Alkitab/Pangentasan/37

^37:1 ꧊ꦧꦺꦗ꦳ꦭꦺꦲꦺꦭ꧀ꦒꦮꦺꦥꦼꦛꦶꦥꦽꦗꦚ꧀ꦗꦶꦪꦤ꧀ꦱꦏꦏꦪꦸꦲꦏꦱꦶꦪ꧈​ꦢꦮꦤꦺ110ꦱꦺꦤ꧀ꦠꦶꦩꦺꦠꦼꦂ꧈​ꦲꦩ꧀ꦧꦤꦺꦱꦂꦠꦝꦸꦮꦸꦂꦫꦺꦥꦝ꧈​ꦪꦏꦸꦮꦶ66ꦱꦺꦤ꧀ꦠꦶꦩꦺꦠꦼꦂ꧉​

^37:2 ꦲꦶꦁꦚ꧀ꦗꦧꦭꦤ꧀ꦲꦶꦁꦚ꧀ꦗꦼꦫꦺꦴꦢꦶꦭꦥꦶꦱ꧀ꦱꦶꦲꦼꦩꦱ꧀ꦩꦸꦂꦤꦶ꧈​ꦭꦤ꧀ꦔꦁꦒꦺꦴꦮꦼꦁꦏꦸꦲꦼꦩꦱ꧀ꦩꦸꦧꦼꦁ꧉​

^37:3 ꦧꦚ꧀ꦗꦸꦂꦢꦶꦒꦮꦺꦏ꧀ꦏꦏꦺꦒꦼꦭꦁꦔꦤ꧀ꦲꦼꦩꦱ꧀ꦥꦥꦠ꧀ꦏꦁꦒꦺꦴꦚ꧀ꦭꦺꦴꦧꦺꦴꦏ꧀ꦏꦏꦺꦥꦶꦏꦸꦭ꧀ꦭꦤ꧀꧈​ꦱꦶꦁꦢꦶꦥꦱꦁꦲꦶꦁꦱꦶꦏꦶꦭ꧀ꦭꦺꦥꦼꦛꦶꦥꦥꦠ꧀꧈​ꦱꦧꦼꦤ꧀ꦱꦶꦱꦶꦃꦒꦼꦭꦁꦔꦤ꧀ꦭꦺꦴꦫꦺꦴ꧉​

^37:4 ꦲꦶꦪꦢꦶꦒꦮꦺꦏ꧀ꦏꦏꦺꦥꦶꦏꦸꦭ꧀ꦭꦤ꧀ꦱꦏꦏꦪꦸꦲꦏꦱꦶꦪ꧈​ꦢꦶꦭꦥꦶꦱ꧀ꦔꦁꦒꦺꦴꦲꦼꦩꦱ꧀꧉​

^37:5 ꦧꦚ꧀ꦗꦸꦂꦢꦶꦱ꧀ꦭꦺꦴꦧꦺꦴꦏ꧀ꦏꦏꦺꦲꦶꦁꦱꦧꦼꦤ꧀ꦱꦶꦱꦶꦃꦲꦶꦁꦥꦼꦛꦶꦩꦲꦸ꧉​

^37:6 ꦥꦼꦛꦶꦩꦲꦸꦲꦶꦪꦢꦶꦒꦮꦺꦏ꧀ꦏꦏꦺꦠꦸꦠꦸꦥ꧀ꦱꦏꦲꦼꦩꦱ꧀ꦩꦸꦂꦤꦶ꧈​ꦢꦮꦤꦺ110ꦱꦺꦤ꧀ꦠꦶꦩꦺꦠꦼꦂꦭꦤ꧀ꦲꦩ꧀ꦧꦤꦺ66ꦱꦺꦤ꧀ꦠꦶꦩꦺꦠꦼꦂ꧉​

^37:7 ꦭꦤ꧀ꦢꦶꦒꦮꦺꦏ꧀ꦏꦏꦺꦉꦫꦸꦥꦤ꧀ꦲꦼꦩꦱ꧀ꦩꦸꦗꦸꦢ꧀ꦏꦼꦫꦸꦧ꧀ꦭꦺꦴꦫꦺꦴꦔꦁꦒꦺꦴꦱ꧀ꦮꦶꦮꦶꦱꦶꦁꦢꦶꦲꦸꦏꦸꦂ꧈​

^37:8 ꦱꦶꦁꦱꦶꦗꦶꦲꦶꦁꦱꦶꦱꦶꦃꦏꦺꦤꦺ꧈​ꦱꦶꦗꦶꦤꦺꦲꦶꦁꦱꦶꦱꦶꦃꦏꦤꦤꦺ꧉​ꦉꦫꦸꦥꦤ꧀ꦭꦺꦴꦫꦺꦴꦩꦲꦸꦢꦶꦒꦮꦺꦢꦢꦶꦱꦶꦗꦶꦏꦫꦺꦴꦠꦸꦠꦸꦥ꧀ꦥꦺ꧉​

^37:9 ꦢꦶꦒꦮꦺꦥꦝꦲꦝꦼꦥ꧀ꦲꦝꦼꦥ꧀ꦥꦤ꧀;ꦢꦺꦤꦺꦱ꧀ꦮꦶꦮꦶꦤꦺꦩꦼꦒꦂꦤꦸꦠꦸꦥ꧀ꦥꦶꦥꦼꦛꦶꦩꦲꦸ꧉​

^37:10 ꧊ꦧꦺꦗ꦳ꦭꦺꦲꦺꦭ꧀ꦒꦮꦺꦩꦺꦗꦱꦏꦏꦪꦸꦲꦏꦱꦶꦪ꧈​ꦢꦮꦤꦺ88ꦱꦺꦤ꧀ꦠꦶꦩꦺꦠꦼꦂ꧈​ꦲꦩ꧀ꦧꦤꦺ44ꦱꦺꦤ꧀ꦠꦶꦩꦺꦠꦼꦂꦭꦤ꧀ꦝꦸꦮꦸꦂꦫꦺ66ꦱꦺꦤ꧀ꦠꦶꦩꦺꦠꦼꦂ꧉​

^37:11 ꦩꦺꦗꦩꦲꦸꦢꦶꦭꦥꦶꦱ꧀ꦱꦶꦩꦱ꧀ꦩꦸꦂꦤꦶ꧈​ꦩꦸꦧꦼꦁꦢꦶꦥꦱꦁꦔꦶꦥ꧀ꦭꦶꦱꦶꦂꦩꦱ꧀꧉​

^37:12 ꦲꦶꦪꦧꦚ꧀ꦗꦸꦂꦢꦶꦒꦮꦺꦏ꧀ꦏꦏꦺꦮꦼꦁꦏꦸꦱꦶꦁꦲꦩ꧀ꦧꦤꦺ7,5ꦱꦺꦤ꧀ꦠꦶꦩꦺꦠꦼꦂꦱꦏꦸꦧꦼꦁꦔꦺꦩꦺꦗꦩꦲꦸ꧉​ꦮꦼꦁꦏꦸꦤꦶꦁꦩꦺꦗꦢꦶꦮꦺꦤꦺꦃꦲꦶꦥ꧀ꦭꦶꦱꦶꦂꦩꦱ꧀꧉​

^37:13 ꦢꦶꦒꦮꦺꦏ꧀ꦏꦏꦺꦒꦼꦭꦁꦔꦤ꧀ꦲꦸꦱꦸꦁꦔꦤ꧀ꦥꦥꦠ꧀ꦱꦶꦁꦢꦶꦥꦱꦁꦲꦤꦲꦶꦁꦥꦺꦴꦗꦺꦴꦏ꧀ꦥꦥꦠ꧀ꦱꦤ꧀ꦝꦸꦮꦸꦂꦫꦶꦁꦱꦶꦏꦶꦭ꧀ꦭꦺ꧉​

^37:14 ꦒꦼꦭꦁꦔꦤ꧀ꦏꦁꦒꦺꦴꦱ꧀ꦭꦺꦴꦧꦺꦴꦏ꧀ꦏꦤ꧀ꦥꦶꦏꦸꦭ꧀ꦭꦤ꧀ꦢꦶꦥꦱꦁꦩꦺꦥꦺꦠ꧀ꦮꦼꦁꦏꦸꦤꦶꦁꦩꦺꦗꦩꦲꦸ꧉​

^37:15 ꦥꦶꦏꦸꦭ꧀ꦭꦤ꧀ꦤꦺꦢꦶꦒꦮꦺꦱꦏꦏꦪꦸꦲꦏꦱꦶꦪꦢꦶꦭꦥꦶꦱ꧀ꦱꦶꦩꦱ꧀꧉​

^37:16 ꦢꦶꦒꦮꦺꦲꦸꦒꦥꦶꦫꦤ꧀ꦠꦶꦱꦶꦁꦠꦼꦩꦸꦩ꧀ꦥꦁꦲꦶꦁꦩꦺꦗꦩꦲꦸꦏꦪꦠ:ꦥꦶꦫꦶꦁꦥꦶꦫꦶꦁ꧈​ꦕꦁꦏꦶꦂꦕꦁꦏꦶꦂ꧈​ꦏꦼꦤ꧀ꦝꦶꦏꦼꦤ꧀ꦝꦶꦭꦤ꧀ꦩꦁꦏꦺꦴꦏ꧀ꦩꦁꦏꦺꦴꦏ꧀ꦮꦝꦃꦲꦁꦒꦸꦂꦱꦲꦺꦴꦱ꧀ꦱꦤ꧀꧈​ꦏꦧꦺꦃꦢꦶꦒꦮꦺꦱꦏꦩꦱ꧀ꦩꦸꦂꦤꦶ꧉​

^37:17 ꧊ꦧꦺꦗ꦳ꦭꦺꦲꦺꦭ꧀ꦒꦮꦺꦥꦼꦢꦩꦂꦫꦤ꧀ꦱꦏꦩꦱ꧀ꦩꦸꦂꦤꦶ꧉​ꦧꦚ꧀ꦕꦶꦏ꧀ꦏꦤꦺꦭꦤ꧀ꦱꦶꦏꦶꦭ꧀ꦭꦺꦱꦏꦩꦱ꧀ꦱꦶꦁꦢꦶꦲꦸꦏꦶꦂ꧉​ꦢꦶꦉꦁꦒꦔꦁꦒꦺꦴꦏꦼꦩ꧀ꦧꦁꦏꦼꦩ꧀ꦧꦁꦔꦤ꧀꧈​ꦏꦸꦝꦸꦥ꧀ꦭꦤ꧀ꦱ꧀ꦭꦒꦤꦺꦲꦶꦫꦱ꧀ꦱꦤ꧀ꦏꦫꦺꦴꦒꦒꦁꦔꦺ꧉​

^37:18 ꦥꦼꦢꦩꦂꦫꦤ꧀ꦩꦲꦸꦲꦤꦥꦁꦔꦺꦤꦼꦩ꧀ꦩꦼꦠꦸꦱꦏꦭꦗꦼꦂꦫꦺ꧈​ꦱꦧꦼꦤ꧀ꦱꦶꦱꦶꦃꦠꦼꦭꦸ꧉​

^37:19 ꦲꦶꦁꦱꦧꦼꦤ꧀ꦥꦁꦲꦤꦉꦉꦁꦒꦤ꧀ꦤꦺꦏꦼꦩ꧀ꦧꦁꦠꦼꦭꦸꦏꦪꦏꦼꦩ꧀ꦧꦁꦧꦢꦩ꧀ꦏꦫꦺꦴꦏꦸꦝꦸꦥ꧀ꦭꦤ꧀ꦱ꧀ꦭꦒꦤꦺ꧉​

^37:20 ꦲꦶꦁꦒꦒꦁꦔꦺꦲꦤꦉꦉꦁꦒꦤ꧀ꦏꦼꦩ꧀ꦧꦁꦥꦥꦠ꧀ꦏꦪꦧꦢꦩ꧀ꦏꦫꦺꦴꦏꦸꦝꦸꦥ꧀ꦭꦤ꧀ꦱ꧀ꦭꦒꦤꦺ꧉​

^37:21 ꦭꦤ꧀ꦲꦶꦁꦱꦔꦶꦱꦺꦴꦂꦫꦶꦁꦱꦧꦼꦤ꧀ꦥꦁꦱꦗꦺꦴꦝꦺꦴꦲꦤꦏꦸꦝꦸꦥ꧀ꦥꦺ꧉​

^37:22 ꦮꦝꦃꦭꦩ꧀ꦥꦸꦩꦲꦸꦱꦂꦠꦏꦸꦝꦸꦥ꧀ꦏꦸꦝꦸꦥ꧀ꦥꦺꦭꦤ꧀ꦥꦁꦥꦁꦔꦺꦢꦶꦒꦮꦺꦱꦏꦲꦸꦏꦶꦂꦲꦸꦏꦶꦂꦫꦤ꧀ꦩꦱ꧀ꦱꦶꦗꦶ꧉​

^37:23 ꦲꦶꦁꦥꦼꦢꦩꦂꦫꦤ꧀ꦩꦲꦸꦢꦶꦒꦮꦺꦏ꧀ꦏꦏꦺꦢꦩꦂꦥꦶꦠꦸꦏꦫꦺꦴꦒꦸꦤ꧀ꦠꦶꦁꦭꦤ꧀ꦠꦝꦃꦭꦔꦼꦱ꧀ꦱꦏꦩꦱ꧀ꦩꦸꦂꦤꦶ꧉​

^37:24 ꦏꦁꦒꦺꦴꦒꦮꦺꦥꦼꦢꦩꦂꦫꦤ꧀ꦱꦂꦠꦥꦶꦫꦤ꧀ꦠꦶꦤꦺꦏꦧꦺꦃꦩ꧀ꦧꦸꦠꦸꦃꦲꦏꦺꦩꦱ꧀ꦩꦸꦂꦤꦶ35ꦏꦶꦭꦺꦴꦒꦿꦩ꧀꧉​

^37:25 ꧊ꦧꦺꦗ꦳ꦭꦺꦲꦺꦭ꧀ꦒꦮꦺꦩꦼꦱ꧀ꦧꦺꦃꦱꦏꦏꦪꦸꦲꦏꦱꦶꦪꦏꦁꦒꦺꦴꦥꦢꦸꦥꦤ꧀꧉​ꦩꦼꦱ꧀ꦧꦺꦃꦩꦲꦸꦥꦼꦱꦒꦶ꧈​ꦢꦮꦭꦤ꧀ꦲꦩ꧀ꦧꦤꦺꦥꦝ45ꦱꦺꦤ꧀ꦠꦶꦩꦺꦠꦼꦂ꧉​ꦝꦸꦮꦸꦂꦫꦺ90ꦱꦺꦤ꧀ꦠꦶꦩꦺꦠꦼꦂ꧉​ꦱꦸꦔꦸꦱꦸꦔꦸꦤꦺꦲꦶꦁꦥꦺꦴꦗꦺꦴꦏ꧀ꦏꦺꦥꦥꦠ꧀ꦢꦢꦶꦱꦶꦗꦶꦏꦫꦺꦴꦩꦼꦱ꧀ꦧꦺꦃꦲꦺ꧉​

^37:26 ꦲꦶꦁꦱꦶꦱꦶꦃꦤ꧀ꦝꦸꦮꦸꦂ꧈​ꦱꦶꦱꦶꦃꦲꦺꦥꦥꦠ꧀ꦱꦂꦠꦱꦸꦔꦸꦤꦺꦢꦶꦭꦥꦶꦱ꧀ꦱꦶꦩꦱ꧀ꦩꦸꦂꦤꦶꦭꦤ꧀ꦲꦶꦁꦱꦏꦸꦧꦼꦁꦔꦺꦢꦶꦒꦮꦺꦏ꧀ꦏꦏꦺꦥ꧀ꦭꦶꦱꦶꦂꦩꦱ꧀꧈​

^37:27 ꦧꦚ꧀ꦗꦸꦂꦢꦶꦒꦮꦺꦏ꧀ꦏꦏꦺꦒꦼꦭꦁꦔꦤ꧀ꦏꦁꦒꦺꦴꦩꦶꦏꦸꦭ꧀꧈​ꦢꦶꦥꦱꦁꦲꦶꦁꦱꦔꦶꦱꦺꦴꦂꦫꦶꦁꦥ꧀ꦭꦶꦱꦶꦂꦲꦶꦁꦱꦶꦱꦶꦃꦲꦺꦭꦺꦴꦫꦺꦴꦏꦁꦒꦺꦴꦱ꧀ꦭꦺꦴꦧꦺꦴꦏ꧀ꦏꦤ꧀ꦥꦶꦏꦸꦭ꧀ꦭꦤ꧀ꦱꦩꦱꦩꦼꦱ꧀ꦧꦺꦃꦩꦲꦸꦢꦶꦲꦸꦱꦸꦁ꧉​

^37:28 ꦥꦶꦏꦸꦭ꧀ꦭꦤ꧀ꦤꦺꦥꦝꦢꦶꦒꦮꦺꦱꦏꦏꦪꦸꦲꦏꦱꦶꦪꦱꦂꦠꦢꦶꦭꦥꦶꦱ꧀ꦩꦱ꧀꧉​

^37:29 ꧊ꦧꦺꦗ꦳ꦭꦺꦲꦺꦭ꧀ꦲꦸꦒꦒꦮꦺꦊꦔꦗꦼꦧꦢ꧀ꦭꦤ꧀ꦢꦸꦥꦩꦸꦂꦤꦶꦱꦶꦁꦢꦶꦕꦩ꧀ꦥꦸꦂꦏꦫꦺꦴꦊꦔꦮꦔꦶ꧉​