Alkitab/Wilangan/23

Kaca iki nganggo aksara Jawa. Yen perambanmu ora ndukung, kowé ora bakal isa ndeleng sauntara tulisan nganggo aksara Jawa ing halaman iki.
Kanggo mbeneraké, mangga diwaca Pitulung:Aksara Jawa.

^23:1 ꦥꦔꦸꦕꦥ꧀ꦥꦺ꧊ꦧꦶꦭꦺꦪꦩ꧀ꦩꦫꦁ꧊ꦧꦭꦏ꧀꧈"ꦏꦸꦭꦚꦸꦮꦸꦤ꧀ꦢꦶꦥꦸꦤ꧀ꦢꦩꦼꦭ꧀ꦭꦏꦼꦤ꧀ꦩꦼꦱ꧀ꦧꦺꦃꦥꦶꦠꦸꦭꦤ꧀ꦚꦸꦮꦸꦤ꧀ꦢꦶꦥꦸꦤ꧀ꦱꦼꦝꦶꦪꦤꦶꦊꦩ꧀ꦧꦸꦗꦊꦂꦥꦶꦠꦸꦭꦤ꧀ꦩꦺꦤ꧀ꦢꦒꦺꦩ꧀ꦧꦺꦭ꧀ꦥꦶꦠꦸ꧉"

^23:2 ꧊ꦧꦭꦏ꧀ꦔ꧀ꦭꦏꦺꦴꦤ꧀ꦤꦶꦲꦥꦱꦶꦁꦢꦶꦗꦭꦸꦏ꧀꧊ꦧꦶꦭꦺꦪꦩ꧀꧉꧊ꦧꦶꦭꦺꦪꦩ꧀ꦧꦚ꧀ꦗꦸꦂꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦫꦸꦥꦱꦥꦶꦭꦤꦁꦱꦶꦗꦶꦭꦤ꧀ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤꦁꦱꦶꦗꦶꦲꦤꦲꦶꦁꦱꦧꦼꦤ꧀ꦩꦼꦱ꧀ꦧꦺꦃ꧉

^23:3 ꧊ꦧꦶꦭꦺꦪꦩ꧀ꦏꦤ꧀ꦝꦏꦫꦺꦴ꧊ꦧꦭꦏ꧀꧈"ꦏꦸꦭꦲꦠꦸꦂꦫꦶꦗꦸꦩꦼꦤꦼꦁꦕꦼꦭꦏ꧀ꦏꦭꦶꦪꦤ꧀ꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀ꦩꦼꦤꦶꦏ꧉ꦏꦸꦭꦧꦝꦺꦤ꧀ꦢꦼꦢꦺꦴꦔ꧈ꦩꦼꦤꦥꦒꦸꦱ꧀ꦠꦶꦄꦭ꧀ꦭꦃꦏꦼꦂꦱꦥꦫꦶꦁꦮꦁꦱꦶꦠ꧀ꦩꦼꦤꦥꦩ꧀ꦧꦺꦴꦠꦼꦤ꧀꧉ꦥꦚ꧀ꦗꦼꦤꦼꦁꦔꦤ꧀ꦧꦝꦺꦏꦸꦭꦲꦠꦸꦂꦫꦶꦥꦶꦂꦱꦱꦼꦢꦪ꧈ꦲꦶꦁꦏꦁꦢꦶꦥꦸꦤ꧀ꦔꦤ꧀ꦢꦶꦏꦏ꧀ꦏꦏꦼꦤ꧀ꦢꦺꦤꦶꦁꦥꦔꦺꦫꦤ꧀ꦝꦠꦼꦁꦏꦸꦭ꧉"꧊ꦧꦶꦭꦺꦪꦩ꧀ꦧꦚ꧀ꦗꦸꦂꦭꦸꦔꦝꦺꦮꦺꦏ꧀ꦏꦤ꧀ꦩꦸꦁꦒꦃꦲꦶꦁꦥꦸꦕꦏ꧀ꦏꦶꦁꦒꦸꦤꦸꦁ꧉

^23:4 ꦲꦤꦲꦶꦁꦏꦺꦴꦤꦺꦴꦒꦸꦱ꧀ꦠꦶꦄꦭ꧀ꦭꦃꦔꦿꦮꦸꦃꦲꦶ꧊ꦧꦶꦭꦺꦪꦩ꧀꧉ꦲꦠꦸꦂꦫꦺ꧊ꦧꦶꦭꦺꦪꦩ꧀ꦩꦫꦁꦄꦭ꧀ꦭꦃ꧈"ꦒꦸꦱ꧀ꦠꦶ꧈ꦏꦸꦭꦱꦩ꧀ꦥꦸꦤ꧀ꦔꦼꦢꦼꦒꦏꦼꦤ꧀ꦩꦼꦱ꧀ꦧꦺꦃꦥꦶꦠꦸ꧈ꦱꦂꦠꦚꦲꦺꦴꦱ꧀ꦱꦏꦼꦤ꧀ꦏꦸꦂꦧꦤ꧀ꦫꦸꦥꦶꦊꦩ꧀ꦧꦸꦗꦊꦂꦱꦼꦠꦸꦁꦒꦭ꧀꧈ꦭꦤ꧀ꦩꦺꦤ꧀ꦢꦒꦺꦩ꧀ꦧꦺꦭ꧀ꦗꦊꦂꦱꦼꦠꦸꦁꦒꦭ꧀ꦲꦶꦁꦱꦧꦼꦤ꧀ꦩꦼꦱ꧀ꦧꦺꦃ꧉"

^23:5 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦥꦫꦶꦁꦝꦮꦸꦃꦲꦥꦱꦶꦁꦏꦸꦢꦸꦢꦶꦠꦶꦤ꧀ꦢꦏ꧀ꦏꦏꦺꦢꦺꦤꦶꦁ꧊ꦧꦶꦭꦺꦪꦩ꧀꧉꧊ꦧꦶꦭꦺꦪꦩ꧀ꦧꦚ꧀ꦗꦸꦂꦢꦶꦝꦮꦸꦃꦲꦶꦧꦭꦶꦤꦼꦩꦺꦴꦤ꧀ꦤꦶ꧊ꦧꦭꦏ꧀꧈ꦔꦤ꧀ꦝꦏ꧀ꦤꦲꦥꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦄꦭ꧀ꦭꦃ꧉

^23:6 ꧊ꦧꦶꦭꦺꦪꦩ꧀ꦧꦚ꧀ꦗꦸꦂꦤꦼꦩꦺꦴꦤ꧀ꦤꦶ꧊ꦧꦭꦏ꧀꧈ꦱꦶꦁꦲꦶꦱꦶꦃꦔꦢꦼꦒ꧀ꦲꦶꦁꦱꦕꦼꦝꦏ꧀ꦏꦺꦩꦼꦱ꧀ꦧꦺꦃ꧈ꦏꦫꦺꦴꦥꦫꦥꦼꦁꦒꦼꦝꦺꦤꦺꦮꦺꦴꦁ꧊ꦩꦺꦴꦮꦧ꧀ꦏꦧꦺꦃ꧉

^23:7 ꧊ꦧꦶꦭꦺꦪꦩ꧀ꦧꦚ꧀ꦗꦸꦂꦩꦼꦝꦂꦮꦁꦱꦶꦠ꧀ꦩꦼꦁꦏꦺꦤꦺ:"ꦱꦏ꧊ꦄꦫꦩ꧀꧈ꦥꦼꦒꦸꦤꦸꦁꦔꦤ꧀ꦱꦶꦱꦶꦃꦮꦺꦠꦤ꧀ꦏꦤ꧈ꦲꦏꦸꦢꦶꦲꦸꦤ꧀ꦢꦁ꧊ꦧꦭꦏ꧀ꦫꦗꦲꦶꦁ꧊ꦩꦺꦴꦮꦧ꧀꧈ꦠꦼꦩ꧀ꦧꦸꦁꦔꦺ꧈‘ꦠꦼꦏꦲ꧈ꦲꦏꦸꦢꦺꦴꦔꦏ꧀ꦤ꧈꧊ꦆꦱꦿꦲꦺꦭ꧀ꦲꦶꦥꦠ꧀ꦲꦶꦥꦠ꧀ꦠꦤ!’

^23:8 ꦲꦥꦲꦏꦸꦧꦶꦱꦔꦶꦥꦠ꧀ꦲꦶꦥꦠꦶ꧈ꦪꦺꦤ꧀ꦒꦸꦱ꧀ꦠꦶꦄꦭ꧀ꦭꦃꦩ꧀ꦧꦼꦂꦏꦃꦲꦶ?ꦲꦥꦲꦏꦸꦧꦶꦱꦔꦭꦁꦲꦭꦁꦔꦶ꧈ꦪꦺꦤ꧀ꦒꦸꦱ꧀ꦠꦶꦄꦭ꧀ꦭꦃꦔꦿꦸꦗꦸꦏ꧀ꦏꦶ?

^23:9 ꦱꦏꦒꦸꦤꦸꦁꦔ꧀ꦒꦺꦴꦤ꧀ꦏꦸꦚꦮꦁ꧈ꦏꦠꦺꦴꦤ꧀ꦕꦼꦛꦒꦮꦁꦒꦮꦁ꧈ꦧꦁꦱꦥꦶꦭꦶꦃꦲꦤ꧀ꦤꦺꦄꦭ꧀ꦭꦃ꧈ꦲꦺꦴꦫꦠꦲꦸꦱꦼꦥꦶꦲꦶꦁꦧꦼꦂꦏꦃ꧉

^23:10 ꦲꦸꦩꦠ꧀꧊ꦆꦱꦿꦲꦺꦭ꧀ꦕꦕꦃꦲꦺꦏꦪꦊꦧꦸ꧈ꦱꦥꦧꦶꦱꦔꦺꦠꦸꦁꦲꦶꦏꦸ?ꦪꦺꦤ꧀ꦮꦶꦱ꧀ꦠꦼꦏꦤ꧀ꦲꦗꦭ꧀ꦏꦸ꧈ꦏꦥꦸꦤ꧀ꦝꦸꦠ꧀ꦠꦏꦪꦲꦸꦩꦠ꧀ꦩꦸ꧈ꦩꦶꦠꦸꦫꦸꦠ꧀ꦲꦶꦁꦱꦧ꧀ꦢꦤꦺꦄꦭ꧀ꦭꦃ꧈ꦥꦠꦶꦏꦸꦧꦏꦭ꧀ꦏ꧀ꦭꦮꦤ꧀ꦱꦸꦩꦫꦃ꧉"

^23:11 ꧊ꦧꦭꦏ꧀ꦧꦚ꧀ꦗꦸꦂꦏꦤ꧀ꦝꦏꦫꦺꦴ꧊ꦧꦶꦭꦺꦪꦩ꧀꧈"ꦏꦺꦴꦏ꧀ꦩꦼꦏꦠꦼꦤ꧀ꦕꦿꦶꦪꦺꦴꦱ꧀ꦥꦚ꧀ꦗꦼꦤꦼꦁꦔꦤ꧀ꦝꦠꦼꦁꦏꦸꦭ?ꦩꦁꦏꦥꦚ꧀ꦗꦼꦤꦼꦁꦔꦤ꧀ꦩꦭꦃꦩ꧀ꦧꦼꦂꦏꦃꦲꦶꦥꦶꦪꦩ꧀ꦧꦏ꧀ꦏꦶꦥꦸꦤ꧀꧉"

^23:12 ꦮꦁꦱꦸꦭ꧀ꦭꦤ꧀ꦤꦺ꧊ꦧꦶꦭꦺꦪꦩ꧀꧈"ꦏꦸꦭꦤꦩꦸꦁꦱꦒꦼꦢ꧀ꦔꦸꦕꦥ꧀ꦥꦏꦼꦤ꧀ꦩꦼꦤꦥꦲꦶꦁꦏꦁꦏꦝꦮꦸꦃꦲꦏꦼꦤ꧀ꦢꦺꦤꦶꦁꦥꦔꦺꦫꦤ꧀꧉"

^23:13 ꧊ꦧꦭꦏ꧀ꦏꦤ꧀ꦝꦏꦫꦺꦴ꧊ꦧꦶꦭꦺꦪꦩ꧀꧈"ꦩꦁꦒꦏꦶꦠꦏꦺꦱꦃꦝꦠꦼꦁꦥꦁꦒꦺꦤ꧀ꦤꦤ꧀ꦱꦤꦺꦱ꧀꧉ꦱꦏꦶꦁꦔꦿꦶꦏꦸꦥꦚ꧀ꦗꦼꦤꦼꦁꦔꦤ꧀ꦧꦝꦺꦥꦶꦂꦱꦱꦥꦺꦫꦁꦔꦤ꧀ꦲꦭꦶꦠ꧀ꦏꦺꦩꦮꦺꦴꦤ꧀ꦱꦏꦶꦁꦧꦁꦱꦩꦼꦤꦶꦏ꧉ꦭꦗꦼꦁꦏꦸꦭꦲꦠꦸꦂꦫꦶꦔꦶꦥꦠ꧀ꦲꦶꦥꦠꦶꦧꦁꦱꦩꦼꦤꦶꦏ꧉"

^23:14 ꧊ꦧꦶꦭꦺꦪꦩ꧀ꦧꦚ꧀ꦗꦸꦂꦢꦶꦲꦗꦏ꧀ꦩꦼꦚꦁ꧊ꦱꦺꦴꦥ꦳ꦶꦩ꧀꧈ꦥꦸꦕꦸꦏ꧀ꦏꦺꦒꦸꦤꦸꦁ꧊ꦥꦶꦱ꧀ꦒ꧉ꦲꦤꦲꦶꦁꦏꦺꦴꦤꦺꦴ꧊ꦧꦶꦭꦺꦪꦩ꧀ꦔꦼꦢꦼꦒꦏꦺꦩꦼꦱ꧀ꦧꦺꦃꦥꦶꦠꦸꦭꦤ꧀ꦲꦶꦁꦱꦧꦼꦤ꧀ꦩꦼꦱ꧀ꦧꦺꦃꦚꦲꦺꦴꦱ꧀ꦱꦏꦺꦏꦸꦂꦧꦤ꧀ꦫꦸꦥꦱꦥꦶꦭꦤꦁꦱꦶꦗꦶꦭꦤ꧀ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤꦁꦱꦶꦗꦶ꧉

^23:15 ꦏꦤ꧀ꦝꦤꦺ꧊ꦧꦶꦭꦺꦪꦩ꧀ꦩꦫꦁ꧊ꦧꦭꦏ꧀꧈"ꦏꦸꦭꦲꦠꦸꦂꦫꦶꦠꦼꦁꦒꦱꦲꦸꦤ꧀ꦠꦮꦶꦱ꧀ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦶ꧈ꦱꦕꦼꦭꦏ꧀ꦏꦶꦥꦸꦤ꧀ꦏꦸꦂꦧꦤ꧀ꦩꦼꦤꦶꦏ꧈ꦏꦸꦭꦧꦝꦺꦏꦺꦱꦃꦱꦼꦏꦼꦝꦥ꧀ꦤ꧀ꦢꦼꦢꦺꦴꦔꦝꦠꦼꦁꦥꦔꦺꦫꦤ꧀꧉"

^23:16 ꦒꦸꦱ꧀ꦠꦶꦄꦭ꧀ꦭꦃꦫꦮꦸꦃ꧈ꦩꦁꦒꦶꦃꦲꦶ꧊ꦧꦶꦭꦺꦪꦩ꧀ꦩꦼꦤꦺꦃꦭꦤ꧀ꦤ꧀ꦝꦮꦸꦃꦲꦏꦺꦲꦥꦱꦶꦁꦏꦸꦢꦸꦢꦶꦏꦤ꧀ꦝꦏ꧀ꦏꦏꦺꦢꦺꦤꦶꦁ꧊ꦧꦶꦭꦺꦪꦩ꧀꧉꧊ꦧꦶꦭꦺꦪꦩ꧀ꦤꦸꦭꦶꦢꦶꦝꦮꦸꦃꦲꦶꦚꦿꦶꦠꦏ꧀ꦏꦏꦺꦩꦫꦁ꧊ꦧꦭꦏ꧀꧈ꦲꦥꦱꦶꦁꦢꦶꦔꦤ꧀ꦢꦶꦏꦏ꧀ꦏꦏꦺꦢꦺꦤꦶꦁꦥꦔꦺꦫꦤ꧀꧉

^23:17 ꧊ꦧꦶꦭꦺꦪꦩ꧀ꦧꦚ꧀ꦗꦸꦂꦤꦼꦩꦺꦴꦤ꧀ꦤꦶ꧊ꦧꦭꦏ꧀꧈ꦱꦶꦁꦲꦶꦱꦶꦃꦔꦢꦼꦒ꧀ꦲꦶꦁꦱꦕꦼꦝꦏ꧀ꦏꦺꦩꦼꦱ꧀ꦧꦺꦃꦏꦫꦺꦴꦥꦫꦥꦼꦁꦒꦼꦝꦺꦤꦺ꧊ꦩꦺꦴꦮꦧ꧀꧉꧊ꦧꦭꦏ꧀ꦠꦏꦺꦴꦤ꧀ꦲꦥꦱꦶꦁꦢꦶꦔꦤ꧀ꦢꦶꦏꦏ꧀ꦏꦏꦺꦢꦺꦤꦶꦁꦥꦔꦺꦫꦤ꧀꧉

^23:18 ꧊ꦧꦶꦭꦺꦪꦩ꧀ꦧꦚ꧀ꦗꦸꦂꦩꦼꦝꦂꦮꦁꦱꦶꦠ꧀ꦩꦼꦁꦏꦺꦤꦺ:"꧊ꦧꦭꦏ꧀ꦧꦶꦤ꧀꧊ꦗ꦳ꦺꦥꦺꦴꦂ꧈ꦩꦗꦸꦮꦩꦿꦺꦤꦺ꧈ꦫꦸꦔꦺꦴꦏ꧀ꦤꦥꦮꦂꦠꦤꦺ!

^23:19 ꦄꦭ꧀ꦭꦃꦢꦸꦢꦸꦩꦤꦸꦁꦱꦱꦶꦁꦱꦼꦤꦼꦁꦢꦺꦴꦫ꧈ꦭꦤ꧀ꦒꦩ꧀ꦥꦁꦱꦸꦭꦪ꧉ꦪꦺꦤ꧀ꦄꦭ꧀ꦭꦃꦗꦚ꧀ꦗꦶ꧈ꦩꦼꦱ꧀ꦛꦶꦢꦶꦠꦼꦠꦼꦥ꧀ꦥꦶ꧉ꦪꦺꦤ꧀ꦔꦤ꧀ꦢꦶꦏꦩꦼꦱ꧀ꦛꦶꦚꦠ꧉

^23:20 ꦲꦏꦸꦢꦶꦝꦮꦸꦃꦲꦶꦩ꧀ꦧꦼꦂꦏꦃꦲꦶ꧈ꦩꦁꦏꦪꦺꦤ꧀ꦄꦭ꧀ꦭꦃꦩ꧀ꦧꦼꦂꦏꦃꦲꦶ꧈ꦲꦺꦴꦫꦧꦶꦱꦢꦶꦲꦸꦁꦏꦶꦂꦫꦶ꧉

^23:21 ꦢꦏ꧀ꦱꦮꦁ꧊ꦆꦱꦿꦲꦺꦭ꧀ꦧꦏꦭ꧀ꦩꦼꦤꦁ꧈ꦲꦺꦴꦫꦲꦤꦱꦶꦁꦧꦶꦱꦚꦼꦒꦃ꧈ꦩꦼꦂꦒꦱꦶꦁꦢꦶꦱꦼꦩ꧀ꦧꦃꦩꦸꦁꦄꦭ꧀ꦭꦃ꧉ꦩꦼꦚꦁꦔꦲꦼꦤ꧀ꦢꦶꦥꦫꦤ꧀ꦤꦺ꧈ꦄꦭ꧀ꦭꦃꦔꦼꦠꦸꦠ꧀ꦠꦏꦺ꧈ꦠꦤ꧀ꦱꦃꦢꦶꦮꦂꦠꦏ꧀ꦏꦏꦺ꧈ꦪꦺꦤ꧀ꦄꦭ꧀ꦭꦃꦲꦶꦏꦸꦫꦗꦤꦺ꧉

^23:22 ꦱꦏ꧊ꦩꦺꦱꦶꦂꦢꦶꦲꦶꦫꦶꦢ꧀ꦢꦺꦤꦶꦁꦥꦔꦺꦫꦤ꧀꧈ꦪꦺꦤ꧀ꦥꦼꦫꦁꦏꦪꦧꦤ꧀ꦛꦺꦁꦲꦭꦱ꧀ꦱꦤ꧀꧉

^23:23 ꦢꦪꦒꦲꦶꦧ꧀꧈ꦲꦶꦭ꧀ꦩꦸꦥꦼꦠꦼꦁ꧈ꦝꦸꦏꦸꦤ꧀ꦲꦩ꧀ꦥꦸꦃ꧈ꦲꦺꦴꦫꦩꦼꦩ꧀ꦥꦤ꧀ꦩꦭꦃꦭꦸꦩ꧀ꦥꦸꦃ꧈ꦔ꧀ꦭꦮꦤ꧀ꦧꦁꦱꦱꦶꦁꦏꦭꦺꦴꦏ꧀꧈ꦢꦶꦗꦁꦏꦸꦁꦄꦭ꧀ꦭꦃꦏ꧀ꦭꦮꦤ꧀ꦲꦺꦭꦺꦴꦏ꧀꧉

^23:24 ꦧꦁꦱꦏꦸꦮꦶꦏꦪꦱꦶꦔꦱꦼꦏ꧀ꦠꦶ꧈ꦩꦸꦁꦱꦸꦃꦲꦺꦢꦶꦠꦸꦧꦿꦸꦏ꧀꧈ꦒꦼꦠꦶꦃꦲꦺꦢꦶꦲꦺꦴꦩ꧀ꦧꦺ꧉ꦪꦺꦤ꧀ꦩꦸꦁꦱꦸꦃꦲꦺꦢꦸꦫꦸꦁꦩꦠꦶ꧈ꦢꦸꦫꦸꦁꦭꦺꦫꦺꦤ꧀ꦥꦔ꧀ꦭꦮꦤ꧀ꦤꦺ꧉"꧊ꦧꦭꦏ꧀ꦩꦫꦁ꧊ꦧꦶꦭꦺꦪꦩ꧀꧈"ꦩꦼꦤꦮꦶꦥꦚ꧀ꦗꦼꦤꦼꦁꦔꦤ꧀ꦩ꧀ꦧꦺꦴꦠꦼꦤ꧀ꦏꦼꦂꦱꦔꦶꦥꦠ꧀ꦲꦶꦥꦠꦶꦧꦁꦱ꧊ꦆꦱꦿꦲꦺꦭ꧀꧈ꦲꦶꦁꦒꦶꦃꦱꦩ꧀ꦥꦸꦤ꧀꧈ꦱꦲꦸꦒꦼꦂꦩ꧀ꦧꦺꦴꦠꦼꦤ꧀ꦩ꧀ꦧꦼꦂꦏꦃꦲꦶꦥꦶꦪꦩ꧀ꦧꦏ꧀ꦏꦶꦥꦸꦤ꧀!"

^23:25 ꦏꦤ꧀ꦝꦤꦺ꧊ꦧꦭꦏ꧀ꦩꦫꦁ꧊ꦧꦶꦭꦺꦪꦩ꧀꧈"ꦩꦼꦤꦮꦶꦥꦚ꧀ꦗꦼꦤꦼꦁꦔꦤ꧀ꦩ꧀ꦧꦺꦴꦠꦼꦤ꧀ꦏꦼꦂꦱꦔꦶꦥꦠ꧀ꦲꦶꦥꦠꦶꦧꦁꦱ꧊ꦆꦱꦿꦲꦺꦭ꧀꧈ꦲꦶꦁꦒꦶꦃꦱꦩ꧀ꦥꦸꦤ꧀꧈ꦱꦲꦸꦒꦼꦂꦩ꧀ꦧꦺꦴꦠꦼꦤ꧀ꦩ꧀ꦧꦼꦂꦏꦃꦲꦶꦥꦶꦪꦩ꧀ꦧꦏ꧀ꦏꦶꦥꦸꦤ꧀!"

^23:26 ꦮꦁꦱꦸꦭ꧀ꦭꦤ꧀ꦤꦺ꧊ꦧꦶꦭꦺꦪꦩ꧀꧈"ꦏꦸꦭꦫꦏ꧀ꦱꦩ꧀ꦥꦸꦤ꧀ꦩꦠꦸꦂꦱꦢꦺꦫꦺꦁꦔꦶꦥꦸꦤ꧀꧈ꦧꦶꦭꦶꦃꦏꦸꦭꦏꦼꦢꦃꦔ꧀ꦭꦩ꧀ꦥꦃꦲꦶꦱꦝꦮꦸꦃꦲꦶꦥꦸꦤ꧀ꦄꦭ꧀ꦭꦃꦝꦠꦼꦁꦏꦸꦭ?"

^23:27 ꦏꦤ꧀ꦝꦤꦺ꧊ꦧꦭꦏ꧀꧈"ꦩꦁꦒꦏꦶꦠꦱꦩꦶꦥꦶꦤ꧀ꦝꦃꦥꦁꦒꦺꦤ꧀ꦤꦤ꧀꧉ꦱꦶꦤ꧀ꦠꦼꦤ꧀ꦔꦼꦂꦠꦺꦴꦱ꧀ꦄꦭ꧀ꦭꦃꦩꦉꦁꦔꦏꦼꦤ꧀ꦥꦚ꧀ꦗꦼꦤꦼꦁꦔꦤ꧀ꦔꦶꦥꦠ꧀ꦲꦶꦥꦠꦶꦠꦶꦪꦁ꧊ꦆꦱꦿꦲꦺꦭ꧀ꦲꦶꦁꦥꦁꦒꦺꦤ꧀ꦤꦤ꧀ꦱꦤꦺꦱ꧀꧉"

^23:28 ꧊ꦧꦶꦭꦺꦪꦩ꧀ꦧꦚ꧀ꦗꦸꦂꦢꦶꦲꦗꦏ꧀ꦩꦼꦚꦁꦥꦸꦕꦏ꧀ꦏꦺꦒꦸꦤꦸꦁ꧊ꦥꦺꦪꦺꦴꦂꦱꦶꦁꦔꦝꦼꦥ꧀ꦥꦏꦺꦱꦼꦒꦫꦮꦼꦝꦶ꧉

^23:29 ꦏꦤ꧀ꦝꦤꦺ꧊ꦧꦶꦭꦺꦪꦩ꧀ꦩꦫꦁ꧊ꦧꦭꦏ꧀꧈"ꦏꦸꦭꦲꦠꦸꦂꦫꦶꦔꦼꦢꦼꦒꦏꦼꦤ꧀ꦩꦼꦱ꧀ꦧꦺꦃꦥꦶꦠꦸꦲꦶꦁꦥꦁꦒꦺꦤ꧀ꦤꦤ꧀ꦩꦼꦤꦶꦏ꧈ꦱꦂꦠꦚꦮꦶꦱ꧀ꦱꦏꦼꦤ꧀ꦊꦩ꧀ꦧꦸꦗꦊꦂꦥꦶꦠꦸꦭꦤ꧀ꦩꦺꦤ꧀ꦢꦒꦺꦩ꧀ꦧꦺꦭ꧀ꦗꦊꦂꦥꦶꦠꦸ꧉"

^23:30 ꧊ꦧꦭꦏ꧀ꦤꦶꦤ꧀ꦢꦏ꧀ꦏꦏꦺꦲꦥꦱꦥꦼꦚ꧀ꦗꦭꦸꦏ꧀ꦏꦺ꧊ꦧꦶꦭꦺꦪꦩ꧀꧉꧊ꦧꦶꦭꦺꦪꦩ꧀ꦧꦚ꧀ꦗꦸꦂꦕꦲꦺꦴꦱ꧀ꦏꦸꦂꦧꦤ꧀ꦲꦶꦁꦱꦧꦼꦤ꧀ꦩꦼꦱ꧀ꦧꦺꦃꦫꦸꦥꦱꦥꦶꦭꦤꦁꦱꦶꦗꦶꦭꦤ꧀ꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤꦁꦱꦶꦗꦶ꧉