Alkitab/Pangentasan/8

^8:1 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ꧊ꦩꦸꦱ꧈​"ꦱꦺꦴꦮꦤ꧀ꦤꦱꦁꦥꦿꦶꦔꦺꦴꦤ꧀ꦩꦼꦤꦺꦃꦱꦂꦠꦲꦠꦸꦂꦤꦪꦺꦤ꧀ꦄꦭ꧀ꦭꦃꦔꦤ꧀ꦢꦶꦏꦩꦼꦁꦏꦺꦤꦺ꧈​‘ꦲꦸꦩꦠ꧀ꦏꦸꦭꦶꦭꦤꦤꦧꦸꦝꦭ꧀ꦔꦧꦼꦏ꧀ꦠꦶꦩꦫꦁꦲꦏꦸ꧉​

^8:2 ꦪꦺꦤ꧀ꦲꦺꦴꦫꦏꦺꦴꦏ꧀ꦭꦶꦭꦤꦶꦭꦸꦔ꧈​ꦤꦼꦒꦫꦲꦶꦏꦶꦧꦏꦭ꧀ꦢꦏ꧀ꦝꦮꦃꦲꦶꦮꦼꦮꦼꦭꦏ꧀ꦏꦺꦴꦝꦺꦴꦏ꧀꧈​ꦩꦶꦤꦁꦏꦥꦲꦸꦏꦸꦩ꧀ꦩꦤ꧀꧉​

^8:3 ꦧꦼꦔꦮꦤ꧀꧊ꦤꦶꦭ꧀ꦧꦏꦭ꧀ꦏꦼꦧꦏ꧀ꦏꦺꦴꦝꦺꦴꦏ꧀;ꦏꦺꦮꦤ꧀ꦏꦺꦮꦤ꧀ꦩꦲꦸꦧꦏꦭ꧀ꦩꦼꦤ꧀ꦠꦱ꧀ꦱꦏꦲꦶꦁꦧꦚꦸ꧈​ꦧꦚ꧀ꦗꦸꦂꦩ꧀ꦭꦼꦧꦸꦲꦶꦁꦏꦼꦝꦠꦺꦴꦤ꧀ꦩꦸ꧈​ꦲꦶꦁꦏꦩꦂꦏꦩꦂꦭꦤ꧀ꦥꦼꦠꦸꦫꦺꦴꦤ꧀;ꦲꦺꦴꦩꦃꦲꦺꦴꦩꦃꦲꦺꦥꦫꦥꦼꦁꦒꦼꦝꦺꦭꦤ꧀ꦫꦏꦾꦠ꧀ꦩꦸ꧈​ꦩꦼꦁꦏꦺꦴꦤꦺꦴꦲꦸꦒꦲꦶꦁꦥꦮꦺꦴꦤ꧀ꦭꦤ꧀ꦲꦶꦁꦥꦚ꧀ꦕꦶꦥꦚ꧀ꦕꦶ꧉​

^8:4 ꦏꦺꦴꦝꦺꦴꦏ꧀ꦏꦺꦴꦝꦺꦴꦏ꧀ꦩꦲꦸꦧꦏꦭ꧀ꦚꦺꦴꦭꦺꦴꦠ꧀ꦠꦶꦲꦮꦏ꧀ꦩꦸ꧈​ꦲꦮꦏ꧀ꦏꦺꦫꦏꦾꦠ꧀ꦩꦸꦱꦂꦠꦲꦮꦏ꧀ꦏꦺꦩꦼꦤ꧀ꦠꦼꦫꦶꦩꦸꦏꦧꦺꦃ꧉’"​

^8:5 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ꧊ꦩꦸꦱ꧈​"ꦲꦫꦸꦤ꧀ꦏꦺꦴꦤ꧀ꦤꦼꦤ꧀ꦔꦕꦸꦁꦔꦏꦺꦠꦼꦏꦼꦤꦺꦲꦶꦁꦱꦤ꧀ꦝꦸꦮꦸꦂꦫꦶꦁꦏꦭꦶꦏꦭꦶ꧈​ꦏꦭꦺꦤ꧀ꦏꦭꦺꦤ꧀ꦱꦂꦠꦧ꧀ꦭꦸꦩ꧀ꦧꦁꦧ꧀ꦭꦸꦩ꧀ꦧꦁꦏꦉꦧꦺꦤ꧀ꦏꦺꦴꦝꦺꦴꦏ꧀ꦏꦺꦴꦝꦺꦴꦏ꧀ꦥꦝꦠꦼꦏꦭꦤ꧀ꦔꦼꦧꦏ꧀ꦏꦶꦠꦤꦃ꧊ꦩꦺꦱꦶꦂ꧉"​

^8:6 ꦲꦫꦸꦤ꧀ꦤꦸꦭꦶꦔꦕꦸꦁꦔꦏꦺꦠꦼꦏꦼꦤꦺꦲꦶꦁꦱꦤ꧀ꦝꦸꦮꦸꦂꦫꦶꦁꦧꦚꦸꦏꦧꦺꦃ;ꦏꦺꦴꦝꦺꦴꦏ꧀ꦏꦺꦴꦝꦺꦴꦏ꧀ꦧꦚ꧀ꦗꦸꦂꦥꦝꦠꦼꦏꦔꦼꦧꦏ꧀ꦏꦶꦠꦤꦃ꧊ꦩꦺꦱꦶꦂ꧉​

^8:7 ꦥꦫꦠꦸꦏꦁꦱꦶꦲꦶꦂꦱꦿꦤꦗꦥꦩꦤ꧀ꦠꦿꦤꦺꦲꦶꦪꦧꦶꦱꦩꦼꦠꦺꦴꦏ꧀ꦏꦏꦺꦏꦺꦴꦝꦺꦴꦏ꧀ꦏꦺꦴꦝꦺꦴꦏ꧀ꦩꦿꦠꦤꦶꦠꦤꦃ꧊ꦩꦺꦱꦶꦂ꧉​

^8:8 ꦱꦁꦥꦿꦶꦔꦺꦴꦤ꧀ꦧꦚ꧀ꦗꦸꦂꦤꦶꦩ꧀ꦧꦭ꧀ꦭꦶ꧊ꦩꦸꦱꦭꦤ꧀ꦲꦫꦸꦤ꧀꧈​ꦝꦮꦸꦃꦲꦺ꧈​"ꦚꦼꦚꦸꦮꦸꦤ꧀ꦤꦩꦫꦁꦄꦭ꧀ꦭꦃꦱꦸꦥꦪꦥꦚ꧀ꦗꦼꦤꦼꦁꦔꦤ꧀ꦤꦺꦔꦶꦭꦁꦔꦶꦏꦺꦴꦝꦺꦴꦏ꧀ꦏꦺꦴꦝꦺꦴꦏ꧀ꦲꦶꦏꦶ;ꦲꦏꦸꦧꦏꦭ꧀ꦔ꧀ꦭꦶꦭꦤꦶꦧꦁꦱꦩꦸꦭꦸꦔꦱꦲꦺꦴꦱ꧀ꦏꦸꦂꦧꦤ꧀ꦩꦫꦁꦄꦭ꧀ꦭꦃ!"

^8:9 ꧊ꦩꦸꦱꦩꦠꦸꦂ꧈​"ꦏꦤ꧀ꦛꦶꦧꦶꦔꦃꦲꦶꦁꦩꦤꦃꦏꦸꦭꦧꦝꦺꦤ꧀ꦢꦼꦢꦺꦴꦔꦏꦒꦼꦩ꧀ꦱꦁꦥꦿꦧꦸ꧈​ꦥꦫꦥꦼꦔꦒꦼꦁꦱꦲꦫꦏꦾꦠ꧀ꦥꦚ꧀ꦗꦼꦤꦼꦁꦔꦤ꧀꧉​ꦏꦺꦴꦝꦺꦴꦏ꧀ꦏꦺꦴꦝꦺꦴꦏ꧀ꦩꦼꦤꦶꦏꦤꦸꦤ꧀ꦠꦼꦤ꧀ꦧꦝꦺꦏꦠꦸꦩ꧀ꦥꦼꦱ꧀꧈​ꦏꦼꦗꦮꦶꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦧꦼꦔꦮꦤ꧀꧊ꦤꦶꦭ꧀꧉​ꦱꦁꦥꦿꦧꦸꦏꦸꦭꦲꦠꦸꦂꦫꦶꦤꦼꦠꦼꦥ꧀ꦥꦏꦼꦤ꧀ꦮꦼꦏ꧀ꦢꦭ꧀ꦭꦶꦥꦸꦤ꧀ꦩ꧀ꦧꦺꦚ꧀ꦗꦶꦁꦩꦼꦤꦥꦲꦼꦁꦒꦺꦤ꧀ꦏꦸꦭꦏꦼꦢꦃꦤ꧀ꦢꦺꦴꦔꦏ꧀ꦏꦏꦼꦤ꧀ꦥꦚ꧀ꦗꦼꦤꦼꦁꦔꦤ꧀꧉"​

^8:10 ꦝꦮꦸꦃꦲꦺꦫꦗꦲꦶꦁ꧊ꦩꦺꦱꦶꦂ꧈​"ꦤ꧀ꦢꦼꦢꦺꦴꦔꦲꦱꦺꦱꦸꦏ꧀!"ꦲꦠꦸꦂꦫꦺ꧊ꦩꦸꦱ꧈​"ꦏꦸꦭꦧꦝꦺꦔꦺꦱ꧀ꦠꦺꦴꦏ꧀ꦏꦏꦼꦤ꧀꧈​ꦱꦁꦥꦿꦧꦸꦧꦝꦺꦩꦶꦂꦱ꧈​ꦧꦶꦭꦶꦃꦩ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦄꦭ꧀ꦭꦃꦱꦤꦺꦱ꧀ꦱꦶꦥꦸꦤ꧀꧉​ꦏꦼꦗꦮꦶꦥꦔꦺꦫꦤ꧀꧈​ꦄꦭ꧀ꦭꦃꦏꦸꦭ꧉​

^8:11 ꦱꦁꦥꦿꦧꦸ꧈​ꦥꦫꦥꦼꦔꦒꦼꦁꦱꦂꦠꦫꦏꦾꦠ꧀ꦧꦝꦺꦭꦸꦮꦂꦱꦏꦶꦁꦒꦁꦒꦸꦮꦤ꧀ꦤꦶꦁꦏꦺꦴꦝꦺꦴꦏ꧀ꦏꦺꦴꦝꦺꦴꦏ꧀ꦩꦼꦤꦶꦏ꧉​ꦏꦺꦴꦝꦺꦴꦏ꧀ꦏꦺꦴꦝꦺꦴꦏ꧀ꦧꦝꦺꦲꦶꦕꦭ꧀ꦱꦼꦢꦪꦏꦼꦗꦮꦶꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦧꦼꦔꦮꦤ꧀꧊ꦤꦶꦭ꧀꧉"​

^8:12 ꧊ꦩꦸꦱꦭꦤ꧀ꦲꦫꦸꦤ꧀ꦧꦚ꧀ꦗꦸꦂꦩꦸꦤ꧀ꦢꦸꦂ꧈​ꦱꦂꦠꦤ꧀ꦢꦼꦢꦺꦴꦔꦩꦫꦁꦄꦭ꧀ꦭꦃꦚꦸꦮꦸꦤ꧀ꦲꦶꦭꦁꦔꦺꦏꦺꦴꦝꦺꦴꦏ꧀ꦏꦺꦴꦝꦺꦴꦏ꧀ꦩꦲꦸ꧉​

^8:13 ꦒꦸꦱ꧀ꦠꦶꦄꦭ꧀ꦭꦃꦚꦼꦩ꧀ꦧꦢꦤꦶꦥꦚꦸꦮꦸꦤ꧀ꦤꦺ꧊ꦩꦸꦱ꧈​ꦩꦸꦭꦏꦺꦴꦝꦺꦴꦏ꧀ꦏꦺꦴꦝꦺꦴꦏ꧀ꦲꦶꦁꦲꦺꦴꦩꦃꦲꦺꦴꦩꦃ꧈​ꦲꦶꦁꦥꦼꦏꦫꦁꦔꦤ꧀ꦭꦤ꧀ꦲꦶꦁꦥꦠꦼꦒꦭ꧀ꦭꦤ꧀ꦥꦝꦩꦠꦶꦏꦧꦺꦃ꧉​

^8:14 ꦧꦛꦁꦔꦺꦧꦚ꧀ꦗꦸꦂꦢꦶꦏ꧀ꦭꦸꦩ꧀ꦥꦸꦏ꧀ꦏꦏꦺꦔꦤ꧀ꦠꦶꦔꦸꦤ꧀ꦝꦸꦁꦲꦸꦤ꧀ꦝꦸꦁ꧈​ꦠꦼꦩꦃꦱꦤꦼꦒꦫ꧊ꦩꦺꦱꦶꦂꦏꦧꦺꦃꦲꦩ꧀ꦧꦸꦤꦺꦧꦕꦶꦤ꧀꧉​

^8:15 ꦤꦭꦶꦏꦏꦺꦴꦝꦺꦴꦏ꧀ꦏꦺꦴꦝꦺꦴꦏ꧀ꦩꦲꦸꦮꦶꦱ꧀ꦥꦝꦩꦠꦶ꧈​ꦫꦗꦲꦶꦁ꧊ꦩꦺꦱꦶꦂꦠꦼꦠꦼꦥ꧀ꦩꦁꦏꦺꦴꦠ꧀ꦠꦏꦺꦒꦭꦶꦃꦲꦺ꧉​ꦭꦤ꧀꧈​ꦏꦪꦱꦶꦁꦢꦶꦔꦤ꧀ꦢꦶꦏꦏ꧀ꦏꦏꦺꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃ꧈​ꦠꦼꦠꦼꦥ꧀ꦲꦺꦴꦫꦩꦶꦪꦂꦱꦏ꧀ꦏꦏꦺꦲꦠꦸꦂꦫꦺ꧊ꦩꦸꦱꦭꦤ꧀ꦲꦫꦸꦤ꧀꧉​

^8:16 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦔꦤ꧀ꦢꦶꦏꦩꦫꦁ꧊ꦩꦸꦱ꧈​"ꦲꦫꦸꦤ꧀ꦏꦺꦴꦤ꧀ꦤꦼꦤ꧀ꦚꦧꦼꦠ꧀ꦠꦏꦺꦠꦼꦏꦼꦤ꧀ꦩꦸꦲꦶꦁꦊꦧꦸꦤꦺꦧꦸꦩꦶ꧈​ꦱꦸꦥꦪꦊꦧꦸꦩꦲꦸꦢꦢꦶꦊꦩꦸꦢ꧀ꦔꦼꦧꦏ꧀ꦏꦶꦠꦤꦃ꧊ꦩꦺꦱꦶꦂꦏꦧꦺꦃ!"

^8:17 ꧊ꦩꦸꦱꦭꦤ꧀ꦲꦫꦸꦤ꧀ꦧꦚ꧀ꦗꦸꦂꦥꦝꦔꦺꦱ꧀ꦠꦺꦴꦏ꧀ꦏꦏꦺꦱꦝꦮꦸꦃꦲꦺꦄꦭ꧀ꦭꦃ꧉​ꦢꦺꦤꦺꦲꦫꦸꦤ꧀ꦔꦕꦸꦁꦔꦏꦺꦠꦼꦏꦼꦤꦺ꧈​ꦤꦸꦭꦶꦚꦧꦼꦠ꧀ꦠꦏꦺꦠꦼꦏꦼꦤ꧀ꦩꦲꦸꦲꦶꦁꦊꦧꦸꦤꦺꦧꦸꦩꦶ꧉​ꦊꦧꦸꦩꦲꦸꦢꦢꦶꦊꦩꦸꦢ꧀ꦭꦤ꧀ꦥꦝꦔꦿꦺꦴꦪꦺꦴꦏ꧀ꦩꦤꦸꦁꦱꦭꦤ꧀ꦏꦺꦮꦤ꧀꧉​ꦲꦃꦲ꧀ꦭꦶꦱꦶꦲꦶꦂꦥꦝꦤꦤ꧀ꦝꦶꦁꦔꦶ;ꦥꦝꦏꦼꦥꦺꦔꦶꦤ꧀ꦩꦼꦠꦺꦴꦏ꧀ꦏꦏꦺꦊꦩꦸꦢ꧀꧈​ꦤꦁꦔꦶꦁꦲꦺꦴꦫꦧꦶꦱ꧉​ꦥꦫꦩꦤꦸꦁꦱꦭꦤ꧀ꦏꦺꦮꦤ꧀ꦠꦼꦠꦼꦥ꧀ꦢꦶꦏꦿꦺꦴꦪꦺꦴꦏ꧀ꦲꦶꦁꦊꦩꦸꦢ꧀꧉​

^8:18 ꦥꦫꦲꦃꦲ꧀ꦭꦶꦱꦶꦲꦶꦂꦥꦝꦤꦤ꧀ꦝꦶꦁꦔꦶ;ꦥꦝꦏꦼꦥꦺꦔꦶꦤ꧀ꦩꦼꦠꦺꦴꦏ꧀ꦏꦏꦺꦊꦩꦸꦢ꧀꧈​ꦤꦁꦔꦶꦁꦲꦺꦴꦫꦧꦶꦱ꧉​ꦥꦫꦩꦤꦸꦁꦱꦭꦤ꧀ꦏꦺꦮꦤ꧀ꦠꦼꦠꦼꦥ꧀ꦢꦶꦏꦿꦺꦴꦪꦺꦴꦏ꧀ꦲꦶꦁꦊꦩꦸꦢ꧀꧉​

^8:19 ꦥꦫꦲꦃꦲ꧀ꦭꦶꦱꦶꦲꦶꦂꦧꦚ꧀ꦗꦸꦂꦥꦝꦩꦠꦸꦂꦩꦫꦁꦱꦁꦥꦿꦶꦔꦺꦴꦤ꧀꧈​"ꦩꦼꦤꦶꦏꦥꦽꦠꦤ꧀ꦝꦱꦏꦶꦁꦄꦭ꧀ꦭꦃꦥꦶꦪꦩ꧀ꦧꦏ꧀꧉"​ꦲꦺꦮꦢꦺꦤꦺꦱꦁꦥꦿꦶꦔꦺꦴꦤ꧀ꦠꦼꦠꦼꦥ꧀ꦲꦺꦴꦫꦏꦼꦂꦱꦩꦶꦪꦂꦱꦏ꧀ꦏꦏꦺꦲꦠꦸꦂꦫꦺ꧊ꦩꦸꦱꦭꦤ꧀ꦲꦫꦸꦤ꧀꧈​ꦥꦝꦏꦫꦺꦴꦱꦶꦁꦮꦶꦱ꧀ꦢꦶꦔꦤ꧀ꦢꦶꦏꦏ꧀ꦏꦏꦺꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃ꧉​

^8:20 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ꧊ꦩꦸꦱ꧈​"ꦱꦺꦱꦸꦏ꧀ꦭꦸꦔꦲꦱꦶꦁꦲꦺꦱꦸꦏ꧀ꦤꦼꦩꦺꦴꦤ꧀ꦤꦤꦱꦁꦥꦿꦶꦔꦺꦴꦤ꧀ꦲꦤꦲꦶꦁꦏꦭꦶ꧉​ꦲꦠꦸꦂꦤꦥꦔꦤ꧀ꦢꦶꦏꦲꦶꦏꦶ꧈​‘ꦲꦸꦩꦠ꧀ꦏꦸ ꦭꦶꦭꦤꦤꦔꦧꦼꦏ꧀ꦠꦶꦩꦫꦁꦲꦏꦸ꧉​

^8:21 ꦪꦺꦤ꧀ꦏꦺꦴꦮꦺꦲꦺꦴꦫꦔ꧀ꦭꦶꦭꦤꦶ꧈​ꦲꦏꦸꦧꦏꦭ꧀ꦤꦼꦏꦏ꧀ꦏꦏꦺꦭꦊꦂꦔꦼꦧꦾꦸꦏ꧀ꦏꦶꦏꦺꦴꦮꦺ꧈​ꦥꦫꦥꦼꦁꦒꦼꦝꦺꦱꦂꦠꦫꦏꦾꦠ꧀ꦩꦸ꧉​ꦲꦺꦴꦩꦃꦲꦺꦮꦺꦴꦁ꧊ꦩꦺꦱꦶꦂꦧꦏꦭ꧀ꦥꦝꦏꦼꦧꦏ꧀ꦭꦊꦂ꧉​

^8:22 ꦤꦁꦔꦶꦁꦲꦏꦸꦧꦏꦭ꧀ꦩ꧀ꦧꦺꦢꦏ꧀ꦏꦏꦺꦮꦶꦭꦪꦃ꧊ꦒꦺꦴꦱꦺꦤ꧀꧈​ꦥꦁꦒꦺꦴꦤ꧀ꦤꦤ꧀ꦤꦺꦲꦸꦩꦠ꧀ꦏꦸ꧉​ꦲꦶꦁꦏꦤꦧꦏꦭ꧀ꦲꦺꦴꦫꦲꦤꦭꦊꦂ꧈​ꦱꦸꦥꦪꦏꦺꦴꦮꦺꦏꦧꦺꦃꦥꦝꦔꦼꦂꦠꦶꦪꦺꦤ꧀ꦲꦏꦸ꧈​ꦄꦭ꧀ꦭꦃ꧈​ꦏꦁꦭꦒꦶꦠꦸꦩꦶꦤ꧀ꦢꦏ꧀ꦲꦶꦁꦤꦼꦒꦫꦏꦺꦤꦺ꧉​

^8:23 ꦲꦏꦸꦧꦏꦭ꧀ꦩ꧀ꦧꦺꦢꦏ꧀ꦏꦏꦺꦲꦸꦩꦠ꧀ꦏꦸꦏꦫꦺꦴꦫꦏꦾꦠ꧀ꦩꦸ꧉’"​

^8:24 ꦒꦸꦱ꧀ꦠꦶꦄꦭ꧀ꦭꦃꦤꦼꦏꦏ꧀ꦏꦏꦺꦭꦊꦂꦲꦏꦺꦃꦧꦔꦼꦠ꧀ꦲꦶꦁꦏꦿꦠꦺꦴꦤ꧀ꦭꦤ꧀ꦲꦶꦁꦲꦺꦴꦩꦃꦲꦺꦥꦫꦲꦧ꧀ꦢꦶꦤꦺꦱꦁꦥꦿꦶꦔꦺꦴꦤ꧀꧉​ꦱꦤꦼꦒꦫ꧊ꦩꦺꦱꦶꦂꦏꦧꦺꦃꦤꦤ꧀ꦝꦁꦱꦁꦱꦫꦧꦔꦼꦠ꧀ꦩꦼꦂꦒꦱꦏꦭꦊꦂꦭꦊꦂꦩꦲꦸ꧉​

^8:25 ꦱꦁꦥꦿꦶꦔꦺꦴꦤ꧀ꦧꦚ꧀ꦗꦸꦂꦤꦶꦩ꧀ꦧꦭ꧀ꦭꦶ꧊ꦩꦸꦱꦭꦤ꧀ꦲꦫꦸꦤ꧀ꦱꦂꦠꦝꦮꦸꦃ꧈​"ꦱꦲꦺꦴꦱ꧀ꦱꦏꦸꦂꦧꦤ꧀ꦩꦫꦁꦲꦭ꧀ꦭꦃꦩꦸꦲꦤꦲꦶꦁꦤꦼꦒꦫꦏꦺꦤꦺꦮꦲꦺ꧉"​

^8:26 "ꦩꦼꦤꦶꦏꦩ꧀ꦧꦺꦴꦠꦼꦤ꧀ꦱꦒꦼꦢ꧀ꦏꦸꦭꦠꦶꦤ꧀ꦢꦏ꧀ꦏꦏꦼꦤ꧀꧈"​ꦲꦠꦸꦂꦮꦁꦱꦸꦭ꧀ꦭꦤ꧀ꦤꦺ꧊ꦩꦸꦱ꧈​"ꦱꦼꦧꦧ꧀ꦠꦶꦪꦁꦠꦶꦪꦁ꧊ꦩꦺꦱꦶꦂꦧꦝꦺꦱꦼꦫꦶꦏ꧀ꦩꦤꦃꦲꦶꦥꦸꦤ꧀꧈​ꦩꦼꦂꦒꦶꦱꦏꦶꦁꦏꦺꦮꦤ꧀ꦲꦶꦁꦏꦁꦏꦸꦭꦱꦲꦺꦴꦱ꧀ꦱꦏꦼꦤ꧀ꦝꦠꦼꦁꦄꦭ꧀ꦭꦃꦏꦸꦭ꧉​ꦩꦼꦤꦮꦶꦏꦸꦭꦚꦼꦩ꧀ꦧꦼꦭꦺꦃꦏꦺꦮꦤ꧀ꦱꦂꦠꦏꦸꦭꦢꦩꦼꦭ꧀ꦏꦸꦂꦧꦤ꧀ꦲꦶꦁꦥꦁꦒꦺꦤ꧀ꦤꦤ꧀ꦤꦶꦥꦸꦤ꧀ꦠꦶꦪꦁ꧊ꦩꦺꦱꦶꦂꦔꦿꦶꦏꦶ꧈​ꦩꦁꦏꦠꦶꦪꦁꦩꦼꦤꦶꦏꦱꦩꦶꦱꦼꦔꦶꦠ꧀ꦝꦠꦼꦁꦏꦸꦭ꧈​ꦠꦼꦩ꧀ꦠꦸꦧꦝꦺꦩ꧀ꦧꦼꦤ꧀ꦠꦸꦂꦫꦶꦱꦺꦭꦝꦠꦼꦁꦏꦸꦭꦱꦧꦁꦱ꧈​ꦔꦤ꧀ꦠꦺꦴꦱ꧀ꦥꦼꦗꦃ꧉​

^8:27 ꦏꦸꦭꦏꦼꦢꦃꦏꦺꦱꦃꦝꦠꦼꦁꦲꦫꦲꦫꦱꦩꦸꦤ꧀ꦲꦶꦁꦏꦁꦠꦼꦧꦶꦃꦲꦶꦥꦸꦤ꧀ꦭꦩ꧀ꦥꦃꦲꦤ꧀ꦠꦶꦒꦁꦢꦶꦤ꧀ꦠꦼꦤ꧀ꦥꦽꦭꦸꦱꦲꦺꦴꦱ꧀ꦏꦸꦂꦧꦤ꧀ꦝꦠꦼꦁꦄꦭ꧀ꦭꦃꦏꦸꦭ꧈​ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦢꦶꦥꦸꦤ꧀ꦝꦮꦸꦃꦲꦏꦼꦤ꧀ꦝꦠꦼꦁꦏꦸꦭ꧉"​

^8:28 ꦱꦁꦥꦿꦶꦔꦺꦴꦤ꧀ꦤꦸꦭꦶꦝꦮꦸꦃ꧈​"ꦲꦏꦸꦔ꧀ꦭꦶꦭꦤꦶꦏꦺꦴꦮꦺꦏꦧꦺꦃꦭꦸꦔꦱꦲꦺꦴꦱ꧀ꦏꦸꦂꦧꦤ꧀ꦩꦫꦁꦥꦔꦺꦫꦤ꧀꧈​ꦲꦭ꧀ꦭꦃꦩꦸ꧈​ꦲꦁꦒꦼꦂꦲꦗꦲꦢꦺꦴꦃꦲꦢꦺꦴꦃ꧉​ꦲꦏꦸꦪꦢꦺꦴꦔꦏ꧀ꦤ!"

^8:29 ꦲꦠꦸꦂꦫꦺ꧊ꦩꦸꦱ꧈​"ꦱꦥꦼꦁꦏꦼꦂꦏꦸꦭꦱꦏꦶꦁꦔꦿꦶꦏꦶ꧈​ꦏꦸꦭꦧꦝꦺꦤ꧀ꦢꦼꦢꦺꦴꦔꦝꦠꦼꦁꦒꦸꦱ꧀ꦠꦶꦄꦭ꧀ꦭꦃ꧈​ꦱꦸꦥꦢꦺꦴꦱ꧀ꦩ꧀ꦧꦺꦚ꧀ꦗꦶꦁꦲꦺꦚ꧀ꦗꦶꦁꦭꦊꦂꦭꦊꦂꦩꦼꦤꦶꦏꦲꦶꦕꦭ꧀꧈​ꦩ꧀ꦧꦺꦴꦠꦼꦤ꧀ꦔ꧀ꦒꦁꦒꦸꦱꦁꦥꦿꦧꦸ꧈​ꦥꦫꦥꦼꦔꦒꦼꦁꦱꦂꦠꦫꦏꦾꦠ꧀ꦲꦶꦁ꧊ꦩꦺꦱꦶꦂ꧉​ꦤꦁꦔꦶꦁꦱꦁꦥꦿꦧꦸꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦩ꧀ꦧ꧀ꦭꦺꦚ꧀ꦗꦤꦶꦩꦭꦶꦃꦱꦂꦠꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦔꦭꦁꦲꦭꦁꦔꦶꦲꦼꦁꦒꦺꦤ꧀ꦤꦶꦥꦸꦤ꧀ꦧꦁꦱ꧊ꦆꦱꦿꦲꦺꦭ꧀ꦱꦲꦺꦴꦱ꧀ꦏꦸꦂꦧꦤ꧀ꦝꦠꦼꦁꦒꦸꦱ꧀ꦠꦶꦄꦭ꧀ꦭꦃ꧉"​

^8:30 ꧊ꦩꦸꦱꦩꦸꦤ꧀ꦢꦸꦂ꧈​ꦧꦚ꧀ꦗꦸꦂꦤ꧀ꦢꦼꦢꦺꦴꦔꦩꦫꦁꦄꦭ꧀ꦭꦃ꧈​

^8:31 ꦭꦤ꧀ꦄꦭ꧀ꦭꦃꦚꦼꦩ꧀ꦧꦢꦤꦶꦥꦚꦸꦮꦸꦤ꧀ꦤꦺ꧊ꦩꦸꦱ꧉​ꦭꦊꦂꦭꦊꦂꦩꦲꦸꦱꦸꦩꦶꦁꦏꦶꦂ꧉​ꦲꦺꦴꦫꦲꦤꦭꦊꦂꦱꦶꦗꦶꦱꦶꦗꦶꦪꦱꦶꦁꦏꦺꦫꦶ꧉​

^8:32 ꦤꦁꦔꦶꦁꦫꦗ꧊ꦩꦺꦱꦶꦂꦠꦼꦠꦼꦥ꧀ꦩꦁꦏꦺꦴꦠ꧀ꦠꦏꦺꦲꦠꦶꦤꦺꦭꦤ꧀ꦲꦺꦴꦫꦔ꧀ꦭꦶꦭꦤꦶꦧꦁꦱ꧊ꦆꦱꦿꦲꦺꦭ꧀ꦭꦸꦔ꧉​