Alkitab/Purwaning Dumadi/19

^19:1 ꦤꦭꦶꦏ​꧊ꦭꦺꦴꦠ꧀ꦤꦸꦗꦸꦭꦸꦁꦒꦸꦃꦲꦤ꧀ꦲꦤꦲꦶꦁꦒꦥꦸꦫꦤꦶꦁꦏꦸꦛ​꧊ꦱꦺꦴꦢꦺꦴꦩ꧀ꦲꦶꦁꦮꦪꦃꦱꦺꦴꦫꦺ꧈​ꦩꦭꦲꦺꦏꦠ꧀ꦭꦺꦴꦫꦺꦴꦩꦲꦸꦫꦮꦸꦃꦩꦿꦺꦴꦤꦺꦴ꧉​ꦧꦉꦁꦮꦼꦫꦸꦃꦩꦭꦲꦺꦏꦠ꧀ꦩꦲꦸ​꧊ꦭꦺꦴꦠ꧀ꦲꦺꦁꦒꦭ꧀ꦲꦺꦁꦒꦭ꧀ꦩꦼꦚꦠ꧀ꦩꦼꦛꦸꦏ꧀ꦏꦏꦺꦭꦤ꧀ꦩ꧀ꦧꦒꦺꦏ꧀ꦏꦏꦺꦏ꧀ꦭꦮꦤ꧀ꦏꦸꦂꦩꦠ꧀꧉​

^19:2 ꦲꦠꦸꦂꦫꦺ꧈​"ꦩ꧀ꦧꦺꦴꦏ꧀ꦧꦶꦭꦶꦃꦮꦺꦴꦤ꧀ꦠꦼꦤ꧀ꦝꦁꦔꦤ꧀ꦲꦶꦁꦥꦼꦁꦒꦭꦶꦃ꧈​ꦱꦸꦩꦁꦒꦏꦸꦭꦲꦠꦸꦂꦫꦶꦥꦶꦤꦫꦏ꧀ꦠꦸꦮꦶꦤ꧀ꦚꦂꦫꦺꦲꦶꦁꦥꦺꦴꦤ꧀ꦝꦺꦴꦏ꧀ꦏꦸꦭ;ꦱꦩꦼꦤꦶꦏꦏꦸꦭꦲꦠꦸꦂꦫꦶꦱꦶꦫꦩ꧀ꦱꦶꦫꦩ꧀ꦫꦸꦩꦶꦪꦶꦤ꧀꧈​ꦩ꧀ꦧꦺꦚ꧀ꦗꦶꦁꦲꦺꦚ꧀ꦗꦶꦁꦔ꧀ꦭꦗꦼꦁꦔꦏꦼꦤ꧀ꦠꦶꦤ꧀ꦢꦏ꧀꧉"​ꦮꦁꦱꦸꦭ꧀ꦭꦤ꧀ꦤꦺꦩꦭꦲꦺꦏꦠ꧀ꦩꦲꦸ꧈​"ꦲꦺꦴꦫ꧈​ꦲꦏꦸꦲꦉꦥ꧀ꦠꦸꦫꦸꦲꦤꦲꦶꦁꦫꦠꦤ꧀ꦏꦺꦤꦺꦮꦲꦺ꧉"​

^19:3 ꦤꦁꦔꦶꦁꦱꦫꦺꦃꦤꦺ​꧊ꦭꦺꦴꦠ꧀ꦲꦢꦽꦁꦧꦔꦼꦠ꧀ꦥꦚꦸꦮꦸꦤ꧀ꦤꦺ꧈​ꦥꦫꦩꦭꦲꦺꦏꦠ꧀ꦩꦲꦸꦤꦸꦭꦶꦩ꧀ꦭꦼꦧꦼꦠ꧀ꦲꦶꦁꦲꦺꦴꦩꦃꦲꦺ꧈​ꦧꦚ꧀ꦗꦸꦂꦢꦶꦲꦺꦴꦭꦃꦲꦺꦴꦭꦃꦲꦏꦺꦫꦺꦴꦠꦶꦠꦤ꧀ꦥꦫꦒꦶ꧈​ꦤꦸꦭꦶꦥꦝꦩꦁꦔꦤ꧀꧉​

^19:4 ꦏꦺꦴꦕꦥ꧀ꦥꦧꦉꦁꦥꦫꦠꦩꦸꦩꦲꦸꦭꦒꦶꦮꦲꦺꦲꦉꦥ꧀ꦥꦝꦩꦥꦤ꧀ꦱꦫꦺ꧈​ꦲꦺꦴꦩꦃꦲꦺ​꧊ꦭꦺꦴꦠ꧀ꦢꦶꦏꦼꦥꦸꦁꦢꦺꦤꦶꦁꦮꦺꦴꦁꦮꦺꦴꦁ​꧊ꦱꦺꦴꦢꦺꦴꦩ꧀ꦠꦸꦮꦲꦼꦤꦺꦴꦩ꧀꧈​ꦲꦺꦴꦫꦲꦤꦱꦶꦁꦏꦺꦫꦶ꧉​

^19:5 ꦮꦺꦴꦁꦮꦺꦴꦁꦩꦲꦸꦥꦝꦔꦸꦤ꧀ꦢꦁꦲꦸꦤ꧀ꦢꦁ꧈​ꦠꦼꦩ꧀ꦧꦸꦁꦔꦺ꧈​"ꦲꦼꦤ꧀ꦢꦶꦮꦺꦴꦁꦔꦺꦱꦶꦁꦥꦝꦔꦶꦤꦼꦥ꧀ꦲꦶꦁꦲꦺꦴꦩꦃꦩꦸꦏꦺꦤꦺ꧉​ꦮꦼꦠꦺꦴꦏ꧀ꦤ꧈​ꦲꦉꦥ꧀ꦢꦏ꧀ꦠꦸꦫꦺꦴꦤ꧀ꦤꦶ!"

^19:6 ​꧊ꦭꦺꦴꦠ꧀ꦤꦸꦭꦶꦩꦼꦠꦸ;ꦭꦮꦁꦔꦺꦢꦶꦠꦸꦠꦸꦥ꧀ꦩꦼꦤꦺꦃ꧈​ꦧꦚ꧀ꦗꦸꦂꦏꦤ꧀ꦝꦏꦫꦺꦴꦮꦺꦴꦁꦮꦺꦴꦁ​꧊ꦱꦺꦴꦢꦺꦴꦩ꧀꧈​

^19:7 ꦠꦼꦩ꧀ꦧꦸꦁꦔꦺ꧈​"ꦥꦫꦱꦼꦝꦺꦫꦺꦏ꧀꧈​ꦱꦩ꧀ꦥꦸꦤ꧀ꦠꦔ꧀ꦭꦩ꧀ꦥꦃꦲꦶꦲꦶꦁꦏꦁꦤꦶꦱ꧀ꦛꦩꦼꦏꦠ꧀ꦠꦼꦤ꧀꧉​

^19:8 ꦏꦸꦭꦒꦝꦃꦲꦤꦏ꧀ꦲꦺꦱ꧀ꦠꦿꦶꦏꦭꦶꦃ꧈​ꦲꦶꦁꦏꦁꦠꦏ꧀ꦱꦶꦃꦥꦿꦮꦤ꧀꧉​ꦩꦼꦤꦶꦏꦧꦝꦺꦏꦸꦭꦥꦱꦿꦃꦲꦏꦼꦤ꧀ꦝꦠꦼꦁꦥꦫꦱꦼꦝꦺꦫꦺꦏ꧀꧈​ꦧꦝꦺꦢꦶꦥꦸꦤ꧀ꦩꦼꦤꦥꦏ꧀ꦏꦏꦼꦤ꧀꧈​ꦩꦁꦒꦱꦏꦼꦂꦱ꧉​ꦤꦩꦸꦁꦥꦫꦠꦩꦸꦏꦸꦭꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦢꦶꦥꦸꦤ꧀ꦒꦁꦒꦸ꧈​ꦩꦂꦒꦶꦱꦩ꧀ꦥꦸꦤ꧀ꦱꦩꦶꦔꦲꦸꦧ꧀ꦲꦶꦁꦥꦺꦴꦤ꧀ꦝꦺꦴꦏ꧀ꦏꦸꦭ꧉"​

^19:9 ꦤꦁꦔꦶꦁꦥꦩ꧀ꦧꦼꦔꦺꦴꦏ꧀ꦏꦺꦮꦺꦴꦁꦲꦏꦺꦃꦩꦲꦸ꧈​"​꧊ꦲꦸꦱ꧀꧈​ꦤꦶꦱꦶꦃ!ꦔꦼꦂꦠꦶꦪꦪꦺꦤ꧀ꦏꦺꦴꦮꦺꦏꦸꦮꦶꦮꦺꦴꦁꦤꦼꦤꦼꦏ꧈​ꦏꦛꦶꦏ꧀ꦲꦶꦱꦶꦃꦲꦉꦥ꧀ꦩꦸꦭꦁꦧꦫꦁ꧉​ꦲꦥꦚ꧀ꦗꦭꦸꦏ꧀ꦢꦏ꧀ꦒꦼꦧꦸꦒꦔꦸꦁꦏꦸꦭ꧀ꦭꦶꦮꦺꦴꦁꦱꦶꦁꦩꦼꦂꦝꦪꦺꦴꦃꦲꦶꦁꦲꦺꦴꦩꦃꦩꦸ?"​꧊ꦭꦺꦴꦠ꧀ꦤꦸꦭꦶꦢꦶꦗꦺꦴꦫꦺꦴꦒꦏꦺꦭꦤ꧀ꦭꦮꦁꦔꦺꦲꦉꦥ꧀ꦢꦶꦧꦼꦗꦢ꧀꧉​

^19:10 ꦤꦁꦔꦶꦁꦏꦺꦴꦕꦥ꧀ꦥꦩꦭꦲꦺꦏꦠ꧀ꦭꦺꦴꦫꦺꦴꦩꦲꦸꦤꦸꦭꦶꦩ꧀ꦧꦸꦏꦏ꧀ꦭꦮꦁꦔꦺ꧉​​꧊ꦭꦺꦴꦠ꧀ꦢꦶꦒꦺꦫꦺꦢ꧀ꦩ꧀ꦭꦼꦧꦸꦔꦺꦴꦩꦃ꧈​ꦭꦮꦁꦔꦺꦤꦸꦭꦶꦢꦶꦏꦚ꧀ꦕꦶꦁꦩꦼꦤꦺꦃ꧉​

^19:11 ꦢꦺꦤꦺꦮꦺꦴꦁꦱꦶꦁꦥꦝꦲꦤꦲꦶꦁꦔꦉꦥ꧀ꦥꦺꦭꦮꦁꦩꦲꦸꦮꦶꦮꦶꦠ꧀ꦱꦶꦁꦕꦶꦭꦶꦏ꧀ꦠꦼꦏꦤ꧀ꦱꦶꦁꦒꦼꦝꦺ꧈​ꦢꦶꦥꦶꦕꦏ꧀ꦏꦏꦺꦩꦿꦶꦥꦠ꧀ꦠꦺ꧈​ꦔꦤ꧀ꦠꦶꦥꦝꦲꦺꦴꦫꦧꦶꦱꦤꦼꦩꦺꦴꦏ꧀ꦏꦏꦺꦭꦮꦁꦔꦺꦏꦺꦩꦃ꧉​

^19:12 ꦩꦭꦲꦺꦏꦠ꧀ꦭꦺꦴꦫꦺꦴꦩꦲꦸꦤꦸꦭꦶꦔꦤ꧀ꦢꦶꦏꦩꦫꦁ​꧊ꦭꦺꦴꦠ꧀꧈​"ꦲꦥꦏꦺꦴꦮꦺꦲꦶꦱꦶꦃꦢꦸꦮꦺꦱꦼꦢꦸꦭꦸꦂꦲꦤꦲꦶꦁꦏꦸꦛꦏꦺꦤꦺ?ꦲꦤꦏ꧀ꦩꦸꦭꦤꦁꦭꦤ꧀ꦮꦢꦺꦴꦤ꧀ꦱꦂꦠꦏꦧꦺꦃꦱꦼꦢꦸꦭꦸꦂꦩꦸꦲꦶꦁꦤꦼꦒꦫꦏꦺꦤꦺꦗꦏꦼꦤ꧀ꦩꦼꦠꦸꦱꦏꦥꦁꦒꦺꦴꦤ꧀ꦤꦤ꧀ꦲꦶꦏꦶ꧉​

^19:13 ꦗꦭꦂꦫꦤ꧀ꦏꦸꦛꦏꦺꦤꦺꦲꦉꦥ꧀ꦢꦏ꧀ꦭꦼꦧꦸꦂ꧈​ꦲꦮꦶꦠ꧀ꦮꦶꦱ꧀ꦲꦏꦺꦃꦥꦼꦱꦩ꧀ꦧꦠ꧀ꦏꦁꦏꦥꦶꦉꦁꦄꦭ꧀ꦭꦃꦩꦸꦁꦒꦸꦃꦢꦸꦫꦏꦤꦺꦮꦺꦴꦁꦏꦺꦤꦺ꧈​ꦭꦤ꧀ꦲꦏꦸꦥꦝꦢꦶꦝꦮꦸꦃꦲꦶꦔ꧀ꦭꦼꦧꦸꦂꦏꦸꦛꦲꦶꦏꦶ꧉"​

^19:14 ​꧊ꦭꦺꦴꦠ꧀ꦤꦸꦭꦶꦩꦼꦠꦸ꧈​ꦏꦤ꧀ꦝꦏꦫꦺꦴꦕꦭꦺꦴꦤ꧀ꦩꦤ꧀ꦠꦸꦤꦺꦭꦺꦴꦫꦺꦴ꧈​ꦠꦼꦩ꧀ꦧꦸꦁꦔꦺ꧈​"ꦲꦺꦁꦒꦭ꧀ꦥꦝꦩꦼꦠꦸꦮꦱꦏꦏꦸꦛꦏꦺꦤꦺ꧈​ꦩꦼꦂꦒꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦤꦸꦩ꧀ꦥꦼꦱ꧀ꦏꦸꦛꦲꦶꦏꦶ꧉"​ꦤꦁꦔꦶꦁꦕꦭꦺꦴꦤ꧀ꦩꦤ꧀ꦠꦸꦤꦺꦭꦺꦴꦫꦺꦴꦩꦲꦸꦩꦭꦃꦔꦫꦤ꧀ꦤꦶ​꧊ꦭꦺꦴꦠ꧀ꦩꦸꦁꦱꦼꦩ꧀ꦧꦿꦤꦤ꧀ꦮꦲꦺ꧉​

^19:15 ꦧꦉꦁꦮꦶꦱ꧀ꦫꦢꦥꦝꦁ꧈​ꦩꦭꦲꦺꦏꦠ꧀ꦭꦺꦴꦫꦺꦴꦩꦲꦸꦤꦸꦭꦶꦚꦼꦉꦒ꧀ꦩꦫꦁ​꧊ꦭꦺꦴꦠ꧀꧈​"ꦮꦶꦱ꧀꧈​ꦒꦺꦏ꧀ꦲꦺꦁꦒꦭ꧀꧈​ꦧꦺꦴꦗꦺꦴꦭꦤ꧀ꦲꦤꦏ꧀ꦩꦸꦭꦺꦴꦫꦺꦴꦒꦮꦤꦼꦤ꧀ꦭꦸꦔꦱꦏꦏꦺꦤꦺ꧈​ꦱꦸꦥꦪꦏꦺꦴꦮꦺꦲꦗꦏꦠꦸꦠ꧀ꦏꦊꦧꦸꦂꦏꦫꦺꦴꦏꦸꦛꦲꦶꦏꦶ꧉"​

^19:16 ​꧊ꦭꦺꦴꦠ꧀ꦩꦔꦸꦩꦔꦸ꧉​ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦲꦱꦶꦃꦩꦫꦁ​꧊ꦭꦺꦴꦠ꧀꧈​ꦩꦸꦭꦤꦺꦢꦶꦲꦺꦩꦤ꧀꧉​ꦠꦔꦤ꧀ꦤꦺ​꧊ꦭꦺꦴꦠ꧀ꦭꦤ꧀ꦧꦺꦴꦗꦺꦴꦤꦺꦤꦸꦭꦶꦢꦶꦕꦤ꧀ꦝꦏ꧀꧈​ꦩꦼꦁꦏꦺꦴꦤꦺꦴꦲꦸꦒꦲꦤꦏ꧀ꦏꦺꦮꦢꦺꦴꦤ꧀ꦭꦺꦴꦫꦺꦴ꧈​ꦧꦚ꧀ꦗꦸꦂꦢꦶꦠꦸꦤ꧀ꦠꦸꦤ꧀ꦩꦼꦠꦸꦭꦤ꧀ꦢꦶꦠꦶꦁꦒꦭ꧀ꦲꦶꦁꦱꦚ꧀ꦗꦧꦤꦺꦏꦸꦛ꧉​

^19:17 ꦏꦫꦺꦴꦢꦶꦏꦤ꧀ꦝꦤꦶ꧈​"ꦫꦶꦏꦠ꧀ꦩ꧀ꦭꦪꦸꦮ꧈​ꦔꦸꦁꦱꦶꦪꦩꦼꦚꦁꦥꦼꦒꦸꦤꦸꦁꦔꦤ꧀꧉​ꦲꦗꦤꦺꦴꦭꦺꦃꦔꦶꦮꦲꦸꦠꦮꦤꦼꦔꦼꦤ꧀ꦭꦤ꧀ꦲꦗꦩꦤ꧀ꦝꦼꦒ꧀ꦲꦤꦲꦶꦁꦠꦤꦃꦔꦫꦺꦏꦺꦤꦺ꧈​ꦱꦸꦥꦪꦏꦺꦴꦮꦺꦥꦝꦲꦺꦴꦫꦏꦠꦸꦠ꧀ꦏꦠꦸꦩ꧀ꦥꦼꦱ꧀꧉"​

^19:18 ꦤꦁꦔꦶꦁ​꧊ꦭꦺꦴꦠ꧀ꦩꦸꦚ꧀ꦗꦸꦏ꧀꧈​"ꦝꦸꦃꦒꦸꦱ꧀ꦠꦶ꧈​ꦩꦸꦒꦶꦏꦸꦭꦱꦩ꧀ꦥꦸꦤ꧀ꦏꦝꦮꦸꦃꦲꦤ꧀ꦩ꧀ꦭꦗꦼꦁꦝꦠꦼꦁꦥꦉꦢꦺꦤ꧀꧉​

^19:19 ꦏꦸꦭꦩꦠꦸꦂꦤꦸꦮꦸꦤ꧀ꦱꦔꦼꦠ꧀ꦢꦺꦤꦺꦱꦩ꧀ꦥꦸꦤ꧀ꦥꦚ꧀ꦗꦼꦤꦼꦁꦔꦤ꧀ꦮꦶꦭꦸꦗꦼꦁꦔꦏꦼꦤ꧀꧈​ꦤꦁꦔꦶꦁꦥꦉꦢꦺꦤ꧀ꦩꦼꦤꦶꦏꦠꦼꦧꦶꦃꦱꦔꦼꦠ꧀꧉​ꦩꦼꦱ꧀ꦛꦶꦏꦸꦭꦧꦝꦺꦏꦼꦠꦸꦠꦸꦠ꧀ꦠꦤ꧀ꦢꦺꦤꦶꦁꦧꦼꦧꦼꦤ꧀ꦢꦸꦩꦼꦤꦶꦏ꧈​ꦔꦤ꧀ꦠꦺꦴꦱ꧀ꦏꦸꦭꦧꦝꦺꦲꦺꦱ꧀ꦠꦸꦥꦼꦗꦃ꧉​

^19:20 ꦲꦶꦁꦔꦗꦼꦁꦩꦼꦤꦶꦏꦮꦺꦴꦤ꧀ꦠꦼꦤ꧀ꦏꦶꦛꦲꦭꦶꦠ꧀꧈​ꦲꦶꦁꦏꦁꦩ꧀ꦧꦺꦴꦠꦼꦤ꧀ꦥꦠꦺꦴꦱ꧀ꦠꦼꦧꦶꦃ꧉​ꦏꦼꦥꦉꦁꦔꦏꦸꦭꦩꦿꦶꦏꦏꦺꦩꦮꦺꦴꦤ꧀꧈​ꦱꦸꦥꦢꦺꦴꦱ꧀ꦏꦸꦭꦱꦒꦼꦢ꧀ꦮꦶꦭꦸꦗꦼꦁ꧉"​

^19:21 ꦮꦁꦱꦸꦭ꧀ꦭꦤ꧀ꦤꦺꦩꦭꦲꦺꦏꦠ꧀꧈​"ꦪꦮꦶꦱ꧀ꦧꦼꦕꦶꦏ꧀꧉​ꦤꦼꦒꦫꦲꦶꦏꦸꦧꦏꦭ꧀ꦲꦺꦴꦫꦢꦏ꧀ꦭꦼꦧꦸꦂ꧉​

^19:22 ꦲꦺꦁꦒꦭ꧀ꦩꦿꦤꦲ!ꦲꦮꦶꦠ꧀ꦲꦏꦸꦲꦺꦴꦫꦧꦶꦱꦠꦸꦩꦶꦤ꧀ꦢꦏ꧀ꦲꦥꦲꦥ꧈​ꦪꦺꦤ꧀ꦏꦺꦴꦮꦺꦢꦸꦫꦸꦁꦠꦼꦏꦤ꧀ꦲꦶꦁꦏꦤ꧉"​ꦱꦫꦺꦃꦤꦺ​꧊ꦭꦺꦴꦠ꧀ꦚꦼꦧꦸꦠ꧀ꦏꦸꦛꦏꦸꦮꦶꦕꦶꦭꦶꦏ꧀꧈​ꦩꦸꦭꦤꦺꦏꦸꦛꦩꦲꦸꦏꦼꦠꦼꦭꦃꦗꦼꦤꦼꦁ​꧊ꦗ꦳ꦺꦴꦮꦂ꧉​

^19:23 ꦏꦺꦴꦕꦥ꧀ꦥꦧꦉꦁꦱꦽꦔꦺꦔꦺꦤꦺꦮꦶꦱ꧀ꦩ꧀ꦭꦼꦛꦺꦏ꧀ꦭꦤ꧀​꧊ꦭꦺꦴꦠ꧀ꦮꦶꦱ꧀ꦠꦼꦏꦤ꧀​꧊ꦗ꦳ꦺꦴꦮꦂ꧈​

^19:24 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦤꦼꦏꦏ꧀ꦏꦏꦺꦲꦸꦢꦤ꧀ꦮ꧀ꦭꦶꦫꦁꦭꦤ꧀ꦒꦼꦤꦶꦱꦏꦲꦶꦁꦭꦔꦶꦠ꧀ꦲꦤꦲꦶꦁꦏꦸꦛ​꧊ꦱꦺꦴꦢꦺꦴꦩ꧀ꦭꦤ꧀​꧊ꦒꦺꦴꦩꦺꦴꦫ꧈​

^19:25 ꦱꦂꦠꦔ꧀ꦭꦼꦧꦸꦂꦏꦸꦛꦏꦸꦛꦩꦲꦸꦭꦤ꧀ꦏꦶꦮꦠꦼꦔꦼꦤ꧀ꦤꦺ꧈​ꦧꦉꦁꦏꦫꦺꦴꦮꦺꦴꦁ꧈​ꦏꦺꦮꦤ꧀ꦭꦤ꧀ꦠꦼꦠꦸꦮꦸꦃꦲꦤ꧀ꦱꦶꦁꦲꦤꦲꦶꦁꦏꦺꦴꦤꦺꦴꦏꦧꦺꦃ꧉​

^19:26 ꦧꦺꦴꦗꦺꦴꦤꦺ​꧊ꦭꦺꦴꦠ꧀ꦩꦤ꧀ꦝꦼꦒ꧀ꦭꦤ꧀ꦤꦺꦴꦭꦺꦃ꧈​ꦠꦼꦩꦃꦱꦤꦭꦶꦏꦩꦭꦶꦃꦢꦢꦶꦠꦸꦒꦸꦲꦸꦪꦃ꧉​

^19:27 ꦲꦺꦱꦸꦏ꧀ꦏꦺ꧈​ꦲꦶꦱꦶꦃꦲꦸꦩꦸꦤ꧀ꦲꦸꦩꦸꦤ꧀꧈​​꧊ꦄꦧꦿꦲꦩ꧀ꦩꦫꦤꦶꦥꦥꦤ꧀ꦱꦶꦁꦮꦶꦔꦶꦤꦺꦢꦶꦲꦼꦁꦒꦺꦴꦔꦢꦼꦒ꧀ꦲꦤꦲꦶꦁꦔꦂꦱꦤꦺꦒꦸꦱ꧀ꦠꦶꦄꦭ꧀ꦭꦃ꧉​

^19:28 ꦧꦉꦁꦚꦮꦁꦲꦼꦤꦼꦂꦫꦺ​꧊ꦱꦺꦴꦢꦺꦴꦩ꧀ꦭꦤ꧀​꧊ꦒꦺꦴꦩꦺꦴꦫꦭꦤ꧀ꦱꦏꦶꦮꦠꦼꦔꦼꦤ꧀ꦤꦺ꧈​ꦤꦸꦭꦶꦮꦼꦫꦸꦃꦲꦤꦏꦼꦧꦸꦭ꧀ꦏꦸꦩꦼꦭꦸꦤ꧀ꦱꦏꦲꦶꦁꦧꦸꦩꦶ꧈​ꦏꦪꦏꦼꦧꦸꦭ꧀ꦭꦺꦥꦮꦺꦴꦤ꧀ꦒꦩ꧀ꦥꦶꦁ꧉​

^19:29 ꦏꦪꦩꦼꦁꦏꦺꦴꦤꦺꦴꦤꦭꦶꦏꦒꦸꦱ꧀ꦠꦶꦄꦭ꧀ꦭꦃꦔ꧀ꦭꦼꦧꦸꦂ​꧊ꦱꦺꦴꦢꦺꦴꦩ꧀ꦭꦤ꧀​꧊ꦒꦺꦴꦩꦺꦴꦫ꧈​ꦏꦤ꧀ꦛꦶꦔꦺꦔꦼꦠ꧀ꦠꦶ​꧊ꦄꦧꦿꦲꦩ꧀ꦭꦤ꧀ꦔꦶꦫꦶꦢ꧀​꧊ꦭꦺꦴꦠ꧀ꦩꦼꦠꦸꦱꦏꦥꦁꦒꦺꦴꦤ꧀ꦤꦤ꧀ꦱꦶꦁꦢꦶꦊꦧꦸꦂ꧉​

^19:30 ꦱꦫꦺꦃꦤꦺꦮꦼꦢꦶꦩꦁꦒꦺꦴꦤ꧀ꦲꦤꦲꦶꦁ​꧊ꦗ꦳ꦺꦴꦮꦂ꧈​​꧊ꦭꦺꦴꦠ꧀ꦭꦤ꧀ꦲꦤꦏ꧀ꦏꦺꦮꦢꦺꦴꦤ꧀ꦭꦺꦴꦫꦺꦴꦤꦸꦭꦶꦥꦶꦤ꧀ꦝꦃꦩꦼꦚꦁꦲꦶꦁꦥꦼꦒꦸꦤꦸꦁꦔꦤ꧀꧈​ꦩꦁꦒꦺꦴꦤ꧀ꦲꦤꦲꦶꦁꦒꦸꦮ꧉​

^19:31 ꦲꦤꦏ꧀ꦮꦢꦺꦴꦤ꧀ꦱꦶꦁꦠꦸꦮꦏꦤ꧀ꦝꦏꦫꦺꦴꦲꦝꦶꦤꦺ꧈​"ꦧꦥꦏ꧀ꦏꦸꦮꦶꦔꦸꦤ꧀ꦢꦸꦂꦫꦶꦱꦼꦥꦸꦃ꧈​ꦩꦁꦏꦱꦤꦼꦒꦫꦏꦺꦤꦺꦲꦺꦴꦫꦲꦤꦮꦺꦴꦁꦭꦤꦁꦱꦶꦁꦔꦸꦩ꧀ꦥꦸꦭ꧀ꦭꦶ꧈​ꦱꦸꦥꦪꦏꦶꦠꦢꦸꦮꦺꦲꦤꦏ꧀꧉​

^19:32 ꦧꦼꦕꦶꦏ꧀ꦏꦺꦧꦥꦏ꧀ꦢꦶꦲꦺꦴꦩ꧀ꦧꦺꦤ꧀ꦤꦶꦲꦁꦒꦸꦂꦱꦸꦥꦪꦩꦼꦤ꧀ꦢꦼꦩ꧀ꦭꦤ꧀ꦤꦸꦫꦺꦴꦤ꧀ꦤꦶꦏꦶꦠ꧈​ꦠꦼꦩꦃꦏꦶꦠꦧꦏꦭ꧀ꦢꦸꦮꦺꦲꦤꦏ꧀꧉"​

^19:33 ꦢꦢꦶꦧꦼꦔꦶꦤꦺ​꧊ꦭꦺꦴꦠ꧀ꦢꦶꦮꦺꦤꦺꦃꦲꦶꦔꦺꦴꦩ꧀ꦧꦺꦲꦁꦒꦸꦂ;ꦲꦤꦏ꧀ꦱꦶꦁꦠꦸꦮꦤꦸꦭꦶꦲꦩꦺꦴꦂꦠꦸꦫꦸꦏꦫꦺꦴꦧꦥꦏ꧀ꦤꦺ꧉​​꧊ꦭꦺꦴꦠ꧀ꦱꦏꦶꦁꦩꦼꦤ꧀ꦢꦼꦩ꧀ꦩꦺꦲꦺꦴꦫꦔꦼꦂꦠꦶꦠꦼꦏꦤꦺꦭꦤ꧀ꦭꦸꦔꦤꦺꦲꦤꦏ꧀ꦏꦺꦩꦲꦸ꧉​

^19:34 ꦲꦺꦱꦸꦏ꧀ꦏꦺꦲꦤꦏ꧀ꦮꦢꦺꦴꦤ꧀ꦱꦶꦁꦩ꧀ꦧꦉꦥ꧀ꦩꦲꦸꦏꦤ꧀ꦝꦏꦫꦺꦴꦲꦝꦶꦤꦺ꧈​"ꦝꦺꦏ꧀ꦧꦼꦔꦶꦲꦏꦸꦮꦶꦱ꧀ꦢꦶꦠꦸꦫꦺꦴꦤ꧀ꦤꦶꦧꦥꦏ꧀꧉​ꦲꦪꦺꦴꦩꦼꦁꦏꦺꦴꦧꦼꦔꦶꦧꦥꦏ꧀ꦢꦶꦒꦮꦺꦩꦼꦤ꧀ꦢꦼꦩ꧀ꦩꦼꦤꦺꦃ꧈​ꦧꦚ꧀ꦗꦸꦂꦏꦺꦴꦮꦺꦒꦼꦤ꧀ꦠꦺꦤ꧀ꦠꦸꦫꦸꦏꦫꦺꦴꦧꦥꦏ꧀꧈​ꦱꦸꦥꦪꦏꦶꦠꦥꦝꦢꦸꦮꦺꦲꦤꦏ꧀ꦏꦧꦺꦃ꧉"​

^19:35 ꦮꦼꦔꦶꦏꦸꦮꦶꦲꦸꦒ​꧊ꦭꦺꦴꦠ꧀ꦢꦶꦲꦺꦴꦩ꧀ꦧꦺꦤ꧀ꦤꦶꦲꦁꦒꦸꦂꦔꦤ꧀ꦠꦶꦩꦼꦤ꧀ꦢꦼꦩ꧀꧈​ꦭꦤ꧀ꦲꦤꦏ꧀ꦏꦺꦱꦶꦁꦤꦺꦴꦩ꧀ꦒꦼꦤ꧀ꦠꦶꦠꦸꦫꦸꦏꦫꦺꦴꦧꦥꦏ꧀ꦤꦺ꧉​​꧊ꦭꦺꦴꦠ꧀ꦱꦏꦶꦁꦩꦼꦤ꧀ꦢꦼꦩ꧀ꦩꦺꦲꦺꦴꦫꦔꦼꦂꦠꦶꦠꦼꦏꦤꦺꦭꦤ꧀ꦭꦸꦔꦤꦺꦲꦤꦏ꧀ꦏꦺꦩꦲꦸ꧉​

^19:36 ꦲꦤꦏ꧀ꦮꦢꦺꦴꦤ꧀ꦏꦫꦺꦴꦏꦫꦺꦴꦤꦺꦧꦚ꧀ꦗꦸꦂꦔꦤ꧀ꦝꦼꦒ꧀ꦏꦫꦺꦴꦧꦥꦏ꧀ꦤꦺ꧉​

^19:37 ꦲꦤꦏ꧀ꦱꦶꦁꦩ꧀ꦧꦉꦥ꧀ꦔ꧀ꦭꦲꦶꦂꦫꦏꦺꦲꦤꦏ꧀ꦭꦤꦁꦭꦤ꧀ꦢꦶꦗꦼꦤꦼꦁꦔꦏꦺ​꧊ꦩꦺꦴꦮꦧ꧀꧈​ꦢꦢꦶꦊꦭꦸꦲꦸꦂꦫꦺꦧꦁꦱ​꧊ꦩꦺꦴꦮꦧ꧀ꦱꦶꦁꦱꦲꦶꦏꦶꦲꦶꦏꦶ꧉​

^19:38 ꦲꦝꦶꦤꦺꦲꦶꦪꦔ꧀ꦭꦲꦶꦂꦫꦏꦺꦲꦤꦏ꧀ꦭꦤꦁ꧈​ꦢꦶꦗꦼꦤꦼꦁꦔꦏꦺꦧꦺꦤ꧀​꧊ꦄꦩꦶ꧈​ꦢꦢꦶꦊꦭꦸꦲꦸꦂꦫꦺꦧꦁꦱ​꧊ꦄꦩꦺꦴꦤ꧀ꦱꦶꦁꦱꦲꦶꦏꦶꦲꦶꦏꦶ꧉​