Alkitab/Wilangan/21

^21:1 ​꧊ꦄꦫꦢ꧀ꦩꦺꦴꦤꦺꦴꦱꦮꦶꦗꦶꦤꦶꦁꦏꦸꦛꦲꦶꦁꦠꦤꦃ​꧊ꦏꦺꦤꦲꦤ꧀ꦱꦶꦱꦶꦃ​꧊ꦏꦶꦢꦸꦭ꧀꧉​ꦧꦉꦁꦫꦗꦤꦺꦏꦸꦛꦩꦲꦸꦏꦿꦸꦔꦸꦪꦺꦤ꧀ꦧꦁꦱ​꧊ꦆꦱꦿꦲꦺꦭ꧀ꦲꦉꦥ꧀ꦠꦼꦏꦭꦶꦮꦠ꧀ꦢꦭꦤ꧀​꧊ꦄꦠꦫꦶꦩ꧀꧈​ꦧꦁꦱ​꧊ꦆꦱꦿꦲꦺꦭ꧀ꦧꦚ꧀ꦗꦸꦂꦢꦶꦱꦼꦫꦁꦭꦤ꧀ꦮꦺꦴꦁꦮꦺꦴꦁꦔꦺꦱꦮꦼꦠꦫꦢꦶꦠꦮꦤ꧀꧉​

^21:2 ꦮꦺꦴꦁ​꧊ꦆꦱꦿꦲꦺꦭ꧀ꦧꦚ꧀ꦗꦸꦂꦔꦠꦸꦂꦫꦏꦺꦗꦚ꧀ꦗꦶꦩꦫꦁꦄꦭ꧀ꦭꦃ꧈​ꦲꦸꦚ꧀ꦗꦸꦏ꧀ꦏꦺ꧈​"ꦩꦼꦤꦮꦶꦥꦔꦺꦫꦤ꧀ꦩꦉꦁꦔꦏꦼꦤ꧀ꦏꦸꦭꦱꦒꦼꦢ꧀ꦔꦮꦺꦴꦤ꧀ꦤꦏꦼꦤ꧀ꦠꦶꦪꦁꦠꦶꦪꦁꦩꦼꦤꦶꦏ꧈​ꦏꦶꦛꦏꦶꦛꦱꦠꦶꦪꦁꦔꦶꦥꦸꦤ꧀ꦱꦼꦢꦪꦧꦝꦺꦏꦸꦭꦱꦲꦺꦴꦱ꧀ꦱꦏꦼꦤ꧀ꦝꦠꦼꦁꦥꦢꦸꦏꦠꦤ꧀ꦥꦱꦫꦠ꧀꧈​ꦱꦂꦠꦠꦶꦪꦁꦠꦶꦪꦁꦔꦶꦥꦸꦤ꧀ꦧꦝꦺꦏꦸꦭꦠꦸꦩ꧀ꦥꦼꦱ꧀ꦱꦼꦢꦪ꧉"​

^21:3 ꦒꦸꦱ꧀ꦠꦶꦄꦭ꧀ꦭꦃꦩꦶꦪꦂꦱꦏ꧀ꦏꦏꦺꦥꦚꦸꦮꦸꦤ꧀ꦤꦺꦮꦺꦴꦁ​꧊ꦆꦱꦿꦲꦺꦭ꧀ꦩꦲꦸꦭꦤ꧀ꦩ꧀ꦧꦶꦪꦤ꧀ꦠꦸꦤꦼꦭꦸꦏ꧀ꦏꦏꦺꦮꦺꦴꦁ​꧊ꦏꦺꦤꦲꦤ꧀꧉​ꦮꦺꦴꦁ​꧊ꦏꦺꦤꦲꦤ꧀ꦭꦤ꧀ꦏꦸꦛꦏꦸꦛꦤꦺꦢꦶꦠꦸꦩ꧀ꦥꦼꦱ꧀ꦏꦧꦺꦃ꧉​ꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴꦧꦚ꧀ꦗꦸꦂꦢꦶꦗꦼꦤꦼꦁꦔꦏꦺ​꧊ꦲꦺꦴꦂꦩ꧉​

^21:4 ꦮꦺꦴꦁ​꧊ꦆꦱꦿꦲꦺꦭ꧀ꦧꦚ꧀ꦗꦸꦂꦭꦸꦔꦱꦏꦒꦸꦤꦸꦁ​꧊ꦲꦺꦴꦂ꧈​ꦩꦼꦚꦁꦠꦼꦭꦸꦏ꧀​꧊ꦄꦏꦧ꧈​ꦩꦏ꧀ꦱꦸꦢ꧀ꦢꦺꦔꦭꦁꦔꦸꦧꦼꦁꦔꦶꦠꦤꦃ​꧊ꦌꦢꦺꦴꦩ꧀꧉​ꦤꦁꦔꦶꦁꦱꦗꦿꦺꦴꦤꦺꦩ꧀ꦭꦏꦸꦲꦼꦤ꧀ꦠꦺꦏ꧀ꦱꦧꦂꦫꦺ꧈​

^21:5 ꦧꦚ꧀ꦗꦸꦂꦥꦝꦩꦸꦤꦶꦩꦸꦤꦶꦚꦭꦃꦲꦏꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀​꧊ꦩꦸꦱ꧈​ꦠꦼꦩ꧀ꦧꦸꦁꦔꦺ꧈​"ꦏꦺꦁꦔꦶꦁꦩꦼꦤꦥꦏꦸꦭꦢꦶꦥꦸꦤ꧀ꦧꦼꦏ꧀ꦠꦩꦼꦢꦭ꧀ꦱꦏꦶꦁꦠꦤꦃ​꧊ꦩꦺꦱꦶꦂꦏꦥꦸꦫꦶꦃꦥꦼꦗꦃꦲꦶꦁꦱꦼꦒꦤ꧀ꦠꦼꦤ꧀ꦮꦼꦝꦶꦩꦼꦤꦶꦏ꧉​ꦲꦶꦁꦔꦿꦶꦏꦶꦩ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦠꦼꦝ;ꦠꦺꦴꦪꦏꦁꦒꦺꦔꦺꦴꦩ꧀ꦧꦺꦲꦶꦁꦒꦶꦃꦩ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀꧉​ꦏꦸꦭꦱꦩꦶꦧꦺꦴꦱꦼꦤ꧀ꦤꦼꦝꦠꦼꦠꦼꦝꦤ꧀ꦲꦶꦁꦏꦁꦫꦺꦩꦺꦃꦩꦼꦤꦶꦏ!"

^21:6 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦤꦼꦏꦏ꧀ꦏꦏꦺꦲꦸꦭꦩꦤ꧀ꦢꦶꦲꦶꦁꦱꦠꦼꦔꦃꦲꦺꦮꦺꦴꦁ​꧊ꦆꦱꦿꦲꦺꦭ꧀꧈​ꦔꦤ꧀ꦠꦶꦲꦏꦺꦃꦱꦶꦁꦥꦝꦩꦠꦶꦢꦶꦕꦺꦴꦏꦺꦴꦠ꧀ꦲꦸꦭꦩꦲꦸ꧉​

^21:7 ꦮꦺꦴꦁ​꧊ꦆꦱꦿꦲꦺꦭ꧀ꦤꦸꦭꦶꦥꦝꦔꦝꦼꦥ꧀ꦩꦫꦁ​꧊ꦩꦸꦱꦭꦤ꧀ꦩꦠꦸꦂ꧈​"ꦏꦸꦭꦱꦩ꧀ꦥꦸꦤ꧀ꦱꦩꦶꦢꦩꦼꦭ꧀ꦢꦺꦴꦱꦔ꧀ꦭꦼꦥꦠ꧀ꦠꦏꦼꦤ꧀ꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦥꦚ꧀ꦗꦼꦤꦼꦁꦔꦤ꧀꧉​ꦱꦩꦼꦤꦶꦏꦏꦸꦭꦲꦠꦸꦂꦫꦶꦚꦸꦮꦸꦤ꧀ꦝꦠꦼꦁꦥꦔꦺꦫꦤ꧀꧈​ꦱꦸꦥꦢꦺꦴꦱ꧀ꦱꦮꦼꦂꦱꦮꦼꦂꦩꦼꦤꦶꦏꦏꦱꦶꦁꦏꦶꦂꦤꦱꦏꦶꦁꦠꦼꦔꦃꦏꦸꦭ꧉"​​꧊ꦩꦸꦱꦧꦚ꧀ꦗꦸꦂꦤ꧀ꦢꦼꦢꦺꦴꦔꦏꦁꦒꦺꦴꦧꦁꦱ​꧊ꦆꦱꦿꦲꦺꦭ꧀꧉​

^21:8 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦝꦮꦸꦃꦩꦫꦁ​꧊ꦩꦸꦱꦒꦮꦺꦲꦸꦭꦠꦶꦫꦺꦴꦤ꧀ꦱꦏꦠꦼꦩ꧀ꦧꦒꦭꦤ꧀ꦢꦶꦝꦮꦸꦃꦲꦶꦩꦱꦁꦲꦶꦁꦕꦒꦏ꧀꧉​ꦱꦧꦼꦤ꧀ꦮꦺꦴꦁꦱꦶꦁꦢꦶꦕꦺꦴꦏꦺꦴꦠ꧀ꦲꦸꦭꦢꦶꦏꦺꦴꦤ꧀ꦩꦤ꧀ꦢꦼꦁꦲꦸꦭꦠꦼꦩ꧀ꦧꦒꦩꦲꦸ꧈​ꦱꦸꦥꦪꦩꦫꦶ꧉​

^21:9 ​꧊ꦩꦸꦱꦧꦚ꧀ꦗꦸꦂꦒꦮꦺꦲꦸꦭꦠꦶꦫꦺꦴꦤ꧀ꦱꦏꦠꦼꦩ꧀ꦧꦒ꧈​ꦢꦶꦥꦱꦁꦲꦶꦁꦕꦒꦏ꧀꧉​ꦱꦧꦼꦤ꧀ꦮꦺꦴꦁꦱꦶꦁꦢꦶꦕꦺꦴꦏꦺꦴꦠ꧀ꦲꦸꦭꦭꦤ꧀ꦩꦤ꧀ꦢꦼꦁꦲꦸꦭꦠꦼꦩ꧀ꦧꦒꦩꦲꦸꦧꦚ꧀ꦗꦸꦂꦢꦢꦶꦮꦫꦱ꧀꧉​

^21:10 ꦮꦺꦴꦁ​꧊ꦆꦱꦿꦲꦺꦭ꧀ꦤꦸꦭꦶꦤꦼꦫꦸꦱ꧀ꦱꦏꦺꦭꦏꦸꦤꦺ꧈​ꦧꦚ꧀ꦗꦸꦂꦥꦱꦁꦏꦺꦩꦃꦲꦶꦁꦏꦸꦛ​꧊ꦎꦧꦺꦴꦠ꧀꧉​

^21:11 ꦱꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴꦤꦸꦭꦶꦔꦭꦶꦃꦩꦼꦚꦁꦠꦶꦭꦱ꧀ꦱꦺꦏꦸꦛ​꧊ꦄꦧꦫꦶꦩ꧀ꦲꦶꦁꦲꦫꦲꦫꦱꦩꦸꦤ꧀ꦱꦮꦺꦠꦤ꧀ꦤꦺꦠꦤꦃ​꧊ꦩꦺꦴꦮꦧ꧀꧉​

^21:12 ꦧꦚ꧀ꦗꦸꦂꦔꦭꦶꦃꦱꦏꦏꦺꦴꦤꦺꦴꦩꦼꦚꦁꦊꦧꦏ꧀​꧊ꦗ꦳ꦺꦫꦺꦢ꧀꧉​

^21:13 ꦱꦏꦏꦺꦴꦤꦺꦴꦔꦭꦶꦃꦩꦼꦤꦺꦃꦩꦼꦚꦁꦥꦁꦒꦺꦴꦤ꧀ꦤꦤ꧀ꦱꦭꦺꦴꦂꦫꦺꦏꦭꦶ​꧊ꦄꦂꦤꦺꦴꦤ꧀꧈​ꦪꦏꦸꦮꦶꦥꦼꦱꦩꦸꦤꦤ꧀ꦱꦶꦁꦲꦩ꧀ꦧꦤꦺꦔꦤ꧀ꦠꦶꦠꦼꦏꦤ꧀ꦠꦤꦃꦲꦺꦮꦺꦴꦁ​꧊ꦄꦩꦺꦴꦫꦶ꧉​꧌ꦏꦭꦶ​꧊ꦄꦂꦤꦺꦴꦤ꧀ꦏꦸꦮꦶꦠꦥꦼꦭ꧀ꦮꦠꦼꦱ꧀ꦱꦺꦠꦤꦃꦲꦺꦮꦺꦴꦁ​꧊ꦩꦺꦴꦮꦧ꧀ꦏꦫꦺꦴꦠꦤꦃꦲꦺꦮꦺꦴꦁ​꧊ꦄꦩꦺꦴꦫꦶ꧉꧍​

^21:14 ꦩꦸꦭꦤꦺꦲꦶꦁ‘ꦏꦶꦠꦧ꧀ꦥꦼꦫꦁꦔꦺꦄꦭ꧀ꦭꦃ’ꦲꦤꦠꦸꦭꦶꦱ꧀ꦱꦤ꧀:"ꦢꦺꦱ​꧊ꦮꦲꦺꦧ꧀꧈​ꦲꦶꦁꦠꦤꦃ​꧊ꦱꦸꦥ꦳ꦭꦤ꧀ꦲꦶꦁꦊꦧꦏ꧀ꦏꦺꦏꦭꦶ​꧊ꦄꦂꦤꦺꦴꦤ꧀꧈​

^21:15 ꦭꦤ꧀ꦭꦺꦫꦺꦁꦭꦺꦫꦺꦁꦔꦺꦊꦧꦏ꧀ꦱꦶꦁꦗꦼꦩ꧀ꦧꦂꦫꦺꦔꦤ꧀ꦠꦶꦠꦼꦏꦤ꧀ꦢꦺꦱ​꧊ꦄꦂ꧈​ꦱꦶꦁꦔꦼꦤꦼꦂꦲꦶꦁꦠꦥꦼꦭ꧀ꦮꦠꦼꦱ꧀ꦱꦺꦠꦤꦃꦲꦺꦮꦺꦴꦁ​꧊ꦩꦺꦴꦮꦧ꧀꧉"​

^21:16 ꦱꦏꦏꦺꦴꦤꦺꦴꦥꦝꦔꦭꦶꦃꦩꦼꦚꦁ​꧊ꦧꦺꦲꦺꦂꦥꦁꦒꦺꦴꦤ꧀ꦤꦤ꧀ꦱꦶꦁꦲꦤꦱꦸꦩꦸꦂꦫꦺ꧉​ꦲꦶꦁꦏꦺꦴꦤꦺꦴꦄꦭ꧀ꦭꦃꦔꦤ꧀ꦢꦶꦏꦩꦫꦁ​꧊ꦩꦸꦱ꧈​"ꦮꦺꦴꦁ​꧊ꦆꦱꦿꦲꦺꦭ꧀ꦥꦝꦏ꧀ꦭꦸꦩ꧀ꦥꦸꦏ꧀ꦤ꧈​ꦲꦉꦥ꧀ꦢꦏ꧀ꦥꦫꦶꦁꦔꦶꦧꦚꦸꦏꦁꦒꦺꦴꦔꦺꦴꦩ꧀ꦧꦺ꧉"​

^21:17 ꦲꦤꦲꦶꦁꦏꦺꦴꦤꦺꦴꦮꦺꦴꦁ​꧊ꦆꦱꦿꦲꦺꦭ꧀ꦥꦝꦩꦼꦚꦚꦶꦩꦼꦁꦏꦺꦤꦺ:"ꦱꦸꦩꦸꦂꦱꦸꦩꦸꦂꦥꦝꦲꦼꦠꦺꦴꦏ꧀ꦤꦧꦚꦸꦩꦸꦱꦲꦶꦏꦶ꧈​ꦲꦉꦥ꧀ꦢꦏ꧀ꦥꦼꦛꦸꦏ꧀ꦏꦫꦺꦴꦩꦼꦩꦸꦗꦶ꧈​

^21:18 ꦱꦸꦩꦸꦂꦱꦶꦁꦢꦶꦏꦼꦝꦸꦏ꧀ꦥꦫꦥꦸꦠꦿꦫꦗ꧈​ꦢꦶꦗꦼꦫꦺꦴꦏ꧀ꦏꦏꦺꦢꦺꦤꦶꦁꦥꦫꦥꦼꦁꦒꦼꦝꦺꦤꦺꦧꦁꦱ꧈​ꦔꦁꦒꦺꦴꦠꦼꦏꦼꦤꦺꦏꦼꦥꦿꦧꦺꦴꦤ꧀꧈​ꦪꦠꦼꦏꦼꦤꦺꦥꦫꦥꦼꦁꦒꦼꦝꦺꦏꦼꦝꦠꦺꦴꦤ꧀꧉"​ꦱꦏꦥꦼꦱꦩꦸꦤꦤ꧀ꦏꦺꦴꦤꦺꦴꦮꦺꦴꦁ​꧊ꦆꦱꦿꦲꦺꦭ꧀ꦧꦚ꧀ꦗꦸꦂꦔꦭꦶꦃꦩꦼꦚꦁ​꧊ꦩꦠꦤ꧈​

^21:19 ꦱꦏꦏꦺꦴꦤꦺꦴꦩꦼꦚꦁ​꧊ꦤꦲꦭꦶꦪꦺꦭ꧀꧈​ꦧꦚ꧀ꦗꦸꦂꦩꦼꦚꦁ​꧊ꦧꦩꦺꦴꦠ꧀;

^21:20 ꦱꦏ​꧊ꦧꦩꦺꦴꦠ꧀ꦩꦼꦚꦁꦊꦧꦏ꧀ꦏꦺꦮꦺꦴꦁ​꧊ꦩꦺꦴꦮꦧ꧀꧈​ꦕꦼꦝꦏ꧀ꦏꦫꦺꦴꦥꦸꦕꦏ꧀ꦏꦺꦒꦸꦤꦸꦁ​꧊ꦥꦶꦱ꧀ꦒ꧈​ꦔꦝꦼꦥ꧀ꦥꦏꦺꦱꦼꦒꦫꦮꦼꦝꦶ꧉​

^21:21 ꦮꦺꦴꦁ​꧊ꦆꦱꦿꦲꦺꦭ꧀ꦏꦶꦫꦶꦩ꧀ꦲꦸꦠꦸꦱ꧀ꦱꦤ꧀ꦩꦫꦁ​꧊ꦱꦶꦲꦺꦴꦤ꧀꧈​ꦫꦗ​꧊ꦄꦩꦺꦴꦫꦶ꧈​ꦢꦶꦏꦺꦴꦤ꧀ꦩꦠꦸꦂꦩꦼꦁꦏꦺꦤꦺ꧈​

^21:22 "ꦏꦸꦭꦚꦸꦮꦸꦤ꧀ꦲꦶꦢꦶꦤ꧀ꦤ꧀ꦝꦺꦫꦺꦏ꧀ꦭꦁꦏꦸꦁꦲꦶꦁꦤꦼꦒꦫꦶꦥꦚ꧀ꦗꦼꦤꦼꦁꦔꦤ꧀꧉​ꦏꦸꦭꦭꦤ꧀ꦫꦗꦏꦪꦏꦸꦭꦩ꧀ꦧꦺꦴꦠꦼꦤ꧀ꦧꦝꦺꦚꦶꦩ꧀ꦥꦁꦱꦏꦶꦁꦩꦼꦂꦒꦶ꧈​ꦔꦶꦢꦏ꧀ꦲꦶꦢꦏ꧀ꦥꦠꦼꦒꦶꦭ꧀ꦭꦤ꧀ꦭꦤ꧀ꦏꦼꦧꦺꦴꦤ꧀ꦏꦼꦧꦺꦴꦤ꧀ꦲꦁꦒꦸꦂ꧈​ꦱꦂꦠꦔꦺꦴꦩ꧀ꦧꦺꦱꦏꦶꦁꦱꦸꦩꦸꦂꦱꦸꦩꦸꦂꦥꦚ꧀ꦗꦼꦤꦼꦁꦔꦤ꧀꧉​ꦏꦸꦭꦤꦩꦸꦁꦧꦝꦺꦩ꧀ꦭꦩ꧀ꦥꦃꦲꦸꦫꦸꦠ꧀ꦩꦼꦂꦒꦶꦲꦒꦼꦁ꧈​ꦔꦤ꧀ꦠꦺꦴꦱ꧀ꦩꦼꦢꦭ꧀ꦱꦏꦶꦁꦮꦶꦭꦪꦃꦥꦚ꧀ꦗꦼꦤꦼꦁꦔꦤ꧀꧉"​

^21:23 ꦤꦁꦔꦶꦁꦫꦗ​꧊ꦱꦶꦲꦺꦴꦤ꧀ꦲꦺꦴꦫꦔꦶꦢꦶꦤ꧀ꦤꦶꦮꦺꦴꦁ​꧊ꦆꦱꦿꦲꦺꦭ꧀ꦭꦶꦮꦠ꧀ꦲꦶꦁꦮꦶꦭꦪꦃꦲꦺ꧉​ꦩꦭꦃꦔ꧀ꦭꦸꦩ꧀ꦥꦸꦏ꧀ꦏꦏꦺꦠꦼꦤ꧀ꦠꦫꦤꦺ꧈​ꦧꦚ꧀ꦗꦸꦂꦔ꧀ꦭꦸꦫꦸꦒ꧀ꦩꦼꦚꦁ​꧊ꦪꦲꦱ꧀꧈​ꦲꦶꦁꦥꦼꦱꦩꦸꦤꦤ꧀꧈​ꦚꦼꦫꦁꦮꦺꦴꦁ​꧊ꦆꦱꦿꦲꦺꦭ꧀꧉​

^21:24 ꦤꦁꦔꦶꦁꦲꦶꦁꦥꦼꦥꦿꦁꦔꦤ꧀ꦩꦲꦸꦲꦏꦺꦃꦮꦺꦴꦁ​꧊ꦄꦩꦺꦴꦫꦶꦱꦶꦁꦩꦠꦶ꧉​ꦮꦶꦭꦪꦃꦲꦺꦧꦚ꧀ꦗꦸꦂꦢꦶꦉꦧꦸꦠ꧀ꦭꦤ꧀ꦢꦶꦲꦼꦁꦒꦺꦴꦤ꧀ꦤꦶꦮꦺꦴꦁ​꧊ꦆꦱꦿꦲꦺꦭ꧀꧈​ꦱꦏꦏꦭꦶ​꧊ꦄꦂꦤꦺꦴꦤ꧀ꦠꦼꦏꦤ꧀ꦏꦭꦶ​꧊ꦪꦧꦺꦴꦏ꧀꧈​ꦱꦶꦁꦱꦶꦱꦶꦃ​꧊ꦭꦺꦴꦂ꧈​ꦪꦏꦸꦮꦶꦠꦥꦼꦭ꧀ꦮꦠꦼꦱ꧀ꦱꦺꦠꦤꦃꦲꦺꦮꦺꦴꦁ​꧊ꦄꦩꦺꦴꦤ꧀꧈​ꦱꦶꦁꦏꦸꦮꦠ꧀꧉​

^21:25 ꦱꦿꦤꦩꦼꦁꦏꦺꦴꦤꦺꦴꦮꦺꦴꦁ​꧊ꦆꦱꦿꦲꦺꦭ꧀ꦤꦼꦭꦸꦏ꧀ꦏꦏꦺꦏꦸꦛꦏꦸꦛꦤꦺꦮꦺꦴꦁ​꧊ꦄꦩꦺꦴꦫꦶꦏꦧꦺꦃ꧈​ꦲꦸꦒ​꧊ꦲꦺꦱ꧀ꦧꦺꦴꦤ꧀ꦭꦤ꧀ꦏꦸꦛꦏꦸꦛꦕꦶꦭꦶꦏ꧀ꦲꦶꦁꦱꦏꦶꦮꦠꦼꦔꦼꦤ꧀ꦤꦺ꧉​ꦮꦺꦴꦁ​꧊ꦆꦱꦿꦲꦺꦭ꧀ꦧꦚ꧀ꦗꦸꦂꦥꦝꦩꦁꦒꦺꦴꦤ꧀ꦲꦶꦁꦏꦺꦴꦤꦺꦴ꧉​

^21:26 ​꧊ꦲꦺꦱ꧀ꦧꦺꦴꦤ꧀ꦏꦸꦮꦶꦏꦸꦛꦏꦿꦗꦤꦺꦫꦗ​꧊ꦱꦶꦲꦺꦴꦤ꧀꧉​ꦫꦗꦩꦲꦸꦠꦲꦸꦥꦼꦫꦁꦏꦫꦺꦴꦫꦗ​꧊ꦩꦺꦴꦮꦧ꧀ꦱꦶꦁꦧꦶꦪꦺꦤ꧀꧈​ꦭꦤ꧀ꦔꦽꦧꦸꦠ꧀ꦮꦶꦭꦪꦃꦲꦺꦔꦤ꧀ꦠꦶꦠꦼꦏꦤ꧀ꦏꦭꦶ​꧊ꦄꦂꦤꦺꦴꦤ꧀꧉​

^21:27 ꦩꦸꦭꦤꦺꦥꦸꦗꦁꦒꦥꦝꦢꦸꦮꦺꦏꦼꦏꦶꦢꦸꦁꦔꦤ꧀ꦩꦼꦁꦏꦺꦤꦺ:"ꦠꦼꦏꦲꦲꦤꦲꦶꦁ​꧊ꦲꦺꦱ꧀ꦧꦺꦴꦤ꧀꧈​ꦤꦼꦒꦫꦤꦺꦫꦗ​꧊ꦱꦶꦲꦺꦴꦤ꧀;ꦏꦼꦥꦺꦔꦶꦤ꧀ꦲꦏꦸꦚꦶꦥꦠ꧀ꦠꦶ꧈​ꦏꦸꦛꦲꦶꦏꦶꦢꦶꦢꦤ꧀ꦢꦤ꧀ꦤꦶ꧉​

^21:28 ꦠꦲꦸꦏꦼꦭꦏꦺꦴꦤ꧀ꦲꦶꦁꦏꦸꦛꦲꦶꦏꦶ꧈​ꦠꦼꦤ꧀ꦠꦫ​꧊ꦱꦶꦲꦺꦴꦤ꧀ꦩꦸꦫꦸꦧ꧀ꦏꦪꦒꦼꦤꦶ꧈​ꦒꦮꦺꦭꦸꦝꦼꦱ꧀ꦏꦸꦛ​꧊ꦄꦂ꧈​ꦠꦤꦃ​꧊ꦩꦺꦴꦮꦧ꧀꧈​ꦥꦼꦒꦸꦤꦸꦁꦔꦤ꧀ꦱꦲꦸꦫꦸꦠ꧀ꦠꦺꦏꦭꦶ​꧊ꦄꦂꦤꦺꦴꦤ꧀ꦥꦝꦢꦶꦭꦭꦥ꧀꧉​

^21:29 ꦏꦺꦴꦮꦺꦮꦺꦴꦁ​꧊ꦩꦺꦴꦮꦧ꧀ꦏꦼꦤꦩꦸꦱꦶꦧꦃ!ꦢꦺꦮ​꧊ꦏꦩꦺꦴꦱ꧀ꦱꦶꦁꦏꦺꦴꦏ꧀ꦱꦼꦩ꧀ꦧꦃ!​꧊ꦏꦩꦺꦴꦱ꧀ꦠꦺꦒꦮꦺꦴꦁꦩꦸꦢꦢꦶꦥꦼꦔꦸꦁꦱꦶ꧈​ꦧꦺꦴꦗꦺꦴꦩꦸꦢꦶꦠꦮꦤ꧀ꦫꦗ​꧊ꦄꦩꦺꦴꦫꦶ꧉​

^21:30 ꦤꦁꦔꦶꦁꦮꦶꦱ꧀ꦭꦸꦝꦼꦱ꧀ꦱꦲꦶꦏꦶꦠꦸꦫꦸꦤ꧀ꦤꦺ꧈​ꦱꦏ​꧊ꦲꦺꦱ꧀ꦧꦺꦴꦤ꧀ꦠꦼꦏꦤ꧀​꧊ꦢꦶꦧꦺꦴꦤ꧀ꦱꦠꦼꦫꦸꦱ꧀ꦱꦺ꧈​ꦱꦏ​꧊ꦤꦱꦶꦩ꧀ꦠꦼꦏꦤ꧀​꧊ꦤꦺꦴꦥ꦳ꦃ꧈​ꦕꦼꦝꦏ꧀​꧊ꦩꦺꦢꦺꦧ꧈​ꦊꦧꦸꦂꦏꦧꦺꦃꦠꦶꦁꦒꦭ꧀ꦢꦺꦴꦚ꧉"​

^21:31 ꦮꦺꦴꦁ​꧊ꦆꦱꦿꦲꦺꦭ꧀ꦧꦚ꧀ꦗꦸꦂꦩꦁꦒꦺꦴꦤ꧀ꦲꦶꦁꦠꦤꦃꦲꦺꦮꦺꦴꦁ​꧊ꦄꦩꦺꦴꦫꦶ꧉​

^21:32 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴ​꧊ꦩꦸꦱꦧꦚ꧀ꦗꦸꦂꦲꦏꦺꦴꦤ꧀ꦮꦺꦴꦁꦮꦺꦴꦁꦒꦺꦴꦭꦺꦏ꧀ꦢꦭꦤ꧀ꦱꦶꦁꦧꦼꦕꦶꦏ꧀ꦝꦺꦮꦺꦏꦁꦒꦺꦴꦚꦼꦫꦁꦏꦸꦛ​꧊ꦪꦲꦺꦗ꦳ꦺꦂ꧉​ꦏꦸꦛꦏꦸꦮꦶꦲꦶꦪꦧꦚ꧀ꦗꦸꦂꦢꦶꦉꦧꦸꦠ꧀ꦢꦺꦤꦶꦁꦮꦺꦴꦁ​꧊ꦆꦱꦿꦲꦺꦭ꧀꧈​ꦩꦼꦁꦏꦺꦴꦤꦺꦴꦲꦸꦒꦏꦸꦛꦕꦶꦭꦶꦏ꧀ꦕꦶꦭꦶꦏ꧀ꦲꦶꦁꦱꦏꦶꦮꦠꦼꦔꦼꦤ꧀ꦤꦺ꧉​ꦮꦺꦴꦁꦮꦺꦴꦁ​꧊ꦄꦩꦺꦴꦫꦶꦢꦶꦠꦸꦤ꧀ꦝꦸꦁꦔꦶꦭꦸꦔ꧉​

^21:33 ꦱꦏꦏꦺꦴꦤꦺꦴꦮꦺꦴꦁ​꧊ꦆꦱꦿꦲꦺꦭ꧀ꦭꦏꦸꦤꦺꦔꦼꦤꦼꦂꦲꦶꦁꦏꦸꦛ​꧊ꦧꦱꦤ꧀꧉​​꧊ꦎꦒ꧀ꦫꦗꦤꦺꦮꦺꦴꦁ​꧊ꦧꦱꦤ꧀ꦩꦼꦛꦸꦏ꧀ꦏꦏꦺꦏꦫꦺꦴꦔ꧀ꦒꦮꦠꦼꦤ꧀ꦠꦫꦤꦺ꧈​ꦧꦚ꧀ꦗꦸꦂꦥꦼꦫꦁꦲꦶꦁꦏꦸꦛ​꧊ꦌꦢꦿꦺꦲꦶ꧉​

^21:34 ꦥꦔꦤ꧀ꦢꦶꦏꦤꦺꦄꦭ꧀ꦭꦃꦩꦫꦁ​꧊ꦩꦸꦱ꧈​"ꦲꦗꦮꦼꦢꦶꦏꦫꦺꦴ​꧊ꦎꦒ꧀꧉​ꦮꦺꦴꦁꦏꦸꦮꦶꦢꦏ꧀ꦲꦸꦭꦸꦁꦔꦏꦺꦩꦫꦁꦏꦺꦴꦮꦺ꧈​ꦱꦫꦏꦾꦠ꧀ꦠꦺꦭꦤ꧀ꦱꦤꦼꦒꦫꦤꦺ꧉​ꦠꦸꦩ꧀ꦥꦼꦱ꧀ꦱꦼꦤ꧀ꦏꦪꦲꦼꦁꦒꦺꦴꦤ꧀ꦩꦸꦤꦸꦩ꧀ꦥꦼꦱ꧀ꦫꦗ​꧊ꦱꦶꦲꦺꦴꦤ꧀ꦭꦤ꧀​꧊ꦲꦺꦱ꧀ꦧꦺꦴꦤ꧀꧉"​

^21:35 ​꧊ꦎꦒ꧀ꦧꦚ꧀ꦗꦸꦂꦢꦶꦥꦠꦺꦤ꧀ꦤꦶꦮꦺꦴꦁ​꧊ꦆꦱꦿꦲꦺꦭ꧀꧈​ꦩꦼꦁꦏꦺꦴꦤꦺꦴꦲꦸꦒꦲꦤꦏ꧀ꦲꦤꦏ꧀ꦏꦺꦭꦤ꧀ꦫꦏꦾꦠ꧀ꦠꦺꦏꦧꦺꦃ꧈​ꦲꦺꦴꦫꦲꦤꦱꦶꦁꦏꦫꦶ꧉​ꦠꦤꦃꦩꦲꦸꦧꦚ꧀ꦗꦸꦂꦢꦶꦲꦼꦁꦒꦺꦴꦤ꧀ꦤꦶꦢꦺꦤꦶꦁꦮꦺꦴꦁ​꧊ꦆꦱꦿꦲꦺꦭ꧀꧉​