Alkitab/Kaimaman/17

^17:1 ꦒꦸꦱ꧀ꦠꦶꦄꦭ꧀ꦭꦃꦝꦮꦸꦃꦩꦫꦁ​꧊ꦩꦸꦱ꧈​

^17:2 ꦱꦸꦥꦪꦤꦼꦫꦸꦱ꧀ꦱꦏꦺꦥꦽꦤꦠꦤ꧀ꦲꦶꦏꦶꦩꦫꦁꦲꦫꦸꦤ꧀꧈​ꦲꦤꦏ꧀ꦲꦤꦏ꧀ꦏꦺꦭꦤ꧀ꦧꦁꦱ​꧊ꦆꦱꦿꦲꦺꦭ꧀ꦏꦧꦺꦃ꧉​

^17:3 (17:3-4)ꦪꦺꦤ꧀ꦮꦺꦴꦁ​꧊ꦆꦱꦿꦲꦺꦭ꧀ꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦩꦫꦁꦄꦭ꧀ꦭꦃꦫꦸꦥꦱꦥꦶ꧈​ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦲꦸꦠꦮꦮꦼꦝꦸꦱ꧀ꦗꦮ꧈​ꦏꦸꦢꦸꦚꦼꦩ꧀ꦧꦼꦭꦺꦃꦏꦺꦮꦤ꧀ꦩꦲꦸꦲꦶꦁꦭꦮꦁꦔꦺꦏꦺꦩꦃꦱꦸꦕꦶ꧉​ꦪꦺꦤ꧀ꦢꦶꦱꦼꦩ꧀ꦧꦼꦭꦺꦃꦲꦶꦁꦭꦶꦪꦥꦁꦒꦺꦴꦤ꧀ꦤꦤ꧀꧈​ꦮꦺꦴꦁꦩꦲꦸꦤꦼꦫꦏ꧀ꦲꦁꦒꦼꦂꦲꦁꦒꦼꦂꦄꦭ꧀ꦭꦃ꧈​ꦩꦼꦂꦒꦩꦸꦠꦃꦲꦏꦺꦒꦼꦠꦶꦃ꧉​ꦮꦺꦴꦁꦩꦲꦸꦏꦸꦢꦸꦢꦶꦱꦺꦧꦿꦠ꧀ꦠꦏꦺꦱꦏꦲꦸꦩꦠ꧀ꦠꦺꦄꦭ꧀ꦭꦃ꧉​

^17:4 (17:3)

^17:5 ꦩꦏ꧀ꦱꦸꦢ꧀ꦢꦺꦥꦽꦤꦠꦤ꧀ꦲꦶꦏꦶꦱꦸꦥꦪꦮꦶꦮꦶꦠ꧀ꦱꦲꦶꦏꦶꦧꦁꦱ​꧊ꦆꦱꦿꦲꦺꦭ꧀ꦪꦺꦤ꧀ꦱꦲꦺꦴꦱ꧀ꦏꦸꦂꦧꦤ꧀ꦫꦸꦥꦏꦺꦮꦤ꧀ꦏꦸꦢꦸꦢꦶꦱꦼꦩ꧀ꦧꦼꦭꦺꦃꦲꦤꦲꦶꦁꦏꦺꦩꦃꦥꦊꦁꦒꦃꦲꦤ꧀ꦤꦺꦄꦭ꧀ꦭꦃ꧈​ꦲꦺꦴꦫꦏꦪꦧꦶꦪꦺꦤ꧀ꦲꦤꦲꦶꦁꦲꦫꦲꦫꦱꦩꦸꦤ꧀꧉​ꦱꦲꦶꦏꦶꦱꦲꦺꦴꦱ꧀ꦱꦤ꧀ꦩꦲꦸꦏꦸꦢꦸꦢꦶꦒꦮꦩꦼꦚꦁꦭꦮꦁꦔꦺꦏꦺꦩꦃꦱꦸꦕꦶ꧈​ꦢꦶꦥꦱꦿꦃꦲꦏꦺꦩꦫꦁꦲꦶꦩꦩ꧀꧈​ꦤꦸꦭꦶꦢꦶꦱꦼꦩ꧀ꦧꦼꦭꦺꦃꦲꦶꦁꦏꦺꦴꦤꦺꦴꦢꦢꦶꦏꦸꦂꦧꦤ꧀ꦏꦼꦱ꧀ꦭꦩꦼꦠ꧀ꦠꦤ꧀꧉​

^17:6 ꦲꦶꦩꦩ꧀ꦏꦸꦢꦸꦚꦶꦫꦩ꧀ꦩꦏꦺꦒꦼꦠꦶꦃꦲꦺꦏꦺꦮꦤ꧀ꦩꦲꦸꦲꦶꦁꦭꦩ꧀ꦧꦸꦁꦔꦺꦩꦼꦱ꧀ꦧꦺꦃ꧈​ꦱꦶꦁꦲꦤꦲꦶꦁꦔꦉꦥ꧀ꦏꦺꦩꦃꦱꦸꦕꦶ꧈​ꦧꦚ꧀ꦗꦸꦂꦔꦺꦴꦧꦺꦴꦁꦒꦗꦶꦃꦲꦺ꧈​ꦱꦸꦥꦪꦒꦤ꧀ꦢꦤꦺꦒꦮꦺꦉꦤꦤꦶꦁꦥꦼꦁꦒꦭꦶꦃꦲꦺꦄꦭ꧀ꦭꦃ꧉​

^17:7 ꦧꦁꦱ​꧊ꦆꦱꦿꦲꦺꦭ꧀ꦏꦸꦢꦸꦱꦼꦠꦾꦩꦫꦁꦄꦭ꧀ꦭꦃꦭꦤ꧀ꦧꦧꦂꦥꦶꦱꦤ꧀ꦲꦺꦴꦫꦏꦼꦤꦚꦼꦩ꧀ꦧꦼꦭꦺꦃꦏꦺꦮꦤ꧀ꦢꦶꦲꦼꦁꦒꦺꦴꦏꦸꦂꦧꦤ꧀ꦏꦁꦒꦺꦴꦚꦼꦩ꧀ꦧꦃꦩꦫꦁꦥꦫꦝꦼꦩꦶꦠ꧀꧈​ꦱꦶꦁꦢꦶꦲꦫꦤ꧀ꦤꦶ"ꦝꦼꦩꦶꦠ꧀ꦮꦼꦝꦸꦱ꧀"꧉​ꦥꦽꦤꦠꦤ꧀ꦲꦶꦏꦶꦏꦸꦢꦸꦢꦶꦠꦼꦠꦼꦥ꧀ꦥꦶꦲꦶꦁꦱꦼꦭꦮꦱ꧀ꦭꦮꦱ꧀ꦱꦺ꧉​

^17:8 "ꦪꦺꦤ꧀ꦲꦤꦮꦺꦴꦁ​꧊ꦆꦱꦿꦲꦺꦭ꧀ꦲꦸꦠꦮꦮꦺꦴꦁꦩꦚ꧀ꦕꦱꦶꦁꦩꦁꦒꦺꦴꦤ꧀ꦲꦶꦁꦏꦺꦴꦤꦺꦴ꧈​ꦱꦲꦺꦴꦱ꧀ꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦲꦸꦠꦮꦏꦸꦂꦧꦤ꧀ꦭꦶꦪꦤꦺ꧈​

^17:9 ꦏꦺꦴꦚ꧀ꦗꦸꦏ꧀ꦩꦫꦁꦄꦭ꧀ꦭꦃ꧈​ꦏꦸꦢꦸꦢꦶꦱꦲꦺꦴꦱ꧀ꦱꦏꦺꦲꦤꦲꦶꦁꦭꦮꦁꦔꦺꦏꦺꦩꦃꦱꦸꦕꦶ꧉​ꦪꦺꦤ꧀ꦲꦼꦁꦒꦺꦴꦤꦺꦚꦲꦺꦴꦱ꧀ꦱꦏꦺꦲꦤꦲꦶꦁꦥꦁꦒꦺꦴꦤ꧀ꦤꦤ꧀ꦭꦶꦪ꧈​ꦮꦺꦴꦁꦔꦺꦱꦶꦁꦱꦲꦺꦴꦱ꧀ꦏꦸꦂꦧꦤ꧀ꦩꦲꦸꦏꦸꦢꦸꦢꦶꦱꦺꦧꦿꦠ꧀ꦠꦏꦺꦱꦏꦲꦸꦩꦠ꧀ꦠꦺꦄꦭ꧀ꦭꦃ꧉​

^17:10 ꦪꦺꦤ꧀ꦲꦤꦮꦺꦴꦁ​꧊ꦆꦱꦿꦲꦺꦭ꧀ꦲꦸꦠꦮꦮꦺꦴꦁꦩꦚ꧀ꦕꦱꦶꦁꦩꦁꦒꦺꦴꦤ꧀ꦲꦶꦁꦏꦺꦴꦤꦺꦴꦩꦁꦔꦤ꧀ꦢꦒꦶꦁꦱꦶꦁꦲꦶꦱꦶꦃꦲꦤꦒꦼꦠꦶꦃꦲꦺ꧉​ꦧꦏꦭ꧀ꦢꦶꦲꦸꦏꦸꦩ꧀ꦢꦺꦤꦶꦁꦄꦭ꧀ꦭꦃꦭꦤ꧀ꦢꦶꦱꦺꦧꦿꦠ꧀ꦠꦏꦺꦱꦏꦲꦸꦩꦠ꧀​꧊ꦆꦱꦿꦲꦺꦭ꧀꧈​

^17:11 ꦩꦼꦂꦒꦚꦮꦤꦺꦠꦶꦠꦃꦱꦶꦁꦲꦸꦫꦶꦥ꧀ꦏꦸꦮꦶꦢꦸꦤꦸꦁꦔꦺꦲꦤꦲꦶꦁꦒꦼꦠꦶꦃ꧉​ꦏꦸꦮꦶꦱꦼꦧꦧ꧀ꦧꦺꦄꦭ꧀ꦭꦃꦝꦮꦸꦃꦱꦸꦥꦪꦒꦼꦠꦶꦃꦲꦺꦏꦧꦺꦃꦏꦸꦢꦸꦢꦶꦱꦸꦤ꧀ꦠꦏ꧀ꦲꦤꦲꦶꦁꦩꦼꦱ꧀ꦧꦺꦃ꧈​ꦏꦁꦒꦺꦴꦔꦿꦸꦮꦠ꧀ꦱꦏꦺꦃꦲꦶꦁꦢꦺꦴꦱꦤꦺꦲꦸꦩꦠ꧀꧉​ꦒꦼꦠꦶꦃꦏꦸꦮꦶꦔꦺꦴꦭꦺꦃꦲꦏꦺꦥꦤꦼꦧꦸꦱ꧀ꦱꦶꦁꦢꦺꦴꦱ꧈​ꦩꦼꦂꦒꦲꦶꦁꦒꦼꦠꦶꦃꦩꦲꦸꦲꦤꦚꦮꦤꦺ꧉​

^17:12 ꦏꦸꦮꦶꦱꦼꦧꦧ꧀ꦧꦺꦮꦺꦴꦁ​꧊ꦆꦱꦿꦲꦺꦭ꧀ꦭꦤ꧀ꦮꦺꦴꦁꦩꦚ꧀ꦕꦱꦶꦁꦩꦁꦒꦺꦴꦤ꧀ꦲꦶꦁꦠꦼꦔꦃꦲꦺ꧈​ꦲꦺꦴꦫꦏꦼꦤꦩꦁꦔꦤ꧀ꦢꦒꦶꦁꦱꦶꦁꦲꦶꦱꦶꦃꦲꦤꦒꦼꦠꦶꦃꦲꦺ꧉​

^17:13 ꦮꦺꦴꦁ​꧊ꦆꦱꦿꦲꦺꦭ꧀ꦲꦸꦠꦮꦮꦺꦴꦁꦩꦚ꧀ꦕꦱꦶꦁꦩꦁꦒꦺꦴꦤ꧀ꦲꦶꦁꦲꦤ꧀ꦠꦫꦤꦺꦧꦁꦱ​꧊ꦆꦱꦿꦲꦺꦭ꧀꧈​ꦱꦩꦱꦩ꧀ꦧꦼꦧꦼꦝꦒ꧀ꦲꦺꦴꦭꦺꦃꦏꦺꦮꦤ꧀ꦲꦸꦠꦮꦩꦤꦸꦏ꧀ꦱꦶꦁꦲꦺꦴꦫꦏꦫꦩ꧀꧈​ꦒꦼꦠꦶꦃꦲꦺꦏꦺꦮꦤ꧀ꦩꦲꦸꦏꦸꦢꦸꦢꦶꦮꦼꦠꦺꦴꦏ꧀ꦏꦏꦺꦔꦤ꧀ꦠꦶꦲꦠꦸꦱ꧀ꦭꦤ꧀ꦢꦶꦲꦸꦫꦸꦒꦊꦩꦃ꧉​

^17:14 ꦩꦼꦂꦒꦚꦮꦤꦺꦱꦧꦼꦤ꧀ꦠꦶꦠꦃꦱꦶꦁꦲꦸꦫꦶꦥ꧀ꦏꦸꦮꦶꦢꦸꦤꦸꦁꦔꦺꦲꦤꦲꦶꦁꦒꦼꦠꦶꦃ꧉​ꦪꦏꦸꦮꦶꦱꦼꦧꦧ꧀ꦧꦺꦄꦭ꧀ꦭꦃꦲꦺꦴꦫꦩꦉꦁꦔꦏꦺꦧꦁꦱ​꧊ꦆꦱꦿꦲꦺꦭ꧀ꦩꦁꦔꦤ꧀ꦢꦒꦶꦁꦱꦶꦁꦲꦶꦱꦶꦃꦲꦤꦒꦼꦠꦶꦃꦲꦺ꧉​ꦱꦧꦼꦤ꧀ꦮꦺꦴꦁꦱꦶꦁꦤꦶꦤ꧀ꦢꦏ꧀ꦏꦏꦺꦩꦼꦁꦏꦺꦴꦤꦺꦴꦏꦸꦢꦸꦢꦶꦱꦺꦧꦿꦠ꧀ꦠꦏꦺꦱꦏꦲꦸꦩꦠ꧀ꦠꦺꦄꦭ꧀ꦭꦃ꧉​

^17:15 ꦮꦺꦴꦁ​꧊ꦆꦱꦿꦲꦺꦭ꧀ꦲꦸꦠꦮꦮꦺꦴꦁꦩꦚ꧀ꦕꦱꦶꦁꦩꦁꦔꦤ꧀ꦢꦒꦶꦁꦔꦺꦏꦺꦮꦤ꧀ꦱꦶꦁꦩꦠꦶꦭꦸꦩꦿꦃ꧈​ꦲꦸꦠꦮꦱꦶꦁꦩꦠꦶꦤꦺꦩꦼꦂꦒꦢꦶꦩꦁꦱꦏꦺꦮꦤ꧀ꦒꦭꦏ꧀꧈​ꦏꦸꦢꦸꦔꦸꦩ꧀ꦧꦃꦱꦤ꧀ꦝꦁꦔꦤ꧀ꦤꦺ꧈​ꦧꦚ꧀ꦗꦸꦂꦲꦢꦸꦱ꧀꧉​ꦮꦺꦴꦁꦩꦲꦸꦤꦗꦶꦱ꧀ꦔꦤ꧀ꦠꦶꦱꦸꦫꦸꦥ꧀꧉​

^17:16 ꦱꦶꦁꦲꦺꦴꦫꦔ꧀ꦭꦏꦺꦴꦤ꧀ꦤꦶꦩꦼꦁꦏꦺꦴꦤꦺꦴꦧꦏꦭ꧀ꦏꦲꦸꦏꦸꦩ꧀꧉"​