺꦲꦶꦩꦩ꧀ꦒꦼꦢꦺꦱꦶꦁ​ꦭꦶꦪꦤꦺ​꧈​ꦱꦶꦁ​ꦏꦪ​ꦩꦺꦭ꧀ꦏꦶꦱꦼꦢꦺꦏ꧀ ꦲꦺꦴꦫ​ꦏꦪ​ꦭꦺꦮ꦳ꦶꦭꦤ꧀ꦠꦸꦫꦸꦤ꧀ꦠꦸꦫꦸꦤꦤ꧀ꦤꦺ?”ꦲꦏꦸ​ꦧꦶꦱ​ꦱꦼꦩꦲꦸꦂ​ꦔꦺꦤꦺ​:ꦢꦺꦴꦁꦔꦺꦤꦧꦶ​ꦩꦺꦴꦱꦼꦱ꧀ꦔꦼꦏꦺꦏ꧀ꦏꦶꦮꦺꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦺꦏ꧀ꦤꦺꦩꦶꦗꦶ​ꦄꦫꦺꦴꦤ꧀ꦭꦤ꧀ꦠꦸꦫꦸꦤ꧀ꦤꦤ꧀ꦤꦺ​꧈​ꦱꦸꦥꦪ​ꦤꦠ​ꦭꦤ꧀ꦤꦸꦤ꧀ꦠꦸꦤ꧀ꦧꦁꦱꦤꦺ​ꦲꦼꦁꦒꦺꦴꦤꦺ​ꦥꦢ​ꦔꦧꦼꦏ꧀ꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦠꦸꦫꦸꦠ꧀ꦥꦼꦂꦤꦠꦤ꧀ꦤꦺ꧉​ꦤꦁꦔꦶꦁ​ꦱꦼꦤꦗꦤ꧀ꦤ​ꦥꦢ​ꦠꦼꦩꦼꦤ꧀ ꦏꦸꦮꦶ​ꦩꦼꦏ꧀ꦱ​ꦲꦺꦴꦫ​ꦧꦶꦱ​ꦔꦽꦱꦶꦏ꧀ꦏꦶ​ꦲꦠꦶꦤꦺ​ꦱꦏ꧀ꦏꦧꦺꦃꦲꦺꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ 12ꦩꦸꦭꦤꦺ​ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦗꦶ​ꦲꦶꦩꦩ꧀ꦒꦼꦢꦺꦭꦶꦪꦤꦺ​ꦱꦶꦁ​ꦧꦶꦱ​ꦔꦽꦱꦶꦏ꧀ꦏꦶ​ꦲꦠꦶꦤꦺ​ꦩꦤꦸꦁꦱ​ꦱꦏ꧀ꦏꦧꦺꦃꦲꦺ꧈​ꦱꦸꦥꦪ​ꦧꦶꦱ​ꦥꦤ꧀ꦠꦼꦱ꧀ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦗꦭꦂꦫꦤ꧀ꦱꦁꦏꦏꦸꦮꦶ​꧈​ꦩꦸꦭꦤꦺ​ꦲꦸꦒ​ꦥꦼꦂꦭꦸ​ꦧꦔꦼꦠ꧀ꦮꦺꦠ꧀ꦮꦺꦠ꧀ꦭꦤ꧀ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦕꦫꦤꦺ​ꦥꦔꦧꦼꦏ꧀ꦠꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦏꦸꦢꦸ​ꦢꦶꦒꦤ꧀ꦠꦶ​꧉​ 13ꦩꦸꦭꦤꦺ​꧈​ꦮꦺꦴꦁ​ꦱꦶꦁ​ꦢꦢꦶ​ꦲꦶꦩꦩ꧀ꦒꦼꦢꦺꦩꦶꦠꦸꦫꦸꦠ꧀ꦥꦼꦂꦤꦠ꧀ꦠꦤ꧀ꦱꦶꦁ​ꦲꦚꦂ​ꦲꦶꦏꦶ​ꦪ​ꦲꦺꦴꦫ​ꦠꦸꦫꦸꦤ꧀ꦤꦤ꧀ꦤꦺ​ꦭꦺꦮ꦳ꦶ꧈​ꦤꦁꦔꦶꦁ​ꦱꦁꦏꦏꦿꦧꦠ꧀ꦭꦶꦪꦤꦺ​꧈​ꦱꦶꦁ​ꦢꦸꦫꦸꦁ​ꦠꦲꦸ​ꦲꦺꦤꦺꦁꦱꦶꦗꦶ​ꦮꦲꦺ​ꦢꦢꦶ​ꦲꦶꦩꦩ꧀ꦭꦤ꧀ꦩꦱꦿꦃꦲꦏꦺꦏꦸꦂꦧꦤ꧀ꦤꦁꦲꦭ꧀ꦠꦂꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 14ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦩꦭꦃ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦼꦠꦸꦤꦺ​ꦱꦁꦏꦏꦿꦧꦠ꧀ꦠꦸꦫꦸꦤ꧀ꦤꦤ꧀ꦤꦺ​ꦪꦸꦢꦃ꧉​ꦭꦤ꧀ꦢꦺꦴꦁꦔꦺꦤꦧꦶ​ꦩꦺꦴꦱꦼꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦮꦺꦴꦁꦮꦺꦴꦁ​ꦱꦶꦁ​ꦏꦸꦢꦸ​ꦢꦢꦶ​ꦲꦶꦩꦩ꧀ ꦢꦺꦏ꧀ꦤꦺꦪ​ꦲꦺꦴꦫ​ꦠꦲꦸ​ꦔꦺꦴꦩꦺꦴꦁꦔꦏꦺꦧ꧀ꦭꦱ꧀ꦧꦧ꧀ꦏꦿꦧꦠ꧀ꦠꦸꦫꦸꦤ꧀ꦤꦤ꧀ꦤꦺ​ꦪꦸꦢꦃꦲꦶꦏꦶ​꧉​

15-16꧋ꦥꦫ​ꦱꦼꦢꦸꦭꦸꦂ​꧈​ꦥꦽꦏꦫ​ꦧꦧ꧀ꦥꦼꦂꦤꦠ꧀ꦠꦤ꧀ꦱꦶꦁ​ꦲꦚꦂ​ꦲꦶꦏꦶ​ꦩꦭꦃ​ꦠꦩ꧀ꦧꦃ​ꦕꦼꦠ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦗꦶ​ꦲꦶꦩꦩ꧀ꦒꦼꦢꦺ​ꦭꦶꦪꦤꦺ​꧈​ꦱꦶꦁ​ꦏꦪ​ꦩꦺꦭ꧀ꦏꦶꦱꦼꦢꦺꦏ꧀ ꦲꦺꦴꦫ​ꦢꦢꦶ​ꦲꦶꦩꦩ꧀ꦩꦶꦠꦸꦫꦸꦠ꧀ꦥꦼꦂꦤꦠꦤ꧀ꦤꦺꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦗꦭꦂꦫꦤ꧀ꦲꦸꦫꦶꦥ꧀ꦠꦼꦫꦸꦱ꧀ ꦲꦺꦴꦫ​ꦧꦶꦱ​ꦩꦠꦶ​꧈​ꦩꦸꦭꦤꦺ​ꦧꦶꦱ​ꦢꦢꦶ​ꦲꦶꦩꦩ꧀ꦱꦭꦮꦱ꧀ꦭꦮꦱ꧀ꦱꦺ​꧉​ 17ꦧꦧ꧀ꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦲꦤꦏ꧀ꦏꦺ​꧈​ꦏꦪ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀:“ꦏꦺꦴꦮꦺ​ꦧꦏꦭ꧀ꦢꦢꦶ​ꦲꦶꦩꦩ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧈​ꦏꦪ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀꧈​” 18ꦢꦢꦶꦤꦺ​ꦥꦼꦂꦤꦠ꧀ꦠꦤ꧀ꦱꦶꦁ​ꦤ꧀ꦢꦶꦱꦶꦏ꧀ꦏꦸꦮꦶ​ꦱꦲꦶꦏꦶ​ꦢꦶꦱꦶꦁꦏꦶꦂꦫꦏꦺ꧈​ꦗꦭꦂꦫꦤ꧀ꦏꦸꦮꦶ​ꦏꦸꦫꦁ​ꦏꦼꦏꦸꦮꦠ꧀ꦠꦤ꧀ꦤꦺ​ꦭꦤ꧀ꦲꦺꦴꦫ​ꦧꦶꦱ​ꦔꦽꦱꦶꦏ꧀ꦏꦶ​ꦲꦠꦶꦤꦺ​ꦩꦤꦸꦁꦱ​ꦱꦏ꧀ꦏꦧꦺꦃꦲꦺꦭꦤ꧀ꦲꦺꦴꦫ​ꦧꦶꦱ​ꦩꦫꦏ꧀ꦏꦏꦺꦩꦤꦸꦁꦱ​ꦧꦶꦱ​ꦥꦤ꧀ꦠꦼꦱ꧀ꦠꦼꦏ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 19ꦮꦸꦗꦸꦠ꧀ꦠꦺꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦲꦺꦴꦫ​ꦧꦶꦱ​ꦩꦫꦏ꧀ꦏꦏꦺꦩꦤꦸꦁꦱ​ꦧꦶꦱ​ꦥꦤ꧀ꦠꦼꦱ꧀ꦠꦼꦏ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦸꦭꦤꦺ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦢꦶꦏꦺꦏ꧀ꦏꦶꦥꦼꦔꦉꦥ꧀ꦲꦉꦥ꧀ꦱꦶꦁ​ꦭꦸꦮꦶꦃ​ꦲꦥꦶꦏ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦼꦔꦉꦥ꧀ꦲꦉꦥ꧀ꦱꦶꦁ​ꦧꦶꦱ​ꦔ꧀ꦒꦮ​ꦲꦮꦏ꧀ꦏꦺ​ꦢꦺꦮꦺꦕꦼꦢꦼꦏ꧀​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

20꧋ꦏꦼꦗꦧ​ꦱꦁꦏꦏꦸꦮꦶ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀ꦱꦸꦩ꧀ꦥꦃ​꧈​ꦏꦁꦒꦺꦴ​ꦔꦤ꧀ꦠꦼꦥ꧀ꦥꦏꦺꦥꦼꦂꦤꦠ꧀ꦠꦤ꧀ꦲꦚꦂ​ꦲꦶꦏꦶ​꧉​ꦢꦺꦴꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦗꦶ​ꦲꦶꦩꦩ꧀ꦲꦶꦩꦩ꧀ꦠꦸꦫꦸꦤ꧀ꦤꦤ꧀ꦤꦺ​ꦭꦺꦮ꦳ꦶ꧈​ꦢꦺꦏ꧀ꦤꦺꦲꦺꦴꦫ​ꦱꦸꦩ꧀ꦥꦃ​꧉​ 21ꦤꦁꦔꦶꦁ​ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦢꦢꦺꦏ꧀ꦏꦏꦺꦲꦶꦩꦩ꧀ꦒꦼꦢꦺ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦸꦩ꧀ꦥꦃ​ꦔꦺꦤꦺ​:

“ꦲꦏꦸ​ꦮꦶꦱ꧀ꦱꦸꦩ꧀ꦥꦃ​꧈​
ꦲꦏꦸ​ꦲꦺꦴꦫ​ꦧꦏꦭ꧀ꦩꦭꦶꦃ​ꦥꦶꦏꦶꦂꦫꦤ꧀ꦤꦺ​꧉​
ꦏꦺꦴꦮꦺ​ꦧꦏꦭ꧀ꦢꦢꦶ​ꦲꦶꦩꦩ꧀ꦱ꧀ꦭꦮꦱ꧀ꦱꦺ꧉​”

22ꦭꦤ꧀ꦗꦭꦂꦫꦤ꧀ꦧꦺꦢ​ꦏꦫꦺꦴ​ꦲꦶꦩꦩ꧀ꦭꦶꦪꦭꦶꦪꦤꦺ​꧈​ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦪ​ꦢꦢꦶ​ꦥꦚ꧀ꦗꦼꦂꦫꦺꦥꦽꦗꦚ꧀ꦗꦶꦪꦤ꧀ꦲꦚꦂ​ꦱꦶꦁ​ꦭꦸꦮꦶꦃ​ꦲꦥꦶꦏ꧀ꦠꦼꦤꦤ꧀꧈​

23꧋ꦥꦫ​ꦱꦼꦢꦸꦭꦸꦂ​꧈​ꦲꦺꦤꦺꦁꦥꦽꦏꦫ​ꦩꦼꦤꦺꦃ​ꦱꦶꦁ​ꦩꦫꦏ꧀ꦏꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦧꦺꦢ​ꦏꦫꦺꦴ​ꦲꦶꦩꦩ꧀ꦲꦶꦩꦩ꧀ꦠꦸꦫꦸꦤ꧀ꦤꦤ꧀ꦤꦺ​ꦭꦺꦮ꦳ꦶ꧉​ꦲꦶꦩꦩ꧀ꦲꦶꦩꦩ꧀ꦠꦸꦫꦸꦤ꧀ꦤꦤ꧀ꦤꦺ​ꦭꦺꦮ꦳ꦶꦏꦸꦮꦶ​ꦥꦶꦫꦁꦥꦶꦫꦁ​꧈​ꦗꦭꦂꦫꦤ꧀ꦥꦢ​ꦩꦠꦶ​ꦭꦤ꧀ꦱꦧꦼꦤ꧀ꦱꦧꦼꦤ꧀ꦏꦸꦢꦸ​ꦢꦶꦒꦤ꧀ꦠꦶ​꧉​ 24ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦫꦶꦥ꧀ꦱ꧀ꦭꦮꦱ꧀ꦱꦺ꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦲꦺꦴꦫ​ꦲꦸꦱꦃꦢꦶꦒꦤ꧀ꦠꦶ​ꦏꦫꦺꦴ​ꦲꦶꦩꦩ꧀ꦭꦶꦪꦤꦺ​꧉​ 25ꦢꦢꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦶꦱ​ꦤꦸꦭꦸꦁꦔꦶ​ꦱꦥ​ꦮꦲꦺ​ꦱꦶꦁ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦶꦮꦠ꧀ꦢꦺꦏ꧀ꦤꦺ꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦶꦱ​ꦔꦽꦱꦶꦏ꧀ꦏꦶ​ꦲꦠꦶꦤꦺ​ꦱꦏ꧀ꦏꦧꦺꦃꦲꦺ꧈​ꦱꦸꦥꦪ​ꦮꦺꦴꦁ​ꦏꦸꦮꦶ​ꦧꦶꦱ​ꦥꦤ꧀ꦠꦼꦱ꧀ꦔꦢꦼꦏ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦱ꧀ꦭꦮꦱ꧀ꦱꦺꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦼꦩ꧀ꦧꦸꦁꦔꦏꦺꦲꦮꦏ꧀ꦏꦺ​ꦢꦺꦮꦺ꧉​

26꧋ꦥꦫ​ꦱꦼꦢꦸꦭꦸꦂ​꧈​ꦠꦏ꧀ꦏꦶꦫꦱꦲꦶꦏꦶ​ꦮꦶꦱ꧀ꦕꦼꦠ​ꦧꦔꦼꦠ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦲꦶꦩꦩ꧀ꦒꦼꦢꦺ​ꦱꦶꦁ​ꦢꦶꦧꦸꦠꦸꦃꦲꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦠꦼꦤꦤ꧀ ꦲꦮꦶꦠ꧀ꦢꦺꦏ꧀ꦤꦺꦱꦸꦕꦶ​꧈​ꦲꦺꦴꦫ​ꦤ꧀ꦢꦸꦮꦺꦱꦭꦃ​ꦲꦥ​ꦢꦺꦴꦱ​꧉​ꦢꦺꦏ꧀ꦤꦺꦲꦸꦒ​ꦲꦢꦺꦴꦃ​ꦧꦔꦼꦠ꧀ꦏꦫꦺꦴ​ꦮꦺꦴꦁ​ꦲꦭ​꧈​ꦩꦭꦃ​ꦕꦼꦢꦼꦏ꧀​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 27ꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦩꦩ꧀ꦒꦼꦢꦺꦱꦶꦁ​ꦧꦺꦢ​ꦠꦼꦤꦤ꧀ꦏꦫꦺꦴ​ꦲꦶꦩꦩ꧀ꦭꦶꦪꦭꦶꦪꦤꦺ​꧈​ꦲꦮꦶꦠ꧀ꦲꦶꦩꦩ꧀ꦭꦶꦪꦭꦶꦪꦤꦺ​ꦱꦧꦼꦤ꧀ꦢꦶꦤ​ꦏꦸꦢꦸ​ꦩꦱꦿꦃꦲꦏꦺꦏꦸꦂꦧꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦢꦺꦴꦱꦤꦺ​ꦢꦺꦮꦺꦤ꧀ꦢꦶꦱꦶꦏ꧀ꦭꦤ꧀ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦧꦶꦱ​ꦩꦱꦿꦃꦲꦏꦺꦏꦸꦂꦧꦤ꧀ꦏꦁꦒꦺꦴ​ꦢꦺꦴꦱꦤꦺ​ꦧꦁꦱꦤꦺ​꧉​ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ ꦲꦸꦱꦃꦔꦺꦴꦤꦺꦴ​꧈​ꦲꦮꦶꦠ꧀ꦮꦶꦱ꧀ꦩꦱꦿꦃꦲꦏꦺꦏꦸꦂꦧꦤ꧀ꦱꦼꦥꦶꦱ꧀ꦱꦤ꧀ꦏꦁꦒꦺꦴ​ꦢꦺꦴꦱꦤꦺ​ꦩꦤꦸꦁꦱ​ꦭꦤ꧀ꦏꦸꦮꦶ​ꦏꦁꦒꦺꦴ​ꦱ꧀ꦭꦮꦱ꧀ꦭꦮꦱ꧀ꦱꦺ꧉​ 28ꦲꦶꦩꦩ꧀ꦲꦶꦩꦩ꧀ꦒꦼꦢꦺꦱꦶꦁ​ꦢꦶꦥꦶꦗꦶ​ꦩꦶꦠꦸꦫꦸꦠ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦏꦸꦮꦶ​ꦤꦩꦸꦁ​ꦮꦺꦴꦁ​ꦲꦸꦫꦶꦥ꧀ꦱꦶꦁ​ꦲꦺꦴꦏꦺꦃꦏꦫꦶꦁꦏꦶꦲꦤ꧀ꦤꦺ꧉​ꦤꦁꦔꦶꦁ​ꦲꦶꦩꦩ꧀ꦒꦼꦢꦺꦩꦶꦠꦸꦫꦸꦠ꧀ꦥꦽꦗꦚ꧀ꦗꦶꦪꦤ꧀ꦱꦶꦁ​ꦲꦚꦂ​꧈​ꦥꦽꦗꦚ꧀ꦗꦶꦪꦤ꧀ꦱꦶꦁ​ꦠꦼꦏꦤꦺ​ꦱꦏ꧀ꦮꦶꦱ꧀ꦱꦺ​ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦱꦶꦁ​ꦢꦶꦥꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦱꦸꦩ꧀ꦥꦃ​꧈​ꦏꦸꦮꦶ​ꦲꦶꦩꦩ꧀ꦒꦼꦢꦺꦱꦶꦁ​ꦲꦺꦴꦫ​ꦲꦺꦤꦺꦁꦏꦫꦶꦁꦏꦶꦲꦤ꧀ꦤꦺꦭꦤ꧀ꦱꦶꦁ​ꦭꦁꦒꦼꦁ​꧈​ꦏꦸꦮꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​

↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦶꦩꦩ꧀ꦒꦼꦢꦺꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​

꧇​꧘꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦱꦏ꧀ꦗꦤꦺꦏꦧꦺꦃ​ꦱꦶꦁ​ꦢꦶꦉꦩ꧀ꦧꦸꦏ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦔꦺꦴꦩꦺꦴꦁꦔꦏꦺꦲꦥ​ꦠ​?ꦲꦺꦴꦫ​ꦭꦶꦪ​ꦪ​ꦤꦩꦸꦁ​ꦲꦶꦏꦶ​:ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦤ꧀ꦢꦸꦮꦺꦲꦶꦩꦩ꧀ꦒꦼꦢꦺꦱꦶꦁ​ꦲꦸꦒ​ꦚꦼꦏꦼꦭ꧀ꦥꦔ꧀ꦮꦱ​ꦤꦁꦱꦼꦧꦼꦭꦃꦲꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺꦤꦁꦱ꧀ꦮꦂꦒ​꧉​ 2ꦲꦶꦩꦩ꧀ꦒꦼꦢꦺꦲꦶꦏꦶ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦏꦤ​ꦏꦸꦮꦶ​ꦥꦁꦒꦺꦴꦤ꧀ꦤꦤ꧀ꦥꦔꦧꦼꦏ꧀ꦠꦶ​ꦱꦶꦁ​ꦱꦸꦕꦶ​ꦢꦺꦮꦺ꧈​ꦲꦺꦴꦫ​ꦲꦺꦤꦺꦁꦭꦶꦪꦤꦺ​꧉​ꦏꦸꦮꦶ​ꦡꦫꦸꦥ꧀ꦥꦔꦧꦼꦏ꧀ꦠꦶ​ꦲꦺꦴꦫ​ꦒꦮꦺꦪꦤ꧀ꦤꦺ​ꦩꦤꦸꦁꦱ​꧈​ꦤꦁꦔꦶꦁ​ꦒꦮꦺꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

3꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦤꦺꦏ꧀ꦲꦶꦩꦩ꧀ꦒꦼꦢꦺꦏꦸꦮꦶ​ꦏꦸꦢꦸ​ꦩꦱꦿꦃꦲꦏꦺꦥꦮꦺꦃꦲꦺ​ꦭꦤ꧀ꦏꦸꦂꦧꦤ꧀ꦤꦺ​ꦩꦤꦸꦁꦱ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦼꦩꦺꦴꦤꦺꦴ​ꦲꦸꦒ​ꦲꦶꦩꦩ꧀ꦩꦺ​ꦒꦼꦢꦺꦲꦮꦏ꧀ꦏꦺ​ꦢꦺꦮꦺ꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦏꦸꦢꦸ​ꦤ꧀ꦢꦸꦮꦺꦲꦥꦲꦥ​ꦱꦶꦁ​ꦏꦸꦢꦸ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​꧌ꦭꦤ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦩꦱꦿꦃꦲꦏꦺꦧꦢꦤ꧀ꦤꦺ​ꦢꦺꦏ꧀ꦤꦺꦢꦺꦮꦺꦢꦢꦶ​ꦏꦸꦂꦧꦤ꧀꧈​) 4ꦤꦁꦔꦶꦁ​ꦱꦼꦩꦸꦁꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦧꦸꦩꦶ​ꦏꦺꦤꦺ​꧈​ꦢꦺꦏ꧀ꦤꦺꦪ​ꦧ꧀ꦭꦱ꧀ꦲꦺꦴꦫ​ꦲꦸꦱꦃꦢꦢꦶ​ꦲꦶꦩꦩ꧀ ꦲꦮꦶꦠ꧀ꦮꦶꦱ꧀ꦲꦺꦤꦺꦁꦲꦶꦩꦩ꧀ꦲꦺꦴꦏꦺꦃꦱꦶꦁ​ꦩꦱꦿꦃꦲꦏꦺꦏꦸꦂꦧꦤ꧀ꦩꦶꦠꦸꦫꦸꦠ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ 5ꦩꦸꦁ​ꦮꦲꦺ​꧈​ꦡꦫꦸꦥ꧀ꦭꦤ꧀ꦥꦁꦒꦺꦴꦤ꧀ꦤꦤ꧀ꦱꦶꦁ​ꦢꦶꦲꦼꦁꦒꦺꦴ​ꦔꦧꦼꦏ꧀ꦠꦶ​ꦭꦤ꧀ꦩꦱꦿꦃꦲꦏꦺꦏꦸꦂꦧꦤ꧀ꦏꦸꦮꦶ​ꦤꦩꦸꦁ​꧈​ꦒꦩ꧀ꦥꦁꦔꦺ​ꦲꦺꦴꦩꦺꦴꦁ​꧈​ꦒꦩ꧀ꦧꦂꦫꦤ꧀ꦤꦺ​ꦭꦤ꧀ꦲꦪꦁꦔꦪꦁꦔꦺꦡꦫꦸꦥ꧀ꦱꦶꦁ​ꦤꦁꦱ꧀ꦮꦂꦒ​꧉​ꦲꦮꦶꦠ꧀ꦱꦏ꧀ꦢꦸꦫꦸꦁꦔꦺꦤꦧꦶ​ꦩꦺꦴꦱꦼꦱ꧀​ꦔ꧀ꦒꦮꦺ​ꦡꦫꦸꦥ꧀ꦥꦔꦧꦼꦏ꧀ꦠꦶ​ꦲꦶꦏꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦩꦫꦁ​ꦢꦺꦏ꧀ꦤꦺ:“ꦩꦺꦴꦱꦼꦱ꧀ ꦏꦺꦴꦮꦺ​ꦏꦸꦢꦸ​ꦔ꧀ꦒꦮꦺ​ꦡꦫꦸꦥ꧀ꦥꦔꦧꦼꦏ꧀ꦠꦶ​ꦲꦶꦏꦶ​ꦤꦸꦫꦸꦠ꧀ꦱꦶꦁ​ꦮꦶꦱ꧀ꦠꦏ꧀ꦢꦸꦢꦸꦃꦢꦸꦢꦸꦃꦲꦏꦺꦩꦫꦁ​ꦏꦺꦴꦮꦺ​ꦤꦁꦒꦸꦤꦸꦁ​ꦯꦶꦤꦻ꧉​” 6ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦶꦩꦩ꧀ꦩꦺ​ꦒꦼꦢꦺꦲꦮꦏ꧀ꦏꦺ​ꦢꦺꦮꦺ꧈​ꦢꦶꦥꦱꦿꦃꦲꦶ​ꦥꦼꦁꦒꦮꦺꦏꦸꦱꦶꦁ​ꦭꦸꦮꦶꦃ​ꦒꦼꦢꦺꦠꦼꦤꦶꦩ꧀ꦧꦁꦥꦼꦁꦒꦮꦺꦪꦤ꧀ꦏꦸꦲꦶꦩꦩ꧀ꦲꦶꦩꦩ꧀ꦤꦁꦧꦸꦩꦶ​ꦩꦲꦸ​꧈​ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦏꦏ꧀ꦏꦏꦺꦭꦤ꧀ꦔꦿꦩ꧀ꦥꦸꦁꦔꦏꦺꦥꦽꦗꦚ꧀ꦗꦶꦪꦤ꧀ꦲꦚꦂ​꧈​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦼꦏꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦱꦶꦁ​ꦭꦸꦮꦶꦃ​ꦒꦼꦢꦺ꧈​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦱꦶꦁ​ꦤ꧀ꦢꦶꦱꦶꦏ꧀꧈​ 7ꦱꦼꦩꦸꦁꦒꦺꦴꦤ꧀ꦤꦺꦥꦽꦗꦚ꧀ꦗꦶꦪꦤ꧀ꦱꦶꦁ​ꦤ꧀ꦢꦶꦱꦶꦏ꧀ꦲꦺꦴꦫ​ꦲꦺꦤꦺꦁꦏꦼꦏꦸꦫꦁꦔꦤ꧀ꦤꦺ​꧈​ꦩꦼꦱ꧀ꦠꦶꦱꦶꦁ​ꦲꦚꦂ​ꦪ​ꦲꦺꦴꦫ​ꦲꦸꦱꦃꦠꦼꦏ​꧉​ 8ꦤꦁꦔꦶꦁ​ꦮꦸꦗꦸꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦪ​ꦲꦺꦴꦫ​ꦊꦒ​ꦏꦫꦺꦴ​ꦥꦽꦗꦚ꧀ꦗꦶꦪꦤ꧀ꦱꦶꦁ​ꦤ꧀ꦢꦶꦱꦶꦏ꧀ ꦩꦸꦭꦤꦺ​ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦧꦁꦱ​ꦆꦱꦿꦌꦭ꧀:

“ꦲꦏꦸ​꧈​ꦒꦸꦱ꧀ꦠꦶꦩꦸ​꧈​ꦔꦺꦴꦩꦺꦴꦁꦩꦫꦁ​ꦏꦺꦴꦮꦺ​꧈​
ꦧꦏꦭ꧀ꦲꦺꦤꦺꦁꦮꦏ꧀ꦠꦸꦩꦸ꧈​
ꦲꦏꦸ​꧈​ꦒꦸꦱ꧀ꦠꦶꦩꦸ​꧈​ꦔ꧀ꦒꦮꦺ​ꦥꦽꦗꦚ꧀ꦗꦶꦪꦤ꧀ꦲꦚꦂ​
ꦏꦫꦺꦴ​ꦧꦁꦱ​ꦆꦱꦿꦌꦭ꧀ꦭꦤ꧀ꦧꦁꦱ​ꦪꦸꦢꦃ꧉​
9ꦲꦺꦴꦫ​ꦥꦽꦗꦚ꧀ꦗꦶꦪꦤ꧀ꦏꦪ​ꦱꦶꦁ​ꦮꦶꦱ꧀ꦠꦏ꧀ꦒꦮꦺ​
ꦢꦺꦴꦁꦔꦺꦲꦏꦸ​ꦤꦸꦤ꧀ꦠꦸꦤ꧀ꦮꦺꦴꦁꦮꦺꦴꦁ​ꦩꦼꦠꦸ​ꦱꦁꦏꦤꦼꦒꦫ​ꦌꦒꦶꦥ꧀ꦠꦼ꧈​
ꦲꦺꦴꦫ​꧈​ꦲꦮꦶꦠ꧀ꦮꦸꦗꦸꦠ꧀ꦠꦺꦧꦁꦱ​ꦆꦱꦿꦌꦭ꧀ꦲꦺꦴꦫ​ꦤꦸꦫꦸꦠ꧀ꦠꦶ​ꦥꦽꦗꦚ꧀ꦗꦶꦪꦤ꧀ꦤꦺ​꧈​
ꦩꦸꦭꦤꦺ​ꦲꦏꦸ​ꦪ​ꦠꦼꦫꦸꦱ꧀ꦔꦼꦢꦺꦴꦃꦲꦶ​꧉​
10ꦥꦽꦗꦚ꧀ꦗꦶꦪꦤ꧀ꦱꦶꦁꦭꦶꦪꦤꦺ
ꦱꦶꦁꦲꦩ꧀ꦧꦺꦱꦸꦏ꧀ꦲꦉꦥ꧀ꦠꦏ꧀ꦒꦮꦺꦏꦫꦺꦴꦧꦁꦱꦆꦱꦿꦌꦭ꧀
ꦲꦸꦤꦶꦤꦺꦔꦺꦤꦺ:
ꦮꦺꦠ꧀ꦮꦺꦠ꧀ꦏꦸꦧꦏꦭ꧀ꦠꦏ꧀ꦊꦧꦺꦴꦏ꧀ꦏꦏꦺꦲꦶꦁꦥꦶꦏꦶꦂꦫꦤ꧀ꦤꦺ
ꦱꦸꦥꦪꦥꦢꦢꦸꦤꦸꦁꦭꦤ꧀ꦠꦏ꧀ꦠꦸꦭꦶꦱ꧀ꦲꦶꦁꦲꦠꦶꦤꦺ
ꦱꦸꦥꦪꦥꦢꦱꦼꦤꦼꦁꦤꦸꦫꦸꦠ꧀ꦠꦶꦏꦉꦥ꧀ꦏꦸ꧉​
ꦲꦏꦸꦧꦏꦭ꧀ꦢꦢꦶꦒꦸꦱ꧀ꦠꦶꦄꦭ꧀ꦭꦃꦲꦺ
ꦭꦤ꧀ꦮꦺꦴꦁꦮꦺꦴꦁꦩꦲꦸꦧꦏꦭ꧀ꦢꦢꦶꦲꦸꦩꦠ꧀ꦏꦸ꧉​
11ꦢꦢꦶꦤꦺꦮꦺꦴꦁꦮꦺꦴꦁꦩꦲꦸꦲꦺꦴꦫꦲꦸꦱꦃꦩꦸꦭꦁꦔꦶꦩꦼꦤꦺꦃ
ꦩꦫꦁꦏꦚ꧀ꦕꦠꦁꦒꦤꦺ
ꦭꦤ꧀ꦲꦺꦴꦫꦲꦸꦱꦃꦔꦺꦴꦩꦺꦴꦁꦔꦶꦱꦼꦢꦸꦭꦸꦂꦫꦺꦲꦏꦸꦲꦶꦏꦶꦱꦥ꧉​
ꦲꦮꦶꦠ꧀ꦏꦧꦺꦃꦮꦺꦴꦁ꧈​ꦮꦺꦴꦁꦒꦼꦢꦺꦭꦤ꧀ꦮꦺꦴꦁꦕꦶꦭꦶꦏ꧀
ꦏꦧꦺꦃꦧꦏꦭ꧀ꦏꦼꦤꦭ꧀ꦏꦫꦺꦴꦲꦏꦸ꧉​
12ꦲꦏꦸ​ꦧꦏꦭ꧀ꦔꦼꦠꦺꦴꦏ꧀ꦏꦏꦺꦏꦮꦼꦭꦱꦤ꧀ꦏꦸ
ꦭꦤ꧀ꦔꦥꦸꦫ​ꦏꦧꦺꦃ​ꦱꦭꦃꦲꦺ​ꦭꦤ꧀ꦢꦺꦴꦱꦢꦺꦴꦱꦤꦺ​
ꦲꦺꦴꦫ​ꦲꦺꦤꦺꦁꦱꦶꦁ​ꦧꦏꦭ꧀ꦠꦏ꧀ꦲꦺꦭꦶꦁ​ꦩꦼꦤꦺꦃ​꧉​”

13ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦏꦺꦧꦧ꧀ꦥꦽꦗꦚ꧀ꦗꦶꦪꦤ꧀ꦱꦶꦁ​ꦲꦚꦂ​꧈​ꦏꦸꦮꦶ​ꦔꦼꦏꦺꦏ꧀ꦏꦶꦠꦤ꧀ꦢꦤꦺꦏ꧀ꦢꦺꦏ꧀ꦤꦺꦲꦸꦒ​ꦤꦼꦠꦼꦥ꧀ꦥꦏꦺꦤꦺꦏ꧀ꦥꦽꦗꦚ꧀ꦗꦶꦪꦤ꧀ꦱꦶꦁ​ꦭꦮꦱ꧀ꦮꦶꦱ꧀ꦲꦺꦴꦫ​ꦏꦁꦒꦺꦴ​ꦒꦮꦺ​꧉​ꦭꦤ꧀ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦲꦁꦒꦼꦥ꧀ꦭꦮꦱ꧀ꦭꦤ꧀ꦲꦺꦴꦫ​ꦏꦁꦒꦺꦴ​ꦒꦮꦺ​꧈​ꦧꦏꦭ꧀​ꦤ꧀ꦢꦁꦢꦶꦧꦸꦮꦁ​꧉​

↑ ↑ ↑


꧋ꦡꦫꦸꦥ꧀ꦥꦔꦧꦼꦏ꧀ꦠꦶ​ꦤꦁꦧꦸꦩꦶ​꧉​

꧇​꧙꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦥꦽꦗꦚ꧀ꦗꦶꦪꦤ꧀ꦱꦶꦁ​ꦤ꧀ꦢꦶꦱꦶꦏ꧀ꦏꦸꦮꦶ​ꦔꦺꦴꦩꦺꦴꦁꦔꦏꦺꦧꦧ꧀ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦭꦤ꧀ꦥꦁꦒꦺꦴꦤ꧀ꦤꦤ꧀ꦥꦔꦧꦼꦏ꧀ꦠꦶ​ꦤꦁꦧꦸꦩꦶ​ꦏꦺꦤꦺ​꧈​ꦒꦮꦺꦪꦤ꧀ꦤꦺ​ꦩꦤꦸꦁꦱ​꧉​ 2ꦏꦸꦮꦶ​ꦏꦪ​ꦔꦺꦤꦺ​:ꦲꦺꦤꦺꦁꦡꦫꦸꦥ꧀ꦱꦶꦁ​ꦢꦶꦢꦼꦏ꧀ꦤꦺꦤꦁꦱꦼꦧꦼꦭꦃꦚ꧀ꦗꦧ​꧉​ꦲꦶꦏꦶ​ꦱꦶꦁ​ꦢꦶꦲꦫꦤ꧀ꦤꦶ​ꦥꦁꦒꦺꦴꦤ꧀ꦤꦤ꧀ꦱꦸꦕꦶ​꧉​ꦤꦁꦚ꧀ꦗꦼꦫꦺꦴꦤꦺ​ꦥꦁꦒꦺꦴꦤ꧀ꦤꦤ꧀ꦥꦔꦧꦼꦏ꧀ꦠꦶ​ꦲꦶꦏꦶ​ꦲꦺꦤꦺꦁꦮꦢꦃꦢꦶꦪꦤ꧀ ꦲꦺꦤꦺꦁꦩꦺꦗꦤꦺ​ꦭꦤ꧀ꦤꦁꦩꦺꦗꦤꦺ​ꦲꦺꦤꦺꦁꦫꦺꦴꦠꦶꦤꦺ​ꦱꦶꦁ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 3ꦤꦁꦲꦩ꧀ꦧꦸꦫꦶꦤꦺ​ꦥꦁꦒꦺꦴꦤ꧀ꦤꦤ꧀ꦥꦔꦧꦼꦏ꧀ꦠꦶ​ꦱꦶꦁ​ꦢꦶꦲꦫꦤ꧀ꦤꦶ​ꦥꦁꦒꦺꦴꦤ꧀ꦤꦤ꧀ꦱꦸꦕꦶ​ꦏꦸꦮꦶ​ꦲꦺꦤꦺꦁꦏꦩꦂ​ꦭꦶꦪꦤꦺ​ꦱꦶꦁ​ꦏꦼꦠꦸꦠꦸꦥ꧀ꦥꦤ꧀ꦏꦫꦺꦴ​ꦏꦺꦴꦂꦢꦺꦤ꧀ꦱꦶꦁ​ꦏꦤ꧀ꦢꦼꦭ꧀ꦒꦺꦴꦩ꧀ꦧꦭ꧀ꦭꦺ꧈​ꦢꦢꦶꦤꦺ​ꦱꦏ꧀ꦲꦩ꧀ꦧꦸꦫꦶꦤꦺ​ꦏꦺꦴꦂꦢꦺꦤ꧀ꦏꦸꦮꦶ​ꦲꦺꦴꦫ​ꦠꦲꦸ​ꦏꦺꦠꦺꦴꦏ꧀​ꦧ꧀ꦭꦱ꧀꧈​ꦏꦩꦂ​ꦱꦶꦁ​ꦤꦁꦲꦩ꧀ꦧꦸꦫꦶꦤꦺ​ꦏꦺꦴꦂꦢꦺꦤ꧀ꦏꦤ꧀ꦢꦼꦭ꧀ꦏꦸꦮꦶ​ꦢꦶꦲꦫꦤ꧀ꦤꦶ​ꦥꦁꦒꦺꦴꦤ꧀ꦤꦤ꧀ꦱꦶꦁ​ꦱꦸꦕꦶ​ꦢꦺꦮꦺ꧉​ 4ꦤꦁꦚ꧀ꦗꦼꦫꦺꦴꦤꦺ​ꦏꦩꦂ​ꦏꦸꦮꦶ​ꦲꦺꦤꦺꦁꦲꦭ꧀ꦠꦂꦫꦺꦒꦮꦺꦪꦤ꧀ꦲꦼꦩꦱ꧀ꦏꦁꦒꦺꦴ​ꦔꦺꦴꦧꦺꦴꦁ​ꦩꦼꦚꦤ꧀꧈​ꦤꦁꦏꦺꦴꦤꦺꦴ​ꦲꦸꦒ​ꦲꦺꦤꦺꦁꦏꦱ꧀ꦱꦺꦮꦢꦃꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦏꦱ꧀ꦏꦸꦮꦶ​ꦚ꧀ꦗꦧꦚ꧀ꦗꦼꦫꦺꦴꦤꦺꦢꦶꦱꦭꦶꦤ꧀ꦤꦶ​ꦏꦫꦺꦴ​ꦲꦼꦩꦱ꧀꧈​ꦤꦁꦚ꧀ꦗꦼꦫꦺꦴꦤꦺ​ꦏꦱ꧀ꦏꦸꦮꦶ​ꦲꦸꦒ​ꦲꦺꦤꦺꦁꦏꦼꦤ꧀ꦢꦶꦒꦮꦺꦪꦤ꧀ꦲꦼꦩꦱ꧀ꦲꦶꦱꦶꦤꦺ​ꦩꦤꦃ​꧈​ꦪꦏꦸꦮꦶ​ꦫꦺꦴꦠꦶ​ꦱꦶꦁ​ꦱꦁꦏꦱ꧀ꦮꦂꦒ​ꦭꦤ꧀ꦲꦸꦒ​ꦲꦺꦤꦺꦁꦠꦼꦏꦼꦤꦺ​ꦲꦶꦩꦩ꧀ꦒꦼꦢꦺꦄꦫꦺꦴꦤ꧀꧈​ꦩ꧀ꦧꦶꦪꦺꦤ꧀ꦠꦼꦏꦼꦤ꧀ꦏꦸꦮꦶ​ꦠꦲꦸ​ꦩꦼꦠꦸ​ꦏꦼꦩ꧀ꦧꦁꦔꦺ​꧉​ꦏꦼꦗꦧ​ꦏꦸꦮꦶ​ꦏꦧꦺꦃ​꧈​ꦤꦁꦚ꧀ꦗꦼꦫꦺꦴꦤꦺ​ꦏꦱ꧀ꦲꦼꦩꦱ꧀ꦏꦸꦮꦶ​ꦲꦸꦒ​ꦲꦺꦤꦺꦁꦮꦠꦸꦤꦺ​ꦫꦺꦴꦁ​ꦊꦩ꧀ꦧꦂꦱꦶꦁ​ꦔꦼꦩꦺꦴꦠ꧀ꦠꦸꦭꦶꦱ꧀ꦱꦤ꧀ꦤꦺ​ꦲꦁꦒꦼꦂꦫꦁꦒꦼꦂ​ꦱꦼꦥꦸꦭꦸꦃ​꧉​ 5ꦤꦁꦱꦏ꧀​ꦤ꧀ꦢꦸꦮꦸꦂꦫꦺꦏꦱ꧀ꦲꦼꦩꦱ꧀ꦏꦸꦮꦶ​ꦲꦺꦤꦺꦁꦉꦕꦤꦺ​ꦩꦸꦭꦺꦏꦠ꧀ꦭꦺꦴꦫꦺꦴ​ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺꦧꦔꦼꦠ꧀꧈​ꦱ꧀ꦮꦶꦮꦶꦤꦺ​ꦩꦸꦭꦺꦏꦠ꧀ꦠꦺꦒꦠꦸꦏ꧀ ꦤꦸꦠꦸꦥ꧀ꦥꦶ​ꦥꦁꦒꦺꦴꦤ꧀ꦤꦤ꧀ꦤꦁꦏꦱ꧀ꦏꦸꦮꦶ​꧈​ꦱꦶꦁ​ꦗꦫꦺꦤꦺ​ꦤꦁꦥꦁꦒꦺꦴꦤ꧀ꦤꦤ꧀ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦩ꧀ꦧꦸꦮꦁ​ꦢꦺꦴꦱꦤꦺ​ꦩꦤꦸꦁꦱ​꧉​ꦉꦕ​ꦭꦺꦴꦫꦺꦴ​ꦏꦸꦮꦶ​ꦠꦤ꧀ꦢꦤꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦏꦺꦴꦤꦺꦴ​꧉​ꦤꦁꦔꦶꦁ​ꦱꦲꦶꦏꦶ​ꦲꦏꦸ​ꦲꦺꦴꦫ​ꦲꦉꦥ꧀ꦔꦺꦴꦩꦺꦴꦁꦔꦏꦺꦧꦧ꧀ꦏꦸꦮꦶ​ꦏꦧꦺꦃ​ꦱꦶꦗꦶꦱꦶꦗꦶ꧉​

6꧋ꦪ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦼꦁꦒꦺꦴꦤꦺ​ꦱꦼꦩ꧀ꦧꦫꦁꦩ꧀ꦧꦫꦁꦏꦼꦠꦠꦤꦁꦱꦏ꧀ꦗꦼꦫꦺꦴꦤꦺꦥꦁꦒꦺꦴꦤ꧀ꦤꦤ꧀ꦱꦸꦕꦶ​ꦩꦲꦸ​꧉​ꦱꦧꦼꦤ꧀ꦢꦶꦤ​ꦥꦫ​ꦲꦶꦩꦩ꧀ꦥꦢ​ꦩ꧀ꦊꦧꦸ​ꦤꦁꦥꦁꦒꦺꦴꦤ꧀ꦤꦤ꧀ꦱꦸꦕꦶ​ꦱꦶꦁ​ꦤꦁꦔꦉꦥ꧀ ꦲꦉꦥ꧀ꦔꦸꦫꦸꦱ꧀ꦱꦶ​ꦥꦼꦁꦒꦮꦺꦪꦤ꧀ꦏꦸ꧉​ 7ꦤꦁꦔꦶꦁ​ꦤꦩꦸꦁ​ꦲꦶꦩꦩ꧀ꦒꦼꦢꦺ​ꦱꦶꦁ​ꦢꦶꦭꦶꦭꦤꦶ​ꦩ꧀ꦊꦧꦸ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦱꦸꦕꦶ​ꦢꦺꦮꦺꦭꦤ꧀ꦏꦸꦮꦶ​ꦮꦲꦺ​ꦤꦩꦸꦁ​ꦱꦼꦠꦲꦸꦤ꧀ꦱꦼꦥꦶꦱ꧀ꦱꦤ꧀꧈​ꦤꦺꦏ꧀ꦲꦶꦩꦩ꧀ꦒꦼꦢꦺ​ꦩ꧀ꦊꦧꦸ​꧈​ꦢꦺꦏ꧀ꦤꦺꦏꦸꦢꦸ​ꦔ꧀ꦒꦮ​ꦒꦼꦠꦶꦃ​ꦱꦶꦁ​ꦏꦸꦢꦸ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦱꦁꦏꦢꦺꦴꦱꦤꦺ​ꦢꦺꦏ꧀ꦤꦺꦢꦺꦮꦺꦭꦤ꧀ꦢꦺꦴꦱꦢꦺꦴꦱꦤꦺ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦚ꧀ꦗꦫꦏ꧀꧈​ 8ꦭꦤ꧀ꦠꦂꦫꦤ꧀ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦩꦲꦸ​ꦏꦧꦺꦃ​ꦫꦺꦴꦃ​ꦱꦸꦕꦶ​ꦤ꧀ꦢꦸꦤꦸꦁꦔꦏꦺꦏꦤ꧀ꦠꦶꦕꦼꦠ​ꦤꦺꦏ꧀ꦱꦸꦮꦺꦤꦺ​ꦲꦶꦗꦶꦏ꧀ꦥꦢ​ꦩꦤꦸꦠ꧀ꦩꦫꦁ​ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦏꦸꦮꦶ​ꦩꦤꦸꦁꦱ​ꦲꦺꦴꦫ​ꦧꦶꦱ​ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 9ꦥꦁꦒꦺꦴꦤ꧀ꦤꦤ꧀ꦱꦸꦕꦶ​ꦱꦶꦁ​ꦤꦁꦔꦉꦥ꧀ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦥꦔꦧꦼꦏ꧀ꦠꦶ​ꦏꦪ​ꦱꦶꦁ​ꦢꦶꦭꦏꦺꦴꦏ꧀ꦏꦏꦺꦲꦶꦁ​ꦢꦶꦤꦤꦺ​ꦱꦲꦶꦏꦶ​꧈​ꦩꦶꦠꦸꦫꦸꦠ꧀ꦥꦽꦗꦚ꧀ꦗꦶꦪꦤ꧀ꦱꦶꦁ​ꦭꦮꦱ꧀꧈​ꦤꦁꦔꦶꦁ​ꦥꦮꦺꦃꦭꦤ꧀ꦏꦸꦂꦧꦤ꧀ꦱꦶꦁ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦴꦫ​ꦧꦶꦱ​ꦔꦽꦱꦶꦏ꧀ꦏꦶ​ꦲꦠꦶꦤꦺ​ꦮꦺꦴꦁꦮꦺꦴꦁ​ꦱꦏ꧀ꦏꦧꦺꦃꦲꦺ꧉​ 10ꦧꦫꦁꦧꦫꦁ​ꦏꦸꦮꦶ​ꦤꦩꦸꦁ​ꦮꦸꦗꦸꦠ꧀ꦥꦔꦤ꧀ ꦲꦺꦴꦩ꧀ꦧꦺꦤ꧀ꦭꦤ꧀ꦮꦼꦂꦤꦮꦼꦂꦤ​ꦠꦠꦕꦫ​ꦧꦧ꧀ꦉꦉꦱꦶꦏ꧀ꦏꦤ꧀꧈​ꦏꦸꦮꦶ​ꦏꦧꦺꦃ​ꦤꦩꦸꦁ​ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦭꦤ꧀ꦠꦠꦕꦫ​ꦥꦔꦧꦼꦏ꧀ꦠꦶ​ꦱꦶꦁ​ꦏꦸꦢꦸ​ꦢꦶꦭꦏꦺꦴꦏ꧀ꦏꦏꦺꦠꦸꦩꦼꦏꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦚꦂꦫꦏꦺꦕꦫꦤꦺ​ꦥꦔꦧꦼꦏ꧀ꦠꦶ​꧉​

11꧋ꦩꦸꦭꦤꦺ​꧈​ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦏꦿꦶꦱ꧀ꦡꦸꦱ꧀ꦮꦶꦱ꧀ꦠꦼꦏ​ꦭꦤ꧀ꦢꦺꦏ꧀ꦤꦺꦢꦢꦶ​ꦲꦶꦩꦩ꧀ꦩꦺ​ꦒꦼꦢꦺꦲꦮꦏ꧀ꦏꦺ​ꦢꦺꦮꦺ꧉​ꦧꦉꦁ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦢꦸꦤ꧀ꦤꦏꦺꦱꦼꦩ꧀ꦧꦫꦁ​ꦱꦶꦁ​ꦧꦼꦕꦶꦏ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦱꦼꦩ꧀ꦧꦫꦁ​ꦱꦶꦁ​ꦱꦏ꧀ꦢꦸꦫꦸꦁꦔꦺꦮꦶꦱ꧀ꦢꦶꦗꦚ꧀ꦗꦶ꧉​ꦏꦿꦶꦱ꧀ꦡꦸꦱ꧀ꦲꦺꦴꦫ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦡꦫꦸꦥ꧀ꦒꦮꦺꦪꦤ꧀ꦤꦺ​ꦩꦤꦸꦁꦱ​꧈​ꦠꦼꦒꦼꦱ꧀ꦱꦺ​ꦲꦺꦴꦫ​ꦥꦁꦒꦺꦴꦤ꧀ꦤꦤ꧀ꦲꦶꦁ​ꦢꦺꦴꦚ​ꦏꦺꦤꦺ​꧈​ꦤꦁꦔꦶꦁ​ꦥꦁꦒꦺꦴꦤ꧀ꦤꦤ꧀ꦱꦶꦁ​ꦭꦸꦮꦶꦃ​ꦲꦥꦶꦏ꧀ꦭꦤ꧀ꦱꦸꦕꦶ​ꦱꦏ꧀ꦏꦧꦺꦃꦲꦺ꧉​ 12ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦶꦩꦩ꧀ꦒꦼꦢꦺ​ꦏꦸꦮꦶ​ꦩ꧀ꦊꦧꦸ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦱꦸꦕꦶ​ꦢꦺꦮꦺꦔ꧀ꦒꦮ​ꦒꦼꦠꦶꦃꦲꦺ​ꦮꦼꦢꦸꦱ꧀ꦲꦥ​ꦥꦼꦢꦺꦠ꧀ ꦢꦶꦥꦱꦿꦃꦲꦏꦺ ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦏꦿꦶꦱ꧀ꦡꦸꦱ꧀​ꦩ꧀ꦊꦧꦸ​ꦱꦼꦥꦶꦱ꧀ꦱꦤ꧀ꦏꦁꦒꦺꦴ​ꦱ꧀ꦭꦮꦱ꧀ꦱꦺꦤꦁꦥꦁꦒꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​ꦭꦤ꧀ꦏꦼꦤꦺꦁꦢꦶꦲꦫꦤ꧀ꦤꦶ​ꦤꦺꦏ꧀ꦢꦺꦏ꧀ꦤꦺꦩꦱꦿꦃꦲꦏꦺꦒꦼꦠꦶꦃꦲꦺ​ꦢꦺꦏ꧀ꦤꦺꦢꦺꦮꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦒꦼꦠꦶꦃꦲꦺ​ꦮꦼꦢꦸꦱ꧀ꦲꦥ​ꦥꦼꦢꦺꦠ꧀꧈​ꦩꦼꦁꦏꦺꦴꦤꦺꦴ​ꦏꦸꦮꦶ​ꦏꦿꦶꦱ꧀ꦡꦸꦱ꧀ꦲꦩ꧀ꦧꦪꦂ​ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺꦱꦏ꧀ꦏꦧꦺꦃꦲꦺꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦥꦔ꧀ꦮꦱꦤꦺ​ꦢꦺꦴꦱ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦢꦢꦶ​ꦱꦶꦗꦶ​ꦏꦫꦺꦴ​ꦢꦺꦏ꧀ꦤꦺꦱ꧀ꦭꦮꦱ꧀ꦱꦺ꧉​ 13ꦥꦫ​ꦱꦼꦢꦸꦭꦸꦂ​꧈​ꦩꦶꦠꦸꦫꦸꦠ꧀ꦥꦽꦗꦚ꧀ꦗꦶꦪꦤ꧀ꦱꦶꦁ​ꦭꦮꦱ꧀ꦏꦸꦮꦶ​ꦔꦺꦤꦺ​:ꦤꦺꦏ꧀ꦲꦺꦤꦺꦁꦮꦺꦴꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧈​ꦲꦶꦩꦩ꧀ꦩꦺ​ꦒꦼꦢꦺ​ꦠꦼꦫꦸꦱ꧀ꦲꦩ꧀ꦧꦼꦭꦺꦃ​ꦮꦼꦢꦸꦱ꧀ꦭꦤꦁ​ꦲꦥ​ꦱꦥꦶ​ꦭꦤꦁ​꧈​ꦲꦥ​ꦔꦺꦴꦧꦺꦴꦁ​ꦏꦸꦂꦧꦤ꧀ꦥꦼꦢꦺꦠ꧀ꦠꦼꦫꦸꦱ꧀ꦲꦮꦸꦤꦺ​ꦢꦶꦕꦩ꧀ꦥꦸꦂ​ꦏꦫꦺꦴ​ꦧꦚꦸ​ꦢꦶꦕꦶꦥꦿꦠ꧀ꦕꦶꦥꦿꦠ꧀ꦠꦏꦺ​ꦩꦫꦁ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦮꦺꦴꦁꦔꦺ​ꦮꦶꦱ꧀ꦢꦶꦲꦁꦒꦼꦥ꧀ꦉꦱꦶꦏ꧀ꦩꦼꦤꦺꦃ​꧉​

14꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦒꦼꦠꦶꦃꦲꦺ​ꦏꦺꦮꦤ꧀ꦮꦲꦺ​ꦮꦶꦱ꧀ꦧꦶꦱ​ꦩꦫꦏ꧀ꦏꦏꦺꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦔꦧꦼꦏ꧀ꦠꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦤꦺꦃ​꧈​ꦲꦥ​ꦲꦺꦴꦫ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦏꦸꦮꦶ​ꦏ꧀ꦮꦱꦤꦺ​ꦒꦼꦠꦶꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦏꦠꦸꦤ꧀ꦠꦸꦤ꧀ꦏꦫꦺꦴ​ꦫꦺꦴꦃ​ꦱꦶꦁ​ꦭꦁꦒꦼꦁ​ꦏꦿꦶꦱ꧀ꦡꦸꦱ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦱꦏ꧀ꦏꦧꦺꦃꦲꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦢꦶ​ꦏꦸꦂꦧꦤ꧀ꦱꦶꦁ​ꦉꦱꦶꦏ꧀꧈​ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦠꦶ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧈​ꦩꦸꦭꦤꦺ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦫꦸꦩꦁꦱ​ꦤ꧀ꦢꦸꦮꦺꦱꦭꦃ​꧈​ꦱꦼꦤꦗꦤ꧀ꦲꦮꦏ꧀ꦏꦺ​ꦢꦺꦮꦺꦩꦲꦸꦤꦺ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦭꦤ꧀ꦏꦸꦢꦸ​ꦢꦶꦥꦠꦺꦤ꧀ꦤꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦶꦲꦸꦕꦸꦭ꧀ꦭꦶ​ꦱꦁꦏꦫꦱ​ꦱꦭꦃ​ꦏꦸꦮꦶ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔꦧꦼꦏ꧀ꦠꦶ​ꦭꦤ꧀​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀ ꦱꦲꦶꦏꦶ​ꦭꦤ꧀ꦱ꧀ꦭꦮꦱ꧀ꦱꦺ꧉​

15꧋ꦏꦼꦗꦧ​ꦱꦁꦏꦏꦸꦮꦶ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦧꦧ꧀ꦱꦶꦁ​ꦲꦉꦥ꧀ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​꧉​ꦏꦿꦶꦱ꧀ꦡꦸꦱ꧀ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦔ꧀ꦒꦮꦺꦏ꧀ꦏꦏꦺꦢꦭꦤ꧀ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔꦧꦼꦏ꧀ꦠꦶ​ꦭꦤ꧀​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦲꦶꦏꦶ​ꦩꦶꦗꦶ​ꦢꦺꦏ꧀ꦤꦺꦢꦢꦶ​ꦲꦶꦩꦩ꧀ꦒꦼꦢꦺꦱꦶꦁ​ꦔꦿꦸꦏꦸꦤ꧀ꦤꦏꦺꦩꦤꦸꦁꦱ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦔ꧀ꦭꦏꦺꦴꦏ꧀ꦏꦏꦺꦥꦽꦗꦚ꧀ꦗꦶꦪꦤ꧀ꦱꦶꦁ​ꦲꦚꦂ​꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦢꦶꦥꦁꦒꦶꦭ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦤꦸꦠ꧀ꦥꦽꦗꦚ꧀ꦗꦶꦪꦤ꧀ꦱꦶꦁ​ꦤ꧀ꦢꦶꦱꦶꦏ꧀ꦧꦶꦱ​ꦤꦩ꧀ꦥ​ꦥꦤ꧀ꦢꦸꦩ꧀ꦩꦤ꧀ꦱꦶꦁ​ꦭꦁꦒꦼꦁ​꧈​ꦏꦪ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦸꦮꦶ​ꦧꦶꦱ​ꦏ꧀ꦭꦏꦺꦴꦤ꧀ ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦢꦺꦴꦱ​ꦏꦧꦺꦃ​ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦩꦤꦸꦠ꧀ꦩꦫꦁ​ꦥꦽꦗꦚ꧀ꦗꦶꦪꦤ꧀ꦱꦶꦁ​ꦤ꧀ꦢꦶꦱꦶꦏ꧀꧈​ 16ꦒꦩ꧀ꦥꦁꦔꦺ​ꦲꦺꦴꦩꦺꦴꦁ​ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦢꦺꦮꦺ!ꦤꦺꦏ꧀ꦲꦺꦤꦺꦁꦠꦺꦱ꧀ꦠꦩꦺꦤ꧀ ꦠꦺꦱ꧀ꦠꦩꦺꦤ꧀ꦏꦸꦮꦶ​ꦧꦶꦱꦤꦺ​ꦏꦁꦒꦺꦴ​ꦤꦺꦏ꧀ꦧꦶꦱ​ꦔꦼꦠꦺꦴꦏ꧀ꦏꦏꦺ꧈​ꦤꦺꦏ꧀ꦱꦶꦁ​ꦤꦸꦭꦶꦱ꧀ꦠꦺꦱ꧀ꦠꦩꦺꦤ꧀ꦏꦸꦮꦶ​ꦮꦶꦱ꧀ꦩꦠꦶ​ꦠꦼꦤꦤ꧀꧈​ 17ꦤꦺꦏ꧀ꦱꦶꦁ​ꦔ꧀ꦒꦮꦺ​ꦠꦺꦱ꧀ꦠꦩꦺꦤ꧀ꦲꦶꦗꦶꦏ꧀ꦲꦸꦫꦶꦥ꧀ ꦠꦺꦱ꧀ꦠꦩꦺꦤ꧀ꦤꦺꦲꦺꦴꦫ​ꦏꦁꦒꦺꦴ​ꦒꦮꦺ​ꦧ꧀ꦭꦱ꧀꧈​ꦲꦮꦶꦠ꧀ꦠꦺꦱ꧀ꦠꦩꦺꦤ꧀ꦏꦸꦮꦶ​ꦧꦶꦱꦤꦺ​ꦏꦁꦒꦺꦴ​ꦤꦩꦸꦁ​ꦤꦺꦏ꧀ꦱꦶꦁ​ꦤꦸꦭꦶꦱ꧀ꦠꦺꦱ꧀ꦠꦩꦺꦤ꧀ꦏꦸꦮꦶ​ꦮꦶꦱ꧀ꦩꦠꦶ​꧉​ 18ꦩꦸꦭꦤꦺ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦢꦸꦤꦸꦁꦤꦺꦏ꧀ꦥꦽꦗꦚ꧀ꦗꦶꦪꦤ꧀ꦱꦶꦁ​ꦤ꧀ꦢꦶꦱꦶꦏ꧀ꦏꦸꦮꦶ​ꦪ​ꦏꦸꦢꦸ​ꦢꦶꦭꦏꦺꦴꦏ꧀ꦏꦏꦺꦏꦫꦺꦴ​ꦒꦼꦠꦶꦃ​꧈​ꦠꦼꦒꦼꦱ꧀ꦱꦺ​ꦏꦸꦢꦸ​ꦲꦺꦤꦺꦁꦱꦶꦁ​ꦢꦶꦥꦠꦺꦤ꧀ꦤꦶ​꧉​ꦮꦸꦗꦸꦠ꧀ꦠꦺꦩ꧀ꦧꦶꦪꦺꦤ꧀ꦤꦺꦏꦼꦥꦿꦶꦪꦺ​? 19ꦤ꧀ꦢꦶꦱꦶꦏ꧀ꦏꦺꦤꦧꦶ​ꦩꦺꦴꦱꦼꦱ꧀​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦮꦺꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦮꦺꦴꦁꦮꦺꦴꦁ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦢꦺꦏ꧀ꦤꦺꦠꦼꦫꦸꦱ꧀​ꦚ꧀ꦗꦶꦏꦸꦏ꧀ꦒꦼꦠꦶꦃꦲꦺ​ꦥꦼꦢꦺꦠ꧀ꦲꦥ​ꦕꦼꦩ꧀ꦥꦺ​꧉​ꦏꦸꦮꦶ​ꦠꦼꦫꦸꦱ꧀ꦢꦶꦕꦩ꧀ꦥꦸꦂꦫꦏꦺ​ꦧꦚꦸ​꧉​ꦤꦧꦶ​ꦩꦺꦴꦱꦼꦱ꧀ꦠꦼꦫꦸꦱ꧀​ꦔ꧀ꦒꦮꦺ​ꦏ꧀ꦮꦱ꧀ꦏꦫꦺꦴ​ꦒꦒꦁꦒꦒꦁꦔꦺꦭꦤ꧀ꦒꦺꦴꦢꦺꦴꦁꦒꦺꦴꦢꦺꦴꦁꦔꦺꦲ꦳ꦶꦱꦺꦴꦥ꧀ꦱꦶꦁ​ꦢꦶꦠꦭꦺꦤ꧀ꦤꦶ​ꦢꦢꦶ​ꦱꦶꦗꦶ​ꦏꦫꦺꦴ​ꦮꦸꦭꦸꦤꦺ​ꦮꦼꦢꦸꦱ꧀ꦒꦺꦩ꧀ꦧꦺꦭ꧀ꦱꦶꦁ​ꦢꦶꦏꦺꦏ꧀ꦏꦶꦫꦸꦥ​ꦲꦧꦁ​ꦩꦠꦼꦁ​꧉​ꦏꦸꦮꦶ​ꦱꦶꦁ​ꦢꦶꦲꦼꦁꦒꦺꦴ​ꦔꦼꦥꦾꦸꦂꦉꦥꦾꦸꦂꦫꦶꦏꦶꦠꦧ꧀ꦧꦺ​ꦭꦤ꧀ꦮꦺꦴꦁꦮꦺꦴꦁꦔꦺ​ꦏꦫꦺꦴ​ꦒꦼꦠꦶꦃꦲꦺ​꧉​ 20ꦱꦏ꧀ꦧꦉꦁꦔꦺꦔꦼꦥꦾꦸꦂꦉꦥꦾꦸꦂꦫꦶꦏꦸꦮꦶ​ꦤꦧꦶ​ꦩꦺꦴꦱꦼꦱ꧀ꦔꦺꦴꦩꦺꦴꦁꦔꦺꦤꦺ​:“ꦲꦶꦏꦶ​ꦒꦼꦠꦶꦃ​ꦱꦶꦁ​ꦢꦶꦲꦼꦁꦒꦺꦴ​ꦔ꧀ꦭꦏꦺꦴꦏ꧀ꦏꦏꦺꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦺꦴꦮꦺ​꧉​” 21ꦩꦼꦁꦏꦺꦴꦤꦺꦴ​ꦲꦸꦒ​ꦤꦧꦶ​ꦩꦺꦴꦱꦼꦱ꧀ꦔꦼꦥꦾꦸꦂꦫꦶ​ꦥꦁꦒꦺꦴꦤ꧀ꦤꦤ꧀ꦤꦺ​ꦭꦤ꧀ꦥꦶꦫꦤ꧀ꦠꦶꦥꦶꦫꦤ꧀ꦠꦶꦤꦺ​ꦏꦧꦺꦃ​ꦱꦶꦁ​ꦢꦶꦏꦁꦒꦺꦴꦏ꧀ꦏꦏꦺꦲꦶꦁ​ꦥꦔꦧꦼꦏ꧀ꦠꦶ​꧉​ 22ꦩꦶꦠꦸꦫꦸꦠ꧀ꦮꦺꦠ꧀ꦮꦺꦠ꧀ꦠꦺꦤꦧꦶꦩꦺꦴꦱꦼꦱ꧀ꦥꦚ꧀ꦕꦺꦤ꧀ꦩꦺꦃꦱꦼꦩ꧀ꦧꦫꦁꦢꦶꦱꦸꦕꦺꦏ꧀ꦏꦏꦺꦔꦁꦒꦺꦴꦒꦼꦠꦶꦃ꧉​ꦩꦼꦁꦏꦺꦴꦤꦺꦴꦲꦸꦒꦢꦺꦴꦱ꧈​ꦧꦶꦱꦤꦺꦢꦶꦔꦥꦸꦫꦤꦩꦸꦁꦤꦺꦏ꧀ꦲꦺꦤꦺꦁꦒꦼꦠꦶꦃꦩꦶꦭꦶ꧉​

꧋ꦏꦸꦂꦧꦤ꧀ꦤꦺꦏꦿꦶꦱ꧀ꦡꦸꦱ꧀ꦲꦩ꧀ꦧꦸꦮꦁꦢꦺꦴꦱ꧉​

23꧋ꦥꦫꦱꦼꦢꦸꦭꦸꦂ꧈​ꦢꦶꦥꦶꦏꦶꦂꦢꦺꦮꦺꦱꦲꦶꦏꦶ!ꦭꦃꦤꦺꦏ꧀ꦧꦫꦁꦧꦫꦁꦱꦶꦁꦤꦩꦸꦁꦢꦢꦶꦒꦩ꧀ꦧꦂꦫꦺꦥꦽꦏꦫꦥꦽꦏꦫꦱꦶꦁꦤꦁꦱ꧀ꦮꦂꦒꦮꦲꦺꦏꦸꦢꦸꦢꦶꦱꦸꦕꦺꦏ꧀ꦏꦏꦺꦔꦁꦒꦺꦴꦏꦸꦂꦧꦤ꧀ꦱꦶꦁꦏꦪꦔꦺꦴꦤꦺꦴ꧈​ꦭꦃꦥꦽꦏꦫꦥꦽꦏꦫꦱꦶꦁꦤꦁꦱ꧀ꦮꦂꦒꦩꦼꦤꦺꦃ꧈​ꦲꦥꦲꦺꦴꦫꦏꦸꦢꦸꦭꦸꦮꦶꦃꦒꦼꦢꦺꦏꦸꦂꦧꦤ꧀ꦤꦺ? 24ꦤꦺꦏ꧀ꦢꦶꦥꦶꦏꦶꦂ​ꦥꦫ​ꦱꦼꦢꦸꦭꦸꦂ​꧈​ꦏꦿꦶꦱ꧀ꦡꦸꦱ꧀ꦲꦺꦴꦫ​ꦩ꧀ꦊꦧꦸ​ꦤꦁꦥꦁꦒꦺꦴꦤ꧀ꦤꦤ꧀ꦥꦔꦧꦼꦏ꧀ꦠꦶ​ꦒꦮꦺꦪꦤ꧀ꦤꦺ​ꦩꦤꦸꦁꦱ​꧈​ꦱꦶꦁ​ ꦤꦩꦸꦁ​ꦲꦪꦁꦔꦪꦁꦔꦺꦥꦁꦒꦺꦴꦤ꧀ꦤꦤ꧀ꦥꦔꦧꦼꦏ꧀ꦠꦶ​ꦱꦶꦁ​ꦠꦼꦤꦤ꧀ꦤꦁꦱ꧀ꦮꦂꦒ​꧈​ꦲꦺꦴꦫ​꧉​ꦤꦁꦔꦶꦁ​ꦏꦿꦶꦱ꧀ꦡꦸꦱ꧀ꦥꦚ꧀ꦕꦺꦤ꧀​ꦩ꧀ꦊꦧꦸ​ꦠꦼꦤꦤ꧀ꦤꦁꦱ꧀ꦮꦂꦒ​꧉​ꦤꦁꦏꦤ​ꦢꦺꦏ꧀ꦤꦺꦱꦲꦶꦏꦶ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦢꦶ​ꦮꦏꦶꦭ꧀ꦭꦺ​ꦲꦮꦏ꧀ꦏꦺ​ꦢꦺꦮꦺ꧈​ꦤ꧀ꦢꦺꦴꦔꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦿꦺꦮꦁꦔꦶ​ꦲꦮꦏ꧀ꦏꦺ​ꦢꦺꦮꦺ꧉​ 25-26ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦤꦺꦏ꧀ꦲꦶꦩꦩ꧀ꦒꦼꦢꦺ​ꦏꦸꦮꦶ​ꦱꦼꦠꦲꦸꦤ꧀ꦱꦼꦥꦶꦱ꧀ꦱꦤ꧀​ꦩ꧀ꦊꦧꦸ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦱꦸꦕꦶ​ꦢꦺꦮꦺꦔ꧀ꦒꦮ​ꦒꦼꦠꦶꦃ​꧈​ꦤꦁꦔꦶꦁ​ꦢꦸꦢꦸ​ꦒꦼꦠꦶꦃꦲꦺ​ꦢꦺꦏ꧀ꦤꦺꦢꦺꦮꦺ꧉​ꦤꦁꦔꦶꦁ​ꦏꦿꦶꦱ꧀ꦡꦸꦱ꧀ꦲꦺꦴꦫ​ꦩ꧀ꦊꦧꦸ​ꦧꦺꦴꦭꦏ꧀ꦧꦭꦶꦏ꧀ꦤꦁꦱ꧀ꦮꦂꦒ​ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦢꦺꦏ꧀ꦤꦺꦢꦺꦮꦺꦢꦢꦶ​ꦏꦸꦂꦧꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦼꦩꦸꦁꦒꦺꦴꦤ꧀ꦤꦺꦔꦺꦴꦤꦺꦴ​ꦩꦼꦱ꧀ꦠꦶꦏꦮꦶꦠ꧀ꦮꦶꦮꦶꦠ꧀ꦠꦤ꧀ꦤꦺ​ꦗꦩꦤ꧀ꦢꦺꦏ꧀ꦤꦺꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀ꦥꦶꦁ​ꦥꦶꦫꦁꦥꦶꦫꦁ​꧉​ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦺꦴꦫ​ꦔꦺꦴꦤꦺꦴ​꧉​ꦏꦁꦒꦺꦴ​ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦢꦢꦶ​ꦏꦸꦂꦧꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦿꦶꦱ꧀ꦡꦸꦱ꧀ꦤꦩꦸꦁ​ꦠꦼꦏ​ꦱꦼꦥꦶꦱ꧀ꦱꦤ꧀ꦤꦁꦗꦒꦠ꧀ ꦲꦶꦁ​ꦗꦩꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦤ꧀꧈​ꦪ​ꦏꦸꦂꦧꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦏꦸꦮꦶ​ꦱꦶꦁ​ꦲꦩ꧀ꦧꦸꦮꦁ​ꦢꦺꦴꦱꦤꦺ​ꦩꦤꦸꦁꦱ​꧉​ 27ꦥꦚ꧀ꦕꦺꦤ꧀ꦮꦶꦱ꧀ꦢꦢꦶ​ꦥꦼꦱ꧀ꦠꦶꦤꦺꦩꦤꦸꦁꦱ​ꦏꦧꦺꦃ​ꦩꦠꦶ​ꦱꦼꦥꦶꦱ꧀ꦱꦤ꧀ꦭꦤ꧀ꦱꦏ꧀ꦮꦶꦱ꧀ꦱꦺ​ꦩꦠꦶ​ꦩꦤꦸꦁꦱ​ꦧꦏꦭ꧀ꦢꦶꦏꦿꦸꦠꦸꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 28ꦩꦼꦁꦏꦺꦴꦤꦺꦴ​ꦲꦸꦒ​ꦏꦿꦶꦱ꧀ꦡꦸꦱ꧀ ꦱꦶꦁ​ꦢꦢꦶ​ꦩꦤꦸꦁꦱ​꧈​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦱꦼꦥꦶꦱ꧀ꦱꦤ꧀ꦢꦢꦶ​ꦏꦸꦂꦧꦤ꧀ꦱꦶꦁ​ꦧꦶꦱ​ꦲꦩ꧀ꦧꦸꦮꦁ​ꦢꦺꦴꦱꦤꦺ​ꦏꦧꦺꦃ​ꦮꦺꦴꦁ​꧉​ꦢꦺꦏ꧀ꦤꦺꦪ​ꦧꦏꦭ꧀ꦠꦼꦏ​ꦩꦼꦤꦺꦃ​ꦤꦁꦗꦒꦠ꧀ ꦥꦶꦁ​ꦥꦶꦤ꧀ꦢꦺꦴꦤꦺ꧈​ꦲꦺꦴꦫ​ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦔ꧀ꦒꦮ​ꦱꦏ꧀ꦲꦺꦤꦺꦁꦔꦺꦏꦧꦼꦕꦶꦏ꧀ꦏꦤ꧀ꦏꦁꦒꦺꦴ​ꦏꦧꦺꦃ​ꦮꦺꦴꦁ​ꦱꦶꦁ​ꦥꦢ​ꦔꦉꦥ꧀ꦲꦉꦥ꧀ꦠꦼꦏꦤꦺ​ꦢꦺꦏ꧀ꦤꦺ꧉​

↑ ↑ ↑


꧋ꦏꦸꦂꦧꦤ꧀ꦱꦶꦁ​ꦤꦼꦧꦸꦱ꧀ꦢꦺꦴꦱꦤꦺ​ꦩꦤꦸꦁꦱ​ꦱꦏ꧀ꦏꦧꦺꦃꦲꦺ꧉​

꧇​꧑꧐꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦏꦸꦮꦶ​ꦤꦩꦸꦁ​ꦲꦪꦁꦔꦪꦁꦔꦺꦥꦽꦏꦫꦥꦽꦏꦫ​ꦱꦶꦁ​ꦧꦼꦕꦶꦏ꧀ꦱꦶꦁ​ꦧꦏꦭ꧀ꦢꦶꦲꦼꦢꦸꦤ꧀ꦤꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦸꦮꦶ​ꦢꦸꦢꦸ​ꦱꦶꦁ​ꦠꦼꦤꦤ꧀ꦤꦺ꧉​ꦱꦧꦼꦤ꧀ꦠꦲꦸꦤ꧀ꦮꦺꦴꦁꦮꦺꦴꦁ​ꦔ꧀ꦒꦮ​ꦏꦸꦂꦧꦤ꧀ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦸꦂꦧꦤ꧀ꦱꦶꦁ​ꦠꦸꦁꦒꦭ꧀ꦭꦺ​ꦮꦲꦺ​꧈​ꦤꦁꦔꦶꦁ​ꦏꦸꦮꦶ​ꦲꦺꦴꦫ​ꦧꦶꦱ​ꦩꦫꦏ꧀ꦏꦏꦺꦮꦺꦴꦁꦮꦺꦴꦁ​ꦱꦶꦁ​ꦔꦸꦩ꧀ꦥꦸꦭ꧀ꦭꦤ꧀ꦥꦱꦿꦃ​ꦏꦸꦂꦧꦤ꧀ꦧꦶꦱ​ꦤꦩ꧀ꦥ​ꦥꦔꦥꦸꦫ​ꦱꦁꦏꦢꦺꦴꦱꦤꦺ​ꦱꦏ꧀ꦏꦧꦺꦃꦲꦺ꧉​ 2ꦱꦼꦩꦸꦁꦒꦺꦴꦤ꧀ꦤꦺꦧꦶꦱ​ꦔꦺꦴꦤꦺꦴ​꧈​ꦩꦼꦱ꧀ꦠꦶꦮꦺꦴꦁꦮꦺꦴꦁ​ꦪ​ꦮꦶꦱ꧀ꦭꦺꦫꦺꦤ꧀ꦲꦼꦁꦒꦺꦴꦤꦺ​ꦩꦱꦿꦃꦲꦏꦺꦏꦸꦂꦧꦤ꧀ ꦲꦮꦶꦠ꧀ꦥꦢ​ꦔꦼꦂꦠꦶ​ꦤꦺꦏ꧀ꦢꦺꦴꦱꦤꦺ​ꦮꦶꦱ꧀ꦢꦶꦔꦥꦸꦫꦏꦧꦺꦃ​ꦱꦏ꧀ꦮꦶꦱ꧀ꦱꦺ​ꦩꦱꦿꦃꦲꦏꦺꦏꦸꦂꦧꦤ꧀ꦱꦼꦥꦶꦱ꧀ꦱꦤ꧀꧈​ 3ꦤꦁꦔꦶꦁ​ꦮꦸꦗꦸꦠ꧀ꦠꦺꦏꦸꦂꦧꦤ꧀ꦱꦶꦁ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦧꦼꦤ꧀ꦠꦲꦸꦤ꧀ꦩꦲꦸ​ꦩꦭꦃ​ꦔꦺꦭꦶꦁꦔꦏꦺꦮꦺꦴꦁꦮꦺꦴꦁ​ꦧꦧ꧀ꦢꦺꦴꦱꦢꦺꦴꦱꦤꦺ​꧉​ 4ꦢꦢꦶꦤꦺ​ꦥꦢ​ꦔꦏꦺꦴꦤ꧀ꦤꦶ​ꦢꦺꦮꦺꦤꦺꦏ꧀ꦒꦼꦠꦶꦃꦲꦺ​ꦱꦥꦶ​ꦲꦥ​ꦮꦼꦢꦸꦱ꧀ꦏꦸꦮꦶ​ꦲꦺꦴꦫ​ꦧꦶꦱ​ꦲꦩ꧀ꦧꦸꦮꦁ​ꦢꦺꦴꦱꦤꦺ​꧉​ 5ꦥꦚ꧀ꦕꦺꦤ꧀ꦏꦸꦮꦶ​ꦪ​ꦧꦼꦤꦼꦂ​꧈​ꦩꦸꦭꦤꦺ​ꦢꦺꦴꦁꦔꦺꦏꦿꦶꦱ꧀ꦡꦸꦱ꧀ꦲꦉꦥ꧀ꦠꦼꦏ​ꦤꦁꦗꦒꦠ꧀ꦏꦺꦤꦺ​꧈​ꦢꦺꦏ꧀ꦤꦺꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦔꦺꦤꦺ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​:

“ꦥꦮꦺꦃꦲꦥ​ꦏꦸꦂꦧꦤ꧀ꦲꦺꦴꦫ​ꦲꦩ꧀ꦧꦺꦴꦏ꧀ꦏꦼꦥꦺꦔꦶꦤ꧀ꦤꦶ꧈​
ꦏꦺꦴꦮꦺ​ꦩꦭꦃ​ꦚꦮꦶꦱ꧀ꦱꦏꦺꦧꦢꦤ꧀ꦏꦁꦒꦺꦴ​ꦲꦏꦸ​꧉​
6ꦏꦸꦂꦧꦤ꧀ꦲꦺꦴꦧꦺꦴꦁꦔꦺꦴꦧꦺꦴꦁꦔꦤ꧀ꦲꦺꦴꦫ​ꦲꦩ꧀ꦧꦺꦴꦏ꧀ꦱꦼꦤꦼꦁꦔꦶ​꧈​
ꦱꦼꦩꦺꦴꦤꦺꦴ​ꦲꦸꦒ​ꦏꦸꦂꦧꦤ꧀ꦱꦼꦩ꧀ꦧꦼꦭꦺꦃꦲꦤ꧀ꦏꦁꦒꦺꦴ​ꦲꦩ꧀ꦧꦸꦮꦁ​ꦢꦺꦴꦱ​꧉​
7ꦲꦏꦸ​ꦠꦼꦫꦸꦱ꧀ꦔꦺꦴꦩꦺꦴꦁ:
‘ꦱꦲꦶꦏꦶ​ꦲꦏꦸ​ꦩꦫ​ꦤꦁꦔ꧀ꦒꦺꦴꦤ꧀ꦩꦸ​꧈​ꦢꦸꦃꦄꦭ꧀ꦭꦃꦏꦸ​꧉​
ꦲꦏꦸ​ꦏꦼꦥꦺꦔꦶꦤ꧀ꦤꦸꦫꦸꦠ꧀ꦠꦶ​ꦏꦉꦥ꧀ꦩꦸ​꧈​
ꦩꦶꦠꦸꦫꦸꦠ꧀ꦲꦥ​ꦱꦶꦁ​ꦏꦼꦠꦸꦭꦶꦱ꧀ꦧꦧ꧀ꦲꦏꦸ​ꦤꦁꦏꦶꦠꦧ꧀꧈​’”

8꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦩꦼꦱ꧀ꦠꦶꦤꦶꦠꦺꦤ꧀ꦤꦶ​ꦤꦺꦏ꧀ꦏꦿꦶꦱ꧀ꦡꦸꦱ꧀​ꦤ꧀ꦢꦶꦱꦶꦏ꧀ꦏꦺꦔꦺꦴꦩꦺꦴꦁꦔꦺꦤꦺ​:“ꦏꦺꦴꦮꦺ​ꦲꦺꦴꦫ​ꦏꦼꦥꦺꦔꦶꦤ꧀ꦥꦮꦺꦃꦲꦥ​ꦏꦸꦂꦧꦤ꧀ꦭꦤ꧀ꦏꦸꦂꦧꦤ꧀ꦲꦺꦴꦧꦺꦴꦁꦔꦺꦴꦧꦺꦴꦁꦔꦤ꧀ꦲꦥ​ꦏꦸꦂꦧꦤ꧀ꦱꦼꦩ꧀ꦧꦼꦭꦺꦃꦲꦤ꧀ꦏꦁꦒꦺꦴ​ꦲꦩ꧀ꦧꦸꦮꦁ​ꦢꦺꦴꦱ​ꦪ​ꦲꦺꦴꦫ​ꦲꦩ꧀ꦧꦺꦴꦏ꧀ꦱꦼꦤꦼꦁꦔꦶ​꧉”ꦭꦃ​ꦱꦏ꧀ꦗꦤꦺꦭꦲꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦠ​ꦱꦶꦁ​ꦔ꧀ꦒꦮꦺ​ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦏꦸꦂꦧꦤ꧀ꦏꦸꦮꦶ​? 9ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦱꦲꦶꦏꦶ​ꦲꦏꦸ​ꦩꦫ​ꦤꦁꦔ꧀ꦒꦺꦴꦤ꧀ꦩꦸ​꧈​ꦢꦸꦃꦄꦭ꧀ꦭꦃꦏꦸ​꧈​ꦲꦏꦸ​ꦏꦼꦥꦺꦔꦶꦤ꧀ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦩꦸ​꧉”ꦭꦃ​ꦏꦸꦮꦶ​ꦤ꧀ꦢꦸꦢꦸꦃꦲꦏꦺꦲꦥ​ꦥꦫ​ꦱꦼꦢꦸꦭꦸꦂ​?ꦏꦸꦮꦶ​ꦤ꧀ꦢꦸꦤꦸꦁꦔꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦚꦶꦁꦏꦶꦂꦫꦏꦺꦕꦫꦤꦺ​ꦏꦸꦂꦧꦤ꧀ꦱꦶꦁ​ꦭꦮꦱ꧀ꦭꦤ꧀ꦢꦶꦒꦤ꧀ꦠꦶ​ꦏꦫꦺꦴ​ꦏꦸꦂꦧꦤ꧀ꦱꦶꦁ​ꦲꦚꦂ​꧉​ 10ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦮꦶꦱ꧀ꦢꦶꦉꦱꦶꦏ꧀ꦏꦶ​ꦱꦁꦏꦱꦏ꧀ꦲꦺꦤꦺꦁꦔꦺꦢꦺꦴꦱ​꧉​ꦏꦸꦮꦶ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀ ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦱꦿꦃꦲꦏꦺꦧꦢꦤ꧀ꦤꦺ​ꦢꦢꦶ​ꦏꦸꦂꦧꦤ꧀ ꦏꦸꦮꦶ​ꦤꦩꦸꦁ​ꦱꦼꦥꦶꦱ꧀ꦱꦤ꧀ꦏꦁꦒꦺꦴ​ꦱ꧀ꦭꦮꦱ꧀ꦱꦺ꧉​

11꧋ꦏꦼꦗꦧ​ꦱꦁꦏꦏꦸꦮꦶ​ꦥꦫ​ꦱꦼꦢꦸꦭꦸꦂ​꧈​ꦲꦶꦏꦶ​ꦢꦶꦥꦶꦏꦶꦂ​ꦗꦗꦭ꧀꧈​ꦲꦶꦩꦩ꧀ꦲꦶꦩꦩ꧀ꦙꦸ ꦢꦶꦤꦢꦶꦤꦤꦺꦥꦢ​ꦔꦸꦫꦸꦱ꧀ꦱꦶ​ꦏꦸꦮꦗꦶꦧ꧀ꦧꦤ꧀ꦤꦺ​ꦏꦫꦺꦴ​ꦔꦢꦼꦏ꧀ꦭꦤ꧀ꦪ​ꦥꦶꦁ​ꦥꦶꦫ​ꦮꦲꦺ​ꦩꦱꦿꦃꦲꦏꦺꦏꦸꦂꦧꦤ꧀ꦱꦶꦁ​ꦠꦸꦁꦒꦭ꧀ꦭꦺ​꧉​ꦤꦁꦔꦶꦁ​ꦏꦸꦂꦧꦤ꧀ꦏꦸꦂꦧꦤ꧀ꦏꦸꦮꦶ​ꦲꦺꦴꦫ​ꦧꦶꦱ​ꦲꦩ꧀ꦧꦸꦮꦁ​ꦢꦺꦴꦱ​꧉​ 12ꦭꦃ​ꦏꦿꦶꦱ꧀ꦡꦸꦱ꧀ꦤꦩꦸꦁ​ꦩꦱꦿꦃꦲꦏꦺꦏꦸꦂꦧꦤ꧀ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱ​ꦱꦼꦥꦶꦱ꧀ꦱꦤ꧀ꦏꦁꦒꦺꦴ​ꦱ꧀ꦭꦮꦱ꧀ꦱꦺ꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦢꦺꦏ꧀ꦤꦺꦠꦼꦫꦸꦱ꧀​ꦚ꧀ꦗꦒꦺꦴꦁꦤꦁꦱꦼꦧꦼꦭꦃꦲꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦺꦭꦸ​ꦔ꧀ꦮꦱꦤꦶ​ꦱꦼꦩ꧀ꦧꦫꦁ​꧉​ 13ꦏꦿꦶꦱ꧀ꦡꦸꦱ꧀ꦱꦲꦶꦏꦶ​ꦔꦼꦤ꧀ꦠꦺꦤ꧀ꦤꦶ​ꦮꦏ꧀ꦠꦸꦩꦸꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦼꦭꦸꦏ꧀ꦏꦏꦺꦩꦸꦁꦱꦸꦃꦲꦺ​ꦏꦧꦺꦃ​ꦭꦤ꧀ꦢꦶꦢꦢꦺꦏ꧀ꦏꦏꦺꦲꦚ꧀ꦕꦶꦏ꧀ꦲꦚ꧀ꦕꦶꦏ꧀ꦏꦤꦺ​ꦱꦶꦏꦶꦭ꧀꧈​ 14ꦢꦢꦶꦤꦺ​ꦏꦫꦺꦴ​ꦏꦸꦂꦧꦤ꧀ꦤꦩꦸꦁ​ꦱꦼꦥꦶꦱ꧀ꦱꦤ꧀ꦏꦿꦶꦱ꧀ꦡꦸꦱ꧀ꦔꦽꦱꦶꦏ꧀ꦏꦶ​ꦮꦺꦴꦁꦮꦺꦴꦁ​ꦱꦁꦏꦢꦺꦴꦱ​꧈​ꦱꦸꦥꦪ​ꦧꦶꦱ​ꦥꦤ꧀ꦠꦼꦱ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦧꦶꦱ​ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦱꦏ꧀ꦏꦧꦺꦃꦲꦺꦩꦫꦁ​ꦢꦺꦏ꧀ꦤꦺ꧉​

15꧋ꦫꦺꦴꦃ​ꦱꦸꦕꦶ​ꦪ​ꦮꦶꦱ꧀ꦚꦼꦏ꧀ꦱꦺꦏ꧀ꦏꦏꦺꦧꦧ꧀ꦲꦶꦏꦶ​ꦤꦁꦏꦶꦠꦧ꧀꧈​ꦒꦸꦱ꧀ꦠꦶ​ꦔꦺꦴꦩꦺꦴꦁꦔꦺꦤꦺ​:

16“ꦲꦶꦏꦶ​ꦥꦽꦗꦚ꧀ꦗꦶꦪꦤ꧀ꦱꦶꦁ​ꦲꦩ꧀ꦧꦺꦱꦸꦏ꧀ꦧꦏꦭ꧀ꦠꦏ꧀ꦒꦮꦺ​ꦏꦫꦺꦴ​ꦮꦺꦴꦁꦮꦺꦴꦁ​꧉​”

ꦒꦸꦱ꧀ꦠꦶ​ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:

“ꦲꦏꦸ​ꦧꦏꦭ꧀ꦤꦸꦭꦶꦱ꧀ꦲꦁꦒꦼꦂꦫꦁꦒꦼꦂꦏꦸꦲꦶꦁ​ꦲꦠꦶꦤꦺ​
ꦭꦤ꧀ꦧꦏꦭ꧀ꦠꦏ꧀ꦠꦤ꧀ꦢꦸꦂꦲꦶꦁ​ꦧꦠꦶꦤꦺ​꧉​”

17“ꦲꦏꦸ​ꦲꦺꦴꦫ​ꦧꦏꦭ꧀ꦔꦺꦭꦶꦁꦔꦏꦺꦱꦏ꧀ꦏꦺꦃꦲꦺꦢꦺꦴꦱꦤꦺ​ꦭꦤ꧀ꦱꦭꦃꦲꦺ​꧉​” 18ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦢꦺꦴꦱꦢꦺꦴꦱꦤꦺ​ꦭꦤ꧀ꦱꦭꦃꦱꦭꦃꦲꦺꦮꦶꦱ꧀ꦢꦶꦔꦥꦸꦫ꧈​ꦮꦶꦱ꧀ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦏꦸꦂꦧꦤ꧀ꦭꦶꦪꦤꦺ​ꦩꦼꦤꦺꦃ​ꦏꦁꦒꦺꦴ​ꦲꦩ꧀ꦧꦸꦮꦁ​ꦢꦺꦴꦱ​꧉​

꧋ꦚꦼꦢꦼꦏ꧀ꦏꦶꦒꦸꦱ꧀ꦠꦶ​ꦄꦭ꧀ꦭꦃ​꧉​

19꧋ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦩꦫ​ꦏꦫꦺꦴ​ꦏꦼꦤ꧀ꦢꦼꦭ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦔꦼꦂꦠꦺꦤ꧀ꦤꦶꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦤꦩ꧀ꦥ​ꦲꦮꦏ꧀ꦏꦺ​ꦢꦺꦮꦺ꧉​ 20ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀​ꦩ꧀ꦧꦸꦏꦏ꧀ꦏꦏꦺꦢꦭꦤ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦢꦭꦤ꧀ꦱꦶꦁ​ꦲꦚꦂ​ꦭꦤ꧀ꦱꦶꦁ​ꦲꦸꦫꦶꦥ꧀ ꦭꦶꦮꦠ꧀ꦏꦺꦴꦂꦢꦺꦤ꧀ꦱꦶꦁ​ꦩꦲꦸꦤꦺ​ꦔꦭꦁꦔꦭꦁꦔꦶꦲꦮꦏ꧀ꦏꦺ​ꦢꦺꦮꦺ꧈​ꦤꦁꦔꦶꦁ​ꦱꦲꦶꦏꦶ​ꦮꦶꦱ꧀ꦏꦱꦸꦮꦺꦏ꧀ꦭꦤ꧀ꦏꦼꦧꦸꦏꦏ꧀ ꦧꦉꦁ​ꦏꦫꦺꦴ​ꦥꦠꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦢꦺꦴꦁꦔꦺꦢꦺꦏ꧀ꦤꦺꦩꦱꦿꦃꦲꦏꦺꦧꦢꦤ꧀ꦤꦺ​ꦢꦢꦶ​ꦏꦸꦂꦧꦤ꧀ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀꧈​ 21ꦏꦫꦺꦴꦩꦼꦤꦺꦃ​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦤ꧀ꦢꦸꦮꦺꦲꦶꦩꦩ꧀ꦒꦼꦢꦺꦱꦶꦁ​ꦢꦢꦶ​ꦥꦼꦁꦒꦼꦢꦺꦤꦺꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 22ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦲꦠꦶ​ꦱꦶꦁ​ꦉꦱꦶꦏ꧀ꦭꦤ꧀ꦥꦼꦔꦤ꧀ꦢꦼꦭ꧀ꦱꦶꦁ​ꦩꦤ꧀ꦠꦼꦥ꧀꧈​ꦲ꦳ꦪꦸꦏ꧀ꦥꦢ​ꦩꦫ​ꦏꦫꦺꦴ​ꦲꦠꦶ​ꦱꦶꦁ​ꦮꦶꦱ꧀ꦲꦺꦴꦫ​ꦤ꧀ꦢꦸꦮꦺꦫꦱ​ꦱꦭꦃ​ꦭꦤ꧀ꦧꦢꦤ꧀ꦱꦶꦁ​ꦮꦶꦱ꧀ꦢꦶꦉꦱꦶꦏ꧀ꦏꦶ​ꦏꦫꦺꦴ​ꦧꦚꦸ​ꦱꦶꦁ​ꦠꦸꦱ꧀꧈​ 23ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦩꦤ꧀ꦠꦼꦥ꧀ꦠꦼꦤꦤ꧀ꦲꦶꦁ​ꦥꦼꦔꦉꦥ꧀ꦲꦉꦥ꧀ꦱꦶꦁ​ꦮꦶꦱ꧀ꦢꦶꦲꦏꦺꦴꦤ꧀ꦤꦶ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦔꦼꦏꦺꦏ꧀ꦏꦶꦗꦚ꧀ꦗꦶ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦲꦺꦴꦫ​ꦒꦺꦴꦫꦺꦴꦃ​꧈​ꦤꦁꦔꦶꦁ​ꦧꦏꦭ꧀ꦤꦸꦫꦸꦠ꧀ꦠꦶ​ꦗꦚ꧀ꦗꦶꦤꦺ​꧉​ 24ꦩꦸꦭꦤꦺ​꧈​ꦲ꦳ꦪꦸꦏ꧀ꦥꦢ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦱꦏ꧀ꦥꦢꦥꦢꦭꦤ꧀ꦥꦢ​ꦤꦸꦭꦸꦁ​ꦱꦏ꧀ꦥꦢꦥꦢ꧈​ꦏꦁꦒꦺꦴ​ꦠꦤ꧀ꦢꦏꦠꦿꦺꦱ꧀ꦤꦤ꧀ꦭꦤ꧀ꦏꦧꦼꦕꦶꦏ꧀ꦏꦤ꧀ꦩꦫꦁ​ꦱꦏ꧀ꦥꦢꦥꦢ꧉​ 25ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦏꦿꦸꦔꦸ​ꦲꦺꦤꦺꦁꦱꦼꦢꦸꦭꦸꦂ​ꦱꦶꦗꦶꦭꦺꦴꦫꦺꦴꦥꦢ​ꦱꦼꦤꦼꦁ​ꦩꦁꦏꦶꦂꦏꦸꦩ꧀ꦥꦸꦭ꧀ꦭꦤ꧀꧈​ꦏꦺꦴꦮꦺ​ꦲꦗ​ꦤꦶꦫꦸ​ꦠꦶꦤ꧀ꦢꦏ꧀ꦱꦶꦁ​ꦏꦪ​ꦔꦺꦴꦤꦺꦴ​꧈​ꦤꦁꦔꦶꦁ​ꦥꦢ​ꦱꦶꦁ​ꦠꦼꦩꦼꦤ꧀ꦤꦁꦏꦸꦩ꧀ꦥꦸꦭ꧀ꦭꦤ꧀ꦭꦤ꧀ꦩꦭꦃ​ꦥꦢ​ꦔꦺꦭꦶꦁꦔꦏꦺꦱꦏ꧀ꦥꦢꦥꦢ꧈​ꦱꦸꦥꦪ​ꦥꦢ​ꦠꦼꦩꦼꦤ꧀ꦲꦸꦒ​ꦔꦸꦁꦏꦸꦭ꧀ꦭꦶ​ꦮꦶꦔꦶꦮꦶꦔꦶ​꧈​ꦲꦮꦶꦠ꧀ꦲꦺꦴꦫ​ꦱꦸꦮꦶꦩꦼꦤꦺꦃ​ꦒꦸꦱ꧀ꦠꦶ​ꦧꦏꦭ꧀ꦠꦼꦏ​ꦭꦤ꧀ꦧꦏꦭ꧀ꦔꦿꦸꦠꦸꦏꦧꦺꦃ​ꦮꦺꦴꦁ​꧉​

26꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔꦺꦭꦶꦁꦔꦏꦺꦩꦫꦁ​ꦱꦏ꧀ꦥꦢꦥꦢ꧈​ꦱꦸꦥꦪ​ꦥꦢ​ꦩꦤ꧀ꦠꦼꦥ꧀ꦲꦶꦁ​ꦥꦼꦔꦤ꧀ꦢꦼꦭ꧀꧈​ꦲꦮꦶꦠ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦱꦩ꧀ꦥꦺꦏ꧀​ꦚ꧀ꦗꦫꦏ꧀​ꦔ꧀ꦒꦮꦺ​ꦢꦺꦴꦱ​ꦱꦏ꧀ꦮꦶꦱ꧀ꦱꦺ​ꦲꦮꦏ꧀ꦏꦺ​ꦢꦺꦮꦺꦢꦶꦏꦺꦏ꧀ꦏꦶꦏꦮꦼꦫꦸꦃꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦁꦏꦥꦶꦠꦸꦠꦸꦂꦫꦺ​꧈​ꦲꦺꦴꦫ​ꦧꦏꦭ꧀ꦲꦺꦤꦺꦁꦏꦸꦂꦧꦤ꧀ꦩꦼꦤꦺꦃ​ꦱꦶꦁ​ꦧꦶꦱ​ꦲꦩ꧀ꦧꦸꦮꦁ​ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ 27ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦤꦩꦸꦁ​ꦧꦶꦱ​ꦔꦉꦥ꧀ꦲꦉꦥ꧀ꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦔꦉꦥ꧀ꦲꦉꦥ꧀ꦒꦼꦤꦶ​ꦩꦸꦭꦏ꧀ꦩꦸꦭꦏ꧀ꦱꦶꦁ​ꦧꦏꦭ꧀ꦔꦺꦴꦧꦺꦴꦁ​ꦏꦧꦺꦃ​ꦮꦺꦴꦁ​ꦱꦶꦁ​ꦔ꧀ꦭꦮꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 28ꦢꦶꦥꦶꦏꦶꦂ​ꦥꦫ​ꦱꦼꦢꦸꦭꦸꦂ​!ꦱꦥ​ꦱꦶꦁ​ꦲꦺꦴꦫ​ꦩꦤꦸꦠ꧀ꦩꦫꦁ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦮꦲꦺ​ꦢꦶꦥꦠꦺꦤ꧀ꦤꦶ​ꦠꦤ꧀ꦥ​ꦮꦼꦭꦱ꧀ꦤꦺꦏ꧀ꦱꦩ꧀ꦥꦺꦏ꧀ꦏꦺꦴꦤꦁꦔꦤ꧀ꦱꦭꦃꦲꦺ​ꦱꦁꦏꦱꦼꦏ꧀ꦱꦶ​ꦭꦺꦴꦫꦺꦴ​ꦲꦥ​ꦠꦼꦭꦸ​꧉​ 29ꦭꦃ​ꦮꦺꦴꦁ​ꦱꦶꦁ​ꦱꦼꦩ꧀ꦧꦿꦤ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦤꦺꦃ​?ꦲꦸꦒ​ꦮꦺꦴꦁ​ꦱꦶꦁ​ꦚꦼꦥꦺꦭꦺꦏ꧀ꦏꦏꦺꦒꦼꦠꦶꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦢꦶꦲꦼꦁꦒꦺꦴ​ꦤꦼꦠꦼꦥ꧀ꦥꦏꦺꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦶꦁ​ꦮꦶꦱ꧀ꦔꦽꦱꦶꦏ꧀ꦏꦶ​ꦮꦺꦴꦁ​ꦏꦸꦮꦶ​ꦱꦁꦏꦢꦺꦴꦱ​꧉​ꦲꦸꦒ​ꦮꦺꦴꦁ​ꦱꦶꦁ​ꦱꦼꦩ꧀ꦧꦿꦤ​ꦏꦫꦺꦴ​ꦫꦺꦴꦃ​ꦱꦸꦕꦶ​ꦱꦶꦁ​ꦮꦶꦱ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦮꦺꦴꦁ​ꦏꦸꦮꦶ​꧉​ꦏꦪ​ꦔꦥ​ꦲꦧꦺꦴꦠ꧀ꦠꦺ​ꦱꦼꦠꦿꦥꦤ꧀ꦤꦺꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧉​ 30ꦲꦥ​ꦲꦮꦏ꧀ꦏꦺ​ ꦢꦺꦮꦺꦭꦭꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦔꦺꦴꦩꦺꦴꦁꦔꦺꦤꦺ​:“ꦲꦏꦸ​ꦱꦶꦁ​ꦧꦏꦭ꧀​ꦩ꧀ꦧꦊꦱ꧀ꦮꦺꦴꦁꦮꦺꦴꦁ​ꦭꦤ꧀ꦲꦏꦸ​ꦱꦶꦁ​ꦧꦏꦭ꧀ꦚꦼꦠꦿꦥ꧀꧉”ꦲꦸꦒ​ꦢꦺꦏ꧀ꦤꦺꦔꦺꦴꦩꦺꦴꦁ:“ꦲꦏꦸ​ꦱꦶꦁ​ꦧꦏꦭ꧀ꦔꦿꦸꦠꦸꦧꦁꦱꦏꦸ​꧉​” 31ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦗ​ꦱꦼꦩ꧀ꦧꦿꦤ​ꦭꦤ꧀ꦲꦗ​ꦱꦩ꧀ꦥꦺꦏ꧀ꦏꦺꦴꦮꦺ​ꦠꦶꦧ​ꦤꦁꦠꦔꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀ ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦚꦼꦠꦿꦥ꧀ꦮꦺꦴꦁ​ꦱꦶꦁ​ꦲꦭ​꧈​ꦲꦮꦶꦠ꧀ꦱꦼꦠꦿꦥꦤ꧀ꦏꦸꦮꦶ​ꦔ꧀ꦒꦶꦭꦤ꧀ꦤꦶꦭꦤ꧀​ꦔ꧀ꦒꦼꦒꦶꦫꦶꦱꦶ​ꦠꦼꦤꦤ꧀꧈​

꧋ꦥꦢ​ꦏꦼꦤ꧀ꦢꦼꦭ꧀ꦠꦼꦫꦸꦱ꧀꧈​

32꧋ꦢꦶꦥꦶꦏꦶꦂ​ꦢꦺꦏ꧀ꦗꦩꦤ꧀​ꦩ꧀ꦧꦶꦪꦺꦤ꧀ꦥꦫ​ꦱꦼꦢꦸꦭꦸꦂ​꧈​ꦢꦺꦴꦁꦔꦺꦏꦺꦴꦮꦺ​ꦩꦺꦴꦭꦃꦲꦶꦤꦸꦫꦸꦠ꧀ꦒꦸꦱ꧀ꦠꦶ​ꦭꦤ꧀ꦩꦺꦴꦭꦃꦲꦶꦢꦸꦤꦸꦁꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​;ꦱꦼꦤꦗꦤ꧀ꦏꦺꦴꦮꦺ​ꦔꦭꦩ꧀ꦩꦶ​ꦱꦏ꧀ꦮꦼꦂꦤꦤꦺ​ꦏꦔꦺꦭ꧀ꦭꦤ꧀ꦭꦤ꧀ꦏꦱꦁꦱꦫꦤ꧀ ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦏꦺꦴꦮꦺ​ꦩꦶꦏꦶꦂ​ꦤꦶꦁꦒꦭ꧀ꦥꦽꦕꦪꦩꦸ​꧈​ꦤꦁꦔꦶꦁ​ꦲꦩ꧀ꦧꦺꦴꦏ꧀ꦠꦼꦫꦸꦱ꧀ꦱꦏꦺꦱꦼꦤꦗꦤ꧀ꦲꦧꦺꦴꦠ꧀ꦠꦺ​ꦏꦪ​ꦔꦥ​꧉​ 33ꦢꦺꦴꦁꦢꦺꦴꦁꦔꦤ꧀ꦏꦺꦴꦮꦺ​ꦢꦶꦲꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦭꦤ꧀ꦢꦶꦒꦮꦺ​ꦠꦺꦴꦤ꧀ꦠꦺꦴꦤ꧀ꦤꦤ꧀ꦤꦁꦔꦉꦥ꧀ꦥꦺ​ꦮꦺꦴꦁ​ꦲꦺꦴꦏꦺꦃ꧈​ꦏꦺꦴꦮꦺ​ꦢꦶꦱꦁꦱꦫ​꧉​ꦢꦺꦴꦁꦢꦺꦴꦁꦔꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦱꦶꦁ​ꦢꦶꦒꦮꦺ​ꦏꦪ​ꦔꦺꦴꦤꦺꦴ​ꦭꦤ꧀ꦏꦺꦴꦮꦺ​ꦱꦶꦁ​ꦤꦸꦭꦸꦁꦔꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦭꦤ꧀ꦩꦺꦭꦸ​ꦚꦁꦒ​ꦏꦔꦺꦭ꧀ꦭꦤ꧀ꦤꦺ​꧉​ 34ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦢꦶꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀ꦗꦭꦂꦫꦤ꧀​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​꧈​ꦏꦺꦴꦮꦺ​ꦪ​ꦥꦢ​ꦩꦺꦭꦸ​ꦔꦿꦱꦏ꧀ꦏꦏꦺꦲꦧꦺꦴꦠ꧀ꦠꦺ​ꦭꦤ꧀ꦩꦺꦭꦸ​ꦤꦸꦭꦸꦁꦔꦶ​ꦱꦏ꧀ꦧꦶꦱꦧꦶꦱꦤꦺ꧉​ꦲꦸꦒ​ꦤꦺꦏ꧀ꦧꦫꦁꦧꦫꦁꦩꦸ​ꦢꦶꦫꦩ꧀ꦥꦱ꧀ꦗꦭꦂꦫꦤ꧀ꦏꦺꦴꦮꦺ​ꦤꦸꦫꦸꦠ꧀ꦒꦸꦱ꧀ꦠꦶ​꧈​ꦏꦺꦴꦮꦺ​ꦪ​ꦲꦺꦴꦫ​ꦱꦸꦱꦃ​꧈​ꦲꦮꦶꦠ꧀ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦤ꧀ꦢꦸꦮꦺꦧꦤ꧀ꦢꦱꦶꦁ​ꦭꦸꦮꦶꦃ​ꦒꦼꦢꦺꦲꦗꦶꦤꦺ​꧈​ꦱꦶꦁ​ꦲꦺꦴꦫ​ꦧꦏꦭ꧀ꦫꦸꦱꦏ꧀ꦱ꧀ꦭꦮꦱ꧀ꦱꦺ꧉​ 35ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦗ​ꦥꦢ​ꦱꦼꦩ꧀ꦥ꧀ꦭꦏ꧀ ꦲꦮꦶꦠ꧀ꦲꦸꦥꦃꦩꦸꦒꦼꦢꦺ꧉​ 36ꦤꦺꦏ꧀ꦏꦺꦴꦮꦺ​ꦏꦼꦥꦺꦔꦶꦤ꧀ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦤꦩ꧀ꦥ​ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦩꦫꦁ​ꦏꦺꦴꦮꦺ​꧈​ꦏꦺꦴꦮꦺ​ꦏꦸꦢꦸ​ꦱꦧꦂ​ꦭꦤ꧀ꦏꦸꦮꦠ꧀ꦠꦼꦫꦸꦱ꧀꧈​ꦤꦁꦏꦶꦠꦧ꧀ꦮꦸꦗꦸꦠ꧀ꦠꦺꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:

37“ꦲꦺꦴꦫ​ꦱꦸꦮꦶꦩꦼꦤꦺꦃ​ꦢꦺꦏ꧀ꦤꦺꦱꦶꦁ​ꦏꦸꦢꦸ​ꦠꦼꦏ​ꦪ​ꦧꦏꦭ꧀ꦠꦼꦏ​ꦠꦼꦤꦤ꧀꧈​
ꦢꦺꦏ꧀ꦤꦺꦲꦺꦴꦫ​ꦧꦏꦭ꧀ꦔꦼꦤ꧀ꦠꦺꦤ꧀ꦤꦶ​ꦱꦸꦮꦶꦩꦼꦤꦺꦃ​꧈​
ꦤꦁꦔꦶꦁ​ꦧꦏꦭ꧀​ꦤ꧀ꦢꦁꦠꦼꦏ​꧉​
38ꦲꦸꦩꦠ꧀ꦏꦸ​ꦱꦶꦁ​ꦧꦼꦤꦼꦂ​ꦲꦸꦫꦶꦥ꧀ꦥꦺꦗꦭꦂꦫꦤ꧀ꦥꦽꦕꦪ​ꦲꦶꦁ​ꦲꦏꦸ​꧉​
ꦤꦁꦔꦶꦁ​ꦤꦺꦏ꧀ꦱꦼꦩ꧀ꦥ꧀ꦭꦏ꧀ꦭꦤ꧀ꦲꦺꦴꦫ​ꦥꦽꦕꦪ​ꦩꦼꦤꦺꦃ​ꦩꦫꦁ​ꦲꦏꦸ​꧈​
ꦲꦏꦸ​ꦧꦏꦭ꧀ꦔꦼꦩꦺꦴꦃꦲꦶ​ꦮꦺꦴꦁ​ꦏꦸꦮꦶ​꧉​”

39ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦏꦪ​ꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​꧉​ꦲꦮꦏ꧀ꦏꦺ​ꦢꦺꦮꦺꦢꦸꦢꦸ​ꦮꦺꦴꦁ​ꦱꦶꦁ​ꦩꦤ꧀ꦢꦼꦏ꧀ꦢꦭꦤ꧀ꦭꦤ꧀ꦏꦼꦱꦱꦂ​꧈​ꦲꦺꦴꦫ​꧉​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦺꦴꦁ​ꦱꦶꦁ​ꦥꦽꦕꦪ​ꦭꦤ꧀ꦗꦭꦂꦫꦤ꧀ꦥꦽꦕꦪ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀꧈​

↑ ↑ ↑


꧋ꦥꦽꦕꦪ​ꦏꦸꦮꦶ​ꦲꦥ​ꦠꦼꦒꦼꦱ꧀ꦱꦺ​?꧉​

꧇​꧑꧑꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦮꦶꦱ꧀ꦔꦺꦴꦩꦺꦴꦁꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦥꦽꦕꦪ​ꦠꦼꦫꦸꦱ꧀ꦩꦫꦁ​ꦒꦸꦱ꧀ꦠꦶ​꧈​ꦱꦼꦤꦗꦤ꧀ꦲꦧꦺꦴꦠ꧀ꦠꦺ​ꦭꦤ꧀ꦲꦔꦺꦭ꧀ꦭꦺ​ꦏꦪ​ꦔꦥ​꧉​ꦭꦃ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦥ​ꦠ​ꦠꦼꦒꦼꦱ꧀ꦱꦺ​?ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦠꦼꦒꦼꦱ꧀ꦱꦺ​ꦩꦔꦼꦂꦠꦺꦤ꧀ꦤꦶꦠꦼꦤꦤ꧀ꦤꦺꦏ꧀ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦶꦁ​ꦢꦶꦲꦉꦥ꧀ꦲꦉꦥ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦩꦼꦱ꧀ꦠꦶꦧꦏꦭ꧀ꦢꦶꦠꦸꦫꦸꦠ꧀ꦠꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦥꦽꦕꦪ​ꦏꦸꦮꦶ​ꦠꦼꦒꦼꦱ꧀ꦱꦺ​ꦩꦔꦼꦂꦠꦺꦤ꧀ꦤꦶꦤꦺꦏ꧀ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦧꦏꦭ꧀​ꦏ꧀ꦭꦏꦺꦴꦤ꧀ꦪ​ꦧꦏꦭ꧀​ꦏ꧀ꦭꦏꦺꦴꦤ꧀ꦠꦼꦤꦤ꧀ ꦱꦼꦤꦗꦤ꧀ꦩꦿꦶꦥꦠ꧀ꦢꦸꦫꦸꦁ​ꦮꦼꦫꦸꦃ​꧉​ 2ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦥꦢ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦢ​ꦤ꧀ꦢꦢꦺꦏ꧀ꦏꦏꦺꦊꦒꦤꦺꦲꦠꦶꦤꦺ​꧉​

3꧋ꦱꦼꦩꦺꦴꦤꦺꦴ​ꦲꦸꦒ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦭꦤ꧀ꦢꦼꦥ꧀ꦥꦺꦲꦶꦏꦶ​ꦲꦺꦤꦺꦁꦔꦺꦱꦁꦏꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦱꦼꦩ꧀ꦧꦫꦁ​ꦱꦶꦁ​ꦲꦺꦤꦺꦁꦭꦤ꧀ꦱꦶꦁ​ꦏꦺꦠꦺꦴꦏ꧀ꦩꦿꦶꦥꦠ꧀ꦏꦸꦮꦶ​ꦏꦼꦥꦿꦶꦪꦺ​ꦠꦼꦏꦤꦺ​꧈​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦢꦸꦤꦸꦁ꧈​ꦤꦩꦸꦁ​ꦔꦼꦂꦠꦶ​ꦤꦺꦏ꧀ꦠꦼꦏꦤꦺ​ꦱꦁꦏꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

4꧋ꦥꦫꦱꦼꦢꦸꦭꦸꦂ꧈​ꦏꦁꦒꦺꦴꦤ꧀ꦢꦸꦤꦸꦁꦔꦏꦺꦧꦧ꧀ꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦲꦶꦏꦶꦕꦺꦴꦤ꧀ꦠꦺꦴꦤꦺꦲꦺꦴꦏꦺꦃꦧꦔꦼꦠ꧀꧈​ꦏꦥꦶꦁꦥꦶꦱꦤ꧀ ꦢꦶꦥꦶꦏꦶꦂꦄꦧꦺꦭ꧀꧈​ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃ꧈​ꦢꦺꦏ꧀ꦤꦺꦔꦼꦂꦠꦶꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦧꦶꦱꦔ꧀ꦒꦮꦏꦸꦂꦧꦤ꧀ꦱꦶꦁꦢꦶꦱꦼꦤꦼꦁꦔꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧈​ꦧꦺꦢꦏꦫꦺꦴꦏꦸꦂꦧꦤ꧀ꦤꦺꦏꦆꦤ꧀꧈​ꦭꦤ꧀ꦗꦭꦂꦫꦤ꧀ꦄꦧꦺꦭ꧀ꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦢꦺꦏ꧀ꦤꦺꦢꦶꦱꦼꦤꦼꦁꦔꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦏꦸꦂꦧꦤ꧀ꦤꦺꦏꦼꦠꦩ꧀ꦥ꧉​ꦢꦢꦶꦤꦺꦱꦼꦤꦗꦤ꧀ꦱꦲꦶꦏꦶ ꦢꦺꦏ꧀ꦤꦺꦮꦶꦱ꧀ꦩꦠꦶꦏꦪꦏꦪꦱ꧀ꦮꦫꦤꦺꦄꦧꦺꦭ꧀ꦲꦶꦗꦶꦏ꧀ꦔꦺꦴꦩꦺꦴꦁꦔꦶꦲꦮꦏ꧀ꦏꦺꦢꦺꦮꦺꦏꦺꦴꦁꦏꦺꦴꦤ꧀​ꦔ꧀ꦭꦏꦺꦴꦤ꧀ꦤꦶꦏꦪꦢꦺꦏ꧀ꦤꦺ꧉​

5꧋ꦏꦥꦶꦁ​ꦥꦶꦤ꧀ꦢꦺꦴꦤꦺꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦲ꦳ꦺꦤꦺꦴꦏ꧀꧈​ꦗꦭꦂꦫꦤ꧀ꦲ꦳ꦺꦤꦺꦴꦏ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦏ꧀ꦤꦺꦢꦶꦗꦶꦏꦸꦏ꧀ꦲꦸꦫꦶꦥ꧀ꦲꦸꦫꦶꦥ꧀ꦥꦤ꧀ꦱꦁꦏꦧꦸꦩꦶ​ꦏꦺꦤꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦤ꧀ꦥ​ꦩꦠꦶ​꧉​ꦢꦢꦶꦤꦺ​ꦢꦺꦏ꧀ꦤꦺꦪ​ꦲꦺꦴꦫ​ꦧꦶꦱ​ꦏꦼꦠꦼꦩꦸ​꧈​ꦲꦮꦶꦠ꧀ꦢꦺꦏ꧀ꦤꦺꦢꦶꦗꦶꦏꦸꦏ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦶꦠꦧ꧀ꦔꦺꦴꦩꦺꦴꦁꦔꦶꦲꦮꦏ꧀ꦏꦺ​ꦢꦺꦮꦺꦤꦺꦏ꧀ꦲꦸꦫꦶꦥ꧀ꦥꦺꦲ꦳ꦺꦤꦺꦴꦏ꧀ ꦱꦏ꧀ꦢꦸꦫꦸꦁꦔꦺꦢꦺꦏ꧀ꦤꦺꦢꦶꦗꦶꦏꦸꦏ꧀ꦱꦁꦏꦧꦸꦩꦶ​ꦏꦺꦤꦺ​꧈​ꦤ꧀ꦢꦢꦺꦏ꧀ꦏꦏꦺꦱꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 6ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦢꦸꦤꦸꦁꦤꦺꦏ꧀ꦮꦺꦴꦁ​ꦲꦺꦴꦫ​ꦧꦶꦱ​ꦤ꧀ꦢꦢꦺꦏ꧀ꦏꦏꦺꦱꦼꦤꦼꦁꦔꦺ​ꦲꦠꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦺꦏ꧀ꦲꦺꦴꦫ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦱꦥ​ꦱꦶꦁ​ꦏꦼꦥꦺꦔꦶꦤ꧀ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦢꦸ​ꦥꦽꦕꦪ​ꦤꦺꦏ꧀ꦢꦺꦏ꧀ꦤꦺꦲꦺꦤꦺꦁꦭꦤ꧀ꦏꦸꦢꦸ​ꦥꦽꦕꦪ​ꦲꦸꦒ​ꦤꦺꦏ꧀ꦢꦺꦏ꧀ꦤꦺꦔꦸꦥꦃꦲꦶꦮꦺꦴꦁ​ꦱꦶꦁ​ꦩꦫ​ꦔ꧀ꦒꦺꦴꦭꦺꦏ꧀ꦏꦶ​ꦢꦺꦏ꧀ꦤꦺꦏꦤ꧀ꦠꦶꦠꦼꦤꦤ꧀ꦤꦤ꧀꧈​

7꧋ꦏꦥꦶꦁ​ꦠꦼꦭꦸꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦺꦭꦶꦁꦔꦤ꧀ꦤꦧꦶ​ꦟꦺꦴꦮꦃ꧉​ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦤꦸꦠ꧀ꦤꦸꦫꦸꦠ꧀ꦠꦶ​ꦲꦥ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦶꦤꦧꦶ​ꦟꦺꦴꦮꦃꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦔꦼꦢꦸꦤ꧀ꦤꦏꦺꦲꦸꦢꦤ꧀ꦒꦼꦢꦺꦱꦶꦁ​ꦧꦏꦭ꧀ꦔꦼꦊꦥ꧀ꦥꦏꦺꦧꦸꦩꦶ​ꦭꦤ꧀ꦩꦠꦺꦤ꧀ꦤꦶ​ꦱꦼꦩ꧀ꦧꦫꦁ​ꦱꦶꦁ​ꦲꦸꦫꦶꦥ꧀꧈​ꦩꦸꦭꦤꦺ​ꦤꦧꦶ​ꦟꦺꦴꦮꦃꦢꦶꦏꦺꦴꦁꦏꦺꦴꦤ꧀​ꦔ꧀ꦒꦮꦺ​ꦏꦥꦭ꧀ ꦱꦸꦥꦪ​ꦢꦺꦏ꧀ꦤꦺꦱꦏ꧀ꦧꦿꦪꦠ꧀ꦠꦺ​ꦧꦶꦱ​ꦱ꧀ꦭꦩꦼꦠ꧀꧈​ꦱꦼꦤꦗꦤ꧀ꦢꦸꦫꦸꦁ​ꦮꦼꦫꦸꦃ​ꦲꦸꦢꦤ꧀ꦤꦺ​꧈​ꦤꦧꦶ​ꦟꦺꦴꦮꦃꦥꦽꦕꦪ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦔ꧀ꦒꦮꦺ​ꦏꦥꦭ꧀ꦭꦺ​꧉​ꦢꦢꦶꦤꦺ​ꦮꦺꦴꦁꦮꦺꦴꦁ​ꦭꦶꦪꦤꦺ​ꦥꦢ​ꦩꦠꦶ​꧈​ꦗꦭꦂꦫꦤ꧀ꦱꦁꦏꦱꦭꦃꦲꦺ​ꦢꦺꦮꦺ꧈​ꦤꦁꦔꦶꦁ​ꦤꦧꦶ​ꦟꦺꦴꦮꦃꦢꦶꦲꦁꦒꦼꦥ꧀ꦧꦼꦤꦼꦂ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​꧉​

8꧋ꦏꦥꦶꦁ​ꦥꦥꦠ꧀ꦥꦫ​ꦱꦼꦢꦸꦭꦸꦂ​꧉​ꦏꦺꦴꦮꦺ​ꦏꦧꦺꦃ​ꦔꦼꦂꦠꦶ​ꦊꦭꦏꦺꦴꦤꦺ​ꦧꦥ​ꦄꦨꦿꦲꦩ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦩꦫꦁ​ꦧꦥ​ꦄꦨꦿꦲꦩ꧀ꦏꦺꦴꦁꦏꦺꦴꦤ꧀ꦤꦶꦁꦒꦭ꧀ꦲꦺꦴꦩꦃꦲꦺ​ꦭꦤ꧀ꦏꦸꦢꦸ​ꦭꦸꦔ​ꦤꦁꦭꦶꦪ​ꦤꦼꦒꦫ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦩꦫꦁ​ꦧꦥ​ꦄꦨꦿꦲꦩ꧀ꦤꦺꦏ꧀ꦲꦩ꧀ꦧꦺꦱꦸꦏ꧀ꦏꦺ​ꦤꦼꦒꦫ​ꦏꦸꦮꦶ​ꦧꦏꦭ꧀ꦢꦶꦏꦺꦏ꧀ꦏꦏꦺꦩꦫꦁ​ꦢꦺꦏ꧀ꦤꦺꦭꦤ꧀ꦠꦸꦫꦸꦤ꧀ꦠꦸꦫꦸꦤꦤ꧀ꦤꦺ꧉​ꦧꦥ​ꦄꦨꦿꦲꦩ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦢꦺꦏ꧀ꦤꦺꦩꦤꦸꦠ꧀ꦭꦤ꧀ꦧꦸꦢꦭ꧀ ꦱꦼꦤꦗꦤ꧀ꦢꦺꦏ꧀ꦤꦺꦲꦺꦴꦫ​ꦔꦼꦂꦠꦶ​ꦤꦁꦲꦼꦤ꧀ꦢꦶ​ꦥꦫꦤ꧀ꦤꦺ​꧉​ 9ꦗꦭꦂꦫꦤ꧀ꦧꦥ​ꦄꦨꦿꦲꦩ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦺꦏ꧀ꦤꦺꦧꦶꦱ​ꦩꦁꦒꦺꦴꦤ꧀ꦤꦁꦤꦼꦒꦫ​ꦏꦸꦮꦶ​ꦏꦪ​ꦮꦺꦴꦁ​ꦚ꧀ꦗꦧ​꧈​ꦱꦼꦤꦗꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦗꦚ꧀ꦗꦶ​ꦩꦫꦁ​ꦢꦺꦏ꧀ꦤꦺ꧈​ꦤꦺꦏ꧀ꦤꦼꦒꦫ​ꦏꦸꦮꦶ​ꦧꦏꦭ꧀ꦮꦺꦏ꧀ꦏꦺꦢꦺꦏ꧀ꦤꦺ꧉​ꦧꦥ​ꦄꦨꦿꦲꦩ꧀ꦩꦁꦒꦺꦴꦤ꧀ꦤꦁꦲꦺꦴꦩꦃ​ꦭꦸꦭꦁ​꧈​ꦱꦼꦩꦺꦴꦤꦺꦴ​ꦲꦸꦒ​ꦲꦤꦏ꧀ꦏꦺ​꧈​ꦪꦏꦸꦮꦶ​ꦆꦱꦏ꧀ꦭꦤ꧀ꦲꦸꦒ​ꦥꦸꦠꦸꦤꦺ​꧈​ꦪꦏꦸꦮꦶ​ꦪꦏꦸꦧ꧀ ꦲꦮꦶꦠ꧀ꦲꦸꦒ​ꦥꦢ​ꦤꦩ꧀ꦥ​ꦥꦽꦗꦚ꧀ꦗꦶꦪꦤ꧀ꦏꦸꦮꦶ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ 10ꦧꦥ​ꦄꦨꦿꦲꦩ꧀ꦒꦼꦊꦩ꧀ꦩꦁꦒꦺꦴꦤ꧀ꦤꦁꦲꦺꦴꦩꦃ​ꦭꦸꦭꦁ​꧈​ꦗꦭꦂꦫꦤ꧀ꦢꦺꦏ꧀ꦤꦺꦔꦼꦂꦠꦶ​ꦤꦺꦏ꧀ꦲꦶꦁ​ꦠꦼꦩ꧀ꦧꦺ​ꦢꦺꦏ꧀ꦤꦺꦧꦏꦭ꧀ꦩꦁꦒꦺꦴꦤ꧀ꦤꦁꦏꦸꦠꦒꦮꦺꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧈​ꦏꦸꦠꦩꦶꦠꦸꦫꦸꦠ꧀ꦥꦶꦏꦶꦂꦫꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦭꦤ꧀ꦏꦸꦠꦱꦶꦁ​ꦥꦺꦴꦤ꧀ꦢꦱꦶꦤꦺꦲꦺꦴꦫ​ꦲ꦳ꦺꦴꦪꦏ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​

11-12꧋ꦏꦺꦴꦮꦺ​ꦲꦸꦒ​ꦔꦼꦂꦠꦶ​ꦊꦭꦏꦺꦴꦤꦺ​ꦧꦥ​ꦄꦨꦿꦲꦩ꧀ꦭꦤ꧀ꦲꦶꦧꦸ​ꦱꦫꦃ​꧉​ꦧꦥ​ꦄꦨꦿꦲꦩ꧀ꦮꦶꦱ꧀ꦠꦸꦮ​ꦧꦔꦼꦠ꧀ꦭꦤ꧀ꦲꦶꦧꦸ​ꦱꦫꦃ​ꦲꦺꦴꦫ​ꦧꦶꦱ​ꦤ꧀ꦢꦸꦮꦺꦲꦤꦏ꧀꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦗꦚ꧀ꦗꦶ​ꦩꦫꦁ​ꦧꦥ​ꦄꦨꦿꦲꦩ꧀ꦤꦺꦏ꧀ꦢꦺꦏ꧀ꦤꦺꦭꦤ꧀ꦲꦶꦧꦸ​ꦱꦫꦃ​ꦧꦏꦭ꧀​ꦤ꧀ꦢꦸꦮꦺꦲꦤꦏ꧀꧈​ꦧꦥ​ꦄꦨꦿꦲꦩ꧀ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦸꦫꦸꦠ꧀ꦠꦶ​ꦗꦚ꧀ꦗꦶꦤꦺ​꧈​ꦩꦸꦭꦤꦺ​ꦮꦺꦴꦁ​ꦱꦶꦗꦶ​ꦠꦼꦫꦸꦱ꧀ꦧꦶꦱ​ꦠꦸꦫꦸꦤ꧀ꦠꦸꦩꦸꦫꦸꦤ꧀ꦢꦢꦶ​ꦥꦶꦫꦁꦥꦶꦫꦁ​꧈​ꦲꦺꦴꦫ​ꦏꦼꦤꦺꦁꦢꦶꦲꦶꦠꦸꦁ꧈​ꦏꦪ​ꦭꦶꦤ꧀ꦠꦁꦭꦶꦤ꧀ꦠꦁ​ꦤꦁꦭꦔꦶꦠ꧀ꦭꦤ꧀ꦱꦤ꧀ꦠꦶꦤꦁꦥꦶꦁꦒꦶꦂ​ꦭꦫ꧈​ꦱꦼꦤꦗꦤ꧀ꦮꦺꦴꦁꦔꦺ​ꦮꦶꦱ꧀ꦠꦸꦮ​ꦭꦤ꧀ꦓꦫꦺꦏ꧀ꦩꦠꦶꦤꦺ​꧉​

13꧋ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​ꦪ​ꦥꦽꦕꦪ​ꦠꦼꦫꦸꦱ꧀ꦠꦼꦏꦤ꧀ꦥꦠꦶꦤꦺ​꧉​ꦢꦺꦴꦁꦔꦺꦩꦠꦶ​ꦪ​ꦢꦸꦫꦸꦁ​ꦤꦩ꧀ꦥ​ꦥꦽꦏꦫꦥꦽꦏꦫ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦩꦸꦁ​ꦥꦢ​ꦚꦮꦁ​ꦱꦁꦏꦏꦢꦺꦴꦃꦲꦤ꧀ꦭꦤ꧀ꦔꦉꦥ꧀ꦲꦉꦥ꧀ꦏꦫꦺꦴ​ꦧꦸꦔꦃ​꧉​ꦮꦺꦴꦁꦮꦺꦴꦁ​ꦩꦲꦸ​ꦲꦺꦴꦫ​ꦲꦶꦱꦶꦤ꧀ꦔꦏꦺꦴꦤ꧀ꦤꦶ​ꦤꦺꦏ꧀ꦤꦁꦤꦼꦒꦫ​ꦏꦸꦮꦶ​ꦤꦩꦸꦁ​ꦏꦪ​ꦮꦺꦴꦁ​ꦚ꧀ꦗꦧ​꧈​ꦏꦪ​ꦮꦺꦴꦁ​ꦩꦩ꧀ꦥꦶꦂ​꧈​ꦲꦺꦴꦫ​ꦮꦺꦴꦁ​ꦱꦶꦁ​ꦩꦁꦒꦺꦴꦤ꧀ꦏꦺꦴꦤꦺꦴ​ꦱ꧀ꦭꦮꦱ꧀ꦱꦺ꧉​ 14ꦮꦺꦴꦁ​ꦱꦶꦁ​ꦔꦏꦺꦴꦤ꧀ꦤꦶ​ꦔꦺꦴꦤꦺꦴ​ꦏꦸꦮꦶ​ꦤ꧀ꦢꦸꦢꦸꦃꦲꦏꦺꦤꦺꦏ꧀ꦥꦢ​ꦔꦉꦥ꧀ꦲꦉꦥ꧀ꦩꦁꦒꦺꦴꦤ꧀ꦤꦁꦤꦼꦒꦫꦤꦺ​ꦢꦺꦮꦺ꧉​ 15ꦮꦺꦴꦁꦮꦺꦴꦁ​ꦩꦲꦸ​ꦲꦺꦴꦫ​ꦥꦢ​ꦏꦁꦔꦼꦤ꧀ꦩꦫꦁ​ꦤꦼꦒꦫ​ꦱꦶꦁ​ꦢꦶꦠꦶꦁꦒꦭ꧀ ꦲꦮꦶꦠ꧀ꦱꦼꦩꦸꦁꦒꦺꦴꦤ꧀ꦤꦺꦏꦁꦔꦼꦤ꧀ꦔꦺꦴꦤꦺꦴ​ꦩꦼꦱ꧀ꦠꦶꦪ​ꦮꦶꦱ꧀ꦧꦭꦶꦏ꧀ꦩꦼꦤꦺꦃ​ꦤꦁꦤꦼꦒꦫꦤꦺ​ꦩꦲꦸꦤꦺ​꧉​ 16ꦤꦁꦔꦶꦁꦮꦸꦗꦸꦠ꧀ꦠꦺꦲꦺꦴꦫꦔꦺꦴꦤꦺꦴ꧉​ꦮꦺꦴꦁꦮꦺꦴꦁꦩꦲꦸꦩꦭꦃꦥꦢꦔꦉꦥ꧀ꦲꦉꦥ꧀ꦩꦁꦒꦺꦴꦤ꧀ꦤꦁꦤꦼꦒꦫꦱꦶꦁꦭꦸꦮꦶꦃꦲꦥꦶꦏ꧀ ꦤꦼꦒꦫꦤꦁꦱ꧀ꦮꦂꦒ꧉​ꦩꦸꦭꦤꦺꦒꦸꦱ꧀ꦠꦶꦄꦭ꧀ꦭꦃ ꦪꦲꦺꦴꦫꦲꦶꦱꦶꦤ꧀ ꦩꦭꦃꦧꦸꦔꦃꦢꦶꦲꦫꦤ꧀ꦤꦶꦒꦸꦱ꧀ꦠꦶꦄꦭ꧀ꦭꦃꦲꦺꦮꦺꦴꦁꦮꦺꦴꦁꦩꦲꦸ꧈​ꦲꦮꦶꦠ꧀ꦒꦸꦱ꧀ꦠꦶꦄꦭ꧀ꦭꦃꦢꦺꦮꦺꦱꦶꦁꦔ꧀ꦒꦮꦺꦏ꧀ꦏꦏꦺꦏꦸꦠꦏꦁꦒꦺꦴꦮꦺꦴꦁꦮꦺꦴꦁꦩꦲꦸ꧉​

17꧋ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦢꦺꦴꦁꦔꦺꦧꦥ​ꦄꦨꦿꦲꦩ꧀ꦔꦸꦂꦧꦤ꧀ꦤꦏꦺꦲꦤꦏ꧀ꦏꦺ​꧈​ꦪꦏꦸꦮꦶ​ꦆꦱꦏ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦗꦚ꧀ꦗꦶ​ꦩꦫꦁ​ꦧꦥ​ꦄꦨꦿꦲꦩ꧀ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦢꦶꦏꦺꦏ꧀ꦏꦶꦠꦸꦫꦸꦤ꧀ꦤꦤ꧀ꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦲꦶꦠꦸꦁ꧈​ꦩꦸꦭꦤꦺ​ꦪ​ꦠꦼꦫꦸꦱ꧀ꦆꦱꦏ꧀ꦭꦲꦶꦂ​꧉​ꦭꦃ​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦏ꧀ꦠꦼꦫꦸꦱ꧀ꦔꦺꦴꦩꦺꦴꦁꦏꦫꦺꦴ​ꦧꦥ​ꦄꦨꦿꦲꦩ꧀ꦏꦺꦴꦁꦏꦺꦴꦤ꧀ꦩꦱꦿꦃꦲꦏꦺꦆꦱꦏ꧀ꦢꦢꦶ​ꦏꦸꦂꦧꦤ꧀?ꦩꦼꦏ꧀ꦱ​ꦧꦥ​ꦄꦨꦿꦲꦩ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦺꦏ꧀ꦤꦺꦩꦱꦿꦃꦲꦏꦺꦲꦤꦏ꧀ꦏꦺ​ꦱꦶꦁ​ꦲꦺꦴꦫ​ꦲꦺꦤꦺꦁꦠꦸꦁꦒꦭ꧀ꦭꦺ​꧉​ 18ꦩꦁꦏ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦺꦴꦩꦺꦴꦁꦏꦫꦺꦴ​ꦧꦥ​ꦄꦨꦿꦲꦩ꧀ ꦤꦺꦏ꧀ꦤꦩꦸꦁ​ꦠꦸꦫꦸꦤ꧀ꦤꦤ꧀ꦤꦺ​ꦆꦱꦏ꧀ꦱꦶꦁ​ꦢꦶꦲꦁꦒꦼꦥ꧀ꦢꦢꦶ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀꧈​ 19ꦤꦁꦔꦶꦁ​ꦧꦥ​ꦄꦨꦿꦲꦩ꧀ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦔꦸꦫꦶꦥ꧀ꦥꦏꦺꦆꦱꦏ꧀ꦱꦁꦏꦥꦠꦶ​꧉​ꦤꦺꦏ꧀ꦢꦶꦥꦶꦏꦶꦂ​ꦪ​ꦏꦼꦤꦺꦁꦢꦶꦲꦫꦤ꧀ꦤꦶ​꧈​ꦤꦺꦏ꧀ꦧꦥ​ꦄꦨꦿꦲꦩ꧀ꦤꦩ꧀ꦥ​ꦲꦤꦏ꧀ꦏꦺ​꧈​ꦪꦏꦸꦮꦶ​ꦆꦱꦏ꧀ ꦲꦸꦫꦶꦥ꧀ꦩꦼꦤꦺꦃ​ꦱꦁꦏꦥꦠꦶ​꧉​

20꧋ꦏꦥꦶꦁ​ꦭꦶꦩꦤꦺ​ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦲꦼꦁꦒꦺꦴꦤꦺ​ꦆꦱꦏ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦆꦱꦏ꧀ꦲꦩ꧀ꦧꦼꦂꦏꦃꦲꦶ​ꦲꦤꦏ꧀ꦏꦺ​ꦫꦒꦶꦭ꧀ꦪꦏꦸꦧ꧀ꦭꦤ꧀ꦲꦤꦏ꧀ꦏꦺ​ꦲꦩ꧀ꦧꦉꦥ꧀ꦌꦱꦲꦸ​꧉​ꦆꦱꦏ꧀ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦧꦏꦭ꧀ꦲꦩ꧀ꦧꦼꦂꦏꦃꦲꦶ​ꦪꦏꦸꦧ꧀ꦭꦤ꧀ꦌꦱꦲꦸ​ꦭꦤ꧀ꦠꦸꦫꦸꦤ꧀ꦤꦤ꧀ꦤꦺ​ꦲꦶꦁ​ꦠꦼꦩ꧀ꦧꦺ​꧉​

21꧋ꦏꦥꦶꦁ​ꦤꦼꦤꦼꦩ꧀ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦧꦧ꧀ꦧꦼꦂꦏꦃꦲꦺ​ꦪꦏꦸꦧ꧀꧈​ꦢꦺꦴꦁꦔꦺꦲꦉꦥ꧀ꦩꦠꦶ​ꦢꦺꦏ꧀ꦤꦺꦲꦩ꧀ꦧꦼꦂꦏꦃꦲꦶ​ꦲꦤꦏ꧀ꦏꦺ​ꦪꦺꦴꦱꦺꦥ꦳꧀ꦏꦧꦺꦃ​ꦭꦺꦴꦫꦺꦴ​꧈​ꦲꦮꦶꦠ꧀ꦢꦺꦏ꧀ꦤꦺꦥꦽꦕꦪ​ꦲꦶꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦮꦶꦱ꧀ꦗꦚ꧀ꦗꦶ​꧈​ꦤꦺꦏ꧀ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦧꦏꦭ꧀ꦲꦺꦴꦫ​ꦏꦼꦤꦺꦁꦢꦶꦲꦶꦠꦸꦁ꧉​ꦪꦏꦸꦧ꧀ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦸꦫꦸꦠ꧀ꦠꦶ​ꦗꦚ꧀ꦗꦶ​ꦲꦶꦏꦶ​ꦲꦸꦒ​ꦭꦶꦮꦠ꧀ꦲꦤꦏ꧀ꦏꦺ​ꦪꦺꦴꦱꦺꦥ꦳꧀ ꦩꦸꦭꦤꦺ​ꦱꦼꦤꦗꦤ꧀ꦪꦏꦸꦧ꧀ꦮꦶꦱ꧀ꦠꦸꦮ​ꦧꦔꦼꦠ꧀ ꦢꦺꦏ꧀ꦤꦺꦔꦢꦼꦏ꧀ꦱꦼꦩꦺꦤ꧀ꦢꦺꦠꦼꦏꦼꦤꦺ​ꦭꦤ꧀ꦔꦧꦼꦏ꧀ꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

22꧋ꦏꦥꦶꦁ​ꦥꦶꦠꦸꦤꦺ​ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦥꦼꦔꦤ꧀ꦢꦼꦭ꧀ꦭꦺ​ꦪꦺꦴꦱꦺꦥ꦳꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦏ꧀ꦢꦸꦫꦸꦁꦔꦺꦩꦠꦶ​ꦪꦺꦴꦱꦺꦥ꦳꧀ꦔꦺꦴꦩꦺꦴꦁꦔꦏꦺꦧꦧ꧀ꦭꦸꦔꦤꦺ​ꦧꦁꦱ​ꦆꦱꦿꦌꦭ꧀ꦱꦁꦏꦤꦼꦒꦫ​ꦌꦒꦶꦥ꧀ꦠꦼ꧉​ꦗꦭꦂꦫꦤ꧀ꦪꦺꦴꦱꦺꦥ꦳꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦺꦏ꧀ꦤꦺꦤꦶꦁꦒꦭ꧀ꦮꦼꦏꦱ꧀ ꦏꦺꦴꦁꦏꦺꦴꦤ꧀​ꦔ꧀ꦒꦮ​ꦧꦢꦤ꧀ꦤꦺ​ꦢꦺꦏ꧀ꦤꦺ꧉​

23꧋ꦏꦥꦶꦁ​ꦮꦺꦴꦭꦸꦤꦺ​ꦥꦫ​ꦱꦼꦢꦸꦭꦸꦂ​꧈​ꦢꦶꦲꦺꦭꦶꦁ​ꦥꦼꦔꦤ꧀ꦢꦼꦭ꧀ꦭꦺ​ꦮꦺꦴꦁ​ꦠꦸꦮꦤꦺ​ꦤꦧꦶ​ꦩꦺꦴꦱꦼꦱ꧀꧈​ꦏꦺꦴꦮꦺ​ꦔꦼꦂꦠꦶ​꧈​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦫꦠꦸꦤꦺ​ꦤꦼꦒꦫ​ꦌꦒꦶꦥ꧀ꦠꦼꦔ꧀ꦒꦮꦺ​ꦮꦺꦠ꧀ꦤꦺꦏ꧀ꦏꦧꦺꦃ​ꦧꦺꦴꦕꦃ​ꦧꦪꦶ​ꦱꦶꦁ​ꦭꦤꦁ​ꦭꦲꦶꦂꦫꦤ꧀ꦮꦺꦴꦁ​ꦆꦱꦿꦌꦭ꧀ꦏꦸꦢꦸ​ꦢꦶꦥꦠꦺꦤ꧀ꦤꦶ​꧉​ꦤꦁꦔꦶꦁ​ꦏꦢꦸꦁ​ꦤꦧꦶ​ꦩꦺꦴꦱꦼꦱ꧀ꦭꦲꦶꦂ​꧈​ꦮꦺꦴꦁ​ꦠꦸꦮꦤꦺ​ꦮꦼꦫꦸꦃ​ꦤꦺꦏ꧀ꦧꦺꦴꦕꦃ​ꦧꦪꦶ​ꦲꦶꦏꦶ​ꦔ꧀ꦒꦤ꧀ꦠꦼꦁꦠꦼꦤꦤ꧀꧈​ꦮꦺꦴꦁ​ꦠꦸꦮꦤꦺ​ꦤꦧꦶ​ꦩꦺꦴꦱꦼꦱ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦲꦺꦴꦫ​ꦮꦼꦢꦶ​ꦔ꧀ꦭꦁꦒꦂ​ꦮꦺꦠ꧀ꦠꦺꦫꦠꦸꦤꦺ​ꦭꦤ꧀​ꦤ꧀ꦢꦼꦭꦶꦏ꧀ꦏꦏꦺꦤꦧꦶ​ꦩꦺꦴꦱꦼꦱ꧀ꦠꦼꦭꦸꦁ​ꦱꦱꦶ​ꦱꦸꦮꦺꦤꦺ​ꦱꦏ꧀ꦮꦶꦱ꧀ꦱꦺ​ꦭꦲꦶꦂ​꧉​

24꧋ꦏꦥꦶꦁ​ꦱꦔꦤꦺ​ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦥꦼꦔꦤ꧀ꦢꦼꦭ꧀ꦭꦺ​ꦤꦧꦶ​ꦩꦺꦴꦱꦼꦱ꧀ꦢꦺꦮꦺ꧉​ꦱꦏ꧀ꦮꦶꦱ꧀ꦱꦺ​ꦢꦶꦮꦱ​ꦢꦺꦏ꧀ꦤꦺꦲꦺꦴꦫ​ꦒꦼꦊꦩ꧀ꦢꦶꦲꦁꦒꦼꦥ꧀ꦢꦢꦶ​ꦥꦸꦠꦸꦤꦺ​ꦫꦠꦸꦤꦺ​ꦤꦼꦒꦫ​ꦌꦒꦶꦥ꧀ꦠꦼ꧉​ 25ꦢꦺꦏ꧀ꦤꦺꦩꦶꦭꦶꦃ​ꦩꦺꦭꦸ​ꦔꦿꦱꦏ꧀ꦏꦏꦺꦏꦔꦺꦭ꧀ꦭꦤ꧀ꦤꦺ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦤꦶꦩ꧀ꦧꦁꦔꦿꦱꦏ꧀ꦏꦏꦺꦏꦼꦥꦺꦤꦏ꧀ꦱꦁꦏꦠꦸꦩꦶꦤ꧀ꦢꦏ꧀ꦱꦶꦁ​ꦲꦭ​꧈​ꦗꦭꦂꦫꦤ꧀ꦏꦸꦮꦶ​ꦤꦩꦸꦁ​ꦱꦼꦢꦶꦭꦸꦠ꧀꧈​ 26ꦤꦧꦶ​ꦩꦺꦴꦱꦼꦱ꧀ꦩꦶꦭꦶꦃ​ꦔ꧀ꦭꦏꦺꦴꦤ꧀ꦤꦶ​ꦏꦔꦺꦭ꧀ꦭꦤ꧀ꦏꦸꦮꦶ​꧈​ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦧꦥ​ꦄꦨꦿꦲꦩ꧀꧈​ꦭꦤ꧀ꦥꦽꦗꦚ꧀ꦗꦶꦪꦤ꧀ꦲꦶꦏꦶ​ꦧꦶꦱꦤꦺ​ꦏꦼꦠꦸꦫꦸꦠ꧀ꦠꦤ꧀ꦭꦶꦮꦠ꧀ꦤꦧꦶ​ꦩꦺꦴꦱꦼꦱ꧀ꦭꦤ꧀ꦭꦶꦮꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦢꦺꦴꦁꦔꦺꦢꦺꦏ꧀ꦤꦺꦲꦸꦒ​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀꧈​ꦏꦸꦮꦶ​ꦱꦶꦁ​ꦩꦫꦏ꧀ꦏꦏꦺꦤꦧꦶ​ꦩꦺꦴꦱꦼꦱ꧀ꦲꦺꦴꦫ​ꦲꦺꦩꦤ꧀ꦤꦶꦁꦒꦭ꧀ꦱꦏ꧀ꦲꦺꦤꦺꦁꦔꦺꦏꦱꦸꦒꦶꦃꦲꦤ꧀ꦤꦁꦤꦼꦒꦫ​ꦌꦒꦶꦥ꧀ꦠꦼ꧉​ꦢꦺꦏ꧀ꦤꦺꦩꦶꦏꦶꦂꦫꦏꦺꦭꦤ꧀ꦔꦉꦥ꧀ꦲꦉꦥ꧀ꦤꦩ꧀ꦥ​ꦏꦱꦸꦒꦶꦃꦲꦤ꧀ꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦲꦩ꧀ꦧꦺꦱꦸꦏ꧀ꦏꦺ​꧉​

27꧋ꦗꦭꦂꦫꦤ꧀ꦤꦧꦶ​ꦩꦺꦴꦱꦼꦱ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦏ꧀ꦤꦺꦭꦸꦔ​ꦱꦁꦏꦤꦼꦒꦫ​ꦌꦒꦶꦥ꧀ꦠꦼ꧈​ꦲꦺꦴꦫ​ꦗꦭꦂꦫꦤ꧀ꦢꦺꦏ꧀ꦤꦺꦮꦼꦢꦶ​ꦏꦫꦺꦴ​ꦫꦠꦸꦤꦺ​꧈​ꦲꦺꦴꦫ​꧈​ꦤꦁꦔꦶꦁ​ꦗꦭꦂꦫꦤ꧀ꦏꦪꦏꦪ​ꦢꦺꦏ꧀ꦤꦺꦮꦼꦫꦸꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦺꦴꦫ​ꦏꦺꦠꦺꦴꦏ꧀ ꦩꦸꦭꦤꦺ​ꦤꦧꦶ​ꦩꦺꦴꦱꦼꦱ꧀ꦩꦤ꧀ꦠꦼꦥ꧀ꦠꦼꦫꦸꦱ꧀ꦲꦼꦁꦒꦺꦴꦤꦺ​ꦥꦽꦕꦪ​꧉​ 28ꦥꦫ​ꦱꦼꦢꦸꦭꦸꦂ​꧈​ꦏꦼꦥꦿꦶꦪꦺ​ꦮꦶꦮꦶꦠ꧀ꦠꦤ꧀ꦤꦺ​ꦫꦶꦪꦪꦥꦱ꧀ꦏꦃ​?ꦲꦥ​ꦲꦺꦴꦫ​ꦗꦭꦂꦫꦤ꧀ꦤꦧꦶ​ꦩꦺꦴꦱꦼꦱ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​?ꦩꦸꦭꦤꦺ​ꦢꦺꦏ꧀ꦤꦺꦔꦺꦴꦩꦺꦴꦁꦏꦫꦺꦴ​ꦮꦺꦴꦁ​ꦆꦱꦿꦌꦭ꧀ꦏꦺꦴꦁꦏꦺꦴꦤ꧀​ꦔ꧀ꦭꦺꦭꦺꦠ꧀ꦠꦶꦭꦮꦁꦔꦺ​ꦲꦺꦴꦩꦃ​ꦏꦫꦺꦴ​ꦒꦼꦠꦶꦃꦲꦺ​ꦮꦼꦢꦸꦱ꧀꧈​ꦏꦸꦮꦶ​ꦏꦁꦒꦺꦴ​ꦔꦭꦁꦔꦭꦁꦔꦶꦩꦸꦭꦺꦏꦠ꧀ꦠꦺꦥꦠꦶ​꧈​ꦱꦸꦥꦪ​ꦲꦺꦴꦫ​ꦩꦠꦺꦤ꧀ꦤꦶ​ꦲꦤꦏ꧀ꦲꦤꦏ꧀ꦏꦺ​ꦧꦁꦱ​ꦆꦱꦿꦌꦭ꧀ꦭꦤꦁ​ꦱꦶꦁ​ꦲꦩ꧀ꦧꦉꦥ꧀꧈​

29꧋ꦏꦥꦶꦁ​ꦱꦼꦥꦸꦭꦸꦃ​ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦥꦼꦔꦤ꧀ꦢꦼꦭ꧀ꦭꦺ​ꦧꦁꦱ​ꦆꦱꦿꦌꦭ꧀ꦢꦺꦴꦁꦔꦺꦥꦢ​ ꦩ꧀ꦭꦏꦸ​ꦭꦶꦮꦠ꧀ꦱꦼꦒꦫ​ꦲꦧꦁ​꧉​ꦗꦭꦂꦫꦤ꧀ꦥꦢ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁꦮꦺꦴꦁ​ꦭꦶꦮꦠ꧀ꦱꦼꦒꦫ​ꦲꦧꦁ​ꦏꦪ​ꦤꦺꦏ꧀​ꦩ꧀ꦭꦏꦸ​ꦤꦁꦢꦫꦠ꧀ꦠꦤ꧀ꦮꦲꦺ​꧉​ꦤꦁꦔꦶꦁ​ꦏꦢꦸꦁ​ꦧꦁꦱ​ꦌꦒꦶꦥ꧀ꦠꦼꦱꦶꦁ​ꦔꦺꦴꦪꦏ꧀ꦲꦉꦥ꧀ꦩꦺꦭꦸ​ꦭꦶꦮꦠ꧀ ꦏꦧꦺꦃ​ꦏꦼꦊꦥ꧀ꦠꦼꦫꦸꦱ꧀ꦩꦠꦶ​꧉​

30꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦲꦸꦒ​ꦏꦺꦭꦶꦁꦔꦤ꧀ꦥꦼꦔꦤ꧀ꦢꦼꦭ꧀ꦭꦺ​ꦧꦁꦱ​ꦆꦱꦿꦌꦭ꧀ ꦢꦺꦴꦁꦔꦺꦥꦢ​ꦔꦩ꧀ꦧꦿꦸꦏ꧀ꦏꦏꦺꦠꦺꦩ꧀ꦧꦺꦴꦏ꧀ꦏꦺ​ꦏꦸꦠꦪꦺꦫꦶꦏꦺꦴꦱꦶꦁ​ꦒꦮꦺꦪꦤ꧀ꦮꦠꦸ​ꦱꦶꦁ​ꦏꦤ꧀ꦢꦼꦭ꧀ꦧꦔꦼꦠ꧀꧈​ꦗꦭꦂꦫꦤ꧀ꦧꦁꦱ​ꦆꦱꦿꦌꦭ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦥꦢ​ꦔꦸꦧꦼꦁꦔꦶ​ꦠꦺꦩ꧀ꦧꦺꦴꦏ꧀ꦏꦺ​ꦥꦶꦠꦸꦁ​ꦢꦶꦤ​ꦱꦸꦮꦺꦤꦺ​꧈​ꦔꦤ꧀ꦠꦶ​ꦲꦩ꧀ꦧꦿꦸꦏ꧀ꦏꦧꦺꦃ​꧉​ 31ꦔꦺꦴꦩꦺꦴꦁꦔꦏꦺꦧꦧ꧀ꦪꦺꦫꦶꦏꦺꦴꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦧꦧ꧀ꦭꦺꦴꦤ꧀ꦠꦺꦫꦲꦧ꧀꧈​ꦫꦲꦧ꧀ꦤꦩ꧀ꦥ​ꦭꦤ꧀​ꦤ꧀ꦢꦼꦭꦶꦏ꧀ꦏꦏꦺꦥꦫ​ꦠꦸꦏꦁ​ꦔꦶꦤ꧀ꦢꦶꦏ꧀ ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦧꦶꦱ​ꦤꦩ꧀ꦥ​ꦥꦔꦥꦸꦫ​꧈​ꦤꦺꦏ꧀ꦤꦶꦁꦒꦭ꧀​ꦏ꧀ꦭꦏꦸꦮꦤ꧀ꦤꦺ​ꦱꦶꦁ​ꦲꦭ​꧉​ꦩꦸꦭꦤꦺ​ꦫꦲꦧ꧀ꦲꦺꦴꦫ​ꦏꦠꦸꦠ꧀ꦢꦶꦥꦠꦺꦤ꧀ꦤꦶ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

32꧋ꦏꦺꦴꦁꦏꦺꦴꦤ꧀ꦠꦼꦫꦸꦱ꧀ꦲꦼꦁꦒꦺꦴꦤ꧀ꦏꦸ​ꦔ꧀ꦒꦩ꧀ꦧꦂꦫꦏꦺꦥꦼꦔꦤ꧀ꦢꦼꦭ꧀ꦭꦺ​ꦮꦺꦴꦁꦮꦺꦴꦁ​ꦢꦺꦏ꧀​ꦩ꧀ꦧꦶꦪꦺꦤ꧀?ꦧꦶꦱ​ꦲꦏꦸ​꧈​ꦤꦁꦔꦶꦁ​ꦮꦏ꧀ꦠꦸꦩꦸꦲꦺꦴꦫ​ꦲꦺꦤꦺꦁ꧈​ꦤꦺꦏ꧀ꦲꦏꦸ​ꦏꦸꦢꦸ​ꦔꦺꦴꦩꦺꦴꦁꦔꦏꦺꦧꦧ꧀ꦥꦼꦔꦤ꧀ꦢꦼꦭ꧀ꦭꦺ​ꦓꦶꦢꦶꦪꦺꦴꦤ꧀ ꦧꦫꦏ꧀ ꦱꦶꦩ꧀ꦱꦺꦴꦤ꧀ ꦪꦺꦥ꧀ꦠ꧈​ꦣꦮ꦳ꦼꦢ꧀ ꦱꦩꦸꦮꦺꦭ꧀ꦭꦤ꧀ꦤꦧꦶ​ꦭꦶꦪꦭꦶꦪꦤꦺ​꧉​ 33-34ꦗꦭꦂꦫꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁꦮꦺꦴꦁ​ꦧꦶꦱ​ꦤꦼꦭꦸꦏ꧀ꦏꦏꦺꦤꦼꦒꦫꦤꦼꦒꦫ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦤꦼꦂ​꧈​ꦩꦸꦭꦤꦺ​ꦪ​ꦥꦢ​ꦢꦶꦠꦸꦭꦸꦁꦔꦶ​ꦏꦪ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦧꦶꦱ​ꦩ꧀ꦧꦶꦁꦏꦼꦩ꧀ꦕꦁꦏꦼꦩ꧀ꦩꦺ​ꦩꦕꦤ꧀ꦔꦼꦭꦶꦃ​ꦭꦤ꧀ꦧꦶꦱ​ꦩꦠꦺꦤ꧀ꦤꦶ​ꦒꦼꦤꦶ​ꦱꦶꦁ​ꦩꦸꦭꦏ꧀ꦩꦸꦭꦏ꧀꧈​ꦱꦭꦺꦴꦏ꧀ꦏꦺꦧꦶꦱ​ꦲꦸꦕꦸꦭ꧀ꦱꦁꦏꦭꦤꦁꦮꦺꦢꦺꦴꦏ꧀ꦥꦼꦢꦁꦱꦶꦁ​ꦲꦉꦥ꧀ꦩꦠꦺꦤ꧀ꦤꦶ​꧉​ꦱꦼꦤꦗꦤ꧀ꦫꦶꦁꦏꦶꦃ​ꦩꦭꦃ​ꦧꦶꦱ​ꦢꦢꦶ​ꦒꦒꦃ​ꦭꦤ꧀ꦫꦺꦴꦱ​꧉​ꦲꦶꦁ​ꦱꦏ꧀ꦗꦼꦫꦺꦴꦤꦺꦥꦺꦫꦁꦔꦤ꧀ꦮꦺꦴꦁꦮꦺꦴꦁ​ꦢꦢꦶ​ꦫꦺꦴꦱ​ꦭꦤ꧀ꦧꦶꦱ​ꦤꦼꦭꦸꦏ꧀ꦏꦏꦺꦩꦸꦁꦱꦸꦃꦩꦸꦁꦱꦸꦃꦲꦺ​ꦔꦤ꧀ꦠꦶ​ꦥꦢ​ꦩ꧀​ꦧ꧀ꦭꦪꦸꦩꦸꦭꦶꦃ​꧉​ 35ꦗꦭꦂꦫꦤ꧀ꦥꦢ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦸꦒ​ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦲꦺꦤꦺꦁꦱꦶꦁ​ꦥꦢ​ꦮꦼꦫꦸꦃ​ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​ꦱꦶꦁ​ꦮꦶꦱ꧀ꦥꦢ​ꦩꦠꦶ​ꦠꦔꦶ​ꦲꦸꦫꦶꦥ꧀ꦩꦼꦤꦺꦃ​꧉​

꧋ꦤꦁꦔꦶꦁ​ꦲꦺꦴꦫ​ꦏꦧꦺꦃ​ꦔꦭꦩ꧀ꦩꦶ​ꦱꦶꦁ​ꦏꦪ​ꦔꦺꦴꦤꦺꦴ​꧉​ꦮꦸꦗꦸꦠ꧀ꦠꦺꦲꦺꦤꦺꦁꦮꦺꦴꦁ​ꦭꦤꦁ​ꦲꦺꦴꦏꦺꦃꦱꦶꦁ​ꦥꦢ​ꦢꦶꦥꦠꦺꦤ꧀ꦤꦶ​꧈​ꦗꦭꦂꦫꦤ꧀ꦥꦢ​ꦩꦤ꧀ꦠꦼꦥ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁꦮꦺꦴꦁ​ꦲꦶꦏꦶ​ꦥꦢ​ꦩꦶꦭꦶꦃ​ꦩꦠꦶ​ꦢꦶꦥꦶꦭꦂꦫ​ꦭꦤ꧀ꦲꦺꦴꦫ​ꦒꦼꦊꦩ꧀ꦢꦶ​ꦲꦺꦕꦸꦭ꧀ꦭꦏꦺ​꧈​ꦲꦮꦶꦠ꧀ꦥꦢ​ꦥꦽꦕꦪ​ꦤꦺꦏ꧀ꦲꦶꦁ​ꦲꦩ꧀ꦧꦺꦱꦸꦏ꧀ꦏꦺ​ꦧꦏꦭ꧀ꦥꦢ​ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦧꦶꦱ​ꦔꦭꦩ꧀ꦩꦶ​ꦲꦸꦫꦶꦥ꧀ꦱꦶꦁ​ꦭꦸꦮꦶꦃ​ꦲꦥꦶꦏ꧀꧈​ 36ꦲꦺꦤꦺꦁꦭꦶꦪꦤꦺ​ꦩꦼꦤꦺꦃ​ꦱꦶꦁ​ꦢꦶꦥꦺꦴꦪꦺꦴꦏ꧀ꦏꦶ​ꦭꦤ꧀ꦢꦶꦥꦼꦤ꧀ꦠꦸꦁꦔꦶ꧉​ꦱꦭꦺꦴꦏ꧀ꦏꦺꦭꦸꦮꦶꦃ​ꦤꦼꦩꦼꦤ꧀ ꦲꦮꦶꦠ꧀ꦢꦶꦧꦤ꧀ꦢ​ꦭꦤ꧀ꦢꦶꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀꧈​ 37ꦲꦺꦤꦺꦁꦲꦸꦒ​ꦱꦶꦁ​ꦢꦶꦧꦤ꧀ꦢꦼꦩ꧀ꦩꦶꦮꦠꦸ​ꦱꦩ꧀ꦥꦺꦏ꧀ꦩꦠꦶ​꧈​ꦱꦭꦺꦴꦏ꧀ꦏꦺꦢꦶꦒꦿꦗꦶ​ꦢꦢꦶ​ꦭꦺꦴꦫꦺꦴ​ꦲꦥ​ꦢꦶꦥꦠꦺꦤ꧀ꦤꦶ​ꦏꦫꦺꦴ​ꦥꦼꦢꦁ꧉​ꦲꦺꦤꦺꦁꦮꦺꦴꦁꦮꦺꦴꦁ​ꦱꦶꦁ​ꦢꦶꦲꦸꦱꦶꦂ​ꦭꦸꦔ​ꦱꦁꦏꦲꦺꦴꦩꦃꦲꦺ​꧈​ꦔꦤ꧀ꦠꦶ​ꦔ꧀ꦭꦩ꧀ꦧꦿꦁ​ꦱꦏ꧀ꦥꦫꦤ꧀ꦥꦫꦤ꧀ ꦤꦩꦸꦁ​ꦔꦁꦒꦺꦴ​ꦱꦭꦶꦤ꧀ꦭꦸꦭꦁ​ꦮꦼꦢꦸꦱ꧀ ꦏꦼꦏꦸꦫꦁꦔꦤ꧀ꦥꦔꦤ꧀ ꦢꦶꦱꦁꦱꦫ​ꦭꦤ꧀ꦢꦶꦥꦶꦭꦂꦫ​꧉​ 38ꦮꦺꦴꦁꦮꦺꦴꦁ​ꦲꦶꦏꦶ​ꦏꦥꦶꦏ꧀ꦏꦼꦤ꧀ꦧꦔꦼꦠ꧀ꦏꦁꦒꦺꦴ​ꦢꦺꦴꦚ​ꦲꦶꦏꦶ​꧉​ꦥꦢ​ꦔ꧀ꦭꦩ꧀ꦧꦿꦁ​ꦫꦤꦫꦺꦤꦺ​ꦤꦁꦮꦸꦱ꧀ꦠꦺꦤ꧀ꦭꦤ꧀ꦒꦸꦤꦸꦁꦒꦸꦤꦸꦁ​꧉​ꦥꦢ​ꦩꦁꦒꦺꦴꦤ꧀ꦤꦁꦒꦸꦮꦒꦸꦮ​ꦭꦤ꧀ꦭꦺꦴꦮꦺꦴꦔꦤ꧀ꦭꦺꦴꦮꦺꦴꦔꦤ꧀ꦤꦺꦧꦸꦩꦶ​꧉​

39꧋ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁꦮꦺꦴꦁ​ꦏꦸꦮꦶ​ꦏꦧꦺꦃ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦤꦸꦭꦸꦁꦔꦶ​ꦭꦤ꧀ꦲꦩ꧀ꦧꦼꦂꦏꦃꦲꦶ​ꦮꦺꦴꦁꦮꦺꦴꦁ​ꦏꦸꦮꦶ​ꦏꦁꦒꦺꦴ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦢꦺꦏ꧀ꦤꦺꦊꦒ​꧉​ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦩꦼꦏ꧀ꦱ​ꦮꦺꦴꦁꦮꦺꦴꦁ​ꦲꦶꦏꦶ​ꦢꦸꦫꦸꦁ​ꦧꦶꦱ​ꦤꦩ꧀ꦥ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦱꦏ꧀ꦗꦼꦫꦺꦴꦤꦺꦥꦽꦗꦚ꧀ꦗꦶꦪꦤ꧀ꦱꦶꦁ​ꦲꦚꦂ​꧈​ꦪꦏꦸꦮꦶ​꧈​ꦤꦺꦏ꧀ꦏꦿꦶꦱ꧀ꦡꦸꦱ꧀ꦧꦏꦭ꧀ꦩꦠꦶ​ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦏꦧꦺꦃ​ꦩꦤꦸꦁꦱ​꧉​ 40ꦏꦼꦤꦺꦁꦲꦥ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦏ꧀ꦲꦺꦴꦫ​ꦔ꧀ꦭꦶꦭꦤꦶ​ꦮꦺꦴꦁꦮꦺꦴꦁ​ꦲꦶꦏꦶ​ꦏꦮꦶꦠ꧀​ꦩ꧀ꦧꦶꦪꦺꦤ꧀ꦤꦩ꧀ꦥ​ꦥꦤꦼꦧꦸꦱ꧀ꦱꦺ​ꦢꦺꦴꦱ​ꦏꦪ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶ?ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦤ꧀ꦢꦸꦮꦺꦤ꧀ꦤꦶ​ꦒꦒꦱ꧀ꦱꦤ꧀ꦱꦶꦁ​ꦭꦸꦮꦶꦃ​ꦲꦥꦶꦏ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦪꦏꦸꦮꦶ​꧈​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦶꦱ​ꦧꦉꦁ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦤꦩ꧀ꦥ​ꦥꦔꦥꦸꦫ​ꦱꦁꦏꦢꦺꦴꦱ​ꦱꦏ꧀ꦏꦧꦺꦃꦲꦺ꧈​ꦱꦸꦥꦪ​ꦧꦶꦱ​ꦥꦤ꧀ꦠꦼꦱ꧀ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

↑ ↑ ↑


꧋ꦒꦸꦱ꧀ꦠꦶ​ꦄꦭ꧀ꦭꦃ​ꦔꦗꦂ​ꦲꦤꦏ꧀ꦲꦤꦏ꧀ꦏꦺ​꧉​

꧇​꧑꧒꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦏꦪ​ꦱꦶꦁ​ꦮꦶꦱ꧀ꦠꦏ꧀ꦢꦸꦤꦸꦁꦢꦸꦤꦸꦁꦔꦏꦺꦤꦁꦔꦉꦥ꧀ꦩꦲꦸ​꧈​ꦏꦺꦴꦮꦺ​ꦱꦲꦶꦏꦶ​ꦔꦼꦂꦠꦶ​ꦲꦥ​ꦠꦼꦒꦼꦱ꧀ꦱꦺ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦲꦶꦏꦶ​ ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦮꦺꦴꦁ​ꦱꦶꦁ​ꦩꦺꦭꦸ​ꦧꦭꦥ꧀ꦥꦤ꧀ꦲꦩ꧀​ꦧ꧀ꦭꦪꦸ꧉​ꦭꦃ​ꦮꦺꦴꦁ​ꦥꦶꦫꦁꦥꦶꦫꦁ​ꦱꦶꦁ​ꦥꦢ​ꦔꦼꦠꦺꦴꦏ꧀ꦏꦏꦺꦥꦼꦔꦤ꧀ꦢꦼꦭ꧀ꦭꦺ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦗꦩꦤ꧀ꦱꦶꦁ​ꦮꦶꦱ꧀​ꦏ꧀ꦭꦶꦮꦠ꧀ꦏꦸꦮꦶ​ꦏꦪꦏꦪ​ꦱꦲꦶꦏꦶ​ꦥꦢ​ꦤꦺꦴꦤ꧀ꦠꦺꦴꦤ꧀ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦥꦢ​ꦩ꧀​ꦧ꧀ꦭꦪꦸꦲꦶꦁ​ꦧꦭꦥꦤ꧀ꦤꦺꦥꦼꦔꦤ꧀ꦢꦼꦭ꧀꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦚꦼꦥꦺꦴꦠ꧀ꦱꦼꦩ꧀ꦧꦫꦁ​ꦱꦶꦁ​ꦔꦼꦧꦺꦴꦠ꧀ꦲꦼꦧꦺꦴꦠ꧀ꦠꦶ​ꦭꦏꦸꦤꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦲꦸꦒ​ꦢꦺꦴꦱꦢꦺꦴꦱ​ꦱꦶꦁ​ꦠꦸꦩꦺꦩ꧀ꦥ꧀ꦭꦺꦏ꧀ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦏꦪ​ꦮꦺꦴꦁ​ꦧꦭꦥ꧀ꦥꦤ꧀ꦲꦩ꧀​ꦧ꧀ꦭꦪꦸꦏꦲꦺ​꧈​ꦱꦏ꧀ꦏꦸꦮꦠ꧀ꦏꦸꦮꦠ꧀ꦠꦺꦩꦗꦸ​ꦠꦼꦫꦸꦱ꧀ꦠꦼꦏꦤ꧀ꦫꦩ꧀ꦥꦸꦁꦔꦺ​꧈​ꦠꦤ꧀ꦥ​ꦏꦼꦱ꧀ꦭꦶꦩꦸꦂ꧉​ 2ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦶꦁ​ꦱꦏ꧀ꦗꦼꦫꦺꦴꦤꦺꦩ꧀​ꦧ꧀ꦭꦪꦸꦲꦶꦁ​ꦧꦭꦥꦤ꧀ꦤꦺꦥꦼꦔꦤ꧀ꦢꦼꦭ꧀ꦲꦶꦏꦶ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦲꦗ​ꦱꦩ꧀ꦥꦺꦏ꧀ꦥꦼꦢꦺꦴꦠ꧀ꦩꦶꦏꦶꦂꦫꦏꦺꦒꦸꦱ꧀ꦠꦶ​ꦪꦺꦯꦸꦱ꧀ ꦲꦮꦶꦠ꧀ꦢꦺꦏ꧀ꦤꦺꦪ​ꦥꦽꦕꦪ​ꦠꦼꦫꦸꦱ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦏꦤ꧀ꦫꦩ꧀ꦥꦸꦁꦔꦺ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦧꦶꦱ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦺꦏ꧀ꦤꦺꦲꦸꦒ​ꦱꦶꦁ​ꦮꦶꦱ꧀​ꦤ꧀ꦢꦸꦢꦸꦃꦲꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺꦏꦼꦥꦿꦶꦪꦺ​ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦒ​ꦱꦶꦁ​ꦔꦿꦺꦮꦁꦔꦶ​ꦲꦮꦏ꧀ꦏꦺ​ꦢꦺꦮꦺꦲꦶꦁ​ꦥꦽꦏꦫ​ꦲꦥ​ꦮꦲꦺ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦥꦽꦕꦪ​ꦠꦼꦫꦸꦱ꧀ꦠꦼꦏꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧉​ꦔꦼꦂꦠꦶꦪ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦱꦼꦩ꧀ꦥ꧀ꦭꦏ꧀ ꦱꦼꦤꦗꦤ꧀​ꦔ꧀ꦭꦏꦺꦴꦤ꧀ꦤꦶ​ꦱꦁꦱꦫ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀ ꦲꦺꦴꦫ​꧈​ꦲꦮꦶꦠ꧀ꦢꦺꦏ꧀ꦤꦺꦩꦶꦏꦶꦂꦫꦏꦺꦏꦧꦸꦔꦃꦲꦤ꧀ꦱꦶꦁ​ꦧꦏꦭ꧀ꦢꦶꦠꦩ꧀ꦥ​ꦲꦶꦁ​ꦠꦼꦩ꧀ꦧꦺ​꧉​ꦩꦸꦭꦤꦺ​꧈​ꦱꦼꦤꦗꦤ꧀ꦢꦺꦏ꧀ꦤꦺꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀ ꦏꦸꦮꦶ​ꦲꦺꦴꦫ​ꦢꦶꦲꦁꦒꦼꦥ꧀ꦔꦶꦱꦶꦤ꧀ꦤꦶꦱꦶꦤ꧀ꦤꦏꦺ꧉​ꦱꦲꦶꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦱꦏ꧀ꦲꦺꦤꦺꦁꦔꦺꦥꦔ꧀ꦮꦱ​ꦧꦉꦁ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

3꧋ꦥꦫ​ꦱꦼꦢꦸꦭꦸꦂ​꧈​ꦥꦢ​ꦲꦺꦭꦶꦁꦔ​ꦩꦫꦁ​ꦏꦔꦺꦭ꧀ꦭꦤ꧀ꦱꦶꦁ​ꦢꦶꦲꦭꦩ꧀ꦩꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦢꦺꦴꦁꦔꦺꦢꦺꦏ꧀ꦤꦺꦔꦢꦼꦥ꧀ꦥꦶꦮꦺꦴꦁ​ꦲꦭ​ꦱꦶꦁ​ꦥꦢ​ꦔꦼꦠꦺꦴꦏ꧀ꦏꦏꦺꦱꦼꦔꦶꦠ꧀ꦠꦺ​ꦲꦠꦶꦤꦺ​ꦩꦫꦁ​ꦢꦺꦏ꧀ꦤꦺ꧉​ꦢꦺꦏ꧀ꦤꦺꦤꦩ꧀ꦥ​ꦏꦸꦮꦶ​ꦏꦧꦺꦃ​ꦏꦫꦺꦴ​ꦱꦧꦂ​ꦭꦤ꧀ꦲꦺꦴꦫ​ꦱꦼꦩ꧀ꦥ꧀ꦭꦏ꧀ꦲꦼꦁꦒꦺꦴꦤꦺ​ꦥꦱꦿꦃ​ꦱꦼꦩ꧀ꦧꦫꦁ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦱꦶꦁ​ꦲꦠꦶꦲꦠꦶ꧈​ꦱꦸꦥꦪ​ꦲꦗ​ꦱꦩ꧀ꦥꦺꦏ꧀ꦱꦼꦩ꧀ꦥ꧀ꦭꦏ꧀ꦲꦠꦶꦤꦺ​ꦭꦤ꧀ꦲꦶꦭꦁ​ꦥꦼꦔꦤ꧀ꦢꦼꦭ꧀ꦭꦺ​꧉​ 4ꦤꦺꦏ꧀ꦢꦶꦥꦶꦏꦶꦂ​꧈​ꦱꦏ꧀ꦗꦤꦺꦲꦼꦁꦒꦺꦴꦤ꧀ꦩꦸ​ꦥꦼꦫꦁ​ꦔ꧀ꦭꦮꦤ꧀ꦢꦺꦴꦱ​ꦏꦸꦮꦶ​ꦢꦸꦫꦸꦁ​ꦱꦩ꧀ꦥꦺꦏ꧀ꦩꦸꦠꦃ​ꦒꦼꦠꦶꦃ​꧉​ 5ꦲꦥ​ꦏꦺꦴꦮꦺ​ꦥꦢ​ꦭꦭꦶ​ꦩꦫꦁ​ꦠꦼꦩ꧀ꦧꦸꦁꦔꦺ​ꦏꦶꦠꦧ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦲꦤꦏ꧀ꦏꦸ​꧈​ꦲꦩ꧀ꦧꦺꦴꦏ꧀ꦥꦢ​ꦢꦶꦥꦶꦏꦶꦂ​ꦱꦶꦁ​ꦲꦥꦶꦏ꧀
ꦤꦺꦏ꧀ꦒꦸꦱ꧀ꦠꦶ​ꦔꦗꦂ​ꦏꦺꦴꦮꦺ​
ꦭꦤ꧀ꦲꦗ​ꦥꦢ​ꦱꦼꦩ꧀ꦥ꧀ꦭꦏ꧀ꦲꦠꦶꦤꦺ​
ꦤꦺꦏ꧀ꦒꦸꦱ꧀ꦠꦶ​ꦩ꧀ꦧꦼꦤꦼꦂꦫꦏꦺꦏꦺꦴꦮꦺ​꧉​
6ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦗꦂ​ꦏꦧꦺꦃ​ꦮꦺꦴꦁ​ꦱꦶꦁ​ꦢꦶꦠꦿꦺꦱ꧀ꦤꦤ꧀ꦤꦶ
ꦭꦤ꧀ꦢꦺꦏ꧀ꦤꦺꦚꦧꦼꦠ꧀ꦠꦶ​ꦏꦧꦺꦃ​ꦮꦺꦴꦁ​ꦱꦶꦁ​ꦢꦶꦲꦏꦸꦲꦤꦏ꧀ꦏꦺ​꧉​”

7ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦗꦂ​ꦏꦺꦴꦮꦺ​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦠꦩ꧀ꦥ​ꦏꦫꦺꦴ​ꦱꦧꦂ​꧈​ꦲꦮꦶꦠ꧀ꦠꦸꦗꦸꦮꦤ꧀ꦤꦺꦏꦸꦮꦶ​ꦏꦁꦒꦺꦴ​ꦩꦸꦭꦁꦔꦶꦏꦺꦴꦮꦺ​ꦧꦧ꧀ꦱꦶꦁ​ꦧꦼꦕꦶꦏ꧀ ꦏꦪ​ꦧꦥꦏ꧀ꦩꦸꦭꦁꦔꦶꦲꦤꦏ꧀ꦏꦺ​ꦏꦲꦺ​꧉​ꦲꦥ​ꦲꦺꦤꦺꦁꦲꦤꦏ꧀ꦱꦶꦁ​ꦲꦺꦴꦫ​ꦠꦲꦸ​ꦢꦶꦲꦗꦂ​ꦏꦫꦺꦴ​ꦧꦥꦏ꧀ꦏꦺ?ꦭꦲꦸꦠ꧀ꦲꦺꦴꦫ​ꦠ​꧉​ 8ꦲꦮꦶꦠ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦔꦗꦂ​ꦏꦺꦴꦮꦺ​꧈​ꦠꦶꦧꦏꦺ​ꦏꦺꦴꦮꦺ​ꦏꦪ​ꦧꦺꦴꦕꦃ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦮꦺꦴꦁ​ꦠꦸꦮ​꧈​ꦏꦪ​ꦧꦺꦴꦕꦃ​ꦩ꧀​ꦧ꧀ꦭꦫꦃ꧉​ꦠꦶꦧꦏꦺ​ꦏꦺꦴꦮꦺ​ꦢꦸꦢꦸ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 9ꦲꦮꦏ꧀ꦏꦺ​ꦢꦺꦮꦺꦭꦲꦸꦠ꧀​ꦤ꧀ꦢꦸꦮꦺꦧꦥ​ꦲꦶꦁ​ꦢꦺꦴꦚ​ꦠ​ꦱꦶꦁ​ꦩꦸꦭꦁꦔꦶꦲꦮꦏ꧀ꦏꦺ​ꦢꦺꦮꦺ?ꦭꦤ꧀ꦢꦺꦏ꧀ꦤꦺꦪ​ꦢꦶꦲꦗꦺꦤ꧀ꦤꦶ​ꦠꦼꦤꦤ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦱꦶꦁ​ꦤꦁꦱ꧀ꦮꦂꦒ​ꦩꦼꦤꦺꦃ​꧈​ꦲꦥ​ꦲꦺꦴꦫ​ꦏꦸꦢꦸ​ꦢꦶꦲꦗꦺꦤ꧀ꦤꦶ​ꦭꦤ꧀ꦢꦶꦒꦸꦒꦸ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦧꦥ​ꦱꦶꦁ​ꦲꦶꦁ​ꦢꦺꦴꦚ​?ꦩꦼꦱ꧀ꦠꦶꦏꦸꦢꦸ​ꦠ​꧈​ꦲꦮꦶꦠ꧀ꦏꦸꦮꦶ​ꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦧꦶꦱ​ꦲꦸꦫꦶꦥ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦱꦺ꧉​ 10ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦲꦶꦁ​ꦢꦺꦴꦚ​ꦲꦼꦁꦒꦺꦴꦤꦺ​ꦔꦗꦂ​ꦲꦮꦏ꧀ꦏꦺ​ꦢꦺꦮꦺꦤꦩꦸꦁ​ꦱꦏ꧀ꦲꦸꦤ꧀ꦠꦂꦫꦭꦤ꧀ꦩꦤꦸꦠ꧀ꦲꦥ​ꦱꦶꦁ​ꦢꦶꦲꦁꦒꦼꦥ꧀ꦧꦼꦕꦶꦏ꧀ꦏꦁꦒꦺꦴ​ꦢꦺꦏ꧀ꦤꦺꦢꦺꦮꦺ꧉​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦤꦁꦱ꧀ꦮꦂꦒ​꧈​ꦔꦗꦂ​ꦲꦮꦏ꧀ꦏꦺ​ꦢꦺꦮꦺꦤꦸꦗꦸ​ꦱꦶꦁ​ꦧꦼꦕꦶꦏ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦥꦺꦧꦶꦱ​ꦱꦸꦕꦶ​ꦏꦪ​ꦢꦺꦏ꧀ꦤꦺ꧉​ 11ꦥꦚ꧀ꦕꦺꦤ꧀ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦢꦶꦲꦗꦂ​ꦏꦸꦮꦶ​ꦫꦱꦤꦺ​ꦲꦺꦴꦫ​ꦏꦼꦥꦺꦤꦏ꧀ ꦩꦭꦃ​ꦭꦫ​ꦲꦶꦁ​ꦲꦠꦶ​꧉​ꦤꦁꦔꦶꦁ​ꦱꦏ꧀ꦮꦶꦱ꧀ꦱꦺ​ꦲꦮꦏ꧀ꦏꦺ​ꦢꦺꦮꦺꦢꦶꦲꦗꦂ​꧈​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦒꦼꦊꦩ꧀ꦩꦤꦸꦠ꧀ꦩꦫꦁ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦃ​ꦏꦸꦮꦶ​ꦩꦫꦏ꧀ꦏꦏꦺꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦧꦶꦱ​ꦠꦼꦤ꧀ꦠꦽꦩ꧀꧈​

꧋ꦥꦶꦮꦸꦭꦁ​ꦭꦤ꧀ꦥꦼꦁꦔꦺꦭꦶꦁꦔꦺꦭꦶꦁ​꧉​

12꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦪ​ꦮꦺꦴꦁ​ꦱꦶꦁ​ꦥꦢ​ꦩꦺꦭꦸ​ꦧꦭꦥ꧀ꦥꦤ꧀ꦲꦩ꧀​ꦧ꧀ꦭꦪꦸꦭꦤ꧀ꦏꦿꦱ​ꦏꦼꦱꦼꦭ꧀ꦏꦲꦺ​꧈​ꦱꦶꦁ​ꦠꦔꦤ꧀ꦤꦺ​ꦱꦺꦁꦏ꧀ꦭꦺꦃ​ꦭꦤ꧀ꦢꦼꦁꦏꦸꦭ꧀ꦭꦺꦊꦩꦼꦱ꧀ ꦲ꦳ꦪꦸꦏ꧀ꦠꦔꦤ꧀ꦤꦺ​ꦥꦢ​ꦢꦶꦲꦼꦠꦸꦁꦔꦏꦺꦩꦼꦤꦺꦃ​ꦭꦤ꧀ꦢꦼꦁꦏꦸꦭ꧀ꦭꦺꦢꦶꦗꦼꦗꦼꦏ꧀ꦏꦏꦺ꧉​ 13ꦲ꦳ꦪꦸꦏ꧀ꦥꦢ​ꦩꦗꦸ​ꦠꦼꦫꦸꦱ꧀ꦱꦶꦁ​ꦊꦩ꧀ꦥꦼꦁ​꧈​ꦱꦸꦥꦪ​ꦧꦶꦱ​ꦤꦫꦶꦏ꧀ꦱꦶꦁ​ꦱꦺꦁꦏ꧀ꦭꦺꦃ​ꦲꦗ​ꦱꦩ꧀ꦥꦺꦏ꧀ꦲꦩ꧀ꦧꦿꦸꦏ꧀ ꦤꦁꦔꦶꦁ​ꦧꦶꦱ​ꦏꦸꦮꦠ꧀ꦩꦼꦤꦺꦃ​꧉​

14꧋ꦲ꦳ꦪꦸꦏ꧀ꦥꦢ​ꦔ꧀ꦭꦸꦩꦸꦃꦲꦶꦠꦼꦤꦤ꧀ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦧꦶꦱ​ꦫꦸꦏꦸꦤ꧀ꦧꦼꦧꦉꦁꦔꦤ꧀ꦭꦤ꧀ꦲ꦳ꦪꦸꦏ꧀ꦥꦢ​ꦔ꧀ꦭꦸꦩꦸꦃꦲꦶꦠꦼꦤꦤ꧀ꦲꦸꦒ​ꦱꦸꦥꦪ​ꦤꦶꦤ꧀ꦢꦏ꧀ꦏꦏꦺꦲꦸꦫꦶꦥ꧀ꦱꦶꦁ​ꦱꦸꦕꦶ​꧉​ꦲꦮꦶꦠ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦧꦶꦱ​ꦮꦼꦫꦸꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦲꦸꦫꦶꦥ꧀ꦥꦺꦲꦺꦴꦫ​ꦔꦺꦴꦤꦺꦴ​꧉​ 15ꦲꦮꦏ꧀ꦏꦺ​ꦢꦺꦮꦺꦱꦶꦗꦶꦱꦶꦗꦶꦤꦺ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦥꦫ​ꦱꦼꦢꦸꦭꦸꦂ​꧈​ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦱꦶꦁ​ꦚꦶꦁꦏꦸꦂꦫꦶꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦥꦢ​ꦱꦶꦁ​ꦲꦠꦶꦲꦠꦶꦲꦸꦒ​꧈​ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦤ꧀ꦢꦸꦮꦺꦤ꧀ꦤꦶ​ꦭꦏꦸ​ꦲꦥ​ꦥꦶꦮꦸꦭꦁ​ꦱꦶꦁ​ꦲꦺꦴꦫ​ꦧꦼꦤꦼꦂ​꧈​ꦱꦶꦁ​ꦤꦩꦸꦁ​ꦤ꧀ꦢꦢꦺꦏ꧀ꦏꦏꦺꦱꦸꦱꦃꦲꦺ​ꦭꦤ꧀ꦫꦸꦱꦏ꧀ꦏꦺ​ꦭꦶꦪꦤꦺ​꧈​ꦏꦪ​ꦠꦸꦏꦸꦭ꧀ꦭꦤ꧀ꦲꦼꦫꦶ​ꦏꦲꦺ​꧉​ 16ꦥꦢ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦲꦸꦒ​꧈​ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦭꦏꦸ​ꦧꦺꦢꦁ꧉​ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦲꦶꦱꦶꦤ꧀ꦏꦪ​ꦌꦱꦲꦸ​꧈​ꦱꦶꦁ​ꦔꦼꦧꦺꦴꦠ꧀ꦠꦶ​ꦥꦔꦤ꧀ꦱꦏ꧀ꦥꦶꦫꦶꦁ​꧈​ꦔꦼꦢꦺꦴꦭ꧀ꦥꦽꦗꦚ꧀ꦗꦶꦪꦤ꧀ꦤꦺ​ꦮꦺꦴꦁ​ꦠꦸꦮꦤꦺ​꧈​ꦪꦏꦸꦮꦶ​ꦥꦽꦗꦚ꧀ꦗꦶꦪꦤ꧀ꦧꦼꦂꦏꦃ​ꦩꦫꦁ​ꦢꦺꦏ꧀ꦤꦺꦱꦶꦁ​ꦢꦢꦶ​ꦲꦤꦏ꧀ꦱꦶꦁ​ꦲꦩ꧀ꦧꦉꦥ꧀꧈​ 17ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦶꦁ​ꦠꦼꦩ꧀ꦧꦺꦩ꧀ꦧꦸꦫꦶꦤꦺꦌꦱꦲꦸ​ꦏꦼꦥꦺꦔꦶꦤ꧀​ꦤ꧀ꦢꦸꦮꦺꦤ꧀ꦤꦶ​ꦧꦼꦂꦏꦃꦲꦺ​ꦥꦽꦗꦚ꧀ꦗꦶꦪꦤ꧀ꦏꦸꦮꦶ​ꦩꦼꦤꦺꦃ​꧈​ꦤꦁꦔꦶꦁ​ꦱꦼꦤꦗꦤ꧀ꦲꦼꦁꦒꦺꦴꦤꦺ​ꦚꦸꦮꦸꦤ꧀ꦢꦶꦭꦧꦸꦃꦲꦶ​ꦠꦔꦶꦱ꧀ꦱꦤ꧀ ꦩꦼꦏ꧀ꦱ​ꦢꦺꦏ꧀ꦤꦺꦲꦺꦴꦫ​ꦧꦶꦱ​ꦤꦩ꧀ꦥ​ꦧꦼꦂꦏꦃꦲꦺ​ꦩꦼꦤꦺꦃ​꧈​ꦲꦮꦶꦠ꧀ꦲꦥ​ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦏꦫꦺꦴ​ꦢꦺꦏ꧀ꦤꦺꦲꦺꦴꦫ​ꦏꦼꦤꦺꦁꦢꦶꦮꦭꦶꦏ꧀ꦩꦼꦤꦺꦃ​꧉​

18꧋ꦥꦫ​ꦱꦼꦢꦸꦭꦸꦂ​꧈​ꦏꦼꦤꦺꦁꦲꦥ​ꦠ​ꦏꦺꦴꦏ꧀ꦲꦮꦏ꧀ꦏꦺ​ꦢꦺꦮꦺꦱꦶꦗꦶꦱꦶꦗꦶꦤꦺ​ꦏꦸꦢꦸ​ꦔ꧀ꦭꦸꦩꦸꦃꦲꦶꦲꦸꦫꦶꦥ꧀ꦫꦸꦩꦏꦼꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦤ꧀ꦢꦸꦮꦺꦤ꧀ꦤꦶ​ꦭꦏꦸ​ꦱꦶꦁ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦮꦶꦱ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀ꦏꦧꦺꦃꦲꦺ?ꦲꦮꦶꦠ꧀ꦥꦢ​ꦔꦼꦂꦠꦶꦪ​ꦤꦺꦏ꧀ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦤ꧀ꦢꦸꦮꦺꦤ꧀ꦤꦶ​ꦥꦽꦗꦚ꧀ꦗꦶꦪꦤ꧀ꦱꦶꦁ​ꦲꦚꦂ​꧈​ꦱꦶꦁ​ꦔ꧀ꦒꦮꦺꦏ꧀ꦏꦏꦺꦢꦭꦤ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦧꦶꦱ​ꦚꦼꦢꦼꦏ꧀ꦏꦶꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦩ꧀ꦧꦶꦪꦺꦤ꧀ꦲꦺꦴꦫ​ꦮꦤꦶ​ꦭꦤ꧀ꦲꦺꦴꦫ​ꦢꦶꦭꦶꦭꦤꦶ​ꦚꦼꦢꦼꦏ꧀ꦏꦶꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦮꦶꦠ꧀ꦧꦺꦢ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧈​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦩ꧀ꦧꦶꦪꦺꦤ꧀ꦚꦼꦢꦼꦏ꧀ꦏꦶꦧꦫꦁ​ꦱꦶꦁ​ꦏꦺꦠꦺꦴꦏ꧀ ꦪꦏꦸꦮꦶ​ꦒꦸꦤꦸꦁ​ꦯꦶꦤꦻꦱꦶꦁ​ꦒꦼꦤꦶꦤꦺ​ꦩꦸꦭꦏ꧀ꦩꦸꦭꦏ꧀ ꦩꦺꦒ​ꦥꦼꦠꦼꦁ​ꦭꦤ꧀ꦲꦔꦶꦤ꧀ꦭꦺꦱꦸꦱ꧀꧈​ 19ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦏꦿꦸꦔꦸ​ꦠꦿꦺꦴꦩ꧀ꦥꦺꦠ꧀ꦩꦸꦤꦶ​꧈​ꦠꦼꦫꦸꦱ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦔꦁꦒꦺꦴ​ꦱ꧀ꦮꦫ​ꦱꦶꦁ​ꦔ꧀ꦒꦶꦭꦤ꧀ꦤꦶ꧉​ꦮꦺꦴꦁꦮꦺꦴꦁ​ꦱꦶꦁ​ꦏꦿꦸꦔꦸ​ꦱ꧀ꦮꦫ​ꦏꦸꦮꦶ​ꦱꦩ꧀ꦥꦺꦏ꧀ꦥꦢ​ꦚꦸꦮꦸꦤ꧀ ꦱꦸꦥꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦔꦺꦴꦩꦺꦴꦁꦩꦼꦤꦺꦃ​꧉​ 20ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦮꦼꦢꦶ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​:“ꦱꦥ​ꦮꦲꦺ​ꦱꦶꦁ​ꦤ꧀ꦢꦼꦩꦺꦏ꧀ꦒꦸꦤꦸꦁ​ꦲꦶꦏꦶ​ꦏꦸꦢꦸ​ꦢꦶꦥꦠꦺꦤ꧀ꦤꦶ​ꦏꦫꦺꦴ​ꦮꦠꦸ​꧈​ꦲꦺꦴꦫ​ꦥꦼꦂꦢꦸꦭꦶꦏꦺꦮꦤ꧀ꦲꦥ​ꦩꦤꦸꦁꦱ​꧉​” 21ꦊꦭꦏꦺꦴꦤ꧀ꦏꦸꦮꦶ​ꦗꦤ꧀​ꦔ꧀ꦒꦶꦭꦤ꧀ꦤꦶꦭꦤ꧀ꦩꦼꦢꦺꦤ꧀ꦤꦶ​ꦠꦼꦤꦤ꧀ ꦱꦩ꧀ꦥꦺꦏ꧀ꦤꦧꦶ​ꦩꦺꦴꦱꦼꦱ꧀ꦢꦺꦮꦺꦲꦩ꧀ꦧꦼꦔꦺꦴꦏ꧀:“ꦲꦏꦸ​ꦮꦼꦢꦶ​ꦧꦔꦼꦠ꧀ꦭꦤ꧀ꦲꦮꦏ꧀ꦏꦸ​ꦤ꧀ꦢꦽꦢꦼꦏ꧀ꦏꦧꦺꦃ​꧉​”

22꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦲꦺꦴꦫ​ꦏꦪ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦩ꧀ꦧꦶꦪꦺꦤ꧀ ꦤꦁꦔꦶꦁ​ꦱꦺꦗꦺ​ꦧꦔꦼꦠ꧀꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦲꦶꦏꦶ​ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦒꦸꦤꦸꦁ​ꦱꦶꦪꦺꦴꦤ꧀ ꦤꦁꦏꦸꦠꦥꦁꦒꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀ ꦪꦏꦸꦮꦶ​ꦱꦶꦁ​ꦢꦶꦲꦫꦤ꧀ꦤꦶ​ꦪꦺꦫꦸꦱꦭꦺꦩ꧀ꦏꦱ꧀ꦮꦂꦒꦤ꧀꧈​ꦤꦁꦏꦺꦴꦤꦺꦴ​ꦩꦸꦭꦺꦏꦠ꧀ꦲꦺꦮꦺꦴꦤ꧀ꦤꦺꦮꦺꦴꦤ꧀ꦥꦢ​ꦔꦸꦩ꧀ꦥꦸꦭ꧀ꦲꦶꦁ​ꦏꦧꦸꦔꦃꦲꦤ꧀ꦒꦼꦢꦺ꧉​ 23ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦩ꧀ꦊꦧꦸ​ꦲꦶꦁ​ꦏꦸꦩ꧀ꦥꦸꦭ꧀ꦭꦤ꧀ꦤꦺ​ꦲꦤꦏ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦢꦶꦲꦁꦒꦼꦥ꧀ꦢꦢꦶ​ꦲꦤꦏ꧀ꦲꦩ꧀ꦧꦉꦥ꧀ꦱꦶꦁ​ꦩꦺꦭꦸ​ꦤ꧀ꦢꦸꦮꦺꦤ꧀ꦤꦶ​ꦱꦼꦩ꧀ꦧꦫꦁ​ꦭꦤ꧀ꦱꦶꦁ​ꦗꦼꦤꦼꦁꦔꦺ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦱ꧀ꦮꦂꦒ​꧉​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦿꦸꦠꦸꦏꦧꦺꦃ​ꦩꦤꦸꦁꦱ​꧈​ꦤꦁꦥꦁꦒꦺꦴꦤ꧀ꦤꦤ꧀ꦤꦺ​ꦫꦺꦴꦃꦲꦺ​ꦮꦺꦴꦁꦮꦺꦴꦁ​ꦱꦶꦁ​ꦲꦸꦫꦶꦥ꧀ꦥꦺꦥꦢ​ꦩꦤꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦲꦶꦏꦶ​ꦮꦶꦱ꧀ꦥꦢ​ꦩꦠꦶ​꧈​ꦩꦸꦭꦤꦺ​ꦥꦢ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​ 24ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦲꦶꦏꦶ​ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦤꦼꦠꦼꦥ꧀ꦥꦏꦺꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦚꦂ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦩꦫ​ꦔꦢꦼꦥ꧀ꦥꦶꦒꦼꦠꦶꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦠꦸꦩꦺꦠꦺꦱ꧀ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦠꦼꦒꦼꦱ꧀ꦱꦺ​ꦒꦼꦠꦶꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦏꦏ꧀ꦏꦏꦺꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦧꦺꦢ​ꦏꦫꦺꦴ​ꦒꦼꦠꦶꦃꦲꦺ​ꦄꦧꦺꦭ꧀ ꦱꦶꦁ​ꦩꦫꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦤꦼꦱꦸ​ꦭꦤ꧀ꦏꦸꦢꦸ​ꦩ꧀ꦧꦊꦱ꧀ꦩꦫꦁ​ꦮꦺꦴꦁ​ꦱꦶꦁ​ꦩꦠꦺꦤ꧀ꦤꦶ​ꦄꦧꦺꦭ꧀꧈​

25꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦥꦢ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦭꦤ꧀ꦲꦗ​ꦱꦩ꧀ꦥꦺꦏ꧀ꦏꦺꦴꦮꦺ​ꦚꦶꦁꦏꦸꦂꦫꦶꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦺꦴꦩꦺꦴꦁꦩꦫꦁ​ꦏꦺꦴꦮꦺ​꧉​ꦲꦮꦶꦠ꧀ꦢꦺꦏ꧀​ꦩ꧀ꦧꦶꦪꦺꦤ꧀​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦲꦺꦤꦺꦁꦱꦶꦗꦶ​ꦮꦲꦺ​ꦱꦶꦁ​ꦧꦶꦱ​ꦔ꧀ꦭꦸꦔꦤ꧀ꦤꦶꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦲꦺꦴꦫ​ꦥꦢ​ꦒꦼꦊꦩ꧀ ꦔꦿꦸꦔꦺꦴꦏ꧀ꦏꦏꦺꦢꦺꦴꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦤꦁꦒꦸꦤꦸꦁ​ꦯꦶꦤꦻ꧉​ꦭꦃ​ꦏꦼꦥꦿꦶꦪꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱꦤꦺ​ꦔ꧀ꦭꦸꦔꦤ꧀ꦤꦶꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦱꦁꦏꦱ꧀ꦮꦂꦒ​? 26ꦢꦺꦏ꧀​ꦩ꧀ꦧꦶꦪꦺꦤ꧀ ꦢꦺꦴꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦱꦁꦏꦒꦸꦤꦸꦁ​ꦯꦶꦤꦻ꧈​ꦱ꧀ꦮꦫꦤꦺ​ꦢꦺꦏ꧀ꦤꦺꦔꦺꦴꦪꦏ꧀ꦏꦏꦺꦧꦸꦩꦶ​꧉​ꦤꦁꦔꦶꦁ​ꦏꦁꦒꦺꦴ​ꦗꦩꦤ꧀ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦼꦠꦺꦴꦏ꧀ꦏꦏꦺꦗꦚ꧀ꦗꦶ​ꦱꦶꦁ​ꦭꦸꦮꦶꦃ​ꦔ꧀ꦒꦶꦭꦤ꧀ꦤꦶ꧈​ꦲꦮꦶꦠ꧀ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦤꦺ​:“ꦲꦏꦸ​ꦧꦏꦭ꧀ꦔꦺꦴꦪꦏ꧀ꦏꦏꦺꦱꦼꦥꦶꦱ꧀ꦱꦤ꧀ꦩꦼꦤꦺꦃ​꧈​ꦲꦺꦴꦫ​ꦤꦩꦸꦁ​ꦧꦸꦩꦶ​꧈​ꦤꦁꦔꦶꦁ​ꦲꦸꦒ​ꦭꦔꦶꦠ꧀꧈​” 27ꦠꦼꦩ꧀ꦧꦸꦁ​“ꦱꦼꦥꦶꦱ꧀ꦱꦤ꧀ꦩꦼꦤꦺꦃ​”ꦏꦸꦮꦶ​ꦔꦺꦴꦩꦺꦴꦁꦔꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦿꦸꦱꦏ꧀ꦱꦼꦩ꧀ꦧꦫꦁ​ꦱꦶꦁ​ꦢꦶꦒꦮꦺ​꧈​ꦤꦁꦔꦶꦁ​ꦲꦺꦴꦫ​ꦏꦁꦒꦺꦴ​ꦔꦢꦼꦏ꧀ꦱ꧀ꦭꦮꦱ꧀ꦱꦺ꧉​ꦢꦢꦶꦤꦺ​ꦤꦩꦸꦁ​ꦱꦼꦩ꧀ꦧꦫꦁ​ꦱꦶꦁ​ꦢꦶꦒꦮꦺ​ꦏꦁꦒꦺꦴ​ꦱ꧀ꦭꦮꦱ꧀ꦱꦺꦧꦏꦭ꧀ꦔꦢꦼꦏ꧀ꦠꦼꦫꦸꦱ꧀꧈​

28꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦶꦏꦺꦏ꧀ꦏꦶꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦺꦴꦫ​ꦫꦸꦱꦏ꧀ ꦩꦸꦭꦤꦺ​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦤꦩ꧀ꦥ​ꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦱꦏ꧀ꦏꦧꦺꦃꦲꦺ꧈​ꦲꦮꦶꦠ꧀ꦢꦺꦏ꧀ꦤꦺꦔꦼꦏꦺꦏ꧀ꦏꦶꦏꦧꦺꦃ​ꦏꦸꦮꦶ​ꦱꦁꦏꦏꦠꦿꦺꦱ꧀ꦤꦤ꧀ꦭꦤ꧀ꦏꦧꦼꦕꦶꦏ꧀ꦏꦤ꧀꧈​ꦠꦸꦗꦸꦮꦤ꧀ꦤꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔ꧀ꦭꦢꦺꦤ꧀ꦤꦶ​ꦢꦺꦏ꧀ꦤꦺꦩꦤꦸꦠ꧀ꦏꦉꦥ꧀ꦥꦺ​ꦢꦺꦏ꧀ꦤꦺ꧈​ꦏꦫꦺꦴ​ꦲꦠꦶ​ꦱꦶꦁ​ꦮꦼꦢꦶ​ꦭꦤ꧀ꦔꦗꦺꦤ꧀ꦤꦶ​꧉​ 29ꦏꦼꦤꦺꦁꦲꦥꦲꦮꦏ꧀ꦏꦺꦢꦺꦮꦺꦏꦺꦴꦏ꧀ꦏꦸꦢꦸꦮꦼꦢꦶꦭꦤ꧀ꦔꦗꦺꦤ꧀ꦤꦶꦩꦫꦁꦒꦸꦱ꧀ꦠꦶꦄꦭ꧀ꦭꦃ?ꦗꦭꦂꦫꦤ꧀ꦒꦸꦱ꧀ꦠꦶꦄꦭ꧀ꦭꦃꦲꦺꦲꦮꦏ꧀ꦏꦺꦢꦺꦮꦺꦏꦸꦮꦶꦒꦸꦱ꧀ꦠꦶꦄꦭ꧀ꦭꦃꦱꦶꦁꦔꦿꦸꦱꦏ꧀ꦏꦧꦺꦃꦮꦺꦴꦁꦱꦶꦁꦲꦺꦴꦫꦒꦼꦊꦩ꧀ꦩꦤꦸꦠ꧀ꦩꦫꦁꦢꦺꦏ꧀ꦤꦺ꧈​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴꦒꦼꦤꦶꦱꦶꦁꦩꦿꦺꦩꦺꦤ꧀ꦔꦺꦴꦧꦺꦴꦁꦱꦼꦩ꧀ꦧꦫꦁꦱꦶꦁꦤꦁꦢꦭꦤ꧀ꦤꦺ꧉​

↑ ↑ ↑


꧋ꦲꦸꦫꦶꦥ꧀ꦧꦼꦧꦉꦁꦔꦤ꧀ꦤꦸꦫꦸꦠ꧀ꦒꦸꦱ꧀ꦠꦶ꧉​

꧇​꧑꧓꧇​ 1꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦱꦲꦶꦏꦶ​ꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦏꦺꦧꦧ꧀ꦥꦽꦏꦫꦥꦽꦏꦫ​ꦱꦶꦁ​ꦥꦼꦤ꧀ꦠꦶꦁ​ꦲꦶꦁ​ꦱꦏ꧀ꦗꦼꦫꦺꦴꦤꦺꦲꦸꦫꦶꦥ꧀ꦧꦼꦧꦉꦁꦔꦤ꧀ꦤꦸꦫꦸꦠ꧀ꦒꦸꦱ꧀ꦠꦶ​꧉​ꦏꦥꦶꦁ​ꦥꦶꦱꦤ꧀ ꦥꦢ​ꦩꦤ꧀ꦠꦼꦥ꧀ꦥ​ꦠꦼꦫꦸꦱ꧀ꦲꦼꦁꦒꦺꦴꦤ꧀ꦩꦸ​ꦥꦢ​ꦠꦿꦺꦱ꧀ꦤꦩꦫꦁ​ꦱꦏ꧀ꦥꦢꦥꦢ꧈​ꦏꦸꦢꦸ​ꦏꦪ​ꦱꦼꦢꦸꦭꦸꦂ​ꦱꦶꦁ​ꦮꦶꦱ꧀ꦢꦶꦢꦢꦺꦏ꧀ꦏꦏꦺꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​

2꧋ꦏꦥꦶꦁ​ꦥꦶꦤ꧀ꦢꦺꦴꦤꦺ꧈​ꦲꦗ​ꦥꦢ​ꦲꦺꦩꦤ꧀ꦔꦼꦏꦺꦏ꧀ꦏꦶꦲꦶꦤꦼꦥ꧀ꦥꦤ꧀ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦁꦏꦭꦶꦪ​ꦥꦁꦒꦺꦴꦤ꧀ꦤꦤ꧀ꦱꦶꦁ​ꦥꦢ​ꦠꦼꦏ​ꦩꦼꦂꦢꦪꦺꦴꦃ꧉​ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦤꦺꦏ꧀ꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦠꦤ꧀ꦥ​ꦔꦼꦂꦠꦶ​ꦥꦢ​ꦤꦩ꧀ꦥ​ꦩꦸꦭꦺꦏꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦶꦏꦶꦫꦺꦤꦩꦸꦁ​ꦔꦼꦏꦺꦏ꧀ꦏꦶꦲꦶꦤꦼꦥ꧀ꦥꦤ꧀ꦩꦫꦁ​ꦢꦪꦺꦴꦃꦱꦁꦏꦲꦢꦺꦴꦃ​ꦮꦲꦺ​꧉​

3꧋ꦏꦥꦶꦁ​ꦠꦼꦭꦸꦤꦺ​꧈​ꦲꦗ​ꦭꦭꦶ​ꦤꦶꦭꦶꦏ꧀ꦏꦶ​ꦱꦼꦢꦸꦭꦸꦂ​ꦱꦶꦁ​ꦤꦁꦱꦼꦠꦿꦥꦤ꧀ꦗꦭꦂꦫꦤ꧀​ꦔ꧀ꦭꦧꦸꦃꦲꦶ​ꦥꦼꦔꦤ꧀ꦢꦼꦭ꧀ꦭꦺ​꧉​ꦢꦶꦲꦁꦒꦼꦥ꧀ꦏꦪ​ꦤꦺꦏ꧀ꦏꦺꦴꦮꦺ​ꦢꦺꦮꦺꦲꦸꦒ​ꦏꦠꦸꦠ꧀ꦢꦶꦱꦼꦠꦿꦥ꧀꧈​ꦲꦸꦒ​ꦲꦗ​ꦭꦭꦶ​ꦤꦸꦭꦸꦁꦔꦶ​ꦱꦼꦢꦸꦭꦸꦂ​ꦱꦶꦁ​ꦢꦶꦥꦶꦭꦂꦫ​ꦗꦭꦂꦫꦤ꧀ꦥꦼꦔꦤ꧀ꦢꦼꦭ꧀ꦭꦺ​꧈​ꦢꦶꦥꦢꦏ꧀ꦏꦏꦺꦤꦺꦏ꧀ꦏꦺꦴꦮꦺ​ꦢꦺꦮꦺꦔꦭꦩ꧀ꦩꦶ​ꦱꦁꦱꦫ​ꦏꦸꦮꦶ​꧉​

4꧋ꦏꦥꦶꦁ​ꦥꦥꦠ꧀ꦠꦺ꧈​ꦲꦏꦸ​ꦏꦼꦥꦺꦔꦶꦤ꧀ꦔꦺꦭꦶꦁꦔꦏꦺꦧꦧ꧀ꦧꦼꦧꦺꦴꦗꦺꦴꦮꦤ꧀;ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦗꦺꦤ꧀ꦤꦶ​ꦠꦼꦤꦤ꧀꧈​ꦮꦺꦴꦁ​ꦭꦤꦁ​ꦭꦤ꧀ꦮꦺꦴꦁ​ꦮꦺꦢꦺꦴꦏ꧀ꦏꦸꦢꦸ​ꦠꦼꦩꦼꦤ꧀ꦠꦼꦫꦸꦱ꧀ꦩꦫꦁ​ꦱꦏ꧀ꦥꦢꦥꦢꦲꦶꦁ​ꦱꦏ꧀ꦗꦼꦫꦺꦴꦤꦺꦧꦼꦧꦺꦴꦗꦺꦴꦮꦤ꧀꧈​ꦲꦏꦸ​ꦔꦺꦭꦶꦁꦔꦏꦺꦏꦺꦴꦮꦺ​ꦧꦧ꧀ꦏꦸꦮꦶ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦚꦼꦠꦿꦥ꧀ꦮꦺꦴꦁ​ꦱꦶꦁ​ꦭꦏꦸ​ꦧꦺꦢꦁꦭꦤ꧀ꦭꦏꦸ​ꦔ꧀ꦭꦺꦴꦤ꧀ꦠꦺ꧉​

5꧋ꦏꦥꦶꦁ​ꦭꦶꦩꦤꦺ​ꦲꦏꦸ​ꦏꦼꦥꦺꦔꦶꦤ꧀ꦔꦺꦭꦶꦁꦔꦏꦺꦏꦺꦴꦮꦺ​ꦧꦧ꧀ꦢꦸꦮꦶꦠ꧀ꦥꦫ​ꦱꦼꦢꦸꦭꦸꦂ​꧉​ꦏꦸꦮꦶ​ꦲꦗ​ꦢꦶꦒꦮꦺ​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦲꦶꦁ​ꦲꦸꦫꦶꦥ꧀ꦩꦸ​ꦭꦤ꧀ꦲꦗ​ꦤꦩꦸꦁ​ꦩꦶꦏꦶꦂꦫꦏꦺꦤꦸꦩ꧀ꦥꦸꦏ꧀ꦤꦸꦩ꧀ꦥꦸꦏ꧀ꦧꦤ꧀ꦢ꧉​ꦲꦥꦶꦏ꧀ꦏꦺ​ꦤꦺꦏ꧀ꦏꦺꦴꦮꦺ​ꦥꦢ​ꦠꦿꦶꦩ​ꦏꦫꦺꦴ​ꦲꦥ​ꦤ꧀ꦢꦸꦮꦺꦤꦺ꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦸꦭꦸꦁꦔꦶ​ꦭꦤ꧀ꦧꦏꦭ꧀ꦔꦿꦺꦮꦁꦔꦶ​ꦏꦺꦴꦮꦺ​꧈​ꦲꦮꦶꦠ꧀ꦢꦺꦏ꧀ꦤꦺꦮꦶꦱ꧀ꦗꦚ꧀ꦗꦶ​ꦔꦺꦤꦺ​:“ꦲꦏꦸ​ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦧꦏꦭ꧀ꦤꦺꦒꦏ꧀ꦏꦏꦺꦏꦺꦴꦮꦺ​ꦭꦤ꧀ꦲꦏꦸ​ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦧꦏꦭ꧀ꦤꦶꦁꦒꦭ꧀ꦏꦺꦴꦮꦺ​꧉​” 6ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦮꦤꦶ​ꦔꦺꦴꦩꦺꦴꦁꦔꦺꦤꦺ​ꦥꦫ​ꦱꦼꦢꦸꦭꦸꦂ​:

“ꦒꦸꦱ꧀ꦠꦶ​ꦧꦏꦭ꧀ꦔꦿꦺꦮꦁꦔꦶ​ꦲꦏꦸ​꧈​ꦩꦸꦭꦤꦺ​ꦲꦏꦸ​ꦲꦺꦴꦫ​ꦮꦼꦢꦶ​;ꦩꦤꦸꦁꦱ​ꦧꦶꦱ​ꦔꦥꦏ꧀ꦏꦏꦺꦲꦏꦸ​?”

7꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦲꦸꦒ​ꦏꦼꦥꦺꦔꦶꦤ꧀ꦔꦺꦭꦶꦁꦔꦏꦺꦏꦺꦴꦮꦺ​ꦧꦧ꧀ꦥꦫ​ꦥꦼꦤꦸꦤ꧀ꦠꦸꦤ꧀ꦱꦶꦁ​ꦢꦺꦏ꧀​ꦩ꧀ꦧꦶꦪꦺꦤ꧀ꦥꦢ​ꦩꦸꦭꦁꦔꦶꦏꦺꦴꦮꦺ​ꦧꦧ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦗ​ꦥꦢ​ꦭꦭꦶ​ꦩꦫꦁ​ꦥꦫ​ꦥꦼꦤꦸꦤ꧀ꦠꦸꦤ꧀ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦏꦸꦮꦶ​꧉​ꦥꦢ​ꦢꦶꦥꦶꦏꦶꦂ​ꦲꦸꦫꦶꦥ꧀ꦥꦺꦥꦫ​ꦥꦼꦤꦸꦤ꧀ꦠꦸꦤ꧀ꦏꦸꦮꦶ​꧈​ꦲꦼꦁꦒꦺꦴꦤꦺ​ꦥꦢ​ꦩꦤꦸꦠ꧀ꦒꦸꦱ꧀ꦠꦶ​ꦠꦼꦏꦤ꧀ꦥꦠꦶꦤꦺ​꧉​ꦥꦼꦔꦤ꧀ꦢꦼꦭ꧀ꦭꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦼꦤꦺꦁꦲꦩ꧀ꦧꦺꦴꦏ꧀ꦠꦶꦫꦸ​꧉​ 8ꦲꦮꦶꦠ꧀ꦥꦫ​ꦥꦼꦤꦸꦤ꧀ꦠꦸꦤ꧀ꦏꦸꦮꦶ​ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦲꦺꦴꦫ​ꦩꦭꦶꦃ​꧈​ꦤꦁꦔꦶꦁ​ꦩ꧀ꦧꦶꦪꦺꦤ꧀ꦭꦤ꧀ꦱꦲꦶꦏꦶ​ꦢꦺꦏ꧀ꦤꦺꦠꦸꦁꦒꦭ꧀ꦭꦺ​ꦮꦲꦺ​꧈​ꦠꦼꦏꦤ꧀ꦱ꧀ꦭꦮꦱ꧀ꦱꦺ꧉​ 9ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦢꦶꦲꦺꦭꦶꦁ​ꦥꦶꦮꦸꦭꦁꦔꦺ​ꦥꦫ​ ꦥꦼꦤꦸꦤ꧀ꦠꦸꦤ꧀ꦱꦶꦁ​ꦮꦶꦱ꧀ꦥꦢ​ꦩꦠꦶ​ꦏꦸꦮꦶ​ꦭꦤ꧀ꦲꦗ​ꦱꦩ꧀ꦥꦺꦏ꧀ꦏꦺꦴꦮꦺ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦥꦶꦮꦸꦭꦁ​ꦱꦶꦁ​ꦲꦺꦴꦫꦲꦺꦴꦫ​꧈​ꦱꦶꦁ​ꦤꦩꦸꦁ​ꦩꦫꦏ꧀ꦏꦏꦺꦏꦺꦴꦮꦺ​ꦤꦶꦁꦒꦭ꧀ꦢꦭꦤ꧀ꦤꦺ​ꦒꦸꦱ꧀ꦠꦶ​꧉​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦗꦭꦂꦫꦤ꧀ꦢꦺꦏ꧀ꦤꦺꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦮꦼꦭꦱ꧀ꦱꦤ꧀ꦤꦺ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦲꦺꦴꦫ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦩꦁꦔꦤ꧀ꦲꦶꦏꦶ​ꦲꦥ​ꦲꦺꦴꦫ​ꦩꦁꦔꦤ꧀ꦏꦲꦺ​꧉​ꦮꦸꦗꦸꦠ꧀ꦠꦺꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦠꦼꦩꦼꦤ꧀ꦤꦼꦠꦼꦥ꧀ꦥꦶ​ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦧꦧ꧀ꦱꦶꦁ​ꦲꦺꦴꦫ​ꦲꦺꦤ꧀ꦠꦸꦏ꧀ꦢꦶꦥꦔꦤ꧀ꦏꦸꦮꦶ​ꦪ​ꦲꦺꦴꦫ​ꦤꦩ꧀ꦥ​ꦧꦠꦶꦲꦥꦲꦥ​꧉​

10꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦢꦺꦴꦱꦤꦺ​ꦮꦶꦱ꧀ꦏꦠꦼꦧꦸꦱ꧀ꦱꦏ꧀ꦏꦧꦺꦃꦲꦺ꧉​ꦮꦺꦴꦁꦮꦺꦴꦁ​ꦱꦶꦁ​ꦲꦶꦗꦶꦏ꧀ꦥꦢ​ꦔꦧꦼꦏ꧀ꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦠꦸꦫꦸꦠ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦲꦺꦴꦫ​ꦧꦶꦱ​ꦏꦠꦼꦧꦸꦱ꧀ꦢꦺꦴꦱꦤꦺ​ꦱꦁꦏꦏꦸꦂꦧꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 11ꦲꦥ​ꦗꦭꦂꦫꦤ꧀ꦤꦺ​?ꦗꦭꦂꦫꦤ꧀ꦩꦶꦠꦸꦫꦸꦠ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦲꦶꦩꦩ꧀ꦩꦺ​ꦒꦼꦢꦺꦚ꧀ꦗꦶꦏꦸꦏ꧀ꦒꦼꦠꦶꦃꦲꦺ​ꦏꦺꦮꦤ꧀ꦱꦶꦁ​ꦢꦶꦧꦼꦭꦺꦃ​ꦠꦼꦫꦸꦱ꧀ꦢꦶꦒꦮ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦱꦸꦕꦶ​ꦢꦺꦮꦺ꧉​ꦒꦼꦠꦶꦃ​ꦏꦸꦮꦶ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦥꦤꦼꦧꦸꦱ꧀ꦱꦺ​ꦢꦺꦴꦱꦢꦺꦴꦱꦤꦺ​꧉​ꦏꦺꦮꦤ꧀ꦱꦶꦁ​ꦢꦶꦧꦼꦭꦺꦃ​ꦩꦲꦸ​ꦠꦼꦫꦸꦱ꧀ꦏꦸꦢꦸ​ꦢꦶꦒꦮ​ꦩꦼꦠꦸ​ꦤꦁꦱꦏ꧀​ꦚ꧀ꦗꦧꦤꦺ​ꦏꦸꦠꦭꦤ꧀ꦏꦸꦢꦸ​ꦢꦶꦲꦺꦴꦧꦺꦴꦁ​ꦤꦁꦏꦺꦴꦤꦺꦴ​꧉​ 12ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦒ​ꦏꦸꦢꦸ​ꦤꦤ꧀ꦢꦁꦱꦁꦱꦫ​ꦭꦤ꧀ꦢꦶꦥꦠꦺꦤ꧀ꦤꦶ​ꦤꦁꦚ꧀ꦗꦧꦤꦺ​ꦏꦸꦠ꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦢꦺꦏ꧀ꦤꦺꦧꦶꦱ​ꦤꦼꦧꦸꦱ꧀ꦢꦺꦴꦱꦤꦺ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦼꦥꦶꦱ꧀ꦱꦤ꧀ꦏꦁꦒꦺꦴ​ꦱꦏ꧀ꦏꦧꦺꦃꦲꦺ꧈​ꦱꦸꦥꦪ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​

13꧋ꦥꦚ꧀ꦕꦺꦤ꧀ꦪ​ꦔꦶꦱꦶꦤ꧀ꦤꦶꦱꦶꦤ꧀ꦤꦏꦺꦠꦼꦤꦤ꧀ꦩꦠꦶ​ꦤꦁꦱꦏ꧀​ꦚ꧀ꦗꦧꦤꦺ​ꦏꦸꦠ꧈​ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦥꦼꦂꦢꦸꦭꦶꦏꦸꦮꦶ​꧈​ꦗꦭꦂꦫꦤ꧀ꦢꦺꦏ꧀ꦤꦺꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧉​ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦱꦲꦶꦏꦶ​ꦥꦢ​ꦤꦶꦁꦒꦭ꧀ꦥꦔꦧꦼꦏ꧀ꦠꦶ​ꦱꦶꦁ​ꦩꦶꦠꦸꦫꦸꦠ꧀ꦕꦫ​ꦱꦶꦁ​ꦭꦮꦱ꧀ ꦱꦶꦁ​ꦩꦶꦠꦸꦫꦸꦠ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔꦧꦼꦏ꧀ꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦶꦮꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ ꦱꦼꦤꦗꦤ꧀ꦲꦮꦏ꧀ꦏꦺ​ꦢꦺꦮꦺꦢꦶꦱꦼꦥꦺꦭꦺꦏ꧀ꦏꦏꦺꦮꦺꦴꦁ​꧉​ 14ꦭꦃ​ꦏꦼꦤꦺꦁꦲꦥ​ꦲꦮꦏ꧀ꦏꦺ​ꦢꦺꦮꦺꦏꦺꦴꦏ꧀ꦏꦸꦢꦸ​ꦤꦶꦁꦒꦭ꧀ꦥꦔꦧꦼꦏ꧀ꦠꦶ​ꦩꦶꦠꦸꦫꦸꦠ꧀ꦕꦫ​ꦱꦶꦁ​ꦭꦮꦱ꧀?ꦗꦭꦂꦫꦤ꧀ꦤꦁꦧꦸꦩꦶ​ꦏꦺꦤꦺ​ꦲꦺꦴꦫ​ꦲꦺꦤꦺꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦏꦼꦤꦺꦁꦢꦶꦲꦼꦁꦒꦺꦴꦤ꧀ꦤꦶ​ꦱ꧀ꦭꦮꦱ꧀ꦱꦺ꧈​ꦲꦺꦴꦫ​꧉​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦔꦉꦥ꧀ꦲꦉꦥ꧀ꦧꦶꦱ​ꦩꦁꦒꦺꦴꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦱꦺ꧉​ 15ꦭꦤ꧀ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦩꦠꦶ​ꦱꦼꦥꦶꦱ꧀ꦱꦤ꧀ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦮꦺꦴꦁ​ꦏꦧꦺꦃ​ꦭꦤ꧀ꦢꦺꦏ꧀ꦤꦺꦤꦁꦱ꧀ꦮꦂꦒ​ꦢꦢꦶ​ꦮꦏꦶꦭ꧀ꦭꦺ​ꦲꦮꦏ꧀ꦏꦺ​ꦢꦺꦮꦺꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦠꦤ꧀ꦱꦃ​ꦩꦠꦸꦂꦏꦼꦱꦸꦮꦸꦤ꧀ꦭꦤ꧀ꦩꦼꦩꦸꦗꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦢꦺꦏ꧀ꦤꦺꦱꦼꦤꦼꦁ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦏꦺꦴꦤ꧀ꦤꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦸꦩꦠ꧀ꦠꦺ​ꦭꦤ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦏꦺꦴꦤ꧀ꦤꦶ​ꦤꦺꦏ꧀ꦢꦺꦏ꧀ꦤꦺꦒꦼꦢꦺꦏ꧀ꦮꦱꦤꦺ​꧉​ 16ꦥꦫ​ꦱꦼꦢꦸꦭꦸꦂ​꧈​ꦏꦼꦗꦧ​ꦱꦁꦏꦏꦸꦮꦶ​꧈​ꦲꦗ​ꦥꦢ​ꦭꦭꦶ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦕꦶꦏ꧀ꦭꦤ꧀ꦤꦸꦭꦸꦁ​ꦩꦫꦁ​ꦱꦏ꧀ꦥꦢꦥꦢ꧈​ꦲꦮꦶꦠ꧀ꦏꦸꦮꦶ​ꦏꦸꦂꦧꦤ꧀ꦱꦶꦁ​ꦢꦶꦱꦼꦤꦼꦁꦔꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

17꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​꧈​ꦏꦺꦴꦮꦺ​ꦏꦸꦢꦸ​ꦩꦤꦸꦠ꧀ꦩꦫꦁ​ꦥꦼꦤꦸꦤ꧀ꦠꦸꦤ꧀ꦥꦼꦤꦸꦤ꧀ꦠꦸꦤ꧀ꦩꦸꦭꦤ꧀ꦲꦥ​ꦥꦶꦮꦸꦭꦁꦔꦺ​ꦏꦸꦢꦸ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧉​ꦗꦭꦂꦫꦤ꧀ꦥꦼꦤꦸꦤ꧀ꦠꦸꦤ꧀ꦥꦼꦤꦸꦤ꧀ꦠꦸꦤ꧀ꦏꦸꦮꦶ​ꦲꦺꦴꦫ​ꦭꦺꦫꦺꦤ꧀ꦲꦼꦁꦒꦺꦴꦤꦺ​ꦥꦢ​ꦚ꧀ꦗꦒ​ꦚꦮꦩꦸ​ꦭꦤ꧀ꦪ​ꦮꦺꦴꦁꦮꦺꦴꦁ​ꦏꦸꦮꦶ​ꦱꦶꦁ​ꦧꦏꦭ꧀ꦲꦱꦺꦴꦏ꧀ꦥꦼꦚ꧀ꦗꦮꦧ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦧ꧀ꦚꦮꦩꦸ​꧉​ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦧꦺꦃ​ꦏꦸꦢꦸ​ꦩꦤꦸꦠ꧀ ꦱꦸꦥꦪ​ꦥꦫ​ꦥꦼꦤꦸꦤ꧀ꦠꦸꦤ꧀ꦧꦶꦱ​ꦚꦩ꧀ꦧꦸꦠ꧀ꦠꦏꦫꦺꦴ​ꦧꦸꦔꦃ​꧈​ꦲꦺꦴꦫ​ꦏꦫꦺꦴ​ꦔ꧀ꦒꦼꦱꦃ​꧈​ꦲꦮꦶꦠ꧀ꦏꦸꦮꦶ​ꦲꦺꦴꦫ​ꦤꦼꦏꦏ꧀ꦏꦏꦺꦧꦼꦕꦶꦏ꧀ꦏꦁꦒꦺꦴ​ꦏꦺꦴꦮꦺ​꧉​

18꧋ꦥꦫ​ꦱꦼꦢꦸꦭꦸꦂ​꧈​ꦲꦗ​ꦥꦢ​ꦭꦺꦫꦺꦤ꧀​ꦤ꧀ꦢꦺꦴꦔꦏ꧀ꦏꦏꦺꦲꦏꦸ​꧉​ꦲꦏꦸ​ꦫꦸꦩꦁꦱ​ꦤ꧀ꦢꦸꦮꦺꦲꦠꦶ​ꦉꦱꦶꦏ꧀ ꦲꦮꦶꦠ꧀ꦱꦏ꧀ꦔꦼꦂꦠꦶꦪꦲꦏꦸ​ꦤꦩꦸꦁ​ꦔ꧀ꦭꦏꦺꦴꦤ꧀ꦤꦶ​ꦥꦽꦏꦫꦥꦽꦏꦫ​ꦱꦶꦁ​ꦧꦼꦤꦼꦂ​꧉​ 19ꦲꦏꦸ​ꦚꦸꦮꦸꦤ꧀ꦥꦤ꧀ꦢꦺꦴꦔꦩꦸ​ꦱꦸꦥꦪ​ꦲꦏꦸ​ꦤ꧀ꦢꦁꦧꦶꦱ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧉​

꧋ꦥꦤ꧀ꦢꦺꦴꦔ​꧉​

20꧋ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦔꦺꦏ꧀ꦏꦺꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦁꦏꦥꦠꦶ​ꦭꦤ꧀ꦱꦲꦶꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦢꦢꦶ​ꦥꦔꦺꦴꦤ꧀ꦱꦶꦁ​ꦒꦼꦢꦺꦢꦺꦮꦺꦏꦁꦒꦺꦴ​ꦥꦫ​ꦮꦼꦢꦸꦱ꧀ꦱꦺ꧉​ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦏꦁꦒꦺꦴ​ꦤꦼꦠꦼꦥ꧀ꦥꦏꦺꦥꦽꦗꦚ꧀ꦗꦶꦪꦤ꧀ꦱꦶꦁ​ꦭꦁꦒꦼꦁ​꧉​ 21ꦩꦸꦭꦤꦺ​ꦥꦤ꧀ꦢꦺꦴꦔꦏꦸ​ꦏꦁꦒꦺꦴ​ꦏꦺꦴꦮꦺ​꧈​ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦧꦶꦱ​ꦔꦼꦧꦼꦏ꧀ꦏꦶ​ꦲꦠꦶꦩꦸ​ꦏꦫꦺꦴ​ꦏꦠꦼꦤ꧀ꦠꦽꦩ꧀ꦩꦤ꧀ ꦔꦼꦢꦸꦤ꧀ꦤꦏꦺꦱꦼꦩ꧀ꦧꦫꦁ​ꦱꦶꦁ​ꦧꦼꦕꦶꦏ꧀ꦱꦶꦁ​ꦲꦩ꧀ꦧꦺꦴꦏ꧀ꦧꦸꦠꦸꦃꦲꦏꦺ꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​꧉​ꦢꦢꦶꦤꦺ​꧈​ꦱꦁꦏꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦼꦁꦒꦺꦴꦤ꧀ꦩꦸ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦤ꧀ꦢꦢꦺꦏ꧀ꦏꦏꦺꦊꦒꦤꦺꦲꦠꦶꦤꦺ​꧉​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦩꦼꦩꦸꦗꦶ​ꦢꦺꦏ꧀ꦤꦺ ꦱ꧀ꦭꦮꦱ꧀ꦭꦮꦱ꧀ꦱꦺ꧈​ꦗꦭꦂꦫꦤ꧀ꦢꦺꦏ꧀ꦤꦺꦒꦼꦢꦺꦏ꧀ꦮꦱꦤꦺ​꧉​ꦄꦩꦺꦤ꧀꧈​

꧋ꦥꦼꦤꦸꦠꦸꦥ꧀ꦭꦤ꧀ꦥꦩꦸꦗꦶ​ꦱ꧀ꦭꦩꦼꦠ꧀꧈​

22꧋ꦥꦫ​ꦱꦼꦢꦸꦭꦸꦂ​꧈​ꦱꦶꦁ​ꦠꦏ꧀ꦱꦸꦮꦸꦤ꧀ ꦠꦼꦩ꧀ꦧꦸꦁꦠꦼꦩ꧀ꦧꦸꦁꦏꦸꦏꦁꦒꦺꦴ​ꦲꦩ꧀ꦧꦔꦸꦤ꧀ꦏꦺꦴꦮꦺ​ꦲꦶꦏꦶ​ꦲꦩ꧀ꦧꦺꦴꦏ꧀ꦠꦩ꧀ꦥ​ꦠꦼꦤꦤ꧀ꦲꦶꦁ​ꦲꦠꦶꦩꦸ​꧉​ꦲꦏꦸ​ꦤꦩꦸꦁ​ꦤꦸꦭꦶꦱ꧀ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧈​ꦱꦼꦤꦗꦤ꧀ꦲꦶꦗꦶꦏ꧀ꦲꦺꦴꦏꦺꦃꦱꦶꦁ​ꦏꦸꦢꦸ​ꦠꦏ꧀ꦲꦺꦴꦩꦺꦴꦁ​꧉​ 23ꦲꦏꦸ​ꦔꦧꦂꦫꦶ​ꦤꦺꦏ꧀ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ꦮꦶꦱ꧀ꦩꦼꦠꦸ​ꦱꦁꦏꦱꦼꦠꦿꦥꦤ꧀꧈​ꦤꦺꦏ꧀ꦢꦺꦏ꧀ꦤꦺꦤ꧀ꦢꦁꦧꦶꦱ​ꦠꦼꦏ​ꦤꦁꦔ꧀ꦒꦺꦴꦤ꧀ꦏꦸ​꧈​ꦩꦼꦤꦮ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦧꦉꦁ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧉​

24꧋ꦲꦏꦸ​ꦚꦸꦮꦸꦤ꧀ꦢꦶꦏꦶꦫꦶꦩ꧀ꦩꦏꦺꦱ꧀ꦭꦩꦼꦠ꧀ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦥꦫ​ꦥꦼꦤꦸꦤ꧀ꦠꦸꦤ꧀ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦧꦺꦃ​ꦱꦶꦁ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​꧉​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦁꦏꦤꦼꦒꦫ​ꦆꦠꦭꦶꦲꦸꦒ​ꦥꦢ​ꦚꦸꦮꦸꦤ꧀ꦩꦫꦁ​ꦲꦏꦸ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​ꦏꦧꦺꦃ​꧉​

25꧋ꦥꦫꦱꦼꦢꦸꦭꦸꦂ꧈​ꦩꦸꦒꦩꦸꦒꦏꦧꦼꦕꦶꦏ꧀ꦏꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦔꦼꦧꦼꦏ꧀ꦏꦶꦏꦺꦴꦮꦺꦏꦧꦺꦃ꧉​

↑ ↑ ↑


← ꦥ꦳ꦶꦭꦺꦩꦺꦴꦤ꧀   ꦪꦏꦺꦴꦧꦸꦱ꧀ →