ꦕꦸ꧈ꦮꦶꦱ꧀ꦠꦏ꧀ꦠꦼꦫꦸꦱ꧀ꦤꦺꦲꦁꦒꦺꦴꦤ꧀ꦏꦸꦩꦕ꧈ꦫꦸꦔꦺꦴꦏ꧀ꦤ꧇ꦥꦶꦫꦧꦫꦢꦶꦥꦸꦤ꧀ꦮꦼꦮꦃꦲꦶꦥꦼꦥꦱꦿꦺꦤ꧀ꦏꦢꦺꦴꦱ꧀ꦧꦸꦏꦸ De gelaarsde Kat (ꦏꦸꦕꦶꦁꦱꦼꦠꦶꦮꦼꦭ꧀ꦭꦤ꧀)ꦩꦭꦃꦧꦺꦴꦠꦼꦤ꧀꧈ꦩꦭꦃꦢꦶꦥꦸꦤ꧀ꦧꦿꦶꦤ꧀ꦝꦶꦭ꧀ꦭꦶ꧈ꦢꦶꦥꦸꦤ꧀ꦥꦸꦫꦶꦃꦩꦸꦔꦼꦭ꧀ꦱꦲꦢꦠ꧀ꦭꦠꦶꦤ꧀꧈ꦏꦶꦫꦁꦮꦱ꧀ꦥꦢꦤꦸꦤ꧀꧉
꧋ꦦꦺꦠꦿꦸꦏ꧀꧇ꦲꦼꦩ꧀꧈ꦉꦩ꧀ꦧꦸꦒ꧀ꦒꦺꦏꦺꦴꦏ꧀ꦱꦗꦏ꧀ꦲꦺꦴꦫꦏꦼꦤꦢꦶꦥꦛꦺꦴꦏ꧀ꦏꦶꦔꦺꦴꦤꦺꦴ꧉ꦥꦝꦤꦺꦱꦮꦶꦗꦶꦤꦶꦁꦒꦸꦫꦸꦩꦸꦭꦁꦩꦸꦫꦶꦢ꧀ꦩꦸꦫꦶꦢ꧀ꦢꦺꦩꦁꦏꦺꦤꦺ꧇ꦲꦺ꧈ꦧꦺꦴꦕꦃꦧꦺꦴꦕꦃ꧈ꦠꦏ꧀ꦏꦤ꧀ꦝꦤ꧀ꦤꦶꦪ꧈ꦥꦺꦴꦩꦲꦸꦫꦶꦥ꧀ꦩꦸꦲꦠꦶꦲꦠꦶꦤꦼꦤ꧀꧈ꦲꦗꦱꦺꦴꦏ꧀ꦝꦼꦩꦼꦤ꧀ꦗꦗꦤ꧀꧈ꦲꦗꦱꦺꦴꦏ꧀ꦝꦼꦩꦼꦤ꧀ꦤꦺꦴꦤ꧀ꦠꦺꦴꦤ꧀꧈ꦲꦗꦱꦺꦴꦏ꧀ꦝꦼꦩꦼꦤ꧀ꦔꦧꦺꦴꦠꦺꦴꦃꦲꦤ꧀꧈ꦲꦗꦫꦺꦴꦪꦭ꧀ꦭꦤ꧀ꦱꦥꦶꦠꦸꦫꦸꦠ꧀ꦠꦺ꧈ꦲꦩꦂꦒꦏꦗꦧꦔꦿꦸꦱꦏ꧀ꦧꦢꦤ꧀ꦩꦸꦝꦺꦮꦺ꧈ꦢꦶꦤꦼꦊꦁꦩꦸꦭꦤꦶꦱ꧀ꦛꦧꦔꦼꦠ꧀꧉ꦒꦸꦫꦸꦱꦶꦁꦩꦸꦭꦁꦩꦁꦏꦺꦴꦤꦺꦴꦏꦸꦮꦶꦥꦤ꧀ꦠꦼꦱ꧀ꦱꦺꦲꦶꦪꦥꦼꦁꦥꦼꦁꦔꦤ꧀ꦭꦤ꧀ꦲꦭꦶꦩ꧀ꦠꦼꦩꦼꦤ꧀ꦤꦤ꧀꧈ꦌ꧈ꦗꦼꦧꦸꦊꦧꦸꦭ꧀ꦱꦧꦼꦤ꧀ꦢꦶꦤꦔꦶꦫꦱ꧀ꦧꦏ꧀ꦩꦶꦤꦁꦥꦼꦕꦶꦤꦤ꧀꧈ꦪꦺꦤ꧀ꦲꦤꦥꦱꦂꦩꦊꦩ꧀꧈ꦲꦺꦴꦫꦠꦲꦸꦤꦁꦔꦺꦴꦩꦃ꧈ꦝꦼꦩꦼꦤ꧀ꦲꦚꦶꦤꦲꦸꦥꦼꦫꦁꦔꦺꦏꦶꦱꦸꦠ꧀ꦭꦤ꧀ꦏꦸꦕꦶꦁ꧈ꦔꦤ꧀ꦠꦶꦲꦸꦠꦁꦔꦺꦫꦶꦤ꧀ꦝꦶꦭ꧀꧈ꦢꦭꦱꦤ꧀ꦱꦼꦭꦶꦂꦫꦺꦧꦲꦺꦥꦠꦶꦁꦠ꧀ꦭꦺꦕꦺꦏ꧀꧉ꦲꦺꦩ꧀ꦧꦸꦃꦪꦺꦤ꧀ꦒꦸꦫꦸꦩꦲꦸꦥꦚ꧀ꦕꦺꦤ꧀ꦢꦶꦮꦗꦶꦧ꧀ꦧꦏꦺꦩꦸꦭꦁꦏꦧꦼꦕꦶꦏ꧀ꦏꦤ꧀ꦩꦫꦁꦩꦸꦫꦶꦢ꧀ꦢꦺ꧈ꦲꦤꦔꦶꦁꦠꦸꦩꦿꦥ꧀ꦲꦮꦏ꧀ꦏꦺꦝꦺꦮꦺꦲꦺꦴꦫꦥꦽꦭꦸꦔ꧀ꦭꦏꦺꦴꦤ꧀ꦤꦶꦏꦧꦼꦕꦶꦏ꧀ꦏꦤ꧀꧉ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦢꦺꦴꦔꦺꦁꦗꦮꦢꦶꦠꦸꦭꦶꦱ꧀ꦭꦠꦶꦤ꧀꧈ꦱꦭꦶꦫꦤꦺꦝꦺꦮꦺꦲꦁꦒꦺꦴꦤ꧀ꦤꦺꦏꦸꦠ꧀ꦧꦃꦔꦁꦒꦺꦴꦲꦏ꧀ꦱꦫꦭꦠꦶꦤ꧀꧉ ꧋ꦓꦫꦺꦁ꧇ꦮꦶꦱ꧀ꦱꦼꦠꦺꦴꦥ꧀꧈ꦏꦺꦴꦏ꧀ꦧꦚ꧀ꦗꦸꦂꦏꦼꦢꦮꦢꦮ꧉ꦠꦏ꧀ꦧꦚ꧀ꦗꦸꦂꦤꦺꦩꦤꦺꦃꦲꦸꦤꦶꦤꦶꦁꦠꦸꦭꦶꦱ꧀ꦱꦤ꧀ꦤꦺ꧇ꦊꦉꦱ꧀ꦏꦛꦃꦲꦶꦁꦏꦁꦩꦸꦫꦶꦁꦩꦸꦫꦶꦁ꧈ꦱꦉꦁꦧꦽꦔꦺꦴꦱ꧀ꦗꦮꦶꦱꦸꦩꦼꦉꦥ꧀ꦱꦼꦫꦠ꧀ꦫꦩꦕꦤ꧀ꦝꦏ꧀ꦏꦺꦧꦚ꧀ꦗꦸꦂꦲꦸꦏꦫꦧꦱꦝꦶꦝꦺꦴꦁꦤꦺꦏ꧀ꦤꦺꦏ꧀ꦏꦺ꧈ꦲꦺꦴꦫꦥꦽꦭꦸꦠꦏ꧀ꦕꦫꦶꦠꦏ꧀ꦲꦏꦺꦤꦁꦏꦺꦤꦺꦩꦏ꧀ꦥ꧀ꦭꦼꦚꦺꦏ꧀ꦢꦶꦥꦸꦤ꧀ꦱꦼꦫꦠ꧀ꦭꦠꦶꦤ꧀꧉ꦏꦼꦢꦼꦉꦁꦔꦺꦴꦪꦏ꧀ꦏꦮꦿꦸꦃ꧈ꦏꦶꦠꦱꦮꦼꦏ꧀ꦤꦼꦤꦼꦔꦼꦤ꧀ꦤꦏꦼꦤ꧀ꦱꦱ꧀ꦠꦿꦭꦠꦶꦤ꧀꧈ꦧꦺꦴꦠꦼꦤ꧀ꦔꦺꦴꦪꦏ꧀ꦏꦮꦶꦲꦸꦠꦮꦶꦠꦼꦩ꧀ꦧꦁ꧈ꦭꦗꦼꦁꦔꦼꦏꦼꦥ꧀ꦱꦱ꧀ꦠꦿꦭꦠꦶꦤ꧀꧉ꦏ꧀ꦭꦺꦤ꧀ꦠꦸꦥꦿꦶꦪꦤ꧀ꦠꦸꦤ꧀꧉
꧋ꦦꦺꦠꦿꦸꦏ꧀꧇ꦮꦝꦸꦃꦱꦫꦶꦭꦲꦺ꧈ꦲꦁꦒꦺꦴꦤ꧀ꦤꦺꦔꦫꦤ꧀ꦤꦶꦏ꧀ꦭꦶꦫꦸꦏꦸꦮꦶꦭꦺꦩꦤ꧀ꦠꦼꦥ꧀꧈ꦧꦺꦴꦏ꧀ꦲꦼꦩ꧀ꦥꦸꦤ꧀ꦔꦺꦴꦠꦼꦤ꧀ꦠꦥꦿꦶꦪꦤ꧀ꦠꦸꦤ꧀꧉ꦫꦏ꧀ꦪꦏꦸꦢꦸꦔꦶꦭꦶꦁꦔꦶ꧈ꦪꦺꦤ꧀ꦥꦤꦼꦩꦸꦤꦺꦱꦶꦗꦶꦱꦶꦗꦶꦤꦶꦁꦮꦺꦴꦁꦏꦸꦮꦶꦧꦺꦢꦧꦺꦢ꧈ꦏꦪꦠ꧇ꦤꦺꦏ꧀ꦥꦤꦼꦩꦸꦏꦸꦱꦫꦥ꧀ꦥꦤ꧀ꦱꦼꦒꦮꦝꦁꦏꦫꦺꦴꦒꦺꦴꦫꦺꦁꦔꦤ꧀꧈ꦧ꧀ꦭꦼꦚꦶꦏ꧀꧈ꦲꦥꦩꦤꦺꦃꦱꦩ꧀ꦧꦼꦭ꧀ꦭꦺꦧꦮꦁ꧈ꦏꦸꦮꦶꦫꦱꦤꦺꦚꦩ꧀ꦭꦼꦁꦧꦔꦼꦠ꧀꧈ꦭꦤꦺꦏ꧀ꦫꦩꦲꦺꦴꦫ꧈ꦏꦉꦩ꧀ꦩꦤ꧀ꦤꦺꦱꦫꦥ꧀ꦥꦤ꧀ꦱꦼꦒꦮꦝꦁ꧈ꦭꦮꦸꦃꦲꦺꦝꦺꦤ꧀ꦝꦺꦁꦫꦒꦶ꧈ꦱꦩ꧀ꦧꦼꦭ꧀ꦭꦺꦠꦺꦩ꧀ꦥꦺꦧꦺꦴꦱꦺꦴꦏ꧀꧉ꦲꦫ꧈ꦧꦥꦏꦫꦺꦴꦲꦤꦏ꧀ꦧꦲꦺꦥꦤꦼꦩꦸꦤꦺꦮꦶꦱ꧀ꦧꦺꦢꦧꦺꦢ꧈ꦲꦥꦩꦤꦺꦃꦮꦺꦴꦁꦭꦶꦪ꧉
꧋ꦓꦫꦺꦁ꧇ꦪꦺꦤ꧀ꦲꦺꦴꦩꦺꦴꦁꦥꦸꦁꦏꦱ꧀ꦱꦤ꧀ꦤꦺꦏꦺꦴꦏ꧀ꦩꦸꦁꦧꦝꦺꦴꦒ꧀ꦒꦤ꧀ꦧꦲꦺ꧉ꦫꦸꦔꦺꦴꦏ꧀ꦤꦩꦤꦺꦃ꧇ꦩꦂꦒꦶꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦔꦺꦮꦃꦲꦶꦲꦢꦠ꧀꧈ꦧꦚ꧀ꦗꦸꦂꦔꦁꦒꦺꦴꦲꦸꦏꦫꦝꦶꦝꦺꦴꦁꦩꦤꦺꦃ꧈ꦪꦏꦸꦮꦶ꧇ Adatrech is en blijft recht ꦩꦸꦁꦒꦸꦃꦠꦼꦒꦼꦱ꧀ꦱꦺꦏꦶꦫꦏꦶꦫꦩꦁꦏꦺꦤꦺ꧇ꦲꦢꦠ꧀ꦱꦶꦁꦮꦶꦱ꧀ꦢꦶꦮꦼꦤꦁꦔꦏꦺꦏꦸꦮꦶꦊꦱ꧀ꦠꦫꦶꦢꦢꦶꦮꦮꦼꦤꦁ꧉
꧋ꦦꦺꦠꦿꦸꦏ꧀꧇ꦲꦢꦠꦺꦮꦺꦴꦁꦗꦮꦏꦸꦮꦶꦝꦺꦏ꧀ꦧꦶꦪꦺꦤ꧀ꦔꦶꦔꦸꦫꦩ꧀ꦧꦸꦠ꧀ꦭꦤ꧀ꦏꦝꦭ꧀ꦩꦺꦤꦺꦏ꧀꧈ꦲꦤꦔꦶꦁꦱꦲꦶꦏꦶꦤꦺꦏꦺꦴꦏ꧀ꦧꦚ꧀ꦗꦸꦂꦧꦸꦏꦏ꧀ꦠꦲꦺꦴꦕꦁꦏꦛꦶꦏ꧀ꦧꦚ꧀ꦗꦸꦂꦥꦺꦴꦠꦁꦥꦸꦭ꧀ꦏꦃ꧉
꧋ꦓꦫꦺꦁ꧇ꦮꦶꦱ꧀꧈ꦮꦶꦱ꧀꧈ꦏꦺꦴꦏ꧀ꦧꦚ꧀ꦗꦸꦂꦫꦸꦥꦫꦸꦥꦱꦶꦁꦢꦶꦉꦩ꧀ꦧꦸꦒ꧀꧈ꦧꦺꦱꦸꦏ꧀ꦧꦲꦺꦩꦤꦺꦃꦥꦝꦢꦶꦧꦚ꧀ꦗꦸꦂꦫꦏꦺ꧉
