Kakawin Arjunawiwāha/Pupuh 17
Pupuh 17 - Praharṣiṇī 
1.
- a. akweh goṣṭinira tangeha yan wiwakṣan
- b. leśyāpatti rasa paḍâkĕkĕs wilāsa
- c. lawan tôcapan ing upaya sampun arpat
- d. ndah mangkin ta sira tĕkêkang parāna
2.
- a. ring tāman ri wĕlahan ing purī-n pararyan
- b. strī-ng antahpuri kahaḍang hanâmajang lek
- c. len tang strī pakirimira hyang Indra ngūni
- d. manglilâmĕng-amĕng aneka dewakanyā
3.
- a. wwantĕn ramyaracana śūnya kāwakanya
- b. ngkanêng kalpataru paran sang arya Pārtha
- c. ring rangkang sphaṭika dulurnira-n panganti
- d. sākārāning ujar arūm karĕngwa dohnya
4.
- a. rūpanya-n pangurayakĕn mĕlĕk gĕlungnya
- b. mwang kenkenya bhujagacarma raktawarṇa
- c. gātranya pwa kadi tatur hañar sinangling
- d. abhrā tang sphaṭikagṛhâsinang rinĕngga
5.
- a. endah tang sphaṭikagṛhâsalin prabhānya
- b. akweh tang suraduhitā mulat wikalpa
- c. hetunya-n para mangungang waneh hanângling
- d. indung toh syapa kitâri māsku lingnya
6.
- a. ndan dūra-n nṛpatanaya katona denya
- b. sarwecchā macĕlĕk adṛśya sūkṣmatattwa
- c. sang lĕnglĕng ta juga tinonya dīnacitta
- d. lwir śokânglih apadapângĕlih lumĕnghe
7.
- a. angrĕs twasnikang awĕlas marĕk tikang wwang
- b. strī kendrānika pakirim hyang Indra ngūni
- c. nda-k waswās pwa sira kadi wruhaku lingnya
- d. manggĕh niścayani manah nika-n tĕkângling
8.
- a. māskw indung syapa ta dulur kitâmara ngke
- b. sākṣāt handaru mangĕnĕs hiḍĕpku rakryan
- c. śrīning kendran iku kitânurun mara ngke
- d. sādhyā sang prahu kita Suprabhāngku māsku
9.
- a. sungsut detyapati subaddha ri hyang Indra
- b. tan len hetunika ri tan kawehta ngūni
- c. mangkin kembuhan i ḍatang sang Arjuna ngkā
- d. nāhan hetu sang asurādhipânĕkana
10.
- a. tan hārohara ta kari hyang Indra mangke
- b. wṛttêng swarga mapa warah kakanta māsku
- c. nāhan lingnya saha tangis girang nimitta
- d. mojar sang kinasĕgĕhan malap manahnya