Alkitab/Kaimaman/18

18:1 ꦒꦸꦱ꧀ꦠꦶꦄꦭ꧀ꦭꦃꦝꦮꦸꦃꦩꦫꦁ​꧊ꦩꦸꦱ꧈​
18:2 ꦱꦸꦥꦪꦤꦼꦫꦸꦱ꧀ꦱꦏꦺꦥꦽꦤꦠꦤ꧀ꦩꦲꦸꦩꦫꦁꦧꦁꦱ​꧊ꦆꦱꦿꦲꦺꦭ꧀ꦩꦼꦁꦏꦺꦤꦺ:"ꦲꦏꦸꦲꦶꦏꦶꦥꦔꦺꦫꦤ꧀꧈​ꦲꦭ꧀ꦭꦃꦩꦸ꧉​
18:3 ꦏꦺꦴꦮꦺꦲꦗꦥꦝꦠꦶꦫꦸꦠꦶꦫꦸꦥꦽꦠꦶꦁꦏꦃꦲꦺꦮꦺꦴꦁ​꧊ꦩꦺꦱꦶꦂ꧈​ꦥꦁꦒꦺꦴꦤ꧀ꦤꦤ꧀ꦩꦸꦩꦺꦴꦤ꧀ꦝꦺꦴꦏ꧀ꦧꦶꦪꦺꦤ꧀꧈​ꦲꦸꦠꦮꦠꦶꦫꦸꦠꦶꦫꦸꦧꦁꦱ​꧊ꦏꦺꦤꦲꦤ꧀꧈​ꦱꦶꦁꦤꦼꦒꦫꦤꦺꦱꦲꦶꦏꦶꦏꦺꦴꦏ꧀ꦲꦼꦁꦒꦺꦴꦤ꧀ꦤꦶꦩꦼꦂꦒꦱꦏꦥꦶꦠꦸꦭꦸꦁꦔꦤ꧀ꦏꦸ꧉​
18:4 ꦲꦁꦒꦼꦂꦲꦁꦒꦼꦂꦏꦸ ꦠꦼꦠꦼꦥ꧀ꦥꦤꦭꦤ꧀ꦝꦮꦸꦃꦏꦸꦭꦏꦺꦴꦤ꧀ꦤꦤ꧉​ꦲꦏꦸꦲꦶꦏꦶꦥꦔꦺꦫꦤ꧀ꦲꦭ꧀ꦭꦃꦩꦸ꧉​
18:5 ꦥꦽꦤꦠꦤ꧀ꦥꦽꦤꦠꦤ꧀ꦭꦤ꧀ꦲꦁꦒꦼꦂꦲꦁꦒꦼꦂꦥꦼꦥꦫꦶꦁꦏꦸꦲꦶꦏꦶꦭꦏꦺꦴꦤ꧀ꦤꦤ꧉​ꦱꦶꦁꦱꦥꦤꦶꦤ꧀ꦢꦏ꧀ꦏꦏꦺ꧈​ꦲꦸꦫꦶꦥ꧀ꦥꦺꦧꦏꦭ꧀ꦱ꧀ꦭꦩꦼꦠ꧀꧉​ꦲꦏꦸꦲꦶꦏꦶꦄꦭ꧀ꦭꦃ꧉"​
18:6 ꦒꦸꦱ꧀ꦠꦶꦄꦭ꧀ꦭꦃꦥꦫꦶꦁꦥꦽꦤꦠꦤ꧀ꦩꦼꦁꦏꦺꦤꦺ:"ꦲꦗꦲꦤꦮꦺꦴꦁꦤꦸꦫꦺꦴꦤ꧀ꦤꦶꦱꦤꦏ꧀ꦱꦼꦢꦸꦭꦸꦂꦫꦺꦝꦺꦮꦺ꧉​
18:7 ꦲꦗꦤꦸꦫꦺꦴꦤ꧀ꦤꦶꦧꦶꦪꦸꦁꦩꦸ꧈​ꦱꦸꦥꦪꦲꦺꦴꦫꦔꦿꦺꦩꦺꦃꦲꦏꦺꦩꦫꦁꦧꦥꦭꦤ꧀ꦧꦶꦪꦸꦁꦩꦸ꧉​
18:8 ꦲꦗꦤꦸꦫꦺꦴꦤ꧀ꦤꦶꦱꦼꦭꦶꦂꦫꦺꦧꦥꦏ꧀ꦩꦸ꧈​ꦱꦸꦥꦪꦏꦺꦴꦮꦺꦲꦺꦴꦫꦔꦿꦺꦩꦺꦃꦲꦏꦺꦧꦥꦏ꧀ꦩꦸ꧉​
18:9 ꦲꦗꦤꦸꦫꦺꦴꦤ꧀ꦤꦶꦱꦼꦢꦸꦭꦸꦂꦩꦸꦲꦸꦠꦮꦱꦼꦢꦸꦭꦸꦂꦩꦸꦏꦸꦮꦭꦺꦴꦤ꧀꧈​ꦲꦶꦪꦱꦶꦁꦢꦶꦒꦼꦝꦺꦏ꧀ꦏꦏꦺꦧꦉꦁꦏꦫꦺꦴꦏꦺꦴꦮꦺ꧈​ꦲꦸꦠꦮꦱꦶꦁꦲꦺꦴꦫ꧉​
18:10 ꦲꦗꦤꦸꦫꦺꦴꦤ꧀ꦤꦶꦥꦸꦠꦸꦩꦸ꧈​ꦏꦸꦮꦶꦧꦏꦭ꧀ꦒꦮꦺꦮꦶꦫꦁꦩꦸꦝꦺꦮꦺ꧉​
18:11 ꦲꦗꦤꦸꦫꦺꦴꦤ꧀ꦤꦶꦱꦼꦢꦸꦭꦸꦂꦩꦸꦤꦸꦁꦒꦭ꧀ꦧꦥꦧꦶꦪꦸꦁ꧈​ꦩꦼꦂꦒꦏꦸꦮꦶꦱꦼꦢꦸꦭꦸꦂꦩꦸꦝꦺꦮꦺ꧉​
18:12 (18:12-13)ꦲꦗꦤꦸꦫꦺꦴꦤ꧀ꦤꦶꦩ꧀ꦧꦺꦴꦏ꧀ꦕꦶꦭꦶꦏ꧀ꦩꦸ꧈​ꦲꦶꦪꦱꦼꦢꦸꦭꦸꦂꦫꦺꦧꦥꦏ꧀ꦩꦸ꧈​ꦲꦸꦠꦮꦱꦼꦢꦸꦭꦸꦂꦫꦺꦲꦶꦧꦸꦩꦸ꧉​
18:13 (18:12)
18:14 ꦲꦗꦤꦸꦫꦺꦴꦤ꧀ꦤꦶꦧꦺꦴꦗꦺꦴꦤꦺꦥꦩꦤ꧀ꦩꦸ꧈​ꦩꦼꦂꦒꦏꦸꦮꦶꦩ꧀ꦧꦺꦴꦏ꧀ꦕꦶꦭꦶꦏ꧀ꦩꦸ꧉​
18:15 ꦲꦗꦤꦸꦫꦺꦴꦤ꧀ꦤꦶꦩꦤ꧀ꦠꦸꦩꦸ
18:16 ꦲꦸꦠꦮꦧꦺꦴꦗꦺꦴꦤꦺꦏꦏꦁꦩꦸ꧉​
18:17 ꦲꦗꦤꦸꦫꦺꦴꦤ꧀ꦤꦶꦮꦺꦴꦁꦮꦢꦺꦴꦤ꧀ꦲꦸꦠꦮꦥꦸꦠꦸꦤꦺꦮꦢꦺꦴꦤ꧀ꦮꦺꦴꦁꦱꦶꦁꦮꦶꦱ꧀ꦠꦲꦸꦏꦺꦴꦏ꧀ꦠꦸꦫꦺꦴꦤ꧀ꦤꦶ꧉​ꦱꦼꦧꦧ꧀ꦧꦶꦱꦲꦸꦒꦮꦺꦴꦁꦏꦸꦮꦶꦲꦶꦱꦶꦃꦱꦼꦢꦸꦭꦸꦂꦩꦸ꧈​ꦭꦤ꧀ꦏꦸꦮꦶꦤꦼꦫꦏ꧀ꦲꦢꦠ꧀꧉​
18:18 ꦲꦗꦲꦩꦺꦏ꧀ꦧꦺꦴꦗꦺꦴꦲꦶꦥꦺꦩꦸ꧌ꦱꦼꦢꦸꦭꦸꦂꦫꦺꦧꦺꦴꦗꦺꦴꦩꦸ꧍꧈​ꦱꦗꦿꦺꦴꦤꦺꦧꦺꦴꦗꦺꦴꦩꦸꦲꦶꦱꦶꦃꦲꦸꦫꦶꦥ꧀꧉​
18:19 ꦲꦗꦤꦸꦫꦺꦴꦤ꧀ꦤꦶꦮꦺꦴꦁꦮꦢꦺꦴꦤ꧀ꦱꦶꦁꦭꦒꦶꦔ꧀ꦒꦫꦥ꧀ꦱꦫꦶ꧉​
18:20 ꦲꦗꦤꦸꦫꦺꦴꦤ꧀ꦤꦶꦧꦺꦴꦗꦺꦴꦤꦺꦮꦺꦴꦁꦭꦶꦪ꧉​ꦥꦼꦁꦒꦮꦺꦱꦶꦁꦩꦼꦁꦏꦺꦴꦤꦺꦴꦩꦲꦸꦤꦗꦶꦱ꧀꧉​
18:21 ꦲꦗꦔꦿꦸꦗꦸꦏ꧀ꦏꦶꦲꦤꦏ꧀ꦩꦸꦢꦶꦲꦼꦁꦒꦺꦴꦱꦗꦺꦤ꧀ꦩꦫꦁ​꧊ꦩꦺꦴꦭꦺꦴꦏ꧀꧈​ꦩꦼꦂꦒꦥꦼꦁꦒꦮꦺꦩꦼꦁꦏꦺꦴꦤꦺꦴꦩꦲꦸꦚꦼꦮꦶꦪꦃꦩꦫꦁꦲꦱ꧀ꦩꦤꦺꦄꦭ꧀ꦭꦃ꧉​
18:22 ꦮꦺꦴꦁꦭꦤꦁꦲꦺꦴꦫꦏꦼꦤꦤꦸꦫꦺꦴꦤ꧀ꦤꦶꦥꦝꦮꦺꦴꦁꦭꦤꦁ꧉​ꦄꦭ꧀ꦭꦃꦱꦼꦔꦶꦠ꧀ꦩꦫꦁꦥꦼꦁꦒꦮꦺꦱꦶꦁꦩꦼꦁꦏꦺꦴꦤꦺꦴꦏꦸꦮꦶ꧉​
18:23 ꦲꦶꦪꦮꦺꦴꦁꦭꦤꦁ꧈​ꦲꦸꦠꦮꦮꦺꦴꦁꦮꦢꦺꦴꦤ꧀꧈​ꦲꦺꦴꦫꦏꦼꦤꦤꦸꦫꦺꦴꦤ꧀ꦤꦶꦏꦺꦮꦤ꧀꧉​ꦱꦥꦱꦶꦁꦔ꧀ꦭꦏꦺꦴꦤ꧀ꦤꦶꦩꦼꦁꦏꦺꦴꦤꦺꦴꦢꦢꦶꦤꦗꦶꦱ꧀꧉​
18:24 ꦏꦺꦴꦮꦺꦲꦗꦢꦢꦶꦤꦗꦶꦱ꧀ꦩꦼꦂꦒꦠꦸꦩꦶꦤ꧀ꦢꦏ꧀ꦱꦶꦁꦩꦼꦁꦏꦺꦴꦤꦺꦴꦩꦲꦸ꧈​ꦱꦼꦧꦧ꧀ꦲꦶꦪꦩꦼꦂꦒꦱꦏꦠꦸꦩꦶꦤ꧀ꦢꦏ꧀ꦱꦶꦁꦩꦼꦁꦏꦺꦴꦤꦺꦴꦏꦸꦮꦶꦮꦺꦴꦁꦏꦥꦶꦂꦥꦝꦢꦢꦶꦤꦗꦶꦱ꧀꧈​ꦪꦏꦸꦮꦶꦱꦶꦁꦥꦝꦩꦁꦒꦺꦴꦤ꧀ꦲꦶꦁꦠꦤꦃ​꧊ꦏꦺꦤꦲꦤ꧀ꦱꦢꦸꦫꦸꦁꦔꦺꦏꦺꦴꦮꦺꦩ꧀ꦭꦼꦧꦸꦩꦿꦺꦴꦤꦺꦴ꧉​ꦩꦸꦭꦤꦺꦥꦝꦢꦶꦠꦸꦤ꧀ꦝꦸꦁꦔꦶꦢꦺꦤꦶꦁꦄꦭ꧀ꦭꦃ꧈​ꦱꦸꦥꦪꦏꦺꦴꦮꦺꦧꦶꦱꦩꦁꦒꦺꦴꦤ꧀ꦲꦶꦁꦏꦺꦴꦤꦺꦴ꧉​
18:25 (18:25-27)ꦩꦼꦂꦒꦱꦏꦏꦭꦏꦸꦮꦤ꧀ꦤꦺꦱꦶꦁꦢꦸꦫꦏꦩꦲꦸꦠꦼꦩꦃꦠꦤꦃꦱꦶꦁꦢꦶꦲꦼꦁꦒꦺꦴꦤ꧀ꦤꦶꦢꦢꦶꦤꦗꦶꦱ꧀꧉​ꦩꦸꦭꦤꦺꦥꦝꦢꦶꦲꦸꦏꦸꦩ꧀ꦢꦺꦤꦶꦁꦄꦭ꧀ꦭꦃꦭꦤ꧀ꦲꦺꦴꦫꦢꦶꦥꦉꦁꦔꦏꦺꦩꦁꦒꦺꦴꦤ꧀ꦲꦤꦲꦶꦁꦏꦺꦴꦤꦺꦴ꧉​ꦤꦁꦔꦶꦁꦏꦺꦴꦮꦺꦲꦗꦥꦶꦱꦤ꧀ꦥꦶꦱꦤ꧀ꦔ꧀ꦭꦏꦺꦴꦤ꧀ꦤꦶꦱꦶꦁꦩꦼꦁꦏꦺꦴꦤꦺꦴ꧉​ꦏꦺꦴꦮꦺꦏꦧꦺꦃꦭꦤ꧀ꦮꦺꦴꦁꦩꦚ꧀ꦕꦱꦶꦁꦲꦤꦲꦶꦁꦲꦤ꧀ꦠꦫꦩꦸꦏꦸꦢꦸꦥꦝꦤꦼꦠꦼꦥ꧀ꦥꦶꦲꦁꦒꦼꦂꦲꦁꦒꦼꦂꦫꦺꦄꦭ꧀ꦭꦃꦭꦤ꧀ꦥꦼꦥꦏꦺꦴꦤꦺ꧈​
18:26 (18:25)
18:27 (18:25)
18:28 ꦱꦸꦥꦪꦏꦺꦴꦮꦺꦲꦺꦴꦫꦏꦼꦠꦶꦧꦤ꧀ꦥꦲꦸꦏꦸꦩ꧀ꦩꦤ꧀ꦤꦺꦄꦭ꧀ꦭꦃꦭꦤ꧀ꦢꦶꦠꦸꦤ꧀ꦝꦸꦁꦱꦏꦠꦤꦃꦏꦺꦴꦤꦺꦴ꧈​ꦏꦪꦱꦶꦁꦢꦶꦲꦭꦩ꧀ꦩꦶꦢꦺꦤꦶꦁꦧꦁꦱꦧꦁꦱꦏꦥꦶꦂꦱꦶꦁꦩꦁꦒꦺꦴꦤ꧀ꦲꦶꦁꦏꦺꦴꦤꦺꦴꦱꦢꦸꦫꦸꦁꦔꦺꦏꦺꦴꦮꦺ꧉​
18:29 ꦥꦝꦔꦼꦂꦠꦶꦪ꧈​ꦪꦺꦤ꧀ꦱꦥꦱꦶꦁꦔ꧀ꦭꦏꦺꦴꦤ꧀ꦤꦶꦥꦼꦁꦒꦮꦺꦢꦸꦫꦏ꧈​ꦧꦏꦭ꧀ꦢꦶꦱꦺꦧꦿꦠ꧀ꦠꦏꦺꦱꦏꦲꦸꦩꦠ꧀ꦠꦺꦄꦭ꧀ꦭꦃ꧉"​
18:30 ꦩꦸꦭꦤꦺꦄꦭ꧀ꦭꦃꦔꦤ꧀ꦢꦶꦏ꧈​"ꦥꦝꦤꦼꦠꦼꦥ꧀ꦤꦥꦼꦥꦏꦺꦴꦤ꧀ꦥꦼꦥꦏꦺꦴꦤ꧀ꦏꦸꦭꦤ꧀ꦲꦗꦤꦶꦫꦸꦥꦼꦁꦒꦮꦺꦤꦺꦧꦁꦱꦧꦁꦱꦏꦥꦶꦂꦱꦶꦁꦧꦶꦪꦺꦤ꧀ꦩꦁꦒꦺꦴꦤ꧀ꦲꦶꦁꦏꦺꦴꦤꦺꦴꦱꦢꦸꦫꦸꦁꦔꦺꦏꦺꦴꦮꦺ꧉​ꦲꦗꦤꦗꦶꦱ꧀ꦱꦏꦺꦲꦮꦏ꧀ꦩꦸꦝꦺꦮꦺꦱꦿꦤꦔ꧀ꦭꦏꦺꦴꦤ꧀ꦤꦶꦥꦼꦁꦒꦮꦺꦥꦼꦁꦒꦮꦺꦩꦲꦸ꧉​ꦲꦏꦸꦲꦶꦏꦶꦥꦔꦺꦫꦤ꧀꧈​ꦲꦭ꧀ꦭꦃꦩꦸ꧉"​