Pestiné mangké kawula iki, nora nembah ija ing Pangéran, jèn tan sinembaha mangké, lamun kawula iku, pan angaku nembah mring Widdhi, pesti kupur punika, jèn tan nembah tuhu, pestiné kapir wong ika, dèn prajitna anembah munapèk singgih, pasèk lamun nembaha.
Lamun wonten kawula sajekti, ngaku nembah ing Allah ta'ala, pesti nemu bilahiné, iku tékad wong bingung, sumantana djenenging abdi, matija durung selam, ing mangké wong iku, panembahé sija-sija, durung weruh kang aran panembah singgih, angèl wong bisa nembah.
Kawarnaa nenggih kang ginupit, Suluk Baka mangké kang rinéka, akatah ika gantjaré, sakèhé ingkang 'ilmu, apan ija apada rungsit, sami ruwet sadaja, tan angrasèng kalbu, rèh durung dèn gurokena, milanipun pinikir rahina wengi, nanging dèrèng kepanggja.
Wonten Baka mangké kang linuwih, lir awajang angundang ing dalang, miwah saparipolahé, polahé dalang iku, saking wajang polahirèki, pan pangutjapé dalang, saking ringgitipun, ing tindak- tanduking dalang, saking wajang mapan ta anané ringgit, margané saking Baka.
Wonten Baka kang linuwih malih, lir sri dalang aningali wajang, miwah saparipolahé, polahé wajang iku, saking dalang polahé jekti, pan pangutjaping wajang, saking dalangipun, miwah satanduk- tindaknja, Ki Djanaka saking Ki Pangseng kang jekti, Ki Pangseng wudjud Esa.
Upamané Ki Sujudana Sri, mangké lawan Ki Widdhi punika, jèn nilih sinilih mangké, tan njata kalihipun, lamun nora silih sinilih, Ardigala lan Bima, tuwiné puniku, mangkana gusti kawula, nora njata jèn nora silih sinilih, Wisnu lawan Ki Kresna.
Pan mangkana ki dalang lan ringgit, nilih mangké sinilih pan njata, Ki Pangseng lan Djanakané, njatané kalihipun, lamun nora silih sinilih, Widdhi lan Sujudana, poma ajwa klèru, dalang dalang wajang wajang, gusti gusti kawula kawula iki, poma lah panggihena.
Kawruhana malih iku singgih, ing pestinė gusti lan kawula, jèn padon tanpa siringé, apan ing padonipun, nora kena maoni malih, ja gusti ja kawula, ja dasih ja ulun, ing pestiné nora kena, ing kalihé tan kena pinilih kasih, tan kena pisah-pisah.
Kadi angangsu api nèng warih, lambang ngambil geni dedamaran, ing kéri lawan kanané, warangka mandjing duwung, mjang parau amot djaladri, kuda ngerap pandengan, lan gigiring punglu, tapaké kuntul anglajang, lan pambarep adiné wuragil kaki, lawan
tambining putjang.
13
