ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥꦫꦫꦱꦸꦭ꧀/22
꧇꧒꧒꧇ 1꧋ꦫꦱꦸꦭ꧀ꦦꦈꦭꦸꦱ꧀ꦔꦺꦴꦩꦺꦴꦁꦔꦺꦤꦺ:“ꦥꦫꦧꦥꦏ꧀ꦭꦤ꧀ꦥꦫꦱꦼꦢꦸꦭꦸꦂꦏꦧꦺꦃ!ꦲꦏꦸꦚꦸꦮꦸꦤ꧀ꦢꦶꦫꦸꦔꦺꦴꦏ꧀ꦏꦏꦺꦲꦼꦁꦒꦺꦴꦤ꧀ꦏꦸꦲꦉꦥ꧀ꦤ꧀ꦢꦸꦮꦺꦲꦺꦴꦩꦺꦴꦁꦲꦶꦏꦶ꧉” 2ꦏꦿꦸꦔꦸꦫꦱꦸꦭ꧀ꦦꦈꦭꦸꦱ꧀ꦔꦺꦴꦩꦺꦴꦁꦧꦱꦆꦧꦿꦤꦶ꧈ꦮꦺꦴꦁꦮꦺꦴꦁꦠꦼꦫꦸꦱ꧀ꦫꦢꦲꦤ꧀ꦠꦼꦁ꧉ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦩꦺꦴꦭꦃꦲꦶꦔꦼꦏꦺꦏ꧀ꦏꦶꦏꦠꦼꦫꦁꦔꦤ꧀ꦔꦺꦤꦺ:
3꧋“ꦥꦫꦱꦼꦢꦸꦭꦸꦂ꧈ꦲꦏꦸꦲꦶꦏꦶꦮꦺꦴꦁꦙꦸ꧈ꦭꦲꦶꦂꦤꦁꦏꦸꦠꦠꦂꦱꦸꦱ꧀ꦤꦁꦧꦮꦃꦯꦶꦭꦶꦱꦶꦪ꧈ꦤꦁꦔꦶꦁꦲꦏꦸꦩꦁꦒꦺꦴꦤ꧀ꦤꦁꦏꦸꦠꦪꦺꦫꦸꦱꦭꦺꦩ꧀ꦢꦢꦶꦩꦸꦫꦶꦢ꧀ꦢꦺꦒꦸꦫꦸꦒꦼꦢꦺꦒꦩꦭꦶꦪꦺꦭ꧀꧈ꦲꦏꦸꦢꦶꦧ꧀ꦭꦗꦂꦫꦶꦧꦧ꧀ꦮꦺꦠ꧀ꦮꦺꦠ꧀ꦠꦺꦥꦫꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺꦢꦺꦮꦺꦔꦤ꧀ꦠꦶꦗꦼꦫꦸ꧉ꦲꦏꦸꦱꦶꦁꦔꦧꦼꦏ꧀ꦠꦶꦩꦫꦁꦒꦸꦱ꧀ꦠꦶ ꦄꦭ꧀ꦭꦃꦪꦠꦼꦤꦤ꧀ꦤꦤ꧀ ꦠꦸꦁꦒꦭ꧀ꦭꦺꦮꦲꦺꦏꦫꦺꦴꦏꦺꦴꦮꦺꦏꦧꦺꦃ꧉ꦲꦏꦸꦪꦥꦚ꧀ꦕꦺꦤ꧀ꦔ꧀ꦭꦮꦤ꧀ꦥꦶꦮꦸꦭꦁꦱꦶꦁꦲꦚꦂꦧꦧ꧀ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈ 4ꦩꦸꦭꦤꦺꦮꦺꦴꦁꦮꦺꦴꦁꦱꦶꦁꦩꦺꦭꦸꦥꦶꦮꦸꦭꦁꦲꦚꦂꦲꦶꦏꦶꦠꦏ꧀ꦱꦶꦪꦱꦶꦪꦱꦩ꧀ꦥꦺꦏ꧀ꦩꦠꦶ꧉ꦮꦺꦴꦁꦮꦺꦴꦁꦏꦸꦮꦶꦠꦏ꧀ꦕꦼꦏꦼꦭ꧀ ꦭꦩꦃꦠꦏ꧀ꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀꧈ 5ꦲꦶꦩꦩ꧀ꦒꦼꦢꦺꦭꦤ꧀ꦮꦂꦒꦤꦺꦏꦿꦸꦠꦺꦴꦤ꧀ꦲꦒꦩꦏꦼꦤꦺꦁꦢꦢꦶꦱꦼꦏ꧀ꦱꦶꦤꦺꦏ꧀ꦲꦏꦸꦲꦺꦴꦫꦒꦺꦴꦫꦺꦴꦃ꧉ꦲꦮꦶꦠ꧀ꦪꦮꦺꦴꦁꦒꦼꦢꦺꦒꦼꦢꦺꦲꦶꦏꦶꦱꦶꦁꦔꦼꦏꦺꦏ꧀ꦏꦶꦭꦪꦁꦩꦫꦁꦲꦏꦸꦏꦁꦒꦺꦴꦚꦼꦏꦼꦭ꧀ꦮꦺꦴꦁꦙꦸꦤꦁꦏꦸꦠꦣꦩꦱ꧀ꦏꦸꦱ꧀ꦱꦶꦁꦥꦢꦩꦺꦭꦸꦥꦶꦮꦸꦭꦁꦲꦚꦂꦲꦶꦏꦶ꧉ꦢꦢꦶꦤꦺꦲꦏꦸꦢꦶꦭꦶꦭꦤꦶꦚꦼꦏꦼꦭ꧀ꦮꦺꦴꦁꦮꦺꦴꦁꦏꦸꦮꦶꦢꦶꦒꦮꦤꦁꦪꦺꦫꦸꦱꦭꦺꦩ꧀ꦱꦸꦥꦪꦥꦢꦢꦶꦱꦼꦠꦿꦥ꧀꧈”
6꧋ꦫꦱꦸꦭ꧀ꦦꦈꦭꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ:“ꦲꦏꦸꦠꦼꦫꦸꦱ꧀ꦧꦸꦢꦭ꧀ꦤꦁꦏꦸꦠꦣꦩꦱ꧀ꦏꦸꦱ꧀꧈ꦏꦢꦸꦁꦮꦶꦱ꧀ꦩꦺꦃꦠꦼꦏꦤ꧀ꦔ꧀ꦒꦺꦴꦤ꧀ꦤꦺ꧈ꦮꦪꦃꦲꦮꦤ꧀ꦔ꧀ꦒꦼꦤ꧀ꦠꦂ꧈ꦭꦃꦏꦺꦴꦏ꧀ꦠꦼꦫꦸꦱ꧀ꦢꦢꦏ꧀ꦏꦤ꧀ꦲꦺꦤꦺꦁꦥꦼꦥꦢꦁꦱꦼꦩ꧀ꦭꦺꦴꦫꦺꦴꦠ꧀ꦱꦁꦏꦭꦔꦶꦠ꧀ꦲꦩ꧀ꦧ꧀ꦊꦉꦁꦔꦶꦲꦏꦸ꧉ 7ꦲꦏꦸꦠꦼꦫꦸꦱ꧀ꦠꦶꦧꦤꦁꦊꦩꦃꦠꦼꦫꦸꦱ꧀ꦏꦿꦸꦔꦸꦱ꧀ꦮꦫꦔꦺꦴꦩꦺꦴꦁ:'ꦱꦲꦸꦭꦸꦱ꧀ ꦱꦲꦸꦭꦸꦱ꧀ ꦏꦼꦤꦺꦁꦲꦥꦏꦺꦴꦮꦺꦏꦺꦴꦏ꧀ꦚꦶꦪꦚꦶꦪꦲꦏꦸ?’ 8ꦲꦏꦸꦠꦼꦫꦸꦱ꧀ꦠꦏꦺꦴꦤ꧀:'ꦏꦺꦴꦮꦺꦏꦸꦮꦶꦱꦥꦒꦸꦱ꧀ꦠꦶ?’ꦱ꧀ꦮꦫꦩꦲꦸꦱꦼꦩꦲꦸꦂ:'ꦲꦏꦸꦲꦶꦏꦶꦪꦺꦯꦸꦱ꧀ꦮꦺꦴꦁꦟꦱꦫꦺꦠ꧀ ꦱꦶꦁꦲꦩ꧀ꦧꦺꦴꦏ꧀ꦱꦶꦪꦱꦶꦪ!’ 9ꦮꦺꦴꦁꦮꦺꦴꦁꦱꦶꦁꦩꦺꦭꦸꦲꦏꦸꦪꦮꦼꦫꦸꦃꦥꦼꦥꦢꦁꦱꦼꦩ꧀ꦭꦺꦴꦫꦺꦴꦠ꧀ꦩꦲꦸ꧈ꦤꦁꦔꦶꦁꦲꦺꦴꦫꦏꦿꦸꦔꦸꦱ꧀ꦮꦫꦱꦶꦁꦔꦺꦴꦩꦺꦴꦁꦩꦫꦁꦲꦏꦸ꧉ 10ꦲꦏꦸꦠꦼꦫꦸꦱ꧀ꦠꦏꦺꦴꦤ꧀ꦩꦼꦤꦺꦃ:'ꦢꦸꦃꦒꦸꦱ꧀ꦠꦶ꧈ꦲꦏꦸꦱꦲꦶꦏꦶꦏꦸꦢꦸꦔ꧀ꦭꦏꦺꦴꦤ꧀ꦤꦶꦲꦥ?’ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:'ꦔꦢꦼꦏ꧀ꦏꦭꦤ꧀ꦏꦤꦧꦸꦢꦭ꧀ꦤꦁꦏꦸꦠꦣꦩꦱ꧀ꦏꦸꦱ꧀꧈ꦤꦁꦏꦺꦴꦤꦺꦴꦏꦺꦴꦮꦺꦧꦏꦭ꧀ꦢꦶꦲꦺꦴꦩꦺꦴꦁꦔꦶꦧꦧ꧀ꦱꦼꦩ꧀ꦧꦫꦁꦱꦶꦁꦢꦶꦏꦉꦥ꧀ꦥꦏꦺꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦱꦶꦁꦏꦸꦢꦸꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ!’ 11ꦥꦼꦥꦢꦁꦱꦶꦁꦱꦼꦩ꧀ꦭꦺꦴꦫꦺꦴꦠ꧀ꦩꦲꦸꦠꦼꦫꦸꦱ꧀ꦩꦫꦏ꧀ꦏꦏꦺꦩꦿꦶꦥꦠ꧀ꦏꦸꦭꦩꦸꦂ꧉ꦲꦏꦸꦠꦼꦫꦸꦱ꧀ꦢꦶꦠꦸꦤ꧀ꦠꦸꦤ꧀ꦏꦫꦺꦴꦏꦚ꧀ꦕꦏꦚ꧀ꦕꦩ꧀ꦊꦧꦸꦤꦁꦏꦸꦠꦣꦩꦱ꧀ꦏꦸꦱ꧀꧈
12꧋“ꦤꦁꦏꦺꦴꦤꦺꦴꦲꦺꦤꦺꦁꦮꦺꦴꦁꦗꦼꦤꦼꦁꦔꦺꦄꦤꦤꦶꦪꦱ꧀ ꦮꦺꦴꦁꦱꦶꦁꦔꦧꦼꦏ꧀ꦠꦶꦩꦫꦁꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦔ꧀ꦭꦏꦺꦴꦤ꧀ꦤꦶꦮꦺꦠ꧀ꦮꦺꦠ꧀ꦠꦺꦤꦧꦶꦩꦺꦴꦱꦼꦱ꧀꧈ꦮꦺꦴꦁꦲꦶꦏꦶꦪꦢꦶꦲꦗꦺꦤ꧀ꦤꦶꦠꦼꦤꦤ꧀ꦏꦫꦺꦴꦮꦺꦴꦁꦙꦸꦏꦧꦺꦃꦱꦶꦁꦩꦁꦒꦺꦴꦤ꧀ꦤꦁꦣꦩꦱ꧀ꦏꦸꦱ꧀ꦏꦺꦴꦤꦺꦴ꧉ 13ꦄꦤꦤꦶꦪꦱ꧀ꦩꦲꦸꦠꦼꦏꦠꦼꦫꦸꦱ꧀ꦔꦢꦼꦏ꧀ꦤꦁꦔꦉꦥ꧀ꦏꦸꦔꦺꦴꦩꦺꦴꦁ:'ꦱꦼꦢꦸꦭꦸꦂꦱꦲꦸꦭꦸꦱ꧀ ꦏꦺꦴꦮꦺꦮꦼꦫꦸꦃꦲꦩꦼꦤꦺꦃ!’ꦱꦏ꧀ꦮꦠ꧀ꦲꦏꦸꦪꦠꦼꦫꦸꦱ꧀ꦧꦶꦱꦮꦼꦫꦸꦃꦩꦼꦤꦺꦃꦠꦼꦫꦸꦱ꧀ꦲꦏꦸꦤ꧀ꦢꦼꦭꦺꦴꦏ꧀ꦏꦏꦺꦢꦺꦏ꧀ꦤꦺ꧉ 14ꦄꦤꦤꦶꦪꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:'ꦒꦸꦱ꧀ꦠꦶꦄꦭ꧀ꦭꦃꦲꦺꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺꦢꦺꦮꦺꦮꦶꦱ꧀ꦩꦶꦭꦶꦃꦏꦺꦴꦮꦺ꧈ꦱꦸꦥꦪꦏꦺꦴꦮꦺꦔꦼꦂꦠꦶꦏꦼꦏꦉꦥ꧀ꦥꦤ꧀ꦤꦺꦢꦺꦏ꧀ꦤꦺꦭꦤ꧀ꦏꦼꦤꦭ꧀ꦩꦫꦁꦒꦸꦱ꧀ꦠꦶꦪꦺꦯꦸꦱ꧀ ꦱꦶꦁꦔ꧀ꦭꦏꦺꦴꦤ꧀ꦤꦶꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉ꦏꦺꦴꦮꦺꦧꦏꦭ꧀ꦏꦿꦸꦔꦸꦱ꧀ꦮꦫꦤꦺꦒꦸꦱ꧀ꦠꦶꦪꦺꦯꦸꦱ꧀ꦢꦺꦮꦺꦔꦺꦴꦩꦺꦴꦁꦩꦫꦁꦏꦺꦴꦮꦺ꧉ 15ꦏꦺꦴꦮꦺꦧꦏꦭ꧀ꦢꦢꦶꦱꦼꦏ꧀ꦱꦶꦤꦺ꧈ꦱꦸꦥꦪꦔꦧꦂꦫꦏꦺꦩꦫꦁꦱꦧꦼꦤ꧀ꦮꦺꦴꦁꦲꦥꦱꦶꦁꦏꦺꦴꦮꦺꦮꦼꦫꦸꦃꦭꦤ꧀ꦏꦿꦸꦔꦸ꧉ 16ꦱꦲꦶꦏꦶꦏꦺꦴꦮꦺꦲꦗꦮꦼꦢꦶꦮꦼꦢꦶꦩꦼꦤꦺꦃ꧈ꦔꦢꦼꦏ꧀ꦏꦭꦤ꧀ꦏꦤꦚ꧀ꦗꦭꦸꦏ꧀ꦢꦶꦧꦥ꧀ꦠꦶꦱ꧀ ꦱꦸꦥꦪꦢꦺꦴꦱꦩꦸꦢꦶꦔꦥꦸꦫꦔꦁꦒꦺꦴꦗꦼꦤꦼꦁꦔꦺꦒꦸꦱ꧀ꦠꦶꦪꦺꦯꦸꦱ꧀꧈’
17꧋“ꦲꦏꦸꦠꦼꦫꦸꦱ꧀ꦧꦭꦶꦏ꧀ꦤꦁꦪꦺꦫꦸꦱꦭꦺꦩ꧀ꦭꦤ꧀ꦢꦺꦴꦁꦔꦺꦲꦏꦸꦲꦶꦗꦶꦏ꧀ꦤ꧀ꦢꦺꦴꦁꦔꦤꦁꦒꦿꦺꦗꦒꦼꦢꦺ꧈ꦲꦏꦸꦢꦶꦏꦺꦏ꧀ꦏꦶꦮꦼꦮꦼꦫꦸꦃꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧉ 18ꦲꦶꦁꦮꦼꦮꦼꦫꦸꦃꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺꦩꦫꦁꦲꦏꦸ:'ꦏꦤꦤ꧀ꦢꦁꦭꦸꦔꦱꦁꦏꦏꦸꦠꦪꦺꦫꦸꦱꦭꦺꦩ꧀ꦏꦺꦤꦺ꧈ꦲꦮꦶꦠ꧀ꦮꦺꦴꦁꦮꦺꦴꦁꦤꦁꦏꦺꦤꦺꦲꦺꦴꦫꦧꦏꦭ꧀ꦥꦽꦕꦪꦩꦫꦁꦥꦱꦼꦏ꧀ꦱꦶꦩꦸꦧꦧ꧀ꦲꦏꦸ!’ 19ꦲꦏꦸꦠꦼꦫꦸꦱ꧀ꦔꦺꦴꦩꦺꦴꦁ:'ꦒꦸꦱ꧀ꦠꦶ꧈ꦮꦺꦴꦁꦮꦺꦴꦁꦲꦶꦏꦶꦭꦲꦸꦠ꧀ꦥꦢꦔꦼꦂꦠꦶꦠꦤꦺꦏ꧀ꦲꦏꦸꦮꦶꦱ꧀ꦔ꧀ꦊꦧꦺꦴꦤ꧀ꦤꦶꦱꦶꦤꦒꦸꦏ꧀ꦱꦶꦤꦒꦸꦏ꧀ꦚꦼꦏꦼꦭ꧀ꦭꦶꦭꦤ꧀ꦔ꧀ꦒꦼꦧꦸꦏ꧀ꦏꦶꦮꦺꦴꦁꦮꦺꦴꦁꦱꦶꦁꦥꦽꦕꦪꦩꦫꦁꦏꦺꦴꦮꦺ?’ 20ꦲꦸꦒꦢꦺꦴꦁꦔꦺꦱ꧀ꦠꦺꦥ꦳ꦤꦸꦱ꧀ ꦱꦶꦁꦔꦼꦏꦺꦏ꧀ꦏꦶꦥꦱꦼꦏ꧀ꦱꦶꦧꦧ꧀ꦏꦺꦴꦮꦺꦢꦶꦧꦤ꧀ꦢꦼꦩ꧀ꦩꦶꦮꦠꦸ꧉ꦲꦏꦸꦢꦺꦮꦺꦤꦁꦏꦺꦴꦤꦺꦴꦭꦤ꧀ꦱꦼꦠꦸꦗꦸꦩꦫꦁꦮꦺꦴꦁꦮꦺꦴꦁꦱꦶꦁꦩ꧀ꦧꦤ꧀ꦢꦼꦩ꧀ꦩꦶꦮꦠꦸꦩꦫꦁꦱ꧀ꦠꦺꦥ꦳ꦤꦸꦱ꧀꧈ꦲꦏꦸꦩꦭꦃꦚ꧀ꦗꦒꦱꦭꦶꦤ꧀ꦤꦺꦮꦺꦴꦁꦮꦺꦴꦁꦱꦶꦁꦩꦠꦺꦤ꧀ꦤꦶꦢꦺꦏ꧀ꦤꦺ! 21ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:'ꦮꦶꦱ꧀ ꦏꦤꦧꦸꦢꦭ꧀ ꦲꦮꦶꦠ꧀ꦏꦺꦴꦮꦺꦠꦏ꧀ꦏꦺꦴꦁꦏꦺꦴꦤ꧀ꦤꦁꦠꦼꦔꦃꦲꦺꦮꦺꦴꦁꦮꦺꦴꦁꦱꦶꦁꦢꦸꦢꦸꦙꦸ꧈ꦱꦶꦁꦲꦢꦺꦴꦃꦲꦢꦺꦴꦃꦥꦁꦒꦺꦴꦤ꧀ꦤꦤ꧀ꦤꦺ!’”
22꧋ꦠꦼꦏꦤ꧀ꦱꦼꦩꦺꦴꦤꦺꦴꦮꦺꦴꦁꦲꦺꦴꦏꦺꦃꦩꦲꦸꦥꦢꦩꦼꦤꦼꦁꦔꦿꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺꦫꦱꦸꦭ꧀ꦦꦈꦭꦸꦱ꧀꧈ꦤꦁꦔꦶꦁꦱꦏ꧀ꦮꦶꦱ꧀ꦱꦺꦏꦸꦮꦶꦮꦺꦴꦁꦮꦺꦴꦁꦥꦢꦧꦼꦔꦺꦴꦏ꧀ꦧꦼꦔꦺꦴꦏ꧀:“ꦥꦠꦺꦤ꧀ꦤꦶꦮꦲꦺ꧈ꦥꦠꦺꦤ꧀ꦤꦶꦮꦲꦺꦮꦺꦴꦁꦏꦸꦮꦶ!ꦲꦺꦴꦫꦥꦤ꧀ꦠꦼꦱ꧀ꦮꦺꦴꦁꦏꦪꦔꦺꦴꦤꦺꦴꦲꦸꦫꦶꦥ꧀!” 23ꦮꦺꦴꦁꦲꦺꦴꦏꦺꦃꦩꦲꦸꦥꦢꦧꦼꦔꦺꦴꦏ꧀ꦧꦼꦔꦺꦴꦏ꧀ꦏꦫꦺꦴꦔꦼꦧꦸꦠ꧀ꦔꦼꦧꦸꦠ꧀ꦠꦏꦺꦱꦭꦶꦤ꧀ꦤꦺꦭꦤ꧀ꦚꦮꦸꦂꦫꦏꦺꦱꦤ꧀ꦠꦶꦩꦼꦤ꧀ꦢꦸꦮꦸꦂ꧉ 24ꦏꦸꦩꦼꦤ꧀ꦢꦤ꧀ꦤꦺꦠꦼꦫꦸꦱ꧀ꦩꦿꦺꦤ꧀ꦠꦃꦔꦺꦴꦁꦏꦺꦴꦤ꧀ꦚꦼꦏꦼꦭ꧀ꦫꦱꦸꦭ꧀ꦦꦈꦭꦸꦱ꧀ꦢꦶꦒꦮꦩ꧀ꦊꦧꦸꦭꦤ꧀ꦢꦶꦠꦏꦺꦴꦤ꧀ꦤꦶꦔꦁꦒꦺꦴꦥꦼꦕꦸꦠ꧀ ꦱꦸꦥꦪꦔꦼꦂꦠꦶꦲꦥꦗꦭꦂꦫꦤ꧀ꦤꦺꦮꦺꦴꦁꦮꦺꦴꦁꦏꦺꦴꦏ꧀ꦥꦢꦥꦠꦶꦁꦧꦽꦔꦺꦴꦏ꧀ꦭꦤ꧀ꦤꦶꦤ꧀ꦢꦏ꧀ꦏꦏꦺꦱꦶꦁꦏꦪꦔꦺꦴꦤꦺꦴꦩꦫꦁꦢꦺꦏ꧀ꦤꦺ꧉ 25ꦤꦁꦔꦶꦁꦏꦢꦸꦁꦫꦱꦸꦭ꧀ꦦꦈꦭꦸꦱ꧀ꦢꦶꦧꦤ꧀ꦢꦲꦉꦥ꧀ꦢꦶꦥꦼꦕꦸꦠ꧀ꦠꦶ꧈ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁꦲꦺꦴꦥ꦳ꦶꦱꦶꦂꦱꦶꦁꦤꦁꦏꦺꦴꦤꦺꦴ:“ꦲꦥꦏꦺꦴꦮꦺꦲꦺꦤ꧀ꦠꦸꦏ꧀ꦩꦼꦕꦸꦠ꧀ꦠꦶꦮꦺꦴꦁꦮꦂꦒꦤꦺꦬꦸꦩ꧀ ꦠꦤ꧀ꦥꦢꦶꦢꦸꦢꦸꦃꦲꦏꦺꦱꦭꦃꦲꦺꦤ꧀ꦢꦶꦱꦶꦏ꧀?”
26꧋ꦏꦢꦸꦁꦏꦿꦸꦔꦸꦤꦺꦏ꧀ꦫꦱꦸꦭ꧀ꦦꦈꦭꦸꦱ꧀ꦏꦸꦮꦶꦮꦂꦒꦤꦺꦤꦼꦒꦫꦬꦸꦩ꧀ ꦲꦺꦴꦥ꦳ꦶꦱꦶꦂꦩꦲꦸꦠꦼꦫꦸꦱ꧀ꦤꦁꦔ꧀ꦒꦺꦴꦤ꧀ꦤꦺꦏꦸꦩꦼꦤ꧀ꦢꦤ꧀ꦤꦺꦔꦺꦴꦩꦺꦴꦁ:“ꦏꦸꦩꦼꦤ꧀ꦢꦤ꧀ ꦏꦼꦥꦿꦶꦪꦺꦱꦲꦶꦏꦶ!ꦮꦺꦴꦁꦏꦸꦮꦶꦮꦂꦒꦤꦺꦤꦼꦒꦫꦬꦸꦩ꧀!”
27꧋ꦏꦸꦩꦼꦤ꧀ꦢꦤ꧀ꦤꦺꦠꦼꦫꦸꦱ꧀ꦩꦫꦤꦶꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦠꦏꦺꦴꦤ꧀:“ꦲꦥꦠꦼꦤꦤ꧀ꦤꦺꦏ꧀ꦏꦺꦴꦮꦺꦏꦸꦮꦶꦮꦂꦒꦤꦺꦤꦼꦒꦫꦬꦸꦩ꧀?”
꧋ꦫꦱꦸꦭ꧀ꦦꦈꦭꦸꦱ꧀ꦱꦼꦩꦲꦸꦂ:“ꦠꦼꦤꦤ꧀!”
28꧋ꦏꦸꦩꦼꦤ꧀ꦢꦤ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦏꦸꦧꦶꦱꦤꦺꦤꦩ꧀ꦥꦭꦪꦁꦢꦢꦶꦮꦂꦒꦤꦺꦤꦼꦒꦫꦬꦸꦩ꧀ꦏꦸꦮꦶꦗꦭꦂꦫꦤ꧀ꦲꦏꦸꦲꦩ꧀ꦧꦪꦂꦢꦸꦮꦶꦠ꧀ꦲꦺꦴꦏꦺꦃ!”ꦫꦱꦸꦭ꧀ꦦꦈꦭꦸꦱ꧀ꦱꦼꦩꦲꦸꦂ:“ꦤꦁꦔꦶꦁꦲꦏꦸꦢꦢꦶꦮꦂꦒꦤꦺꦬꦸꦩ꧀ꦱꦁꦏꦏꦼꦭꦲꦶꦂꦫꦤ꧀ꦏꦸ꧉”
29꧋ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦱꦶꦁꦲꦉꦥ꧀ꦤꦏꦺꦴꦤ꧀ꦤꦶꦫꦱꦸꦭ꧀ꦦꦈꦭꦸꦱ꧀ꦩꦲꦸꦱꦏ꧀ꦮꦠ꧀ꦥꦢꦩꦸꦤ꧀ꦢꦸꦂ꧉ꦏꦸꦩꦼꦤ꧀ꦢꦤ꧀ꦤꦺꦲꦩ꧀ꦧꦫꦁ꧈ꦏꦢꦸꦁꦔꦼꦂꦠꦶꦤꦺꦏ꧀ꦦꦈꦭꦸꦱ꧀ꦏꦸꦮꦶꦮꦂꦒꦤꦺꦬꦸꦩ꧀ ꦠꦼꦫꦸꦱ꧀ꦮꦼꦢꦶ꧈ꦲꦮꦶꦠ꧀ꦢꦺꦏ꧀ꦤꦺꦱꦶꦁꦔꦺꦴꦁꦏꦺꦴꦤ꧀ꦔꦿꦤ꧀ꦠꦺꦮꦂꦒꦤꦺꦬꦸꦩ꧀꧈
30꧋ꦤꦁꦔꦶꦁꦏꦸꦩꦼꦤ꧀ꦢꦤ꧀ꦤꦺꦏꦼꦥꦺꦔꦶꦤ꧀ꦔꦼꦂꦠꦶꦲꦥꦗꦭꦂꦫꦤ꧀ꦤꦺꦮꦺꦴꦁꦮꦺꦴꦁꦙꦸꦏꦺꦴꦏ꧀ꦥꦢꦔꦼꦭꦃꦲꦏꦺꦫꦱꦸꦭ꧀ꦦꦈꦭꦸꦱ꧀꧈ꦩꦸꦭꦤꦺꦲꦺꦱꦸꦏ꧀ꦏꦺꦢꦺꦏ꧀ꦤꦺꦠꦼꦫꦸꦱ꧀ꦔꦸꦩ꧀ꦥꦸꦭ꧀ꦭꦏꦺꦏꦿꦸꦠꦺꦴꦤ꧀ꦲꦒꦩ꧉ꦏꦸꦩꦼꦤ꧀ꦢꦤ꧀ꦤꦺꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦔꦸꦕꦸꦭ꧀ꦭꦶꦫꦤ꧀ꦠꦺꦤꦺꦫꦱꦸꦭ꧀ꦦꦈꦭꦸꦱ꧀ ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦔ꧀ꦒꦮꦤꦁꦔꦉꦥ꧀ꦥꦺꦏꦿꦸꦠꦺꦴꦤ꧀ꦩꦲꦸ꧉
| ← ꧇꧒꧑꧇ | ꧇꧒꧓꧇ → |