Kakawin Banawa Sĕkar Tanakung/Pupuh 1

Pupuh 1

1.

• Atyantādhikaning sukārya winangun śrī Jiwanendrādhipa
• Tan lyan śrāddha bhaṭāra mokta maluy ing somyālayâdhiprabhu
• Mangke mūrtinira n cinarwan apagĕh ring śwetasinghāsana
• Sakwehning bala mukhya sang nṛpa kabeh dampaty amuṣpa krama

2.

• Lwir guntur pakatonan ing taḍah anekâtryâsusun tar pĕgat
• Mily āpānakabhojanâna ḍumawuh ring peka munggw ing sabhā
• Len tang dāna ri sang mahādwija gĕnĕp ring śangkha tapwan kurang
• Gohdānādi sabhūṣaṇâśwa ratha len wastrâdulur kañcana

3.

• Warṇan tingkah i sang watĕk ratu madudwan wĕtwa-wĕtwan kabeh
• Wwantĕn gīta nirakṣarâtika wināhyākĕn langönyêng gunung
• Mambĕtning dyah angañjalîniringakĕn dening kakungnyêkaki
• Śrī nāthêng Kṛtabhūmi mĕnggĕp amangun tingkah widagdheng raras

4.

• Tan sor śrī naranātha ring Mataram ing tingkah langöning gunung
• Cārângrakta wado hajîki winangun tingkah madadyan wukir
• Harṣêkang wwang anon kakung saha lawan dyah ceṭikêng āśrama
• Singgih yan tama ring langö nṛpati mangdānî raras tan sipi

5.

• Kocap sang nṛpati Pamotan adhikārêng rūm praśāstêng langö
• Ndan tingkah gaga wĕtwa-wĕtwanira moghânrang langöning gaga
• Wwantĕn stry arja kalih jalunya n ahañang ngkânê siringning hĕnu
• Prāyângjantĕn ajangga ring Jawa kapanggih ndan matĕnggö gaga

6.

• Sangke śrī paramêśwarêng Lasĕm apūrwang wĕtwa-wĕtwan lĕyĕp
• Strī munggw ing dalĕm ing taman manalukat lāwan kakungnyâlangö
• Apnĕd dening aningkah uttama langönyâmānuṣângde lĕngĕng
• Tob pinghe ngaraning kidungnya ginawe tilngkah maweh kung lulut

7.

• Wwantĕn parwata tan siping kalĕngĕngan sākṣāt pawitrācala
• Tan len amṛtamāsa gīta tuladan kāryâtĕmah parwata
• Ndah byakta ng jalatuṇḍa tang śaraṇa sangkĕp tan hanângul kabeh
• Sawwat śrī naranātha ring Kahuripan sotan kawīndrânulus