Kakawin Arjunawiwāha/Pupuh 15
Pupuh 15 - Kusumawilasita 
1.
- a. ndah tinamuy ta sang nṛpatiputra ri wĕkas ing anindya ṣaḍrasa
- b. tunggal ikang turung ratiwilāsa hinilanira tan wawang labuh
- c. prārthana yan huwus pĕjah ikang asura sira mamuktya sanggama
- d. ring tadanantara krama haturnira mamuhun i jĕng Surādhipa
2.
- a. ramya parĕng manambah angĕnoh sawawa kadi huwus samāgama
- b. oṃ bapa śāswatâta kita karwa sulabha mĕnangêng prayojñana
- c. ling Suranātha mangkat angadĕg sang adulura huwus ḍatang ri heng
- d. tan pangucap tuhun mata nirâtha juga marahakĕn manahnira
3.
- a. sampun adan sirâpaduluran turida pisalin ing Manobhawa
- b. ardha kamerangĕn tékap i lampahira hana dudūnikang ulah
- c. deni pakon Surādhipa lawan kadi sumariya mangkanā hĕlĕm
- d. hetunirāhĕnĕng pinaguñĕp-guñĕpakĕn ikang apsarâpsarī
4.
- a. ambaramārga lālana tuhun hatinira paḍa kabwatan raras
- b. mogha mahirya-hiryan anahā-ng rumuhuna sakarĕng parĕng mulat
- c. sang nṛpaputra mojar ibu toh rumuhuna juga haywa tâkĕmul
- d. Ndak pahwas larisni panĕpinta rinacana ri pinggiring tapih
5.
- a. yan ruhuna nghulun rari katon kita bari lagi kapwa tolihĕn
- b. yan parĕngā lumakwa kadi wehĕn aparĕka mĕne-n panuntuna
- c. ramyanikang haneng wuri manambyakĕna kahulunan palar wruha
- d. nyan suruhan mahywa gĕlunganta mangayati lukarnya meh tiba
6.
- a. epu juga-n tumona mukhaning puru-puru cala yan tininghalan
- b. yan hana doṣaning marĕngu rakwa yan ahalana raśmining guyu
- c. yan ri dalĕm ri heng wĕngi manganti pĕtĕng unang ing anggĕgĕ smara
- d. tan dadi tan tikĕl juga halista kadi marahakĕn pĕh ing hati
7.
- a. mangkana lingnira ndan api tan wruh ika sang ing arĕp salah sahur
- b. rakryan adoh ulih nṛpatiputra lumaku huningan tikang hawan
- c. riñcinikang surālaya matingkah angulilingi Meruparwata
- d. Bharatawarṣamaṇḍala kidul ndi kunang arah-arah ring Astina
8.
- a. tan rumaras kari twasing anon ayap i sabhanikāng anglare
- b. kungnira sang patang siki kakâri kalima sira sang patibrata
- c. aywa hinopakĕn tangisikā sang abuhaya dudū sakêng sira
- d. lingnya sang Arjunânahurakĕn śapatha juga sirângdĕlĕng mata
9.
- a. mangkana denira marĕkakĕn kira-kira tucapa-ng katungkulan
- b. lwah ri lurahnikang Tuhinaparwata mangapa kasor sakêng tasik
- c. ring mapasir mapaṇḍan akarang liman asĕmu lĕyĕp tininghalan
- d. ring mamanuk manambay angadoh wruh anawanakĕn ambĕking mulat
10.
- a. pinggir ikâradin kadi lilit pata-patahanikang hĕnîriya
- b. ramya śaneh-śaneh mawatu hantiga winasĕhan ing pasang-surud
- c. andul aśoka bāṇa sakasālas aparigi hanâpuḍe-puḍe
- d. wwadnya kadînukir hana kadînanamakĕn angasut śilātala
11.
- a. śūnya tanora mānuṣa tĕkêrika yatan adhikārapaṇḍita
- b. nghing wwang anganti ring watu sumong wwang ika nipuṇa manghuwus-huwus
- c. brāhmaṇa tīrthagocara pilih sang ataki-taki niṣparigraha
- d. sarwasukhâkĕmul hariṇacarma madulur anusup lawan kidang
12.
- a. konang-unang katon liman alasnya tuhagana masūryasewana
- b. wwe sumirat sakêng tulalayanya masidĕkung ulahnya yan makĕm
- c. mwang hana satwa kasturi sĕḍĕng mangiḍĕmi sĕkaring gaḍung mure
- d. tinghalikâpĕḍe humarĕp ing dinakara kadi manghiḍĕp smṛti
13.
- a. nyāsa kadî pangipyan aparan ta kunang ika hanādi kālasan
- b. caṇḍi śilânana-ng cawiri piṇḍa manangisa mahĕmbi-hĕmbihan
- c. kalyan aśoka rambay anisih pariginika rinuntuh ing gaḍung
- d. nyū gaḍing anglangut paḍa matĕb tumirisakĕn anaknya yan ruru
14.
- a. tan hana ta pwa karwa lĕpihan mahas-ahas irikang nadītaṭa
- b. mrak juga mukti ramyani rĕmĕngnya wahu tĕka mangambwakĕn hudan
- c. wruh tumiling maninghali kilat lumari kadi cariknikang langit
- d. tan huningan sinaṇḍing i rabinya mangamĕr anisik sakêng wuri