Alkitab/Purwaning Dumadi/23

^23:1 ꦲꦸꦩꦸꦂꦫꦺ​꧊ꦱꦫꦃꦚꦤ꧀ꦝꦏ꧀ꦱꦠꦸꦱ꧀ꦥꦶꦠꦸꦭꦶꦏꦸꦂꦠꦲꦸꦤ꧀꧈​

^23:2 ꦧꦚ꧀ꦗꦸꦂꦠꦶꦁꦒꦭ꧀ꦢꦺꦴꦚꦲꦤꦲꦶꦁ​꧊ꦏꦶꦂꦪꦠ꧀​꧊ꦄꦂꦧ꧈​ꦪꦏꦸꦮꦶ​꧊ꦲꦺꦧꦿꦺꦴꦤ꧀꧈​ꦲꦶꦁꦠꦤꦃ​꧊ꦏꦺꦤꦲꦤ꧀꧉​​꧊ꦄꦧꦿꦲꦩ꧀ꦤꦸꦁꦒꦺꦴꦤ꧀ꦤꦶꦭꦤ꧀ꦤꦔꦶꦱ꧀ꦱꦶꦭꦪꦺꦴꦤꦺ꧉​

^23:3 ꦭꦪꦺꦴꦤ꧀ꦩꦲꦸꦧꦚ꧀ꦗꦸꦂꦢꦶꦠꦶꦁꦒꦭ꧀ꦤꦼꦩꦺꦴꦤ꧀ꦤꦶꦲꦤꦏ꧀ꦲꦤꦏ꧀ꦏꦺ​꧊ꦲꦺꦠ꧀꧈​ꦠꦼꦩ꧀ꦧꦸꦁꦔꦺ꧈​

^23:4 "ꦏꦸꦭꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦶꦢꦢꦺꦴꦱ꧀ꦠꦶꦪꦁꦔꦩꦚ꧀ꦕ꧈​ꦲꦶꦁꦏꦁꦩꦺꦴꦤ꧀ꦝꦺꦴꦏ꧀ꦮꦺꦴꦤ꧀ꦠꦼꦤ꧀ꦤꦼꦒꦫꦶꦥꦚ꧀ꦗꦼꦤꦼꦁꦔꦤ꧀꧉​ꦩꦼꦤꦮꦶꦩ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦥꦏꦺꦮꦼꦢ꧀ꦢꦶꦥꦸꦤ꧀꧈​ꦏꦸꦭꦏꦼꦥꦺꦔꦶꦤ꧀ꦠꦸꦩ꧀ꦧꦱ꧀ꦱꦶꦠꦶꦲꦶꦁꦔꦿꦶꦏꦶꦏꦁꦒꦺꦔꦸꦧꦸꦂꦱꦺꦩꦃꦏꦸꦭ꧉"​

^23:5 ꦮꦺꦴꦁꦮꦺꦴꦁ​꧊ꦲꦺꦠ꧀ꦤꦸꦭꦶꦥꦝꦩꦁꦱꦸꦭ꧀ꦭꦶ꧈​

^23:6 "ꦥꦚ꧀ꦗꦼꦤꦼꦁꦔꦤ꧀ꦫꦏ꧀ꦥꦽꦱꦱꦠ꧀ꦫꦗꦮꦺꦴꦤ꧀ꦠꦼꦤ꧀ꦲꦶꦁꦱꦠꦼꦔꦃꦲꦶꦁꦧꦁꦱꦏꦸꦭ꧉​ꦥꦿꦩꦶꦭꦱꦸꦩꦁꦒꦏꦸꦭꦲꦠꦸꦂꦫꦶꦩꦶꦭꦶꦃꦥꦶꦪꦩ꧀ꦧꦏ꧀ꦥꦁꦒꦺꦤ꧀ꦤꦤ꧀ꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦏꦼꦂꦱꦏ꧀ꦏꦏꦼꦤ꧀ꦏꦁꦒꦺꦥꦼꦱꦫꦺꦪꦤ꧀꧉​ꦏꦸꦭꦱꦩꦶꦧꦶꦔꦃꦩꦼꦤꦮꦶꦥꦚ꧀ꦗꦼꦤꦼꦁꦔꦤ꧀ꦏꦼꦂꦱꦚꦫꦺꦏ꧀ꦏꦏꦼꦤ꧀ꦲꦶꦁꦏꦁꦱꦺꦢꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦶ꧉"​

^23:7 ​꧊ꦄꦧꦿꦲꦩ꧀ꦧꦚ꧀ꦗꦸꦂꦩ꧀ꦧꦸꦁꦏꦸꦏ꧀ꦔꦸꦂꦩꦠ꧀ꦠꦶꦥꦫꦲꦤꦏ꧀ꦏꦺ​꧊ꦲꦺꦠ꧀ꦩꦲꦸ꧈​

^23:8 ꦱꦂꦠꦩꦁꦱꦸꦭ꧀ꦭꦶ꧈​"ꦩꦼꦤꦮꦶꦥꦫꦱꦼꦝꦺꦫꦺꦏ꧀ꦱꦩ꧀ꦥꦸꦤ꧀ꦩꦉꦁꦔꦏꦼꦤ꧀ꦏꦸꦭꦔꦸꦧꦸꦂꦱꦺꦩꦃꦏꦸꦭꦮꦺꦴꦤ꧀ꦠꦼꦤ꧀ꦔꦿꦶꦏꦶ꧈​ꦏꦸꦭꦚꦸꦮꦸꦤ꧀ꦠꦸꦭꦸꦁꦏꦼꦂꦱꦲꦤꦼꦩ꧀ꦧꦸꦁꦔꦏꦼꦤ꧀ꦝꦠꦼꦁ​꧊ꦌꦥ꦳ꦿꦺꦴꦤ꧀꧈​ꦲꦤꦏ꧀ꦏꦶꦥꦸꦤ꧀​꧊ꦗ꦳ꦺꦴꦲꦂ꧈​

^23:9 ꦱꦸꦥꦢꦺꦴꦱ꧀ꦏꦸꦭꦲꦁꦱꦭ꧀ꦤꦸꦩ꧀ꦧꦱ꧀ꦒꦸꦮ​꧊ꦩꦃꦥꦺꦭ꧈​ꦒꦝꦃꦲꦤ꧀ꦤꦶꦥꦸꦤ꧀꧈​ꦲꦶꦁꦏꦁꦏꦼꦥꦽꦤꦃꦲꦶꦁꦱꦶꦱꦶꦃꦲꦺꦥꦠꦼꦒꦶꦭ꧀ꦭꦤ꧀ꦤꦶꦥꦸꦤ꧀꧉​ꦥꦶꦤ꧀ꦠꦼꦤ꧀ꦉꦒꦶꦤꦶꦥꦸꦤ꧀ꦧꦝꦺꦏꦸꦭꦧꦪꦂ꧈​ꦭꦤ꧀ꦥꦚ꧀ꦗꦼꦤꦼꦁꦔꦤ꧀ꦏꦸꦭꦲꦠꦸꦂꦫꦶꦤꦼꦏ꧀ꦱꦺꦤ꧀ꦤꦶ꧈​ꦩꦂꦒꦶꦱꦶꦠꦶꦩꦼꦤꦶꦏꦩꦼꦤꦮꦶꦱꦩ꧀ꦥꦸꦤ꧀ꦢꦢꦺꦴꦱ꧀ꦒꦝꦃꦲꦤ꧀ꦏꦸꦭ꧈​ꦧꦝꦺꦏꦸꦭꦲꦼꦁꦒꦺꦏꦸꦧꦸꦂꦫꦤ꧀꧉"​

^23:10 ​꧊ꦌꦥ꦳ꦿꦺꦴꦤ꧀ꦝꦺꦮꦺꦥꦶꦤꦸꦗꦸꦩꦺꦭꦸꦭꦶꦁꦒꦶꦃꦏꦫꦺꦴꦮꦺꦴꦁꦮꦺꦴꦁ​꧊ꦲꦺꦠ꧀ꦩꦲꦸ꧉​​꧊ꦌꦥ꦳ꦿꦺꦴꦤ꧀ꦧꦚ꧀ꦗꦸꦂꦩꦁꦱꦸꦭ꧀ꦭꦶ​꧊ꦄꦧꦿꦲꦩ꧀꧈​ꦢꦶꦱꦼꦏ꧀ꦱꦺꦤ꧀ꦤꦶꦢꦺꦤꦶꦁꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦱꦶꦁꦥꦝꦔ꧀ꦭꦸꦩ꧀ꦥꦸꦏ꧀ꦲꦤꦲꦶꦁꦱꦼꦏꦺꦛꦺꦁꦔꦺꦤꦼꦒꦫꦩꦲꦸ꧈​

^23:11 "ꦫꦩ​꧊ꦄꦧꦿꦲꦩ꧀ꦲꦶꦁꦏꦁꦏꦸꦭꦲꦸꦂꦩꦠ꧀ꦠꦶ꧉​ꦥꦱꦶꦠꦺꦤ꧀ꦩꦼꦤꦶꦏꦏꦸꦭꦲꦠꦸꦂꦫꦏꦼꦤ꧀ꦝꦠꦼꦁꦥꦚ꧀ꦗꦼꦤꦼꦁꦔꦤ꧀;ꦩꦼꦏꦠ꧀ꦠꦼꦤ꧀ꦲꦸꦒꦶꦒꦸꦮꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸ꧈​ꦲꦶꦁꦒꦶꦃꦏꦸꦭꦲꦠꦸꦂꦫꦏꦼꦤ꧀ꦥꦶꦱꦤ꧀꧉​ꦥꦫꦱꦼꦝꦺꦫꦺꦏ꧀ꦱꦼꦢꦪꦏꦸꦭꦲꦠꦸꦂꦫꦶꦚꦼꦏ꧀ꦱꦺꦤ꧀ꦤꦶꦲꦠꦸꦂꦏꦸꦭꦩꦼꦤꦶꦏ꧉​ꦱꦸꦩꦁꦒꦲꦶꦁꦏꦁꦱꦺꦢꦏꦸꦭꦲꦠꦸꦂꦫꦶꦚꦫꦺꦏ꧀ꦏꦏꦼꦤ꧀ꦲꦶꦁꦔꦿꦶꦏꦸ꧉"​

^23:12 ​꧊ꦄꦧꦿꦲꦩ꧀ꦩ꧀ꦧꦸꦁꦏꦸꦏ꧀ꦲꦸꦂꦩꦠ꧀ꦩꦼꦤꦺꦃꦩꦫꦁꦥꦫꦲꦤꦏ꧀ꦏꦺ​꧊ꦲꦺꦠ꧀꧈​

^23:13 ꦭꦤ꧀ꦏꦱꦼꦏ꧀ꦱꦺꦤ꧀ꦤꦤ꧀ꦢꦺꦤꦶꦁꦮꦺꦴꦁꦮꦺꦴꦁꦩꦲꦸꦏꦤ꧀ꦝꦏꦫꦺꦴ​꧊ꦌꦥ꦳ꦿꦺꦴꦤ꧀ꦩꦼꦁꦏꦺꦤꦺ꧈​"ꦏꦸꦭꦲꦠꦸꦂꦫꦶꦩꦼꦁꦒꦭꦶꦃꦲꦠꦸꦂꦏꦸꦭ꧉​ꦩꦼꦤꦮꦶꦏꦼꦥꦉꦁ꧈​ꦥꦱꦶꦠꦺꦤ꧀ꦩꦼꦤꦶꦏꦱꦼꦢꦪꦧꦝꦺꦏꦸꦭꦠꦸꦩ꧀ꦧꦱ꧀ꦭꦤ꧀ꦏꦸꦭꦧꦪꦂ꧈​ꦱꦸꦥꦢꦺꦴꦱ꧀ꦏꦸꦭꦱꦒꦼꦢ꧀ꦔꦸꦧꦸꦂꦱꦺꦩꦃꦏꦸꦭꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸ꧉"​

^23:14 ​꧊ꦌꦥ꦳ꦿꦺꦴꦤ꧀ꦩꦁꦱꦸꦭ꧀ꦭꦶ꧈​

^23:15 "ꦫꦩ​꧊ꦄꦧꦿꦲꦩ꧀꧈​ꦱꦶꦠꦶꦩꦼꦤꦶꦏꦤꦩꦸꦁꦥꦼꦔꦲꦺꦴꦱ꧀ꦏꦮꦤ꧀ꦲꦠꦸꦱ꧀ꦲꦂꦠꦱ꧀ꦭꦏ;ꦩꦼꦤꦥꦠꦼꦒꦼꦱ꧀ꦱꦶꦥꦸꦤ꧀ꦲꦂꦠꦱꦼꦩꦤ꧀ꦠꦼꦤ꧀ꦩꦼꦤꦶꦏꦠꦸꦩꦿꦥ꧀ꦥꦚ꧀ꦗꦼꦤꦼꦁꦔꦤ꧀ꦭꦤ꧀ꦏꦸꦭ?ꦱꦸꦩꦁꦒꦏꦲꦒꦼꦩ꧀ꦩꦚꦫꦺꦏ꧀ꦏꦏꦼꦤ꧀ꦲꦶꦁꦏꦁꦱꦺꦢ꧉"​

^23:16 ​꧊ꦄꦧꦿꦲꦩ꧀ꦱꦫꦸꦗꦸꦏ꧀ꦏꦫꦺꦴꦥꦼꦚ꧀ꦗꦭꦸꦏ꧀ꦏꦺ​꧊ꦌꦥ꦳ꦿꦺꦴꦤ꧀ꦩꦲꦸ꧈​ꦤꦸꦭꦶꦤꦶꦩ꧀ꦧꦁꦝꦸꦮꦶꦠ꧀ꦱ꧀ꦭꦏ꧌ꦱꦶꦁꦥꦪꦸꦏꦁꦒꦺꦴꦢꦺꦴꦭ꧀ꦠꦶꦤꦸꦏꦸ꧍꧈​ꦕꦕꦃꦲꦺ400ꦱꦺꦏꦼꦭ꧀꧈​ꦏꦱꦼꦏ꧀ꦱꦺꦤ꧀ꦤꦤ꧀ꦢꦺꦤꦶꦁꦧꦁꦱ​꧊ꦲꦺꦠ꧀꧉​

^23:17 ꦩꦼꦁꦏꦺꦴꦤꦺꦴꦩꦸꦭꦤꦺꦊꦩꦃꦲꦺ​꧊ꦌꦥ꦳ꦿꦺꦴꦤ꧀ꦲꦶꦁ​꧊ꦩꦃꦥꦺꦭ꧈​ꦮꦺꦠꦤ꧀​꧊ꦩꦩꦿꦺ꧈​ꦒꦸꦮꦭꦤ꧀ꦱꦏꦺꦃꦲꦺꦮꦶꦠ꧀ꦮꦶꦠ꧀ꦠꦤ꧀ꦱꦶꦁꦲꦤꦲꦶꦁꦥꦊꦩꦃꦲꦤ꧀ꦩꦲꦸ꧈​

^23:18 ꦏꦠꦼꦠꦼꦥ꧀ꦥꦏꦺꦢꦢꦶꦢꦸꦮꦺꦏ꧀ꦏꦺ​꧊ꦄꦧꦿꦲꦩ꧀;ꦢꦶꦱꦼꦏ꧀ꦱꦺꦤ꧀ꦤꦶꦢꦺꦤꦶꦁꦮꦺꦴꦁꦮꦺꦴꦁ​꧊ꦲꦺꦠ꧀꧈​ꦱꦶꦁꦥꦝꦩꦺꦭꦸꦉꦩ꧀ꦧꦸꦒꦤ꧀ꦲꦶꦁꦱꦼꦏꦺꦛꦺꦁꦔꦺꦤꦼꦒꦫꦩꦲꦸ꧉​

^23:19 ​꧊ꦄꦧꦿꦲꦩ꧀ꦧꦚ꧀ꦗꦸꦂꦔꦸꦧꦸꦂ​꧊ꦱꦫꦃꦲꦤꦲꦶꦁꦒꦸꦮ​꧊ꦩꦃꦥꦺꦭ꧈​ꦕꦼꦝꦏ꧀ꦏꦫꦺꦴꦏꦸꦛ​꧊ꦩꦩꦿꦺ꧈​ꦲꦶꦁꦠꦤꦃ​꧊ꦏꦺꦤꦲꦤ꧀꧉​

^23:20 ꦢꦢꦶꦊꦩꦃꦏꦫꦺꦴꦒꦸꦮ​꧊ꦩꦃꦥꦺꦭꦢꦶꦉꦱ꧀ꦩꦺꦏ꧀ꦏꦏꦺꦢꦺꦤꦶꦁꦮꦺꦴꦁ​꧊ꦲꦺꦠ꧀ꦢꦢꦶꦢꦸꦮꦺꦏ꧀ꦏꦺ​꧊ꦄꦧꦿꦲꦩ꧀꧈​ꦏꦁꦒꦺꦴꦏꦸꦧꦸꦂꦫꦤ꧀꧉​