Kaca:Surinaams-javaans-nt.djvu/5

Kaca iki wis dikorèksi

Kabar kabungahan sangka
Gusti Allah miturut Matéus

Layang turunan

1 ¹ Iki layang turunané mbah-mbahané Gusti Yésus Kristus. Gusti Yésus Kristus kuwi turunané ratu Daved lan ratu Daved turunané Bapa Abraham.

² Bapa Abraham kuwi bapaké Isak, Isak bapaké Yakub, Yakub bapaké Yudah sak seduluré. ³ Yudah bapaké Pèrès lan Sérak, Tamar ibuné. Pèrès bapaké Kèsrom lan Kèsrom bapaké Aram. ⁴ Aram bapaké Aminadab, Aminadab bapaké Nakson lan Nakson bapaké Salmon. ^5-6 Salmon bapaké Boas, Rahab ibuné. Boas bapaké Obèd, Rut ibuné. Obèd bapaké Isai lan Isai bapaké ratu Daved. Daved bapaké Soléman, ibuné tilasané Uriah. ⁷ Soléman bapaké Rekobéam, Rekobéam bapaké Abia, Abia bapaké Asa. ⁸ Asa bapaké Yosafat, Yosafat bapaké Yoram, Yoram bapaké Usia. ⁹ Usia bapaké Yotam, Yotam bapaké Akas lan Akas bapaké Hiskia. ¹⁰ Hiskia bapaké Manasé, Manasé bapaké Amon, Amon bapaké Yosia. ¹¹ Yosia bapaké Yekonya sak seduluré. Ing waktu kuwi bangsa Israèl diboyong nang tanah Babilon.

¹² Nang tanah Babilon kono layang turunan kuwi terusané ngéné: Yekonya bapaké Séaltièl, Séaltièl bapaké Sérubabil. ¹³ Sérubabil bapaké Abihud lan Abihud bapaké Eliakim. Eliakim bapaké Asur. ¹⁴ Asur bapaké Sadok, Sadok bapaké Akim lan Akim bapaké Eliud. ¹⁵ Eliud bapaké Eliasar, Eliasar bapaké Matan, Matan bapaké Yakub. ¹⁶ Yakub bapaké Yosèf lan Yosèf kuwi bojoné Maria. Maria kuwi sing nglairké Gusti Yésus, sing diarani Kristus.

¹⁷ Dadi ènèng turunan patbelas ping telu, yakuwi: Patbelas wiwit Abraham tekané Daved, patbelas wiwit Daved tekané beboyongan nang tanah Babilon lan patbelas wiwit beboyongan nang tanah Babilon tekané Kristus.

Lairé Gusti Yésus

¹⁸ Lairé Gusti Yésus Kristus kuwi lakuné ngéné: Maria, ibuné, wis patyangan karo Yosèf. Nanging sakdurungé kawin Maria wis meteng sangka Roh Sutyi. ¹⁹ Lah jalaran Yosèf kuwi sakwijiné wong sing nglakoni kekarepané Gusti Allah, mulané dèkné ya ora gelem nggawé wirangé Maria nang tengahé wong okèh. Yosèf jawané arep meneng-menengan waé medot pepatyangané karo Maria. ²⁰ Nanging sak barengé nggagas-nggagas bab kuwi, dèkné éntuk impèn. Ing sakjeroné impèn kuwi mulékaté Gusti ngétok marang dèkné ngomong ngéné: “Yosèf, turunané ratu Daved, kowé aja wedi ngepèk Maria dadi bojomu, awit bayi sing digémbol kuwi tekané sangka Roh Sutyi. ²¹ Maria bakal nglairké anak lanang sing kudu mbok jenengké Yésus, awit Dèkné bakal nylametké bangsané sangka dosané.”

^22-23 Kuwi mau kabèh marakké klakon sing wis diomong karo Gusti dèk mbiyèn liwat nabi Yésaya, sing uniné ngéné: “Enèng prawan bakal meteng lan nglairké anak lanang, sing bakal dijenengké Imanuèl, tegesé: Gusti Allah karo awaké déwé.”