Alkitab/Pangentasan/15

15:1 ꧊ꦩꦸꦱꦭꦤ꧀ꦥꦫꦮꦺꦴꦁ꧊ꦆꦱꦿꦲꦺꦭ꧀ꦧꦚ꧀ꦗꦸꦂꦔ꧀ꦭꦒꦺꦴꦏ꧀ꦏꦏꦺꦏꦶꦢꦸꦁꦥꦩꦸꦗꦶꦏꦠꦸꦂꦩꦫꦁꦄꦭ꧀ꦭꦃ꧈​ꦩꦼꦁꦏꦺꦤꦺ:"ꦢꦏ꧀ꦔꦶꦢꦸꦁꦏꦺꦴꦚ꧀ꦗꦸꦏ꧀ꦩꦫꦁꦥꦔꦺꦫꦤ꧀꧈​ꦩꦼꦂꦒꦲꦼꦁꦒꦺꦴꦤꦺꦥꦼꦫꦁꦮꦶꦱ꧀ꦩꦼꦤꦁ꧉​ꦗꦫꦤ꧀ꦭꦤ꧀ꦱꦶꦁꦤꦸꦁꦒꦁꦏꦧꦺꦃꦥꦝꦏꦏ꧀ꦭꦼꦊꦧ꧀ꦧꦏꦺꦲꦶꦁꦱꦼꦒꦫ꧉​
15:2 ꦥꦔꦺꦫꦤ꧀ꦔꦽꦏ꧀ꦱꦩꦫꦁꦲꦏꦸ꧈​ꦏ꧀ꦭꦮꦤ꧀ꦲꦱ꧀ꦠꦤꦺꦏꦁꦫꦺꦴꦱ꧈​ꦠꦼꦩꦃꦮꦶꦱ꧀ꦚ꧀ꦭꦩꦼꦠ꧀ꦠꦏꦺꦧꦁꦱꦏꦸ꧉​ꦥꦔꦺꦫꦤ꧀ꦲꦶꦏꦸ꧊ꦄꦭ꧀ꦭꦃꦏꦸ꧈​ꦥꦼꦥꦸꦤ꧀ꦝꦺꦤ꧀ꦤꦺꦊꦭꦸꦲꦸꦂꦏꦸ꧈​ꦩꦸꦭꦤꦺꦲꦉꦥ꧀ꦢꦏ꧀ꦥꦸꦗꦶꦏꦭꦸꦲꦸꦂꦫꦤ꧀ꦤꦺ꧉​
15:3 ꦥꦔꦺꦫꦤ꧀ꦲꦶꦏꦸꦱꦺꦤꦥꦠꦶꦲꦶꦁꦥꦼꦫꦁ꧈​ꦲꦱ꧀ꦩꦤꦺꦏꦱꦼꦧꦸꦠ꧀ꦄꦭ꧀ꦭꦃ꧉​
15:4 ꦧꦭ꧊ꦩꦺꦱꦶꦂ꧈​ꦗꦫꦤ꧀ꦭꦤ꧀ꦏꦿꦺꦠꦤꦺꦢꦶꦏ꧀ꦭꦼꦊꦧ꧀ꦧꦏꦺꦲꦶꦁꦱꦼꦒꦫ꧉​ꦥꦫꦥꦿꦮꦶꦫꦱꦶꦁꦥꦶꦭꦶꦃꦲꦤ꧀ꦥꦝꦏ꧀ꦭꦼꦊꦧ꧀ꦲꦶꦁꦱꦼꦒꦫ꧊ꦠꦺꦧꦺꦫꦲꦸ꧉​
15:5 ꦥꦝꦏꦏꦸꦧꦸꦂꦲꦶꦁꦱꦼꦒꦫꦱꦶꦁꦗꦼꦫꦺꦴ꧈​ꦥꦝꦏꦼꦊꦩ꧀ꦏꦪꦮꦠꦸꦲꦶꦁꦝꦱꦂꦫꦶꦁꦧꦚꦸ꧉​
15:6 ꦲꦱ꧀ꦠꦠꦼꦔꦼꦤꦺꦄꦭ꧀ꦭꦃꦔꦺꦫꦩ꧀ꦲꦺꦫꦩ꧀ꦩꦏꦺ꧈​ꦩꦸꦁꦱꦸꦃꦢꦶꦉꦩꦸꦏ꧀ꦲꦗꦸꦂꦩꦸꦩꦸꦂ꧉​
15:7 ꦏꦭꦪꦤ꧀ꦏꦭꦸꦲꦸꦂꦫꦤ꧀ꦲꦶꦁꦏꦁꦲꦒꦸꦁ꧈​ꦥꦢꦸꦏꦱꦩ꧀ꦥꦸꦤ꧀ꦤꦸꦩ꧀ꦥꦼꦱ꧀ꦱꦏꦛꦃꦲꦶꦁꦩꦼꦁꦱꦃꦥꦢꦸꦏ꧉​ꦧꦼꦧꦼꦤ꧀ꦢꦸꦥꦢꦸꦏꦩꦸꦭꦢ꧀ꦩꦸꦭꦢ꧀꧈​ꦩ꧀ꦧꦼꦱ꧀ꦩꦶꦩꦼꦁꦱꦃꦥꦽꦱꦱꦠ꧀ꦢꦩꦶ꧉​
15:8 ꦱꦼꦒꦤ꧀ꦠꦼꦤ꧀ꦥꦢꦸꦏꦱꦼꦧꦸꦭ꧀꧈​ꦠꦺꦴꦪꦥꦶꦪꦏ꧀ꦩꦶꦁꦒꦃ꧈​ꦔꦢꦼꦒ꧀ꦗꦼꦗꦼꦒ꧀ꦏꦢꦺꦴꦱ꧀ꦠꦺꦩ꧀ꦧꦺꦴꦏ꧀꧈​ꦔꦤ꧀ꦠꦺꦴꦱ꧀ꦝꦱꦂꦫꦶꦁꦱꦼꦒꦤ꧀ꦠꦼꦤ꧀ꦏꦺꦁꦔꦶꦁꦏꦲꦩ꧀ꦧꦃ꧉​
15:9 ꦥꦔꦸꦕꦥ꧀ꦥꦶꦥꦸꦤ꧀ꦩꦼꦁꦱꦃ꧈​‘ꦥꦝꦢꦏ꧀ꦲꦺꦴꦪꦏ꧀ꦏꦺ꧈​ꦢꦏ꧀ꦫꦪꦃꦲꦺꦧꦫꦁꦢꦂꦧꦺꦏ꧀ꦏꦺ꧈​ꦢꦏ꧀ꦲꦼꦢꦸꦩ꧀ꦲꦼꦢꦸꦩ꧀꧈​ꦢꦏ꧀ꦗꦸꦥꦸꦏ꧀ꦲꦶꦁꦱꦏꦉꦥ꧀ꦏꦸ꧈​ꦢꦏ꧀ꦲꦸꦤꦸꦱ꧀ꦥꦼꦝꦁꦏꦸ꧈​ꦭꦤ꧀ꦲꦥꦱꦶꦁꦢꦶꦢꦸꦮꦺꦤ꧀ꦤꦶꦢꦏ꧀ꦒꦮꦏꦧꦺꦃ꧉’​
15:10 ꦤꦥꦱ꧀ꦱꦏꦶꦁꦥꦢꦸꦏꦱꦼꦥꦶꦱ꧀ꦱꦤ꧀ꦏꦺꦩꦮꦺꦴꦤ꧀꧈​ꦚ꧀ꦗꦭꦂꦫꦶꦠꦶꦪꦁ꧊ꦩꦺꦱꦶꦂꦱꦩꦶꦏ꧀ꦭꦼꦊꦧ꧀꧉​ꦱꦩꦶꦏꦼꦊꦩ꧀ꦥꦽꦱꦱꦠ꧀ꦠꦶꦩꦃ꧈​ꦲꦶꦁꦠꦺꦴꦪꦲꦶꦁꦏꦁꦔ꧀ꦒꦼꦒꦶꦫꦶꦱꦶ꧉​
15:11 ꦢꦺꦮꦥꦸꦤ꧀ꦢꦶꦱꦒꦼꦢ꧀ꦚꦩꦺꦤ꧀ꦤꦶꦥꦢꦸꦏ꧈​ꦄꦭ꧀ꦭꦃꦩꦲꦩꦸꦭꦾꦭꦤ꧀ꦩꦲꦱꦸꦕꦶ?ꦱꦶꦤ꧀ꦠꦼꦤ꧀ꦲꦶꦁꦏꦁꦱꦒꦼꦢ꧀ꦢꦩꦼꦭ꧀ꦏꦲꦺꦭꦺꦴꦏ꧀ꦏꦤ꧀ꦭꦤ꧀ꦩꦏꦂꦪꦏꦤ꧀ꦛꦶꦥꦔ꧀ꦮꦲꦺꦴꦱ꧀?
15:12 ꦩꦼꦤꦮꦶꦥꦢꦸꦏꦔꦁꦏꦠ꧀ꦲꦱ꧀ꦠꦠꦼꦔꦼꦤ꧀ꦥꦢꦸꦏ꧈​ꦭꦗꦼꦁꦱꦩꦶꦏꦲꦸꦤ꧀ꦠꦭ꧀ꦢꦺꦤꦶꦁꦧꦸꦩꦶ꧉​
15:13 ꦥꦢꦸꦏꦱꦼꦠꦾꦝꦠꦼꦁꦗꦚ꧀ꦗꦶꦥꦢꦸꦏ꧈​ꦲꦸꦩꦠ꧀ꦲꦶꦁꦏꦁꦥꦢꦸꦏꦭꦸꦮꦂꦫꦶꦭꦗꦼꦁꦥꦢꦸꦏꦲꦶꦫꦶꦢ꧀꧈​ꦝꦠꦼꦁꦠꦤꦃꦥꦢꦸꦏꦲꦶꦁꦏꦁꦱꦸꦕꦶꦱꦿꦤꦥꦔ꧀ꦮꦲꦺꦴꦱ꧀꧉​
15:14 (15:14-15)ꦥꦫꦧꦁꦱꦱꦩꦶꦩꦶꦉꦁ꧈​ꦭꦗꦼꦁꦱꦩꦶꦒꦼꦩꦼꦠꦼꦂ꧉​ꦠꦶꦪꦁ꧊ꦥ꦳ꦶꦭꦶꦱ꧀ꦠꦶꦤ꧀ꦱꦩꦶꦏꦼꦝꦼꦂ꧈​ꦭꦤ꧀ꦥꦫꦥꦼꦔꦒꦼꦁ꧊ꦌꦢꦺꦴꦩ꧀ꦱꦩꦶꦒꦺꦒꦺꦂ꧉​ꦥꦫꦥꦔ꧀ꦮꦲꦺꦴꦱ꧀ꦲꦶꦁ꧊ꦩꦺꦴꦮꦧ꧀ꦱꦩꦶꦲꦗꦿꦶꦃꦱꦔꦼꦠ꧀꧈​ꦠꦶꦪꦁꦠꦶꦪꦁ꧊ꦏꦺꦤꦲꦤ꧀ꦱꦩꦶꦱꦼꦩ꧀ꦥ꧀ꦭꦃ꧈​ꦒꦼꦩꦼꦠꦼꦂ꧉​
15:15 (15:14)
15:16 ꦱꦩꦶꦏꦼꦠꦩꦤ꧀ꦲꦶꦁꦥꦒꦶꦫꦶꦱ꧀ꦱꦉꦁꦱꦸꦩꦼꦉꦥ꧀ꦥꦔ꧀ꦮꦲꦺꦴꦱ꧀ꦥꦢꦸꦏ꧈​ꦝꦸꦃꦥꦔꦺꦫꦤ꧀꧉​ꦱꦩꦶꦚ꧀ꦗꦼꦔꦼꦂꦱꦏꦶꦁꦲꦗꦿꦶꦃꦲꦶꦥꦸꦤ꧀꧈​ꦔꦤ꧀ꦠꦺꦴꦱ꧀ꦲꦸꦩꦠ꧀ꦥꦢꦸꦏꦩꦼꦁꦏꦼꦂꦏꦺꦱꦃꦱꦏꦶꦁꦔꦿꦶꦏꦸ꧈​ꦲꦶꦁꦒꦶꦃꦲꦸꦩꦠ꧀ꦲꦶꦁꦏꦁꦥꦢꦸꦏꦭꦸꦮꦂꦫꦶꦱꦏꦶꦁꦥꦔꦮꦸꦭ꧀ꦭꦤ꧀꧉​
15:17 ꦧꦁꦱ꧊ꦆꦱꦿꦲꦺꦭ꧀ꦥꦢꦸꦏꦲꦶꦫꦶꦢ꧀ꦱꦲꦥꦢꦸꦏꦠꦤꦼꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦉꦢꦶꦏꦒꦸꦁꦔꦤ꧀ꦥꦢꦸꦏꦥꦶꦪꦩ꧀ꦧꦏ꧀꧈​ꦲꦶꦁꦥꦁꦒꦺꦤ꧀ꦤꦤ꧀ꦲꦶꦁꦏꦁꦥꦢꦸꦏꦢꦊꦩ꧀ꦩꦶ꧈​ꦲꦶꦁꦥꦱꦸꦕꦺꦤ꧀ꦪꦱꦤꦺꦲꦱ꧀ꦠꦥꦢꦸꦏ꧉​
15:18 ꦲꦶꦁꦒꦶꦃꦥꦢꦸꦏ꧈​ꦝꦸꦃꦄꦭ꧀ꦭꦃ꧈​ꦲꦶꦁꦏꦁꦔꦼꦫꦺꦃꦭꦁꦒꦼꦁꦲꦶꦁꦱꦼꦭꦩꦶꦭꦩꦶꦤꦶꦥꦸꦤ꧀꧉"​
15:19 ꦤꦭꦶꦏꦮꦺꦴꦁ꧊ꦆꦱꦿꦲꦺꦭ꧀ꦥꦝꦩ꧀ꦭꦏꦸꦤꦿꦠꦱ꧀ꦱꦼꦒꦫ꧈​ꦥꦝꦔꦩ꧀ꦧꦃꦲꦶꦁꦊꦩꦃꦒꦱꦶꦏ꧀꧉​ꦤꦁꦔꦶꦁꦧꦉꦁꦮꦺꦴꦁ꧊ꦩꦺꦱꦶꦂꦭꦤ꧀ꦏꦿꦺꦠꦏꦿꦺꦠꦤꦺꦢꦭꦃꦧꦭꦤꦺꦗꦫꦤ꧀ꦤꦤ꧀ꦥꦝꦩ꧀ꦭꦼꦧꦸꦲꦶꦁꦱꦼꦒꦫ꧈​ꦒꦸꦱ꧀ꦠꦶꦄꦭ꧀ꦭꦃꦤꦁꦏꦼꦧ꧀ꦧꦏꦺꦧꦚꦸꦤꦺꦩꦼꦤꦺꦃ꧈​ꦠꦼꦩꦃꦥꦝꦏ꧀ꦭꦼꦊꦧ꧀꧉​
15:20 ꧊ꦩꦶꦂꦪꦩ꧀꧈​ꦤꦧꦶꦮꦢꦺꦴꦤ꧀꧈​ꦩ꧀ꦧꦏꦾꦸꦤꦺꦲꦫꦸꦤ꧀꧈​ꦤꦸꦭꦶꦚ꧀ꦗꦸꦥꦸꦏ꧀ꦠꦼꦂꦧꦁꦔꦺ꧈​ꦭꦤ꧀ꦧꦼꦧꦉꦁꦔꦤ꧀ꦏꦫꦺꦴꦥꦫꦮꦺꦴꦁꦮꦢꦺꦴꦤ꧀ꦭꦶꦪꦤꦺꦱꦶꦁꦲꦶꦪꦥꦝꦤꦧꦸꦃꦠꦼꦂꦧꦁꦤꦸꦭꦶꦥꦝꦗꦼꦗꦺꦴꦒꦺꦢ꧀ꦢꦤ꧀꧈​ꦔꦽꦥꦺꦏ꧀ꦏꦏꦺꦏꦶꦢꦸꦁ꧈​ꦱꦸꦫꦱꦤꦺ:
15:21 "ꦥꦝꦔꦶꦢꦸꦁꦔꦏꦒꦼꦩ꧀ꦥꦔꦺꦫꦤ꧀ꦄꦭ꧀ꦭꦃ꧈​ꦲꦮꦶꦠ꧀ꦒꦼꦝꦺꦏꦭꦸꦲꦸꦂꦫꦤ꧀ꦤꦺ꧉​ꦗꦫꦤ꧀ꦏꦫꦺꦴꦱꦶꦁꦤꦸꦁꦒꦁꦔꦶꦥꦝꦢꦶꦏ꧀ꦭꦼꦊꦧ꧀ꦧꦏꦺꦲꦶꦁꦱꦼꦒꦫ꧉"​
15:22 ꧊ꦩꦸꦱꦧꦚ꧀ꦗꦸꦂꦔꦶꦫꦶꦢ꧀ꦧꦁꦱ꧊ꦆꦱꦿꦲꦺꦭ꧀ꦱꦏꦱꦼꦒꦫ꧊ꦠꦺꦧꦺꦫꦲꦸꦩꦼꦚꦁꦲꦶꦁꦱꦼꦒꦫꦮꦼꦝꦶ꧊ꦱꦸꦂ꧉​ꦲꦼꦁꦒꦺꦴꦤꦺꦩ꧀ꦭꦏꦸꦔ꧀ꦭꦶꦮꦠ꧀ꦠꦶꦲꦫꦲꦫ꧈​ꦩꦁꦏꦱꦗꦿꦺꦴꦤꦶꦁꦠꦼꦭꦸꦁꦢꦶꦤꦥꦝꦲꦺꦴꦫꦲꦺꦴꦭꦺꦃꦧꦚꦸ꧉​
15:23 ꦧꦚ꧀ꦗꦸꦂꦠꦼꦏꦤ꧀ꦲꦶꦁꦥꦁꦒꦺꦴꦤ꧀ꦤꦤ꧀ꦱꦶꦁꦗꦼꦤꦼꦁꦔꦺꦩꦫ꧉​ꦧꦚꦸꦲꦶꦁꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴꦫꦱꦤꦺꦥꦲꦶꦠ꧀ꦧꦔꦼꦠ꧀꧈​ꦔꦤ꧀ꦠꦶꦲꦺꦴꦫꦏꦼꦤꦢꦶꦲꦺꦴꦩ꧀ꦧꦺ꧉​ꦥꦁꦒꦺꦴꦤ꧀ꦤꦤ꧀ꦩꦲꦸꦢꦶꦗꦼꦤꦼꦁꦔꦏꦺꦩꦫ꧈​ꦠꦼꦒꦼꦱ꧀ꦱꦺꦥꦲꦶꦠ꧀꧉​
15:24 ꦮꦺꦴꦁꦮꦺꦴꦁꦥꦝꦔꦼꦢꦸꦩꦼꦭ꧀ꦩꦫꦁ꧊ꦩꦸꦱ꧈​ꦥꦔꦸꦕꦥ꧀ꦥꦺ꧈​"ꦏꦸꦭꦱꦩꦶꦧꦝꦺꦔꦺꦴꦩ꧀ꦧꦺꦩꦼꦤꦥ?"
15:25 ꧊ꦩꦸꦱꦧꦚ꧀ꦗꦸꦂꦤ꧀ꦢꦼꦢꦺꦴꦔꦏ꧀ꦭꦮꦤ꧀ꦔ꧀ꦒꦤ꧀ꦠꦼꦂꦩꦫꦁꦄꦭ꧀ꦭꦃ꧉​ꦒꦸꦱ꧀ꦠꦶꦄꦭ꧀ꦭꦃꦤꦼꦢꦃꦲꦏꦺꦏꦪꦸꦩꦫꦁ꧊ꦩꦸꦱ꧉​꧊ꦩꦸꦱꦔꦸꦚ꧀ꦕꦭ꧀ꦭꦏꦺꦏꦪꦸꦩꦲꦸꦲꦶꦁꦧꦚꦸ;ꦧꦚꦸꦤꦺꦧꦚ꧀ꦗꦸꦂꦏꦼꦤꦢꦶꦲꦺꦴꦩ꧀ꦧꦺ꧉​ꦲꦶꦪꦲꦶꦁꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴꦮꦺꦴꦁ꧊ꦆꦱꦿꦲꦺꦭ꧀ꦥꦝꦢꦶꦥꦫꦶꦁꦔꦶꦥꦽꦤꦠꦤ꧀ꦥꦽꦤꦠꦤ꧀ꦏꦁꦏꦸꦢꦸꦢꦶꦠꦼꦠꦼꦥ꧀ꦥꦶ꧈​ꦱꦂꦠꦲꦶꦪꦥꦝꦢꦶꦠꦺꦠꦺꦂꦲꦶꦩꦤ꧀ꦤꦺ꧉​
15:26 ꦥꦔꦤ꧀ꦢꦶꦏꦤꦺꦒꦸꦱ꧀ꦠꦶꦄꦭ꧀ꦭꦃ꧈​"ꦏꦺꦴꦮꦺꦏꦸꦢꦸꦥꦝꦩ꧀ꦧꦔꦸꦤ꧀ꦠꦸꦫꦸꦠ꧀ꦩꦫꦁꦲꦏꦸꦱꦂꦠꦤꦶꦤ꧀ꦢꦏ꧀ꦏꦏꦺꦱꦼꦏꦧꦺꦃꦲꦶꦁꦝꦮꦸꦃꦏꦸ꧉​ꦩꦼꦤꦮꦏꦺꦴꦮꦺꦥꦝꦠꦸꦩꦶꦤ꧀ꦢꦏ꧀ꦩꦼꦁꦏꦺꦴꦤꦺꦴ꧈​ꦏꦺꦴꦮꦺꦲꦺꦴꦫꦧꦏꦭ꧀ꦢꦏ꧀ꦲꦸꦏꦸꦩ꧀ꦔꦁꦒꦺꦴꦩꦼꦩꦭꦱꦶꦁꦮꦶꦱ꧀ꦢꦏ꧀ꦠꦤ꧀ꦢꦸꦏ꧀ꦏꦏꦺꦩꦫꦁꦮꦺꦴꦁ꧊ꦩꦺꦱꦶꦂ꧉​ꦲꦏꦸꦲꦶꦏꦶꦄꦭ꧀ꦭꦃꦏꦁꦩꦫꦱ꧀ꦱꦏꦺꦏꦺꦴꦮꦺ꧉"​
15:27 ꦱꦧꦚ꧀ꦗꦸꦂꦫꦺꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦠꦼꦏꦤ꧀ꦥꦁꦒꦺꦴꦤ꧀ꦤꦤ꧀ꦱꦶꦁꦗꦼꦤꦼꦁꦔꦺ꧊ꦌꦭꦶꦩ꧀꧉​ꦲꦶꦁꦏꦤꦲꦤꦱꦸꦩ꧀ꦧꦼꦂꦕꦕꦃꦲꦺꦫꦺꦴꦭꦱ꧀ꦱꦂꦠꦮꦶꦠ꧀ꦏꦸꦂꦩꦥꦶꦠꦸꦁꦥꦸꦭꦸꦃ꧉​ꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦧꦚ꧀ꦗꦸꦂꦥꦝꦔꦼꦢꦼꦒꦏꦺꦏꦺꦩꦃꦲꦶꦁꦱꦕꦼꦝꦏ꧀ꦏꦺꦱꦸꦩ꧀ꦧꦼꦂꦩꦲꦸ꧉​