Kakawin Arjunawiwāha/Pupuh 1
Oṃ awighnamastu
Pupuh 1 – Śardūlawikrīdhita 
|
(ꦰꦂꦢꦹꦭꦮꦶꦏꦿꦲꦷꦝꦶꦠ) |
|---|---|
| 1. | |
| a. ambĕk sang paramārthapaṇḍita huwus limpad sakêng śūnyatā | ꦲꦩ꧀ꦧꦼꦏ꧀ꦱꦁꦥꦫꦩꦴꦂꦛꦥꦟ꧀ꦝꦶꦠ꧀ꦲꦸꦮꦸꦱ꧀ꦭꦶꦩ꧀ꦥꦢ꧀ꦱꦏꦼꦁꦯꦹꦚꦠꦴ |
| b. tan sangkêng wiṣaya parayojñananira lwir sanggrahêng lokika | ꦠꦤ꧀ꦱꦁꦏꦼꦁꦮꦶꦰꦪꦥꦫꦪꦺꦴꦘꦤꦤꦶꦫꦭ꧀ꦮꦶꦂꦱꦁꦒꦿꦲꦼꦁꦭꦺꦴꦏꦶꦏ |
| c. siddhāning yaśawīrya donira sukhāning rāt kininkinira | ꦱꦶꦢ꧀ꦝꦴꦤꦶꦁꦪꦯꦮꦷꦂꦪꦢꦺꦴꦤꦶꦫꦱꦸꦑꦴꦤꦶꦁꦫꦴꦠ꧀ꦏꦶꦤꦶꦤ꧀ꦏꦶꦤꦶꦫ |
| d. santoṣâhĕlĕtan kĕlir sira sakêng sang hyang Jagatkāraṇa | ꦱꦤ꧀ꦠꦺꦴꦰꦴꦲꦼꦊꦠꦤ꧀ꦏꦼꦭꦶꦂꦱꦶꦫꦱꦏꦼꦁꦱꦁꦲꦾꦁꦗꦒꦠ꧀ꦏꦴꦫꦟ |
| 2. | |
| a. uṣṇiṣaningkw i lĕbūni pādukanira sang mangkana lwirnira | ꦲꦸꦰꦟꦶꦰꦤꦶꦁꦏ꧀ꦮꦶꦊꦧꦹꦤꦶꦥꦴꦢꦸꦏꦤꦶꦫꦱꦁꦩꦁꦏꦤꦭ꧀ꦮꦶꦂꦤꦶꦫ |
| b. manggĕh manggalaning mikĕt kawijayan sang Pārtha ring kahyangan | ꦩꦁꦒꦼꦃꦩꦁꦒꦭꦤꦶꦁꦩꦶꦏꦼꦠ꧀ꦏꦮꦶꦗꦪꦤ꧀ꦱꦁꦥꦴꦂꦛꦫꦶꦁꦏꦲꦾꦔꦤ꧀ |
| c. sambaddha pwa bhaṭāra śakra katĕkan durnīti lāwan bhaya | ꦱꦩ꧀ꦧꦢ꧀ꦝꦥ꧀ꦮꦨꦛꦴꦫꦯꦏꦿꦏꦠꦼꦏꦤ꧀ꦢꦸꦂꦤꦷꦠꦶꦭꦴꦮꦤ꧀ꦨꦪ |
| d. wwantĕn detya madĕg Niwātakawacâkhyatîng jagat digjaya | ꦮꦤ꧀ꦠꦼꦤ꧀ꦢꦼꦠꦾꦩꦢꦺꦒ꧀ꦤꦶꦮꦴꦠꦏꦮꦕꦑꦠꦷꦁꦗꦒꦠ꧀ꦢꦶꦒ꧀ꦗꦪ |
| 3. | |
| a. jĕngning Meru kidul kuṭanya maharĕp sumyuha ng Indrâlaya | ꦗꦼꦁꦤꦶꦁꦩꦺꦫꦸꦏꦶꦢꦸꦭ꧀ꦏꦸꦛꦚꦩꦲꦉꦥ꧀ꦱꦸꦩꦾꦸꦲꦁꦆꦤ꧀ꦢꦿꦭꦪ |
| b. mwang polih warawīrya tan pĕjaha dening dewa yakṣâsura | ꦩ꧀ꦮꦁꦥꦺꦴꦭꦶꦃꦮꦫꦮꦷꦂꦪꦠꦤ꧀ꦥꦼꦗꦲꦢꦺꦤꦶꦁꦢꦺꦮꦪꦏ꧀ꦰꦱꦸꦫ |
| c. nghing yan mānuṣa śakti yatna juga ko n āngling bhaṭārêriya | ꦔ꧀ꦲꦶꦁꦪꦤ꧀ꦩꦴꦤꦸꦰꦯꦏ꧀ꦠꦶꦪꦠ꧀ꦤꦗꦸꦒꦏꦺꦴꦤꦴꦔ꧀ꦭꦶꦁꦨꦛꦴꦉꦫꦶꦪ |
| d. yêkā nitya hinĕm watĕk ṛṣi kabeh ring swarga hārohara | ꦪꦼꦏꦴꦤꦶꦠꦾꦲꦶꦤꦼꦩ꧀ꦮꦠꦼꦏ꧀ꦉꦰꦶꦏꦧꦺꦃꦫꦶꦁꦱ꧀ꦮꦂꦒꦲꦴꦫꦺꦴꦲꦫ |
| 4. | |
| a. sang hyang śakra sumimpĕni ing naya kumon pehning rasâlapkĕna | ꦱꦁꦲꦾꦁꦯꦏꦿꦱꦸꦩꦶꦩ꧀ꦥꦼꦤꦶꦲꦶꦁꦤꦪꦏꦸꦩꦺꦴꦤ꧀ꦥꦺꦃꦤꦶꦁꦫꦱꦭꦥ꧀ꦏꦼꦤ |
| b. an wwang śakti sahāyaning mĕjahanêkang śatru petĕn tĕka | ꦲꦤ꧀ꦮꦁꦯꦏ꧀ꦠꦶꦱꦲꦴꦪꦤꦶꦁꦩꦼꦗꦲꦥꦺꦏꦁꦯꦠꦿꦸꦥꦼꦠꦼꦤ꧀ꦠꦼꦏ |
| c. sang Pārtha pwa hañar karĕngwan atapâsādhyâjayā ring raņa | ꦱꦁꦥꦴꦂꦛꦥ꧀ꦮꦲꦚꦂꦏꦉꦔ꧀ꦮꦤ꧀ꦲꦠꦥꦱꦴꦝꦗꦪꦴꦫꦶꦁꦫꦟ |
| d. yan polih wara hundangĕn lĕwu matêwĕhning kŗtānugraha | ꦪꦤ꧀ꦥꦺꦴꦭꦶꦃꦮꦫꦲꦸꦤ꧀ꦢꦔꦼꦤ꧀ꦊꦮꦸꦩꦠꦼꦮꦼꦃꦤꦶꦁꦏꦽꦠꦴꦤꦸꦒꦿꦲ |
| 5. | |
| a. wyarthêkang japa mantra yan kasalimur dening rajah mwang tamah | ꦮꦾꦂꦛꦼꦏꦁꦗꦥꦩꦤ꧀ꦠꦿꦪꦤ꧀ꦏꦱꦭꦶꦩꦸꦂꦢꦺꦤꦶꦁꦫꦗꦃꦩ꧀ꦮꦁꦠꦩꦃ |
| b. nghing yan langgĕng ikang śiwasmṛti dhatang śraddha bhaṭārêswara | ꦔ꧀ꦲꦶꦁꦪꦤ꧀ꦭꦁꦒꦼꦁꦲꦶꦏꦁꦯꦶꦮꦱ꧀ꦩꦼꦂꦠꦶꦝꦠꦁꦯꦿꦢ꧀ꦝꦨꦛꦴꦉꦱ꧀ꦮꦫ |
| c. ambĕk nirwisayâlilang huwa huwā lwirnya n sukhâdhyātmikā | ꦲꦩ꧀ꦧꦼꦏ꧀ꦤꦶꦂꦮꦶꦱꦪꦭꦶꦭꦁꦲꦸꦮꦲꦸꦮꦴꦭ꧀ꦮꦶꦂꦚꦤ꧀ꦱꦸꦑꦝꦠ꧀ꦩꦶꦏꦴ |
| d. singhit mātra juga prabhedanika lāwan prih kayogīśwaran | ꦱꦶꦔ꧀ꦲꦶꦠ꧀ꦩꦴꦠꦿꦗꦸꦒꦥꦿꦨꦺꦢꦤꦶꦏꦭꦴꦮꦤ꧀ꦥꦿꦶꦃꦏꦪꦺꦴꦒꦷꦯ꧀ꦮꦫꦤ꧀ |
| 6. | |
| a. yângde sangśayani hyang indra tumahā sang pārtha tan dhārakā | ꦪꦁꦢꦺꦱꦁꦯꦪꦤꦶꦲꦾꦁꦲꦶꦤ꧀ꦢꦿꦠꦸꦩꦲꦴꦱꦁꦥꦴꦂꦛꦠꦤ꧀ꦝꦴꦫꦏꦴ |
| b. hetunyan magawe ta bañcana panonê cipta sang Phalguna | ꦲꦺꦠꦸꦚꦤ꧀ꦩꦒꦮꦼꦠꦧꦚ꧀ꦕꦤꦥꦤꦺꦴꦤꦼꦕꦶꦥ꧀ꦠꦱꦁꦦꦭ꧀ꦒꦸꦤ |
| c. yan hīnā mara tan harĕp-harĕp amet metâśraya len sira | ꦪꦤ꧀ꦲꦷꦤꦴꦩꦫꦠꦤ꧀ꦲꦉꦥ꧀ꦲꦉꦥ꧀ꦲꦩꦺꦠ꧀ꦩꦼꦠꦯꦿꦪꦊꦤ꧀ꦱꦶꦫ |
| d. yapwan tan kawĕnang binañcana mara n manggĕh palinggihnira | ꦪꦥ꧀ꦮꦤ꧀ꦠꦤ꧀ꦏꦮꦼꦤꦁꦧꦶꦤꦚ꧀ꦕꦤꦩꦫꦤ꧀ꦩꦁꦒꦼꦃꦥꦭꦶꦁꦒꦶꦃꦤꦶꦫ |
| 7. | |
| a. lakşmining suraloka sampun ayaśā ngṛñcĕm tapa mwang brata | ꦭꦏ꧀ꦰꦩꦶꦤꦶꦁꦱꦸꦫꦭꦺꦴꦏꦱꦩ꧀ꦥꦸꦤ꧀ꦲꦪꦯꦴꦔꦼꦂꦚ꧀ꦕꦼꦩ꧀ꦠꦥꦩ꧀ꦮꦁꦧꦿꦠ |
| b. akweh sang pinilih pitung siki tikang hantukning okir mulat | ꦲꦏ꧀ꦮꦺꦃꦱꦁꦥꦶꦤꦶꦭꦶꦃꦥꦶꦠꦸꦁꦱꦶꦏꦶꦠꦶꦏꦁꦲꦤ꧀ꦠꦸꦏ꧀ꦤꦶꦁꦲꦺꦴꦏꦶꦂꦩꦸꦭꦠ꧀ |
| c. rwêkang ādi Tilottamā pamĕkas ing kôcap lawan Suprabhā | ꦫ꧀ꦮꦼꦏꦁāꦢꦶꦠꦶꦭꦺꦴꦠ꧀ꦠꦩꦴꦥꦩꦼꦏꦱ꧀ꦲꦶꦁꦏꦕꦥ꧀ꦭꦮꦤ꧀ꦱꦸꦥꦿꦨꦴ |
| d. yêka marma tuhun lĕhĕng-lĕhĕnga sangkêng rūpa sang hyang Ratih | ꦪꦼꦏꦩꦂꦩꦠꦸꦲꦸꦤ꧀ꦊꦲꦼꦁꦊꦲꦼꦔꦱꦁꦏꦼꦁꦫꦹꦥꦱꦁꦲꦾꦁꦫꦠꦶꦃ |
| 8. | |
| a. tambenya liningir tĕkêngkin inamĕr dening watĕk dewata | ꦠꦩ꧀ꦧꦺꦚꦭꦶꦤꦶꦔꦶꦂꦠꦼꦏꦼꦁꦏꦶꦤ꧀ꦲꦶꦤꦩꦼꦂꦢꦼꦤꦶꦁꦮꦠꦼꦏ꧀ꦢꦼꦮꦠ |
| b. sampūrņa pwa ya mapradakṣiṇa ta yâmujâmidĕr ping tiga | ꦱꦩ꧀ꦥꦹꦂꦟꦥ꧀ꦮꦪꦩꦥꦿꦢꦏ꧀ꦰꦶꦟꦠꦪꦩꦸꦗꦩꦶꦢꦼꦂꦥꦶꦁꦠꦶꦒ |
| c. hyang Brāhmā dumadak caturmukha bhāṭārêndrâmahâkweh mata | ꦲꦾꦁꦧꦿꦴꦃꦩꦴꦢꦸꦩꦢꦏ꧀ꦕꦠꦸꦂꦩꦸꦑꦨꦴꦛꦴꦉꦤ꧀ꦢꦿꦩꦲꦏ꧀ꦮꦺꦃꦩꦠ |
| d. erang minggĕka kociwâmbĕkira yan kālanya n unggwing wukir | ꦲꦺꦫꦁꦩꦶꦁꦒꦼꦏꦏꦺꦴꦕꦶꦮꦮꦩ꧀ꦧꦼꦏꦶꦫꦪꦤ꧀ꦏꦴꦭꦚꦤꦸꦁꦒ꧀ꦮꦶꦁꦮꦸꦏꦶꦂ |
| 9. | |
| a. yêkā rakwa kinon hyang indra sĕdhĕng amwit kapwa yâmurṣita | ꦪꦼꦏꦴꦫꦏ꧀ꦮꦏꦶꦤꦺꦴꦤ꧀ꦲꦾꦁꦲꦶꦤ꧀ꦢꦿꦱꦼꦝꦼꦁꦲꦩ꧀ꦮꦶꦠ꧀ꦏꦥ꧀ꦮꦪꦩꦸꦂꦰꦶꦠ |
| b. oṃ putrī silihĕnkwa rūmta sakarĕng waswās manahny arjuna | ꦲꦺꦴꦩ꧀ꦥꦸꦠꦿꦷꦱꦶꦭꦶꦲꦼꦤ꧀ꦏ꧀ꦮꦫꦹꦩ꧀ꦠꦱꦏꦉꦁꦮꦱ꧀ꦮꦴꦱ꧀ꦩꦤꦃꦚ꧀ꦲꦂꦗꦸꦤ |
| c. strīnyêkang inucap manohara subhadrā mwang si ratnôlupuy | ꦱ꧀ꦠꦿꦷꦚꦼꦏꦁꦲꦶꦤꦸꦕꦥ꧀ꦩꦤꦺꦴꦲꦫꦱꦸꦨꦢꦿꦴꦩ꧀ꦮꦁꦱꦶꦫꦠ꧀ꦤꦭꦸꦥꦸꦪ꧀ |
| d. tan sora pwa tĕkapnikā daśaguṇan rūpanya dentânaku | ꦠꦤ꧀ꦱꦺꦴꦫꦥ꧀ꦮꦠꦼꦏꦥ꧀ꦤꦶꦏꦴꦢꦯꦒꦸꦟꦤ꧀ꦫꦹꦥꦚꦢꦺꦤ꧀ꦠꦤꦏꦸ |
| 10. | |
| a. yan tan poliha rūm sĕkarning asanânungsung rarabning rĕrĕb | ꦪꦤ꧀ꦠꦤ꧀ꦥꦺꦴꦭꦶꦲꦫꦹꦩ꧀ꦱꦼꦏꦂꦤꦶꦁꦲꦱꦤꦤꦸꦁꦱꦸꦁꦫꦫꦧ꧀ꦤꦶꦁꦉꦉꦧ꧀ |
| b. tan pandeya raras liring ni luruning lek lwir wulatning langit | ꦠꦤ꧀ꦥꦤ꧀ꦢꦺꦪꦫꦫꦱ꧀ꦭꦶꦫꦶꦁꦤꦶꦭꦸꦫꦸꦤꦶꦁꦊꦏ꧀ꦭ꧀ꦮꦶꦂꦮꦸꦭꦠ꧀ꦤꦶꦁꦭꦔꦶꦠ꧀ |
| c. mwang yan kelikana ng gaḍung wahu mure mambĕt gĕlung kesisan | ꦩ꧀ꦮꦁꦪꦤ꧀ꦏꦺꦭꦶꦏꦤꦁꦒꦝꦸꦁꦮꦲꦸꦩꦸꦉꦩꦩ꧀ꦧꦼꦠ꧀ꦒꦼꦭꦸꦁꦏꦼꦱꦶꦱꦤ꧀ |
| d. t-antuk têbu huwus hayunta kabalik hyang Kāma yan mangkana | ꦠ꧀ꦲꦤ꧀ꦠꦸꦏ꧀ꦠꦼꦧꦸꦲꦸꦮꦸꦱ꧀ꦲꦪꦸꦤ꧀ꦠꦏꦧꦭꦶꦏ꧀ꦲꦾꦁꦏꦴꦩꦪꦤ꧀ꦩꦁꦏꦤ |
| 11. | |
| a. ling hyang śakra nahan sinambahakĕn ing widyādhārī mūr tĕhĕr | ꦭꦶꦁꦲꦾꦁꦯꦏꦿꦤꦲꦤ꧀ꦱꦶꦤꦩ꧀ꦧꦲꦏꦼꦤ꧀ꦲꦶꦁꦮꦶꦢꦾꦴꦝꦴꦫꦷꦩꦹꦂꦠꦼꦲꦼꦂ |
| b. wĕrnyâlon kadi mandamāruta yayan menggal ḍatang ring paran | ꦮꦼꦂꦚꦭꦺꦴꦤ꧀ꦏꦢꦶꦩꦤ꧀ꦢꦩꦴꦫꦸꦠꦪꦪꦤ꧀ꦩꦺꦁꦒꦭ꧀ꦝꦠꦁꦫꦶꦁꦥꦫꦤ꧀ |
| c. akweh tâpsari ceṭika milu tuhun kapwângiring doh kabeh | ꦲꦏ꧀ꦮꦺꦃꦠꦥ꧀ꦱꦫꦶꦕꦼꦛꦶꦏꦩꦶꦭꦸꦠꦸꦲꦸꦤ꧀ꦏꦥ꧀ꦮꦔꦶꦫꦶꦁꦢꦺꦴꦃꦏꦧꦼꦃ |
| d. ton têkang wukir Indrakīla maparĕk mangkin tumampak ta ya | ꦠꦺꦴꦤ꧀ꦠꦼꦏꦁꦮꦸꦏꦶꦂꦆꦤ꧀ꦢꦿꦏꦷꦭꦩꦥꦉꦏ꧀ꦩꦁꦏꦶꦤ꧀ꦠꦸꦩꦩ꧀ꦥꦏ꧀ꦠꦪ |
| 12. | |
| a. eñjing kāla nika-n ḍatang wijah-wijah wahwâḍarat ring hĕnu | ꦲꦺꦚ꧀ꦗꦶꦁꦏꦴꦭꦤꦶꦏꦤ꧀ꦝꦠꦁꦮꦶꦗꦃꦮꦶꦗꦃꦮꦃꦲ꧀ꦮꦝꦫꦠ꧀ꦫꦶꦁꦲꦼꦤꦸ |
| b. osik camara ring gĕgĕr ḍara-ḍaran lwirnya-n manon apsari | ꦲꦺꦴꦱꦶꦏ꧀ꦕꦩꦫꦫꦶꦁꦒꦼꦒꦼꦂꦝꦫꦝꦫꦤ꧀ꦭ꧀ꦮꦶꦂꦚꦤ꧀ꦩꦤꦺꦴꦤ꧀ꦲꦥ꧀ꦱꦫꦶ |
| c. masyang-syang pakatonan ing kayu manis sinwamnya manggĕh miguh | ꦩꦱꦾꦁꦱꦾꦁꦥꦏꦠꦺꦴꦤꦤ꧀ꦲꦶꦁꦏꦪꦸꦩꦤꦶꦱ꧀ꦱꦶꦤ꧀ꦮꦩ꧀ꦚꦩꦁꦒꦼꦃꦩꦶꦒꦸꦃ |
| d. kadyânangtang ibangnikang susu lawan lambe marūm-rūmana | ꦏꦢꦾꦤꦁꦠꦁꦲꦶꦧꦁꦤꦶꦏꦁꦱꦸꦱꦸꦭꦮꦤ꧀ꦭꦩ꧀ꦧꦺꦩꦫꦹꦩ꧀ꦫꦹꦩꦤ |
| 13. | |
| a. tingkahning wanawṛkṣa mogha tinĕngĕt ramyanya de ning hima | ꦠꦶꦁꦏꦃꦤꦶꦁꦮꦤꦮ꧀ṛꦏ꧀ꦰꦩꦺꦴꦓꦠꦶꦤꦼꦔꦼꦠ꧀ꦫꦩꦾꦚꦢꦺꦤꦶꦁꦲꦶꦩ |
| b. rĕm tan waspada sāparĕk juga katon mūr ng wwang muwah yâhawuk | ꦉꦩ꧀ꦠꦤ꧀ꦮꦱ꧀ꦥꦢꦱꦴꦥꦉꦏ꧀ꦗꦸꦒꦏꦠꦺꦴꦤ꧀ꦩꦹꦂꦔ꧀ꦮ꧀ꦮꦁꦩꦸꦮꦃꦪꦲꦮꦸꦏ꧀ |
| c. sinwam kapwa sĕkar kuningnya dinĕlö kumbang humung tan katon | ꦱꦶꦤ꧀ꦮꦩ꧀ꦏꦥ꧀ꦮꦱꦼꦏꦂꦏꦸꦤꦶꦁꦚꦢꦶꦤꦼꦭꦼꦴꦏꦸꦩ꧀ꦧꦁꦲꦸꦩꦸꦁꦠꦤ꧀ꦏꦠꦺꦴꦤ꧀ |
| d. dwīning mrak rumarab kasampir i ragasning candanâpāyunan | ꦢ꧀ꦮꦷꦤꦶꦁꦩꦿꦏ꧀ꦫꦸꦩꦫꦧ꧀ꦏꦱꦩ꧀ꦥꦶꦂꦲꦶꦫꦒꦱ꧀ꦤꦶꦁꦕꦤ꧀ꦢꦤꦥꦴꦪꦸꦤꦤ꧀ |
| 14. | |
| a. ābhāning patapan gihā watu putih lwirnya-n panungsung guyu | ꦲꦴꦨꦴꦤꦶꦁꦥꦠꦥꦤ꧀ꦒꦶꦲꦴꦮꦠꦸꦥꦸꦠꦶꦃꦭ꧀ꦮꦶꦂꦚꦤ꧀ꦥꦤꦸꦁꦱꦸꦁꦒꦸꦪꦸ |
| b. tut himbang magirang-girang winulatan ramyanya de sang ḍatang | ꦠꦸꦠ꧀ꦲꦶꦩ꧀ꦧꦁꦩꦒꦶꦫꦁꦒꦶꦫꦁꦮꦶꦤꦸꦭꦠꦤ꧀ꦫꦩꦾꦚꦢꦺꦱꦁꦝꦠꦁ |
| c. gĕngning prihnya kunang nimittaning unang moghârarĕm ng wwang mulat | ꦒꦼꦁꦤꦶꦁꦥꦿꦶꦃꦚꦏꦸꦤꦁꦤꦶꦩꦶꦠ꧀ꦠꦤꦶꦁꦲꦸꦤꦁꦩꦺꦴꦓꦫꦉꦩ꧀ꦔ꧀ꦮ꧀ꦮꦁꦩꦸꦭꦠ꧀ |
| d. angde kung makuwung-kuwung langit ika truh-truh sinĕnwan rawi | ꦲꦁꦢꦺꦏꦸꦁꦩꦏꦸꦮꦸꦁꦏꦸꦮꦸꦁꦭꦔꦶꦠ꧀ꦲꦶꦏꦠꦿꦸꦃꦠꦿꦸꦃꦱꦶꦤꦼꦤ꧀ꦮꦤ꧀ꦫꦮꦶ |
| 15. | |
| a. tunghāning parangan mangungkuli jurang pātāla tulyâdalĕm | ꦠꦸꦁꦲꦴꦤꦶꦁꦥꦫꦔꦤ꧀ꦩꦔꦸꦁꦏꦸꦭꦶꦗꦸꦫꦁꦥꦴꦠꦴꦭꦠꦸꦭꦾꦢꦊꦩ꧀ |
| b. er tambang malabuh jurang kapalĕyĕ ngkānêng lĕngisning paras | ꦲꦺꦂꦠꦩ꧀ꦧꦁꦩꦭꦧꦸꦃꦗꦸꦫꦁꦏꦥꦊꦪꦼꦁꦏꦴꦤꦼꦁꦊꦔꦶꦱ꧀ꦤꦶꦁꦥꦫꦱ꧀ |
| c. rĕsrĕsnya-n hana ring tawang parĕng awūr anghrit tikang sundari | ꦉꦱꦽꦱ꧀ꦚꦤ꧀ꦲꦤꦫꦶꦁꦠꦮꦁꦥꦉꦁꦲꦮꦹꦂꦲꦁꦲꦿꦶꦠ꧀ꦠꦶꦏꦁꦱꦸꦤ꧀ꦢꦫꦶ |
| d. kaywan wruh mangungang katon wĕlas-arĕpnyâlung sumambyângawe | ꦏꦪ꧀ꦮꦤ꧀ꦮꦿꦸꦃꦩꦔꦸꦔꦁꦏꦠꦺꦴꦤ꧀ꦮꦼꦭꦱ꧀ꦲꦉꦥ꧀ꦚꦭꦸꦁꦱꦸꦩꦩ꧀ꦧꦾꦔꦮꦺ |