Alkitab/Kaimaman/21

^21:1 ꦒꦸꦱ꧀ꦠꦶꦄꦭ꧀ꦭꦃꦤ꧀ꦝꦮꦸꦃꦲꦶ​꧊ꦩꦸꦱꦩꦫꦶꦁꦔꦏꦺꦥꦽꦤꦠꦤ꧀ꦩꦫꦁꦥꦫꦲꦶꦩꦩ꧀ꦲꦤꦏ꧀ꦠꦸꦫꦸꦤꦺꦲꦫꦸꦤ꧀ꦩꦼꦁꦏꦺꦤꦺ:"ꦲꦶꦩꦩ꧀ꦲꦺꦴꦫꦏꦼꦤꦤꦗꦶꦱ꧀ꦱꦏꦺꦲꦮꦏ꧀ꦏꦺꦩꦼꦂꦒꦭꦪꦢ꧀꧈​ꦩꦺꦭꦸꦲꦸꦥꦕꦫꦥꦼꦔꦸꦧꦸꦂꦫꦤ꧀ꦤꦺꦱꦤꦏ꧀ꦱꦼꦢꦸꦭꦸꦂꦫꦺ꧉​

^21:2 ꦏꦼꦗꦧꦪꦺꦤ꧀ꦱꦶꦁꦩꦠꦶꦩꦲꦸꦲꦶꦧꦸꦤꦺ꧈​ꦧꦥꦏ꧀ꦤꦺ꧈​ꦲꦤꦏ꧀ꦏꦺꦭꦤꦁꦲꦸꦠꦮꦮꦢꦺꦴꦤ꧀꧈​ꦱꦼꦢꦸꦭꦸꦂꦫꦺꦭꦤꦁ꧈​

^21:3 ꦲꦸꦠꦮꦱꦼꦢꦸꦭꦸꦂꦫꦺꦮꦢꦺꦴꦤ꧀ꦱꦶꦁꦢꦸꦫꦸꦁꦏꦮꦶꦤ꧀꧈​ꦭꦤ꧀ꦩꦁꦒꦺꦴꦤ꧀ꦤꦸꦁꦒꦭ꧀ꦱꦲꦺꦴꦩꦃ꧉​

^21:4 ꦲꦶꦩꦩ꧀ꦲꦺꦴꦫꦏꦼꦤꦤꦗꦶꦱ꧀ꦱꦏꦺꦲꦮꦏ꧀ꦏꦺꦩꦼꦂꦒꦭꦪꦢ꧀ꦮꦺꦴꦁꦩꦠꦶ꧈​ꦱꦶꦁꦲꦤꦲꦭꦸꦂꦫꦤ꧀ꦤꦺꦱꦼꦢꦸꦭꦸꦂꦏꦢꦁꦏꦠꦸꦠ꧀꧉​

^21:5 ꦲꦶꦩꦩ꧀ꦲꦺꦴꦫꦏꦼꦤꦚꦸꦏꦸꦂꦱꦶꦫꦃꦲꦺ꧈​ꦥꦺꦫꦁꦔꦤ꧀ꦱꦶꦁꦲꦼꦤ꧀ꦢꦶꦮꦲꦺ;ꦲꦺꦴꦫꦏꦼꦤꦔꦼꦛꦺꦴꦏ꧀ꦗꦺꦁꦒꦺꦴꦠ꧀ꦠꦺ꧈​ꦲꦸꦠꦮꦤꦠꦺꦴꦤ꧀ꦤꦶꦲꦮꦏ꧀ꦏꦺꦔꦁꦒꦺꦴꦥꦶꦫꦤ꧀ꦠꦶꦭꦤ꧀ꦝꦼꦥ꧀꧈​ꦏꦁꦒꦺꦴꦤꦺꦭꦏ꧀ꦏꦏꦺꦲꦼꦁꦒꦺꦴꦤꦺꦱꦸꦱꦃꦩꦼꦂꦒꦏꦼꦥꦠꦺꦤ꧀꧉​

^21:6 ꦲꦶꦩꦩ꧀ꦩꦲꦸꦢꦏ꧀ꦱꦼꦁꦏꦼꦂꦢꦢꦶꦏꦒꦸꦁꦔꦤ꧀ꦏꦸꦝꦺꦮꦺ꧈​ꦩꦸꦭꦤꦺꦲꦺꦴꦫꦏꦼꦤꦒꦮꦺꦏꦸꦕꦼꦩ꧀ꦩꦺꦲꦱ꧀ꦩꦏꦸ꧉​ꦲꦶꦩꦩ꧀ꦏꦸꦮꦶꦮꦺꦴꦁꦱꦶꦁꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦝꦲꦂꦫꦤ꧀ꦏꦺꦴꦚ꧀ꦗꦸꦏ꧀ꦩꦫꦁꦲꦏꦸ꧈​ꦩꦸꦭꦤꦺꦏꦸꦢꦸꦱꦸꦕꦶ꧉​

^21:7 ꦲꦶꦩꦩ꧀ꦲꦺꦴꦫꦏꦼꦤꦏꦮꦶꦤ꧀ꦏꦫꦺꦴꦮꦤꦶꦠꦠꦶꦭꦱ꧀ꦠꦸꦤꦱꦸꦱꦶꦭꦲꦸꦠꦮꦮꦺꦴꦁꦮꦢꦺꦴꦤ꧀ꦱꦶꦁꦢꦸꦢꦸꦥꦿꦮꦤ꧀꧈​ꦲꦸꦠꦮꦮꦺꦴꦁꦱꦶꦁꦥꦼꦒꦠ꧀ꦠꦤ꧀꧈​ꦩꦼꦂꦒꦲꦶꦩꦩ꧀ꦏꦸꦮꦶꦢꦸꦮꦺꦏ꧀ꦏꦸꦝꦺꦮꦺ꧉​

^21:8 ꦲꦶꦩꦩ꧀ꦏꦸꦢꦸꦔꦏꦺꦴꦤ꧀ꦤꦶꦭꦤ꧀ꦫꦸꦩꦁꦱꦢꦢꦶꦮꦺꦴꦁꦱꦶꦁꦢꦏ꧀ꦱꦼꦁꦏꦼꦂꦏꦁꦒꦺꦴꦲꦏꦸꦝꦺꦮꦺ꧈​ꦩꦼꦂꦒꦝꦺꦮꦺꦏ꧀ꦏꦺꦏꦸꦮꦶꦮꦺꦴꦁꦱꦶꦁꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦝꦲꦂꦫꦤ꧀ꦏꦺꦴꦚ꧀ꦗꦸꦏ꧀ꦩꦫꦁꦲꦏꦸ꧉​ꦲꦏꦸꦲꦶꦏꦶꦄꦭ꧀ꦭꦃꦏꦁꦱꦸꦕꦶꦭꦤ꧀ꦏꦁꦤꦸꦕꦺꦏ꧀ꦏꦏꦺꦲꦸꦩꦠ꧀ꦏꦸ꧉​

^21:9 ꦪꦺꦤ꧀ꦲꦤꦏ꧀ꦏꦺꦮꦢꦺꦴꦤ꧀ꦲꦶꦩꦩ꧀ꦢꦢꦶꦮꦤꦶꦠꦠꦸꦤꦱꦸꦱꦶꦭ꧈​ꦏꦸꦮꦶꦔꦶꦤꦧꦥꦏ꧀ꦤꦺ꧈​ꦩꦸꦭꦤꦺꦏꦸꦢꦸꦢꦶꦲꦺꦴꦧꦺꦴꦁꦔꦤ꧀ꦠꦶꦩꦠꦶ꧉​

^21:10 ꦢꦺꦤꦺꦲꦶꦩꦩ꧀ꦲꦒꦸꦁꦢꦶꦱꦼꦁꦏꦼꦂꦏꦒꦼꦩ꧀ꦄꦭ꧀ꦭꦃꦢꦢꦶꦲꦶꦩꦩ꧀꧈​ꦔꦁꦒꦺꦴꦢꦶꦗꦼꦧꦢ꧀ꦢꦶꦊꦔꦱꦸꦕꦶꦲꦶꦁꦱꦶꦫꦃꦲꦺꦭꦤ꧀ꦱꦿꦤꦢꦶꦲꦼꦁꦒꦺꦴꦤ꧀ꦤꦶꦱꦤ꧀ꦝꦁꦔꦤ꧀ꦲꦶꦩꦩ꧀꧉​ꦩꦸꦭꦤꦺꦫꦩ꧀ꦧꦸꦠ꧀ꦠꦺꦲꦺꦴꦫꦏꦼꦤꦢꦶꦲꦾꦺꦴꦫꦺꦲꦸꦠꦮꦲꦺꦴꦫꦏꦼꦤꦚꦸꦮꦺꦏ꧀ꦱꦤ꧀ꦝꦁꦔꦤ꧀ꦤꦺꦏꦁꦒꦺꦴꦤꦺꦭꦏ꧀ꦏꦏꦺꦱꦸꦱꦃꦲꦶꦁꦲꦠꦶꦤꦺꦩꦼꦂꦒꦏꦼꦥꦠꦺꦤ꧀꧉​

^21:11 (21:11-12)ꦲꦶꦩꦩ꧀ꦲꦒꦸꦁꦏꦸꦮꦶꦢꦶꦱꦲꦺꦴꦱ꧀ꦱꦏꦺꦩꦫꦁꦲꦏꦸꦢꦢꦶꦮꦺꦴꦁꦱꦶꦁꦢꦏ꧀ꦱꦼꦁꦏꦼꦂ꧈​ꦩꦸꦭꦤꦺꦲꦺꦴꦫꦏꦼꦤꦤꦗꦶꦱ꧀ꦱꦏꦺꦲꦮꦏ꧀ꦏꦺ;ꦲꦺꦴꦫꦏꦼꦤꦤꦗꦶꦱ꧀ꦱꦏꦺꦏꦺꦩꦃꦱꦸꦕꦶꦩꦼꦂꦒꦩꦼꦠꦸꦱꦏꦏꦺꦴꦤꦺꦴ꧈​ꦭꦤ꧀ꦩ꧀ꦭꦼꦧꦸꦲꦶꦁꦲꦺꦴꦩꦃꦱꦶꦁꦲꦤꦭꦪꦺꦴꦤꦺ꧈​ꦱꦼꦤꦗꦤ꧀ꦏꦸꦮꦶꦭꦪꦺꦴꦤꦺꦧꦥꦏ꧀ꦲꦸꦠꦮꦲꦶꦧꦸꦤꦺꦝꦺꦮꦺ꧉​

^21:12 (21:11)

^21:13 (21:13-14)ꦲꦶꦩꦩ꧀ꦲꦒꦸꦁꦏꦸꦢꦸꦏꦮꦶꦤ꧀ꦏꦫꦺꦴꦥꦿꦮꦤ꧀ꦱꦏꦠꦊꦂꦫꦺꦝꦺꦮꦺ꧈​ꦲꦺꦴꦫꦏꦼꦤꦏꦮꦶꦤ꧀ꦏꦫꦺꦴꦫꦤ꧀ꦝꦲꦸꦠꦮꦮꦺꦴꦁꦮꦢꦺꦴꦤ꧀ꦱꦶꦁꦢꦶꦥꦼꦒꦠ꧀꧈​ꦲꦸꦠꦮꦮꦤꦶꦠꦠꦶꦭꦱ꧀ꦠꦸꦤꦱꦸꦱꦶꦭ꧉​

^21:14 (21:13)

^21:15 ꦪꦺꦤ꧀ꦲꦺꦴꦫꦩꦼꦁꦏꦺꦴꦤꦺꦴꦲꦤꦏ꧀ꦲꦤꦏ꧀ꦏꦺꦱꦶꦁꦩꦼꦱ꧀ꦛꦶꦤꦺꦱꦸꦕꦶꦧꦏꦭ꧀ꦢꦢꦶꦤꦗꦶꦱ꧀꧉​ꦲꦏꦸꦲꦶꦏꦶꦄꦭ꧀ꦭꦃ꧈​ꦱꦶꦁꦮꦶꦱ꧀ꦚꦼꦁꦏꦼꦂꦮꦺꦴꦁꦩꦲꦸꦢꦢꦶꦲꦶꦩꦩ꧀ꦲꦒꦸꦁ꧉"​

^21:16 ꦝꦮꦸꦃꦲꦺꦄꦭ꧀ꦭꦃꦩꦫꦁ​꧊ꦩꦸꦱ

^21:17 ꦏꦁꦒꦺꦴꦲꦫꦸꦤ꧀꧈​"ꦪꦺꦤ꧀ꦲꦤꦲꦤꦏ꧀ꦩꦸꦱꦶꦁꦲꦮꦏ꧀ꦏꦺꦕꦕꦢ꧀ꦲꦺꦴꦫꦏꦼꦤꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦝꦲꦂꦫꦤ꧀ꦏꦺꦴꦚ꧀ꦗꦸꦏ꧀ꦩꦫꦁꦲꦏꦸ꧉​ꦲꦶꦏꦶꦥꦽꦤꦠꦤ꧀ꦏꦁꦒꦺꦴꦱꦼꦭꦮꦱ꧀ꦭꦮꦱ꧀ꦱꦺ꧉​

^21:18 ꦮꦺꦴꦁꦱꦶꦁꦲꦮꦏ꧀ꦏꦺꦕꦕꦢ꧀ꦲꦺꦴꦫꦏꦼꦤꦚꦲꦺꦴꦱ꧀ꦱꦏꦺꦏꦸꦂꦧꦤ꧀꧈​ꦏꦪꦠ:ꦮꦺꦴꦁꦮꦸꦠ꧈​ꦮꦺꦴꦁꦭꦸꦩ꧀ꦥꦸꦃ꧈​ꦮꦺꦴꦁꦱꦶꦁꦕꦕꦢ꧀ꦲꦶꦫꦸꦁꦔꦺ;

^21:19 ꦱꦼꦩꦺꦴꦤꦺꦴꦲꦸꦒꦮꦺꦴꦁꦱꦶꦁꦠꦔꦤ꧀ꦤꦺꦲꦥꦸꦱ꧀꧈​ꦲꦸꦠꦮꦮꦺꦴꦁꦱꦶꦁꦱꦶꦏꦶꦭ꧀ꦭꦺꦥꦶꦚ꧀ꦕꦁ;

^21:20 ꦮꦺꦴꦁꦱꦶꦁꦧꦸꦁꦏꦸꦏ꧀ꦲꦸꦠꦮꦕꦺꦧꦺꦴꦭ꧀;ꦮꦺꦴꦁꦱꦶꦁꦭꦫꦩꦿꦶꦥꦠ꧀ꦠꦺ꧈​ꦲꦸꦠꦮꦢꦸꦮꦺꦭꦫꦏꦸꦭꦶꦠ꧀꧈​ꦭꦤ꧀ꦮꦺꦴꦁꦱꦶꦁꦢꦶꦏꦼꦧꦶꦂꦫꦶ꧉​

^21:21 ꦲꦤꦏ꧀ꦠꦸꦫꦸꦤꦺꦲꦶꦩꦩ꧀ꦲꦫꦸꦤ꧀ꦱꦶꦁꦲꦮꦏ꧀ꦏꦺꦕꦕꦢ꧀ꦲꦺꦴꦫꦏꦼꦤꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦏꦺꦴꦚ꧀ꦗꦸꦏ꧀ꦩꦫꦁꦲꦏꦸ꧉​

^21:22 ꦤꦁꦔꦶꦁꦲꦺꦴꦭꦺꦃꦩꦁꦔꦤ꧀ꦥꦔꦤ꧀ꦤꦤ꧀ꦱꦶꦁꦢꦶꦱꦲꦺꦴꦱ꧀ꦱꦏꦺꦩꦫꦁꦲꦏꦸ꧈​ꦢꦢꦶꦪꦏꦸꦂꦧꦤ꧀ꦝꦲꦂꦫꦤ꧀ꦱꦶꦁꦱꦸꦕꦶ꧈​ꦲꦸꦠꦮꦏꦸꦂꦧꦤ꧀ꦝꦲꦂꦫꦤ꧀ꦱꦶꦁꦩ꧀ꦭꦶꦒꦶꦏꦁꦒꦺꦴꦲꦏꦸꦝꦺꦮꦺ꧉​

^21:23 ꦮꦺꦴꦁꦱꦶꦁꦕꦕꦢ꧀ꦩꦲꦸꦲꦺꦴꦫꦏꦼꦤꦕꦼꦝꦏ꧀ꦕꦼꦝꦏ꧀ꦏꦫꦺꦴꦒꦼꦧꦼꦂꦱꦸꦕꦶꦲꦸꦠꦮꦕꦼꦝꦏ꧀ꦕꦼꦝꦏ꧀ꦏꦫꦺꦴꦩꦼꦱ꧀ꦧꦺꦃ꧉​ꦮꦺꦴꦁꦩꦲꦸꦲꦺꦴꦫꦏꦼꦤꦒꦮꦺꦤꦗꦶꦱ꧀ꦱꦺꦥꦶꦫꦤ꧀ꦠꦶꦥꦶꦫꦤ꧀ꦠꦶꦱꦶꦁꦢꦶꦱꦼꦁꦏꦼꦂꦏꦁꦒꦺꦴꦲꦏꦸ꧈​ꦩꦼꦂꦒꦲꦏꦸꦲꦶꦏꦶꦄꦭ꧀ꦭꦃ꧈​ꦭꦤ꧀ꦲꦶꦪꦲꦏꦸꦱꦶꦁꦚꦼꦁꦏꦼꦂꦥꦶꦫꦤ꧀ꦠꦶꦥꦶꦫꦤ꧀ꦠꦶꦩꦲꦸ꧉"​

^21:24 ꦏꦸꦮꦶꦏꦧꦺꦃꦢꦶꦝꦮꦸꦃꦲꦏꦺꦢꦺꦤꦶꦁ​꧊ꦩꦸꦱꦩꦫꦁꦲꦫꦸꦤ꧀꧈​ꦩꦫꦁꦲꦤꦏ꧀ꦲꦤꦏ꧀ꦏꦺꦭꦤ꧀ꦩꦫꦁꦲꦸꦩꦠ꧀​꧊ꦆꦱꦿꦲꦺꦭ꧀ꦏꦧꦺꦃ꧉​