Kakawin Nītiśāstra/Pupuh 15

Pupuh XV – wasantatilaka

1.

• lwirning purohita wiśeṣa ri sang narendra
• sang wruh ri śāstra putusing paramādhi-kāwi
• ring widya-sāra sarasāhuwusan kagĕgwan
• sakteng śiwārcana sadāgama tan kaluptan

2.

• mwang modi dīkṣi wĕdihanya tĕkĕs linakṣan
• wijñeng samādhi japa hūti ginöng sadarpa
• mekṣawa ring naya karakṣanirang narendra
• manggĕh purohita tikā ta ngaranya ring rāt

3.

• tingkahnikang prabhu sumīkṣa ri bhŗtya sangghya
• sakwehnya kottama kamadhya lawan kaniṣṭa
• yekā warah-warahaneka ya karma yukti
• sangkeng kuṭāra gĕlarĕn tĕkaping sumīṣa

4.

• nang wadwa tan kaparĕking nagarāryakĕnta
• wwang bwat maśabda lĕmĕhan mapi-tūwi langguk
• nityeki yan pamĕng-amĕng manutindriyanya
• buddhinya durjana kaṭungka papā nicāra

5.

• krureka tan hana kasomyanikā wuwusnya
• tan hantuṣa ng kĕḍi-kĕḍik ya ‘ti-moha garwa
• tan bhakti matwang i tuhan titir sampe sĕnghit
• yeku ng balācĕmer ulahnya ya dohakĕnta

6.

• mwang wadwa tinggalakĕna pwa tĕkap narendra
• kopa pragalbha tuwi tan hana mardawanya
• nityeki lālana taman hana mātra denya
• sakteng pirak kanaka ngiṣṭi dhana pwa tansah

7.

• lāwan malih wwang angupĕt ri tuhanya nitya
• dudwāti mūrka kuhakānika göng sadarpa
• śabdanya tan rahayu nityaśa wākparuṣya
• tan yukti karyanĕnirādhipati ng swa-sena

8.

• lwirning narādhipatining bala ring swa sena
• pāt kwehnya rakwa huningan pwa rĕngönta mangke
• bwat krūra sāhasa, kṛpāṇa sudhira malwat
• len warṇasangkara kunang mamati tapaswi

9.

• ring bwat krĕpāṇa ya kasora ring ardha kopa
• ring warṇasangkara lĕhĕng juga tang kṛpāṇa
• yapwan kṛtaghna kalĕhĕng juga tang manāmpuh
• yekā gatinya pilihĕn tĕkaping sinewa

10.

• yan sājña sang prabhu pakaryanirang amatya
• tri pwekanang phala kabhukty anuteng swarāja
• swargādi len ika dhanāgama tang kapangguh
• sangkeng kaśaktining amatya maweh kasiddhan

11.

• pathyā tigolahĕn ikā mapatih wiśeṣa
• lĕngkĕp wruhing guṇa samāpta lawan kaśūran
• dharmārthakāma kawĕnang ya kaniścayeng twas
• yan nirguṇeku tilarĕn pwa tĕkap narendra

12.

• salwirnikang guṇa mijil saka ring munīndra
• ring doṣasanghya mĕtu ring kuhakāti mūrka
• ring mūrka sewu kasĕlan ya sujanma tunggal
• yogyālapĕn tang ati-śuddha suśīla tunggal