Alkitab/Wilangan/11

11:1 ꦧꦁꦱ​꧊ꦆꦱꦿꦲꦺꦭ꧀ꦥꦝꦔ꧀ꦒꦸꦤ꧀ꦢꦼꦭ꧀ꦭꦶꦒꦸꦱ꧀ꦠꦶꦄꦭ꧀ꦭꦃꦩꦼꦂꦒꦲꦼꦁꦒꦺꦴꦤꦺꦥꦝꦔꦽꦏꦱꦤꦤ꧀ꦝꦁꦏꦼꦏꦸꦫꦁꦔꦤ꧀ꦫꦸꦥꦫꦸꦥ꧉​ꦧꦉꦁꦩꦽꦁꦥꦁꦒꦸꦤ꧀ꦢꦼꦭ꧀ꦭꦺꦮꦺꦴꦁ​꧊ꦆꦱꦿꦲꦺꦭ꧀ꦩꦲꦸ꧈​ꦒꦸꦱ꧀ꦠꦶꦄꦭ꧀ꦭꦃꦢꦸꦏ꧈​ꦤꦸꦭꦶꦤꦼꦏꦏ꧀ꦏꦏꦺꦒꦼꦤꦶꦲꦶꦁꦥꦭꦺꦫꦺꦤ꧀ꦤꦤ꧀ꦏꦺꦴꦤꦺꦴ꧉​ꦒꦼꦤꦶꦤꦺꦩꦸꦭꦢ꧀ꦩꦸꦭꦢ꧀ꦔꦺꦴꦧꦺꦴꦁꦏꦺꦩꦃꦏꦺꦩꦃꦱꦮꦼꦠꦫ꧉​
11:2 ꦮꦺꦴꦁꦮꦺꦴꦁꦧꦚ꧀ꦗꦸꦂꦥꦝꦧꦼꦔꦺꦴꦏ꧀ꦧꦼꦔꦺꦴꦏ꧀ꦚ꧀ꦗꦭꦸꦏ꧀ꦠꦸꦭꦸꦁꦏꦫꦺꦴ​꧊ꦩꦸꦱ꧉​​꧊ꦩꦸꦱꦤꦸꦭꦶꦤ꧀ꦢꦼꦢꦺꦴꦔꦩꦫꦁꦄꦭ꧀ꦭꦃ꧈​ꦠꦼꦩꦃꦒꦼꦤꦶꦤꦺꦧꦚ꧀ꦗꦸꦂꦱꦶꦉꦥ꧀꧉​
11:3 ꦩꦼꦂꦒꦱꦏꦊꦭꦏꦺꦴꦤ꧀ꦩꦲꦸ꧈​ꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴꦢꦶꦗꦼꦤꦼꦁꦔꦏꦺ​꧊ꦠꦧꦺꦫ꧉​ꦱꦶꦁꦠꦼꦒꦼꦱ꧀ꦱꦺꦲꦶꦁꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴꦒꦸꦱ꧀ꦠꦶꦄꦭ꧀ꦭꦃꦤꦼꦏꦏ꧀ꦏꦏꦺꦒꦼꦤꦶ꧉​
11:4 ꦲꦶꦁꦲꦤ꧀ꦠꦫꦤꦺꦮꦺꦴꦁ​꧊ꦆꦱꦿꦲꦺꦭ꧀ꦲꦤꦮꦺꦴꦁꦮꦺꦴꦁꦩꦚ꧀ꦕꦱꦶꦁꦏꦼꦠꦒꦶꦃꦲꦤ꧀ꦩꦁꦔꦤ꧀ꦲꦺꦤꦏ꧀꧉​ꦮꦺꦴꦁꦮꦺꦴꦁ​꧊ꦆꦱꦿꦲꦺꦭ꧀ꦲꦶꦪꦧꦚ꧀ꦗꦸꦂꦲꦤꦱꦶꦁꦩꦺꦭꦸꦩꦺꦭꦸꦏꦼꦥꦺꦔꦶꦤ꧀ꦩꦁꦔꦤ꧀ꦲꦶꦮꦏ꧀꧈​ꦩꦸꦭꦤꦺꦧꦚ꧀ꦗꦸꦂꦥꦝꦒꦿꦸꦤ꧀ꦢꦼꦭ꧀ꦭꦤ꧀꧉​ꦠꦼꦩ꧀ꦧꦸꦁꦔꦺ꧈​"ꦩ꧀ꦧꦺꦴꦏ꧀ꦪꦺꦤ꧀ꦔꦺꦤꦺꦲꦶꦏꦶꦲꦤꦱꦶꦁꦔꦼꦠꦼꦂꦫꦶꦲꦶꦮꦏ꧀!
11:5 ꦲꦤꦲꦶꦁ​꧊ꦩꦺꦱꦶꦂꦏꦶꦠꦧꦶꦱꦩꦁꦔꦤ꧀ꦲꦶꦮꦏ꧀ꦱꦠꦸꦠꦸꦒ꧈​ꦠꦤ꧀ꦥꦔꦼꦠꦺꦴꦏ꧀ꦏꦏꦺꦝꦸꦮꦶꦠ꧀꧉​ꦧꦶꦱꦩꦁꦔꦤ꧀ꦠꦶꦩꦸꦤ꧀꧈​ꦱꦼꦩꦁꦏ꧈​ꦥꦿꦺꦲꦶ꧈​ꦧꦿꦩ꧀ꦧꦁꦭꦤ꧀ꦧꦮꦁ!
11:6 ꦲꦤꦲꦶꦁꦏꦺꦤꦺꦏꦶꦠꦥꦝꦏꦼꦤ꧀ꦠꦺꦏ꧀ꦏꦤ꧀ꦠꦼꦤꦒ꧈​ꦩꦁꦏꦲꦺꦴꦫꦲꦤꦱꦶꦁꦢꦶꦥꦔꦤ꧀꧈​ꦏꦼꦗꦧꦩꦸꦁꦩꦤ꧀ꦤꦛꦺꦴꦏ꧀꧉"​
11:7 ꧌ꦩꦤ꧀ꦤꦏꦸꦮꦶꦫꦸꦥꦤꦺꦏꦪꦠꦸꦩ꧀ꦧꦂ꧈​ꦮꦼꦂꦤꦤꦺꦥꦸꦠꦶꦃꦱꦼꦩꦸꦏꦸꦤꦶꦁ꧉​
11:8 (11:8-9)ꦠꦼꦏꦤꦺꦲꦶꦁꦥꦭꦺꦫꦺꦤ꧀ꦤꦤ꧀ꦥꦤ꧀ꦝꦏ꧀ꦧꦼꦔꦶ꧈​ꦧꦉꦁꦏꦫꦺꦴꦠꦶꦧꦤꦺꦧꦸꦤ꧀꧉꧍​ꦲꦺꦱꦸꦏ꧀ꦏꦺꦮꦺꦴꦁꦮꦺꦴꦁꦥꦝꦔ꧀ꦭꦸꦩ꧀ꦥꦸꦏ꧀ꦏꦏꦺꦩꦤ꧀ꦤ꧈​ꦤꦸꦭꦶꦢꦶꦝꦼꦥ꧀ꦭꦺꦴꦏ꧀ꦢꦢꦶꦒ꧀ꦭꦼꦥꦸꦁ꧈​ꦧꦚ꧀ꦗꦸꦂꦢꦶꦒꦮꦺꦫꦺꦴꦠꦶꦧꦸꦤ꧀ꦢꦼꦂꦧꦸꦤ꧀ꦢꦼꦂꦲꦸꦠꦮꦒꦺꦥꦺꦁ꧉​ꦫꦱꦤꦺꦏꦪꦫꦺꦴꦠꦶꦱꦶꦁꦢꦶꦥꦁꦒꦁ꧈​ꦔꦁꦒꦺꦴꦊꦔꦗ꦳ꦲꦶꦠꦸꦤ꧀꧉​
11:9 (11:8)
11:10 ​꧊ꦩꦸꦱꦏꦿꦸꦔꦸꦥꦁꦒꦸꦤ꧀ꦢꦼꦭ꧀ꦭꦺꦮꦺꦴꦁꦮꦺꦴꦁ​꧊ꦆꦱꦿꦲꦺꦭ꧀꧈​ꦱꦶꦁꦥꦝꦔꦢꦼꦒ꧀ꦔ꧀ꦒꦺꦴꦩ꧀ꦧꦺꦴꦭ꧀ꦔ꧀ꦒꦺꦴꦩ꧀ꦧꦺꦴꦭ꧀ꦲꦶꦁꦔꦉꦥ꧀ꦥꦺꦭꦮꦁꦏꦺꦩꦃꦱꦸꦕꦶ꧉​ꦒꦸꦱ꧀ꦠꦶꦄꦭ꧀ꦭꦃꦢꦸꦏ꧈​ꦔꦤ꧀ꦠꦶ​꧊ꦩꦸꦱꦱꦼꦝꦶꦃꦧꦔꦼꦠ꧀꧉​
11:11 ꦩꦸꦭꦤꦺꦧꦚ꧀ꦗꦸꦂꦩꦠꦸꦂꦩꦫꦁꦄꦭ꧀ꦭꦃ꧈​"ꦏꦺꦁꦔꦶꦁꦩꦼꦤꦥꦥꦢꦸꦏꦠꦸꦩꦶꦤ꧀ꦢꦏ꧀ꦩꦼꦏꦠ꧀ꦠꦼꦤ꧀ꦝꦠꦼꦁꦏꦸꦭ?ꦩꦼꦤꦥꦩ꧀ꦧꦺꦴꦠꦼꦤ꧀ꦉꦤꦝꦠꦼꦁꦏꦸꦭ?ꦏꦺꦁꦔꦶꦁꦩꦼꦤꦥꦏꦸꦭꦢꦶꦥꦸꦤ꧀ꦧꦿꦸꦏꦶꦠꦁꦒꦼꦭ꧀ꦗꦮꦧ꧀ꦔꦿꦶꦩꦠ꧀ꦠꦶꦠꦶꦪꦁꦠꦶꦪꦁꦩꦼꦤꦶꦏ?
11:12 ꦫꦏ꧀ꦱꦤꦺꦱ꧀ꦏꦸꦭꦲꦶꦁꦏꦁꦤꦶꦠꦃꦲꦏꦼꦤ꧀ꦲꦸꦠꦮꦶꦢꦩꦼꦭ꧀ꦠꦶꦪꦁꦠꦶꦪꦁꦩꦼꦤꦶꦏꦱꦼꦭꦩꦶꦤꦶꦥꦸꦤ꧀ꦩ꧀ꦭꦩ꧀ꦥꦃꦝꦠꦼꦁꦤꦼꦒꦫꦶꦲꦶꦁꦏꦁꦥꦢꦸꦏꦗꦚ꧀ꦗꦺꦏ꧀ꦏꦏꦼꦤ꧀ꦏꦭꦶꦪꦤ꧀ꦱꦸꦥꦲꦺꦴꦱ꧀ꦝꦠꦼꦁꦊꦭꦸꦲꦸꦂꦫꦶꦥꦸꦤ꧀?
11:13 ꦱꦩꦼꦤꦶꦏꦠꦶꦪꦁꦠꦶꦪꦁꦩꦼꦤꦶꦏꦱꦩꦶꦏꦼꦠꦒꦶꦃꦲꦤ꧀꧈​ꦏꦼꦥꦺꦔꦶꦤ꧀ꦱꦔꦼꦠ꧀ꦤꦼꦝꦲꦸꦭꦩ꧀꧉​ꦱꦏꦶꦁꦥꦸꦤ꧀ꦢꦶꦱꦒꦼꦢ꧀ꦏꦸꦭꦲꦁꦱꦭ꧀ꦲꦸꦭꦩ꧀ꦏꦁꦒꦺꦚꦸꦏꦤꦶꦤꦼꦝꦠꦶꦪꦁꦱꦼꦩꦤ꧀ꦠꦼꦤ꧀ꦏꦛꦃꦲꦶꦥꦸꦤ꧀?
11:14 ꦕꦼꦏꦏ꧀ꦏꦶꦥꦸꦤ꧀ꦏꦸꦭꦩ꧀ꦧꦺꦴꦠꦼꦤ꧀ꦱꦒꦃꦚꦁꦒꦶꦠꦁꦒꦼꦭ꧀ꦗꦮꦧ꧀ꦲꦶꦁꦏꦁꦱꦼꦩꦤ꧀ꦠꦼꦤ꧀ꦲꦮꦿꦠ꧀ꦠꦶꦥꦸꦤ꧀ꦤꦩꦸꦁꦥꦶꦪꦩ꧀ꦧꦏ꧀ꦏꦤ꧀!
11:15 ꦩꦼꦤꦮꦶꦏꦥꦸꦫꦶꦃꦠꦼꦫꦸꦱ꧀ꦠꦼꦫꦸꦱ꧀ꦱꦤ꧀ꦏꦢꦺꦴꦱ꧀ꦩꦼꦏꦠ꧀ꦠꦼꦤ꧀꧈​ꦚꦸꦮꦸꦤ꧀ꦔꦥꦸꦤ꧀ꦠꦼꦤ꧀꧈​ꦏꦸꦭꦲꦭꦸꦮꦸꦁꦢꦶꦥꦸꦤ꧀ꦥꦼꦗꦃꦲꦤꦏꦺꦩꦮꦺꦴꦤ꧀꧈​ꦱꦸꦥꦢꦺꦴꦱ꧀ꦩ꧀ꦧꦺꦴꦠꦼꦤ꧀ꦔꦿꦲꦺꦴꦱ꧀ꦱꦏꦼꦤ꧀ꦲꦮꦿꦠ꧀ꦠꦶꦁꦱꦼꦱꦁꦒꦺꦤ꧀ꦏꦸꦭ꧉"​
11:16 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ​꧊ꦩꦸꦱ꧈​"ꦏꦺꦴꦮꦺꦔ꧀ꦭꦸꦩ꧀ꦥꦸꦏ꧀ꦤꦮꦺꦴꦁꦥꦶꦠꦸꦁꦥꦸꦭꦸꦃꦱꦶꦁꦢꦶꦲꦺꦫꦶꦁꦔꦶꦭꦤ꧀ꦢꦶꦲꦁꦒꦼꦥ꧀ꦢꦢꦶꦥꦤꦸꦤ꧀ꦠꦸꦤ꧀ꦤꦺꦲꦸꦩꦠ꧀ꦲꦶꦏꦶ꧉​ꦏꦺꦴꦤ꧀ꦤꦼꦤ꧀ꦔꦝꦼꦥ꧀ꦲꦏꦸꦲꦶꦁꦏꦺꦩꦃꦱꦸꦕꦶ꧈​ꦔꦢꦼꦒ꧀ꦗꦺꦗꦺꦂꦏꦫꦺꦴꦏꦺꦴꦮꦺ꧉​
11:17 ꦲꦏꦸꦧꦏꦭ꧀ꦠꦸꦩꦼꦝꦏ꧀ꦤ꧀ꦝꦮꦸꦃꦲꦶꦏꦺꦴꦮꦺ꧉​ꦲꦏꦸꦧꦏꦭ꧀ꦚ꧀ꦗꦸꦥꦸꦏ꧀ꦱꦥꦺꦫꦔꦤꦺꦫꦺꦴꦃꦱꦶꦁꦢꦏ꧀ꦥꦫꦶꦁꦔꦏꦺꦩꦫꦁꦏꦺꦴꦮꦺ꧈​ꦭꦤ꧀ꦧꦏꦭ꧀ꦢꦏ꧀ꦲꦼꦢꦸꦩ꧀ꦲꦼꦢꦸꦩ꧀ꦩꦫꦁꦮꦺꦴꦁꦩꦲꦸ꧉​ꦮꦺꦴꦁꦮꦺꦴꦁꦩꦲꦸꦩꦼꦁꦏꦺꦴꦤꦺꦧꦏꦭ꧀ꦧꦶꦱꦩ꧀ꦧꦶꦪꦤ꧀ꦠꦸꦩꦶꦏꦸꦭ꧀ꦠꦁꦒꦸꦁꦗꦮꦧ꧀꧈​ꦔꦿꦸꦩꦠ꧀ꦠꦶꦧꦁꦱꦲꦶꦏꦶ;ꦢꦢꦶꦏꦺꦴꦮꦺꦲꦺꦴꦫꦝꦺꦮꦺꦏ꧀ꦏꦤ꧀꧉"​
11:18 ꦱꦲꦶꦏꦶꦧꦁꦱꦏꦸꦮꦶꦏꦤ꧀ꦝꦤ꧀ꦤꦤꦩꦼꦁꦏꦺꦤꦺ꧈​"ꦏꦺꦴꦮꦺꦥꦝꦤꦸꦕꦺꦏ꧀ꦤꦲꦮꦏ꧀ꦩꦸꦏꦁꦒꦺꦴꦱꦺꦱꦸꦏ꧀꧉​ꦏꦺꦴꦮꦺꦧꦏꦭ꧀ꦥꦝꦩꦁꦔꦤ꧀ꦲꦶꦮꦏ꧀꧉​ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦩꦶꦉꦁꦔꦏꦺꦥꦼꦱꦩ꧀ꦧꦠ꧀ꦩꦸꦭꦤ꧀ꦥꦁꦒꦸꦤ꧀ꦢꦼꦭ꧀ꦩꦸ;ꦏꦺꦴꦮꦺꦥꦝꦏꦼꦥꦺꦔꦶꦤ꧀ꦩꦁꦔꦤ꧀ꦲꦶꦮꦏ꧀꧈​ꦭꦤ꧀ꦔꦁꦒꦼꦥ꧀ꦪꦺꦤ꧀ꦲꦶꦁ​꧊ꦩꦺꦱꦶꦂꦏꦲꦤꦤ꧀ꦩꦸꦭꦸꦮꦶꦃꦧꦼꦕꦶꦏ꧀꧉​ꦱꦲꦶꦏꦶꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦩꦫꦶꦁꦔꦶꦲꦶꦮꦏ꧀꧈​ꦭꦤ꧀ꦏꦸꦮꦶꦏꦸꦢꦸꦏꦺꦴꦏ꧀ꦥꦔꦤ꧀꧉​
11:19 ꦲꦶꦮꦏ꧀ꦩꦲꦸꦲꦺꦴꦫꦩꦸꦁꦕꦸꦏꦸꦥ꧀ꦏꦁꦒꦺꦴꦱꦼꦢꦶꦤꦲꦸꦠꦮꦫꦺꦴꦁꦢꦶꦤ꧈​ꦭꦶꦩꦁꦢꦶꦤꦲꦸꦠꦮꦱꦼꦥꦸꦭꦸꦃꦢꦶꦤ꧈​ꦲꦸꦒꦲꦺꦴꦫꦩꦸꦁꦕꦸꦏꦸꦥ꧀ꦏꦁꦒꦺꦴꦫꦺꦴꦁꦥꦸꦭꦸꦃꦢꦶꦤ꧈​
11:20 ꦤꦁꦔꦶꦁꦏꦁꦒꦺꦴꦱꦼꦱꦱꦶꦩꦸꦥꦸꦠ꧀꧈​ꦔꦤ꧀ꦠꦶꦏꦺꦴꦮꦺꦗꦼꦭꦺꦃꦭꦤ꧀ꦮꦼꦠꦼꦁꦩꦸꦏꦼꦮꦉꦒꦤ꧀꧉​ꦏꦸꦮꦶꦩꦼꦂꦒꦏꦺꦴꦮꦺꦥꦝꦤꦩ꧀ꦥꦶꦏ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃꦱꦶꦁꦲꦤꦲꦶꦁꦠꦼꦔꦃꦩꦸ꧈​ꦭꦤ꧀ꦩꦼꦂꦒꦏꦺꦴꦮꦺꦮꦶꦱ꧀ꦥꦝꦔ꧀ꦒꦸꦤ꧀ꦢꦼꦭ꧀ꦭꦶꦥꦚ꧀ꦗꦼꦤꦼꦁꦔꦤ꧀ꦤꦺꦱꦂꦠꦔꦁꦒꦼꦥ꧀ꦪꦺꦤ꧀ꦭꦸꦮꦶꦃꦧꦼꦕꦶꦏ꧀ꦱꦲꦸꦥꦩꦏꦺꦴꦮꦺꦲꦺꦴꦫꦭꦸꦔꦱꦏꦠꦤꦃ​꧊ꦩꦺꦱꦶꦂ꧉"​
11:21 ​꧊ꦩꦸꦱꦲꦸꦒꦩꦠꦸꦂꦩꦫꦁꦒꦸꦱ꧀ꦠꦶꦄꦭ꧀ꦭꦃ꧈​"ꦕꦕꦃꦲꦶꦥꦸꦤ꧀ꦠꦶꦪꦁꦲꦶꦁꦏꦁꦏꦮꦸꦭꦲꦶꦫꦶꦢ꧀ꦩꦼꦤꦶꦏ600.000꧈​ꦩꦁꦏꦥꦢꦸꦏꦔꦤ꧀ꦢꦶꦏꦧꦝꦺꦩꦫꦶꦁꦔꦶꦲꦸꦭꦩ꧀ꦕꦼꦏꦥ꧀ꦏꦁꦒꦺꦱꦼꦮꦸꦭ꧀ꦭꦤ꧀?
11:22 ꦥꦶꦤ꧀ꦠꦼꦤ꧀ꦏꦺꦩꦮꦺꦴꦤ꧀ꦕꦕꦃꦲꦶꦥꦸꦤ꧀ꦊꦩ꧀ꦧꦸꦭꦤ꧀ꦩꦺꦤ꧀ꦢꦲꦶꦁꦏꦁꦥꦽꦭꦸꦢꦶꦥꦸꦤ꧀ꦥꦿꦒꦠ꧀ꦏꦁꦒꦺꦚꦼꦏꦥ꧀ꦥꦶꦏꦧꦼꦠꦃꦲꦤ꧀ꦤꦶꦥꦸꦤ꧀ꦠꦶꦪꦁꦱꦼꦩꦤ꧀ꦠꦼꦤ꧀ꦢꦶꦥꦸꦤ꧀ꦏ꧀ꦭꦼꦩ꧀ꦥꦏ꧀ꦏꦏꦼꦤ꧀ꦱꦼꦢꦪꦫꦏ꧀ꦲꦶꦁꦒꦶꦃꦢꦺꦫꦺꦁꦕꦼꦏꦥ꧀?"
11:23 ꦒꦸꦱ꧀ꦠꦶꦄꦭ꧀ꦭꦃꦥꦫꦶꦁꦮꦁꦱꦸꦭ꧀ꦭꦤ꧀꧈​‘ꦥꦔ꧀ꦮꦱꦏꦸ ꦲꦶꦏꦶꦠꦤ꧀ꦥꦮꦔꦼꦤ꧀ꦤꦤ꧀꧉​ꦱꦲꦶꦏꦶꦲꦸꦒꦏꦺꦴꦮꦺꦧꦏꦭ꧀ꦔꦼꦂꦠꦶ꧈​ꦲꦥꦱꦶꦁꦢꦏ꧀ꦏꦤ꧀ꦝꦏ꧀ꦏꦏꦺꦲꦶꦏꦶꦧꦏꦭ꧀ꦏꦼꦭꦏꦺꦴꦤ꧀ꦲꦥꦲꦺꦴꦫ꧉"​
11:24 ​꧊ꦩꦸꦱꦧꦚ꧀ꦗꦸꦂꦩꦼꦠꦸꦱꦏꦏꦺꦩꦃꦱꦸꦕꦶꦭꦤ꧀ꦔꦸꦩꦸꦩ꧀ꦩꦏꦺꦩꦫꦁꦧꦁꦱ​꧊ꦆꦱꦿꦲꦺꦭ꧀ꦏꦧꦺꦃ꧈​ꦲꦥꦱꦶꦃꦁꦢꦶꦔꦤ꧀ꦢꦶꦏꦏ꧀ꦏꦏꦺꦢꦺꦤꦶꦁꦄꦭ꧀ꦭꦃ꧉​​꧊ꦩꦸꦱꦔ꧀ꦭꦸꦩ꧀ꦥꦸꦏ꧀ꦏꦏꦺꦥꦫꦥꦼꦩꦶꦩ꧀ꦥꦶꦤ꧀ꦥꦶꦠꦸꦁꦥꦸꦭꦸꦃ꧈​ꦢꦶꦏꦺꦴꦤ꧀ꦔꦢꦼꦒ꧀ꦲꦶꦁꦱꦲꦸꦧꦼꦁꦔꦺꦏꦺꦩꦃꦱꦸꦕꦶ꧉​
11:25 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦠꦸꦩꦼꦝꦏ꧀ꦲꦶꦁꦩꦺꦒꦭꦤ꧀ꦔꦤ꧀ꦢꦶꦏꦩꦫꦁ​꧊ꦩꦸꦱ꧈​ꦧꦚ꧀ꦗꦸꦂꦩꦸꦤ꧀ꦝꦸꦠ꧀ꦱꦥꦺꦫꦔꦤꦺꦫꦺꦴꦃꦱꦶꦁꦏꦥꦫꦶꦁꦔꦏꦺꦩꦫꦁ​꧊ꦩꦸꦱ꧈​ꦤꦸꦭꦶꦢꦶꦲꦼꦢꦸꦩ꧀ꦲꦼꦢꦸꦩ꧀ꦩꦏꦺꦮꦺꦴꦁꦥꦶꦠꦸꦁꦥꦸꦭꦸꦃꦩꦲꦸ꧉​ꦧꦉꦁꦫꦺꦴꦃꦤꦼꦝꦏ꧀ꦏꦶ꧈​ꦮꦺꦴꦁꦮꦺꦴꦁꦩꦲꦸꦧꦚ꧀ꦗꦸꦂꦥꦝꦕꦠꦸꦂꦫꦤ꧀ꦏꦪꦤꦧꦶ꧈​ꦱꦼꦤꦗꦤ꧀ꦲꦺꦴꦫꦊꦠ꧀ꦱꦸꦮꦺꦧꦚ꧀ꦗꦸꦂꦩꦼꦤꦼꦁ꧉​
11:26 ꦲꦤꦮꦺꦴꦁꦭꦺꦴꦫꦺꦴꦱꦏꦲꦤ꧀ꦠꦫꦤꦺꦮꦺꦴꦁꦥꦶꦠꦸꦁꦥꦸꦭꦸꦃꦩꦲꦸ꧈​ꦪꦲꦶꦏꦸ​꧊ꦌꦭ꧀ꦢꦢ꧀ꦭꦤ꧀​꧊ꦩꦺꦢꦢ꧀꧈​ꦏꦫꦶꦲꦤꦲꦶꦁꦏꦺꦩꦃꦲꦺ꧈​ꦲꦺꦴꦫꦩꦺꦭꦸꦔꦢꦼꦒ꧀ꦧꦼꦧꦉꦁꦔꦤ꧀ꦏꦫꦺꦴꦏꦚ꧀ꦕꦏꦚ꧀ꦕꦤꦺꦲꦶꦁꦏꦺꦩꦃꦱꦸꦕꦶ꧉​ꦮꦺꦴꦁꦭꦺꦴꦫꦺꦴꦩꦲꦸꦲꦸꦒꦏꦠꦼꦝꦏ꧀ꦏꦤ꧀ꦫꦺꦴꦃꦭꦤ꧀ꦲꦶꦪꦥꦝꦕꦠꦸꦂꦫꦤ꧀ꦏꦪꦤꦧꦶ꧉​
11:27 ꦲꦤꦤꦺꦴꦤꦺꦴꦩ꧀ꦩꦤ꧀ꦱꦶꦁꦮꦼꦫꦸꦃꦊꦭꦏꦺꦴꦤ꧀ꦩꦲꦸ꧈​ꦧꦚ꧀ꦗꦸꦂꦩ꧀ꦭꦪꦸꦲꦮꦺꦃꦮꦼꦫꦸꦃꦩꦫꦁ​꧊ꦩꦸꦱ꧉​
11:28 ​꧊ꦪꦺꦴꦱꦸꦮꦧꦶꦤ꧀​꧊ꦤꦸꦤ꧀꧈​ꦲꦧ꧀ꦢꦶꦤꦺ​꧊ꦩꦸꦱ꧈​ꦱꦶꦁꦮꦶꦮꦶꦠ꧀ꦤꦺꦴꦩ꧀ꦢꦢꦶꦥꦼꦩ꧀ꦧꦤ꧀ꦠꦸꦤꦺ꧈​ꦩꦠꦸꦂꦩꦫꦁ​꧊ꦩꦸꦱꦩꦼꦁꦏꦺꦤꦺ꧈​"ꦤ꧀ꦢꦫ꧈​ꦠꦶꦪꦁꦏꦭꦶꦃꦩꦼꦤꦶꦏꦢꦶꦥꦸꦤ꧀ꦝꦮꦸꦃꦲꦤꦱꦸꦥꦢꦺꦴꦱ꧀ꦱꦩꦶꦩꦺꦤ꧀ꦢꦼꦭ꧀!"
11:29 ꦮꦁꦱꦸꦭ꧀ꦭꦤ꧀ꦤꦺ​꧊ꦩꦸꦱ꧈​"ꦏꦺꦴꦏ꧀ꦩꦼꦩ꧀ꦥꦼꦁꦠꦼꦩꦼꦤ꧀ꦲꦼꦁꦒꦺꦴꦤ꧀ꦩꦸꦩ꧀ꦧꦺꦭꦤꦶꦲꦏꦸ?ꦱꦶꦁꦢꦏ꧀ꦱꦸꦮꦸꦤ꧀ꦩꦭꦃꦱꦸꦥꦪꦒꦸꦱ꧀ꦠꦶꦄꦭ꧀ꦭꦃꦏꦼꦂꦱꦩꦫꦶꦁꦔꦏꦺꦫꦺꦴꦃꦲꦺꦩꦫꦁꦱꦧꦁꦱꦏꦧꦺꦃ꧈​ꦭꦤ꧀ꦤ꧀ꦢꦢꦺꦏ꧀ꦏꦏꦺꦱꦧꦁꦱꦏꦧꦺꦃꦢꦢꦶꦤꦧꦶ!"
11:30 ​꧊ꦩꦸꦱꦧꦚ꧀ꦗꦸꦠ꧀ꦩꦸꦭꦶꦃ꧈​ꦱꦼꦩꦺꦴꦤꦺꦴꦲꦸꦒꦮꦺꦴꦁꦥꦶꦠꦸꦁꦥꦸꦭꦸꦃꦩꦲꦸꦥꦝꦩꦸꦭꦶꦃꦩꦼꦚꦁꦏꦺꦩꦃꦲꦺꦝꦺꦮꦺꦝꦺꦮꦺ꧉​
11:31 ꦒꦸꦱ꧀ꦠꦶꦄꦭ꧀ꦭꦃꦤꦼꦏꦏ꧀ꦏꦏꦺꦲꦔꦶꦤ꧀ꦱꦏꦱꦼꦒꦫ꧉​ꦲꦔꦶꦤ꧀ꦩꦲꦸꦔ꧀ꦒꦮꦩꦤꦸꦏ꧀ꦒꦼꦩꦏ꧀ꦥꦶꦫꦁꦥꦶꦫꦤ꧀ꦱꦶꦁꦥꦝꦩꦧꦸꦂꦕꦼꦤ꧀ꦝꦺꦏ꧀ꦧꦔꦼꦠ꧀꧉​ꦠꦼꦏꦤ꧀ꦥꦭꦺꦫꦺꦃꦲꦤ꧀ꦤꦺꦮꦺꦴꦁ​꧊ꦆꦱꦿꦲꦺꦭ꧀ꦩꦤꦸꦏ꧀ꦩꦤꦸꦏ꧀ꦩꦲꦸꦥꦝꦩꦺꦚ꧀ꦕꦺꦴꦏ꧀ꦱꦲꦼꦁꦒꦺꦴꦤ꧀ꦲꦼꦁꦒꦺꦴꦤ꧀ꦔꦤ꧀ꦠꦶꦱꦮꦼꦠꦫꦏꦶꦭꦺꦴꦩꦺꦠꦼꦂꦱꦏꦶꦮꦠꦼꦔꦼꦤ꧀ꦤꦺꦥꦭꦺꦫꦺꦃꦲꦤ꧀꧉​ꦱꦏꦶꦁꦲꦏꦺꦃꦲꦺꦔꦤ꧀ꦠꦶꦥꦝꦠꦸꦩ꧀ꦥꦁꦠꦶꦤ꧀ꦝꦶꦃ꧈​ꦝꦸꦮꦸꦂꦫꦺꦠꦸꦩ꧀ꦥꦸꦏ꧀ꦏꦤ꧀ꦤꦺꦮꦼꦠꦫꦱꦩꦺꦠꦼꦂ꧉​
11:32 ꦱꦼꦢꦶꦤꦏꦸꦮꦶ꧈​ꦧꦼꦔꦶꦤꦺꦱꦼꦮꦼꦔꦶꦩꦸꦥꦸꦠ꧀ꦭꦤ꧀ꦲꦺꦱꦸꦏ꧀ꦏꦺꦱꦼꦢꦶꦤꦝꦼꦒ꧀ꦮꦺꦴꦁ​꧊ꦆꦱꦿꦲꦺꦭ꧀ꦥꦝꦱꦼꦁꦏꦸꦢ꧀ꦔ꧀ꦭꦸꦩ꧀ꦥꦸꦏ꧀ꦏꦏꦺꦩꦤꦸꦏ꧀ꦒꦼꦩꦏ꧀ꦩꦲꦸ꧉​ꦱꦧꦼꦤ꧀ꦮꦺꦴꦁꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦺꦴꦫꦏꦸꦫꦁꦱꦏꦱꦺꦮꦸꦏꦶꦭꦺꦴꦒꦿꦩ꧀꧉​ꦩꦤꦸꦏ꧀ꦩꦤꦸꦏ꧀ꦩꦲꦸꦥꦝꦢꦶꦱꦶꦒꦂꦫꦶꦭꦤ꧀ꦢꦶꦥꦺꦥꦺꦔꦤ꧀ꦠꦶꦒꦫꦶꦁꦲꦤꦲꦶꦁꦱꦏꦸꦧꦼꦁꦔꦺꦥꦭꦺꦫꦺꦤ꧀ꦤꦤ꧀꧉​
11:33 ꦒꦸꦱ꧀ꦠꦶꦄꦭ꧀ꦭꦃꦢꦸꦏꦥꦶꦂꦱꦲꦼꦁꦒꦺꦴꦤꦺꦥꦝꦢꦽꦩ꧀ꦧꦭꦤ꧀ꦔ꧀ꦒꦒꦱ꧀꧈​ꦩꦸꦭꦤꦺꦧꦚ꧀ꦗꦸꦂꦢꦶꦲꦸꦏꦸꦩ꧀ꦱꦿꦤꦥꦒꦼꦧ꧀ꦭꦸꦒ꧀꧉​
11:34 ꦩꦼꦂꦒꦱꦏꦏꦸꦮꦶꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴꦢꦶꦗꦼꦤꦼꦁꦔꦏꦺ"​꧊ꦏꦶꦧꦿꦺꦴꦠ꧀​꧊ꦠꦲꦮ"​꧌ꦏꦸꦧꦸꦂꦫꦤ꧀ꦢꦽꦩ꧀ꦧ꧍꧈​ꦗꦭꦂꦫꦤ꧀ꦲꦶꦪꦲꦤꦲꦶꦁꦏꦺꦴꦤꦺꦴꦥꦔꦸꦧꦸꦂꦫꦺꦮꦺꦴꦁꦱꦶꦁꦥꦝꦩꦠꦶꦏꦼꦤꦥꦲꦸꦏꦸꦩ꧀ꦩꦤ꧀ꦩꦲꦸ꧉​
11:35 ꦧꦁꦱ​꧊ꦆꦱꦿꦲꦺꦭ꧀ꦔꦭꦶꦃꦱ꧀ꦱꦏꦏꦺꦴꦤꦺꦴꦩꦼꦚꦁꦏꦸꦛ​꧊ꦲꦗ꦳ꦺꦫꦺꦴꦠ꧀ꦭꦤ꧀ꦩꦱꦁꦏꦺꦩꦃꦲꦤꦲꦶꦁꦏꦺꦴꦤꦺꦴ꧉​