Alkitab/Purwaning Dumadi/13

^13:1 ​꧊ꦄꦧꦿꦩ꧀ꦭꦤ꧀ꦧꦺꦴꦗꦺꦴꦤꦺꦤꦸꦭꦶꦧꦸꦝꦭ꧀ꦱꦏꦠꦤꦃ​꧊ꦩꦺꦱꦶꦂ꧈​ꦔ꧀ꦒꦮꦱꦧꦫꦁꦢꦂꦧꦺꦏ꧀ꦏꦺꦏꦧꦺꦃ꧈​ꦧꦭꦶꦩꦼꦚꦁꦠꦤꦃ​꧊ꦏꦺꦤꦲꦤ꧀ꦱꦶꦱꦶꦃ​꧊ꦏꦶꦢꦸꦭ꧀꧉​​꧊ꦭꦺꦴꦠ꧀ꦲꦶꦪꦩꦺꦭꦸ꧉​

^13:2 ​꧊ꦄꦧꦿꦩ꧀ꦢꦢꦶꦮꦺꦴꦁꦱꦸꦒꦶꦃ꧉​ꦲꦶꦔꦺꦴꦤ꧀ꦲꦶꦔꦺꦴꦤ꧀ꦤꦺꦲꦏꦺꦃꦧꦔꦼꦠ꧀꧈​ꦩꦼꦁꦏꦺꦴꦤꦺꦴꦲꦸꦒꦢꦸꦮꦺꦱ꧀ꦭꦏꦭꦤ꧀ꦲꦼꦩꦱ꧀ꦱꦥꦶꦫꦁꦥꦶꦫꦁ꧉​

^13:3 ꦲꦼꦁꦒꦺꦴꦤꦺꦩꦁꦒꦺꦴꦤ꧀ꦔꦭꦶꦃꦔꦭꦶꦃ꧈​ꦔꦤ꧀ꦠꦶꦠꦼꦏꦤ꧀ꦕꦼꦝꦏ꧀ꦏꦸꦛ​꧊ꦧꦺꦠꦺꦭ꧀꧈​ꦥꦥꦤ꧀ꦱꦶꦁꦧꦶꦪꦺꦤ꧀ꦠꦲꦸꦢꦶꦲꦼꦁꦒꦺꦴꦤ꧀ꦤꦶ꧈​

^13:4 ꦪꦏꦸꦮꦶꦲꦤꦲꦶꦁꦲꦤ꧀ꦠꦫꦤꦺ​꧊ꦧꦺꦠꦺꦭ꧀ꦭꦤ꧀​꧊ꦄꦲꦶ꧈​ꦱꦶꦁꦧꦶꦪꦺꦤ꧀ꦠꦲꦸꦢꦶꦲꦼꦢꦼꦒꦩꦼꦱ꧀ꦧꦺꦃ꧉​​꧊ꦄꦧꦿꦩ꧀ꦧꦚ꧀ꦗꦸꦂꦩꦼꦩꦸꦗꦩꦫꦁꦒꦸꦱ꧀ꦠꦶꦄꦭ꧀ꦭꦃꦏꦫꦺꦴꦚꦼꦧꦸꦠ꧀ꦲꦱ꧀ꦩꦤꦺ꧉​

^13:5 ꦏꦺꦴꦕꦥ꧀ꦥ​꧊ꦭꦺꦴꦠ꧀ꦱꦶꦁꦔꦼꦠꦸꦠ꧀ꦠꦏꦺ​꧊ꦄꦧꦿꦩ꧀꧈​ꦲꦶꦪꦢꦸꦮꦺꦧꦿꦪꦠ꧀꧈​ꦧꦠꦸꦂꦠꦸꦏꦺꦴꦤ꧀꧈​ꦱꦂꦠꦲꦶꦔꦺꦴꦤ꧀ꦲꦶꦔꦺꦴꦤ꧀ꦮꦼꦝꦸꦱ꧀ꦭꦤ꧀ꦱꦥꦶꦲꦏꦺꦃ꧉​

^13:6 ꦩꦁꦏꦥꦥꦤ꧀ꦏꦺꦴꦤꦺꦴꦲꦺꦴꦫꦕꦸꦏꦸꦥ꧀ꦪꦺꦤ꧀ꦢꦶꦲꦼꦁꦒꦺꦴꦤ꧀ꦤꦶꦧꦼꦧꦉꦁꦔꦤ꧀꧈​ꦠꦼꦩꦃꦲꦤ꧀ꦱꦏꦲꦏꦺꦃꦲꦺꦲꦶꦔꦺꦴꦤ꧀ꦲꦶꦔꦺꦴꦤ꧀ꦤꦺ꧈​ꦮꦺꦴꦁꦭꦺꦴꦫꦺꦴꦩꦲꦸꦥꦝꦲꦺꦴꦫꦧꦶꦱꦤꦸꦁꦒꦭ꧀ꦱꦥꦔꦺꦴꦤ꧀ꦤꦤ꧀꧉​

^13:7 ꦥꦔꦺꦴꦤ꧀ꦤꦺ​꧊ꦄꦧꦿꦩ꧀ꦏꦫꦺꦴꦥꦔꦺꦴꦤ꧀ꦤꦺ​꧊ꦭꦺꦴꦠ꧀ꦧꦚ꧀ꦗꦸꦂꦥꦝꦠꦸꦏꦂꦫꦤ꧀꧉​ꦏꦼꦗꦧꦏꦸꦮꦶꦥꦥꦤ꧀ꦏꦺꦴꦤꦺꦴꦲꦶꦪꦢꦶꦲꦼꦁꦒꦺꦴꦤ꧀ꦤꦶꦢꦺꦤꦶꦁꦧꦁꦱ​꧊ꦏꦺꦤꦲꦤ꧀ꦭꦤ꧀ꦧꦁꦱ​꧊ꦥ꦳ꦺꦫꦶꦱ꧀꧉​

^13:8 ​꧊ꦄꦧꦿꦩ꧀ꦤꦸꦭꦶꦏꦤ꧀ꦝꦏꦫꦺꦴ​꧊ꦭꦺꦴꦠ꧀꧈​"ꦲꦏꦸꦭꦤ꧀ꦏꦺꦴꦮꦺꦫꦏ꧀ꦥꦝꦱꦼꦢꦸꦭꦸꦂ꧉​ꦪꦺꦤ꧀ꦲꦏꦸꦭꦤ꧀ꦏꦺꦴꦮꦺꦔꦤ꧀ꦠꦶꦥꦝꦥꦢꦸ꧈​ꦏꦸꦮꦶꦲꦺꦴꦫꦧꦼꦕꦶꦏ꧀;ꦱꦼꦩꦺꦴꦤꦺꦴꦲꦸꦒꦥꦔꦺꦴꦤ꧀ꦏꦸꦭꦤ꧀ꦥꦔꦺꦴꦤ꧀ꦩꦸ꧉​ꦠꦤꦃꦱꦤꦼꦒꦫꦲꦶꦏꦶꦫꦏ꧀ꦲꦶꦱꦶꦃꦗꦼꦩ꧀ꦧꦂ꧉​

^13:9 ꦩꦸꦭꦤꦺꦧꦼꦕꦶꦏ꧀ꦏꦺꦲꦏꦸꦭꦤ꧀ꦏꦺꦴꦮꦺꦥꦝꦥꦼꦥꦶꦱꦃꦲꦤ꧀ꦮꦲꦺ;ꦪꦺꦤ꧀ꦏꦺꦴꦮꦺꦔꦶꦮ꧈​ꦲꦏꦸꦢꦏ꧀ꦤꦼꦁꦔꦼꦤ꧀;ꦪꦺꦤ꧀ꦏꦺꦴꦮꦺꦤꦼꦔꦼꦤ꧀꧈​ꦲꦏꦸꦢꦏ꧀ꦔꦶꦮ꧉"​

^13:10 ​꧊ꦭꦺꦴꦠ꧀ꦩꦮꦱ꧀ꦪꦺꦤ꧀ꦠꦤꦃꦔꦫꦺꦱꦏꦶꦮꦠꦼꦔꦼꦤ꧀ꦤꦺꦏꦭꦶ​꧊ꦪꦂꦢꦺꦤ꧀ꦔꦤ꧀ꦠꦶꦠꦼꦏꦤ꧀ꦏꦸꦛ​꧊ꦗ꦳ꦺꦴꦮꦂꦏꦸꦮꦶꦏꦧꦺꦃꦭꦺꦴꦃꦧꦔꦼꦠ꧀꧉​ꦏꦲꦺꦤ꧀ꦢꦃꦲꦤ꧀ꦤꦺꦠꦤꦃꦏꦺꦴꦤꦺꦴꦏꦪꦥꦼꦠꦩꦤ꧀ꦤꦤ꧀ꦤꦺꦄꦭ꧀ꦭꦃꦲꦸꦠꦮꦏꦪꦠꦤꦃ​꧊ꦩꦺꦱꦶꦂ꧉​꧌ꦤꦭꦶꦏꦱꦼꦩꦺꦴꦤꦺꦴ​꧊ꦱꦺꦴꦢꦺꦴꦩ꧀ꦭꦤ꧀​꧊ꦒꦺꦴꦩꦺꦴꦫꦢꦸꦫꦸꦁꦏꦫꦸꦱꦏ꧀ꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃ꧉꧍​

^13:11 ꦢꦢꦶꦤꦺ​꧊ꦭꦺꦴꦠ꧀ꦩꦶꦭꦶꦃꦠꦤꦃꦔꦫꦺꦱꦲꦸꦫꦸꦠ꧀ꦠꦺꦏꦭꦶ​꧊ꦪꦂꦢꦺꦤ꧀ꦩꦲꦸꦏꦧꦺꦃꦢꦢꦶꦢꦸꦮꦺꦏ꧀ꦏꦺ꧈​ꦧꦚ꧀ꦗꦸꦂꦧꦸꦝꦭ꧀ꦩꦼꦔꦺꦠ꧀ꦠꦤ꧀꧉​ꦩꦼꦁꦏꦺꦴꦤꦺꦴ​꧊ꦄꦧꦿꦩ꧀ꦭꦤ꧀​꧊ꦭꦺꦴꦠ꧀ꦥꦝꦥꦼꦥꦶꦱꦃꦲꦤ꧀꧉​

^13:12 ​꧊ꦄꦧꦿꦩ꧀ꦠꦼꦠꦼꦥ꧀ꦩꦁꦒꦺꦴꦤ꧀ꦲꦤꦲꦶꦁꦠꦤꦃ​꧊ꦏꦺꦤꦲꦤ꧀꧈​ꦱꦂꦠ​꧊ꦭꦺꦴꦠ꧀ꦔꦼꦁꦒꦺꦴꦤ꧀ꦤꦶꦠꦤꦃꦔꦫꦺꦱꦲꦸꦫꦸꦠ꧀ꦠꦺꦏꦭꦶ​꧊ꦪꦂꦢꦺꦤ꧀ꦭꦤ꧀ꦤꦚ꧀ꦕꦼꦧ꧀ꦧꦏꦺꦏꦺꦩꦃꦲꦺꦕꦼꦝꦏ꧀ꦏꦫꦺꦴꦏꦸꦛ​꧊ꦱꦺꦴꦢꦺꦴꦩ꧀꧉​

^13:13 ꦢꦺꦤꦺꦮꦺꦴꦁ​꧊ꦱꦺꦴꦢꦺꦴꦩ꧀ꦏꦸꦮꦶꦏꦭꦏꦸꦮꦤ꧀ꦤꦺꦲꦭꦧꦔꦼꦠ꧀ꦭꦤ꧀ꦢꦺꦴꦱꦤꦺꦱꦸꦤ꧀ꦝꦸꦭ꧀ꦭꦔꦶꦠ꧀꧉​

^13:14 ꦱꦮꦶꦱ꧀ꦱꦺ​꧊ꦭꦺꦴꦠ꧀ꦩꦶꦱꦃ꧈​ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ​꧊ꦄꦧꦿꦩ꧀꧈​"ꦔꦢꦼꦒ꧈​ꦤ꧀ꦢꦼꦊꦁꦔꦩꦼꦔꦭꦺꦴꦂꦭꦤ꧀ꦩꦼꦔꦶꦢꦸꦭ꧀꧈​ꦩꦼꦔꦺꦠ꧀ꦠꦤ꧀ꦭꦤ꧀ꦩꦼꦔꦸꦭꦺꦴꦤ꧀꧉​

^13:15 ꦠꦤꦃꦱꦶꦁꦏꦺꦴꦏ꧀ꦢꦼꦊꦁꦏꦸꦮꦶꦏꦧꦺꦃꦧꦏꦭ꧀ꦢꦏ꧀ꦥꦫꦶꦁꦔꦏꦺꦩꦫꦁꦏꦺꦴꦮꦺꦭꦤ꧀ꦠꦸꦫꦸꦤ꧀ꦩꦸ꧈​ꦱꦂꦠꦧꦏꦭ꧀ꦢꦢꦶꦢꦸꦮꦺꦏ꧀ꦏꦺꦠꦸꦫꦸꦤ꧀ꦩꦸꦲꦶꦁꦱꦼꦭꦮꦱ꧀ꦭꦮꦱ꧀ꦱꦺ꧉​

^13:16 ꦠꦸꦫꦸꦤ꧀ꦩꦸꦧꦏꦭ꧀ꦢꦏ꧀ꦒꦮꦺꦲꦏꦺꦃꦧꦔꦼꦠ꧀꧈​ꦔꦤ꧀ꦠꦶꦲꦺꦴꦫꦏꦼꦤꦢꦶꦲꦺꦠꦸꦁ꧈​ꦲꦮꦶꦠ꧀ꦏꦲꦤꦤꦺꦏꦪꦢꦺꦤꦺꦊꦧꦸꦤꦶꦁꦧꦸꦩꦶ꧉​

^13:17 ꦱꦲꦶꦏꦶꦭꦸꦔꦲ꧈​ꦠꦤꦃꦲꦶꦏꦶꦢ꧀ꦭꦗꦃꦲꦤꦱꦼꦥꦶꦫꦢꦮꦭꦤ꧀ꦲꦩ꧀ꦧꦤꦺ꧈​ꦲꦮꦶꦠ꧀ꦠꦤꦃꦲꦶꦏꦶꦧꦏꦭ꧀ꦢꦏ꧀ꦥꦫꦶꦁꦔꦏꦺꦩꦫꦁꦏꦺꦴꦮꦺ꧉"​

^13:18 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴ​꧊ꦄꦧꦿꦩ꧀ꦤꦸꦭꦶꦩ꧀ꦧꦼꦝꦺꦴꦭ꧀ꦏꦺꦩꦃꦲꦺ꧈​ꦧꦚ꧀ꦗꦸꦂꦩꦁꦒꦺꦴꦤ꧀ꦲꦶꦁꦱꦕꦼꦝꦏ꧀ꦏꦺꦮꦶꦠ꧀ꦮꦶꦠ꧀ꦠꦤ꧀ꦲꦶꦁꦏꦸꦛ​꧊ꦩꦩꦿꦺ꧈​ꦲꦺꦴꦫꦲꦢꦺꦴꦃꦱꦏ​꧊ꦲꦺꦧꦿꦺꦴꦤ꧀꧉​ꦲꦶꦁꦏꦺꦴꦤꦺꦴ​꧊ꦄꦧꦿꦩ꧀ꦧꦚ꧀ꦗꦸꦂꦔꦼꦢꦼꦒꦏꦺꦩꦼꦱ꧀ꦧꦺꦃꦏꦺꦴꦚ꧀ꦗꦸꦏ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉​