Kakawin Nāgarakṛtâgama/Pupuh 8
Pupuh 8 – Sajenising Atikṛti
1.
- a. wārṇan tingkahikang purādbhuta kuṭanya bata bang umidĕr makandĕl aruhur
- b. kulwan ḍi dwura waktra mangharĕpakĕn lĕbuh agĕng i tĕngah way edran adalĕm
- c. brāhmāsthāna matunggalan pathani buddhi jajar inapi kapwa sök caracara
- d. ngkā tônggwan para taṇḍa tan pĕgat aganti kumĕmit i karakṣaning purasabhā
2.
- a. lor tang gopura śobhitābhinawa kontĕn ika wĕsi rinūpakāparimitā
- b. wetan saṇḍingikârja panggung aruhur patigan ika binajralepa maputih
- c. kānnah lor kidul i pĕkĕn rakĕt ikang yaśa wkasing apañjang adbhuta dahāt
- d. angkĕg caitra pahömaning bala samūha kidūl ika catuspathāhyang ahalĕp
3.
- a. alwāgimbar ikang wanguntur an hatur diśi watangan ikāwitāna ri tĕngah
- b. lor tang weśma panangkilan para bhūjangga khimuta para mantry alinggih apupul
- c. wetan nggwan para śewa boddha mawiwāda mucap aji sahopakāra wĕki sök
- d. prāyaścitta ri kālaning grahaṇa phalguṇa makaphala haywaning sabhūwana
4.
- a. kānnaḥ wetan ikang pahoman ajajar tiga-tiga ri tĕngah kaśaiwan aruhur
- b. nggwan sang wipra kidul paḍottama susun barat i natar ikābatur patawuran
- c. nggwan sang sogata lor susun tiga tikang wangunan i pucak ārja môkir-ukiran
- d. kapwāñjrah racananya puṣpa pinaran nṛpati satata yan hanoma mapupul
5.
- a. ngkānêng jro kiduling wanguntur ahlĕt palawanan ikana paśewan atathā
- b. weśmârjâjajar anghapit hawan angulwan i tĕngah ika tañjung angjrah askar
- c. ndah kulwan mahlĕt mūwah kidul i panggung ika balay aneka medran i tpi
- d. arddhâlwā ri tĕngah natar nikana maṇḍapa pasatan aśangkya lot mawurahan
6.
- a. ri jronyeki muwah paśewan akidul dudug angusi wijil kapingrwa ri dalĕm
- b. tingkahnyêki tinumpa-tumpa mahlĕt palawangan ikanang sapaṇṭa tiningkah
- c. kapwa wweśma subaddha watwan ika len saka balabag usuknya tan pacacadan
- d. sök dening bala hajy anangkil agilir makmit an umapekṣa wāra matutur