Alkitab/Purwaning Dumadi/32

^32:1 ​꧊ꦪꦏꦸꦧ꧀ꦧꦚ꧀ꦗꦸꦂꦤꦼꦫꦸꦱ꧀ꦱꦏꦺꦭꦏꦸꦤꦺ꧉​ꦢꦸꦩꦢꦏ꧀ꦏꦤ꧀ꦮꦼꦫꦸꦃꦲꦤꦩꦭꦲꦺꦏꦠ꧀ꦠꦺꦥꦔꦺꦫꦤ꧀ꦱꦮꦼꦠꦫꦥꦝꦩꦼꦛꦸꦏ꧀ꦏꦏꦺ꧉​

^32:2 ​꧊ꦪꦏꦸꦧ꧀ꦧꦚ꧀ꦗꦸꦂꦕ꧀ꦭꦛꦸ꧈​"ꦲꦶꦏꦶꦥꦼꦢꦊꦩ꧀ꦩꦤ꧀ꦤꦺꦄꦭ꧀ꦭꦃ꧉"​ꦩꦸꦭꦤꦺꦥꦁꦒꦺꦴꦤ꧀ꦤꦤ꧀ꦩꦲꦸꦢꦶꦗꦼꦤꦼꦁꦔꦶ:​꧊ꦩꦲꦤꦲꦶꦩ꧀꧉​

^32:3 ꦱꦮꦶꦱ꧀ꦱꦺꦏꦸꦮꦶ​꧊ꦪꦏꦸꦧ꧀ꦧꦚ꧀ꦗꦸꦂꦏꦺꦴꦁꦏꦺꦴꦤ꧀ꦤꦤ꧀ꦮꦺꦴꦁꦱꦮꦼꦠꦫꦤ꧀ꦝꦶꦱꦶꦏ꧀ꦏꦶꦭꦏꦸꦤꦺꦩꦼꦚꦁꦠꦤꦃ​꧊ꦌꦢꦺꦴꦩ꧀꧈​ꦤꦼꦩꦺꦴꦤ꧀ꦤꦶ​꧊ꦌꦱꦲꦸ꧈​ꦏꦏꦁꦤꦺ꧉​

^32:4 ꦏꦺꦴꦁꦏꦺꦴꦤ꧀ꦤꦤ꧀ꦩꦲꦸꦥꦝꦢꦶꦮꦼꦭꦶꦁꦩꦼꦁꦏꦺꦤꦺ꧈​"ꦩꦠꦸꦂꦫꦏꦫꦺꦴꦧꦼꦤ꧀ꦢꦫꦏꦸ​꧊ꦌꦱꦲꦸ꧈​‘ꦏꦁꦲꦧ꧀ꦢꦶ​꧊ꦪꦏꦸꦧ꧀ꦩꦠꦸꦂꦩꦼꦏꦠ꧀ꦠꦼꦤ꧀:ꦏꦸꦭꦔꦠꦸꦂꦫꦶꦥꦶꦂꦱ꧈​ꦧꦶꦭꦶꦃꦱꦢꦔꦸꦤꦶꦥꦸꦤ꧀ꦩꦼꦤꦶꦏꦏꦸꦭꦔꦺꦔꦺꦂ​꧊ꦭꦧꦤ꧀꧉​

^32:5 ꦱꦩꦁꦏꦺꦏꦸꦭꦒꦝꦃꦊꦩ꧀ꦧꦸ꧈​ꦏꦸꦭ꧀ꦢꦶ꧈​ꦩꦺꦤ꧀ꦢꦒꦺꦩ꧀ꦧꦺꦭ꧀ꦭꦤ꧀ꦩꦺꦤ꧀ꦢꦗꦮꦶ꧈​ꦠꦸꦮꦶꦤ꧀ꦫꦺꦚ꧀ꦕꦁꦱꦮꦼꦠꦮꦶꦱ꧀꧉​ꦲꦼꦁꦒꦺꦤ꧀ꦏꦸꦭꦔꦠꦸꦂꦫꦶꦥꦶꦂꦱꦩꦼꦤꦶꦏꦩ꧀ꦧꦺꦴꦠꦼꦤ꧀ꦱꦤꦺꦱ꧀ꦱꦸꦥꦢꦺꦴꦱ꧀ꦥꦶꦱꦺꦴꦮꦤ꧀ꦏꦸꦭꦩꦼꦤꦶꦏꦤ꧀ꦢꦢꦺꦴꦱ꧀ꦱꦏꦼꦤ꧀ꦉꦤꦥꦚ꧀ꦗꦼꦤꦼꦁꦔꦤ꧀꧉’"​

^32:6 ꦤꦭꦶꦏꦧꦭꦶ꧈​ꦏꦺꦴꦁꦏꦺꦴꦤ꧀ꦤꦤ꧀ꦩꦲꦸꦥꦝꦩꦠꦸꦂ꧈​"ꦏꦸꦭꦱꦩ꧀ꦥꦸꦤ꧀ꦏꦼꦥꦁꦒꦶꦃꦏꦭꦶꦪꦤ꧀ꦏꦁꦫꦏ​꧊ꦌꦱꦲꦸ꧈​ꦱꦩꦼꦤꦶꦏꦱꦩ꧀ꦥꦸꦤ꧀ꦧꦶꦝꦭ꧀ꦩꦼꦛꦸꦏ꧀ꦏꦏꦼꦤ꧀ꦥꦚ꧀ꦗꦼꦤꦼꦁꦔꦤ꧀꧈​ꦏꦝꦺꦫꦺꦏ꧀ꦏꦏꦼꦤ꧀ꦠꦶꦪꦁꦏꦮꦤ꧀ꦲꦠꦸꦱ꧀꧉"​

^32:7 ꦏꦿꦸꦔꦸꦲꦠꦸꦂꦫꦺꦥꦫꦏꦺꦴꦁꦏꦺꦴꦤ꧀ꦤꦤ꧀ꦩꦲꦸ​꧊ꦪꦏꦸꦧ꧀ꦮꦼꦢꦶꦧꦔꦼꦠ꧀꧉​ꦥꦫꦧꦠꦸꦂꦫꦺ꧈​ꦩꦼꦁꦏꦺꦴꦤꦺꦴꦲꦸꦒꦮꦼꦝꦸꦱ꧀ꦱꦺꦒꦺꦩ꧀ꦧꦺꦭ꧀ꦭꦤ꧀ꦮꦼꦝꦸꦱ꧀ꦗꦮ꧈​ꦱꦥꦶꦭꦤ꧀ꦲꦸꦤ꧀ꦠꦤꦺꦢꦶꦥꦺꦫꦁꦢꦢꦶꦫꦺꦴꦁꦥꦤ꧀ꦛ꧉​

^32:8 ꦥꦔꦸꦤꦤ꧀ꦢꦶꦏꦤꦺ꧈​"ꦱꦲꦸꦥꦩ​꧊ꦌꦱꦲꦸꦤꦼꦩ꧀ꦥꦸꦃꦱꦶꦁꦱꦥꦤ꧀ꦛ꧈​ꦢꦶꦒꦮꦺꦭꦸꦝꦼꦱ꧀꧈​ꦱꦲꦺꦴꦫꦲꦺꦴꦫꦤꦺꦱꦶꦁꦭꦶꦪꦤꦺꦧꦶꦱꦲꦺꦴꦚ꧀ꦕꦠ꧀꧉"​

^32:9 ​꧊ꦪꦏꦸꦧ꧀ꦤ꧀ꦢꦼꦢꦺꦴꦔ꧈​"ꦝꦸꦃꦄꦭ꧀ꦭꦃ꧈​ꦲꦶꦁꦏꦁꦢꦶꦥꦸꦤ꧀ꦱꦼꦩ꧀ꦧꦃꦊꦭꦸꦲꦸꦂꦏꦸꦭ​꧊ꦄꦧꦿꦲꦩ꧀ꦭꦤ꧀​꧊ꦆꦱ꧀ꦏꦏ꧀;ꦩꦸꦒꦶꦏꦼꦂꦱꦩꦶꦪꦂꦱꦏ꧀ꦏꦏꦼꦤ꧀ꦲꦠꦸꦂꦏꦸꦭ!ꦥꦚ꧀ꦗꦼꦤꦼꦁꦔꦤ꧀ꦥꦶꦪꦩ꧀ꦧꦏ꧀ꦲꦶꦁꦏꦁꦥꦫꦶꦁꦝꦮꦸꦃ꧈​ꦱꦸꦥꦢꦺꦴꦱ꧀ꦏꦸꦭꦮꦁꦱꦸꦭ꧀ꦝꦠꦼꦁꦤꦼꦒꦫꦶꦏꦸꦭꦭꦤ꧀ꦱꦤꦏ꧀ꦱꦼꦝꦺꦫꦺꦏ꧀ꦏꦸꦭ꧉​ꦥꦚ꧀ꦗꦼꦤꦼꦁꦔꦤ꧀ꦱꦩ꧀ꦥꦸꦤ꧀ꦥꦽꦗꦚ꧀ꦗꦶꦧꦝꦺꦔꦶꦫꦶꦢ꧀ꦭꦩ꧀ꦥꦃꦏꦸꦭꦮꦁꦱꦸꦭ꧀ꦏꦤ꧀ꦛꦶꦮꦶꦭꦸꦗꦼꦁ꧉​

^32:10 ꦏꦸꦭꦩ꧀ꦧꦺꦴꦠꦼꦤ꧀ꦥꦤ꧀ꦠꦼꦱ꧀ꦤꦩ꧀ꦥꦶꦱꦶꦃꦭꦤ꧀ꦏꦱꦼꦠꦾꦤ꧀ꦲꦶꦁꦏꦁꦠꦸꦩꦤ꧀ꦢꦸꦏ꧀ꦝꦠꦼꦁꦏꦸꦭ꧉​ꦤꦭꦶꦏꦏꦸꦭꦩꦁꦏꦠ꧀꧈​ꦚꦧꦿꦁꦭꦺꦥꦺꦤ꧀​꧊ꦪꦂꦢꦺꦤ꧀꧈​ꦏꦸꦭꦩ꧀ꦧꦺꦴꦠꦼꦤ꧀ꦩ꧀ꦧꦼꦏ꧀ꦠꦩꦼꦤꦥꦩꦼꦤꦥ꧈​ꦏꦼꦗꦮꦶꦠꦼꦏꦼꦤ꧀꧉​ꦩꦁꦏꦱꦩꦁꦏꦺꦏꦸꦭꦮꦁꦱꦸꦭ꧀ꦩ꧀ꦧꦼꦏ꧀ꦠꦥꦼꦥꦤ꧀ꦛꦤ꧀ꦏꦭꦶꦃꦩꦼꦤꦶꦏ꧉​

^32:11 ꦲꦢꦽꦁꦥꦚꦸꦮꦸꦤ꧀ꦏꦸꦭ꧈​ꦩꦸꦒꦶꦏꦭꦸꦮꦂꦫꦤꦱꦏꦶꦁꦠꦔꦤ꧀ꦤꦶꦥꦸꦤ꧀ꦏꦏꦁꦏꦸꦭ​꧊ꦌꦱꦲꦸ꧉​ꦏꦸꦭꦲꦗꦿꦶꦃꦩ꧀ꦧꦺꦴꦏ꧀ꦧꦶꦭꦶꦃꦩꦁꦏꦺꦤꦼꦩ꧀ꦥꦸꦃꦭꦤ꧀ꦔ꧀ꦒꦼꦕꦏ꧀ꦏꦸꦭꦱꦼꦢꦪ꧈​ꦥꦫꦠꦶꦪꦁꦲꦺꦱ꧀ꦠꦿꦶꦭꦤ꧀ꦭꦫꦺꦭꦫꦺ꧉​

^32:12 ꦩꦸꦒꦶꦥꦚ꧀ꦗꦼꦤꦼꦁꦔꦤ꧀ꦔꦺꦔꦼꦠ꧀ꦠꦶꦗꦚ꧀ꦗꦶꦥꦚ꧀ꦗꦼꦤꦼꦁꦔꦤ꧀꧈​ꦧꦶꦭꦶꦃꦥꦚ꧀ꦗꦼꦤꦼꦁꦔꦤ꧀ꦧꦝꦺꦔꦶꦫꦶꦢ꧀ꦭꦩ꧀ꦥꦃꦏꦸꦭꦮꦁꦱꦸꦭ꧀ꦝꦠꦼꦁꦥꦁꦒꦺꦤ꧀ꦤꦤ꧀ꦤꦶꦥꦸꦤ꧀ꦧꦥꦏ꧀ꦏꦸꦭꦏꦤ꧀ꦛꦶꦮꦶꦭꦸꦗꦼꦁ꧉​ꦱꦂꦠꦥꦚ꧀ꦗꦼꦤꦼꦁꦔꦤ꧀ꦧꦝꦺꦩꦫꦶꦁꦔꦶꦲꦤꦏ꧀ꦠꦸꦫꦸꦤ꧀ꦏꦛꦃ꧈​ꦔꦤ꧀ꦠꦺꦴꦱ꧀ꦩ꧀ꦧꦺꦴꦠꦼꦤ꧀ꦱꦒꦼꦢ꧀ꦏꦲꦺꦠꦁ꧈​ꦩꦼꦂꦒꦶꦏꦛꦃꦲꦶꦥꦸꦤ꧀ꦏꦢꦺꦴꦱ꧀ꦮꦼꦝꦶꦲꦶꦁꦒꦶꦱꦶꦏ꧀ꦏꦶꦁꦱꦼꦒꦤ꧀ꦠꦼꦤ꧀꧉"​

^32:13 ​꧊ꦪꦏꦸꦧ꧀ꦔꦶꦤꦼꦥ꧀ꦲꦤꦲꦶꦁꦏꦺꦴꦤꦺꦴ꧉​ꦤꦸꦭꦶꦤꦶꦱꦶꦃꦲꦏꦺꦫꦗꦏꦪꦤꦺꦱꦥꦺꦫꦁꦔꦤ꧀꧈​ꦏꦒꦮꦺꦲꦠꦸꦂꦲꦠꦸꦂꦩꦫꦁ​꧊ꦌꦱꦲꦸ꧈​ꦏꦏꦁꦤꦺ꧉​

^32:14 ꦲꦠꦸꦂꦲꦠꦸꦂꦩꦲꦸꦫꦸꦥꦮꦼꦝꦸꦱ꧀ꦮꦢꦺꦴꦤ꧀ꦫꦺꦴꦁꦲꦠꦸꦱ꧀꧈​ꦮꦼꦝꦸꦱ꧀ꦭꦤꦁꦫꦺꦴꦁꦥꦸꦭꦸꦃ꧈​ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦮꦢꦺꦴꦤ꧀ꦫꦺꦴꦁꦲꦠꦸꦱ꧀꧈​ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤꦁꦫꦺꦴꦁꦥꦸꦭꦸꦃ꧈​

^32:15 ꦲꦸꦤ꧀ꦠꦱꦶꦁꦲꦶꦱꦶꦃꦤꦸꦱꦺꦴꦤ꧀ꦤꦶꦠꦼꦭꦸꦁꦥꦸꦭꦸꦃ꧈​ꦱꦲꦤꦏ꧀ꦏꦺꦥꦶꦱꦤ꧀꧈​ꦱꦥꦶꦮꦢꦺꦴꦤ꧀ꦥꦠꦁꦥꦸꦭꦸꦃ꧈​ꦱꦥꦶꦭꦤꦁꦫꦺꦴꦭꦱ꧀꧈​ꦏꦸꦭ꧀ꦢꦶꦮꦢꦺꦴꦤ꧀ꦫꦺꦴꦁꦥꦸꦭꦸꦃꦭꦤ꧀ꦏꦸꦭ꧀ꦢꦶꦭꦤꦁꦱꦼꦥꦸꦭꦸꦃ꧉​

^32:16 ꦏꦺꦮꦤ꧀ꦏꦺꦮꦤ꧀ꦩꦲꦸꦢꦶꦥꦤ꧀ꦛꦥꦤ꧀ꦛꦭꦤ꧀ꦱꦧꦼꦤ꧀ꦥꦤ꧀ꦛꦤꦺꦢꦶꦥꦱꦿꦃꦲꦏꦺꦩꦫꦁꦧꦠꦸꦂꦱꦶꦗꦶ;ꦏꦫꦺꦴꦢꦶꦮꦼꦭꦶꦁꦩꦼꦁꦏꦺꦤꦺ꧈​"ꦩ꧀ꦭꦏꦸꦮꦤ꧀ꦝꦶꦱꦶꦏ꧀ꦏꦶꦭꦏꦸꦏꦸ꧉​ꦲꦤ꧀ꦠꦫꦤꦺꦥꦼꦥꦤ꧀ꦛꦤ꧀ꦱꦶꦗꦶꦭꦤ꧀ꦱꦶꦗꦶꦤꦺꦏꦸꦢꦸꦲꦤꦊꦠ꧀ꦠꦺ꧉"​

^32:17 ꦧꦠꦸꦂꦱꦶꦁꦲꦤꦲꦶꦁꦔꦉꦥ꧀ꦝꦺꦮꦺꦢꦶꦮꦼꦭꦶꦁꦩꦼꦁꦏꦺꦤꦺ꧈​"ꦩꦼꦁꦏꦺꦴꦪꦺꦤ꧀ꦏꦼꦥꦼꦛꦸꦏ꧀ꦏꦏꦁꦏꦸ​꧊ꦌꦱꦲꦸꦭꦤ꧀ꦢꦶꦠꦏꦺꦴꦤ꧀ꦤꦶ꧈​‘ꦧꦼꦤ꧀ꦢꦫꦩꦸꦱꦥ?ꦏꦺꦮꦤ꧀ꦏꦺꦮꦤ꧀ꦲꦶꦏꦶꦢꦸꦮꦺꦏ꧀ꦏꦺꦱꦥ?’

^32:18 ꦮꦁꦱꦸꦭ꧀ꦭꦤ꧀ꦤ꧈​‘ꦒꦝꦃꦲꦤ꧀ꦤꦶꦥꦸꦤ꧀ꦏꦁꦲꦧ꧀ꦢꦶ​꧊ꦪꦏꦸꦧ꧀꧉​ꦩꦼꦤꦶꦏꦲꦠꦸꦂꦲꦠꦸꦂꦏꦁꦒꦺ​꧊ꦌꦱꦲꦸ꧈​ꦧꦼꦤ꧀ꦢꦫꦤꦶꦥꦸꦤ꧀꧉​ꦏꦁꦲꦧ꧀ꦢꦶ​꧊ꦪꦏꦸꦧ꧀ꦥꦶꦪꦩ꧀ꦧꦏ꧀ꦔꦼꦠꦸꦠ꧀ꦠꦏꦼꦤ꧀ꦮꦺꦴꦤ꧀ꦠꦼꦤ꧀ꦮꦶꦁꦏꦶꦁ꧉’"​

^32:19 ꦧꦠꦸꦂꦱꦶꦁꦏꦥꦶꦤ꧀ꦝꦺꦴ꧈​ꦏꦠꦼꦭꦸꦭꦤ꧀ꦏꦧꦺꦃꦱꦶꦁꦏꦥꦱꦿꦃꦲꦤ꧀ꦥꦼꦥꦤ꧀ꦛꦤ꧀ꦩꦲꦸꦢꦶꦮꦼꦭꦶꦁꦥꦝ:ꦪꦺꦤ꧀ꦏꦼꦥꦼꦛꦸꦏ꧀​꧊ꦌꦱꦲꦸꦢꦶꦏꦺꦴꦤ꧀ꦩꦠꦸꦂ꧈​

^32:20 "ꦏꦁꦲꦧ꧀ꦢꦶ​꧊ꦪꦏꦸꦧ꧀ꦥꦶꦪꦩ꧀ꦧꦏ꧀ꦩ꧀ꦭꦩ꧀ꦥꦃꦔꦼꦠꦸꦠ꧀ꦠꦏꦼꦤ꧀ꦮꦺꦴꦤ꧀ꦠꦼꦤ꧀ꦮꦶꦁꦏꦶꦁ꧉"​ꦥꦶꦏꦶꦂꦫꦤ꧀ꦤꦺ​꧊ꦪꦏꦸꦧ꧀꧈​"ꦩꦸꦒꦩꦸꦒꦱꦿꦤꦲꦠꦸꦂꦲꦠꦸꦂꦲꦶꦏꦶ​꧊ꦌꦱꦲꦸꦭꦶꦭꦶꦃꦲꦠꦶꦤꦺ꧈​ꦭꦤ꧀ꦪꦺꦤ꧀ꦩꦼꦁꦏꦺꦴꦏꦼꦠꦼꦩꦸꦏꦫꦺꦴꦲꦏꦸ꧈​ꦮꦶꦱ꧀ꦧꦶꦱꦔꦥꦸꦫꦏꦭꦸꦥꦸꦠ꧀ꦠꦤ꧀ꦏꦸ꧉"​

^32:21 ꦩꦼꦁꦏꦺꦴꦤꦺꦴꦲꦠꦸꦂꦲꦠꦸꦂꦩꦲꦸꦩ꧀ꦭꦏꦸꦤ꧀ꦢꦶꦱꦶꦏ꧀꧈​ꦭꦤ꧀​꧊ꦪꦏꦸꦧ꧀ꦝꦺꦮꦺꦧꦼꦔꦶꦏꦸꦮꦶꦏꦺꦫꦶ꧈​ꦔꦶꦤꦼꦥ꧀ꦲꦤꦲꦶꦁꦏꦺꦩꦃ꧉​

^32:22 ꦲꦶꦁꦧꦼꦔꦶꦏꦸꦮꦶꦲꦸꦒ​꧊ꦪꦏꦸꦧ꧀ꦠꦔꦶꦭꦤ꧀ꦚꦧꦿꦁꦔꦏꦺꦧꦺꦴꦗꦺꦴꦤꦺꦭꦺꦴꦫꦺꦴꦱꦂꦠꦱꦼꦭꦶꦂꦫꦺꦭꦺꦴꦫꦺꦴꦠꦸꦮꦶꦤ꧀ꦲꦤꦏ꧀ꦏꦺꦱꦼꦮꦼꦭꦱ꧀꧈​ꦲꦶꦁꦏꦭꦶ​꧊ꦪꦧꦺꦴꦏ꧀꧉​

^32:23 ꦤꦸꦭꦶꦲꦶꦪꦚꦧꦿꦁꦔꦏꦺꦱꦧꦫꦁꦢꦂꦧꦺꦏ꧀ꦏꦺꦏꦧꦺꦃ꧉​

^32:24 ꦤꦁꦔꦶꦁ​꧊ꦪꦏꦸꦧ꧀ꦝꦺꦮꦺꦏꦺꦫꦶꦲꦶꦗꦺꦤ꧀ꦲꦤꦲꦶꦁꦏꦺꦩꦃ꧉​ꦢꦸꦩꦢꦏ꧀ꦏꦤ꧀ꦲꦤꦮꦺꦴꦁꦭꦤꦁꦠꦼꦏꦔ꧀ꦒꦼꦭꦸꦠ꧀​꧊ꦪꦏꦸꦧ꧀ꦔꦤ꧀ꦠꦶꦔꦉꦥ꧀ꦥꦏꦺꦧꦾꦂ꧉​

^32:25 ꦧꦉꦁꦲꦺꦴꦫꦧꦶꦱꦔꦭꦃꦲꦏꦺ​꧊ꦪꦏꦸꦧ꧀꧈​ꦮꦺꦴꦁꦩꦲꦸꦧꦚ꧀ꦗꦸꦂꦩꦸꦤ꧀ꦠꦶꦂꦕꦼꦛꦶꦏ꧀ꦏꦺ​꧊ꦪꦏꦸꦧ꧀ꦔꦤ꧀ꦠꦶꦏꦼꦱ꧀ꦭꦺꦪꦺꦴ꧉​

^32:26 ꦕ꧀ꦭꦛꦸꦤꦺꦮꦺꦴꦁꦩꦲꦸ꧈​"ꦲꦏꦸꦕꦸꦭ꧀ꦤ꧈​ꦲꦶꦏꦶꦮꦶꦱ꧀ꦲꦉꦥ꧀ꦧꦾꦂ꧉"​ꦮꦁꦱꦸꦭ꧀ꦭꦤ꧀ꦤꦺ​꧊ꦪꦏꦸꦧ꧀꧈​"ꦥꦚ꧀ꦗꦼꦤꦼꦁꦔꦤ꧀ꦩ꧀ꦧꦺꦴꦠꦼꦤ꧀ꦧꦝꦺꦏꦸꦭꦕꦸꦭ꧀ꦭꦏꦼꦤ꧀꧈​ꦩꦼꦤꦮꦶꦢꦺꦫꦺꦁꦩ꧀ꦧꦼꦂꦏꦃꦲꦶꦏꦸꦭ꧉"​

^32:27 "ꦗꦼꦤꦼꦁꦩꦸꦱꦥ?"ꦥꦶꦠꦏꦺꦴꦤ꧀ꦤꦺꦮꦺꦴꦁꦩꦲꦸ꧉​ꦮꦁꦱꦸꦭ꧀ꦭꦤ꧀ꦤꦺ꧈​"​꧊ꦪꦏꦸꦧ꧀꧉"​

^32:28 ꦕ꧀ꦭꦛꦸꦤꦺꦮꦺꦴꦁꦩꦲꦸ꧈​"ꦗꦼꦤꦼꦁꦩꦸꦲꦗꦢꦶꦱꦼꦧꦸꦠ꧀​꧊ꦪꦏꦸꦧ꧀ꦩꦼꦤꦺꦃ꧈​ꦤꦁꦔꦶꦁ​꧊ꦆꦱꦿꦲꦺꦭ꧀;ꦩꦼꦂꦒꦏꦺꦴꦮꦺꦮꦶꦱ꧀ꦒꦼꦭꦸꦠ꧀ꦏꦫꦺꦴꦄꦭ꧀ꦭꦃꦭꦤ꧀ꦏꦫꦺꦴꦩꦤꦸꦁꦱ꧈​ꦩꦁꦏꦩꦼꦤꦁ꧉"​

^32:29 ​꧊ꦪꦏꦸꦧ꧀ꦒꦼꦤ꧀ꦠꦶꦠꦏꦺꦴꦤ꧀꧈​"ꦲꦱ꧀ꦩꦥꦚ꧀ꦗꦼꦤꦼꦁꦔꦤ꧀ꦱꦶꦤ꧀ꦠꦼꦤ꧀?"ꦤꦁꦔꦶꦁꦢꦶꦮꦁꦱꦸꦭ꧀ꦭꦶ꧈​"ꦏꦺꦴꦮꦺꦲꦺꦴꦫꦥꦽꦭꦸꦠꦏꦺꦴꦤ꧀ꦗꦼꦤꦼꦁꦏꦸ!"​꧊ꦪꦏꦸꦧ꧀ꦧꦚ꧀ꦗꦸꦂꦢꦶꦧꦼꦂꦏꦃꦲꦶ꧉​

^32:30 ꦥꦔꦸꦤꦤ꧀ꦢꦶꦏꦤꦺ​꧊ꦪꦏꦸꦧ꧀꧈​"ꦲꦏꦸꦮꦶꦱ꧀ꦏꦼꦠꦼꦩꦸꦏꦫꦺꦴꦄꦭ꧀ꦭꦃꦲꦢꦸꦲꦉꦥ꧀꧈​ꦲꦺꦮꦱꦼꦩꦺꦴꦤꦺꦴꦲꦶꦱꦶꦃꦊꦱ꧀ꦠꦫꦶꦲꦸꦫꦶꦥ꧀꧉"​ꦩꦸꦭꦤꦺꦥꦁꦒꦺꦴꦤ꧀ꦤꦤ꧀ꦩꦲꦸꦢꦶꦗꦼꦤꦼꦁꦔꦶ​꧊ꦥ꧀ꦤꦶꦪꦺꦭ꧀꧉​

^32:31 ꦧꦉꦁꦱꦽꦔꦺꦔꦺꦤꦺꦩ꧀ꦭꦼꦛꦺꦏ꧀​꧊ꦪꦏꦸꦧ꧀ꦧꦚ꧀ꦗꦸꦂꦩꦁꦏꦠ꧀꧉​ꦭꦏꦸꦤꦺꦥꦶꦚ꧀ꦕꦁ꧈​ꦩꦼꦂꦒꦕꦼꦛꦶꦏ꧀ꦏꦺꦏꦼꦱ꧀ꦭꦺꦪꦺꦴ꧉​

^32:32 ꦠꦼꦏꦤ꧀ꦱꦼꦥꦿꦺꦤꦺꦮꦺꦴꦁ​꧊ꦆꦱꦿꦲꦺꦭ꧀꧈​ꦲꦤꦏ꧀ꦠꦸꦫꦸꦤꦺ​꧊ꦪꦏꦸꦧ꧀꧈​ꦥꦝꦲꦺꦴꦫꦩꦁꦔꦤ꧀ꦢꦒꦶꦁꦱꦶꦁꦲꦤꦲꦶꦁꦕꦼꦛꦶꦏ꧀꧈​ꦩꦼꦂꦒꦕꦼꦛꦶꦏ꧀ꦏꦺ​꧊ꦪꦏꦸꦧ꧀ꦏꦼꦱ꧀ꦭꦺꦪꦺꦴꦤꦭꦶꦏꦒꦼꦭꦸꦠ꧀ꦠꦤ꧀ꦏꦫꦺꦴꦄꦭ꧀ꦭꦃꦩꦲꦸ꧉​