ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦱꦼꦫꦠ꧀

꧋ꦥꦼꦩ꧀ꦧꦸꦏꦏ꧀ꦏꦤ꧀​ꦭꦤ꧀ꦥꦩꦸꦗꦶ​ꦱ꧀ꦭꦩꦼꦠ꧀꧈​

꧇​꧑꧇​

^1-7꧋ꦥꦫ​ꦱꦼꦢꦸꦭꦸꦂꦏꦸ​ꦏꦧꦺꦃ​ꦤꦁꦏꦸꦠꦬꦸꦩ꧀ ꦲꦶꦏꦶ​ꦭꦪꦁ​ꦱꦁꦏꦔ꧀ꦒꦺꦴꦤ꧀ꦏꦸ​꧈​ꦦꦈꦭꦸꦱ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦥꦚ꧀ꦕꦺꦤ꧀ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​ꦭꦤ꧀ꦩꦁꦒꦶꦭ꧀ꦏꦺꦴꦮꦺ​꧈​ꦱꦸꦥꦪ​ꦢꦢꦶ​ꦲꦸꦩꦠ꧀ꦠꦺ​꧉​

꧋ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦔꦼꦧꦼꦏ꧀ꦏꦶ​ꦲꦸꦫꦶꦥ꧀ꦩꦸ​ꦏꦫꦺꦴ​ꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺ꧉​

꧋ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦩꦫꦁ​ꦏꦺꦴꦮꦺ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦶꦱ꧀ꦩꦶꦗꦶ​ꦲꦏꦸ​ꦢꦢꦶ​ꦥꦼꦭꦢꦺꦤ꧀ꦤꦺ​꧉​ꦲꦏꦸ​ꦏꦸꦢꦸ​ꦢꦢꦶ​ꦫꦱꦸꦭ꧀ꦭꦺ​ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦧꦺꦃ​ꦩꦤꦸꦁꦱ​꧉​ꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦭꦶꦮꦠ꧀ꦥꦫ​ꦤꦧꦶ​ꦭꦤ꧀ꦪ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀꧈​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦔꦺꦴꦩꦺꦴꦁꦔꦏꦺꦧꦧ꧀ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦏ꧀ꦕꦫ​ꦩꦤꦸꦁꦱ​ꦢꦺꦏ꧀ꦤꦺꦢꦢꦶ​ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀꧈​ꦭꦤ꧀ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦫꦶꦥ꧀ꦥꦺꦱꦸꦕꦶ​ꦱꦏ꧀ꦏꦧꦺꦃꦲꦺ꧈​ꦩꦸꦭꦤꦺ​ꦱꦏ꧀ꦮꦶꦱ꧀ꦱꦺ​ꦢꦺꦏ꧀ꦤꦺꦠꦔꦶ​ꦱꦁꦏꦥꦠꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦒꦼꦢꦺꦩꦫꦁ​ꦲꦤꦏ꧀ꦏꦺ​꧈​ꦱꦸꦥꦪ​ꦔ꧀ꦮꦱꦤꦶ​ꦏꦿꦠꦺꦴꦤꦺ​꧉​ꦲꦏꦸ​ꦱꦲꦶꦏꦶ​ꦢꦢꦶ​ꦮꦏꦶꦭ꧀ꦭꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦥꦚ꧀ꦕꦺꦤ꧀ꦔꦼꦏꦺꦏ꧀ꦏꦶꦥꦼꦁꦒꦮꦺꦏꦸꦲꦶꦏꦶ​ꦩꦫꦁ​ꦲꦏꦸ​꧈​ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺꦱꦶꦁ​ꦔꦺꦴꦩꦺꦴꦁꦔꦶꦲꦏꦸ​꧉​ꦲꦏꦸ​ꦏꦸꦢꦸ​ꦔꦺꦴꦩꦺꦴꦁꦔꦶꦏꦧꦺꦃ​ꦧꦁꦱ​ꦱꦶꦁ​ꦢꦸꦢꦸ​ꦙꦸ꧈​ꦱꦸꦥꦪ​ꦥꦢ​ꦥꦽꦕꦪ​ꦭꦤ꧀ꦥꦢ​ꦩꦤꦸꦠ꧀ꦩꦫꦁ​ꦏꦿꦶꦱ꧀ꦡꦸꦱ꧀꧈​ꦏꦸꦮꦶ​ꦥꦚ꧀ꦕꦺꦤ꧀ꦏꦿꦶꦱ꧀ꦡꦸꦱ꧀ꦢꦺꦮꦺꦱꦶꦁ​ꦔꦺꦴꦁꦏꦺꦴꦤ꧀ꦲꦏꦸ​꧉​ꦭꦤ꧀ꦏꦺꦴꦮꦺ​ꦱꦶꦁ​ꦩꦁꦒꦺꦴꦤ꧀ꦤꦁꦏꦸꦠꦬꦸꦩ꧀ ꦏꦺꦴꦮꦺ​ꦲꦩ꧀ꦧꦫꦁ​ꦏꦸꦢꦸ​ꦠꦏ꧀ꦲꦺꦴꦩꦺꦴꦁꦔꦶꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦁꦒꦶꦭ꧀ꦏꦺꦴꦮꦺ​ꦱꦸꦥꦪ​ꦢꦢꦶ​ꦲꦤꦏ꧀ꦏꦺ​꧉​

꧋ꦫꦱꦸꦭ꧀ꦦꦈꦭꦸꦱ꧀ꦏꦼꦥꦺꦔꦶꦤ꧀ꦤꦶꦭꦶꦏ꧀ꦏꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦏꦸꦠꦬꦸꦩ꧀꧈​

⁸꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦥꦚ꧀ꦕꦺꦤ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦚꦩ꧀ꦧꦸꦠ꧀ꦠꦲꦶꦁ​ꦲꦸꦫꦶꦥ꧀ꦩꦸ​꧉​ꦲꦮꦶꦠ꧀ꦤꦁꦲꦼꦤ꧀ꦢꦶ​ꦮꦲꦺ​ꦮꦺꦴꦁꦮꦺꦴꦁ​ꦥꦢ​ꦔꦺꦴꦩꦺꦴꦁꦔꦏꦺꦧꦧ꧀ꦥꦼꦔꦤ꧀ꦢꦼꦭ꧀ꦩꦸ​꧉​ ⁹ꦲꦏꦸ​ꦲꦺꦴꦫ​ꦒꦺꦴꦫꦺꦴꦃ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦢꦶ​ꦱꦼꦏ꧀ꦱꦶꦏꦸ​꧉​ꦢꦺꦏ꧀ꦤꦺꦱꦶꦁ​ꦠꦏ꧀ꦱꦼꦩ꧀ꦧꦃ​ꦭꦤ꧀ꦠꦏ꧀ꦭꦧꦸꦃꦲꦶꦱꦏ꧀ꦲꦠꦶꦏꦸ​꧈​ꦲꦮꦶꦠ꧀ꦲꦏꦸ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦲꦤꦏ꧀ꦏꦺ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦔꦼꦂꦠꦶ​ꦤꦺꦏ꧀ꦲꦏꦸ​ꦲꦺꦴꦫ​ꦠꦲꦸ​ꦭꦭꦶ​ꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​ꦏꦧꦺꦃ​꧉​ ^10-11ꦲꦏꦸ​ꦥꦚ꧀ꦕꦺꦤ꧀ꦲꦗꦼꦏ꧀​ꦤ꧀ꦢꦺꦴꦁꦔ꧈​ꦱꦸꦥꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦏꦼꦭꦸꦁꦒꦂꦫꦤ꧀ꦩꦫꦁ​ꦲꦏꦸ​ꦤ꧀ꦢꦁꦧꦶꦱ​ꦤꦶꦭꦶꦏ꧀ꦏꦶ​ꦏꦺꦴꦮꦺ​꧈​ꦲꦮꦶꦠ꧀ꦲꦏꦸ​ꦗꦤ꧀ꦏꦼꦥꦺꦔꦶꦤ꧀ꦠꦼꦤꦤ꧀ꦏꦼꦥꦼꦠꦸꦏ꧀ꦏꦫꦺꦴ​ꦏꦺꦴꦮꦺ​꧉​ꦩꦼꦤꦮ​ꦲꦏꦸ​ꦧꦶꦱ​ꦔꦼꦢꦸꦩ꧀ꦧꦼꦂꦏꦃ​ꦏꦱꦸꦏ꧀ꦩꦤ꧀ꦩꦫꦁ​ꦏꦺꦴꦮꦺ​ꦭꦤ꧀ꦩꦼꦤꦮ​ꦲꦏꦸ​ꦧꦶꦱ​ꦤꦩ꧀ꦧꦃꦤꦩ꧀ꦧꦃꦲꦶꦥꦼꦔꦤ꧀ꦢꦼꦭ꧀ꦩꦸ​ꦩꦫꦁ​ꦒꦸꦱ꧀ꦠꦶ​꧉​ ¹²ꦠꦼꦒꦼꦱ꧀ꦱꦺ​ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦥꦽꦕꦪ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦲꦩ꧀ꦧꦔꦸꦤ꧀ꦥꦼꦔꦤ꧀ꦢꦼꦭ꧀ꦭꦺ​ꦱꦏ꧀ꦥꦢꦥꦢ꧈​ꦲꦏꦸ​ꦏꦼꦧꦔꦸꦤ꧀ꦱꦁꦏꦥꦼꦔꦤ꧀ꦢꦼꦭ꧀ꦩꦸ​ꦭꦤ꧀ꦏꦺꦴꦮꦺ​ꦏꦼꦧꦔꦸꦤ꧀ꦱꦁꦏꦥꦼꦔꦤ꧀ꦢꦼꦭ꧀ꦏꦸ​꧉​

¹³꧋ꦠꦼꦤꦤ꧀ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦗꦭꦂꦫꦤ꧀ꦱꦁꦏꦏꦸꦮꦶ​ꦮꦶꦱ꧀ꦥꦶꦁ​ꦥꦶꦫ​ꦮꦲꦺ​ꦲꦏꦸ​ꦮꦶꦱ꧀ꦲꦉꦥ꧀ꦧꦸꦢꦭ꧀ꦤꦁꦔ꧀ꦒꦺꦴꦤ꧀ꦩꦸ​꧈​ꦤꦁꦔꦶꦁ​ꦠꦼꦏꦤꦺ​ꦱꦲꦶꦏꦶ​ꦲꦭꦁꦔꦤ꧀ꦤꦺ​ꦮꦶꦱ꧀ꦲꦺꦤꦺꦁꦮꦲꦺ​꧈​ꦢꦢꦶꦤꦺ​ꦢꦸꦫꦸꦁ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀꧈​ꦏꦉꦥ꧀ꦏꦸ​ꦥꦫ​ꦱꦼꦢꦸꦭꦸꦂ​꧈​ꦏꦪ​ꦲꦼꦁꦒꦺꦴꦤ꧀ꦏꦸ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦤꦁꦠꦼꦔꦃꦲꦺ​ꦧꦁꦱ​ꦭꦶꦪꦭꦶꦪꦤꦺ​꧈​ꦱꦼꦩꦺꦴꦤꦺꦴ​ꦲꦸꦒ​ꦲꦏꦸ​ꦧꦶꦱ​ꦚꦩ꧀ꦧꦸꦠ꧀ꦠꦭꦤ꧀ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦤꦁꦠꦼꦔꦃꦩꦸ​꧉​ ¹⁴ꦲꦏꦸ​ꦲꦶꦏꦶ​ꦫꦸꦩꦁꦱ​ꦤ꧀ꦢꦸꦮꦺꦤ꧀ꦤꦶ​ꦥꦼꦚ꧀ꦗꦮꦧ꧀ꦩꦫꦁ​ꦏꦧꦺꦃ​ꦧꦁꦱ​꧈​ꦩꦸꦭꦤꦺ​ꦲꦏꦸ​ꦏꦸꦢꦸ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦩꦫꦁ​ ꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦒꦿꦶꦏ꧀ꦱꦶꦁ​ꦩꦁꦒꦺꦴꦤ꧀ꦤꦁꦏꦸꦠ꧈​ꦲꦸꦒ​ꦩꦫꦁ​ꦮꦺꦴꦁ​ꦱꦶꦁ​ꦲꦺꦴꦫ​ꦔꦺꦴꦩꦺꦴꦁꦒꦿꦶꦏ꧀ꦱꦶꦁ​ꦩꦁꦒꦺꦴꦤ꧀ꦤꦁꦏꦼꦧꦺꦴꦤ꧀ꦤꦤ꧀ ꦩꦫꦁ​ꦮꦺꦴꦁ​ꦱꦶꦁ​ꦱꦼꦏꦺꦴꦭꦃ​ꦭꦤ꧀ꦲꦸꦒ​ꦩꦫꦁ​ꦮꦺꦴꦁ​ꦱꦶꦁ​ꦲꦺꦴꦫ​ꦱꦼꦏꦺꦴꦭꦃ​꧉​ ¹⁵ꦪꦏꦸꦮꦶ​ꦗꦭꦂꦫꦤ꧀ꦤꦺ​ꦲꦏꦸ​ꦏꦼꦥꦺꦔꦶꦤ꧀​ꦤ꧀ꦢꦁꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦤꦁꦏꦸꦠꦬꦸꦩ꧀ ꦱꦸꦥꦪ​ꦲꦏꦸ​ꦧꦶꦱ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦤꦁꦏꦺꦴꦤꦺꦴ​꧉​

꧋ꦥꦔ꧀ꦮꦱꦤꦺ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

¹⁶꧋ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦧ꧀ꦭꦱ꧀ꦲꦺꦴꦫ​ꦲꦶꦱꦶꦤ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦗꦭꦂꦫꦤ꧀ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦒꦼꦢꦺꦧꦔꦼꦠ꧀ꦏ꧀ꦮꦱꦤꦺ​꧉​ꦪ​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦱꦶꦁ​ꦢꦶꦏꦁꦒꦺꦴꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦚ꧀ꦭꦩꦼꦠ꧀ꦠꦏꦺꦏꦧꦺꦃ​ꦮꦺꦴꦁ​ꦱꦶꦁ​ꦥꦽꦕꦪ​꧈​ꦤꦺꦴꦩꦼꦂ​ꦱꦶꦗꦶ​ꦏꦁꦒꦺꦴ​ꦧꦁꦱ​ꦙꦸ꧈​ꦤꦁꦔꦶꦁ​ꦲꦸꦒ​ꦏꦁꦒꦺꦴ​ꦧꦁꦱ​ꦭꦶꦪꦭꦶꦪꦤꦺ​꧉​ ¹⁷ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​?ꦲꦮꦶꦠ꧀ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦤ꧀ꦢꦸꦤꦸꦁꦔꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦤꦺꦏ꧀ꦏꦮꦶꦠ꧀​ꦩ꧀ꦧꦶꦪꦺꦤ꧀ꦤꦺꦩꦤꦸꦁꦱ​ꦧꦶꦱꦤꦺ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦤꦺꦏ꧀ꦒꦼꦊꦩ꧀ꦥꦽꦕꦪ​ꦭꦤ꧀​ꦚ꧀ꦗꦒꦏ꧀ꦏꦏꦺꦩꦫꦁ​ꦢꦺꦏ꧀ꦤꦺ꧉​ꦮꦸꦗꦸꦠ꧀ꦠꦺꦪ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦲꦸꦤꦶꦤꦺ​ꦔꦺꦤꦺ​:“ꦮꦺꦴꦁ​ꦱꦶꦁ​ꦮꦶꦱ꧀ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦫꦶꦥ꧀ꦥꦺꦏꦸꦢꦸ​ꦚ꧀ꦗꦒꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

꧋ꦱꦭꦃꦲꦺ​ꦩꦤꦸꦁꦱ​꧉​

¹⁸꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦏꦸꦮꦶ​ꦩꦲꦸ​ꦔꦺꦴꦩꦺꦴꦁꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦚ꧀ꦭꦩꦼꦠ꧀ꦠꦏꦺꦮꦺꦴꦁ​ꦱꦶꦁ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ꦏꦼꦤꦺꦁꦲꦥ​ꦏꦸꦮꦶ​ꦏꦺꦴꦏ꧀ꦥꦼꦤ꧀ꦠꦶꦁ​ꦧꦔꦼꦠ꧀?ꦲꦶꦏꦶ​ꦥꦼꦤ꧀ꦠꦶꦁ​ꦧꦔꦼꦠ꧀ ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤꦼꦱꦸ​ꦠꦼꦤꦤ꧀ꦩꦫꦁ​ꦩꦤꦸꦁꦱ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦚꦼꦠꦿꦥ꧀ꦏꦧꦺꦃ​ꦮꦺꦴꦁ​ꦱꦶꦁ​ꦲꦺꦴꦫ​ꦔꦗꦺꦤ꧀ꦤꦶ​ꦩꦫꦁ​ꦢꦺꦏ꧀ꦤꦺꦭꦤ꧀ꦱꦶꦁ​ꦔ꧀ꦒꦮꦺ​ꦲꦭ​ꦩꦫꦁ​ꦭꦶꦪꦤꦺ​꧉​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦏꦸꦮꦶ​ꦱꦏ꧀ꦗꦤꦺꦤꦩꦸꦁ​ꦔꦭꦁꦔꦭꦁꦔꦶꦮꦺꦴꦁ​ꦭꦶꦪꦤꦺ​꧈​ꦩꦫꦏ꧀ꦏꦏꦺꦭꦶꦪꦤꦺ​ꦲꦺꦴꦫ​ꦧꦶꦱ​ꦩꦔꦼꦂꦠꦺꦤ꧀ꦤꦶꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦱꦏ꧀ꦮꦸꦗꦸꦠ꧀ꦠꦺ꧉​ ¹⁹ꦥꦫ​ꦱꦼꦢꦸꦭꦸꦂ​꧈​ꦱꦏ꧀ꦗꦤꦺꦏꦧꦺꦃ​ꦮꦺꦴꦁ​ꦧꦶꦱ​ꦩꦔꦼꦂꦠꦺꦤ꧀ꦤꦶꦧꦧ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦱꦏ꧀ꦩꦼꦱ꧀ꦠꦶꦤꦺ꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀​ꦤ꧀ꦢꦸꦢꦸꦃꦲꦏꦺꦭꦤ꧀​ꦤ꧀ꦢꦸꦤꦸꦁꦔꦏꦺꦩꦫꦁ​ꦩꦤꦸꦁꦱ​꧉​ ²⁰ꦮꦸꦗꦸꦠ꧀ꦠꦺꦏꦮꦶꦠ꧀​ꦩ꧀ꦧꦶꦪꦺꦤ꧀​ꦩ꧀ꦧꦶꦪꦺꦤ꧀ꦤꦺ꧈​ꦢꦺꦴꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦒꦮꦺ​ꦭꦔꦶꦠ꧀ꦭꦤ꧀ꦧꦸꦩꦶ​꧈​ꦱꦼꦩꦸꦁꦒꦺꦴꦤ꧀ꦤꦺꦩꦤꦸꦁꦱ​ꦒꦼꦊꦩ꧀ꦚꦮꦁ​ꦭꦤ꧀ꦩꦶꦏꦶꦂ​ꦧꦧ꧀ꦱꦼꦩ꧀ꦧꦫꦁ​ꦱꦶꦁ​ꦢꦶꦒꦮꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦼꦱ꧀ꦠꦶꦧꦫꦁ​ꦭꦺꦴꦫꦺꦴ​ꦲꦶꦏꦶ​ꦩꦤꦸꦁꦱ​ꦧꦶꦱ​ꦢꦸꦤꦸꦁ꧈​ꦪꦏꦸꦮꦶ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦭꦁꦒꦼꦁ​ꦥꦔ꧀ꦮꦱꦤꦺ​ꦭꦤ꧀ꦤꦺꦏ꧀ꦢꦺꦏ꧀ꦤꦺꦮꦸꦗꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀꧈​ꦢꦢꦶꦤꦺ​ꦩꦤꦸꦁꦱ​ꦲꦺꦴꦫ​ꦤ꧀ꦢꦸꦮꦺꦗꦭꦂꦫꦤ꧀ꦏꦁꦒꦺꦴ​ꦤꦸꦠꦸꦥ꧀ꦥꦶ​ꦱꦭꦃꦲꦺ​꧉​ ²¹ꦏꦫꦺꦴꦩꦼꦤꦺꦃ​ꦥꦫ​ꦱꦼꦢꦸꦭꦸꦂ​꧈​ꦱꦼꦤꦗꦤ꧀ꦩꦤꦸꦁꦱ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦭꦁꦒꦼꦁ​ꦏ꧀ꦮꦱꦤꦺ​꧈​ꦤꦁꦔꦶꦁ​ꦲꦺꦴꦫ​ꦥꦢ​ꦒꦼꦊꦩ꧀ꦩꦼꦩꦸꦗꦶ​ꦭꦤ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦢꦺꦏ꧀ꦤꦺ꧉​ꦩꦭꦃ​ꦥꦢ​ꦩ꧀​ꦧ꧀ꦭꦫꦃꦲꦺꦴꦫ​ꦔ꧀ꦒꦼꦤꦃ​ꦥꦶꦏꦶꦂꦫꦤ꧀ꦤꦺ​꧈​ꦩꦫꦏ꧀ꦏꦏꦺꦥꦢ​ꦧꦶꦔꦸꦁ​ꦏꦉꦥ꧀ꦥꦺ​꧈​ꦲꦮꦶꦠ꧀ꦥꦼꦠꦼꦁ​ꦲꦠꦶꦤꦺ​꧉​ ²²ꦫꦸꦩꦁꦱꦤꦺ​ꦮꦺꦴꦁ​ꦔꦼꦂꦠꦶ​꧈​ꦤꦁꦔꦶꦁ​ꦩꦭꦃ​ꦩꦸꦤ꧀ꦢꦏ꧀ꦧꦺꦴꦢꦺꦴ꧉​ ²³ꦩꦸꦭꦤꦺ​ꦲꦺꦴꦫ​ꦥꦢ​ꦚꦼꦩ꧀ꦧꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦭꦁꦒꦼꦁ​꧈​ꦤꦁꦔꦶꦁ​ꦩꦭꦃ​ꦥꦢ​ꦚꦼꦩ꧀ꦧꦃ​ꦉꦕꦉꦕ​ꦱꦶꦁ​ꦫꦸꦥ​ꦩꦤꦸꦁꦱ​ꦱꦶꦁ​ꦩꦠꦶ​꧈​ꦲꦥ​ꦩꦤꦸꦏ꧀ ꦲꦥ​ꦏꦺꦮꦤ꧀ꦱꦶꦁ​ꦱꦶꦏꦶꦭ꧀ꦭꦺ​ꦥꦥꦠ꧀ ꦲꦥ​ꦏꦺꦮꦤ꧀ꦱꦶꦁ​ꦲꦩ꧀ꦧꦿꦁꦏꦁ​꧉​

²⁴꧋ꦭꦤ꧀ꦗꦭꦂꦫꦤ꧀ꦩꦤꦸꦁꦱ​ꦩꦸꦤ꧀ꦢꦏ꧀ꦧꦺꦴꦢꦺꦴꦭꦤ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦲꦺꦴꦫ​ꦔ꧀ꦒꦼꦤꦃ​ꦔꦺꦴꦤꦺꦴ​꧈​ꦩꦸꦭꦤꦺ​ꦠꦼꦫꦸꦱ꧀ꦥꦢ​ꦢꦶꦥꦱꦿꦃꦲꦏꦺꦩꦫꦁ​ꦥꦔ꧀ꦮꦱꦤꦺ​ꦏꦼꦱꦼꦤꦼꦁꦔꦤ꧀ꦫꦸꦱꦸꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ꦏꦫꦺꦴ​ꦲꦮꦏ꧀ꦏꦺ​ꦱꦏ꧀ꦥꦢꦥꦢ꧉​ ²⁵ꦮꦺꦴꦁꦮꦺꦴꦁ​ꦏꦸꦮꦶ​ꦔ꧀ꦒꦸꦒꦸ​ꦧꦫꦁ​ꦱꦶꦁ​ꦒꦺꦴꦫꦺꦴꦃ​꧈​ꦧꦫꦁ​ꦱꦶꦁ​ꦧꦼꦤꦼꦂ​ꦧꦧ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦭꦃ​ꦲꦺꦴꦫ​ꦥꦢ​ꦒꦼꦊꦩ꧀ꦥꦽꦕꦪ​꧉​ꦩꦸꦭꦤꦺ​ꦠꦼꦫꦸꦱ꧀ꦚꦼꦩ꧀ꦧꦃ​ꦭꦤ꧀ꦔꦗꦺꦤ꧀ꦤꦶ​ꦩꦫꦁ​ꦧꦫꦁꦧꦫꦁ​ꦒꦮꦺꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦚꦼꦩ꧀ꦧꦃ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧈​ꦱꦶꦁ​ꦔ꧀ꦒꦮꦺ​ꦱꦼꦩ꧀ꦧꦫꦁ​ꦭꦤ꧀ꦱꦶꦁ​ꦏꦸꦢꦸ​ꦢꦶꦥꦸꦗꦶꦱ꧀ꦭꦮꦱ꧀ꦱꦺ꧉​ꦄꦩꦺꦤ꧀꧈​

²⁶꧋ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦱꦁꦏꦏ꧀ꦭꦏꦸꦮꦤ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦩꦤꦸꦁꦱ​ꦢꦶ​ꦲꦺꦕꦸꦭ꧀ꦭꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦥꦢ​ꦤꦸꦫꦸꦠ꧀ꦠꦶ​ꦏꦼꦱꦼꦤꦼꦔꦤ꧀ꦤꦺꦢꦒꦶꦁ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀꧈​ꦩꦸꦭꦤꦺ​ꦱꦶꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦲꦺꦴꦫ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦭꦸꦩꦿꦃ​ꦩꦼꦤꦺꦃ​꧈​ꦤꦁꦔꦶꦁ​ꦱꦶꦁ​ꦲꦺꦴꦫ​ꦭꦸꦩꦿꦃ​꧉​ꦲꦺꦴꦫ​ꦥꦢ​ꦔ꧀ꦒꦺꦴꦭꦺꦏ꧀ꦒꦤ꧀ꦢꦺꦁꦔꦤ꧀ꦏꦫꦺꦴ​ꦮꦺꦴꦁ​ꦭꦤꦁ​꧈​ꦤꦁꦔꦶꦁ​ꦮꦺꦴꦁ​ꦮꦺꦢꦺꦴꦏ꧀ꦩꦭꦃ​ꦒꦤ꧀ꦢꦺꦁꦔꦤ꧀ꦏꦫꦺꦴ​ꦮꦺꦴꦁ​ꦮꦺꦢꦺꦴꦏ꧀꧈​ ²⁷ꦱꦼꦩꦺꦴꦤꦺꦴ​ꦲꦸꦒ​ꦱꦶꦁ​ꦭꦤꦁꦭꦤꦁ​꧉​ꦲꦺꦴꦫ​ꦒꦤ꧀ꦢꦺꦁꦔꦤ꧀ꦏꦫꦺꦴ​ꦮꦺꦴꦁ​ꦮꦺꦢꦺꦴꦏ꧀ꦩꦼꦤꦺꦃ​ꦏꦪ​ꦱꦏ꧀ ꦭꦸꦩꦿꦃꦲꦺ​꧈​ꦲꦺꦴꦫ​꧈​ꦤꦁꦔꦶꦁ​ꦮꦺꦴꦁ​ꦭꦤꦁ​ꦩꦭꦃ​ꦏꦼꦠꦫꦶꦏ꧀ꦲꦠꦶꦤꦺ​ꦏꦫꦺꦴ​ꦠꦸꦁꦒꦭ꧀ꦮꦺꦴꦁ​ꦭꦤꦁ​ꦭꦤ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀꧈​ꦩꦸꦭꦤꦺ​ꦪ​ꦥꦢ​ꦤꦩ꧀ꦥ​ꦲꦸꦥꦃꦱꦶꦁ​ꦕꦺꦴꦕꦺꦴꦏ꧀​ꦏꦫꦺꦴ​ꦏ꧀ꦭꦏꦸꦮꦤ꧀ꦤꦺ​꧉​

²⁸꧋ꦭꦤ꧀ꦩꦼꦤꦺꦃ​ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦧ꧀ꦭꦱ꧀ꦲꦺꦴꦫ​ꦩꦼꦂꦭꦺꦴꦏ꧀ꦏꦏꦺꦱꦸꦥꦪ​ꦧꦶꦱ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦪ​ꦢꦶꦲꦼꦗꦂꦫꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦺꦤ꧀ꦥꦢ​ꦤꦸꦫꦸꦠ꧀ꦠꦶ​ꦲꦔꦼꦤ꧀ꦤꦔꦼꦤ꧀ꦤꦺꦱꦶꦁ​ꦩ꧀​ꦧ꧀ꦭꦫꦃꦩ꧀​ꦧ꧀ꦭꦫꦃꦲꦺꦴꦫ​ꦔ꧀ꦒꦼꦤꦃ​꧉​ꦩꦸꦭꦤꦺ​ꦪ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦼꦩ꧀ꦧꦫꦁ​ꦱꦶꦁ​ꦲꦺꦴꦫ​ꦲꦥꦶꦏ꧀꧈​ ^29-30ꦲꦠꦶꦤꦺ​ꦮꦶꦱ꧀ꦏꦼꦧꦼꦏ꧀ꦏꦫꦺꦴ​ꦲꦔꦼꦤ꧀ꦲꦔꦼꦤ꧀ꦱꦶꦁ​ꦲꦺꦴꦫ​ꦧꦼꦤꦼꦂ​꧈​ꦏꦫꦺꦴ​ꦧꦫꦁ​ꦲꦭ​꧈​ꦭꦏꦸ​ꦧꦺꦢꦁꦭꦤ꧀ꦲ꦳ꦮ​ꦱꦿꦏꦃ​꧉​ꦱꦼꦤꦼꦁ​ꦔ꧀ꦒꦮꦺ​ꦲꦭ​꧈​ꦱꦼꦤꦼꦁ​ꦱꦼꦔꦶꦠ꧀ ꦩꦼꦩꦠꦺꦤ꧀ꦤꦶ​ꦭꦤ꧀ꦠꦸꦏꦂꦫꦤ꧀꧈​ꦱꦼꦤꦼꦁ​ꦔꦥꦸꦱ꧀ꦱꦶ​ꦭꦶꦪꦤꦺ​ꦭꦤ꧀ꦱꦼꦤꦼꦁ​ꦔ꧀ꦒꦮꦺ​ꦭꦫꦤꦺ​ꦲꦠꦶ​ꦭꦶꦪꦤꦺ​꧉​ꦱꦼꦤꦼꦁ​ꦚꦠꦸꦂ​ꦭꦤ꧀ꦔꦸꦤ꧀ꦢꦠ꧀ꦠꦸꦤ꧀ꦢꦠ꧀ꦭꦶꦪꦤꦺ​꧉​ꦥꦢ​ꦱꦼꦔꦶꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦺꦴꦩ꧀ꦧꦺꦴꦁ꧈​ꦒꦼꦩꦸꦁꦒꦸꦁ​ꦭꦤ꧀ꦏꦸꦫꦁꦔꦗꦂ꧉​ꦤꦺꦏ꧀ꦲꦉꦥ꧀​ꦔ꧀ꦒꦮꦺ​ꦲꦭ​ꦲꦏꦭ꧀ꦭꦺ​ꦮꦶꦱ꧀ꦲꦺꦤꦺꦁꦮꦲꦺ​꧉​ꦏꦫꦺꦴ​ꦮꦺꦴꦁ​ꦠꦸꦮ​ꦮꦶꦱ꧀ꦲꦺꦴꦫ​ꦔꦗꦺꦤ꧀ꦤꦶ​ꦧ꧀ꦭꦱ꧀꧈​ ³¹ꦲꦺꦴꦫ​ꦤ꧀ꦢꦸꦮꦺꦤ꧀ꦤꦶ​ꦏꦢꦸꦤꦸꦁꦔꦤ꧀ꦭꦤ꧀ꦲꦺꦴꦫ​ꦏꦼꦤꦺꦁꦢꦶꦗꦒꦏ꧀ꦏꦏꦺ꧉​ꦲꦺꦴꦫ​ꦤ꧀ꦢꦸꦮꦺꦱꦼꦤꦼꦁ​ꦏꦫꦺꦴ​ꦱꦼꦢꦸꦭꦸꦂꦫꦺ​ꦢꦺꦮꦺꦭꦤ꧀ꦲꦺꦴꦫ​ꦤ꧀ꦢꦸꦮꦺꦩꦼꦭꦱ꧀​ꦧ꧀ꦭꦱ꧀ꦏꦫꦺꦴ​ꦭꦶꦪꦤꦺ​꧉​ ³²ꦮꦺꦴꦁꦮꦺꦴꦁ​ꦏꦸꦮꦶ​ꦱꦏ꧀ꦗꦤꦺꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦸꦥꦃꦲꦶꦥꦠꦶ​ꦩꦫꦁ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦤꦁꦔꦶꦁ​ꦲꦺꦴꦫ​ꦥꦢ​ꦮꦼꦢꦶ​ꦧ꧀ꦭꦱ꧀ ꦩꦭꦃ​ꦥꦢ​ꦔꦼꦊꦩ꧀ꦭꦶꦪꦤꦺ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦏꦪ​ꦔꦺꦴꦤꦺꦴ​꧉​

↑ ↑ ↑

꧋ꦒꦸꦱ꧀ꦠꦶ​ꦄꦭ꧀ꦭꦃ​ꦚꦼꦠꦿꦥ꧀ꦱꦏ꧀ꦧꦼꦤꦼꦂꦫꦺ​꧉​

꧇​꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦩꦼꦱ꧀ꦠꦶꦱꦼꦠꦸꦗꦸ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦚꦼꦠꦿꦥ꧀ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦏꦸꦮꦶ​꧉​ꦩꦼꦤꦮ​ꦏꦺꦴꦮꦺ​ꦩꦶꦏꦶꦂ​ꦤꦺꦏ꧀ꦏꦺꦴꦮꦺ​ꦢꦺꦮꦺꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦏꦪ​ꦔꦺꦴꦤꦺꦴ​꧉​ꦱꦲꦶꦏꦶ​ꦲꦏꦸ​ꦔꦺꦴꦩꦺꦴꦁꦩꦫꦁ​ꦏꦺꦴꦮꦺ​ꦏꦧꦺꦃ​ꦱꦶꦁ​ꦥꦢ​ꦩꦶꦏꦶꦂ​ꦔꦺꦴꦤꦺꦴ​ꦏꦸꦮꦶ​:ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦧꦏꦭ꧀ꦚꦼꦠꦿꦥ꧀ꦏꦺꦴꦮꦺ​꧉​ꦲꦮꦶꦠ꧀ꦤꦺꦏ꧀ꦏꦺꦴꦮꦺ​ꦩ꧀ꦧꦼꦤꦼꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦢꦺꦏ꧀ꦤꦺꦚꦼꦠꦿꦥ꧀ꦮꦺꦴꦁ​ꦭꦶꦪꦤꦺ​꧈​ꦏꦺꦴꦮꦺ​ꦲꦸꦒ​ꦩ꧀ꦧꦼꦤꦼꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦢꦺꦏ꧀ꦤꦺꦚꦼꦠꦿꦥ꧀ꦲꦮꦏ꧀ꦩꦸ​ꦢꦺꦮꦺ꧉​ꦲꦮꦶꦠ꧀ꦏꦺꦴꦮꦺ​ꦱꦶꦁ​ꦥꦢ​ꦚꦭꦃꦚꦭꦃꦲꦏꦺꦭꦶꦪꦤꦺ​꧈​ꦏꦺꦴꦮꦺ​ꦢꦺꦮꦺꦲꦸꦒ​ꦔ꧀ꦭꦏꦺꦴꦤ꧀ꦤꦶ​ꦥꦽꦏꦫꦥꦽꦏꦫ​ꦱꦶꦁ​ꦲꦭ​ꦏꦸꦮꦶ​꧉​ ²ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦚꦼꦠꦿꦥ꧀ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦏꦸꦮꦶ​ꦩꦶꦠꦸꦫꦸꦠ꧀ꦱꦏ꧀ꦧꦼꦤꦼꦂꦫꦺ​꧉​ ³ꦩꦸꦭꦤꦺ​ꦲꦗ​ꦩꦶꦏꦶꦂ​ꦤꦺꦏ꧀ꦏꦺꦴꦮꦺ​ꦧꦶꦱ​ꦔ꧀ꦭꦸꦔꦤ꧀ꦤꦶꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦺꦴꦮꦺ​ꦏꦸꦮꦶ​ꦱꦶꦁ​ꦥꦢ​ꦚꦭꦃꦚꦭꦃꦲꦏꦺꦭꦶꦪꦤꦺ​꧈​ꦤꦁꦔꦶꦁ​ꦏꦺꦴꦮꦺ​ꦢꦺꦮꦺꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ ⁴ꦲꦥ​ꦏꦺꦴꦮꦺ​ꦩꦭꦃ​ꦲꦺꦴꦫ​ꦏꦸꦢꦸ​ꦧꦸꦔꦃ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦏꦠꦿꦺꦱ꧀ꦤꦤꦺ꧈​ꦏꦼꦱꦧꦂꦫꦤ꧀ꦤꦺ​ꦭꦤ꧀ꦏꦮꦼꦭꦱ꧀ꦱꦤ꧀ꦤꦺ​ꦩꦫꦁ​ꦏꦺꦴꦮꦺ​꧉​ꦲꦥ​ꦏꦺꦴꦮꦺ​ꦲꦺꦴꦫ​ꦢꦸꦤꦸꦁꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦸꦫꦸꦁ​ꦚꦼꦠꦿꦥ꧀ꦏꦺꦴꦮꦺ​꧈​ꦗꦭꦂꦫꦤ꧀ꦢꦺꦏ꧀ꦤꦺꦔꦼꦤ꧀ꦠꦺꦤ꧀ꦤꦶ​꧈​ꦱꦸꦥꦪ​ꦏꦺꦴꦮꦺ​ꦥꦢ​ꦔꦿꦸꦩꦁꦱꦤꦶ​ꦱꦭꦃꦩꦸ​ꦭꦤ꧀ꦤꦶꦁꦒꦭ꧀​ꦏ꧀ꦭꦏꦸꦮꦤ꧀ꦱꦶꦁ​ꦲꦭ​꧉​ ⁵ꦤꦁꦔꦶꦁ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦩꦭꦃ​ꦥꦢ​ꦤ꧀ꦢꦧ꧀ꦊꦏ꧀ꦭꦤ꧀ꦲꦺꦴꦫ​ꦒꦼꦊꦩ꧀ꦩꦭꦶꦃ​ꦏ꧀ꦭꦏꦸꦮꦤ꧀ꦤꦺ​꧉​ꦏꦺꦴꦮꦺ​ꦩꦭꦃ​ꦥꦢ​ꦤꦩ꧀ꦧꦃꦲꦶ​ꦤꦼꦱꦸꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦔ꧀ꦒꦼꦢꦺꦏ꧀ꦏꦏꦺꦱꦼꦠꦿꦥꦤ꧀ꦩꦸꦲꦩ꧀ꦧꦺꦱꦸꦏ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦿꦸꦠꦸꦏꦧꦺꦃ​ꦮꦺꦴꦁ​ꦏꦪ​ꦱꦏ꧀ꦧꦼꦤꦼꦂꦫꦺ​꧉​ ⁶ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦿꦸꦠꦸꦏꦧꦺꦃ​ꦮꦺꦴꦁ​ꦩꦶꦠꦸꦫꦸꦠ꧀ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦢꦺꦮꦺꦢꦺꦮꦺ꧉​ ⁷ꦠꦼꦒꦼꦱ꧀ꦱꦺ​꧈​ꦮꦺꦴꦁ​ꦱꦶꦁ​ꦠꦼꦩꦼꦤ꧀​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀ ꦗꦭꦂꦫꦤ꧀ꦏꦼꦥꦺꦔꦶꦤ꧀ꦢꦶꦱꦼꦤꦼꦁꦔꦶ​ꦭꦤ꧀ꦢꦶꦲꦼꦊꦩ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦗꦭꦂꦫꦤ꧀ꦏꦼꦥꦺꦔꦶꦤ꧀​ꦤ꧀ꦢꦸꦮꦺꦲꦸꦫꦶꦥ꧀ꦱꦶꦁ​ꦲꦺꦴꦫ​ꦲꦺꦤꦺꦁꦩꦠꦶꦤꦺ​꧈​ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦧꦏꦭ꧀ꦢꦶꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁸ꦤꦁꦔꦶꦁ​ꦮꦺꦴꦁ​ꦱꦶꦁ​ꦱꦿꦏꦃ​ꦭꦤ꧀ꦲꦺꦴꦫ​ꦥꦼꦂꦢꦸꦭꦶꦩꦫꦁ​ꦭꦶꦪꦤꦺ​꧈​ꦮꦺꦴꦁ​ꦱꦶꦁ​ꦲꦺꦴꦫ​ꦒꦼꦊꦩ꧀​ꦔ꧀ꦒꦸꦒꦸ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​ꦧꦧ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦩꦭꦃ​ꦥꦢ​ꦱꦼꦤꦼꦁ​ꦔ꧀ꦒꦮꦺ​ꦲꦭ​ꦩꦫꦁ​ꦭꦶꦪꦤꦺ​꧈​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦧꦏꦭ꧀ꦤꦩ꧀ꦥ​ꦱꦼꦠꦿꦥꦤ꧀ꦱꦶꦁ​ꦔ꧀ꦒꦶꦭꦤ꧀ꦤꦶꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁹ꦱꦥ​ꦮꦺꦴꦁꦔꦺ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦲꦭ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦔꦼꦂꦠꦶꦪ​ꦤꦺꦏ꧀ꦧꦏꦭ꧀ꦔꦿꦱꦏ꧀ꦏꦏꦺꦏꦔꦺꦭ꧀ꦭꦤ꧀ꦭꦤ꧀ꦏꦱꦁꦱꦫꦤ꧀ ꦲꦺꦴꦫ​ꦢꦢꦶ​ꦱꦼꦧꦧ꧀ꦮꦺꦴꦁ​ꦙꦸꦲꦥ​ꦮꦺꦴꦁ​ꦧꦁꦱ​ꦭꦶꦪꦤꦺ​꧉​ ¹⁰ꦤꦁꦔꦶꦁ​ꦱꦥ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦱꦼꦤꦼꦁ​ꦭꦤ꧀ꦔꦼꦊꦩ꧀ꦩꦫꦁ​ꦮꦺꦴꦁ​ꦏꦸꦮꦶ​ꦭꦤ꧀ꦧꦏꦭ꧀ꦢꦶꦏꦺꦏ꧀ꦏꦶꦏꦠꦼꦤ꧀ꦠꦽꦩ꧀ꦩꦤ꧀ ꦲꦸꦒ​ꦲꦺꦴꦫ​ꦢꦢꦶ​ꦱꦼꦧꦧ꧀ꦮꦺꦴꦁ​ꦙꦸꦲꦥ​ꦮꦺꦴꦁ​ꦧꦁꦱ​ꦭꦶꦪ​꧉​ ¹¹ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦿꦸꦠꦸꦩꦤꦸꦁꦱ​꧈​ꦢꦺꦏ꧀ꦤꦺꦲꦺꦴꦫ​ꦧꦏꦭ꧀ꦥꦶꦭꦶꦃꦱꦶꦃ꧉​

¹²꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦉꦥ꧀ꦠꦏ꧀ꦢꦸꦤꦸꦁꦔꦏꦺꦩꦼꦤꦺꦃ​ꦏꦼꦤꦺꦁꦲꦥ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦏ꧀ꦧꦏꦭ꧀ꦔꦿꦸꦠꦸꦩꦤꦸꦁꦱ​ꦩꦶꦠꦸꦫꦸꦠ꧀ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦢꦺꦮꦺꦢꦺꦮꦺ꧉​ꦲꦮꦶꦠ꧀ ꦧꦼꦤꦼꦂ​ꦮꦺꦴꦁ​ꦱꦶꦁ​ꦢꦸꦢꦸ​ꦧꦁꦱ​ꦙꦸꦲꦺꦴꦫ​ꦔꦼꦂꦠꦶ​ꦩꦫꦁ​ꦮꦺꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ ꦱꦶꦁ​ꦠꦼꦏꦤꦺ​ꦭꦶꦮꦠ꧀ꦤꦧꦶ​ꦩꦺꦴꦱꦼꦱ꧀ ꦤꦁꦔꦶꦁ​ꦤꦺꦏ꧀ꦮꦺꦴꦁꦮꦺꦴꦁ​ꦏꦸꦮꦶ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦪ​ꦧꦏꦭ꧀ꦢꦶꦱꦼꦠꦿꦥ꧀ꦠꦤ꧀ꦥ​ꦔꦁꦒꦺꦴꦏ꧀ꦏꦏꦺꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ꦭꦃ​ꦮꦺꦴꦁ​ꦧꦁꦱ​ꦙꦸꦱꦶꦁ​ꦔꦼꦂꦠꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦤꦺꦏ꧀ꦮꦺꦴꦁꦔꦺ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦪ​ꦧꦏꦭ꧀ꦢꦶꦱꦼꦠꦿꦥ꧀ꦩꦶꦠꦸꦫꦸꦠ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ ¹³ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦱꦶꦁ​ꦢꦶꦠꦩ꧀ꦥ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦴꦫ​ꦮꦺꦴꦁ​ꦱꦶꦁ​ꦤꦩꦸꦁ​ꦔꦼꦂꦠꦶ​ꦩꦫꦁ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦶꦮꦠ꧀ꦤꦧꦶ​ꦩꦺꦴꦱꦼꦱ꧀ ꦲꦺꦴꦫ​꧈​ꦤꦁꦔꦶꦁ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦥ​ꦱꦶꦁ​ꦢꦶꦮꦸꦭꦁꦔꦏꦺꦲꦶꦁ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ ¹⁴ꦲꦮꦶꦠ꧀ꦧꦼꦤꦼꦂ​ꦮꦺꦴꦁ​ꦱꦶꦁ​ꦢꦸꦢꦸ​ꦧꦁꦱ​ꦙꦸꦲꦺꦴꦫ​ꦤ꧀ꦢꦸꦮꦺꦤ꧀ꦤꦶ​ꦭꦤ꧀ꦲꦺꦴꦫ​ꦔꦼꦂꦠꦶ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦢꦶꦮꦸꦭꦁꦔꦏꦺꦲꦶꦁ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦤꦁꦔꦶꦁ​ꦤꦺꦏ꧀ꦮꦺꦴꦁꦔꦺ​ꦲꦶꦁ​ꦲꦠꦶꦤꦺ​ꦤ꧀ꦢꦸꦮꦺꦤ꧀ꦤꦶ​ꦏꦢꦸꦤꦸꦁꦔꦤ꧀ꦭꦤ꧀ꦮꦺꦴꦁꦔꦺ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀ ꦮꦸꦗꦸꦠ꧀ꦠꦺꦮꦺꦴꦁꦔꦺ​ꦪ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦲꦮꦶꦠ꧀ꦲꦶꦁ​ꦲꦠꦶꦤꦺ​ꦮꦺꦴꦁꦔꦺ​ꦤ꧀ꦢꦸꦮꦺꦤ꧀ꦤꦶ​ꦏꦢꦸꦤꦸꦁꦔꦤ꧀ꦧꦧ꧀ꦲꦭ​ꦭꦤ꧀ꦧꦼꦕꦶꦏ꧀꧈​ ¹⁵ꦏ꧀ꦭꦏꦸꦮꦤ꧀ꦤꦺ​ꦮꦺꦴꦁꦔꦺ​ꦏꦸꦮꦶ​ꦤ꧀ꦢꦸꦢꦸꦃꦲꦏꦺꦤꦺꦏ꧀ꦲꦥ​ꦱꦶꦁ​ꦢꦶꦮꦸꦭꦁꦔꦏꦺꦲꦶꦁ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦮꦶꦱ꧀ꦏꦼꦠꦸꦭꦶꦱ꧀ꦲꦶꦁ​ꦲꦠꦶꦤꦺ​꧉​ꦢꦢꦶꦤꦺ​ꦱ꧀ꦮꦫꦤꦺ​ꦲꦠꦶꦤꦺ​ꦮꦺꦴꦁꦔꦺ​ꦱꦶꦁ​ꦔꦿꦸꦠꦸꦮꦺꦴꦁꦔꦺ​꧉​ꦤꦺꦏ꧀ꦮꦺꦴꦁꦔꦺ​ꦔ꧀ꦒꦮꦺ​ꦧꦼꦕꦶꦏ꧀ ꦱ꧀ꦮꦫꦤꦺ​ꦲꦠꦶꦤꦺ​ꦱꦶꦁ​ꦩ꧀ꦧꦼꦤꦼꦂꦫꦏꦺ꧈​ꦤꦺꦏ꧀​ꦔ꧀ꦒꦮꦺ​ꦲꦭ​꧈​ꦱ꧀ꦮꦫꦤꦺ​ꦲꦠꦶꦤꦺ​ꦪ​ꦚꦭꦃꦚꦭꦃꦲꦏꦺ꧉​ ¹⁶ꦥꦫ​ꦱꦼꦢꦸꦭꦸꦂ​꧈​ꦩꦤꦸꦠ꧀ꦏꦧꦂ​ꦏꦧꦸꦔꦃꦲꦤ꧀ꦱꦶꦁ​ꦠꦏ꧀ꦒꦼꦭꦂꦫꦏꦺ꧈​ꦪ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦩ꧀ꦧꦺꦱꦸꦏ꧀ꦧꦏꦭ꧀ꦭꦺ​ꦲꦶꦁ​ꦢꦶꦤꦤꦺ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦺꦴꦁꦏꦺꦴꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦔꦿꦸꦠꦸꦩꦤꦸꦁꦱ​꧉​ꦢꦺꦏ꧀ꦤꦺꦔꦼꦂꦠꦶ​ꦲꦔꦼꦤ꧀ꦤꦔꦼꦤ꧀ꦤꦺꦩꦤꦸꦁꦱ​꧈​ꦱꦼꦩꦺꦴꦤꦺꦴ​ꦲꦸꦒ​ꦱꦼꦩ꧀ꦧꦫꦁ​ꦱꦶꦁ​ꦢꦶꦢꦼꦭꦶꦏ꧀ꦏꦏꦺꦲꦶꦁ​ꦲꦠꦶꦤꦺ​꧉​

꧋ꦮꦺꦴꦁ​ꦙꦸꦭꦤ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​

¹⁷꧋ꦥꦫ​ꦱꦼꦢꦸꦭꦸꦂ​꧈​ꦭꦃ​ꦱꦲꦶꦏꦶ​ꦏꦺꦴꦮꦺ​ꦢꦺꦮꦺꦏꦼꦥꦿꦶꦪꦺ​꧉​ꦏꦺꦴꦮꦺ​ꦧꦸꦔꦃ​ꦤꦺꦏ꧀ꦏꦺꦴꦮꦺ​ꦮꦺꦴꦁ​ꦙꦸ꧈​ꦲꦮꦶꦠ꧀ꦏꦺꦴꦮꦺ​ꦤ꧀ꦢꦸꦮꦺꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ꦏꦺꦴꦮꦺ​ꦤ꧀ꦢꦸꦮꦺꦤ꧀ꦤꦶ​ꦫꦸꦩꦁꦱ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦗꦶ​ꦏꦺꦴꦮꦺ​꧈​ꦲꦺꦴꦫ​ꦧꦁꦱ​ꦭꦶꦪꦤꦺ​꧉​ ¹⁸ꦏꦺꦴꦮꦺ​ꦫꦸꦩꦁꦱ​ꦔꦼꦂꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦁꦏꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦏꦺꦴꦮꦺ​ꦧꦶꦱ​ꦩꦔꦼꦂꦠꦺꦤ꧀ꦤꦶꦲꦥ​ꦱꦶꦁ​ꦲꦥꦶꦏ꧀ꦢꦺꦮꦺ꧉​ ¹⁹ꦏꦺꦴꦮꦺ​ꦔꦁꦒꦼꦥ꧀ꦢꦢꦶ​ꦥꦼꦤꦸꦤ꧀ꦠꦸꦤꦺ​ꦱꦶꦁ​ꦭꦩꦸꦂ​꧈​ꦢꦢꦶ​ꦥꦼꦥꦢꦁꦔꦺꦱꦶꦁ​ꦤꦁꦥꦼꦥꦼꦠꦼꦁ​꧉​ ²⁰ꦏꦺꦴꦮꦺ​ꦲꦸꦒ​ꦫꦸꦩꦁꦱ​ꦧꦶꦱ​ꦩ꧀ꦧꦼꦤꦼꦂꦫꦏꦺꦱꦶꦁ​ꦏ꧀ꦭꦺꦫꦸ​ꦥꦶꦏꦶꦂꦫꦤ꧀ꦤꦺ​ꦭꦤ꧀ꦫꦸꦩꦁꦱ​ꦢꦢꦶ​ꦒꦸꦫꦸꦤꦺ​ꦲꦤꦏ꧀ꦲꦤꦏ꧀꧈​ꦥꦚ꧀ꦕꦺꦤ꧀ ꦏꦺꦴꦮꦺ​ꦧꦸꦔꦃ​ꦤꦺꦏ꧀ꦏꦺꦴꦮꦺ​ꦤ꧀ꦢꦸꦮꦺꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦮꦺꦠ꧀ꦮꦺꦠ꧀ꦱꦶꦁ​ꦔꦼꦏꦺꦏ꧀ꦏꦶꦱꦏ꧀ꦲꦺꦤꦺꦁꦔꦺꦏꦮꦼꦫꦸꦃꦭꦤ꧀ꦱꦏ꧀ꦲꦺꦤꦺꦁꦔꦺꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​ꦩꦫꦁ​ꦏꦺꦴꦮꦺ​꧉​ ²¹ꦏꦺꦴꦮꦺ​ꦥꦢ​ꦩꦸꦭꦁꦔꦶꦮꦺꦴꦁ​ꦭꦶꦪ​꧈​ꦭꦃ​ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦲꦺꦴꦫ​ꦩꦸꦭꦁꦔꦶꦲꦮꦏ꧀ꦩꦸ​ꦢꦺꦮꦺ?ꦏꦺꦴꦮꦺ​ꦔꦺꦴꦩꦺꦴꦁ:“ꦲꦗ​ꦚꦺꦴꦭꦺꦴꦁ​꧈​”ꦭꦃ​ꦏꦼꦤꦺꦁꦲꦥ​ꦏꦺꦴꦮꦺ​ꦢꦺꦮꦺꦏꦺꦴꦏ꧀ꦚꦺꦴꦭꦺꦴꦁ​? ²²ꦏꦺꦴꦮꦺ​ꦩꦸꦭꦁꦔꦶ:“ꦲꦗ​ꦭꦏꦸ​ꦧꦺꦢꦁ꧈​”ꦭꦃ​ꦏꦼꦤꦺꦁꦲꦥ​ꦏꦺꦴꦮꦺ​ꦢꦺꦮꦺꦏꦺꦴꦏ꧀ꦭꦏꦸ​ꦧꦺꦢꦁ?ꦗꦫꦺꦤꦺ​ꦏꦺꦴꦮꦺ​ꦱꦼꦔꦶꦠ꧀ꦩꦫꦁ​ꦧꦿꦲꦭ​꧈​ꦭꦃ​ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦚꦺꦴꦭꦺꦴꦁꦔꦶ​ꦱꦁꦏꦲꦺꦴꦩꦃꦲꦺꦴꦩꦃꦲꦺ​ꦱꦼꦩ꧀ꦧꦃꦲꦤ꧀ꦧꦿꦲꦭ​? ²³ꦏꦺꦴꦮꦺ​ꦱꦺꦴꦩ꧀ꦧꦺꦴꦁ꧈​ꦗꦭꦂꦫꦤ꧀ꦏꦺꦴꦮꦺ​ꦤ꧀ꦢꦸꦮꦺꦤ꧀ꦤꦶ​ꦫꦸꦩꦁꦱ​ꦤꦺꦏ꧀ꦏꦺꦴꦮꦺ​ꦱꦶꦁ​ꦢꦶꦥꦱꦿꦃꦲꦶ​ꦮꦺꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦏꦺꦴꦮꦺ​ꦢꦺꦮꦺꦥꦢ​ꦩꦶꦫꦁꦩꦶꦫꦁꦔꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦤꦼꦫꦏ꧀ꦮꦺꦠ꧀ꦮꦺꦠ꧀ꦏꦸꦮꦶ​꧉​ ²⁴ꦮꦸꦗꦸꦠ꧀ꦠꦺꦪ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦗꦭꦂꦫꦤ꧀ꦱꦁꦏꦏ꧀ꦭꦏꦸꦮꦤ꧀ꦩꦸꦗꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦼꦮꦶꦫꦁꦮꦶꦫꦁꦤꦁꦠꦼꦔꦃꦲꦺ​ꦧꦁꦱ​ꦱꦶꦁ​ꦢꦸꦢꦸ​ꦙꦸ꧉​”

²⁵꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦏꦼꦥꦺꦔꦶꦤ꧀​ꦤ꧀ꦢꦸꦤꦸꦁꦔꦏꦺꦏꦺꦴꦮꦺ​ꦧꦧ꧀ꦲꦶꦏꦶ​:ꦲꦼꦁꦒꦺꦴꦤ꧀ꦩꦸ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦏꦸꦮꦶ​ꦤꦩꦸꦁ​ꦲꦺꦤꦺꦁꦲꦗꦶꦤꦺ​꧈​ꦤꦺꦏ꧀ꦏꦺꦴꦮꦺ​ꦲꦸꦒ​ꦥꦢ​ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ꦠꦼꦒꦼꦱ꧀ꦱꦺ​꧈​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦏꦸꦮꦶ​꧈​ꦲꦼꦁꦒꦺꦴꦤ꧀ꦩꦸ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦏꦸꦮꦶ​ꦲꦺꦴꦫ​ꦏꦁꦒꦺꦴ​ꦒꦮꦺ​꧉​ ²⁶ꦤꦁꦔꦶꦁ​꧈​ꦱꦼꦤꦗꦤ꧀ꦤ​ꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ ꦤꦩꦸꦁ​ꦔ꧀ꦭꦏꦺꦴꦤ꧀ꦤꦶ​ꦲꦥ​ꦱꦶꦁ​ꦢꦶꦮꦸꦭꦁꦔꦏꦺꦲꦶꦁ​ꦮꦺꦠ꧀ꦮꦺꦠ꧀ꦩꦲꦸ​꧈​ꦭꦃ​ꦏꦸꦮꦶ​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦢꦶ​ꦏꦪ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀꧈​ ²⁷ꦢꦢꦶꦤꦺ​꧈​ꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦱꦶꦁ​ꦲꦺꦴꦫ​ꦱꦸꦤꦠ꧀ꦩꦭꦃ​ꦧꦏꦭ꧀ꦚꦭꦃꦚꦭꦃꦲꦏꦺꦏꦺꦴꦮꦺ​ꦱꦶꦁ​ꦥꦢ​ꦱꦸꦤꦠ꧀ ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦤꦼꦫꦏ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦱꦼꦤꦗꦤ꧀ꦲꦺꦴꦫ​ꦱꦸꦤꦠ꧀ ꦤꦁꦔꦶꦁ​ꦩꦭꦃ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦱꦶꦁ​ꦏꦼꦠꦸꦭꦶꦱ꧀ꦲꦶꦁ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ ²⁸ꦕꦼꦏꦏ꧀ꦏꦺ​ꦉꦩ꧀ꦧꦸꦏ꧀ꦥꦫ​ꦱꦼꦢꦸꦭꦸꦂ​꧈​ꦱꦥ​ꦠ​ꦱꦶꦁ​ꦏꦼꦤꦺꦁꦢꦶꦲꦫꦤ꧀ꦤꦶ​ꦮꦺꦴꦁ​ꦙꦸꦠꦼꦤꦤ꧀꧈​ꦭꦤ꧀ꦱꦥ​ꦠ​ꦱꦶꦁ​ꦠꦼꦤꦤ꧀ꦏꦼꦤꦺꦁꦢꦶꦲꦫꦤ꧀ꦤꦶ​ꦮꦺꦴꦁ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀?ꦲꦺꦴꦫ​ꦮꦺꦴꦁ​ꦙꦸꦱꦶꦁ​ꦱꦁꦏꦭꦲꦶꦫꦤ꧀ꦤꦺꦭꦤ꧀ꦲꦺꦴꦫ​ꦮꦺꦴꦁ​ꦱꦶꦁ​ꦱꦸꦤꦠ꧀ꦏꦸꦭꦶꦠ꧀ꦠꦺ​꧈​ꦲꦺꦴꦫ​꧉​ ²⁹ꦮꦺꦴꦁ​ꦙꦸꦱꦶꦁ​ꦠꦼꦤꦤ꧀ꦏꦸꦮꦶ​ꦮꦺꦴꦁ​ꦱꦶꦁ​ꦢꦢꦶ​ꦮꦺꦴꦁ​ꦙꦸꦲꦶꦁ​ꦲꦠꦶꦤꦺ​꧈​ꦮꦺꦴꦁ​ꦱꦶꦁ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦤ꧀ꦮꦺꦴꦁ​ꦱꦶꦁ​ꦱꦸꦤꦠ꧀ꦠꦼꦤꦤ꧀ꦏꦸꦮꦶ​ꦪ​ꦮꦺꦴꦁ​ ꦱꦶꦁ​ꦱꦸꦤꦠ꧀ꦲꦶꦁ​ꦲꦠꦶꦤꦺ​꧈​ꦱꦶꦁ​ꦢꦶꦱꦸꦤꦠ꧀ꦠꦶꦏꦫꦺꦴ​ꦫꦺꦴꦃ​ꦱꦸꦕꦶ​꧈​ꦲꦺꦴꦫ​ꦮꦺꦴꦁ​ꦱꦶꦁ​ꦱꦸꦤꦠ꧀ꦩꦤꦸꦠ꧀ꦠꦸꦭꦶꦱ꧀ꦱꦤ꧀ꦤꦺ​ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ꦢꦢꦶꦤꦺ​ꦪ​ꦮꦺꦴꦁ​ꦱꦶꦁ​ꦢꦢꦶ​ꦮꦺꦴꦁ​ꦙꦸꦲꦶꦁ​ꦲꦠꦶꦤꦺ​ꦭꦤ꧀ꦮꦺꦴꦁ​ꦱꦶꦁ​ꦱꦸꦤꦠ꧀ꦲꦶꦁ​ꦲꦠꦶꦤꦺ​ꦱꦶꦁ​ꦤꦩ꧀ꦥ​ꦥꦼꦔꦊꦩ꧀ꦩꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧈​ꦲꦺꦴꦫ​ꦱꦁꦏꦩꦤꦸꦁꦱ​꧉​

↑ ↑ ↑

 

꧇​꧓꧇​ ¹꧋ꦠꦶꦧꦏꦺ​ꦥꦫ​ꦱꦼꦢꦸꦭꦸꦂ​꧈​ꦲꦥ​ꦪ​ꦲꦺꦤꦺꦁꦒꦸꦤꦤꦺ​ꦢꦢꦶ​ꦮꦺꦴꦁ​ꦙꦸꦤꦺꦏ꧀ꦢꦶꦥꦢꦏ꧀ꦏꦏꦺꦏꦫꦺꦴ​ꦧꦁꦱ​ꦭꦶꦪꦭꦶꦪꦤꦺ​ꦭꦤ꧀​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦲꦶꦏꦸ​ꦲꦥ​ꦪ​ꦲꦺꦤꦺꦁꦥꦼꦂꦭꦸꦤꦺ? ²ꦩꦶꦠꦸꦫꦸꦠ꧀ꦥꦶꦤꦼꦩꦸꦏꦸꦥꦫ​ꦱꦼꦢꦸꦭꦸꦂ​꧈​ꦒꦸꦤꦤꦺ​ꦲꦺꦴꦏꦺꦃꦧꦔꦼꦠ꧀꧈​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦪ​ꦲꦶꦏꦶ​:ꦒꦸꦱ꧀ꦠꦶ​ꦄꦭ꧀ꦭꦃ​ꦩꦱꦿꦃꦲꦏꦺꦥꦶꦠꦸꦠꦸꦂꦫꦺ​ꦩꦫꦁ​ꦧꦁꦱ​ꦙꦸ꧉​ ³ꦭꦃ​ꦤꦁꦔꦶꦁ​ꦠꦼꦫꦸꦱ꧀ꦏꦼꦥꦿꦶꦪꦺ​?ꦮꦸꦗꦸꦠ꧀ꦠꦺꦲꦺꦤꦺꦁꦮꦺꦴꦁ​ꦙꦸꦱꦶꦁ​ꦱꦼꦤꦗꦤ꧀​ꦤ꧀ꦢꦸꦮꦺꦤ꧀ꦤꦶ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦩꦼꦏ꧀ꦱ​ꦲꦺꦴꦫ​ꦩꦤꦸꦠ꧀ꦩꦫꦁ​ꦥꦶꦠꦸꦠꦸꦂ​ꦏꦸꦮꦶ​꧉​ꦲꦥ​ꦏꦸꦮꦶ​ꦲꦺꦴꦫ​ꦠꦤ꧀ꦢꦤꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦏꦼꦤꦺꦁꦢꦶꦗꦒꦏ꧀ꦏꦏꦺ꧉​ ⁴ꦧ꧀ꦭꦱ꧀ꦲꦺꦴꦫ​ꦥꦫ​ꦱꦼꦢꦸꦭꦸꦂ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦏꦼꦤꦺꦁꦢꦶꦗꦒꦏ꧀ꦏꦏꦺꦠꦼꦫꦸꦱ꧀ ꦱꦼꦤꦗꦤ꧀ꦩꦤꦸꦁꦱ​ꦒꦺꦴꦫꦺꦴꦃ​ꦧꦧ꧀ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦸꦗꦸꦠ꧀ꦠꦺꦤꦁꦏꦶꦠꦧ꧀ꦪ​ꦲꦺꦤꦺꦁꦠꦸꦭꦶꦱ꧀ꦱꦤ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦢꦢꦶꦤꦺ​ꦏꦼꦠꦫ​ꦒꦸꦱ꧀ꦠꦶ​꧈​
ꦤꦺꦏ꧀ꦠꦼꦩ꧀ꦧꦸꦁꦩꦸ​ꦏꦧꦺꦃ​ꦧꦼꦤꦼꦂ​
ꦭꦤ꧀ꦱꦼꦤꦗꦤ꧀ꦤ​ꦏꦺꦴꦮꦺ​ꦢꦶꦱꦭꦃꦲꦏꦺꦏꦼꦥꦿꦶꦪꦺ​ꦮꦲꦺ​꧈​
ꦧꦏꦭ꧀ꦏꦼꦠꦶꦠꦶꦏ꧀ꦤꦺꦏ꧀ꦏꦺꦴꦮꦺ​ꦧꦼꦤꦼꦂ​ꦠꦼꦫꦸꦱ꧀꧈​”

⁵꧋ꦢꦢꦶꦤꦺ​ꦲꦥ​ꦪ​ꦲꦺꦴꦫ​ꦧꦼꦤꦼꦂ​ꦤꦺꦏ꧀ꦗꦭꦂꦫꦤ꧀ꦱꦁꦏꦏ꧀ꦭꦏꦸꦮꦤ꧀ꦤꦺ​ꦮꦺꦴꦁ​ꦙꦸꦱꦶꦁ​ꦲꦺꦴꦫ​ꦠꦼꦩꦼꦤ꧀ ꦩꦭꦃ​ꦧꦶꦱ​ꦏꦼꦠꦫ​ꦧꦔꦼꦠ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦩꦼꦤ꧀ꦠꦼꦫꦸꦱ꧀?ꦲꦥ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦏ꧀ꦭꦺꦫꦸ​ꦤꦺꦏ꧀ꦢꦺꦏ꧀ꦤꦺꦚꦼꦠꦿꦥ꧀ꦲꦮꦏ꧀ꦏꦺ​ꦢꦺꦮꦺ?꧌ꦲꦏꦸ​ꦲꦶꦏꦶ​ꦱꦏ꧀ꦗꦤꦺꦤꦩꦸꦁ​ꦤꦶꦫꦸ​ꦲꦺꦴꦩꦺꦴꦁꦔꦤ꧀ꦤꦺ​ꦮꦺꦴꦁꦮꦺꦴꦁ​꧉​) ⁶ꦧ꧀ꦭꦱ꧀ꦲꦺꦴꦫ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦏ꧀ꦭꦺꦫꦸ​!ꦭꦃ​ꦱꦼꦩꦸꦁꦒꦺꦴꦤ꧀ꦤꦺꦢꦺꦏ꧀ꦤꦺꦏ꧀ꦭꦺꦫꦸ​꧈​ꦏꦼꦥꦿꦶꦪꦺ​ꦢꦺꦏ꧀ꦤꦺꦧꦶꦱꦤꦺ​ꦔꦿꦸꦠꦸꦩꦤꦸꦁꦱ​?

⁷꧋ꦭꦤ꧀ꦩꦼꦤꦺꦃ​ꦥꦫ​ꦱꦼꦢꦸꦭꦸꦂ​꧈​ꦱꦼꦩꦸꦁꦒꦺꦴꦤ꧀ꦤꦺꦧꦼꦤꦼꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦠꦺꦴꦏ꧀ꦏꦺ​ꦱꦁꦏꦒꦺꦴꦫꦺꦴꦃꦏꦸ​꧈​ꦭꦃ​ꦏꦼꦤꦺꦁꦲꦥ​ꦒꦺꦴꦫꦺꦴꦃꦏꦸ​ꦏꦺꦴꦏ꧀ꦢꦶꦱꦭꦃꦲꦏꦺ?ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦢꦶꦲꦁꦒꦼꦥ꧀ꦮꦺꦴꦁ​ꦢꦺꦴꦱ​? ⁸ꦤꦺꦏ꧀ꦥꦚ꧀ꦕꦺꦤ꧀ꦔꦺꦴꦤꦺꦴ​ꦠꦼꦤꦤ꧀ ꦲꦮꦏ꧀ꦏꦺ​ꦢꦺꦮꦺꦭꦸꦮꦸꦁꦔꦺꦴꦩꦺꦴꦁꦔꦺꦤꦺ​ꦮꦲꦺ​:“ꦲ꦳ꦪꦸꦏ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦮꦲꦺ​꧈​ꦱꦸꦥꦪ​ꦱꦶꦁ​ꦲꦥꦶꦏ꧀ꦧꦶꦱ​ꦩꦼꦠꦸ​꧉”ꦥꦚ꧀ꦕꦺꦤ꧀ꦲꦏꦸ​ꦲꦶꦏꦶ​ꦢꦶꦲꦫꦤ꧀ꦤꦶ​ꦏꦫꦺꦴ​ꦮꦺꦴꦁꦮꦺꦴꦁ​꧈​ꦗꦫꦺꦤꦺ​ꦲꦏꦸ​ꦩꦸꦭꦁꦔꦶꦥꦶꦠꦸꦠꦸꦂ​ꦱꦶꦁ​ꦏꦪ​ꦔꦺꦴꦤꦺꦴ​ꦭꦤ꧀ꦲꦏꦸ​ꦗꦤ꧀ꦲꦶꦱꦶꦤ꧀ꦠꦼꦤꦤ꧀꧈​ꦤꦁꦔꦶꦁ​ꦥꦢ​ꦔꦼꦂꦠꦶꦪ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦚꦼꦠꦿꦥ꧀ꦮꦺꦴꦁꦮꦺꦴꦁ​ꦏꦸꦮꦶ​ꦏꦪ​ꦱꦏ꧀ꦩꦼꦱ꧀ꦠꦶꦤꦺ꧈​ꦪ​ꦮꦺꦴꦁꦮꦺꦴꦁ​ꦏꦸꦮꦶ​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧈​ꦩꦶꦏꦶꦫꦺꦱꦸꦥꦪ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦏꦺꦠꦺꦴꦏ꧀꧈​

꧋ꦮꦺꦴꦁ​ꦏꦧꦺꦃ​ꦢꦺꦴꦱ​꧉​

⁹꧋ꦥꦫ​ꦱꦼꦢꦸꦭꦸꦂ​꧈​ꦲꦥ​ꦲꦏꦸ​ꦲꦶꦏꦶ​ꦔꦺꦴꦩꦺꦴꦁꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦺꦴꦁ​ꦙꦸꦱꦶꦁ​ꦲꦥꦶꦏ꧀ꦢꦺꦮꦺ꧈​ꦔꦸꦁꦏꦸꦭ꧀ꦭꦶ​ꦧꦁꦱ​ꦭꦶꦪꦭꦶꦪꦤꦺ​?ꦧ꧀ꦭꦱ꧀ꦲꦺꦴꦫ​!ꦲꦏꦸ​ꦩꦭꦃ​ꦮꦶꦱ꧀​ꦤ꧀ꦢꦸꦤꦸꦁꦔꦏꦺꦤꦺꦏ꧀ꦮꦺꦴꦁ​ꦙꦸꦏꦸꦮꦶ​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦮꦺꦴꦁ​ꦱꦶꦁ​ꦢꦸꦢꦸ​ꦙꦸ꧈​ꦏꦧꦺꦃ​ꦮꦶꦱ꧀ꦢꦶꦏ꧀ꦮꦱꦤꦶ​ꦢꦺꦴꦱ​꧉​ ¹⁰ꦧꦧ꧀ꦲꦶꦏꦶ​ꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:

“ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦱꦶꦁ​ꦧꦼꦤꦼꦂ​꧉​
¹¹ꦲꦺꦴꦫ​ꦲꦺꦤꦺꦁꦱꦶꦁ​ꦔꦼꦂꦠꦶ​ꦲꦥ​ꦏꦼꦥꦺꦔꦶꦤ꧀ꦔꦼꦂꦠꦶ​
ꦩꦫꦁ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​
¹²ꦏꦧꦺꦃ​ꦮꦶꦱ꧀ꦥꦢ​ꦤꦶꦁꦒꦭ꧀ꦒꦸꦱ꧀ꦠꦶ​ꦄꦭ꧀ꦭꦃ​
ꦭꦤ꧀ꦲꦺꦴꦫ​ꦏꦁꦒꦺꦴ​ꦒꦮꦺ​ꦲꦥꦲꦥ​꧉​
ꦲꦺꦴꦫ​ꦲꦺꦤꦺꦁꦱꦶꦗꦶ​ꦮꦲꦺ​ꦱꦶꦁ​ꦔ꧀ꦒꦮꦺ​ꦏꦧꦼꦕꦶꦏ꧀ꦏꦤ꧀꧈​
ꦱꦶꦗꦶ​ꦮꦲꦺ​ꦲꦺꦴꦫ​꧉​
¹³ꦠꦼꦭꦏ꧀ꦏꦺ​ꦏꦪ​ꦏꦸꦧꦸꦂꦫꦤ꧀ꦩꦼꦔ​ꦭꦤ꧀ꦲꦶꦭꦠ꧀ꦠꦺ​ꦥꦶꦤ꧀ꦠꦼꦂꦫꦺ​ꦲꦺꦫꦩ꧀ꦩꦺꦫꦩ꧀ꦤꦺꦏ꧀ꦔꦥꦸꦱ꧀ꦱꦶ​ꦮꦺꦴꦁ​꧉​
ꦭꦩ꧀ꦧꦺꦤꦺ​ꦏꦪ​ꦲꦺꦤꦺꦁꦫꦕꦸꦤ꧀ꦤꦺ​꧈​
ꦏꦫꦺꦴ​ꦠꦼꦩ꧀ꦧꦸꦁꦔꦺ​ꦥꦢ​ꦔꦼꦩ꧀ꦧꦿꦸꦏ꧀ꦏꦏꦺꦭꦤ꧀ꦔꦿꦸꦱꦏ꧀ꦲꦸꦫꦶꦥ꧀ꦥꦺꦭꦶꦪꦤꦺ​꧉​
¹⁴ꦕꦁꦏꦼꦩ꧀ꦩꦺ​ꦏꦼꦧꦼꦏ꧀ꦏꦫꦺꦴ​ꦠꦼꦩ꧀ꦧꦸꦁ​ꦲꦭ​꧈​
ꦱꦼꦤꦼꦁ​ꦩꦸꦗꦺꦏ꧀ꦏꦏꦺꦲꦭꦁꦔꦤ꧀ꦩꦫꦁ​ꦭꦶꦪꦤꦺ​꧉​
¹⁵ꦒꦩ꧀ꦥꦁ​ꦤꦺꦏ꧀​ꦤ꧀ꦢꦢꦺꦏ꧀ꦏꦏꦺꦱꦁꦱꦫꦤꦺ​
ꦭꦤ꧀ꦩꦠꦺꦤ꧀ꦤꦶ​ꦮꦺꦴꦁ​ꦭꦶꦪꦤꦺ​꧉​
¹⁶ꦤꦁꦲꦼꦤ꧀ꦢꦶ​ꦮꦲꦺ​ꦱꦶꦁ​ꦢꦶꦠꦼꦏꦤꦶ​
ꦩꦼꦱ꧀ꦠꦶꦤꦶꦁꦒꦭ꧀ꦠꦶꦥꦏ꧀ꦏꦫꦸꦱꦏ꧀ꦏꦤ꧀ꦭꦤ꧀ꦏꦱꦁꦱꦫꦤ꧀꧈​
¹⁷ꦲꦸꦫꦶꦥ꧀ꦏꦠꦼꦤ꧀ꦠꦽꦩ꧀ꦩꦤ꧀ꦲꦺꦴꦫ​ꦥꦢ​ꦔꦼꦂꦠꦶ​ꦧ꧀ꦭꦱ꧀꧈​
¹⁸ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​
ꦮꦺꦴꦁꦮꦺꦴꦁ​ꦲꦶꦏꦶ​ꦗꦤ꧀ꦲꦺꦴꦫ​ꦤ꧀ꦢꦸꦮꦺꦮꦼꦢꦶ​ꦧ꧀ꦭꦱ꧀꧈​”

¹⁹꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦢꦸꦤꦸꦁꦤꦺꦏ꧀ꦱꦼꦩ꧀ꦧꦫꦁ​ꦱꦶꦁ​ꦢꦶꦲꦺꦴꦩꦺꦴꦁꦲꦶꦁ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦏꦸꦮꦶ​ꦪ​ꦏꦁꦒꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦤ꧀ꦢꦸꦮꦺꦤ꧀ꦤꦶ​ꦮꦺꦠ꧀ꦮꦺꦠ꧀ꦏꦸꦮꦶ​꧈​ꦪ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦺꦴꦁ​ꦙꦸ꧉​ ꦢꦢꦶꦤꦺ​ꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦠꦼꦫꦸꦱ꧀ꦔꦺꦴꦩꦺꦴꦁꦤꦺꦏ꧀ꦲꦺꦴꦫ​ꦔꦼꦂꦠꦶ​ꦤꦺꦏ꧀ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦏꦸꦮꦶ​ꦲꦺꦴꦫ​ꦲꦥꦶꦏ꧀꧈​ꦩꦼꦁꦏꦺꦴꦤꦺꦴ​ꦏꦸꦮꦶ​ꦢꦢꦶꦤꦺ​ꦲꦺꦤꦺꦁꦧꦼꦤꦼꦂꦫꦺ​ꦤꦺꦏ꧀ꦏꦧꦺꦃ​ꦮꦺꦴꦁ​ꦱꦏ꧀ꦗꦒꦠ꧀ ꦠꦼꦒꦼꦱ꧀ꦱꦺ​ꦮꦺꦴꦁ​ꦙꦸꦭꦤ꧀ꦱꦶꦁ​ꦢꦸꦢꦸ​ꦙꦸ꧈​ꦏꦸꦢꦸ​ꦲꦱꦺꦴꦏ꧀ꦥꦼꦚ꧀ꦗꦮꦧ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁰ꦮꦺꦴꦁ​ꦲꦸꦫꦶꦥ꧀ꦲꦺꦴꦫ​ꦲꦺꦤꦺꦁꦱꦶꦗꦶ​ꦮꦲꦺ​ꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦗꦭꦂꦫꦤ꧀​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ꦤꦁꦔꦶꦁ​ꦮꦺꦠ꧀ꦮꦺꦠ꧀ꦏꦸꦮꦶ​ꦤꦩꦸꦁ​ꦏꦁꦒꦺꦴ​ꦤ꧀ꦢꦸꦢꦸꦃꦲꦏꦺꦤꦺꦏ꧀ꦩꦤꦸꦁꦱ​ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧉​

꧋ꦒꦸꦱ꧀ꦠꦶ​ꦄꦭ꧀ꦭꦃ​ꦒꦼꦊꦩ꧀ꦤꦩ꧀ꦥ​ꦩꦤꦸꦁꦱ​꧉​

²¹꧋ꦤꦁꦔꦶꦁ​ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦔ꧀ꦒꦮꦺ​ꦢꦭꦤ꧀ꦭꦶꦪꦤꦺ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦢꦭꦤ꧀ꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦧꦶꦱ​ꦏꦼꦠꦩ꧀ꦥꦢꦺꦏ꧀ꦤꦺ꧉​ꦲꦶꦏꦶ​ꦲꦺꦴꦫ​ꦭꦤ꧀ꦠꦂꦫꦤ꧀ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦲꦺꦴꦫ​꧈​ꦤꦁꦔꦶꦁ​ꦭꦤ꧀ꦠꦂꦫꦤ꧀ꦢꦭꦤ꧀ꦱꦶꦁ​ꦲꦚꦂ​꧈​ꦱꦼꦤꦗꦤ꧀​ꦩ꧀ꦧꦶꦪꦺꦤ꧀ꦤꦧꦶ​ꦩꦺꦴꦱꦼꦱ꧀ꦭꦤ꧀ꦤꦧꦶ​ꦭꦶꦪꦭꦶꦪꦤꦺ​ꦪ​ꦮꦶꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦢꦭꦤ꧀ꦲꦶꦏꦶ​꧉​ ²²ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱꦤꦺ​ꦢꦶꦲꦁꦒꦼꦥ꧀ꦧꦼꦤꦼꦂ​ꦭꦤ꧀ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦤꦩꦸꦁ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦏꦧꦺꦃ​ꦮꦺꦴꦁ​ꦧꦶꦱ​ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀ ꦤꦺꦏ꧀ꦒꦼꦊꦩ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦩ꧀ꦧꦺꦢꦏ꧀​ꦩ꧀ꦧꦺꦢꦏ꧀ꦏꦏꦺ꧈​ꦲꦺꦴꦫ​ꦢꦢꦶ​ꦱꦼꦧꦧ꧀ꦮꦺꦴꦁ​ꦙꦸꦲꦥ​ꦧꦁꦱ​ꦭꦶꦪ​꧉​ ²³ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦧꦶꦱ​ꦔꦺꦴꦩꦺꦴꦁꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​꧉​ꦲꦮꦶꦠ꧀ꦏꦧꦺꦃ​ꦮꦺꦴꦁ​ꦮꦶꦱ꧀ꦠꦶꦧ​ꦲꦶꦁ​ꦢꦺꦴꦱ​ꦭꦤ꧀ꦗꦭꦂꦫꦤ꧀ꦏꦧꦺꦃ​ꦤꦩꦸꦁ​ꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦢꦺꦮꦺ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦧ꧀ꦭꦱ꧀ꦲꦺꦴꦫ​ꦏꦺꦠꦺꦴꦏ꧀ꦲꦥꦶꦏ꧀ꦏꦺ​ꦱꦁꦏꦲꦸꦫꦶꦥ꧀ꦥꦺꦩꦤꦸꦁꦱ​꧉​ ²⁴ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦏ꧀ꦱ​ꦒꦼꦊꦩ꧀ꦔꦁꦒꦼꦥ꧀ꦩꦤꦸꦁꦱ​ꦧꦼꦤꦼꦂ​ꦭꦤ꧀ꦒꦼꦊꦩ꧀ꦤꦩ꧀ꦥ​ꦩꦤꦸꦁꦱ​꧈​ꦤꦺꦏ꧀ꦒꦼꦊꦩ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦮꦶꦱ꧀ꦤꦼꦧꦸꦱ꧀ꦢꦺꦴꦱꦤꦺ​ꦩꦤꦸꦁꦱ​꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦸꦗꦸꦠ꧀ꦠꦏꦺꦏꦮꦼꦭꦱ꧀ꦱꦤ꧀ꦤꦺ​ꦭꦤ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦩꦤꦸꦁꦱ​꧈​ꦱꦶꦁ​ꦱꦏ꧀ꦗꦤꦺꦏꦸꦢꦸ​ꦢꦶꦱꦼꦠꦿꦥ꧀꧈​ ²⁵ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦺꦴꦁꦏꦺꦴꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​꧈​ꦚꦁꦒ​ꦱꦼꦠꦿꦥꦤ꧀ꦤꦺꦩꦤꦸꦁꦱ​꧈​ꦱꦸꦥꦪ​ꦩꦤꦸꦁꦱ​ꦧꦶꦱ​ꦢꦶꦭꦸꦮꦂꦫꦶ​ꦱꦁꦏꦤꦼꦱꦸꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦧꦶꦱ​ꦤꦩ꧀ꦥ​ꦥꦔꦥꦸꦫ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦼꦠꦶꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦠꦸꦩꦺꦠꦺꦱ꧀ꦢꦺꦴꦁꦔꦺꦢꦺꦏ꧀ꦤꦺꦩꦠꦶ​ꦭꦤ꧀ꦱꦥ​ꦱꦶꦁ​ꦥꦽꦕꦪ​ꦤꦺꦏ꧀ꦒꦼꦠꦶꦃ​ꦠꦸꦩꦺꦠꦺꦱ꧀ꦏꦸꦮꦶ​ꦏꦁꦒꦺꦴ​ꦔ꧀ꦭꦧꦸꦃꦲꦶ​ꦩꦤꦸꦁꦱ​꧈​ꦮꦺꦴꦁ​ꦏꦸꦮꦶ​ꦩꦼꦱ꧀ꦠꦶꦧꦏꦭ꧀ꦤꦩ꧀ꦥ​ꦥꦔꦥꦸꦫ​ꦭꦤ꧀ꦧꦶꦱ​ꦤꦶꦠꦺꦤ꧀ꦤꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦤꦼꦂ​꧉​ꦲꦮꦶꦠ꧀ꦲꦶꦁ​ꦗꦩꦤ꧀ꦱꦶꦁ​ꦮꦶꦱ꧀​ꦏ꧀ꦭꦶꦮꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦚꦼꦠꦿꦥ꧀ꦩꦤꦸꦁꦱ​꧈​ꦗꦭꦂꦫꦤ꧀ꦢꦺꦏ꧀ꦤꦺꦏꦼꦥꦺꦔꦶꦤ꧀ꦔꦼꦠꦺꦴꦏ꧀ꦏꦏꦺꦏꦼꦱꦧꦂꦫꦤ꧀ꦤꦺ​꧉​ ²⁶ꦤꦁꦔꦶꦁ​ꦱꦲꦶꦏꦶ​ꦮꦶꦱ꧀ꦠꦼꦏꦤ꧀ꦮꦚ꧀ꦕꦶꦤꦺ​ꦢꦺꦏ꧀ꦤꦺ​ꦚꦼꦠꦿꦥ꧀ꦏꦧꦺꦃ​ꦩꦤꦸꦁꦱ​꧈​ꦗꦭꦂꦫꦤ꧀ꦱꦁꦏꦢꦺꦴꦱꦤꦺ​꧈​ꦠꦼꦒꦼꦱ꧀ꦱꦺ​꧈​ꦲꦸꦒ​ꦩꦤꦸꦁꦱ​ꦱꦶꦁ​ꦲꦶꦁ​ꦗꦩꦤ꧀ꦱꦶꦁ​ꦮꦶꦱ꧀​ꦏ꧀ꦭꦶꦮꦠ꧀ꦢꦶꦱꦧꦂꦫꦶ꧉​ꦱꦲꦶꦏꦶ​ꦧꦶꦱ​ꦏꦺꦠꦺꦴꦏ꧀ꦤꦺꦏ꧀ꦢꦺꦏ꧀ꦤꦺ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦤꦼꦂ​꧉​ꦭꦤ꧀ꦢꦺꦏ꧀ꦤꦺ​ꦲꦸꦒ​ꦤꦩ꧀ꦥ​ꦏꦧꦺꦃ​ꦮꦺꦴꦁ​ꦱꦶꦁ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦢꦶꦲꦁꦒꦼꦥ꧀ꦧꦼꦤꦼꦂ​꧉​

²⁷꧋ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦥ​ꦱꦶꦁ​ꦲꦉꦥ꧀ꦢꦶꦲꦼꦁꦒꦺꦴ​ꦥꦩꦺꦂꦫꦤ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ?ꦧ꧀ꦭꦱ꧀ꦲꦺꦴꦫ​ꦲꦺꦤꦺꦁ꧉​ꦭꦃ​ꦲꦥ​ꦱꦶꦁ​ꦩꦫꦏ꧀ꦏꦏꦺꦩꦤꦸꦁꦱ​ꦧꦶꦱ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​?ꦲꦥ​ꦗꦭꦂꦫꦤ꧀ꦱꦁꦏꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀?ꦲꦺꦴꦫ​꧈​ꦤꦁꦔꦶꦁ​ꦩꦤꦸꦁꦱ​ꦧꦶꦱꦤꦺ​ꦢꦶꦲꦁꦒꦼꦥ꧀ꦧꦼꦤꦼꦂ​ꦭꦤ꧀ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦗꦭꦂꦫꦤ꧀ꦱꦁꦏꦥꦽꦕꦪ​꧉​ ²⁸ꦢꦢꦶꦤꦺ​ꦕꦼꦏꦏ꧀ꦏꦺ​ꦉꦩ꧀ꦧꦸꦏ꧀ꦥꦫ​ꦱꦼꦢꦸꦭꦸꦂ​꧈​ꦩꦤꦸꦁꦱ​ꦧꦶꦱꦤꦺ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦗꦭꦂꦫꦤ꧀ꦱꦁꦏꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦺꦴꦫ​ꦗꦭꦂꦫꦤ꧀ꦱꦁꦏꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ ²⁹ꦲꦥ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦤꦩꦸꦁ​ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦮꦺꦴꦁ​ꦙꦸ?ꦲꦥ​ꦢꦸꦢꦸ​ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦧꦁꦱ​ꦭꦶꦪ​ꦲꦸꦒ​?ꦩꦼꦱ꧀ꦠꦶꦪ​ꦠ​! ³⁰ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦸꦗꦸꦠ꧀ꦠꦺꦪ​ꦤꦩꦸꦁ​ꦱꦶꦗꦶ​꧉​ꦢꦺꦏ꧀ꦤꦺꦤꦩ꧀ꦥ​ꦩꦤꦸꦁꦱ​ꦤꦩꦸꦁ​ꦭꦤ꧀ꦠꦂꦫꦤ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦮꦺꦴꦁ​ꦙꦸꦭꦤ꧀ꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦠꦸꦁꦒꦭ꧀ꦭꦺ​ꦮꦲꦺ​꧉​ ³¹ꦭꦃ​ꦩꦼꦤꦮ​ꦏꦺꦴꦮꦺ​ꦠꦼꦫꦸꦱ꧀ꦔꦺꦴꦩꦺꦴꦁ:ꦠꦶꦧꦏꦺ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦮꦶꦱ꧀ꦲꦺꦴꦫ​ꦢꦶꦏꦁꦒꦺꦴꦏ꧀ꦏꦏꦺꦩꦼꦤꦺꦃ​?ꦲꦺꦴꦫ​ꦔꦺꦴꦤꦺꦴ​꧉​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦮꦏ꧀ꦏꦺ​ꦢꦺꦮꦺꦩꦭꦃ​ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦏꦸꦮꦶ​꧉​

↑ ↑ ↑

꧋ꦧꦥ​ꦄꦨꦿꦲꦩ꧀ꦏꦼꦠꦩ꧀ꦥꦗꦭꦂꦫꦤ꧀ꦱꦁꦏꦥꦼꦔꦤ꧀ꦢꦼꦭ꧀ꦭꦺ​꧉​

꧇​꧔꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩ꧀ꦥ​ꦩꦤꦸꦁꦱ​ꦗꦭꦂꦫꦤ꧀ꦱꦁꦏꦥꦼꦔꦤ꧀ꦢꦼꦭ꧀ꦭꦺ​꧈​ꦲꦺꦴꦫ​ꦗꦭꦂꦫꦤ꧀ꦱꦁꦏꦲꦼꦁꦒꦺꦴꦤꦺ​ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦭꦤ꧀ꦥꦼꦂꦤꦠ꧀ꦠꦤ꧀꧈​ꦭꦃ​ꦏꦼꦥꦿꦶꦪꦺ​ꦪ​ꦏꦫꦺꦴ​ ꦧꦥ​ꦄꦨꦿꦲꦩ꧀ ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ? ²ꦱꦼꦩꦸꦁꦒꦺꦴꦤ꧀ꦤꦺꦧꦥ​ꦄꦨꦿꦲꦩ꧀ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦗꦭꦂꦫꦤ꧀ꦱꦁꦏꦥꦽꦏꦫꦥꦽꦏꦫ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦢꦺꦏ꧀ꦤꦺ꧈​ꦪ​ꦲꦺꦤꦺꦁꦧꦼꦤꦼꦂꦫꦺ​ꦢꦺꦏ꧀ꦤꦺꦤ꧀ꦢꦸꦮꦺꦗꦭꦂꦫꦤ꧀ꦏꦁꦒꦺꦴ​ꦥꦩꦺꦂ​꧉​ꦤꦁꦔꦶꦁ​ꦢꦺꦏ꧀ꦤꦺꦲꦺꦴꦫ​ꦧꦶꦱ​ꦩꦩꦺꦂꦫꦏꦺꦲꦥꦲꦥ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ³ꦮꦸꦗꦸꦠ꧀ꦠꦺꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦄꦨꦿꦲꦩ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦗꦭꦂꦫꦤ꧀ꦱꦁꦏꦥꦽꦕꦪ​꧈​ꦄꦨꦿꦲꦩ꧀ꦢꦶꦠꦩ꧀ꦥ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦢꦶ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​” ⁴ꦮꦺꦴꦁ​ꦱꦶꦁ​ꦚꦩ꧀ꦧꦸꦠ꧀ꦠꦪ​ꦮꦶꦱ꧀ꦱꦏ꧀ꦩꦼꦱ꧀ꦠꦶꦤꦺꦤꦺꦏ꧀ꦤꦩ꧀ꦥ​ꦧꦪꦂꦫꦤ꧀ ꦲꦶꦏꦸ​ꦲꦸꦥꦃꦲꦺꦲꦼꦁꦒꦺꦴꦤꦺ​ꦚꦩ꧀ꦧꦸꦠ꧀ꦠ꧈​ꦢꦸꦢꦸ​ꦥꦮꦺꦃ꧉​ ⁵ꦭꦃ​ꦮꦺꦴꦁ​ꦱꦶꦁ​ꦲꦺꦴꦫ​ꦚ꧀ꦗꦒꦏ꧀ꦏꦏꦺꦥꦼꦁꦒꦮꦺꦪꦤ꧀ꦏꦸ꧈​ꦤꦁꦔꦶꦁ​ꦤꦩꦸꦁ​ꦚ꧀ꦗꦒꦏ꧀ꦏꦏꦺꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦩ꧀ꦥ​ꦏꦧꦺꦃ​ꦮꦺꦴꦁ​ꦱꦶꦁ​ꦥꦽꦕꦪ​꧈​ꦮꦺꦴꦁ​ꦏꦸꦮꦶ​ꦪ​ꦏꦼꦠꦩ꧀ꦥꦠꦼꦤꦤ꧀ ꦲꦮꦶꦠ꧀ꦮꦺꦴꦁꦔꦺ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁶ꦫꦠꦸ​ꦣꦮ꦳ꦼꦢ꧀ꦪ​ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦏꦺꦧꦧ꧀ꦥꦽꦏꦫ​ꦲꦶꦏꦶ​ꦭꦤ꧀ꦢꦺꦏ꧀ꦤꦺꦩꦺꦭꦸ​ꦧꦸꦔꦃ​ꦏꦫꦺꦴ​ꦮꦺꦴꦁ​ꦱꦶꦁ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦗꦭꦂꦫꦤ꧀ꦥꦼꦁꦒꦮꦺꦏꦸꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦮꦺꦴꦁ​ꦏꦸꦮꦶ​꧉​ ⁷ꦫꦠꦸ​ꦣꦮ꦳ꦼꦢ꧀ꦩꦭꦃ​ꦔꦺꦴꦩꦺꦴꦁꦔꦺꦤꦺ​:

“ꦒꦼꦢꦺꦠꦼꦤꦤ꧀ꦧꦸꦔꦃꦩꦸ​꧈​
ꦮꦺꦴꦁ​ꦱꦶꦁ​ꦢꦶꦔꦥꦸꦫꦏ꧀ꦭꦺꦫꦸꦤꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​
⁸ꦒꦼꦢꦺꦠꦼꦤꦤ꧀ꦧꦸꦔꦃꦩꦸ​꧈​
ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦔꦶꦠꦸꦁꦱꦭꦃꦩꦸ​!”

⁹꧋ꦥꦫ​ꦱꦼꦢꦸꦭꦸꦂ​꧈​ꦱꦶꦁ​ꦢꦶꦲꦼꦊꦩ꧀ꦏꦫꦺꦴ​ꦫꦠꦸ​ꦣꦮ꦳ꦼꦢ꧀ꦲꦶꦏꦶ​ꦲꦥ​ꦤꦩꦸꦁ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦲꦥ​ꦲꦸꦒ​ꦮꦺꦴꦁ​ꦱꦶꦁ​ꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀?ꦲꦮꦏ꧀ꦏꦺ​ꦢꦺꦮꦺꦩꦲꦸ​ꦮꦶꦱ꧀ꦔꦺꦴꦩꦺꦴꦁꦤꦺꦏ꧀ꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ꦤꦺꦏ꧀ꦧꦥ​ꦄꦨꦿꦲꦩ꧀ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​꧉​ ¹⁰ꦭꦃ​ꦧꦥ​ꦄꦨꦿꦲꦩ꧀ꦲꦼꦁꦒꦺꦴꦤꦺ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦏꦥꦤ꧀꧈​ꦲꦥ​ꦢꦺꦏ꧀ꦤꦺꦏꦼꦠꦩ꧀ꦥꦱꦏ꧀ꦢꦸꦫꦸꦁꦔꦺꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦲꦥ​ꦱꦏ꧀ꦮꦶꦱ꧀ꦱꦺ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀? ¹¹ꦮꦸꦗꦸꦠ꧀ꦠꦺꦪ​ꦱꦏ꧀ꦢꦸꦫꦸꦁꦔꦺꦢꦺꦏ꧀ꦤꦺꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦠ​꧈​ꦲꦺꦴꦫ​ꦱꦏ꧀ꦮꦶꦱ꧀ꦱꦺ​꧉​ꦲꦮꦶꦠ꧀ꦱꦏ꧀ꦢꦸꦫꦸꦁꦔꦺꦧꦥ​ꦄꦨꦿꦲꦩ꧀​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ ꦢꦺꦏ꧀ꦤꦺꦮꦶꦱ꧀ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦸꦤꦠ꧀ꦏꦸꦮꦶ​ꦤꦩꦸꦁ​ꦠꦤ꧀ꦢꦤꦺꦤꦺꦏ꧀ꦧꦥ​ꦄꦨꦿꦲꦩ꧀ꦮꦶꦱ꧀ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​꧉​ꦕꦼꦏꦏ꧀ꦏꦺ​ꦉꦩ꧀ꦧꦸꦏ꧀ꦥꦫ​ꦱꦼꦢꦸꦭꦸꦂ​꧈​ꦧꦥ​ꦄꦨꦿꦲꦩ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​ꦢꦺꦏ꧀ꦤꦺꦢꦶꦠꦩ꧀ꦥ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦤ꧀ꦢꦤꦺꦤꦺꦏ꧀ꦢꦺꦏ꧀ꦤꦺꦢꦶꦠꦩ꧀ꦥ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦏ꧀ꦤꦺꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀꧈​ꦩꦼꦁꦏꦺꦴꦤꦺꦴ​ꦏꦸꦮꦶ​ꦏꦧꦺꦃ​ꦮꦺꦴꦁ​ꦱꦶꦁ​ꦥꦽꦕꦪ​ꦢꦶꦲꦁꦒꦼꦥ꧀ꦢꦢꦶ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦼꦤꦗꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀꧈​ ¹²ꦭꦃ​ꦮꦺꦴꦁ​ꦙꦸꦏꦧꦺꦃ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦏꦸꦮꦶ​ꦲꦺꦴꦫ​ꦢꦢꦶ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦗꦭꦂꦫꦤ꧀​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ ꦤꦁꦔꦶꦁ​ꦗꦭꦂꦫꦤ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦪ​ꦲꦼꦁꦒꦺꦴꦤꦺ​ꦧꦥ​ꦄꦨꦿꦲꦩ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦏ꧀ꦢꦸꦫꦸꦁꦔꦺꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀꧈​

꧋ꦧꦥ​ꦄꦨꦿꦲꦩ꧀ꦤꦩ꧀ꦥ​ꦥꦽꦗꦚ꧀ꦗꦶꦪꦤ꧀ꦗꦭꦂꦫꦤ꧀ꦥꦽꦕꦪ​꧉​

¹³꧋ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦗꦚ꧀ꦗꦶ​ꦩꦫꦁ​ꦧꦥ​ꦄꦨꦿꦲꦩ꧀ꦭꦤ꧀ꦥꦫ​ꦠꦸꦫꦸꦤ꧀ꦤꦤ꧀ꦤꦺ​ꦤꦺꦏ꧀ꦧꦏꦭ꧀ꦢꦶꦏꦺꦏ꧀ꦏꦶꦗꦒꦠ꧀ꦲꦶꦏꦶ​꧉​ꦭꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦼꦁꦒꦺꦴꦤꦺ​ꦔꦼꦏꦺꦏ꧀ꦏꦶꦥꦽꦗꦚ꧀ꦗꦶꦪꦤ꧀ꦲꦶꦏꦶ​ꦲꦺꦴꦫ​ꦗꦭꦂꦫꦤ꧀ꦧꦥ​ꦄꦨꦿꦲꦩ꧀ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦲꦺꦴꦫ​꧈​ꦤꦁꦔꦶꦁ​ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦗꦭꦂꦫꦤ꧀ꦱꦁꦏꦥꦽꦕꦪ​ꦏꦸꦮꦶ​ꦢꦺꦏ꧀ꦤꦺꦧꦶꦱ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁴ꦱꦼꦩꦸꦁꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦥꦽꦗꦚ꧀ꦗꦶꦪꦤ꧀ꦤꦺ​ꦤꦩꦸꦁ​ꦩꦫꦁ​ꦮꦺꦴꦁ​ꦱꦶꦁ​ꦥꦢ​ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦠꦶꦧꦏꦺ​ꦩꦤꦸꦁꦱ​ꦲꦺꦴꦫ​ꦲꦸꦱꦃꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦼꦩꦺꦴꦤꦺꦴ​ꦲꦸꦒ​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦲꦺꦤꦺꦁꦲꦗꦶꦤꦺ​꧉​ ¹⁵ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦩꦤꦸꦁꦱ​ꦏꦼꦥꦺꦔꦶꦤ꧀ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦂꦫꦤ꧀ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦲꦺꦤ꧀ꦠꦸꦏ꧀ꦲꦺꦤ꧀ꦠꦸꦏ꧀ꦏꦺꦤꦩꦸꦁ​ꦱꦼꦠꦿꦥꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦩꦤꦸꦁꦱ​ꦥꦢ​ꦤꦼꦫꦏ꧀ꦮꦺꦠ꧀ꦮꦺꦠ꧀ꦏꦸꦮꦶ​꧉​ꦢꦢꦶꦤꦺ​ꦤꦺꦏ꧀ꦮꦺꦠ꧀ꦮꦺꦠ꧀ꦏꦸꦮꦶ​ꦲꦺꦴꦫ​ꦲꦺꦤꦺꦁꦪ​ꦲꦺꦴꦫ​ꦲꦺꦤꦺꦁꦱꦶꦁ​ꦢꦶꦠꦼꦫꦏ꧀꧈​

¹⁶꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦔꦼꦏꦺꦏ꧀ꦏꦶꦥꦽꦗꦚ꧀ꦗꦶꦪꦤ꧀ꦤꦺ​ꦩꦫꦁ​ꦮꦺꦴꦁ​ꦱꦶꦁ​ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦤꦧꦶ​ꦩꦺꦴꦱꦼꦱ꧀ ꦤꦁꦔꦶꦁ​ꦤꦩꦸꦁ​ꦩꦫꦁ​ꦮꦺꦴꦁ​ꦱꦶꦁ​ꦚ꧀ꦗꦒꦏ꧀ꦏꦏꦺꦩꦫꦁ​ꦢꦺꦏ꧀ꦤꦺꦧꦶꦱ​ꦤꦩ꧀ꦥ​ꦥꦽꦗꦚ꧀ꦗꦶꦪꦤ꧀ꦤꦺ​꧉​ꦢꦢꦶꦤꦺ​ꦧꦶꦱ​ꦏꦺꦠꦺꦴꦏ꧀ ꦤꦺꦏ꧀ꦏꦸꦮꦶ​ꦥꦮꦺꦃꦱꦶꦁ​ꦩꦼꦠꦸ​ꦱꦁꦏꦲꦠꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦤ꧀ꦱꦶꦁ​ꦥꦼꦤ꧀ꦠꦶꦁ​ꦲꦸꦒ​꧈​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦗ​ ꦱꦩ꧀ꦥꦺꦏ꧀ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦱꦶꦗꦶ​ꦮꦲꦺ​ꦏꦺꦭꦁꦔꦤ꧀ꦥꦽꦗꦚ꧀ꦗꦶꦪꦤ꧀ꦲꦶꦏꦶ​꧈​ꦤꦁꦔꦶꦁ​ꦏꦧꦺꦃ​ꦏꦸꦢꦸ​ꦤꦩ꧀ꦥ​ꦥꦤ꧀ꦢꦸꦩ꧀ꦩꦤ꧀꧈​ꦏꦸꦮꦶ​ꦲꦺꦴꦫ​ꦤꦩꦸꦁ​ꦮꦺꦴꦁ​ꦙꦸꦱꦶꦁ​ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦲꦺꦴꦫ​꧈​ꦤꦁꦔꦶꦁ​ꦲꦸꦒ​ꦭꦶꦪꦭꦶꦪꦤꦺ​ꦱꦶꦁ​ꦚ꧀ꦗꦒꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦧꦥ​ꦄꦨꦿꦲꦩ꧀꧈​ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦧꦥ​ꦄꦨꦿꦲꦩ꧀ꦏꦸꦮꦶ​ꦧꦥꦏ꧀ꦏꦺꦏꦧꦺꦃ​ꦮꦺꦴꦁ​ꦱꦶꦁ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁷ꦤꦁꦏꦶꦠꦧ꧀ꦮꦸꦗꦸꦠ꧀ꦠꦺꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦲꦏꦸ​ꦤ꧀ꦢꦢꦺꦏ꧀ꦏꦏꦺꦏꦺꦴꦮꦺ​ꦢꦢꦶ​ꦧꦥꦏ꧀ꦏꦺꦧꦁꦱ​ꦥꦶꦫꦁꦥꦶꦫꦁ​!”ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥ​ꦄꦨꦿꦲꦩ꧀ꦪ​ꦥꦚ꧀ꦕꦺꦤ꧀ꦢꦢꦶ​ꦧꦥꦏ꧀ꦏꦺꦧꦁꦱ​ꦥꦶꦫꦁꦥꦶꦫꦁ​ꦠꦼꦤꦤ꧀ ꦪꦏꦸꦮꦶ​ꦏꦧꦺꦃ​ꦧꦁꦱ​ꦱꦶꦁ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦧꦥ​ꦄꦨꦿꦲꦩ꧀꧈​ꦧꦥ​ꦄꦨꦿꦲꦩ꧀ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦸꦫꦶꦥ꧀ꦥꦏꦺꦮꦺꦴꦁ​ꦩꦠꦶ​ꦭꦤ꧀ꦢꦺꦏ꧀ꦤꦺꦥꦽꦕꦪ​ꦲꦸꦒ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​꧈​ꦔꦁꦒꦺꦴ​ꦠꦼꦩ꧀ꦧꦸꦁꦔꦺ​ꦧꦶꦱ​ꦤꦼꦏꦏ꧀ꦏꦏꦺꦧꦫꦁ​ꦱꦶꦁ​ꦢꦸꦫꦸꦁ​ꦲꦺꦤꦺꦁꦧꦶꦱ​ꦲꦺꦤꦺꦁ꧉​ ¹⁸ꦗꦭꦂꦫꦤ꧀ꦱꦁꦏꦥꦼꦔꦤ꧀ꦢꦼꦭ꧀ꦏꦸꦮꦶ​ꦥꦫ​ꦱꦼꦢꦸꦭꦸꦂ​꧈​ꦧꦥ​ꦄꦨꦿꦲꦩ꧀ꦠꦼꦠꦼꦥ꧀ꦥꦽꦕꦪ​ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦢꦢꦶ​ꦧꦥꦏ꧀ꦏꦺꦧꦁꦱ​ꦥꦶꦫꦁꦥꦶꦫꦁ​꧉​ꦩꦸꦭꦤꦺ​ꦢꦺꦏ꧀ꦤꦺꦪ​ꦱꦧꦂ​ꦠꦼꦫꦸꦱ꧀ꦔꦉꦥ꧀ꦲꦉꦥ꧀ꦏꦼꦠꦸꦫꦸꦠꦤ꧀ꦤꦺꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦢꦺꦏ꧀ꦤꦺ꧈​ꦱꦼꦤꦗꦤ꧀ꦱꦏ꧀ꦕꦫ​ꦩꦤꦸꦁꦱ​ꦧꦥ​ꦄꦨꦿꦲꦩ꧀ꦮꦶꦱ꧀ꦲꦺꦴꦫ​ꦧꦶꦱ​ꦲꦺꦤ꧀ꦠꦸꦏ꧀ꦠꦸꦫꦸꦤ꧀ꦤꦤ꧀꧈​ꦤꦁꦔꦶꦁ​ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦺꦴꦩꦺꦴꦁ:“ꦲꦤꦏ꧀ꦠꦸꦫꦸꦤꦤ꧀ꦩꦸꦧꦏꦭ꧀ꦲꦺꦴꦏꦺꦃꦧꦔꦼꦠ꧀꧈​”

¹⁹꧋ꦩꦸꦭꦤꦺ​꧈​ꦱꦼꦤꦗꦤ꧀ꦧꦥ​ꦄꦨꦿꦲꦩ꧀ꦲꦸꦩꦸꦂꦫꦺ​ꦮꦶꦱ꧀ꦩꦺꦃ​ꦱꦠꦸꦱ꧀ꦠꦲꦸꦤ꧀ ꦪ​ꦗꦤ꧀ꦮꦶꦱ꧀ꦠꦸꦮ​ꦠꦼꦤꦤ꧀ ꦏꦫꦺꦴꦩꦼꦤꦺꦃ​ꦢꦺꦏ꧀ꦤꦺꦔꦼꦂꦠꦶ​ꦤꦺꦏ꧀ꦧꦺꦴꦗꦺꦴꦤꦺ​꧈​ꦲꦶꦧꦸ​ꦱꦫꦃ​꧈​ꦮꦶꦱ꧀ꦠꦸꦮ​ꦭꦤ꧀ꦮꦶꦱ꧀ꦲꦺꦴꦫ​ꦧꦶꦱ​ꦤ꧀ꦢꦸꦮꦺꦲꦤꦏ꧀ꦩꦼꦤꦺꦃ​꧈​ꦩꦼꦏ꧀ꦱ​ꦢꦺꦏ꧀ꦤꦺꦲꦺꦴꦫ​ꦲꦶꦭꦁ​ꦥꦼꦔꦤ꧀ꦢꦼꦭ꧀ꦭꦺ​꧉​ ^20-21ꦧꦥ​ꦄꦨꦿꦲꦩ꧀ꦥꦽꦕꦪ​ꦠꦼꦫꦸꦱ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦸꦫꦸꦠ꧀ꦠꦶ​ꦗꦚ꧀ꦗꦶꦤꦺ​ꦩꦫꦁ​ꦢꦺꦏ꧀ꦤꦺ꧉​ꦥꦼꦔꦤ꧀ꦢꦼꦭ꧀ꦭꦺ​ꦲꦺꦴꦫ​ꦱꦸꦢ​ꦧ꧀ꦭꦱ꧀ ꦩꦭꦃ​ꦠꦩ꧀ꦧꦃ​ꦩꦤ꧀ꦠꦼꦥ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦥꦚ꧀ꦕꦺꦤ꧀ꦏꦒꦸꦁꦒꦸꦁꦱꦁꦏꦥꦼꦔꦤ꧀ꦢꦼꦭ꧀ꦭꦺ​ꦧꦥ​ꦄꦨꦿꦲꦩ꧀ ꦲꦮꦶꦠ꧀ꦢꦺꦏ꧀ꦤꦺꦥꦽꦕꦪ​ꦠꦼꦤꦤ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦸꦫꦸꦠ꧀ꦠꦶ​ꦗꦚ꧀ꦗꦶꦤꦺ​꧉​ ²²ꦩꦸꦭꦤꦺ​ꦧꦥ​ꦄꦨꦿꦲꦩ꧀ꦪ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ^23-25ꦤꦁꦔꦶꦁ​ꦠꦼꦩ꧀ꦧꦸꦁ​“ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​”ꦏꦸꦮꦶ​ꦲꦺꦴꦫ​ꦤꦩꦸꦁ​ꦏꦁꦒꦺꦴ​ꦧꦥ​ꦄꦨꦿꦲꦩ꧀ꦢꦺꦮꦺ꧈​ꦤꦁꦔꦶꦁ​ꦲꦸꦒ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​꧉​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦚ꧀ꦗꦒꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦔꦺꦏ꧀ꦏꦺꦪꦺꦯꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦱꦁꦏꦥꦠꦶ​꧉​ꦪ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦏꦶ​ꦱꦶꦁ​ꦢꦶꦥꦠꦺꦤ꧀ꦤꦶ​ꦏꦁꦒꦺꦴ​ꦤꦼꦧꦸꦱ꧀ꦱꦭꦃꦲꦺ​ꦲꦮꦏ꧀ꦏꦺ​ꦢꦺꦮꦺ꧉​ꦤꦁꦔꦶꦁ​ꦢꦺꦏ꧀ꦤꦺꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​꧈​ꦱꦸꦥꦪ​ꦧꦶꦱ​ꦔꦿꦸꦏꦸꦤ꧀ꦤꦏꦺꦲꦮꦏ꧀ꦏꦺ​ꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

↑ ↑ ↑

꧋ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧇​꧕꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦩꦔꦼꦂꦠꦺꦤ꧀ꦤꦶꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦗꦭꦂꦫꦤ꧀ꦱꦁꦏꦥꦽꦕꦪ​꧈​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦮꦶꦱ꧀ꦫꦸꦏꦸꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦶꦏꦶ​ꦧꦶꦱꦤꦺ​ꦏꦼꦠꦸꦫꦸꦠ꧀ꦠꦤ꧀ꦗꦭꦂꦫꦤ꧀ꦱꦁꦏꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ ²ꦭꦤ꧀ꦗꦭꦂꦫꦤ꧀ꦱꦁꦏꦥꦼꦔꦤ꧀ꦢꦼꦭ꧀ꦭꦺ​ꦲꦮꦏ꧀ꦏꦺ​ꦢꦺꦮꦺꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦮꦶꦱ꧀ꦩꦠꦶ​ꦤꦼꦧꦸꦱ꧀ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦔꦿꦱꦏ꧀ꦏꦏꦺ​ꦏꦧꦼꦕꦶꦏ꧀ꦏꦤ꧀ꦤꦺ​꧉​ꦪ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​ꦱꦶꦁ​ꦢꦢꦶ​ꦠꦸꦁꦒꦏ꧀ꦏꦺ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​ꦩꦸꦭꦤꦺ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦧꦸꦔꦃꦧꦸꦔꦃ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦔꦉꦥ꧀ꦲꦉꦥ꧀ꦤꦺꦏ꧀ꦧꦏꦭ꧀ꦲꦺꦤ꧀ꦠꦸꦏ꧀ꦥꦤ꧀ꦢꦸꦩ꧀ꦩꦤ꧀ ꦪꦏꦸꦮꦶ​꧈​ꦱꦼꦩ꧀ꦧꦫꦁ​ꦤꦁꦱ꧀ꦮꦂꦒ​ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ ³ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤꦩꦸꦁ​ꦧꦸꦔꦃꦧꦸꦔꦃ​ꦔꦉꦥ꧀ꦲꦉꦥ꧀ꦥꦤ꧀ꦢꦸꦩ꧀ꦩꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦤꦁꦔꦶꦁ​ꦲꦸꦒ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦭꦩ꧀ꦩꦶ​ꦏꦔꦺꦭ꧀ꦭꦤ꧀ꦲꦮꦏ꧀ꦏꦺ​ꦢꦺꦮꦺꦠꦼꦠꦼꦥ꧀ꦧꦸꦔꦃ​꧉​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦏꦔꦺꦭ꧀ꦭꦤ꧀ꦏꦸꦮꦶ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦏꦸꦮꦠ꧀ꦲꦶꦁ​ꦥꦼꦔꦤ꧀ꦢꦼꦭ꧀꧈​ ⁴ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦸꦮꦠ꧀ꦠꦼꦫꦸꦱ꧀ꦲꦶꦁ​ꦏꦔꦺꦭ꧀ꦭꦤ꧀ꦲꦥ​ꦮꦲꦺ​꧈​ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦩꦤ꧀ꦠꦼꦥ꧀ꦲꦶꦁ​ꦲꦠꦶꦤꦺ​ꦭꦤ꧀ꦏꦼꦤꦺꦁꦢꦶꦥꦽꦕꦪ​꧉​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦼꦤꦺꦁꦢꦶꦥꦽꦕꦪ​꧈​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦧꦶꦱ​ꦔꦉꦥ꧀ꦲꦉꦥ꧀ꦤꦩ꧀ꦥ​ꦥꦤ꧀ꦢꦸꦩ꧀ꦩꦤ꧀꧈​ ⁵ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦲꦸꦱꦃꦮꦼꦢꦶ​ꦤꦺꦏ꧀ꦥꦼꦔꦉꦥ꧀ꦲꦉꦥ꧀ꦏꦸꦮꦶ​ꦧꦏꦭ꧀​ꦤ꧀ꦢꦢꦺꦏ꧀ꦏꦏꦺꦒꦼꦭꦤꦺ​ꦲꦠꦶ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦼꦢꦸꦤ꧀ꦤꦏꦺꦏꦠꦿꦺꦱ꧀ꦤꦤꦺꦲꦶꦁ​ꦲꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦴꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦢꦸꦤ꧀ꦤꦏꦺꦫꦺꦴꦃ​ꦱꦸꦕꦶ​ꦲꦶꦁ​ꦲꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦲꦮꦏ꧀ꦏꦺ​ꦢꦺꦮꦺꦢꦸꦤꦸꦁꦱꦼꦥꦶꦫ​ꦒꦼꦢꦺꦤꦺꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​

⁶꧋ꦥꦫ​ꦱꦼꦢꦸꦭꦸꦂ​꧈​ꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦥꦚ꧀ꦕꦺꦤ꧀ꦏꦼꦠꦫ​ꦠꦼꦤꦤ꧀ ꦲꦮꦶꦠ꧀ꦱꦼꦤꦗꦤ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ ꦢꦶꦥꦠꦺꦤ꧀ꦤꦶ​ꦠꦤ꧀ꦥ​ꦢꦶꦏꦺꦏ꧀ꦏꦶꦮꦼꦭꦱ꧀ ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦒꦼꦢꦺꦱꦭꦃꦲꦺ​꧈​ꦏꦿꦶꦱ꧀ꦡꦸꦱ꧀ꦩꦼꦏ꧀ꦱ​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦲꦸꦱꦃꦤꦩ꧀ꦥ​ꦱꦼꦠꦿꦥꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ꦥꦠꦶꦤꦺ​ꦏꦿꦶꦱ꧀ꦡꦸꦱ꧀ꦥꦚ꧀ꦕꦺꦤ꧀ꦮꦶꦱ꧀ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀ꦢꦸꦫꦸꦁꦔꦺ꧈​ꦠꦸꦗꦸꦮꦤ꧀ꦤꦺꦏꦁꦒꦺꦴ​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦱꦼꦠꦿꦥꦤ꧀ꦤꦺ꧉​ ⁷ꦤꦺꦏ꧀ꦢꦶꦥꦶꦏꦶꦂ​ꦥꦫ​ꦱꦼꦢꦸꦭꦸꦂ​꧈​ꦩꦠꦶ​ꦔ꧀ꦭꦧꦸꦃꦲꦶ​ꦮꦺꦴꦁ​ꦧꦼꦤꦼꦂ​ꦮꦲꦺ​ꦮꦶꦱ꧀ꦲꦔꦺꦭ꧀ꦧꦔꦼꦠ꧀꧈​ꦩꦼꦤꦮ​ꦪ​ꦲꦺꦤꦺꦁꦮꦺꦴꦁ​ꦱꦶꦁ​ꦒꦼꦊꦩ꧀ꦩꦠꦶ​ꦔ꧀ꦭꦧꦸꦃꦲꦶ​ꦮꦺꦴꦁ​ꦧꦼꦕꦶꦏ꧀ ꦱꦶꦁ​ꦲꦺꦤꦺꦁꦥꦤ꧀ꦠꦼꦱ꧀ꦱꦺ​ꦢꦶꦭꦧꦸꦃꦲꦶ​꧉​ ⁸ꦩꦸꦭꦤꦺ​꧈​ꦥꦚ꧀ꦕꦺꦤ꧀ꦏꦺꦠꦺꦴꦏ꧀ꦠꦼꦤꦤ꧀ꦒꦼꦢꦺꦤꦺꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦲꦮꦶꦠ꧀ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦲꦶꦗꦶꦏ꧀​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧈​ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦠꦶ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧉​ ⁹ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦧꦶꦱ​ꦔꦼꦂꦠꦶ​ꦠꦼꦤꦤ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦒꦼꦊꦩ꧀ꦤꦩ꧀ꦥ​ꦲꦮꦏ꧀ꦏꦺ​ꦢꦺꦮꦺ꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦠꦶ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦒꦼꦠꦶꦃꦲꦺ​ꦠꦸꦩꦺꦠꦺꦱ꧀ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ꦭꦤ꧀ꦗꦭꦂꦫꦤ꧀ꦱꦁꦏꦏꦸꦮꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦫꦸꦏꦸꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦠꦼꦤꦤ꧀ꦤꦺꦏ꧀ꦮꦶꦱ꧀ꦢꦶꦭꦸꦮꦂꦫꦶ​ꦱꦁꦏꦤꦼꦱꦸꦤꦺꦭꦤ꧀ꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦧꦏꦭ꧀ꦤꦼꦏꦤꦶ​ꦏꦧꦺꦃ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ ¹⁰ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦗꦭꦂꦫꦤ꧀ꦢꦺꦏ꧀​ꦩ꧀ꦧꦶꦪꦺꦤ꧀ꦮꦲꦺ​ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦥꦺꦲꦶꦗꦶꦏ꧀​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦭꦤ꧀ꦢꦢꦶ​ꦩꦸꦁꦱꦸꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦒꦼꦊꦩ꧀ꦔꦺꦴꦁꦏꦺꦴꦤ꧀ꦲꦤꦏ꧀ꦏꦺ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦫꦸꦏꦸꦤ꧀ꦩꦼꦤꦺꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦃ​ꦱꦲꦶꦏꦶ​ꦩꦼꦤꦺꦃ​꧈​ꦱꦏ꧀ꦮꦶꦱ꧀ꦱꦺ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦶꦫꦸꦏꦸꦤ꧀ꦤꦏꦺ꧈​ꦩꦺꦴꦱꦺꦴꦏ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦧꦏꦭ꧀ꦱ꧀ꦭꦩꦼꦠ꧀ꦱꦏ꧀ꦠꦼꦫꦸꦱ꧀ꦱꦺ꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦫꦶꦥ꧀ꦏꦁꦒꦺꦴ​ꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺ꧉​ ¹¹ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤꦩꦸꦁ​ꦧꦸꦔꦃ​ꦗꦭꦂꦫꦤ꧀ꦱꦁꦏꦏꦸꦮꦶ​ꦮꦲꦺ​꧈​ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦧꦸꦔꦃ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦮꦶꦱ꧀ꦧꦶꦱ​ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦔꦿꦸꦏꦸꦤ꧀ꦤꦏꦺꦲꦮꦏ꧀ꦏꦺ​ꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦧꦥ​ꦄꦢꦩ꧀ꦭꦤ꧀ꦏꦿꦶꦱ꧀ꦡꦸꦱ꧀꧈​

¹²꧋ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦢꦸꦤꦸꦁꦧꦧ꧀ꦲꦶꦏꦶ​ꦥꦫ​ꦱꦼꦢꦸꦭꦸꦂ​:ꦗꦭꦂꦫꦤ꧀ꦮꦺꦴꦁ​ꦱꦶꦗꦶ​ꦔ꧀ꦒꦮꦺ​ꦢꦺꦴꦱ​꧈​ꦪꦏꦸꦮꦶ​ꦧꦥ​ꦄꦢꦩ꧀ ꦢꦺꦴꦱ​ꦠꦼꦫꦸꦱ꧀​ꦩ꧀ꦊꦧꦸ​ꦲꦶꦁ​ꦢꦺꦴꦚ​ꦭꦤ꧀ꦗꦭꦂꦫꦤ꧀ꦢꦺꦴꦱꦤꦺ​ꦮꦺꦴꦁ​ꦱꦶꦗꦶ​ꦩꦲꦸ​꧈​ꦥꦠꦶ​ꦲꦸꦒ​ꦤꦼꦏꦤꦶ​ꦩꦤꦸꦁꦱ​꧉​ꦠꦼꦒꦼꦱ꧀ꦱꦺ​꧈​ꦮꦶꦱ꧀ꦢꦢꦶ​ꦥꦼꦱ꧀ꦠꦶꦤꦺꦏꦧꦺꦃ​ꦩꦤꦸꦁꦱ​ꦩꦠꦶ​꧈​ꦗꦭꦂꦫꦤ꧀ꦏꦧꦺꦃ​ꦮꦶꦱ꧀ꦏꦼꦊꦧꦺꦴꦤ꧀ꦢꦺꦴꦱ​꧉​ ¹³ꦥꦚ꧀ꦕꦺꦤ꧀ ꦢꦺꦴꦱ​ꦮꦶꦱ꧀​ꦔ꧀ꦊꦧꦺꦴꦤ꧀ꦤꦶꦩꦤꦸꦁꦱ​ꦱꦏ꧀ꦢꦸꦫꦸꦁꦔꦺꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦠꦼꦏ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦧꦶꦱ​ꦚꦼꦠꦿꦥ꧀ꦩꦤꦸꦁꦱ​꧈​ꦲꦮꦶꦠ꧀ꦢꦸꦫꦸꦁ​ꦥꦢ​ꦤ꧀ꦢꦸꦮꦺꦤ꧀ꦤꦶ​ꦮꦺꦠ꧀ꦮꦺꦠ꧀ꦏꦸꦮꦶ​꧈​ꦢꦢꦶꦤꦺ​ꦲꦺꦴꦫ​ꦏꦼꦤꦺꦁꦢꦶꦱꦭꦃꦲꦏꦺ꧉​ ¹⁴ꦤꦁꦔꦶꦁ​ꦱꦼꦤꦗꦤ꧀ꦲꦶꦁ​ꦗꦩꦤ꧀ꦤꦺ​ꦧꦥ​ꦄꦢꦩ꧀ꦠꦼꦏꦤꦺ​ꦗꦩꦤ꧀ꦤꦺ​ꦤꦧꦶ​ꦩꦺꦴꦱꦼꦱ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦚꦼꦠꦿꦥ꧀ꦩꦤꦸꦁꦱ​ꦗꦭꦂꦫꦤ꧀ꦱꦁꦏꦢꦺꦴꦱꦤꦺ​꧈​ꦲꦮꦶꦠ꧀ꦢꦸꦫꦸꦁ​ꦲꦺꦤꦺꦁꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦩꦼꦏ꧀ꦱ​ꦏꦧꦺꦃ​ꦩꦤꦸꦁꦱ​ꦲꦶꦁ​ꦗꦩꦤ꧀ꦏꦸꦮꦶ​ꦥꦢ​ꦩꦠꦶ​꧉​ꦤꦺꦏ꧀ꦢꦶꦥꦶꦏꦶꦂ​ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦴꦫ​ꦔ꧀ꦒꦮꦺ​ꦢꦺꦴꦱ​ꦏꦪ​ꦧꦥ​ꦄꦢꦩ꧀ ꦲꦮꦶꦠ꧀ꦧꦥ​ꦄꦢꦩ꧀ꦗꦤ꧀ꦢꦶꦥꦼꦔꦶꦁ​ꦠꦼꦤꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦢꦢꦶꦤꦺ​ꦢꦺꦏ꧀ꦤꦺꦢꦢꦶ​ꦮꦏꦶꦭ꧀ꦭꦺ​ꦏꦧꦺꦃ​ꦩꦤꦸꦁꦱ​ꦭꦤ꧀ꦩꦼꦁꦏꦺꦴꦤꦺꦴ​ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦮꦏꦶꦭ꧀ꦭꦺ​ꦩꦤꦸꦁꦱ​ꦭꦶꦪꦤꦺ​ꦱꦶꦁ​ꦧꦏꦭ꧀ꦠꦼꦏ​꧈​ꦪꦏꦸꦮꦶ​ꦏꦿꦶꦱ꧀ꦡꦸꦱ꧀꧈​ ¹⁵ꦤꦺꦏ꧀ꦔꦺꦴꦤꦺꦴ​꧈​ꦲꦥ​ꦧꦥ​ꦄꦢꦩ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦠꦸꦁꦒꦭ꧀ꦭꦺ​꧈​ꦲꦺꦴꦫ​ꦲꦺꦤꦺꦁꦧꦺꦢꦤꦺ​?ꦒꦼꦢꦺꦧꦔꦼꦠ꧀ꦧꦺꦢꦤꦺ​?ꦲꦮꦶꦠ꧀ꦗꦭꦂꦫꦤ꧀ꦱꦁꦏꦱꦭꦃꦲꦺ​ꦧꦥ​ꦄꦢꦩ꧀ꦏꦧꦺꦃ​ꦩꦤꦸꦁꦱ​ꦚꦶꦩ꧀ꦥꦁ​ꦱꦁꦏꦢꦭꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦗꦭꦂꦫꦤ꧀ꦱꦁꦏꦥꦼꦭꦧꦸꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦏꦧꦺꦃ​ꦩꦤꦸꦁꦱ​ꦭꦤ꧀ꦤꦸꦭꦸꦁꦔꦶ​ꦩꦤꦸꦁꦱ​꧈​ꦱꦸꦥꦪ​ꦧꦶꦱ​ꦧꦭꦶꦏ꧀ꦤꦁꦢꦭꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦤꦺꦃ​꧉​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦗꦭꦂꦫꦤ꧀ꦱꦭꦃꦲꦺ​ꦮꦺꦴꦁ​ꦱꦶꦗꦶ​ꦏꦧꦺꦃ​ꦮꦺꦴꦁ​ꦩꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦢꦸꦤꦸꦁ꧈​ꦱꦼꦥꦶꦫ​ꦒꦼꦢꦺꦤꦺꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦧꦺꦃ​ꦩꦤꦸꦁꦱ​꧉​ꦲꦮꦶꦠ꧀ꦗꦭꦂꦫꦤ꧀ꦱꦁꦏꦒꦼꦢꦺꦤꦺꦏꦧꦼꦕꦶꦏ꧀ꦏꦤ꧀ꦤꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦁꦏꦺꦴꦤ꧀ꦮꦺꦴꦁ​ꦱꦶꦗꦶ​ꦠꦼꦏ​ꦤꦁꦗꦒꦠ꧀ ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦸꦥꦪ​ꦧꦶꦱ​ꦤꦸꦭꦸꦁꦔꦶ​ꦏꦧꦺꦃ​ꦩꦤꦸꦁꦱ​꧉​ ¹⁶ꦥꦚ꧀ꦕꦺꦤ꧀ꦒꦼꦢꦺꦧꦔꦼꦠ꧀ꦧꦺꦢꦤꦺ​ꦥꦮꦺꦃꦱꦶꦁ​ꦩꦼꦠꦸ​ꦱꦁꦏꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦩꦤꦸꦁꦱ​꧈​ꦤꦺꦏ꧀ꦢꦶꦥꦢꦏ꧀ꦏꦏꦺꦏꦫꦺꦴ​ꦲꦺꦤ꧀ꦠꦸꦏ꧀ꦲꦺꦤ꧀ꦠꦸꦏ꧀ꦏꦺꦩꦤꦸꦁꦱ​꧈​ꦗꦭꦂꦫꦤ꧀ꦱꦁꦏꦱꦭꦃꦲꦺ​ꦮꦺꦴꦁ​ꦱꦶꦗꦶ​ꦩꦲꦸ​꧉​ꦏꦸꦮꦶ​ꦔꦺꦤꦺ​ꦥꦫ​ꦱꦼꦢꦸꦭꦸꦂ​!ꦗꦭꦂꦫꦤ꧀ꦱꦁꦏꦱꦭꦃꦲꦺ​ꦮꦺꦴꦁ​ꦱꦶꦗꦶ​꧈​ꦏꦧꦺꦃ​ꦮꦺꦴꦁ​ꦏꦠꦸꦠ꧀ꦱꦭꦃ​ꦭꦤ꧀ꦏꦧꦺꦃ​ꦲꦸꦒ​ꦏꦸꦢꦸ​ ꦢꦶꦱꦼꦠꦿꦥ꧀꧈​ꦤꦁꦔꦶꦁ​ꦗꦭꦂꦫꦤ꧀ꦱꦁꦏꦱꦭꦃꦲꦺ​ꦮꦺꦴꦁ​ꦲꦺꦴꦏꦺꦃ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦭꦃ​ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦲꦩ꧀ꦧꦸꦮꦁ​ꦱꦭꦃꦲꦺ​ꦏꦧꦺꦃ​ꦩꦤꦸꦁꦱ​꧉​ ¹⁷ꦗꦭꦂꦫꦤ꧀ꦱꦁꦏꦱꦭꦃꦲꦺ​ꦮꦺꦴꦁ​ꦱꦶꦗꦶ​ꦩꦤꦸꦁꦱ​ꦏꦧꦺꦃ​ꦏꦸꦢꦸ​ꦩꦠꦶ​꧉​ꦤꦁꦔꦶꦁ​ꦭꦸꦮꦶꦃ​ꦒꦼꦢꦺꦥꦔ꧀ꦮꦱꦤꦺ​ꦮꦺꦴꦁ​ꦱꦶꦗꦶ​ꦱꦶꦁ​ꦭꦶꦪꦤꦺ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦲꦮꦶꦠ꧀ꦗꦭꦂꦫꦤ꧀ꦱꦁꦏꦒꦼꦢꦺꦤꦺꦏꦧꦼꦕꦶꦏ꧀ꦏꦤ꧀ꦤꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦥꦶꦠꦸꦭꦸꦁꦔꦤ꧀ꦒꦼꦢꦺꦩꦫꦁ​ꦩꦤꦸꦁꦱ​ꦭꦤ꧀ꦩꦤꦸꦁꦱ​ꦧꦶꦱ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦺꦏ꧀ꦒꦼꦊꦩ꧀ꦤꦩ꧀ꦥ​ꦥꦶꦠꦸꦭꦸꦁꦔꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦱꦥ​ꦱꦶꦁ​ꦒꦼꦊꦩ꧀ꦤꦩ꧀ꦥ​ꦢꦺꦏ꧀ꦤꦺꦧꦏꦭ꧀ꦲꦸꦫꦶꦥ꧀ꦢꦢꦶ​ꦱꦶꦗꦶ​ꦭꦤ꧀ꦩꦺꦭꦸ​ꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱ​ꦏꦫꦺꦴ​ꦢꦺꦏ꧀ꦤꦺ꧉​

¹⁸꧋ꦢꦢꦶꦤꦺ​ꦕꦼꦏꦏ꧀ꦏꦺ​ꦉꦩ꧀ꦧꦸꦏ꧀ꦔꦺꦤꦺ​ꦥꦫ​ꦱꦼꦢꦸꦭꦸꦂ​:ꦗꦭꦂꦫꦤ꧀ꦱꦁꦏꦱꦭꦃꦲꦺ​ꦮꦺꦴꦁ​ꦱꦶꦗꦶ​ꦏꦧꦺꦃ​ꦮꦺꦴꦁ​ꦢꦶꦲꦁꦒꦼꦥ꧀ꦱꦭꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦼꦩꦺꦴꦤꦺꦴ​ꦲꦸꦒ​ꦠꦸꦩꦶꦤ꧀ꦢꦏ꧀ꦏꦺ​ꦧꦼꦕꦶꦏ꧀ꦮꦺꦴꦁ​ꦱꦶꦗꦶ​ꦔꦶꦭꦁꦔꦏꦺꦱꦭꦃꦲꦺ​ꦏꦧꦺꦃ​ꦮꦺꦴꦁ​꧈​ꦱꦸꦥꦪ​ꦧꦶꦱ​ꦲꦸꦫꦶꦥ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁹ꦲꦸꦒ​꧈​ꦗꦭꦂꦫꦤ꧀ꦮꦺꦴꦁ​ꦱꦶꦗꦶ​ꦲꦺꦴꦫ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦧꦺꦃ​ꦮꦺꦴꦁ​ꦢꦶꦲꦁꦒꦼꦥ꧀ꦱꦭꦃ​꧈​ꦩꦸꦭꦤꦺ​꧈​ꦗꦭꦂꦫꦤ꧀ꦮꦺꦴꦁ​ꦱꦶꦗꦶ​ꦩꦤꦸꦠ꧀ ꦏꦧꦺꦃ​ꦮꦺꦴꦁ​ꦧꦶꦱ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

²⁰꧋ꦥꦫ​ꦱꦼꦢꦸꦭꦸꦂ​꧈​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦏꦸꦮꦶ​ꦠꦼꦏꦤꦺ​ꦤꦩꦸꦁ​ꦏꦁꦒꦺꦴ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦠꦸꦩꦶꦤ꧀ꦢꦏ꧀ꦏꦺ​ꦩꦤꦸꦁꦱ​ꦏꦸꦮꦶ​ꦤꦩꦸꦁ​ꦱꦭꦃ​ꦠꦼꦫꦸꦱ꧀ꦭꦤ꧀ꦢꦺꦴꦱꦤꦺ​ꦤꦸꦩ꧀ꦥꦸꦏ꧀ꦤꦸꦩ꧀ꦥꦸꦏ꧀꧈​ꦢꦢꦶꦤꦺ​ꦧꦶꦱ​ꦏꦺꦠꦺꦴꦏ꧀ꦲꦸꦒ​ꦒꦼꦢꦺꦤꦺꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦩꦸꦤ꧀ꦢꦏ꧀ꦠꦼꦫꦸꦱ꧀꧈​ ²¹ꦭꦤ꧀ꦏꦪ​ꦲꦼꦁꦒꦺꦴꦤꦺ​ꦢꦺꦴꦱ​ꦒꦼꦢꦺꦏ꧀ꦮꦱꦤꦺ​ꦭꦤ꧀ꦤꦼꦏꦏ꧀ꦏꦏꦺꦥꦠꦶ​꧈​ꦱꦼꦩꦺꦴꦤꦺꦴ​ꦲꦸꦒ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦒꦼꦢꦺꦏ꧀ꦮꦱꦤꦺ​꧈​ꦧꦶꦱ​ꦩꦫꦏ꧀ꦏꦏꦺꦩꦤꦸꦁꦱ​ꦧꦶꦱ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦤ꧀ꦢꦸꦮꦺꦤ꧀ꦤꦶ​ꦲꦸꦫꦶꦥ꧀ꦭꦁꦒꦼꦁ​꧈​ꦗꦭꦂꦫꦤ꧀ꦥꦼꦭꦧꦸꦃꦲꦤ꧀ꦤꦺ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​

↑ ↑ ↑

꧋ꦩꦠꦶ​ꦭꦤ꧀ꦲꦸꦫꦶꦥ꧀ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​

꧇​꧖꧇​ ¹꧋ꦭꦃ​ꦏꦸꦮꦶ​ꦏꦧꦺꦃ​ꦲꦥ​ꦠꦼꦒꦼꦱ꧀ꦱꦺ​ꦥꦫ​ꦱꦼꦢꦸꦭꦸꦂ​?ꦲꦥ​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦏꦸꦢꦸ​ꦤꦩ꧀ꦧꦃꦲꦶ​ꦢꦺꦴꦱꦤꦺ​꧈​ꦱꦸꦥꦪ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦩꦸꦤ꧀ꦢꦏ꧀? ²ꦧ꧀ꦭꦱ꧀ꦲꦗ​ꦤ꧀ꦢꦸꦮꦺꦤ꧀ꦤꦶ​ꦒꦒꦱ꧀ꦱꦤ꧀ꦏꦪ​ꦔꦺꦴꦤꦺꦴ​꧈​ꦥꦫ​ꦱꦼꦢꦸꦭꦸꦂ​!ꦲꦮꦶꦠ꧀ꦏꦁꦒꦺꦴ​ꦢꦺꦴꦱ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦶꦱ꧀ꦩꦠꦶ​꧈​ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦏꦼꦤꦺꦁꦲꦸꦫꦶꦥ꧀​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦩꦼꦤꦺꦃ​꧉​ ³ꦲꦥ​ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦤꦺꦏ꧀ꦱꦏ꧀ꦧꦉꦁꦔꦺꦲꦮꦏ꧀ꦏꦺ​ꦢꦺꦮꦺꦢꦶꦧꦥ꧀ꦠꦶꦱ꧀ ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ꦢꦢꦶꦤꦺ​ꦢꦺꦴꦁꦔꦺꦢꦺꦏ꧀ꦤꦺ​ꦩꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦪ​ꦏꦠꦸꦠ꧀ꦩꦠꦶ​ꦏꦫꦺꦴ​ꦢꦺꦏ꧀ꦤꦺ​꧉​ꦥꦼꦩ꧀ꦧꦥ꧀ꦠꦶꦱ꧀ꦱꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦏꦠꦸꦠ꧀ꦩꦠꦶ​ꦭꦤ꧀ꦏꦏꦸꦧꦸꦂ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ ⁴ꦢꦢꦶꦤꦺ​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦤꦔꦺꦏ꧀ꦏꦺꦏꦿꦶꦱ꧀ꦡꦸꦱ꧀ꦱꦁꦏꦥꦠꦶ​ꦔꦁꦒꦺꦴ​ꦥꦔ꧀ꦮꦱꦤꦺ​ꦱꦶꦁ​ꦒꦼꦢꦺ꧈​ꦱꦸꦥꦪ​ꦧꦶꦱ​ꦲꦸꦫꦶꦥ꧀ꦩꦼꦤꦺꦃ​꧈​ꦩꦼꦁꦏꦺꦴꦤꦺꦴ​ꦲꦸꦒ​ꦲꦮꦏ꧀ꦏꦺ​ꦢꦺꦮꦺꦥꦢ​ꦤꦩ꧀ꦥ​ꦲꦸꦫꦶꦥ꧀ꦲꦚꦂ​꧈​ꦲꦸꦫꦶꦥ꧀ꦱꦶꦁ​ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀ꦏꦧꦺꦃꦲꦺ꧉​

⁵꧋ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦏꦠꦸꦠ꧀ꦩꦠꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦠꦸꦠ꧀ꦏꦫꦺꦴ​ꦏꦿꦶꦱ꧀ꦡꦸꦱ꧀ꦠꦔꦶ​ꦩꦼꦤꦺꦃ​ꦲꦶꦁ​ꦲꦸꦫꦶꦥ꧀ꦱꦶꦁ​ꦲꦚꦂ​꧉​ ⁶ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦱꦶꦁ​ꦭꦮꦱ꧀ꦮꦶꦱ꧀ꦏꦠꦸꦠ꧀ꦩꦠꦶ​ꦏꦥꦼꦤ꧀ꦠꦺꦁꦏꦫꦺꦴ​ꦏꦿꦶꦱ꧀ꦡꦸꦱ꧀ ꦱꦸꦥꦪ​ꦥꦔ꧀ꦮꦱꦤꦺ​ꦢꦺꦴꦱ​ꦱꦶꦁ​ꦲꦤ​ꦲꦶꦁ​ꦲꦮꦏ꧀ꦏꦺ​ꦢꦺꦮꦺꦏꦫꦸꦱꦏ꧀ꦭꦤ꧀ꦲꦺꦴꦫ​ꦧꦶꦱ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦔ꧀ꦒꦮꦺ​ꦢꦺꦴꦱ​ꦩꦼꦤꦺꦃ​꧉​ ⁷ꦲꦮꦶꦠ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦩꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦪ​ꦮꦶꦱ꧀ꦲꦸꦕꦸꦭ꧀ꦱꦁꦏꦥꦔ꧀ꦮꦱꦤꦺ​ꦢꦺꦴꦱ​꧉​ ⁸ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦏꦠꦸꦠ꧀ꦩꦠꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦥꦽꦕꦪ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦲꦸꦫꦶꦥ꧀ꦧꦉꦁ​ꦏꦫꦺꦴ​ꦢꦺꦏ꧀ꦤꦺ꧉​ ⁹ꦭꦤ꧀ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦲꦸꦫꦶꦥ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦱꦏ꧀ꦠꦼꦫꦸꦱ꧀ꦱꦺ꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦠꦔꦶ​ꦱꦁꦏꦥꦠꦶ​ꦭꦤ꧀ꦢꦺꦏ꧀ꦤꦺꦲꦺꦴꦫ​ꦧꦏꦭ꧀ꦩꦠꦶ​ꦩꦼꦤꦺꦃ​꧉​ꦥꦠꦶ​ꦮꦶꦱ꧀ꦲꦺꦴꦫ​ꦧꦏꦭ꧀ꦧꦶꦱ​ꦔ꧀ꦮꦱꦤꦶ​ꦢꦺꦏ꧀ꦤꦺꦩꦼꦤꦺꦃ​꧉​ ¹⁰ꦏꦿꦶꦱ꧀ꦡꦸꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦏꦸꦮꦶ​ꦥꦠꦶ​ꦏꦁꦒꦺꦴ​ꦢꦺꦴꦱ​꧈​ꦠꦼꦒꦼꦱ꧀ꦱꦺ​ꦩꦼꦢꦺꦴꦠ꧀ꦥꦔ꧀ꦮꦱꦤꦺ​ꦢꦺꦴꦱ​꧉​ꦭꦤ꧀ꦏꦸꦮꦶ​ꦤꦩꦸꦁ​ꦏ꧀ꦭꦏꦺꦴꦤ꧀ꦱꦼꦥꦶꦱ꧀ꦱꦤ꧀ꦏꦁꦒꦺꦴ​ꦱ꧀ꦭꦮꦱ꧀ꦱꦺ꧉​ꦭꦃ​ꦱꦲꦶꦏꦶ​ꦏꦿꦶꦱ꧀ꦡꦸꦱ꧀ꦲꦸꦫꦶꦥ꧀ ꦲꦸꦫꦶꦥ꧀ꦥꦺꦤꦩꦸꦁ​ꦏꦁꦒꦺꦴ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹¹ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦲꦸꦒ​ꦏꦸꦢꦸ​ꦥꦢ​ꦔꦁꦒꦼꦥ꧀ꦲꦮꦏ꧀ꦩꦸ​ꦮꦶꦱ꧀ꦩꦠꦶ​ꦏꦁꦒꦺꦴ​ꦢꦺꦴꦱ​꧈​ꦱꦸꦥꦪ​ꦧꦶꦱ​ꦲꦸꦫꦶꦥ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹²꧋ꦲꦗ​ꦱꦩ꧀ꦥꦺꦏ꧀ꦢꦺꦴꦱ​ꦔ꧀ꦮꦱꦤꦶ​ꦲꦮꦏ꧀ꦩꦸ​ꦩꦼꦤꦺꦃ​ꦭꦤ꧀ꦲꦗ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦲꦭ​꧉​ ¹³ꦲꦮꦏ꧀ꦩꦸ​ꦲꦗ​ꦱꦩ꧀ꦥꦺꦏ꧀ꦢꦶꦏꦁꦒꦺꦴꦏ꧀ꦏꦏꦺꦏꦫꦺꦴ​ꦥꦔ꧀ꦮꦱꦤꦺ​ꦢꦺꦴꦱ​ꦏꦁꦒꦺꦴ​ꦔ꧀ꦭꦏꦺꦴꦤ꧀ꦤꦶ​ꦱꦏ꧀ꦮꦼꦂꦤꦤꦺ​ꦲꦭ​꧉​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦮꦲꦺ​ꦲꦺꦴꦫ​꧉​ꦤꦁꦔꦶꦁ​ꦲꦮꦏ꧀ꦩꦸ​ꦏꦸꦢꦸ​ꦢꦶꦥꦱꦿꦃꦲꦏꦺ ꦏꦁꦒꦺꦴ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦏꦺꦴꦮꦺ​ꦩꦲꦸꦤꦺ​ꦩꦠꦶ​꧈​ꦤꦁꦔꦶꦁ​ꦱꦲꦶꦏꦶ​ꦮꦶꦱ꧀ꦢꦶꦲꦸꦫꦶꦥ꧀ꦥꦏꦺꦩꦼꦤꦺꦃ​꧉​ꦲꦮꦏ꧀ꦩꦸ​ꦱꦏ꧀ꦏꦸꦗꦸꦂꦱꦲꦶꦏꦶ​ꦢꦶꦥꦱꦿꦃꦲꦏꦺꦏꦁꦒꦺꦴ​ꦤꦶꦤ꧀ꦢꦏ꧀ꦏꦏꦺꦥꦽꦏꦫꦥꦽꦏꦫ​ꦱꦶꦁ​ꦧꦼꦕꦶꦏ꧀꧈​

¹⁴꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦗꦭꦂꦫꦤ꧀ꦢꦺꦴꦱ​ꦲꦺꦴꦫ​ꦏꦼꦤꦺꦁꦔ꧀ꦮꦱꦤꦶ​ꦲꦸꦫꦶꦥ꧀ꦩꦸ​ꦩꦼꦤꦺꦃ​꧉​ꦲꦸꦫꦶꦥ꧀ꦩꦸ​ꦱꦲꦶꦏꦶ​ꦲꦺꦴꦫ​ꦒꦸꦩꦤ꧀ꦠꦸꦁ​ꦲꦶꦁ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦩꦼꦤꦺꦃ​꧈​ꦲꦺꦴꦫ​꧈​ꦤꦁꦔꦶꦁ​ꦒꦸꦩꦤ꧀ꦠꦸꦁ​ꦲꦶꦁ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦲꦸꦫꦶꦥ꧀ꦏꦁꦒꦺꦴ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹⁵꧋ꦲꦥ​ꦠꦼꦒꦼꦱ꧀ꦱꦺ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦲꦺꦴꦫ​ꦒꦸꦩꦤ꧀ꦠꦸꦁ​ꦲꦶꦁ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦤꦁꦔꦶꦁ​ꦲꦶꦁ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​?ꦲꦥ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦢꦶꦭꦶꦭꦤꦶ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​? ¹⁶ꦲꦺꦴꦫ​ꦥꦫ​ꦱꦼꦢꦸꦭꦸꦂ​꧈​ꦧ꧀ꦭꦱ꧀ꦲꦺꦴꦫ​!ꦏꦺꦴꦮꦺ​ꦔꦼꦂꦠꦶ​ꦢꦺꦮꦺ꧈​ꦤꦺꦏ꧀ꦏꦺꦴꦮꦺ​ꦩꦱꦿꦃꦲꦏꦺꦲꦸꦫꦶꦥ꧀ꦩꦸ​ꦢꦢꦶ​ꦥꦼꦭꦢꦺꦤ꧀ꦤꦺ​ꦱꦏ꧀ꦮꦶꦗꦶꦤꦺꦮꦺꦴꦁ​꧈​ꦏꦺꦴꦮꦺ​ꦪ​ꦏꦸꦢꦸ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦮꦺꦴꦁ​ꦏꦸꦮꦶ​꧉​ꦱꦼꦩꦺꦴꦤꦺꦴ​ꦲꦸꦒ​ꦏꦺꦴꦮꦺ​ꦧꦶꦱ​ꦢꦢꦶ​ꦥꦼꦭꦢꦺꦤ꧀ꦤꦺ​ꦢꦺꦴꦱ​ꦭꦤ꧀ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦢꦺꦴꦱ​꧉​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦏꦺꦴꦮꦺ​ꦧꦏꦭ꧀ꦢꦶꦧꦸꦮꦁ​ꦤꦁꦤꦼꦫꦏ꧈​ꦥꦶꦱꦃ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦱꦺ꧉​ꦤꦺꦏ꧀ꦏꦺꦴꦮꦺ​ꦩꦱꦿꦃꦲꦏꦺꦲꦸꦫꦶꦥ꧀ꦩꦸ​ꦏꦁꦒꦺꦴ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦺꦏ꧀ꦤꦺꦧꦏꦭ꧀ꦔꦿꦺꦮꦁꦔꦶ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦤꦶꦤ꧀ꦢꦏ꧀ꦏꦏꦺꦱꦼꦩ꧀ꦧꦫꦁ​ꦱꦶꦁ​ꦧꦼꦤꦼꦂ​꧉​ ¹⁷ꦤꦁꦔꦶꦁ​꧈​ꦩꦠꦸꦂꦏꦼꦱꦸꦮꦸꦤ꧀ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​!ꦲꦮꦶꦠ꧀ꦱꦼꦤꦗꦤ꧀ꦩꦲꦸꦤꦺ​ꦏꦺꦴꦮꦺ​ꦢꦢꦶ​ꦥꦼꦭꦢꦺꦤ꧀ꦤꦺ​ꦢꦺꦴꦱ​꧈​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦥꦢ​ꦤꦸꦫꦸꦠ꧀ꦱꦏ꧀ꦲꦠꦶꦩꦸ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦢꦶꦮꦸꦭꦁꦔꦏꦺꦩꦫꦁ​ꦏꦺꦴꦮꦺ​ꦏꦫꦺꦴ​ꦥꦫ​ꦫꦱꦸꦭ꧀꧈​ ¹⁸ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦥꦼꦢꦺꦴꦠ꧀ꦱꦁꦏꦥꦔ꧀ꦮꦱꦤꦺ​ꦢꦺꦴꦱ​꧈​ꦏꦺꦴꦮꦺ​ꦱꦲꦶꦏꦶ​ꦥꦢ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦤꦼꦂ​꧉​

¹⁹꧋ꦥꦫ​ꦱꦼꦢꦸꦭꦸꦂ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦢꦸꦤꦸꦁꦏꦸꦮꦶ​ꦩꦲꦸ​꧈​ꦠꦏ꧀ꦒꦩ꧀ꦧꦂꦫꦏꦺꦏꦫꦺꦴ​ꦱ꧀ꦭꦥ꦳꧀꧈​ꦲꦮꦶꦠ꧀ꦮꦸꦗꦸꦠ꧀ꦠꦺꦏꦺꦴꦮꦺ​ꦩ꧀ꦧꦶꦪꦺꦤ꧀ꦪ​ꦥꦢ​ꦩꦱꦿꦃꦲꦏꦺꦲꦸꦫꦶꦥ꧀ꦩꦸ​ꦏꦪ​ꦱ꧀ꦭꦥ꦳꧀ꦏꦁꦒꦺꦴ​ꦔ꧀ꦭꦏꦺꦴꦤ꧀ꦤꦶ​ꦱꦏ꧀ꦮꦼꦂꦤꦤꦺ​ꦥꦽꦏꦫ​ꦱꦶꦁ​ꦏꦺꦴꦠꦺꦴꦂ​ꦭꦤ꧀ꦱꦶꦁ​ꦲꦺꦴꦫ​ꦔ꧀ꦒꦼꦤꦃ​꧈​ꦱꦼꦭꦺꦴꦠ꧀ꦱꦸꦮꦶꦱꦼꦭꦺꦴꦠ꧀ꦏꦼꦧꦕꦸꦠ꧀꧈​ꦩꦸꦭꦤꦺ​ꦱꦲꦶꦏꦶ​ꦲꦸꦫꦶꦥ꧀ꦩꦸ​ꦏꦸꦢꦸ​ꦲꦩ꧀ꦧꦺꦴꦏ꧀ꦥꦱꦿꦃꦲꦏꦺ꧈​ꦏꦁꦒꦺꦴ​ꦤꦸꦫꦸꦠ꧀ꦠꦶ​ꦱꦼꦩ꧀ꦧꦫꦁ​ꦱꦶꦁ​ꦧꦼꦤꦼꦂ​꧈​ꦱꦸꦥꦪ​ꦲꦸꦫꦶꦥ꧀ꦩꦸ​ꦧꦶꦱ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

²⁰꧋ꦢꦺꦴꦁꦔꦺꦏꦺꦴꦮꦺ​ꦲꦶꦗꦶꦏ꧀ꦢꦢꦶ​ꦱ꧀ꦭꦥ꦳꧀ꦥ꦳ꦺꦢꦺꦴꦱ​꧈​ꦏꦺꦴꦮꦺ​ꦲꦺꦴꦫ​ꦩꦶꦏꦶꦂꦫꦏꦺꦧ꧀ꦭꦱ꧀ꦧꦧ꧀ꦤꦶꦤ꧀ꦢꦏ꧀ꦏꦏꦺꦥꦽꦏꦫ​ꦱꦶꦁ​ꦧꦼꦤꦼꦂ​꧉​ ²¹ꦭꦃ​ꦲꦥ​ꦲꦺꦤ꧀ꦠꦸꦏ꧀ꦲꦺꦤ꧀ꦠꦸꦏ꧀ꦏꦺꦲꦼꦁꦒꦺꦴꦤ꧀ꦩꦸ​ꦔ꧀ꦭꦏꦺꦴꦤ꧀ꦤꦶ​ꦥꦽꦏꦫꦥꦽꦏꦫ​ꦱꦶꦁ​ꦲꦭ​ꦏꦸꦮꦶ​?ꦩꦭꦃ​ꦏꦺꦴꦮꦺ​ꦢꦺꦮꦺꦲꦶꦱꦶꦤ꧀ꦱꦲꦶꦏꦶ​꧉​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦠꦶꦧ​ꦤꦁꦤꦼꦫꦏ꧉​ ²²ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦢꦶꦥꦼꦢꦺꦴꦠ꧀ꦱꦁꦏꦥꦔ꧀ꦮꦱꦤꦺ​ꦢꦺꦴꦱ​ꦭꦤ꧀ꦱꦲꦶꦏꦶ​ꦏꦺꦴꦮꦺ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦲꦸꦫꦶꦥ꧀ꦩꦸ​ꦱꦲꦶꦏꦶ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ​ꦩꦫꦁ​ꦏꦺꦴꦮꦺ​꧉​ ²³ꦕꦼꦏꦏ꧀ꦏꦺ​ꦉꦩ꧀ꦧꦸꦏ꧀ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦢꦺꦴꦱ​ꦔ꧀ꦮꦱꦤꦶ​ꦲꦸꦫꦶꦥ꧀ꦩꦸ​꧈​ꦲꦺꦤ꧀ꦠꦸꦏ꧀ꦲꦺꦤ꧀ꦠꦸꦏ꧀ꦏꦺꦥꦠꦶ​ꦱꦶꦁ​ꦭꦁꦒꦼꦁ​꧉​ꦤꦁꦔꦶꦁ​ꦩꦫꦁ​ꦮꦺꦴꦁ​ꦱꦶꦁ​ꦲꦸꦫꦶꦥ꧀ꦥꦺꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ​꧈​ꦏꦁꦒꦺꦴ​ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​꧉​

↑ ↑ ↑

꧋ꦢꦭꦤ꧀ꦱꦶꦁ​ꦭꦮꦱ꧀ꦢꦶꦠꦶꦁꦒꦭ꧀ ꦤꦸꦫꦸꦠ꧀ꦢꦭꦤ꧀ꦱꦶꦁ​ꦲꦚꦂ​꧉​

꧇​꧗꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦱꦲꦶꦏꦶ​ꦏꦼꦥꦺꦔꦶꦤ꧀ꦔꦼꦏꦺꦏ꧀ꦏꦶꦒꦩ꧀ꦧꦂ​ꦭꦶꦪꦤꦺ​ꦏꦁꦒꦺꦴ​ꦤ꧀ꦢꦸꦤꦸꦁꦔꦏꦺ꧈​ꦤꦺꦏ꧀ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦲꦺꦴꦫ​ꦒꦸꦩꦤ꧀ꦠꦸꦁ​ꦲꦶꦁ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦤꦁꦔꦶꦁ​ꦒꦸꦩꦤ꧀ꦠꦸꦁ​ꦲꦶꦁ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦺꦴꦮꦺ​ꦮꦺꦴꦁ​ꦱꦶꦁ​ꦥꦢ​ꦔꦼꦂꦠꦶ​ꦕꦫꦤꦺ​ꦮꦺꦠ꧀ ꦩꦸꦭꦤꦺ​ꦲꦉꦥ꧀ꦠꦏ꧀ꦢꦸꦤꦸꦁꦔꦏꦺꦔꦺꦤꦺ​:ꦮꦺꦠ꧀ꦏꦸꦮꦶ​ꦏꦁꦒꦺꦴꦤꦺ​ꦤꦩꦸꦁ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦗꦶꦏ꧀ꦲꦸꦫꦶꦥ꧀꧈​ ²ꦒꦩ꧀ꦥꦁꦔꦺ​ꦲꦺꦴꦩꦺꦴꦁ​ꦔꦺꦤꦺ​꧉​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦤ꧀ꦢꦸꦮꦺꦧꦺꦴꦗꦺꦴ​ꦏꦸꦮꦶ​ꦤ꧀ꦢꦸꦮꦺꦤ꧀ꦤꦶ​ꦏꦸꦮꦗꦶꦧ꧀ꦧꦤ꧀ꦩꦫꦁ​ꦧꦺꦴꦗꦺꦴꦤꦺ​꧈​ꦤꦺꦏ꧀ꦢꦺꦏ꧀ꦤꦺꦲꦶꦗꦶꦏ꧀ꦲꦸꦫꦶꦥ꧀꧈​ꦤꦺꦏ꧀ꦱꦶꦁ​ꦭꦤꦁ​ꦮꦶꦱ꧀ꦩꦠꦶ​꧈​ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦲꦺꦴꦫ​ꦤ꧀ꦢꦸꦮꦺꦏꦸꦮꦗꦶꦧ꧀ꦧꦤ꧀ꦲꦥꦲꦥ​ꦩꦫꦁ​ꦧꦺꦴꦗꦺꦴꦤꦺ​꧈​ꦠꦼꦒꦼꦱ꧀ꦱꦺ​꧈​ꦢꦺꦏ꧀ꦤꦺꦏꦼꦤꦺꦁꦔ꧀ꦒꦺꦴꦭꦺꦏ꧀ꦮꦺꦴꦁ​ꦭꦤꦁ​ꦭꦶꦪꦤꦺ​꧉​ ³ꦱꦼꦩꦸꦁꦒꦺꦴꦤ꧀ꦤꦺꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦩ꧀ꦭꦏꦸ​ꦏꦫꦺꦴ​ꦮꦺꦴꦁ​ꦭꦤꦁ​ꦭꦶꦪꦤꦺ​ꦢꦺꦴꦁꦔꦺꦧꦺꦴꦗꦺꦴꦤꦺ​ꦲꦶꦗꦶꦏ꧀ꦲꦸꦫꦶꦥ꧀ ꦪ​ꦧꦼꦤꦼꦂ​ꦤꦺꦏ꧀ꦢꦺꦏ꧀ꦤꦺꦢꦶꦱꦭꦃꦲꦏꦺꦮꦺꦴꦁ​ꦤꦺꦏ꧀ꦭꦏꦸ​ꦧꦺꦢꦁ꧉​ꦭꦃ​ꦤꦁꦔꦶꦁ​ꦤꦺꦏ꧀ꦱꦶꦁ​ꦭꦤꦁ​ꦮꦶꦱ꧀ꦩꦠꦶ​꧈​ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦮꦶꦱ꧀ꦲꦺꦴꦫ​ꦏꦼꦧꦤ꧀ꦢꦩꦼꦤꦺꦃ​ꦏꦫꦺꦴ​ꦱꦶꦁ​ꦭꦤꦁ​ꦭꦤ꧀ꦢꦺꦏ꧀ꦤꦺꦧꦶꦱ​ꦏꦮꦶꦤ꧀ꦏꦫꦺꦴ​ꦮꦺꦴꦁ​ꦭꦤꦁ​ꦭꦶꦪꦤꦺ​꧈​ꦏꦸꦮꦶ​ꦲꦺꦴꦫ​ꦭꦏꦸ​ꦧꦺꦢꦁ꧉​

⁴꧋ꦏꦁꦒꦺꦴ​ꦏꦺꦴꦮꦺ​ꦱꦏ꧀ꦗꦤꦺꦪ​ꦏꦪ​ꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​!ꦢꦺꦴꦁꦔꦺꦏꦿꦶꦱ꧀ꦡꦸꦱ꧀ꦩꦠꦶ​꧈​ꦏꦺꦴꦮꦺ​ꦪ​ꦏꦠꦸꦠ꧀ꦩꦠꦶ​ꦏꦫꦺꦴ​ꦢꦺꦏ꧀ꦤꦺ꧉​ꦢꦢꦶꦤꦺ​ꦏꦁꦒꦺꦴ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦏꦺꦴꦮꦺ​ꦪ​ꦮꦶꦱ꧀ꦩꦠꦶ​ꦭꦤ꧀ꦮꦶꦱ꧀ꦲꦺꦴꦫ​ꦏꦼꦧꦤ꧀ꦢꦩꦼꦤꦺꦃ​ꦩꦫꦁ​ꦮꦺꦠ꧀ꦮꦺꦠ꧀ꦏꦸꦮꦶ​꧉​ꦏꦺꦴꦮꦺ​ꦱꦲꦶꦏꦶ​ ꦏꦼꦧꦤ꧀ꦢꦩꦫꦁ​ꦮꦺꦴꦁ​ꦭꦶꦪꦤꦺ​꧈​ꦮꦺꦴꦁ​ꦱꦶꦁ​ꦮꦶꦱ꧀ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​꧉​ꦏꦺꦴꦮꦺ​ꦱꦲꦶꦏꦶ​ꦮꦶꦱ꧀ꦏꦼꦧꦤ꧀ꦢꦩꦫꦁ​ꦏꦿꦶꦱ꧀ꦡꦸꦱ꧀ ꦱꦸꦥꦪ​ꦲꦸꦫꦶꦥ꧀ꦩꦸ​ꦧꦶꦱ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁵ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦥꦺꦲꦶꦗꦶꦏ꧀ꦢꦶꦏ꧀ꦮꦱꦤꦶ​ꦏꦫꦺꦴ​ꦢꦺꦴꦱ​꧈​ꦲꦮꦏ꧀ꦏꦺ​ꦢꦺꦮꦺꦩꦭꦃ​ꦥꦢ​ꦱꦼꦤꦼꦁ​ꦤꦸꦫꦸꦠ꧀ꦠꦶ​ꦲꦭ​꧈​ꦲꦮꦶꦠ꧀ꦮꦺꦠ꧀ꦮꦺꦠ꧀ꦱꦶꦁ​ꦩꦼꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦲꦺꦤ꧀ꦠꦸꦏ꧀ꦔꦺꦤꦺ​ꦲꦥ​ꦲꦺꦴꦫ​ꦲꦺꦤ꧀ꦠꦸꦏ꧀ꦔꦺꦴꦤꦺꦴ​ꦮꦸꦗꦸꦠ꧀ꦠꦺꦩꦭꦃ​ꦤꦫꦶꦏ꧀ꦲꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦏꦺꦴꦁꦏꦺꦴꦤ꧀​ꦔ꧀ꦭꦏꦺꦴꦤ꧀ꦤꦶ​ꦥꦽꦏꦫꦥꦽꦏꦫ​ꦱꦶꦁ​ꦢꦶꦥꦼꦔꦶꦁ​꧉​ꦲꦺꦤ꧀ꦠꦸꦏ꧀ꦲꦺꦤ꧀ꦠꦸꦏ꧀ꦏꦺꦲꦥ​?ꦲꦮꦏ꧀ꦏꦺ​ꦢꦺꦮꦺꦩꦭꦃ​ꦤꦸꦫꦸꦠ꧀ꦠꦶ​ꦲꦭ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦢꦸ​ꦚꦼꦠꦿꦥ꧀ꦲꦮꦏ꧀ꦏꦺ​ꦢꦺꦮꦺꦤꦁꦤꦼꦫꦏ꧉​ ⁶ꦤꦁꦔꦶꦁ​ꦮꦸꦗꦸꦠ꧀ꦠꦺꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦢꦶꦥꦼꦢꦺꦴꦠ꧀ꦱꦁꦏꦫꦤ꧀ꦠꦺꦤꦺ​ꦮꦺꦠ꧀ꦮꦺꦠ꧀ꦱꦶꦁ​ꦲꦩ꧀ꦧꦤ꧀ꦢ​ꦏꦺꦴꦮꦺ​ꦏꦸꦮꦶ​꧉​ꦏꦁꦒꦺꦴ​ꦮꦺꦠ꧀ꦮꦺꦠ꧀ꦏꦸꦮꦶ​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦩꦠꦶ​꧉​ꦱꦲꦶꦏꦶ​ꦏꦺꦴꦮꦺ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦢꦭꦤ꧀ꦱꦶꦁ​ꦲꦚꦂ​꧈​ꦔꦁꦒꦺꦴ​ꦥꦶꦠꦸꦭꦸꦁꦔꦤ꧀ꦤꦺ​ꦫꦺꦴꦃ​ꦱꦸꦕꦶ​꧉​ꦢꦭꦤ꧀ꦱꦶꦁ​ꦭꦮꦱ꧀ ꦩꦶꦠꦸꦫꦸꦠ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦮꦶꦱ꧀ꦢꦶꦠꦶꦁꦒꦭ꧀꧈​

꧋ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦭꦤ꧀ꦢꦺꦴꦱ​꧉​

⁷꧋ꦤꦺꦏ꧀ꦮꦺꦠ꧀ꦮꦺꦠ꧀ꦏꦸꦮꦶ​ꦩꦫꦏ꧀ꦏꦏꦺꦢꦺꦴꦱ​꧈​ꦠꦶꦧꦏꦺ​ꦪ​ꦲꦺꦴꦫ​ꦲꦥꦶꦏ꧀?ꦲꦺꦴꦫ​ꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​꧈​ꦧ꧀ꦭꦱ꧀ꦲꦺꦴꦫ​꧉​ꦤꦁꦔꦶꦁ​ꦗꦭꦂꦫꦤ꧀ꦱꦁꦏꦮꦺꦠ꧀ꦮꦺꦠ꧀ꦏꦸꦮꦶ​ꦲꦏꦸ​ꦔꦼꦂꦠꦶ​ꦢꦺꦴꦱ​ꦏꦸꦮꦶ​ꦲꦥ​꧉​ꦱꦼꦩꦸꦁꦒꦺꦴꦤ꧀ꦤꦺꦤꦁꦮꦺꦠ꧀ꦲꦺꦴꦫ​ꦩꦼꦁꦔꦶꦁ​:“ꦲꦗ​ꦩꦶꦭꦶꦏ꧀ꦧꦫꦁꦔꦺ​ꦭꦶꦪꦤꦺ​꧈​”ꦲꦏꦸ​ꦩꦼꦱ꧀ꦠꦶꦪ​ꦲꦺꦴꦫ​ꦔꦼꦂꦠꦶ​ꦠꦼꦩ꧀ꦧꦸꦁ​ꦩꦶꦭꦶꦏ꧀ꦏꦸꦮꦶ​ꦠꦼꦒꦼꦱ꧀ꦱꦺ​ꦲꦥ​꧉​ ⁸ꦢꦢꦶꦤꦺ​ꦮꦺꦠ꧀ꦮꦺꦠ꧀ꦏꦸꦮꦶ​ꦩꦭꦃ​ꦩꦫꦏ꧀ꦏꦏꦺꦢꦺꦴꦱ​ꦔ꧀ꦒꦸꦒꦃ​ꦫꦱꦫꦱꦱꦶꦁ​ꦲꦭ​ꦲꦶꦁ​ꦲꦠꦶꦏꦸ​꧉​ ^9-10ꦏꦫꦺꦴꦩꦼꦤꦺꦃ​ꦥꦫ​ꦱꦼꦢꦸꦭꦸꦂ​꧈​ꦠꦤ꧀ꦥ​ꦮꦺꦠ꧀ꦮꦺꦠ꧀ꦢꦺꦴꦱ​ꦩꦼꦱ꧀ꦠꦶꦩꦠꦶ​꧈​ꦠꦼꦒꦼꦱ꧀ꦱꦺ​꧈​ꦱꦼꦩꦸꦁꦒꦺꦴꦤ꧀ꦤꦺꦮꦺꦠ꧀ꦮꦺꦠ꧀ꦏꦸꦮꦶ​ꦲꦺꦴꦫ​ꦲꦺꦤꦺꦁ꧈​ꦪ​ꦲꦺꦴꦫ​ꦲꦺꦤꦺꦁꦱꦶꦁ​ꦔ꧀ꦒꦸꦒꦃ​ꦫꦱꦫꦱꦱꦶꦁ​ꦲꦭ​꧉​ꦲꦏꦸ​ꦩ꧀ꦧꦶꦪꦺꦤ꧀ꦪ​ꦲꦸꦫꦶꦥ꧀ꦠꦤ꧀ꦥ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦲꦏꦸ​ꦪ​ꦲꦺꦴꦫ​ꦔꦼꦂꦠꦶ​ꦲꦥ​ꦱꦶꦁ​ꦢꦶꦥꦼꦔꦶꦁ​ꦭꦤ꧀ꦲꦥ​ꦱꦶꦁ​ꦲꦺꦴꦫ​꧉​ꦩꦶꦏꦶꦫꦺꦱꦼꦩ꧀ꦧꦫꦁ​ꦪ​ꦮꦶꦱ꧀ꦲꦥꦶꦏ꧀ꦮꦲꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦧꦏꦭ꧀ꦚꦼꦠꦿꦥ꧀ꦲꦏꦸ​꧉​ꦤꦁꦔꦶꦁ​ꦱꦏ꧀ꦮꦶꦱ꧀ꦱꦺ​ꦲꦏꦸ​ꦔꦼꦂꦠꦶ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦺꦴꦩꦺꦴꦁ:“ꦲꦗ​ꦩꦶꦭꦶꦏ꧀ꦩꦫꦁ​ꦧꦫꦁꦔꦺ​ꦭꦶꦪꦤꦺ​꧈​”ꦭꦃ​ꦏꦺꦴꦏ꧀ꦲꦶꦁ​ꦲꦠꦶꦏꦸ​ꦠꦼꦫꦸꦱ꧀ꦩꦭꦶꦃ​ꦤ꧀ꦢꦸꦮꦺꦫꦱ​ꦩꦶꦭꦶꦏ꧀ꦧꦫꦁꦔꦺ​ꦭꦶꦪꦤꦺ​꧉​ꦭꦃ​ꦲꦏꦸ​ꦠꦼꦫꦸꦱ꧀ꦫꦸꦩꦁꦱ​ꦤꦼꦫꦏ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦏꦸ​ꦫꦸꦩꦁꦱ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦭꦤ꧀ꦥꦤ꧀ꦠꦼꦱ꧀ꦢꦶꦱꦼꦠꦿꦥ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦶꦧꦸꦮꦁ​ꦤꦁꦤꦼꦫꦏ꧉​ꦢꦢꦶꦤꦺ​꧈​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦠꦸꦗꦸꦮꦤ꧀ꦤꦺꦏꦁꦒꦺꦴ​ꦤꦸꦤ꧀ꦠꦸꦤ꧀ꦲꦏꦸ​ꦱꦸꦥꦪ​ꦧꦶꦱ​ꦲꦸꦫꦶꦥ꧀ꦫꦸꦩꦏꦼꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦼꦧꦸꦭ꧀ꦭꦺ​ꦩꦭꦃ​ꦩꦫꦏ꧀ꦏꦏꦺꦲꦏꦸ​ꦥꦼꦢꦺꦴꦠ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹¹ꦗꦭꦂꦫꦤ꧀ꦱꦁꦏꦮꦺꦠ꧀ꦩꦲꦸ​ꦢꦺꦴꦱ​ꦩꦭꦃ​ꦤꦼꦩꦸ​ꦢꦭꦤ꧀ꦤꦫꦶꦏ꧀ꦲꦠꦶꦏꦸ​ꦩꦫꦁ​ꦲꦭ​꧈​ꦱꦸꦥꦪ​ꦲꦏꦸ​ꦥꦶꦱꦃ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​

¹²꧋ꦤꦁꦔꦶꦁ​ꦱꦼꦤꦗꦤ꧀ꦮꦺꦠ꧀ꦮꦺꦠ꧀ꦩꦲꦸ​ꦗꦼꦧꦸꦭ꧀ꦭꦺ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦔ꧀ꦒꦮꦺ​ꦢꦺꦴꦱ​꧈​ꦲꦏꦸ​ꦲꦺꦴꦫ​ꦔꦺꦴꦩꦺꦴꦁꦤꦺꦏ꧀ꦮꦺꦠ꧀ꦮꦺꦠ꧀ꦏꦸꦮꦶ​ꦲꦭ​꧈​ꦲꦺꦴꦫ​ꦥꦫ​ꦱꦼꦢꦸꦭꦸꦂ​꧉​ꦮꦺꦠ꧀ꦮꦺꦠ꧀ꦏꦸꦮꦶ​ꦠꦼꦏꦤꦺ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦼꦩꦺꦴꦤꦺꦴ​ꦲꦸꦒ​ꦲꦁꦒꦼꦂꦫꦁꦒꦼꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦸꦮꦶ​ꦏꦧꦺꦃ​ꦧꦼꦤꦼꦂ​ꦭꦤ꧀ꦲꦥꦶꦏ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ ¹³ꦭꦃ​ꦩꦺꦴꦱꦺꦴꦏ꧀ꦧꦫꦁ​ꦱꦶꦁ​ꦲꦥꦶꦏ꧀ꦩꦫꦏ꧀ꦏꦏꦺꦲꦏꦸ​ꦥꦶꦱꦃ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​?ꦭꦃ​ꦏꦼꦥꦿꦶꦪꦺ​ꦏꦸꦮꦶ​?ꦲꦺꦴꦫ​ꦥꦫ​ꦱꦼꦢꦸꦭꦸꦂ​꧈​ꦲꦺꦴꦫ​ꦔꦺꦴꦤꦺꦴ​!ꦢꦺꦴꦱ​ꦱꦶꦁ​ꦩꦫꦏ꧀ꦏꦏꦺꦲꦏꦸ​ꦥꦶꦱꦃ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦱꦏ꧀ꦧꦼꦤꦼꦂꦫꦺ​ꦔꦺꦤꦺ​:ꦢꦺꦴꦱ​ꦱꦶꦁ​ꦩꦫꦏ꧀ꦏꦏꦺꦲꦏꦸ​ꦤꦼꦫꦏ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦗꦭꦂꦫꦤ꧀ꦱꦁꦏꦏꦸꦮꦶ​ꦲꦏꦸ​ꦩꦭꦶꦃ​ꦥꦶꦱꦃ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦲꦏꦸ​ꦧꦶꦱ​ꦮꦼꦫꦸꦃ​ꦢꦺꦮꦺ꧈​ꦤꦺꦏ꧀ꦢꦺꦴꦱ​ꦤꦼꦏꦏ꧀ꦏꦏꦺꦲꦭ​꧉​ꦢꦢꦶꦤꦺ​ꦢꦺꦴꦁꦔꦺꦤꦼꦫꦏ꧀ꦲꦁꦒꦼꦂꦫꦁꦒꦼꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦤꦶꦤ꧀ꦢꦏ꧀ꦏꦏꦺꦧꦫꦁ​ꦱꦶꦁ​ꦢꦶꦥꦼꦔꦶꦁ​꧈​ꦲꦏꦸ​ꦮꦼꦫꦸꦃ​꧈​ꦤꦺꦏ꧀ꦲꦶꦁ​ꦲꦠꦶꦏꦸ​ꦲꦺꦤꦺꦁꦫꦱ​ꦲꦭ​ꦱꦶꦁ​ꦒꦼꦢꦺꦧꦔꦼꦠ꧀ꦏ꧀ꦮꦱꦤꦺ​꧉​ꦭꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦲꦁꦒꦼꦂꦫꦁꦒꦼꦂ​꧈​ꦱꦸꦥꦪ​ꦏꦸꦮꦶ​ꦧꦶꦱ​ꦏꦺꦠꦺꦴꦏ꧀꧈​

¹⁴꧋ꦥꦫ​ꦱꦼꦢꦸꦭꦸꦂ​꧈​ꦏꦸꦮꦶ​ꦗꦭꦂꦫꦤ꧀ꦤꦺ​ꦔꦺꦤꦺ​:ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦏꦸꦮꦶ​ꦠꦼꦏꦤꦺ​ꦱꦁꦏꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦲꦏꦸ​ꦲꦶꦏꦶ​ꦤꦩꦸꦁ​ꦮꦺꦴꦁ​ꦲꦸꦫꦶꦥ꧀ꦱꦶꦁ​ꦮꦸꦗꦸꦠ꧀ꦏꦼꦢꦒꦶꦁꦔꦤ꧀ꦱꦶꦁ​ꦢꦶꦏ꧀ꦮꦱꦤꦶ​ꦢꦺꦴꦱ​꧉​ ¹⁵ꦲꦏꦸ​ꦢꦺꦮꦺꦪ​ꦲꦺꦴꦫ​ꦢꦸꦤꦸꦁꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧉​ꦲꦥ​ꦏꦉꦥ꧀ꦏꦸ​ꦩꦭꦃ​ꦲꦺꦴꦫ​ꦠꦏ꧀ꦭꦏꦺꦴꦤ꧀ꦤꦶ​꧈​ꦲꦏꦸ​ꦩꦭꦃ​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦱꦶꦁ​ꦠꦏ꧀ꦱꦼꦔꦶꦠ꧀ꦠꦶ​꧉​ ¹⁶ꦗꦭꦂꦫꦤ꧀ꦲꦏꦸ​ꦩꦭꦃ​ꦔ꧀ꦭꦏꦺꦴꦤ꧀ꦤꦶ​ꦲꦥ​ꦱꦶꦁ​ꦲꦺꦴꦫ​ꦠꦏ꧀ꦏꦉꦥ꧀ꦥꦏꦺ꧈​ꦢꦢꦶꦤꦺ​ꦏꦼꦠꦫ​꧈​ꦤꦺꦏ꧀ꦲꦏꦸ​ꦔꦏꦺꦴꦤ꧀ꦤꦶ​꧈​ꦤꦺꦏ꧀ꦮꦺꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦧꦼꦤꦼꦂ​꧉​ ¹⁷ꦢꦢꦶꦤꦺ​ꦢꦸꦢꦸ​ꦲꦏꦸ​ꦢꦺꦮꦺꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦩꦲꦸ​꧈​ꦤꦁꦔꦶꦁ​ꦥꦔ꧀ꦮꦱꦤꦺ​ꦢꦺꦴꦱ​ꦱꦶꦁ​ꦲꦤ​ꦲꦶꦁ​ꦲꦏꦸ​꧈​ꦏꦸꦮꦶ​ꦱꦶꦁ​ꦩꦫꦏ꧀ꦏꦏꦺꦲꦏꦸ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦲꦭ​꧉​ ¹⁸ꦥꦚ꧀ꦕꦺꦤ꧀ꦲꦏꦸ​ꦢꦺꦮꦺꦪ​ꦔꦏꦺꦴꦤ꧀ꦤꦶ​ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦲꦶꦏꦶ​ꦤꦩꦸꦁ​ꦩꦤꦸꦁꦱ​꧈​ꦲꦏꦸ​ꦲꦺꦴꦫ​ꦧꦶꦱ​ꦤꦶꦤ꧀ꦢꦏ꧀ꦏꦏꦺꦲꦥꦲꦥ​ꦱꦶꦁ​ ꦧꦼꦕꦶꦏ꧀꧈​ꦧꦼꦤꦼꦂ​ꦲꦏꦸ​ꦤ꧀ꦢꦸꦮꦺꦤ꧀ꦤꦶ​ꦏꦼꦥꦺꦔꦶꦤ꧀ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦕꦶꦏ꧀ ꦤꦁꦔꦶꦁ​ꦲꦏꦸ​ꦲꦺꦴꦫ​ꦧꦶꦱ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦏꦸꦮꦶ​꧉​ ¹⁹ꦩꦸꦭꦤꦺ​ꦲꦏꦸ​ꦪ​ꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀ ꦱꦼꦤꦗꦤ꧀ꦪ​ꦏꦉꦥ꧀ꦠꦼꦤꦤ꧀꧈​ꦩꦭꦃ​ꦱꦶꦁ​ꦲꦭ​꧈​ꦱꦶꦁ​ꦲꦺꦴꦫ​ꦠꦏ꧀ꦏꦉꦥ꧀ꦥꦏꦺ꧈​ꦩꦭꦃ​ꦏꦸꦮꦶ​ꦱꦶꦁ​ꦠꦏ꧀ꦭꦏꦺꦴꦤ꧀ꦤꦶ​꧉​ ²⁰ꦭꦃ​ꦤꦺꦏ꧀ꦲꦏꦸ​ꦩꦭꦃ​ꦔ꧀ꦭꦏꦺꦴꦤ꧀ꦤꦶ​ꦥꦽꦏꦫꦥꦽꦏꦫ​ꦱꦶꦁ​ꦲꦺꦴꦫ​ꦠꦏ꧀ꦏꦉꦥ꧀ꦥꦏꦺ꧈​ꦢꦢꦶꦤꦺ​ꦪ​ꦏꦼꦠꦫ​ꦠꦼꦤꦤ꧀ ꦤꦺꦏ꧀ꦢꦸꦢꦸ​ꦲꦏꦸ​ꦢꦺꦮꦺꦱꦶꦁ​ꦤꦶꦤ꧀ꦢꦏ꧀ꦏꦏꦺꦲꦭ​ꦏꦸꦮꦶ​꧈​ꦤꦁꦔꦶꦁ​ꦥꦔ꧀ꦮꦱꦤꦺ​ꦢꦺꦴꦱ​ꦱꦶꦁ​ꦲꦤ​ꦲꦶꦁ​ꦲꦏꦸ​꧉​

²¹꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦱꦲꦶꦏꦶ​ꦤꦶꦠꦺꦤ꧀ꦤꦶ​ꦲꦶꦏꦶ​:ꦤꦺꦏ꧀ꦲꦏꦸ​ꦏꦼꦥꦺꦔꦶꦤ꧀​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀ ꦗꦼꦧꦸꦭ꧀ꦭꦺ​ꦱꦶꦁ​ꦠꦏ꧀ꦭꦏꦺꦴꦤ꧀ꦤꦶ​ꦤꦩꦸꦁ​ꦱꦶꦁ​ꦲꦭ​꧉​ꦏꦪꦏꦪ​ꦲꦶꦏꦶ​ꦏꦺꦴꦏ꧀ꦢꦢꦶ​ꦏꦭꦸꦩꦿꦃꦲꦤ꧀꧈​ ²²ꦥꦚ꧀ꦕꦺꦤ꧀ꦲꦶꦁ​ꦲꦠꦶꦏꦸ​ꦲꦏꦸ​ꦪ​ꦧꦸꦔꦃ​ꦠꦼꦤꦤ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦮꦺꦠ꧀ꦮꦺꦠ꧀ꦏꦸꦮꦶ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ ²³ꦤꦁꦔꦶꦁ​ꦲꦏꦸ​ꦤꦶꦠꦺꦤ꧀ꦤꦶ​ꦤꦺꦏ꧀ꦤꦁꦲꦮꦏ꧀ꦏꦸ​ꦏꦪꦏꦪ​ꦲꦺꦤꦺꦁꦮꦺꦠ꧀ꦭꦶꦪꦤꦺ​ꦱꦶꦁ​ꦔ꧀ꦭꦮꦤ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦗꦼꦧꦸꦭ꧀ꦭꦺ​ꦲꦏꦸ​ꦪ​ꦤꦶꦤ꧀ꦢꦏ꧀ꦏꦏꦺꦥꦽꦏꦫ​ꦱꦶꦁ​ꦲꦺꦴꦫ​ꦢꦶꦱꦼꦠꦸꦗꦺꦴꦤ꧀ꦤꦶ​ꦏꦫꦺꦴ​ꦱ꧀ꦮꦫꦤꦺ​ꦲꦠꦶꦏꦸ​꧉​ꦲꦏꦸ​ꦏꦼꦧꦤ꧀ꦢꦏꦫꦺꦴ​ꦥꦔ꧀ꦮꦱꦤꦺ​ꦢꦺꦴꦱ​ꦱꦶꦁ​ꦔꦫꦤ꧀ꦤꦶ​ꦲꦥ​ꦱꦶꦁ​ꦏꦸꦢꦸ​ꦠꦏ꧀ꦭꦏꦺꦴꦤ꧀ꦤꦶ​꧉​ ²⁴ꦥꦚ꧀ꦕꦺꦤ꧀ꦕꦶꦭꦏ​ꦠꦼꦤꦤ꧀ꦲꦮꦏ꧀ꦏꦸ​ꦲꦶꦏꦶ​꧉​ꦱꦥ​ꦠ​ꦱꦶꦁ​ꦧꦶꦱ​ꦔ꧀ꦭꦸꦮꦂꦫꦶ​ꦲꦏꦸ​ꦱꦁꦏꦧꦢꦤ꧀ꦱꦶꦁ​ꦩꦫꦏ꧀ꦏꦏꦺꦲꦏꦸ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦭꦤ꧀ꦏꦥꦶꦱꦃ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​? ²⁵ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​!ꦢꦺꦏ꧀ꦤꦺꦱꦶꦁ​ꦔ꧀ꦭꦸꦮꦂꦫꦶ​ꦲꦏꦸ​ꦭꦤ꧀ꦠꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦗꦭꦂꦫꦤ꧀ꦱꦁꦏꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦢꦺꦴꦱ​ꦮꦶꦱ꧀ꦲꦺꦴꦫ​ꦧꦶꦱ​ꦔ꧀ꦮꦱꦤꦶ​ꦲꦏꦸ​ꦩꦼꦤꦺꦃ​꧉​

꧋ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦮꦸꦗꦸꦠ꧀ꦠꦺꦱꦼꦤꦗꦤ꧀ꦲꦏꦸ​ꦔꦏꦺꦴꦤ꧀ꦤꦶ​ꦤꦺꦏ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦥꦶꦏ꧀ꦭꦤ꧀ꦏꦸꦢꦸ​ꦢꦶꦭꦏꦺꦴꦤ꧀ꦤꦶ​꧈​ꦤꦁꦔꦶꦁ​ꦲꦏꦸ​ꦏꦭꦃ​ꦏꦫꦺꦴ​ꦥꦔ꧀ꦮꦱꦤꦺ​ꦢꦺꦴꦱ​ꦱꦶꦁ​ꦩꦫꦏ꧀ꦏꦏꦺꦲꦏꦸ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦲꦭ​꧉​

↑ ↑ ↑

꧋ꦲꦸꦫꦶꦥ꧀ꦤꦸꦫꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦫꦺꦴꦃ​ꦱꦸꦕꦶ​꧉​

꧇​꧘꧇​ ¹꧋ꦤꦁꦔꦶꦁ​ꦱꦲꦶꦏꦶ​ꦮꦶꦱ꧀ꦲꦺꦴꦫ​ꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​꧈​ꦲꦮꦶꦠ꧀ꦱꦥ​ꦱꦶꦁ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦮꦶꦱ꧀ꦲꦺꦴꦫ​ꦢꦶꦲꦁꦒꦼꦥ꧀ꦱꦭꦃ​ꦩꦼꦤꦺꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦺꦴꦫ​ꦧꦏꦭ꧀ꦤꦩ꧀ꦥ​ꦱꦼꦠꦿꦥꦤ꧀꧈​ ²ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​?ꦗꦭꦂꦫꦤ꧀ꦱꦏ꧀ꦧꦉꦁꦔꦺꦲꦮꦏ꧀ꦏꦺ​ꦢꦺꦮꦺꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ ꦫꦺꦴꦃ​ꦱꦸꦕꦶ​ꦔꦚꦂꦫꦏꦺꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​ꦱꦲꦶꦏꦶ​ꦫꦺꦴꦃ​ꦱꦸꦕꦶ​ꦱꦶꦁ​ꦔ꧀ꦮꦱꦤꦶ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​ꦥꦔ꧀ꦮꦱꦤꦺ​ꦢꦺꦴꦱ​꧈​ꦱꦶꦁ​ꦩꦶꦱꦃ​ꦲꦮꦏ꧀ꦏꦺ​ꦢꦺꦮꦺꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦶꦱ꧀ꦢꦶꦏꦭꦃꦲꦏꦺ꧉​ ³ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦧꦶꦱ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦩꦼꦢꦺꦴꦠ꧀​ꦏ꧀ꦭꦏꦸꦮꦤ꧀ꦲꦭ​꧉​ꦢꦺꦴꦱ​ꦒꦼꦢꦺꦧꦔꦼꦠ꧀ꦥꦔ꧀ꦮꦱꦤꦺ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦏꦔꦺꦭ꧀ꦭꦤ꧀ꦔꦭꦃꦲꦏꦺ꧉​ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦏ꧀ꦤꦺꦔꦺꦴꦁꦏꦺꦴꦤ꧀ꦲꦤꦏ꧀ꦏꦺ​ꦩꦼꦢꦸꦤ꧀ꦤꦁꦗꦒꦠ꧀ꦏꦺꦤꦺ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦢꦶ​ꦩꦤꦸꦁꦱ​ꦱꦶꦁ​ꦲꦸꦒ​ꦤ꧀ꦢꦸꦮꦺꦤ꧀ꦤꦶ​ꦧꦢꦤ꧀ꦏꦪ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧉​ꦢꦺꦏ꧀ꦤꦺꦩꦠꦶ​ꦢꦢꦶ​ꦏꦸꦂꦧꦤ꧀ꦏꦁꦒꦺꦴ​ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ꦢꦢꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦭꦶꦃ​ꦔꦁꦒꦼꦥ꧀ꦏꦿꦶꦱ꧀ꦡꦸꦱ꧀ꦱꦭꦃ​ꦭꦤ꧀ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦱꦼꦠꦿꦥꦤ꧀ꦤꦺ꧉​ ⁴ꦩꦼꦁꦏꦺꦴꦤꦺꦴ​ꦏꦸꦮꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤꦼꦠꦼꦥ꧀ꦥꦶ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧈​ꦗꦚ꧀ꦗꦶ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦢꦺꦴꦱ​꧈​ꦤꦁꦔꦶꦁ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦫꦺꦴꦃ​ꦱꦸꦕꦶ​꧉​ ⁵ꦮꦺꦴꦁ​ꦱꦶꦁ​ꦲꦸꦫꦶꦥ꧀ꦥꦺꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦏꦼꦢꦒꦶꦁꦔꦤ꧀ꦤꦺ​꧈​ꦥꦶꦏꦶꦂꦫꦤ꧀ꦤꦺ​ꦪ​ꦢꦶꦭꦏꦺꦴꦏ꧀ꦏꦏꦺꦏꦫꦺꦴ​ꦏꦼꦢꦒꦶꦁꦔꦤ꧀ꦤꦺ​꧉​ꦤꦁꦔꦶꦁ​ꦮꦺꦴꦁ​ꦱꦶꦁ​ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦶꦏꦶꦂꦫꦤ꧀ꦤꦺ​ꦪ​ꦏꦠꦸꦤ꧀ꦠꦸꦤ꧀ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁶ꦤꦺꦏ꧀ꦥꦶꦏꦶꦂꦫꦤ꧀ꦩꦸ​ꦢꦶꦏ꧀ꦮꦱꦤꦶ​ꦏꦼꦢꦒꦶꦁꦔꦤ꧀ ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦏꦺꦴꦮꦺ​ꦧꦏꦭ꧀ꦥꦶꦱꦃ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦱꦺ꧉​ꦤꦁꦔꦶꦁ​ꦤꦺꦏ꧀ꦥꦶꦏꦶꦂꦫꦤ꧀ꦩꦸ​ꦏꦠꦸꦤ꧀ꦠꦸꦤ꧀ꦏꦼꦏꦉꦥ꧀ꦥꦤ꧀ꦤꦺ​ꦫꦺꦴꦃꦲꦺ​ꦄꦭ꧀ꦭꦃ​꧈​ꦲꦺꦤ꧀ꦠꦸꦏ꧀ꦲꦺꦤ꧀ꦠꦸꦏ꧀ꦏꦺꦧꦏꦭ꧀ꦲꦸꦫꦶꦥ꧀ꦱꦶꦁ​ꦠꦼꦤ꧀ꦠꦽꦩ꧀ꦭꦤ꧀ꦭꦁꦒꦼꦁ​꧉​ ⁷ꦮꦺꦴꦁ​ꦱꦶꦁ​ꦥꦶꦏꦶꦂꦫꦤ꧀ꦤꦺ​ꦢꦶꦏ꧀ꦮꦱꦤꦶ​ꦏꦼꦢꦒꦶꦁꦔꦤ꧀ꦏꦸꦮꦶ​ꦢꦢꦶ​ꦩꦸꦁꦱꦸꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦲꦺꦴꦫ​ꦩꦤꦸꦠ꧀ꦩꦫꦁ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦥꦚ꧀ꦕꦺꦤ꧀ꦪ​ꦲꦺꦴꦫ​ꦧꦶꦱ​ꦲꦸꦫꦶꦥ꧀ꦩꦤꦸꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁸ꦲꦸꦫꦶꦥ꧀ꦥꦺꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦧ꧀ꦭꦱ꧀ꦲꦺꦴꦫ​ꦧꦶꦱ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

⁹꧋ꦭꦃ​ꦤꦁꦔꦶꦁ​ꦏꦺꦴꦮꦺ​ꦏꦸꦮꦶ​ꦏꦼꦥꦿꦶꦪꦺ​ꦥꦫ​ꦱꦼꦢꦸꦭꦸꦂ​?ꦲꦥ​ꦏꦺꦴꦮꦺ​ꦲꦶꦗꦶꦏ꧀ꦢꦶꦭꦏꦺꦴꦏ꧀ꦏꦏꦺꦏꦼꦢꦒꦶꦁꦔꦤ꧀꧈​ꦪ​ꦮꦶꦱ꧀ꦲꦺꦴꦫ​ꦠ​!ꦱꦲꦶꦏꦶ​ꦏꦺꦴꦮꦺ​ꦥꦢ​ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦲꦏꦸ​ꦔꦼꦂꦠꦶ​ꦤꦺꦏ꧀ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦺꦴꦤ꧀ꦲꦶꦁ​ꦏꦺꦴꦮꦺ​꧉​ꦱꦼꦩꦸꦁꦒꦺꦴꦤ꧀ꦤꦺꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦩꦁꦒꦺꦴꦤ꧀ꦲꦶꦁ​ꦏꦺꦴꦮꦺ​꧈​ꦩꦼꦱ꧀ꦠꦶꦏꦺꦴꦮꦺ​ꦪ​ꦢꦸꦢꦸ​ꦮꦺꦏ꧀ꦏꦺꦏꦿꦶꦱ꧀ꦡꦸꦱ꧀꧈​ ¹⁰ꦪ​ꦧꦼꦤꦼꦂ​꧈​ꦤꦺꦏ꧀ꦏꦿꦶꦱ꧀ꦡꦸꦱ꧀ꦩꦁꦒꦺꦴꦤ꧀ꦲꦶꦁ​ꦲꦠꦶꦩꦸ​꧈​ꦧꦢꦤ꧀ꦩꦸ​ꦪ​ꦲꦶꦗꦶꦏ꧀ꦢꦶꦏ꧀ꦮꦱꦤꦶ​ꦥꦠꦶ​꧈​ꦗꦭꦂꦫꦤ꧀ꦱꦁꦏꦢꦺꦴꦱ​꧈​ꦤꦁꦔꦶꦁ​ꦫꦺꦴꦃꦩꦸ​ꦲꦸꦫꦶꦥ꧀ ꦲꦮꦶꦠ꧀ꦏꦺꦴꦮꦺ​ꦮꦶꦱ꧀ꦢꦶꦲꦁꦒꦼꦥ꧀ꦧꦼꦤꦼꦂ​ꦭꦤ꧀ꦢꦶꦠꦩ꧀ꦥ​ ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹¹ꦥꦫ​ꦱꦼꦢꦸꦭꦸꦂ​꧈​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦔꦺꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦁꦏꦥꦠꦶ​꧉​ꦭꦤ꧀ꦮꦸꦗꦸꦠ꧀ꦠꦺꦪ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦠꦶꦩꦸ​꧈​ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦩꦼꦱ꧀ꦠꦶꦲꦸꦒ​ꦧꦏꦭ꧀ꦤꦔꦺꦏ꧀ꦏꦺꦧꦢꦤ꧀ꦩꦸ​ꦱꦁꦏꦥꦠꦶ​꧉​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦠꦶꦩꦸ​꧈​ꦏꦸꦮꦶ​ꦱꦶꦁ​ꦧꦏꦭ꧀ꦔꦸꦫꦶꦥ꧀ꦥꦏꦺꦧꦢꦤ꧀ꦩꦸ​ꦱꦁꦏꦥꦠꦶ​꧉​

¹²꧋ꦢꦢꦶꦤꦺ​ꦔꦺꦤꦺ​ꦥꦫ​ꦱꦼꦢꦸꦭꦸꦂ​:ꦲꦮꦏ꧀ꦏꦺ​ꦢꦺꦮꦺꦥꦚ꧀ꦕꦺꦤ꧀​ꦤ꧀ꦢꦸꦮꦺꦏꦸꦮꦗꦶꦧ꧀ꦧꦤ꧀ꦏꦸꦢꦸ​ꦲꦸꦫꦶꦥ꧀ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦏꦼꦢꦒꦶꦁꦔꦤ꧀꧈​ ¹³ꦲꦮꦶꦠ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦏꦼꦢꦒꦶꦁꦔꦤ꧀ ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦥꦶꦱꦃ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦱꦺ꧉​ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦩꦠꦺꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦏꦼꦢꦒꦶꦁꦔꦤ꧀ꦔꦁꦒꦺꦴ​ꦥꦶꦠꦸꦭꦸꦁꦔꦤ꧀ꦤꦺ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦺꦴꦮꦺ​ꦧꦏꦭ꧀ꦲꦸꦫꦶꦥ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦱꦺ꧉​ ¹⁴ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦱꦶꦁ​ꦲꦸꦫꦶꦥ꧀ꦥꦺꦏꦠꦸꦤ꧀ꦠꦸꦤ꧀ꦠꦼꦤꦤ꧀ꦏꦫꦺꦴ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪ​ꦮꦺꦴꦁ​ꦏꦸꦮꦶ​ꦱꦶꦁ​ꦏꦼꦤꦺꦁꦢꦶꦲꦫꦤ꧀ꦤꦶ​ꦠꦼꦤꦤ꧀ꦤꦺꦏ꧀ꦮꦸꦗꦸꦠ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁵ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​?ꦲꦮꦶꦠ꧀ꦮꦸꦗꦸꦠ꧀ꦠꦺꦏꦺꦴꦮꦺ​ꦩꦲꦸꦤꦺ​ꦥꦢ​ꦮꦼꦢꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦼꦢꦶ​ꦤꦺꦏ꧀ꦧꦏꦭ꧀ꦢꦶꦱꦼꦠꦿꦥ꧀꧈​ꦤꦁꦔꦶꦁ​ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦼꦢꦸꦤ꧀ꦤꦏꦺꦫꦺꦴꦃꦲꦺ​ꦏꦺꦴꦁꦏꦺꦴꦤ꧀ꦩꦁꦒꦺꦴꦤ꧀ꦲꦶꦁ​ꦲꦠꦶꦩꦸ​꧉​ꦲꦥ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​ꦩꦫꦏ꧀ꦏꦏꦺꦏꦺꦴꦮꦺ​ꦮꦼꦢꦶ​?ꦲꦺꦴꦫ​!ꦫꦺꦴꦃ​ꦲꦶꦏꦶ​ꦩꦁꦒꦺꦴꦤ꧀ꦲꦶꦁ​ꦲꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦩꦭꦃ​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤ꧀ꦢꦸꦮꦺꦮꦼꦢꦶ​ꦚꦼꦭꦸꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​:“ꦧꦥꦏ꧀ ꦧꦥꦏ꧀ꦏꦸ​!” ¹⁶ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦤ꧀ꦢꦸꦤꦸꦁꦔꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀꧈​

¹⁷꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦩ꧀ꦧꦺꦱꦸꦏ꧀ꦲꦮꦏ꧀ꦏꦺ​ꦢꦺꦮꦺꦪ​ꦩꦼꦱ꧀ꦠꦶꦤꦩ꧀ꦥ​ꦥꦤ꧀ꦢꦸꦩ꧀ꦩꦤ꧀ꦱꦶꦁ​ꦱꦲꦶꦏꦶ​ꦮꦶꦱ꧀ꦏꦱꦶꦩ꧀ꦥꦼꦤ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤꦩꦸꦁ​ꦤꦩ꧀ꦥ​ꦥꦤ꧀ꦢꦸꦩ꧀ꦩꦤ꧀ ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦧꦏꦭ꧀ꦢꦶꦏꦺꦏ꧀ꦏꦶꦥꦁꦒꦺꦴꦤ꧀ꦤꦤ꧀ꦱꦶꦁ​ꦢꦸꦮꦸꦂꦢꦺꦮꦺ꧈​ꦠꦸꦁꦒꦭ꧀ꦭꦺ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦱꦒꦸꦃ​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀ꦏꦪ​ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦧꦏꦭ꧀ꦔꦸꦁꦒꦃꦲꦏꦺꦲꦮꦏ꧀ꦏꦺ​ꦢꦺꦮꦺꦏꦪ​ꦏꦿꦶꦱ꧀ꦡꦸꦱ꧀꧈​

꧋ꦥꦼꦔꦉꦥ꧀ꦲꦉꦥ꧀ꦥꦺ​ꦲꦤꦏ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹⁸꧋ꦥꦫ​ꦱꦼꦢꦸꦭꦸꦂ​꧈​ꦱꦏ꧀ꦏꦺꦃꦲꦺꦏꦱꦁꦱꦫꦤ꧀ꦱꦶꦁ​ꦢꦶꦲꦭꦩ꧀ꦩꦶ​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​꧈​ꦩꦤꦸꦠ꧀ꦥꦶꦤꦼꦩꦸꦏꦸ꧈​ꦲꦺꦴꦫ​ꦲꦺꦤꦺꦁꦥꦢꦤꦺ​ꦧ꧀ꦭꦱ꧀ꦏꦫꦺꦴ​ꦲꦸꦥꦃꦲꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦱꦁꦏꦱ꧀ꦮꦂꦒ​꧈​ꦱꦶꦁ​ꦧꦏꦭ꧀ꦢꦶꦧꦸꦏꦏ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦲꦩ꧀ꦧꦺꦱꦸꦏ꧀꧈​ ¹⁹ꦲꦮꦶꦠ꧀ꦭꦔꦶꦠ꧀ꦭꦤ꧀ꦧꦸꦩꦶ​ꦥꦚ꧀ꦕꦺꦤ꧀ꦪ​ꦔꦉꦥ꧀ꦲꦉꦥ꧀ꦢꦶꦤꦤꦺ​ꦠꦼꦤꦤ꧀ ꦲꦩ꧀ꦧꦺꦱꦸꦏ꧀ꦏꦥꦤ꧀ꦠ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦼꦠꦺꦴꦏ꧀ꦏꦏꦺꦲꦸꦥꦃꦲꦺꦲꦤꦏ꧀ꦲꦤꦏ꧀ꦏꦺ​꧉​ ²⁰ꦏꦼꦤꦺꦁꦲꦥ​ꦏꦺꦴꦏ꧀ꦥꦢ​ꦔꦉꦥ꧀ꦲꦉꦥ꧀?ꦗꦭꦂꦫꦤ꧀ꦱꦼꦩ꧀ꦧꦫꦁ​ꦒꦮꦺꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦮꦶꦱ꧀ꦏꦼꦤꦺꦁꦏꦫꦸꦱꦏ꧀ꦏꦤ꧀ ꦢꦢꦶ​ꦩꦸꦱ꧀ꦥꦿ​꧈​ꦲꦺꦴꦫ​ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦲꦸꦩꦲꦸꦤꦺ꧉​ꦤꦁꦔꦶꦁ​ꦏꦸꦮꦶ​ꦲꦺꦴꦫ​ꦱꦁꦏꦏꦼꦏꦉꦥ꧀ꦥꦤ꧀ꦤꦺ​ꦢꦺꦮꦺ꧈​ꦲꦺꦴꦫ​꧈​ꦏꦸꦮꦶ​ꦥꦚ꧀ꦕꦺꦤ꧀ꦮꦶꦱ꧀ꦢꦢꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧈​ꦗꦭꦂꦫꦤ꧀ꦗꦒꦠ꧀ꦮꦶꦱ꧀ꦏꦼꦤꦺꦁꦢꦺꦴꦱ​꧉​ꦤꦁꦔꦶꦁ​ꦲꦶꦗꦶꦏ꧀ꦲꦺꦤꦺꦁꦥꦼꦔꦉꦥ꧀ꦲꦉꦥ꧀꧈​ ²¹ꦲꦺꦤꦺꦁꦮꦚ꧀ꦕꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦚꦂꦫꦏꦺꦱꦼꦩ꧀ꦧꦫꦁ​꧈​ꦱꦸꦥꦪ​ꦲꦺꦴꦫ​ꦧꦶꦱ​ꦫꦸꦱꦏ꧀ꦭꦤ꧀ꦩꦠꦶ​ꦩꦼꦤꦺꦃ​꧉​ꦱꦼꦩ꧀ꦧꦫꦁ​ꦩꦭꦃ​ꦧꦏꦭ꧀ꦢꦶꦲꦚꦂꦫꦏꦺ꧈​ꦱꦸꦥꦪ​ꦧꦶꦱ​ꦩꦼꦂꦢꦺꦏ꧈​ꦠꦸꦁꦒꦭ꧀ꦭꦺ​ꦏꦫꦺꦴ​ꦲꦤꦏ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²²ꦥꦚ꧀ꦕꦺꦤ꧀ꦧꦼꦤꦼꦂ​꧈​ꦱꦲꦶꦏꦶ​ꦗꦒꦠ꧀ꦲꦶꦗꦶꦏ꧀ꦱꦩ꧀ꦧꦠ꧀ꦔꦿꦱꦏ꧀ꦏꦏꦺꦭꦫ​꧈​ꦏꦪ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦲꦶꦗꦶꦏ꧀​ꦔ꧀ꦭꦫꦤꦶ​ꦤꦺꦏ꧀ꦲꦉꦥ꧀​ꦩ꧀ꦧꦪꦶꦏꦲꦺ​꧉​ ²³ꦲꦺꦴꦫ​ꦤꦩꦸꦁ​ꦗꦒꦠ꧀ꦱꦶꦁ​ꦱꦩ꧀ꦧꦠ꧀ ꦤꦁꦔꦶꦁ​ꦲꦸꦒ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦁ​ꦤꦩ꧀ꦥ​ꦥꦮꦺꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦱꦼꦥꦶꦱꦤ꧀ꦤꦤ꧀ ꦪꦏꦸꦮꦶ​ꦫꦺꦴꦃ​ꦱꦸꦕꦶ​꧉​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦮꦶꦱ꧀ꦏꦁꦒꦺꦴꦤ꧀ꦤꦤ꧀ꦫꦺꦴꦃ​ꦱꦸꦕꦶ​ꦲꦸꦒ​ꦥꦢ​ꦔ꧀ꦒꦼꦱꦃ​ꦲꦶꦁ​ꦱꦏ꧀ꦗꦼꦫꦺꦴꦤꦺꦏꦼꦧꦠꦶꦤ꧀ꦤꦤ꧀ ꦱꦏ꧀ꦧꦉꦁꦔꦺꦲꦮꦏ꧀ꦏꦺ​ꦢꦺꦮꦺꦔꦉꦥ꧀ꦲꦉꦥ꧀ꦮꦚ꧀ꦕꦶꦤꦺ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦁꦏꦠ꧀ꦲꦮꦏ꧀ꦏꦺ​ꦢꦺꦮꦺ꧈​ꦢꦶꦠꦼꦠꦼꦥ꧀ꦥꦏꦺꦢꦢꦶ​ꦲꦤꦏ꧀ꦏꦺ​ꦭꦤ꧀ꦔꦚꦂꦫꦏꦺꦧꦢꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦧꦢꦤ꧀ꦱꦶꦁ​ꦭꦁꦒꦼꦁ​꧉​ ²⁴ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦶꦱ꧀ꦢꦶꦱ꧀ꦭꦩꦼꦠ꧀ꦠꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔꦉꦥ꧀ꦲꦉꦥ꧀ꦮꦚ꧀ꦕꦶꦤꦺ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦚꦂꦫꦏꦺꦧꦢꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦔꦁꦏꦠ꧀ꦲꦮꦏ꧀ꦏꦺ​ꦢꦺꦮꦺꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦢꦸꦮꦸꦂꦢꦺꦮꦺ꧉​ꦤꦁꦔꦶꦁ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦮꦼꦫꦸꦃ​ꦱꦶꦁ​ꦢꦶꦲꦉꦥ꧀ꦲꦉꦥ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦠꦶꦧꦏꦺ​ꦪ​ꦮꦶꦱ꧀ꦲꦺꦴꦫ​ꦥꦼꦔꦉꦥ꧀ꦲꦉꦥ꧀ꦩꦼꦤꦺꦃ​꧉​ꦲꦮꦶꦠ꧀ ꦱꦥ​ꦱꦶꦁ​ꦔꦉꦥ꧀ꦲꦉꦥ꧀ꦧꦫꦁ​ꦱꦶꦁ​ꦮꦶꦱ꧀ꦏꦺꦠꦺꦴꦏ꧀? ²⁵ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺ ꦔꦉꦥ꧀ꦲꦉꦥ꧀ꦧꦫꦁ​ꦱꦶꦁ​ꦲꦮꦏ꧀ꦏꦺ​ꦢꦺꦮꦺꦢꦸꦫꦸꦁ​ꦮꦼꦫꦸꦃ​꧈​ꦲꦮꦏ꧀ꦏꦺ​ꦢꦺꦮꦺꦩꦼꦱ꧀ꦠꦶꦧꦏꦭ꧀ꦔꦉꦥ꧀ꦲꦉꦥ꧀ꦏꦫꦺꦴ​ꦱꦧꦂ​꧉​

²⁶꧋ꦱꦼꦩꦺꦴꦤꦺꦴ​ꦲꦸꦒ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦏꦤꦺ​ꦲꦉꦥ꧀ꦩꦶꦠꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦫꦶꦁꦏꦶꦃ​ꦲꦶꦏꦶ​꧉​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦔꦼꦂꦠꦶ​ꦏꦼꦥꦿꦶꦪꦺ​ꦕꦫꦤꦺ​ꦤ꧀ꦢꦺꦴꦁꦔꦱꦶꦁ​ꦧꦼꦤꦼꦂ​ꦏꦸꦮꦶ​꧉​ꦩꦸꦭꦤꦺ​ꦫꦺꦴꦃ​ꦱꦸꦕꦶ​ꦤ꧀ꦢꦺꦴꦔꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦔꦁꦒꦺꦴ​ꦱꦩ꧀ꦧꦠ꧀ꦭꦤ꧀​ꦔ꧀ꦒꦼꦱꦃ​;ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦺꦴꦫ​ꦧꦶꦱ​ꦤ꧀ꦢꦸꦤꦸꦁꦔꦏꦺꦔꦁꦒꦺꦴ​ꦠꦼꦩ꧀ꦧꦸꦁꦔꦺ​ꦩꦤꦸꦁꦱ​꧉​ ²⁷ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦮꦼꦫꦸꦃ​ꦚ꧀ꦗꦼꦫꦺꦴꦤꦺ​ꦲꦠꦶꦤꦺ​ꦩꦤꦸꦁꦱ​꧈​ꦔꦼꦂꦠꦶ​ꦲꦸꦒ​ꦲꦥ​ꦥꦼꦚ꧀ꦗꦭꦸꦏꦤ꧀ꦤꦺꦫꦺꦴꦃ​ꦱꦸꦕꦶ​꧉​ꦲꦮꦶꦠ꧀ꦤꦺꦏ꧀ꦫꦺꦴꦃ​ꦱꦸꦕꦶ​ꦤ꧀ꦢꦺꦴꦔꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺ꧈​ꦩꦼꦱ꧀ꦠꦶꦥꦤ꧀ꦢꦺꦴꦔ​ꦏꦸꦮꦶ​ꦕꦺꦴꦕꦺꦴꦏ꧀​ꦏꦫꦺꦴ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

²⁸꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦥꦢ​ꦔꦼꦂꦠꦶ​ꦧꦧ꧀ꦲꦶꦏꦶ​:ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦼꦩ꧀ꦧꦫꦁ​ꦱꦶꦁ​ꦏ꧀ꦭꦏꦺꦴꦤ꧀ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦢꦶꦏꦁꦒꦺꦴꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦤꦼꦏꦏ꧀ꦏꦏꦺꦧꦼꦕꦶꦏ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦏꦮꦶꦠ꧀ꦱꦏ꧀ꦢꦸꦫꦸꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦼꦂꦠꦶ​ꦲꦥ​ꦱꦶꦁ​ꦲꦉꦥ꧀ꦢꦶꦠꦶꦤ꧀ꦢꦏ꧀ꦏꦏꦺ꧈​ꦩꦸꦭꦤꦺ​꧈​ꦱꦏ꧀ꦢꦸꦫꦸꦁꦔꦺꦢꦺꦏ꧀ꦤꦺꦪ​ꦮꦶꦱ꧀ꦩꦶꦗꦶ​ꦮꦺꦴꦁꦮꦺꦴꦁ​ꦱꦶꦁ​ꦲꦉꦥ꧀ꦢꦶꦏꦁꦒꦺꦴꦏ꧀ꦏꦏꦺꦏꦁꦒꦺꦴ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦢꦺꦏ꧀ꦤꦺ꧉​ ²⁹ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦮꦶꦱ꧀ꦔꦼꦂꦠꦶ​ꦱꦏ꧀ꦢꦸꦫꦸꦁꦔꦺ꧈​ꦱꦥ​ꦱꦶꦁ​ꦧꦏꦭ꧀ꦤꦸꦫꦸꦠ꧀ꦢꦺꦏ꧀ꦤꦺ꧈​ꦩꦸꦭꦤꦺ​ꦪ​ꦢꦶꦠꦼꦔꦼꦂꦫꦶ​ꦱꦏ꧀ꦢꦸꦫꦸꦁꦔꦺ꧈​ꦱꦸꦥꦪ​ꦧꦶꦱ​ꦢꦢꦶ​ꦏꦪ​ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦏꦿꦶꦱ꧀ꦡꦸꦱ꧀ꦢꦢꦶ​ꦏꦪ​ꦲꦤꦏ꧀ꦲꦩ꧀ꦧꦉꦥ꧀ꦲꦶꦁ​ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ³⁰ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦱꦶꦁ​ꦮꦶꦱ꧀ꦢꦶꦠꦼꦔꦼꦂꦫꦶ​ꦩꦲꦸ​꧈​ꦪꦏꦸꦮꦶ​ꦱꦶꦁ​ꦮꦶꦱ꧀ꦢꦶꦥꦁꦒꦶꦭ꧀꧈​ꦭꦤ꧀ꦮꦺꦴꦁ​ꦱꦶꦁ​ꦮꦶꦱ꧀ꦢꦶꦥꦁꦒꦶꦭ꧀ꦏꦸꦮꦶ​ꦮꦺꦴꦁ​ꦱꦶꦁ​ꦮꦶꦱ꧀ꦢꦶꦲꦁꦒꦼꦥ꧀ꦧꦼꦤꦼꦂ​ꦭꦤ꧀ꦢꦶꦠꦩ꧀ꦥ​꧉​ꦪ​ꦱꦶꦁ​ꦮꦶꦱ꧀ꦢꦶꦠꦩ꧀ꦥ​ꦲꦶꦏꦶ​ꦱꦶꦁ​ꦲꦸꦒ​ꦢꦶꦲꦁꦏꦠ꧀ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦢꦸꦮꦸꦂꦢꦺꦮꦺ꧈​ꦢꦢꦶ​ꦱꦶꦗꦶ​ꦏꦫꦺꦴ​ꦢꦺꦏ꧀ꦤꦺ꧉​

꧋ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦠꦼꦥ꧀ꦩꦤ꧀ꦠꦼꦥ꧀ꦏꦠꦿꦺꦱ꧀ꦤꦤꦺ꧈​ꦲꦺꦴꦫ​ꦧꦏꦭ꧀ꦩꦭꦶꦃ​꧉​

³¹꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦩꦶꦏꦶꦂꦫꦏꦺꦏꦸꦮꦶ​ꦩꦲꦸ​ꦏꦧꦺꦃ​꧈​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦔꦺꦴꦩꦺꦴꦁꦏꦼꦥꦿꦶꦪꦺ​?ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦿꦺꦮꦁꦔꦶ​ꦲꦮꦏ꧀ꦏꦺ​ꦢꦺꦮꦺ꧈​ꦱꦥ​ꦠ​ꦱꦶꦁ​ꦧꦶꦱ​ꦔꦭꦃꦲꦏꦺꦲꦮꦏ꧀ꦏꦺ​ꦢꦺꦮꦺ?ꦲꦺꦴꦫ​ꦲꦺꦤꦺꦁ! ³²ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦲꦺꦩꦤ꧀ꦩꦱꦿꦃꦲꦏꦺꦲꦤꦏ꧀ꦏꦺ​ꦢꦢꦶ​ꦏꦸꦂꦧꦤ꧀ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​꧉​ꦩꦺꦴꦱꦺꦴꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦧꦏꦭ꧀ꦔꦼꦏꦺꦏ꧀ꦏꦶꦱꦼꦩ꧀ꦧꦫꦁ​ꦱꦶꦁ​ꦢꦶꦧꦸꦠꦸꦃꦲꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ?ꦤꦺꦏ꧀ꦢꦺꦏ꧀ꦤꦺꦲꦺꦴꦫ​ꦲꦺꦩꦤ꧀ꦔꦼꦏꦺꦏ꧀ꦏꦏꦺꦲꦤꦏ꧀ꦏꦺ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦢꦺꦏ꧀ꦤꦺꦪ​ꦲꦺꦴꦫ​ꦧꦏꦭ꧀ꦲꦺꦩꦤ꧀ꦔꦼꦏꦺꦏ꧀ꦏꦏꦺꦱꦼꦩ꧀ꦧꦫꦁ​ꦭꦶꦪꦤꦺ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ ³³ꦭꦃ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦮꦶꦱ꧀ꦩꦶꦭꦶꦃ​ꦲꦮꦏ꧀ꦏꦺ​ꦢꦺꦮꦺ꧈​ꦲꦥ​ꦲꦺꦤꦺꦁꦮꦺꦴꦁ​ꦲꦸꦫꦶꦥ꧀ꦱꦶꦁ​ꦲꦶꦗꦶꦏ꧀ꦮꦤꦶ​ꦚꦭꦃꦚꦭꦃꦲꦏꦺꦲꦮꦏ꧀ꦏꦺ​ꦢꦺꦮꦺ?ꦏꦼꦥꦺꦔꦶꦤ꧀ꦔꦼꦂꦠꦶ​ꦲꦏꦸ​!ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀ꦔꦥꦸꦫ​ꦭꦤ꧀ꦤꦩ꧀ꦥ​ꦲꦮꦏ꧀ꦏꦺ​ꦢꦺꦮꦺ꧈​ꦲꦥ​ꦲꦺꦤꦺꦁꦮꦺꦴꦁ​ꦲꦸꦫꦶꦥ꧀ꦱꦶꦁ​ꦮꦤꦶ​ꦔꦺꦴꦩꦺꦴꦁꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦗꦶꦏ꧀ꦏꦸꦢꦸ​ꦚꦼꦠꦿꦥ꧀ꦲꦮꦏ꧀ꦏꦺ​ꦢꦺꦮꦺ? ³⁴ꦮꦶꦱ꧀ꦲꦺꦴꦫ​ꦥꦫ​ꦱꦼꦢꦸꦭꦸꦂ​꧈​ꦲꦮꦶꦠ꧀ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦤꦼꦧꦸꦱ꧀ꦱꦭꦃꦲꦺ​ꦲꦮꦏ꧀ꦏꦺ​ꦢꦺꦮꦺ꧉​ꦲꦺꦴꦫ​ꦤꦩꦸꦁ​ꦩꦠꦶ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧈​ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​ꦭꦤ꧀ꦱꦲꦶꦏꦶ​ꦢꦺꦏ꧀ꦤꦺꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦸꦫꦸꦱ꧀ꦱꦶ​ꦏꦥꦼꦂꦭꦸꦮꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧉​

³⁵꧋ꦥꦫ​ꦱꦼꦢꦸꦭꦸꦂ​꧈​ꦠꦏ꧀ꦏꦶꦫꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦥꦢ​ꦢꦸꦤꦸꦁꦤꦺꦏ꧀ꦲꦺꦴꦫ​ꦲꦺꦤꦺꦁꦲꦥꦲꦥ​ꦱꦶꦁ​ꦧꦶꦱ​ꦩꦼꦢꦺꦴꦠ꧀ꦲꦮꦏ꧀ꦏꦺ​ꦢꦺꦮꦺꦱꦁꦏꦏꦠꦿꦺꦱ꧀ꦤꦤꦺꦏꦿꦶꦱ꧀ꦡꦸꦱ꧀꧈​ꦲꦺꦴꦫ​ꦏꦱꦸꦱꦃꦲꦤ꧀ꦲꦥ​ꦉꦏꦱꦤꦺ​ꦲꦸꦫꦶꦥ꧀ ꦲꦺꦴꦫ​ꦥꦔꦤꦶꦪꦪ​꧈​ꦲꦺꦴꦫ​ꦏꦼꦩ꧀ꦭꦫꦠ꧀ꦠꦤ꧀ꦲꦥ​ꦏꦼꦏꦸꦫꦁꦔꦤ꧀ꦥꦔꦤ꧀ ꦲꦺꦴꦫ​ꦲꦭꦁꦔꦤ꧀ꦲꦥ​ꦥꦠꦶ​꧈​ꦧ꧀ꦭꦱ꧀ꦲꦺꦴꦫ​ꦲꦺꦤꦺꦁ! ³⁶ꦫꦠꦸ​ꦣꦮ꦳ꦼꦢ꧀ꦢꦺꦏ꧀​ꦩ꧀ꦧꦶꦪꦺꦤ꧀ꦪ​ꦮꦶꦱ꧀ꦠꦲꦸ​ꦱꦩ꧀ꦧꦠ꧀ ꦏꦪ​ꦱꦶꦁ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀​꧈​ꦲꦸꦤꦶꦤꦺ​ꦔꦺꦤꦺ​:

“ꦢꦸꦃ​ꦒꦸꦱ꧀ꦠꦶ​꧈​
ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦤꦸꦫꦸꦠ꧀ꦏꦺꦴꦮꦺ​꧈​
ꦱꦱꦠ꧀ꦠꦺꦱꦧꦼꦤ꧀ꦢꦶꦤ​ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦢꦶꦥꦠꦺꦤ꧀ꦤꦶ​
ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦱꦼꦔꦶꦠ꧀ꦏꦺꦴꦮꦺ​꧉​
ꦲꦺꦭꦶꦁ​​ꦲꦺꦭꦶꦁ​​ꦲꦮꦏ꧀ꦏꦺ​ꦢꦺꦮꦺ
ꦏꦪ​ꦮꦼꦢꦸꦱ꧀ꦱꦶꦁ​ꦲꦉꦥ꧀ꦢꦶꦧꦼꦭꦺꦃ​ꦏꦲꦺ​꧉​”

³⁷ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦧꦶꦱ​ꦩꦼꦤꦁꦔꦏꦺꦱꦼꦩ꧀ꦧꦫꦁ​ꦏꦸꦮꦶ​꧈​ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦤꦿꦺꦱ꧀ꦤꦤ꧀ꦤꦶꦲꦮꦏ꧀ꦏꦺ​ꦢꦺꦮꦺ꧈​ꦲꦸꦒ​ꦔꦿꦺꦮꦁꦔꦶ​ꦲꦮꦏ꧀ꦏꦺ​ꦢꦺꦮꦺ꧉​ ^38-39ꦩꦸꦭꦤꦺ​ꦲꦏꦸ​ꦔꦼꦂꦠꦶ​ꦤꦺꦏ꧀ꦲꦺꦴꦫ​ꦲꦺꦤꦺꦁꦥꦽꦏꦫ​ꦲꦥ​ꦮꦲꦺ​ꦧꦶꦱ​ꦩꦶꦱꦃ​ꦲꦏꦸ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦥꦠꦶ​꧈​ꦲꦺꦴꦫ​ꦉꦏꦱꦤꦺ​ꦲꦸꦫꦶꦥ꧀ ꦲꦺꦴꦫ​ꦩꦸꦭꦺꦏꦠ꧀ ꦲꦺꦴꦫ​ꦥꦔ꧀ꦮꦱ​꧈​ꦲꦺꦴꦫ​ꦗꦩꦤ꧀ꦱꦲꦶꦏꦶ​꧈​ꦲꦺꦴꦫ​ꦗꦩꦤ꧀ꦱꦶꦁ​ꦧꦏꦭ꧀​ꦏ꧀ꦭꦏꦺꦴꦤ꧀ ꦲꦺꦴꦫ​ꦏꦼꦏꦸꦮꦠ꧀ꦠꦤ꧀ ꦲꦺꦴꦫ​ ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦩꦸꦁꦒꦃ​ꦢꦸꦮꦸꦂꦲꦥ​ꦩꦼꦢꦸꦤ꧀ꦗꦼꦫꦸ꧈​ꦧ꧀ꦭꦱ꧀ꦲꦺꦴꦫ​ꦲꦺꦤꦺꦁꦲꦥꦲꦥ​ꦤꦁꦭꦔꦶꦠ꧀ꦭꦤ꧀ꦧꦸꦩꦶ​ꦱꦶꦁ​ꦧꦶꦱ​ꦩꦶꦱꦃ​ꦲꦮꦏ꧀ꦏꦺ​ꦢꦺꦮꦺꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦮꦶꦱ꧀ꦔꦼꦠꦺꦴꦏ꧀ꦏꦏꦺꦏꦠꦿꦺꦱ꧀ꦤꦤꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺꦭꦶꦮꦠ꧀ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​

↑ ↑ ↑

꧋ꦥꦽꦏꦫ​ꦱꦶꦁ​ꦩꦫꦏ꧀ꦏꦏꦺꦫꦱꦸꦭ꧀ꦦꦈꦭꦸꦱ꧀ꦱꦼꦢꦶ꧉​

꧇​꧙꧇​ ^1-2꧋ꦥꦫ​ꦱꦼꦢꦸꦭꦸꦂ​꧈​ꦲꦺꦤꦺꦁꦥꦽꦏꦫ​ꦱꦶꦗꦶ​ꦱꦶꦁ​ꦩꦫꦏ꧀ꦏꦏꦺꦲꦏꦸ​ꦗꦤ꧀ꦱꦼꦢꦶꦠꦼꦤꦤ꧀ ꦧꦫꦁ​ꦱꦶꦗꦶ​ꦱꦶꦁ​ꦠꦤ꧀ꦱꦃ​ꦤ꧀ꦢꦢꦺꦏ꧀ꦏꦏꦺꦭꦫꦤꦺ​ꦲꦠꦶꦏꦸ​꧉​ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦲꦺꦴꦫ​ꦒꦺꦴꦫꦺꦴꦃ​!ꦏꦿꦶꦱ꧀ꦡꦸꦱ꧀ꦢꦺꦮꦺꦢꦢꦶ​ꦱꦼꦏ꧀ꦱꦶꦏꦸ​ꦭꦤ꧀ꦫꦺꦴꦃ​ꦱꦸꦕꦶ​꧈​ꦱꦶꦁ​ꦔꦼꦂꦠꦶ​ꦥꦶꦏꦶꦂꦫꦤ꧀ꦏꦸ​꧈​ꦲꦸꦒ​ꦢꦢꦶ​ꦱꦼꦏ꧀ꦱꦶꦏꦸ​꧉​ꦧꦫꦁ​ꦱꦶꦗꦶ​ꦲꦶꦏꦶ​ꦱꦶꦁ​ꦩꦫꦏ꧀ꦏꦏꦺꦲꦏꦸ​ꦠꦤ꧀ꦱꦃ​ꦱꦼꦢꦶꦲꦶꦁ​ꦲꦠꦶ​꧈​ꦪꦏꦸꦮꦶ​꧈​ꦏꦲꦤꦤꦺꦧꦁꦱꦏꦸ​ꦢꦺꦮꦺ꧈​ꦧꦁꦱ​ꦆꦱꦿꦌꦭ꧀ ꦱꦶꦁ​ꦤꦩ꧀ꦥꦶꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ³ꦠꦼꦤꦤ꧀ꦥꦫ​ꦱꦼꦢꦸꦭꦸꦂ​꧈​ꦱꦼꦩꦸꦁꦒꦺꦴꦤ꧀ꦤꦺꦏꦼꦤꦺꦁꦔꦺꦴꦤꦺꦴ​ꦲꦏꦸ​ꦒꦼꦊꦩ꧀ꦢꦶꦥꦶꦱꦃ​ꦱꦁꦏꦏꦿꦶꦱ꧀ꦡꦸꦱ꧀ ꦤꦺꦏ꧀ꦏꦸꦮꦶ​ꦧꦶꦱ​ꦤꦸꦭꦸꦁꦔꦶ​ꦧꦁꦱꦏꦸ​꧉​ ⁴ꦮꦺꦴꦁꦮꦺꦴꦁ​ꦏꦸꦮꦶ​ꦏꦸꦫꦁ​ꦲꦥ​ꦩꦼꦤꦺꦃ​ꦠ​?ꦮꦸꦗꦸꦠ꧀ꦠꦺꦪ​ꦧꦁꦱ​ꦆꦱꦿꦌꦭ꧀ꦱꦶꦁ​ꦢꦶꦲꦏꦸꦲꦤꦏ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦚ꧀ꦭꦺꦴꦫꦺꦴꦠ꧀ꦠꦏꦺꦥꦼꦥꦢꦁꦔꦺꦩꦫꦁ​ꦧꦁꦱ​ꦲꦶꦏꦶ​ꦭꦤ꧀ꦪ​ꦮꦶꦱ꧀ꦢꦶꦏꦺꦏ꧀ꦏꦶꦥꦽꦗꦚ꧀ꦗꦶꦪꦤ꧀ꦥꦽꦗꦚ꧀ꦗꦶꦪꦤ꧀꧈​ꦮꦶꦱ꧀ꦢꦶꦥꦱꦿꦃꦲꦶ​ꦮꦺꦠ꧀ꦮꦺꦠ꧀ꦠꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦮꦶꦱ꧀ꦢꦶꦧ꧀ꦭꦗꦂꦫꦶꦚꦼꦩ꧀ꦧꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦱꦏ꧀ꦩꦼꦱ꧀ꦠꦶꦤꦺꦭꦤ꧀ꦪ​ꦮꦶꦱ꧀ꦢꦶꦏꦺꦏ꧀ꦏꦶꦗꦚ꧀ꦗꦶ​ꦤꦺꦏ꧀ꦧꦏꦭ꧀ꦢꦶꦧꦼꦂꦏꦃꦲꦶ​ꦭꦤ꧀ꦢꦶꦠꦸꦭꦸꦁꦔꦶ​꧉​ ⁵ꦮꦸꦗꦸꦠ꧀ꦠꦺꦪ​ꦠꦸꦫꦸꦤ꧀ꦠꦸꦫꦸꦤꦤ꧀ꦤꦺꦧꦥ​ꦄꦨꦿꦲꦩ꧀ ꦆꦱꦏ꧀ꦭꦤ꧀ꦪꦏꦸꦧ꧀ꦭꦤ꧀ꦱꦏ꧀ꦕꦫ​ꦩꦤꦸꦁꦱ​ꦏꦿꦶꦱ꧀ꦡꦸꦱ꧀ꦢꦺꦮꦺꦪ​ꦢꦢꦶ​ꦠꦸꦫꦸꦤ꧀ꦤꦤ꧀ꦤꦺ​꧉​ꦢꦺꦏ꧀ꦤꦺꦮꦸꦗꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦺꦏ꧀ꦤꦺꦱꦶꦁ​ꦔ꧀ꦮꦱꦤꦶ​ꦱꦼꦩ꧀ꦧꦫꦁ​꧉​ꦩꦸꦭꦤꦺ​ꦏꦿꦶꦱ꧀ꦡꦸꦱ꧀ꦥꦤ꧀ꦠꦼꦱ꧀ꦢꦶꦒꦸꦁꦒꦸꦁ​ꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦄꦩꦺꦤ꧀꧈​

⁶꧋ꦤꦁꦔꦶꦁ​ꦥꦫ​ꦱꦼꦢꦸꦭꦸꦂ​꧈​ꦱꦼꦤꦗꦤ꧀ꦧꦁꦱ​ꦆꦱꦿꦌꦭ꧀ꦤꦩ꧀ꦥꦶꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦏꦸ​ꦲꦺꦴꦫ​ꦔꦺꦴꦩꦺꦴꦁꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦢꦺꦴꦠ꧀ꦥꦽꦗꦚ꧀ꦗꦶꦪꦤ꧀ꦤꦺ​ꦩꦫꦁ​ꦧꦥ​ꦄꦨꦿꦲꦩ꧀ ꦲꦺꦴꦫ​꧉​ꦥꦚ꧀ꦕꦺꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦗꦚ꧀ꦗꦶ​ꦩꦫꦁ​ꦧꦥ​ꦄꦨꦿꦲꦩ꧀ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦲꦩ꧀ꦧꦼꦂꦏꦃꦲꦶ​ꦏꦧꦺꦃ​ꦧꦁꦱ​ꦭꦤ꧀ꦠꦂꦫꦤ꧀ꦧꦥ​ꦄꦨꦿꦲꦩ꧀ꦭꦤ꧀ꦠꦸꦫꦸꦤ꧀ꦠꦸꦫꦸꦤꦤ꧀ꦤꦺꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦩꦼꦢꦺꦴꦠ꧀ꦥꦽꦗꦚ꧀ꦗꦶꦪꦤ꧀ꦲꦶꦏꦶ​꧉​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​?ꦲꦮꦶꦠ꧀ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦗꦼꦤꦼꦁ​ꦲꦚꦂ​ꦩꦫꦁ​ꦪꦏꦸꦧ꧀꧈​ꦪꦏꦸꦧ꧀ꦗꦼꦤꦼꦁꦔꦺ​ꦩꦭꦶꦃ​ꦆꦱꦿꦌꦭ꧀꧈​ꦤꦁꦔꦶꦁ​ꦤꦺꦏ꧀ꦲꦏꦸ​ꦔꦺꦴꦩꦺꦴꦁꦧꦁꦱ​ꦆꦱꦿꦌꦭ꧀ ꦲꦏꦸ​ꦲꦺꦴꦫ​ꦔꦺꦴꦩꦺꦴꦁꦔꦏꦺꦠꦸꦫꦸꦤ꧀ꦠꦸꦫꦸꦤꦤ꧀ꦤꦺꦪꦏꦸꦧ꧀ꦩꦤꦸꦠ꧀ꦏꦼꦭꦲꦶꦂꦫꦤ꧀ꦤꦺ​꧈​ꦲꦺꦴꦫ​꧈​ꦤꦁꦔꦶꦁ​ꦏꦧꦺꦃ​ꦮꦺꦴꦁ​ꦱꦶꦁ​ꦢꦶꦲꦫꦤ꧀ꦤꦶ​ꦧꦁꦱ​ꦆꦱꦿꦌꦭ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​ ⁷ꦱꦼꦩꦺꦴꦤꦺꦴ​ꦲꦸꦒ​ꦤꦺꦏ꧀ꦲꦏꦸ​ꦔꦺꦴꦩꦺꦴꦁꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ ꦲꦏꦸ​ꦲꦺꦴꦫ​ꦔꦺꦴꦩꦺꦴꦁꦔꦏꦺꦠꦸꦫꦸꦤ꧀ꦠꦸꦫꦸꦤꦤ꧀ꦤꦺꦧꦥ​ꦄꦨꦿꦲꦩ꧀ꦱꦁꦏꦏꦼꦭꦲꦶꦂꦫꦤ꧀ꦤꦺ​꧈​ꦲꦺꦴꦫ​꧈​ꦤꦁꦔꦶꦁ​ꦏꦧꦺꦃ​ꦮꦺꦴꦁ​ꦱꦶꦁ​ꦢꦶꦲꦫꦤ꧀ꦤꦶ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦭꦃ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦧꦥ​ꦄꦨꦿꦲꦩ꧀:“ꦤꦩꦸꦁ​ꦠꦸꦫꦸꦤ꧀ꦤꦤ꧀ꦤꦺ​ꦆꦱꦏ꧀ꦧꦏꦭ꧀ꦠꦏ꧀ꦲꦁꦒꦼꦥ꧀ꦠꦸꦫꦸꦤꦤ꧀ꦩꦸ꧉​” ⁸ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦴꦤꦺꦴ​ꦩꦫꦁ​ꦧꦥ​ꦄꦨꦿꦲꦩ꧀ ꦢꦺꦏ꧀ꦤꦺꦤ꧀ꦢꦸꦤꦸꦁꦔꦏꦺꦤꦺꦏ꧀ꦲꦺꦴꦫ​ꦮꦺꦴꦁ​ꦱꦶꦁ​ꦢꦢꦶ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦱꦁꦏꦏꦼꦭꦲꦶꦂꦫꦤ꧀ꦤꦺ​ꦱꦶꦁ​ꦢꦶꦲꦫꦤ꧀ꦤꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​꧈​ꦤꦁꦔꦶꦁ​ꦮꦺꦴꦁ​ꦱꦶꦁ​ꦢꦶꦲꦫꦤ꧀ꦤꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦮꦺꦴꦁ​ꦱꦶꦁ​ꦭꦲꦶꦂꦫꦺ​ꦩꦶꦠꦸꦫꦸꦠ꧀ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦧꦥ​ꦄꦨꦿꦲꦩ꧀꧈​ ⁹ꦮꦸꦗꦸꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦧꦥ​ꦄꦨꦿꦲꦩ꧀:“ꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦶꦱ꧀ꦥꦼꦤꦼꦂꦮꦏ꧀ꦠꦸꦩꦸ꧈​ꦲꦏꦸ​ꦧꦏꦭ꧀ꦠꦼꦏ​ꦩꦼꦤꦺꦃ​ꦭꦤ꧀ꦲꦶꦧꦸ​ꦱꦫꦃ​ꦧꦏꦭ꧀​ꦔ꧀ꦭꦲꦶꦂꦫꦏꦺꦲꦤꦏ꧀ꦭꦤꦁ​꧉​”

¹⁰꧋ꦏꦫꦺꦴꦩꦼꦤꦺꦃ​꧈​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦶꦧꦸ​ꦬꦼꦧꦺꦏꦃꦧꦺꦴꦗꦺꦴꦤꦺ​ꦧꦥ​ꦆꦱꦏ꧀꧈​ꦱꦁꦏꦧꦥ​ꦆꦱꦏ꧀ꦲꦶꦧꦸ​ꦬꦼꦧꦺꦏꦃꦔ꧀ꦭꦲꦶꦂꦫꦏꦺꦲꦤꦏ꧀ꦭꦤꦁ​ꦭꦺꦴꦫꦺꦴ​꧈​ꦪꦏꦸꦮꦶ​ꦌꦱꦲꦸ​ꦭꦤ꧀ꦪꦏꦸꦧ꧀꧈​ ¹¹ꦤꦁꦔꦶꦁ​ꦱꦏ꧀ꦢꦸꦫꦸꦁꦔꦺꦧꦺꦴꦕꦃ​ꦭꦺꦴꦫꦺꦴ​ꦩꦲꦸ​ꦭꦲꦶꦂ​꧈​ꦢꦢꦶꦤꦺ​ꦱꦏ꧀ꦢꦸꦫꦸꦁꦔꦺꦧꦺꦴꦕꦃ​ꦭꦺꦴꦫꦺꦴ​ꦩꦲꦸ​ꦤꦶꦤ꧀ꦢꦏ꧀ꦏꦏꦺꦲꦭ​ꦲꦥ​ꦧꦼꦕꦶꦏ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦩꦶꦭꦶꦃ​ꦱꦶꦁ​ꦱꦶꦗꦶ​ꦏꦁꦒꦺꦴ​ꦤꦸꦫꦸꦠ꧀ꦠꦶ​ꦥꦽꦗꦚ꧀ꦗꦶꦪꦤ꧀ꦤꦺ​ꦩꦫꦁ​ꦧꦥ​ꦄꦨꦿꦲꦩ꧀ꦭꦤ꧀ꦠꦸꦫꦸꦤ꧀ꦠꦸꦫꦸꦤꦤ꧀ꦤꦺ꧉​ ¹²ꦢꦢꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦼꦁꦒꦺꦴꦤꦺ​ꦩꦶꦭꦶꦃ​ꦏꦸꦮꦶ​ꦲꦺꦴꦫ​ꦩꦶꦠꦸꦫꦸꦠ꧀ꦲꦥ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦱꦭꦃꦱꦶꦗꦶꦤꦺ​ꦲꦤꦏ꧀ꦭꦤꦁ​ꦩꦲꦸ​꧈​ꦲꦺꦴꦫ​꧈​ꦤꦁꦔꦶꦁ​ꦢꦺꦏ꧀ꦤꦺꦤꦩꦸꦁ​ꦩꦶꦭꦶꦃ​ꦱꦶꦗꦶ​ꦱꦏ꧀ꦏꦉꦥ꧀ꦥꦺ​ꦢꦺꦏ꧀ꦤꦺꦢꦺꦮꦺ꧉​ꦱꦏ꧀ꦢꦸꦫꦸꦁꦔꦺꦲꦶꦧꦸ​ꦬꦼꦧꦺꦏꦃꦔ꧀ꦭꦲꦶꦂꦫꦏꦺꦲꦤꦏ꧀ꦏꦼꦩ꧀ꦧꦂ​ꦩꦲꦸ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦢꦺꦏ꧀ꦤꦺ:“ꦱꦶꦁ​ꦠꦸꦮ​ꦧꦏꦭ꧀ꦢꦢꦶ​ꦥꦼꦭꦢꦺꦤ꧀ꦤꦺ​ꦱꦶꦁ​ꦲꦼꦤꦺꦴꦩ꧀!” ¹³ꦭꦤ꧀ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦪ​ꦕꦺꦴꦕꦺꦴꦏ꧀​ꦏꦫꦺꦴ​ꦠꦼꦩ꧀ꦧꦸꦁ​ꦭꦶꦪꦤꦺ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦪꦏꦸꦧ꧀ꦥꦚ꧀ꦕꦺꦤ꧀ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦤꦁꦔꦶꦁ​ꦌꦱꦲꦸ​ꦠꦏ꧀ꦠꦩ꧀ꦥꦶꦏ꧀꧈​”

¹⁴꧋ꦭꦺꦴ​꧈​ꦤꦺꦏ꧀ꦔꦺꦴꦤꦺꦴ​ꦲꦥ​ꦒꦸꦱ꧀ꦠꦶ​ꦄꦭ꧀ꦭꦃ​ꦥꦶꦭꦶꦃꦱꦶꦃ?ꦲꦺꦴꦫ​꧈​ꦧ꧀ꦭꦱ꧀ꦲꦺꦴꦫ​! ¹⁵ꦮꦸꦗꦸꦠ꧀ꦠꦺꦢꦺꦴꦁꦔꦺꦠꦸꦫꦸꦤ꧀ꦠꦸꦫꦸꦤꦤ꧀ꦤꦺꦧꦥ​ꦪꦏꦸꦧ꧀ꦤꦶꦁꦒꦭ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦚꦼꦩ꧀ꦧꦃ​ꦉꦕ​ꦥꦼꦢꦺꦠ꧀ꦲꦼꦩꦱ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦤꦧꦶ​ꦩꦺꦴꦱꦼꦱ꧀:“ꦲꦏꦸ​ꦧꦏꦭ꧀ꦩꦼꦭꦱ꧀ꦱꦶ​ꦱꦥ​ꦮꦲꦺ​ꦱꦏ꧀ꦏꦉꦥ꧀ꦏꦸ​ꦭꦤ꧀ꦲꦏꦸ​ꦧꦏꦭ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦏꦸ​ꦩꦫꦁ​ꦱꦥ​ꦮꦲꦺ​ꦱꦏ꧀ꦏꦉꦥ꧀ꦏꦸ​!” ¹⁶ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦢꦸꦤꦸꦁꦲꦶꦏꦶ​:ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦗꦶ​ꦮꦺꦴꦁ​ꦏꦺꦴꦁꦏꦺꦴꦤ꧀ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​꧈​ꦲꦺꦴꦫ​ꦢꦢꦶ​ꦱꦼꦧꦧ꧀ꦮꦺꦴꦁ​ꦏꦸꦮꦶ​ꦏꦉꦥ꧀ꦲꦥ​ꦲꦺꦴꦫ​꧈​ꦲꦥ​ꦮꦺꦴꦁ​ꦏꦸꦮꦶ​ꦠꦼꦩꦼꦤ꧀ꦲꦥ​ꦲꦺꦴꦫ​꧉​ꦤꦁꦔꦶꦁ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦗꦶ​ꦮꦺꦴꦁ​꧈​ꦏꦸꦮꦶ​ꦗꦭꦂꦫꦤ꧀ꦢꦺꦏ꧀ꦤꦺꦏꦼꦥꦺꦔꦶꦤ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦮꦺꦴꦁ​ꦏꦸꦮꦶ​꧉​ ¹⁷ꦮꦸꦗꦸꦠ꧀ꦠꦺꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦁꦏꦺꦴꦤ꧀ꦤꦧꦶ​ꦩꦺꦴꦱꦼꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦫꦠꦸꦤꦺ​ꦤꦼꦒꦫ​ꦌꦒꦶꦥ꧀ꦠꦼ:“ꦏꦺꦴꦮꦺ​ꦠꦏ꧀ꦭꦶꦭꦤꦶ​ꦢꦢꦶ​ꦫꦠꦸ​ꦠꦼꦏꦤꦺ​ꦱꦼꦥꦿꦺꦤꦺ​ꦏꦸꦮꦶ​꧈​ꦱꦸꦥꦪ​ꦏꦺꦴꦮꦺ​ꦮꦼꦫꦸꦃ​ꦏ꧀ꦮꦱꦏꦸꦭꦤ꧀ꦱꦸꦥꦪ​ꦗꦒꦠ꧀ꦔꦼꦂꦠꦶ​ꦤꦺꦏ꧀ꦲꦏꦸ​ꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​” ¹⁸ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦱꦲꦶꦏꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦭꦱ꧀ꦱꦶ​ꦱꦥ​ꦮꦲꦺ​ꦱꦏ꧀ꦏꦉꦥ꧀ꦥꦺ​ꦭꦤ꧀ꦔꦠꦺꦴꦱ꧀ꦱꦏꦺꦲꦠꦶꦤꦺ​ꦱꦥ​ꦮꦲꦺ​ꦱꦏ꧀ꦏꦉꦥ꧀ꦥꦺ​꧉​

¹⁹꧋ꦭꦃ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦠꦺꦴꦱ꧀ꦱꦏꦺꦲꦠꦶꦤꦺ​ꦮꦺꦴꦁ​꧈​ꦠꦶꦧꦏꦺ​ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦏꦼꦤꦺꦁꦢꦶꦱꦭꦃꦲꦏꦺꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦤ꧀ꦢꦼꦤ꧀ꦢꦼꦁ꧈​ꦲꦮꦶꦠ꧀ꦲꦶꦏꦸ​ꦗꦫꦺꦤꦺ​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦃ​ꦱꦥ​ꦱꦶꦁ​ꦧꦶꦱ​ꦔꦭꦁꦔꦭꦁꦔꦶꦢꦺꦏ꧀ꦤꦺ? ²⁰ꦲꦺꦴꦫ​ꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦮꦶ​ꦱꦥ​ꦠ​ꦏꦺꦴꦏ꧀ꦮꦤꦶ​ꦩꦲꦶꦢꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​?ꦲꦥ​ꦏꦶꦫꦏꦶꦫ​ꦏꦼꦤ꧀ꦢꦶꦏꦲꦺ​ꦮꦤꦶ​ꦔꦺꦴꦩꦺꦴꦁꦏꦫꦺꦴ​ꦱꦶꦁ​ꦠꦸꦏꦁ​ꦔ꧀ꦒꦮꦺ​:“ꦭꦃ​ꦲꦏꦸ​ꦏꦺꦴꦏ꧀ꦲꦩ꧀ꦧꦺꦴꦏ꧀ꦒꦮꦺ​ꦏꦪ​ꦔꦺꦤꦺ​?” ²¹ꦠꦏ꧀ꦏꦶꦫꦏꦺꦴꦮꦺ​ꦩꦭꦃ​ꦱꦼꦠꦸꦗꦸ​ꦏꦫꦺꦴ​ꦲꦏꦸ​꧈​ꦤꦺꦏ꧀ꦱꦶꦁ​ꦠꦸꦏꦁ​ꦔ꧀ꦒꦮꦺ​ꦏꦼꦤ꧀ꦢꦶꦩꦲꦸ​ꦏꦼꦤꦺꦁꦔ꧀ꦒꦮꦺ​ꦏꦼꦤ꧀ꦢꦶꦩꦲꦸ​ꦱꦏ꧀ꦏꦉꦥ꧀ꦥꦺ​꧉​ꦱꦁꦏꦊꦩꦃ​ꦊꦩ꧀ꦥꦸꦁ​ꦱꦏ꧀ꦏꦼꦥꦼꦭ꧀ꦮꦺꦴꦁꦔꦺ​ꦧꦶꦱ​ꦔ꧀ꦒꦮꦺ​ꦏꦼꦤ꧀ꦢꦶꦱꦶꦁ​ꦭꦫꦁ​ꦉꦒꦤꦺ​ꦲꦥ​ꦏꦼꦤ꧀ꦢꦶꦱꦶꦁ​ꦩꦸꦫꦃ​꧉​

²²꧋ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦏꦪ​ꦮꦺꦴꦁ​ꦱꦶꦁ​ꦠꦸꦏꦁ​ꦔ꧀ꦒꦮꦺ​ꦏꦼꦤ꧀ꦢꦶꦏꦸꦮꦶ​꧉​ꦢꦺꦏ꧀ꦤꦺꦧꦶꦱ​ꦔꦼꦠꦺꦴꦏ꧀ꦏꦏꦺꦤꦼꦱꦸꦤꦺꦭꦤ꧀ꦢꦺꦏ꧀ꦤꦺꦲꦸꦒ​ꦧꦶꦱ​ꦔꦼꦠꦺꦴꦏ꧀ꦏꦏꦺꦏ꧀ꦮꦱꦤꦺ​꧉​ ²³ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦔꦼꦠꦺꦴꦏ꧀ꦏꦏꦺꦒꦼꦢꦺꦤꦺꦏꦮꦼꦭꦱ꧀ꦱꦤ꧀ꦤꦺ​ꦩꦫꦁ​ꦱꦥ​ꦮꦲꦺ​ꦱꦶꦁ​ꦩꦫꦏ꧀ꦏꦏꦺꦤꦼꦱꦸ​ꦭꦤ꧀ꦏꦸꦢꦸ​ꦢꦶꦱꦼꦠꦿꦥ꧀ꦭꦤ꧀ꦢꦶꦫꦸꦱꦏ꧀ ꦱꦸꦥꦪ​ꦢꦺꦏ꧀ꦤꦺꦧꦶꦱ​ꦔꦼꦠꦺꦴꦏ꧀ꦏꦏꦺꦱꦼꦥꦶꦫ​ꦒꦼꦢꦺꦤꦺꦏꦮꦼꦭꦱ꧀ꦱꦤ꧀ꦤꦺ​ꦩꦫꦁ​ꦱꦥ​ꦮꦲꦺ​ꦱꦶꦁ​ꦮꦶꦱ꧀ꦢꦶꦥꦶꦭꦶꦃ​ꦱꦏ꧀ꦢꦸꦫꦸꦁꦔꦺꦭꦤ꧀ꦱꦶꦁ​ꦧꦏꦭ꧀ꦢꦶꦲꦁꦏꦠ꧀ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦢꦸꦮꦸꦂꦢꦺꦮꦺ꧈​ꦢꦢꦶ​ꦱꦶꦗꦶ​ꦏꦫꦺꦴ​ꦢꦺꦏ꧀ꦤꦺ꧉​ ²⁴ꦪꦏꦸꦮꦶ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧈​ꦱꦶꦁ​ꦮꦶꦱ꧀ꦢꦶꦥꦁꦒꦶꦭ꧀ ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦤꦩꦸꦁ​ꦩꦁꦒꦶꦭ꧀ꦱꦁꦏꦠꦼꦔꦃꦲꦺ​ꦧꦁꦱ​ꦙꦸ꧈​ꦤꦁꦔꦶꦁ​ꦲꦸꦒ​ꦱꦁꦏꦧꦁꦱ​ꦭꦶꦪꦤꦺ​꧉​ ²⁵ꦮꦸꦗꦸꦠ꧀ꦠꦺꦤꦧꦶ​ꦲ꦳ꦺꦴꦱꦺꦪ​ꦢꦺꦏ꧀ꦗꦩꦤ꧀​ꦩ꧀ꦧꦶꦪꦺꦤ꧀ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦺꦤꦺ​:

“ꦱꦶꦁ​ꦢꦸꦢꦸ​ꦲꦸꦩꦠ꧀ꦏꦸ​ꦧꦏꦭ꧀ꦠꦏ꧀ꦕꦼꦭꦸꦏ꧀​ꦲꦸꦩꦠ꧀ꦏꦸ​
ꦭꦤ꧀ꦱꦶꦁ​ꦩꦲꦸꦤꦺ​ꦲꦺꦴꦫ​ꦔꦿꦱꦏ꧀ꦏꦏꦺ​ꦏꦠꦿꦺꦱ꧀ꦤꦤ꧀ꦏꦸ
ꦱꦲꦶꦏꦶ​ꦠꦏ꧀ꦕꦼꦭꦸꦏ꧀​ꦮꦺꦴꦁ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧉​”

²⁶ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦔꦺꦴꦩꦺꦴꦁꦔꦺꦤꦺ​ꦭꦤ꧀ꦠꦂꦫꦤ꧀ꦤꦧꦶ​ꦲ꦳ꦺꦴꦱꦺꦪ​:

“ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦢꦺꦏ꧀ꦤꦺꦩ꧀ꦧꦶꦪꦺꦤ꧀
ꦔꦺꦴꦩꦺꦴꦁꦤꦺꦏ꧀ꦮꦺꦴꦁꦮꦺꦴꦁ​ꦏꦸꦮꦶ​ꦢꦸꦢꦸ​ꦲꦸꦩꦠ꧀ꦠꦺ​꧈​
ꦪ​ꦤꦁꦥꦁꦒꦺꦴꦤ꧀ꦤꦤ꧀ꦏꦸꦮꦶ​
ꦮꦺꦴꦁꦮꦺꦴꦁ​ꦧꦏꦭ꧀ꦢꦶꦲꦏꦸꦲꦤꦏ꧀
ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀꧈​”

²⁷꧋ꦤꦁꦔꦶꦁ​ꦏꦁꦒꦺꦴ​ꦧꦁꦱ​ꦆꦱꦿꦌꦭ꧀ꦤꦧꦶ​ꦪꦺꦱꦪ​ꦔꦺꦴꦩꦺꦴꦁꦔꦺꦤꦺ​:“ꦱꦼꦤꦗꦤ꧀ꦧꦁꦱ​ꦆꦱꦿꦌꦭ꧀ꦲꦺꦴꦏꦺꦃꦲꦺꦏꦪ​ꦱꦤ꧀ꦠꦶꦤꦺꦱꦼꦒꦫ​꧈​ꦤꦁꦔꦶꦁ​ꦱꦶꦁ​ꦧꦏꦭ꧀ꦢꦶꦱ꧀ꦭꦩꦼꦠ꧀ꦠꦏꦺꦤꦩꦸꦁ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧉​ ²⁸ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦚꦼꦠꦿꦥ꧀ꦏꦧꦺꦃ​ꦮꦺꦴꦁ​ꦱꦶꦁ​ꦩꦁꦒꦺꦴꦤ꧀ꦤꦁꦏꦺꦴꦤꦺꦴ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦼꦁꦒꦺꦴꦤꦺ​ꦤꦶꦤ꧀ꦢꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦏꦸꦮꦶ​ꦩꦲꦸ​ꦪ​ꦒꦼꦭꦶꦱ꧀ꦭꦤ꧀ꦠꦼꦤꦤ꧀ꦤꦤ꧀꧈​” ²⁹ꦱꦏ꧀ꦢꦸꦫꦸꦁꦔꦺꦤꦧꦶ​ꦪꦺꦱꦪ​ꦪ​ꦮꦶꦱ꧀ꦔꦺꦴꦩꦺꦴꦁꦔꦺꦤꦺ​:“ꦱꦼꦩꦸꦁꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦒꦼꦢꦺꦏ꧀ꦮꦱꦤꦺ​ꦲꦺꦴꦫ​ꦤꦶꦁꦒꦭ꧀ꦭꦶ​ꦠꦸꦫꦸꦤ꧀ꦤꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦲꦮꦏ꧀ꦏꦺ​ꦢꦺꦮꦺꦩꦼꦱ꧀ꦠꦶꦮꦶꦱ꧀ꦢꦢꦶ​ꦏꦪ​ꦏꦸꦠꦏꦸꦠꦱꦺꦴꦢꦺꦴꦩ꧀ꦭꦤ꧀ꦓꦺꦴꦩꦺꦴꦫꦃ꧉​”

꧋ꦧꦁꦱ​ꦆꦱꦿꦌꦭ꧀ꦲꦺꦴꦫ​ꦥꦽꦕꦪ​꧉​

³⁰꧋ꦢꦢꦶꦤꦺ​ꦲꦥ​ꦠ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦥꦫ​ꦱꦼꦢꦸꦭꦸꦂ​?ꦱꦶꦁ​ꦢꦶꦲꦺꦴꦩꦺꦴꦁꦪ​ꦲꦶꦏꦶ​:ꦧꦁꦱꦧꦁꦱ​ꦱꦶꦁ​ꦲꦺꦴꦫ​ꦥꦢ​ꦔ꧀ꦭꦸꦩꦸꦃꦲꦶꦱꦸꦥꦪ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦭꦃ​ꦥꦢ​ꦏꦼꦠꦩ꧀ꦥ꧈​ꦗꦭꦂꦫꦤ꧀ꦥꦢ​ꦥꦽꦕꦪ​꧉​ ³¹ꦤꦁꦔꦶꦁ​ꦧꦁꦱ​ꦆꦱꦿꦌꦭ꧀ꦱꦶꦁ​ꦥꦢ​ꦔ꧀ꦭꦸꦩꦸꦃꦲꦶꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ ꦲꦮꦶꦠ꧀ꦩꦶꦏꦶꦫꦺꦏꦸꦮꦶ​ꦧꦶꦱ​ꦩꦫꦏ꧀ꦏꦏꦺꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦁꦱ​ꦏꦸꦮꦶ​ꦩꦭꦃ​ꦲꦺꦴꦫ​ꦏꦼꦠꦩ꧀ꦥꦗꦭꦂꦫꦤ꧀ꦱꦁꦏꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦏꦸꦮꦶ​꧉​ ³²ꦭꦃ​ꦏꦼꦤꦺꦁꦲꦥ​ꦏꦺꦴꦏ꧀ꦲꦺꦴꦫ​ꦏꦼꦠꦩ꧀ꦥ?ꦗꦭꦂꦫꦤ꧀ꦲꦺꦴꦫ​ꦔꦁꦒꦺꦴ​ ꦥꦽꦕꦪ​꧈​ꦤꦁꦔꦶꦁ​ꦥꦢ​ꦚ꧀ꦗꦒꦏ꧀ꦏꦏꦺꦲꦥ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺ꧉​ꦢꦢꦶꦤꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦏꦪ​ꦮꦺꦴꦁ​ꦩ꧀​ꦧ꧀ꦭꦪꦸ꧈​ꦤꦁꦔꦶꦁ​ꦤ꧀​ꦢ꧀ꦭꦺꦔꦺꦂ꧈​ꦠꦼꦫꦸꦱ꧀ꦏꦼꦱꦤ꧀ꦢꦸꦁꦮꦠꦸ​ꦠꦶꦧ​꧉​ ³³ꦤꦁ​ꦏꦶꦠꦧ꧀​ꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:

“ꦢꦼꦭꦺꦴꦏ꧀ꦏꦼꦤ꧀ ꦤꦁꦏꦸꦠꦱꦶꦪꦺꦴꦤ꧀ꦠꦏ꧀ꦥꦱꦁꦔꦶ​ꦮꦠꦸ​
ꦱꦶꦁ​ꦩꦫꦏ꧀ꦏꦏꦺꦮꦺꦴꦁ​ꦏꦼꦱꦤ꧀ꦢꦸꦁꦭꦤ꧀ꦠꦶꦧ​꧉​
ꦤꦁꦔꦶꦁ​ꦱꦥ​ꦱꦶꦁ​ꦚ꧀ꦗꦒꦏ꧀ꦏꦏꦺꦮꦠꦸ​ꦏꦸꦮꦶ​
ꦲꦺꦴꦫ​ꦧꦏꦭ꧀ꦏꦶꦱꦶꦤ꧀ꦤꦤ꧀꧉”

ꦮꦠꦸꦤꦁꦏꦸꦠꦱꦶꦪꦺꦴꦤ꧀ꦏꦸꦮꦶ​ꦪ​ꦲꦺꦴꦫ​ꦭꦶꦪ​ꦏꦼꦗꦧ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​)

↑ ↑ ↑

꧋ꦥꦤꦸꦮꦸꦤ꧀ꦤꦺꦫꦱꦸꦭ꧀ꦦꦈꦭꦸꦱ꧀꧈​

꧇​꧑꧐꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦥꦩꦸꦗꦶꦏꦸ​ꦲꦶꦁ​ꦲꦠꦶ​ꦭꦤ꧀ꦥꦤ꧀ꦢꦺꦴꦔꦏꦸ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦲꦺꦴꦫ​ꦭꦶꦪ​ꦤꦩꦸꦁ​ꦲꦶꦏꦶ​:ꦲꦩ꧀ꦧꦺꦴꦏ꧀ꦧꦁꦱꦏꦸ​ꦧꦶꦱ​ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀꧈​ ²ꦲꦏꦸ​ꦥꦚ꧀ꦕꦺꦤ꧀ꦚꦼꦏ꧀ꦱꦺꦤ꧀ꦤꦶ​ꦢꦺꦮꦺꦤꦺꦏ꧀ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦔꦧꦼꦏ꧀ꦠꦶ​ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦥꦔꦧꦼꦏ꧀ꦠꦶꦤꦺ​ꦲꦺꦴꦫ​ꦔꦁꦒꦺꦴ​ꦏꦮꦼꦫꦸꦃꦱꦶꦁ​ꦧꦼꦤꦼꦂ​꧉​ ³ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦴꦫ​ꦥꦢ​ꦔꦼꦂꦠꦶ​ꦏꦼꦥꦿꦶꦪꦺ​ꦕꦫꦤꦺ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩ꧀ꦧꦼꦤꦼꦂꦫꦏꦺꦩꦤꦸꦁꦱ​꧈​ꦱꦸꦥꦪ​ꦧꦶꦱ​ꦏꦼꦠꦩ꧀ꦥ꧉​ꦮꦺꦴꦁꦮꦺꦴꦁ​ꦩꦲꦸ​ꦥꦢ​ꦚ꧀ꦗꦗꦭ꧀​ꦔ꧀ꦒꦺꦴꦭꦺꦏ꧀ꦢꦭꦤ꧀ꦢꦺꦮꦺ꧈​ꦩꦶꦏꦶꦫꦺ꧈​ꦤꦺꦏ꧀ꦥꦢ​ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦭꦤ꧀ꦥꦼꦂꦤꦠꦤ꧀ꦤꦺꦲꦒꦩ​꧈​ꦧꦏꦭ꧀ꦢꦶꦠꦩ꧀ꦥ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦸꦭꦤꦺ​ꦲꦺꦴꦫ​ꦒꦼꦊꦩ꧀ꦤꦸꦫꦸꦠ꧀ꦢꦭꦤ꧀ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​ꦭꦤ꧀ꦠꦂꦫꦤ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ⁴ꦲꦮꦶꦠ꧀ꦏꦿꦶꦱ꧀ꦡꦸꦱ꧀ꦏꦸꦮꦶ​ꦮꦶꦱ꧀ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀ꦠꦺꦲꦒꦩ​꧉​ꦩꦤꦸꦁꦱ​ꦧꦶꦱꦤꦺ​ꦢꦶꦲꦁꦒꦼꦥ꧀ꦧꦼꦤꦼꦂ​ꦭꦤ꧀ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦏꦸꦢꦸ​ꦥꦽꦕꦪ​ꦩꦫꦁ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

꧋ꦧꦶꦱꦤꦺ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦭꦤ꧀ꦠꦂꦫꦤ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

⁵꧋ꦤꦧꦶ​ꦩꦺꦴꦱꦼꦱ꧀ꦔꦺꦴꦩꦺꦴꦁꦔꦺꦤꦺ​ꦧꦧ꧀ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦂꦫꦤ꧀ꦤꦼꦠꦼꦥ꧀ꦥꦶ​ꦮꦺꦠ꧀ꦮꦺꦠ꧀:“ꦱꦥ​ꦮꦲꦺ​ꦱꦶꦁ​ꦤꦼꦠꦼꦥ꧀ꦥꦶ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​꧈​ꦗꦭꦂꦫꦤ꧀ꦱꦁꦏꦮꦺꦠ꧀ꦮꦺꦠ꧀ꦠꦺꦏꦸꦮꦶ​꧉​” ⁶ꦤꦁꦔꦶꦁ​ꦧꦧ꧀ꦮꦺꦴꦁ​ꦱꦶꦁ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦂꦫꦤ꧀ꦥꦽꦕꦪ​ꦠꦼꦩ꧀ꦧꦸꦁꦔꦺ​ꦤꦧꦶ​ꦩꦺꦴꦱꦼꦱ꧀ꦔꦺꦤꦺ​:“ꦲꦗ​ꦩꦶꦏꦶꦂ​:ꦱꦥ​ꦱꦶꦁ​ꦧꦏꦭ꧀ꦩꦸꦁꦒꦃ​ꦤꦁꦱ꧀ꦮꦂꦒ​?”ꦤꦁꦏꦺꦤꦺ​ꦤꦧꦶ​ꦩꦺꦴꦱꦼꦱ꧀ꦱꦏ꧀ꦗꦤꦺꦔꦺꦴꦩꦺꦴꦁꦤꦺꦏ꧀ꦲꦺꦴꦫ​ꦲꦸꦱꦃꦲꦺꦤꦺꦁꦮꦺꦴꦁ​ꦩꦸꦁꦒꦃ​ꦩꦫꦤꦶ​ꦏꦿꦶꦱ꧀ꦡꦸꦱ꧀ꦢꦶꦒꦮ​ꦩꦼꦢꦸꦤ꧀ ꦱꦸꦥꦪ​ꦏꦿꦶꦱ꧀ꦡꦸꦱ꧀ꦧꦶꦱ​ꦤ꧀ꦢꦸꦤꦸꦁꦔꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦏꦼꦥꦿꦶꦪꦺ​ꦧꦶꦱꦤꦺ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁷ꦤꦧꦶ​ꦩꦺꦴꦱꦼꦱ꧀ꦲꦸꦒ​ꦔꦺꦴꦩꦺꦴꦁꦔꦺꦤꦺ​:“ꦲꦗ​ꦩꦶꦏꦶꦂ​:ꦱꦥ​ꦱꦶꦁ​ꦧꦏꦭ꧀ꦩꦼꦢꦸꦤ꧀ꦤꦁꦥꦁꦒꦺꦴꦤ꧀ꦤꦤ꧀ꦤꦺ​ꦮꦺꦴꦁ​ꦩꦠꦶ​?”ꦤꦁꦏꦺꦤꦺ​ꦤꦧꦶ​ꦩꦺꦴꦱꦼꦱ꧀ꦱꦏ꧀ꦗꦤꦺꦔꦺꦴꦩꦺꦴꦁꦤꦺꦏ꧀ꦲꦺꦴꦫ​ꦲꦸꦱꦃꦲꦺꦤꦺꦁꦮꦺꦴꦁ​ꦩꦼꦢꦸꦤ꧀ꦤꦁꦠꦼꦔꦃꦲꦺ​ꦮꦺꦴꦁ​ꦩꦠꦶ​ꦭꦤ꧀​ꦔ꧀ꦒꦮ​ꦏꦿꦶꦱ꧀ꦡꦸꦱ꧀ꦩꦸꦁꦒꦃ​ꦩꦼꦤꦺꦃ​꧈​ꦱꦸꦥꦪ​ꦔꦺꦴꦩꦺꦴꦁꦔꦶꦲꦮꦏ꧀ꦏꦺ​ꦢꦺꦮꦺꦏꦼꦥꦿꦶꦪꦺ​ꦧꦶꦱꦤꦺ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦺꦴꦫ​ꦧꦼꦤꦼꦂ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦩꦶꦏꦶꦂ​ꦔꦺꦴꦤꦺꦴ​꧈​ꦲꦮꦶꦠ꧀ꦮꦸꦗꦸꦠ꧀ꦠꦺꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦼꦢꦸꦤ꧀ꦤꦁꦗꦒꦠ꧀ꦏꦺꦤꦺ​ꦭꦤ꧀ꦢꦺꦏ꧀ꦤꦺꦲꦸꦒ​ꦮꦶꦱ꧀ꦠꦔꦶ​ꦩꦼꦤꦺꦃ​ꦱꦁꦏꦥꦠꦶ​꧉​ ⁸ꦤꦁꦔꦶꦁ​ꦤꦧꦶ​ꦩꦺꦴꦱꦼꦱ꧀ꦩꦭꦃ​ꦔꦺꦴꦩꦺꦴꦁꦔꦺꦤꦺ​ꦥꦫ​ꦱꦼꦢꦸꦭꦸꦂ​:“ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦕꦼꦢꦼꦏ꧀​ꦏꦫꦺꦴ​ꦏꦺꦴꦮꦺ​꧈​ꦲꦤ​ꦲꦶꦁ​ꦭꦩ꧀ꦧꦺꦩꦸ​ꦭꦤ꧀ꦲꦤ​ꦲꦶꦁ​ꦲꦠꦶꦩꦸ​꧉”ꦠꦼꦒꦼꦱ꧀ꦱꦺ​꧈​ꦏꦧꦺꦃ​ꦮꦺꦴꦁ​ꦒꦩ꧀ꦥꦁ​ꦩꦔꦼꦂꦠꦺꦤ꧀ꦤꦶꦏꦼꦥꦿꦶꦪꦺ​ꦩꦤꦸꦁꦱ​ꦧꦶꦱꦤꦺ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦺꦴꦫ​ꦲꦔꦺꦭ꧀ꦢꦸꦤꦸꦁꦔꦺ​ꦭꦤ꧀ꦏꦼꦤꦺꦁꦢꦶꦲꦺꦴꦩꦺꦴꦁ꧉​ꦪꦏꦸꦮꦶ​ꦥꦶꦠꦸꦠꦸꦂꦫꦺ​ꦲꦮꦏ꧀ꦏꦺ​ꦢꦺꦮꦺꦩꦫꦁ​ꦏꦺꦴꦮꦺ​:ꦧꦶꦱꦤꦺ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦮꦺ​ꦏꦸꦢꦸ​ꦤꦩ꧀ꦥ​ꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦚ꧀ꦗꦒꦏ꧀ꦏꦏꦺꦥꦼꦁꦒꦮꦺꦤꦺ​ꦢꦺꦮꦺ꧉​ ⁹ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦏꦺꦴꦮꦺ​ꦔꦏꦺꦴꦤ꧀ꦤꦶ​ꦏꦫꦺꦴ​ꦭꦩ꧀ꦧꦺꦩꦸ​ꦤꦺꦏ꧀ꦪꦺꦯꦸꦱ꧀ꦏꦸꦮꦶ​ꦒꦸꦱ꧀ꦠꦶ​ꦭꦤ꧀ꦏꦺꦴꦮꦺ​ꦥꦽꦕꦪ​ꦲꦶꦁ​ꦲꦠꦶꦩꦸ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦔꦺꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦥꦠꦶ​꧈​ꦏꦺꦴꦮꦺ​ꦩꦼꦱ꧀ꦠꦶꦧꦏꦭ꧀ꦱ꧀ꦭꦩꦼꦠ꧀꧈​ ¹⁰ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦥꦽꦕꦪ​ꦲꦶꦁ​ꦲꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦔꦺꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦥꦠꦶ​꧉​ꦏꦸꦮꦶ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦸꦒ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔꦏꦺꦴꦤ꧀ꦤꦶ​ꦔꦁꦒꦺꦴ​ꦠꦼꦩ꧀ꦧꦸꦁ​꧈​ꦤꦺꦏ꧀ꦪꦺꦯꦸꦱ꧀ꦏꦸꦮꦶ​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦲꦮꦶꦠ꧀ꦏꦸꦮꦶ​ꦱꦶꦁ​ꦚ꧀ꦭꦩꦼꦠ꧀ꦠꦏꦺꦲꦮꦏ꧀ꦏꦺ​ꦢꦺꦮꦺ꧉​ ¹¹ꦮꦸꦗꦸꦠ꧀ꦠꦺꦏꦶꦠꦧ꧀ꦮꦶꦱ꧀ꦔꦺꦴꦩꦺꦴꦁꦔꦺꦤꦺ​:“ꦱꦥ​ꦱꦶꦁ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺꦲꦺꦴꦫ​ꦧꦏꦭ꧀ꦏꦶꦱꦶꦤ꧀ꦤꦤ꧀꧈​” ¹²ꦢꦢꦶꦤꦺ​ꦲꦺꦴꦫ​ꦢꦢꦶ​ꦱꦼꦧꦧ꧀ꦮꦺꦴꦁ​ꦏꦸꦮꦶ​ꦮꦺꦴꦁ​ꦙꦸꦲꦥ​ꦧꦁꦱ​ꦭꦶꦪꦤꦺ​꧈​ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦒꦸꦱ꧀ꦠꦶꦤꦺ​ꦏꦧꦺꦃ​ꦮꦺꦴꦁ​ꦭꦤ꧀ꦢꦺꦏ꧀ꦤꦺꦲꦩ꧀ꦧꦼꦂꦏꦃꦲꦶ​ꦏꦧꦺꦃ​ꦮꦺꦴꦁ​ꦏꦤ꧀ꦠꦶꦭꦸꦧꦺꦂ​꧈​ꦏꦧꦺꦃ​ꦮꦺꦴꦁ​ꦱꦶꦁ​ꦚ꧀ꦗꦭꦸꦏ꧀ꦠꦸꦭꦸꦁ​ꦩꦫꦁ​ꦢꦺꦏ꧀ꦤꦺ꧉​ ¹³ꦮꦸꦗꦸꦠ꧀ꦠꦺꦤꦁꦏꦶꦠꦧ꧀ꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦱꦥ​ꦮꦲꦺ​ꦱꦶꦁ​ꦚꦼꦧꦸꦠ꧀ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦧꦏꦭ꧀ꦱ꧀ꦭꦩꦼꦠ꧀꧈​”

¹⁴꧋ꦭꦃ​ꦩꦼꦤꦮ​ꦠꦼꦫꦸꦱ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦠꦏꦺꦴꦤ꧀:“ꦭꦃ​ꦏꦼꦥꦿꦶꦪꦺ​ꦮꦺꦴꦁꦮꦺꦴꦁ​ꦧꦶꦱꦤꦺ​ꦚꦼꦧꦸꦠ꧀ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦤꦺꦏ꧀ꦲꦺꦴꦫ​ꦥꦢ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ꦱꦼꦩꦸꦁꦒꦺꦴꦤ꧀ꦤꦺꦒꦼꦊꦩ꧀ꦥꦽꦕꦪ​꧈​ꦏꦼꦥꦿꦶꦪꦺ​ꦮꦺꦴꦁꦮꦺꦴꦁ​ꦧꦶꦱꦤꦺ​ꦥꦽꦕꦪ​꧈​ꦤꦺꦏ꧀ꦲꦺꦴꦫ​ꦠꦲꦸ​ꦏꦿꦸꦔꦸ​ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦏꦫꦺꦴꦩꦼꦤꦺꦃ​꧈​ꦏꦼꦥꦿꦶꦪꦺ​ꦮꦺꦴꦁꦮꦺꦴꦁ​ꦧꦶꦱꦤꦺ​ꦏꦿꦸꦔꦸ​ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦤꦺꦏ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦠꦼꦏ​ꦔꦧꦂꦫꦏꦺ꧉​ ¹⁵ꦭꦤ꧀ꦏꦼꦗꦧ​ꦱꦁꦏꦏꦸꦮꦶ​꧈​ꦏꦼꦥꦿꦶꦪꦺ​ꦲꦺꦤꦺꦁꦮꦺꦴꦁ​ꦧꦶꦱꦤꦺ​ꦧꦸꦢꦭ꧀ꦔꦧꦂꦫꦏꦺ꧈​ꦤꦺꦏ꧀ꦲꦺꦴꦫ​ꦢꦶꦏꦺꦴꦁꦏꦺꦴꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​?”ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦪ​ꦥꦚ꧀ꦕꦺꦤ꧀ꦲꦺꦤꦺꦁꦧꦼꦤꦼꦂꦫꦺ​꧉​ꦤꦁꦔꦶꦁ​ꦮꦸꦗꦸꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦺꦴꦁꦏꦺꦴꦤ꧀ꦤꦧꦶꦤꦧꦶ​ꦠꦼꦏ​ꦔꦧꦂꦫꦶ​ꦩꦫꦁ​ꦧꦁꦱ​ꦆꦱꦿꦌꦭ꧀ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦲꦮꦶꦠ꧀ꦤꦧꦶ​ꦪꦺꦱꦪ​ꦪ​ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦺꦤꦺ​:“ꦮꦺꦴꦁ​ꦱꦶꦁ​ꦠꦼꦏ​ꦔ꧀ꦒꦮ​ꦏꦧꦂ​ꦏꦧꦸꦔꦃꦲꦤ꧀ꦥꦚ꧀ꦕꦺꦤ꧀​ꦩ꧀ꦧꦸꦔꦃꦲꦏꦺꦠꦼꦤꦤ꧀!” ¹⁶ꦤꦁꦔꦶꦁ​ꦮꦸꦗꦸꦠ꧀ꦠꦺꦏꦼꦥꦿꦶꦪꦺ​ꦥꦫ​ꦱꦼꦢꦸꦭꦸꦂ​?ꦪ​ꦧꦼꦤꦼꦂ​ꦮꦺꦴꦁꦮꦺꦴꦁ​ꦥꦢ​ꦏꦿꦸꦔꦸ​ꦏꦧꦂ​ꦧꦧ꧀ꦏꦿꦶꦱ꧀ꦡꦸꦱ꧀ ꦤꦁꦔꦶꦁ​ꦲꦺꦴꦫ​ꦏꦧꦺꦃ​ꦥꦢ​ꦒꦼꦊꦩ꧀ꦥꦽꦕꦪ​꧉​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​?ꦲꦮꦶꦠ꧀ꦤꦧꦶ​ꦪꦺꦱꦪ​ꦲꦸꦒ​ꦔꦺꦴꦩꦺꦴꦁꦔꦺꦤꦺ​:“ꦢꦸꦃꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦔꦧꦂꦫꦶ​ꦮꦺꦴꦁꦮꦺꦴꦁ​ꦧꦧ꧀ꦥꦶꦠꦸꦠꦸꦂꦩꦸ​꧈​ꦤꦁꦔꦶꦁ​ꦲꦺꦴꦫ​ꦥꦢ​ꦒꦼꦊꦩ꧀ꦥꦽꦕꦪ​꧉​” ¹⁷ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦥꦫ​ꦱꦼꦢꦸꦭꦸꦂ​꧈​ꦥꦽꦕꦪ​ꦏꦸꦮꦶ​ꦠꦸꦏꦸꦭ꧀ꦭꦺꦱꦁꦏꦏꦿꦸꦔꦸ​꧈​ꦏꦿꦸꦔꦸ​ꦥꦶꦠꦸꦠꦸꦂ​ꦧꦧ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦢꦶꦏꦧꦂꦫꦏꦺ꧉​

¹⁸꧋ꦤꦁꦔꦶꦁ​ꦲꦥ​ꦠꦼꦤꦤ꧀ꦠ​ꦤꦺꦏ꧀ꦧꦁꦱ​ꦆꦱꦿꦌꦭ꧀ꦲꦺꦴꦫ​ꦠꦲꦸ​ꦏꦿꦸꦔꦸ​ꦧꦧ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀?ꦲꦺꦴꦫ​꧈​ꦤꦺꦏ꧀ꦏꦸꦮꦶ​ꦲꦺꦴꦫ​ꦧꦶꦱ​꧉​ꦮꦺꦴꦁꦮꦺꦴꦁ​ꦮꦶꦱ꧀ꦏꦿꦸꦔꦸ​ꦧꦧ꧀ꦏꦿꦶꦱ꧀ꦡꦸꦱ꧀꧈​ꦮꦸꦗꦸꦠ꧀ꦠꦺꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:

“ꦱ꧀ꦮꦫꦤꦺ​ꦮꦺꦴꦁꦮꦺꦴꦁ​
ꦱꦶꦁ​ꦔ꧀ꦒꦮ​ꦏꦧꦂ​ꦏꦧꦸꦔꦃꦲꦤ꧀
ꦮꦶꦱ꧀ꦫꦠ​ꦤꦁꦱꦏ꧀ꦗꦒꦠ꧀
ꦭꦤ꧀ꦠꦼꦩ꧀ꦧꦸꦁꦔꦺ​ꦮꦶꦱ꧀ꦠꦼꦏꦤ꧀ꦥꦺꦴꦗꦺꦴꦏ꧀ꦥꦺꦴꦗꦺꦴꦏ꧀ꦏꦺ​ꦧꦸꦩꦶ​꧉​”

¹⁹ꦲꦥ​ꦧꦁꦱ​ꦆꦱꦿꦌꦭ꧀ꦏꦿꦸꦔꦸ​ꦏꦧꦂꦫꦺ​꧈​ꦤꦁꦔꦶꦁ​ꦲꦺꦴꦫ​ꦢꦸꦤꦸꦁꦠꦼꦒꦼꦱ꧀ꦱꦺ​?ꦲꦺꦴꦫ​꧈​ꦩꦼꦱ꧀ꦠꦶꦢꦸꦤꦸꦁ꧈​ꦲꦮꦶꦠ꧀ꦩꦭꦃ​ꦤꦧꦶ​ꦩꦺꦴꦱꦼꦱ꧀ꦱꦶꦁ​ꦤ꧀ꦢꦸꦤꦸꦁꦔꦏꦺꦲꦮꦏ꧀ꦏꦺ​ꦢꦺꦮꦺꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺ꧈​ꦤꦺꦏ꧀ꦧꦁꦱ​ꦆꦱꦿꦌꦭ꧀ꦢꦸꦤꦸꦁꦩꦫꦁ​ꦏꦧꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦧ꧀ꦏꦿꦶꦱ꧀ꦡꦸꦱ꧀꧈​ꦮꦸꦗꦸꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​ꦭꦤ꧀ꦠꦂꦫꦤ꧀ꦤꦧꦶ​ꦩꦺꦴꦱꦼꦱ꧀:

“ꦲꦏꦸ​ꦧꦏꦭ꧀ꦩꦫꦏ꧀ꦏꦏꦺꦲꦠꦶꦩꦸ​ꦩꦺꦫꦶ​
ꦩꦫꦁ​ꦧꦁꦱ​ꦭꦶꦪꦤꦺ​꧉​
ꦏꦺꦴꦮꦺ​ꦧꦏꦭ꧀ꦤꦼꦱꦸ​
ꦩꦫꦁ​ꦧꦁꦱ​ꦱꦶꦁ​ꦲꦩ꧀ꦧꦺꦴꦏ꧀ꦲꦁꦒꦼꦥ꧀ꦲꦺꦴꦫ​ꦔꦼꦂꦠꦶ​ꦥꦶꦠꦸꦠꦸꦂꦏꦸ​꧉​”

²⁰ꦤꦧꦶ​ꦪꦺꦱꦪ​ꦲꦩ꧀ꦧꦫꦁ​ꦩꦭꦃ​ꦏꦼꦤ꧀ꦢꦼꦭ꧀ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦧꦁꦱ​ꦭꦶꦪꦤꦺ​ꦱꦶꦁ​ꦲꦺꦴꦫ​ꦔ꧀ꦒꦺꦴꦭꦺꦏ꧀ꦏꦶ​ꦲꦏꦸ​
ꦧꦏꦭ꧀ꦤꦼꦩꦸ​ꦲꦏꦸ​
ꦭꦤ꧀ꦧꦁꦱ​ꦭꦶꦪꦤꦺ​ꦱꦶꦁ​ꦲꦺꦴꦫ​ꦤꦺꦏꦺꦴꦏ꧀ꦤꦺꦏꦺꦴꦏ꧀ꦏꦏꦺꦲꦏꦸ​
ꦧꦏꦭ꧀ꦏꦼꦤꦭ꧀ꦩꦫꦁ​ꦲꦏꦸ​꧉​”

²¹ꦤꦁꦔꦶꦁ​ꦧꦧ꧀ꦧꦁꦱ​ꦆꦱꦿꦌꦭ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​ꦭꦤ꧀ꦠꦂꦫꦤ꧀ꦤꦧꦶ​ꦪꦺꦱꦪ​:“ꦱꦼꦢꦶꦤ​ꦩꦸꦥꦸꦠ꧀ꦲꦏꦸ​ꦔꦼꦭꦸꦁꦔꦏꦺꦠꦔꦤ꧀ꦏꦸ​ꦩꦫꦁ​ꦧꦁꦱ​ꦱꦶꦁ​ꦲꦺꦴꦫ​ꦩꦤꦸꦠ꧀ ꦤꦁꦔꦶꦁ​ꦔ꧀ꦭꦮꦤ꧀ꦩꦫꦁ​ꦲꦏꦸ​!”

↑ ↑ ↑

꧋ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦤꦩ꧀ꦥꦶꦏ꧀ꦧꦁꦱ​ꦆꦱꦿꦌꦭ꧀꧈​

꧇​꧑꧑꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦼꦤꦗꦤ꧀ꦔꦺꦴꦤꦺꦴ​꧈​ꦲꦗ​ꦩꦶꦏꦶꦂ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦚꦶꦁꦏꦸꦂꦫꦶꦧꦁꦱ​ꦆꦱꦿꦌꦭ꧀꧈​ꦲꦺꦴꦫ​ꦔꦺꦴꦤꦺꦴ​꧈​ꦮꦸꦗꦸꦠ꧀ꦠꦺꦲꦏꦸ​ꦲꦶꦏꦶ​ꦪ​ꦮꦺꦴꦁ​ꦆꦱꦿꦌꦭ꧀ ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦱꦁꦏꦧꦥ​ꦧꦺꦚꦩꦶꦤ꧀꧈​ ²ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦤꦩ꧀ꦥꦶꦏ꧀ꦧꦁꦱ​ꦱꦶꦁ​ꦮꦶꦱ꧀ꦢꦶꦥꦶꦭꦶꦃ​ꦏꦮꦶꦠ꧀ꦮꦶꦮꦶꦠ꧀ꦠꦤ꧀ꦤꦺ​꧉​ꦏꦺꦴꦮꦺ​ꦩꦼꦱ꧀ꦠꦶꦔꦼꦂꦠꦶ​ꦲꦪꦠ꧀ꦱꦁꦏꦏꦶꦠꦧ꧀ꦱꦶꦁ​ꦚꦿꦶꦠꦏ꧀ꦏꦏꦺꦢꦺꦴꦁꦔꦺꦤꦧꦶ​ꦌꦭꦶꦪ​ꦔꦼꦭꦃꦲꦏꦺꦧꦁꦱ​ꦆꦱꦿꦌꦭ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦧꦶ​ꦌꦭꦶꦪ​ꦔꦺꦴꦩꦺꦴꦁꦔꦺꦤꦺ​: ³“ꦢꦸꦃꦒꦸꦱ꧀ꦠꦶ​꧈​ꦧꦁꦱ​ꦆꦱꦿꦌꦭ꧀ꦩꦠꦺꦤ꧀ꦤꦶ​ꦤꦧꦶꦤꦧꦶ​ꦱꦶꦁ​ꦲꦩ꧀ꦧꦺꦴꦏ꧀ꦏꦺꦴꦁꦏꦺꦴꦤ꧀ꦠꦼꦏ​꧉​ꦮꦺꦴꦁꦮꦺꦴꦁ​ꦔꦿꦸꦱꦏ꧀ꦲꦭ꧀ꦠꦂꦫꦭ꧀ꦠꦂꦱꦶꦁ​ꦢꦶꦲꦼꦁꦒꦺꦴ​ꦏꦸꦂꦧꦤ꧀ꦩꦫꦁ​ꦏꦺꦴꦮꦺ​꧉​ꦤꦩꦸꦁ​ꦲꦏꦸ​ꦢꦺꦮꦺꦱꦶꦁ​ꦲꦶꦗꦶꦏ꧀ꦲꦸꦫꦶꦥ꧀ꦭꦤ꧀ꦱꦲꦶꦏꦶ​ꦮꦺꦴꦁꦮꦺꦴꦁ​ꦪ​ꦥꦢ​ꦲꦉꦥ꧀ꦩꦠꦺꦤ꧀ꦤꦶ​ꦲꦏꦸ​꧉​” ⁴ꦤꦁꦔꦶꦁ​ꦱꦏ꧀ꦗꦤꦺꦠꦼꦩ꧀ꦧꦸꦁ​ꦏꦸꦮꦶ​ꦪ​ꦲꦺꦴꦫ​ꦥꦠꦺꦏꦧꦼꦤꦼꦂ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦼꦩꦲꦸꦂ​ꦔꦺꦤꦺ​ꦩꦫꦁ​ꦤꦧꦶ​ꦌꦭꦶꦪ​:“ꦲꦺꦴꦫ​꧈​ꦲꦺꦴꦫ​ꦤꦩꦸꦁ​ꦏꦺꦴꦮꦺ​ꦢꦺꦮꦺꦱꦶꦁ​ꦢꦶꦠꦶꦁꦒꦭ꧀ ꦲꦮꦶꦠ꧀ꦏꦼꦗꦧ​ꦏꦺꦴꦮꦺ​ꦲꦏꦸ​ꦲꦶꦗꦶꦏ꧀​ꦤ꧀ꦢꦸꦮꦺꦮꦺꦴꦁ​ꦥꦶꦠꦸꦁ​ꦲꦺꦮꦸ​ꦱꦶꦁ​ꦏꦼꦤꦺꦁꦠꦏ꧀ꦗꦒꦏ꧀ꦏꦏꦺ꧈​ꦮꦺꦴꦁ​ꦱꦶꦁ​ꦲꦺꦴꦫ​ꦒꦼꦊꦩ꧀ꦚꦼꦩ꧀ꦧꦃ​ꦩꦫꦁ​ꦉꦕ​ꦨꦄꦭ꧀꧈​” ⁵ꦥꦫ​ꦱꦼꦢꦸꦭꦸꦂ​꧈​ꦲꦶꦁ​ꦗꦩꦤ꧀ꦱꦲꦶꦏꦶ​ꦪ​ꦥꦢ​ꦮꦲꦺ​ꦏꦫꦺꦴ​ꦗꦩꦤ꧀​ꦩ꧀ꦧꦶꦪꦺꦤ꧀ ꦠꦼꦒꦼꦱ꧀ꦱꦺ​꧈​ꦲꦶꦗꦶꦏ꧀ꦲꦺꦤꦺꦁꦠꦸꦫꦃꦲꦤ꧀ꦤꦺ​ꦧꦁꦱ​ꦆꦱꦿꦌꦭ꧀ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦱꦶꦁ​ꦮꦶꦱ꧀ꦢꦶꦥꦶꦭꦶꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦲꦮꦏ꧀ꦏꦺ​ ꦢꦺꦮꦺꦲꦶꦏꦶ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦼꦥꦺꦔꦶꦤ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​꧉​ ⁶ꦒꦸꦱ꧀ꦠꦶ​ꦄꦭ꧀ꦭꦃ​ꦲꦼꦁꦒꦺꦴꦤꦺ​ꦩꦶꦭꦶꦃ​ꦲꦺꦴꦫ​ꦤ꧀ꦢꦼꦭꦺꦴꦏ꧀ꦥꦼꦁꦒꦮꦺꦤꦺ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦲꦺꦴꦫ​꧈​ꦤꦁꦔꦶꦁ​ꦤꦩꦸꦁ​ꦗꦭꦂꦫꦤ꧀ꦱꦁꦏꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​ꦱꦼꦩꦸꦁꦒꦺꦴꦤ꧀ꦤꦺꦱꦁꦏꦥꦼꦁꦒꦮꦺꦤꦺ​ꦮꦺꦴꦁꦮꦺꦴꦁ​꧈​ꦠꦶꦧꦏꦺ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦲꦺꦴꦫ​ꦮꦸꦗꦸꦠ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦠꦼꦤꦤ꧀꧈​

⁷꧋ꦥꦫ​ꦱꦼꦢꦸꦭꦸꦂ​꧈​ꦏꦸꦮꦶ​ꦔꦺꦤꦺ​:ꦱꦼꦤꦗꦤ꧀ꦧꦁꦱ​ꦆꦱꦿꦌꦭ꧀ꦏꦼꦥꦺꦔꦶꦤ꧀ꦢꦶꦲꦁꦒꦼꦥ꧀ꦧꦼꦤꦼꦂ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦲꦺꦴꦫ​ꦏꦼꦠꦩ꧀ꦥ꧉​ꦤꦩꦸꦁ​ꦮꦺꦴꦁ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦱꦁꦏꦠꦼꦔꦃꦲꦺ​ꦧꦁꦱ​ꦆꦱꦿꦌꦭ꧀ꦱꦶꦁ​ꦏꦼꦠꦩ꧀ꦥ꧈​ꦏꦸꦮꦶ​ꦱꦶꦁ​ꦮꦶꦱ꧀ꦢꦶꦥꦶꦭꦶꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦶꦪꦤꦺ​ꦏꦧꦺꦃ​ꦥꦢ​ꦢꦢꦶ​ꦮꦁꦏꦺꦴꦠ꧀ꦲꦠꦶꦤꦺ​ꦭꦤ꧀ꦲꦺꦴꦫ​ꦧꦶꦱ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦱꦏ꧀ꦩꦼꦱ꧀ꦠꦶꦤꦺ꧉​ ⁸ꦥꦚ꧀ꦕꦺꦤ꧀ꦕꦺꦴꦕꦺꦴꦏ꧀​ꦏꦫꦺꦴ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦲꦠꦶ​ꦭꦤ꧀ꦥꦶꦏꦶꦂꦫꦤ꧀ꦤꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦮꦶꦱ꧀ꦢꦶꦒꦮꦺ​ꦒꦧꦸꦏ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦢꦶꦤꦺ​ꦠꦼꦏꦤ꧀ꦱꦼꦥꦿꦺꦤꦺ​ꦮꦺꦴꦁꦮꦺꦴꦁ​ꦩꦲꦸ​ꦲꦺꦴꦫ​ꦧꦶꦱ​ꦮꦼꦫꦸꦃ​ꦏꦫꦺꦴ​ꦩꦿꦶꦥꦠ꧀ꦠꦺ​ꦭꦤ꧀ꦲꦺꦴꦫ​ꦧꦶꦱ​ꦏꦿꦸꦔꦸ​ꦏꦫꦺꦴ​ꦏꦸꦥꦶꦁꦔꦺ​꧉​” ⁹ꦫꦠꦸ​ꦣꦮ꦳ꦼꦢ꧀ꦲꦸꦒ​ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦺꦤꦺ​:

“ꦢꦸꦃꦒꦸꦱ꧀ꦠꦶ​꧈​
ꦧꦁꦱ​ꦆꦱꦿꦌꦭ꧀ꦩꦶꦏꦶꦂ​ꦤꦺꦏ꧀ꦏꦼꦠꦩ꧀ꦥ꧈​
ꦗꦭꦂꦫꦤ꧀ꦏꦺꦴꦮꦺ​ꦮꦶꦱ꧀ꦔꦼꦏꦺꦏ꧀ꦏꦶ
ꦮꦺꦠ꧀ꦮꦺꦠ꧀ꦩꦸꦩꦫꦁ​ꦧꦁꦱ​ꦏꦸꦮꦶ​꧉​
ꦩꦸꦭꦤꦺ​ꦲꦏꦸ​ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​꧈​
ꦱꦸꦥꦪ​ꦤ꧀ꦢꦸꦤꦸꦁꦔꦏꦺꦩꦫꦁ​ꦧꦁꦱ​ꦆꦱꦿꦌꦭ꧀
ꦤꦺꦏ꧀ꦲꦺꦴꦫ​ꦏꦼꦠꦩ꧀ꦥ꧉​
ꦥꦢ​ꦏꦒꦺꦠ꧀ꦠꦏꦪ​ꦏꦺꦮꦤ꧀ꦏꦒꦺꦠ꧀
ꦤꦺꦏ꧀ꦏꦼꦤꦺꦁꦥꦱꦁꦔꦤ꧀ꦏꦲꦺ​ꦭꦤ꧀ꦤꦶꦠꦺꦤ꧀ꦤꦶ​꧈​
ꦤꦺꦏ꧀ꦥꦢ​ꦤꦼꦫꦏ꧀ꦮꦺꦠ꧀ꦮꦺꦠ꧀ꦩꦸ꧉​
ꦲꦏꦸ​ꦚꦸꦮꦸꦤ꧀
ꦮꦺꦴꦁꦮꦺꦴꦁ​ꦏꦸꦮꦶ​ꦢꦶꦱꦼꦠꦿꦥ꧀ꦏꦪ​ꦱꦏ꧀ꦩꦼꦱ꧀ꦠꦶꦤꦺ꧉​
¹⁰ꦥꦢ​ꦥꦼꦠꦼꦁꦔꦲꦔꦼꦤ꧀ꦤꦔꦼꦤ꧀ꦤꦺ꧈​
ꦱꦸꦥꦪ​ꦲꦺꦴꦫ​ꦧꦶꦱ​ꦢꦸꦤꦸꦁꦠꦼꦩ꧀ꦧꦸꦁꦩꦸ​
ꦭꦤ꧀ꦱꦸꦥꦪ​ꦥꦢ​ꦧꦸꦁꦏꦸꦏ꧀ꦏꦼꦩꦺꦴꦩꦺꦴꦠ꧀ꦠꦤ꧀ꦏꦱꦸꦱꦃꦲꦤ꧀ꦤꦺ​꧉​”

¹¹꧋ꦥꦫ​ꦱꦼꦢꦸꦭꦸꦂ​꧈​ꦲꦥ​ꦮꦺꦴꦁ​ꦤꦺꦏ꧀ꦏꦼꦱꦤ꧀ꦢꦸꦁꦱꦩ꧀ꦥꦺꦏ꧀ꦠꦶꦧ​ꦏꦲꦺ​ꦠꦼꦫꦸꦱ꧀ꦩꦼꦁꦏꦸꦉꦥ꧀ꦠꦼꦫꦸꦱ꧀?ꦩꦼꦱ꧀ꦠꦶꦲꦺꦴꦫ​꧈​ꦩꦼꦱ꧀ꦠꦶꦧꦏꦭ꧀ꦠꦔꦶ​ꦩꦼꦤꦺꦃ​꧉​ꦱꦼꦩꦺꦴꦤꦺꦴ​ꦲꦸꦒ​ꦧꦁꦱ​ꦆꦱꦿꦌꦭ꧀ ꦱꦏ꧀ꦮꦶꦱ꧀ꦱꦺ​ꦏꦼꦠꦩ꧀ꦥꦶꦏ꧀ ꦩꦺꦴꦱꦺꦴꦏ꧀ꦲꦺꦴꦫ​ꦧꦶꦱ​ꦏꦼꦠꦩ꧀ꦥꦩꦼꦤꦺꦃ​?ꦩꦼꦱ꧀ꦠꦶꦧꦏꦭ꧀ꦢꦶꦠꦔꦺꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦗꦭꦂꦫꦤ꧀ꦧꦁꦱ​ꦆꦱꦿꦌꦭ꧀ꦤꦩ꧀ꦥꦶꦏ꧀ꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦧꦁꦱ​ꦭꦶꦪꦤꦺ​ꦱꦶꦁ​ꦏꦼꦭꦶꦭ꧀ꦭꦤ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀ ꦱꦸꦥꦪ​ꦧꦁꦱ​ꦆꦱꦿꦌꦭ꧀ꦢꦢꦶ​ꦩꦺꦫꦶ​꧉​ ¹²ꦢꦢꦶꦤꦺ​ꦱꦭꦃꦲꦺ​ꦧꦁꦱ​ꦆꦱꦿꦌꦭ꧀ꦩꦭꦃ​ꦤꦼꦏꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦏꦁꦒꦺꦴ​ꦧꦁꦱ​ꦭꦶꦪꦭꦶꦪꦤꦺ​꧉​ꦭꦃ​ꦤꦺꦏ꧀ꦠꦶꦧꦤꦺ​ꦧꦁꦱ​ꦆꦱꦿꦌꦭ꧀ꦮꦲꦺ​ꦮꦶꦱ꧀ꦧꦶꦱ​ꦤꦼꦏꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ ꦭꦃ​ꦱꦼꦥꦶꦫ​ꦒꦼꦢꦺꦤꦺꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦧꦁꦱ​ꦭꦶꦪꦭꦶꦪꦤꦺ​ꦲꦩ꧀ꦧꦺꦱꦸꦏ꧀ ꦤꦺꦏ꧀ꦧꦁꦱ​ꦆꦱꦿꦌꦭ꧀ꦏꦧꦺꦃ​ꦧꦏꦭ꧀ꦢꦶꦠꦔꦺꦏ꧀ꦏꦏꦺ?

꧋ꦧꦁꦱ​ꦱꦶꦁ​ꦢꦸꦢꦸ​ꦙꦸꦲꦺꦴꦫ​ꦏꦼꦤꦺꦁꦒꦼꦩꦸꦁꦒꦸꦁ​꧉​

¹³꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦏꦸ​ꦤ꧀ꦢꦸꦮꦺꦤ꧀ꦤꦶ​ꦠꦼꦩ꧀ꦧꦸꦁ​ꦩꦫꦁ​ꦏꦺꦴꦮꦺ​ꦱꦶꦁ​ꦢꦸꦢꦸ​ꦧꦁꦱ​ꦆꦱꦿꦌꦭ꧀꧈​ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦩꦶꦗꦶ​ꦲꦏꦸ​ꦢꦢꦶ​ꦫꦱꦸꦭ꧀ ꦏꦺꦴꦁꦏꦺꦴꦤ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦫꦁ​ꦧꦁꦱꦧꦁꦱ​ꦱꦶꦁ​ꦢꦸꦢꦸ​ꦙꦸ꧉​ꦲꦏꦸ​ꦗꦤ꧀ꦧꦸꦔꦃ​ꦠꦼꦤꦤ꧀ꦢꦶꦏꦺꦏ꧀ꦏꦶꦥꦼꦁꦒꦮꦺꦏꦸꦲꦶꦏꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁴ꦱꦶꦁ​ꦠꦏ꧀ꦱꦸꦮꦸꦤ꧀ꦧꦁꦱꦏꦸ​ꦢꦺꦮꦺꦧꦶꦱ​ꦩꦺꦫꦶ​ꦩꦫꦁ​ꦧꦁꦱ​ꦭꦶꦪ​ꦱꦶꦁ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦸꦒꦩꦸꦒ​ꦧꦁꦱꦏꦸ​ꦲꦺꦤꦺꦁꦱꦶꦗꦶꦭꦺꦴꦫꦺꦴꦱꦶꦁ​ꦲꦸꦒ​ꦧꦶꦱ​ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁵ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩ꧀ꦥꦶꦏ꧀ꦧꦁꦱ​ꦆꦱꦿꦌꦭ꧀ ꦧꦁꦱ​ꦭꦶꦪꦭꦶꦪꦤꦺ​ꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦃ​ꦤꦺꦏ꧀ꦧꦁꦱ​ꦆꦱꦿꦌꦭ꧀ꦧꦏꦭ꧀ꦢꦶꦠꦔꦺꦏ꧀ꦏꦏꦺꦭꦤ꧀ꦏꦼꦠꦩ꧀ꦥꦩꦼꦤꦺꦃ​꧈​ꦏꦪ​ꦔꦥ​ꦒꦼꦢꦺꦤꦺꦧꦼꦂꦏꦃꦲꦺ​ꦧꦁꦱ​ꦭꦶꦪꦭꦶꦪꦤꦺ​꧉​ꦧꦏꦭ꧀ꦏꦪ​ꦮꦺꦴꦁ​ꦱꦶꦁ​ꦮꦶꦱ꧀ꦩꦠꦶ​ꦢꦶꦠꦔꦺꦏ꧀ꦏꦏꦺꦢꦢꦶ​ꦲꦸꦫꦶꦥ꧀ꦩꦼꦤꦺꦃ​꧉​

¹⁶꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦧꦥ​ꦄꦨꦿꦲꦩ꧀ꦏꦸꦮꦶ​ꦮꦶꦱ꧀ꦢꦢꦶ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦸꦫꦸꦤ꧀ꦠꦸꦫꦸꦤꦤ꧀ꦤꦺꦩꦼꦱ꧀ꦠꦶꦪ​ꦱꦼꦩꦺꦴꦤꦺꦴ​ꦲꦸꦒ​꧉​ꦤꦺꦏ꧀ꦕꦸꦮꦶꦭ꧀ꦭꦤ꧀ꦤꦺ​ꦫꦺꦴꦠꦶ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦒꦼꦱ꧀ꦱꦺ​ꦫꦺꦴꦠꦶꦤꦺ​ꦱꦏ꧀ꦏꦧꦺꦃꦲꦺꦪ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦺꦏ꧀ꦲꦺꦴꦪꦺꦴꦠ꧀ꦠꦺꦮꦺꦏ꧀ꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦁꦔꦺ​ꦲꦸꦒ​ꦪ​ꦮꦺꦏ꧀ꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁷ꦱꦲꦶꦏꦶ​ꦲꦉꦥ꧀ꦠꦏ꧀ꦒꦩ꧀ꦧꦂꦫꦏꦺꦔꦺꦤꦺ​ꦥꦫ​ꦱꦼꦢꦸꦭꦸꦂ​꧉​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦮꦶꦠ꧀ꦎꦭꦺꦥ꦳꧀ꦏꦲꦺ​ꦩꦼꦱ꧀ꦠꦶꦔꦼꦠꦺꦴꦏ꧀ꦏꦶꦥꦁꦔꦺ​ꦱꦶꦁ​ꦲꦺꦴꦫ​ꦩꦼꦠꦸ​ꦮꦺꦴꦃꦲꦺ​꧉​ꦭꦃ​ꦲꦶꦏꦶ​ꦔ꧀ꦒꦩ꧀ꦧꦂꦫꦏꦺꦧꦁꦱ​ꦆꦱꦿꦌꦭ꧀꧈​ꦭꦃ​ꦏꦺꦴꦮꦺ​ꦏꦸꦮꦶ​ꦱꦶꦁ​ꦢꦸꦢꦸ​ꦧꦁꦱ​ꦆꦱꦿꦌꦭ꧀ꦏꦼꦤꦺꦁꦢꦶꦥꦢꦏ꧀ꦏꦏꦺ ꦏꦫꦺꦴ​ꦮꦶꦠ꧀ꦎꦭꦺꦥ꦳꧀ꦱꦶꦁ​ꦲꦭꦱ꧀ꦱꦤ꧀꧈​ꦢꦢꦶꦤꦺ​ꦱꦲꦶꦏꦶ​ꦏꦪꦏꦪ​ꦥꦁꦔꦺ​ꦮꦶꦠ꧀ꦎꦭꦺꦥ꦳꧀ꦲꦭꦱ꧀ꦱꦤ꧀ꦢꦶꦲꦺꦤ꧀ꦠꦼꦂꦤꦁꦮꦶꦠ꧀ꦎꦭꦺꦥ꦳꧀ꦱꦶꦁ​ꦲꦥꦶꦏ꧀꧈​ꦏꦺꦴꦮꦺ​ꦱꦲꦶꦏꦶ​ꦏꦪ​ꦥꦁꦔꦺ​ꦎꦭꦺꦥ꦳꧀ꦲꦭꦱ꧀ꦱꦤ꧀ꦕꦩ꧀ꦥꦸꦂ​ꦱꦏ꧀ꦮꦶꦠ꧀ꦏꦫꦺꦴ​ꦥꦁ​ꦭꦶꦪꦭꦶꦪꦤꦺ​ꦱꦁꦏꦮꦶꦠ꧀ꦎꦭꦺꦥ꦳꧀ꦱꦶꦁ​ꦲꦥꦶꦏ꧀ꦭꦤ꧀ꦥꦁꦔꦺ​ꦏꦧꦺꦃ​ꦲꦺꦤ꧀ꦠꦸꦏ꧀ꦏꦺꦥꦔꦤ꧀ꦱꦁꦏꦲꦺꦴꦪꦺꦴꦠ꧀ꦠꦺꦮꦶꦠ꧀ꦎꦭꦺꦥ꦳꧀ꦱꦶꦁ​ꦲꦥꦶꦏ꧀꧈​ ¹⁸ꦤꦁꦔꦶꦁ​ꦏꦺꦴꦮꦺ​ꦲꦗ​ꦚꦼꦥꦺꦭꦺꦏ꧀ꦏꦏꦺꦥꦁꦔꦺ​ꦱꦶꦁ​ꦢꦶꦏꦺꦠꦺꦴꦏ꧀ꦏꦶ꧉​ꦲꦗ​ꦠꦼꦫꦸꦱ꧀ꦒꦼꦩꦸꦁꦒꦸꦁ​꧈​ꦲꦮꦶꦠ꧀ꦏꦺꦴꦮꦺ​ꦏꦸꦮꦶ​ꦤꦩꦸꦁ​ꦥꦁ​ꦮꦲꦺ​꧉​ꦏꦺꦴꦮꦺ​ꦲꦺꦴꦫ​ꦚꦁꦒ​ꦲꦺꦴꦪꦺꦴꦠ꧀ꦠꦺ꧈​ꦤꦁꦔꦶꦁ​ꦲꦺꦴꦪꦺꦴꦠ꧀ꦠꦺꦱꦶꦁ​ꦚꦁꦒ​ꦏꦺꦴꦮꦺ​꧉​

¹⁹꧋ꦭꦃ​ꦩꦼꦤꦮ​ꦏꦺꦴꦮꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃ​ꦥꦁꦔꦺ​ꦢꦶꦏꦺꦠꦺꦴꦏ꧀ꦏꦶꦏꦸꦮꦶ​ꦭꦲꦸꦠ꧀ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦢꦶꦲꦺꦤ꧀ꦠꦼꦂꦠ​?” ²⁰ꦏꦸꦮꦶ​ꦧꦼꦤꦼꦂ​꧈​ꦤꦁꦔꦶꦁ​ꦏꦺꦴꦮꦺ​ꦲꦗ​ꦭꦭꦶ​ꦤꦺꦏ꧀ꦥꦁꦔꦺ​ꦢꦶꦏꦺꦠꦺꦴꦏ꧀ꦏꦶꦏꦸꦮꦶ​꧈​ꦗꦭꦂꦫꦤ꧀ꦲꦺꦴꦫ​ꦥꦽꦕꦪ​ꦭꦤ꧀ꦏꦺꦴꦮꦺ​ꦢꦶꦲꦺꦤ꧀ꦠꦼꦂꦫꦏꦺ꧈​ꦗꦭꦂꦫꦤ꧀ꦏꦺꦴꦮꦺ​ꦥꦽꦕꦪ​꧉​ꦤꦁꦔꦶꦁ​ꦲꦗ​ꦠꦼꦫꦸꦱ꧀ꦒꦼꦩꦸꦁꦒꦸꦁ​꧈​ꦩꦭꦃ​ꦏꦸꦢꦸ​ꦱꦶꦁ​ꦲꦠꦶꦲꦠꦶ꧉​ ²¹ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦔꦺꦩꦤ꧀ꦥꦁꦔꦺ​ꦮꦶꦠ꧀ꦎꦭꦺꦥ꦳꧀ꦱꦶꦁ​ꦲꦥꦶꦏ꧀ ꦩꦺꦴꦱꦺꦴꦏ꧀ꦢꦺꦏ꧀ꦤꦺꦧꦏꦭ꧀ꦔꦺꦩꦤ꧀ꦥꦁꦔꦺ​ꦮꦶꦠ꧀ꦲꦭꦱ꧀ꦱꦤ꧀꧈​ꦠꦼꦒꦼꦱ꧀ꦱꦺ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦔꦺꦩꦤ꧀ꦧꦁꦱ​ꦆꦱꦿꦌꦭ꧀ ꦲꦥ​ꦏꦺꦴꦮꦺ​ꦩꦶꦏꦶꦂ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦺꦩꦤ꧀ꦏꦺꦴꦮꦺ​꧉​ ²²ꦢꦢꦶꦤꦺ​ꦏꦺꦴꦮꦺ​ꦱꦲꦶꦏꦶ​ꦢꦸꦤꦸꦁꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦤꦩꦸꦁ​ꦒꦼꦢꦺꦏꦧꦼꦕꦶꦏ꧀ꦏꦤ꧀ꦤꦺ​꧈​ꦤꦁꦔꦶꦁ​ꦢꦺꦏ꧀ꦤꦺꦲꦸꦒ​ꦏꦼꦫꦱ꧀ ꦲꦺꦴꦫ​ꦏꦼꦤꦺꦁꦢꦶꦒꦮꦺ​ꦱꦼꦩ꧀ꦧꦿꦤ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦗꦂ​ꦧꦁꦱ​ꦆꦱꦿꦌꦭ꧀ꦱꦶꦁ​ꦲꦺꦴꦫ​ꦩꦤꦸꦠ꧀ ꦤꦁꦔꦶꦁ​ꦢꦺꦏ꧀ꦤꦺꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦏꦺꦴꦮꦺ​꧈​ꦤꦺꦏ꧀ꦏꦺꦴꦮꦺ​ꦠꦼꦩꦼꦤ꧀ꦠꦼꦫꦸꦱ꧀ꦩꦤꦸꦠ꧀ꦩꦫꦁ​ꦢꦺꦏ꧀ꦤꦺ꧉​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦩꦤꦸꦠ꧀ ꦏꦺꦴꦮꦺ​ꦲꦸꦒ​ꦧꦏꦭ꧀ꦏꦪ​ꦥꦁ​ꦱꦶꦁ​ꦢꦶꦏꦼꦠꦺꦴꦏ꧀꧈​ ²³ꦤꦁꦔꦶꦁ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦧꦁꦱ​ꦆꦱꦿꦌꦭ꧀ꦠꦼꦫꦸꦱ꧀ꦥꦢ​ꦤꦩ꧀ꦥ​ꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦢ​ꦩꦤꦸꦠ꧀ ꦩꦼꦱ꧀ꦠꦶꦧꦏꦭ꧀ꦢꦶꦲꦺꦤ꧀ꦠꦼꦂꦫꦏꦺꦩꦼꦤꦺꦃ​ꦤꦁꦮꦶꦠ꧀ꦎꦭꦺꦥ꦳꧀ꦱꦶꦁ​ꦲꦥꦶꦏ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦒꦼꦢꦺꦏ꧀ꦮꦱꦤꦺ​ꦭꦤ꧀ꦧꦶꦱ​ꦔꦼꦚ꧀ꦕꦼꦥ꧀ꦥꦏꦺ​ꦩꦼꦤꦺꦃ​꧉​ ²⁴ꦏꦺꦴꦮꦺ​ꦥꦫ​ꦱꦼꦢꦸꦭꦸꦂ​ꦱꦶꦁ​ꦢꦸꦢꦸ​ꦧꦁꦱ​ꦆꦱꦿꦌꦭ꧀ ꦏꦺꦴꦮꦺ​ꦏꦪ​ꦥꦁꦔꦺ​ꦮꦶꦠ꧀ꦎꦭꦺꦥ꦳꧀ꦲꦭꦱ꧀ꦱꦤ꧀ꦱꦶꦁ​ꦢꦶꦏꦼꦠꦺꦴꦏ꧀ꦠꦼꦫꦸꦱ꧀ꦢꦶ​ꦲꦺꦚ꧀ꦕꦼꦥ꧀ꦥꦏꦺ​ꦤꦁꦮꦶꦠ꧀ꦎꦭꦺꦥ꦳꧀ꦱꦶꦁ​ꦲꦥꦶꦏ꧀꧈​ꦏꦸꦮꦶ​ꦱꦏ꧀ꦗꦤꦺꦲꦺꦴꦫ​ꦔ꧀ꦒꦺꦴꦤ꧀​ꦔ꧀ꦒꦺꦴꦤꦤ꧀ꦩꦸ꧉​ꦭꦃ​ꦲꦥ​ꦲꦺꦴꦫ​ꦭꦸꦮꦶꦃ​ꦒꦩ꧀ꦥꦁ​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦚ꧀ꦕꦼꦥ꧀ꦥꦏꦺ​ꦥꦁꦔꦺ​ꦮꦶꦠ꧀ꦎꦭꦺꦥ꦳꧀ꦱꦶꦁ​ꦲꦥꦶꦏ꧀ ꦱꦶꦁ​ꦩꦲꦸꦤꦺ​ꦢꦶꦏꦼꦠꦺꦴꦏ꧀ ꦤꦁꦔꦶꦁ​ꦠꦼꦫꦸꦱ꧀ꦢꦶꦥꦱꦁ​ꦤꦁꦮꦶꦠ꧀ꦠꦺ​ꦢꦺꦮꦺꦩꦼꦤꦺꦃ​꧉​

꧋ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀​ꦚ꧀ꦭꦩꦼꦠ꧀ꦠꦏꦺꦧꦁꦱ​ꦆꦱꦿꦌꦭ꧀꧈​

²⁵꧋ꦥꦫ​ꦱꦼꦢꦸꦭꦸꦂ​꧈​ꦲꦺꦤꦺꦁꦥꦽꦏꦫ​ꦭꦶꦪꦤꦺ​ꦱꦶꦁ​ꦚꦠ꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦁꦏꦠ꧀ꦧꦁꦱ​ꦆꦱꦿꦌꦭ꧀꧈​ꦲꦏꦸ​ꦏꦸꦢꦸ​ꦔꦸꦢꦂꦫꦏꦺꦥꦽꦏꦫ​ꦲꦶꦏꦶ​꧈​ꦱꦸꦥꦪ​ꦏꦺꦴꦮꦺ​ꦲꦺꦴꦫ​ꦤ꧀ꦢꦸꦮꦺꦤ꧀ꦤꦶ​ꦥꦶꦏꦶꦂꦫꦤ꧀ꦤꦺꦏ꧀ꦤꦩꦸꦁ​ꦏꦺꦴꦮꦺ​ꦱꦶꦁ​ꦢꦶꦠꦩ꧀ꦥ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦭꦃ​ꦧꦁꦱ​ꦆꦱꦿꦌꦭ꧀ꦲꦺꦴꦫ​꧉​ꦥꦽꦏꦫ​ꦲꦶꦏꦶ​ꦩꦲꦸꦤꦺ​ꦥꦚ꧀ꦕꦺꦤ꧀ꦏꦱꦶꦩ꧀ꦥꦼꦤ꧀ ꦤꦁꦔꦶꦁ​ꦱꦲꦶꦏꦶ​ꦲꦉꦥ꧀ꦠꦏ꧀ꦲꦺꦴꦩꦺꦴꦁꦔꦏꦺꦩꦫꦁ​ꦏꦺꦴꦮꦺ​꧉​ꦏꦸꦮꦶ​ꦔꦺꦤꦺ​:ꦧꦁꦱ​ꦆꦱꦿꦌꦭ꧀ꦲꦼꦁꦒꦺꦴꦤꦺ​ꦩꦁꦏꦺꦴꦠ꧀ꦠꦏꦺꦲꦠꦶꦤꦺ​ꦏꦸꦮꦶ​ꦲꦺꦴꦫ​ꦏꦁꦒꦺꦴ​ꦱ꧀ꦭꦮꦱ꧀ꦱꦺ꧈​ꦤꦁꦔꦶꦁ​ꦤꦩꦸꦁ​ꦠꦼꦏꦤ꧀ꦲꦩ꧀ꦧꦺꦱꦸꦏ꧀ ꦤꦺꦏ꧀ꦏꦧꦺꦃ​ꦧꦁꦱ​ꦱꦶꦁ​ꦢꦸꦢꦸ​ꦙꦸꦮꦶꦱ꧀ꦏꦿꦸꦔꦸ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ²⁶ꦩꦼꦁꦏꦺꦴꦤꦺꦴ​ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀​ꦚ꧀ꦭꦩꦼꦠ꧀ꦠꦏꦺꦧꦁꦱ​ꦆꦱꦿꦌꦭ꧀꧈​ꦲꦶꦏꦶ​ꦥꦚ꧀ꦕꦺꦤ꧀ꦮꦶꦱ꧀ꦕꦺꦴꦕꦺꦴꦏ꧀​ꦏꦫꦺꦴ​ꦠꦼꦩ꧀ꦧꦸꦁꦔꦺ​ꦤꦧꦶ​ꦪꦺꦱꦪ​ꦤꦁꦏꦶꦠꦧ꧀​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦗꦸꦫꦸ​ꦱ꧀ꦭꦩꦼꦠ꧀ꦠꦺ​ꦩꦤꦸꦁꦱ​ꦠꦼꦏꦤꦺ​ꦱꦁꦏꦱ꧀ꦮꦂꦒ​꧈​
ꦢꦺꦏ꧀ꦤꦺꦧꦏꦭ꧀ꦲꦩ꧀ꦧꦸꦮꦁ​ꦱꦏ꧀ꦏꦺꦃꦲꦺꦢꦺꦴꦱꦤꦺ​
ꦥꦫ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦪꦏꦸꦧ꧀꧈​”

²⁷ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦔꦺꦴꦩꦺꦴꦁꦔꦺꦤꦺ​:

“ꦲꦏꦸ​ꦧꦏꦭ꧀​ꦔ꧀ꦒꦮꦺ​ꦥꦽꦗꦚ꧀ꦗꦶꦪꦤ꧀ꦲꦚꦂ​
ꦏꦫꦺꦴ​ꦧꦁꦱ​ꦆꦱꦿꦌꦭ꧀
ꦤꦺꦏ꧀ꦲꦏꦸ​ꦮꦶꦱ꧀ꦔꦥꦸꦫ​ꦱꦏ꧀ꦏꦺꦃꦲꦺꦱꦭꦃꦲꦺ​꧉​”

²⁸ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦧꦁꦱ​ꦆꦱꦿꦌꦭ꧀ꦤꦩ꧀ꦥꦶꦏ꧀ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦩꦸꦭꦤꦺ​ꦪ​ꦢꦢꦶ​ꦩꦸꦁꦱꦸꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦃ​ꦏꦸꦮꦶ​ꦩꦭꦃ​ꦤꦼꦏꦏ꧀ꦏꦏꦺꦧꦼꦕꦶꦏ꧀ꦏꦁꦒꦺꦴ​ꦏꦺꦴꦮꦺ​꧉​ꦤꦁꦔꦶꦁ​ꦗꦭꦂꦫꦤ꧀ꦧꦁꦱ​ꦆꦱꦿꦌꦭ꧀ꦏꦸꦮꦶ​ꦱꦏ꧀ꦮꦶꦗꦶꦤꦺꦧꦁꦱ​ꦱꦶꦁ​ꦢꦶꦥꦶꦭꦶꦃ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦪ​ꦢꦶꦲꦺꦩꦤ꧀ꦠꦼꦤꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦭꦶꦁ​ꦥꦽꦗꦚ꧀ꦗꦶꦪꦤ꧀ꦤꦺ​ꦩꦫꦁ​ꦧꦥ​ꦄꦨꦿꦲꦩ꧀ ꦆꦱꦏ꧀ꦭꦤ꧀ꦪꦏꦸꦧ꧀꧈​ ²⁹ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦔ꧀ꦒꦮꦺ​ꦥꦸꦠꦸꦱ꧀ꦱꦤ꧀ꦩꦶꦭꦶꦃ​ꦭꦤ꧀ꦲꦩ꧀ꦧꦼꦂꦏꦃꦲꦶ​ꦧꦁꦱ​ꦆꦱꦿꦌꦭ꧀ ꦢꦺꦏ꧀ꦤꦺꦲꦺꦴꦫ​ꦧꦏꦭ꧀ꦩꦭꦶꦃ​ꦥꦶꦏꦶꦂꦫꦤ꧀ꦤꦺ​꧉​ ³⁰ꦮꦸꦗꦸꦠ꧀ꦠꦺꦏꦺꦴꦮꦺ​ꦥꦫ​ꦱꦼꦢꦸꦭꦸꦂ​ꦱꦶꦁ​ꦢꦸꦢꦸ​ꦧꦁꦱ​ꦙꦸ꧈​ꦏꦺꦴꦮꦺ​ꦩꦲꦸꦤꦺ​ꦪ​ꦲꦺꦴꦫ​ꦥꦢ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦥꦢ​ꦤꦩ꧀ꦥ​ꦏꦮꦼꦭꦱ꧀ꦱꦤ꧀ꦤꦺ​꧉​ꦏꦼꦤꦺꦁꦲꦥ​?ꦗꦭꦂꦫꦤ꧀ꦧꦁꦱ​ꦙꦸꦤꦩ꧀ꦥꦶꦏ꧀ꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ³¹ꦩꦼꦁꦏꦺꦴꦤꦺꦴ​ꦲꦸꦒ​꧈​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦏꦮꦼꦭꦱ꧀ꦱꦤ꧀ꦤꦺ​ꦩꦫꦁ​ꦏꦺꦴꦮꦺ​ꦱꦶꦁ​ꦢꦸꦢꦸ​ꦙꦸ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦧꦏꦭ꧀ꦔꦼꦠꦺꦴꦏ꧀ꦏꦏꦺꦏꦮꦼꦭꦱ꧀ꦱꦤ꧀ꦤꦺ​ꦩꦫꦁ​ꦧꦁꦱ​ꦙꦸ꧉​ ³²ꦢꦢꦶꦤꦺ​ꦧꦁꦱ​ꦙꦸꦭꦤ꧀ ꦧꦁꦱ​ꦱꦶꦁ​ꦢꦸꦢꦸ​ꦙꦸꦏꦧꦺꦃ​ꦮꦶꦱ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦭꦤ꧀ꦪ​ꦮꦶꦱ꧀ꦱꦏ꧀ꦩꦼꦱ꧀ꦠꦶꦤꦺꦤꦺꦏ꧀ꦏꦸꦢꦸ​ꦤꦩ꧀ꦥ​ꦱꦼꦠꦿꦥꦤ꧀ꦤꦺ꧉​ꦭꦤ꧀ꦗꦭꦂꦫꦤ꧀ꦱꦁꦏꦏꦸꦮꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦲꦶꦏꦶ​ꦧꦶꦱ​ꦔꦼꦠꦺꦴꦏ꧀ꦏꦏꦺꦏꦮꦼꦭꦱ꧀ꦱꦤ꧀ꦤꦺ​ꦩꦫꦁ​ꦏꦧꦺꦃ​ꦩꦤꦸꦁꦱ​꧈​ꦱꦶꦁ​ꦙꦸꦭꦤ꧀ꦱꦶꦁ​ꦢꦸꦢꦸ​ꦙꦸ꧉​

꧋ꦥꦩꦸꦗꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

³³꧋ꦥꦚ꧀ꦕꦺꦤ꧀ꦪ​ꦔ꧀ꦒꦸꦩꦸꦤ꧀ꦤꦏꦺꦠꦼꦤꦤ꧀ꦒꦼꦢꦺꦤꦺꦏꦱꦸꦒꦶꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦧꦼꦂꦏꦃ​꧈​ꦏꦮꦼꦫꦸꦃꦭꦤ꧀ꦥꦔꦼꦂꦠꦶ​꧉​ꦥꦸꦠꦸꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦤ꧀ꦢꦸꦤꦸꦁꦔꦏꦺꦭꦤ꧀ꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦢꦸꦤꦸꦁꦠꦸꦩꦶꦤ꧀ꦢꦏ꧀ꦏꦺ​꧉​ ³⁴ꦤꦧꦶ​ꦪꦺꦱꦪ​ꦪ​ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦏꦺꦧꦧ꧀ꦲꦶꦏꦶ​꧈​ꦮꦸꦗꦸꦠ꧀ꦠꦺꦏꦼꦠꦸꦭꦶꦱ꧀ꦔꦺꦤꦺ​ꦤꦁꦏꦶꦠꦧ꧀:

“ꦱꦥ​ꦠ​ꦱꦶꦁ​ꦔꦼꦂꦠꦶ​ꦥꦶꦏꦶꦂꦫꦤ꧀ꦤꦺ​ꦒꦸꦱ꧀ꦠꦶ​
ꦭꦤ꧀ꦱꦥ​ꦠ​ꦱꦶꦁ​ꦧꦶꦱ​ꦔꦿꦺꦮꦁꦔꦶ​ꦢꦺꦏ꧀ꦤꦺꦲꦶꦁ​ꦥꦩꦶꦏꦶꦂꦫꦤ꧀꧈​
³⁵ꦱꦥ​ꦠ​ꦮꦶꦱ꧀ꦔꦸꦠꦁꦔꦶ​ꦒꦸꦱ꧀ꦠꦶ​ꦄꦭ꧀ꦭꦃ​
ꦭꦤ꧀ꦮꦤꦶ​ꦚ꧀ꦗꦭꦸꦏ꧀ꦧꦪꦂ​!”

³⁶ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦱꦼꦩ꧀ꦧꦫꦁ​ꦏꦸꦮꦶ​ꦠꦼꦏꦤꦺ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦧꦶꦱꦤꦺ​ꦲꦺꦤꦺꦁꦠꦼꦫꦸꦱ꧀ꦏꦸꦮꦶ​ꦪ​ꦱꦁꦏꦏꦼꦏꦸꦮꦠ꧀ꦠꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦏꦧꦺꦃ​ꦮꦺꦴꦁ​ꦏꦸꦢꦸ​ꦩꦼꦩꦸꦗꦶ​ꦭꦤ꧀ꦚꦼꦩ꧀ꦧꦃ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦱꦺ꧉​ꦄꦩꦺꦤ꧀꧈​

↑ ↑ ↑

꧋ꦲꦸꦫꦶꦥ꧀ꦏꦁꦒꦺꦴ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧇​꧑꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦧꦺꦃ​ꦱꦲꦶꦏꦶ​ꦮꦶꦱ꧀ꦢꦸꦤꦸꦁꦱꦼꦩꦺꦴꦤꦺꦴ​ꦒꦼꦢꦺꦤꦺꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦩꦸꦭꦤꦺ​ꦲꦏꦸ​ꦚꦸꦮꦸꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​꧈​ꦲꦩ꧀ꦧꦺꦴꦏ꧀ꦧꦢꦤ꧀ꦩꦸ​ꦢꦶꦥꦱꦿꦃꦲꦏꦺꦢꦢꦶ​ꦏꦸꦂꦧꦤ꧀ꦱꦶꦁ​ꦲꦸꦫꦶꦥ꧀ꦭꦤ꧀ꦱꦶꦁ​ꦱꦸꦕꦶ​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦸꦮꦶ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦢꦺꦏ꧀ꦤꦺꦭꦤ꧀ꦏꦸꦮꦶ​ꦥꦔꦧꦼꦏ꧀ꦠꦶ​ꦱꦶꦁ​ꦱꦏ꧀ꦩꦼꦱ꧀ꦠꦶꦤꦺꦏꦁꦒꦺꦴ​ꦏꦺꦴꦮꦺ​꧉​ ²ꦩꦸꦭꦤꦺ​꧈​ꦲꦗ​ꦥꦢ​ꦩꦺꦭꦸꦩꦺꦭꦸ​ꦏꦫꦺꦴ​ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦮꦺꦴꦁ​ꦱꦶꦁ​ꦲꦺꦴꦫ​ꦤꦸꦫꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦗ​ꦏꦪ​ꦔꦺꦴꦤꦺꦴ​꧈​ꦤꦁꦔꦶꦁ​ꦥꦢ​ꦩꦤꦸꦠ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦲꦠꦶ​ꦭꦤ꧀ꦥꦶꦏꦶꦂꦫꦤ꧀ꦩꦸ​ꦢꦢꦶꦪ​ꦲꦚꦂ​꧉​ꦲꦮꦶꦠ꧀ꦤꦩꦸꦁ​ꦩꦼꦁꦏꦺꦴꦤꦺꦴ​ꦏꦸꦮꦶ​ꦏꦺꦴꦮꦺ​ꦧꦶꦱ​ꦩꦔꦼꦂꦠꦺꦤ꧀ꦤꦶꦩꦫꦁ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦔꦼꦂꦠꦶꦪ​ꦥꦫ​ꦱꦼꦢꦸꦭꦸꦂ​꧈​ꦪ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦱꦶꦁ​ꦧꦼꦕꦶꦏ꧀ꦢꦺꦮꦺꦏꦁꦒꦺꦴ​ꦲꦸꦫꦶꦥ꧀ꦩꦸ​꧉​

꧋ꦤꦺꦏ꧀ꦏꦺꦴꦮꦺ​ꦤꦸꦫꦸꦠ꧀ꦠꦶ​ꦏꦸꦮꦶ​꧈​ꦏꦺꦴꦮꦺ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦲꦠꦶꦤꦺ​ꦢꦺꦏ꧀ꦤꦺ꧉​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦱꦶꦁ​ꦲꦥꦶꦏ꧀ꦢꦺꦮꦺꦏꦁꦒꦺꦴ​ꦏꦺꦴꦮꦺ​꧈​ꦏꦸꦮꦶ​ꦲꦺꦴꦫ​ꦲꦺꦤꦺꦁꦏ꧀ꦭꦺꦫꦸꦤꦺ꧉​

³꧋ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦥꦚ꧀ꦕꦺꦤ꧀ꦮꦶꦱ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦲꦏꦸ​ꦭꦤ꧀ꦢꦺꦏ꧀ꦤꦺꦮꦶꦱ꧀ꦔꦼꦏꦺꦏ꧀ꦏꦶꦥꦼꦁꦒꦮꦺꦏꦸꦲꦶꦏꦶ​ꦩꦫꦁ​ꦲꦏꦸ​꧉​ꦩꦸꦭꦤꦺ​ꦲꦏꦸ​ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​ꦱꦶꦗꦶꦱꦶꦗꦶꦤꦺ​:ꦲꦗ​ꦩꦶꦏꦶꦂ​ꦤꦺꦏ꧀ꦏꦺꦴꦮꦺ​ꦏꦸꦮꦶ​ꦱꦶꦁ​ꦲꦥꦶꦏ꧀ꦢꦺꦮꦺ꧈​ꦤꦁꦔꦶꦁ​ꦲꦔꦼꦤ꧀ꦲꦔꦼꦤ꧀ꦭꦤ꧀ꦲꦠꦶꦩꦸ​ꦏꦸꦢꦸ​ꦱꦶꦁ​ꦱꦏ꧀ꦧꦼꦤꦼꦂꦫꦺ​꧉​ꦔꦼꦂꦠꦶꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦼꦏꦺꦏ꧀ꦏꦶꦱꦏ꧀ꦮꦼꦂꦤꦤꦺ​ꦏꦥꦶꦤ꧀ꦠꦼꦂꦫꦤ꧀ꦩꦫꦁ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​꧉​ ⁴ꦥꦫ​ꦱꦼꦢꦸꦭꦸꦂ​꧈​ꦧꦢꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦥꦺꦫꦁꦔꦤ꧀ꦤꦺ​ꦲꦺꦴꦏꦺꦃꦭꦤ꧀ꦥꦼꦁꦒꦮꦺꦪꦤ꧀ꦏꦸꦱꦺꦗꦺꦱꦺꦗꦺ꧉​ ⁵ꦱꦼꦩꦺꦴꦤꦺꦴ​ꦲꦸꦒ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧈​ꦱꦼꦤꦗꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦺꦴꦁ​ꦲꦺꦴꦏꦺꦃ꧈​ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦮꦶꦱ꧀ꦢꦢꦶ​ꦱꦶꦗꦶ​ꦲꦶꦁ​ꦏꦿꦶꦱ꧀ꦡꦸꦱ꧀꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦧꦢꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​ꦭꦤ꧀ꦏꦪ​ꦥꦺꦫꦁꦔꦤ꧀ꦤꦺ​ꦧꦢꦤ꧀ꦩꦲꦸ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦪ​ꦤ꧀ꦢꦸꦮꦺꦥꦼꦁꦒꦮꦺꦏꦸꦢꦺꦮꦺꦢꦺꦮꦺ꧈​ꦏꦁꦒꦺꦴ​ꦤꦸꦭꦸꦁꦔꦶ​ꦱꦏ꧀ꦏꦧꦺꦃꦲꦺ꧉​ ⁶ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦮꦼꦂꦤꦮꦼꦂꦤ​ꦏꦥꦶꦤ꧀ꦠꦼꦂꦫꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦱꦶꦗꦶꦱꦶꦗꦶꦤꦺ​꧈​ꦏꦁꦒꦺꦴ​ꦚꦩ꧀ꦧꦸꦠ꧀ꦠꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​꧉​ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦢꦶꦏꦺꦏ꧀ꦏꦶꦏꦥꦶꦤ꧀ꦠꦼꦂꦫꦤ꧀ꦧꦶꦱ​ꦤꦩ꧀ꦥ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏꦸꦢꦸ​ꦢꦶꦲꦺꦴꦩꦺꦴꦁꦔꦏꦺꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦥꦱꦩꦸꦮꦤ꧀ ꦱꦼꦢꦸꦭꦸꦂ​ꦏꦸꦮꦶ​ꦪ​ꦏꦸꦢꦸ​ꦤꦶꦤ꧀ꦢꦏ꧀ꦏꦏꦺꦥꦼꦁꦒꦮꦺꦏꦸꦏꦸꦮꦶ​ꦔꦁꦒꦺꦴ​ꦏꦼꦏꦸꦮꦠ꧀ꦠꦤ꧀ꦤꦺ​ꦒꦸꦱ꧀ꦠꦶ​꧉​ ⁷ꦤꦺꦏ꧀ꦢꦶꦏꦺꦏ꧀ꦏꦶꦏꦥꦶꦤ꧀ꦠꦼꦂꦫꦤ꧀ꦏꦁꦒꦺꦴ​ꦤꦸꦭꦸꦁꦔꦶ​ꦲꦥ​ꦩꦸꦭꦁꦔꦶꦭꦶꦪꦤꦺ​꧈​ꦪ​ꦏꦸꦢꦸ​ꦢꦶꦏꦁꦒꦺꦴꦏ꧀ꦏꦏꦺꦏꦪ​ꦱꦏ꧀ꦩꦼꦱ꧀ꦠꦶꦤꦺ꧉​ ⁸ꦤꦺꦏ꧀ꦲꦺꦤꦺꦁꦱꦶꦁ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦏꦁꦒꦺꦴ​ꦔꦤ꧀ꦠꦼꦥ꧀ꦥꦏꦺꦥꦼꦔꦤ꧀ꦢꦼꦭ꧀ꦭꦺ​ꦱꦼꦢꦸꦭꦸꦂ​ꦭꦶꦪꦤꦺ​꧈​ꦪ​ꦏꦸꦢꦸ​ꦢꦶꦠꦶꦤ꧀ꦢꦏ꧀ꦏꦏꦺꦏꦪ​ꦱꦏ꧀ꦩꦼꦱ꧀ꦠꦶꦤꦺ꧉​ꦱꦶꦁ​ꦧꦶꦱ​ꦔꦼꦢꦸꦩ꧀ꦉꦗꦼꦏꦶ​ꦩꦫꦁ​ꦭꦶꦪꦤꦺ​ꦪ​ꦏꦸꦢꦸ​ꦢꦶꦠꦶꦤ꧀ꦢꦏ꧀ꦏꦏꦺꦠꦤ꧀ꦥ​ꦲꦺꦩꦤ꧀꧈​ꦱꦥ​ꦱꦶꦁ​ꦢꦶꦏꦺꦏ꧀ꦏꦶꦏꦥꦶꦤ꧀ꦠꦼꦂꦫꦤ꧀ꦤꦸꦤ꧀ꦠꦸꦤ꧀ ꦪ​ꦏꦸꦢꦸ​ꦤꦸꦤ꧀ꦠꦸꦤ꧀ꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​ꦏꦫꦺꦴ​ꦱꦧꦂ​ꦭꦤ꧀ꦠꦼꦩꦼꦤ꧀꧈​ꦱꦶꦁ​ꦢꦶꦏꦺꦏ꧀ꦏꦶꦲꦠꦶ​ꦩꦼꦭꦱ꧀ꦪ​ꦏꦸꦢꦸ​ꦔꦼꦠꦺꦴꦏ꧀ꦏꦏꦺꦏꦮꦼꦭꦱ꧀ꦱꦤ꧀ꦤꦺ​ꦩꦫꦁ​ꦭꦶꦪꦤꦺ​ꦏꦫꦺꦴ​ꦲꦠꦶ​ꦱꦶꦁ​ꦧꦸꦔꦃ​꧉​

꧋ꦏꦠꦿꦺꦱ꧀ꦤꦤ꧀ꦩꦫꦁ​ꦱꦏ꧀ꦥꦢꦥꦢ꧉​

⁹꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦠꦿꦺꦱ꧀ꦤꦱꦶꦁ​ꦠꦼꦤꦤ꧀ꦤꦤ꧀ꦩꦫꦁ​ꦱꦏ꧀ꦥꦢꦥꦢ꧈​ꦲꦗ​ ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦤ꧀꧈​ꦩꦸꦭꦤꦺ​꧈​ꦏꦺꦴꦮꦺ​ꦏꦸꦢꦸ​ꦚꦶꦁꦏꦸꦂꦫꦶꦧꦫꦁ​ꦱꦶꦁ​ꦲꦭ​꧈​ꦱꦶꦁ​ꦧꦼꦕꦶꦏ꧀ꦏꦸꦢꦸ​ꦲꦩ꧀ꦧꦺꦴꦏ꧀ꦒꦺꦴꦤ꧀ꦢꦺꦭ꧀ꦭꦶ꧉​ ¹⁰ꦥꦢ​ꦠꦿꦺꦱ꧀ꦤꦲꦩꦫꦁ​ꦱꦏ꧀ꦥꦢꦥꦢꦱꦏ꧀ꦲꦠꦶꦩꦸ​꧈​ꦲꦮꦶꦠ꧀ꦏꦺꦴꦮꦺ​ꦮꦶꦱ꧀ꦢꦢꦶ​ꦠꦸꦁꦒꦭ꧀ꦱꦼꦢꦸꦭꦸꦂ​ꦲꦶꦁ​ꦧꦿꦪꦠ꧀ꦠꦺ​ꦏꦿꦶꦱ꧀ꦡꦸꦱ꧀꧈​ꦥꦢ​ꦔꦗꦺꦤ꧀ꦤꦤ​ꦩꦫꦁ​ꦱꦏ꧀ꦥꦢꦥꦢ꧈​ꦩꦭꦃ​ꦲꦥꦶꦏ꧀ꦏꦺ​ꦤꦺꦏ꧀ꦏꦺꦴꦮꦺ​ꦥꦢ​ꦏꦼꦤꦺꦁꦢꦶꦠꦶꦫꦸ​ꦏꦫꦺꦴ​ꦭꦶꦪꦤꦺ​ꦲꦶꦁ​ꦥꦽꦏꦫ​ꦲꦶꦏꦶ​꧉​ ¹¹ꦲꦗ​ꦥꦢ​ꦩꦊꦱ꧀ ꦤꦁꦔꦶꦁ​ꦥꦢ​ꦚꦩꦫꦶꦤꦺꦒꦮꦺ​ꦏꦁꦒꦺꦴ​ꦒꦸꦱ꧀ꦠꦶ​ꦱꦶꦁ​ꦠꦼꦤꦤ꧀ꦤꦤ꧀ꦏꦫꦺꦴ​ꦲꦠꦶ​ꦱꦶꦁ​ꦱꦼꦤꦼꦁ​꧉​ ¹²ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦼꦏꦺꦏ꧀ꦏꦶꦧꦫꦁ​ꦱꦶꦁ​ꦔ꧀ꦒꦸꦩꦸꦤ꧀​ꦔ꧀ꦒꦸꦩꦸꦤ꧀ꦤꦏꦺꦩꦫꦁ​ꦏꦺꦴꦮꦺ​꧈​ꦩꦸꦭꦤꦺ​ꦏꦸꦮꦶ​ꦏꦸꦢꦸ​ꦢꦶꦲꦉꦥ꧀ꦲꦉꦥ꧀ꦏꦫꦺꦴ​ꦧꦸꦔꦃ​ꦲꦶꦁ​ꦲꦠꦶ​꧉​ꦢꦢꦶꦤꦺ​ꦤꦺꦏ꧀ꦏꦔꦺꦭ꧀ꦭꦤ꧀ꦠꦼꦏ​꧈​ꦏꦺꦴꦮꦺ​ꦧꦶꦱ​ꦱꦧꦂ​ꦭꦤ꧀ꦏꦸꦮꦠ꧀ꦭꦤ꧀ꦧꦶꦱ​ꦥꦱꦿꦃ​ꦱꦼꦩ꧀ꦧꦫꦁ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦱꦏ꧀ꦗꦼꦫꦺꦴꦤꦺꦥꦤ꧀ꦢꦺꦴꦔ​꧉​ ¹³ꦱꦼꦢꦸꦭꦸꦂꦩꦸꦱꦶꦁ​ꦥꦢ​ꦏꦼꦏꦸꦫꦁꦔꦤ꧀ꦲꦶꦁ​ꦱꦤ꧀ꦢꦁꦭꦤ꧀ꦥꦔꦤ꧀ꦏꦸꦢꦸ​ꦲꦩ꧀ꦧꦺꦴꦏ꧀ꦠꦸꦭꦸꦁꦔꦶ​ꦭꦤ꧀ꦤꦺꦏ꧀ꦲꦺꦤꦺꦁꦢꦪꦺꦴꦃꦏꦸꦢꦸ​ꦢꦶꦠꦩ꧀ꦥ​ꦭꦤ꧀ꦢꦶꦫꦸꦩꦠ꧀ꦠꦶ​ꦱꦶꦁ​ꦲꦥꦶꦏ꧀꧈​

¹⁴꧋ꦮꦺꦴꦁ​ꦱꦶꦁ​ꦔ꧀ꦒꦮꦺ​ꦱꦁꦱꦫꦤꦺ​ꦲꦸꦫꦶꦥ꧀ꦩꦸ​ꦏꦸꦢꦸ​ꦲꦩ꧀ꦧꦺꦴꦏ꧀ꦱꦸꦮꦸꦤ꧀ꦤꦏꦺꦱꦶꦁ​ꦧꦼꦕꦶꦏ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦼꦥꦶꦱ꧀ꦱꦤ꧀ꦩꦼꦤꦺꦃ​ꦲꦏꦸ​ꦔꦺꦴꦩꦺꦴꦁ:ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦢꦸ​ꦲꦩ꧀ꦧꦺꦴꦏ꧀ꦥꦸꦗꦺꦏ꧀ꦏꦏꦺꦲꦥꦶꦏ꧀ ꦲꦗ​ꦢꦶꦥꦸꦗꦺꦏ꧀ꦏꦏꦺꦱꦶꦁ​ꦲꦭ​꧉​ ¹⁵ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦤꦩ꧀ꦥ​ꦏꦧꦸꦔꦃꦲꦤ꧀ ꦥꦢ​ꦩꦺꦭꦸꦮ​ꦧꦸꦔꦃ​꧈​ꦤꦺꦏ꧀ꦲꦺꦤꦺꦁꦱꦶꦁ​ꦱꦸꦱꦃ​꧈​ꦥꦢ​ꦩꦺꦭꦸꦮ​ꦱꦸꦱꦃ​꧉​ ¹⁶ꦥꦢ​ꦢꦢꦶꦪ​ꦱꦶꦗꦶ​ꦲꦶꦁ​ꦲꦠꦶ​ꦏꦫꦺꦴ​ꦱꦼꦢꦸꦭꦸꦂ​ꦏꦧꦺꦃ​ꦱꦏ꧀ꦥꦱꦩꦸꦮꦤ꧀꧈​ꦩꦸꦭꦤꦺ​꧈​ꦲꦗ​ꦤꦩꦸꦁ​ꦩꦶꦏꦶꦂꦫꦏꦺꦥꦼꦁꦒꦮꦺꦏꦸꦱꦶꦁ​ꦒꦼꦢꦺ꧈​ꦤꦁꦔꦶꦁ​ꦥꦢ​ꦱꦼꦤꦼꦁꦔ​ꦲꦸꦒ​ꦔꦸꦫꦸꦱ꧀ꦱꦶ​ꦥꦼꦁꦒꦮꦺꦏꦸꦱꦶꦁ​ꦕꦶꦭꦶꦏ꧀꧈​ꦲꦗ​ꦩꦶꦏꦶꦂ​ꦏꦺꦴꦮꦺ​ꦱꦶꦁ​ꦥꦶꦤ꧀ꦠꦼꦂ​ꦢꦺꦮꦺ꧉​

¹⁷꧋ꦲꦗ​ꦩ꧀ꦧꦊꦱ꧀ꦲꦭ​ꦩꦫꦁ​ꦮꦺꦴꦁ​ꦱꦶꦁ​ꦔ꧀ꦒꦮꦺ​ꦲꦭ​ꦩꦫꦁ​ꦏꦺꦴꦮꦺ​꧈​ꦤꦁꦔꦶꦁ​ꦔ꧀ꦒꦮꦺꦪꦧꦼꦕꦶꦏ꧀ꦩꦫꦁ​ꦱꦥ​ꦮꦲꦺ​꧉​ ¹⁸ꦥꦢ​ꦔ꧀ꦭꦸꦩꦸꦃꦲꦶꦱꦏ꧀ꦧꦶꦱꦧꦶꦱꦩꦸ꧈​ꦱꦸꦥꦪ​ꦲꦸꦫꦶꦥ꧀ꦫꦸꦏꦸꦤ꧀ꦭꦤ꧀ꦠꦼꦤ꧀ꦠꦽꦩ꧀ꦏꦫꦺꦴ​ꦏꦧꦺꦃ​ꦮꦺꦴꦁ​꧉​

¹⁹꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲꦗ​ꦥꦶꦱꦤ꧀ꦥꦶꦱꦤ꧀​ꦤ꧀ꦢꦸꦮꦺꦤ꧀ꦤꦶ​ꦏꦼꦥꦺꦔꦶꦤ꧀​ꦩ꧀ꦧꦊꦱ꧀ꦲꦭ​ꦩꦫꦁ​ꦮꦺꦴꦁ​ꦱꦶꦁ​ꦔ꧀ꦒꦮꦺ​ꦲꦭ​ꦩꦫꦁ​ꦏꦺꦴꦮꦺ​꧉​ꦏꦪ​ꦔꦺꦴꦤꦺꦴ​ꦏꦸꦢꦸ​ꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦲꦺ​꧉​ꦲꦗ​ꦭꦭꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦺꦴꦩꦺꦴꦁꦔꦺꦤꦺ​ꦤꦁꦏꦶꦠꦧ꧀:“ꦲꦏꦸ​ꦱꦶꦁ​ꦧꦏꦭ꧀​ꦩ꧀ꦧꦊꦱ꧀ ꦲꦏꦸ​ꦢꦺꦮꦺꦱꦶꦁ​ꦧꦏꦭ꧀ꦠꦸꦩꦤ꧀ꦢꦁ​꧉​” ²⁰ꦏꦺꦴꦮꦺ​ꦩꦭꦃ​ꦏꦸꦢꦸ​ꦲꦺꦭꦶꦁ​ꦩꦫꦁ​ꦠꦼꦩ꧀ꦧꦸꦁꦔꦺ​ꦏꦶꦠꦧ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦤꦺꦏ꧀ꦩꦸꦁꦱꦸꦃꦩꦸ​ꦔꦼꦭꦶꦃ​ꦏꦸꦢꦸ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦩꦁꦔꦤ꧀ ꦤꦺꦏ꧀ꦔꦼꦭꦏ꧀ꦏꦸꦢꦸ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦔꦺꦴꦩ꧀ꦧꦺ​꧉​ꦤꦺꦏ꧀ꦏꦺꦴꦮꦺ​ꦤꦶꦤ꧀ꦢꦏ꧀ꦏꦏꦺꦏꦸꦮꦶ​꧈​ꦩꦸꦁꦱꦸꦃꦩꦸ​ꦧꦏꦭ꧀ꦫꦸꦩꦁꦱ​ꦲꦶꦱꦶꦤ꧀ꦢꦺꦮꦺꦭꦤ꧀ꦧꦏꦭ꧀ꦔꦏꦺꦴꦤ꧀ꦤꦶ​ꦱꦭꦃꦲꦺ​꧉​” ²¹ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦗ​ꦱꦩ꧀ꦥꦺꦏ꧀ꦏꦺꦴꦮꦺ​ꦏꦼꦤꦺꦁꦢꦶꦏꦭꦃꦲꦏꦺꦏꦫꦺꦴ​ꦠꦸꦩꦶꦤ꧀ꦢꦏ꧀ꦲꦭ​꧈​ꦲꦗ​꧈​ꦤꦁꦔꦶꦁ​ꦏꦺꦴꦮꦺ​ꦏꦸꦢꦸ​ꦩꦼꦤꦁꦔꦏꦺꦠꦸꦩꦶꦤ꧀ꦢꦏ꧀ꦲꦭ​ꦔꦁꦒꦺꦴ​ꦠꦸꦩꦶꦤ꧀ꦢꦏ꧀ꦧꦼꦕꦶꦏ꧀꧈​

↑ ↑ ↑

꧋ꦏꦸꦮꦗꦶꦧ꧀ꦧꦤ꧀ꦩꦫꦁ​ꦥꦫ​ꦥꦔ꧀ꦮꦱ​꧉​

꧇​꧑꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦏꦧꦺꦃ​ꦮꦺꦴꦁ​꧈​ꦠꦼꦒꦼꦱ꧀ꦱꦺ​ꦏꦺꦴꦮꦺ​ꦲꦩ꧀ꦧꦫꦁ​꧈​ꦏꦸꦢꦸ​ꦤꦸꦫꦸꦠ꧀ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦱꦁꦏꦥꦔ꧀ꦮꦱꦤꦺ​ꦤꦼꦒꦫ​꧈​ꦲꦮꦶꦠ꧀ꦥꦔ꧀ꦮꦱꦤꦺ​ꦤꦼꦒꦫ​ꦏꦸꦮꦶ​ꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦼꦠꦼꦥ꧀ꦥꦏꦺ꧉​ ²ꦢꦢꦶꦤꦺ​ꦱꦥ​ꦱꦶꦁ​ꦔ꧀ꦭꦮꦤ꧀ꦩꦫꦁ​ꦥꦔ꧀ꦮꦱꦤꦺ​ꦤꦼꦒꦫ​ꦏꦸꦮꦶ​ꦱꦏ꧀ꦧꦼꦤꦼꦂꦫꦺ​ꦪ​ꦔ꧀ꦭꦮꦤ꧀ꦩꦫꦁ​ꦥꦼꦂꦤꦠꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦸꦭꦤꦺ​꧈​ꦱꦥ​ꦱꦶꦁ​ꦤꦼꦫꦏ꧀ꦥꦼꦂꦤꦠꦤ꧀ꦤꦺꦤꦼꦒꦫ​ꦪ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦧꦏꦭ꧀ꦤꦩ꧀ꦥ​ꦱꦼꦠꦿꦥꦤ꧀꧈​ ³ꦲꦮꦶꦠ꧀ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀ꦲꦺꦴꦫ​ꦲꦸꦱꦃꦮꦼꦢꦶ​ꦩꦫꦁ​ꦥꦔ꧀ꦮꦱꦤꦺ​ꦤꦼꦒꦫ​꧉​ꦮꦺꦴꦁ​ꦱꦶꦁ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦲꦭ​꧈​ꦏꦸꦮꦶ​ꦱꦶꦁ​ꦏꦸꦢꦸ​ꦮꦼꦢꦶ​꧉​ꦩꦸꦭꦤꦺ​꧈​ꦤꦺꦏ꧀ꦏꦺꦴꦮꦺ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦕꦶꦏ꧀ ꦏꦺꦴꦮꦺ​ꦲꦺꦴꦫ​ꦲꦸꦱꦃꦮꦼꦢꦶ​꧈​ꦏꦺꦴꦮꦺ​ꦩꦭꦃ​ꦧꦏꦭ꧀ꦤꦩ꧀ꦥ​ꦥꦼꦔꦊꦩ꧀ꦩꦤ꧀ꦱꦁꦏꦤꦼꦒꦫ​꧉​ ⁴ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦥꦫ​ꦱꦼꦢꦸꦭꦸꦂ​꧈​ꦥꦔ꧀ꦮꦱꦤꦺ​ꦤꦼꦒꦫ​ꦏꦸꦮꦶ​ꦱꦏ꧀ꦗꦤꦺꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦧꦼꦕꦶꦏ꧀ꦩꦸ​ꦢꦺꦮꦺ꧉​ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦲꦭ​꧈​ꦪ​ꦧꦼꦤꦼꦂ​ꦏꦺꦴꦮꦺ​ꦮꦼꦢꦶ​꧈​ꦲꦮꦶꦠ꧀ꦩꦶꦠꦸꦫꦸꦠ꧀ꦥꦼꦂꦤꦠꦤ꧀ꦤꦺꦤꦼꦒꦫ​ꦏꦺꦴꦮꦺ​ꦪ​ꦏꦸꦢꦸ​ꦢꦶꦱꦼꦠꦿꦥ꧀꧈​ꦥꦔ꧀ꦮꦱꦤꦺ​ꦤꦼꦒꦫ​ꦏꦸꦮꦶ​ꦥꦚ꧀ꦕꦺꦤ꧀ꦒꦩꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦱꦥ​ꦮꦲꦺ​ꦱꦶꦁ​ꦤꦶꦤ꧀ꦢꦏ꧀ꦏꦏꦺꦲꦭ​꧉​ ⁵ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦼꦤꦺꦁꦲꦥ​ꦲꦮꦏ꧀ꦏꦺ​ꦢꦺꦮꦺꦏꦺꦴꦏ꧀ꦏꦸꦢꦸ​ꦩꦤꦸꦠ꧀ꦩꦫꦁ​ꦥꦼꦂꦤꦠꦤ꧀ꦤꦺꦤꦼꦒꦫ​?ꦲꦺꦴꦫ​ꦤꦩꦸꦁ​ꦗꦭꦂꦫꦤ꧀ꦮꦼꦢꦶ​ꦢꦶꦱꦼꦠꦿꦥ꧀ ꦤꦁꦔꦶꦁ​ꦲꦸꦒ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦏꦸꦮꦶ​ꦧꦫꦁ​ꦲꦥꦶꦏ꧀ꦱꦶꦁ​ꦏꦸꦢꦸ​ꦢꦶꦭꦏꦺꦴꦤ꧀ꦤꦶ​꧉​

⁶꧋ꦩꦸꦭꦤꦺ​ꦏꦺꦴꦮꦺ​ꦪ​ꦥꦢ​ꦲꦩ꧀ꦧꦪꦂ​ꦧꦼꦭꦱ꧀ꦠꦶꦁ꧈​ꦲꦮꦶꦠ꧀ꦤꦼꦒꦫ​ꦏꦸꦢꦸ​ꦲꦩ꧀ꦧꦪꦂ​ꦮꦺꦴꦁꦮꦺꦴꦁ​ꦱꦶꦁ​ꦚꦼꦏꦼꦭ꧀ꦥꦔ꧀ꦮꦱ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦤꦼꦠꦼꦥ꧀ꦥꦶ​ꦏꦸꦮꦗꦶꦧ꧀ꦧꦤ꧀ꦤꦺ​ꦭꦤ꧀ꦥꦢ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁷ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦏꦸꦢꦸ​ꦤꦼꦠꦼꦥ꧀ꦥꦶ​ꦏꦸꦮꦗꦶꦧ꧀ꦧꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦩꦫꦁ​ꦥꦫ​ ꦥꦔ꧀ꦮꦱ​꧉​ꦤꦺꦏ꧀ꦏꦸꦢꦸ​ꦲꦩ꧀ꦧꦪꦂ​ꦧꦼꦭꦱ꧀ꦠꦶꦁꦪ​ꦏꦸꦢꦸ​ꦢꦶꦧꦪꦂ​꧈​ꦤꦺꦏ꧀ꦏꦸꦢꦸ​ꦔꦗꦺꦤ꧀ꦤꦶ​ꦲꦥ​ꦔꦼꦊꦩ꧀ꦱꦶꦁ​ꦚꦼꦏꦼꦭ꧀ꦥꦔ꧀ꦮꦱ​꧈​ꦪ​ꦏꦸꦢꦸ​ꦢꦶꦠꦶꦤ꧀ꦢꦏ꧀ꦏꦏꦺꦔꦺꦴꦤꦺꦴ​꧉​

꧋ꦏꦸꦮꦗꦶꦧ꧀ꦧꦤ꧀ꦩꦫꦁ​ꦱꦏ꧀ꦥꦢꦥꦢ꧉​

⁸꧋ꦥꦫ​ꦱꦼꦢꦸꦭꦸꦂ​꧈​ꦲꦥꦶꦏ꧀ꦏꦺ​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦤ꧀ꦢꦸꦮꦺꦲꦸꦠꦁ​ꦲꦥꦲꦥ​ꦩꦫꦁ​ꦱꦥꦱꦥ​꧈​ꦏꦼꦗꦧ​ꦤ꧀ꦢꦸꦮꦺꦲꦸꦠꦁ​ꦏꦠꦿꦺꦱ꧀ꦤꦤ꧀ꦩꦫꦁ​ꦱꦏ꧀ꦥꦢꦥꦢ꧉​ꦲꦮꦶꦠ꧀ꦮꦺꦴꦁ​ꦱꦶꦁ​ꦠꦿꦺꦱ꧀ꦤꦩꦫꦁ​ꦭꦶꦪꦤꦺ​ꦏꦸꦮꦶ​ꦤꦼꦠꦼꦥ꧀ꦥꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀ꦏꦧꦺꦃꦲꦺ꧉​ ⁹ꦧꦼꦤꦼꦂ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦲꦁꦒꦼꦂꦫꦁꦒꦼꦂ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦏꦪꦢꦺꦤꦺ:ꦲꦗ​ꦭꦏꦸ​ꦧꦺꦢꦁ꧈​ꦲꦗ​ꦩꦼꦩꦠꦺꦤ꧀ꦤꦶ​꧈​ꦲꦗ​ꦚꦺꦴꦭꦺꦴꦁ​꧈​ꦲꦗ​ꦩꦶꦭꦶꦏ꧀ꦧꦫꦁꦔꦺ​ꦭꦶꦪꦤꦺ​ꦭꦤ꧀ꦲꦺꦤꦺꦁꦲꦁꦒꦼꦂꦫꦁꦒꦼꦂ​ꦭꦶꦪꦤꦺ​꧉​ꦤꦁꦔꦶꦁ​ꦲꦁꦒꦼꦂꦫꦁꦒꦼꦂ​ꦏꦸꦮꦶ​ꦩꦲꦸ​ꦏꦧꦺꦃ​ꦏꦼꦤꦺꦁꦢꦶꦢꦢꦺꦏ꧀ꦏꦏꦺꦲꦁꦒꦼꦂ​ꦱꦶꦗꦶ​꧈​ꦪꦏꦸꦮꦶ​:ꦥꦢ​ꦠꦿꦺꦱ꧀ꦤꦲꦩꦫꦁ​ꦭꦶꦪꦤꦺ​ꦏꦪ​ꦲꦼꦁꦒꦺꦴꦤ꧀ꦩꦸ​ꦤꦿꦺꦱ꧀ꦤꦤ꧀ꦤꦶꦲꦮꦏ꧀ꦩꦸ​ꦢꦺꦮꦺ꧉​ ¹⁰ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦱꦶꦁ​ꦠꦿꦺꦱ꧀ꦤꦩꦫꦁ​ꦭꦶꦪꦤꦺ​ꦏꦸꦮꦶ​ꦪ​ꦲꦺꦴꦫ​ꦧꦏꦭ꧀​ꦔ꧀ꦒꦮꦺ​ꦲꦭ​ꦩꦫꦁ​ꦭꦶꦪꦤꦺ​꧉​ꦢꦢꦶꦤꦺ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦤꦿꦺꦱ꧀ꦤꦤ꧀ꦤꦶꦭꦶꦪꦤꦺ​꧈​ꦲꦮꦏ꧀ꦏꦺ​ꦢꦺꦮꦺꦤꦼꦠꦼꦥ꧀ꦥꦶ​ꦲꦁꦒꦼꦂꦫꦁꦒꦼꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀ꦏꦧꦺꦃꦲꦺ꧉​

¹¹꧋ꦥꦫ​ꦱꦼꦢꦸꦭꦸꦂ​꧈​ꦥꦽꦏꦫ​ꦧꦧ꧀ꦠꦿꦺꦱ꧀ꦤꦩꦫꦁ​ꦱꦏ꧀ꦥꦢꦥꦢꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦠꦼꦤꦤ꧀ ꦲꦮꦶꦠ꧀ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦱꦶꦁ​ꦲꦮꦱ꧀ꦭꦤ꧀ꦠꦠꦠꦠ​꧈​ꦏꦪ​ꦮꦺꦴꦁ​ꦱꦶꦁ​ꦠꦔꦶꦠꦸꦫꦸ꧉​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​?ꦗꦭꦂꦫꦤ꧀ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦕꦼꦢꦼꦏ꧀​ꦧꦔꦼꦠ꧀ꦏꦫꦺꦴ​ꦠꦼꦏꦤꦺ​ꦏꦿꦶꦱ꧀ꦡꦸꦱ꧀ ꦱꦶꦁ​ꦏꦸꦢꦸ​ꦚ꧀ꦗꦶꦏꦸꦏ꧀ꦲꦮꦏ꧀ꦏꦺ​ꦢꦺꦮꦺꦱꦁꦏꦢꦺꦴꦚ​ꦱꦶꦁ​ꦏꦼꦧꦼꦏ꧀ꦲꦭ​ꦲꦶꦏꦶ​꧈​ꦱꦸꦥꦪ​ꦢꦶꦢꦢꦺꦏ꧀ꦏꦏꦺꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦭꦮꦱ꧀ꦭꦮꦱ꧀ꦱꦺ​꧉​ꦮꦏ꧀ꦠꦸ​ꦏꦸꦮꦶ​ꦮꦶꦱ꧀ꦱꦼꦭꦺꦴꦠ꧀ꦕꦼꦢꦼꦏ꧀​ꦤꦺꦏ꧀ꦢꦶꦥꦢꦏ꧀ꦏꦏꦺꦏꦫꦺꦴ​ꦩ꧀ꦧꦶꦪꦺꦤ꧀ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦩꦱꦿꦃꦲꦏꦺꦲꦸꦫꦶꦥ꧀ꦥꦺꦩꦫꦁ​ꦏꦿꦶꦱ꧀ꦡꦸꦱ꧀꧈​ ¹²ꦤꦺꦏ꧀ꦲꦸꦫꦶꦥ꧀ꦲꦶꦁ​ꦢꦺꦴꦚ​ꦱꦶꦁ​ꦏꦼꦧꦼꦏ꧀ꦲꦭ​ꦲꦶꦏꦶ​ꦢꦶꦥꦢꦏ꧀ꦏꦏꦺꦏꦫꦺꦴ​ꦮꦼꦔꦶ​꧈​ꦥꦚ꧀ꦕꦺꦤ꧀ꦮꦼꦔꦶꦤꦺꦪ​ꦮꦶꦱ꧀ꦩꦺꦃ​ꦲꦼꦤ꧀ꦠꦺꦏ꧀ꦭꦤ꧀ꦲꦮꦤ꧀ꦮꦶꦱ꧀ꦩꦺꦃ​ꦠꦼꦏ​꧉​ꦩꦸꦭꦤꦺ​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦤꦶꦁꦒꦭ꧀ꦠꦸꦩꦶꦤ꧀ꦢꦏ꧀ꦥꦼꦠꦼꦁ​ꦭꦤ꧀ꦲ꦳ꦪꦸꦏ꧀ꦥꦢ​ꦚꦼꦏꦼꦭ꧀ꦒꦩꦤ꧀ꦤꦺ​ꦥꦼꦥꦢꦁ꧉​ ¹³ꦲ꦳ꦪꦸꦏ꧀ꦥꦢ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦕꦶꦏ꧀ ꦏꦪ​ꦮꦺꦴꦁ​ꦱꦶꦁ​ꦲꦤ​ꦲꦶꦁ​ꦥꦢꦁꦏꦼꦤꦺꦁꦢꦶꦱꦮꦁ​ꦭꦶꦪꦤꦺ​꧉​ꦠꦼꦒꦼꦱ꧀ꦱꦺ​꧈​ꦲꦗ​ꦫꦩꦺꦫꦩꦺ​ꦔꦺꦴꦩ꧀ꦧꦺ​ꦭꦤ꧀ꦩꦧꦸꦏ꧀ ꦲꦗ​ꦭꦏꦸ​ꦧꦺꦢꦁꦤꦶꦤ꧀ꦢꦏ꧀ꦏꦏꦺꦲꦸꦫꦶꦥ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ ꦲꦗ​ꦥꦢ​ꦠꦸꦏꦂꦫꦤ꧀ꦭꦤ꧀ꦏꦸꦩꦺꦫꦺꦤ꧀꧈​ ¹⁴ꦲꦗ​ꦏꦪ​ꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​꧈​ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦏꦺꦴꦮꦺ​ꦪ​ꦏꦸꦢꦸ​ꦲꦸꦫꦶꦥ꧀ꦤꦶꦫꦸ​ꦢꦺꦏ꧀ꦤꦺ꧉​ꦲꦗ​ꦩꦶꦏꦶꦂ​ꦏꦼꦥꦿꦶꦪꦺ​ꦱꦶꦁ​ꦲꦉꦥ꧀ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦢꦺꦴꦱ​ꦲꦶꦁ​ꦲꦮꦏ꧀ꦩꦸ​꧈​ꦏꦸꦮꦶ​ꦤꦩꦸꦁ​ꦔ꧀ꦒꦺꦴꦭꦺꦏ꧀ꦏꦼꦩꦉꦩ꧀ꦩꦤ꧀ꦤꦺ​ꦏꦼꦢꦒꦶꦔꦤ꧀ꦩꦸ꧉​

↑ ↑ ↑

꧋ꦱꦶꦁ​ꦱꦧꦂ​ꦩꦫꦁ​ꦱꦏ꧀ꦥꦢꦥꦢ꧉​

꧇​꧑꧔꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦺꦤꦺꦁꦥꦽꦏꦫ​ꦭꦶꦪꦤꦺ​ꦱꦶꦁ​ꦏꦸꦢꦸ​ꦠꦏ꧀ꦲꦺꦴꦩꦺꦴꦁ​꧈​ꦪꦏꦸꦮꦶ​꧈​ꦧꦧ꧀ꦥꦔꦤ꧀ꦭꦤ꧀ꦢꦶꦤ​꧉​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦪ​ꦲꦶꦏꦶ​:ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦲꦶꦗꦶꦏ꧀ꦲꦼꦤꦺꦴꦩ꧀ꦥꦼꦔꦤ꧀ꦢꦼꦭ꧀ꦭꦺ​꧈​ꦢꦶꦠꦩ꧀ꦥ​ꦱꦶꦁ​ꦲꦥꦶꦏ꧀ ꦱꦼꦤꦗꦤ꧀ꦱꦼꦢꦸꦭꦸꦂ​ꦏꦸꦮꦶ​ꦲꦶꦗꦶꦏ꧀ꦤꦼꦠꦼꦥ꧀ꦥꦶ​ꦱꦏ꧀ꦮꦼꦂꦤꦤꦺ​ꦱꦶꦫꦶꦏꦤ꧀ꦤꦺꦲꦒꦩ​ꦧꦧ꧀ꦥꦔꦤ꧀ꦭꦤ꧀ꦢꦶꦤ​꧉​ꦥꦽꦏꦫꦥꦽꦏꦫ​ꦏꦸꦮꦶ​ꦲꦗ​ꦱꦩ꧀ꦥꦺꦏ꧀ꦢꦶꦒꦮꦺ​ꦗꦭꦂꦫꦤ꧀ꦏꦁꦒꦺꦴ​ꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀ꦧꦧ꧀ꦲꦥ​ꦱꦶꦁ​ꦧꦼꦤꦼꦂ​ꦭꦤ꧀ꦲꦥ​ꦱꦶꦁ​ꦏ꧀ꦭꦺꦫꦸ​꧉​ ²ꦲꦮꦶꦠ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦥꦽꦕꦪ​ꦤꦺꦏ꧀ꦲꦺꦤ꧀ꦠꦸꦏ꧀ꦩꦁꦔꦤ꧀ꦥꦔꦤ꧀ꦤꦤ꧀ꦲꦥ​ꦮꦲꦺ​꧈​ꦤꦁꦔꦶꦁ​ꦭꦶꦪꦤꦺ​ꦥꦽꦕꦪ​ꦤꦺꦏ꧀ꦲꦺꦴꦫ​ꦲꦺꦤ꧀ꦠꦸꦏ꧀ꦩꦁꦔꦤ꧀ꦲꦶꦮꦏ꧀ꦢꦒꦶꦁ​꧈​ꦩꦸꦭꦤꦺ​ꦪ​ꦤꦩꦸꦁ​ꦩꦁꦔꦤ꧀ꦗꦔꦤ꧀ꦤꦤ꧀꧈​ ³ꦱꦼꦢꦸꦭꦸꦂ​ꦱꦶꦁ​ꦥꦽꦕꦪ​ꦤꦺꦏ꧀ꦲꦺꦤ꧀ꦠꦸꦏ꧀ꦩꦁꦔꦤ꧀ꦥꦔꦤ꧀ꦤꦤ꧀ꦲꦥ​ꦮꦲꦺ​ꦲꦺꦴꦫ​ꦏꦼꦤꦺꦁꦚꦼꦥꦺꦭꦺꦏ꧀ꦏꦏꦺꦭꦶꦪꦤꦺ​ꦱꦶꦁ​ꦲꦺꦴꦫ​ꦩꦁꦔꦤ꧀ꦲꦶꦮꦏ꧀꧈​ꦱꦼꦩꦺꦴꦤꦺꦴ​ꦲꦸꦒ​꧈​ꦱꦼꦢꦸꦭꦸꦂ​ꦱꦶꦁ​ꦤꦩꦸꦁ​ꦩꦁꦔꦤ꧀ꦗꦔꦤ꧀ꦤꦤ꧀ ꦲꦺꦴꦫ​ꦩꦁꦔꦤ꧀ꦲꦶꦮꦏ꧀ ꦲꦺꦴꦫ​ꦏꦼꦤꦺꦁꦚꦭꦃꦚꦭꦃꦲꦏꦺꦭꦶꦪꦤꦺ​ꦱꦶꦁ​ꦩꦁꦔꦤ꧀ꦢꦒꦶꦁ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀​ꦔ꧀ꦭꦶꦭꦤꦶ​ꦱꦼꦢꦸꦭꦸꦂ​ꦏꦸꦮꦶ​ꦩꦁꦔꦤ꧀ꦲꦥ​ꦮꦲꦺ​ꦭꦤ꧀ꦢꦺꦏ꧀ꦤꦺꦪ​ꦮꦶꦱ꧀ꦤꦩ꧀ꦥ​ꦱꦼꦢꦸꦭꦸꦂ​ꦏꦸꦮꦶ​꧉​ ⁴ꦭꦃ​ꦤꦺꦏ꧀ꦒꦸꦱ꧀ꦠꦶꦤꦺ​ꦱꦼꦢꦸꦭꦸꦂ​ꦏꦸꦮꦶ​ꦔ꧀ꦭꦶꦭꦤꦶ​꧈​ꦲꦥ​ꦏꦺꦴꦮꦺ​ꦏꦸꦮꦶ​ꦒꦸꦱ꧀ꦠꦶꦤꦺ​ꦱꦼꦢꦸꦭꦸꦂ​ꦏꦸꦮꦶ​ꦏꦺꦴꦏ꧀ꦮꦤꦶ​ꦚꦭꦃꦚꦭꦃꦲꦏꦺꦢꦺꦏ꧀ꦤꦺ꧉​ꦏꦼꦠꦩ꧀ꦥ​ꦲꦺꦴꦫꦤꦺ​ꦏꦸꦮꦶ​ꦒꦸꦱ꧀ꦠꦶꦤꦺ​ꦱꦼꦢꦸꦭꦸꦂ​ꦏꦸꦮꦶ​ꦱꦶꦁ​ꦔꦫꦤ꧀ꦤꦶ​꧉​ꦤꦁꦔꦶꦁ​ꦱꦼꦢꦸꦭꦸꦂ​ꦏꦸꦮꦶ​ꦧꦏꦭ꧀ꦏꦼꦠꦩ꧀ꦥ꧈​ꦲꦮꦶꦠ꧀ꦒꦸꦱ꧀ꦠꦶ​ꦢꦺꦮꦺꦱꦶꦁ​ꦧꦏꦭ꧀ꦔꦿꦺꦮꦁꦔꦶ​꧉​

⁵꧋ꦲꦸꦒ​ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦔꦁꦒꦼꦥ꧀ꦢꦶꦤ​ꦱꦶꦗꦶꦤꦺ​ꦭꦸꦮꦶꦃ​ꦲꦥꦶꦏ꧀ꦠꦼꦤꦶꦩ꧀ꦧꦁꦢꦶꦤ​ꦭꦶꦪꦤꦺ​꧉​ꦤꦁꦔꦶꦁ​ꦱꦼꦢꦸꦭꦸꦂ​ꦭꦶꦪꦤꦺ​ꦥꦽꦕꦪ​ꦤꦺꦏ꧀ꦢꦶꦤ​ꦏꦧꦺꦃ​ꦠꦸꦁꦒꦭ꧀ꦭꦺ​ꦮꦲꦺ​꧉​ꦪ​ꦧꦺꦤ꧀ ꦧꦧ꧀ꦲꦶꦏꦶ​ꦏꦧꦺꦃ​ꦱꦼꦢꦸꦭꦸꦂ​ꦢꦶꦭꦶꦭꦤꦶ​ꦤꦸꦫꦸꦠ꧀ꦠꦶ​ꦥꦼꦔꦤ꧀ꦢꦼꦭ꧀ꦭꦺ​ꦢꦺꦮꦺꦢꦺꦮꦺ꧉​ ⁶ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦱꦼꦢꦸꦭꦸꦂ​ꦱꦶꦁ​ꦔꦫꦤ꧀ꦤꦶ​ꦱꦏ꧀ꦮꦶꦗꦶꦤꦺꦢꦶꦤ​ꦭꦸꦮꦶꦃ​ꦒꦼꦢꦺꦠꦼꦤꦶꦩ꧀ꦧꦁꦭꦶꦪꦤꦺ​ꦏꦸꦮꦶ​ꦪ​ꦗꦭꦂꦫꦤ꧀ꦱꦼꦢꦸꦭꦸꦂ​ꦏꦸꦮꦶ​ꦏꦼꦥꦺꦔꦶꦤ꧀ꦔꦗꦺꦤ꧀ꦤꦶ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ꦭꦃ​ꦱꦼꦢꦸꦭꦸꦂ​ꦱꦶꦁ​ꦥꦽꦕꦪ​ꦤꦺꦏ꧀ꦲꦺꦤ꧀ꦠꦸꦏ꧀ꦩꦁꦔꦤ꧀ꦥꦔꦤ꧀ꦤꦤ꧀ꦲꦥ​ꦮꦲꦺ​ꦱꦼꦩꦺꦴꦤꦺꦴ​ꦲꦸꦒ​ꦤꦺꦏ꧀ꦩꦁꦔꦤ꧀ꦪ​ꦏꦁꦒꦺꦴ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦸꦗꦸꦠ꧀ꦠꦺꦱꦼꦢꦸꦭꦸꦂ​ꦏꦸꦮꦶ​ꦤꦺꦏ꧀ꦩꦁꦔꦤ꧀ꦪ​ꦤ꧀ꦢꦺꦴꦁꦔꦭꦤ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦃ​ꦱꦼꦢꦸꦭꦸꦂ​ꦱꦶꦁ​ꦲꦺꦴꦫ​ꦩꦁꦔꦤ꧀ꦲꦶꦮꦏ꧀ ꦱꦶꦁ​ꦤꦩꦸꦁ​ꦩꦁꦔꦤ꧀ꦗꦔꦤ꧀ꦤꦤ꧀ ꦲꦸꦒ​ꦤꦺꦏ꧀ꦩꦁꦔꦤ꧀ꦪ​ꦏꦁꦒꦺꦴ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​꧈​ꦲꦮꦶꦠ꧀ꦢꦺꦏ꧀ꦤꦺꦪ​ꦤ꧀ꦢꦺꦴꦁꦔꦭꦤ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

⁷꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦏꦼꦤꦺꦁꦚꦭꦃꦚꦭꦃꦲꦏꦺꦱꦏ꧀ꦥꦢꦥꦢꦲꦶꦁ​ꦥꦽꦏꦫꦥꦽꦏꦫ​ꦲꦶꦏꦶ​꧉​ꦲꦮꦶꦠ꧀ ꦱꦼꦤꦗꦤ꧀ꦤ​ꦲꦸꦫꦶꦥ꧀ ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦢꦺꦮꦺ꧈​ꦱꦼꦤꦗꦤ꧀ꦤ​ꦩꦠꦶ​ꦪ​ꦲꦺꦴꦫ​ꦏꦉꦥ꧀ꦥꦺ​ꦢꦺꦮꦺ꧉​ ⁸ꦤꦺꦏ꧀ꦲꦸꦫꦶꦥ꧀ ꦲꦮꦏ꧀ꦏꦺ​ꦢꦺꦮꦺꦪ​ꦲꦸꦫꦶꦥ꧀ꦏꦁꦒꦺꦴ​ꦒꦸꦱ꧀ꦠꦶ​꧈​ꦤꦺꦏ꧀ꦩꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦪ​ꦩꦠꦶ​ꦏꦁꦒꦺꦴ​ꦒꦸꦱ꧀ꦠꦶ​꧉​ꦥꦠꦶ​ꦲꦸꦫꦶꦥꦺ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦤꦁꦠꦔꦤ꧀ꦤꦺ​ꦒꦸꦱ꧀ꦠꦶ​꧉​ ⁹ꦲꦮꦶꦠ꧀ꦏꦿꦶꦱ꧀ꦡꦸꦱ꧀ꦪ​ꦮꦶꦱ꧀ꦩꦠꦶ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦢꦺꦏ꧀ꦤꦺꦠꦔꦶ​ꦱꦁꦏꦥꦠꦶ​꧈​ꦱꦸꦥꦪ​ꦧꦶꦱ​ꦔ꧀ꦮꦱꦤꦶ​ꦏꦧꦺꦃ​ꦩꦤꦸꦁꦱ​꧈​ꦱꦶꦁ​ꦮꦶꦱ꧀ꦩꦠꦶ​ꦭꦤ꧀ꦱꦶꦁ​ꦲꦶꦗꦶꦏ꧀ꦲꦸꦫꦶꦥ꧀꧈​

¹⁰꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦱꦶꦁ​ꦲꦺꦴꦫ​ꦩꦁꦔꦤ꧀ꦲꦶꦮꦏ꧀ ꦲꦗ​ꦚꦭꦃꦚꦭꦃꦲꦏꦺꦱꦶꦁ​ꦩꦁꦔꦤ꧀ꦲꦶꦮꦏ꧀ꦭꦤ꧀ꦏꦺꦴꦮꦺ​ꦱꦶꦁ​ꦩꦁꦔꦤ꧀ꦱꦼꦩ꧀ꦧꦫꦁ​꧈​ꦲꦗ​ꦚꦼꦥꦺꦭꦺꦏ꧀ꦏꦏꦺꦱꦶꦁ​ꦲꦺꦴꦫ​ꦩꦁꦔꦤ꧀ꦲꦶꦮꦏ꧀꧈​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​?ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦲꦩ꧀ꦧꦺꦱꦸꦏ꧀ꦧꦏꦭ꧀ꦏꦸꦢꦸ​ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦺꦏ꧀ꦤꦺꦱꦶꦁ​ꦧꦏꦭ꧀ꦔꦫꦤ꧀ꦤꦶ​ꦏ꧀ꦭꦺꦫꦸꦧꦼꦤꦼꦫꦺꦲꦮꦏ꧀ꦏꦺ​ꦢꦺꦮꦺ꧉​ ¹¹ꦮꦸꦗꦸꦠ꧀ꦠꦺꦤꦁꦏꦶꦠꦧ꧀ꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:

“ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦤꦺ​:
ꦏꦪ​ꦲꦼꦁꦒꦺꦴꦤ꧀ꦏꦸ​ꦮꦸꦗꦸꦠ꧀ꦲꦸꦫꦶꦥ꧀
ꦩꦼꦁꦏꦺꦴꦤꦺꦴ​ꦲꦸꦒ​ꦲꦏꦸ​ꦔꦺꦴꦩꦺꦴꦁ
ꦤꦺꦏ꧀ꦏꦧꦺꦃ​ꦮꦺꦴꦁ​ꦧꦏꦭ꧀ꦱꦸꦗꦸꦠ꧀ꦔꦧꦼꦏ꧀ꦠꦶ​ꦲꦏꦸ​
ꦭꦤ꧀ꦏꦧꦺꦃ​ꦮꦺꦴꦁ​ꦧꦏꦭ꧀ꦔꦏꦺꦴꦤ꧀ꦤꦶ​
ꦤꦺꦏ꧀ꦲꦏꦸ​ꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

¹²ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦗꦶꦱꦶꦗꦶꦤꦺ​ꦧꦏꦭ꧀ꦲꦱꦺꦴꦏ꧀ꦥꦼꦚ꧀ꦗꦮꦧ꧀ꦢꦺꦮꦺꦢꦺꦮꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦲꦗ​ꦢꦢꦶ​ꦱꦤ꧀ꦢꦸꦔꦤ꧀ꦤꦺꦭꦶꦪꦤꦺ​꧉​

¹³꧋ꦩꦸꦭꦤꦺ​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦲꦗ​ꦥꦢ​ꦚꦭꦃꦚꦭꦃꦲꦏꦺꦱꦏ꧀ꦥꦢꦥꦢꦩꦼꦤꦺꦃ​꧉​ꦭꦸꦮꦸꦁꦲ꦳ꦪꦸꦏ꧀ꦥꦢ​ꦔ꧀ꦒꦮꦺ​ꦥꦸꦠꦸꦱ꧀ꦱꦤ꧀ꦱꦶꦁ​ꦩꦤ꧀ꦠꦼꦥ꧀ꦲꦺꦴꦫ​ꦲꦉꦥ꧀ꦤꦶꦤ꧀ꦢꦏ꧀ꦏꦏꦺꦥꦽꦏꦫ​ꦲꦥ​ꦮꦲꦺ​ꦱꦶꦁ​ꦩꦫꦏ꧀ꦏꦏꦺꦭꦶꦪꦤꦺ​ꦧꦶꦱ​ꦱꦼꦩ꧀ꦥ꧀ꦭꦏ꧀ꦥꦼꦔꦤ꧀ꦢꦼꦭ꧀ꦭꦺ​ꦲꦥ​ꦠꦶꦧ​ꦩꦼꦤꦺꦃ​ꦲꦶꦁ​ꦢꦺꦴꦱ​꧉​ ¹⁴ꦧꦼꦤꦼꦂ​꧈​ꦗꦭꦂꦫꦤ꧀ꦲꦏꦸ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶꦏꦸ​ꦪꦺꦯꦸꦱ꧀ ꦲꦏꦸ​ꦔꦼꦂꦠꦶ​ꦤꦺꦏ꧀ꦲꦺꦴꦫ​ꦲꦺꦤꦺꦁꦧꦫꦁ​ꦲꦥ​ꦮꦲꦺ​ꦏꦺꦴꦠꦺꦴꦂ​ꦱꦁꦏꦏꦉꦥ꧀ꦥꦺ​ꦢꦺꦮꦺ꧈​ꦲꦺꦴꦫ​ꦥꦫ​ꦱꦼꦢꦸꦭꦸꦂ​꧉​ꦧꦫꦁ​ꦏꦸꦮꦶ​ꦏꦺꦴꦠꦺꦴꦂ​ꦏꦁꦒꦺꦴ​ꦮꦺꦴꦁ​ꦱꦶꦁ​ꦔꦁꦒꦼꦥ꧀ꦤꦺꦏ꧀ꦧꦫꦁ​ꦏꦸꦮꦶ​ꦏꦺꦴꦠꦺꦴꦂ​꧉​

¹⁵꧋ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦗꦭꦂꦫꦤ꧀ꦱꦁꦏꦱꦶꦁ​ꦩ꧀ꦧꦺꦴꦏ꧀ꦥꦔꦤ꧀ꦲꦺꦤꦺꦁꦱꦼꦢꦸꦭꦸꦂ​ꦏꦼꦕꦼꦤ꧀ꦠꦺꦴꦏ꧀​ꦲꦠꦶꦤꦺ​꧈​ꦠꦶꦧꦏꦺ​ꦏꦺꦴꦮꦺ​ꦪ​ꦲꦺꦴꦫ​ꦩ꧀ꦭꦏꦸ​ꦔꦁꦒꦺꦴ​ꦏꦠꦿꦺꦱ꧀ꦤꦤ꧀꧈​ꦲꦗ​ꦱꦩ꧀ꦥꦺꦏ꧀ ꦗꦭꦂꦫꦤ꧀ꦱꦁꦏꦧꦫꦁ​ꦱꦶꦁ​ꦩ꧀ꦧꦺꦴꦏ꧀ꦥꦔꦤ꧀ ꦲꦺꦤꦺꦁꦱꦼꦢꦸꦭꦸꦂ​ꦱꦼꦩ꧀ꦥ꧀ꦭꦏ꧀ꦥꦼꦔꦤ꧀ꦢꦼꦭ꧀ꦭꦺ​꧉​ꦔꦼꦂꦠꦶꦪ​ꦤꦺꦏ꧀ꦏꦿꦶꦱ꧀ꦡꦸꦱ꧀ꦩꦠꦶ​ꦲꦸꦒ​ꦔ꧀ꦭꦧꦸꦃꦲꦶ​ꦱꦼꦢꦸꦭꦸꦂ​ꦏꦸꦮꦶ​꧉​ ¹⁶ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦱꦶꦁ​ꦲꦠꦶꦲꦠꦶ꧈​ꦲꦗ​ꦱꦩ꧀ꦥꦺꦏ꧀ꦥꦽꦏꦫ​ꦱꦶꦁ​ꦲꦩ꧀ꦧꦺꦴꦏ꧀ꦲꦁꦒꦼꦥ꧀ꦧꦼꦕꦶꦏ꧀ꦱꦩ꧀ꦥꦺꦏ꧀ꦢꦶꦲꦁꦒꦼꦥ꧀ꦲꦭ​ꦏꦫꦺꦴ​ꦱꦼꦢꦸꦭꦸꦂ​ꦭꦶꦪ​꧉​ ¹⁷ꦲꦮꦶꦠ꧀ ꦲꦺꦴꦫ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦩꦁꦔꦤ꧀ꦲꦶꦏꦶ​ꦲꦥ​ꦲꦺꦴꦫ​ꦔꦺꦴꦩ꧀ꦧꦺ​ꦏꦲꦺ​ꦏꦸꦮꦶ​ꦠꦤ꧀ꦢꦤꦺꦤꦺꦏ꧀ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦢꦶꦏ꧀ꦮꦱꦤꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​!ꦤꦁꦔꦶꦁ​ꦤꦺꦏ꧀ꦱꦁꦏꦥꦶꦠꦸꦭꦸꦁꦔꦤ꧀ꦤꦺ​ꦫꦺꦴꦃ​ꦱꦸꦕꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔꦼꦠꦺꦴꦏ꧀ꦏꦏꦺꦧꦫꦁ​ꦱꦶꦁ​ꦧꦼꦤꦼꦂ​ꦭꦤ꧀ꦧꦶꦱ​ꦔꦼꦠꦺꦴꦏ꧀ꦏꦏꦺꦏꦠꦼꦤ꧀ꦠꦽꦩ꧀ꦩꦤ꧀ꦭꦤ꧀ꦏꦧꦸꦔꦃꦲꦤ꧀ ꦏꦸꦮꦶ​ꦠꦤ꧀ꦢꦤꦺꦤꦺꦏ꧀ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦢꦶꦏ꧀ꦮꦱꦤꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁸ꦮꦺꦴꦁ​ꦱꦶꦁ​ꦔ꧀ꦭꦢꦺꦤ꧀ꦤꦶ​ꦏꦿꦶꦱ꧀ꦡꦸꦱ꧀ꦔꦁꦒꦺꦴ​ꦲꦠꦶ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦥꦚ꧀ꦕꦺꦤ꧀​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦸꦒ​ꦢꦶꦲꦗꦺꦤ꧀ꦤꦶ​ꦏꦫꦺꦴ​ꦩꦤꦸꦁꦱ​꧉​

¹⁹꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔ꧀ꦭꦸꦩꦸꦃꦲꦶꦠꦼꦤꦤ꧀ꦤꦶꦤ꧀ꦢꦏ꧀ꦏꦏꦺꦥꦽꦏꦫꦥꦽꦏꦫ​ꦱꦶꦁ​ꦧꦶꦱ​ꦤ꧀ꦢꦢꦺꦏ꧀ꦏꦏꦺꦫꦸꦏꦸꦤ꧀ꦭꦤ꧀ꦱꦶꦁ​ꦧꦶꦱ​ꦔꦤ꧀ꦠꦼꦥ꧀ꦥꦏꦺꦥꦼꦔꦤ꧀ꦢꦼꦭ꧀ꦭꦺ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​꧉​ ²⁰ꦲꦗ​ꦱꦩ꧀ꦥꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦩ꧀ꦧꦸꦧꦿꦃ​ꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​ꦄꦭ꧀ꦭꦃ​ꦗꦭꦂꦫꦤ꧀ꦱꦁꦏꦥꦽꦏꦫ​ꦥꦔꦤ꧀ꦤꦤ꧀꧈​ꦪ​ꦧꦼꦤꦼꦂ​꧈​ꦥꦔꦤ꧀ꦤꦤ꧀ꦲꦥ​ꦮꦲꦺ​ꦏꦼꦤꦺꦁꦢꦶꦥꦔꦤ꧀ ꦤꦁꦔꦶꦁ​ꦲꦺꦴꦫ​ꦲꦥꦶꦏ꧀ꦤꦺꦏ꧀ꦲꦥ​ꦱꦶꦁ​ꦢꦶꦥꦔꦤ꧀ꦲꦮꦏ꧀ꦏꦺ​ꦢꦺꦮꦺꦏꦸꦮꦶ​ꦱꦩ꧀ꦥꦺꦏ꧀​ꦤ꧀ꦢꦢꦺꦏ꧀ꦏꦏꦺꦱꦤ꧀ꦢꦸꦔꦤ꧀ꦤꦺꦱꦼꦢꦸꦭꦸꦂ​ꦭꦶꦪꦤꦺ​꧉​ ²¹ꦲꦥꦶꦏ꧀ꦏꦺ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦩꦁꦔꦤ꧀ꦢꦒꦶꦁ​ꦲꦥ​ꦲꦺꦴꦫ​ꦔꦺꦴꦩ꧀ꦧꦺ​ꦲꦁꦒꦸꦂ​ꦲꦥ​ꦲꦺꦴꦫ​ꦤꦶꦤ꧀ꦢꦏ꧀ꦏꦏꦺꦲꦥ​ꦮꦲꦺ​ꦱꦶꦁ​ꦧꦶꦱ​ꦩꦫꦏ꧀ꦏꦏꦺꦱꦼꦢꦸꦭꦸꦂ​ꦭꦶꦪꦤꦺ​ꦱꦼꦩ꧀ꦥ꧀ꦭꦏ꧀ꦥꦼꦔꦤ꧀ꦢꦼꦭ꧀ꦭꦺ​꧉​ ²²ꦥꦼꦔꦤ꧀ꦢꦼꦭ꧀ꦩꦸ​ꦧꦧ꧀ꦲꦥ​ꦱꦶꦁ​ꦏꦼꦤꦺꦁꦭꦤ꧀ꦲꦥ​ꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦥꦔꦤ꧀ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦱꦶꦩ꧀ꦥꦼꦤ꧀ꦲꦶꦁ​ꦲꦠꦶꦩꦸ​ꦢꦺꦮꦺ꧈​ꦤꦩꦸꦁ​ꦏꦺꦴꦮꦺ​ꦢꦺꦮꦺꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ ꦏꦸꦢꦸ​ꦔꦼꦂꦠꦶ​꧉​ꦥꦚ꧀ꦕꦺꦤ꧀ꦧꦼꦗꦠꦼꦤꦤ꧀ꦮꦺꦴꦁ​ꦱꦶꦁ​ꦧꦶꦱ​ꦔꦫꦤ꧀ꦤꦶ​ꦲꦶꦁ​ꦲꦠꦶꦤꦺ​ꦢꦺꦮꦺꦲꦥ​ꦱꦶꦁ​ꦧꦼꦤꦼꦂ​꧈​ꦠꦤ꧀ꦥ​ꦫꦸꦩꦁꦱ​ꦱꦭꦃ​ꦲꦶꦁ​ꦠꦼꦩ꧀ꦧꦺꦩ꧀ꦧꦸꦫꦶꦤꦺ꧉​ ²³ꦤꦁꦔꦶꦁ​ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦤꦺꦏꦠ꧀ꦩꦁꦔꦤ꧀ꦥꦔꦤ꧀ꦤꦤ꧀ꦠꦤ꧀ꦥ​ꦔꦼꦂꦠꦶ​ꦥꦔꦤ꧀ꦤꦤ꧀ꦩꦲꦸ​ꦲꦥꦶꦏ꧀ꦢꦶꦥꦔꦤ꧀ꦲꦥ​ꦲꦺꦴꦫ​꧈​ꦱꦼꦢꦸꦭꦸꦂ​ꦏꦸꦮꦶ​ꦢꦺꦴꦱ​꧈​ꦲꦺꦴꦫ​ꦤꦩꦸꦁ​ꦲꦶꦁ​ꦲꦠꦶꦤꦺ​ꦢꦺꦮꦺ꧈​ꦤꦁꦔꦶꦁ​ꦲꦸꦒ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦮꦶꦠ꧀ꦥꦚ꧀ꦕꦺꦤ꧀ꦢꦺꦴꦱ​ꦤꦺꦏ꧀ꦏꦺꦴꦮꦺ​ꦤꦶꦤ꧀ꦢꦏ꧀ꦏꦏꦺꦥꦽꦏꦫ​ꦲꦥ​ꦮꦲꦺ​ꦠꦤ꧀ꦥ​ꦔꦼꦂꦠꦶ​ꦲꦶꦁ​ꦲꦠꦶ​ꦧꦼꦤꦼꦂ​ꦲꦺꦴꦫꦤꦺ​꧉​

↑ ↑ ↑

꧋ꦔ꧀ꦒꦮꦺ​ꦱꦼꦤꦼꦁꦔꦺ​ꦭꦶꦪꦤꦺ​꧈​ꦲꦺꦴꦫ​ꦔ꧀ꦒꦺꦴꦭꦺꦏ꧀ꦱꦼꦤꦼꦁꦔꦺ​ꦢꦺꦮꦺ꧉​

꧇​꧑꧕꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦫꦸꦩꦁꦱ​ꦮꦶꦱ꧀ꦗꦼꦫꦸꦥꦼꦔꦤ꧀ꦢꦼꦭ꧀ꦭꦺ​꧈​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦚꦧꦂꦫꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦲꦶꦗꦶꦏ꧀ꦲꦼꦤꦺꦴꦩ꧀ꦥꦼꦔꦤ꧀ꦢꦼꦭ꧀ꦭꦺ​꧉​ꦲꦗ​ꦤꦩꦸꦁ​ꦩꦶꦏꦶꦂ​ꦱꦶꦁ​ꦲꦥꦶꦏ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦮꦲꦺ​꧉​ ²ꦩꦭꦃ​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦱꦶꦗꦶꦱꦶꦗꦶꦤꦺ​ꦥꦢ​ꦤꦶꦤ꧀ꦢꦏ꧀ꦏꦏꦺꦲꦥ​ꦱꦶꦁ​ꦲꦥꦶꦏ꧀ꦏꦁꦒꦺꦴ​ꦱꦼꦢꦸꦭꦸꦂ​ꦭꦶꦪꦤꦺ​ꦭꦤ꧀ꦲꦥ​ꦱꦶꦁ​ꦧꦶꦱ​ꦔꦤ꧀ꦠꦼꦥ꧀ꦥꦏꦺꦥꦼꦔꦤ꧀ꦢꦼꦭ꧀ꦭꦺ​ꦱꦼꦢꦸꦭꦸꦂ​ꦭꦶꦪꦤꦺ​꧉​ ³ꦲꦮꦶꦠ꧀ꦏꦿꦶꦱ꧀ꦡꦸꦱ꧀ꦮꦸꦗꦸꦠ꧀ꦠꦺꦪ​ꦲꦺꦴꦫ​ꦔ꧀ꦒꦺꦴꦭꦺꦏ꧀ꦱꦼꦤꦼꦁꦔꦺ​ꦢꦺꦮꦺ꧈​ꦲꦺꦴꦫ​꧈​ꦤꦁꦔꦶꦁ​ꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦢꦸꦃꦄꦭ꧀ꦭꦃ​꧈​ꦠꦼꦩ꧀ꦧꦸꦁꦔꦺ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦏꦺꦴꦮꦺ​꧈​ꦠꦶꦧꦤꦺ​ꦲꦶꦁ​ꦲꦏꦸ​꧉​”

⁴꧋ꦥꦫ​ꦱꦼꦢꦸꦭꦸꦂ​꧈​ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦢꦺꦏ꧀ꦗꦩꦤ꧀​ꦩ꧀ꦧꦶꦪꦺꦤ꧀ꦏꦸꦮꦶ​ꦠꦸꦗꦸꦮꦤ꧀ꦤꦺꦏꦁꦒꦺꦴ​ꦩꦸꦭꦁꦔꦶꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦥꦢ​ꦱꦧꦂ​ꦭꦤ꧀​ꦤ꧀ꦢꦸꦮꦺꦏꦼꦏꦸꦮꦠ꧀ꦠꦤ꧀ꦤꦸꦫꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦤ꧀ꦗꦭꦂꦫꦤ꧀ꦱꦁꦏꦏꦸꦮꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔꦉꦥ꧀ꦲꦉꦥ꧀ꦤꦩ꧀ꦥ​ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁵ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦔꦼꦏꦺꦏ꧀ꦏꦶꦏꦼꦱꦧꦂꦫꦤ꧀ꦭꦤ꧀ꦏꦼꦏꦸꦮꦠ꧀ꦠꦤ꧀ ꦔꦿꦺꦮꦁꦔꦶ​ꦏꦺꦴꦮꦺ​ꦏꦧꦺꦃ​꧈​ꦱꦸꦥꦪ​ꦧꦶꦱ​ꦢꦢꦶ​ꦱꦶꦗꦶ​ꦲꦶꦁ​ꦏꦼꦏꦉꦥ꧀ꦥꦤ꧀ꦭꦤ꧀ꦧꦶꦱ​ꦤꦶꦤ꧀ꦢꦏ꧀ꦏꦏꦺꦲꦸꦫꦶꦥ꧀ꦤꦸꦫꦸꦠ꧀ꦠꦶꦥꦏ꧀ꦏꦺ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​ ⁶ꦢꦢꦶꦤꦺ​ꦏꦺꦴꦮꦺ​ꦏꦧꦺꦃ​ꦧꦶꦱ​ꦢꦢꦶ​ꦱꦶꦗꦶ​ꦲꦶꦁ​ꦲꦠꦶ​ꦭꦤ꧀ꦧꦼꦧꦉꦁꦔꦤ꧀ꦏꦺꦴꦮꦺ​ꦧꦶꦱ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦭꦩ꧀ꦧꦺꦩꦸ​꧉​ꦢꦺꦏ꧀ꦤꦺꦱꦶꦁ​ꦢꦢꦶ​ꦧꦥꦏ꧀ꦏꦺꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

꧋ꦏꦿꦶꦱ꧀ꦡꦸꦱ꧀ꦏꦁꦒꦺꦴ​ꦧꦁꦱ​ꦙꦸꦭꦤ꧀ꦱꦶꦁ​ꦢꦸꦢꦸ​ꦙꦸ꧉​

⁷꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦩꦶꦏꦶꦂꦫꦏꦺꦏꦸꦮꦶ​ꦩꦲꦸ​ꦏꦧꦺꦃ​ꦱꦶꦁ​ꦠꦏ꧀ꦲꦺꦴꦩꦺꦴꦁ​꧈​ꦲ꦳ꦪꦸꦏ꧀ꦤꦩ꧀ꦥ​ꦱꦏ꧀ꦥꦢꦥꦢꦏꦫꦺꦴ​ꦧꦸꦔꦃ​꧈​ꦏꦪ​ꦲꦼꦁꦒꦺꦴꦤꦺ​ꦏꦿꦶꦱ꧀ꦡꦸꦱ꧀ꦤꦩ꧀ꦥ​ꦏꦺꦴꦮꦺ​꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦏꦿꦶꦱ꧀ꦡꦸꦱ꧀ꦩꦫꦏ꧀ꦏꦏꦺꦮꦺꦴꦁꦮꦺꦴꦁ​ꦥꦢ​ꦔ꧀ꦭꦸꦲꦸꦂꦫꦏꦺꦗꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁸ꦲꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦲꦮꦶꦠ꧀ꦲꦼꦁꦒꦺꦴꦤꦺ​ꦏꦿꦶꦱ꧀ꦡꦸꦱ꧀ꦠꦼꦏ​ꦔ꧀ꦭꦢꦺꦤ꧀ꦤꦶ​ꦧꦁꦱ​ꦙꦸꦏꦸꦮꦶ​ꦏꦁꦒꦺꦴ​ꦤ꧀ꦢꦸꦢꦸꦃꦲꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦩꦼꦢꦺꦴꦠ꧀ ꦤꦁꦔꦶꦁ​ꦩꦭꦃ​ꦤꦸꦫꦸꦠ꧀ꦠꦶ​ꦥꦽꦗꦚ꧀ꦗꦶꦪꦤ꧀ꦤꦺ​ꦩꦫꦁ​ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺ꧉​ ⁹ꦏꦼꦗꦧ​ꦱꦁꦏꦏꦸꦮꦶ​꧈​ꦏꦿꦶꦱ꧀ꦡꦸꦱ꧀ꦠꦼꦏ​꧈​ꦱꦸꦥꦪ​ꦲꦸꦒ​ꦧꦁꦱ​ꦱꦶꦁ​ꦢꦸꦢꦸ​ꦙꦸꦧꦶꦱ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦔꦼꦠꦺꦴꦏ꧀ꦏꦏꦺꦏꦮꦼꦭꦱ꧀ꦱꦤ꧀ꦤꦺ​꧉​ꦮꦸꦗꦸꦠ꧀ꦠꦺꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:

“ꦲꦏꦸ​ꦧꦏꦭ꧀​ꦔ꧀ꦭꦸꦲꦸꦂꦫꦏꦺꦗꦼꦤꦼꦁꦩꦸ​
ꦭꦤ꧀ꦤꦁꦠꦼꦔꦃꦲꦺ​ꦥꦫ​ꦧꦁꦱ​
ꦲꦏꦸ​ꦧꦏꦭ꧀ꦩꦼꦩꦸꦗꦶ​ꦏꦺꦴꦮꦺ​꧉​”

¹⁰ꦲꦸꦒ​ꦲꦺꦤꦺꦁꦠꦼꦩ꧀ꦧꦸꦁ​ꦔꦺꦤꦺ​ꦱꦁꦏꦤꦧꦶ​ꦩꦺꦴꦱꦼꦱ꧀:

“ꦲꦺ​ꦥꦫ​ꦧꦁꦱ​ꦱꦶꦁ​ꦢꦸꦢꦸ​ꦙꦸ꧈​
ꦥꦢ​ꦧꦸꦔꦃꦧꦸꦔꦃꦲ​ꦧꦉꦁ​
ꦏꦫꦺꦴ​ꦧꦁꦱ​ꦥꦶꦭꦶꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

¹¹ꦲꦺꦤꦺꦁꦠꦸꦭꦶꦱ꧀ꦱꦤ꧀ꦭꦶꦪꦤꦺ​ꦩꦼꦤꦺꦃ​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦲꦺ​ꦥꦫ​ꦧꦁꦱ​ꦱꦶꦁ​ꦢꦸꦢꦸ​ꦙꦸ꧈​
ꦥꦢ​ꦩꦼꦩꦸꦗꦶꦪ​ꦩꦫꦁ​ꦒꦸꦱ꧀ꦠꦶ​
ꦭꦤ꧀ꦧꦁꦱꦧꦁꦱ​ꦭꦶꦪꦤꦺ​꧈​
ꦥꦢ​ꦩꦼꦩꦸꦗꦶꦪ​ꦩꦫꦁ​ꦢꦺꦏ꧀ꦤꦺ​꧉​”

¹²ꦤꦧꦶ​ꦪꦺꦱꦪ​ꦲꦸꦒ​ꦮꦶꦱ꧀ꦔꦺꦴꦩꦺꦴꦁꦔꦺꦤꦺ​꧈​ꦏꦪ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀:

“ꦧꦥ​ꦆꦱꦲꦶ​꧈​ꦧꦥꦏ꧀ꦏꦺꦫꦠꦸ​ꦣꦮ꦳ꦼꦢ꧀ ꦧꦏꦭ꧀
ꦤꦸꦏꦸꦭ꧀ꦭꦏꦺꦠꦸꦫꦸꦤ꧀ꦤꦤ꧀ꦱꦶꦁ​ꦧꦏꦭ꧀ꦔ꧀ꦮꦱꦤꦶ​
ꦥꦫ​ꦧꦁꦱ​ꦱꦶꦁ​ꦢꦸꦢꦸ​ꦙꦸ꧉​
ꦪ​ꦢꦺꦏ꧀ꦤꦺꦱꦶꦁ​ꦢꦢꦶ​ꦥꦼꦔꦉꦥ꧀ꦲꦉꦥ꧀ꦥꦺ​
ꦧꦁꦱ​ꦱꦶꦁ​ꦢꦸꦢꦸ​ꦙꦸ꧉​”

¹³꧋ꦥꦫ​ꦱꦼꦢꦸꦭꦸꦂ​꧈​ꦥꦤ꧀ꦢꦺꦴꦔꦏꦸ​꧈​ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦢꦢꦶ​ꦥꦼꦔꦉꦥ꧀ꦲꦉꦥ꧀ꦥꦺ​ꦏꦧꦺꦃ​ꦩꦤꦸꦁꦱ​꧈​ꦔꦼꦧꦼꦏ꧀ꦏꦶ​ꦲꦠꦶꦩꦸ​ꦏꦫꦺꦴ​ꦏꦧꦸꦔꦃꦲꦤ꧀ꦭꦤ꧀ꦏꦠꦼꦤ꧀ꦠꦽꦩ꧀ꦩꦤ꧀ ꦲꦮꦶꦠ꧀ꦏꦺꦴꦮꦺ​ꦥꦢ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ꦩꦸꦒꦩꦸꦒ​ꦥꦼꦔꦉꦥ꧀ꦲꦉꦥ꧀ꦩꦸ​ꦩꦸꦤ꧀ꦢꦏ꧀ꦠꦼꦫꦸꦱ꧀ꦱꦁꦏꦥꦶꦠꦸꦭꦸꦁꦔꦤ꧀ꦤꦺ​ꦫꦺꦴꦃ​ꦱꦸꦕꦶ​꧉​

꧋ꦏꦼꦤꦺꦁꦲꦥ​ꦫꦱꦸꦭ꧀ꦦꦈꦭꦸꦱ꧀ꦏꦺꦴꦏ꧀ꦤꦸꦭꦶꦱ꧀ꦭꦪꦁ​ꦲꦶꦏꦶ​꧉​

¹⁴꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦢꦺꦮꦺꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦏꦧꦺꦃ​ꦲꦺꦴꦫ​ꦏꦸꦫꦁ​ꦲꦶꦁ​ꦠꦸꦩꦶꦤ꧀ꦢꦏ꧀ ꦧꦼꦕꦶꦏ꧀ ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦧꦼꦏ꧀ꦏꦶ​ꦲꦠꦶꦩꦸ​ꦏꦫꦺꦴ​ꦏꦮꦼꦫꦸꦃ꧉​ꦩꦸꦭꦤꦺ​ꦏꦺꦴꦮꦺ​ꦪ​ꦧꦶꦱ​ꦩꦸꦭꦁꦔꦶꦱꦏ꧀ꦥꦢꦥꦢ꧉​ ¹⁵ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦤꦁꦭꦪꦁ​ꦲꦶꦏꦶ​ꦲꦏꦸ​ꦏꦼꦤ꧀ꦢꦼꦭ꧀ꦔꦺꦭꦶꦁꦔꦏꦺꦧꦧ꧀ꦥꦽꦏꦫ​ꦱꦶꦗꦶꦭꦺꦴꦫꦺꦴꦩꦫꦁ​ꦏꦺꦴꦮꦺ​꧉​ꦲꦼꦁꦒꦺꦴꦤ꧀ꦏꦸ​ꦮꦤꦶ​ꦤꦸꦭꦶꦱ꧀ꦏꦫꦺꦴ​ꦏꦼꦤ꧀ꦢꦼꦭ꧀ꦏꦸꦮꦶ​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦩꦶꦭꦶꦃ​ꦲꦏꦸ​ꦭꦤ꧀ꦔꦼꦏꦺꦏ꧀ꦏꦶꦥꦼꦁꦒꦮꦺꦏꦸꦲꦶꦏꦶ​꧉​ ¹⁶ꦲꦏꦸ​ꦏꦸꦢꦸ​ꦢꦢꦶ​ꦥꦼꦭꦢꦺꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀​ꦔ꧀ꦒꦮ​ꦏꦧꦂ​ꦏꦧꦸꦔꦃꦲꦤ꧀ꦩꦫꦁ​ꦧꦁꦱꦧꦁꦱ​ꦱꦶꦁ​ꦢꦸꦢꦸ​ꦙꦸ꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦲꦏꦸ​ꦧꦶꦱ​ꦔ꧀ꦒꦮ​ꦧꦁꦱꦧꦁꦱ​ꦱꦶꦁ​ꦢꦸꦢꦸ​ꦙꦸꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦧꦶꦱ​ꦏꦼꦠꦩ꧀ꦥꦭꦤ꧀ꦲꦸꦫꦶꦥ꧀ꦥꦺꦧꦶꦱ​ꦏꦁꦒꦺꦴꦤ꧀ꦤꦤ꧀ꦭꦤ꧀ꦏꦠꦸꦤ꧀ꦠꦸꦤ꧀ꦫꦺꦴꦃ​ꦱꦸꦕꦶ​꧉​ꦩꦸꦭꦤꦺ​ꦲꦏꦸ​ꦔꦁꦒꦼꦥ꧀ꦲꦏꦸ​ꦲꦶꦏꦶ​ꦏꦪ​ꦲꦶꦩꦩ꧀ꦱꦶꦁ​ꦩꦱꦿꦃꦲꦏꦺꦏꦸꦂꦧꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦸꦂꦧꦤ꧀ꦏꦸ​ꦱꦶꦁ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦧꦁꦱꦧꦁꦱ​ꦱꦶꦁ​ꦢꦸꦢꦸ​ꦙꦸꦲꦶꦏꦶ​꧉​ ¹⁷ꦭꦤ꧀ꦗꦭꦂꦫꦤ꧀ꦲꦏꦸ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦲꦏꦸ​ꦧꦸꦔꦃ​ꦧꦶꦱ​ꦚꦩ꧀ꦧꦸꦠ꧀ꦠꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁸ꦲꦮꦶꦠ꧀ꦲꦏꦸ​ꦤꦩꦸꦁ​ꦮꦤꦶ​ꦔꦺꦴꦩꦺꦴꦁꦔꦏꦺꦲꦥ​ꦱꦶꦁ​ꦮꦶꦱ꧀ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦏꦿꦶꦱ꧀ꦡꦸꦱ꧀ꦭꦤ꧀ꦠꦂꦫꦤ꧀ꦲꦏꦸ​꧈​ꦪꦏꦸꦮꦶ​꧈​ꦤꦸꦤ꧀ꦠꦸꦤ꧀ꦧꦁꦱꦧꦁꦱ​ꦱꦶꦁ​ꦢꦸꦢꦸ​ꦙꦸ꧈​ꦱꦸꦥꦪ​ꦥꦢ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦧꦶꦱꦤꦺ​ꦥꦢ​ꦩꦤꦸꦠ꧀ ꦗꦭꦂꦫꦤ꧀ꦏꦿꦸꦔꦸ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦭꦤ꧀ꦮꦼꦫꦸꦃ​ꦏ꧀ꦮꦱꦤꦺ​ꦒꦸꦱ꧀ꦠꦶ​ꦱꦁꦏꦲꦏꦸ​꧉​ ¹⁹ꦏꦼꦗꦧ​ꦱꦁꦏꦏꦸꦮꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦲꦏꦸ​꧈​ꦱꦸꦥꦪ​ꦲꦏꦸ​ꦧꦶꦱ​ꦤꦶꦤ꧀ꦢꦏ꧀ꦏꦏꦺꦠꦤ꧀ꦢꦠꦤ꧀ꦢꦭꦤ꧀ꦩꦸꦗꦶꦗꦠ꧀ꦩꦸꦗꦶꦗꦠ꧀ꦏꦁꦒꦺꦴ​ꦩꦤꦸꦁꦱ​꧉​ꦏꦫꦺꦴꦩꦼꦤꦺꦃ​ꦫꦺꦴꦃ​ꦱꦸꦕꦶ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦲꦏꦸ​꧈​ꦱꦸꦥꦪ​ꦲꦏꦸ​ꦧꦶꦱ​ꦤꦶꦤ꧀ꦢꦏ꧀ꦏꦏꦺꦥꦼꦁꦒꦮꦺꦥꦼꦁꦒꦮꦺ​ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺꦲꦶꦏꦶ​꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦲꦏꦸ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦩ꧀ꦥꦺꦏ꧀ꦫꦠ​꧈​ꦮꦶꦮꦶꦠ꧀ꦏꦸꦠꦪꦺꦫꦸꦱꦭꦺꦩ꧀​ꦩ꧀ꦭꦏꦸꦩ꧀ꦭꦏꦸ​ꦔꦤ꧀ꦠꦶ​ꦠꦼꦏꦤ꧀ꦧꦮꦃꦆꦭꦶꦫꦶꦏꦸꦩ꧀꧈​ ²⁰ꦤꦁꦔꦶꦁ​ꦲꦏꦸ​ꦤꦩꦸꦁ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦤꦁꦥꦁꦒꦺꦴꦤꦤ꧀ꦥꦁꦒꦺꦴꦤꦤ꧀ꦱꦶꦁ​ꦢꦸꦫꦸꦁ​ꦠꦲꦸ​ꦢꦶꦏꦧꦂꦫꦶ​ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦢꦢꦶꦤꦺ​ꦲꦏꦸ​ꦲꦺꦴꦫ​ꦚꦩ꧀ꦧꦸꦠ꧀ꦠꦤꦁꦏꦼꦧꦺꦴꦤ꧀ꦱꦶꦁ​ꦮꦶꦱ꧀ꦢꦶꦒꦫꦥ꧀ꦮꦺꦴꦁ​ꦭꦶꦪ​꧉​ ²¹ꦮꦸꦗꦸꦠ꧀ꦠꦺꦤꦁꦏꦶꦠꦧ꧀ꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:

“ꦮꦺꦴꦁ​ꦱꦶꦁ​ꦢꦸꦫꦸꦁ​ꦠꦲꦸ​ꦢꦶꦏꦧꦂꦫꦶ​ꦧꦧ꧀ꦢꦺꦏ꧀ꦤꦺ
ꦧꦏꦭ꧀ꦮꦼꦫꦸꦃ​ꦢꦺꦏ꧀ꦤꦺ
ꦭꦤ꧀ꦮꦺꦴꦁ​ꦱꦶꦁ​ꦢꦸꦫꦸꦁ​ꦠꦲꦸ​ꦏꦿꦸꦔꦸ​
ꦧꦏꦭ꧀ꦢꦸꦤꦸꦁ꧉​”

꧋ꦫꦱꦸꦭ꧀ꦦꦈꦭꦸꦱ꧀ꦲꦉꦥ꧀ꦠꦼꦏ​ꦤꦁꦏꦸꦠꦬꦸꦩ꧀꧈​

²²꧋ꦥꦫ​ꦱꦼꦢꦸꦭꦸꦂ​꧈​ꦪꦏꦸꦮꦶ​ꦗꦭꦂꦫꦤ꧀ꦤꦺ​ꦱꦶꦁ​ꦩꦫꦏ꧀ꦏꦏꦺꦲꦏꦸ​ꦏꦫꦺꦥꦺꦴꦠ꧀ꦠꦤ꧀ꦲꦺꦴꦫ​ꦧꦶꦱ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧉​ ²³ꦤꦁꦔꦶꦁ​ꦱꦲꦶꦏꦶ​ꦥꦼꦁꦒꦮꦺꦤꦺꦤꦁꦧꦮꦃꦏꦺꦤꦺ​ꦮꦶꦱ꧀ꦫꦩ꧀ꦥꦸꦁ​ꦭꦤ꧀ꦪ​ꦥꦚ꧀ꦕꦺꦤ꧀ꦮꦶꦱ꧀ꦥꦶꦫꦁꦥꦶꦫꦁ​ꦠꦲꦸꦤ꧀ꦠꦼꦤꦤ꧀ꦲꦼꦁꦒꦺꦴꦤ꧀ꦏꦸ​ꦏꦼꦥꦺꦔꦶꦤ꧀ꦤꦶꦭꦶꦏ꧀ꦏꦶ​ꦏꦺꦴꦮꦺ​꧉​ ²⁴ꦩꦸꦭꦤꦺ​꧈​ꦱꦶꦁ​ꦠꦏ꧀ꦱꦸꦮꦸꦤ꧀ ꦤꦺꦏ꧀ꦲꦏꦸ​ꦭꦸꦔ​ꦤꦁꦤꦼꦒꦫ​ꦱ꧀ꦥꦚꦺꦴꦭ꧀ꦲꦏꦸ​ꦧꦶꦱ​ꦩꦩ꧀ꦥꦶꦂ​ꦤꦁꦔ꧀ꦒꦺꦴꦤ꧀ꦩꦸ​꧉​ꦤꦺꦏ꧀ꦲꦏꦸ​ꦭꦺꦫꦺꦤ꧀ꦤꦁꦏꦸꦠꦬꦸꦩ꧀ꦏꦺꦴꦤꦺꦴ​꧈​ꦲꦏꦸ​ꦧꦏꦭ꧀ꦧꦼꦧꦉꦁꦔꦤ꧀ꦏꦫꦺꦴ​ꦏꦺꦴꦮꦺ​ꦱꦏ꧀ꦲꦸꦤ꧀ꦠꦂꦫ꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦲꦏꦸ​ꦧꦏꦭ꧀ꦚꦸꦮꦸꦤ꧀ꦥꦶꦠꦸꦭꦸꦁꦔꦤ꧀ꦩꦸ​꧈​ꦱꦸꦥꦪ​ꦲꦏꦸ​ꦧꦶꦱ​ꦤꦼꦫꦸꦱ꧀ꦱꦏꦺꦭꦏꦸꦏꦸ​꧉​ ²⁵ꦤꦁꦔꦶꦁ​ꦱꦲꦶꦏꦶ​ꦲꦏꦸ​ꦲꦉꦥ꧀ꦧꦸꦢꦭ꧀ꦤꦁꦏꦸꦠꦪꦺꦫꦸꦱꦭꦺꦩ꧀ ꦲꦏꦸ​ꦲꦉꦥ꧀ꦔꦿꦺꦮꦁꦔꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦤꦁꦏꦤ​꧉​ ²⁶ꦲꦮꦶꦠ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦩꦱꦼꦢꦺꦴꦤꦶꦪꦭꦤ꧀ꦄꦏꦪꦥꦢ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦢꦸꦮꦶꦠ꧀ꦏꦫꦺꦴ​ꦲꦺꦏ꧀ꦭꦱ꧀ꦱꦺ​ꦲꦠꦶ​꧈​ꦏꦁꦒꦺꦴ​ꦤꦸꦭꦸꦁꦔꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦪꦺꦫꦸꦱꦭꦺꦩ꧀ꦱꦶꦁ​ꦲꦺꦴꦫ​ꦤ꧀ꦢꦸꦮꦺ꧉​ ²⁷ꦥꦸꦠꦸꦱ꧀ꦱꦤ꧀ꦏꦸꦮꦶ​ꦩꦼꦠꦸ​ꦱꦁꦏꦏꦉꦥ꧀ꦥꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦢꦺꦮꦺꦭꦤ꧀ꦥꦚ꧀ꦕꦺꦤ꧀ꦪ​ꦲꦺꦤꦺꦁꦧꦼꦤꦼꦂꦫꦺ​ꦤꦺꦏ꧀ꦮꦺꦴꦁꦮꦺꦴꦁ​ꦲꦶꦏꦶ​ꦏꦸꦢꦸ​ꦤꦸꦭꦸꦁꦔꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦪꦺꦫꦸꦱꦭꦺꦩ꧀ꦱꦶꦁ​ꦲꦺꦴꦫ​ꦤ꧀ꦢꦸꦮꦺ꧉​ꦮꦸꦗꦸꦠ꧀ꦠꦺꦪ​ꦧꦁꦱ​ꦙꦸꦱꦶꦁ​ꦔ꧀ꦒꦮ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦫꦁ​ꦧꦁꦱꦧꦁꦱ​ꦱꦶꦁ​ꦢꦸꦢꦸ​ꦙꦸ꧉​ꦭꦤ꧀ꦗꦭꦂꦫꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦮꦶꦱ꧀ꦔꦼꦢꦸꦩ꧀ꦧꦤ꧀ꦢꦏꦱꦸꦏ꧀ꦩꦤ꧀ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦢꦸꦢꦸ​ꦙꦸ꧈​ꦩꦸꦭꦤꦺ​ꦪ​ꦮꦶꦱ꧀ꦱꦏ꧀ꦩꦼꦱ꧀ꦠꦶꦤꦺꦤꦺꦏ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦢꦸꦢꦸ​ꦙꦸꦚꦸꦏꦸꦥ꧀ꦥꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦧꦁꦱ​ꦙꦸꦏꦫꦺꦴ​ꦱꦤ꧀ꦢꦁꦥꦔꦤ꧀꧈​

²⁸꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦏꦸ​ꦮꦶꦱ꧀ꦫꦩ꧀ꦥꦸꦁ​ꦏꦫꦺꦴ​ꦥꦼꦁꦒꦮꦺꦏꦸꦲꦶꦏꦶ​꧈​ꦠꦼꦒꦼꦱ꧀ꦱꦺ​꧈​ꦤꦺꦏ꧀ꦲꦏꦸ​ꦮꦶꦱ꧀ꦩꦱꦿꦃꦲꦏꦺꦢꦸꦮꦶꦠ꧀ꦲꦸꦫꦸꦤ꧀ꦤꦤ꧀ꦩꦲꦸ​ꦏꦧꦺꦃ​ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦪꦺꦫꦸꦱꦭꦺꦩ꧀ ꦲꦏꦸ​ꦧꦏꦭ꧀ꦧꦸꦢꦭ꧀ꦤꦁꦤꦼꦒꦫ​ꦱ꧀ꦥꦚꦺꦴꦭ꧀ꦭꦤ꧀ꦩꦩ꧀ꦥꦶꦂ​ꦤꦁꦔ꧀ꦒꦺꦴꦤ꧀ꦩꦸ​ꦤꦁꦏꦸꦠꦬꦸꦩ꧀꧈​ ²⁹ꦤꦺꦏ꧀ꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦲꦏꦸ​ꦧꦏꦭ꧀​ꦔ꧀ꦒꦮ​ꦧꦼꦂꦏꦃ​ꦲꦺꦴꦏꦺꦃꦱꦁꦏꦏꦿꦶꦱ꧀ꦡꦸꦱ꧀ ꦱꦶꦁ​ꦲꦉꦥ꧀ꦠꦏ꧀ꦲꦼꦢꦸꦩ꧀ꦏꦫꦺꦴ​ꦏꦺꦴꦮꦺ​꧉​

³⁰꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦭꦤ꧀ꦲꦏꦸ​ꦱꦲꦶꦏꦶ​ꦥꦢ​ꦚꦩ꧀ꦧꦸꦠ꧀ꦠꦧꦼꦧꦉꦁꦔꦤ꧀ꦏꦁꦒꦺꦴ​ ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦲꦮꦏ꧀ꦏꦺ​ꦢꦺꦮꦺꦧꦼꦧꦉꦁꦔꦤ꧀ꦔꦿꦱꦏ꧀ꦏꦏꦺꦏꦠꦿꦺꦱ꧀ꦤꦤꦺꦫꦺꦴꦃ​ꦱꦸꦕꦶ​ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​ꦩꦸꦭꦤꦺ​ꦲꦏꦸ​ꦚꦸꦮꦸꦤ꧀ꦠꦼꦤꦤ꧀ꦩꦫꦁ​ꦏꦺꦴꦮꦺ​꧈​ꦲꦩ꧀ꦧꦺꦴꦏ꧀ꦲꦏꦸ​ꦢꦶꦫꦺꦮꦁꦔꦶ​ꦲꦶꦁ​ꦱꦏ꧀ꦗꦼꦫꦺꦴꦤꦺꦥꦼꦫꦔꦤ꧀ꦏꦸ꧉​ꦲꦏꦸ​ꦢꦶꦢꦺꦴꦔꦏ꧀ꦏꦏꦺꦱꦸꦥꦪ​ꦧꦶꦱ​ꦱ꧀ꦭꦩꦼꦠ꧀꧈​ ³¹ꦢꦶꦢꦺꦴꦔꦏ꧀ꦏꦏꦺ꧈​ꦱꦸꦥꦪ​ꦲꦏꦸ​ꦧꦶꦱ​ꦲꦸꦕꦸꦭ꧀ꦱꦁꦏꦠꦔꦤ꧀ꦤꦺ​ꦮꦺꦴꦁ​ꦙꦸꦤꦁꦪꦸꦢꦺꦪ​ꦱꦶꦁ​ꦥꦢ​ꦔ꧀ꦭꦮꦤ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧉​ꦢꦶꦢꦺꦴꦔꦏ꧀ꦏꦏꦺ꧈​ꦱꦸꦥꦪ​ꦢꦸꦮꦶꦠ꧀ꦲꦸꦫꦸꦤ꧀ꦤꦤ꧀ꦧꦶꦱ​ꦢꦶꦠꦩ꧀ꦥ​ꦲꦥꦶꦏ꧀ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦪꦺꦫꦸꦱꦭꦺꦩ꧀꧈​ ³²ꦢꦢꦶꦤꦺ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦭꦶꦭꦤꦶ​꧈​ꦲꦏꦸ​ꦧꦶꦱ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦏꦫꦺꦴ​ꦲꦠꦶ​ꦧꦸꦔꦃ​ꦭꦤ꧀ꦲꦼꦁꦒꦺꦴꦤ꧀ꦏꦸ​ꦤꦶꦭꦶꦏ꧀ꦏꦶ​ꦏꦺꦴꦮꦺ​ꦧꦶꦱ​ꦔ꧀ꦒꦮꦺ​ꦱꦼꦒꦼꦂꦫꦺ​ꦲꦠꦶꦏꦸ​ꦭꦤ꧀ꦲꦠꦶꦩꦸ​꧉​ ³³ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦧꦶꦱ​ꦔꦼꦏꦺꦏ꧀ꦏꦶꦏꦠꦼꦤ꧀ꦠꦽꦩ꧀ꦩꦤ꧀ ꦲꦩ꧀ꦧꦼꦂꦏꦃꦲꦶ​ꦏꦺꦴꦮꦺ​ꦏꦧꦺꦃ​꧉​ꦄꦩꦺꦤ꧀꧈​

↑ ↑ ↑

꧋ꦏꦶꦫꦶꦩ꧀ꦏꦧꦂꦏꦧꦂꦱ꧀ꦭꦩꦼꦠ꧀꧈​

꧇​꧑꧖꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦚꦸꦮꦸꦤ꧀ꦩꦫꦁ​ꦏꦺꦴꦮꦺ​꧈​ꦤꦺꦏ꧀ꦱꦼꦢꦸꦭꦸꦂ​ꦥ꦳ꦺꦧꦺ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧈​ꦢꦺꦏ꧀ꦤꦺꦢꦶꦠꦩ꧀ꦥ​ꦭꦤ꧀ꦢꦶꦭꦢꦺꦤ꧀ꦤꦶ​ꦱꦶꦁ​ꦲꦥꦶꦏ꧀ ꦲꦮꦶꦠ꧀ꦢꦺꦏ꧀ꦤꦺꦪ​ꦏꦪ​ꦲꦮꦏ꧀ꦏꦺ​ꦢꦺꦮꦺꦤꦸꦫꦸꦠ꧀ꦒꦸꦱ꧀ꦠꦶ​꧉​ꦱꦼꦢꦸꦭꦸꦂ​ꦥ꦳ꦺꦧꦺ​ꦲꦶꦏꦶ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​ꦤꦁꦥꦱꦩꦸꦮꦤ꧀ꦤꦁꦏꦸꦠꦏꦺꦁꦏꦿꦺꦪ​꧉​ ²ꦩꦸꦭꦤꦺ​ꦲꦏꦸ​ꦚꦸꦮꦸꦤ꧀ꦩꦫꦁ​ꦏꦺꦴꦮꦺ​꧈​ꦱꦼꦢꦸꦭꦸꦂ​ꦲꦶꦏꦶ​ꦢꦶꦭꦢꦺꦤ꧀ꦤꦶ​ꦏꦪ​ꦱꦏ꧀ꦥꦤ꧀ꦠꦼꦱ꧀ꦱꦺ​ꦏꦁꦒꦺꦴ​ꦱꦼꦢꦸꦭꦸꦂ​ꦱꦶꦁ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​꧉​ꦤꦺꦏ꧀ꦧꦸꦠꦸꦃ​ꦲꦥꦲꦥ​ꦢꦶꦠꦸꦭꦸꦁꦔꦶ​꧈​ꦲꦮꦶꦠ꧀ꦢꦺꦏ꧀ꦤꦺꦢꦺꦮꦺꦪ​ꦮꦶꦱ꧀ꦤꦸꦭꦸꦁꦔꦶ​ꦱꦼꦢꦸꦭꦸꦂ​ꦥꦶꦫꦁꦥꦶꦫꦁ​꧈​ꦏꦪꦢꦺꦤꦺꦲꦏꦸ​ꦲꦶꦏꦶ​꧉​

³꧋ꦲꦏꦸ​ꦚꦸꦮꦸꦤ꧀ꦢꦶꦏꦶꦫꦶꦩ꧀ꦩꦏꦺꦱ꧀ꦭꦩꦼꦠ꧀ꦩꦫꦁ​ꦱꦼꦢꦸꦭꦸꦂ​ꦄꦏ꧀ꦮꦶꦭ​ꦭꦤ꧀ꦥꦿꦶꦱ꧀ꦏ꧈​ꦏꦚ꧀ꦕꦏꦸ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​ ⁴ꦱꦼꦢꦸꦭꦸꦂ​ꦱꦏ꧀ꦗꦺꦴꦢꦺꦴꦲꦶꦏꦶ​ꦲꦺꦴꦫ​ꦲꦺꦩꦤ꧀ꦲꦸꦫꦶꦥ꧀ꦥꦺꦲꦼꦁꦒꦺꦴꦤꦺ​ꦤꦸꦭꦸꦁꦔꦶ​ꦲꦏꦸ​꧉​ꦭꦤ꧀ꦲꦺꦴꦫ​ꦤꦩꦸꦁ​ꦲꦏꦸ​ꦢꦺꦮꦺ꧈​ꦤꦁꦔꦶꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦁꦏꦥꦱꦩꦸꦮꦤ꧀ꦥꦱꦩꦸꦮꦤ꧀ꦱꦶꦁ​ꦢꦸꦢꦸ​ꦧꦁꦱ​ꦙꦸꦪ​ꦫꦸꦩꦁꦱ​ꦏꦼꦥꦺꦴꦠꦁꦔꦤ꧀ꦥꦶꦠꦸꦭꦸꦁꦔꦤ꧀ꦏꦫꦺꦴ​ꦱꦼꦢꦸꦭꦸꦂ​ꦭꦺꦴꦫꦺꦴ​ꦲꦶꦏꦶ​꧉​ ⁵ꦢꦶꦏꦶꦫꦶꦩ꧀ꦩꦏꦺꦱ꧀ꦭꦩꦼꦠ꧀ꦲꦸꦒ​ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦥꦢ​ꦩꦺꦭꦸ​ꦏꦸꦩ꧀ꦥꦸꦭ꧀ꦭꦤ꧀ꦤꦁꦲꦺꦴꦩꦃꦲꦺ​ꦱꦼꦢꦸꦭꦸꦂ​ꦄꦏ꧀ꦮꦶꦭ​ꦭꦤ꧀ꦥꦿꦶꦱ꧀ꦏ꧉​

꧋ꦏꦼꦥꦿꦶꦪꦺ​ꦏꦧꦂꦫꦺ​ꦏꦫꦺꦴ​ꦱꦼꦢꦸꦭꦸꦂꦏꦸ​ꦌꦥꦺꦤꦺꦠꦸꦱ꧀ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ?ꦢꦺꦏ꧀ꦤꦺꦤꦸꦫꦸꦠ꧀ꦒꦸꦱ꧀ꦠꦶ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦤꦁꦧꦮꦃꦄꦱꦶꦪ​꧉​ ⁶ꦏꦶꦫꦶꦩꦏꦺꦱ꧀ꦭꦩꦼꦠ꧀ꦩꦫꦁ​ꦱꦼꦢꦸꦭꦸꦂ​ꦩꦫꦶꦪ꧉​ꦢꦺꦏ꧀ꦤꦺꦪ​ꦲꦺꦴꦫ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦲꦼꦁꦒꦺꦴꦤꦺ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦏꦺꦴꦮꦺ​꧉​ ⁷ꦏꦼꦥꦿꦶꦪꦺ​ꦏꦧꦂꦫꦺ​ꦏꦫꦺꦴ​ꦱꦼꦢꦸꦭꦸꦂ​ꦄꦢꦿꦺꦴꦤꦶꦏꦸꦱ꧀ꦭꦤ꧀ꦱꦼꦢꦸꦭꦸꦂ​ꦙꦸꦤꦶꦪ꧈​ꦏꦚ꧀ꦕꦏꦸ​ꦠꦸꦁꦒꦭ꧀ꦧꦁꦱ​ꦱꦶꦁ​ꦲꦸꦒ​ꦢꦶꦱꦼꦠꦿꦥ꧀ꦧꦉꦁ​ꦏꦫꦺꦴ​ꦲꦏꦸ​꧉​ꦱꦼꦢꦸꦭꦸꦂ​ꦭꦺꦴꦫꦺꦴ​ꦲꦶꦏꦶ​ꦥꦚ꧀ꦕꦺꦤ꧀ꦫꦱꦸꦭ꧀ꦱꦶꦁ​ꦏꦗꦺꦤ꧀ꦠꦼꦤꦤ꧀ꦭꦤ꧀ꦲꦼꦁꦒꦺꦴꦤꦺ​ꦤꦸꦫꦸꦠ꧀ꦒꦸꦱ꧀ꦠꦶ​ꦩꦭꦃ​ꦭꦸꦮꦶꦃ​ꦱꦸꦮꦶꦠꦼꦤꦶꦩ꧀ꦧꦁꦲꦏꦸ​꧉​

⁸꧋ꦏꦶꦫꦶꦩꦏꦺꦱ꧀ꦭꦩꦼꦠ꧀ꦩꦫꦁ​ꦄꦩ꧀ꦥ꧀ꦭꦶꦪꦠꦸꦱ꧀ ꦱꦼꦢꦸꦭꦸꦂꦏꦸ​ꦲꦶꦁ​ꦒꦸꦱ꧀ꦠꦶ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶꦠꦼꦤꦤ꧀꧈​ ⁹ꦲꦗ​ꦭꦭꦶ​ꦩꦫꦁ​ꦱꦼꦢꦸꦭꦸꦂ​ꦈꦂꦧꦤꦸꦱ꧀ ꦱꦶꦁ​ꦏꦪ​ꦲꦏꦸ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦏꦿꦶꦱ꧀ꦡꦸꦱ꧀꧈​ꦲꦸꦒ​ꦯ꧀ꦠꦏꦶꦱ꧀ ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧉​ ¹⁰ꦏꦶꦫꦶꦩꦏꦺꦱ꧀ꦭꦩꦼꦠ꧀ꦩꦫꦁ​ꦱꦼꦢꦸꦭꦸꦂ​ꦄꦥꦺꦊꦱ꧀ ꦱꦶꦁ​ꦠꦼꦩꦼꦤ꧀ꦤꦸꦫꦸꦠ꧀ꦏꦿꦶꦱ꧀ꦡꦸꦱ꧀꧈​ꦲꦸꦒ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦲꦺꦴꦩꦃꦲꦺ​ꦱꦼꦢꦸꦭꦸꦂ​ꦄꦫꦶꦱ꧀ꦠꦺꦴꦧꦼꦊꦱ꧀꧈​ ¹¹ꦱꦼꦢꦸꦭꦸꦂ​ꦲ꦳ꦺꦫꦺꦴꦢꦶꦪꦸꦩ꧀ ꦱꦼꦢꦸꦭꦸꦂ​ꦠꦸꦁꦒꦭ꧀ꦧꦁꦱ​꧈​ꦏꦶꦫꦶꦩꦏꦺꦱ꧀ꦭꦩꦼꦠ꧀ꦲꦸꦒ​ꦩꦫꦁ​ꦢꦺꦏ꧀ꦤꦺ꧉​ꦏꦼꦥꦿꦶꦪꦺ​ꦏꦧꦂꦫꦺ​ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤꦁꦲꦺꦴꦩꦃꦲꦺ​ꦱꦼꦢꦸꦭꦸꦂ​ꦤꦂꦏꦶꦱꦸꦱ꧀?ꦱꦶꦁ​ꦠꦏ꧀ꦱꦸꦮꦸꦤ꧀ꦥꦢ​ꦱ꧀ꦭꦩꦼꦠ꧀ꦱꦁꦏꦧꦼꦂꦏꦃꦲꦺ​ꦒꦸꦱ꧀ꦠꦶ​꧉​

¹²꧋ꦲꦗ​ꦭꦭꦶ​ꦲꦸꦒ​ꦩꦫꦁ​ꦱꦼꦢꦸꦭꦸꦂ​ꦠꦿꦶꦥ꦳ꦺꦤ​ꦭꦤ꧀ꦱꦼꦢꦸꦭꦸꦂ​ꦠꦿꦶꦥꦺꦴꦱ꧉​ꦱꦼꦢꦸꦭꦸꦂ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦲꦶꦏꦶ​ꦪ​ꦲꦺꦴꦫ​ꦱꦼꦩ꧀ꦧꦿꦤ​ꦲꦼꦁꦒꦺꦴꦤꦺ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​꧉​ꦲꦸꦒ​ꦱꦼꦢꦸꦭꦸꦂꦏꦸ​ꦮꦺꦢꦺꦴꦏ꧀ꦦꦺꦂꦱꦶꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧉​ꦢꦺꦏ꧀ꦤꦺꦲꦸꦒ​ꦲꦺꦴꦫ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦲꦼꦁꦒꦺꦴꦤꦺ​ꦚꦩ꧀ꦧꦸꦠ꧀ꦠꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​꧉​ ¹³ꦏꦶꦫꦶꦩꦏꦺꦱ꧀ꦭꦩꦼꦠ꧀ꦩꦫꦁ​ꦱꦼꦢꦸꦭꦸꦂ​ꦫꦸꦥ꦳ꦸꦱ꧀ ꦱꦶꦁ​ꦚꦠ​ꦠꦼꦤꦤ꧀ꦥꦼꦁꦒꦮꦺꦪꦤ꧀ꦏꦸꦏꦁꦒꦺꦴ​ꦒꦸꦱ꧀ꦠꦶ​꧉​ꦲꦸꦒ​ꦲꦶꦧꦸꦤꦺ​ꦱꦼꦢꦸꦭꦸꦂ​ꦫꦸꦥ꦳ꦸꦱ꧀ ꦱꦶꦁ​ꦠꦿꦺꦱ꧀ꦤꦩꦫꦁ​ꦲꦏꦸ​ꦏꦪ​ꦲꦤꦏ꧀ꦏꦺ​ꦢꦺꦮꦺ꧉​ ¹⁴ꦏꦼꦥꦿꦶꦪꦺ​ꦏꦧꦂꦫꦺ​ꦏꦫꦺꦴ​ꦱꦼꦢꦸꦭꦸꦂ​ꦄꦱꦶꦤ꧀ꦏꦿꦶꦠꦸꦱ꧀ ꦱꦼꦢꦸꦭꦸꦂ​ꦥ꦳꧀ꦭꦶꦏꦺꦴꦤ꧀ ꦱꦼꦢꦸꦭꦸꦂ​ꦲ꦳ꦺꦂꦩꦺꦱ꧀ ꦱꦼꦢꦸꦭꦸꦂ​ꦥꦠꦿꦺꦴꦧꦱ꧀ ꦱꦼꦢꦸꦭꦸꦂ​ꦲ꦳ꦺꦂꦩꦱ꧀ꦭꦤ꧀ꦲꦸꦒ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦧꦼꦧꦉꦔꦤ꧀ꦤꦺ? ¹⁵ꦏꦶꦫꦶꦩꦏꦺꦱ꧀ꦭꦩꦼꦠ꧀ꦩꦫꦁ​ꦱꦼꦢꦸꦭꦸꦂ​ꦦ꦳ꦶꦭꦺꦴꦭꦺꦴꦒꦼꦱ꧀ꦭꦤ꧀ꦱꦼꦢꦸꦭꦸꦂ​ꦪꦸꦭꦶꦪ​꧈​ꦱꦼꦢꦸꦭꦸꦂ​ꦤꦺꦫꦸꦱ꧀ꦭꦤ꧀ꦪꦸꦤꦺ꧉​ꦲꦸꦒ​ꦏꦶꦫꦶꦩꦏꦺꦱ꧀ꦭꦩꦼꦠ꧀ꦩꦫꦁ​ꦱꦼꦢꦸꦭꦸꦂ​ꦎꦭꦶꦩ꧀ꦥꦱ꧀ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦧꦼꦧꦉꦔꦤ꧀ꦤꦺ꧉​

¹⁶꧋ꦥꦫ​ꦱꦼꦢꦸꦭꦸꦂ​꧈​ꦥꦢ​ꦫꦁꦏꦸꦭ꧀ꦭꦤꦱꦏ꧀ꦥꦢꦥꦢꦏꦁꦒꦺꦴ​ꦠꦤ꧀ꦢꦏꦠꦿꦺꦱ꧀ꦤꦤ꧀ꦱꦁꦏꦲꦏꦸ​꧉​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦁꦏꦥꦱꦩꦸꦮꦤ꧀ꦏꦧꦺꦃ​ꦤꦁꦧꦮꦃꦏꦺꦤꦺ​ꦥꦢ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​ꦏꦧꦺꦃ​ꦱꦶꦁ​ꦤꦁꦏꦸꦠꦬꦸꦩ꧀ꦏꦺꦴꦤꦺꦴ​꧉​

¹⁷꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦏꦼꦥꦺꦔꦶꦤ꧀ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​꧈​ꦱꦸꦥꦪ​ꦥꦢ​ ꦲꦮꦱ꧀ꦭꦤ꧀ꦲꦠꦶꦲꦠꦶꦏꦫꦺꦴ​ꦮꦺꦴꦁ​ꦱꦶꦁ​ꦩꦫꦏ꧀ꦏꦏꦺꦕꦺꦴꦁ​ꦏꦿꦺꦃ​ꦭꦤ꧀ꦩꦼꦕꦃ​ꦥꦱꦩꦸꦮꦤ꧀ ꦲꦸꦒ​ꦩꦫꦏ꧀ꦏꦏꦺꦱꦼꦢꦸꦭꦸꦂ​ꦱꦶꦗꦶꦭꦺꦴꦫꦺꦴꦤꦶꦁꦒꦭ꧀ꦢꦭꦤ꧀ꦤꦺ​ꦒꦸꦱ꧀ꦠꦶ​꧉​ꦥꦢ​ꦩꦸꦭꦁꦔꦏꦺꦥꦽꦏꦫꦥꦽꦏꦫ​ꦱꦶꦁ​ꦲꦺꦴꦫ​ꦕꦺꦴꦕꦺꦴꦏ꧀​ꦧ꧀ꦭꦱ꧀ꦏꦫꦺꦴ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​ꦱꦶꦁ​ꦮꦶꦱ꧀ꦢꦶꦮꦸꦭꦁꦔꦏꦺꦩꦫꦁ​ꦏꦺꦴꦮꦺ​꧉​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦢꦶꦲꦼꦢꦺꦴꦃꦲꦶ​꧉​ ¹⁸ꦏꦼꦤꦺꦁꦲꦥ​ꦲꦮꦏ꧀ꦏꦺ​ꦢꦺꦮꦺꦏꦺꦴꦏ꧀ꦏꦸꦢꦸ​ꦔꦼꦢꦺꦴꦃꦲꦶ​ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​?ꦲꦮꦶꦠ꧀ꦲꦺꦴꦫ​ꦥꦢ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ꦲꦺꦴꦩꦺꦴꦁꦔꦤ꧀ꦤꦺ​ꦌꦤꦏ꧀ꦏꦺꦭꦤ꧀ꦲꦭꦸꦱ꧀ꦱꦺ​ꦲꦺꦫꦩ꧀ꦩꦺꦫꦩ꧀ ꦤꦁꦔꦶꦁ​ꦠꦸꦗꦸꦮꦤ꧀ꦤꦺꦤꦩꦸꦁ​ꦔꦼꦤꦺꦁꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦲꦺꦴꦫ​ꦔꦼꦂꦠꦶ​ꦤꦺꦏ꧀ꦢꦶꦲꦥꦸꦱ꧀ꦱꦶ​꧉​ ¹⁹ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​!ꦲꦮꦶꦠ꧀ꦏꦧꦺꦃ​ꦮꦺꦴꦁ​ꦮꦶꦱ꧀ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦤꦸꦫꦸꦠ꧀ꦒꦸꦱ꧀ꦠꦶ​ꦠꦼꦤꦤ꧀꧈​ꦩꦸꦭꦤꦺ​ꦲꦏꦸ​ꦪ​ꦧꦸꦔꦃ​ꦠꦼꦤꦤ꧀꧈​ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦏꦉꦥ꧀ꦏꦸ​ꦏꦺꦴꦮꦺ​ꦥꦢ​ꦩꦶꦏꦶꦂ​ꦱꦶꦁ​ꦲꦥꦶꦏ꧀ꦧꦧ꧀ꦱꦶꦁ​ꦧꦼꦤꦼꦂ​꧈​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧉​ꦧꦧ꧀ꦱꦶꦁ​ꦲꦭ​꧈​ꦏꦸꦮꦶ​ꦏꦸꦢꦸ​ꦢꦶꦲꦼꦢꦺꦴꦃꦲꦶ​꧉​ ²⁰ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦧꦶꦱ​ꦔꦼꦏꦺꦏ꧀ꦏꦶꦏꦠꦼꦤ꧀ꦠꦽꦩ꧀ꦩꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦢꦺꦏ꧀ꦤꦺꦱꦶꦁ​ꦤ꧀ꦢꦁꦧꦏꦭ꧀ꦔꦽꦩꦸꦏ꧀ꦱꦺꦠꦤ꧀ꦤꦁꦔꦶꦱꦺꦴꦂꦫꦺ​ꦱꦶꦏꦶꦭ꧀ꦩꦸ​꧉​

꧋ꦩꦸꦒꦩꦸꦒ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦔꦼꦧꦼꦏ꧀ꦏꦶ​ꦲꦠꦶꦩꦸ​!

²¹꧋ꦥꦫ​ꦱꦼꦢꦸꦭꦸꦂ​꧈​ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ꦱꦶꦁ​ꦚꦩ꧀ꦧꦸꦠ꧀ꦠꦏꦫꦺꦴ​ꦲꦏꦸ​꧈​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​꧉​ꦲꦸꦒ​ꦱꦼꦢꦸꦭꦸꦂ​ꦭꦸꦱꦶꦪꦸꦱ꧀ ꦙꦱꦺꦴꦤ꧀ꦭꦤ꧀ꦱꦼꦢꦸꦭꦸꦂ​ꦯꦺꦴꦱꦶꦥꦠꦺꦂ꧈​ꦏꦧꦺꦃ​ꦠꦸꦁꦒꦭ꧀ꦧꦁꦱ​ꦏꦫꦺꦴ​ꦲꦏꦸ​꧉​

²²꧋ꦲꦏꦸ​ꦢꦺꦮꦺꦲꦸꦒ​꧈​ꦠꦺꦂꦠꦶꦪꦸꦱ꧀ ꦱꦶꦁ​ꦤꦸꦭꦶꦱ꧀ꦭꦪꦁ​ꦲꦶꦏꦶ​꧈​ꦪ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​ꦏꦧꦺꦃ​ꦱꦶꦁ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​꧉​

^23-24꧋ꦲꦸꦒ​ꦱꦼꦢꦸꦭꦸꦂ​ꦒꦪꦸꦱ꧀ꦏꦶꦫꦶꦩ꧀ꦱ꧀ꦭꦩꦼꦠ꧀꧈​ꦢꦺꦏ꧀ꦤꦺꦱꦶꦁ​ꦠꦏ꧀ꦲꦶꦤꦼꦥ꧀ꦥꦶꦭꦤ꧀ꦢꦺꦏ꧀ꦤꦺꦲꦸꦒ​ꦱꦶꦁ​ꦔꦼꦏꦺꦏ꧀ꦏꦶꦥꦁꦒꦺꦴꦤ꧀ꦤꦤ꧀ꦩꦫꦁ​ꦥꦱꦩꦸꦮꦤ꧀ꦔꦸꦩ꧀ꦥꦸꦭ꧀ꦤꦁꦲꦺꦴꦩꦃꦲꦺ​꧉​ꦏꦧꦂ​ꦱ꧀ꦭꦩꦼꦠ꧀ꦲꦸꦒ​ꦱꦁꦏꦱꦼꦢꦸꦭꦸꦂ​ꦌꦫꦱ꧀ꦠꦸꦱ꧀ ꦱꦶꦁ​ꦚꦼꦏꦼꦭ꧀ꦢꦸꦮꦶꦠ꧀ꦠꦺꦏꦸꦠꦏꦺꦤꦺ​꧉​ꦲꦸꦒ​ꦱꦼꦢꦸꦭꦸꦂ​ꦏ꧀ꦮꦂꦠꦸꦱ꧀ꦏꦶꦫꦶꦩ꧀ꦏꦧꦂ​ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​꧉​ꦩꦸꦒꦩꦸꦒ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦔꦼꦧꦼꦏ꧀ꦏꦶ​ꦲꦠꦶꦩꦸ​ꦏꦧꦺꦃ​꧉​

꧋ꦥꦩꦸꦗꦶ​ꦭꦤ꧀ꦥꦼꦤꦸꦠꦸꦥ꧀꧈​

²⁵꧋ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦥꦢ​ꦔ꧀ꦭꦸꦲꦸꦂꦫꦏꦺꦗꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦏ꧀ꦤꦺꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦔꦸꦮꦠ꧀ꦠꦏꦺꦥꦼꦔꦤ꧀ꦢꦼꦭ꧀ꦩꦸ​꧉​ꦪꦏꦸꦮꦶ​ꦱꦶꦁ​ꦠꦏ꧀ꦲꦺꦴꦩꦺꦴꦁꦔꦏꦺ꧈​ꦤꦺꦏ꧀ꦲꦏꦸ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦥꦚ꧀ꦕꦺꦤ꧀ꦏꦱꦶꦩ꧀ꦥꦼꦤ꧀ꦥꦶꦫꦁꦥꦶꦫꦁ​ꦲꦠꦸꦱ꧀ꦠꦲꦸꦤ꧀꧈​ ²⁶ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦭꦁꦒꦼꦁ​ꦱꦲꦶꦏꦶ​ꦮꦶꦱ꧀ꦔꦸꦢꦂꦫꦏꦺꦱꦶꦩ꧀ꦥꦼꦤ꧀ꦤꦤ꧀ꦲꦶꦏꦶ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦢꦺꦏ꧀ꦤꦺ꧉​ꦲꦮꦏ꧀ꦏꦺ​ꦢꦺꦮꦺꦢꦶꦏꦺꦴꦁꦏꦺꦴꦤ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​꧈​ꦱꦶꦁ​ꦲꦸꦒ​ꦮꦶꦱ꧀ꦢꦶꦲꦺꦴꦩꦺꦴꦁꦔꦏꦺꦏꦫꦺꦴ​ꦥꦫ​ꦤꦧꦶ​ꦤꦁꦏꦶꦠꦧ꧀꧈​ꦏꦧꦺꦃ​ꦧꦁꦱ​ꦏꦸꦢꦸ​ꦏꦿꦸꦔꦸ​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​꧈​ꦱꦸꦥꦪ​ꦧꦶꦱ​ꦥꦽꦕꦪ​ꦭꦤ꧀ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

²⁷꧋ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦺꦴꦫ​ꦲꦺꦤꦺꦁꦭꦶꦪꦤꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦒꦼꦢꦺꦢꦺꦮꦺꦏꦮꦼꦫꦸꦃꦲꦺ꧈​ꦢꦺꦏ꧀ꦤꦺ​ꦢꦺꦮꦺꦱꦶꦁ​ꦏꦸꦢꦸ​ꦢꦶꦭꦸꦲꦸꦂꦫꦏꦺꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦢꦺꦏ꧀ꦤꦺ​ꦱꦶꦁ​ꦔꦺꦴꦁꦏꦺꦴꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀​ꦚ꧀ꦭꦩꦼꦠ꧀ꦠꦏꦺꦲꦮꦏ꧀ꦏꦺ​ꦢꦺꦮꦺ꧉​ꦄꦩꦺꦤ꧀꧈​

ꦦꦈꦭꦸꦱ꧀

↑ ↑ ↑

꧋ꦥꦼꦩ꧀ꦧꦸꦏꦏ꧀ꦏꦤ꧀​ꦭꦤ꧀ꦥꦩꦸꦗꦶ​ꦱ꧀ꦭꦩꦼꦠ꧀꧈​

꧇​꧑꧇​

^1-2꧋ꦥꦫ​ꦱꦼꦢꦸꦭꦸꦂ​꧈​ꦲꦶꦏꦶ​ꦭꦪꦁ​ꦱꦁꦏꦔ꧀ꦒꦺꦴꦤ꧀ꦏꦸ​꧈​ꦦꦈꦭꦸꦱ꧀ ꦱꦶꦁ​ꦢꦶꦥꦁꦒꦶꦭ꧀ꦏꦫꦺꦴ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦢꦢꦶ​ꦫꦱꦸꦭ꧀ꦭꦺ​ꦭꦤ꧀ꦲꦸꦒ​ꦱꦁꦏꦱꦼꦢꦸꦭꦸꦂ​ꦱꦺꦴꦱ꧀ꦠꦺꦤꦺꦱ꧀ ꦩꦫꦁ​ꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦏꦸꦠꦏꦺꦴꦫꦶꦤ꧀ꦠꦴ꧉​ꦏꦺꦴꦮꦺ​ꦏꦧꦺꦃ​ꦮꦶꦱ꧀ꦢꦶꦥꦶꦭꦶꦃ​ꦢꦢꦶ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦱꦸꦕꦶ​꧈​ꦗꦭꦂꦫꦤ꧀ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ ꦧꦉꦁ​ꦏꦫꦺꦴ​ꦱꦼꦢꦸꦭꦸꦂ​ꦏꦧꦺꦃ​ꦤꦁꦲꦼꦤ꧀ꦢꦶ​ꦮꦲꦺ​꧈​ꦱꦶꦁ​ꦥꦢ​ꦩꦼꦩꦸꦗꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦮꦺꦴꦁꦮꦺꦴꦁ​ꦭꦤ꧀ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​

³꧋ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦔꦼꦢꦸꦤ꧀ꦤꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦩꦫꦁ​ꦏꦺꦴꦮꦺ​ꦏꦧꦺꦃ​꧉​

꧋ꦏꦱꦸꦒꦶꦃꦲꦤ꧀ꦲꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

⁴꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦲꦺꦴꦫ​ꦭꦺꦫꦺꦤ꧀ꦲꦼꦁꦒꦺꦴꦤ꧀ꦏꦸ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦏꦺꦴꦮꦺ​꧈​ꦲꦮꦶꦠ꧀ꦢꦺꦏ꧀ꦤꦺꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦏꦺꦴꦮꦺ​꧈​ꦱꦏ꧀ꦮꦶꦱ꧀ꦱꦺ​ꦏꦺꦴꦮꦺ​ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​ ⁵ꦲꦼꦁꦒꦺꦴꦤ꧀ꦩꦸ​ꦢꦢꦶ​ꦱꦶꦗꦶ​ꦏꦫꦺꦴ​ꦢꦺꦏ꧀ꦤꦺꦏꦸꦮꦶ​ꦩꦫꦏ꧀ꦏꦏꦺꦏꦺꦴꦮꦺ​ꦧꦶꦱ​ꦱꦸꦒꦶꦃ​ꦲꦶꦁ​ꦥꦽꦏꦫ​ꦲꦥ​ꦮꦲꦺ​꧈​ꦪ​ꦱꦸꦒꦶꦃ​ꦲꦶꦁ​ꦠꦼꦠꦼꦩ꧀ꦧꦸꦁꦔꦤ꧀ꦭꦤ꧀ꦲꦸꦒ​ꦱꦸꦒꦶꦃ​ꦲꦶꦁ​ꦏꦮꦼꦫꦸꦃ꧉​ ^6-7ꦥꦶꦮꦸꦭꦁꦔꦺ​ꦲꦮꦏ꧀ꦏꦺ​ꦢꦺꦮꦺꦩꦫꦁ​ꦏꦺꦴꦮꦺ​ꦧꦧ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦤ꧀ꦠꦼꦥ꧀ꦲꦶꦁ​ꦲꦠꦶꦩꦸ​꧈​ꦩꦸꦭꦤꦺ​꧈​ꦲꦶꦁ​ꦱꦏ꧀ꦗꦼꦫꦺꦴꦤꦺꦔꦉꦥ꧀ꦲꦉꦥ꧀ꦠꦼꦏꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦺꦴꦮꦺ​ꦪ​ꦲꦺꦴꦫ​ꦏꦼꦏꦸꦫꦁꦔꦤ꧀ꦲꦥꦲꦥ​ꦧ꧀ꦭꦱ꧀ꦧꦧ꧀ꦏꦥꦶꦤ꧀ꦠꦼꦫꦤ꧀ꦏꦥꦶꦤ꧀ꦠꦼꦂꦫꦤ꧀ꦥꦮꦺꦃꦲꦺ​ꦫꦺꦴꦃ​ꦱꦸꦕꦶ​꧉​ ⁸ꦒꦸꦱ꧀ꦠꦶ​ꦲꦸꦒ​ꦧꦏꦭ꧀ꦔꦿꦺꦮꦁꦔꦶ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦏꦸꦮꦠ꧀ꦠꦼꦫꦸꦱ꧀ꦠꦼꦏꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦭꦤ꧀ꦱꦸꦥꦪ​ꦲꦩ꧀ꦧꦺꦱꦸꦏ꧀ ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦠꦼꦏ​ꦔꦿꦸꦠꦸꦩꦤꦸꦁꦱ​꧈​ꦏꦺꦴꦮꦺ​ꦏꦧꦺꦃ​ꦧꦶꦱ​ꦏꦼꦠꦼꦩꦸ​ꦠꦤ꧀ꦥ​ꦱꦭꦃ​꧉​ ⁹ꦒꦸꦱ꧀ꦠꦶ​ꦄꦭ꧀ꦭꦃ​ꦥꦚ꧀ꦕꦺꦤ꧀ꦏꦼꦤꦺꦁꦢꦶꦗꦒꦏ꧀ꦏꦏꦺꦠꦼꦤꦤ꧀꧈​ꦢꦺꦏ꧀ꦤꦺꦱꦶꦁ​ꦩꦁꦒꦶꦭ꧀ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦲꦸꦫꦶꦥ꧀ꦢꦢꦶ​ꦱꦶꦗꦶ​ꦏꦫꦺꦴ​ꦲꦤꦏ꧀ꦏꦺ​꧈​ꦪꦏꦸꦮꦶ​꧈​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​

꧋ꦥꦢ​ꦢꦢꦶꦪ​ꦱꦶꦗꦶ​ꦲꦶꦁ​ꦥꦶꦏꦶꦂꦫꦤ꧀꧈​

¹⁰꧋ꦥꦫ​ꦱꦼꦢꦸꦭꦸꦂ​꧈​ꦏꦼꦗꦧ​ꦱꦁꦏꦏꦸꦮꦶ​ꦩꦲꦸ​ꦏꦧꦺꦃ​ꦲꦏꦸ​ꦤ꧀ꦢꦸꦮꦺꦤ꧀ꦤꦶ​ꦠꦼꦩ꧀ꦧꦸꦁ​ꦭꦶꦪꦤꦺ​ꦩꦫꦁ​ꦏꦺꦴꦮꦺ​!ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦲꦏꦸ​ꦚꦸꦮꦸꦤ꧀ꦠꦼꦤꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​꧈​ꦲꦩ꧀ꦧꦺꦴꦏ꧀ꦲꦗ​ꦥꦢ​ꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀ꦭꦤ꧀ꦱꦺꦗꦺꦱꦺꦗꦺꦥꦶꦤꦼꦩꦸꦤꦺꦔꦺꦴꦤꦺꦴ​꧉​ꦲꦩ꧀ꦧꦺꦴꦏ꧀ꦥꦢ​ꦤꦸꦁꦒꦭ꧀ꦭ​ꦢꦢꦶ​ꦱꦶꦗꦶ​ꦲꦶꦁ​ꦥꦶꦏꦶꦂꦫꦤ꧀ꦭꦤ꧀ꦲꦶꦁ​ꦏꦼꦏꦉꦥ꧀ꦥꦤ꧀ꦲꦼꦁꦒꦺꦴꦤ꧀ꦩꦸ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​꧉​ ¹¹ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦏꦺꦧꦧ꧀ꦲꦶꦏꦶ​ꦩꦫꦁ​ꦏꦺꦴꦮꦺ​?ꦗꦭꦂꦫꦤ꧀ꦲꦺꦤꦺꦁꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦁꦏꦧꦿꦪꦠ꧀ꦠꦺ​ꦱꦼꦢꦸꦭꦸꦂ​ꦏ꧀ꦭꦺꦴꦌꦔꦺꦴꦩꦺꦴꦁꦔꦶꦲꦏꦸ​꧈​ꦗꦫꦺꦤꦺ​ꦤꦁꦠꦼꦔꦃꦩꦸ​ꦲꦺꦤꦺꦁꦱꦶꦁ​ꦥꦢ​ꦠꦸꦏꦂꦫꦤ꧀꧈​ ¹²ꦗꦫꦺꦤꦺ​ꦲꦺꦤꦺꦁꦱꦶꦁ​ꦔꦺꦴꦩꦺꦴꦁ:“ꦲꦏꦸ​ꦩꦺꦭꦸ​ꦫꦱꦸꦭ꧀ꦦꦈꦭꦸꦱ꧀ ”ꦭꦶꦪꦤꦺ​ꦔꦺꦴꦩꦺꦴꦁ:“ꦲꦏꦸ​ꦩꦺꦭꦸ​ꦄꦥꦺꦴꦭꦺꦴꦱ꧀ ”ꦭꦶꦪꦤꦺ​ꦩꦼꦤꦺꦃ​ꦔꦺꦴꦩꦺꦴꦁ:“ꦲꦏꦸ​ꦩꦺꦭꦸ​ꦫꦱꦸꦭ꧀ꦦꦺꦠꦿꦸꦱ꧀”ꦭꦤ꧀ꦲꦸꦒ​ꦲꦺꦤꦺꦁꦱꦶꦁ​ꦔꦺꦴꦩꦺꦴꦁ:“ꦲꦏꦸ​ꦩꦺꦭꦸ​ꦏꦿꦶꦱ꧀ꦡꦸꦱ꧀꧈​”

¹³꧋ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦴꦏ꧀ꦢꦶꦥꦶꦏꦶꦂ​ꦱꦶꦁ​ꦲꦥꦶꦏ꧀!ꦲꦥ​ꦏꦿꦶꦱ꧀ꦡꦸꦱ꧀ꦩꦸꦭꦁꦔꦶꦤꦺꦏ꧀ꦱꦶꦁ​ꦤꦸꦫꦸꦠ꧀ꦢꦺꦏ꧀ꦤꦺꦏꦸꦮꦶ​ꦏꦸꦢꦸꦤꦺ​ꦱꦺꦗꦺꦱꦺꦗꦺꦭꦤ꧀ꦢꦺꦮꦺꦢꦺꦮꦺ?ꦭꦲꦸꦠ꧀ꦲꦺꦴꦫ​ꦠ​?ꦲꦥ​ꦱꦶꦁ​ꦢꦶꦥꦼꦤ꧀ꦠꦺꦁꦩꦠꦶ​ꦔ꧀ꦭꦧꦸꦃꦲꦶ​ꦏꦺꦴꦮꦺ​ꦏꦸꦮꦶ​ꦫꦱꦸꦭ꧀ꦦꦈꦭꦸꦱ꧀?ꦲꦥ​ꦏꦺꦴꦮꦺ​ꦏꦸꦮꦶ​ꦢꦶꦧꦥ꧀ꦠꦶꦱ꧀ꦱꦸꦥꦪ​ꦢꦢꦶ​ꦩꦸꦫꦶꦢ꧀ꦢꦺ​ꦫꦱꦸꦭ꧀ꦦꦈꦭꦸꦱ꧀?ꦭꦲꦸꦠ꧀ꦲꦺꦴꦫ​ꦠ​?

¹⁴꧋ꦩꦸꦭꦤꦺ​ꦲꦏꦸ​ꦪ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤ꧀ꦢꦶꦭꦭꦃꦲꦺꦲꦏꦸ​ ꦪ​ꦲꦺꦴꦫ​ꦲꦩ꧀ꦧꦥ꧀ꦠꦶꦱ꧀ꦱꦥꦱꦥ​ꦱꦁꦏꦥꦱꦩꦸꦮꦤ꧀ꦩꦸ꧈​ꦏꦼꦗꦧ​ꦤꦩꦸꦁ​ꦱꦼꦢꦸꦭꦸꦂ​ꦏꦿꦶꦱ꧀ꦥꦸꦱ꧀ꦭꦤ꧀ꦱꦼꦢꦸꦭꦸꦂ​ꦒꦪꦸꦱ꧀꧈​ ¹⁵ꦢꦢꦶꦤꦺ​ꦪ​ꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦔꦺꦴꦩꦺꦴꦁꦤꦺꦏ꧀​ꦩ꧀ꦧꦶꦪꦺꦤ꧀ꦥꦢ​ꦢꦶꦧꦥ꧀ꦠꦶꦱ꧀ꦱꦸꦥꦪ​ꦢꦢꦶ​ꦩꦸꦫꦶꦢ꧀ꦏꦸ​꧉​ ¹⁶ꦲꦺꦴ​ꦪ​꧈​ꦲꦏꦸ​ꦭꦭꦶ​꧈​ꦲꦏꦸ​ꦏꦺꦭꦶꦁꦔꦤ꧀ꦤꦺꦏ꧀ꦲꦏꦸ​ꦲꦩ꧀ꦧꦥ꧀ꦠꦶꦱ꧀ꦱꦼꦢꦸꦭꦸꦂ​ꦱ꧀ꦠꦺꦥ꦳ꦤꦸꦱ꧀ꦱꦏ꧀ꦧꦿꦪꦠ꧀ꦠꦺ​ꦲꦩ꧀ꦧꦫꦁ​꧉​ꦤꦁꦔꦶꦁ​ꦱꦏ꧀ꦔꦼꦂꦠꦶꦪꦲꦏꦸ​ꦮꦶꦱ꧀​ꦧ꧀ꦭꦱ꧀ꦲꦺꦴꦫ​ꦲꦩ꧀ꦧꦥ꧀ꦠꦶꦱ꧀ꦱꦥꦱꦥ​ꦩꦼꦤꦺꦃ​꧉​ ¹⁷ꦥꦫ​ꦱꦼꦢꦸꦭꦸꦂ​꧈​ꦏꦿꦶꦱ꧀ꦡꦸꦱ꧀ꦲꦺꦴꦫ​ꦔꦺꦴꦁꦏꦺꦴꦤ꧀ꦲꦏꦸ​ꦲꦩ꧀ꦧꦥ꧀ꦠꦶꦱ꧀ꦮꦺꦴꦁ​꧈​ꦤꦁꦔꦶꦁ​ꦢꦺꦏ꧀ꦤꦺꦔꦺꦴꦁꦏꦺꦴꦤ꧀ꦲꦏꦸ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀꧈​ꦲꦼꦁꦒꦺꦴꦤ꧀ꦏꦸ​ꦩꦸꦭꦁꦔꦏꦺꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦪ​ꦲꦺꦴꦫ​ꦔꦁꦒꦺꦴ​ꦠꦼꦩ꧀ꦧꦸꦁ​ꦱꦶꦁ​ꦲꦧꦺꦴꦠ꧀ꦠꦧꦺꦴꦠ꧀ ꦲꦺꦴꦫ​ꦩꦤꦸꦠ꧀ꦏꦥꦶꦤ꧀ꦠꦼꦂꦫꦤ꧀ꦤꦺ​ꦩꦤꦸꦁꦱ​꧉​ꦲꦮꦶꦠ꧀ꦤꦺꦏ꧀​ꦚ꧀ꦗꦒꦏ꧀ꦏꦏꦺꦏꦥꦶꦤ꧀ꦠꦼꦂꦫꦤ꧀ꦤꦺ​ꦩꦤꦸꦁꦱ​꧈​ꦠꦶꦧꦏꦺ​ꦲꦼꦁꦒꦺꦴꦤꦺ​ꦏꦿꦶꦱ꧀ꦡꦸꦱ꧀ꦩꦠꦶ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀ꦪ​ꦲꦺꦴꦫ​ꦲꦺꦤꦺꦁꦲꦗꦶꦤꦺ​ꦧ꧀ꦭꦱ꧀꧈​

꧋ꦥꦠꦶꦤꦺ​ꦏꦿꦶꦱ꧀ꦡꦸꦱ꧀ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀ꦏꦸꦮꦶ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦏꦥꦶꦤ꧀ꦠꦼꦂꦫꦤ꧀ꦤꦺ​ꦩꦤꦸꦁꦱ​ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧉​

¹⁸꧋ꦥꦫ​ꦱꦼꦢꦸꦭꦸꦂ​꧈​ꦏꦁꦒꦺꦴ​ꦮꦺꦴꦁ​ꦱꦶꦁ​ꦩ꧀ꦭꦏꦸ​ꦲꦶꦁ​ꦢꦭꦤ꧀ꦱꦶꦁ​ꦚ꧀ꦗꦸꦗꦸꦏ꧀ꦤꦁꦏꦫꦸꦱꦏ꧀ꦏꦤ꧀ꦏꦧꦂ​ꦧꦧ꧀ꦥꦠꦶꦤꦺ​ꦏꦿꦶꦱ꧀ꦡꦸꦱ꧀ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀ꦏꦸꦮꦶ​ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧉​ꦤꦁꦔꦶꦁ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀ ꦏꦧꦂ​ꦲꦶꦏꦶ​ꦢꦢꦶ​ꦏꦼꦏꦸꦮꦠ꧀ꦠꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁹ꦤꦁꦏꦶꦠꦧ꧀ꦱꦸꦕꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦺꦴꦩꦺꦴꦁꦔꦺꦤꦺ​:

“ꦲꦏꦸ​ꦧꦏꦭ꧀​ꦩ꧀ꦧꦸꦪꦂꦫꦏꦺ
ꦏꦮꦼꦫꦸꦃꦲꦺꦮꦺꦴꦁ​ꦥꦶꦤ꧀ꦠꦼꦂ​
ꦭꦤ꧀ꦥꦔꦼꦂꦠꦶꦤꦺꦧꦏꦭ꧀ꦠꦏ꧀ꦊꦧꦸꦂ​꧉​”

²⁰ꦢꦢꦶꦤꦺ​꧈​ꦤꦁꦲꦼꦤ꧀ꦢꦶ​ꦏꦥꦶꦤ꧀ꦠꦼꦂꦫꦤ꧀ꦤꦺ​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦫꦸꦃ?ꦤꦁꦲꦼꦤ꧀ꦢꦶ​ꦏꦥꦶꦤ꧀ꦠꦼꦂꦫꦤ꧀ꦤꦺ​ꦱꦶꦁ​ꦠꦸꦏꦁ​ꦩꦶꦏꦶꦂ​ꦲꦶꦁ​ꦗꦩꦤ꧀ꦱꦲꦶꦏꦶ​?ꦒꦸꦱ꧀ꦠꦶ​ꦄꦭ꧀ꦭꦃ​ꦭꦲꦸꦠ꧀ꦮꦶꦱ꧀ꦔꦺꦴꦩꦺꦴꦁꦠ​ꦤꦺꦏ꧀ꦏꦥꦶꦤ꧀ꦠꦼꦂꦫꦤ꧀ꦤꦺ​ꦩꦤꦸꦁꦱ​ꦏꦸꦮꦶ​ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧉​

²¹꧋ꦲꦮꦶꦠ꧀ꦱꦁꦏꦏꦮꦼꦫꦸꦃꦲꦺ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦼꦠꦼꦥ꧀ꦥꦏꦺ꧈​ꦱꦸꦥꦪ​ꦩꦤꦸꦁꦱ​ꦲꦺꦴꦫ​ꦧꦶꦱ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦁꦏꦏꦥꦶꦤ꧀ꦠꦼꦂꦫꦤ꧀ꦤꦺ​ꦢꦺꦮꦺ꧉​ꦩꦭꦃ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦼꦠꦼꦥ꧀ꦥꦏꦺꦔꦼꦏꦺꦏ꧀ꦏꦶꦱ꧀ꦭꦩꦼꦠ꧀ꦩꦫꦁ​ꦮꦺꦴꦁ​ꦱꦶꦁ​ꦥꦽꦕꦪ​ꦩꦫꦁ​ꦏꦧꦂ​ꦱꦶꦁ​ꦢꦶꦒꦼꦭꦂꦫꦏꦺ꧈​ꦏꦧꦂ​ꦱꦶꦁ​ꦢꦶꦲꦫꦤ꧀ꦤꦶ​ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​ꦏꦫꦺꦴ​ꦩꦤꦸꦁꦱ​꧉​ ²²ꦮꦺꦴꦁ​ꦙꦸꦥꦢ​ꦏꦼꦥꦺꦔꦶꦤ꧀ꦮꦼꦫꦸꦃ​ꦩꦸꦗꦶꦗꦠ꧀ ꦮꦺꦴꦁ​ꦒꦿꦶꦏ꧀ꦥꦢ​ꦔ꧀ꦒꦺꦴꦭꦺꦏ꧀ꦏꦶ​ꦏꦮꦼꦫꦸꦃ꧉​ ²³ꦤꦁꦔꦶꦁ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦲꦮꦏ꧀ꦏꦺ​ꦢꦺꦮꦺꦩꦭꦃ​ꦔꦧꦂꦫꦏꦺꦧꦧ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦢꦶꦥꦼꦤ꧀ꦠꦺꦁ꧉​ꦏꦁꦒꦺꦴ​ꦮꦺꦴꦁ​ꦙꦸꦏꦧꦂ​ꦲꦶꦏꦶ​ꦢꦢꦶ​ꦱꦤ꧀ꦢꦸꦁꦔꦤ꧀ꦭꦤ꧀ꦏꦁꦒꦺꦴ​ꦮꦺꦴꦁ​ꦒꦿꦶꦏ꧀ꦏꦸꦮꦶ​ꦏꦧꦂ​ꦱꦶꦁ​ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧉​ ²⁴ꦤꦁꦔꦶꦁ​ꦏꦁꦒꦺꦴ​ꦮꦺꦴꦁ​ꦱꦶꦁ​ꦮꦶꦱ꧀ꦢꦶꦥꦁꦒꦶꦭ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦢꦢꦶ​ꦱꦼꦧꦧ꧀ꦮꦺꦴꦁ​ꦙꦸꦲꦥ​ꦮꦺꦴꦁ​ꦒꦿꦶꦏ꧀ ꦏꦿꦶꦱ꧀ꦡꦸꦱ꧀ꦏꦸꦮꦶ​ꦏ꧀ꦮꦱꦤꦺ​ꦭꦤ꧀ꦏꦮꦼꦫꦸꦃꦲꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁵ꦲꦮꦶꦠ꧀ꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦏꦺꦠꦺꦴꦏ꧀ꦏꦺ​ꦧꦺꦴꦢꦺꦴ꧈​ꦮꦸꦗꦸꦠ꧀ꦠꦺꦭꦸꦮꦶꦃ​ꦗꦼꦫꦸꦠꦼꦤꦶꦩ꧀ꦧꦁꦏꦮꦼꦫꦸꦃꦲꦺꦩꦤꦸꦁꦱ​ꦭꦤ꧀ꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏꦺꦠꦺꦴꦏ꧀ꦏꦺ​ꦲꦺꦴꦫ​ꦲꦺꦤꦺꦁꦏꦼꦏꦸꦮꦠ꧀ꦠꦤ꧀ꦤꦺ​꧈​ꦩꦭꦃ​ꦭꦸꦮꦶꦃ​ꦫꦺꦴꦱ​ꦠꦼꦤꦶꦩ꧀ꦧꦁꦏꦼꦏꦸꦮꦠ꧀ꦠꦤ꧀ꦤꦺ​ꦩꦤꦸꦁꦱ​꧉​ ²⁶ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦴꦏ꧀ꦥꦢ​ꦲꦺꦭꦶꦁ​ꦠ​ꦢꦺꦴꦁꦔꦺꦏꦺꦴꦮꦺ​ꦢꦶꦥꦁꦒꦶꦭ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦺꦴꦫ​ꦲꦺꦴꦏꦺꦃꦱꦶꦁ​ꦏꦼꦤꦺꦁꦢꦶꦲꦫꦤ꧀ꦤꦶ​ꦮꦺꦴꦁ​ꦥꦶꦤ꧀ꦠꦼꦂ​ꦲꦥ​ꦮꦺꦴꦁ​ꦒꦼꦢꦺꦥꦁꦏꦠ꧀ꦠꦺ​ꦲꦥ​ꦮꦺꦴꦁ​ꦒꦼꦢꦺꦭꦲꦶꦫꦤ꧀ꦤꦺ ²⁷ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦭꦃ​ꦩꦶꦭꦶꦃ​ꦮꦺꦴꦁ​ꦱꦶꦁ​ꦢꦶꦲꦁꦒꦼꦥ꧀ꦧꦺꦴꦢꦺꦴꦏꦫꦺꦴ​ꦮꦺꦴꦁ​ꦗꦒꦠ꧀ꦏꦺꦤꦺ​꧈​ꦏꦁꦒꦺꦴ​ꦔꦶꦱꦶꦤ꧀ꦤꦏꦺꦮꦺꦴꦁ​ꦱꦶꦁ​ꦥꦶꦤ꧀ꦠꦼꦂ​꧉​ꦱꦼꦩꦺꦴꦤꦺꦴ​ꦲꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦭꦶꦃ​ꦮꦺꦴꦁ​ꦱꦶꦁ​ꦤꦁꦗꦒꦠ꧀ꦏꦺꦤꦺ​ꦏꦺꦠꦺꦴꦏ꧀ꦏꦺ​ꦫꦶꦁꦏꦶꦃ​꧈​ꦏꦁꦒꦺꦴ​ꦔꦶꦱꦶꦤ꧀ꦤꦏꦺꦮꦺꦴꦁ​ꦱꦶꦁ​ꦫꦺꦴꦱ​꧉​ ²⁸ꦥꦚ꧀ꦕꦺꦤ꧀ ꦱꦶꦁ​ꦢꦶꦲꦁꦒꦼꦥ꧀ꦕꦶꦭꦶꦏ꧀ꦭꦤ꧀ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧈​ꦱꦶꦁ​ꦢꦶꦲꦁꦒꦼꦥ꧀ꦲꦺꦴꦫ​ꦲꦺꦤꦺꦁꦲꦗꦶꦤꦺ​ꦤꦁꦗꦒꦠ꧀ꦏꦺꦤꦺ​꧈​ꦪꦏꦸꦮꦶ​ꦔꦭꦃꦲꦏꦺꦲꦥ​ꦱꦶꦁ​ꦢꦶꦲꦁꦒꦼꦥ꧀ꦲꦺꦤꦺꦁꦲꦗꦶꦤꦺ​ꦏꦫꦺꦴ​ꦗꦒꦠ꧀꧈​ ²⁹ꦢꦢꦶꦤꦺ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦶꦱ​ꦒꦼꦩꦸꦁꦒꦸꦁ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ³⁰ꦤꦁꦔꦶꦁ​ꦏꦺꦴꦮꦺ​ꦮꦶꦱ꧀ꦢꦶꦢꦢꦺꦏ꧀ꦏꦏꦺꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦺꦏ꧀ꦤꦺꦮꦶꦱ꧀​ꦤ꧀ꦢꦢꦺꦏ꧀ꦏꦏꦺꦏꦿꦶꦱ꧀ꦡꦸꦱ꧀ꦢꦢꦶ​ꦏꦮꦼꦫꦸꦃꦲꦺꦲꦮꦏ꧀ꦏꦺ​ꦢꦺꦮꦺ꧉​ꦏꦿꦶꦱ꧀ꦡꦸꦱ꧀ꦮꦶꦱ꧀ꦔꦿꦸꦏꦸꦤ꧀ꦤꦏꦺꦲꦮꦏ꧀ꦏꦺ​ꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦺꦏ꧀ꦤꦺꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦧꦶꦱ​ꦲꦸꦫꦶꦥ꧀ꦱꦶꦁ​ꦱꦸꦕꦶ​ꦭꦤ꧀ꦢꦺꦏ꧀ꦤꦺꦱꦶꦁ​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦢꦺꦴꦱ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦲꦸꦫꦶꦥ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦭꦮꦱ꧀ꦱꦺ꧉​ ³¹ꦤꦁ​ꦏꦶꦠꦧ꧀​ꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦱꦥ​ꦱꦶꦁ​ꦲꦉꦥ꧀ꦒꦼꦩꦸꦁꦒꦸꦁ​꧈​ꦲꦥꦶꦏ꧀ꦤꦺꦏ꧀ꦔꦼꦒꦸꦁꦔꦏꦺꦲꦥ​ꦱꦶꦁ​ꦮꦶꦱ꧀ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

↑ ↑ ↑

꧋ꦧꦧ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦢꦶꦥꦼꦤ꧀ꦠꦺꦁ꧉​

꧇​꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦩ꧀ꦧꦶꦪꦺꦤ꧀ꦢꦺꦴꦁꦔꦺꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦔꦧꦂꦫꦏꦺ ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦲꦸꦤꦺ​ꦢꦶꦱꦶꦩ꧀ꦥꦼꦤ꧀ ꦲꦏꦸ​ꦲꦺꦴꦫ​ꦔꦁꦒꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦶꦁ​ꦢꦸꦮꦸꦂꦢꦸꦮꦸꦂꦲꦥ​ꦠꦼꦩ꧀ꦧꦸꦁꦔꦺ​ꦮꦺꦴꦁ​ꦥꦶꦤ꧀ꦠꦼꦂ​꧉​ ²ꦲꦮꦶꦠ꧀ ꦱꦸꦮꦺꦤꦺ​ꦲꦏꦸ​ꦤꦁꦠꦼꦔꦃꦩꦸ​꧈​ꦲꦏꦸ​ꦥꦚ꧀ꦕꦺꦤ꧀ꦮꦶꦱ꧀​ꦤ꧀ꦢꦸꦮꦺꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦲꦺꦴꦫ​ꦩꦶꦏꦶꦂꦫꦏꦺꦲꦥꦲꦥ​ꦩꦼꦤꦺꦃ​ꦏꦼꦗꦧ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦪ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦢꦶꦥꦼꦤ꧀ꦠꦺꦁ꧉​ ³ꦏꦸꦮꦶ​ꦗꦭꦂꦫꦤ꧀ꦤꦺ​ꦲꦏꦸ​ꦲꦺꦴꦫ​ꦧꦶꦱ​ꦲꦥꦲꦥ​ꦱꦁꦏꦏꦥꦶꦤ꧀ꦠꦼꦫꦤ꧀ꦏꦸꦢꦺꦮꦺ꧉​ꦮꦼꦢꦶꦏꦸ​ꦭꦤ꧀ꦱꦁꦱꦶꦏꦸꦤꦺꦏ꧀ꦲꦏꦸ​ꦱꦩ꧀ꦥꦺꦏ꧀ꦲꦺꦴꦫ​ꦔꦼꦠꦺꦴꦏ꧀ꦏꦏꦺꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦔꦼꦠꦺꦴꦏ꧀ꦏꦏꦺꦥꦶꦏꦶꦂꦫꦤ꧀ꦏꦸ​ꦢꦺꦮꦺ꧉​ ⁴ꦩꦸꦭꦤꦺ​ꦲꦼꦁꦒꦺꦴꦤ꧀ꦏꦸ​ꦩꦸꦭꦁꦔꦶꦭꦤ꧀​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦪ​ꦲꦺꦴꦫ​ꦔꦁꦒꦺꦴ​ꦠꦼꦩ꧀ꦧꦸꦁ​ꦱꦶꦁ​ꦢꦸꦮꦸꦂꦢꦸꦮꦸꦂꦔꦼꦒꦸꦭ꧀ꦭꦏꦺꦏꦥꦶꦤ꧀ꦠꦼꦂꦫꦤ꧀ꦤꦺ​ꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦔꦁꦒꦺꦴ​ꦠꦼꦩ꧀ꦧꦸꦁ​ꦱꦶꦁ​ꦔꦼꦠꦺꦴꦏ꧀ꦏꦏꦺꦏ꧀ꦮꦱꦤꦺ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁵ꦢꦢꦶꦤꦺ​ꦥꦽꦕꦪꦩꦸ​ꦲꦺꦴꦫ​ꦒꦸꦩꦤ꧀ꦠꦸꦁ​ꦲꦶꦁ​ꦥꦔꦼꦂꦠꦶꦤꦺꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦲꦶꦁ​ꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦏꦮꦼꦫꦸꦃꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​

⁶꧋ꦥꦫ​ꦱꦼꦢꦸꦭꦸꦂ​꧈​ꦱꦼꦤꦗꦤ꧀ꦔꦺꦴꦤꦺꦴ​꧈​ꦲꦏꦸ​ꦲꦸꦒ​ꦔꦺꦴꦩꦺꦴꦁꦔꦏꦺꦧꦧ꧀ꦏꦮꦼꦫꦸꦃ꧈​ꦤꦁꦔꦶꦁ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦩꦠꦼꦁ​ꦥꦼꦔꦤ꧀ꦢꦼꦭ꧀ꦭꦺ​꧉​ꦲꦺꦴꦫ​ꦏꦮꦼꦫꦸꦃꦱꦶꦁ​ꦱꦁꦏꦢꦺꦴꦚ​ꦲꦥ​ꦏꦮꦼꦫꦸꦃꦲꦺꦥꦫ​ꦥꦔ꧀ꦮꦱ​ꦱꦶꦁ​ꦔ꧀ꦮꦱꦤꦶ​ꦗꦒꦠ꧀ꦱꦶꦁ​ꦲꦉꦥ꧀ꦫꦸꦱꦏ꧀ꦲꦶꦏꦶ​꧉​ ⁷ꦏꦮꦼꦫꦸꦃꦱꦶꦁ​ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​ꦏꦮꦼꦫꦸꦃꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​ꦏꦮꦼꦫꦸꦃꦱꦶꦩ꧀ꦥꦼꦤ꧀ꦤꦤ꧀ꦱꦶꦁ​ꦩꦤꦸꦁꦱ​ꦲꦺꦴꦫ​ꦔꦼꦂꦠꦶ​꧉​ꦤꦁꦔꦶꦁ​ꦏꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦺꦴꦭꦃꦲꦶꦔ꧀ꦒꦮꦺ​ꦗꦒꦠ꧀ ꦢꦺꦏ꧀ꦤꦺꦮꦶꦱ꧀​ꦤ꧀ꦢꦸꦮꦺꦒꦒꦱ꧀ꦱꦤ꧀ꦲꦩ꧀ꦧꦼꦂꦏꦃꦲꦶ​ꦲꦮꦏ꧀ꦏꦺ​ꦢꦺꦮꦺꦔꦁꦒꦺꦴ​ꦏꦮꦼꦫꦸꦃꦲꦶꦏꦶ​꧉​ ⁸ꦥꦫ​ꦥꦔ꧀ꦮꦱ​ꦤꦁꦗꦒꦠ꧀ꦲꦶꦏꦶ​ꦲꦺꦴꦫ​ꦲꦺꦤꦺꦁꦱꦶꦁ​ꦔꦼꦂꦠꦶ​ꦧꦧ꧀ꦏꦮꦼꦫꦸꦃꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​꧉​ꦱꦼꦩꦸꦁꦒꦺꦴꦤ꧀ꦤꦺꦔꦼꦂꦠꦶ​ꦔꦺꦴꦤꦺꦴ​ꦩꦼꦱ꧀ꦠꦶꦮꦺꦴꦁꦮꦺꦴꦁ​ꦲꦺꦴꦫ​ꦩꦠꦺꦤ꧀ꦤꦶ​ꦒꦸꦱ꧀ꦠꦶ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀ ꦒꦸꦱ꧀ꦠꦶ​ꦱꦶꦁ​ꦒꦼꦢꦺꦢꦺꦮꦺꦏ꧀ꦮꦱꦤꦺ​꧉​ ⁹ꦤꦁꦔꦶꦁ​ꦥꦚ꧀ꦕꦺꦤ꧀ꦪ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀​ꦔꦺꦤꦺ​:

“ꦩꦿꦶꦥꦠ꧀ꦢꦸꦫꦸꦁ​ꦠꦲꦸ​ꦮꦼꦫꦸꦃ​꧈​
ꦏꦸꦥꦶꦁ​ꦢꦸꦫꦸꦁ​ꦠꦲꦸ​ꦏꦿꦸꦔꦸ​
ꦭꦤ꧀ꦲꦠꦶ​ꦢꦸꦫꦸꦁ​ꦠꦲꦸ​ꦩꦶꦏꦶꦂ​ꦧ꧀ꦭꦱ꧀
ꦪ​ꦥꦽꦏꦫꦥꦽꦏꦫ​ꦏꦸꦮꦶ​
ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​
ꦏꦁꦒꦺꦴ​ꦮꦺꦴꦁ​ꦱꦶꦁ​ꦠꦿꦺꦱ꧀ꦤꦩꦫꦁ​ꦢꦺꦏ꧀ꦤꦺ꧉​”

¹⁰ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦩ꧀ꦧꦸꦏꦏ꧀ꦏꦏꦺꦏꦮꦼꦫꦸꦃꦱꦶꦩ꧀ꦥꦼꦤ꧀ꦤꦤ꧀ꦲꦶꦏꦶ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦠꦂꦫꦤ꧀ꦫꦺꦴꦃ​ꦱꦸꦕꦶ​꧉​ꦫꦺꦴꦃ​ꦱꦸꦕꦶ​ꦏꦸꦮꦶ​ꦚ꧀ꦗꦗꦃꦲꦶꦱꦼꦩ꧀ꦧꦫꦁ​꧈​ꦲꦸꦒ​ꦱꦼꦩ꧀ꦧꦫꦁ​ꦱꦶꦁ​ꦢꦶꦱꦶꦩ꧀ꦥꦼꦤ꧀ꦗꦼꦫꦸꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹¹ꦏꦪ​ꦲꦼꦁꦒꦺꦴꦤꦺ​ꦤꦩꦸꦁ​ꦫꦺꦴꦃꦲꦺ​ꦩꦤꦸꦁꦱ​ꦢꦺꦮꦺꦱꦶꦁ​ꦔꦼꦂꦠꦶ​ꦲꦶꦱꦶꦤꦺ​ꦲꦠꦶꦤꦺ​ꦩꦤꦸꦁꦱ​꧈​ꦩꦼꦁꦏꦺꦴꦤꦺꦴ​ꦲꦸꦒ​ꦫꦺꦴꦃ​ꦱꦸꦕꦶ​ꦩꦔꦼꦂꦠꦺꦤ꧀ꦤꦶꦥꦶꦏꦶꦂꦫꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹²ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦺꦴꦫ​ꦤꦩ꧀ꦥ​ꦫꦺꦴꦃ​ꦱꦶꦁ​ꦱꦁꦏꦢꦺꦴꦚ​꧈​ꦲꦺꦴꦫ​꧈​ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦤꦩ꧀ꦥ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔꦼꦂꦠꦶ​ꦧꦧ꧀ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦏꦺꦏ꧀ꦏꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹³꧋ꦩꦸꦭꦤꦺ​꧈​ꦤꦺꦏ꧀ꦲꦏꦸ​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦧꦧ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦏꦸ​ꦲꦺꦴꦫ​ꦔꦁꦒꦺꦴ​ꦏꦥꦶꦤ꧀ꦠꦼꦂꦫꦤ꧀ꦤꦺ​ꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦲꦏꦸ​ꦩꦤꦸꦠ꧀ꦥꦶꦮꦸꦭꦁꦔꦺ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁴ꦮꦺꦴꦁ​ꦱꦶꦁ​ꦲꦺꦴꦫ​ꦢꦶꦏ꧀ꦮꦱꦤꦶ​ꦏꦫꦺꦴ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦧꦶꦱ​ꦤꦩ꧀ꦥ​ꦭꦤ꧀ꦔꦼꦂꦠꦶ​ꦩꦫꦁ​ꦥꦽꦏꦫꦥꦽꦏꦫ​ꦱꦶꦁ​ꦱꦁꦏꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦶꦏꦶꦫꦺꦏꦸꦮꦶ​ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧈​ꦲꦮꦶꦠ꧀ꦧꦶꦱꦤꦺ​ꦔꦼꦂꦠꦶ​ꦤꦩꦸꦁ​ꦤꦺꦏ꧀ꦢꦶꦏ꧀ꦮꦱꦤꦶ​ꦏꦫꦺꦴ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁵ꦮꦺꦴꦁ​ꦱꦶꦁ​ꦢꦶꦏ꧀ꦮꦱꦤꦶ​ꦏꦫꦺꦴ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦔꦼꦂꦠꦶ​ꦱꦼꦩ꧀ꦧꦫꦁ​꧈​ꦤꦁꦔꦶꦁ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦶꦱ​ꦚ꧀ꦗꦗꦃꦲꦶꦢꦺꦏ꧀ꦤꦺ꧉​ ¹⁶ꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:

“ꦱꦥ​ꦱꦶꦁ​ꦧꦶꦱ​ꦩꦔꦼꦂꦠꦺꦤ꧀ꦤꦶꦥꦶꦏꦶꦂꦫꦤ꧀ꦤꦺ​ꦒꦸꦱ꧀ꦠꦶ​?
ꦱꦥ​ꦱꦶꦁ​ꦧꦶꦱ​ꦩꦸꦭꦁꦔꦶꦢꦺꦏ꧀ꦤꦺ?”

ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦥꦶꦏꦶꦂꦫꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​

↑ ↑ ↑

꧋ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦄꦥꦺꦴꦭꦺꦴꦱ꧀ꦤꦩꦸꦁ​ꦥꦼꦭꦢꦺꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​

꧇​꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦠꦏ꧀​ꦧ꧀ꦭꦏ​ꦮꦲꦺ​!ꦲꦏꦸ​ꦲꦺꦴꦫ​ꦧꦶꦱ​ꦉꦉꦩ꧀ꦧꦸꦏ꧀ꦏꦤ꧀ꦏꦫꦺꦴ​ꦏꦺꦴꦮꦺ​ꦏꦪ​ꦮꦺꦴꦁ​ꦱꦶꦁ​ꦮꦶꦱ꧀​ꦤ꧀ꦢꦸꦮꦺꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦏꦸ​ꦏꦼꦥꦼꦏ꧀ꦱ​ꦉꦩ꧀ꦧꦸꦏ꧀ꦏꦤ꧀ꦏꦫꦺꦴ​ꦏꦺꦴꦮꦺ​ꦏꦪ​ꦮꦺꦴꦁ​ꦏꦢꦺꦴꦚꦃꦲꦤ꧀ ꦮꦺꦴꦁ​ꦱꦶꦁ​ꦱꦏ꧀ꦕꦫ​ꦏꦿꦶꦱ꧀ꦠꦼꦤ꧀ꦲꦶꦗꦶꦏ꧀ꦲꦼꦤꦺꦴꦩ꧀ꦲꦶꦁ​ꦥꦼꦔꦤ꧀ꦢꦼꦭ꧀꧈​ ^2-3ꦲꦏꦸ​ꦏꦮꦶꦠ꧀​ꦩ꧀ꦧꦶꦪꦺꦤ꧀ꦏꦼꦥꦼꦏ꧀ꦱ​ꦔꦼꦏꦺꦏ꧀ꦏꦶꦩꦺꦂꦏꦶꦩꦫꦁ​ꦏꦺꦴꦮꦺ​꧈​ꦲꦺꦴꦫ​ꦥꦔꦤ꧀ꦱꦶꦁ​ꦲꦠꦺꦴꦱ꧀ ꦲꦮꦶꦠ꧀ꦏꦺꦴꦮꦺ​ꦢꦸꦫꦸꦁ​ꦏꦸꦮꦠ꧀ꦤꦩ꧀ꦥ​ꦏꦸꦮꦶ​꧉​ꦮꦸꦗꦸꦠ꧀ꦠꦺꦠꦼꦏꦤ꧀ꦱꦲꦶꦏꦶ​ ꦏꦺꦴꦮꦺ​ꦪ​ꦢꦸꦫꦸꦁ​ꦏꦸꦮꦠ꧀ ꦲꦮꦶꦠ꧀ꦲꦸꦫꦶꦥ꧀ꦩꦸ​ꦏꦸꦮꦶ​ꦲꦶꦗꦶꦏ꧀ꦏꦪ​ꦮꦺꦴꦁ​ꦏꦢꦺꦴꦚꦃꦲꦤ꧀꧈​ꦭꦃ​ꦤꦺꦏ꧀ꦏꦺꦴꦮꦺ​ꦲꦶꦗꦶꦏ꧀ꦥꦢ​ꦱꦼꦤꦼꦁ​ꦩꦺꦫꦶ​ꦭꦤ꧀ꦠꦸꦏꦂꦫꦤ꧀ꦔꦺꦴꦤꦺꦴ​꧈​ꦲꦥ​ꦏꦸꦮꦶ​ꦲꦺꦴꦫ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦲꦸꦫꦶꦥ꧀ꦩꦸ​ꦲꦶꦗꦶꦏ꧀ꦩꦤꦸꦠ꧀ꦕꦫꦤꦺ​ꦏꦢꦺꦴꦚꦃꦲꦤ꧀? ⁴ꦮꦸꦗꦸꦠ꧀ꦠꦺꦲꦺꦤꦺꦁꦱꦶꦁ​ꦔꦺꦴꦩꦺꦴꦁ:“ꦲꦏꦸ​ꦩꦺꦭꦸ​ꦦꦈꦭꦸꦱ꧀”ꦭꦤ꧀ꦭꦶꦪꦤꦺ​ꦔꦺꦴꦩꦺꦴꦁ:“ꦲꦏꦸ​ꦩꦺꦭꦸ​ꦄꦥꦺꦴꦭꦺꦴꦱ꧀꧉”ꦏꦸꦮꦶ​ꦭꦲꦸꦠ꧀ꦕꦫꦤꦺ​ꦮꦺꦴꦁ​ꦏꦢꦺꦴꦚꦃꦲꦤ꧀ꦠ​?

⁵꧋ꦢꦶꦥꦶꦏꦶꦂ​ꦥꦫ​ꦱꦼꦢꦸꦭꦸꦂ​!ꦄꦥꦺꦴꦭꦺꦴꦱ꧀ꦏꦸꦮꦶ​ꦱꦥ​ꦠ​ꦭꦤ꧀ꦦꦈꦭꦸꦱ꧀ꦏꦸꦮꦶ​ꦱꦥ​?ꦲꦥ​ꦲꦺꦴꦫ​ꦤꦩꦸꦁ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦸꦤ꧀ꦠꦸꦤ꧀ꦏꦺꦴꦮꦺ​ꦱꦸꦥꦪ​ꦧꦶꦱ​ꦢꦢꦶ​ꦮꦺꦴꦁ​ꦥꦽꦕꦪ​?ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦤꦩꦸꦁ​ꦚꦩ꧀ꦧꦸꦠ꧀ꦠꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​꧉​ ⁶ꦲꦏꦸ​ꦱꦶꦁ​ꦤꦤ꧀ꦢꦸꦂ​꧈​ꦄꦥꦺꦴꦭꦺꦴꦱ꧀ꦱꦶꦁ​ꦚꦶꦫꦩ꧀ꦩꦶ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦤꦸꦏꦸꦭ꧀ꦭꦏꦺ꧉​ ⁷ꦮꦺꦴꦁ​ꦱꦶꦁ​ꦤꦤ꧀ꦢꦸꦂ​ꦭꦤ꧀ꦮꦺꦴꦁ​ꦱꦶꦁ​ꦚꦶꦫꦩ꧀ꦩꦶ​ꦏꦸꦮꦶ​ꦲꦺꦴꦫ​ꦥꦼꦤ꧀ꦠꦶꦁ​꧉​ꦱꦶꦁ​ꦥꦼꦤ꧀ꦠꦶꦁ​ꦪ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦢꦺꦏ꧀ꦤꦺꦱꦶꦁ​ꦤꦸꦏꦸꦭ꧀ꦭꦏꦺ꧉​ ⁸ꦮꦺꦴꦁ​ꦱꦶꦁ​ꦤꦤ꧀ꦢꦸꦂ​ꦭꦤ꧀ꦱꦶꦁ​ꦚꦶꦫꦩ꧀ꦩꦶ​ꦏꦸꦮꦶ​ꦠꦸꦁꦒꦭ꧀ꦭꦺ​ꦮꦲꦺ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦸꦥꦃꦲꦶꦱꦶꦗꦶꦱꦶꦗꦶꦤꦺ​ꦩꦤꦸꦠ꧀ꦥꦼꦁꦒꦮꦺꦪꦤ꧀ꦏꦸꦢꦺꦮꦺꦢꦺꦮꦺ꧉​ ⁹ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦔꦿꦺꦮꦁꦔꦶ​ꦱꦏ꧀ꦥꦢꦥꦢꦲꦶꦁ​ꦏꦼꦂꦗꦤꦤ꧀ꦤꦺꦒꦸꦱ꧀ꦠꦶ​꧉​ꦭꦃ​ꦏꦺꦴꦮꦺ​ꦏꦸꦮꦶ​ꦢꦢꦶ​ꦊꦩꦃ​ꦱꦶꦁ​ꦢꦶꦒꦫꦥ꧀ꦒꦸꦱ꧀ꦠꦶ​꧉​

꧋ꦏꦺꦴꦮꦺ​ꦏꦸꦮꦶ​ꦲꦸꦒ​ꦲꦺꦴꦩꦃ​ꦱꦶꦁ​ꦢꦶꦢꦼꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​꧉​ ¹⁰ꦲꦏꦸ​ꦲꦶꦏꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦮꦺꦴꦁ​ꦱꦶꦁ​ꦱꦁꦏꦏꦥꦶꦤ꧀ꦠꦼꦂꦫꦤ꧀ꦤꦺ​ꦒꦸꦱ꧀ꦠꦶ​ꦢꦢꦶ​ꦮꦺꦴꦁ​ꦱꦶꦁ​ꦠꦸꦏꦁ​ꦔ꧀ꦒꦮꦺ​ꦲꦺꦴꦩꦃ​ꦭꦤ꧀​ꦔ꧀ꦒꦮꦺ​ꦥꦺꦴꦤ꧀ꦢꦱꦶꦤꦺ꧈​ꦱꦸꦥꦪ​ꦥꦼꦭꦢꦺꦤ꧀ꦭꦶꦪꦤꦺ​ꦧꦶꦱ​ꦔꦼꦢꦼꦏ꧀ꦏꦏꦺꦲꦺꦴꦩꦃꦲꦺ​ꦤꦁꦱꦏ꧀​ꦤ꧀ꦢꦸꦮꦸꦂꦫꦺꦥꦺꦴꦤ꧀ꦢꦱꦶꦩꦲꦸ​꧉​ꦤꦁꦔꦶꦁ​ꦱꦥ​ꦮꦲꦺ​ꦱꦶꦁ​ꦔꦼꦢꦼꦏ꧀ꦏꦏꦺꦲꦺꦴꦩꦃꦲꦺ​ꦏꦸꦢꦸ​ꦱꦶꦁ​ꦲꦠꦶꦲꦠꦶ꧈​ꦠꦼꦒꦼꦱ꧀ꦱꦺ​ꦏꦸꦢꦸ​ꦩꦸꦭꦁꦔꦶꦱꦶꦁ​ꦧꦼꦤꦼꦂ​꧉​ ¹¹ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀ꦤꦼꦠꦼꦥ꧀ꦥꦏꦺꦤꦺꦏ꧀ꦤꦩꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦢꦢꦶ​ꦥꦺꦴꦤ꧀ꦢꦱꦶꦤꦺꦲꦺꦴꦩꦃ​ꦩꦲꦸ​꧉​ ¹²ꦲꦶꦁ​ꦥꦺꦴꦤ꧀ꦢꦱꦶꦲꦶꦏꦶ​ꦲꦺꦤꦺꦁꦱꦶꦁ​ꦧꦶꦱ​ꦔꦼꦢꦼꦏ꧀ꦏꦏꦺꦲꦺꦴꦩꦃ​ꦔꦁꦒꦺꦴ​ꦲꦼꦩꦱ꧀ ꦱꦼꦭꦏ​꧈​ꦮꦠꦸ​ꦭꦫꦁ​꧈​ꦏꦪꦸ​꧈​ꦱꦸꦏꦼꦠ꧀ꦒꦫꦶꦁ​ꦲꦥ​ꦢꦩꦺꦤ꧀꧈​ ¹³ꦲꦥꦶꦏ꧀ꦲꦺꦴꦫꦤꦺ​ꦥꦼꦁꦒꦮꦺꦪꦤ꧀ꦏꦸꦧꦏꦭ꧀ꦏꦼꦠꦫ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦏꦿꦶꦱ꧀ꦡꦸꦱ꧀ꦠꦼꦏ​꧉​ꦲꦮꦶꦠ꧀ꦲꦶꦁ​ꦢꦶꦤ​ꦏꦸꦮꦶ​ꦥꦼꦁꦒꦮꦺꦪꦤ꧀ꦏꦸꦮꦺꦴꦁ​ꦏꦧꦺꦃ​ꦧꦏꦭ꧀ꦢꦶꦗꦗꦭ꧀ꦔꦁꦒꦺꦴ​ꦒꦼꦤꦶ​꧉​ꦒꦼꦤꦶ​ꦩꦲꦸ​ꦱꦶꦁ​ꦧꦏꦭ꧀ꦔꦼꦠꦺꦴꦏ꧀ꦏꦏꦺꦲꦥꦶꦏ꧀ꦲꦺꦴꦫꦤꦺ​ꦥꦼꦁꦒꦮꦺꦪꦤ꧀ꦏꦸ꧉​ ¹⁴ꦤꦺꦏ꧀ꦲꦺꦴꦩꦃ​ꦱꦶꦁ​ꦢꦶꦢꦼꦏ꧀ꦏꦏꦺꦱꦏ꧀​ꦤ꧀ꦢꦸꦮꦸꦂꦫꦺꦥꦺꦴꦤ꧀ꦢꦱꦶꦩꦲꦸ​ꦢꦶꦲꦺꦴꦧꦺꦴꦁ​ꦲꦺꦴꦫ​ꦲꦼꦩ꧀ꦥꦤ꧀ ꦮꦺꦴꦁꦔꦺ​ꦱꦶꦁ​ꦔꦼꦢꦼꦏ꧀ꦏꦏꦺꦧꦏꦭ꧀ꦤꦩ꧀ꦥ​ꦲꦸꦥꦃ꧉​ ¹⁵ꦤꦁꦔꦶꦁ​ꦤꦺꦏ꧀ꦲꦺꦴꦩꦃꦲꦺ​ꦏꦺꦴꦧꦺꦴꦁ​꧈​ꦮꦺꦴꦁꦔꦺ​ꦧꦏꦭ꧀ꦏꦺꦭꦁꦔꦤ꧀ꦲꦸꦥꦃꦲꦺ꧉​ꦮꦺꦴꦁꦔꦺ​ꦢꦺꦮꦺꦪ​ꦧꦏꦭ꧀ꦱ꧀ꦭꦩꦼꦠ꧀ ꦤꦁꦔꦶꦁ​ꦏꦪ​ꦮꦺꦴꦁ​ꦱꦶꦁ​ꦢꦶꦲꦼꦠꦺꦴꦏ꧀ꦏꦏꦺꦱꦁꦏꦲꦺꦴꦩꦃ​ꦏꦺꦴꦧꦺꦴꦁ​ꦏꦲꦺ​꧉​

¹⁶꧋ꦥꦫ​ꦱꦼꦢꦸꦭꦸꦂ​꧈​ꦲꦥ​ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦏꦸꦮꦶ​ꦲꦺꦴꦩꦃ​ꦥꦁꦒꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦫꦺꦴꦃ​ꦱꦸꦕꦶ​ꦩꦁꦒꦺꦴꦤ꧀ꦲꦶꦁ​ꦏꦺꦴꦮꦺ​? ¹⁷ꦢꦢꦶꦤꦺ​ꦱꦥ​ꦱꦶꦁ​ꦔꦿꦸꦱꦏ꧀ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦧꦏꦭ꧀ꦔꦿꦸꦱꦏ꧀ꦮꦺꦴꦁ​ꦏꦸꦮꦶ​꧉​ꦲꦮꦶꦠ꧀ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦱꦸꦕꦶ​ꦭꦤ꧀ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦪ​ꦏꦺꦴꦮꦺ​꧉​

꧋ꦲꦗ​ꦥꦢ​ꦱꦺꦴꦩ꧀ꦧꦺꦴꦁ꧉​

¹⁸꧋ꦥꦫ​ꦱꦼꦢꦸꦭꦸꦂ​꧈​ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦮꦺꦴꦁ​ꦱꦶꦁ​ꦔꦥꦸꦱ꧀ꦱꦶ​ꦲꦮꦏ꧀ꦏꦺ​ꦢꦺꦏ꧀ꦤꦺꦢꦺꦮꦺ꧉​ꦤꦺꦏ꧀ꦤꦁꦠꦼꦔꦃꦩꦸ​ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦩꦶꦏꦶꦂ​ꦤꦺꦏ꧀​ꦤ꧀ꦢꦸꦮꦺꦏꦮꦼꦫꦸꦃꦩꦤꦸꦠ꧀ꦕꦫꦤꦺ​ꦏꦢꦺꦴꦚꦃꦲꦤ꧀ ꦧꦺꦤ꧀ꦮꦺꦴꦁ​ꦏꦸꦮꦶ​ꦢꦢꦶ​ꦧꦺꦴꦢꦺꦴꦮꦲꦺ​꧈​ꦱꦸꦥꦪ​ꦧꦶꦱ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦫꦸꦃꦠꦼꦤꦤ꧀꧈​ ¹⁹ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦱꦶꦁ​ꦢꦶꦲꦁꦒꦼꦥ꧀ꦏꦮꦼꦫꦸꦃꦏꦫꦺꦴ​ꦗꦒꦠ꧀ ꦏꦸꦮꦶ​ꦩꦭꦃ​ꦢꦶꦲꦁꦒꦼꦥ꧀ꦧꦺꦴꦢꦺꦴꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦧꦧ꧀ꦲꦶꦏꦶ​ꦏꦶꦠꦧ꧀ꦮꦶꦱ꧀ꦔꦺꦴꦩꦺꦴꦁꦔꦏꦺꦔꦺꦤꦺ​:“ꦮꦺꦴꦁꦮꦺꦴꦁ​ꦥꦶꦤ꧀ꦠꦼꦂ​ꦢꦶꦏꦭ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦏꦥꦶꦤ꧀ꦠꦼꦂꦫꦤ꧀ꦤꦺ​ꦮꦺꦴꦁꦮꦺꦴꦁ​ꦩꦲꦸ​ꦢꦺꦮꦺ꧉​” ²⁰ꦤꦁꦏꦶꦠꦧ꧀ꦲꦸꦒ​ꦲꦺꦤꦺꦁꦠꦸꦭꦶꦱ꧀ꦱꦤ꧀ꦭꦶꦪꦤꦺ​ꦲꦸꦤꦶꦤꦺ​ꦔꦺꦤꦺ​:“ꦒꦸꦱ꧀ꦠꦶ​ꦄꦭ꧀ꦭꦃ​ꦩꦔꦼꦂꦠꦺꦤ꧀ꦤꦶꦤꦺꦏ꧀ꦥꦶꦏꦶꦂꦫꦤ꧀ꦤꦺ​ꦮꦺꦴꦁ​ꦥꦶꦤ꧀ꦠꦼꦂ​ꦲꦺꦴꦫ​ꦏꦁꦒꦺꦴ​ꦒꦮꦺ​꧉​” ²¹ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦱꦶꦁ​ꦔꦼꦒꦸꦭ꧀ꦊꦒꦸꦭ꧀ꦭꦏꦺꦱꦭꦃꦱꦶꦗꦶꦤꦺ​ꦩꦤꦸꦁꦱ​꧉​ꦱꦼꦩ꧀ꦧꦫꦁ​ꦏꦸꦮꦶ​ꦏꦧꦺꦃ​ꦮꦶꦱ꧀ꦢꦢꦶ​ꦮꦺꦏ꧀ꦩꦸ꧉​ ²²ꦦꦈꦭꦸꦱ꧀ ꦄꦥꦺꦴꦭꦺꦴꦱ꧀ ꦦꦺꦠꦿꦸꦱ꧀ ꦗꦒꦠ꧀ꦲꦶꦏꦶ​꧈​ꦲꦸꦫꦶꦥ꧀ꦭꦤ꧀ꦥꦠꦶ​꧈​ꦗꦩꦤ꧀ꦱꦲꦶꦏꦶ​ꦭꦤ꧀ꦲꦸꦒ​ꦗꦩꦤ꧀ꦱꦶꦁ​ꦧꦏꦭ꧀​ꦏ꧀ꦭꦏꦺꦴꦤ꧀ ꦏꦸꦮꦶ​ꦏꦧꦺꦃ​ꦮꦶꦱ꧀ꦮꦺꦏ꧀ꦩꦸ꧉​ ²³ꦱꦼꦩꦺꦴꦤꦺꦴ​ꦲꦸꦒ​ꦏꦺꦴꦮꦺ​ꦏꦧꦺꦃ​ꦮꦶꦱ꧀ꦮꦺꦏ꧀ꦏꦺꦏꦿꦶꦱ꧀ꦡꦸꦱ꧀ꦭꦤ꧀ꦏꦿꦶꦱ꧀ꦡꦸꦱ꧀ꦮꦺꦏ꧀ꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​

↑ ↑ ↑

꧋ꦥꦼꦭꦢꦺꦤ꧀ꦱꦶꦁ​ꦏꦼꦤꦺꦁꦢꦶꦥꦽꦕꦪ​꧉​

꧇​꧔꧇​ ¹꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦥꦼꦭꦢꦺꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦱꦶꦁ​ꦢꦶꦥꦱꦿꦃꦲꦶ​ꦥꦼꦁꦒꦮꦺꦏꦸꦔꦧꦂꦫꦏꦺꦥꦽꦏꦫ​ꦱꦶꦁ​ꦩꦲꦸꦤꦺ​ꦢꦶꦱꦶꦩ꧀ꦥꦼꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²ꦥꦼꦭꦢꦺꦤ꧀ꦱꦶꦁ​ꦢꦶꦥꦱꦿꦃꦲꦶ​ꦥꦼꦁꦒꦮꦺꦏꦸꦏꦪ​ꦔꦺꦴꦤꦺꦴ​ꦏꦸꦮꦶ​ꦏꦸꦢꦸ​ꦧꦶꦱ​ꦧꦫꦁ​ꦱꦶꦗꦶ​ꦲꦶꦏꦶ​꧈​ꦪꦏꦸꦮꦶ​꧈​ꦏꦸꦢꦸ​ꦏꦼꦤꦺꦁꦢꦶꦥꦽꦕꦪ​꧉​ ³ꦲꦏꦸ​ꦗꦤ꧀ꦲꦺꦴꦫ​ꦥꦼꦂꦢꦸꦭꦶꦠꦼꦤꦤ꧀ꦏꦼꦥꦿꦶꦪꦺ​ꦏꦺꦴꦮꦺ​ꦲꦥ​ꦮꦺꦴꦁ​ꦭꦶꦪꦤꦺ​ꦲꦼꦁꦒꦺꦴꦤꦺ​ꦥꦢ​ꦔꦁꦒꦼꦥ꧀ꦲꦏꦸ​꧉​ ⁴ꦲꦏꦸ​ꦢꦺꦮꦺꦪ​ꦲꦺꦴꦫ​ꦫꦸꦩꦁꦱ​ ꦱꦭꦃ​꧈​ꦤꦁꦔꦶꦁ​ꦏꦸꦮꦶ​ꦲꦺꦴꦫ​ꦔꦺꦴꦩꦺꦴꦁꦔꦏꦺꦤꦺꦏ꧀ꦲꦏꦸ​ꦲꦺꦴꦫ​ꦲꦺꦤꦺꦁꦏ꧀ꦭꦺꦫꦸꦤꦺ꧉​ꦒꦸꦱ꧀ꦠꦶ​ꦢꦺꦮꦺꦱꦶꦁ​ꦔꦫꦤ꧀ꦤꦶ​ꦱꦭꦃꦧꦼꦤꦼꦂꦏꦸ꧉​ ⁵ꦩꦸꦭꦤꦺ​ꦏꦺꦴꦮꦺ​ꦲꦗ​ꦥꦢ​ꦏꦼꦱꦸꦱꦸ​ꦚꦭꦃꦚꦭꦃꦲꦏꦺ꧈​ꦭꦸꦮꦸꦁꦔꦼꦤ꧀ꦠꦺꦤ꧀ꦤꦶ​ꦲꦩ꧀ꦧꦺꦱꦸꦏ꧀ꦠꦼꦏꦤꦺ​ꦒꦸꦱ꧀ꦠꦶ​ꦮꦲꦺ​꧉​ꦢꦺꦏ꧀ꦤꦺꦱꦶꦁ​ꦧꦏꦭ꧀ꦲꦩ꧀ꦧꦸꦏꦏ꧀ꦱꦼꦩ꧀ꦧꦫꦁ​ꦱꦶꦁ​ꦱꦲꦶꦏꦶ​ꦏꦱꦶꦩ꧀ꦥꦼꦤ꧀ꦲꦶꦁ​ꦲꦠꦶꦤꦺ​ꦩꦤꦸꦁꦱ​꧉​ꦏꦧꦺꦃ​ꦮꦺꦴꦁ​ꦧꦏꦭ꧀ꦤꦩ꧀ꦥ​ꦥꦼꦔꦊꦩ꧀ꦩꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦩꦤꦸꦠ꧀ꦥꦼꦁꦒꦮꦺꦤꦺ​ꦢꦺꦮꦺꦢꦺꦮꦺ꧉​

꧋ꦏꦸꦢꦸ​ꦱꦶꦁ​ꦲꦤ꧀ꦢꦥ꧀ꦥꦱꦺꦴꦂ꧉​

⁶꧋ꦥꦫ​ꦱꦼꦢꦸꦭꦸꦂ​꧈​ꦥꦽꦏꦫꦥꦽꦏꦫ​ꦏꦸꦮꦶ​ꦩꦲꦸ​ꦏꦧꦺꦃ​ꦮꦶꦱ꧀ꦠꦏ꧀ꦭꦏꦺꦴꦤ꧀ꦤꦶ​ꦢꦺꦮꦺ꧈​ꦱꦼꦩꦺꦴꦤꦺꦴ​ꦲꦸꦒ​ꦄꦥꦺꦴꦭꦺꦴꦱ꧀ ꦱꦸꦥꦪ​ꦏꦺꦴꦮꦺ​ꦧꦶꦱ​ꦤꦶꦫꦸ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦧꦶꦱ​ꦔꦼꦂꦠꦶ​ꦲꦥ​ꦠꦼꦒꦼꦱ꧀ꦱꦺ​ꦠꦼꦩ꧀ꦧꦸꦁ​:“ꦲꦗ​ꦱꦩ꧀ꦥꦺꦏ꧀​ꦔ꧀ꦭꦶꦮꦠ꧀ꦠꦶ​ꦥꦶꦠꦸꦠꦸꦂꦫꦺ​꧉”ꦢꦢꦶꦤꦺ​ꦤꦁꦠꦼꦔꦃꦩꦸ​ꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦔꦼꦊꦩ꧀ꦱꦶꦗꦶꦤꦺ​ꦭꦤ꧀ꦚꦼꦥꦺꦭꦺꦏ꧀ꦏꦏꦺꦭꦶꦪꦤꦺ​꧉​ ⁷ꦱꦥ​ꦠ​ꦱꦶꦁ​ꦩꦫꦏ꧀ꦏꦏꦺꦏꦺꦴꦮꦺ​ꦩꦶꦏꦶꦂ​ꦥꦶꦤ꧀ꦠꦼꦂ​ꦔꦸꦁꦏꦸꦭ꧀ꦭꦶ​ꦭꦶꦪꦤꦺ​ꦔꦺꦴꦤꦺꦴ​?ꦲꦥ​ꦢꦸꦢꦸ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦼꦏꦺꦏ꧀ꦏꦶꦏꦺꦴꦮꦺ​ꦱꦼꦩ꧀ꦧꦫꦁ​ꦱꦶꦁ​ꦲꦤ​ꦲꦶꦁ​ꦏꦺꦴꦮꦺ​ꦏꦸꦮꦶ​?ꦭꦃ​ꦏꦺꦴꦮꦺ​ꦏꦺꦴꦏ꧀ꦠꦼꦫꦸꦱ꧀ꦱꦺꦴꦩ꧀ꦧꦺꦴꦁꦔꦺꦴꦤꦺꦴ​꧈​ꦏꦪ​ꦱꦶꦁ​ꦲꦤ​ꦲꦶꦁ​ꦏꦺꦴꦮꦺ​ꦏꦸꦮꦶ​ꦢꦸꦢꦸ​ꦥꦮꦺꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦲꦺ​꧉​

⁸꧋ꦥꦫ​ꦱꦼꦢꦸꦭꦸꦂ​꧈​ꦥꦚ꧀ꦕꦺꦤ꧀ ꦏꦺꦴꦮꦺ​ꦩꦶꦏꦶꦂ​ꦤꦺꦏ꧀ꦮꦶꦱ꧀ꦲꦺꦴꦫ​ꦧꦸꦠꦸꦃ​ꦲꦥꦲꦥ​ꦩꦼꦤꦺꦃ​꧈​ꦏꦺꦴꦮꦺ​ꦩꦶꦏꦶꦂ​ꦮꦶꦱ꧀ꦥꦼꦥꦏ꧀ꦲꦶꦁ​ꦱꦼꦩ꧀ꦧꦫꦁ​꧉​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦥꦶꦠꦸꦭꦸꦁꦔꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦩꦼꦤꦺꦃ​꧈​ꦲꦮꦶꦠ꧀ꦏꦺꦴꦮꦺ​ꦩꦶꦏꦶꦂ​꧈​ꦲꦶꦁ​ꦏꦱꦸꦏ꧀ꦩꦤ꧀ꦥꦁꦏꦠ꧀ꦠꦺ​ꦮꦶꦱ꧀ꦢꦸꦮꦸꦂꦧꦔꦼꦠ꧀ꦏꦪ​ꦫꦠꦸ​꧉​ꦥꦚ꧀ꦕꦺꦤ꧀ ꦏꦉꦥ꧀ꦏꦸ​ꦱꦸꦥꦪ​ꦏꦺꦴꦮꦺ​ꦧꦶꦱ​ꦢꦸꦮꦸꦂꦠꦼꦤꦤ꧀ꦥꦁꦏꦠ꧀ꦠꦺ​ꦲꦶꦁ​ꦏꦱꦸꦏ꧀ꦩꦤ꧀ ꦢꦢꦶꦤꦺ​ꦲꦏꦸ​ꦧꦶꦱ​ꦚꦩ꧀ꦧꦸꦠ꧀ꦠꦧꦼꦧꦉꦁꦔꦤ꧀ꦏꦫꦺꦴ​ꦏꦺꦴꦮꦺ​꧉​ ⁹ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦩꦶꦠꦸꦫꦸꦠ꧀ꦥꦶꦤꦼꦩꦸꦏꦸ꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧈​ꦱꦶꦁ​ꦢꦢꦶ​ꦫꦱꦸꦭ꧀ ꦢꦶꦏꦺꦏ꧀ꦏꦶꦥꦁꦏꦠ꧀ꦱꦶꦁ​ꦲꦼꦤ꧀ꦢꦺꦏ꧀ꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦢꦢꦶ​ꦏꦪ​ꦮꦺꦴꦁ​ꦱꦶꦁ​ꦤꦩ꧀ꦥ​ꦱꦼꦠꦿꦥꦤ꧀ꦥꦠꦶ​ꦤꦁꦔꦉꦥ꧀ꦥꦺ​ꦮꦺꦴꦁ​ꦲꦺꦴꦏꦺꦃ꧉​ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦢꦢꦶ​ꦠꦺꦴꦤ꧀ꦠꦺꦴꦤ꧀ꦤꦤ꧀ꦤꦺ​ꦗꦒꦠ꧀ ꦪ​ꦠꦺꦴꦤ꧀ꦠꦺꦴꦤ꧀ꦤꦤ꧀ꦤꦺ​ꦥꦫ​ꦩꦸꦭꦺꦏꦠ꧀ ꦪ​ꦠꦺꦴꦤ꧀ꦠꦺꦴꦤ꧀ꦤꦤ꧀ꦤꦺ​ꦩꦤꦸꦁꦱ​꧉​ ¹⁰ꦗꦭꦂꦫꦤ꧀​ꦔ꧀ꦭꦧꦸꦃꦲꦶ​ꦏꦿꦶꦱ꧀ꦡꦸꦱ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦢꦢꦶ​ꦮꦺꦴꦁ​ꦱꦶꦁ​ꦧꦺꦴꦢꦺꦴ꧈​ꦤꦁꦔꦶꦁ​ꦏꦺꦴꦮꦺ​ꦢꦢꦶ​ꦮꦺꦴꦁ​ꦏꦿꦶꦱ꧀ꦠꦼꦤ꧀ꦱꦶꦁ​ꦒꦼꦢꦺꦏꦮꦼꦫꦸꦃꦲꦺ꧉​ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦮꦺꦴꦁ​ꦕꦶꦭꦶꦏ꧀ ꦤꦁꦔꦶꦁ​ꦏꦺꦴꦮꦺ​ꦢꦢꦶ​ꦮꦺꦴꦁ​ꦒꦼꦢꦺ꧉​ꦏꦺꦴꦮꦺ​ꦤꦩ꧀ꦥ​ꦥꦼꦔꦊꦩ꧀ꦩꦤ꧀ ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦢꦶꦱꦼꦥꦺꦭꦺꦏ꧀ꦏꦏꦺ꧉​ ¹¹ꦠꦼꦏꦤꦺ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦔꦿꦱꦏ꧀ꦏꦏꦺꦔꦼꦭꦶꦃ​ꦭꦤ꧀ꦔꦼꦭꦏ꧀ꦭꦤ꧀ꦲꦺꦴꦫ​ꦤ꧀ꦢꦸꦮꦺꦱꦭꦶꦤ꧀꧈​ꦲꦮꦏ꧀ꦏꦺ​ꦢꦺꦮꦺꦢꦶꦒꦼꦧꦸꦏ꧀ꦏꦶꦭꦤ꧀ꦲꦮꦏ꧀ꦏꦺ​ꦢꦺꦮꦺꦔꦭꦺꦴꦂꦔꦶꦢꦸꦭ꧀ꦔꦺꦠꦤ꧀ꦔꦸꦭꦺꦴꦤ꧀ꦏꦪ​ꦮꦺꦴꦁ​ꦲꦺꦴꦫ​ꦤ꧀ꦢꦸꦮꦺꦲꦺꦴꦩꦃ​꧉​ ¹²ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦚꦩ꧀ꦧꦸꦠ꧀ꦠꦲꦧꦺꦴꦠ꧀ꦱꦸꦥꦪ​ꦧꦶꦱ​ꦩꦁꦔꦤ꧀꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦢꦶꦥꦺꦴꦪꦺꦴꦏ꧀ꦏꦶ​꧈​ꦲꦮꦏ꧀ꦏꦺ​ꦢꦺꦮꦺꦩꦭꦃ​ꦩꦸꦗꦺꦏ꧀ꦏꦏꦺꦱꦶꦁ​ꦲꦥꦶꦏ꧀꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦢꦶꦱꦶꦪꦱꦶꦪ​꧈​ꦲꦮꦏ꧀ꦏꦺ​ꦢꦺꦮꦺꦱꦧꦂ​ꦠꦼꦫꦸꦱ꧀꧈​ ¹³ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦢꦶꦲꦺꦴꦭꦺꦴꦏ꧀ꦲꦺꦴꦭꦺꦴꦏ꧀ ꦲꦮꦏ꧀ꦏꦺ​ꦢꦺꦮꦺꦩ꧀ꦧꦊꦱ꧀ꦏꦫꦺꦴ​ꦠꦼꦩ꧀ꦧꦸꦁ​ꦲꦭꦸꦱ꧀꧈​ꦥꦚ꧀ꦕꦺꦤ꧀ ꦠꦼꦏꦤꦺ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦤꦩꦸꦁ​ꦢꦢꦶ​ꦭꦔꦶꦠ꧀ꦗꦒꦠ꧀꧈​ꦲꦮꦏ꧀ꦏꦺ​ꦢꦺꦮꦺꦢꦶꦲꦁꦒꦼꦥ꧀ꦢꦢꦶ​ꦏꦺꦱꦺꦠ꧀ꦠꦺꦧꦸꦩꦶ​꧉​

¹⁴꧋ꦥꦫ​ꦱꦼꦢꦸꦭꦸꦂ​꧈​ꦲꦼꦁꦒꦺꦴꦤ꧀ꦏꦸ​ꦤꦸꦭꦶꦱ꧀ꦩꦫꦁ​ꦏꦺꦴꦮꦺ​ꦲꦶꦏꦶ​ꦲꦺꦴꦫ​ꦗꦭꦂꦫꦤ꧀ꦲꦏꦸ​ꦏꦼꦥꦺꦔꦶꦤ꧀​ꦔ꧀ꦒꦮꦺ​ꦲꦶꦱꦶꦤ꧀ꦩꦸ​꧈​ꦲꦺꦴꦫ​꧈​ꦤꦁꦔꦶꦁ​ꦗꦭꦂꦫꦤ꧀ꦲꦏꦸ​ꦏꦼꦥꦺꦔꦶꦤ꧀ꦩꦸꦭꦁꦔꦶꦏꦺꦴꦮꦺ​ꦏꦪ​ꦲꦤꦏ꧀ꦲꦤꦏ꧀ꦏꦸ​ꦢꦺꦮꦺꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶꦠꦼꦤꦤ꧀꧈​ ¹⁵ꦲꦮꦶꦠ꧀ ꦱꦼꦤꦗꦤ꧀ꦤ​ꦲꦺꦮꦺꦴꦤ꧀ꦤꦺꦮꦺꦴꦤ꧀ꦱꦶꦁ​ꦩꦸꦭꦁꦔꦶꦏꦺꦴꦮꦺ​ꦲꦶꦁ​ꦢꦭꦤ꧀ꦤꦺ​ꦏꦿꦶꦱ꧀ꦡꦸꦱ꧀ ꦤꦁꦔꦶꦁ​ꦧꦥꦏ꧀ꦩꦸ​ꦤꦩꦸꦁ​ꦱꦶꦗꦶ​꧉​ꦲꦶꦁ​ꦏꦿꦶꦱ꧀ꦡꦸꦱ꧀ꦲꦏꦸ​ꦲꦶꦏꦶ​ꦢꦢꦶ​ꦧꦥꦏ꧀ꦩꦸ​꧈​ꦲꦮꦶꦠ꧀ꦲꦏꦸ​ꦱꦶꦁ​ꦔ꧀ꦒꦮ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦩꦫꦁ​ꦏꦺꦴꦮꦺ​꧉​ ¹⁶ꦩꦸꦭꦤꦺ​ꦲꦏꦸ​ꦔꦺꦴꦩꦺꦴꦁꦩꦫꦁ​ꦏꦺꦴꦮꦺ​ꦥꦫ​ꦱꦼꦢꦸꦭꦸꦂ​:ꦲꦩ꧀ꦧꦺꦴꦏ꧀ꦥꦢ​ꦤꦶꦫꦸ​ꦲꦏꦸ​꧉​ ¹⁷ꦩꦸꦭꦤꦺ​ꦲꦏꦸ​ꦔꦺꦴꦁꦏꦺꦴꦤ꧀ꦠꦶꦩꦺꦴꦠꦶꦪꦸꦱ꧀ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧉​ꦱꦏ꧀ꦕꦫ​ꦏꦱꦸꦏ꧀ꦩꦤ꧀ꦠꦶꦩꦺꦴꦠꦶꦪꦸꦱ꧀ꦏꦸꦮꦶ​ꦲꦤꦏ꧀ꦏꦸ​ꦢꦺꦮꦺꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶꦭꦤ꧀ꦱꦶꦁ​ꦠꦼꦩꦼꦤ꧀ꦲꦶꦁ​ꦒꦸꦱ꧀ꦠꦶ​꧉​ꦠꦶꦩꦺꦴꦠꦶꦪꦸꦱ꧀ꦲꦸꦒ​ꦱꦶꦁ​ꦧꦏꦭ꧀ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​ꦧꦧ꧀ꦥꦶꦠꦸꦠꦸꦂꦥꦶꦠꦸꦠꦸꦂꦲꦸꦫꦸꦠ꧀ꦠꦤ꧀ꦲꦶꦁ​ꦱꦏ꧀ꦗꦼꦫꦺꦴꦤꦺꦲꦸꦫꦶꦥ꧀ꦲꦚꦂ​ꦲꦶꦏꦶ​꧈​ꦥꦶꦠꦸꦠꦸꦂ​ꦱꦶꦁ​ꦱꦁꦏꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦠꦏ꧀ꦮꦸꦭꦁꦔꦏꦺꦤꦁꦥꦱꦩꦸꦮꦤ꧀ꦥꦱꦩꦸꦮꦤ꧀ꦤꦁꦲꦼꦤ꧀ꦢꦶ​ꦮꦲꦺ​꧉​

¹⁸꧋ꦤꦁꦠꦼꦔꦃꦩꦸ​ꦏꦺꦴꦤꦺꦴ​ꦲꦺꦤꦺꦁꦮꦺꦴꦁ​ꦱꦶꦁ​ꦥꦢ​ꦱꦺꦴꦩ꧀ꦧꦺꦴꦁ꧈​ꦗꦭꦂꦫꦤ꧀ꦩꦶꦏꦶꦂ​ꦤꦺꦏ꧀ꦲꦏꦸ​ꦲꦺꦴꦫ​ꦧꦏꦭ꧀ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦩꦼꦤꦺꦃ​꧉​ ¹⁹ꦤꦁꦔꦶꦁ​ꦤꦺꦏ꧀ꦒꦸꦱ꧀ꦠꦶ​ꦏꦉꦥ꧀ ꦲꦏꦸ​ꦲꦺꦴꦫ​ꦱꦸꦮꦶꦩꦼꦤꦺꦃ​ꦧꦏꦭ꧀ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧉​ꦢꦢꦶꦤꦺ​ꦲꦏꦸ​ꦧꦶꦱ​ꦮꦼꦫꦸꦃ​ꦢꦺꦮꦺ꧈​ꦲꦥ​ꦠꦼꦩ꧀ꦧꦸꦁꦔꦺ​ꦮꦺꦴꦁꦮꦺꦴꦁ​ꦱꦶꦁ​ꦱꦺꦴꦩ꧀ꦧꦺꦴꦁꦏꦸꦮꦶ​ꦲꦺꦤꦺꦁꦮꦸꦗꦸꦠ꧀ꦠꦺꦠꦼꦤꦤ꧀꧈​ ²⁰ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦱꦶꦁ​ꦢꦶꦏ꧀ꦮꦱꦤꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦴꦫ​ꦤꦩꦸꦁ​ꦏꦼꦠꦫ​ꦲꦶꦁ​ꦠꦼꦩ꧀ꦧꦸꦁꦔꦺ​꧈​ꦤꦁꦔꦶꦁ​ꦲꦶꦁ​ꦏꦼꦏꦸꦮꦠ꧀ꦠꦤ꧀ꦤꦺ​꧉​ ²¹ꦭꦃ​ꦱꦲꦶꦏꦶ​ꦏꦉꦥ꧀ꦩꦸ​ꦏꦼꦥꦿꦶꦪꦺ​?ꦲꦏꦸ​ꦏꦸꦢꦸ​ꦠꦼꦏ​ꦚꦼꦤꦺꦤ꧀ꦤꦶꦏꦺꦴꦮꦺ​ꦲꦥ​ꦠꦼꦏ​ ꦔꦁꦒꦺꦴ​ꦠꦼꦩ꧀ꦧꦸꦁ​ꦲꦭꦸꦱ꧀ꦏꦁꦒꦺꦴ​ꦔꦼꦠꦺꦴꦏ꧀ꦏꦏꦺꦏꦠꦿꦺꦱ꧀ꦤꦤ꧀ꦏꦸꦩꦫꦁ​ꦏꦺꦴꦮꦺ​꧉​

↑ ↑ ↑

꧋ꦱꦼꦢꦸꦭꦸꦂ​ꦱꦶꦁ​ꦏ꧀ꦭꦏꦸꦮꦤ꧀ꦤꦺ​ꦲꦺꦴꦫ​ꦥꦤ꧀ꦠꦼꦱ꧀ꦏꦸꦢꦸ​ꦢꦶꦲꦼꦠꦺꦴꦏ꧀ꦏꦏꦺꦱꦁꦏꦥꦱꦩꦸꦮꦤ꧀꧈​

꧇​꧕꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦥꦚ꧀ꦕꦺꦤ꧀ꦮꦶꦱ꧀ꦏꦿꦸꦔꦸ​ꦤꦺꦏ꧀ꦤꦁꦠꦼꦔꦃꦩꦸ​ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦤ꧀ꦢꦸꦮꦺꦏ꧀ꦭꦏꦸꦮꦤ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀​ꦧ꧀ꦭꦱ꧀ ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦏ꧀ꦭꦏꦸꦮꦤ꧀ꦤꦺ​ꦮꦺꦴꦁ​ꦱꦶꦁ​ꦲꦺꦴꦫ​ꦔꦼꦂꦠꦶ​ꦒꦸꦱ꧀ꦠꦶ​꧉​ꦲꦮꦶꦠ꧀ꦲꦏꦸ​ꦏꦿꦸꦔꦸ​ꦤꦺꦏ꧀ꦱꦼꦢꦸꦭꦸꦂ​ꦏꦸꦮꦶ​ꦠꦸꦫꦸ​ꦏꦫꦺꦴ​ꦲꦶꦧꦸꦤꦺ​ꦏꦸꦮꦭꦺꦴꦤ꧀꧈​ ²ꦱꦼꦤꦗꦤ꧀ꦲꦺꦤꦺꦁꦏ꧀ꦭꦏꦸꦮꦤ꧀ꦏꦪ​ꦔꦺꦴꦤꦺꦴ​꧈​ꦏꦺꦴꦮꦺ​ꦩꦭꦃ​ꦥꦢ​ꦱꦺꦴꦩ꧀ꦧꦺꦴꦁ꧉​ꦥꦤ꧀ꦠꦼꦱ꧀ꦱꦺ​ꦏꦺꦴꦮꦺ​ꦥꦢ​ꦱꦩ꧀ꦧꦠ꧀ꦭꦤ꧀ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦩ꧀ꦧꦺꦴꦏ꧀ꦲꦼꦠꦺꦴꦏ꧀ꦏꦏꦺꦱꦁꦏꦥꦱꦩꦸꦮꦤ꧀꧈​ ³ꦤꦺꦏ꧀ꦏꦁꦒꦺꦴ​ꦲꦏꦸ​꧈​ꦧꦼꦤꦼꦂ​ꦲꦏꦸ​ꦲꦺꦴꦫ​ꦏꦺꦠꦺꦴꦏ꧀ꦕꦩ꧀ꦥꦸꦂ​ꦏꦫꦺꦴ​ꦏꦺꦴꦮꦺ​꧈​ꦤꦁꦔꦶꦁ​ꦲꦶꦁ​ꦏꦱꦸꦏ꧀ꦩꦤ꧀ꦲꦏꦸ​ꦤꦁꦠꦼꦔꦃꦩꦸ​꧉​ꦩꦸꦭꦤꦺ​꧈​ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦲꦏꦸ​ꦮꦶꦱ꧀ꦔꦼꦏꦺꦏ꧀ꦏꦶꦱꦼꦠꦿꦥꦤ꧀ꦩꦫꦁ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦪ​ꦏꦪ​ꦤꦺꦏ꧀ꦲꦏꦸ​ꦤꦁꦏꦺꦴꦤꦺꦴ​ꦮꦲꦺ​꧉​ ^4-5ꦏꦺꦴꦮꦺ​ꦏꦧꦺꦃ​ꦤꦺꦏ꧀ꦥꦢ​ꦔꦸꦩ꧀ꦥꦸꦭ꧀ ꦧꦉꦁ​ꦏꦫꦺꦴ​ꦲꦏꦸ​ꦱꦶꦁ​ꦲꦸꦒ​ꦔꦸꦩ꧀ꦥꦸꦭ꧀ꦏꦫꦺꦴ​ꦏꦺꦴꦮꦺ​ꦲꦶꦁ​ꦏꦱꦸꦏ꧀ꦩꦤ꧀ ꦔꦁꦒꦺꦴ​ꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦮꦏ꧀ꦏꦺ​ꦢꦺꦮꦺꦩꦱꦿꦃꦲꦏꦺꦮꦺꦴꦁ​ꦏꦸꦮꦶ​ꦩꦫꦁ​ꦱꦺꦠꦤ꧀ ꦱꦸꦥꦪ​ꦏꦼꦢꦒꦶꦁꦔꦤ꧀ꦤꦺ​ꦢꦶꦫꦸꦱꦏ꧀ ꦤꦁꦔꦶꦁ​ꦚꦮꦤꦺ​ꦧꦶꦱ​ꦱ꧀ꦭꦩꦼꦠ꧀ꦲꦩ꧀ꦧꦺꦱꦸꦏ꧀ꦤꦺꦏ꧀ꦒꦸꦱ꧀ꦠꦶ​ꦠꦼꦏ​꧉​

⁶꧋ꦥꦫ​ꦱꦼꦢꦸꦭꦸꦂ​꧈​ꦲꦺꦴꦫ​ꦥꦤ꧀ꦠꦼꦱ꧀​ꦧ꧀ꦭꦱ꧀ꦲꦼꦁꦒꦺꦴꦤ꧀ꦩꦸ​ꦱꦺꦴꦩ꧀ꦧꦺꦴꦁ꧉​ꦏ꧀ꦭꦏꦸꦮꦤ꧀ꦏꦪ​ꦔꦺꦴꦤꦺꦴ​ꦏꦺꦴꦏ꧀ꦲꦺꦴꦫ​ꦲꦩ꧀ꦧꦺꦴꦏ꧀ꦒꦫꦥ꧀?ꦏꦺꦴꦮꦺ​ꦭꦲꦸꦠ꧀ꦥꦢ​ꦔꦼꦂꦠꦶ​ꦠ​ꦤꦺꦏ꧀ꦫꦒꦶ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦏꦸꦮꦶ​ꦔꦿꦒꦺꦤ꧀ꦤꦶ​ꦒꦤ꧀ꦢꦸꦩ꧀ꦩꦺ​ꦏꦧꦺꦃ​? ⁷ꦩꦸꦭꦤꦺ​꧈​ꦫꦒꦶ​ꦱꦶꦁ​ꦭꦮꦱ꧀ ꦪꦏꦸꦮꦶ​ꦢꦺꦴꦱ​꧈​ꦲꦩ꧀ꦧꦺꦴꦏ꧀ꦢꦶꦧꦸꦮꦁ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦏꦪ​ꦒꦤ꧀ꦢꦸꦩ꧀ꦱꦶꦁ​ꦲꦚꦂ​꧈​ꦱꦶꦁ​ꦠꦸꦱ꧀ ꦱꦶꦁ​ꦲꦺꦴꦫ​ꦲꦺꦤꦺꦁꦫꦒꦶꦤꦺ​꧉​ꦭꦤ꧀ꦏꦺꦴꦮꦺ​ꦪ​ꦥꦚ꧀ꦕꦺꦤ꧀ꦏꦪ​ꦔꦺꦴꦤꦺꦴ​꧉​ꦲꦮꦶꦠ꧀ꦏꦿꦶꦱ꧀ꦡꦸꦱ꧀ ꦕꦼꦩ꧀ꦥꦺꦤꦺ​ꦥꦱ꧀ꦏꦃ​꧈​ꦮꦶꦱ꧀ꦢꦶꦧꦼꦭꦺꦃ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦲꦸꦕꦸꦭ꧀ꦱꦁꦏꦏ꧀ꦮꦱꦤꦺ​ꦢꦺꦴꦱ​꧉​ ⁸ꦩꦸꦭꦤꦺ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦩꦁꦔꦤ꧀ꦧꦼꦧꦉꦁꦔꦤ꧀ ꦲꦺꦴꦫ​ꦩꦁꦔꦤ꧀ꦫꦺꦴꦠꦶ​ꦱꦶꦁ​ꦔꦁꦒꦺꦴ​ꦫꦒꦶ​ꦭꦮꦱ꧀ ꦪꦏꦸꦮꦶ​ꦫꦒꦶꦤꦺ​ꦢꦺꦴꦱ​ꦭꦤ꧀ꦲꦭ​꧈​ꦤꦁꦔꦶꦁ​ꦲ꦳ꦪꦸꦏ꧀ꦥꦢ​ꦩꦁꦔꦤ꧀ꦫꦺꦴꦠꦶ​ꦱꦶꦁ​ꦲꦺꦴꦫ​ꦲꦺꦤꦺꦁꦫꦒꦶꦤꦺ​꧈​ꦫꦺꦴꦠꦶꦤꦺ​ꦏꦱꦸꦕꦺꦤ꧀ꦭꦤ꧀ꦏꦧꦼꦤꦼꦂꦫꦤ꧀꧈​

⁹꧋ꦥꦫ​ꦱꦼꦢꦸꦭꦸꦂ​꧈​ꦤꦁꦭꦪꦁꦏꦸ​ꦱꦶꦁ​ꦤ꧀ꦢꦶꦱꦶꦏ꧀ꦲꦏꦸ​ꦮꦶꦱ꧀ꦔꦺꦴꦩꦺꦴꦁ꧈​ꦩꦼꦁꦔꦶꦁ​ꦏꦺꦴꦮꦺ​ꦧꦼꦧꦉꦁꦔꦤ꧀ꦏꦫꦺꦴ​ꦮꦺꦴꦁ​ꦱꦶꦁ​ꦭꦏꦸ​ꦧꦺꦢꦁ꧉​ ¹⁰ꦏꦺꦴꦮꦺ​ꦩꦼꦱ꧀ꦠꦶꦪ​ꦢꦸꦤꦸꦁꦤꦺꦏ꧀ꦲꦏꦸ​ꦲꦺꦴꦫ​ꦔꦺꦴꦩꦺꦴꦁꦔꦏꦺꦧꦧ꧀ꦮꦺꦴꦁ​ꦱꦶꦁ​ꦲꦺꦴꦫ​ꦤꦸꦫꦸꦠ꧀ꦒꦸꦱ꧀ꦠꦶ​꧈​ꦱꦶꦁ​ꦩꦠꦢꦸꦮꦶꦠ꧀ꦠꦼꦤ꧀ ꦱꦶꦁ​ꦠꦸꦏꦁ​ꦩꦼꦉꦱ꧀ꦭꦶꦪꦤꦺ​ꦭꦤ꧀ꦱꦶꦁ​ꦚꦼꦩ꧀ꦧꦃ​ꦧꦫꦁ​ꦥꦼꦥꦼꦠꦼꦁ​꧉​ꦲꦮꦶꦠ꧀ꦱꦼꦩꦸꦁꦒꦺꦴꦤ꧀ꦤꦺꦏꦺꦴꦮꦺ​ꦏꦸꦢꦸ​ꦔꦼꦢꦺꦴꦃꦲꦶ​ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦏꦺꦴꦮꦺ​ꦪ​ꦏꦸꦢꦸ​ꦭꦸꦔ​ꦱꦁꦏꦗꦒꦠ꧀ꦲꦶꦏꦶ​꧉​ ¹¹ꦤꦁꦔꦶꦁ​ꦲꦺꦴꦫ​ꦔꦺꦴꦤꦺꦴ​꧈​ꦏꦉꦥ꧀ꦏꦸ​ꦏꦺꦴꦮꦺ​ꦲꦗ​ꦧꦼꦧꦉꦁꦔꦤ꧀ꦏꦫꦺꦴ​ꦮꦺꦴꦁ​ꦱꦶꦁ​ꦔꦏꦸꦤꦺ​ꦏꦿꦶꦱ꧀ꦠꦼꦤ꧀ ꦤꦁꦔꦶꦁ​ꦮꦸꦗꦸꦠ꧀ꦠꦺꦱꦼꦤꦼꦁ​ꦭꦏꦸ​ꦧꦺꦢꦁ꧈​ꦮꦺꦴꦁ​ꦱꦶꦁ​ꦩꦠꦢꦸꦮꦶꦠ꧀ꦠꦼꦤ꧀ ꦚꦼꦩ꧀ꦧꦃ​ꦧꦿꦲꦭ​꧈​ꦚꦠꦸꦂ​ꦲꦭ​꧈​ꦱꦼꦤꦼꦁ​ꦩꦧꦸꦏ꧀ꦭꦤ꧀ꦱꦼꦤꦼꦁ​ꦚꦺꦴꦭꦺꦴꦁ​꧉​ꦏꦺꦴꦮꦺ​ꦲꦗ​ꦱꦩ꧀ꦥꦺꦏ꧀ꦩꦁꦔꦤ꧀ꦧꦉꦁ​ꦏꦫꦺꦴ​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧉​

^12-13꧋ꦲꦏꦸ​ꦲꦺꦴꦫ​ꦚꦭꦃꦚꦭꦃꦲꦏꦺꦮꦺꦴꦁ​ꦱꦶꦁ​ꦤꦁꦚ꧀ꦗꦧꦤꦺ​ꦥꦱꦩꦸꦮꦤ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦧꦏꦭ꧀ꦚꦭꦃꦚꦭꦃꦲꦏꦺꦮꦺꦴꦁꦮꦺꦴꦁ​ꦏꦸꦮꦶ​꧉​ꦭꦲꦸꦠ꧀ꦮꦶꦱ꧀ꦭꦸꦩꦿꦃ​ꦠ​ꦤꦺꦏ꧀ꦏꦺꦴꦮꦺ​ꦚꦭꦃꦚꦭꦃꦲꦏꦺꦮꦺꦴꦁ​ꦤꦁꦚ꧀ꦗꦼꦫꦺꦴꦤꦺ​ꦥꦱꦩꦸꦮꦤ꧀ꦩꦸꦢꦺꦮꦺ꧉​ꦩꦸꦭꦤꦺ​꧈​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦏꦸꦢꦸ​ꦢꦶꦲꦼꦠꦺꦴꦏ꧀ꦏꦏꦺꦱꦁꦏꦥꦱꦩꦸꦮꦤ꧀꧈​

↑ ↑ ↑

꧋ꦲꦗ​ꦔ꧀ꦒꦺꦴꦭꦺꦏ꧀ꦧꦼꦤꦼꦂ​ꦤꦁꦔ꧀ꦒꦺꦴꦤ꧀ꦤꦺꦮꦺꦴꦁ​ꦚ꧀ꦗꦧ​꧉​

꧇​꧖꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦺꦤꦺꦁꦥꦽꦏꦫ​ꦭꦶꦪꦤꦺ​꧉​ꦤꦺꦏ꧀ꦲꦺꦤꦺꦁꦱꦏ꧀ꦮꦶꦗꦶꦤꦺꦱꦼꦢꦸꦭꦸꦂ​ꦤ꧀ꦢꦸꦮꦺꦤ꧀ꦤꦶ​ꦫꦺꦥꦺꦴꦠ꧀ꦏꦫꦺꦴ​ꦱꦼꦢꦸꦭꦸꦂ​ꦭꦶꦪꦤꦺ​꧈​ꦭꦃ​ꦏꦺꦴꦏ꧀ꦠꦼꦒꦼꦭ꧀ꦠꦼꦒꦼꦭ꧀ꦭꦺꦔ꧀ꦒꦺꦴꦭꦺꦏ꧀ꦥꦶꦠꦸꦭꦸꦁꦔꦤ꧀ꦤꦁꦏꦿꦸꦠꦺꦴꦤ꧀ꦱꦶꦁ​ꦲꦺꦴꦫ​ꦔꦼꦂꦠꦶ​ꦒꦸꦱ꧀ꦠꦶ​꧉​ꦲꦥꦶꦏ꧀ꦏꦺ​ꦥꦽꦏꦫ​ꦏꦸꦮꦶ​ꦢꦶꦉꦩ꧀ꦧꦸꦏ꧀ꦭꦤ꧀ꦢꦶꦫꦩ꧀ꦥꦸꦁꦔꦏꦺꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦮꦲꦺ​ꦠ​? ²ꦲꦥ​ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦱꦶꦁ​ꦧꦏꦭ꧀ꦔꦿꦸꦠꦸꦗꦒꦠ꧀ꦲꦶꦏꦶ​?ꦭꦃ​ꦤꦺꦏ꧀ꦏꦺꦴꦮꦺ​ꦱꦶꦁ​ꦏꦸꦢꦸ​ꦔꦿꦸꦠꦸꦗꦒꦠ꧀ ꦩꦺꦴꦱꦺꦴꦏ꧀ꦏꦺꦴꦮꦺ​ꦲꦺꦴꦫ​ꦧꦶꦱ​ꦔꦸꦫꦸꦱ꧀ꦱꦶ​ꦥꦽꦏꦫ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​? ³ꦲꦥ​ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦔꦿꦸꦠꦸꦥꦫ​ꦩꦸꦭꦺꦏꦠ꧀꧈​ꦩꦺꦴꦱꦺꦴꦏ꧀ꦏꦺꦴꦮꦺ​ꦲꦺꦴꦫ​ꦧꦶꦱ​ꦔꦿꦩ꧀ꦥꦸꦁꦔꦏꦺꦥꦽꦏꦫꦥꦽꦏꦫ​ꦱꦶꦁ​ꦒꦩ꧀ꦥꦁ​ꦏꦸꦮꦶ​꧉​ ⁴ꦲꦥ​ꦗꦭꦂꦫꦤ꧀ꦤꦺ​ꦥꦽꦏꦫꦥꦽꦏꦫ​ꦏꦪ​ꦔꦺꦴꦤꦺꦴ​ꦏꦺꦴꦏ꧀ꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁ​ꦮꦺꦴꦁ​ꦱꦶꦁ​ꦲꦺꦴꦫ​ꦒꦼꦒꦪꦸꦠ꧀ꦠꦤ꧀​ꦧ꧀ꦭꦱ꧀ꦏꦫꦺꦴ​ꦥꦱꦩꦸꦮꦤ꧀ꦏꦿꦶꦱ꧀ꦠꦼꦤ꧀? ⁵ꦏꦺꦴꦮꦺ​ꦗꦤ꧀ꦔꦶꦱꦶꦤ꧀ꦤꦶꦱꦶꦤ꧀ꦤꦏꦺꦧꦔꦼꦠ꧀!ꦩꦺꦴꦱꦺꦴꦏ꧀ꦤꦁꦥꦱꦩꦸꦮꦤ꧀ꦮꦺꦴꦁ​ꦱꦶꦗꦶ​ꦮꦲꦺ​ꦲꦺꦴꦫ​ꦲꦺꦤꦺꦁꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏꦥꦶꦤ꧀ꦠꦼꦂꦫꦤ꧀ꦔꦿꦩ꧀ꦥꦸꦁꦔꦏꦺꦥꦽꦏꦫꦤꦺ​ꦱꦼꦢꦸꦭꦸꦂ​ꦭꦺꦴꦫꦺꦴ​ ꦩꦲꦸ​꧉​ ⁶ꦭꦃ​ꦏꦺꦴꦏ꧀ꦱꦩ꧀ꦥꦺꦏ꧀ꦱꦼꦢꦸꦭꦸꦂ​ꦱꦶꦁ​ꦱꦶꦗꦶꦤꦺ​ꦔ꧀ꦒꦮ​ꦱꦼꦢꦸꦭꦸꦂ​ꦭꦶꦪꦤꦺ​ꦤꦁꦏꦿꦸꦠꦺꦴꦤ꧀ꦱꦶꦁ​ꦲꦺꦴꦫ​ꦔꦼꦂꦠꦶ​ꦒꦸꦱ꧀ꦠꦶ​꧉​

⁷꧋ꦥꦚ꧀ꦕꦺꦤ꧀ ꦤꦺꦏ꧀ꦤꦁꦠꦼꦔꦃꦩꦸ​ꦲꦺꦤꦺꦁꦠꦸꦁꦒꦭ꧀ꦱꦼꦢꦸꦭꦸꦂ​ꦥꦢ​ꦠꦸꦏꦂꦫꦤ꧀ꦏꦸꦮꦶ​ꦪ​ꦮꦶꦱ꧀ꦏꦼꦧꦕꦸꦠ꧀ꦠꦼꦤꦤ꧀꧈​ꦏꦼꦤꦺꦁꦲꦥ​ꦏꦺꦴꦏ꧀ꦲꦺꦴꦫ​ꦒꦼꦊꦩ꧀ꦤꦿꦶꦩ​ꦭꦤ꧀ꦔꦭꦃ​ꦮꦲꦺ​? ⁸ꦏꦺꦴꦮꦺ​ꦩꦭꦃ​ꦔꦶꦱꦶꦤ꧀ꦤꦶꦱꦶꦤ꧀ꦤꦏꦺꦏꦸꦩ꧀ꦥꦸꦭ꧀ꦭꦤ꧀ꦩꦸ​ꦢꦺꦮꦺ꧈​ꦱꦶꦁ​ꦱꦶꦗꦶ​ꦔ꧀ꦒꦮꦺ​ꦲꦺꦭꦺꦏ꧀ꦏꦺ​ꦭꦶꦪꦤꦺ​꧈​ꦲꦶꦏꦸ​ꦏꦫꦺꦴ​ꦠꦸꦁꦒꦭ꧀ꦱꦼꦢꦸꦭꦸꦂ​꧉​ ^9-10ꦲꦥ​ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦧꦏꦭ꧀ꦲꦩ꧀ꦧꦼꦂꦏꦃꦲꦶ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ꦲꦗ​ꦥꦢ​ꦏ꧀ꦭꦺꦫꦸ​ꦔꦺꦴꦤꦺꦴ​꧉​ꦮꦺꦴꦁ​ꦱꦶꦁ​ꦏ꧀ꦭꦏꦸꦮꦤ꧀ꦤꦺ​ꦲꦭ​꧈​ꦮꦺꦴꦁ​ꦱꦶꦁ​ꦚꦼꦩ꧀ꦧꦃ​ꦥꦼꦥꦼꦠꦼꦁ​꧈​ꦮꦺꦴꦁ​ꦱꦶꦁ​ꦭꦏꦸ​ꦧꦺꦢꦁꦭꦤ꧀ꦮꦺꦴꦁ​ꦱꦶꦁ​ꦭꦏꦸ​ꦲ꦳ꦺꦴꦩꦺꦴ꧈​ꦲꦸꦒ​ꦩꦭꦶꦁ​꧈​ꦮꦺꦴꦁ​ꦱꦶꦁ​ꦩꦠꦢꦸꦮꦶꦠ꧀ꦠꦼꦤ꧀ꦭꦤ꧀ꦮꦺꦴꦁ​ꦱꦶꦁ​ꦠꦸꦏꦁ​ꦩꦧꦸꦏ꧀ ꦏꦧꦺꦃ​ꦏꦸꦮꦶ​ꦲꦺꦴꦫ​ꦧꦏꦭ꧀ꦤꦩ꧀ꦥ​ꦧꦼꦂꦏꦃ​ꦲꦶꦁ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦼꦩꦺꦴꦤꦺꦴ​ꦲꦸꦒ​ꦮꦺꦴꦁ​ꦱꦶꦁ​ꦱꦼꦤꦼꦁ​ꦚꦠꦸꦂ​ꦲꦭ​ꦭꦤ꧀ꦱꦶꦁ​ꦩꦼꦉꦱ꧀ꦭꦶꦪꦤꦺ​꧉​ ¹¹ꦥꦚ꧀ꦕꦺꦤ꧀​꧈​ꦩ꧀ꦧꦶꦪꦺꦤ꧀ꦏꦺꦴꦮꦺ​ꦲꦺꦤꦺꦁꦱꦶꦁ​ꦏꦪ​ꦔꦺꦴꦤꦺꦴ​꧈​ꦤꦁꦔꦶꦁ​ꦱꦲꦶꦏꦶ​ꦲꦸꦫꦶꦥ꧀ꦩꦸ​ꦮꦶꦱ꧀ꦢꦶꦉꦱꦶꦏ꧀ꦏꦶ​꧉​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦢꦶꦱꦸꦕꦺꦏ꧀ꦏꦏꦺ​ꦭꦤ꧀ꦢꦶꦲꦁꦒꦼꦥ꧀ꦧꦼꦤꦼꦂ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦸꦮꦶ​ꦱꦁꦏꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦲꦮꦏ꧀ꦏꦺ​ꦢꦺꦮꦺ꧉​

꧋ꦧꦢꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦢꦶꦏꦁꦒꦺꦴꦏ꧀ꦏꦏꦺꦏꦁꦒꦺꦴ​ꦒꦸꦱ꧀ꦠꦶ​꧈​ꦲꦺꦴꦫ​ꦏꦁꦒꦺꦴ​ꦭꦏꦸ​ꦧꦺꦢꦁ꧉​

¹²꧋ꦥꦫ​ꦱꦼꦢꦸꦭꦸꦂ​꧈​ꦩꦼꦤꦮ​ꦤꦁꦠꦼꦔꦃꦩꦸ​ꦲꦺꦤꦺꦁꦱꦶꦁ​ꦔꦺꦴꦩꦺꦴꦁ:“ꦲꦏꦸ​ꦲꦺꦤ꧀ꦠꦸꦏ꧀​ꦔ꧀ꦭꦏꦺꦴꦤ꧀ꦤꦶ​ꦱꦼꦩ꧀ꦧꦫꦁ​꧉”ꦠꦼꦩ꧀ꦧꦸꦁ​ꦏꦸꦮꦶ​ꦥꦚ꧀ꦕꦺꦤ꧀ꦧꦼꦤꦼꦂ​꧈​ꦤꦁꦔꦶꦁ​ꦲꦺꦴꦫ​ꦱꦼꦩ꧀ꦧꦫꦁ​ꦲꦥꦶꦏ꧀ꦏꦁꦒꦺꦴ​ꦏꦺꦴꦮꦺ​꧉​ꦥꦚ꧀ꦕꦺꦤ꧀ꦲꦏꦸ​ꦲꦺꦤ꧀ꦠꦸꦏ꧀​ꦔ꧀ꦭꦏꦺꦴꦤ꧀ꦤꦶ​ꦲꦥ​ꦮꦲꦺ​꧈​ꦤꦁꦔꦶꦁ​ꦲꦏꦸ​ꦲꦼꦩꦺꦴꦃ​ꦢꦢꦶ​ꦱ꧀ꦭꦥ꦳꧀ꦥ꦳ꦺꦲꦥꦲꦥ​꧉​ ¹³ꦏꦁꦒꦺꦴ​ꦩ꧀ꦧꦼꦤꦼꦂꦫꦏꦺꦏ꧀ꦭꦏꦸꦮꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ꦲꦸꦒ​ꦲꦺꦤꦺꦁꦱꦶꦁ​ꦔꦺꦴꦩꦺꦴꦁ:“ꦥꦔꦤ꧀ꦭꦲꦸꦠ꧀ꦏꦁꦒꦺꦴ​ꦮꦼꦠꦼꦁ​ꦠ​ꦭꦤ꧀ꦮꦼꦠꦼꦁ​ꦏꦸꦮꦶ​ꦭꦲꦸꦠ꧀ꦏꦁꦒꦺꦴ​ꦥꦔꦤ꧀ꦠ​?”ꦏꦸꦮꦶ​ꦪ​ꦧꦼꦤꦼꦂ​꧈​ꦤꦁꦔꦶꦁ​ꦥꦔꦤ꧀ꦭꦤ꧀ꦮꦼꦠꦼꦁ​ꦏꦸꦮꦶ​ꦧꦏꦭ꧀ꦢꦶꦫꦸꦱꦏ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦧꦢꦤ꧀ꦏꦸꦮꦶ​ꦲꦺꦴꦫ​ꦏꦁꦒꦺꦴ​ꦭꦏꦸ​ꦧꦺꦢꦁ꧈​ꦤꦁꦔꦶꦁ​ꦏꦁꦒꦺꦴ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦭꦤ꧀ꦒꦸꦱ꧀ꦠꦶ​ꦪ​ꦒꦼꦊꦩ꧀ꦔꦁꦒꦺꦴꦏ꧀ꦏꦏꦺꦧꦢꦤ꧀ꦩꦲꦸ​꧉​ ¹⁴ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦔꦺꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦥꦠꦶ​꧈​ꦱꦼꦩꦺꦴꦤꦺꦴ​ꦲꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦔꦺꦏ꧀ꦏꦺꦧꦢꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦔꦁꦒꦺꦴ​ꦥꦔ꧀ꦮꦱꦤꦺ​꧉​

¹⁵꧋ꦥꦫ​ꦱꦼꦢꦸꦭꦸꦂ​꧈​ꦲꦥ​ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦤꦺꦏ꧀ꦧꦢꦤ꧀ꦩꦸ​ꦏꦸꦮꦶ​ꦥꦺꦫꦁꦔꦤ꧀ꦤꦺ​ꦧꦢꦤ꧀ꦤꦺ​ꦏꦿꦶꦱ꧀ꦡꦸꦱ꧀?ꦲꦥ​ꦪ​ꦥꦤ꧀ꦠꦼꦱ꧀ꦤꦺꦏ꧀ꦲꦏꦸ​ꦚ꧀ꦗꦶꦏꦸꦏ꧀ꦥꦺꦫꦁꦔꦤ꧀ꦤꦺ​ꦧꦢꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦠꦼꦫꦸꦱ꧀ꦠꦏ꧀ꦢꦢꦺꦏ꧀ꦏꦏꦺꦥꦺꦫꦁꦔꦤ꧀ꦤꦺ​ꦧꦢꦤ꧀ꦤꦺ​ꦱꦏ꧀ꦮꦶꦗꦶꦤꦺꦭꦺꦴꦤ꧀ꦠꦺ?ꦪ​ꦲꦺꦴꦫ​ꦠ​! ¹⁶ꦲꦥ​ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​꧈​ꦤꦺꦏ꧀ꦏꦺꦴꦮꦺ​ꦠꦸꦫꦸ​ꦏꦫꦺꦴ​ꦭꦺꦴꦤ꧀ꦠꦺꦧꦢꦤ꧀ꦩꦸ​ꦏꦸꦮꦶ​ꦠꦼꦫꦸꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦭꦺꦴꦤ꧀ꦠꦺꦩꦲꦸ​꧉​ꦤꦁꦏꦶꦠꦧ꧀ꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦮꦺꦴꦁ​ꦭꦺꦴꦫꦺꦴ​ꦏꦸꦮꦶ​ꦧꦏꦭ꧀ꦢꦢꦶ​ꦧꦢꦤ꧀ꦱꦶꦗꦶ​꧉​” ¹⁷ꦤꦁꦔꦶꦁ​ꦱꦥ​ꦒꦤ꧀ꦢꦺꦁꦔꦤ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦱꦏ꧀ꦕꦫ​ꦏꦱꦸꦏ꧀ꦩꦤ꧀ꦮꦺꦴꦁ​ꦏꦸꦮꦶ​ꦢꦢꦶ​ꦱꦶꦗꦶ​ꦏꦫꦺꦴ​ꦢꦺꦏ꧀ꦤꦺ꧉​

¹⁸꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦭꦏꦸ​ꦧꦺꦢꦁꦏꦸꦮꦶ​ꦢꦶꦲꦼꦢꦺꦴꦃꦲꦶ​!ꦢꦺꦴꦱ​ꦭꦶꦪꦭꦶꦪꦤꦺ​ꦱꦶꦁ​ꦢꦸꦢꦸ​ꦭꦏꦸ​ꦧꦺꦢꦁꦏꦸꦮꦶ​ꦢꦶꦠꦶꦤ꧀ꦢꦏ꧀ꦏꦏꦺꦱꦏ꧀​ꦚ꧀ꦗꦧꦤꦺ​ꦧꦢꦤ꧀ ꦤꦁꦔꦶꦁ​ꦮꦺꦴꦁ​ꦱꦶꦁ​ꦭꦏꦸ​ꦧꦺꦢꦁꦏꦸꦮꦶ​ꦔꦿꦸꦱꦏ꧀ꦧꦢꦤ꧀ꦤꦺ​ꦢꦺꦮꦺ꧉​ ¹⁹ꦲꦥ​ꦏꦺꦴꦮꦺ​ꦲꦺꦴꦫ​ꦥꦢ​ꦔꦼꦂꦠꦶ​ꦤꦺꦏ꧀ꦧꦢꦤ꧀ꦩꦸ​ꦏꦸꦮꦶ​ꦢꦢꦶ​ꦥꦁꦒꦺꦴꦤ꧀ꦤꦤ꧀ꦤꦺ​ꦫꦺꦴꦃ​ꦱꦸꦕꦶ​?ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦼꦏꦺꦏ꧀ꦏꦶꦫꦺꦴꦃ​ꦱꦸꦕꦶ​ꦲꦶꦏꦶ​ꦩꦫꦁ​ꦏꦺꦴꦮꦺ​꧉​ꦏꦺꦴꦮꦺ​ꦏꦸꦮꦶ​ꦮꦶꦱ꧀ꦢꦸꦢꦸ​ꦮꦺꦏ꧀ꦩꦸꦢꦺꦮꦺ꧈​ꦤꦁꦔꦶꦁ​ꦏꦺꦴꦮꦺ​ꦮꦶꦱ꧀ꦮꦺꦏ꧀ꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁰ꦢꦺꦏ꧀ꦤꦺꦮꦶꦱ꧀ꦤꦸꦏꦸ​ꦏꦺꦴꦮꦺ​ꦭꦤ꧀ꦉꦒꦤꦺ​ꦱꦶꦁ​ꦭꦫꦁ​ꦮꦶꦱ꧀ꦢꦶꦧꦪꦂ​꧉​ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦧꦢꦤ꧀ꦩꦸ​ꦏꦸꦮꦶ​ꦲꦩ꧀ꦧꦺꦴꦏ꧀ꦢꦶꦏꦁꦒꦺꦴꦏ꧀ꦏꦏꦺꦏꦁꦒꦺꦴ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​꧉​

↑ ↑ ↑

꧋ꦲꦸꦫꦸꦠ꧀ꦠꦤ꧀ꦏꦁꦒꦺꦴ​ꦮꦺꦴꦁ​ꦱꦶꦁ​ꦧꦼꦧꦺꦴꦗꦺꦴꦮꦤ꧀꧈​

꧇​꧗꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦏꦸ​ꦲꦉꦥ꧀ꦔꦽꦩ꧀ꦧꦸꦏ꧀ꦧꦧ꧀ꦥꦽꦏꦫꦥꦽꦏꦫ​ꦱꦶꦁ​ꦲꦩ꧀ꦧꦺꦴꦏ꧀ꦠꦸꦭꦶꦱ꧀ꦤꦁꦭꦪꦁꦩꦸ​꧉​

꧋ꦥꦚ꧀ꦕꦺꦤ꧀ꦲꦥꦶꦏ꧀ꦤꦺꦏ꧀ꦮꦺꦴꦁ​ꦭꦤꦁ​ꦲꦺꦴꦫ​ꦤ꧀ꦢꦸꦮꦺꦧꦺꦴꦗꦺꦴ​꧉​ ²ꦤꦁꦔꦶꦁ​ꦗꦭꦂꦫꦤ꧀ꦥꦁꦒꦺꦴꦢꦭꦏꦸ​ꦧꦺꦢꦁꦒꦼꦢꦺꦧꦔꦼꦠ꧀ꦏꦁꦒꦺꦴ​ꦮꦺꦴꦁ​ꦭꦤꦁ​ꦭꦤ꧀ꦮꦺꦴꦁ​ꦮꦺꦢꦺꦴꦏ꧀ ꦩꦸꦭꦤꦺ​ꦲꦥꦶꦏ꧀ꦏꦺ​ꦤꦺꦏ꧀ꦱꦧꦼꦤ꧀ꦮꦺꦴꦁ​ꦭꦤꦁ​ꦤ꧀ꦢꦸꦮꦺꦧꦺꦴꦗꦺꦴ​ꦢꦺꦮꦺꦭꦤ꧀ꦱꦧꦼꦤ꧀ꦮꦺꦴꦁ​ꦮꦺꦢꦺꦴꦏ꧀ꦲꦸꦒ​ꦤ꧀ꦢꦸꦮꦺꦧꦺꦴꦗꦺꦴ​ꦢꦺꦮꦺ꧉​ ³ꦱꦧꦼꦤ꧀ꦮꦺꦴꦁ​ꦭꦤꦁ​ꦏꦸꦢꦸ​ꦤꦼꦠꦼꦥ꧀ꦥꦶ​ꦏꦸꦮꦗꦶꦧ꧀ꦧꦤ꧀ꦤꦺ​ꦩꦫꦁ​ꦧꦺꦴꦗꦺꦴꦤꦺ​ꦭꦤ꧀ꦱꦼꦩꦺꦴꦤꦺꦴ​ꦲꦸꦒ​ꦱꦧꦼꦤ꧀ꦮꦺꦴꦁ​ꦮꦺꦢꦺꦴꦏ꧀ꦩꦫꦁ​ꦱꦶꦁ​ꦭꦤꦁ​꧈​ꦢꦢꦶꦤꦺ​ꦱꦶꦁ​ꦱꦶꦗꦶ​ꦔ꧀ꦒꦮꦺ​ꦩꦉꦩ꧀ꦩꦺ​ꦲꦠꦶꦤꦺ​ꦭꦶꦪꦤꦺ​꧉​ ⁴ꦮꦺꦴꦁ​ꦮꦺꦢꦺꦴꦏ꧀ꦲꦺꦴꦫ​ꦏꦼꦤꦺꦁꦔ꧀ꦮꦱꦤꦶ​ꦧꦢꦤ꧀ꦤꦺ​ꦢꦺꦮꦺ꧈​ꦤꦁꦔꦶꦁ​ꦱꦶꦁ​ꦭꦤꦁ​꧉​ꦱꦼꦩꦺꦴꦤꦺꦴ​ꦲꦸꦒ​ꦮꦺꦴꦁ​ꦭꦤꦁ​ꦲꦺꦴꦫ​ꦏꦼꦤꦺꦁꦔ꧀ꦮꦱꦤꦶ​ꦧꦢꦤ꧀ꦤꦺ​ꦢꦺꦮꦺ꧈​ꦤꦁꦔꦶꦁ​ꦱꦶꦁ​ꦮꦺꦢꦺꦴꦏ꧀꧈​ ⁵ꦏꦺꦴꦮꦺ​ꦲꦺꦴꦫ​ꦏꦼꦤꦺꦁꦔꦼꦩꦺꦴꦃꦲꦶ​ꦱꦏ꧀ꦥꦢꦥꦢ꧈​ꦏꦼꦗꦧ​ꦤꦺꦏ꧀ꦥꦢ​ꦏꦉꦥ꧀ꦥꦺ​ꦔ꧀ꦒꦮꦺ​ꦮꦏ꧀ꦠꦸ​ꦏꦁꦒꦺꦴ​ꦥꦤ꧀ꦢꦺꦴꦔ​꧉​ ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦪ​ꦏꦸꦢꦸ​ꦕꦩ꧀ꦥꦸꦂ​ꦩꦼꦤꦺꦃ​꧈​ꦱꦸꦥꦪ​ꦲꦺꦴꦫ​ꦠꦶꦧ​ꦲꦶꦁ​ꦥꦁꦒꦺꦴꦢꦤꦺꦱꦺꦠꦤ꧀ ꦗꦭꦂꦫꦤ꧀ꦲꦺꦴꦫ​ꦏꦸꦮꦠ꧀ꦩꦼꦁꦒꦏ꧀ꦏꦼꦥꦺꦔꦶꦤ꧀ꦤꦺ​꧉​

⁶꧋ꦲꦏꦸ​ꦔꦺꦴꦩꦺꦴꦁꦏꦧꦺꦃ​ꦏꦸꦮꦶ​ꦩꦫꦁ​ꦏꦺꦴꦮꦺ​ꦲꦺꦴꦫ​ꦏꦁꦒꦺꦴ​ꦔꦼꦏꦺꦏ꧀ꦏꦶꦥꦼꦂꦤꦠ꧀ꦠꦤ꧀ ꦲꦺꦴꦫ​꧈​ꦤꦁꦔꦶꦁ​ꦩꦭꦃ​ꦏꦁꦒꦺꦴ​ꦔꦼꦥꦺꦤꦏ꧀ꦏꦏꦺ꧉​ ⁷ꦤꦺꦏ꧀ꦏꦁꦒꦺꦴ​ꦲꦏꦸ​꧈​ꦏꦼꦥꦺꦔꦶꦤ꧀ꦏꦸꦏꦧꦺꦃ​ꦮꦺꦴꦁ​ꦧꦶꦱꦲ​ꦏꦪ​ꦲꦏꦸ​꧉​ꦤꦁꦔꦶꦁ​ꦱꦧꦼꦤ꧀ꦮꦺꦴꦁ​ꦤꦩ꧀ꦥ​ꦥꦮꦺꦃꦱꦺꦗꦺꦱꦺꦗꦺꦱꦁꦏꦒꦸꦱ꧀ꦠꦶ​꧈​ꦱꦶꦁ​ꦱꦶꦗꦶ​ꦲꦶꦏꦶ​꧈​ꦱꦶꦁ​ꦭꦶꦪꦤꦺ​ꦏꦲꦺ​꧉​

⁸꧋ꦏꦁꦒꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦢꦸꦫꦸꦁ​ꦲꦺꦴꦩꦃꦲꦺꦴꦩꦃ​ꦭꦤ꧀ꦥꦫ​ꦫꦤ꧀ꦢ꧈​ꦲꦥꦶꦏ꧀ꦏꦺ​ꦤꦺꦏ꧀ꦠꦼꦫꦸꦱ꧀ꦲꦶꦗꦺꦤ꧀ꦮꦲꦺ​ꦏꦪ​ꦲꦏꦸ​ꦲꦶꦏꦶ​꧉​ ⁹ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦏꦸꦮꦠ꧀ꦩꦼꦁꦒꦏ꧀ꦏꦉꦥ꧀ꦥꦺ​ꦧꦢꦤ꧀ꦩꦸ​꧈​ꦲꦥꦶꦏ꧀ꦏꦺ​ꦪ​ꦔꦼꦥꦺꦏ꧀ꦧꦺꦴꦗꦺꦴ​ꦮꦲꦺ​꧈​ꦠꦼꦤꦶꦩ꧀ꦧꦁꦲꦺꦴꦫ​ꦏꦸꦮꦠ꧀ꦩꦼꦁꦒꦏ꧀ꦏꦼꦥꦺꦔꦶꦤ꧀ꦤꦺ​꧉​

¹⁰꧋ꦏꦁꦒꦺꦴ​ꦮꦺꦴꦁ​ꦱꦶꦁ​ꦮꦶꦱ꧀ꦲꦺꦴꦩꦃꦲꦺꦴꦩꦃ​ꦒꦸꦱ꧀ꦠꦶ​ꦤ꧀ꦢꦸꦮꦺꦤ꧀ꦤꦶ​ꦠꦼꦩ꧀ꦧꦸꦁ​ꦲꦶꦏꦶ​ꦭꦤ꧀ꦲꦶꦏꦶ​ꦢꦸꦢꦸ​ꦠꦼꦩ꧀ꦧꦸꦁꦏꦸ​ꦢꦺꦮꦺ:“ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦮꦶꦱ꧀ꦏꦮꦶꦤ꧀ꦲꦺꦴꦫ​ꦏꦼꦤꦺꦁꦩꦼꦒꦠ꧀ꦧꦺꦴꦗꦺꦴꦤꦺ​꧉​” ¹¹ꦤꦺꦏ꧀ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦩꦼꦏ꧀ꦱ​ꦩꦼꦒꦠ꧀ꦱꦶꦁ​ꦭꦤꦁ​꧈​ꦮꦺꦴꦁ​ꦮꦺꦢꦺꦴꦏ꧀ꦏꦸꦮꦶ​ꦲꦺꦴꦫ​ꦏꦼꦤꦺꦁꦏꦮꦶꦤ꧀ꦩꦼꦤꦺꦃ​꧉​ꦤꦺꦏ꧀ꦏꦼꦥꦺꦔꦶꦤ꧀ꦲꦺꦴꦩꦃꦲꦺꦴꦩꦃ​ꦪ​ꦏꦸꦢꦸ​ꦧꦭꦺꦤ꧀ꦮꦲꦺ​ꦏꦫꦺꦴ​ꦧꦺꦴꦗꦺꦴꦤꦺ​꧉​ꦱꦼꦩꦺꦴꦤꦺꦴ​ꦲꦸꦒ​꧈​ꦮꦺꦴꦁ​ꦭꦤꦁ​ꦲꦺꦴꦫ​ꦏꦼꦤꦺꦁꦩꦼꦒꦠ꧀ꦧꦺꦴꦗꦺꦴꦤꦺ​꧉​

¹²꧋ꦏꦁꦒꦺꦴ​ꦥꦽꦏꦫ​ꦭꦶꦪꦭꦶꦪꦤꦺ​꧈​ꦲꦏꦸ​꧈​ꦢꦸꦢꦸ​ꦒꦸꦱ꧀ꦠꦶ​꧈​ꦤ꧀ꦢꦸꦮꦺꦠꦼꦩ꧀ꦧꦸꦁ​ꦲꦶꦏꦶ​:ꦤꦺꦏ꧀ꦲꦺꦤꦺꦁꦮꦺꦴꦁ​ꦏꦿꦶꦱ꧀ꦠꦼꦤ꧀ꦭꦤꦁ​ꦤ꧀ꦢꦸꦮꦺꦧꦺꦴꦗꦺꦴ​ꦱꦶꦁ​ꦲꦺꦴꦫ​ꦥꦽꦕꦪ​꧈​ꦤꦁꦔꦶꦁ​ꦒꦼꦊꦩ꧀ꦧꦼꦧꦉꦁꦔꦤ꧀ꦠꦼꦫꦸꦱ꧀ꦏꦫꦺꦴ​ꦢꦺꦏ꧀ꦤꦺ꧈​ꦮꦺꦴꦁꦔꦺ​ꦪ​ꦲꦗ​ꦢꦶꦥꦼꦒꦠ꧀꧈​ ¹³ꦲꦸꦒ​ꦤꦺꦏ꧀ꦲꦺꦤꦺꦁꦮꦺꦴꦁ​ꦏꦿꦶꦱ꧀ꦠꦼꦤ꧀ꦮꦺꦢꦺꦴꦏ꧀​ꦤ꧀ꦢꦸꦮꦺꦧꦺꦴꦗꦺꦴ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​꧈​ꦱꦶꦁ​ꦒꦼꦊꦩ꧀ꦲꦸꦫꦶꦥ꧀ꦧꦼꦧꦉꦁꦔꦤ꧀ꦏꦫꦺꦴ​ꦢꦺꦏ꧀ꦤꦺ꧈​ꦮꦺꦴꦁ​ꦏꦿꦶꦱ꧀ꦠꦼꦤ꧀ꦮꦺꦢꦺꦴꦏ꧀ꦩꦲꦸ​ꦪ​ꦲꦺꦴꦫ​ꦏꦼꦤꦺꦁꦩꦼꦒꦠ꧀ꦱꦶꦁ​ꦭꦤꦁ​꧉​ ¹⁴ꦮꦺꦴꦁ​ꦭꦤꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦲꦸ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦢꦺꦏ꧀ꦤꦺꦢꦢꦶ​ꦧꦺꦴꦗꦺꦴꦤꦺ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦥꦽꦕꦪ​꧉​ꦱꦼꦩꦺꦴꦤꦺꦴ​ꦲꦸꦒ​꧈​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦲꦺꦴꦫ​ꦥꦽꦕꦪ​ꦧꦶꦱ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦢꦺꦏ꧀ꦤꦺꦧꦺꦴꦗꦺꦴꦤꦺ​ꦮꦺꦴꦁ​ꦭꦤꦁ​ꦱꦶꦁ​ꦥꦽꦕꦪ​꧉​ꦤꦺꦏ꧀ꦲꦺꦴꦫ​ꦔꦺꦴꦤꦺꦴ​ꦲꦤꦏ꧀ꦲꦤꦏ꧀ꦏꦺ​ꦲꦩ꧀ꦧꦫꦁ​ꦪ​ꦢꦢꦶ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​꧉​ꦤꦁꦔꦶꦁ​ꦱꦲꦶꦏꦶ​ꦮꦸꦗꦸꦠ꧀ꦠꦺꦪ​ꦢꦶꦠꦩ꧀ꦥ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁵ꦤꦁꦔꦶꦁ​ꦤꦺꦏ꧀ꦱꦶꦁ​ꦲꦺꦴꦫ​ꦥꦽꦕꦪ​ꦚ꧀ꦗꦭꦸꦏ꧀ꦥꦼꦒꦠ꧀ꦪ​ꦲꦗ​ꦢꦶꦥꦼꦁꦒꦏ꧀꧈​ꦤꦁꦏꦺꦴꦤꦺꦴ​ꦮꦺꦴꦁ​ꦏꦿꦶꦱ꧀ꦠꦼꦤ꧀ꦱꦶꦁ​ꦭꦤꦁ​ꦲꦥ​ꦮꦺꦢꦺꦴꦏ꧀ꦩꦲꦸ​ꦲꦺꦴꦫ​ꦏꦼꦥꦼꦏ꧀ꦱ​ꦔ꧀ꦒꦺꦴꦤ꧀ꦢꦺꦭ꧀ꦭꦶ꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦶꦭ꧀ꦏꦺꦴꦮꦺ​ꦱꦸꦥꦪ​ꦲꦸꦫꦶꦥ꧀ꦩꦸ​ꦠꦼꦤ꧀ꦠꦽꦩ꧀ ꦲꦺꦴꦫ​ꦕꦺꦴꦁ​ꦏꦿꦺꦃ​꧉​ ¹⁶ꦲꦮꦶꦠ꧀ꦏꦺꦴꦮꦺ​꧈​ꦱꦼꦢꦸꦭꦸꦂ​ꦮꦺꦢꦺꦴꦏ꧀ꦱꦶꦁ​ꦥꦽꦕꦪ​꧈​ꦏꦺꦴꦮꦺ​ꦪ​ꦲꦺꦴꦫ​ꦔꦼꦂꦠꦶ​ꦠ​ꦲꦥ​ꦧꦺꦴꦗꦺꦴꦩꦸ​ꦧꦏꦭ꧀ꦤꦩ꧀ꦥ​ꦒꦸꦱ꧀ꦠꦶ​ꦲꦥ​ꦲꦺꦴꦫ​꧉​ꦭꦤ꧀ꦏꦺꦴꦮꦺ​ꦲꦸꦒ​꧈​ꦱꦼꦢꦸꦭꦸꦂ​ꦭꦤꦁ​꧈​ꦏꦺꦴꦮꦺ​ꦲꦥ​ꦪ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦧꦶꦱ​ꦩꦫꦏ꧀ꦏꦏꦺꦧꦺꦴꦗꦺꦴꦩꦸ​ꦤꦩ꧀ꦥ​ꦒꦸꦱ꧀ꦠꦶ​?

꧋ꦏꦪ​ꦩꦲꦸꦤꦺ​ꦮꦲꦺ​ꦢꦺꦴꦁꦔꦺꦤꦩ꧀ꦥ​ꦒꦸꦱ꧀ꦠꦶ​꧉​

¹⁷꧋ꦥꦫ​ꦱꦼꦢꦸꦭꦸꦂ​꧈​ꦲꦥꦶꦏ꧀ꦏꦺ​ꦏꦺꦴꦮꦺ​ꦔꦺꦴꦤꦺꦴ​ꦮꦲꦺ​ꦩꦤꦸꦠ꧀ꦏꦲꦤꦤ꧀ꦥꦤ꧀ꦢꦸꦩ꧀ꦩꦤ꧀ꦤꦺ​ꦒꦸꦱ꧀ꦠꦶ​ꦩꦫꦁ​ꦏꦺꦴꦮꦺ​꧈​ꦢꦺꦴꦁꦔꦺꦏꦺꦴꦮꦺ​ꦤꦩ꧀ꦥ​ꦒꦸꦱ꧀ꦠꦶ​꧉​ꦪ​ꦥꦼꦂꦤꦠ꧀ꦠꦤ꧀ꦲꦶꦏꦶ​ꦱꦶꦁ​ꦠꦏ꧀ꦮꦸꦭꦁꦔꦏꦺꦤꦁꦥꦱꦩꦸꦮꦤ꧀ꦥꦱꦩꦸꦮꦤ꧀ꦏꦧꦺꦃ​꧉​ ¹⁸ꦏꦁꦒꦺꦴ​ꦤ꧀ꦢꦸꦤꦸꦁꦔꦏꦺꦠꦼꦩ꧀ꦧꦸꦁꦏꦸ​ꦏꦸꦮꦶ​ꦩꦲꦸ​ꦲꦉꦥ꧀ꦠꦏ꧀ꦏꦺꦏ꧀ꦏꦶꦕꦺꦴꦤ꧀ꦠꦺꦴ​ꦱꦲꦶꦏꦶ​!ꦱꦼꦩꦸꦁꦒꦺꦴꦤ꧀ꦤꦺꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦢꦺꦴꦁꦔꦺꦤꦩ꧀ꦥ​ꦒꦸꦱ꧀ꦠꦶ​ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ ꦱꦼꦢꦸꦭꦸꦂ​ꦏꦸꦮꦶ​ꦮꦶꦱ꧀ꦲꦺꦴꦫ​ꦲꦸꦱꦃꦧꦶꦔꦸꦁ​ꦲꦉꦥ꧀ꦔꦶꦭꦁꦔꦶ​ꦱꦸꦤꦠ꧀ꦠꦺ꧉​ꦱꦼꦩꦺꦴꦤꦺꦴ​ꦲꦸꦒ​꧈​ꦱꦼꦢꦸꦭꦸꦂ​ꦱꦶꦁ​ꦢꦸꦫꦸꦁ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦢꦺꦴꦁꦔꦺꦤꦩ꧀ꦥ​ꦒꦸꦱ꧀ꦠꦶ​꧈​ꦱꦼꦢꦸꦭꦸꦂ​ꦏꦸꦮꦶ​ꦮꦶꦱ꧀ꦲꦺꦴꦫ​ꦲꦸꦱꦃꦧꦶꦔꦸꦁ​ꦲꦉꦥ꧀ꦱꦸꦤꦠ꧀꧈​ ¹⁹ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦲꦥ​ꦲꦺꦴꦫ​ꦏꦸꦮꦶ​ꦲꦺꦴꦫ​ꦢꦢꦶ​ꦱꦼꦧꦧ꧀​ꦧ꧀ꦭꦱ꧀꧈​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦪꦏꦸꦮꦶ​꧈​ꦏꦧꦺꦃ​ꦏꦸꦢꦸ​ꦤꦸꦫꦸꦠ꧀ꦠꦶ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁰ꦱꦧꦼꦤ꧀ꦮꦺꦴꦁ​ꦮꦶꦱ꧀ꦧꦺꦤ꧀ꦏꦪ​ꦩꦲꦸꦤꦺ​ꦮꦲꦺ​ꦢꦺꦴꦁꦔꦺꦤꦩ꧀ꦥ​ꦒꦸꦱ꧀ꦠꦶ​꧉​ ²¹ꦤꦺꦏ꧀ꦏꦺꦴꦮꦺ​ꦩꦲꦸꦤꦺ​ꦱ꧀ꦭꦥ꦳꧀ ꦲꦺꦴꦫ​ꦢꦢꦶ​ꦲꦥ​꧉​ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦲꦺꦤ꧀ꦠꦸꦏ꧀ꦏꦼꦭꦸꦁꦒꦂꦫꦤ꧀ꦢꦢꦶ​ꦮꦺꦴꦁ​ꦩꦼꦂꦢꦺꦏ꧈​ꦏꦼꦭꦸꦁꦒꦂꦫꦤ꧀ꦏꦸꦮꦶ​ꦪ​ꦢꦶꦏꦁꦒꦺꦴꦏ꧀ꦏꦏꦺ꧉​ ²²ꦲꦮꦶꦠ꧀ ꦱꦼꦤꦗꦤ꧀ꦤ​ꦮꦺꦴꦁ​ꦱ꧀ꦭꦥ꦳꧀ ꦤꦺꦏ꧀ꦮꦶꦱ꧀ꦤꦩ꧀ꦥ​ꦒꦸꦱ꧀ꦠꦶ​ꦪ​ꦢꦢꦶ​ꦮꦺꦴꦁ​ꦩꦼꦂꦢꦺꦏ꧉​ꦱꦼꦩꦺꦴꦤꦺꦴ​ꦲꦸꦒ​ꦮꦺꦴꦁ​ꦩꦼꦂꦢꦺꦏ꧈​ꦤꦺꦏ꧀ꦮꦶꦱ꧀ꦤꦩ꧀ꦥ​ꦒꦸꦱ꧀ꦠꦶ​ꦪ​ꦢꦢꦶ​ꦥꦼꦭꦢꦺꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​ ²³ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦮꦶꦱ꧀ꦢꦶꦠꦸꦏꦸ​ꦭꦤ꧀ꦮꦶꦱ꧀ꦢꦶꦧꦪꦂ​ꦏꦫꦺꦴ​ꦒꦸꦱ꧀ꦠꦶ​꧉​ꦩꦸꦭꦤꦺ​ꦏꦺꦴꦮꦺ​ꦲꦗ​ꦢꦢꦶ​ꦱ꧀ꦭꦥ꦳꧀ꦥ꦳ꦺꦩꦤꦸꦁꦱ​ꦩꦼꦤꦺꦃ​꧉​ ²⁴ꦱꦧꦼꦤ꧀ꦮꦺꦴꦁ​ꦧꦺꦤ꧀ꦏꦪ​ꦩꦲꦸꦤꦺ​ꦮꦲꦺ​ꦢꦺꦴꦁꦔꦺꦤꦩ꧀ꦥ​ꦒꦸꦱ꧀ꦠꦶ​꧉​

꧋ꦲꦸꦫꦸꦠ꧀ꦠꦤ꧀ꦏꦁꦒꦺꦴ​ꦮꦺꦴꦁ​ꦱꦶꦁ​ꦢꦸꦫꦸꦁ​ꦲꦺꦴꦩꦃꦲꦺꦴꦩꦃ​꧉​

²⁵꧋ꦥꦫ​ꦱꦼꦢꦸꦭꦸꦂ​꧈​ꦏꦁꦒꦺꦴ​ꦮꦺꦴꦁ​ꦱꦶꦁ​ꦢꦸꦫꦸꦁ​ꦲꦺꦴꦩꦃꦲꦺꦴꦩꦃ​ꦲꦏꦸ​ꦲꦺꦴꦫ​ꦤ꧀ꦢꦸꦮꦺꦠꦼꦩ꧀ꦧꦸꦁ​ꦲꦥꦲꦥ​ꦱꦁꦏꦒꦸꦱ꧀ꦠꦶ​꧈​ꦤꦁꦔꦶꦁ​ꦲꦏꦸ​ꦏꦼꦥꦺꦔꦶꦤ꧀ꦔꦼꦏꦺꦏ꧀ꦏꦶꦥꦶꦤꦼꦩꦸꦏꦸꦢꦺꦮꦺꦩꦫꦁ​ꦏꦺꦴꦮꦺ​꧉​ꦤꦁꦔꦶꦁ​꧈​ꦱꦼꦤꦗꦤ꧀ꦥꦶꦤꦼꦩꦸꦏꦸꦢꦺꦮꦺ꧈​ꦪ​ꦏꦼꦤꦺꦁꦲꦩ꧀ꦧꦺꦴꦏ꧀ ꦠꦸꦫꦸꦠ꧀ ꦲꦮꦶꦠ꧀ꦲꦏꦸ​ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦱꦶꦁ​ꦔꦼꦏꦺꦏ꧀ꦏꦶꦏꦮꦼꦫꦸꦃꦲꦶꦏꦶ​ꦩꦫꦁ​ꦲꦏꦸ​꧉​

²⁶꧋ꦩꦶꦠꦸꦫꦸꦠ꧀ꦥꦶꦤꦼꦩꦸꦏꦸ꧈​ꦤꦺꦏ꧀ꦔꦺꦭꦶꦁꦔꦶ​ꦲꦺꦴꦏꦺꦃꦲꦺꦏꦱꦸꦱꦃꦲꦤ꧀ꦲꦶꦁ​ꦗꦩꦤ꧀ꦱꦲꦶꦏꦶ​꧈​ꦲꦥꦶꦏ꧀ꦏꦺ​ꦤꦺꦏ꧀ꦮꦺꦴꦁ​ꦭꦤꦁ​ꦮꦶꦱ꧀ꦲꦺꦴꦫ​ꦔꦼꦥꦺꦏ꧀ꦧꦺꦴꦗꦺꦴ​ꦮꦲꦺ​꧉​ ²⁷ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦤ꧀ꦢꦸꦮꦺꦧꦺꦴꦗꦺꦴ​꧈​ꦪ​ꦲꦗ​ꦢꦶꦥꦼꦒꦠ꧀꧈​ꦤꦺꦏ꧀ꦮꦶꦱ꧀ꦲꦺꦴꦫ​ꦤ꧀ꦢꦸꦮꦺꦧꦺꦴꦗꦺꦴ​꧈​ꦪ​ꦮꦶꦱ꧀ꦲꦗ​ꦔ꧀ꦒꦺꦴꦭꦺꦏ꧀ꦭꦶꦪꦤꦺ​꧉​ ²⁸ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦏꦮꦶꦤ꧀ꦪ​ꦲꦺꦴꦫ​ꦢꦺꦴꦱ​꧉​ꦲꦸꦒ​ꦤꦺꦏ꧀ꦲꦺꦤꦺꦁꦥꦿꦮꦤ꧀ꦔꦼꦥꦺꦏ꧀ꦧꦺꦴꦗꦺꦴ​꧈​ꦏꦸꦮꦶ​ꦪ​ꦲꦺꦴꦫ​ꦢꦺꦴꦱ​꧉​ꦲꦏꦸ​ꦤꦩꦸꦁ​ꦏꦼꦥꦺꦔꦶꦤ꧀ꦔꦭꦁꦔꦭꦁꦔꦶꦏꦺꦴꦮꦺ​꧈​ꦱꦸꦥꦪ​ꦲꦺꦴꦫ​ꦔꦭꦩ꧀ꦩꦶ​ꦏꦔꦺꦭ꧀ꦭꦤ꧀ꦤꦺ​ꦮꦺꦴꦁ​ꦱꦶꦁ​ꦲꦺꦴꦩꦃꦲꦺꦴꦩꦃ​꧉​

²⁹꧋ꦥꦫ​ꦱꦼꦢꦸꦭꦸꦂ​꧈​ꦏꦉꦥ꧀ꦏꦸ​ꦏꦸꦮꦶ​ꦔꦺꦤꦺ​:ꦮꦏ꧀ꦠꦸꦩꦸꦮꦶꦱ꧀ꦲꦺꦴꦫ​ꦲꦺꦴꦏꦺꦃ꧉​ꦩꦸꦭꦤꦺ​꧈​ꦮꦶꦮꦶꦠ꧀ꦱꦲꦶꦏꦶ​꧈​ꦮꦺꦴꦁ​ꦭꦤꦁ​ꦱꦶꦁ​ꦤ꧀ꦢꦸꦮꦺꦧꦺꦴꦗꦺꦴ​ꦲꦸꦫꦶꦥ꧀ꦥꦺꦏꦸꦢꦸ​ꦢꦶꦲꦁꦒꦼꦥ꧀ꦏꦪ​ꦮꦺꦴꦁ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦧꦺꦴꦗꦺꦴ​ꦮꦲꦺ​꧉​ ³⁰ꦮꦺꦴꦁ​ꦱꦶꦁ​ꦠꦔꦶꦱ꧀ꦱꦤ꧀ ꦢꦶꦒꦮꦺ​ꦏꦪ​ꦱꦶꦁ​ꦲꦺꦴꦫ​ꦱꦼꦢꦶꦮꦲꦺ​꧉​ꦮꦺꦴꦁ​ꦱꦶꦁ​ꦥꦢ​ꦧꦸꦔꦃ​꧈​ꦢꦶꦒꦮꦺ​ꦏꦪ​ꦱꦶꦁ​ꦲꦺꦴꦫ​ꦧꦸꦔꦃ​ꦮꦲꦺ​꧉​ꦮꦺꦴꦁ​ꦱꦶꦁ​ꦠꦼꦠꦸꦏꦸ​꧈​ꦢꦶꦒꦮꦺ​ꦏꦪ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦲꦥꦲꦥ​ꦮꦲꦺ​꧉​ ³¹ꦮꦺꦴꦁ​ꦱꦶꦁ​ꦢꦺꦴꦢꦺꦴꦭ꧀ꦭꦤ꧀ꦧꦫꦁꦧꦫꦁ​ꦏꦢꦺꦴꦚꦃꦲꦤ꧀ꦲꦶꦏꦶ​꧈​ꦢꦶꦒꦮꦺ​ꦏꦪ​ꦱꦶꦁ​ꦲꦺꦴꦫ​ꦏꦼꦕꦼꦚ꧀ꦕꦁ​ꦏꦫꦺꦴ​ꦧꦫꦁꦧꦫꦁ​ꦲꦶꦏꦶ​꧉​ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦗꦒꦠ꧀ꦱꦶꦁ​ꦏꦺꦠꦺꦴꦏ꧀ꦱꦲꦶꦏꦶ​ꦲꦶꦏꦶ​ꦮꦶꦱ꧀​ꦤ꧀ꦢꦁꦲꦶꦭꦁ​ꦮꦲꦺ​꧉​

³²꧋ꦥꦫ​ꦱꦼꦢꦸꦭꦸꦂ​꧈​ꦏꦉꦥ꧀ꦏꦸ​ꦏꦺꦴꦮꦺ​ꦧꦶꦱꦲ​ꦲꦸꦫꦶꦥ꧀ꦠꦤ꧀ꦥ​ꦱꦸꦩꦼꦭꦁ​꧉​ꦮꦺꦴꦁ​ꦭꦤꦁ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦧꦺꦴꦗꦺꦴ​ꦧꦶꦱ​ꦩꦶꦏꦶꦂꦫꦏꦺꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​ꦭꦤ꧀ꦏꦼꦥꦺꦔꦶꦤ꧀​ꦤ꧀ꦢꦢꦺꦏ꧀ꦏꦏꦺꦊꦒꦤꦺꦒꦸꦱ꧀ꦠꦶ​꧉​ ³³ꦤꦁꦔꦶꦁ​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦧꦺꦴꦗꦺꦴ​ꦏꦸꦮꦶ​ꦏꦸꦢꦸ​ꦔꦸꦫꦸꦱ꧀ꦱꦶ​ꦥꦽꦏꦫꦥꦽꦏꦫ​ꦏꦢꦺꦴꦚꦃꦲꦤ꧀ꦲꦶꦏꦶ​꧈​ꦲꦮꦶꦠ꧀ꦮꦺꦴꦁꦔꦺ​ꦏꦼꦥꦺꦔꦶꦤ꧀​ꦔ꧀ꦒꦮꦺ​ꦊꦒꦤꦺꦲꦠꦶꦤꦺ​ꦧꦺꦴꦗꦺꦴꦤꦺ​꧉​ꦩꦸꦭꦤꦺ​꧈​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦧꦺꦴꦗꦺꦴ​ꦏꦸꦮꦶ​ꦲꦔꦼꦤ꧀ꦤꦔꦼꦤ꧀ꦤꦺꦪ​ꦏꦼꦠꦫꦶꦏ꧀ꦫꦤꦭꦤ꧀ꦏꦼꦠꦫꦶꦏ꧀ꦫꦺꦤꦺ꧉​ ³⁴ꦭꦃ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦮꦶꦱ꧀ꦲꦺꦴꦫ​ꦤ꧀ꦢꦸꦮꦺꦧꦺꦴꦗꦺꦴ​ꦩꦼꦤꦺꦃ​ꦭꦤ꧀ꦧꦺꦴꦕꦃ​ꦮꦺꦢꦺꦴꦏ꧀ꦥꦿꦮꦤ꧀ꦱꦶꦁ​ꦢꦸꦫꦸꦁ​ꦤ꧀ꦢꦸꦮꦺꦧꦺꦴꦗꦺꦴ​ꦧꦶꦱ​ꦩꦶꦏꦶꦂꦫꦏꦺꦧꦧ꧀ꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​ꦭꦤ꧀ꦧꦶꦱ​ꦩꦱꦿꦃꦲꦏꦺꦚꦮꦫꦒꦤꦺꦏꦁꦒꦺꦴ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​꧉​ꦤꦁꦔꦶꦁ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦤ꧀ꦢꦸꦮꦺꦧꦺꦴꦗꦺꦴ​ꦩꦶꦏꦶꦂꦫꦏꦺꦥꦽꦏꦫꦥꦽꦏꦫ​ꦏꦢꦺꦴꦚꦃꦲꦤ꧀ ꦲꦮꦶꦠ꧀ꦏꦼꦥꦺꦔꦶꦤ꧀ꦤꦸꦫꦸꦠ꧀ꦠꦶ​ꦱꦼꦤꦼꦁꦔꦺ​ꦲꦠꦶꦤꦺ​ꦱꦶꦁ​ꦭꦤꦁ​꧉​

³⁵꧋ꦥꦫ​ꦱꦼꦢꦸꦭꦸꦂ​꧈​ꦲꦼꦁꦒꦺꦴꦤ꧀ꦏꦸ​ꦩꦶꦠꦸꦠꦸꦂꦫꦶ​ꦏꦺꦴꦮꦺ​ꦔꦺꦴꦤꦺꦴ​ꦏꦸꦮꦶ​ꦏꦁꦒꦺꦴ​ꦧꦼꦕꦶꦏ꧀ꦩꦸ​ꦢꦺꦮꦺ꧈​ꦲꦺꦴꦫ​ꦏꦁꦒꦺꦴ​ꦚ꧀ꦗꦶꦉꦠ꧀ꦏꦺꦴꦮꦺ​꧉​ꦏꦁꦒꦺꦴ​ꦲꦏꦸ​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺ꧈​ꦧꦶꦱꦲ​ꦏꦺꦴꦮꦺ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦥꦼꦁꦒꦮꦺꦏꦸꦱꦶꦁ​ꦧꦼꦕꦶꦏ꧀ꦭꦤ꧀ꦱꦶꦁ​ꦧꦼꦤꦼꦂ​꧈​ꦱꦸꦥꦪ​ꦲꦸꦫꦶꦥ꧀ꦩꦸ​ꦧꦶꦱ​ꦱꦏ꧀ꦏꦧꦺꦃꦲꦺꦏꦁꦒꦺꦴ​ꦔꦼꦂꦗꦤ꧀ꦤꦶꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​꧉​

³⁶꧋ꦤꦺꦏ꧀ꦲꦺꦤꦺꦁꦮꦺꦴꦁ​ꦠꦸꦮ​ꦫꦸꦩꦁꦱ​ꦱꦭꦃ​ꦩꦫꦁ​ꦲꦤꦏ꧀ꦏꦺ​ꦥꦿꦮꦤ꧀ ꦗꦭꦂꦫꦤ꧀ꦩꦸꦤ꧀ꦢꦏ꧀ꦲꦸꦩꦸꦂꦫꦺ​ꦭꦤ꧀ꦏꦸꦢꦸ​ꦢꦶꦏꦮꦶꦤ꧀ꦤꦏꦺ꧈​ꦪ​ꦏꦸꦢꦸ​ꦩꦤꦸꦠ꧀ꦲꦥ​ꦱꦶꦁ​ꦧꦼꦤꦼꦂ​ꦮꦲꦺ​꧉​ꦲꦺꦴꦫ​ꦢꦺꦴꦱ​ꦤꦺꦏ꧀ꦢꦺꦏ꧀ꦤꦺꦔꦮꦶꦤ꧀ꦤꦏꦺꦲꦤꦏ꧀ꦏꦺ​꧉​ ³⁷ꦤꦁꦔꦶꦁ​ꦤꦺꦏ꧀ꦮꦶꦱ꧀ꦢꦢꦶ​ꦏꦉꦥ꧀ꦥꦺ​ꦮꦺꦴꦁꦔꦺ​꧈​ꦠꦤ꧀ꦥ​ꦲꦺꦤꦺꦁꦱꦶꦁ​ꦩꦼꦏ꧀ꦱ​ꦢꦺꦏ꧀ꦤꦺ꧈​ꦲꦺꦴꦫ​ꦲꦉꦥ꧀ꦔꦮꦶꦤ꧀ꦤꦏꦺꦲꦤꦏ꧀ꦏꦺ​꧈​ꦢꦺꦏ꧀ꦤꦺꦤ꧀ꦢꦸꦮꦺꦏ꧀ꦮꦱ​ꦔ꧀ꦒꦮꦺ​ꦥꦸꦠꦸꦱ꧀ꦱꦤ꧀ꦏꦸꦮꦶ​꧉​ꦏꦸꦮꦶ​ꦪ​ꦲꦺꦴꦫ​ꦏ꧀ꦭꦺꦫꦸ​꧉​ ³⁸ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦠꦸꦮ​ꦱꦶꦁ​ꦔꦮꦶꦤ꧀ꦤꦏꦺꦲꦤꦏ꧀ꦏꦺ​ꦮꦺꦢꦺꦴꦏ꧀ꦪ​ꦲꦥꦶꦏ꧀ ꦤꦁꦔꦶꦁ​ꦮꦺꦴꦁ​ꦠꦸꦮ​ꦱꦶꦁ​ꦲꦺꦴꦫ​ꦔꦮꦶꦤ꧀ꦤꦏꦺꦲꦤꦏ꧀ꦏꦺ​ꦮꦺꦢꦺꦴꦏ꧀ꦭꦸꦮꦶꦃ​ꦲꦥꦶꦏ꧀꧈​

³⁹꧋ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦮꦶꦱ꧀​ꦤ꧀ꦢꦸꦮꦺꦧꦺꦴꦗꦺꦴ​ꦏꦸꦮꦶ​ꦤ꧀ꦢꦸꦮꦺꦏꦸꦮꦗꦶꦧ꧀ꦧꦤ꧀ꦩꦫꦁ​ꦧꦺꦴꦗꦺꦴꦤꦺ​ꦤꦩꦸꦁ​ꦱꦸꦮꦺꦤꦺ​ꦱꦶꦁ​ꦭꦤꦁ​ꦲꦶꦗꦶꦏ꧀ꦲꦸꦫꦶꦥ꧀꧈​ꦤꦁꦔꦶꦁ​ꦤꦺꦏ꧀ꦱꦶꦁ​ꦭꦤꦁ​ꦮꦶꦱ꧀ꦩꦠꦶ​꧈​ꦮꦺꦴꦁ​ꦮꦺꦢꦺꦴꦏ꧀ꦏꦸꦮꦶ​ꦏꦼꦤꦺꦁꦏꦮꦶꦤ꧀ꦩꦼꦤꦺꦃ​ꦏꦫꦺꦴ​ꦱꦥ​ꦮꦲꦺ​ꦱꦶꦁ​ꦢꦶꦱꦼꦤꦼꦁꦔꦶ​꧈​ꦗꦚ꧀ꦗꦶ​ꦏꦫꦺꦴ​ꦮꦺꦴꦁ​ꦥꦽꦕꦪ​ꦮꦲꦺ​꧉​ ⁴⁰ꦤꦁꦔꦶꦁ​ꦤꦺꦏ꧀ꦠꦏ꧀ꦥꦶꦏꦶꦂ​꧈​ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦭꦸꦮꦶꦃ​ꦏꦼꦥꦺꦤꦏ꧀ꦤꦺꦏ꧀ꦲꦺꦴꦫ​ꦔ꧀ꦒꦺꦴꦭꦺꦏ꧀ꦧꦺꦴꦗꦺꦴ​ꦩꦼꦤꦺꦃ​꧉​ꦏꦸꦮꦶ​ꦩꦲꦸ​ꦪ​ꦥꦶꦤꦼꦩꦸꦏꦸꦢꦺꦮꦺ꧈​ꦤꦁꦔꦶꦁ​ꦲꦏꦸ​ꦥꦽꦕꦪ​ꦤꦺꦏ꧀ꦏꦸꦮꦶ​ꦕꦺꦴꦕꦺꦴꦏ꧀​ꦏꦫꦺꦴ​ꦏꦉꦥ꧀ꦥꦺ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

↑ ↑ ↑

꧋ꦧꦧ꧀ꦱꦗꦺꦤ꧀ꦤꦺ​ꦧꦿꦲꦭ​꧉​

꧇​꧘꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦏꦸ​ꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦏꦺꦧꦧ꧀ꦱꦼꦱꦗꦺꦤ꧀ꦤꦺ​ꦧꦿꦲꦭ​꧉​ꦥꦚ꧀ꦕꦺꦤ꧀ꦧꦼꦤꦼꦂ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦮꦺꦴꦁꦮꦺꦴꦁ​꧈​ꦗꦫꦺꦤꦺ​ꦥꦢ​ꦔꦼꦂꦠꦶ​ꦤꦺꦏ꧀ꦧꦿꦲꦭ​ꦏꦸꦮꦶ​ꦱꦏ꧀ꦗꦤꦺꦲꦺꦴꦫ​ꦲꦺꦤꦺꦁꦮꦸꦗꦸꦠ꧀ꦠꦺ꧉​ꦤꦁꦔꦶꦁ​ꦥꦔꦼꦂꦠꦶ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦤꦩꦸꦁ​ꦩꦫꦏ꧀ꦏꦏꦺꦱꦺꦴꦩ꧀ꦧꦺꦴꦁ꧉​ꦱꦶꦁ​ꦧꦶꦱ​ꦲꦩ꧀ꦧꦔꦸꦤ꧀ꦏꦸꦮꦶ​ꦤꦩꦸꦁ​ꦏꦠꦿꦺꦱ꧀ꦤꦤ꧀꧈​ ²ꦮꦺꦴꦁ​ꦱꦶꦁ​ꦫꦸꦩꦁꦱ​ꦔꦼꦂꦠꦶ​ꦏꦸꦮꦶ​ꦱꦏ꧀ꦗꦤꦺꦥꦔꦼꦂꦠꦶꦤꦺꦢꦸꦫꦸꦁ​ꦲꦥꦲꦥ​꧉​ ³ꦤꦁꦔꦶꦁ​ꦮꦺꦴꦁ​ꦱꦶꦁ​ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦸꦮꦶ​ꦱꦶꦁ​ꦢꦶꦱꦼꦤꦼꦁꦔꦶ​ꦏꦫꦺꦴ​ꦢꦺꦏ꧀ꦤꦺ꧉​

⁴꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦧꦧ꧀ꦩꦁꦔꦤ꧀ꦱꦼꦱꦗꦺꦤ꧀ꦤꦺ​ꦧꦿꦲꦭ​ꦏꦸꦮꦶ​ꦔꦺꦤꦺ​!ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦔꦼꦂꦠꦶ​ꦤꦺꦏ꧀ꦧꦿꦲꦭ​ꦏꦸꦮꦶ​ꦱꦏ꧀ꦗꦤꦺꦧꦫꦁ​ꦱꦶꦁ​ꦲꦺꦴꦫ​ꦲꦺꦤꦺꦁ꧉​ꦱꦶꦁ​ꦲꦺꦤꦺꦁꦤꦩꦸꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​ ⁵ꦪ​ꦧꦼꦤꦼꦂ​꧈​ꦤꦁꦭꦔꦶꦠ꧀ꦭꦤ꧀ꦤꦁꦧꦸꦩꦶ​ ꦥꦚ꧀ꦕꦺꦤ꧀ꦲꦺꦤꦺꦁꦱꦶꦁ​ꦢꦶꦲꦁꦒꦼꦥ꧀ꦗꦫꦺꦤꦺ​ꦒꦸꦱ꧀ꦠꦶ​ꦲꦭ꧀ꦭꦃꦒꦸꦱ꧀ꦠꦶꦄꦭ꧀ꦭꦃ​꧉​ꦏꦪ​ꦔꦺꦴꦤꦺꦴ​ꦏꦸꦮꦶ​ꦪ​ꦥꦚ꧀ꦕꦺꦤ꧀ꦲꦺꦤꦺꦁꦲꦺꦴꦏꦺꦃꦧꦔꦼꦠ꧀꧈​ ⁶ꦤꦁꦔꦶꦁ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦤꦩꦸꦁ​ꦲꦺꦤꦺꦁꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦗꦶ​꧈​ꦪꦏꦸꦮꦶ​꧈​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦱꦶꦁ​ꦤ꧀ꦢꦸꦮꦺꦥꦶꦏꦶꦂꦫꦤ꧀​ꦔ꧀ꦒꦮꦺ​ꦱꦼꦩ꧀ꦧꦫꦁ​ꦏꦧꦺꦃ​ꦭꦤ꧀ꦢꦺꦏ꧀ꦤꦺꦱꦶꦁ​ꦢꦢꦶ​ꦠꦸꦗꦸꦮꦤ꧀ꦤꦺꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦤꦩꦸꦁ​ꦲꦺꦤꦺꦁꦒꦸꦱ꧀ꦠꦶ​ꦱꦶꦗꦶ​꧈​ꦪꦏꦸꦮꦶ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦢꦶꦏꦺꦴꦁꦏꦺꦴꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦒꦮꦺ​ꦱꦼꦩ꧀ꦧꦫꦁ​ꦭꦤ꧀ꦢꦺꦏ꧀ꦤꦺꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦧꦶꦱ​ꦲꦸꦫꦶꦥ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

⁷꧋ꦤꦁꦔꦶꦁ​ꦲꦺꦴꦫ​ꦏꦧꦺꦃ​ꦱꦼꦢꦸꦭꦸꦂ​ꦤ꧀ꦢꦸꦮꦺꦤ꧀ꦤꦶ​ꦥꦔꦼꦂꦠꦶ​ꦲꦶꦏꦶ​꧉​ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦩ꧀ꦧꦶꦪꦺꦤ꧀​ꦩ꧀ꦧꦶꦪꦺꦤ꧀ꦤꦺꦚꦼꦩ꧀ꦧꦃ​ꦧꦿꦲꦭ​ꦭꦤ꧀ꦠꦼꦏꦤ꧀ꦱꦼꦥꦿꦺꦤꦺ​ꦤꦺꦏ꧀ꦩꦁꦔꦤ꧀ꦥꦔꦤ꧀ꦤꦤ꧀ꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦧꦿꦲꦭ​꧈​ꦩꦶꦏꦶꦫꦺꦧꦿꦲꦭ​ꦏꦸꦮꦶ​ꦲꦺꦤꦺꦁꦏ꧀ꦮꦱꦤꦺ​ꦠꦼꦤꦤ꧀ꦭꦤ꧀ꦩꦶꦏꦶꦫꦺꦥꦔꦤ꧀ꦤꦤ꧀ꦏꦸꦮꦶ​ꦮꦺꦏ꧀ꦏꦺꦧꦿꦲꦭ​ꦠꦼꦤꦤ꧀꧈​ꦭꦤ꧀ꦗꦭꦂꦫꦤ꧀ꦮꦺꦴꦁ​ꦏꦸꦮꦶ​ꦥꦼꦔꦤ꧀ꦢꦼꦭ꧀ꦭꦺ​ꦲꦶꦗꦶꦏ꧀ꦫꦶꦁꦏꦶꦃ​꧈​ꦢꦢꦶꦤꦺ​ꦤꦺꦏ꧀ꦩꦁꦔꦤ꧀ꦥꦔꦤ꧀ꦤꦤ꧀ꦱꦶꦁ​ꦏꦪ​ꦔꦺꦴꦤꦺꦴ​ꦩꦶꦏꦶꦫꦺꦏꦸꦮꦶ​ꦩꦫꦏ꧀ꦏꦏꦺꦲꦭ​꧉​ ⁸ꦥꦫ​ꦱꦼꦢꦸꦭꦸꦂ​꧈​ꦥꦔꦤ꧀ꦤꦤ꧀ꦱꦶꦁ​ꦢꦶꦥꦔꦤ꧀ꦲꦮꦏ꧀ꦏꦺ​ꦢꦺꦮꦺꦏꦸꦮꦶ​ꦲꦺꦴꦫ​ꦔ꧀ꦒꦮ​ꦲꦮꦏ꧀ꦏꦺ​ꦢꦺꦮꦺꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦺꦏ꧀ꦲꦺꦴꦫ​ꦩꦁꦔꦤ꧀ ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦏꦺꦭꦁꦔꦤ꧀ꦲꦥꦲꦥ​꧈​ꦤꦺꦏ꧀ꦩꦁꦔꦤ꧀ ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦲꦺꦤ꧀ꦠꦸꦏ꧀ꦧꦠꦶꦲꦥꦲꦥ​꧉​

⁹꧋ꦱꦶꦁ​ꦥꦼꦤ꧀ꦠꦶꦁ​ꦏꦸꦮꦶ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦲꦠꦶꦲꦠꦶ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤ꧀ꦢꦢꦺꦏ꧀ꦏꦏꦺꦱꦼꦩ꧀ꦥ꧀ꦭꦏ꧀ꦏꦺꦮꦺꦴꦁ​ꦱꦶꦁ​ꦲꦶꦗꦶꦏ꧀ꦲꦼꦤꦺꦴꦩ꧀ꦥꦼꦔꦤ꧀ꦢꦼꦭ꧀ꦭꦺ​꧈​ꦱꦼꦤꦗꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦺꦤ꧀ꦠꦸꦏ꧀ꦩꦁꦔꦤ꧀ꦱꦼꦩ꧀ꦧꦫꦁ​꧉​ ¹⁰ꦒꦩ꧀ꦥꦁꦔꦺ​ꦲꦺꦴꦩꦺꦴꦁ​ꦥꦫ​ꦱꦼꦢꦸꦭꦸꦂ​꧈​ꦱꦼꦩꦸꦁꦒꦺꦴꦤ꧀ꦤꦺꦲꦺꦤꦺꦁꦮꦺꦴꦁ​ꦱꦶꦁ​ꦲꦶꦗꦶꦏ꧀ꦲꦼꦤꦺꦴꦩ꧀ꦥꦼꦔꦤ꧀ꦢꦼꦭ꧀ꦭꦺ​ꦮꦼꦫꦸꦃ​ꦏꦺꦴꦮꦺ​꧈​ꦱꦶꦁ​ꦗꦫꦺꦤꦺ​ꦤ꧀ꦢꦸꦮꦺꦏꦮꦼꦫꦸꦃ꧈​ꦩꦺꦭꦸ​ꦩꦁꦔꦤ꧀ꦥꦔꦤ꧀ꦤꦤ꧀ꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦧꦿꦲꦭ​꧈​ꦩꦼꦱ꧀ꦠꦶꦮꦺꦴꦁꦔꦺ​ꦩꦲꦸ​ꦠꦼꦫꦸꦱ꧀ꦲꦺꦴꦫ​ꦮꦼꦢꦶ​ꦩꦺꦭꦸ​ꦩꦁꦔꦤ꧀ꦥꦔꦤ꧀ꦤꦤ꧀ꦱꦶꦁ​ꦏꦪ​ꦔꦺꦴꦤꦺꦴ​꧈​ꦤꦁꦔꦶꦁ​ꦲꦠꦶꦤꦺ​ꦲꦺꦴꦫ​ꦏꦿꦱ​ꦏꦼꦥꦺꦤꦏ꧀ ꦲꦮꦶꦠ꧀ꦢꦺꦏ꧀ꦤꦺꦩꦶꦏꦶꦫꦺꦔ꧀ꦒꦮꦺ​ꦢꦺꦴꦱ​꧉​ ¹¹ꦢꦢꦶꦤꦺ​ꦗꦭꦂꦫꦤ꧀ꦱꦁꦏꦏꦮꦼꦫꦸꦃꦩꦸ꧈​ꦱꦼꦢꦸꦭꦸꦂ​ꦱꦶꦁ​ꦲꦼꦤꦺꦴꦩ꧀ꦥꦼꦔꦤ꧀ꦢꦼꦭ꧀ꦭꦺ​ꦏꦸꦮꦶ​ꦢꦢꦶ​ꦱꦼꦩ꧀ꦥ꧀ꦭꦏ꧀꧈​ꦭꦃ​ꦩꦁꦏ​ꦏꦿꦶꦱ꧀ꦡꦸꦱ꧀ꦩꦠꦶ​ꦲꦸꦒ​ꦔ꧀ꦭꦧꦸꦃꦲꦶ​ꦱꦼꦢꦸꦭꦸꦂ​ꦏꦸꦮꦶ​꧉​ ¹²ꦠꦶꦧꦏꦺ​ꦏꦺꦴꦮꦺ​ꦔ꧀ꦒꦮꦺ​ꦢꦺꦴꦱ​ꦩꦫꦁ​ꦏꦿꦶꦱ꧀ꦡꦸꦱ꧀ ꦲꦮꦶꦠ꧀ꦏꦺꦴꦮꦺ​ꦚꦼꦩ꧀ꦥ꧀ꦭꦏ꧀ꦏꦏꦺꦱꦼꦢꦸꦭꦸꦂꦩꦸꦱꦶꦁ​ꦲꦶꦗꦶꦏ꧀ꦲꦼꦤꦺꦴꦩ꧀ꦥꦼꦔꦤ꧀ꦢꦼꦭ꧀ꦭꦺ​꧉​ ¹³ꦩꦸꦭꦤꦺ​꧈​ꦤꦺꦏ꧀ꦥꦔꦤ꧀ꦤꦤ꧀ꦏꦸꦮꦶ​ꦩꦫꦏ꧀ꦏꦏꦺꦱꦼꦢꦸꦭꦸꦂꦏꦸ​ꦠꦶꦧ​ꦲꦶꦁ​ꦢꦺꦴꦱ​꧈​ꦲꦏꦸ​ꦭꦸꦮꦸꦁꦲꦺꦴꦫ​ꦩꦁꦔꦤ꧀ꦥꦔꦤ꧀ꦤꦤ꧀ꦩꦲꦸ​ꦱ꧀ꦭꦮꦱ꧀ꦱꦺ꧈​ꦢꦢꦶꦤꦺ​ꦲꦏꦸ​ꦲꦺꦴꦫ​ꦩꦫꦏ꧀ꦏꦏꦺꦱꦼꦢꦸꦭꦸꦂꦏꦸ​ꦱꦼꦩ꧀ꦥ꧀ꦭꦏ꧀ꦥꦼꦔꦤ꧀ꦢꦼꦭ꧀ꦭꦺ​꧉​

↑ ↑ ↑

꧋ꦥꦼꦁꦒꦮꦺꦪꦤ꧀ꦏꦸꦭꦤ꧀ꦧꦒꦺꦪꦤ꧀ꦤꦺꦫꦱꦸꦭ꧀꧈​

꧇​꧙꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦲꦶꦏꦶ​ꦲꦥ​ꦢꦸꦢꦸ​ꦮꦺꦴꦁ​ꦩꦼꦂꦢꦺꦏ?ꦲꦏꦸ​ꦲꦶꦏꦶ​ꦲꦥ​ꦢꦸꦢꦸ​ꦫꦱꦸꦭ꧀?ꦲꦏꦸ​ꦭꦲꦸꦠ꧀ꦮꦶꦱ꧀ꦠꦲꦸ​ꦮꦼꦫꦸꦃ​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦠ​?ꦭꦤ꧀ꦏꦺꦴꦮꦺ​ꦏꦸꦮꦶ​ꦭꦲꦸꦠ꧀ꦮꦺꦴꦃꦲꦺ​ꦥꦼꦁꦒꦮꦺꦤꦺꦏꦁꦒꦺꦴ​ꦒꦸꦱ꧀ꦠꦶ​ꦠ​? ²ꦱꦼꦤꦗꦤ꧀ꦮꦺꦴꦁ​ꦭꦶꦪ​ꦲꦺꦴꦫ​ꦒꦼꦊꦩ꧀ꦔꦁꦒꦼꦥ꧀ꦲꦏꦸ​ꦫꦱꦸꦭ꧀ ꦤꦁꦔꦶꦁ​ꦏꦁꦒꦺꦴ​ꦏꦺꦴꦮꦺ​ꦲꦏꦸ​ꦲꦶꦏꦶ​ꦪ​ꦫꦱꦸꦭ꧀ꦠ​?ꦲꦮꦶꦠ꧀ꦏꦺꦴꦮꦺ​ꦢꦺꦮꦺꦭꦤ꧀ꦲꦸꦫꦶꦥ꧀ꦩꦸ​ꦢꦢꦶ​ꦮꦺꦴꦁ​ꦥꦽꦕꦪ​ꦏꦸꦮꦶ​ꦠꦤ꧀ꦢꦤꦺꦤꦺꦏ꧀ꦲꦏꦸ​ꦲꦶꦏꦶ​ꦫꦱꦸꦭ꧀꧈​ ³ꦤꦺꦏ꧀ꦲꦺꦤꦺꦁꦮꦺꦴꦁ​ꦤ꧀ꦢꦼꦢꦼꦱ꧀​ꦤ꧀ꦢꦼꦢꦼꦱ꧀ꦏꦼꦥꦺꦔꦶꦤ꧀ꦔꦼꦂꦠꦶ​꧈​ꦮꦁꦱꦸꦭ꧀ꦭꦤ꧀ꦏꦸ​ꦥꦚ꧀ꦕꦺꦤ꧀ꦔꦺꦴꦤꦺꦴ​ꦏꦸꦮꦶ​꧉​ ⁴ꦩꦺꦴꦱꦺꦴꦏ꧀ꦲꦏꦸ​ꦲꦺꦴꦫ​ꦲꦺꦤ꧀ꦠꦸꦏ꧀ꦤꦩ꧀ꦥ​ꦥꦔꦤ꧀ꦭꦤ꧀ꦲꦺꦴꦩ꧀ꦧꦺꦤ꧀ꦱꦁꦏꦲꦼꦁꦒꦺꦴꦤ꧀ꦏꦸ​ꦚꦩ꧀ꦧꦸꦠ꧀ꦠ? ⁵ꦩꦺꦴꦱꦺꦴꦏ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦲꦺꦤ꧀ꦠꦸꦏ꧀​ꦔ꧀ꦒꦮ​ꦧꦺꦴꦗꦺꦴꦤꦺ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦊꦭꦸꦁꦔꦤ꧀ ꦏꦪ​ꦥꦫ​ꦫꦱꦸꦭ꧀ꦭꦶꦪꦤꦺ​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦲꦸꦒ​ꦫꦱꦸꦭ꧀ꦦꦺꦠꦿꦸꦱ꧀꧈​ ⁶ꦲꦥ​ꦤꦩꦸꦁ​ꦧꦂꦤꦧꦱ꧀ꦏꦫꦺꦴ​ꦲꦏꦸ​ꦢꦺꦮꦺꦱꦶꦁ​ꦏꦸꦢꦸ​ꦔ꧀ꦒꦺꦴꦭꦺꦏ꧀ꦥꦔꦤ꧀ꦢꦺꦮꦺ? ⁷ꦲꦥ​ꦏꦺꦴꦮꦺ​ꦠꦲꦸ​ꦏꦿꦸꦔꦸ​ꦤꦺꦏ꧀ꦱꦺꦴꦭ꧀ꦢꦠ꧀ꦏꦸꦮꦶ​ꦲꦩ꧀ꦧꦪꦂ​ꦒꦗꦶꦲꦤ꧀ꦤꦺꦢꦺꦮꦺ?ꦲꦥ​ꦲꦺꦤꦺꦁꦮꦺꦴꦁ​ꦠꦤ꧀ꦢꦸꦂꦱꦶꦁ​ꦲꦺꦴꦫ​ꦩꦁꦔꦤ꧀ꦥꦩꦼꦠꦸꦤꦺ​ꦏꦼꦧꦺꦴꦤꦺ​?ꦲꦥ​ꦲꦺꦤꦺꦁꦮꦺꦴꦁ​ꦔꦶꦔꦸ​ꦮꦼꦢꦸꦱ꧀ꦱꦶꦁ​ꦲꦺꦴꦫ​ꦔꦺꦴꦩ꧀ꦧꦺ​ꦩꦺꦂꦏꦶꦤꦺꦮꦼꦢꦸꦱ꧀ꦱꦺ?

⁸꧋ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​ꦲꦺꦴꦫ​ꦤꦩꦸꦁ​ꦭꦸꦩꦿꦃ​ꦩꦶꦠꦸꦫꦸꦠ꧀ꦥꦶꦏꦶꦂꦫꦤ꧀ꦤꦺ​ꦩꦤꦸꦁꦱ​꧈​ꦤꦁꦔꦶꦁ​ꦏꦶꦠꦧ꧀ꦲꦸꦒ​ꦮꦶꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦏꦸꦮꦶ​꧉​ ⁹ꦤꦁꦏꦶꦠꦧ꧀ꦧꦺ​ꦤꦧꦶ​ꦩꦺꦴꦱꦼꦱ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦱꦥꦶ​ꦱꦶꦁ​ꦔꦶꦊꦱ꧀ꦲꦗ​ꦢꦶꦧꦶꦁꦏꦼꦩ꧀ꦕꦁꦏꦼꦩ꧀ꦩꦺ​꧉”ꦲꦥ​ꦤꦁꦏꦺꦤꦺ​ꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦏꦺꦧꦧ꧀ꦱꦥꦶ​?ꦩꦼꦱ꧀ꦠꦶꦲꦺꦴꦫ​ꦠ​! ¹⁰ꦱꦶꦁ​ꦢꦶꦲꦺꦴꦩꦺꦴꦁꦤꦁꦠꦸꦭꦶꦱ꧀ꦱꦤ꧀ꦲꦶꦏꦶ​ꦪ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​!ꦥꦚ꧀ꦕꦺꦤ꧀ꦱꦶꦁ​ꦢꦶꦠꦸꦭꦶꦱ꧀ꦲꦶꦏꦶ​ꦔꦺꦴꦩꦺꦴꦁꦔꦏꦺꦧꦧ꧀ꦲꦮꦏ꧀ꦏꦺ​ꦢꦺꦮꦺ꧈​ꦲꦮꦶꦠ꧀ꦮꦺꦴꦁ​ꦱꦶꦁ​ꦔꦼꦥ꧀ꦭꦸꦏ꧀ꦭꦤ꧀ꦱꦶꦁ​ꦥꦤꦺꦤ꧀ꦏꦸꦢꦸ​ꦧꦶꦱ​ꦚ꧀ꦗꦒꦏ꧀ꦏꦏꦺꦧꦒꦺꦪꦤ꧀ꦤꦺꦱꦁꦏꦥꦤꦺꦤ꧀ꦤꦤ꧀ꦤꦺ​꧉​

¹¹꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦚꦼꦧꦂ​ꦮꦶꦗꦶ​ꦏꦱꦸꦏ꧀ꦩꦤ꧀ꦲꦶꦁ​ꦏꦺꦴꦮꦺ​꧈​ꦲꦥ​ꦲꦺꦴꦫ​ꦭꦸꦩꦿꦃ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦸꦤ꧀ꦢꦸꦃꦧꦫꦁ​ꦱꦶꦁ​ꦢꦶꦧꦸꦠꦸꦃꦲꦏꦺꦱꦧꦼꦤ꧀ꦢꦶꦤꦤꦺ​꧉​ ¹²ꦤꦺꦏ꧀ꦭꦶꦪꦭꦶꦪꦤꦺ​ꦤꦩ꧀ꦥ​ꦧꦒꦺꦪꦤ꧀ꦏꦸꦮꦶ​ꦱꦁꦏꦏꦺꦴꦮꦺ​꧈​ꦲꦥ​ꦧꦒꦺꦪꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦏꦸꦢꦸꦤꦺ​ꦲꦺꦴꦫ​ꦔꦸꦁꦏꦸꦭ꧀ꦭꦶ​ꦲꦺꦤ꧀ꦠꦸꦏ꧀ꦏꦺꦭꦶꦪꦤꦺ​?

꧋ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦔꦁꦒꦺꦴꦏ꧀ꦏꦏꦺꦏꦼꦭꦸꦁꦒꦂꦫꦤ꧀ꦏꦸꦮꦶ​;ꦲꦮꦏ꧀ꦏꦺ​ꦢꦺꦮꦺꦩꦭꦃ​ꦚꦸꦏꦸꦥ꧀ꦥꦶ​ꦧꦸꦠꦸꦃꦲꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦔꦭꦁꦔꦭꦁꦔꦶꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​ ¹³ꦏꦺꦴꦮꦺ​ꦩꦼꦱ꧀ꦠꦶꦔꦼꦂꦠꦶ​ꦤꦺꦏ꧀ꦮꦺꦴꦁ​ꦱꦶꦁ​ꦚꦩ꧀ꦧꦸꦠ꧀ꦠꦤꦁꦒꦿꦺꦗ​ꦒꦼꦢꦺꦏꦸꦮꦶ​ꦤꦩ꧀ꦥ​ꦥꦔꦤ꧀ꦤꦺ​ꦱꦁꦏꦒꦿꦺꦗ​ꦒꦼꦢꦺ꧉​ꦱꦼꦩꦺꦴꦤꦺꦴ​ꦲꦸꦒ​꧈​ꦮꦺꦴꦁ​ꦱꦶꦁ​ꦩꦱꦿꦃꦲꦏꦺꦏꦸꦂꦧꦤ꧀ꦤꦁꦲꦭ꧀ꦠꦂꦪ​ꦤꦩ꧀ꦥ​ꦧꦒꦺꦪꦤ꧀ꦤꦺꦱꦁꦏꦲꦭ꧀ꦠꦂ꧉​ ¹⁴ꦩꦸꦭꦤꦺ​ꦒꦸꦱ꧀ꦠꦶ​ꦲꦸꦒ​ꦪ​ꦮꦶꦱ꧀​ꦔ꧀ꦒꦮꦺ​ꦥꦼꦂꦤꦠ꧀ꦠꦤ꧀ꦤꦺꦏ꧀ꦱꦧꦼꦤ꧀ꦮꦺꦴꦁ​ꦱꦶꦁ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦏꦸꦢꦸ​ꦤꦩ꧀ꦥ​ꦥꦔꦤ꧀ꦤꦺ​ꦱꦁꦏꦲꦼꦁꦒꦺꦴꦤꦺ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂ​ꦩꦲꦸ​꧉​

¹⁵꧋ꦤꦁꦔꦶꦁ​ꦲꦏꦸ​ꦲꦺꦴꦫ​ꦠꦲꦸ​ꦔꦁꦒꦺꦴꦏ꧀ꦏꦏꦺꦏꦼꦭꦸꦁꦒꦂꦫꦤ꧀ꦲꦶꦏꦶ​ꦧ꧀ꦭꦱ꧀ꦭꦤ꧀ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦪ​ꦲꦺꦴꦫ​ꦗꦭꦂꦫꦤ꧀ꦲꦏꦸ​ꦏꦼꦥꦺꦔꦶꦤ꧀ꦤꦩ꧀ꦥ​ꦲꦥꦲꦥ​꧉​ꦲꦺꦴꦫ​꧈​ꦲꦏꦸ​ꦭꦸꦮꦸꦁꦩꦠꦶ​ꦮꦲꦺ​ꦠꦼꦤꦶꦩ꧀ꦧꦁꦲꦏꦸ​ꦏꦺꦭꦁꦔꦤ꧀ꦥꦽꦏꦫ​ꦱꦶꦗꦶ​ꦱꦶꦁ​ꦏꦼꦤꦺꦁꦠꦏ꧀ꦲꦼꦁꦒꦺꦴ​ꦥꦩꦺꦂꦫꦤ꧀ꦲꦶꦏꦶ​꧉​ ¹⁶ꦲꦼꦁꦒꦺꦴꦤ꧀ꦏꦸ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦏꦸꦮꦶ​ꦪ​ꦲꦺꦴꦫ​ꦠꦏ꧀ꦒꦮꦺ​ꦱꦺꦴꦩ꧀ꦧꦺꦴꦁꦲꦥ​ꦥꦩꦺꦂꦫꦤ꧀ ꦲꦮꦶꦠ꧀ꦲꦏꦸ​ꦤꦩꦸꦁ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​꧉​ꦭꦤ꧀ꦏꦪ​ꦔꦥ​ꦱꦸꦱꦃꦏꦸ​ꦤꦺꦏ꧀ꦲꦏꦸ​ꦲꦺꦴꦫ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​꧉​ ¹⁷ꦱꦼꦩꦸꦁꦒꦺꦴꦤ꧀ꦤꦺꦠꦏ꧀ꦏꦼꦂꦗꦤ꧀ꦤꦶꦱꦁꦏꦏꦉꦥ꧀ꦏꦸ​ꦢꦺꦮꦺ꧈​ꦪ​ꦱꦏ꧀ꦧꦼꦤꦼꦂꦫꦺ​ꦤꦺꦏ꧀ꦲꦏꦸ​ꦔꦉꦥ꧀ꦲꦉꦥ꧀ꦲꦸꦥꦃ꧉​ꦤꦁꦔꦶꦁ​ꦥꦼꦁꦒꦮꦺꦏꦸꦲꦶꦏꦶ​ꦲꦺꦴꦫ​ꦱꦁꦏꦏꦉꦥ꧀ꦏꦸ​ꦢꦺꦮꦺ꧈​ꦲꦮꦶꦠ꧀ꦏꦸꦮꦶ​ꦏꦸꦮꦗꦶꦧ꧀ꦧꦤ꧀ꦱꦶꦁ​ꦢꦶꦥꦱꦿꦃꦲꦏꦺꦩꦫꦁ​ꦲꦏꦸ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁸ꦠꦶꦧꦏꦺ​ꦲꦸꦥꦃꦏꦸꦲꦶꦏꦶ​ꦲꦥ​?ꦲꦸꦥꦃꦏꦸꦪ​ꦲꦶꦏꦶ​:ꦲꦏꦸ​ꦧꦶꦱ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦠꦤ꧀ꦥ​ꦤꦩ꧀ꦥ​ꦲꦸꦥꦃ꧈​ꦠꦼꦒꦼꦱ꧀ꦱꦺ​ꦠꦤ꧀ꦥ​ꦚ꧀ꦗꦭꦸꦏ꧀ꦧꦒꦺꦪꦤ꧀ꦏꦸ꧉​

¹⁹꧋ꦲꦏꦸ​ꦥꦚ꧀ꦕꦺꦤ꧀ꦩꦼꦂꦢꦺꦏ꧈​ꦲꦺꦴꦫ​ꦱ꧀ꦭꦥ꦳꧀ꦥ꦳ꦺꦱꦥꦱꦥ​꧉​ꦤꦁꦔꦶꦁ​ꦲꦮꦏ꧀ꦏꦸ​ꦠꦏ꧀ꦢꦢꦺꦏ꧀ꦏꦏꦺꦱ꧀ꦭꦥ꦳꧀ꦥ꦳ꦺꦱꦧꦼꦤ꧀ꦮꦺꦴꦁ​꧈​ꦱꦸꦥꦪ​ꦮꦺꦴꦁ​ꦥꦶꦫꦁꦥꦶꦫꦁ​ꦧꦶꦱ​ꦏꦼꦠꦫꦶꦏ꧀ꦲꦠꦶꦤꦺ​ꦩꦫꦁ​ꦏꦿꦶꦱ꧀ꦡꦸꦱ꧀꧈​ ²⁰ꦤꦺꦏ꧀ꦲꦏꦸ​ꦚꦩ꧀ꦧꦸꦠ꧀ꦠꦤꦁꦠꦼꦔꦃꦲꦺ​ꦮꦺꦴꦁ​ꦙꦸ꧈​ꦠꦶꦤ꧀ꦢꦏ꧀ꦠꦤ꧀ꦢꦸꦏ꧀ꦏꦸ​ꦪ​ꦏꦪ​ꦮꦺꦴꦁ​ꦙꦸ꧈​ꦱꦸꦥꦪ​ꦧꦶꦱ​ꦤꦫꦶꦏ꧀ꦲꦠꦶꦤꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦩꦫꦁ​ꦏꦿꦶꦱ꧀ꦡꦸꦱ꧀꧈​ꦲꦏꦸ​ꦪ​ꦩꦤꦸꦠ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦏꦪ​ꦮꦺꦴꦁꦮꦺꦴꦁ​ꦏꦸꦮꦶ​꧉​ ²¹ꦭꦤ꧀ꦏꦁꦒꦺꦴ​ꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦲꦏꦸ​ꦪ​ꦏꦪ​ꦮꦺꦴꦁ​ꦱꦶꦁ​ꦢꦸꦢꦸ​ꦙꦸ꧈​ꦏꦪ​ꦲꦺꦴꦫ​ꦔꦼꦂꦠꦶ​ꦠꦠꦕꦫꦤꦺ​ꦮꦺꦴꦁ​ꦙꦸꦮꦲꦺ​꧈​ꦱꦸꦥꦪ​ꦧꦶꦱ​ꦤꦫꦶꦏ꧀ꦮꦺꦴꦁꦮꦺꦴꦁ​ꦏꦸꦮꦶ​꧉​ꦏꦸꦮꦶ​ꦲꦺꦴꦫ​ꦗꦭꦂꦫꦤ꧀ꦲꦏꦸ​ꦲꦺꦴꦫ​ꦩꦤꦸꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦸꦗꦸꦠ꧀ꦠꦺꦲꦏꦸ​ꦪ​ꦩꦤꦸꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ²²ꦤꦁꦠꦼꦔꦃꦲꦺ​ꦮꦺꦴꦁ​ꦱꦶꦁ​ꦲꦼꦤꦺꦴꦩ꧀ꦥꦼꦔꦤ꧀ꦢꦼꦭ꧀ꦭꦺ​꧈​ꦲꦏꦸ​ꦪ​ꦏꦪ​ꦮꦺꦴꦁ​ꦱꦶꦁ​ꦲꦶꦗꦶꦏ꧀ꦲꦼꦤꦺꦴꦩ꧀ꦥꦼꦔꦤ꧀ꦢꦼꦭ꧀ꦭꦺ​꧈​ꦱꦸꦥꦪ​ꦧꦶꦱ​ꦤꦫꦶꦏ꧀ꦮꦺꦴꦁꦮꦺꦴꦁ​ꦏꦸꦮꦶ​꧉​ꦢꦢꦶꦤꦺ​꧈​ꦏꦁꦒꦺꦴ​ꦱꦥ​ꦮꦲꦺ​ꦲꦏꦸ​ꦪ​ꦮꦶꦱ꧀ꦢꦢꦶ​ꦠꦸꦁꦒꦭ꧀ꦭꦺ​ꦮꦲꦺ​꧈​ꦱꦸꦥꦪ​ꦔꦁꦒꦺꦴ​ꦲꦏꦭ꧀ꦲꦥ​ꦮꦲꦺ​ꦲꦏꦸ​ꦧꦶꦱ​ꦤꦫꦶꦏ꧀ꦱꦶꦗꦶꦭꦺꦴꦫꦺꦴꦲꦶꦁ​ꦏꦼꦱ꧀ꦭꦩꦼꦠ꧀ꦠꦤ꧀꧈​

²³꧋ꦲꦏꦸ​ꦱꦒꦸꦃ​ꦔ꧀ꦭꦏꦺꦴꦤ꧀ꦤꦶ​ꦲꦥ​ꦮꦲꦺ​ꦏꦁꦒꦺꦴ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦸꦥꦪ​ꦲꦏꦸ​ꦧꦶꦱ​ꦩꦺꦭꦸ​ꦔꦿꦱꦏ꧀ꦏꦏꦺꦮꦺꦴꦃꦲꦺ​꧉​ ²⁴ꦏꦺꦴꦮꦺ​ꦩꦼꦱ꧀ꦠꦶꦮꦶꦱ꧀ꦥꦢ​ꦔꦼꦂꦠꦶ​ꦤꦺꦏ꧀ꦤꦁꦧꦭꦥ꧀ꦥꦤ꧀ꦲꦩ꧀​ꦧ꧀ꦭꦪꦸꦏꦲꦺ​ꦲꦺꦴꦏꦺꦃꦱꦶꦁ​ꦩꦺꦭꦸ​ꦩ꧀​ꦧ꧀ꦭꦪꦸ꧈​ꦤꦁꦔꦶꦁ​ꦱꦶꦁ​ꦩꦼꦤꦁ​ꦤꦩꦸꦁ​ꦱꦶꦗꦶ​꧉​ꦩꦸꦭꦤꦺ​꧈​ꦲꦼꦁꦒꦺꦴꦤ꧀ꦩꦸ​ꦩ꧀​ꦧ꧀ꦭꦪꦸꦏꦸꦮꦶ​ꦏꦸꦢꦸꦤꦺ​ꦏꦪ​ꦮꦺꦴꦁ​ꦱꦶꦁ​ꦏꦼꦥꦺꦔꦶꦤ꧀ꦩꦼꦤꦁ​ꦭꦤ꧀ꦢꦢꦶ​ꦏꦩ꧀ꦥꦶꦪꦸꦤ꧀꧈​ ²⁵ꦱꦧꦼꦤ꧀ꦮꦺꦴꦁ​ꦱꦶꦁ​ꦲꦉꦥ꧀ꦩꦺꦭꦸ​ꦧꦭꦥ꧀ꦥꦤ꧀ꦏꦸꦮꦶ​ꦩꦼꦱ꧀ꦠꦶꦤꦠ​ꦲꦮꦏ꧀ꦏꦺ​ꦱꦶꦁ​ꦠꦼꦤꦤ꧀ꦤꦤ꧀꧈​ꦲꦼꦁꦒꦺꦴꦤꦺ​ꦔ꧀ꦭꦏꦺꦴꦤ꧀ꦤꦶ​ꦏꦸꦮꦶ​ꦢꦶꦏꦸꦮꦠ꧀ꦏꦸꦮꦠ꧀ꦠꦏꦺꦠꦼꦤꦤ꧀ ꦱꦸꦥꦪ​ꦧꦶꦱ​ꦤꦩ꧀ꦥ​ꦠꦤ꧀ꦢꦏꦩꦼꦤꦔꦤ꧀ꦤꦺ꧈​ꦪꦏꦸꦮꦶ​꧈​ꦩꦏꦸꦠꦱꦶꦁ​ꦧꦏꦭ꧀ꦫꦸꦱꦏ꧀꧈​ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦔꦸꦮꦠ꧀ꦔꦸꦮꦠ꧀ꦠꦏꦺꦔ꧀ꦭꦏꦺꦴꦤ꧀ꦤꦶ​ꦏꦸꦮꦶ​꧈​ꦱꦸꦥꦪ​ꦧꦶꦱ​ꦤꦩ꧀ꦥ​ꦩꦏꦸꦠꦱꦶꦁ​ꦭꦁꦒꦼꦁ​꧉​ ²⁶ꦩꦸꦭꦤꦺ​ꦲꦼꦁꦒꦺꦴꦤ꧀ꦏꦸ​ꦩ꧀​ꦧ꧀ꦭꦪꦸꦪ​ꦲꦺꦴꦫ​ꦔꦮꦏ꧀ꦮꦲꦺ​꧈​ꦲꦺꦴꦫ​ꦏꦪ​ꦧꦺꦴꦏ꧀ꦱꦼꦂꦱꦶꦁ​ꦔꦤ꧀ꦠꦼꦩ꧀ꦩꦺꦔꦮꦸꦂ​ꦮꦲꦺ​꧈​ꦲꦺꦴꦫ​꧉​ ²⁷ꦲꦏꦸ​ꦤꦠ​ꦲꦮꦏ꧀ꦏꦸ​ꦱꦶꦁ​ꦠꦼꦤꦤ꧀ꦤꦤ꧀ ꦱꦸꦥꦪ​ꦲꦮꦏ꧀ꦏꦸ​ꦧꦶꦱ​ꦩꦤꦸꦠ꧀ꦏꦉꦥ꧀ꦏꦸ​꧉​ꦤꦺꦏ꧀ꦲꦺꦴꦫ​ꦔꦺꦴꦤꦺꦴ​꧈​ꦩꦼꦁꦏꦺꦴ​ꦤ꧀ꦢꦏ꧀ꦲꦏꦸ​ꦚꦼꦭꦸꦏ꧀ꦏꦶ​ꦭꦶꦪꦤꦺ​ꦩꦺꦭꦸ​ꦧꦭꦥ꧀ꦥꦤ꧀ ꦤꦁꦔꦶꦁ​ꦲꦏꦸ​ꦢꦺꦮꦺꦏꦭꦃ​꧉​

↑ ↑ ↑

꧋ꦲꦗ​ꦤꦶꦫꦸ​ꦠꦸꦩꦶꦤ꧀ꦢꦏ꧀ꦲꦭ​꧉​

꧇​꧑꧐꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦴꦏ꧀ꦲꦺꦭꦶꦁꦔ​ꦩꦫꦁ​ꦊꦭꦏꦺꦴꦤꦺ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦩ꧀ꦧꦶꦪꦺꦤ꧀ꦱꦶꦁ​ꦥꦢ​ꦩꦺꦭꦸ​ꦤꦧꦶ​ꦩꦺꦴꦱꦼꦱ꧀꧈​ꦮꦺꦴꦁꦮꦺꦴꦁ​ꦥꦢ​ꦢꦶꦥꦒꦼꦂꦫꦶ​ꦏꦫꦺꦴ​ꦩꦺꦒ​ꦭꦤ꧀ꦥꦢ​ꦔꦧꦿꦃꦱꦼꦒꦫ​ꦲꦧꦁ​ꦏꦤ꧀ꦠꦶꦱ꧀ꦭꦩꦼꦠ꧀꧈​ ²ꦤꦁꦱꦏ꧀ꦔꦶꦱꦺꦴꦂꦫꦺ​ꦩꦺꦒ​ꦭꦤ꧀ꦱꦏ꧀ꦗꦼꦫꦺꦴꦤꦺꦱꦼꦒꦫ​ꦩꦲꦸ​ꦮꦺꦴꦁꦮꦺꦴꦁ​ꦏꦼꦤꦺꦁꦢꦶꦲꦫꦤ꧀ꦤꦶ​ꦏꦼꦧꦥ꧀ꦠꦶꦱ꧀ꦢꦢꦶ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦤꦧꦶ​ꦩꦺꦴꦱꦼꦱ꧀ ꦲꦺꦴꦫ​ꦧꦺꦢ​ꦏꦪ​ꦏꦺꦴꦮꦺ​ꦏꦸꦮꦶ​ꦥꦢ​ꦏꦼꦧꦥ꧀ꦠꦶꦱ꧀ꦢꦢꦶ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦿꦶꦱ꧀ꦡꦸꦱ꧀꧈​ ³ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦩꦲꦸ​ꦥꦢ​ꦩꦁꦔꦤ꧀ꦫꦺꦴꦠꦶ​ꦱꦶꦁ​ꦠꦸꦁꦒꦭ꧀ꦭꦺ​꧈​ꦫꦺꦴꦠꦶ​ꦱꦶꦁ​ꦢꦶꦲꦼꦢꦸꦤ꧀ꦤꦏꦺꦱꦁꦏꦱ꧀ꦮꦂꦒ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁴ꦏꦧꦺꦃ​ꦲꦸꦒ​ꦥꦢ​ꦔꦺꦴꦩ꧀ꦧꦺ​ꦧꦚꦸ​ꦥꦮꦺꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ ꦧꦚꦸ​ꦱꦶꦁ​ꦩꦼꦠꦸ​ꦱꦁꦏꦮꦠꦸ​꧉​ꦮꦠꦸꦤꦺ​ꦏꦸꦮꦶ​ꦪ​ꦏꦿꦶꦱ꧀ꦡꦸꦱ꧀ꦢꦺꦮꦺ꧈​ꦲꦮꦶꦠ꧀ꦔꦼꦏꦺꦏ꧀ꦏꦶꦧꦚꦸ​ꦮꦺꦴꦁꦮꦺꦴꦁ​꧈​ꦏꦪ​ꦲꦼꦁꦒꦺꦴꦤꦺ​ꦏꦿꦶꦱ꧀ꦡꦸꦱ꧀ꦔꦼꦏꦺꦏ꧀ꦏꦶꦧꦚꦸ​ꦥꦔꦸꦫꦶꦥ꧀ꦥꦤ꧀꧈​ꦩꦸꦭꦤꦺ​ꦮꦠꦸꦤꦺ​ꦪ​ꦔꦼꦠꦸꦠ꧀ꦠꦏꦺꦮꦺꦴꦁꦮꦺꦴꦁ​ꦤꦁꦲꦼꦤ꧀ꦢꦶ​ꦮꦲꦺ​꧉​ ⁵ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦩꦼꦏ꧀ꦱ​ꦲꦺꦴꦏꦺꦃꦱꦶꦁ​ꦲꦺꦴꦫ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦪ​ꦥꦢ​ꦩꦠꦶ​ꦭꦤ꧀ꦏꦏꦸꦧꦸꦂ​ꦥꦠꦶꦁ​ꦱ꧀ꦊꦧꦂ​ꦤꦁꦮꦸꦱ꧀ꦠꦺꦤ꧀꧈​

⁶꧋ꦥꦫ​ꦱꦼꦢꦸꦭꦸꦂ​꧈​ꦊꦭꦏꦺꦴꦤ꧀ꦊꦭꦏꦺꦴꦤ꧀ꦏꦸꦮꦶ​ꦩꦲꦸ​ꦢꦢꦶ​ꦕꦺꦴꦤ꧀ꦠꦺꦴ​ꦏꦁꦒꦺꦴ​ꦤ꧀ꦢꦸꦢꦸꦃꦲꦏꦺꦭꦤ꧀ꦔꦺꦭꦶꦁꦔꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤ꧀ꦢꦸꦮꦺꦤ꧀ꦤꦶ​ꦏꦼꦥꦺꦔꦶꦤ꧀ꦩꦫꦁ​ꦱꦶꦁ​ꦲꦺꦴꦫ​ꦲꦥꦶꦏ꧀ ꦏꦪ​ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦏꦫꦺꦴ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀꧈​ ⁷ꦩꦸꦭꦤꦺ​꧈​ꦲꦗ​ꦥꦢ​ꦚꦼꦩ꧀ꦧꦃ​ꦧꦿꦲꦭ​ꦏꦪ​ꦮꦺꦴꦁꦮꦺꦴꦁ​ꦏꦸꦮꦶ​꧉​ꦧꦧ꧀ꦲꦶꦏꦸ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦔꦺꦤꦺ​:“ꦮꦺꦴꦁꦮꦺꦴꦁ​ꦥꦢ​ꦗꦼꦗꦒꦺꦴꦁꦔꦤ꧀ ꦩꦁꦔꦤ꧀ꦭꦤ꧀ꦔꦺꦴꦩ꧀ꦧꦺ​ꦭꦤ꧀ꦚꦼꦩ꧀ꦧꦃ​ꦧꦿꦲꦭ​꧈​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦠꦼꦫꦸꦱ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀​ꦧ꧀ꦭꦱ꧀꧈​” ⁸ꦲꦮꦏ꧀ꦏꦺ​ꦢꦺꦮꦺꦲꦗ​ꦭꦏꦸ​ꦧꦺꦢꦁꦏꦪ​ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦮꦺꦴꦁꦮꦺꦴꦁ​ꦩ꧀ꦧꦶꦪꦺꦤ꧀ ꦱꦩ꧀ꦥꦺꦏ꧀ꦮꦺꦴꦁ​ꦠꦼꦭꦸꦭꦶꦏꦸꦂ​ꦲꦺꦮꦸ​ꦥꦢ​ꦩꦠꦶ​ꦱꦼꦢꦶꦤ​꧉​ ⁹ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦲꦺꦴꦫ​ꦏꦼꦤꦺꦁꦚ꧀ꦗꦗꦭ꧀ꦏꦼꦱꦧꦂꦫꦤ꧀ꦤꦺ​ꦒꦸꦱ꧀ꦠꦶ​ꦏꦪ​ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦮꦺꦴꦁꦮꦺꦴꦁ​ꦩ꧀ꦧꦶꦪꦺꦤ꧀;ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦥꦢ​ꦩꦠꦶ​ꦢꦶꦕꦺꦴꦏꦺꦴꦠ꧀ꦲꦸꦭ​꧉​ ¹⁰ꦲꦗ​ꦥꦢ​ꦔ꧀ꦒꦼꦱꦃ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦮꦺꦴꦁꦮꦺꦴꦁ​꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦢꦶꦥꦠꦺꦤ꧀ꦤꦶ​ꦏꦫꦺꦴ​ꦩꦸꦭꦺꦏꦠ꧀ꦠꦺꦥꦠꦶ​꧉​

¹¹꧋ꦥꦫ​ꦱꦼꦢꦸꦭꦸꦂ​꧈​ꦱꦶꦁ​ꦢꦶꦲꦭꦩ꧀ꦩꦶ​ꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​ꦠꦸꦗꦸꦮꦤ꧀ꦤꦺꦏꦁꦒꦺꦴ​ꦠꦸꦭꦢꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ꦏꦸꦮꦶ​ꦩꦲꦸ​ꦏꦧꦺꦃ​ꦏꦼꦠꦸꦭꦶꦱ꧀ ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺ꧈​ꦱꦶꦁ​ꦲꦸꦫꦶꦥ꧀ꦲꦶꦁ​ꦗꦩꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦤ꧀ꦲꦶꦏꦶ​꧈​ꦥꦢ​ꦔꦼꦂꦠꦶ​ꦭꦤ꧀ꦲꦺꦴꦫ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦲꦺꦴꦫ​ꦲꦥꦶꦏ꧀ꦏꦸꦮꦶ​꧉​

¹²꧋ꦩꦸꦭꦤꦺ​꧈​ꦱꦥ​ꦱꦶꦁ​ꦫꦸꦩꦁꦱ​ꦤꦺꦏ꧀ꦮꦶꦱ꧀ꦩꦤ꧀ꦠꦼꦥ꧀ꦗꦼꦗꦼꦏ꧀ꦠꦼꦤꦤ꧀ꦲꦶꦁ​ꦥꦼꦔꦤ꧀ꦢꦼꦭ꧀ ꦭꦸꦮꦸꦁꦱꦶꦁ​ꦲꦠꦶꦲꦠꦶꦮꦲꦺ​꧈​ꦱꦸꦥꦪ​ꦲꦺꦴꦫ​ꦠꦶꦧ​꧉​ ¹³ꦥꦫ​ꦱꦼꦢꦸꦭꦸꦂ​꧈​ꦥꦁꦒꦺꦴꦢꦱꦶꦁ​ꦲꦩ꧀ꦧꦺꦴꦏ꧀ꦲꦭꦩ꧀ꦩꦶ​ꦏꦸꦮꦶ​ꦥꦁꦒꦺꦴꦢꦱꦶꦁ​ꦭꦸꦩꦿꦃ​ꦢꦶꦲꦭꦩ꧀ꦩꦶ​ꦱꦧꦼꦤ꧀ꦮꦺꦴꦁ​꧉​ꦤꦁꦔꦶꦁ​ꦏꦺꦴꦮꦺ​ꦧꦶꦱ​ꦚ꧀ꦗꦒꦏ꧀ꦏꦏꦺꦒꦸꦱ꧀ꦠꦶ​꧈​ꦢꦺꦏ꧀ꦤꦺꦲꦺꦴꦫ​ꦧꦏꦭ꧀ꦩꦼꦢꦺꦴꦠ꧀ꦗꦚ꧀ꦗꦶ​꧉​ꦒꦸꦱ꧀ꦠꦶ​ꦲꦺꦴꦫ​ꦧꦏꦭ꧀​ꦔ꧀ꦭꦶꦭꦤꦶ​ꦏꦺꦴꦮꦺ​ꦏꦼꦤꦺꦁꦥꦁꦒꦺꦴꦢꦱꦩ꧀ꦥꦺꦏ꧀ꦔꦸꦁꦏꦸꦭ꧀ꦭꦶ​ꦏꦸꦮꦠ꧀ꦩꦸ꧉​ꦤꦺꦏ꧀ꦏꦺꦴꦮꦺ​ꦢꦶꦒꦺꦴꦢ꧈​ꦒꦸꦱ꧀ꦠꦶ​ꦧꦏꦭ꧀ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦩꦤ꧀ꦠꦼꦥ꧀ꦠꦼꦫꦸꦱ꧀꧈​ꦭꦤ꧀ꦒꦸꦱ꧀ꦠꦶ​ꦧꦏꦭ꧀ꦔꦼꦏꦺꦏ꧀ꦏꦶꦢꦭꦤ꧀ ꦱꦸꦥꦪ​ꦏꦺꦴꦮꦺ​ꦧꦶꦱ​ꦲꦸꦕꦸꦭ꧀ꦱꦁꦏꦥꦁꦒꦺꦴꦢꦩꦲꦸ​꧉​

¹⁴꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲꦗ​ꦥꦢ​ꦚꦼꦩ꧀ꦧꦃ​ꦧꦿꦲꦭ​꧈​ꦏꦸꦮꦶ​ꦢꦶꦲꦼꦢꦺꦴꦃꦲꦶ​ꦮꦲꦺ​꧉​ ¹⁵ꦲꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦲꦮꦶꦠ꧀ꦏꦺꦴꦮꦺ​ꦠꦏ꧀ꦲꦁꦒꦼꦥ꧀ꦮꦺꦴꦁ​ꦔꦼꦂꦠꦶ​꧉​ꦲꦩ꧀ꦧꦺꦴꦏ꧀ꦢꦶꦠꦶꦩ꧀ꦧꦁ​ꦢꦺꦮꦺ꧈​ꦱꦶꦁ​ꦲꦉꦥ꧀ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​ꦧꦼꦤꦼꦂ​ꦲꦥ​ꦲꦺꦴꦫ​꧉​ ¹⁶ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦺꦴꦩ꧀ꦧꦺ​ꦲꦁꦒꦸꦂ​ꦤꦺꦏ꧀ꦏꦸꦩ꧀ꦥꦸꦭ꧀ꦭꦤ꧀ ꦏꦁꦒꦺꦴ​ꦔꦺꦭꦶꦁꦔꦏꦺꦒꦼꦠꦶꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦱꦶꦁ​ꦠꦸꦩꦺꦠꦺꦱ꧀ꦏꦁꦒꦺꦴ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦲꦮꦏ꧀ꦏꦺ​ꦢꦺꦮꦺꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​꧈​ꦏꦸꦮꦶ​ꦤ꧀ꦢꦸꦢꦸꦃꦲꦏꦺꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦧꦺꦃ​ꦮꦺꦴꦁ​ꦱꦶꦁ​ꦮꦶꦱ꧀ꦢꦶꦠꦼꦧꦸꦱ꧀ꦏꦫꦺꦴ​ꦒꦼꦠꦶꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦱꦼꦩꦺꦴꦤꦺꦴ​ꦲꦸꦒ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦩꦁꦔꦤ꧀ꦫꦺꦴꦠꦶꦤꦺ​ꦤꦺꦏ꧀ꦏꦸꦩ꧀ꦥꦸꦭ꧀ꦭꦤ꧀ ꦏꦸꦮꦶ​ꦤ꧀ꦢꦸꦢꦸꦃꦲꦏꦺꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦮꦺꦴꦁ​ꦏꦧꦺꦃ​ꦱꦶꦁ​ꦮꦶꦱ꧀ꦢꦶꦭꦧꦸꦃꦲꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦱꦏ꧀ꦧꦉꦁꦔꦺꦢꦺꦏ꧀ꦤꦺꦩꦱꦿꦃꦲꦏꦺꦧꦢꦤ꧀ꦤꦺ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀꧈​ ¹⁷ꦲꦮꦶꦠ꧀ꦫꦺꦴꦠꦶꦤꦺ​ꦤꦩꦸꦁ​ꦱꦶꦗꦶ​꧈​ꦱꦼꦩꦺꦴꦤꦺꦴ​ꦲꦸꦒ​ꦲꦮꦏ꧀ꦏꦺ​ꦢꦺꦮꦺ꧈​ꦱꦼꦤꦗꦤ꧀ꦮꦺꦴꦁ​ꦲꦺꦴꦏꦺꦃ꧈​ꦤꦁꦔꦶꦁ​ꦮꦸꦗꦸꦠ꧀ꦠꦺꦧꦢꦤ꧀ꦱꦶꦗꦶ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦥꦢ​ꦩꦁꦔꦤ꧀ꦱꦁꦏꦫꦺꦴꦠꦶ​ꦱꦶꦗꦶ​ꦩꦲꦸ​꧉​

¹⁸꧋ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦴꦏ꧀ꦢꦶꦥꦶꦏꦶꦂ​ꦧꦁꦱ​ꦆꦱꦿꦌꦭ꧀ꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀꧈​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦩꦁꦔꦤ꧀ꦏꦸꦂꦧꦤ꧀ꦱꦶꦁ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦲꦭ꧀ꦠꦂꦭꦲꦸꦠ꧀ꦥꦢ​ꦩꦺꦭꦸ​ꦔ꧀ꦭꦢꦺꦤ꧀ꦤꦶ​ꦤꦁꦲꦭ꧀ꦠꦂꦠ​꧉​ ¹⁹ꦲꦏꦸ​ꦱꦏ꧀ꦗꦤꦺꦏꦼꦥꦺꦔꦶꦤ꧀​ꦤ꧀ꦢꦸꦤꦸꦁꦔꦏꦺꦲꦥ​ꦠ​?ꦲꦥ​ꦧꦿꦲꦭ​ꦭꦤ꧀ꦥꦔꦤ꧀ꦤꦤ꧀ꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦧꦿꦲꦭ​ꦏꦸꦮꦶ​ꦲꦺꦤꦺꦁꦠꦼꦒꦼꦱ꧀ꦱꦺ​?ꦧ꧀ꦭꦱ꧀ꦲꦺꦴꦫ​! ²⁰ꦥꦔꦤ꧀ꦤꦤ꧀ꦱꦶꦁ​ꦢꦶꦥꦱꦿꦃꦲꦏꦺꦩꦫꦁ​ꦧꦿꦲꦭ​ꦏꦸꦮꦶ​ꦱꦏ꧀ꦗꦤꦺꦲꦺꦴꦫ​ꦢꦶꦥꦱꦿꦃꦲꦏꦺꦩꦫꦁ​ꦧꦿꦲꦭ​꧈​ꦤꦁꦔꦶꦁ​ꦩꦫꦁ​ꦱꦺꦠꦤ꧀ꦱꦺꦠꦤ꧀꧈​ꦭꦤ꧀ꦲꦏꦸ​ꦲꦺꦴꦫ​ꦒꦼꦊꦩ꧀ꦤꦺꦏ꧀ꦏꦺꦴꦮꦺ​ꦢꦢꦶ​ꦱꦶꦗꦶ​ꦏꦫꦺꦴ​ꦱꦺꦠꦤ꧀ꦱꦺꦠꦤ꧀꧈​ ²¹ꦏꦺꦴꦮꦺ​ꦲꦺꦴꦫ​ꦏꦼꦤꦺꦁꦔꦺꦴꦩ꧀ꦧꦺ​ꦱꦁꦏꦩꦁꦏꦺꦴꦏ꧀ꦏꦺꦒꦸꦱ꧀ꦠꦶ​ꦭꦤ꧀ꦲꦸꦒ​ꦱꦁꦏꦩꦁꦏꦺꦴꦏ꧀ꦏꦺꦱꦺꦠꦤ꧀ꦱꦺꦠꦤ꧀꧈​ꦱꦼꦩꦺꦴꦤꦺꦴ​ꦲꦸꦒ​ꦏꦺꦴꦮꦺ​ꦲꦺꦴꦫ​ꦏꦼꦤꦺꦁꦩꦁꦔꦤ꧀ꦫꦺꦴꦠꦶꦤꦺ​ꦒꦸꦱ꧀ꦠꦶ​ꦭꦤ꧀ꦩꦁꦔꦤ꧀ꦫꦺꦴꦠꦶꦤꦺ​ꦱꦺꦠꦤ꧀ꦱꦺꦠꦤ꧀꧈​ ²²ꦲꦥ​ꦏꦺꦴꦮꦺ​ꦏꦼꦥꦺꦔꦶꦤ꧀ꦤꦤ꧀ꦠꦁ​ꦒꦸꦱ꧀ꦠꦶ​?ꦲꦥ​ꦲꦮꦏ꧀ꦏꦺ​ꦢꦺꦮꦺꦏꦼꦏꦸꦮꦠ꧀ꦠꦤ꧀ꦤꦺ​ꦔꦸꦁꦏꦸꦭ꧀ꦭꦶ​ꦒꦸꦱ꧀ꦠꦶ​?

꧋ꦲꦺꦴꦫ​ꦲꦺꦤꦺꦁꦱꦶꦫꦶꦏ꧀ꦏꦤ꧀ꦲꦥꦲꦥ​꧉​

²³꧋ꦥꦫ​ꦱꦼꦢꦸꦭꦸꦂ​꧈​ꦲꦺꦤꦺꦁꦱꦶꦁ​ꦔꦺꦴꦩꦺꦴꦁ:“ꦲꦏꦸ​ꦱꦼꦩ꧀ꦧꦫꦁ​ꦲꦺꦤ꧀ꦠꦸꦏ꧀꧉”ꦪ​ꦧꦼꦤꦼꦂ​ꦏꦸꦮꦶ​꧈​ ꦤꦁꦔꦶꦁ​ꦲꦺꦴꦫ​ꦱꦼꦩ꧀ꦧꦫꦁ​ꦲꦥꦶꦏ꧀꧈​ꦱꦼꦩ꧀ꦧꦫꦁ​ꦲꦺꦤ꧀ꦠꦸꦏ꧀ ꦤꦁꦔꦶꦁ​ꦲꦺꦴꦫ​ꦱꦼꦩ꧀ꦧꦫꦁ​ꦲꦩ꧀ꦧꦔꦸꦤ꧀꧈​ ²⁴ꦲꦗ​ꦥꦢ​ꦔ꧀ꦒꦺꦴꦭꦺꦏ꧀ꦏꦶ​ꦌꦤꦏ꧀ꦏꦺꦢꦺꦮꦺꦮꦲꦺ​꧈​ꦤꦁꦔꦶꦁ​ꦲꦸꦒ​ꦏꦸꦢꦸ​ꦔ꧀ꦒꦺꦴꦭꦺꦏ꧀ꦏꦶ​ꦱꦶꦁ​ꦧꦼꦕꦶꦏ꧀ꦏꦁꦒꦺꦴ​ꦭꦶꦪꦤꦺ​꧉​

²⁵꧋ꦤꦺꦏ꧀ꦏꦺꦴꦮꦺ​ꦠꦸꦏꦸ​ꦲꦶꦮꦏ꧀ꦢꦒꦶꦁ​ꦤꦁꦥꦱꦂ​꧈​ꦲꦥ​ꦱꦼꦤꦼꦁꦩꦸ​ꦢꦶꦠꦸꦏꦸ​ꦮꦲꦺ​꧈​ꦲꦺꦴꦫ​ꦲꦸꦱꦃꦠꦏꦺꦴꦤ꧀ꦠꦏꦺꦴꦤ꧀ꦲꦶꦮꦏ꧀ꦏꦺ​ꦱꦁꦏꦔꦼꦤ꧀ꦢꦶ​ꦲꦥ​ꦏꦼꦥꦿꦶꦪꦺ​꧈​ꦗꦭꦂꦫꦤ꧀ꦮꦼꦢꦶ​ꦤꦺꦏ꧀ꦢꦺꦴꦱ​꧉​ ²⁶ꦤꦁꦏꦶꦠꦧ꧀ꦏꦼꦠꦸꦭꦶꦱ꧀ꦔꦺꦤꦺ​ꦠ​:“ꦧꦸꦩꦶ​ꦭꦤ꧀ꦱꦏ꧀ꦲꦶꦱꦶꦤꦺ​ꦏꦸꦮꦶ​ꦮꦺꦏ꧀ꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦧꦺꦃ​꧉​”

²⁷꧋ꦤꦺꦏ꧀ꦏꦺꦴꦮꦺ​ꦢꦶꦲꦸꦤ꧀ꦢꦁ​ꦩꦁꦔꦤ꧀ꦏꦫꦺꦴ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦭꦤ꧀ꦏꦺꦴꦮꦺ​ꦒꦼꦊꦩ꧀ꦤꦼꦏꦤꦶ​꧈​ꦱꦼꦩ꧀ꦧꦫꦁ​ꦱꦶꦁ​ꦢꦶꦱꦸꦒꦸꦃꦲꦏꦺꦏꦼꦤꦺꦁꦲꦩ꧀ꦧꦺꦴꦏ꧀ꦥꦔꦤ꧀꧈​ꦲꦺꦴꦫ​ꦲꦸꦱꦃꦱꦩꦂ​ꦲꦥꦲꦥ​꧉​ ²⁸ꦤꦁꦔꦶꦁ​ꦤꦺꦏ꧀ꦲꦺꦤꦺꦁꦱꦶꦁ​ꦔꦺꦴꦩꦺꦴꦁꦩꦫꦁ​ꦏꦺꦴꦮꦺ​:“ꦲꦶꦮꦏ꧀ꦏꦸꦮꦶ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦧꦿꦲꦭ​꧈​”ꦪ​ꦲꦥꦶꦏ꧀ꦏꦺ​ꦲꦗ​ꦢꦶꦥꦔꦤ꧀ꦮꦲꦺ​꧈​ꦔꦼꦧꦺꦴꦠ꧀ꦠꦶ​ꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦱꦸꦥꦪ​ꦲꦔꦼꦤ꧀ꦤꦔꦼꦤ꧀ꦤꦺꦲꦺꦴꦫ​ꦧꦶꦔꦸꦁ​꧉​ ²⁹ꦲꦏꦸ​ꦲꦺꦴꦫ​ꦔꦺꦴꦩꦺꦴꦁꦤꦺꦏ꧀ꦲꦔꦼꦤ꧀ꦲꦔꦼꦤ꧀ꦩꦸ​ꦱꦶꦁ​ꦧꦶꦔꦸꦁ​꧈​ꦲꦺꦴꦫ​꧈​ꦤꦁꦔꦶꦁ​ꦲꦔꦼꦤ꧀ꦤꦔꦼꦤ꧀ꦤꦺꦮꦺꦴꦁ​ꦱꦶꦁ​ꦭꦶꦪꦤꦺ​꧉​ꦭꦃ​ꦤꦁꦔꦶꦁ​ꦲꦺꦤꦺꦁꦮꦺꦴꦁ​ꦧꦶꦱ​ꦔꦺꦴꦩꦺꦴꦁ:

꧋“ꦏꦼꦤꦺꦁꦲꦥ​ꦏꦺꦴꦏ꧀ꦲꦔꦼꦤ꧀ꦤꦔꦼꦤ꧀ꦤꦺꦮꦺꦴꦁ​ꦭꦶꦪ​ꦔꦭꦁꦔꦭꦁꦔꦶꦏꦩꦼꦂꦢꦺꦏꦲꦤ꧀ꦏꦸ? ³⁰ꦤꦺꦏ꧀ꦱꦶꦁ​ꦠꦏ꧀ꦥꦔꦤ꧀ꦮꦶꦱ꧀ꦠꦏ꧀ꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​꧈​ꦭꦃ​ꦏꦺꦴꦏ꧀ꦲꦶꦗꦶꦏ꧀ꦲꦺꦤꦺꦁꦱꦶꦁ​ꦚꦭꦃꦚꦭꦃꦲꦏꦺꦲꦏꦸ​ꦧꦧ꧀ꦥꦔꦤ꧀ꦱꦶꦁ​ꦮꦶꦱ꧀ꦠꦏ꧀ꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​?”

³¹꧋ꦥꦚ꧀ꦕꦺꦤ꧀ꦧꦼꦤꦼꦂ​ꦲꦺꦴꦩꦺꦴꦁꦔꦤ꧀ꦏꦸꦮꦶ​꧈​ꦤꦁꦔꦶꦁ​ꦲꦗ​ꦭꦭꦶ​ꦤꦺꦏ꧀ꦱꦼꦩ꧀ꦧꦫꦁ​ꦱꦶꦁ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺ꧈​ꦲꦺꦴꦫ​ꦢꦢꦶ​ꦱꦼꦧꦧ꧀ꦩꦁꦔꦤ꧀ꦲꦥ​ꦔꦺꦴꦩ꧀ꦧꦺ​꧈​ꦲꦥ​ꦮꦲꦺ​ꦱꦶꦁ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦏꦸꦮꦶ​ꦏꦸꦢꦸ​ꦏꦁꦒꦺꦴ​ꦔ꧀ꦒꦸꦁꦒꦸꦁꦒꦸꦱ꧀ꦠꦶ​ꦄꦭ꧀ꦭꦃ​꧉​ ³²ꦲꦗ​ꦱꦩ꧀ꦥꦺꦏ꧀ꦲꦥ​ꦮꦲꦺ​ꦱꦶꦁ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦩꦫꦏ꧀ꦏꦏꦺꦮꦺꦴꦁ​ꦭꦶꦪꦤꦺ​ꦠꦶꦧ​ꦲꦶꦁ​ꦢꦺꦴꦱ​꧈​ꦲꦺꦴꦫ​ꦮꦺꦴꦁ​ꦙꦸ꧈​ꦲꦺꦴꦫ​ꦮꦺꦴꦁ​ꦒꦿꦶꦏ꧀ꦭꦤ꧀ꦲꦺꦴꦫ​ꦮꦺꦴꦁ​ꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ³³ꦲꦩ꧀ꦧꦺꦴꦏ꧀ꦏꦪ​ꦲꦏꦸ​ꦲꦶꦏꦶ​:ꦲꦶꦁ​ꦲꦥ​ꦮꦲꦺ​ꦱꦶꦁ​ꦠꦏ꧀ꦭꦏꦺꦴꦤ꧀ꦤꦶ​ꦲꦏꦸ​ꦔ꧀ꦒꦺꦴꦭꦺꦏ꧀ꦱꦼꦤꦼꦁꦔꦺ​ꦮꦺꦴꦁ​ꦏꦧꦺꦃ​꧉​ꦲꦏꦸ​ꦲꦺꦴꦫ​ꦤꦩꦸꦁ​ꦩꦶꦏꦶꦂ​ꦱꦼꦤꦼꦁꦏꦸ​ꦢꦺꦮꦺꦮꦲꦺ​꧈​ꦤꦁꦔꦶꦁ​ꦱꦶꦁ​ꦠꦏ꧀ꦒꦺꦴꦭꦺꦏ꧀ꦏꦶꦲꦥ​ꦱꦶꦁ​ꦲꦥꦶꦏ꧀ꦏꦁꦒꦺꦴ​ꦭꦶꦪꦤꦺ​꧉​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦏꦁꦒꦺꦴ​ꦲꦏꦸ​꧈​ꦧꦶꦱꦲ​ꦏꦧꦺꦃ​ꦤꦼꦩꦸ​ꦏꦼꦱ꧀ꦭꦩꦼꦠ꧀ꦠꦤ꧀ꦱꦶꦁ​ꦭꦁꦒꦼꦁ​꧉​

↑ ↑ ↑

 

꧇​꧑꧑꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦴꦏ꧀ꦥꦢ​ꦤꦶꦫꦸ​ꦲꦏꦸ​꧈​ꦏꦪ​ꦲꦼꦁꦒꦺꦴꦤ꧀ꦏꦸ​ꦤꦶꦫꦸ​ꦏꦿꦶꦱ꧀ꦡꦸꦱ꧀꧈​

꧋ꦮꦺꦴꦁ​ꦮꦺꦢꦺꦴꦏ꧀ꦏꦸꦢꦸ​ꦔꦗꦺꦤ꧀ꦤꦶ​ꦩꦫꦁ​ꦧꦺꦴꦗꦺꦴꦤꦺ​꧉​

²꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦥꦚ꧀ꦕꦺꦤ꧀ꦔꦼꦊꦩ꧀ꦏꦺꦴꦮꦺ​꧈​ꦲꦮꦶꦠ꧀ꦏꦺꦴꦮꦺ​ꦠꦤ꧀ꦱꦃ​ꦥꦢ​ꦲꦺꦭꦶꦁ​ꦩꦫꦁ​ꦲꦏꦸ​ꦭꦤ꧀ꦥꦢ​ꦠꦼꦩꦼꦤ꧀ꦤꦸꦫꦸꦠ꧀ꦥꦶꦠꦸꦠꦸꦂ​ꦱꦶꦁ​ꦠꦏ꧀ꦮꦸꦭꦁꦔꦏꦺ꧉​ ³ꦤꦁꦔꦶꦁ​ꦏꦉꦥ꧀ꦏꦸ​ꦱꦸꦥꦪ​ꦏꦺꦴꦮꦺ​ꦥꦢ​ꦔꦼꦂꦠꦶ​ꦤꦺꦏ꧀ꦏꦿꦶꦱ꧀ꦡꦸꦱ꧀ꦏꦸꦮꦶ​ꦱꦶꦫꦃꦲꦺ​ꦮꦺꦴꦁ​ꦭꦤꦁ​ꦭꦤ꧀ꦮꦺꦴꦁ​ꦭꦤꦁ​ꦏꦸꦮꦶ​ꦱꦶꦫꦃꦲꦺ​ꦧꦺꦴꦗꦺꦴꦤꦺ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦱꦶꦫꦃꦲꦺ​ꦏꦿꦶꦱ꧀ꦡꦸꦱ꧀꧈​ ⁴ꦢꦢꦶꦤꦺ​꧈​ꦤꦺꦏ꧀ꦮꦺꦴꦁ​ꦭꦤꦁ​ꦤ꧀ꦢꦺꦴꦁꦔꦲꦥ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦥꦱꦩꦸꦮꦤ꧀ꦏꦫꦺꦴ​ꦏꦸꦢꦸꦁꦤꦁꦱꦶꦫꦃꦲꦺ​꧈​ꦏꦸꦮꦶ​ꦠꦶꦧꦏꦺ​ꦲꦺꦴꦫ​ꦔꦗꦺꦤ꧀ꦤꦶ​ꦩꦫꦁ​ꦏꦿꦶꦱ꧀ꦡꦸꦱ꧀ꦱꦶꦁ​ꦢꦢꦶ​ꦱꦶꦫꦃꦲꦺ​ꦢꦺꦏ꧀ꦤꦺ꧉​ ⁵ꦤꦁꦔꦶꦁ​ꦤꦺꦏ꧀ꦮꦺꦴꦁ​ꦮꦺꦢꦺꦴꦏ꧀​ꦤ꧀ꦢꦺꦴꦁꦔꦲꦥ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦥꦱꦩꦸꦮꦤ꧀ꦠꦤ꧀ꦥ​ꦏꦸꦢꦸꦁꦔꦤ꧀ꦱꦶꦫꦃꦲꦺ​꧈​ꦮꦺꦴꦁ​ꦮꦺꦢꦺꦴꦏ꧀ꦏꦸꦮꦶ​ꦲꦺꦴꦫ​ꦔꦗꦺꦤ꧀ꦤꦶ​ꦩꦫꦁ​ꦱꦶꦁ​ꦭꦤꦁ​꧈​ꦥꦢ​ꦮꦲꦺ​ꦏꦫꦺꦴ​ꦤꦺꦏ꧀ꦫꦩ꧀ꦧꦸꦠ꧀ꦠꦺ​ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦢꦶꦕꦸꦏꦸꦂ​꧉​ ⁶ꦤꦺꦏ꧀ꦮꦺꦴꦁ​ꦮꦺꦢꦺꦴꦏ꧀ꦲꦺꦴꦫ​ꦏꦸꦢꦸꦁꦔꦤ꧀ꦱꦶꦫꦃꦲꦺ​꧈​ꦲꦥꦶꦏ꧀ꦏꦺ​ꦢꦶꦏꦼꦠꦺꦴꦏ꧀ꦮꦲꦺ​ꦫꦩ꧀ꦧꦸꦠ꧀ꦠꦺ​꧉​ꦤꦁꦔꦶꦁ​ꦗꦭꦂꦫꦤ꧀ꦲꦺꦴꦫ​ꦥꦤ꧀ꦠꦼꦱ꧀ꦤꦺꦏ꧀ꦮꦺꦴꦁ​ꦮꦺꦢꦺꦴꦏ꧀ꦢꦶꦕꦸꦏꦸꦂ​꧈​ꦲꦥ​ꦢꦶꦏꦼꦠꦺꦴꦏ꧀ꦫꦩ꧀ꦧꦸꦠ꧀ꦠꦺ​꧈​ꦩꦸꦭꦤꦺ​ꦲꦥꦶꦏ꧀ꦏꦺ​ꦤꦺꦏ꧀ꦮꦺꦴꦁ​ꦮꦺꦢꦺꦴꦏ꧀ꦏꦸꦢꦸꦁꦔꦤ꧀ꦱꦶꦫꦃꦲꦺ​꧉​ ⁷ꦮꦺꦴꦁ​ꦭꦤꦁ​ꦲꦺꦴꦫ​ꦲꦸꦱꦃꦔꦁꦒꦺꦴ​ꦏꦸꦢꦸꦁ꧈​ꦲꦮꦶꦠ꧀ꦮꦺꦴꦁ​ꦭꦤꦁ​ꦏꦸꦮꦶ​ꦔꦼꦠꦺꦴꦏ꧀ꦏꦏꦺꦫꦸꦥ​ꦭꦤ꧀ꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦮꦺꦴꦁ​ꦮꦺꦢꦺꦴꦏ꧀ꦔꦼꦠꦺꦴꦏ꧀ꦏꦏꦺꦏ꧀ꦮꦱꦤꦺ​ꦮꦺꦴꦁ​ꦭꦤꦁ​꧉​ ⁸ꦲꦮꦶꦠ꧀ ꦲꦺꦴꦫ​ꦮꦺꦴꦁ​ꦭꦤꦁ​ꦱꦶꦁ​ꦢꦶꦒꦮꦺ​ꦱꦁꦏꦮꦺꦴꦁ​ꦮꦺꦢꦺꦴꦏ꧀ ꦤꦁꦔꦶꦁ​ꦮꦺꦴꦁ​ꦮꦺꦢꦺꦴꦏ꧀ꦱꦁꦏꦮꦺꦴꦁ​ꦭꦤꦁ​꧉​ ⁹ꦱꦼꦩꦺꦴꦤꦺꦴ​ꦲꦸꦒ​꧈​ꦲꦺꦴꦫ​ꦮꦺꦴꦁ​ꦭꦤꦁ​ꦢꦶꦒꦮꦺ​ꦏꦁꦒꦺꦴ​ꦮꦺꦴꦁ​ꦮꦺꦢꦺꦴꦏ꧀ ꦤꦁꦔꦶꦁ​ꦮꦺꦴꦁ​ꦮꦺꦢꦺꦴꦏ꧀ꦏꦁꦒꦺꦴ​ꦮꦺꦴꦁ​ꦭꦤꦁ​꧉​ ¹⁰ꦲꦸꦒ​ꦏꦁꦒꦺꦴ​ꦥꦫ​ꦩꦸꦭꦺꦏꦠ꧀ꦱꦶꦁ​ꦚꦮꦁ​꧈​ꦭꦸꦮꦶꦃ​ꦲꦥꦶꦏ꧀ꦤꦺꦏ꧀ꦮꦺꦴꦁ​ꦮꦺꦢꦺꦴꦏ꧀ꦏꦸꦢꦸꦁꦔꦤ꧀ ꦢꦢꦶ​ꦏꦺꦠꦺꦴꦏ꧀ꦤꦺꦏ꧀ꦢꦺꦏ꧀ꦤꦺꦩꦤꦸꦠ꧀ꦩꦫꦁ​ꦧꦺꦴꦗꦺꦴꦤꦺ​꧉​ ¹¹ꦤꦁꦔꦶꦁ​ꦥꦫ​ꦱꦼꦢꦸꦭꦸꦂ​꧈​ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦱꦶꦁ​ꦢꦢꦶ​ꦮꦺꦴꦁ​ꦏꦿꦶꦱ꧀ꦠꦼꦤ꧀ ꦮꦺꦴꦁ​ꦮꦺꦢꦺꦴꦏ꧀​ꦩ꧀ꦧꦸꦠꦸꦃꦲꦏꦺꦮꦺꦴꦁ​ꦭꦤꦁ​ꦭꦤ꧀ꦮꦺꦴꦁ​ꦭꦤꦁ​ꦩ꧀ꦧꦸꦠꦸꦃꦲꦏꦺꦮꦺꦴꦁ​ꦮꦺꦢꦺꦴꦏ꧀꧈​ ¹²ꦲꦮꦶꦠ꧀ꦏꦪ​ꦲꦼꦁꦒꦺꦴꦤꦺ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦒꦮꦺꦪꦤ꧀ꦤꦺ​ꦱꦁꦏꦮꦺꦴꦁ​ꦭꦤꦁ​꧈​ꦱꦼꦩꦺꦴꦤꦺꦴ​ꦲꦸꦒ​ꦮꦺꦴꦁ​ꦭꦤꦁ​ꦩꦼꦠꦸꦤꦺ​ꦱꦁꦏꦮꦺꦴꦁ​ꦮꦺꦢꦺꦴꦏ꧀ꦭꦤ꧀ꦱꦼꦩ꧀ꦧꦫꦁ​ꦏꦧꦺꦃ​ꦩꦼꦠꦸꦤꦺ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​

¹³꧋ꦲꦩ꧀ꦧꦺꦴꦏ꧀ꦢꦶꦥꦶꦏꦶꦂ​ꦢꦺꦮꦺꦥꦫ​ꦱꦼꦢꦸꦭꦸꦂ​꧈​ꦲꦥ​ꦏꦶꦫꦏꦶꦫ​ꦥꦤ꧀ꦠꦼꦱ꧀ꦤꦺꦏ꧀ꦮꦺꦴꦁ​ꦮꦺꦢꦺꦴꦏ꧀​ꦤ꧀ꦢꦺꦴꦁꦔꦤꦁꦥꦱꦩꦸꦮꦤ꧀ꦠꦤ꧀ꦥ​ꦏꦸꦢꦸꦁꦔꦤ꧀? ¹⁴ꦤꦺꦏ꧀ꦢꦶꦱꦮꦁ​ꦱꦏ꧀ꦕꦫ​ꦩꦤꦸꦁꦱ​ꦮꦲꦺ​ꦮꦶꦱ꧀ꦏꦺꦠꦺꦴꦏ꧀ꦢꦺꦮꦺ:ꦲꦥ​ꦪ​ꦏꦺꦠꦺꦴꦏ꧀ꦲꦥꦶꦏ꧀ꦤꦺꦏ꧀ꦮꦺꦴꦁ​ꦭꦤꦁ​ꦫꦩ꧀ꦧꦸꦠ꧀ꦠꦺ​ꦢꦮ​?ꦲꦥ​ꦲꦺꦴꦫ​ꦔꦶꦱꦶꦤ꧀ꦤꦶꦱꦶꦤ꧀ꦤꦏꦺ? ¹⁵ꦤꦁꦔꦶꦁ​ꦏꦁꦒꦺꦴ​ꦮꦺꦴꦁ​ꦮꦺꦢꦺꦴꦏ꧀ꦫꦩ꧀ꦧꦸꦠ꧀ꦢꦮ​ꦩꦭꦃ​ꦢꦢꦶ​ꦥꦤ꧀ꦠꦼꦱ꧀ꦱꦺ​꧉​ꦫꦩ꧀ꦧꦸꦠ꧀ꦢꦮ​ꦏꦸꦮꦶ​ꦏꦁꦒꦺꦴ​ꦮꦺꦴꦁ​ꦮꦺꦢꦺꦴꦏ꧀ꦏꦪ​ꦏꦸꦢꦸꦁꦔꦺꦱꦶꦫꦃ​꧉​ ¹⁶ꦤꦺꦏ꧀ꦲꦺꦤꦺꦁꦮꦺꦴꦁ​ꦲꦺꦴꦫ​ꦱꦼꦠꦸꦗꦸ​꧈​ꦮꦁꦱꦸꦭ꧀ꦭꦤ꧀ꦏꦸ​ꦔꦺꦤꦺ​ꦮꦲꦺ​:ꦲꦮꦏ꧀ꦏꦺ​ꦢꦺꦮꦺꦭꦤ꧀ꦥꦱꦩꦸꦮꦤ꧀ꦥꦱꦩꦸꦮꦤ꧀ꦭꦶꦪꦤꦺ​ꦲꦺꦴꦫ​ꦤ꧀ꦢꦸꦮꦺꦥꦼꦂꦤꦠ꧀ꦠꦤ꧀ꦭꦶꦪꦤꦺ​꧉​

꧋ꦧꦧ꧀ꦥꦺꦱ꧀ꦠ​ꦱꦸꦕꦶ​꧉​

¹⁷꧋ꦥꦫ​ꦱꦼꦢꦸꦭꦸꦂ​꧈​ꦲꦶꦁ​ꦥꦽꦏꦫ​ꦱꦶꦁ​ꦲꦉꦥ꧀ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​ꦲꦏꦸ​ꦲꦺꦴꦫ​ꦧꦶꦱ​ꦔꦼꦊꦩ꧀ꦏꦺꦴꦮꦺ​꧈​ꦲꦮꦶꦠ꧀ꦲꦼꦁꦒꦺꦴꦤ꧀ꦩꦸ​ꦥꦢ​ꦏꦸꦩ꧀ꦥꦸꦭ꧀ꦭꦤ꧀ꦲꦺꦴꦫ​ꦤ꧀ꦢꦢꦺꦏ꧀ꦏꦏꦺꦧꦼꦕꦶꦏ꧀ꦏꦺ​ꦥꦱꦩꦸꦮꦤ꧀ ꦤꦁꦔꦶꦁ​ꦩꦭꦃ​ꦤ꧀ꦢꦢꦺꦏ꧀ꦏꦏꦺꦲꦭ​꧉​ ¹⁸ꦲꦥ​ꦗꦭꦂꦫꦤ꧀ꦤꦺ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​?ꦏꦥꦶꦁ​ꦥꦶꦱꦤ꧀ ꦲꦏꦸ​ꦏꦿꦸꦔꦸ​ꦤꦺꦏ꧀ꦏꦺꦴꦮꦺ​ꦥꦢ​ꦤ꧀ꦢꦸꦮꦺꦒꦺꦴꦭꦺꦴꦁꦔꦤ꧀ꦢꦺꦮꦺꦢꦺꦮꦺꦤꦺꦏ꧀ꦏꦸꦩ꧀ꦥꦸꦭ꧀ꦭꦤ꧀꧈​ꦥꦚ꧀ꦕꦺꦤ꧀ꦲꦏꦸ​ꦪ​ꦥꦽꦕꦪ​ꦤꦺꦏ꧀ꦏꦧꦂ​ꦲꦶꦏꦶ​ꦲꦺꦤꦺꦁꦠꦼꦤꦤ꧀ꦤꦺ꧉​ ¹⁹ꦥꦚ꧀ꦕꦺꦤ꧀​ꦏꦸꦢꦸ​ꦲꦺꦤꦺꦁꦥꦼꦕꦃ​ꦥꦼꦕꦃꦲꦤ꧀​ꦔꦺꦴꦤꦺꦴ​ꦤꦁꦥꦱꦩꦸꦮꦤ꧀ ꦱꦸꦥꦪ​ꦏꦺꦠꦺꦴꦏ꧀ꦱꦥ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦠꦼꦤꦤ꧀꧈​ ²⁰ꦤꦁꦔꦶꦁ​ꦤꦁꦏꦸꦩ꧀ꦥꦸꦭ꧀ꦭꦤ꧀ꦩꦸ​ꦏꦸꦮꦶ​ꦲꦺꦴꦫ​ꦥꦤ꧀ꦠꦼꦱ꧀​ꦧ꧀ꦭꦱ꧀ꦲꦼꦁꦒꦺꦴꦤ꧀ꦩꦸ​ꦥꦢ​ꦩꦁꦔꦤ꧀ꦫꦺꦴꦠꦶꦤꦺ​ꦒꦸꦱ꧀ꦠꦶ​ꦤꦺꦏ꧀ꦥꦢ​ꦩꦁꦔꦤ꧀ꦥꦺꦱ꧀ꦠ​ꦱꦸꦕꦶ​꧉​ ²¹ꦲꦮꦶꦠ꧀ꦏꦺꦴꦮꦺ​ꦤꦺꦏ꧀ꦩꦁꦔꦤ꧀ ꦏꦧꦺꦃ​ꦥꦢ​ꦩꦁꦔꦤ꧀ꦥꦔꦤ꧀ꦤꦺ​ꦢꦺꦮꦺꦢꦺꦮꦺ꧈​ꦱꦩ꧀ꦥꦺꦏ꧀ꦲꦺꦤꦺꦁꦱꦶꦁ​ꦔꦼꦭꦶꦃ​ꦭꦤ꧀ꦲꦺꦤꦺꦁꦱꦶꦁ​ꦩꦼꦤ꧀ꦢꦼꦩ꧀꧈​ ²²ꦭꦃ​ꦏꦺꦴꦏ꧀ꦏꦪ​ꦮꦺꦴꦁ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦲꦺꦴꦩꦃ​ꦮꦲꦺ​;ꦲꦥ​ꦲꦺꦴꦫ​ꦧꦶꦱ​ꦩꦁꦔꦤ꧀ꦲꦥ​ꦔꦺꦴꦩ꧀ꦧꦺ​ꦤꦁꦲꦺꦴꦩꦃ​꧉​ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦥꦢ​ꦚꦼꦥꦺꦭꦺꦏ꧀ꦏꦏꦺꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦔ꧀ꦒꦮꦺ​ꦲꦶꦱꦶꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺ?ꦭꦃ​ꦲꦏꦸ​ꦏꦸꦢꦸ​ꦔꦺꦴꦩꦺꦴꦁꦲꦥ​ꦩꦫꦁ​ꦏꦺꦴꦮꦺ​ꦧꦧ꧀ꦥꦽꦏꦫ​ꦲꦶꦏꦶ​?ꦚ꧀ꦗꦭꦸꦏ꧀ꦠꦏ꧀ꦲꦼꦊꦩ꧀?ꦲꦺꦴꦫ​꧈​ꦲꦏꦸ​ꦲꦺꦴꦫ​ꦧꦶꦱ​ꦔꦼꦊꦩ꧀ꦏꦺꦴꦮꦺ​ꦧꦧ꧀ꦲꦶꦏꦶ​꧉​

²³꧋ꦥꦶꦮꦸꦭꦁ​ꦧꦧ꧀ꦥꦺꦱ꧀ꦠ​ꦱꦸꦕꦶ​ꦱꦶꦁ​ꦠꦏ꧀ꦠꦩ꧀ꦥ​ꦱꦁꦏꦒꦸꦱ꧀ꦠꦶ​꧈​ꦪ​ꦥꦶꦮꦸꦭꦁ​ꦲꦶꦏꦶ​ꦱꦶꦁ​ꦠꦏ꧀ꦮꦸꦭꦁꦔꦏꦺꦩꦫꦁ​ꦏꦺꦴꦮꦺ​꧉​ꦥꦶꦮꦸꦭꦁ​ꦲꦶꦏꦶ​ꦔꦺꦤꦺ​:ꦲꦶꦁ​ꦮꦼꦔꦶꦤꦺ꧈​ꦱꦏ꧀ꦢꦸꦫꦸꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦕꦼꦏꦼꦭ꧀ꦩꦸꦁꦱꦸꦃꦲꦺ​꧈​ꦢꦺꦏ꧀ꦤꦺꦚ꧀ꦗꦶꦏꦸꦏ꧀ꦫꦺꦴꦠꦶꦤꦺ​꧉​ ²⁴ꦱꦏ꧀ꦮꦶꦱ꧀ꦱꦺ​ꦢꦺꦏ꧀ꦤꦺꦤ꧀ꦢꦺꦴꦁꦔꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦫꦺꦴꦠꦶ​ꦩꦲꦸ​ꦠꦼꦫꦸꦱ꧀ꦢꦶꦕꦸꦮꦶꦭ꧀ꦕꦸꦮꦶꦭ꧀ꦏꦫꦺꦴ​ꦔꦺꦴꦩꦺꦴꦁ:“ꦲꦶꦏꦶ​ꦧꦢꦤ꧀ꦏꦸ​ꦱꦶꦁ​ꦠꦏ꧀ꦥꦱꦿꦃꦲꦏꦺꦏꦁꦒꦺꦴ​ꦏꦺꦴꦮꦺ​꧉​ꦲꦶꦏꦶ​ꦢꦶꦥꦔꦤ꧀ꦏꦁꦒꦺꦴ​ꦥꦼꦁꦔꦺꦭꦶꦁꦔꦺꦭꦶꦁ​ꦩꦫꦁ​ꦲꦏꦸ​꧉​” ²⁵ꦲꦸꦒ​ꦱꦏ꧀ꦮꦶꦱ꧀ꦱꦺ​ꦩꦁꦔꦤ꧀ꦫꦺꦴꦠꦶ​꧈​ꦒꦸꦱ꧀ꦠꦶ​ꦠꦼꦫꦸꦱ꧀​ꦚ꧀ꦗꦶꦏꦸꦏ꧀ꦩꦁꦏꦺꦴꦏ꧀ꦏꦺꦲꦺꦴꦩ꧀ꦧꦺꦤ꧀ꦭꦤ꧀ꦔꦺꦴꦩꦺꦴꦁ:“ꦩꦁꦏꦺꦴꦏ꧀ꦲꦶꦏꦶ​ꦥꦽꦗꦚ꧀ꦗꦶꦪꦤ꧀ꦲꦚꦂ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦽꦗꦚ꧀ꦗꦶꦪꦤ꧀ꦱꦶꦁ​ꦢꦶꦠꦼꦠꦼꦥ꧀ꦥꦏꦺꦔꦁꦒꦺꦴ​ꦒꦼꦠꦶꦃꦏꦸ​꧉​ꦱꦧꦼꦤ꧀ꦱꦧꦼꦤ꧀ꦏꦺꦴꦮꦺ​ꦔꦺꦴꦩ꧀ꦧꦺ​ꦱꦁꦏꦩꦁꦏꦺꦴꦏ꧀ꦲꦶꦏꦶ​꧈​ꦒꦮꦺꦤꦼꦤ꧀ꦥꦼꦁꦔꦺꦭꦶꦁꦔꦺꦭꦶꦁ​ꦩꦫꦁ​ꦲꦏꦸ​꧉​”

²⁶꧋ꦥꦫ​ꦱꦼꦢꦸꦭꦸꦂ​꧈​ꦱꦧꦼꦤ꧀ꦱꦧꦼꦤ꧀ꦏꦺꦴꦮꦺ​ꦩꦁꦔꦤ꧀ꦫꦺꦴꦠꦶ​ꦭꦤ꧀ꦔꦺꦴꦩ꧀ꦧꦺ​ꦱꦁꦏꦩꦁꦏꦺꦴꦏ꧀ꦲꦶꦏꦶ​꧈​ꦏꦺꦴꦮꦺ​ꦱꦏ꧀ꦗꦤꦺꦔꦧꦂꦫꦏꦺꦥꦠꦶꦤꦺ​ꦒꦸꦱ꧀ꦠꦶ​꧈​ꦔꦤ꧀ꦠꦶ​ꦢꦺꦏ꧀ꦤꦺꦠꦼꦏ​ꦩꦼꦤꦺꦃ​꧉​ ²⁷ꦩꦸꦭꦤꦺ​꧈​ꦱꦥ​ꦱꦶꦁ​ꦩꦁꦔꦤ꧀ꦫꦺꦴꦠꦶꦤꦺ​ꦭꦤ꧀ꦔꦺꦴꦩ꧀ꦧꦺ​ꦱꦁꦏꦩꦁꦏꦺꦴꦏ꧀ꦲꦶꦏꦶ​ꦔꦁꦒꦺꦴ​ꦥꦠꦿꦥ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ ꦠꦤ꧀ꦥ​ꦔꦗꦺꦤ꧀ꦤꦶ​ꦒꦸꦱ꧀ꦠꦶ​꧈​ꦮꦺꦴꦁ​ꦏꦸꦮꦶ​ꦔ꧀ꦒꦮꦺ​ꦢꦺꦴꦱ​ꦩꦫꦁ​ꦧꦢꦤ꧀ꦤꦺ​ꦭꦤ꧀ꦒꦼꦠꦶꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ²⁸ꦲꦥꦶꦏ꧀ꦏꦺ​꧈​ꦱꦏ꧀ꦢꦸꦫꦸꦁꦔꦺꦲꦮꦏ꧀ꦏꦺ​ꦢꦺꦮꦺꦩꦁꦔꦤ꧀ꦫꦺꦴꦠꦶꦤꦺ​꧈​ꦲꦮꦏ꧀ꦏꦺ​ꦢꦺꦮꦺꦩꦺꦠꦤꦶ​ꦲꦸꦫꦶꦥ꧀ꦥꦺꦢꦺꦮꦺꦢꦺꦮꦺꦤ꧀ꦢꦶꦱꦶꦏ꧀꧈​ ²⁹ꦲꦮꦶꦠ꧀ꦤꦺꦏ꧀ꦲꦶꦁ​ꦱꦏ꧀ꦗꦼꦫꦺꦴꦤꦺꦩꦁꦔꦤ꧀ꦫꦺꦴꦠꦶꦤꦺ​ꦭꦤ꧀ꦔꦺꦴꦩ꧀ꦧꦺ​ꦱꦁꦏꦩꦁꦏꦺꦴꦏ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦥꦢ​ꦤꦶꦠꦺꦤ꧀ꦤꦶ​ꦤꦺꦏ꧀ꦱꦶꦁ​ꦢꦶꦥꦔꦤ꧀ꦭꦤ꧀ꦢꦶꦲꦺꦴꦩ꧀ꦧꦺ​ꦏꦸꦮꦶ​ꦱꦏ꧀ꦗꦤꦺꦧꦢꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦼꦁꦒꦺꦴꦤꦺ​ꦩꦁꦔꦤ꧀ꦭꦤ꧀ꦔꦺꦴꦩ꧀ꦧꦺ​ꦏꦸꦮꦶ​ꦧꦏꦭ꧀ꦤꦼꦏꦏ꧀ꦏꦏꦺꦲꦗꦂꦫꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ ³⁰ꦩꦸꦭꦤꦺ​ꦲꦗ​ꦏꦒꦺꦠ꧀ꦤꦺꦏ꧀ꦤꦁꦥꦱꦩꦸꦮꦤ꧀ꦩꦸꦲꦺꦴꦏꦺꦃꦮꦺꦴꦁ​ꦱꦶꦁ​ꦥꦢ​ꦭꦫ​ꦭꦤ꧀ꦫꦶꦁꦏꦶꦃ​꧈​ꦩꦭꦃ​ꦲꦺꦴꦏꦺꦃꦲꦩ꧀ꦧꦫꦁ​ꦱꦶꦁ​ꦥꦢ​ꦩꦠꦶ​꧉​ ³¹ꦤꦺꦏ꧀ꦱꦏ꧀ꦢꦸꦫꦸꦁꦔꦺꦩꦁꦔꦤ꧀ꦫꦺꦴꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦩꦺꦠꦤꦶ​ꦲꦸꦫꦶꦥ꧀ꦥꦺꦤ꧀ꦢꦶꦱꦶꦏ꧀ ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦧꦏꦭ꧀ꦢꦶꦲꦗꦂ​ꦏꦫꦺꦴ​ꦒꦸꦱ꧀ꦠꦶ​꧉​ ³²ꦤꦁꦔꦶꦁ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦗꦂ​ꦲꦮꦏ꧀ꦏꦺ​ꦢꦺꦮꦺꦏꦸꦮꦶ​ꦠꦸꦗꦸꦮꦤ꧀ꦤꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦗ​ꦱꦩ꧀ꦥꦺꦏ꧀ꦢꦶꦧꦸꦮꦁ​ꦤꦁꦤꦼꦫꦏꦧꦉꦁ​ꦏꦫꦺꦴ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​꧉​

³³꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦏꦺꦴꦮꦺ​ꦥꦢ​ꦔꦸꦩ꧀ꦥꦸꦭ꧀ꦩꦁꦔꦤ꧀ꦫꦺꦴꦠꦶꦤꦺ​ꦒꦸꦱ꧀ꦠꦶ​꧈​ꦥꦢ​ꦔꦼꦤ꧀ꦠꦺꦤ꧀ꦤꦤ​ꦩꦫꦁ​ꦱꦏ꧀ꦥꦢꦥꦢꦤ꧀ꦢꦶꦱꦶꦏ꧀꧈​ ³⁴ꦤꦺꦏ꧀ꦲꦺꦤꦺꦁꦮꦺꦴꦁ​ꦱꦶꦁ​ꦔꦼꦭꦶꦃ​꧈​ꦮꦺꦴꦁ​ꦏꦸꦮꦶ​ꦲꦥꦶꦏ꧀ꦏꦺ​ꦩꦁꦔꦤ꧀ꦤꦁꦲꦺꦴꦩꦃ​ꦤ꧀ꦢꦶꦱꦶꦏ꧀ ꦢꦢꦶꦤꦺ​ꦤꦺꦏ꧀ꦥꦢ​ꦔꦸꦩ꧀ꦥꦸꦭ꧀ꦲꦺꦴꦫ​ꦤꦼꦏꦏ꧀ꦏꦏꦺꦲꦗꦂꦫꦤ꧀꧈​ꦧꦧ꧀ꦥꦽꦏꦫ​ꦭꦶꦪꦭꦶꦪꦤꦺ​ꦲꦉꦥ꧀ꦠꦏ꧀ꦉꦩ꧀ꦧꦸꦏ꧀ꦲꦩ꧀ꦧꦺꦱꦸꦏ꧀ꦮꦲꦺ​ꦤꦺꦏ꧀ꦲꦏꦸ​ꦠꦼꦏ​꧉​

↑ ↑ ↑

꧋ꦏꦥꦶꦤ꧀ꦠꦼꦫꦤ꧀ꦏꦥꦶꦤ꧀ꦠꦼꦂꦫꦤ꧀ꦥꦮꦺꦃꦲꦺ​ꦫꦺꦴꦃ​ꦱꦸꦕꦶ​꧉​

꧇​꧑꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦱꦲꦶꦏꦶ​ꦲꦉꦥ꧀ꦔꦺꦴꦩꦺꦴꦁꦔꦏꦺꦧꦧ꧀ ꦏꦥꦶꦤ꧀ꦠꦼꦫꦤ꧀ꦏꦥꦶꦤ꧀ꦠꦼꦂꦫꦤ꧀ꦥꦮꦺꦃꦲꦺ​ꦫꦺꦴꦃ​ꦱꦸꦕꦶ​꧈​ꦱꦸꦥꦪ​ꦏꦺꦴꦮꦺ​ꦏꦧꦺꦃ​ꦥꦢ​ꦔꦼꦂꦠꦶ​ꦱꦏ꧀ꦧꦼꦤꦼꦂꦫꦺ​꧉​ ²ꦩ꧀ꦧꦶꦪꦺꦤ꧀ ꦢꦺꦴꦁꦔꦺꦏꦺꦴꦮꦺ​ꦢꦸꦫꦸꦁ​ꦤꦸꦫꦸꦠ꧀ꦒꦸꦱ꧀ꦠꦶ​꧈​ꦏꦺꦴꦮꦺ​ꦔꦼꦂꦠꦶ​ꦢꦺꦮꦺ꧈​ꦲꦸꦫꦶꦥ꧀ꦩꦸ​ꦥꦢ​ꦏꦼꦠꦫꦶꦏ꧀ꦧꦿꦲꦭ​ꦱꦶꦁ​ꦧꦶꦱꦸ​꧈​ꦫꦤꦫꦺꦤꦺ​ꦏꦼꦱꦱꦂꦱꦱꦂ꧉​ ³ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦭꦤ꧀ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦫꦺꦴꦃ​ꦱꦸꦕꦶ​ꦧꦶꦱ​ꦔꦁꦒꦺꦴꦏ꧀ꦏꦏꦺꦮꦺꦴꦁ​ꦏꦺꦴꦁꦏꦺꦴꦤ꧀ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​꧈​ꦤꦁꦔꦶꦁ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦢꦶꦏ꧀ꦮꦱꦤꦶ​ꦫꦺꦴꦃ​ꦱꦸꦕꦶ​ꦠꦼꦫꦸꦱ꧀ꦩꦶꦱꦸꦃ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦱꦼꦩꦺꦴꦤꦺꦴ​ꦲꦸꦒ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦧꦶꦱ​ꦔꦏꦺꦴꦤ꧀ꦤꦶ​ꦤꦺꦏ꧀ꦪꦺꦯꦸꦱ꧀ꦏꦸꦮꦶ​ꦒꦸꦱ꧀ꦠꦶ​꧈​ꦤꦺꦏ꧀ꦮꦺꦴꦁ​ꦏꦸꦮꦶ​ꦲꦺꦴꦫ​ꦢꦶꦏ꧀ꦮꦱꦤꦶ​ꦫꦺꦴꦃ​ꦱꦸꦕꦶ​꧉​

⁴꧋ꦏꦥꦶꦤ꧀ꦠꦼꦫꦤ꧀ꦏꦥꦶꦤ꧀ꦠꦼꦂꦫꦤ꧀ꦥꦮꦺꦃꦲꦺ​ꦫꦺꦴꦃ​ꦱꦸꦕꦶ​ꦏꦸꦮꦶ​ꦮꦼꦂꦤꦮꦼꦂꦤ​꧈​ꦤꦁꦔꦶꦁ​ꦱꦶꦁ​ꦔꦼꦏꦺꦏ꧀ꦏꦶꦏꦥꦶꦤ꧀ꦠꦼꦫꦤ꧀ꦏꦥꦶꦤ꧀ꦠꦼꦂꦫꦤ꧀ꦏꦸꦮꦶ​ꦤꦩꦸꦁ​ꦱꦶꦗꦶ​꧈​ꦪꦏꦸꦮꦶ​ꦫꦺꦴꦃ​ꦱꦸꦕꦶ​꧉​ ⁵ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦕꦫꦤꦺ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​꧈​ꦮꦼꦂꦤꦮꦼꦂꦤ​ꦧꦔꦼꦠ꧀ ꦤꦁꦔꦶꦁ​ꦱꦶꦁ​ꦔꦼꦏꦺꦏ꧀ꦏꦶꦥꦼꦁꦒꦮꦺꦏꦸꦤꦩꦸꦁ​ꦱꦶꦗꦶ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ⁶ꦲꦺꦤꦺꦁꦮꦼꦂꦤꦮꦼꦂꦤ​ꦥꦼꦁꦒꦮꦺ​ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧈​ꦤꦁꦔꦶꦁ​ꦤꦩꦸꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦗꦶ​ꦱꦶꦁ​ꦤꦶꦤ꧀ꦢꦏ꧀ꦏꦏꦺꦏꦸꦮꦶ​ꦏꦧꦺꦃ​ꦲꦶꦁ​ꦮꦺꦴꦁ​ꦏꦧꦺꦃ​꧉​ ⁷ꦱꦧꦼꦤ꧀ꦱꦼꦢꦸꦭꦸꦂ​ꦱꦶꦁ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦥꦮꦺꦃꦲꦺ​ꦫꦺꦴꦃ​ꦱꦸꦕꦶ​ꦱꦶꦁ​ꦔꦼꦠꦺꦴꦏ꧀ꦏꦏꦺꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦠꦸꦗꦸꦮꦤ꧀ꦤꦺꦏꦁꦒꦺꦴ​ꦲꦩ꧀ꦧꦔꦸꦤ꧀ꦱꦼꦢꦸꦭꦸꦂ​ꦏꦧꦺꦃ​ꦤꦁꦥꦱꦩꦸꦮꦤ꧀꧈​ ⁸ꦱꦶꦁ​ꦱꦶꦗꦶ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦱꦁꦏꦫꦺꦴꦃ​ꦱꦸꦕꦶ​ꦱꦸꦥꦪ​ꦧꦶꦱ​ꦔꦺꦴꦩꦺꦴꦁꦔꦁꦒꦺꦴ​ꦏꦮꦼꦫꦸꦃꦲꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦶꦁ​ꦭꦶꦪꦤꦺ​ꦲꦸꦒ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦱꦁꦏꦠꦸꦁꦒꦭ꧀ꦭꦺ​ꦫꦺꦴꦃ​ꦱꦸꦕꦶ​ꦱꦸꦥꦪ​ꦧꦶꦱ​ꦤ꧀ꦢꦸꦮꦺꦤ꧀ꦤꦶ​ꦥꦔꦼꦂꦠꦶꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦮꦼꦂꦤꦮꦼꦂꦤ​ꦥꦽꦏꦫ​꧉​ ⁹ꦱꦶꦁ​ꦱꦶꦗꦶ​ꦢꦶꦏꦺꦏ꧀ꦏꦶꦥꦼꦔꦤ꧀ꦢꦼꦭ꧀ꦒꦼꦢꦺꦏꦫꦺꦴ​ꦫꦺꦴꦃ​ꦱꦸꦕꦶ​ꦭꦤ꧀ꦱꦶꦗꦶꦤꦺ​ꦩꦼꦤꦺꦃ​ꦢꦶꦏꦺꦏ꧀ꦏꦶꦏꦥꦶꦤ꧀ꦠꦼꦂꦫꦤ꧀ꦤꦩ꧀ꦧꦤꦶ​ꦮꦺꦴꦁ​ꦭꦫ​꧉​ ¹⁰ꦲꦺꦤꦺꦁꦲꦸꦒ​ꦱꦶꦁ​ꦢꦶꦏꦺꦏ꧀ꦏꦶꦥꦔ꧀ꦮꦱ​ꦏꦫꦺꦴ​ꦫꦺꦴꦃ​ꦱꦸꦕꦶ​ꦱꦸꦥꦪ​ꦧꦶꦱ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ ꦭꦶꦪꦤꦺ​ꦩꦼꦤꦺꦃ​ꦢꦶꦏꦺꦏ꧀ꦏꦶꦏꦥꦶꦤ꧀ꦠꦼꦂꦫꦤ꧀ꦏꦁꦒꦺꦴ​ꦩꦼꦩꦸꦭꦁ​ꦭꦤ꧀ꦲꦺꦤꦺꦁꦩꦼꦤꦺꦃ​ꦱꦶꦁ​ꦢꦶꦏꦺꦏ꧀ꦏꦶꦏꦥꦶꦤ꧀ꦠꦼꦂꦫꦤ꧀ꦏꦁꦒꦺꦴ​ꦤꦶꦠꦺꦤ꧀ꦤꦶ​ꦭꦤ꧀​ꦩ꧀ꦧꦺꦢꦏ꧀ꦏꦏꦺꦫꦺꦴꦃ​ꦱꦶꦁ​ꦱꦁꦏꦒꦸꦱ꧀ꦠꦶ​ꦭꦤ꧀ꦫꦺꦴꦃꦫꦺꦴꦃ​ꦱꦶꦁ​ꦲꦭ​꧉​ꦲꦺꦤꦺꦁꦱꦶꦁ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦱꦶꦁ​ꦩꦫꦏ꧀ꦏꦏꦺꦧꦶꦱ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀ꦭꦤ꧀ꦭꦶꦪꦤꦺ​ꦩꦼꦤꦺꦃ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦏꦁꦒꦺꦴ​ꦤ꧀ꦢꦸꦤꦸꦁꦔꦏꦺꦠꦼꦒꦼꦱ꧀ꦱꦺ​ꦧꦱ​ꦏꦱꦸꦏ꧀ꦩꦤ꧀ꦏꦸꦮꦶ​꧉​ ¹¹ꦏꦸꦮꦶ​ꦏꦧꦺꦃ​ꦥꦼꦁꦒꦮꦺꦤꦺ​ꦫꦺꦴꦃ​ꦱꦸꦕꦶ​꧈​ꦢꦺꦏ꧀ꦤꦺꦔꦼꦏꦺꦏ꧀ꦏꦶꦏꦥꦶꦤ꧀ꦠꦼꦂꦫꦤ꧀ꦩꦫꦁ​ꦱꦼꦢꦸꦭꦸꦂ​ꦱꦶꦗꦶꦱꦶꦗꦶꦤꦺ​ꦩꦤꦸꦠ꧀ꦏꦉꦥ꧀ꦥꦺ​ꦢꦺꦏ꧀ꦤꦺꦢꦺꦮꦺ꧉​

꧋ꦧꦢꦤ꧀ꦱꦶꦗꦶ​꧈​ꦤꦁꦔꦶꦁ​ꦥꦺꦫꦁꦔꦤ꧀ꦤꦺ​ꦲꦺꦴꦏꦺꦃ꧉​

¹²꧋ꦥꦫ​ꦱꦼꦢꦸꦭꦸꦂ​꧈​ꦏꦿꦶꦱ꧀ꦡꦸꦱ꧀ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦧꦢꦤ꧀ꦱꦶꦗꦶ​ꦱꦶꦁ​ꦲꦺꦴꦏꦺꦃꦥꦺꦫꦁꦔꦤ꧀ꦤꦺ​꧉​ꦱꦼꦤꦗꦤ꧀ꦥꦺꦫꦁꦔꦤ꧀ꦤꦺ​ꦲꦺꦴꦏꦺꦃ꧈​ꦤꦁꦔꦶꦁ​ꦲꦮꦏ꧀ꦏꦺ​ꦤꦩꦸꦁ​ꦱꦶꦗꦶ​꧉​ ¹³ꦱꦼꦩꦺꦴꦤꦺꦴ​ꦲꦸꦒ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦧꦺꦃ​꧈​ꦲꦺꦴꦫ​ꦢꦢꦶ​ꦱꦼꦧꦧ꧀ꦮꦺꦴꦁ​ꦙꦸ꧈​ꦮꦺꦴꦁ​ꦒꦿꦶꦏ꧀ ꦱ꧀ꦭꦥ꦳꧀ꦲꦥ​ꦮꦺꦴꦁ​ꦩꦼꦂꦢꦺꦏ꧈​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦏꦼꦧꦥ꧀ꦠꦶꦱ꧀ꦢꦢꦶ​ꦧꦢꦤ꧀ꦱꦶꦗꦶ​ꦭꦤ꧀ꦫꦺꦴꦃ​ꦱꦸꦕꦶ​ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦏꦧꦺꦃ​꧉​

¹⁴꧋ꦤꦺꦏ꧀ꦢꦶꦥꦶꦏꦶꦂ​꧈​ꦧꦢꦤ꧀ꦲꦶꦏꦶ​ꦲꦺꦤꦺꦁꦔꦺꦲꦺꦴꦫ​ꦤꦩꦸꦁ​ꦱꦁꦏꦥꦺꦫꦁꦔꦤ꧀ꦱꦶꦗꦶ​꧈​ꦲꦺꦴꦫ​꧈​ꦤꦁꦔꦶꦁ​ꦱꦁꦏꦥꦺꦫꦁꦔꦤ꧀ꦲꦺꦴꦏꦺꦃ꧉​ ¹⁵ꦒꦩ꧀ꦥꦁꦔꦺ​ꦲꦺꦴꦩꦺꦴꦁ​꧈​ꦱꦶꦏꦶꦭ꧀ꦧꦶꦱ​ꦔꦺꦴꦩꦺꦴꦁ:“ꦲꦏꦸ​ꦢꦸꦢꦸ​ꦠꦔꦤ꧀ ꦩꦸꦭꦤꦺ​ꦲꦏꦸ​ꦲꦺꦴꦫ​ꦥꦺꦫꦁꦔꦤ꧀ꦤꦺ​ꦧꦢꦤ꧀ꦤꦺ​꧉”ꦏꦼꦥꦿꦶꦪꦺ​ꦮꦲꦺ​꧈​ꦒꦼꦊꦩ꧀ꦲꦺꦴꦫ​ꦒꦼꦊꦩ꧀ ꦱꦶꦏꦶꦭ꧀ꦪ​ꦢꦢꦶ​ꦥꦺꦫꦁꦔꦤ꧀ꦤꦺ​ꦧꦢꦤ꧀ꦤꦺ​꧉​ ¹⁶ꦲꦸꦒ​ꦏꦸꦥꦶꦁ​ꦧꦶꦱ​ꦔꦺꦴꦩꦺꦴꦁ:“ꦗꦭꦂꦫꦤ꧀ꦲꦏꦸ​ꦢꦸꦢꦸ​ꦩꦿꦶꦥꦠ꧀ ꦲꦏꦸ​ꦲꦺꦴꦫ​ꦥꦺꦫꦁꦔꦤ꧀ꦤꦺ​ꦧꦢꦤ꧀ꦤꦺ​꧉”ꦱꦼꦤꦼꦁ​ꦲꦺꦴꦫ​ꦱꦼꦤꦼꦁ​ꦏꦸꦥꦶꦁ​ꦪ​ꦥꦺꦫꦁꦔꦤ꧀ꦤꦺ​ꦧꦢꦤ꧀ꦤꦺ​꧉​ ¹⁷ꦥꦫ​ꦱꦼꦢꦸꦭꦸꦂ​꧈​ꦱꦼꦩꦸꦁꦒꦺꦴꦤ꧀ꦤꦺꦧꦢꦤ꧀ꦱꦏ꧀ꦏꦸꦗꦸꦂꦤꦩꦸꦁ​ꦩꦿꦶꦥꦠ꧀ ꦭꦃ​ꦏꦼꦥꦿꦶꦪꦺ​ꦧꦶꦱꦤꦺ​ꦏꦿꦸꦔꦸ​?ꦭꦤ꧀ꦱꦼꦩꦸꦁꦒꦺꦴꦤ꧀ꦤꦺꦧꦢꦤ꧀ꦲꦶꦏꦶ​ꦤꦩꦸꦁ​ꦏꦸꦥꦶꦁ​꧈​ꦏꦼꦥꦿꦶꦪꦺ​ꦧꦶꦱꦤꦺ​ꦔꦩ꧀ꦧꦸ​? ¹⁸ꦥꦚ꧀ꦕꦺꦤ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦔ꧀ꦒꦮꦺ​ꦮꦼꦂꦤꦮꦼꦂꦤ​ꦥꦺꦫꦁꦔꦤ꧀ꦱꦶꦁ​ꦢꦶꦏꦺꦏ꧀ꦏꦶꦥꦁꦒꦺꦴꦤ꧀ꦤꦤ꧀ꦤꦺ​ꦢꦺꦮꦺꦢꦺꦮꦺꦤꦁꦧꦢꦤ꧀ꦤꦺ​꧈​ꦩꦤꦸꦠ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​ ¹⁹ꦪ​ꦒꦺꦏ꧀ꦏꦼꦥꦿꦶꦪꦺ​ꦱꦼꦩꦸꦁꦒꦺꦴꦤ꧀ꦤꦺꦲꦺꦤꦺꦁꦧꦢꦤ꧀ꦱꦶꦁ​ꦥꦺꦫꦁꦔꦤ꧀ꦤꦺ​ꦤꦩꦸꦁ​ꦱꦶꦗꦶ​꧉​ ²⁰ꦤꦁꦔꦶꦁ​ꦮꦸꦗꦸꦠ꧀ꦠꦺꦪ​ꦥꦺꦫꦁꦔꦤ꧀ꦥꦶꦫꦁꦥꦶꦫꦁ​ꦱꦶꦁ​ꦢꦢꦶ​ꦧꦢꦤ꧀ꦱꦶꦗꦶ​꧉​

²¹꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦩꦿꦶꦥꦠ꧀ꦲꦺꦴꦫ​ꦧꦶꦱ​ꦔꦺꦴꦩꦺꦴꦁꦏꦫꦺꦴ​ꦠꦔꦤ꧀:“ꦲꦏꦸ​ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦏꦺꦴꦮꦺ​꧈​”ꦲꦥ​ꦱꦶꦫꦃ​ꦔꦺꦴꦩꦺꦴꦁꦏꦫꦺꦴ​ꦱꦶꦏꦶꦭ꧀:“ꦲꦏꦸ​ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦏꦺꦴꦮꦺ​!” ²²ꦩꦭꦃ​ꦤꦺꦏ꧀ꦢꦶꦥꦶꦏꦶꦂ​꧈​ꦥꦺꦫꦁꦔꦤ꧀ꦱꦶꦁ​ꦏꦺꦠꦺꦴꦏ꧀ꦏꦺ​ꦕꦶꦭꦶꦏ꧀ꦢꦺꦮꦺ꧈​ꦏꦸꦮꦶ​ꦩꦭꦃ​ꦱꦶꦁ​ꦢꦶꦧꦸꦠꦸꦃꦲꦏꦺꦧꦔꦼꦠ꧀꧈​ ^23-24ꦮꦸꦗꦸꦠ꧀ꦠꦺꦥꦺꦫꦁꦔꦤ꧀ꦱꦶꦁ​ꦏꦺꦠꦺꦴꦏ꧀ꦏꦺ​ꦲꦺꦴꦫ​ꦲꦺꦤꦺꦁꦲꦗꦶꦤꦺ​꧈​ꦏꦸꦮꦶ​ꦩꦭꦃ​ꦢꦶꦲꦥꦶꦏ꧀ꦲꦥꦶꦏ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦥꦺꦫꦁꦔꦤ꧀ꦤꦺ​ꦧꦢꦤ꧀ꦱꦶꦁ​ꦏꦺꦠꦺꦴꦏ꧀ꦏꦺ​ꦲꦺꦴꦫ​ꦥꦠꦺꦏꦲꦥꦶꦏ꧀ ꦱꦶꦁ​ꦢꦶꦢꦼꦭꦶꦏ꧀ꦏꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦏꦸꦮꦶ​ꦩꦭꦃ​ꦢꦶꦒꦠꦺꦏ꧀ꦏꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦥꦺꦫꦁꦔꦤ꧀ꦱꦶꦁ​ꦲꦥꦶꦏ꧀꧈​ꦏꦸꦮꦶ​ꦥꦚ꧀ꦕꦺꦤ꧀ꦮꦶꦱ꧀ꦢꦶꦠꦠ​ꦔꦺꦴꦤꦺꦴ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦥꦺꦫꦁꦔꦤ꧀ꦱꦶꦁ​ ꦏꦺꦠꦺꦴꦏ꧀ꦏꦺ​ꦲꦺꦴꦫ​ꦥꦠꦺꦏꦲꦥꦶꦏ꧀ꦧꦶꦱ​ꦏꦺꦠꦺꦴꦏ꧀ꦥꦤ꧀ꦠꦼꦱ꧀꧈​ ²⁵ꦢꦢꦶꦤꦺ​ꦤꦁꦧꦢꦤ꧀ꦏꦸꦮꦶ​ꦥꦺꦫꦔꦤ꧀ꦥꦺꦫꦔꦤ꧀ꦲꦺꦴꦫ​ꦢꦺꦮꦺꦢꦺꦮꦺ꧈​ꦤꦁꦔꦶꦁ​ꦥꦢ​ꦔꦿꦺꦮꦁꦔꦶ​ꦱꦏ꧀ꦥꦢꦥꦢ꧉​ ²⁶ꦩꦸꦭꦤꦺ​꧈​ꦤꦺꦏ꧀ꦲꦺꦤꦺꦁꦥꦺꦫꦁꦔꦤ꧀ꦱꦶꦗꦶ​ꦭꦫ​꧈​ꦥꦺꦫꦁꦔꦤ꧀ꦭꦶꦪꦭꦶꦪꦤꦺ​ꦩꦺꦭꦸ​ꦏꦿꦱ​ꦏꦧꦺꦃ​꧉​ꦱꦼꦩꦺꦴꦤꦺꦴ​ꦲꦸꦒ​꧈​ꦤꦺꦏ꧀ꦥꦺꦫꦁꦔꦤ꧀ꦱꦶꦗꦶ​ꦤꦩ꧀ꦥ​ꦥꦼꦔꦊꦩ꧀ꦩꦤ꧀ ꦭꦶꦪꦭꦶꦪꦤꦺ​ꦩꦺꦭꦸ​ꦧꦸꦔꦃ​꧉​

²⁷꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦧꦺꦃ​ꦪ​ꦠꦸꦁꦒꦭ꧀ꦭꦺ​ꦏꦫꦺꦴ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​꧈​ꦠꦼꦒꦼꦱ꧀ꦱꦺ​꧈​ꦏꦺꦴꦮꦺ​ꦏꦧꦺꦃ​ꦢꦢꦶ​ꦧꦢꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​ꦱꦧꦼꦤ꧀ꦱꦼꦢꦸꦭꦸꦂ​ꦱꦶꦗꦶꦱꦶꦗꦶꦢꦢꦶ​ꦥꦺꦫꦁꦔꦤ꧀ꦤꦺ​ꦧꦢꦤ꧀ꦏꦸꦮꦶ​꧉​ ²⁸ꦲꦶꦁ​ꦱꦏ꧀ꦗꦼꦫꦺꦴꦤꦺꦥꦱꦩꦸꦮꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦮꦶꦱ꧀ꦔꦼꦏꦺꦏ꧀ꦏꦶꦥꦁꦒꦺꦴꦤ꧀ꦤꦤ꧀ꦢꦺꦮꦺꦢꦺꦮꦺꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​꧉​ꦤꦺꦴꦩꦼꦂ​ꦱꦶꦗꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦫꦱꦸꦭ꧀ꦫꦱꦸꦭ꧀;ꦥꦶꦤ꧀ꦢꦺꦴꦤꦺꦤꦧꦶꦤꦧꦶ​;ꦏꦥꦶꦁ​ꦠꦼꦭꦸꦤꦺ​ꦒꦸꦫꦸꦒꦸꦫꦸ​;ꦠꦼꦫꦸꦱ꧀ꦲꦸꦒ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦧꦶꦱ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦔꦼꦏꦺꦏ꧀ꦏꦶꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦥꦱꦩꦸꦮꦤ꧀ꦱꦶꦁ​ꦧꦶꦱ​ꦤꦩ꧀ꦧꦤꦶ​ꦮꦺꦴꦁ​ꦭꦫ​꧉​ꦭꦶꦪꦤꦺ​ꦧꦶꦱ​ꦠꦼꦠꦸꦭꦸꦁ​ꦩꦫꦁ​ꦮꦺꦴꦁ​ꦭꦶꦪ​ꦭꦤ꧀ꦭꦶꦪꦤꦺ​ꦩꦼꦤꦺꦃ​ꦧꦶꦱ​ꦢꦢꦶ​ꦥꦼꦤꦸꦤ꧀ꦠꦸꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​꧉​ꦲꦸꦒ​ꦲꦺꦤꦺꦁꦱꦶꦁ​ꦧꦶꦱ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀꧈​ ²⁹ꦢꦶꦥꦶꦏꦶꦂ​ꦢꦺꦮꦺꦠ​꧈​ꦲꦥ​ꦏꦧꦺꦃ​ꦢꦢꦶ​ꦫꦱꦸꦭ꧀ꦭꦤ꧀ꦲꦥ​ꦪ​ꦏꦧꦺꦃ​ꦢꦢꦶ​ꦤꦧꦶ​ꦲꦥ​ꦒꦸꦫꦸ​꧈​ꦪ​ꦲꦺꦴꦫ​ꦠ​!ꦲꦥ​ꦪ​ꦏꦧꦺꦃ​ꦧꦶꦱ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀? ³⁰ꦲꦥ​ꦪ​ꦏꦧꦺꦃ​ꦧꦶꦱ​ꦤꦩ꧀ꦧꦤꦶ​ꦮꦺꦴꦁ​ꦭꦫ​ꦭꦤ꧀ꦲꦥ​ꦪ​ꦏꦧꦺꦃ​ꦧꦶꦱ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀ꦭꦤ꧀​ꦤ꧀ꦢꦸꦤꦸꦁꦔꦏꦺꦠꦼꦒꦼꦱ꧀ꦱꦺ​ꦧꦱ​ꦏꦸꦮꦶ​꧉​ ³¹ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦥꦢ​ꦔꦸꦢꦶꦪ​ꦧꦶꦱ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦱꦶꦁ​ꦢꦸꦮꦸꦂꦢꦺꦮꦺ꧉​

↑ ↑ ↑

꧋ꦏꦠꦿꦺꦱ꧀ꦤꦤ꧀꧈​

ꦤꦁꦔꦶꦁ​ꦱꦲꦶꦏꦶ​ꦲꦉꦥ꧀ꦠꦏ꧀ꦢꦸꦢꦸꦃꦲꦶꦢꦭꦤ꧀ꦱꦶꦁ​ꦲꦥꦶꦏ꧀ꦢꦺꦮꦺ꧉​

꧇​꧑꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦼꦤꦗꦤ꧀ꦲꦏꦸ​ꦧꦶꦱ​ꦔꦺꦴꦩꦺꦴꦁꦱꦏ꧀ꦲꦺꦤꦺꦁꦔꦺꦧꦱꦤꦺ​ꦩꦤꦸꦁꦱ​ꦭꦤ꧀ꦧꦱꦤꦺ​ꦩꦸꦭꦺꦏꦠ꧀ꦥꦶꦱꦤ꧀ ꦤꦁꦔꦶꦁ​ꦤꦺꦏ꧀ꦲꦏꦸ​ꦲꦺꦴꦫ​ꦤ꧀ꦢꦸꦮꦺꦏꦠꦿꦺꦱ꧀ꦤꦤ꧀ ꦠꦼꦩ꧀ꦧꦸꦁꦏꦸ​ꦏꦪ​ꦒꦺꦴꦁ​ꦱꦶꦁ​ꦩ꧀ꦧꦽꦧꦼꦏ꧀ꦏꦶꦏꦸꦥꦶꦁ​ꦭꦤ꧀ꦏꦪ​ꦭꦺꦴꦚ꧀ꦕꦺꦁ​ꦱꦶꦁ​ꦥꦠꦶꦁ​ꦏ꧀ꦭꦺꦴꦤꦺꦁ꧉​

²꧋ꦱꦼꦤꦗꦤ꧀ꦲꦏꦸ​ꦧꦶꦱ​ꦤꦩ꧀ꦥ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦩꦤꦸꦁꦱ​ꦭꦤ꧀ꦧꦶꦱ​ꦩꦔꦼꦂꦠꦺꦤ꧀ꦤꦶꦏꦮꦼꦫꦸꦃꦏꦧꦺꦃ​ꦱꦶꦁ​ꦢꦶꦱꦶꦩ꧀ꦥꦼꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦧꦶꦱ​ꦩꦔꦼꦂꦠꦺꦤ꧀ꦤꦶꦱꦼꦩ꧀ꦧꦫꦁ​ꦱꦶꦁ​ꦏꦼꦤꦺꦁꦢꦶꦔꦼꦂꦠꦺꦤ꧀ꦤꦶ​ꦭꦤ꧀ꦱꦼꦤꦗꦤ꧀ꦤ​ꦲꦏꦸ​ꦤ꧀ꦢꦸꦮꦺꦥꦼꦔꦤ꧀ꦢꦼꦭ꧀ꦱꦶꦁ​ꦒꦼꦢꦺꦱꦩ꧀ꦥꦺꦏ꧀ꦧꦶꦱ​ꦚꦸꦫꦸꦁ​ꦒꦸꦤꦸꦁ​꧈​ꦤꦁꦔꦶꦁ​ꦤꦺꦏ꧀ꦲꦏꦸ​ꦲꦺꦴꦫ​ꦤ꧀ꦢꦸꦮꦺꦏꦠꦿꦺꦱ꧀ꦤꦤ꧀ ꦲꦏꦸ​ꦲꦺꦴꦫ​ꦲꦺꦤꦺꦁꦲꦗꦶꦤꦺ​ꦧ꧀ꦭꦱ꧀꧈​

³꧋ꦱꦼꦤꦗꦤ꧀ꦏꦧꦺꦃ​ꦤ꧀ꦢꦸꦮꦺꦩꦸꦠꦏ꧀ꦏꦺꦏ꧀ꦏꦏꦺꦏꦁꦒꦺꦴ​ꦔꦿꦸꦩꦠ꧀ꦠꦶ​ꦮꦺꦴꦁ​ꦱꦶꦁ​ꦩ꧀ꦭꦫꦠ꧀ꦭꦤ꧀ꦲꦮꦏ꧀ꦏꦸ​ꦥꦶꦱꦤ꧀ꦠꦏ꧀ꦏꦺꦏ꧀ꦏꦏꦺꦧꦺꦤ꧀ꦢꦶꦲꦺꦴꦧꦺꦴꦁ​꧈​ꦤꦁꦔꦶꦁ​ꦤꦺꦏ꧀ꦲꦏꦸ​ꦲꦺꦴꦫ​ꦤ꧀ꦢꦸꦮꦺꦏꦠꦿꦺꦱ꧀ꦤꦤ꧀ ꦏꦧꦺꦃ​ꦩꦲꦸ​ꦲꦺꦴꦫ​ꦏꦁꦒꦺꦴ​ꦒꦮꦺ​꧉​

⁴꧋ꦏꦠꦿꦺꦱ꧀ꦤꦤ꧀ꦏꦸꦮꦶ​ꦱꦧꦂ​ꦭꦤ꧀ꦒꦼꦩꦠꦶ​꧈​ꦲꦺꦴꦫ​ꦩꦺꦫꦶ​꧈​ꦲꦺꦴꦫ​ꦱꦺꦴꦩ꧀ꦧꦺꦴꦁꦭꦤ꧀ꦲꦺꦴꦫ​ꦒꦼꦩꦸꦁꦒꦸꦁ​꧉​ ⁵ꦏꦠꦿꦺꦱ꧀ꦤꦤ꧀ꦲꦺꦴꦫ​ꦏꦸꦫꦁꦔꦗꦂꦭꦤ꧀ꦲꦺꦴꦫ​ꦔ꧀ꦒꦺꦴꦭꦺꦏ꧀ꦩꦼꦤꦁꦔꦺ​ꦢꦺꦮꦺ;ꦲꦺꦴꦫ​ꦒꦩ꧀ꦥꦁ​ꦏꦼꦕꦼꦤ꧀ꦠꦺꦴꦏ꧀​ꦭꦤ꧀ꦲꦺꦴꦫ​ꦔꦼꦤ꧀ꦢꦼꦩ꧀ꦱꦭꦃꦲꦺ​ꦭꦶꦪꦤꦺ​ꦲꦶꦁ​ꦲꦠꦶ​꧉​ ⁶ꦏꦠꦿꦺꦱ꧀ꦤꦤ꧀ꦲꦺꦴꦫ​ꦱꦼꦤꦼꦁ​ꦩꦫꦁ​ꦧꦫꦁ​ꦲꦭ​꧈​ꦤꦁꦔꦶꦁ​ꦱꦼꦤꦼꦁ​ꦩꦫꦁ​ꦏꦧꦼꦕꦶꦏ꧀ꦏꦤ꧀꧈​ ⁷ꦏꦠꦿꦺꦱ꧀ꦤꦤ꧀ꦏꦸꦮꦶ​ꦲꦺꦴꦫ​ꦠꦲꦸ​ꦱꦼꦩ꧀ꦥ꧀ꦭꦏ꧀ ꦤꦁꦔꦶꦁ​ꦥꦽꦕꦪ​꧈​ꦔꦉꦥ꧀ꦲꦉꦥ꧀ꦭꦤ꧀ꦱꦧꦂ​ꦠꦼꦫꦸꦱ꧀꧈​

⁸꧋ꦏꦠꦿꦺꦱ꧀ꦤꦤ꧀ꦏꦸꦮꦶ​ꦲꦺꦴꦫ​ꦲꦺꦤꦺꦁꦲꦼꦤ꧀ꦠꦺꦏ꧀ꦏꦺ​꧉​ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦏꦁꦒꦺꦴ​ꦱꦼꦢꦶꦭꦸꦠ꧀ ꦧꦱ​ꦏꦱꦸꦏ꧀ꦩꦤ꧀ꦧꦏꦭ꧀ꦩꦤ꧀ꦢꦼꦏ꧀ꦭꦤ꧀ꦥꦔꦼꦂꦠꦶ​ꦧꦏꦭ꧀ꦲꦶꦭꦁ​꧉​ ^9-10ꦲꦮꦶꦠ꧀ꦥꦔꦼꦂꦠꦶ​ꦭꦤ꧀ꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦢꦶꦏꦺꦏ꧀ꦏꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦢꦸꦫꦸꦁ​ꦱꦏ꧀ꦏꦧꦺꦃꦲꦺ꧈​ꦤꦁꦔꦶꦁ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦔꦼꦂꦠꦶ​ꦱꦏ꧀ꦏꦧꦺꦃꦲꦺ꧉​ꦥꦔꦼꦂꦠꦶꦤꦺꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦧꦏꦭ꧀ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​ꦧ꧀ꦭꦱ꧀꧈​

¹¹꧋ꦢꦺꦴꦁꦔꦺꦲꦏꦸ​ꦲꦶꦗꦶꦏ꧀ꦧꦺꦴꦕꦃ​꧈​ꦲꦺꦴꦩꦺꦴꦔꦤ꧀ꦏꦸ꧈​ꦥꦔꦿꦱꦏꦸ​ꦭꦤ꧀ꦥꦶꦏꦶꦂꦫꦤ꧀ꦏꦸ​ꦪ​ꦏꦪ​ꦧꦺꦴꦕꦃ​꧉​ꦤꦁꦔꦶꦁ​ꦱꦲꦶꦏꦶ​꧈​ꦱꦏ꧀ꦮꦶꦱ꧀ꦱꦺ​ꦲꦏꦸ​ꦢꦶꦮꦱ​꧈​ꦲꦏꦸ​ꦮꦶꦱ꧀ꦲꦺꦴꦫ​ꦏꦪ​ꦔꦺꦴꦤꦺꦴ​ꦩꦼꦤꦺꦃ​꧉​ꦱꦲꦶꦏꦶ​ꦥꦔꦼꦂꦠꦶꦏꦸꦭꦤ꧀ꦏꦥꦶꦤ꧀ꦠꦼꦫꦤ꧀ꦏꦸꦪ​ꦩꦸꦤ꧀ꦢꦏ꧀꧈​ ¹²ꦱꦼꦩꦺꦴꦤꦺꦴ​ꦲꦸꦒ​꧈​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦮꦼꦫꦸꦃꦲꦺꦤꦩꦸꦁ​ꦭꦩꦠ꧀ꦭꦩꦠ꧀ ꦏꦪ​ꦤꦁꦏꦕ​ꦉꦒꦼꦠ꧀ꦏꦲꦺ​꧉​ꦤꦁꦔꦶꦁ​ꦲꦩ꧀ꦧꦺꦱꦸꦏ꧀ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦲꦢꦼꦥ꧀ꦥꦢꦼꦥ꧀ꦥꦤ꧀ꦭꦤ꧀ꦧꦶꦱ​ꦮꦼꦫꦸꦃ​ꦱꦶꦁ​ꦩꦠ꧀꧈​ꦥꦔꦼꦂꦠꦶꦤꦺꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦤꦩꦸꦁ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧈​ꦤꦁꦔꦶꦁ​ꦲꦩ꧀ꦧꦺꦱꦸꦏ꧀ꦲꦏꦸ​ꦧꦏꦭ꧀ꦔꦼꦂꦠꦶ​ꦱꦏ꧀ꦏꦧꦺꦃꦲꦺ꧈​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦂꦠꦶ​ꦩꦫꦁ​ꦲꦏꦸ​꧉​

¹³꧋ꦠꦼꦭꦸꦁ​ꦥꦽꦏꦫ​ꦲꦶꦏꦶ​ꦧꦏꦭ꧀ꦲꦺꦤꦺꦁꦠꦼꦫꦸꦱ꧀ ꦪꦏꦸꦮꦶ​:ꦥꦽꦕꦪ​꧈​ꦥꦼꦔꦉꦥ꧀ꦲꦉꦥ꧀ꦭꦤ꧀ꦏꦠꦿꦺꦱ꧀ꦤꦤ꧀꧈​ꦤꦁꦔꦶꦁ​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦪ​ꦏꦠꦿꦺꦱ꧀ꦤꦤ꧀꧈​

↑ ↑ ↑

꧋ꦧꦧ꧀ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦧꦧ꧀ꦧꦱ​ꦏꦱꦸꦏ꧀ꦩꦤ꧀꧈​

꧇​꧑꧔꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦏꦠꦿꦺꦱ꧀ꦤꦤ꧀ꦏꦸꦮꦶ​ꦥꦼꦤ꧀ꦠꦶꦁ​ꦧꦔꦼꦠ꧀ ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦔ꧀ꦭꦸꦩꦸꦃꦲꦶꦠꦼꦤꦤ꧀ꦱꦸꦥꦪ​ꦥꦢ​ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦱꦏ꧀ꦥꦢꦥꦢ꧉​ꦤꦁꦔꦶꦁ​ꦲꦸꦒ​ꦏꦺꦴꦮꦺ​ꦏꦸꦢꦸ​ꦤ꧀ꦢꦸꦮꦺꦤ꧀ꦤꦶ​ꦏꦼꦥꦺꦔꦶꦤ꧀ꦤꦩ꧀ꦥ​ꦏꦥꦶꦤ꧀ꦠꦼꦫꦤ꧀ꦏꦥꦶꦤ꧀ꦠꦼꦂꦫꦤ꧀ꦥꦮꦺꦃꦲꦺ​ꦫꦺꦴꦃ​ꦱꦸꦕꦶ​ꦭꦤ꧀ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦧꦧ꧀ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​꧉​ ²ꦥꦫ​ꦱꦼꦢꦸꦭꦸꦂ​꧈​ꦱꦼꦢꦸꦭꦸꦂ​ꦱꦶꦁ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀ꦏꦸꦮꦶ​ꦲꦺꦴꦫ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦏꦁꦒꦺꦴ​ꦩꦤꦸꦁꦱ​꧈​ꦤꦁꦔꦶꦁ​ꦱꦼꦢꦸꦭꦸꦂ​ꦏꦸꦮꦶ​ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦤꦸꦁꦱ​ꦲꦺꦴꦫ​ꦧꦶꦱ​ꦢꦸꦤꦸꦁꦠꦼꦩ꧀ꦧꦸꦁꦔꦺ​ꦱꦼꦢꦸꦭꦸꦂ​ꦏꦸꦮꦶ​꧈​ꦲꦮꦶꦠ꧀ꦢꦺꦏ꧀ꦤꦺꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀ꦱꦁꦏꦏꦉꦥ꧀ꦥꦺ​ꦫꦺꦴꦃ​ꦱꦸꦕꦶ​꧉​ꦠꦼꦩ꧀ꦧꦸꦁ​ꦏꦸꦮꦶ​ꦩꦤꦸꦁꦱ​ꦲꦺꦴꦫ​ꦧꦶꦱ​ꦢꦸꦤꦸꦁ꧈​ꦲꦮꦶꦠ꧀ꦏꦸꦮꦶ​ꦥꦽꦏꦫꦥꦽꦏꦫ​ꦮꦼꦮꦢꦶ​꧉​ ³ꦤꦁꦔꦶꦁ​ꦱꦼꦢꦸꦭꦸꦂ​ꦱꦶꦁ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​ꦏꦸꦮꦶ​ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴ​ꦩꦤꦸꦁꦱ​ꦭꦤ꧀ꦧꦶꦱ​ꦲꦩ꧀ꦧꦔꦸꦤ꧀ ꦩꦶꦠꦸꦠꦸꦂꦫꦶ​ꦭꦤ꧀​ꦔ꧀ꦭꦶꦥꦸꦂ​꧉​ ⁴ꦱꦼꦢꦸꦭꦸꦂ​ꦱꦶꦁ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀ꦏꦸꦮꦶ​ꦤꦩꦸꦁ​ꦲꦩ꧀ꦧꦔꦸꦤ꧀ꦲꦸꦫꦶꦥ꧀ꦥꦺꦢꦺꦏ꧀ꦤꦺꦢꦺꦮꦺ꧈​ꦤꦁꦔꦶꦁ​ꦱꦼꦢꦸꦭꦸꦂ​ꦱꦶꦁ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​ꦏꦸꦮꦶ​ꦲꦩ꧀ꦧꦔꦸꦤ꧀ꦱꦼꦢꦸꦭꦸꦂ​ꦏꦧꦺꦃ​ꦱꦏ꧀ꦥꦱꦩꦸꦮꦤ꧀꧈​

⁵꧋ꦥꦚ꧀ꦕꦺꦤ꧀ ꦏꦉꦥ꧀ꦏꦸ​ꦏꦺꦴꦮꦺ​ꦧꦶꦱꦲ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀ ꦤꦁꦔꦶꦁ​ꦭꦸꦮꦶꦃ​ꦲꦥꦶꦏ꧀ꦤꦺꦏ꧀ꦏꦺꦴꦮꦺ​ꦧꦶꦱ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​ꦮꦲꦺ​꧉​ꦲꦮꦶꦠ꧀ꦱꦼꦢꦸꦭꦸꦂ​ꦱꦶꦁ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦧꦱ​ꦭꦸꦩꦿꦃ​ꦏꦸꦮꦶ​ꦲꦗꦶꦤꦺ​ꦔꦸꦁꦏꦸꦭ꧀ꦭꦶ​ꦱꦼꦢꦸꦭꦸꦂ​ꦱꦶꦁ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀;ꦏꦼꦗꦧ​ꦤꦺꦏ꧀ꦤꦁꦥꦱꦩꦸꦮꦤ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦧꦶꦱ​ꦤ꧀ꦢꦸꦤꦸꦁꦔꦏꦺꦧꦱ​ꦏꦱꦸꦏ꧀ꦩꦤ꧀ꦩꦲꦸ​꧈​ꦢꦢꦶꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦏ꧀ꦥꦱꦩꦸꦮꦤ꧀ꦧꦶꦱ​ꦏꦼꦧꦔꦸꦤ꧀ꦏꦧꦺꦃ​꧉​

⁶꧋ꦥꦫ​ꦱꦼꦢꦸꦭꦸꦂ​꧈​ꦱꦼꦩꦸꦁꦒꦺꦴꦤ꧀ꦤꦺꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦠꦼꦫꦸꦱ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦔꦁꦒꦺꦴ​ꦧꦱ​ꦏꦱꦸꦏ꧀ꦩꦤ꧀ ꦭꦃ​ꦏꦸꦮꦶ​ꦲꦥ​ꦲꦗꦶꦤꦺ​?ꦧ꧀ꦭꦱ꧀ꦲꦺꦴꦫ​ꦲꦺꦤꦺꦁ꧈​ꦏꦼꦗꦧ​ꦤꦺꦏ꧀ꦲꦏꦸ​ꦔ꧀ꦒꦮ​ꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦥ​ꦥꦔꦼꦂꦠꦶ​꧈​ꦲꦥ​ꦥꦶꦮꦸꦭꦁ​ꦔꦁꦒꦺꦴ​ꦧꦱ​ꦱꦶꦁ​ꦏꦺꦴꦮꦺ​ꦧꦶꦱ​ꦢꦸꦤꦸꦁ꧉​ ⁷ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦲꦶꦤ꧀ꦱ꧀ꦠꦿꦸꦩꦺꦤ꧀ꦤꦶꦤ꧀ꦱ꧀ꦠꦿꦸꦩꦺꦤ꧀ꦱꦶꦁ​ꦲꦺꦴꦫ​ꦲꦺꦤꦺꦁꦚꦮꦤꦺ​꧈​ꦏꦪꦢꦺꦤꦺꦱꦸꦭꦶꦁ​ꦭꦤ꧀ꦏꦶꦠꦂ꧉​ꦏꦼꦥꦿꦶꦪꦺ​ꦮꦺꦴꦁ​ꦧꦶꦱꦤꦺ​ꦔꦼꦂꦠꦶ​ꦭꦒꦸꦤꦺ​ꦤꦺꦏ꧀ꦱꦶꦁ​ꦔꦸꦤꦺꦏ꧀ꦏꦏꦺꦲꦺꦴꦫ​ꦔꦁꦒꦺꦴ​ꦱ꧀ꦮꦫ​ꦱꦶꦁ​ꦕꦼꦠ​? ⁸ꦏꦪ​ꦱꦺꦴꦭ꧀ꦢꦠ꧀ꦱꦶꦁ​ꦠꦸꦏꦁ​ꦔꦸꦤꦺꦏ꧀ꦏꦏꦺꦠꦿꦺꦴꦩ꧀ꦥꦺꦠ꧀ꦠꦺꦏꦲꦺ​꧉​ꦤꦺꦏ꧀ꦱꦶꦁ​ꦔꦸꦤꦺꦏ꧀ꦏꦏꦺꦤꦩꦸꦁ​ꦲꦁꦒꦼꦂ​ꦩꦸꦤꦶ​ꦮꦲꦺ​꧈​ꦭꦃ​ꦏꦼꦥꦿꦶꦪꦺ​ꦮꦺꦴꦁꦮꦺꦴꦁ​ꦧꦶꦱꦤꦺ​ꦩꦗꦸ​ꦲꦉꦥ꧀ꦥꦼꦫꦁ​꧉​ ⁹ꦱꦼꦩꦺꦴꦤꦺꦴ​ꦲꦸꦒ​ꦏꦺꦴꦮꦺ​꧈​ꦏꦼꦥꦿꦶꦪꦺ​ꦮꦺꦴꦁꦮꦺꦴꦁ​ꦧꦶꦱꦤꦺ​ꦢꦸꦤꦸꦁꦱꦶꦁ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁ​ꦤꦺꦏ꧀ꦠꦼꦩ꧀ꦧꦸꦁꦩꦸ​ꦲꦺꦴꦫ​ꦕꦼꦠ​꧈​ꦲꦮꦶꦠ꧀ꦏꦺꦴꦮꦺ​ꦔꦁꦒꦺꦴ​ꦧꦱ​ꦏꦱꦸꦏ꧀ꦩꦤ꧀꧈​ꦠꦼꦩ꧀ꦧꦸꦁꦠꦼꦩ꧀ꦧꦸꦁꦩꦸ​ꦧꦏꦭ꧀ꦲꦶꦭꦁ​ꦔꦁꦒꦸꦂ​꧈​ꦏꦧꦸꦂ​ꦏꦠꦸꦠ꧀ꦲꦔꦶꦤ꧀꧈​ ¹⁰ꦤꦁꦗꦒꦠ꧀ꦏꦺꦤꦺ​ꦲꦺꦤꦺꦁꦧꦱ​ꦥꦶꦫꦁꦥꦶꦫꦁ​ꦭꦤ꧀ꦱꦶꦗꦶꦱꦶꦗꦶꦤꦺ​ꦏꦼꦤꦺꦁꦢꦶꦏꦁꦒꦺꦴꦏ꧀ꦏꦏꦺꦒꦮꦺ​ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀꧈​ ¹¹ꦤꦁꦔꦶꦁ​ꦤꦺꦏ꧀ꦲꦏꦸ​ꦲꦺꦴꦫ​ꦢꦸꦤꦸꦁꦧꦱꦤꦺ​ꦱꦶꦁ​ꦢꦶꦏꦁꦒꦺꦴꦏ꧀ꦏꦏꦺꦏꦫꦺꦴ​ꦱꦏ꧀ꦮꦶꦗꦶꦤꦺꦮꦺꦴꦁ​꧈​ꦢꦢꦶꦤꦺ​ꦮꦺꦴꦁ​ꦏꦸꦮꦶ​ꦏꦁꦒꦺꦴ​ꦲꦏꦸ​ꦏꦪ​ꦮꦺꦴꦁ​ꦱꦺꦗꦺ​ꦧꦱ​ꦭꦤ꧀ꦲꦏꦸ​ꦏꦁꦒꦺꦴ​ꦮꦺꦴꦁꦔꦺ​ꦪ​ꦏꦪ​ꦮꦺꦴꦁ​ꦱꦺꦗꦺ​ꦧꦱ​꧉​

¹²꧋ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦏꦼꦥꦺꦔꦶꦤ꧀ꦤꦩ꧀ꦥ​ꦏꦥꦶꦤ꧀ꦠꦼꦫꦤ꧀ꦏꦥꦶꦤ꧀ꦠꦼꦂꦫꦤ꧀ꦥꦮꦺꦃꦲꦺ​ꦫꦺꦴꦃ​ꦱꦸꦕꦶ​꧈​ꦲꦩ꧀ꦧꦺꦴꦏ꧀ꦱꦏ꧀ꦧꦶꦱꦧꦶꦱꦩꦸꦥꦢ​ꦔ꧀ꦒꦺꦴꦭꦺꦏ꧀ꦏꦤ​ꦏꦥꦶꦤ꧀ꦠꦼꦂꦫꦤ꧀ꦤꦺ​ꦫꦺꦴꦃ​ꦱꦸꦕꦶ​ꦱꦶꦁ​ꦧꦶꦱ​ꦲꦩ꧀ꦧꦔꦸꦤ꧀ꦱꦏ꧀ꦥꦱꦩꦸꦮꦤ꧀ ꦲꦺꦴꦫ​ꦱꦶꦁ​ꦤꦩꦸꦁ​ꦲꦩ꧀ꦧꦔꦸꦤ꧀ꦏꦺꦴꦮꦺ​ꦢꦺꦮꦺ꧉​

¹³꧋ꦩꦸꦭꦤꦺ​꧈​ꦱꦼꦢꦸꦭꦸꦂ​ꦱꦶꦁ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀ꦏꦸꦮꦶ​ꦏꦸꦢꦸ​ꦚꦸꦮꦸꦤ꧀ꦱꦸꦥꦪ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦧꦶꦱ​ꦤ꧀ꦢꦸꦤꦸꦁꦔꦏꦺꦲꦥ​ꦱꦶꦁ​ꦢꦶꦲꦺꦴꦩꦺꦴꦁꦔꦁꦒꦺꦴ​ꦧꦱ​ꦏꦱꦸꦏ꧀ꦩꦤ꧀ꦩꦲꦸ​꧉​ ¹⁴ꦲꦮꦶꦠ꧀ꦤꦺꦏ꧀ꦲꦏꦸ​ꦤ꧀ꦢꦺꦴꦁꦔꦔꦁꦒꦺꦴ​ꦧꦱ​ꦏꦱꦸꦏ꧀ꦩꦤ꧀ ꦪ​ꦧꦼꦤꦼꦂ​ꦏꦱꦸꦏ꧀ꦩꦤ꧀ꦏꦸꦤ꧀ꦢꦼꦢꦺꦴꦔ​꧈​ꦤꦁꦔꦶꦁ​ꦥꦶꦏꦶꦂꦫꦤ꧀ꦏꦸ​ꦲꦺꦴꦫ​ꦩꦺꦭꦸ​ꦤ꧀ꦢꦺꦴꦁꦔ꧉​ ¹⁵ꦭꦃ​ꦱꦏ꧀ꦗꦤꦺꦏꦸꦢꦸꦤꦺ​ꦏꦼꦥꦿꦶꦪꦺ​?ꦏꦸꦢꦸꦤꦺ​ꦔꦺꦤꦺ​:ꦲꦏꦸ​ꦏꦸꦢꦸ​ꦤ꧀ꦢꦼꦢꦺꦴꦔ​ꦔꦁꦒꦺꦴ​ꦧꦱ​ꦏꦱꦸꦏ꧀ꦩꦤ꧀ ꦤꦁꦔꦶꦁ​ꦲꦏꦸ​ꦲꦸꦒ​ꦏꦸꦢꦸ​ꦤ꧀ꦢꦼꦢꦺꦴꦔ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​꧉​ꦱꦼꦩꦺꦴꦤꦺꦴ​ꦲꦸꦒ​ꦲꦏꦸ​ꦏꦼꦥꦺꦔꦶꦤ꧀ꦩꦼꦩꦸꦗꦶ​ꦔꦁꦒꦺꦴ​ꦧꦱ​ꦏꦱꦸꦏ꧀ꦩꦤ꧀ꦭꦤ꧀ꦲꦸꦒ​ꦩꦼꦩꦸꦗꦶ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​꧉​ ¹⁶ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦏꦺꦴꦮꦺ​ꦩꦼꦩꦸꦗꦶ​ꦭꦤ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦔꦁꦒꦺꦴ​ꦧꦱ​ꦏꦱꦸꦏ꧀ꦩꦤ꧀ꦮꦲꦺ​꧈​ꦭꦃ​ꦏꦼꦥꦿꦶꦪꦺ​ꦱꦼꦢꦸꦭꦸꦂ​ꦭꦶꦪꦤꦺ​ꦱꦶꦁ​ꦩꦺꦭꦸ​ꦏꦸꦩ꧀ꦥꦸꦭ꧀ꦭꦤ꧀ꦧꦶꦱꦤꦺ​ꦔꦺꦴꦩꦺꦴꦁ“ꦄꦩꦺꦤ꧀ ”ꦏꦁꦒꦺꦴ​ꦠꦤ꧀ꦢꦤꦺꦏ꧀ꦱꦼꦠꦸꦗꦸ​ꦏꦫꦺꦴ​ꦠꦼꦩ꧀ꦧꦸꦁꦩꦸ​;ꦭꦃ​ꦮꦺꦴꦁꦔꦺ​ꦲꦺꦴꦫ​ꦔꦼꦂꦠꦶ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁ​꧉​ ¹⁷ꦲꦼꦁꦒꦺꦴꦤ꧀ꦩꦸ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦏꦸꦮꦶ​ ꦥꦚ꧀ꦕꦺꦤ꧀ꦪ​ꦧꦼꦤꦼꦂ​ꦧꦔꦼꦠ꧀ ꦤꦁꦔꦶꦁ​ꦮꦺꦴꦁ​ꦭꦶꦪꦤꦺ​ꦲꦺꦴꦫ​ꦏꦼꦧꦔꦸꦤ꧀​ꦧ꧀ꦭꦱ꧀꧈​

¹⁸꧋ꦲꦏꦸ​ꦗꦤ꧀ꦩꦠꦸꦂꦏꦼꦱꦸꦮꦸꦤ꧀ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦏꦸ​ꦧꦶꦱ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀ ꦩꦭꦃ​ꦔꦸꦁꦏꦸꦭ꧀ꦭꦶ​ꦏꦺꦴꦮꦺ​ꦏꦧꦺꦃ​꧉​ ¹⁹ꦤꦁꦔꦶꦁ​ꦤꦁꦥꦱꦩꦸꦮꦤ꧀ꦲꦏꦸ​ꦭꦸꦮꦸꦁꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦏ꧀ꦏꦼꦕꦥ꧀ꦫꦺꦴꦁ​ꦏꦼꦕꦥ꧀​ꦱꦶꦁ​ꦭꦶꦪꦤꦺ​ꦧꦶꦱ​ꦢꦸꦤꦸꦁ꧈​ꦱꦸꦥꦪ​ꦧꦶꦱ​ꦏꦼꦧꦔꦸꦤ꧀ ꦠꦼꦤꦶꦩ꧀ꦧꦁꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦲꦺꦮꦺꦴꦤ꧀ꦤꦺꦮꦺꦴꦤ꧀ꦔꦁꦒꦺꦴ​ꦧꦱ​ꦏꦱꦸꦏ꧀ꦩꦤ꧀ ꦤꦁꦔꦶꦁ​ꦭꦶꦪꦤꦺ​ꦲꦺꦴꦫ​ꦧꦶꦱ​ꦢꦸꦤꦸꦁ꧉​

²⁰꧋ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦴꦏ꧀ꦥꦶꦏꦶꦂꦫꦤ꧀ꦩꦸ​ꦲꦗ​ꦏꦪ​ꦥꦶꦏꦶꦂꦫꦤ꧀ꦤꦺ​ꦧꦺꦴꦕꦃ​ꦔꦺꦴꦤꦺꦴ​꧉​ꦲꦶꦁ​ꦥꦽꦏꦫ​ꦱꦶꦁ​ꦲꦭ​ꦏꦺꦴꦮꦺ​ꦏꦼꦤꦺꦁꦏꦪ​ꦧꦺꦴꦕꦃ​ꦱꦶꦁ​ꦢꦸꦫꦸꦁ​ꦔꦼꦂꦠꦶ​ꦧꦺꦢꦤꦺ​ꦲꦭ​ꦭꦤ꧀ꦧꦼꦕꦶꦏ꧀꧈​ꦤꦁꦔꦶꦁ​ꦤꦺꦏ꧀ꦩꦶꦏꦶꦂ​ꦏꦸꦮꦶ​ꦏꦺꦴꦮꦺ​ꦏꦸꦢꦸ​ꦏꦪ​ꦮꦺꦴꦁ​ꦱꦶꦁ​ꦮꦶꦱ꧀ꦢꦶꦮꦱ​꧉​ ²¹ꦤꦁꦏꦶꦠꦧ꧀ꦏꦼꦠꦸꦭꦶꦱ꧀ꦔꦺꦤꦺ​ꦧꦧ꧀ꦲꦶꦏꦶ​:

“ꦒꦸꦱ꧀ꦠꦶ​ꦔꦺꦴꦩꦺꦴꦁ:
ꦲꦏꦸ​ꦧꦏꦭ꧀ꦔꦺꦴꦩꦺꦴꦁꦩꦫꦁ​ꦧꦁꦱ​ꦲꦶꦏꦶ​
ꦔꦁꦒꦺꦴ​ꦧꦱꦧꦱ​ꦭꦶꦪ​
ꦭꦤ꧀ꦭꦤ꧀ꦠꦂꦫꦤ꧀ꦮꦺꦴꦁꦮꦺꦴꦁ​ꦱꦁꦏꦭꦶꦪ​ꦤꦼꦒꦫ​꧈​
ꦤꦁꦔꦶꦁ​ꦧꦁꦱ​ꦲꦶꦏꦶ​ꦩꦼꦏ꧀ꦱ​
ꦲꦺꦴꦫ​ꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺꦩꦫꦁ​ꦲꦏꦸ​꧉​”

²²ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦧꦱ​ꦏꦱꦸꦏ꧀ꦩꦤ꧀ꦏꦸꦮꦶ​ꦲꦺꦴꦫ​ꦩꦫꦏ꧀ꦏꦏꦺꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦠꦼꦫꦸꦱ꧀ꦧꦶꦱ​ꦢꦢꦶ​ꦮꦺꦴꦁ​ꦥꦽꦕꦪ​꧈​ꦲꦺꦴꦫ​꧉​ꦤꦁꦔꦶꦁ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​ꦏꦸꦮꦶ​ꦧꦶꦱ​ꦩꦫꦏ꧀ꦏꦏꦺꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦭꦶꦃ​ꦧꦶꦱ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​꧉​

²³꧋ꦱꦼꦩꦸꦁꦒꦺꦴꦤ꧀ꦤꦺꦤꦁꦏꦸꦩ꧀ꦥꦸꦭ꧀ꦭꦤ꧀ꦮꦺꦴꦁ​ꦱꦏ꧀ꦥꦱꦩꦸꦮꦤ꧀ꦏꦧꦺꦃ​ꦥꦢ​ꦤ꧀ꦢꦺꦴꦁꦔꦔꦁꦒꦺꦴ​ꦧꦱ​ꦏꦱꦸꦏ꧀ꦩꦤ꧀ ꦭꦃ​ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦠꦼꦏ​꧈​ꦮꦺꦴꦁꦮꦺꦴꦁ​ꦏꦸꦮꦶ​ꦲꦥ​ꦲꦺꦴꦫ​ꦠꦼꦫꦸꦱ꧀ꦩꦶꦏꦶꦂ​ꦤꦺꦏ꧀ꦏꦺꦴꦮꦺ​ꦲꦺꦢꦤ꧀ꦏꦧꦺꦃ​? ²⁴ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦏꦧꦺꦃ​ꦥꦢ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​꧈​ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦲꦥ​ꦮꦺꦴꦁ​ꦚ꧀ꦗꦧ​ꦱꦶꦁ​ꦏꦼꦥꦺꦔꦶꦤ꧀ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦠꦼꦏ​꧈​ꦩꦼꦱ꧀ꦠꦶꦮꦺꦴꦁ​ꦏꦸꦮꦶ​ꦧꦏꦭ꧀ꦔꦿꦸꦩꦁꦱꦤꦶ​ꦢꦺꦴꦱꦢꦺꦴꦱꦤꦺ​꧈​ꦗꦭꦂꦫꦤ꧀ꦱꦁꦏꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦱꦶꦁ​ꦢꦶꦲꦼꦠꦺꦴꦏ꧀ꦏꦏꦺꦩꦲꦸ​꧉​ꦢꦢꦶꦤꦺ​ꦮꦺꦴꦁ​ꦏꦸꦮꦶ​ꦧꦏꦭ꧀ꦫꦸꦩꦁꦱ​ꦢꦶꦮꦺꦭꦺꦏ꧀ꦏꦏꦺꦱꦁꦏꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦩꦲꦸ​꧉​ ²⁵ꦥꦽꦏꦫꦥꦽꦏꦫ​ꦱꦶꦁ​ꦏꦱꦶꦩ꧀ꦥꦼꦤ꧀ꦲꦶꦁ​ꦲꦠꦶꦤꦺ​ꦧꦏꦭ꧀ꦩꦼꦠꦸ​ꦏꦧꦺꦃ​ꦭꦤ꧀ꦮꦺꦴꦁꦔꦺ​ꦧꦏꦭ꧀ꦤꦶꦧ​ꦔꦧꦼꦏ꧀ꦠꦶ​ꦩꦫꦁ​ꦒꦸꦱ꧀ꦠꦶ​ꦭꦤ꧀ꦔꦏꦺꦴꦤ꧀ꦤꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦠꦺꦴꦏ꧀ꦠꦼꦤꦤ꧀ꦤꦁꦠꦼꦔꦃꦩꦸ​꧉​

꧋ꦥꦼꦂꦤꦠ꧀ꦠꦤ꧀ꦏꦁꦒꦺꦴ​ꦏꦸꦩ꧀ꦥꦸꦭ꧀ꦭꦤ꧀꧈​

²⁶꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦏꦺꦴꦮꦺ​ꦥꦢ​ꦔꦸꦩ꧀ꦥꦸꦭ꧀ꦤꦁꦥꦱꦩꦸꦮꦤ꧀ ꦲꦥꦶꦏ꧀ꦏꦺ​ꦤꦺꦏ꧀ꦲꦺꦤꦺꦁꦱꦶꦁ​ꦱꦶꦔꦶ꧈​ꦲꦺꦤꦺꦁꦱꦶꦁ​ꦩꦸꦭꦁ​꧈​ꦲꦺꦤꦺꦁꦱꦶꦁ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​꧈​ꦲꦺꦤꦺꦁꦱꦶꦁ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀ꦭꦤ꧀ꦲꦺꦤꦺꦁꦭꦶꦪꦤꦺ​ꦱꦶꦁ​ꦤ꧀ꦢꦸꦤꦸꦁꦔꦏꦺꦠꦼꦒꦼꦱ꧀ꦱꦺ​ꦧꦱ​ꦏꦱꦸꦏ꧀ꦩꦤ꧀ꦩꦲꦸ​꧉​ꦏꦧꦺꦃ​ꦩꦲꦸ​ꦏꦸꦢꦸ​ꦢꦶꦭꦏꦺꦴꦏ꧀ꦏꦏꦺꦏꦁꦒꦺꦴ​ꦲꦩ꧀ꦧꦔꦸꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦏ꧀ꦥꦱꦩꦸꦮꦤ꧀ꦏꦧꦺꦃ​꧉​ ²⁷ꦤꦺꦏ꧀ꦲꦺꦤꦺꦁꦱꦶꦁ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀ ꦪ​ꦲꦥꦶꦏ꧀ꦏꦺ​ꦤꦺꦏ꧀ꦤꦩꦸꦁ​ꦮꦺꦴꦁ​ꦭꦺꦴꦫꦺꦴ​ꦲꦥ​ꦥꦭꦶꦁꦲꦺꦴꦏꦺꦃꦮꦺꦴꦁ​ꦠꦼꦭꦸ​ꦮꦲꦺ​꧈​ꦒꦼꦤ꧀ꦠꦺꦤ꧀ꦒꦼꦤ꧀ꦠꦺꦤ꧀ꦤꦤ꧀ꦭꦤ꧀ꦏꦸꦢꦸꦤꦺ​ꦲꦺꦤꦺꦁꦱꦶꦗꦶ​ꦱꦶꦁ​ꦤ꧀ꦢꦸꦤꦸꦁꦔꦏꦺꦠꦼꦒꦼꦱ꧀ꦱꦺ​꧉​ ²⁸ꦤꦺꦏ꧀ꦤꦁꦏꦸꦩ꧀ꦥꦸꦭ꧀ꦭꦤ꧀ꦏꦸꦮꦶ​ꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦤ꧀ꦢꦸꦤꦸꦁꦔꦏꦺꦠꦼꦒꦼꦱ꧀ꦱꦺ​꧈​ꦲꦥꦶꦏ꧀ꦏꦺ​ꦱꦼꦢꦸꦭꦸꦂ​ꦱꦶꦁ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀ꦏꦸꦮꦶ​ꦩꦼꦤꦼꦁ​ꦮꦲꦺ​꧉​ꦠꦼꦩ꧀ꦧꦸꦁꦔꦺ​ꦢꦶꦱꦶꦩ꧀ꦥꦼꦤ꧀ꦲꦶꦁ​ꦲꦠꦶꦤꦺ​ꦢꦺꦮꦺꦮꦲꦺ​ꦲꦥ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁹ꦮꦺꦴꦁ​ꦱꦶꦁ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​ꦏꦸꦢꦸꦤꦺ​ꦤꦩꦸꦁ​ꦭꦺꦴꦫꦺꦴ​ꦲꦥ​ꦠꦼꦭꦸ​ꦮꦲꦺ​꧈​ꦭꦶꦪꦤꦺ​ꦏꦸꦢꦸ​ꦔꦿꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀ꦭꦤ꧀ꦩꦶꦏꦶꦂ​ꦠꦼꦩ꧀ꦧꦸꦁ​ꦏꦸꦮꦶ​ꦱꦁꦏꦒꦸꦱ꧀ꦠꦶ​ꦲꦥ​ꦲꦺꦴꦫ​꧉​ ³⁰ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦭꦶꦪꦤꦺ​ꦤꦩ꧀ꦥ​ꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​꧈​ꦲꦥꦶꦏ꧀ꦏꦺ​ꦤꦺꦏ꧀ꦢꦺꦏ꧀ꦤꦺꦔꦼꦤ꧀ꦠꦺꦤ꧀ꦤꦶ​ꦭꦶꦪꦤꦺ​ꦱꦶꦁ​ꦲꦶꦗꦶꦏ꧀ꦔꦺꦴꦩꦺꦴꦁꦧꦺꦤ꧀ꦫꦩ꧀ꦥꦸꦁ​ꦤ꧀ꦢꦶꦱꦶꦏ꧀꧈​ ³¹ꦲꦮꦶꦠ꧀ꦏꦺꦴꦮꦺ​ꦏꦼꦤꦺꦁꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦔꦁꦒꦺꦴ​ꦧꦱ​ꦭꦸꦩꦿꦃ​꧈​ꦤꦁꦔꦶꦁ​ꦏꦸꦢꦸ​ꦒꦼꦤ꧀ꦠꦺꦤ꧀ꦒꦼꦤ꧀ꦠꦺꦤ꧀ꦤꦤ꧀ ꦱꦸꦥꦪ​ꦮꦺꦴꦁ​ꦱꦏ꧀ꦥꦱꦩꦸꦮꦤ꧀ꦧꦶꦱ​ꦤꦩ꧀ꦥ​ꦥꦶꦮꦸꦭꦁ​ꦭꦤ꧀ꦏꦼꦧꦔꦸꦤ꧀꧈​ ³²ꦮꦺꦴꦁ​ꦱꦶꦁ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​ꦏꦸꦢꦸ​ꦧꦶꦱ​ꦔ꧀ꦮꦱꦤꦶ​ꦠꦼꦩ꧀ꦧꦸꦁꦔꦺ​ꦭꦤ꧀ꦧꦶꦱ​ꦔꦼꦤ꧀ꦢꦼꦏ꧀ꦤꦺꦏ꧀ꦢꦸꦫꦸꦁ​ꦮꦚ꧀ꦕꦶꦤꦺ​꧉​ ³³ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦱꦼꦤꦼꦁ​ꦏꦫꦺꦴ​ꦭꦏꦸ​ꦱꦶꦁ​ꦫꦸꦱꦸꦭꦤ꧀ꦲꦺꦴꦫ​ꦔ꧀ꦒꦼꦤꦃ​꧈​ꦤꦁꦔꦶꦁ​ꦢꦺꦏ꧀ꦤꦺꦱꦼꦤꦼꦁ​ꦏꦫꦺꦴ​ꦭꦏꦸ​ꦱꦶꦁ​ꦔꦁꦒꦺꦴ​ꦥꦼꦂꦤꦠ꧀ꦠꦤ꧀ꦭꦤ꧀ꦏꦠꦼꦤ꧀ꦠꦽꦩ꧀ꦩꦤ꧀꧈​

³⁴꧋ꦏꦪ​ꦤꦁꦥꦱꦩꦸꦮꦤ꧀ꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦧꦺꦃ​꧈​ꦱꦼꦢꦸꦭꦸꦂ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦤꦺꦏ꧀ꦤꦁꦏꦸꦩ꧀ꦥꦸꦭ꧀ꦭꦤ꧀ꦲꦗ​ꦥꦢ​ꦫꦩꦺ​ ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ ꦲꦮꦶꦠ꧀ꦩꦶꦠꦸꦫꦸꦠ꧀ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦮꦺꦴꦁ​ꦮꦺꦢꦺꦴꦏ꧀ꦏꦸꦢꦸ​ꦔꦗꦺꦤ꧀ꦤꦶ​ꦩꦫꦁ​ꦮꦺꦴꦁ​ꦱꦶꦁ​ꦔꦺꦴꦩꦺꦴꦁ꧉​ ³⁵ꦤꦺꦏ꧀ꦏꦼꦥꦺꦔꦶꦤ꧀ꦠꦏꦺꦴꦤ꧀ꦲꦥꦲꦥ​ꦱꦶꦁ​ꦲꦺꦴꦫ​ꦢꦸꦤꦸꦁ꧈​ꦏꦸꦢꦸ​ꦠꦏꦺꦴꦤ꧀ꦩꦫꦁ​ꦧꦺꦴꦗꦺꦴꦤꦺ​ꦤꦺꦏ꧀ꦮꦶꦱ꧀ꦤꦁꦲꦺꦴꦩꦃ​꧉​ꦏꦁꦒꦺꦴ​ꦮꦺꦴꦁ​ꦮꦺꦢꦺꦴꦏ꧀ꦲꦺꦴꦫ​ꦥꦤ꧀ꦠꦼꦱ꧀ꦤꦺꦏ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦤꦁꦏꦸꦩ꧀ꦥꦸꦭ꧀ꦭꦤ꧀꧈​

³⁶꧋ꦥꦫ​ꦱꦼꦢꦸꦭꦸꦂ​꧈​ꦲꦥ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦠꦼꦏꦤꦺ​ꦱꦁꦏꦔ꧀ꦒꦺꦴꦤ꧀ꦩꦸ​?ꦭꦤ꧀ꦲꦥ​ꦤꦩꦸꦁ​ꦏꦺꦴꦮꦺ​ꦱꦶꦁ​ꦔꦼꦂꦠꦶ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​?ꦭꦲꦸꦠ꧀ꦲꦺꦴꦫ​ꦠ​? ³⁷ꦱꦼꦢꦸꦭꦸꦂ​ꦱꦶꦁ​ꦩꦶꦏꦶꦂ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦱꦁꦏꦫꦺꦴꦃ​ꦱꦸꦕꦶ​ꦭꦤ꧀ꦧꦶꦱ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦥ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦭꦶꦪꦭꦶꦪꦤꦺ​ꦱꦁꦏꦫꦺꦴꦃ​ꦱꦸꦕꦶ​꧈​ꦱꦼꦢꦸꦭꦸꦂ​ꦏꦸꦮꦶ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦱꦶꦁ​ꦠꦏ꧀ꦠꦸꦭꦶꦱ꧀ꦤꦁꦭꦪꦁ​ꦲꦶꦏꦶ​ꦥꦼꦂꦤꦠꦤ꧀ꦤꦺꦒꦸꦱ꧀ꦠꦶ​ꦢꦺꦮꦺ꧉​ ³⁸ꦤꦺꦏ꧀ꦱꦼꦢꦸꦭꦸꦂ​ꦏꦸꦮꦶ​ꦲꦺꦴꦫ​ꦒꦼꦊꦩ꧀ꦤꦸꦫꦸꦠ꧀ꦩꦫꦁ​ꦥꦼꦂꦤꦠ꧀ꦠꦤ꧀ꦲꦶꦏꦶ​꧈​ꦢꦺꦏ꧀ꦤꦺꦮꦶꦱ꧀ꦲꦗ​ꦢꦶꦒꦠꦺꦏ꧀ꦏꦏꦺꦮꦲꦺ​꧉​

³⁹꧋ꦕꦼꦏꦏ꧀ꦏꦺ​ꦉꦩ꧀ꦧꦸꦏ꧀ꦥꦫ​ꦱꦼꦢꦸꦭꦸꦂ​꧈​ꦥꦢ​ꦔꦸꦢꦶꦪ​ꦱꦸꦥꦪ​ꦧꦶꦱ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦧꦱ​ꦱꦶꦁ​ꦭꦸꦩꦿꦃ​꧈​ꦤꦁꦔꦶꦁ​ꦲꦗ​ꦔꦭꦁꦔꦭꦁꦔꦶꦏꦥꦶꦤ꧀ꦠꦼꦂꦫꦤ꧀ꦥꦮꦺꦃꦲꦺ​ꦫꦺꦴꦃ​ꦱꦸꦕꦶ​ꦱꦶꦁ​ꦩꦫꦏ꧀ꦏꦏꦺꦧꦶꦱ​ꦔꦼꦠꦺꦴꦏ꧀ꦏꦏꦺꦧꦱ​ꦏꦱꦸꦏ꧀ꦩꦤ꧀꧈​ ⁴⁰ꦤꦁꦔꦶꦁ​ꦱꦼꦩ꧀ꦧꦫꦁ​ꦏꦸꦢꦸ​ꦔꦁꦒꦺꦴ​ꦥꦼꦂꦤꦠ꧀ꦠꦤ꧀ꦭꦤ꧀ꦱꦶꦁ​ꦥꦤ꧀ꦠꦼꦱ꧀꧈​

↑ ↑ ↑

꧋ꦧꦧ꧀ꦠꦔꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦁꦏꦥꦠꦶ​꧉​

꧇​꧑꧕꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦏꦸ​ꦏꦼꦥꦺꦔꦶꦤ꧀ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​ꦧꦧ꧀ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦮꦶꦱ꧀ꦠꦏ꧀ꦒꦼꦭꦂꦩꦫꦁ​ꦏꦺꦴꦮꦺ​ꦢꦺꦏ꧀​ꦩ꧀ꦧꦶꦪꦺꦤ꧀꧈​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦮꦶꦱ꧀ꦲꦩ꧀ꦧꦺꦴꦏ꧀ꦠꦩ꧀ꦥ​ꦭꦤ꧀ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦥꦢ​ꦩꦤ꧀ꦠꦼꦥ꧀ꦥꦽꦕꦪ​ꦩꦫꦁ​ꦏꦧꦂ​ꦏꦧꦸꦔꦃꦲꦤ꧀ꦩꦲꦸ​꧉​ ²ꦗꦭꦂꦫꦤ꧀ꦏꦺꦴꦮꦺ​ꦥꦽꦕꦪ​ꦩꦫꦁ​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦏꦺꦴꦮꦺ​ꦮꦶꦱ꧀ꦢꦶꦱ꧀ꦭꦩꦼꦠ꧀ꦠꦏꦺ꧈​ꦗꦚ꧀ꦗꦶ​ꦲꦩ꧀ꦧꦺꦴꦏ꧀ꦠꦩ꧀ꦥꦤꦶ​ꦱꦏ꧀ꦏꦧꦺꦃꦲꦺꦏꦫꦺꦴ​ꦲꦠꦶ​ꦱꦶꦁ​ꦩꦤ꧀ꦠꦼꦥ꧀ꦭꦤ꧀ꦲꦺꦴꦫ​ꦤꦩ꧀ꦥ​ꦒꦸꦱ꧀ꦠꦶ​ꦠꦤ꧀ꦥ​ꦩꦶꦏꦶꦂ​ꦱꦶꦁ​ꦲꦥꦶꦏ꧀​ꦤ꧀ꦢꦶꦱꦶꦏ꧀꧈​

³꧋ꦥꦶꦠꦸꦠꦸꦂ​ꦱꦶꦁ​ꦠꦏ꧀ꦒꦼꦭꦂꦩꦫꦁ​ꦏꦺꦴꦮꦺ​ꦏꦸꦮꦶ​ꦪ​ꦥꦶꦠꦸꦠꦸꦂ​ꦱꦶꦁ​ꦠꦏ꧀ꦠꦩ꧀ꦥ​ꦱꦁꦏꦭꦶꦪꦤꦺ​ꦭꦤ꧀ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦪꦏꦸꦮꦶ​꧈​ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦠꦶ​ꦚꦁꦒ​ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦪ​ꦏꦪ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀꧈​ ⁴ꦢꦺꦏ꧀ꦤꦺꦠꦼꦫꦸꦱ꧀ꦢꦶꦏꦸꦧꦸꦂ​ꦭꦤ꧀ꦢꦺꦏ꧀ꦤꦺꦠꦔꦶ​ꦩꦼꦤꦺꦃ​ꦱꦁꦏꦥꦠꦶ​ꦲꦶꦁ​ꦠꦼꦭꦸꦁ​ꦢꦶꦤꦤꦺ​꧈​ꦲꦸꦒ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀꧈​ ⁵ꦏꦿꦶꦱ꧀ꦡꦸꦱ꧀ꦠꦼꦫꦸꦱ꧀ꦔꦺꦠꦺꦴꦏ꧀ꦩꦫꦁ​ꦦꦺꦠꦿꦸꦱ꧀ ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦔꦺꦠꦺꦴꦏ꧀ꦩꦫꦁ​ꦫꦱꦸꦭ꧀ꦱꦶꦁ​ꦫꦺꦴꦭꦱ꧀꧈​ ⁶ꦢꦺꦏ꧀ꦤꦺꦠꦼꦫꦸꦱ꧀ꦔꦺꦠꦺꦴꦏ꧀ꦩꦼꦤꦺꦃ​꧈​ꦱꦲꦶꦏꦶ​ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦧꦼꦧꦉꦁꦔꦤ꧀​ꦏ꧀ꦭꦶꦮꦠ꧀ꦭꦶꦩꦁ​ꦲꦠꦸꦱ꧀ꦲꦺꦴꦏꦺꦃꦲꦺ;ꦩꦸꦫꦶꦢ꧀ꦩꦸꦫꦶꦢ꧀ꦲꦶꦏꦶ​ꦲꦺꦴꦏꦺꦃꦱꦶꦁ​ꦱꦲꦶꦏꦶ​ꦲꦶꦗꦶꦏ꧀ꦲꦸꦫꦶꦥ꧀ ꦱꦭꦺꦴꦏ꧀ꦏꦺꦮꦶꦱ꧀ꦥꦢ​ꦩꦠꦶ​꧉​ ⁷ꦏꦿꦶꦱ꧀ꦡꦸꦱ꧀ꦠꦼꦫꦸꦱ꧀ꦔꦺꦠꦺꦴꦏ꧀ꦩꦫꦁ​ꦪꦏꦺꦴꦧꦸꦱ꧀ꦭꦤ꧀ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦩꦫꦁ​ꦫꦱꦸꦭ꧀ꦱꦶꦁ​ꦫꦺꦴꦭꦱ꧀ꦏꦧꦺꦃ​꧉​

⁸꧋ꦱꦶꦁ​ꦏꦺꦫꦶ​ꦢꦺꦮꦺꦏꦿꦶꦱ꧀ꦡꦸꦱ꧀ꦔꦺꦠꦺꦴꦏ꧀ꦩꦫꦁ​ꦲꦏꦸ​꧈​ꦱꦼꦤꦗꦤ꧀ꦲꦏꦸ​ꦲꦶꦏꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦧꦪꦶ​ꦱꦶꦁ​ꦭꦲꦶꦂꦫꦺ​ꦏꦼꦭꦠ꧀ꦠꦼꦤ꧀꧈​ ⁹ꦲꦏꦸ​ꦲꦶꦏꦶ​ꦫꦱꦸꦭ꧀ꦱꦶꦁ​ꦕꦶꦭꦶꦏ꧀ꦢꦺꦮꦺꦭꦤ꧀ꦲꦺꦴꦫ​ꦥꦤ꧀ꦠꦼꦱ꧀ꦢꦶꦕꦼꦭꦸꦏ꧀​ꦫꦱꦸꦭ꧀ ꦲꦮꦶꦠ꧀ꦲꦏꦸ​ꦤ꧀ꦢꦢꦺꦏ꧀ꦏꦏꦺꦱꦁꦱꦫꦤꦺ​ꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁰ꦤꦁꦔꦶꦁ​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦭꦱ꧀ꦧꦔꦼꦠ꧀ꦩꦫꦁ​ꦲꦏꦸ​꧈​ꦲꦏꦸ​ꦱꦲꦶꦏꦶ​ꦧꦶꦱ​ꦢꦢꦶ​ꦏꦪ​ꦔꦺꦤꦺ​ꦲꦶꦏꦶ​꧉​ꦭꦤ꧀ꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦏꦸ​ꦲꦶꦏꦶ​ꦲꦺꦴꦫ​ꦩꦸꦱ꧀ꦥꦿ​꧈​ꦲꦮꦶꦠ꧀ꦲꦼꦁꦒꦺꦴꦤ꧀ꦏꦸ​ꦚꦩ꧀ꦧꦸꦠ꧀ꦠꦏꦼꦫꦱ꧀ꦱꦺ​ꦪ​ꦔꦸꦁꦏꦸꦭ꧀ꦭꦶ​ꦫꦱꦸꦭ꧀ꦭꦶꦪꦭꦶꦪꦤꦺ​꧉​ꦱꦏ꧀ꦗꦤꦺꦱꦶꦁ​ꦚꦩ꧀ꦧꦸꦠ꧀ꦠꦪ​ꦲꦺꦴꦫ​ꦱꦁꦏꦏꦼꦏꦸꦮꦠ꧀ꦠꦤ꧀ꦏꦸ​ꦢꦺꦮꦺ꧈​ꦲꦺꦴꦫ​꧈​ꦤꦁꦔꦶꦁ​ꦱꦁꦏꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦏꦸ​꧉​ ¹¹ꦢꦢꦶꦤꦺ​ꦲꦺꦴꦫ​ꦥꦼꦤ꧀ꦠꦶꦁ​ꦱꦥ​ꦱꦶꦁ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦺꦴꦫ​ꦢꦢꦶ​ꦱꦼꦧꦧ꧀ꦲꦏꦸ​ꦲꦥ​ꦭꦶꦪꦤꦺ​꧉​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦪ​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦱꦶꦁ​ꦢꦶꦒꦼꦭꦂ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦪ​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦱꦶꦁ​ꦲꦩ꧀ꦧꦺꦴꦏ꧀ꦥꦽꦕꦪ​꧉​

꧋ꦧꦧ꧀ꦠꦔꦶꦤꦺ​ꦮꦺꦴꦁ​ꦩꦠꦶ​꧉​

¹²꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦩꦸꦭꦁꦔꦶꦤꦺꦏ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦠꦔꦶ​ꦱꦁꦏꦥꦠꦶ​꧈​ꦭꦃ​ꦤꦁꦥꦱꦩꦸꦮꦤ꧀ꦩꦸꦏꦺꦴꦏ꧀ꦲꦺꦤꦺꦁꦮꦺꦴꦁ​ꦱꦶꦗꦶꦭꦺꦴꦫꦺꦴꦱꦶꦁ​ꦔꦺꦴꦩꦺꦴꦁꦤꦺꦏ꧀ꦮꦺꦴꦁ​ꦩꦠꦶ​ꦲꦺꦴꦫ​ꦧꦏꦭ꧀ꦠꦔꦶ​ꦩꦼꦤꦺꦃ​꧉​ ¹³ꦱꦼꦩꦸꦁꦒꦺꦴꦤ꧀ꦤꦺꦠꦼꦤꦤ꧀ꦤꦺꦏ꧀ꦮꦺꦴꦁ​ꦩꦠꦶ​ꦲꦺꦴꦫ​ꦠꦔꦶ​ꦩꦼꦤꦺꦃ​꧈​ꦠꦶꦧꦏꦺ​ꦏꦿꦶꦱ꧀ꦡꦸꦱ꧀ꦪ​ꦲꦺꦴꦫ​ꦠꦔꦶ​ꦱꦁꦏꦥꦠꦶ​꧉​ ¹⁴ꦭꦃ​ꦤꦺꦏ꧀ꦏꦿꦶꦱ꧀ꦡꦸꦱ꧀ꦲꦺꦴꦫ​ꦠꦔꦶ​ꦱꦁꦏꦥꦠꦶ​ꦠꦼꦤꦤ꧀ ꦠꦶꦧꦏꦺ​ꦥꦶꦠꦸꦠꦸꦂ​ꦱꦶꦁ​ꦢꦶꦒꦼꦭꦂ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦏꦸꦮꦶ​ꦏꦺꦴꦠꦺꦴꦁꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​ꦭꦤ꧀ꦲꦼꦁꦒꦺꦴꦤ꧀ꦩꦸ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦶꦧꦏꦺ​ꦪ​ꦩꦸꦱ꧀ꦥꦿ​꧉​ ¹⁵ꦭꦃ​ꦤꦺꦏ꧀ꦔꦺꦴꦤꦺꦴ​ꦠꦼꦤꦤ꧀ ꦠꦶꦧꦏꦺ​ꦲꦮꦏ꧀ꦏꦺ​ꦢꦺꦮꦺꦒꦺꦴꦫꦺꦴꦃ​ꦧꦧ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦔꦺꦴꦩꦺꦴꦁꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ ꦤꦔꦺꦏ꧀ꦏꦺꦏꦿꦶꦱ꧀ꦡꦸꦱ꧀ꦱꦁꦏꦥꦠꦶ​꧈​ꦤꦁꦔꦶꦁ​ꦗꦫꦺꦤꦺ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦠꦔꦶ​ꦱꦁꦏꦥꦠꦶ​꧉​ ¹⁶ꦢꦢꦶꦤꦺ​ꦤꦺꦏ꧀ꦩꦶꦠꦸꦫꦸꦠ꧀ꦲꦺꦴꦩꦺꦴꦁꦔꦤ꧀ꦏꦸꦮꦶ​ꦏꦿꦶꦱ꧀ꦡꦸꦱ꧀ꦪ​ꦲꦺꦴꦫ​ꦠꦔꦶ​ꦱꦁꦏꦥꦠꦶ​꧈​ꦲꦮꦶꦠ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦠꦔꦶ​ꦱꦁꦏꦥꦠꦶ​꧉​ ¹⁷ꦭꦃ​ꦤꦺꦏ꧀ꦏꦿꦶꦱ꧀ꦡꦸꦱ꧀ꦲꦺꦴꦫ​ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​꧈​ꦥꦽꦕꦪꦩꦸ​ꦪ​ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​ꦧ꧀ꦭꦱ꧀ꦭꦤ꧀ꦠꦶꦧꦏꦺ​ꦏꦺꦴꦮꦺ​ꦲꦶꦗꦶꦏ꧀ꦏꦼꦗꦶꦉꦠ꧀ꦲꦶꦁ​ꦢꦺꦴꦱꦢꦺꦴꦱꦩꦸ​꧉​ ¹⁸ꦤꦺꦏ꧀ꦔꦺꦴꦤꦺꦴ​ꦠꦼꦤꦤ꧀ ꦠꦶꦧꦏꦺ​ꦮꦺꦴꦁ​ꦥꦽꦕꦪ​ꦱꦶꦁ​ꦮꦶꦱ꧀ꦥꦢ​ꦩꦠꦶ​ꦪ​ꦕꦶꦭꦏ​ꦠꦼꦤꦤ꧀ ꦲꦮꦶꦠ꧀ꦩꦠꦶ​ꦔ꧀ꦒꦮ​ꦢꦺꦴꦱꦤꦺ​꧉​ ¹⁹ꦭꦃ​ꦤꦺꦏ꧀ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀ꦏꦸꦮꦶ​ꦤꦩꦸꦁ​ꦏꦁꦒꦺꦴ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦱꦸꦮꦺꦤꦺ​ꦤꦁꦢꦺꦴꦚ​ꦏꦺꦤꦺ​ꦮꦲꦺ​꧈​ꦠꦶꦧꦏꦺ​ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦮꦺꦴꦁ​ꦱꦶꦁ​ꦕꦶꦭꦏ​ꦢꦺꦮꦺꦤꦁꦗꦒꦠ꧀ꦏꦺꦤꦺ​꧉​

²⁰꧋ꦤꦁꦔꦶꦁ​ꦲꦺꦴꦫ​ꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​꧈​ꦱꦶꦁ​ꦧꦼꦤꦼꦂ​ꦪꦏꦸꦮꦶ​:ꦏꦿꦶꦱ꧀ꦡꦸꦱ꧀ꦥꦚ꧀ꦕꦺꦤ꧀ꦮꦶꦱ꧀ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​꧉​ꦢꦺꦏ꧀ꦤꦺꦱꦶꦁ​ꦠꦔꦶ​ꦱꦁꦏꦥꦠꦶ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦭꦤ꧀ꦗꦭꦂꦫꦤ꧀ꦱꦁꦏꦏꦸꦮꦶ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦮꦺꦴꦁ​ꦱꦶꦁ​ꦥꦽꦕꦪ​ꦱꦶꦁ​ꦥꦢ​ꦩꦠꦶ​ꦧꦏꦭ꧀ꦠꦔꦶ​ꦩꦼꦤꦺꦃ​꧉​ ²¹ꦲꦮꦶꦠ꧀ꦮꦺꦴꦁ​ꦱꦶꦗꦶ​ꦱꦶꦁ​ꦩꦫꦏ꧀ꦏꦏꦺꦮꦺꦴꦁ​ꦏꦧꦺꦃ​ꦩꦠꦶ​ꦭꦤ꧀ꦱꦼꦩꦺꦴꦤꦺꦴ​ꦲꦸꦒ​ꦮꦺꦴꦁ​ꦱꦶꦗꦶ​ꦱꦶꦁ​ꦩꦫꦏ꧀ꦏꦏꦺꦏꦧꦺꦃ​ꦮꦺꦴꦁ​ꦧꦶꦱ​ꦠꦔꦶ​ꦩꦼꦤꦺꦃ​ꦱꦁꦏꦥꦠꦶ​꧉​ ²²ꦏꦪ​ꦲꦼꦁꦒꦺꦴꦤꦺ​ꦏꦧꦺꦃ​ꦮꦺꦴꦁ​ꦏꦠꦸꦠ꧀ꦩꦠꦶ​ꦏꦫꦺꦴ​ꦄꦢꦩ꧀ ꦱꦼꦩꦺꦴꦤꦺꦴ​ꦲꦸꦒ​ꦏꦧꦺꦃ​ꦮꦺꦴꦁ​ꦱꦶꦁ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦧꦏꦭ꧀ꦏꦠꦸꦠ꧀ꦲꦸꦫꦶꦥ꧀ꦩꦼꦤꦺꦃ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ ²³ꦤꦁꦔꦶꦁ​ꦱꦶꦗꦶꦱꦶꦗꦶꦤꦺ​ꦢꦶꦠꦔꦺꦏ꧀ꦏꦏꦺꦩꦤꦸꦠ꧀ꦮꦚ꧀ꦕꦶꦤꦺ​ꦢꦺꦮꦺꦢꦺꦮꦺ꧈​ꦪꦏꦸꦮꦶ​:ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦏꦿꦶꦱ꧀ꦡꦸꦱ꧀ ꦠꦼꦫꦸꦱ꧀ꦮꦺꦴꦁꦮꦺꦴꦁ​ꦱꦶꦁ​ꦥꦽꦕꦪ​꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦏꦿꦶꦱ꧀ꦡꦸꦱ꧀ꦠꦼꦏ​ꦩꦼꦤꦺꦃ​꧉​ ²⁴ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦲꦼꦤ꧀ꦠꦺꦏ꧀ꦏꦺ​ꦗꦩꦤ꧀꧈​ꦏꦿꦶꦱ꧀ꦡꦸꦱ꧀ꦧꦏꦭ꧀ꦤꦼꦭꦸꦏ꧀ꦏꦏꦺꦱꦏ꧀ꦲꦺꦤꦺꦁꦔꦺꦥꦼꦁꦒꦼꦢꦺ꧈​ꦥꦼꦩꦿꦺꦤ꧀ꦠꦃꦭꦤ꧀ꦥꦔ꧀ꦮꦱ​ꦭꦤ꧀ꦏꦧꦺꦃ​ꦏꦸꦮꦶ​ꦧꦏꦭ꧀ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺ꧉​ ²⁵ꦲꦮꦶꦠ꧀ꦏꦿꦶꦱ꧀ꦡꦸꦱ꧀ꦏꦸꦢꦸ​ꦚ꧀ꦗꦒꦺꦴꦁꦢꦢꦶ​ꦫꦠꦸꦤꦺ​ꦗꦒꦠ꧀ꦔꦤ꧀ꦠꦶ​ꦩꦸꦁꦱꦸꦃꦲꦺ​ꦏꦧꦺꦃ​ꦮꦶꦱ꧀ꦢꦶꦠꦼꦭꦸꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁶ꦩꦸꦁꦱꦸꦃ​ꦱꦶꦁ​ꦒꦼꦢꦺꦢꦺꦮꦺꦱꦶꦁ​ꦧꦏꦭ꧀ꦢꦶꦠꦼꦭꦸꦏ꧀ꦏꦏꦺꦏꦸꦮꦶ​ꦥꦠꦶ​꧉​ ²⁷ꦤꦁꦏꦶꦠꦧ꧀ꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​ꦧꦧ꧀ꦲꦶꦏꦶ​:“ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦼꦭꦸꦏ꧀ꦏꦏꦺꦱꦼꦩ꧀ꦧꦫꦁ​ꦏꦧꦺꦃ​ꦲꦶꦁ​ꦱꦏ꧀ꦔꦶꦱꦺꦴꦂꦫꦺ​ꦏꦿꦶꦱ꧀ꦡꦸꦱ꧀꧉”ꦠꦼꦩ꧀ꦧꦸꦁ​“ꦱꦼꦩ꧀ꦧꦫꦁ​ꦏꦧꦺꦃ​”ꦏꦸꦮꦶ​ꦲꦺꦴꦫ​ꦔꦺꦴꦩꦺꦴꦁꦔꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦩ꧀ꦧꦫꦁ​ꦏꦠꦸꦠ꧀ ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦤꦼꦭꦸꦏ꧀ꦏꦏꦺꦱꦼꦩ꧀ꦧꦫꦁ​ꦩꦲꦸ​ꦩꦫꦁ​ꦏꦿꦶꦱ꧀ꦡꦸꦱ꧀꧈​ ²⁸ꦱꦏ꧀ꦮꦶꦱ꧀ꦱꦺ​ꦱꦼꦩ꧀ꦧꦫꦁ​ꦏꦧꦺꦃ​ꦮꦶꦱ꧀ꦢꦶꦠꦼꦭꦸꦏ꧀ꦏꦏꦺꦩꦫꦁ​ꦏꦿꦶꦱ꧀ꦡꦸꦱ꧀ ꦠꦼꦫꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦼꦭꦸꦏ꧀ꦏꦏꦺꦢꦺꦏ꧀ꦤꦺꦢꦺꦮꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦮꦶꦱ꧀ꦤꦼꦭꦸꦏ꧀ꦏꦏꦺꦱꦼꦩ꧀ꦧꦫꦁ​ꦏꦧꦺꦃ​ꦩꦫꦁ​ꦲꦤꦏ꧀ꦏꦺ​꧉​ꦢꦢꦶꦤꦺ​꧈​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦱꦼꦩ꧀ꦧꦫꦁ​ꦧꦏꦭ꧀ꦢꦶꦏ꧀ꦮꦱꦤꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀ꦏꦧꦺꦃꦲꦺ꧉​

²⁹꧋ꦥꦫ​ꦱꦼꦢꦸꦭꦸꦂ​꧈​ꦱꦼꦩꦸꦁꦒꦺꦴꦤ꧀ꦤꦺꦮꦺꦴꦁ​ꦩꦠꦶ​ꦲꦺꦴꦫ​ꦧꦏꦭ꧀ꦠꦔꦶ​ꦩꦼꦤꦺꦃ​꧈​ꦭꦃ​ꦏꦼꦤꦺꦁꦲꦥ​ꦏꦺꦴꦏ꧀ꦮꦺꦴꦁꦮꦺꦴꦁ​ꦢꦶꦧꦥ꧀ꦠꦶꦱ꧀ꦢꦢꦶ​ꦮꦏꦶꦭ꧀ꦭꦺ​ꦮꦺꦴꦁ​ꦥꦽꦕꦪ​ꦱꦶꦁ​ꦮꦶꦱ꧀ꦩꦠꦶ​?ꦲꦥ​ꦱꦶꦁ​ꦢꦶꦒꦺꦴꦭꦺꦏ꧀ꦏꦶ​?ꦤꦺꦏ꧀ꦮꦺꦴꦁ​ꦱꦶꦁ​ꦩꦠꦶ​ꦲꦺꦴꦫ​ꦧꦏꦭ꧀ꦠꦔꦶ​ꦩꦼꦤꦺꦃ​꧈​ꦭꦃ​ꦮꦺꦴꦁꦮꦺꦴꦁ​ꦏꦺꦴꦏ꧀ꦔꦼꦩꦼꦤ꧀ꦔꦼꦩꦼꦤ꧀ꦤꦏꦺꦢꦶꦧꦥ꧀ꦠꦶꦱ꧀ꦢꦢꦶ​ꦮꦏꦶꦭ꧀ꦭꦺ​ꦮꦺꦴꦁ​ꦥꦽꦕꦪ​ꦱꦶꦁ​ꦮꦶꦱ꧀ꦩꦠꦶ​? ³⁰ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧈​ꦏꦼꦤꦺꦁꦲꦥ​ꦏꦺꦴꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦏ꧀ꦮꦚ꧀ꦕꦶ​ꦮꦚ꧀ꦕꦶ​ꦮꦤꦶ​ꦔꦢꦼꦥ꧀ꦥꦶꦲꦭꦁꦔꦤ꧀꧈​ ³¹ꦥꦚ꧀ꦕꦺꦤ꧀ ꦱꦧꦼꦤ꧀ꦢꦶꦤ​ꦲꦏꦸ​ꦔꦢꦼꦥ꧀ꦥꦶꦥꦠꦶ​꧉​ꦭꦤ꧀ꦲꦏꦸ​ꦔꦺꦴꦩꦺꦴꦁꦲꦶꦏꦶ​ꦗꦭꦂꦫꦤ꧀ꦏꦺꦴꦮꦺ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦲꦠꦶꦏꦸ​꧈​ꦱꦲꦶꦏꦶ​ꦏꦺꦴꦮꦺ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ³²ꦱꦼꦩꦸꦁ​ꦒꦺꦴꦤ꧀ꦤꦺ​ꦮꦺꦴꦁ​ꦩꦠꦶ​ꦲꦺꦴꦫ​ꦠꦔꦶ​ꦩꦼꦤꦺꦃ​꧈​ꦲꦥ​ꦠꦼꦒꦼꦱ꧀ꦱꦺ​ꦲꦏꦸ​ꦔ꧀ꦭꦮꦤ꧀ꦮꦺꦴꦁꦮꦺꦴꦁ​ꦱꦶꦁ​ꦩꦸꦁꦱꦸꦃ​ꦲꦏꦸ​ꦤꦁꦏꦸꦠꦌꦥ꦳ꦺꦱꦼ꧈​ꦲꦺꦭꦶꦁ​​ꦲꦺꦭꦶꦁ​​ꦏꦪ​ꦒꦼꦭꦸꦠ꧀ꦩꦠꦶꦲꦸꦫꦶꦥ꧀ꦥꦸꦫꦶꦥ꧀ꦥꦤ꧀ꦏꦫꦺꦴ​ꦏꦺꦮꦤ꧀ꦏꦺꦮꦤ꧀ꦱꦶꦁ​ꦒꦭꦏ꧀ꦏꦲꦺ​꧉​ꦤꦺꦏ꧀ꦥꦚ꧀ꦕꦺꦤ꧀ꦮꦺꦴꦁ​ꦩꦠꦶ​ꦮꦶꦱ꧀ꦲꦺꦴꦫ​ꦢꦶꦠꦔꦺꦏ꧀ꦏꦏꦺꦩꦼꦤꦺꦃ​꧈​ꦪ​ꦲꦥꦶꦏ꧀ꦏꦺ​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦤꦩꦸꦁ​ꦥꦢ​ꦩꦁꦔꦤ꧀ꦭꦤ꧀ꦔꦺꦴꦩ꧀ꦧꦺ​ꦮꦲꦺ​꧈​ꦲꦮꦶꦠ꧀ꦱꦺꦱꦸꦏ꧀ꦧꦏꦭ꧀ꦩꦠꦶ​꧉​

³³꧋ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦴꦏ꧀ꦏꦺꦴꦮꦺ​ꦲꦗ​ꦏꦼꦤꦺꦁꦢꦶꦲꦥꦸꦱ꧀ꦱꦶ​ꦮꦺꦴꦁ​ꦔꦺꦴꦤꦺꦴ​꧉​ꦤꦺꦏ꧀ꦏꦺꦴꦮꦺ​ꦧꦼꦧꦉꦁꦔꦤ꧀ꦏꦫꦺꦴ​ꦮꦺꦴꦁ​ꦱꦶꦁ​ꦏ꧀ꦭꦺꦫꦸ​꧈​ꦏꦺꦴꦮꦺ​ꦩꦼꦱ꧀ꦠꦶꦧꦏꦭ꧀ꦏꦠꦸꦠ꧀​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦏ꧀ꦭꦺꦫꦸ​꧉​ ³⁴ꦲꦩ꧀ꦧꦺꦴꦏ꧀ꦥꦢ​ꦤ꧀ꦢꦸꦮꦺꦤ꧀ꦤꦶ​ꦥꦶꦏꦶꦂꦫꦤ꧀ꦱꦶꦁ​ꦥꦢꦁꦭꦤ꧀ꦲꦗ​ꦥꦢ​ꦔ꧀ꦒꦮꦺ​ꦢꦺꦴꦱ​ꦩꦼꦤꦺꦃ​꧉​ꦲꦏꦸ​ꦮꦤꦶ​ꦔꦺꦴꦩꦺꦴꦁꦤꦺꦏ꧀ꦤꦁꦥꦱꦩꦸꦮꦤ꧀ꦩꦸꦲꦺꦤꦺꦁꦱꦶꦗꦶꦭꦺꦴꦫꦺꦴꦱꦶꦁ​ꦲꦺꦴꦫ​ꦔꦼꦂꦠꦶ​ꦧ꧀ꦭꦱ꧀ꦧꦧ꧀ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦺꦴꦮꦺ​ꦏꦸꦢꦸ​ꦲꦶꦱꦶꦤ꧀ꦧꦧ꧀ꦏꦸꦮꦶ​꧉​

꧋ꦧꦢꦤ꧀ꦱꦏ꧀ꦮꦶꦱ꧀ꦱꦺ​ꦠꦔꦶ​ꦱꦁꦏꦥꦠꦶ​꧉​

³⁵꧋ꦥꦫ​ꦱꦼꦢꦸꦭꦸꦂ​꧈​ꦩꦼꦤꦮ​ꦲꦺꦤꦺꦁꦮꦺꦴꦁ​ꦠꦏꦺꦴꦤ꧀:“ꦭꦃ​ꦏꦼꦥꦿꦶꦪꦺ​ꦮꦺꦴꦁ​ꦩꦠꦶ​ꦲꦼꦁꦒꦺꦴꦤꦺ​ꦠꦔꦶ​ꦩꦼꦤꦺꦃ​ꦭꦤ꧀ꦤꦺꦏ꧀ꦮꦶꦱ꧀ꦠꦔꦶ​ꦩꦼꦤꦺꦃ​ꦧꦢꦤ꧀ꦤꦺ​ꦏꦪ​ꦔꦥ​?” ³⁶ꦤꦺꦏ꧀ꦢꦶꦥꦶꦏꦶꦂ​꧈​ꦏꦸꦮꦶ​ꦥꦚ꧀ꦕꦺꦤ꧀ꦥꦶꦠꦏꦺꦴꦤ꧀ꦤꦤ꧀ꦤꦺ​ꦮꦺꦴꦁ​ꦧꦺꦴꦢꦺꦴ꧉​ꦤꦺꦏ꧀ꦏꦺꦴꦮꦺ​ꦤꦤ꧀ꦢꦸꦂ​ꦮꦶꦗꦶ​ꦤꦁꦊꦩꦃ​꧈​ꦲꦥ​ꦮꦶꦗꦶꦤꦺ​ꦲꦺꦴꦫ​ꦏꦸꦢꦸ​ꦩꦠꦶ​ꦤ꧀ꦢꦶꦱꦶꦏ꧀ꦱꦏ꧀ꦢꦸꦫꦸꦁꦔꦺꦠꦸꦏꦸꦭ꧀? ³⁷ꦱꦶꦁ​ꦲꦩ꧀ꦧꦺꦴꦏ꧀ꦠꦤ꧀ꦢꦸꦂꦭꦲꦸꦠ꧀ꦤꦩꦸꦁ​ ꦮꦶꦗꦶ​ꦠ​꧈​ꦒꦩ꧀ꦥꦁꦔꦺ​ꦲꦺꦴꦩꦺꦴꦁ​ꦮꦶꦗꦶ​ꦒꦤ꧀ꦢꦸꦩ꧀ꦲꦥ​ꦮꦶꦗꦶ​ꦭꦶꦪꦤꦺ​꧈​ꦤꦁꦔꦶꦁ​ꦩꦼꦱ꧀ꦠꦶꦪ​ꦲꦺꦴꦫ​ꦠꦤ꧀ꦢꦸꦂꦫꦤ꧀ꦱꦶꦁ​ꦮꦶꦱ꧀ꦥꦼꦥꦏ꧀ꦠ​? ³⁸ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦸꦏꦸꦭ꧀ꦭꦏꦺꦮꦶꦗꦶ​ꦩꦲꦸ​꧈​ꦱꦸꦥꦪ​ꦧꦶꦱ​ꦩꦸꦤ꧀ꦢꦏ꧀ꦒꦼꦢꦺꦢꦢꦶ​ꦠꦤ꧀ꦢꦸꦂꦫꦤ꧀ꦭꦤ꧀ꦱꦧꦼꦤ꧀ꦮꦶꦗꦶ​ꦔꦼꦠꦺꦴꦏ꧀ꦏꦏꦺꦠꦤ꧀ꦢꦸꦂꦫꦤ꧀ꦤꦺ​ꦢꦺꦮꦺꦢꦺꦮꦺ꧉​

³⁹꧋ꦱꦼꦩꦺꦴꦤꦺꦴ​ꦲꦸꦒ​꧈​ꦱꦧꦼꦤ꧀ꦢꦒꦶꦁ​ꦪ​ꦱꦺꦗꦺ​꧉​ꦢꦒꦶꦁꦔꦺ​ꦩꦤꦸꦁꦱ​ꦱꦺꦗꦺ​ꦏꦫꦺꦴ​ꦢꦒꦶꦁꦔꦺ​ꦏꦺꦮꦤ꧀꧈​ꦭꦤ꧀ꦢꦒꦶꦁꦔꦺ​ꦏꦺꦮꦤ꧀ꦪ​ꦱꦺꦗꦺꦱꦺꦗꦺꦩꦼꦤꦺꦃ​꧉​ꦭꦤ꧀ꦢꦒꦶꦁꦔꦺ​ꦩꦤꦸꦏ꧀ꦱꦺꦗꦺ​ꦏꦫꦺꦴ​ꦢꦒꦶꦁꦔꦺ​ꦏꦺꦮꦤ꧀ꦭꦶꦪꦤꦺ​ꦭꦤ꧀ꦲꦶꦮꦏ꧀ꦢꦒꦶꦁꦔꦺ​ꦱꦺꦗꦺ​ꦩꦼꦤꦺꦃ​꧉​

⁴⁰꧋ꦲꦸꦒ​ꦲꦺꦤꦺꦁꦧꦫꦁ​ꦱꦶꦁ​ꦤꦁꦭꦔꦶꦠ꧀ꦭꦤ꧀ꦧꦫꦁ​ꦱꦶꦁ​ꦤꦁꦧꦸꦩꦶ​꧉​ꦲꦥꦶꦏ꧀ꦏꦺ​ꦧꦫꦁ​ꦱꦶꦁ​ꦤꦁꦭꦔꦶꦠ꧀ꦲꦶꦏꦶ​ꦱꦺꦗꦺ​ꦏꦫꦺꦴ​ꦲꦥꦶꦏ꧀ꦏꦺ​ꦧꦫꦁ​ꦱꦶꦁ​ꦤꦁꦧꦸꦩꦶ​꧉​ ⁴¹ꦥꦢꦁꦔꦺꦱꦽꦔꦺꦔꦺ​ꦱꦺꦗꦺ​ꦏꦫꦺꦴ​ꦥꦢꦁꦔꦺꦩ꧀ꦧꦸꦭꦤ꧀ꦭꦤ꧀ꦭꦶꦤ꧀ꦠꦁꦭꦶꦤ꧀ꦠꦁ​ꦪ​ꦱꦺꦗꦺ​ꦩꦼꦤꦺꦃ​ꦥꦢꦁꦔꦺ꧉​ꦩꦭꦃ​ꦭꦶꦤ꧀ꦠꦁ​ꦏꦫꦺꦴ​ꦭꦶꦤ꧀ꦠꦁ​ꦢꦺꦮꦺꦪ​ꦮꦶꦱ꧀ꦱꦺꦗꦺꦱꦺꦗꦺꦩꦼꦤꦺꦃ​꧉​

⁴²꧋ꦮꦺꦴꦁ​ꦩꦠꦶ​ꦤꦺꦏ꧀ꦠꦔꦶ​ꦩꦼꦤꦺꦃ​ꦲꦩ꧀ꦧꦺꦱꦸꦏ꧀ꦪ​ꦏꦪ​ꦔꦺꦴꦤꦺꦴ​꧉​ꦧꦢꦤ꧀ꦱꦶꦁ​ꦢꦶꦏꦸꦧꦸꦂ​ꦏꦸꦮꦶ​ꦧꦢꦤ꧀ꦱꦶꦁ​ꦫꦸꦱꦏ꧀ ꦤꦁꦔꦶꦁ​ꦲꦩ꧀ꦧꦺꦱꦸꦏ꧀ꦱꦶꦁ​ꦢꦶꦠꦔꦺꦏ꧀ꦏꦏꦺꦧꦢꦤ꧀ꦱꦶꦁ​ꦭꦁꦒꦼꦁ​꧉​ ⁴³ꦱꦶꦁ​ꦢꦶꦏꦸꦧꦸꦂ​ꦏꦸꦮꦶ​ꦧꦢꦤ꧀ꦲꦺꦭꦺꦏ꧀ꦭꦤ꧀ꦫꦶꦁꦏꦶꦃ​꧈​ꦤꦁꦔꦶꦁ​ꦱꦶꦁ​ꦢꦶꦠꦔꦺꦏ꧀ꦏꦏꦺꦧꦢꦤ꧀ꦱꦶꦁ​ꦲꦥꦶꦏ꧀ꦭꦤ꧀ꦏꦸꦮꦠ꧀꧈​ ⁴⁴ꦱꦶꦁ​ꦢꦶꦏꦸꦧꦸꦂ​ꦤꦩꦸꦁ​ꦧꦢꦤ꧀ꦏꦼꦢꦒꦶꦁꦔꦤ꧀ ꦤꦁꦔꦶꦁ​ꦱꦶꦁ​ꦢꦶꦠꦔꦺꦏ꧀ꦏꦏꦺꦧꦢꦤ꧀ꦏꦱꦸꦏ꧀ꦩꦤ꧀꧈​ꦲꦮꦶꦠ꧀ꦤꦺꦏ꧀ꦲꦺꦤꦺꦁꦧꦢꦤ꧀ꦏꦼꦢꦒꦶꦁꦔꦤ꧀ ꦲꦸꦒ​ꦲꦺꦤꦺꦁꦧꦢꦤ꧀ꦏꦱꦸꦏ꧀ꦩꦤ꧀꧈​ ⁴⁵ꦤꦁꦏꦶꦠꦧ꧀ꦪ​ꦮꦶꦱ꧀ꦏꦼꦠꦸꦭꦶꦱ꧀:“ꦩꦤꦸꦁꦱ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺ꧈​ꦄꦢꦩ꧀ ꦢꦢꦶ​ꦮꦺꦴꦁ​ꦲꦸꦫꦶꦥ꧀ꦲꦶꦁ​ꦏꦼꦢꦒꦶꦁꦔꦤ꧀꧉”ꦤꦁꦔꦶꦁ​ꦏꦿꦶꦱ꧀ꦡꦸꦱ꧀ ꦄꦢꦩ꧀ꦱꦶꦁ​ꦏꦺꦫꦶ​ꦢꦺꦮꦺ꧈​ꦢꦢꦶ​ꦮꦶꦮꦶꦠ꧀ꦠꦤ꧀ꦤꦺ​ꦲꦸꦫꦶꦥ꧀ꦲꦶꦁ​ꦏꦱꦸꦏ꧀ꦩꦤ꧀꧈​ ⁴⁶ꦱꦶꦁ​ꦠꦼꦏ​ꦤ꧀ꦢꦶꦱꦶꦏ꧀ꦢꦸꦢꦸ​ꦧꦢꦤ꧀ꦏꦱꦸꦏ꧀ꦩꦤ꧀ ꦤꦁꦔꦶꦁ​ꦧꦢꦤ꧀ꦏꦼꦢꦒꦶꦁꦔꦤ꧀꧈​ꦱꦏ꧀ꦮꦶꦱ꧀ꦱꦺ​ꦧꦢꦤ꧀ꦏꦼꦢꦒꦶꦁꦔꦤ꧀ꦠꦼꦫꦸꦱ꧀ꦱꦶꦁ​ꦏꦱꦸꦏ꧀ꦩꦤ꧀꧈​ ⁴⁷ꦄꦢꦩ꧀ꦱꦶꦁ​ꦤ꧀ꦢꦶꦱꦶꦏ꧀ꦒꦮꦺꦪꦤ꧀ꦤꦺ​ꦱꦁꦏꦊꦩꦃ​꧈​ꦤꦁꦔꦶꦁ​ꦄꦢꦩ꧀ꦱꦶꦁ​ꦏꦥꦶꦤ꧀ꦢꦺꦴ꧈​ꦏꦿꦶꦱ꧀ꦡꦸꦱ꧀ ꦠꦼꦏꦤꦺ​ꦱꦁꦏꦱ꧀ꦮꦂꦒ​꧉​ ⁴⁸ꦏꦧꦺꦃ​ꦮꦺꦴꦁ​ꦏꦸꦮꦶ​ꦠꦸꦫꦸꦤ꧀ꦤꦤ꧀ꦤꦺ​ꦄꦢꦩ꧀ ꦢꦢꦶꦤꦺ​ꦧꦢꦤ꧀ꦤꦺ​ꦪ​ꦱꦁꦏꦊꦩꦃ​꧈​ꦏꦪ​ꦢꦺꦏ꧀ꦤꦺ꧉​

꧋ꦤꦁꦔꦶꦁ​ꦮꦺꦴꦁ​ꦱꦶꦁ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦏꦸꦮꦶ​ꦧꦏꦭ꧀​ꦤ꧀ꦢꦸꦮꦺꦧꦢꦤ꧀ꦏꦱ꧀ꦮꦂꦒꦤ꧀ ꦏꦪ​ꦢꦺꦏ꧀ꦤꦺ꧉​ ⁴⁹ꦏꦪ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦲꦶꦏꦶ​ꦏꦺꦠꦺꦴꦏ꧀ꦮꦺꦴꦁ​ꦒꦮꦺꦪꦤ꧀ꦱꦁꦏꦊꦩꦃ​꧈​ꦤꦁꦔꦶꦁ​ꦲꦩ꧀ꦧꦺꦱꦸꦏ꧀ꦲꦮꦏ꧀ꦏꦺ​ꦢꦺꦮꦺꦏꦪ​ꦏꦿꦶꦱ꧀ꦡꦸꦱ꧀ꦱꦶꦁ​ꦠꦼꦏꦤꦺ​ꦱꦁꦏꦱ꧀ꦮꦂꦒ​꧉​

꧋ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦗꦩꦤ꧀꧈​

⁵⁰꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦏꦼꦥꦺꦔꦶꦤ꧀​ꦤ꧀ꦢꦸꦤꦸꦁꦔꦏꦺꦩꦫꦁ​ꦏꦺꦴꦮꦺ​ꦤꦺꦏ꧀ꦧꦢꦤ꧀ꦏꦼꦢꦒꦶꦁꦔꦤ꧀ꦏꦸꦮꦶ​ꦲꦺꦴꦫ​ꦧꦏꦭ꧀ꦧꦶꦱ​ꦩꦺꦭꦸ​ꦲꦸꦫꦶꦥ꧀ꦲꦶꦁ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦧꦢꦤ꧀ꦱꦶꦁ​ꦫꦸꦱꦏ꧀ꦲꦺꦴꦫ​ꦧꦶꦱ​ꦭꦁꦒꦼꦁ​꧉​

^51-52꧋ꦲꦏꦸ​ꦱꦲꦶꦏꦶ​ꦲꦉꦥ꧀ꦲꦩ꧀ꦧꦸꦏꦏ꧀ꦥꦶꦠꦸꦠꦸꦂ​ꦱꦶꦁ​ꦏꦱꦶꦩ꧀ꦥꦼꦤ꧀:ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦺꦴꦫ​ꦏꦧꦺꦃ​ꦧꦏꦭ꧀ꦩꦠꦶ​꧈​ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦩꦭꦶꦃ​꧈​ꦱꦏ꧀​ꦏ꧀ꦭꦺꦭꦥ꧀ꦥꦤ꧀ ꦤꦺꦏ꧀ꦱ꧀ꦮꦫꦤꦺ​ꦠꦿꦺꦴꦩ꧀ꦥꦺꦠ꧀ꦱꦶꦁ​ꦏꦺꦫꦶ​ꦢꦺꦮꦺꦧꦏꦭ꧀ꦩꦸꦤꦶ​꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦏꦿꦶꦱ꧀ꦡꦸꦱ꧀ꦠꦼꦏ​ꦩꦼꦤꦺꦃ​꧉​ꦤꦺꦏ꧀ꦠꦿꦺꦴꦩ꧀ꦥꦺꦠ꧀ꦠꦺꦩꦸꦤꦶ​꧈​ꦮꦺꦴꦁ​ꦩꦠꦶ​ꦧꦏꦭ꧀ꦥꦢ​ꦠꦔꦶ​ꦢꦢꦶ​ꦮꦺꦴꦁ​ꦱꦶꦁ​ꦭꦁꦒꦼꦁ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦧꦏꦭ꧀ꦩꦭꦶꦃ​꧉​ ⁵³ꦲꦮꦶꦠ꧀ꦧꦢꦤ꧀ꦱꦶꦁ​ꦫꦸꦱꦏ꧀ꦧꦏꦭ꧀ꦩꦭꦶꦃ​ꦢꦢꦶ​ꦭꦁꦒꦼꦁ​꧉​ ⁵⁴ꦤꦺꦏ꧀ꦏꦸꦮꦶ​ꦮꦶꦱ꧀​ꦏ꧀ꦭꦏꦺꦴꦤ꧀ꦠꦼꦤꦤ꧀ ꦢꦢꦶꦤꦺ​ꦏꦼꦠꦸꦫꦸꦠ꧀ꦠꦤ꧀ꦠꦼꦩ꧀ꦧꦸꦁꦔꦺ​ꦏꦶꦠꦧ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦥꦠꦶ​ꦮꦶꦱ꧀ꦢꦶꦲꦸꦤ꧀ꦠꦭ꧀ꦏꦫꦺꦴ​ꦏꦩꦼꦤꦔꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​”
⁵⁵“ꦥꦠꦶ​꧈​ꦲꦼꦤ꧀ꦢꦶ​ꦏꦩꦼꦤꦔꦤ꧀ꦩꦸ?ꦥꦠꦶ​꧈​ꦏꦺꦴꦮꦺ​ꦲꦥ​ꦲꦶꦗꦶꦏ꧀ꦧꦶꦱ​ꦔ꧀ꦒꦮꦺ​ꦲꦭ​?”

⁵⁶ꦥꦚ꧀ꦕꦺꦤ꧀ꦧꦼꦤꦼꦂ​꧈​ꦩꦤꦸꦁꦱ​ꦲꦶꦗꦶꦏ꧀ꦩꦠꦶ​꧈​ꦗꦭꦂꦫꦤ꧀ꦩꦤꦸꦁꦱ​ꦲꦶꦗꦶꦏ꧀​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧉​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦤꦺꦏ꧀ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦏꦸꦢꦸ​ꦩꦠꦶ​꧉​ ⁵⁷ꦤꦁꦔꦶꦁ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦤꦩ꧀ꦥ​ꦏꦩꦼꦤꦁꦔꦤ꧀ꦱꦁꦏꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​

⁵⁸꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦥꦢ​ꦱꦶꦁ​ꦩꦤ꧀ꦠꦼꦥ꧀ꦭꦤ꧀ꦗꦼꦗꦼꦏ꧀ꦲꦶꦁ​ꦥꦼꦔꦤ꧀ꦢꦼꦭ꧀ꦩꦸ​꧉​ꦥꦢ​ꦱꦶꦁ​ꦱꦽꦒꦼꦥ꧀ꦲꦶꦁ​ꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​ꦲꦥ​ꦮꦲꦺ​꧈​ꦲꦮꦶꦠ꧀ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦥꦼꦁꦒꦮꦺꦪꦤ꧀ꦏꦸꦮꦶ​ꦲꦺꦴꦫ​ꦧꦏꦭ꧀ꦩꦸꦱ꧀ꦥꦿ​ꦧ꧀ꦭꦱ꧀꧈​

↑ ↑ ↑

꧋ꦲꦸꦫꦸꦤ꧀ꦤꦤ꧀ꦏꦁꦒꦺꦴ​ꦥꦱꦩꦸꦮꦤ꧀ꦤꦁꦪꦸꦢꦺꦪ​꧉​

꧇​꧑꧖꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦏꦸ​ꦏꦼꦥꦺꦔꦶꦤ꧀ꦔꦽꦩ꧀ꦧꦸꦏ꧀ꦧꦧ꧀ꦲꦸꦫꦸꦤ꧀ꦤꦤ꧀ꦏꦁꦒꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦥꦱꦩꦸꦮꦤ꧀ꦤꦁꦪꦸꦢꦺꦪ​꧉​ꦧꦧ꧀ꦏꦸꦮꦶ​ꦏꦺꦴꦮꦺ​ꦏꦸꦢꦸ​ꦤꦸꦫꦸꦠ꧀ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦲꦸꦫꦸꦠ꧀ꦠꦤ꧀ꦱꦶꦁ​ꦠꦏ꧀ꦏꦺꦏ꧀ꦏꦏꦺꦩꦫꦁ​ꦥꦱꦩꦸꦮꦤ꧀ꦥꦱꦩꦸꦮꦤ꧀ꦤꦁꦒꦭꦱꦶꦪꦴ꧉​ ²ꦪꦏꦸꦮꦶ​꧈​ꦱꦧꦼꦤ꧀ꦢꦶꦤ​ꦩꦶꦁꦒꦸ​ꦏꦺꦴꦮꦺ​ꦏꦸꦢꦸ​ꦚꦶꦁꦏꦶꦂꦫꦏꦺꦢꦸꦮꦶꦠ꧀ ꦱꦏ꧀​ꦤ꧀ꦢꦸꦮꦺꦤꦺꦠꦼꦫꦸꦱ꧀ꦢꦶꦭꦸꦩ꧀ꦥꦸꦏ꧀ꦏꦏꦺ꧉​ꦢꦢꦶꦤꦺ​ꦲꦩ꧀ꦧꦺꦱꦸꦏ꧀ ꦤꦺꦏ꧀ꦲꦏꦸ​ꦠꦼꦏ​꧈​ꦏꦺꦴꦮꦺ​ꦮꦶꦱ꧀ꦲꦺꦴꦫ​ꦲꦸꦱꦃꦚꦸꦱꦸꦚꦸꦱꦸꦔ꧀ꦭꦸꦩ꧀ꦥꦸꦏ꧀ꦏꦏꦺꦢꦸꦮꦶꦠ꧀ꦩꦲꦸ​꧉​ ³ꦤꦺꦏ꧀ꦲꦏꦸ​ꦮꦶꦱ꧀ꦠꦼꦏꦤ꧀​ꦔ꧀ꦒꦺꦴꦤ꧀ꦩꦸ​꧈​ꦲꦏꦸ​ꦧꦏꦭ꧀ꦔꦺꦴꦁꦏꦺꦴꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦏꦼꦤꦺꦁꦲꦩ꧀ꦧꦺꦴꦏ꧀ꦥꦽꦕꦪ​꧈​ꦱꦸꦥꦪ​ꦔꦼꦠꦼꦂꦫꦏꦺꦲꦸꦫꦸꦤꦤ꧀ꦩꦸꦏꦸꦮꦶ​ꦤꦁꦏꦸꦠꦪꦺꦫꦸꦱꦭꦺꦩ꧀꧈​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦧꦏꦭ꧀ꦠꦏ꧀ꦒꦮꦤ꧀ꦤꦶꦭꦪꦁ​ꦏꦁꦒꦺꦴ​ꦠꦤ꧀ꦢꦤꦺꦏ꧀ꦏꦺꦴꦁꦏꦺꦴꦤ꧀ꦤꦤ꧀ꦩꦸ​꧉​ ⁴ꦤꦺꦏ꧀ꦲꦏꦸ​ꦏꦸꦢꦸ​ꦩꦺꦭꦸ​ꦲꦩ꧀ꦧꦫꦁ​꧈​ꦪ​ꦲꦥꦶꦏ꧀ꦮꦲꦺ​꧉​ꦮꦺꦴꦁꦮꦺꦴꦁ​ꦧꦺꦤ꧀ꦧꦸꦢꦭ꧀ꦏꦫꦺꦴ​ꦲꦏꦸ​ꦥꦶꦱꦤ꧀꧈​

꧋ꦫꦱꦸꦭ꧀ꦦꦈꦭꦸꦱ꧀ꦲꦉꦥ꧀ꦠꦼꦏ​ꦤꦁꦥꦱꦩꦸꦮꦤ꧀ꦏꦺꦴꦫꦶꦤ꧀ꦠꦴ꧉​

⁵꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦲꦏꦸ​ꦮꦶꦱ꧀ꦫꦩ꧀ꦥꦸꦁ​ꦤꦁꦧꦮꦃꦩꦱꦼꦢꦺꦴꦤꦶꦪ꧈​ꦲꦮꦶꦠ꧀ꦲꦏꦸ​ꦏꦼꦥꦺꦔꦶꦤ꧀​ꦩ꧀ꦭꦏꦸꦩ꧀ꦭꦏꦸ​ꦤꦶꦭꦶꦏ꧀ꦏꦶ​ꦧꦮꦃꦏꦤ​ꦤ꧀ꦢꦶꦱꦶꦏ꧀꧈​ ⁶ꦤꦁꦔꦶꦁ​ꦲꦏꦸ​ꦩꦶꦏꦶꦂ​ꦤꦺꦏ꧀ꦧꦏꦭ꧀ꦤꦁꦔ꧀ꦒꦺꦴꦤ꧀ꦩꦸ​ꦫꦢ​ꦱꦸꦮꦶ꧈​ꦩꦼꦤꦮ​ꦪ​ꦱꦏ꧀ꦱꦸꦮꦺꦤꦺ​ꦮꦪꦃ​ꦲꦢꦼꦩ꧀ꦭꦤ꧀ꦲꦔꦶꦤ꧀ꦧꦤ꧀ꦠꦼꦂ​꧉​ꦢꦢꦶꦤꦺ​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​꧈​ꦏꦺꦴꦮꦺ​ꦧꦶꦱ​ꦔꦿꦺꦮꦁꦔꦶ​ꦲꦏꦸ​ꦲꦼꦁꦒꦺꦴꦤ꧀ꦏꦸ​ꦤꦼꦫꦸꦱ꧀ꦱꦏꦺꦢꦭꦤ꧀ꦏꦸ​꧉​ ⁷ꦤꦺꦏ꧀ꦒꦸꦱ꧀ꦠꦶ​ꦏꦉꦥ꧀ ꦲꦏꦸ​ꦏꦼꦥꦺꦔꦶꦤ꧀ꦩꦁꦒꦺꦴꦤ꧀ꦱꦶꦁ​ꦫꦢ​ꦱꦸꦮꦶꦤꦁꦔ꧀ꦒꦺꦴꦤ꧀ꦩꦸ​꧈​ꦱꦸꦥꦪ​ꦲꦼꦁꦒꦺꦴꦤ꧀ꦏꦸ​ꦠꦼꦏ​ꦲꦺꦴꦫ​ꦏꦪ​ꦮꦺꦴꦁ​ꦩꦩ꧀ꦥꦶꦂ​ꦮꦲꦺ​꧉​

^8-9꧋ꦲꦏꦸ​ꦲꦉꦥ꧀ꦤꦁꦌꦥ꦳ꦺꦱꦼꦠꦼꦫꦸꦱ꧀ꦠꦼꦏꦤꦺ​ꦫꦶꦪꦪꦦꦤ꧀ꦠꦺꦏꦺꦴꦱ꧀ꦠ꧈​ꦲꦮꦶꦠ꧀ꦤꦁꦏꦺꦤꦺ​ꦲꦺꦴꦏꦺꦃꦏꦼꦭꦸꦁꦒꦫꦤ꧀ꦤꦺꦏꦁꦒꦺꦴ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧈​ꦱꦼꦤꦗꦤ꧀ꦱꦶꦁ​ꦔ꧀ꦭꦮꦤ꧀ꦪ​ꦲꦺꦴꦏꦺꦃꦲꦸꦒ​꧉​

¹⁰꧋ꦤꦺꦏ꧀ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧈​ꦢꦺꦏ꧀ꦤꦺꦪ​ꦢꦶꦠꦩ꧀ꦥ​ꦱꦶꦁ​ꦲꦥꦶꦏ꧀ꦧꦺꦤ꧀ꦏꦿꦱ꧀ꦱꦤ꧀꧈​ꦢꦺꦏ꧀ꦤꦺꦪ​ꦏꦪ​ꦲꦏꦸ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​꧉​

¹¹꧋ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦚꦼꦥꦺꦭꦺꦏ꧀ꦏꦏꦺꦢꦺꦏ꧀ꦤꦺ꧈​ꦤꦁꦔꦶꦁ​ꦩꦭꦃ​ꦢꦶꦠꦸꦭꦸꦁꦔꦶ​ꦱꦸꦥꦪ​ꦢꦺꦏ꧀ꦤꦺꦤ꧀ꦢꦁꦧꦶꦱ​ꦧꦭꦶꦏ꧀ꦤꦁꦔ꧀ꦒꦺꦴꦤ꧀ꦏꦸ​ꦏꦤ꧀ꦠꦶꦱ꧀ꦭꦩꦼꦠ꧀ ꦲꦮꦶꦠ꧀ꦲꦏꦸ​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦔꦉꦥ꧀ꦲꦉꦥ꧀ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀꧈​ ¹²ꦧꦧ꧀ꦱꦼꦢꦸꦭꦸꦂ​ꦄꦥꦺꦴꦭꦺꦴꦱ꧀ ꦲꦏꦸ​ꦪ​ꦮꦶꦱ꧀ꦥꦶꦁ​ꦥꦶꦫ​ꦮꦲꦺ​ꦚꦸꦮꦸꦤ꧀ꦢꦺꦏ꧀ꦤꦺꦱꦸꦥꦪ​ꦤꦶꦭꦶꦏ꧀ꦏꦶ​ꦏꦺꦴꦮꦺ​꧈​ꦧꦉꦁ​ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​꧉​ꦤꦁꦔꦶꦁ​ꦱꦲꦶꦏꦶ​ꦢꦺꦏ꧀ꦤꦺꦢꦸꦫꦸꦁ​ꦒꦼꦊꦩ꧀꧈​ꦏꦥꦤ꧀ꦏꦥꦤ꧀ ꦤꦺꦏ꧀ꦲꦺꦤꦺꦁꦏꦼꦭꦸꦁꦒꦫꦤ꧀ꦤꦺ꧈​ꦢꦺꦏ꧀ꦤꦺꦧꦏꦭ꧀ꦤꦁꦔ꧀ꦒꦺꦴꦤ꧀ꦩꦸ​꧉​

꧋ꦥꦼꦤꦸꦠꦸꦥ꧀꧈​

¹³꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦭꦤ꧀ꦏꦸꦢꦸ​ꦱꦶꦁ​ꦩꦤ꧀ꦠꦼꦥ꧀ꦲꦶꦁ​ꦥꦼꦔꦤ꧀ꦢꦼꦭ꧀꧈​ꦥꦢ​ꦱꦶꦁ​ꦏꦼꦤ꧀ꦢꦼꦭ꧀ꦭꦤ꧀ꦲꦗ​ꦱꦩ꧀ꦥꦺꦏ꧀ꦏꦭꦃ​ꦏꦫꦺꦴ​ꦥꦔ꧀ꦮꦱꦤꦺ​ꦱꦺꦠꦤ꧀꧈​ ¹⁴ꦤꦺꦏ꧀ꦚꦩ꧀ꦧꦸꦠ꧀ꦠꦲꦥ​ꦮꦲꦺ​꧈​ꦢꦶꦭꦏꦺꦴꦤ꧀ꦤꦶ​ꦔꦁꦒꦺꦴ​ꦏꦠꦿꦺꦱ꧀ꦤꦤ꧀꧈​

¹⁵꧋ꦏꦺꦴꦮꦺ​ꦩꦼꦱ꧀ꦠꦶꦮꦶꦱ꧀ꦥꦢ​ꦔꦼꦂꦠꦶ​ꦤꦺꦏ꧀ꦱꦼꦢꦸꦭꦸꦂ​ꦱ꧀ꦠꦺꦥ꦳ꦤꦸꦱ꧀ꦱꦏ꧀ꦧꦿꦪꦠ꧀ꦠꦺ​ꦏꦸꦮꦶ​ꦮꦺꦴꦁ​ꦏꦿꦶꦱ꧀ꦠꦼꦤ꧀ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦤꦁꦧꦮꦃꦄꦏꦪꦭꦤ꧀ꦢꦺꦏ꧀ꦤꦺꦪ​ꦮꦶꦱ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦏꦁꦒꦺꦴ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​꧉​ ¹⁶ꦏꦉꦥ꧀ꦏꦸ​꧈​ꦏꦺꦴꦮꦺ​ꦥꦢ​ꦩꦤꦸꦠ​ꦩꦫꦁ​ꦱꦼꦢꦸꦭꦸꦂ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦪ​ꦩꦫꦁ​ꦱꦥ​ꦮꦲꦺ​ꦱꦶꦁ​ꦥꦢ​ꦔꦿꦺꦮꦁꦔꦶ​ꦭꦤ꧀ꦩꦺꦭꦸ​ꦚꦁꦒ​ꦉꦏꦱ​ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​꧉​

¹⁷꧋ꦲꦏꦸ​ꦥꦚ꧀ꦕꦺꦤ꧀ꦧꦸꦔꦃ​ꦤꦺꦏ꧀ꦱꦼꦢꦸꦭꦸꦂ​ꦱ꧀ꦠꦺꦥ꦳ꦤꦸꦱ꧀ ꦥ꦳ꦺꦴꦂꦠꦸꦤꦠꦸꦱ꧀ꦭꦤ꧀ꦄꦏꦆꦏꦸꦱ꧀ꦥꦢ​ꦠꦼꦏ​ꦤꦶꦭꦶꦏ꧀ꦏꦶ​ꦲꦏꦸ​꧉​ꦱꦼꦤꦗꦤ꧀ꦲꦏꦸ​ꦏꦁꦔꦼꦤ꧀ꦩꦫꦁ​ꦏꦺꦴꦮꦺ​꧈​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦮꦶꦱ꧀ꦢꦢꦶ​ꦮꦏꦶꦭ꧀ꦩꦸ​꧉​ ¹⁸ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦗꦤ꧀ꦔꦼꦥꦺꦤꦏ꧀ꦏꦏꦺꦲꦠꦶꦏꦸ​ꦠꦼꦤꦤ꧀ ꦏꦪ​ꦲꦼꦁꦒꦺꦴꦤꦺ​ꦥꦢ​ꦔ꧀ꦒꦮꦺ​ꦧꦸꦔꦃꦲꦺ​ꦲꦠꦶꦩꦸ​꧉​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦗꦺꦤ꧀ꦤꦶ​꧉​

¹⁹꧋ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦁꦏꦥꦱꦩꦸꦮꦤ꧀ꦥꦱꦩꦸꦮꦤ꧀ꦤꦁꦧꦮꦃꦄꦱꦶꦪ​ꦥꦢ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦏꦧꦺꦃ​꧉​ꦲꦸꦒ​ꦱꦼꦢꦸꦭꦸꦂ​ꦄꦏ꧀ꦮꦶꦭ​ꦭꦤ꧀ꦥꦿꦶꦱ꧀ꦏꦶꦭ​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦥꦢ​ꦏꦸꦩ꧀ꦥꦸꦭ꧀ꦭꦤ꧀ꦤꦁꦲꦺꦴꦩꦃꦲꦺ​ꦱꦼꦢꦸꦭꦸꦂ​ꦲꦶꦏꦶ​ꦥꦢ​ꦏꦶꦫꦶꦩ꧀ꦏꦼꦱ꧀ꦭꦩꦼꦠ꧀ꦠꦤ꧀ꦤꦺ​ꦒꦸꦱ꧀ꦠꦶ​ꦏꦧꦺꦃ​꧉​ ²⁰ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦧꦺꦃ​ꦱꦶꦁ​ꦤꦁꦏꦺꦤꦺ​ꦥꦢ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​꧉​ꦭꦤ꧀ꦲꦗ​ꦭꦭꦶ​ꦲꦸꦒ​ꦔꦺꦴꦩꦺꦴꦁꦔꦏꦺꦤꦺꦏ꧀ꦲꦏꦸ​ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦱꦼꦢꦸꦭꦸꦂ​ꦏꦧꦺꦃ​ꦱꦶꦗꦶꦱꦶꦗꦶꦤꦺ​꧉​

²¹꧋ꦲꦏꦸ​ꦢꦺꦮꦺ꧈​ꦦꦈꦭꦸꦱ꧀ ꦱꦶꦁ​ꦤꦸꦭꦶꦱ꧀ꦏꦧꦂ​ꦱ꧀ꦭꦩꦼꦠ꧀ꦲꦶꦏꦶ​ꦩꦫꦁ​ꦏꦺꦴꦮꦺ​꧉​

²²꧋ꦱꦥ​ꦱꦶꦁ​ꦲꦺꦴꦫ​ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦮꦱ꧀ꦮꦺꦴꦁ​ꦏꦸꦮꦶ​ꦤꦩ꧀ꦥ​ꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​!ꦩꦸꦒꦩꦸꦒ​ꦒꦸꦱ꧀ꦠꦶ​ꦤ꧀ꦢꦁꦠꦼꦏ​꧉​ꦩꦫꦤꦠꦃ​!

²³꧋ꦩꦸꦒꦩꦸꦒ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦤꦲ​ꦲꦶꦁ​ꦏꦺꦴꦮꦺ​ꦏꦧꦺꦃ​꧉​

²⁴꧋ꦲꦏꦸ​ꦏꦶꦫꦶꦩ꧀ꦏꦠꦿꦺꦱ꧀ꦤꦤ꧀ꦏꦸꦩꦫꦁ​ꦏꦺꦴꦮꦺ​ꦏꦧꦺꦃ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦲꦶꦁ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​

ꦦꦈꦭꦸꦱ꧀

↑ ↑ ↑

꧋ꦥꦩꦸꦗꦶ​ꦱ꧀ꦭꦩꦼꦠ꧀꧈​

꧇​꧑꧇​

¹꧋ꦥꦫ​ꦱꦼꦢꦸꦭꦸꦂꦏꦸ​ꦤꦁꦥꦱꦩꦸꦮꦤ꧀ꦏꦺꦴꦫꦶꦤ꧀ꦠꦴ꧈​ꦲꦶꦏꦶ​ꦭꦪꦁ​ꦱꦁꦏꦲꦼꦁꦒꦺꦴꦤ꧀ꦏꦸ​꧈​ꦦꦈꦭꦸꦱ꧀ꦭꦤ꧀ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀꧈​ꦏꦺꦴꦮꦺ​ꦏꦧꦺꦃ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦩꦶꦗꦶ​ꦲꦏꦸ​ꦢꦢꦶ​ꦫꦱꦸꦭ꧀ꦭꦺ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​

꧋ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤꦩꦸꦁ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤꦁꦏꦸꦠꦏꦺꦴꦫꦶꦤ꧀ꦠꦴ꧈​ꦤꦁꦔꦶꦁ​ꦲꦸꦒ​ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​ꦤꦁꦧꦮꦃꦄꦏꦪꦏꦧꦺꦃ​꧉​

²꧋ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦔꦼꦢꦸꦤ꧀ꦤꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦩꦫꦁ​ꦏꦺꦴꦮꦺ​ꦏꦧꦺꦃ​꧉​

꧋ꦫꦱꦸꦭ꧀ꦦꦈꦭꦸꦱ꧀ꦩꦠꦸꦂꦏꦼꦱꦸꦮꦸꦤ꧀꧈​

³꧋ꦲ꦳ꦪꦸꦏ꧀ꦥꦢ​ꦩꦼꦩꦸꦗꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦥꦚ꧀ꦕꦺꦤ꧀ꦱꦏ꧀ꦮꦶꦗꦶꦤꦺꦧꦥꦏ꧀ꦱꦶꦁ​ꦒꦼꦢꦺꦏꦮꦼꦭꦱ꧀ꦱꦤ꧀ꦤꦺ​꧈​ꦱꦶꦁ​ꦠꦤ꧀ꦱꦃ​ꦔ꧀ꦭꦶꦥꦸꦂ​ꦲꦮꦏ꧀ꦏꦺ​ꦢꦺꦮꦺ꧉​ ⁴ꦢꦺꦏ꧀ꦤꦺꦲꦸꦒ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦠꦼꦏꦤ꧀ꦱꦏ꧀ꦮꦼꦂꦤꦤꦺ​ꦏꦱꦸꦱꦃꦲꦤ꧀ ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦧꦶꦱ​ꦤꦸꦭꦸꦁꦔꦶ​ꦭꦶꦪꦤꦺ​ꦱꦶꦁ​ꦔꦭꦩ꧀ꦩꦶ​ꦏꦱꦸꦱꦃꦲꦤ꧀꧈​ꦠꦼꦒꦼꦱ꧀ꦱꦺ​꧈​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤꦸꦭꦸꦁꦔꦶ​ꦭꦶꦪꦤꦺ​ꦱꦶꦁ​ꦔꦭꦩ꧀ꦩꦶ​ꦏꦱꦸꦱꦃꦲꦤ꧀ ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦱꦸꦱꦃꦲꦤ꧀꧈​ ⁵ꦲꦗ​ꦏꦒꦺꦠ꧀ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦮꦏ꧀ꦏꦺ​ꦢꦺꦮꦺꦠꦤ꧀ꦱꦃ​ꦔꦭꦩ꧀ꦩꦶ​ꦏꦱꦸꦱꦃꦲꦤ꧀ ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦢꦺꦏ꧀ꦤꦺ꧉​ꦤꦁꦔꦶꦁ​ꦥꦢ​ꦔꦼꦂꦠꦶꦪ​ꦲꦸꦒ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦸꦭꦸꦁꦔꦶ​ꦭꦤ꧀ꦔꦸꦮꦠ꧀ꦠꦏꦺꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀꧈​ ⁶ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦏꦸ​ꦔꦭꦩ꧀ꦩꦶ​ꦏꦱꦁꦱꦫꦤ꧀ ꦠꦸꦗꦸꦮꦤ꧀ꦤꦺꦪ​ꦤꦩꦸꦁ​ꦏꦁꦒꦺꦴ​ꦤꦸꦭꦸꦁꦔꦶ​ꦭꦤ꧀ꦔꦸꦮꦠ꧀ꦠꦏꦺꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦏꦸꦮꦠ꧀ꦠꦼꦫꦸꦱ꧀ꦠꦼꦏꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧈​ꦪꦏꦸꦮꦶ​ꦲꦩ꧀ꦧꦺꦱꦸꦏ꧀ ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀​ꦚ꧀ꦭꦩꦼꦠ꧀ꦠꦏꦺꦏꦺꦴꦮꦺ​ꦱꦏ꧀ꦏꦧꦺꦃꦲꦺ꧉​ꦱꦼꦩꦺꦴꦤꦺꦴ​ꦲꦸꦒ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺ꧈​ꦠꦸꦗꦸꦮꦤ꧀ꦤꦺꦤꦩꦸꦁ​ꦱꦸꦥꦪ​ꦏꦺꦴꦮꦺ​ꦥꦢ​ꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦧꦶꦱ​ꦤꦸꦭꦸꦁꦔꦶ​ꦭꦤ꧀ꦔꦸꦮꦠ꧀ꦠꦏꦺꦏꦺꦴꦮꦺ​ꦲꦸꦒ​꧉​ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦏꦸꦮꦠ꧀ꦚꦁꦒ​ꦏꦱꦸꦱꦃꦲꦤ꧀ꦲꦥ​ꦮꦲꦺ​꧈​ꦲꦮꦶꦠ꧀ꦏꦺꦴꦮꦺ​ꦲꦸꦒ​ꦮꦶꦱ꧀​ꦧ꧀ꦭꦗꦂꦥꦱꦿꦃ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦪ​ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦥꦱꦿꦃ​ꦩꦫꦁ​ꦢꦺꦏ꧀ꦤꦺ꧉​ ⁷ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦤ꧀ꦢꦸꦮꦺꦤ꧀ꦤꦶ​ꦥꦼꦔꦉꦥ꧀ꦲꦉꦥ꧀ꦤꦺꦏ꧀ꦏꦺꦴꦮꦺ​ꦧꦏꦭ꧀ꦏꦸꦮꦠ꧀ꦠꦼꦫꦸꦱ꧀ꦚꦁꦒ​ꦏꦱꦸꦱꦃꦲꦤ꧀ꦲꦥ​ꦮꦲꦺ​꧉​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦼꦂꦠꦶ​ꦏꦸꦮꦶ​ꦥꦫ​ꦱꦼꦢꦸꦭꦸꦂ​?ꦲꦮꦶꦠ꧀ꦏꦪ​ꦲꦼꦁꦒꦺꦴꦤ꧀ꦩꦸ​ꦔꦭꦩ꧀ꦩꦶ​ꦏꦱꦸꦱꦃꦲꦤ꧀ꦏꦪ​ꦲꦮꦏ꧀ꦏꦺ​ꦢꦺꦮꦺ꧈​ꦩꦼꦁꦏꦺꦴꦤꦺꦴ​ꦲꦸꦒ​ꦏꦺꦴꦮꦺ​ꦧꦏꦭ꧀ꦤꦩ꧀ꦥ​ꦏꦼꦏꦸꦮꦠ꧀ꦠꦤ꧀ꦏꦪ​ꦲꦮꦏ꧀ꦏꦺ​ꦢꦺꦮꦺ꧉​

⁸꧋ꦲꦏꦸ​ꦮꦤꦶ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦲꦮꦶꦠ꧀ꦢꦼꦭꦺꦴꦏ꧀ꦏꦼꦤ꧀ꦲꦸꦫꦶꦥ꧀ꦏꦸ​ꦢꦺꦮꦺꦲꦶꦏꦶ​꧉​ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦭꦩ꧀ꦩꦶ​ꦏꦱꦁꦱꦫꦤ꧀ꦒꦼꦢꦺ​ꦠꦼꦤꦤ꧀ꦤꦁꦧꦮꦃꦄꦱꦶꦪ​꧉​ꦱꦁꦏꦶꦁꦲꦧꦺꦴꦠ꧀ꦠꦺ​꧈​ꦲꦮꦏ꧀ꦏꦺ​ꦢꦺꦮꦺꦩꦶꦏꦶꦂ​ꦤꦺꦏ꧀ꦲꦺꦴꦫ​ꦧꦏꦭ꧀ꦏꦸꦮꦠ꧀ꦚꦁꦒ​ꦩꦼꦤꦺꦃ​ꦭꦤ꧀ꦪ​ꦮꦶꦱ꧀ꦠꦠꦠꦠ​ꦤꦺꦏ꧀ꦲꦺꦴꦫ​ꦧꦏꦭ꧀ꦲꦸꦫꦶꦥ꧀ꦩꦼꦤꦺꦃ​꧉​ ⁹ꦠꦼꦤꦤ꧀ꦥꦫ​ꦱꦼꦢꦸꦭꦸꦂ​꧈​ꦲꦶꦁ​ꦲꦠꦶ​ꦫꦱꦤꦺ​ꦮꦶꦱ꧀ꦓꦫꦺꦏ꧀ꦩꦠꦶꦤꦺ​ꦮꦲꦺ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦭꦶꦭꦤꦶ​ꦏꦸꦮꦶ​ꦩꦲꦸ​ꦏꦧꦺꦃ​ꦏ꧀ꦭꦏꦺꦴꦤ꧀ ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦚ꧀ꦗꦒꦏ꧀ꦏꦏꦺꦏꦼꦏꦸꦮꦠ꧀ꦠꦤ꧀ꦤꦺ​ꦢꦺꦮꦺ꧈​ꦤꦁꦔꦶꦁ​ꦚ꧀ꦗꦒꦏ꧀ꦏꦏꦺꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦸꦗꦸꦠ꧀ꦠꦺꦢꦺꦏ꧀ꦤꦺꦧꦶꦱ​ꦤꦔꦺꦏ꧀ꦏꦺꦮꦺꦴꦁ​ꦱꦶꦁ​ ꦮꦶꦱ꧀ꦩꦠꦶ​꧉​ ¹⁰ꦥꦚ꧀ꦕꦺꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦮꦶꦱ꧀ꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦔꦭꦩ꧀ꦩꦶ​ꦏꦔꦺꦭ꧀ꦭꦤ꧀ꦒꦼꦢꦺꦱꦩ꧀ꦥꦺꦏ꧀ꦲꦉꦥ꧀ꦩꦠꦶ​꧉​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦥꦽꦕꦪ​ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀꧈​ ¹¹ꦥꦺꦴꦏꦺꦴꦏ꧀ꦏꦺ​꧈​ꦏꦺꦴꦮꦺ​ꦏꦧꦺꦃ​ꦏꦸꦢꦸ​ꦤ꧀ꦢꦺꦴꦔꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ ꦢꦢꦶꦤꦺ​ꦱꦼꦢꦸꦭꦸꦂ​ꦥꦶꦫꦁꦥꦶꦫꦁ​ꦧꦏꦭ꧀ꦧꦶꦱ​ꦩꦼꦩꦸꦗꦶ​ꦭꦤ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦢꦺꦏ꧀ꦤꦺꦤꦩ꧀ꦥ​ꦥꦤ꧀ꦢꦺꦴꦔꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦤ꧀ꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦏꦔꦺꦭ꧀ꦭꦤ꧀ꦲꦥ​ꦮꦲꦺ​꧉​

꧋ꦫꦱꦸꦭ꧀ꦦꦈꦭꦸꦱ꧀ꦲꦺꦴꦫ​ꦱꦶꦢ​ꦠꦼꦏ​ꦤꦁꦏꦺꦴꦫꦶꦤ꧀ꦠꦴ꧉​

¹²꧋ꦥꦫ​ꦱꦼꦢꦸꦭꦸꦂ​꧈​ꦲꦥ​ꦠ​ꦱꦶꦁ​ꦩꦫꦏ꧀ꦏꦏꦺꦲꦏꦸ​ꦏꦼꦤ꧀ꦢꦼꦭ꧀?ꦗꦭꦂꦫꦤ꧀ꦲꦏꦸ​ꦫꦸꦩꦁꦱ​ꦉꦱꦶꦏ꧀ꦲꦶꦁ​ꦭꦲꦶꦂ​ꦭꦤ꧀ꦧꦠꦶꦤ꧀ꦩꦫꦁ​ꦏꦧꦺꦃ​ꦮꦺꦴꦁ​꧈​ꦩꦭꦃꦩꦭꦃꦩꦫꦁ​ꦏꦺꦴꦮꦺ​ꦱꦶꦁ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​꧉​ꦲꦏꦸ​ꦧ꧀ꦭꦏ​ꦩꦫꦁ​ꦏꦺꦴꦮꦺ​꧈​ꦲꦮꦶꦠ꧀ꦏꦸꦮꦶ​ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦤ꧀ꦢꦸꦮꦺꦫꦸꦩꦁꦱ​ꦉꦱꦶꦏ꧀ꦲꦶꦁ​ꦭꦲꦶꦂ​ꦭꦤ꧀ꦧꦠꦶꦤ꧀ꦏꦸꦮꦶ​ꦲꦺꦴꦫ​ꦩꦤꦸꦠ꧀ꦕꦫꦤꦺ​ꦮꦺꦴꦁ​ꦥꦶꦤ꧀ꦠꦼꦂ​ꦤꦁꦗꦒꦠ꧀ꦏꦺꦤꦺ​꧈​ꦲꦺꦴꦫ​꧈​ꦤꦁꦔꦶꦁ​ꦩꦤꦸꦠ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦁꦏꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦒꦼꦢꦺꦏꦧꦼꦕꦶꦏ꧀ꦏꦤ꧀ꦤꦺ​꧉​ ^13-14ꦮꦸꦗꦸꦠ꧀ꦠꦺꦥꦫ​ꦱꦼꦢꦸꦭꦸꦂ​꧈​ꦱꦼꦩ꧀ꦧꦫꦁ​ꦱꦶꦁ​ꦏꦼꦠꦸꦭꦶꦱ꧀ꦤꦁꦭꦪꦁꦔꦺ​ꦲꦮꦏ꧀ꦏꦺ​ꦢꦺꦮꦺꦪ​ꦗꦼꦭꦱ꧀ꦏꦧꦺꦃ​ꦏꦁꦒꦺꦴ​ꦏꦺꦴꦮꦺ​꧈​ꦩꦸꦭꦤꦺ​ꦏꦺꦴꦮꦺ​ꦱꦲꦶꦏꦶ​ꦧꦶꦱ​ꦢꦸꦤꦸꦁꦠꦸꦗꦸꦮꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧈​ꦱꦼꦤꦗꦤ꧀ꦢꦸꦫꦸꦁ​ꦱꦏ꧀ꦏꦧꦺꦃꦲꦺ꧉​ꦤꦁꦔꦶꦁ​ꦲꦏꦸ​ꦥꦽꦕꦪ​ꦤꦺꦏ꧀ꦏꦺꦴꦮꦺ​ꦧꦏꦭ꧀ꦢꦸꦤꦸꦁꦤꦺꦏ꧀ꦠꦸꦗꦸꦮꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦉꦱꦶꦏ꧀ꦱꦏ꧀ꦏꦧꦺꦃꦲꦺ꧉​

꧋ꦢꦢꦶꦤꦺ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦏ​ꦩꦼꦤꦺꦃ​ꦲꦺꦤꦺꦁꦥꦤ꧀ꦠꦼꦱ꧀ꦱꦺ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦩ꧀ꦧꦺꦴꦏ꧀ꦒꦮꦺ​ꦥꦩꦺꦂ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​꧈​ꦏꦪ​ꦲꦼꦁꦒꦺꦴꦤ꧀ꦩꦸ​ꦥꦤ꧀ꦠꦼꦱ꧀ꦢꦶꦒꦮꦺ​ꦥꦩꦺꦂ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​

^15-16꧋ꦗꦭꦂꦫꦤ꧀ꦲꦏꦸ​ꦔꦼꦂꦠꦶ​ꦏꦸꦮꦶ​꧈​ꦩꦸꦭꦤꦺ​ꦲꦏꦸ​ꦪ​ꦮꦶꦱ꧀ꦏꦼꦥꦺꦔꦶꦤ꧀ꦤꦶꦭꦶꦏ꧀ꦏꦶ​ꦏꦺꦴꦮꦺ​ꦥꦶꦁ​ꦭꦺꦴꦫꦺꦴ​꧉​ꦥꦶꦁ​ꦥꦶꦱꦤ꧀ꦤꦺꦲꦏꦸ​ꦩꦶꦏꦶꦂ​ꦲꦉꦥ꧀ꦩꦩ꧀ꦥꦶꦂ​ꦤꦁꦔ꧀ꦒꦺꦴꦤ꧀ꦩꦸ​ꦢꦺꦴꦁꦔꦺꦲꦏꦸ​ꦧꦸꦢꦭ꧀ꦤꦁꦧꦮꦃꦩꦱꦼꦢꦺꦴꦤꦶꦪꦭꦤ꧀ꦥꦶꦤ꧀ꦢꦺꦴꦤꦺꦤꦺꦏ꧀ꦧꦭꦶꦏ꧀ꦱꦁꦏꦏꦤ​ꦭꦺꦫꦺꦤ꧀ꦤꦁꦔ꧀ꦒꦺꦴꦤ꧀ꦩꦸ​ꦩꦼꦤꦺꦃ​꧈​ꦱꦸꦥꦪ​ꦲꦏꦸ​ꦧꦶꦱ​ꦤꦸꦭꦸꦁꦔꦶ​ꦏꦺꦴꦮꦺ​ꦭꦸꦮꦶꦃ​ꦲꦺꦴꦏꦺꦃ꧉​ꦏꦫꦺꦴꦩꦼꦤꦺꦃ​ꦲꦏꦸ​ꦪ​ꦩ꧀ꦧꦸꦠꦸꦃꦲꦏꦺꦥꦶꦠꦸꦭꦸꦁꦔꦤ꧀ꦩꦸ​ꦏꦁꦒꦺꦴ​ꦤꦼꦫꦸꦱ꧀ꦱꦏꦺꦲꦼꦁꦒꦺꦴꦤ꧀ꦏꦸ​ꦲꦉꦥ꧀ꦧꦸꦢꦭ꧀ꦤꦁꦧꦮꦃꦪꦸꦢꦺꦪ​꧉​ ¹⁷ꦲꦥ​ꦏꦼꦏꦉꦥꦤ꧀ꦏꦸꦲꦶꦏꦶ​ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦤ꧀?ꦩꦼꦱ꧀ꦠꦶꦲꦺꦴꦫ​ꦠ​?ꦲꦥ​ꦲꦏꦸ​ꦪ​ꦩꦺꦚ꧀​ꦕ꧀ꦭꦃ​ꦩꦺꦚ꧀​ꦕ꧀ꦭꦶꦃ​ꦏꦪ​ꦮꦺꦴꦁ​ꦱꦶꦁ​ꦲꦺꦴꦫ​ꦔꦼꦂꦠꦶ​ꦒꦸꦱ꧀ꦠꦶ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦱꦲꦶꦏꦶ​ꦔꦺꦴꦩꦺꦴꦁ“ꦪ​꧈​”ꦤꦁꦔꦶꦁ​ꦱꦺꦱꦸꦏ꧀ꦔꦺꦴꦩꦺꦴꦁ“ꦲꦺꦴꦫ​꧉​” ¹⁸ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦼꦤꦺꦁꦢꦶꦥꦽꦕꦪ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦏꦼꦤꦺꦁꦢꦶꦥꦽꦕꦪ​꧉​ꦲꦮꦶꦠ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦺꦴꦩꦺꦴꦁ“ꦪ​”ꦠꦼꦒꦼꦱ꧀ꦱꦺ​ꦪ​“ꦪ​”ꦭꦤ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦺꦴꦩꦺꦴꦁ“ꦲꦺꦴꦫ​”ꦠꦼꦒꦼꦱ꧀ꦱꦺ​ꦪ​“ꦲꦺꦴꦫ​꧉”ꦲꦺꦴꦫ​ꦔꦺꦴꦩꦺꦴꦁ“ꦪ​”ꦤꦁꦔꦶꦁ​ꦠꦼꦒꦼꦱ꧀ꦱꦺ​“ꦲꦺꦴꦫ​꧉​” ¹⁹ꦮꦸꦗꦸꦠ꧀ꦠꦺꦏꦧꦂ​ꦧꦧ꧀ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦠꦏ꧀ꦏꦧꦂꦫꦏꦺꦧꦉꦁ​ꦏꦫꦺꦴ​ꦱꦶꦭꦱ꧀ꦭꦤ꧀ꦠꦶꦩꦺꦴꦠꦶꦪꦸꦱ꧀ ꦪ​ꦲꦺꦴꦫ​ꦩꦺꦴꦭꦃꦩꦭꦶꦃ​꧉​ꦠꦼꦒꦼꦱ꧀ꦱꦺ​꧈​ꦲꦥ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦏꦿꦶꦱ꧀ꦡꦸꦱ꧀ꦪ​ꦢꦶꦭꦏꦺꦴꦤ꧀ꦤꦶ​ꦠꦼꦤꦤ꧀꧈​ ²⁰ꦲꦶꦏꦶ​ꦥꦚ꧀ꦕꦺꦤ꧀ꦠꦼꦤꦤ꧀ꦥꦫ​ꦱꦼꦢꦸꦭꦸꦂ​꧈​ꦲꦮꦶꦠ꧀ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦪ​ꦢꦶꦠꦸꦫꦸꦠ꧀ꦠꦶ​ꦏꦧꦺꦃ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔꦏꦺꦴꦤ꧀ꦤꦶ​ꦠꦼꦤꦤ꧀ꦭꦤ꧀ꦔꦺꦴꦩꦺꦴꦁ“ꦄꦩꦺꦤ꧀ ”ꦥꦚ꧀ꦕꦺꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦤꦸꦫꦸꦠ꧀ꦠꦶ​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦧꦺꦃ​꧈​ꦢꦺꦏ꧀ꦤꦺꦥꦤ꧀ꦠꦼꦱ꧀ꦢꦶꦥꦸꦗꦶ꧉​ ²¹ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦲꦏꦸ​ꦭꦤ꧀ꦏꦺꦴꦮꦺ​꧈​ꦱꦸꦥꦪ​ꦥꦼꦔꦤ꧀ꦢꦼꦭ꧀ꦭꦺ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦩꦫꦁ​ꦏꦿꦶꦱ꧀ꦡꦸꦱ꧀ꦧꦶꦱ​ꦩꦤ꧀ꦠꦼꦥ꧀ꦠꦼꦫꦸꦱ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦩꦶꦗꦶ​ꦲꦮꦏ꧀ꦏꦺ​ꦢꦺꦮꦺ꧉​ ²²ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦮꦶꦱ꧀ꦔꦼꦕꦥ꧀ꦲꦮꦏ꧀ꦏꦺ​ꦢꦺꦮꦺ꧈​ꦏꦁꦒꦺꦴ​ꦠꦤ꧀ꦢꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦶꦱ꧀ꦢꦢꦶ​ꦲꦸꦩꦠ꧀ꦠꦺ​ꦢꦺꦏ꧀ꦤꦺ꧉​ꦏꦫꦺꦴꦩꦼꦤꦺꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦫꦺꦴꦃ​ꦱꦸꦕꦶ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦏꦁꦒꦺꦴ​ꦥꦚ꧀ꦗꦼꦂ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦼꦏꦺꦏ꧀ꦏꦶꦱꦼꦩ꧀ꦧꦫꦁ​ꦭꦶꦪꦤꦺ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦤꦁꦱ꧀ꦮꦂꦒ​꧉​

²³꧋ꦥꦫ​ꦱꦼꦢꦸꦭꦸꦂ​꧈​ꦲꦥ​ꦠ​ꦗꦭꦂꦫꦤ꧀ꦤꦺ​ꦲꦏꦸ​ꦏꦺꦴꦏ꧀ꦲꦺꦴꦫ​ꦱꦶꦢ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​?ꦱꦲꦶꦏꦶ​ꦲꦉꦥ꧀ꦠꦏ꧀ꦲꦺꦴꦩꦺꦴꦁꦔꦏꦺꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦔꦼꦂꦠꦶ​ꦤꦺꦏ꧀ꦲꦏꦸ​ꦲꦺꦴꦫ​ꦒꦺꦴꦫꦺꦴꦃ​꧉​ꦲꦏꦸ​ꦢꦸꦫꦸꦁ​ꦠꦼꦏ​ꦤꦁꦏꦸꦠꦏꦺꦴꦫꦶꦤ꧀ꦠꦴꦏꦸꦮꦶ​꧈​ꦗꦭꦂꦫꦤ꧀ꦲꦏꦸ​ꦲꦼꦩꦺꦴꦃ​ꦔꦽꦩ꧀ꦧꦸꦏ꧀ꦥꦽꦏꦫꦥꦽꦏꦫ​ꦱꦶꦁ​ꦲꦺꦴꦫ​ꦥꦼꦤꦼꦂ꧈​ꦲꦮꦶꦠ꧀ꦏꦸꦮꦶ​ꦩꦼꦁꦏꦺꦴ​ꦤ꧀ꦢꦢꦺꦏ꧀ꦏꦏꦺꦭꦫꦤꦺ​ꦲꦠꦶꦩꦸ​꧉​ ²⁴ꦲꦏꦸ​ꦲꦺꦴꦫ​ꦔꦺꦴꦩꦺꦴꦁꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦩꦤ꧀ꦢꦺꦴꦂꦫꦶꦲꦸꦫꦶꦥ꧀ꦩꦸ​꧈​ꦲꦺꦴꦫ​꧈​ꦲꦮꦶꦠ꧀ꦮꦸꦗꦸꦠ꧀ꦠꦺꦏꦺꦴꦮꦺ​ꦪ​ꦥꦢ​ꦩꦤ꧀ꦠꦼꦥ꧀ꦲꦶꦁ​ꦥꦼꦔꦤ꧀ꦢꦼꦭ꧀꧈​ꦤꦁꦔꦶꦁ​ꦱꦼꦩꦸꦁꦒꦺꦴꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦠꦼꦏ​꧈​ꦠꦸꦗꦸꦮꦤ꧀ꦤꦺꦪ​ꦲꦺꦴꦫ​ꦭꦶꦪ​ꦏꦼꦗꦧ​ꦏꦁꦒꦺꦴ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦩꦸ​꧉​

↑ ↑ ↑

 

꧇​꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦔ꧀ꦒꦮꦺ​ꦥꦸꦠꦸꦱ꧀ꦱꦤ꧀ꦲꦺꦴꦫ​ꦤꦶꦭꦶꦏ꧀ꦏꦶ​ꦏꦺꦴꦮꦺ​ꦏꦸꦮꦶ​꧈​ꦲꦮꦶꦠ꧀ꦲꦏꦸ​ꦲꦼꦩꦺꦴꦃ​ꦤ꧀ꦢꦢꦺꦏ꧀ꦏꦏꦺꦱꦼꦢꦶꦤꦺꦲꦠꦶꦩꦸ​꧈​ꦏꦪ​ꦢꦺꦴꦁꦔꦺꦲꦏꦸ​ꦠꦼꦏ​ꦱꦶꦁ​ꦤ꧀ꦢꦶꦱꦶꦏ꧀ꦏꦲꦺ​꧉​ ²ꦲꦮꦶꦠ꧀ꦤꦺꦏ꧀ꦲꦏꦸ​ꦱꦩ꧀ꦥꦺꦏ꧀​ꦔ꧀ꦒꦮꦺ​ꦱꦼꦢꦶꦩꦸ꧈​ꦲꦏꦸ​ꦢꦺꦮꦺꦪ​ꦩꦺꦭꦸ​ꦱꦼꦢꦶ꧉​ꦲꦥ​ꦪ​ꦲꦺꦤꦺꦁꦱꦶꦁ​ꦧꦏꦭ꧀ꦧꦶꦱ​ꦔ꧀ꦭꦶꦥꦸꦂ​ꦲꦏꦸ​ꦤꦺꦏ꧀ꦏꦺꦴꦮꦺ​ꦥꦢ​ꦱꦼꦢꦶ꧉​ ³ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦠꦼꦤꦶꦩ꧀ꦧꦁꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧈​ꦲꦏꦸ​ꦭꦸꦮꦸꦁꦤꦸꦭꦶꦱ꧀ꦭꦪꦁ​ꦮꦲꦺ​꧉​ꦤꦁꦭꦪꦁ​ꦏꦸꦮꦶ​ꦲꦏꦸ​ꦮꦶꦱ꧀​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦧꦧ꧀ꦥꦽꦏꦫꦥꦽꦏꦫ​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦠꦠ​꧉​ꦢꦢꦶꦤꦺ​ꦤꦺꦏ꧀ꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧈​ꦏꦺꦴꦮꦺ​ꦧꦶꦱ​ꦔ꧀ꦒꦮꦺ​ꦧꦸꦔꦃꦲꦺ​ꦲꦠꦶꦏꦸ​ꦠꦼꦤꦤ꧀ ꦲꦺꦴꦫ​ꦤ꧀ꦢꦢꦺꦏ꧀ꦏꦏꦺꦱꦼꦢꦶꦏꦸꦠꦼꦫꦸꦱ꧀꧈​ꦭꦤ꧀ꦲꦏꦸ​ꦪ​ꦥꦽꦕꦪ​ꦤꦺꦏ꧀ꦏꦺꦴꦮꦺ​ꦥꦢ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦠꦼꦩ꧀ꦧꦸꦁꦠꦼꦩ꧀ꦧꦸꦁꦏꦸꦏꦸꦮꦶ​꧈​ꦱꦸꦥꦪ​ꦲꦏꦸ​ꦧꦶꦱ​ꦧꦸꦔꦃ​꧉​ꦤꦺꦏ꧀ꦲꦏꦸ​ꦧꦸꦔꦃ​꧈​ꦏꦺꦴꦮꦺ​ꦏꦧꦺꦃ​ꦩꦼꦱ꧀ꦠꦶꦪ​ꦩꦺꦭꦸ​ꦧꦸꦔꦃ​꧉​ ⁴ꦥꦫ​ꦱꦼꦢꦸꦭꦸꦂ​꧈​ꦥꦢ​ꦔꦼꦂꦠꦶꦪ​ꦤꦺꦏ꧀ꦲꦺꦴꦫ​ꦏꦼꦥꦺꦤꦏ꧀ꦲꦼꦁꦒꦺꦴꦤ꧀ꦏꦸ​ꦤꦸꦭꦶꦱ꧀ꦭꦪꦁ​ꦏꦸꦮꦶ​꧈​ꦤꦁꦔꦶꦁ​ꦏꦫꦺꦴ​ꦲꦠꦶ​ꦱꦶꦁ​ꦱꦸꦱꦃ​ꦭꦤ꧀ꦱꦼꦢꦶ꧉​ꦲꦏꦸ​ꦲꦺꦴꦫ​ꦏꦸꦮꦠ꧀ꦔꦼꦩ꧀ꦥꦼꦠ꧀ꦲꦼꦭꦸꦃꦏꦸ​꧉​ꦲꦏꦸ​ꦧ꧀ꦭꦱ꧀ꦲꦺꦴꦫ​ꦤ꧀ꦢꦸꦮꦺꦒꦒꦱ꧀ꦱꦤ꧀ꦩꦫꦏ꧀ꦏꦏꦺꦏꦺꦴꦮꦺ​ꦱꦼꦢꦶ꧈​ꦲꦺꦴꦫ​꧈​ꦤꦁꦔꦶꦁ​ꦲꦏꦸ​ꦩꦭꦃ​ꦏꦼꦥꦺꦔꦶꦤ꧀​ꦤ꧀ꦢꦸꦤꦸꦁꦔꦏꦺꦱꦼꦥꦶꦫ​ꦒꦼꦢꦺꦤꦺꦏꦠꦿꦺꦱ꧀ꦤꦤ꧀ꦏꦸꦩꦫꦁ​ꦏꦺꦴꦮꦺ​꧉​

꧋ꦱꦼꦢꦸꦭꦸꦂ​ꦱꦶꦁ​ꦱꦭꦃ​ꦢꦶꦔꦥꦸꦫ꧉​

⁵꧋ꦱꦼꦢꦸꦭꦸꦂ​ꦱꦶꦁ​ꦔ꧀ꦒꦮꦺ​ꦫꦺꦕꦺꦴꦏ꧀​ꦏꦸꦮꦶ​ꦱꦏ꧀ꦗꦤꦺꦲꦺꦴꦫ​ꦤ꧀ꦢꦢꦺꦏ꧀ꦏꦏꦺꦱꦸꦱꦃꦲꦺ​ꦲꦏꦸ​꧈​ꦤꦁꦔꦶꦁ​ꦱꦶꦁ​ꦱꦸꦱꦃ​ꦩꦭꦃ​ꦏꦺꦴꦮꦺ​ꦏꦧꦺꦃ​꧈​ꦱꦼꦤꦗꦤ꧀ꦤ​ꦲꦺꦴꦫ​ꦏꦼꦧꦕꦸꦠ꧀ꦧꦔꦼꦠ꧀꧈​ ⁶ꦮꦸꦗꦸꦠ꧀ꦠꦺꦢꦺꦏ꧀ꦤꦺꦪ​ꦮꦶꦱ꧀ꦲꦩ꧀ꦧꦺꦴꦏ꧀ꦒꦫꦥ꧀ꦧꦼꦧꦉꦁꦔꦤ꧀ꦭꦤ꧀ꦮꦸꦗꦸꦠ꧀ꦠꦺꦪ​ꦮꦶꦱ꧀ꦕꦸꦏꦸꦥ꧀꧈​ ⁷ꦱꦲꦶꦏꦶ​ꦱꦼꦢꦸꦭꦸꦂ​ꦏꦸꦮꦶ​ꦢꦶꦔꦥꦸꦫꦮꦲꦺ​ꦭꦤ꧀ꦢꦶꦲꦁꦏꦠ꧀ꦩꦼꦤꦺꦃ​꧈​ꦱꦸꦥꦪ​ꦲꦗ​ꦱꦩ꧀ꦥꦺꦏ꧀ꦱꦼꦩ꧀ꦥ꧀ꦭꦏ꧀ꦲꦠꦶꦤꦺ​꧉​ ⁸ꦩꦸꦭꦤꦺ​ꦲꦏꦸ​ꦚꦸꦮꦸꦤ꧀ꦠꦼꦤꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​ꦥꦫ​ꦱꦼꦢꦸꦭꦸꦂ​꧈​ꦢꦶꦏꦺꦠꦺꦴꦏ꧀ꦏꦏꦺꦤꦺꦏ꧀ꦏꦺꦴꦮꦺ​ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦢꦺꦏ꧀ꦤꦺ꧉​ ⁹ꦭꦤ꧀ꦲꦏꦸ​ꦪ​ꦥꦽꦕꦪ​ꦤꦺꦏ꧀ꦏꦺꦴꦮꦺ​ꦧꦏꦭ꧀ꦤꦸꦫꦸꦠ꧀ꦠꦶ​ꦏꦉꦥ꧀ꦏꦸ​꧈​ꦲꦮꦶꦠ꧀ꦲꦏꦸ​ꦤꦸꦭꦶꦱ꧀ꦭꦪꦁ​ꦱꦶꦁ​ꦤ꧀ꦢꦶꦱꦶꦏ꧀ꦏꦸꦮꦶ​꧈​ꦲꦸꦒ​ꦗꦭꦂꦫꦤ꧀ꦲꦏꦸ​ꦏꦼꦥꦺꦔꦶꦤ꧀ꦔꦼꦂꦠꦶ​ꦏꦺꦴꦮꦺ​ꦥꦢ​ꦤꦸꦫꦸꦠ꧀ꦠꦶ​ꦠꦼꦩ꧀ꦧꦸꦁꦠꦼꦩ꧀ꦧꦸꦁꦏꦸꦲꦥ​ꦲꦺꦴꦫ​꧉​ꦮꦸꦗꦸꦠ꧀ꦠꦺꦏꦧꦺꦃ​ꦲꦺꦴꦩꦺꦴꦁꦏꦸꦪ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧉​ ¹⁰ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦏꦺꦴꦮꦺ​ꦔꦥꦸꦫ​ꦱꦼꦢꦸꦭꦸꦂ​ꦏꦸꦮꦶ​꧈​ꦔꦼꦂꦠꦶꦪ​ꦤꦺꦏ꧀ꦲꦏꦸ​ꦲꦸꦒ​ꦩꦺꦭꦸ​ꦔꦥꦸꦫ​ꦢꦺꦏ꧀ꦤꦺ꧉​ꦲꦏꦸ​ꦥꦚ꧀ꦕꦺꦤ꧀ꦔꦥꦸꦫ​ꦱꦼꦢꦸꦭꦸꦂ​ꦏꦸꦮꦶ​꧈​ꦱꦼꦤꦗꦤ꧀ꦱꦭꦃꦲꦺ​ꦢꦺꦏ꧀ꦤꦺꦪ​ꦲꦺꦴꦫ​ꦠꦏ꧀ꦒꦮꦺ​ꦱꦼꦧꦧ꧀ꦭꦤ꧀ꦏꦿꦶꦱ꧀ꦡꦸꦱ꧀ꦢꦺꦮꦺꦮꦼꦫꦸꦃ​ꦤꦺꦏ꧀ꦲꦏꦸ​ꦔꦥꦸꦫ​ꦱꦼꦢꦸꦭꦸꦂ​ꦏꦸꦮꦶ​ꦲꦶꦁ​ꦭꦲꦶꦂ​ꦭꦤ꧀ꦧꦠꦶꦤ꧀ ꦲꦮꦶꦠ꧀ꦲꦏꦸ​ꦤꦸꦗꦸ​ꦲꦥ​ꦱꦶꦁ​ꦧꦼꦕꦶꦏ꧀ꦏꦁꦒꦺꦴ​ꦏꦺꦴꦮꦺ​ꦏꦧꦺꦃ​꧉​ ¹¹ꦢꦢꦶꦤꦺ​ꦱꦺꦠꦤ꧀​ꦲꦺꦴꦫ​ꦧꦶꦱ​ꦤꦼꦩꦸ​ꦢꦭꦤ꧀ꦏꦁꦒꦺꦴ​ꦔꦿꦸꦱꦏ꧀ꦲꦮꦏ꧀ꦏꦺ​ꦢꦺꦮꦺ꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦲꦏꦭ꧀ꦭꦺ​ꦢꦺꦏ꧀ꦤꦺꦏꦼꦥꦿꦶꦪꦺ​꧉​

꧋ꦲꦺꦤꦺꦁꦧꦸꦔꦃꦲꦺ​꧈​ꦲꦺꦤꦺꦁꦱꦸꦩꦼꦭꦁ​ꦔꦺ​꧉​

¹²꧋ꦥꦫ​ꦱꦼꦢꦸꦭꦸꦂ​꧈​ꦢꦺꦴꦁꦔꦺꦲꦏꦸ​ꦠꦼꦏ​ꦤꦁꦏꦸꦠꦠꦿꦺꦴꦮꦱ꧀ꦲꦉꦥ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶ​ꦪ​ꦔ꧀ꦒꦮꦺꦏ꧀ꦏꦏꦺꦢꦭꦤ꧀ꦲꦏꦸ​꧈​ꦮꦸꦗꦸꦠ꧀ꦠꦺꦪ​ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦱꦼꦤꦼꦁ​ꦔꦿꦸꦔꦺꦴꦏ꧀ꦏꦏꦺ꧉​ ¹³ꦤꦁꦔꦶꦁ​ꦲꦶꦁ​ꦲꦠꦶꦏꦸ​ꦫꦱꦤꦺ​ꦩꦼꦏ꧀ꦱ​ꦲꦺꦴꦫ​ꦏꦼꦥꦺꦤꦏ꧀ ꦲꦮꦶꦠ꧀ꦲꦏꦸ​ꦢꦸꦫꦸꦁ​ꦏꦼꦥꦼꦠꦸꦏ꧀ꦏꦫꦺꦴ​ꦱꦼꦢꦸꦭꦸꦂ​ꦠꦶꦠꦸꦱ꧀ꦱꦶꦁ​ꦏꦸꦢꦸ​ꦔ꧀ꦒꦮ​ꦏꦧꦂ​ꦱꦁꦏꦔ꧀ꦒꦺꦴꦤ꧀ꦩꦸ​꧉​ꦩꦸꦭꦤꦺ​ꦲꦏꦸ​ꦪ​ꦲꦺꦴꦫ​ꦱꦸꦮꦶꦤꦁꦏꦸꦠꦠꦿꦺꦴꦮꦱ꧀ꦏꦺꦴꦤꦺꦴ​꧈​ꦲꦏꦸ​ꦠꦼꦫꦸꦱ꧀ꦥꦩꦶꦠ꧀ꦠꦤ꧀ꦲꦉꦥ꧀ꦤꦁꦧꦮꦃꦩꦱꦼꦢꦺꦴꦤꦶꦪ꧉​

꧋ꦒꦸꦱ꧀ꦠꦶ​ꦔ꧀ꦒꦮꦺꦏ꧀ꦏꦏꦺꦢꦭꦤ꧀꧈​

¹⁴꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦤꦁꦲꦼꦤ꧀ꦢꦶ​ꦮꦲꦺ​ꦢꦺꦏ꧀ꦤꦺ​ꦤꦸꦤ꧀ꦠꦸꦤ꧀ꦲꦏꦸ​꧉​ꦭꦤ꧀ꦗꦭꦂꦫꦤ꧀ꦱꦁꦏꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦺꦴꦁꦮꦺꦴꦁ​ꦧꦶꦱ​ꦔꦼꦂꦠꦶ​ꦤꦺꦏ꧀ꦲꦏꦸ​꧈​ꦱꦶꦁ​ꦩꦲꦸꦤꦺ​ꦩꦸꦁꦱꦸꦃꦲꦺ​꧈​ꦱꦲꦶꦏꦶ​ꦢꦢꦶ​ꦥꦼꦭꦢꦺꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​ꦱꦲꦶꦏꦶ​ꦤꦁꦲꦼꦤ꧀ꦢꦶ​ꦮꦲꦺ​ꦱꦶꦁ​ꦠꦏ꧀ꦥꦫꦤ꧀ꦤꦶ꧈​ꦲꦏꦸ​ꦧꦶꦱ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦭꦤ꧀ꦱꦁꦏꦥꦶꦠꦸꦭꦸꦁꦔꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦒꦼꦊꦩ꧀ꦤꦩ꧀ꦥ​ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​꧈​ꦲꦺꦭꦶꦁ​​ꦲꦺꦭꦶꦁ​​ꦏꦪ​ꦊꦔ​ꦮꦔꦶ​ꦱꦶꦁ​ꦔꦧꦂꦏꦲꦺ​꧉​ ¹⁵ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦏꦸ​ꦪ​ꦏꦪ​ꦲꦩ꧀ꦧꦸꦤꦺ​ꦊꦔ​ꦮꦔꦶ​ꦏꦲꦺ​꧈​ꦠꦼꦒꦼꦱ꧀ꦱꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦼꦤꦼꦁ​ꦠꦼꦤꦤ꧀ꦲꦼꦁꦒꦺꦴꦤ꧀ꦏꦸ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​

꧋ꦲꦏꦸ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦲꦺꦴꦫ​ꦤꦩꦸꦁ​ꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀ ꦤꦁꦔꦶꦁ​ꦲꦸꦒ​ꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦤꦩ꧀ꦥ​ꦏꦫꦸꦱꦏ꧀ꦏꦤ꧀꧈​ ¹⁶ꦏꦁꦒꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦧꦏꦭ꧀ꦤꦩ꧀ꦥ​ꦏꦫꦸꦱꦏ꧀ꦏꦤ꧀ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦏꦪ​ꦲꦩ꧀ꦧꦸꦤꦺ​ꦧꦠꦁꦔꦺꦮꦺꦴꦁ​ꦩꦠꦶ​꧈​ꦤꦁꦔꦶꦁ​ꦏꦁꦒꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀ꦩꦭꦃ​ꦏꦪ​ꦲꦩ꧀ꦧꦸꦤꦺ​ꦊꦔ​ꦮꦼꦔꦶ​꧉​ꦲꦥ​ꦲꦺꦤꦺꦁꦱꦶꦁ​ꦏꦸꦮꦠ꧀ꦔꦼꦂꦗꦤ꧀ꦤꦶꦥꦼꦁꦒꦮꦺꦏꦸꦲꦶꦏꦶ​? ¹⁷ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦲꦺꦴꦫ​ꦏꦪ​ꦭꦶꦪꦭꦶꦪꦤꦺ​ꦱꦶꦁ​ ꦥꦢ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦏꦁꦒꦺꦴ​ꦔ꧀ꦒꦺꦴꦭꦺꦏ꧀ꦧꦠꦶ꧈​ꦲꦺꦴꦫ​ꦧꦺꦢ​ꦏꦪ​ꦧꦏꦸꦭ꧀ꦱꦶꦁ​ꦔꦶꦢꦼꦂꦫꦏꦺꦢꦒꦁꦔꦤ꧀ꦤꦺ​ꦏꦲꦺ​꧈​ꦲꦺꦴꦫ​꧉​ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦢꦢꦶ​ꦥꦼꦭꦢꦺꦤ꧀ꦤꦺ​ꦏꦿꦶꦱ꧀ꦡꦸꦱ꧀ ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦩꦿꦺꦤ꧀ꦠꦃ​ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦏ꧀ꦤꦺꦚꦮꦁ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦢꦺꦏ꧀ꦤꦺꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦚꦩ꧀ꦧꦸꦠ꧀ꦠꦏꦫꦺꦴ​ꦲꦠꦶ​ꦱꦶꦁ​ꦉꦱꦶꦏ꧀꧈​

↑ ↑ ↑

꧋ꦫꦱꦸꦭ꧀ꦦꦈꦭꦸꦱ꧀ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦭꦪꦁ​ꦥꦼꦔꦊꦩ꧀ꦩꦤ꧀꧈​

꧇​꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦥ​ꦲꦏꦸ​ꦲꦶꦏꦶ​ꦔꦼꦊꦩ꧀ꦲꦮꦏ꧀ꦏꦸ​ꦢꦺꦮꦺꦩꦫꦁ​ꦏꦺꦴꦮꦺ​?ꦲꦏꦸ​ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦭꦪꦁ​ꦥꦼꦔꦊꦩ꧀ꦩꦤ꧀ꦏꦁꦒꦺꦴ​ꦏꦺꦴꦮꦺ​ꦭꦤ꧀ꦲꦏꦸ​ꦪ​ꦲꦺꦴꦫ​ꦔ꧀ꦒꦺꦴꦭꦺꦏ꧀ꦭꦪꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦱꦁꦏꦏꦺꦴꦮꦺ​꧈​ꦱꦼꦤꦗꦤ꧀ꦭꦶꦪꦭꦶꦪꦤꦺ​ꦲꦺꦴꦏꦺꦃꦱꦶꦁ​ꦩꦼꦂꦭꦺꦴꦏ꧀ꦩꦼꦂꦭꦺꦴꦏ꧀ꦏꦏꦺꦏꦸꦮꦶ​꧉​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦧꦫꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦥꦫ​ꦱꦼꦢꦸꦭꦸꦂ​? ²ꦲꦮꦶꦠ꧀ꦏꦺꦴꦮꦺ​ꦢꦺꦮꦺꦏꦧꦺꦃ​ꦢꦢꦶ​ꦠꦤ꧀ꦢꦤꦺꦤꦺꦏ꧀ꦲꦏꦸ​ꦩꦸꦭꦁꦔꦶꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ꦢꦢꦶꦤꦺ​ꦤꦁꦲꦼꦤ꧀ꦢꦶ​ꦮꦲꦺ​ꦏꦺꦴꦮꦺ​ꦏꦼꦤꦺꦁꦠꦏ꧀ꦒꦮꦺ​ꦥꦩꦺꦂꦫꦤ꧀ ꦠꦼꦒꦼꦱ꧀ꦱꦺ​꧈​ꦏꦺꦴꦮꦺ​ꦱꦶꦁ​ꦢꦢꦶ​ꦭꦪꦁ​ꦥꦼꦔꦊꦩꦤ꧀ꦏꦸ꧉​ꦤꦁꦔꦶꦁ​ꦭꦪꦁꦏꦸ​ꦏꦼꦠꦸꦭꦶꦱ꧀ꦲꦶꦁ​ꦲꦠꦶꦩꦸ​꧈​ꦲꦺꦴꦫ​ꦤꦁꦏꦼꦂꦠꦱ꧀ ꦲꦮꦶꦠ꧀ꦮꦺꦴꦁꦮꦺꦴꦁ​ꦧꦶꦱ​ꦮꦼꦫꦸꦃ​ꦭꦤ꧀ꦢꦸꦤꦸꦁꦢꦺꦮꦺꦱꦁꦏꦲꦸꦫꦶꦥ꧀ꦩꦸ​꧈​ꦤꦺꦏ꧀ꦲꦏꦸ​ꦩꦸꦭꦁꦔꦏꦺꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ ³ꦲꦸꦫꦶꦥ꧀ꦩꦸ​ꦱꦶꦁ​ꦲꦚꦂ​ꦏꦸꦮꦶ​ꦮꦺꦴꦃꦲꦺ​ꦥꦼꦁꦒꦮꦺꦪꦤ꧀ꦏꦸꦲꦮꦏ꧀ꦏꦺ​ꦢꦺꦮꦺꦭꦤ꧀ꦏꦸꦮꦶ​ꦏꦪꦏꦪ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦭꦪꦁ​ꦥꦼꦔꦊꦩꦤ꧀ꦏꦸꦱꦁꦏꦏꦿꦶꦱ꧀ꦡꦸꦱ꧀꧈​ꦲꦺꦴꦫ​ꦭꦪꦁ​ꦱꦶꦁ​ꦏꦼꦠꦸꦭꦶꦱ꧀ꦏꦫꦺꦴ​ꦲꦺꦁꦏꦶ꧈​ꦲꦺꦴꦫ​꧈​ꦤꦁꦔꦶꦁ​ꦏꦫꦺꦴ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀꧈​ꦠꦼꦒꦼꦱ꧀ꦱꦺ​꧈​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦮꦶꦱ꧀ꦔꦚꦂꦫꦏꦺꦲꦸꦫꦶꦥ꧀ꦩꦸ​ꦱꦏ꧀ꦏꦧꦺꦃꦲꦺ꧉​ꦭꦪꦁ​ꦥꦼꦔꦊꦩ꧀ꦩꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦱꦁꦏꦏꦿꦶꦱ꧀ꦡꦸꦱ꧀ꦲꦺꦴꦫ​ꦢꦶꦠꦠꦃ​ꦤꦁꦮꦠꦸ​ꦏꦪ​ꦲꦁꦒꦼꦂꦫꦁꦒꦼꦂꦫꦺ​ꦤꦧꦶ​ꦩꦺꦴꦱꦼꦱ꧀ ꦲꦺꦴꦫ​꧈​ꦤꦁꦔꦶꦁ​ꦲꦶꦁ​ꦲꦠꦶꦤꦺ​ꦩꦤꦸꦁꦱ​꧉​

꧋ꦥꦼꦭꦢꦺꦤ꧀ꦤꦺ​ꦥꦽꦗꦚ꧀ꦗꦶꦪꦤ꧀ꦲꦚꦂ​꧉​

⁴꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦮꦤꦶ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦲꦏꦸ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀꧈​ ⁵ꦤꦁꦔꦶꦁ​ꦲꦏꦸ​ꦲꦺꦴꦫ​ꦔꦺꦴꦩꦺꦴꦁꦤꦺꦏ꧀ꦲꦼꦁꦒꦺꦴꦤ꧀ꦏꦸ​ꦧꦶꦱ​ꦔꦼꦂꦗꦤ꧀ꦤꦶꦥꦼꦁꦒꦮꦺꦏꦸꦏꦸꦮꦶ​ꦱꦁꦏꦏꦼꦏꦸꦮꦠ꧀ꦠꦤ꧀ꦏꦸ​ꦢꦺꦮꦺ꧈​ꦧ꧀ꦭꦱ꧀ꦲꦺꦴꦫ​꧈​ꦩꦭꦃ​ꦲꦏꦸ​ꦔꦏꦺꦴꦤ꧀ꦤꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦲꦏꦸ​꧈​ꦱꦸꦥꦪ​ꦲꦏꦸ​ꦧꦶꦱ​ꦤꦶꦤ꧀ꦢꦏ꧀ꦏꦏꦺꦏꦸꦮꦶ​ꦏꦧꦺꦃ​꧉​ ⁶ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦩꦶꦗꦶ​ꦭꦤ꧀ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦲꦏꦸ​ꦱꦸꦥꦪ​꧈​ꦲꦏꦸ​ꦧꦶꦱ​ꦥꦤ꧀ꦠꦼꦱ꧀ꦔꦧꦂꦫꦏꦺꦥꦽꦗꦚ꧀ꦗꦶꦪꦤ꧀ꦱꦶꦁ​ꦲꦚꦂ​ꦩꦫꦁ​ꦩꦤꦸꦁꦱ​ꦏꦧꦺꦃ​꧉​ꦲꦏꦸ​ꦲꦺꦴꦫ​ꦔꦧꦂꦫꦏꦺꦧꦧ꧀ꦮꦺꦠ꧀ꦮꦺꦠ꧀ꦤꦧꦶ​ꦩꦺꦴꦱꦼꦱ꧀ꦱꦶꦁ​ꦏꦼꦠꦸꦭꦶꦱ꧀ꦲꦶꦁ​ꦥꦽꦗꦚ꧀ꦗꦶꦪꦤ꧀ꦱꦶꦁ​ꦭꦮꦱ꧀ ꦲꦺꦴꦫ​꧈​ꦤꦁꦔꦶꦁ​ꦲꦏꦸ​ꦔꦧꦂꦫꦏꦺꦧꦧ꧀ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦲꦺꦴꦫ​ꦔꦺꦴꦩꦺꦴꦁꦔꦏꦺꦧꦧ꧀ꦮꦺꦠ꧀ꦮꦺꦠ꧀ꦤꦧꦶ​ꦩꦺꦴꦱꦼꦱ꧀?ꦲꦮꦶꦠ꧀ꦮꦺꦠ꧀ꦮꦺꦠ꧀ꦏꦸꦮꦶ​ꦤꦼꦏꦏ꧀ꦏꦏꦺꦥꦠꦶ​ꦩꦫꦁ​ꦱꦧꦼꦤ꧀ꦮꦺꦴꦁ​ꦱꦶꦁ​ꦲꦺꦴꦫ​ꦥꦢ​ꦩꦤꦸꦠ꧀ꦏꦸꦮꦶ​꧉​ꦤꦁꦔꦶꦁ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦭꦃ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦩꦤꦸꦁꦱ​꧈​ꦱꦸꦥꦪ​ꦧꦶꦱ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦧꦶꦱ​ꦲꦸꦫꦶꦥ꧀ꦏꦫꦺꦴ​ꦢꦺꦏ꧀ꦤꦺꦱ꧀ꦭꦮꦱ꧀ꦱꦺ꧉​

⁷꧋ꦥꦫ​ꦱꦼꦢꦸꦭꦸꦂ​꧈​ꦧꦼꦤꦼꦂ​ꦲꦁꦒꦼꦂꦫꦁꦒꦼꦂ​ꦤꦧꦶ​ꦩꦺꦴꦱꦼꦱ꧀ꦱꦶꦁ​ꦢꦶꦠꦠꦃ​ꦤꦁꦮꦠꦸ​ꦤꦼꦏꦏ꧀ꦏꦏꦺꦥꦠꦶ​ꦩꦫꦁ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦢ​ꦒꦼꦊꦩ꧀ꦩꦤꦸꦠ꧀ ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦲꦁꦒꦼꦂꦫꦁꦒꦼꦂ​ꦏꦸꦮꦶ​ꦠꦼꦏꦤꦺ​ꦏꦫꦺꦴ​ꦱ꧀ꦭꦺꦴꦫꦺꦴꦠ꧀ꦠꦺꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦴꦁꦔꦺꦤꦧꦶ​ꦩꦺꦴꦱꦼꦱ꧀ꦔꦼꦠꦺꦴꦏ꧀ꦏꦏꦺꦲꦁꦒꦼꦂꦫꦁꦒꦼꦂ​ꦱꦶꦁ​ꦢꦶꦠꦠꦃ​ꦤꦁꦮꦠꦸ​ꦲꦶꦏꦶ​ꦕꦪꦃꦤꦺ​ꦢꦺꦏ꧀ꦤꦺꦱꦼꦩ꧀ꦭꦺꦴꦫꦺꦴꦠ꧀ꦱꦁꦏꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦼꦥꦢꦁꦔꦺꦲꦩ꧀​ꦧ꧀ꦊꦉꦁꦔꦶ​ꦧꦁꦱ​ꦆꦱꦿꦌꦭ꧀ ꦱꦩ꧀ꦥꦺꦏ꧀ꦲꦺꦴꦫ​ꦥꦢ​ꦏꦸꦮꦠ꧀ꦩꦤ꧀ꦢꦼꦁ​ꦠꦼꦫꦸꦱ꧀꧈​ꦤꦁꦔꦶꦁ​ꦱꦼꦤꦗꦤ꧀ꦱ꧀ꦭꦺꦴꦫꦺꦴꦠ꧀ꦠꦺꦥꦼꦥꦢꦁꦩꦲꦸ​ꦒꦼꦢꦺꦤꦺꦏꦪ​ꦔꦺꦴꦤꦺꦴ​꧈​ꦱꦸꦮꦶꦱꦸꦮꦶꦪ​ꦲꦶꦭꦁ​꧉​ ⁸ꦤꦺꦏ꧀ꦢꦶꦥꦢꦏ꧀ꦏꦏꦺꦏꦫꦺꦴ​ꦥꦼꦁꦒꦮꦺꦤꦺ​ꦫꦺꦴꦃ​ꦱꦸꦕꦶ​꧈​ꦲꦥ​ꦥꦼꦁꦒꦮꦺꦤꦺ​ꦫꦺꦴꦃ​ꦱꦸꦕꦶ​ꦲꦶꦁ​ꦲꦸꦫꦶꦥ꧀ꦥꦺꦩꦤꦸꦁꦱ​ꦲꦺꦴꦫ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦒꦼꦢꦺꦤꦺꦥꦼꦥꦢꦁꦔꦺ? ⁹ꦢꦶꦥꦶꦏꦶꦂ​ꦢꦺꦮꦺꦥꦫ​ꦱꦼꦢꦸꦭꦸꦂ​꧈​ꦭꦃ​ꦤꦺꦏ꧀ꦮꦺꦠ꧀ꦮꦺꦠ꧀ꦠꦺꦥꦽꦗꦚ꧀ꦗꦶꦪꦤ꧀ꦭꦮꦱ꧀ ꦱꦶꦁ​ꦔ꧀ꦒꦮ​ꦥꦠꦶ​ꦏꦁꦒꦺꦴ​ꦩꦤꦸꦁꦱ​꧈​ꦠꦼꦏꦤꦺ​ꦏꦫꦺꦴ​ꦥꦼꦥꦢꦁꦱꦶꦁ​ꦱꦼꦩ꧀ꦭꦺꦴꦫꦺꦴꦠ꧀ꦔꦺꦴꦤꦺꦴ​꧈​ꦩꦺꦴꦱꦺꦴꦏ꧀ꦥꦽꦗꦚ꧀ꦗꦶꦪꦤ꧀ꦱꦶꦁ​ꦲꦚꦂ​꧈​ꦱꦶꦁ​ꦩꦫꦏ꧀ꦏꦏꦺꦩꦤꦸꦁꦱ​ꦢꦶꦲꦁꦒꦼꦥ꧀ꦧꦼꦤꦼꦂ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦭꦸꦮꦶꦃ​ꦒꦼꦢꦺꦥꦔ꧀ꦮꦱꦤꦺ​꧈​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦱꦶꦁ​ꦤ꧀ꦢꦶꦱꦶꦏ꧀꧈​

¹⁰꧋ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦢꦶꦮꦸꦭꦁꦔꦏꦺꦏꦫꦺꦴ​ꦤꦧꦶ​ꦩꦺꦴꦱꦼꦱ꧀ꦪ​ꦧꦼꦤꦼꦂ​ꦠꦼꦏꦤꦺ​ꦏꦫꦺꦴ​ꦱ꧀ꦭꦺꦴꦫꦺꦴꦠ꧀ꦠꦺꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦏꦸꦮꦶ​ꦱꦲꦶꦏꦶ​ꦲꦺꦴꦫ​ꦲꦥꦲꦥ​ꦤꦺꦏ꧀ꦢꦶꦥꦢꦏ꧀ꦏꦏꦺꦏꦫꦺꦴ​ꦥꦶꦠꦸꦠꦸꦂ​ꦱꦶꦁ​ꦭꦸꦮꦶꦃ​ꦒꦼꦢꦺꦥꦔ꧀ꦮꦱꦤꦺ​꧈​ꦱꦶꦁ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦩꦤꦸꦁꦱ​꧈​ꦱꦸꦥꦪ​ꦧꦶꦱ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹¹ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦭꦃ​ꦤꦺꦏ꧀ꦥꦶꦠꦸꦠꦸꦂ​ꦱꦶꦁ​ꦲꦺꦴꦫ​ꦭꦁꦒꦼꦁ​ꦮꦲꦺ​ꦠꦼꦏꦤꦺ​ꦔꦁꦒꦺꦴ​ꦥꦼꦥꦢꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦱꦼꦩ꧀ꦭꦺꦴꦫꦺꦴꦠ꧀ꦔꦺꦴꦤꦺꦴ​꧈​ꦭꦃ​ꦥꦶꦠꦸꦠꦸꦂ​ꦱꦶꦁ​ꦭꦁꦒꦼꦁ​ꦩꦼꦤꦺꦃ​꧈​ꦩꦺꦴꦱꦺꦴꦏ꧀ꦲꦺꦴꦫ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦥꦔ꧀ꦮꦱꦤꦺ​?

¹²꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦲꦏꦸ​ꦤ꧀ꦢꦸꦮꦺꦤ꧀ꦤꦶ​ꦥꦼꦔꦤ꧀ꦢꦼꦭ꧀ꦏꦸꦮꦶ​꧈​ꦩꦸꦭꦤꦺ​ꦲꦏꦸ​ꦪ​ꦩꦸꦭꦁꦔꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦫꦺꦴ​ꦏꦼꦤ꧀ꦢꦼꦭ꧀꧈​ ¹³ꦲꦏꦸ​ꦲꦺꦴꦫ​ꦏꦪ​ꦤꦧꦶ​ꦩꦺꦴꦱꦼꦱ꧀ꦱꦶꦁ​ꦤꦸꦠꦸꦥ꧀ꦥꦶ​ꦕꦪꦃꦤꦺ​꧈​ꦱꦸꦥꦪ​ꦧꦁꦱ​ꦆꦱꦿꦌꦭ꧀ꦲꦺꦴꦫ​ꦮꦼꦫꦸꦃ​ꦲꦶꦭꦁꦔꦺ​ꦱ꧀ꦭꦺꦴꦫꦺꦴꦠ꧀ꦠꦺꦥꦼꦥꦢꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁴ꦲꦮꦶꦠ꧀ꦧꦁꦱ​ꦆꦱꦿꦌꦭ꧀ꦮꦶꦱ꧀ꦒꦥꦸꦏ꧀ꦥꦶꦏꦶꦂꦫꦤ꧀ꦤꦺ​ꦭꦤ꧀ꦲꦺꦴꦫ​ꦧꦶꦱ​ꦢꦸꦤꦸꦁꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦸꦗꦸꦠ꧀ꦠꦺꦠꦼꦏꦤ꧀ꦱꦼꦥꦿꦺꦤꦺ​ꦏꦪꦏꦪ​ꦲꦶꦗꦶꦏ꧀ꦏꦼꦠꦸꦠꦸꦥ꧀ꦥꦤ꧀ ꦲꦮꦶꦠ꧀ꦤꦺꦏ꧀ꦥꦢ​ꦔꦸꦩ꧀ꦥꦸꦭ꧀ꦭꦤ꧀ꦢꦶꦮꦕꦏ꧀ꦏꦏꦺ​ꦱꦁꦏꦥꦽꦗꦚ꧀ꦗꦶꦪꦤ꧀ꦭꦮꦱ꧀ ꦩꦼꦏ꧀ꦱ​ꦢꦸꦫꦸꦁ​ꦧꦶꦱ​ꦢꦸꦤꦸꦁ꧉​ꦏꦪꦏꦪ​ꦠꦸꦠꦸꦥ꧀ꦥꦺ​ꦕꦪꦃꦤꦺ​ꦢꦸꦫꦸꦁ​ꦢꦶꦕꦼꦥꦺꦴꦠ꧀​꧉​ꦱꦏ꧀ꦗꦤꦺꦪ​ꦧꦼꦤꦼꦂ​꧈​ꦲꦮꦶꦠ꧀ꦤꦩꦸꦁ​ꦏꦿꦶꦱ꧀ꦡꦸꦱ꧀ꦢꦺꦮꦺꦱꦶꦁ​ꦧꦶꦱ​ꦚꦼꦥꦺꦴꦠ꧀ꦠꦸꦠꦸꦥ꧀ꦏꦸꦮꦶ​꧉​ꦠꦼꦒꦼꦱ꧀ꦱꦺ​ꦥꦫ​ꦱꦼꦢꦸꦭꦸꦂ​꧈​ꦤꦩꦸꦁ​ꦤꦺꦏ꧀ꦒꦼꦊꦩ꧀ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀ꦩꦤꦸꦁꦱ​ꦧꦶꦱ​ꦢꦸꦤꦸꦁꦤꦺꦏ꧀ꦥꦽꦗꦚ꧀ꦗꦶꦪꦤ꧀ꦭꦮꦱ꧀ꦮꦶꦱ꧀ꦲꦺꦴꦫ​ꦏꦁꦒꦺꦴ​ꦩꦼꦤꦺꦃ​꧈​ꦲꦮꦶꦠ꧀ꦱꦲꦶꦏꦶ​ꦔꦼꦂꦠꦶ​ꦤꦺꦏ꧀ꦧꦶꦱꦤꦺ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦤꦺꦏ꧀​ꦚ꧀ꦗꦒꦏ꧀ꦏꦏꦺꦩꦫꦁ​ꦏꦿꦶꦱ꧀ꦡꦸꦱ꧀꧈​ ¹⁵ꦠꦼꦏꦤ꧀ꦱꦼꦥꦿꦺꦤꦺ​ꦤꦺꦏ꧀ꦧꦁꦱ​ꦆꦱꦿꦌꦭ꧀ꦔꦸꦩ꧀ꦥꦸꦭ꧀ꦭꦤ꧀ꦩꦕ​ꦱꦁꦏꦏꦶꦠꦧ꧀ꦧꦺ​ꦤꦧꦶ​ꦩꦺꦴꦱꦼꦱ꧀ ꦩꦼꦏ꧀ꦱ​ꦢꦸꦫꦸꦁ​ꦥꦢ​ꦢꦸꦤꦸꦁꦤꦺꦏ꧀ꦏꦸꦮꦶ​ꦔꦺꦴꦩꦺꦴꦁꦔꦏꦺꦧꦧ꧀ꦏꦿꦶꦱ꧀ꦡꦸꦱ꧀ ꦲꦮꦶꦠ꧀ꦏꦪꦏꦪ​ꦲꦶꦗꦶꦏ꧀ꦏꦼꦠꦸꦠꦸꦥ꧀ꦥꦤ꧀ꦲꦠꦶꦤꦺ​꧉​ ¹⁶ꦤꦁꦔꦶꦁ​ꦤꦺꦏ꧀ꦒꦼꦊꦩ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦠꦸꦠꦸꦥ꧀ꦥꦺ​ꦧꦶꦱ​ꦏꦕꦼꦥꦺꦴꦠ꧀​꧈​ꦲꦺꦴꦫ​ꦧꦺꦢ​ꦏꦪ​ꦤꦧꦶ​ꦩꦺꦴꦱꦼꦱ꧀ꦚꦼꦥꦺꦴꦠ꧀ꦠꦸꦠꦸꦥ꧀ꦥꦺ​ꦕꦪꦃꦤꦺ​꧈​ꦢꦺꦴꦁꦔꦺꦲꦉꦥ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹⁷꧋ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦼꦠꦼꦥ꧀ꦥꦏꦺꦥꦽꦗꦚ꧀ꦗꦶꦪꦤ꧀ꦱꦶꦁ​ꦭꦮꦱ꧀ꦪ​ꦠꦸꦁꦒꦭ꧀ꦭꦺ​ꦏꦫꦺꦴ​ꦫꦺꦴꦃ​ꦱꦸꦕꦶ​꧉​ꦢꦢꦶꦤꦺ​ꦱꦥ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦫꦺꦴꦃꦲꦺ​ꦒꦸꦱ꧀ꦠꦶ​ꦮꦶꦱ꧀ꦥꦼꦢꦺꦴꦠ꧀ ꦮꦶꦱ꧀ꦲꦺꦴꦫ​ꦲꦸꦱꦃꦚ꧀ꦗꦒꦏ꧀ꦏꦏꦺꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦩꦼꦤꦺꦃ​꧉​ ¹⁸ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦧꦶꦱ​ꦩꦤ꧀ꦢꦼꦁ​ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧈​ꦗꦭꦂꦫꦤ꧀ꦲꦠꦶꦤꦺ​ꦮꦶꦱ꧀ꦲꦺꦴꦫ​ꦏꦼꦠꦸꦠꦸꦥ꧀ꦥꦤ꧀ꦩꦼꦤꦺꦃ​꧉​ꦏꦪꦏꦪ​ꦲꦮꦏ꧀ꦏꦺ​ꦢꦺꦮꦺꦮꦼꦫꦸꦃ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦱ꧀ꦭꦺꦴꦫꦺꦴꦠ꧀ꦠꦺꦥꦔ꧀ꦮꦱꦤꦺ​ꦤꦁꦏꦕ​ꦥꦼꦔꦶꦭꦺꦴꦤ꧀꧈​ꦱꦏ꧀ꦧꦉꦁꦔꦺꦲꦮꦏ꧀ꦏꦺ​ꦢꦺꦮꦺꦚꦮꦁ​ꦏꦸꦮꦶ​꧈​ꦲꦮꦏ꧀ꦏꦺ​ꦢꦺꦮꦺꦱꦼꦭꦺꦴꦠ꧀ꦱꦸꦮꦶꦱꦼꦭꦺꦴꦠ꧀ꦩꦢꦫꦸꦥꦏꦫꦺꦴ​ꦒꦩ꧀ꦧꦂ​ꦤꦁꦏꦕ​ꦏꦸꦮꦶ​꧉​ꦢꦢꦶꦤꦺ​ꦱꦼꦭꦺꦴꦠ꧀ꦱꦸꦮꦶꦱꦼꦭꦺꦴꦠ꧀ꦏꦼꦠꦫ​ꦱꦼꦥꦶꦫ​ꦒꦼꦢꦺꦤꦺꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦱꦶꦁ​ꦚꦩ꧀ꦧꦸꦠ꧀ꦠꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​ꦥꦚ꧀ꦕꦺꦤ꧀ ꦊꦭꦏꦺꦴꦤ꧀ꦱꦶꦁ​ꦏꦪ​ꦔꦺꦴꦤꦺꦴ​ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦧꦶꦱꦤꦺ​ꦏꦼꦠꦸꦫꦸꦠ꧀ꦠꦤ꧀ꦪ​ꦱꦁꦏꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​꧈​ꦠꦼꦒꦼꦱ꧀ꦱꦺ​ꦱꦁꦏꦥꦼꦁꦒꦮꦺꦪꦤ꧀ꦏꦸꦫꦺꦴꦃꦲꦺ​ꦒꦸꦱ꧀ꦠꦶ​ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​

↑ ↑ ↑

꧋ꦧꦤ꧀ꦢꦱꦶꦁ​ꦢꦶꦮꦢꦃꦲꦶꦤꦁꦏꦼꦤ꧀ꦢꦶꦊꦩ꧀ꦥꦸꦁ​꧉​

꧇​꧔꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦒꦼꦢꦺꦏꦮꦼꦭꦱ꧀ꦱꦤ꧀ꦤꦺ​꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦔꦼꦏꦺꦏ꧀ꦏꦶꦥꦼꦁꦒꦮꦺꦏꦸꦲꦶꦏꦶ​ꦩꦫꦁ​ꦲꦏꦸ​꧉​ꦲꦏꦸ​ꦪ​ꦲꦺꦴꦫ​ꦧꦏꦭ꧀ꦱꦼꦩ꧀ꦥ꧀ꦭꦏ꧀ꦲꦠꦶꦤꦺ​ꦭꦤ꧀ꦲꦏꦸ​ꦲꦺꦴꦫ​ꦧꦏꦭ꧀ꦩꦤ꧀ꦢꦼꦏ꧀ꦲꦼꦁꦒꦺꦴꦤ꧀ꦏꦸ​ꦩꦸꦭꦁꦔꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦚꦂ​ꦲꦶꦏꦶ​꧉​ ²ꦲꦏꦸ​ꦩꦭꦃ​ꦔꦼꦩꦺꦴꦃꦲꦶ​ꦭꦤ꧀ꦔꦼꦢꦺꦴꦃꦲꦶ​ꦠꦸꦩꦶꦤ꧀ꦢꦏ꧀ꦱꦶꦁ​ꦔꦶꦱꦶꦤ꧀ꦤꦶꦱꦶꦤ꧀ꦤꦏꦺꦭꦤ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ꦢꦶꦱꦮꦁ​꧉​ꦮꦸꦗꦸꦠ꧀ꦠꦺꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦔꦥꦸꦱ꧀ꦱꦶ​ꦲꦥ​ꦩꦭ꧀ꦱꦸ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​꧉​ꦲꦮꦏ꧀ꦏꦺ​ꦢꦺꦮꦺꦩꦭꦃ​ꦩꦸꦭꦁꦔꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦕꦫ​ꦱꦶꦁ​ꦗꦼꦭꦱ꧀ ꦢꦢꦶꦤꦺ​ꦏꦧꦺꦃ​ꦮꦺꦴꦁ​ꦔꦼꦂꦠꦶ​ꦤꦺꦏ꧀ꦲꦏꦸ​ꦩꦸꦭꦁꦔꦏꦺꦱꦏ꧀ꦧꦼꦤꦼꦂꦫꦺ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦤꦶꦠꦺꦤ꧀ꦤꦶ​꧉​ ³ꦤꦁꦔꦶꦁ​꧈​ꦱꦼꦩꦸꦁꦒꦺꦴꦤ꧀ꦤꦺꦩꦼꦏ꧀ꦱ​ꦲꦶꦗꦶꦏ꧀ꦲꦺꦤꦺꦁꦮꦺꦴꦁ​ꦱꦶꦁ​ꦲꦺꦴꦫ​ꦧꦶꦱ​ꦚꦩ꧀ꦥꦺꦤ꧀ꦤꦶꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦱꦶꦁ​ꦠꦏ꧀ꦮꦸꦭꦁꦔꦏꦺ꧈​ꦏꦸꦮꦶ​ꦲꦺꦴꦫ​ꦗꦭꦂꦫꦤ꧀ꦠꦼꦩ꧀ꦧꦸꦁꦏꦸ​ꦏꦸꦫꦁ​ꦗꦼꦭꦱ꧀ ꦲꦺꦴꦫ​ꦥꦫ​ꦱꦼꦢꦸꦭꦸꦂ​꧈​ꦤꦁꦔꦶꦁ​ꦗꦭꦂꦫꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦮꦶꦱ꧀ꦢꦶꦠꦩ꧀ꦥꦶꦏ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦲꦺꦴꦫ​ꦒꦼꦊꦩ꧀ꦥꦽꦕꦪ​꧉​ ⁴ꦱꦶꦁ​ꦲꦩ꧀​ꦧ꧀ꦊꦉꦁꦔꦶ​ꦲꦠꦶꦤꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦪ​ꦱꦺꦠꦤ꧀​꧉​ꦱꦸꦮꦺꦤꦺ​ꦲꦸꦫꦶꦥ꧀ꦲꦶꦁ​ꦢꦺꦴꦚ​ꦏꦺꦤꦺ​ꦪ​ꦢꦺꦏ꧀ꦤꦺꦱꦶꦁ​ꦔ꧀ꦮꦱꦤꦶ​ꦲꦠꦶꦤꦺ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦢꦢꦶꦤꦺ​ꦮꦺꦴꦁꦮꦺꦴꦁ​ꦲꦶꦏꦶ​ꦪ​ꦲꦺꦴꦫ​ꦧꦶꦱ​ꦢꦸꦤꦸꦁꦩꦫꦁ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦭꦤ꧀ꦪ​ꦲꦺꦴꦫ​ꦥꦢ​ꦧꦶꦱ​ꦔꦿꦱꦏ꧀ꦏꦏꦺ​ꦢꦺꦮꦺꦒꦼꦢꦺꦤꦺꦥꦔ꧀ꦮꦱꦤꦺ​ꦏꦿꦶꦱ꧀ꦡꦸꦱ꧀ ꦱꦶꦁ​ꦔꦼꦠꦺꦴꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ ⁵ꦮꦸꦗꦸꦠ꧀ꦠꦺꦲꦏꦸ​ꦪ​ꦲꦺꦴꦫ​ꦔꦺꦴꦩꦺꦴꦁꦔꦏꦺꦧꦧ꧀ꦲꦮꦏ꧀ꦏꦸ​ꦢꦺꦮꦺꦱꦸꦥꦪ​ꦏꦺꦴꦮꦺ​ꦥꦢ​ꦔꦼꦊꦩ꧀ꦲꦏꦸ​꧈​ꦲꦺꦴꦫ​꧉​ꦱꦶꦁ​ꦠꦏ꧀ꦮꦸꦭꦁꦔꦏꦺꦪ​ꦲꦺꦴꦫ​ꦭꦶꦪꦤꦺ​ꦏꦼꦗꦧ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦸꦥꦪ​ꦏꦺꦴꦮꦺ​ꦥꦢ​ꦤꦩ꧀ꦥ​ꦢꦺꦏ꧀ꦤꦺꦢꦢꦶ​ꦒꦸꦱ꧀ꦠꦶꦩꦸ​꧉​ꦲꦏꦸ​ꦤꦩꦸꦁ​ꦏꦼꦥꦺꦔꦶꦤ꧀​ꦔ꧀ꦭꦢꦺꦤ꧀ꦤꦶ​ꦏꦺꦴꦮꦺ​ꦏꦧꦺꦃ​꧈​ꦲꦮꦶꦠ꧀ꦏꦸꦮꦶ​ꦱꦶꦁ​ꦢꦢꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ ꦪꦺꦯꦸꦱ꧀ꦲꦶꦁ​ꦲꦸꦫꦶꦥ꧀ꦏꦸ​꧉​ ⁶ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦏꦼꦥꦺꦔꦶꦤ꧀ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦥꦫ​ꦱꦼꦢꦸꦭꦸꦂ​?ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦩ꧀ꦧꦶꦪꦺꦤ꧀​ꦩ꧀ꦧꦶꦪꦺꦤ꧀ꦤꦺ꧈​ꦢꦺꦴꦁꦔꦺꦤꦩꦸꦁ​ꦲꦺꦤꦺꦁꦥꦼꦠꦼꦁ​꧈​ꦤꦼꦏꦏ꧀ꦏꦏꦺꦥꦼꦥꦢꦁ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦚ꧀ꦭꦺꦴꦫꦺꦴꦠ꧀ꦠꦏꦺꦥꦼꦥꦢꦁꦔꦺꦲꦶꦁ​ꦲꦠꦶꦏꦸ​ꦔꦁꦒꦺꦴ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦢꦢꦶꦤꦺ​ꦲꦏꦸ​ꦱꦲꦶꦏꦶ​ꦧꦶꦱ​ꦔꦼꦂꦠꦶ​ꦱꦼꦥꦶꦫ​ꦒꦼꦢꦺꦤꦺꦏꦠꦿꦺꦱ꧀ꦤꦤꦺꦭꦤ꧀ꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦢꦶꦏꦺꦠꦺꦴꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

⁷꧋ꦤꦁꦔꦶꦁ​ꦥꦶꦠꦸꦠꦸꦂ​ꦲꦶꦏꦶ​ꦢꦶꦮꦢꦃꦲꦶꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦱꦶꦁ​ꦫꦶꦁꦏꦶꦃ​ꦲꦶꦏꦶ​꧉​ꦏꦪꦏꦪ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦧꦤ꧀ꦢꦒꦼꦢꦺꦱꦶꦁ​ꦢꦶꦮꦢꦃꦲꦶꦏꦼꦤ꧀ꦢꦶꦊꦩ꧀ꦥꦸꦁ​꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦧꦶꦱ​ꦏꦺꦠꦺꦴꦏ꧀ꦠꦼꦤꦤ꧀ꦤꦺꦏ꧀ꦏꦼꦏꦸꦮꦠ꧀ꦠꦤ꧀ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦠꦼꦏꦤꦺ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦫꦸꦩꦁꦱ​ꦫꦶꦁꦏꦶꦃ​꧉​ ⁸ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​?ꦲꦮꦶꦠ꧀ꦲꦏꦸ​ꦲꦶꦏꦶ​ꦢꦶꦥꦼꦤꦼꦠ꧀ꦱꦁꦏꦮꦺꦠꦤ꧀ꦏꦸꦭꦺꦴꦤ꧀ꦭꦺꦴꦂꦏꦶꦢꦸꦭ꧀ ꦤꦁꦔꦶꦁ​ꦲꦺꦴꦫ​ꦉꦩꦸꦏ꧀꧈​ꦲꦗꦼꦏ꧀ꦧꦶꦔꦸꦁ​ꦲꦺꦴꦫ​ꦔꦼꦂꦠꦶ​ꦲꦥ​ꦱꦶꦁ​ꦏꦸꦢꦸ​ꦠꦏ꧀ꦠꦶꦤ꧀ꦢꦏ꧀ꦏꦏꦺ꧈​ꦤꦁꦔꦶꦁ​ꦲꦺꦴꦫ​ꦠꦲꦸ​ꦱꦼꦩ꧀ꦥ꧀ꦭꦏ꧀꧈​ ⁹ꦲꦗꦼꦏ꧀ꦢꦶꦩꦸꦁꦱꦸꦃ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦲꦺꦴꦫ​ꦠꦲꦸ​ꦤꦶꦁꦒꦭ꧀ꦲꦏꦸ​꧉​ꦲꦮꦏ꧀ꦏꦼꦤꦺꦁꦲꦭꦁꦔꦤ꧀ ꦤꦁꦔꦶꦁ​ꦲꦺꦴꦫ​ꦩꦠꦶ​꧉​

¹⁰꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦥꦢ​ꦔꦼꦂꦠꦶ​ꦢꦺꦮꦺꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦲꦺ​ꦮꦶꦱ꧀ꦢꦶꦥꦠꦺꦤ꧀ꦤꦶ​꧈​ꦩꦸꦭꦤꦺ​ꦲꦏꦸ​ꦪ​ꦢꦸꦤꦸꦁꦤꦺꦏ꧀ꦱꦏ꧀ꦮꦚ꧀ꦕꦶ​ꦮꦚ꧀ꦕꦶ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦏꦭ꧀ꦩꦠꦺꦤ꧀ꦤꦶ​ꦲꦏꦸ​꧈​ꦗꦭꦂꦫꦤ꧀ꦲꦏꦸ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧉​ꦲꦏꦸ​ꦱꦒꦸꦃ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦱꦸꦥꦪ​ꦩꦤꦸꦁꦱ​ꦧꦶꦱ​ꦤꦶꦠꦺꦤ꧀ꦤꦶ​ꦢꦺꦮꦺꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦫꦶꦥ꧀ꦭꦤ꧀ꦱꦸꦥꦪ​ꦮꦺꦴꦁꦮꦺꦴꦁ​ꦥꦢ​ꦢꦸꦤꦸꦁꦤꦺꦏ꧀ꦢꦺꦏ꧀ꦤꦺ​ꦱꦶꦁ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦲꦏꦸ​꧉​ ¹¹ꦲꦶꦁ​ꦲꦸꦫꦶꦥ꧀ꦏꦸ​ꦲꦶꦏꦶ​ꦲꦏꦸ​ꦮꦶꦱ꧀ꦏꦼꦉꦥ꧀ꦕꦼꦢꦼꦏ꧀​ꦏꦫꦺꦴ​ꦥꦠꦶ​꧈​ꦗꦭꦂꦫꦤ꧀ꦲꦏꦸ​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦔ꧀ꦭꦶꦭꦤꦶ​ꦏꦧꦺꦃ​ꦩꦲꦸ​ꦏ꧀ꦭꦏꦺꦴꦤ꧀ ꦱꦸꦥꦪ​ꦏꦧꦺꦃ​ꦮꦺꦴꦁ​ꦧꦶꦱ​ꦮꦼꦫꦸꦃ​ꦢꦺꦮꦺꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦫꦶꦥ꧀ꦭꦤ꧀ꦥꦢ​ꦢꦸꦤꦸꦁꦤꦺꦏ꧀ꦢꦺꦏ꧀ꦤꦺꦱꦶꦁ​ꦔꦸꦮꦠ꧀ꦠꦏꦺꦲꦮꦏ꧀ꦏꦸ​ꦱꦶꦁ​ꦫꦶꦁꦏꦶꦃ​ꦲꦶꦏꦶ​꧉​ ¹²ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦲꦶꦏꦶ​ꦱꦱꦠ꧀ꦠꦺꦔꦿꦱꦏ꧀ꦏꦏꦺꦏꦱꦁꦱꦫꦤ꧀ꦠꦼꦫꦸꦱ꧀ꦱꦩ꧀ꦥꦺꦏ꧀ꦲꦉꦥ꧀ꦩꦠꦶ​꧈​ꦤꦁꦔꦶꦁ​ꦗꦭꦂꦫꦤ꧀ꦱꦁꦏꦏꦱꦁꦱꦫꦤ꧀ꦏꦸ​ꦏꦺꦴꦮꦺ​ꦧꦶꦱ​ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​꧉​

¹³꧋ꦤꦁ​ꦏꦶꦠꦧ꧀​ꦲꦺꦤꦺꦁꦠꦸꦭꦶꦱ꧀ꦱꦤ꧀ꦔꦺꦤꦺ​ꦥꦫ​ꦱꦼꦢꦸꦭꦸꦂ​:“ꦲꦏꦸ​ꦠꦤ꧀ꦱꦃ​ꦥꦽꦕꦪ​ꦩꦫꦁ​ꦏꦺꦴꦮꦺ​ꦒꦸꦱ꧀ꦠꦶ​꧈​ꦩꦸꦭꦤꦺ​ꦲꦏꦸ​ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦥꦶꦠꦸꦭꦸꦁ​ꦔꦤ꧀ꦏꦸ​꧉​” ¹⁴ꦔꦁꦒꦺꦴ​ꦥꦼꦔꦤ꧀ꦢꦼꦭ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦏꦸ​ꦱꦲꦶꦏꦶ​ꦠꦤ꧀ꦱꦃ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧈​ꦲꦮꦶꦠ꧀ꦲꦏꦸ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦤꦔꦺꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦥꦠꦶ​꧈​ꦲꦸꦒ​ꦧꦏꦭ꧀ꦤꦔꦺꦏ꧀ꦏꦺꦲꦏꦸ​ꦱꦁꦏꦥꦠꦶ​꧈​ꦱꦸꦥꦪ​ꦲꦏꦸ​ꦧꦶꦱ​ꦲꦸꦫꦶꦥ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦧꦏꦭ꧀ꦤꦩ꧀ꦥ​ꦲꦏꦸ​ꦤꦁꦱ꧀ꦮꦂꦒ​ꦧꦼꦧꦉꦁꦔꦤ꧀ꦏꦫꦺꦴ​ꦏꦺꦴꦮꦺ​ꦏꦧꦺꦃ​꧉​

¹⁵꧋ꦥꦫ​ꦱꦼꦢꦸꦭꦸꦂ​꧈​ꦱꦁꦱꦫꦏꦸ​ꦏꦧꦺꦃ​ꦏꦸꦮꦶ​ꦤꦩꦸꦁ​ꦏꦁꦒꦺꦴ​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦥꦢ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦤꦺꦏ꧀ꦮꦺꦴꦁꦮꦺꦴꦁ​ꦱꦶꦁ​ꦤꦩ꧀ꦥ​ꦏꦮꦼꦭꦱ꧀ꦱꦤ꧀ꦤꦺ​ꦭꦤ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦩ꧀ꦧꦃ​ꦠꦼꦫꦸꦱ꧀ ꦮꦺꦴꦁꦮꦺꦴꦁ​ꦱꦶꦁ​ꦩꦠꦸꦂꦏꦼꦱꦸꦮꦸꦤ꧀ꦭꦤ꧀ꦩꦼꦩꦸꦗꦶ​ꦩꦫꦁ​ꦢꦺꦏ꧀ꦤꦺꦪ​ꦧꦏꦭ꧀ꦠꦩ꧀ꦧꦃ​ꦠꦼꦫꦸꦱ꧀ ꦲꦮꦶꦠ꧀ꦢꦺꦏ꧀ꦤꦺꦥꦚ꧀ꦕꦺꦤ꧀ꦒꦼꦢꦺꦠꦼꦤꦤ꧀ꦥꦔ꧀ꦮꦱꦤꦺ​꧉​

꧋ꦏꦔꦺꦭ꧀ꦭꦤ꧀ꦱꦼꦢꦶꦭꦸꦠ꧀ꦤꦼꦏꦏ꧀ꦏꦏꦺꦏꦧꦸꦔꦃꦲꦤ꧀ꦭꦁꦒꦼꦁ​꧉​

¹⁶꧋ꦩꦸꦭꦤꦺ​ꦲꦏꦸ​ꦪ​ꦲꦺꦴꦫ​ꦱꦼꦩ꧀ꦥ꧀ꦭꦏ꧀ꦲꦠꦶꦤꦺ​ꦥꦫ​ꦱꦼꦢꦸꦭꦸꦂ​꧉​ꦧꦼꦤꦼꦂ​ꦧꦢꦤ꧀ꦱꦶꦁ​ꦏꦺꦠꦺꦴꦏ꧀ꦱꦼꦭꦺꦴꦠ꧀ꦱꦸꦮꦶꦱꦼꦭꦺꦴꦠ꧀ꦫꦸꦱꦏ꧀ꦔꦿꦱꦏ꧀ꦏꦏꦺꦏꦱꦁꦱꦫꦤ꧀ ꦤꦁꦔꦶꦁ​ꦲꦶꦁ​ꦚ꧀ꦗꦼꦫꦸꦃꦲꦠꦶ​ꦲꦏꦸ​ꦏꦿꦱ​ꦢꦶꦲꦚꦂꦫꦏꦺꦠꦼꦫꦸꦱ꧀ꦱꦧꦼꦤ꧀ꦢꦶꦤ​꧈​ꦢꦢꦶꦤꦺ​ꦱꦼꦭꦺꦴꦠ꧀ꦱꦸꦮꦶꦫꦱꦤꦺ​ꦱꦼꦭꦺꦴꦠ꧀ꦏꦸꦮꦠ꧀꧈​ ¹⁷ꦏꦔꦺꦭ꧀ꦭꦤ꧀ꦱꦶꦁ​ꦠꦏ꧀ꦲꦭꦩ꧀ꦩꦶ​ꦱꦏ꧀ꦗꦼꦫꦺꦴꦤꦺꦲꦸꦫꦶꦥ꧀ꦲꦶꦁ​ꦢꦺꦴꦚ​ꦲꦶꦏꦶ​ꦲꦺꦴꦫ​ꦲꦥꦲꦥ​ꦧ꧀ꦭꦱ꧀ꦤꦺꦏ꧀ꦠꦏ꧀ꦥꦢꦏ꧀ꦏꦏꦺꦏꦫꦺꦴ​ꦲꦸꦥꦃꦲꦺꦏꦱꦁꦱꦫꦤ꧀ꦱꦶꦁ​ꦲꦩ꧀ꦧꦺꦱꦸꦏ꧀ꦧꦏꦭ꧀ꦠꦏ꧀ꦠꦩ꧀ꦥ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦸꦥꦃꦏꦸꦮꦶ​ꦧꦏꦭ꧀ꦒꦼꦢꦺ​ꦠꦼꦤꦤ꧀ ꦔ꧀ꦒꦸꦩꦸꦤ꧀​ꦔ꧀ꦒꦸꦩꦸꦤ꧀ꦤꦏꦺ꧉​ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦔꦿꦱꦏ꧀ꦏꦏꦺ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦧꦺꦃ​ꦱꦭꦮꦱ꧀ꦭꦮꦱ꧀ꦱꦺ​꧈​ꦲꦮꦶꦠ꧀ꦏꦸꦮꦶ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦧꦺꦃ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ ¹⁸ꦩꦸꦭꦤꦺ​ꦲꦏꦸ​ꦪ​ꦤꦩꦸꦁ​ꦩꦤ꧀ꦢꦼꦁ​ꦩꦫꦁ​ꦲꦸꦥꦃꦏꦸꦱꦶꦁ​ꦤꦁꦱ꧀ꦮꦂꦒ​꧈​ꦱꦶꦁ​ꦱꦲꦶꦏꦶ​ꦲꦺꦴꦫ​ꦏꦺꦠꦺꦴꦏ꧀꧈​ꦲꦏꦸ​ꦲꦺꦴꦫ​ꦩꦶꦏꦶꦂꦫꦏꦺꦏꦱꦁꦱꦫꦤ꧀ꦱꦶꦁ​ꦠꦏ꧀ꦫꦱꦏ꧀ꦏꦏꦺꦱꦲꦶꦏꦶ​꧉​ꦧꦫꦁ​ꦱꦶꦁ​ꦏꦺꦠꦺꦴꦏ꧀ꦏꦸꦮꦶ​ꦧꦏꦭ꧀ꦭꦶꦮꦠ꧀ꦏꦧꦺꦃ​꧈​ꦲꦺꦴꦫ​ꦱꦸꦮꦶꦲꦺꦤꦺꦁꦔꦺ꧉​ꦤꦁꦔꦶꦁ​ꦲꦸꦥꦃꦱꦶꦁ​ꦤꦁꦱ꧀ꦮꦂꦒ​꧈​ꦱꦶꦁ​ꦲꦺꦴꦫ​ꦏꦺꦠꦺꦴꦏ꧀ ꦏꦸꦮꦶ​ꦱꦶꦁ​ꦭꦁꦒꦼꦁ​꧉​

↑ ↑ ↑

 

꧇​꧕꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦧꦢꦤ꧀ꦏꦢꦺꦴꦚꦃꦲꦤ꧀ꦱꦶꦁ​ꦢꦶꦲꦼꦁꦒꦺꦴꦤ꧀ꦤꦶ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦺꦴꦫ​ꦭꦁꦒꦼꦁ​꧈​ꦤꦩꦸꦁ​ꦱꦏ꧀ꦲꦸꦤ꧀ꦠꦂꦫ꧉​ꦢꦢꦶꦤꦺ​ꦤꦺꦏ꧀ꦲꦮꦏ꧀ꦏꦺ​ ꦢꦺꦮꦺꦢꦶꦥꦠꦺꦤ꧀ꦤꦶ​꧈​ꦲꦮꦏ꧀ꦏꦺ​ꦢꦺꦮꦺꦪ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦼꦏꦺꦏ꧀ꦏꦶꦧꦢꦤ꧀ꦱꦶꦁ​ꦲꦚꦂ​ꦤꦁꦱ꧀ꦮꦂꦒ​꧈​ꦱꦶꦁ​ꦏꦼꦤꦺꦁꦢꦶꦲꦼꦁꦒꦺꦴꦤ꧀ꦤꦶ​ꦲꦮꦏ꧀ꦏꦺ​ꦢꦺꦮꦺꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦲꦶꦏꦶ​ꦲꦺꦴꦫ​ꦏꦪ​ꦲꦺꦴꦩꦃ​ꦒꦮꦺꦪꦤ꧀ꦤꦺ​ꦩꦤꦸꦁꦱ​꧈​ꦲꦺꦴꦫ​꧈​ꦲꦮꦶꦠ꧀ꦲꦶꦏꦶ​ꦧꦢꦤ꧀ꦥꦁꦒꦺꦴꦤ꧀ꦤꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦭꦁꦒꦼꦁ​꧉​ ^2-3ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦪ​ꦥꦢ​ꦔ꧀ꦒꦼꦱꦃ​ꦏꦼꦥꦺꦔꦶꦤ꧀ꦩꦼꦠꦸ​ꦱꦁꦏꦲꦺꦴꦩꦃ​ꦏꦢꦺꦴꦚꦃꦲꦤ꧀ꦲꦶꦏꦶ​꧈​ꦱꦸꦥꦪ​ꦤ꧀ꦢꦁꦧꦶꦱ​ꦩꦁꦒꦺꦴꦤ꧀ꦤꦁꦧꦢꦤ꧀ꦏꦱ꧀ꦮꦂꦒꦤ꧀ꦱꦶꦁ​ꦭꦁꦒꦼꦁ​꧉​ꦲꦮꦶꦠ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦧꦶꦱ​ꦔꦁꦒꦺꦴ​ꦧꦢꦤ꧀ꦏꦱ꧀ꦮꦂꦒꦤ꧀ꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦧꦏꦭ꧀ꦮꦸꦢ​꧈​ꦤꦁꦔꦶꦁ​ꦧꦏꦭ꧀ꦔꦁꦒꦺꦴ​ꦱꦭꦶꦤ꧀ꦱꦶꦁ​ꦭꦁꦒꦼꦁ​꧉​ ⁴ꦱꦸꦮꦺꦤꦺ​ꦲꦮꦏ꧀ꦏꦺ​ꦢꦺꦮꦺꦲꦶꦗꦶꦏ꧀ꦩꦁꦒꦺꦴꦤ꧀ꦤꦁꦧꦢꦤ꧀ꦏꦢꦺꦴꦚꦃꦲꦤ꧀ꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦔꦿꦱꦏ꧀ꦏꦏꦺꦏꦱꦁꦱꦫꦤ꧀ꦠꦼꦫꦸꦱ꧀ꦭꦤ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦔ꧀ꦒꦼꦱꦃ​ꦏꦼꦥꦺꦔꦶꦤ꧀ꦩꦼꦠꦸ​꧉​ꦲꦺꦴꦫ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦤꦶꦁꦒꦭ꧀ꦧꦢꦤ꧀ꦏꦢꦺꦴꦚꦃꦲꦤ꧀ꦲꦶꦏꦶ​꧈​ꦲꦺꦴꦫ​꧈​ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦤꦩ꧀ꦥ​ꦧꦢꦤ꧀ꦲꦚꦂ​ꦱꦁꦏꦱ꧀ꦮꦂꦒ​꧉​ꦢꦢꦶꦤꦺ​ꦧꦢꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦏꦢꦺꦴꦚꦃꦲꦤ꧀ꦧꦏꦭ꧀ꦢꦶꦒꦤ꧀ꦠꦶ​ꦢꦢꦶ​ꦧꦢꦤ꧀ꦱꦶꦁ​ꦭꦁꦒꦼꦁ​꧉​ ⁵ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦮꦶꦱ꧀ꦤꦠ​ꦏꦸꦮꦶ​ꦩꦲꦸ​ꦏꦧꦺꦃ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦢꦺꦏ꧀ꦤꦺꦢꦺꦮꦺꦮꦶꦱ꧀ꦔꦼꦏꦺꦏ꧀ꦏꦶꦫꦺꦴꦃ​ꦱꦸꦕꦶ​ꦏꦁꦒꦺꦴ​ꦥꦚ꧀ꦗꦼꦂꦫꦺꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦫꦺꦴꦃ​ꦱꦸꦕꦶ​ꦏꦸꦮꦶ​ꦥꦚ꧀ꦗꦼꦂꦫꦺ꧈​ꦏꦁꦒꦺꦴ​ꦠꦤ꧀ꦢꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦼꦏꦺꦏ꧀ꦏꦶꦭꦶꦪꦤꦺ​ꦱꦏ꧀ꦏꦧꦺꦃꦲꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​

⁶꧋ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦥꦫ​ꦱꦼꦢꦸꦭꦸꦂ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦠꦼꦤꦤ꧀ꦤꦺꦏ꧀ꦱꦸꦮꦺꦤꦺ​ꦲꦮꦏ꧀ꦏꦺ​ꦢꦺꦮꦺꦲꦶꦗꦶꦏ꧀ꦩꦁꦒꦺꦴꦤ꧀ꦤꦁꦧꦢꦤ꧀ꦏꦢꦺꦴꦚꦃꦲꦤ꧀ꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦧꦶꦱ​ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦱ꧀ꦮꦂꦒ​꧉​ ⁷ꦱꦲꦶꦏꦶ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦤꦁꦧꦢꦤ꧀ꦏꦢꦺꦴꦚꦃꦲꦤ꧀ꦲꦶꦏꦶ​ꦪ​ꦤꦩꦸꦁ​ꦔꦁꦒꦺꦴ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦼꦤꦗꦤ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦮꦼꦫꦸꦃ​ꦩꦫꦁ​ꦢꦺꦏ꧀ꦤꦺ꧉​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤꦩꦸꦁ​ꦚ꧀ꦗꦒꦏ꧀ꦏꦏꦺꦧꦫꦁ​ꦱꦶꦁ​ꦏꦺꦠꦺꦴꦏ꧀꧈​ ⁸ꦲꦏꦸ​ꦥꦚ꧀ꦕꦺꦤ꧀ꦪ​ꦮꦶꦱ꧀ꦩꦤ꧀ꦠꦼꦥ꧀ꦲꦶꦁ​ꦲꦠꦶ​꧉​ꦲꦏꦸ​ꦩꦭꦃ​ꦏꦼꦥꦺꦔꦶꦤ꧀ꦤꦶꦁꦒꦭ꧀ꦧꦢꦤ꧀ꦏꦢꦺꦴꦚꦃꦲꦤ꧀ꦲꦶꦏꦶ​ꦭꦤ꧀ꦧꦺꦴꦪꦺꦴꦁꦤꦁꦲꦺꦴꦩꦃꦏꦸ​ꦤꦁꦱ꧀ꦮꦂꦒ​꧈​ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​꧉​ ⁹ꦩꦸꦭꦤꦺ​ꦲꦏꦸ​ꦪ​ꦤꦩꦸꦁ​ꦤ꧀ꦢꦸꦮꦺꦠꦸꦗꦸꦮꦤ꧀ꦱꦶꦗꦶ​ꦲꦶꦏꦶ​꧈​ꦪꦏꦸꦮꦶ​:ꦏꦼꦥꦿꦶꦪꦺ​ꦧꦶꦱꦏꦸ​ꦲꦸꦫꦶꦥ꧀ꦱꦶꦁ​ꦤ꧀ꦢꦢꦺꦏ꧀ꦏꦏꦺꦱꦼꦤꦼꦁꦔꦺ​ꦒꦸꦱ꧀ꦠꦶ​꧈​ꦲꦺꦴꦫ​ꦢꦢꦶ​ꦱꦼꦧꦧ꧀ꦲꦶꦗꦶꦏ꧀ꦲꦸꦫꦶꦥ꧀ꦤꦁꦧꦢꦤ꧀ꦱꦶꦁ​ꦠꦏ꧀ꦲꦼꦁꦒꦺꦴꦤ꧀ꦤꦶ​ꦲꦶꦏꦶ​ꦲꦥ​ꦮꦶꦱ꧀ꦩꦼꦠꦸ​꧉​ ¹⁰ꦲꦮꦶꦠ꧀ꦏꦼꦥꦿꦶꦪꦺ​ꦮꦲꦺ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦏꦸꦢꦸ​ꦩꦫ​ꦤꦁꦔꦉꦥ꧀ꦥꦺ​ꦏꦿꦶꦱ꧀ꦡꦸꦱ꧀ꦲꦱꦺꦴꦏ꧀ꦥꦼꦚ꧀ꦗꦮꦧ꧀ꦢꦺꦮꦺꦢꦺꦮꦺ꧉​ꦠꦼꦒꦼꦱ꧀ꦱꦺ​꧈​ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦢꦶꦏꦿꦸꦠꦸꦏꦫꦺꦴ​ꦏꦿꦶꦱ꧀ꦡꦸꦱ꧀ꦭꦤ꧀ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦤꦩ꧀ꦥ​ꦲꦸꦥꦃꦩꦤꦸꦠ꧀ꦠꦸꦩꦶꦤ꧀ꦢꦏ꧀ꦏꦺ​ꦢꦺꦮꦺꦢꦺꦮꦺꦱꦸꦮꦺꦤꦺ​ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦤꦁꦧꦢꦤ꧀ꦏꦢꦺꦴꦚꦃꦲꦤ꧀ꦲꦶꦏꦶ​꧈​ꦩꦼꦤꦮ​ꦧꦼꦕꦶꦏ꧀ ꦩꦼꦤꦮ​ꦲꦭ​꧉​

꧋ꦏꦿꦶꦱ꧀ꦡꦸꦱ꧀ꦔꦿꦸꦏꦸꦤ꧀ꦤꦏꦺꦲꦮꦏ꧀ꦏꦺ​ꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹¹꧋ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦲꦏꦸ​ꦔꦼꦂꦠꦶ​ꦤꦺꦏ꧀ꦲꦏꦸ​ꦧꦏꦭ꧀ꦢꦶꦏꦿꦸꦠꦸꦏꦫꦺꦴ​ꦒꦸꦱ꧀ꦠꦶ​꧈​ꦩꦸꦭꦤꦺ​ꦲꦏꦸ​ꦪ​ꦮꦼꦢꦶ​ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦭꦤ꧀ꦲꦏꦸ​ꦠꦤ꧀ꦱꦃ​ꦤ꧀ꦢꦸꦤꦸꦁꦔꦏꦺꦩꦫꦁ​ꦮꦺꦴꦁꦮꦺꦴꦁ​ꦤꦺꦏ꧀ꦲꦠꦶꦏꦸ​ꦉꦱꦶꦏ꧀꧈​ꦒꦸꦱ꧀ꦠꦶ​ꦔꦼꦂꦠꦶ​ꦚ꧀ꦗꦼꦫꦺꦴꦤꦺ​ꦲꦠꦶꦏꦸ​ꦭꦤ꧀ꦱꦶꦁ​ꦠꦏ꧀ꦱꦸꦮꦸꦤ꧀ꦏꦺꦴꦮꦺ​ꦏꦧꦺꦃ​ꦱꦼꦩꦺꦴꦤꦺꦴ​ꦲꦸꦒ​ꦥꦢ​ꦤꦶꦠꦺꦤ꧀ꦤꦶ​ꦢꦺꦮꦺꦭꦤ꧀ꦔꦏꦺꦴꦤ꧀ꦤꦶ​ꦲꦶꦁ​ꦲꦠꦶꦩꦸ​ꦤꦺꦏ꧀ꦲꦏꦸ​ꦲꦺꦴꦫ​ꦒꦺꦴꦫꦺꦴꦃ​꧉​ ¹²ꦲꦏꦸ​ꦲꦺꦴꦫ​ꦲꦉꦥ꧀ꦔꦼꦊꦩ꧀ꦲꦮꦏ꧀ꦏꦸ​ꦢꦺꦮꦺꦤꦁꦔꦉꦥ꧀ꦩꦸ​꧈​ꦲꦺꦴꦫ​꧈​ꦤꦁꦔꦶꦁ​ꦲꦏꦸ​ꦤꦩꦸꦁ​ꦤ꧀ꦢꦸꦤꦸꦁꦔꦏꦺꦩꦫꦁ​ꦏꦺꦴꦮꦺ​ꦤꦺꦏ꧀ꦲꦺꦴꦫ​ꦲꦸꦱꦃꦮꦼꦢꦶ​ꦔꦺꦴꦩꦺꦴꦁꦱꦶꦁ​ꦧꦼꦕꦶꦏ꧀ꦧꦧ꧀ꦲꦏꦸ​꧉​ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦩꦁꦱꦸꦭ꧀ꦭꦶ​ꦱꦏ꧀ꦧꦼꦤꦼꦂꦫꦺ​ꦩꦫꦁ​ꦮꦺꦴꦁꦮꦺꦴꦁ​꧈​ꦱꦶꦁ​ꦥꦢ​ꦔꦼꦒꦸꦁꦔꦏꦺꦩꦤꦸꦁꦱ​ꦩꦤꦸꦠ꧀ꦏꦺꦠꦺꦴꦏ꧀ꦏꦺ​꧈​ꦲꦺꦴꦫ​ꦩꦤꦸꦠ꧀ꦏꦱꦸꦏ꧀ꦩꦤꦺ​꧉​

¹³꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦠꦸꦩꦶꦤ꧀ꦢꦏ꧀ꦏꦸ​ꦏꦪ​ꦮꦺꦴꦁ​ꦧꦺꦴꦢꦺꦴ꧈​ꦗꦭꦂꦫꦤ꧀ꦲꦏꦸ​ꦔꦼꦒꦸꦁꦔꦏꦺꦲꦮꦏ꧀ꦏꦸ​ꦢꦺꦮꦺ꧈​ꦔꦼꦂꦠꦶꦪ​ꦤꦺꦏ꧀ꦏꦸꦮꦶ​ꦏꦁꦒꦺꦴ​ꦔ꧀ꦭꦧꦸꦃꦲꦶ​ꦭꦤ꧀​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦺꦏ꧀ꦲꦏꦸ​ꦔꦁꦒꦺꦴ​ꦕꦫ​ꦱꦶꦁ​ꦱꦏ꧀ꦥꦤ꧀ꦠꦼꦱ꧀ꦱꦺ​꧈​ꦏꦸꦮꦶ​ꦪ​ꦏꦁꦒꦺꦴ​ꦏꦺꦴꦮꦺ​꧉​ ¹⁴ꦲꦥ​ꦱꦶꦁ​ꦠꦏ꧀ꦠꦶꦤ꧀ꦢꦏ꧀ꦏꦏꦺꦏꦸꦮꦶ​ꦮꦶꦱ꧀ꦲꦺꦴꦫ​ꦏꦉꦥ꧀ꦏꦸ​ꦢꦺꦮꦺ꧈​ꦤꦁꦔꦶꦁ​ꦏꦠꦿꦺꦱ꧀ꦤꦤꦺꦏꦿꦶꦱ꧀ꦡꦸꦱ꧀ꦱꦶꦁ​ꦔ꧀ꦭꦏꦺꦴꦏ꧀ꦏꦏꦺꦲꦸꦫꦶꦥ꧀ꦏꦸ​꧉​ꦲꦮꦶꦠ꧀ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦿꦶꦱ꧀ꦡꦸꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦗꦭꦂꦫꦤ꧀ꦱꦁꦏꦢꦺꦴꦱꦤꦺ​ꦏꦧꦺꦃ​ꦩꦤꦸꦁꦱ​꧉​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦪ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦮꦶꦱ꧀ꦩꦠꦶ​ꦏꦁꦒꦺꦴ​ꦲꦸꦫꦶꦥ꧀ꦱꦶꦁ​ꦭꦮꦱ꧀꧈​ ¹⁵ꦏꦿꦶꦱ꧀ꦡꦸꦱ꧀ꦩꦠꦶ​ꦢꦢꦶ​ꦮꦏꦶꦭ꧀ꦭꦺ​ꦏꦧꦺꦃ​ꦩꦤꦸꦁꦱ​꧈​ꦱꦸꦥꦪ​ꦏꦧꦺꦃ​ꦮꦺꦴꦁ​ꦱꦶꦁ​ꦮꦶꦱ꧀ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​ꦲꦺꦴꦫ​ꦲꦸꦫꦶꦥ꧀ꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦢꦺꦮꦺꦩꦼꦤꦺꦃ​꧈​ꦲꦺꦴꦫ​꧈​ꦤꦁꦔꦶꦁ​ꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦏꦿꦶꦱ꧀ꦡꦸꦱ꧀꧈​ꦲꦮꦶꦠ꧀ꦢꦺꦏ꧀ꦤꦺꦱꦶꦁ​ꦩꦠꦶ​ꦭꦤ꧀ꦠꦔꦶ​ꦩꦼꦤꦺꦃ​ꦱꦁꦏꦥꦠꦶ​ꦔ꧀ꦭꦧꦸꦃꦲꦶ​ꦩꦤꦸꦁꦱ​꧉​

¹⁶꧋ꦩꦸꦭꦤꦺ​ꦲꦗ​ꦥꦢ​ꦔꦁꦒꦼꦥ꧀ꦮꦺꦴꦁꦮꦺꦴꦁ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​꧉​ꦥꦚ꧀ꦕꦺꦤ꧀ ꦩ꧀ꦧꦶꦪꦺꦤ꧀ꦲꦏꦸ​ꦢꦺꦮꦺꦪ​ꦏ꧀ꦭꦺꦫꦸ​꧈​ꦲꦮꦶꦠ꧀ꦏꦿꦶꦱ꧀ꦡꦸꦱ꧀ꦠꦏ꧀ꦲꦁꦒꦼꦥ꧀ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦮꦺꦴꦁ​ꦭꦶꦪꦭꦶꦪꦤꦺ​꧉​ꦤꦁꦔꦶꦁ​ꦱꦲꦶꦏꦶ​ꦲꦏꦸ​ꦮꦶꦱ꧀ꦲꦺꦴꦫ​ꦏꦪ​ꦔꦺꦴꦤꦺꦴ​ꦩꦼꦤꦺꦃ​꧉​ ¹⁷ꦲꦮꦶꦠ꧀ꦱꦥ​ꦱꦶꦁ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀ꦮꦶꦱ꧀ꦢꦢꦶ​ꦮꦺꦴꦁ​ꦲꦚꦂ​ꦱꦏ꧀ꦏꦧꦺꦃꦲꦺ꧉​ꦲꦸꦫꦶꦥ꧀ꦥꦺꦮꦶꦱ꧀ꦲꦺꦴꦫ​ꦏꦪ​ꦩꦲꦸꦤꦺ​ꦩꦼꦤꦺꦃ​꧈​ꦲꦺꦴꦫ​꧈​ꦤꦁꦔꦶꦁ​ꦱꦲꦶꦏꦶ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦲꦚꦂ​ꦱꦏ꧀ꦏꦧꦺꦃꦲꦺ꧉​ ¹⁸ꦲꦸꦫꦶꦥ꧀ꦲꦚꦂ​ꦲꦶꦏꦶ​ꦥꦮꦺꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦏ꧀ꦤꦺꦒꦼꦊꦩ꧀ꦤꦩ꧀ꦥ​ꦲꦮꦏ꧀ꦏꦺ​ꦢꦺꦮꦺ꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦠꦶ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧉​ꦭꦤ꧀ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦁꦏꦺꦴꦤ꧀ꦲꦮꦏ꧀ꦏꦺ​ꦢꦺꦮꦺꦏꦺꦴꦁꦏꦺꦴꦤ꧀ꦔꦧꦂꦫꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦒꦼꦊꦩ꧀ꦤꦩ꧀ꦥ​ꦏꦧꦺꦃ​ꦮꦺꦴꦁ​꧉​ ¹⁹ꦠꦼꦒꦼꦱ꧀ꦱꦺ​꧈​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔꦧꦂꦫꦏꦺꦤꦺꦏ꧀ꦩꦤꦸꦁꦱ​ꦧꦶꦱ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦠꦶ​ꦚꦁꦒ​ꦱꦭꦃꦲꦺ​ꦏꦧꦺꦃ​ꦩꦤꦸꦁꦱ​꧉​ꦩꦸꦭꦤꦺ​ꦱꦲꦶꦏꦶ​ꦢꦺꦴꦱꦤꦺ​ꦮꦶꦱ꧀ꦲꦺꦴꦫ​ꦢꦶꦲꦶꦠꦸꦁꦩꦼꦤꦺꦃ​꧉​

²⁰꧋ꦢꦢꦶꦤꦺ​ꦲꦏꦸ​ꦲꦶꦏꦶ​ꦢꦢꦶ​ꦮꦏꦶꦭ꧀ꦭꦺ​ꦏꦿꦶꦱ꧀ꦡꦸꦱ꧀ꦤꦁꦗꦒꦠ꧀ ꦠꦼꦒꦼꦱ꧀ꦱꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦸꦤ꧀ꦢꦁ​ꦩꦤꦸꦁꦱ​ꦭꦤ꧀ꦠꦂꦫꦤ꧀ꦲꦏꦸ​꧉​ꦩꦸꦭꦤꦺ​꧈​ꦩꦤꦸꦠ꧀ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦏꦿꦶꦱ꧀ꦡꦸꦱ꧀ ꦲꦏꦸ​ꦚꦸꦮꦸꦤ꧀ꦠꦼꦤꦤ꧀ꦤꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​꧈​ꦲꦩ꧀ꦧꦺꦴꦏ꧀ꦥꦢ​ꦒꦼꦊꦩ꧀ꦩ​ꦢꦶꦫꦸꦏꦸꦤ꧀ꦤꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²¹ꦥꦫ​ꦱꦼꦢꦸꦭꦸꦂ​꧈​ꦏꦿꦶꦱ꧀ꦡꦸꦱ꧀ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦢꦺꦴꦱ​ꦢꦶꦏꦺꦴꦁꦏꦺꦴꦤ꧀ꦚꦁꦒ​ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦲꦮꦏ꧀ꦏꦺ​ꦢꦺꦮꦺꦪ​ꦮꦶꦱ꧀ꦢꦶꦔꦥꦸꦫꦭꦤ꧀ꦢꦶꦲꦁꦒꦼꦥ꧀ꦲꦺꦴꦫ​ꦤ꧀ꦢꦸꦮꦺꦢꦺꦴꦱ​ꦩꦼꦤꦺꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

↑ ↑ ↑

꧋ꦥꦼꦔꦭꦩꦤ꧀ꦤꦺ​ꦫꦱꦸꦭ꧀ꦦꦈꦭꦸꦱ꧀ꦲꦶꦁ​ꦱꦏ꧀ꦗꦼꦫꦺꦴꦤꦺꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​꧉​

꧇​꧖꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​꧈​ꦱꦶꦁ​ꦚꦩ꧀ꦧꦸꦠ꧀ꦠꦧꦼꦧꦉꦁꦔꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦏꦸ​ꦚꦸꦮꦸꦤ꧀ꦠꦼꦤꦤ꧀ꦤꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​:ꦲꦩ꧀ꦧꦺꦴꦏ꧀ꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦺꦴꦮꦺ​ꦲꦗ​ꦢꦶꦒꦮꦺ​ꦩꦸꦱ꧀ꦥꦿ​꧉​ꦗꦭꦂꦫꦤ꧀ꦩꦼꦭꦱ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦔꦥꦸꦫ​ꦢꦺꦴꦱꦩꦸ​꧈​ꦲꦗ​ꦧꦭꦶꦏ꧀​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦩꦼꦤꦺꦃ​꧉​ ²ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀ꦔꦺꦴꦩꦺꦴꦁꦔꦺꦤꦺ​ꦤꦁꦏꦶꦠꦧ꧀​:

“ꦲꦶꦁ​ꦮꦚ꧀ꦕꦶ​ꦱꦶꦁ​ꦠꦏ꧀ꦏꦉꦥ꧀ꦥꦏꦺ
ꦲꦏꦸ​ꦔꦿꦸꦔꦺꦴꦏ꧀ꦏꦏꦺꦱꦩ꧀ꦧꦠ꧀ꦩꦸ​
ꦭꦤ꧀ꦲꦶꦁ​ꦢꦶꦤ​ꦏꦼꦱ꧀ꦭꦩꦼꦠ꧀ꦠꦤ꧀ꦩꦸ​
ꦲꦏꦸ​ꦠꦼꦏ​ꦤꦸꦭꦸꦁꦔꦶ​ꦏꦺꦴꦮꦺ​꧉​”

ꦥꦫ​ꦱꦼꦢꦸꦭꦸꦂ​꧈​ꦪ​ꦱꦲꦶꦏꦶ​ꦲꦶꦏꦶ​ꦮꦚ꧀ꦕꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦉꦥ꧀ꦤꦸꦭꦸꦁꦔꦶ​ꦏꦺꦴꦮꦺ​ꦭꦤ꧀ꦪ​ꦱꦲꦶꦏꦶ​ꦲꦶꦏꦶ​ꦢꦶꦤ​ꦏꦼꦱ꧀ꦭꦩꦼꦠ꧀ꦠꦤ꧀ꦩꦸ​꧉​

³꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦔꦠꦶꦲꦠꦶ​ꦠꦼꦤꦤ꧀ꦲꦗ​ꦱꦩ꧀ꦥꦺꦏ꧀​ꦤ꧀ꦢꦢꦺꦏ꧀ꦏꦏꦺꦱꦤ꧀ꦢꦸꦁꦔꦤ꧀ꦩꦫꦁ​ꦱꦥ​ꦮꦲꦺ​꧉​ꦢꦢꦶꦤꦺ​ꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​ꦱꦶꦁ​ꦠꦏ꧀ꦏꦼꦂꦗꦤ꧀ꦤꦶꦲꦺꦴꦫ​ꦲꦺꦤ꧀ꦠꦸꦏ꧀ꦲꦺꦭꦺꦏ꧀꧈​ ⁴ꦲꦶꦁ​ꦥꦽꦏꦫ​ꦲꦥ​ꦮꦲꦺ​ꦱꦶꦁ​ꦠꦏ꧀ꦭꦏꦺꦴꦤ꧀ꦤꦶ​ꦲꦏꦸ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦲꦏꦸ​ꦲꦶꦏꦶ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦪꦢꦺꦤꦺ:ꦏꦱꦸꦱꦃꦲꦤ꧀ꦭꦤ꧀ꦏꦔꦺꦭ꧀ꦭꦤ꧀ꦲꦥ​ꦮꦲꦺ​ꦠꦏ꧀ꦱꦁꦒ​ꦏꦫꦺꦴ​ꦱꦧꦂ​꧉​ ⁵ꦲꦏꦸ​ꦩꦁꦔꦤ꧀ꦒꦼꦧꦸꦏ꧀ ꦩꦁꦔꦤ꧀ꦱꦼꦠꦿꦥꦤ꧀ꦭꦤ꧀ꦲꦸꦒ​ꦠꦲꦸ​ꦢꦶꦏꦿꦺꦴꦪꦺꦴꦏ꧀꧈​ꦲꦏꦸ​ꦔꦿꦱꦏ꧀ꦏꦏꦺꦚꦩ꧀ꦧꦸꦠ꧀ꦠꦲꦢꦸꦱ꧀ꦏꦿꦶꦔꦼꦠ꧀ ꦏꦸꦫꦁ​ꦠꦸꦫꦸ​ꦭꦤ꧀ꦏꦸꦫꦁ​ꦥꦔꦤ꧀꧈​ ⁶ꦲꦏꦸ​ꦔꦼꦠꦺꦴꦏ꧀ꦏꦏꦺꦧꦼꦕꦶꦏ꧀ ꦚꦩ꧀ꦧꦸꦠ꧀ꦠꦔꦁꦒꦺꦴ​ꦏꦮꦼꦫꦸꦃ꧈​ꦱꦧꦂ​ꦭꦤ꧀ꦒꦼꦩꦠꦶ​ꦩꦫꦁ​ꦱꦥ​ꦮꦲꦺ​꧉​ꦲꦏꦸ​ꦩꦤꦸꦠ꧀ꦩꦫꦁ​ꦥꦶꦤꦸꦤ꧀ꦠꦸꦤ꧀ꦤꦺꦫꦺꦴꦃ​ꦱꦸꦕꦶ​ꦭꦤ꧀ꦤꦿꦺꦱ꧀ꦤꦤ꧀ꦤꦶꦭꦶꦪꦤꦺ​ꦱꦏ꧀ꦲꦠꦶꦏꦸ​꧉​ ⁷ꦲꦏꦸ​ꦔꦧꦂꦫꦏꦺꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧈​ꦥꦶꦠꦸꦠꦸꦂꦫꦺ​ꦏꦿꦶꦱ꧀ꦡꦸꦱ꧀ꦭꦤ꧀ꦲꦏꦸ​ꦱꦶꦁ​ꦔꦧꦂꦫꦏꦺꦪ​ꦔꦁꦒꦺꦴ​ꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦏꦸ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦤꦸꦫꦸꦠ꧀ꦠꦶ​ꦲꦥ​ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦢꦶꦤꦺ​ꦲꦏꦸ​ꦧꦶꦱ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ꦠꦤ꧀ꦥ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦶꦱ​ꦚꦭꦃꦚꦭꦃꦲꦏꦺꦤꦺꦏ꧀ꦲꦏꦸ​ꦤꦶꦤ꧀ꦢꦏ꧀ꦏꦏꦺꦲꦭ​꧉​ ⁸ꦲꦏꦸ​ꦢꦺꦴꦁꦢꦺꦴꦁꦔꦤ꧀ꦢꦶꦲꦗꦺꦤ꧀ꦤꦶ​꧈​ꦢꦺꦴꦁꦢꦺꦴꦁꦔꦤ꧀ꦢꦶꦱꦼꦥꦺꦭꦺꦏ꧀ꦏꦏꦺ꧈​ꦢꦺꦴꦁꦢꦺꦴꦁꦔꦤ꧀ꦢꦶꦲꦼꦊꦩ꧀ ꦢꦺꦴꦁꦢꦺꦴꦁꦔꦤ꧀ꦢꦶꦲꦺꦴꦭꦺꦴꦏ꧀ꦲꦺꦴꦭꦺꦴꦏ꧀꧈​ꦪ​ꦲꦺꦴꦫ​ꦢꦢꦶ​ꦲꦥ​꧉​ꦱꦼꦤꦗꦤ꧀ꦲꦏꦸ​ꦔꦺꦴꦩꦺꦴꦁꦱꦏ꧀ꦧꦼꦤꦼꦂꦫꦺ​꧈​ꦲꦏꦸ​ꦩꦼꦏ꧀ꦱ​ꦢꦶꦲꦫꦤ꧀ꦤꦶ​ꦠꦸꦏꦁ​ꦔꦥꦸꦱ꧀ꦱꦶ​꧉​ ⁹ꦏꦧꦺꦃ​ꦮꦺꦴꦁ​ꦏꦼꦤꦭ꧀ꦩꦫꦁ​ꦲꦏꦸ​꧈​ꦤꦁꦔꦶꦁ​ꦲꦺꦴꦏꦺꦃꦱꦶꦁ​ꦲꦺꦴꦫ​ꦒꦼꦊꦩ꧀ꦔꦁꦒꦼꦥ꧀ꦲꦏꦸ​ꦏꦪ​ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​ꦲꦏꦸ​ꦲꦗꦼꦏ꧀ꦔꦢꦼꦥ꧀ꦥꦶꦥꦠꦶ​꧈​ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦶꦗꦶꦏ꧀ꦲꦸꦫꦶꦥ꧀꧈​ꦱꦼꦤꦗꦤ꧀ꦲꦏꦸ​ꦢꦶꦥꦼꦤ꧀ꦠꦸꦁꦔꦶ꧈​ꦤꦁꦔꦶꦁ​ꦲꦏꦸ​ꦲꦺꦴꦫ​ꦩꦠꦶ​꧉​ ¹⁰ꦱꦼꦤꦗꦤ꧀ꦲꦏꦸ​ꦢꦶꦒꦮꦺ​ꦱꦼꦢꦶ꧈​ꦤꦁꦔꦶꦁ​ꦲꦏꦸ​ꦧꦸꦔꦃ​ꦠꦼꦫꦸꦱ꧀꧈​ꦲꦏꦸ​ꦏꦺꦠꦺꦴꦏ꧀​ꦩ꧀ꦭꦫꦠ꧀ ꦤꦁꦔꦶꦁ​ꦲꦏꦸ​ꦤ꧀ꦢꦢꦺꦏ꧀ꦏꦏꦺꦱꦸꦒꦶꦃꦲꦺ​ꦮꦺꦴꦁ​ꦥꦶꦫꦁꦥꦶꦫꦁ​꧉​ꦏꦺꦠꦺꦴꦏ꧀ꦏꦺ​ꦲꦺꦴꦫ​ꦤ꧀ꦢꦸꦮꦺꦲꦥꦲꦥ​꧈​ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦏꦸ​ꦤ꧀ꦢꦸꦮꦺꦱꦼꦩ꧀ꦧꦫꦁ​꧉​

¹¹꧋ꦥꦫ​ꦱꦼꦢꦸꦭꦸꦂꦏꦸ​ꦤꦁꦏꦺꦴꦫꦶꦤ꧀ꦠꦴ꧈​ꦲꦏꦸ​ꦮꦶꦱ꧀ꦔꦺꦴꦩꦺꦴꦁꦧ꧀ꦭꦏ​ꦩꦫꦁ​ꦏꦺꦴꦮꦺ​ꦭꦤ꧀ꦱꦼꦩ꧀ꦧꦫꦁ​ꦱꦶꦁ​ꦤꦁꦚ꧀ꦗꦼꦫꦺꦴꦤꦺ​ꦲꦠꦶꦏꦸ​ꦮꦶꦱ꧀ꦠꦏ꧀ꦲꦼꦠꦺꦴꦏ꧀ꦏꦏꦺꦏꦧꦺꦃ​꧉​ ¹²ꦤꦺꦏ꧀ꦲꦺꦤꦺꦁꦫꦱ​ꦱꦶꦁ​ꦲꦺꦴꦫ​ꦏꦼꦥꦺꦤꦏ꧀ꦲꦼꦁꦒꦺꦴꦤ꧀ꦩꦸ​ꦧꦼꦧꦉꦁꦔꦤ꧀ꦏꦫꦺꦴ​ꦲꦏꦸ​꧈​ꦏꦸꦮꦶ​ꦲꦺꦴꦫ​ꦗꦭꦂꦫꦤ꧀ꦠꦸꦩꦶꦤ꧀ꦢꦏ꧀ꦏꦸ​ꦱꦭꦃ​ꦩꦫꦁ​ꦏꦺꦴꦮꦺ​꧈​ꦲꦺꦴꦫ​꧈​ꦤꦁꦔꦶꦁ​ꦏꦸꦮꦶ​ ꦗꦭꦂꦫꦤ꧀ꦱꦁꦏꦱꦭꦃꦩꦸ​ꦢꦺꦮꦺ꧉​ ¹³ꦥꦫ​ꦱꦼꦢꦸꦭꦸꦂ​꧈​ꦲꦼꦁꦒꦺꦴꦤ꧀ꦏꦸ​ꦩꦶꦠꦸꦠꦸꦂꦫꦶ​ꦏꦺꦴꦮꦺ​ꦏꦸꦮꦶ​ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦠꦏ꧀ꦲꦁꦒꦼꦥ꧀ꦲꦤꦏ꧀ꦲꦤꦏ꧀ꦏꦸ​ꦢꦺꦮꦺ꧉​ꦩꦸꦭꦤꦺ​꧈​ꦩ꧀ꦧꦺꦴꦏ꧀ꦥꦢ​ꦢꦶꦏꦺꦠꦺꦴꦏ꧀ꦏꦏꦺꦩꦫꦁ​ꦲꦏꦸ​ꦫꦱꦤꦺ​ꦲꦠꦶꦩꦸ​꧈​ꦏꦪ​ꦲꦼꦁꦒꦺꦴꦤ꧀ꦏꦸ​ꦔꦺꦠꦺꦴꦏ꧀ꦏꦏꦺ​ꦫꦱꦤꦺ​ꦲꦠꦶꦏꦸ​ꦩꦫꦁ​ꦏꦺꦴꦮꦺ​꧉​

꧋ꦲꦗ​ꦱꦩ꧀ꦥꦺꦏ꧀ꦒꦸꦥꦏ꧀ꦉꦉꦒꦼꦠ꧀ꦠꦺ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​꧉​

¹⁴꧋ꦥꦫ​ꦱꦼꦢꦸꦭꦸꦂ​꧈​ꦲꦗ​ꦒꦼꦒꦤ꧀ꦢꦺꦁꦔꦤ꧀ꦏꦫꦺꦴ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​꧉​ꦲꦥ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦒꦼꦒꦤ꧀ꦢꦺꦁꦔꦤ꧀ꦏꦫꦺꦴ​ꦮꦺꦴꦁ​ꦱꦶꦁ​ꦔ꧀ꦭꦮꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​?ꦩꦼꦱ꧀ꦠꦶꦲꦺꦴꦫ​꧉​ꦲꦥ​ꦥꦼꦥꦢꦁꦧꦶꦱ​ꦧꦼꦧꦉꦁꦔꦤ꧀ꦏꦫꦺꦴ​ꦥꦼꦥꦼꦠꦼꦁ​?ꦩꦼꦱ꧀ꦠꦶꦲꦺꦴꦫ​꧉​ ¹⁵ꦏꦿꦶꦱ꧀ꦡꦸꦱ꧀ꦲꦥ​ꦠꦲꦸ​ꦱꦼꦠꦸꦗꦸ​ꦏꦫꦺꦴ​ꦱꦺꦠꦤ꧀?ꦩꦸꦭꦤꦺ​꧈​ꦮꦺꦴꦁ​ꦱꦶꦁ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀ꦪ​ꦲꦺꦴꦫ​ꦠꦸꦁꦒꦭ꧀ꦭꦺ​ꦏꦫꦺꦴ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​꧉​ ¹⁶ꦭꦤ꧀ꦲꦺꦴꦩꦃ​ꦥꦁꦒꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦲꦺꦴꦫ​ꦠꦸꦁꦒꦭ꧀ꦭꦺ​ꦏꦫꦺꦴ​ꦲꦺꦴꦩꦃꦲꦺ​ꦧꦿꦲꦭ​꧉​ꦲꦮꦶꦠ꧀ꦥꦁꦒꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀ꦪ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧉​ꦮꦸꦗꦸꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀ꦠꦲꦸ​ꦔꦺꦴꦩꦺꦴꦁ꧈​ꦏꦪ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀​꧈​ꦲꦸꦤꦶꦤꦺ​ꦔꦺꦤꦺ​:

“ꦲꦏꦸ​ꦧꦏꦭ꧀ꦩꦁꦒꦺꦴꦤ꧀ꦢꦢꦶ​ꦱꦶꦗꦶ​ꦏꦫꦺꦴ​ꦲꦸꦩꦠ꧀ꦏꦸ​
ꦭꦤ꧀ꦲꦏꦸ​ꦧꦏꦭ꧀ꦧꦼꦧꦉꦁꦔꦤ꧀ꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧉​
ꦲꦏꦸ​ꦧꦏꦭ꧀ꦢꦢꦶ​ꦒꦸꦱ꧀ꦠꦶ​ꦄꦭ꧀ꦭꦃꦲꦺ​
ꦭꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦢꦢꦶ​ꦲꦸꦩꦠ꧀ꦏꦸ​꧉​”

¹⁷ꦤꦁꦲꦪꦠ꧀ꦭꦶꦪꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​:

“ꦭꦸꦔꦲ​ꦱꦁꦏꦠꦼꦔꦃꦲꦺ​ꦮꦺꦴꦁꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​
ꦭꦤ꧀ꦥꦢ​ꦥꦶꦱꦃꦲ​ꦱꦁꦏꦮꦺꦴꦁꦮꦺꦴꦁ​ꦏꦸꦮꦶ​꧉​
ꦲꦗ​ꦥꦢ​ꦤ꧀ꦢꦼꦩꦺꦏ꧀ꦧꦫꦁ​ꦱꦶꦁ​ꦏꦺꦴꦠꦺꦴꦂ​꧈​
ꦩꦼꦁꦏꦺꦴ​ꦲꦏꦸ​ꦧꦏꦭ꧀ꦤꦩ꧀ꦥ​ꦏꦺꦴꦮꦺ​꧉​”

¹⁸ꦤꦁꦲꦪꦠ꧀ꦭꦶꦪꦤꦺ​ꦩꦼꦤꦺꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​:

“ꦲꦏꦸ​ꦧꦏꦭ꧀ꦢꦢꦶ​ꦧꦥꦏ꧀ꦏꦁꦒꦺꦴ​ꦏꦺꦴꦮꦺ​
ꦭꦤ꧀ꦏꦺꦴꦮꦺ​ꦧꦏꦭ꧀ꦢꦢꦶ​ꦲꦤꦏ꧀ꦲꦤꦏ꧀ꦭꦤꦁ​ꦭꦤ꧀ꦮꦺꦢꦺꦴꦏ꧀ꦏꦁꦒꦺꦴ​ꦲꦏꦸ​꧉​
ꦏꦸꦮꦶ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦱꦶꦁ​ꦏ꧀ꦮꦱ​ꦢꦺꦮꦺ꧉​”

↑ ↑ ↑

 

꧇​꧗꧇​ ¹꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲꦮꦏ꧀ꦏꦺ​ꦢꦺꦮꦺꦥꦢ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦼꦏꦺꦏ꧀ꦏꦶꦥꦽꦗꦚ꧀ꦗꦶꦪꦤ꧀ꦥꦽꦗꦚ꧀ꦗꦶꦪꦤ꧀ꦲꦶꦏꦶ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦲ꦳ꦪꦸꦏ꧀ꦠ​ꦱꦲꦶꦏꦶ​ꦥꦢ​ꦔꦽꦱꦶꦏ꧀ꦏꦶ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦱꦁꦏꦱꦼꦩ꧀ꦧꦫꦁ​ꦱꦶꦁ​ꦔ꧀ꦒꦮꦺ​ꦉꦒꦼꦠ꧀ꦠꦺꦧꦢꦤ꧀ꦭꦤ꧀ꦲꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦤꦩꦸꦁ​ꦔ꧀ꦭꦏꦺꦴꦤ꧀ꦤꦶ​ꦲꦥ​ꦱꦶꦁ​ꦤ꧀ꦢꦢꦺꦏ꧀ꦏꦏꦺꦱꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦔꦗꦺꦤ꧀ꦤꦶ​ꦠꦼꦤꦤ꧀ꦩꦫꦁ​ꦢꦺꦏ꧀ꦤꦺ꧉​

²꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦲꦩ꧀ꦧꦺꦴꦏ꧀ꦢꦶꦥꦽꦕꦪ​ꦠ​!ꦲꦏꦸ​ꦔꦼꦂꦠꦶ​ꦤꦺꦏ꧀ꦲꦺꦤꦺꦁꦱꦶꦁ​ꦥꦢ​ꦚꦭꦃꦚꦭꦃꦲꦏꦺꦲꦏꦸ​꧈​ꦗꦫꦺꦤꦺ​ꦲꦏꦸ​ꦱꦼꦩ꧀ꦧꦿꦤ​ꦏꦫꦺꦴ​ꦏꦺꦴꦮꦺ​꧈​ꦤꦁꦔꦶꦁ​ꦲꦏꦸ​ꦲꦺꦴꦫ​ꦫꦸꦩꦁꦱ​ꦠꦲꦸ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦲꦺꦴꦫ​ꦧꦼꦤꦼꦂ​ꦩꦫꦁ​ꦏꦺꦴꦮꦺ​꧉​ꦲꦏꦸ​ꦪ​ꦲꦺꦴꦫ​ꦠꦲꦸ​ꦤ꧀ꦢꦢꦺꦏ꧀ꦏꦏꦺꦫꦸꦱꦏ꧀ꦏꦺ​ꦲꦸꦫꦶꦥ꧀ꦥꦺꦱꦥ​ꦮꦲꦺ​ꦭꦤ꧀ꦲꦏꦸ​ꦪ​ꦲꦺꦴꦫ​ꦫꦸꦩꦁꦱ​ꦠꦲꦸ​ꦔ꧀ꦒꦺꦴꦭꦺꦏ꧀ꦧꦠꦶꦱꦁꦏꦲꦸꦫꦶꦥ꧀ꦥꦺꦱꦥ​ꦮꦲꦺ​꧉​ ³ꦲꦏꦸ​ꦔꦺꦴꦩꦺꦴꦁꦏꦸꦮꦶ​ꦲꦺꦴꦫ​ꦏꦁꦒꦺꦴ​ꦚꦭꦃꦚꦭꦃꦲꦏꦺꦏꦺꦴꦮꦺ​꧈​ꦲꦺꦴꦫ​꧉​ꦲꦏꦸ​ꦩꦭꦃ​ꦠꦲꦸ​ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦏꦧꦺꦃ​ꦲꦤ​ꦲꦶꦁ​ꦲꦠꦶꦏꦸ​;ꦥꦠꦶꦲꦸꦫꦶꦥ꧀ꦏꦠꦿꦺꦱ꧀ꦤꦤ꧀ꦏꦸꦩꦫꦁ​ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦥꦼꦢꦺꦴꦠ꧀꧈​

꧋ꦧꦸꦔꦃ​ꦱꦏ꧀ꦮꦶꦱ꧀ꦱꦺ​ꦱꦸꦱꦃ​꧉​

⁴꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦥꦚ꧀ꦕꦺꦤ꧀ꦧꦶꦱ​ꦧ꧀ꦭꦏ​ꦠꦼꦤꦤ꧀ꦩꦫꦁ​ꦏꦺꦴꦮꦺ​ꦭꦤ꧀ꦏꦺꦴꦮꦺ​ꦥꦚ꧀ꦕꦺꦤ꧀ꦏꦼꦤꦺꦁꦠꦏ꧀ꦒꦮꦺ​ꦥꦩꦺꦂꦫꦤ꧀꧈​ꦱꦼꦤꦗꦤ꧀ꦲꦏꦸ​ꦔꦭꦩ꧀ꦩꦶ​ꦏꦱꦸꦱꦃꦲꦤ꧀ꦲꦺꦴꦏꦺꦃ꧈​ꦗꦭꦂꦫꦤ꧀ꦏꦺꦴꦮꦺ​ꦔ꧀ꦭꦶꦥꦸꦂ​ꦲꦏꦸ​꧈​ꦲꦠꦶꦏꦸ​ꦧꦶꦱ​ꦏꦼꦧꦼꦏ꧀ꦏꦫꦺꦴ​ꦏꦧꦸꦔꦃꦲꦤ꧀꧈​ ⁵ꦲꦮꦶꦠ꧀ꦱꦏ꧀ꦮꦶꦱ꧀ꦱꦺ​ꦲꦏꦸ​ꦠꦼꦏ​ꦤꦁꦩꦱꦼꦢꦺꦴꦤꦶꦪꦲꦏꦸ​ꦪ​ꦲꦺꦴꦫ​ꦧꦶꦱ​ꦤꦼꦩꦸ​ꦲꦪꦼꦩ꧀꧈​ꦤꦁꦲꦼꦤ꧀ꦢꦶ​ꦮꦲꦺ​ꦲꦏꦸ​ꦢꦶꦥꦺꦫꦁ​!ꦥꦺꦫꦁꦔꦤ꧀ꦱꦁꦏꦚ꧀ꦗꦧ​꧈​ꦪꦏꦸꦮꦶ​ꦮꦺꦴꦁꦮꦺꦴꦁ​ꦱꦶꦁ​ꦠꦤ꧀ꦱꦃ​ꦔ꧀ꦭꦮꦤ꧀ꦲꦮꦏ꧀ꦏꦺ​ꦢꦺꦮꦺ꧉​ꦥꦺꦫꦁꦔꦤ꧀ꦱꦁꦏꦚ꧀ꦗꦼꦫꦸꦃ꧈​ꦪꦏꦸꦮꦶ​ꦫꦱ​ꦱꦁꦱꦶꦲꦶꦁ​ꦲꦠꦶ​ꦤꦺꦏ꧀ꦩꦶꦏꦶꦂꦫꦏꦺꦏꦺꦴꦮꦺ​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​꧉​ ⁶ꦤꦁꦔꦶꦁ​ꦏꦼꦱꦸꦮꦸꦤ꧀ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔ꧀ꦭꦶꦥꦸꦂ​ꦲꦠꦶꦤꦺ​ꦮꦺꦴꦁ​ꦱꦼꦩ꧀ꦥ꧀ꦭꦏ꧀ ꦲꦮꦶꦠ꧀ꦱꦲꦶꦏꦶ​ꦱꦼꦢꦸꦭꦸꦂ​ꦠꦶꦠꦸꦱ꧀ꦮꦶꦱ꧀ꦧꦭꦶꦏ꧀ꦤꦁꦔ꧀ꦒꦺꦴꦤ꧀ꦏꦸ​ꦩꦼꦤꦺꦃ​ꦭꦤ꧀ꦲꦠꦶꦏꦸ​ꦏꦿꦱ​ꦧꦸꦔꦃ​꧉​ ⁷ꦧꦸꦔꦃ​ꦲꦺꦴꦫ​ꦤꦩꦸꦁ​ꦗꦭꦂꦫꦤ꧀ꦠꦶꦠꦸꦱ꧀ꦮꦶꦱ꧀ꦤꦁꦔ꧀ꦒꦺꦴꦤ꧀ꦏꦸ​ꦩꦼꦤꦺꦃ​꧈​ꦲꦺꦴꦫ​꧈​ꦤꦁꦔꦶꦁ​ꦲꦸꦒ​ꦗꦭꦂꦫꦤ꧀ꦠꦶꦠꦸꦱ꧀ꦢꦺꦮꦺꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦏꦧꦺꦃ​ꦥꦢ​ꦔ꧀ꦭꦶꦥꦸꦂ​ꦢꦺꦏ꧀ꦤꦺ꧉​ꦢꦺꦏ꧀ꦤꦺꦩꦭꦃ​ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦥꦢ​ꦏꦁꦔꦼꦤ꧀ꦠꦼꦤꦤ꧀ꦩꦫꦁ​ꦲꦏꦸ​꧉​ꦠꦶꦠꦸꦱ꧀ꦲꦸꦒ​ꦔꦺꦴꦩꦺꦴꦁꦔꦏꦺꦤꦺꦏ꧀ꦏꦺꦴꦮꦺ​ꦥꦢ​ꦱꦼꦢꦶ꧈​ꦫꦸꦩꦁꦱ​ꦤ꧀ꦢꦸꦮꦺ ꦱꦭꦃ​ꦩꦫꦁ​ꦲꦏꦸ​꧈​ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦥꦢ​ꦲꦺꦴꦫ​ꦮꦼꦢꦶ​ꦲꦩ꧀ꦧꦺꦭꦤꦶ​ꦲꦏꦸ​꧉​ꦏꦧꦂ​ꦏꦸꦮꦶ​ꦏꦧꦺꦃ​ꦥꦚ꧀ꦕꦺꦤ꧀ꦤꦩ꧀ꦧꦃꦲꦶ​ꦧꦸꦔꦃꦲꦺ​ꦲꦠꦶꦏꦸ​꧉​

⁸꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦫꦸꦩꦁꦱ​ꦤꦺꦏ꧀ꦭꦪꦁꦏꦸ​ꦱꦶꦁ​ꦏꦺꦫꦶ​ꦔ꧀ꦒꦮꦺ​ꦱꦸꦱꦃꦲꦺ​ꦲꦠꦶꦩꦸ​꧈​ꦤꦁꦔꦶꦁ​ꦲꦏꦸ​ꦲꦺꦴꦫ​ꦒꦼꦭ​ꦤꦺꦏ꧀ꦲꦏꦸ​ꦤꦸꦭꦶꦱ꧀ꦭꦪꦁ​ꦏꦸꦮꦶ​꧉​ꦲꦺꦴꦫ​꧈​ꦲꦏꦸ​ꦒꦺꦴꦫꦺꦴꦃ​ꦤꦺꦏ꧀ꦲꦏꦸ​ꦔꦺꦴꦩꦺꦴꦁꦲꦺꦴꦫ​ꦒꦼꦭ​꧈​ꦲꦮꦶꦠ꧀ꦲꦏꦸ​ꦪ​ꦒꦼꦭ​ꦠꦼꦤꦤ꧀ꦤꦺꦏ꧀ꦭꦪꦁꦏꦸ​ꦔ꧀ꦒꦮꦺ​ꦱꦼꦢꦶꦤꦺꦲꦠꦶꦩꦸ​꧈​ꦱꦼꦤꦗꦤ꧀ꦱꦼꦢꦶꦩꦸꦤꦩꦸꦁ​ꦱꦼꦢꦶꦭꦸꦠ꧀꧈​ ⁹ꦱꦲꦶꦏꦶ​ꦲꦏꦸ​ꦧꦸꦔꦃ​꧈​ꦲꦺꦴꦫ​ꦧꦸꦔꦃ​ꦗꦭꦂꦫꦤ꧀ꦲꦏꦸ​ꦔ꧀ꦒꦮꦺ​ꦱꦼꦢꦶꦩꦸ꧈​ꦲꦺꦴꦫ​꧈​ꦤꦁꦔꦶꦁ​ꦲꦏꦸ​ꦧꦸꦔꦃ​ꦗꦭꦂꦫꦤ꧀ꦱꦼꦢꦶꦩꦸꦩꦫꦏ꧀ꦏꦏꦺꦏꦺꦴꦮꦺ​ꦥꦢ​ꦔꦿꦸꦩꦁꦱꦤꦶ​ꦏ꧀ꦭꦺꦫꦸꦩꦸꦭꦤ꧀ꦱꦲꦶꦏꦶ​ꦏꦺꦴꦮꦺ​ꦥꦢ​ꦚ꧀ꦗꦭꦸꦏ꧀ꦔꦥꦸꦫ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦠꦼꦫꦁ​ꦧꦔꦼꦠ꧀ꦤꦺꦏ꧀ꦱꦼꦢꦶꦩꦸꦏꦸꦮꦶ​ꦥꦚ꧀ꦕꦺꦤ꧀ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦠꦶꦧꦏꦺ​ꦭꦪꦁꦏꦸ​ꦪ​ꦲꦺꦴꦫ​ꦔ꧀ꦒꦮꦺ​ꦲꦭ​꧈​ꦩꦭꦃ​ꦔ꧀ꦒꦮ​ꦧꦼꦕꦶꦏ꧀ꦏꦁꦒꦺꦴ​ꦏꦺꦴꦮꦺ​꧉​

¹⁰꧋ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦱꦼꦢꦶꦤꦺꦏ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦩꦭꦃ​ꦩꦫꦏ꧀ꦏꦏꦺꦮꦺꦴꦁ​ꦔꦿꦸꦩꦁꦱꦤꦶ​ꦱꦭꦃꦲꦺ​꧈​ꦱꦸꦥꦪ​ꦚ꧀ꦗꦭꦸꦏ꧀ꦔꦥꦸꦫ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦱꦼꦢꦶꦏꦪ​ꦔꦺꦴꦤꦺꦴ​ꦏꦸꦮꦶ​ꦩꦭꦃ​ꦤꦼꦏꦏ꧀ꦏꦏꦺꦏꦼꦱ꧀ꦭꦩꦼꦠ꧀ꦠꦤ꧀ ꦲꦺꦴꦫ​ꦤ꧀ꦢꦢꦺꦏ꧀ꦏꦏꦺꦒꦼꦭ​ꦲꦶꦁ​ꦠꦼꦩ꧀ꦧꦺꦩ꧀ꦧꦸꦫꦶ​꧉​ꦤꦁꦔꦶꦁ​ꦱꦼꦢꦶꦱꦏ꧀ꦕꦫꦤꦺ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦧꦺꦢ​꧈​ꦏꦸꦮꦶ​ꦤꦼꦏꦏ꧀ꦏꦏꦺꦥꦠꦶ​꧉​ꦲꦮꦶꦠ꧀ꦱꦼꦤꦗꦤ꧀ꦫꦸꦩꦁꦱ​ꦱꦭꦃ​꧈​ꦤꦁꦔꦶꦁ​ꦲꦺꦴꦫ​ꦥꦢ​ꦚ꧀ꦗꦭꦸꦏ꧀ꦔꦥꦸꦫ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹¹ꦭꦃ​ꦏꦺꦴꦮꦺ​ꦮꦶꦱ꧀ꦥꦢ​ꦔꦭꦩ꧀ꦩꦶ​ꦱꦼꦢꦶꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦶꦥꦶꦏꦶꦂ​ꦢꦺꦮꦺꦱꦼꦢꦸꦭꦸꦂ​ꦲꦥ​ꦲꦺꦤ꧀ꦠꦸꦏ꧀ꦲꦺꦤ꧀ꦠꦸꦏ꧀ꦏꦺ!ꦮꦸꦗꦸꦠ꧀ꦠꦺꦱꦲꦶꦏꦶ​ꦏꦺꦴꦮꦺ​ꦥꦢ​ꦩꦼꦩ꧀ꦥꦼꦁ​ꦠꦼꦤꦤ꧀ꦲꦼꦁꦒꦺꦴꦤ꧀ꦩꦸ​ꦔ꧀ꦒꦫꦥ꧀ꦱꦼꦢꦸꦭꦸꦂ​ꦱꦶꦁ​ꦱꦭꦃ​꧈​ꦏꦺꦴꦮꦺ​ꦲꦸꦒ​ꦠꦼꦤꦤ꧀ꦤꦤ꧀ꦲꦼꦁꦒꦺꦴꦤ꧀ꦩꦸ​ꦲꦩ꧀ꦧꦺꦭꦤꦶ​ꦲꦏꦸ​꧉​ꦱꦲꦶꦏꦶ​ꦪ​ꦏꦺꦠꦺꦴꦏ꧀ꦠꦼꦤꦤ꧀ꦤꦺꦏ꧀ꦏꦺꦴꦮꦺ​ꦱꦼꦔꦶꦠ꧀ꦏꦫꦺꦴ​ꦧꦫꦁ​ꦱꦶꦁ​ꦲꦭ​꧈​ꦲꦮꦶꦠ꧀ꦱꦲꦶꦏꦶ​ꦏꦼꦠꦫ​ꦠꦼꦤꦤ꧀ꦤꦺꦏ꧀ꦏꦺꦴꦮꦺ​ꦮꦼꦢꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦲꦶꦏꦶ​ꦏꦺꦴꦮꦺ​ꦩꦭꦃ​ꦏꦁꦔꦼꦤ꧀ꦠꦼꦤꦤ꧀ꦩꦫꦁ​ꦲꦏꦸ​꧈​ꦏꦼꦥꦺꦔꦶꦤ꧀​ꦤ꧀ꦢꦸꦢꦸꦃꦲꦏꦺꦩꦫꦁ​ꦲꦏꦸ​ꦤꦺꦏ꧀ꦏꦺꦴꦮꦺ​ꦱꦲꦶꦏꦶ​ꦥꦢ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦒꦼꦊꦩ꧀​ꦔ꧀ꦒꦫꦥ꧀ꦱꦼꦢꦸꦭꦸꦂ​ꦱꦶꦁ​ꦔ꧀ꦒꦮꦺ​ꦢꦺꦴꦱ​꧉​ꦏꦸꦮꦶ​ꦩꦲꦸ​ꦏꦧꦺꦃ​ꦔꦼꦏꦺꦏ꧀ꦏꦶꦠꦤ꧀ꦢꦤꦺꦏ꧀ꦏꦺꦴꦮꦺ​ꦏꦼꦥꦺꦔꦶꦤ꧀​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦤꦼꦂ​꧉​

¹²꧋ꦥꦫ​ꦱꦼꦢꦸꦭꦸꦂ​꧈​ꦢꦢꦶꦤꦺ​ꦲꦼꦁꦒꦺꦴꦤ꧀ꦏꦸ​ꦤꦸꦭꦶꦱ꧀ꦭꦪꦁ​ꦱꦶꦁ​ꦏꦺꦫꦶ​ꦏꦲꦺ​ꦲꦺꦴꦫ​ꦏꦁꦒꦺꦴ​ꦔ꧀ꦒꦫꦥ꧀ꦱꦼꦢꦸꦭꦸꦂ​ꦱꦶꦁ​ꦱꦭꦃ​ꦲꦥ​ꦲꦩ꧀ꦧꦺꦭꦤꦶ​ꦱꦼꦢꦸꦭꦸꦂ​ꦱꦶꦁ​ꦢꦶꦱꦭꦃꦲꦏꦺ꧈​ꦲꦺꦴꦫ​꧉​ꦤꦁꦔꦶꦁ​ꦲꦼꦁꦒꦺꦴꦤ꧀ꦏꦸ​ꦔ꧀ꦭꦪꦁꦔꦶ​ꦏꦺꦴꦮꦺ​ꦏꦲꦺ​ꦠꦸꦗꦸꦮꦤ꧀ꦤꦺ꧈​ꦱꦸꦥꦪ​ꦏꦺꦴꦮꦺ​ꦏꦧꦺꦃ​ꦥꦢ​ꦔꦏꦺꦴꦤ꧀ꦤꦶ​ꦢꦺꦮꦺꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦺꦏ꧀ꦏꦺꦴꦮꦺ​ꦥꦢ​ꦭꦧꦸꦃ​ꦠꦼꦤꦤ꧀ꦏꦁꦒꦺꦴ​ꦲꦏꦸ​꧉​ ¹³ꦏꦸꦮꦶ​ꦱꦶꦁ​ꦔ꧀ꦭꦶꦥꦸꦂ​ꦲꦠꦶꦏꦸ​ꦠꦼꦤꦤ꧀꧈​

꧋ꦏꦼꦗꦧ​ꦱꦁꦏꦥꦔ꧀ꦭꦶꦥꦸꦂ​ꦲꦶꦏꦸ​꧈​ꦲꦏꦸ​ꦲꦸꦒ​ꦧꦸꦔꦃ​ꦗꦭꦂꦫꦤ꧀ꦏꦺꦴꦮꦺ​ꦏꦧꦺꦃ​ꦥꦢ​ꦔꦪꦼꦩꦏꦺꦲꦠꦶꦤꦺ​ꦱꦼꦢꦸꦭꦸꦂ​ꦠꦶꦠꦸꦱ꧀;ꦢꦺꦏ꧀ꦤꦺꦲꦺꦴꦫ​ꦲꦸꦱꦃꦱꦁꦱꦶꦧꦧ꧀ꦏꦺꦴꦮꦺ​꧉​ ¹⁴ꦏꦺꦴꦮꦺ​ꦥꦚ꧀ꦕꦺꦤ꧀ꦠꦏ꧀ꦒꦮꦺ​ꦥꦩꦺꦂꦫꦤ꧀ꦩꦫꦁ​ꦱꦼꦢꦸꦭꦸꦂ​ꦠꦶꦠꦸꦱ꧀ꦭꦤ꧀ꦲꦏꦸ​ꦧꦸꦔꦃ​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦔ꧀ꦒꦮꦺ​ꦲꦶꦱꦶꦤ꧀ꦏꦸ​ꦩꦫꦁ​ꦢꦺꦏ꧀ꦤꦺ꧉​ꦏꦪꦢꦺꦤꦺꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦠꦏ꧀ꦲꦺꦴꦩꦺꦴꦁ​ꦩꦫꦁ​ꦏꦺꦴꦮꦺ​ꦧꦼꦤꦼꦂ​ꦏꦧꦺꦃ​꧈​ꦱꦲꦶꦏꦶ​ꦮꦸꦗꦸꦠ꧀ꦠꦺꦪ​ꦏꦼꦠꦫ​ꦤꦺꦏ꧀ꦱꦼꦩ꧀ꦧꦫꦁ​ꦧꦧ꧀ꦏꦺꦴꦮꦺ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦩꦫꦁ​ꦱꦼꦢꦸꦭꦸꦂ​ꦠꦶꦠꦸꦱ꧀ꦪ​ꦧꦼꦤꦼꦂ​ꦏꦧꦺꦃ​꧉​ ¹⁵ꦏꦠꦿꦺꦱ꧀ꦤꦤꦺꦠꦶꦠꦸꦱ꧀ꦩꦫꦁ​ꦏꦺꦴꦮꦺ​ꦱꦲꦶꦏꦶ​ꦩꦸꦤ꧀ꦢꦏ꧀ꦒꦼꦢꦺ꧈​ꦲꦮꦶꦠ꧀ꦢꦺꦏ꧀ꦤꦺꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦥꦢ​ꦩꦤꦸꦠ꧀ꦩꦫꦁ​ꦠꦼꦩ꧀ꦧꦸꦁꦠꦼꦩ꧀ꦧꦸꦁꦏꦸ꧉​ꦮꦸꦗꦸꦠ꧀ꦠꦺꦢꦺꦏ꧀ꦤꦺꦪ​ꦲꦩ꧀ꦧꦺꦴꦏ꧀ꦲꦗꦺꦤ꧀ꦤꦶ​ꦠꦼꦤꦤ꧀ꦢꦺꦴꦁꦔꦺꦢꦺꦏ꧀ꦤꦺꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦭꦤ꧀ꦪ​ꦲꦩ꧀ꦧꦺꦴꦏ꧀ꦠꦩ꧀ꦥ​ꦲꦥꦶꦏ꧀ꦧꦔꦼꦠ꧀꧈​ ¹⁶ꦲꦏꦸ​ꦗꦤ꧀ꦧꦸꦔꦃ​ꦠꦼꦤꦤ꧀ꦤꦺꦏ꧀ꦏꦺꦴꦮꦺ​ꦏꦼꦤꦺꦁꦠꦏ꧀ꦥꦽꦕꦪ​ꦱꦏ꧀ꦏꦧꦺꦃꦲꦺ꧉​

↑ ↑ ↑

꧋ꦲꦗ​ꦲꦺꦩꦤ꧀ꦥꦮꦺꦃ꧉​

꧇​꧘꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦏꦸ​ꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦶꦏꦺꦴꦮꦺ​ꦏꦧꦺꦃ​ꦧꦧ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦥꦱꦩꦸꦮꦤ꧀ꦥꦱꦩꦸꦮꦤ꧀ꦤꦁꦧꦮꦃꦩꦱꦼꦢꦺꦴꦤꦶꦪ꧉​ ²ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦥꦱꦩꦸꦮꦤ꧀ꦥꦱꦩꦸꦮꦤ꧀ꦲꦶꦏꦶ​ꦥꦢ​ꦔꦭꦩ꧀ꦩꦶ​ꦏꦔꦺꦭ꧀ꦭꦤ꧀ꦱꦶꦁ​ꦲꦧꦺꦴꦠ꧀ꦠꦼꦤꦤ꧀ ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​ꦥꦢ​ꦤ꧀ꦢꦸꦮꦺꦤ꧀ꦤꦶ​ꦏꦧꦸꦔꦃꦲꦤ꧀ꦒꦼꦢꦺꦲꦶꦁ​ꦲꦠꦶ​꧉​ꦭꦤ꧀ꦱꦼꦤꦗꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦢꦺꦮꦺꦲꦺꦴꦫ​ꦤ꧀ꦢꦸꦮꦺ꧈​ꦤꦁꦔꦶꦁ​ꦲꦼꦁꦒꦺꦴꦤꦺ​ꦤꦸꦭꦸꦁꦔꦶ​ꦭꦶꦪꦤꦺ​ꦲꦺꦴꦫ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧉​ ^3-4ꦲꦏꦸ​ꦮꦼꦫꦸꦃ​ꦢꦺꦮꦺꦤꦺꦏ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦲꦶꦏꦶ​ꦥꦢ​ꦥꦮꦺꦃꦱꦏ꧀ꦏꦸꦮꦠ꧀ꦠꦺ꧈​ꦩꦭꦃ​ꦱꦏ꧀ꦗꦤꦺꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦏꦸꦮꦶ​꧉​ꦱꦁꦏꦏꦉꦥ꧀ꦥꦺ​ꦢꦺꦮꦺꦭꦤ꧀ꦏꦫꦺꦴ​ꦲꦠꦶ​ꦱꦶꦁ​ꦊꦒꦭꦶꦭꦱꦼꦢꦸꦭꦸꦂꦱꦼꦢꦸꦭꦸꦂ​ꦲꦶꦏꦶ​ꦥꦢ​ꦚꦸꦮꦸꦤ꧀ꦠꦼꦤꦤ꧀ꦩꦫꦁ​ꦲꦏꦸ​꧈​ꦚ꧀ꦗꦭꦸꦏ꧀ꦢꦶꦏꦺꦏ꧀ꦏꦶꦏꦼꦭꦸꦁꦒꦂꦫꦤ꧀ꦩꦺꦭꦸ​ꦤꦸꦭꦸꦁꦔꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤꦁꦪꦸꦢꦺꦪ​꧉​ ⁵ꦥꦮꦺꦃꦲꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦩꦱꦼꦢꦺꦴꦤꦶꦪꦏꦸꦮꦶ​ꦗꦤ꧀ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦱꦶꦁ​ꦠꦏ꧀ꦗꦒꦏ꧀ꦏꦏꦺ꧉​ꦲꦮꦶꦠ꧀​ꦤ꧀ꦢꦶꦱꦶꦏ꧀ꦏꦺꦥꦢ​ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦩꦫꦁ​ꦒꦸꦱ꧀ꦠꦶ​ꦭꦤ꧀ꦤꦩꦸꦁ​ꦏꦼꦥꦺꦔꦶꦤ꧀ꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦒꦸꦱ꧀ꦠꦶ​꧉​ꦠꦼꦫꦸꦱ꧀ꦥꦢ​ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦩꦫꦁ​ꦲꦏꦸ​꧈​ꦏꦼꦥꦺꦔꦶꦤ꧀ꦤꦸꦫꦸꦠ꧀ꦠꦶ​ꦏꦉꦥ꧀ꦏꦸ​꧈​ꦲꦮꦶꦠ꧀ ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦥꦢ​ꦔꦼꦂꦠꦶ​ꦤꦺꦏ꧀ꦏꦸꦮꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​꧉​ ⁶ꦩꦸꦭꦤꦺ​ꦲꦏꦸ​ꦪ​ꦠꦼꦫꦸꦱ꧀ꦚꦸꦮꦸꦤ꧀ꦩꦫꦁ​ꦱꦼꦢꦸꦭꦸꦂ​ꦠꦶꦠꦸꦱ꧀ ꦱꦶꦁ​ꦮꦶꦱ꧀ꦩꦺꦴꦭꦃꦲꦶꦔ꧀ꦭꦸꦩ꧀ꦥꦸꦏ꧀ꦏꦏꦺꦥꦮꦺꦃꦩꦸ꧈​ꦱꦸꦥꦪ​ꦢꦺꦏ꧀ꦤꦺꦔꦿꦩ꧀ꦥꦸꦁꦔꦏꦺꦥꦶꦠꦸꦭꦸꦁꦔꦤ꧀ꦩꦸ​ꦏꦁꦒꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦲꦶꦏꦶ​꧉​

⁷꧋ꦥꦫ​ꦱꦼꦢꦸꦭꦸꦂ​꧈​ꦲꦶꦁ​ꦥꦽꦏꦫ​ꦲꦥ​ꦮꦲꦺ​ꦏꦺꦴꦮꦺ​ꦗꦤ꧀ꦭꦸꦧꦺꦂ​ꦠꦼꦤꦤ꧀!ꦮꦸꦗꦸꦠ꧀ꦠꦺꦏꦺꦴꦮꦺ​ꦗꦼꦫꦸꦲꦶꦁ​ꦥꦼꦔꦤ꧀ꦢꦼꦭ꧀ ꦭꦸꦮꦼꦱ꧀ꦲꦶꦁ​ꦠꦼꦩ꧀ꦧꦸꦁ​꧈​ꦗꦼꦩ꧀ꦧꦂ​ꦲꦶꦁ​ꦏꦮꦼꦫꦸꦃ꧈​ꦠꦼꦩꦼꦤ꧀ꦲꦶꦁ​ꦠꦼꦠꦸꦭꦸꦁ​ꦭꦤ꧀ꦲꦸꦒ​ꦭꦸꦧꦺꦂ​ꦲꦶꦁ​ꦏꦠꦿꦺꦱ꧀ꦤꦤ꧀ꦏꦸꦩꦫꦁ​ꦏꦺꦴꦮꦺ​꧉​ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦱꦶꦁ​ꦠꦏ꧀ꦗꦭꦸꦏ꧀ ꦥꦮꦺꦃꦩꦸꦲꦶꦏꦶ​ꦏꦁꦒꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦪꦺꦫꦸꦱꦭꦺꦩ꧀ꦧꦶꦱꦲ​ꦭꦸꦧꦺꦂ​꧉​

⁸꧋ꦲꦏꦸ​ꦲꦺꦴꦫ​ꦩꦼꦏ꧀ꦱ​ꦏꦺꦴꦮꦺ​ꦥꦫ​ꦱꦼꦢꦸꦭꦸꦂ​꧈​ꦲꦺꦴꦫ​꧈​ꦲꦏꦸ​ꦤꦩꦸꦁ​ꦏꦼꦥꦺꦔꦶꦤ꧀ꦮꦼꦫꦸꦃ​ꦲꦥ​ꦏꦠꦿꦺꦱ꧀ꦤꦤ꧀ꦩꦸꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦠꦸꦁꦒꦭ꧀ꦭꦺ​ꦏꦫꦺꦴ​ꦏꦠꦿꦺꦱ꧀ꦤꦤꦺꦭꦤ꧀ꦥꦼꦭꦧꦸꦃꦲꦤ꧀ꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦩꦱꦼꦢꦺꦴꦤꦶꦪ꧈​ꦱꦶꦁ​ꦥꦢ​ꦤꦸꦭꦸꦁꦔꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦪꦺꦫꦸꦱꦭꦺꦩ꧀ꦱꦶꦁ​ꦥꦢ​ꦏꦼꦏꦸꦫꦁꦔꦤ꧀꧈​ ⁹ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦥꦢ​ꦲꦺꦭꦶꦁꦔ​ꦩꦫꦁ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦱꦶꦁ​ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ꦱꦼꦤꦗꦤ꧀ꦢꦺꦏ꧀ꦤꦺꦱꦸꦒꦶꦃ​꧈​ꦢꦺꦏ꧀ꦤꦺꦱꦒꦸꦃ​ꦔ꧀ꦭꦏꦺꦴꦤ꧀ꦤꦶ​ꦏꦼꦩ꧀ꦭꦫꦠ꧀ꦠꦤ꧀ꦏꦁꦒꦺꦴ​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧉​ꦢꦢꦶꦤꦺ​ꦱꦁꦏꦏꦼꦩ꧀ꦭꦫꦠ꧀ꦠꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦺꦴꦮꦺ​ꦧꦶꦱ​ꦤꦩ꧀ꦥ​ꦏꦱꦸꦒꦶꦃꦲꦤ꧀ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹⁰꧋ꦩꦶꦠꦸꦫꦸꦠ꧀ꦥꦶꦤꦼꦩꦸꦏꦸꦲꦥꦶꦏ꧀ꦏꦺ​ꦔꦺꦤꦺ​ꦮꦲꦺ​:ꦏꦺꦴꦮꦺ​ꦢꦺꦮꦺꦱꦶꦁ​ꦔꦼꦠꦺꦴꦏ꧀ꦏꦏꦺꦒꦒꦱ꧀ꦱꦤ꧀ꦏꦁꦒꦺꦴ​ꦤꦸꦭꦸꦁꦔꦶ​ꦥꦱꦩꦸꦮꦤ꧀ꦥꦱꦩꦸꦮꦤ꧀ꦱꦶꦁ​ꦏꦼꦏꦸꦫꦁꦔꦤ꧀ꦭꦤ꧀ꦮꦸꦗꦸꦠ꧀ꦠꦺꦪ​ꦏꦺꦴꦮꦺ​ꦲꦸꦒ​ꦱꦶꦁ​ꦩꦺꦴꦭꦃꦲꦶꦔ꧀ꦭꦸꦩ꧀ꦥꦸꦏ꧀ꦏꦏꦺꦢꦸꦮꦶꦠ꧀ꦠꦲꦸꦤ꧀ꦱꦶꦁ​ꦮꦶꦱ꧀꧈​ ¹¹ꦥꦫ​ꦱꦼꦢꦸꦭꦸꦂ​꧈​ꦲꦥꦶꦏ꧀ꦏꦺ​ꦥꦼꦁꦒꦮꦺꦪꦤ꧀ꦲꦶꦏꦶ​ꦪ​ꦤ꧀ꦢꦁꦢꦶꦫꦩ꧀ꦥꦸꦁꦔꦏꦺꦮꦲꦺ​꧉​ꦢꦢꦶꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦧꦶꦱ​ꦮꦼꦫꦸꦃ​ꦢꦺꦮꦺꦤꦺꦏ꧀ꦏꦺꦴꦮꦺ​ꦥꦢ​ꦏꦼꦥꦺꦔꦶꦤ꧀ꦔꦿꦩ꧀ꦥꦸꦁꦔꦏꦺꦠꦼꦤꦤ꧀ꦲꦥ​ꦱꦶꦁ​ꦮꦶꦱ꧀ꦲꦩ꧀ꦧꦺꦴꦏ꧀ꦮꦶꦮꦶꦠ꧀ꦠꦶ​ꦢꦺꦮꦺ꧉​ꦥꦢ​ꦥꦮꦺꦃꦲꦱꦏ꧀ꦏꦸꦮꦠ꧀ꦩꦸ꧈​ꦤꦺꦏ꧀​ꦤ꧀ꦢꦸꦮꦺꦲꦺꦴꦏꦺꦃꦪ​ꦔꦼꦏꦺꦏ꧀ꦏꦶꦲꦺꦴꦏꦺꦃ꧈​ꦤꦺꦏ꧀​ꦤ꧀ꦢꦸꦮꦺꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦪ​ꦔꦼꦏꦺꦏ꧀ꦏꦶꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧉​ ¹²ꦱꦶꦁ​ꦥꦼꦤ꧀ꦠꦶꦁ​꧈​ꦤꦺꦏ꧀ꦥꦮꦺꦃꦏꦸꦢꦸ​ꦏꦫꦺꦴ​ꦲꦠꦶ​ꦱꦶꦁ​ꦊꦒꦭꦶꦭ꧉​ꦲꦮꦶꦠ꧀ꦤꦺꦏ꧀ꦲꦺꦴꦫ​ꦤ꧀ꦢꦸꦮꦺꦪ​ꦧꦼꦤꦼꦂ​ꦲꦺꦴꦫ​ꦧꦶꦱ​ꦥꦮꦺꦃ꧈​ꦤꦁꦔꦶꦁ​ꦤꦺꦏ꧀​ꦤ꧀ꦢꦸꦮꦺꦏꦸꦢꦸ​ꦥꦮꦺꦃꦱꦏ꧀ꦏꦸꦮꦠ꧀ꦠꦺ꧉​

¹³꧋ꦲꦏꦸ​ꦲꦺꦴꦫ​ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦏꦸꦢꦸ​ꦤꦸꦭꦸꦁꦔꦶ​ꦭꦶꦪꦤꦺ​ꦠꦼꦫꦸꦱ꧀ꦏꦺꦴꦮꦺ​ꦢꦺꦮꦺꦱꦩ꧀ꦥꦺꦏ꧀ꦏꦔꦺꦭ꧀ꦭꦤ꧀ ꦲꦺꦴꦫ​꧈​ꦥꦫ​ꦱꦼꦢꦸꦭꦸꦂ​꧉​ꦏꦉꦥ꧀ꦏꦸ​꧈​ꦱꦸꦥꦪ​ꦱꦁꦏꦏꦭꦸꦧꦺꦫꦤ꧀ꦩꦸꦏꦺꦴꦮꦺ​ꦤꦸꦭꦸꦁꦔꦶ​ꦱꦶꦁ​ꦥꦢ​ꦏꦼꦏꦸꦫꦁꦔꦤ꧀ ꦢꦢꦶꦤꦺ​ꦏꦧꦺꦃ​ꦧꦶꦱ​ꦏꦼꦕꦸꦏꦸꦥ꧀ꦥꦤ꧀꧈​ ¹⁴ꦱꦥ​ꦔꦼꦂꦠꦶ​ꦏꦥꦤ꧀ꦏꦥꦤ꧀ꦏꦺꦴꦮꦺ​ꦢꦺꦮꦺꦏꦼꦏꦸꦫꦁꦔꦤ꧀꧈​ꦤꦁꦔꦶꦁ​ꦱꦼꦢꦸꦭꦸꦂꦱꦼꦢꦸꦭꦸꦂꦩꦸ​ꦱꦶꦁ​ꦏꦼꦭꦸꦧꦺꦂꦫꦤ꧀ꦩꦼꦱ꧀ꦠꦶꦧꦏꦭ꧀ꦒꦼꦤ꧀ꦠꦺꦤ꧀ꦤꦸꦭꦸꦁꦔꦶ​ꦏꦺꦴꦮꦺ​꧉​ꦢꦢꦶꦤꦺ​ꦧꦶꦱ​ꦥꦢꦥꦢ꧉​ ¹⁵ꦧꦧ꧀ꦲꦶꦏꦶ​ꦤꦁꦏꦶꦠꦧ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦱꦶꦁ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦺꦴꦏꦺꦃꦩꦭꦃ​ꦲꦺꦴꦫ​ꦠꦸꦫꦃ​꧈​ꦭꦃ​ꦱꦶꦁ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦲꦺꦴꦫ​ꦏꦼꦏꦸꦫꦁꦔꦤ꧀꧉”꧌ꦏꦸꦮꦶ​ꦔꦺꦴꦩꦺꦴꦁꦔꦏꦺꦧꦧ꧀ꦥꦔꦤ꧀ꦤꦤ꧀ꦱꦁꦏꦭꦔꦶꦠ꧀ꦱꦶꦁ​ꦗꦼꦤꦼꦁꦔꦺ​ꦩꦤꦃ​꧉​)

꧋ꦫꦱꦸꦭ꧀ꦦꦈꦭꦸꦱ꧀ꦔꦼꦊꦩ꧀ꦠꦶꦠꦸꦱ꧀ꦭꦤ꧀ꦏꦚ꧀ꦕꦤꦺ​꧉​

¹⁶꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦩꦠꦸꦂꦏꦼꦱꦸꦮꦸꦤ꧀ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦢꦺꦏ꧀ꦤꦺꦱꦶꦁ​ꦔꦼꦏꦺꦏ꧀ꦏꦶꦏꦠꦿꦺꦱ꧀ꦤꦤ꧀ꦩꦫꦁ​ꦱꦼꦢꦸꦭꦸꦂ​ꦠꦶꦠꦸꦱ꧀꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦏꦪ​ꦲꦏꦸ​ꦢꦺꦮꦺꦲꦼꦁꦒꦺꦴꦤꦺ​ꦔ꧀ꦭꦸꦩꦸꦃꦲꦶꦠꦼꦤꦤ꧀ꦏꦼꦥꦺꦔꦶꦤ꧀ꦤꦸꦭꦸꦁꦔꦶ​ꦏꦺꦴꦮꦺ​꧉​ ¹⁷ꦱꦼꦢꦸꦭꦸꦂ​ꦠꦶꦠꦸꦱ꧀ꦲꦺꦴꦫ​ꦤꦩꦸꦁ​ꦧꦸꦔꦃ​ꦗꦭꦂꦫꦤ꧀ꦲꦏꦸ​ꦤꦼꦩ꧀ꦧꦸꦁ​ꦢꦺꦏ꧀ꦤꦺ꧈​ꦤꦁꦔꦶꦁ​ꦱꦁꦏꦶꦁꦧꦸꦔꦃꦲꦺ​ꦧꦶꦱ​ꦤꦸꦭꦸꦁꦔꦶ​ꦏꦺꦴꦮꦺ​꧈​ꦢꦺꦏ꧀ꦤꦺꦩꦭꦃ​ꦧꦸꦢꦭ꧀ꦤꦁꦔ꧀ꦒꦺꦴꦤ꧀ꦩꦸ​ꦱꦁꦏꦏꦉꦥ꧀ꦥꦺ​ꦢꦺꦮꦺ꧉​ ¹⁸ꦲꦏꦸ​ꦲꦸꦒ​ꦔꦺꦴꦁꦏꦺꦴꦤ꧀ꦱꦼꦢꦸꦭꦸꦂ​ꦭꦶꦪꦤꦺ​ꦔꦚ꧀ꦕꦤꦶ​ꦱꦼꦢꦸꦭꦸꦂ​ꦠꦶꦠꦸꦱ꧀꧈​ꦥꦱꦩꦸꦮꦤ꧀ꦥꦱꦩꦸꦮꦤ꧀ꦏꦧꦺꦃ​ꦪ​ꦮꦶꦱ꧀ꦏꦼꦤꦭ꧀ꦭꦤ꧀ꦥꦢ​ꦔꦼꦊꦩ꧀ꦩꦫꦁ​ꦱꦼꦢꦸꦭꦸꦂ​ꦲꦶꦏꦶ​꧈​ꦲꦮꦶꦠ꧀ꦢꦺꦏ꧀ꦤꦺꦲꦼꦁꦒꦺꦴꦤꦺ​ꦚꦩ꧀ꦧꦸꦠ꧀ꦠꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦪ​ꦲꦺꦴꦫ​ꦱꦼꦩ꧀ꦧꦿꦤ​꧉​ ¹⁹ꦏꦫꦺꦴꦩꦼꦤꦺꦃ​꧈​ꦥꦱꦩꦸꦮꦤ꧀ꦥꦱꦩꦸꦮꦤ꧀ꦮꦶꦱ꧀ꦩꦶꦗꦶ​ꦱꦼꦢꦸꦭꦸꦂ​ꦲꦶꦏꦶ​ꦏꦺꦴꦁꦏꦺꦴꦤ꧀ꦔꦚ꧀ꦕꦤꦶ​ꦲꦮꦏ꧀ꦏꦺ​ꦢꦺꦮꦺꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔ꧀ꦒꦮ​ꦲꦸꦫꦸꦤꦤ꧀ꦩꦸꦤꦁꦪꦺꦫꦸꦱꦭꦺꦩ꧀ ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦪ​ꦮꦶꦱ꧀ꦢꦶꦥꦱꦿꦃꦲꦶ​ꦥꦼꦁꦒꦮꦺꦏꦸꦲꦶꦏꦶ​꧉​ꦲꦮꦏ꧀ꦏꦺ​ꦢꦺꦮꦺꦱꦼꦤꦼꦁ​ꦠꦼꦠꦸꦭꦸꦁ​꧉​

²⁰꧋ꦲꦮꦏ꧀ꦏꦺ​ꦢꦺꦮꦺꦪ​ꦲꦠꦶꦲꦠꦶꦠꦼꦤꦤ꧀ ꦲꦗ​ꦱꦩ꧀ꦥꦺꦏ꧀ꦏꦼꦤꦺꦁꦢꦶꦱꦭꦃꦲꦏꦺꦮꦺꦴꦁ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦸꦤ꧀ꦠꦼꦠ꧀ꦢꦸꦮꦶꦠ꧀ꦠꦺꦲꦥ​ꦏꦼꦥꦿꦶꦪꦺ​꧈​ꦲꦮꦶꦠ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦥꦢ​ꦥꦮꦺꦃꦪ​ꦲꦺꦴꦫ​ꦲꦺꦩꦤ꧀ꦠꦼꦤꦤ꧀꧈​ ²¹ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦩꦶꦏꦶꦂꦫꦏꦺꦱꦼꦩ꧀ꦧꦫꦁ​ꦱꦏ꧀ꦢꦸꦫꦸꦁꦔꦺ꧈​ꦱꦸꦥꦪ​ꦲꦺꦴꦫ​ꦏꦼꦤꦺꦁꦢꦶꦲꦫꦤ꧀ꦤꦶ​ꦮꦺꦴꦁ​ꦏꦼꦥꦿꦶꦪꦺ​ꦮꦲꦺ​꧉​ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦤꦼꦂ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦤꦁꦔꦉꦥ꧀ꦥꦺ​ꦩꦤꦸꦁꦱ​꧉​

²²꧋ꦏꦼꦗꦧ​ꦱꦼꦢꦸꦭꦸꦂ​ꦏꦸꦮꦶ​ꦩꦲꦸ​꧈​ꦲꦏꦸ​ꦲꦸꦒ​ꦔꦺꦴꦁꦏꦺꦴꦤ꧀ꦱꦼꦢꦸꦭꦸꦂ​ꦱꦶꦗꦶ​ꦩꦼꦤꦺꦃ​ꦔꦚ꧀ꦕꦤꦶ​ꦱꦼꦢꦸꦭꦸꦂ​ꦠꦶꦠꦸꦱ꧀꧈​ꦱꦼꦢꦸꦭꦸꦂ​ꦲꦶꦏꦶ​ ꦲꦸꦒ​ꦮꦶꦱ꧀ꦔꦼꦠꦺꦴꦏ꧀ꦏꦏꦺꦤꦺꦏ꧀ꦢꦺꦏ꧀ꦤꦺꦲꦗꦼꦏ꧀ꦱꦽꦒꦼꦥ꧀ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​ꦲꦶꦁ​ꦥꦽꦏꦫ​ꦲꦥ​ꦮꦲꦺ​꧉​ꦢꦺꦏ꧀ꦤꦺꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦥꦢ​ꦱꦼꦤꦼꦁ​ꦤꦸꦭꦸꦁꦔꦶ​ꦭꦶꦪꦤꦺ​꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦏꦼꦥꦺꦔꦶꦤ꧀ꦠꦼꦤꦤ꧀ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧉​ ²³ꦧꦧ꧀ꦱꦼꦢꦸꦭꦸꦂ​ꦠꦶꦠꦸꦱ꧀ꦏꦺꦴꦮꦺ​ꦢꦺꦮꦺꦥꦢ​ꦔꦼꦂꦠꦶ​ꦥꦫ​ꦱꦼꦢꦸꦭꦸꦂ​꧈​ꦢꦺꦏ꧀ꦤꦺꦏꦚ꧀ꦕꦏꦸ​ꦱꦶꦁ​ꦠꦼꦩꦼꦤ꧀ꦔꦿꦺꦮꦁꦔꦶ​ꦲꦏꦸ​ꦲꦼꦁꦒꦺꦴꦤ꧀ꦏꦸ​ꦚꦩ꧀ꦧꦸꦠ꧀ꦠꦔ꧀ꦭꦧꦸꦃꦲꦶ​ꦏꦺꦴꦮꦺ​꧉​ꦢꦺꦏ꧀ꦤꦺꦮꦲꦺ꧉​ꦭꦃ​ꦱꦼꦢꦸꦭꦸꦂ​ꦭꦺꦴꦫꦺꦴ​ꦱꦶꦁ​ꦭꦶꦪꦤꦺ​ꦏꦸꦮꦶ​ꦮꦏꦶꦭ꧀ꦭꦺ​ꦥꦱꦩꦸꦮꦤ꧀ꦥꦱꦩꦸꦮꦤ꧀;ꦏꦿꦶꦱ꧀ꦡꦸꦱ꧀ꦥꦚ꧀ꦕꦺꦤ꧀ꦏꦺꦠꦺꦴꦏ꧀ꦏ꧀ꦮꦱꦤꦺ​ꦭꦤ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦠꦼꦤꦤ꧀ꦱꦁꦏꦲꦸꦫꦶꦥ꧀ꦥꦺꦱꦼꦢꦸꦭꦸꦂ​ꦭꦺꦴꦫꦺꦴ​ꦲꦶꦏꦶ​꧉​ ²⁴ꦩꦸꦭꦤꦺ​ꦲꦏꦸ​ꦚꦸꦮꦸꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​ꦥꦫ​ꦱꦼꦢꦸꦭꦸꦂ​꧈​ꦱꦼꦢꦸꦭꦸꦂꦱꦼꦢꦸꦭꦸꦂ​ꦲꦶꦏꦶ​ꦢꦶꦠꦩ꧀ꦥ​ꦱꦶꦁ​ꦲꦥꦶꦏ꧀ꦭꦤ꧀ꦢꦶꦏꦺꦠꦺꦴꦏ꧀ꦏꦏꦺꦏꦠꦿꦺꦱ꧀ꦤꦤ꧀ꦩꦸ꧉​ꦢꦢꦶꦤꦺ​ꦥꦱꦩꦸꦮꦤ꧀ꦥꦱꦩꦸꦮꦤ꧀ꦏꦧꦺꦃ​ꦧꦶꦱ​ꦔꦼꦂꦠꦶ​ꦤꦺꦏ꧀ꦲꦼꦁꦒꦺꦴꦤ꧀ꦏꦸ​ꦔꦼꦊꦩ꧀ꦏꦺꦴꦮꦺ​ꦲꦺꦤꦺꦁꦮꦸꦗꦸꦠ꧀ꦠꦺ꧉​

↑ ↑ ↑

꧋ꦲꦸꦫꦸꦤ꧀ꦤꦤ꧀ꦏꦁꦒꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦪꦸꦢꦺꦪ​꧉​

꧇​꧙꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦮꦶꦱ꧀ꦲꦺꦴꦫ​ꦲꦸꦱꦃꦔꦺꦴꦩꦺꦴꦁꦔꦶꦏꦺꦴꦮꦺ​ꦤꦺꦏ꧀ꦏꦺꦴꦮꦺ​ꦏꦸꦢꦸ​ꦤꦸꦭꦸꦁꦔꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦪꦸꦢꦺꦪ​꧉​ ²ꦲꦮꦶꦠ꧀ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦱꦼꦤꦼꦁ​ꦠꦼꦠꦸꦭꦸꦁ​꧈​ꦩꦸꦭꦤꦺ​ꦏꦺꦴꦮꦺ​ꦪ​ꦠꦏ꧀ꦒꦮꦺ​ꦥꦩꦺꦂꦫꦤ꧀ꦩꦫꦁ​ꦥꦱꦩꦸꦮꦤ꧀ꦥꦱꦩꦸꦮꦤ꧀ꦤꦁꦩꦱꦼꦢꦺꦴꦤꦶꦪ꧉​ꦲꦏꦸ​ꦔꦺꦴꦩꦺꦴꦁꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦤꦺꦏ꧀ꦏꦺꦴꦮꦺ​ꦱꦶꦁ​ꦤꦁꦏꦺꦴꦫꦶꦤ꧀ꦠꦴꦤꦁꦧꦮꦃꦄꦏꦪꦏꦺꦴꦤꦺꦴ​ꦮꦶꦱ꧀ꦥꦢ​ꦩꦺꦴꦭꦃꦲꦶꦔꦼꦏꦺꦏ꧀ꦏꦶꦲꦸꦫꦸꦤ꧀ꦤꦤ꧀ꦮꦶꦮꦶꦠ꧀ꦠꦲꦸꦤ꧀ꦱꦶꦁ​ꦏꦼꦥꦸꦁꦏꦸꦂ​꧉​ꦏꦸꦮꦶ​ꦢꦢꦶ​ꦠꦸꦭꦢꦏꦁꦒꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦧꦮꦃꦩꦱꦼꦢꦺꦴꦤꦶꦪ꧈​ꦩꦸꦭꦤꦺ​ꦪ​ꦠꦼꦫꦸꦱ꧀ꦥꦢ​ꦩꦺꦭꦸ​ꦠꦠꦠꦠ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦸꦫꦸꦤ꧀ꦤꦤ꧀꧈​ ³ꦲꦏꦸ​ꦔꦺꦴꦁꦏꦺꦴꦤ꧀ꦱꦼꦢꦸꦭꦸꦂ​ꦠꦶꦠꦸꦱ꧀ꦭꦤ꧀ꦏꦚ꧀ꦕꦤꦺ​ꦭꦺꦴꦫꦺꦴ​ꦲꦶꦏꦶ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧈​ꦱꦸꦥꦪ​ꦏꦧꦺꦃ​ꦔꦼꦂꦠꦶ​ꦤꦺꦏ꧀ꦲꦼꦁꦒꦺꦴꦤ꧀ꦏꦸ​ꦔꦼꦊꦩ꧀ꦏꦺꦴꦮꦺ​ꦲꦺꦴꦫ​ꦏꦪ​ꦠꦺꦴꦁꦏꦺꦴꦱꦺꦴꦁ꧈​ꦤꦁꦔꦶꦁ​ꦲꦺꦤꦺꦁꦮꦸꦗꦸꦠ꧀ꦠꦺꦠꦼꦤꦤ꧀꧈​ꦲꦏꦸ​ꦔꦺꦴꦩꦺꦴꦁꦤꦺꦏ꧀ꦢꦸꦮꦶꦠ꧀ꦲꦸꦫꦸꦤꦤ꧀ꦩꦸꦮꦶꦱ꧀ꦧꦏꦭ꧀ꦢꦶꦭꦸꦩ꧀ꦥꦸꦏ꧀ꦏꦏꦺꦱꦏ꧀ꦢꦸꦫꦸꦁꦔꦺꦱꦼꦢꦸꦭꦸꦂꦱꦼꦢꦸꦭꦸꦂ​ꦲꦶꦏꦶ​ꦠꦼꦏꦤ꧀​ꦔ꧀ꦒꦺꦴꦤ꧀ꦩꦸ​꧉​ ⁴ꦤꦺꦏ꧀ꦲꦺꦴꦫ​ꦔꦺꦴꦤꦺꦴ​꧈​ꦩꦼꦁꦏꦺꦴ​ꦲꦏꦸ​ꦏꦶꦱꦶꦤ꧀ꦤꦤ꧀ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦁꦏꦩꦱꦼꦢꦺꦴꦤꦶꦪꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦧꦉꦁ​ꦏꦫꦺꦴ​ꦲꦏꦸ​꧈​ꦤꦁꦔꦶꦁ​ꦲꦸꦫꦸꦤꦤ꧀ꦩꦸꦢꦸꦫꦸꦁ​ꦢꦶꦕꦮꦶꦱ꧀ꦱꦏꦺ​꧉​ꦲꦺꦴꦫ​ꦲꦏꦸ​ꦢꦺꦮꦺ꧈​ꦤꦁꦔꦶꦁ​ꦏꦺꦴꦮꦺ​ꦲꦩ꧀ꦧꦫꦁ​ꦩꦼꦱ꧀ꦠꦶꦩꦺꦭꦸ​ꦲꦶꦱꦶꦤ꧀ ꦲꦮꦶꦠ꧀ꦲꦏꦸ​ꦮꦶꦱ꧀ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦏꦼꦤꦺꦁꦠꦏ꧀ꦥꦽꦕꦪ​꧉​ ⁵ꦩꦸꦭꦤꦺ​ꦱꦼꦢꦸꦭꦸꦂ​ꦠꦶꦠꦸꦱ꧀ꦭꦤ꧀ꦏꦚ꧀ꦕꦤꦺ​ꦠꦏ꧀ꦏꦺꦴꦁꦏꦺꦴꦤ꧀ꦧꦸꦢꦭ꧀​ꦤ꧀ꦢꦶꦱꦶꦏ꧀ꦤꦁꦔ꧀ꦒꦺꦴꦤ꧀ꦩꦸ​꧈​ꦱꦸꦥꦪ​ꦥꦢ​ꦔꦿꦺꦮꦁꦔꦶ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦸꦫꦸꦤ꧀ꦤꦤ꧀ꦱꦶꦁ​ꦲꦩ꧀ꦧꦺꦴꦏ꧀ꦗꦚ꧀ꦗꦶ​ꦢꦺꦏ꧀​ꦩ꧀ꦧꦶꦪꦺꦤ꧀꧈​ꦢꦢꦶꦤꦺ​ꦤꦺꦏ꧀ꦲꦏꦸ​ꦠꦼꦏ​꧈​ꦲꦸꦫꦸꦤꦤ꧀ꦩꦸꦮꦶꦱ꧀ꦢꦶꦕꦮꦶꦱ꧀ꦱꦏꦺ​꧈​ꦱꦸꦥꦪ​ꦧꦶꦱ​ꦏꦺꦠꦺꦴꦏ꧀ꦤꦺꦏ꧀ꦲꦸꦫꦸꦤ꧀ꦤꦤ꧀ꦏꦸꦮꦶ​ꦩꦼꦠꦸ​ꦱꦁꦏꦲꦠꦶ​ꦱꦶꦁ​ꦊꦒꦭꦶꦭ꧈​ꦲꦺꦴꦫ​ꦩꦼꦠꦸ​ꦗꦭꦂꦫꦤ꧀ꦏꦺꦴꦮꦺ​ꦏꦼꦥꦼꦏ꧀ꦱ​꧉​

⁶꧋ꦲꦗ​ꦭꦭꦶ​ꦩꦫꦁ​ꦠꦼꦩ꧀ꦧꦸꦁ​ꦱꦶꦁ​ꦲꦸꦤꦶꦤꦺ​ꦔꦺꦤꦺ​ꦥꦫ​ꦱꦼꦢꦸꦭꦸꦂ​:“ꦱꦶꦁ​ꦚꦼꦧꦂ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦪ​ꦧꦏꦭ꧀ꦔꦸꦤ꧀ꦢꦸꦃꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧈​ꦤꦁꦔꦶꦁ​ꦱꦶꦁ​ꦚꦼꦧꦂ​ꦲꦺꦴꦏꦺꦃꦪ​ꦧꦏꦭ꧀ꦔꦸꦤ꧀ꦢꦸꦃꦲꦺꦴꦏꦺꦃ꧉​” ⁷ꦤꦺꦏ꧀ꦏꦺꦴꦮꦺ​ꦥꦮꦺꦃ꧈​ꦱꦶꦗꦶꦱꦶꦗꦶꦤꦺ​ꦏꦸꦢꦸ​ꦩꦶꦏꦶꦂ​ꦢꦺꦮꦺꦲꦶꦁ​ꦲꦠꦶ​ꦲꦉꦥ꧀ꦔꦼꦏꦺꦏ꧀ꦏꦶꦥꦶꦫ​꧈​ꦲꦗ​ꦏꦼꦥꦼꦏ꧀ꦱ​ꦲꦥ​ꦠꦼꦫꦸꦱ꧀ꦒꦼꦭ​ꦲꦶꦁ​ꦲꦩ꧀ꦧꦸꦫꦶ​꧉​ꦔꦼꦂꦠꦶꦪ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦼꦤꦼꦁ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦥꦮꦺꦃꦏꦫꦺꦴ​ꦲꦠꦶ​ꦱꦶꦁ​ꦧꦸꦔꦃ​꧉​ ⁸ꦒꦸꦱ꧀ꦠꦶꦄꦭ꧀ꦭꦃꦤ꧀ꦢꦸꦮꦺꦤ꧀ꦤꦶꦏ꧀ꦮꦱꦲꦩ꧀ꦧꦼꦂꦏꦃꦲꦶꦏꦺꦴꦮꦺꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦱꦶꦁꦩ꧀ꦧꦺꦴꦏ꧀ꦧꦸꦠꦸꦃꦲꦏꦺ꧈​ꦱꦸꦥꦪꦱꦏ꧀ꦮꦚ꧀ꦕꦶꦮꦚ꧀ꦕꦶꦏꦺꦴꦮꦺꦧꦶꦱꦏꦼꦕꦸꦏꦸꦥ꧀ꦥꦤ꧀ꦲꦶꦁꦥꦽꦏꦫꦲꦥꦮꦲꦺ꧉​ꦏꦺꦴꦮꦺꦩꦭꦃꦧꦶꦱꦤ꧀ꦢꦸꦮꦺꦠꦸꦫꦃꦲꦤ꧀ꦲꦺꦴꦏꦺꦃꦏꦁꦒꦺꦴꦤꦶꦤ꧀ꦢꦏ꧀ꦏꦏꦺꦱꦏ꧀ꦮꦼꦂꦤꦤꦺꦥꦼꦁꦒꦮꦺꦏꦸꦱꦶꦁꦧꦼꦕꦶꦏ꧀ꦏꦁꦒꦺꦴꦤꦸꦭꦸꦁꦔꦶꦭꦶꦪꦤꦺ꧉​ ⁹ꦧꦧ꧀ꦲꦶꦏꦶ​ꦤꦁꦏꦶꦠꦧ꧀ꦲꦺꦤꦺꦁꦲꦪꦠ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦢꦺꦏ꧀ꦤꦺꦔꦼꦢꦸꦩ꧀ꦩꦫꦁ​ꦱꦶꦁ​ꦩ꧀ꦭꦫꦠ꧀
ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦲꦺꦭꦶꦁ​ꦩꦫꦁ​
ꦏꦧꦼꦕꦶꦏ꧀ꦏꦤ꧀ꦤꦺ​ꦮꦺꦴꦁ​ꦏꦸꦮꦶ​ꦱ꧀ꦭꦮꦱ꧀ꦱꦺ꧉​”

¹⁰ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦚꦮꦶꦱ꧀ꦱꦏꦺꦮꦶꦗꦶ​ꦏꦁꦒꦺꦴ​ꦱꦶꦁ​ꦚꦼꦧꦂ​꧈​ꦱꦸꦥꦪ​ꦲꦺꦤꦺꦁꦥꦔꦤ꧀ꦏꦁꦒꦺꦴ​ꦱꦶꦁ​ꦔꦼꦭꦶꦃ​꧈​ꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦱꦶꦁ​ꦧꦏꦭ꧀ꦚꦸꦏꦸꦥ꧀ꦥꦶ​ꦏꦺꦴꦮꦺ​ꦠꦼꦫꦸꦱ꧀ꦲꦶꦁ​ꦏꦧꦸꦠꦸꦲꦤ꧀ꦩꦸ꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦩꦗꦸ​ꦠꦼꦫꦸꦱ꧀ꦲꦼꦁꦒꦺꦴꦤ꧀ꦩꦸ​ꦤꦸꦭꦸꦁꦔꦶ​ꦭꦶꦪꦤꦺ​ꦱꦶꦁ​ꦏꦼꦏꦸꦫꦁꦔꦤ꧀꧈​ ¹¹ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦤ꧀ꦠꦼꦥ꧀ꦥꦏꦺꦲꦠꦶꦩꦸ​ꦭꦤ꧀ꦧꦏꦭ꧀ꦚꦸꦏꦸꦥ꧀ꦥꦶ​ꦏꦺꦴꦮꦺ​ꦲꦶꦁ​ꦮꦼꦂꦤꦮꦼꦂꦤ​ꦥꦽꦏꦫ​꧈​ꦱꦸꦥꦪ​ꦱ꧀ꦭꦮꦱ꧀ꦱꦺꦏꦺꦴꦮꦺ​ꦧꦶꦱ​ꦲꦸꦫꦸꦤ꧀ꦩꦫꦁ​ꦭꦶꦪꦤꦺ​꧉​ꦏꦫꦺꦴꦩꦼꦤꦺꦃ​ꦥꦫ​ꦱꦼꦢꦸꦭꦸꦂ​꧈​ꦲꦸꦫꦸꦤ꧀ꦤꦤ꧀ꦱꦁꦏꦲꦠꦶꦩꦸ​ꦱꦶꦁ​ꦧꦏꦭ꧀ꦠꦏ꧀ꦒꦮ​ꦤꦁꦪꦸꦢꦺꦪ​ꦏꦸꦮꦶ​ꦧꦏꦭ꧀ꦩꦫꦏ꧀ꦏꦏꦺꦱꦼꦢꦸꦭꦸꦂ​ꦥꦶꦫꦁꦥꦶꦫꦁ​ꦥꦢ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹²ꦢꦢꦶꦤꦺ​ꦲꦸꦫꦸꦤꦤ꧀ꦩꦸꦏꦸꦮꦶ​ꦲꦺꦴꦫ​ꦤꦩꦸꦁ​ꦚꦸꦏꦸꦥ꧀ꦥꦶ​ꦏꦧꦸꦠꦸꦃꦲꦤ꧀ꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦪꦸꦢꦺꦪ​꧈​ꦤꦁꦔꦶꦁ​ꦲꦸꦫꦸꦤꦤ꧀ꦩꦸꦲꦸꦒ​ꦩꦫꦏ꧀ꦏꦏꦺꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦩꦠꦸꦂꦏꦼꦱꦸꦮꦸꦤ꧀ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹³ꦩꦼꦁꦏꦺꦴꦤꦺꦴ​ꦏꦸꦮꦶ​ꦧꦏꦭ꧀ꦏꦼꦠꦫ​ꦲꦸꦒ​ꦤꦺꦏ꧀ꦏꦺꦴꦮꦺ​ꦥꦢ​ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦢ​ꦏꦼꦥꦺꦔꦶꦤ꧀ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​꧉​ꦭꦤ꧀ꦮꦺꦴꦁ​ꦲꦺꦴꦏꦺꦃꦧꦏꦭ꧀ꦔꦼꦊꦩ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦥꦢ​ꦮꦼꦫꦸꦃ​ꦏꦧꦼꦕꦶꦏ꧀ꦏꦤ꧀ꦩꦸ​ꦭꦤ꧀ꦥꦢ​ꦤꦶꦠꦺꦤ꧀ꦤꦶ​ꦢꦺꦮꦺꦤꦺꦏ꧀ꦏꦺꦴꦮꦺ​ꦲꦺꦴꦫ​ꦤꦩꦸꦁ​ꦔꦏꦺꦴꦤ꧀ꦤꦶ​꧈​ꦤꦁꦔꦶꦁ​ꦚꦠ​ꦠꦼꦤꦤ꧀​ꦔ꧀ꦭꦏꦺꦴꦤ꧀ꦤꦶ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​ꦮꦺꦴꦁꦮꦺꦴꦁ​ꦧꦏꦭ꧀ꦔꦼꦊꦩ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​꧈​ꦗꦭꦂꦫꦤ꧀ꦏꦺꦴꦮꦺ​ꦲꦺꦴꦫ​ꦲꦺꦩꦤ꧀ꦔꦼꦢꦸꦩ꧀ꦧꦼꦂꦏꦃ​ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦪꦸꦢꦺꦪ​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​꧉​ ¹⁴ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦧꦏꦭ꧀ꦥꦢ​ꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​ꦏꦫꦺꦴ​ꦏꦠꦿꦺꦱ꧀ꦤꦤ꧀ ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦢꦸꦤ꧀ꦤꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦏꦺꦴꦮꦺ​ꦱꦩ꧀ꦥꦺꦏ꧀ꦭꦸꦧꦺꦂꦭꦸꦧꦺꦂ​꧉​ ¹⁵ꦩꦸꦭꦤꦺ​ꦲ꦳ꦪꦸꦏ꧀ꦥꦢ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦮꦶꦱ꧀ꦔꦼꦢꦸꦤ꧀ꦤꦏꦺꦥꦮꦺꦃꦱꦶꦁ​ꦒꦼꦢꦺꦧꦔꦼꦠ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦥꦮꦺꦃꦱꦶꦁ​ꦒꦼꦢꦺꦤꦺꦲꦺꦴꦫ​ꦏꦼꦤꦺꦁꦢꦶꦢꦸꦤꦸꦁꦔꦏꦺꦔꦁꦒꦺꦴ​ꦠꦼꦩ꧀ꦧꦸꦁꦔꦺ​ꦩꦤꦸꦁꦱ​꧉​

↑ ↑ ↑

꧋ꦫꦱꦸꦭ꧀ꦦꦈꦭꦸꦱ꧀ꦩꦁꦱꦸꦭ꧀ꦭꦶ​ꦏꦼꦭꦲꦤ꧀ꦤꦺꦮꦺꦴꦁꦮꦺꦴꦁ​꧉​

꧇​꧑꧐꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦺꦤꦺꦁꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦤꦺꦏ꧀ꦲꦏꦸ​ꦲꦶꦏꦶ​꧈​ꦦꦈꦭꦸꦱ꧀ ꦲꦺꦴꦫ​ꦮꦤꦶ​ꦔꦺꦴꦩꦺꦴꦁꦤꦺꦏ꧀ꦲꦢꦼꦥ꧀ꦥꦢꦼꦥ꧀ꦥꦤ꧀ꦏꦫꦺꦴ​ꦏꦺꦴꦮꦺ​꧈​ꦗꦫꦺꦤꦺ​ꦮꦤꦶꦤꦺꦏ꧀ꦲꦏꦸ​ꦲꦢꦺꦴꦃ​ꦏꦫꦺꦴ​ꦏꦺꦴꦮꦺ​꧉​ꦗꦫꦺꦤꦺ​ꦤꦺꦏ꧀ꦤꦁꦭꦪꦁ​ꦲꦏꦸ​ꦮꦤꦶ​ꦔꦺꦴꦩꦺꦴꦁꦏꦼꦫꦱ꧀꧈​ꦱꦲꦶꦏꦶ​ꦲꦏꦸ​ꦚꦸꦮꦸꦤ꧀ꦩꦫꦁ​ꦏꦺꦴꦮꦺ​ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦚꦸꦮꦸꦤ꧀ꦏꦫꦺꦴ​ꦲꦠꦶ​ꦱꦶꦁ​ꦲꦤ꧀ꦢꦥ꧀ꦥꦱꦺꦴꦂꦭꦤ꧀ꦧꦼꦕꦶꦏ꧀ ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦪ​ꦏꦪ​ꦔꦺꦴꦤꦺꦴ​:ꦮꦺꦴꦁꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦏꦪ​ꦔꦺꦴꦤꦺꦴ​ꦏꦸꦮꦶ​ꦥꦢ​ꦢꦶꦠꦩ꧀ꦥꦶꦏ꧀꧈​ ²ꦢꦢꦶꦤꦺ​ꦤꦺꦏ꧀ꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧈​ꦲꦏꦸ​ꦲꦺꦴꦫ​ꦲꦸꦱꦃꦔꦺꦴꦩꦺꦴꦁꦏꦼꦫꦱ꧀ꦩꦫꦁ​ꦏꦺꦴꦮꦺ​꧈​ꦱꦼꦤꦗꦤ꧀ꦲꦏꦸ​ꦧꦏꦭ꧀ꦔꦺꦴꦩꦺꦴꦁꦏꦼꦫꦱ꧀ꦠꦼꦤꦤ꧀ꦩꦫꦁ​ꦮꦺꦴꦁꦮꦺꦴꦁ​ꦭꦶꦪꦤꦺ​꧉​ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦔꦫꦤ꧀ꦤꦶ​ꦲꦏꦸ​ꦗꦫꦺꦤꦺ​ꦏ꧀ꦭꦏꦸꦮꦤ꧀ꦏꦸꦏꦪ​ꦮꦺꦴꦁ​ꦏꦢꦺꦴꦚꦃꦲꦤ꧀ ꦱꦶꦁ​ꦲꦺꦴꦫ​ꦩꦤꦸꦠ꧀ꦩꦫꦁ​ꦏꦿꦶꦱ꧀ꦡꦸꦱ꧀꧈​ ³ꦪ​ꦧꦼꦤꦼꦂ​ꦲꦏꦸ​ꦮꦺꦴꦁ​ꦲꦸꦫꦶꦥ꧀ꦲꦶꦁ​ꦢꦺꦴꦚ​ꦏꦺꦤꦺ​ꦏꦪ​ꦮꦺꦴꦁ​ꦭꦶꦪꦤꦺ​꧈​ꦤꦁꦔꦶꦁ​ꦲꦏꦸ​ꦲꦺꦴꦫ​ꦧꦏꦭ꧀​ꦔ꧀ꦭꦮꦤ꧀ꦒꦸꦫꦸꦒꦸꦫꦸ​ꦥꦭ꧀ꦱꦸ​ꦏꦸꦮꦶ​ꦔꦁꦒꦺꦴ​ꦕꦫꦤꦺ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀꧈​ ⁴ꦒꦩꦤ꧀ꦏꦸꦲꦺꦴꦫ​ꦒꦩꦤ꧀ꦏꦢꦺꦴꦚꦃꦲꦤ꧀ ꦲꦺꦴꦫ​꧈​ꦤꦁꦔꦶꦁ​ꦒꦩꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦒꦩꦤ꧀ꦱꦶꦁ​ꦏꦸꦮꦠ꧀ꦭꦤ꧀ꦱꦶꦁ​ꦧꦶꦱ​ꦔꦽꦩꦸꦏ꧀ꦠꦺꦧꦺꦁꦠꦺꦧꦺꦁꦔꦺꦩꦸꦁꦱꦸꦃꦲꦺ​꧉​ꦠꦼꦒꦼꦱ꧀ꦱꦺ​꧈​ꦲꦏꦸ​ꦧꦶꦱ​ꦤ꧀ꦢꦸꦢꦸꦃꦲꦏꦺꦏ꧀ꦭꦺꦫꦸꦤꦺꦒꦸꦫꦸꦒꦸꦫꦸ​ꦥꦭ꧀ꦱꦸ​ꦏꦸꦮꦶ​꧉​ ⁵ꦲꦺꦴꦩꦺꦴꦁꦔꦤ꧀ꦒꦼꦢꦺꦒꦼꦢꦺꦱꦶꦁꦤꦩꦸꦁꦔꦭꦁꦔꦭꦁꦔꦶꦮꦺꦴꦁꦮꦺꦴꦁꦩꦫꦏ꧀ꦏꦏꦺꦲꦺꦴꦫꦧꦶꦱꦔꦼꦂꦠꦶꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦧꦼꦤꦼꦂ꧈​ꦧꦏꦭ꧀ꦠꦏ꧀ꦫꦺꦴꦩ꧀ꦧꦏ꧀꧈​ꦥꦶꦏꦶꦂꦫꦤ꧀ꦥꦶꦏꦶꦂꦫꦤꦺꦩꦤꦸꦁꦱꦧꦏꦭ꧀ꦠꦏ꧀ꦒꦫꦥ꧀ꦭꦤ꧀ꦠꦏ꧀ꦠꦼꦭꦸꦏ꧀ꦏꦏꦺꦩꦫꦁꦏꦼꦏꦉꦥ꧀ꦥꦤ꧀ꦤꦺꦏꦿꦶꦱ꧀ꦡꦸꦱ꧀꧈​ ⁶ꦤꦺꦏ꧀ꦮꦶꦱ꧀ꦏꦺꦠꦺꦴꦏ꧀ꦠꦼꦤꦤ꧀ꦤꦺꦏ꧀ꦏꦺꦴꦮꦺ​ꦮꦶꦱ꧀ꦥꦢ​ꦩꦤꦸꦠ꧀ꦱꦏ꧀ꦏꦧꦺꦃꦲꦺꦩꦫꦁ​ꦏꦿꦶꦱ꧀ꦡꦸꦱ꧀ ꦲꦏꦸ​ꦧꦏꦭ꧀​ꦔ꧀ꦒꦫꦥ꧀ꦏꦧꦺꦃ​ꦮꦺꦴꦁ​ꦱꦶꦁ​ꦔ꧀ꦭꦮꦤ꧀ꦥꦶꦮꦸꦭꦁꦔꦺ​ꦏꦿꦶꦱ꧀ꦡꦸꦱ꧀꧈​

⁷꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦱꦏ꧀ꦧꦼꦤꦼꦂꦫꦺ​꧉​ꦤꦁꦠꦼꦔꦃꦩꦸ​ꦥꦚ꧀ꦕꦺꦤ꧀ꦲꦺꦤꦺꦁꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦏꦫꦺꦴ​ꦏꦺꦴꦮꦺ​ꦤꦺꦏ꧀ꦢꦺꦏ꧀ꦤꦺꦢꦶꦥꦶꦭꦶꦃ​ꦠꦼꦤꦤ꧀ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ꦮꦺꦴꦁ​ꦏꦸꦮꦶ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦲꦏꦸ​ꦥꦢ​ꦮꦲꦺ​ꦥꦶꦭꦶꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦭꦤ꧀ꦏꦿꦶꦱ꧀ꦡꦸꦱ꧀ꦪ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦲꦏꦸ​꧉​ ⁸ꦱꦼꦩꦸꦁꦒꦺꦴꦤ꧀ꦤꦺꦲꦏꦸ​ꦔꦼꦒꦸꦁꦔꦏꦺꦧꦧ꧀ꦥꦔ꧀ꦮꦱ​ꦏꦸꦮꦶ​꧈​ꦲꦏꦸ​ꦪ​ꦲꦺꦴꦫ​ꦲꦶꦱꦶꦤ꧀ ꦲꦮꦶꦠ꧀ꦥꦔ꧀ꦮꦱ​ꦏꦸꦮꦶ​ꦏꦁꦒꦺꦴ​ꦲꦩ꧀ꦧꦔꦸꦤ꧀ꦏꦺꦴꦮꦺ​꧈​ꦲꦺꦴꦫ​ꦏꦁꦒꦺꦴ​ꦔꦿꦸꦱꦏ꧀ꦏꦺꦴꦮꦺ​꧉​ ⁹ꦲꦏꦸ​ꦲꦺꦴꦫ​ꦤꦸꦗꦸ​ꦲꦉꦥ꧀ꦩꦼꦢꦺꦤ꧀ꦩꦼꦢꦺꦤ꧀ꦤꦶ​ꦏꦺꦴꦮꦺ​ꦏꦫꦺꦴ​ꦭꦪꦁꦭꦪꦁꦏꦸ​꧉​ ¹⁰ꦪ​ꦧꦼꦤꦼꦂ​ꦲꦺꦤꦺꦁꦮꦺꦴꦁ​ꦱꦶꦁ​ꦔꦺꦴꦩꦺꦴꦁ:“ꦤꦁꦭꦪꦁ​ꦦꦈꦭꦸꦱ꧀ꦠꦼꦩ꧀ꦧꦸꦁꦔꦺ​ꦏꦼꦫꦱ꧀ꦭꦤ꧀ꦥꦼꦢꦼꦱ꧀ ꦤꦁꦔꦶꦁ​ꦤꦺꦏ꧀ꦲꦢꦼꦥ꧀ꦥꦢꦼꦥ꧀ꦥꦤ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦢꦺꦏ꧀ꦤꦺꦲꦺꦴꦫ​ꦱꦼꦩ꧀ꦧꦢ​ꦧ꧀ꦭꦱ꧀ ꦲꦺꦴꦫ​ꦱꦼꦩ꧀ꦧꦢ​ꦠꦼꦩ꧀ꦧꦸꦁꦔꦺ​ꦭꦤ꧀ꦲꦺꦴꦫ​ꦱꦼꦩ꧀ꦧꦢ​ꦏꦺꦠꦺꦴꦏ꧀ꦏꦺ​꧉​” ¹¹ꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦤꦁꦭꦪꦁꦭꦪꦁꦏꦸ​ꦲꦺꦴꦫ​ꦧꦺꦢ​ꦏꦫꦺꦴ​ꦱꦶꦁ​ꦧꦏꦭ꧀ꦠꦏ꧀ꦠꦶꦤ꧀ꦢꦏ꧀ꦏꦏꦺꦤꦺꦏ꧀ꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧉​

¹²꧋ꦥꦚ꧀ꦕꦺꦤ꧀ꦲꦏꦸ​ꦲꦺꦴꦫ​ꦮꦤꦶ​ꦩꦢꦏ꧀ꦏꦏꦺꦲꦮꦏ꧀ꦏꦸ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦩꦶꦏꦶꦫꦺꦮꦶꦱ꧀ꦲꦥꦶꦏ꧀ꦢꦺꦮꦺ꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦧꦺꦴꦢꦺꦴꦧꦔꦼꦠ꧀꧈​ꦧꦺꦴꦢꦺꦴꦤꦺ​ꦔꦺꦤꦺ​:ꦭꦃ​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦔ꧀ꦒꦮꦺ​ꦲꦸꦏꦸꦂꦫꦤ꧀ꦩꦤꦸꦠ꧀ꦥꦶꦤꦼꦩꦸꦤꦺꦢꦺꦮꦺꦠꦼꦫꦸꦱ꧀ꦥꦢ​ꦩꦢꦏ꧀ꦏꦏꦺꦏ꧀ꦭꦏꦸꦮꦤ꧀ꦤꦺ​ꦏꦫꦺꦴ​ꦲꦸꦏꦸꦂꦫꦤ꧀ꦤꦺ​ꦢꦺꦮꦺ꧉​

¹³꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦏꦸ​ꦔ꧀ꦒꦸꦁꦒꦸꦁ꧈​ꦲꦏꦸ​ꦲꦺꦴꦫ​ꦔ꧀ꦭꦶꦮꦠ꧀ꦠꦶ​ꦮꦠꦼꦱ꧀ ꦱꦶꦁ​ꦠꦏ꧀ꦒꦸꦁꦒꦸꦁ​ꦏꦸꦮꦶ​ꦱꦏ꧀ꦗꦼꦫꦺꦴꦤꦺꦮꦠꦼꦱ꧀꧈​ꦮꦠꦼꦱ꧀ꦱꦺ​ꦪꦏꦸꦮꦶ​:ꦥꦼꦁꦒꦮꦺꦏꦸꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦲꦏꦸ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦤ꧀ꦏꦺꦴꦮꦺ​ꦲꦸꦒ​ꦏ꧀ꦊꦧꦸ​ꦲꦶꦁ​ꦥꦼꦁꦒꦮꦺꦤꦺꦲꦶꦏꦶ​꧉​ ¹⁴ꦢꦢꦶꦤꦺ​ꦲꦏꦸ​ꦪ​ꦲꦺꦴꦫ​ꦔ꧀ꦭꦶꦮꦠ꧀ꦠꦶ​ꦮꦠꦼꦱ꧀ꦱꦺ​ꦭꦤ꧀ꦏꦺꦴꦮꦺ​ꦲꦺꦴꦫ​ꦠꦶꦧ​ꦲꦶꦁ​ꦱꦏ꧀​ꦚ꧀ꦗꦧꦤꦺ​ꦉꦁꦒꦤ꧀ꦏꦸ꧉​ꦮꦸꦗꦸꦠ꧀ꦠꦺꦪ​ꦲꦏꦸ​ꦱꦶꦁ​ꦠꦼꦏ​ ꦤ꧀ꦢꦶꦱꦶꦏ꧀ꦢꦺꦮꦺꦤꦁꦔ꧀ꦒꦺꦴꦤ꧀ꦩꦸ​ꦔ꧀ꦒꦮ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​

¹⁵꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦏꦸ​ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦢꦢꦶ​ꦉꦁꦒꦤ꧀ꦏꦸ꧈​ꦲꦏꦸ​ꦲꦺꦴꦫ​ꦒꦺꦴꦫꦺꦴꦃ​ꦭꦤ꧀ꦲꦏꦸ​ꦲꦺꦴꦫ​ꦔ꧀ꦭꦶꦮꦠ꧀ꦠꦶ​ꦮꦠꦼꦱ꧀ꦱꦺ​ꦥꦼꦁꦒꦮꦺꦤꦺ꧈​ꦲꦮꦶꦠ꧀ꦢꦸꦢꦸ​ꦭꦶꦪꦤꦺ​꧈​ꦤꦁꦔꦶꦁ​ꦲꦏꦸ​ꦢꦺꦮꦺꦱꦶꦁ​ꦔ꧀ꦒꦮ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦤꦁꦔ꧀ꦒꦺꦴꦤ꧀ꦩꦸ​꧉​ꦤꦁꦔꦶꦁ​ꦥꦼꦔꦉꦥ꧀ꦲꦉꦥ꧀ꦏꦸ​꧈​ꦥꦼꦔꦤ꧀ꦢꦼꦭ꧀ꦩꦸ​ꦧꦶꦱꦲ​ꦩꦸꦤ꧀ꦢꦏ꧀ꦠꦼꦫꦸꦱ꧀ ꦱꦸꦥꦪ​ꦥꦼꦁꦒꦮꦺꦤꦺꦤꦁꦠꦼꦔꦃꦩꦸ​ꦲꦸꦒ​ꦧꦶꦱ​ꦩꦸꦤ꧀ꦢꦏ꧀ꦒꦼꦢꦺ​꧈​ꦠꦤ꧀ꦥ​ꦔ꧀ꦭꦶꦮꦠ꧀ꦠꦶ​ꦮꦠꦼꦱ꧀ꦱꦶꦁ​ꦮꦶꦱ꧀ꦢꦶꦕꦠꦼꦠ꧀​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦲꦏꦸ​꧉​ ¹⁶ꦤꦺꦏ꧀ꦏꦸꦮꦶ​ꦮꦶꦱ꧀​ꦏ꧀ꦭꦏꦺꦴꦤ꧀ ꦲꦏꦸ​ꦧꦶꦱ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦤꦁꦥꦁꦒꦺꦴꦤꦤ꧀ꦥꦁꦒꦺꦴꦤꦤ꧀ꦭꦶꦪ​ꦱꦶꦁ​ꦲꦢꦺꦴꦃꦲꦢꦺꦴꦃ​꧉​ꦲꦮꦶꦠ꧀ꦲꦏꦸ​ꦲꦺꦴꦫ​ꦒꦼꦊꦩ꧀ꦔꦼꦒꦸꦁꦔꦏꦺꦧꦧ꧀ꦥꦼꦁꦒꦮꦺꦏꦸꦱꦶꦁ​ꦮꦶꦱ꧀ꦢꦶꦏꦼꦂꦗꦤ꧀ꦤꦶꦤꦁꦏꦼꦧꦺꦴꦤꦺ​ꦮꦺꦴꦁ​ꦭꦶꦪ​꧉​

¹⁷꧋ꦤꦺꦏ꧀ꦲꦏꦸ​ꦔꦼꦒꦸꦁ꧈​ꦲꦏꦸ​ꦪ​ꦔꦼꦒꦸꦁꦔꦏꦺꦒꦸꦱ꧀ꦠꦶ​꧈​ꦱꦶꦁ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦲꦏꦸ​꧉​ꦮꦸꦗꦸꦠ꧀ꦠꦺꦤꦁꦏꦶꦠꦧ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦱꦥ​ꦱꦶꦁ​ꦲꦉꦥ꧀ꦔꦼꦒꦸꦁꦔꦼꦒꦸꦁꦔꦏꦺ꧈​ꦲꦥꦶꦏ꧀ꦏꦺ​ꦮꦺꦴꦁ​ꦏꦸꦮꦶ​ꦔꦼꦒꦸꦁꦔꦏꦺꦧꦧ꧀ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​” ¹⁸ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦢꦸꦢꦸ​ꦮꦺꦴꦁ​ꦱꦶꦁ​ꦔꦼꦊꦩ꧀ꦥꦼꦁꦒꦮꦺꦪꦤ꧀ꦏꦸꦢꦺꦮꦺꦱꦶꦁ​ꦢꦶꦲꦁꦒꦼꦥ꧀ꦲꦥꦶꦏ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦮꦺꦴꦁ​ꦱꦶꦁ​ꦢꦶꦲꦼꦊꦩ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧈​ꦏꦸꦮꦶ​ꦱꦶꦁ​ꦢꦶꦲꦁꦒꦼꦥ꧀ꦲꦥꦶꦏ꧀꧈​

↑ ↑ ↑

꧋ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦫꦱꦸꦭ꧀ꦫꦱꦸꦭ꧀ꦱꦶꦁ​ꦥꦭ꧀ꦱꦸ​꧉​

꧇​꧑꧑꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦶꦁ​ꦠꦏ꧀ꦱꦸꦮꦸꦤ꧀ꦲꦺꦴꦫ​ꦢꦢꦶ​ꦲꦠꦶꦩꦸ​ꦲꦼꦁꦒꦺꦴꦤ꧀ꦏꦸ​ꦔꦺꦴꦩꦺꦴꦁꦏꦪ​ꦮꦺꦴꦁ​ꦧꦺꦴꦢꦺꦴꦲꦶꦏꦶ​꧉​ꦪ​ꦲꦏꦸ​ꦢꦶꦱꦧꦂꦫꦶꦱꦼꦢꦶꦭꦸꦠ꧀ꦩꦼꦤꦺꦃ​꧉​ ²ꦥꦚ꧀ꦕꦺꦤ꧀ꦲꦏꦸꦱꦸꦩꦼꦭꦁꦠꦼꦤꦤ꧀ꦧꦧ꧀ꦏꦺꦴꦮꦺ꧈​ꦏꦪꦲꦼꦁꦒꦺꦴꦤꦺꦒꦸꦱ꧀ꦠꦶꦄꦭ꧀ꦭꦃꦱꦸꦩꦼꦭꦁꦧꦧ꧀ꦏꦺꦴꦮꦺ꧉​ꦏꦼꦤꦺꦁꦲꦥꦲꦏꦸꦏꦺꦴꦏ꧀ꦱꦸꦩꦼꦭꦁꦠꦼꦤꦤ꧀ꦧꦧ꧀ꦏꦺꦴꦮꦺꦥꦫꦱꦼꦢꦸꦭꦸꦂ?ꦲꦮꦶꦠ꧀ꦏꦺꦴꦮꦺꦮꦶꦱ꧀ꦠꦏ꧀ꦒꦤ꧀ꦢꦺꦁꦔꦏꦺꦏꦫꦺꦴꦏꦿꦶꦱ꧀ꦡꦸꦱ꧀ ꦏꦪꦱꦏ꧀ꦮꦶꦗꦶꦤꦺꦧꦥꦏ꧀ꦩꦕꦁꦏꦺꦲꦤꦏ꧀ꦏꦺꦮꦺꦢꦺꦴꦏ꧀ꦱꦶꦁꦥꦿꦮꦤ꧀ꦏꦫꦺꦴꦱꦏ꧀ꦮꦶꦗꦶꦤꦺꦮꦺꦴꦁꦭꦤꦁ꧉​ ³ꦤꦁꦔꦶꦁ​꧈​ꦮꦼꦢꦶꦏꦸ​ꦤꦺꦏ꧀ꦏꦺꦴꦮꦺ​ꦱꦩ꧀ꦥꦺꦏ꧀ꦏꦼꦤꦺꦁꦲꦏꦭ꧀ꦭꦺ​ꦱꦺꦠꦤ꧀ ꦏꦪ​ꦲꦶꦧꦸ​ꦌꦮ꦳꧈​ꦱꦶꦁ​ꦢꦶꦲꦥꦸꦱ꧀ꦱꦶ​ꦏꦫꦺꦴ​ꦲꦸꦭ​ꦠꦼꦫꦸꦱ꧀ꦲꦺꦴꦫ​ꦩꦤꦸꦠ꧀ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦼꦁꦏꦺꦴ​ꦏꦺꦴꦮꦺ​ꦲꦩ꧀ꦧꦫꦁ​ꦱꦩ꧀ꦥꦺꦏ꧀ꦢꦶꦱꦱꦂꦫꦏꦺꦏꦫꦺꦴ​ꦒꦸꦫꦸꦒꦸꦫꦸ​ꦥꦭ꧀ꦱꦸ​ꦏꦸꦮꦶ​ꦠꦼꦫꦸꦱ꧀ꦲꦺꦴꦫ​ꦠꦿꦺꦱ꧀ꦤꦩꦫꦁ​ꦏꦿꦶꦱ꧀ꦡꦸꦱ꧀ꦏꦪ​ꦩꦲꦸꦩꦲꦸꦤꦺꦩꦼꦤꦺꦃ​꧈​ꦔꦁꦒꦺꦴ​ꦏꦠꦿꦺꦱ꧀ꦤꦤ꧀ꦱꦶꦁ​ꦠꦸꦱ꧀ꦭꦤ꧀ꦱꦶꦁ​ꦠꦼꦤꦤ꧀꧈​ ⁴ꦲꦏꦸ​ꦱꦸꦩꦼꦭꦁ​꧈​ꦲꦮꦶꦠ꧀ꦏꦺꦴꦮꦺ​ꦔ꧀ꦭꦶꦭꦤꦶ​ꦱꦥ​ꦮꦲꦺ​ꦠꦼꦏ​ꦤꦁꦥꦱꦩꦸꦮꦤ꧀ꦭꦤ꧀ꦩꦸꦭꦁꦔꦏꦺꦧꦧ꧀ꦪꦺꦯꦸꦱ꧀ ꦤꦁꦔꦶꦁ​ꦥꦶꦮꦸꦭꦁꦔꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦱꦺꦗꦺ​ꦧꦔꦼꦠ꧀ꦏꦫꦺꦴ​ꦱꦶꦁ​ꦠꦏ꧀ꦮꦸꦭꦁꦔꦏꦺ꧉​ꦱꦼꦩꦺꦴꦤꦺꦴ​ꦲꦸꦒ​ꦏꦺꦴꦮꦺ​ꦒꦼꦊꦩ꧀ꦤꦩ꧀ꦥ​ꦫꦺꦴꦃ​ꦭꦶꦪꦤꦺ​ꦭꦤ꧀ꦥꦶꦠꦸꦠꦸꦂ​ꦭꦶꦪꦤꦺ​꧈​ꦱꦶꦁ​ꦗꦫꦺꦤꦺ​ꦏꦧꦂ​ꦏꦧꦸꦔꦃꦲꦤ꧀ꦲꦸꦒ​꧉​

⁵꧋ꦥꦫ​ꦱꦼꦢꦸꦭꦸꦂ​꧈​ꦫꦸꦩꦁꦱꦏꦸ​ꦲꦏꦸ​ꦲꦺꦴꦫ​ꦏꦭꦃ​ꦏꦫꦺꦴ​ꦫꦱꦸꦭ꧀ꦫꦱꦸꦭ꧀ꦱꦶꦁ​ꦲꦩ꧀ꦧꦺꦴꦏ꧀ꦲꦁꦒꦼꦥ꧀ꦫꦱꦸꦭ꧀ꦒꦼꦢꦺꦏꦸꦮꦶ​꧉​ ⁶ꦧꦼꦤꦼꦂ​ꦲꦏꦸ​ꦲꦺꦴꦫ​ꦧꦶꦱ​ꦔꦺꦴꦩꦺꦴꦁꦏꦪ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦤꦁꦔꦶꦁ​ꦏꦸꦮꦶ​ꦲꦺꦴꦫ​ꦔꦺꦴꦩꦺꦴꦁꦤꦺꦏ꧀ꦲꦏꦸ​ꦲꦺꦴꦫ​ꦤ꧀ꦢꦸꦮꦺꦏꦮꦼꦫꦸꦃ꧉​ꦮꦸꦗꦸꦠ꧀ꦠꦺꦪ​ꦮꦶꦱ꧀ꦏꦼꦠꦫ​ꦠꦼꦤꦤ꧀ꦠ​ꦲꦶꦁ​ꦠꦶꦤ꧀ꦢꦏ꧀ꦠꦤ꧀ꦢꦸꦏ꧀ꦏꦸ​ꦱꦏ꧀ꦏꦧꦺꦃꦲꦺ꧉​

⁷꧋ꦲꦥ​ꦲꦏꦸ​ꦱꦭꦃ​ꦗꦭꦂꦫꦤ꧀ꦠꦸꦩꦶꦤ꧀ꦢꦏ꧀ꦏꦸ​ꦩꦫꦁ​ꦏꦺꦴꦮꦺ​ꦔꦁꦒꦺꦴ​ꦲꦤ꧀ꦢꦥ꧀ꦥꦱꦺꦴꦂ?ꦲꦥ​ꦠꦸꦗꦸꦮꦤ꧀ꦏꦸ​ꦲꦺꦴꦫ​ꦤꦩꦸꦁ​ꦏꦁꦒꦺꦴ​ꦔꦁꦏꦠ꧀ꦏꦺꦴꦮꦺ​?ꦩꦸꦭꦤꦺ​ꦲꦏꦸ​ꦪ​ꦲꦺꦴꦫ​ꦚ꧀ꦗꦭꦸꦏ꧀ꦧꦪꦂꦫꦤ꧀ꦲꦼꦁꦒꦺꦴꦤ꧀ꦏꦸ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦺꦴꦮꦺ​꧉​ ⁸ꦩꦭꦃ​ꦥꦱꦩꦸꦮꦤ꧀ꦥꦱꦩꦸꦮꦤ꧀ꦭꦶꦪꦤꦺ​ꦱꦶꦁ​ꦚꦺꦴꦏꦺꦴꦁꦔꦶꦲꦏꦸ​ꦱꦸꦮꦺꦤꦺ​ꦲꦏꦸ​ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦏꦿꦶꦱ꧀ꦡꦸꦱ꧀ꦤꦁꦔ꧀ꦒꦺꦴꦤ꧀ꦩꦸ​꧉​ꦱꦱꦠ꧀ꦠꦺꦲꦏꦸ​ꦩꦼꦉꦱ꧀ꦥꦱꦩꦸꦮꦤ꧀ꦥꦱꦩꦸꦮꦤ꧀ꦏꦸꦮꦶ​꧈​ꦱꦸꦥꦪ​ꦲꦏꦸ​ꦧꦶꦱ​ꦤꦸꦭꦸꦁꦔꦶ​ꦏꦺꦴꦮꦺ​꧉​ ⁹ꦱꦸꦮꦺꦤꦺ​ꦲꦏꦸ​ꦤꦁꦔ꧀ꦒꦺꦴꦤ꧀ꦩꦸ​ꦲꦏꦸ​ꦪ​ꦲꦺꦴꦫ​ꦠꦲꦸ​ꦔꦿꦸꦱꦸꦃꦲꦶꦏꦺꦴꦮꦺ​ꦤꦺꦏ꧀ꦲꦏꦸ​ꦧꦸꦠꦸꦃ​ꦲꦥꦲꦥ​꧉​ꦱꦏ꧀ꦔꦼꦂꦠꦶꦪꦲꦏꦸ​ꦲꦺꦴꦫ​ꦠꦲꦸ​ꦚ꧀ꦗꦭꦸꦏ꧀ꦢꦸꦮꦶꦠ꧀ꦩꦫꦁ​ꦱꦥꦱꦥ​꧈​ꦲꦮꦶꦠ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦠꦼꦏ​ꦱꦁꦏꦩꦱꦼꦢꦺꦴꦤꦶꦪꦮꦶꦱ꧀ꦥꦢ​ꦚꦸꦏꦸꦥ꧀ꦥꦶ​ꦧꦸꦠꦸꦃꦏꦸ​꧉​ꦢꦢꦶꦤꦺ​ꦲꦏꦸ​ꦲꦺꦴꦫ​ꦠꦲꦸ​ꦢꦢꦶ​ꦉꦁꦒꦤ꧀ꦩꦸ​ꦏꦼꦥꦿꦶꦪꦺ​ꦮꦲꦺ​ꦭꦤ꧀ꦱꦏ꧀ꦠꦼꦫꦸꦱ꧀ꦱꦺꦪ​ꦲꦺꦴꦫ​꧉​ ¹⁰ꦥꦫ​ꦱꦼꦢꦸꦭꦸꦂ​꧈​ꦏꦪ​ꦲꦼꦁꦒꦺꦴꦤꦺ​ꦏꦿꦶꦱ꧀ꦡꦸꦱ꧀ꦠꦼꦩ꧀ꦧꦸꦁꦔꦺ​ꦠꦼꦤꦤ꧀ ꦱꦼꦩꦺꦴꦤꦺꦴ​ꦲꦸꦒ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​ꦠꦼꦤꦤ꧀ ꦲꦮꦶꦠ꧀ꦏꦿꦶꦱ꧀ꦡꦸꦱ꧀ꦲꦸꦫꦶꦥ꧀ꦲꦶꦁ​ꦲꦠꦶꦏꦸ​꧉​ꦩꦸꦭꦤꦺ​ꦲꦏꦸ​ꦮꦤꦶ​ꦔꦺꦴꦩꦺꦴꦁꦤꦺꦏ꧀ꦤꦁꦄꦏꦪꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦱꦶꦁ​ꦧꦶꦱ​ꦔꦫꦤ꧀ꦤꦶ​ꦤꦺꦏ꧀ꦲꦏꦸ​ꦒꦺꦴꦫꦺꦴꦃ​꧈​ꦲꦮꦶꦠ꧀ꦲꦏꦸ​ꦲꦺꦴꦫ​ꦠꦲꦸ​ꦚ꧀ꦗꦭꦸꦏ꧀ꦲꦸꦫꦸꦤ꧀ꦤꦤ꧀ꦱꦥꦱꦥ​꧉​ ¹¹ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦥꦫ​ꦱꦼꦢꦸꦭꦸꦂ​?ꦲꦥ​ꦗꦭꦂꦫꦤ꧀ꦲꦏꦸ​ꦲꦺꦴꦫ​ꦠꦿꦺꦱ꧀ꦤꦩꦫꦁ​ꦏꦺꦴꦮꦺ​?ꦲꦺꦴꦫ​ꦥꦫ​ꦱꦼꦢꦸꦭꦸꦂ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦔꦼꦂꦠꦶ​ꦤꦺꦏ꧀ꦲꦏꦸ​ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦏꦺꦴꦮꦺ​꧉​

¹²꧋ꦭꦤ꧀ꦲꦥ​ꦱꦶꦁ​ꦮꦶꦱ꧀ꦠꦏ꧀ꦠꦶꦤ꧀ꦢꦏ꧀ꦏꦏꦺꦲꦉꦥ꧀ꦠꦏ꧀ꦠꦼꦫꦸꦱ꧀ꦱꦏꦺ꧈​ꦱꦸꦥꦪ​ꦫꦱꦸꦭ꧀ꦫꦱꦸꦭ꧀ ꦭꦶꦪꦤꦺ​ꦏꦸꦮꦶ​ꦲꦺꦴꦫ​ꦧꦶꦱ​ꦤꦼꦩꦸ​ꦏꦼꦭꦸꦁꦒꦂꦫꦤ꧀ꦏꦁꦒꦺꦴ​ꦒꦼꦩꦸꦁꦒꦸꦁ​ꦭꦤ꧀ꦔꦺꦴꦩꦺꦴꦁꦤꦺꦏ꧀ꦥꦼꦁꦒꦮꦺꦪꦤ꧀ꦏꦸꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦲꦏꦸ​꧉​ ¹³ꦮꦺꦴꦁꦮꦺꦴꦁ​ꦏꦸꦮꦶ​ꦢꦸꦢꦸ​ꦫꦱꦸꦭ꧀ꦫꦱꦸꦭ꧀ꦱꦶꦁ​ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦫꦱꦸꦭ꧀ꦫꦱꦸꦭ꧀ꦱꦶꦁ​ꦥꦭ꧀ꦱꦸ​꧈​ꦱꦶꦁ​ꦔꦥꦸꦱ꧀ꦱꦶ​꧉​ꦔꦁꦒꦼꦥ꧀ꦥꦺꦫꦱꦸꦭ꧀ꦭꦺ​ꦏꦿꦶꦱ꧀ꦡꦸꦱ꧀ꦠꦼꦤꦤ꧀ ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦺꦴꦫ​꧉​ ¹⁴ꦏꦸꦮꦶ​ꦲꦺꦴꦫ​ꦔ꧀ꦒꦸꦩꦸꦤ꧀ꦤꦏꦺ꧈​ꦲꦮꦶꦠ꧀ꦱꦺꦠꦤ꧀ꦢꦺꦮꦺꦧꦶꦱ​ꦠꦼꦏ​ꦏꦪ​ꦩꦸꦭꦺꦏꦠ꧀ꦥꦼꦥꦢꦁ꧉​ ¹⁵ꦩꦸꦭꦤꦺ​ꦪ​ꦲꦗ​ꦏꦒꦺꦠ꧀ꦤꦺꦏ꧀ꦧꦭꦤꦺ​ꦱꦺꦠꦤ꧀​ꦠꦼꦏꦤꦺ​ꦏꦪ​ꦥꦼꦭꦢꦺꦤ꧀ꦤꦺ​ꦏꦧꦼꦕꦶꦏ꧀ꦏꦤ꧀꧈​ꦤꦁꦔꦶꦁ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦤꦩ꧀ꦥ​ꦱꦼꦠꦿꦥꦤ꧀ꦱꦶꦁ​ꦕꦺꦴꦕꦺꦴꦏ꧀​ꦏꦫꦺꦴ​ꦏ꧀ꦭꦏꦸꦮꦤ꧀ꦤꦺ​꧉​

꧋ꦏꦱꦁꦱꦫꦤꦺ​ꦫꦱꦸꦭ꧀ꦦꦈꦭꦸꦱ꧀ꦲꦼꦁꦒꦺꦴꦤꦺ​ꦢꦢꦶ​ꦫꦱꦸꦭ꧀꧈​

¹⁶꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦠꦏ꧀ꦲꦺꦴꦩꦺꦴꦁꦔꦏꦺꦱꦶꦁ​ꦕꦼꦠ​ꦠꦼꦤꦤ꧀:ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦮꦺꦴꦁ​ꦔꦶꦫ​ꦤꦺꦏ꧀ꦲꦏꦸ​ꦲꦶꦏꦶ​ꦮꦺꦴꦁ​ꦧꦺꦴꦢꦺꦴ꧉​ꦤꦁꦔꦶꦁ​ꦱꦼꦩꦸꦁꦒꦺꦴꦤ꧀ꦤꦺꦲꦺꦤꦺꦁꦮꦺꦴꦁ​ꦔꦁꦒꦼꦥ꧀ꦲꦏꦸ​ꦲꦶꦏꦶ​ꦧꦺꦴꦢꦺꦴ꧈​ꦪ​ꦧꦺꦤ꧀ ꦲꦏꦸ​ꦢꦶꦠꦩ꧀ꦥ​ꦏꦪ​ꦮꦺꦴꦁ​ꦧꦺꦴꦢꦺꦴꦮꦲꦺ​꧈​ꦱꦸꦥꦪ​ꦲꦏꦸ​ꦧꦶꦱ​ꦒꦼꦩꦸꦁꦒꦸꦁ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧈​ꦤꦶꦫꦸ​ꦮꦺꦴꦁꦮꦺꦴꦁ​ꦱꦶꦁ​ꦧꦺꦴꦢꦺꦴꦏꦸꦮꦶ​꧉​ ¹⁷ꦢꦢꦶꦤꦺ​ꦱꦶꦁ​ꦲꦉꦥ꧀ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​ꦲꦺꦴꦫ​ꦱꦁꦏꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​꧈​ꦲꦺꦴꦫ​꧈​ꦤꦁꦔꦶꦁ​ꦠꦼꦩ꧀ꦧꦸꦁꦏꦸ​ꦢꦺꦮꦺ꧈​ꦠꦼꦩ꧀ꦧꦸꦁꦔꦺ​ꦮꦺꦴꦁ​ꦱꦶꦁ​ꦢꦶꦲꦫꦤ꧀ꦤꦶ​ꦧꦺꦴꦢꦺꦴ꧈​ꦱꦶꦁ​ꦔꦼꦗꦺꦴꦏ꧀ꦏꦏꦺꦏꦼꦏꦸꦮꦠ꧀ꦠꦤ꧀ꦤꦺ​ꦢꦺꦮꦺ꧉​ ¹⁸ꦮꦺꦴꦁ​ꦲꦺꦴꦏꦺꦃꦥꦢ​ꦔꦼꦒꦸꦁꦔꦏꦺꦏꦥꦶꦤ꧀ꦠꦼꦂꦫꦤ꧀ꦤꦺ​ꦢꦺꦮꦺ꧈​ꦲꦏꦸ​ꦲꦸꦒ​ꦲꦉꦥ꧀ꦩꦺꦭꦸ​ꦔꦺꦴꦤꦺꦴ​꧉​ ¹⁹ꦗꦭꦂꦫꦤ꧀ꦏꦺꦴꦮꦺ​ꦔꦁꦒꦼꦥ꧀ꦏꦺꦴꦮꦺ​ꦢꦺꦮꦺꦥꦶꦤ꧀ꦠꦼꦂ​꧈​ꦩꦸꦭꦤꦺ​ꦏꦺꦴꦮꦺ​ꦪ​ꦚꦧꦂꦫꦶ​ꦮꦺꦴꦁꦮꦺꦴꦁ​ꦱꦶꦁ​ꦧꦺꦴꦢꦺꦴ꧉​ ²⁰ꦮꦸꦗꦸꦠ꧀ꦠꦺꦏꦺꦴꦮꦺ​ꦚꦧꦂꦫꦶ​ꦱꦥ​ꦮꦲꦺ​ꦱꦶꦁ​ꦩꦤ꧀ꦢꦺꦴꦂꦫꦶꦏꦺꦴꦮꦺ​꧈​ꦱꦶꦁ​ꦩꦼꦉꦱ꧀ꦭꦤ꧀ꦱꦶꦁ​ꦔꦼꦫꦺꦃ​ꦏꦺꦴꦮꦺ​꧉​ꦏꦺꦴꦮꦺ​ꦲꦸꦒ​ꦚꦧꦂꦫꦶ​ꦮꦺꦴꦁ​ꦱꦶꦁ​ꦔꦼꦥꦭ꧀ꦭꦤ꧀ꦤꦥꦸꦏ꧀ꦏꦺꦴꦮꦺ​꧉​ ²¹ꦲꦏꦸ​ꦲꦶꦱꦶꦤ꧀ ꦲꦮꦶꦠ꧀ꦲꦏꦸ​ꦥꦚ꧀ꦕꦺꦤ꧀ꦔꦏꦺꦴꦤ꧀ꦤꦶ​ꦤꦺꦏ꧀ꦲꦏꦸ​ꦲꦺꦴꦫ​ꦤ꧀ꦢꦸꦮꦺꦏꦼꦤ꧀ꦢꦼꦭ꧀​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦏꦪ​ꦔꦺꦴꦤꦺꦴ​꧉​

꧋ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦲꦺꦴꦫ​ꦤꦩꦸꦁ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦶꦱ​ꦔꦼꦒꦸꦁꦔꦼꦒꦸꦁꦔꦏꦺꦲꦸꦫꦶꦥ꧀ꦥꦺꦢꦺꦮꦺ꧉​ꦲꦏꦸ​ꦪ​ꦧꦶꦱ​ꦲꦸꦒ​꧈​ꦱꦼꦤꦗꦤ꧀ꦲꦺꦴꦩꦺꦴꦁꦏꦸꦲꦶꦏꦶ​ꦤꦩꦸꦁ​ꦩꦺꦭꦸꦩꦺꦭꦸ​ꦮꦺꦴꦁ​ꦧꦺꦴꦢꦺꦴ꧉​ ²²ꦮꦺꦴꦁꦮꦺꦴꦁ​ꦏꦸꦮꦶ​ꦗꦫꦺꦤꦺ​ꦮꦺꦴꦁ​ꦆꦧꦿꦤꦶ​꧈​ꦲꦏꦸ​ꦪ​ꦮꦺꦴꦁ​ꦆꦧꦿꦤꦶ​꧉​ꦗꦫꦺꦤꦺ​ꦮꦺꦴꦁ​ꦆꦱꦿꦌꦭ꧀ ꦲꦏꦸ​ꦪ​ꦮꦺꦴꦁ​ꦆꦱꦿꦌꦭ꧀꧈​ꦗꦫꦺꦤꦺ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ ꦲꦏꦸ​ꦲꦸꦒ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀꧈​ ²³ꦗꦫꦺꦤꦺ​ꦥꦼꦭꦢꦺꦤ꧀ꦤꦺ​ꦏꦿꦶꦱ꧀ꦡꦸꦱ꧀ ꦤꦁꦔꦶꦁ​ꦲꦏꦸ​ꦱꦶꦁ​ꦔ꧀ꦭꦢꦺꦤ꧀ꦤꦶ​ꦏꦿꦶꦱ꧀ꦡꦸꦱ꧀ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦮꦺꦴꦁ​ꦏꦸꦮꦶ​ꦏꦧꦺꦃ​꧉​ꦲꦺꦴꦫ​ꦔ꧀ꦒꦸꦩꦸꦤ꧀ꦲꦏꦸ​ꦤꦺꦏ꧀ꦏꦺꦴꦮꦺ​ꦩꦶꦏꦶꦂ​ꦤꦺꦏ꧀ꦲꦺꦴꦩꦺꦴꦁꦏꦸꦏꦸꦮꦶ​ꦠꦼꦫꦸꦱ꧀ꦲꦩ꧀​ꦧ꧀ꦭꦫꦃꦩ꧀​ꦧ꧀ꦭꦫꦃ꧉​ꦮꦸꦗꦸꦠ꧀ꦠꦺꦲꦼꦁꦒꦺꦴꦤ꧀ꦏꦸ​ꦚꦩ꧀ꦧꦸꦠ꧀ꦠꦲꦧꦺꦴꦠ꧀ꦠꦺ​ꦔꦸꦁꦏꦸꦭ꧀ꦭꦶ​ꦮꦺꦴꦁꦮꦺꦴꦁ​ꦏꦸꦮꦶ​꧉​ꦲꦼꦁꦒꦺꦴꦤ꧀ꦏꦸ​ꦢꦶꦱꦼꦠꦿꦥ꧀​ꦔ꧀ꦭꦧꦸꦃꦲꦶ​ꦏꦿꦶꦱ꧀ꦡꦸꦱ꧀ꦏꦼꦉꦥ꧀ꦥꦺꦪ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦮꦺꦴꦁꦮꦺꦴꦁ​ꦏꦸꦮꦶ​꧉​ꦲꦏꦸ​ꦩꦁꦔꦤ꧀ꦒꦼꦧꦸꦏ꧀ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦮꦺꦴꦁꦮꦺꦴꦁ​ꦏꦸꦮꦶ​꧉​ꦲꦏꦸ​ꦮꦶꦱ꧀ꦥꦶꦁ​ꦥꦶꦫ​ꦩꦺꦃ​ꦩꦠꦶ​꧈​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦮꦺꦴꦁꦮꦺꦴꦁ​ꦏꦸꦮꦶ​꧉​ ²⁴ꦮꦶꦱ꧀ꦥꦶꦁ​ꦭꦶꦩ​ꦲꦏꦸ​ꦔꦿꦱꦏ꧀ꦏꦏꦺꦭꦤꦁꦮꦺꦢꦺꦴꦏ꧀ꦥꦼꦕꦸꦠ꧀꧈​ꦲꦏꦸ​ꦢꦶꦥꦼꦕꦸꦠ꧀ꦠꦶ​ꦩꦤꦸꦠ꧀ꦥꦼꦂꦤꦠꦤ꧀ꦤꦺꦲꦒꦩ​ꦙꦸꦱꦶꦁ​ꦢꦶꦲꦫꦤ꧀ꦤꦶ​“ꦥꦠꦁ​ꦥꦸꦭꦸꦃ​ꦏꦸꦫꦁ​ꦱꦶꦗꦶ​”꧉​ꦢꦢꦶꦤꦺ​ꦭꦶꦩ​ꦥꦶꦁ​ꦥꦠꦁ​ꦥꦸꦭꦸꦃ​ꦏꦸꦫꦁ​ꦱꦶꦗꦶ​꧉​ ²⁵ꦲꦏꦸ​ꦮꦶꦱ꧀ꦢꦶꦒꦼꦧꦸꦏ꧀ꦏꦶꦥꦶꦁ​ꦠꦼꦭꦸ​ꦏꦫꦺꦴ​ꦮꦺꦴꦁ​ꦬꦸꦩ꧀ꦭꦤ꧀ꦱꦼꦥꦶꦱ꧀ꦱꦤ꧀ꦲꦏꦸ​ꦢꦶꦧꦤ꧀ꦢꦼꦩ꧀ꦩꦶꦮꦠꦸ​꧉​ꦱꦩ꧀ꦥꦺꦏ꧀ꦥꦶꦁ​ꦠꦼꦭꦸ​ꦏꦥꦭ꧀ꦱꦶꦁ​ꦠꦏ꧀ꦠꦸꦩ꧀ꦥꦏ꧀ꦏꦶ​ꦏꦼꦊꦥ꧀ꦭꦤ꧀ꦱꦼꦥꦶꦱ꧀ꦱꦤ꧀ꦲꦏꦸ​ꦏꦺꦴꦩ꧀ꦥꦭ꧀ꦏꦩ꧀ꦥꦸꦭ꧀ꦤꦁꦱꦼꦒꦫ​꧈​ꦱꦼꦢꦶꦤꦱꦼꦮꦼꦔꦶꦱꦸꦮꦺꦤꦺ​꧉​ ²⁶ꦲꦏꦸ​ꦲꦗꦼꦏ꧀ꦊꦭꦸꦁꦔꦤ꧀​ꦔ꧀ꦭꦢꦺꦤ꧀ꦤꦶ​ꦏꦿꦶꦱ꧀ꦡꦸꦱ꧀ ꦔꦢꦼꦥ꧀ꦥꦶꦱꦏ꧀ꦮꦼꦂꦤꦤꦺ​ꦲꦭꦁꦔꦤ꧀ꦤꦁꦭꦫ꧈​ꦠꦸꦏꦁ​ꦔꦿꦩ꧀ꦥꦺꦴꦏ꧀ ꦲꦭꦁꦔꦤ꧀ꦱꦁꦏꦧꦁꦱꦏꦸ​ꦢꦺꦮꦺꦮꦺꦴꦁ​ꦙꦸ꧈​ꦲꦭꦁꦔꦤ꧀ꦱꦁꦏꦧꦁꦱ​ꦭꦶꦪꦤꦺ​꧈​ꦔꦢꦼꦥ꧀ꦥꦶꦲꦭꦁꦔꦤ꧀ꦤꦁꦏꦸꦠꦭꦤ꧀ꦲꦸꦒ​ꦤꦁꦮꦸꦱ꧀ꦠꦺꦤ꧀ ꦢꦺꦴꦁꦢꦺꦴꦁꦔꦤ꧀ꦤꦁꦱꦼꦒꦫ​ꦭꦤ꧀ꦲꦸꦒ​ꦲꦏꦸ​ꦔꦢꦼꦥ꧀ꦥꦶꦲꦭꦁꦔꦤ꧀ꦱꦁꦏꦮꦺꦴꦁꦮꦺꦴꦁ​ꦱꦶꦁ​ꦔꦏꦸꦤꦺ​ꦱꦼꦢꦸꦭꦸꦂ​꧉​ ²⁷ꦲꦼꦁꦒꦺꦴꦤ꧀ꦏꦸ​ꦚꦩ꧀ꦧꦸꦠ꧀ꦠꦪ​ꦉꦏꦱ​ꦠꦼꦤꦤ꧀꧈​ꦲꦏꦸ​ꦏꦼꦉꦥ꧀ꦲꦺꦴꦫ​ꦠꦸꦫꦸ​꧈​ꦲꦺꦴꦫ​ꦩꦁꦔꦤ꧀ꦭꦤ꧀ꦲꦺꦴꦫ​ꦔꦺꦴꦩ꧀ꦧꦺ​꧈​ꦱꦼꦤꦗꦤ꧀ꦔꦼꦭꦏ꧀ꦭꦤ꧀ꦔꦼꦭꦶꦃ​꧉​ꦲꦏꦸ​ꦏꦼꦉꦥ꧀ꦏꦢꦼꦩ꧀ꦩꦼꦤ꧀ ꦲꦮꦶꦠ꧀ꦲꦺꦴꦫ​ꦤ꧀ꦢꦸꦮꦺꦱꦤ꧀ꦢꦁꦔꦤ꧀꧈​ ²⁸ꦏꦼꦗꦧ​ꦏꦫꦺꦥꦺꦴꦠ꧀ꦠꦤ꧀ꦭꦶꦪꦭꦶꦪꦤꦺ​꧈​ꦱꦧꦼꦤ꧀ꦢꦶꦤ​ꦲꦏꦸ​ꦠꦤ꧀ꦱꦃ​ꦩꦶꦏꦶꦂꦫꦏꦺꦥꦱꦩꦸꦮꦤ꧀ꦥꦱꦩꦸꦮꦤ꧀ꦏꦧꦺꦃ​꧉​ ²⁹ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦏꦿꦱ​ꦫꦶꦁꦏꦶꦃ​꧈​ꦲꦏꦸ​ꦪ​ꦩꦺꦭꦸ​ꦔꦿꦱꦏ꧀ꦏꦏꦺꦫꦶꦁꦏꦶꦃ​꧈​ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦤꦶꦧꦏ꧀ꦏꦏꦺꦭꦶꦪꦤꦺ​ꦲꦶꦁ​ꦢꦺꦴꦱ​꧈​ꦲꦏꦸ​ꦪ​ꦩꦺꦭꦸ​ꦏꦿꦱ​ꦗꦺꦁꦏꦺꦭ꧀ꦠꦼꦤꦤ꧀꧈​

³⁰꧋ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦲꦏꦸ​ꦏꦼꦥꦼꦏ꧀ꦱ​ꦒꦼꦩꦸꦁꦒꦸꦁ​꧈​ꦲꦏꦸ​ꦱꦲꦶꦏꦶ​ꦲꦉꦥ꧀ꦔꦼꦒꦸꦁꦔꦏꦺꦥꦽꦏꦫꦥꦽꦏꦫ​ꦱꦶꦁ​ꦔꦼꦠꦺꦴꦏ꧀ꦏꦏꦺꦏꦫꦶꦁꦏꦶꦲꦤ꧀ꦏꦸ꧉​ ³¹ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦏꦸꦢꦸ​ꦢꦶꦒꦸꦁꦒꦸꦁ​ꦱ꧀ꦭꦮꦱ꧀ꦭꦮꦱ꧀ꦱꦺ꧈​ꦢꦺꦏ꧀ꦤꦺꦔꦼꦂꦠꦶ​ꦤꦺꦏ꧀ꦲꦏꦸ​ꦲꦺꦴꦫ​ꦒꦺꦴꦫꦺꦴꦃ​꧉​ ³²ꦢꦺꦴꦁꦔꦺꦲꦏꦸ​ꦤꦁꦏꦸꦠꦣꦩꦱ꧀ꦏꦸꦱ꧀ ꦒꦿꦩꦁꦔꦺꦏꦺꦴꦤꦺꦴ​ꦩꦿꦺꦤ꧀ꦠꦃ​ꦔꦺꦴꦁꦏꦺꦴꦤ꧀​ꦚ꧀ꦗꦒ​ꦏꦸꦠꦤꦺ꧈​ꦗꦭꦂꦫꦤ꧀ꦲꦉꦥ꧀ꦚꦼꦏꦼꦭ꧀ꦲꦏꦸ​꧉​ꦒꦿꦩꦁꦲꦶꦏꦶ​ꦮꦏꦶꦭ꧀ꦭꦺ​ꦫꦠꦸ​ ꦄꦫꦺꦠꦱ꧀꧈​ ³³ꦤꦁꦔꦶꦁ​ꦲꦏꦸ​ꦢꦶꦲꦼꦢꦸꦤ꧀ꦤꦏꦺꦔꦁꦒꦺꦴ​ꦏꦿꦚ꧀ꦗꦁ​ꦱꦁꦏꦗꦼꦤ꧀ꦢꦺꦭꦤꦺꦠꦺꦩ꧀ꦧꦺꦴꦏ꧀ꦏꦺ​ꦏꦸꦠꦩꦲꦸ​꧉​ꦢꦢꦶꦤꦺ​ꦲꦏꦸ​ꦧꦶꦱ​ꦩꦿꦸꦕꦸꦠ꧀ꦱꦁꦏꦠꦔꦤ꧀ꦤꦺ​ꦒꦿꦩꦁꦔꦺ꧉​

↑ ↑ ↑

꧋ꦧꦧ꧀ꦮꦼꦮꦼꦫꦸꦃꦭꦤ꧀ꦥꦩꦼꦢꦂꦫꦤ꧀꧈​

꧇​꧑꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦔꦼꦂꦠꦶ​ꦤꦺꦏ꧀ꦲꦺꦴꦫ​ꦲꦺꦤꦺꦁꦒꦸꦤꦤꦺ​꧈​ꦤꦁꦔꦶꦁ​ꦲꦏꦸ​ꦏꦼꦥꦼꦏ꧀ꦱ​ꦤꦼꦫꦸꦱ꧀ꦱꦏꦺꦲꦼꦁꦒꦺꦴꦤ꧀ꦏꦸ​ꦒꦼꦩꦸꦁꦒꦸꦁ​꧉​ꦱꦲꦶꦏꦶ​ꦲꦏꦸ​ꦲꦉꦥ꧀ꦔꦺꦴꦩꦺꦴꦁꦔꦏꦺꦧꦧ꧀ꦮꦼꦮꦼꦫꦸꦃꦭꦤ꧀ꦥꦩꦼꦢꦂꦫꦤ꧀ꦱꦁꦏꦒꦸꦱ꧀ꦠꦶ​꧉​ꦗꦫꦺꦤꦺ​ꦏꦸꦮꦶ​ꦱꦶꦁ​ꦢꦶꦲꦼꦒꦸꦭ꧀ꦭꦏꦺꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧉​ ²ꦲꦏꦸ​ꦏꦼꦤꦭ꧀ꦱꦏ꧀ꦮꦶꦗꦶꦤꦺꦮꦺꦴꦁ​ꦏꦿꦶꦱ꧀ꦠꦼꦤ꧀ꦱꦶꦁ​ꦥꦠ꧀ꦧꦼꦭꦱ꧀ꦠꦲꦸꦤ꧀ꦏꦼꦥꦸꦁꦏꦸꦂ​ꦢꦶꦲꦁꦏꦠ꧀​ꦩ꧀ꦊꦧꦸ​ꦤꦁꦱ꧀ꦮꦂꦒ​ꦱꦶꦁ​ꦢꦸꦮꦸꦂꦢꦺꦮꦺ꧉​ꦲꦏꦸ​ꦲꦺꦴꦫ​ꦔꦼꦂꦠꦶ​ꦲꦼꦩ꧀ꦧꦸꦃ​ꦱꦏ꧀ꦲꦮꦏ꧀ꦏꦺ​꧈​ꦲꦼꦩ꧀ꦧꦸꦃ​ꦤꦩꦸꦁ​ꦚꦮꦤꦺ​꧉​ꦤꦩꦸꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦼꦂꦠꦶ​꧉​ ³ꦲꦏꦸ​ꦔꦼꦂꦠꦶ​ꦠꦼꦤꦤ꧀ꦤꦺꦏ꧀ꦮꦺꦴꦁ​ꦲꦶꦏꦶ​ꦢꦶꦲꦁꦏꦠ꧀​ꦩ꧀ꦊꦧꦸ​ꦦꦶꦂꦢꦸꦱ꧀ ꦲꦼꦩ꧀ꦧꦸꦃ​ꦱꦏ꧀ꦲꦮꦏ꧀ꦏꦺ​꧈​ꦲꦼꦩ꧀ꦧꦸꦃ​ꦲꦺꦴꦫ​꧈​ꦲꦏꦸ​ꦲꦺꦴꦫ​ꦔꦼꦂꦠꦶ​꧉​ꦤꦩꦸꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦼꦂꦠꦶ​꧉​ ⁴ꦤꦁꦔꦶꦁ​ꦲꦏꦸ​ꦔꦼꦂꦠꦶ​ꦤꦺꦏ꧀ꦤꦁꦏꦤ​ꦮꦺꦴꦁ​ꦲꦶꦏꦶ​ꦏꦿꦸꦔꦸ​ꦱ꧀ꦮꦫꦱ꧀ꦮꦫ​ꦱꦶꦁ​ꦲꦺꦴꦫ​ꦧꦶꦱ​ꦢꦶꦢꦸꦤꦸꦁꦔꦏꦺꦔꦁꦒꦺꦴ​ꦠꦼꦩ꧀ꦧꦸꦁꦔꦺ​ꦩꦤꦸꦁꦱ​ꦭꦤ꧀ꦩꦤꦸꦁꦱ​ꦪ​ꦲꦺꦴꦫ​ꦏꦼꦭꦶꦭ꧀ꦭꦤ꧀ꦔꦺꦴꦩꦺꦴꦁꦔꦏꦺꦧꦧ꧀ꦏꦸꦮꦶ​꧉​ ⁵ꦮꦺꦴꦁ​ꦏꦸꦮꦶ​ꦏꦼꦤꦺꦁꦠꦏ꧀ꦒꦸꦁꦒꦸꦁ​꧈​ꦤꦁꦔꦶꦁ​ꦲꦏꦸ​ꦲꦺꦴꦫ​ꦧꦏꦭ꧀​ꦔ꧀ꦒꦸꦁꦒꦸꦁꦲꦮꦏ꧀ꦏꦸ​ꦢꦺꦮꦺ꧈​ꦱꦶꦁ​ꦤꦩ꧀ꦥ​ꦮꦼꦮꦼꦫꦸꦃꦏꦸꦮꦶ​꧉​ꦲꦮꦶꦠ꧀ꦤꦺꦏ꧀ꦲꦏꦸ​ꦔ꧀ꦒꦸꦁꦒꦸꦁꦲꦮꦏ꧀ꦏꦸ​꧈​ꦲꦏꦸ​ꦤꦩꦸꦁ​ꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦏꦺꦏꦫꦶꦁꦏꦶꦲꦤ꧀ꦏꦸꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦒꦮꦺ​ꦥꦩꦺꦂꦫꦤ꧀꧈​ ⁶ꦤꦁꦔꦶꦁ​ꦱꦼꦩꦸꦁꦒꦺꦴꦤ꧀ꦤꦺꦮꦼꦮꦼꦫꦸꦃꦮꦼꦮꦼꦫꦸꦃꦏꦸꦮꦶ​ꦠꦏ꧀ꦒꦮꦺ​ꦥꦩꦺꦂꦫꦤ꧀ ꦲꦶꦏꦸ​ꦪ​ꦲꦺꦴꦫ​ꦏ꧀ꦭꦺꦫꦸ​꧈​ꦲꦮꦶꦠ꧀​ꦏ꧀ꦭꦏꦺꦴꦤ꧀ꦠꦼꦤꦤ꧀꧈​ꦩꦸꦁ​ꦲꦏꦸ​ꦭꦸꦮꦸꦁꦲꦺꦴꦫ​ꦔꦺꦴꦩꦺꦴꦁꦔꦏꦺꦧꦧ꧀ꦏꦸꦮꦶ​꧈​ꦩꦼꦁꦏꦺꦴ​ꦤ꧀ꦢꦏ꧀ꦮꦺꦴꦁꦮꦺꦴꦁ​ꦥꦢ​ꦔꦗꦺꦤ꧀ꦤꦶ​ꦲꦏꦸ​ꦗꦭꦂꦫꦤ꧀ꦲꦏꦸ​ꦲꦺꦤ꧀ꦠꦸꦏ꧀ꦮꦼꦮꦼꦫꦸꦃꦮꦼꦮꦼꦫꦸꦃꦏꦸꦮꦶ​꧉​ꦏꦉꦥ꧀ꦏꦸ​꧈​ꦤꦺꦏ꧀ꦮꦺꦴꦁꦮꦺꦴꦁ​ꦔꦗꦺꦤ꧀ꦤꦶ​ꦲꦏꦸ​ꦪ​ꦤꦩꦸꦁ​ꦗꦭꦂꦫꦤ꧀ꦮꦼꦫꦸꦃ​ꦲꦸꦫꦶꦥ꧀ꦏꦸ​꧈​ꦲꦥ​ꦱꦶꦁ​ꦠꦏ꧀ꦭꦏꦺꦴꦤ꧀ꦤꦶ​ꦭꦤ꧀ꦲꦥ​ꦱꦶꦁ​ꦠꦏ꧀ꦮꦸꦭꦁꦔꦏꦺ꧉​

⁷꧋ꦱꦸꦥꦪꦲꦏꦸꦲꦺꦴꦫꦒꦼꦩꦸꦁꦒꦸꦁꦭꦤ꧀ꦩꦩꦺꦂꦫꦏꦺꦥꦼꦔꦭꦩꦤ꧀ꦥꦼꦔꦭꦩ꧀ꦩꦤ꧀ꦱꦶꦁꦔ꧀ꦒꦸꦩꦸꦤ꧀ꦤꦏꦺꦏꦸꦮꦶ꧈​ꦒꦸꦱ꧀ꦠꦶꦄꦭ꧀ꦭꦃꦔ꧀ꦭꦶꦭꦤꦶꦥꦼꦂꦚꦏꦶꦠ꧀ꦤꦼꦏꦤꦶꦲꦮꦏ꧀ꦏꦸ;ꦫꦱꦤꦺꦏꦪꦲꦼꦫꦶꦚꦺꦴꦕꦺꦴꦏ꧀ꦢꦒꦶꦁꦏꦸ꧉​ꦤꦺꦏ꧀ꦠꦏ꧀ꦫꦱꦏ꧀ꦏꦏꦺ꧈​ꦏꦪꦏꦪꦏꦸꦮꦶꦒꦩꦤ꧀ꦤꦺꦱꦺꦠꦤ꧀ꦏꦁꦒꦺꦴꦔꦤ꧀ꦠꦼꦩ꧀ꦩꦶꦲꦏꦸ꧉​ ⁸ꦱꦩ꧀ꦥꦺꦏ꧀ꦥꦶꦁ​ꦠꦼꦭꦸ​ꦲꦏꦸ​ꦱꦩ꧀ꦧꦠ꧀ꦩꦫꦁ​ꦒꦸꦱ꧀ꦠꦶ​꧈​ꦚꦸꦮꦸꦤ꧀ꦲꦩ꧀ꦧꦸꦮꦁ​ꦥꦼꦂꦚꦏꦶꦠ꧀ꦏꦸꦮꦶ​ꦱꦁꦏꦲꦮꦏ꧀ꦏꦸ​꧉​ ⁹ꦤꦁꦔꦶꦁ​ꦒꦸꦱ꧀ꦠꦶ​ꦩꦭꦃ​ꦱꦼꦩꦲꦸꦂ​ꦔꦺꦤꦺ​:“ꦲꦏꦸ​ꦲꦺꦴꦫ​ꦧꦏꦭ꧀ꦲꦩ꧀ꦧꦸꦮꦁ​ꦥꦼꦂꦚꦏꦶꦠ꧀ꦏꦸꦮꦶ​꧈​ꦤꦁꦔꦶꦁ​ꦏꦧꦼꦕꦶꦏ꧀ꦏꦤ꧀ꦏꦸ​ꦧꦏꦭ꧀ꦤꦸꦭꦸꦁꦔꦶ​ꦏꦺꦴꦮꦺ​꧈​ꦏꦸꦮꦶ​ꦮꦶꦱ꧀ꦚꦩ꧀ꦧꦸꦠ꧀ꦒꦮꦺꦪ꧉​ꦲꦮꦶꦠ꧀ꦥꦔ꧀ꦮꦱꦏꦸ​ꦏꦼꦠꦫꦤꦺꦲꦶꦁ​ꦏꦫꦶꦁꦏꦶꦲꦤ꧀ꦩꦸ꧉”ꦩꦸꦭꦤꦺ​ꦤꦺꦏ꧀ꦲꦏꦸ​ꦏꦸꦢꦸ​ꦥꦩꦺꦂ​꧈​ꦲꦏꦸ​ꦩꦭꦃ​ꦱꦼꦤꦼꦁ​ꦔꦺꦴꦩꦺꦴꦁꦔꦏꦺꦧꦧ꧀ꦏꦫꦶꦁꦏꦶꦲꦤ꧀ꦏꦸ꧈​ꦱꦸꦥꦪ​ꦲꦏꦸ​ꦧꦶꦱ​ꦔꦿꦱꦏ꧀ꦏꦏꦺꦏꦼꦏꦸꦮꦠ꧀ꦠꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦚꦩ꧀ꦧꦸꦠ꧀ꦠꦲꦶꦁ​ꦲꦏꦸ​꧉​

¹⁰꧋ꦥꦫ​ꦱꦼꦢꦸꦭꦸꦂ​꧈​ꦏꦁꦒꦺꦴ​ꦔ꧀ꦭꦧꦸꦃꦲꦶ​ꦏꦿꦶꦱ꧀ꦡꦸꦱ꧀ꦲꦏꦸ​ꦱꦼꦤꦼꦁ​ꦔꦭꦩ꧀ꦩꦶ​ꦲꦥꦼꦱ꧀꧈​ꦲꦏꦸ​ꦒꦼꦊꦩ꧀ꦢꦶꦱꦼꦥꦺꦭꦺꦏ꧀ꦏꦏꦺ꧈​ꦲꦏꦸ​ꦒꦼꦊꦩ꧀ꦏꦔꦺꦭ꧀ꦭꦤ꧀ꦲꦥ​ꦢꦶꦥꦶꦭꦂꦫ​ꦭꦤ꧀ꦲꦏꦸ​ꦒꦼꦊꦩ꧀ꦔꦭꦩ꧀ꦩꦶ​ꦏꦱꦸꦱꦃꦲꦤ꧀ꦭꦶꦪꦭꦶꦪꦤꦺ​꧉​ꦲꦮꦶꦠ꧀ꦲꦶꦁ​ꦮꦏ꧀ꦠꦸ​ꦲꦥꦼꦱ꧀ꦒꦸꦱ꧀ꦠꦶ​ꦧꦏꦭ꧀ꦔꦸꦮꦠ꧀ꦠꦏꦺꦲꦏꦸ​꧉​

¹¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦫꦸꦩꦁꦱ​ꦤꦺꦏ꧀ꦲꦺꦴꦩꦺꦴꦔꦤ꧀ꦏꦸꦏꦪ​ꦲꦺꦴꦩꦺꦴꦁꦔꦤ꧀ꦤꦺ​ꦮꦺꦴꦁ​ꦧꦺꦴꦢꦺꦴ꧈​ꦤꦁꦔꦶꦁ​ꦥꦚ꧀ꦕꦺꦤ꧀ꦏꦺꦴꦮꦺ​ꦱꦶꦁ​ꦩꦼꦏ꧀ꦱ​ꦲꦏꦸ​꧉​ꦱꦏ꧀ꦗꦤꦺꦏꦺꦴꦮꦺ​ꦱꦶꦁ​ꦏꦸꦢꦸ​ꦔꦺꦴꦩꦺꦴꦁꦤꦺꦏ꧀ꦲꦏꦸ​ꦱꦶꦁ​ꦧꦼꦤꦼꦂ​꧉​ꦧꦼꦤꦼꦂ​ꦲꦏꦸ​ꦲꦶꦏꦶ​ꦢꦸꦢꦸ​ꦱꦥꦱꦥ​꧈​ꦤꦁꦔꦶꦁ​ꦲꦏꦸ​ꦲꦺꦴꦫ​ꦏꦭꦃ​ꦏꦫꦺꦴ​ꦫꦱꦸꦭ꧀ꦫꦱꦸꦭ꧀ꦱꦶꦁ​ꦲꦩ꧀ꦧꦺꦴꦏ꧀ꦲꦁꦒꦼꦥ꧀ꦒꦼꦢꦺꦢꦺꦮꦺꦏꦸꦮꦶ​꧉​ ¹²ꦲꦮꦶꦠ꧀ꦪ​ꦮꦶꦱ꧀ꦕꦼꦠ​ꦠꦼꦤꦤ꧀ꦠꦤ꧀ꦢꦤꦺꦤꦺꦏ꧀ꦲꦏꦸ​ꦲꦶꦏꦶ​ꦫꦱꦸꦭ꧀ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​ꦮꦸꦗꦸꦠ꧀ꦠꦺꦏꦺꦴꦮꦺ​ꦢꦺꦮꦺꦮꦶꦱ꧀ꦏꦼꦉꦥ꧀ꦮꦼꦫꦸꦃ​ꦲꦼꦁꦒꦺꦴꦤ꧀ꦏꦸ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀ꦭꦤ꧀ꦠꦤ꧀ꦢꦠꦤ꧀ꦢꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧈​ꦏꦁꦒꦺꦴ​ꦔꦼꦠꦺꦴꦏ꧀ꦏꦏꦺꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦥꦢ​ꦔ꧀ꦒꦠꦺꦏ꧀ꦏꦏꦺ꧉​ ¹³ꦲꦥ​ꦲꦺꦤꦺꦁꦏꦸꦫꦁꦔꦺꦲꦼꦁꦒꦺꦴꦤ꧀ꦏꦸ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦏꦺꦴꦮꦺ​ꦤꦺꦏ꧀ꦢꦶꦥꦢꦏ꧀ꦏꦏꦺꦏꦫꦺꦴ​ꦥꦱꦩꦸꦮꦤ꧀ꦭꦶꦪꦭꦶꦪꦤꦺ​?ꦧꦼꦤꦼꦂ​ꦲꦺꦤꦺꦁꦏꦸꦫꦁꦔꦺ꧈​ꦲꦮꦶꦠ꧀ꦲꦏꦸ​ꦲꦺꦴꦫ​ꦚ꧀ꦗꦭꦸꦏ꧀ꦲꦸꦫꦸꦤ꧀ꦤꦤ꧀ꦩꦫꦁ​ꦏꦺꦴꦮꦺ​꧉​ꦤꦺꦏ꧀ꦏꦸꦮꦶ​ꦲꦩ꧀ꦧꦺꦴꦏ꧀ꦲꦁꦒꦼꦥ꧀ꦱꦭꦃ​꧈​ꦲꦏꦸ​ꦪ​ꦚ꧀ꦗꦭꦸꦏ꧀ꦔꦥꦸꦫ​ꦩꦫꦁ​ꦏꦺꦴꦮꦺ​꧉​

¹⁴꧋ꦱꦲꦶꦏꦶ​ꦲꦏꦸ​ꦮꦶꦱ꧀ꦠꦠꦠꦠ​ꦲꦉꦥ꧀ꦤꦶꦭꦶꦏ꧀ꦏꦶ​ꦏꦺꦴꦮꦺ​ꦩꦼꦤꦺꦃ​꧈​ꦥꦶꦁ​ꦠꦼꦭꦸꦤꦺ​꧉​ꦤꦁꦔꦶꦁ​ꦲꦏꦸ​ꦲꦺꦴꦫ​ꦧꦏꦭ꧀​ꦚ꧀ꦗꦭꦸꦏ꧀ꦲꦸꦫꦸꦤ꧀ꦤꦤ꧀ ꦲꦮꦶꦠ꧀ꦢꦸꦢꦸ​ꦧꦫꦁꦩꦸ​ꦱꦶꦁ​ꦠꦏ꧀ꦒꦺꦴꦭꦺꦏ꧀ꦏꦶ꧈​ꦲꦺꦴꦫ​꧉​ꦱꦶꦁ​ꦠꦏ꧀ꦒꦺꦴꦭꦺꦏ꧀ꦏꦶꦏꦸꦮꦶ​ꦪ​ꦏꦺꦴꦮꦺ​ꦢꦺꦮꦺ꧉​ꦲꦥ​ꦪ​ꦧꦺꦴꦕꦃ​ꦱꦶꦁ​ꦏꦸꦢꦸ​ꦔꦿꦸꦩꦠ꧀ꦠꦶ​ꦮꦺꦴꦁ​ꦠꦸꦮꦤꦺ​꧈​ꦩꦼꦱ꧀ꦠꦶꦪ​ꦮꦺꦴꦁ​ꦠꦸꦮꦤꦺ​ꦱꦶꦁ​ꦔꦿꦸꦩꦠ꧀ꦠꦶ​ꦲꦤꦏ꧀ꦲꦤꦏ꧀ꦏꦺ​꧉​ ¹⁵ꦩꦸꦭꦤꦺ​ꦲꦏꦸ​ꦪ​ꦩꦭꦃ​ꦧꦸꦔꦃ​ꦤꦺꦏ꧀ꦲꦏꦸ​ꦧꦶꦱ​ꦔꦿꦺꦮꦁꦔꦶ​ꦏꦺꦴꦮꦺ​ꦏꦫꦺꦴ​ꦱꦏ꧀​ꦤ꧀ꦢꦸꦮꦺꦩꦸ꧉​ꦲꦩ꧀ꦧꦺꦴꦏ꧀ꦲꦸꦫꦶꦥ꧀ꦏꦸ​ꦢꦺꦮꦺꦮꦲꦺ​ꦲꦏꦸ​ꦲꦺꦴꦫ​ꦲꦺꦩꦤ꧀ꦏꦁꦒꦺꦴ​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧉​ꦏꦺꦠꦺꦴꦏ꧀ꦏꦺ​ꦏꦠꦿꦺꦱ꧀ꦤꦤ꧀ꦩꦸꦩꦫꦁ​ꦲꦏꦸ​ꦩꦭꦃ​ꦱꦸꦢ​꧈​ꦗꦭꦂꦫꦤ꧀ꦏꦠꦿꦺꦱ꧀ꦤꦤ꧀ꦏꦸꦩꦫꦁ​ꦏꦺꦴꦮꦺ​ꦩꦸꦤ꧀ꦢꦏ꧀꧈​

¹⁶꧋ꦤꦁꦔꦶꦁ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦱꦼꦤꦼꦁ​ꦏꦫꦺꦴ​ꦲꦏꦸ​ꦔꦺꦴꦩꦺꦴꦁ:“ꦥꦚ꧀ꦕꦺꦤ꧀ꦦꦈꦭꦸꦱ꧀ꦲꦺꦴꦫ​ꦢꦢꦶ​ꦉꦁꦒꦤ꧀ ꦤꦁꦔꦶꦁ​ꦢꦺꦏ꧀ꦤꦺꦥꦶꦤ꧀ꦠꦼꦂ​ꦔꦏꦭ꧀ꦭꦶ​ꦏꦺꦴꦮꦺ​꧉​” ¹⁷ꦥꦫ​ꦱꦼꦢꦸꦭꦸꦂ​꧈​ꦲꦥ​ꦠꦲꦸ​ꦲꦏꦸ​ꦔ꧀ꦒꦺꦴꦭꦺꦏ꧀ꦧꦠꦶꦭꦤ꧀ꦠꦂꦫꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦠꦏ꧀ꦏꦺꦴꦁꦏꦺꦴꦤ꧀ꦤꦁꦔ꧀ꦒꦺꦴꦤ꧀ꦩꦸ​? ¹⁸ꦲꦏꦸ​ꦔꦺꦴꦁꦏꦺꦴꦤ꧀ꦱꦼꦢꦸꦭꦸꦂ​ꦠꦶꦠꦸꦱ꧀ꦤꦶꦭꦶꦏ꧀ꦏꦶ​ꦏꦺꦴꦮꦺ​ꦧꦉꦁ​ꦏꦫꦺꦴ​ꦱꦼꦢꦸꦭꦸꦂ​ꦏꦿꦶꦱ꧀ꦠꦼꦤ꧀ꦭꦶꦪꦤꦺ​꧉​ꦲꦥ​ꦱꦼꦢꦸꦭꦸꦂ​ꦠꦶꦠꦸꦱ꧀ꦔꦏꦭ꧀ꦭꦶ​ꦏꦺꦴꦮꦺ​?ꦭꦲꦸꦠ꧀ꦲꦺꦴꦫ​ꦠ​?ꦏꦺꦴꦮꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦱꦼꦢꦸꦭꦸꦂ​ꦠꦶꦠꦸꦱ꧀ꦏꦫꦺꦴ​ꦲꦏꦸ​ꦲꦺꦴꦫ​ꦱꦺꦗꦺ​ꦥꦶꦏꦶꦂꦫꦤ꧀ꦤꦺ​ꦭꦤ꧀ꦠꦸꦩꦶꦤ꧀ꦢꦏ꧀ꦏꦺ​ꦏꦁꦒꦺꦴ​ꦏꦺꦴꦮꦺ​꧉​

¹⁹꧋ꦏꦺꦴꦮꦺ​ꦩꦼꦤꦮ​ꦮꦶꦱ꧀ꦱꦸꦮꦶꦩꦶꦏꦶꦂ​ꦤꦺꦏ꧀ꦲꦏꦸ​ꦲꦶꦏꦶ​ꦩ꧀ꦧꦼꦤꦼꦂꦫꦏꦺꦲꦮꦏ꧀ꦏꦸ​ꦢꦺꦮꦺ꧉​ꦲꦺꦴꦫ​ꦥꦫ​ꦱꦼꦢꦸꦭꦸꦂ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦂꦠꦶ​ꦤꦺꦏ꧀ꦏꦧꦺꦃ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​ꦩꦤꦸꦠ꧀ꦏꦉꦥ꧀ꦥꦺ​ꦏꦿꦶꦱ꧀ꦡꦸꦱ꧀꧈​ꦱꦼꦩ꧀ꦧꦫꦁ​ꦱꦶꦁ​ꦠꦏ꧀ꦭꦏꦺꦴꦤ꧀ꦤꦶ​ꦤꦩꦸꦁ​ꦏꦁꦒꦺꦴ​ꦲꦩ꧀ꦧꦔꦸꦤ꧀ꦏꦺꦴꦮꦺ​ꦠꦼꦤꦤ꧀꧈​ ²⁰ꦲꦮꦶꦠ꧀ꦲꦏꦸ​ꦱꦸꦩꦼꦭꦁ​꧈​ꦮꦼꦢꦶꦏꦸ​ꦩꦼꦁꦏꦺꦴ​ꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧈​ꦠꦼꦫꦸꦱ꧀ꦤꦼꦩꦸ​ꦏꦺꦴꦮꦺ​ꦱꦺꦗꦺ​ꦏꦫꦺꦴ​ꦥꦼꦔꦉꦥ꧀ꦲꦉꦥ꧀ꦏꦸ​꧉​ꦲꦥ​ꦩꦼꦤꦮ​ꦏꦺꦴꦮꦺ​ꦤꦼꦩꦺꦴꦤ꧀ꦤꦶ​ꦲꦏꦸ​ꦱꦺꦗꦺ​ꦏꦫꦺꦴ​ꦥꦼꦔꦉꦥ꧀ꦲꦉꦥ꧀ꦩꦸ​꧉​ꦲꦏꦸ​ꦮꦼꦢꦶ​ꦤꦺꦏ꧀ꦩꦼꦁꦏꦺꦴ​ꦤꦺꦏ꧀ꦲꦏꦸ​ꦠꦼꦏ​ꦠꦼꦫꦸꦱ꧀ꦤꦼꦩꦸ​ꦏꦺꦴꦮꦺ​ꦥꦢ​ꦠꦸꦏꦂꦫꦤ꧀ꦲꦥ​ꦥꦢ​ꦩꦺꦫꦶ​ꦩꦫꦁ​ꦱꦏ꧀ꦥꦢꦥꦢ꧈​ꦥꦢ​ꦤꦼꦱꦸ​ꦲꦥ​ꦤꦩꦸꦁ​ꦔꦸꦫꦸꦱ꧀ꦱꦶ​ꦲꦸꦫꦶꦥ꧀ꦥꦺꦢꦺꦮꦺꦢꦺꦮꦺ꧈​ꦲꦥ​ꦥꦢ​ꦔꦺꦭꦺꦏ꧀ꦲꦺꦭꦺꦏ꧀ ꦚꦠꦸꦂ​ꦲꦥ​ꦚꦺꦴꦩ꧀ꦧꦺꦴꦁꦔꦶꦱꦏ꧀ꦥꦢꦥꦢꦲꦥ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦫꦸꦱꦸ꧉​ ²¹ꦲꦏꦸ​ꦥꦚ꧀ꦕꦺꦤ꧀ꦮꦼꦢꦶ​ꦥꦫ​ꦱꦼꦢꦸꦭꦸꦂ​꧈​ꦩꦼꦁꦏꦺꦴ​ꦤꦺꦏ꧀ꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦠꦼꦫꦸꦱ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦏ꧀ꦏꦏꦺꦲꦏꦸ​ꦏꦿꦱ​ꦲꦶꦱꦶꦤ꧀ꦤꦁꦔꦉꦥ꧀ꦩꦸ​꧉​ꦩꦼꦤꦮ​ꦲꦏꦸ​ꦧꦏꦭ꧀ꦱꦼꦢꦶꦩꦶꦏꦶꦂꦫꦏꦺꦱꦼꦢꦸꦭꦸꦂ​ꦥꦶꦫꦁꦥꦶꦫꦁ​ꦱꦶꦁ​ꦩꦲꦸꦤꦺ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧈​ꦤꦁꦔꦶꦁ​ꦢꦸꦫꦸꦁ​ꦤꦶꦁꦒꦭ꧀​ꦏ꧀ꦭꦏꦸꦮꦤ꧀ꦱꦶꦁ​ꦏꦺꦴꦠꦺꦴꦂ​ꦏꦸꦮꦶ​꧈​ꦏꦪꦢꦺꦤꦺꦭꦏꦸ​ꦧꦺꦢꦁꦭꦤ꧀​ꦏ꧀ꦭꦏꦸꦮꦤ꧀ꦭꦶꦪꦭꦶꦪꦤꦺ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀꧈​

↑ ↑ ↑

꧋ꦥꦼꦤꦸꦠꦸꦥ꧀꧈​

꧇​꧑꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦶꦏꦶ​ꦧꦏꦭ꧀ꦥꦶꦁ​ꦠꦼꦭꦸꦤꦺ​ꦲꦼꦁꦒꦺꦴꦤ꧀ꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧉​ꦤꦁꦏꦶꦠꦧ꧀ꦲꦺꦤꦺꦁꦲꦪꦠ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦱꦧꦼꦤ꧀ꦏꦼꦭꦃꦲꦤ꧀ꦧꦶꦱꦤꦺ​ꦏꦼꦠꦩ꧀ꦥꦤꦩꦸꦁ​ꦤꦺꦏ꧀ꦲꦺꦤꦺꦁꦱꦼꦏ꧀ꦱꦶꦤꦺ​ꦭꦺꦴꦫꦺꦴ​ꦲꦥ​ꦠꦼꦭꦸ​꧉​” ²ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦭꦤ꧀ꦲꦸꦒ​ꦭꦶꦪꦭꦶꦪꦤꦺ​꧈​ꦏꦧꦺꦃ​ꦱꦶꦁ​ꦮꦶꦱ꧀ꦠꦏ꧀ꦲꦺꦭꦶꦁꦔꦏꦺꦢꦺꦴꦁꦔꦺꦲꦏꦸ​ꦠꦼꦏ​ꦥꦶꦁ​ꦥꦶꦤ꧀ꦢꦺꦴꦤꦺ꧈​ꦱꦼꦤꦗꦤ꧀ꦱꦲꦶꦏꦶ​ꦲꦏꦸ​ꦲꦢꦺꦴꦃ​ꦏꦫꦺꦴ​ꦏꦺꦴꦮꦺ​꧈​ꦲꦏꦸ​ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​ꦱꦼꦥꦶꦱ꧀ꦱꦤ꧀ꦩꦼꦤꦺꦃ​:ꦲꦩ꧀ꦧꦺꦱꦸꦏ꧀ꦤꦺꦏ꧀ꦲꦏꦸ​ꦠꦼꦏ​ꦩꦼꦤꦺꦃ​ꦤꦁꦔ꧀ꦒꦺꦴꦤ꧀ꦩꦸ​ꦲꦏꦸ​ꦲꦺꦴꦫ​ꦧꦏꦭ꧀ꦔꦺꦩꦤ꧀ꦱꦥꦱꦥ​꧉​ ³ꦏꦺꦴꦮꦺ​ꦧꦏꦭ꧀ꦮꦼꦫꦸꦃ​ꦢꦺꦮꦺꦲꦥ​ꦠꦤ꧀ꦢꦤꦺꦤꦺꦏ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦔꦺꦴꦁꦏꦺꦴꦤ꧀ꦲꦏꦸ​ꦠꦼꦤꦤ꧀ ꦲꦮꦶꦠ꧀ꦤꦺꦏ꧀ꦏꦿꦶꦱ꧀ꦡꦸꦱ꧀ꦠꦸꦩꦤ꧀ꦢꦁ​꧈​ꦲꦺꦴꦫ​ꦏꦪ​ꦮꦺꦴꦁ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦏ꧀ꦮꦱ​꧈​ꦤꦁꦔꦶꦁ​ꦢꦺꦏ꧀ꦤꦺꦧꦏꦭ꧀ꦔꦼꦠꦺꦴꦏ꧀ꦏꦏꦺꦏ꧀ꦮꦱꦤꦺ​ꦭꦤ꧀ꦧꦏꦭ꧀​ꦔ꧀ꦒꦫꦥ꧀ꦔꦁꦒꦺꦴ​ꦕꦫ​ꦱꦶꦁ​ꦏꦼꦫꦱ꧀꧈​ ⁴ꦧꦼꦤꦼꦂ​꧈​ꦢꦺꦴꦁꦔꦺꦏꦿꦶꦱ꧀ꦡꦸꦱ꧀ꦢꦶꦥꦼꦤ꧀ꦠꦺꦁꦢꦺꦏ꧀ꦤꦺꦏꦪ​ꦩꦤꦸꦁꦱ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦏꦼꦏꦸꦮꦠ꧀ꦠꦤ꧀ ꦤꦁꦔꦶꦁ​ꦱꦲꦶꦏꦶ​ꦢꦺꦏ꧀ꦤꦺꦲꦸꦫꦶꦥ꧀ꦔꦁꦒꦺꦴ​ꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦏꦸ​ꦪ​ꦫꦸꦩꦁꦱ​ꦲꦺꦴꦫ​ꦤ꧀ꦢꦸꦮꦺꦏꦼꦏꦸꦮꦠ꧀ꦠꦤ꧀ꦏꦪ​ꦏꦿꦶꦱ꧀ꦡꦸꦱ꧀ ꦤꦁꦔꦶꦁ​ꦏꦺꦴꦮꦺ​ꦧꦏꦭ꧀ꦮꦼꦫꦸꦃ​ꦢꦺꦮꦺꦤꦺꦏ꧀ꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧈​ꦲꦏꦸ​ꦧꦏꦭ꧀ꦏꦪ​ꦏꦿꦶꦱ꧀ꦡꦸꦱ꧀ꦔꦁꦒꦺꦴ​ꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

⁵꧋ꦥꦫ​ꦱꦼꦢꦸꦭꦸꦂ​꧈​ꦠꦶꦩ꧀ꦧꦁꦔꦼꦤ꧀ꦢꦺꦮꦺꦲꦸꦫꦶꦥ꧀ꦩꦸ​꧈​ꦲꦶꦗꦶꦏ꧀ꦥꦽꦕꦪ​ꦠꦼꦤꦤ꧀ꦩꦫꦁ​ꦏꦿꦶꦱ꧀ꦡꦸꦱ꧀ꦲꦥ​ꦲꦺꦴꦫ​꧉​ꦢꦶꦱꦮꦁ​ꦠꦼꦤꦤ꧀ꦲꦠꦶꦩꦸ​꧈​ꦲꦶꦗꦶꦏ꧀ꦥꦽꦕꦪ​ꦲꦥ​ꦲꦺꦴꦫ​꧉​ꦏꦺꦴꦮꦺ​ꦥꦢ​ꦔꦼꦂꦠꦶ​ꦤꦺꦏ꧀ꦏꦿꦶꦱ꧀ꦡꦸꦱ꧀ꦩꦁꦒꦺꦴꦤ꧀ꦲꦶꦁ​ꦲꦠꦶꦩꦸ​꧉​ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦤꦶꦩ꧀ꦧꦁ​ꦲꦸꦫꦶꦥ꧀ꦩꦸ​꧈​ꦩꦼꦤꦮ​ꦏꦺꦴꦮꦺ​ꦤꦶꦠꦺꦤ꧀ꦤꦶ​ꦢꦺꦮꦺꦤꦺꦏ꧀ꦥꦼꦔꦤ꧀ꦢꦼꦭ꧀ꦩꦸ​ꦭꦸꦤ꧀ꦠꦸꦂ​꧉​ ⁶ꦧꦧ꧀ꦲꦏꦸ​꧈​ꦲꦏꦸ​ꦥꦽꦕꦪ​꧈​ꦤꦺꦏ꧀ꦱꦏ꧀ꦮꦶꦱ꧀ꦱꦺ​ꦏꦺꦴꦮꦺ​ꦥꦢ​ꦤꦶꦩ꧀ꦧꦁ​ꦥꦶꦮꦸꦭꦁ​ꦭꦤ꧀ꦠꦶꦤ꧀ꦢꦏ꧀ꦏꦸ꧈​ꦏꦺꦴꦮꦺ​ꦧꦏꦭ꧀ꦤꦶꦠꦺꦤ꧀ꦤꦶ​ꦢꦺꦮꦺꦤꦺꦏ꧀ꦲꦏꦸ​ꦲꦶꦏꦶ​ꦫꦱꦸꦭ꧀ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​ ⁷ꦥꦤ꧀ꦢꦺꦴꦔꦏꦸ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦒꦩꦸꦒ​ꦏꦺꦴꦮꦺ​ꦲꦺꦴꦫ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦏ꧀ꦭꦺꦫꦸ​ꦧꦧ꧀ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​꧉​ꦲꦏꦸ​ꦤ꧀ꦢꦺꦴꦁꦔ꧈​ꦲꦺꦴꦫ​ꦱꦸꦥꦪ​ꦏꦼꦠꦫ​ꦠꦼꦤꦤ꧀ꦤꦺꦏ꧀ꦲꦏꦸ​ꦲꦶꦏꦶ​ꦤꦶꦤ꧀ꦢꦏ꧀ꦏꦏꦺꦱꦏ꧀ꦧꦼꦤꦼꦂꦫꦺ​꧈​ꦲꦺꦴꦫ​꧈​ꦤꦁꦔꦶꦁ​ꦲꦏꦸ​ꦤ꧀ꦢꦺꦴꦁꦔꦱꦸꦥꦪ​ꦏꦺꦴꦮꦺ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦤꦼꦂ​꧈​ꦱꦼꦤꦗꦤ꧀ꦩꦼꦤꦮ​ꦏꦺꦠꦺꦴꦏ꧀ꦏꦺ​ꦲꦏꦸ​ꦏ꧀ꦭꦺꦫꦸ​꧉​ ⁸ꦤꦺꦏ꧀ꦏꦺꦴꦮꦺ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦤꦼꦂ​꧈​ꦲꦏꦸ​ꦮꦶꦱ꧀ꦲꦺꦴꦫ​ꦲꦸꦱꦃꦩ꧀ꦧꦼꦤꦼꦂꦫꦏꦺꦏꦺꦴꦮꦺ​꧉​ꦲꦏꦸ​ꦲꦺꦴꦫ​ꦧꦏꦭ꧀​ꦔ꧀ꦭꦮꦤ꧀ꦱꦶꦁ​ꦧꦼꦤꦼꦂ​꧈​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​ꦩꦭꦃ​ꦠꦏ꧀ꦠꦸꦫꦸꦠ꧀ꦭꦤ꧀ꦠꦏ꧀ꦭꦧꦸꦃꦲꦶ꧉​ ⁹ꦲꦏꦸ​ꦩꦭꦃ​ꦧꦸꦔꦃ​ꦱꦼꦤꦗꦤ꧀ꦏꦺꦠꦺꦴꦏ꧀ꦏꦺ​ꦲꦺꦴꦫ​ꦤ꧀ꦢꦸꦮꦺꦥꦔ꧀ꦮꦱ​꧈​ꦗꦚ꧀ꦗꦶ​ꦏꦺꦴꦮꦺ​ꦥꦢ​ꦏꦺꦠꦺꦴꦏ꧀ꦩꦤ꧀ꦠꦼꦥ꧀ꦲꦼꦁꦒꦺꦴꦤ꧀ꦩꦸ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀꧈​ꦩꦸꦭꦤꦺ​ꦲꦏꦸ​ꦪ​ꦤ꧀ꦢꦺꦴꦁꦔꦱꦸꦥꦪ​ꦱꦼꦩ꧀ꦧꦫꦁ​ꦧꦶꦱ​ꦢꦢꦶꦪ​ꦲꦥꦶꦏ꧀ꦏꦧꦺꦃ​ꦏꦫꦺꦴ​ꦏꦺꦴꦮꦺ​꧉​ ¹⁰ꦪꦏꦸꦮꦶ​ꦗꦭꦂꦫꦤ꧀ꦤꦺ​ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦩꦫꦁ​ꦏꦺꦴꦮꦺ​꧈​ꦱꦲꦶꦏꦶ​ꦦꦸꦩ꧀ꦥꦸꦁꦲꦏꦸ​ꦲꦶꦗꦶꦏ꧀ꦲꦢꦺꦴꦃ​ꦏꦫꦺꦴ​ꦏꦺꦴꦮꦺ​꧉​ꦢꦢꦶꦤꦺ​ꦤꦺꦏ꧀ꦲꦏꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦲꦏꦸ​ꦲꦺꦴꦫ​ꦲꦸꦱꦃꦔꦁꦒꦺꦴꦏ꧀ꦏꦏꦺꦥꦔ꧀ꦮꦱꦏꦸ​ꦱꦁꦏꦒꦸꦱ꧀ꦠꦶ​ꦭꦤ꧀​ꦔ꧀ꦒꦫꦥ꧀ꦏꦺꦴꦮꦺ​ꦔꦁꦒꦺꦴ​ꦕꦫ​ꦱꦶꦁ​ ꦏꦼꦫꦱ꧀꧈​ꦲꦮꦶꦠ꧀ꦒꦸꦱ꧀ꦠꦶ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦲꦏꦸ​ꦏꦁꦒꦺꦴ​ꦔꦁꦏꦠ꧀ꦏꦺꦴꦮꦺ​꧈​ꦲꦺꦴꦫ​ꦏꦁꦒꦺꦴ​ꦚꦼꦩ꧀ꦥ꧀ꦭꦏ꧀ꦏꦏꦺꦏꦺꦴꦮꦺ​꧉​

¹¹꧋ꦲꦺꦴꦫ​ꦭꦶꦮꦠ꧀ꦥꦫ​ꦱꦼꦢꦸꦭꦸꦂ​꧈​ꦥꦢ​ꦧꦸꦔꦃꦲ​꧉​ꦥꦢ​ꦔ꧀ꦭꦸꦩꦸꦃꦲꦶꦠꦼꦤꦤ꧀ꦱꦸꦥꦪ​ꦱꦼꦩ꧀ꦧꦫꦁ​ꦧꦶꦱ​ꦢꦢꦶ​ꦲꦥꦶꦏ꧀ꦏꦧꦺꦃ​ꦤꦁꦔ꧀ꦒꦺꦴꦤ꧀ꦩꦸ​ꦏꦺꦴꦤꦺꦴ​꧉​ꦥꦢ​ꦔ꧀ꦭꦶꦥꦸꦂꦫꦱꦏ꧀ꦥꦢꦥꦢꦭꦤ꧀ꦥꦢ​ꦲꦸꦫꦶꦥ꧀ꦥ​ꦱꦶꦁ​ꦫꦸꦏꦸꦤ꧀ꦭꦤ꧀ꦠꦼꦤ꧀ꦠꦽꦩ꧀꧈​ꦩꦼꦁꦏꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦱ꧀ꦠꦶꦧꦏꦭ꧀ꦲꦩ꧀ꦧꦼꦂꦏꦃꦲꦶ​ꦏꦺꦴꦮꦺ​ꦏꦧꦺꦃ​꧈​ꦲꦮꦶꦠ꧀ꦢꦺꦏ꧀ꦤꦺꦱꦶꦁ​ꦧꦶꦱ​ꦔꦼꦏꦺꦏ꧀ꦏꦶꦏꦠꦿꦺꦱ꧀ꦤꦤ꧀ꦭꦤ꧀ꦏꦠꦼꦤ꧀ꦠꦽꦩ꧀ꦩꦤ꧀꧈​

¹²꧋ꦥꦫ​ꦱꦼꦢꦸꦭꦸꦂ​꧈​ꦥꦢ​ꦱꦭꦩ꧀ꦩꦤ꧀ꦠꦔꦤ꧀ꦩꦫꦁ​ꦱꦏ꧀ꦥꦢꦥꦢꦔꦁꦒꦺꦴ​ꦏꦠꦿꦺꦱ꧀ꦤꦤꦺꦲꦠꦶ​꧉​

꧋ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤꦁꦏꦺꦤꦺ​ꦏꦫꦺꦴ​ꦲꦸꦒ​ꦥꦢ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​ꦏꦧꦺꦃ​꧉​

¹³꧋ꦩꦸꦒꦩꦸꦒꦏꦧꦼꦕꦶꦏ꧀ꦏꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦏꦠꦿꦺꦱ꧀ꦤꦤꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦥꦼꦤꦸꦤ꧀ꦠꦸꦤꦺꦫꦺꦴꦃꦱꦸꦕꦶꦩꦒꦼꦂꦫꦶꦏꦺꦴꦮꦺꦏꦧꦺꦃ꧉​

ꦦꦈꦭꦸꦱ꧀ꦭꦤ꧀ꦠꦶꦩꦺꦴꦠꦶꦪꦸꦱ꧀

↑ ↑ ↑

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

¹꧋ꦥꦫ​ꦱꦼꦢꦸꦭꦸꦂ​꧈​ꦲꦶꦏꦶ​ꦭꦪꦁ​ꦱꦁꦏꦔ꧀ꦒꦺꦴꦤ꧀ꦏꦸ​꧈​ꦦꦈꦭꦸꦱ꧀꧈​ꦲꦏꦸ​ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​ꦤꦺꦏ꧀ꦲꦏꦸ​ꦲꦶꦏꦶ​ꦢꦢꦶ​ꦫꦱꦸꦭ꧀ꦲꦺꦴꦫ​ꦱꦁꦏꦏꦼꦏꦉꦥ꧀ꦥꦤ꧀ꦤꦺ​ꦩꦤꦸꦁꦱ​꧉​ꦢꦸꦢꦸ​ꦩꦤꦸꦁꦱ​ꦱꦶꦁ​ꦤ꧀ꦢꦢꦺꦏ꧀ꦏꦏꦺꦲꦏꦸ​ꦢꦢꦶ​ꦫꦱꦸꦭ꧀ ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦩꦁꦒꦶꦭ꧀ꦲꦏꦸ​ꦭꦤ꧀ꦲꦸꦒ​ꦱꦁꦏꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧈​ꦱꦶꦁ​ꦮꦶꦱ꧀ꦤꦔꦺꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦁꦏꦥꦠꦶ​꧉​ ²ꦲꦏꦸ​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤꦁꦏꦺꦤꦺ​ꦏꦫꦺꦴ​ꦲꦏꦸ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​ꦏꦧꦺꦃ​ꦱꦶꦁ​ꦤꦁꦥꦱꦩꦸꦮꦤ꧀ꦥꦱꦩꦸꦮꦤ꧀ꦤꦁꦧꦮꦃꦒꦭꦱꦶꦪꦴ꧉​

³꧋ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦩꦫꦁ​ꦏꦺꦴꦮꦺ​ꦏꦧꦺꦃ​꧉​

⁴꧋ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦏꦁꦒꦺꦴ​ꦤꦼꦧꦸꦱ꧀ꦱꦭꦃꦲꦺ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦲꦸꦕꦸꦭ꧀ꦱꦁꦏꦥꦔ꧀ꦮꦱꦤꦺ​ꦗꦩꦤ꧀ꦱꦶꦁ​ꦲꦭ​ꦲꦶꦏꦶ​꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦢꦺꦏ꧀ꦤꦺꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉​ ⁵ꦩꦸꦒ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦒꦸꦁꦒꦸꦁꦱ꧀ꦭꦮꦱ꧀ꦭꦮꦱ꧀ꦱꦺ!ꦄꦩꦺꦤ꧀꧈​

꧋ꦲꦺꦴꦫ​ꦲꦺꦤꦺꦁꦏꦧꦂ​ꦏꦧꦸꦔꦃꦲꦤ꧀ꦱꦶꦁ​ꦭꦶꦪꦤꦺ​꧉​

⁶꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦏꦺꦴꦏ꧀​ꦔ꧀ꦒꦸꦩꦸꦤ꧀ꦠꦼꦤꦤ꧀ꦔꦿꦱꦏ꧀ꦏꦏꦺꦏꦺꦴꦮꦺ​꧉​ꦭꦃ​ꦏꦺꦴꦮꦺ​ꦏꦺꦴꦏ꧀ꦒꦼꦭꦶꦱ꧀ꦠꦼꦩꦼꦤ꧀ꦤꦶꦁꦒꦭ꧀ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦲꦸꦠ꧀ꦢꦺꦏ꧀ꦤꦺꦠ​ꦱꦶꦁ​ꦩꦁꦒꦶꦭ꧀ꦏꦺꦴꦮꦺ​꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦠꦿꦺꦱ꧀ꦤꦭꦤ꧀ꦩꦼꦭꦱ꧀ꦩꦫꦁ​ꦏꦺꦴꦮꦺ​꧉​ꦭꦃ​ꦱꦲꦶꦏꦶ​ꦏꦺꦴꦮꦺ​ꦏꦺꦴꦏ꧀ꦥꦢ​ꦏꦠꦸꦠ꧀ꦏꦫꦺꦴ​“ꦏꦧꦂ​ꦏꦧꦸꦔꦃꦲꦤ꧀”ꦱꦶꦁ​ꦭꦶꦪꦤꦺ​꧈​ꦱꦶꦁ​ꦮꦸꦗꦸꦠ꧀ꦠꦺꦢꦸꦢꦸ​ꦏꦧꦂ​ꦏꦧꦸꦔꦃꦲꦤ꧀꧈​ ⁷“ꦏꦧꦂ​ꦏꦧꦸꦔꦃꦲꦤ꧀”ꦭꦶꦪꦤꦺ​ꦏꦸꦮꦶ​ꦲꦺꦴꦫ​ꦲꦺꦤꦺꦁ!ꦤꦁꦔꦶꦁ​ꦲꦏꦸ​ꦔꦺꦴꦩꦺꦴꦁꦔꦏꦺꦧꦧ꧀“ꦏꦧꦂ​ꦏꦧꦸꦔꦃꦲꦤ꧀”ꦱꦶꦁ​ꦭꦶꦪꦤꦺ​ꦏꦸꦮꦶ​ꦗꦭꦂꦫꦤ꧀ꦲꦺꦤꦺꦁꦮꦺꦴꦁ​ꦱꦶꦁ​ꦥꦢ​ꦩ꧀ꦧꦶꦔꦸꦁꦔꦏꦺꦏꦺꦴꦮꦺ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦲꦉꦥ꧀ꦩꦭꦶꦏ꧀ꦏꦧꦂ​ꦱꦶꦁ​ꦧꦼꦤꦼꦂ​ꦧꦧ꧀ꦏꦿꦶꦱ꧀ꦡꦸꦱ꧀꧈​ ⁸ꦤꦁꦔꦶꦁ​꧈​ꦱꦼꦤꦗꦤ꧀ꦤ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦥ​ꦩꦸꦭꦺꦏꦠ꧀ꦱꦁꦏꦱ꧀ꦮꦂꦒ​ꦔ꧀ꦒꦮ​ꦏꦧꦂ​ꦱꦶꦁ​ꦱꦺꦗꦺ​ꦏꦫꦺꦴ​ꦱꦶꦁ​ꦮꦶꦱ꧀ꦠꦏ꧀ꦮꦸꦭꦁꦔꦏꦺꦩꦫꦁ​ꦏꦺꦴꦮꦺ​꧈​ꦩꦸꦒꦩꦸꦒ​ꦢꦶꦱꦼꦠꦿꦥ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁹ꦩ꧀ꦧꦶꦪꦺꦤ꧀ꦲꦏꦸ​ꦮꦶꦱ꧀ꦔꦺꦴꦩꦺꦴꦁꦭꦤ꧀ꦱꦲꦶꦏꦶ​ꦠꦏ꧀ꦧꦭꦺꦤ꧀ꦤꦶꦩꦼꦤꦺꦃ​:ꦤꦺꦏ꧀ꦲꦺꦤꦺꦁꦮꦺꦴꦁ​ꦔ꧀ꦒꦮ​ꦏꦧꦂ​ꦱꦶꦁ​ꦱꦺꦗꦺ​ꦏꦫꦺꦴ​ꦱꦶꦁ​ꦮꦶꦱ꧀ꦠꦏ꧀ꦮꦸꦭꦁꦔꦏꦺꦩꦫꦁ​ꦏꦺꦴꦮꦺ​꧈​ꦩꦸꦒꦩꦸꦒ​ꦮꦺꦴꦁ​ꦏꦸꦮꦶ​ꦢꦶꦱꦼꦠꦿꦥ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹⁰꧋ꦲꦏꦸ​ꦲꦶꦏꦶ​ꦲꦺꦴꦫ​ꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦲꦏꦸ​ꦩꦤꦸꦠ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦏꦸ​ꦲꦺꦴꦫ​ꦔ꧀ꦒꦺꦴꦭꦺꦏ꧀ꦊꦩ꧀ꦭꦼꦩꦤ꧀ꦤꦺꦩꦤꦸꦁꦱ​꧉​ꦤꦺꦏ꧀ꦲꦏꦸ​ꦏꦼꦥꦺꦔꦶꦤ꧀ꦢꦶꦲꦼꦊꦩ꧀ꦩꦤꦸꦁꦱ​ꦲꦏꦸ​ꦲꦺꦴꦫ​ꦧꦶꦱ​ꦢꦢꦶ​ꦥꦼꦭꦢꦺꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​

꧋ꦥꦁꦒꦶꦭꦤ꧀ꦤꦺꦦꦈꦭꦸꦱ꧀ꦢꦢꦶ​ꦫꦱꦸꦭ꧀꧈​

¹¹꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦲꦶꦏꦶ​!ꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦠꦏ꧀ꦒꦼꦭꦂꦫꦏꦺꦏꦸꦮꦶ​ꦲꦺꦴꦫ​ꦩꦼꦠꦸ​ꦱꦁꦏꦲꦏꦭ꧀ꦭꦺ​ꦭꦤ꧀ꦥꦶꦏꦶꦂꦫꦤ꧀ꦤꦺ​ꦩꦤꦸꦁꦱ​꧈​ꦲꦺꦴꦫ​꧉​ ¹²ꦲꦏꦸ​ꦪ​ꦲꦺꦴꦫ​ꦤꦩ꧀ꦥ​ꦏꦧꦂ​ꦲꦶꦏꦶ​ꦱꦁꦏꦩꦤꦸꦁꦱ​꧉​ꦏꦫꦺꦴꦩꦼꦤꦺꦃ​꧈​ꦢꦸꦢꦸ​ꦩꦤꦸꦁꦱ​ꦱꦶꦁ​ꦩꦸꦭꦁꦔꦶꦲꦏꦸ​ꦧꦧ꧀ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦢꦺꦮꦺꦱꦶꦁ​ꦔ꧀ꦒꦼꦭꦂꦫꦏꦺꦩꦫꦁ​ꦲꦏꦸ​꧉​

¹³꧋ꦏꦺꦴꦮꦺ​ꦩꦼꦱ꧀ꦠꦶꦮꦶꦱ꧀ꦥꦢ​ꦏꦿꦸꦔꦸ​ꦧꦧ꧀ꦲꦸꦫꦶꦥ꧀ꦏꦸ​ꦩ꧀ꦧꦶꦪꦺꦤ꧀꧈​ꦲꦏꦸ​ꦢꦢꦶ​ꦮꦺꦴꦁ​ꦙꦸꦱꦶꦁ​ꦠꦼꦩꦼꦤ꧀​ꦔ꧀ꦭꦏꦺꦴꦤ꧀ꦤꦶ​ꦥꦼꦂꦤꦠꦤ꧀ꦤꦺꦲꦒꦩ​ꦙꦸ꧉​ꦏꦺꦴꦮꦺ​ꦲꦸꦒ​ꦩꦼꦱ꧀ꦠꦶꦮꦶꦱ꧀ꦥꦢ​ꦏꦿꦸꦔꦸ​ ꦲꦼꦁꦒꦺꦴꦤ꧀ꦏꦸ​ꦩꦼꦩ꧀ꦥꦼꦁ​ꦱꦏ꧀ꦲꦶꦤ꧀ꦠꦼꦂꦫꦶꦤ꧀ꦠꦼꦂꦏꦸꦔꦿꦸꦱꦏ꧀ꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦚꦶꦪꦚꦶꦪ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ¹⁴ꦲꦼꦁꦒꦺꦴꦤ꧀ꦏꦸꦔ꧀ꦭꦏꦺꦴꦤ꧀ꦤꦶꦥꦼꦂꦤꦠꦤ꧀ꦤꦺꦲꦒꦩꦙꦸꦪꦲꦺꦴꦫꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦤ꧀꧈​ꦠꦼꦩꦼꦤ꧀ꦏꦸꦔꦸꦁꦏꦸꦭ꧀ꦭꦶꦭꦶꦪꦭꦶꦪꦤꦺꦱꦶꦁꦠꦸꦁꦒꦭ꧀ꦲꦸꦩꦸꦂꦫꦺꦏꦫꦺꦴꦲꦏꦸ꧉​ꦱꦼꦩꦺꦴꦤꦺꦴꦲꦸꦒꦲꦼꦁꦒꦺꦴꦤ꧀ꦏꦸꦤꦼꦠꦼꦥ꧀ꦥꦶꦲꦢꦠ꧀ꦭꦤ꧀ꦠꦠꦕꦫꦠꦶꦁꦒꦭꦤ꧀ꦤꦺꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺꦢꦺꦮꦺ꧈​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦭꦶꦪꦭꦶꦪꦤꦺꦠꦼꦩꦼꦤ꧀ꦤꦺꦲꦼꦁꦒꦺꦴꦤ꧀ꦏꦸꦔ꧀ꦭꦏꦺꦴꦤ꧀ꦤꦶꦏꦸꦮꦶꦏꦧꦺꦃ꧉​

¹⁵꧋ꦤꦁꦔꦶꦁ​ꦥꦚ꧀ꦕꦺꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦭꦶꦃ​ꦲꦏꦸ​ꦏꦮꦶꦠ꧀ꦱꦏ꧀ꦢꦸꦫꦸꦁꦔꦺꦲꦏꦸ​ꦭꦲꦶꦂ​꧈​ꦗꦭꦂꦫꦤ꧀ꦢꦺꦏ꧀ꦤꦺꦠꦿꦺꦱ꧀ꦤꦩꦫꦁ​ꦲꦏꦸ​꧉​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦶꦭ꧀ꦲꦏꦸ​ꦏꦺꦴꦁꦏꦺꦴꦤ꧀ꦢꦢꦶ​ꦥꦼꦭꦢꦺꦤ꧀ꦤꦺ​꧉​ ¹⁶ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦲꦤꦏ꧀ꦏꦺ​ꦩꦫꦁ​ꦲꦏꦸ​꧈​ꦱꦸꦥꦪ​ꦲꦏꦸ​ꦧꦸꦢꦭ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦫꦁ​ꦧꦁꦱꦧꦁꦱ​ꦭꦶꦪ​ꦱꦶꦁ​ꦢꦸꦫꦸꦁ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦏ꧀ꦮꦶꦱ꧀ꦱꦺ​ꦲꦏꦸ​ꦲꦺꦤ꧀ꦠꦸꦏ꧀ꦥꦁꦒꦶꦭꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​ꦲꦏꦸ​ꦲꦺꦴꦫ​ꦠꦼꦫꦸꦱ꧀ꦠꦏꦺꦴꦤ꧀ꦲꦥ​ꦥꦼꦂꦠꦶꦩ꧀ꦧꦁꦔꦤ꧀ꦏꦫꦺꦴ​ꦩꦤꦸꦁꦱ​ꦱꦥ​ꦮꦲꦺ​꧈​ꦲꦺꦴꦫ​꧉​ ¹⁷ꦲꦏꦸ​ꦲꦸꦒ​ꦲꦺꦴꦫ​ꦠꦼꦫꦸꦱ꧀ꦧꦸꦢꦭ꧀ꦤꦁꦏꦸꦠꦪꦺꦫꦸꦱꦭꦺꦩ꧀ꦩꦼꦠꦸꦮꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦢꦶꦥꦁꦒꦶꦭ꧀ꦢꦢꦶ​ꦫꦱꦸꦭ꧀ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​꧉​ꦲꦏꦸ​ꦩꦭꦃ​ꦠꦼꦫꦸꦱ꧀ꦭꦸꦔ​ꦤꦁꦧꦮꦃꦄꦫꦧ꧀ꦭꦤ꧀ꦱꦁꦏꦏꦺꦴꦤꦺꦴ​ꦲꦏꦸ​ꦠꦼꦫꦸꦱ꧀ꦧꦭꦶꦏ꧀ꦩꦼꦤꦺꦃ​ꦤꦁꦏꦸꦠꦣꦩꦱ꧀ꦏꦸꦱ꧀꧈​ ¹⁸ꦱꦏ꧀ꦮꦶꦱ꧀ꦱꦺ​ꦠꦼꦭꦸꦁ​ꦠꦲꦸꦤ꧀ꦲꦏꦸ​ꦠꦼꦫꦸꦱ꧀ꦧꦸꦢꦭ꧀ꦩꦼꦤꦺꦃ​ꦤꦁꦪꦺꦫꦸꦱꦭꦺꦩ꧀ ꦏꦼꦥꦺꦔꦶꦤ꧀ꦩꦼꦠꦸꦮꦭꦤ꧀ꦔꦼꦤꦭꦶꦫꦱꦸꦭ꧀ꦦꦺꦠꦿꦸꦱ꧀꧈​ꦲꦏꦸ​ꦔꦶꦤꦼꦥ꧀ꦫꦺꦴꦁ​ꦩꦶꦁꦒꦸ​ꦤꦁꦲꦺꦴꦩꦃꦲꦺ​ꦫꦱꦸꦭ꧀ꦦꦺꦠꦿꦸꦱ꧀꧈​ ¹⁹ꦲꦏꦸ​ꦪ​ꦲꦺꦴꦫ​ꦏꦼꦠꦼꦩꦸ​ꦏꦫꦺꦴ​ꦫꦱꦸꦭ꧀ꦫꦱꦸꦭ꧀ꦭꦶꦪꦤꦺ​꧈​ꦏꦼꦗꦧ​ꦤꦩꦸꦁ​ꦪꦏꦺꦴꦧꦸꦱ꧀ ꦲꦢꦶꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀꧈​

²⁰꧋ꦱꦶꦁ​ꦠꦏ꧀ꦠꦸꦭꦶꦱ꧀ꦲꦶꦏꦶ​ꦱꦏ꧀ꦧꦼꦤꦼꦂꦫꦺ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦂꦠꦶ​ꦤꦺꦏ꧀ꦲꦏꦸ​ꦲꦺꦴꦫ​ꦒꦺꦴꦫꦺꦴꦃ​꧉​

²¹꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦲꦏꦸ​ꦠꦼꦫꦸꦱ꧀ꦭꦸꦔ​ꦤꦁꦮꦼꦂꦤꦮꦼꦂꦤ​ꦥꦁꦒꦺꦴꦤ꧀ꦤꦤ꧀ꦠꦸꦫꦸꦠ꧀ꦤꦼꦒꦫ​ꦯꦶꦫꦶꦪ​ꦭꦤ꧀ꦤꦼꦒꦫ​ꦯꦶꦭꦶꦱꦶꦪ꧉​ ²²ꦤꦁꦔꦶꦁ​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦥꦱꦩꦸꦮꦤ꧀ꦥꦱꦩꦸꦮꦤ꧀ꦏꦿꦶꦱ꧀ꦠꦼꦤ꧀ꦤꦁꦪꦸꦢꦺꦪ​ꦢꦸꦫꦸꦁ​ꦥꦢ​ꦏꦼꦤꦭ꧀ꦩꦫꦁ​ꦲꦏꦸ​꧉​ ²³ꦤꦩꦸꦁ​ꦏꦿꦸꦔꦸ​ꦧꦧ꧀ꦲꦏꦸ​ꦱꦁꦏꦮꦺꦴꦁ​ꦭꦶꦪꦭꦶꦪꦤꦺ​ꦱꦶꦁ​ꦔꦺꦴꦩꦺꦴꦁꦔꦺꦤꦺ​:“ꦮꦺꦴꦁ​ꦱꦶꦁ​ꦩ꧀ꦧꦶꦪꦺꦤ꧀ꦚꦶꦪꦚꦶꦪ​ꦲꦮꦏ꧀ꦏꦺ​ꦢꦺꦮꦺꦏꦲꦺ​ꦱꦲꦶꦏꦶ​ꦩꦭꦶꦃ​꧉​ꦩꦲꦸꦤꦺ​ꦢꦺꦏ꧀ꦤꦺꦱꦏ꧀ꦏꦸꦮꦠ꧀ꦏꦸꦮꦠ꧀ꦠꦺꦔꦿꦸꦱꦏ꧀ꦥꦼꦔꦤ꧀ꦢꦼꦭ꧀ꦭꦺ​ꦲꦮꦏ꧀ꦏꦺ​ꦢꦺꦮꦺꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦭꦃ​ꦱꦲꦶꦏꦶ​ꦢꦺꦏ꧀ꦤꦺꦏꦺꦴꦏ꧀ꦩꦭꦃ​ꦔꦺꦴꦩꦺꦴꦁꦔꦶꦏꦧꦺꦃ​ꦮꦺꦴꦁ​ꦏꦺꦴꦁꦏꦺꦴꦤ꧀ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​” ²⁴ꦢꦢꦶꦤꦺ​ꦗꦭꦂꦫꦤ꧀ꦱꦁꦏꦲꦏꦸ​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦔ꧀ꦒꦸꦁꦒꦸꦁꦒꦸꦱ꧀ꦠꦶ​ꦄꦭ꧀ꦭꦃ​꧉​

↑ ↑ ↑

꧋ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦥꦫ​ꦫꦱꦸꦭ꧀ꦭꦶꦪꦤꦺ​꧉​

꧇​꧒꧇​ ¹꧋ꦊꦠ꧀ꦥꦠ꧀ꦧꦼꦭꦱ꧀ꦠꦲꦸꦤ꧀ꦲꦏꦸ​ꦠꦼꦫꦸꦱ꧀ꦧꦭꦶꦏ꧀ꦩꦼꦤꦺꦃ​ꦤꦁꦪꦺꦫꦸꦱꦭꦺꦩ꧀ꦏꦫꦺꦴ​ꦧꦂꦤꦧꦱ꧀꧈​ꦠꦶꦠꦸꦱ꧀ꦲꦩ꧀ꦧꦫꦁ​ꦠꦏ꧀ꦲꦼꦗꦺꦏ꧀꧈​ ²ꦲꦼꦁꦒꦺꦴꦤ꧀ꦏꦸ​ꦧꦸꦢꦭ꧀ꦤꦁꦪꦺꦫꦸꦱꦭꦺꦩ꧀ꦏꦸꦮꦶ​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦺꦴꦁꦏꦺꦴꦤ꧀ꦲꦏꦸ​꧉​ꦤꦁꦏꦤ​ꦲꦏꦸ​ꦠꦼꦫꦸꦱ꧀ꦉꦩ꧀ꦧꦸꦏ꧀ꦏꦤ꧀ꦏꦫꦺꦴ​ꦥꦼꦤꦸꦤ꧀ꦠꦸꦤ꧀ꦥꦼꦤꦸꦤ꧀ꦠꦸꦤ꧀ꦤꦺꦥꦱꦩꦸꦮꦤ꧀꧈​ꦲꦏꦸ​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦧꦧ꧀ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦠꦏ꧀ꦒꦼꦭꦂꦫꦏꦺꦩꦫꦁ​ꦭꦶꦪꦭꦶꦪ​ꦧꦁꦱ​꧉​ꦲꦏꦸ​ꦔ꧀ꦒꦼꦤꦃꦔ꧀ꦒꦼꦤꦃꦲꦏꦺꦏꦸꦮꦶ​ꦩꦲꦸ​ꦏꦧꦺꦃ​꧉​ꦲꦏꦸ​ꦏꦼꦥꦺꦔꦶꦤ꧀ꦔꦼꦂꦠꦶ​ꦮꦺꦴꦁꦮꦺꦴꦁ​ꦲꦶꦏꦶ​ꦱꦼꦠꦸꦗꦸ​ꦲꦥ​ꦲꦺꦴꦫ​ꦏꦫꦺꦴ​ꦥꦼꦁꦒꦮꦺꦏꦸꦱꦶꦁ​ꦮꦶꦱ꧀ꦠꦏ꧀ꦭꦏꦺꦴꦤ꧀ꦤꦶ​ꦮꦶꦮꦶꦠ꧀​ꦩ꧀ꦧꦶꦪꦺꦤ꧀ꦠꦼꦏꦤꦺ​ꦱꦲꦶꦏꦶ​꧉​ꦲꦏꦸ​ꦏꦼꦥꦺꦔꦶꦤ꧀ꦔꦼꦂꦠꦶ​ꦲꦼꦁꦒꦺꦴꦤ꧀ꦏꦸ​ꦚꦩ꧀ꦧꦸꦠ꧀ꦠꦲꦶꦏꦶ​ꦩꦸꦱ꧀ꦥꦿ​ꦲꦥ​ꦲꦺꦴꦫ​꧉​ ³ꦤꦁꦔꦶꦁ​ꦮꦸꦗꦸꦠ꧀ꦠꦺꦠꦶꦠꦸꦱ꧀ ꦏꦚ꧀ꦕꦏꦸ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​꧈​ꦪ​ꦲꦺꦴꦫ​ꦢꦶꦥꦼꦏ꧀ꦱ​ꦏꦺꦴꦁꦏꦺꦴꦤ꧀ꦱꦸꦤꦠ꧀ꦏꦪ​ꦮꦺꦴꦁ​ꦙꦸ꧈​ꦱꦼꦤꦗꦤ꧀ꦢꦺꦏ꧀ꦤꦺꦏꦸꦮꦶ​ꦮꦺꦴꦁ​ꦒꦿꦶꦏ꧀꧈​ ⁴ꦪ​ꦧꦼꦤꦼꦂ​ꦲꦺꦤꦺꦁꦱꦶꦁ​ꦥꦢ​ꦩꦺꦭꦸ​ꦉꦩ꧀ꦧꦸꦏ꧀ꦏꦤ꧀ꦤꦁꦏꦺꦴꦤꦺꦴ​ꦭꦤ꧀ꦔꦺꦴꦩꦺꦴꦁꦤꦺꦏ꧀ꦠꦶꦠꦸꦱ꧀ꦏꦸꦢꦸ​ꦱꦸꦤꦠ꧀꧈​ꦏꦸꦮꦶ​ꦮꦺꦴꦁ​ꦱꦶꦁ​ꦤꦩꦸꦁ​ꦔꦏꦸ​ꦤꦺꦏ꧀ꦏꦿꦶꦱ꧀ꦠꦼꦤ꧀ ꦤꦁꦔꦶꦁ​ꦠꦼꦏꦤꦺ​ꦤꦁꦧꦼꦒꦤ꧀ꦢꦿꦶꦁꦔꦤ꧀ꦏꦺꦴꦤꦺꦴ​ꦤꦩꦸꦁ​ꦏꦼꦥꦺꦔꦶꦤ꧀ꦔꦼꦂꦠꦶ​ꦱꦶꦁ​ꦢꦶꦮꦸꦭꦁꦔꦏꦺꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦥ​:ꦲꦮꦏ꧀ꦏꦺ​ꦢꦺꦮꦺꦩꦸꦭꦁꦔꦶꦮꦺꦴꦁꦮꦺꦴꦁ​ꦏꦺꦴꦁꦏꦺꦴꦤ꧀​ꦔ꧀ꦭꦏꦺꦴꦤ꧀ꦤꦶ​ꦥꦼꦂꦤꦠꦤ꧀ꦤꦺꦲꦒꦩ​ꦙꦸꦲꦥ​ꦲꦺꦴꦫ​꧉​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦧꦺꦃ​ꦪ​ꦮꦶꦱ꧀ꦲꦺꦴꦫ​ꦲꦸꦱꦃꦩꦤꦸꦠ꧀ꦥꦼꦂꦤꦠꦤ꧀ꦤꦺꦲꦒꦩ​ꦙꦸ꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦮꦺꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦏꦉꦥ꧀ꦥꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦢꦶꦒꦮꦺ​ꦱ꧀ꦭꦥ꦳꧀ꦥ꦳ꦺꦥꦼꦂꦤꦠꦤ꧀ꦤꦺꦲꦒꦩ​ꦙꦸ꧉​ ⁵ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦧ꧀ꦭꦱ꧀ꦲꦺꦴꦫ​ꦩꦸꦤ꧀ꦢꦸꦂ​꧉​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦒꦼꦊꦩ꧀ꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦗꦭꦂꦫꦤ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦪꦏꦸꦮꦶ​:ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦱꦶꦁ​ꦠꦸꦱ꧀ꦩꦫꦁ​ꦏꦺꦴꦮꦺ​꧉​

⁶꧋ꦮꦸꦗꦸꦠ꧀ꦠꦺꦥꦼꦤꦸꦤ꧀ꦠꦸꦤ꧀ꦥꦼꦤꦸꦤ꧀ꦠꦸꦤ꧀ꦏꦺꦴꦤꦺꦴ​꧈​ꦱꦶꦁ​ꦗꦫꦺꦤꦺ​ꦒꦼꦢꦺꦧꦔꦼꦠ꧀ꦥꦁꦏꦠ꧀ꦠꦺ​꧈​ꦪ​ꦲꦺꦴꦫ​ꦔꦺꦴꦩꦺꦴꦁꦲꦥꦲꦥ​ꦧꦧ꧀ꦱꦶꦁ​ꦠꦏ꧀ꦮꦸꦭꦁꦔꦏꦺ꧉​ꦏꦁꦒꦺꦴ​ꦲꦏꦸ​ꦪ​ꦲꦺꦴꦫ​ꦢꦢꦶ​ꦱꦼꦧꦧ꧀ ꦮꦺꦴꦁꦮꦺꦴꦁ​ꦏꦸꦮꦶ​ꦒꦼꦢꦺꦥꦁꦏꦠ꧀ꦠꦺ​ꦲꦥ​ꦲꦺꦴꦫ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦲꦺꦴꦫ​ꦚꦮꦁ​ꦥꦁꦏꦠ꧀ꦠꦺ​ꦮꦺꦴꦁ​꧉​ ⁷ꦤꦁꦔꦶꦁ​ꦮꦺꦴꦁꦮꦺꦴꦁ​ꦏꦸꦮꦶ​ꦩꦭꦃ​ꦥꦢ​ꦢꦸꦤꦸꦁꦤꦺꦏ꧀ꦲꦏꦸ​ꦲꦶꦏꦶ​ꦥꦚ꧀ꦕꦺꦤ꧀ꦢꦶꦏꦺꦏ꧀ꦏꦶꦧꦒꦺꦪꦤ꧀ꦭꦶꦪꦤꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​:ꦲꦏꦸ​ꦏꦸꦢꦸ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦫꦁ​ꦭꦶꦪ​ꦧꦁꦱ​꧈​ꦱꦶꦁ​ꦢꦸꦢꦸ​ꦧꦁꦱ​ꦙꦸ꧉​ꦲꦺꦴꦫ​ꦧꦺꦢ​ꦏꦪ​ꦫꦱꦸꦭ꧀ꦦꦺꦠꦿꦸꦱ꧀ ꦱꦶꦁ​ꦢꦶꦥꦁꦒꦶꦭ꧀ꦏꦫꦺꦴ​ꦒꦸꦱ꧀ꦠꦶ​ꦲꦸꦒ​꧈​ꦤꦁꦔꦶꦁ​ꦢꦺꦏ꧀ꦤꦺꦲꦺꦤ꧀ꦠꦸꦏ꧀ꦧꦒꦺꦪꦤ꧀ꦧꦁꦱ​ꦙꦸ꧉​ ⁸ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦿꦺꦤ꧀ꦠꦃ​ꦭꦤ꧀ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦫꦱꦸꦭ꧀ꦦꦺꦠꦿꦸꦱ꧀ꦏꦁꦒꦺꦴ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦩꦫꦁ​ꦧꦁꦱ​ꦙꦸ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦱꦶꦁ​ꦩꦿꦺꦤ꧀ꦠꦃ​ꦭꦤ꧀ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦲꦏꦸ​ꦏꦁꦒꦺꦴ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦩꦫꦁ​ꦭꦶꦪꦭꦶꦪ​ꦧꦁꦱ​꧉​ ⁹ꦫꦱꦸꦭ꧀ꦪꦏꦺꦴꦧꦸꦱ꧀ ꦫꦱꦸꦭ꧀ꦦꦺꦠꦿꦸꦱ꧀ ꦫꦱꦸꦭ꧀ꦭꦤ꧀ꦪꦺꦴꦲꦤꦼꦱ꧀ ꦱꦶꦁ​ꦥꦢ​ꦢꦶꦲꦁꦒꦼꦥ꧀ꦥꦼꦔꦉꦥ꧀ꦥꦺ​ꦥꦱꦩꦸꦮꦤ꧀ ꦥꦢ​ꦢꦸꦤꦸꦁꦏꦧꦺꦃ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦼꦏꦺꦏ꧀ꦏꦶꦥꦼꦁꦒꦮꦺꦏꦸꦲꦶꦏꦶ​ꦩꦫꦁ​ꦲꦏꦸ​꧉​ꦩꦸꦭꦤꦺ​ꦠꦼꦫꦸꦱ꧀ꦥꦢ​ꦱꦭꦩ꧀ꦩꦤ꧀ꦠꦔꦤ꧀ꦏꦫꦺꦴ​ꦲꦏꦸ​ꦭꦤ꧀ꦧꦂꦤꦧꦱ꧀ ꦏꦁꦒꦺꦴ​ꦠꦤ꧀ꦢꦤꦺꦏ꧀ꦥꦢ​ꦱꦼꦠꦸꦗꦸ​꧈​ꦠꦼꦒꦼꦱ꧀ꦱꦺ​꧈​ꦢꦺꦏ꧀ꦤꦺꦥꦢ​ꦚꦩ꧀ꦧꦸꦠ꧀ꦠꦤꦁꦠꦼꦔꦃꦲꦺ​ꦧꦁꦱ​ꦙꦸꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦚꦩ꧀ꦧꦸꦠ꧀ꦠꦤꦁꦠꦼꦔꦃꦲꦺ​ꦭꦶꦪꦭꦶꦪ​ꦧꦁꦱ​꧉​ ¹⁰ꦤꦁꦔꦶꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦚꦸꦮꦸꦤ꧀ꦧꦫꦁ​ꦱꦶꦗꦶ​ꦲꦶꦏꦶ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦪꦏꦸꦮꦶ​꧈​ꦲꦮꦏ꧀ꦏꦺ​ꦢꦺꦮꦺꦲꦗ​ꦱꦩ꧀ꦥꦺꦏ꧀ꦭꦭꦶ​ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦤꦁꦱꦏ꧀ꦠꦼꦔꦃꦲꦺ​ꦥꦱꦩꦸꦮꦤ꧀ꦥꦱꦩꦸꦮꦤ꧀ꦧꦁꦱ​ꦙꦸ꧉​ꦥꦽꦏꦫ​ꦏꦸꦮꦶ​ꦪ​ꦥꦚ꧀ꦕꦺꦤ꧀ꦠꦏ꧀ꦲꦼꦩꦼꦤ꧀ꦤꦼꦩꦼꦤ꧀ꦤꦏꦺꦠꦼꦤꦤ꧀꧈​

꧋ꦫꦱꦸꦭ꧀ꦦꦈꦭꦸꦱ꧀ꦚꦼꦤꦺꦤ꧀ꦤꦶꦫꦱꦸꦭ꧀ꦦꦺꦠꦿꦸꦱ꧀꧈​

¹¹꧋ꦤꦁꦔꦶꦁ​ꦢꦺꦴꦁꦔꦺꦫꦱꦸꦭ꧀ꦦꦺꦠꦿꦸꦱ꧀ꦠꦼꦏ​ꦤꦁꦏꦸꦠꦄꦤ꧀ꦠꦶꦪꦺꦴꦏꦶꦲꦏꦸ​ꦥꦚ꧀ꦕꦺꦤ꧀​ꦧ꧀ꦭꦏ​ꦠꦼꦤꦤ꧀ꦏꦫꦺꦴ​ꦢꦺꦏ꧀ꦤꦺ꧉​ꦥꦚ꧀ꦕꦺꦤ꧀ꦠꦏ꧀ꦱꦼꦤꦺꦤ꧀ꦤꦶ꧈​ꦗꦭꦂꦫꦤ꧀ꦢꦺꦏ꧀ꦤꦺꦏ꧀ꦭꦺꦫꦸ​ꦧꦔꦼꦠ꧀꧈​ꦲꦥ​ꦏ꧀ꦭꦺꦫꦸꦤꦺ? ¹²ꦩꦲꦸꦤꦺ​ꦫꦱꦸꦭ꧀ꦦꦺꦠꦿꦸꦱ꧀ꦒꦼꦊꦩ꧀ꦩꦁꦔꦤ꧀ꦧꦉꦁ​ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦿꦶꦱ꧀ꦠꦼꦤ꧀ꦱꦶꦁ​ꦲꦺꦴꦫ​ꦱꦸꦤꦠ꧀꧈​ꦏꦢꦸꦁ​ꦮꦺꦴꦁꦔꦺ​ꦪꦏꦺꦴꦧꦸꦱ꧀ꦱꦁꦏꦪꦺꦫꦸꦱꦭꦺꦩ꧀ꦠꦼꦏ​ꦤꦁꦄꦤ꧀ꦠꦶꦪꦺꦴꦏꦶꦏꦺꦴꦤꦺꦴ​ꦏꦺꦴꦏ꧀ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦲꦺꦴꦫ​ꦒꦼꦊꦩ꧀ꦩꦁꦔꦤ꧀ꦧꦉꦁ​ꦩꦼꦤꦺꦃ​ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦿꦶꦱ꧀ꦠꦼꦤ꧀ꦏꦸꦮꦶ​꧉​ꦗꦭꦂꦫꦤ꧀ꦢꦺꦏ꧀ꦤꦺꦮꦼꦢꦶ​ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦿꦶꦱ꧀ꦠꦼꦤ꧀ꦱꦶꦁ​ꦱꦁꦏꦪꦺꦫꦸꦱꦭꦺꦩ꧀꧈​ꦲꦮꦶꦠ꧀ꦏꦉꦥ꧀ꦥꦺ​ꦮꦺꦴꦁꦮꦺꦴꦁ​ꦙꦸꦱꦶꦁ​ꦱꦁꦏꦪꦺꦫꦸꦱꦭꦺꦩ꧀ꦲꦶꦏꦶ​꧈​ꦏꦧꦺꦃ​ꦮꦺꦴꦁ​ꦱꦶꦁ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦲꦸꦒ​ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀꧈​ꦩꦸꦭꦤꦺ​ꦮꦺꦴꦁꦮꦺꦴꦁ​ꦲꦶꦏꦶ​ꦩꦶꦏꦶꦂ​ꦤꦺꦏ꧀ꦩꦁꦔꦤ꧀ꦧꦉꦁ​ꦏꦫꦺꦴ​ꦮꦺꦴꦁ​ꦱꦶꦁ​ꦲꦺꦴꦫ​ꦱꦸꦤꦠ꧀ꦏꦸꦮꦶ​ꦲꦺꦴꦫ​ꦲꦥꦶꦏ꧀꧈​ ¹³ꦲꦺꦴꦫ​ꦤꦩꦸꦁ​ꦫꦱꦸꦭ꧀ꦦꦺꦠꦿꦸꦱ꧀ꦢꦺꦮꦺ꧈​ꦤꦁꦔꦶꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦙꦸꦱꦶꦁ​ꦭꦶꦪꦤꦺ​ꦲꦩ꧀ꦧꦫꦁ​ꦠꦼꦫꦸꦱ꧀ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦺꦩꦺꦭꦸ​ꦩꦸꦤ꧀ꦢꦸꦂ​ꦤꦶꦫꦸ​ꦫꦱꦸꦭ꧀ꦦꦺꦠꦿꦸꦱ꧀꧈​ꦩꦭꦃ​ꦧꦂꦤꦧꦱ꧀ꦲꦩ꧀ꦧꦫꦁ​ꦩꦺꦭꦸꦩꦺꦭꦸ​ꦏ꧀ꦭꦏꦸꦮꦤ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧉​ ¹⁴ꦤꦁꦔꦶꦁ​ꦏꦢꦸꦁ​ꦲꦏꦸ​ꦤꦶꦠꦺꦤ꧀ꦤꦶ​ꦤꦺꦏ꧀ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦫꦱꦸꦭ꧀ꦦꦺꦠꦿꦸꦱ꧀ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦏꦸꦮꦶ​ꦲꦺꦴꦫ​ꦕꦺꦴꦕꦺꦴꦏ꧀​ꦏꦫꦺꦴ​ꦥꦶꦮꦸꦭꦁ​ꦱꦁꦏꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦏꦸ​ꦠꦼꦫꦸꦱ꧀ꦚꦼꦤꦺꦤ꧀ꦤꦶꦫꦱꦸꦭ꧀ꦦꦺꦠꦿꦸꦱ꧀ꦤꦁꦔꦉꦥ꧀ꦥꦺ​ꦮꦺꦴꦁ​ꦲꦺꦴꦏꦺꦃꦏꦺꦴꦤꦺꦴ​꧉​ꦲꦏꦸ​ꦔꦺꦴꦩꦺꦴꦁꦔꦺꦤꦺ​:“ꦱꦼꦤꦗꦤ꧀ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦙꦸ꧈​ꦤꦁꦔꦶꦁ​ꦏꦺꦴꦮꦺ​ꦢꦺꦮꦺꦮꦶꦱ꧀ꦲꦺꦴꦫ​ꦤꦸꦫꦸꦠ꧀ꦥꦼꦂꦤꦠꦤ꧀ꦤꦺꦮꦺꦴꦁ​ꦙꦸ꧉​ꦭꦃ​ꦏꦺꦴꦏ꧀ꦏꦺꦴꦮꦺ​ꦲꦉꦥ꧀ꦩꦼꦏ꧀ꦱ​ꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦏꦺꦴꦁꦏꦺꦴꦤ꧀ꦲꦸꦫꦶꦥ꧀ꦏꦪ​ꦮꦺꦴꦁ​ꦙꦸ꧉​”

¹⁵꧋ꦧꦼꦤꦼꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦺꦴꦁ​ꦙꦸꦱꦁꦏꦭꦲꦶꦂꦫꦤ꧀ ꦢꦸꦢꦸ​ꦧꦁꦱ​ꦭꦶꦪ​ꦱꦶꦁ​ꦔ꧀ꦭꦁꦒꦂ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁶ꦤꦁꦔꦶꦁ​ꦱꦼꦤꦗꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦔꦼꦂꦠꦶ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦮꦶꦠ꧀ꦕꦶꦭꦶꦏ꧀ ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦩꦤꦸꦁꦱ​ꦧꦶꦱꦤꦺ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦴꦫ​ꦗꦭꦂꦫꦤ꧀​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦠꦺꦲꦒꦩ​ꦙꦸ꧈​ꦤꦁꦔꦶꦁ​ꦩꦤꦸꦁꦱ​ꦏꦼꦠꦩ꧀ꦥ꧈​ꦗꦭꦂꦫꦤ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

꧋ꦱꦼꦩꦺꦴꦤꦺꦴ​ꦲꦸꦒ​ꦲꦮꦏ꧀ꦏꦺ​ꦢꦺꦮꦺ꧈​ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦫꦸꦏꦸꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦠꦼꦒꦼꦱ꧀ꦱꦺ​꧈​ꦲꦮꦏ꧀ꦏꦺ​ꦢꦺꦮꦺꦢꦶꦠꦩ꧀ꦥ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦺꦴꦫ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦠꦺꦲꦒꦩ​ꦙꦸ꧉​ꦲꦺꦴꦫ​ꦲꦺꦤꦺꦁꦮꦺꦴꦁ​ꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦗꦭꦂꦫꦤ꧀ꦮꦺꦴꦁ​ꦏꦸꦮꦶ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦠꦺꦲꦒꦩ​꧉​ ¹⁷ꦭꦃ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦁ​ꦮꦺꦴꦁ​ꦙꦸꦏꦼꦥꦺꦔꦶꦤ꧀ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦂꦫꦤ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ꦢꦢꦶꦤꦺ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦢꦸꦤꦸꦁꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦸꦒ​ꦮꦺꦴꦁ​ꦢꦺꦴꦱ​꧈​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦮꦺꦴꦁ​ꦭꦶꦪ​ꦧꦁꦱ​ꦱꦶꦁ​ꦲꦺꦴꦫ​ꦔꦼꦂꦠꦶ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦺꦴ​꧈​ꦭꦃ​ꦤꦺꦏ꧀ꦔꦺꦴꦤꦺꦴ​꧈​ꦲꦥ​ꦏꦿꦶꦱ꧀ꦡꦸꦱ꧀ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦢꦺꦴꦱ​?ꦥꦶꦱꦤ꧀ꦥꦶꦱꦤ꧀ ꦲꦺꦴꦫ​! ¹⁸ꦤꦁꦔꦶꦁ​ꦱꦼꦩꦸꦁꦒꦺꦴꦤ꧀ꦤꦺꦲꦏꦸ​ꦲꦶꦗꦶꦏ꧀ꦩꦶꦏꦶꦂ​ꦤꦺꦏ꧀ꦲꦏꦸ​ꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦂꦫꦤ꧀​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦲꦒꦩ​꧈​ꦲꦏꦸ​ꦩꦼꦱ꧀ꦠꦶꦏ꧀ꦭꦺꦫꦸ​ꦠꦼꦤꦤ꧀꧈​ ¹⁹ꦩꦶꦠꦸꦫꦸꦠ꧀ꦮꦺꦠ꧀ꦠꦺꦲꦒꦩ​ꦙꦸꦲꦏꦸ​ꦲꦶꦏꦶ​ꦮꦶꦱ꧀ꦩꦠꦶ​꧈​ꦗꦭꦂꦫꦤ꧀ꦲꦏꦸ​ꦮꦶꦱ꧀ꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦏꦸꦮꦶ​ꦩꦼꦤꦺꦃ​꧈​ꦱꦸꦥꦪ​ꦲꦏꦸ​ꦱꦲꦶꦏꦶ​ꦧꦶꦱ​ꦲꦸꦫꦶꦥ꧀ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁰ꦲꦏꦸ​ꦱꦲꦶꦏꦶ​ꦮꦶꦱ꧀ꦏꦠꦸꦠ꧀ꦩꦠꦶ​ꦏꦥꦼꦤ꧀ꦠꦺꦁꦏꦫꦺꦴ​ꦏꦿꦶꦱ꧀ꦡꦸꦱ꧀ ꦱꦶꦁ​ꦲꦶꦗꦶꦏ꧀ꦲꦸꦫꦶꦥ꧀ꦲꦶꦏꦸ​ꦢꦸꦢꦸ​ꦲꦏꦸ​ꦩꦼꦤꦺꦃ​꧈​ꦤꦁꦔꦶꦁ​ꦏꦿꦶꦱ꧀ꦡꦸꦱ꧀ꦱꦶꦁ​ꦲꦸꦫꦶꦥ꧀ꦲꦶꦁ​ꦲꦏꦸ​꧉​ꦭꦤ꧀ꦱꦸꦮꦺꦤꦺ​ꦲꦏꦸ​ꦲꦸꦫꦶꦥ꧀ꦲꦶꦁ​ꦢꦺꦴꦚ​ꦏꦺꦤꦺ​꧈​ꦲꦼꦁꦒꦺꦴꦤ꧀ꦏꦸ​ꦧꦶꦱ​ꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦗꦭꦂꦫꦤ꧀ꦲꦏꦸ​ꦥꦽꦕꦪ​ꦩꦫꦁ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦿꦺꦱ꧀ꦤꦤ꧀ꦤꦶꦲꦏꦸ​꧉​ꦢꦺꦏ꧀ꦤꦺꦱꦶꦁ​ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦢꦶꦥꦠꦺꦤ꧀ꦤꦶ​ꦔ꧀ꦭꦧꦸꦃꦲꦶ​ꦲꦏꦸ​꧉​ ²¹ꦤꦩꦸꦁ​ꦩꦼꦁꦏꦺꦴꦤꦺꦴ​ꦏꦸꦮꦶ​ꦏꦮꦼꦭꦱ꧀ꦱꦤ꧀ꦤꦺ​ꦭꦤ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦩꦶꦒꦸꦤꦤꦶ​ꦏꦁꦒꦺꦴ​ꦲꦏꦸ​꧉​ꦱꦼꦩꦸꦁꦒꦺꦴꦤ꧀ꦤꦺꦩꦤꦸꦁꦱ​ꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦂꦫꦤ꧀​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦠꦺꦲꦒꦩ​꧈​ꦠꦶꦧꦏꦺ​ꦏꦿꦶꦱ꧀ꦡꦸꦱ꧀ꦲꦼꦁꦒꦺꦴꦤꦺ​ꦩꦠꦶ​ꦪ​ꦠꦤ꧀ꦥ​ꦒꦸꦤ​꧉​

↑ ↑ ↑

꧋ꦱ꧀ꦭꦩꦼꦠ꧀ꦗꦭꦂꦫꦤ꧀ꦥꦽꦕꦪ​꧉​

꧇​꧓꧇​ ¹꧋ꦥꦫ​ꦱꦼꦢꦸꦭꦸꦂꦏꦸ​ꦤꦁꦒꦭꦱꦶꦪꦴ!ꦏꦺꦴꦮꦺ​ꦗꦤ꧀​ꦏ꧀ꦭꦺꦫꦸ​ꦧꦔꦼꦠ꧀!ꦱꦥ​ꦠ​ꦱꦶꦁ​ꦩ꧀​ꦧ꧀ꦭꦶꦔꦼꦂꦫꦏꦺꦏꦺꦴꦮꦺ​?ꦲꦺꦴꦫ​ꦏꦸꦫꦁꦏꦸꦫꦁꦲꦼꦁꦒꦺꦴꦤ꧀ꦏꦸ​ꦤ꧀ꦢꦸꦤꦸꦁꦔꦏꦺꦩꦫꦁ​ꦏꦺꦴꦮꦺ​ꦤꦺꦏ꧀ꦏꦿꦶꦱ꧀ꦡꦸꦱ꧀ꦩꦠꦶ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧉​ ²ꦗꦗꦭ꧀ꦢꦶꦥꦶꦏꦶꦂ​ꦱꦶꦁ​ꦲꦥꦶꦏ꧀:ꦲꦥ​ꦲꦼꦁꦒꦺꦴꦤ꧀ꦩꦸ​ꦤꦩ꧀ꦥ​ꦫꦺꦴꦃ​ꦱꦸꦕꦶ​ꦏꦸꦮꦶ​ꦗꦭꦂꦫꦤ꧀ꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦲꦒꦩ​ꦲꦥ​ꦗꦭꦂꦫꦤ꧀ꦏꦺꦴꦮꦺ​ꦔꦿꦸꦔꦺꦴꦏ꧀ꦏꦏꦺꦭꦤ꧀ꦥꦽꦕꦪ​ꦩꦫꦁ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀? ³ꦏꦺꦴꦏ꧀ꦏꦼꦧꦔꦼꦠ꧀ꦠꦼꦤ꧀​ꦏ꧀ꦭꦺꦫꦸꦩꦸꦏꦸꦮꦶ​?ꦭꦃ​ꦏꦺꦴꦮꦺ​ꦮꦶꦱ꧀ꦩꦺꦴꦭꦃꦲꦶꦲꦸꦫꦶꦥ꧀ꦲꦚꦂ​ꦱꦁꦏꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦏ꧀ꦱꦲꦶꦏꦶ​ꦲꦸꦫꦶꦥ꧀ꦩꦸ​ꦱꦶꦁ​ꦲꦚꦂ​ꦏꦸꦮꦶ​ꦲꦉꦥ꧀ꦲꦩ꧀ꦧꦺꦴꦏ꧀ꦠꦼꦫꦸꦱ꧀ꦱꦏꦺꦔꦁꦒꦺꦴ​ꦏꦼꦏꦸꦮꦠ꧀ꦠꦤ꧀ꦩꦸ​ꦢꦺꦮꦺ? ⁴ꦠꦶꦧꦏꦺ​ꦲꦼꦁꦒꦺꦴꦤ꧀ꦩꦸ​ꦔ꧀ꦭꦏꦺꦴꦤ꧀ꦤꦶ​ꦏꦔꦺꦭ꧀ꦭꦤ꧀​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦲꦺꦴꦫ​ꦲꦺꦤꦺꦁꦒꦸꦤꦤꦺ​ꦧ꧀ꦭꦱ꧀꧈​ꦲꦺꦴꦫ​ꦏꦪ​ꦔꦺꦴꦤꦺꦴ​ꦠ​? ⁵ꦒꦸꦱ꧀ꦠꦶ​ꦄꦭ꧀ꦭꦃ​ꦭꦲꦸꦠ꧀ꦮꦶꦱ꧀ꦔꦼꦏꦺꦏ꧀ꦏꦶꦫꦺꦴꦃ​ꦱꦸꦕꦶ​ꦭꦤ꧀ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦤꦁꦠꦼꦔꦃꦩꦸ​ꦠ​?ꦲꦥ​ꦏꦸꦮꦶ​ꦩꦲꦸ​ꦏꦧꦺꦃ​ꦏ꧀ꦭꦏꦺꦴꦤ꧀ꦗꦭꦂꦫꦤ꧀ꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦲꦒꦩ​ꦲꦥ​ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦔꦿꦸꦔꦺꦴꦏ꧀ꦏꦏꦺꦭꦤ꧀ꦥꦽꦕꦪ​ꦩꦫꦁ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀?

⁶꧋ꦢꦶꦲꦺꦭꦶꦁ​ꦧꦥ​ꦄꦨꦿꦲꦩ꧀꧈​ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦢꦺꦏ꧀ꦤꦺꦏꦼꦠꦩ꧀ꦥ꧉​ ⁷ꦢꦢꦶꦤꦺ​ꦏꦺꦴꦮꦺ​ꦱꦲꦶꦏꦶ​ꦢꦸꦤꦸꦁꦤꦺꦏ꧀ꦮꦺꦴꦁꦮꦺꦴꦁ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦏꦸꦮꦶ​ꦪ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦧꦥ​ꦄꦨꦿꦲꦩ꧀꧈​ ⁸ꦏꦶꦠꦧ꧀ꦱꦸꦕꦶ​ꦮꦶꦱ꧀ꦔꦺꦴꦩꦺꦴꦁꦔꦏꦺꦱꦏ꧀ꦢꦸꦫꦸꦁꦔꦺ꧈​ꦤꦺꦏ꧀ꦧꦁꦱ​ꦭꦶꦪ​꧈​ꦱꦶꦁ​ꦢꦸꦢꦸ​ꦙꦸ꧈​ꦧꦏꦭ꧀ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦗꦭꦂꦫꦤ꧀ꦱꦁꦏꦥꦽꦕꦪ​꧉​ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦩꦫꦁ​ꦧꦥ​ꦄꦨꦿꦲꦩ꧀ꦔꦺꦤꦺ​:“ꦗꦭꦂꦫꦤ꧀ꦱꦁꦏꦏꦺꦴꦮꦺ​ꦏꦧꦺꦃ​ꦧꦁꦱ​ꦤꦁꦧꦸꦩꦶ​ꦧꦏꦭ꧀ꦠꦏ꧀ꦧꦼꦂꦏꦃꦲꦶ​꧉​” ⁹ꦧꦥ​ꦄꦨꦿꦲꦩ꧀ꦥꦽꦕꦪ​꧈​ꦩꦸꦭꦤꦺ​ꦢꦺꦏ꧀ꦤꦺꦢꦶꦧꦼꦂꦏꦃꦲꦶ​꧉​ꦱꦼꦩꦺꦴꦤꦺꦴ​ꦲꦸꦒ​꧈​ꦏꦧꦺꦃ​ꦮꦺꦴꦁ​ꦱꦶꦁ​ꦥꦽꦕꦪ​ꦥꦢ​ꦢꦶꦧꦼꦂꦏꦃꦲꦶ​ꦏꦪ​ꦧꦥ​ꦄꦨꦿꦲꦩ꧀꧈​

¹⁰꧋ꦤꦁꦔꦶꦁ​ꦏꦧꦺꦃ​ꦮꦺꦴꦁ​ꦱꦶꦁ​ꦥꦢ​ꦚ꧀ꦗꦒꦏ꧀ꦏꦏꦺꦮꦺꦠ꧀ꦠꦺꦲꦒꦩ​ꦮꦶꦱ꧀ꦢꦶꦲꦁꦒꦼꦥ꧀ꦱꦭꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦏꦶꦠꦧ꧀ꦱꦸꦕꦶ​ꦏꦼꦠꦸꦭꦶꦱ꧀ꦔꦺꦤꦺ​:“ꦱꦥ​ꦮꦲꦺ​ꦱꦶꦁ​ꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦠꦺꦲꦒꦩ​ꦱꦏ꧀ꦏꦧꦺꦃꦲꦺꦏꦪ​ꦱꦏ꧀ꦩꦼꦱ꧀ꦠꦶꦤꦺ꧈​ꦮꦺꦴꦁ​ꦏꦸꦮꦶ​ꦢꦶꦲꦁꦒꦼꦥ꧀ꦱꦭꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​” ¹¹ꦭꦤ꧀ꦲꦸꦒ​ꦪ​ꦮꦶꦱ꧀ꦠꦼꦫꦁ​ꦧꦔꦼꦠ꧀ꦤꦺꦏ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦗꦭꦂꦫꦤ꧀ꦮꦺꦴꦁ​ꦏꦸꦮꦶ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦠꦺꦲꦒꦩ​꧉​ꦲꦮꦶꦠ꧀ꦏꦶꦠꦧ꧀ꦱꦸꦕꦶ​ꦮꦶꦱ꧀ꦔꦺꦴꦩꦺꦴꦁꦔꦺꦤꦺ​:“ꦮꦺꦴꦁ​ꦱꦶꦁ​ꦏꦲꦁꦒꦼꦥ꧀ꦧꦼꦤꦼꦂ​ꦭꦤ꧀ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦧꦏꦭ꧀ꦲꦸꦫꦶꦥ꧀ꦗꦭꦂꦫꦤ꧀ꦱꦁꦏꦥꦽꦕꦪ​꧉​” ¹²ꦮꦺꦠ꧀ꦠꦺꦲꦒꦩ​ꦏꦸꦮꦶ​ꦲꦺꦴꦫ​ꦔꦁꦒꦺꦴꦏ꧀ꦏꦏꦺꦥꦼꦔꦤ꧀ꦢꦼꦭ꧀꧈​ꦏꦶꦠꦧ꧀ꦱꦸꦕꦶ​ꦔꦺꦴꦩꦺꦴꦁꦔꦏꦺꦔꦺꦤꦺ​ꦧꦧ꧀ꦲꦶꦏꦶ​:“ꦱꦥ​ꦮꦲꦺ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦠꦺꦲꦒꦩ​ꦧꦏꦭ꧀ꦲꦸꦫꦶꦥ꧀ꦗꦭꦂꦫꦤ꧀ꦱꦁꦏꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦩꦲꦸ​꧉​”

¹³꧋ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦲꦺꦴꦫ​ꦢꦶꦲꦁꦒꦼꦥ꧀ꦱꦭꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦢꦢꦶ​ꦮꦏꦶꦭ꧀ꦭꦺ​ꦲꦮꦏ꧀ꦏꦺ​ꦢꦺꦮꦺꦚꦁꦒ​ꦱꦭꦃꦲꦺ​ꦲꦮꦏ꧀ꦏꦺ​ꦢꦺꦮꦺ꧉​ꦤꦁꦏꦶꦠꦧ꧀ꦱꦸꦕꦶ​ꦏꦼꦠꦸꦭꦶꦱ꧀ꦔꦺꦤꦺ​:“ꦱꦥ​ꦮꦲꦺ​ꦱꦶꦁ​ꦏꦥꦼꦤ꧀ꦠꦺꦁꦤꦁꦏꦪꦸ​ꦢꦶꦲꦁꦒꦼꦥ꧀ꦱꦭꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​” ¹⁴ꦲꦼꦁꦒꦺꦴꦤꦺ​ꦏꦿꦶꦱ꧀ꦡꦸꦱ꧀​ꦔ꧀ꦭꦏꦺꦴꦤ꧀ꦤꦶ​ꦏꦸꦮꦶ​ꦩꦲꦸ​ꦠꦸꦗꦸꦮꦤ꧀ꦤꦺꦱꦸꦥꦪ​ꦏꦧꦺꦃ​ꦧꦁꦱ​ꦧꦶꦱ​ꦤꦩ꧀ꦥ​ꦧꦼꦂꦏꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦩꦫꦁ​ꦧꦥ​ꦄꦨꦿꦲꦩ꧀꧈​ꦠꦼꦒꦼꦱ꧀ꦱꦺ​꧈​ꦏꦧꦺꦃ​ꦧꦁꦱ​ꦱꦶꦁ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦱꦥ​ꦱꦶꦁ​ꦥꦽꦕꦪ​ꦲꦸꦒ​ꦧꦶꦱ​ꦤꦩ꧀ꦥ​ꦫꦺꦴꦃ​ꦱꦸꦕꦶ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹⁵꧋ꦥꦫ​ꦱꦼꦢꦸꦭꦸꦂ​!ꦱꦲꦶꦏꦶ​ꦲꦉꦥ꧀ꦠꦏ꧀ꦢꦸꦤꦸꦁꦔꦏꦺꦏꦫꦺꦴ​ꦒꦩ꧀ꦧꦂ​ꦱꦶꦁ​ꦭꦸꦮꦶꦃ​ ꦒꦩ꧀ꦥꦁ​꧉​ꦤꦺꦏ꧀ꦲꦺꦤꦺꦁꦮꦺꦴꦁ​ꦭꦺꦴꦫꦺꦴ​ꦥꦢ​ꦱꦼꦠꦸꦗꦸ​ꦲꦶꦁ​ꦱꦏ꧀ꦮꦶꦗꦶꦤꦺꦥꦽꦏꦫ​꧈​ꦮꦺꦴꦁ​ꦭꦺꦴꦫꦺꦴ​ꦏꦸꦮꦶ​ꦠꦼꦫꦸꦱ꧀​ꦔ꧀ꦒꦮꦺ​ꦥꦽꦗꦚ꧀ꦗꦶꦪꦤ꧀ꦭꦤ꧀ꦥꦽꦗꦚ꧀ꦗꦶꦪꦤ꧀ꦏꦸꦮꦶ​ꦠꦼꦫꦸꦱ꧀ꦢꦶꦠꦤ꧀ꦢꦠꦔꦤ꧀꧈​ꦱꦼꦤꦗꦤ꧀ꦤꦩꦸꦁ​ꦥꦽꦗꦚ꧀ꦗꦶꦪꦤ꧀ꦤꦺ​ꦩꦤꦸꦁꦱ​꧈​ꦤꦁꦔꦶꦁ​ꦤꦺꦏ꧀ꦮꦶꦱ꧀ꦢꦶꦠꦤ꧀ꦢꦠꦔꦤ꧀ꦥꦽꦗꦚ꧀ꦗꦶꦪꦤ꧀ꦲꦶꦏꦸ​ꦲꦺꦴꦫ​ꦏꦼꦤꦺꦁꦢꦶꦥꦼꦢꦺꦴꦠ꧀ꦭꦤ꧀ꦲꦺꦴꦫ​ꦏꦼꦤꦺꦁꦢꦶꦠꦩ꧀ꦧꦃꦲꦶ​ꦲꦥꦲꦥ​꧉​ ¹⁶ꦩꦼꦁꦏꦺꦴꦤꦺꦴ​ꦲꦸꦒ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦔ꧀ꦒꦮꦺ​ꦥꦽꦗꦚ꧀ꦗꦶꦪꦤ꧀ꦏꦫꦺꦴ​ꦧꦥ​ꦄꦨꦿꦲꦩ꧀ꦭꦤ꧀ꦏꦫꦺꦴ​“ꦠꦸꦫꦸꦤ꧀ꦤꦤ꧀ꦤꦺ​꧉”ꦏꦶꦠꦧ꧀ꦱꦸꦕꦶ​ꦲꦺꦴꦫ​ꦔꦺꦴꦩꦺꦴꦁ“ꦭꦤ꧀ꦏꦫꦺꦴ​ꦠꦸꦫꦸꦤ꧀ꦠꦸꦫꦸꦤꦤ꧀ꦤꦺ꧈​”ꦠꦼꦒꦼꦱ꧀ꦱꦺ​ꦮꦺꦴꦁ​ꦲꦺꦴꦏꦺꦃ꧈​ꦲꦺꦴꦫ​꧉​ꦤꦁꦔꦶꦁ​ꦏꦶꦠꦧ꧀ꦱꦸꦕꦶ​ꦠꦼꦫꦁ​ꦧꦔꦼꦠ꧀ꦔꦺꦴꦩꦺꦴꦁ“ꦭꦤ꧀ꦏꦫꦺꦴ​ꦠꦸꦫꦸꦤ꧀ꦤꦤ꧀ꦤꦺ​꧈​”ꦠꦼꦒꦼꦱ꧀ꦱꦺ​ꦤꦩꦸꦁ​ꦏꦫꦺꦴ​ꦮꦺꦴꦁ​ꦱꦶꦗꦶ​꧈​ꦪꦏꦸꦮꦶ​ꦏꦿꦶꦱ꧀ꦡꦸꦱ꧀꧈​ ¹⁷ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦱꦏ꧀ꦗꦤꦺꦲꦉꦥ꧀​ꦤ꧀ꦢꦸꦤꦸꦁꦔꦏꦺꦲꦥ​ꦩꦫꦁ​ꦏꦺꦴꦮꦺ​?ꦲꦏꦸ​ꦤ꧀ꦢꦸꦤꦸꦁꦔꦏꦺꦲꦶꦏꦶ​:ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦔ꧀ꦒꦮꦺ​ꦥꦽꦗꦚ꧀ꦗꦶꦪꦤ꧀ꦭꦤ꧀ꦢꦺꦏ꧀ꦤꦺꦗꦚ꧀ꦗꦶ​ꦤꦺꦏ꧀ꦧꦏꦭ꧀ꦤꦼꦠꦼꦥ꧀ꦥꦶ​ꦥꦽꦗꦚ꧀ꦗꦶꦪꦤ꧀ꦏꦸꦮꦶ​꧉​ꦠꦼꦫꦸꦱ꧀ꦥꦠꦁ​ꦲꦠꦸꦱ꧀ꦠꦼꦭꦸꦁ​ꦥꦸꦭꦸꦃ​ꦠꦲꦸꦤ꧀ꦱꦏ꧀ꦮꦶꦱ꧀ꦱꦺ​ꦔ꧀ꦒꦮꦺ​ꦥꦽꦗꦚ꧀ꦗꦶꦪꦤ꧀ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦮꦺꦠ꧀ꦮꦺꦠ꧀ꦱꦶꦁ​ꦏꦸꦢꦸ​ꦢꦶꦠꦸꦫꦸꦠ꧀꧈​ꦤꦁꦔꦶꦁ​꧈​ꦲꦺꦴꦫ​ꦗꦭꦂꦫꦤ꧀ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦮꦺꦠ꧀ꦮꦺꦠ꧀ꦏꦸꦮꦶ​ꦠꦼꦫꦸꦱ꧀ꦥꦽꦗꦚ꧀ꦗꦶꦪꦤ꧀ꦤꦺ​ꦲꦺꦴꦫ​ꦩ꧀ꦭꦏꦸ​ꦲꦥ​ꦲꦺꦴꦫ​ꦏꦁꦒꦺꦴ​꧈​ꦲꦺꦴꦫ​ꦔꦺꦴꦤꦺꦴ​꧉​ ¹⁸ꦲꦮꦶꦠ꧀ ꦱꦼꦩꦸꦁꦒꦺꦴꦤ꧀ꦤꦺꦥꦮꦺꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦒꦸꦩꦤ꧀ꦠꦸꦁ​ꦏꦫꦺꦴ​ꦮꦺꦠ꧀ꦮꦺꦠ꧀ꦠꦺꦲꦒꦩ​꧈​ꦠꦶꦧꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦼꦁꦒꦺꦴꦤꦺ​ꦥꦮꦺꦃꦪ​ꦲꦺꦴꦫ​ꦗꦭꦂꦫꦤ꧀ꦥꦽꦗꦚ꧀ꦗꦶꦪꦤ꧀ꦤꦺ​꧉​ꦤꦁꦔꦶꦁ​ꦮꦸꦗꦸꦠ꧀ꦠꦺꦏꦼꦥꦿꦶꦪꦺ​?ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦗꦚ꧀ꦗꦶ​꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦤꦼꦠꦼꦥ꧀ꦥꦶ​ꦗꦚ꧀ꦗꦶ​ꦏꦸꦮꦶ​ꦭꦤ꧀ꦔꦼꦏꦺꦏ꧀ꦏꦶꦧꦥ​ꦄꦨꦿꦲꦩ꧀ꦲꦥ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦩꦫꦁ​ꦢꦺꦏ꧀ꦤꦺ꧉​

¹⁹꧋ꦭꦃ​ꦤꦺꦏ꧀ꦔꦺꦴꦤꦺꦴ​꧈​ꦮꦺꦠ꧀ꦮꦺꦠ꧀ꦠꦺꦲꦒꦩ​ꦏꦸꦮꦶ​ꦠꦶꦧꦏꦺ​ꦏꦁꦒꦺꦴ​ꦔꦥ​?ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦮꦺꦠ꧀ꦮꦺꦠ꧀ꦏꦸꦮꦶ​ꦏꦁꦒꦺꦴ​ꦔꦼꦠꦺꦴꦏ꧀ꦏꦏꦺꦱꦭꦃꦲꦺ​ꦩꦤꦸꦁꦱ​꧉​ꦮꦺꦠ꧀ꦮꦺꦠ꧀ꦏꦸꦮꦶ​ꦏꦁꦒꦺꦴꦤꦺ​ꦤꦩꦸꦁ​ꦔꦤ꧀ꦠꦶ​ꦠꦼꦏꦤꦺ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦢꦺꦏ꧀ꦤꦺꦱꦶꦁ​ꦢꦶꦲꦺꦴꦩꦺꦴꦁꦲꦶꦁ​ꦥꦽꦗꦚ꧀ꦗꦶꦪꦤ꧀ꦭꦤ꧀ꦢꦺꦏ꧀ꦤꦺꦱꦶꦁ​ꦤꦩ꧀ꦥꦤꦶ​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦠ꧀ꦮꦺꦠ꧀ꦏꦸꦮꦶ​ꦠꦼꦏꦤꦺ​ꦲꦺꦴꦫ​ꦠꦼꦫꦸꦱ꧀ꦱꦤ꧀ꦮꦲꦺ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦁꦏꦺꦴꦤ꧀ꦩꦸꦭꦺꦏꦠ꧀ꦩꦸꦭꦺꦏꦠ꧀ꦔꦼꦏꦺꦏ꧀ꦏꦏꦺꦮꦺꦠ꧀ꦮꦺꦠ꧀ꦏꦸꦮꦶ​ꦩꦫꦁ​ꦤꦧꦶ​ꦩꦺꦴꦱꦼꦱ꧀ ꦠꦼꦫꦸꦱ꧀ꦱꦁꦏꦤꦧꦶ​ꦩꦺꦴꦱꦼꦱ꧀ꦧꦶꦱ​ꦠꦼꦏꦤ꧀​ꦔ꧀ꦒꦺꦴꦤ꧀ꦤꦺꦮꦺꦴꦁꦮꦺꦴꦁ​꧉​ꦢꦢꦶꦤꦺ​ꦤꦧꦶ​ꦩꦺꦴꦱꦼꦱ꧀ꦢꦢꦶ​ꦭꦤ꧀ꦠꦂꦫꦤ꧀꧈​ ²⁰ꦤꦁꦔꦶꦁ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦼꦠꦼꦥ꧀ꦥꦶ​ꦥꦽꦗꦚ꧀ꦗꦶꦪꦤ꧀ꦤꦺ​ꦩꦫꦁ​ꦧꦥ​ꦄꦨꦿꦲꦩ꧀ꦢꦺꦏ꧀ꦤꦺꦲꦺꦴꦫ​ꦩ꧀ꦧꦸꦠꦸꦃꦲꦏꦺꦮꦺꦴꦁ​ꦢꦢꦶ​ꦭꦤ꧀ꦠꦂꦫꦤ꧀ ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦏꦸꦢꦸ​ꦠꦸꦩꦤ꧀ꦢꦁ​ꦭꦤ꧀ꦧꦥ​ꦄꦨꦿꦲꦩ꧀ꦤꦩꦸꦁ​ꦏꦸꦢꦸ​ꦤꦩ꧀ꦥꦤꦶ​꧉​

꧋ꦠꦸꦗꦸꦮꦤ꧀ꦤꦺꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​

²¹꧋ꦭꦺꦴ​꧈​ꦭꦃ​ꦤꦺꦏ꧀ꦔꦺꦴꦤꦺꦴ​ꦠꦶꦧꦏꦺ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦠꦠꦥ꧀ꦥꦤ꧀ꦏꦫꦺꦴ​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​?ꦲꦺꦴꦫ​ꦔꦺꦴꦤꦺꦴ​!ꦱꦼꦩꦸꦁꦒꦺꦴꦤ꧀ꦤꦺꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ​ꦩꦫꦁ​ꦮꦺꦴꦁꦮꦺꦴꦁ​꧈​ꦪ​ꦥꦚ꧀ꦕꦺꦤ꧀ꦧꦼꦤꦼꦂ​ꦤꦺꦏ꧀ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦏꦸꦮꦶ​ꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​ ²²ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦺꦴꦫ​ꦔꦺꦴꦤꦺꦴ​!ꦩꦭꦃ​ꦏꦶꦠꦧ꧀ꦱꦸꦕꦶ​ꦤ꧀ꦢꦸꦤꦸꦁꦔꦏꦺꦤꦺꦏ꧀ꦩꦤꦸꦁꦱ​ꦱꦏ꧀ꦗꦒꦠ꧀ꦮꦶꦱ꧀ꦢꦶꦏ꧀ꦮꦱꦤꦶ​ꦲꦭ​꧉​ꦢꦢꦶꦤꦺ​ꦱꦶꦁ​ꦤꦩ꧀ꦥ​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦤꦩꦸꦁ​ꦮꦺꦴꦁ​ꦱꦶꦁ​ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦧꦶꦱ​ꦔ꧀ꦭꦸꦮꦂꦫꦶ​ꦱꦁꦏꦏ꧀ꦮꦱꦤꦺ​ꦲꦭ​꧉​

²³꧋ꦱꦏ꧀ꦢꦸꦫꦸꦁꦔꦺꦲꦮꦏ꧀ꦏꦺꦢꦺꦮꦺꦧꦶꦱꦥꦽꦕꦪꦩꦫꦁꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦮꦏ꧀ꦏꦺꦢꦺꦮꦺꦢꦶꦏꦸꦫꦸꦁꦏꦫꦺꦴꦮꦺꦠ꧀ꦮꦺꦠ꧀ꦠꦺꦲꦒꦩ꧈​ꦏꦪꦮꦺꦴꦁꦤꦁꦱꦼꦠꦿꦥꦤ꧀ꦏꦲꦺ꧈​ꦔꦼꦤ꧀ꦠꦺꦤ꧀ꦤꦶꦮꦚ꧀ꦕꦶꦤꦺꦲꦮꦏ꧀ꦏꦺꦢꦺꦮꦺꦧꦶꦱꦏꦼꦠꦩ꧀ꦥꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦠꦂꦫꦤ꧀ꦥꦽꦕꦪ꧉​ ²⁴ꦢꦢꦶꦤꦺ​ꦮꦺꦠ꧀ꦮꦺꦠ꧀ꦏꦸꦮꦶ​ꦏꦁꦒꦺꦴ​ꦤꦠ​ꦲꦮꦏ꧀ꦏꦺ​ꦢꦺꦮꦺꦔꦤ꧀ꦠꦶ​ꦠꦼꦏꦤꦺ​ꦏꦿꦶꦱ꧀ꦡꦸꦱ꧀ ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦂꦫꦤ꧀ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀꧈​ ²⁵ꦩꦸꦭꦤꦺ​꧈​ꦗꦭꦂꦫꦤ꧀ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦥꦢ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀ ꦮꦺꦠ꧀ꦮꦺꦠ꧀ꦏꦸꦮꦶ​ꦮꦶꦱ꧀ꦲꦺꦴꦫ​ꦏꦁꦒꦺꦴ​ꦩꦼꦤꦺꦃ​꧉​

²⁶꧋ꦏꦺꦴꦮꦺ​ꦱꦲꦶꦏꦶ​ꦮꦶꦱ꧀ꦢꦢꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦏꦺꦴꦮꦺ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦭꦤ꧀ꦢꦢꦶ​ꦱꦶꦗꦶ​ꦏꦫꦺꦴ​ꦢꦺꦏ꧀ꦤꦺ꧉​ ²⁷ꦏꦺꦴꦮꦺ​ꦮꦶꦱ꧀ꦥꦢ​ꦢꦶꦧꦥ꧀ꦠꦶꦱ꧀ ꦏꦸꦮꦶ​ꦠꦼꦒꦼꦱ꧀ꦱꦺ​ꦏꦺꦴꦮꦺ​ꦢꦶꦏꦸꦩ꧀ꦥꦸꦭ꧀ꦭꦏꦺꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ꦏꦪ​ꦮꦺꦴꦁ​ꦔꦁꦒꦺꦴ​ꦱꦭꦶꦤ꧀ꦏꦲꦺ​꧈​ꦏꦺꦴꦮꦺ​ꦱꦲꦶꦏꦶ​ꦔꦁꦒꦺꦴ​ꦏꦿꦶꦱ꧀ꦡꦸꦱ꧀꧈​ ²⁸ꦢꦢꦶꦤꦺ​ꦱꦲꦶꦏꦶ​ꦮꦶꦱ꧀ꦲꦺꦴꦫ​ꦲꦺꦤꦺꦁꦧꦺꦢꦤꦺ​ꦏꦺꦴꦮꦺ​ꦮꦺꦴꦁ​ꦙꦸꦲꦥ​ꦮꦺꦴꦁ​ꦒꦿꦶꦏ꧀ ꦱ꧀ꦭꦥ꦳꧀ꦲꦥ​ꦮꦺꦴꦁ​ꦩꦼꦂꦢꦺꦏ꧈​ꦮꦺꦴꦁ​ꦭꦤꦁ​ꦲꦥ​ꦮꦺꦴꦁ​ꦮꦺꦢꦺꦴꦏ꧀꧈​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦮꦺ​ꦠꦸꦁꦒꦭ꧀ꦭꦺ​ꦏꦧꦺꦃ​꧈​ꦗꦭꦂꦫꦤ꧀ꦏꦺꦴꦮꦺ​ꦮꦺꦏ꧀ꦏꦺꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​ ²⁹ꦤꦺꦏ꧀ꦏꦺꦴꦮꦺ​ꦮꦺꦏ꧀ꦏꦺꦏꦿꦶꦱ꧀ꦡꦸꦱ꧀ ꦏꦺꦴꦮꦺ​ꦢꦢꦶ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦭꦤ꧀ꦏꦺꦴꦮꦺ​ꦲꦸꦒ​ꦧꦶꦱ​ꦤꦩ꧀ꦥ​ꦥꦽꦗꦚ꧀ꦗꦶꦪꦤ꧀ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦧꦥ​ꦄꦨꦿꦲꦩ꧀꧈​

↑ ↑ ↑

 

꧇​꧔꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦗꦗꦭ꧀ꦠꦏ꧀ꦢꦸꦤꦸꦁꦔꦏꦺꦔꦺꦤꦺ​ꦱꦲꦶꦏꦶ​:ꦤꦺꦏ꧀ꦲꦃꦭꦶꦮꦫꦶꦱ꧀ꦏꦸꦮꦶ​ꦲꦶꦗꦶꦏ꧀ꦧꦺꦴꦕꦃ​꧈​ꦢꦺꦏ꧀ꦤꦺꦲꦺꦴꦫ​ꦲꦺꦤꦺꦁꦧꦺꦢꦤꦺ​ꦏꦫꦺꦴ​ꦱ꧀ꦭꦥ꦳꧀ ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦲꦥꦲꦥ​꧈​ꦱꦼꦤꦗꦤ꧀ꦲꦃꦭꦶꦮꦫꦶꦱ꧀ꦏꦸꦮꦶ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦱꦼꦩ꧀ꦧꦫꦁꦔꦺ꧉​ ²ꦱꦸꦮꦺꦤꦺ​ꦢꦺꦏ꧀ꦤꦺꦲꦶꦗꦶꦏ꧀ꦧꦺꦴꦕꦃ​ꦮꦺꦴꦁ​ꦭꦶꦪꦤꦺ​ꦱꦶꦁ​ꦢꦶꦥꦱꦿꦃꦲꦶ​ꦔꦿꦸꦩꦠ꧀ꦠꦶ​ꦢꦺꦏ꧀ꦤꦺꦭꦤ꧀ꦔꦸꦫꦸꦱ꧀ꦱꦶ​ꦲꦥꦲꦥꦤꦺ​꧉​ꦤꦁꦔꦶꦁ​ꦤꦺꦏ꧀ꦮꦶꦱ꧀ꦠꦼꦏꦤ꧀ꦢꦶꦤꦤꦺ​ꦱꦶꦁ​ꦮꦶꦱ꧀ꦢꦶꦠꦼꦠꦼꦥ꧀ꦥꦏꦺꦏꦫꦺꦴ​ꦧꦥꦏ꧀ꦏꦺ꧈​ꦲꦃꦭꦶꦮꦫꦶꦱ꧀ꦩꦲꦸ​ꦧꦶꦱ​ꦔꦸꦫꦸꦱ꧀ꦱꦶ​ꦱꦼꦩ꧀ꦧꦫꦁꦩ꧀ꦧꦫꦁꦔꦺꦢꦺꦮꦺ꧉​ ³ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦢꦺꦏ꧀​ꦩ꧀ꦧꦶꦪꦺꦤ꧀ꦪ​ꦔꦺꦴꦤꦺꦴ​ꦏꦸꦮꦶ​꧉​ꦱꦏ꧀ꦢꦸꦫꦸꦁꦔꦺꦲꦮꦏ꧀ꦏꦺ​ꦢꦺꦮꦺꦢꦶꦮꦱ​ꦲꦶꦁ​ꦏꦱꦸꦏ꧀ꦩꦤ꧀ ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦢꦢꦶ​ꦱ꧀ꦭꦥ꦳꧀ꦥ꦳ꦺꦥꦔ꧀ꦮꦱꦥꦔ꧀ꦮꦱ​ꦱꦶꦁ​ꦤꦁꦗꦒꦠ꧀ꦏꦺꦤꦺ​꧉​ ⁴ꦤꦁꦔꦶꦁ​ꦏꦢꦸꦁ​ꦮꦶꦱ꧀ꦠꦼꦏꦤ꧀ꦮꦪꦃꦲꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦁꦏꦺꦴꦤ꧀ꦲꦤꦏ꧀ꦏꦺ​ꦠꦼꦏ​ꦤꦁꦗꦒꦠ꧀ꦏꦺꦤꦺ​꧉​ꦠꦼꦏꦤꦺ​ꦏꦪ​ꦧꦪꦶ​ꦱꦶꦁ​ꦭꦲꦶꦂ​ꦱꦁꦏꦮꦺꦴꦁ​ꦮꦺꦢꦺꦴꦏ꧀ꦭꦤ꧀ꦢꦺꦏ꧀ꦤꦺꦲꦸꦒ​ꦩꦤꦸꦠ꧀​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦠꦺꦲꦒꦩ​ꦏꦪ​ꦱꦏ꧀ꦩꦼꦱ꧀ꦠꦶꦤꦺ꧉​ ⁵ꦤꦁꦔꦶꦁ​ꦠꦼꦏꦤꦺ​ꦢꦺꦏ꧀ꦤꦺꦏꦸꦮꦶ​ꦠꦸꦗꦸꦮꦤ꧀ꦤꦺꦔꦸꦕꦸꦭ꧀ꦭꦶ​ꦏꦧꦺꦃ​ꦮꦺꦴꦁ​ꦱꦶꦁ​ꦢꦶꦏꦸꦫꦸꦁ​ꦏꦫꦺꦴ​ꦮꦺꦠ꧀ꦮꦺꦠ꧀ꦠꦺꦲꦒꦩ​꧈​ꦱꦸꦥꦪ​ꦧꦶꦱ​ꦢꦢꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

⁶꧋ꦭꦤ꧀ꦗꦭꦂꦫꦤ꧀ꦏꦺꦴꦮꦺ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦁꦏꦺꦴꦤ꧀ꦫꦺꦴꦃꦲꦺ​ꦲꦤꦏ꧀ꦏꦺ​ꦩꦁꦒꦺꦴꦤ꧀ꦲꦶꦁ​ꦲꦠꦶꦩꦸ​꧉​ꦪ​ꦫꦺꦴꦃ​ꦲꦶꦏꦶ​ꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦧꦶꦱ​ꦚꦼꦧꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​:“ꦄꦨ꧈​ꦧꦥꦏ꧀ꦏꦸ​!” ⁷ꦢꦢꦶꦤꦺꦏꦺꦴꦮꦺꦱꦲꦶꦏꦶꦮꦶꦱ꧀ꦲꦺꦴꦫꦔ꧀ꦭꦢꦺꦤ꧀ꦤꦶꦒꦸꦱ꧀ꦠꦶꦄꦭ꧀ꦭꦃꦏꦪꦱ꧀ꦭꦥ꦳꧀ꦩꦼꦤꦺꦃ꧈​ꦲꦺꦴꦫ꧈​ꦤꦁꦔꦶꦁꦱꦲꦶꦏꦶꦏꦺꦴꦮꦺꦮꦶꦱ꧀ꦢꦢꦶꦲꦤꦏ꧀ꦏꦺ꧉​ꦭꦤ꧀ꦗꦭꦂꦫꦤ꧀ꦏꦺꦴꦮꦺꦮꦶꦱ꧀ꦢꦢꦶꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃ꧈​ꦏꦺꦴꦮꦺꦧꦏꦭ꧀ꦤꦩ꧀ꦥꦱꦼꦩ꧀ꦧꦫꦁꦏꦧꦺꦃꦱꦶꦁꦮꦶꦱ꧀ꦮꦺꦏ꧀ꦏꦺꦲꦤꦏ꧀ꦏꦺꦒꦸꦱ꧀ꦠꦶꦄꦭ꧀ꦭꦃ꧉​

꧋ꦱꦸꦩꦼꦭꦁꦔꦺꦫꦱꦸꦭ꧀ꦦꦈꦭꦸꦱ꧀꧈​

⁸꧋ꦤꦁꦔꦶꦁ​ꦩꦲꦸꦤꦺ​ꦲꦺꦴꦫ​ꦔꦺꦴꦤꦺꦴ​ꦠ​!ꦩꦲꦸꦤꦺ​ꦏꦺꦴꦮꦺ​ꦲꦺꦴꦫ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦏꦺꦴꦮꦺ​ꦥꦢ​ꦢꦢꦶ​ꦱ꧀ꦭꦥ꦳꧀ꦥ꦳ꦺꦒꦸꦱ꧀ꦠꦶ​ꦲꦭ꧀ꦭꦃꦒꦸꦱ꧀ꦠꦶꦄꦭ꧀ꦭꦃ​ꦱꦶꦁ​ꦮꦸꦗꦸꦠ꧀ꦠꦺꦲꦺꦴꦫ​ꦲꦺꦤꦺꦁ꧉​ ⁹ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦥꦢ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦭꦸꦮꦶꦃ​ꦧꦼꦤꦼꦂ​꧈​ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦏꦼꦤꦭ꧀ꦩꦫꦁ​ꦏꦺꦴꦮꦺ​꧉​ꦩꦺꦴꦱꦺꦴꦏ꧀ꦏꦺꦴꦮꦺ​ꦱꦲꦶꦏꦶ​ꦲꦉꦥ꧀ꦔꦼꦠꦸꦠ꧀ꦠꦏꦺꦭꦤ꧀ꦚꦼꦩ꧀ꦧꦃ​ꦩꦫꦁ​ꦥꦔ꧀ꦮꦱꦥꦔ꧀ꦮꦱ​ꦱꦶꦁ​ꦲꦺꦴꦫ​ꦩ꧀ꦧꦼꦗꦗꦶꦏꦸꦮꦶ​?ꦲꦥ​ꦏꦺꦴꦮꦺ​ꦲꦉꦥ꧀ꦩꦺꦴꦭꦃꦲꦶꦏꦪ​ꦩꦲꦸꦤꦺ​ꦩꦼꦤꦺꦃ​? ¹⁰ꦭꦃ​ꦏꦺꦴꦮꦺ​ꦏꦺꦴꦏ꧀ꦩꦼꦂꦭꦺꦴꦏ꧀ꦩꦼꦂꦭꦺꦴꦏ꧀ꦏꦏꦺꦢꦶꦤꦤ꧀ ꦱꦱꦺꦤ꧀ ꦮꦼꦂꦤꦮꦼꦂꦤ​ꦮꦪꦃ​ꦭꦤ꧀ꦲꦺꦤꦺꦁꦠꦲꦸꦤ꧀ꦱꦶꦁ​ꦲꦥꦶꦏ꧀ꦭꦤ꧀ꦠꦲꦸꦤ꧀ꦱꦶꦁ​ꦲꦩ꧀ꦧꦺꦴꦏ꧀ꦱꦶꦫꦶꦏ꧀ꦏꦶ꧉​ ¹¹ꦲꦏꦸ​ꦏꦺꦴꦏ꧀ꦱꦁꦱꦶ!ꦩꦼꦁꦏꦺꦴ​ꦲꦼꦁꦒꦺꦴꦤ꧀ꦏꦸ​ꦔ꧀ꦭꦧꦸꦃꦲꦶ​ꦏꦺꦴꦮꦺ​ꦠꦶꦧꦏꦺ​ꦩꦸꦱ꧀ꦥꦿ​ꦏꦧꦺꦃ​?

¹²꧋ꦥꦫ​ꦱꦼꦢꦸꦭꦸꦂ​!ꦲꦏꦸ​ꦚꦸꦮꦸꦤ꧀ꦠꦼꦤꦤ꧀ꦩꦫꦁ​ꦏꦺꦴꦮꦺ​!ꦲꦩ꧀ꦧꦺꦴꦏ꧀ꦏꦪ​ꦲꦏꦸ​ꦲꦶꦏꦶ​!ꦱꦼꦤꦗꦤ꧀ꦲꦏꦸ​ꦲꦶꦏꦶ​ꦮꦺꦴꦁ​ꦙꦸ꧈​ꦤꦁꦔꦶꦁ​ꦲꦏꦸ​ꦩꦭꦶꦃ​ꦢꦢꦶ​ꦏꦪ​ꦮꦺꦴꦁ​ꦱꦶꦁ​ꦢꦸꦢꦸ​ꦙꦸ꧈​ꦏꦪ​ꦏꦺꦴꦮꦺ​ꦏꦸꦮꦶ​ꦩꦲꦸꦤꦺ​꧈​ꦲꦏꦸ​ꦩꦼꦂꦢꦺꦏ꧈​ꦮꦶꦱ꧀ꦲꦺꦴꦫ​ꦩꦼꦂꦭꦺꦴꦏ꧀ꦩꦼꦂꦭꦺꦴꦏ꧀ꦏꦏꦺꦮꦺꦠ꧀ꦮꦺꦠ꧀ꦠꦺꦲꦒꦩ​꧉​ꦢꦺꦴꦁꦔꦺꦲꦏꦸ​ꦱꦼꦥꦶꦱꦤ꧀ꦤꦤ꧀ꦤꦁꦔ꧀ꦒꦺꦴꦤ꧀ꦩꦸ​꧈​ꦮꦸꦗꦸꦠ꧀ꦠꦺꦪ​ꦲꦺꦴꦫ​ꦲꦺꦤꦺꦁꦏ꧀ꦭꦺꦫꦸꦏꦸꦫꦁꦔꦺꦧ꧀ꦭꦱ꧀ꦲꦼꦁꦒꦺꦴꦤ꧀ꦩꦸ​ꦤꦩ꧀ꦥ​ꦲꦏꦸ​꧉​ ¹³ꦏꦺꦴꦮꦺ​ꦩꦼꦱ꧀ꦠꦶꦲꦶꦗꦶꦏ꧀ꦏꦺꦭꦶꦁꦔꦤ꧀ ꦢꦺꦴꦁꦔꦺꦲꦏꦸ​ꦠꦼꦏ​ꦱꦼꦥꦶꦱꦤ꧀ꦤꦤ꧀ꦤꦁꦔ꧀ꦒꦺꦴꦤ꧀ꦩꦸ​ꦔ꧀ꦒꦮ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦏꦲꦺ​ꦢꦺꦴꦁꦔꦺꦲꦏꦸ​ꦭꦫ​꧉​ ¹⁴ꦲꦼꦁꦒꦺꦴꦤ꧀ꦏꦸ​ꦭꦫ​ꦏꦸꦮꦶ​ꦱꦏ꧀ꦗꦤꦺꦏꦼꦤꦺꦁꦲꦩ꧀ꦧꦺꦴꦏ꧀ꦒꦮꦺ​ꦗꦭꦂꦫꦤ꧀ꦏꦁꦒꦺꦴ​ꦤꦩ꧀ꦥꦶꦏ꧀ꦲꦏꦸ​꧈​ꦤꦁꦔꦶꦁ​ꦮꦸꦗꦸꦠ꧀ꦠꦺꦏꦺꦴꦮꦺ​ꦪ​ꦲꦺꦴꦫ​ꦔꦺꦴꦤꦺꦴ​꧉​ꦲꦏꦸ​ꦩꦭꦃ​ꦲꦩ꧀ꦧꦺꦴꦏ꧀ꦠꦩ꧀ꦥꦤꦶ​ꦏꦪ​ꦩꦸꦭꦺꦏꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦮꦲꦺ​꧈​ꦩꦭꦃ​ꦔꦸꦁꦏꦸꦭ꧀ꦭꦶ​ꦏꦸꦮꦶ​꧈​ꦲꦏꦸ​ꦲꦩ꧀ꦧꦺꦴꦏ꧀ꦠꦩ꧀ꦥ​ꦏꦪ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦢꦺꦮꦺ꧉​ ¹⁵ꦗꦫꦺꦤꦺ​ꦩ꧀ꦧꦶꦪꦺꦤ꧀ꦲꦏꦸ​ꦩꦫꦏ꧀ꦏꦏꦺꦏꦺꦴꦮꦺ​ꦧꦸꦔꦃ​꧈​ꦭꦃ​ꦱꦲꦶꦏꦶ​ꦏꦺꦴꦮꦺ​ꦏꦺꦴꦏ꧀ꦩꦭꦶꦃ​꧉​ꦲꦏꦸ​ꦢꦺꦮꦺꦔꦼꦂꦠꦶ​ꦒꦼꦢꦺꦤꦺꦏꦠꦿꦺꦱ꧀ꦤꦤ꧀ꦩꦸꦩꦫꦁ​ꦲꦏꦸ​꧉​ꦱꦼꦩꦸꦁꦒꦺꦴꦤ꧀ꦤꦺꦧꦶꦱ​ꦔꦺꦴꦤꦺꦴ​ꦏꦺꦴꦮꦺ​ꦲꦺꦴꦫ​ꦲꦺꦩꦤ꧀ꦚꦸꦥ꧀ꦭꦶꦏ꧀ꦩꦿꦶꦥꦠ꧀ꦩꦸ​ꦲꦩ꧀ꦧꦺꦴꦏ꧀ꦏꦺꦏ꧀ꦤꦺꦲꦏꦸ​ꦏꦁꦒꦺꦴ​ꦔ꧀ꦒꦤ꧀ꦠꦶ​ꦩꦿꦶꦥꦠ꧀ꦏꦸ​ꦱꦶꦁ​ꦭꦫ​꧉​ ¹⁶ꦭꦃ​ꦏꦺꦴꦏ꧀ꦱꦲꦶꦏꦶ​ꦲꦏꦸ​ꦢꦢꦶ​ꦩꦸꦁꦱꦸꦃꦩꦸ​?ꦲꦥ​ꦏꦺꦴꦮꦺ​ꦩꦸꦁꦱꦸꦃ​ꦩꦫꦁ​ꦲꦏꦸ​ꦗꦭꦂꦫꦤ꧀ꦲꦏꦸ​ꦲꦶꦏꦶ​ꦔꦺꦴꦩꦺꦴꦁꦱꦏ꧀ꦧꦼꦤꦼꦂꦫꦺ​ꦩꦫꦁ​ꦏꦺꦴꦮꦺ​?

¹⁷꧋ꦮꦺꦴꦁꦮꦺꦴꦁ​ꦭꦶꦪꦤꦺ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​ꦗꦤ꧀ꦥꦢ​ꦔ꧀ꦒꦠꦺꦏ꧀ꦏꦏꦺꦠꦼꦤꦤ꧀ꦩꦫꦁ​ꦏꦺꦴꦮꦺ​꧈​ꦤꦁꦔꦶꦁ​ꦠꦸꦗꦸꦮꦤ꧀ꦤꦺꦲꦺꦴꦫ​ꦲꦥꦶꦏ꧀꧈​ꦏꦉꦥ꧀ꦥꦺ​ꦤꦩꦸꦁ​ꦩꦶꦱꦃ​ꦏꦺꦴꦮꦺ​ꦱꦁꦏꦲꦏꦸ​꧈​ꦱꦸꦥꦪ​ꦏꦺꦴꦮꦺ​ꦥꦢ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​꧉​ ¹⁸ꦥꦚ꧀ꦕꦺꦤ꧀ꦲꦥꦶꦏ꧀ꦧꦔꦼꦠ꧀ꦤꦺꦏ꧀ꦲꦺꦤꦺꦁꦱꦶꦁ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦏꦺꦴꦮꦺ​꧈​ꦤꦁꦔꦶꦁ​ꦪ​ꦏꦸꦢꦸ​ꦤꦼꦏꦏ꧀ꦏꦏꦺꦧꦼꦕꦶꦏ꧀ꦠꦼꦤꦤ꧀ꦏꦁꦒꦺꦴ​ꦏꦺꦴꦮꦺ​꧉​ꦭꦤ꧀ꦩꦼꦤꦺꦃ​꧈​ꦲꦺꦴꦫ​ꦤꦩꦸꦁ​ꦤꦺꦏ꧀ꦢꦺꦴꦁꦔꦺꦲꦏꦸ​ꦤꦁꦔ꧀ꦒꦺꦴꦤ꧀ꦩꦸ​ꦮꦲꦺ​꧈​ꦤꦁꦔꦶꦁ​ꦱꦏ꧀ꦠꦼꦫꦸꦱ꧀ꦱꦺ꧉​ ¹⁹ꦲꦤꦏ꧀ꦲꦤꦏ꧀ꦏꦸ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ!ꦤꦺꦏ꧀ꦲꦏꦸ​ꦩꦶꦏꦶꦂꦫꦏꦺꦏꦺꦴꦮꦺ​ꦲꦏꦸ​ꦏꦿꦱ​ꦭꦫ​ꦏꦪ​ꦮꦺꦴꦁ​ꦲꦉꦥ꧀​ꦩ꧀ꦧꦪꦶꦏꦲꦺ​꧉​ꦏꦥꦤ꧀ꦏꦺꦴꦮꦺ​ꦧꦏꦭ꧀ꦢꦸꦤꦸꦁꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦧꦶꦱꦤꦺ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦭꦤ꧀ꦠꦂꦫꦤ꧀ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀? ²⁰ꦏꦪ​ꦔꦥ​ꦏꦼꦥꦺꦔꦶꦤ꧀ꦏꦸꦧꦶꦱ​ꦤꦁꦔ꧀ꦒꦺꦴꦤ꧀ꦩꦸ​ꦱꦲꦶꦏꦶ​꧈​ꦱꦸꦥꦪ​ꦲꦏꦸ​ꦧꦶꦱ​ ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦱꦶꦁ​ꦥꦼꦤꦼꦂꦏꦫꦺꦴ​ꦏꦺꦴꦮꦺ​꧉​ꦲꦏꦸ​ꦗꦤ꧀ꦱꦼꦢꦶꦠꦼꦤꦤ꧀ꦔꦿꦱꦏ꧀ꦏꦏꦺꦏꦺꦴꦮꦺ​?

꧋ꦲꦶꦧꦸ​ꦲ꦳ꦒꦂ​ꦭꦤ꧀ꦲꦶꦧꦸ​ꦱꦫꦃ​ꦏꦁꦒꦺꦴ​ꦒꦩ꧀ꦧꦂ​꧉​

²¹꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦱꦶꦁ​ꦥꦢ​ꦚ꧀ꦗꦒꦏ꧀ꦏꦏꦺꦮꦺꦠ꧀ꦮꦺꦠ꧀ꦠꦺꦲꦒꦩ​꧈​ꦲꦏꦸ​ꦱꦲꦶꦏꦶ​ꦏꦼꦥꦺꦔꦶꦤ꧀ꦠꦏꦺꦴꦤ꧀ꦩꦫꦁ​ꦏꦺꦴꦮꦺ​?ꦲꦥ​ꦏꦺꦴꦮꦺ​ꦲꦺꦴꦫ​ꦥꦢ​ꦔꦼꦂꦠꦶ​ꦱꦶꦁ​ꦢꦶꦲꦺꦴꦩꦺꦴꦁꦤꦁꦮꦺꦠ꧀ꦮꦺꦠ꧀ꦏꦸꦮꦶ​꧉​ ²²ꦤꦁꦏꦺꦴꦤꦺꦴ​ꦏꦼꦠꦸꦭꦶꦱ꧀ꦤꦺꦏ꧀ꦧꦥ​ꦄꦨꦿꦲꦩ꧀​ꦤ꧀ꦢꦸꦮꦺꦲꦤꦏ꧀ꦭꦺꦴꦫꦺꦴ​:ꦱꦶꦗꦶ​ꦏꦫꦺꦴ​ꦱ꧀ꦭꦥ꦳꧀ꦥ꦳ꦺꦭꦤ꧀ꦭꦶꦪꦤꦺ​ꦏꦫꦺꦴ​ꦧꦺꦴꦗꦺꦴꦤꦺ​ꦢꦺꦮꦺ꧈​ꦮꦺꦴꦁ​ꦱꦶꦁ​ꦩꦼꦂꦢꦺꦏ꧉​ ²³ꦲꦤꦏ꧀ꦱꦶꦁ​ꦏꦫꦺꦴ​ꦱ꧀ꦭꦥ꦳꧀ꦥ꦳ꦺꦏꦸꦮꦶ​ꦭꦲꦶꦂꦫꦺ​ꦏꦪ​ꦱꦏ꧀ꦭꦸꦩꦿꦃꦲꦺ​꧈​ꦠꦼꦒꦼꦱ꧀ꦱꦺ​꧈​ꦱꦁꦏꦏꦉꦥ꧀ꦥꦺ​ꦩꦤꦸꦁꦱ​꧉​ꦤꦁꦔꦶꦁ​ꦲꦤꦏ꧀ꦱꦶꦁ​ꦏꦫꦺꦴ​ꦧꦺꦴꦗꦺꦴꦤꦺ​ꦢꦺꦮꦺꦏꦸꦮꦶ​ꦭꦲꦶꦂꦫꦺ​ꦱꦁꦏꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁴ꦲꦶꦏꦶ​ꦲꦺꦤꦺꦁꦥꦶꦮꦸꦭꦁꦔꦺ​ꦱꦶꦁ​ꦗꦼꦫꦸ!ꦮꦺꦴꦁ​ꦮꦺꦢꦺꦴꦏ꧀ꦭꦺꦴꦫꦺꦴ​ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦥꦽꦗꦚ꧀ꦗꦶꦪꦤ꧀ꦱꦶꦁ​ꦫꦺꦴꦁ​ꦮꦼꦂꦤ​꧉​ꦱꦶꦁ​ꦱ꧀ꦭꦥ꦳꧀ ꦪꦏꦸꦮꦶ​ꦲ꦳ꦒꦂ​꧈​ꦤꦸꦫꦸꦤ꧀ꦤꦏꦺꦲꦤꦏ꧀ꦲꦤꦏ꧀ꦱꦶꦁ​ꦢꦢꦶ​ꦱ꧀ꦭꦥ꦳꧀꧈​ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦥꦽꦗꦚ꧀ꦗꦶꦪꦤ꧀ꦱꦶꦁ​ꦠꦼꦏꦤꦺ​ꦱꦁꦏꦒꦸꦤꦸꦁ​ꦯꦶꦤꦻ꧉​ꦱꦶꦁ​ꦭꦶꦪꦤꦺ​꧈​ꦱꦶꦁ​ꦧꦺꦴꦗꦺꦴꦤꦺ​ꦢꦺꦮꦺ꧈​ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦪꦺꦫꦸꦱꦭꦺꦩ꧀ꦱꦶꦁ​ꦤꦁꦱ꧀ꦮꦂꦒ​꧉​ ²⁵ꦒꦸꦤꦸꦁꦯꦶꦤꦻꦏꦸꦮꦶꦤꦁꦤꦼꦒꦫꦄꦫꦧ꧀ ꦤꦁꦏꦤꦗꦼꦤꦼꦁꦔꦺꦲ꦳ꦒꦂ꧉​ꦏꦸꦮꦶꦒꦩ꧀ꦧꦂꦫꦺꦏꦸꦠꦪꦺꦫꦸꦱꦭꦺꦩ꧀ꦱꦶꦁꦗꦩꦤ꧀ꦱꦲꦶꦏꦶ꧉​ꦪꦺꦫꦸꦱꦭꦺꦩ꧀ꦏꦸꦮꦶꦲꦺꦭꦶꦁꦲꦺꦭꦶꦁꦏꦪꦲꦶꦧꦸꦱꦶꦁꦢꦢꦶꦱ꧀ꦭꦥ꦳꧀ꦏꦲꦺ꧈​ꦲꦮꦶꦠ꧀ꦮꦺꦴꦁꦔꦺꦱꦶꦁꦩꦁꦒꦺꦴꦤ꧀ꦤꦁꦏꦺꦴꦤꦺꦴꦥꦢꦩꦤꦸꦠ꧀ꦮꦺꦠ꧀ꦮꦺꦠ꧀ꦠꦺꦤꦧꦶꦩꦺꦴꦱꦼꦱ꧀ꦭꦤ꧀ꦲꦢꦠ꧀ꦠꦠꦕꦫꦤꦺꦤꦧꦶꦩꦺꦴꦱꦼꦱ꧀꧈​ ²⁶ꦤꦁꦔꦶꦁ​ꦪꦺꦫꦸꦱꦭꦺꦩ꧀ꦱꦶꦁ​ꦤꦁꦱ꧀ꦮꦂꦒ​ꦏꦸꦮꦶ​ꦏꦪ​ꦲꦶꦧꦸ​ꦱꦫꦃ​꧈​ꦩꦼꦂꦢꦺꦏ꧉​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦩꦼꦂꦢꦺꦏ꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦲꦸꦱꦃꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ ²⁷ꦏꦶꦠꦧ꧀ꦱꦸꦕꦶ​ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦏꦺꦧꦧ꧀ꦲꦶꦏꦶ​ꦢꦺꦏ꧀​ꦩ꧀ꦧꦶꦪꦺꦤ꧀꧈​ꦲꦸꦤꦶꦤꦺ​ꦔꦺꦤꦺ​:

“ꦧꦸꦔꦃꦧꦸꦔꦃꦲ​꧈​ꦏꦺꦴꦮꦺ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦒꦧꦸꦏ꧀
ꦱꦶꦁ​ꦲꦺꦴꦫ​ꦠꦲꦸ​ꦤ꧀ꦢꦸꦮꦺꦲꦤꦏ꧀!ꦧꦸꦔꦃꦧꦸꦔꦃꦲ​ꦭꦤ꧀ꦱꦸꦫꦏ꧀ꦱꦸꦫꦏ꧀ꦏ​꧈​
ꦏꦺꦴꦮꦺ​ꦱꦶꦁ​ꦲꦺꦴꦫ​ꦠꦲꦸ​ꦔ꧀ꦭꦫꦤꦶ​꧉​
ꦗꦭꦂꦫꦤ꧀ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦢꦶꦠꦶꦁꦒꦭ꧀ꦏꦫꦺꦴ​ꦧꦺꦴꦗꦺꦴꦤꦺ​
ꦧꦏꦭ꧀​ꦤ꧀ꦢꦸꦮꦺꦲꦤꦏ꧀ꦲꦺꦴꦏꦺꦃꦲꦺꦔꦸꦁꦏꦸꦭ꧀ꦭꦶ​ꦱꦶꦁ​ꦚꦤ꧀ꦢꦁꦔꦶꦧꦺꦴꦗꦺꦴꦤꦺ​꧉​”

²⁸꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦤꦏ꧀ꦲꦤꦏ꧀ꦱꦶꦁ​ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦧꦥ​ꦄꦨꦿꦲꦩ꧀ ꦏꦪ​ꦧꦥ​ꦆꦱꦏ꧀ ꦲꦤꦏ꧀ꦥꦽꦗꦚ꧀ꦗꦶꦪꦤ꧀꧈​ ²⁹ꦲꦶꦁ​ꦗꦩꦤ꧀ꦏꦸꦮꦶ​ꦲꦤꦏ꧀ꦱꦶꦁ​ꦭꦲꦶꦂꦫꦺ​ꦱꦁꦏꦏꦉꦥ꧀ꦥꦺ​ꦭꦤ꧀ꦲꦏꦭ꧀ꦭꦺ​ꦩꦤꦸꦁꦱ​ꦮꦶꦱ꧀ꦚꦶꦪꦚꦶꦪ​ꦲꦤꦏ꧀ꦱꦶꦁ​ꦭꦲꦶꦂꦫꦺ​ꦱꦁꦏꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦶꦁ​ꦢꦶꦤꦤꦺ​ꦱꦲꦶꦏꦶ​ꦪ​ꦲꦶꦗꦶꦏ꧀ꦔꦺꦴꦤꦺꦴ​꧉​ ³⁰ꦤꦁꦔꦶꦁ​ꦏꦶꦠꦧ꧀ꦱꦸꦕꦶ​ꦔꦺꦴꦩꦺꦴꦁꦏꦼꦥꦿꦶꦪꦺ​?“ꦱ꧀ꦭꦥ꦳꧀ꦏꦸꦮꦶ​ꦱꦏ꧀ꦲꦤꦏ꧀ꦏꦺ​ꦏꦺꦴꦁꦏꦺꦴꦤ꧀ꦭꦸꦔ​ꦮꦲꦺ​꧈​ꦗꦭꦂꦫꦤ꧀ꦲꦤꦏ꧀ꦏꦺ​ꦱ꧀ꦭꦥ꦳꧀ꦏꦸꦮꦶ​ꦲꦺꦴꦫ​ꦧꦏꦭ꧀ꦲꦺꦤ꧀ꦠꦸꦏ꧀ꦥꦤ꧀ꦢꦸꦩ꧀ꦩꦤ꧀꧈​ꦱꦶꦁ​ꦧꦏꦭ꧀ꦤꦩ꧀ꦥ​ꦥꦤ꧀ꦢꦸꦩ꧀ꦩꦤ꧀ꦤꦺ​ꦤꦩꦸꦁ​ꦲꦤꦏ꧀ꦏꦺ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦩꦼꦂꦢꦺꦏ꧈​ꦱꦶꦁ​ꦢꦸꦢꦸ​ꦱ꧀ꦭꦥ꦳꧀꧈​” ³¹ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​!ꦏꦧꦺꦃ​ꦏꦸꦮꦶ​ꦩꦲꦸ​ꦱꦶꦁ​ꦏ꧀ꦭꦏꦺꦴꦤ꧀ꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀ ꦤ꧀ꦢꦸꦤꦸꦁꦔꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦲꦤꦏ꧀ꦏꦺ​ꦮꦺꦴꦁ​ꦱꦶꦁ​ꦩꦼꦂꦢꦺꦏ꧈​ꦲꦺꦴꦫ​ꦲꦤꦏ꧀ꦏꦺ​ꦮꦺꦴꦁ​ꦱꦶꦁ​ꦱ꧀ꦭꦥ꦳꧀꧈​

↑ ↑ ↑

꧋ꦮꦺꦴꦁ​ꦏꦿꦶꦱ꧀ꦠꦼꦤ꧀ꦮꦶꦱ꧀ꦩꦼꦂꦢꦺꦏ꧉​

꧇​꧕꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦩꦼꦂꦢꦺꦏꦠꦼꦤꦤ꧀ ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦫꦏ꧀ꦏꦏꦺꦩꦼꦂꦢꦺꦏꦲꦮꦏ꧀ꦏꦺ​ꦢꦺꦮꦺ꧉​ꦩꦸꦭꦤꦺ​꧈​ꦥꦢ​ꦔꦢꦼꦏ꧀ꦏꦱꦶꦁ​ꦗꦼꦗꦼꦏ꧀ꦭꦤ꧀ꦲꦗ​ꦒꦼꦊꦩ꧀ꦢꦢꦶ​ꦱ꧀ꦭꦥ꦳꧀ꦩꦼꦤꦺꦃ​꧉​

²꧋ꦱꦶꦁ​ꦲꦉꦥ꧀ꦠꦏ꧀ꦲꦺꦴꦩꦺꦴꦁ​ꦱꦲꦶꦏꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦒꦠꦺꦏ꧀ꦏꦏꦺꦱꦶꦁ​ꦲꦥꦶꦏ꧀ꦠꦼꦤꦤ꧀꧈​ꦲꦏꦸ​꧈​ꦦꦈꦭꦸꦱ꧀ ꦔꦺꦴꦩꦺꦴꦁꦔꦶꦏꦺꦴꦮꦺ​:ꦤꦺꦏ꧀ꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ ꦠꦶꦧꦏꦺ​ꦏꦿꦶꦱ꧀ꦡꦸꦱ꧀ꦲꦼꦁꦒꦺꦴꦤꦺ​ꦔ꧀ꦭꦧꦸꦃꦲꦶ​ꦏꦺꦴꦮꦺ​ꦲꦺꦴꦫ​ꦲꦺꦤꦺꦁꦒꦸꦤꦤꦺ​꧉​ ³ꦱꦼꦥꦶꦱ꧀ꦱꦤ꧀ꦩꦼꦤꦺꦃ​ꦲꦏꦸ​ꦔꦺꦴꦩꦺꦴꦁꦔꦶꦏꦺꦴꦮꦺ​ꦏꦧꦺꦃ​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀:ꦤꦺꦏ꧀ꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ ꦏꦺꦴꦮꦺ​ꦲꦸꦒ​ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦲꦒꦩ​ꦱꦏ꧀ꦏꦧꦺꦃꦲꦺ꧉​ ⁴ꦤꦺꦏ꧀ꦏꦺꦴꦮꦺ​ꦏꦼꦥꦺꦔꦶꦤ꧀ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦂꦫꦤ꧀​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦏꦸꦮꦶ​꧈​ꦏꦺꦴꦮꦺ​ꦩꦭꦃ​ꦥꦼꦢꦺꦴꦠ꧀ꦱꦁꦏꦏꦿꦶꦱ꧀ꦡꦸꦱ꧀ꦭꦤ꧀ꦏꦺꦴꦮꦺ​ꦏꦺꦭꦁꦔꦤ꧀ꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁵ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧈​ꦲꦮꦏ꧀ꦏꦺ​ꦢꦺꦮꦺꦚ꧀ꦗꦒꦏ꧀ꦏꦏꦺꦫꦺꦴꦃ​ꦱꦸꦕꦶ​ꦱꦶꦁ​ꦔꦿꦺꦮꦁꦔꦶ​ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩ꧀ꦥ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦠꦂꦫꦤ꧀ꦏꦿꦶꦱ꧀ꦡꦸꦱ꧀꧈​ ⁶ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦲꦥ​ꦲꦺꦴꦫ​ꦏꦸꦮꦶ​ꦮꦶꦱ꧀ꦲꦺꦴꦫ​ꦢꦢꦶ​ꦱꦼꦧꦧ꧀꧈​ꦱꦶꦁ​ꦥꦼꦤ꧀ꦠꦶꦁ​ꦭꦤ꧀ꦥꦼꦂꦭꦸ​ꦪꦏꦸꦮꦶ​:ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀ꦭꦤ꧀ꦥꦼꦔꦤ꧀ꦢꦼꦭ꧀ꦲꦶꦏꦶ​ꦧꦶꦱꦤꦺ​ꦏꦺꦠꦺꦴꦏ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦠꦿꦺꦱ꧀ꦤꦠꦶꦤꦿꦺꦱ꧀ꦤꦤ꧀꧈​

⁷꧋ꦥꦫ​ꦱꦼꦢꦸꦭꦸꦂ​!ꦏꦺꦴꦮꦺ​ꦩꦲꦸꦤꦺ​ꦮꦶꦱ꧀ꦧꦼꦤꦼꦂꦧꦼꦤꦼꦂ꧈​ꦭꦃ​ꦱꦲꦶꦏꦶ​ꦏꦺꦴꦏ꧀ꦲꦺꦴꦫ​ꦥꦢ​ ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​?ꦱꦥ​ꦠ​ꦱꦶꦁ​ꦩꦭꦶꦏ꧀ꦲꦔꦼꦤ꧀ꦲꦔꦼꦤ꧀ꦩꦸ​? ⁸ꦪ​ꦲꦼꦩ꧀ꦧꦸꦃ​ꦱꦥ​꧈​ꦤꦁꦔꦶꦁ​ꦲꦏꦸ​ꦔꦼꦂꦠꦶ​ꦤꦺꦏ꧀ꦮꦺꦴꦁ​ꦏꦸꦮꦶ​ꦢꦸꦢꦸ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦺꦴꦁꦏꦺꦴꦤ꧀꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦶꦭ꧀ꦏꦺꦴꦮꦺ​ꦱꦸꦥꦪ​ꦏꦺꦴꦮꦺ​ꦩꦼꦂꦢꦺꦏ꧉​ ⁹ꦱꦼꦤꦗꦤ꧀ꦤ​ꦤꦩꦸꦁ​ꦮꦺꦴꦁ​ꦱꦶꦗꦶ​ꦮꦲꦺ​ꦠ​ꦱꦶꦁ​ꦲꦺꦴꦫ​ꦧꦼꦤꦼꦂ​꧈​ꦱꦸꦮꦶꦱꦸꦮꦶꦭꦶꦪꦭꦶꦪꦤꦺ​ꦧꦏꦭ꧀ꦏꦼꦠꦸꦭꦂꦫꦤ꧀ꦭꦤ꧀ꦏꦠꦸꦠ꧀ꦏꦧꦺꦃ​꧉​ ¹⁰ꦤꦁꦔꦶꦁ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​꧈​ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦱꦼꦠꦸꦗꦸ​ꦏꦫꦺꦴ​ꦱꦶꦁ​ꦠꦏ꧀ꦲꦺꦴꦩꦺꦴꦁ​꧉​ꦩꦸꦁ​ꦮꦲꦺ​꧈​ꦱꦥ​ꦮꦲꦺ​ꦱꦶꦁ​ꦔ꧀ꦒꦮꦺ​ꦧꦶꦔꦸꦁꦔꦺ​ꦲꦠꦶꦩꦸ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦧꦏꦭ꧀ꦔꦿꦩ꧀ꦥꦸꦁꦔꦏꦺꦮꦺꦴꦁ​ꦏꦸꦮꦶ​꧉​ꦲꦺꦴꦫ​ꦥꦼꦂꦢꦸꦭꦶꦱꦥ​!

¹¹꧋ꦥꦫ​ꦱꦼꦢꦸꦭꦸꦂ​꧈​ꦲꦺꦤꦺꦁꦱꦶꦁ​ꦥꦢ​ꦔꦺꦴꦩꦺꦴꦁꦤꦺꦏ꧀ꦲꦏꦸ​ꦢꦺꦮꦺꦩꦸꦭꦁꦔꦶꦮꦺꦴꦁꦮꦺꦴꦁ​ꦏꦺꦴꦁꦏꦺꦴꦤ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀꧈​ꦭꦃ​ꦏꦸꦮꦶ​ꦏꦼꦥꦿꦶꦪꦺ​!ꦱꦼꦩꦸꦁꦒꦺꦴꦤ꧀ꦤꦺꦲꦏꦸ​ꦲꦶꦗꦶꦏ꧀ꦩꦸꦭꦁꦔꦶꦔꦺꦴꦤꦺꦴ​꧈​ꦩꦺꦴꦱꦺꦴꦏ꧀ꦲꦏꦸ​ꦲꦶꦗꦶꦏ꧀ꦢꦶꦱꦶꦪꦱꦶꦪ​ꦮꦺꦴꦁ​?ꦪ​ꦲꦺꦴꦫ​ꦠ​?ꦤꦺꦏ꧀ꦲꦏꦸ​ꦲꦶꦗꦶꦏ꧀ꦩꦸꦭꦁꦔꦶꦏꦺꦴꦁꦏꦺꦴꦤ꧀ꦥꦢ​ꦱꦸꦤꦠ꧀ ꦩꦼꦱ꧀ꦠꦶꦪ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦤꦼꦱꦸ​ꦏꦫꦺꦴ​ꦲꦏꦸ​꧈​ꦱꦼꦤꦗꦤ꧀ꦤ​ꦲꦏꦸ​ꦩꦸꦭꦁꦔꦶꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦩꦠꦶ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧉​ ¹²ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦩ꧀ꦧꦶꦔꦸꦁꦔꦏꦺꦲꦠꦶꦩꦸ​ꦏꦸꦮꦶ​꧈​ꦲꦥꦶꦏ꧀ꦏꦺ​ꦧꦺꦤ꧀ꦥꦢ​ꦱꦸꦤꦠ꧀ꦢꦶꦏꦼꦠꦺꦴꦏ꧀ꦠꦼꦏꦤ꧀ꦥꦺꦴꦏ꧀ꦏꦺꦥꦶꦱꦤ꧀꧈​

¹³꧋ꦤꦁꦔꦶꦁꦏꦺꦴꦮꦺ꧈​ꦥꦫꦱꦼꦢꦸꦭꦸꦂ꧈​ꦏꦺꦴꦮꦺꦏꦸꦮꦶꦮꦶꦱ꧀ꦢꦶꦥꦁꦒꦶꦭ꧀ꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦱꦸꦥꦪꦏꦺꦴꦮꦺꦢꦢꦶꦮꦺꦴꦁꦩꦼꦂꦢꦺꦏ꧈​ꦲꦺꦴꦫꦲꦸꦱꦃꦔ꧀ꦭꦏꦺꦴꦤ꧀ꦤꦶꦮꦺꦠ꧀ꦮꦺꦠ꧀ꦠꦺꦲꦒꦩ꧉​ꦩꦸꦁꦮꦲꦺ꧈​ꦲꦺꦴꦫꦢꦸꦩꦺꦃꦏꦺꦴꦮꦺꦩꦼꦂꦢꦺꦏꦠꦼꦫꦸꦱ꧀ꦏꦺꦴꦮꦺꦲꦉꦥ꧀ꦱꦏ꧀ꦏꦉꦥ꧀ꦥꦺ꧉​ꦏꦩꦼꦂꦢꦺꦏꦲꦤ꧀ꦏꦸꦮꦶꦲꦗꦢꦶꦒꦮꦺꦗꦭꦂꦫꦤ꧀ꦏꦁꦒꦺꦴꦔꦸꦩ꧀ꦧꦂꦏꦼꦱꦼꦤꦼꦁꦔꦤ꧀꧈​ꦩꦭꦃꦲꦥꦶꦏ꧀ꦏꦺꦏꦺꦴꦮꦺꦥꦢꦠꦸꦭꦸꦁꦠꦶꦤꦸꦭꦸꦁꦔꦁꦒꦺꦴꦏꦠꦿꦺꦱ꧀ꦤꦤ꧀꧈​ ¹⁴ꦥꦚ꧀ꦕꦺꦤ꧀ꦠꦼꦤꦤ꧀ ꦤꦺꦏ꧀ꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦱꦶꦗꦶ​ꦲꦶꦏꦶ​꧈​ꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦧꦺꦃ​꧉​ꦧꦫꦁ​ꦱꦶꦗꦶ​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦏꦸꦮꦶ​ꦪ​ꦲꦶꦏꦶ​:ꦠꦿꦺꦱ꧀ꦤꦩꦫꦁ​ꦭꦶꦪꦤꦺ​ꦏꦪ​ꦲꦼꦁꦒꦺꦴꦤ꧀ꦩꦸ​ꦠꦿꦺꦱ꧀ꦤꦩꦫꦁ​ꦲꦮꦏ꧀ꦩꦸ​ꦢꦺꦮꦺ꧉​ ¹⁵ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦥꦢ​ꦏꦼꦫꦃ​ꦏꦪ​ꦏꦺꦮꦤ꧀ ꦲꦮꦱ꧀ ꦩꦼꦁꦏꦺꦴ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦧꦸꦧꦂ​ꦏꦧꦺꦃ​꧉​

꧋ꦲꦸꦫꦶꦥ꧀ꦩꦤꦸꦠ꧀ꦫꦺꦴꦃ​ꦱꦸꦕꦶ​꧉​

¹⁶꧋ꦥꦫ​ꦱꦼꦢꦸꦭꦸꦂ​꧈​ꦏꦉꦥ꧀ꦏꦸ​ꦔꦺꦤꦺ​:ꦲꦸꦫꦶꦥ꧀ꦩꦸ​ꦏꦸꦢꦸ​ꦩꦤꦸꦠ꧀ꦫꦺꦴꦃ​ꦱꦸꦕꦶ​꧉​ꦲꦗ​ꦥꦢ​ꦤꦸꦫꦸꦠ꧀ꦠꦶ​ꦏꦼꦏꦉꦥꦶꦁꦢꦒꦶꦁ​꧉​ ¹⁷ꦏꦼꦏꦉꦥꦶꦁꦢꦒꦶꦁ​ꦏꦸꦮꦶ​ꦔ꧀ꦭꦮꦤ꧀ꦩꦫꦁ​ꦏꦼꦏꦉꦥꦶꦁꦫꦺꦴꦃ​ꦱꦸꦕꦶ​ꦭꦤ꧀ꦫꦺꦴꦃ​ꦱꦸꦕꦶ​ꦔ꧀ꦭꦮꦤ꧀ꦩꦫꦁ​ꦏꦼꦏꦉꦥꦶꦁꦢꦒꦶꦁ​꧉​ꦥꦔ꧀ꦮꦱ​ꦭꦺꦴꦫꦺꦴ​ꦏꦸꦮꦶ​ꦥꦼꦫꦁ​ꦠꦼꦫꦸꦱ꧀ꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​ꦢꦢꦶꦤꦺ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦏꦉꦥ꧀ꦥꦏꦺꦲꦺꦴꦫ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀꧈​ ¹⁸ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦢꦶꦠꦸꦤ꧀ꦠꦸꦤ꧀ꦏꦫꦺꦴ​ꦫꦺꦴꦃ​ꦱꦸꦕꦶ​꧈​ꦏꦺꦴꦮꦺ​ꦲꦺꦴꦫ​ꦲꦸꦱꦃꦔꦁꦒꦺꦴꦏ꧀ꦏꦏꦺꦮꦺꦠ꧀ꦮꦺꦠ꧀ꦠꦺꦲꦒꦩ​꧉​

^19-21꧋ꦥꦚ꧀ꦕꦺꦤ꧀ꦪꦮꦶꦱ꧀ꦏꦼꦠꦫꦧꦔꦼꦠ꧀​ꦏ꧀ꦭꦏꦸꦮꦤ꧀ꦱꦶꦁꦩꦼꦠꦸꦱꦁꦏꦏꦼꦏꦉꦥꦶꦁꦢꦒꦶꦁ꧈​ꦪꦏꦸꦮꦶ:ꦭꦏꦸꦧꦺꦢꦁ꧈​ꦲꦔꦼꦤ꧀ꦲꦔꦼꦤ꧀ꦭꦤ꧀​ꦏ꧀ꦭꦏꦸꦮꦤ꧀ꦱꦶꦁꦏꦺꦴꦠꦺꦴꦂ꧈​ꦲꦺꦴꦫꦲꦸꦫꦸꦱ꧀ ꦚꦼꦩ꧀ꦧꦃꦧꦿꦲꦭ꧈​ꦱꦤ꧀ꦠꦺꦠ꧀ꦱꦤ꧀ꦠꦺꦠ꧀ꦠꦤ꧀ ꦩꦼꦩꦸꦁꦱꦸꦃ꧈​ꦱꦼꦤꦼꦁꦥꦢꦸ꧈​ꦩꦺꦫꦶ꧈​ꦔꦸꦩ꧀ꦧꦂꦤꦼꦱꦸꦤꦺ꧈​ꦲꦥꦶꦏ꧀ꦏꦺꦢꦶꦲꦼꦁꦒꦺꦴꦢꦺꦮꦺꦲꦺꦴꦫꦥꦼꦂꦢꦸꦭꦶꦭꦶꦪꦤꦺ꧈​ꦱꦼꦤꦼꦁꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀ꦭꦤ꧀ꦫꦺꦕꦺꦴꦏ꧀ ꦱꦼꦔꦶꦠ꧀ꦱꦼꦔꦶꦠ꧀ꦠꦤ꧀ ꦩꦼꦩꦠꦺꦤ꧀ꦤꦶ꧈​ꦩꦧꦸꦏ꧀ꦭꦤ꧀ꦫꦩꦺꦲꦺꦴꦫꦔ꧀ꦒꦼꦤꦃꦭꦤ꧀ꦭꦶꦪꦭꦶꦪꦤꦺꦩꦼꦤꦺꦃ꧉​ꦧꦧ꧀ꦏꦸꦮꦶꦩꦲꦸꦏꦧꦺꦃꦲꦏꦸꦮꦶꦱ꧀ꦠꦲꦸꦔꦺꦴꦩꦺꦴꦁꦩꦫꦁꦏꦺꦴꦮꦺꦢꦺꦏ꧀​ꦩ꧀ꦧꦶꦪꦺꦤ꧀ ꦤꦁꦔꦶꦁꦱꦲꦶꦏꦶꦠꦏ꧀ꦲꦺꦭꦶꦁꦔꦏꦺꦩꦼꦤꦺꦃ:ꦮꦺꦴꦁꦱꦶꦁꦏ꧀ꦭꦏꦸꦮꦤ꧀ꦤꦺꦏꦪꦔꦺꦴꦤꦺꦴꦏꦸꦮꦶꦲꦺꦴꦫꦧꦏꦭ꧀ꦢꦶꦠꦩ꧀ꦥꦲꦶꦁꦏꦿꦠꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉​

^22-23꧋ꦤꦁꦔꦶꦁ​ꦤꦺꦏ꧀ꦫꦺꦴꦃ​ꦱꦸꦕꦶ​ꦱꦶꦁ​ꦔ꧀ꦮꦱꦤꦶ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧈​ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦧꦶꦱ​ꦠꦿꦺꦱ꧀ꦤ꧈​ꦧꦸꦔꦃ​꧈​ꦠꦼꦤ꧀ꦠꦽꦩ꧀ ꦱꦧꦂ​꧈​ꦒꦼꦩꦠꦶ​꧈​ꦤꦶꦤ꧀ꦢꦏ꧀ꦏꦏꦺꦧꦼꦕꦶꦏ꧀ ꦠꦼꦩꦼꦤ꧀ ꦲꦤ꧀ꦢꦥ꧀ꦥꦱꦺꦴꦂꦭꦤ꧀ꦧꦶꦱ​ꦔꦼꦤ꧀ꦢꦼꦏ꧀ꦲ꦳ꦮ​ꦱꦶꦁ​ꦲꦺꦴꦫ​ꦲꦥꦶꦏ꧀꧈​ꦲꦺꦴꦫ​ꦲꦺꦤꦺꦁꦮꦺꦠ꧀ꦱꦶꦗꦶꦱꦶꦗꦶꦪ​ꦱꦶꦁ​ꦩꦼꦁꦔꦶꦁ​ꦧꦫꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧉​ ²⁴ꦭꦤ꧀ꦱꦥ​ꦱꦶꦁ​ꦤꦸꦫꦸꦠ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦠꦺꦤ꧀ꦤꦶ​ꦏꦼꦏꦉꦥꦶꦁꦢꦒꦶꦁ​ꦭꦤ꧀ꦥꦼꦥꦺꦔꦶꦤ꧀ꦤꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ ꦏꦸꦮꦶ​ꦏꦧꦺꦃ​ꦮꦶꦱ꧀ꦏꦠꦸꦠ꧀ꦏꦥꦼꦤ꧀ꦠꦺꦁ꧉​ ²⁵ꦗꦭꦂꦫꦤ꧀ꦫꦺꦴꦃ​ꦱꦸꦕꦶ​ꦮꦶꦱ꧀ꦔꦚꦂꦫꦏꦺꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦲꦸꦫꦶꦥ꧀ꦩꦤꦸꦠ꧀ꦥꦼꦤꦸꦤ꧀ꦠꦸꦤꦺ​ꦫꦺꦴꦃ​ꦱꦸꦕꦶ​ꦱꦏ꧀ꦏꦧꦺꦃꦲꦺ꧉​ ²⁶ꦲꦮꦏ꧀ꦏꦺ​ꦢꦺꦮꦺꦲꦗ​ꦥꦢ​ꦱꦺꦴꦩ꧀ꦧꦺꦴꦁ꧈​ꦲꦗ​ꦥꦢ​ꦚ꧀ꦗꦭꦂꦫꦶ​ꦭꦶꦪꦤꦺ​ꦭꦤ꧀ꦲꦗ​ꦥꦢ​ꦩꦺꦫꦶ​ꦩꦫꦁ​ꦭꦶꦪꦤꦺ​꧉​

↑ ↑ ↑

꧋ꦤꦸꦭꦸꦁ​ꦱꦏ꧀ꦥꦢꦥꦢ꧉​

꧇​꧖꧇​ ¹꧋ꦥꦫꦱꦼꦢꦸꦭꦸꦂ꧈​ꦤꦺꦏ꧀ꦲꦺꦤꦺꦁꦮꦺꦴꦁꦏꦺꦴꦤꦁꦔꦤ꧀​ꦔ꧀ꦭꦏꦺꦴꦤ꧀ꦤꦶꦲꦭ꧈​ꦏꦺꦴꦮꦺꦱꦶꦁꦏꦠꦸꦤ꧀ꦠꦸꦤ꧀ꦫꦺꦴꦃꦱꦸꦕꦶꦏꦸꦢꦸꦤꦸꦤ꧀ꦠꦸꦤ꧀ꦱꦼꦢꦸꦭꦸꦂꦏꦸꦮꦶꦧꦭꦶꦏ꧀ꦩꦼꦤꦺꦃꦤꦸꦫꦸꦠ꧀ꦢꦭꦤ꧀ꦱꦶꦁꦧꦼꦤꦼꦂ꧉​ꦤꦁꦔꦶꦁꦲꦼꦁꦒꦺꦴꦤ꧀ꦩꦸꦔꦺꦭꦶꦁꦔꦏꦺꦱꦼꦢꦸꦭꦸꦂꦏꦸꦮꦶꦏꦸꦢꦸꦏꦫꦺꦴꦲꦠꦶ ꦱꦶꦁꦱꦧꦂ꧉​ꦭꦤ꧀ꦏꦺꦴꦮꦺꦢꦺꦮꦺꦪꦏꦸꦢꦸꦱꦶꦁꦲꦠꦶꦲꦠꦶꦏꦫꦺꦴꦲꦮꦏ꧀ꦩꦸꦢꦺꦮꦺ꧈​ꦗꦭꦂꦫꦤ꧀ꦏꦺꦴꦮꦺꦢꦺꦮꦺꦲꦸꦒꦧꦶꦱꦏꦼꦤꦺꦁꦥꦚ꧀ꦕꦺꦴꦧ꧉​ ²ꦏꦔꦺꦭ꧀ꦭꦤ꧀ꦤꦺ​ꦠꦸꦁꦒꦭ꧀ꦱꦼꦢꦸꦭꦸꦂ​ꦏꦸꦢꦸ​ꦢꦶꦱꦁꦒ​ꦧꦼꦧꦉꦁꦔꦤ꧀꧈​ꦩꦼꦁꦏꦺꦴꦤꦺꦴ​ꦏꦸꦮꦶ​ꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​ ³ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦔꦁꦒꦼꦥ꧀ꦲꦥꦶꦏ꧀ꦢꦺꦮꦺ꧈​ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦺꦴꦫ​꧈​ꦱꦼꦢꦸꦭꦸꦂ​ꦏꦸꦮꦶ​ꦤꦩꦸꦁ​ꦔꦥꦸꦱ꧀ꦱꦶ​ꦢꦺꦏ꧀ꦤꦺꦢꦺꦮꦺ꧉​ ⁴ꦩꦸꦭꦤꦺ​꧈​ꦏꦧꦺꦃ​ꦏꦸꦢꦸ​ꦤꦶꦩ꧀ꦧꦁ​ꦏ꧀ꦭꦏꦸꦮꦤ꧀ꦤꦺ​ꦢꦺꦮꦺꦢꦺꦮꦺ꧉​ꦤꦺꦏ꧀ꦫꦸꦩꦁꦱ​ꦧꦼꦤꦼꦂ​꧈​ꦱꦼꦢꦸꦭꦸꦂ​ꦏꦸꦮꦶ​ꦧꦶꦱ​ꦊꦒ​ꦧꦧ꧀ꦲꦸꦫꦶꦥ꧀ꦥꦺ꧈​ꦤꦁꦔꦶꦁ​ꦲꦗ​ꦩꦢꦏ꧀ꦩꦢꦏ꧀ꦏꦏꦺꦏꦫꦺꦴ​ꦏ꧀ꦭꦏꦸꦮꦤ꧀ꦤꦺ​ꦭꦶꦪꦤꦺ​꧉​ ⁵ꦗꦭꦂꦫꦤ꧀ ꦏꦧꦺꦃ​ꦮꦺꦴꦁ​ꦏꦸꦢꦸ​ꦔ꧀ꦒꦫꦥ꧀ꦏꦔꦺꦭ꧀ꦭꦤ꧀ꦤꦺ​ꦭꦤ꧀ꦏꦫꦶꦁꦏꦶꦲꦤ꧀ꦤꦺꦢꦺꦮꦺꦢꦺꦮꦺ꧉​

⁶꧋ꦮꦺꦴꦁ​ꦱꦶꦁ​ꦤꦩ꧀ꦥ​ꦥꦶꦮꦸꦭꦁ​ꦱꦁꦏꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦢꦸ​ꦩ꧀ꦧꦊꦱ꧀ꦏꦧꦼꦕꦶꦏ꧀ꦏꦤ꧀ꦩꦫꦁ​ꦱꦶꦁ​ꦩꦸꦭꦁꦔꦶ꧉​

⁷꧋ꦲꦗ​ꦥꦢ​ꦱꦼꦩ꧀ꦧꦿꦤ​ꦏꦫꦺꦴ​ꦲꦸꦫꦶꦥ꧀ꦩꦸ​ꦢꦺꦮꦺ!ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦏꦼꦤꦺꦁꦢꦶꦒꦮꦺ​ꦒꦼꦒꦸꦪꦺꦴꦤ꧀꧈​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦱꦼꦧꦂ​꧈​ꦏꦸꦮꦶ​ꦱꦶꦁ​ꦧꦏꦭ꧀ꦲꦩ꧀ꦧꦺꦴꦏ꧀ꦲꦸꦤ꧀ꦢꦸꦃ꧉​ ⁸ꦤꦺꦏ꧀ꦱꦶꦁ​ꦢꦶꦱꦼꦧꦂ​ꦤꦩꦸꦁ​ꦏꦼꦏꦉꦥ꧀ꦥꦤ꧀ꦤꦺ​ꦢꦒꦶꦁ​꧈​ꦱꦶꦁ​ꦢꦶꦲꦸꦤ꧀ꦢꦸꦃꦏꦫꦸꦱꦏ꧀ꦏꦤ꧀꧈​ꦤꦁꦔꦶꦁ​ꦤꦺꦏ꧀ꦱꦶꦁ​ꦢꦶꦱꦼꦧꦂ​ꦏꦼꦏꦉꦥ꧀ꦥꦤ꧀ꦤꦺ​ꦫꦺꦴꦃ​ꦱꦸꦕꦶ​꧈​ꦱꦶꦁ​ꦢꦶꦲꦸꦤ꧀ꦢꦸꦃꦲꦸꦫꦶꦥ꧀ꦭꦁꦒꦼꦁ​꧉​ ⁹ꦩꦸꦭꦤꦺ꧈​ꦲ꦳ꦪꦸꦏ꧀ꦲꦗꦥꦢꦏꦼꦱꦼꦭ꧀ꦤꦶꦤ꧀ꦢꦏ꧀ꦏꦏꦺꦱꦶꦁꦧꦼꦕꦶꦏ꧀꧈​ꦤꦺꦏ꧀ꦲꦮꦏ꧀ꦏꦺꦢꦺꦮꦺꦲꦺꦴꦫꦏꦼꦤ꧀ꦢꦺꦴ꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦶꦱ꧀ꦮꦚ꧀ꦕꦶꦤꦺ꧈​ꦩꦼꦱ꧀ꦠꦶꦲꦮꦏ꧀ꦏꦺꦢꦺꦮꦺꦧꦏꦭ꧀ꦔꦸꦤ꧀ꦢꦸꦃꦮꦺꦴꦃꦲꦺ꧉​ ¹⁰ꦩꦸꦭꦤꦺ​꧈​ꦦꦸꦩ꧀ꦥꦸꦁꦲꦶꦗꦶꦏ꧀ꦲꦺꦤꦺꦁꦏꦼꦭꦸꦁꦒꦫꦤ꧀ꦤꦺ꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦔ꧀ꦒꦮꦺ​ꦧꦼꦕꦶꦏ꧀ꦩꦫꦁ​ꦮꦺꦴꦁ​ꦏꦧꦺꦃ​꧈​ꦭꦸꦮꦶꦃꦭꦸꦮꦶꦃ​ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦠꦸꦁꦒꦭ꧀ꦥꦽꦕꦪ​꧉​

꧋ꦠꦸꦗꦸꦮꦤ꧀ꦤꦺꦮꦺꦴꦁꦮꦺꦴꦁ​ꦱꦶꦁ​ꦩꦸꦭꦁ​ꦏꦺꦴꦁꦏꦺꦴꦤ꧀ꦱꦸꦤꦠ꧀꧈​

¹¹꧋ꦥꦫ​ꦱꦼꦢꦸꦭꦸꦂ​꧈​ꦱꦏ꧀ꦢꦸꦫꦸꦁꦔꦺꦲꦏꦸ​ꦤꦸꦠꦸꦥ꧀ꦭꦪꦁ​ꦲꦶꦏꦶ​ꦲꦏꦸ​ꦲꦉꦥ꧀ꦲꦩ꧀ꦧꦭꦺꦤ꧀ꦤꦶ​ꦩꦼꦤꦺꦃ​ꦧꦧ꧀​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀꧈​ꦲꦶꦏꦶ​ꦱꦏ꧀ꦮꦶꦗꦶꦤꦺꦥꦽꦏꦫ​ꦱꦶꦁ​ꦥꦼꦤ꧀ꦠꦶꦁ​ꦧꦔꦼꦠ꧀ ꦩꦸꦭꦤꦺ​ꦪ​ꦠꦏ꧀ꦠꦸꦭꦶꦱ꧀ꦢꦺꦮꦺꦏꦫꦺꦴ​ꦠꦸꦭꦶꦱ꧀ꦱꦤ꧀ꦱꦶꦁ​ꦒꦼꦢꦺꦒꦼꦢꦺ꧉​ ¹²ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦩꦼꦏ꧀ꦱ​ꦏꦺꦴꦮꦺ​ꦏꦺꦴꦁꦏꦺꦴꦤ꧀​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦏꦸꦮꦶ​ꦱꦏ꧀ꦗꦤꦺꦱꦶꦁ​ꦢꦶꦒꦺꦴꦭꦺꦏ꧀ꦏꦶ​ꦤꦩꦸꦁ​ꦲꦥ​?ꦮꦺꦴꦁꦮꦺꦴꦁ​ꦏꦸꦮꦶ​ꦤꦩꦸꦁ​ꦏꦼꦥꦺꦔꦶꦤ꧀ꦢꦶꦲꦼꦊꦩ꧀ꦭꦤ꧀ꦢꦶꦲꦗꦺꦤ꧀ꦤꦶ​ꦏꦫꦺꦴ​ꦮꦺꦴꦁ​ꦙꦸ꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦠꦶ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀​ꦔ꧀ꦭꦧꦸꦃꦲꦶ​ꦩꦤꦸꦁꦱ​꧈​ꦱꦸꦥꦪ​ꦩꦤꦸꦁꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦤ꧀ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦮꦺꦴꦁ​ꦱꦶꦁ​ꦥꦽꦕꦪ​ꦏꦸꦮꦶ​ꦧꦏꦭ꧀ꦢꦶꦱꦶꦪꦱꦶꦪ​ꦭꦤ꧀ꦏꦔꦺꦭ꧀ꦭꦤ꧀꧈​ꦩꦸꦭꦤꦺ​꧈​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦮꦼꦢꦶ​ꦢꦶꦱꦶꦪꦱꦶꦪ​ꦭꦤ꧀ꦥꦢ​ꦮꦼꦢꦶ​ꦏꦔꦺꦭ꧀ꦭꦤ꧀꧈​ꦏꦸꦮꦶ​ꦗꦭꦂꦫꦤ꧀ꦤꦺ​ꦮꦺꦴꦁꦮꦺꦴꦁ​ꦥꦢ​ꦩꦼꦏ꧀ꦱ​ꦏꦺꦴꦮꦺ​ꦏꦺꦴꦁꦏꦺꦴꦤ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦮꦲꦺ​꧉​ ¹³ꦱꦼꦤꦗꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ ꦤꦁꦔꦶꦁ​ꦱꦏ꧀ꦗꦤꦺꦪ​ꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦲꦒꦩ​ꦱꦏ꧀ꦏꦧꦺꦃꦲꦺ꧉​ꦮꦺꦴꦁꦮꦺꦴꦁ​ꦩꦼꦏ꧀ꦱ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦏꦼꦤꦺꦁꦢꦶꦲꦼꦁꦒꦺꦴ​ꦥꦩꦺꦂꦫꦤ꧀ꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​ꦤꦺꦏ꧀ꦏꦺꦴꦮꦺ​ꦲꦸꦒ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀꧈​ ¹⁴ꦤꦁꦔꦶꦁ​ꦏꦁꦒꦺꦴ​ꦲꦏꦸ​ꦧꦫꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦧꦏꦭ꧀ꦠꦏ꧀ꦲꦼꦁꦒꦺꦴ​ꦥꦩꦺꦂꦫꦤ꧀꧈​ꦱꦶꦁ​ꦠꦏ꧀ꦲꦼꦁꦒꦺꦴ​ꦥꦩꦺꦂꦫꦤ꧀ꦪ​ꦤꦩꦸꦁ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦱꦶꦁ​ꦩꦠꦶ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀​ꦔ꧀ꦭꦧꦸꦃꦲꦶ​ꦲꦏꦸ​꧉​ꦱꦲꦶꦏꦶ​ꦢꦺꦴꦚ​ꦮꦶꦱ꧀ꦲꦺꦴꦫ​ꦥꦼꦤ꧀ꦠꦶꦁ​ꦏꦁꦒꦺꦴ​ꦲꦏꦸ​ꦭꦤ꧀ꦲꦏꦸ​ꦪ​ꦮꦶꦱ꧀ꦲꦺꦴꦫ​ꦥꦼꦤ꧀ꦠꦶꦁ​ꦏꦁꦒꦺꦴ​ꦢꦺꦴꦚ​꧉​

¹⁵꧋ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧ꧀ꦭꦱ꧀ꦲꦺꦴꦫ​ꦥꦼꦤ꧀ꦠꦶꦁ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀ꦲꦥ​ꦲꦺꦴꦫ​꧉​ꦱꦶꦁ​ꦥꦼꦂꦭꦸ​ꦢꦺꦮꦺꦪꦏꦸꦮꦶ​:ꦲꦥ​ꦲꦮꦏ꧀ꦏꦺ​ꦢꦺꦮꦺꦤ꧀ꦢꦸꦮꦺꦤ꧀ꦤꦶ​ꦲꦸꦫꦶꦥ꧀ꦲꦚꦂ​?

꧋ꦥꦼꦤꦸꦠꦸꦥ꧀ꦭꦤ꧀ꦥꦩꦸꦗꦶ​ꦱ꧀ꦭꦩꦼꦠ꧀꧈​

¹⁶꧋ꦱꦶꦁ​ꦠꦏ꧀ꦱꦸꦮꦸꦤ꧀ ꦩꦸꦒꦩꦸꦒ​ꦏꦧꦺꦃ​ꦱꦶꦁ​ꦥꦢ​ꦩꦤꦸꦠ꧀ꦩꦫꦁ​ꦥꦶꦠꦸꦠꦸꦂ​ꦏꦸꦮꦶ​ꦭꦤ꧀ꦏꦧꦺꦃ​ꦱꦶꦁ​ꦮꦶꦱ꧀ꦮꦺꦏ꧀ꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱꦲ​ꦤꦩ꧀ꦥ​ꦏꦠꦼꦤ꧀ꦠꦽꦩ꧀ꦩꦤ꧀ꦭꦤ꧀ꦏꦧꦼꦕꦶꦏ꧀ꦏꦤ꧀꧈​

¹⁷꧋ꦥꦫꦱꦼꦢꦸꦭꦸꦂ꧈​ꦮꦶꦮꦶꦠ꧀ꦱꦲꦶꦏꦶꦩ꧀ꦧꦺꦴꦏ꧀ꦲꦗꦥꦢꦔꦿꦸꦱꦸꦃꦲꦶꦲꦏꦸꦩꦼꦤꦺꦃꦏꦫꦺꦴꦥꦽꦏꦫꦏꦸꦮꦶ꧉​ꦠꦠꦸꦠꦠꦸꦤꦁꦲꦮꦏ꧀ꦏꦸꦲꦶꦏꦶꦠꦤ꧀ꦢꦤꦺꦤꦺꦏ꧀ꦲꦏꦸꦲꦶꦏꦶꦤꦩꦸꦁꦥꦼꦭꦢꦺꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦢꦺꦮꦺ꧉​

¹⁸꧋ꦕꦸꦏꦸꦥ꧀ꦱꦼꦩꦺꦴꦤꦺꦴꦭꦪꦁꦲꦶꦏꦶ!ꦩꦸꦒꦩꦸꦒꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦔꦺꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺꦩꦫꦁꦏꦺꦴꦮꦺꦏꦧꦺꦃ꧉​

ꦦꦈꦭꦸꦱ꧀

↑ ↑ ↑

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

¹꧋ꦥꦫ​ꦱꦼꦢꦸꦭꦸꦂ​꧈​ꦲꦶꦏꦶ​ꦭꦪꦁ​ꦱꦁꦏꦔ꧀ꦒꦺꦴꦤ꧀ꦏꦸ​꧈​ꦦꦈꦭꦸꦱ꧀ ꦩꦫꦁ​ꦏꦺꦴꦮꦺ​ꦏꦧꦺꦃ​ꦤꦁꦏꦸꦠꦌꦥ꦳ꦺꦱꦼ꧈​ꦱꦶꦁ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦢ​ꦠꦼꦩꦼꦤ꧀ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​ꦲꦏꦸ​ꦢꦢꦶ​ꦫꦱꦸꦭ꧀ꦭꦺ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦲꦶꦏꦶ​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦩꦶꦭꦶꦃ​ꦲꦏꦸ​꧉​

²꧋ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦩꦫꦁ​ꦏꦺꦴꦮꦺ​꧉​

꧋ꦧꦼꦂꦏꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

³꧋ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦥꦢ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦮꦶꦠ꧀ꦢꦺꦏ꧀ꦤꦺꦲꦩ꧀ꦧꦼꦂꦏꦃꦲꦶ​ꦲꦮꦏ꧀ꦏꦺ​ꦢꦺꦮꦺꦏꦫꦺꦴ​ꦱꦏ꧀ꦲꦺꦤꦺꦁꦔꦺꦧꦼꦂꦏꦃ​ꦏꦱꦸꦏ꧀ꦩꦤ꧀ꦱꦁꦏꦱ꧀ꦮꦂꦒ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦩ꧀ꦧꦼꦂꦏꦃꦲꦶ​ꦲꦮꦏ꧀ꦏꦺ​ꦢꦺꦮꦺꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ ⁴ꦱꦏ꧀ꦢꦸꦫꦸꦁꦔꦺꦗꦒꦠ꧀ꦢꦶꦒꦮꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦩꦶꦭꦶꦃ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦮꦺꦏ꧀ꦏꦺꦏꦿꦶꦱ꧀ꦡꦸꦱ꧀꧈​ꦢꦢꦶꦤꦺ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦢꦼꦏ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦉꦱꦶꦏ꧀ꦲꦺꦴꦫ​ꦲꦺꦤꦺꦁꦱꦭꦃꦲꦺ​꧉​

⁵꧋ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦠꦿꦺꦱ꧀ꦤꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦩꦸꦭꦤꦺ​ꦢꦺꦏ꧀ꦤꦺꦔꦺꦴꦁꦏꦺꦴꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦏꦁꦒꦺꦴ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦢꦢꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​ꦏꦸꦮꦶ​ꦥꦚ꧀ꦕꦺꦤ꧀ꦮꦶꦱ꧀ꦢꦢꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦺꦏ꧀ꦤꦺꦮꦶꦱ꧀ꦊꦒ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀ꦔꦺꦴꦤꦺꦴ​꧉​ ⁶ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦢꦺꦏ꧀ꦤꦺꦮꦶꦱ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦲꦮꦏ꧀ꦏꦺ​ꦢꦺꦮꦺꦢꦶꦒꦼꦩꦠꦺꦤ꧀ꦤꦶ​ꦠꦼꦤꦤ꧀ ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦲꦤꦏ꧀ꦏꦺ​ꦱꦶꦁ​ꦢꦶꦠꦿꦺꦱ꧀ꦤꦤ꧀ꦤꦶ꧉​ ⁷ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦲꦸꦕꦸꦭ꧀ꦱꦁꦏꦥꦔ꧀ꦮꦱꦤꦺ​ꦢꦺꦴꦱ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ꦢꦺꦏ꧀ꦤꦺꦔꦼꦠꦺꦴꦏ꧀ꦏꦏꦺꦒꦼꦠꦶꦃꦲꦺ​ꦭꦤ꧀ꦩꦠꦶ​ꦏꦁꦒꦺꦴ​ꦲꦩ꧀ꦧꦪꦂ​ꦱꦭꦃꦲꦺ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤꦩ꧀ꦥ​ꦥꦔꦥꦸꦫ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​

^8-9꧋ꦥꦚ꧀ꦕꦺꦤ꧀ꦒꦼꦢꦺꦠꦼꦤꦤ꧀ꦏꦮꦼꦭꦱ꧀ꦱꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧈​ꦢꦶꦏꦺꦠꦺꦴꦏ꧀ꦏꦏꦺꦩꦫꦁꦲꦮꦏ꧀ꦏꦺꦢꦺꦮꦺꦔꦤ꧀ꦠꦶꦭꦸꦧꦺꦂꦭꦸꦧꦺꦂ꧉​ꦔ꧀ꦒꦸꦩꦸꦤ꧀ꦤꦏꦺꦠꦼꦤꦤ꧀ꦥꦔꦼꦂꦠꦶꦤꦺꦭꦤ꧀ꦏꦮꦼꦫꦸꦃꦲꦺꦲꦼꦁꦒꦺꦴꦤꦺꦒꦸꦱ꧀ꦠꦶꦄꦭ꧀ꦭꦃꦤ꧀ꦢꦸꦢꦸꦃꦲꦏꦺꦭꦤ꧀​ꦤ꧀ꦢꦸꦤꦸꦁꦔꦏꦺꦏꦼꦏꦉꦥ꧀ꦥꦤ꧀ꦤꦺꦩꦫꦁꦲꦮꦏ꧀ꦏꦺꦢꦺꦮꦺ꧉​ꦫꦚ꧀ꦕꦩ꧀ꦩꦤ꧀ꦥꦸꦠꦸꦱ꧀ꦱꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦲꦶꦏꦶꦩꦲꦸꦩꦲꦸꦤꦺꦢꦸꦫꦸꦁꦢꦶꦲꦼꦠꦺꦴꦏ꧀ꦏꦏꦺ꧈​ꦤꦁꦔꦶꦁꦱꦲꦶꦏꦶꦢꦺꦏ꧀ꦤꦺꦮꦶꦱ꧀ꦊꦒꦤ꧀ꦢꦸꦢꦸꦃꦲꦏꦺꦩꦫꦁꦲꦮꦏ꧀ꦏꦺꦢꦺꦮꦺꦲꦥꦱꦶꦁꦢꦢꦶꦏꦼꦏꦉꦥ꧀ꦥꦤ꧀ꦤꦺ꧉​ꦩꦸꦭꦤꦺꦒꦸꦱ꧀ꦠꦶꦄꦭ꧀ꦭꦃꦔꦺꦴꦁꦏꦺꦴꦤ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦼꦢꦸꦤ꧀ꦤꦁꦗꦒꦠ꧀​ꦔ꧀ꦭꦏꦺꦴꦤ꧀ꦤꦶꦥꦠꦶꦔ꧀ꦭꦧꦸꦃꦲꦶꦲꦮꦏ꧀ꦏꦺꦢꦺꦮꦺ꧉​ ¹⁰ꦏꦸꦮꦶꦥꦚ꧀ꦕꦺꦤ꧀ꦮꦶꦱ꧀ꦢꦢꦶꦥꦸꦠꦸꦱ꧀ꦱꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦏꦁꦒꦺꦴꦚ꧀ꦭꦩꦼꦠ꧀ꦠꦏꦺꦲꦮꦏ꧀ꦏꦺꦢꦺꦮꦺꦭꦤ꧀ꦮꦶꦱ꧀​ꦏ꧀ꦭꦏꦺꦴꦤ꧀ꦏꦧꦺꦃꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺꦢꦺꦏ꧀ꦤꦺꦭꦤ꧀ꦲꦩ꧀ꦧꦺꦱꦸꦏ꧀ ꦤꦺꦏ꧀ꦮꦶꦱ꧀ꦮꦚ꧀ꦕꦶꦤꦺ꧈​ꦱꦼꦩ꧀ꦧꦫꦁꦱꦶꦁꦤꦁꦱ꧀ꦮꦂꦒꦭꦤ꧀ꦱꦶꦁꦤꦁꦧꦸꦩꦶꦧꦏꦭ꧀ꦢꦶꦢꦢꦺꦏ꧀ꦏꦏꦺꦱꦶꦗꦶ꧉​ꦏꦿꦶꦱ꧀ꦡꦸꦱ꧀ꦱꦶꦁꦢꦢꦶꦱꦼꦱꦶꦫꦃꦲꦺ꧉​

¹¹꧋ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺ꧈​ꦱꦶꦁ​ꦮꦺꦴꦁ​ꦙꦸ꧈​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦮꦶꦱ꧀​ꦤ꧀ꦢꦸꦮꦺꦤ꧀ꦤꦶ​ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦮꦺꦏ꧀ꦏꦺꦏꦿꦶꦱ꧀ꦡꦸꦱ꧀꧈​ꦏꦸꦮꦶ​ꦥꦚ꧀ꦕꦺꦤ꧀ꦮꦶꦱ꧀ꦢꦢꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦮꦶꦠ꧀​ꦩ꧀ꦧꦶꦪꦺꦤ꧀​ꦩ꧀ꦧꦶꦪꦺꦤ꧀ꦤꦺꦭꦤ꧀ꦱꦼꦩ꧀ꦧꦫꦁ​ꦪ​ꦏ꧀ꦭꦏꦺꦴꦤ꧀ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦢꦺꦏ꧀ꦤꦺ꧉​ ¹²ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧈​ꦱꦶꦁ​ꦮꦶꦱ꧀ꦱꦸꦮꦶꦔꦉꦥ꧀ꦲꦉꦥ꧀ꦠꦼꦏꦤꦺ​ꦏꦿꦶꦱ꧀ꦡꦸꦱ꧀ ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦥꦢ​ꦔ꧀ꦭꦸꦲꦸꦂꦫꦏꦺꦒꦼꦢꦺꦤꦺꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹³꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦱꦶꦁ​ꦢꦸꦢꦸ​ꦮꦺꦴꦁ​ꦙꦸ꧈​ꦱꦼꦩꦺꦴꦤꦺꦴ​ꦲꦸꦒ​!ꦗꦭꦂꦫꦤ꧀ꦏꦺꦴꦮꦺ​ ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦏꦺꦴꦮꦺ​ꦲꦸꦒ​ꦤ꧀ꦢꦸꦮꦺꦤ꧀ꦤꦶ​ꦥꦤ꧀ꦢꦸꦩ꧀ꦩꦤ꧀ꦲꦶꦏꦶ​꧉​ꦢꦺꦴꦁꦔꦺꦏꦺꦴꦮꦺ​ꦏꦿꦸꦔꦸ​ꦏꦧꦂ​ꦱꦶꦁ​ꦧꦼꦤꦼꦂ​꧈​ꦪꦏꦸꦮꦶ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦱꦶꦁ​ꦤꦼꦏꦏ꧀ꦏꦏꦺꦏꦼꦱ꧀ꦭꦩꦼꦠ꧀ꦠꦤ꧀ ꦮꦸꦗꦸꦠ꧀ꦠꦺꦏꦺꦴꦮꦺ​ꦠꦼꦫꦸꦱ꧀ꦥꦢ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ꦔꦼꦏꦺꦏ꧀ꦏꦶꦕꦥ꧀ꦩꦫꦁ​ꦏꦺꦴꦮꦺ​ꦏꦁꦒꦺꦴ​ꦠꦤ꧀ꦢꦤꦺꦏ꧀ꦏꦺꦴꦮꦺ​ꦮꦶꦱ꧀ꦮꦺꦏ꧀ꦏꦺꦢꦺꦏ꧀ꦤꦺ꧉​ꦕꦥ꧀ꦥꦺ​ꦏꦸꦮꦶ​ꦪ​ꦫꦺꦴꦃ​ꦱꦸꦕꦶ​꧈​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦲꦶꦏꦶ​ꦮꦶꦱ꧀ꦲꦩ꧀ꦧꦺꦴꦏ꧀ꦠꦩ꧀ꦥ​꧉​ ¹⁴ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦮꦶꦱ꧀ꦤꦩ꧀ꦥ​ꦫꦺꦴꦃ​ꦱꦸꦕꦶ​ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦮꦏ꧀ꦏꦺ​ꦢꦺꦮꦺ꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔꦼꦂꦠꦶ​ꦠꦼꦤꦤ꧀ ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦲꦩ꧀ꦧꦺꦱꦸꦏ꧀ꦧꦏꦭ꧀ꦔꦼꦏꦺꦏ꧀ꦏꦶꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦩꦫꦁ​ꦲꦤꦏ꧀ꦲꦤꦏ꧀ꦏꦺ​꧉​ꦫꦺꦴꦃ​ꦱꦸꦕꦶ​ꦲꦸꦒ​ꦠꦤ꧀ꦢꦤꦺ꧈​ꦤꦺꦏ꧀ꦏꦧꦺꦃ​ꦮꦺꦴꦁ​ꦱꦶꦁ​ꦮꦶꦱ꧀ꦢꦢꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦩꦼꦂꦢꦺꦏꦠꦼꦤꦤ꧀ ꦲꦺꦴꦫ​ꦢꦢꦶ​ꦱ꧀ꦭꦥ꦳꧀ꦥ꦳ꦺꦲꦥꦲꦥ​꧉​ꦩꦸꦭꦤꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦢꦸ​ꦢꦶꦒꦸꦁꦒꦸꦁ​꧈​ꦗꦭꦂꦫꦤ꧀ꦒꦼꦢꦺꦧꦔꦼꦠ꧀ꦏ꧀ꦮꦱꦤꦺ​꧉​

꧋ꦥꦤ꧀ꦢꦺꦴꦔꦤꦺ​ꦫꦱꦸꦭ꧀ꦦꦈꦭꦸꦱ꧀꧈​

^15-16꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦱꦏ꧀ꦥ꧀ꦭꦺꦴꦏ꧀ꦏꦺꦲꦏꦸ​ꦏꦿꦸꦔꦸ​ꦧꦧ꧀ꦥꦽꦕꦪꦩꦸ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦧꦧ꧀ꦏꦠꦿꦺꦱ꧀ꦤꦤ꧀ꦩꦸꦩꦫꦁ​ꦲꦤꦏ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦏꦸ​ꦪ​ꦲꦺꦴꦫ​ꦭꦺꦫꦺꦤ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦧꦼꦤ꧀ꦲꦏꦸ​ꦤ꧀ꦢꦺꦴꦁꦔꦲꦏꦸ​ꦪ​ꦩꦼꦱ꧀ꦠꦶꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​ꦏꦧꦺꦃ​꧉​ ¹⁷ꦲꦏꦸ​ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦱꦶꦁ​ꦔ꧀ꦒꦸꦩꦸꦤ꧀ꦤꦏꦺꦏ꧀ꦮꦱꦤꦺ​꧈​ꦱꦶꦁ​ꦩꦿꦺꦤ꧀ꦠꦃ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦔꦼꦏꦺꦏ꧀ꦏꦶꦫꦺꦴꦃ​ꦱꦸꦕꦶ​ꦩꦫꦁ​ꦏꦺꦴꦮꦺ​꧉​ꦲꦮꦶꦠ꧀ꦫꦺꦴꦃ​ꦱꦸꦕꦶ​ꦱꦶꦁ​ꦧꦶꦱ​ꦔꦼꦏꦺꦏ꧀ꦏꦶꦏꦮꦼꦫꦸꦃꦩꦫꦁ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦢꦸꦤꦸꦁꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦧꦶꦱ​ꦏꦼꦤꦭ꧀ꦩꦫꦁ​ꦢꦺꦏ꧀ꦤꦺ꧉​ ^18-19ꦩꦸꦒꦩꦸꦒ​ꦫꦺꦴꦃ​ꦱꦸꦕꦶ​ꦩꦢꦁꦔꦶꦥꦶꦏꦶꦂꦫꦤ꧀ꦩꦸ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦢꦸꦤꦸꦁꦲꦥ​ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦩꦁꦒꦶꦭ꧀ꦏꦺꦴꦮꦺ​꧉​ꦢꦢꦶꦤꦺ​ꦏꦺꦴꦮꦺ​ꦲꦸꦒ​ꦧꦶꦱ​ꦢꦸꦤꦸꦁꦱꦼꦥꦶꦫ​ꦒꦼꦢꦺꦤꦺꦧꦼꦂꦏꦃꦧꦼꦂꦏꦃ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦺꦴꦮꦺ​ꦭꦤ꧀ꦱꦼꦥꦶꦫ​ꦒꦼꦢꦺꦤꦺꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦤ​ꦲꦶꦁ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦥꦽꦕꦪ​ꦲꦶꦏꦶ​꧉​ꦥꦔ꧀ꦮꦱ​ꦲꦶꦏꦶ​ꦥꦚ꧀ꦕꦺꦤ꧀ꦒꦼꦢꦺ​ꦧꦔꦼꦠ꧀꧈​ ²⁰ꦪ​ꦥꦔ꧀ꦮꦱ​ꦲꦶꦏꦶ​ꦱꦶꦁ​ꦤꦔꦺꦏ꧀ꦏꦺꦏꦿꦶꦱ꧀ꦡꦸꦱ꧀ꦱꦁꦏꦥꦠꦶ​ꦭꦤ꧀ꦱꦶꦁ​ꦚ꧀ꦗꦒꦺꦴꦁꦔꦏꦺꦢꦺꦏ꧀ꦤꦺꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦒꦼꦢꦺꦢꦺꦮꦺꦥꦔ꧀ꦮꦱꦤꦺ​꧉​ ²¹ꦤꦁꦏꦺꦴꦤꦺꦴ​ꦏꦿꦶꦱ꧀ꦡꦸꦱ꧀ꦲꦶꦁ​ꦱꦏ꧀​ꦤ꧀ꦢꦸꦮꦸꦂꦫꦺꦱꦏ꧀ꦲꦺꦤꦺꦁꦔꦺꦥꦔ꧀ꦮꦱ​ꦱꦶꦁ​ꦤꦁꦭꦔꦶꦠ꧀ꦭꦤ꧀ꦱꦏ꧀ꦲꦺꦤꦺꦁꦔꦺꦥꦼꦁꦒꦼꦢꦺꦲꦥ​ꦮꦲꦺ​꧉​ꦥꦔ꧀ꦮꦱꦤꦺ​ꦏꦿꦶꦱ꧀ꦡꦸꦱ꧀ꦥꦚ꧀ꦕꦺꦤ꧀ꦔꦸꦁꦏꦸꦭ꧀ꦭꦶ​ꦱꦏ꧀ꦲꦺꦤꦺꦁꦔꦺꦥꦔ꧀ꦮꦱ​ꦱꦶꦁ​ꦲꦤ​ꦲꦶꦁ​ꦗꦩꦤ꧀ꦱꦲꦶꦏꦶ​ꦭꦤ꧀ꦱꦶꦁ​ꦲꦤ​ꦲꦶꦁ​ꦗꦩꦤ꧀ꦱꦶꦁ​ꦧꦏꦭ꧀ꦠꦼꦏ​꧉​ ²²ꦱꦼꦩ꧀ꦧꦫꦁ​ꦢꦶꦢꦺꦏꦺꦏ꧀ꦲꦶꦁ​ꦱꦏ꧀ꦔꦶꦱꦺꦴꦂꦫꦺ​ꦏꦿꦶꦱ꧀ꦡꦸꦱ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦢꦶꦢꦢꦺꦏ꧀ꦏꦏꦺꦱꦼꦱꦶꦫꦃꦲꦺ​ꦥꦱꦩꦸꦮꦤ꧀꧈​ ²³ꦥꦱꦩꦸꦮꦤ꧀ꦏꦸꦮꦶ​ꦧꦢꦤ꧀ꦤꦺ​ꦏꦿꦶꦱ꧀ꦡꦸꦱ꧀ ꦢꦢꦶꦤꦺ​ꦏꦫꦺꦴ​ꦥꦱꦩꦸꦮꦤ꧀ꦤꦺꦏꦿꦶꦱ꧀ꦡꦸꦱ꧀ꦱꦲꦶꦏꦶ​ꦮꦶꦱ꧀ꦥꦼꦥꦏ꧀꧈​ꦭꦤ꧀ꦪ​ꦏꦿꦶꦱ꧀ꦡꦸꦱ꧀ꦢꦺꦮꦺꦱꦶꦁ​ꦩꦫꦏ꧀ꦏꦏꦺꦱꦼꦩ꧀ꦧꦫꦁ​ꦤꦁꦗꦒꦠ꧀ꦏꦺꦤꦺ​ꦧꦶꦱ​ꦥꦼꦥꦏ꧀꧈​

↑ ↑ ↑

꧋ꦭꦲꦶꦂ​ꦩꦼꦤꦺꦃ​ꦲꦶꦁ​ꦲꦸꦫꦶꦥ꧀ꦲꦚꦂ​꧉​

꧇​꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦱꦏ꧀ꦕꦫ​ꦏꦱꦸꦏ꧀ꦩꦤ꧀ꦏꦺꦴꦮꦺ​ꦩ꧀ꦧꦶꦪꦺꦤ꧀ꦪ​ꦮꦶꦱ꧀ꦥꦢ​ꦩꦠꦶ​꧈​ꦗꦭꦂꦫꦤ꧀ꦏꦺꦴꦮꦺ​ꦲꦺꦴꦫ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦏꦺꦴꦮꦺ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ ²ꦢꦺꦏ꧀​ꦩ꧀ꦧꦶꦪꦺꦤ꧀ꦏꦺꦴꦮꦺ​ꦥꦢ​ꦤꦸꦫꦸꦠ꧀ꦭꦏꦸꦤꦺꦢꦺꦴꦚ​ꦱꦶꦁ​ꦲꦭ​꧉​ꦏꦺꦴꦮꦺ​ꦥꦢ​ꦩꦤꦸꦠ꧀ꦩꦫꦁ​ꦥꦔ꧀ꦮꦱꦤꦺ​ꦫꦺꦴꦃꦫꦺꦴꦃ​ꦱꦶꦁ​ꦤꦁꦭꦔꦶꦠ꧀;ꦪ​ꦫꦺꦴꦃꦫꦺꦴꦃ​ꦲꦶꦏꦶ​ꦱꦶꦁ​ꦔ꧀ꦮꦱꦤꦶ​ꦲꦸꦫꦶꦥ꧀ꦥꦺꦮꦺꦴꦁꦮꦺꦴꦁ​ꦱꦶꦁ​ꦤꦩ꧀ꦥꦶꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​꧉​ ³ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦧꦺꦃ​ꦢꦺꦏ꧀​ꦩ꧀ꦧꦶꦪꦺꦤ꧀ꦲꦸꦫꦶꦥ꧀ꦥꦺꦪ​ꦏꦪ​ꦮꦺꦴꦁꦮꦺꦴꦁ​ꦏꦸꦮꦶ​꧉​ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦥꦺꦤꦩꦸꦁ​ꦤꦸꦫꦸꦠ꧀ꦠꦶ​ꦏꦼꦱꦼꦤꦼꦔꦤ꧀ꦤꦺꦲꦠꦶ​ꦭꦤ꧀​ꦔ꧀ꦭꦏꦺꦴꦤ꧀ꦤꦶ​ꦲꦥ​ꦮꦲꦺ​ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦢꦒꦶꦁ​ꦭꦤ꧀ꦥꦶꦏꦶꦂꦫꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ꦲꦮꦏ꧀ꦏꦺ​ꦢꦺꦮꦺꦩ꧀ꦧꦶꦪꦺꦤ꧀ꦲꦸꦫꦶꦥ꧀ꦥꦺꦪ​ꦏꦪ​ꦮꦺꦴꦁꦮꦺꦴꦁ​ꦭꦶꦪꦤꦺ​ꦭꦤ꧀ꦤꦩꦸꦁ​ꦤꦩ꧀ꦧꦃꦲꦶ​ꦤꦼꦱꦸꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​

⁴꧋ꦤꦁꦔꦶꦁ​ꦒꦼꦢꦺꦠꦼꦤꦤ꧀ꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦗꦭꦂꦫꦤ꧀ꦢꦺꦏ꧀ꦤꦺꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ ⁵ꦩꦸꦭꦤꦺ​꧈​ꦱꦼꦤꦗꦤ꧀ꦱꦏ꧀ꦕꦫ​ꦏꦱꦸꦏ꧀ꦩꦤ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦩꦠꦶ​ꦗꦭꦂꦫꦤ꧀ꦱꦭꦃꦲꦺ​ꦲꦮꦏ꧀ꦏꦺ​ꦢꦺꦮꦺ꧈​ꦧꦉꦁ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦶꦠꦔꦺꦏ꧀ꦏꦏꦺꦩꦼꦤꦺꦃ​ꦱꦁꦏꦥꦠꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦥꦚ꧀ꦕꦺꦤ꧀ ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀ ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦭꦱ꧀ꦱꦶ​ꦲꦮꦏ꧀ꦏꦺ​ꦢꦺꦮꦺ꧉​ ⁶ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦲꦮꦏ꧀ꦏꦺ​ꦢꦺꦮꦺꦪ​ꦮꦶꦱ꧀ꦏꦠꦸꦠ꧀ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​ꦧꦉꦁ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦱꦸꦥꦪ​ꦧꦉꦁ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦲꦮꦏ꧀ꦏꦺ​ꦢꦺꦮꦺꦔ꧀ꦮꦱꦤꦶ​ꦱ꧀ꦮꦂꦒ​꧉​ ⁷ꦪ​ꦩꦼꦁꦏꦺꦴꦤꦺꦴ​ꦏꦸꦮꦶ​ ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦏꦁꦒꦺꦴ​ꦱ꧀ꦭꦮꦱ꧀ꦱꦺ꧈​ꦤꦺꦏ꧀ꦏꦮꦼꦭꦱ꧀ꦱꦤ꧀ꦤꦺ​ꦭꦤ꧀ꦏꦠꦿꦺꦱ꧀ꦤꦤꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦱꦶꦁ​ꦢꦶꦮꦸꦗꦸꦠ꧀ꦠꦏꦺꦲꦶꦁ​ꦏꦿꦶꦱ꧀ꦡꦸꦱ꧀ ꦔꦸꦁꦏꦸꦭ꧀ꦭꦶ​ꦱꦼꦩ꧀ꦧꦫꦁ​꧉​

⁸꧋ꦥꦫ​ꦱꦼꦢꦸꦭꦸꦂ​꧈​ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦲꦶꦏꦶ​:ꦏꦺꦴꦮꦺ​ꦧꦶꦱ​ꦤꦩ꧀ꦥ​ꦏꦼꦱ꧀ꦭꦩꦼꦠ꧀ꦠꦤ꧀ꦏꦸꦮꦶ​ꦤꦩꦸꦁ​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦏꦮꦼꦭꦱ꧀ꦱꦤ꧀ꦤꦺ​ꦩꦫꦁ​ꦏꦺꦴꦮꦺ​꧈​ꦱꦏ꧀ꦧꦉꦁꦔꦺꦏꦺꦴꦮꦺ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀꧈​ꦠꦼꦒꦼꦱ꧀ꦱꦺ​꧈​ꦏꦸꦮꦶ​ꦥꦮꦺꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦧ꧀ꦭꦱ꧀ꦢꦸꦢꦸ​ꦲꦸꦥꦃꦲꦺꦲꦼꦁꦒꦺꦴꦤ꧀ꦩꦸ​ꦔ꧀ꦒꦮꦺ​ꦧꦼꦕꦶꦏ꧀꧈​ ⁹ꦢꦢꦶꦤꦺ​ꦪ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦶꦱ​ꦱꦺꦴꦩ꧀ꦧꦺꦴꦁꦭꦤ꧀ꦔꦼꦊꦩ꧀ꦢꦺꦏ꧀ꦤꦺꦢꦺꦮꦺ꧉​ ¹⁰ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦶꦱ​ꦔꦼꦊꦩ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦢꦺꦮꦺ꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤ꧀ꦢꦢꦺꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦏꦪ​ꦔꦺꦤꦺ​꧉​ꦱꦏ꧀ꦧꦉꦁꦔꦺꦲꦮꦏ꧀ꦏꦺ​ꦢꦺꦮꦺꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦔꦚꦂꦫꦏꦺꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀ ꦲꦮꦶꦠ꧀ꦏꦸꦮꦶ​ꦮꦶꦱ꧀ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦮꦶꦠ꧀​ꦩ꧀ꦧꦶꦪꦺꦤ꧀​ꦩ꧀ꦧꦶꦪꦺꦤ꧀ꦤꦺ꧉​

꧋ꦮꦺꦴꦁ​ꦙꦸꦭꦤ꧀ꦮꦺꦴꦁ​ꦢꦸꦢꦸ​ꦙꦸꦢꦢꦶ​ꦱꦶꦗꦶ​ꦲꦶꦁ​ꦏꦿꦶꦱ꧀ꦡꦸꦱ꧀꧈​

¹¹꧋ꦥꦫ​ꦱꦼꦢꦸꦭꦸꦂ​꧈​ꦥꦢ​ꦲꦺꦭꦶꦁꦔ​!ꦩꦲꦸꦤꦺ​ꦏꦺꦴꦮꦺ​ꦲꦺꦴꦫ​ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦮꦺꦴꦁ​ꦙꦸ꧈​ꦱꦶꦁ​ꦥꦢ​ꦱꦸꦤꦠ꧀ ꦏꦧꦺꦃ​ꦔꦫꦤ꧀ꦤꦶ​ꦏꦺꦴꦮꦺ​ꦏꦸꦮꦶ​“ꦮꦺꦴꦁ​ꦲꦺꦴꦫ​ꦱꦸꦤꦠ꧀”꧉​ ¹²ꦭꦃ​ꦩ꧀ꦧꦶꦪꦺꦤ꧀​ꦩ꧀ꦧꦶꦪꦺꦤ꧀ꦤꦺꦏꦺꦴꦮꦺ​ꦏꦼꦥꦿꦶꦪꦺ​?ꦩ꧀ꦧꦶꦪꦺꦤ꧀ꦤꦺꦏꦺꦴꦮꦺ​ꦥꦢ​ꦥꦶꦱꦃ​ꦱꦁꦏꦏꦿꦶꦱ꧀ꦡꦸꦱ꧀ ꦏꦺꦴꦮꦺ​ꦮꦺꦴꦁ​ꦭꦶꦪ​ꦧꦁꦱ​꧈​ꦢꦸꦢꦸ​ꦧꦁꦱ​ꦆꦱꦿꦌꦭ꧀ꦱꦶꦁ​ꦢꦶꦥꦶꦭꦶꦃ​ꦭꦤ꧀ꦢꦶꦏꦺꦏ꧀ꦏꦶꦥꦽꦗꦚ꧀ꦗꦶꦪꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦲꦼꦁꦒꦺꦴꦤ꧀ꦩꦸ​ꦲꦸꦫꦶꦥ꧀ꦲꦶꦁ​ꦢꦺꦴꦚ​ꦏꦺꦤꦺ​ꦩꦲꦸꦤꦺ​ꦏꦺꦴꦮꦺ​ꦲꦺꦴꦫ​ꦤ꧀ꦢꦸꦮꦺꦲꦥꦲꦥ​꧈​ꦲꦺꦴꦫ​ꦤ꧀ꦢꦸꦮꦺꦥꦼꦔꦉꦥ꧀ꦲꦉꦥ꧀ꦭꦤ꧀ꦲꦺꦴꦫ​ꦤ꧀ꦢꦸꦮꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹³ꦤꦁꦔꦶꦁ​꧈​ꦱꦼꦤꦗꦤ꧀ꦤ​ꦏꦺꦴꦮꦺ​ꦩꦲꦸꦤꦺ​ꦲꦢꦺꦴꦃ​ꦧꦔꦼꦠ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦢꦶꦕꦼꦢꦼꦏ꧀ꦏꦏꦺ​ꦏꦫꦺꦴ​ꦢꦺꦏ꧀ꦤꦺ꧉​ꦏꦸꦮꦶ​ꦗꦭꦂꦫꦤ꧀ꦏꦺꦴꦮꦺ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦭꦤ꧀ꦒꦼꦠꦶꦃꦲꦺ​ꦏꦿꦶꦱ꧀ꦡꦸꦱ꧀ꦮꦶꦱ꧀ꦠꦸꦩꦺꦠꦺꦱ꧀ꦏꦁꦒꦺꦴ​ꦲꦩ꧀ꦧꦪꦂ​ꦱꦭꦃꦩꦸ​꧉​ ¹⁴ꦲꦏꦸ​ꦩꦲꦸ​ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦱꦲꦶꦏꦶ​ꦮꦶꦱ꧀ꦢꦶꦕꦼꦢꦼꦏ꧀ꦏꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦢꦺꦮꦺꦮꦶꦱ꧀ꦔꦿꦸꦏꦸꦤ꧀ꦤꦏꦺꦲꦮꦏ꧀ꦏꦺ​ꦢꦺꦮꦺꦩꦫꦁ​ꦱꦏ꧀ꦥꦢꦥꦢ꧉​ꦢꦺꦏ꧀ꦤꦺꦱꦶꦁ​ꦔ꧀ꦒꦠꦸꦏ꧀ꦏꦏꦺꦮꦺꦴꦁ​ꦙꦸꦏꦫꦺꦴ​ꦱꦶꦁ​ꦢꦸꦢꦸ​ꦙꦸꦢꦢꦶ​ꦱꦶꦗꦶ​꧈​ꦏꦪ​ꦮꦺꦴꦁ​ꦠꦸꦁꦒꦭ꧀ꦱꦏ꧀ꦧꦿꦪꦠ꧀ꦮꦲꦺ​꧈​ꦱꦼꦤꦗꦤ꧀ꦤ​ꦩꦲꦸꦤꦺ​ꦩꦸꦁꦱꦸꦃꦲꦺ​꧉​ꦏꦿꦶꦱ꧀ꦡꦸꦱ꧀ꦮꦶꦱ꧀ꦲꦩ꧀ꦧꦸꦧꦿꦃ​ꦠꦺꦩ꧀ꦧꦺꦴꦏ꧀ꦏꦺ​ꦱꦶꦁ​ꦩꦶꦱꦃ​ꦮꦺꦴꦁ​ꦙꦸꦱꦁꦏꦮꦺꦴꦁ​ꦱꦶꦁ​ꦢꦸꦢꦸ​ꦙꦸ꧈​ꦠꦼꦒꦼꦱ꧀ꦱꦺ​꧈​ꦏꦿꦶꦱ꧀ꦡꦸꦱ꧀ꦮꦶꦱ꧀ꦲꦩ꧀ꦧꦸꦮꦁ​ꦫꦱ​ꦱꦼꦔꦶꦠ꧀ꦱꦶꦁ​ꦩꦫꦏ꧀ꦏꦏꦺꦩꦼꦩꦸꦁꦱꦸꦃ꧉​ ¹⁵ꦢꦺꦏ꧀ꦤꦺꦔ꧀ꦭꦏꦺꦴꦤ꧀ꦤꦶ​ꦥꦠꦶ​꧈​ꦠꦸꦗꦸꦮꦤ꧀ꦤꦺꦩꦠꦺꦤ꧀ꦤꦶ​ꦮꦺꦠ꧀ꦠꦺꦭꦤ꧀ꦥꦼꦂꦤꦠꦤ꧀ꦤꦺꦲꦒꦩ​ꦙꦸꦱꦶꦁ​ꦩꦶꦱꦃ​ꦧꦁꦱ​ꦙꦸꦱꦁꦏꦭꦶꦪ​ꦧꦁꦱ​꧉​ꦱꦲꦶꦏꦶ​ꦧꦁꦱ​ꦭꦺꦴꦫꦺꦴ​ꦲꦶꦏꦶ​ꦮꦶꦱ꧀ꦢꦶꦫꦸꦏꦸꦤ꧀ꦤꦏꦺꦭꦤ꧀ꦢꦶꦢꦢꦺꦏ꧀ꦏꦏꦺꦮꦺꦴꦁ​ꦲꦚꦂ​꧈​ꦏꦧꦺꦃ​ꦔꦸꦩ꧀ꦥꦸꦭ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ ¹⁶ꦤꦁꦔꦶꦁ​ꦏꦿꦶꦱ꧀ꦡꦸꦱ꧀ꦲꦼꦁꦒꦺꦴꦤꦺ​ꦩꦠꦶ​ꦤꦁꦥꦼꦤ꧀ꦠꦺꦁꦔꦤ꧀ꦠꦸꦗꦸꦮꦤ꧀ꦤꦺꦲꦺꦴꦫ​ꦤꦩꦸꦁ​ꦔꦿꦸꦏꦸꦤ꧀ꦤꦏꦺꦧꦁꦱ​ꦭꦺꦴꦫꦺꦴ​ꦏꦸꦮꦶ​ꦩꦫꦁ​ꦱꦏ꧀ꦥꦢꦥꦢ꧈​ꦲꦺꦴꦫ​꧉​ꦏꦿꦶꦱ꧀ꦡꦸꦱ꧀ꦲꦼꦁꦒꦺꦴꦤꦺ​ꦩꦠꦶ​ꦠꦸꦗꦸꦮꦤ꧀ꦤꦺꦲꦸꦒ​ꦏꦁꦒꦺꦴ​ꦔꦿꦸꦏꦸꦤ꧀ꦤꦏꦺꦧꦁꦱ​ꦭꦺꦴꦫꦺꦴ​ꦏꦸꦮꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦱꦲꦶꦏꦶ​ꦮꦶꦱ꧀ꦲꦺꦴꦫ​ꦲꦺꦤꦺꦁꦕꦫ​ꦩꦼꦩꦸꦁꦱꦸꦃꦲꦤ꧀꧈​ ¹⁷ꦏꦿꦶꦱ꧀ꦡꦸꦱ꧀ꦠꦼꦏꦤꦺ​ꦔ꧀ꦒꦮ​ꦏꦧꦂ​ꦧꦧ꧀ꦉꦫꦸꦏꦸꦤ꧀ꦤꦤ꧀ꦩꦫꦁ​ꦏꦺꦴꦮꦺ​ꦱꦶꦁ​ꦩꦲꦸꦤꦺ​ꦲꦢꦺꦴꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦸꦒ​ꦩꦫꦁ​ꦧꦁꦱ​ꦙꦸ꧈​ꦱꦶꦁ​ꦕꦼꦢꦼꦏ꧀​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁸ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦮꦶꦱ꧀​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧈​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦮꦺꦴꦁ​ꦙꦸꦭꦤ꧀ꦲꦸꦒ​ꦱꦶꦁ​ꦢꦸꦢꦸ​ꦙꦸꦮꦶꦱ꧀ꦏꦠꦸꦤ꧀ꦠꦸꦤ꧀ꦏꦧꦺꦃ​ꦏꦫꦺꦴ​ꦫꦺꦴꦃ​ꦱꦸꦕꦶ​꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉​

¹⁹꧋ꦢꦢꦶꦤꦺ​ꦏꦺꦴꦮꦺ​ꦱꦲꦶꦏꦶ​ꦮꦶꦱ꧀ꦲꦺꦴꦫ​ꦮꦺꦴꦁ​ꦚ꧀ꦗꦧ​ꦩꦼꦤꦺꦃ​꧈​ꦲꦺꦴꦫ​!ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦢꦢꦶ​ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁰ꦏꦺꦴꦮꦺ​ꦏꦧꦺꦃ​ꦱꦲꦶꦏꦶ​ꦮꦶꦱ꧀ꦏꦪ​ꦲꦺꦴꦩꦃ​ꦏꦲꦺ​꧈​ꦢꦶꦢꦼꦏ꧀ꦤꦺꦤꦁꦥꦺꦴꦤ꧀ꦢꦱꦶꦱꦶꦁ​ꦮꦶꦱ꧀ꦢꦶꦥꦱꦁ​ꦏꦫꦺꦴ​ꦥꦫ​ꦫꦱꦸꦭ꧀ꦭꦤ꧀ꦥꦫ​ꦤꦧꦶ​꧉​ ²¹ꦭꦃ​ꦏꦿꦶꦱ꧀ꦡꦸꦱ꧀ꦢꦺꦮꦺꦱꦶꦁ​ꦢꦢꦶ​ꦮꦠꦸ​ꦱꦶꦁ​ꦚꦁꦒ​ꦲꦺꦴꦩꦃꦲꦺ​꧈​ꦠꦼꦒꦼꦱ꧀ꦱꦺ​꧈​ꦢꦺꦏ꧀ꦤꦺꦱꦶꦁ​ꦔ꧀ꦒꦤ꧀ꦢꦺꦁꦔꦏꦺꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦢꦢꦶ​ꦱꦶꦗꦶ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦢꦢꦶ​ꦥꦁꦒꦺꦴꦤ꧀ꦤꦤ꧀ꦱꦶꦁ​ꦱꦸꦕꦶ​꧉​ ²²ꦗꦭꦂꦫꦤ꧀ꦏꦺꦴꦮꦺ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦏꦺꦴꦮꦺ​ꦱꦶꦁ​ꦢꦸꦢꦸ​ꦮꦺꦴꦁ​ꦙꦸꦧꦶꦱ​ꦧꦼꦧꦉꦁꦔꦤ꧀ꦢꦢꦶ​ꦱꦶꦗꦶ​ꦏꦫꦺꦴ​ꦮꦺꦴꦁ​ꦙꦸꦭꦤ꧀ꦧꦼꦧꦉꦁꦔꦤ꧀ꦏꦺꦴꦮꦺ​ꦢꦢꦶ​ꦥꦁꦒꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦂꦫꦤ꧀ꦫꦺꦴꦃ​ꦱꦸꦕꦶ​꧉​

↑ ↑ ↑

꧋ꦥꦼꦁꦒꦮꦺꦪꦤ꧀ꦏꦸꦫꦱꦸꦭ꧀ꦦꦈꦭꦸꦱ꧀ꦤꦁꦠꦼꦔꦃꦲꦺ​ꦮꦺꦴꦁ​ꦱꦶꦁ​ꦢꦸꦢꦸ​ꦙꦸ꧉​

꧇​꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦩꦸꦭꦤꦺ​ꦲꦏꦸ​꧈​ꦦꦈꦭꦸꦱ꧀ ꦱꦲꦶꦏꦶ​ꦤꦁꦱꦼꦠꦿꦥꦤ꧀ꦲꦶꦏꦶ​ꦗꦭꦂꦫꦤ꧀ꦲꦏꦸ​ꦔ꧀ꦭꦧꦸꦃꦲꦶ​ꦏꦺꦴꦮꦺ​ꦱꦶꦁ​ꦢꦸꦢꦸ​ꦮꦺꦴꦁ​ꦙꦸ꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦢꦢꦶ​ꦱꦶꦗꦶ​ꦏꦫꦺꦴ​ꦮꦺꦴꦁ​ꦙꦸ꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦲꦼꦁꦒꦺꦴꦤ꧀ꦏꦸ​ꦔ꧀ꦭꦢꦺꦤ꧀ꦤꦶ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​ ²ꦏꦺꦴꦮꦺ​ꦩꦼꦱ꧀ꦠꦶꦪ​ꦮꦶꦱ꧀ ꦥꦢ​ꦏꦿꦸꦔꦸ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦲꦏꦸ​꧈​ꦩꦸꦭꦤꦺ​ꦢꦺꦏ꧀ꦤꦺꦔꦼꦏꦺꦏ꧀ꦏꦶꦥꦼꦁꦒꦮꦺꦏꦸꦲꦶꦏꦶ​ꦩꦫꦁ​ꦲꦏꦸ​ꦏꦁꦒꦺꦴ​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧉​ ³ꦒꦸꦱ꧀ꦠꦶ​ꦄꦭ꧀ꦭꦃ​ꦥꦚ꧀ꦕꦺꦤ꧀ꦮꦶꦱ꧀ꦏꦉꦥ꧀​ꦤ꧀ꦢꦸꦢꦸꦃꦲꦏꦺꦮꦼꦮꦢꦶꦤꦺ​ꦩꦫꦁ​ꦲꦏꦸ​꧉​ꦲꦏꦸ​ꦮꦶꦱ꧀ꦤꦸꦭꦶꦱ꧀ꦧꦧ꧀ꦲꦶꦏꦶ​ꦏꦸꦮꦶ​ꦩꦲꦸ​꧈​ꦱꦼꦤꦗꦤ꧀ꦤ​ꦤꦩꦸꦁ​ꦕꦼꦏꦏ꧀ꦮꦲꦺ​꧉​ ⁴ꦤꦁꦔꦶꦁꦤꦺꦏ꧀​ꦩ꧀ꦧꦺꦴꦏ꧀ꦮꦕꦱꦶꦁꦲꦥꦶꦏ꧀ꦏꦺꦴꦮꦺꦩꦼꦱ꧀ꦠꦶꦧꦶꦱꦔꦼꦂꦠꦶꦲꦥꦢꦸꦤꦸꦁꦏꦸꦧꦧ꧀ꦫꦚ꧀ꦕꦩ꧀ꦩꦤ꧀ꦤꦺꦏꦿꦶꦱ꧀ꦡꦸꦱ꧀ꦲꦶꦏꦶ꧉​ ⁵ꦏꦮꦶꦠ꧀ꦗꦩꦤ꧀​ꦩ꧀ꦧꦶꦪꦺꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦸꦫꦸꦁ​ꦠꦲꦸ​ꦔ꧀ꦒꦼꦭꦂꦫꦏꦺꦮꦼꦮꦢꦶꦤꦺ​ꦲꦶꦏꦶ​꧈​ꦤꦁꦔꦶꦁ​ꦱꦲꦶꦏꦶ​꧈​ꦭꦤ꧀ꦠꦂꦫꦤ꧀ꦫꦺꦴꦃ​ꦱꦸꦕꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦧꦧ꧀ꦲꦶꦏꦶ​ꦩꦫꦁ​ꦫꦱꦸꦭ꧀ꦫꦱꦸꦭ꧀ꦭꦤ꧀ꦤꦧꦶꦤꦧꦶ​꧉​ ⁶ꦮꦼꦮꦢꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦸ​ꦪ​ꦲꦶꦏꦶ​:ꦭꦤ꧀ꦠꦂꦫꦤ꧀ꦥꦽꦕꦪ​ꦩꦫꦁ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦲꦸꦒ​ꦥꦢ​ꦩꦺꦭꦸ​ꦲꦺꦤ꧀ꦠꦸꦏ꧀ꦥꦤ꧀ꦢꦸꦩ꧀ꦩꦤ꧀ꦱꦁꦏꦧꦼꦂꦏꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏꦁꦒꦺꦴ​ꦮꦺꦴꦁ​ꦙꦸ꧉​ꦮꦺꦴꦁꦮꦺꦴꦁ​ꦏꦸꦮꦶ​ꦢꦶꦒꦤ꧀ꦢꦺꦁꦔꦏꦺꦢꦢꦶ​ꦱꦶꦗꦶ​꧈​ꦪꦏꦸꦮꦶ​ꦧꦢꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦭꦤ꧀ꦲꦸꦒ​ꦥꦢ​ꦩꦺꦭꦸ​ꦤ꧀ꦢꦸꦮꦺꦤ꧀ꦤꦶ​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

⁷꧋ꦲꦏꦸ​ꦱꦲꦶꦏꦶ​ꦢꦢꦶ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦲꦶꦏꦶ​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦉꦥ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦲꦏꦸ​ꦭꦤ꧀ꦩꦶꦭꦶꦃ​ꦲꦏꦸ​꧉​ꦢꦺꦏ꧀ꦤꦺꦱꦶꦁ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦲꦏꦸ​꧈​ꦱꦸꦥꦪ​ꦲꦏꦸ​ꦧꦶꦱ​ꦔꦼꦂꦗꦤ꧀ꦤꦶꦥꦼꦁꦒꦮꦺꦏꦸꦲꦶꦏꦶ​꧉​ ⁸ꦲꦏꦸ​ꦲꦶꦏꦶ​ꦱꦏ꧀ꦗꦤꦺꦮꦺꦴꦁ​ꦱꦶꦁ​ꦕꦶꦭꦶꦏ꧀ꦢꦺꦮꦺꦲꦶꦁ​ꦱꦏ꧀ꦠꦼꦔꦃꦲꦺ​ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦏ꧀ꦱ​ꦒꦼꦊꦩ꧀ꦔꦼꦏꦺꦏ꧀ꦏꦶꦥꦼꦁꦒꦮꦺꦏꦸꦱꦶꦁ​ꦒꦼꦢꦺꦲꦶꦏꦶ​ꦩꦫꦁ​ꦲꦏꦸ​꧉​ꦲꦏꦸ​ꦏꦸꦢꦸ​ꦔꦧꦂꦫꦶ​ꦮꦺꦴꦁꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦧꦧ꧀ꦏꦱꦸꦒꦶꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺꦭꦤ꧀ꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦢꦸꦤꦸꦁꦔꦏꦺ꧉​ ⁹ꦲꦏꦸ​ꦏꦸꦢꦸ​ꦤ꧀ꦢꦸꦤꦸꦁꦔꦏꦺꦩꦫꦁ​ꦏꦧꦺꦃ​ꦮꦺꦴꦁ​ꦏꦼꦥꦿꦶꦪꦺ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦭꦏꦺꦴꦏ꧀ꦏꦏꦺꦏꦼꦏꦉꦥ꧀ꦥꦤ꧀ꦤꦺ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔ꧀ꦒꦮꦺ​ꦭꦔꦶꦠ꧀ꦭꦤ꧀ꦧꦸꦩꦶ​ꦚꦶꦩ꧀ꦥꦼꦤ꧀ꦮꦼꦮꦢꦶ​ꦲꦶꦏꦶ​ꦥꦶꦫꦁꦥꦶꦫꦁ​ꦲꦠꦸꦱ꧀ꦠꦲꦸꦤ꧀ꦱꦸꦮꦺꦤꦺ​꧉​ ¹⁰ꦭꦃ​ꦱꦲꦶꦏꦶ​ꦥꦚ꧀ꦕꦺꦤ꧀ꦮꦶꦱ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦒꦼꦭꦂ​ꦮꦼꦮꦢꦶ​ꦲꦶꦏꦶ​ꦩꦫꦁ​ꦏꦧꦺꦃ​ꦮꦺꦴꦁ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴꦏ꧀ꦏꦏꦺꦥꦱꦩꦸꦮꦤ꧀ꦤꦺꦏꦁꦒꦺꦴ​ꦔꦼꦠꦺꦴꦏ꧀ꦏꦏꦺꦱꦏ꧀ꦮꦼꦂꦤꦤꦺ​ꦏꦮꦼꦫꦸꦃꦲꦺꦩꦫꦁ​ꦥꦔ꧀ꦮꦱꦥꦔ꧀ꦮꦱ​ꦭꦤ꧀ꦥꦼꦁꦒꦼꦢꦺꦥꦼꦁꦒꦼꦢꦺꦱꦶꦁ​ꦤꦁꦭꦔꦶꦠ꧀꧈​ ¹¹ꦏꦸꦮꦶ​ꦩꦲꦸ​ꦏꦧꦺꦃ​ꦏ꧀ꦭꦏꦺꦴꦤ꧀ꦭꦤ꧀ꦠꦂꦫꦤ꧀ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦩꦶꦠꦸꦫꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦼꦏꦉꦥ꧀ꦥꦤ꧀ꦤꦺ​ꦱꦶꦁ​ꦭꦁꦒꦼꦁ​꧉​

¹²꧋ꦥꦫ​ꦱꦼꦢꦸꦭꦸꦂ​꧈​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦮꦶꦱ꧀ꦲꦺꦴꦫ​ꦲꦺꦤꦺꦁꦲꦭꦁꦔꦭꦁꦔꦺꦧ꧀ꦭꦱ꧀ ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦩꦫ​ꦏꦫꦺꦴ​ꦏꦼꦤ꧀ꦢꦼꦭ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦸꦮꦶ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦭꦤ꧀ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ ¹³ꦩꦸꦭꦤꦺ​ꦲꦏꦸ​ꦚꦸꦮꦸꦤ꧀ꦩꦫꦁ​ꦏꦺꦴꦮꦺ​꧈​ꦲꦗ​ꦥꦢ​ꦱꦼꦩ꧀ꦥ꧀ꦭꦏ꧀ ꦱꦼꦤꦗꦤ꧀ꦤ​ꦲꦏꦸ​ꦱꦁꦱꦫ​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧉​ꦏꦺꦴꦮꦺ​ꦩꦭꦃ​ꦏꦸꦢꦸ​ꦧꦸꦔꦃ​꧉​

꧋ꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

^14-15꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦏꦸ​ꦩꦶꦏꦶꦂꦫꦏꦺꦏꦸꦮꦶ​ꦩꦲꦸ​ꦏꦧꦺꦃ​꧈​ꦲꦏꦸ​ꦠꦼꦫꦸꦱ꧀​ꦤ꧀ꦢꦺꦴꦁꦔꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧈​ꦱꦶꦁ​ꦢꦢꦶ​ꦮꦶꦮꦶꦠ꧀ꦠꦤ꧀ꦤꦺ​ꦏꦧꦺꦃ​ꦧꦿꦪꦠ꧀ꦱꦶꦁ​ꦤꦁꦱ꧀ꦮꦂꦒ​ꦭꦤ꧀ꦤꦁꦧꦸꦩꦶ​꧉​ ¹⁶ꦲꦏꦸ​ꦤ꧀ꦢꦺꦴꦁꦔ꧈​ꦱꦸꦥꦪ​ꦢꦺꦏ꧀ꦤꦺꦤꦸꦭꦸꦁꦔꦶ​ꦏꦺꦴꦮꦺ​ꦱꦁꦏꦏꦱꦸꦒꦶꦃꦲꦤ꧀ꦤꦺ​ꦱꦶꦁ​ꦲꦺꦴꦫ​ꦲꦺꦤꦺꦁꦲꦼꦤ꧀ꦠꦺꦏ꧀ꦏꦺ​ꦭꦤ꧀ꦭꦤ꧀ꦠꦂꦫꦤ꧀ꦫꦺꦴꦃ​ꦱꦸꦕꦶ​ꦏꦺꦴꦮꦺ​ꦧꦶꦱ​ꦤꦩ꧀ꦥ​ꦏꦼꦏꦸꦮꦠ꧀ꦠꦤ꧀ꦱꦶꦁ​ꦧꦶꦱ​ꦔꦤ꧀ꦠꦼꦥ꧀ꦥꦏꦺꦲꦠꦶꦩꦸ​꧉​ ¹⁷ꦢꦢꦶꦤꦺ​ꦏꦿꦶꦱ꧀ꦡꦸꦱ꧀ꦧꦶꦱ​ꦩꦁꦒꦺꦴꦤ꧀ꦲꦶꦁ​ꦲꦠꦶꦩꦸ​꧈​ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ ¹⁸ꦲꦏꦸ​ꦤ꧀ꦢꦺꦴꦁꦔꦲꦸꦒ​꧈​ꦩꦸꦒꦩꦸꦒ​ꦏꦺꦴꦮꦺ​ꦏꦧꦺꦃ​ꦧꦶꦱ​ꦔꦺꦴꦪꦺꦴꦠ꧀ꦭꦤ꧀ꦩꦤ꧀ꦠꦼꦥ꧀ꦲꦶꦁ​ꦱꦏ꧀ꦗꦼꦫꦺꦴꦤꦺꦏꦠꦿꦺꦱ꧀ꦤꦤ꧀ ꦱꦸꦥꦪ​ꦧꦼꦧꦉꦁꦔꦤ꧀ꦏꦫꦺꦴ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦧꦺꦃ​ꦏꦺꦴꦮꦺ​ꦧꦶꦱ​ꦢꦸꦤꦸꦁꦱꦼꦥꦶꦫ​ꦲꦩ꧀ꦧꦤꦺ​ꦭꦤ꧀ꦢꦮꦤꦺ​ꦭꦤ꧀ꦱꦼꦥꦶꦫ​ꦢꦸꦮꦸꦂꦫꦺꦭꦤ꧀ꦗꦼꦫꦸꦤꦺꦏꦠꦿꦺꦱ꧀ꦤꦤꦺꦏꦿꦶꦱ꧀ꦡꦸꦱ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ ¹⁹ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦤꦶꦠꦺꦤ꧀ꦤꦶ​ꦤꦺꦏ꧀ꦏꦠꦿꦺꦱ꧀ꦤꦤꦺꦏꦿꦶꦱ꧀ꦡꦸꦱ꧀ꦏꦸꦮꦶ​ꦒꦼꦢꦺꦤꦺꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦢꦸꦤꦸꦁꦭꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦲꦠꦶꦩꦸ​ꦧꦏꦭ꧀ꦏꦼꦧꦼꦏ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​

²⁰꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦢꦺꦏ꧀ꦤꦺꦧꦶꦱ​ꦤꦶꦤ꧀ꦢꦏ꧀ꦏꦏꦺꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦱꦶꦁ​ꦢꦶꦱꦸꦮꦸꦤ꧀ꦭꦤ꧀ꦱꦶꦁ​ꦢꦶꦥꦶꦏꦶꦂ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦤꦶꦤ꧀ꦢꦏ꧀ꦏꦏꦺꦲꦶꦏꦶ​꧈​ꦗꦭꦂꦫꦤ꧀ꦏ꧀ꦮꦱꦤꦺ​ꦱꦲꦶꦏꦶ​ꦮꦶꦱ꧀ꦚꦩ꧀ꦧꦸꦠ꧀ꦠꦲꦶꦁ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧉​ ²¹ꦩꦸꦭꦤꦺ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦲꦶꦁ​ꦥꦱꦩꦸꦮꦤ꧀ꦭꦤ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦲ꦳ꦪꦸꦏ꧀ꦥꦢ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦭꦮꦱ꧀ꦱꦺ!ꦄꦩꦺꦤ꧀꧈​

↑ ↑ ↑

꧋ꦱꦺꦗꦺ​ꦥꦼꦁꦒꦮꦺꦪꦤ꧀ꦏꦸ꧈​ꦱꦶꦗꦶ​ꦠꦸꦗꦸꦮꦤ꧀ꦤꦺ꧉​

꧇​꧔꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦱꦶꦁ​ꦤꦁꦱꦼꦠꦿꦥꦤ꧀ꦗꦭꦂꦫꦤ꧀​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​꧈​ ꦲꦏꦸ​ꦚꦸꦮꦸꦤ꧀ꦠꦼꦤꦤ꧀ꦩꦫꦁ​ꦏꦺꦴꦮꦺ​:ꦲꦩ꧀ꦧꦺꦴꦏ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦱꦶꦁ​ꦥꦤ꧀ꦠꦼꦱ꧀ꦭꦤ꧀ꦱꦶꦁ​ꦕꦺꦴꦕꦺꦴꦏ꧀​ꦏꦫꦺꦴ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦮꦶꦱ꧀ꦩꦁꦒꦶꦭ꧀ꦏꦺꦴꦮꦺ​꧉​ ²ꦥꦢ​ꦱꦶꦁ​ꦲꦤ꧀ꦢꦥ꧀ꦥꦱꦺꦴꦂ꧈​ꦱꦶꦁ​ꦲꦭꦸꦱ꧀ꦭꦤ꧀ꦱꦶꦁ​ꦱꦧꦂ​ꦩꦫꦁ​ꦱꦏ꧀ꦥꦢꦥꦢꦔꦁꦒꦺꦴ​ꦏꦠꦿꦺꦱ꧀ꦤꦤ꧀꧈​ ³ꦱꦏ꧀ꦧꦶꦱꦧꦶꦱꦩꦸꦥꦢ​ꦔꦸꦢꦶꦪ​ꦲꦸꦫꦶꦥ꧀ꦧꦼꦧꦉꦁꦔꦤ꧀ꦱꦶꦁ​ꦫꦸꦏꦸꦤ꧀ ꦲꦮꦶꦠ꧀ꦏꦺꦴꦮꦺ​ꦏꦧꦺꦃ​ꦮꦶꦱ꧀ꦢꦶꦢꦢꦺꦏ꧀ꦏꦏꦺꦱꦶꦗꦶ​ꦏꦫꦺꦴ​ꦫꦺꦴꦃ​ꦱꦸꦕꦶ​꧉​ ⁴ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦩꦼꦱ꧀ꦠꦶꦮꦶꦱ꧀ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦏꦧꦺꦃ​ꦮꦶꦱ꧀ꦢꦢꦶ​ꦧꦢꦤ꧀ꦱꦶꦗꦶ​ꦭꦤ꧀ꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦸꦫꦶꦥ꧀ꦩꦸ​ꦪ​ꦫꦺꦴꦃ​ꦱꦸꦕꦶ​ꦱꦶꦁ​ꦠꦸꦁꦒꦭ꧀ꦭꦺ​꧉​ꦱꦼꦩꦺꦴꦤꦺꦴ​ꦲꦸꦒ​꧈​ꦱꦏ꧀ꦮꦶꦱ꧀ꦱꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦶꦭ꧀ꦏꦺꦴꦮꦺ​꧈​ꦥꦼꦔꦉꦥ꧀ꦲꦉꦥ꧀ꦩꦸ​ꦪ​ꦠꦸꦁꦒꦭ꧀ꦭꦺ​꧉​ ⁵ꦏꦫꦺꦴꦩꦼꦤꦺꦃ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶꦩꦸ​ꦪ​ꦠꦸꦁꦒꦭ꧀ꦭꦺ​꧈​ꦥꦼꦔꦤ꧀ꦢꦼꦭ꧀ꦩꦸ​ꦪ​ꦠꦸꦁꦒꦭ꧀ꦭꦺ​ꦭꦤ꧀ꦧꦥ꧀ꦠꦶꦱꦤ꧀ꦩꦸꦪ​ꦠꦸꦁꦒꦭ꧀ꦭꦺ​꧉​ ⁶ꦭꦤ꧀ꦩꦼꦤꦺꦃ​꧈​ꦤꦩꦸꦁ​ꦲꦺꦤꦺꦁꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦗꦶ​꧈​ꦧꦥꦏ꧀ꦏꦺꦭꦤ꧀ꦒꦸꦱ꧀ꦠꦶꦤꦺ​ꦏꦺꦴꦮꦺ​ꦏꦧꦺꦃ​꧉​ꦢꦺꦏ꧀ꦤꦺꦱꦶꦁ​ꦔꦁꦒꦺꦴꦏ꧀ꦏꦏꦺꦏꦺꦴꦮꦺ​ꦏꦧꦺꦃ​ꦏꦁꦒꦺꦴ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦭꦤ꧀ꦢꦺꦏ꧀ꦤꦺꦱꦶꦁ​ꦩꦁꦒꦺꦴꦤ꧀ꦲꦶꦁ​ꦲꦸꦫꦶꦥ꧀ꦩꦸ​ꦏꦧꦺꦃ​꧉​

⁷꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦮꦶꦱ꧀ꦥꦢ​ꦤꦩ꧀ꦥ​ꦏꦥꦶꦤ꧀ꦠꦼꦂꦫꦤ꧀ꦢꦺꦮꦺꦢꦺꦮꦺ꧉​ꦏꦸꦮꦶ​ꦥꦮꦺꦃꦲꦺ​ꦏꦿꦶꦱ꧀ꦡꦸꦱ꧀ ꦱꦶꦁ​ꦔꦼꦏꦺꦏ꧀ꦏꦶꦩꦫꦁ​ꦲꦮꦏ꧀ꦏꦺ​ꦢꦺꦮꦺꦔꦁꦒꦺꦴ​ꦠꦏꦼꦫꦤ꧀ꦤꦺꦢꦺꦏ꧀ꦤꦺꦢꦺꦮꦺ꧉​ ⁸ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦏꦺꦧꦧ꧀ꦲꦶꦏꦶ​ꦭꦤ꧀ꦏꦼꦠꦸꦭꦶꦱ꧀ꦔꦺꦤꦺ​ꦤꦁꦏꦶꦠꦧ꧀ꦱꦸꦕꦶ​:

“ꦢꦺꦏ꧀ꦤꦺꦩꦸꦁꦒꦃ​ꦱ꧀ꦮꦂꦒ​꧈​
ꦚꦁꦏꦶꦁ​ꦏꦧꦺꦃ​
ꦱꦶꦁ​ꦮꦶꦱ꧀ꦢꦶꦏꦭꦃꦲꦏꦺ
ꦭꦤ꧀ꦢꦺꦏ꧀ꦤꦺꦔꦼꦏꦺꦏ꧀ꦏꦶꦥꦮꦺꦃ
ꦩꦫꦁ​ꦩꦤꦸꦁꦱ​꧉​”

⁹ꦥꦫ​ꦱꦼꦢꦸꦭꦸꦂ​꧈​ꦭꦃ​ꦠꦼꦩ꧀ꦧꦸꦁ​“ꦩꦸꦁꦒꦃ​”ꦏꦸꦮꦶ​ꦲꦥ​ꦠ​ꦠꦼꦒꦼꦱ꧀ꦱꦺ​?ꦏꦸꦮꦶ​ꦠꦼꦒꦼꦱ꧀ꦱꦺ​:ꦱꦏ꧀ꦢꦸꦫꦸꦁꦔꦺꦏꦿꦶꦱ꧀ꦡꦸꦱ꧀ꦩꦸꦁꦒꦃ​ꦤꦁꦱ꧀ꦮꦂꦒ​꧈​ꦢꦺꦏ꧀ꦤꦺꦩꦼꦢꦸꦤ꧀​ꦤ꧀ꦢꦶꦱꦶꦏ꧀ꦤꦁꦥꦁꦒꦺꦴꦤ꧀ꦤꦤ꧀ꦱꦏ꧀ꦔꦶꦱꦺꦴꦂꦫꦺ​ꦧꦸꦩꦶ​꧉​ ¹⁰ꦢꦢꦶꦤꦺ​꧈​ꦢꦺꦏ꧀ꦤꦺꦱꦶꦁ​ꦩꦼꦢꦸꦤ꧀ꦭꦤ꧀ꦢꦺꦏ꧀ꦤꦺꦲꦸꦒ​ꦱꦶꦁ​ꦩꦸꦁꦒꦃ​ꦢꦸꦮꦸꦂꦫꦺꦔ꧀ꦭꦶꦮꦠ꧀ꦠꦶ​ꦭꦔꦶꦠ꧀ ꦱꦸꦥꦪ​ꦧꦶꦱ​ꦔ꧀ꦮꦱꦤꦶ​ꦱꦼꦩ꧀ꦧꦫꦁ​꧉​ ¹¹ꦪ​ꦢꦺꦏ꧀ꦤꦺꦱꦶꦁ​ꦔꦼꦏꦺꦏ꧀ꦏꦶꦥꦼꦁꦒꦮꦺꦏꦸꦩꦫꦁ​ꦮꦺꦴꦁꦮꦺꦴꦁ​:ꦲꦺꦤꦺꦁꦱꦶꦁ​ꦢꦢꦶ​ꦫꦱꦸꦭ꧀ ꦱꦭꦺꦴꦏ꧀ꦏꦺꦢꦢꦶ​ꦤꦧꦶ​꧈​ꦭꦶꦪꦤꦺ​ꦩꦼꦤꦺꦃ​ꦢꦢꦶ​ꦠꦸꦏꦁ​ꦔ꧀ꦒꦼꦭꦂ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦱꦭꦺꦴꦏ꧀ꦏꦺꦩꦼꦤꦺꦃ​ꦢꦢꦶ​ꦥꦼꦤꦸꦤ꧀ꦠꦸꦤ꧀ꦭꦤ꧀ꦲꦸꦒ​ꦲꦺꦤꦺꦁꦱꦶꦁ​ꦢꦢꦶ​ꦒꦸꦫꦸ​꧉​ ¹²ꦏꦿꦶꦱ꧀ꦡꦸꦱ꧀ꦔꦼꦏꦺꦏ꧀ꦏꦶꦮꦺꦴꦁꦮꦺꦴꦁ​ꦲꦶꦏꦶ​ꦩꦫꦁ​ꦥꦱꦩꦸꦮꦤ꧀ꦤꦺꦏꦁꦒꦺꦴ​ꦲꦩ꧀ꦧꦔꦸꦤ꧀ꦏꦧꦺꦃ​ꦱꦶꦁ​ꦥꦢ​ꦥꦽꦕꦪ​꧈​ꦱꦸꦥꦪ​ꦧꦶꦱ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​꧉​ꦢꦢꦶꦤꦺ​ꦥꦱꦩꦸꦮꦤ꧀ꦤꦺꦏꦿꦶꦱ꧀ꦡꦸꦱ꧀ꦱꦸꦮꦶꦱꦸꦮꦶꦧꦶꦱ​ꦠꦩ꧀ꦧꦃ​ꦫꦺꦴꦱ​꧉​ ¹³ꦤꦺꦏ꧀ꦧꦶꦱ​ꦔꦺꦴꦤꦺꦴ​꧈​ꦱꦸꦮꦶꦱꦸꦮꦶꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦧꦶꦱ​ꦢꦢꦶ​ꦱꦶꦗꦶ​ꦲꦶꦁ​ꦥꦼꦔꦤ꧀ꦢꦼꦭ꧀ꦭꦤ꧀ꦲꦶꦁ​ꦥꦔꦼꦂꦠꦶ​ꦧꦧ꧀ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦒꦼꦱ꧀ꦱꦺ​꧈​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦢꦢꦶ​ꦮꦺꦴꦁ​ꦱꦶꦁ​ꦢꦶꦮꦱ​ꦲꦶꦁ​ꦏꦱꦸꦏ꧀ꦩꦤ꧀ꦭꦤ꧀ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦥꦽꦕꦪ​ꦭꦤ꧀ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦏꦿꦶꦱ꧀ꦡꦸꦱ꧀꧈​ ¹⁴ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦮꦶꦱ꧀ꦲꦺꦴꦫ​ꦏꦪ​ꦧꦺꦴꦕꦃ​ꦕꦶꦭꦶꦏ꧀ꦩꦼꦤꦺꦃ​꧈​ꦏꦪ​ꦲꦺꦴꦩ꧀ꦧꦏ꧀ꦫꦤꦫꦺꦤꦺ​ꦏꦠꦸꦠ꧀ꦲꦔꦶꦤ꧀ꦤꦺ​ꦥꦶꦮꦸꦭꦁ​ꦱꦶꦁ​ꦩꦺꦴꦭꦃꦩꦭꦶꦃ​꧉​ꦏꦸꦮꦶ​ꦥꦶꦮꦸꦭꦁꦔꦺ​ꦮꦺꦴꦁ​ꦱꦶꦁ​ꦔꦥꦸꦱ꧀ꦱꦶ​ꦏꦺꦴꦮꦺ​ꦭꦤ꧀ꦠꦸꦗꦸꦮꦤ꧀ꦤꦺꦤꦩꦸꦁ​ꦲꦉꦥ꧀ꦚꦤ꧀ꦢꦶꦁꦏꦺꦴꦮꦺ​ꦔꦁꦒꦺꦴ​ꦮꦼꦂꦤꦮꦼꦂꦤ​ꦲꦏꦭ꧀꧈​

¹⁵꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦏꦼꦤꦺꦁꦔꦺꦴꦩꦺꦴꦁꦔꦏꦺꦧꦧ꧀ꦥꦶꦠꦸꦠꦸꦂ​ꦱꦶꦁ​ꦭꦶꦪꦤꦺ​꧈​ꦏꦼꦗꦧ​ꦤꦩꦸꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦤꦿꦺꦱ꧀ꦤꦤ꧀ꦤꦶꦱꦏ꧀ꦥꦢꦥꦢꦠꦼꦫꦸꦱ꧀ ꦱꦸꦥꦪ​ꦱꦸꦮꦶꦱꦸꦮꦶꦲꦮꦏ꧀ꦏꦺ​ꦢꦺꦮꦺꦧꦶꦱ​ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦏꦿꦶꦱ꧀ꦡꦸꦱ꧀ ꦱꦼꦱꦶꦫꦃꦲꦺ​ꦲꦮꦏ꧀ꦏꦺ​ꦢꦺꦮꦺ꧈​ꦲꦺꦴꦫ​ꦧꦺꦢ​ꦏꦪ​ꦧꦢꦤ꧀ꦏꦲꦺ​ꦩꦼꦱ꧀ꦠꦶꦪ​ꦩꦤꦸꦠ꧀ꦱꦶꦫꦃꦲꦺ​꧉​ ¹⁶ꦲꦸꦒ​ꦏꦪ​ꦧꦢꦤ꧀ꦏꦲꦺ​꧈​ꦱꦼꦤꦗꦤ꧀ꦱꦶꦏꦶꦭ꧀ꦠꦔꦤ꧀ꦤꦺꦔ꧀ꦒꦺꦴꦤ꧀ꦤꦺꦢꦺꦮꦺꦢꦺꦮꦺ꧈​ꦤꦁꦔꦶꦁ​ꦢꦢꦶ​ꦱꦶꦗꦶ​ꦭꦤ꧀ꦚꦩ꧀ꦧꦸꦠ꧀ꦠꦧꦼꦧꦉꦁꦔꦤ꧀ ꦱꦸꦥꦪ​ꦲꦮꦏ꧀ꦱꦏ꧀ꦏꦸꦗꦸꦂꦧꦶꦱ​ꦩꦸꦤ꧀ꦢꦏ꧀ꦒꦼꦢꦺꦭꦤ꧀ꦩꦸꦤ꧀ꦢꦏ꧀ꦫꦺꦴꦱ​꧉​ꦪ​ꦔꦺꦴꦤꦺꦴ​ꦏꦸꦮꦶ​ꦲꦼꦁꦒꦺꦴꦤꦺ​ꦏꦿꦶꦱ꧀ꦡꦸꦱ꧀ꦤꦠ​ꦥꦱꦩꦸꦮꦤ꧀ꦤꦺ꧉​ꦤꦺꦏ꧀ꦏꦧꦺꦃ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦥꦢ​ꦩꦼꦤꦸꦁꦒꦭ꧀ꦢꦢꦶ​ꦱꦶꦗꦶ​ꦭꦤ꧀ꦚꦩ꧀ꦧꦸꦠ꧀ꦠꦧꦼꦧꦉꦁꦔꦤ꧀ꦔꦁꦒꦺꦴ​ꦏꦠꦿꦺꦱ꧀ꦤꦤ꧀ ꦱꦸꦮꦶꦱꦸꦮꦶꦩꦼꦱ꧀ꦠꦶꦠꦼꦫꦸꦱ꧀ꦩꦸꦤ꧀ꦢꦏ꧀ꦏꦸꦮꦠ꧀ꦲꦼꦁꦒꦺꦴꦤꦺ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦲꦸꦫꦶꦥ꧀ꦲꦚꦂ​ꦲꦶꦁ​ꦏꦿꦶꦱ꧀ꦡꦸꦱ꧀꧈​

¹⁷꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦲꦏꦸ​ꦚꦸꦮꦸꦤ꧀ꦠꦼꦤꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​:ꦲꦸꦫꦶꦥ꧀ꦩꦸ​ꦲꦩ꧀ꦧꦺꦴꦏ꧀ꦲꦗ​ꦥꦢ​ꦏꦪ​ꦲꦸꦫꦶꦥ꧀ꦥꦺꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​꧈​ꦱꦶꦁ​ꦤꦩꦸꦁ​ꦩꦶꦏꦶꦂ​ꦧꦫꦁ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀꧈​ ¹⁸ꦲꦔꦼꦤ꧀ꦤꦔꦼꦤ꧀ꦤꦺꦮꦺꦴꦁꦮꦺꦴꦁ​ꦏꦸꦮꦶ​ꦮꦶꦱ꧀ꦏꦼꦥꦼꦠꦼꦁꦔꦼꦤ꧀ꦭꦤ꧀ꦲꦺꦴꦫ​ꦧꦶꦱ​ꦔꦿꦱꦏ꧀ꦏꦏꦺꦲꦸꦫꦶꦥ꧀ꦲꦚꦂ​ꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦺꦴꦫ​ꦥꦢ​ꦔꦼꦂꦠꦶ​ꦧꦧ꧀ꦲꦶꦏꦶ​꧈​ꦗꦭꦂꦫꦤ꧀ꦥꦢ​ꦏꦏꦸ​ꦲꦠꦶꦤꦺ​꧉​ ¹⁹ꦮꦶꦱ꧀ꦲꦺꦴꦫ​ꦥꦢ​ꦤ꧀ꦢꦸꦮꦺꦤ꧀ꦤꦶ​ꦲꦶꦱꦶꦤ꧀​ꦧ꧀ꦭꦱ꧀꧈​ꦱꦼꦤꦼꦁꦔꦺ​ꦤꦩꦸꦁ​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦲꦭ​ꦭꦤ꧀ꦔꦸꦩ꧀ꦧꦂ​ꦏ꧀ꦭꦏꦸꦮꦤ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀꧈​

²⁰꧋ꦤꦁꦔꦶꦁ​ꦏꦺꦴꦮꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦸꦫꦶꦥ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦺꦴꦫ​ꦕꦺꦴꦕꦺꦴꦏ꧀​ꦧ꧀ꦭꦱ꧀ꦏꦫꦺꦴ​ꦥꦶꦮꦸꦭꦁꦔꦺ​ꦏꦿꦶꦱ꧀ꦡꦸꦱ꧀꧈​ ²¹ꦏꦺꦴꦮꦺ​ꦮꦶꦱ꧀ꦏꦿꦸꦔꦸ​ꦧꦧ꧀ꦏꦿꦶꦱ꧀ꦡꦸꦱ꧀ꦭꦤ꧀ꦮꦶꦱ꧀ꦢꦶꦮꦸꦭꦁꦔꦶꦕꦫꦤꦺ​ꦮꦺꦴꦁ​ꦤꦸꦫꦸꦠ꧀ꦒꦸꦱ꧀ꦠꦶ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺꦮꦶꦱ꧀​ꦤ꧀ꦢꦸꦢꦸꦃꦲꦏꦺꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ ²²ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏ꧀ꦭꦏꦸꦮꦤ꧀ꦱꦶꦁ​ꦏꦪ​ꦩ꧀ꦧꦶꦪꦺꦤ꧀ꦏꦸꦢꦸ​ꦲꦩ꧀ꦧꦺꦴꦏ꧀ꦠꦶꦁꦒꦭ꧀ ꦲꦮꦶꦠ꧀ꦏꦼꦱꦼꦤꦼꦁꦔꦤ꧀ꦱꦶꦁ​ꦲꦭ​ꦏꦸꦮꦶ​ꦱꦶꦁ​ꦚꦤ꧀ꦢꦶꦁꦭꦤ꧀ꦔꦿꦸꦱꦏ꧀ꦏꦺꦴꦮꦺ​꧉​ ²³ꦥꦶꦏꦶꦂꦫꦤ꧀ꦩꦸ​ꦏꦸꦢꦸ​ꦩꦭꦶꦃ​ꦱꦏ꧀ꦏꦧꦺꦃꦲꦺ꧉​ ²⁴ꦱꦲꦶꦏꦶ​ꦏꦺꦴꦮꦺ​ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦱꦶꦁ​ꦲꦚꦂ​꧈​ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​꧈​ꦲꦸꦫꦶꦥ꧀ꦱꦶꦁ​ꦧꦼꦤꦼꦂ​ꦭꦤ꧀ꦱꦶꦁ​ꦱꦸꦕꦶ​꧉​

²⁵꧋ꦩꦸꦭꦤꦺ​꧈​ꦲꦗ​ꦥꦢ​ꦒꦺꦴꦫꦺꦴꦃ​ꦩꦼꦤꦺꦃ​ꦩꦫꦁ​ꦱꦏ꧀ꦥꦢꦥꦢ꧈​ꦤꦁꦔꦶꦁ​ꦤꦺꦏ꧀ꦔꦺꦴꦩꦺꦴꦁꦱꦶꦁ​ꦱꦏ꧀ꦧꦼꦤꦼꦂꦫꦺ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦧꦺꦃ​ꦮꦶꦱ꧀ꦢꦢꦶ​ꦧꦢꦤ꧀ꦱꦶꦗꦶ​꧈​ꦪꦏꦸꦮꦶ​ꦥꦱꦩꦸꦮꦤ꧀ꦤꦺꦏꦿꦶꦱ꧀ꦡꦸꦱ꧀꧈​ ²⁶ꦤꦺꦏ꧀ꦏꦺꦴꦮꦺꦤꦼꦱꦸꦏꦫꦺꦴꦱꦥꦱꦥ꧈​ꦲꦗꦱꦩ꧀ꦥꦺꦏ꧀ꦠꦼꦫꦸꦱ꧀​ꦔ꧀ꦭꦏꦺꦴꦤ꧀ꦤꦶꦱꦶꦁꦲꦭ꧉​ꦤꦼꦱꦸꦩꦸꦲꦗꦢꦶꦲꦼꦤ꧀ꦢꦼꦩ꧀ꦲꦶꦁꦲꦠꦶꦔꦤ꧀ꦠꦶꦱꦼꦢꦶꦤꦱꦸꦮꦺꦤꦺ꧈​ꦤꦁꦔꦶꦁꦤ꧀ꦢꦁꦢꦶꦧꦸꦮꦁ꧉​ ²⁷ꦲꦗ​ꦱꦩ꧀ꦥꦺꦏ꧀ꦏꦺꦴꦮꦺ​ꦔꦼꦏꦺꦏ꧀ꦏꦶꦢꦭꦤ꧀ꦩꦫꦁ​ꦱꦺꦠꦤ꧀꧈​ ²⁸ꦮꦺꦴꦁ​ꦱꦶꦁ​ꦩꦲꦸꦤꦺ​ꦠꦸꦏꦁ​ꦚꦺꦴꦭꦺꦴꦁ​꧈​ꦱꦲꦶꦏꦶ​ꦲꦗ​ꦚꦺꦴꦭꦺꦴꦁ​ꦩꦼꦤꦺꦃ​꧈​ꦩꦭꦃ​ꦥꦢ​ꦚꦩꦫꦶꦤꦺꦒꦮꦺ​ꦔ꧀ꦒꦺꦴꦭꦺꦏ꧀ꦥꦔꦤ꧀ꦤꦺ​ꦢꦺꦮꦺꦭꦤ꧀ꦏꦁꦒꦺꦴ​ꦤꦸꦭꦸꦁꦔꦶ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺ꧉​ ²⁹ꦲꦗꦥꦢꦔꦁꦒꦺꦴꦏ꧀ꦏꦏꦺꦠꦼꦩ꧀ꦧꦸꦁꦱꦶꦁꦲꦺꦴꦫꦲꦥꦶꦏ꧀ ꦱꦶꦁꦚꦺꦴꦕꦺꦴꦏ꧀ꦲꦠꦶꦤꦺꦮꦺꦴꦁꦭꦶꦪ꧉​ꦲꦥꦶꦏ꧀ꦏꦺꦩꦭꦃꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦱꦶꦁꦧꦶꦱꦔ꧀ꦭꦶꦥꦸꦂ꧉​ꦢꦢꦶꦤꦺꦱꦶꦁꦩ꧀ꦧꦺꦴꦏ꧀ꦲꦺꦴꦩꦺꦴꦁꦧꦶꦱꦤꦼꦏꦏ꧀ꦏꦏꦺꦧꦼꦕꦶꦏ꧀ꦏꦁꦒꦺꦴꦮꦺꦴꦁꦮꦺꦴꦁꦱꦶꦁꦔꦿꦸꦔꦺꦴꦏ꧀ꦏꦏꦺ꧉​ ³⁰ꦥꦫ​ꦱꦼꦢꦸꦭꦸꦂ​꧈​ꦲꦗ​ꦥꦢ​ꦔ꧀ꦒꦮꦺ​ꦱꦼꦢꦶꦤꦺꦫꦺꦴꦃ​ꦱꦸꦕꦶ​꧈​ꦲꦮꦶꦠ꧀ꦫꦺꦴꦃ​ꦱꦸꦕꦶ​ꦲꦶꦏꦶ​ꦠꦤ꧀ꦢꦤꦺꦤꦺꦏ꧀ꦏꦺꦴꦮꦺ​ꦮꦶꦱ꧀ꦮꦺꦏ꧀ꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦫꦺꦴꦃ​ꦱꦸꦕꦶ​ꦱꦶꦁ​ꦧꦏꦭ꧀ꦔꦿꦺꦮꦁꦔꦶ​ꦏꦺꦴꦮꦺ​ꦠꦼꦫꦸꦱ꧀ꦔꦤ꧀ꦠꦶ​ꦲꦩ꧀ꦧꦺꦱꦸꦏ꧀ ꦤꦺꦏ꧀ꦏꦺꦴꦮꦺ​ꦧꦏꦭ꧀ꦢꦶꦭꦸꦮꦂꦫꦶ​ꦱꦏ꧀ꦏꦧꦺꦃꦲꦺꦱꦁꦏꦥꦔ꧀ꦮꦱꦤꦺ​ꦲꦭ​꧉​ ³¹ꦥꦢ​ꦢꦶꦧꦸꦮꦁ​ꦏꦧꦺꦃ​ꦫꦱ​ꦗꦺꦁꦏꦺꦭ꧀ꦭꦤ꧀ꦤꦼꦱꦸ​ꦭꦤ꧀ꦲꦗ​ꦥꦢ​ꦔ꧀ꦒꦼꦤ꧀ꦠꦏ꧀​ꦔ꧀ꦒꦼꦤ꧀ꦠꦏ꧀ꦭꦤ꧀ꦲꦗ​ꦥꦢ​ꦔꦺꦴꦩꦺꦴꦁꦲꦭ​ꦧꦧ꧀ꦭꦶꦪꦤꦺ​꧉​ꦲꦸꦒ​ꦫꦱ​ꦱꦼꦔꦶꦠ꧀ ꦲꦗ​ꦢꦶꦲꦼꦤ꧀ꦢꦼꦩ꧀ ꦤꦁꦔꦶꦁ​ꦢꦶꦧꦸꦮꦁ​꧉​ ³²ꦲꦥꦶꦏ꧀ꦏꦺ​ꦤꦺꦏ꧀ꦏꦺꦴꦮꦺ​ꦏꦧꦺꦃ​ꦥꦢ​ꦧꦼꦕꦶꦏ꧀ꦭꦤ꧀ꦒꦼꦩꦠꦶ​ꦩꦫꦁ​ꦱꦏ꧀ꦥꦢꦥꦢ꧉​ꦱꦶꦁ​ꦱꦭꦃ​ꦥꦢ​ꦢꦶꦔꦥꦸꦫ꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦮꦶꦱ꧀ꦔꦥꦸꦫ​ꦩꦫꦁ​ꦏꦺꦴꦮꦺ​ꦏꦧꦺꦃ​ꦭꦤ꧀ꦠꦂꦫꦤ꧀ꦏꦿꦶꦱ꧀ꦡꦸꦱ꧀꧈​

↑ ↑ ↑

꧋ꦲꦸꦫꦶꦥ꧀ꦲꦶꦁ​ꦥꦼꦥꦢꦁꦔꦺꦏꦿꦶꦱ꧀ꦡꦸꦱ꧀꧈​

꧇​꧕꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦮꦶ​ꦏꦧꦺꦃ​ꦮꦶꦱ꧀ꦥꦢ​ꦢꦢꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦠꦿꦺꦱ꧀ꦤꦧꦔꦼꦠ꧀ꦩꦫꦁ​ꦏꦺꦴꦮꦺ​꧈​ꦩꦸꦭꦤꦺ​ꦏꦺꦴꦮꦺ​ꦪ​ꦏꦸꦢꦸ​ꦤꦶꦫꦸ​ꦢꦺꦏ꧀ꦤꦺ꧉​ ²ꦏꦪ​ꦲꦼꦁꦒꦺꦴꦤꦺ​ꦏꦿꦶꦱ꧀ꦡꦸꦱ꧀ꦤꦿꦺꦱ꧀ꦤꦤ꧀ꦤꦶꦲꦮꦏ꧀ꦏꦺ​ꦢꦺꦮꦺ꧈​ꦏꦺꦴꦮꦺ​ꦏꦧꦺꦃ​ꦲꦸꦒ​ꦏꦸꦢꦸ​ꦔꦼꦠꦺꦴꦏ꧀ꦏꦏꦺꦏꦠꦿꦺꦱ꧀ꦤꦤ꧀ꦩꦸꦩꦫꦁ​ꦱꦏ꧀ꦥꦢꦥꦢ꧉​ꦏꦿꦶꦱ꧀ꦡꦸꦱ꧀ꦩꦠꦶ​ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦥꦔ꧀ꦮꦱꦤꦺ​ꦲꦭ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦊꦒ​ꦧꦔꦼꦠ꧀ꦏꦫꦺꦴ​ꦏꦸꦂꦧꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦲꦶꦏꦶ​꧉​

³꧋ꦏꦺꦴꦮꦺ​ꦱꦲꦶꦏꦶ​ꦮꦶꦱ꧀ꦢꦢꦶ​ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦲꦗ​ꦱꦩ꧀ꦥꦺꦏ꧀ꦢꦶꦲꦺꦴꦩꦺꦴꦁꦮꦺꦴꦁ​ꦤꦺꦏ꧀ꦤꦁꦠꦼꦔꦃꦩꦸ​ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦭꦏꦸ​ꦧꦺꦢꦁꦲꦥ​ꦱꦺꦏ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ꦲꦥ​ꦭꦏꦸ​ꦩꦸꦂꦏ꧉​ ⁴ꦲꦗ​ꦥꦶꦱꦤ꧀ꦥꦶꦱꦤ꧀ꦏꦺꦴꦮꦺ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦫꦸ​꧈​ꦠꦼꦩ꧀ꦧꦸꦁ​ꦱꦶꦁ​ꦱꦼꦩ꧀ꦧꦿꦤ​ꦲꦥ​ꦠꦼꦩ꧀ꦧꦸꦁ​ꦥ꧀ꦭꦺꦱꦺꦠ꧀ꦠꦤ꧀꧈​ꦏꦸꦮꦶ​ꦮꦶꦱ꧀ꦲꦺꦴꦫ​ꦥꦤ꧀ꦠꦼꦱ꧀ꦏꦁꦒꦺꦴ​ꦏꦺꦴꦮꦺ​꧉​ꦠꦼꦤꦶꦩ꧀ꦧꦁꦔꦺꦴꦤꦺꦴ​ꦭꦸꦮꦸꦁꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦩꦠꦸꦂꦏꦼꦱꦸꦮꦸꦤ꧀ꦮꦲꦺ​ꦩꦫꦁ​ꦒꦸꦱ꧀ꦠꦶ​꧉​ ⁵ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦮꦺꦴꦁ​ꦱꦶꦁ​ꦭꦏꦸ​ꦧꦺꦢꦁ꧈​ꦱꦶꦁ​ꦭꦏꦸ​ꦱꦺꦏ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ꦭꦤ꧀ꦮꦺꦴꦁ​ꦱꦶꦁ​ꦩꦸꦂꦏꦏꦸꦮꦶ​ꦏꦧꦺꦃ​ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦧꦏꦭ꧀ꦲꦺꦤ꧀ꦠꦸꦏ꧀ꦥꦤ꧀ꦢꦸꦩ꧀ꦩꦤ꧀ꦲꦶꦁ​ꦏꦿꦠꦺꦴꦤꦺ​ꦏꦿꦶꦱ꧀ꦡꦸꦱ꧀ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦏꦸ​ꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦶꦏꦺꦴꦮꦺ​ꦤꦺꦏ꧀ꦭꦏꦸ​ꦩꦸꦂꦏꦏꦸꦮꦶ​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦚꦼꦩ꧀ꦧꦃ​ꦧꦿꦲꦭ​꧉​

⁶꧋ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ ꦲꦗ​ꦱꦩ꧀ꦥꦺꦏ꧀ꦏꦺꦴꦮꦺ​ꦢꦶꦲꦥꦸꦱ꧀ꦱꦶ​ꦮꦺꦴꦁ​ꦏꦫꦺꦴ​ꦲꦺꦴꦩꦺꦴꦁꦔꦤ꧀ꦱꦶꦁ​ꦲꦺꦤꦏ꧀ ꦗꦫꦺꦤꦺ​ꦱꦼꦤꦗꦤ꧀ꦤ​ꦔ꧀ꦭꦏꦺꦴꦤ꧀ꦤꦶ​ꦱꦼꦩ꧀ꦧꦫꦁ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ꦏꦸꦮꦶ​ꦪ​ꦲꦺꦴꦫ​ꦲꦥꦲꦥ​꧉​ꦔꦼꦂꦠꦶꦪ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦚꦼꦠꦿꦥ꧀ꦏꦧꦺꦃ​ꦮꦺꦴꦁ​ꦱꦶꦁ​ꦲꦺꦴꦫ​ꦒꦼꦊꦩ꧀ꦩꦤꦸꦠ꧀ꦩꦫꦁ​ꦢꦺꦏ꧀ꦤꦺ꧉​ ⁷ꦲꦗ​ꦥꦢ​ꦩꦺꦭꦸꦩꦺꦭꦸ​ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧉​ ⁸ꦏꦺꦴꦮꦺ​ꦩꦲꦸꦤꦺ​ꦥꦢ​ꦩ꧀ꦭꦏꦸ​ꦲꦶꦁ​ꦥꦼꦥꦼꦠꦼꦁ​꧈​ꦗꦭꦂꦫꦤ꧀ꦏꦺꦴꦮꦺ​ꦲꦢꦺꦴꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀​ꦤ꧀ꦢꦸꦮꦺꦤ꧀ꦤꦶ​ꦥꦼꦥꦢꦁ꧈​ꦗꦭꦂꦫꦤ꧀ꦏꦺꦴꦮꦺ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​꧉​ꦩꦸꦭꦤꦺ​꧈​ꦏꦺꦴꦮꦺ​ꦏꦸꦢꦸ​ꦲꦸꦫꦶꦥ꧀ꦲꦶꦁ​ꦥꦼꦥꦢꦁ꧈​ꦢꦢꦶꦤꦺ​ꦏꦺꦠꦺꦴꦏ꧀ꦤꦺꦏ꧀ꦏꦺꦴꦮꦺ​ꦔꦼꦂꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁹ꦲꦮꦶꦠ꧀ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦲꦶꦁ​ꦥꦼꦥꦢꦁ꧈​ꦲꦮꦏ꧀ꦏꦺ​ꦢꦺꦮꦺꦩꦼꦱ꧀ꦠꦶꦧꦏꦭ꧀​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀ ꦱꦶꦁ​ꦧꦼꦤꦼꦂ​ꦭꦤ꧀ꦱꦶꦁ​ ꦠꦼꦤꦤ꧀꧈​ ¹⁰ꦥꦢ​ꦢꦶꦥꦶꦏꦶꦂ​ꦱꦶꦁ​ꦲꦥꦶꦏ꧀ꦲꦥ​ꦱꦶꦁ​ꦢꦶꦱꦼꦤꦼꦁꦔꦶ​ꦠꦼꦤꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹¹ꦲꦗ​ꦥꦢ​ꦩꦺꦭꦸꦩꦺꦭꦸ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦲꦸꦫꦶꦥ꧀ꦲꦶꦁ​ꦥꦼꦥꦼꦠꦼꦁ​꧈​ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦤꦩꦸꦁ​ꦧꦫꦁ​ꦱꦶꦁ​ꦲꦺꦴꦫ​ꦲꦺꦤꦺꦁꦲꦗꦶꦤꦺ​꧉​ꦩꦭꦃ​ꦲꦥꦶꦏ꧀ꦏꦺ​꧈​ꦮꦺꦴꦁꦮꦺꦴꦁ​ꦏꦸꦮꦶ​ꦢꦶꦢꦸꦤꦸꦁꦔꦏꦺꦮꦲꦺ​ꦤꦺꦏ꧀ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦏꦸꦮꦶ​ꦲꦺꦴꦫ​ꦧꦼꦤꦼꦂ​꧉​ ¹²ꦥꦚ꧀ꦕꦺꦤ꧀ꦠꦼꦤꦤ꧀ ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦮꦺꦴꦁꦮꦺꦴꦁ​ꦏꦸꦮꦶ​ꦏꦫꦺꦴ​ꦤ꧀ꦢꦼꦭꦶꦏ꧀​ꦤ꧀ꦢꦼꦭꦶꦏ꧀ꦗꦤ꧀ꦔꦶꦱꦶꦤ꧀ꦤꦶꦱꦶꦤ꧀ꦤꦏꦺꦠꦼꦤꦤ꧀ꦤꦺꦏ꧀ꦢꦶꦲꦺꦴꦩꦺꦴꦁ꧉​ ¹³ꦤꦁꦔꦶꦁ​ꦤꦺꦏ꧀ꦱꦼꦩ꧀ꦧꦫꦁ​ꦏꦸꦮꦶ​ꦏꦧꦺꦃ​ꦢꦶꦏꦺꦠꦺꦴꦏ꧀ꦏꦏꦺ꧈​ꦮꦺꦴꦁꦮꦺꦴꦁ​ꦧꦶꦱ​ꦮꦼꦫꦸꦃ​ꦢꦺꦮꦺꦲꦥ​ꦮꦸꦗꦸꦠ꧀ꦠꦺ꧉​ ¹⁴ꦩꦼꦁꦏꦺꦴꦤꦺꦴ​ꦲꦸꦒ​꧈​ꦤꦺꦏ꧀ꦮꦺꦴꦁꦮꦺꦴꦁ​ꦚꦮꦁ​ꦲꦸꦫꦶꦥ꧀ꦩꦸ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​꧈​ꦮꦺꦴꦁꦮꦺꦴꦁ​ꦧꦏꦭ꧀ꦫꦸꦩꦁꦱ​ꦢꦺꦮꦺꦤꦺꦏ꧀ꦥꦶꦏꦶꦂꦫꦤ꧀ꦤꦺ​ꦭꦤ꧀​ꦏ꧀ꦭꦏꦸꦮꦤ꧀ꦤꦺ​ꦏꦸꦮꦶ​ꦏ꧀ꦭꦺꦫꦸ​ꦏꦧꦺꦃ​꧉​ꦭꦃ​ꦤꦺꦏ꧀ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦫꦸꦱ꧀ꦥꦢ​ꦲꦸꦫꦶꦥ꧀ꦱꦶꦁ​ꦱꦏ꧀ꦧꦼꦤꦼꦂꦫꦺ​꧈​ꦢꦢꦶꦤꦺ​ꦧꦶꦱ​ꦢꦢꦶ​ꦮꦺꦴꦁ​ꦱꦶꦁ​ꦲꦶꦁ​ꦥꦼꦥꦢꦁꦲꦸꦒ​꧉​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​ꦩꦲꦸ​ꦮꦶꦱ꧀ꦠꦲꦸ​ꦢꦶꦲꦺꦴꦩꦺꦴꦁꦏꦫꦺꦴ​ꦤꦧꦶ​ꦪꦺꦱꦪ​ꦢꦺꦏ꧀​ꦩ꧀ꦧꦶꦪꦺꦤ꧀꧈​ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦤꦺ​:

“ꦮꦺꦴꦁ​ꦱꦶꦁ​ꦥꦢ​ꦠꦸꦫꦸ​꧈​ꦥꦢ​ꦩꦼꦭꦺꦏ꧀ꦏ​꧈​
ꦥꦢ​ꦠꦔꦶꦪ​ꦱꦁꦏꦠꦼꦔꦃꦲꦺ​ꦮꦺꦴꦁ​ꦩꦠꦶ​꧈​
ꦲꦮꦶꦠ꧀ꦏꦿꦶꦱ꧀ꦡꦸꦱ꧀ꦧꦏꦭ꧀ꦩꦢꦁꦔꦶꦏꦺꦴꦮꦺ​꧉​”

¹⁵꧋ꦩꦸꦭꦤꦺ​꧈​ꦥꦫ​ꦱꦼꦢꦸꦭꦸꦂ​꧈​ꦲꦸꦫꦶꦥ꧀ꦩꦸ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦠꦼꦤꦤ꧀꧈​ꦲꦗ​ꦏꦪ​ꦮꦺꦴꦁ​ꦧꦺꦴꦢꦺꦴ꧈​ꦤꦁꦔꦶꦁ​ꦏꦺꦴꦮꦺ​ꦏꦸꦢꦸ​ꦏꦪ​ꦮꦺꦴꦁ​ꦱꦶꦁ​ꦢꦸꦤꦸꦁ꧉​ ¹⁶ꦏꦼꦭꦸꦁꦒꦂꦫꦤ꧀ꦲꦥ​ꦮꦲꦺ​ꦏꦸꦢꦸ​ꦲꦩ꧀ꦧꦺꦴꦏ꧀ꦏꦁꦒꦺꦴꦏ꧀ꦏꦏꦺꦏꦁꦒꦺꦴ​ꦔ꧀ꦒꦮꦺ​ꦧꦼꦕꦶꦏ꧀ ꦲꦮꦶꦠ꧀ꦲꦶꦁ​ꦗꦩꦤ꧀ꦲꦶꦏꦶ​ꦲꦺꦴꦏꦺꦃꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ ¹⁷ꦩꦸꦭꦤꦺ​꧈​ꦥꦢ​ꦩꦶꦏꦶꦂ​ꦱꦶꦁ​ꦲꦥꦶꦏ꧀ꦠꦼꦤꦤ꧀ ꦱꦸꦥꦪ​ꦏꦺꦴꦮꦺ​ꦧꦶꦱ​ꦢꦸꦤꦸꦁꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦲꦸꦫꦶꦥ꧀ꦩꦸ​꧉​ꦲꦗ​ꦲꦸꦫꦶꦥ꧀ꦔꦮꦸꦂ​ꦮꦲꦺ​꧉​

¹⁸꧋ꦭꦤ꧀ꦲꦗ​ꦥꦢ​ꦱꦼꦤꦼꦁ​ꦔꦺꦴꦩ꧀ꦧꦺ​꧈​ꦏꦸꦮꦶ​ꦤꦩꦸꦁ​ꦔꦿꦸꦱꦏ꧀ꦲꦸꦫꦶꦥ꧀ꦩꦸ​꧉​ꦠꦼꦤꦶꦩ꧀ꦧꦁꦔꦺꦴꦤꦺꦴ​ꦭꦸꦮꦸꦁꦥꦢ​ꦏꦼꦧꦼꦏ꧀ꦲꦶꦁ​ꦫꦺꦴꦃ​ꦱꦸꦕꦶ​ꦮꦲꦺ​꧉​ ¹⁹ꦢꦢꦶꦤꦺ​ꦤꦺꦏ꧀ꦔꦸꦩ꧀ꦥꦸꦭ꧀ꦧꦼꦧꦉꦁꦔꦤ꧀ꦏꦺꦴꦮꦺ​ꦧꦶꦱ​ꦩꦼꦩꦸꦗꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦱꦶꦔꦶꦱꦶꦔꦶꦱꦁꦏꦏꦶꦠꦧ꧀ꦭꦤ꧀ꦱꦶꦔꦶꦱꦶꦔꦶꦱꦶꦁ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦭꦤ꧀ꦲꦸꦒ​ꦔꦁꦒꦺꦴ​ꦱꦶꦔꦶꦱꦶꦔꦶꦱꦶꦁ​ꦩꦼꦠꦸ​ꦱꦁꦏꦫꦺꦴꦃ​ꦱꦸꦕꦶ​꧉​ꦥꦢ​ꦱꦶꦔꦶꦱꦶꦔꦶꦧꦼꦧꦉꦁꦔꦤ꧀ꦭꦤ꧀ꦥꦢ​ꦩꦼꦩꦸꦗꦶꦪ​ꦒꦸꦱ꧀ꦠꦶ​ꦱꦏ꧀ꦲꦠꦶꦩꦸ​꧉​ ²⁰ꦲꦗ​ꦥꦢ​ꦭꦺꦫꦺꦤ꧀ꦲꦼꦁꦒꦺꦴꦤ꧀ꦩꦸ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧈​ꦱꦶꦁ​ꦔꦼꦏꦺꦏ꧀ꦏꦶꦱꦼꦩ꧀ꦧꦫꦁ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧉​

꧋ꦮꦺꦴꦁ​ꦭꦤꦁ​ꦭꦤ꧀ꦮꦺꦴꦁ​ꦮꦺꦢꦺꦴꦏ꧀ꦲꦶꦁ​ꦱꦏ꧀ꦗꦼꦫꦺꦴꦤꦺꦧꦼꦧꦺꦴꦗꦺꦴꦮꦤ꧀꧈​

²¹꧋ꦩꦸꦭꦤꦺ​꧈​ꦥꦫ​ꦱꦼꦢꦸꦭꦸꦂ​꧈​ꦥꦢ​ꦔꦗꦺꦤ꧀ꦤꦤ​ꦩꦫꦁ​ꦱꦏ꧀ꦥꦢꦥꦢ꧈​ꦲꦮꦶꦠ꧀ꦏꦸꦮꦶ​ꦔꦗꦺꦤ꧀ꦤꦶ​ꦩꦫꦁ​ꦏꦿꦶꦱ꧀ꦡꦸꦱ꧀꧈​

²²꧋ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦮꦺꦢꦺꦴꦏ꧀ ꦏꦺꦴꦮꦺ​ꦏꦸꦢꦸ​ꦩꦤꦸꦠ꧀ꦩꦫꦁ​ꦧꦺꦴꦗꦺꦴꦩꦸ​꧈​ꦏꦪ​ꦲꦼꦁꦒꦺꦴꦤ꧀ꦩꦸ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​꧉​ ²³ꦲꦮꦶꦠ꧀ꦮꦺꦴꦁ​ꦭꦤꦁ​ꦏꦸꦮꦶ​ꦢꦢꦶ​ꦱꦼꦱꦶꦫꦃꦲꦺ​ꦮꦺꦴꦁ​ꦮꦺꦢꦺꦴꦏ꧀ ꦏꦪ​ꦲꦼꦁꦒꦺꦴꦤꦺ​ꦏꦿꦶꦱ꧀ꦡꦸꦱ꧀ꦢꦢꦶ​ꦱꦼꦱꦶꦫꦃꦲꦺ​ꦥꦱꦩꦸꦮꦤ꧀ꦤꦺ꧉​ꦏꦿꦶꦱ꧀ꦡꦸꦱ꧀ꦱꦶꦁ​ꦔ꧀ꦭꦸꦮꦂꦫꦶ​ꦮꦺꦴꦁꦮꦺꦴꦁ​ꦱꦁꦏꦥꦔ꧀ꦮꦱꦤꦺ​ꦲꦭ​ꦠꦼꦫꦸꦱ꧀ꦢꦶꦢꦢꦺꦏ꧀ꦏꦏꦺꦱꦶꦗꦶ​ꦲꦶꦁ​ꦥꦱꦩꦸꦮꦤ꧀ꦤꦺ꧈​ꦱꦶꦁ​ꦢꦶꦲꦁꦒꦼꦥ꧀ꦧꦢꦤ꧀ꦤꦺ​ꦢꦺꦏ꧀ꦤꦺ꧉​ ²⁴ꦩꦸꦭꦤꦺ​꧈​ꦏꦪ​ꦲꦼꦁꦒꦺꦴꦤꦺ​ꦥꦱꦩꦸꦮꦤ꧀ꦤꦺꦏꦿꦶꦱ꧀ꦡꦸꦱ꧀ꦏꦸꦢꦸ​ꦩꦤꦸꦠ꧀ꦩꦫꦁ​ꦏꦿꦶꦱ꧀ꦡꦸꦱ꧀ ꦱꦼꦩꦺꦴꦤꦺꦴ​ꦲꦸꦒ​ꦮꦺꦴꦁ​ꦮꦺꦢꦺꦴꦏ꧀ꦏꦸꦢꦸ​ꦩꦤꦸꦠ꧀ꦩꦫꦁ​ꦧꦺꦴꦗꦺꦴꦤꦺ​ꦲꦶꦁ​ꦥꦽꦏꦫ​ꦲꦥ​ꦮꦲꦺ​꧉​

²⁵꧋ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦭꦤꦁ​꧈​ꦏꦺꦴꦮꦺ​ꦏꦸꦢꦸ​ꦤꦿꦺꦱ꧀ꦤꦤ꧀ꦤꦶꦧꦺꦴꦗꦺꦴꦩꦸ​꧈​ꦏꦪ​ꦲꦼꦁꦒꦺꦴꦤꦺ​ꦏꦿꦶꦱ꧀ꦡꦸꦱ꧀ꦤꦿꦺꦱ꧀ꦤꦤ꧀ꦤꦶꦥꦱꦩꦸꦮꦤ꧀ꦤꦺ꧈​ꦱꦩ꧀ꦥꦺꦏ꧀ꦢꦶꦭꦧꦸꦃꦲꦶ​ꦩꦠꦶ​꧉​ ²⁶ꦩꦼꦁꦏꦺꦴꦤꦺꦴ​ꦏꦸꦮꦶ​ꦏꦿꦶꦱ꧀ꦡꦸꦱ꧀ꦲꦩ꧀ꦧꦸꦮꦁ​ꦱꦭꦃꦲꦺ​ꦥꦱꦩꦸꦮꦤ꧀ꦤꦺ꧈​ꦢꦶꦉꦱꦶꦏ꧀ꦏꦶ​ꦔꦁꦒꦺꦴ​ꦧꦥ꧀ꦠꦶꦱ꧀ꦱꦤ꧀ꦲꦶꦁ​ꦧꦚꦸ​ꦭꦤ꧀ꦔꦁꦒꦺꦴ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧉​ ²⁷ꦏꦉꦥ꧀ꦥꦺ​ꦏꦿꦶꦱ꧀ꦡꦸꦱ꧀ ꦱꦸꦥꦪ​ꦢꦺꦏ꧀ꦤꦺꦧꦶꦱ​ꦚꦤ꧀ꦢꦁꦔꦶꦥꦱꦩꦸꦮꦤ꧀ꦱꦶꦁ​ꦱꦼꦩ꧀ꦭꦺꦴꦫꦺꦴꦠ꧀ ꦲꦺꦴꦫ​ꦲꦺꦤꦺꦁꦉꦒꦼꦠ꧀ꦠꦺꦭꦤ꧀ꦲꦺꦴꦫ​ꦲꦺꦤꦺꦁꦥꦶꦁꦒꦼꦠ꧀ꦠꦺꦲꦥ​ꦏꦼꦥꦿꦶꦪꦺ​ꦮꦲꦺ​꧈​ꦤꦁꦔꦶꦁ​ꦱꦸꦕꦶ​ꦭꦤ꧀ꦉꦱꦶꦏ꧀ꦱꦏ꧀ꦏꦧꦺꦃꦲꦺ꧉​ ²⁸ꦩꦸꦭꦤꦺ​ꦮꦺꦴꦁ​ꦭꦤꦁ​ꦏꦸꦢꦸ​ꦤꦿꦺꦱ꧀ꦤꦤ꧀ꦤꦶꦧꦺꦴꦗꦺꦴꦤꦺ​꧈​ꦲꦮꦶꦠ꧀ꦧꦺꦴꦗꦺꦴꦤꦺ​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦧꦢꦤ꧀ꦤꦺ​ꦢꦺꦮꦺ꧉​ ²⁹ꦢꦢꦶꦤꦺ​ꦮꦺꦴꦁ​ꦭꦤꦁ​ꦱꦶꦁ​ꦤꦿꦺꦱ꧀ꦤꦤ꧀ꦤꦶꦧꦺꦴꦗꦺꦴꦤꦺ​ꦏꦸꦮꦶ​ꦱꦏ꧀ꦗꦤꦺꦤꦿꦺꦱ꧀ꦤꦤ꧀ꦤꦶꦧꦢꦤ꧀ꦤꦺ​ꦢꦺꦮꦺ꧉​ꦲꦥ​ꦲꦺꦤꦺꦁꦮꦺꦴꦁ​ꦱꦶꦁ​ꦱꦼꦔꦶꦠ꧀ꦩꦫꦁ​ꦧꦢꦤ꧀ꦤꦺ​ꦢꦺꦮꦺ꧈​ꦩꦼꦱ꧀ꦠꦶꦲꦺꦴꦫ​ꦠ​꧈​ꦩꦭꦃ​ꦢꦶꦏꦺꦏ꧀ꦏꦶꦩꦁꦔꦤ꧀ꦭꦤ꧀ꦢꦶꦫꦸꦩꦠ꧀ꦠꦶ​꧉​ ³⁰ꦏꦿꦶꦱ꧀ꦡꦸꦱ꧀ꦪ​ꦔꦺꦴꦤꦺꦴ​ꦩꦫꦁ​ꦥꦱꦩꦸꦮꦤ꧀ꦤꦺ꧈​ꦲꦮꦶꦠ꧀ꦏꦸꦮꦶ​ꦧꦢꦤ꧀ꦤꦺ​ꦢꦺꦏ꧀ꦤꦺꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦥꦺꦫꦔꦤ꧀ꦥꦺꦫꦔꦤ꧀ꦤꦺ​꧉​ ³¹ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀ꦔꦺꦴꦩꦺꦴꦁꦔꦺꦤꦺ​ꦩ꧀ꦧꦶꦪꦺꦤ꧀:“ꦩꦸꦭꦤꦺ​ꦮꦺꦴꦁ​ꦭꦤꦁ​ꦏꦸꦢꦸ​ꦤꦶꦁꦒꦭ꧀ꦧꦥꦧꦶꦪꦸꦁꦔꦺ​ꦭꦤ꧀ꦩꦁꦒꦺꦴꦤ꧀ꦏꦫꦺꦴ​ꦧꦺꦴꦗꦺꦴꦤꦺ​꧈​ꦭꦤ꧀ꦮꦺꦴꦁ​ꦭꦺꦴꦫꦺꦴ​ꦏꦸꦮꦶ​ꦢꦢꦶ​ꦢꦒꦶꦁ​ꦱꦶꦗꦶ​꧉​” ³²ꦠꦼꦩ꧀ꦧꦸꦁ​ꦏꦸꦮꦶ​ꦚꦁꦒ​ꦮꦼꦮꦢꦶ​ ꦱꦶꦁ​ꦗꦼꦫꦸꦠꦼꦒꦼꦱ꧀ꦱꦺ​ꦏꦁꦒꦺꦴ​ꦏꦿꦶꦱ꧀ꦡꦸꦱ꧀ꦭꦤ꧀ꦥꦱꦩꦸꦮꦤ꧀ꦤꦺ꧉​ ³³ꦤꦁꦔꦶꦁ​ꦠꦼꦩ꧀ꦧꦸꦁ​ꦲꦶꦏꦶ​ꦲꦸꦒ​ꦏꦁꦒꦺꦴ​ꦏꦺꦴꦮꦺ​꧈​ꦔꦺꦴꦩꦺꦴꦁꦔꦏꦺꦤꦺꦏ꧀ꦱꦧꦼꦤ꧀ꦮꦺꦴꦁ​ꦭꦤꦁ​ꦏꦸꦢꦸ​ꦤꦿꦺꦱ꧀ꦤꦤ꧀ꦤꦶꦧꦺꦴꦗꦺꦴꦤꦺ​ꦏꦪ​ꦲꦼꦁꦒꦺꦴꦤꦺ​ꦤꦿꦺꦱ꧀ꦤꦤ꧀ꦤꦶꦧꦢꦤ꧀ꦤꦺ​ꦢꦺꦏ꧀ꦤꦺꦢꦺꦮꦺꦭꦤ꧀ꦱꦧꦼꦤ꧀ꦮꦺꦴꦁ​ꦮꦺꦢꦺꦴꦏ꧀ꦏꦸꦢꦸ​ꦔꦗꦺꦤ꧀ꦤꦶ​ꦩꦫꦁ​ꦱꦶꦁ​ꦭꦤꦁ​꧉​

↑ ↑ ↑

꧋ꦲꦤꦏ꧀ꦭꦤ꧀ꦮꦺꦴꦁ​ꦠꦸꦮ​꧉​

꧇​꧖꧇​ ^1-3ꦧꦺꦴꦕꦃꦧꦺꦴꦕꦃ​꧈​ꦏꦺꦴꦮꦺ​ꦲꦸꦒ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​꧈​ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦩꦤꦸꦠ꧀ꦩꦫꦁ​ꦮꦺꦴꦁ​ꦠꦸꦮꦩꦸ​꧉​ꦏꦸꦮꦶ​ꦥꦚ꧀ꦕꦺꦤ꧀ꦧꦼꦤꦼꦂ​꧈​ꦲꦮꦶꦠ꧀​ꦩ꧀ꦧꦶꦪꦺꦤ꧀​ꦩ꧀ꦧꦶꦪꦺꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦺꦴꦩꦺꦴꦁꦔꦺꦤꦺ​:“ꦔꦗꦺꦤ꧀ꦤꦤ​ꦩꦫꦁ​ꦧꦥ​ꦭꦤ꧀ꦧꦶꦪꦸꦁꦩꦸ​꧉”ꦏꦸꦮꦶ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦱꦶꦁ​ꦔ꧀ꦒꦤ꧀ꦢꦺꦁꦥꦽꦗꦚ꧀ꦗꦶꦪꦤ꧀ꦔꦺꦤꦺ​:“ꦱꦸꦥꦪ​ꦏꦺꦴꦮꦺ​ꦥꦢ​ꦱ꧀ꦭꦩꦼꦠ꧀ꦭꦤ꧀ꦲꦸꦫꦶꦥ꧀ꦩꦸ​ꦤꦁꦗꦒꦠ꧀ꦏꦺꦤꦺ​ꦧꦶꦱ​ꦢꦮ​ꦲꦸꦩꦸꦂꦫꦺ​꧉​”

⁴꧋ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦱꦶꦁ​ꦥꦢ​ꦤ꧀ꦢꦸꦮꦺꦲꦤꦏ꧀ ꦲꦗ​ꦥꦢ​ꦔ꧀ꦒꦮꦺ​ꦭꦫꦤꦺ​ꦲꦠꦶꦤꦺ​ꦲꦤꦏ꧀ꦲꦤꦏ꧀ꦩꦸ​꧉​ꦲꦤꦏ꧀ꦲꦤꦏ꧀ꦏꦸꦢꦸ​ꦲꦩ꧀ꦧꦺꦴꦏ꧀ꦫꦸꦩꦠꦶ​ꦭꦤ꧀ꦲꦩ꧀ꦧꦺꦴꦏ꧀ꦮꦸꦭꦁꦔꦶꦱꦶꦁ​ꦲꦥꦶꦏ꧀ ꦱꦸꦥꦪ​ꦧꦶꦱ​ꦔꦼꦂꦠꦶ​ꦢꦭꦤ꧀ꦤꦺ​ꦒꦸꦱ꧀ꦠꦶ​꧉​

⁵꧋ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦱ꧀ꦭꦥ꦳꧀ ꦏꦺꦴꦮꦺ​ꦥꦢ​ꦩꦤꦸꦠ​ꦩꦫꦁ​ꦮꦺꦴꦁ​ꦱꦶꦁ​ꦥꦢ​ꦤ꧀ꦢꦸꦮꦺꦤ꧀ꦤꦶ​ꦏꦺꦴꦮꦺ​꧉​ꦥꦢ​ꦔꦗꦺꦤ꧀ꦤꦤ​ꦭꦤ꧀​ꦤ꧀ꦢꦸꦮꦺꦏꦸꦮꦼꦢꦶ​ꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​꧉​ꦥꦢ​ꦚꦩꦫꦶꦤꦺꦒꦮꦺ​ꦏꦫꦺꦴ​ꦧꦸꦔꦃ​꧈​ꦲꦮꦶꦠ꧀ꦱꦏ꧀ꦗꦤꦺꦏꦺꦴꦮꦺ​ꦏꦸꦮꦶ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦏꦿꦶꦱ꧀ꦡꦸꦱ꧀꧈​ ⁶ꦤꦁꦔꦶꦁ​ꦲꦗ​ꦤꦩꦸꦁ​ꦤꦺꦏ꧀ꦢꦶꦠꦸꦁꦒꦺꦴꦤ꧀ꦤꦶ​ꦮꦲꦺ​ꦏꦺꦴꦮꦺ​ꦚꦩ꧀ꦧꦸꦠ꧀ꦠꦏꦫꦺꦴ​ꦱꦼꦤꦼꦁ​꧈​ꦲꦗ​ꦤꦩꦸꦁ​ꦔ꧀ꦒꦺꦴꦭꦺꦏ꧀ꦊꦩ꧀ꦊꦩ꧀ꦩꦤ꧀꧈​ꦱꦶꦁ​ꦲꦩ꧀ꦧꦺꦴꦏ꧀ꦭꦧꦸꦃꦲꦶꦏꦸꦮꦶ​ꦱꦏ꧀ꦗꦤꦺꦏꦿꦶꦱ꧀ꦡꦸꦱ꧀ꦢꦺꦮꦺ꧈​ꦩꦸꦭꦤꦺ​ꦚꦩꦫꦶꦤꦺꦒꦮꦺ​ꦱꦶꦁ​ꦠꦼꦩꦼꦤ꧀ ꦲꦮꦶꦠ꧀ꦏꦸꦮꦶ​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁷ꦩꦸꦭꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦱ꧀ꦭꦥ꦳꧀ ꦚꦩꦫꦶꦤꦺꦒꦮꦺ​ꦏꦫꦺꦴ​ꦧꦸꦔꦃ​꧈​ꦲꦮꦶꦠ꧀ꦏꦺꦴꦮꦺ​ꦲꦺꦴꦫ​ꦔ꧀ꦭꦢꦺꦤ꧀ꦤꦶ​ꦩꦤꦸꦁꦱ​꧈​ꦤꦁꦔꦶꦁ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦢꦺꦮꦺ꧉​ ⁸ꦢꦺꦏ꧀ꦤꦺꦱꦶꦁ​ꦧꦏꦭ꧀ꦔꦸꦥꦃꦲꦶꦏꦺꦴꦮꦺ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦸꦥꦃꦲꦶꦏꦧꦺꦃ​ꦮꦺꦴꦁ​ꦱꦶꦁ​ꦔ꧀ꦒꦮꦺ​ꦧꦼꦕꦶꦏ꧀ ꦲꦺꦴꦫ​ꦢꦢꦶ​ꦱꦼꦧꦧ꧀ꦮꦺꦴꦁ​ꦏꦸꦮꦶ​ꦱ꧀ꦭꦥ꦳꧀ꦲꦥ​ꦮꦺꦴꦁ​ꦩꦼꦂꦢꦺꦏ꧉​

⁹꧋ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤ꧀ꦢꦸꦮꦺꦱ꧀ꦭꦥ꦳꧀ ꦏꦺꦴꦮꦺ​ꦲꦸꦒ​ꦏꦸꦢꦸ​ꦱꦶꦁ​ꦲꦥꦶꦏ꧀ꦏꦫꦺꦴ​ꦱ꧀ꦭꦥ꦳꧀ꦱ꧀ꦭꦥ꦳꧀ꦩꦸ꧉​ꦲꦗ​ꦢꦶꦒꦼꦤ꧀ꦠꦏ꧀ꦒꦼꦤ꧀ꦠꦏ꧀꧈​ꦥꦢ​ꦲꦺꦭꦶꦁꦔ​ꦤꦺꦏ꧀ꦏꦺꦴꦮꦺ​ꦭꦤ꧀ꦱ꧀ꦭꦥ꦳꧀ꦱ꧀ꦭꦥ꦳꧀ꦩꦸꦏꦸꦮꦶ​ꦤ꧀ꦢꦸꦮꦺꦒꦸꦱ꧀ꦠꦶ​ꦱꦶꦁ​ꦠꦸꦁꦒꦭ꧀ꦭꦺ​ꦤꦁꦱ꧀ꦮꦂꦒ​꧉​ꦢꦺꦏ꧀ꦤꦺꦲꦺꦴꦫ​ꦥꦶꦭꦶꦃꦱꦶꦃ꧉​

꧋ꦒꦩꦤ꧀ꦤꦺ​ꦥꦼꦫꦁ​ꦏꦱꦸꦏ꧀ꦩꦤ꧀꧈​

¹⁰꧋ꦥꦫ​ꦱꦼꦢꦸꦭꦸꦂ​꧈​ꦏꦁꦒꦺꦴ​ꦥꦼꦤꦸꦠꦸꦥ꧀ ꦱꦲꦶꦏꦶ​ꦲꦏꦸ​ꦲꦉꦥ꧀ꦔꦺꦴꦩꦺꦴꦁꦲꦶꦏꦶ​:ꦲꦼꦁꦒꦺꦴꦤ꧀ꦩꦸ​ꦔ꧀ꦭꦮꦤ꧀ꦱꦺꦠꦤ꧀ꦏꦸꦮꦶ​ꦲꦗ​ꦔꦁꦒꦺꦴ​ꦏꦼꦏꦸꦮꦠ꧀ꦠꦤ꧀ꦩꦸ​ꦢꦺꦮꦺ꧈​ꦤꦁꦔꦶꦁ​ꦔꦁꦒꦺꦴ​ꦏꦼꦏꦸꦮꦠ꧀ꦠꦤ꧀ꦤꦺ​ꦒꦸꦱ꧀ꦠꦶ​ꦱꦶꦁ​ꦒꦼꦢꦺ꧉​ ¹¹ꦏꦪ​ꦱꦺꦴꦭ꧀ꦢꦠ꧀ꦱꦶꦁ​ꦲꦉꦥ꧀ꦧꦸꦢꦭ꧀ꦥꦼꦫꦁ​ꦏꦲꦺ​ꦔꦁꦒꦺꦴ​ꦒꦩꦤ꧀ꦤꦺ​ꦏꦧꦺꦃ​꧈​ꦏꦺꦴꦮꦺ​ꦲꦸꦒ​ꦏꦸꦢꦸ​ꦔꦁꦒꦺꦴ​ꦒꦩꦤ꧀ꦒꦩꦤ꧀ꦏꦧꦺꦃ​ꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦏꦸꦮꦠ꧀​ꦩ꧀ꦧꦊꦱ꧀ꦲꦏꦭ꧀ꦭꦏꦭ꧀ꦭꦺꦱꦺꦠꦤ꧀ꦱꦶꦁ​ꦔ꧀ꦭꦮꦤ꧀ꦏꦺꦴꦮꦺ​꧉​ ¹²ꦲꦮꦶꦠ꧀ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦥꦫ​ꦱꦼꦢꦸꦭꦸꦂ​꧉​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦺꦴꦫ​ꦥꦼꦫꦁ​ꦔ꧀ꦭꦮꦤ꧀ꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦥꦼꦫꦁ​ꦔ꧀ꦭꦮꦤ꧀ꦫꦺꦴꦃꦫꦺꦴꦃ​ꦲꦭ​ꦱꦶꦁ​ꦤꦁꦭꦔꦶꦠ꧀ ꦏꦪꦢꦺꦤꦺꦥꦼꦁꦒꦼꦢꦺꦥꦼꦁꦒꦼꦢꦺꦭꦤ꧀ꦥꦔ꧀ꦮꦱꦥꦔ꧀ꦮꦱ​ꦱꦶꦁ​ꦔ꧀ꦮꦱꦤꦶ​ꦗꦒꦠ꧀ꦲꦶꦁ​ꦗꦩꦤ꧀ꦱꦶꦁ​ꦲꦭ​ꦲꦶꦏꦶ​꧉​ ¹³ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦔꦁꦒꦺꦴꦏ꧀ꦏꦏꦺꦒꦩꦤ꧀ꦒꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦩꦒꦼꦂꦫꦶ​ꦲꦮꦏ꧀ꦩꦸ​ꦢꦺꦮꦺ꧉​ꦢꦢꦶꦤꦺ​ꦏꦥꦤ꧀ꦏꦥꦤ꧀ꦤꦺꦏ꧀ꦱꦺꦠꦤ꧀​ꦔ꧀ꦭꦮꦤ꧀ ꦏꦺꦴꦮꦺ​ꦧꦶꦱ​ꦏꦸꦮꦠ꧀​ꦩ꧀ꦧꦊꦱ꧀ꦭꦤ꧀ꦤꦺꦏ꧀ꦮꦶꦱ꧀ꦫꦩ꧀ꦥꦸꦁ​ꦥꦼꦫꦁ​꧈​ꦏꦺꦴꦮꦺ​ꦲꦶꦗꦶꦏ꧀ꦠꦼꦠꦼꦥ꧀ꦏꦸꦮꦠ꧀꧈​

¹⁴꧋ꦥꦢꦔꦢꦼꦏ꧀ꦱꦶꦁꦗꦼꦗꦼꦏ꧀ꦭꦤ꧀ꦠꦠꦠꦠꦔꦺꦤꦺ!ꦏꦥꦶꦁꦥꦶꦱꦤ꧀:ꦏꦺꦴꦮꦺꦏꦸꦢꦸꦔꦼꦂꦠꦶꦭꦤ꧀ꦥꦽꦕꦪꦩꦫꦁꦥꦶꦮꦸꦭꦁꦔꦺꦒꦸꦱ꧀ꦠꦶꦄꦭ꧀ꦭꦃ꧈​ꦢꦢꦶꦤꦺꦱꦏ꧀ꦮꦚ꧀ꦕꦶꦮꦚ꧀ꦕꦶꦏꦺꦴꦮꦺꦮꦶꦱ꧀ꦠꦠꦠꦠꦭꦤ꧀ꦧꦶꦱꦩ꧀ꦧꦊꦱ꧀ꦩꦸꦁꦱꦸꦃꦩꦸ꧉​ꦲꦺꦴꦫꦧꦺꦢꦏꦪꦱꦧꦸꦏ꧀ꦏꦺꦱꦺꦴꦭ꧀ꦢꦠ꧀ꦏꦲꦺꦱꦶꦁꦤꦭꦺꦤ꧀ꦤꦶꦱꦭꦶꦤ꧀ꦤꦺ꧈​ꦱꦸꦥꦪꦲꦺꦴꦫꦲꦸꦕꦸꦭ꧀꧈​ꦏꦥꦶꦁꦥꦶꦤ꧀ꦢꦺꦴꦤꦺ:ꦤꦩꦸꦁꦧꦫꦁꦱꦶꦁꦧꦼꦕꦶꦏ꧀ꦱꦶꦁꦏꦸꦢꦸꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ꧈​ꦲꦮꦶꦠ꧀ꦏꦸꦮꦶꦩꦒꦼꦂꦫꦶꦲꦠꦶꦩꦸ꧈​ꦏꦪꦱꦺꦴꦭ꧀ꦢꦠ꧀ꦤꦺꦏ꧀ꦔꦁꦒꦺꦴꦠꦸꦠꦸꦥ꧀ꦢꦢꦏꦲꦺ꧉​ ¹⁵ꦏꦥꦶꦁꦠꦼꦭꦸꦤꦺ:ꦱꦏ꧀ꦮꦚ꧀ꦕꦶꦮꦚ꧀ꦕꦶꦏꦺꦴꦮꦺꦏꦸꦢꦸꦮꦶꦱ꧀ꦠꦠꦠꦠꦧꦶꦱꦔꦺꦴꦩꦺꦴꦁꦔꦶꦭꦶꦪꦤꦺꦧꦧ꧀ꦏꦧꦂꦏꦧꦸꦔꦃꦲꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁꦔꦿꦸꦏꦸꦤ꧀ꦤꦏꦺꦩꦤꦸꦁꦱꦩꦫꦁꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦩꦫꦁꦱꦏ꧀ꦥꦢꦥꦢ꧉​ꦩꦸꦭꦤꦺꦏꦺꦴꦮꦺꦏꦸꦢꦸꦏꦪꦱꦺꦴꦭ꧀ꦢꦠ꧀ꦱꦶꦁꦲꦉꦥ꧀ꦧꦸꦢꦭ꧀ꦥꦼꦫꦁꦏꦲꦺ꧈​ꦱꦼꦥꦠꦸꦤꦺꦮꦶꦱ꧀ꦢꦶꦲꦼꦁꦒꦺꦴꦭꦤ꧀ꦢꦶꦠꦭꦺꦤ꧀ꦤꦶ꧉​ ¹⁶ꦏꦥꦶꦁ​ꦥꦥꦠ꧀:ꦲꦶꦁ​ꦏꦔꦺꦭ꧀ꦭꦤ꧀ꦲꦥ​ꦮꦲꦺ​꧈​ꦥꦽꦕꦪꦲ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦸꦭꦸꦁꦔꦶ​ꦏꦺꦴꦮꦺ​꧉​ꦲꦺꦴꦫ​ꦧꦺꦢ​ꦏꦪ​ꦱꦺꦴꦭ꧀ꦢꦠ꧀ꦚꦼꦏꦼꦭ꧀ꦠꦺꦧꦺꦁꦔꦺꦏꦲꦺ​ꦏꦁꦒꦺꦴ​ꦤꦸꦠꦸꦥ꧀ꦥꦶ​ꦲꦮꦏ꧀ꦏꦺ​꧉​ꦢꦢꦶꦤꦺ​ꦤꦺꦏ꧀ꦱꦺꦠꦤ꧀​ꦔꦼꦕꦸꦭ꧀ꦭꦏꦺ​ꦥꦤꦃꦥꦤꦃ​ꦱꦶꦁ​ꦲꦺꦤꦺꦁꦒꦼꦤꦶꦤꦺ​ꦩꦫꦁ​ꦏꦺꦴꦮꦺ​꧈​ꦏꦺꦴꦮꦺ​ꦧꦶꦱ​ꦤꦩ꧀ꦥꦶꦏ꧀꧈​ꦠꦼꦒꦼꦱ꧀ꦱꦺ​꧈​ꦤꦺꦏ꧀ ꦱꦺꦠꦤ꧀​ꦲꦉꦥ꧀​ꦔ꧀ꦊꦧꦺꦴꦏ꧀ꦏꦏꦺꦧꦫꦁ​ꦱꦶꦁ​ꦲꦺꦴꦫ​ꦲꦥꦶꦏ꧀ꦲꦶꦁ​ꦲꦔꦼꦤ꧀ꦲꦔꦼꦤ꧀ꦩꦸ​꧈​ꦏꦺꦴꦮꦺ​ꦧꦶꦱ​ꦔꦼꦤ꧀ꦢꦼꦏ꧀ꦏꦸꦮꦶ​꧉​ ¹⁷ꦏꦥꦶꦁ​ꦭꦶꦩꦤꦺ​:ꦏꦺꦴꦮꦺ​ꦏꦸꦢꦸ​ꦤ꧀ꦢꦸꦮꦺꦤ꧀ꦤꦶ​ꦥꦼꦔꦤ꧀ꦢꦼꦭ꧀ꦱꦶꦁ​ꦩꦤ꧀ꦠꦼꦥ꧀ꦤꦺꦏ꧀ꦒꦸꦱ꧀ꦠꦶ​ꦮꦶꦱ꧀​ꦚ꧀ꦭꦩꦼꦠ꧀ꦠꦏꦺꦏꦺꦴꦮꦺ​꧈​ꦲꦺꦴꦫ​ꦧꦺꦢ​ꦏꦪ​ꦱꦺꦴꦭ꧀ꦢꦠ꧀ꦔꦁꦒꦺꦴ​ꦠꦺꦴꦥꦶ​ꦱꦶꦁ​ꦲꦠꦺꦴꦱ꧀ꦏꦲꦺ​ꦏꦁꦒꦺꦴ​ꦤꦸꦠꦸꦥ꧀ꦥꦶ​ꦱꦶꦫꦃꦲꦺ​꧉​ꦏꦥꦶꦁ​ꦤꦼꦤꦼꦩ꧀:ꦤꦺꦏ꧀ꦱꦺꦠꦤ꧀ꦲꦉꦥ꧀ꦔꦼꦤꦺꦁꦏꦺꦴꦮꦺ​ꦔꦁꦒꦺꦴ​ꦲꦥꦸꦱ꧀ꦱꦤ꧀ ꦲꦗ​ꦮꦼꦢꦶ​꧈​ꦚ꧀ꦗꦭꦸꦏ꧀ꦏ​ꦠꦸꦭꦸꦁ​ꦩꦫꦁ​ꦫꦺꦴꦃ​ꦱꦸꦕꦶ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦩ꧀ꦧꦊꦱ꧀ꦩꦸꦁꦱꦸꦃꦩꦸ​ꦔꦁꦒꦺꦴ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦺꦴꦫ​ꦧꦺꦢ​ꦏꦪ​ꦱꦺꦴꦭ꧀ꦢꦠ꧀ꦱꦶꦁ​ꦔ꧀ꦭꦮꦤ꧀ꦩꦸꦁꦱꦸꦃꦲꦺ​ꦏꦲꦺ​ꦏꦫꦺꦴ​ꦥꦼꦢꦁꦱꦶꦁ​ꦭꦤꦁ꧉​ ¹⁸ꦪꦔꦺꦴꦤꦺꦴꦏꦸꦮꦶꦲꦼꦁꦒꦺꦴꦤ꧀ꦩꦸꦏꦸꦢꦸꦗꦒꦗꦒꦭꦤ꧀ꦠꦠꦠꦠ꧈​ꦤꦁꦔꦶꦁꦲꦗꦥꦢꦭꦭꦶꦲꦶꦏꦶ:ꦥꦢꦤ꧀ꦢꦼꦢꦺꦴꦔꦲꦭꦤ꧀ꦥꦢꦚ꧀ꦗꦭꦸꦏ꧀ꦏꦠꦸꦭꦸꦁꦩꦫꦁꦒꦸꦱ꧀ꦠꦶꦄꦭ꧀ꦭꦃꦱꦏ꧀ꦮꦚ꧀ꦕꦶꦮꦚ꧀ꦕꦶꦭꦤ꧀ꦲꦶꦁꦥꦽꦏꦫꦲꦥꦮꦲꦺ꧉​ꦫꦺꦴꦃꦱꦸꦕꦶꦱꦶꦁꦔꦿꦺꦮꦁꦔꦶꦏꦺꦴꦮꦺꦤꦺꦏ꧀ꦏꦺꦴꦮꦺꦤ꧀ꦢꦺꦴꦁꦔ꧉​ꦏꦺꦴꦮꦺꦲꦸꦒꦏꦸꦢꦸꦱꦶꦁꦠꦠꦠꦠ꧈​ꦱꦸꦥꦪꦱꦏ꧀ꦮꦚ꧀ꦕꦶꦮꦚ꧀ꦕꦶꦧꦶꦱꦤ꧀ꦢꦺꦴꦔꦏ꧀ꦏꦏꦺꦱꦼꦢꦸꦭꦸꦂꦏꦧꦺꦃꦱꦶꦁꦥꦽꦕꦪꦭꦤ꧀ꦲꦗꦥꦢꦏꦼꦱꦼꦭ꧀ꦲꦼꦁꦒꦺꦴꦤ꧀ꦩꦸꦤ꧀ꦢꦼꦢꦺꦴꦔ꧉​ ¹⁹ꦲꦏꦸ​ꦲꦸꦒ​ꦚꦸꦮꦸꦤ꧀ꦥꦤ꧀ꦢꦺꦴꦔꦩꦸ​꧉​ꦲꦏꦸ​ꦢꦶꦢꦺꦴꦔꦏ꧀ꦏꦏꦺ꧈​ꦱꦸꦥꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦿꦺꦮꦁꦔꦶ​ꦲꦏꦸ​ꦭꦤ꧀ꦲꦏꦸ​ꦧꦶꦱ​ꦏꦼꦤ꧀ꦢꦼꦭ꧀ꦔꦺꦴꦩꦺꦴꦁꦔꦏꦺꦧꦧ꧀ꦮꦼꦮꦢꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​꧈​ꦲꦏꦸ​ꦏꦸꦢꦸ​ꦔꦧꦂꦫꦶ​ꦩꦫꦁ​ꦏꦧꦺꦃ​ꦮꦺꦴꦁ​ꦤꦺꦏ꧀ꦏꦿꦶꦱ꧀ꦡꦸꦱ꧀ꦠꦼꦏ​ꦤꦁꦗꦒꦠ꧀ꦔꦿꦸꦏꦸꦤ꧀ꦤꦏꦺꦏꦧꦺꦃ​ꦩꦤꦸꦁꦱ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦫꦁ​ꦱꦏ꧀ꦥꦢꦥꦢ꧉​ ²⁰ꦲꦏꦸ​ꦢꦶꦥꦿꦺꦤ꧀ꦠꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦁꦏꦺꦴꦤ꧀ꦔꦺꦴꦩꦺꦴꦁꦔꦏꦺꦧꦧ꧀ꦏꦸꦮꦶ​ꦭꦤ꧀ꦏꦸꦮꦶ​ꦱꦶꦁ​ꦩꦫꦏ꧀ꦏꦏꦺꦲꦏꦸ​ꦢꦶꦱꦼꦠꦿꦥ꧀ꦲꦶꦏꦶ​꧉​ꦩꦸꦭꦤꦺ​ꦲꦏꦸ​ꦪ​ꦢꦶꦢꦺꦴꦔꦏ꧀ꦏꦏꦺꦠꦼꦤꦤ꧀ ꦱꦸꦥꦪ​ꦲꦏꦸ​ꦲꦺꦴꦫ​ꦮꦼꦢꦶ​ꦔꦺꦴꦩꦺꦴꦁ꧈​ꦲꦮꦶꦠ꧀ꦏꦸꦮꦶ​ꦮꦶꦱ꧀ꦢꦢꦶ​ꦥꦼꦁꦒꦮꦺꦤꦺ꧉​

꧋ꦥꦼꦤꦸꦠꦸꦥ꧀ꦭꦤ꧀ꦥꦩꦸꦗꦶ​ꦱ꧀ꦭꦩꦼꦠ꧀꧈​

^21-22꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦲꦸꦒ​ꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦶꦏꦺꦴꦮꦺ​ꦏꦧꦺꦃ​ꦤꦺꦏ꧀ꦱꦼꦢꦸꦭꦸꦂ​ꦡꦶꦏꦶꦏꦸꦱ꧀ꦠꦏ꧀ꦏꦺꦴꦁꦏꦺꦴꦤ꧀ꦤꦁꦔ꧀ꦒꦺꦴꦤ꧀ꦩꦸ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦏꦿꦸꦔꦸ​ꦏꦧꦂꦫꦺ​ꦧꦧ꧀ꦲꦏꦸ​ꦲꦶꦏꦶ​꧉​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦱꦼꦢꦸꦭꦸꦂ​ꦡꦶꦏꦶꦏꦸꦱ꧀ꦲꦶꦏꦶ​ꦏꦚ꧀ꦕ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶꦠꦼꦤꦤ꧀꧈​ꦢꦺꦏ꧀ꦤꦺꦪ​ꦠꦼꦩꦼꦤ꧀ꦲꦼꦁꦒꦺꦴꦤꦺ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​꧉​ꦩꦸꦭꦤꦺ​ꦪ​ꦢꦺꦏ꧀ꦤꦺꦱꦶꦁ​ꦠꦏ꧀ꦏꦺꦴꦁꦏꦺꦴꦤ꧀ꦤꦶꦭꦶꦏ꧀ꦏꦶ​ꦏꦺꦴꦮꦺ​꧉​ꦢꦺꦏ꧀ꦤꦺꦱꦶꦁ​ꦧꦏꦭ꧀ꦔꦧꦂꦫꦶ​ꦏꦺꦴꦮꦺ​ꦧꦧ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦧꦺꦃ​ꦱꦶꦁ​ꦤꦁꦏꦸꦠꦬꦸꦩ꧀ꦏꦺꦤꦺ​꧉​ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦲꦪꦼꦩ꧀ꦏꦧꦺꦃ​꧉​

²³꧋ꦲꦏꦸ​ꦤ꧀ꦢꦺꦴꦁꦔꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦏꦺꦴꦮꦺ​ꦏꦧꦺꦃ​ꦧꦶꦱ​ꦤꦩ꧀ꦥ​ꦏꦠꦼꦤ꧀ꦠꦽꦩ꧀ꦩꦤ꧀ ꦏꦠꦿꦺꦱ꧀ꦤꦤ꧀ꦭꦤ꧀ꦥꦼꦔꦤ꧀ꦢꦼꦭ꧀꧈​

²⁴꧋ꦕꦸꦏꦸꦥ꧀ꦱꦼꦩꦺꦤꦺꦮꦲꦺꦭꦪꦁꦲꦶꦏꦶ꧉​ꦩꦸꦒꦩꦸꦒꦒꦸꦱ꧀ꦠꦶꦄꦭ꧀ꦭꦃꦔꦺꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺꦩꦫꦁꦏꦺꦴꦮꦺꦏꦧꦺꦃ꧈​ꦱꦶꦁꦥꦢꦩꦤ꧀ꦠꦼꦥ꧀ꦠꦿꦺꦱ꧀ꦤꦩꦫꦁꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺꦲꦮꦏ꧀ꦏꦺꦢꦺꦮꦺ꧉​

ꦦꦈꦭꦸꦱ꧀

↑ ↑ ↑

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

¹꧋ꦥꦫ​ꦱꦼꦢꦸꦭꦸꦂ​ꦤꦁꦏꦸꦠꦥ꦳ꦶꦭꦶꦥꦶ​꧈​ꦲꦶꦏꦶ​ꦭꦪꦁ​ꦱꦁꦏꦱꦼꦢꦸꦭꦸꦂꦩꦸꦦꦈꦭꦸꦱ꧀ꦭꦤ꧀ꦠꦶꦩꦺꦴꦠꦶꦪꦸꦱ꧀ ꦱꦶꦁ​ꦔ꧀ꦭꦢꦺꦤ꧀ꦤꦶ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ ꦩꦫꦁ​ꦏꦺꦴꦮꦺ​ꦏꦧꦺꦃ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦶꦁ​ꦮꦶꦱ꧀ꦥꦢ​ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦭꦤ꧀ꦲꦸꦒ​ꦩꦫꦁ​ꦥꦫ​ꦥꦼꦤꦸꦤ꧀ꦠꦸꦤ꧀ꦭꦤ꧀ꦥꦼꦭꦢꦺꦤ꧀ꦤꦺ​ꦥꦱꦩꦸꦮꦤ꧀꧈​

²꧋ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦩꦫꦁ​ꦏꦺꦴꦮꦺ​ꦏꦧꦺꦃ​꧉​

꧋ꦥꦤ꧀ꦢꦺꦴꦔꦤꦺ​ꦫꦱꦸꦭ꧀ꦦꦈꦭꦸꦱ꧀꧈​

³꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦲꦏꦸ​ꦏꦺꦭꦶꦁꦔꦤ꧀ꦏꦺꦴꦮꦺ​ꦲꦏꦸ​ꦗꦤ꧀ꦩꦠꦸꦂꦏꦼꦱꦸꦮꦸꦤ꧀ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ^4-5ꦱꦧꦼꦤ꧀ꦲꦏꦸ​ꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​ꦲꦏꦸ​ꦪ​ꦤ꧀ꦢꦺꦴꦁꦔꦏꦫꦺꦴ​ꦧꦸꦔꦃ​꧈​ꦗꦭꦂꦫꦤ꧀ꦏꦺꦭꦶꦁꦔꦤ꧀ꦲꦼꦁꦒꦺꦴꦤ꧀ꦩꦸ​ꦔꦿꦺꦮꦁꦔꦶ​ꦲꦏꦸ​꧈​ꦢꦺꦴꦁꦔꦺꦲꦏꦸ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦏꦮꦶꦠ꧀ꦲꦏꦸ​ꦠꦼꦏ​ꦤꦁꦥ꦳ꦶꦭꦶꦥꦶ​ꦏꦺꦴꦤꦺꦴ​ꦔꦤ꧀ꦠꦶ​ꦠꦼꦏꦤ꧀ꦱꦼꦥꦿꦺꦤꦺ​꧉​ ⁶ꦲꦏꦸ​ꦲꦸꦒ​ꦧꦸꦔꦃ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦩꦶꦮꦶꦠ꧀ꦠꦶ​ꦥꦼꦁꦒꦮꦺꦏꦸꦧꦼꦕꦶꦏ꧀ꦲꦶꦁ​ꦏꦺꦴꦮꦺ​꧉​ꦭꦤ꧀ꦲꦏꦸ​ꦪꦏꦶꦤ꧀ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦤꦼꦫꦸꦱ꧀ꦱꦏꦺꦥꦼꦁꦒꦮꦺꦏꦸꦲꦶꦏꦶ​ꦠꦼꦏꦤ꧀ꦫꦩ꧀ꦥꦸꦁꦔꦺ​꧈​ꦲꦩ꧀ꦧꦺꦱꦸꦏ꧀ꦲꦶꦁ​ꦢꦶꦤ​ꦠꦼꦏꦤꦺ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​ ⁷ꦏꦺꦴꦮꦺ​ꦥꦚ꧀ꦕꦺꦤ꧀ꦱ꧀ꦭꦮꦱ꧀ꦱꦺꦲꦤ​ꦲꦶꦁ​ꦲꦠꦶꦏꦸ​ꦭꦤ꧀ꦲꦏꦸ​ꦠꦤ꧀ꦱꦃ​ꦩꦶꦏꦶꦂꦫꦏꦺꦏꦺꦴꦮꦺ​꧉​ꦭꦃ​ꦏꦼꦥꦿꦶꦪꦺ​ꦩꦼꦤꦺꦃ​!ꦏꦺꦴꦮꦺ​ꦔꦿꦺꦮꦁꦔꦶ​ꦲꦏꦸ​ꦔꦼꦂꦗꦤ꧀ꦤꦶꦥꦼꦁꦒꦮꦺꦏꦸꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦲꦏꦸ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦺꦴꦮꦺ​ꦔꦿꦺꦮꦁꦔꦶ​ꦲꦏꦸ​ꦱꦸꦮꦺꦤꦺ​ꦲꦏꦸ​ꦤꦁꦱꦼꦠꦿꦥꦤ꧀ꦏꦺꦤꦺ​ꦭꦤ꧀ꦲꦸꦒ​ꦢꦺꦴꦁꦔꦺꦲꦏꦸ​ꦢꦶꦥꦁꦒꦶꦭ꧀ꦤꦁꦏꦿꦸꦠꦺꦴꦤ꧀ ꦏꦁꦒꦺꦴ​ꦲꦩ꧀ꦧꦺꦭꦤꦶ​ꦭꦤ꧀​ꦔ꧀ꦒꦼꦭꦂꦫꦏꦺꦤꦺꦏ꧀ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦸꦮꦶ​ꦧꦼꦤꦼꦂ​꧉​ ⁸ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦗꦤ꧀ꦏꦁꦔꦼꦤ꧀ꦠꦼꦤꦤ꧀ꦩꦫꦁ​ꦏꦺꦴꦮꦺ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦂꦠꦶ​ꦤꦺꦏ꧀ꦲꦏꦸ​ꦲꦺꦴꦫ​ꦒꦺꦴꦫꦺꦴꦃ​꧉​ꦲꦏꦸ​ꦠꦿꦺꦱ꧀ꦤꦩꦫꦁ​ꦏꦺꦴꦮꦺ​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦤꦿꦺꦱ꧀ꦤꦤ꧀ꦤꦶꦏꦺꦴꦮꦺ​꧉​

⁹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦥꦚ꧀ꦕꦺꦤ꧀​ꦤ꧀ꦢꦺꦴꦁꦔꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦏꦠꦿꦺꦱ꧀ꦤꦤ꧀ꦩꦸꦩꦫꦁ​ꦱꦏ꧀ꦥꦢꦥꦢꦧꦶꦱ​ꦩꦸꦤ꧀ꦢꦏ꧀ꦠꦼꦫꦸꦱ꧀꧈​ꦤꦺꦏ꧀ꦏꦺꦴꦮꦺ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦏꦸꦮꦶ​꧈​ꦥꦔꦼꦂꦠꦶꦩꦸ​ꦧꦧ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦸꦮꦶꦱꦸꦮꦶꦧꦶꦱ​ꦠꦩ꧀ꦧꦃ​ꦗꦼꦫꦸꦭꦤ꧀ꦏꦺꦴꦮꦺ​ꦧꦶꦱ​ꦤꦶꦠꦺꦤ꧀ꦤꦶ​ꦧꦫꦁ​ꦱꦶꦁ​ꦧꦼꦤꦼꦂ​ꦭꦤ꧀ꦱꦶꦁ​ꦲꦺꦴꦫ​꧉​ ¹⁰ꦢꦢꦶꦤꦺ​ꦲꦶꦁ​ꦱꦼꦩ꧀ꦧꦫꦁ​ꦥꦽꦏꦫ​ꦏꦺꦴꦮꦺ​ꦧꦶꦱ​ꦩꦶꦭꦶꦃ​ꦱꦶꦁ​ꦲꦥꦶꦏ꧀ꦢꦺꦮꦺ꧈​ꦱꦸꦥꦪ​ꦲꦩ꧀ꦧꦺꦱꦸꦏ꧀ꦲꦶꦁ​ꦢꦶꦤ​ꦠꦼꦏꦤꦺ​ꦏꦿꦶꦱ꧀ꦡꦸꦱ꧀ ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦔꦿꦸꦠꦸꦏꦧꦺꦃ​ꦩꦤꦸꦁꦱ​꧈​ꦏꦺꦴꦮꦺ​ꦧꦏꦭ꧀ꦏꦼꦠꦼꦩꦸ​ꦉꦱꦶꦏ꧀ꦭꦤ꧀ꦥꦤ꧀ꦠꦼꦱ꧀ ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦸꦫꦶꦥ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦤꦩꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦢꦺꦮꦺꦱꦶꦁ​ꦧꦶꦱ​ꦔꦼꦏꦺꦏ꧀ꦏꦶ꧉​ ¹¹ꦤꦺꦏ꧀ꦏꦺꦴꦮꦺ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦏꦸꦮꦶ​꧈​ꦮꦺꦴꦁꦮꦺꦴꦁ​ꦧꦶꦱ​ꦮꦼꦫꦸꦃ​ꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦮꦺꦴꦁꦮꦺꦴꦁ​ꦧꦏꦭ꧀ꦔꦼꦊꦩ꧀ꦢꦺꦏ꧀ꦤꦺ꧉​

꧋ꦲꦸꦫꦶꦥ꧀ꦏꦁꦒꦺꦴ​ꦏꦿꦶꦱ꧀ꦡꦸꦱ꧀꧈​

¹²꧋ꦥꦫ​ꦱꦼꦢꦸꦭꦸꦂ​꧈​ꦔꦼꦂꦠꦶꦪ​ꦤꦺꦏ꧀ꦏꦔꦺꦭ꧀ꦭꦤ꧀ꦱꦶꦁ​ꦮꦶꦱ꧀ꦠꦏ꧀ꦲꦭꦩ꧀ꦩꦶ​ꦏꦸꦮꦶ​ꦩꦭꦃ​ꦩꦫꦏ꧀ꦏꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦧꦶꦱ​ꦏꦱꦼꦧꦂ​꧉​ ¹³ꦥꦫ​ꦱꦺꦴꦭ꧀ꦢꦠ꧀ꦱꦶꦁ​ꦚ꧀ꦗꦒ​ꦲꦺꦴꦩꦃꦲꦺ​ꦒꦿꦩꦁꦔꦺꦭꦤ꧀ꦮꦺꦴꦁ​ꦏꦧꦺꦃ​ꦱꦶꦁ​ꦤꦁꦏꦺꦤꦺ​ꦱꦲꦶꦏꦶ​ꦥꦢ​ꦔꦼꦂꦠꦶ​ꦤꦺꦏ꧀ꦲꦏꦸ​ꦲꦶꦏꦶ​ꦢꦶꦱꦼꦠꦿꦥ꧀​ꦔ꧀ꦭꦧꦸꦃꦲꦶ​ꦏꦿꦶꦱ꧀ꦡꦸꦱ꧀꧈​ ¹⁴ꦭꦤ꧀ꦩꦼꦤꦺꦃ​꧈​ꦗꦭꦂꦫꦤ꧀ꦲꦏꦸ​ꦲꦶꦏꦶ​ꦢꦶꦱꦼꦠꦿꦥ꧀ ꦲꦺꦴꦏꦺꦃꦱꦼꦢꦸꦭꦸꦂ​ꦱꦶꦁ​ꦩꦸꦤ꧀ꦢꦏ꧀ꦏꦸꦮꦠ꧀ꦥꦼꦔꦤ꧀ꦢꦼꦭ꧀ꦭꦺ​ꦩꦫꦁ​ꦒꦸꦱ꧀ꦠꦶ​ꦭꦤ꧀ꦥꦢ​ꦏꦼꦤ꧀ꦢꦼꦭ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦠꦤ꧀ꦥ​ꦮꦼꦢꦶ​꧉​

¹⁵꧋ꦥꦚ꧀ꦕꦺꦤ꧀ꦧꦼꦤꦼꦂ​꧈​ꦲꦸꦒ​ꦲꦺꦤꦺꦁꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦩꦸꦭꦁꦔꦏꦺꦧꦧ꧀ꦏꦿꦶꦱ꧀ꦡꦸꦱ꧀ ꦗꦭꦂꦫꦤ꧀​ꦤ꧀ꦢꦸꦮꦺꦫꦱ​ꦩꦺꦫꦶ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ ꦄꦭ꧀ꦭꦃ​ꦔꦁꦒꦺꦴꦏ꧀ꦏꦏꦺꦲꦏꦸ​꧈​ꦥꦢ​ꦉꦧꦸꦠ꧀ꦠꦤ꧀ꦏꦼꦥꦺꦔꦶꦤ꧀ꦢꦢꦶ​ꦥꦼꦔꦉꦥ꧀꧈​ ¹⁶ꦤꦁꦔꦶꦁ​ꦲꦺꦤꦺꦁꦭꦶꦪꦤꦺ​ꦲꦸꦒ​ꦱꦶꦁ​ꦥꦢ​ꦩꦸꦭꦁꦔꦏꦺꦏꦿꦶꦱ꧀ꦡꦸꦱ꧀ꦏꦫꦺꦴ​ꦲꦠꦶ​ꦉꦱꦶꦏ꧀꧈​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦥꦢ​ꦠꦿꦺꦱ꧀ꦤꦩꦫꦁ​ꦲꦏꦸ​ꦭꦤ꧀ꦥꦢ​ꦢꦸꦤꦸꦁꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦺꦴꦁꦏꦺꦴꦤ꧀ꦲꦏꦸ​ꦲꦩ꧀ꦧꦺꦭꦤꦶ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ¹⁷ꦮꦺꦴꦁꦮꦺꦴꦁꦱꦶꦁꦩꦸꦭꦁꦔꦏꦺꦏꦫꦺꦴꦠꦸꦗꦸꦮꦤ꧀ꦱꦶꦁꦲꦺꦴꦫꦲꦥꦶꦏ꧀ꦏꦸꦮꦶꦱꦶꦁꦢꦶꦒꦺꦴꦭꦺꦏ꧀ꦏꦶꦤꦩꦸꦁꦏꦼꦏꦉꦥ꧀ꦥꦤ꧀ꦤꦺꦢꦺꦮꦺ꧉​ꦒꦒꦱ꧀ꦱꦤ꧀ꦤꦺꦤꦺꦏ꧀ꦔꦺꦴꦤꦺꦴꦏꦸꦮꦶꦠꦼꦫꦸꦱ꧀ꦤꦩ꧀ꦧꦃꦲꦶꦏꦔꦺꦭ꧀ꦭꦤ꧀ꦏꦸꦱꦸꦮꦺꦤꦺꦲꦏꦸꦤꦁꦱꦼꦠꦿꦥꦤ꧀ꦏꦺꦤꦺ꧉​

¹⁸꧋ꦤꦁꦔꦶꦁ​ꦲꦺꦴꦫ​ꦢꦢꦶ​ꦲꦥ​!ꦏꦁꦒꦺꦴ​ꦲꦏꦸ​ꦪ​ꦮꦶꦱ꧀ꦲꦥꦶꦏ꧀ꦮꦲꦺ​꧉​ꦠꦸꦗꦸꦮꦤ꧀ꦤꦺꦲꦼꦩ꧀ꦧꦸꦃ​ꦲꦭ​꧈​ꦲꦼꦩ꧀ꦧꦸꦃ​ꦧꦼꦕꦶꦏ꧀ ꦏꦸꦮꦶ​ꦲꦺꦴꦫ​ꦢꦢꦶ​ꦱꦼꦧꦧ꧀꧈​ꦱꦶꦁ​ꦥꦼꦤ꧀ꦠꦶꦁ​꧈​ꦏꦼꦥꦿꦶꦪꦺ​ꦮꦲꦺ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦧꦶꦱ​ꦏꦱꦼꦧꦂ​꧉​ꦏꦸꦮꦶ​ꦱꦶꦁ​ꦩꦫꦏ꧀ꦏꦏꦺꦲꦏꦸ​ꦧꦸꦔꦃ​꧉​ ¹⁹ꦲꦏꦸ​ꦪ​ꦧꦏꦭ꧀ꦧꦸꦔꦃ​ꦠꦼꦫꦸꦱ꧀ ꦲꦮꦶꦠ꧀ꦲꦏꦸ​ꦥꦽꦕꦪ​ꦤꦺꦏ꧀ꦲꦏꦸ​ꦧꦏꦭ꧀ꦢꦶꦲꦼꦠꦺꦴꦏ꧀ꦏꦏꦺ꧈​ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦤ꧀ꦢꦺꦴꦔꦏ꧀ꦏꦏꦺꦲꦏꦸ​ꦭꦤ꧀ꦗꦭꦂꦫꦤ꧀ꦫꦺꦴꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦤꦸꦭꦸꦁꦔꦶ​ꦲꦏꦸ​꧉​ ²⁰ꦱꦶꦁꦠꦏ꧀ꦱꦸꦮꦸꦤ꧀ꦠꦼꦤꦤ꧀ ꦲꦗꦱꦩ꧀ꦥꦺꦏ꧀ꦲꦏꦸꦏꦼꦥꦿꦶꦪꦺꦮꦲꦺꦔ꧀ꦭꦏꦺꦴꦤ꧀ꦤꦶꦧꦫꦁꦱꦶꦁꦔꦶꦱꦶꦤ꧀ꦤꦶꦱꦶꦤ꧀ꦤꦏꦺ꧉​ꦩꦭꦃꦱꦏ꧀ꦮꦚ꧀ꦕꦶꦮꦚ꧀ꦕꦶ꧈​ꦤꦁꦔꦶꦁꦭꦸꦮꦶꦃꦭꦸꦮꦶꦃꦱꦲꦶꦏꦶ꧈​ꦧꦶꦱꦲꦲꦏꦸꦔꦺꦴꦩꦺꦴꦁꦏꦫꦺꦴꦏꦼꦤ꧀ꦢꦼꦭ꧀ ꦠꦤ꧀ꦥꦮꦼꦢꦶꦱꦥꦱꦥ꧉​ꦢꦢꦶꦤꦺꦲꦏꦸꦧꦶꦱꦔ꧀ꦭꦸꦲꦸꦂꦫꦏꦺꦏꦿꦶꦱ꧀ꦡꦸꦱ꧀ꦲꦶꦁꦠꦶꦤ꧀ꦢꦏ꧀ꦠꦤ꧀ꦢꦸꦏ꧀ꦏꦸ꧈​ꦱꦼꦤꦗꦤ꧀ꦤꦭꦤ꧀ꦠꦂꦫꦤ꧀ꦲꦸꦫꦶꦥ꧀ꦏꦸ꧈​ꦱꦼꦤꦗꦤ꧀ꦤꦏꦸꦢꦸꦠꦏ꧀ꦭꦧꦸꦃꦲꦶꦩꦠꦶ꧉​ ²¹ꦲꦮꦶꦠ꧀ ꦏꦁꦒꦺꦴ​ꦲꦏꦸ​ꦲꦸꦫꦶꦥ꧀ꦏꦸꦮꦶ​ꦲꦥ​ꦠ​?ꦤꦺꦏ꧀ꦲꦏꦸ​ꦲꦸꦫꦶꦥ꧀ꦪ​ꦤꦩꦸꦁ​ꦏꦁꦒꦺꦴ​ꦏꦿꦶꦱ꧀ꦡꦸꦱ꧀꧈​ꦤꦺꦏ꧀ꦲꦏꦸ​ꦩꦠꦶ​꧈​ꦏꦸꦮꦶ​ꦩꦭꦃ​ꦠꦏ꧀ꦲꦁꦒꦼꦥ꧀ꦭꦸꦮꦶꦃ​ꦲꦥꦶꦏ꧀꧈​ ²²ꦤꦁꦔꦶꦁ​ꦤꦺꦏ꧀ꦲꦏꦸ​ꦲꦸꦫꦶꦥ꧀ ꦲꦏꦸ​ꦧꦶꦱ​ꦚꦩ꧀ꦧꦸꦠ꧀ꦠꦭꦸꦮꦶꦃ​ꦲꦺꦴꦏꦺꦃꦏꦁꦒꦺꦴ​ꦒꦸꦱ꧀ꦠꦶ​꧉​ꦢꦢꦶꦤꦺ​ꦲꦏꦸ​ꦲꦶꦏꦶ​ꦧꦶꦔꦸꦁ​ꦩꦶꦭꦶꦃ​ꦱꦶꦁ​ꦲꦼꦤ꧀ꦢꦶ​꧉​ ²³ꦲꦏꦸ​ꦲꦺꦴꦫ​ꦧꦶꦱ​ꦔꦫꦤ꧀ꦤꦶ​!ꦱꦏ꧀ꦗꦤꦺꦲꦏꦸ​ꦪ​ꦏꦼꦥꦺꦔꦶꦤ꧀ꦠꦼꦤꦤ꧀ꦤꦶꦁꦒꦭ꧀ꦢꦺꦴꦚ​ꦲꦶꦏꦶ​ꦱꦸꦥꦪ​ꦲꦏꦸ​ꦧꦶꦱ​ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀;ꦏꦸꦮꦶ​ꦱꦶꦁ​ꦲꦥꦶꦏ꧀ꦢꦺꦮꦺ꧉​ ²⁴ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦤꦺꦏ꧀ꦲꦏꦸ​ꦲꦸꦫꦶꦥ꧀ꦩꦭꦃ​ꦲꦥꦶꦏ꧀ꦏꦁꦒꦺꦴ​ꦏꦺꦴꦮꦺ​꧈​ꦢꦢꦶꦤꦺ​ꦲꦏꦸ​ꦧꦶꦱ​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧉​ ²⁵ꦥꦚ꧀ꦕꦺꦤ꧀ꦲꦏꦸ​ꦔꦼꦂꦠꦶ​ꦤꦺꦏ꧀ꦲꦏꦸ​ꦲꦶꦗꦶꦏ꧀ꦢꦶꦭꦶꦭꦤꦶ​ꦲꦸꦫꦶꦥ꧀ꦭꦤ꧀ꦢꦶꦭꦶꦭꦤꦶ​ꦧꦼꦧꦉꦁꦔꦤ꧀ꦏꦫꦺꦴ​ꦏꦺꦴꦮꦺ​꧈​ꦱꦸꦥꦪ​ꦲꦏꦸ​ꦧꦶꦱ​ꦔꦸꦤ꧀ꦢꦏ꧀ꦏꦏꦺꦥꦼꦔꦤ꧀ꦢꦼꦭ꧀ꦩꦸ​ꦭꦤ꧀ꦏꦧꦸꦔꦃꦲꦤ꧀ꦩꦸ​꧉​ ²⁶ꦩꦸꦭꦤꦺ​꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦲꦏꦸ​ꦮꦶꦱ꧀ꦕꦩ꧀ꦥꦸꦂ​ꦩꦼꦤꦺꦃ​ꦏꦫꦺꦴ​ꦏꦺꦴꦮꦺ​꧈​ꦏꦺꦴꦮꦺ​ꦧꦶꦱ​ꦔ꧀ꦒꦸꦁꦒꦸꦁꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ ꦗꦭꦂꦫꦤ꧀ꦢꦺꦏ꧀ꦤꦺꦱꦶꦁ​ꦔ꧀ꦒꦮ​ꦲꦏꦸ​ꦤꦁꦔ꧀ꦒꦺꦴꦤ꧀ꦩꦸ​꧉​

²⁷꧋ꦥꦫ​ꦱꦼꦢꦸꦭꦸꦂ​꧈​ꦏꦁꦒꦺꦴ​ꦱꦲꦶꦏꦶ​ꦱꦶꦁ​ꦥꦼꦂꦭꦸ​ꦢꦺꦮꦺꦪ​ꦲꦶꦏꦶ​:ꦲꦸꦫꦶꦥ꧀ꦩꦸ​ꦏꦸꦢꦸ​ꦕꦺꦴꦕꦺꦴꦏ꧀​ꦏꦫꦺꦴ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦢꦢꦶꦤꦺ​ꦏꦼꦠꦼꦩꦸ​ꦲꦥ​ꦲꦺꦴꦫ​꧈​ꦲꦏꦸ​ꦧꦏꦭ꧀ꦏꦿꦸꦔꦸ​ꦤꦺꦏ꧀ꦏꦺꦴꦮꦺ​ꦠꦼꦠꦼꦥ꧀ꦩꦤ꧀ꦠꦼꦥ꧀ꦠꦸꦁꦒꦭ꧀ꦏꦉꦥ꧀ꦲꦼꦁꦒꦺꦴꦤ꧀ꦩꦸ​ꦥꦢ​ꦔ꧀ꦭꦧꦸꦃꦲꦶ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ²⁸ꦲꦗ​ꦥꦢ​ꦮꦼꦢꦶ​ꦏꦫꦺꦴ​ꦩꦸꦁꦱꦸꦃꦩꦸ​!ꦱꦶꦁ​ꦏꦼꦤ꧀ꦢꦼꦭ꧀ꦠꦼꦫꦸꦱ꧀ ꦱꦸꦥꦪ​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦔꦼꦂꦠꦶ​ꦤꦺꦏ꧀ꦧꦏꦭ꧀ꦏꦭꦃ​꧉​ꦏꦺꦴꦮꦺ​ꦱꦶꦁ​ꦧꦏꦭ꧀ꦩꦼꦤꦁ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦼꦏꦺꦏ꧀ꦏꦶꦏꦩꦼꦤꦁꦔꦤ꧀ꦩꦫꦁ​ꦏꦺꦴꦮꦺ​꧉​ ²⁹ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦢꦶꦥꦶꦭꦶꦃ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦱꦸꦥꦪ​ꦏꦺꦴꦮꦺ​ꦥꦢ​ꦔ꧀ꦭꦢꦺꦤ꧀ꦤꦶ​ꦢꦺꦏ꧀ꦤꦺ꧉​ꦲꦺꦴꦫ​ꦤꦩꦸꦁ​ꦭꦤ꧀ꦠꦂꦫꦤ꧀ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧈​ꦤꦁꦔꦶꦁ​ꦲꦸꦒ​ꦭꦤ꧀ꦠꦂꦫꦤ꧀​ꦔ꧀ꦭꦏꦺꦴꦤ꧀ꦤꦶ​ꦏꦔꦺꦭ꧀ꦭꦤ꧀​ꦔ꧀ꦭꦧꦸꦃꦲꦶ​ꦢꦺꦏ꧀ꦤꦺ꧉​ ³⁰ꦩꦸꦭꦤꦺ​ꦱꦲꦶꦏꦶ​ꦏꦺꦴꦮꦺ​ꦏꦫꦺꦴ​ꦲꦏꦸ​ꦧꦼꦧꦉꦁꦔꦤ꧀​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀꧈​ꦢꦺꦏ꧀​ꦩ꧀ꦧꦶꦪꦺꦤ꧀ꦏꦺꦴꦮꦺ​ꦥꦢ​ꦮꦼꦫꦸꦃ​ꦢꦺꦮꦺꦲꦶꦁ​ꦲꦸꦫꦶꦥ꧀ꦏꦸ​ꦭꦤ꧀ꦱꦲꦶꦏꦶ​ꦏꦺꦴꦮꦺ​ꦥꦢ​ꦏꦿꦸꦔꦸ​ꦤꦺꦏ꧀ꦲꦏꦸ​ꦲꦶꦗꦶꦏ꧀​ꦔ꧀ꦭꦏꦺꦴꦤ꧀ꦤꦶ​ꦏꦔꦺꦭ꧀ꦭꦤ꧀꧈​

↑ ↑ ↑

꧋ꦲꦤ꧀ꦢꦥ꧀ꦥꦱꦺꦴꦂꦭꦤ꧀ꦏꦭꦸꦲꦸꦂꦫꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​

꧇​꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦼꦁꦒꦺꦴꦤ꧀ꦩꦸ​ꦱꦲꦶꦏꦶ​ꦥꦢ​ꦤ꧀ꦢꦸꦮꦺꦤ꧀ꦤꦶ​ꦏꦼꦏꦸꦮꦠ꧀ꦠꦤ꧀ꦏꦸꦮꦶ​ꦭꦲꦸꦠ꧀ꦗꦭꦂꦫꦤ꧀ꦏꦺꦴꦮꦺ​ꦫꦸꦩꦏꦼꦠ꧀ꦩꦫꦁ​ꦏꦿꦶꦱ꧀ꦡꦸꦱ꧀ꦠ​?ꦭꦤ꧀ꦲꦠꦶꦩꦸ​ꦱꦲꦶꦏꦶ​ꦤꦩ꧀ꦥ​ꦥꦔ꧀ꦭꦶꦥꦸꦂ​ꦏꦸꦮꦶ​ꦲꦥ​ꦲꦺꦴꦫ​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦠꦿꦺꦱ꧀ꦤꦩꦫꦁ​ꦏꦺꦴꦮꦺ​?ꦏꦺꦴꦮꦺ​ꦲꦸꦒ​ꦥꦢ​ꦠꦿꦺꦱ꧀ꦤꦠꦶꦤꦿꦺꦱ꧀ꦤꦤ꧀ꦭꦤ꧀ꦒꦼꦩꦠꦶ​ꦩꦫꦁ​ꦱꦏ꧀ꦥꦢꦥꦢ꧈​ꦏꦸꦮꦶ​ꦭꦲꦸꦠ꧀ꦗꦭꦂꦫꦤ꧀ꦏꦺꦴꦮꦺ​ꦤ꧀ꦢꦸꦮꦺꦤ꧀ꦤꦶ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠ​? ²ꦩꦸꦭꦤꦺ​꧈​ꦲꦩ꧀ꦧꦺꦴꦏ꧀ꦥꦢ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦲꦠꦶꦏꦸ​ꦱꦏ꧀ꦏꦧꦺꦃꦲꦺꦥꦶꦱꦤ꧀ꦠ​!ꦲꦩ꧀ꦧꦺꦴꦏ꧀ꦥꦢ​ꦢꦢꦶꦪ​ꦱꦶꦗꦶ​ꦲꦶꦁ​ꦲꦔꦼꦤ꧀ꦲꦔꦼꦤ꧀ꦭꦤ꧀ꦥꦢ​ꦠꦿꦺꦱ꧀ꦤꦲꦠꦼꦫꦸꦱ꧀ꦩꦫꦁ​ꦱꦏ꧀ꦥꦢꦥꦢ꧉​ꦥꦢ​ꦠꦸꦁꦒꦭ꧀ꦭ​ꦲꦶꦁ​ꦲꦠꦶ​ꦭꦤ꧀ꦲꦶꦁ​ꦏꦉꦥ꧀꧈​ ³ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦤꦩꦸꦁ​ꦱꦼꦤꦼꦁ​ꦔ꧀ꦒꦺꦴꦭꦺꦏ꧀ꦏꦶ​ꦏꦥꦼꦂꦭꦸꦮꦤ꧀ꦤꦺꦢꦺꦮꦺꦮꦲꦺ​ꦲꦥ​ꦔ꧀ꦒꦺꦴꦭꦺꦏ꧀ꦊꦩ꧀ꦊꦩ꧀ꦩꦤ꧀꧈​ꦭꦸꦮꦶꦃ​ꦧꦼꦕꦶꦏ꧀ꦥꦢ​ꦲꦤ꧀ꦢꦥ꧀ꦥꦱꦺꦴꦂꦩꦫꦁ​ꦱꦏ꧀ꦥꦢꦥꦢ꧉​ꦲꦗ​ꦥꦢ​ꦤ꧀ꦢꦸꦮꦺꦤ꧀ꦤꦶ​ꦫꦸꦩꦁꦱ​ꦲꦥꦶꦏ꧀ꦏꦺ​ꦔꦸꦁꦏꦸꦭ꧀ꦭꦶ​ꦭꦶꦪꦤꦺ​꧈​ꦤꦁꦔꦶꦁ​ꦩꦭꦃ​ꦥꦢ​ꦔꦗꦺꦤ꧀ꦤꦤ​ꦩꦫꦁ​ꦭꦶꦪꦤꦺ​ꦔꦸꦁꦏꦸꦭ꧀ꦭꦶ​ꦲꦮꦏ꧀ꦩꦸ​ꦢꦺꦮꦺ꧉​ ⁴ꦲꦗ​ꦤꦩꦸꦁ​ꦩꦶꦏꦶꦂꦫꦏꦺꦧꦸꦠꦸꦃꦲꦺ​ꦢꦺꦮꦺꦮꦲꦺ​꧈​ꦭꦸꦮꦶꦃ​ꦧꦼꦕꦶꦏ꧀ꦥꦢ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦏꦥꦼꦂꦭꦸꦮꦤ꧀ꦤꦺꦱꦏ꧀ꦥꦢꦥꦢ꧉​

^5-6꧋ꦏꦺꦴꦮꦺ​ꦏꦸꦢꦸ​ꦤ꧀ꦢꦸꦮꦺꦤ꧀ꦤꦶ​ꦲꦠꦶ​ꦱꦶꦁ​ꦥꦤ꧀ꦠꦼꦱ꧀ꦏꦁꦒꦺꦴ​ꦮꦺꦴꦁ​ꦱꦶꦁ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦲꦮꦶꦠ꧀ ꦱꦼꦤꦗꦤ꧀ꦢꦺꦏ꧀ꦤꦺꦮꦸꦗꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦢꦺꦏ꧀ꦤꦺꦲꦺꦴꦫ​ꦠꦲꦸ​ꦤ꧀ꦢꦸꦮꦺꦤ꧀ꦤꦶ​ꦏꦼꦥꦺꦔꦶꦤ꧀ꦔꦼꦠꦺꦴꦏ꧀ꦏꦏꦺꦤꦺꦏ꧀ꦢꦺꦏ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁷ꦩꦭꦃ​ꦱꦁꦏꦏꦉꦥ꧀ꦥꦺ​ꦢꦺꦮꦺꦢꦺꦏ꧀ꦤꦺꦤꦶꦁꦒꦭ꧀ꦥꦁꦒꦺꦴꦤ꧀ꦤꦤ꧀ꦤꦺ​꧈​ꦩꦶꦭꦶꦃ​ꦢꦢꦶ​ꦏꦪ​ꦥꦼꦭꦢꦺꦤ꧀ꦭꦤ꧀ꦢꦢꦶ​ꦠꦸꦁꦒꦭ꧀ꦭꦺ​ꦩꦤꦸꦁꦱ​꧉​ ⁸ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦫꦸꦥ​ꦩꦤꦸꦁꦱ​ꦔꦱꦺꦴꦂꦫꦏꦺꦲꦸꦫꦶꦥ꧀ꦥꦺꦭꦤ꧀ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦩ꧀ꦥꦺꦏ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀꧈​ ⁹ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦭꦸꦲꦸꦂꦫꦏꦺꦢꦺꦏ꧀ꦤꦺꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦢꦸꦮꦸꦂꦢꦺꦮꦺꦭꦤ꧀ꦢꦶꦏꦺꦏ꧀ꦏꦶꦥꦔ꧀ꦮꦱ​ꦱꦶꦁ​ꦒꦼꦢꦺꦢꦺꦮꦺ꧈​ꦔꦸꦁꦏꦸꦭ꧀ꦭꦶ​ꦱꦏ꧀ꦲꦺꦤꦺꦁꦔꦺꦥꦔ꧀ꦮꦱ​꧉​ ^10-11ꦢꦢꦶꦤꦺ​ꦱꦼꦩ꧀ꦧꦫꦁ​ꦱꦶꦁ​ꦤꦁꦱ꧀ꦮꦂꦒ​꧈​ꦱꦶꦁ​ꦤꦁꦧꦸꦩꦶ​ꦭꦤ꧀ꦱꦶꦁ​ꦤꦁꦱꦏ꧀ꦔꦶꦱꦺꦴꦂꦫꦺ​ꦧꦸꦩꦶ​ꦧꦏꦭ꧀ꦥꦢ​ꦱꦸꦗꦸꦠ꧀ꦭꦤ꧀ꦔꦏꦺꦴꦤ꧀ꦤꦶ​ꦤꦺꦏ꧀ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦸꦮꦶ​ꦒꦸꦱ꧀ꦠꦶ​꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦏꦧꦺꦃ​ꦥꦢ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉​

꧋ꦏꦪ​ꦥꦼꦥꦢꦁꦚ꧀ꦭꦺꦴꦫꦺꦴꦠ꧀ꦠꦶꦗꦒꦠ꧀꧈​

^12-13꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ!ꦏꦺꦴꦮꦺ​ꦱꦼꦩꦺꦴꦤꦺꦴ​ꦲꦸꦒ​꧈​ꦏꦪ​ꦲꦼꦁꦒꦺꦴꦤ꧀ꦩꦸ​ꦥꦢ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦴꦁꦔꦺꦲꦏꦸ​ꦲꦶꦗꦶꦏ꧀ꦕꦩ꧀ꦥꦸꦂ​ꦏꦫꦺꦴ​ꦏꦺꦴꦮꦺ​꧈​ꦭꦸꦮꦶꦃ​ꦥꦼꦂꦭꦸ​ꦱꦲꦶꦏꦶ​꧈​ꦱꦸꦮꦺꦤꦺ​ꦲꦏꦸ​ꦲꦢꦺꦴꦃ​ꦏꦫꦺꦴ​ꦏꦺꦴꦮꦺ​꧉​ꦩꦸꦭꦤꦺ​꧈​ꦏꦺꦴꦮꦺ​ꦏꦸꦢꦸ​ꦔ꧀ꦭꦸꦩꦸꦃꦲꦶꦔꦸꦢꦶ​ꦏꦼꦱ꧀ꦭꦩꦼꦠ꧀ꦠꦤ꧀ꦤꦺ​ꦲꦸꦫꦶꦥ꧀ꦩꦸ​ꦱꦏ꧀ꦏꦧꦺꦃꦲꦺ꧉​ꦲꦼꦁꦒꦺꦴꦤ꧀ꦩꦸ​ꦤꦶꦤ꧀ꦢꦏ꧀ꦏꦏꦺꦏꦸꦮꦶ​ꦏꦸꦢꦸ​ꦏꦫꦺꦴ​ꦲꦠꦶ​ꦱꦶꦁ​ꦮꦼꦢꦶ​ꦭꦤ꧀ꦔꦗꦺꦤ꧀ꦤꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦢꦺꦏ꧀ꦤꦺꦱꦶꦁ​ꦚꦩ꧀ꦧꦸꦠ꧀ꦠꦲꦶꦁ​ꦲꦸꦫꦶꦥ꧀ꦩꦸ​꧉​ꦢꦺꦏ꧀ꦤꦺꦱꦶꦁ​ꦔꦼꦏꦺꦏ꧀ꦏꦶꦏꦉꦥ꧀ꦭꦤ꧀ꦏꦥꦶꦤ꧀ꦠꦼꦂꦫꦤ꧀ꦩꦫꦁ​ꦏꦺꦴꦮꦺ​ꦏꦁꦒꦺꦴ​ꦔ꧀ꦭꦏꦺꦴꦤ꧀ꦤꦶ​ꦲꦥ​ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹⁴꧋ꦩꦸꦭꦤꦺ​꧈​ꦲꦶꦁ​ꦲꦥ​ꦮꦲꦺ​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧈​ꦲꦗ​ꦥꦢ​ꦔ꧀ꦒꦼꦱꦃ​ꦭꦤ꧀ꦏꦺꦴꦏꦺꦃꦲꦤ꧀ꦲꦺꦴꦩꦺꦴꦁ​꧉​ ¹⁵ꦢꦢꦶꦤꦺ​ꦏꦺꦴꦮꦺ​ꦲꦺꦴꦫ​ꦢꦶꦱꦭꦃꦲꦏꦺꦮꦺꦴꦁ​꧈​ꦲꦮꦶꦠ꧀ꦏꦺꦴꦮꦺ​ꦢꦢꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦉꦱꦶꦏ꧀ꦭꦤ꧀ꦧꦼꦤꦼꦂ​ꦲꦶꦁ​ꦱꦼꦩ꧀ꦧꦫꦁ​ꦥꦽꦏꦫ​꧈​ꦱꦼꦤꦗꦤ꧀ꦏꦺꦴꦮꦺ​ꦏꦸꦮꦶ​ꦲꦸꦫꦶꦥ꧀ꦤꦁꦠꦼꦔꦃꦲꦺ​ꦮꦺꦴꦁ​ꦱꦶꦁ​ꦏꦼꦧꦕꦸꦠ꧀ꦲꦼꦁꦒꦺꦴꦤꦺ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ꦏꦺꦴꦮꦺ​ꦩꦭꦃ​ꦏꦸꦢꦸ​ꦱꦼꦩ꧀ꦭꦺꦴꦫꦺꦴꦠ꧀ꦏꦪ​ꦭꦶꦤ꧀ꦠꦁꦭꦶꦤ꧀ꦠꦁ​ꦤꦁꦭꦔꦶꦠ꧀ꦏꦲꦺ​꧉​ ¹⁶ꦢꦶꦏꦧꦂꦫꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ​ꦩꦫꦁ​ꦩꦤꦸꦁꦱ​꧉​ꦤꦺꦏ꧀ꦏꦺꦴꦮꦺ​ꦥꦢ​ꦤꦶꦤ꧀ꦢꦏ꧀ꦏꦏꦺꦏꦸꦮꦶ​ꦩꦲꦸ​ꦏꦧꦺꦃ​ꦏꦺꦴꦮꦺ​ꦧꦏꦭ꧀ꦏꦼꦤꦺꦁꦠꦏ꧀ꦒꦮꦺ​ꦥꦩꦺꦂꦫꦤ꧀ꦲꦩ꧀ꦧꦺꦱꦸꦏ꧀ꦤꦺꦏ꧀ꦏꦿꦶꦱ꧀ꦡꦸꦱ꧀ꦠꦼꦏ​ꦩꦼꦤꦺꦃ​꧉​ꦢꦢꦶꦤꦺ​ꦧꦏꦭ꧀ꦏꦺꦠꦺꦴꦏ꧀ꦤꦺꦏ꧀ꦥꦼꦁꦒꦮꦺꦤꦺꦭꦤ꧀ꦥꦼꦭꦧꦸꦲꦤ꧀ꦏꦸꦲꦺꦴꦫ​ꦩꦸꦱ꧀ꦥꦿ​꧉​

¹⁷꧋ꦲꦼꦁꦒꦺꦴꦤ꧀ꦩꦸ​ꦥꦢ​ꦥꦽꦕꦪ​ꦭꦤ꧀ꦩꦱꦿꦃꦲꦏꦺꦲꦸꦫꦶꦥ꧀ꦩꦸ​ꦩꦫꦁ​ꦏꦿꦶꦱ꧀ꦡꦸꦱ꧀ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦏꦸꦂꦧꦤ꧀꧈​ꦭꦃ​ꦱꦲꦶꦏꦶ​꧈​ꦤꦺꦏ꧀ꦲꦏꦸ​ꦏꦸꦢꦸ​ꦩꦠꦶ​ꦥꦶꦱꦤ꧀ꦏꦁꦒꦺꦴ​ꦚꦸꦏꦸꦥ꧀ꦥꦶ​ꦭꦤ꧀ꦔꦿꦩ꧀ꦥꦸꦁꦔꦏꦺꦏꦸꦂꦧꦤ꧀ꦏꦸꦮꦶ​꧈​ꦲꦏꦸ​ꦩꦭꦃ​ꦧꦸꦔꦃ​꧉​ꦲꦏꦸ​ꦧꦸꦔꦃ​ꦠꦼꦤꦤ꧀ꦤꦺꦏ꧀ꦏꦺꦴꦮꦺ​ꦭꦤ꧀ꦲꦏꦸ​ꦧꦶꦱ​ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦁꦏꦺꦴꦤꦺꦴ​ꦏꦸꦮꦶ​꧉​ ¹⁸ꦏꦺꦴꦮꦺ​ꦱꦼꦩꦺꦴꦤꦺꦴ​ꦲꦸꦒ​ꦏꦸꦢꦸ​ꦥꦢ​ꦧꦸꦔꦃ​ꦲꦼꦁꦒꦺꦴꦤ꧀ꦩꦸ​ꦧꦶꦱ​ꦩꦱꦿꦃꦲꦏꦺꦲꦸꦫꦶꦥ꧀ꦩꦸ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦲꦏꦸ​ꦲꦸꦒ​ꦧꦶꦱ​ꦩꦺꦭꦸ​ꦧꦸꦔꦃ​ꦏꦫꦺꦴ​ꦏꦺꦴꦮꦺ​꧉​

꧋ꦠꦶꦩꦺꦴꦠꦶꦪꦸꦱ꧀ꦭꦤ꧀ꦌꦥꦥ꦳ꦿꦺꦴꦢꦶꦠꦸꦱ꧀꧈​

¹⁹꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦭꦶꦭꦤꦶ​꧈​ꦲꦺꦴꦫ​ꦱꦸꦮꦶꦩꦼꦤꦺꦃ​ꦲꦏꦸ​ꦧꦏꦭ꧀ꦔꦺꦴꦁꦏꦺꦴꦤ꧀ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦤꦶꦭꦶꦏ꧀ꦏꦶ​ꦏꦺꦴꦮꦺ​꧉​ꦢꦢꦶꦤꦺ​ꦲꦏꦸ​ꦧꦶꦱ​ꦏꦿꦸꦔꦸ​ꦏꦼꦥꦿꦶꦪꦺ​ꦏꦧꦂꦫꦺ​ꦤꦁꦔ꧀ꦒꦺꦴꦤ꧀ꦩꦸ​ꦏꦺꦴꦤꦺꦴ​ꦭꦤ꧀ꦲꦠꦶꦏꦸ​ꦧꦶꦱ​ꦲꦪꦼꦩ꧀꧈​ ²⁰ꦲꦏꦸ​ꦔꦺꦴꦁꦏꦺꦴꦤ꧀ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ ꦗꦭꦂꦫꦤ꧀ꦤꦩꦸꦁ​ꦢꦺꦏ꧀ꦤꦺꦢꦺꦮꦺꦱꦶꦁ​ꦠꦸꦁꦒꦭ꧀ꦫꦱ​ꦭꦤ꧀ꦠꦸꦁꦒꦭ꧀ꦥꦶꦏꦶꦂ​ꦏꦫꦺꦴ​ꦲꦏꦸ​ꦧꦧ꧀ꦏꦼꦱ꧀ꦭꦩꦼꦠ꧀ꦠꦤ꧀ꦩꦸ​꧉​ ²¹ꦱꦼꦢꦸꦭꦸꦂ​ꦭꦶꦪꦭꦶꦪꦤꦺ​ꦤꦩꦸꦁ​ꦥꦢ​ꦩꦶꦏꦶꦂꦫꦏꦺꦧꦸꦠꦸꦃꦲꦺ​ꦢꦺꦮꦺ꧈​ꦲꦺꦴꦫ​ꦲꦺꦤꦺꦁꦱꦶꦁ​ꦩꦶꦏꦶꦂꦫꦏꦺꦧꦧ꧀ꦏꦥꦼꦂꦭꦸꦮꦤ꧀ꦤꦺꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​ ²²ꦤꦁꦔꦶꦁꦏꦺꦴꦮꦺꦔꦼꦂꦠꦶꦢꦺꦮꦺꦤꦺꦏ꧀ꦱꦼꦢꦸꦭꦸꦂꦠꦶꦩꦺꦴꦠꦶꦪꦸꦱ꧀ꦏꦼꦤꦺꦁꦠꦏ꧀ꦗꦒꦏ꧀ꦏꦏꦺꦠꦼꦤꦤ꧀꧈​ꦢꦺꦏ꧀ꦤꦺꦠꦼꦩꦼꦤ꧀ꦔꦿꦺꦮꦁꦔꦶꦲꦏꦸꦔ꧀ꦒꦼꦭꦂꦏꦧꦂꦏꦧꦸꦔꦃꦲꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦺꦭꦶꦁꦲꦺꦭꦶꦁꦏꦪꦲꦤꦏ꧀ꦔꦿꦺꦮꦁꦔꦶꦚꦩ꧀ꦧꦸꦠ꧀ꦠꦧꦥꦏ꧀ꦏꦺꦏꦲꦺ꧉​ ²³ꦪ​ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ꦲꦶꦏꦶ​ꦱꦶꦁ​ꦠꦏ꧀ꦏꦺꦴꦁꦏꦺꦴꦤ꧀ꦤꦶꦭꦶꦏ꧀ꦏꦶ​ꦏꦺꦴꦮꦺ​꧈​ꦲꦺꦴꦫ​ꦱꦸꦮꦶꦩꦼꦤꦺꦃ​꧉​ꦢꦺꦏ꧀ꦤꦺꦠꦏ꧀ꦏꦺꦴꦁꦏꦺꦴꦤ꧀ꦔꦼꦤ꧀ꦠꦺꦤ꧀ꦤꦶ​ꦫꦩ꧀ꦥꦸꦁꦔꦺ​ꦏꦿꦸꦠꦺꦴꦤ꧀ꦏꦸꦤ꧀ꦢꦶꦱꦶꦏ꧀꧈​ꦲꦏꦸ​ꦏꦼꦥꦺꦔꦶꦤ꧀ꦔꦼꦂꦠꦶ​ꦤ꧀ꦢꦶꦱꦶꦏ꧀ꦲꦏꦸ​ꦲꦶꦏꦶ​ꦧꦏꦭ꧀ꦢꦶꦲꦼꦠꦺꦴꦏ꧀ꦏꦏꦺꦲꦥ​ꦢꦶꦠꦸꦠꦸꦥ꧀ꦠꦼꦫꦸꦱ꧀꧈​ ²⁴ꦤꦁꦔꦶꦁ​ꦲꦏꦸ​ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦧꦏꦭ꧀ꦔꦿꦺꦮꦁꦔꦶ​꧈​ꦢꦢꦶꦤꦺ​ꦲꦺꦴꦫ​ꦱꦸꦮꦶꦩꦼꦤꦺꦃ​ꦲꦏꦸ​ꦢꦺꦮꦺꦲꦸꦒ​ꦧꦏꦭ꧀ꦧꦶꦱ​ꦤꦶꦭꦶꦏ꧀ꦏꦶ​ꦏꦺꦴꦮꦺ​꧉​

²⁵꧋ꦲꦏꦸ​ꦩꦶꦏꦶꦂ​ꦱꦼꦢꦸꦭꦸꦂ​ꦌꦥꦥ꦳ꦿꦺꦴꦢꦶꦠꦸꦱ꧀ꦲꦉꦥ꧀ꦠꦏ꧀ꦏꦺꦴꦁꦏꦺꦴꦤ꧀ꦩꦸꦭꦶꦃ​ꦮꦲꦺ​꧉​ꦢꦺꦏ꧀ꦤꦺꦲꦩ꧀ꦧꦺꦴꦏ꧀ꦏꦺꦴꦁꦏꦺꦴꦤ꧀ꦠꦼꦏ​ꦤꦁꦔ꧀ꦒꦺꦴꦤ꧀ꦏꦸ​꧈​ꦱꦸꦥꦪ​ ꦔꦿꦺꦮꦁꦔꦶ​ꦲꦏꦸ​ꦏꦁꦒꦺꦴ​ꦮꦏꦶꦭ꧀ꦏꦺꦴꦮꦺ​꧉​ꦭꦤ꧀ꦢꦺꦏ꧀ꦤꦺꦪ​ꦔꦿꦺꦮꦁꦔꦶ​ꦲꦏꦸ​ꦠꦼꦤꦤ꧀ꦏꦫꦺꦴ​ꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​ꦭꦤ꧀ꦧꦼꦧꦉꦁꦔꦤ꧀ꦲꦮꦏ꧀ꦏꦺ​ꦢꦺꦮꦺꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦤꦺꦏ꧀ꦥꦶꦠꦸꦠꦸꦂ​ꦱꦶꦁ​ꦢꦶꦮꦸꦭꦁꦔꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀꧈​ ²⁶ꦤꦁꦔꦶꦁ​ꦌꦥꦥ꦳ꦿꦺꦴꦢꦶꦠꦸꦱ꧀ꦠꦏ꧀ꦏꦺꦴꦁꦏꦺꦴꦤ꧀ꦩꦸꦭꦶꦃ​ꦮꦲꦺ​꧈​ꦲꦮꦶꦠ꧀ꦢꦺꦏ꧀ꦤꦺꦏꦁꦔꦼꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​꧉​ꦏꦺꦴꦮꦺ​ꦏꦿꦸꦔꦸ​ꦤꦺꦏ꧀ꦢꦺꦏ꧀ꦤꦺꦭꦫ​꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦫꦢ​ꦱꦁꦱꦶ꧈​ꦮꦼꦢꦶ​ꦤꦺꦏ꧀ꦏꦺꦴꦮꦺ​ꦩꦼꦁꦏꦺꦴ​ꦠꦼꦫꦸꦱ꧀ꦥꦢ​ꦧꦶꦔꦸꦁ​꧉​ ²⁷ꦢꦺꦏ꧀ꦤꦺꦪ​ꦥꦚ꧀ꦕꦺꦤ꧀ꦭꦫ​ꦠꦼꦤꦤ꧀ ꦩꦭꦃ​ꦩꦺꦃ​ꦮꦲꦺ​ꦩꦠꦶ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦭꦱ꧀ꦩꦫꦁ​ꦢꦺꦏ꧀ꦤꦺꦭꦤ꧀ꦤꦩ꧀ꦧꦤꦶ​ꦢꦺꦏ꧀ꦤꦺ꧉​ꦱꦏ꧀ꦗꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦩꦼꦭꦱ꧀ꦩꦫꦁ​ꦲꦏꦸ​ꦲꦩ꧀ꦧꦫꦁ​꧈​ꦲꦮꦶꦠ꧀ꦱꦼꦩꦸꦁꦒꦺꦴꦤ꧀ꦤꦺꦢꦺꦏ꧀ꦤꦺꦲꦺꦴꦫ​ꦩꦫꦶ​꧈​ꦱꦸꦱꦃꦏꦸ​ꦩꦼꦱ꧀ꦠꦶꦠꦩ꧀ꦧꦃ​ꦒꦼꦢꦺ꧉​ ²⁸ꦱꦲꦶꦏꦶ​ꦢꦺꦏ꧀ꦤꦺꦠꦏ꧀ꦏꦺꦴꦁꦏꦺꦴꦤ꧀​ꦤ꧀ꦢꦁꦧꦭꦶꦏ꧀ꦤꦁꦔ꧀ꦒꦺꦴꦤ꧀ꦩꦸ​꧈​ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦧꦸꦔꦃ​ꦩꦼꦤꦺꦃ​ꦮꦼꦫꦸꦃ​ꦢꦺꦏ꧀ꦤꦺꦭꦤ꧀ꦲꦏꦸ​ꦪ​ꦲꦺꦴꦫ​ꦲꦸꦱꦃꦱꦁꦱꦶꦩꦼꦤꦺꦃ​ꦩꦶꦏꦶꦂꦫꦏꦺꦏꦺꦴꦮꦺ​꧉​ ^29-30ꦩꦸꦭꦤꦺ​꧈​ꦱꦼꦢꦸꦭꦸꦂ​ꦌꦥꦥ꦳ꦿꦺꦴꦢꦶꦠꦸꦱ꧀ꦢꦶꦠꦩ꧀ꦥ​ꦏꦫꦺꦴ​ꦧꦸꦔꦃ​ꦭꦤ꧀ꦱꦏ꧀ꦥꦤ꧀ꦠꦼꦱ꧀ꦱꦺ​ꦏꦁꦒꦺꦴ​ꦱꦼꦢꦸꦭꦸꦂ​ꦲꦶꦁ​ꦒꦸꦱ꧀ꦠꦶ​꧉​ꦮꦺꦴꦁ​ꦱꦶꦁ​ꦏꦪ​ꦢꦺꦏ꧀ꦤꦺꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦗꦺꦤ꧀ꦤꦶ​ꦠꦼꦤꦤ꧀ ꦲꦮꦶꦠ꧀ꦢꦺꦏ꧀ꦤꦺꦲꦺꦴꦫ​ꦲꦺꦩꦤ꧀ꦚꦮꦤꦺ​ꦲꦼꦁꦒꦺꦴꦤꦺ​ꦚꦩ꧀ꦧꦸꦠ꧀ꦠꦔ꧀ꦭꦧꦸꦃꦲꦶ​ꦏꦿꦶꦱ꧀ꦡꦸꦱ꧀ ꦱꦩ꧀ꦥꦺꦏ꧀ꦩꦺꦃ​ꦮꦲꦺ​ꦩꦠꦶ​꧉​ꦏꦸꦮꦶ​ꦗꦭꦂꦫꦤ꧀ꦢꦺꦏ꧀ꦤꦺꦤꦸꦭꦸꦁꦔꦶ​ꦲꦏꦸ​ꦏꦁꦒꦺꦴ​ꦮꦏꦶꦭ꧀ꦏꦺꦴꦮꦺ​꧉​

↑ ↑ ↑

꧋ꦏꦼꦱ꧀ꦭꦩꦼꦠ꧀ꦠꦤ꧀ꦤꦩꦸꦁ​ꦭꦤ꧀ꦠꦂꦫꦤ꧀ꦥꦽꦕꦪ​꧉​

꧇​꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦏꦁꦒꦺꦴ​ꦤꦼꦫꦸꦱ꧀ꦱꦏꦺꦲꦺꦴꦩꦺꦴꦁꦏꦸꦩꦲꦸ​꧈​ꦥꦢ​ꦧꦸꦔꦃꦲ​ꦠꦼꦫꦸꦱ꧀ ꦗꦭꦂꦫꦤ꧀ꦏꦺꦴꦮꦺ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​꧉​ꦲꦏꦸ​ꦲꦺꦴꦫ​ꦏꦼꦱꦼꦭ꧀ꦲꦩ꧀ꦧꦺꦴꦭꦤ꧀​ꦩ꧀ꦧꦭꦺꦤ꧀ꦤꦶ​ꦱꦶꦁ​ꦮꦶꦱ꧀ꦠꦏ꧀ꦠꦸꦭꦶꦱ꧀꧈​ꦏꦸꦮꦶ​ꦩꦭꦃ​ꦲꦥꦶꦏ꧀ꦏꦁꦒꦺꦴ​ꦏꦺꦴꦮꦺ​꧈​ꦢꦢꦶꦤꦺ​ꦏꦺꦴꦮꦺ​ꦲꦺꦴꦫ​ꦚꦶꦩ꧀ꦥꦁ​ꦢꦭꦤ꧀꧈​ ²ꦏꦺꦴꦮꦺ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦱꦼꦤꦼꦁ​ꦔꦿꦸꦱꦏ꧀ ꦱꦶꦁ​ꦏ꧀ꦭꦏꦸꦮꦤ꧀ꦤꦺ​ꦏꦪ​ꦲꦱꦸ​꧉​ꦥꦢ​ꦱꦶꦁ​ꦲꦠꦶꦲꦠꦶꦏꦫꦺꦴ​ꦮꦺꦴꦁꦮꦺꦴꦁ​ꦲꦶꦏꦸ​꧈​ꦱꦶꦁ​ꦩꦼꦏ꧀ꦱ​ꦏꦺꦴꦮꦺ​ꦏꦺꦴꦁꦏꦺꦴꦤ꧀ꦱꦸꦤꦠ꧀꧈​ ³ꦮꦺꦴꦁ​ꦱꦶꦁ​ꦏꦼꦤꦺꦁꦢꦶꦲꦫꦤ꧀ꦤꦶ​ꦮꦺꦴꦁ​ꦱꦸꦤꦠ꧀ꦠꦼꦤꦤ꧀ꦏꦸꦮꦶ​ꦪ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧉​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦩꦤꦸꦠ꧀ꦥꦼꦤꦸꦤ꧀ꦠꦸꦤꦺ​ꦫꦺꦴꦃ​ꦱꦸꦕꦶ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦤꦩꦸꦁ​ꦚ꧀ꦗꦒꦏ꧀ꦏꦏꦺꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ ꦱꦶꦁ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦏ꧀ꦤꦺꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦚ꧀ꦗꦒꦏ꧀ꦏꦏꦺꦮꦺꦠ꧀ꦮꦺꦠ꧀ꦱꦶꦁ​ꦏꦸꦢꦸ​ꦢꦶꦭꦏꦺꦴꦤ꧀ꦤꦶ​꧉​ ⁴ꦱꦼꦩꦸꦁꦒꦺꦴꦤ꧀ꦤꦺꦲꦺꦤꦺꦁꦮꦺꦴꦁ​ꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦗꦭꦂꦫꦤ꧀​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦲꦒꦩ​꧈​ꦩꦼꦱ꧀ꦠꦶꦲꦏꦸ​ꦲꦶꦏꦶ​ꦱꦶꦁ​ꦧꦏꦭ꧀ꦏꦼꦠꦩ꧀ꦥꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺ꧉​ ⁵ꦮꦸꦗꦸꦠ꧀ꦠꦺꦲꦏꦸ​ꦪ​ꦢꦶꦱꦸꦤꦠ꧀ꦠꦶꦢꦺꦴꦁꦔꦺꦲꦏꦸ​ꦤ꧀ꦢꦸꦮꦺꦲꦸꦩꦸꦂ​ꦮꦺꦴꦭꦸꦁ​ꦢꦶꦤ​꧉​ꦲꦏꦸ​ꦭꦲꦶꦂꦫꦤ꧀ꦱꦁꦏꦧꦁꦱ​ꦆꦱꦿꦌꦭ꧀ ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦧꦺꦚꦩꦶꦤ꧀꧈​ꦢꦢꦶꦤꦺ​ꦲꦏꦸ​ꦪ​ꦮꦺꦴꦁ​ꦙꦸꦱꦶꦁ​ꦠꦸꦱ꧀꧈​ꦭꦤ꧀ꦩꦼꦤꦺꦃ​꧈​ꦲꦶꦁ​ꦧꦧꦏ꧀ꦏꦤ꧀ꦲꦢꦠ꧀​ꦠꦠ​ꦕꦫꦤꦺ​ꦭꦤ꧀ꦮꦺꦠ꧀ꦮꦺꦠ꧀ꦠꦺꦲꦒꦩ​ꦲꦏꦸ​ꦪ​ꦲꦺꦴꦫ​ꦱꦼꦩ꧀ꦧꦿꦤ​꧈​ꦗꦭꦂꦫꦤ꧀ꦲꦏꦸ​ꦩꦲꦸꦤꦺ​ꦮꦺꦴꦁ​ꦥ꦳ꦫꦶꦱꦶ​꧉​ ⁶ꦱꦁꦏꦶꦁꦠꦼꦩꦼꦤ꧀ꦤꦺꦭꦤ꧀ꦱꦽꦒꦼꦥ꧀ꦥꦺꦲꦼꦁꦒꦺꦴꦤ꧀ꦏꦸ​ꦔ꧀ꦭꦏꦺꦴꦤ꧀ꦤꦶ​ꦲꦒꦩ​꧈​ꦲꦏꦸ​ꦱꦩ꧀ꦥꦺꦏ꧀ꦮꦤꦶ​ꦔꦿꦸꦱꦏ꧀ꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦮꦺꦠ꧀ꦠꦺꦭꦤ꧀ꦥꦼꦂꦤꦠꦤ꧀ꦤꦺꦲꦒꦩ​ꦙꦸꦏꦧꦺꦃ​ꦠꦏ꧀ꦭꦏꦺꦴꦤ꧀ꦤꦶ​ꦏꦤ꧀ꦠꦶꦠꦼꦩꦼꦤ꧀ꦭꦤ꧀ꦠꦤ꧀ꦥ​ꦏ꧀ꦭꦺꦫꦸ​꧉​ ⁷ꦥꦚ꧀ꦕꦺꦤ꧀ ꦢꦺꦏ꧀​ꦩ꧀ꦧꦶꦪꦺꦤ꧀ꦲꦏꦸ​ꦚ꧀ꦗꦒꦏ꧀ꦏꦏꦺꦏꦸꦮꦶ​ꦩꦲꦸ​ꦏꦧꦺꦃ​ꦱꦶꦁ​ꦠꦏ꧀ꦭꦏꦺꦴꦤ꧀ꦤꦶ​꧉​ꦤ꧀ꦢꦫꦤ꧀ꦤꦶꦤꦺꦏ꧀ꦲꦏꦸ​ꦠꦼꦩꦼꦤ꧀​ꦔ꧀ꦭꦏꦺꦴꦤ꧀ꦤꦶ​ꦏꦧꦺꦃ​ꦏꦸꦮꦶ​ꦲꦏꦸ​ꦠꦼꦫꦸꦱ꧀ꦧꦶꦱ​ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦲꦺꦴꦫ​꧈​ꦩꦸꦭꦤꦺ​ꦏꦸꦮꦶ​ꦩꦲꦸ​ꦏꦧꦺꦃ​ꦱꦲꦶꦏꦶ​ꦲꦺꦴꦫ​ꦠꦏ꧀ꦏꦁꦒꦺꦴꦏ꧀ꦏꦏꦺꦩꦼꦤꦺꦃ​꧈​ꦗꦭꦂꦫꦤ꧀ꦱꦲꦶꦏꦶ​ꦱꦶꦁ​ꦠꦏ꧀ꦗꦒꦏ꧀ꦏꦏꦺꦤꦩꦸꦁ​ꦏꦿꦶꦱ꧀ꦡꦸꦱ꧀ꦢꦺꦮꦺ꧉​ ^8-9ꦥꦚ꧀ꦕꦺꦤ꧀ ꦏꦧꦺꦃ​ꦏꦸꦮꦶ​ꦩꦲꦸ​ꦗꦤ꧀ꦲꦺꦴꦫ​ꦲꦺꦤꦺꦁꦲꦗꦶꦤꦺ​ꦧ꧀ꦭꦱ꧀ꦤꦺꦏ꧀ꦠꦏ꧀ꦥꦢꦏ꧀ꦏꦏꦺꦏꦫꦺꦴ​ꦏꦮꦼꦫꦸꦃꦧꦧ꧀ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ ꦒꦸꦱ꧀ꦠꦶꦏꦸ​꧉​ꦱꦼꦩ꧀ꦧꦫꦁ​ꦏꦸꦮꦶ​ꦩꦲꦸ​ꦏꦧꦺꦃ​ꦥꦚ꧀ꦕꦺꦤ꧀ꦮꦶꦱ꧀ꦠꦏ꧀ꦧꦸꦮꦁ꧈​ꦗꦭꦂꦫꦤ꧀ꦲꦺꦴꦫ​ꦏꦁꦒꦺꦴ​ꦒꦮꦺ​꧉​ꦱꦲꦶꦏꦶ​ꦱꦶꦁ​ꦠꦏ꧀ꦗꦒꦏ꧀ꦏꦏꦺꦤꦩꦸꦁ​ꦏꦿꦶꦱ꧀ꦡꦸꦱ꧀ꦭꦤ꧀ꦲꦏꦸ​ꦏꦼꦥꦺꦔꦶꦤ꧀ꦢꦢꦶ​ꦱꦶꦗꦶ​ꦏꦫꦺꦴ​ꦢꦺꦏ꧀ꦤꦺ꧉​ꦲꦏꦸ​ꦮꦶꦱ꧀ꦲꦺꦴꦫ​ꦚ꧀ꦗꦒꦏ꧀ꦏꦏꦺꦮꦺꦠ꧀ꦠꦺꦲꦒꦩ​ꦩꦼꦤꦺꦃ​꧈​ꦤꦁꦔꦶꦁ​ꦲꦏꦸ​ꦧꦶꦱꦤꦺ​ꦏꦼꦲꦁꦒꦼꦥ꧀ꦧꦼꦤꦼꦂ​ꦭꦤ꧀ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦭꦤ꧀ꦠꦂꦫꦤ꧀ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀꧈​ ^10-11ꦤꦩꦸꦁ​ꦧꦫꦁ​ꦱꦶꦗꦶ​ꦲꦶꦏꦶ​ꦱꦶꦁ​ꦠꦏ꧀ꦏꦉꦥ꧀ꦥꦏꦺ꧈​ꦪꦏꦸꦮꦶ​꧈​ꦲꦏꦸ​ꦏꦼꦥꦺꦔꦶꦤ꧀ꦫꦸꦩꦏꦼꦠ꧀ꦩꦫꦁ​ꦏꦿꦶꦱ꧀ꦡꦸꦱ꧀ ꦱꦸꦥꦪ​ꦲꦏꦸ​ꦧꦶꦱ​ꦏꦼꦤꦭ꧀ꦩꦫꦁ​ꦢꦺꦏ꧀ꦤꦺꦭꦤ꧀ꦔꦿꦱꦏ꧀ꦏꦏꦺꦏ꧀ꦮꦱꦤꦺ​꧈​ꦏ꧀ꦮꦱ​ꦱꦶꦁ​ꦤꦔꦺꦏ꧀ꦏꦺꦢꦺꦏ꧀ꦤꦺꦱꦁꦏꦥꦠꦶ​꧉​ꦲꦏꦸ​ꦲꦸꦒ​ꦱꦒꦸꦃ​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀ꦏꦪ​ꦏꦿꦶꦱ꧀ꦡꦸꦱ꧀ ꦱꦼꦤꦗꦤ꧀ꦤ​ꦱꦩ꧀ꦥꦺꦏ꧀ꦩꦠꦶ​꧈​ꦱꦸꦥꦪ​ꦲꦏꦸ​ꦲꦸꦒ​ꦧꦶꦱ​ꦢꦶꦠꦔꦺꦏ꧀ꦏꦏꦺꦩꦼꦤꦺꦃ​ꦱꦁꦏꦥꦠꦶ​꧉​

꧋ꦔ꧀ꦭꦸꦩꦸꦃꦲꦶꦚꦩ꧀ꦥꦺꦤ꧀ꦤꦶꦱꦶꦁ​ꦢꦶꦠꦸꦗꦸ​꧉​

¹²꧋ꦲꦏꦸ​ꦲꦺꦴꦫ​ꦔꦺꦴꦩꦺꦴꦁꦤꦺꦏ꧀ꦲꦏꦸ​ꦮꦶꦱ꧀ꦠꦼꦏꦤ꧀ꦭꦤ꧀ꦮꦶꦱ꧀ꦧꦶꦱ​ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦲꦶꦁ​ꦲꦸꦫꦶꦥ꧀ꦏꦸ​꧈​ꦪ​ꦢꦸꦫꦸꦁ​꧈​ꦤꦁꦔꦶꦁ​ꦲꦏꦸ​ꦔ꧀ꦭꦸꦩꦸꦃꦲꦶꦠꦼꦤꦤ꧀ ꦱꦸꦥꦪ​ꦱꦸꦮꦶꦱꦸꦮꦶ ꦧꦶꦱ​ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦏꦿꦶꦱ꧀ꦡꦸꦱ꧀ ꦱꦶꦁ​ꦩꦁꦒꦶꦭ꧀ꦲꦏꦸ​꧉​ ¹³ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦢꦺꦮꦺꦥꦚ꧀ꦕꦺꦤ꧀ꦫꦸꦩꦁꦱ​ꦤꦺꦏ꧀ꦲꦏꦸ​ꦲꦶꦏꦶ​ꦢꦸꦫꦸꦁ​ꦠꦼꦏꦤ꧀ꦱꦏ꧀ꦏꦧꦺꦃꦲꦺ꧈​ꦢꦸꦫꦸꦁ​꧈​ꦤꦁꦔꦶꦁ​ꦧꦫꦁ​ꦱꦶꦗꦶ​ꦲꦶꦏꦶ​ꦱꦶꦁ​ꦠꦏ꧀ꦭꦏꦺꦴꦤ꧀ꦤꦶ​꧈​ꦪꦏꦸꦮꦶ​:ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀​ꦏ꧀ꦭꦶꦮꦠ꧀ꦠꦏ꧀ꦭꦏꦺꦴꦏ꧀ꦏꦏꦺꦏꦧꦺꦃ​꧈​ꦱꦸꦥꦪ​ꦲꦏꦸ​ꦧꦶꦱ​ꦔꦼꦩꦠ꧀ꦠꦏꦺꦭꦤ꧀ꦚꦩ꧀ꦥꦺꦤ꧀ꦤꦶꦱꦶꦁ​ꦤꦁꦔꦉꦥ꧀ꦏꦸ​꧉​ ¹⁴ꦩꦸꦭꦤꦺ​ꦲꦏꦸ​ꦪ​ꦔ꧀ꦭꦸꦩꦸꦃꦲꦶꦠꦼꦤꦤ꧀ꦱꦏ꧀ꦏꦸꦮꦠ꧀ꦏꦸꦮꦠ꧀ꦏꦸ꧈​ꦱꦸꦥꦪ​ꦤ꧀ꦢꦁꦧꦶꦱ​ꦚꦩ꧀ꦥꦺꦤ꧀ꦤꦶꦠꦸꦗꦸꦮꦤ꧀ꦏꦸ​ꦭꦤ꧀ꦧꦶꦱ​ꦤꦩ꧀ꦥ​ꦲꦸꦥꦃꦱꦶꦁ​ꦤꦁꦱ꧀ꦮꦂꦒ​꧉​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦶꦭ꧀ꦲꦮꦏ꧀ꦏꦺ​ꦢꦺꦮꦺꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤꦩ꧀ꦥ​ꦲꦸꦥꦃꦲꦶꦏꦶ​꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦮꦶꦱ꧀​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧉​

¹⁵꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦁ​ꦮꦶꦱ꧀​ꦤ꧀ꦢꦸꦮꦺꦤ꧀ꦤꦶ​ꦏꦢꦸꦤꦸꦁꦔꦤ꧀ꦱꦶꦁ​ꦩꦠꦼꦁ​ꦧꦧ꧀ꦕꦫꦤꦺ​ꦮꦺꦴꦁ​ꦤꦸꦫꦸꦠ꧀ꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦩꦶꦏꦶꦂ​ꦔꦺꦴꦤꦺꦴ​꧉​ꦤꦁꦔꦶꦁ​ꦤꦺꦏ꧀ꦤꦁꦠꦼꦔꦃꦩꦸ​ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦥꦶꦤꦼꦩꦸꦭꦶꦪꦤꦺ​ꦧꦧ꧀ꦲꦶꦏꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦧꦏꦭ꧀​ꦤ꧀ꦢꦸꦤꦸꦁꦔꦏꦺꦩꦫꦁ​ꦏꦺꦴꦮꦺ​꧉​ ¹⁶ꦩꦸꦁ​ꦮꦲꦺ​꧈​ꦱꦼꦤꦗꦤ꧀ꦏꦼꦥꦿꦶꦪꦺ​ꦮꦲꦺ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦤꦸꦫꦸꦠ꧀ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​

¹⁷꧋ꦥꦫ​ꦱꦼꦢꦸꦭꦸꦂ​꧈​ꦥꦢ​ꦢꦶꦠꦼꦫꦸꦱ꧀ꦱꦏꦺꦲꦼꦁꦒꦺꦴꦤ꧀ꦩꦸ​ꦥꦢ​ꦤꦸꦫꦸꦠ꧀ꦲꦏꦸ​꧉​ꦲꦏꦸ​ꦮꦶꦱ꧀ꦔꦼꦏꦺꦏ꧀ꦏꦶꦠꦸꦭꦢꦩꦫꦁ​ꦏꦺꦴꦮꦺ​꧈​ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦤꦶꦫꦸ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦤꦸꦫꦸꦠ꧀ꦠꦸꦭꦢꦏꦸꦮꦶ​꧉​ ¹⁸ꦗꦭꦂꦫꦤ꧀ꦲꦺꦴꦏꦺꦃꦮꦺꦴꦁ​ꦱꦶꦁ​ꦲꦸꦫꦶꦥ꧀ꦥꦺꦲꦺꦴꦫ​ꦥꦤ꧀ꦠꦼꦱ꧀​ꦧ꧀ꦭꦱ꧀ ꦩꦭꦃ​ꦢꦢꦶ​ꦩꦸꦁꦱꦸꦃꦲꦺ​ꦥꦼꦤ꧀ꦠꦺꦔꦤ꧀ꦤꦺꦏꦿꦶꦱ꧀ꦡꦸꦱ꧀꧈​ꦮꦺꦴꦁꦮꦺꦴꦁ​ꦏꦸꦮꦶ​ꦲꦸꦫꦶꦥ꧀ꦔꦺꦴꦤꦺꦴ​ꦫꦸꦩꦁꦱꦤꦺ​ꦮꦶꦱ꧀ꦲꦥꦶꦏ꧀ꦮꦲꦺ​꧈​ꦏꦿꦶꦱ꧀ꦡꦸꦱ꧀ꦲꦺꦴꦫ​ꦲꦸꦱꦃꦩꦠꦶ​ꦤꦁꦥꦼꦤ꧀ꦠꦺꦁꦔꦤ꧀​ꦔ꧀ꦭꦧꦸꦃꦲꦶ​ꦩꦤꦸꦁꦱ​꧉​ꦥꦚ꧀ꦕꦺꦤ꧀ꦲꦏꦸ​ꦮꦶꦱ꧀ꦥꦶꦁ​ꦥꦶꦫ​ꦔꦺꦴꦩꦺꦴꦁꦔꦏꦺꦧꦧ꧀ꦲꦶꦏꦶ​ꦭꦤ꧀ꦱꦲꦶꦏꦶ​ꦠꦏ꧀ꦧꦭꦺꦤ꧀ꦤꦶꦱꦼꦥꦶꦱ꧀ꦱꦤ꧀ꦩꦼꦤꦺꦃ​ꦏꦫꦺꦴ​ꦤꦔꦶꦱ꧀: ¹⁹ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦲꦩ꧀ꦧꦸꦮꦁ​ꦮꦺꦴꦁꦮꦺꦴꦁ​ꦏꦸꦮꦶ​ꦤꦁꦤꦼꦫꦏ꧉​ꦄꦗꦸꦂꦫꦺꦥꦢ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦲꦺꦴꦫ​꧈​ꦩꦭꦃ​ꦥꦢ​ꦤꦸꦫꦸꦠ꧀ꦠꦶ​ꦏꦼꦱꦼꦤꦼꦁꦔꦤ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀꧈​ꦤꦺꦏ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦱꦶꦁ​ꦔꦶꦱꦶꦤ꧀ꦤꦶꦱꦶꦤ꧀ꦤꦏꦺꦮꦶꦱ꧀ꦲꦺꦴꦫ​ꦥꦢ​ꦤ꧀ꦢꦸꦮꦺꦤ꧀ꦤꦶ​ꦫꦸꦩꦁꦱ​ꦲꦶꦱꦶꦤ꧀;ꦏ꧀ꦭꦏꦸꦮꦤ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦩꦭꦃ​ꦢꦶꦲꦼꦁꦒꦺꦴ​ꦥꦩꦺꦂꦫꦤ꧀ꦭꦤ꧀ꦱꦶꦁ​ꦢꦶꦒꦒꦱ꧀ꦤꦩꦸꦁ​ꦧꦫꦁ​ꦏꦢꦺꦴꦚꦃꦲꦤ꧀꧈​ ²⁰ꦤꦁꦔꦶꦁꦲꦮꦏ꧀ꦏꦺꦢꦺꦮꦺꦲꦺꦴꦫꦏꦪꦔꦺꦴꦤꦺꦴꦥꦫꦱꦼꦢꦸꦭꦸꦂ꧈​ꦲꦮꦶꦠ꧀ꦥꦁꦒꦺꦴꦤ꧀ꦤꦤ꧀ꦤꦺꦲꦮꦏ꧀ꦏꦺꦢꦺꦮꦺꦲꦶꦏꦶꦤꦁꦱ꧀ꦮꦂꦒ꧉​ꦩꦸꦭꦤꦺꦲꦮꦏ꧀ꦏꦺꦢꦺꦮꦺꦥꦢꦔꦉꦥ꧀ꦲꦉꦥ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦗꦸꦫꦸꦱ꧀ꦭꦩꦼꦠ꧀ꦠꦺꦲꦮꦏ꧀ꦏꦺꦢꦺꦮꦺ꧈​ꦱꦶꦁꦧꦏꦭ꧀ꦠꦼꦏꦱꦁꦏꦱ꧀ꦮꦂꦒ꧉​ ²¹ꦏꦫꦺꦴ​ꦥꦔ꧀ꦮꦱ​ꦱꦶꦁ​ꦤꦼꦭꦸꦏ꧀ꦏꦏꦺꦱꦼꦩ꧀ꦧꦫꦁ​ꦏꦧꦺꦃ​ꦢꦺꦏ꧀ꦤꦺꦧꦏꦭ꧀​ꦔ꧀ꦒꦤ꧀ꦠꦶ​ꦧꦢꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦁ​ꦫꦶꦁꦏꦶꦃ​ꦭꦤ꧀ꦫꦸꦱꦏ꧀ ꦱꦸꦥꦪ​ꦧꦶꦱ​ꦩꦭꦶꦃ​ꦏꦪ​ꦧꦢꦤ꧀ꦤꦺ​ꦢꦺꦏ꧀ꦤꦺꦢꦺꦮꦺ꧉​

↑ ↑ ↑

 

꧇​꧔꧇​ ¹꧋ꦩꦸꦭꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶꦭꦤ꧀ꦱꦶꦁ​ꦠꦏ꧀ꦏꦔꦼꦤ꧀ꦤꦶꦠꦼꦤꦤ꧀ ꦱꦶꦁ​ꦔ꧀ꦒꦮꦺ​ꦧꦸꦔꦃꦲꦺ​ꦲꦠꦶꦏꦸ​ꦭꦤ꧀ꦱꦶꦁ​ꦠꦏ꧀ꦒꦮꦺ​ꦥꦩꦺꦂꦫꦤ꧀ ꦱꦼꦩ꧀ꦧꦫꦁ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​ꦩꦲꦸ​ꦏꦸꦢꦸ​ꦲꦩ꧀ꦧꦺꦴꦏ꧀ꦥꦶꦏꦶꦂ​ꦱꦶꦁ​ꦲꦥꦶꦏ꧀꧈​ꦏꦉꦥ꧀ꦏꦸ​ꦏꦺꦴꦮꦺ​ꦏꦧꦺꦃ​ꦧꦶꦱꦲ​ꦏꦼꦚ꧀ꦕꦼꦁ​ꦔ꧀ꦒꦺꦴꦤ꧀ꦢꦺꦭ꧀ꦭꦶꦒꦸꦱ꧀ꦠꦶ​꧉​

²꧋ꦲꦏꦸ​ꦚꦸꦮꦸꦤ꧀ꦩꦫꦁ​ꦱꦼꦢꦸꦭꦸꦂꦏꦸ​ꦮꦺꦢꦺꦴꦏ꧀ꦎꦢꦶꦪꦭꦤ꧀ꦯꦶꦤ꧀ꦠꦶꦏꦺ꧈​ꦲꦩ꧀ꦧꦺꦴꦏ꧀ꦱꦼꦢꦸꦭꦸꦂꦫꦤ꧀ꦱꦶꦁ​ꦫꦸꦏꦸꦤ꧀꧈​ꦏꦺꦴꦮꦺ​ꦏꦧꦺꦃ​ꦭꦺꦴꦫꦺꦴꦤꦺ​ꦭꦲꦸꦠ꧀ꦮꦶꦱ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦠ​? ³ꦭꦤ꧀ꦲꦏꦸ​ꦲꦸꦒ​ꦚꦸꦮꦸꦤ꧀ꦩꦫꦁ​ꦱꦼꦢꦸꦭꦸꦂꦏꦸ​ꦯꦸꦢ꧀ꦱꦶꦒꦺꦴꦱ꧀ ꦏꦚ꧀ꦕꦏꦸ​ꦚꦩ꧀ꦧꦸꦠ꧀ꦠꦱꦶꦁ​ꦏꦼꦤꦺꦁꦠꦏ꧀ꦗꦒꦏ꧀ꦏꦏꦺꦠꦼꦤꦤ꧀ ꦲꦩ꧀ꦧꦺꦴꦏ꧀ꦱꦼꦢꦸꦭꦸꦂ​ꦮꦺꦢꦺꦴꦏ꧀ꦭꦺꦴꦫꦺꦴ​ꦏꦸꦮꦶ​ꦢꦶꦠꦸꦭꦸꦁꦔꦶ​꧈​ꦱꦸꦥꦪ​ꦧꦶꦱ​ꦫꦸꦏꦸꦤ꧀ꦩꦼꦤꦺꦃ​꧈​ꦗꦭꦂꦫꦤ꧀ꦱꦼꦢꦸꦭꦸꦂ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦏꦸꦮꦶ​ꦲꦺꦴꦫ​ꦱꦼꦩ꧀ꦧꦿꦤ​ꦲꦼꦁꦒꦺꦴꦤꦺ​ꦚꦩ꧀ꦧꦸꦠ꧀ꦠꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦫꦺꦴ​ꦲꦏꦸ​꧈​ꦧꦼꦧꦉꦁꦔꦤ꧀ꦏꦫꦺꦴ​ꦱꦼꦢꦸꦭꦸꦂ​ꦏ꧀ꦭꦺꦩꦼꦤ꧀ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦱꦶꦁ​ꦗꦼꦤꦼꦁꦔꦺ​ꦏꦼꦠꦸꦭꦶꦱ꧀ꦤꦁꦧꦸꦏꦸ​ꦥꦔꦸꦫꦶꦥ꧀ꦥꦤ꧀꧈​

⁴꧋ꦥꦫ​ꦱꦼꦢꦸꦭꦸꦂ​꧈​ꦥꦢ​ꦧꦸꦔꦃꦲ​ꦠꦼꦫꦸꦱ꧀ꦲꦼꦁꦒꦺꦴꦤ꧀ꦩꦸ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​!ꦠꦏ꧀ꦧꦭꦺꦤ꧀ꦤꦶꦱꦼꦥꦶꦱ꧀ꦱꦤ꧀ꦩꦼꦤꦺꦃ​:ꦥꦢ​ꦧꦸꦔꦃꦲ​!

⁵꧋ꦏꦫꦺꦴ​ꦏꦧꦺꦃ​ꦮꦺꦴꦁ​ꦏꦺꦴꦮꦺ​ꦏꦸꦢꦸ​ꦱꦶꦁ​ꦔꦭꦃ​꧉​ꦲꦺꦴꦫ​ꦱꦸꦮꦶꦩꦼꦤꦺꦃ​ꦒꦸꦱ꧀ꦠꦶ​ꦧꦏꦭ꧀ꦠꦼꦏ​꧉​ ⁶ꦲꦗ​ꦥꦢ​ꦱꦸꦩꦼꦭꦁ​꧈​ꦤꦁꦔꦶꦁ​ꦏꦉꦥ꧀ꦩꦸ​ꦲꦥ​ꦮꦲꦺ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦥꦤ꧀ꦢꦺꦴꦔ​ꦭꦤ꧀ꦥꦚꦸꦮꦸꦤ꧀꧈​ꦭꦤ꧀ꦥꦢ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​꧉​ ⁷ꦩꦼꦁꦏꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦱ꧀ꦠꦶꦧꦏꦭ꧀ꦔꦼꦏꦺꦏ꧀ꦏꦶꦏꦠꦼꦤ꧀ꦠꦽꦩ꧀ꦩꦤ꧀ꦲꦶꦁ​ꦲꦠꦶꦩꦸ​꧈​ꦏꦠꦼꦤ꧀ꦠꦽꦩ꧀ꦩꦤ꧀ꦱꦶꦁ​ꦔꦸꦁꦏꦸꦭ꧀ꦭꦶ​ꦏꦢꦸꦤꦸꦔꦤ꧀ꦤꦺꦩꦤꦸꦁꦱ​꧉​ꦭꦤ꧀ꦗꦭꦂꦫꦤ꧀ꦏꦺꦴꦮꦺ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ ꦲꦠꦶꦩꦸ​ꦭꦤ꧀ꦲꦔꦼꦤ꧀ꦲꦔꦼꦤ꧀ꦩꦸ​ꦲꦺꦴꦫ​ꦧꦏꦭ꧀ꦧꦶꦔꦸꦁ​꧉​

⁸꧋ꦥꦫ​ꦱꦼꦢꦸꦭꦸꦂ​꧈​ꦱꦏ꧀ꦢꦸꦫꦸꦁꦔꦺꦲꦏꦸ​ꦤꦸꦠꦸꦥ꧀ꦭꦪꦁ​ꦲꦶꦏꦶ​꧈​ꦲꦏꦸ​ꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦏꦺꦧꦧ꧀ꦱꦶꦗꦶ​ꦩꦼꦤꦺꦃ​꧈​ꦪ​ꦲꦶꦏꦶ​:ꦥꦢ​ꦩꦶꦏꦶꦂ​ꦧꦫꦁ​ꦱꦶꦁ​ꦠꦼꦤꦤ꧀ ꦱꦶꦁ​ꦥꦤ꧀ꦠꦼꦱ꧀ ꦱꦶꦁ​ꦧꦼꦤꦼꦂ​꧈​ꦱꦶꦁ​ꦉꦱꦶꦏ꧀ ꦱꦶꦁ​ꦚꦼꦤꦼꦁꦔꦏꦺꦭꦤ꧀ ꦧꦫꦁ​ꦱꦶꦁ​ꦢꦶꦲꦗꦺꦤ꧀ꦤꦶ​ꦏꦫꦺꦴ​ꦩꦤꦸꦁꦱ​꧉​ ⁹ꦏꦧꦺꦃ​ꦥꦽꦏꦫ​ꦱꦶꦁ​ꦮꦶꦱ꧀ꦠꦏ꧀ꦮꦸꦭꦁꦔꦏꦺꦭꦤ꧀ꦱꦶꦁ​ꦮꦶꦱ꧀ꦲꦩ꧀ꦧꦺꦴꦏ꧀ꦠꦩ꧀ꦥ​꧈​ꦱꦼꦤꦗꦤ꧀ꦤ​ꦠꦼꦩ꧀ꦧꦸꦁꦏꦸ​꧈​ꦱꦼꦤꦗꦤ꧀ꦤ​ꦠꦶꦤ꧀ꦢꦏ꧀ꦏꦸ꧈​ꦏꦧꦺꦃ​ꦏꦸꦢꦸ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦠꦼꦤꦤ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦔꦪꦼꦩꦏꦺꦲꦠꦶꦩꦸ​꧈​ꦩꦼꦱ꧀ꦠꦶꦧꦏꦭ꧀ꦤꦸꦤ꧀ꦠꦸꦤ꧀ꦏꦺꦴꦮꦺ​ꦠꦼꦫꦸꦱ꧀꧈​

꧋ꦫꦱꦸꦭ꧀ꦦꦈꦭꦸꦱ꧀ꦩꦠꦸꦂꦏꦼꦱꦸꦮꦸꦤ꧀꧈​

¹⁰꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦗꦤ꧀ꦧꦸꦔꦃ​ꦠꦼꦤꦤ꧀ꦱꦲꦶꦏꦶ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀ꦲꦼꦁꦒꦺꦴꦤ꧀ꦩꦸ​ꦏꦼꦥꦺꦔꦶꦤ꧀ꦔꦿꦺꦮꦁꦔꦶ​ꦲꦏꦸ​꧉​ꦲꦏꦸ​ꦪ​ꦔꦼꦂꦠꦶ​ꦤꦺꦏ꧀ꦲꦺꦴꦫ​ꦤꦩꦸꦁ​ꦱꦲꦶꦏꦶ​ꦮꦲꦺ​ꦏꦺꦴꦮꦺ​ꦩꦶꦏꦶꦂꦫꦏꦺꦲꦏꦸ​꧈​ꦤꦁꦔꦶꦁ​ꦮꦶꦱ꧀ꦱꦸꦮꦶ꧈​ꦩꦸꦁ​ꦮꦲꦺ​ꦮꦶꦔꦶꦮꦶꦔꦶ​ꦏꦺꦴꦮꦺ​ꦢꦸꦫꦸꦁ​ꦏꦺꦴꦧꦼꦂ​ꦩꦼꦂꦭꦺꦴꦏ꧀ꦏꦏꦺ꧉​ ¹¹ꦲꦼꦁꦒꦺꦴꦤ꧀ꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦲꦺꦴꦫ​ꦗꦭꦂꦫꦤ꧀ꦲꦏꦸ​ꦲꦶꦏꦶ​ꦏꦼꦏꦸꦫꦁꦔꦤ꧀ꦲꦥ​ꦏꦼꦥꦿꦶꦪꦺ​꧈​ꦲꦺꦴꦫ​꧉​ꦲꦶꦏꦸ​ꦲꦺꦴꦫ​ꦢꦢꦶ​ꦱꦼꦧꦧ꧀ ꦗꦭꦂꦫꦤ꧀ꦲꦏꦸ​ꦧꦶꦱ​ꦚꦸꦏꦸꦥ꧀ꦥꦶ​ꦲꦮꦏ꧀ꦏꦸ​ꦢꦺꦮꦺꦏꦫꦺꦴ​ꦲꦥ​ꦲꦺꦤꦺꦁꦔꦺ꧉​ ¹²ꦲꦮꦶꦠ꧀ꦲꦏꦸ​ꦮꦶꦱ꧀ꦔꦿꦱꦏ꧀ꦏꦏꦺꦏꦼꦏꦸꦫꦁꦔꦤ꧀ ꦲꦸꦒ​ꦏꦼꦭꦸꦧꦺꦂꦫꦤ꧀꧈​ꦲꦏꦸ​ꦔꦼꦂꦠꦶ​ꦏꦼꦥꦿꦶꦪꦺ​ꦲꦼꦁꦒꦺꦴꦤ꧀ꦏꦸ​ꦏꦸꦢꦸ​ꦔꦢꦼꦥ꧀ꦥꦶꦱꦶꦠꦸꦮꦱꦶꦲꦥ​ꦮꦲꦺ​꧈​ꦲꦶꦁ​ꦮꦪꦃ​ꦮꦫꦱ꧀ꦩꦸꦭꦤ꧀ꦲꦶꦁ​ꦮꦪꦃ​ꦔꦼꦭꦶꦃ​꧈​ꦲꦶꦁ​ꦏꦼꦭꦸꦧꦺꦂꦫꦤ꧀ꦭꦤ꧀ꦲꦶꦁ​ꦏꦼꦏꦸꦫꦁꦔꦤ꧀꧈​ ¹³ꦱꦶꦠꦸꦮꦱꦶꦲꦥ​ꦮꦲꦺ​ꦲꦏꦸ​ꦧꦶꦱ​ꦚꦁꦒ​꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦲꦏꦸ​꧉​

¹⁴꧋ꦤꦁꦔꦶꦁ​ꦪ​ꦲꦥꦶꦏ꧀ꦧꦔꦼꦠ꧀ꦲꦼꦁꦒꦺꦴꦤ꧀ꦩꦸ​ꦥꦢ​ꦤꦸꦭꦸꦁꦔꦶ​ꦲꦏꦸ​ꦲꦶꦁ​ꦱꦏ꧀ꦗꦼꦫꦺꦴꦤꦺꦏꦔꦺꦭ꧀ꦭꦤ꧀ꦲꦶꦏꦶ​꧉​ ¹⁵ꦥꦫ​ꦱꦼꦢꦸꦭꦸꦂ​ꦤꦁꦥ꦳ꦶꦭꦶꦥꦶ​꧈​ꦏꦺꦴꦮꦺ​ꦢꦺꦮꦺꦥꦢ​ꦔꦼꦂꦠꦶ​꧈​ꦢꦺꦴꦁꦔꦺꦲꦏꦸ​ꦭꦸꦔ​ꦱꦁꦏꦩꦱꦼꦢꦺꦴꦤꦶꦪ꧈​ꦱꦏ꧀ꦮꦶꦱ꧀ꦱꦺ​ꦲꦏꦸ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦱꦼꦥꦶꦱꦤ꧀ꦤꦤ꧀ ꦮꦸꦗꦸꦠ꧀ꦠꦺꦪ​ꦲꦺꦴꦫ​ꦲꦺꦤꦺꦁꦥꦱꦩꦸꦮꦤ꧀ꦭꦶꦪꦤꦺ​ꦱꦶꦁ​ꦔꦿꦺꦮꦁꦔꦶ​ꦲꦏꦸ​ꦏꦼꦗꦧ​ꦩꦸꦁ​ꦏꦺꦴꦮꦺ​ꦢꦺꦮꦺ꧉​ ¹⁶ꦲꦸꦒ​ꦢꦺꦴꦁꦔꦺꦲꦏꦸ​ꦤꦁꦏꦸꦠꦠꦺꦱꦴꦭꦺꦴꦤꦶꦏꦴꦏꦺꦴꦮꦺ​ꦪ​ꦥꦢ​ꦔꦶꦫꦶꦩ꧀ꦩꦶꦱꦺꦴꦏꦺꦴꦁꦔꦤ꧀ꦱꦶꦁ​ꦠꦏ꧀ꦧꦸꦠꦸꦃꦲꦏꦺ꧈​ꦩꦭꦃ​ꦱꦩ꧀ꦥꦺꦏ꧀ꦥꦶꦁ​ꦥꦶꦤ꧀ꦢꦺꦴꦲꦼꦁꦒꦺꦴꦤ꧀ꦩꦸ​ꦏꦶꦫꦶꦩ꧀꧈​ ¹⁷ꦪ​ꦲꦺꦴꦫ​ꦔꦺꦴꦩꦺꦴꦁꦤꦺꦏ꧀ꦲꦏꦸ​ꦲꦶꦏꦶ​ꦱꦼꦤꦼꦁ​ꦤꦩ꧀ꦥ​ꦥꦮꦺꦃꦩꦸ꧈​ꦲꦺꦴꦫ​꧈​ꦤꦁꦔꦶꦁ​ꦲꦏꦸ​ꦏꦼꦥꦺꦔꦶꦤ꧀ꦮꦼꦫꦸꦃ​ꦏꦧꦼꦕꦶꦏ꧀ꦏꦤ꧀ꦩꦸ​ꦤꦸꦩ꧀ꦥꦸꦏ꧀ꦤꦸꦩ꧀ꦥꦸꦏ꧀ꦠꦼꦫꦸꦱ꧀꧈​ ¹⁸ꦩꦸꦭꦤꦺ​ꦲꦏꦸ​ꦏꦼꦥꦺꦔꦶꦤ꧀ꦔꦧꦂꦫꦶ​ꦤꦺꦏ꧀ꦏꦶꦫꦶꦩꦤ꧀ꦩꦸꦮꦶꦱ꧀ꦠꦏ꧀ꦠꦩ꧀ꦥ​ꦏꦧꦺꦃ​ꦭꦤ꧀ꦥꦮꦺꦃꦩꦸꦲꦺꦴꦏꦺꦃꦲꦺꦩꦭꦃ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦱꦶꦁ​ꦠꦏ꧀ꦧꦸꦠꦸꦃꦲꦏꦺ꧉​ꦏꦶꦫꦶꦩꦤ꧀ꦩꦸꦱꦶꦁ​ꦢꦶꦒꦮ​ꦏꦫꦺꦴ​ꦱꦼꦢꦸꦭꦸꦂ​ꦌꦥꦥ꦳ꦿꦺꦴꦢꦶꦠꦸꦱ꧀ꦮꦶꦱ꧀ꦠꦏ꧀ꦠꦩ꧀ꦥ​ꦭꦤ꧀ꦱꦲꦶꦏꦶ​ꦲꦏꦸ​ꦮꦶꦱ꧀ꦲꦺꦴꦫ​ꦏꦼꦏꦸꦫꦁꦔꦤ꧀ꦲꦥꦲꦥ​꧉​ꦥꦮꦺꦃꦩꦸꦏꦸꦮꦶ​ꦲꦁꦒꦼꦥ꧀ꦥꦼꦤ꧀ꦥꦮꦺꦃꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦮꦺꦃꦱꦶꦁ​ꦲꦺꦤꦏ꧀ꦲꦩ꧀ꦧꦸꦤꦺ​ꦏꦪ​ꦏꦸꦂꦧꦤ꧀ꦱꦶꦁ​ꦢꦶꦱꦼꦤꦼꦁꦔꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁹ꦒꦸꦱ꧀ꦠꦶ​ꦄꦭ꧀ꦭꦃꦏꦸ​ꦲꦶꦏꦶ​ꦔ꧀ꦒꦸꦩꦸꦤ꧀ꦤꦏꦺꦏꦱꦸꦒꦶꦃꦲꦤ꧀ꦤꦺ​꧈​ꦢꦺꦏ꧀ꦤꦺꦧꦏꦭ꧀ꦔꦼꦏꦺꦏ꧀ꦏꦶꦲꦥ​ꦮꦲꦺ​ꦱꦶꦁ​ꦲꦩ꧀ꦧꦺꦴꦏ꧀ꦧꦸꦠꦸꦃꦲꦏꦺ꧈​ꦗꦭꦂꦫꦤ꧀ꦏꦺꦴꦮꦺ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​ ²⁰ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦥꦢ​ꦩꦼꦩꦸꦗꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦱ꧀ꦭꦮꦱ꧀ꦭꦮꦱ꧀ꦱꦺ!ꦄꦩꦺꦤ꧀꧈​

꧋ꦥꦼꦤꦸꦠꦸꦥ꧀ꦭꦤ꧀ꦥꦩꦸꦗꦶ​ꦱ꧀ꦭꦩꦼꦠ꧀꧈​

²¹꧋ꦲꦏꦸ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦏꦧꦺꦃ​ꦱꦶꦁ​ꦥꦢ​ꦤꦸꦫꦸꦠ꧀ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀꧈​ꦲꦸꦒ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤꦁꦏꦺꦤꦺ​ꦏꦫꦺꦴ​ꦲꦏꦸ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​꧉​ ²²ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦿꦶꦱ꧀ꦠꦼꦤ꧀ꦭꦶꦪꦭꦶꦪꦤꦺ​ꦱꦶꦁ​ꦤꦁꦏꦸꦠꦏꦺꦤꦺ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦲꦸꦒ​꧈​ꦭꦸꦮꦶꦃꦭꦸꦮꦶꦃ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦏꦼꦂꦗ​ꦤꦁꦲꦺꦴꦩꦃꦲꦺ​ꦫꦠꦸꦤꦺ​꧉​

²³꧋ꦥꦫꦱꦼꦢꦸꦭꦸꦂ꧈​ꦕꦸꦏꦸꦥ꧀ꦱꦼꦩꦺꦤꦺꦮꦲꦺꦭꦪꦁꦲꦶꦏꦶ꧈​ꦩꦸꦒꦩꦸꦒꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦲꦩ꧀ꦧꦼꦂꦏꦃꦲꦶꦏꦺꦴꦮꦺꦏꦧꦺꦃ꧉​

ꦦꦈꦭꦸꦱ꧀ꦭꦤ꧀ꦠꦶꦩꦺꦴꦠꦶꦪꦸꦱ꧀

↑ ↑ ↑

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

^1-2꧋ꦭꦪꦁ​ꦱꦁꦏꦦꦈꦭꦸꦱ꧀ ꦱꦶꦁ​ꦢꦶꦥꦶꦭꦶꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦢꦶ​ꦫꦱꦸꦭ꧀ꦭꦺ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦭꦤ꧀ꦲꦸꦒ​ꦱꦁꦏꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ ꦩꦫꦁ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦏꦸꦠꦏꦺꦴꦭꦺꦴꦱꦺ​꧈​ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦱꦶꦁ​ꦠꦼꦩꦼꦤ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦩꦫꦁ​ꦏꦺꦴꦮꦺ​ꦏꦧꦺꦃ​!

꧋ꦠꦼꦩ꧀ꦧꦸꦁ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

^3-4꧋ꦥꦫ​ꦱꦼꦢꦸꦭꦸꦂ​꧈​ꦱꦧꦼꦤ꧀ꦲꦮꦏ꧀ꦏꦺ​ꦢꦺꦮꦺꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​꧈​ꦲꦮꦏ꧀ꦏꦺ​ꦢꦺꦮꦺꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦏꦿꦸꦔꦸ​ꦤꦺꦏ꧀ꦏꦺꦴꦮꦺ​ꦥꦢ​ꦥꦽꦕꦪ​ꦠꦼꦤꦤ꧀ꦩꦫꦁ​ꦏꦿꦶꦱ꧀ꦡꦸꦱ꧀꧈​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦏꦿꦸꦔꦸ​ꦧꦧ꧀ꦏꦠꦿꦺꦱ꧀ꦤꦤ꧀ꦩꦸꦩꦫꦁ​ꦏꦧꦺꦃ​ꦮꦺꦴꦁ​ꦱꦶꦁ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁵ꦏꦺꦴꦮꦺ​ꦥꦽꦕꦪ​ꦭꦤ꧀ꦠꦿꦺꦱ꧀ꦤ꧈​ꦗꦭꦂꦫꦤ꧀ꦏꦺꦴꦮꦺ​ꦤ꧀ꦢꦸꦮꦺꦤ꧀ꦤꦶ​ꦥꦼꦔꦉꦥ꧀ꦲꦉꦥ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦚꦮꦶꦱ꧀ꦱꦏꦺꦧꦼꦂꦏꦃ​ꦱꦶꦁ​ꦒꦼꦢꦺꦤꦁꦱ꧀ꦮꦂꦒ​ꦏꦁꦒꦺꦴ​ꦏꦺꦴꦮꦺ​ꦏꦧꦺꦃ​꧉​ꦧꦧ꧀ꦥꦼꦔꦉꦥ꧀ꦲꦉꦥ꧀ꦲꦶꦏꦶ​ꦏꦺꦴꦮꦺ​ꦏꦿꦸꦔꦸ​ꦱꦼꦥꦶꦱꦤ꧀ꦤꦤ꧀ꦢꦺꦴꦁꦔꦺꦏꦺꦴꦮꦺ​ꦏꦿꦸꦔꦸ​ꦏꦧꦂ​ꦱꦶꦁ​ꦚꦠ​꧈​ꦪꦏꦸꦮꦶ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ⁶ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦮꦶꦱ꧀ꦏꦱꦼꦧꦂ​ꦤꦁꦱꦏ꧀ꦗꦼꦩ꧀ꦧꦂꦫꦺ​ꦧꦸꦩꦶ​ꦭꦤ꧀ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦥꦽꦕꦪ​ꦩꦫꦁ​ꦏꦧꦂ​ꦲꦶꦏꦶ​ꦠꦼꦫꦸꦱ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦩꦤꦸꦠ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦥꦢ​ꦮꦲꦺ​ꦏꦫꦺꦴ​ꦊꦭꦏꦺꦴꦤ꧀ꦲꦶꦁ​ꦲꦸꦫꦶꦥ꧀ꦩꦸ​꧈​ꦱꦏ꧀ꦮꦶꦱ꧀ꦱꦺ​ꦏꦺꦴꦮꦺ​ꦏꦿꦸꦔꦸ​ꦏꦧꦂ​ꦏꦧꦸꦔꦃꦲꦤ꧀ꦱꦶꦁ​ꦱꦼꦥꦶꦱꦤ꧀ꦤꦤ꧀꧈​ꦮꦸꦗꦸꦠ꧀ꦠꦺꦏꦺꦴꦮꦺ​ꦪ​ꦠꦼꦫꦸꦱ꧀ꦧꦶꦱ​ꦢꦸꦤꦸꦁꦧꦧ꧀ꦏꦮꦼꦭꦱ꧀ꦱꦤ꧀ꦤꦺ​ꦭꦤ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦏꦪ​ꦱꦏ꧀ꦧꦼꦤꦼꦂꦫꦺ​꧉​ ⁷ꦏꦺꦴꦮꦺ​ꦏꦿꦸꦔꦸ​ꦧꦧ꧀ꦏꦸꦮꦶ​ꦩꦲꦸ​ꦏꦧꦺꦃ​ꦱꦁꦏꦱꦼꦢꦸꦭꦸꦂ​ꦌꦥꦥ꦳ꦿꦱ꧀ ꦏꦚ꧀ꦕꦏꦸ​ꦱꦶꦁ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​ꦏꦪ​ꦲꦏꦸ​꧉​ꦢꦺꦏ꧀ꦤꦺꦠꦏ꧀ꦠꦿꦺꦱ꧀ꦤꦤ꧀ꦤꦶꦠꦼꦤꦤ꧀ꦭꦤ꧀ꦢꦺꦏ꧀ꦤꦺꦥꦼꦭꦢꦺꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦱꦶꦁ​ꦏꦼꦤꦺꦁꦢꦶꦗꦒꦏ꧀ꦏꦏꦺꦭꦤ꧀ꦱꦶꦁ​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧉​ ⁸ꦪ​ꦱꦼꦢꦸꦭꦸꦂ​ꦌꦥꦥ꦳ꦿꦱ꧀ꦲꦶꦏꦶ​ꦱꦶꦁ​ꦔꦺꦴꦩꦺꦴꦁꦔꦶꦲꦮꦏ꧀ꦏꦺ​ꦢꦺꦮꦺꦧꦧ꧀ꦏꦠꦿꦺꦱ꧀ꦤꦤ꧀ꦩꦸ꧈​ꦏꦠꦿꦺꦱ꧀ꦤꦤ꧀ꦱꦶꦁ​ꦱꦁꦏꦫꦺꦴꦃ​ꦱꦸꦕꦶ​꧉​

⁹꧋ꦩꦸꦭꦤꦺ​꧈​ꦮꦶꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦏꦿꦸꦔꦸ​ꦏꦧꦂ​ꦱꦁꦏꦔ꧀ꦒꦺꦴꦤ꧀ꦩꦸ​ꦏꦸꦮꦶ​ꦠꦼꦏꦤꦺ​ꦱꦲꦶꦏꦶ​꧈​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦭꦺꦫꦺꦤ꧀​ꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​꧉​ꦲꦮꦏ꧀ꦏꦺ​ꦢꦺꦮꦺꦤ꧀ꦢꦺꦴꦁꦔ꧈​ꦩꦸꦒ​ꦏꦺꦴꦮꦺ​ꦧꦶꦱ​ꦤ꧀ꦢꦸꦮꦺꦤ꧀ꦤꦶ​ꦥꦔꦼꦂꦠꦶ​ꦧꦧ꧀ꦲꦥ​ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦲꦸꦫꦶꦥ꧀ꦩꦸ​꧉​ꦩꦸꦒ​ꦏꦺꦴꦮꦺ​ꦧꦶꦱ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦫꦸꦃꦭꦤ꧀ꦏꦢꦸꦤꦸꦁꦔꦤ꧀ꦲꦶꦁ​ꦏꦱꦸꦏ꧀ꦩꦤ꧀꧈​ ¹⁰ꦢꦢꦶꦤꦺ​ꦲꦸꦫꦶꦥ꧀ꦩꦸ​ꦧꦶꦱ​ꦥꦤ꧀ꦠꦼꦱ꧀ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦭꦤ꧀ꦒꦸꦱ꧀ꦠꦶ​ꦲꦸꦒ​ꦧꦶꦱ​ꦊꦒ​ꦲꦶꦁ​ꦱꦼꦩ꧀ꦧꦫꦁ​ꦥꦽꦏꦫ​ꦱꦶꦁ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧉​ꦩꦸꦒ​ꦏꦺꦴꦮꦺ​ꦧꦶꦱ​ꦩꦸꦤ꧀ꦢꦏ꧀ꦲꦼꦁꦒꦺꦴꦤ꧀ꦩꦸ​ꦔ꧀ꦒꦮꦺ​ꦧꦼꦕꦶꦏ꧀ꦩꦫꦁ​ꦭꦶꦪꦤꦺ​ꦭꦤ꧀ꦏꦮꦼꦫꦸꦃꦩꦸꦧꦧ꧀ꦒꦸꦱ꧀ꦠꦶ​ꦧꦶꦱꦲ​ꦱꦼꦭꦺꦴꦠ꧀ꦱꦸꦮꦶꦱꦼꦭꦺꦴꦠ꧀ꦩꦸꦤ꧀ꦢꦏ꧀꧈​ ¹¹ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦤ꧀ꦢꦺꦴꦁꦔ꧈​ꦩꦸꦒ​ꦏꦺꦴꦮꦺ​ꦧꦶꦱ​ꦤꦩ꧀ꦥ​ꦏꦼꦏꦸꦮꦠ꧀ꦠꦤ꧀ꦱꦁꦏꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦏꦸꦮꦠ꧀ꦚꦁꦒ​ꦱꦼꦩ꧀ꦧꦫꦁ​ꦏꦫꦺꦴ​ꦱꦧꦂ​꧈​ꦠꦤ꧀ꦥ​ꦤꦼꦱꦸ​ꦩꦫꦁ​ꦮꦺꦴꦁ​ꦱꦶꦁ​ꦔ꧀ꦒꦮꦺ​ꦱꦁꦱꦫꦤꦺ​ꦲꦸꦫꦶꦥ꧀ꦩꦸ​꧉​ ¹²ꦩꦭꦃ​ꦧꦶꦱꦲ​ꦥꦢ​ꦧꦸꦔꦃ​ꦭꦤ꧀ꦥꦢ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧈​ꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦥꦤ꧀ꦠꦼꦱ꧀ꦤꦩ꧀ꦥ​ꦥꦤ꧀ꦢꦸꦩ꧀ꦩꦤ꧀ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦤꦁꦥꦁꦒꦺꦴꦤ꧀ꦤꦤ꧀ꦥꦼꦥꦢꦁ꧈​ꦏꦁꦒꦺꦴ​ꦏꦧꦺꦃ​ꦮꦺꦴꦁ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​꧉​ ¹³ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦥꦔ꧀ꦮꦱꦤꦺ​ꦥꦼꦥꦼꦠꦼꦁ​ꦭꦤ꧀ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦏꦧꦺꦴꦪꦺꦴꦁ​ꦏꦤ꧀ꦠꦶꦱ꧀ꦭꦩꦼꦠ꧀ꦲꦶꦁ​ ꦱꦏ꧀ꦔꦶꦱꦺꦴꦂꦫꦺ​ꦥꦔ꧀ꦮꦱꦤꦺ​ꦲꦤꦏ꧀ꦏꦺ​ꦱꦶꦁ​ꦢꦶꦠꦿꦺꦱ꧀ꦤꦤ꧀ꦤꦶ꧉​ ¹⁴ꦪ​ꦗꦭꦂꦫꦤ꧀ꦱꦁꦏꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦲꦸꦕꦸꦭ꧀ꦱꦁꦏꦥꦔ꧀ꦮꦱꦤꦺ​ꦱꦺꦠꦤ꧀ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦧꦶꦱ​ꦤꦩ꧀ꦥ​ꦥꦔꦥꦸꦫꦤꦺ​ꦢꦺꦴꦱ​꧉​

꧋ꦏꦿꦶꦱ꧀ꦡꦸꦱ꧀ꦏꦸꦮꦶ​ꦱꦥ​?꧉​

¹⁵꧋ꦲꦏꦸ​ꦱꦲꦶꦏꦶ​ꦏꦼꦥꦺꦔꦶꦤ꧀​ꦤ꧀ꦢꦸꦤꦸꦁꦔꦏꦺꦧꦧ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦴꦫ​ꦏꦺꦠꦺꦴꦏ꧀ ꦤꦁꦔꦶꦁ​ꦱꦥ​ꦱꦶꦁ​ꦮꦼꦫꦸꦃ​ꦏꦿꦶꦱ꧀ꦡꦸꦱ꧀ꦪ​ꦮꦼꦫꦸꦃ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦔꦼꦠꦺꦴꦏ꧀ꦏꦏꦺꦩꦫꦁ​ꦩꦤꦸꦁꦱ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦮꦸꦗꦸꦠ꧀ꦠꦺꦏꦪ​ꦔꦥ​꧉​ꦏꦿꦶꦱ꧀ꦡꦸꦱ꧀ꦲꦸꦒ​ꦱꦶꦁ​ꦢꦢꦶ​ꦱꦼꦱꦶꦫꦃꦲꦺ​ꦱꦼꦩ꧀ꦧꦫꦁ​ꦱꦶꦁ​ꦲꦺꦤꦺꦁ꧉​ ¹⁶ꦏꦸꦮꦶ​ꦗꦭꦂꦫꦤ꧀ꦢꦺꦏ꧀ꦤꦺꦱꦶꦁ​ꦢꦶꦥꦿꦺꦤ꧀ꦠꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦁꦏꦺꦴꦤ꧀​ꦔ꧀ꦒꦮꦺ​ꦱꦼꦩ꧀ꦧꦫꦁ​ꦱꦶꦁ​ꦲꦺꦤꦺꦁ꧈​ꦱꦼꦩ꧀ꦧꦫꦁ​ꦱꦶꦁ​ꦤꦁꦧꦸꦩꦶ​꧈​ꦱꦶꦁ​ꦏꦺꦠꦺꦴꦏ꧀ꦩꦿꦶꦥꦠ꧀ꦭꦤ꧀ꦲꦸꦒ​ꦱꦼꦩ꧀ꦧꦫꦁ​ꦱꦶꦁ​ꦤꦁꦱ꧀ꦮꦂꦒ​ꦱꦶꦁ​ꦲꦺꦴꦫ​ꦏꦺꦠꦺꦴꦏ꧀ꦩꦿꦶꦥꦠ꧀ ꦱꦼꦩꦺꦴꦤꦺꦴ​ꦲꦸꦒ​ꦏꦧꦺꦃ​ꦫꦺꦴꦃꦫꦺꦴꦃ​ꦭꦤ꧀ꦥꦔ꧀ꦮꦱ​꧉​ꦏꦧꦺꦃ​ꦩꦲꦸ​ꦲꦺꦤꦺꦁꦔꦺꦱꦁꦏꦏꦿꦶꦱ꧀ꦡꦸꦱ꧀ꦭꦤ꧀ꦏꦁꦒꦺꦴ​ꦔ꧀ꦭꦸꦲꦸꦂꦫꦏꦺꦏꦿꦶꦱ꧀ꦡꦸꦱ꧀꧈​ ¹⁷ꦏꦫꦺꦴꦩꦼꦤꦺꦃ​꧈​ꦏꦿꦶꦱ꧀ꦡꦸꦱ꧀ꦮꦶꦱ꧀ꦲꦺꦤꦺꦁꦱꦏ꧀ꦢꦸꦫꦸꦁꦔꦺꦱꦼꦩ꧀ꦧꦫꦁ​ꦏꦸꦮꦶ​ꦏꦧꦺꦃ​ꦲꦺꦤꦺꦁꦭꦤ꧀ꦢꦺꦏ꧀ꦤꦺꦱꦶꦁ​ꦔ꧀ꦮꦱꦤꦶ​ꦭꦤ꧀ꦤꦠ​ꦱꦼꦩ꧀ꦧꦫꦁ​ꦱꦶꦁ​ꦲꦺꦤꦺꦁ꧉​ ¹⁸ꦏꦿꦶꦱ꧀ꦡꦸꦱ꧀ꦏꦸꦮꦶ​ꦱꦼꦱꦶꦫꦃꦲꦺ​ꦧꦢꦤ꧀ꦤꦺ​꧈​ꦪꦏꦸꦮꦶ​ꦥꦱꦩꦸꦮꦤ꧀ꦤꦺ꧉​ꦢꦺꦏ꧀ꦤꦺꦱꦶꦁ​ꦢꦢꦶ​ꦮꦶꦮꦶꦠ꧀ꦠꦤ꧀ꦤꦺ​ꦭꦤ꧀ꦱꦶꦁ​ꦔꦼꦏꦺꦏ꧀ꦏꦶꦲꦸꦫꦶꦥ꧀ꦩꦫꦁ​ꦥꦱꦩꦸꦮꦤ꧀ꦤꦺ꧉​ꦢꦺꦏ꧀ꦤꦺꦲꦸꦒ​ꦱꦶꦁ​ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦲꦶꦁ​ꦱꦼꦩ꧀ꦧꦫꦁ​ꦥꦽꦏꦫ​ꦏꦿꦶꦱ꧀ꦡꦸꦱ꧀ꦪ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺ꧉​ ¹⁹ꦏꦿꦶꦱ꧀ꦡꦸꦱ꧀ꦢꦢꦶ​ꦱꦼꦱꦶꦫꦃꦲꦺ​ꦱꦼꦩ꧀ꦧꦫꦁ​꧈​ꦗꦭꦂꦫꦤ꧀ꦮꦶꦱ꧀ꦢꦢꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦩꦁꦒꦺꦴꦤ꧀ꦲꦶꦁ​ꦏꦿꦶꦱ꧀ꦡꦸꦱ꧀ ꦱꦸꦥꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦏꦺꦠꦺꦴꦏ꧀ꦱꦏ꧀ꦏꦧꦺꦃꦲꦺꦲꦶꦁ​ꦏꦿꦶꦱ꧀ꦡꦸꦱ꧀꧈​ ²⁰ꦪ​ꦭꦤ꧀ꦠꦂꦫꦤ꧀ꦏꦿꦶꦱ꧀ꦡꦸꦱ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦿꦸꦏꦸꦤ꧀ꦤꦏꦺꦱꦼꦩ꧀ꦧꦫꦁ​ꦏꦫꦺꦴ​ꦢꦺꦏ꧀ꦤꦺꦢꦺꦮꦺ꧉​ꦱꦼꦩ꧀ꦧꦫꦁ​ꦱꦶꦁ​ꦤꦁꦱ꧀ꦮꦂꦒ​ꦭꦤ꧀ꦱꦶꦁ​ꦤꦁꦧꦸꦩꦶ​ꦮꦶꦱ꧀ꦢꦶꦫꦸꦏꦸꦤ꧀ꦤꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦂꦫꦤ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦢꦶꦥꦼꦤ꧀ꦠꦺꦁꦒꦼꦠꦶꦃꦲꦺ​ꦠꦸꦩꦺꦠꦺꦱ꧀ꦱꦩ꧀ꦥꦺꦏ꧀ꦩꦠꦶ​꧉​

²¹꧋ꦏꦺꦴꦮꦺ​ꦲꦩ꧀ꦧꦫꦁ​ꦱꦲꦶꦏꦶ​ꦮꦶꦱ꧀ꦢꦶꦫꦸꦏꦸꦤ꧀ꦤꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦼꦤꦗꦤ꧀ꦲꦸꦫꦶꦥ꧀ꦩꦸ​ꦩꦲꦸꦤꦺ​ꦲꦢꦺꦴꦃ​ꦏꦫꦺꦴ​ꦢꦺꦏ꧀ꦤꦺ꧉​ꦏꦺꦴꦮꦺ​ꦩ꧀ꦧꦶꦪꦺꦤ꧀ꦩꦭꦃ​ꦩꦸꦁꦱꦸꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦱꦶꦁ​ꦲꦩ꧀ꦧꦺꦴꦏ꧀ꦒꦒꦱ꧀ꦭꦤ꧀ꦱꦶꦁ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦤꦩꦸꦁ​ꦧꦫꦁ​ꦲꦭ​꧉​ ²²ꦤꦁꦔꦶꦁ​ꦱꦲꦶꦏꦶ​ꦮꦶꦱ꧀ꦲꦺꦴꦫ​ꦔꦺꦴꦤꦺꦴ​꧉​ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦿꦸꦏꦸꦤ꧀ꦤꦏꦺꦏꦺꦴꦮꦺ​ꦏꦫꦺꦴ​ꦢꦺꦏ꧀ꦤꦺꦢꦺꦮꦺꦭꦤ꧀ꦠꦂꦫꦤ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦩꦠꦶ​ꦏꦪ​ꦩꦤꦸꦁꦱ​꧉​ꦏꦿꦶꦱ꧀ꦡꦸꦱ꧀ꦩꦠꦶ​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦢꦢꦶ​ꦮꦺꦴꦁ​ꦲꦸꦫꦶꦥ꧀ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​꧈​ꦮꦺꦴꦁ​ꦱꦶꦁ​ꦉꦱꦶꦏ꧀ꦠꦤ꧀ꦥ​ꦱꦭꦃ​꧉​ ²³ꦩꦸꦭꦤꦺꦏꦺꦴꦮꦺꦏꦸꦢꦸꦩꦤ꧀ꦠꦼꦥ꧀ꦲꦼꦁꦒꦺꦴꦤ꧀ꦩꦸꦥꦽꦕꦪꦩꦫꦁꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦲꦗꦱꦩ꧀ꦥꦺꦏ꧀ꦏꦺꦴꦮꦺꦢꦶꦱꦶꦩ꧀ꦥꦁꦔꦏꦺꦱꦁꦏꦥꦼꦔꦉꦥ꧀ꦲꦉꦥ꧀ꦱꦶꦁꦏꦉꦩ꧀ꦧꦸꦏ꧀ꦲꦶꦁꦏꦧꦂꦏꦧꦸꦔꦃꦲꦤ꧀ꦤꦺꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦪꦏꦧꦂꦏꦧꦸꦔꦃꦲꦤ꧀ꦲꦶꦏꦶꦱꦶꦁꦏꦱꦼꦧꦂꦤꦁꦱꦏ꧀ꦗꦼꦩ꧀ꦧꦂꦫꦺꦗꦒꦠ꧀ꦭꦤ꧀ꦲꦏꦸꦲꦶꦏꦶ꧈​ꦦꦈꦭꦸꦱ꧀ꦮꦶꦱ꧀ꦢꦢꦶꦥꦼꦭꦢꦺꦤ꧀ꦤꦺꦒꦸꦱ꧀ꦠꦶꦏꦁꦒꦺꦴꦔꦼꦂꦗꦤ꧀ꦤꦶꦲꦶꦏꦶ꧉​

꧋ꦥꦼꦭꦧꦸꦮꦤ꧀ꦤꦺꦫꦱꦸꦭ꧀ꦦꦈꦭꦸꦱ꧀ꦏꦁꦒꦺꦴꦥꦱꦩꦸꦮꦤ꧀꧈​

²⁴꧋ꦩꦸꦭꦤꦺ​ꦲꦏꦸ​ꦱꦲꦶꦏꦶ​ꦪ​ꦤꦤ꧀ꦢꦁꦏꦔꦺꦭ꧀ꦭꦤ꧀ꦏꦁꦒꦺꦴ​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧈​ꦤꦁꦔꦶꦁ​ꦲꦏꦸ​ꦩꦭꦃ​ꦧꦸꦔꦃ​ꦲꦼꦁꦒꦺꦴꦤ꧀ꦏꦸ​ꦔ꧀ꦭꦏꦺꦴꦤ꧀ꦤꦶ​ꦲꦶꦏꦶ​꧉​ꦢꦢꦶꦤꦺ​ꦲꦏꦸ​ꦧꦶꦱ​ꦔ꧀ꦒꦼꦤꦼꦥ꧀ꦥꦶ​ꦏꦼꦏꦸꦫꦁꦔꦤ꧀ꦤꦺ​ꦏꦱꦁꦱꦫꦤꦺ​ꦏꦿꦶꦱ꧀ꦡꦸꦱ꧀ꦏꦁꦒꦺꦴ​ꦧꦢꦤ꧀ꦤꦺ​꧈​ꦪꦏꦸꦮꦶ​ꦥꦱꦩꦸꦮꦤ꧀ꦤꦺ꧉​ ²⁵ꦲꦏꦸ​ꦢꦢꦶ​ꦥꦼꦭꦢꦺꦤ꧀ꦤꦺ​ꦥꦱꦩꦸꦮꦤ꧀ ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦼꦏꦺꦏ꧀ꦏꦶꦥꦼꦁꦒꦮꦺꦏꦸꦲꦶꦏꦶ​ꦩꦫꦁ​ꦲꦏꦸ​꧉​ꦲꦏꦸ​ꦏꦸꦢꦸ​ꦔꦧꦂꦫꦏꦺꦩꦫꦁ​ꦏꦺꦴꦮꦺ​ꦧꦧ꧀ꦱꦼꦩ꧀ꦧꦫꦁ​ꦱꦶꦁ​ꦧꦏꦭ꧀ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦏꦺꦴꦮꦺ​꧉​ ²⁶ꦩꦲꦸꦤꦺ​꧈​ꦲꦶꦁ​ꦗꦩꦤ꧀ꦱꦶꦁ​ꦮꦶꦱ꧀​ꦏ꧀ꦭꦶꦮꦠ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦢꦸꦫꦸꦁ​ꦠꦲꦸ​ꦔꦺꦴꦩꦺꦴꦁꦔꦏꦺꦧꦧ꧀ꦏꦸꦮꦶ​ꦩꦫꦁ​ꦱꦥꦱꦥ​꧉​ꦤꦁꦔꦶꦁ​ꦱꦲꦶꦏꦶ​ꦏꦧꦂ​ꦲꦶꦏꦶ​ꦢꦶꦲꦼꦠꦺꦴꦏ꧀ꦏꦏꦺꦩꦫꦁ​ꦥꦱꦩꦸꦮꦤ꧀꧈​ ²⁷ꦒꦸꦱ꧀ꦠꦶ​ꦄꦭ꧀ꦭꦃ​ꦥꦚ꧀ꦕꦺꦤ꧀ꦮꦶꦱ꧀ꦏꦼꦥꦺꦔꦶꦤ꧀ꦔꦼꦠꦺꦴꦏ꧀ꦏꦏꦺꦏꦧꦂ​ꦲꦶꦏꦶ​ꦩꦫꦁ​ꦥꦱꦩꦸꦮꦤ꧀ꦤꦺ꧉​ꦪ​ꦏꦧꦂ​ꦲꦶꦏꦶ​ꦱꦶꦁ​ꦔꦺꦴꦩꦺꦴꦁꦔꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦼꦏꦏ꧀ꦏꦏꦺꦧꦫꦁ​ꦱꦶꦁ​ꦔ꧀ꦒꦸꦩꦸꦤ꧀​ꦔ꧀ꦒꦸꦩꦸꦤ꧀ꦤꦏꦺꦩꦫꦁ​ꦏꦧꦺꦃ​ꦧꦁꦱ​ꦱꦶꦁ​ꦢꦸꦢꦸ​ꦙꦸ꧉​ꦏꦧꦂ​ꦲꦶꦏꦶ​ꦔꦺꦴꦩꦺꦴꦁꦔꦏꦺꦲꦥ​ꦠ​ꦱꦏ꧀ꦗꦤꦺ?ꦏꦧꦂ​ꦲꦶꦏꦶ​ꦔꦺꦴꦩꦺꦴꦁꦔꦏꦺꦤꦺꦏ꧀ꦏꦿꦶꦱ꧀ꦡꦸꦱ꧀ꦲꦸꦒ​ꦧꦏꦭ꧀ꦩꦁꦒꦺꦴꦤ꧀ꦲꦶꦁ​ꦏꦺꦴꦮꦺ​ꦱꦶꦁ​ꦢꦸꦢꦸ​ꦙꦸ꧉​ꦭꦤ꧀ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀ꦩꦁꦒꦺꦴꦤ꧀ꦲꦶꦁ​ꦏꦺꦴꦮꦺ​꧈​ꦏꦺꦴꦮꦺ​ꦲꦸꦒ​ꦔꦉꦥ꧀ꦲꦉꦥ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦼꦊꦩ꧀ꦏꦺꦴꦮꦺ​ꦭꦤ꧀ꦔꦼꦏꦺꦏ꧀ꦏꦶꦧꦫꦁ​ꦱꦶꦁ​ꦔ꧀ꦒꦸꦩꦸꦤ꧀​ꦔ꧀ꦒꦸꦩꦸꦤ꧀ꦤꦏꦺꦩꦫꦁ​ꦏꦺꦴꦮꦺ​꧉​ ²⁸ꦪ​ꦏꦧꦂ​ꦱꦶꦁ​ꦥꦼꦤ꧀ꦠꦶꦁ​ꦧꦔꦼꦠ꧀ꦲꦶꦏꦶ​ꦱꦶꦁ​ꦢꦶꦒꦼꦭꦂꦫꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦏꦧꦂ​ꦧꦧ꧀ꦏꦿꦶꦱ꧀ꦡꦸꦱ꧀꧈​ ꦲꦮꦏ꧀ꦏꦺ​ꦢꦺꦮꦺꦔꦺꦭꦶꦁꦔꦏꦺꦩꦫꦁ​ꦏꦧꦺꦃ​ꦮꦺꦴꦁ​꧈​ꦱꦸꦥꦪ​ꦥꦢ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦭꦤ꧀ꦱꦏ꧀ꦲꦶꦤ꧀ꦠꦼꦂꦫꦶꦤ꧀ꦠꦼꦫꦺꦲꦮꦏ꧀ꦏꦺ​ꦢꦺꦮꦺꦩꦸꦭꦁꦔꦶꦏꦼꦥꦿꦶꦪꦺ​ꦕꦫꦤꦺ​ꦮꦺꦴꦁ​ꦤꦸꦫꦸꦠ꧀ꦒꦸꦱ꧀ꦠꦶ​꧉​ꦢꦢꦶꦤꦺ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦥꦢ​ꦠꦼꦏ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦲꦸꦱꦃꦮꦼꦢꦶ​꧈​ꦲꦮꦶꦠ꧀ꦲꦸꦫꦶꦥ꧀ꦥꦺꦕꦺꦴꦕꦺꦴꦏ꧀​ꦏꦫꦺꦴ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​꧉​ ²⁹ꦩꦸꦭꦤꦺ​ꦲꦏꦸ​ꦔ꧀ꦭꦸꦩꦸꦃꦲꦶꦚꦩ꧀ꦧꦸꦠ꧀ꦠꦱꦏ꧀ꦲꦶꦤ꧀ꦠꦼꦂꦫꦶꦤ꧀ꦠꦼꦂꦏꦸꦏꦫꦺꦴ​ꦥꦶꦠꦸꦭꦸꦁꦔꦤ꧀ꦤꦺ​ꦏꦿꦶꦱ꧀ꦡꦸꦱ꧀ꦱꦶꦁ​ꦠꦸꦩꦤ꧀ꦢꦁ​ꦏꦫꦺꦴ​ꦏꦼꦏꦸꦮꦠ꧀ꦠꦤ꧀ꦤꦺ​ꦲꦶꦁ​ꦲꦸꦫꦶꦥ꧀ꦏꦸ​꧉​

↑ ↑ ↑

 

꧇​꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦥ​ꦠ​ꦗꦭꦂꦫꦤ꧀ꦤꦺ​ꦲꦼꦁꦒꦺꦴꦤ꧀ꦏꦸ​ꦚꦩ꧀ꦧꦸꦠ꧀ꦠꦱꦏ꧀ꦏꦸꦮꦠ꧀ꦏꦸꦔ꧀ꦭꦧꦸꦃꦲꦶ​ꦏꦺꦴꦮꦺ​ꦱꦶꦁ​ꦤꦁꦏꦺꦴꦭꦺꦴꦱꦺ​꧈​ꦲꦸꦒ​ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦱꦶꦁ​ꦤꦁꦭꦎꦢꦶꦱꦺꦪꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦱꦶꦁ​ꦢꦸꦫꦸꦁ​ꦠꦲꦸ​ꦏꦼꦥꦼꦠꦸꦏ꧀ꦲꦏꦸ​? ²ꦗꦭꦂꦫꦤ꧀ꦤꦺ​꧈​ꦱꦸꦥꦪ​ꦏꦺꦴꦮꦺ​ꦏꦧꦺꦃ​ꦧꦶꦱ​ꦩꦤ꧀ꦠꦼꦥ꧀ꦲꦶꦁ​ꦥꦼꦔꦤ꧀ꦢꦼꦭ꧀ꦭꦤ꧀ꦥꦢ​ꦠꦿꦺꦱ꧀ꦤꦩꦫꦁ​ꦱꦏ꧀ꦥꦢꦥꦢꦭꦤ꧀ꦧꦶꦱ​ꦫꦸꦏꦸꦤ꧀ꦧꦼꦧꦉꦁꦔꦤ꧀꧈​ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦫꦸꦃꦱꦶꦁ​ꦗꦼꦫꦸꦭꦤ꧀ꦧꦶꦱ​ꦢꦸꦤꦸꦁꦱꦏ꧀ꦏꦧꦺꦃꦲꦺꦧꦧ꧀ꦮꦼꦮꦢꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​ꦏꦿꦶꦱ꧀ꦡꦸꦱ꧀꧈​ ³ꦏꦿꦶꦱ꧀ꦡꦸꦱ꧀ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏꦱꦸꦒꦶꦃꦲꦤ꧀ꦤꦺ​ꦏꦮꦼꦫꦸꦃꦭꦤ꧀ꦥꦔꦼꦂꦠꦶ​꧉​

⁴꧋ꦲꦏꦸ​ꦔꦺꦴꦩꦺꦴꦁꦔꦶꦏꦺꦴꦮꦺ​ꦧꦧ꧀ꦲꦶꦏꦶ​꧈​ꦱꦸꦥꦪ​ꦏꦺꦴꦮꦺ​ꦲꦺꦴꦫ​ꦏꦼꦤꦺꦁꦢꦶꦲꦥꦸꦱ꧀ꦱꦶ​ꦮꦺꦴꦁ​ꦏꦫꦺꦴ​ꦲꦺꦴꦩꦺꦴꦁꦔꦤ꧀ꦱꦶꦁ​ꦲꦺꦤꦏ꧀꧈​ ⁵ꦧꦼꦤꦼꦂ​꧈​ꦲꦏꦸ​ꦢꦺꦮꦺꦲꦺꦴꦫ​ꦤꦁꦠꦼꦔꦃꦩꦸ​꧈​ꦤꦁꦔꦶꦁ​ꦲꦶꦁ​ꦧꦠꦶꦤꦤ꧀ꦏꦸꦲꦏꦸ​ꦕꦩ꧀ꦥꦸꦂ​ꦏꦫꦺꦴ​ꦏꦺꦴꦮꦺ​꧉​ꦲꦏꦸ​ꦧꦸꦔꦃ​ꦠꦼꦤꦤ꧀ꦧꦶꦱ​ꦏꦿꦸꦔꦸ​ꦤꦺꦏ꧀ꦏꦺꦴꦮꦺ​ꦏꦧꦺꦃ​ꦥꦢ​ꦫꦸꦏꦸꦤ꧀ꦧꦼꦧꦉꦁꦔꦤ꧀ꦭꦤ꧀ꦥꦢ​ꦩꦤ꧀ꦠꦼꦥ꧀ꦲꦼꦁꦒꦺꦴꦤ꧀ꦩꦸ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀꧈​

꧋ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦼꦤꦁꦔꦏꦺꦱꦼꦩ꧀ꦧꦫꦁ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀꧈​

⁶꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦮꦶꦱ꧀ꦥꦢ​ꦤꦩ꧀ꦥ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦢꦢꦶ​ꦒꦸꦱ꧀ꦠꦶꦩꦸ​꧈​ꦩꦸꦭꦤꦺ​ꦱꦲꦶꦏꦶ​ꦏꦺꦴꦮꦺ​ꦏꦸꦢꦸ​ꦠꦼꦫꦸꦱ꧀ꦲꦸꦫꦶꦥ꧀ꦫꦸꦩꦏꦼꦠ꧀ꦩꦫꦁ​ꦢꦺꦏ꧀ꦤꦺ꧉​ ⁷ꦠꦼꦒꦼꦱ꧀ꦱꦺ꧈​ꦥꦢꦩꦤ꧀ꦠꦼꦥ꧀ꦥꦲꦼꦁꦒꦺꦴꦤ꧀ꦩꦸꦥꦽꦕꦪꦭꦤ꧀ꦤꦸꦫꦸꦠ꧀ꦠꦩꦫꦁꦥꦶꦠꦸꦠꦸꦂꦱꦶꦁꦢꦶꦮꦸꦭꦁꦔꦏꦺꦱꦶꦁꦤ꧀ꦢꦶꦱꦶꦏ꧀ꦢꦺꦮꦺ꧈​ꦱꦸꦥꦪꦧꦶꦱꦩꦤ꧀ꦠꦼꦥ꧀ꦏꦪꦮꦶꦠ꧀ꦱꦶꦁꦔꦺꦴꦪꦺꦴꦠ꧀ꦗꦼꦫꦸ꧉​ꦢꦶꦠꦼꦫꦸꦱ꧀ꦤꦲꦼꦁꦒꦺꦴꦤ꧀ꦩꦸꦥꦢꦩꦤꦸꦠ꧀ꦭꦤ꧀​ꦚ꧀ꦗꦒꦏ꧀ꦏꦏꦺꦩꦫꦁꦏꦿꦶꦱ꧀ꦡꦸꦱ꧀ꦭꦤ꧀ꦲꦗꦥꦶꦱꦤ꧀ꦥꦶꦱꦤ꧀ꦏꦼꦤ꧀ꦢꦺꦴꦲꦼꦁꦒꦺꦴꦤ꧀ꦩꦸꦥꦽꦕꦪꦩꦫꦁꦥꦶꦠꦸꦠꦸꦂꦱꦶꦁꦧꦼꦤꦼꦂꦧꦧ꧀ꦏꦿꦶꦱ꧀ꦡꦸꦱ꧀ ꦏꦪꦱꦶꦁꦮꦶꦱ꧀ꦢꦶꦮꦸꦭꦁꦔꦏꦺꦩꦫꦁꦏꦺꦴꦮꦺꦏꦫꦺꦴꦱꦼꦢꦸꦭꦸꦂꦌꦥꦥ꦳ꦿꦱ꧀꧈​ꦭꦤ꧀ꦲꦗꦥꦢꦭꦺꦫꦺꦤ꧀ꦲꦼꦁꦒꦺꦴꦤ꧀ꦩꦸꦩꦠꦸꦂꦏꦼꦱꦸꦮꦸꦤ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉​

⁸꧋ꦥꦢ​ꦢꦶꦲꦠꦶꦲꦠꦶ꧈​ꦲꦗ​ꦱꦩ꧀ꦥꦺꦏ꧀ꦏꦺꦴꦮꦺ​ꦏꦠꦸꦠ꧀ꦏꦼꦗꦶꦉꦠ꧀ꦏꦫꦺꦴ​ꦥꦶꦠꦸꦠꦸꦂ​ꦱꦶꦁ​ꦲꦥꦸꦱ꧀ꦱꦤ꧀ ꦪꦏꦸꦮꦶ​ꦥꦶꦠꦸꦠꦸꦂ​ꦒꦮꦺꦪꦤ꧀ꦤꦺ​ꦩꦤꦸꦁꦱ​ꦱꦶꦁ​ꦩꦤꦸꦠ꧀ꦥꦔ꧀ꦮꦱꦥꦔ꧀ꦮꦱ​ꦤꦁꦗꦒꦠ꧀꧈​ꦏꦸꦮꦶ​ꦢꦸꦢꦸ​ꦥꦶꦠꦸꦠꦸꦂ​ꦱꦶꦁ​ꦱꦁꦏꦏꦿꦶꦱ꧀ꦡꦸꦱ꧀꧈​ ⁹ꦲꦗ​ꦥꦢ​ꦔ꧀ꦒꦸꦒꦸ​ꦥꦶꦮꦸꦭꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦢꦢꦶ​ꦩꦤꦸꦁꦱ​ꦭꦤ꧀ꦩꦤꦸꦁꦱ​ꦲꦶꦏꦶ​ꦪ​ꦏꦿꦶꦱ꧀ꦡꦸꦱ꧀ꦢꦺꦮꦺ꧉​ ¹⁰ꦢꦺꦏ꧀ꦤꦺꦲꦤ​ꦲꦶꦁ​ꦱꦏ꧀​ꦤ꧀ꦢꦸꦮꦸꦂꦫꦺꦏꦧꦺꦃ​ꦥꦔ꧀ꦮꦱ​꧈​ꦏꦪꦢꦺꦤꦺꦩꦸꦭꦺꦏꦠ꧀ꦩꦸꦭꦺꦏꦠ꧀ꦭꦤ꧀ꦱꦺꦠꦤ꧀ꦱꦺꦠꦤ꧀꧈​ꦩꦸꦭꦤꦺ​꧈​ꦗꦭꦂꦫꦤ꧀ꦏꦺꦴꦮꦺ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦏꦺꦴꦮꦺ​ꦲꦸꦒ​ꦮꦶꦱ꧀​ꦤ꧀ꦢꦸꦮꦺꦤ꧀ꦤꦶ​ꦱꦼꦩ꧀ꦧꦫꦁ​ꦱꦶꦁ​ꦲꦩ꧀ꦧꦺꦴꦏ꧀ꦧꦸꦠꦸꦃꦲꦏꦺꦏꦁꦒꦺꦴ​ꦩꦔꦼꦂꦠꦺꦤ꧀ꦤꦶꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

¹¹꧋ꦢꦺꦴꦁꦔꦺꦏꦺꦴꦮꦺ​ꦤꦩ꧀ꦥ​ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦠꦤ꧀ꦢꦩꦫꦁ​ꦏꦺꦴꦮꦺ​ꦏꦁꦒꦺꦴ​ꦤꦼꦔꦼꦂꦫꦶ​ꦤꦺꦏ꧀ꦏꦺꦴꦮꦺ​ꦱꦲꦶꦏꦶ​ꦮꦶꦱ꧀ꦮꦺꦏ꧀ꦏꦺꦢꦺꦏ꧀ꦤꦺ꧉​ꦏꦸꦮꦶ​ꦢꦸꦢꦸ​ꦱꦸꦤꦠ꧀ꦱꦶꦁ​ꦭꦤ꧀ꦠꦂꦫꦤ꧀ꦠꦔꦤ꧀ꦤꦺ​ꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦱꦸꦤꦠ꧀ꦭꦤ꧀ꦠꦂꦫꦤ꧀ꦏꦿꦶꦱ꧀ꦡꦸꦱ꧀ ꦲꦮꦶꦠ꧀ꦢꦺꦏ꧀ꦤꦺꦱꦶꦁ​ꦩꦼꦢꦺꦴꦠ꧀ꦏꦺꦴꦮꦺ​ꦱꦁꦏꦏꦼꦱꦼꦤꦼꦔꦤ꧀ꦩꦸꦱꦶꦁ​ꦲꦭ​꧉​ ¹²ꦱꦏ꧀ꦧꦉꦁꦔꦺꦏꦺꦴꦮꦺ​ꦢꦶꦧꦥ꧀ꦠꦶꦱ꧀ꦲꦶꦁ​ꦧꦚꦸ​꧈​ꦏꦺꦴꦮꦺ​ꦏꦠꦸꦠ꧀ꦏꦏꦸꦧꦸꦂ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦭꦤ꧀ꦲꦸꦒ​ꦢꦶꦠꦔꦺꦏ꧀ꦏꦏꦺꦩꦼꦤꦺꦃ​ꦲꦶꦁ​ꦲꦸꦫꦶꦥ꧀ꦲꦚꦂ​꧈​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦔꦺꦏ꧀ꦏꦺꦏꦿꦶꦱ꧀ꦡꦸꦱ꧀ꦱꦁꦏꦥꦠꦶ​꧉​ꦏꦺꦴꦮꦺ​ꦱꦲꦶꦏꦶ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦲꦚꦂ​꧈​ꦗꦭꦂꦫꦤ꧀ꦏꦺꦴꦮꦺ​ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦩꦼꦢꦺꦴꦠ꧀ꦏꦺꦴꦮꦺ​ꦱꦁꦏꦥꦔ꧀ꦮꦱꦤꦺ​ꦲꦭ​꧈​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦤꦔꦺꦏ꧀ꦏꦺꦏꦿꦶꦱ꧀ꦡꦸꦱ꧀ꦱꦁꦏꦥꦠꦶ​꧉​ ¹³ꦥꦚ꧀ꦕꦺꦤ꧀ꦔꦺꦴꦤꦺꦴ​ꦏꦸꦮꦶ​ꦊꦭꦏꦺꦴꦤꦺ​ꦲꦸꦫꦶꦥ꧀ꦩꦸ​ꦏꦧꦺꦃ​꧉​ꦩꦲꦸꦤꦺ​ꦏꦺꦴꦮꦺ​ꦥꦢ​ꦩꦠꦶ​ꦲꦶꦁ​ꦏꦱꦸꦏ꧀ꦩꦤ꧀ ꦗꦭꦂꦫꦤ꧀ꦏꦺꦴꦮꦺ​ꦲꦺꦴꦫ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦏꦺꦴꦮꦺ​ꦪ​ꦲꦺꦴꦫ​ꦔꦼꦂꦠꦶ​ꦧꦧ꧀ꦲꦸꦫꦶꦥ꧀ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦸꦭꦤꦺ​ꦏꦺꦴꦮꦺ​ꦪ​ꦤꦩꦸꦁ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦲꦭ​ꦠꦼꦫꦸꦱ꧀꧈​ꦤꦁꦔꦶꦁ​ꦱꦼꦤꦗꦤ꧀ꦤ​ꦏꦺꦴꦮꦺ​ꦩꦲꦸꦤꦺ​ꦩꦠꦶ​ꦲꦶꦁ​ꦏꦱꦸꦏ꧀ꦩꦤ꧀ ꦱꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦸꦫꦶꦥ꧀ꦥꦏꦺꦏꦺꦴꦮꦺ​ꦧꦉꦁ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ ¹⁴ꦱꦭꦃꦲꦺ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦮꦶꦱ꧀ꦢꦶꦔꦥꦸꦫꦭꦤ꧀ꦭꦪꦁ​ꦠꦤ꧀ꦢꦱꦭꦃꦲꦺ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦶꦕꦺꦴꦫꦺꦏ꧀​ꦏꦧꦺꦃ​꧉​ꦥꦚ꧀ꦕꦺꦤ꧀ꦪ​ꦭꦪꦁ​ꦏꦸꦮꦶ​ꦭꦤ꧀ꦲꦶꦱꦶꦲꦶꦱꦶꦤꦺꦭꦪꦁ​ꦏꦸꦮꦶ​ꦱꦶꦁ​ꦚꦼꦚ꧀ꦕꦁ​ꦭꦤ꧀ꦚꦭꦃꦚꦭꦃꦲꦏꦺꦲꦮꦏ꧀ꦏꦺ​ꦢꦺꦮꦺ꧉​ꦤꦁꦔꦶꦁ​ꦱꦲꦶꦏꦶ​ꦏꦸꦮꦶ​ꦏꦧꦺꦃ​ꦮꦶꦱ꧀ꦢꦶꦱꦸꦮꦺꦏ꧀ꦏꦫꦺꦴ​ꦒꦸꦱ꧀ꦠꦶ​꧈​ ꦮꦶꦱ꧀ꦏꦠꦸꦠ꧀ꦢꦶꦥꦏꦸ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀꧈​ ¹⁵ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀ꦏꦺꦴꦤꦺꦴ​ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦼꦤꦁꦔꦏꦺꦥꦔ꧀ꦮꦱꦤꦺ​ꦫꦺꦴꦃꦫꦺꦴꦃ​ꦱꦶꦁ​ꦲꦭ​ꦏꦧꦺꦃ​꧉​ꦥꦔ꧀ꦮꦱꦥꦔ꧀ꦮꦱ​ꦩꦲꦸ​ꦏꦧꦺꦃ​ꦢꦶꦲꦺꦫꦺꦠ꧀ꦠꦺꦫꦺꦠ꧀ꦢꦶꦒꦮꦺ​ꦠꦺꦴꦤ꧀ꦠꦺꦴꦤ꧀ꦤꦤ꧀ꦲꦶꦁ​ꦱꦏ꧀ꦗꦼꦫꦺꦴꦤꦺꦲꦫꦏ꧀ꦲꦫꦏ꧀ꦏꦤ꧀ ꦏꦁꦒꦺꦴ​ꦠꦤ꧀ꦢꦤꦺꦏ꧀ꦏꦿꦶꦱ꧀ꦡꦸꦱ꧀ꦮꦶꦱ꧀ꦩꦼꦤꦁ​꧉​

꧋ꦥꦢ​ꦤꦸꦫꦸꦠ꧀ꦠ​ꦏꦿꦶꦱ꧀ꦡꦸꦱ꧀ ꦲꦺꦴꦫ​ꦥꦼꦂꦤꦠ꧀ꦠꦤ꧀ꦒꦮꦺꦪꦤ꧀ꦤꦺ​ꦩꦤꦸꦁꦱ​꧉​

¹⁶꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲꦗ​ꦥꦢ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦥꦼꦔꦶꦁ​ꦩꦁꦔꦤ꧀ꦲꦶꦏꦶ​ꦭꦤ꧀ꦥꦼꦔꦶꦁ​ꦔꦺꦴꦩ꧀ꦧꦺ​ꦏꦲꦺ​꧈​ꦏꦸꦢꦸ​ꦔꦸꦂꦩꦠ꧀ꦢꦶꦤ​ꦲꦶꦏꦶ​ꦲꦥ​ꦠꦲꦸꦤ꧀ꦏꦲꦺ​ꦲꦥ​ꦠꦁꦒꦭ꧀ꦲꦚꦂ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦲꦸꦒ​ꦩꦼꦏ꧀ꦱ​ꦔꦺꦴꦁꦏꦺꦴꦤ꧀ꦩꦤꦸꦠ꧀ꦥꦼꦂꦤꦠꦤ꧀ꦥꦼꦂꦤꦠꦤ꧀ꦤꦺꦢꦶꦤ​ꦱꦧꦠ꧀꧈​

¹⁷꧋ꦏꦸꦮꦶ​ꦲꦗ​ꦢꦶꦫꦺꦮꦺꦱ꧀ ꦗꦭꦂꦫꦤ꧀ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦏꦸꦮꦶ​ꦩꦲꦸ​ꦏꦧꦺꦃ​ꦤꦩꦸꦁ​ꦲꦪꦁꦔꦪꦁꦔꦺꦧꦫꦁ​ꦱꦶꦁ​ꦧꦏꦭ꧀ꦠꦼꦏ​꧉​ꦱꦶꦁ​ꦚꦠ​ꦠꦼꦤꦤ꧀ꦪ​ꦏꦿꦶꦱ꧀ꦡꦸꦱ꧀ꦢꦺꦮꦺ꧉​ꦢꦺꦏ꧀ꦤꦺꦱꦲꦶꦏꦶ​ꦮꦶꦱ꧀ꦠꦼꦏ​꧈​ꦩꦸꦭꦤꦺ​ꦏꦺꦴꦮꦺ​ꦲꦺꦴꦫ​ꦲꦸꦱꦃꦔ꧀ꦭꦏꦺꦴꦤ꧀ꦤꦶ​ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦱꦶꦁ​ꦭꦮꦱ꧀ꦏꦸꦮꦶ​꧉​ ¹⁸ꦤꦺꦏ꧀ꦲꦺꦤꦺꦁꦮꦺꦴꦁ​ꦚꦼꦥꦺꦭꦺꦏ꧀ꦏꦏꦺꦥꦽꦕꦪꦩꦸ​ꦭꦤ꧀ꦔꦏꦸꦲꦏꦸ​ꦤꦺꦏ꧀ꦲꦥꦶꦏ꧀ꦏꦺ​ꦔꦸꦁꦏꦸꦭ꧀ꦭꦶ​ꦏꦺꦴꦮꦺ​꧈​ꦗꦭꦂꦫꦤ꧀ꦢꦺꦏ꧀ꦤꦺꦗꦫꦺꦤꦺ​ꦤꦩ꧀ꦥ​ꦏꦮꦼꦫꦸꦃꦭꦤ꧀ꦩꦼꦤꦮ​ꦠꦼꦫꦸꦱ꧀ꦔꦺꦴꦩꦺꦴꦁꦔꦶꦏꦺꦴꦮꦺ​ꦏꦺꦴꦁꦏꦺꦴꦤ꧀ꦱꦶꦁ​ꦲꦤ꧀ꦢꦥ꧀ꦥꦱꦺꦴꦂꦧꦔꦼꦠ꧀ꦭꦤ꧀ꦏꦺꦴꦁꦏꦺꦴꦤ꧀ꦚꦼꦩ꧀ꦧꦃ​ꦩꦫꦁ​ꦩꦸꦭꦺꦏꦠ꧀ꦩꦸꦭꦺꦏꦠ꧀ ꦏꦺꦴꦮꦺ​ꦲꦗ​ꦒꦼꦊꦩ꧀꧈​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦤꦩꦸꦁ​ꦱꦺꦴꦩ꧀ꦧꦺꦴꦁ꧈​ꦤꦁꦔꦶꦁ​ꦲꦺꦴꦫ​ꦲꦺꦤꦺꦁꦮꦸꦗꦸꦠ꧀ꦠꦺ꧈​ꦥꦶꦏꦶꦂꦫꦤ꧀ꦤꦺ​ꦤꦩꦸꦁ​ꦕꦫ​ꦏꦢꦺꦴꦚꦃꦲꦤ꧀꧈​ ¹⁹ꦏꦸꦮꦶ​ꦲꦺꦴꦫ​ꦕꦺꦴꦕꦺꦴꦏ꧀​ꦏꦫꦺꦴ​ꦱꦼꦱꦼꦩ꧀ꦧꦃꦲꦤ꧀ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ꦏꦿꦶꦱ꧀ꦡꦸꦱ꧀ꦱꦶꦁ​ꦏꦸꦢꦸ​ꦢꦶꦒꦸꦒꦸ​꧈​ꦲꦮꦶꦠ꧀ꦢꦺꦏ꧀ꦤꦺꦱꦶꦁ​ꦢꦢꦶ​ꦱꦼꦱꦶꦫꦃꦲꦺ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦢꦺꦏ꧀ꦤꦺꦱꦶꦁ​ꦔꦿꦸꦩꦠ꧀ꦠꦶ​ꦭꦤ꧀ꦔꦸꦩ꧀ꦥꦸꦭ꧀ꦭꦏꦺꦲꦮꦏ꧀ꦱꦏ꧀ꦏꦸꦗꦸꦂꦧꦶꦱ​ꦢꦢꦶ​ꦱꦶꦗꦶ​ꦔꦁꦒꦺꦴ​ꦧꦭꦸꦁ​ꦭꦤ꧀ꦱꦸꦁꦱꦸꦩ꧀꧈​ꦢꦢꦶꦤꦺ​ꦧꦶꦱ​ꦩꦸꦤ꧀ꦢꦏ꧀ꦒꦼꦢꦺ​ꦏꦪ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦩꦠꦶ​ꦭꦤ꧀ꦲꦸꦫꦶꦥ꧀ꦏꦠꦸꦠ꧀ꦏꦿꦶꦱ꧀ꦡꦸꦱ꧀꧈​

^20-21꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦮꦶꦱ꧀ꦥꦢ​ꦏꦠꦸꦠ꧀ꦩꦠꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦭꦤ꧀ꦏꦺꦴꦮꦺ​ꦱꦲꦶꦏꦶ​ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦲꦚꦂ​꧉​ꦏꦺꦴꦮꦺ​ꦮꦶꦱ꧀ꦲꦺꦴꦫ​ꦲꦸꦱꦃꦔ꧀ꦭꦏꦺꦴꦤ꧀ꦤꦶ​ꦥꦼꦂꦤꦠ꧀ꦠꦤ꧀ꦭꦤ꧀ꦱꦶꦫꦶꦏ꧀ꦏꦤ꧀ꦱꦶꦁ​ꦢꦶꦥꦼꦂꦭꦺꦴꦏ꧀ꦏꦏꦺꦏꦫꦺꦴ​ꦮꦺꦴꦁ​ꦱꦶꦁ​ꦲꦺꦴꦫ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦔꦺꦴꦩꦺꦴꦁ:“ꦲꦗ​ꦤ꧀ꦢꦼꦩꦺꦏ꧀ꦲꦶꦏꦶ​꧈​”“ꦲꦗ​ꦔꦶꦕꦶꦥ꧀ꦥꦶ​ꦏꦸꦮꦶ​꧈​”ꦭꦤ꧀“ꦲꦗ​ꦚꦺꦁꦒꦺꦴꦭ꧀ꦲꦶꦏꦶ​ꦭꦤ꧀ꦏꦸꦮꦶ​!” ²²ꦏꦸꦮꦶ​ꦏꦧꦺꦃ​ꦭꦲꦸꦠ꧀ꦒꦮꦺꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠ​?ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦒꦮꦺ​ꦏꦸꦮꦶ​ꦏꦧꦺꦃ​ꦭꦲꦸꦠ꧀ꦱꦸꦥꦪ​ꦢꦶꦏꦁꦒꦺꦴꦏ꧀ꦏꦏꦺꦠ​?ꦤꦺꦏ꧀ꦮꦶꦱ꧀ꦢꦶꦏꦁꦒꦺꦴꦏ꧀ꦏꦏꦺꦪ​ꦮꦶꦱ꧀ꦲꦼꦤ꧀ꦠꦺꦏ꧀ꦠ​?ꦩꦸꦭꦤꦺ​꧈​ꦲꦗ​ꦥꦢ​ꦔꦿꦺꦮꦺꦱ꧀ꦩꦫꦁ​ꦥꦼꦂꦤꦠ꧀ꦠꦤ꧀ꦭꦤ꧀ꦱꦶꦫꦶꦏ꧀ꦏꦤ꧀ꦒꦮꦺꦪꦤ꧀ꦤꦺ​ꦩꦤꦸꦁꦱ​꧉​ ²³ꦥꦚ꧀ꦕꦺꦤ꧀ ꦤꦺꦏ꧀ꦢꦶꦱꦮꦁ​ꦧꦫꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦏꦺꦠꦺꦴꦏ꧀ꦏꦺ​ꦪ​ꦱꦼꦱꦼꦩ꧀ꦧꦃꦲꦤ꧀ꦱꦶꦁ​ꦲꦥꦶꦏ꧀ꦢꦺꦮꦺ꧈​ꦏꦪꦢꦺꦤꦺꦚꦼꦩ꧀ꦧꦃ​ꦩꦫꦁ​ꦩꦸꦭꦺꦏꦠ꧀ ꦲꦤ꧀ꦢꦥ꧀ꦥꦱꦺꦴꦂꦱꦶꦁ​ꦏ꧀ꦭꦶꦮꦠ꧀ꦭꦸꦩꦿꦃ​ꦭꦤ꧀ꦔꦗꦂ​ꦲꦮꦏ꧀ꦏꦺ​ꦢꦺꦮꦺ꧉​ꦤꦁꦔꦶꦁ​ꦱꦏ꧀ꦗꦤꦺꦲꦺꦴꦫ​ꦲꦺꦤꦺꦁꦥꦼꦂꦭꦸꦤꦺꦧ꧀ꦭꦱ꧀ ꦩꦭꦃ​ꦤꦩꦸꦁ​ꦩꦫꦏ꧀ꦏꦏꦺꦱꦺꦴꦩ꧀ꦧꦺꦴꦁ꧉​

↑ ↑ ↑

 

꧇​꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ꦩꦸꦭꦤꦺ​꧈​ꦢꦺꦴꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦤꦔꦺꦏ꧀ꦏꦺꦏꦿꦶꦱ꧀ꦡꦸꦱ꧀ꦱꦁꦏꦥꦠꦶ​꧈​ꦏꦺꦴꦮꦺ​ꦲꦸꦒ​ꦏꦠꦸꦠ꧀ꦏꦫꦺꦴ​ꦏꦿꦶꦱ꧀ꦡꦸꦱ꧀ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​꧉​ꦏꦺꦴꦮꦺ​ꦱꦲꦶꦏꦶ​ꦮꦶꦱ꧀​ꦤ꧀ꦢꦸꦮꦺꦲꦸꦫꦶꦥ꧀ꦲꦚꦂ​꧉​ꦥꦢ​ꦩꦶꦏꦶꦂꦫ​ꦧꦫꦁ​ꦱꦶꦁ​ꦤꦁꦱ꧀ꦮꦂꦒ​꧈​ꦤꦁꦥꦁꦒꦺꦴꦤ꧀ꦤꦤ꧀ꦤꦺ​ꦏꦿꦶꦱ꧀ꦡꦸꦱ꧀ ꦱꦶꦁ​ꦚ꧀ꦗꦒꦺꦴꦁꦤꦁꦠꦼꦔꦼꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²ꦥꦢ​ꦩꦶꦏꦶꦂꦫ​ꦱꦼꦩ꧀ꦧꦫꦁ​ꦱꦶꦁ​ꦤꦁꦱ꧀ꦮꦂꦒ​꧈​ꦲꦗ​ꦱꦶꦁ​ꦲꦶꦁ​ꦢꦺꦴꦚ​ꦏꦺꦤꦺ​꧉​ ³ꦲꦮꦶꦠ꧀ꦏꦺꦴꦮꦺ​ꦏꦸꦮꦶ​ꦮꦶꦱ꧀ꦩꦠꦶ​ꦏꦠꦸꦠ꧀ꦏꦫꦺꦴ​ꦏꦿꦶꦱ꧀ꦡꦸꦱ꧀ꦭꦤ꧀ꦲꦸꦫꦶꦥ꧀ꦲꦭ​ꦱꦶꦁ​ꦏꦪ​ꦩꦲꦸꦤꦺ​ꦏꦸꦮꦶ​ꦮꦶꦱ꧀ꦢꦶꦫꦩ꧀ꦥꦸꦁꦔꦏꦺ꧉​ꦲꦸꦫꦶꦥ꧀ꦩꦸ​ꦱꦲꦶꦏꦶ​ꦲꦶꦏꦶ​ꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀ ꦏꦱꦶꦩ꧀ꦥꦼꦤ꧀ꦲꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁴ꦤꦩꦸꦁ​ꦏꦿꦶꦱ꧀ꦡꦸꦱ꧀ꦢꦺꦮꦺꦱꦶꦁ​ꦧꦶꦱ​ꦔꦼꦏꦺꦏ꧀ꦏꦶꦲꦸꦫꦶꦥ꧀ꦏꦱ꧀ꦮꦂꦒꦤ꧀ꦏꦸꦮꦶ​꧉​ꦩꦸꦭꦤꦺ​꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦠꦼꦏ​ꦩꦼꦤꦺꦃ​꧈​ꦏꦧꦺꦃ​ꦮꦺꦴꦁ​ꦧꦏꦭ꧀ꦮꦼꦫꦸꦃ​ꦲꦸꦫꦶꦥ꧀ꦲꦚꦂ​ꦲꦶꦏꦶ​ꦭꦤ꧀ꦏꦺꦴꦮꦺ​ꦧꦏꦭ꧀ꦏꦠꦸꦠ꧀ꦏꦲꦼꦊꦩ꧀ꦧꦉꦁ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​

꧋ꦲꦸꦫꦶꦥ꧀ꦱꦶꦁ​ꦲꦚꦂ​ꦭꦤ꧀ꦲꦸꦫꦶꦥ꧀ꦱꦶꦁ​ꦭꦮꦱ꧀꧈​

⁵꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦩꦼꦢꦺꦴꦠ꧀ꦏꦼꦱꦼꦤꦼꦁꦔꦤ꧀ꦱꦶꦁ​ꦲꦭ​ꦏꦪꦢꦺꦤꦺ:ꦭꦏꦸ​ꦧꦺꦢꦁ꧈​ꦔ꧀ꦭꦏꦺꦴꦤ꧀ꦤꦶ​ꦱꦺꦏ꧀ꦱꦶꦁ​ꦲꦺꦴꦫ​ꦭꦸꦩꦿꦃ​꧈​ꦔꦼꦥꦺꦔꦶꦤ꧀ꦤꦶꦱꦺꦏ꧀ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀ꦭꦤ꧀ꦭꦏꦸ​ꦩꦸꦂꦏ꧉​ꦭꦏꦸ​ꦩꦸꦂꦏꦏꦸꦮꦶ​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦥꦚꦼꦩ꧀ꦧꦃ​ꦩꦫꦁ​ꦧꦿꦲꦭ​꧉​ ⁶ꦏ꧀ꦭꦏꦸꦮꦤ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦤꦩꦸꦁ​ꦤꦼꦏꦏ꧀ꦏꦏꦺꦤꦼꦱꦸꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ^7-8ꦩ꧀ꦧꦶꦪꦺꦤ꧀ꦏꦺꦴꦮꦺ​ꦥꦚ꧀ꦕꦺꦤ꧀​ꦤ꧀ꦢꦸꦮꦺꦤ꧀ꦤꦶ​ꦏ꧀ꦭꦏꦸꦮꦤ꧀ꦱꦶꦁ​ꦏꦪ​ꦔꦺꦴꦤꦺꦴ​꧈​ꦤꦁꦔꦶꦁ​ꦱꦲꦶꦏꦶ​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦧꦸꦮꦁꦏꦧꦺꦃ​꧈​ꦏꦪꦢꦺꦤꦺ:ꦤꦼꦱꦸ​꧈​ꦗꦺꦁꦏꦺꦭ꧀ ꦫꦱ​ꦱꦼꦔꦶꦠ꧀ ꦥꦼꦔꦺꦴꦩꦺꦴꦁꦔꦤ꧀ꦲꦭ​ꦧꦧ꧀ꦭꦶꦪꦤꦺ​ꦭꦤ꧀ꦠꦼꦩ꧀ꦧꦸꦁ​ꦱꦶꦁ​ꦏꦺꦴꦠꦺꦴꦂ​꧉​

⁹꧋ꦲꦸꦒ​꧈​ꦲꦗ​ꦥꦢ​ꦒꦺꦴꦫꦺꦴꦃ​ꦩꦫꦁ​ꦱꦏ꧀ꦥꦢꦥꦢ꧈​ꦲꦮꦶꦠ꧀ꦲꦸꦫꦶꦥ꧀ꦱꦶꦁ​ꦭꦮꦱ꧀ꦭꦤ꧀​ꦏ꧀ꦭꦏꦸꦮꦤ꧀ꦱꦶꦁ​ꦭꦮꦱ꧀ꦮꦶꦱ꧀ꦲꦩ꧀ꦧꦺꦴꦏ꧀ꦧꦸꦮꦁ꧉​ ¹⁰ꦏꦺꦴꦮꦺ​ꦱꦲꦶꦏꦶ​ꦮꦶꦱ꧀ꦢꦢꦶ​ꦮꦺꦴꦁ​ꦲꦚꦂ​ꦱꦶꦁ​ꦱꦸꦮꦶꦱꦸꦮꦶꦱꦼꦭꦺꦴꦠ꧀ꦩꦢꦫꦸꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔ꧀ꦒꦮꦺ​ꦏꦺꦴꦮꦺ​꧉​ꦩꦸꦭꦤꦺ​꧈​ꦱꦸꦮꦶꦱꦸꦮꦶꦏꦺꦴꦮꦺ​ꦲꦸꦒ​ꦩꦸꦤ꧀ꦢꦏ꧀ꦢꦸꦤꦸꦁꦩꦫꦁ​ꦲꦥ​ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦲꦸꦫꦶꦥ꧀ꦩꦸ​꧉​ ¹¹ꦢꦢꦶꦤꦺ​꧈​ꦗꦭꦂꦫꦤ꧀ꦏꦺꦴꦮꦺ​ꦏꦧꦺꦃ​ꦮꦶꦱ꧀ꦢꦢꦶ​ꦮꦺꦴꦁ​ꦲꦚꦂ​꧈​ꦮꦶꦱ꧀ꦲꦺꦴꦫ​ꦢꦢꦶ​ꦱꦼꦧꦧ꧀ꦩꦼꦤꦺꦃ​ꦏꦺꦴꦮꦺ​ꦏꦸꦮꦶ​ꦢꦸꦢꦸ​ꦮꦺꦴꦁ​ꦙꦸꦲꦥ​ꦮꦺꦴꦁ​ꦙꦸ꧈​ꦏꦺꦴꦮꦺ​ꦏꦸꦮꦶ​ꦱꦸꦤꦠ꧀ꦲꦥ​ꦲꦺꦴꦫ​꧈​ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦭꦶꦪ​ꦧꦁꦱ​ꦲꦥ​ꦮꦺꦴꦁ​ꦲꦺꦴꦫ​ꦔꦼꦂꦠꦶ​ꦠꦠꦕꦫ​꧈​ꦏꦺꦴꦮꦺ​ꦏꦸꦮꦶ​ꦱ꧀ꦭꦥ꦳꧀ꦲꦥ​ꦮꦺꦴꦁ​ꦩꦼꦂꦢꦺꦏ꧉​ꦏꦸꦮꦶ​ꦩꦲꦸ​ꦏꦧꦺꦃ​ꦮꦶꦱ꧀​ꦧ꧀ꦭꦱ꧀ꦲꦺꦴꦫ​ꦢꦢꦶ​ꦱꦼꦧꦧ꧀꧈​ꦱꦶꦁ​ꦢꦢꦶ​ꦱꦼꦧꦧ꧀ꦪ​ꦏꦿꦶꦱ꧀ꦡꦸꦱ꧀ ꦱꦶꦁ​ꦲꦸꦫꦶꦥ꧀ꦲꦶꦁ​ꦏꦺꦴꦮꦺ​ꦏꦧꦺꦃ​꧉​

¹²꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦮꦶꦱ꧀ꦢꦶꦥꦶꦭꦶꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦏꦺꦴꦮꦺ​ꦩꦺꦭꦸ​ꦢꦢꦶ​ꦧꦿꦪꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦢꦶꦠꦿꦺꦱ꧀ꦤꦤ꧀ꦤꦶꦠꦼꦤꦤ꧀꧈​ꦩꦸꦭꦤꦺ​꧈​ꦱꦲꦶꦏꦶ​ꦏꦺꦴꦮꦺ​ꦏꦸꦢꦸ​ꦤ꧀ꦢꦸꦮꦺꦤ꧀ꦤꦶ​ꦩꦼꦭꦱ꧀ꦭꦤ꧀ꦏꦸꦢꦸ​ꦒꦼꦩꦠꦶ​ꦩꦫꦁ​ꦭꦶꦪꦤꦺ​꧉​ꦲꦗ​ꦤ꧀ꦢꦸꦮꦺꦤ꧀ꦤꦶ​ꦥꦶꦏꦶꦂꦫꦤ꧀ꦤꦺꦏ꧀ꦏꦺꦴꦮꦺ​ꦏꦸꦮꦶ​ꦲꦥꦶꦏ꧀ꦏꦺ​ꦔꦸꦁꦏꦸꦭ꧀ꦭꦶ​ꦭꦶꦪꦤꦺ​꧈​ꦤꦁꦔꦶꦁ​ꦱꦶꦁ​ꦲꦤ꧀ꦢꦥ꧀ꦥꦱꦺꦴꦂ꧈​ꦱꦶꦁ​ꦲꦭꦸꦱ꧀ꦭꦤ꧀ꦱꦶꦁ​ꦱꦧꦂ​꧉​ ¹³ꦥꦢ​ꦠꦸꦭꦸꦁꦠꦶꦤꦸꦭꦸꦁꦔ​ꦭꦤ꧀ꦥꦢ​ꦔꦥꦸꦫꦲ​ꦩꦫꦁ​ꦱꦏ꧀ꦥꦢꦥꦢ꧈​ꦤꦺꦏ꧀ꦱꦭꦃꦱꦶꦗꦶꦲꦺꦤꦺꦁꦱꦶꦁ​ꦤ꧀ꦢꦸꦮꦺꦱꦭꦃ​꧉​ꦏꦺꦴꦮꦺ​ꦏꦸꦢꦸ​ꦔꦥꦸꦫ​ꦩꦫꦁ​ꦭꦶꦪꦤꦺ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦮꦶꦱ꧀ꦔꦥꦸꦫ​ꦩꦫꦁ​ꦏꦺꦴꦮꦺ​꧉​ ¹⁴ꦭꦤ꧀ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺ꧈​ꦱꦶꦁ​ꦏꦸꦢꦸ​ꦲꦶꦁ​ꦱꦏ꧀​ꦤ꧀ꦢꦸꦮꦸꦂꦫꦺꦱꦼꦩ꧀ꦧꦫꦁ​ꦲꦶꦏꦶ​ꦪ​ꦲꦺꦴꦫ​ꦭꦶꦪ​ꦏꦼꦗꦧ​ꦏꦠꦿꦺꦱ꧀ꦤꦤ꧀꧈​ꦲꦮꦶꦠ꧀ꦤꦺꦏ꧀ꦏꦺꦴꦮꦺ​ꦥꦢ​ꦠꦿꦺꦱ꧀ꦤꦩꦫꦁ​ꦱꦏ꧀ꦥꦢꦥꦢ꧈​ꦏꦺꦴꦮꦺ​ꦧꦶꦱ​ꦲꦸꦫꦶꦥ꧀ꦫꦸꦏꦸꦤ꧀ꦧꦼꦧꦉꦁꦔꦤ꧀ꦢꦢꦶ​ꦱꦶꦗꦶ​꧉​ ¹⁵ꦏꦿꦶꦱ꧀ꦡꦸꦱ꧀ꦮꦶꦱ꧀ꦤꦼꦤ꧀ꦠꦽꦩꦏꦺꦲꦸꦫꦶꦥ꧀ꦩꦸ​꧈​ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦲꦸꦫꦶꦥ꧀ꦧꦼꦧꦉꦁꦔꦤ꧀ꦱꦶꦁ​ꦠꦼꦤ꧀ꦠꦽꦩ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀ꦩꦁꦒꦶꦭ꧀ꦏꦺꦴꦮꦺ​ꦱꦸꦥꦪ​ꦥꦢ​ꦫꦸꦏꦸꦤ꧀ꦧꦼꦧꦉꦁꦔꦤ꧀ ꦲꦮꦶꦠ꧀ꦏꦺꦴꦮꦺ​ꦮꦶꦱ꧀ꦢꦢꦶ​ꦧꦢꦤ꧀ꦱꦶꦗꦶ​꧉​ꦲꦗ​ꦥꦢ​ꦭꦭꦶ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁶ꦏꦺꦴꦮꦺꦏꦸꦢꦸꦔ꧀ꦭꦸꦩꦸꦃꦲꦶꦱꦸꦥꦪꦥꦔꦼꦂꦠꦶꦩꦸꦧꦧ꧀ꦥꦶꦠꦸꦠꦸꦂꦫꦺꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦧꦶꦱꦩꦸꦤ꧀ꦢꦏ꧀ꦠꦼꦫꦸꦱ꧀ꦭꦤ꧀​ꦩ꧀ꦧꦺꦴꦏ꧀ꦠꦸꦫꦸꦠ꧀ꦠꦼꦤꦤ꧀꧈​ꦩꦸꦭꦤꦺ꧈​ꦱꦏ꧀ꦲꦶꦤ꧀ꦠꦼꦂꦫꦶꦤ꧀ꦠꦼꦂꦩꦸꦥꦢꦮꦸꦭꦁꦔꦤꦭꦤ꧀ꦲꦺꦭꦶꦁꦔꦤꦱꦏ꧀ꦥꦢꦥꦢ꧉​ꦥꦢꦩꦼꦩꦸꦗꦶꦪꦒꦸꦱ꧀ꦠꦶꦄꦭ꧀ꦭꦃꦱꦏ꧀ꦲꦠꦶꦩꦸ꧈​ꦔꦁꦒꦺꦴꦱꦶꦔꦶꦱꦶꦁꦱꦁꦏꦏꦶꦠꦧ꧀ꦱꦸꦕꦶꦭꦤ꧀ꦱꦶꦔꦶꦱꦶꦁꦔ꧀ꦭꦸꦲꦸꦂꦫꦏꦺꦗꦼꦤꦼꦁꦔꦺꦒꦸꦱ꧀ꦠꦶꦄꦭ꧀ꦭꦃ꧉​ꦩꦼꦩꦸꦗꦶꦪꦒꦸꦱ꧀ꦠꦶꦄꦭ꧀ꦭꦃꦲꦸꦒꦔꦁꦒꦺꦴꦱꦶꦔꦶꦱꦶꦁꦢꦶꦲꦼꦢꦸꦤ꧀ꦤꦏꦺꦏꦫꦺꦴꦫꦺꦴꦃꦱꦸꦕꦶꦲꦶꦁꦲꦠꦶꦩꦸ꧉​ꦢꦶꦏꦺꦠꦺꦴꦏ꧀ꦏꦏꦺꦔꦁꦒꦺꦴꦱꦶꦔꦶꦱꦶꦔꦶꦏꦸꦮꦶꦤꦺꦏ꧀ꦏꦺꦴꦮꦺꦩꦠꦸꦂꦏꦼꦱꦸꦮꦸꦤ꧀ꦠꦼꦤꦤ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉​ ¹⁷ꦭꦤ꧀ꦩꦼꦤꦺꦃ​꧈​ꦲꦶꦁ​ꦱꦼꦩ꧀ꦧꦫꦁ​ꦥꦽꦏꦫ​ꦱꦶꦁ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁ​ꦭꦤ꧀ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧈​ꦢꦶꦏꦺꦠꦺꦴꦏ꧀ꦏꦏꦺꦤꦺꦏ꧀ꦏꦺꦴꦮꦺ​ꦮꦶꦱ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦲꦗ​ꦥꦢ​ꦭꦭꦶ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀​ꦚ꧀ꦭꦩꦼꦠ꧀ꦠꦏꦺꦲꦮꦏ꧀ꦏꦺ​ꦢꦺꦮꦺ꧉​

꧋ꦲꦸꦫꦸꦠ꧀ꦠꦤ꧀ꦏꦁꦒꦺꦴ​ꦧꦿꦪꦠ꧀ꦏꦿꦶꦱ꧀ꦠꦼꦤ꧀꧈​

¹⁸꧋ꦱꦲꦶꦏꦶ​ꦲꦏꦸ​ꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦏꦺꦧꦧ꧀ꦲꦸꦫꦶꦥ꧀ꦧꦼꦧꦉꦁꦔꦤ꧀ꦲꦶꦁ​ꦱꦏ꧀ꦗꦼꦫꦺꦴꦤꦺꦲꦺꦴꦩꦃ​꧉​ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦮꦺꦢꦺꦴꦏ꧀ ꦏꦺꦴꦮꦺ​ꦏꦸꦢꦸ​ꦩꦤꦸꦠ꧀ꦩꦫꦁ​ꦧꦺꦴꦗꦺꦴꦩꦸ​꧉​ꦤꦺꦏ꧀ꦮꦺꦴꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦥꦤ꧀ꦠꦼꦱ꧀ꦱꦺ​ꦔꦺꦴꦤꦺꦴ​꧉​

¹⁹꧋ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦭꦤꦁ​꧈​ꦏꦺꦴꦮꦺ​ꦏꦸꦢꦸ​ꦤꦿꦺꦱ꧀ꦤꦤ꧀ꦤꦶꦧꦺꦴꦗꦺꦴꦩꦸ​ꦭꦤ꧀ꦲꦗ​ꦥꦶꦱꦤ꧀ꦥꦶꦱꦤ꧀​ꦤ꧀ꦢꦢꦺꦏ꧀ꦏꦏꦺꦥꦼꦫꦶꦤꦺꦲꦠꦶꦤꦺ​꧉​

²⁰꧋ꦧꦺꦴꦕꦃꦧꦺꦴꦕꦃ​꧈​ꦏꦺꦴꦮꦺ​ꦏꦸꦢꦸ​ꦩꦤꦸꦠ꧀ꦩꦫꦁ​ꦮꦺꦴꦁ​ꦠꦸꦮꦩꦸ​ꦲꦶꦁ​ꦲꦥ​ꦮꦲꦺ​꧈​ꦲꦮꦶꦠ꧀ꦒꦸꦱ꧀ꦠꦶ​ꦱꦼꦤꦼꦁ​ꦤꦺꦏ꧀ꦲꦤꦏ꧀ꦲꦤꦏ꧀ꦩꦤꦸꦠ꧀꧈​

²¹꧋ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦱꦶꦁ​ꦮꦶꦱ꧀​ꦤ꧀ꦢꦸꦮꦺꦲꦤꦏ꧀ ꦲꦗ​ꦔ꧀ꦒꦮꦺ​ꦭꦫꦤꦺ​ꦲꦠꦶꦤꦺ​ꦲꦤꦏ꧀ꦲꦤꦏ꧀ꦩꦸ​꧉​ꦩꦼꦁꦏꦺꦴ​ꦤ꧀ꦢꦏ꧀ꦥꦢ​ꦱꦼꦩ꧀ꦥ꧀ꦭꦏ꧀꧈​

²²꧋ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦱꦶꦁ​ꦱ꧀ꦭꦥ꦳꧀ ꦏꦺꦴꦮꦺ​ꦲꦸꦒ​ꦏꦸꦢꦸ​ꦩꦤꦸꦠ꧀ꦩꦫꦁ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦲꦸꦫꦶꦥ꧀ꦩꦸ​ꦲꦶꦁ​ꦢꦺꦴꦚ​ꦏꦺꦤꦺ​꧉​ꦏꦺꦴꦮꦺ​ꦏꦸꦢꦸ​ꦩꦤꦸꦠ꧀ꦲꦶꦁ​ꦥꦽꦏꦫ​ꦲꦥ​ꦮꦲꦺ​꧈​ꦲꦺꦴꦫ​ꦤꦩꦸꦁ​ꦤꦺꦏ꧀ꦏꦺꦴꦮꦺ​ꦢꦶꦠꦸꦁꦒꦺꦴꦤ꧀ꦤꦶ​꧈​ꦤꦩꦸꦁ​ꦔ꧀ꦒꦺꦴꦭꦺꦏ꧀ꦊꦩ꧀ꦊꦩ꧀ꦩꦤ꧀ꦮꦲꦺ​꧈​ꦲꦺꦴꦫ​꧈​ꦤꦁꦔꦶꦁ​ꦩꦤꦸꦠ꧀ꦱꦏ꧀ꦲꦠꦶꦩꦸ​꧈​ꦗꦭꦂꦫꦤ꧀ꦏꦺꦴꦮꦺ​ꦔꦗꦺꦤ꧀ꦤꦶ​ꦩꦫꦁ​ꦒꦸꦱ꧀ꦠꦶ​꧉​

²³꧋ꦲꦶꦁ​ꦥꦼꦁꦒꦮꦺꦏꦸꦲꦥ​ꦮꦲꦺ​꧈​ꦚꦩꦫꦶꦤꦺꦒꦮꦺ​ꦏꦫꦺꦴ​ꦱꦼꦤꦼꦁ​꧈​ꦢꦶꦲꦁꦒꦼꦥ꧀ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​꧈​ꦲꦺꦴꦫ​ꦏꦁꦒꦺꦴ​ꦩꦤꦸꦁꦱ​꧉​ ²⁴ꦔꦼꦂꦠꦶꦪ​ꦤꦺꦏ꧀ꦒꦸꦱ꧀ꦠꦶ​ꦢꦺꦮꦺꦱꦶꦁ​ꦧꦏꦭ꧀ꦔꦸꦥꦃꦲꦶꦏꦺꦴꦮꦺ​꧉​ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦪ​ꦧꦏꦭ꧀ꦲꦩ꧀ꦧꦺꦴꦏ꧀ꦠꦩ꧀ꦥ​ꦲꦸꦒ​꧉​ꦲꦮꦶꦠ꧀ꦏꦺꦴꦮꦺ​ꦏꦸꦮꦶ​ꦱꦏ꧀ꦗꦤꦺꦲꦺꦴꦫ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦩꦤꦸꦁꦱ​꧈​ꦤꦁꦔꦶꦁ​ꦏꦁꦒꦺꦴ​ꦏꦿꦶꦱ꧀ꦡꦸꦱ꧀ꦢꦺꦮꦺ꧉​ ²⁵ꦩꦸꦭꦤꦺ​꧈​ꦱꦥ​ꦱꦶꦁ​ꦤꦼꦫꦸꦱ꧀ꦱꦏꦺꦱꦭꦃꦲꦺ​꧈​ꦲꦗ​ꦏꦒꦺꦠ꧀ꦤꦺꦏ꧀ꦧꦏꦭ꧀ꦤꦩ꧀ꦥ​ꦲꦸꦥꦃꦲꦺꦲꦸꦒ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦥꦶꦭꦶꦃꦱꦶꦃ꧉​

↑ ↑ ↑

 

꧇​꧔꧇​ ¹꧋ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦱꦶꦁ​ꦤ꧀ꦢꦸꦮꦺꦱ꧀ꦭꦥ꦳꧀!ꦏꦺꦴꦮꦺ​ꦏꦸꦢꦸ​ꦠꦸꦩꦶꦤ꧀ꦢꦏ꧀ꦱꦶꦁ​ ꦧꦼꦤꦼꦂ​ꦩꦫꦁ​ꦱ꧀ꦭꦥ꦳꧀ꦩꦸꦭꦤ꧀ꦏꦸꦢꦸ​ꦲꦩ꧀ꦧꦺꦴꦏ꧀ꦫꦸꦩꦠꦶ​ꦱꦶꦁ​ꦲꦥꦶꦏ꧀꧈​ꦥꦢ​ꦲꦺꦭꦶꦁꦔ​ꦤꦺꦏ꧀ꦏꦺꦴꦮꦺ​ꦲꦸꦒ​ꦲꦺꦤꦺꦁꦱꦶꦁ​ꦤ꧀ꦢꦸꦮꦺ꧈​ꦪꦏꦸꦮꦶ​ꦒꦸꦱ꧀ꦠꦶꦩꦸ​ꦤꦁꦱ꧀ꦮꦂꦒ​꧉​

꧋ꦥꦼꦁꦔꦺꦭꦶꦁꦔꦺꦭꦶꦁ​ꦱꦶꦁ​ꦥꦼꦤ꧀ꦠꦶꦁ​꧉​

²꧋ꦥꦫ​ꦱꦼꦢꦸꦭꦸꦂꦏꦸ​ꦏꦧꦺꦃ​꧈​ꦲꦗ​ꦭꦺꦫꦺꦤ꧀ꦲꦼꦁꦒꦺꦴꦤ꧀ꦩꦸ​ꦤ꧀ꦢꦼꦢꦺꦴꦔ​꧉​ꦥꦢ​ꦱꦶꦁ​ꦲꦮꦱ꧀ꦭꦤ꧀ꦱꦶꦁ​ꦲꦠꦶꦲꦠꦶꦭꦤ꧀ꦲꦗ​ꦭꦭꦶ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦸꦭꦸꦁꦔꦶ​ꦏꦺꦴꦮꦺ​꧉​ ³ꦲꦏꦸ​ꦲꦸꦒ​ꦢꦶꦢꦺꦴꦔꦏ꧀ꦏꦏꦺ꧈​ꦱꦸꦥꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦒꦮꦺꦏ꧀ꦏꦏꦺꦢꦭꦤ꧀ꦲꦼꦁꦒꦺꦴꦤ꧀ꦏꦸ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧉​ꦢꦢꦶꦤꦺ​ꦲꦏꦸ​ꦧꦶꦱ​ꦤ꧀ꦢꦸꦤꦸꦁꦔꦏꦺꦩꦫꦁ​ꦏꦧꦺꦃ​ꦮꦺꦴꦁ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦁꦏꦺꦴꦤ꧀ꦏꦿꦶꦱ꧀ꦡꦸꦱ꧀ꦠꦼꦏ​ꦤꦁꦗꦒꦠ꧀ ꦠꦸꦗꦸꦮꦤ꧀ꦤꦺꦤꦸꦭꦸꦁꦔꦶ​ꦏꦧꦺꦃ​ꦮꦺꦴꦁ​꧈​ꦲꦺꦴꦫ​ꦤꦩꦸꦁ​ꦮꦺꦴꦁ​ꦙꦸ꧉​ꦲꦶꦏꦶ​ꦮꦼꦮꦢꦶ​ꦱꦶꦁ​ꦩꦲꦸꦤꦺ​ꦏꦱꦶꦩ꧀ꦥꦼꦤ꧀ ꦤꦁꦔꦶꦁ​ꦱꦲꦶꦏꦶ​ꦏꦸꦢꦸ​ꦠꦏ꧀ꦒꦼꦭꦂꦫꦏꦺ꧉​ꦏꦸꦮꦶ​ꦗꦭꦂꦫꦤ꧀ꦤꦺ​ꦲꦏꦸ​ꦱꦲꦶꦏꦶ​ꦢꦶꦱꦼꦠꦿꦥ꧀ꦲꦶꦏꦶ​꧉​ ⁴ꦩꦸꦭꦤꦺ​꧈​ꦲꦏꦸ​ꦢꦶꦢꦺꦴꦔꦏ꧀ꦏꦏꦺꦠꦼꦤꦤ꧀ ꦱꦸꦥꦪ​ꦲꦏꦸ​ꦧꦶꦱ​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦧꦧ꧀ꦲꦶꦏꦶ​ꦏꦪ​ꦱꦶꦁ​ꦱꦏ꧀ꦩꦼꦱ꧀ꦠꦶꦤꦺꦩꦫꦁ​ꦮꦺꦴꦁꦮꦺꦴꦁ​꧉​

^5-6꧋ꦠꦶꦤ꧀ꦢꦏ꧀ꦠꦤ꧀ꦢꦸꦏ꧀ꦩꦸꦲꦶꦁꦠꦼꦔꦃꦲꦺꦮꦺꦴꦁꦱꦶꦁꦲꦺꦴꦫꦥꦽꦕꦪꦏꦸꦢꦸꦱꦶꦁꦥꦤ꧀ꦠꦼꦱ꧀ ꦔꦁꦒꦺꦴꦏꦢꦸꦤꦸꦁꦔꦤ꧀ꦭꦤ꧀ꦱꦧꦼꦤ꧀ꦏꦼꦭꦸꦁꦒꦂꦫꦤ꧀ꦏꦸꦢꦸꦩ꧀ꦧꦺꦴꦏ꧀ꦏꦁꦒꦺꦴꦏ꧀ꦏꦏꦺꦱꦶꦁꦲꦥꦶꦏ꧀ ꦏꦁꦒꦺꦴꦔꦺꦠꦺꦴꦏ꧀ꦏꦏꦺꦤꦺꦏ꧀ꦏꦿꦶꦱ꧀ꦡꦸꦱ꧀ꦏꦼꦥꦺꦔꦶꦤ꧀ꦤꦸꦭꦸꦁꦔꦶꦏꦧꦺꦃꦮꦺꦴꦁ꧉​ꦤꦺꦏ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴꦮꦺꦴꦁꦮꦺꦴꦁꦏꦸꦮꦶꦠꦼꦩ꧀ꦧꦸꦁꦩꦸꦏꦸꦢꦸꦱꦶꦁꦱꦼꦢꦼꦥ꧀ꦭꦤ꧀ꦩꦶꦒꦸꦤꦤꦶ꧉​ꦢꦢꦶꦤꦺꦤꦺꦏ꧀ꦲꦺꦤꦺꦁꦱꦶꦁꦠꦏꦺꦴꦤ꧀ꦲꦥꦮꦲꦺꦏꦺꦴꦮꦺꦧꦶꦱꦚꦲꦸꦂꦫꦶꦱꦶꦁꦱꦏ꧀ꦩꦼꦱ꧀ꦠꦶꦤꦺ꧉​

꧋ꦏꦧꦂꦱ꧀ꦭꦩꦼꦠ꧀ꦭꦤ꧀ꦥꦼꦤꦸꦠꦸꦥ꧀꧈​

⁷꧋ꦥꦫ​ꦱꦼꦢꦸꦭꦸꦂ​꧈​ꦱꦼꦢꦸꦭꦸꦂ​ꦡꦶꦏꦶꦏꦸꦱ꧀ꦠꦏ꧀ꦏꦺꦴꦁꦏꦺꦴꦤ꧀ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦏꦿꦸꦔꦸ​ꦱꦁꦏꦢꦺꦏ꧀ꦤꦺꦧꦧ꧀ꦏꦼꦥꦿꦶꦪꦺ​ꦏꦧꦂꦫꦺ​ꦏꦫꦺꦴ​ꦲꦏꦸ​ꦲꦶꦏꦶ​꧉​ꦱꦼꦢꦸꦭꦸꦂ​ꦡꦶꦏꦶꦏꦸꦱ꧀ꦲꦶꦏꦶ​ꦠꦏ꧀ꦠꦿꦺꦱ꧀ꦤꦤ꧀ꦤꦶꦠꦼꦤꦤ꧀ ꦢꦺꦏ꧀ꦤꦺꦗꦤ꧀ꦠꦼꦩꦼꦤ꧀ꦔꦿꦺꦮꦁꦔꦶ​ꦲꦏꦸ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​꧉​ ⁸ꦩꦸꦭꦤꦺ​ꦲꦏꦸ​ꦪ​ꦔꦺꦴꦁꦏꦺꦴꦤ꧀ꦢꦺꦏ꧀ꦤꦺꦤꦶꦭꦶꦏ꧀ꦏꦶ​ꦏꦺꦴꦮꦺ​꧉​ꦢꦺꦏ꧀ꦤꦺꦧꦶꦱ​ꦔꦧꦂꦫꦶ​ꦏꦺꦴꦮꦺ​ꦧꦧ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦁ​ꦤꦁꦬꦸꦩ꧀ꦏꦺꦤꦺ​ꦭꦤ꧀ꦢꦺꦏ꧀ꦤꦺꦲꦸꦒ​ꦧꦶꦱ​ꦲꦩ꧀ꦧꦔꦸꦤ꧀ꦭꦤ꧀​ꦔ꧀ꦭꦶꦥꦸꦂ​ꦲꦠꦶꦩꦸ​ꦏꦧꦺꦃ​꧉​ ⁹ꦱꦼꦢꦸꦭꦸꦂ​ꦡꦶꦏꦶꦏꦸꦱ꧀ꦧꦏꦭ꧀ꦢꦶꦏꦚ꧀ꦕꦤꦶ​ꦏꦫꦺꦴ​ꦱꦼꦢꦸꦭꦸꦂ​ꦎꦤꦺꦱꦶꦩꦸꦱ꧀꧈​ꦏꦺꦴꦮꦺ​ꦩꦼꦱ꧀ꦠꦶꦏꦼꦤꦭ꧀ꦎꦤꦺꦱꦶꦩꦸꦱ꧀ ꦢꦺꦏ꧀ꦤꦺꦪ​ꦱꦁꦏꦏꦺꦴꦭꦺꦴꦱꦺ​ꦏꦺꦴꦤꦺꦴ​꧉​ꦲꦶꦏꦶ​ꦪ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶꦭꦤ꧀ꦢꦺꦏ꧀ꦤꦺꦠꦼꦩꦼꦤ꧀ꦔꦿꦺꦮꦁꦔꦶ​ꦲꦏꦸ​ꦤꦁꦏꦺꦤꦺ​꧉​ꦱꦼꦢꦸꦭꦸꦂ​ꦭꦺꦴꦫꦺꦴ​ꦲꦶꦏꦶ​ꦱꦶꦁ​ꦧꦏꦭ꧀ꦔꦧꦂꦫꦶ​ꦏꦺꦴꦮꦺ​ꦧꦧ꧀ꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​ꦤꦁꦬꦸꦩ꧀ꦏꦺꦤꦺ​꧉​

¹⁰꧋ꦱꦼꦢꦸꦭꦸꦂ​ꦄꦫꦶꦱ꧀ꦠꦂꦏꦸꦱ꧀ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​꧉​ꦢꦺꦏ꧀ꦤꦺꦢꦶꦱꦼꦠꦿꦥ꧀ꦏꦫꦺꦴ​ꦲꦏꦸ​ꦤꦁꦏꦺꦤꦺ​꧉​ꦏꦧꦂ​ꦱ꧀ꦭꦩꦼꦠ꧀ꦲꦸꦒ​ꦱꦁꦏꦱꦼꦢꦸꦭꦸꦂ​ꦩꦂꦏꦸꦱ꧀꧈​ꦱꦼꦢꦸꦭꦸꦂ​ꦩꦂꦏꦸꦱ꧀ꦲꦶꦏꦶ​ꦥꦺꦴꦤꦏꦤ꧀ꦤꦺꦱꦼꦢꦸꦭꦸꦂ​ꦧꦂꦤꦧꦱ꧀꧈​ꦲꦏꦸ​ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦏꦺꦧꦧ꧀ꦱꦼꦢꦸꦭꦸꦂ​ꦩꦂꦏꦸꦱ꧀ꦲꦶꦏꦶ​꧉​ꦏꦥꦤ꧀ꦏꦥꦤ꧀ꦤꦺꦏ꧀ꦢꦺꦏ꧀ꦤꦺꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦪ​ꦢꦶꦠꦩ꧀ꦥ​ꦱꦶꦁ​ꦲꦥꦶꦏ꧀꧈​ ¹¹ꦲꦸꦒ​ꦱꦼꦢꦸꦭꦸꦂ​ꦪꦺꦯꦸꦱ꧀ ꦱꦶꦁ​ꦥꦫꦥꦤ꧀ꦤꦺꦪꦸꦱ꧀ꦠꦸꦱ꧀ ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​꧉​ꦱꦁꦏꦧꦁꦱ​ꦙꦸꦪ​ꦤꦩꦸꦁ​ꦱꦼꦢꦸꦭꦸꦂ​ꦠꦼꦭꦸ​ꦲꦶꦏꦸ​ꦩꦲꦸ​ꦱꦶꦁ​ꦔꦿꦺꦮꦁꦔꦶ​ꦲꦏꦸ​ꦏꦫꦺꦴ​ꦥꦼꦁꦒꦮꦺꦪꦤ꧀ꦏꦸꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦼꦢꦸꦭꦸꦂ​ꦠꦼꦭꦸ​ꦲꦶꦏꦶ​ꦥꦚ꧀ꦕꦺꦤ꧀ꦥꦶꦠꦸꦭꦸꦁꦔꦤ꧀ꦒꦼꦢꦺꦏꦁꦒꦺꦴ​ꦲꦏꦸ​꧉​

¹²꧋ꦏꦧꦂ​ꦱ꧀ꦭꦩꦼꦠ꧀ꦲꦸꦒ​ꦱꦁꦏꦱꦼꦢꦸꦭꦸꦂ​ꦌꦥꦥ꦳ꦿꦱ꧀ ꦱꦶꦁ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦏꦿꦶꦱ꧀ꦡꦸꦱ꧀ꦪꦺꦯꦸꦱ꧀ꦲꦸꦒ​꧉​ꦢꦺꦏ꧀ꦤꦺꦪ​ꦱꦼꦢꦸꦭꦸꦂ​ꦱꦁꦏꦔ꧀ꦒꦺꦴꦤ꧀ꦩꦸ​ꦏꦺꦴꦤꦺꦴ​꧉​ꦔꦼꦂꦠꦶꦪ​ꦤꦺꦏ꧀ꦱꦼꦢꦸꦭꦸꦂ​ꦌꦥꦥ꦳ꦿꦱ꧀ꦲꦶꦏꦶ​ꦠꦼꦩꦼꦤ꧀​ꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦩꦤ꧀ꦠꦼꦥ꧀ꦲꦶꦁ​ꦥꦼꦔꦤ꧀ꦢꦼꦭ꧀ꦭꦤ꧀ꦧꦶꦱ​ꦢꦶꦮꦱ​ꦲꦶꦁ​ꦏꦱꦸꦏ꧀ꦩꦤ꧀꧈​ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦔꦼꦂꦠꦶ​ꦲꦥ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦺꦴꦫ​ꦤꦩꦸꦁ​ꦔꦼꦂꦠꦶ​꧈​ꦤꦁꦔꦶꦁ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦠꦼꦤꦤ꧀꧈​ ¹³ꦗꦤ꧀ꦲꦺꦴꦫ​ꦱꦼꦩ꧀ꦧꦿꦤ​ꦠꦼꦤꦤ꧀ꦱꦼꦢꦸꦭꦸꦂ​ꦌꦥꦥ꦳ꦿꦱ꧀ꦲꦶꦏꦶ​ꦲꦼꦁꦒꦺꦴꦤꦺ​ꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​꧈​ꦲꦏꦸ​ꦮꦼꦫꦸꦃ​ꦢꦺꦮꦺ꧉​ꦭꦤ꧀ꦲꦺꦴꦫ​ꦤꦩꦸꦁ​ꦏꦺꦴꦮꦺ​ꦱꦶꦁ​ꦤꦁꦏꦺꦴꦭꦺꦴꦱꦺ​ꦱꦶꦁ​ꦢꦶꦢꦺꦴꦔꦏ꧀ꦏꦏꦺ꧈​ꦤꦁꦔꦶꦁ​ꦲꦸꦒ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤꦁꦭꦎꦢꦶꦱꦺꦪꦭꦤ꧀ꦲ꦳ꦶꦫꦥꦺꦴꦭꦶꦱ꧀꧈​ ¹⁴ꦢꦺꦴꦏ꧀ꦠꦼꦂ​ꦭꦸꦏꦱ꧀ ꦏꦚ꧀ꦕꦏꦸ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶꦭꦤ꧀ꦲꦸꦒ​ꦱꦼꦢꦸꦭꦸꦂ​ꦢꦺꦩꦱ꧀ꦩꦺꦭꦸ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​ꦏꦧꦺꦃ​꧉​

¹⁵꧋ꦲꦮꦏ꧀ꦏꦺ​ꦢꦺꦮꦺꦚꦸꦮꦸꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​꧈​ꦏꦧꦂ​ꦱ꧀ꦭꦩꦼꦠ꧀ꦱꦁꦏꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦸꦒ​ꦢꦶꦏꦶꦫꦶꦩ꧀ꦩꦏꦺꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦭꦎꦢꦶꦱꦺꦪꦭꦤ꧀ꦲꦸꦒ​ꦩꦫꦁ​ꦱꦼꦢꦸꦭꦸꦂ​ꦤꦶꦩ꧀ꦥ꦳​ꦭꦤ꧀ꦥꦱꦩꦸꦮꦤ꧀ꦱꦶꦁ​ꦔꦸꦩ꧀ꦥꦸꦭ꧀ꦤꦁꦲꦺꦴꦩꦃꦲꦺ​ꦢꦺꦏ꧀ꦤꦺ꧉​ ¹⁶ꦤꦺꦏ꧀ꦭꦪꦁꦲꦶꦏꦶꦮꦶꦱ꧀ꦢꦶꦮꦕꦏ꧀ꦏꦏꦺꦤꦁꦥꦱꦩꦸꦮꦤ꧀ꦏꦺꦴꦭꦺꦴꦱꦺꦏꦺꦴꦤꦺꦴ꧈​ꦠꦼꦫꦸꦱ꧀ꦢꦶꦲꦼꦠꦼꦂꦫꦏꦺꦤꦁꦭꦎꦢꦶꦱꦺꦪ꧈​ꦱꦸꦥꦪꦲꦸꦒꦢꦶꦮꦕꦏ꧀ꦏꦏꦺꦤꦁꦥꦱꦩꦸꦮꦤ꧀ꦏꦤ꧉​ꦭꦃꦭꦪꦁꦱꦶꦁꦠꦏ꧀ꦏꦶꦫꦶꦩꦏꦺꦩꦫꦁꦥꦱꦩꦸꦮꦤ꧀ꦭꦎꦢꦶꦱꦺꦪ꧈​ꦏꦸꦮꦶꦲꦸꦒꦏꦸꦢꦸꦩ꧀ꦧꦺꦴꦏ꧀ꦮꦕꦏ꧀ꦏꦺ ꦤꦁꦥꦱꦩꦸꦮꦤ꧀ꦩꦸ꧉​ ¹⁷ꦱꦼꦢꦸꦭꦸꦂ​ꦄꦂꦏꦶꦥꦸꦱ꧀ꦢꦶꦲꦺꦴꦩꦺꦴꦁꦔꦶꦱꦸꦥꦪ​ꦔꦼꦂꦗꦤ꧀ꦤꦶꦥꦼꦁꦒꦮꦺꦪꦤ꧀ꦏꦸꦒꦸꦱ꧀ꦠꦶ​ꦠꦼꦫꦸꦱ꧀ꦠꦼꦏꦤ꧀ꦫꦩ꧀ꦥꦸꦁꦔꦺ​꧉​

¹⁸꧋ꦕꦸꦏꦸꦥ꧀ꦱꦼꦩꦺꦤꦺꦮꦲꦺꦭꦪꦁꦲꦶꦏꦶ꧈​ꦲꦏꦸꦢꦺꦮꦺꦱꦶꦁꦔꦼꦏꦺꦏ꧀ꦏꦶꦠꦤ꧀ꦢꦠꦁꦔꦤ꧀꧈​ꦲꦗꦥꦢꦭꦭꦶꦤꦺꦏ꧀ꦲꦏꦸꦲꦶꦏꦶꦤꦁꦱꦼꦠꦿꦥꦤ꧀​ꦔ꧀ꦭꦧꦸꦃꦲꦶꦏꦺꦴꦮꦺ꧉​

꧋ꦩꦸꦒꦩꦸꦒꦒꦸꦱ꧀ꦠꦶꦄꦭ꧀ꦭꦃꦔꦺꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺꦩꦫꦁꦏꦺꦴꦮꦺꦏꦧꦺꦃ꧉​

ꦦꦈꦭꦸꦱ꧀

↑ ↑ ↑

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

¹꧋ꦥꦫ​ꦱꦼꦢꦸꦭꦸꦂ​꧈​ꦲꦶꦏꦶ​ꦭꦪꦁ​ꦱꦁꦏꦦꦈꦭꦸꦱ꧀ ꦱꦶꦭꦱ꧀ꦭꦤ꧀ꦠꦶꦩꦺꦴꦠꦶꦪꦸꦱ꧀ ꦩꦫꦁ​ꦥꦱꦩꦸꦮꦤ꧀ꦤꦁꦏꦸꦠꦠꦺꦱꦴꦭꦺꦴꦤꦶꦏꦴꦱꦶꦁ​ꦮꦶꦱ꧀ꦢꦢꦶ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

꧋ꦩꦸꦒꦩꦸꦒ​ꦏꦧꦼꦕꦶꦏ꧀ꦏꦤ꧀ꦭꦤ꧀ꦏꦠꦼꦤ꧀ꦠꦽꦩ꧀ꦩꦤ꧀ꦔꦼꦧꦼꦏ꧀ꦏꦶ​ꦏꦺꦴꦮꦺ​ꦏꦧꦺꦃ​꧉​

꧋ꦥꦱꦩꦸꦮꦤ꧀ꦠꦺꦱꦴꦭꦺꦴꦤꦶꦏꦴꦏꦁꦒꦺꦴ​ꦠꦸꦭꦢ꧉​

²꧋ꦥꦫ​ꦱꦼꦢꦸꦭꦸꦂ​꧈​ꦱꦧꦼꦤ꧀ꦲꦮꦏ꧀ꦏꦺ​ꦢꦺꦮꦺꦤ꧀ꦢꦺꦴꦁꦔ꧈​ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦭꦭꦶ​ꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​ꦏꦧꦺꦃ​꧉​ꦲꦮꦏ꧀ꦏꦺ​ꦢꦺꦮꦺꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦢꦺꦏ꧀ꦤꦺꦔꦺꦭꦶꦁꦔꦏꦺꦲꦮꦏ꧀ꦏꦺ​ꦢꦺꦮꦺꦧꦧ꧀ꦏꦺꦴꦮꦺ​ꦏꦧꦺꦃ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦤ꧀ꦢꦺꦴꦁꦔ꧉​ ³ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦭꦭꦶ​ꦩꦫꦁ​ꦥꦼꦁꦒꦮꦺꦏꦸꦱꦶꦁ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦱꦁꦏꦥꦽꦕꦪꦩꦸ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦲꦗꦼꦏ꧀ꦩꦶꦏꦶꦂꦫꦏꦺꦲꦼꦁꦒꦺꦴꦤ꧀ꦩꦸ​ꦥꦢ​ꦔ꧀ꦭꦸꦩꦸꦃꦲꦶꦠꦸꦭꦸꦁꦠꦶꦤꦸꦭꦸꦁ​꧈​ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦱꦏ꧀ꦥꦢꦥꦢ꧉​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦭꦭꦶ​ꦲꦼꦁꦒꦺꦴꦤ꧀ꦩꦸ​ꦥꦢ​ꦱꦧꦂ​ꦚꦁꦒ​ꦱꦏ꧀ꦮꦼꦂꦤꦤꦺ​ꦏꦔꦺꦭ꧀ꦭꦤ꧀ꦠꦤ꧀ꦥ​ꦱꦼꦩ꧀ꦥ꧀ꦭꦏ꧀ ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦤ꧀ꦢꦸꦮꦺꦤ꧀ꦤꦶ​ꦥꦼꦔꦉꦥ꧀ꦲꦉꦥ꧀ꦤꦺꦏ꧀ꦧꦏꦭ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦱꦼꦩ꧀ꦧꦫꦁ​ꦏꦸꦮꦶ​ꦔꦼꦏꦺꦏ꧀ꦏꦶꦠꦤ꧀ꦢꦤꦺꦏ꧀ꦏꦺꦴꦮꦺ​ꦲꦸꦫꦶꦥ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦏꦧꦺꦃ​꧉​ ⁴ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦠꦤ꧀ꦱꦃ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦏꦺꦴꦮꦺ​ꦭꦤ꧀ꦢꦺꦏ꧀ꦤꦺꦮꦶꦱ꧀ꦩꦶꦭꦶꦃ​ꦏꦺꦴꦮꦺ​ꦢꦢꦶ​ꦲꦸꦩꦠ꧀ꦠꦺ​꧉​ꦏꦼꦥꦿꦶꦪꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱꦤꦺ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦭꦶꦃ​ꦏꦺꦴꦮꦺ​? ⁵ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦲꦼꦁꦒꦺꦴꦤꦺ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦤꦩꦸꦁ​ꦏꦫꦺꦴ​ꦠꦼꦩ꧀ꦧꦸꦁ​ꦮꦲꦺ​꧈​ꦲꦺꦴꦫ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦔꦼꦠꦺꦴꦏ꧀ꦏꦏꦺꦏ꧀ꦮꦱꦤꦺ​ꦏꦫꦺꦴ​ꦥꦼꦁꦒꦮꦺ​ꦱꦶꦁ​ꦔ꧀ꦒꦸꦩꦸꦤ꧀​ꦔ꧀ꦒꦸꦩꦸꦤ꧀ꦤꦏꦺ꧉​ꦭꦤ꧀ꦩꦼꦤꦺꦃ​꧈​ꦫꦺꦴꦃ​ꦱꦸꦕꦶ​ꦱꦶꦁ​ꦤ꧀ꦢꦸꦤꦸꦁꦔꦏꦺꦩꦫꦁ​ꦏꦺꦴꦮꦺ​ꦤꦺꦏ꧀ꦥꦶꦠꦸꦠꦸꦂ​ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦧꦼꦤꦼꦂ​꧉​ꦏꦺꦴꦮꦺ​ꦥꦢ​ꦔꦼꦂꦠꦶ​ꦢꦺꦮꦺ꧈​ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦲꦶꦗꦶꦏ꧀ꦕꦩ꧀ꦥꦸꦂ​ꦏꦫꦺꦴ​ꦏꦺꦴꦮꦺ​꧈​ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦥꦺꦪ​ꦲꦠꦶꦲꦠꦶꦠꦼꦤꦤ꧀ꦲꦶꦁ​ꦲꦥ​ꦮꦲꦺ​꧉​ꦏꦸꦮꦶ​ꦩꦲꦸ​ꦏꦁꦒꦺꦴ​ꦔꦼꦏꦺꦏ꧀ꦏꦶꦠꦸꦭꦢꦱꦶꦁ​ꦲꦥꦶꦏ꧀ꦩꦫꦁ​ꦏꦺꦴꦮꦺ​꧉​ ⁶ꦭꦤ꧀ꦏꦺꦴꦮꦺ​ꦱꦲꦶꦏꦶ​ꦲꦸꦒ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦏꦔꦺꦭ꧀ꦭꦤ꧀ꦤꦶꦫꦸ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦤꦶꦫꦸ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦲꦮꦶꦠ꧀ ꦱꦼꦤꦗꦤ꧀ꦲꦧꦺꦴꦠ꧀ꦭꦤ꧀ꦲꦔꦺꦭ꧀ꦧꦔꦼꦠ꧀ ꦏꦺꦴꦮꦺ​ꦩꦼꦏ꧀ꦱ​ꦒꦼꦊꦩ꧀ꦤꦩ꧀ꦥ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦧꦸꦔꦃ​꧉​ꦫꦺꦴꦃ​ꦱꦸꦕꦶ​ꦱꦶꦁ​ꦔꦼꦏꦺꦏ꧀ꦏꦶꦏꦧꦸꦔꦃꦲꦤ꧀ꦏꦸꦮꦶ​ꦩꦫꦁ​ꦏꦺꦴꦮꦺ​꧉​ ⁷ꦢꦢꦶꦤꦺ​ꦱꦲꦶꦏꦶ​ꦏꦺꦴꦮꦺ​ꦏꦼꦤꦺꦁꦢꦶꦠꦶꦫꦸ​ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦧꦺꦃ​ꦱꦶꦁ​ꦩꦁꦒꦺꦴꦤ꧀ꦤꦁꦧꦮꦃꦩꦱꦼꦢꦺꦴꦤꦶꦪꦭꦤ꧀ꦧꦮꦃꦄꦏꦪ꧉​ ⁸ꦲꦮꦶꦠ꧀ꦩꦺꦴꦭꦃꦲꦶꦱꦁꦏꦔ꧀ꦒꦺꦴꦤ꧀ꦩꦸ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ꦩꦿꦺꦩꦺꦤ꧀ꦩꦿꦺꦩꦺꦤ꧀꧈​ꦲꦺꦴꦫ​ꦤꦩꦸꦁ​ꦤꦁꦧꦮꦃꦩꦱꦼꦢꦺꦴꦤꦶꦪꦭꦤ꧀ꦄꦏꦪꦮꦲꦺ​꧈​ꦤꦁꦔꦶꦁ​ꦤꦁꦲꦼꦤ꧀ꦢꦶꦲꦼꦤ꧀ꦢꦶ​ꦮꦺꦴꦁꦮꦺꦴꦁ​ꦥꦢ​ꦏꦿꦸꦔꦸ​ꦧꦧ꧀ꦥꦼꦔꦤ꧀ꦢꦼꦭ꧀ꦩꦸ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦲꦺꦴꦫ​ꦲꦸꦱꦃꦔꦺꦴꦩꦺꦴꦁꦲꦥꦲꦥ​ꦩꦼꦤꦺꦃ​ꦥꦽꦏꦫ​ꦏꦸꦮꦶ​꧉​ ⁹ꦮꦺꦴꦁꦮꦺꦴꦁ​ꦏꦸꦮꦶ​ꦢꦺꦮꦺꦥꦢ​ꦔꦺꦴꦩꦺꦴꦁꦔꦏꦺꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦭꦤ꧀ꦲꦼꦁꦒꦺꦴꦤ꧀ꦩꦸ​ꦥꦢ​ꦤꦩ꧀ꦥ​ꦲꦮꦏ꧀ꦏꦺ​ꦢꦺꦮꦺ꧉​ꦲꦸꦒ​ꦥꦢ​ꦔꦺꦴꦩꦺꦴꦁꦔꦏꦺꦲꦼꦁꦒꦺꦴꦤ꧀ꦩꦸ​ꦥꦢ​ꦤꦶꦁꦒꦭ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦥꦭ꧀ꦱꦸ​ꦭꦤ꧀ꦱꦲꦶꦏꦶ​ꦏꦺꦴꦮꦺ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦚꦠ​ꦭꦤ꧀ ꦱꦶꦁ​ꦲꦸꦫꦶꦥ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​ ¹⁰ꦭꦤ꧀ꦱꦲꦶꦏꦶ​ꦏꦺꦴꦮꦺ​ꦥꦢ​ꦔꦉꦥ꧀ꦲꦉꦥ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦧꦏꦭ꧀ꦠꦼꦏ​ꦩꦼꦤꦺꦃ​ꦱꦁꦏꦱ꧀ꦮꦂꦒ​꧈​ꦪꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦮꦶꦱ꧀ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​꧉​ꦢꦺꦏ꧀ꦤꦺꦱꦶꦁ​ꦔꦸꦕꦸꦭ꧀ꦭꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦚꦼꦠꦿꦥ꧀ꦏꦧꦺꦃ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​

↑ ↑ ↑

꧋ꦠꦸꦩꦶꦤ꧀ꦢꦏ꧀ꦏꦺ​ꦫꦱꦸꦭ꧀ꦦꦈꦭꦸꦱ꧀ꦤꦁꦠꦺꦱꦴꦭꦺꦴꦤꦶꦏꦴ꧉​

꧇​꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦠꦼꦏꦤꦺ​ꦲꦮꦏ꧀ꦏꦺ​ꦢꦺꦮꦺꦤꦁꦔ꧀ꦒꦺꦴꦤ꧀ꦩꦸ​ꦲꦺꦴꦫ​ꦩꦸꦱ꧀ꦥꦿ​꧉​ ²ꦱꦏ꧀ꦢꦸꦫꦸꦁꦔꦺꦲꦮꦏ꧀ꦏꦺ​ꦢꦺꦮꦺꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦶꦱꦶꦪꦱꦶꦪ​ꦭꦤ꧀ꦢꦶꦒꦮꦺ​ꦱꦼꦩ꧀ꦧꦿꦤ​ꦤꦁꦏꦸꦠꦥ꦳ꦶꦭꦶꦥꦶ​꧉​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦏꦼꦏꦼꦤ꧀ꦢꦼꦭ꧀ꦭꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦱꦼꦤꦗꦤ꧀ꦲꦮꦏ꧀ꦏꦺ​ꦢꦺꦮꦺꦢꦶꦲꦭꦁꦔꦭꦁꦔꦶ꧈​ꦲꦮꦏ꧀ꦏꦺ​ꦢꦺꦮꦺꦩꦼꦏ꧀ꦱ​ꦔ꧀ꦒꦮ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦺꦴꦮꦺ​꧉​ ³ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦔꦤ꧀ꦢꦤ꧀ꦤꦶꦏꦺꦴꦮꦺ​ꦏꦸꦮꦶ​ꦲꦺꦴꦫ​ꦏꦁꦒꦺꦴ​ꦚꦤ꧀ꦢꦶꦁꦏꦺꦴꦮꦺ​ꦲꦥ​ꦔ꧀ꦒꦺꦴꦭꦺꦏ꧀ꦧꦠꦶꦲꦥ​ꦔꦥꦸꦱ꧀ꦱꦶ​꧈​ꦲꦺꦴꦫ​꧉​ ⁴ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦤꦸꦗꦸ​ꦱꦸꦥꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦊꦒ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦏ꧀ꦤꦺꦱꦶꦁ​ꦔꦼꦂꦠꦶ​ꦲꦔꦼꦤ꧀ꦤꦔꦼꦤ꧀ꦥꦶꦏꦶꦫꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦢꦺꦏ꧀ꦤꦺꦮꦶꦱ꧀ꦔꦁꦒꦼꦥ꧀ꦲꦮꦏ꧀ꦏꦺ​ꦢꦺꦮꦺꦥꦤ꧀ꦠꦼꦱ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦔ꧀ꦒꦺꦴꦭꦺꦏ꧀ꦥꦼꦔꦊꦩ꧀ꦩꦤ꧀ꦤꦺ​ꦩꦤꦸꦁꦱ​꧈​ꦤꦁꦔꦶꦁ​ꦲꦥ​ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁵ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦢꦢꦶ​ꦱꦼꦏ꧀ꦱꦶ​!ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦠꦲꦸ​ꦔꦁꦒꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦲꦺꦤꦏ꧀ꦏꦁꦒꦺꦴ​ꦔꦼꦤꦺꦁꦏꦺꦴꦮꦺ​꧈​ꦱꦸꦥꦪ​ꦤꦼꦩꦸ​ꦧꦠꦶ꧈​ꦲꦺꦴꦫ​꧉​ ⁶ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦠꦲꦸ​ꦔ꧀ꦒꦺꦴꦭꦺꦏ꧀ꦥꦼꦔꦊꦩꦤ꧀ꦩꦸꦲꦥ​ꦮꦺꦴꦁ​ꦭꦶꦪꦤꦺ​꧉​ꦱꦏ꧀ꦗꦤꦺꦲꦮꦏ꧀ꦏꦺ​ꦢꦺꦮꦺꦢꦢꦶ​ꦫꦱꦸꦭ꧀ꦭꦺ​ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦩꦿꦺꦤ꧀ꦠꦃ​ꦭꦤ꧀​ꦚ꧀ꦗꦭꦸꦏ꧀ꦲꦥ​ꦮꦲꦺ​꧉​ ⁷ꦤꦁꦔꦶꦁ​ꦲꦺꦴꦫ​꧈​ꦱꦸꦮꦺꦤꦺ​ꦲꦮꦏ꧀ꦏꦺ​ꦢꦺꦮꦺꦕꦩ꧀ꦥꦸꦂ​ꦏꦫꦺꦴ​ꦏꦺꦴꦮꦺ​ꦲꦮꦏ꧀ꦏꦺ​ꦢꦺꦮꦺꦩꦭꦃ​ꦱꦫꦺꦃ​꧈​ꦏꦪ​ꦲꦶꦧꦸ​ꦱꦶꦁ​ꦤꦿꦺꦱ꧀ꦤꦤ꧀ꦤꦶꦭꦤ꧀ꦔꦿꦸꦩꦠ꧀ꦠꦶ​ꦲꦤꦏ꧀ꦲꦤꦏ꧀ꦏꦺ​ꦏꦲꦺ​꧉​ ⁸ꦩꦸꦭꦤꦺ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦠꦿꦺꦱ꧀ꦤꦧꦔꦼꦠ꧀ꦩꦫꦁ​ꦏꦺꦴꦮꦺ​꧈​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤꦩꦸꦁ​ꦔ꧀ꦒꦮ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦺꦴꦮꦺ​꧈​ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦲꦺꦴꦫ​ꦲꦺꦩꦤ꧀ꦔꦼꦏꦺꦏ꧀ꦏꦏꦺꦚꦮꦤꦺ​ꦥꦶꦱꦤ꧀꧈​ꦲꦮꦏ꧀ꦏꦺ​ꦢꦺꦮꦺꦗꦤ꧀ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦏꦺꦴꦮꦺ​꧉​ ⁹ꦏꦺꦴꦮꦺ​ꦢꦺꦮꦺꦩꦼꦱ꧀ꦠꦶꦲꦶꦗꦶꦏ꧀ꦏꦺꦭꦶꦁꦔꦤ꧀ꦥꦫ​ꦱꦼꦢꦸꦭꦸꦂ​!ꦲꦮꦏ꧀ꦏꦺ​ꦢꦺꦮꦺꦚꦩ꧀ꦧꦸꦠ꧀ꦠꦩꦼꦩ꧀ꦥꦼꦁ​ꦲꦮꦤ꧀ꦭꦤ꧀ꦮꦼꦔꦶ​ꦔ꧀ꦒꦺꦴꦭꦺꦏ꧀ꦥꦔꦤ꧀ ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦢꦢꦶ​ꦉꦁꦒꦤ꧀ꦭꦤ꧀ꦫꦺꦥꦺꦴꦠ꧀ꦩꦸ꧉​ꦪ​ꦔꦺꦴꦤꦺꦴ​ꦏꦸꦮꦶ​ꦲꦮꦏ꧀ꦏꦺ​ꦢꦺꦮꦺꦲꦼꦁꦒꦺꦴꦤꦺ​ꦔ꧀ꦒꦼꦭꦂ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦺꦴꦮꦺ​꧉​

¹⁰꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦢꦺꦮꦺꦱꦶꦁ​ꦢꦢꦶ​ꦱꦼꦏ꧀ꦱꦶ​ꦭꦤ꧀ꦲꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦸꦮꦺꦤꦺ​ꦲꦮꦏ꧀ꦏꦺ​ꦢꦺꦮꦺꦕꦩ꧀ꦥꦸꦂ​ꦏꦫꦺꦴ​ꦏꦺꦴꦮꦺ​ꦱꦶꦁ​ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦥꦺꦲꦠꦶꦲꦠꦶ꧈​ꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦱꦶꦁ​ꦲꦺꦴꦫ​ꦲꦥꦶꦏ꧀꧈​ꦏꦫꦺꦴ​ꦱꦥꦱꦥ​ꦲꦮꦏ꧀ꦏꦺ​ꦢꦺꦮꦺꦪ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦤꦼꦂ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦔꦼꦏꦺꦏ꧀ꦏꦶꦗꦭꦂꦫꦤ꧀ꦮꦺꦴꦁ​ꦚꦭꦃꦚꦭꦃꦲꦏꦺꦲꦮꦏ꧀ꦏꦺ​ꦢꦺꦮꦺ꧉​ ¹¹ꦭꦤ꧀ꦏꦺꦴꦮꦺꦢꦺꦮꦺꦔꦼꦂꦠꦶꦲꦼꦁꦒꦺꦴꦤꦺꦲꦮꦏ꧀ꦏꦺꦢꦺꦮꦺꦔꦤ꧀ꦢꦤ꧀ꦤꦶꦭꦤ꧀​ꦔ꧀ꦭꦶꦥꦸꦂꦏꦺꦴꦮꦺꦱꦶꦗꦶꦱꦶꦗꦶꦤꦺ꧉​ꦲꦺꦭꦶꦁꦲꦺꦭꦶꦁꦏꦪꦧꦥꦏ꧀ꦔꦤ꧀ꦢꦤ꧀ꦤꦶꦲꦤꦏ꧀ꦲꦤꦏ꧀ꦏꦺꦏꦲꦺ꧉​ ¹²ꦲꦮꦏ꧀ꦏꦺ​ꦢꦺꦮꦺꦔꦺꦭꦶꦁꦔꦏꦺꦭꦤ꧀​ꦔ꧀ꦭꦶꦥꦸꦂ​ꦏꦺꦴꦮꦺ​ꦲꦶꦁ​ꦮꦪꦃ​ꦲꦔꦺꦭ꧀ ꦱꦸꦥꦪ​ꦲꦸꦫꦶꦥ꧀ꦩꦸ​ꦤ꧀ꦢꦢꦺꦏ꧀ꦏꦏꦺꦊꦒꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦮꦶꦱ꧀ꦩꦁꦒꦶꦭ꧀ꦏꦺꦴꦮꦺ​ꦏꦺꦴꦁꦏꦺꦴꦤ꧀ꦩꦺꦭꦸ​ꦲꦶꦁ​ꦏꦿꦠꦺꦴꦤꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦔꦿꦱꦏ꧀ꦏꦏꦺꦏꦧꦸꦔꦃꦲꦤ꧀ꦒꦼꦢꦺꦱ꧀ꦭꦮꦱ꧀ꦱꦺ꧉​

¹³꧋ꦲꦺꦤꦺꦁꦗꦭꦂꦫꦤ꧀ꦭꦶꦪꦤꦺ​ꦩꦼꦤꦺꦃ​ꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦠꦤ꧀ꦱꦃ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​꧈​ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦺꦴꦮꦺ​꧈​ꦏꦺꦴꦮꦺ​ꦥꦢ​ꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺꦭꦤ꧀ꦥꦢ​ꦒꦼꦊꦩ꧀ꦤꦩ꧀ꦥ​꧉​ꦭꦤ꧀ꦩꦼꦤꦺꦃ​꧈​ꦲꦺꦴꦫ​ꦲꦩ꧀ꦧꦺꦴꦏ꧀ꦲꦁꦒꦼꦥ꧀ꦏꦪ​ꦥꦶꦠꦸꦠꦸꦂꦫꦺ​ꦩꦤꦸꦁꦱ​꧈​ꦲꦺꦴꦫ​꧈​ꦤꦁꦔꦶꦁ​ꦏꦪ​ꦱꦏ꧀ꦚꦠꦤꦺ​꧈​ꦲꦩ꧀ꦧꦺꦴꦏ꧀ꦲꦁꦒꦼꦥ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​ꦮꦸꦗꦸꦠ꧀ꦠꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦚꦩ꧀ꦧꦸꦠ꧀ꦠꦠꦼꦤꦤ꧀ꦲꦶꦁ​ꦲꦸꦫꦶꦥ꧀ꦩꦸ​꧈​ꦱꦶꦁ​ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ¹⁴ꦲꦮꦏ꧀ꦏꦺ​ꦢꦺꦮꦺꦤꦶꦠꦺꦤ꧀ꦤꦶ​ꦤꦺꦏ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦚꦩ꧀ꦧꦸꦠ꧀ꦠꦤꦁꦠꦼꦔꦃꦩꦸ​꧈​ꦲꦮꦶꦠ꧀ꦲꦥ​ꦱꦶꦁ​ꦥꦢ​ꦢꦶꦲꦭꦩ꧀ꦩꦶ​ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦪꦸꦢꦺꦪ​ꦲꦸꦒ​ꦏꦺꦴꦮꦺ​ꦥꦢ​ꦮꦲꦺ​ꦔꦭꦩ꧀ꦩꦶ​꧉​ꦏꦪ​ꦲꦼꦁꦒꦺꦴꦤꦺ​ꦮꦺꦴꦁ​ꦲꦒꦩ​ꦙꦸꦚꦶꦪꦚꦶꦪ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦿꦶꦱ꧀ꦠꦼꦤ꧀ꦱꦶꦁ​ꦤꦁꦪꦸꦢꦺꦪ​꧈​ꦧꦁꦱꦩꦸ​ꦢꦺꦮꦺꦲꦸꦒ​ꦚꦶꦪꦚꦶꦪ​ꦏꦺꦴꦮꦺ​꧉​ ¹⁵ꦩ꧀ꦧꦶꦪꦺꦤ꧀​ꦩ꧀ꦧꦶꦪꦺꦤ꧀ꦤꦺꦮꦺꦴꦁ​ꦲꦒꦩ​ꦙꦸꦩꦠꦺꦤ꧀ꦤꦶ​ꦥꦫ​ꦤꦧꦶ​꧈​ꦠꦼꦫꦸꦱ꧀ꦩꦠꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦱꦲꦶꦏꦶ​ꦮꦺꦴꦁꦮꦺꦴꦁ​ꦏꦸꦮꦶ​ꦚꦶꦪꦚꦶꦪ​ꦲꦮꦏ꧀ꦏꦺ​ꦢꦺꦮꦺꦱꦩ꧀ꦥꦺꦏ꧀​ꦏ꧀ꦭꦶꦮꦠ꧀ꦔꦼꦏꦠ꧀ ꦤ꧀ꦢꦢꦺꦏ꧀ꦏꦏꦺꦤꦼꦱꦸꦤꦺꦒꦸꦱ꧀ꦠꦶ​ ꦄꦭ꧀ꦭꦃ​꧉​ꦭꦤ꧀ꦩꦼꦤꦺꦃ​꧈​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦩꦸꦁꦱꦸꦃ​ꦩꦫꦁ​ꦱꦧꦼꦤ꧀ꦮꦺꦴꦁ​꧉​ ¹⁶ꦥꦢ​ꦔꦭꦁꦔꦭꦁꦔꦶꦲꦮꦏ꧀ꦏꦺ​ꦢꦺꦮꦺꦱꦸꦥꦪ​ꦲꦺꦴꦫ​ꦧꦶꦱ​ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦧꦁꦱ​ꦭꦶꦪꦤꦺ​꧈​ꦥꦶꦠꦸꦠꦸꦂ​ꦱꦶꦁ​ꦧꦶꦱ​ꦤꦼꦏꦏ꧀ꦏꦏꦺꦏꦼꦱ꧀ꦭꦩꦼꦠ꧀ꦠꦤ꧀꧈​ꦢꦢꦶꦤꦺ​ꦱꦭꦃꦲꦺ​ꦮꦺꦴꦁ​ꦲꦒꦩ​ꦙꦸꦏꦸꦮꦶ​ꦤꦸꦩ꧀ꦥꦸꦏ꧀ꦤꦸꦩ꧀ꦥꦸꦏ꧀ꦱꦩ꧀ꦥꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦱꦧꦂ​ꦩꦼꦤꦺꦃ​ꦭꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦢꦶꦱꦼꦠꦿꦥ꧀꧈​

꧋ꦫꦱꦸꦭ꧀ꦦꦈꦭꦸꦱ꧀ꦏꦺꦥꦺꦔꦶꦤ꧀ꦤꦶꦭꦶꦏ꧀ꦏꦶ​ꦥꦱꦩꦸꦮꦤ꧀ꦠꦺꦱꦴꦭꦺꦴꦤꦶꦏꦴ꧉​

¹⁷꧋ꦤꦁꦔꦶꦁ​ꦥꦫ​ꦱꦼꦢꦸꦭꦸꦂ​꧈​ꦱꦏ꧀ꦮꦶꦱ꧀ꦱꦺ​ꦲꦮꦏ꧀ꦏꦺ​ꦢꦺꦮꦺꦥꦶꦱꦃ​ꦱꦏ꧀ꦲꦸꦤ꧀ꦠꦂꦫꦱꦁꦏꦏꦺꦴꦮꦺ​꧈​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦏꦁꦔꦼꦤ꧀ꦠꦼꦤꦤ꧀ꦩꦫꦁ​ꦏꦺꦴꦮꦺ​꧉​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦥꦚ꧀ꦕꦺꦤ꧀ꦥꦶꦱꦃ​ꦲꦶꦁ​ꦫꦒ꧈​ꦲꦺꦴꦫ​ꦮꦼꦫꦸꦃ​ꦏꦺꦴꦮꦺ​꧈​ꦤꦁꦔꦶꦁ​ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦥꦶꦱꦃ​ꦲꦶꦁ​ꦲꦠꦶ​꧉​ꦩꦸꦭꦤꦺ​꧈​ꦲꦮꦏ꧀ꦏꦺ​ꦢꦺꦮꦺꦪ​ꦔ꧀ꦭꦸꦩꦸꦃꦲꦶꦠꦼꦤꦤ꧀ꦱꦸꦥꦪ​ꦧꦶꦱ​ꦏꦼꦥꦼꦠꦸꦏ꧀ꦩꦼꦤꦺꦃ​ꦏꦫꦺꦴ​ꦏꦺꦴꦮꦺ​꧉​ ¹⁸ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦧꦭꦶꦏ꧀ꦤꦁꦔ꧀ꦒꦺꦴꦤ꧀ꦩꦸ​ꦭꦤ꧀ꦲꦏꦸ​ꦢꦺꦮꦺ꧈​ꦦꦈꦭꦸꦱ꧀ ꦮꦶꦱ꧀ꦥꦶꦁ​ꦥꦶꦫ​ꦚ꧀ꦗꦗꦭ꧀​ꦔ꧀ꦒꦺꦴꦭꦺꦏ꧀ꦢꦭꦤ꧀ ꦤꦁꦔꦶꦁ​ꦱꦺꦠꦤ꧀ꦔꦭꦁꦔꦭꦁꦔꦶꦲꦮꦏ꧀ꦏꦺ​ꦢꦺꦮꦺ꧉​

¹⁹꧋ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦧꦭꦶꦏ꧀ꦩꦼꦤꦺꦃ​꧈​ꦏꦺꦴꦮꦺ​ꦩꦼꦱ꧀ꦠꦶꦧꦉꦁ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦔꦢꦼꦏ꧀ꦤꦁꦔꦉꦥ꧀ꦥꦺ​꧉​ꦱꦥ​ꦩꦼꦤꦺꦃ​ꦏꦼꦗꦧ​ꦏꦺꦴꦮꦺ​ꦱꦶꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦔꦉꦥ꧀ꦲꦉꦥ꧀ꦠꦼꦏꦤꦺ​ꦒꦸꦱ꧀ꦠꦶ​꧉​ꦱꦥ​ꦏꦼꦗꦧ​ꦏꦺꦴꦮꦺ​ꦱꦶꦁ​ꦢꦢꦶ​ꦧꦸꦔꦃꦲꦺ​ꦭꦤ꧀ꦥꦩꦺꦫꦤꦺꦲꦮꦏ꧀ꦏꦺ​ꦢꦺꦮꦺ꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦏ​꧉​ꦲꦺꦴꦫ​ꦲꦺꦤꦺꦁꦱꦶꦁ​ꦔꦸꦁꦏꦸꦭ꧀ꦭꦶ​ꦏꦺꦴꦮꦺ​꧉​ ²⁰ꦥꦚ꧀ꦕꦺꦤ꧀ꦠꦼꦤꦤ꧀ ꦏꦺꦴꦮꦺ​ꦱꦶꦁ​ꦢꦢꦶ​ꦥꦩꦺꦫꦤꦺꦭꦤ꧀ꦏꦧꦸꦔꦃꦲꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺ꧉​

↑ ↑ ↑

 

꧇​꧓꧇​ ^1-3ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦲꦺꦴꦫ​ꦧꦼꦠꦃ​ꦔꦼꦩ꧀ꦥꦼꦠ꧀ꦏꦔꦼꦤ꧀ꦤꦺ꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦔꦺꦴꦁꦏꦺꦴꦤ꧀ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ꦧꦸꦢꦭ꧀ꦤꦁꦔ꧀ꦒꦺꦴꦤ꧀ꦩꦸ​꧈​ꦲꦮꦏ꧀ꦏꦺ​ꦢꦺꦮꦺꦧꦺꦤ꧀ꦏꦺꦫꦶ​ꦮꦲꦺ​ꦤꦁꦄꦠꦺꦤꦼ​ꦏꦺꦤꦺ​꧉​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦠꦶꦩꦺꦴꦠꦶꦪꦸꦱ꧀ꦏꦸꦮꦶ​ꦱꦼꦢꦸꦭꦸꦂꦫꦺ​ꦲꦮꦏ꧀ꦏꦺ​ꦢꦺꦮꦺꦲꦶꦁ​ꦥꦼꦔꦤ꧀ꦢꦼꦭ꧀ꦭꦤ꧀ꦢꦺꦏ꧀ꦤꦺꦔꦿꦺꦮꦁꦔꦶ​ꦲꦮꦏ꧀ꦏꦺ​ꦢꦺꦮꦺꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦢꦺꦏ꧀ꦤꦺꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧈​ꦱꦸꦥꦪ​ꦧꦶꦱ​ꦲꦩ꧀ꦧꦔꦸꦤ꧀ꦏꦺꦴꦮꦺ​ꦭꦤ꧀ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​꧈​ꦲꦗ​ꦱꦩ꧀ꦥꦺꦏ꧀ꦲꦩ꧀ꦧꦭꦶꦏ꧀ꦢꦭꦤ꧀ꦭꦤ꧀ꦤꦶꦁꦒꦭ꧀ꦒꦸꦱ꧀ꦠꦶ​꧈​ꦱꦼꦤꦗꦤ꧀ꦏꦺꦴꦮꦺ​ꦢꦶꦱꦶꦪꦱꦶꦪ​꧉​ꦏꦺꦴꦮꦺ​ꦮꦶꦱ꧀ꦔꦼꦂꦠꦶ​ꦢꦺꦮꦺꦤꦺꦏ꧀ꦏꦔꦺꦭ꧀ꦭꦤ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦥꦚ꧀ꦕꦺꦤ꧀ꦮꦶꦱ꧀ꦭꦸꦩꦿꦃ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ ⁴ꦏꦺꦴꦮꦺ​ꦩꦼꦱ꧀ꦠꦶꦏꦺꦭꦶꦁꦔꦤ꧀ ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦲꦶꦗꦶꦏ꧀ꦕꦩ꧀ꦥꦸꦂ​ꦏꦫꦺꦴ​ꦏꦺꦴꦮꦺ​꧈​ꦲꦮꦏ꧀ꦏꦺ​ꦢꦺꦮꦺꦭꦲꦸꦠ꧀ꦮꦶꦱ꧀ꦔꦺꦴꦩꦺꦴꦁꦱꦏ꧀ꦢꦸꦫꦸꦁꦔꦺꦤꦺꦏ꧀ꦮꦺꦴꦁꦮꦺꦴꦁ​ꦧꦏꦭ꧀ꦔꦭꦁꦔꦭꦁꦔꦶꦭꦤ꧀ꦚꦶꦪꦚꦶꦪ​ꦲꦮꦏ꧀ꦏꦺ​ꦢꦺꦮꦺ꧉​ꦭꦃ​ꦪꦏꦸꦮꦶ​ꦱꦶꦁ​ꦏ꧀ꦭꦏꦺꦴꦤ꧀ꦠꦼꦤꦤ꧀ꦱꦲꦶꦏꦶ​꧉​ ⁵ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦔꦺꦴꦁꦏꦺꦴꦤ꧀ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ꦤꦶꦭꦶꦏ꧀ꦏꦶ​ꦏꦺꦴꦮꦺ​꧈​ꦗꦭꦂꦫꦤ꧀ꦲꦏꦸ​ꦲꦺꦴꦫ​ꦱꦧꦂ​ꦔꦼꦤ꧀ꦠꦺꦤ꧀ꦤꦶ​ꦱꦸꦮꦶꦩꦼꦤꦺꦃ​꧉​ꦲꦏꦸ​ꦏꦼꦥꦺꦔꦶꦤ꧀ꦔꦼꦂꦠꦶ​ꦏꦼꦥꦿꦶꦪꦺ​ꦏꦧꦂꦫꦺ​ꦥꦼꦔꦤ꧀ꦢꦼꦭ꧀ꦩꦸ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦲꦏꦸ​ꦫꦢ​ꦱꦁꦱꦶꦤꦺꦏ꧀ꦱꦺꦠꦤ꧀ꦩꦼꦤꦮ​ꦔ꧀ꦒꦺꦴꦢꦏꦺꦴꦮꦺ​ꦠꦼꦫꦸꦱ꧀ꦏꦺꦴꦮꦺ​ꦥꦢ​ꦱꦼꦩ꧀ꦥ꧀ꦭꦏ꧀꧈​ꦩꦼꦁꦏꦺꦴ​ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦔ꧀ꦭꦸꦩꦸꦃꦲꦶꦚꦩ꧀ꦧꦸꦠ꧀ꦠꦤꦁꦔ꧀ꦒꦺꦴꦤ꧀ꦩꦸ​ꦏꦸꦮꦶ​ꦤ꧀ꦢꦏ꧀ꦩꦸꦱ꧀ꦥꦿ​꧉​

⁶꧋ꦤꦁꦔꦶꦁ​ꦱꦲꦶꦏꦶ​ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ꦮꦶꦱ꧀ꦧꦭꦶꦏ꧀ꦩꦼꦤꦺꦃ​ꦱꦁꦏꦔ꧀ꦒꦺꦴꦤ꧀ꦩꦸ​ꦭꦤ꧀ꦢꦺꦏ꧀ꦤꦺꦔ꧀ꦒꦮ​ꦏꦧꦂ​ꦱꦶꦁ​ꦤ꧀ꦢꦢꦺꦏ꧀ꦏꦏꦺꦧꦸꦔꦃꦲꦺ​ꦲꦮꦏ꧀ꦏꦺ​ꦢꦺꦮꦺ꧉​ꦢꦺꦏ꧀ꦤꦺꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦥꦢ​ꦩꦤ꧀ꦠꦼꦥ꧀ꦲꦶꦁ​ꦥꦼꦔꦤ꧀ꦢꦼꦭ꧀ꦭꦤ꧀ꦲꦶꦁ​ꦏꦠꦿꦺꦱ꧀ꦤꦤ꧀ꦭꦤ꧀ꦥꦢ​ꦤ꧀ꦢꦸꦮꦺꦥꦼꦔꦁꦒꦼꦥ꧀ꦧꦼꦕꦶꦏ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ꦱꦼꦢꦸꦭꦸꦂ​ꦠꦶꦩꦺꦴꦠꦶꦪꦸꦱ꧀ꦲꦸꦒ​ꦔꦧꦂꦫꦶ​ꦤꦺꦏ꧀ꦏꦺꦴꦮꦺ​ꦥꦢ​ꦏꦁꦔꦼꦤ꧀ꦠꦼꦤꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦏꦪ​ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦏꦁꦔꦼꦤ꧀ꦩꦫꦁ​ꦏꦺꦴꦮꦺ​꧉​ ⁷ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦧꦂ​ꦏꦸꦮꦶ​ꦩꦲꦸ​ꦏꦧꦺꦃ​ꦔ꧀ꦭꦶꦥꦸꦂ​ꦲꦮꦏ꧀ꦏꦺ​ꦢꦺꦮꦺꦲꦶꦁ​ꦱꦏ꧀ꦗꦼꦫꦺꦴꦤꦺꦏꦱꦸꦱꦃꦲꦤ꧀ꦭꦤ꧀ꦏꦱꦁꦱꦫꦤ꧀ ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦥꦢ​ꦥꦽꦕꦪ​ꦠꦼꦫꦸꦱ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ⁸ꦱꦏ꧀ꦮꦶꦱ꧀ꦱꦺ​ꦲꦮꦏ꧀ꦏꦺ​ꦢꦺꦮꦺꦏꦿꦸꦔꦸ​ꦤꦺꦏ꧀ꦏꦺꦴꦮꦺ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​ꦠꦼꦫꦸꦱ꧀ ꦲꦮꦏ꧀ꦏꦺ​ꦢꦺꦮꦺꦏꦿꦱ​ꦲꦸꦫꦶꦥ꧀ꦩꦼꦤꦺꦃ​꧉​ ⁹ꦏꦺꦴꦮꦺ​ꦗꦤ꧀ꦤꦼꦏꦏ꧀ꦏꦏꦺꦏꦧꦸꦔꦃꦲꦤ꧀ꦒꦼꦢꦺꦠꦼꦤꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ꦏꦸꦫꦁ​ꦠꦼꦩ꧀ꦧꦸꦁꦔꦺ​ꦲꦮꦏ꧀ꦏꦺ​ꦢꦺꦮꦺꦏꦁꦒꦺꦴ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦧ꧀ꦏꦸꦮꦶ​꧉​ ¹⁰ꦄꦮꦤ꧀ꦮꦼꦔꦶꦲꦮꦏ꧀ꦏꦺ​ꦢꦺꦮꦺꦠꦤ꧀ꦱꦃ​ꦤ꧀ꦢꦺꦴꦁꦔꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦚꦸꦮꦸꦤ꧀ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤꦶꦭꦶꦏ꧀ꦏꦶ​ꦏꦺꦴꦮꦺ​ꦭꦤ꧀ꦧꦶꦱ​ꦚꦸꦏꦸꦥ꧀ꦥꦏꦺꦏꦼꦏꦸꦫꦁꦔꦤ꧀ꦤꦺ​ꦥꦼꦔꦤ꧀ꦢꦼꦭ꧀ꦩꦸ​꧉​

¹¹꧋ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦒꦮꦺꦏ꧀ꦏꦏꦺꦢꦭꦤ꧀ ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦠꦼꦏꦤ꧀​ꦔ꧀ꦒꦺꦴꦤ꧀ꦩꦸ​꧉​ ¹²ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦸꦥꦪ​ꦤꦩ꧀ꦧꦃꦲꦶ​ꦏꦠꦿꦺꦱ꧀ꦤꦤ꧀ꦩꦸꦩꦫꦁ​ꦱꦏ꧀ꦥꦢꦥꦢꦭꦤ꧀ ꦩꦫꦁ​ꦮꦺꦴꦁ​ꦏꦧꦺꦃ​꧉​ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦤꦿꦺꦱ꧀ꦤꦤ꧀ꦤꦶꦭꦶꦪꦤꦺ​ꦏꦪ​ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦤꦿꦺꦱ꧀ꦤꦤ꧀ꦤꦶꦏꦺꦴꦮꦺ​꧉​ ¹³ꦪ​ꦔꦺꦴꦤꦺꦴ​ꦏꦸꦮꦶ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦤ꧀ꦠꦼꦥ꧀ꦥꦏꦺꦲꦠꦶꦩꦸ​꧈​ꦱꦸꦥꦪ​ꦲꦩ꧀ꦧꦺꦱꦸꦏ꧀ ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦏ​ꦏꦫꦺꦴ​ꦥꦫ​ꦱꦸꦕꦶ​꧈​ꦏꦺꦴꦮꦺ​ꦧꦶꦱ​ꦉꦱꦶꦏ꧀ꦭꦤ꧀ꦱꦸꦕꦶ​ꦔꦢꦼꦏ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉​

↑ ↑ ↑

꧋ꦲꦸꦫꦶꦥ꧀ꦱꦶꦁ​ꦱꦸꦕꦶ​ꦤꦸꦫꦸꦠ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​꧉​

꧇​꧔꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦩꦸꦭꦁꦔꦶꦏꦺꦴꦮꦺ​ꦧꦧ꧀ꦕꦫꦤꦺ​ꦲꦸꦫꦶꦥ꧀ꦱꦶꦁ​ꦤ꧀ꦢꦢꦺꦏ꧀ꦏꦏꦺꦊꦒꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦸꦫꦶꦥ꧀ꦩꦸ​ꦮꦸꦗꦸꦠ꧀ꦠꦺꦪ​ꦏꦪ​ꦔꦺꦴꦤꦺꦴ​꧉​ꦤꦁꦔꦶꦁ​ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦮꦏ꧀ꦏꦺ​ꦢꦺꦮꦺꦩꦼꦏ꧀ꦱ​ꦚꦸꦮꦸꦤ꧀ꦩꦫꦁ​ꦏꦺꦴꦮꦺ​ꦱꦸꦥꦪ​ꦥꦢ​ꦩꦗꦸꦮ​ꦭꦤ꧀ꦩꦸꦤ꧀ꦢꦏ꧀ꦏꦠꦼꦫꦸꦱ꧀꧈​ ²ꦏꦺꦴꦮꦺ​ꦔꦼꦂꦠꦶ​ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦱꦶꦁ​ꦮꦶꦱ꧀ꦢꦶꦮꦸꦭꦁꦔꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦱꦁꦏꦏꦉꦥ꧀ꦥꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ³ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦮꦺ​ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦱꦶꦁ​ꦉꦱꦶꦏ꧀ꦭꦤ꧀ꦱꦶꦁ​ꦥꦤ꧀ꦠꦼꦱ꧀ ꦔꦼꦢꦺꦴꦃꦲꦶ​ꦭꦏꦸ​ꦧꦺꦢꦁ꧉​ ⁴ꦱꦧꦼꦤ꧀ꦮꦺꦴꦁ​ꦭꦤꦁ​ꦲꦼꦁꦒꦺꦴꦤꦺ​ꦲꦸꦫꦶꦥ꧀ꦧꦼꦧꦉꦁꦔꦤ꧀ꦏꦫꦺꦴ​ꦧꦺꦴꦗꦺꦴꦤꦺ​ꦏꦸꦢꦸꦤꦺ​ꦏꦫꦺꦴ​ꦲꦠꦶ​ꦱꦶꦁ​ꦱꦼꦤꦼꦁ​ꦭꦤ꧀ꦔꦗꦺꦤ꧀ꦤꦶ​꧉​ ⁵ꦲꦗ​ꦩꦤꦸꦠ꧀ꦲ꦳ꦮ​ꦏꦼꦱꦼꦤꦼꦁꦔꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ ꦏꦪ​ꦏꦭꦸꦩꦿꦲꦤ꧀ꦤꦺꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦔꦼꦂꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁶ꦲꦶꦁ​ꦧꦧ꧀ꦲꦶꦏꦸ​ꦏꦺꦴꦮꦺ​ꦲꦗ​ꦱꦩ꧀ꦥꦺꦏ꧀​ꦔ꧀ꦒꦮꦺꦏ꧀ꦏꦏꦺꦮꦶꦫꦁꦔꦺ​ꦭꦤ꧀ꦲꦗ​ꦱꦩ꧀ꦥꦺꦏ꧀ꦔꦥꦸꦱ꧀ꦱꦶ​ꦱꦼꦢꦸꦭꦸꦂꦩꦸ꧉​ꦲꦮꦏ꧀ꦏꦺ​ꦢꦺꦮꦺꦲꦼꦁꦒꦺꦴꦤꦺ​ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​ꦪ​ꦮꦶꦱ꧀ꦲꦺꦴꦫ​ꦏꦸꦫꦁꦏꦸꦫꦁ꧈​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦚꦼꦠꦿꦥ꧀ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦭꦏꦸꦮꦤ꧀ꦏꦪ​ꦔꦺꦴꦤꦺꦴ​ꦏꦸꦮꦶ​꧉​ ⁷ꦲꦮꦶꦠ꧀ꦱꦶꦁ​ꦢꦶꦏꦉꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦴꦫ​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦥꦺꦫꦸꦱꦸꦱꦏ꧀ꦒꦼꦊꦩ꧀ꦩꦺ꧈​ꦲꦺꦴꦫ​꧈​ꦤꦁꦔꦶꦁ​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦱꦶꦁ​ꦱꦸꦕꦶ​꧉​ ⁸ꦩꦸꦭꦤꦺ​꧈​ꦱꦥ​ꦲꦺꦴꦫ​ꦤꦸꦫꦸꦠ꧀ꦥꦶꦮꦸꦭꦁ​ꦲꦶꦏꦶ​꧈​ꦲꦺꦴꦫ​ꦤꦩ꧀ꦥꦶꦏ꧀ꦩꦤꦸꦁꦱ​꧈​ꦤꦁꦔꦶꦁ​ꦤꦩ꧀ꦥꦶꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦼꦏꦺꦏ꧀ꦏꦶꦫꦺꦴꦃꦲꦺ​ꦱꦸꦕꦶ​ꦩꦫꦁ​ꦏꦺꦴꦮꦺ​꧉​

⁹꧋ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦲꦺꦴꦫ​ꦲꦸꦱꦃꦤꦸꦭꦶꦱ꧀ꦱꦶ​ꦏꦺꦴꦮꦺ​ꦤꦺꦏ꧀ꦏꦸꦢꦸ​ꦠꦿꦺꦱ꧀ꦤꦩꦫꦁ​ꦠꦸꦁꦒꦭ꧀ꦱꦼꦢꦸꦭꦸꦂ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀ꦩꦸꦭꦁꦔꦶꦩꦫꦁ​ꦏꦺꦴꦮꦺ​ꦏꦼꦥꦿꦶꦪꦺ​ꦕꦫꦤꦺ​ꦮꦺꦴꦁ​ꦠꦿꦺꦱ꧀ꦤꦩꦫꦁ​ꦱꦏ꧀ꦥꦢꦥꦢꦏꦸꦮꦶ​꧉​ ¹⁰ꦭꦤ꧀ꦮꦸꦗꦸꦠ꧀ꦠꦺꦏꦺꦴꦮꦺ​ꦪ​ꦥꦢ​ꦔꦼꦠꦺꦴꦏ꧀ꦏꦏꦺꦏꦠꦿꦺꦱ꧀ꦤꦤ꧀ꦏꦸꦮꦶ​ꦩꦫꦁ​ꦱꦼꦢꦸꦭꦸꦂ​ꦏꦧꦺꦃ​ꦤꦁꦧꦮꦃꦩꦱꦼꦢꦺꦴꦤꦶꦪ꧉​ꦤꦁꦔꦶꦁ​ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​ꦱꦼꦥꦶꦱ꧀ꦱꦤ꧀ꦩꦼꦤꦺꦃ​꧈​ꦱꦸꦥꦪ​ꦲꦼꦁꦒꦺꦴꦤ꧀ꦩꦸ​ꦠꦿꦺꦱ꧀ꦤꦩꦫꦁ​ꦱꦏ꧀ꦥꦢꦥꦢꦲꦶꦤ꧀ꦠꦼꦂꦫꦩꦸꦤ꧀ꦢꦏ꧀ꦠꦼꦫꦸꦱ꧀꧈​ ¹¹ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦔ꧀ꦭꦸꦩꦸꦃꦲꦶꦲꦸꦫꦶꦥ꧀ꦱꦶꦁ​ꦫꦸꦏꦸꦤ꧀ꦭꦤ꧀ꦠꦼꦤ꧀ꦠꦽꦩ꧀꧈​ꦥꦢ​ꦔꦸꦫꦸꦱ꧀ꦱꦶ​ꦲꦸꦫꦶꦥ꧀ꦥꦺꦢꦺꦮꦺꦭꦤ꧀ꦚꦩꦫꦶꦤꦺꦒꦮꦺ​ꦔ꧀ꦒꦺꦴꦭꦺꦏ꧀ꦱꦤ꧀ꦢꦁꦥꦔꦤ꧀ꦢꦺꦮꦺꦢꦺꦮꦺ꧈​ꦏꦪ​ꦱꦶꦁ​ꦮꦶꦱ꧀ꦢꦶꦮꦸꦭꦁꦔꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦢꦺꦏ꧀ꦲꦧꦼꦤ꧀ꦤꦺꦏꦲꦺ​꧉​ ¹²ꦢꦢꦶꦤꦺ​ꦮꦺꦴꦁ​ꦚ꧀ꦗꦧ​ꦧꦶꦱ​ꦔꦗꦺꦤ꧀ꦤꦶ​ꦩꦫꦁ​ꦏꦺꦴꦮꦺ​ꦭꦤ꧀ꦏꦺꦴꦮꦺ​ꦲꦺꦴꦫ​ꦲꦸꦱꦃꦚ꧀ꦗꦒꦏ꧀ꦏꦏꦺꦮꦺꦴꦁ​ꦭꦶꦪ​꧈​ꦤꦁꦔꦶꦁ​ꦧꦶꦱ​ꦚꦩ꧀ꦧꦸꦠ꧀ꦒꦮꦺꦪꦲꦮꦏ꧀ꦩꦸ​ꦢꦺꦮꦺ꧉​

꧋ꦧꦧ꧀ꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦩꦠꦶ​ꦭꦤ꧀ꦠꦼꦏꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

¹³꧋ꦥꦫ​ꦱꦼꦢꦸꦭꦸꦂ​!ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦶꦏꦺꦴꦮꦺ​ꦧꦧ꧀ꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦩꦠꦶ​꧈​ꦢꦢꦶꦤꦺ​ꦏꦺꦴꦮꦺ​ꦔꦼꦂꦠꦶ​ꦭꦤ꧀ꦲꦺꦴꦫ​ꦲꦸꦱꦃꦱꦼꦢꦶꦏꦪ​ꦮꦺꦴꦁ​ꦭꦶꦪꦭꦶꦪꦤꦺ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦥꦼꦔꦉꦥ꧀ꦲꦉꦥ꧀꧈​ ¹⁴ꦲꦮꦏ꧀ꦏꦺ​ꦢꦺꦮꦺꦥꦢ​ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦩꦠꦶ​ꦭꦤ꧀ꦠꦔꦶ​ꦩꦼꦤꦺꦃ​ꦱꦁꦏꦥꦠꦶ​?ꦱꦼꦩꦺꦴꦤꦺꦴ​ꦲꦸꦒ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦮꦺꦴꦁ​ꦏꦧꦺꦃ​ꦱꦶꦁ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦤꦁꦔꦶꦁ​ꦱꦶꦁ​ꦱꦲꦶꦏꦶ​ꦮꦶꦱ꧀ꦩꦠꦶ​꧈​ꦲꦩ꧀ꦧꦺꦱꦸꦏ꧀ꦧꦏꦭ꧀ꦢꦶꦠꦔꦺꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦧꦶꦱ​ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

¹⁵꧋ꦩꦸꦭꦤꦺ​꧈​ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​ꦏꦫꦺꦴ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺ:ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦲꦶꦗꦶꦏ꧀ꦲꦸꦫꦶꦥ꧀ꦠꦼꦏꦤ꧀ꦧꦭꦶꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦧꦏꦭ꧀ꦧꦸꦢꦭ꧀​ꦤ꧀ꦢꦶꦱꦶꦏ꧀ ꦤꦶꦁꦒꦭ꧀ꦱꦶꦁ​ꦮꦶꦱ꧀ꦥꦢ​ꦩꦠꦶ​꧈​ꦲꦺꦴꦫ​꧉​ ¹⁶ꦲꦮꦶꦠ꧀ꦲꦩ꧀ꦧꦺꦱꦸꦏ꧀ꦥꦼꦁꦒꦼꦢꦺꦤꦺꦩꦸꦭꦺꦏꦠ꧀ꦧꦏꦭ꧀ꦔꦧꦂꦫꦶ​ꦤ꧀ꦢꦶꦱꦶꦏ꧀ꦏꦫꦺꦴ​ꦱ꧀ꦮꦫ​ꦧꦤ꧀ꦠꦼꦂ​ꦭꦤ꧀ꦠꦿꦺꦴꦩ꧀ꦥꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦩꦸꦤꦶ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺꦧꦏꦭ꧀ꦩꦼꦢꦸꦤ꧀ꦱꦁꦏꦱ꧀ꦮꦂꦒ​꧉​ꦠꦼꦫꦸꦱ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦮꦶꦱ꧀ꦩꦠꦶ​ꦧꦏꦭ꧀ꦥꦢ​ꦠꦔꦶ​ꦤ꧀ꦢꦶꦱꦶꦏ꧀꧈​ ¹⁷ꦱꦏ꧀ꦮꦶꦱ꧀ꦱꦺ​ꦏꦸꦮꦶ​꧈​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦲꦶꦗꦶꦏ꧀ꦲꦸꦫꦶꦥ꧀ꦠꦼꦫꦸꦱ꧀ꦧꦉꦁ​ꦏꦫꦺꦴ​ꦱꦶꦁ​ꦲꦼꦤ꧀ꦠꦱ꧀ꦢꦶꦠꦔꦺꦏ꧀ꦏꦏꦺꦏꦸꦮꦶ​꧈​ꦩꦸꦁꦒꦃ​ꦤꦁꦩꦺꦒ​ꦩꦼꦠꦸꦮꦒꦸꦱ꧀ꦠꦶ​ꦤꦁꦭꦔꦶꦠ꧀꧈​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦱ꧀ꦭꦮꦱ꧀ꦭꦮꦱ꧀ꦱꦺꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​꧉​ ¹⁸ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦔ꧀ꦭꦶꦥꦸꦂ​ꦭꦤ꧀ꦲꦩ꧀ꦧꦔꦸꦤ꧀ꦱꦏ꧀ꦥꦢꦥꦢꦏꦫꦺꦴ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦏꦸꦮꦶ​ꦩꦲꦸ​꧉​

↑ ↑ ↑

꧋ꦠꦠꦠꦠ​ꦔꦼꦤ꧀ꦠꦺꦤ꧀ꦤꦶ​ꦠꦼꦏꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧇​꧕꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦲꦺꦴꦫ​ꦲꦸꦱꦃꦤꦸꦭꦶꦱ꧀ꦱꦶ​ꦏꦺꦴꦮꦺ​ꦧꦧ꧀ꦏꦥꦤ꧀ꦠꦼꦏꦤꦺ​ꦒꦸꦱ꧀ꦠꦶ​ꦭꦤ꧀ꦲꦺꦤꦺꦁꦲꦥ​ꦧꦏꦭ꧀ꦭꦺ​ꦤꦺꦏ꧀ꦢꦺꦏ꧀ꦤꦺꦠꦼꦏ​꧉​ ²ꦲꦮꦶꦠ꧀ꦏꦺꦴꦮꦺ​ꦏꦧꦺꦃ​ꦮꦶꦱ꧀ꦥꦢ​ꦔꦼꦂꦠꦶ​ꦢꦺꦮꦺꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦏꦤꦺ​ꦲꦶꦁ​ꦱꦏ꧀ꦮꦶꦗꦶꦤꦺꦮꦚ꧀ꦕꦶ​ꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦲꦫꦤ꧀ꦤꦶ​꧈​ꦏꦪ​ꦠꦼꦏꦤꦺ​ꦩꦭꦶꦁ​ꦏꦲꦺ​꧈​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦔꦼꦂꦠꦶ​ꦱꦏ꧀ꦢꦸꦫꦸꦁꦔꦺ꧉​ ³ꦤꦺꦏ꧀ꦮꦺꦴꦁꦮꦺꦴꦁ​ꦥꦢ​ꦫꦱꦤ꧀ꦫꦱꦤ꧀:“ꦮꦶꦱ꧀ꦠꦼꦤ꧀ꦠꦽꦩ꧀ꦭꦤ꧀ꦮꦶꦱ꧀ꦲꦥꦶꦏ꧀ꦱꦲꦶꦏꦶ​꧈​”ꦠꦼꦫꦸꦱ꧀ꦩꦏ꧀​ꦧ꧀ꦊꦁ​꧈​ꦏꦫꦸꦱꦏ꧀ꦏꦤ꧀ꦒꦼꦢꦺ​ꦠꦼꦏ​꧈​ꦏꦪ​ꦮꦺꦴꦁ​ꦮꦺꦢꦺꦴꦏ꧀ꦤꦺꦏ꧀ꦲꦉꦥ꧀​ꦩ꧀ꦧꦪꦶꦏꦲꦺ​꧈​ꦢꦢꦏ꧀ꦏꦤ꧀ꦏꦿꦱ​ꦭꦫ​꧉​ꦮꦶꦱ꧀ꦲꦺꦴꦫ​ꦏꦼꦤꦺꦁꦢꦶꦲꦼꦤ꧀ꦢꦼꦏ꧀ꦩꦼꦤꦺꦃ​꧉​ ⁴ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦲꦸꦱꦃꦱꦁꦱꦶ꧈​ꦥꦫ​ꦱꦼꦢꦸꦭꦸꦂ​꧉​ꦏꦺꦴꦮꦺ​ꦥꦢ​ꦔꦉꦥ꧀ꦲꦉꦥ꧀ꦒꦸꦱ꧀ꦠꦶ​꧈​ꦢꦢꦶꦤꦺ​ꦤꦺꦏ꧀ꦢꦺꦏ꧀ꦤꦺꦠꦼꦏ​ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦏꦒꦺꦠ꧀ꦏꦪ​ꦮꦺꦴꦁ​ꦤꦺꦏ꧀ꦏꦼꦩꦭꦶꦁꦔꦤ꧀ꦏꦲꦺ​꧉​ꦲꦺꦴꦫ​꧈​ꦲꦮꦶꦠ꧀ꦏꦺꦴꦮꦺ​ꦲꦺꦴꦫ​ꦏꦪ​ꦮꦺꦴꦁ​ꦱꦶꦁ​ꦩ꧀ꦭꦏꦸ​ꦤꦁꦥꦼꦠꦼꦁꦔꦤ꧀ꦏꦲꦺ​꧉​ ⁵ꦲꦺꦴꦫ​꧈​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦪ​ꦮꦺꦴꦁ​ꦱꦶꦁ​ꦩ꧀ꦭꦏꦸ​ꦲꦶꦁ​ꦮꦪꦃ​ꦲꦮꦤ꧀ ꦲꦶꦁ​ꦥꦢꦁ꧈​ꦢꦢꦶꦤꦺ​ꦧꦶꦱ​ꦮꦼꦫꦸꦃ​꧉​ꦲꦺꦴꦫ​ꦏꦪ​ꦮꦺꦴꦁ​ꦲꦶꦁ​ꦥꦼꦠꦼꦁꦔꦤ꧀꧈​

⁶꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦥꦺꦲꦗ​ꦏꦪ​ꦮꦺꦴꦁ​ꦠꦸꦫꦸ​꧈​ꦲꦮꦶꦠ꧀ꦮꦺꦴꦁ​ꦤꦺꦏ꧀ꦠꦸꦫꦸ​ꦏꦸꦮꦶ​ꦤꦺꦏ꧀ꦲꦺꦤꦺꦁꦲꦥꦲꦥ​ꦲꦺꦴꦫ​ꦔꦼꦂꦠꦶ​꧉​ꦪ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦸꦫꦶꦥ꧀ꦥꦺꦮꦺꦴꦁ​ꦱꦶꦁ​ꦲꦺꦴꦫ​ꦤꦸꦫꦸꦠ꧀ꦒꦸꦱ꧀ꦠꦶ​꧉​ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦩꦼꦭꦺꦏ꧀ꦭꦤ꧀ꦗꦒꦗꦒ​꧉​ ⁷ꦥꦚ꧀ꦕꦺꦤ꧀ ꦮꦺꦴꦁ​ꦠꦸꦫꦸꦤ꧀ꦤꦺ​ꦪ​ꦮꦪꦃ​ꦮꦼꦔꦶ​ꦭꦤ꧀ꦱꦶꦁ​ꦩꦧꦸꦏ꧀ꦲꦺꦴꦩ꧀ꦧꦺꦤ꧀ꦪ​ꦩꦧꦸꦏ꧀ꦮꦪꦃ​ꦮꦼꦔꦶ​꧉​ ⁸ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦁ​ꦲꦸꦫꦶꦥ꧀ꦲꦶꦁ​ꦥꦢꦁꦏꦸꦢꦸ​ꦱꦶꦁ​ꦲꦮꦱ꧀꧈​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦚ꧀ꦗꦒ​ꦲꦮꦏ꧀ꦏꦺ​ꦢꦺꦮꦺꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦭꦤ꧀ꦠꦿꦺꦱ꧀ꦤꦩꦫꦁ​ꦢꦺꦏ꧀ꦤꦺꦭꦤ꧀ꦩꦫꦁ​ꦱꦏ꧀ꦥꦢꦥꦢ꧉​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦚ꧀ꦗꦒꦏ꧀ꦏꦏꦺꦭꦤ꧀ꦥꦽꦕꦪ​ꦠꦼꦤꦤ꧀ꦤꦺꦏ꧀ꦒꦸꦱ꧀ꦠꦶ​ꦧꦏꦭ꧀​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦏ꧀ꦮꦱꦤꦺ​ꦲꦭ​꧉​ ⁹ꦲꦮꦶꦠ꧀ ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦺꦴꦫ​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦤꦼꦩꦸ​ꦏꦫꦸꦱꦏ꧀ꦏꦤ꧀ ꦲꦺꦴꦫ​꧈​ꦤꦁꦔꦶꦁ​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦤꦼꦩꦸ​ꦏꦼꦱ꧀ꦭꦩꦼꦠ꧀ꦠꦤ꧀꧈​ꦲꦮꦏ꧀ꦏꦺ​ꦢꦺꦮꦺꦧꦶꦱꦤꦺ​ꦱ꧀ꦭꦩꦼꦠ꧀ ꦤꦺꦏ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ¹⁰ꦢꦺꦏ꧀ꦤꦺꦩꦠꦶ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧉​ꦢꦢꦶꦤꦺ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦢꦺꦏ꧀ꦤꦺꦠꦼꦏ​꧈​ꦲꦼꦩ꧀ꦧꦸꦃ​ꦲꦮꦏ꧀ꦏꦺ​ꦢꦺꦮꦺꦲꦶꦗꦶꦏ꧀ꦲꦸꦫꦶꦥ꧀ ꦲꦼꦩ꧀ꦧꦸꦃ​ꦮꦶꦱ꧀ꦩꦠꦶ​꧈​ꦏꦸꦮꦶ​ꦲꦺꦴꦫ​ꦢꦢꦶ​ꦱꦼꦧꦧ꧀꧈​ꦥꦺꦴꦏꦺꦴꦏ꧀ꦏꦺ​꧈​ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦲꦸꦫꦶꦥ꧀ꦢꦢꦶ​ꦱꦶꦗꦶ​ꦏꦫꦺꦴ​ꦢꦺꦏ꧀ꦤꦺ꧉​ ¹¹ꦩꦸꦭꦤꦺ​꧈​ꦏꦺꦴꦮꦺ​ꦏꦸꦢꦸ​ꦔ꧀ꦭꦶꦥꦸꦂ​ꦭꦤ꧀ꦲꦩ꧀ꦧꦔꦸꦤ꧀ꦱꦏ꧀ꦥꦢꦥꦢꦏꦫꦺꦴ​ꦠꦼꦩ꧀ꦧꦸꦁ​ꦲꦶꦏꦶ​꧉​ꦪ​ꦏꦪ​ꦱꦶꦁ​ꦮꦶꦱ꧀ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦱꦲꦶꦏꦶ​꧉​

꧋ꦮꦼꦂꦤꦮꦼꦂꦤ​ꦥꦶꦠꦸꦠꦸꦂ​ꦏꦁꦒꦺꦴ​ꦥꦼꦤꦸꦠꦸꦥ꧀꧈​

¹²꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦚꦸꦮꦸꦤ꧀ꦩꦫꦁ​ꦏꦺꦴꦮꦺ​:ꦲꦩ꧀ꦧꦺꦴꦏ꧀ꦥꦢ​ꦔꦗꦺꦤ꧀ꦤꦶ​ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦥꦢ​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧉​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦱꦶꦁ​ꦢꦶꦥꦁꦒꦶꦭ꧀ꦏꦫꦺꦴ​ꦒꦸꦱ꧀ꦠꦶ​ꦢꦢꦶ​ꦥꦼꦤꦸꦤ꧀ꦠꦸꦤ꧀ꦩꦸꦭꦤ꧀ꦱꦶꦁ​ꦩꦸꦭꦁꦔꦶꦏꦺꦴꦮꦺ​ꦧꦧ꧀ꦧꦼꦤꦼꦂꦏ꧀ꦭꦺꦫꦸꦤꦺꦠꦶꦤ꧀ꦢꦏ꧀ꦩꦸ​ꦱꦏ꧀ꦕꦫ​ꦮꦺꦴꦁ​ꦏꦿꦶꦱ꧀ꦠꦼꦤ꧀꧈​ ¹³ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦱꦶꦁ​ꦚꦩ꧀ꦧꦸꦠ꧀ꦠꦔ꧀ꦭꦧꦸꦃꦲꦶ​ꦏꦺꦴꦮꦺ​꧈​ꦩꦸꦭꦤꦺ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦗꦺꦤ꧀ꦤꦶ​ꦭꦤ꧀ꦲꦩ꧀ꦧꦺꦴꦏ꧀ꦠꦿꦺꦱ꧀ꦤꦤ꧀ꦤꦶꦔꦸꦁꦏꦸꦭ꧀ꦭꦶ​ꦱꦏ꧀ꦭꦸꦩꦿꦃꦲꦺ​꧉​ꦲꦸꦫꦶꦥ꧀ꦱꦶꦁ​ꦫꦸꦏꦸꦤ꧀ꦧꦼꦧꦉꦁꦔꦤ꧀꧈​

¹⁴꧋ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦱꦶꦁ​ꦩꦊꦱ꧀ꦲꦺꦴꦫ​ꦒꦼꦊꦩ꧀ꦏꦼꦂꦗ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁꦔꦶ꧉​ꦱꦶꦁ​ꦲꦶꦗꦶꦏ꧀ꦮꦼꦢꦶ​ꦭꦤ꧀ꦱꦁꦱꦶꦏꦸꦢꦸ​ꦲꦩ꧀ꦧꦺꦴꦏ꧀ꦫꦺꦮꦁꦔꦶꦧꦺꦤ꧀ꦏꦼꦤ꧀ꦢꦼꦭ꧀꧈​ꦱꦶꦁ​ꦲꦶꦗꦶꦏ꧀ꦫꦶꦁꦏꦶꦃ​ꦲꦶꦁ​ꦥꦼꦔꦤ꧀ꦢꦼꦭ꧀ꦏꦸꦢꦸ​ꦲꦩ꧀ꦧꦺꦴꦏ꧀ꦠꦸꦭꦸꦁꦔꦶ​꧈​ꦤꦁꦔꦶꦁ​ꦏꦸꦢꦸ​ꦱꦶꦁ​ꦱꦧꦂ​ꦏꦫꦺꦴ​ꦱꦥ​ꦮꦲꦺ​꧉​ ¹⁵ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦩ꧀ꦧꦊꦱ꧀ꦲꦭ​ꦩꦫꦁ​ꦭꦶꦪ​꧈​ꦤꦁꦔꦶꦁ​ꦥꦢ​ꦔ꧀ꦭꦸꦩꦸꦃꦲꦶꦔ꧀ꦒꦮꦺ​ꦧꦼꦕꦶꦏ꧀ꦩꦫꦁ​ꦱꦏ꧀ꦥꦢꦥꦢꦭꦤ꧀ꦩꦫꦁ​ꦏꦧꦺꦃ​ꦮꦺꦴꦁ​꧉​

^16-18꧋ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦼꦁꦒꦺꦴꦤ꧀ꦩꦸ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦸꦮꦶ​ꦪ​ꦲꦶꦏꦶ​:ꦏꦧꦸꦔꦃꦲꦤ꧀ꦩꦸ​ꦢꦶꦏꦺꦠꦺꦴꦏ꧀ꦏꦏꦺꦠꦼꦫꦸꦱ꧀ ꦲꦗ​ꦥꦢ​ꦏꦼꦱꦼꦭ꧀​ꦤ꧀ꦢꦺꦴꦁꦔꦭꦤ꧀ꦥꦢ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ ꦲꦺꦴꦫ​ꦤꦩꦸꦁ​ꦤꦺꦏ꧀ꦲꦺꦤ꧀ꦠꦺꦁꦭꦤ꧀ꦏꦼꦥꦺꦤꦏ꧀ ꦤꦁꦔꦶꦁ​ꦲꦸꦒ​ꦤꦺꦏ꧀ꦲꦧꦺꦴꦠ꧀ꦭꦤ꧀ꦲꦔꦺꦭ꧀꧈​

¹⁹꧋ꦲꦗ​ꦥꦢ​ꦔꦼꦤ꧀ꦢꦼꦏ꧀ꦥꦼꦁꦒꦮꦺꦪꦤ꧀ꦏꦸꦫꦺꦴꦃ​ꦱꦸꦕꦶ​ꦲꦶꦁ​ꦲꦸꦫꦶꦥ꧀ꦩꦸ​꧉​ ^20-21ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦤ꧀ꦢꦸꦮꦺꦤ꧀ꦤꦶ​ꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦩ꧀ꦧꦸꦁ​ꦏꦸꦮꦶ​ꦲꦗ​ꦢꦶꦱꦼꦥꦺꦭꦺꦏ꧀ꦏꦏꦺ꧈​ꦤꦁꦔꦶꦁ​ꦢꦶꦥꦶꦏꦶꦂ​ꦭꦤ꧀ꦢꦶꦢꦼꦭꦺꦴꦏ꧀​ꦏ꧀ꦭꦺꦫꦸꦧꦼꦤꦼꦫꦺ꧉​ꦱꦶꦁ​ꦧꦼꦤꦼꦂ​ꦢꦶꦭꦏꦺꦴꦤ꧀ꦤꦶ​꧉​ ²²ꦧꦫꦁ​ꦲꦭ​ꦲꦥ​ꦮꦲꦺ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦼꦢꦺꦴꦃꦲꦶ꧉​

²³꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦤ꧀ꦢꦺꦴꦁꦔꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦧꦶꦱ​ꦔꦼꦏꦺꦏ꧀ꦏꦶꦠꦼꦤ꧀ꦠꦽꦩ꧀ꦩꦫꦁ​ꦏꦺꦴꦮꦺ​꧈​ꦱꦸꦥꦪ​ꦢꦺꦏ꧀ꦤꦺꦔꦽꦱꦶꦏ꧀ꦏꦶ​ꦲꦸꦫꦶꦥ꧀ꦩꦸ​꧈​ꦧꦺꦤ꧀ꦲꦸꦫꦶꦥ꧀ꦩꦸ​ꦲꦶꦁ​ꦲꦥ​ꦮꦲꦺ​ꦧꦶꦱ​ꦏꦪ​ꦢꦺꦏ꧀ꦤꦺꦢꦺꦮꦺ꧉​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦤ꧀ꦢꦺꦴꦁꦔꦱꦸꦥꦪ​ꦲꦸꦫꦶꦥ꧀ꦩꦸ​ꦱꦏ꧀ꦏꦧꦺꦃꦲꦺ꧈​ꦲꦶꦁ​ꦫꦺꦴꦃ​꧈​ꦚꦮ​ꦭꦤ꧀ꦫꦒ꧈​ꦧꦶꦱ​ꦉꦱꦶꦏ꧀꧈​ꦢꦢꦶꦤꦺ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦠꦼꦏ​꧈​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦶꦱ​ꦚꦭꦃꦚꦭꦃꦲꦏꦺ ꦏꦺꦴꦮꦺ​꧉​ ²⁴ꦒꦸꦱ꧀ꦠꦶ​ꦱꦶꦁ​ꦚꦼꦭꦸꦏ꧀ꦏꦺꦴꦮꦺ​꧈​ꦢꦺꦏ꧀ꦤꦺꦧꦏꦭ꧀ꦤꦤ꧀ꦢꦁꦔꦶ​ꦠꦼꦤꦤ꧀꧈​ꦢꦺꦏ꧀ꦤꦺꦧꦏꦭ꧀ꦤꦼꦠꦼꦥ꧀ꦥꦶ​ꦗꦚ꧀ꦗꦶꦤꦺ​꧉​

²⁵꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦚꦸꦮꦸꦤ꧀ꦥꦤ꧀ꦢꦺꦴꦔꦩꦸ​꧉​

^26-27꧋ꦏꦶꦫꦶꦩꦏꦺꦱ꧀ꦭꦩꦼꦠ꧀ꦩꦫꦁꦱꦼꦢꦸꦭꦸꦂꦏꦧꦺꦃꦭꦤ꧀ꦲꦏꦸꦚꦸꦮꦸꦤ꧀ꦩꦫꦁꦏꦺꦴꦮꦺ꧈​ꦒꦸꦱ꧀ꦠꦶꦢꦺꦮꦺꦢꦢꦶꦱꦼꦏ꧀ꦱꦶ꧈​ꦭꦪꦁꦲꦶꦏꦶꦢꦶꦮꦕꦏ꧀ꦏꦏꦺꦩꦫꦁꦱꦼꦢꦸꦭꦸꦂꦏꦸꦏꦿꦶꦱ꧀ꦠꦼꦤ꧀ꦏꦧꦺꦃ꧉​

²⁸꧋ꦕꦸꦏꦸꦥ꧀ꦱꦼꦩꦺꦤꦺꦮꦲꦺ!ꦩꦸꦒꦩꦸꦒꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦔꦺꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺꦩꦫꦁꦏꦺꦴꦮꦺꦏꦧꦺꦃ꧉​

ꦦꦈꦭꦸꦱ꧀

↑ ↑ ↑

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

¹꧋ꦥꦫ​ꦱꦼꦢꦸꦭꦸꦂ​꧈​ꦲꦶꦏꦶ​ꦭꦪꦁ​ꦱꦁꦏꦦꦈꦭꦸꦱ꧀ ꦱꦶꦭꦱ꧀ꦭꦤ꧀ꦠꦶꦩꦺꦴꦠꦶꦪꦸꦱ꧀ ꦩꦫꦁ​ꦥꦱꦩꦸꦮꦤ꧀ꦤꦁꦏꦸꦠꦠꦺꦱꦴꦭꦺꦴꦤꦶꦏꦴꦱꦶꦁ​ꦮꦶꦱ꧀ꦢꦢꦶ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

²꧋ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦔꦼꦢꦸꦤ꧀ꦤꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦩꦫꦁ​ꦏꦺꦴꦮꦺ​ꦏꦧꦺꦃ​꧉​

꧋ꦏꦿꦶꦱ꧀ꦡꦸꦱ꧀ꦧꦏꦭ꧀ꦔꦿꦸꦠꦸꦱꦏ꧀ꦧꦼꦤꦼꦂꦫꦺ​꧉​

³꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦠꦤ꧀ꦱꦃ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦩꦶꦏꦶꦂꦫꦏꦺꦏꦺꦴꦮꦺ​꧉​ꦥꦚ꧀ꦕꦺꦤ꧀ꦲꦺꦤꦺꦁꦮꦸꦗꦸꦠ꧀ꦠꦺꦠꦼꦤꦤ꧀꧈​ꦲꦮꦶꦠ꧀ꦥꦼꦔꦤ꧀ꦢꦼꦭ꧀ꦩꦸ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦭꦺꦴꦠ꧀ꦱꦸꦮꦶꦱꦼꦭꦺꦴꦠ꧀ꦠꦩ꧀ꦧꦃ​ꦭꦤ꧀ꦏꦠꦿꦺꦱ꧀ꦤꦤ꧀ꦩꦸꦩꦫꦁ​ꦱꦏ꧀ꦥꦢꦥꦢꦱꦼꦭꦺꦴꦠ꧀ꦱꦸꦮꦶꦱꦼꦭꦺꦴꦠ꧀ꦩꦸꦤ꧀ꦢꦏ꧀꧈​ ⁴ꦩꦸꦭꦤꦺ​ꦏꦺꦴꦮꦺ​ꦱꦶꦁ​ꦢꦶꦒꦮꦺ​ꦥꦩꦺꦂ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦤꦁꦥꦱꦩꦸꦮꦤ꧀ꦥꦱꦩꦸꦮꦤ꧀ꦭꦶꦪꦤꦺ​꧉​ꦲꦮꦏ꧀ꦏꦺ​ꦢꦺꦮꦺꦥꦚ꧀ꦕꦺꦤ꧀ꦔꦺꦴꦩꦺꦴꦁꦔꦶꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦤꦺꦏ꧀ꦥꦼꦔꦤ꧀ꦢꦼꦭ꧀ꦩꦸ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦤ꧀ꦠꦼꦥ꧀ꦠꦼꦤꦤ꧀ ꦱꦼꦤꦗꦤ꧀ꦏꦺꦴꦮꦺ​ꦢꦶꦱꦶꦪꦱꦶꦪ​ꦭꦤ꧀​ꦔ꧀ꦭꦏꦺꦴꦤ꧀ꦤꦶ​ꦱꦏ꧀ꦮꦼꦂꦤꦤꦺ​ꦏꦱꦁꦱꦫꦤ꧀ꦭꦤ꧀ꦏꦔꦺꦭ꧀ꦭꦤ꧀꧈​

⁵꧋ꦏꦸꦮꦶ​ꦏꦧꦺꦃ​ꦢꦢꦶ​ꦠꦤ꧀ꦢꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦿꦸꦠꦸꦏꦧꦺꦃ​ꦮꦺꦴꦁ​ꦱꦏ꧀ꦧꦼꦤꦼꦂꦫꦺ​꧉​ꦠꦼꦒꦼꦱ꧀ꦱꦺ​꧈​ꦏꦺꦴꦮꦺ​ꦱꦶꦁ​ꦱꦲꦶꦏꦶ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦩ꧀ꦧꦺꦱꦸꦏ꧀ꦏꦺꦴꦮꦺ​ꦧꦏꦭ꧀ꦤꦩ꧀ꦥ​ꦲꦸꦥꦃꦲꦺ꧈​ꦪꦏꦸꦮꦶ​꧈​ꦏꦺꦴꦮꦺ​ꦧꦏꦭ꧀ꦢꦶꦲꦁꦒꦼꦥ꧀ꦥꦤ꧀ꦠꦼꦱ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦊꦧꦺꦴꦤ꧀ꦤꦶꦏꦿꦠꦺꦴꦤꦺ​꧉​ ⁶ꦥꦚ꧀ꦕꦺꦤ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦱ꧀ꦠꦶꦧꦏꦭ꧀ꦤꦶꦤ꧀ꦢꦏ꧀ꦏꦏꦺꦱꦏ꧀ꦧꦼꦤꦼꦂꦫꦺ​꧈​ꦢꦺꦏ꧀ꦤꦺꦧꦏꦭ꧀ꦤꦼꦏꦏ꧀ꦏꦏꦺꦏꦱꦁꦱꦫꦤ꧀ꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦚꦶꦪꦚꦶꦪ​ꦏꦺꦴꦮꦺ​꧉​ ⁷ꦩꦭꦃ​ꦏꦺꦴꦮꦺ​ꦱꦶꦁ​ꦱꦲꦶꦏꦶ​ꦥꦢ​ꦤꦤ꧀ꦢꦁꦏꦔꦺꦭ꧀ꦭꦤ꧀ꦧꦏꦭ꧀ꦢꦶꦏꦺꦏ꧀ꦏꦶꦲꦪꦼꦩ꧀ꦧꦉꦁ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦲꦩ꧀ꦧꦫꦁ​꧉​ꦲꦶꦏꦶ​ꦧꦏꦭ꧀​ꦏ꧀ꦭꦏꦺꦴꦤ꧀ꦲꦩ꧀ꦧꦺꦱꦸꦏ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦢꦸꦤ꧀ꦱꦁꦏꦱ꧀ꦮꦂꦒ​ꦏꦫꦺꦴ​ꦩꦸꦭꦺꦏꦠ꧀ꦩꦸꦭꦺꦏꦠ꧀ꦱꦶꦁ​ꦒꦼꦢꦺꦏ꧀ꦮꦱꦤꦺ​꧉​ ⁸ꦏꦫꦺꦴ​ꦒꦼꦤꦶ​ꦱꦶꦁ​ꦩꦸꦭꦏ꧀ꦩꦸꦭꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦧꦏꦭ꧀ꦔꦿꦩ꧀ꦥꦸꦁꦔꦏꦺꦏꦧꦺꦃ​ꦮꦺꦴꦁ​ꦱꦶꦁ​ꦥꦢ​ꦤꦩ꧀ꦥꦶꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦶꦁ​ꦥꦢ​ꦤꦩ꧀ꦥꦶꦏ꧀ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ⁹ꦠꦼꦤꦤ꧀ ꦒꦸꦱ꧀ꦠꦶ​ꦧꦏꦭ꧀ꦚꦼꦠꦿꦥ꧀ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦱꦏ꧀ꦧꦼꦤꦼꦂꦫꦺ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦢꦶꦲꦸꦱꦶꦂ​꧈​ꦲꦢꦺꦴꦃ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦭꦮꦱ꧀ꦱꦺ꧈​ꦲꦢꦺꦴꦃ​ꦱꦁꦏꦏꦩꦸꦭꦾꦤꦺ​ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧉​ ¹⁰ꦏꦸꦮꦶ​ꦏꦧꦺꦃ​ꦧꦏꦭ꧀​ꦏ꧀ꦭꦏꦺꦴꦤ꧀ꦲꦩ꧀ꦧꦺꦱꦸꦏ꧀ꦲꦶꦁ​ꦢꦶꦤ​ꦠꦼꦏꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦤꦩ꧀ꦥ​ꦥꦼꦔꦊꦩ꧀ꦩꦤ꧀ꦤꦺ​ꦏꦧꦺꦃ​ꦮꦺꦴꦁ​ꦱꦶꦁ​ꦮꦶꦱ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦩꦫꦁ​ꦢꦺꦏ꧀ꦤꦺ꧉​ꦲꦶꦁ​ꦢꦶꦤ​ꦏꦸꦮꦶ​ꦏꦧꦺꦃ​ꦱꦶꦁ​ꦥꦽꦕꦪ​ꦧꦏꦭ꧀​ꦔ꧀ꦭꦸꦲꦸꦂꦫꦏꦺꦢꦺꦏ꧀ꦤꦺ꧉​ꦏꦺꦴꦮꦺ​ꦲꦩ꧀ꦧꦫꦁ​ꦧꦏꦭ꧀ꦲꦺꦤꦺꦁꦤꦁꦏꦺꦴꦤꦺꦴ​꧈​ꦲꦮꦶꦠ꧀ꦏꦺꦴꦮꦺ​ꦲꦸꦒ​ꦥꦢ​ꦒꦼꦊꦩ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦲꦮꦏ꧀ꦏꦺ​ꦢꦺꦮꦺꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀꧈​

¹¹꧋ꦩꦸꦭꦤꦺ​꧈​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦩꦶꦏꦶꦂꦫꦏꦺꦧꦧ꧀ꦏꦸꦮꦶ​ꦩꦲꦸ​ꦏꦧꦺꦃ​꧈​ꦲꦮꦏ꧀ꦏꦺ​ꦢꦺꦮꦺꦠꦤ꧀ꦱꦃ​ꦤ꧀ꦢꦺꦴꦔꦏ꧀ꦏꦏꦺꦏꦺꦴꦮꦺ​꧈​ꦧꦶꦱꦲ​ꦲꦺꦤꦺꦁꦮꦺꦴꦃꦲꦺ​ꦭꦤ꧀ꦲꦺꦤꦺꦁꦥꦤ꧀ꦠꦼꦱ꧀ꦱꦺ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦩꦶꦭꦶꦃ​ꦏꦺꦴꦮꦺ​꧈​ꦲꦺꦴꦫ​ꦔꦁꦒꦸꦂ​ꦮꦲꦺ​꧉​ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦿꦺꦮꦁꦔꦶ​ꦏꦺꦴꦮꦺ​ꦏꦫꦺꦴ​ꦏ꧀ꦮꦱꦤꦺ​꧈​ꦱꦸꦥꦪ​ꦧꦫꦁ​ꦧꦼꦕꦶꦏ꧀ꦱꦶꦁ​ꦲꦩ꧀ꦧꦺꦴꦏ꧀ꦏꦉꦥ꧀ꦥꦏꦺꦭꦤ꧀ꦥꦼꦁꦒꦮꦺꦏꦸꦲꦥ​ꦮꦲꦺ​ꦏꦁꦒꦺꦴ​ꦒꦸꦱ꧀ꦠꦶ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀ꦏꦧꦺꦃ​꧉​ ¹²ꦢꦢꦶꦤꦺꦱꦁꦏꦲꦸꦫꦶꦥ꧀ꦩꦸꦗꦼꦤꦼꦁꦔꦺꦒꦸꦱ꧀ꦠꦶꦧꦏꦭ꧀ꦢꦶꦭꦸꦲꦸꦂꦫꦏꦺꦏꦫꦺꦴꦮꦺꦴꦁꦮꦺꦴꦁꦭꦤ꧀ꦏꦺꦴꦮꦺꦢꦺꦮꦺꦧꦏꦭ꧀ꦢꦶꦲꦼꦊꦩ꧀ꦏꦫꦺꦴꦒꦸꦱ꧀ꦠꦶ꧈​ꦲꦮꦶꦠ꧀ꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦧꦏꦭ꧀ꦔꦺꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺꦩꦫꦁꦏꦺꦴꦮꦺ꧉​

↑ ↑ ↑

꧋ꦮꦺꦴꦁꦢꦸꦫꦏ꧉​

꧇​꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦲꦉꦥ꧀ꦔꦺꦴꦩꦺꦴꦁꦔꦏꦺꦧꦧ꧀ꦠꦼꦏꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦧꦧ꧀ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦢꦶꦏꦸꦩ꧀ꦥꦸꦭ꧀ꦭꦏꦺꦢꦢꦶ​ꦱꦶꦗꦶ​ꦏꦫꦺꦴ​ꦢꦺꦏ꧀ꦤꦺꦤꦁꦥꦁꦒꦺꦴꦤ꧀ꦤꦤ꧀ꦤꦺ​꧉​ ²ꦥꦚ꧀ꦕꦺꦤ꧀ꦮꦶꦱ꧀ꦲꦺꦤꦺꦁꦱꦶꦁ​ꦥꦢ​ꦩꦸꦭꦁꦔꦶꦤꦺꦏ꧀ꦏꦸꦮꦶ​ꦮꦶꦱ꧀​ꦏ꧀ꦭꦏꦺꦴꦤ꧀꧈​ꦗꦫꦺꦤꦺ​ꦫꦺꦴꦃ​ꦱꦸꦕꦶ​ꦱꦶꦁ​ꦔꦺꦴꦩꦺꦴꦁꦔꦶꦔꦺꦴꦤꦺꦴ​꧉​ꦲꦸꦒ​ꦲꦺꦤꦺꦁꦱꦶꦁ​ꦔꦺꦴꦩꦺꦴꦁꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦠꦲꦸ​ꦩꦸꦭꦁꦔꦶꦤꦺꦏ꧀ꦏꦸꦮꦶ​ꦮꦶꦱ꧀​ꦏ꧀ꦭꦏꦺꦴꦤ꧀ꦭꦤ꧀ꦲꦺꦤꦺꦁꦭꦶꦪꦤꦺ​ꦩꦼꦤꦺꦃ​ꦔꦺꦴꦩꦺꦴꦁꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦠꦲꦸ​ꦤꦸꦭꦶꦱ꧀ꦤꦁꦭꦪꦁ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦠꦼꦏ​꧉​ꦥꦫ​ꦱꦼꦢꦸꦭꦸꦂ​꧈​ꦲꦗ​ꦱꦩ꧀ꦥꦺꦏ꧀ꦲꦺꦴꦩꦺꦴꦁꦔꦤ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦤ꧀ꦢꦢꦺꦏ꧀ꦏꦏꦺꦧꦶꦔꦸꦁꦔꦺ​ꦲꦠꦶꦩꦸ​꧉​ ³ꦮꦺꦴꦁꦮꦺꦴꦁꦏꦸꦮꦶꦔꦥꦸꦱ꧀ꦱꦶ꧈​ꦲꦗꦢꦶꦒꦸꦒꦸ꧉​ꦲꦮꦶꦠ꧀ꦱꦏ꧀ꦢꦸꦫꦸꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦠꦼꦏꦩꦼꦤꦺꦃꦮꦺꦴꦁꦥꦶꦫꦁꦥꦶꦫꦁꦧꦏꦭ꧀ꦥꦢꦤꦶꦁꦒꦭ꧀ꦢꦭꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉​ꦱꦏ꧀ꦮꦶꦱ꧀ꦱꦺꦏꦸꦮꦶꦠꦼꦫꦸꦱ꧀ꦮꦺꦴꦁꦢꦸꦫꦏꦔꦺꦠꦺꦴꦏ꧀ ꦤꦁꦔꦶꦁꦢꦺꦏ꧀ꦤꦺꦧꦏꦭ꧀ꦢꦶꦧꦸꦮꦁꦤꦁꦤꦼꦫꦏꦏꦫꦺꦴꦒꦸꦱ꧀ꦠꦶ꧉​ ⁴ꦮꦺꦴꦁꦢꦸꦫꦏꦏꦸꦮꦶꦧꦏꦭ꧀​ꦔ꧀ꦭꦮꦤ꧀ꦩꦫꦁꦱꦼꦩ꧀ꦧꦫꦁꦱꦶꦁꦢꦶꦱꦼꦩ꧀ꦧꦃꦭꦤ꧀ꦱꦶꦁꦢꦶꦲꦁꦒꦼꦥ꧀ꦒꦸꦱ꧀ꦠꦶꦄꦭ꧀ꦭꦃꦏꦫꦺꦴꦩꦤꦸꦁꦱ꧉​ꦢꦺꦏ꧀ꦤꦺꦩꦭꦃꦧꦏꦭ꧀​ꦚ꧀ꦗꦒꦺꦴꦁꦤꦺꦴꦁꦏꦿꦺꦴꦁꦤꦁꦒꦿꦺꦗꦒꦼꦢꦺ꧈​ꦔꦏꦸꦲꦏꦸꦤꦺꦏ꧀ꦢꦺꦏ꧀ꦤꦺꦏꦸꦮꦶꦒꦸꦱ꧀ꦠꦶꦄꦭ꧀ꦭꦃ꧈​ꦔꦸꦁꦏꦸꦭ꧀ꦭꦶꦭꦶꦪꦭꦶꦪꦤꦺ꧉​

⁵꧋ꦧꦧ꧀ꦏꦸꦮꦶ​ꦩꦲꦸ​ꦏꦧꦺꦃ​ꦲꦏꦸ​ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦶꦏꦺꦴꦮꦺ​ꦢꦺꦴꦁꦔꦺꦲꦏꦸ​ꦲꦶꦗꦶꦏ꧀ꦤꦁꦔ꧀ꦒꦺꦴꦤ꧀ꦩꦸ​꧉​ꦲꦥ​ꦮꦶꦱ꧀ꦥꦢ​ꦭꦭꦶ​? ⁶ꦏꦺꦴꦮꦺꦔꦼꦂꦠꦶꦤꦺꦏ꧀ꦱꦲꦶꦏꦶꦲꦶꦗꦶꦏ꧀ꦲꦺꦤꦺꦁꦱꦶꦁꦔꦭꦁꦔꦭꦁꦔꦶꦮꦺꦴꦁꦢꦸꦫꦏꦲꦶꦏꦶ꧈​ꦩꦸꦭꦤꦺꦢꦸꦫꦸꦁꦧꦶꦱꦔꦺꦠꦺꦴꦏ꧀꧈​ꦢꦺꦏ꧀ꦤꦺꦩꦼꦠꦸꦤꦺꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦶꦱ꧀ꦮꦚ꧀ꦕꦶꦤꦺ꧈​ꦤꦺꦏ꧀ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀​ꦔ꧀ꦭꦶꦭꦤꦶ꧉​ ⁷ꦥꦚ꧀ꦕꦺꦤ꧀ꦱꦲꦶꦏꦶ​ꦢꦺꦏ꧀ꦤꦺꦮꦶꦱ꧀ꦚꦩ꧀ꦧꦸꦠ꧀ꦠ꧈​ꦔꦺꦴꦗꦺꦴꦏ꧀ꦲꦺꦴꦗꦺꦴꦏ꧀ꦏꦶ​ꦮꦺꦴꦁꦮꦺꦴꦁ​ꦏꦺꦴꦁꦏꦺꦴꦤ꧀ꦥꦢ​ꦤꦶꦁꦒꦭ꧀ꦢꦭꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦲꦶꦗꦶꦏ꧀ꦩꦼꦤꦼꦁꦩꦼꦤꦼꦁꦔꦤ꧀ꦮꦲꦺ​꧉​ꦲꦶꦗꦶꦏ꧀ꦲꦺꦤꦺꦁꦱꦶꦁ​ꦔꦢꦁꦔꦢꦁꦔꦶ꧉​ ⁸ꦩꦼꦠꦸꦤꦺꦲꦩ꧀ꦧꦺꦱꦸꦏ꧀ ꦤꦺꦏ꧀ꦱꦶꦁꦔꦢꦁꦔꦢꦁꦔꦶꦲꦶꦏꦶꦮꦶꦱ꧀ꦭꦸꦔ꧉​ꦤꦁꦔꦶꦁꦒꦸꦱ꧀ꦠꦶꦪꦺꦯꦸꦱ꧀ꦧꦏꦭ꧀ꦠꦼꦏꦭꦤ꧀ꦧꦏꦭ꧀ꦩꦠꦺꦤ꧀ꦤꦶꦮꦺꦴꦁꦢꦸꦫꦏꦏꦫꦺꦴꦠꦼꦩ꧀ꦧꦸꦁꦔꦺꦭꦤ꧀​ꦚ꧀ꦗꦼꦢꦸꦭ꧀ꦭꦺꦒꦸꦱ꧀ꦠꦶꦪꦺꦯꦸꦱ꧀ꦧꦏꦭ꧀ꦔꦿꦩ꧀ꦥꦸꦁꦔꦏꦺꦏ꧀ꦮꦱꦤꦺꦮꦺꦴꦁꦢꦸꦫꦏꦏꦸꦮꦶꦱꦏ꧀ꦏꦧꦺꦃꦲꦺ꧉​ ⁹ꦮꦺꦴꦁꦢꦸꦫꦏꦏꦸꦮꦶꦤꦺꦏ꧀ꦩꦼꦠꦸꦧꦏꦭ꧀ꦔꦁꦒꦺꦴꦏ꧀ꦮꦱꦤꦺꦱꦺꦠꦤ꧀ ꦧꦶꦱꦔꦺꦠꦺꦴꦏ꧀ꦏꦏꦺꦏ꧀ꦮꦱꦤꦺꦏꦫꦺꦴꦠꦤ꧀ꦢꦠꦤ꧀ꦢꦭꦤ꧀ꦩꦸꦗꦶꦗꦠ꧀ꦩꦸꦗꦶꦗꦠ꧀ ꦏꦁꦒꦺꦴꦚꦤ꧀ꦢꦶꦁꦮꦺꦴꦁꦮꦺꦴꦁ꧉​ ¹⁰ꦮꦺꦴꦁꦮꦺꦴꦁꦱꦶꦁꦥꦚ꧀ꦕꦺꦤ꧀ꦤꦺꦮꦶꦱ꧀ꦧꦏꦭ꧀ꦠꦶꦧꦲꦶꦁꦏꦫꦸꦱꦏ꧀ꦏꦤ꧀ꦥꦢꦒꦼꦊꦩ꧀​ꦔ꧀ꦒꦸꦒꦸꦲꦥꦸꦱ꧀ꦱꦤ꧀ꦏꦸꦮꦶ꧉​ꦲꦮꦶꦠ꧀ꦲꦺꦴꦫꦒꦼꦊꦩ꧀ꦤꦩ꧀ꦥꦥꦶꦠꦸꦠꦸꦂꦱꦶꦁꦧꦼꦤꦼꦂ꧈​ꦱꦶꦁꦧꦶꦱꦚ꧀ꦭꦩꦼꦠ꧀ꦠꦏꦺꦲꦸꦫꦶꦥ꧀ꦥꦺ꧈​ꦩꦭꦃꦥꦢꦤꦩ꧀ꦥꦶꦏ꧀ꦏꦸꦮꦶ꧉​ ¹¹ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦢꦸꦤ꧀ꦤꦏꦺꦥꦔ꧀ꦮꦱ​ꦱꦶꦁ​ꦚꦤ꧀ꦢꦶꦁꦮꦺꦴꦁꦮꦺꦴꦁ​ꦏꦸꦮꦶ​꧈​ꦱꦶꦁ​ꦩꦫꦏ꧀ꦏꦏꦺꦮꦺꦴꦁꦮꦺꦴꦁ​ꦔ꧀ꦒꦸꦒꦸ​ꦲꦥꦸꦱ꧀ꦱꦤ꧀꧈​ ¹²ꦩꦼꦁꦏꦺꦴꦤꦺꦴ​ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦚꦼꦠꦿꦥ꧀ꦏꦧꦺꦃ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦢ​ꦔ꧀ꦒꦸꦒꦸ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧈​ꦮꦺꦴꦁ​ꦱꦶꦁ​ꦥꦢ​ꦱꦼꦤꦼꦁ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦲꦭ​꧉​

꧋ꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​꧉​

¹³꧋ꦤꦁꦔꦶꦁ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦱꦶꦁ​ꦢꦶꦠꦿꦺꦱ꧀ꦤꦤ꧀ꦤꦶꦠꦼꦤꦤ꧀ꦏꦫꦺꦴ​ꦒꦸꦱ꧀ꦠꦶ​꧉​ꦲꦮꦏ꧀ꦏꦺ​ꦢꦺꦮꦺꦫꦸꦩꦁꦱ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦸꦢꦸ​ꦠꦤ꧀ꦱꦃ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦔꦺꦭꦶꦁꦔꦏꦺꦏꦺꦴꦮꦺ​ꦏꦧꦺꦃ​꧉​ꦲꦮꦶꦠ꧀ꦒꦸꦱ꧀ꦠꦶ​ꦮꦶꦱ꧀ꦩꦶꦭꦶꦃ​ꦏꦺꦴꦮꦺ​꧉​ꦥꦚ꧀ꦕꦺꦤ꧀ꦏꦺꦴꦮꦺ​ꦱꦶꦁ​ꦢꦶꦭꦸꦮꦂꦫꦶ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦱꦁꦏꦏ꧀ꦮꦱꦤꦺ​ꦲꦭ​꧉​ꦏꦸꦮꦶ​ꦥꦼꦁꦒꦮꦺꦪꦤ꧀ꦏꦸꦫꦺꦴꦃ​ꦱꦸꦕꦶ​꧈​ꦱꦶꦁ​ꦮꦶꦱ꧀ꦔꦽꦱꦶꦏ꧀ꦏꦶ​ꦲꦸꦫꦶꦥ꧀ꦩꦸ​ꦭꦤ꧀ꦲꦸꦒ​ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦥꦽꦕꦪ​ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦧꦼꦤꦼꦂ​꧉​ ¹⁴ꦒꦸꦱ꧀ꦠꦶ​ꦮꦶꦱ꧀ꦩꦁꦒꦶꦭ꧀ꦏꦺꦴꦮꦺ​ꦭꦤ꧀ꦠꦂꦫꦤ꧀ꦏꦧꦂ​ꦏꦧꦸꦔꦃꦲꦤ꧀ꦱꦶꦁ​ꦢꦶꦒꦼꦭꦂꦫꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦩꦫꦁ​ꦏꦺꦴꦮꦺ​꧉​ꦒꦸꦱ꧀ꦠꦶ​ꦩꦁꦒꦶꦭ꧀ꦏꦺꦴꦮꦺ​ꦱꦸꦥꦪ​ꦏꦺꦴꦮꦺ​ꦲꦸꦒ​ꦲꦺꦤ꧀ꦠꦸꦏ꧀ꦥꦤ꧀ꦢꦸꦩ꧀ꦩꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦒꦼꦱ꧀ꦱꦺ​꧈​ꦏꦺꦴꦮꦺ​ꦧꦏꦭ꧀ꦢꦶꦒꦸꦁꦒꦸꦁꦒꦸꦁꦒꦸꦁꦏꦪ​ꦲꦼꦁꦒꦺꦴꦤꦺ​ꦮꦺꦴꦁꦮꦺꦴꦁ​ꦧꦏꦭ꧀​ꦔ꧀ꦒꦸꦁꦒꦸꦁꦒꦸꦱ꧀ꦠꦶ​ꦪꦺꦯꦸꦱ꧀꧈​ ¹⁵ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦸꦢꦸ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦤꦸꦫꦸꦠ꧀ꦩꦫꦁ​ꦥꦶꦠꦸꦠꦸꦂ​ꦱꦶꦁ​ꦮꦶꦱ꧀ꦢꦶꦮꦸꦭꦁꦔꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦔꦁꦒꦺꦴ​ꦠꦼꦩ꧀ꦧꦸꦁ​ꦭꦤ꧀ꦲꦸꦒ​ꦔꦁꦒꦺꦴ​ꦭꦪꦁ​꧉​

¹⁶꧋ꦱꦁꦏꦏꦧꦼꦕꦶꦏ꧀ꦏꦤ꧀ꦤꦺ​꧈​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦢꦺꦮꦺ꧈​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦱꦶꦁ​ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧈​ꦮꦶꦱ꧀ꦔꦼꦏꦺꦏ꧀ꦏꦶꦥꦔ꧀ꦭꦶꦥꦸꦂ​ꦭꦤ꧀ꦥꦼꦔꦉꦥ꧀ꦲꦉꦥ꧀ꦱꦶꦁ​ꦭꦁꦒꦼꦁ​ꦩꦫꦁ​ꦏꦺꦴꦮꦺ​꧉​ ¹⁷ꦩꦸꦒꦩꦸꦒ​ꦢꦺꦏ꧀ꦤꦺꦲꦸꦒ​ꦔꦼꦏꦺꦏ꧀ꦏꦶꦏꦼꦏꦼꦤ꧀ꦢꦼꦭ꧀ꦭꦤ꧀ꦭꦤ꧀ꦏꦼꦏꦸꦮꦠ꧀ꦠꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​ꦲꦼꦁꦒꦺꦴꦤ꧀ꦩꦸ​ꦥꦢ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦕꦶꦏ꧀ ꦱꦼꦤꦗꦤ꧀ꦤ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦠꦼꦩ꧀ꦧꦸꦁ​ꦲꦥ​ꦏꦫꦺꦴ​ꦥꦼꦁꦒꦮꦺꦏꦸ꧉​

↑ ↑ ↑

꧋ꦫꦱꦸꦭ꧀ꦦꦈꦭꦸꦱ꧀ꦚꦸꦮꦸꦤ꧀ꦥꦤ꧀ꦢꦺꦴꦔ​꧉​

꧇​꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦶꦗꦶꦏ꧀ꦲꦺꦤꦺꦁꦥꦽꦏꦫ​ꦱꦶꦗꦶꦭꦺꦴꦫꦺꦴꦩꦼꦤꦺꦃ​ꦱꦶꦁ​ꦏꦸꦢꦸ​ꦠꦏ꧀ꦲꦺꦴꦩꦺꦴꦁ​꧉​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦪꦏꦸꦮꦶ​꧈​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦲꦩ꧀ꦧꦺꦴꦏ꧀ꦢꦺꦴꦔꦏ꧀ꦏꦺ꧉​ꦢꦶꦢꦺꦴꦔꦏ꧀ꦏꦏꦺꦱꦸꦥꦪ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦧꦶꦱ​ꦩꦿꦺꦩꦺꦤ꧀ꦩꦿꦺꦩꦺꦤ꧀ꦠꦼꦫꦸꦱ꧀ꦭꦤ꧀ꦢꦶꦠꦩ꧀ꦥ​ꦏꦫꦺꦴ​ꦮꦺꦴꦁꦮꦺꦴꦁ​꧈​ꦪ​ꦏꦪ​ꦤꦁꦔ꧀ꦒꦺꦴꦤ꧀ꦩꦸ​ꦏꦺꦴꦤꦺꦴ​꧉​ ²ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦺꦴꦫ​ꦏꦧꦺꦃ​ꦮꦺꦴꦁ​ꦒꦼꦊꦩ꧀ꦥꦽꦕꦪ​ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧉​ꦲꦺꦴꦏꦺꦃꦱꦶꦁ​ꦥꦢ​ꦔ꧀ꦭꦮꦤ꧀ꦭꦤ꧀​ꦤ꧀ꦢꦢꦺꦏ꧀ꦏꦏꦺꦱꦁꦱꦫꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ꦩꦸꦭꦤꦺ​꧈​ꦲꦮꦏ꧀ꦏꦺ​ꦢꦺꦮꦺꦚꦸꦮꦸꦤ꧀ꦥꦤ꧀ꦢꦺꦴꦔꦩꦸ​꧈​ꦱꦸꦥꦪ​ꦒꦸꦱ꧀ꦠꦶ​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦠꦔꦤ꧀ꦤꦺ​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​꧉​

³꧋ꦤꦁꦔꦶꦁ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦏꦼꦤꦺꦁꦢꦶꦗꦒꦏ꧀ꦏꦏꦺ꧉​ꦢꦺꦏ꧀ꦤꦺꦧꦏꦭ꧀ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦥꦽꦕꦪ​ꦠꦼꦫꦸꦱ꧀ꦭꦤ꧀ꦢꦺꦏ꧀ꦤꦺꦧꦏꦭ꧀ꦩꦒꦼꦂꦫꦶ​ꦏꦺꦴꦮꦺ​ꦱꦁꦏꦱꦏ꧀ꦮꦼꦂꦤꦤꦺ​ꦲꦭ​꧉​ ⁴ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦠꦼꦩꦼꦤ꧀ꦤꦸꦫꦸꦠ꧀ꦒꦸꦱ꧀ꦠꦶ​꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦥꦽꦕꦪ​ꦤꦺꦏ꧀ꦥꦶꦠꦸꦠꦸꦂꦫꦺ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦧꦏꦭ꧀ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧈​ꦱꦲꦶꦏꦶ​ꦭꦤ꧀ꦱꦏ꧀ꦠꦼꦫꦸꦱ꧀ꦱꦺ꧉​

⁵꧋ꦩꦸꦒꦩꦸꦒ​ꦒꦸꦱ꧀ꦠꦶ​ꦩꦢꦁꦔꦶꦲꦠꦶꦩꦸ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦢꦸꦤꦸꦁꦱꦼꦥꦶꦫ​ꦒꦼꦢꦺꦤꦺꦏꦠꦿꦺꦱ꧀ꦤꦤꦺꦒꦸꦱ꧀ꦠꦶ​ꦩꦫꦁ​ꦏꦺꦴꦮꦺ​ꦭꦤ꧀ꦥꦚꦸꦮꦸꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦲꦸꦒ​꧈​ꦩꦸꦒꦩꦸꦒ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦔꦼꦏꦺꦏ꧀ꦏꦶꦏꦼꦩꦤ꧀ꦠꦼꦥ꧀ꦥꦤ꧀ꦩꦫꦁ​ꦏꦺꦴꦮꦺ​꧉​

꧋ꦲꦗ​ꦩꦊꦱ꧀ꦏꦼꦂꦗ​꧉​

⁶꧋ꦥꦫ​ꦱꦼꦢꦸꦭꦸꦂ​꧈​ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦲꦮꦏ꧀ꦏꦺ​ꦢꦺꦮꦺꦩꦿꦺꦤ꧀ꦠꦃ​ꦏꦺꦴꦮꦺ​:ꦱꦼꦢꦸꦭꦸꦂ​ꦱꦶꦁ​ꦩꦊꦱ꧀ꦏꦼꦂꦗ​ꦭꦤ꧀ꦱꦶꦁ​ꦲꦸꦫꦶꦥ꧀ꦱꦏ꧀ꦏꦉꦥ꧀ꦥꦺ​꧈​ꦱꦶꦁ​ꦲꦺꦴꦫ​ꦤꦸꦫꦸꦠ꧀ꦩꦫꦁ​ꦥꦶꦮꦸꦭꦁꦔꦺ​ꦲꦮꦏ꧀ꦏꦺ​ꦢꦺꦮꦺ꧈​ꦱꦼꦢꦸꦭꦸꦂ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦼꦢꦺꦴꦃꦲꦶ꧉​ ⁷ꦏꦺꦴꦮꦺ​ꦢꦺꦮꦺꦥꦢ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦔꦼꦏꦺꦏ꧀ꦏꦶꦠꦸꦭꦢꦱꦶꦁ​ꦏꦼꦤꦺꦁꦲꦩ꧀ꦧꦺꦴꦏ꧀ꦠꦶꦫꦸ​꧉​ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦤꦁꦔ꧀ꦒꦺꦴꦤ꧀ꦩꦸ​ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦲꦺꦤꦏ꧀ꦲꦺꦤꦏ꧀ꦱ꧀ꦭꦺꦴꦚ꧀ꦗꦺꦴꦂ​ꦮꦲꦺ​꧉​ ⁸ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦚ꧀ꦗꦒꦺꦴꦁꦚ꧀ꦗꦒꦏ꧀ꦏꦏꦺꦭꦶꦪꦤꦺ​꧈​ꦲꦺꦴꦫ​꧉​ꦮꦸꦗꦸꦠ꧀ꦠꦺꦲꦮꦏ꧀ꦏꦺ​ꦢꦺꦮꦺꦚꦩ꧀ꦧꦸꦠ꧀ꦠꦄꦮꦤ꧀ꦮꦼꦔꦶꦱꦩ꧀ꦥꦺꦏ꧀ꦠꦔꦤ꧀ꦤꦺ​ꦏꦥꦊꦤ꧀ ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦢꦢꦶ​ꦉꦁꦒꦤꦺꦱꦥꦱꦥ​꧉​ ⁹ꦲꦮꦏ꧀ꦏꦺ​ꦢꦺꦮꦺꦲꦼꦁꦒꦺꦴꦤꦺ​ꦚꦩ꧀ꦧꦸꦠ꧀ꦠꦏꦸꦮꦶ​ꦲꦺꦴꦫ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦲꦺꦤ꧀ꦠꦸꦏ꧀​ꦚ꧀ꦗꦭꦸꦏ꧀ꦱꦺꦴꦏꦺꦴꦁꦔꦤ꧀ꦏꦺꦴꦮꦺ​꧈​ꦲꦺꦴꦫ​꧈​ꦤꦁꦔꦶꦁ​ꦱꦸꦥꦪ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦏꦼꦤꦺꦁꦲꦩ꧀ꦧꦺꦴꦏ꧀ꦠꦶꦫꦸ​꧉​ ¹⁰ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦤꦁꦔ꧀ꦒꦺꦴꦤ꧀ꦩꦸ​ꦲꦮꦏ꧀ꦏꦺ​ꦢꦺꦮꦺꦪ​ꦲꦗꦼꦏ꧀ꦔꦺꦴꦩꦺꦴꦁꦔꦶꦏꦺꦴꦮꦺ​:ꦱꦼꦢꦸꦭꦸꦂ​ꦱꦶꦁ​ꦩꦊꦱ꧀ꦏꦼꦂꦗ​ꦲꦗ​ꦢꦶꦫꦺꦮꦁꦔꦶ​꧉​

¹¹꧋ꦲꦮꦏ꧀ꦏꦺ​ꦢꦺꦮꦺꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦏꦿꦸꦔꦸ​ꦤꦺꦏ꧀ꦤꦁꦔ꧀ꦒꦺꦴꦤ꧀ꦩꦸ​ꦲꦺꦤꦺꦁꦱꦼꦢꦸꦭꦸꦂ​ꦱꦶꦗꦶꦭꦺꦴꦫꦺꦴꦱꦶꦁ​ꦩꦊꦱ꧀ꦏꦼꦂꦗ​꧈​ꦩꦭꦃ​ꦤꦩꦸꦁ​ꦔꦺꦠꦤ꧀ꦔꦸꦭꦺꦴꦤ꧀ꦔꦿꦸꦱꦸꦃꦲꦶꦲꦸꦫꦶꦥ꧀ꦥꦺꦭꦶꦪꦤꦺ​꧉​ ¹²ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦲꦮꦏ꧀ꦏꦺ​ꦢꦺꦮꦺꦩꦿꦺꦤ꧀ꦠꦃ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦸꦮꦶ​ꦱꦸꦥꦪ​ꦥꦢ​ꦚꦩ꧀ꦧꦸꦠ꧀ꦠꦔ꧀ꦒꦺꦴꦭꦺꦏ꧀ꦱꦤ꧀ꦢꦁꦥꦔꦤ꧀ꦤꦺꦢꦺꦮꦺ꧉​

¹³꧋ꦭꦤ꧀ꦏꦺꦴꦮꦺ​꧈​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦱꦶꦁ​ꦲꦺꦴꦫ​ꦏꦪ​ꦔꦺꦴꦤꦺꦴ​꧈​ꦏꦺꦴꦮꦺ​ꦲꦗ​ꦥꦢ​ꦏꦼꦱꦼꦭ꧀ꦲꦼꦁꦒꦺꦴꦤ꧀ꦩꦸ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀꧈​ ¹⁴ꦢꦶꦠꦶꦠꦺꦤ꧀ꦤꦶ​꧈​ꦩꦼꦤꦮ​ꦮꦲꦺ​ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦲꦺꦴꦫ​ꦒꦼꦊꦩ꧀ꦩꦤꦸꦠ꧀ꦩꦫꦁ​ꦲꦺꦴꦩꦺꦴꦁꦔꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦏꦼꦠꦸꦭꦶꦱ꧀ꦤꦁꦭꦪꦁ​ꦲꦶꦏꦶ​꧉​ꦱꦼꦢꦸꦭꦸꦂ​ꦏꦸꦮꦶ​ꦲꦗ​ꦢꦶꦲꦼꦗꦺꦏ꧀ꦧꦼꦧꦉꦁꦔꦤ꧀ ꦩꦼꦁꦏꦺꦴ​ꦭꦲꦸꦠ꧀ꦲꦶꦱꦶꦤ꧀ꦢꦺꦮꦺ꧉​ ¹⁵ꦤꦁꦔꦶꦁ​ꦢꦺꦏ꧀ꦤꦺꦲꦗ​ꦢꦶꦲꦁꦒꦼꦥ꧀ꦏꦪ​ꦩꦸꦁꦱꦸꦃ​꧈​ꦲꦺꦴꦫ​꧈​ꦢꦺꦏ꧀ꦤꦺꦏꦸꦢꦸ​ꦲꦩ꧀ꦧꦺꦴꦏ꧀ꦧꦼꦤꦼꦂꦫꦏꦺꦏꦪ​ꦱꦼꦢꦸꦭꦸꦂ​꧉​

꧋ꦥꦼꦤꦸꦠꦸꦥ꧀ꦭꦤ꧀ꦥꦩꦸꦗꦶ​ꦱ꧀ꦭꦩꦼꦠ꧀꧈​

¹⁶꧋ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦢꦺꦮꦺꦱꦶꦁ​ꦧꦶꦱ​ꦔꦼꦏꦺꦏ꧀ꦏꦶꦏꦠꦼꦤ꧀ꦠꦽꦩ꧀ꦩꦤ꧀꧈​ꦩꦸꦒꦩꦸꦒ​ꦢꦺꦏ꧀ꦤꦺꦤꦸꦤ꧀ꦠꦸꦤ꧀ꦏꦺꦴꦮꦺ​ꦏꦧꦺꦃ​ꦭꦤ꧀ꦔꦼꦏꦺꦏ꧀ꦏꦶꦏꦠꦼꦤ꧀ꦠꦽꦩ꧀ꦩꦤ꧀ꦩꦫꦁ​ꦏꦺꦴꦮꦺ​ꦱꦏ꧀ꦠꦼꦫꦸꦱ꧀ꦱꦺꦲꦶꦁ​ꦥꦽꦏꦫ​ꦲꦥ​ꦮꦲꦺ​꧉​

¹⁷꧋ꦕꦸꦏꦸꦥ꧀ꦱꦼꦩꦺꦤꦺ​ꦮꦲꦺ​ꦭꦪꦁ​ꦲꦶꦏꦶ​꧉​ꦲꦏꦸ​꧈​ꦦꦈꦭꦸꦱ꧀ ꦲꦏꦸ​ꦱꦶꦁ​ꦤꦤ꧀ꦢꦠꦔꦤ꧀ꦤꦶꦭꦪꦁ​ꦲꦶꦏꦶ​꧈​ꦲꦏꦸ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​꧉​

¹⁸꧋ꦩꦸꦒꦩꦸꦒꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦔꦺꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺꦩꦫꦁꦏꦺꦴꦮꦺꦏꦧꦺꦃ꧉​

ꦦꦈꦭꦸꦱ꧀ꦭꦤ꧀ꦠꦶꦩꦺꦴꦠꦶꦪꦸꦱ꧀

↑ ↑ ↑

Cithakan:Jawa

↑ ↑ ↑

#if:

↑ ↑ ↑

#if:

↑ ↑ ↑

#if:

↑ ↑ ↑

#if:

↑ ↑ ↑

#if:

↑ ↑ ↑

#if:

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:C

---

Cithakan:Jawa ↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:C

---

Cithakan:Jawa ↑ ↑ ↑

Cithakan:C

---

Cithakan:Jawa ↑ ↑ ↑

Cithakan:C

---

Cithakan:Jawa ↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑

Cithakan:Jawa

↑ ↑ ↑