ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/꧇꧑꧇ꦠꦶꦩꦺꦴꦠꦶꦪꦸꦱ꧀/5

ꦥꦱꦭ꧀ ꧇​꧑꧇​ ꧇​꧒꧇​ ꧇​꧓꧇​ ꧇​꧔꧇​ ꧇​꧕꧇​ ꧇​꧖꧇​

꧋ꦠꦸꦩꦶꦤ꧀ꦢꦏ꧀ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦥꦱꦩꦸꦮꦤ꧀꧈​

꧇​꧕꧇​ 1꧋ꦠꦶꦩꦺꦴꦠꦶꦪꦸꦱ꧀ ꦤꦺꦏ꧀ꦏꦺꦴꦮꦺ​ꦲꦉꦥ꧀​ꦩ꧀ꦧꦼꦤꦼꦂꦫꦏꦺꦱꦼꦢꦸꦭꦸꦂ​ꦭꦤꦁ​ꦱꦶꦁ​ꦠꦸꦮ​꧈​ꦲꦗ​ꦢꦶꦱꦼꦤꦺꦤ꧀ꦤꦶ꧈​ꦤꦁꦔꦶꦁ​ꦮꦺꦴꦁꦔꦺ​ꦢꦶꦲꦗꦺꦤ꧀ꦤꦶ​ꦏꦪ​ꦧꦥꦏ꧀ꦩꦸ​ꦢꦺꦮꦺꦭꦤ꧀ꦢꦶꦲꦼꦗꦺꦏ꧀ꦉꦩ꧀ꦧꦸꦏ꧀ꦏꦤ꧀꧈​ꦲꦸꦒ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦤꦁ​ꦱꦶꦁ​ꦲꦼꦤꦺꦴꦩ꧀ ꦢꦶꦲꦁꦒꦼꦥ꧀ꦏꦪ​ꦏꦏꦁ​ꦭꦤ꧀ꦲꦢꦶꦏ꧀ꦩꦸꦢꦺꦮꦺ꧉​ 2ꦱꦼꦢꦸꦭꦸꦂꦱꦼꦢꦸꦭꦸꦂ​ꦮꦺꦢꦺꦴꦏ꧀ꦱꦶꦁ​ꦮꦶꦱ꧀ꦠꦸꦮ​ꦢꦶꦲꦁꦒꦼꦥ꧀ꦏꦪ​ꦲꦶꦧꦸꦩꦸ​ꦢꦺꦮꦺꦭꦤ꧀ꦤꦺꦏ꧀ꦔꦺꦴꦩꦺꦴꦁꦔꦶꦱꦼꦢꦸꦭꦸꦂꦱꦼꦢꦸꦭꦸꦂ​ꦮꦺꦢꦺꦴꦏ꧀ꦱꦶꦁ​ꦲꦼꦤꦺꦴꦩ꧀ꦲꦁꦒꦼꦥ꧀ꦥꦏꦪ​ꦲꦢꦶꦏ꧀ꦩꦸꦢꦺꦮꦺ꧉​ꦤꦺꦏ꧀ꦔꦺꦴꦩꦺꦴꦁꦔꦶꦱꦶꦁ​ꦥꦤ꧀ꦠꦼꦱ꧀ꦭꦤ꧀ꦏꦫꦺꦴ​ꦲꦠꦶ​ꦱꦶꦁ​ꦉꦱꦶꦏ꧀꧈​

3꧋ꦲꦩ꧀ꦧꦺꦴꦏ꧀ꦫꦤ꧀ꦢꦱꦶꦁ​ꦧ꧀ꦭꦱ꧀ꦲꦺꦴꦫ​ꦤ꧀ꦢꦸꦮꦺꦏꦿꦤ꧀ꦢꦃꦏꦸꦢꦸ​ꦢꦶꦫꦸꦩꦠ꧀ꦠꦶ​ꦱꦶꦁ​ꦱꦏ꧀ꦩꦼꦱ꧀ꦠꦶꦤꦺ꧉​ 4ꦤꦁꦔꦶꦁ​ꦲꦩ꧀ꦧꦺꦴꦏ꧀ꦫꦤ꧀ꦢꦱꦶꦁ​ꦤ꧀ꦢꦸꦮꦺꦲꦤꦏ꧀ꦥꦸꦠꦸ​꧈​ꦲꦤꦏ꧀ꦥꦸꦠꦸꦤꦺ​ꦱꦶꦁ​ꦏꦸꦢꦸ​ꦔꦿꦸꦩꦠ꧀ꦠꦶ​ꦏꦁꦒꦺꦴ​ꦩ꧀ꦧꦊꦱ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦮꦺꦴꦁ​ꦠꦸꦮ​꧉​ꦏꦸꦮꦶ​ꦱꦶꦁ​ꦢꦶꦱꦼꦤꦼꦁꦔꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦏꦸꦮꦶ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​ꦠꦼꦤꦤ꧀꧈​ 5ꦭꦃ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦥꦚ꧀ꦕꦺꦤ꧀ꦫꦤ꧀ꦢꦠꦼꦤꦤ꧀ꦭꦤ꧀ꦲꦺꦴꦫ​ꦤ꧀ꦢꦸꦮꦺꦱꦥꦱꦥ​ꦧ꧀ꦭꦱ꧀ꦏꦸꦢꦸ​ꦚ꧀ꦗꦒꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦄꦮꦤ꧀ꦮꦼꦔꦶꦏꦸꦢꦸ​ꦠꦼꦩꦼꦤ꧀​ꦤ꧀ꦢꦼꦢꦺꦴꦔ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦚꦸꦮꦸꦤ꧀ꦥꦶꦠꦸꦭꦸꦁꦔꦤ꧀ꦤꦺ​꧉​ 6ꦤꦁꦔꦶꦁ​ꦫꦤ꧀ꦢꦱꦶꦁ​ꦲꦸꦫꦶꦥ꧀ꦥꦺꦩꦸꦁ​ꦤꦸꦫꦸꦠ꧀ꦠꦶ​ꦏꦼꦱꦼꦤꦼꦔꦤ꧀ꦤꦺ꧈​ꦫꦤ꧀ꦢꦏꦸꦮꦶ​ꦱꦏ꧀ꦗꦤꦺꦮꦶꦱ꧀ꦩꦠꦶ​꧈​ꦱꦼꦤꦗꦤ꧀ꦏꦺꦠꦺꦴꦏ꧀ꦲꦶꦗꦶꦏ꧀ꦲꦸꦫꦶꦥ꧀꧈​ 7ꦩꦸꦭꦤꦺ​ꦠꦶꦩꦺꦴꦠꦶꦪꦸꦱ꧀ ꦫꦤ꧀ꦢꦫꦤ꧀ꦢꦏꦸꦢꦸ​ꦲꦩ꧀ꦧꦺꦴꦏ꧀ꦮꦸꦭꦁꦔꦶꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​ꦩꦲꦸ​꧈​ꦱꦸꦥꦪ​ꦲꦺꦴꦫ​ꦏꦼꦤꦺꦁꦢꦶꦱꦭꦃꦲꦏꦺꦮꦺꦴꦁ​꧉​ 8ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦱꦶꦁ​ꦲꦺꦴꦫ​ꦒꦼꦊꦩ꧀ꦔꦿꦸꦩꦠ꧀ꦠꦶ​ꦱꦼꦢꦸꦭꦸꦂꦫꦺ​ꦢꦺꦮꦺ꧈​ꦩꦭꦃꦩꦭꦃꦱꦼꦢꦸꦭꦸꦂꦫꦺ​ꦢꦺꦮꦺꦠꦸꦁꦒꦭ꧀ꦱꦏ꧀ꦲꦺꦴꦩꦃ​꧈​ꦮꦺꦴꦁ​ꦏꦸꦮꦶ​ꦲꦺꦴꦫ​ꦢꦸꦤꦸꦁꦲꦥ​ꦠꦼꦒꦼꦱ꧀ꦱꦺ​ꦤꦸꦫꦸꦠ꧀ꦒꦸꦱ꧀ꦠꦶ​ꦭꦤ꧀​ꦏ꧀ꦭꦏꦸꦮꦤ꧀ꦤꦺ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦥꦫ​ꦫꦤ꧀ꦢ꧉​

9꧋ꦥꦱꦩꦸꦮꦤ꧀ꦏꦸꦢꦸꦔꦿꦸꦩꦠ꧀ꦠꦶꦩ꧀ꦧꦺꦴꦏ꧀ꦫꦤ꧀ꦢ꧈​ꦪꦏꦸꦮꦶ꧈​ꦫꦤ꧀ꦢꦱꦶꦁꦲꦸꦩꦸꦂꦫꦺꦱ꧀ꦮꦶꦢꦏ꧀ꦩꦸꦁꦒꦃꦭꦤ꧀ꦱꦶꦁꦩꦲꦸꦤꦺꦤꦩꦸꦁꦏꦮꦶꦤ꧀ꦱꦼꦥꦶꦱ꧀ꦱꦤ꧀ ꦮꦺꦴꦁꦱꦶꦁꦱꦼꦤꦼꦁꦔ꧀ꦒꦮꦺꦧꦼꦕꦶꦏ꧀꧈​ 10ꦩꦸꦭꦤꦺ​ꦮꦺꦴꦁ​ꦏꦧꦺꦃ​ꦏꦸꦢꦸ​ꦔꦫꦤ꧀ꦤꦶ​ꦤꦺꦏ꧀ꦢꦺꦏ꧀ꦤꦺꦏꦸꦮꦶ​ꦮꦺꦴꦁ​ꦲꦥꦶꦏ꧀꧈​ꦏꦸꦢꦸꦤꦺ​ꦮꦺꦴꦁ​ꦱꦶꦁ​ꦔꦿꦸꦩꦠ꧀ꦠꦶ​ꦭꦤ꧀ꦩꦸꦭꦁꦔꦶꦲꦤꦏ꧀ꦲꦤꦏ꧀ꦏꦺ​ꦱꦶꦁ​ꦲꦥꦶꦏ꧀ꦭꦤ꧀ꦲꦺꦴꦫ​ꦲꦺꦩꦤ꧀ꦔꦼꦏꦺꦏ꧀ꦏꦶꦲꦶꦤꦼꦥ꧀ꦥꦤ꧀ꦩꦫꦁ​ꦢꦪꦺꦴꦃꦲꦺ꧉​ꦏꦸꦢꦸꦤꦺ​ꦮꦺꦴꦁ​ꦱꦶꦁ​ꦱꦼꦤꦼꦁ​ꦔ꧀ꦭꦢꦺꦤ꧀ꦤꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦲꦶꦁ​ꦥꦼꦔꦤ꧀ꦢꦼꦭ꧀ꦭꦤ꧀ꦱꦶꦁ​ꦱꦼꦤꦼꦁ​ꦤꦸꦭꦸꦁꦔꦶ​ꦮꦺꦴꦁ​ꦏꦔꦺꦭ꧀ꦭꦤ꧀ ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦱꦏ꧀ꦮꦼꦂꦤꦤꦺ​ꦥꦼꦁꦒꦮꦺꦏꦸꦱꦶꦁ​ꦲꦥꦶꦏ꧀꧈​ꦲꦩ꧀ꦧꦺꦴꦏ꧀ꦫꦤ꧀ꦢꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦱꦶꦁ​ꦏꦸꦢꦸ​ꦢꦶꦠꦸꦭꦶꦱ꧀ꦗꦼꦤꦼꦁꦔꦺ​ꦤꦁꦧꦸꦏꦸ​꧉​

11꧋ꦤꦁꦔꦶꦁ​ꦫꦤ꧀ꦢꦫꦤ꧀ꦢꦱꦶꦁ​ꦲꦶꦗꦶꦏ꧀ꦲꦼꦤꦺꦴꦩ꧀ꦲꦗ​ꦢꦶꦠꦸꦭꦶꦱ꧀ꦗꦼꦤꦼꦁꦔꦺ​ꦤꦁꦧꦸꦏꦸ​꧈​ꦲꦮꦶꦠ꧀ꦤꦺꦏ꧀ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦤ꧀ꦢꦸꦮꦺꦱꦼꦤꦼꦁꦱꦼꦤꦼꦁꦔꦤ꧀ꦩꦼꦤꦺꦃ​ꦠꦼꦫꦸꦱ꧀ꦥꦢ​ꦤꦶꦁꦒꦭ꧀ꦒꦸꦱ꧀ꦠꦶ​ꦭꦤ꧀ꦥꦢ​ꦔ꧀ꦒꦺꦴꦭꦺꦏ꧀ꦧꦺꦴꦗꦺꦴ​ꦩꦼꦤꦺꦃ​꧉​ 12ꦢꦢꦶꦤꦺ​ꦠꦼꦫꦸꦱ꧀ꦥꦢ​ꦩꦼꦢꦺꦴꦠ꧀ꦗꦚ꧀ꦗꦶꦤꦺ​ꦩꦲꦸꦤꦺ​꧉​ 13ꦏꦫꦺꦴꦩꦼꦤꦺꦃ​꧈​ꦗꦭꦂꦫꦤ꧀ꦲꦺꦴꦫ​ꦤ꧀ꦢꦸꦮꦺꦥꦼꦁꦒꦮꦺꦏꦸꦲꦥꦲꦥ​꧈​ꦠꦼꦫꦸꦱ꧀ꦥꦢ​ꦩ꧀ꦊꦧꦸꦩꦼꦠꦸ​ꦠꦸꦫꦸꦠ꧀ꦲꦺꦴꦩꦃ​ꦔ꧀ꦒꦸꦤꦼꦩ꧀ꦮꦺꦴꦁ​ꦭꦶꦪ​ꦭꦤ꧀ꦩꦺꦭꦸꦩꦺꦭꦸ​ꦔꦿꦸꦱꦸꦃꦲꦶꦲꦸꦫꦶꦥ꧀ꦥꦺꦭꦶꦪꦤꦺ​꧉​ 14ꦩꦸꦭꦤꦺ​꧈​ꦏꦉꦥ꧀ꦏꦸ​ꦫꦤ꧀ꦢꦫꦤ꧀ꦢꦱꦶꦁ​ꦲꦶꦗꦶꦏ꧀ꦲꦼꦤꦺꦴꦩ꧀ꦧꦺꦤ꧀ꦥꦢ​ꦔ꧀ꦒꦺꦴꦭꦺꦏ꧀ꦧꦺꦴꦗꦺꦴ​ꦩꦼꦤꦺꦃ​ꦭꦤ꧀ꦲꦺꦴꦩꦃꦲꦺꦴꦩꦃ​ꦮꦲꦺ​꧈​ꦱꦸꦥꦪ​ꦥꦢ​ꦤ꧀ꦢꦸꦮꦺꦲꦤꦏ꧀ꦭꦤ꧀ꦧꦶꦱ​ꦔꦸꦫꦸꦱ꧀ꦱꦶ​ꦧꦿꦪꦠ꧀ꦠꦺ​ꦢꦺꦮꦺ꧉​ꦢꦢꦶꦤꦺ​ꦲꦺꦴꦫ​ꦔꦼꦏꦺꦏ꧀ꦏꦶꦗꦭꦂꦫꦤ꧀ꦩꦫꦁ​ꦩꦸꦁꦱꦸꦃꦲꦺ​ꦲꦮꦏ꧀ꦏꦺ​ꦢꦺꦮꦺꦏꦁꦒꦺꦴ​ꦚꦭꦃꦚꦭꦃꦲꦏꦺꦲꦮꦏ꧀ꦏꦺ​ꦢꦺꦮꦺ꧉​ 15ꦲꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦗꦭꦂꦫꦤ꧀ꦮꦶꦱ꧀ꦲꦺꦤꦺꦁꦫꦤ꧀ꦢꦫꦤ꧀ꦢꦱꦶꦁ​ꦤꦶꦁꦒꦭ꧀ꦒꦸꦱ꧀ꦠꦶ​ꦭꦤ꧀​ꦔ꧀ꦒꦸꦒꦸ​ꦩꦫꦁ​ꦱꦺꦠꦤ꧀꧈​ 16ꦤꦺꦏ꧀ꦲꦺꦤꦺꦁꦮꦺꦴꦁ​ꦏꦿꦶꦱ꧀ꦠꦼꦤ꧀ꦮꦺꦢꦺꦴꦏ꧀​ꦤ꧀ꦢꦸꦮꦺꦫꦤ꧀ꦢꦤꦁꦲꦺꦴꦩꦃ​꧈​ꦫꦤ꧀ꦢꦏꦸꦮꦶ​ꦏꦸꦢꦸ​ꦢꦶꦫꦸꦩꦠ꧀ꦠꦶ​꧈​ꦱꦸꦥꦪ​ꦲꦺꦴꦫ​ꦢꦢꦶ​ꦉꦁꦒꦤꦺꦥꦱꦩꦸꦮꦤ꧀꧈​ꦢꦢꦶꦤꦺ​ꦥꦱꦩꦸꦮꦤ꧀ꦧꦶꦱ​ꦔꦿꦸꦩꦠ꧀ꦠꦶ​ꦫꦤ꧀ꦢꦫꦤ꧀ꦢꦱꦶꦁ​ꦲꦺꦴꦫ​ꦤ꧀ꦢꦸꦮꦺꦱꦥꦱꦥ​꧉​

꧋ꦥꦫ​ꦥꦼꦤꦸꦤ꧀ꦠꦸꦤꦺ​ꦥꦱꦩꦸꦮꦤ꧀꧈​

17꧋ꦠꦶꦩꦺꦴꦠꦶꦪꦸꦱ꧀ ꦥꦫ​ꦥꦼꦤꦸꦤ꧀ꦠꦸꦤ꧀ꦱꦶꦁ​ꦧꦶꦱ​ꦤꦠ​ꦭꦤ꧀ꦤꦸꦤ꧀ꦠꦸꦤ꧀ꦥꦱꦩꦸꦮꦤ꧀ꦱꦶꦁ​ꦲꦥꦶꦏ꧀ꦏꦸꦢꦸ​ꦢꦶꦠꦩ꧀ꦧꦃꦲꦶ​ꦲꦸꦥꦃꦲꦺ꧈​ꦩꦭꦃꦩꦭꦃꦥꦼꦤꦸꦤ꧀ꦠꦸꦤ꧀ꦱꦶꦁ​ꦠꦸꦏꦁ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦭꦤ꧀ꦱꦶꦁ​ꦠꦸꦏꦁ​ꦩꦸꦭꦁꦔꦶ꧉​ꦏꦸꦮꦶ​ꦱꦏ꧀ꦩꦼꦱ꧀ꦠꦶꦤꦺ꧉​ 18ꦤꦁꦏꦶꦠꦧ꧀ꦱꦸꦕꦶ​ꦭꦲꦸꦠ꧀ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​ꦠ​:“ꦱꦥꦶ​ꦱꦶꦁ​ꦔꦶꦊꦱ꧀ꦲꦗ​ꦢꦶꦧꦶꦁꦏꦼꦩ꧀ꦕꦁꦏꦼꦩ꧀ꦩꦺ​꧉”ꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺꦔꦺꦴꦩꦺꦴꦁꦔꦺꦤꦺ​:“ꦮꦺꦴꦁ​ꦱꦶꦁ​ꦚꦩ꧀ꦧꦸꦠ꧀ꦠꦏꦸꦢꦸ​ꦤꦩ꧀ꦥ​ꦲꦸꦥꦃꦲꦺ꧉​” 19-20ꦤꦺꦏ꧀ꦲꦺꦤꦺꦁꦱꦼꦢꦸꦭꦸꦂ​ꦚꦭꦃꦚꦭꦃꦲꦏꦺꦱꦏ꧀ꦮꦶꦗꦶꦤꦺꦥꦼꦤꦸꦤ꧀ꦠꦸꦤ꧀ ꦲꦗ​ꦢꦶꦠꦩ꧀ꦥ​ꦤꦺꦏ꧀ꦲꦺꦴꦫ​ꦲꦺꦤꦺꦁꦱꦼꦏ꧀ꦱꦶꦤꦺ​ꦭꦺꦴꦫꦺꦴ​ꦲꦥ​ꦠꦼꦭꦸ​꧉​ꦤꦺꦏ꧀ꦥꦼꦤꦸꦤ꧀ꦠꦸꦤ꧀ꦏꦸꦮꦶ​ꦥꦚ꧀ꦕꦺꦤ꧀ꦱꦭꦃ​ꦠꦼꦤꦤ꧀ ꦮꦺꦴꦁꦔꦺ​ꦏꦸꦢꦸ​ꦲꦩ꧀ꦧꦺꦴꦏ꧀ꦧꦼꦤꦼꦂꦫꦏꦺꦤꦁꦔꦉꦥ꧀ꦥꦺ​ꦱꦼꦢꦸꦭꦸꦂ​ꦭꦶꦪꦭꦶꦪꦤꦺ​꧈​ꦱꦸꦥꦪ​ꦲꦺꦴꦫ​ꦥꦢ​ꦤꦶꦫꦸ​ꦏ꧀ꦭꦏꦸꦮꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ꦏꦸꦮꦶ​꧉​

21꧋ꦲꦏꦸ​ꦩꦿꦺꦤ꧀ꦠꦃ​ꦏꦺꦴꦮꦺ​ꦠꦼꦤꦤ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦥꦫ​ꦩꦸꦭꦺꦏꦠ꧀ꦱꦶꦁ​ꦱꦸꦕꦶ​:ꦲꦥ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​ꦩꦲꦸ​ꦏꦸꦢꦸ​ꦲꦩ꧀ꦧꦺꦴꦏ꧀ꦠꦤ꧀ꦢꦁꦔꦶ​ꦠꦼꦤꦤ꧀꧈​ꦤꦺꦏ꧀ꦲꦉꦥ꧀​ꦩ꧀ꦧꦼꦤꦼꦂꦫꦏꦺꦱꦼꦢꦸꦭꦸꦂ​꧈​ꦲꦗ​ꦤ꧀ꦢꦸꦮꦺꦤ꧀ꦤꦶ​ꦒꦒꦱ꧀ꦱꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ꦧꦧ꧀ꦱꦼꦢꦸꦭꦸꦂ​ꦏꦸꦮꦶ​ꦱꦏ꧀ꦢꦸꦫꦸꦁꦔꦺ꧉​ 22ꦲꦗ​ꦏꦼꦱꦸꦱꦸ​ꦤꦸꦩ꧀ꦥꦁꦔꦶ​ꦠꦔꦤ꧀ꦭꦤ꧀​ꦤ꧀ꦢꦺꦴꦔꦏ꧀ꦏꦏꦺꦱꦼꦢꦸꦭꦸꦂ​ꦢꦢꦶ​ꦥꦼꦤꦸꦤ꧀ꦠꦸꦤ꧀ꦲꦥ​ꦥꦼꦭꦢꦺꦤ꧀ꦤꦺ​ꦥꦱꦩꦸꦮꦤ꧀꧈​ꦩꦼꦤꦮ​ꦮꦲꦺ​ꦮꦺꦴꦁꦔꦺ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦭꦤ꧀ꦏꦺꦴꦮꦺ​ꦩꦼꦁꦏꦺꦴ​ꦏꦠꦸꦠ꧀ꦱꦭꦃ​꧉​ꦩꦸꦭꦤꦺ​꧈​ꦱꦶꦁ​ꦲꦠꦶꦲꦠꦶꦭꦤ꧀ꦲꦸꦫꦶꦥ꧀ꦩꦸ​ꦏꦸꦢꦸ​ꦱꦶꦁ​ꦉꦱꦶꦏ꧀꧈​

23꧋ꦏꦺꦴꦮꦺ​ꦲꦗꦼꦏ꧀ꦭꦫ​ꦮꦼꦠꦼꦁꦔꦺ​꧈​ꦩꦸꦭꦤꦺ​ꦪ​ꦢꦶꦲꦺꦴꦩ꧀ꦧꦺꦤ꧀ꦤꦶ​ꦲꦁꦒꦸꦂ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧈​ꦲꦗ​ꦤꦩꦸꦁ​ꦧꦚꦸ​ꦮꦲꦺ​꧉​

24꧋ꦲꦺꦤꦺꦁꦮꦺꦴꦁ​ꦱꦶꦁ​ꦢꦺꦴꦱꦤꦺ​ꦗꦤ꧀ꦏꦼꦠꦫ​ꦧꦔꦼꦠ꧀ ꦏꦼꦠꦫꦤꦺꦲꦺꦴꦫ​ꦲꦸꦱꦃꦔꦼꦤ꧀ꦠꦺꦤ꧀ꦤꦶ​ꦲꦩ꧀ꦧꦺꦱꦸꦏ꧀ ꦤꦺꦏ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦭꦶꦪꦤꦺ​ꦢꦺꦴꦱꦤꦺ​ꦱꦲꦶꦏꦶ​ꦢꦸꦫꦸꦁ​ꦏꦺꦠꦺꦴꦏ꧀ ꦏꦼꦠꦫꦤꦺꦲꦩ꧀ꦧꦺꦱꦸꦏ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 25ꦏꦪ​ꦔꦺꦴꦤꦺꦴ​ꦲꦸꦒ​꧈​ꦥꦼꦁꦒꦮꦺ​ꦧꦼꦕꦶꦏ꧀ꦲꦺꦴꦏꦺꦃꦲꦺꦴꦏꦺꦃꦲꦺꦱꦲꦶꦏꦶ​ꦮꦶꦱ꧀ꦏꦺꦠꦺꦴꦏ꧀꧈​ꦤꦁꦔꦶꦁ​ꦲꦸꦒ​ꦥꦼꦁꦒꦮꦺ​ꦧꦼꦕꦶꦏ꧀ꦱꦶꦁ​ꦢꦸꦫꦸꦁ​ꦏꦺꦠꦺꦴꦏ꧀ꦱꦲꦶꦏꦶ​꧈​ꦲꦩ꧀ꦧꦺꦱꦸꦏ꧀ꦏꦺꦠꦺꦴꦏ꧀꧈​

↑ ↑ ↑

← ꧇​꧔꧇​   ꧇​꧖꧇​ →