Alkitab/Pangentasan/5

Kaca iki nganggo aksara Jawa. Yen perambanmu ora ndukung, kowé ora bakal isa ndeleng sauntara tulisan nganggo aksara Jawa ing halaman iki.
Kanggo mbeneraké, mangga diwaca Pitulung:Aksara Jawa.

^5:1 ꧊ꦩꦸꦱꦭꦤ꧀ꦲꦫꦸꦤ꧀ꦱꦺꦴꦮꦤ꧀ꦱꦁꦥꦿꦶꦔꦺꦴꦤ꧀ꦱꦂꦠꦩꦠꦸꦂ꧈"ꦥꦔꦺꦫꦤ꧀꧈ꦲꦭ꧀ꦭꦃꦲꦶꦥꦸꦤ꧀꧊ꦆꦱꦿꦲꦺꦭ꧀ꦝꦮꦸꦃꦩꦼꦏꦠ꧀ꦠꦼꦤ꧀꧈‘ꦲꦸꦩꦠ꧀ꦏꦸ ꦭꦶꦭꦤꦤꦭꦸꦔ꧈ꦱꦸꦥꦪꦔꦧꦼꦏ꧀ꦠꦶꦩꦫꦁꦲꦏꦸꦲꦤꦲꦶꦁꦲꦫꦲꦫꦱꦩꦸꦤ꧀꧉’"

^5:2 ꦱꦁꦥꦿꦶꦔꦺꦴꦤ꧀ꦤ꧀ꦢꦔꦸ꧈"ꦥꦔꦺꦫꦤ꧀ꦲꦭ꧀ꦭꦃꦩꦸꦏꦸꦮꦶꦱꦥ?ꦲꦥꦱꦼꦧꦧ꧀ꦧꦺꦲꦏꦸꦏꦸꦢꦸꦔꦿꦸꦔꦺꦴꦏ꧀ꦏꦏꦺꦲꦭ꧀ꦭꦃꦩꦸꦭꦤ꧀ꦔ꧀ꦭꦶꦭꦤꦶꦧꦁꦱ꧊ꦆꦱꦿꦲꦺꦭ꧀ꦭꦸꦔ?ꦲꦏꦸꦲꦺꦴꦫꦠꦼꦥꦸꦁꦏꦫꦺꦴꦲꦭ꧀ꦭꦃꦩꦸꦏꦸꦮꦶꦱꦂꦠ꧊ꦆꦱꦿꦲꦺꦭ꧀ꦲꦺꦴꦫꦢꦏ꧀ꦭꦶꦭꦤꦶꦭꦸꦔ꧉"

^5:3 ꧊ꦩꦸꦱꦭꦤ꧀ꦲꦫꦸꦤ꧀ꦩꦠꦸꦂ꧈"ꦥꦔꦺꦫꦤ꧀꧈ꦲꦭ꧀ꦭꦃꦲꦶꦥꦸꦤ꧀ꦠꦶꦪꦁ꧊ꦆꦧꦿꦤꦶꦱꦩ꧀ꦥꦸꦤ꧀ꦤ꧀ꦝꦮꦸꦃꦲꦶꦏꦸꦭ꧈ꦱꦸꦥꦢꦺꦴꦱ꧀ꦥꦚ꧀ꦗꦼꦤꦼꦁꦔꦤ꧀ꦔ꧀ꦭꦶꦭꦤꦶꦠꦶꦪꦁ꧊ꦆꦧꦿꦤꦶꦏꦺꦱꦃꦝꦠꦼꦁꦲꦫꦲꦫꦱꦩꦸꦤ꧀꧈ꦲꦶꦁꦏꦁꦠꦼꦧꦶꦃꦲꦶꦥꦸꦤ꧀ꦭꦩ꧀ꦥꦃꦲꦤ꧀ꦠꦶꦒꦁꦢꦶꦤ꧀ꦠꦼꦤ꧀꧈ꦥꦽꦭꦸꦱꦲꦺꦴꦱ꧀ꦏꦸꦂꦧꦤ꧀ꦝꦠꦼꦁꦥꦔꦺꦫꦤ꧀ꦄꦭ꧀ꦭꦃ꧈ꦲꦶꦁꦒꦶꦃꦄꦭ꧀ꦭꦃꦏꦸꦭ꧉ꦩꦼꦤꦮꦶꦏꦸꦭꦱꦼꦢꦪꦩ꧀ꦧꦺꦴꦠꦼꦤ꧀ꦔ꧀ꦭꦩ꧀ꦥꦃꦲꦶ꧈ꦥꦔꦺꦫꦤ꧀ꦧꦝꦺꦩꦼꦗꦃꦲꦶꦏꦸꦭꦱꦿꦤꦱꦼꦱꦏꦶꦠ꧀ꦱꦲꦥꦼꦫꦁ꧉"

^5:4 ꦱꦁꦥꦿꦶꦔꦺꦴꦤ꧀ꦔꦤ꧀ꦢꦶꦏꦩꦫꦁ꧊ꦩꦸꦱꦭꦤ꧀ꦲꦫꦸꦤ꧀꧈"ꦲꦥꦏꦉꦥ꧀ꦩꦸꦮꦺꦴꦁꦮꦺꦴꦁꦏꦸꦮꦶꦏꦺꦴꦏ꧀ꦏꦺꦴꦤ꧀ꦤꦶꦁꦒꦭ꧀ꦥꦼꦒꦮꦺꦪꦤ꧀ꦤꦺ?ꦧꦠꦸꦂꦧꦠꦸꦂꦏꦸꦮꦶꦏꦸꦢꦸꦧꦭꦶꦚꦩ꧀ꦧꦸꦠ꧀ꦒꦮꦺꦩꦼꦤꦺꦃ!

^5:5 ꦧꦁꦱꦩꦸꦕꦕꦃꦲꦺꦮꦶꦱ꧀ꦭꦸꦮꦶꦃꦲꦏꦺꦃꦠꦶꦤꦶꦩ꧀ꦧꦁꦧꦁꦱ꧊ꦩꦺꦱꦶꦂ꧉ꦭꦤ꧀ꦱꦲꦶꦏꦶꦏꦺꦴꦮꦺꦏꦧꦺꦃꦲꦉꦥ꧀ꦭꦺꦫꦺꦤ꧀꧈ꦲꦺꦴꦫꦚꦩ꧀ꦧꦸꦠ꧀ꦒꦮꦺ!"

^5:6 ꦲꦶꦁꦢꦶꦤꦏꦸꦮꦶꦲꦸꦒꦥꦫꦥꦼꦔꦮꦱ꧀ꦧꦁꦱ꧊ꦩꦺꦱꦶꦂꦱꦂꦠꦥꦫꦩꦤ꧀ꦝꦺꦴꦂ꧊ꦆꦱꦿꦲꦺꦭ꧀ꦢꦶꦝꦮꦸꦃꦲꦶꦩꦼꦁꦏꦺꦤꦺ꧈

^5:7 "ꦧꦁꦱꦏꦸꦮꦶꦲꦗꦏꦺꦴꦏ꧀ꦮꦺꦤꦺꦃꦲꦶꦩꦼꦫꦁꦩꦼꦤꦺꦃꦏꦁꦒꦺꦴꦒꦮꦺꦧꦠ꧈ꦏꦉꦧꦺꦤ꧀ꦒꦺꦴꦭꦺꦏ꧀ꦝꦺꦮꦺ꧉

^5:8 ꦮꦺꦴꦁꦮꦺꦴꦁꦏꦸꦮꦶꦏꦺꦴꦤ꧀ꦤꦼꦤ꧀ꦒꦮꦺꦧꦠꦕꦕꦃꦲꦺꦥꦝꦏꦪꦮꦶꦔꦶꦮꦶꦔꦶ꧈ꦱꦶꦗꦶꦮꦲꦺꦲꦺꦴꦫꦏꦼꦤꦏꦸꦫꦁ꧉ꦝꦱꦂꦮꦺꦴꦁꦏꦸꦫꦁꦒꦮꦺꦪꦤ꧀꧈ꦩꦸꦭꦤꦺꦠꦤ꧀ꦱꦃꦒꦺꦴꦭꦺꦏ꧀ꦲꦊꦱ꧀ꦱꦤ꧀ꦱꦸꦥꦪꦢꦶꦭꦶꦭꦤꦶꦭꦸꦔꦱꦲꦺꦴꦱ꧀ꦏꦸꦂꦧꦤ꧀ꦩꦫꦁꦲꦭ꧀ꦭꦃꦲꦺ꧉

^5:9 ꦩꦸꦭꦤꦺꦥꦼꦒꦮꦺꦪꦤ꧀ꦤꦺꦠꦩ꧀ꦧꦃꦲꦤꦱꦶꦁꦭꦸꦮꦶꦃꦲꦧꦺꦴꦠ꧀꧈ꦲꦗꦢꦶꦮꦺꦤꦺꦃꦲꦶꦮꦼꦏ꧀ꦠꦸꦏꦁꦒꦺꦴꦔꦱꦺꦴ꧈ꦱꦸꦥꦪꦲꦺꦴꦫꦏꦺꦴꦧꦼꦂꦔꦿꦸꦔꦺꦴꦏ꧀ꦏꦏꦺꦕꦿꦶꦠꦱꦶꦁꦲꦺꦴꦫꦲꦺꦴꦫ꧉"

^5:10 ꦥꦫꦥꦼꦔꦮꦱ꧀꧊ꦩꦺꦱꦶꦂꦱꦂꦠꦩꦤ꧀ꦝꦺꦴꦂꦩꦤ꧀ꦝꦺꦴꦂ꧊ꦆꦱꦿꦲꦺꦭ꧀ꦤꦸꦭꦶꦥꦝꦧꦸꦝꦭ꧀ꦭꦤ꧀ꦏꦤ꧀ꦝꦏꦫꦺꦴꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀꧈"ꦱꦁꦥꦿꦧꦸꦝꦮꦸꦃꦱꦸꦥꦪꦲꦏꦸꦥꦝꦲꦺꦴꦫꦩꦺꦤꦺꦃꦲꦶꦩꦼꦫꦁꦩꦼꦤꦺꦃꦩꦫꦁꦏꦺꦴꦮꦺ꧉

^5:11 ꦏꦺꦴꦮꦺꦏꦧꦺꦃꦏꦸꦢꦸꦒꦺꦴꦭꦺꦏ꧀ꦝꦺꦮꦺ꧈ꦤꦁꦔꦶꦁꦲꦺꦴꦭꦺꦃꦩꦸꦒꦮꦺꦧꦠꦏꦸꦢꦸꦥꦝꦕꦕꦃꦲꦺꦏꦫꦺꦴꦱꦶꦁꦮꦶꦔꦶꦮꦶꦔꦶ꧉"

^5:12 ꦧꦁꦱ꧊ꦆꦱꦿꦲꦺꦭ꧀ꦧꦚ꧀ꦗꦸꦂꦭꦸꦔꦔꦸꦧꦼꦁꦔꦶꦠꦤꦃ꧊ꦩꦺꦱꦶꦂꦒꦺꦴꦭꦺꦏ꧀ꦩꦼꦫꦁ꧉

^5:13 ꦱꦧꦼꦤ꧀ꦢꦶꦤꦮꦺꦴꦁ꧊ꦆꦱꦿꦲꦺꦭ꧀ꦩꦲꦸꦢꦶꦥꦼꦏ꧀ꦱꦢꦺꦤꦶꦁꦥꦫꦥꦼꦔꦮꦱ꧀ꦱꦸꦥꦪꦒꦮꦺꦧꦠꦕꦕꦃꦲꦺꦥꦝꦏꦪꦤꦭꦶꦏꦢꦶꦮꦺꦤꦺꦃꦲꦶꦩꦼꦫꦁ꧉

^5:14 ꦥꦫꦥꦼꦔꦮꦱ꧀꧊ꦩꦺꦱꦶꦂꦤꦸꦭꦶꦥꦝꦔ꧀ꦒꦼꦧꦸꦒꦩꦤ꧀ꦝꦺꦴꦂꦩꦤ꧀ꦝꦺꦴꦂ꧊ꦆꦱꦿꦲꦺꦭ꧀ꦱꦶꦁꦢꦶꦮꦗꦶꦧ꧀ꦧꦏꦺꦔꦠꦸꦂꦒꦮꦺꦪꦤ꧀ꦤꦺꦥꦫꦧꦠꦸꦂ꧉ꦮꦺꦴꦁ꧊ꦩꦺꦱꦶꦂꦩꦲꦸꦥꦝꦠꦏꦺꦴꦤ꧀꧈"ꦪꦒꦺꦤꦺꦮꦺꦴꦁꦮꦺꦴꦁ꧊ꦆꦱꦿꦲꦺꦭ꧀ꦲꦺꦴꦫꦒꦮꦺꦧꦠꦥꦝꦕꦕꦃꦲꦺꦏꦫꦺꦴꦮꦶꦔꦶꦮꦶꦔꦶ?"

^5:15 ꦩꦤ꧀ꦝꦺꦴꦂꦩꦤ꧀ꦝꦺꦴꦂ꧊ꦆꦱꦿꦲꦺꦭ꧀ꦧꦚ꧀ꦗꦸꦂꦱꦺꦴꦮꦤ꧀ꦱꦁꦥꦿꦧꦸꦱꦂꦠꦱꦼꦱꦩ꧀ꦧꦠ꧀꧈"ꦏꦺꦁꦔꦶꦁꦩꦼꦤꦥꦥꦚ꧀ꦗꦼꦤꦼꦁꦔꦤ꧀ꦩꦠꦿꦥ꧀ꦥꦶꦏꦸꦭꦱꦼꦢꦪꦩꦼꦏꦠ꧀ꦠꦼꦤ꧀?

^5:16 ꦏꦸꦭꦩ꧀ꦧꦺꦴꦠꦼꦤ꧀ꦢꦶꦥꦸꦤ꧀ꦥꦫꦶꦁꦔꦶꦩꦼꦫꦁ꧈ꦤꦁꦔꦶꦁꦏꦼꦢꦃꦢꦩꦼꦭ꧀ꦧꦠ꧉ꦱꦩꦼꦤꦶꦏꦏꦸꦭꦱꦩꦶꦢꦶꦥꦸꦤ꧀ꦒꦼꦧꦒ꧈ꦩꦁꦏꦥꦚ꧀ꦗꦼꦤꦼꦁꦔꦤ꧀ꦲꦶꦁꦏꦁꦠꦁꦒꦼꦭ꧀ꦗꦮꦧ꧀꧉"

^5:17 ꦱꦁꦥꦿꦶꦔꦺꦴꦤ꧀ꦝꦮꦸꦃ꧈"ꦏꦺꦴꦮꦺꦥꦝꦏꦼꦱꦺꦢ꧀꧈ꦲꦺꦴꦫꦒꦼꦊꦩ꧀ꦚꦩ꧀ꦧꦸꦠ꧀ꦒꦮꦺ꧉ꦏꦸꦮꦶꦱꦼꦧꦧ꧀ꦧꦺꦏꦺꦴꦮꦺꦥꦝꦚ꧀ꦗꦭꦸꦏ꧀ꦢꦶꦭꦶꦭꦤꦶꦱꦲꦺꦴꦱ꧀ꦏꦸꦂꦧꦤ꧀ꦩꦫꦁꦲꦭ꧀ꦭꦃꦩꦸ꧉

^5:18 ꦲꦪꦺꦴꦚꦩ꧀ꦧꦸꦠ꧀ꦒꦮꦺꦩꦼꦤꦺꦃ!ꦏꦺꦴꦮꦺꦥꦝꦲꦺꦴꦫꦢꦶꦮꦺꦤꦺꦃꦲꦶꦩꦼꦫꦁ꧈ꦤꦁꦔꦶꦁꦏꦸꦢꦸꦧꦶꦱꦒꦮꦺꦧꦠꦱꦶꦁꦥꦝꦕꦕꦃꦲꦺ꧉"

^5:19 ꦩꦤ꧀ꦝꦺꦴꦂꦩꦤ꧀ꦝꦺꦴꦂꦥꦝꦏꦿꦱꦪꦺꦤ꧀ꦮꦺꦴꦁꦮꦺꦴꦁꦔꦺꦥꦝꦫꦺꦥꦺꦴꦠ꧀ꦧꦔꦼꦠ꧀꧈ꦲꦮꦶꦠ꧀ꦢꦶꦝꦮꦸꦃꦲꦶꦏꦸꦢꦸꦒꦮꦺꦧꦠꦕꦕꦃꦲꦺꦥꦝꦏꦪꦮꦶꦔꦶꦮꦶꦔꦶ꧉

^5:20 ꦱꦥꦸꦁꦏꦸꦂꦫꦺꦱꦺꦴꦮꦤ꧀ꦱꦁꦥꦿꦶꦔꦺꦴꦤ꧀ꦮꦺꦴꦁꦮꦺꦴꦁꦩꦲꦸꦧꦚ꧀ꦗꦸꦂꦥꦝꦤꦼꦩꦺꦴꦤ꧀ꦤꦶ꧊ꦩꦸꦱꦭꦤ꧀ꦲꦫꦸꦤ꧀ꦱꦶꦁꦥꦚ꧀ꦕꦺꦤ꧀ꦭꦒꦶꦔꦼꦤ꧀ꦠꦺꦤ꧀ꦤꦶ꧉

^5:21 ꦠꦼꦩ꧀ꦧꦸꦁꦔꦺꦩꦤ꧀ꦝꦺꦴꦂꦩꦤ꧀ꦝꦺꦴꦂꦩꦲꦸ꧈"ꦒꦸꦱ꧀ꦠꦶꦄꦭ꧀ꦭꦃꦱꦩ꧀ꦥꦸꦤ꧀ꦩꦶꦂꦱꦥꦺꦴꦏꦭ꧀ꦥꦚ꧀ꦗꦼꦤꦼꦁꦔꦤ꧀꧈ꦩꦶꦭꦩꦼꦱ꧀ꦛꦶꦧꦝꦺꦔꦸꦏꦸꦩ꧀ꦥꦚ꧀ꦗꦼꦤꦼꦁꦔꦤ꧀꧈ꦱꦼꦧꦧ꧀ꦥꦚ꧀ꦗꦼꦤꦼꦁꦔꦤ꧀ꦲꦶꦁꦏꦁꦢꦢꦺꦴꦱ꧀ꦗꦭꦂꦫꦤ꧀ꦤꦶꦥꦸꦤ꧀ꦏꦸꦭꦱꦩꦶꦢꦶꦥꦸꦤ꧀ꦱꦼꦔꦶꦠ꧀ꦠꦶꦢꦺꦤꦶꦁꦱꦁꦥꦿꦶꦔꦺꦴꦤ꧀ꦠꦸꦮꦶꦤ꧀ꦥꦫꦥꦼꦔꦒꦼꦁ꧉ꦥꦚ꧀ꦗꦼꦤꦼꦁꦔꦤ꧀ꦚꦸꦏꦤꦶꦝꦝꦏ꧀ꦏꦤ꧀ꦝꦠꦼꦁꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦏꦁꦒꦺꦩꦼꦗꦃꦲꦶꦏꦸꦭ꧉"

^5:22 ꧊ꦩꦸꦱꦧꦚ꧀ꦗꦸꦂꦱꦺꦴꦮꦤ꧀ꦩꦫꦁꦔꦂꦱꦤꦺꦄꦭ꧀ꦭꦃꦩꦼꦤꦺꦃ꧈ꦲꦠꦸꦂꦫꦺ꧈"ꦝꦸꦃꦄꦭ꧀ꦭꦃ꧈ꦩꦼꦤꦥꦱꦼꦧꦧ꧀ꦧꦶꦥꦸꦤ꧀ꦥꦢꦸꦏꦤ꧀ꦝꦠꦼꦁꦔꦏꦼꦤ꧀ꦏꦱꦁꦱꦫꦤ꧀ꦝꦠꦼꦁꦧꦁꦱꦩꦼꦤꦶꦏ?ꦩꦼꦤꦥꦱꦼꦧꦧ꧀ꦧꦶꦥꦸꦤ꧀ꦥꦢꦸꦏꦔꦸꦠꦸꦱ꧀ꦏꦮꦸꦭꦩꦿꦶꦏꦶ?

^5:23 ꦮꦶꦮꦶꦠ꧀ꦏꦮꦸꦭꦱꦺꦴꦮꦤ꧀ꦝꦠꦼꦁꦱꦁꦥꦿꦶꦔꦺꦴꦤ꧀꧈ꦩꦠꦸꦂꦢꦶꦥꦸꦤ꧀ꦲꦸꦠꦸꦱ꧀ꦢꦺꦤꦶꦁꦄꦭ꧀ꦭꦃ꧈ꦱꦁꦥꦿꦶꦔꦺꦴꦤ꧀ꦱꦩ꧀ꦥꦸꦤ꧀ꦚꦶꦪꦚꦶꦪꦧꦁꦱꦩꦼꦤꦶꦏ;ꦭꦤ꧀ꦥꦢꦸꦏꦩ꧀ꦧꦺꦴꦠꦼꦤ꧀ꦩꦫꦶꦁꦔꦶꦥꦶꦠꦸꦭꦸꦁꦔꦤ꧀ꦩꦼꦤꦥꦩꦼꦤꦥ꧉"