Kakawin Nītiśāstra/Pupuh 1

Pupuh I - śārdūlawikrīḍita

1.

• sĕmbahni nghulun ing bhaṭāra hari sarwajñātma bhuh nityaśa
• sang tan seng hṛdayântikta tulisĕn ngke supratiṣṭhenamĕr
• ring wāhya stuti sĕmbahi nghulun i jöng sang hyang sahasrāngśumān
• dadya prākṛta nītiśāstra hinikĕt lambang winākteng prajā

2.

• ring wwang tan wruha ring subhāṣita mapunggung mangraseng ṣaḍrasa
• tan wruh pangrasaning sĕḍah pucang adoh tambūla widyāsĕpi
• yan wwantĕn mawiweka śāstra nirapekṣa byakta monabrata
• yan wwang mangkana tulyaning rahinikā lwirnyān guwekā hiḍĕp

3.

• ring widyā wiṣa tulya denikang anabhyāsālasang sampĕnĕh
• yan tan jīrṇa tikāng bhinojana hatur wiṣyātĕmah wyādhaya
• ring hinārtha daridra tulya wiṣa goṣṭinyātĕmah manglare
• ring kanyā wiṣa tulya ring jaḍa pikun, tanpâmṛtângde wingit

4.

• ring janmādhika meta citta rĕsĕping sarwa prajāngenaka
• ring strī-madhya manohara priya wuwustāngde manah kūng lulut
• yan ring madhyani sang pinaṇḍita mucap tatwôpadeśa prihĕn
• yan ring madhyanikāng musuh mucapakĕn wāk-śūra singhākṛti

5.

• krūra ng sarpa wiṣamya somya tĕkaping mantrāmṛtākarṣaṇa
• singha wyāghra hilang galaknika tĕkapning stambhanā-mantra ya
• matta ng kuñjara yāngkuśāngrubuhakĕn dadyātĕmah mardawa
• krūrāning ripuśeṣa durjana gĕlĕngnya yweki tan wiśwasān

6.

• jroning wwe parimāṇa nāla gaganging tuñjung dawut kawruhi
• yan ring jātikula pracāra winaya mwang śīla karmenggita
• yan ring paṇḍita ring ksamā mudita śāntopekṣa ris mardawa
• sang śāstrajña wuwusnirāmrĕta paḍānyāngde sutuṣṭeng prajā

7.

• wwantĕn wwang sugih artha hina sabhinuktinyālpa ring bhūṣaṇa
• wwantĕn wwang guṇamanta śīla naya hinānūt rikāng durjana
• wwang dirghāyuṣa wrĕddha hina tan arĕp ring dharmaśāstrolahĕn
• yeku ng janma nirarthaka traya wilangnyoripnya nir tanpa don

8.

• yan ring pakṣi tinucca kāka hinaran pāpātmaka ng caṇḍala
• ring sarwāmrĕga gardabheka hinaran tuccātmaka ng caṇḍala
• ring buddhiki tinucca caṇḍala si kopāngde hilangning kṣamā
• ring durmitra cinaṇḍaleng jana kasar tang caṇḍala trinucap

9.

• ring dyun alpa bañunya kampita kucak yapwan hibĕk wwe sthiti
• yan ring go rawa ghora śabdanika göng alpa kṣiranyākĕḍik
• yan ring janma kurūpa ceṣṭitanikākweh bhāwa solahnika
• ring janmālpaka śāstra garwita tĕrĕh śabdanya tanpāmrĕta

10.

• singhā rakṣakaning halas, halas ikāngrakṣeng hari nityaśa
• singhā mwang wana tan patūt paḍa wirodhāngdoh tikang keśarī
• rug brāṣṭa ng wana denikang jana tinor wrĕkṣanya cirṇāpaḍang
• singhānghöt ri jurangnikang tĕgal ayū n sāmpun dinon durbala

11.

• ring wwang haywa nirāśrayeka gawayĕn tekāng mahā n āśraya
• ton tang nāga mangāśraye sira bhaṭāra tryambakāngarcana
• sangke bhaktinikāpagĕh dadi sawit de hyang trirājyāntaka
• prāptekāng garuḍa prasomya mulating nāga praṇateng ruhur

12.

• tingkahning suta mānuteng bapa gawenya mwang guṇā piṇḍanĕn
• ton tang matsya wihanggamekana si kūrmānaknya noreniwö
• ring mīneka rinakṣaṇeka dinĕlö ng aṇḍanya tan sparśanan
• ring kūrmekana ng aṇḍa yeningĕt-ingĕt tan ton tuhun dhyāna ya.

13.

• yapwan hantiganing wihanggama hinasparśanya tan niṣṭura
• mengĕt ring samayānya sangka ri kanang kośa swayam-putra ya
• byakta mwang bapa rakwa rūpa guṇa len kāryanya tan bheda ya
• tan mangka ng jana-putra winwang iniwö tan sah rinakṣenamĕr

14.

• sang wedajña phalanya homa wangunĕn byaktāmrĕteng rāt kabeh
• śīlāwṛtti phalanya ring śruti pagĕh ring buddhi tañ cañcala
• bhogānindya phalanya yan kinahanan ring artha dāneng prajā
• ring strī putra phalanya ring surata len śardūlawikriḍita.