ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/꧇꧑꧇ꦦꦺꦠꦿꦸꦱ꧀

꧁꧋ꦭꦪꦁꦔꦺꦫꦱꦸꦭ꧀ꦦꦺꦠꦿꦸꦱ꧀꧈​꧂
ꦭꦪꦁꦤꦺꦴꦩꦼꦂꦱꦶꦗꦶ

---

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

¹꧋ꦭꦪꦁꦩꦫꦁꦱꦼꦢꦸꦭꦸꦂꦱꦼꦢꦸꦭꦸꦂꦏꦸꦱꦶꦁꦥꦢꦏꦥꦼꦚ꧀ꦕꦂꦩꦁꦒꦺꦴꦤ꧀ꦤꦁꦧꦮꦃꦥꦺꦴꦤ꧀ꦠꦸꦱ꧀ ꦧꦮꦃꦒꦭꦱꦶꦪꦴ꧈​ꦧꦮꦃꦑꦥꦢꦺꦴꦱꦶꦪ꧈​ꦤꦁꦧꦮꦃꦄꦱꦶꦪꦭꦤ꧀ꦧꦮꦃꦧꦶꦠꦶꦤꦶꦪ꧈​ꦱꦼꦢꦸꦭꦸꦂꦱꦼꦢꦸꦭꦸꦂꦱꦶꦁꦮꦶꦱ꧀ꦢꦶꦥꦶꦭꦶꦃꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦢꦢꦶꦲꦸꦩꦠ꧀ꦠꦺꦭꦤ꧀ꦱꦲꦶꦏꦶꦥꦢꦩꦁꦒꦺꦴꦤ꧀ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦲꦢꦺꦴꦃꦏꦫꦺꦴꦤꦼꦒꦫꦤꦺꦢꦺꦮꦺ꧉​

꧋ꦲꦶꦏꦶꦭꦪꦁꦱꦁꦏꦦꦺꦠꦿꦸꦱ꧀ ꦱꦼꦢꦸꦭꦸꦂꦩꦸꦱꦶꦁꦢꦶꦥꦶꦭꦶꦃꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦢꦢꦶꦫꦱꦸꦭ꧀ꦭꦺ꧉​ ²ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦮꦶꦱ꧀ꦢꦶꦥꦶꦭꦶꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦏꦸꦮꦶ​ꦥꦚ꧀ꦕꦺꦤ꧀ꦮꦶꦱ꧀ꦢꦢꦶ​ꦏꦉꦥ꧀ꦥꦺ​ꦏꦮꦶꦠ꧀​ꦩ꧀ꦧꦶꦪꦺꦤ꧀ꦤꦺ꧉​ꦩꦸꦭꦤꦺ​ꦢꦺꦏ꧀ꦤꦺꦔꦼꦢꦸꦤ꧀ꦤꦏꦺꦫꦺꦴꦃ​ꦱꦸꦕꦶ​ꦲꦶꦁ​ꦲꦸꦫꦶꦥ꧀ꦩꦸ​꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦢꦢꦶ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦱꦸꦕꦶ​꧉​ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦲꦸꦫꦶꦥ꧀ꦩꦤꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦧꦶꦱ​ꦉꦱꦶꦏ꧀ꦲꦠꦶꦩꦸ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦭꦤ꧀ꦒꦼꦠꦶꦃꦲꦺ​ꦠꦸꦩꦺꦠꦺꦱ꧀ꦏꦁꦒꦺꦴ​ꦤꦼꦧꦸꦱ꧀ꦱꦏ꧀ꦏꦺꦃꦲꦺꦢꦺꦴꦱꦩꦸ​꧉​

꧋ꦩꦸꦒꦩꦸꦒ​ꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦭꦸꦧꦺꦂ​ꦲꦶꦁ​ꦲꦸꦫꦶꦥ꧀ꦩꦸ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦥꦼꦔꦉꦥ꧀ꦲꦉꦥ꧀ꦥꦺ​ꦲꦮꦏ꧀ꦏꦺ​ꦢꦺꦮꦺ꧉​

³꧋ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦥꦢ​ꦩꦼꦩꦸꦗꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦥꦏ꧀ꦏꦺꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦲꦮꦶꦠ꧀ꦱꦁꦏꦒꦼꦢꦺꦤꦺꦏꦮꦼꦭꦱ꧀ꦱꦤ꧀ꦤꦺ​ꦢꦺꦏ꧀ꦤꦺꦔꦚꦂꦫꦏꦺꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺ꧈​ꦧꦉꦁ​ꦏꦫꦺꦴ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​꧉​ꦗꦭꦂꦫꦤ꧀ꦱꦁꦏꦏꦸꦮꦶ​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦲꦸꦫꦶꦥ꧀ꦥꦺꦏꦼꦧꦼꦏ꧀ꦏꦫꦺꦴ​ꦥꦼꦔꦉꦥ꧀ꦲꦉꦥ꧀꧈​ ⁴ꦏꦼꦗꦧ​ꦱꦁꦏꦏꦸꦮꦶ​꧈​ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦧꦶꦱ​ꦔꦉꦥ꧀ꦲꦉꦥ꧀ꦩꦫꦁ​ꦥꦤ꧀ꦢꦸꦩ꧀ꦩꦤ꧀ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦥꦤ꧀ꦢꦸꦩ꧀ꦩꦤ꧀ꦲꦶꦏꦶ​ꦏꦱꦶꦩ꧀ꦥꦼꦤ꧀ꦤꦁꦱ꧀ꦮꦂꦒ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦩꦸꦭꦤꦺ​ꦪ​ꦲꦺꦴꦫ​ꦧꦶꦱ​ꦫꦸꦱꦏ꧀ꦲꦥ​ꦉꦒꦼꦠ꧀ꦲꦥ​ꦲꦭꦸꦩ꧀꧈​ ⁵ꦏꦫꦺꦴꦩꦼꦤꦺꦃ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦒꦼꦂꦫꦶ​ꦲꦮꦏ꧀ꦏꦺ​ꦢꦺꦮꦺꦔꦁꦒꦺꦴ​ꦥꦔ꧀ꦮꦱꦤꦺ​꧈​ꦗꦚ꧀ꦗꦶ​ꦲꦮꦏ꧀ꦏꦺ​ꦢꦺꦮꦺꦩꦤ꧀ꦠꦼꦥ꧀ꦠꦼꦫꦸꦱ꧀ꦲꦼꦁꦒꦺꦴꦤꦺ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ꦠꦸꦗꦸꦮꦤ꧀ꦤꦺ꧈​ꦱꦸꦥꦪ​ꦲꦶꦁ​ꦠꦼꦩ꧀ꦧꦺ​꧈​ꦲꦶꦁ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦱꦏ꧀ꦲꦺꦤꦺꦁꦔꦺꦲꦭ​ꦭꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦱꦼꦩ꧀ꦧꦫꦁ​ꦧꦏꦭ꧀ꦤꦼꦏꦏ꧀ꦏꦏꦺꦧꦼꦕꦶꦏ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​

⁶꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦲ꦳ꦪꦸꦏ꧀ꦥꦢ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦲꦶꦁ​ꦏꦧꦸꦔꦃꦲꦤ꧀ ꦱꦼꦤꦗꦤ꧀ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦱꦼꦢꦶꦭꦸꦠ꧀ꦤꦤ꧀ꦢꦁꦱꦏ꧀ꦮꦼꦂꦤꦤꦺ​ꦏꦱꦸꦱꦃꦲꦤ꧀꧈​ ⁷ꦏꦸꦮꦶꦏꦧꦺꦃꦏꦸꦢꦸꦏ꧀ꦭꦏꦺꦴꦤ꧀ ꦱꦸꦥꦪꦏꦺꦠꦺꦴꦏ꧀ꦠꦼꦤꦤ꧀ꦲꦺꦴꦫꦤꦺꦥꦼꦔꦤ꧀ꦢꦼꦭ꧀ꦭꦺꦲꦮꦏ꧀ꦏꦺꦢꦺꦮꦺꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉​ꦤꦺꦏ꧀ꦢꦶꦥꦶꦏꦶꦂꦥꦫꦱꦼꦢꦸꦭꦸꦂ꧈​ꦒꦺꦏ꧀ꦲꦼꦩꦱ꧀ꦱꦶꦁꦧꦏꦭ꧀ꦫꦸꦱꦏ꧀ꦮꦲꦺꦏꦸꦢꦸꦢꦶꦲꦺꦴꦧꦺꦴꦁ꧈​ꦱꦸꦥꦪꦏꦺꦠꦺꦴꦏ꧀ꦠꦼꦤꦤ꧀ꦲꦺꦴꦫꦤꦺ꧉​ꦩꦸꦭꦤꦺꦏꦸꦮꦶꦏꦧꦺꦃꦏꦸꦢꦸꦏ꧀ꦭꦏꦺꦴꦤ꧀ ꦱꦸꦥꦪꦲꦩ꧀ꦧꦺꦱꦸꦏ꧀ ꦤꦺꦏ꧀ꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦠꦼꦏꦩꦼꦤꦺꦃ꧈​ꦲꦮꦏ꧀ꦏꦺꦢꦺꦮꦺꦧꦶꦱꦤꦩ꧀ꦥꦥꦼꦔꦊꦩ꧀ꦩꦤ꧀ꦒꦼꦢꦺꦱꦁꦏꦒꦸꦱ꧀ꦠꦶꦄꦭ꧀ꦭꦃ꧉​ ⁸ꦏꦺꦴꦮꦺ​ꦥꦢ​ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦼꦤꦗꦤ꧀ꦏꦺꦴꦮꦺ​ꦢꦸꦫꦸꦁ​ꦠꦲꦸ​ꦮꦼꦫꦸꦃ​ꦢꦺꦏ꧀ꦤꦺꦭꦤ꧀ꦱꦼꦤꦗꦤ꧀ꦤ​ꦏꦺꦴꦮꦺ​ꦱꦲꦶꦏꦶ​ꦲꦺꦴꦫ​ꦮꦼꦫꦸꦃ​ꦢꦺꦏ꧀ꦤꦺ꧈​ꦩꦼꦏ꧀ꦱ​ꦏꦺꦴꦮꦺ​ꦥꦢ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ꦭꦤ꧀ꦱꦲꦶꦏꦶ​ꦏꦺꦴꦮꦺ​ꦥꦢ​ꦔꦭꦩ꧀ꦩꦶ​ꦏꦧꦸꦔꦃꦲꦤ꧀ꦱꦶꦁ​ꦒꦼꦢꦺꦲꦶꦁ​ꦲꦠꦶꦩꦸ​꧈​ꦏꦧꦸꦔꦃꦲꦤ꧀ꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦢꦸꦤꦸꦁꦔꦏꦺꦭꦤ꧀ꦏꦧꦸꦔꦃꦲꦤ꧀ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺꦠꦼꦤꦤ꧀꧈​ ⁹ꦥꦫ​ꦱꦼꦢꦸꦭꦸꦂ​꧈​ꦧꦼꦤꦼꦂ​ꦏꦺꦴꦮꦺ​ꦥꦢ​ꦧꦸꦔꦃ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦿꦩ꧀ꦥꦸꦁꦔꦏꦺꦥꦼꦁꦒꦮꦺꦪꦤ꧀ꦏꦸꦲꦶꦁ​ꦲꦸꦫꦶꦥ꧀ꦩꦸ​꧈​ꦪꦏꦸꦮꦶ​꧈​ꦢꦺꦏ꧀ꦤꦺꦧꦏꦭ꧀​ꦔ꧀ꦭꦸꦮꦂꦫꦶ​ꦏꦺꦴꦮꦺ​ꦏꦧꦺꦃ​ꦱꦁꦏꦱꦏ꧀ꦲꦺꦤꦺꦁꦔꦺꦲꦭ​ꦲꦶꦁ​ ꦢꦺꦴꦚ​ꦏꦺꦤꦺ​꧈​ꦱꦸꦥꦪ​ꦲꦶꦁ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦱꦼꦩ꧀ꦧꦫꦁ​ꦧꦶꦱ​ꦢꦢꦶ​ꦧꦼꦕꦶꦏ꧀ꦏꦁꦒꦺꦴ​ꦏꦺꦴꦮꦺ​꧉​ꦭꦤ꧀ꦏꦸꦮꦶ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀ ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

¹⁰꧋ꦧꦧ꧀ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀​ꦔ꧀ꦭꦸꦮꦂꦫꦶ​ꦏꦺꦴꦮꦺ​ꦱꦁꦏꦱꦏ꧀ꦲꦺꦤꦺꦁꦔꦺꦲꦭ​ꦲꦶꦁ​ꦢꦺꦴꦚ​ꦏꦺꦤꦺ​ꦏꦸꦮꦶ​ꦥꦫ​ꦤꦧꦶ​ꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀ꦮꦶꦱ꧀ꦏꦼꦥꦺꦔꦶꦤ꧀ꦔꦼꦂꦠꦶ​꧈​ꦩꦸꦭꦤꦺ​ꦮꦶꦱ꧀ꦥꦢ​ꦩꦶꦏꦶꦂꦩꦶꦏꦶꦂꦫꦏꦺꦭꦤ꧀ꦤꦶꦠꦶꦥꦿꦶꦏ꧀ꦱ​ꦱꦏ꧀ꦧꦶꦱꦧꦶꦱꦤꦺ꧉​ꦥꦫ​ꦤꦧꦶ​ꦏꦸꦮꦶ​ꦮꦶꦱ꧀ꦔꦺꦴꦩꦺꦴꦁꦔꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦏꦺꦴꦮꦺ​꧉​ ¹¹ꦲꦮꦶꦠ꧀ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦤ​ꦲꦶꦁ​ꦏꦿꦶꦱ꧀ꦡꦸꦱ꧀ꦲꦸꦒ​ꦲꦤ​ꦲꦶꦁ​ꦥꦫ​ꦤꦧꦶ​ꦏꦸꦮꦶ​ꦭꦤ꧀ꦔꦼꦏꦺꦏ꧀ꦏꦶꦔꦼꦂꦠꦶ​ꦩꦫꦁ​ꦥꦫ​ꦤꦧꦶ​꧈​ꦤꦺꦏ꧀ꦏꦿꦶꦱ꧀ꦡꦸꦱ꧀ꦧꦏꦭ꧀​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀ꦒꦼꦢꦺ꧈​ꦲꦸꦒ​ꦤꦺꦏ꧀ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦢꦺꦏ꧀ꦤꦺꦧꦏꦭ꧀ꦔꦼꦠꦺꦴꦏ꧀ꦏꦏꦺꦒꦼꦢꦺꦤꦺꦏ꧀ꦮꦱꦤꦺ​꧉​ꦥꦫ​ꦤꦧꦶ​ꦩꦲꦸ​ꦩꦶꦏꦶꦂ​ꦭꦤ꧀ꦤꦶꦠꦶꦥꦿꦶꦏ꧀ꦱ​ꦏꦼꦥꦺꦔꦶꦤ꧀ꦔꦼꦂꦠꦶ​ꦏꦥꦤ꧀ꦭꦤ꧀ꦏꦼꦥꦿꦶꦪꦺ​ꦲꦼꦁꦒꦺꦴꦤꦺ​ꦥꦽꦏꦫꦥꦽꦏꦫ​ꦩꦲꦸ​ꦧꦏꦭ꧀​ꦏ꧀ꦭꦏꦺꦴꦤ꧀꧈​ ¹²ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤ꧀ꦢꦸꦢꦸꦃꦲꦏꦺꦩꦫꦁ​ꦥꦫ​ꦤꦧꦶ​ꦩꦲꦸ​꧈​ꦤꦺꦏ꧀ꦥꦽꦏꦫꦥꦽꦏꦫ​ꦱꦶꦁ​ꦏꦸꦢꦸ​ꦏ꧀ꦭꦏꦺꦴꦤ꧀ꦏꦸꦮꦶ​ꦲꦺꦴꦫ​ꦧꦏꦭ꧀​ꦏ꧀ꦭꦏꦺꦴꦤ꧀ꦲꦶꦁ​ꦗꦩꦤ꧀ꦤꦺ​ꦥꦫ​ꦤꦧꦶ​ꦏꦸꦮꦶ​꧈​ꦲꦺꦴꦫ​꧈​ꦤꦁꦔꦶꦁ​ꦧꦏꦭ꧀​ꦏ꧀ꦭꦏꦺꦴꦤ꧀ꦲꦶꦁ​ꦗꦩꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​꧉​ꦪ​ꦥꦽꦏꦫꦥꦽꦏꦫ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦥꦫ​ꦤꦧꦶ​ꦏꦸꦮꦶ​ꦱꦶꦁ​ꦱꦲꦶꦏꦶ​ꦢꦶꦏꦧꦂꦫꦏꦺꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦫꦺꦴꦃ​ꦱꦸꦕꦶ​ꦱꦶꦁ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​ꦏꦁꦒꦺꦴ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦏꦸꦮꦶ​ꦭꦤ꧀ꦥꦫ​ꦩꦸꦭꦺꦏꦠ꧀ꦮꦲꦺ​ꦏꦪꦏꦪ​ꦥꦢ​ꦔꦶꦚ꧀ꦗꦼꦤ꧀ ꦗꦭꦂꦫꦤ꧀ꦏꦼꦥꦺꦔꦶꦤ꧀ꦢꦸꦤꦸꦁꦧꦧ꧀ꦥꦽꦏꦫꦥꦽꦏꦫ​ꦏꦸꦮꦶ​꧉​

꧋ꦥꦢ​ꦲꦸꦫꦶꦥ꧀ꦱꦶꦁ​ꦱꦸꦕꦶ​꧉​

¹³꧋ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦥꦢ​ꦢꦶꦥꦶꦏꦶꦂ​ꦥꦽꦏꦫꦥꦽꦏꦫ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦩꦲꦸ​ꦭꦤ꧀ꦥꦢ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦲꦼꦁꦒꦺꦴꦤ꧀ꦩꦸ​ꦔ꧀ꦭꦏꦺꦴꦏ꧀ꦏꦏꦺꦲꦸꦫꦶꦥ꧀꧈​ꦏꦺꦴꦮꦺ​ꦏꦸꦢꦸ​ꦱꦶꦁ​ꦲꦮꦱ꧀ꦭꦤ꧀ꦱꦶꦁ​ꦩꦤ꧀ꦠꦼꦥ꧀ꦲꦼꦁꦒꦺꦴꦤ꧀ꦩꦸ​ꦥꦢ​ꦔꦉꦥ꧀ꦲꦉꦥ꧀ꦠꦼꦏꦤꦺ​ꦧꦼꦂꦏꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪꦏꦸꦮꦶ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦧꦏꦭ꧀ꦠꦼꦏ​ꦩꦼꦤꦺꦃ​ꦭꦤ꧀​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦱꦏ꧀ꦲꦺꦤꦺꦁꦔꦺꦲꦭ​ꦲꦶꦁ​ꦢꦺꦴꦚ​ꦏꦺꦤꦺ​꧉​ ¹⁴ꦏꦺꦴꦮꦺ​ꦏꦸꦢꦸ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦥꦽꦏꦫ​ꦲꦥ​ꦮꦲꦺ​ꦭꦤ꧀ꦲꦗ​ꦱꦩ꧀ꦥꦺꦏ꧀ꦏꦠꦸꦠ꧀ꦩꦼꦤꦺꦃ​ꦩꦺꦭꦸ​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦱꦶꦁ​ꦲꦭ​ꦏꦪ​ꦱꦶꦁ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦩ꧀ꦧꦶꦪꦺꦤ꧀ꦢꦺꦴꦁꦔꦺꦏꦺꦴꦮꦺ​ꦢꦸꦫꦸꦁ​ꦔꦼꦂꦠꦶ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ¹⁵ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦱꦶꦁ​ꦱꦸꦕꦶ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦩꦁꦒꦶꦭ꧀ꦏꦺꦴꦮꦺ​꧈​ꦪ​ꦱꦸꦕꦶ​꧉​ ¹⁶ꦥꦚ꧀ꦕꦺꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦪ​ꦮꦶꦱ꧀ꦔꦺꦴꦁꦏꦺꦴꦤ꧀ꦤꦧꦶ​ꦩꦺꦴꦱꦼꦱ꧀ꦤꦸꦭꦶꦱ꧀ꦔꦺꦤꦺ​:“ꦲꦏꦸ​꧈​ꦒꦸꦱ꧀ꦠꦶ​ꦄꦭ꧀ꦭꦃꦩꦸ꧈​ꦱꦸꦕꦶ​꧈​ꦩꦸꦭꦤꦺ​ꦏꦺꦴꦮꦺ​ꦲꦸꦒ​ꦏꦸꦢꦸ​ꦲꦸꦫꦶꦥ꧀ꦱꦶꦁ​ꦱꦸꦕꦶ​꧉​”

¹⁷꧋ꦥꦫ​ꦱꦼꦢꦸꦭꦸꦂ​꧈​ꦧꦼꦤꦼꦂ​ꦤꦺꦏ꧀ꦏꦺꦴꦮꦺ​ꦤ꧀ꦢꦺꦴꦁꦔꦒꦸꦱ꧀ꦠꦶ​ꦄꦭ꧀ꦭꦃ​ꦲꦩ꧀ꦧꦺꦴꦏ꧀ꦕꦼꦭꦸꦏ꧀​“ꦧꦥꦏ꧀꧉”ꦤꦁꦔꦶꦁ​ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦥꦶꦭꦶꦃꦱꦶꦃ꧈​ꦲꦺꦴꦫ​ꦢꦸꦩꦺꦃꦏꦺꦴꦮꦺ​ꦲꦤꦏ꧀ꦏꦺ​꧈​ꦲꦺꦴꦫ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀​ꦤ꧀ꦢꦼꦭꦺꦴꦏ꧀ꦭꦏꦸꦤꦺꦭꦤ꧀ꦲꦭꦧꦼꦤꦼꦫꦺꦏꦧꦺꦃ​ꦮꦺꦴꦁ​꧉​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦥꦢ​ꦤ꧀ꦢꦸꦮꦺꦤ꧀ꦤꦶ​ꦮꦼꦢꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦸꦮꦺꦤꦺ​ꦲꦮꦏ꧀ꦏꦺ​ꦢꦺꦮꦺꦲꦸꦫꦶꦥ꧀ꦲꦶꦁ​ꦢꦺꦴꦚ​ꦏꦺꦤꦺ​꧈​ꦲ꦳ꦪꦸꦏ꧀ꦥꦢ​ꦲꦸꦫꦶꦥ꧀ꦱꦶꦁ​ꦲꦠꦶꦲꦠꦶ꧉​ ¹⁸ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦥꦫ​ꦱꦼꦢꦸꦭꦸꦂ​꧈​ꦩꦲꦸꦤꦺ​ꦲꦸꦫꦶꦥ꧀ꦥꦺꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧈​ꦲꦮꦶꦠ꧀ꦥꦶꦮꦸꦭꦁꦔꦺ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦤꦩꦸꦁ​ꦩꦫꦏ꧀ꦏꦏꦺꦲꦮꦏ꧀ꦏꦺ​ꦢꦺꦮꦺꦔ꧀ꦭꦏꦺꦴꦤ꧀ꦤꦶ​ꦧꦫꦁꦧꦫꦁ​ꦱꦶꦁ​ꦲꦺꦴꦫ​ꦲꦺꦤꦺꦁꦠꦼꦒꦼꦱ꧀ꦱꦺ​꧉​ꦤꦁꦔꦶꦁ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦶꦥꦼꦢꦺꦴꦠ꧀ꦱꦁꦏꦲꦸꦫꦶꦥ꧀ꦱꦶꦁ​ꦲꦺꦴꦫ​ꦩꦶꦒꦸꦤꦤꦶ​ꦏꦸꦮꦶ​꧉​ꦭꦃ​ꦲꦥ​ꦱꦶꦁ​ꦢꦶꦲꦼꦁꦒꦺꦴ​ꦲꦩ꧀ꦧꦪꦂ​ꦏꦸꦮꦶ​ꦥꦫ​ꦱꦼꦢꦸꦭꦸꦂ​?ꦲꦺꦴꦫ​ꦧꦫꦁ​ꦱꦶꦁ​ꦫꦸꦱꦏ꧀ ꦲꦺꦴꦫ​ꦲꦼꦩꦱ꧀ꦲꦥ​ꦱꦼꦭꦏ​꧈​ꦲꦺꦴꦫ​꧉​ ¹⁹ꦱꦶꦁ​ꦢꦶꦲꦼꦁꦒꦺꦴ​ꦲꦩ꧀ꦧꦪꦂ​ꦪ​ꦒꦼꦠꦶꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦱꦶꦁ​ꦒꦼꦢꦺꦲꦗꦶꦤꦺ​꧉​ꦲꦮꦶꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦏꦸꦂꦧꦤ꧀ꦤꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦪ​ꦮꦼꦢꦸꦱ꧀ꦱꦶꦁ​ꦲꦺꦴꦫ​ꦲꦺꦤꦺꦁꦕꦶꦫꦶꦤꦺ​ꦧ꧀ꦭꦱ꧀꧈​ ²⁰ꦱꦏ꧀ꦢꦸꦫꦸꦁꦔꦺꦗꦒꦠ꧀ꦢꦶꦒꦮꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦩꦶꦭꦶꦃ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦧꦏꦭ꧀ꦢꦢꦶ​ꦏꦸꦂꦧꦤ꧀ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦩꦤꦸꦁꦱ​꧉​ꦤꦁꦔꦶꦁ​ꦔꦼꦤ꧀ꦠꦺꦤ꧀ꦤꦶ​ꦗꦩꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦤ꧀ꦲꦶꦏꦶ​꧈​ꦗꦩꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦁꦏꦺꦴꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦼꦢꦸꦤ꧀ꦤꦁꦗꦒꦠ꧀ꦏꦺꦤꦺ​ꦤꦼꦏꦏ꧀ꦏꦏꦺꦏꦼꦱ꧀ꦭꦩꦼꦠ꧀ꦠꦤ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ ²¹ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺꦱꦏ꧀ꦏꦧꦺꦃꦲꦺ꧉​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦔꦺꦏ꧀ꦏꦺꦢꦺꦏ꧀ꦤꦺꦱꦁꦏꦥꦠꦶ​ꦭꦤ꧀ꦢꦺꦏ꧀ꦤꦺꦢꦶꦏꦺꦏ꧀ꦏꦶꦥꦔ꧀ꦮꦱ​ꦔꦸꦁꦏꦸꦭ꧀ꦭꦶ​ꦱꦼꦩ꧀ꦧꦫꦁ​꧈​ꦠꦸꦗꦸꦮꦤ꧀ꦤꦺ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ ꦧꦶꦱ​ꦔꦉꦥ꧀ꦲꦉꦥ꧀ꦤꦩ꧀ꦥ​ꦱꦏ꧀ꦲꦺꦤꦺꦁꦔꦺꦏꦧꦼꦕꦶꦏ꧀ꦏꦤ꧀ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦲꦶꦁ​ꦠꦼꦩ꧀ꦧꦺ​꧉​

²²꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦥꦢ​ꦠꦼꦩꦼꦤ꧀ꦩꦤꦸꦠ꧀ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦏꦺꦴꦮꦺ​ꦪ​ꦥꦢ​ꦤꦶꦤ꧀ꦢꦏ꧀ꦏꦏꦺꦲꦸꦫꦶꦥ꧀ꦱꦶꦁ​ꦉꦱꦶꦏ꧀ ꦥꦼꦢꦺꦴꦠ꧀ꦱꦁꦏꦱꦏ꧀ꦲꦺꦤꦺꦁꦔꦺꦥꦶꦪꦭ​꧉​ꦏꦸꦮꦶ​ꦗꦭꦂꦫꦤ꧀ꦤꦺ​ꦏꦺꦴꦮꦺ​ꦱꦲꦶꦏꦶ​ꦥꦢ​ꦧꦶꦱ​ꦠꦿꦺꦱ꧀ꦤꦲꦶꦁ​ꦭꦲꦶꦂꦧꦠꦶꦤ꧀ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦠꦸꦁꦒꦭ꧀ꦥꦽꦕꦪ​꧈​ꦩꦸꦭꦤꦺ​ꦪ​ꦥꦢ​ꦩꦼꦩ꧀ꦥꦼꦁꦔ​ꦠꦼꦫꦸꦱ꧀ꦲꦼꦁꦒꦺꦴꦤ꧀ꦩꦸ​ꦥꦢ​ꦤꦿꦺꦱ꧀ꦤꦤ꧀ꦤꦶꦱꦏ꧀ꦥꦢꦥꦢ꧈​ꦤꦁꦔꦶꦁ​ꦔꦁꦒꦺꦴ​ꦏꦠꦿꦺꦱ꧀ꦤꦤ꧀ꦱꦶꦁ​ꦭꦸꦮꦶꦃ​ꦗꦼꦫꦸ꧉​ ²³ꦲꦮꦶꦠ꧀ꦔꦼꦂꦠꦶꦪ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦱꦲꦶꦏꦶ​ꦮꦶꦱ꧀ꦢꦢꦶ​ꦮꦺꦴꦁ​ꦲꦚꦂ​꧈​ꦏꦭꦲꦶꦂꦫꦏꦺꦩꦼꦤꦺꦃ​꧈​ꦲꦺꦴꦫ​ꦱꦁꦏꦧꦥ​ꦩꦤꦸꦁꦱ​ꦱꦶꦁ​ꦏꦸꦢꦸ​ꦩꦠꦶ​꧈​ꦲꦺꦴꦫ​꧈​ꦤꦁꦔꦶꦁ​ꦱꦁꦏꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀ꦭꦤ꧀ꦭꦁꦒꦼꦁ​꧉​ ²⁴ꦏꦸꦮꦶ​ꦥꦚ꧀ꦕꦺꦤ꧀ꦮꦶꦱ꧀ꦕꦺꦴꦕꦺꦴꦏ꧀​ꦏꦫꦺꦴ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦏꦧꦺꦃ​ꦩꦤꦸꦁꦱ​ꦏꦸꦮꦶ​ꦏꦪ​ꦱꦸꦏꦼꦠ꧀
ꦭꦤ꧀ꦒꦒꦃꦒꦼꦢꦺꦤꦺꦤꦩꦸꦁ​ꦏꦪ​ꦏꦼꦩ꧀ꦧꦁ​꧉​
ꦱꦸꦏꦼꦠ꧀ꦠꦺ​ꦢꦢꦶ​ꦒꦫꦶꦁ​ꦭꦤ꧀ꦏꦼꦩ꧀ꦧꦁꦔꦺ​ꦒꦺꦴꦒꦿꦺꦴꦏ꧀
ꦤꦁꦔꦶꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦠꦼꦥ꧀ꦠꦼꦫꦸꦱ꧀ꦱꦭꦮꦱ꧀ꦭꦮꦱ꧀ꦱꦺ​꧉​”

²⁵ꦪ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​ꦱꦶꦁ​ꦢꦶꦒꦼꦭꦂꦫꦏꦺꦩꦫꦁ​ꦏꦺꦴꦮꦺ​ꦲꦶꦁ​ꦏꦧꦂ​ꦏꦧꦸꦔꦃꦲꦤ꧀꧈​

↑ ↑ ↑

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦮꦠꦸ​ꦱꦶꦁ​ꦲꦸꦫꦶꦥ꧀꧈​

꧇​꧒꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦏꦼꦥꦿꦶꦪꦺ​ꦲꦮꦏ꧀ꦏꦺ​ꦢꦺꦮꦺꦲꦼꦁꦒꦺꦴꦤꦺ​ꦏꦸꦢꦸ​ꦲꦸꦫꦶꦥ꧀ꦧꦼꦧꦉꦁꦔꦤ꧀ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦠꦸꦁꦒꦭ꧀ꦥꦽꦕꦪ​?ꦏꦥꦶꦁ​ꦥꦶꦱꦤ꧀ ꦲꦗ​ꦥꦢ​ꦩꦶꦏꦶꦂ​ꦲꦭ​ꦧꦧ꧀ꦭꦶꦪꦤꦺ​꧉​ꦏꦥꦶꦁ​ꦥꦶꦤ꧀ꦢꦺꦴ꧈​ꦲꦗ​ꦥꦢ​ꦔꦥꦸꦱ꧀ꦱꦶ​ꦭꦶꦪꦤꦺ​꧉​ꦏꦥꦶꦁ​ꦠꦼꦭꦸ​꧈​ꦲꦗ​ꦥꦢ​ꦲꦺꦠꦺꦴꦏ꧀ꦲꦺꦠꦺꦴꦏ꧀ꦤꦶꦤ꧀ꦢꦏ꧀ꦏꦏꦺꦧꦼꦕꦶꦏ꧀ꦩꦫꦁ​ꦭꦶꦪꦤꦺ​꧈​ꦤꦩꦸꦁ​ꦏꦁꦒꦺꦴ​ꦤꦸꦠꦸꦥ꧀ꦥꦶ​ꦱꦭꦃꦲꦺ​ꦭꦤ꧀​ꦏ꧀ꦭꦺꦫꦸꦤꦺꦢꦺꦮꦺ꧉​ꦏꦥꦶꦁ​ꦥꦥꦠ꧀ ꦲꦗ​ꦥꦢ​ꦩꦺꦫꦶ​ꦩꦫꦁ​ꦭꦶꦪꦤꦺ​꧉​ꦏꦥꦶꦁ​ꦭꦶꦩ​꧈​ꦲꦗ​ꦥꦢ​ꦚꦠꦸꦂ​ꦲꦭ​ꦩꦫꦁ​ꦭꦶꦪꦤꦺ​꧉​ꦮꦫꦶꦱꦤ꧀ꦤꦺꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦠꦶꦁꦒꦭ꧀ꦏꦧꦺꦃ​꧉​ ^2-3ꦱꦶꦁ​ꦥꦼꦂꦭꦸ​ꦢꦺꦮꦺ꧈​ꦏꦺꦴꦮꦺ​ꦏꦸꦢꦸ​ꦏꦪ​ꦧꦺꦴꦕꦃ​ꦧꦪꦶ​ꦱꦶꦁ​ꦲꦼꦤ꧀ꦠꦱ꧀ꦭꦲꦶꦂ​ꦏꦲꦺ​꧈​ꦤꦩꦸꦁ​ꦏꦼꦥꦺꦔꦶꦤ꧀ꦧꦚꦸ​ꦱꦸꦱꦸ​꧈​ꦠꦼꦒꦼꦱ꧀ꦱꦺ​ꦏꦺꦴꦮꦺ​ꦏꦸꦢꦸ​ꦤꦩꦸꦁ​ꦏꦼꦥꦺꦔꦶꦤ꧀ꦩꦤꦸꦠ꧀ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦧꦚꦸ​ꦱꦸꦱꦸ​ꦏꦱꦸꦏ꧀ꦩꦤ꧀ꦱꦶꦁ​ꦠꦸꦱ꧀꧈​ꦲꦶꦏꦸ​ꦱꦶꦁ​ꦧꦶꦱ​ꦩꦫꦏ꧀ꦏꦏꦺꦏꦺꦴꦮꦺ​ꦤ꧀ꦢꦸꦮꦺꦤ꧀ꦤꦶ​ꦏꦼꦏꦸꦮꦠ꧀ꦠꦤ꧀ꦠꦼꦫꦸꦱ꧀ꦩꦤꦸꦠ꧀ꦩꦫꦁ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦏꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧈​ꦪꦏꦸꦮꦶ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦱꦏ꧀ꦲꦺꦤꦺꦁꦔꦺꦲꦭ​ꦲꦶꦁ​ꦢꦺꦴꦚ​ꦏꦺꦤꦺ​꧉​ꦩꦸꦭꦤꦺ​꧈​ꦥꦢ​ꦩꦼꦩ꧀ꦥꦼꦁꦔ​ꦲꦼꦁꦒꦺꦴꦤ꧀ꦩꦸ​ꦥꦢ​ꦩꦤꦸꦠ꧀ꦩꦫꦁ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦏꦺꦴꦮꦺ​ꦮꦶꦱ꧀ꦥꦢ​ꦔꦿꦱꦏ꧀ꦏꦏꦺꦢꦺꦮꦺꦱꦼꦥꦶꦫ​ꦒꦼꦢꦺꦤꦺꦏꦧꦼꦕꦶꦏ꧀ꦏꦤ꧀ꦤꦺ​ꦢꦺꦏ꧀ꦤꦺ꧉​

^4-5꧋ꦥꦫ​ꦱꦼꦢꦸꦭꦸꦂ​꧈​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦥꦽꦕꦪ​ꦲꦶꦏꦶ​ꦢꦢꦶ​ꦲꦺꦴꦩꦃ​ꦥꦁꦒꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦃ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦢꦢꦶ​ꦮꦠꦸ​ꦱꦶꦁ​ꦮꦶꦮꦶꦠ꧀ꦠꦤ꧀ ꦮꦠꦸ​ꦱꦶꦁ​ꦢꦶꦥꦱꦁ​ꦤ꧀ꦢꦶꦱꦶꦏ꧀ꦢꦺꦮꦺ꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲ꦳ꦪꦸꦏ꧀ꦥꦢ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦮꦠꦸ​ꦭꦶꦪꦭꦶꦪꦤꦺ​ꦱꦶꦁ​ꦢꦶꦲꦼꦁꦒꦺꦴ​ꦔ꧀ꦒꦮꦺ​ꦲꦺꦴꦩꦃꦲꦺ​꧈​ꦤꦸꦫꦸꦠ꧀ꦮꦠꦸ​ꦱꦶꦁ​ꦮꦶꦮꦶꦠ꧀ꦠꦤ꧀꧈​ꦢꦢꦶꦤꦺ​ꦏꦁꦒꦺꦴ​ꦔ꧀ꦒꦮꦺ​ꦲꦺꦴꦩꦃ​ꦏꦱꦸꦏ꧀ꦩꦤ꧀ꦲꦶꦏꦶ​꧈​ꦲꦺꦴꦩꦃ​ꦥꦁꦒꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦢꦶ​ꦮꦠꦸ​ꦱꦶꦁ​ꦲꦸꦫꦶꦥ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦩꦶꦭꦶꦃ​ꦢꦺꦏ꧀ꦤꦺꦭꦤ꧀ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦏ꧀ꦤꦺꦪ​ꦒꦼꦢꦺꦧꦔꦼꦠ꧀ꦲꦗꦶꦤꦺ​꧈​ꦱꦼꦤꦗꦤ꧀ꦢꦺꦏ꧀ꦤꦺꦲꦺꦴꦫ​ꦢꦶꦏꦁꦒꦺꦴꦏ꧀ꦏꦏꦺꦏꦫꦺꦴ​ꦩꦤꦸꦁꦱ​꧈​ꦗꦭꦂꦫꦤ꧀ꦲꦺꦴꦫ​ꦥꦢ​ꦢꦸꦤꦸꦁ꧉​ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦸꦒ​ꦢꦢꦶ​ꦮꦠꦸꦮꦠꦸ​ꦱꦶꦁ​ꦲꦸꦫꦶꦥ꧀ꦏꦁꦒꦺꦴ​ꦔꦼꦢꦼꦏ꧀ꦏꦏꦺꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦩꦃ​ꦏꦱꦸꦏ꧀ꦩꦤ꧀꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦪ​ꦢꦢꦶ​ꦲꦶꦩꦩ꧀ꦲꦶꦩꦩ꧀ꦱꦶꦁ​ꦏꦸꦢꦸ​ꦩꦱꦿꦃꦲꦏꦺꦏꦸꦂꦧꦤ꧀ꦏꦸꦂꦧꦤ꧀ꦏꦱꦸꦏ꧀ꦩꦤ꧀ꦱꦶꦁ​ꦤ꧀ꦢꦢꦺꦏ꧀ꦏꦏꦺꦊꦒꦤꦺꦲꦠꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦢꦢꦶ​ꦱꦶꦗꦶ​ꦏꦫꦺꦴ​ꦏꦿꦶꦱ꧀ꦡꦸꦱ꧀꧈​ ⁶ꦧꦧ꧀ꦲꦶꦏꦶ​ꦏꦧꦺꦃ​ꦥꦚ꧀ꦕꦺꦤ꧀ꦪ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦫꦸꦔꦺꦴꦏ꧀ꦏꦏꦺ꧈​ꦲꦏꦸ​ꦮꦶꦱ꧀ꦩꦱꦁ​ꦮꦠꦸ​ꦮꦶꦮꦶꦠ꧀ꦠꦤ꧀ꦤꦁꦏꦸꦠꦱꦶꦪꦺꦴꦤ꧀
ꦮꦠꦸ​ꦱꦶꦁ​ꦠꦏ꧀ꦥꦶꦭꦶꦃ​ꦢꦺꦮꦺꦭꦤ꧀ꦮꦠꦸ​ꦱꦶꦁ​ꦒꦼꦢꦺꦧꦔꦼꦠ꧀ꦲꦗꦶꦤꦺ​꧉​
ꦱꦥ​ꦱꦶꦁ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺꦲꦺꦴꦫ​ꦧꦏꦭ꧀ꦏꦶꦱꦶꦤ꧀ꦤꦤ꧀꧈​”

⁷ꦢꦢꦶꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦥꦽꦕꦪ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦒꦼꦢꦺꦧꦔꦼꦠ꧀ꦲꦗꦶꦤꦺ​꧉​ꦤꦁꦔꦶꦁ​ꦏꦁꦒꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺꦲꦺꦤꦺꦁꦲꦪꦠ꧀ꦤꦁꦏꦶꦠꦧ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦮꦠꦸ​ꦱꦶꦁ​ꦲꦺꦴꦫ​ꦢꦶꦏꦁꦒꦺꦴꦏ꧀ꦏꦏꦺꦏꦫꦺꦴ​ꦱꦶꦁ​ꦠꦸꦏꦁ​ꦔ꧀ꦒꦮꦺ​ꦲꦺꦴꦩꦃ​꧈​
ꦩꦭꦃ​ꦮꦠꦸ​ꦏꦸꦮꦶ​ꦱꦶꦁ​ꦢꦢꦶ​ꦮꦠꦸ​ꦮꦶꦮꦶꦠ꧀ꦠꦤ꧀꧈​”

⁸ꦲꦸꦒ​ꦲꦺꦤꦺꦁꦲꦪꦠ꧀ꦭꦶꦪꦤꦺ​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦪ​ꦮꦠꦸ​ꦏꦸꦮꦶ​ꦱꦶꦁ​ꦢꦢꦶ​ꦱꦤ꧀ꦢꦸꦁꦔꦤ꧀
ꦭꦤ꧀ꦮꦠꦸ​ꦏꦸꦮꦶ​ꦱꦶꦁ​ꦩꦫꦏ꧀ꦏꦏꦺꦮꦺꦴꦁ​ꦠꦶꦧ​꧉​”

ꦮꦺꦴꦁ​ꦱꦶꦁ​ꦏꦼꦱꦤ꧀ꦢꦸꦁꦭꦤ꧀ꦠꦶꦧ​ꦏꦸꦮꦶ​ꦪ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦏꦸꦮꦶ​ꦮꦶꦱ꧀ꦢꦢꦶ​ꦥꦼꦱ꧀ꦠꦶꦤꦺꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​꧉​

⁹꧋ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦧꦁꦱ​ꦱꦶꦁ​ꦢꦶꦥꦶꦭꦶꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦲꦶꦩꦩ꧀ꦲꦶꦩꦩ꧀ꦩꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔ꧀ꦮꦱꦤꦶ​ꦱꦼꦩ꧀ꦧꦫꦁ​꧉​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦢꦢꦶ​ꦧꦁꦱ​ꦱꦶꦁ​ꦱꦸꦕꦶ​꧈​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧈​ꦏꦥꦶꦭꦶꦃ​ꦏꦁꦒꦺꦴ​ꦔꦧꦂꦫꦏꦺꦥꦼꦁꦒꦮꦺꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔ꧀ꦒꦸꦩꦸꦤ꧀​ꦔ꧀ꦒꦸꦩꦸꦤ꧀ꦤꦏꦺ꧉​ꦪ​ꦢꦺꦏ꧀ꦤꦺꦱꦶꦁ​ꦔ꧀ꦭꦸꦮꦂꦫꦶ​ꦲꦮꦏ꧀ꦏꦺ​ꦢꦺꦮꦺꦱꦁꦏꦥꦔ꧀ꦮꦱꦤꦺ​ꦥꦼꦥꦼꦠꦼꦁ​ꦭꦤ꧀ꦱꦲꦶꦏꦶ​ꦤꦸꦤ꧀ꦠꦸꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦁ​ꦥꦼꦥꦢꦁꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧈​ꦲꦮꦶꦠ꧀ꦢꦺꦏ꧀ꦤꦺꦠꦤ꧀ꦱꦃ​ꦔꦼꦠꦺꦴꦏ꧀ꦏꦏꦺꦏꦠꦿꦺꦱ꧀ꦤꦤꦺꦭꦤ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​ ¹⁰ꦮꦸꦗꦸꦠ꧀ꦠꦺꦲꦮꦏ꧀ꦏꦺ​ꦢꦺꦮꦺꦩ꧀ꦧꦶꦪꦺꦤ꧀ꦢꦸꦢꦸ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦲꦸꦩꦠ꧀ꦠꦺ​ꦢꦺꦏ꧀ꦤꦺꦢꦺꦮꦺ꧉​ꦩ꧀ꦧꦶꦪꦺꦤ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦢꦶꦩꦼꦭꦱ꧀ꦱꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦱꦲꦶꦏꦶ​ꦢꦺꦏ꧀ꦤꦺꦔꦼꦠꦺꦴꦏ꧀ꦏꦏꦺꦏꦮꦼꦭꦱ꧀ꦱꦤ꧀ꦤꦺ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺ꧉​

꧋ꦲꦸꦫꦶꦥ꧀ꦱꦶꦁ​ꦢꦢꦶ​ꦠꦸꦭꦢ꧉​

¹¹꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲꦗ​ꦥꦢ​ꦭꦭꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦲꦶꦁ​ꦢꦺꦴꦚ​ꦏꦺꦤꦺ​ꦤꦩꦸꦁ​ꦩꦩ꧀ꦥꦶꦂ​ꦔꦺꦴꦩ꧀ꦧꦺ​꧉​ꦏꦺꦤꦺ​ꦲꦺꦴꦫ​ꦥꦁꦒꦺꦴꦤ꧀ꦤꦤ꧀ꦤꦺ​ꦲꦮꦏ꧀ꦏꦺ​ꦢꦺꦮꦺꦏꦁꦒꦺꦴ​ꦱ꧀ꦭꦮꦱ꧀ꦱꦺ꧉​ꦩꦸꦭꦤꦺ​ꦲꦏꦸ​ꦔꦺꦭꦶꦁꦔꦏꦺꦠꦼꦤꦤ꧀ꦩꦫꦁ​ꦏꦺꦴꦮꦺ​:ꦲꦗ​ꦥꦢ​ꦩꦤꦸꦠ꧀ꦩꦫꦁ​ꦏꦼꦱꦼꦤꦼꦔꦤ꧀ꦤꦺꦲꦠꦶ​ꦱꦶꦁ​ꦤꦩꦸꦁ​ꦩꦫꦏ꧀ꦏꦏꦺꦢꦺꦴꦱ​꧉​ꦏꦸꦮꦶ​ꦤꦩꦸꦁ​ꦔꦭꦁꦔꦭꦁꦔꦶꦏꦺꦴꦮꦺ​ꦲꦼꦁꦒꦺꦴꦤ꧀ꦩꦸ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​꧉​ ¹²ꦲꦥꦶꦏ꧀ꦏꦺ​꧈​ꦲꦶꦁ​ꦱꦏ꧀ꦠꦼꦔꦃꦲꦺ​ꦧꦁꦱꦧꦁꦱ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦮꦺ​ꦥꦢ​ꦤꦶꦤ꧀ꦢꦏ꧀ꦏꦏꦺꦲꦸꦫꦶꦥ꧀ꦱꦶꦁ​ꦥꦤ꧀ꦠꦼꦱ꧀꧈​ꦢꦢꦶꦤꦺ​꧈​ꦱꦼꦤꦗꦤ꧀ꦮꦺꦴꦁꦮꦺꦴꦁ​ꦥꦢ​ꦔꦫꦤ꧀ꦤꦶ​ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦲꦭ​꧈​ꦤꦁꦔꦶꦁ​ꦗꦭꦂꦫꦤ꧀ꦤꦶꦠꦺꦤ꧀ꦤꦶ​ꦠꦶꦤ꧀ꦢꦏ꧀ꦩꦸ​ꦱꦶꦁ​ꦧꦼꦕꦶꦏ꧀ ꦏꦥꦤ꧀ꦏꦥꦤ꧀ꦤꦺꦏ꧀ꦢꦶꦠꦼꦏꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦲꦶꦁ​ꦲꦸꦫꦶꦥ꧀ꦥꦺ꧈​ꦩꦼꦱ꧀ꦠꦶꦧꦏꦭ꧀ꦔꦼꦊꦩ꧀ꦢꦺꦏ꧀ꦤꦺ꧉​

꧋ꦔꦗꦺꦤ꧀ꦤꦶ​ꦩꦫꦁ​ꦥꦼꦂꦤꦠ꧀ꦠꦤ꧀꧈​

¹³꧋ꦱꦼꦩꦺꦴꦤꦺꦴ​ꦲꦸꦒ​ꦥꦫ​ꦱꦼꦢꦸꦭꦸꦂ​꧈​ꦲꦼꦁꦒꦺꦴꦤ꧀ꦩꦸ​ꦲꦸꦫꦶꦥ꧀ꦲꦶꦁ​ꦱꦏ꧀ꦠꦼꦔꦃꦲꦺ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦢ​ꦩꦤꦸꦠ​ꦩꦫꦁ​ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦒꦮꦺꦪꦤ꧀ꦤꦺ​ꦩꦤꦸꦁꦱ​꧈​ꦲꦮꦶꦠ꧀ꦏꦸꦮꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​꧉​ꦠꦼꦒꦼꦱ꧀ꦱꦺ​꧈​ꦥꦢ​ꦩꦤꦸꦠ​ꦩꦫꦁ​ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦱꦶꦁ​ꦱꦁꦏꦫꦠꦸꦤꦺ​꧈​ꦲꦮꦶꦠ꧀ꦏꦸꦮꦶ​ꦥꦔ꧀ꦮꦱ​ꦱꦶꦁ​ꦢꦸꦮꦸꦂꦢꦺꦮꦺ꧉​ ¹⁴ꦲꦸꦒ​ꦥꦢ​ꦩꦤꦸꦠ​ꦩꦫꦁ​ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦱꦁꦏꦒꦿꦩꦁꦒꦿꦩꦁ꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦢꦢꦶ​ꦮꦏꦶꦭ꧀ꦭꦺ​ꦫꦠꦸꦤꦺ​ꦏꦁꦒꦺꦴ​ꦚꦼꦠꦿꦥ꧀ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦭꦤ꧀ꦔꦸꦥꦃꦲꦶꦮꦺꦴꦁ​ꦱꦶꦁ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦕꦶꦏ꧀꧈​ ¹⁵ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​꧈​ꦧꦶꦱꦲ​ꦮꦺꦴꦁꦮꦺꦴꦁ​ꦱꦶꦁ​ꦠꦤ꧀ꦥ​ꦗꦭꦂꦫꦤ꧀ꦚꦭꦃꦚꦭꦃꦲꦏꦺꦭꦤ꧀​ꦔ꧀ꦒꦸꦤꦼꦩ꧀ꦏꦺꦴꦮꦺ​ꦥꦢ​ꦮꦼꦫꦸꦃ​ꦢꦺꦮꦺ꧈​ꦤꦺꦏ꧀ꦏꦺꦴꦮꦺ​ꦤꦩꦸꦁ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀꧈​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦧꦏꦭ꧀ꦥꦢ​ꦏꦶꦱꦶꦤ꧀ꦤꦤ꧀ꦢꦺꦮꦺꦭꦤ꧀ꦲꦺꦴꦫ​ꦮꦤꦶ​ꦔꦺꦴꦩꦺꦴꦁꦱꦶꦁ​ꦲꦺꦴꦫꦲꦺꦴꦫ​ꦩꦼꦤꦺꦃ​꧉​ ¹⁶ꦥꦫ​ꦱꦼꦢꦸꦭꦸꦂ​꧈​ꦧꦼꦤꦼꦂ​ꦏꦺꦴꦮꦺ​ꦱꦲꦶꦏꦶ​ꦮꦶꦱ꧀ꦢꦶꦭꦸꦮꦂꦫꦶ​ꦱꦁꦏꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦮꦺꦴꦁ​ꦢꦺꦴꦱ​꧈​ꦤꦁꦔꦶꦁ​ꦏꦸꦮꦶ​ꦲꦗ​ꦠꦼꦫꦸꦱ꧀ꦢꦶꦒꦮꦺ​ꦗꦭꦂꦫꦤ꧀ꦭꦤ꧀ꦢꦶꦒꦮꦺ​ꦤꦸꦠꦸꦥ꧀ꦥꦶ​ꦏ꧀ꦭꦏꦸꦮꦤ꧀ꦱꦶꦁ​ꦲꦭ​꧉​ꦩꦭꦃ​ꦲꦥꦶꦏ꧀ꦏꦺ​꧈​ꦱꦲꦶꦏꦶ​꧈​ꦱꦏ꧀ꦮꦶꦱ꧀ꦱꦺ​ꦏꦺꦴꦮꦺ​ꦮꦶꦱ꧀ꦩꦼꦂꦢꦺꦏ꧈​ꦚꦩ꧀ꦧꦸꦠ꧀ꦒꦮꦺꦩꦤꦸꦠ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁷ꦏꦁꦒꦺꦴ​ꦫꦶꦁꦏꦼꦱ꧀ꦱꦺ​ꦉꦩ꧀ꦧꦸꦏ꧀ꦥꦫ​ꦱꦼꦢꦸꦭꦸꦂ​꧈​ꦥꦢ​ꦔꦗꦺꦤ꧀ꦤꦤ​ꦩꦫꦁ​ꦠꦸꦁꦒꦭ꧀ꦩꦤꦸꦁꦱ​ꦭꦤ꧀ꦠꦿꦺꦱ꧀ꦤꦲꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦠꦸꦁꦒꦭ꧀ꦥꦽꦕꦪ​꧉​ꦥꦢ​ꦔꦗꦺꦤ꧀ꦤꦤ​ꦩꦫꦁ​ꦫꦠꦸꦤꦺ​ꦭꦤ꧀ꦥꦢ​ꦮꦼꦢꦶꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​꧉​

¹⁸꧋ꦥꦫ​ꦱꦼꦢꦸꦭꦸꦂ​꧈​ꦱꦲꦶꦏꦶ​ꦲꦏꦸ​ꦏꦼꦥꦺꦔꦶꦤ꧀​ꦤ꧀ꦢꦸꦮꦺꦤ꧀ꦤꦶ​ꦠꦼꦩ꧀ꦧꦸꦁ​ꦩꦫꦁ​ꦥꦫ​ꦱꦼꦢꦸꦭꦸꦂ​ꦱꦶꦁ​ꦱ꧀ꦭꦥ꦳꧀꧈​ꦠꦼꦩ꧀ꦧꦸꦁꦏꦸ​ꦔꦺꦤꦺ​:ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦱ꧀ꦭꦥ꦳꧀ ꦥꦢ​ꦔꦗꦺꦤ꧀ꦤꦤ​ꦩꦫꦁ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏꦺꦴꦮꦺ​꧉​ꦥꦢ​ꦩꦤꦸꦠ​ꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦲꦺꦴꦫ​ꦤꦩꦸꦁ​ꦩꦫꦁ​ꦱꦶꦁ​ꦲꦥꦶꦏ꧀ꦭꦤ꧀ꦒꦼꦩꦠꦶ​꧈​ꦤꦁꦔꦶꦁ​ꦲꦸꦒ​ꦥꦢ​ꦩꦤꦸꦠ​ꦩꦫꦁ​ꦱꦶꦁ​ꦏꦼꦉꦁ​꧉​ ¹⁹ꦏꦼꦤꦺꦁꦲꦥ​ꦏꦺꦴꦏ꧀ꦲꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​?ꦲꦮꦶꦠ꧀ꦤꦺꦏ꧀ꦏꦺꦴꦮꦺ​ꦠꦤ꧀ꦥ​ꦱꦭꦃ​ꦲꦥꦲꦥ​ꦢꦶꦒꦼꦧꦸꦏ꧀ꦏꦶ꧈​ ꦤꦁꦔꦶꦁ​ꦗꦭꦂꦫꦤ꧀ꦏꦺꦴꦮꦺ​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​ꦏꦱꦁꦱꦫꦤ꧀ꦏꦸꦮꦶ​ꦲꦩ꧀ꦧꦺꦴꦏ꧀ꦱꦁꦒ​ꦏꦫꦺꦴ​ꦱꦧꦂ​꧈​ꦔꦼꦂꦠꦶꦪ​ꦤꦺꦏ꧀ꦏꦸꦮꦶ​ꦧꦼꦂꦏꦃꦲꦺ​ꦒꦸꦱ꧀ꦠꦶ​꧉​ ²⁰ꦤꦺꦏ꧀ꦏꦺꦴꦮꦺ​ꦢꦶꦒꦼꦧꦸꦏ꧀ꦏꦶꦗꦭꦂꦫꦤ꧀ꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦱꦶꦁ​ꦲꦺꦴꦫ​ꦲꦥꦶꦏ꧀ ꦏꦸꦮꦶ​ꦪ​ꦥꦚ꧀ꦕꦺꦤ꧀ꦱꦏ꧀ꦧꦼꦤꦼꦂꦫꦺ​꧉​ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦤꦼꦂ​ꦭꦤ꧀ꦱꦼꦤꦗꦤ꧀ꦔꦺꦴꦤꦺꦴ​ꦏꦺꦴꦮꦺ​ꦩꦼꦏ꧀ꦱ​ꦢꦶꦒꦼꦧꦸꦏ꧀ꦏꦶ꧈​ꦔꦼꦂꦠꦶꦪ​ꦥꦫ​ꦱꦼꦢꦸꦭꦸꦂ​ꦱ꧀ꦭꦥ꦳꧀ ꦏꦸꦮꦶ​ꦧꦼꦂꦏꦃꦲꦺ​ꦒꦸꦱ꧀ꦠꦶ​꧉​ ²¹ꦩꦸꦭꦤꦺ​꧈​ꦲꦗ​ꦥꦢ​ꦏꦒꦺꦠ꧀ꦥꦫ​ꦱꦼꦢꦸꦭꦸꦂ​꧈​ꦲꦮꦶꦠ꧀ꦢꦺꦴꦁꦔꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦶꦭ꧀ꦲꦮꦏ꧀ꦏꦺ​ꦢꦺꦮꦺ꧈​ꦢꦺꦏ꧀ꦤꦺꦮꦶꦱ꧀ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀꧈​ꦮꦸꦗꦸꦠ꧀ꦠꦺꦏꦿꦶꦱ꧀ꦡꦸꦱ꧀ꦢꦺꦮꦺꦪ​ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀​ꦔ꧀ꦭꦧꦸꦃꦲꦶ​ꦏꦺꦴꦮꦺ​꧈​ꦏꦁꦒꦺꦴ​ꦤꦶꦁꦒꦭ꧀ꦭꦶ​ꦠꦸꦭꦢꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧉​ꦢꦢꦶꦤꦺ​ꦏꦺꦴꦮꦺ​ꦱꦲꦶꦏꦶ​ꦤꦩꦸꦁ​ꦤꦸꦫꦸꦠ꧀ꦠꦶꦥꦏ꧀ꦏꦺ​ꦢꦺꦏ꧀ꦤꦺ꧉​ ²²ꦤꦺꦏ꧀ꦢꦶꦥꦶꦏꦶꦂ​ꦥꦫ​ꦱꦼꦢꦸꦭꦸꦂ​꧈​ꦥꦚ꧀ꦕꦺꦤ꧀ꦧꦼꦤꦼꦂ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦢꦺꦏ꧀ꦤꦺꦲꦺꦴꦫ​ꦠꦲꦸ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦭꦤ꧀ꦢꦺꦏ꧀ꦤꦺꦲꦺꦴꦫ​ꦠꦲꦸ​ꦒꦺꦴꦫꦺꦴꦃ​꧉​” ²³ꦮꦸꦗꦸꦠ꧀ꦠꦺꦢꦺꦴꦁꦔꦺꦢꦺꦏ꧀ꦤꦺꦢꦶꦲꦺꦴꦭꦺꦴꦏ꧀ꦲꦺꦴꦭꦺꦴꦏ꧀ ꦢꦺꦏ꧀ꦤꦺꦲꦺꦴꦫ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀꧈​ꦢꦺꦴꦁꦔꦺꦢꦺꦏ꧀ꦤꦺꦢꦶꦥꦶꦭꦂꦫ​꧈​ꦢꦺꦏ꧀ꦤꦺꦲꦺꦴꦫ​ꦔꦺꦴꦩꦺꦴꦁꦤꦺꦏ꧀ꦲꦉꦥ꧀​ꦩ꧀ꦧꦊꦱ꧀ꦲꦭ​ꦲꦥ​ꦏꦼꦥꦿꦶꦪꦺ​꧈​ꦲꦺꦴꦫ​꧉​ꦤꦁꦔꦶꦁ​ꦢꦺꦏ꧀ꦤꦺꦩꦱꦿꦃꦲꦏꦺꦱꦼꦩ꧀ꦧꦫꦁ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦧꦏꦭ꧀ꦔꦿꦸꦠꦸꦱꦼꦩ꧀ꦧꦫꦁ​ꦩꦤꦸꦠ꧀ꦱꦏ꧀ꦧꦼꦤꦼꦂꦫꦺ​꧉​ ²⁴ꦲꦩ꧀ꦧꦺꦴꦏ꧀ꦢꦶꦥꦶꦏꦶꦂ​ꦥꦫ​ꦱꦼꦢꦸꦭꦸꦂ​꧈​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦥꦠꦺꦤ꧀ꦤꦶ​ꦤꦁꦏꦪꦸ​ꦥꦼꦤ꧀ꦠꦺꦁꦔꦤ꧀꧈​ꦤꦁꦏꦺꦴꦤꦺꦴ​ꦢꦺꦏ꧀ꦤꦺꦤꦩ꧀ꦥ​ꦱꦼꦠꦿꦥꦤ꧀ ꦗꦭꦂꦫꦤ꧀ꦱꦁꦏꦢꦺꦴꦱ​ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦢꦺꦴꦠ꧀ꦥꦔ꧀ꦮꦱꦤꦺ​ꦢꦺꦴꦱ​ꦱꦶꦁ​ꦲꦩ꧀ꦧꦤ꧀ꦢ​ꦲꦮꦏ꧀ꦏꦺ​ꦢꦺꦮꦺ꧈​ꦠꦸꦗꦸꦮꦤ꧀ꦤꦺ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦲꦸꦫꦶꦥ꧀ꦱꦶꦁ​ꦧꦼꦤꦼꦂ​ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦧꦶ​ꦪꦺꦱꦪ​ꦢꦺꦏ꧀​ꦩ꧀ꦧꦶꦪꦺꦤ꧀ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦏꦺꦧꦧ꧀ꦏꦱꦁꦱꦫꦤ꧀ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦤꦺ​:“ꦧꦶꦭꦸꦂ​ꦤꦁꦲꦮꦏ꧀ꦏꦺ​ꦢꦺꦏ꧀ꦤꦺꦤ꧀ꦢꦢꦺꦏ꧀ꦏꦏꦺꦮꦫꦱ꧀ꦱꦏꦺ꧉​” ²⁵ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦩ꧀ꦧꦶꦪꦺꦤ꧀ꦏꦺꦴꦮꦺ​ꦏꦼꦱꦱꦂꦱꦱꦂꦏꦪ​ꦮꦼꦢꦸꦱ꧀ꦲꦩ꧀​ꦧ꧀ꦭꦫꦃ꧈​ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦥꦢ​ꦩꦸꦭꦶꦃ​ꦔꦼꦠꦸꦠ꧀ꦠꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦔꦼꦔꦺꦴꦤ꧀ꦭꦤ꧀ꦔꦿꦸꦩꦠ꧀ꦠꦶ​ꦚꦮꦩꦸ​꧉​

↑ ↑ ↑

꧋ꦲꦸꦫꦶꦥ꧀ꦧꦼꦧꦺꦴꦗꦺꦴꦮꦤ꧀꧈​

꧇​꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦱꦲꦶꦏꦶ​ꦲꦉꦥ꧀ꦔꦺꦴꦩꦺꦴꦁꦔꦏꦺꦧꦧ꧀ꦥꦼꦂꦤꦠ꧀ꦠꦤ꧀ꦏꦁꦒꦺꦴ​ꦮꦺꦴꦁ​ꦮꦺꦢꦺꦴꦏ꧀ꦲꦶꦁ​ꦱꦏ꧀ꦗꦼꦫꦺꦴꦤꦺꦲꦺꦴꦩꦃꦲꦺꦴꦩꦃ​꧉​ꦠꦼꦩ꧀ꦧꦸꦁꦏꦸ​ꦏꦁꦒꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦮꦺꦢꦺꦴꦏ꧀ꦱꦶꦁ​ꦤ꧀ꦢꦸꦮꦺꦧꦺꦴꦗꦺꦴ​ꦔꦺꦤꦺ​:“ꦏꦺꦴꦮꦺ​ꦏꦸꦢꦸ​ꦩꦤꦸꦠ꧀ꦩꦫꦁ​ꦧꦺꦴꦗꦺꦴꦩꦸ​꧉​ꦲꦮꦶꦠ꧀ꦲꦺꦤꦺꦁꦱꦼꦢꦸꦭꦸꦂꦱꦼꦢꦸꦭꦸꦂ​ꦮꦺꦢꦺꦴꦏ꧀ꦱꦶꦁ​ꦧꦺꦴꦗꦺꦴꦤꦺ​ꦢꦸꦫꦸꦁ​ꦒꦼꦊꦩ꧀ꦥꦽꦕꦪ​ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧉​ꦤꦁꦔꦶꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦮꦺꦢꦺꦴꦏ꧀ꦏꦸꦮꦶ​ꦧꦶꦱ​ꦤꦫꦶꦏ꧀ꦲꦠꦶꦤꦺ​ꦧꦺꦴꦗꦺꦴꦤꦺ​꧈​ꦱꦸꦥꦪ​ꦒꦼꦊꦩ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​꧈​ꦠꦤ꧀ꦥ​ꦔꦺꦴꦩꦺꦴꦁꦲꦥꦲꦥ​ꦧꦧ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧉​” ²ꦭꦃ​ꦏꦸꦮꦶ​ꦏꦼꦥꦿꦶꦪꦺ​ꦧꦶꦱꦤꦺ​ꦏꦼꦠꦸꦫꦸꦠ꧀ꦠꦤ꧀?ꦏꦸꦮꦶ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀ꦤꦺꦏ꧀ꦠꦶꦁꦏꦃꦭꦏꦸꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦮꦺꦢꦺꦴꦏ꧀ꦔꦼꦠꦺꦴꦏ꧀ꦏꦏꦺꦤꦺꦏ꧀ꦲꦸꦫꦶꦥ꧀ꦥꦺꦉꦱꦶꦏ꧀ꦭꦤ꧀ꦔꦗꦺꦤ꧀ꦤꦶ​ꦩꦫꦁ​ꦒꦸꦱ꧀ꦠꦶ​꧉​ ³ꦩꦸꦭꦤꦺꦱꦼꦢꦸꦭꦸꦂꦱꦼꦢꦸꦭꦸꦂꦮꦺꦢꦺꦴꦏ꧀ ꦏꦺꦴꦮꦺꦲꦗꦤꦩꦸꦁꦩꦶꦏꦶꦂꦥꦕꦏ꧀ꦏꦤ꧀ꦤꦺꦚ꧀ꦗꦧꦱꦶꦁꦏꦺꦠꦺꦴꦏ꧀ ꦏꦪꦢꦺꦤꦺꦤꦠꦫꦩ꧀ꦧꦸꦠ꧀ ꦔꦁꦒꦺꦴꦒꦼꦭꦁꦏꦭꦸꦁꦲꦼꦩꦱ꧀ꦭꦤ꧀ꦱꦭꦶꦤ꧀ꦱꦶꦁꦤꦸꦫꦸꦠ꧀ꦗꦩꦤ꧀ ꦲꦺꦴꦫ꧉​ ⁴ꦤꦁꦔꦶꦁꦥꦢꦩꦶꦏꦶꦂꦫꦥꦕꦏ꧀ꦏꦤ꧀ꦤꦺꦚ꧀ꦗꦼꦫꦸꦃꦲꦠꦶꦩꦸ꧈​ꦲꦮꦶꦠ꧀ꦏꦸꦮꦶꦱꦶꦁꦭꦁꦒꦼꦁ꧉​ꦏꦺꦴꦮꦺꦏꦸꦢꦸꦤ꧀ꦢꦸꦮꦺꦲꦠꦶꦱꦶꦁꦒꦼꦩꦠꦶꦭꦤ꧀ꦱꦶꦁꦲꦤ꧀ꦠꦼꦁ꧉​ꦏꦸꦮꦶꦥꦕꦏ꧀ꦏꦤ꧀ꦱꦶꦁꦲꦥꦶꦏ꧀ꦢꦺꦮꦺ꧈​ꦱꦶꦁꦢꦶꦱꦼꦤꦼꦁꦔꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧉​ ⁵ꦲꦮꦶꦠ꧀ꦮꦺꦴꦁꦮꦺꦢꦺꦴꦏ꧀ꦮꦺꦢꦺꦴꦏ꧀ꦱꦶꦁꦥꦢꦔꦧꦼꦏ꧀ꦠꦶꦩꦫꦁꦒꦸꦱ꧀ꦠꦶꦄꦭ꧀ꦭꦃꦲꦶꦁꦗꦩꦤ꧀​ꦩ꧀ꦧꦶꦪꦺꦤ꧀ꦪꦤꦩꦸꦁꦩꦼꦂꦭꦺꦴꦏ꧀ꦏꦏꦺꦥꦕꦏ꧀ꦏꦤ꧀ꦤꦺꦲꦠꦶꦤꦺ꧉​ꦮꦺꦴꦁꦮꦺꦴꦁꦏꦸꦮꦶꦥꦢꦔꦉꦥ꧀ꦲꦉꦥ꧀ꦥꦽꦗꦚ꧀ꦗꦶꦪꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦲꦸꦒꦥꦢꦩꦤꦸꦠ꧀ꦩꦫꦁꦧꦺꦴꦗꦺꦴꦤꦺ꧉​ ⁶ꦏꦪꦢꦺꦤꦺꦲꦶꦧꦸ​ꦱꦫꦃ​꧈​ꦧꦺꦴꦗꦺꦴꦤꦺ​ꦧꦥ​ꦄꦨꦿꦲꦩ꧀꧈​ꦲꦶꦧꦸ​ꦱꦫꦃ​ꦲꦸꦒ​ꦩꦤꦸꦠ꧀ꦩꦫꦁ​ꦧꦥ​ꦄꦨꦿꦲꦩ꧀ ꦩꦸꦭꦤꦺ​ꦚꦼꦭꦸꦏ꧀ꦢꦺꦏ꧀ꦤꦺꦒꦸꦱ꧀ꦠꦶ​꧉​ꦤꦺꦏ꧀ꦏꦺꦴꦮꦺ​꧈​ꦱꦼꦢꦸꦭꦸꦂꦱꦼꦢꦸꦭꦸꦂ​ꦮꦺꦢꦺꦴꦏ꧀ ꦧꦶꦱ​ꦤ꧀ꦢꦸꦮꦺꦤ꧀ꦤꦶ​ꦲꦠꦶ​ꦏꦪ​ꦲꦶꦧꦸ​ꦱꦫꦃ​꧈​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀ ꦠꦤ꧀ꦥ​ꦮꦼꦢꦶ​ꦲꦭꦁꦔꦤ꧀ꦲꦥꦲꦥ​꧈​ꦏꦺꦴꦮꦺ​ꦏꦼꦤꦺꦁꦢꦶꦲꦫꦤ꧀ꦤꦶ​ꦲꦤꦏ꧀ꦲꦤꦏ꧀ꦏꦺ​ꦲꦶꦧꦸ​ꦱꦫꦃ​꧉​

⁷꧋ꦏꦁꦒꦺꦴ​ꦏꦺꦴꦮꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦤꦁ​꧈​ꦥꦼꦂꦤꦠ꧀ꦠꦤ꧀ꦲꦶꦁ​ꦱꦏ꧀ꦗꦼꦫꦺꦴꦤꦺꦲꦺꦴꦩꦃꦲꦺꦴꦩꦃ​ꦏꦸꦮꦶ​ꦔꦺꦤꦺ​:ꦏꦺꦴꦮꦺ​ꦏꦸꦢꦸ​ꦠꦸꦩꦶꦤ꧀ꦢꦏ꧀ꦔꦁꦒꦺꦴ​ꦏꦢꦸꦤꦸꦁꦔꦤ꧀ ꦩꦔꦼꦂꦠꦺꦤ꧀ꦤꦶꦤꦺꦏ꧀ꦮꦺꦴꦁ​ꦮꦺꦢꦺꦴꦏ꧀ꦏꦸꦮꦶ​ꦭꦸꦮꦶꦃ​ꦫꦶꦁꦏꦶꦃ​ꦠꦼꦤꦶꦩ꧀ꦧꦁꦮꦺꦴꦁ​ꦭꦤꦁ​꧉​ꦩꦸꦭꦤꦺ​ꦧꦺꦴꦗꦺꦴꦩꦸ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦗꦺꦤ꧀ꦤꦶ​꧈​ꦲꦮꦶꦠ꧀ꦢꦺꦏ꧀ꦤꦺꦲꦸꦒ​꧈​ꦏꦪ​ꦏꦺꦴꦮꦺ​꧈​ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​ꦥꦮꦺꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​꧈​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦔꦗꦺꦤ꧀ꦤꦶ​ꦩꦫꦁ​ꦧꦺꦴꦗꦺꦴꦩꦸ​꧈​ꦥꦤ꧀ꦢꦺꦴꦔꦩꦸ​ꦲꦺꦴꦫ​ꦧꦏꦭ꧀ꦢꦶꦠꦩ꧀ꦥ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦠꦿꦺꦱ꧀ꦤꦭꦤ꧀ꦫꦸꦏꦸꦤ꧀ꦧꦼꦧꦉꦁꦔꦤ꧀꧈​

⁸꧋ꦕꦼꦏꦏ꧀ꦏꦺ​ꦉꦩ꧀ꦧꦸꦏ꧀ꦥꦫ​ꦱꦼꦢꦸꦭꦸꦂ​꧈​ꦲꦩ꧀ꦧꦺꦴꦏ꧀ꦥꦢ​ꦠꦸꦁꦒꦭ꧀ꦭ​ꦥꦶꦏꦶꦂ​ꦭꦤ꧀ꦠꦸꦁꦒꦭ꧀ꦭ​ꦏꦉꦥ꧀ꦭꦤ꧀ꦥꦢ​ꦩꦺꦭꦸꦮ​ꦏꦿꦱ​ꦭꦤ꧀ꦩꦺꦭꦸꦮ​ꦚꦁꦒ​ꦏꦔꦺꦭ꧀ꦭꦤ꧀ꦤꦺ​ꦭꦶꦪꦤꦺ​꧉​ꦥꦢ​ꦠꦿꦺꦱ꧀ꦤꦲꦭꦤ꧀ꦲꦤ꧀ꦢꦥ꧀ꦥꦱꦺꦴꦂꦩꦫꦁ​ꦱꦏ꧀ꦥꦢꦥꦢ꧉​ ⁹ꦲꦗ​ꦥꦶꦱꦤ꧀ꦥꦶꦱꦤ꧀​ꦩ꧀ꦧꦊꦱ꧀ꦲꦭ​ꦏꦫꦺꦴ​ꦲꦭ​ꦭꦤ꧀ꦤꦺꦏ꧀ꦲꦺꦤꦺꦁꦮꦺꦴꦁ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦏꦺꦴꦮꦺ​꧈​ꦲꦗ​ꦒꦼꦤ꧀ꦠꦺꦤ꧀ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦮꦺꦴꦁꦔꦺ​꧈​ꦲꦗ​ꦔꦺꦴꦤꦺꦴ​꧉​ꦤꦁꦔꦶꦁ​ꦮꦺꦴꦁ​ꦱꦶꦁ​ꦔ꧀ꦒꦮꦺ​ꦲꦭ​ꦩꦫꦁ​ꦏꦺꦴꦮꦺ​ꦢꦶꦥꦸꦗꦺꦏ꧀ꦏꦏꦺꦱꦶꦁ​ꦧꦼꦕꦶꦏ꧀ꦮꦲꦺ​꧉​ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦤꦩ꧀ꦥ​ꦱꦏ꧀ꦲꦺꦤꦺꦁꦔꦺꦏꦧꦼꦕꦶꦏ꧀ꦏꦤ꧀ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​ꦏꦁꦒꦺꦴ​ꦏꦺꦴꦮꦺ​꧈​ꦲꦮꦶꦠ꧀ꦏꦸꦮꦶ​ꦠꦸꦗꦸꦮꦤ꧀ꦤꦺ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦁꦒꦶꦭ꧀ꦏꦺꦴꦮꦺ​꧉​ ¹⁰ꦧꦧ꧀ꦲꦶꦏꦶ​ꦤꦁꦏꦶꦠꦧ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:

“ꦱꦥ​ꦱꦶꦁ​ꦏꦼꦥꦺꦔꦶꦤ꧀ꦲꦸꦫꦶꦥ꧀ꦱꦶꦁ​ꦱ꧀ꦭꦩꦼꦠ꧀
ꦭꦤ꧀ꦔꦿꦱꦏ꧀ꦏꦏꦺꦮꦏ꧀ꦠꦸ​ꦱꦶꦁ​ꦏꦼꦥꦺꦤꦏ꧀
ꦮꦺꦴꦁ​ꦏꦸꦮꦶ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦏꦫꦺꦴ​ꦲꦶꦭꦠ꧀ꦠꦺ​꧈​
ꦲꦗ​ꦱꦩ꧀ꦥꦺꦏ꧀ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦶꦁ​ꦲꦭ​꧉​
ꦏꦸꦢꦸ​ꦧꦶꦱ​ꦩ꧀ꦧꦶꦁꦏꦼꦩ꧀ꦭꦩ꧀ꦧꦺꦤꦺ​꧈​
ꦲꦗ​ꦱꦩ꧀ꦥꦺꦏ꧀ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦶꦁ​ꦒꦺꦴꦫꦺꦴꦃ​꧉​
¹¹ꦚꦶꦁꦏꦶꦂꦫꦤꦧꦫꦁꦲꦭꦭꦤ꧀​ꦔ꧀ꦭꦏꦺꦴꦤ꧀ꦤꦤꦱꦶꦁꦧꦼꦕꦶꦏ꧀꧈​
ꦔ꧀ꦒꦺꦴꦭꦺꦏ꧀ꦏꦤꦫꦸꦏꦸꦤ꧀ꦭꦤ꧀ꦥꦢꦔ꧀ꦭꦸꦩꦸꦃꦲꦶꦧꦶꦱꦤꦼꦏꦏ꧀ꦏꦏꦺꦏꦠꦼꦤ꧀ꦠꦽꦩ꧀ꦩꦤ꧀꧈​
¹²ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦼꦤꦼꦁ​ꦩꦫꦁ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦤꦼꦂ​
ꦭꦤ꧀ꦢꦺꦏ꧀ꦤꦺꦔꦿꦸꦔꦺꦴꦏ꧀ꦏꦏꦺꦥꦤ꧀ꦢꦺꦴꦔꦤꦺ​ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​꧈​
ꦤꦁꦔꦶꦁ​ꦢꦺꦏ꧀ꦤꦺꦔ꧀ꦭꦮꦤ꧀ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​”

꧋ꦱꦁꦱꦫ​꧈​ꦗꦭꦂꦫꦤ꧀​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀꧈​

¹³꧋ꦥꦫ​ꦱꦼꦢꦸꦭꦸꦂ​꧈​ꦭꦸꦩꦿꦃꦲꦺ​꧈​ꦤꦺꦏ꧀ꦏꦺꦴꦮꦺ​ꦔ꧀ꦭꦸꦩꦸꦃꦲꦶꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦕꦶꦏ꧀ ꦩꦼꦱ꧀ꦠꦶꦪ​ꦲꦺꦴꦫ​ꦲꦺꦤꦺꦁꦱꦶꦁ​ꦔ꧀ꦒꦮꦺ​ꦲꦭ​ꦩꦫꦁ​ꦏꦺꦴꦮꦺ​꧉​ ¹⁴ꦤꦁꦔꦶꦁ​ꦱꦼꦩꦸꦁꦒꦺꦴꦤ꧀ꦤꦺꦏꦺꦴꦮꦺ​ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦱꦁꦱꦫ​ꦱꦼꦤꦗꦤ꧀ꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀ ꦏꦸꦮꦶ​ꦲꦁꦒꦼꦥ꧀ꦥꦼꦤ꧀ꦧꦼꦂꦏꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦲꦺ​꧉​ꦩꦸꦭꦤꦺ​꧈​ꦲꦗ​ꦥꦢ​ꦮꦼꦢꦶ​ꦩꦫꦁ​ꦮꦺꦴꦁ​ꦱꦶꦁ​ꦩꦼꦢꦺꦤ꧀ꦩꦼꦢꦺꦤ꧀ꦤꦶ​ꦏꦺꦴꦮꦺ​ꦭꦤ꧀ꦲꦗ​ꦥꦢ​ꦧꦶꦔꦸꦁ​꧉​ ¹⁵ꦤꦩꦸꦁ​ꦏꦿꦶꦱ꧀ꦡꦸꦱ꧀ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦥꦶꦏꦶꦂ​ꦲꦶꦁ​ꦲꦠꦶꦩꦸ​꧈​ꦲꦮꦶꦠ꧀ꦢꦺꦏ꧀ꦤꦺꦒꦸꦱ꧀ꦠꦶꦩꦸ​꧉​ꦢꦢꦶꦤꦺ​ꦤꦺꦏ꧀ꦲꦺꦤꦺꦁꦮꦺꦴꦁ​ꦠꦏꦺꦴꦤ꧀ ꦏꦺꦴꦮꦺ​ꦧꦶꦱ​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦧꦧ꧀ꦥꦼꦔꦤ꧀ꦢꦼꦭ꧀ꦭꦤ꧀ꦥꦼꦔꦉꦥ꧀ꦲꦉꦥ꧀ꦱꦶꦁ​ꦲꦤ​ꦲꦶꦁ​ꦲꦠꦶꦩꦸ​꧉​ ¹⁶ꦩꦸꦁ​ꦮꦲꦺ​꧈​ꦱꦶꦁ​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦏꦸꦮꦶ​ꦏꦸꦢꦸ​ꦔꦁꦒꦺꦴ​ꦠꦼꦩ꧀ꦧꦸꦁ​ꦱꦶꦁ​ꦲꦭꦸꦱ꧀ꦭꦤ꧀ꦥꦤ꧀ꦠꦼꦱ꧀ ꦏꦫꦺꦴ​ꦲꦠꦶ​ꦱꦶꦁ​ꦉꦱꦶꦏ꧀꧈​ꦢꦢꦶꦤꦺ​ꦮꦺꦴꦁꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦔꦏꦺꦱꦶꦁ​ꦲꦺꦴꦫꦲꦺꦴꦫ​ꦧꦧ꧀ꦲꦸꦫꦶꦥ꧀ꦩꦸ​ꦏꦸꦮꦶ​ꦏꦶꦱꦶꦤ꧀ꦤꦤ꧀ꦢꦺꦮꦺ꧈​ꦤꦺꦏ꧀ꦥꦢ​ꦤꦶꦠꦺꦤ꧀ꦤꦶ​ꦏꦠꦼꦩꦼꦤ꧀ꦤꦤ꧀ꦤꦺ​ꦲꦼꦁꦒꦺꦴꦤ꧀ꦩꦸ​ꦤꦸꦫꦸꦠ꧀ꦏꦿꦶꦱ꧀ꦡꦸꦱ꧀꧈​

꧋ꦏꦿꦶꦱ꧀ꦡꦸꦱ꧀ꦱꦁꦱꦫ​ꦏꦁꦒꦺꦴ​ꦠꦸꦭꦢ꧉​

¹⁷꧋ꦥꦫ​ꦱꦼꦢꦸꦭꦸꦂ​꧈​ꦔꦭꦩ꧀ꦩꦶ​ꦏꦱꦁꦱꦫꦤ꧀ꦗꦭꦂꦫꦤ꧀ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦕꦶꦏ꧀ꦏꦸꦮꦶ​ꦩꦭꦃ​ꦧꦫꦁ​ꦱꦶꦁ​ꦲꦥꦶꦏ꧀ ꦤꦺꦏ꧀ꦏꦸꦮꦶ​ꦥꦚ꧀ꦕꦺꦤ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦤꦶꦩ꧀ꦧꦁꦔꦭꦩ꧀ꦩꦶ​ꦏꦱꦁꦱꦫꦤ꧀ꦗꦭꦂꦫꦤ꧀​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦲꦭ​꧉​ ¹⁸ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦏꦿꦶꦱ꧀ꦡꦸꦱ꧀ꦢꦺꦮꦺꦪ​ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧈​ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺꦱꦏ꧀ꦏꦧꦺꦃꦲꦺꦭꦤ꧀ꦏꦁꦒꦺꦴ​ꦱ꧀ꦭꦮꦱ꧀ꦱꦺ꧉​ꦢꦢꦶꦤꦺ​ꦮꦺꦴꦁ​ꦱꦶꦁ​ꦲꦺꦴꦫ​ꦱꦭꦃ​ꦩꦠꦶ​ꦔ꧀ꦭꦧꦸꦃꦲꦶ​ꦮꦺꦴꦁ​ꦱꦶꦁ​ꦱꦭꦃ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦏꦼꦠꦩ꧀ꦥꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦼꦤꦼꦂ​ꦢꦶꦥꦠꦺꦤ꧀ꦤꦶ​ꦧꦢꦤ꧀ꦤꦺ​꧈​ꦤꦁꦔꦶꦁ​ꦫꦺꦴꦃꦲꦺ​ꦲꦸꦫꦶꦥ꧀ꦠꦼꦫꦸꦱ꧀꧈​ ¹⁹ꦪ​ꦫꦺꦴꦃꦲꦺ​ꦏꦿꦶꦱ꧀ꦡꦸꦱ꧀ꦏꦸꦮꦶ​ꦱꦶꦁ​ꦩꦼꦢꦸꦤ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦩꦫꦁ​ꦫꦺꦴꦃꦫꦺꦴꦃꦲꦺ​ꦮꦺꦴꦁ​ꦩꦠꦶ​ꦱꦶꦁ​ꦢꦶꦱꦼꦠꦿꦥ꧀꧈​ ²⁰ꦪꦏꦸꦮꦶ​ꦫꦺꦴꦃꦫꦺꦴꦃꦲꦺ​ꦮꦺꦴꦁꦮꦺꦴꦁ​ꦱꦁꦏꦗꦩꦤ꧀ꦤꦺ​ꦤꦧꦶ​ꦟꦺꦴꦮꦃ꧈​ꦱꦶꦁ​ꦲꦺꦴꦫ​ꦥꦢ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦶꦁ​ꦗꦩꦤ꧀ꦏꦸꦮꦶ​ꦟꦺꦴꦮꦃꦔ꧀ꦒꦮꦺ​ꦏꦥꦭ꧀ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦤ꧀ꦠꦺꦤ꧀ꦤꦶ​ꦏꦫꦺꦴ​ꦱꦧꦂ​ꦩꦫꦁ​ꦮꦺꦴꦁꦮꦺꦴꦁ​꧈​ꦤꦁꦔꦶꦁ​ꦤꦩꦸꦁ​ꦮꦺꦴꦁ​ꦮꦺꦴꦭꦸ​ꦱꦶꦁ​ꦩ꧀ꦊꦧꦸ​ꦤꦁꦏꦥꦭ꧀ꦭꦺ​ꦭꦤ꧀ꦧꦶꦱ​ꦱ꧀ꦭꦩꦼꦠ꧀ ꦲꦺꦴꦫ​ꦏꦠꦸꦠ꧀ꦩꦠꦶ​ꦏꦼꦊꦥ꧀꧈​ ²¹ꦏꦼꦊꦥ꧀ꦥꦤ꧀ꦒꦼꦢꦺꦭꦤ꧀ꦏꦥꦭ꧀ꦒꦼꦢꦺꦲꦶꦁ​ꦗꦩꦤ꧀ꦤꦺ​ꦤꦧꦶ​ꦟꦺꦴꦮꦃꦏꦸꦮꦶ​ꦒꦩ꧀ꦧꦂꦫꦺ​ꦥꦼꦩ꧀ꦧꦥ꧀ꦠꦶꦱ꧀ꦱꦤ꧀ꦧꦚꦸ​ꦱꦶꦁ​ꦔ꧀ꦭꦸꦮꦂꦫꦶ​ꦏꦺꦴꦮꦺ​ꦱꦁꦏꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦮꦺꦴꦁ​ꦢꦺꦴꦱ​ꦭꦤ꧀ꦩꦼꦢꦺꦴꦠ꧀ꦏꦺꦴꦮꦺ​ꦱꦁꦏꦲꦸꦫꦶꦥ꧀ꦢꦺꦴꦱ​꧈​ꦗꦭꦂꦫꦤ꧀ꦏꦺꦴꦮꦺ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦤꦧꦶ​ꦟꦺꦴꦮꦃꦲꦶꦁ​ꦗꦩꦤ꧀ꦤꦺ​꧉​ꦢꦢꦶꦤꦺ​ꦥꦼꦩ꧀ꦧꦥ꧀ꦠꦶꦱ꧀ꦱꦤ꧀ꦧꦚꦸ​ꦏꦸꦮꦶ​ꦲꦺꦴꦫ​ꦏꦁꦒꦺꦴ​ꦔꦽꦱꦶꦏ꧀ꦏꦶ​ꦲꦮꦏ꧀ꦏꦺ​ꦱꦁꦏꦉꦒꦼꦠ꧀ ꦲꦺꦴꦫ​꧈​ꦤꦁꦔꦶꦁ​ꦏꦁꦒꦺꦴ​ꦠꦤ꧀ꦢꦤꦺꦏ꧀ꦏꦺꦴꦮꦺ​ꦩꦤꦸꦠ꧀ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦏꦺꦴꦮꦺ​ ꦔꦏꦺꦴꦤ꧀ꦤꦶ​ꦤꦺꦏ꧀ꦲꦸꦫꦶꦥ꧀ꦩꦸ​ꦮꦶꦱ꧀ꦲꦩ꧀ꦧꦺꦴꦏ꧀ꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦮꦶꦱ꧀ꦢꦶꦭꦸꦮꦂꦫꦶ​ꦱꦁꦏꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦮꦺꦴꦁ​ꦢꦺꦴꦱ​꧈​ꦗꦭꦂꦫꦤ꧀ꦏꦺꦴꦮꦺ​ꦥꦽꦕꦪ​ꦩꦫꦁ​ꦏꦿꦶꦱ꧀ꦡꦸꦱ꧀ ꦱꦶꦁ​ꦮꦶꦱ꧀ꦠꦔꦶ​ꦩꦼꦤꦺꦃ​ꦱꦁꦏꦥꦠꦶ​꧉​ꦩꦸꦭꦤꦺ​ꦥꦼꦩ꧀ꦧꦥ꧀ꦠꦶꦱꦤ꧀ꦩꦸꦲꦶꦁ​ꦧꦚꦸ​ꦪ​ꦧꦶꦱ​ꦚ꧀ꦭꦩꦼꦠ꧀ꦠꦏꦺꦏꦺꦴꦮꦺ​ꦱꦁꦏꦥꦔ꧀ꦮꦱꦤꦺ​ꦢꦺꦴꦱ​꧉​ ²²ꦭꦃ​ꦏꦿꦶꦱ꧀ꦡꦸꦱ꧀ ꦱꦶꦁ​ꦮꦶꦱ꧀ꦠꦔꦶ​ꦩꦼꦤꦺꦃ​ꦱꦁꦏꦥꦠꦶ​꧈​ꦱꦲꦶꦏꦶ​ꦮꦶꦱ꧀ꦩꦸꦁꦒꦃ​ꦤꦁꦱ꧀ꦮꦂꦒ​ꦤꦁꦠꦼꦔꦼꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦢꦺꦏ꧀ꦤꦺꦔ꧀ꦮꦱꦤꦶ​ꦱꦼꦩ꧀ꦧꦫꦁ​꧈​ꦏꦪꦢꦺꦤꦺꦩꦸꦭꦺꦏꦠ꧀ꦩꦸꦭꦺꦏꦠ꧀ꦭꦤ꧀ꦱꦏ꧀ꦲꦺꦤꦺꦁꦔꦺꦥꦔ꧀ꦮꦱꦤꦺ​ꦫꦺꦴꦃꦫꦺꦴꦃ​꧉​

↑ ↑ ↑

꧋ꦲꦸꦫꦶꦥ꧀ꦲꦚꦂ​꧉​

꧇​꧔꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦥꦢ​ꦔꦼꦂꦠꦶꦪ​ꦤꦺꦏ꧀ꦏꦿꦶꦱ꧀ꦡꦸꦱ꧀ꦢꦺꦮꦺꦪ​ꦮꦶꦱ꧀​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀ꦢꦺꦴꦁꦔꦺꦢꦺꦏ꧀ꦤꦺꦲꦶꦗꦶꦏ꧀ꦤꦁꦗꦒꦠ꧀ꦏꦺꦤꦺ​꧉​ꦩꦸꦭꦤꦺ​ꦏꦺꦴꦮꦺ​ꦱꦼꦩꦺꦴꦤꦺꦴ​ꦲꦸꦒ​ꦏꦸꦢꦸ​ꦏꦪ​ꦏꦿꦶꦱ꧀ꦡꦸꦱ꧀ꦤꦠ​ꦲꦠꦶꦩꦸ​꧈​ꦱꦸꦥꦪ​ꦏꦸꦮꦠ꧀꧈​ꦲꦮꦶꦠ꧀ꦏꦱꦁꦱꦫꦤ꧀ꦗꦭꦂꦫꦤ꧀​ꦔ꧀ꦭꦧꦸꦃꦲꦶ​ꦒꦸꦱ꧀ꦠꦶ​ꦏꦸꦮꦶ​ꦠꦤ꧀ꦢꦤꦺꦤꦺꦏ꧀ꦏꦺꦴꦮꦺ​ꦮꦶꦱ꧀ꦩꦫꦶ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧉​ ²ꦢꦢꦶꦤꦺ​ꦱꦸꦮꦺꦤꦺ​ꦲꦶꦗꦶꦏ꧀ꦲꦸꦫꦶꦥ꧀ꦤꦁꦗꦒꦠ꧀ꦏꦺꦤꦺ​ꦏꦺꦴꦮꦺ​ꦤꦩꦸꦁ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦏꦠꦸꦠ꧀ꦩꦼꦤꦺꦃ​ꦏꦫꦺꦴ​ꦏꦼꦱꦼꦤꦼꦔꦤ꧀ꦤꦺꦲꦠꦶ​ꦏꦪ​ꦩꦲꦸꦤꦺ​꧉​ ³ꦲꦮꦶꦠ꧀ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦢꦶꦥꦶꦏꦶꦂ​ꦪ​ꦮꦶꦱ꧀ꦏꦼꦱꦸꦮꦺꦤ꧀ꦧꦔꦼꦠ꧀ꦲꦼꦁꦒꦺꦴꦤ꧀ꦩꦸ​ꦩꦲꦸꦤꦺ​ꦏꦠꦸꦠ꧀ꦭꦤ꧀ꦏꦼꦥꦼꦏ꧀ꦱ​ꦩꦺꦭꦸꦩꦺꦭꦸ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦏꦪ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦸꦗꦸꦠ꧀ꦠꦺꦩꦲꦸꦤꦺ​ꦏꦺꦴꦮꦺ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦔꦸꦩ꧀ꦧꦂ​ꦱꦼꦤꦼꦁ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀​ꦧ꧀ꦭꦱ꧀ ꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦲꦠꦶ​ꦱꦶꦁ​ꦲꦭ​꧈​ꦏꦼꦉꦥ꧀ꦩꦧꦸꦏ꧀ ꦫꦩꦺꦫꦩꦺ​ꦒꦿꦸꦢꦏ꧀ꦒꦿꦸꦢꦸꦏ꧀ ꦔꦸꦩ꧀ꦥꦸꦭ꧀ꦲꦺꦴꦩ꧀ꦧꦺꦤ꧀ꦲꦺꦴꦩ꧀ꦧꦺꦤ꧀ꦭꦤ꧀ꦲꦸꦒ​ꦏꦺꦴꦮꦺ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦧꦿꦲꦭ​ꦮꦼꦂꦤꦮꦼꦂꦤ​ꦱꦶꦁ​ꦔꦶꦱꦶꦤ꧀ꦤꦶꦱꦶꦤ꧀ꦤꦏꦺ꧉​ ⁴ꦏꦚ꧀ꦕꦏꦚ꧀ꦕꦩꦸ​ꦩ꧀ꦧꦶꦪꦺꦤ꧀ꦱꦶꦁ​ꦲꦺꦴꦫ​ꦥꦽꦕꦪ​ꦠꦼꦫꦸꦱ꧀ꦥꦢ​ꦏꦒꦺꦠ꧀ꦤꦶꦠꦺꦤ꧀ꦤꦶ​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦒꦼꦊꦩ꧀ꦩꦺꦭꦸꦩꦺꦭꦸ​ꦩꦼꦤꦺꦃ​ꦏꦫꦺꦴ​ꦧꦫꦁ​ꦱꦶꦁ​ꦲꦺꦴꦫ​ꦔ꧀ꦒꦼꦤꦃ​ꦏꦸꦮꦶ​꧉​ꦩꦸꦭꦤꦺ​ꦏꦺꦴꦮꦺ​ꦱꦲꦶꦏꦶ​ꦥꦢ​ꦢꦶꦲꦫꦤ꧀ꦤꦶ​ꦱꦶꦁ​ꦲꦺꦴꦫꦲꦺꦴꦫ​꧉​ ⁵ꦤꦁꦔꦶꦁ​ꦲꦺꦴꦫ​ꦲꦥꦲꦥ​꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦮꦶꦱ꧀​ꦔ꧀ꦒꦼꦤꦃ​ꦤꦺꦏ꧀ꦧꦏꦭ꧀ꦲꦱꦺꦴꦏ꧀ꦥꦼꦚ꧀ꦗꦮꦧ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦧꦏꦭ꧀ꦔꦿꦸꦠꦸꦮꦺꦴꦁ​ꦲꦸꦫꦶꦥ꧀ꦭꦤ꧀ꦮꦺꦴꦁ​ꦩꦠꦶ​꧉​ ⁶ꦪꦏꦸꦮꦶ​ꦗꦭꦂꦫꦤ꧀ꦤꦺ​ꦏꦿꦶꦱ꧀ꦡꦸꦱ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦩꦫꦁ​ꦮꦺꦴꦁ​ꦩꦠꦶ​꧉​ꦲꦮꦶꦠ꧀ ꦱꦼꦤꦗꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦮꦶꦱ꧀ꦩꦠꦶ​ꦱꦏ꧀ꦕꦫ​ꦧꦢꦤ꧀ ꦤꦁꦔꦶꦁ​ꦗꦭꦂꦫꦤ꧀ꦏꦿꦶꦱ꧀ꦡꦸꦱ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦱꦲꦶꦏꦶ​ꦫꦺꦴꦃꦫꦺꦴꦃꦲꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦶꦱ​ꦲꦸꦫꦶꦥ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱ꧀ꦭꦮꦱ꧀ꦱꦺ꧉​

꧋ꦔ꧀ꦭꦢꦺꦤ꧀ꦤꦶ​ꦱꦏ꧀ꦥꦢꦥꦢꦔꦁꦒꦺꦴ​ꦏꦼꦏꦸꦮꦠ꧀ꦠꦤ꧀ꦤꦺ​ꦒꦸꦱ꧀ꦠꦶ​꧉​

⁷꧋ꦥꦫ​ꦱꦼꦢꦸꦭꦸꦂ​꧈​ꦗꦩꦤ꧀ꦲꦶꦏꦶ​ꦮꦶꦱ꧀ꦲꦉꦥ꧀ꦠꦼꦏꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧉​ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦱꦶꦁ​ꦥꦢꦁꦲꦶꦁ​ꦥꦶꦏꦶꦂꦫꦤ꧀ꦭꦤ꧀ꦱꦶꦁ​ꦲꦮꦱ꧀ꦲꦶꦁ​ꦲꦔꦼꦤ꧀ꦲꦔꦼꦤ꧀ ꦱꦸꦥꦪ​ꦏꦺꦴꦮꦺ​ꦧꦶꦱ​ꦤ꧀ꦢꦺꦴꦁꦔꦱꦶꦁ​ꦱꦏ꧀ꦩꦼꦱ꧀ꦠꦶꦤꦺ꧉​ ⁸ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦪꦏꦸꦮꦶ​꧈​ꦥꦢ​ꦠꦿꦺꦱ꧀ꦤꦲꦱꦏ꧀ꦲꦠꦶꦩꦸ​ꦩꦫꦁ​ꦱꦏ꧀ꦥꦢꦥꦢ꧉​ꦲꦮꦶꦠ꧀ꦤꦺꦏ꧀ꦲꦮꦏ꧀ꦏꦺ​ꦠꦿꦺꦱ꧀ꦤꦱꦏ꧀ꦲꦠꦶꦤꦺ​ꦩꦫꦁ​ꦭꦶꦪꦤꦺ​꧈​ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦧꦏꦭ꧀ꦔꦺꦴꦩꦺꦴꦁꦔꦺꦴꦩꦺꦴꦁꦔꦏꦺꦧꦧ꧀​ꦏ꧀ꦭꦺꦫꦸꦤꦺꦭꦤ꧀ꦱꦭꦃꦲꦺ​ꦭꦶꦪꦤꦺ​꧉​ ⁹ꦲꦸꦒ​ꦥꦫ​ꦱꦼꦢꦸꦭꦸꦂ​꧈​ꦲꦗ​ꦥꦢ​ꦲꦺꦩꦤ꧀ꦤꦩ꧀ꦥ​ꦱꦼꦢꦸꦭꦸꦂ​ꦠꦸꦁꦒꦭ꧀ꦥꦽꦕꦪ​ꦔꦶꦤꦼꦥ꧀ꦤꦁꦲꦺꦴꦩꦃꦩꦸ​꧉​ꦢꦶꦭꦢꦺꦤ꧀ꦤꦶ​ꦠꦤ꧀ꦥ​ꦔ꧀ꦒꦼꦱꦃ​꧉​ ¹⁰ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦥꦢ​ꦢꦶꦏꦺꦏ꧀ꦏꦶꦏꦥꦶꦤ꧀ꦠꦼꦂꦫꦤ꧀ꦢꦺꦮꦺꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦸꦮꦶ​ꦥꦢ​ꦢꦶꦏꦁꦒꦺꦴꦏ꧀ꦏꦏꦺꦏꦁꦒꦺꦴ​ꦤꦸꦭꦸꦁꦔꦶ​ꦭꦶꦪꦤꦺ​꧉​ꦤꦺꦏ꧀ꦏꦺꦴꦮꦺ​ꦢꦶꦏꦺꦏ꧀ꦏꦶꦥꦼꦁꦒꦮꦺꦏꦸꦲꦥ​ꦮꦲꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦤ꧀ꦢꦁꦔꦤ​ꦏꦫꦺꦴ​ꦠꦼꦩꦼꦤ꧀ꦠꦼꦏꦤ꧀ꦫꦩ꧀ꦥꦸꦁꦔꦺ​꧉​ꦢꦢꦶꦤꦺ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦶꦱ​ꦏꦺꦠꦺꦴꦏ꧀ꦲꦶꦁ​ꦮꦼꦂꦤꦮꦼꦂꦤ​ꦕꦫ​꧉​ ¹¹ꦒꦩ꧀ꦥꦁꦔꦺ​ꦲꦺꦴꦩꦺꦴꦁ​:ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦪ​ꦧꦺꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀ꦱꦶꦁ​ꦔꦺꦴꦩꦺꦴꦁ꧉​ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦤꦸꦭꦸꦁꦔꦶ​ꦭꦶꦪꦤꦺ​꧈​ꦪ​ꦢꦶꦭꦏꦺꦴꦤ꧀ꦤꦶ​ꦔꦁꦒꦺꦴ​ꦏꦼꦏꦸꦮꦠ꧀ꦠꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦲꦶꦁ​ꦱꦼꦩ꧀ꦧꦫꦁ​ꦱꦶꦁ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦏꦁꦒꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦢꦶꦭꦸꦲꦸꦂꦫꦏꦺ꧉​ꦥꦚ꧀ꦕꦺꦤ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏꦸꦢꦸ​ꦢꦶꦒꦸꦁꦒꦸꦁ​ꦭꦤ꧀ꦢꦺꦏ꧀ꦤꦺꦱꦶꦁ​ꦔ꧀ꦮꦱꦤꦶ​ꦱꦼꦩ꧀ꦧꦫꦁ​꧈​ꦱꦲꦶꦏꦶ​ꦭꦤ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦄꦩꦺꦤ꧀!

꧋ꦤꦤ꧀ꦢꦁꦱꦁꦱꦫ​ꦗꦭꦂꦫꦤ꧀ꦢꦢꦶ​ꦮꦺꦴꦁ​ꦏꦿꦶꦱ꧀ꦠꦼꦤ꧀꧈​

¹²꧋ꦥꦫꦱꦼꦢꦸꦭꦸꦂꦱꦶꦁꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦲꦗꦥꦢꦏꦒꦺꦠ꧀ꦲꦼꦁꦒꦺꦴꦤ꧀ꦩꦸꦤꦤ꧀ꦢꦁꦏꦔꦺꦭ꧀ꦭꦤ꧀ꦏꦁꦒꦺꦴꦚ꧀ꦗꦗꦭ꧀ꦩꦤ꧀ꦠꦼꦥ꧀ꦲꦺꦴꦫꦤꦺꦥꦽꦕꦪꦩꦸ꧉​ꦏꦸꦮꦶꦱꦏ꧀ꦮꦶꦗꦶꦤꦺꦊꦭꦏꦺꦴꦤ꧀ꦱꦶꦁꦢꦶꦲꦭꦩ꧀ꦩꦶꦏꦧꦺꦃꦮꦺꦴꦁꦱꦶꦁꦥꦢꦥꦽꦕꦪꦩꦫꦁꦒꦸꦱ꧀ꦠꦶ꧉​ ¹³ꦲꦗ​ꦥꦢ​ ꦏꦒꦺꦠ꧀ ꦤꦁꦔꦶꦁ​ꦥꦢ​ꦧꦸꦔꦃꦲ​꧈​ꦲꦮꦶꦠ꧀ꦏꦺꦴꦮꦺ​ꦩꦺꦭꦸ​ꦔꦿꦱꦏ꧀ꦏꦏꦺꦏꦁꦱꦁꦱꦫꦤ꧀ꦤꦺꦏꦿꦶꦱ꧀ꦡꦸꦱ꧀꧈​ꦤꦁꦔꦶꦁ​ꦏꦪ​ꦔꦥ​ꦒꦼꦢꦺꦤꦺꦏꦧꦸꦔꦃꦲꦤ꧀ꦩꦸ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦏꦿꦶꦱ꧀ꦡꦸꦱ꧀ꦧꦏꦭ꧀ꦠꦼꦏ​ꦩꦼꦤꦺꦃ​ꦭꦤ꧀ꦏꦧꦺꦃ​ꦮꦺꦴꦁ​ꦧꦏꦭ꧀ꦮꦼꦫꦸꦃ​ꦱꦼꦥꦶꦫ​ꦒꦼꦢꦺꦤꦺꦏ꧀ꦮꦱꦤꦺ​꧉​ ¹⁴ꦩꦸꦭꦤꦺ​꧈​ꦤꦺꦏ꧀ꦏꦺꦴꦮꦺ​ꦢꦶꦲꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦮꦺꦴꦁ​ꦗꦭꦂꦫꦤ꧀ꦏꦺꦴꦮꦺ​ꦤꦸꦫꦸꦠ꧀ꦏꦿꦶꦱ꧀ꦡꦸꦱ꧀ ꦏꦸꦮꦶ​ꦲꦁꦒꦼꦥ꧀ꦥꦼꦤ꧀ꦧꦼꦂꦏꦃ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦏꦸꦮꦶ​ꦠꦤ꧀ꦢꦤꦺꦤꦺꦏ꧀ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺꦩꦁꦒꦺꦴꦤ꧀ꦲꦶꦁ​ꦲꦠꦶꦩꦸ​꧉​ ¹⁵ꦲꦗ​ꦱꦩ꧀ꦥꦺꦏ꧀ꦏꦺꦴꦮꦺ​ꦤꦤ꧀ꦢꦁꦱꦁꦱꦫ​꧈​ꦗꦭꦂꦫꦤ꧀ꦏꦺꦴꦮꦺ​ꦩꦠꦺꦤ꧀ꦤꦶ​ꦮꦺꦴꦁ​ꦲꦥ​ꦚꦺꦴꦭꦺꦴꦁ​ꦲꦥ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦭꦶꦪꦤꦺ​ꦲꦥ​ꦗꦭꦂꦫꦤ꧀ꦏꦺꦴꦮꦺ​ꦔꦿꦸꦱꦸꦃꦲꦶꦲꦸꦫꦶꦥ꧀ꦥꦺꦮꦺꦴꦁ​ꦭꦶꦪ​꧉​ ¹⁶ꦤꦁꦔꦶꦁ​ꦤꦺꦏ꧀ꦲꦼꦁꦒꦺꦴꦤ꧀ꦩꦸ​ꦤꦤ꧀ꦢꦁꦱꦁꦱꦫ​ꦏꦸꦮꦶ​ꦗꦭꦂꦫꦤ꧀ꦏꦺꦴꦮꦺ​ꦤꦸꦫꦸꦠ꧀ꦏꦿꦶꦱ꧀ꦡꦸꦱ꧀ ꦏꦺꦴꦮꦺ​ꦲꦺꦴꦫ​ꦲꦸꦱꦃꦲꦶꦱꦶꦤ꧀꧈​ꦩꦭꦃ​ꦥꦢ​ꦧꦸꦔꦃꦲ​ꦭꦤ꧀ꦩꦼꦩꦸꦗꦶꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦏꦺꦴꦮꦺ​ꦢꦶꦲꦫꦤ꧀ꦤꦶ​ꦮꦺꦴꦁ​ꦏꦿꦶꦱ꧀ꦠꦼꦤ꧀꧈​

¹⁷꧋ꦥꦚ꧀ꦕꦺꦤ꧀ ꦮꦏ꧀ꦠꦸꦩꦸꦮꦶꦱ꧀ꦠꦼꦏ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦺꦴꦭꦃꦲꦶꦔꦿꦸꦠꦸꦩꦤꦸꦁꦱ​ꦭꦤ꧀ꦢꦺꦏ꧀ꦤꦺꦧꦏꦭ꧀ꦩꦺꦴꦭꦃꦲꦶꦤꦁꦲꦺꦴꦩꦃꦲꦺ​ꦢꦺꦮꦺꦤ꧀ꦢꦶꦱꦶꦏ꧀ ꦪ​ꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦁ​ꦥꦽꦕꦪ​꧉​ꦭꦃ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦺꦴꦭꦃꦲꦶꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦥꦽꦕꦪ​꧈​ꦭꦃ​ꦏꦪ​ꦔꦥ​ꦧꦏꦭ꧀ꦭꦺ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦿꦸꦠꦸꦮꦺꦴꦁ​ꦱꦶꦁ​ꦥꦢ​ꦤꦩ꧀ꦥꦶꦏ꧀ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦏꦿꦶꦱ꧀ꦡꦸꦱ꧀꧈​ ¹⁸ꦧꦧ꧀ꦲꦶꦏꦶ​ꦤꦁꦏꦶꦠꦧ꧀ꦲꦺꦤꦺꦁꦠꦸꦭꦶꦱ꧀ꦱꦤ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

“ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦭꦶꦭꦤꦶ​ꦏꦔꦺꦭ꧀ꦭꦤ꧀ꦤꦼꦏꦤꦶ​ꦲꦸꦫꦶꦥ꧀ꦥꦺꦮꦺꦴꦁ​ꦧꦼꦕꦶꦏ꧀
ꦭꦃ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦭꦤ꧀ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦩꦼꦤꦺꦃ​꧈​ꦏꦪ​ꦔꦥ​ꦧꦏꦭ꧀ꦭꦺ​?”

¹⁹ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦏꦺꦴꦮꦺ​ꦤꦤ꧀ꦢꦁꦱꦁꦱꦫ​ꦗꦭꦂꦫꦤ꧀ꦏꦸꦮꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦱꦿꦃꦲ​ꦱꦼꦩ꧀ꦧꦫꦁ​ꦩꦫꦁ​ꦢꦺꦏ꧀ꦤꦺꦱꦶꦁ​ꦔ꧀ꦒꦮꦺ​ꦲꦸꦫꦶꦥ꧀ꦭꦤ꧀ꦥꦢ​ꦠꦼꦠꦼꦥ꧀ꦠꦼꦫꦸꦱ꧀ꦲꦼꦁꦒꦺꦴꦤ꧀ꦩꦸ​ꦔ꧀ꦒꦮꦺ​ꦧꦼꦕꦶꦏ꧀ ꦲꦮꦶꦠ꧀ꦢꦺꦏ꧀ꦤꦺꦱ꧀ꦭꦮꦱ꧀ꦱꦺꦧꦏꦭ꧀ꦤꦸꦭꦸꦁꦔꦶ​ꦏꦺꦴꦮꦺ​꧉​

↑ ↑ ↑

꧋ꦔ꧀ꦭꦢꦺꦤ꧀ꦤꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦥꦽꦕꦪ​꧉​

꧇​꧕꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦱꦲꦶꦏꦶ​ꦏꦼꦥꦺꦔꦶꦤ꧀​ꦤ꧀ꦢꦸꦮꦺꦤ꧀ꦤꦶ​ꦠꦼꦩ꧀ꦧꦸꦁ​ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦏꦪ​ꦲꦏꦸ​ꦢꦢꦶ​ꦥꦼꦤꦸꦤ꧀ꦠꦸꦤꦺ​ꦥꦱꦩꦸꦮꦤ꧀꧈​ꦏꦺꦴꦮꦺ​ꦥꦢ​ꦔꦼꦂꦠꦶ​ꦤꦺꦏ꧀ꦲꦏꦸ​ꦢꦺꦮꦺꦮꦼꦫꦸꦃ​ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀​ꦔ꧀ꦭꦧꦸꦃꦲꦶ​ꦲꦮꦏ꧀ꦏꦺ​ꦢꦺꦮꦺ꧈​ꦱꦸꦥꦪ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦢꦺꦏ꧀ꦤꦺꦠꦼꦏ​ꦩꦼꦤꦺꦃ​ꦩꦫꦤꦶ​ꦲꦮꦏ꧀ꦏꦺ​ꦢꦺꦮꦺ꧈​ꦲꦏꦸ​ꦧꦉꦁ​ꦏꦫꦺꦴ​ꦏꦺꦴꦮꦺ​ꦏꦧꦺꦃ​ꦲꦸꦒ​ꦤꦩ꧀ꦥ​ꦥꦼꦔꦊꦩ꧀ꦩꦤ꧀ꦧꦉꦁ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦶꦁ​ꦧꦏꦭ꧀ꦢꦶꦏꦺꦏ꧀ꦏꦶꦥꦔ꧀ꦮꦱ​ꦱꦶꦁ​ꦢꦸꦮꦸꦂꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²ꦗꦭꦂꦫꦤ꧀ꦱꦁꦏꦏꦸꦮꦶ​ꦩꦲꦸ​ꦏꦧꦺꦃ​꧈​ꦲꦏꦸ​ꦚꦸꦮꦸꦤ꧀ꦩꦫꦁ​ꦥꦫ​ꦥꦼꦤꦸꦤ꧀ꦠꦸꦤ꧀ ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦏꦺꦴꦮꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦥꦢ​ꦢꦶꦫꦸꦩꦠ꧀ꦠꦶ​ꦱꦶꦁ​ꦲꦥꦶꦏ꧀ ꦠꦼꦒꦼꦱ꧀ꦱꦺ​꧈​ꦏꦫꦺꦴ​ꦲꦠꦶ​ꦱꦶꦁ​ꦏꦉꦥ꧀ ꦩꦔꦼꦂꦠꦺꦤ꧀ꦤꦶꦤꦺꦏ꧀ꦏꦸꦮꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦢꦶꦤꦺ​ꦲꦺꦴꦫ​ꦏꦼꦥꦼꦏ꧀ꦱ​꧉​ꦲꦗ​ꦤꦤ꧀ꦢꦁꦔꦶ​ꦥꦼꦁꦒꦮꦺꦪꦤ꧀ꦗꦭꦂꦫꦤ꧀ꦏꦺꦴꦮꦺ​ꦩꦶꦏꦶꦂ​ꦧꦪꦂꦫꦤ꧀ꦲꦥ​ꦧꦠꦶ꧈​ꦲꦺꦴꦫ​꧈​ꦤꦁꦔꦶꦁ​ꦗꦭꦂꦫꦤ꧀ꦏꦼꦥꦺꦔꦶꦤ꧀​ꦔ꧀ꦭꦢꦺꦤ꧀ꦤꦶ​꧉​ ³ꦲꦗ​ꦩꦤ꧀ꦢꦺꦴꦂꦫꦶꦮꦺꦴꦁꦮꦺꦴꦁ​ꦱꦶꦁ​ꦢꦶꦥꦱꦿꦃꦲꦏꦺꦩꦫꦁ​ꦥꦼꦚ꧀ꦗꦮꦧ꧀ꦩꦸ​꧈​ꦤꦁꦔꦶꦁ​ꦩꦭꦃ​ꦥꦢ​ꦢꦢꦶꦪ​ꦠꦸꦭꦢꦱꦶꦁ​ꦲꦥꦶꦏ꧀ꦏꦁꦒꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​꧉​ ⁴ꦢꦢꦶꦤꦺ​ꦲꦩ꧀ꦧꦺꦱꦸꦏ꧀ ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦥꦼꦤꦸꦤ꧀ꦠꦸꦤ꧀ꦒꦼꦢꦺ꧈​ꦠꦼꦏ​ꦩꦼꦤꦺꦃ​ꦭꦤ꧀ꦏꦧꦺꦃ​ꦮꦺꦴꦁ​ꦧꦏꦭ꧀ꦮꦼꦫꦸꦃ​꧈​ꦢꦺꦏ꧀ꦤꦺꦧꦏꦭ꧀ꦔꦼꦊꦩ꧀ꦏꦺꦴꦮꦺ​ꦲꦺꦴꦫ​ꦲꦺꦤꦺꦁꦲꦼꦤ꧀ꦠꦺꦏ꧀ꦏꦺ​꧈​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦊꦩ꧀ꦢꦺꦏ꧀ꦤꦺ꧉​

⁵꧋ꦩꦼꦁꦏꦺꦴꦤꦺꦴ​ꦲꦸꦒ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦲꦼꦤꦺꦴꦩ꧀꧈​ꦏꦺꦴꦮꦺ​ꦏꦸꦢꦸ​ꦔꦗꦺꦤ꧀ꦤꦶ​ꦭꦤ꧀​ꦔ꧀ꦒꦸꦒꦸ​ꦩꦫꦁ​ꦠꦼꦩ꧀ꦧꦸꦁꦔꦺ​ꦥꦫ​ꦥꦼꦤꦸꦤ꧀ꦠꦸꦤ꧀꧈​ꦥꦫ​ꦱꦼꦢꦸꦭꦸꦂ​꧈​ꦲꦼꦁꦒꦺꦴꦤ꧀ꦩꦸ​ꦧꦼꦧꦉꦁꦔꦤ꧀ꦩꦫꦁ​ꦱꦏ꧀ꦥꦢꦥꦢꦏꦸꦢꦸ​ꦔꦁꦒꦺꦴ​ꦲꦤ꧀ꦢꦥ꧀ꦥꦱꦺꦴꦂ꧉​ꦲꦮꦶꦠ꧀ꦤꦁꦏꦶꦠꦧ꧀ꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:“ꦒꦸꦱ꧀ꦠꦶ​ꦄꦭ꧀ꦭꦃ​ꦱꦼꦔꦶꦠ꧀ꦩꦫꦁ​ꦮꦺꦴꦁ​ꦱꦶꦁ​ꦱꦺꦴꦩ꧀ꦧꦺꦴꦁ꧈​ꦤꦁꦔꦶꦁ​ꦢꦺꦏ꧀ꦤꦺꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦮꦺꦴꦁ​ꦱꦶꦁ​ꦲꦤ꧀ꦢꦥ꧀ꦥꦱꦺꦴꦂ꧉​” ⁶ꦩꦸꦭꦤꦺ꧈​ꦥꦢꦱꦸꦗꦸꦠ꧀ꦠꦩꦫꦁꦒꦸꦱ꧀ꦠꦶꦄꦭ꧀ꦭꦃꦱꦶꦁꦏ꧀ꦮꦱ꧈​ꦢꦺꦏ꧀ꦤꦺꦧꦏꦭ꧀ꦔꦁꦏꦠ꧀ꦏꦺꦴꦮꦺꦤꦺꦏ꧀ꦮꦶꦱ꧀ꦮꦚ꧀ꦕꦶꦤꦺ꧉​ ⁷ꦱꦸꦩꦼꦭꦁꦩꦸꦏꦧꦺꦃꦥꦱꦿꦃꦤꦩꦫꦁꦒꦸꦱ꧀ꦠꦶꦄꦭ꧀ꦭꦃ꧈​ꦲꦮꦶꦠ꧀ꦢꦺꦏ꧀ꦤꦺꦱꦶꦁꦔꦿꦸꦩꦠ꧀ꦠꦶꦏꦺꦴꦮꦺ꧉​

⁸꧋ꦥꦫ​ꦱꦼꦢꦸꦭꦸꦂ​꧈​ꦥꦢ​ꦱꦶꦁ​ꦥꦢꦁꦲꦶꦁ​ꦥꦶꦏꦶꦂꦫꦤ꧀ꦭꦤ꧀ꦱꦶꦁ​ꦲꦮꦱ꧀ ꦲꦮꦶꦠ꧀ꦱꦺꦠꦤ꧀ ꦩꦸꦁꦱꦸꦃꦩꦸ​꧈​ꦏ꧀ꦭꦶꦤ꧀ꦠꦼꦂꦫꦤ꧀ꦏꦪ​ꦩꦕꦤ꧀ꦔꦼꦭꦶꦃ​ꦔ꧀ꦒꦺꦴꦭꦺꦏ꧀ꦥꦔꦤ꧀꧈​ ⁹ꦩꦸꦭꦤꦺ​꧈​ꦥꦢ​ꦩꦤ꧀ꦠꦼꦥ꧀ꦥ​ꦲꦶꦁ​ꦥꦼꦔꦤ꧀ꦢꦼꦭ꧀ ꦱꦸꦥꦪ​ꦏꦺꦴꦮꦺ​ꦧꦶꦱ​ꦔ꧀ꦭꦮꦤ꧀ꦤꦺꦏ꧀ꦢꦺꦏ꧀ꦤꦺꦤꦼꦏꦤꦶ​ꦏꦺꦴꦮꦺ​꧉​ꦲꦮꦶꦠ꧀ ꦲꦗ​ꦭꦭꦶ​ꦤꦺꦏ꧀ꦱꦼꦢꦸꦭꦸꦂꦱꦼꦢꦸꦭꦸꦂꦩꦸ​ꦠꦸꦁꦒꦭ꧀ꦥꦽꦕꦪ​ꦤꦁꦱꦏ꧀ꦗꦒꦠ꧀ꦲꦸꦒ​ꦥꦢ​ꦤꦤ꧀ꦢꦁꦏꦔꦺꦭ꧀ꦭꦤ꧀ꦏꦪ​ꦏꦺꦴꦮꦺ​꧉​ ¹⁰ꦤꦁꦔꦶꦁ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦏꦺꦴꦮꦺ​ꦭꦤ꧀ꦢꦺꦏ꧀ꦤꦺꦱꦶꦁ​ꦤꦸꦭꦸꦁꦔꦶ​ꦏꦺꦴꦮꦺ​꧈​ꦪ​ꦢꦺꦏ꧀ꦤꦺꦱꦶꦁ​ꦩꦁꦒꦶꦭ꧀ꦏꦺꦴꦮꦺ​ꦭꦤ꧀ꦗꦭꦂꦫꦤ꧀ꦏꦺꦴꦮꦺ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦏꦺꦴꦮꦺ​ꦧꦏꦭ꧀ꦢꦶꦲꦁꦏꦠ꧀ ꦱꦸꦥꦪ​ꦧꦶꦱ​ꦩꦺꦭꦸ​ꦤ꧀ꦢꦸꦮꦺꦤ꧀ꦤꦶ​ꦥꦔ꧀ꦮꦱ​ꦱꦶꦁ​ꦢꦸꦮꦸꦂ꧈​ꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦧꦼꦤꦼꦂ​ꦏꦺꦴꦮꦺ​ꦱꦲꦶꦏꦶ​ꦥꦢ​ꦤꦤ꧀ꦢꦁꦱꦁꦱꦫ​꧈​ꦤꦁꦔꦶꦁ​ꦏꦸꦮꦶ​ꦤꦩꦸꦁ​ꦱꦼꦢꦶꦭꦸꦠ꧀꧈​ꦲꦮꦶꦠ꧀ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦏꦺꦴꦮꦺ​ꦧꦏꦭ꧀ꦢꦶꦠꦔꦺꦏ꧀ꦏꦏꦺꦭꦤ꧀ꦢꦶꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ ꦱꦸꦥꦪ​ꦏꦺꦴꦮꦺ​ꦧꦶꦱ​ꦔꦢꦼꦏ꧀ꦗꦼꦗꦼꦏ꧀ꦲꦶꦁ​ꦥꦼꦔꦤ꧀ꦢꦼꦭ꧀ ꦲꦺꦴꦫ​ꦩꦺꦴꦪꦏ꧀ꦩꦪꦶꦏ꧀꧈​ ¹¹ꦥꦚ꧀ꦕꦺꦤ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦒꦼꦢꦺꦢꦺꦮꦺꦏ꧀ꦮꦱꦤꦺ​ꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦄꦩꦺꦤ꧀꧈​

꧋ꦥꦼꦤꦸꦠꦸꦥ꧀ꦭꦤ꧀ꦥꦩꦸꦗꦶ​ꦱ꧀ꦭꦩꦼꦠ꧀꧈​

¹²꧋ꦥꦫ​ꦱꦼꦢꦸꦭꦸꦂ​꧈​ꦱꦼꦢꦸꦭꦸꦂ​ꦱꦶꦭꦱ꧀ꦱꦶꦁ​ꦔꦿꦺꦮꦁꦔꦶ​ꦲꦏꦸ​ꦤꦸꦭꦶꦱ꧀ꦭꦪꦁ​ꦲꦶꦏꦶ​ꦩꦫꦁ​ꦏꦺꦴꦮꦺ​꧉​ꦢꦺꦏ꧀ꦤꦺꦪ​ꦏꦪ​ꦲꦏꦸ​ꦚꦩ꧀ꦧꦸꦠ꧀ꦠꦏꦁꦒꦺꦴ​ꦒꦸꦱ꧀ꦠꦶ​ꦭꦤ꧀ꦲꦏꦸ​ꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦏꦼꦤꦺꦁꦠꦏ꧀ꦥꦽꦕꦪ​꧉​ꦲꦏꦸ​ꦤꦸꦭꦶꦱ꧀ꦭꦪꦁ​ꦕꦼꦏꦏ꧀ꦲꦶꦏꦶ​ꦏꦁꦒꦺꦴ​ꦔꦤ꧀ꦠꦼꦥ꧀ꦥꦏꦺꦥꦼꦔꦤ꧀ꦢꦼꦭ꧀ꦩꦸ​ꦭꦤ꧀ꦲꦸꦒ​ꦏꦁꦒꦺꦴ​ꦔꦼꦏꦺꦏ꧀ꦏꦶꦥꦱꦼꦏ꧀ꦱꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤꦸꦭꦸꦁꦔꦶ​ꦲꦮꦏ꧀ꦏꦺ​ꦢꦺꦮꦺꦠꦼꦤꦤ꧀ ꦪ​ꦏꦪ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦤꦁꦭꦪꦁ​ꦲꦶꦏꦶ​꧉​ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦥꦢ​ꦩꦤ꧀ꦠꦼꦥ꧀ꦥ​ꦠꦼꦫꦸꦱ꧀ꦲꦶꦁ​ꦥꦼꦔꦤ꧀ꦢꦼꦭ꧀꧈​

¹³꧋ꦱꦼꦢꦸꦭꦸꦂꦱꦼꦢꦸꦭꦸꦂꦩꦸ​ꦠꦸꦁꦒꦭ꧀ꦥꦽꦕꦪ​ꦏꦧꦺꦃ​ꦤꦁꦏꦸꦠꦨꦧꦶꦭꦺꦴꦤ꧀ꦏꦺꦤꦺ​ꦥꦢ​ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦮꦶꦱ꧀ꦩꦶꦗꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦲꦶꦏꦶ​꧈​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦏꦺꦴꦮꦺ​꧉​ꦲꦸꦒ​ꦱꦼꦢꦸꦭꦸꦂ​ꦩꦂꦏꦸꦱ꧀ꦏꦶꦫꦶꦩ꧀ꦱ꧀ꦭꦩꦼꦠ꧀ꦩꦫꦁ​ꦏꦺꦴꦮꦺ​꧉​ꦢꦺꦏ꧀ꦤꦺꦥꦚ꧀ꦕꦺꦤ꧀ꦠꦏ꧀ꦲꦁꦒꦼꦥ꧀ꦲꦤꦏ꧀ꦏꦸ​ꦲꦶꦁ​ꦏꦱꦸꦏ꧀ꦩꦤ꧀꧈​ ¹⁴ꦢꦶꦲꦺꦴꦩꦺꦴꦁꦔꦏꦺꦩꦫꦁꦱꦼꦢꦸꦭꦸꦂꦱꦼꦢꦸꦭꦸꦂꦏꦧꦺꦃꦤꦺꦏ꧀ꦲꦏꦸꦠꦿꦺꦱ꧀ꦤꦩꦫꦁꦏꦺꦴꦮꦺꦱꦶꦗꦶꦱꦶꦗꦶꦤꦺ꧉​

꧋ꦩꦸꦒꦩꦸꦒꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦲꦤꦲꦲꦶꦁꦏꦺꦴꦮꦺꦏꦧꦺꦃ꧈​ꦗꦭꦂꦫꦤ꧀ꦏꦺꦴꦮꦺꦮꦶꦱ꧀ꦢꦢꦶꦱꦶꦗꦶꦏꦫꦺꦴꦏꦿꦶꦱ꧀ꦡꦸꦱ꧀꧈​

ꦦꦺꦠꦿꦸꦱ꧀

↑ ↑ ↑

← ꦪꦏꦺꦴꦧꦸꦱ꧀

꧇꧒꧇ꦦꦺꦠꦿꦸꦱ꧀ →