Alkitab/Wilangan/35

35:1 ꦲꦶꦁꦠꦤꦃꦔꦫꦺ​꧊ꦩꦺꦴꦮꦧ꧀꧈​ꦱꦕꦼꦝꦏ꧀ꦏꦺꦏꦭꦶ​꧊ꦪꦂꦢꦺꦤ꧀꧈​ꦱꦔꦉꦥ꧀ꦥꦺꦏꦸꦛ​꧊ꦪꦺꦫꦶꦏꦺꦴ꧈​ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ​꧊ꦩꦸꦱ꧈​
35:2 "ꦧꦁꦱ​꧊ꦆꦱꦿꦲꦺꦭ꧀ꦏꦤ꧀ꦝꦤ꧀ꦤꦤꦪꦺꦤ꧀ꦮꦺꦴꦁ​꧊ꦭꦺꦮꦶꦏꦸꦢꦸꦢꦶꦮꦺꦤꦺꦃꦲꦶꦏꦸꦛꦱꦮꦼꦠꦫꦢꦶꦲꦼꦁꦒꦺꦴꦩꦁꦒꦺꦴꦤ꧀ꦭꦤ꧀ꦥꦔꦺꦴꦤ꧀ꦤꦤ꧀ꦲꦶꦁꦱꦲꦸꦧꦼꦁꦔꦺ꧉​ꦏꦸꦮꦶꦏꦸꦢꦸꦢꦶꦗꦸꦥꦸꦏ꧀ꦏꦏꦺꦱꦏꦥꦤ꧀ꦢꦸꦩ꧀ꦩꦤ꧀ꦠꦤꦃꦥꦸꦱꦏꦱꦶꦁꦥꦝꦢꦶꦠꦩ꧀ꦥꦢꦺꦤꦶꦁꦥꦫꦠꦊꦂ꧉​
35:3 ꦏꦸꦛꦏꦸꦛꦩꦲꦸꦧꦏꦭ꧀ꦢꦢꦶꦢꦸꦮꦺꦏ꧀ꦏꦺꦮꦺꦴꦁ​꧊ꦭꦺꦮꦶꦢꦶꦲꦼꦁꦒꦺꦴꦩꦁꦒꦺꦴꦤ꧀꧉​ꦥꦔꦺꦴꦤ꧀ꦤꦤ꧀ꦲꦶꦁꦱꦲꦸꦧꦼꦁꦔꦺꦏꦸꦮꦶꦏꦁꦒꦺꦴꦫꦗꦏꦪꦭꦤ꧀ꦏꦺꦮꦤ꧀ꦏꦺꦮꦤ꧀ꦤꦺꦭꦶꦪꦤꦺ꧉​
35:4 ꦊꦩꦃꦱꦶꦁꦢꦶꦲꦼꦁꦒꦺꦴꦥꦔꦺꦴꦤ꧀ꦤꦤ꧀ꦏꦸꦮꦶꦲꦩ꧀ꦧꦤꦺ450ꦩꦺꦠꦼꦂꦱꦏꦠꦺꦩ꧀ꦧꦺꦴꦏ꧀ꦏꦺꦏꦸꦛ꧈​ꦩꦸꦧꦼꦁ꧉​
35:5 ꦢꦢꦶꦊꦩꦃꦥꦔꦺꦴꦤ꧀ꦤꦤ꧀ꦤꦺꦮꦺꦴꦁ​꧊ꦭꦺꦮꦶꦏꦸꦮꦶꦢꦮꦤꦺꦱꦧꦼꦤ꧀ꦲꦶꦫꦶꦁ900ꦩꦺꦠꦼꦂ;ꦏꦸꦛꦤꦺꦢꦸꦩꦸꦤꦸꦁꦲꦤꦲꦶꦁꦠꦼꦔꦃꦲꦺ꧉​
35:6 ꦮꦺꦴꦁ​꧊ꦭꦺꦮꦶꦏꦸꦢꦸꦏꦺꦴꦏ꧀ꦮꦺꦤꦺꦃꦲꦶꦏꦸꦛꦥꦔꦸꦁꦱꦺꦤ꧀ꦤꦼꦩ꧀꧈​ꦪꦏꦸꦮꦶꦥꦁꦒꦺꦴꦤ꧀ꦤꦤ꧀ꦏꦁꦒꦺꦴꦔꦸꦁꦱꦶꦮꦺꦴꦁꦱꦶꦁꦲꦺꦴꦫꦏꦼꦗꦫꦒ꧀ꦩꦠꦺꦤ꧀ꦤꦶꦮꦺꦴꦁ꧉​ꦏꦼꦗꦧꦱꦏꦏꦸꦮꦶꦮꦺꦴꦁ​꧊ꦭꦺꦮꦶꦏꦸꦢꦸꦢꦶꦮꦺꦤꦺꦃꦲꦶꦏꦸꦛꦥꦠꦁꦥꦸꦭꦸꦃꦭꦺꦴꦫꦺꦴꦭꦶꦪꦤꦺ꧈​
35:7 ꦏꦫꦺꦴꦥꦔꦺꦴꦤ꧀ꦤꦤ꧀ꦤꦺ꧉​ꦢꦢꦶꦏꦧꦺꦃꦲꦤꦏꦸꦛꦥꦠꦁꦥꦸꦭꦸꦃꦮꦺꦴꦭꦸꦱꦶꦁꦏꦸꦢꦸꦢꦶꦮꦺꦤꦺꦃꦲꦏꦺꦩꦫꦁꦮꦺꦴꦁ​꧊ꦭꦺꦮꦶ꧉​
35:8 ꦕꦕꦃꦲꦺꦏꦸꦛꦏꦸꦛꦤꦺꦮꦺꦴꦁ​꧊ꦭꦺꦮꦶꦲꦶꦁꦮꦶꦭꦪꦃꦲꦺꦠꦊꦂꦠꦊꦂꦫꦺ​꧊ꦆꦱꦿꦲꦺꦭ꧀ꦏꦸꦢꦸꦢꦶꦠꦼꦩ꧀ꦠꦺꦴꦏ꧀ꦏꦏꦺꦩꦶꦠꦸꦫꦸꦠ꧀ꦒꦼꦝꦺꦕꦶꦭꦶꦏ꧀ꦏꦺꦮꦶꦭꦪꦃꦲꦺꦠꦊꦂꦩꦲꦸ꧉"​
35:9 ꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏꦩꦫꦁ​꧊ꦩꦸꦱ
35:10 ꦱꦸꦥꦪꦤ꧀ꦝꦮꦸꦃꦲꦶꦧꦁꦱ​꧊ꦆꦱꦿꦲꦺꦭ꧀ꦩꦼꦁꦏꦺꦤꦺ꧈​"ꦱꦮꦶꦱ꧀ꦱꦺꦏꦺꦴꦮꦺꦚꦧꦿꦁꦏꦭꦶ​꧊ꦪꦂꦢꦺꦤ꧀ꦭꦤ꧀ꦩ꧀ꦭꦼꦧꦸꦲꦶꦁꦠꦤꦃ​꧊ꦏꦺꦤꦲꦤ꧀꧈​
35:11 ꦥꦝꦤꦼꦩ꧀ꦠꦺꦴꦏ꧀ꦤꦏꦸꦛꦏꦸꦛꦥꦔꦸꦁꦱꦺꦤ꧀꧈​ꦱꦸꦥꦪꦮꦺꦴꦁꦮꦺꦴꦁꦱꦶꦁꦩꦠꦺꦤ꧀ꦤꦶꦮꦺꦴꦁꦭꦶꦪꦲꦺꦴꦫꦏꦗꦫꦒ꧀꧈​ꦧꦶꦱꦔꦸꦁꦱꦶꦩꦿꦺꦴꦤꦺꦴ꧉​
35:12 ꦧꦶꦱꦚꦶꦁꦏꦶꦂꦫꦶꦥꦼꦩꦊꦱ꧀ꦱꦺꦱꦤꦏ꧀ꦱꦼꦢꦸꦭꦸꦂꦫꦺꦮꦺꦴꦁꦱꦶꦁꦩꦠꦶ꧉​ꦩꦼꦂꦒꦮꦺꦴꦁꦱꦶꦁꦢꦶꦢꦏ꧀ꦮꦩꦠꦺꦤ꧀ꦤꦶꦮꦺꦴꦁꦲꦺꦴꦫꦏꦼꦤꦢꦶꦲꦸꦏꦸꦩ꧀ꦥꦠꦶ꧈​ꦱꦢꦸꦫꦸꦁꦔꦺꦥꦽꦏꦫꦤꦺꦢꦶꦥꦿꦶꦏ꧀ꦱꦭꦤ꧀ꦢꦶꦲꦢꦶꦭ꧀ꦭꦶꦲꦤꦲꦶꦁꦥꦼꦔꦢꦶꦭ꧀ꦭꦤ꧀ꦲꦸꦩꦸꦩ꧀꧉​
35:13 ꦤꦼꦩ꧀ꦠꦺꦴꦏ꧀ꦤꦏꦸꦛꦤꦼꦩ꧀꧈​
35:14 ꦠꦼꦭꦸꦲꦶꦁꦱꦮꦺꦠꦤ꧀ꦤꦺꦏꦭꦶ​꧊ꦪꦂꦢꦺꦤ꧀ꦭꦤ꧀ꦠꦼꦭꦸꦲꦶꦁꦠꦤꦃ​꧊ꦏꦺꦤꦲꦤ꧀꧉​
35:15 ꦏꦸꦛꦏꦸꦛꦩꦲꦸꦧꦏꦭ꧀ꦢꦢꦶꦏꦸꦛꦥꦔꦸꦁꦱꦺꦤ꧀ꦏꦁꦒꦺꦴꦮꦺꦴꦁ​꧊ꦆꦱꦿꦲꦺꦭ꧀ꦭꦤ꧀ꦏꦁꦒꦺꦴꦮꦺꦴꦁꦩꦚ꧀ꦕꦱꦶꦁꦥꦝꦩꦁꦒꦺꦴꦤ꧀ꦲꦶꦁꦏꦺꦴꦤꦺꦴ꧈​ꦏꦁꦒꦺꦴꦱꦮꦼꦠꦫꦩꦁꦱꦲꦸꦠꦮꦱꦠꦼꦫꦸꦱ꧀ꦱꦺ꧉​ꦱꦥꦮꦲꦺꦱꦶꦁꦩꦠꦺꦤ꧀ꦤꦶꦮꦺꦴꦁꦠꦤ꧀ꦥꦢꦶꦗꦫꦒ꧀꧈​ꦧꦶꦱꦔꦸꦁꦱꦶꦲꦶꦁꦱꦭꦃꦱꦶꦗꦶꦤꦺꦏꦸꦛꦤꦼꦩ꧀ꦩꦲꦸ꧉​
35:16 (35:16-18)ꦤꦁꦔꦶꦁꦩꦼꦤꦮꦮꦺꦴꦁꦩꦲꦸꦲꦼꦁꦒꦺꦴꦤꦺꦩꦠꦺꦤ꧀ꦤꦶꦔꦁꦒꦺꦴꦒꦩꦤ꧀ꦮꦼꦱꦶ꧈​ꦮꦠꦸꦲꦸꦠꦮꦏꦪꦸ꧈​ꦏꦸꦮꦶꦱꦭꦃ꧈​ꦩꦼꦂꦒꦚ꧀ꦗꦫꦒ꧀ꦩꦠꦺꦤ꧀ꦤꦶꦭꦤ꧀ꦏꦸꦢꦸꦢꦶꦲꦸꦏꦸꦩ꧀ꦥꦠꦶ꧉​
35:17 (35:16)
35:18 (35:16)
35:19 ꦱꦤꦏ꧀ꦱꦼꦢꦸꦭꦸꦂꦫꦺꦮꦺꦴꦁꦱꦶꦁꦢꦶꦥꦠꦺꦤ꧀ꦤꦶꦩꦲꦸꦱꦶꦁꦏꦸꦢꦸꦤꦶꦤ꧀ꦢꦏ꧀ꦏꦏꦺꦲꦸꦏꦸꦩ꧀ꦩꦤ꧀ꦥꦠꦶ꧉​ꦪꦺꦤ꧀ꦏꦼꦥꦼꦛꦸꦏ꧀ꦏꦫꦺꦴꦱꦶꦁꦩꦠꦺꦤ꧀ꦤꦶꦩꦲꦸ꧈​ꦏꦼꦤꦠꦼꦫꦸꦱ꧀ꦢꦶꦥꦠꦺꦤ꧀ꦤꦶ꧉​
35:20 ꦪꦺꦤ꧀ꦲꦤꦮꦺꦴꦁꦱꦶꦁꦩꦼꦂꦒꦱꦼꦔꦶꦠ꧀ꦩꦠꦺꦤ꧀ꦤꦶꦥꦼꦥꦝꦤꦺꦱꦿꦤꦢꦶꦧꦤ꧀ꦠꦶꦁꦲꦸꦠꦮꦢꦶꦧꦭꦁꦔꦁꦒꦺꦴꦧꦫꦁ꧈​
35:21 ꦲꦸꦠꦮꦢꦶꦗꦺꦴꦠꦺꦴꦱ꧀꧈​ꦮꦺꦴꦁꦏꦸꦮꦶꦒꦮꦺꦥꦠꦶꦭꦤ꧀ꦏꦸꦢꦸꦢꦶꦲꦸꦏꦸꦩ꧀ꦥꦠꦶ꧉​ꦱꦤꦏ꧀ꦱꦼꦢꦸꦭꦸꦂꦫꦺꦱꦶꦁꦢꦶꦥꦠꦺꦤ꧀ꦤꦶ꧈​ꦱꦶꦁꦕꦼꦝꦏ꧀ꦝꦺꦮꦺ꧈​ꦏꦸꦢꦸꦤꦶꦤ꧀ꦢꦏ꧀ꦏꦏꦺꦲꦸꦏꦸꦩ꧀ꦩꦤ꧀ꦥꦠꦶꦩꦲꦸ꧉​ꦪꦺꦤ꧀ꦏꦼꦥꦼꦛꦸꦏ꧀ꦏꦫꦺꦴꦱꦶꦁꦩꦠꦺꦤ꧀ꦤꦶ꧈​ꦮꦺꦴꦁꦩꦲꦸꦏꦼꦤꦠꦼꦫꦸꦱ꧀ꦢꦶꦥꦠꦺꦤ꧀ꦤꦶ꧉​
35:22 ꦤꦁꦔꦶꦁꦱꦲꦸꦥꦩꦲꦤꦮꦺꦴꦁꦱꦶꦁꦠꦤ꧀ꦥꦢꦶꦗꦫꦒ꧀ꦚ꧀ꦗꦭꦂꦫꦶꦥꦠꦶꦤꦺꦮꦺꦴꦁꦭꦶꦪ꧈​ꦱꦶꦁꦲꦺꦴꦫꦩꦼꦂꦒꦱꦼꦔꦶꦠ꧀꧈​ꦲꦶꦪꦱꦿꦤꦢꦶꦧꦤ꧀ꦠꦶꦁ꧈​ꦲꦸꦠꦮꦱꦿꦤꦢꦶꦧꦭꦁꦔꦁꦒꦺꦴꦧꦫꦁ꧈​
35:23 ꦲꦸꦠꦮꦩꦼꦂꦒꦲꦺꦴꦫꦔ꧀ꦭꦼꦒꦺꦮꦤꦶꦧꦏ꧀ꦏꦏꦺꦮꦠꦸꦱꦶꦁꦤꦶꦧꦤꦶꦮꦺꦴꦁꦭꦶꦪ꧈​ꦢꦸꦢꦸꦱꦠꦿꦸꦤꦺ꧈​ꦭꦤ꧀ꦝꦺꦮꦺꦏ꧀ꦏꦺꦥꦚ꧀ꦕꦺꦤ꧀ꦲꦺꦴꦫꦤꦶꦪꦠ꧀ꦲꦉꦥ꧀ꦒꦮꦺꦕꦶꦭꦏꦤꦺꦮꦺꦴꦁꦱꦶꦁꦏꦼꦠꦶꦧꦤ꧀ꦮꦠꦶꦩꦲꦸ꧈​
35:24 ꦲꦶꦁꦥꦽꦏꦫꦥꦽꦏꦫꦱꦶꦁꦩꦼꦁꦏꦺꦴꦤꦺꦴꦏꦸꦮꦶꦫꦏꦾꦠ꧀ꦏꦸꦢꦸꦩ꧀ꦧꦺꦭꦤꦶꦮꦺꦴꦁꦱꦶꦁꦚ꧀ꦗꦭꦂꦫꦶꦥꦠꦶꦩꦲꦸ꧈​ꦭꦤ꧀ꦲꦺꦴꦫꦏꦼꦤꦩ꧀ꦧꦺꦭꦤꦶꦱꦤꦏ꧀ꦱꦼꦢꦸꦭꦸꦂꦫꦺꦱꦶꦁꦩꦠꦶ꧈​ꦱꦶꦁꦥꦝꦲꦉꦥ꧀ꦩꦊꦱ꧀ꦩꦠꦺꦤ꧀ꦤꦶ꧉​
35:25 (35:25-28)ꦮꦺꦴꦁꦱꦶꦁꦲꦺꦴꦫꦏꦼꦗꦫꦒ꧀ꦚꦼꦧꦧ꧀ꦧꦏꦺꦥꦠꦶꦤꦺꦭꦶꦪꦤ꧀꧈​ꦏꦸꦢꦸꦢꦶꦱ꧀ꦭꦩꦼꦠ꧀ꦠꦏꦺꦢꦺꦤꦶꦁꦫꦏꦾꦠ꧀ꦱꦏꦲꦚ꧀ꦕꦩ꧀ꦩꦤ꧀ꦤꦺꦱꦤꦏ꧀ꦱꦼꦢꦸꦭꦸꦂꦮꦺꦴꦁꦱꦶꦁꦢꦢꦶꦏꦸꦂꦧꦤ꧀꧉​ꦮꦺꦴꦁꦱꦶꦁꦚꦼꦧꦧ꧀ꦧꦏꦺꦩꦠꦶꦩꦲꦸꦏꦸꦢꦸꦢꦶꦧꦭꦺꦏ꧀ꦏꦏꦺꦲꦶꦁꦏꦸꦛꦥꦔꦸꦁꦱꦺꦤ꧀ꦤꦺ꧉​ꦮꦺꦴꦁꦩꦲꦸꦏꦸꦢꦸꦩꦁꦒꦺꦴꦤ꧀ꦲꦤꦲꦶꦁꦏꦸꦛꦏꦺꦴꦤꦺꦴ꧈​ꦔꦤ꧀ꦠꦶꦱꦶꦁꦢꦢꦶꦲꦶꦩꦩ꧀ꦲꦒꦸꦁꦤꦭꦶꦏꦱꦼꦩꦤꦠꦶꦁꦒꦭ꧀ꦢꦺꦴꦚ;ꦭꦒꦶꦱꦮꦶꦱ꧀ꦱꦺꦏꦸꦮꦶꦮꦺꦴꦁꦩꦲꦸꦏꦼꦤꦧꦭꦶꦩꦼꦚꦁꦢꦺꦱꦤꦺ꧉​ꦤꦁꦔꦶꦁꦪꦺꦤ꧀ꦮꦺꦴꦁꦩꦲꦸꦭꦸꦔꦱꦏꦏꦸꦛꦥꦔꦸꦁꦱꦺꦤ꧀ꦤꦺ꧈​ꦧꦚ꧀ꦗꦸꦂꦢꦶꦥꦽꦒꦺꦴꦏ꧀ꦏꦶꦢꦺꦤꦶꦁꦱꦤꦏ꧀ꦱꦼꦢꦸꦭꦸꦂꦫꦺꦮꦺꦴꦁꦱꦶꦁꦢꦢꦶꦏꦸꦂꦧꦤ꧀꧈​ꦏꦼꦤꦢꦶꦥꦠꦺꦤ꧀ꦤꦶ;ꦥꦼꦩꦊꦱ꧀ꦩꦼꦁꦏꦺꦴꦤꦺꦴꦏꦸꦮꦶꦲꦺꦴꦫꦢꦺꦴꦱ꧈​
35:26 (35:25)
35:27 (35:25)
35:28 (35:25)
35:29 ꦥꦽꦤꦠꦤ꧀ꦥꦽꦤꦤ꧀ꦠꦤ꧀ꦲꦶꦏꦶꦏꦁꦒꦺꦴꦏꦺꦴꦮꦺꦭꦤ꧀ꦲꦤꦏ꧀ꦲꦤꦏ꧀ꦩꦸ꧈​ꦲꦤꦲꦶꦁꦔꦼꦤ꧀ꦢꦶꦮꦲꦺꦥꦁꦒꦺꦴꦤ꧀ꦤꦤ꧀ꦤꦺ꧉​
35:30 ꦲꦶꦁꦧꦧ꧀ꦒꦮꦺꦥꦠꦶ꧈​ꦮꦺꦴꦁꦱꦶꦁꦢꦶꦢꦏ꧀ꦮꦩꦠꦺꦤ꧀ꦤꦶ꧈​ꦩꦸꦁꦧꦶꦱꦢꦶꦠꦼꦠꦼꦥ꧀ꦥꦏꦺꦏꦭꦸꦥꦸꦠ꧀ꦠꦤ꧀ꦤꦺꦭꦤ꧀ꦢꦶꦲꦸꦏꦸꦩ꧀ꦥꦠꦶꦪꦺꦤ꧀ꦲꦤꦱꦼꦏ꧀ꦱꦶꦭꦺꦴꦫꦺꦴꦲꦸꦠꦮꦭꦸꦮꦶꦃꦱꦶꦁꦩ꧀ꦧꦸꦏ꧀ꦠꦺꦏ꧀ꦏꦏꦺ꧉​ꦥꦱꦼꦏ꧀ꦱꦶꦤꦺꦮꦺꦴꦁꦱꦶꦗꦶꦲꦺꦴꦫꦕꦸꦏꦸꦥ꧀ꦏꦁꦒꦺꦴꦩ꧀ꦧꦸꦏ꧀ꦠꦺꦏ꧀ꦏꦏꦺꦪꦺꦤ꧀ꦥꦤ꧀ꦢꦏ꧀ꦮꦩꦲꦸꦧꦼꦤꦼꦂ꧉​
35:31 ꦮꦺꦴꦁꦱꦶꦁꦩꦠꦺꦤ꧀ꦤꦶꦏꦸꦢꦸꦒꦼꦤ꧀ꦠꦶꦢꦶꦥꦠꦺꦤ꧀ꦤꦶ꧉​ꦲꦸꦏꦸꦩ꧀ꦩꦤ꧀ꦤꦺꦲꦺꦴꦫꦏꦼꦤꦢꦶꦠꦼꦧꦸꦱ꧀ꦔꦁꦒꦺꦴꦝꦸꦮꦶꦠ꧀꧉​
35:32 ꦪꦺꦤ꧀ꦲꦤꦮꦺꦴꦁꦔꦸꦁꦱꦶꦲꦶꦁꦏꦸꦛꦥꦔꦸꦁꦱꦺꦤ꧀꧈​ꦏꦺꦴꦮꦺꦲꦺꦴꦫꦏꦼꦤꦤꦩ꧀ꦥꦤꦶꦝꦸꦮꦶꦠ꧀ꦠꦼꦧꦸꦱ꧀ꦱꦤ꧀ꦭꦤ꧀ꦲꦺꦴꦫꦏꦼꦤꦔꦶꦢꦶꦤ꧀ꦤꦶꦮꦺꦴꦁꦩꦲꦸꦩꦸꦭꦶꦃꦲꦶꦁꦲꦺꦴꦩꦃꦲꦺꦱꦢꦸꦫꦸꦁꦔꦺꦲꦶꦩꦩ꧀ꦲꦒꦸꦁꦠꦶꦁꦒꦭ꧀ꦢꦺꦴꦚ꧉​
35:33 ꦪꦺꦤ꧀ꦏꦺꦴꦮꦺꦔ꧀ꦭꦏꦺꦴꦤ꧀ꦤꦶꦩꦼꦁꦏꦺꦴꦤꦺꦴ꧈​ꦏꦺꦴꦮꦺꦒꦮꦺꦉꦒꦼꦢ꧀ꦢꦺꦠꦤꦃꦱꦶꦁꦏꦺꦴꦏ꧀ꦲꦼꦁꦒꦺꦴꦤ꧀ꦤꦶ꧉​ꦫꦗꦥꦠꦶꦏꦸꦮꦶꦒꦮꦺꦉꦒꦼꦢ꧀ꦢꦺꦤꦼꦒꦫ꧉​ꦩꦸꦭꦤꦺꦲꦺꦴꦫꦲꦤꦢꦭꦤ꧀ꦭꦶꦪꦏꦼꦗꦧꦩꦠꦺꦤ꧀ꦤꦶꦮꦺꦴꦁꦱꦶꦁꦒꦮꦺꦥꦠꦶ꧉​
35:34 ꦲꦗꦒꦮꦺꦉꦒꦼꦢ꧀ꦢꦺꦠꦤꦃꦱꦶꦁꦏꦺꦴꦏ꧀ꦲꦼꦁꦒꦺꦴꦤ꧀ꦤꦶ꧈​ꦩꦼꦂꦒꦲꦏꦸꦲꦶꦏꦶꦄꦭ꧀ꦭꦃ꧈​ꦏꦁꦩꦁꦒꦺꦴꦤ꧀ꦲꦶꦁꦠꦼꦔꦃꦲꦺꦧꦁꦱ​꧊ꦆꦱꦿꦲꦺꦭ꧀꧉"​