ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦪꦺꦴꦲ꦳ꦤꦼꦱ꧀/16

꧋ꦥꦼꦁꦒꦮꦺꦪꦤ꧀ꦏꦸꦫꦺꦴꦃ​ꦱꦸꦕꦶ​꧉​

꧇​꧑꧖꧇​ ¹꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦸꦮꦶ​ꦩꦲꦸ​ꦏꦧꦺꦃ​ꦠꦏ꧀ꦢꦸꦤꦸꦁꦢꦸꦤꦸꦁꦔꦏꦺꦩꦫꦁ​ꦏꦺꦴꦮꦺ​꧈​ꦱꦸꦥꦪ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦶꦱ꧀​ꦏ꧀ꦭꦏꦺꦴꦤ꧀ꦠꦼꦤꦤ꧀ ꦏꦺꦴꦮꦺ​ꦲꦗ​ꦱꦩ꧀ꦥꦺꦏ꧀ꦏꦒꦺꦠ꧀ꦭꦤ꧀ꦲꦶꦭꦁ​ꦥꦼꦔꦤ꧀ꦢꦼꦭ꧀ꦭꦺ​꧉​ ²ꦥꦚ꧀ꦕꦺꦤ꧀ꦧꦏꦭ꧀​ꦏ꧀ꦭꦏꦺꦴꦤ꧀ꦠꦼꦤꦤ꧀꧈​ꦏꦺꦴꦮꦺ​ꦲꦺꦴꦫ​ꦤꦩꦸꦁ​ꦧꦏꦭ꧀ꦢꦶꦲꦼꦠꦺꦴꦏ꧀ꦏꦏꦺꦱꦁꦏꦱꦶꦤꦒꦸꦏ꧀ ꦤꦁꦔꦶꦁ​ꦮꦺꦴꦁꦮꦺꦴꦁ​ꦧꦏꦭ꧀ꦩꦠꦺꦤ꧀ꦤꦶ​ꦏꦺꦴꦮꦺ​ꦲꦩ꧀ꦧꦫꦁ​꧉​ꦩꦭꦃ​ꦩꦶꦏꦶꦫꦺꦥꦢ​ꦔ꧀ꦒꦮꦺ​ꦧꦼꦕꦶꦏ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​ꦤꦺꦏ꧀​ꦔ꧀ꦭꦏꦺꦴꦤ꧀ꦤꦶ​ꦔꦺꦴꦤꦺꦴ​ꦏꦸꦮꦶ​꧉​ ³ꦮꦺꦴꦁꦮꦺꦴꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦏꦪ​ꦔꦺꦴꦤꦺꦴ​ꦏꦸꦮꦶ​꧈​ꦗꦭꦂꦫꦤ꧀ꦲꦺꦴꦫ​ꦥꦢ​ꦔꦼꦂꦠꦶ​ꦠꦼꦤꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦫꦁ​ꦲꦏꦸ​꧉​ ⁴ꦤꦁꦔꦶꦁ​ꦏꦺꦴꦮꦺ​ꦠꦏ꧀ꦲꦺꦴꦩꦺꦴꦁꦔꦶꦱꦏ꧀ꦢꦸꦫꦸꦁꦔꦺ꧈​ꦱꦸꦥꦪ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦏꦧꦺꦃ​ꦲꦶꦏꦶ​ꦏ꧀ꦭꦏꦺꦴꦤ꧀ꦠꦼꦤꦤ꧀ꦏꦺꦴꦮꦺ​ꦥꦢ​ꦲꦺꦭꦶꦁ​ꦩꦫꦁ​ꦠꦼꦩ꧀ꦧꦸꦁꦏꦸ​ꦭꦤ꧀ꦲꦺꦴꦫ​ꦥꦢ​ꦏꦒꦺꦠ꧀꧈​

꧋“ꦩꦲꦸꦤꦺ​ꦏꦺꦴꦮꦺ​ꦲꦺꦴꦫ​ꦠꦏ꧀ꦲꦺꦴꦩꦺꦴꦁꦔꦶꦧꦧ꧀ꦲꦶꦏꦶ​꧈​ꦲꦮꦶꦠ꧀ꦲꦏꦸ​ꦲꦶꦗꦶꦏ꧀ꦕꦩ꧀ꦥꦸꦂ​ꦏꦫꦺꦴ​ꦏꦺꦴꦮꦺ​꧉​ ⁵ꦤꦁꦔꦶꦁ​ꦱꦲꦶꦏꦶ​ꦲꦏꦸ​ꦲꦉꦥ꧀ꦧꦭꦶꦏ꧀ꦩꦼꦤꦺꦃ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦺꦴꦁꦏꦺꦴꦤ꧀ꦲꦏꦸ​ꦠꦼꦏ​ꦤꦁꦗꦒꦠ꧀ꦏꦺꦤꦺ​꧉​ꦥꦚ꧀ꦕꦺꦤ꧀ꦲꦏꦸ​ꦲꦉꦥ꧀ꦭꦸꦔ​꧈​ꦭꦃ​ꦏꦺꦴꦏ꧀ꦲꦺꦴꦫ​ꦲꦺꦤꦺꦁꦱꦶꦁ​ꦠꦏꦺꦴꦤ꧀ꦩꦫꦁ​ꦲꦏꦸ​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦲꦉꦥ꧀ꦭꦸꦔ​꧉​ ⁶ꦩꦭꦃ​ꦠꦼꦫꦸꦱ꧀ꦥꦢ​ꦱꦼꦢꦶꦔꦺꦴꦤꦺꦴ​ꦧꦧ꧀ꦱꦼꦩ꧀ꦧꦫꦁ​ꦱꦶꦁ​ꦠꦏ꧀ꦲꦺꦴꦩꦺꦴꦁꦔꦏꦺꦏꦸꦮꦶ​꧉​ ⁷ꦤꦁꦔꦶꦁ​ꦠꦼꦤꦤ꧀ ꦭꦸꦮꦶꦃ​ꦲꦥꦶꦏ꧀ꦏꦁꦒꦺꦴ​ꦏꦺꦴꦮꦺ​ꦤꦺꦏ꧀ꦲꦏꦸ​ꦭꦸꦔ​꧈​ꦱꦸꦥꦪ​ꦲꦏꦸ​ꦧꦶꦱ​ꦔꦺꦴꦁꦏꦺꦴꦤ꧀ꦫꦺꦴꦃ​ꦱꦸꦕꦶ​꧈​ꦥꦼꦤꦸꦭꦸꦁ​ꦩꦸ​꧈​ꦠꦼꦏ​꧉​ꦤꦺꦏ꧀ꦲꦏꦸ​ꦲꦺꦴꦫ​ꦭꦸꦔ​꧈​ꦢꦺꦏ꧀ꦤꦺ​ꦲꦺꦴꦫ​ꦧꦏꦭ꧀ꦠꦼꦏ​꧉​ ⁸ꦩꦭꦃ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦫꦺꦴꦃ​ꦱꦸꦕꦶ​ꦠꦼꦏ​꧈​ꦢꦺꦏ꧀ꦤꦺꦧꦏꦭ꧀​ꦤ꧀ꦢꦸꦢꦸꦃꦲꦏꦺꦩꦫꦁ​ꦩꦤꦸꦁꦱ​ꦤꦺꦏ꧀ꦥꦶꦏꦶꦂꦫꦤ꧀ꦤꦺ​ꦧꦧ꧀ꦢꦺꦴꦱ​꧈​ꦧꦧ꧀ꦱꦶꦁ​ꦧꦼꦤꦼꦂ​ꦭꦤ꧀ꦧꦧ꧀ꦏꦿꦸꦠꦺꦴꦤ꧀​ꦏ꧀ꦭꦺꦫꦸ​ꦏꦧꦺꦃ​꧉​ ⁹ꦫꦺꦴꦃ​ꦱꦸꦕꦶ​ꦤ꧀ꦢꦸꦢꦸꦃꦲꦏꦺꦲꦥ​ꦧꦧ꧀ꦢꦺꦴꦱ​?ꦩꦤꦸꦁꦱ​ꦢꦺꦴꦱ​꧈​ꦗꦭꦂꦫꦤ꧀ꦲꦺꦴꦫ​ꦥꦽꦕꦪ​ꦩꦫꦁ​ꦲꦏꦸ​꧉​ ¹⁰ꦧꦧ꧀ꦱꦶꦁ​ꦧꦼꦤꦼꦂ​꧈​ꦫꦺꦴꦃ​ꦱꦸꦕꦶ​ꦧꦏꦭ꧀​ꦤ꧀ꦢꦸꦢꦸꦃꦲꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦼꦥ꧀ꦲꦏꦸ​ꦧꦼꦤꦼꦂ​꧉​ꦤꦺꦏ꧀ꦲꦺꦴꦫ​ꦔꦺꦴꦤꦺꦴ​ꦩꦺꦴꦱꦺꦴꦏ꧀ꦲꦏꦸ​ꦲꦉꦥ꧀ꦤꦶꦁꦒꦭ꧀ꦏꦺꦴꦮꦺ​ꦭꦤ꧀ꦧꦭꦶꦏ꧀ꦩꦼꦤꦺꦃ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​꧉​ ¹¹ꦧꦧ꧀ꦏꦿꦸꦠꦺꦴꦤ꧀ ꦫꦺꦴꦃ​ꦱꦸꦕꦶ​ꦧꦏꦭ꧀​ꦤ꧀ꦢꦸꦢꦸꦃꦲꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦔ꧀ꦒꦮꦺ​ꦥꦸꦠꦸꦱ꧀ꦱꦤ꧀ꦚꦼꦠꦿꦥ꧀ꦫꦠꦸꦤꦺ​ꦗꦒꦠ꧀ ꦪꦏꦸꦮꦶ​ꦱꦺꦠꦤ꧀ ꦱ꧀ꦭꦮꦱ꧀ꦱꦺ꧉​

¹²꧋“ꦲꦺꦤꦺꦁꦲꦺꦴꦏꦺꦃꦱꦶꦁ​ꦲꦶꦗꦶꦏ꧀ꦏꦸꦢꦸ​ꦠꦏ꧀ꦲꦺꦴꦩꦺꦴꦁ​ꦩꦫꦁ​ꦏꦺꦴꦮꦺ​꧈​ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦢꦸꦫꦸꦁ​ꦧꦶꦱ​ꦢꦸꦤꦸꦁꦏꦸꦮꦶ​ꦏꦧꦺꦃ​꧉​ ¹³ꦲꦩ꧀ꦧꦺꦱꦸꦏ꧀ꦤꦺꦏ꧀ꦫꦺꦴꦃ​ꦱꦸꦕꦶ​ꦠꦼꦏ​꧈​ꦢꦺꦏ꧀ꦤꦺꦱꦶꦁ​ꦧꦏꦭ꧀​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦱꦼꦩ꧀ꦧꦫꦁ​꧉​ꦢꦺꦏ꧀ꦤꦺꦱꦶꦁ​ꦧꦏꦭ꧀ꦩꦸꦭꦁꦔꦶꦧꦧ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦱꦏ꧀ꦧꦼꦤꦼꦂꦫꦺ​;ꦲꦺꦴꦫ​ꦤꦸꦫꦸꦠ꧀ꦥꦶꦏꦶꦂꦫꦤ꧀ꦤꦺ​ꦢꦺꦏ꧀ꦤꦺꦢꦺꦮꦺ꧈​ꦲꦺꦴꦫ​꧈​ꦤꦁꦔꦶꦁ​ꦢꦺꦏ꧀ꦤꦺꦤꦩꦸꦁ​ꦩꦸꦭꦁꦔꦏꦺꦲꦥ​ꦲꦺꦴꦩꦺꦴꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦤ꧀ꦩꦼꦤꦺꦃ​꧈​ꦫꦺꦴꦃ​ꦱꦸꦕꦶ​ꦲꦸꦒ​ꦧꦏꦭ꧀​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦧꦧ꧀ꦱꦼꦩ꧀ꦧꦫꦁꦩ꧀ꦧꦫꦁꦱꦶꦁ​ꦧꦏꦭ꧀​ꦏ꧀ꦭꦏꦺꦴꦤ꧀꧈​ ¹⁴ꦱꦼꦩ꧀ꦧꦫꦁ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦢꦺꦏ꧀ꦤꦺꦏꦸꦮꦶ​ꦱꦁꦏꦔ꧀ꦒꦺꦴꦤ꧀ꦏꦸ​꧈​ꦩꦸꦭꦤꦺ​ꦢꦺꦏ꧀ꦤꦺꦧꦏꦭ꧀​ꦔ꧀ꦭꦸꦲꦸꦂꦫꦏꦺꦲꦏꦸ​꧉​ ¹⁵ꦱꦼꦩ꧀ꦧꦫꦁ​ꦱꦶꦁ​ꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​ꦏꦸꦮꦶ​ꦪ​ꦱꦁꦏꦔ꧀ꦒꦺꦴꦤ꧀ꦏꦸ​ꦲꦸꦒ​꧉​ꦩꦸꦭꦤꦺ​ꦲꦏꦸ​ꦩꦲꦸ​ꦔꦺꦴꦩꦺꦴꦁꦤꦺꦏ꧀ꦱꦼꦩ꧀ꦧꦫꦁ​ꦱꦶꦁ​ꦢꦶꦮꦸꦭꦁꦔꦏꦺꦏꦫꦺꦴ​ꦫꦺꦴꦃ​ꦱꦸꦕꦶ​ꦏꦸꦮꦶ​ꦱꦁꦏꦔ꧀ꦒꦺꦴꦤ꧀ꦏꦸ​꧉​”

꧋ꦱꦸꦱꦃ​ꦭꦤ꧀ꦧꦸꦔꦃ​꧉​

¹⁶꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:“ꦲꦺꦴꦫ​ꦱꦸꦮꦶꦩꦼꦤꦺꦃ​ꦲꦏꦸ​ꦧꦏꦭ꧀ꦭꦸꦔ​ꦭꦤ꧀ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦮꦼꦫꦸꦃ​ꦲꦏꦸ​ꦩꦼꦤꦺꦃ​꧈​ꦤꦁꦔꦶꦁ​ꦲꦺꦴꦫ​ꦊꦠ꧀ꦱꦸꦮꦶꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦲꦏꦸ​ꦧꦏꦭ꧀ꦠꦼꦏ​ꦩꦼꦤꦺꦃ​꧉​”

¹⁷꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦥꦢ​ꦠꦏꦺꦴꦤ꧀ꦩꦫꦁ​ꦱꦏ꧀ꦥꦢꦥꦢ:“ꦭꦃ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦱꦏ꧀ꦗꦤꦺꦔꦺꦴꦩꦺꦴꦁꦔꦏꦺꦧꦧ꧀ꦲꦥ​ꦠ​꧈​ ꦏꦺꦴꦏ꧀ꦔꦺꦴꦩꦺꦴꦁꦤꦺꦏ꧀ꦲꦺꦴꦫ​ꦱꦸꦮꦶꦩꦼꦤꦺꦃ​ꦧꦏꦭ꧀ꦭꦸꦔ​ꦭꦤ꧀ꦲꦺꦴꦫ​ꦊꦠ꧀ꦱꦸꦮꦶꦱꦏ꧀ꦮꦶꦱ꧀ꦱꦺ​ꦭꦸꦔ​ꦧꦏꦭ꧀ꦠꦼꦏ​ꦩꦼꦤꦺꦃ​꧉​ꦭꦤ꧀ꦩꦼꦤꦺꦃ​꧈​ꦢꦺꦏ꧀ꦤꦺꦔꦺꦴꦩꦺꦴꦁꦤꦺꦏ꧀ꦲꦉꦥ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺ꧉​ ¹⁸ꦏꦺꦴꦏ꧀ꦔꦺꦴꦩꦺꦴꦁꦲꦺꦴꦫ​ꦊꦠ꧀ꦱꦸꦮꦶꦩꦼꦤꦺꦃ​?ꦏꦸꦮꦶ​ꦔꦺꦴꦩꦺꦴꦁꦔꦏꦺꦲꦥ​ꦠ​?ꦲꦮꦏ꧀ꦏꦺ​ꦢꦺꦮꦺꦏꦺꦴꦏ꧀ꦲꦺꦴꦫ​ꦢꦸꦤꦸꦁ!”

¹⁹꧋ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​ꦤꦺꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦏꦼꦥꦺꦔꦶꦤ꧀ꦠꦏꦺꦴꦤ꧀ꦩꦫꦁ​ꦢꦺꦏ꧀ꦤꦺ꧈​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦲꦺꦴꦫ​ꦥꦢ​ꦢꦸꦤꦸꦁꦲꦼꦁꦒꦺꦴꦤ꧀ꦏꦸ​ꦔꦺꦴꦩꦺꦴꦁꦤꦺꦏ꧀ꦲꦺꦴꦫ​ꦱꦸꦮꦶꦩꦼꦤꦺꦃ​ꦲꦏꦸ​ꦧꦏꦭ꧀ꦭꦸꦔ​ꦠꦼꦫꦸꦱ꧀ꦲꦺꦴꦫ​ꦊꦠ꧀ꦱꦸꦮꦶꦩꦼꦤꦺꦃ​ꦲꦏꦸ​ꦧꦏꦭ꧀ꦠꦼꦏ​ꦩꦼꦤꦺꦃ​꧉​ ²⁰ꦱꦲꦶꦏꦶ​ꦲꦉꦥ꧀ꦠꦏ꧀ꦢꦸꦤꦸꦁꦔꦏꦺ꧈​ꦩꦸꦭꦤꦺ​ꦢꦶꦫꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀꧈​ꦏꦺꦴꦮꦺ​ꦧꦏꦭ꧀ꦥꦢ​ꦱꦩ꧀ꦧꦠ꧀ꦭꦤ꧀ꦠꦔꦶꦱ꧀ꦱꦤ꧀ ꦤꦁꦔꦶꦁ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦥꦢ​ꦧꦸꦔꦃ​꧉​ꦏꦺꦴꦮꦺ​ꦧꦏꦭ꧀ꦥꦢ​ꦱꦼꦢꦶ꧈​ꦤꦁꦔꦶꦁ​ꦱꦼꦢꦶꦩꦸꦧꦏꦭ꧀ꦢꦢꦶ​ꦏꦧꦸꦔꦃꦲꦤ꧀꧈​ ²¹ꦏꦪ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦲꦉꦥ꧀​ꦩ꧀ꦧꦪꦶꦏꦲꦺ​:ꦱꦸꦮꦺꦤꦺ​ꦩ꧀ꦧꦪꦶꦔꦿꦱꦏ꧀ꦏꦏꦺꦭꦫ​꧈​ꦤꦁꦔꦶꦁ​ꦤꦺꦏ꧀ꦧꦪꦶꦤꦺ​ꦮꦶꦱ꧀ꦭꦲꦶꦂ​ꦮꦺꦴꦁꦔꦺ​ꦧꦸꦔꦃ​ꦠꦼꦤꦤ꧀ ꦭꦭꦶ​ꦭꦫꦤꦺ​꧉​ ²²ꦏꦪ​ꦔꦺꦴꦤꦺꦴ​ꦲꦸꦒ​ꦏꦺꦴꦮꦺ​꧉​ꦱꦲꦶꦏꦶ​ꦏꦺꦴꦮꦺ​ꦥꦢ​ꦱꦼꦢꦶ꧈​ꦗꦭꦂꦫꦤ꧀ꦲꦏꦸ​ꦲꦉꦥ꧀ꦭꦸꦔ​꧉​ꦤꦁꦔꦶꦁ​ꦤꦺꦏ꧀ꦲꦏꦸ​ꦧꦭꦶꦏ꧀ꦩꦼꦤꦺꦃ​ꦏꦺꦴꦮꦺ​ꦧꦏꦭ꧀ꦥꦢ​ꦧꦸꦔꦃ​ꦲꦺꦴꦫ​ꦲꦺꦤꦺꦁꦲꦼꦤ꧀ꦠꦺꦏ꧀ꦏꦺ​꧉​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦏꦭ꧀ꦧꦶꦱ​ꦔꦽꦧꦸꦠ꧀ꦏꦧꦸꦔꦃꦲꦤ꧀ꦲꦶꦏꦶ​ꦱꦁꦏꦲꦠꦶꦩꦸ​꧉​

²³꧋“ꦲꦶꦁ​ꦮꦪꦃ​ꦏꦸꦮꦶ​ꦏꦺꦴꦮꦺ​ꦲꦺꦴꦫ​ꦲꦸꦱꦃꦠꦏꦺꦴꦤ꧀ꦲꦏꦸ​ꦲꦥꦲꦥ​ꦩꦼꦤꦺꦃ​꧉​ꦢꦶꦲꦺꦭꦶꦁ​ꦠꦼꦤꦤ꧀ꦲꦺꦴꦩꦺꦴꦁꦏꦸꦲꦶꦏꦶ​:ꦤꦼꦩ꧀ꦧꦸꦁꦔꦲꦥ​ꦮꦲꦺ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​꧈​ꦢꦺꦏ꧀ꦤꦺꦩꦼꦱ꧀ꦠꦶꦧꦏꦭ꧀ꦤꦸꦫꦸꦠ꧀ꦠꦶ​꧈​ꦗꦭꦂꦫꦤ꧀ꦱꦁꦏꦲꦏꦸ​꧉​ ²⁴ꦠꦸꦩꦼꦏꦤꦺ​ꦱꦲꦶꦏꦶ​ꦏꦺꦴꦮꦺ​ꦢꦸꦫꦸꦁ​ꦠꦲꦸ​ꦤꦼꦩ꧀ꦧꦸꦁ​ꦲꦥꦲꦥ​ꦔꦁꦒꦺꦴ​ꦗꦼꦤꦼꦁꦏꦸ​꧉​ꦥꦢ​ꦤꦼꦩ꧀ꦧꦸꦁꦔ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦱ꧀ꦠꦶꦧꦏꦭ꧀ꦔꦼꦏꦺꦏ꧀ꦏꦶ꧉​ꦏꦸꦮꦶ​ꦏꦼꦏꦉꦥ꧀ꦥꦤ꧀ꦤꦺ​ꦢꦺꦏ꧀ꦤꦺ꧈​ꦱꦸꦥꦪ​ꦏꦺꦴꦮꦺ​ꦧꦶꦱ​ꦧꦸꦔꦃ​ꦠꦼꦤꦤ꧀꧈​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦩꦼꦤꦁꦔꦏꦺꦗꦒꦠ꧀꧈​

²⁵꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:“ꦠꦼꦏꦤꦺ​ꦱꦲꦶꦏꦶ​ꦲꦼꦁꦒꦺꦴꦤ꧀ꦏꦸ​ꦩꦸꦭꦁꦔꦶꦏꦺꦴꦮꦺ​ꦤꦩꦸꦁ​ꦔꦁꦒꦺꦴ​ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦒꦩ꧀ꦧꦂ​꧈​ꦤꦁꦔꦶꦁ​ꦲꦺꦴꦫ​ꦊꦠ꧀ꦱꦸꦮꦶꦩꦼꦤꦺꦃ​ꦲꦏꦸ​ꦲꦺꦴꦫ​ꦲꦸꦱꦃꦩꦸꦭꦁꦔꦶꦔꦺꦴꦤꦺꦴ​ꦩꦼꦤꦺꦃ​꧉​ꦱꦼꦩ꧀ꦧꦫꦁ​ꦧꦧ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​ꦧꦏꦭ꧀ꦠꦏ꧀ꦲꦺꦴꦩꦺꦴꦁꦔꦏꦺꦧ꧀ꦭꦏ​ꦮꦲꦺ​꧉​ ²⁶ꦲꦶꦁ​ꦮꦪꦃ​ꦏꦸꦮꦶ​ꦲꦏꦸ​ꦲꦺꦴꦫ​ꦲꦸꦱꦃꦤꦼꦩ꧀ꦧꦸꦁꦔꦏꦺꦏꦺꦴꦮꦺ​꧈​ꦤꦁꦔꦶꦁ​ꦏꦺꦴꦮꦺ​ꦢꦺꦮꦺꦱꦶꦁ​ꦧꦏꦭ꧀ꦤꦼꦩ꧀ꦧꦸꦁ​ꦔꦁꦒꦺꦴ​ꦗꦼꦤꦼꦁꦏꦸ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​꧉​ ²⁷ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦠꦿꦺꦱ꧀ꦤꦩꦫꦁ​ꦏꦺꦴꦮꦺ​꧈​ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦠꦿꦺꦱ꧀ꦤꦩꦫꦁ​ꦲꦏꦸ​ꦭꦤ꧀ꦥꦢ​ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦺꦴꦁꦏꦺꦴꦤ꧀ꦲꦏꦸ​꧉​ ²⁸ꦥꦚ꧀ꦕꦺꦤ꧀ꦠꦼꦤꦤ꧀ ꦲꦏꦸ​ꦲꦶꦏꦶ​ꦠꦼꦏꦤꦺ​ꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​ꦩꦼꦢꦸꦤ꧀ꦤꦁꦗꦒꦠ꧀ꦏꦺꦤꦺ​꧉​ꦱꦲꦶꦏꦶ​ꦲꦏꦸ​ꦲꦉꦥ꧀ꦤꦶꦁꦒꦭ꧀ꦗꦒꦠ꧀ꦲꦶꦏꦶ​ꦧꦭꦶꦏ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​꧉​”

²⁹꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃ​ꦲꦩ꧀ꦧꦺꦴꦏ꧀ꦔꦺꦴꦤꦺꦴ​ꦠ​ꦒꦸꦱ꧀ꦠꦶ​!ꦱꦲꦶꦏꦶ​ꦏꦺꦴꦮꦺ​ꦱꦶꦁ​ꦩꦸꦭꦁꦔꦶꦲꦺꦴꦫ​ꦲꦔꦺꦭ꧀꧈​ ³⁰ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦔꦼꦂꦠꦶ​ꦱꦼꦩ꧀ꦧꦫꦁ​꧉​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦲꦸꦱꦃꦠꦏꦺꦴꦤ꧀ꦩꦫꦁ​ꦏꦺꦴꦮꦺ​ꦩꦼꦤꦺꦃ​꧉​ꦩꦸꦭꦤꦺ​ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦤꦺꦏ꧀ꦏꦺꦴꦮꦺ​ꦏꦸꦮꦶ​ꦠꦼꦏꦤꦺ​ꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​”

³¹꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦲꦥ​ꦏꦺꦴꦮꦺ​ꦥꦢ​ꦥꦽꦕꦪ​ꦠꦼꦤꦤ꧀ꦱꦲꦶꦏꦶ​?ꦲꦏꦸ​ꦲꦺꦴꦫ​ꦔꦤ꧀ꦢꦼꦭ꧀ꦤꦺꦏ꧀ꦏꦺꦴꦮꦺ​ꦤ꧀ꦢꦸꦮꦺꦥꦽꦕꦪ​ꦱꦶꦁ​ꦩꦤ꧀ꦠꦼꦥ꧀ꦠꦼꦤꦤ꧀꧈​ ³²ꦢꦶꦠꦶꦠꦺꦤ꧀ꦤꦶ​ꦠ​!ꦧꦏꦭ꧀ꦲꦺꦤꦺꦁꦮꦚ꧀ꦕꦶꦤꦺ​꧈​ꦲꦺꦴꦫ​ꦱꦸꦮꦶꦩꦼꦤꦺꦃ​꧈​ꦏꦺꦴꦮꦺ​ꦏꦧꦺꦃ​ꦧꦏꦭ꧀ꦧꦸꦪꦂ​ꦢꦺꦮꦺꦢꦺꦮꦺꦥꦫꦤ꧀ꦤꦺ​꧉​ꦲꦏꦸ​ꦧꦏꦭ꧀​ꦩ꧀ꦧꦺꦴꦏ꧀ꦠꦶꦁꦒꦭ꧀ꦢꦺꦮꦺ꧉​ꦱꦏ꧀ꦗꦤꦺ​ꦪ​ꦲꦺꦴꦫ​ꦢꦺꦮꦺ꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​ꦔꦚ꧀ꦕꦤꦶ​ꦲꦏꦸ​꧉​ ³³ꦏꦺꦴꦮꦺ​ꦠꦏ꧀ꦲꦺꦴꦩꦺꦴꦁꦔꦶꦏꦸꦮꦶ​ꦩꦲꦸ​ꦏꦧꦺꦃ​ꦱꦸꦥꦪ​ꦏꦺꦴꦮꦺ​ꦧꦶꦱ​ꦫꦸꦩꦏꦼꦠ꧀ꦩꦫꦁ​ꦲꦏꦸ​ꦭꦤ꧀​ꦤ꧀ꦢꦸꦮꦺꦤ꧀ꦤꦶ​ꦲꦪꦼꦩ꧀꧈​ꦤꦁ​ꦗꦒꦠ꧀ꦏꦺꦤꦺ​ꦏꦺꦴꦮꦺ​ꦧꦏꦭ꧀ꦏꦔꦺꦭ꧀ꦭꦤ꧀ꦠꦼꦤꦤ꧀ ꦲꦮꦶꦠ꧀ꦏꦺꦴꦮꦺ​ꦤꦸꦫꦸꦠ꧀ꦲꦏꦸ​꧈​ꦤꦁꦔꦶꦁ​ꦢꦶꦏꦸꦮꦠ꧀ꦠꦏꦺꦠꦼꦫꦸꦱ꧀ ꦲꦏꦸ​ꦮꦶꦱ꧀ꦩꦼꦤꦁꦔꦏꦺꦱꦼꦩ꧀ꦧꦫꦁ​ꦏꦸꦮꦶ​꧉​”

↑ ↑ ↑

← ꧇​꧑꧕꧇​

꧇​꧑꧗꧇​ →