Kakawin Arjunawiwāha/Pupuh 21

by Mpu Kanwa

Pupuh 21 – Wasantatilaka

1.

• a. yan bwat Niwātakawacâgul-agul pragalbha
• b. krodhêrikang mangiku nīti mamet upāya
• c. tan sāma bheda dhana kewala daṇḍakarma
• d. göngning parākrama jugênadu kaprawīran

2.

• a. mantrinya pād ubhayaśuddhakula praśāsta
• b. Krūdhākṣa Duṣkṛta Wirakta Karālawaktra
• c. wetbet Hiraṇyakasipuh kula Kālakeya
• d. manggĕh kṛtārtha ginulang halu ring raṇāngga

3.

• a. nirbhīta lāgi tinurun sura ring Sumeru
• b. mangke pwa Śakra sira sang pupusĕn tĕkāna
• c. mwang mānuṣāśraya kaniṣṭha dumeh ya māna
• d. tan sangśayan tĕka rumampasa ng indraloka

4.

• a. mangkat ta daityapati kātara mṛtyurūpa
• b. sampun pratiṣṭha sira ring ratha hīrabajra
• c. mātangga rākṣasa mangir manisih wélangnya
• d. gumrit bĕlah sahana ning pṛthiwī n inambah

5.

• a. krūrâmire sira ri kūwara ning rathâlwā
• b. dewāngganângisapu jöng salayânguḍoḍa
• c. anyat añāmarani deni panasnikang twas
• d. krodhānalâlatu-latûmĕtu ring matâbāng

6

• a. ardhâsĕsök lakunikang bala daityasangghya
• b. sangkīrṇa lakṣata rākṣasa rākṣakanya
• c. wyāghrâśwa singha hana gardabha wāhananya
• d. sarwecca ng āyudha mijil ri puhun wulunya

7.

• a. tĕngran mĕlĕk bhujagacarma tĕkê mukhanya
• b. cūḍāmaṇinya bukakuṇḍur ika pradīpta
• c. sewu wwalung puluh atiṇḍih anekawarṇa
• d. lwir wangkawângibĕki rāt dhwaja daityarāja

8.

• a. Krūdhākṣa Duṣkṛta panĕṇḍas arampak agyā
• b. sānak samāyudha sama dhwajawāhananya
• c. Sundopasundasuta śūra mahāprabhāwa
• d. salwirning endah atibhīṣaṇa bhūṣaṇanya

9.

• a. sakwehnikāng asura dānawa pangharĕpnya
• b. sangkĕp hanan gaganamārga hanan padāti
• c. tĕngran gajājina wiśāla tĕkê gaḍingnya
• d. lwīr andhakāra kumĕlab lumarap kilatnya^[1]

10.

• a. rwêkang tulak balakang ing laku sārabhūta
• b. kĕmbar sulakṣaṇa Wirakta Karālawaktra
• c. kapwâhawān asurajanma gajendrarūpa
• d. wruh ring gadāyudha paḍâmawa lori hīra

11.

• a. sök śūradānawa mahāsura pādarakṣa
• b. ākāra sārwuda jurunya dudū ng balanya
• c. tĕngranya singha sinasat kumĕlab wulunya
• d. kady âlun ing jaladhi dening angin pracaṇḍa

12.

• a. sakwehnikāng asura dānawa tan pradhāna
• b. tapwan pĕgat saka rikang kuṭa pāt lawangnya
• c. kady âcalâlaku-laku mwang alas jurangnya
• d. lwir sāgarâtula-tular gumuruh sakāmbah

13.

• a. ndātan hanâlas angadĕg paḍa bhasmibhūta
• b. āpan rĕbah tĕkapikāng anila pracaṇḍa
• c. syūh dening aśwa rathacakra linūd inambah
• d. liṇḍū hudan saha gĕlap kumupak halisyus

14.

• a. utpāta ning sa-Maṇimāntakarājya śīrṇa
• b. guntur tikāng acala tūt kidul ing Sumeru
• c. kolāhalân tinapak ing baladaityasanggha
• d. swargâlilang sakahawan rinurah rinampak

Footnote

1. Varian: lwir handhakāra ... or lwir-ng andhakāra