Kakawin Nītiśāstra/Pupuh 9

Pupuh IX - Kṛti-1

1.

• kadi sang hyang indra sang amukti suka wibhawa bhoga wīryawān
• sira sang wiweka guṇamanta paḍa-paḍa lawan hyang iśwara
• atiyowanātuha sudharma paḍanira bhaṭāra keśawa
• ikanang wimūḍha paśu tulya manahika mabhoga sanggama

2.

• kramaning dadi wwang ana ring bhuwana pahutanganta ring prajā
• ri sirang munindra nguniweh sang atithi-gamaneka sambhraman
• athawā muwah swa-pita rahyang amara rĕṇa yogya kingkingĕn
• panahurta ring pitara potraka luputakĕning yamālayu

3.

• krĕtu pañcayajña gawayĕnta panahura hutangta ring widhi
• sahurĕnn upādhyaya samasta hutangira ri sang rĕṣiśwara
• waca gorawe sira sang abhyagata taman ayogya sambhraman
• iti śāsaneng dumadi tan palĕ-palĕha ri dharma sang wiku

4.

• yaśa kirti karmakĕna denta tan ĕlĕm-ĕlĕmeka śighranĕn
• gawayĕn tikang talaga tunggal amaḍa magawe sumur satus
• magawe’ki tālaga satus wilangika paḍa pinra sakrama
• mapaḍeki labhaning aputra sawiji guṇamanta sādhana