꧋ꦏꦭꦩꦶꦁꦒꦸꦏꦥꦼꦁꦏꦼꦂꦏꦺꦴꦤ꧀ꦱꦸꦭ꧀ꦗꦼꦤ꧀ꦢꦿꦭ꧀ꦱꦶꦪꦼꦩ꧀ꦠꦸꦮꦤ꧀ Nai Siong Naranong ꦄꦩ꧀ꦠꦼꦤꦂꦥꦥꦽꦤ꧀ꦠꦃꦲꦤ꧀ Phija Bradi baddha Bhubal ꦠꦸꦮꦶꦤ꧀ꦥꦔꦼꦫꦤ꧀ Jagjivalit ꦩꦫꦠꦩꦸꦝꦠꦼꦁꦏꦫꦠꦺꦴꦤ꧀ꦔꦪꦺꦴꦓꦾꦏꦂꦠ꧈ꦏꦲꦶꦫꦶꦢ꧀ꦲꦶꦁꦠꦸꦮꦤ꧀ꦄꦱꦶꦱ꧀ꦠꦺꦤ꧀ꦫꦺꦱꦶꦝꦺꦤ꧀꧉ꦧꦺꦴꦏ꧀ꦩꦤꦮꦶꦥꦽꦭꦸꦧꦝꦼꦔꦽꦩ꧀ꦧꦒ꧀ꦲꦶꦁꦧꦧ꧀ꦧꦝꦼꦫꦮꦸꦃꦲꦶꦥꦸꦤ꧀ꦱꦿꦶꦟꦠꦯꦶꦪꦼꦩ꧀ꦧꦼꦚ꧀ꦗꦶꦁꦲꦶꦁꦮꦸꦭꦤ꧀ꦗꦸꦤꦶ꧉
꧋ꦱꦲꦢꦼꦒ꧀ꦒꦶꦁ Antiwoeker Vereeniging ꦲꦶꦁꦲꦶꦁꦨꦤ꧀ꦝꦸꦁꦏꦭꦠꦁꦒꦭ꧀ 22 ꦥꦺꦧꦿꦸꦮꦫꦶ 1927꧈ꦢꦸꦩꦸꦒꦶꦤꦶꦁꦏꦱꦤ꧀ꦤꦶꦁꦠꦲꦸꦤ꧀ꦮꦲꦸꦱꦩ꧀ꦥꦸꦤ꧀ꦱꦒꦼꦢ꧀ꦱꦸꦏꦥꦶꦠꦸꦭꦸꦁꦔꦤ꧀ꦠꦸꦮꦶꦤ꧀ꦱꦸꦏꦥꦤꦶꦩ꧀ꦧꦁꦠꦶꦠꦶꦪꦁ 131꧈ꦲꦶꦁꦒꦶꦃꦥꦸꦤꦶꦏꦧꦺꦴꦁꦱꦌꦫꦺꦴꦥꦃ 66꧈ꦥꦿꦶꦧꦸꦩꦶ 63 ꦠꦸꦮꦶꦤ꧀ꦧꦺꦴꦁꦱꦡꦶꦪꦺꦴꦁꦲ꧀ꦮ 2꧉ꦠꦶꦠꦶꦪꦁꦱꦩꦤ꧀ꦠꦼꦤ꧀ꦮꦲꦸꦏꦛꦃꦲꦶꦁꦏꦁꦲꦁꦱꦭ꧀ꦥꦶꦠꦸꦭꦸꦁꦔꦤ꧀꧉
꧋ꦧꦼꦱ꧀ꦠꦶꦂꦫꦶꦁꦲꦸꦩꦠ꧀ꦆꦱ꧀ꦭꦩ꧀ꦲꦶꦁꦔꦪꦺꦴꦓꦾꦏꦂꦠꦩꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦲꦫꦏ꧀ꦲꦫꦏ꧀ꦏꦤ꧀ꦲꦶꦁꦢꦶꦤ꧀ꦠꦼꦤ꧀ꦲꦒꦼꦁꦩꦼꦏꦿꦢꦤ꧀ꦏꦁꦗꦼꦁꦟꦧꦶꦩꦸꦃꦲꦩ꧀ꦩꦢ꧀ꦢꦶꦥꦸꦤ꧀ꦱꦤ꧀ꦢꦺꦏ꧀ꦲꦏꦼꦤ꧀꧈ꦢꦺꦤꦺꦲꦶꦁꦧꦧ꧀ꦱꦼꦱꦺꦴꦫꦃꦲꦒꦩꦶ꧈ꦧꦝꦼꦏꦠꦶꦤ꧀ꦢꦏ꧀ꦲꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦢꦶꦤ꧀ꦠꦼꦤ꧀ꦩꦊꦩ꧀ꦉꦧꦺꦴ꧈ꦮꦺꦴꦤ꧀ꦠꦼꦤ꧀ꦲꦶꦁꦱꦼꦏꦺꦴꦭꦃꦲꦤ꧀ꦆꦱ꧀ꦭꦩ꧀ꦩꦶꦪꦃꦯꦸꦂꦪꦺꦁꦗꦸꦫꦶꦠ꧀ꦠꦤ꧀꧉
꧋ꦏꦮꦂꦠꦺꦴꦱ꧀ꦱꦏꦼꦤ꧀꧈ꦲꦶꦁꦏꦫꦠꦺꦴꦤ꧀ꦯꦸꦫꦏꦂꦠꦧꦝꦼꦮꦺꦴꦤ꧀ꦠꦼꦤ꧀ꦥꦶꦏꦿꦩꦺꦤ꧀ꦥꦸꦠꦿꦶꦏꦏꦭꦶꦃꦏꦊꦉꦱ꧀ꦮꦪꦃꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀꧈ꦱꦩꦶꦥꦸꦠꦿꦤꦶꦥꦸꦤ꧀ꦏꦁꦗꦼꦁꦦꦔꦼꦫꦤ꧀ꦲꦂꦪꦏꦸꦯꦸꦩꦪꦸꦢ꧈ꦱꦠꦸꦁꦒꦭ꧀ꦲꦁꦱꦭ꧀ꦫꦢꦺꦤ꧀ꦯꦸꦠꦮꦶꦢꦶꦏ꧀ꦢ꧈ꦱꦠꦸꦁꦒꦭ꧀ꦭꦶꦥꦸꦤ꧀ꦲꦁꦱꦭ꧀ꦏꦁꦗꦼꦁꦨꦸꦥꦠꦶꦲꦶꦁꦗꦼꦦꦫ꧉
꧋ꦚꦩ꧀ꦧꦼꦠ꧀ꦠꦶꦮꦂꦠꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦮꦿꦠ꧀ꦲꦶꦁꦏꦗꦮꦺꦤ꧀꧈ꦧꦧ꧀ꦧꦱꦗꦮꦶꦏꦮꦸꦭꦁꦔꦏꦼꦤ꧀ꦲꦶꦁ Osvia ꦨꦤ꧀ꦝꦸꦁ꧈ꦥꦸꦤꦶꦏꦱꦠꦼꦔꦃꦩꦺꦃꦏꦠꦼꦠꦼꦥ꧀ꦥꦏꦼꦤ꧀꧉ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦩꦏꦠꦼꦤ꧀꧈ꦲꦮꦶꦠ꧀ꦭꦭꦢ꧀ꦢꦤ꧀ꦤꦶꦁꦥꦿꦺꦴꦥꦺꦤ꧀ꦱꦶꦗꦮꦶꦏꦶꦭꦺꦤ꧀ꦥꦸꦤꦶꦏꦲꦸꦒꦶꦮꦺꦴꦤ꧀ꦠꦼꦤ꧀ꦠꦶꦠꦶꦪꦁꦔꦶꦥꦸꦤ꧀ꦲꦶꦁꦏꦁꦧꦺꦴꦠꦼꦤ꧀ꦩꦔꦽꦠꦺꦴꦱ꧀ꦧꦺꦴꦱꦯꦸꦤ꧀ꦝ꧈ꦏꦢꦺꦴꦱ꧀ꦠ꧇ꦠꦶꦠꦶꦪꦁꦲꦶꦁꦨꦤ꧀ꦠꦼꦤ꧀ꦱꦶꦱꦶꦃꦭꦺꦂ꧈ꦆꦤ꧀ꦢꦿꦩꦪꦸꦠꦸꦮꦶꦤ꧀ꦕꦶꦉꦨꦺꦴꦤ꧀꧉ꦢꦢꦺꦴꦱ꧀ꦕꦭꦺꦴꦤ꧀ꦥꦿꦶꦪꦤ꧀ꦠꦸꦤ꧀ꦲꦶꦁꦭꦭꦢ꧀ꦢꦤ꧀ꦗꦮꦶꦏꦶꦭꦺꦤ꧀ꦲꦶꦁꦒꦶꦃꦏꦼꦢꦃꦩꦔꦽꦠꦺꦴꦱ꧀ꦧꦱꦗꦮꦶ꧉
꧋ꦲꦶꦁꦮꦼꦏ꧀ꦢꦭ꧀ꦥꦸꦤꦶꦏꦉꦉꦒꦺꦤ꧀ꦤꦶꦁꦫꦶꦗꦼꦏꦶꦲꦶꦁꦏꦫꦔꦚꦂ(ꦏꦼꦝꦸ)꧈ꦏꦊꦧꦼꦠ꧀ꦩꦶꦫꦃ꧉ꦥꦤ꧀ꦠꦸꦤ꧀ꦱꦝꦕꦶꦤ꧀ꦉꦒꦶ f 3 - f 3,50꧉ꦥꦺꦴꦲꦸꦁꦱꦝꦕꦶꦤ꧀ f 0,50 - f 0,60꧉ꦒꦥ꧀ꦭꦺꦏ꧀ꦱꦝꦕꦶꦤ꧀ f 1,10 - f 1,20꧈ꦠꦸꦮꦶꦤ꧀ꦧꦺꦴꦠꦼꦤ꧀ꦏꦼꦤ꧀ꦝꦠ꧀ꦠꦶꦠꦶꦪꦁꦲꦶꦁꦉꦢꦺꦤ꧀ꦲꦤ꧀ꦢꦭꦶꦢꦶꦂꦲꦩ꧀ꦧꦼꦏ꧀ꦠꦥꦺꦴꦲꦸꦁꦝꦠꦼꦁꦏꦶꦛ꧈ꦤꦤ꧀ꦝꦏ꧀ꦲꦏꦼꦤ꧀ꦧꦶꦭꦶꦃꦠꦤꦼꦩ꧀ꦩꦤ꧀ꦥꦺꦴꦲꦸꦁꦲꦶꦁꦥꦉꦢꦺꦤ꧀ꦩꦗꦼꦁ꧉
꧋ꦱꦼꦢꦾꦠꦩꦩꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦏꦱꦺꦂꦤꦼꦥꦸꦭꦶꦱꦶꦲꦶꦁꦡꦸꦁꦏꦏ꧀꧈ꦏꦱꦸꦩꦼꦉꦥ꧀ꦥꦤ꧀ꦏꦩ꧀ꦧꦃꦲꦶꦁꦱꦱꦏꦶꦠ꧀ꦥꦺꦱ꧀꧉ꦲꦶꦁꦏꦁꦮꦗꦶꦧ꧀ꦭꦗꦼꦁꦲꦤꦶꦤ꧀ꦢꦏ꧀ꦲꦏꦼꦤ꧀ꦫꦶꦫꦶꦒꦼꦤ꧀ꦱꦥꦽꦭꦸꦤꦶꦥꦸꦤ꧀꧈ꦱꦲꦥꦫꦥꦸꦭꦶꦱꦶꦏꦱꦶꦁꦏꦶꦂꦫꦏꦼꦤ꧀ꦱꦏꦶꦁꦔꦿꦶꦏꦸ꧉
꧋ꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦆꦤ꧀ꦱꦼꦥꦺꦏ꧀ꦠꦸꦂꦧꦸꦂꦒꦼꦊꦏ꧀ꦱꦼꦠꦤ꧀ꦠꦶꦪꦁꦱꦶꦠꦶꦮꦶꦮꦶꦠ꧀ꦠꦁꦒꦭ꧀ 1 ꦗꦤꦸꦮꦫꦶ꧈ꦫꦢꦺꦤ꧀ꦢꦸꦂꦪꦠ꧀ꦏꦩꦶꦭ꧀꧈ꦄꦩ꧀ꦠꦼꦤꦂꦏꦁꦏꦧꦤ꧀ꦠꦺꦴꦏ꧀ꦲꦏꦼꦤ꧀ꦝꦠꦼꦁꦝꦼꦥꦂꦠꦼꦩꦺꦤ꧀ꦥꦔꦢꦶꦭ꧀ꦭꦤ꧀꧉ꦥꦁꦏꦠ꧀ꦥꦸꦤꦶꦏꦤꦩꦥꦁꦏꦠ꧀ꦲꦺꦁꦒꦭ꧀꧉
꧋ꦱꦺꦴꦮꦤ꧀ꦤꦶꦥꦸꦤ꧀ꦲꦸꦠꦸꦱꦤ꧀ꦱꦶꦪꦼꦩ꧀ꦝꦠꦼꦁꦏꦫꦠꦺꦴꦤ꧀ꦔꦪꦺꦴꦓꦾꦏꦂꦠ꧈ꦏꦛꦃꦏꦮꦺꦴꦤ꧀ꦠꦼꦤ꧀ꦤꦤ꧀ꦲꦶꦁꦏꦁꦲꦢꦩꦼꦭ꧀ꦏꦉꦤꦤ꧀ꦤꦶꦁꦠꦩꦸ꧈ꦩꦶꦭꦧꦼꦚ꧀ꦗꦶꦁꦫꦮꦸꦃꦲꦶꦥꦸꦤ꧀ꦱꦿꦶꦤꦉꦤ꧀ꦢꦿꦲꦶꦁꦯꦶꦪꦼꦩ꧀꧈ꦲꦸꦒꦶꦧꦝꦼꦢꦶꦥꦸꦤ꧀ꦱꦼꦒꦃꦠꦶꦠꦶꦔꦭ꧀ꦭꦤ꧀ꦏꦢꦺꦴꦱ꧀ꦲꦶꦁꦏꦁꦢꦶꦥꦸꦤ꧀ꦥꦶꦠꦺꦴꦁꦠꦺꦴꦤ꧀ꦤꦏꦼꦤ꧀ꦮꦲꦸ꧉꧋ꦫꦢꦺꦤ꧀ꦥꦚ꧀ꦗꦶꦯꦱꦿꦏꦸꦱꦸꦩ꧈ꦄꦱꦶꦱ꧀ꦠꦺꦤ꧀ꦮꦢꦤꦲꦶꦁꦏꦁꦏꦥꦿꦶꦏ꧀ꦱꦲꦶꦁꦪꦸꦱ꧀ꦠꦶꦱꦶ꧈ꦏꦢꦏ꧀ꦮꦤꦩ꧀ꦥꦺꦤ꧀ꦤꦶꦧꦼꦱꦼꦭ꧀꧈ꦥꦿꦏꦮꦶꦱ꧀ꦱꦶꦥꦸꦤ꧀ꦏꦶꦫꦁꦠꦼꦫꦁ꧉ꦎꦥ꧀ꦱꦶꦫꦶꦁꦪꦸꦱ꧀ꦠꦶꦱꦶꦠꦸꦮꦶꦤ꧀ꦩꦶꦱ꧀ꦠꦼꦂꦯꦸꦮꦤꦤꦶꦩ꧀ꦧꦁꦱꦸꦥꦢꦺꦴꦱ꧀ꦢꦶꦥꦸꦤ꧀ꦭꦸꦮꦂꦫꦶꦱꦏꦶꦁꦱꦼꦉꦒ꧀ꦒꦤ꧀꧉꧋ꦏꦭꦠꦁꦒꦭ꧀ 14 ꦗꦤꦸꦮꦫꦶ꧈ꦠꦸꦮꦤ꧀ꦫꦺꦱꦶꦢꦺꦤ꧀ꦲꦶꦁꦦꦱꦸꦫꦸꦮꦤ꧀ꦩꦫꦶꦁꦔꦏꦼꦤ꧀ꦒꦚ꧀ꦗꦂꦫꦤ꧀ꦢꦊꦩ꧀ꦱꦿꦶꦨꦒꦼꦤ꧀ꦝꦏꦁꦗꦼꦁꦯꦿꦶꦩꦲꦫꦗꦥꦸꦠꦿꦶꦝꦸꦩꦠꦼꦁꦩꦱ꧀꧈ꦗꦪꦢꦶꦦꦿꦗ꧈ꦥꦠꦶꦃꦲꦶꦁꦑꦿꦏ꧀ꦱꦲꦄꦤ꧀꧈ꦭꦤ꧀ꦲꦶꦁꦠꦁꦒꦭ꧀ 23 ꦗꦤꦸꦮꦫꦶꦲꦸꦒꦶꦧꦝꦼꦩ꧀ꦥꦺꦏ꧀ꦲꦏꦼꦤ꧀ꦒꦚ꧀ꦗꦂꦫꦤ꧀ꦝꦠꦼꦁꦠꦸꦮꦤ꧀ Ter Poorten ꦄꦱꦶꦱ꧀ꦠꦺꦤ꧀ꦉꦱꦶꦝꦺꦤ꧀ꦩꦭꦁ꧈ꦠꦸꦮꦤ꧀ Bussemaker ꦧꦸꦂꦒꦼꦩꦶꦱ꧀ꦠꦼꦂꦠꦸꦮꦶꦤ꧀ Ds. Lapel꧉ꦠꦸꦩꦿꦥ꧀ꦠꦸꦮꦤ꧀ Ter Poorten ꦲꦸꦒꦶꦧꦝꦼꦏꦥꦫꦶꦁꦔꦏꦼꦤ꧀ꦠꦫꦶꦩꦏꦱꦶꦃꦲꦶꦥꦸꦤ꧀ꦥꦩꦫꦶꦤ꧀ꦤ꧀ꦠꦃ꧉
꧋ꦊꦁꦒꦤꦤ꧀ꦏꦗꦮꦺꦤ꧀ꦤꦺꦴꦩꦼꦂ 2791 ꦩꦂꦠꦺꦴꦱ꧀ꦱꦏꦼꦤ꧀꧈ꦏꦭꦲꦶꦁꦢꦶꦤ꧀ꦠꦼꦤ꧀ꦏꦼꦩꦶꦱ꧀ꦠꦁꦒꦭ꧀ꦏꦥꦶꦁ 12 ꦮꦸꦭꦤ꧀ꦥꦸꦤꦶꦏꦮꦚ꧀ꦕꦶꦗꦩ꧀ 6 ꦲꦺꦚ꧀ꦗꦶꦁ꧈ꦮꦺꦴꦤ꧀ꦠꦼꦤ꧀ꦠꦶꦪꦁꦤꦩꦱꦤ꧀ꦤꦢꦶꦲꦶꦁꦱꦸꦤ꧀ꦤꦸꦱꦝꦼꦩ꧀꧈ꦕꦶꦭꦕꦥ꧀꧈ꦥꦼꦗꦃꦮꦺꦴꦤ꧀ꦠꦼꦤ꧀ꦲꦶꦁꦭꦺꦥꦺꦤ꧀꧈ꦗꦭꦂꦫꦤ꧀ꦱꦮꦼꦒ꧀ꦩꦚ꧀ꦗꦶꦁꦏꦶꦩꦠ꧀ꦱꦏꦶꦠ꧀ꦠꦶꦥꦸꦤ꧀ꦲꦪꦤ꧀꧉
꧋ꦏꦺꦴꦤ꧀ꦠꦿꦺꦴꦭꦶꦂ B.B. ꦲꦶꦁꦦꦱꦸꦫꦸꦮꦤ꧀꧈ꦠꦸꦮꦤ꧀ W. Pino Post ꦏꦥꦶꦤ꧀ꦝꦃꦝꦠꦼꦁꦦꦊꦩ꧀ꦧꦁ꧈ꦲꦶꦁꦏꦁꦧꦝꦼꦲꦁꦒꦼꦤ꧀ꦠꦺꦴꦱ꧀ꦱꦶꦢꦺꦫꦺꦁꦮꦺꦴꦤ꧀ꦠꦼꦤ꧀꧉ꦮꦢꦤꦲꦶꦁꦦꦱꦸꦫꦸꦮꦤ꧀꧈ꦩꦱ꧀ꦦꦸꦂꦧꦮꦶꦂꦪꦏꦥꦶꦤ꧀ꦝꦃꦝꦠꦼꦁꦏꦫꦔ꧀ꦭꦺꦴ꧈ꦩꦭꦁ꧈ꦲꦶꦁꦏꦁꦲꦁꦒꦼꦤ꧀ꦠꦺꦴꦱ꧀ꦱꦶꦩꦱ꧀ꦄꦃꦩꦢ꧀ꦫꦱ꧀ꦠꦶꦏ꧈ꦮꦢꦤꦓꦝꦶꦁ꧈ꦏꦿꦏ꧀ꦱꦲꦄꦤ꧀꧉
꧋Aneta ꦩꦂꦠꦺꦴꦱ꧀ꦱꦏꦼꦤ꧀꧇ꦧꦼꦱ꧀ꦠꦶꦂ V.V.L. ꦔꦠꦸꦂꦫꦏꦼꦤ꧀ꦥꦩꦿꦪꦺꦴꦒꦶꦝꦠꦼꦁꦝꦶꦫꦺꦏ꧀ꦠꦸꦂꦎꦤ꧀ꦢꦼꦂꦮꦮꦶꦱ꧀ꦲꦶꦁꦧꦧ꧀ꦏꦶꦫꦁꦥꦿꦪꦺꦴꦒꦶꦤꦶꦥꦸꦤ꧀ꦥꦼꦛꦸꦏ꧀ꦧꦪꦂꦫꦤ꧀ꦱꦼꦏꦺꦴꦭꦃꦲꦶꦁꦏꦁꦒꦸꦁꦒꦸꦔꦶꦥꦸꦤ꧀ f 10,- ꦩꦶꦁꦒꦃꦩꦮꦶꦲꦩ꧀ꦧꦪꦂꦥ꧀ꦭꦏ꧀ꦱꦺꦒꦼꦭ꧀꧈ꦏꦢꦺꦴꦱ꧀ꦭꦶꦩꦿꦃꦲꦶꦁꦥꦼꦛꦸꦏ꧀꧉ꦠꦸꦮꦶꦤ꧀ꦠꦶꦪꦁꦤꦩ꧀ꦥꦺꦤ꧀ꦤꦶꦠꦶꦫꦃꦲꦤ꧀ꦤꦶꦁꦧꦪꦂꦫꦤ꧀ꦱꦼꦏꦺꦴꦭꦃꦠꦸꦩꦿꦥ꧀ꦲꦤꦏ꧀ꦲꦤꦏ꧀ꦏꦶꦁꦠꦶꦪꦁꦲꦶꦁꦏꦁꦱꦼꦏꦺꦴꦭꦃꦲꦶꦥꦸꦤ꧀ꦩꦁꦒꦺꦤ꧀ꦤꦸꦁꦒꦶꦭ꧀ꦱꦱꦼꦏꦺꦴꦭꦃꦲꦤ꧀ꦲꦸꦠꦮꦶꦱꦤꦺꦱ꧀ꦱꦼꦏꦺꦴꦭꦃꦲꦤ꧀꧈ꦩꦤꦮꦶꦮꦁꦱꦸꦭ꧀ꦭꦶꦁꦲꦂꦠꦮꦲꦸꦭꦁꦏꦸꦁ f 10,- ꦲꦶꦁꦒꦶꦃꦏꦼꦢꦃꦲꦩ꧀ꦧꦪꦂꦥ꧀ꦭꦏ꧀ꦱꦺꦒꦼꦭ꧀꧉ꦭꦤ꧀ꦩꦭꦶꦃꦲꦱꦿꦶꦁꦏꦭꦩ꧀ꦥꦃꦲꦤ꧀꧈ꦲꦂꦠꦲꦶꦁꦏꦁꦢꦶꦥꦸꦤ꧀ꦧꦪꦂꦫꦏꦼꦤ꧀ꦏꦶꦫꦁꦱꦏꦶꦁ f 10,- ꦤꦔꦶꦁꦥ꧀ꦭꦏ꧀ꦱꦺꦒꦼꦭ꧀ꦭꦶꦥꦸꦤ꧀ꦲꦸꦒꦶꦱꦩ꧀ꦥꦸꦤ꧀ꦏꦼꦭꦗꦼꦁꦢꦶꦥꦸꦤ꧀ꦧꦪꦂ꧉ꦝꦼꦥꦂꦠꦼꦩꦺꦤ꧀ꦲꦁꦒꦭꦶꦃꦥꦿꦪꦺꦴꦒꦶꦝꦠꦼꦁꦥꦤꦶꦩ꧀ꦧꦁꦮꦲꦸ꧈ꦱꦲꦤꦼꦠꦼꦥ꧀ꦥꦏꦼꦤ꧀ꦧꦶꦭꦶꦃꦲꦂꦠꦥ꧀ꦭꦏ꧀ꦱꦺꦒꦼꦭ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦭꦗꦼꦁꦢꦶꦥꦸꦤ꧀ꦧꦪꦂꦮꦲꦸꦧꦝꦼꦢꦶꦥꦸꦤ꧀ꦭꦶꦤ꧀ꦠꦺꦴꦤ꧀ꦤꦶ꧈ꦧꦶꦭꦶꦃꦲꦂꦠꦚꦠꦧꦪꦂꦫꦤ꧀ꦱꦼꦏꦺꦴꦭꦃꦮꦲꦸꦏꦶꦫꦁꦱꦏꦶꦁꦱꦢꦱꦫꦸꦥꦶꦪꦃ꧈ꦥꦸꦤꦥꦢꦼꦤꦼꦧꦧ꧀ꦏꦭꦁꦏꦸꦁꦔꦤ꧀ꦤꦶꦁꦥꦩ꧀ꦧꦪꦂꦫꦤ꧀꧉
꧋ꦤꦸꦱꦸꦭ꧀ꦭꦶꦏꦠꦿꦁꦔꦤ꧀ꦲꦶꦁꦧꦧ꧀ꦲꦂꦠꦥꦭ꧀ꦱꦸꦲꦶꦁꦏꦁꦥꦶꦤꦁꦒꦶꦃꦮꦺꦴꦤ꧀ꦠꦼꦤ꧀ꦲꦶꦁꦕꦶꦦꦫꦲꦆ꧈ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦮꦿꦠ꧀ꦲꦶꦁꦏꦗꦮꦺꦤ꧀꧉ꦠꦶꦪꦁꦔꦶꦥꦸꦤ꧀ꦲꦶꦁꦏꦁꦲꦩ꧀ꦧꦭꦶꦧꦸꦏ꧀ꦏꦏꦼꦤ꧀ꦲꦂꦠꦮꦲꦸꦤꦩꦏꦂꦮꦶꦡ꧈ꦱꦂꦠꦤꦭꦶꦏꦏꦒ꧀ꦭꦼꦝꦃꦮꦺꦴꦤ꧀ꦠꦼꦤ꧀ꦲꦶꦁꦏꦕꦩꦠ꧀ꦠꦤ꧀꧈ꦥꦶꦤꦁꦒꦶꦃꦲꦂꦠꦫꦶꦁꦒꦶꦠ꧀ꦲꦸꦠꦮꦶꦫꦸꦥꦶꦪꦃꦥꦭ꧀ꦱꦸ꧈ꦥꦸꦤꦥꦢꦼꦤꦼꦥꦶꦫꦤ꧀ꦠꦺꦴꦱ꧀ꦱꦶꦁꦲꦢꦩꦼꦭ꧀ꦲꦂꦠ꧉ꦩꦏꦠꦼꦤ꧀ꦲꦸꦒꦶꦔꦏꦼꦤ꧀꧈ꦧꦶꦭꦶꦃꦲꦁꦒꦺꦤ꧀ꦤꦶꦥꦸꦤ꧀ꦢꦩꦼꦭ꧀ꦲꦂꦠꦮꦲꦸꦮꦺꦴꦤ꧀ꦠꦼꦤ꧀ꦲꦶꦁꦕꦶꦏꦩ꧀ꦥꦺꦏ꧀꧈ꦱꦩ꧀ꦥꦸꦤ꧀ꦱꦢꦱꦮꦸꦭꦤ꧀꧈ꦥꦩ꧀ꦧꦸꦕꦭ꧀ꦭꦶꦥꦸꦤ꧀ꦲꦂꦠꦮꦲꦸꦝꦠꦼꦁꦏꦧꦸꦢꦶꦢꦪꦤ꧀ꦲꦶꦁꦱꦠꦤꦃꦦꦿꦶꦪꦁꦔꦤ꧀꧈ꦱꦫꦤꦏꦭꦶꦤ꧀ꦠꦺꦴꦏ꧀ꦲꦏꦼꦤ꧀꧉
