ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥꦩꦼꦢꦂꦫꦤ꧀

꧁꧋ꦥꦩꦼꦢꦂꦫꦤ꧀꧈​꧂

---

꧋ꦫꦱꦸꦭ꧀ꦪꦺꦴꦲꦤꦼꦱ꧀ꦤꦩ꧀ꦥꦥꦩꦼꦢꦂꦫꦤ꧀ꦱꦁꦏꦒꦸꦱ꧀ꦠꦶꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

꧇​꧑꧇​

¹꧋ꦧꦸꦏꦸ​ꦲꦶꦏꦶ​ꦲꦶꦱꦶꦤꦺ​ꦥꦩꦼꦢꦂꦫꦤ꧀ꦧꦧ꧀ꦥꦽꦏꦫꦥꦽꦏꦫ​ꦱꦶꦁ​ꦧꦏꦭ꧀​ꦏ꧀ꦭꦏꦺꦴꦤ꧀ ꦱꦶꦁ​ꦠꦼꦏꦤꦺ​ꦱꦁꦏꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦺꦴꦁꦏꦺꦴꦤ꧀ꦩꦫꦁ​ꦏꦿꦶꦱ꧀ꦡꦸꦱ꧀ ꦱꦸꦥꦪ​ꦤ꧀ꦢꦸꦢꦸꦃꦲꦏꦺꦩꦫꦁ​ꦥꦫ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦧ꧀ꦥꦽꦏꦫꦥꦽꦏꦫ​ꦏꦧꦺꦃ​ꦱꦶꦁ​ꦤ꧀ꦢꦁꦏꦸꦢꦸ​ꦏ꧀ꦭꦏꦺꦴꦤ꧀꧈​ꦏꦿꦶꦱ꧀ꦡꦸꦱ꧀ꦔꦺꦴꦁꦏꦺꦴꦤ꧀ꦩꦸꦭꦺꦏꦠ꧀​ꦤ꧀ꦢꦸꦢꦸꦃꦲꦏꦺꦱꦼꦩ꧀ꦧꦫꦁ​ꦩꦲꦸ​ꦩꦫꦁ​ꦫꦱꦸꦭ꧀ꦪꦺꦴꦲꦤꦼꦱ꧀꧈​ ²ꦫꦱꦸꦭ꧀ꦪꦺꦴꦲꦤꦼꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦱꦼꦩ꧀ꦧꦫꦁ​ꦱꦶꦁ​ꦢꦺꦏ꧀ꦤꦺꦮꦼꦫꦸꦃ​꧈​ꦕꦺꦴꦕꦺꦴꦏ꧀​ꦏꦫꦺꦴ​ꦱꦼꦩ꧀ꦧꦫꦁ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ³ꦧꦼꦗꦮꦺꦴꦁꦮꦺꦴꦁꦱꦶꦁꦥꦢꦩꦕꦏ꧀ꦏꦺꦭꦤ꧀ꦧꦼꦗꦱꦶꦁꦥꦢꦔꦿꦸꦔꦺꦴꦏ꧀ꦏꦏꦺꦭꦤ꧀​ꦔ꧀ꦭꦏꦺꦴꦤ꧀ꦤꦶꦠꦼꦩ꧀ꦧꦸꦁꦠꦼꦩ꧀ꦧꦸꦁꦱꦶꦁꦏꦼꦠꦸꦭꦶꦱ꧀ꦤꦁꦧꦸꦏꦸꦲꦶꦏꦶ꧈​ꦲꦮꦶꦠ꧀ꦲꦺꦴꦫꦱꦸꦮꦶꦩꦼꦤꦺꦃꦏꦧꦺꦃꦧꦏꦭ꧀​ꦏ꧀ꦭꦏꦺꦴꦤ꧀꧈​

꧋ꦏꦧꦂꦱ꧀ꦭꦩꦼꦠ꧀ꦩꦫꦁꦥꦱꦩꦸꦮꦤ꧀ꦥꦶꦠꦸ꧉​

^4-6꧋ꦲꦶꦏꦶ​ꦭꦪꦁ​ꦱꦁꦏꦔ꧀ꦒꦺꦴꦤ꧀ꦏꦸ​꧈​ꦪꦺꦴꦲꦤꦼꦱ꧀ ꦩꦫꦁ​ꦥꦱꦩꦸꦮꦤ꧀ꦥꦶꦠꦸ​ꦱꦶꦁ​ꦤꦁꦄꦱꦶꦪ​ꦕꦶꦭꦶꦏ꧀꧈​

꧋ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦱꦲꦶꦏꦶ​ꦲꦺꦤꦺꦁꦭꦤ꧀ꦱꦶꦁ​ꦩ꧀ꦧꦶꦪꦺꦤ꧀ꦮꦶꦱ꧀ꦲꦺꦤꦺꦁꦭꦤ꧀ꦱꦶꦁ​ꦧꦏꦭ꧀ꦠꦼꦏ​꧈​ꦩꦸꦒꦩꦸꦒ​ꦔꦼꦏꦺꦏ꧀ꦏꦤꦏꦧꦼꦕꦶꦏ꧀ꦏꦤ꧀ꦭꦤ꧀ꦏꦠꦼꦤ꧀ꦠꦽꦩ꧀ꦩꦤ꧀ꦩꦫꦁ​ꦏꦺꦴꦮꦺ​ꦏꦧꦺꦃ​꧉​ꦱꦼꦩꦺꦴꦤꦺꦴ​ꦲꦸꦒ​ꦫꦺꦴꦃ​ꦥꦶꦠꦸ​ꦱꦶꦁ​ꦤꦁꦔꦉꦥ꧀ꦥꦺ​ꦢꦩ꧀ꦥꦂꦫꦺꦭꦤ꧀ꦲꦸꦒ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦱꦼꦏ꧀ꦱꦶ​ꦱꦶꦁ​ꦏꦼꦤꦺꦁꦢꦶꦥꦽꦕꦪ​꧉​ꦢꦺꦏ꧀ꦤꦺꦱꦶꦁ​ꦠꦔꦶ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦱꦁꦏꦥꦠꦶ​ꦭꦤ꧀ꦢꦺꦏ꧀ꦤꦺꦚꦼꦏꦼꦭ꧀ꦱꦏ꧀ꦲꦺꦤꦺꦁꦔꦺꦥꦔ꧀ꦮꦱ​ꦤꦁꦧꦸꦩꦶ​ꦲꦶꦏꦶ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ ꦱꦶꦁ​ꦤꦿꦺꦱ꧀ꦤꦤ꧀ꦤꦶꦲꦮꦏ꧀ꦏꦺ​ꦢꦺꦮꦺꦱꦩ꧀ꦥꦺꦏ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦏꦁꦒꦺꦴ​ꦲꦩ꧀ꦧꦸꦮꦁ​ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧈​ꦮꦶꦱ꧀ꦔꦁꦏꦠ꧀ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦫꦠꦸꦫꦠꦸ​ꦭꦤ꧀ꦲꦶꦩꦩ꧀ꦲꦶꦩꦩ꧀ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺ꧉​ꦪ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦒꦼꦢꦺꦢꦺꦮꦺꦏ꧀ꦮꦱꦤꦺ​ꦭꦤ꧀ꦱꦶꦁ​ꦏꦸꦢꦸ​ꦢꦶꦥꦸꦗꦶꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦄꦩꦺꦤ꧀꧈​

⁷꧋ꦠꦶꦠꦺꦤ꧀ꦤꦶ!ꦢꦺꦏ꧀ꦤꦺꦧꦏꦭ꧀ꦠꦼꦏꦤꦁꦩꦺꦒꦭꦤ꧀ꦏꦧꦺꦃꦮꦺꦴꦁꦧꦏꦭ꧀ꦮꦼꦫꦸꦃꦢꦺꦏ꧀ꦤꦺ꧈​ꦲꦸꦒꦮꦺꦴꦁꦱꦶꦁꦚ꧀ꦗꦺꦴꦗꦺꦴꦃꦢꦺꦏ꧀ꦤꦺ꧉​ꦏꦧꦺꦃꦧꦁꦱꦤꦁꦧꦸꦩꦶꦧꦏꦭ꧀ꦥꦢꦱꦩ꧀ꦧꦠ꧀ꦠꦔꦶꦱ꧀ꦱꦤ꧀ ꦗꦭꦂꦫꦤ꧀ꦱꦁꦏꦢꦺꦏ꧀ꦤꦺ꧉​ꦪꦥꦚ꧀ꦕꦺꦤ꧀ꦔꦺꦴꦤꦺꦴꦠꦼꦤꦤ꧀꧈​ꦄꦩꦺꦤ꧀!

⁸꧋“ꦲꦏꦸ​ꦲꦶꦏꦶ​ꦄꦭ꧀ꦥ꦳ꦃꦭꦤ꧀ꦎꦩꦺꦏꦃ”꧌ꦮꦶꦮꦶꦠ꧀ꦠꦤ꧀ꦤꦺ​ꦭꦤ꧀ꦱꦶꦁ​ꦥꦼꦤꦸꦠꦸꦥ꧀ꦥꦺ)ꦪꦏꦸꦮꦶ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧈​ꦱꦶꦁ​ꦱꦲꦶꦏꦶ​ꦭꦤ꧀​ꦩ꧀ꦧꦶꦪꦺꦤ꧀ꦮꦶꦱ꧀ꦲꦺꦤꦺꦁꦭꦤ꧀ꦱꦶꦁ​ꦧꦏꦭ꧀ꦠꦼꦏ​꧉​

꧋ꦫꦱꦸꦭ꧀ꦪꦺꦴꦲꦤꦼꦱ꧀ꦤꦩ꧀ꦥ​ꦥꦩꦼꦢꦂꦫꦤ꧀ꦤꦁꦥꦸꦭꦥꦠ꧀ꦩꦺꦴꦱ꧀꧈​

⁹꧋ꦲꦏꦸ​ꦲꦶꦏꦶ​ꦪꦺꦴꦲꦤꦼꦱ꧀ ꦱꦼꦢꦸꦭꦸꦂꦩꦸꦭꦤ꧀ꦏꦚ꧀ꦕꦩꦸ​ꦲꦶꦁ​ꦱꦏ꧀ꦗꦼꦫꦺꦴꦤꦺꦏꦱꦸꦱꦃꦲꦤ꧀꧈​ꦲꦏꦸ​ꦠꦸꦁꦒꦭ꧀ꦭꦺ​ꦏꦫꦺꦴ​ꦏꦺꦴꦮꦺ​ꦏꦧꦺꦃ​ꦢꦢꦶ​ꦮꦂꦒꦤꦺ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦏꦸ​ꦪ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦲꦼꦁꦒꦺꦴꦤ꧀ꦏꦸ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦲꦏꦸ​ꦢꦶꦧꦸꦮꦁ​ꦤꦁꦥꦸꦭꦥꦠ꧀ꦩꦺꦴꦱ꧀ ꦗꦭꦂꦫꦤ꧀ꦲꦏꦸ​ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦔꦺꦴꦩꦺꦴꦁꦔꦏꦺꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀꧈​ ¹⁰ꦲꦶꦁ​ꦢꦶꦤ​ꦩꦶꦁꦒꦸ​ꦲꦏꦸ​ꦢꦶꦏ꧀ꦮꦱꦤꦶ​ꦏꦫꦺꦴ​ꦫꦺꦴꦃ​ꦱꦸꦕꦶ​꧉​ꦲꦏꦸ​ꦠꦼꦫꦸꦱ꧀ꦏꦿꦸꦔꦸ​ꦱ꧀ꦮꦫ​ꦧꦤ꧀ꦠꦼꦂ​ꦤꦁꦲꦩ꧀ꦧꦸꦫꦶꦏꦸ​꧈​ꦏꦪ​ꦱ꧀ꦮꦫꦤꦺ​ꦠꦿꦺꦴꦩ꧀ꦥꦺꦠ꧀꧈​ ¹¹ꦱ꧀ꦮꦫ​ꦏꦸꦮꦶ​ꦲꦸꦤꦶꦤꦺ​ꦔꦺꦤꦺ​:“ꦲꦥ​ꦱꦶꦁ​ꦏꦺꦴꦮꦺ​ꦮꦼꦫꦸꦃ​ꦏꦸꦮꦶ​ꦢꦶꦠꦸꦭꦶꦱ꧀ꦤꦁꦧꦸꦏꦸ​꧈​ꦠꦼꦫꦸꦱ꧀ꦢꦶꦏꦶꦫꦶꦩ꧀ꦩꦏꦺꦩꦫꦁ​ꦥꦱꦩꦸꦮꦤ꧀ꦥꦶꦠꦸ​꧈​ꦪꦏꦸꦮꦶ​ꦥꦱꦩꦸꦮꦤ꧀ꦤꦁꦌꦥ꦳ꦺꦱꦼ꧈​ꦱ꧀ꦩꦶꦂꦤ​꧈​ꦦꦺꦂꦏꦩꦸꦱ꧀ ꦠꦶꦪꦠꦶꦫ​꧈​ꦱꦂꦢꦶꦱ꧀ ꦥ꦳ꦶꦭꦢꦺꦭ꧀ꦥ꦳ꦶꦪ​ꦭꦤ꧀ꦥꦱꦩꦸꦮꦤ꧀ꦤꦁꦭꦎꦢꦶꦱꦺꦪ꧉​”

^12-13꧋ꦲꦏꦸ​ꦠꦼꦫꦸꦱ꧀ꦤꦺꦴꦭꦺꦃ​ꦲꦩ꧀ꦧꦸꦫꦶ​꧈​ꦲꦮꦶꦠ꧀ꦏꦼꦥꦺꦔꦶꦤ꧀ꦮꦼꦫꦸꦃ​ꦱꦥ​ꦱꦶꦁ​ꦔꦺꦴꦩꦺꦴꦁꦩꦫꦁ​ꦲꦏꦸ​ꦏꦸꦮꦶ​꧉​ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦮꦢꦃꦢꦶꦪꦤ꧀ꦥꦶꦠꦸ​ꦒꦮꦺꦪꦤ꧀ꦲꦼꦩꦱ꧀꧈​ꦤꦁꦠꦼꦔꦃꦠꦼꦔꦃꦲꦺ​ꦮꦢꦃꦢꦶꦪꦤ꧀ꦥꦶꦠꦸ​ꦩꦲꦸ​ꦲꦺꦤꦺꦁꦮꦺꦴꦁ​ꦔꦢꦼꦏ꧀ ꦏꦪ​ꦲꦤꦏ꧀ꦏꦺ​ꦩꦤꦸꦁꦱ​꧉​ꦮꦺꦴꦁꦔꦺ​ꦔꦁꦒꦺꦴ​ꦱꦭꦶꦤ꧀ꦱꦶꦁ​ ꦢꦮꦤꦺ​ꦱꦩ꧀ꦥꦺꦏ꧀ꦠꦼꦏꦤ꧀ꦱꦶꦏꦶꦭ꧀ꦭꦺ​ꦭꦤ꧀ꦢꦢꦤꦺꦔꦁꦒꦺꦴ​ꦱꦧꦸꦏ꧀ꦲꦼꦩꦱ꧀꧈​ ¹⁴ꦫꦩ꧀ꦧꦸꦠ꧀ꦠꦺ​ꦥꦸꦠꦶꦃ​ꦏꦪ​ꦮꦸꦭꦸ​ꦮꦼꦢꦸꦱ꧀ ꦥꦸꦠꦶꦃ​ꦠꦼꦤꦤ꧀ꦏꦪ​ꦩꦺꦴꦫꦶ​ꦭꦤ꧀ꦩꦿꦶꦥꦠ꧀ꦠꦺ​ꦩꦸꦫꦸꦥ꧀ꦏꦪ​ꦒꦼꦤꦶ​꧉​ ¹⁵ꦱꦶꦏꦶꦭ꧀ꦭꦺ​ꦱꦼꦩ꧀ꦭꦺꦴꦫꦺꦴꦠ꧀ꦏꦪ​ꦧꦿꦺꦴꦤ꧀ꦢꦶꦲꦺꦴꦧꦺꦴꦁ​ꦱꦩ꧀ꦥꦺꦏ꧀ꦲꦗꦺꦂ​ꦏꦲꦺ​ꦭꦤ꧀ꦱ꧀ꦮꦫꦤꦺ​ꦧꦤ꧀ꦠꦼꦂꦫꦺ​ꦏꦪ​ꦧꦚꦸ​ꦒꦸꦩꦿꦺꦴꦗꦺꦴꦏ꧀꧈​ ¹⁶ꦠꦔꦤ꧀ꦤꦺ​ꦠꦼꦔꦼꦤ꧀ꦚꦼꦏꦼꦭ꧀ꦭꦶꦤ꧀ꦠꦁ​ꦥꦶꦠꦸ​꧉​ꦱꦁꦏꦕꦁꦏꦼꦩ꧀ꦩꦺ​ꦩꦼꦠꦸ​ꦥꦼꦢꦁꦔꦺꦱꦶꦁ​ꦭꦤꦁꦏꦶꦮꦠꦼꦔꦼꦤ꧀ꦭꦤ꧀ꦫꦲꦶꦤꦺ​ꦱꦼꦩ꧀ꦭꦺꦴꦫꦺꦴꦠ꧀ꦏꦪ​ꦱꦽꦔꦺꦔꦺ​ꦲꦶꦁ​ꦮꦪꦃ​ꦲꦮꦤ꧀꧈​ ¹⁷ꦏꦢꦸꦁ​ꦲꦏꦸ​ꦮꦼꦫꦸꦃ​ꦮꦺꦴꦁꦔꦺ​ꦩꦲꦸ​꧈​ꦲꦏꦸ​ꦠꦼꦫꦸꦱ꧀ꦠꦶꦧ​ꦏꦪ​ꦮꦺꦴꦁ​ꦩꦠꦶ​ꦤꦁꦔꦉꦥ꧀ꦥꦺ​꧉​ꦤꦁꦔꦶꦁ​ꦮꦺꦴꦁꦔꦺ​ꦤꦸꦩ꧀ꦥꦁꦔꦏꦺꦠꦔꦤ꧀ꦤꦺ​ꦠꦼꦔꦼꦤ꧀ꦲꦶꦁ​ꦲꦏꦸ​ꦏꦫꦺꦴ​ꦔꦺꦴꦩꦺꦴꦁ:“ꦲꦗ​ꦮꦼꦢꦶ​!ꦲꦏꦸ​ꦮꦶꦮꦶꦠ꧀ꦠꦤ꧀ꦤꦺ​ꦭꦤ꧀ꦥꦼꦤꦸꦠꦸꦥ꧀ꦥꦺ꧉​ ¹⁸ꦲꦏꦸ​ꦱꦶꦁ​ꦲꦸꦫꦶꦥ꧀꧈​ꦲꦏꦸ​ꦮꦶꦱ꧀ꦩꦠꦶ​꧈​ꦤꦁꦔꦶꦁ​ꦱꦲꦶꦏꦶ​ꦲꦏꦸ​ꦲꦸꦫꦶꦥ꧀ꦱ꧀ꦭꦮꦱ꧀ꦱꦺ꧉​ꦲꦏꦸ​ꦱꦶꦁ​ꦔ꧀ꦮꦱꦤꦶ​ꦥꦠꦶ​ꦭꦤ꧀ꦗꦒꦠ꧀ꦠꦺꦮꦺꦴꦁ​ꦩꦠꦶ​꧉​ ¹⁹ꦩꦸꦭꦤꦺ​꧈​ꦲꦥ​ꦱꦶꦁ​ꦏꦺꦴꦮꦺ​ꦮꦼꦫꦸꦃ​ꦏꦸꦮꦶ​ꦢꦶꦠꦸꦭꦶꦱ꧀꧈​ꦢꦶꦠꦸꦭꦶꦱ꧀ꦥꦽꦏꦫꦥꦽꦏꦫ​ꦱꦶꦁ​ꦏꦺꦴꦮꦺ​ꦮꦼꦫꦸꦃ​ꦱꦲꦶꦏꦶ​ꦭꦤ꧀ꦲꦸꦒ​ꦱꦶꦁ​ꦧꦏꦭ꧀​ꦏ꧀ꦭꦏꦺꦴꦤ꧀꧈​ ²⁰ꦭꦶꦤ꧀ꦠꦁꦥꦶꦠꦸꦱꦶꦁꦤꦁꦠꦔꦤ꧀ꦏꦸꦠꦼꦔꦼꦤ꧀ꦭꦤ꧀ꦲꦸꦒꦮꦢꦃꦢꦶꦪꦤ꧀ꦲꦼꦩꦱ꧀ꦥꦶꦠꦸꦲꦶꦏꦶꦲꦺꦤꦺꦁꦠꦼꦒꦼꦱ꧀ꦱꦺ꧈​ꦪꦏꦸꦮꦶ:ꦭꦶꦤ꧀ꦠꦁꦥꦶꦠꦸꦏꦸꦮꦶꦥꦫꦩꦸꦭꦺꦏꦠ꧀ꦠꦺꦥꦱꦩꦸꦮꦤ꧀ꦥꦶꦠꦸꦭꦤ꧀ꦮꦢꦃꦢꦶꦪꦤ꧀ꦲꦼꦩꦱ꧀ꦥꦶꦠꦸꦏꦸꦮꦶꦪꦥꦱꦩꦸꦮꦤ꧀ꦱꦶꦁꦥꦶꦠꦸ꧉​”

↑ ↑ ↑

꧋ꦠꦼꦩ꧀ꦧꦸꦁꦏꦁꦒꦺꦴꦥꦱꦩꦸꦮꦤ꧀ꦌꦥ꦳ꦺꦱꦼ꧉​

꧇​꧒꧇​ ¹꧋“ꦤꦸꦭꦶꦱ꧀ꦱ​ꦔꦺꦤꦺ​ꦩꦫꦁ​ꦩꦸꦭꦺꦏꦠ꧀ꦠꦺꦥꦱꦩꦸꦮꦤ꧀ꦌꦥ꦳ꦺꦱꦼ:ꦮꦺꦴꦁ​ꦱꦶꦁ​ꦚꦼꦏꦼꦭ꧀ꦭꦶꦤ꧀ꦠꦁ​ꦥꦶꦠꦸ​ꦤꦁꦠꦔꦤ꧀ꦤꦺ​ꦠꦼꦔꦼꦤ꧀ꦭꦤ꧀ꦱꦶꦁ​ꦩ꧀ꦭꦏꦸ​ꦤꦁꦠꦼꦔꦃꦲꦺ​ꦮꦢꦃꦢꦶꦪꦤ꧀ꦲꦼꦩꦱ꧀ꦥꦶꦠꦸ​ꦔꦺꦴꦩꦺꦴꦁꦔꦺꦤꦺ​: ²ꦲꦏꦸ​ꦔꦼꦂꦠꦶ​ꦱꦏ꧀ꦏꦺꦃꦲꦺꦥꦼꦁꦒꦮꦺꦩꦸ​꧈​ꦥꦼꦭꦧꦸꦃꦩꦸꦭꦤ꧀ꦏꦠꦼꦩꦼꦤ꧀ꦤꦤ꧀ꦩꦸ​꧉​ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦧꦶꦱ​ꦕꦼꦕꦩ꧀ꦥꦸꦂꦫꦤ꧀​ꦏꦫꦺꦴ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ꦮꦺꦴꦁꦮꦺꦴꦁ​ꦱꦶꦁ​ꦔꦏꦸꦤꦺ​ꦫꦱꦸꦭ꧀ ꦤꦁꦔꦶꦁ​ꦮꦸꦗꦸꦠ꧀ꦠꦺꦢꦸꦢꦸ​꧈​ꦥꦢ​ꦲꦩ꧀ꦧꦺꦴꦏ꧀ꦠꦶꦠꦶꦥꦿꦶꦏ꧀ꦱ꧉​ꦗꦼꦧꦸꦭ꧀ꦭꦺ​ꦮꦺꦴꦁ​ꦱꦶꦁ​ꦔꦥꦸꦱ꧀ꦱꦶ​꧉​ ³ꦲꦏꦸ​ꦔꦼꦂꦠꦶ​ꦲꦼꦁꦒꦺꦴꦤ꧀ꦩꦸ​ꦱꦧꦂ​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀​ꦔ꧀ꦭꦧꦸꦃꦲꦶ​ꦲꦏꦸ​꧈​ꦱꦼꦤꦗꦤ꧀ꦲꦧꦺꦴꦠ꧀ꦠꦺ​ꦏꦪ​ꦔꦥ​ꦏꦺꦴꦮꦺ​ꦲꦺꦴꦫ​ꦱꦼꦩ꧀ꦥ꧀ꦭꦏ꧀꧈​ ⁴ꦤꦁꦔꦶꦁ​ꦲꦺꦤꦺꦁꦥꦽꦏꦫ​ꦱꦶꦗꦶ​ꦲꦏꦸ​ꦲꦺꦴꦫ​ꦱꦼꦤꦼꦁ​꧈​ꦪꦏꦸꦮꦶ​꧈​ꦏꦺꦴꦮꦺ​ꦮꦶꦱ꧀ꦲꦺꦴꦫ​ꦠꦿꦺꦱ꧀ꦤꦩꦼꦤꦺꦃ​ꦩꦫꦁ​ꦲꦏꦸ​ꦏꦪ​ꦤ꧀ꦢꦶꦱꦶꦏ꧀​ꦤ꧀ꦢꦶꦱꦶꦏ꧀ꦏꦺ꧉​ ⁵ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦔꦿꦸꦩꦁꦱꦤꦶ​ꦠꦼꦤꦤ꧀ꦱꦼꦥꦶꦫ​ꦢꦸꦮꦸꦂꦫꦺꦠꦶꦧꦩꦸ꧉​ꦥꦢ​ꦲꦩ꧀ꦧꦭꦶꦏ꧀ꦏꦭꦤ꧀ꦥꦢ​ꦭꦏꦺꦴꦤ꧀ꦤꦤ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦩꦲꦸꦩꦲꦸꦤꦺ꧉​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦔ꧀ꦭꦏꦺꦴꦤ꧀ꦤꦶ​ꦲꦸꦫꦶꦥ꧀ꦲꦚꦂ​꧈​ꦲꦏꦸ​ꦧꦏꦭ꧀ꦠꦼꦏ​ꦭꦤ꧀ꦧꦏꦭ꧀​ꦚ꧀ꦗꦶꦏꦸꦏ꧀ꦮꦢꦃꦢꦶꦪꦤ꧀ꦤꦺꦱꦁꦏꦥꦁꦒꦺꦴꦤ꧀ꦤꦤ꧀ꦤꦺ​꧉​ ⁶ꦤꦁꦔꦶꦁ​ꦪ​ꦲꦺꦤꦺꦁꦥꦽꦏꦫ​ꦱꦶꦗꦶ​ꦱꦶꦁ​ꦲꦥꦶꦏ꧀ ꦪꦏꦸꦮꦶ​꧈​ꦲꦼꦁꦒꦺꦴꦤ꧀ꦩꦸ​ꦥꦢ​ꦮꦲꦺ​ꦏꦫꦺꦴ​ꦲꦏꦸ​ꦱꦼꦔꦶꦠ꧀ꦩꦫꦁ​ꦥꦽꦏꦫꦥꦽꦏꦫ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦩꦺꦭꦸ​ꦟꦶꦏꦺꦴꦭꦆꦱ꧀꧈​

⁷꧋“ꦱꦥ​ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧈​ꦢꦶꦫꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦫꦺꦴꦃ​ꦱꦸꦕꦶ​ꦩꦫꦁ​ꦥꦱꦩꦸꦮꦤ꧀ꦥꦱꦩꦸꦮꦤ꧀꧈​

꧋“ꦱꦥ​ꦱꦶꦁ​ꦩꦼꦤꦁ​ꦧꦏꦭ꧀ꦠꦏ꧀ꦏꦺꦏ꧀ꦏꦶꦩꦁꦔꦤ꧀ꦮꦺꦴꦃꦲꦺ​ꦮꦶꦠ꧀ꦥꦔꦸꦫꦶꦥ꧀ꦥꦤ꧀ꦱꦶꦁ​ꦤꦁꦏꦼꦧꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦠꦼꦩ꧀ꦧꦸꦁ​ꦏꦁꦒꦺꦴ​ꦥꦱꦩꦸꦮꦤ꧀ꦱ꧀ꦩꦶꦂꦤ​꧉​

⁸꧋“ꦤꦸꦭꦶꦱ꧀ꦱ​ꦔꦺꦤꦺ​ꦩꦫꦁ​ꦩꦸꦭꦺꦏꦠ꧀ꦠꦺꦥꦱꦩꦸꦮꦤ꧀ꦱ꧀ꦩꦶꦂꦤ​:ꦲꦶꦏꦶ​ꦠꦼꦩ꧀ꦧꦸꦁꦔꦺ​ꦮꦶꦮꦶꦠ꧀ꦠꦤ꧀ꦤꦺ​ꦭꦤ꧀ꦥꦼꦤꦸꦠꦸꦥ꧀ꦥꦺ꧈​ꦱꦶꦁ​ꦮꦶꦱ꧀ꦩꦠꦶ​ꦭꦤ꧀ꦲꦸꦫꦶꦥ꧀ꦩꦼꦤꦺꦃ​: ⁹ꦲꦏꦸ​ꦔꦼꦂꦠꦶ​ꦏꦼꦱꦸꦱꦲꦤ꧀ꦩꦸ꧉​ꦏꦺꦴꦮꦺ​ꦩ꧀ꦭꦫꦠ꧀ ꦤꦁꦔꦶꦁ​ꦱꦏ꧀ꦗꦤꦺꦏꦺꦴꦮꦺ​ꦱꦸꦒꦶꦃ​꧉​ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦢꦶꦲꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦔꦏꦸꦤꦺ​ꦮꦺꦴꦁ​ꦙꦸ꧈​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦺꦴꦫ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦧꦭꦤꦺ​ꦱꦺꦠꦤ꧀꧈​ ¹⁰ꦏꦺꦴꦮꦺ​ꦲꦗ​ꦮꦼꦢꦶ​ꦏꦫꦺꦴ​ꦏꦱꦁꦱꦫꦤ꧀ꦱꦶꦁ​ꦱꦼꦢꦶꦭꦸꦠ꧀ꦩꦼꦤꦺꦃ​ꦧꦏꦭ꧀ꦤꦼꦏꦤꦶ​ꦏꦺꦴꦮꦺ​꧉​ꦱꦺꦠꦤ꧀​ꦧꦏꦭ꧀​ꦔ꧀ꦊꦧꦺꦴꦏ꧀ꦏꦏꦺꦮꦺꦴꦁ​ꦱꦶꦗꦶꦭꦺꦴꦫꦺꦴꦱꦁꦏꦥꦱꦩꦸꦮꦤ꧀ꦩꦸꦤꦁꦱꦼꦠꦿꦥꦤ꧀꧈​ꦏꦸꦮꦶ​ꦏꦁꦒꦺꦴ​ꦚꦺꦴꦧ​ꦏꦺꦴꦮꦺ​꧉​ꦏꦺꦴꦮꦺ​ꦧꦏꦭ꧀ꦤꦤ꧀ꦢꦁꦏꦱꦸꦱꦃꦲꦤ꧀ꦱꦼꦥꦸꦭꦸꦃ​ꦢꦶꦤ​ꦱꦸꦮꦺꦤꦺ​꧉​ꦤꦁꦔꦶꦁ​ꦥꦢ​ꦩꦤ꧀ꦠꦼꦥ꧀ꦥ​ꦠꦼꦫꦸꦱ꧀ꦲꦼꦁꦒꦺꦴꦤ꧀ꦩꦸ​ꦤꦸꦫꦸꦠ꧀ꦲꦏꦸ​꧈​ꦱꦼꦤꦗꦤ꧀ꦏꦸꦢꦸ​ꦭꦧꦸꦃ​ꦥꦠꦶ​꧉​ꦏꦺꦴꦮꦺ​ꦧꦏꦭ꧀ꦠꦏ꧀ꦲꦸꦥꦃꦲꦶꦲꦸꦫꦶꦥ꧀ꦱꦶꦁ​ꦢꦢꦶ​ꦩꦏꦸꦠꦤ꧀ꦤꦺꦏꦩꦼꦤꦔꦤ꧀ꦩꦸ꧉​

¹¹꧋“ꦱꦥ​ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧈​ꦢꦶꦫꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦫꦺꦴꦃ​ꦱꦸꦕꦶ​ꦩꦫꦁ​ꦥꦱꦩꦸꦮꦤ꧀ꦥꦱꦩꦸꦮꦤ꧀꧈​

꧋“ꦱꦥ​ꦱꦶꦁ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦲꦺꦴꦫ​ꦧꦏꦭ꧀ꦔꦭꦩ꧀ꦩꦶ​ꦥꦠꦶ​ꦏꦥꦶꦤ꧀ꦢꦺꦴ꧉​

꧋ꦠꦼꦩ꧀ꦧꦸꦁ​ꦏꦁꦒꦺꦴ​ꦥꦱꦩꦸꦮꦤ꧀ꦦꦺꦂꦏꦩꦸꦱ꧀꧈​

¹²꧋“ꦤꦸꦭꦶꦱ꧀ꦱ​ꦔꦺꦤꦺ​ꦩꦫꦁ​ꦩꦸꦭꦺꦏꦠ꧀ꦠꦺꦥꦱꦩꦸꦮꦤ꧀ꦦꦺꦂꦏꦩꦸꦱ꧀:ꦲꦶꦏꦶ​ꦠꦼꦩ꧀ꦧꦸꦁꦔꦺ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦥꦼꦢꦁꦭꦤꦁꦏꦶꦮꦠꦼꦔꦼꦤ꧀: ¹³ꦲꦏꦸ​ꦔꦼꦂꦠꦶ​ꦥꦁꦒꦺꦴꦤ꧀ꦤꦤ꧀ꦩꦸ​꧉​ꦏꦺꦴꦮꦺ​ꦩꦁꦒꦺꦴꦤ꧀ꦤꦁꦏꦸꦠꦱꦶꦁ​ꦢꦶꦏ꧀ꦮꦱꦤꦶ​ꦏꦫꦺꦴ​ꦱꦺꦠꦤ꧀꧈​ꦏꦺꦴꦮꦺ​ꦥꦢ​ꦩꦤ꧀ꦠꦼꦥ꧀ꦲꦼꦁꦒꦺꦴꦤ꧀ꦩꦸ​ꦤꦸꦫꦸꦠ꧀ꦲꦏꦸ​꧉​ꦩꦭꦃ​ꦢꦺꦴꦁꦔꦺꦄꦤ꧀ꦠꦶꦥꦱ꧀ ꦱꦼꦏ꧀ꦱꦶꦏꦸ​ꦱꦶꦁ​ꦩꦤ꧀ꦠꦼꦥ꧀ ꦢꦶꦥꦠꦺꦤ꧀ꦤꦶ​ꦤꦁꦥꦁꦒꦺꦴꦤ꧀ꦤꦤ꧀ꦤꦺ​ꦱꦺꦠꦤ꧀ ꦏꦺꦴꦮꦺ​ꦲꦺꦴꦫ​ꦥꦢ​ꦚꦺꦭꦏ꧀ꦏꦶ​ꦥꦼꦔꦤ꧀ꦢꦼꦭ꧀ꦩꦸ​ꦩꦫꦁ​ꦲꦏꦸ​꧉​ ¹⁴ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦲꦺꦤꦺꦁꦥꦽꦏꦫ​ꦱꦶꦗꦶꦭꦺꦴꦫꦺꦴꦤꦁꦥꦱꦩꦸꦮꦤ꧀ꦩꦸꦱꦶꦁ​ꦲꦺꦴꦫ​ꦠꦏ꧀ꦱꦼꦤꦼꦁꦔꦶ​꧉​ꦪꦏꦸꦮꦶ​꧈​ꦤꦁꦠꦼꦔꦃꦩꦸ​ꦲꦺꦤꦺꦁꦮꦺꦴꦁ​ꦱꦶꦗꦶꦭꦺꦴꦫꦺꦴꦱꦶꦁ​ꦤꦸꦫꦸꦠ꧀ꦥꦶꦮꦸꦭꦁꦔꦺ​ꦧꦶꦭꦺꦪꦩ꧀꧈​ꦧꦶꦭꦺꦪꦩ꧀ꦏꦸꦮꦶ​ꦔꦗꦤ꧀ꦤꦶ​ꦧꦭꦏ꧀ ꦱꦸꦥꦪ​ꦤꦶꦧꦏ꧀ꦏꦏꦺꦮꦺꦴꦁ​ꦆꦱꦿꦌꦭ꧀ꦲꦶꦁ​ꦢꦺꦴꦱ​꧉​ꦢꦶꦏꦺꦴꦁꦏꦺꦴꦤ꧀ꦔꦺꦴꦗꦺꦴꦏ꧀ꦲꦺꦴꦗꦺꦴꦏ꧀ꦏꦶ​ꦮꦺꦴꦁ​ꦆꦱꦿꦌꦭ꧀ꦱꦸꦥꦪ​ꦥꦢ​ꦩꦁꦔꦤ꧀ꦱꦼꦱꦗꦺꦤ꧀ꦤꦺ​ꦧꦿꦲꦭ​ꦭꦤ꧀ꦱꦸꦥꦪ​ꦥꦢ​ꦭꦏꦸ​ꦧꦺꦢꦁ꧉​ ¹⁵ꦤꦁꦥꦱꦩꦸꦮꦤ꧀ꦩꦸꦏꦺꦴꦤꦺꦴ​ꦲꦸꦒ​ꦲꦺꦤꦺꦁꦮꦺꦴꦁ​ꦱꦶꦗꦶꦭꦺꦴꦫꦺꦴꦱꦶꦁ​ꦥꦢ​ꦤꦸꦫꦸꦠ꧀ꦥꦶꦮꦸꦭꦁꦔꦺ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦟꦶꦏꦺꦴꦭꦆꦱ꧀꧈​ ¹⁶ꦩꦸꦭꦤꦺ​꧈​ꦏꦺꦴꦮꦺ​ꦥꦢ​ꦤꦶꦁꦒꦭ꧀ꦭ​ꦢꦺꦴꦱꦢꦺꦴꦱꦩꦸ​ꦭꦤ꧀​ꦔ꧀ꦭꦏꦺꦴꦤ꧀ꦤꦤ​ꦲꦸꦫꦶꦥ꧀ꦲꦚꦂ​!ꦲꦮꦶꦠ꧀ꦤꦺꦏ꧀ꦲꦺꦴꦫ​꧈​ꦲꦏꦸ​ꦧꦏꦭ꧀​ꦤ꧀ꦢꦁꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​ꦭꦤ꧀​ꦔ꧀ꦭꦮꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦔꦁꦒꦺꦴ​ꦥꦼꦢꦁꦱꦶꦁ​ꦩꦼꦠꦸ​ꦱꦁꦏꦕꦁꦏꦼꦩ꧀ꦏꦸ​꧉​

¹⁷꧋“ꦱꦥ​ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧈​ꦢꦶꦫꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦫꦺꦴꦃ​ꦱꦸꦕꦶ​ꦩꦫꦁ​ꦥꦱꦩꦸꦮꦤ꧀ꦥꦱꦩꦸꦮꦤ꧀꧈​

꧋“ꦱꦥ​ꦱꦶꦁ​ꦩꦼꦤꦁ​ꦧꦏꦭ꧀ꦠꦏ꧀ꦏꦺꦏ꧀ꦏꦶꦩꦤꦃ​ꦱꦶꦩ꧀ꦥꦼꦤ꧀ꦤꦤ꧀ꦭꦤ꧀ꦧꦏꦭ꧀ꦠꦏ꧀ꦏꦺꦏ꧀ꦏꦶꦮꦠꦸ​ꦥꦸꦠꦶꦃ​꧉​ꦤꦁꦮꦠꦸ​ꦥꦸꦠꦶꦃ​ꦏꦸꦮꦶ​ꦏꦼꦠꦸꦭꦶꦱ꧀ꦗꦼꦤꦼꦁ​ꦱꦶꦁ​ꦲꦚꦂ​꧈​ꦗꦼꦤꦼꦁ​ꦱꦶꦁ​ꦲꦺꦴꦫ​ꦲꦺꦤꦺꦁꦱꦶꦁ​ꦔꦼꦂꦠꦶ​꧈​ꦏꦼꦗꦧ​ꦤꦩꦸꦁ​ꦮꦺꦴꦁ​ꦱꦶꦁ​ꦢꦶꦏꦺꦏ꧀ꦏꦶꦗꦼꦤꦼꦁ​ꦩꦲꦸ​꧉​

꧋ꦠꦼꦩ꧀ꦧꦸꦁ​ꦏꦁꦒꦺꦴ​ꦥꦱꦩꦸꦮꦤ꧀ꦠꦶꦪꦠꦶꦫ​꧉​

¹⁸꧋“ꦤꦸꦭꦶꦱ꧀ꦱ​ꦔꦺꦤꦺ​ꦩꦫꦁ​ꦩꦸꦭꦺꦏꦠ꧀ꦠꦺꦥꦱꦩꦸꦮꦤ꧀ꦠꦶꦪꦠꦶꦫ​:ꦲꦶꦏꦶ​ꦠꦼꦩ꧀ꦧꦸꦁꦔꦺ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦩꦿꦶꦥꦠ꧀ꦠꦺ​ꦏꦪ​ꦲꦸꦫꦸꦧ꧀ꦧꦺ​ꦒꦼꦤꦶ​ꦭꦤ꧀ꦱꦶꦏꦶꦭ꧀ꦭꦺ​ꦏꦪ​ꦧꦿꦺꦴꦤ꧀ꦩꦸꦫꦸꦥ꧀ꦩꦼꦔꦔꦃ​: ¹⁹ꦲꦏꦸ​ꦔꦼꦂꦠꦶ​ꦥꦼꦁꦒꦮꦺꦩꦸ​ꦏꦧꦺꦃ​꧈​ꦪꦏꦸꦮꦶ​ꦏꦠꦿꦺꦱ꧀ꦤꦤ꧀ꦩꦸ꧈​ꦥꦽꦕꦪꦩꦸ​꧈​ꦥꦶꦠꦸꦭꦸꦁꦔꦤ꧀ꦩꦸ​ꦭꦤ꧀ꦏꦼꦩꦤ꧀ꦠꦼꦥꦤ꧀ꦩꦸꦲꦶꦁ​ꦱꦏ꧀ꦗꦼꦫꦺꦴꦤꦺꦤꦤ꧀ꦢꦁꦱꦁꦱꦫ​꧉​ꦭꦤ꧀ꦲꦏꦸ​ꦔꦼꦂꦠꦶ​ꦤꦺꦏ꧀ꦥꦼꦁꦒꦮꦺꦩꦸ​ꦱꦶꦁ​ꦏꦺꦫꦶ​ꦢꦺꦮꦺꦭꦸꦮꦶꦃ​ꦲꦥꦶꦏ꧀ꦤꦺꦏ꧀ꦢꦶꦠꦶꦩ꧀ꦧꦁ​ꦏꦫꦺꦴ​ꦱꦶꦁ​ꦤ꧀ꦢꦶꦱꦶꦏ꧀꧈​ ²⁰ꦤꦁꦔꦶꦁ​ꦲꦺꦤꦺꦁꦥꦽꦏꦫ​ꦱꦶꦗꦶ​ꦱꦶꦁ​ꦲꦺꦴꦫ​ꦠꦏ꧀ꦱꦼꦤꦼꦁꦔꦶ​꧈​ꦪꦏꦸꦮꦶ​꧈​ꦲꦼꦁꦒꦺꦴꦤ꧀ꦩꦸ​ꦔꦼꦗꦂꦫꦏꦺꦆꦱꦼꦧꦺꦭ꧀꧈​ꦮꦺꦴꦁ​ꦮꦺꦢꦺꦴꦏ꧀ꦲꦶꦏꦶ​ꦔꦏꦸꦤꦺ​ꦤꦧꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦼꦩꦸꦭꦁ​ꦭꦤ꧀ꦚꦤ꧀ꦢꦶꦁꦥꦼꦭꦢꦺꦤ꧀ꦥꦼꦭꦢꦺꦤ꧀ꦏꦸ꧈​ꦩꦫꦏ꧀ꦏꦏꦺꦥꦢ​ꦭꦏꦸ​ꦧꦺꦢꦁꦭꦤ꧀ꦩꦁꦔꦤ꧀ꦱꦼꦱꦗꦺꦤ꧀ꦤꦺ​ꦧꦿꦲꦭ​꧉​ ²¹ꦲꦏꦸ​ꦮꦶꦱ꧀ꦔꦼꦏꦺꦏ꧀ꦏꦶꦮꦏ꧀ꦠꦸ​ꦩꦫꦁ​ꦮꦺꦴꦁ​ꦩꦲꦸ​꧈​ꦤꦁꦔꦶꦁ​ꦲꦺꦴꦫ​ꦒꦼꦊꦩ꧀ꦩꦤ꧀ꦢꦼꦏ꧀ꦲꦼꦁꦒꦺꦴꦤꦺ​ꦭꦏꦸ​ꦧꦺꦢꦁ꧉​ ²²ꦩꦸꦭꦤꦺ​ꦧꦏꦭ꧀ꦠꦏ꧀ꦧꦤ꧀ꦠꦶꦁ​ꦢꦢꦶ​ꦭꦫ​ꦭꦤ꧀ꦧꦏꦭ꧀​ꦔ꧀ꦒꦺꦠꦏ꧀ꦤꦁꦥꦼꦠꦸꦫꦺꦴꦤ꧀꧈​ꦤꦁꦏꦺꦴꦤꦺꦴ​ꦆꦱꦼꦧꦺꦭ꧀ꦭꦤ꧀ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦭꦏꦸ​ꦧꦺꦢꦁꦏꦫꦺꦴ​ꦢꦺꦏ꧀ꦤꦺꦧꦏꦭ꧀ꦤꦤ꧀ꦢꦁꦏꦱꦁꦱꦫꦤ꧀ꦒꦼꦢꦺ꧉​ꦏꦸꦮꦶ​ꦧꦏꦭ꧀​ꦤ꧀ꦢꦁꦠꦏ꧀ꦠꦶꦤ꧀ꦢꦏ꧀ꦏꦏꦺꦠꦼꦤꦤ꧀ ꦤꦺꦏ꧀ꦲꦺꦴꦫ​ꦥꦢ​ꦔꦼꦤ꧀ꦢꦼꦏ꧀​ꦏ꧀ꦭꦏꦸꦮꦤ꧀ꦤꦺ​ꦱꦶꦁ​ꦲꦭ​ꦏꦸꦮꦶ​꧉​ ²³ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦤꦸꦫꦸꦠ꧀ꦆꦱꦼꦧꦺꦭ꧀ꦪ​ꦧꦏꦭ꧀ꦠꦏ꧀ꦥꦠꦺꦤ꧀ꦤꦶ​꧈​ꦱꦸꦥꦪ​ꦏꦧꦺꦃ​ꦥꦱꦩꦸꦮꦤ꧀ꦥꦢ​ꦔꦼꦂꦠꦶ​ꦤꦺꦏ꧀ꦲꦏꦸ​ꦮꦼꦫꦸꦃ​ꦲꦶꦱꦶꦤꦺ​ꦲꦠꦶꦤꦺ​ꦭꦤ꧀ꦲꦔꦼꦤ꧀ꦤꦔꦼꦤ꧀ꦤꦺꦩꦤꦸꦁꦱ​꧉​ꦭꦤ꧀ꦲꦏꦸ​ꦧꦏꦭ꧀​ꦩ꧀ꦧꦊꦱ꧀ꦩꦫꦁ​ꦏꦧꦺꦃ​ꦮꦺꦴꦁ​ꦩꦶꦠꦸꦫꦸꦠ꧀​ꦏ꧀ꦭꦏꦸꦮꦤ꧀ꦤꦺ​ꦢꦺꦮꦺꦢꦺꦮꦺ꧉​

²⁴꧋“ꦤꦁꦔꦶꦁ​ꦏꦁꦒꦺꦴ​ꦮꦺꦴꦁꦮꦺꦴꦁ​ꦭꦶꦪꦤꦺ​ꦤꦁꦠꦶꦪꦠꦶꦫ​ꦱꦶꦁ​ꦲꦺꦴꦫ​ꦤꦸꦫꦸꦠ꧀ꦥꦶꦮꦸꦭꦁꦔꦺ​ꦆꦱꦼꦧꦺꦭ꧀ꦭꦤ꧀ꦱꦶꦁ​ꦲꦺꦴꦫ​ꦚꦶꦤꦲꦸ​ꦲꦺꦭ꧀ꦩꦸꦲꦺꦭ꧀ꦩꦸꦤꦺꦱꦺꦠꦤ꧀ ꦲꦏꦸ​ꦗꦚ꧀ꦗꦶ​꧈​ꦲꦏꦸ​ꦲꦺꦴꦫ​ꦧꦏꦭ꧀ꦤꦩ꧀ꦧꦃꦲꦶ​ꦩꦺꦴꦩꦺꦴꦠ꧀ꦠꦤ꧀ꦭꦶꦪꦤꦺ​ꦩꦫꦁ​ꦏꦺꦴꦮꦺ​꧉​ ²⁵ꦤꦁꦔꦶꦁ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦏꦸꦮꦶ​ꦲꦤ꧀ꦠꦼꦥ꧀ꦤꦠꦼꦫꦸꦱ꧀ꦔꦤ꧀ꦠꦶ​ꦠꦼꦏꦏꦸ​꧉​ ²⁶ꦱꦥ​ꦱꦶꦁ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦭꦤ꧀​ꦔ꧀ꦭꦏꦺꦴꦤ꧀ꦤꦶ​ꦠꦼꦩ꧀ꦧꦸꦁꦏꦸ​ꦠꦼꦏꦤ꧀ꦫꦩ꧀ꦥꦸꦁꦔꦺ​꧈​ꦧꦏꦭ꧀ꦠꦏ꧀ꦏꦺꦏ꧀ꦏꦶꦥꦔ꧀ꦮꦱ​ꦏꦁꦒꦺꦴ​ꦔ꧀ꦮꦱꦤꦶ​ꦥꦫ​ꦧꦁꦱ​꧉​ ²⁷ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀​ꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱ​ꦔꦁꦒꦺꦴ​ꦠꦼꦏꦼꦤ꧀ꦮꦼꦱꦶ​ꦭꦤ꧀ꦧꦁꦱꦧꦁꦱ​ꦩꦲꦸ​ꦧꦏꦭ꧀ꦢꦶꦉꦩꦸꦏ꧀ꦏꦪ​ꦧꦫꦁ​ꦒꦮꦺꦪꦤ꧀ꦊꦩ꧀ꦥꦸꦁ​꧉​ ²⁸ꦥꦔ꧀ꦮꦱ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦏꦸ​ꦲꦸꦒ​ꦮꦶꦱ꧀ꦤꦩ꧀ꦥ​ꦱꦁꦏꦧꦥꦏ꧀ꦏꦸ​꧉​ꦮꦺꦴꦁꦮꦺꦴꦁ​ꦩꦲꦸ​ꦲꦸꦒ​ꦧꦏꦭ꧀ꦠꦏ꧀ꦏꦺꦏ꧀ꦏꦶꦭꦶꦤ꧀ꦠꦁ​ꦥꦚ꧀ꦗꦼꦂ​ꦲꦺꦱꦸꦏ꧀꧈​

²⁹꧋“ꦱꦥꦱꦶꦁꦤ꧀ꦢꦸꦮꦺꦏꦸꦥꦶꦁ꧈​ꦢꦶꦫꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺꦫꦺꦴꦃꦱꦸꦕꦶꦩꦫꦁꦥꦱꦩꦸꦮꦤ꧀ꦥꦱꦩꦸꦮꦤ꧀꧈​”

↑ ↑ ↑

꧋ꦠꦼꦩ꧀ꦧꦸꦁꦏꦁꦒꦺꦴꦥꦱꦩꦸꦮꦤ꧀ꦱꦂꦢꦶꦱ꧀꧈​

꧇​꧓꧇​ ¹꧋“ꦤꦸꦭꦶꦱ꧀ꦱ​ꦔꦺꦤꦺ​ꦩꦫꦁ​ꦩꦸꦭꦺꦏꦠ꧀ꦠꦺꦥꦱꦩꦸꦮꦤ꧀ꦱꦂꦢꦶꦱ꧀:ꦲꦶꦏꦶ​ꦠꦼꦩ꧀ꦧꦸꦁꦔꦺ​ꦱꦶꦁ​ꦤ꧀ꦢꦸꦮꦺꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦥꦶꦠꦸ​ꦭꦤ꧀ꦱꦶꦁ​ꦤ꧀ꦢꦸꦮꦺꦭꦶꦤ꧀ꦠꦁ​ꦥꦶꦠꦸ​:ꦲꦏꦸ​ꦔꦼꦂꦠꦶ​ꦱꦏ꧀ꦏꦺꦃꦲꦺꦥꦼꦁꦒꦮꦺꦩꦸ​꧉​ꦏꦺꦴꦮꦺ​ꦥꦢ​ꦢꦶꦲꦫꦤ꧀ꦤꦶ​ꦲꦸꦫꦶꦥ꧀ ꦤꦁꦔꦶꦁ​ꦮꦸꦗꦸꦠ꧀ꦠꦺꦏꦺꦴꦮꦺ​ꦩꦠꦶ​꧉​ ²ꦩꦸꦭꦤꦺ​ꦥꦢ​ꦠꦔꦶꦪ​ꦭꦤ꧀ꦢꦤ꧀ꦢꦤ꧀ꦤꦤ​ꦱꦶꦁ​ꦲꦶꦗꦶꦏ꧀ꦏꦼꦤꦺꦁꦢꦶꦢꦤ꧀ꦢꦤ꧀ꦤꦶ​ꦭꦤ꧀ꦱꦶꦁ​ꦮꦶꦱ꧀ꦲꦉꦥ꧀ꦩꦠꦶ​꧉​ꦲꦮꦶꦠ꧀ꦥꦼꦁꦒꦮꦺꦩꦸ​ꦲꦺꦴꦫ​ꦲꦺꦤꦺꦁꦱꦶꦗꦶ​ꦮꦲꦺ​ꦱꦶꦁ​ꦏꦲꦁꦒꦼꦥ꧀ꦱꦩ꧀ꦥꦸꦂꦤ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃꦏꦸ​꧉​ ³ꦲꦩ꧀ꦧꦺꦴꦏ꧀ꦢꦶꦲꦺꦭꦶꦁꦔꦺꦭꦶꦁ​ꦩꦼꦤꦺꦃ​ꦏꦼꦥꦿꦶꦪꦺ​ꦲꦼꦁꦒꦺꦴꦤ꧀ꦩꦸ​ꦥꦢ​ꦏꦿꦸꦔꦸ​ꦭꦤ꧀ꦤꦩ꧀ꦥ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​꧉​ꦏꦸꦮꦶ​ꦲꦩ꧀ꦧꦺꦴꦏ꧀ꦢꦶꦥꦶꦏꦶꦂ​ꦭꦤ꧀ꦥꦢ​ꦔ꧀ꦭꦏꦺꦴꦤ꧀ꦤꦤ​ꦲꦸꦫꦶꦥ꧀ꦱꦶꦁ​ ꦲꦚꦂ​꧉​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦠꦔꦶ​꧈​ꦲꦏꦸ​ꦧꦏꦭ꧀ꦤꦼꦏꦤꦶ​ꦏꦺꦴꦮꦺ​ꦏꦪ​ꦕꦫꦤꦺ​ꦩꦭꦶꦁ​ꦤꦺꦏ꧀ꦠꦼꦏ​ꦏꦲꦺ​꧈​ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦏꦥꦤ꧀꧈​ ⁴ꦤꦁꦔꦶꦁ​ꦤꦁꦱꦂꦢꦶꦱ꧀ꦲꦺꦤꦺꦁꦱꦶꦗꦶꦭꦺꦴꦫꦺꦴꦱꦶꦁ​ꦲꦺꦴꦫ​ꦔꦽꦒꦼꦠ꧀ꦠꦶꦱꦭꦶꦤ꧀ꦤꦺ꧉​ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦤꦺꦁꦥꦤ꧀ꦠꦼꦱ꧀ꦱꦺ​ꦔꦁꦒꦺꦴ​ꦱꦭꦶꦤ꧀ꦥꦸꦠꦶꦃ​ꦭꦤ꧀ꦧꦏꦭ꧀​ꦩ꧀ꦭꦏꦸ​ꦧꦼꦧꦉꦁꦔꦤ꧀ꦏꦫꦺꦴ​ꦲꦏꦸ​꧉​ ⁵ꦱꦥ​ꦱꦶꦁ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦧꦏꦭ꧀ꦢꦶꦲꦼꦁꦒꦺꦴꦤ꧀ꦤꦶ​ꦱꦭꦶꦤ꧀ꦥꦸꦠꦶꦃ​ꦭꦤ꧀ꦗꦼꦤꦼꦁꦔꦺ​ꦮꦺꦴꦁ​ꦏꦸꦮꦶ​ꦩꦲꦸ​ꦲꦺꦴꦫ​ꦧꦏꦭ꧀ꦠꦏ꧀ꦲꦶꦭꦏ꧀ꦏꦶꦱꦁꦏꦧꦸꦏꦸ​ꦥꦔꦸꦫꦶꦥ꧀ꦥꦤ꧀꧈​ꦲꦏꦸ​ꦩꦭꦃ​ꦧꦏꦭ꧀ꦔꦏꦺꦴꦤ꧀ꦤꦶ​ꦩꦫꦁ​ꦧꦥꦏ꧀ꦏꦸ​ꦭꦤ꧀ꦥꦫ​ꦩꦸꦭꦺꦏꦠ꧀ꦠꦺ꧈​ꦤꦺꦏ꧀ꦮꦺꦴꦁ​ꦏꦸꦮꦶ​ꦮꦺꦏ꧀ꦏꦸ꧉​

⁶꧋“ꦱꦥ​ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧈​ꦢꦶꦫꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦫꦺꦴꦃ​ꦱꦸꦕꦶ​ꦩꦫꦁ​ꦥꦱꦩꦸꦮꦤ꧀ꦥꦱꦩꦸꦮꦤ꧀꧈​

꧋ꦠꦼꦩ꧀ꦧꦸꦁ​ꦏꦁꦒꦺꦴ​ꦥꦱꦩꦸꦮꦤ꧀ꦥ꦳ꦶꦭꦢꦺꦭ꧀ꦥ꦳ꦶꦪ​꧉​

⁷꧋“ꦤꦸꦭꦶꦱ꧀ꦱ​ꦩꦫꦁ​ꦩꦸꦭꦺꦏꦠ꧀ꦠꦺꦥꦱꦩꦸꦮꦤ꧀ꦥ꦳ꦶꦭꦢꦺꦭ꧀ꦥ꦳ꦶꦪ​:ꦲꦶꦏꦶ​ꦠꦼꦩ꧀ꦧꦸꦁꦔꦺ​ꦱꦶꦁ​ꦱꦸꦕꦶ​ꦭꦤ꧀ꦱꦶꦁ​ꦱꦼꦗꦠꦶ​꧈​ꦱꦶꦁ​ꦚꦼꦏꦼꦭ꧀ꦏꦸꦚ꧀ꦕꦶꦤꦺ​ꦣꦮ꦳ꦼꦢ꧀꧈​ꦤꦺꦏ꧀ꦢꦺꦏ꧀ꦤꦺꦲꦩ꧀ꦧꦸꦏꦏ꧀ ꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦤꦸꦠꦸꦥ꧀ꦭꦤ꧀ꦤꦺꦏ꧀ꦢꦺꦏ꧀ꦤꦺꦤꦸꦠꦸꦥ꧀ ꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦲꦩ꧀ꦧꦸꦏꦏ꧀꧈​ ⁸ꦲꦏꦸ​ꦔꦼꦂꦠꦶ​ꦱꦏ꧀ꦏꦺꦃꦲꦺꦥꦼꦁꦒꦮꦺꦩꦸ​꧉​ꦲꦏꦸ​ꦮꦶꦱ꧀​ꦩ꧀ꦧꦸꦏꦏ꧀ꦏꦏꦺꦭꦮꦁ​ꦏꦺꦴꦮꦺ​ꦭꦤ꧀ꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦤꦸꦠꦸꦥ꧀꧈​ꦧꦼꦤꦼꦂ​ꦕꦶꦭꦶꦏ꧀ꦏꦼꦏꦸꦮꦠ꧀ꦠꦤ꧀ꦩꦸ​꧈​ꦤꦁꦔꦶꦁ​ꦏꦺꦴꦮꦺ​ꦥꦢ​ꦤꦼꦠꦼꦥ꧀ꦥꦶ​ꦥꦶꦮꦸꦭꦁꦏꦸ​ꦭꦤ꧀ꦲꦺꦴꦫ​ꦩꦶꦫꦁꦔꦏꦺꦲꦏꦸ​꧉​ ⁹ꦔꦼꦂꦠꦶꦪ​꧈​ꦮꦺꦴꦁꦮꦺꦴꦁ​ꦧꦭꦤꦺ​ꦱꦺꦠꦤ꧀ ꦱꦶꦁ​ꦥꦢ​ꦒꦺꦴꦫꦺꦴꦃ​ꦭꦤ꧀ꦔꦏꦸꦲꦏꦸ​ꦗꦫꦺꦤꦺ​ꦮꦺꦴꦁ​ꦙꦸ꧈​ꦤꦁꦔꦶꦁ​ꦮꦸꦗꦸꦠ꧀ꦠꦺꦢꦸꦢꦸ​꧈​ꦮꦺꦴꦁꦮꦺꦴꦁ​ꦏꦸꦮꦶ​ꦠꦏ꧀ꦠꦼꦭꦸꦏ꧀ꦏꦏꦺꦱꦸꦥꦪ​ꦥꦢ​ꦱꦸꦗꦸꦠ꧀ꦤꦁꦔꦉꦥ꧀ꦩꦸ​ꦭꦤ꧀ꦥꦢ​ꦔꦏꦺꦴꦤ꧀ꦤꦶ​ꦤꦺꦏ꧀ꦲꦏꦸ​ꦠꦿꦺꦱ꧀ꦤꦩꦫꦁ​ꦏꦺꦴꦮꦺ​ꦏꦧꦺꦃ​꧉​ ¹⁰ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦤꦼꦠꦼꦥ꧀ꦥꦶ​ꦥꦶꦮꦸꦭꦁꦏꦸ​ꦭꦤ꧀ꦥꦢ​ꦩꦤ꧀ꦠꦼꦥ꧀ꦠꦼꦫꦸꦱ꧀ ꦩꦸꦭꦤꦺ​ꦲꦏꦸ​ꦧꦏꦭ꧀ꦩꦒꦼꦂꦫꦶ​ꦏꦺꦴꦮꦺ​ꦲꦶꦁ​ꦢꦶꦤ​ꦏꦱꦁꦱꦫꦤ꧀ꦱꦶꦁ​ꦧꦏꦭ꧀ꦠꦼꦏ​ꦲꦶꦁ​ꦢꦺꦴꦚ​ꦲꦶꦏꦶ​꧈​ꦏꦁꦒꦺꦴ​ꦚ꧀ꦗꦗꦭ꧀ꦮꦺꦴꦁ​ꦱꦶꦁ​ꦩꦁꦒꦺꦴꦤ꧀ꦤꦁꦧꦸꦩꦶ​꧉​ ¹¹ꦲꦏꦸ​ꦤ꧀ꦢꦁꦠꦼꦏ​꧉​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦢꦸꦮꦺꦤ꧀ꦤꦶ​ꦏꦸꦮꦶ​ꦕꦼꦏꦼꦭ꧀ꦭꦤ​ꦱꦶꦁ​ꦏꦼꦚ꧀ꦕꦼꦁ​ꦠꦼꦤꦤ꧀ꦭꦤ꧀ꦲꦗ​ꦱꦩ꧀ꦥꦺꦏ꧀ꦲꦺꦤꦺꦁꦮꦺꦴꦁ​ꦱꦶꦁ​ꦔꦽꦧꦸꦠ꧀ꦲꦸꦥꦃꦲꦺꦏꦩꦼꦤꦔꦤ꧀ꦩꦸ꧉​ ¹²ꦱꦥ​ꦱꦶꦁ​ꦤꦼꦠꦼꦥ꧀ꦥꦶ​ꦥꦶꦮꦸꦭꦁꦏꦸ​ꦧꦏꦭ꧀ꦠꦏ꧀ꦢꦢꦺꦏ꧀ꦏꦏꦺꦕꦒꦏ꧀ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃꦏꦸ​ꦭꦤ꧀ꦲꦺꦴꦫ​ꦧꦏꦭ꧀ꦩꦼꦠꦸ​ꦩꦼꦤꦺꦃ​ꦱꦁꦏꦏꦺꦴꦤꦺꦴ​꧉​ꦏꦫꦺꦴꦩꦼꦤꦺꦃ​ꦮꦺꦴꦁ​ꦏꦸꦮꦶ​ꦧꦏꦭ꧀ꦠꦏ꧀ꦠꦸꦭꦶꦱ꧀ꦱꦶꦗꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃꦏꦸ​ꦭꦤ꧀ꦗꦼꦤꦼꦁꦔꦺ​ꦏꦸꦠꦤꦺꦒꦸꦱ꧀ꦠꦶ​ꦄꦭ꧀ꦭꦃꦏꦸ​꧈​ꦪꦏꦸꦮꦶ​ꦏꦸꦠꦪꦺꦫꦸꦱꦭꦺꦩ꧀ꦲꦚꦂ​ꦒꦮꦺꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦩꦼꦢꦸꦤ꧀ꦱꦁꦏꦱ꧀ꦮꦂꦒ​꧈​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃꦏꦸ​꧉​ꦲꦸꦒ​ꦧꦏꦭ꧀ꦠꦏ꧀ꦠꦸꦭꦶꦱ꧀ꦱꦶꦗꦼꦤꦼꦁꦏꦸ​ꦱꦶꦁ​ꦲꦚꦂ​꧉​ ¹³“ꦱꦥ​ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧈​ꦢꦶꦫꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺ​ꦫꦺꦴꦃ​ꦱꦸꦕꦶ​ꦩꦫꦁ​ꦥꦱꦩꦸꦮꦤ꧀ꦥꦱꦩꦸꦮꦤ꧀꧈​

꧋ꦠꦼꦩ꧀ꦧꦸꦁ​ꦏꦁꦒꦺꦴ​ꦥꦱꦩꦸꦮꦤ꧀ꦭꦎꦢꦶꦱꦺꦪ꧉​

¹⁴꧋“ꦤꦸꦭꦶꦱ꧀ꦱ​ꦔꦺꦤꦺ​ꦩꦫꦁ​ꦩꦸꦭꦺꦏꦠ꧀ꦠꦺꦥꦱꦩꦸꦮꦤ꧀ꦭꦎꦢꦶꦱꦺꦪ:ꦲꦶꦏꦶ​ꦠꦼꦩ꧀ꦧꦸꦁꦔꦺ​ꦄꦩꦺꦤ꧀ ꦱꦶꦁ​ꦏꦼꦤꦺꦁꦢꦶꦥꦽꦕꦪ​꧈​ꦱꦼꦏ꧀ꦱꦶ​ꦱꦶꦁ​ꦠꦼꦩꦼꦤ꧀ꦭꦤ꧀ꦱꦼꦗꦠꦶ​꧈​ꦮꦶꦮꦶꦠ꧀ꦠꦤ꧀ꦤꦺ​ꦱꦏ꧀ꦏꦺꦃꦲꦺꦠꦶꦠꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​:

¹⁵꧋“ꦲꦏꦸ​ꦔꦼꦂꦠꦶ​ꦱꦏ꧀ꦏꦺꦃꦲꦺꦥꦼꦁꦒꦮꦺꦩꦸ​꧉​ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦲꦢꦼꦩ꧀ꦭꦤ꧀ꦲꦺꦴꦫ​ꦥꦤꦱ꧀꧈​ꦩꦭꦃ​ꦲꦥꦶꦏ꧀ꦤꦺꦏ꧀ꦏꦺꦴꦮꦺ​ꦲꦢꦼꦩ꧀ꦲꦥ​ꦥꦤꦱ꧀꧈​ ¹⁶ꦗꦭꦂꦫꦤ꧀ꦏꦺꦴꦮꦺ​ꦲꦺꦴꦫ​ꦲꦢꦼꦩ꧀ꦲꦺꦴꦫ​ꦥꦤꦱ꧀ ꦩꦸꦭꦤꦺ​ꦏꦺꦴꦮꦺ​ꦧꦏꦭ꧀ꦠꦏ꧀ꦊꦥꦺꦃꦱꦁꦏꦕꦁꦏꦼꦩ꧀ꦏꦸ​꧉​ ¹⁷ꦏꦺꦴꦮꦺ​ꦔꦏꦸꦤꦺ​:ꦲꦏꦸ​ꦲꦶꦏꦶ​ꦱꦸꦒꦶꦃ​꧈​ꦲꦏꦸ​ꦕꦸꦏꦸꦥ꧀ꦲꦶꦁ​ꦱꦼꦩ꧀ꦧꦫꦁ​ꦭꦤ꧀ꦲꦺꦴꦫ​ꦏꦼꦏꦸꦫꦁꦔꦤ꧀ꦲꦥꦲꦥ​꧉​ꦤꦁꦔꦶꦁ​ꦏꦺꦴꦮꦺ​ꦏꦸꦮꦶ​ꦲꦺꦴꦫ​ꦔꦼꦂꦠꦶ​ꦤꦺꦏ꧀ꦱꦏ꧀ꦗꦤꦺꦏꦺꦴꦮꦺ​ꦏꦸꦮꦶ​ꦩ꧀ꦭꦫꦠ꧀ꦭꦤ꧀ꦏꦸꦢꦸ​ꦢꦶꦩꦼꦭꦱ꧀ꦱꦶꦠꦼꦤꦤ꧀꧈​ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦮꦸꦢ​ꦭꦤ꧀ꦭꦩꦸꦂ​꧉​ ¹⁸ꦩꦸꦭꦤꦺ​ꦲꦏꦸ​ꦔꦺꦴꦩꦺꦴꦁꦔꦶꦏꦺꦴꦮꦺ​:ꦥꦢ​ꦠꦸꦏꦸꦮ​ꦲꦼꦩꦱ꧀ꦤꦁꦔ꧀ꦒꦺꦴꦤ꧀ꦏꦸ​꧈​ꦱꦶꦁ​ꦮꦶꦱ꧀ꦢꦶꦲꦼꦠꦸꦱ꧀ꦔꦁꦒꦺꦴ​ꦒꦼꦤꦶ​꧈​ꦱꦸꦥꦪ​ꦢꦢꦶ​ꦱꦸꦒꦶꦃ​꧉​ꦥꦢ​ꦠꦸꦏꦸꦮ​ꦤꦁꦔ꧀ꦒꦺꦴꦤ꧀ꦏꦸ​ꦱꦤ꧀ꦢꦁꦔꦤ꧀ꦥꦸꦠꦶꦃ​ꦭꦤ꧀ꦲꦼꦁꦒꦺꦴꦤ꧀ꦤꦼꦤ꧀ ꦏꦁꦒꦺꦴ​ꦤꦸꦠꦸꦥ꧀ꦥꦶ​ꦲꦼꦁꦒꦺꦴꦤ꧀ꦩꦸ​ꦮꦸꦢ​ꦭꦤ꧀ꦔꦶꦱꦶꦤ꧀ꦲꦶꦱꦶꦤ꧀ꦤꦶ​꧉​ꦲꦸꦒ​꧈​ꦥꦢ​ꦠꦸꦏꦸꦮ​ꦲꦺꦴꦧꦠ꧀ꦩꦠ​ꦏꦁꦒꦺꦴ​ꦤꦩ꧀ꦧꦤꦶ​ꦩꦿꦶꦥꦠ꧀ꦩꦸ​꧈​ꦱꦸꦥꦪ​ꦧꦶꦱ​ꦮꦼꦫꦸꦃ​꧉​ ¹⁹ꦮꦺꦴꦁꦮꦺꦴꦁ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦪꦏꦸꦮꦶ​ꦱꦶꦁ​ꦠꦏ꧀ꦮꦼꦭꦺꦏ꧀ꦏꦏꦺꦭꦤ꧀ꦱꦶꦁ​ꦠꦏ꧀ꦲꦗꦂ​꧉​ꦩꦸꦭꦤꦺ​ꦥꦢ​ꦢꦶꦠꦼꦤꦤ꧀ꦤꦏꦺꦲꦼꦁꦒꦺꦴꦤ꧀ꦩꦸ​ꦔꦧꦼꦏ꧀ꦠꦶ​ꦭꦤ꧀ꦥꦢ​ꦤꦶꦁꦒꦭ꧀ꦭ​ꦢꦺꦴꦱꦢꦺꦴꦱꦩꦸ​ꦭꦤ꧀​ꦔ꧀ꦭꦏꦺꦴꦤ꧀ꦤꦤ​ꦲꦸꦫꦶꦥ꧀ꦲꦚꦂ​꧉​ ²⁰ꦔꦼꦂꦠꦶꦪ​!ꦲꦏꦸ​ꦤꦁꦔꦉꦥ꧀ꦭꦮꦁ​ꦭꦤ꧀ꦠꦺꦴꦠꦺꦴꦏ꧀ꦠꦺꦴꦠꦺꦴꦏ꧀꧈​ꦤꦺꦏ꧀ꦲꦺꦤꦺꦁꦮꦺꦴꦁ​ꦏꦿꦸꦔꦸ​ꦱ꧀ꦮꦫꦏꦸ​ꦭꦤ꧀​ꦩ꧀ꦧꦸꦏꦏ꧀ꦏꦏꦺꦭꦮꦁ​꧈​ꦲꦏꦸ​ꦧꦏꦭ꧀​ꦩ꧀ꦊꦧꦸ​ꦤꦁꦲꦺꦴꦩꦃꦲꦺ​ꦭꦤ꧀ꦩꦁꦔꦤ꧀ꦧꦼꦧꦉꦁꦔꦤ꧀ꦏꦫꦺꦴ​ꦮꦺꦴꦁ​ꦏꦸꦮꦶ​꧉​ ²¹ꦱꦥ​ꦱꦶꦁ​ꦩꦼꦤꦁ​ꦧꦏꦭ꧀ꦠꦏ꧀ꦲꦼꦗꦺꦏ꧀​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦏꦸ꧉​ꦲꦮꦶꦠ꧀ꦲꦏꦸ​ꦲꦸꦒ​ꦮꦶꦱ꧀ꦩꦼꦤꦁ​ꦭꦤ꧀ꦱꦲꦶꦏꦶ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦫꦺꦧꦥꦏ꧀ꦏꦸ​꧉​

²²꧋“ꦱꦥꦱꦶꦁꦤ꧀ꦢꦸꦮꦺꦏꦸꦥꦶꦁ꧈​ꦢꦶꦫꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦔꦺꦫꦺꦴꦃꦱꦸꦕꦶꦩꦫꦁꦥꦱꦩꦸꦮꦤ꧀ꦥꦱꦩꦸꦮꦤ꧀꧈​”

↑ ↑ ↑

꧋ꦢꦩ꧀ꦥꦂꦤꦁꦱ꧀ꦮꦂꦒ꧉​

꧇​꧔꧇​ ¹꧋ꦱꦏ꧀ꦮꦶꦱ꧀ꦱꦺ​ꦲꦶꦏꦸ​꧈​ꦲꦏꦸ​꧈​ꦪꦺꦴꦲꦤꦼꦱ꧀ ꦠꦼꦫꦸꦱ꧀ꦲꦺꦤ꧀ꦠꦸꦏ꧀ꦥꦩꦼꦢꦂꦫꦤ꧀ꦭꦶꦪꦤꦺ​꧉​ꦲꦏꦸ​ ꦮꦼꦫꦸꦃ​ꦭꦮꦁ​ꦤꦁꦱ꧀ꦮꦂꦒ​ꦩꦼꦔ​ꦭꦤ꧀ꦲꦺꦤꦺꦁꦱ꧀ꦮꦫ​ꦱꦶꦁ​ꦩꦲꦸꦤꦺ​ꦲꦏꦸ​ꦮꦶꦱ꧀ꦠꦲꦸ​ꦏꦿꦸꦔꦸ​ꦭꦤ꧀ꦱꦶꦁ​ꦲꦸꦤꦶꦤꦺ​ꦏꦪ​ꦠꦿꦺꦴꦩ꧀ꦥꦺꦠ꧀꧈​ꦱ꧀ꦮꦫ​ꦏꦸꦮꦶ​ꦔꦺꦴꦩꦺꦴꦁꦔꦺꦤꦺ​:“ꦩꦸꦁꦒꦃꦲ​ꦫꦺꦤꦺ꧉​ꦏꦺꦴꦮꦺ​ꦧꦏꦭ꧀ꦠꦏ꧀ꦢꦸꦢꦸꦃꦲꦶꦲꦥ​ꦱꦶꦁ​ꦧꦏꦭ꧀​ꦏ꧀ꦭꦏꦺꦴꦤ꧀ꦲꦩ꧀ꦧꦺꦱꦸꦏ꧀” ²ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦲꦏꦸ​ꦠꦼꦫꦸꦱ꧀ꦢꦶꦏ꧀ꦮꦱꦤꦶ​ꦏꦫꦺꦴ​ꦫꦺꦴꦃꦲꦺ​ꦄꦭ꧀ꦭꦃ​꧉​ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦢꦩ꧀ꦥꦂꦤꦁꦱ꧀ꦮꦂꦒ​ꦏꦺꦴꦤꦺꦴ​꧉​ ³ꦱꦶꦁ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦏꦺꦴꦤꦺꦴ​ꦫꦸꦥꦤꦺ​ꦱꦼꦩ꧀ꦭꦺꦴꦫꦺꦴꦠ꧀ꦏꦪ​ꦮꦠꦸ​ꦪꦱ꧀ꦥꦶꦱ꧀ꦭꦤ꧀ꦱꦂꦢꦶꦱ꧀꧈​ꦢꦩ꧀ꦥꦂꦫꦺꦩꦲꦸ​ꦢꦶꦲꦸꦧꦼꦁꦔꦶ​ꦏ꧀ꦭꦸꦮꦸꦁ​ꦱꦶꦁ​ꦱꦼꦩ꧀ꦭꦺꦴꦫꦺꦴꦠ꧀ꦏꦪ​ꦱ꧀ꦩꦫꦏ꧀꧈​ ⁴ꦤꦁꦱꦏ꧀ꦲꦸꦧꦼꦁꦔꦺ​ꦢꦩ꧀ꦥꦂꦩꦲꦸ​ꦲꦺꦤꦺꦁꦢꦩ꧀ꦥꦂꦢꦩ꧀ꦥꦂꦭꦶꦪꦤꦺ​꧈​ꦥꦠ꧀ꦭꦶꦏꦸꦂ​ꦲꦺꦴꦏꦺꦃꦲꦺ꧉​ꦢꦩ꧀ꦥꦂꦥꦠ꧀ꦭꦶꦏꦸꦂ​ꦏꦸꦮꦶ​ꦢꦶꦗꦒꦺꦴꦁꦔꦶꦥꦶꦤꦶꦠꦸꦮ​ꦥꦠ꧀ꦭꦶꦏꦸꦂ​꧈​ꦱꦶꦁ​ꦥꦢ​ꦔꦁꦒꦺꦴ​ꦱꦭꦶꦤ꧀ꦥꦸꦠꦶꦃ​ꦭꦤ꧀ꦔꦁꦒꦺꦴ​ꦩꦏꦸꦠꦲꦼꦩꦱ꧀꧈​ ⁵ꦢꦩ꧀ꦥꦂꦩꦲꦸ​ꦔꦼꦠꦺꦴꦏ꧀ꦏꦏꦺꦱ꧀ꦭꦺꦴꦫꦺꦴꦠ꧀ꦠꦺꦥꦢꦁꦥꦠꦶꦁ​ꦏ꧀ꦭꦺꦭꦥ꧀ ꦲꦸꦒ​ꦱ꧀ꦮꦫ​ꦏꦪ​ꦒ꧀ꦭꦸꦢꦸꦏ꧀꧈​ꦤꦁꦔꦉꦥ꧀ꦥꦺ​ꦢꦩ꧀ꦥꦂꦲꦺꦤꦺꦁꦲꦺꦴꦧꦺꦴꦂ​ꦥꦶꦠꦸ​ꦩꦸꦫꦸꦥ꧀:ꦏꦸꦮꦶ​ꦫꦺꦴꦃꦲꦺ​ꦄꦭ꧀ꦭꦃ​ꦥꦶꦠꦸ​꧉​ ⁶ꦤꦁꦔꦉꦥ꧀ꦥꦺ​ꦢꦩ꧀ꦥꦂꦲꦸꦒ​ꦲꦺꦤꦺꦁꦏꦪ​ꦱꦼꦒꦫ​ꦧꦼꦤꦶꦁ​꧈​ꦏꦪ​ꦏꦕ​ꦏꦿꦶꦱ꧀ꦠꦭ꧀꧈​

꧋ꦤꦁꦱꦏ꧀ꦠꦼꦔꦃꦲꦺ​ꦢꦩ꧀ꦥꦂꦭꦤ꧀ꦱꦏ꧀ꦲꦸꦧꦼꦁꦔꦺ​ꦲꦺꦤꦺꦁꦏꦲꦸꦫꦶꦥ꧀ꦥꦤ꧀ꦥꦥꦠ꧀ ꦔꦉꦥ꧀​ꦩ꧀ꦧꦸꦫꦶꦤꦺꦏꦼꦧꦼꦏ꧀ꦩꦠ​꧉​ ⁷ꦏꦲꦸꦫꦶꦥ꧀ꦥꦤ꧀ꦱꦶꦁ​ꦤꦺꦴꦩꦼꦂ​ꦱꦶꦗꦶ​ꦫꦸꦥꦤꦺ​ꦏꦪ​ꦱꦶꦔ​꧈​ꦱꦶꦁ​ꦤꦺꦴꦩꦼꦂ​ꦭꦺꦴꦫꦺꦴ​ꦏꦪ​ꦱꦥꦶ​ꦭꦤꦁ​꧈​ꦱꦶꦁ​ꦤꦺꦴꦩꦼꦂ​ꦠꦼꦭꦸ​ꦫꦸꦥꦤꦺ​ꦏꦪ​ꦮꦺꦴꦁ​ꦲꦸꦫꦶꦥ꧀ꦭꦤ꧀ꦱꦶꦁ​ꦤꦺꦴꦩꦼꦂ​ꦥꦥꦠ꧀ꦫꦸꦥꦤꦺ​ꦏꦪ​ꦩꦤꦸꦏ꧀ꦒꦫꦸꦢꦩꦧꦸꦂ​꧉​ ⁸ꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦩꦲꦸ​ꦱꦶꦗꦶꦱꦶꦗꦶꦤꦺ​ꦤ꧀ꦢꦸꦮꦺꦱ꧀ꦮꦶꦮꦶ​ꦤꦼꦤꦼꦩ꧀ꦭꦤ꧀ꦲꦮꦏ꧀ꦏꦺ​ꦱꦏ꧀ꦏꦸꦗꦸꦂꦚ꧀ꦗꦧꦚ꧀ꦗꦼꦫꦺꦴ​ꦏꦼꦧꦼꦏ꧀ꦩꦠ​꧉​ꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦩꦲꦸ​ꦄꦮꦤ꧀ꦮꦼꦔꦶꦥꦢ​ꦩꦼꦩꦸꦗꦶ​ꦠꦤ꧀ꦥ​ꦭꦺꦫꦺꦤ꧀ ꦔꦺꦴꦩꦺꦴꦁ:

“ꦱꦸꦕꦶ​꧈​ꦱꦸꦕꦶ​꧈​ꦱꦸꦕꦶ​꧈​
ꦒꦸꦱ꧀ꦠꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧈​
ꦱꦶꦁ​ꦩ꧀ꦧꦶꦪꦺꦤ꧀ꦲꦺꦤꦺꦁ꧈​ꦱꦲꦶꦏꦶ​ꦲꦺꦤꦺꦁ
ꦭꦤ꧀ꦱꦶꦁ​ꦲꦩ꧀ꦧꦺꦱꦸꦏ꧀ꦧꦏꦭ꧀ꦠꦼꦏ​꧉​”

^9-10꧋ꦭꦤ꧀ꦱꦧꦼꦤ꧀ꦱꦧꦼꦤ꧀ꦤꦺꦏ꧀ꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦩꦲꦸ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦥꦩꦸꦗꦶ​꧈​ꦏꦲꦸꦂꦩꦠ꧀ꦠꦤ꧀ꦭꦤ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦱꦶꦁ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦭꦤ꧀ꦱꦶꦁ​ꦲꦸꦫꦶꦥ꧀ꦭꦁꦒꦼꦁ​ꦱ꧀ꦭꦮꦱ꧀ꦭꦮꦱ꧀ꦱꦺ꧈​ꦥꦫ​ꦥꦶꦤꦶꦠꦸꦮ​ꦥꦠ꧀ꦭꦶꦏꦸꦂ​ꦥꦢ​ꦱꦸꦗꦸꦠ꧀ꦤꦁꦔꦉꦥ꧀ꦥꦺ​ꦱꦶꦁ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦩꦲꦸ​꧈​ꦚꦼꦩ꧀ꦧꦃ​ꦱꦶꦁ​ꦲꦸꦫꦶꦥ꧀ꦭꦁꦒꦼꦁ​ꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦥꦶꦤꦶꦠꦸꦮ​ꦥꦠ꧀ꦭꦶꦏꦸꦂ​ꦩꦲꦸ​ꦠꦼꦫꦸꦱ꧀ꦚꦺꦭꦺꦃꦲꦏꦺꦩꦏꦸꦠꦤ꧀ꦤꦺꦤꦁꦔꦉꦥ꧀ꦥꦺ​ꦢꦩ꧀ꦥꦂꦩꦲꦸ​ꦏꦫꦺꦴ​ꦔꦺꦴꦩꦺꦴꦁ:

¹¹“ꦢꦸꦃꦒꦸꦱ꧀ꦠꦶ꧈​ꦒꦸꦱ꧀ꦠꦶꦄꦭ꧀ꦭꦃꦲꦺꦲꦮꦏ꧀ꦏꦺꦢꦺꦮꦺ꧈​
ꦏꦺꦴꦮꦺꦥꦤ꧀ꦠꦼꦱ꧀ꦤꦩ꧀ꦥꦏꦭꦸꦲꦸꦂꦫꦤ꧀ ꦥꦩꦸꦗꦶꦭꦤ꧀ꦥꦔ꧀ꦮꦱ꧈​
ꦲꦮꦶꦠ꧀ꦏꦺꦴꦮꦺꦱꦶꦁꦔ꧀ꦒꦮꦺꦱꦼꦩ꧀ꦧꦫꦁ꧉​
ꦱꦁꦏꦏꦼꦏꦉꦥ꧀ꦥꦤ꧀ꦤꦺꦒꦸꦱ꧀ꦠꦶꦱꦼꦩ꧀ꦧꦫꦁꦲꦺꦤꦺꦁꦭꦤ꧀ꦧꦶꦱꦲꦸꦫꦶꦥ꧀꧈​”

↑ ↑ ↑

꧋ꦧꦸꦏꦸꦒꦸꦭꦸꦁꦔꦤ꧀꧈​

꧇​꧕꧇​ ¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦤꦺꦏ꧀ꦱꦶꦁ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦩꦲꦸ​ꦠꦔꦤ꧀ꦤꦺ​ꦠꦼꦔꦼꦤ꧀ꦚꦼꦏꦼꦭ꧀ꦧꦸꦏꦸ​ꦒꦸꦭꦸꦁꦔꦤ꧀꧈​ꦧꦸꦏꦸ​ꦩꦲꦸ​ꦚ꧀ꦗꦧꦚ꧀ꦗꦼꦫꦺꦴ​ꦏꦼꦧꦼꦏ꧀ꦠꦸꦭꦶꦱ꧀ꦱꦤ꧀ꦭꦤ꧀ꦢꦶꦱꦺꦒꦼꦭ꧀ꦏꦫꦺꦴ​ꦱꦺꦒꦼꦭ꧀ꦥꦶꦠꦸ​꧉​ ²ꦲꦏꦸ​ꦲꦸꦒ​ꦮꦼꦫꦸꦃ​ꦩꦸꦭꦺꦏꦠ꧀ꦱꦶꦁ​ꦒꦼꦢꦺꦒꦒꦃ꧉​ꦩꦸꦭꦺꦏꦠ꧀ꦲꦶꦏꦶ​ꦔꦺꦴꦩꦺꦴꦁꦔꦁꦒꦺꦴ​ꦱ꧀ꦮꦫ​ꦧꦤ꧀ꦠꦼꦂ​:“ꦱꦥ​ꦱꦶꦁ​ꦥꦤ꧀ꦠꦼꦱ꧀​ꦔ꧀ꦭꦺꦤ꧀ꦠꦺꦏ꧀ꦏꦶꦱꦺꦒꦼꦭ꧀ꦱꦺꦒꦼꦭ꧀ꦲꦶꦏꦶ​ꦭꦤ꧀ꦲꦩ꧀ꦧꦸꦏꦏ꧀ꦧꦸꦏꦸꦤꦺ​?” ³ꦤꦁꦔꦶꦁ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦤꦁꦱ꧀ꦮꦂꦒ​ꦲꦥ​ꦤꦁꦧꦸꦩꦶ​ꦲꦥ​ꦤꦁꦱꦏ꧀ꦔꦶꦱꦺꦴꦂꦫꦺ​ꦧꦸꦩꦶ​ꦱꦶꦁ​ꦧꦶꦱ​ꦲꦩ꧀ꦧꦸꦏꦏ꧀ꦧꦸꦏꦸ​ꦒꦸꦭꦸꦁꦔꦤ꧀ꦏꦸꦮꦶ​ꦭꦤ꧀​ꦤ꧀ꦢꦼꦭꦺꦴꦏ꧀​ꦚ꧀ꦗꦼꦫꦺꦴꦤꦺ​꧉​ ⁴ꦲꦏꦸ​ꦠꦼꦫꦸꦱ꧀ꦤꦔꦶꦱ꧀ꦏꦼꦭꦫꦭꦫ​꧈​ꦲꦮꦶꦠ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦶꦱ​ꦲꦩ꧀ꦧꦸꦏꦏ꧀ꦧꦸꦏꦸ​ꦩꦲꦸ​ꦭꦤ꧀ꦩꦕ​ꦲꦶꦱꦶꦤꦺ​꧉​ ⁵ꦠꦼꦫꦸꦱ꧀ꦲꦺꦤꦺꦁꦥꦶꦤꦶꦠꦸꦮ​ꦔꦺꦴꦩꦺꦴꦁꦩꦫꦁ​ꦲꦏꦸ​:“ꦲꦗ​ꦤꦔꦶꦱ꧀!ꦢꦼꦭꦺꦴꦏ꧀ꦏꦼꦤ꧀ ꦱꦶꦔ​ꦠꦸꦫꦸꦤ꧀ꦤꦤ꧀ꦤꦺ​ꦪꦸꦢꦃ꧈​ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ ꦮꦶꦱ꧀ꦩꦼꦤꦁꦔꦏꦺꦭꦤ꧀ꦧꦶꦱ​ꦔ꧀ꦭꦺꦤ꧀ꦠꦺꦏ꧀ꦱꦺꦒꦼꦭ꧀ꦥꦶꦠꦸ​ꦩꦲꦸ​ꦭꦤ꧀ꦲꦩ꧀ꦧꦸꦏꦏ꧀ꦧꦸꦏꦸꦤꦺ​ꦒꦸꦭꦸꦁꦔꦤ꧀꧈​” ⁶ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦕꦼꦩ꧀ꦥꦺ​ꦔꦢꦼꦏ꧀ꦤꦁꦱꦏ꧀ꦠꦼꦔꦃꦲꦺ​ꦢꦩ꧀ꦥꦂꦭꦤ꧀ꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦭꦤ꧀ꦥꦫ​ꦥꦶꦤꦶꦠꦸꦮ​꧉​ꦕꦼꦩ꧀ꦥꦺ​ꦩꦲꦸ​ꦏꦺꦠꦺꦴꦏ꧀ꦏꦺ​ꦏꦪ​ꦮꦶꦱ꧀ꦢꦶꦧꦼꦭꦺꦃ​꧉​ꦕꦼꦩ꧀ꦥꦺ​ꦩꦲꦸ​ꦱꦸꦔꦸꦤꦺ​ꦥꦶꦠꦸ​ꦭꦤ꧀ꦩꦠꦤꦺ​ꦥꦶꦠꦸ​꧈​ꦪꦏꦸꦮꦶ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦥꦶꦠꦸ​ꦱꦶꦁ​ꦢꦶꦏꦺꦴꦁꦏꦺꦴꦤ꧀ꦧꦸꦢꦭ꧀ꦤꦁꦱꦏ꧀ꦭꦸꦩꦃꦲꦺꦧꦸꦩꦶ​꧉​ ⁷ꦕꦼꦩ꧀ꦥꦺ​ꦩꦲꦸ​ꦠꦼꦫꦸꦱ꧀ꦩꦗꦸ​ꦭꦤ꧀ꦤꦩ꧀ꦥꦤꦶ​ꦧꦸꦏꦸ​ꦒꦸꦭꦸꦁꦔꦤ꧀ꦩꦲꦸ​ꦱꦁꦏꦠꦔꦤ꧀ꦠꦼꦔꦼꦤ꧀ꦤꦺꦱꦶꦁ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦫꦺ꧉​ ⁸ꦏꦢꦸꦁ​ꦏꦸꦮꦶ​ꦮꦶꦱ꧀​ꦏ꧀ꦭꦏꦺꦴꦤ꧀ ꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦭꦤ꧀ꦥꦶꦤꦶꦠꦸꦮ​ꦥꦠ꧀ꦭꦶꦏꦸꦂ​ꦠꦼꦫꦸꦱ꧀ꦱꦸꦗꦸꦠ꧀ꦤꦁꦔꦉꦥ꧀ꦥꦺ​ꦕꦼꦩ꧀ꦥꦺꦤꦺ​꧉​ꦱꦧꦼꦤ꧀ꦥꦶꦤꦶꦠꦸꦮ​ꦚꦼꦏꦼꦭ꧀ꦲ꦳ꦉꦥ꧀ꦭꦤ꧀ꦩꦁꦏꦺꦴꦏ꧀ꦲꦼꦩꦱ꧀ꦲꦶꦱꦶꦤꦺ​ꦩꦼꦚꦤ꧀ ꦪꦏꦸꦮꦶ​ꦥꦤ꧀ꦢꦺꦴꦔꦤꦺ​ꦥꦫ​ꦱꦸꦕꦶ​꧉​ ^9-10ꦠꦼꦫꦸꦱ꧀ꦥꦢ​ꦱꦶꦔꦶꦏꦶꦢꦸꦁ​ꦲꦚꦂ​꧈​ꦠꦼꦩ꧀ꦧꦸꦁꦔꦺ​:

“ꦏꦺꦴꦮꦺ​ꦥꦤ꧀ꦠꦼꦱ꧀ꦤꦩ꧀ꦥ​ꦧꦸꦏꦸ​ꦒꦸꦭꦸꦁꦔꦤ꧀
ꦭꦤ꧀​ꦔ꧀ꦭꦺꦤ꧀ꦠꦺꦏ꧀ꦱꦺꦒꦼꦭ꧀ꦱꦺꦒꦼꦭ꧀ꦭꦺ꧉​
ꦲꦮꦶꦠ꧀ꦏꦺꦴꦮꦺ​ꦮꦶꦱ꧀ꦢꦶꦥꦠꦺꦤ꧀ꦤꦶ​
ꦭꦤ꧀ꦔꦁꦒꦺꦴ​ꦥꦠꦶꦩꦸ​ꦏꦺꦴꦮꦺ​ꦮꦶꦱ꧀ꦤꦼꦧꦸꦱ꧀ꦩꦤꦸꦁꦱ​
ꦱꦁꦏꦱꦧꦼꦤ꧀ꦠꦊꦂ​꧈​ꦱꦧꦼꦤ꧀ꦧꦱ​꧈​
ꦱꦧꦼꦤ꧀ꦤꦼꦒꦫ​ꦭꦤ꧀ꦧꦁꦱ​꧈​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​
ꦮꦺꦴꦁꦮꦺꦴꦁ​ꦩꦲꦸ​ꦲꦩ꧀ꦧꦺꦴꦏ꧀ꦢꦢꦺꦏ꧀ꦏꦏꦺꦠꦸꦫꦸꦤ꧀ꦠꦸꦫꦸꦤꦤ꧀ꦤꦺꦫꦠꦸ​꧈​
ꦢꦢꦶ​ꦲꦶꦩꦩ꧀ꦲꦶꦩꦩ꧀ꦱꦶꦁ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦱꦶꦁ​ꦲꦸꦒ​ꦧꦏꦭ꧀ꦚꦼꦏꦼꦭ꧀ꦥꦔ꧀ꦮꦱ​ꦤꦁꦧꦸꦩꦶ​꧉​”

¹¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦭꦤ꧀ꦏꦿꦸꦔꦸ​ꦱ꧀ꦮꦫꦤꦺ​ꦩꦸꦭꦺꦏꦠ꧀ꦱꦶꦁ​ꦲꦺꦮꦺꦴꦤ꧀ꦤꦺꦮꦺꦴꦤ꧀ꦲꦺꦴꦏꦺꦃꦲꦺ꧉​ꦥꦢ​ꦔꦢꦼꦏ꧀ꦔꦸꦧꦼꦁꦔꦶ​ꦢꦩ꧀ꦥꦂꦫꦺ꧈​ꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦭꦤ꧀ꦥꦫ​ꦥꦶꦤꦶꦠꦸꦮ​꧉​ ¹²ꦥꦫ​ꦩꦸꦭꦺꦏꦠ꧀ꦩꦲꦸ​ꦥꦢ​ꦔꦺꦴꦩꦺꦴꦁꦔꦁꦒꦺꦴ​ꦱ꧀ꦮꦫ​ꦧꦤ꧀ꦠꦼꦂ​꧈​ꦠꦼꦩ꧀ꦧꦸꦁꦔꦺ​:

“ꦕꦼꦩ꧀ꦥꦺ​ꦱꦶꦁ​ꦮꦶꦱ꧀ꦢꦶꦧꦼꦭꦺꦃ​ꦥꦤ꧀ꦠꦼꦱ꧀ꦤꦩ꧀ꦥ​ꦥꦔ꧀ꦮꦱ​꧈​
ꦏꦱꦸꦒꦶꦃꦲꦤ꧀ ꦏꦮꦼꦫꦸꦃꦭꦤ꧀ꦏꦼꦏꦸꦮꦠ꧀ꦠꦤ꧀
ꦏꦲꦸꦂꦩꦠ꧀ꦠꦤ꧀ ꦏꦭꦸꦲꦸꦂꦫꦤ꧀ꦭꦤ꧀ꦥꦩꦸꦗꦶ​꧉​”

¹³ꦲꦏꦸ​ꦠꦼꦫꦸꦱ꧀ꦏꦿꦸꦔꦸ​ꦱꦏ꧀ꦏꦺꦃꦲꦺꦏꦲꦸꦫꦶꦥ꧀ꦥꦤ꧀ꦱꦶꦁ​ꦤꦁꦱ꧀ꦮꦂꦒ​ꦭꦤ꧀ꦤꦁꦧꦸꦩꦶ​ꦭꦤ꧀ꦲꦸꦒ​ꦱꦶꦁ​ꦤꦁꦱꦏ꧀ꦔꦶꦱꦺꦴꦂꦫꦺ​ꦧꦸꦩꦶ​ꦭꦤ꧀ꦤꦁꦱꦼꦒꦫ​꧈​ꦥꦚ꧀ꦕꦺꦤ꧀ꦱꦏ꧀ꦲꦺꦤꦺꦁꦔꦺꦲꦸꦫꦶꦥ꧀ꦏꦧꦺꦃ​ꦥꦢ​ꦱꦶꦔꦶ꧈​ꦠꦼꦩ꧀ꦧꦸꦁꦔꦺ​:

“ꦏꦭꦸꦲꦸꦂꦫꦤ꧀ꦭꦤ꧀ꦥꦩꦸꦗꦶ​
ꦩꦫꦁ​ꦱꦶꦁ​ꦚ꧀ꦗꦒꦺꦴꦁꦤꦁꦢꦩ꧀ꦥꦂ
ꦭꦤ꧀ꦩꦫꦁ​ꦕꦼꦩ꧀ꦥꦺꦤꦺ​꧈​
ꦏꦲꦸꦂꦩꦠ꧀ꦠꦤ꧀ꦭꦤ꧀ꦏꦼꦏꦸꦮꦠ꧀ꦠꦤ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​”

¹⁴ꦭꦃ​ꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦩꦲꦸ​ꦠꦼꦫꦸꦱ꧀ꦥꦢ​ꦱꦼꦩꦲꦸꦂ​:“ꦄꦩꦺꦤ꧀꧉”ꦥꦫ​ꦥꦶꦤꦶꦠꦸꦮ​ꦠꦼꦫꦸꦱ꧀ꦥꦢ​ꦱꦸꦗꦸꦠ꧀ꦭꦤ꧀ꦩꦼꦩꦸꦗꦶ​꧉​

↑ ↑ ↑

꧋ꦱꦺꦒꦼꦭ꧀ꦤꦼꦤꦼꦩ꧀ꦢꦶꦏ꧀ꦭꦺꦤ꧀ꦠꦺꦏ꧀​꧉​

꧇​꧖꧇​ ¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦕꦼꦩ꧀ꦥꦺꦤꦺ​ꦔ꧀ꦭꦺꦤ꧀ꦠꦺꦏ꧀ꦱꦺꦒꦼꦭ꧀ꦱꦶꦗꦶ​ꦱꦁꦏꦱꦺꦒꦼꦭ꧀ꦱꦶꦁ​ꦥꦶꦠꦸ​꧉​ꦲꦏꦸ​ꦏꦿꦸꦔꦸ​ꦠꦼꦩ꧀ꦧꦸꦁꦔꦺ​ꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦩꦲꦸ​ꦱꦶꦁ​ꦤꦺꦴꦩꦼꦂ​ꦱꦶꦗꦶ​ꦔꦺꦴꦩꦺꦴꦁꦔꦁꦒꦺꦴ​ꦱ꧀ꦮꦫ​ꦏꦪ​ꦒ꧀ꦭꦸꦢꦸꦏ꧀:“ꦫꦺꦤꦺ!” ²ꦲꦏꦸ​ꦠꦼꦫꦸꦱ꧀ꦔꦼꦩꦠ꧀ꦠꦏꦺꦭꦤ꧀ꦮꦼꦫꦸꦃ​ꦗꦫꦤ꧀ꦥꦸꦠꦶꦃ​꧉​ꦱꦶꦁ​ꦤꦸꦩ꧀ꦥꦏ꧀ꦗꦫꦤ꧀ꦤꦺ​ꦚꦼꦏꦼꦭ꧀ꦥꦤꦃ​ꦭꦤ꧀ꦢꦶꦲꦼꦁꦒꦺꦴꦤ꧀ꦤꦶ​ꦩꦏꦸꦠꦏꦩꦼꦤꦁꦔꦤ꧀ ꦠꦼꦫꦸꦱ꧀ꦩꦗꦸ​ꦏꦪ​ꦮꦺꦴꦁ​ꦱꦶꦁ​ꦩꦼꦤꦁ​ꦥꦼꦫꦁ​꧉​

³꧋ꦕꦼꦩ꧀ꦥꦺꦤꦺ​ꦠꦼꦫꦸꦱ꧀​ꦔ꧀ꦭꦺꦤ꧀ꦠꦺꦏ꧀ꦱꦺꦒꦼꦭ꧀ꦱꦶꦁ​ꦤꦺꦴꦩꦼꦂ​ꦭꦺꦴꦫꦺꦴ​ꦭꦤ꧀ꦲꦏꦸ​ꦏꦿꦸꦔꦸ​ꦏꦲꦸꦫꦶꦥ꧀ꦥꦤ꧀ꦱꦶꦁ​ꦤꦺꦴꦩꦼꦂ​ꦭꦺꦴꦫꦺꦴ​ꦔꦺꦴꦩꦺꦴꦁ:“ꦲ꦳ꦪꦸꦏ꧀!” ⁴ꦠꦼꦫꦸꦱ꧀ꦲꦺꦤꦺꦁꦗꦫꦤ꧀ꦭꦶꦪꦤꦺ​ꦩꦗꦸ​꧈​ꦫꦸꦥꦤꦺ​ꦲꦧꦁ​ꦲꦩ꧀ꦧꦿꦤꦁ​꧉​ꦱꦶꦁ​ꦤꦸꦩ꧀ꦥꦏ꧀ꦗꦫꦤ꧀ꦤꦺ​ꦲꦺꦤ꧀ꦠꦸꦏ꧀ꦥꦔ꧀ꦮꦱ​ꦲꦩ꧀ꦧꦸꦮꦁ​ꦏꦠꦼꦤ꧀ꦠꦽꦩ꧀ꦩꦤ꧀ꦱꦶꦁ​ꦤꦁꦧꦸꦩꦶ​꧈​ꦱꦸꦥꦪ​ꦮꦺꦴꦁꦮꦺꦴꦁ​ꦥꦢ​ꦩꦠꦺꦤ꧀ꦤꦶ​ꦱꦏ꧀ꦥꦢꦥꦢ꧉​ꦩꦸꦭꦤꦺ​ꦮꦺꦴꦁꦔꦺ​ꦲꦺꦤ꧀ꦠꦸꦏ꧀ꦥꦼꦢꦁꦒꦼꦢꦺ꧉​

⁵꧋ꦕꦼꦩ꧀ꦥꦺꦤꦺ​ꦠꦼꦫꦸꦱ꧀​ꦔ꧀ꦭꦺꦤ꧀ꦠꦺꦏ꧀ꦱꦺꦒꦼꦭ꧀ꦱꦶꦁ​ꦤꦺꦴꦩꦼꦂ​ꦠꦼꦭꦸ​꧉​ꦲꦏꦸ​ꦏꦿꦸꦔꦸ​ꦏꦲꦸꦫꦶꦥ꧀ꦥꦤ꧀ꦤꦺꦴꦩꦼꦂ​ꦠꦼꦭꦸ​ꦔꦺꦴꦩꦺꦴꦁ:“ꦲ꦳ꦪꦸꦏ꧀!”ꦲꦏꦸ​ꦔꦼꦩꦠ꧀ꦠꦏꦺꦠꦼꦫꦸꦱ꧀ꦮꦼꦫꦸꦃ​ꦗꦫꦤ꧀ꦲꦶꦉꦁ​꧈​ꦢꦶꦠꦸꦩ꧀ꦥꦏ꧀ꦏꦶ​ꦮꦺꦴꦁ​ꦱꦶꦁ​ꦚꦼꦏꦼꦭ꧀ꦠꦶꦩ꧀ꦧꦁꦔꦤ꧀꧈​ ⁶ꦲꦏꦸ​ꦠꦼꦫꦸꦱ꧀ꦏꦿꦸꦔꦸ​ꦏꦪ​ꦱ꧀ꦮꦫ​ꦱꦁꦏꦠꦼꦔꦃꦠꦼꦔꦃꦲꦺ​ꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦩꦲꦸ​꧈​ꦲꦸꦤꦶꦤꦺ​:“ꦒꦤ꧀ꦢꦸꦩ꧀ꦱꦼꦏꦶꦭꦺꦴꦏꦁꦒꦺꦴ​ꦧꦪꦂꦫꦤ꧀ꦱꦼꦢꦶꦤ​ꦭꦤ꧀ꦗꦒꦸꦁ​ꦠꦼꦭꦸꦁ​ꦏꦶꦭꦺꦴ​ꦏꦁꦒꦺꦴ​ꦧꦪꦂꦫꦤ꧀ꦱꦼꦢꦶꦤ​꧉​ꦤꦁꦔꦶꦁ​ꦲꦗ​ꦔꦿꦸꦱꦏ꧀ꦮꦶꦠ꧀ꦮꦶꦠ꧀ꦎꦭꦺꦥ꦳꧀ꦭꦤ꧀ꦮꦶꦠ꧀ꦮꦶꦠ꧀ꦢꦽꦲꦶꦥ꦳꧀꧈​”

⁷꧋ꦕꦼꦩ꧀ꦥꦺꦤꦺ​ꦠꦼꦫꦸꦱ꧀​ꦔ꧀ꦭꦺꦤ꧀ꦠꦺꦏ꧀ꦱꦺꦒꦼꦭ꧀ꦱꦶꦁ​ꦤꦺꦴꦩꦼꦂ​ꦥꦥꦠ꧀ꦭꦤ꧀ꦲꦏꦸ​ꦏꦿꦸꦔꦸ​ꦏꦲꦸꦫꦶꦥ꧀ꦥꦤ꧀ꦱꦶꦁ​ꦤꦺꦴꦩꦼꦂ​ꦥꦥꦠ꧀ꦔꦺꦴꦩꦺꦴꦁ:“ꦲ꦳ꦪꦸꦏ꧀!” ⁸ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦲꦺꦤꦺꦁꦗꦫꦤ꧀ꦫꦸꦥꦤꦺ​ꦥꦸꦕꦼꦠ꧀ꦢꦶꦠꦸꦩ꧀ꦥꦏ꧀ꦏꦶ​ꦮꦺꦴꦁ​ꦱꦶꦁ​ꦗꦼꦤꦼꦁꦔꦺ​ꦥꦠꦶ​꧉​ꦮꦺꦴꦁꦔꦺ​ꦢꦶꦲꦼꦠꦸꦠ꧀ꦠꦏꦺꦏꦫꦺꦴ​ꦏꦿꦠꦺꦴꦤꦺ​ꦥꦠꦶ​꧉​ꦥꦠꦶ​ꦭꦤ꧀ꦏꦿꦠꦺꦴꦤꦺ​ꦥꦠꦶ​ꦥꦢ​ꦲꦺꦤ꧀ꦠꦸꦏ꧀ꦥꦔ꧀ꦮꦱ​ꦩꦠꦺꦤ꧀ꦤꦶ​ꦱꦼꦥꦿꦥꦠ꧀ꦠꦺꦧꦸꦩꦶ​ꦔꦁꦒꦺꦴ​ꦥꦼꦢꦁ꧈​ꦏꦸꦫꦁ​ꦥꦔꦤ꧀ ꦥꦼꦂꦚꦏꦶꦠ꧀ꦭꦤ꧀ꦏꦺꦮꦤ꧀ꦒꦭꦏ꧀꧈​ ⁹ꦏꦢꦸꦁ​ꦕꦼꦩ꧀ꦥꦺꦤꦺ​ꦔ꧀ꦭꦺꦤ꧀ꦠꦺꦏ꧀ꦱꦺꦒꦼꦭ꧀ꦱꦶꦁ​ꦤꦺꦴꦩꦼꦂ​ꦭꦶꦩ​꧈​ꦲꦏꦸ​ꦮꦼꦫꦸꦃ​ꦤꦁꦔꦶꦱꦺꦴꦂꦫꦺ​ꦲꦭ꧀ꦠꦂꦚꦮꦚꦮꦤꦺꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦢꦶꦥꦠꦺꦤ꧀ꦤꦶ​꧈​ꦗꦭꦂꦫꦤ꧀ꦥꦢ​ꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁰ꦚꦮꦚꦮꦩꦲꦸꦥꦢꦕꦼꦭꦸꦏ꧀ꦕꦼꦭꦸꦏ꧀ꦔꦁꦒꦺꦴꦱ꧀ꦮꦫꦧꦤ꧀ꦠꦼꦂ꧈​ꦲꦸꦤꦶꦤꦺ:“ꦢꦸꦃꦏꦿꦶꦱ꧀ꦡꦸꦱ꧀ꦱꦶꦁꦏ꧀ꦮꦱꦢꦺꦮꦺ꧈​ꦱꦶꦁꦱꦸꦕꦶꦢꦺꦮꦺꦭꦤ꧀ꦱꦶꦁꦠꦼꦩꦼꦤ꧀ꦢꦺꦮꦺ!ꦏꦸꦢꦸꦔꦼꦤ꧀ꦠꦺꦤ꧀ꦤꦶꦱꦼꦥꦶꦫꦩꦼꦤꦺꦃꦱꦸꦮꦺꦤꦺꦲꦼꦁꦒꦺꦴꦤ꧀ꦩꦸꦔꦿꦸꦠꦸꦩꦤꦸꦁꦱꦤꦁꦧꦸꦩꦶ꧈​ꦏꦁꦒꦺꦴꦩ꧀ꦧꦊꦱ꧀ꦲꦼꦁꦒꦺꦴꦤꦺꦥꦢꦩꦠꦺꦤ꧀ꦤꦶꦲꦮꦏ꧀ꦏꦺꦢꦺꦮꦺ?” ¹¹ꦚꦮꦚꦮꦩꦲꦸꦠꦼꦫꦸꦱ꧀ꦢꦶꦏꦺꦏ꧀ꦏꦶꦱꦭꦶꦤ꧀ꦥꦸꦠꦶꦃꦱꦶꦗꦶꦱꦶꦗꦶꦭꦤ꧀ꦢꦶꦲꦺꦴꦩꦺꦴꦁꦔꦶ꧈​ꦱꦸꦥꦪꦥꦢꦭꦺꦫꦺꦤ꧀​ꦤ꧀ꦢꦶꦱꦶꦏ꧀ꦔꦼꦤ꧀ꦠꦺꦤ꧀ꦤꦶꦒꦼꦤꦼꦥ꧀ꦥꦺꦕꦕꦃꦲꦺꦮꦺꦴꦁꦮꦺꦴꦁꦱꦶꦁꦠꦸꦁꦒꦭ꧀ꦥꦼꦁꦒꦮꦺꦏꦸꦏꦫꦺꦴꦮꦺꦴꦁꦮꦺꦴꦁꦏꦸꦮꦶꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦱꦶꦁꦲꦸꦒꦧꦏꦭ꧀ꦥꦢꦢꦶꦥꦠꦺꦤ꧀ꦤꦶꦏꦪꦮꦺꦴꦁꦮꦺꦴꦁꦩꦲꦸ꧉​

¹²꧋ꦏꦢꦸꦁ​ꦕꦼꦩ꧀ꦥꦺꦤꦺ​ꦔ꧀ꦭꦺꦤ꧀ꦠꦺꦏ꧀ꦱꦺꦒꦼꦭ꧀ꦱꦶꦁ​ꦤꦺꦴꦩꦼꦂ​ꦤꦼꦤꦼꦩ꧀ ꦲꦏꦸ​ꦠꦼꦫꦸꦱ꧀ꦏꦿꦱ​ ꦲꦺꦤꦺꦁꦭꦶꦤ꧀ꦢꦸꦱꦶꦁ​ꦔ꧀ꦒꦼꦒꦶꦫꦶꦱꦶ​꧉​ꦱꦽꦔꦺꦔꦺ​ꦩꦭꦶꦃ​ꦲꦶꦉꦁ​ꦏꦪ​ꦲꦉꦁ​ꦭꦤ꧀​ꦩ꧀ꦧꦸꦭꦤ꧀ꦤꦺꦩꦭꦶꦃ​ꦲꦧꦁ​ꦏꦪ​ꦒꦼꦠꦶꦃ​꧉​ ¹³ꦭꦶꦤ꧀ꦠꦁꦭꦶꦤ꧀ꦠꦁ​ꦤꦁꦭꦔꦶꦠ꧀ꦥꦢ​ꦫꦺꦴꦤ꧀ꦠꦺꦴꦏ꧀ꦠꦶꦧ​ꦤꦁꦧꦸꦩꦶ​꧈​ꦏꦪ​ꦮꦺꦴꦃ​ꦲꦚ꧀ꦗꦶꦂ​ꦱꦶꦁ​ꦫꦺꦴꦤ꧀ꦠꦺꦴꦏ꧀ꦏꦼꦤꦺꦁꦲꦔꦶꦤ꧀ꦒꦼꦢꦺ꧉​ ¹⁴ꦭꦔꦶꦠ꧀ꦠꦺ​ꦠꦼꦫꦸꦱ꧀​ꦔ꧀ꦭꦸꦤ꧀ꦠꦸꦁꦏꦪ​ꦏꦼꦂꦠꦱ꧀ꦢꦶꦒꦸꦭꦸꦁ​ꦭꦤ꧀ꦱꦏ꧀ꦏꦺꦃꦲꦺꦒꦸꦤꦸꦁ​ꦭꦤ꧀ꦥꦸꦭꦥꦢ​ꦔꦭꦶꦃ​ꦱꦁꦏꦥꦁꦒꦺꦴꦤ꧀ꦤꦤ꧀ꦤꦺ​꧉​ ¹⁵ꦥꦫ​ꦫꦠꦸ​ꦤꦁꦧꦸꦩꦶ​꧈​ꦥꦫ​ꦥꦼꦁꦒꦼꦢꦺꦭꦤ꧀ꦥꦫ​ꦥꦼꦤꦸꦤ꧀ꦠꦸꦤꦺ​ꦩꦶꦭꦶꦠꦺꦂ​꧈​ꦥꦫ​ꦮꦺꦴꦁ​ꦱꦸꦒꦶꦃ​ꦭꦤ꧀ꦥꦫ​ꦥꦔ꧀ꦮꦱ​꧈​ꦱꦏ꧀ꦏꦺꦃꦲꦺꦱ꧀ꦭꦥ꦳꧀ꦭꦤ꧀ꦮꦺꦴꦁ​ꦩꦼꦂꦢꦺꦏꦥꦢ​ꦤ꧀ꦢꦼꦭꦶꦏ꧀ꦤꦁꦒꦸꦮꦒꦸꦮ​ꦭꦤ꧀ꦤꦁꦮꦠꦸꦤꦺ​ꦒꦸꦤꦸꦁꦒꦸꦤꦸꦁ​꧉​ ¹⁶ꦮꦺꦴꦁꦮꦺꦴꦁꦩꦲꦸꦥꦢꦔꦺꦴꦩꦺꦴꦁꦩꦫꦁꦒꦸꦤꦸꦁꦒꦸꦤꦸꦁꦭꦤ꧀ꦮꦠꦸꦮꦠꦸ:“ꦠꦶꦧꦲꦤꦶꦧꦤꦶꦲꦮꦏ꧀ꦏꦺꦢꦺꦮꦺꦭꦤ꧀ꦲꦭꦶꦁꦔꦭꦶꦁꦔꦤꦲꦮꦏ꧀ꦏꦺꦢꦺꦮꦺ꧈​ꦱꦸꦥꦪꦲꦮꦏ꧀ꦏꦺꦢꦺꦮꦺꦲꦺꦴꦫꦏꦺꦠꦺꦴꦏ꧀ꦏꦫꦺꦴꦮꦺꦴꦁꦱꦶꦁꦚ꧀ꦗꦒꦺꦴꦁꦤꦁꦢꦩ꧀ꦥꦂꦭꦤ꧀ꦱꦸꦥꦪꦲꦮꦏ꧀ꦏꦺꦢꦺꦮꦺꦲꦺꦴꦫꦏꦼꦤꦺꦁꦱꦼꦠꦿꦥꦤ꧀ꦤꦺꦕꦼꦩ꧀ꦥꦺꦤꦺ꧉​ ¹⁷ꦲꦮꦶꦠ꧀ꦢꦶꦤꦥꦼꦩ꧀ꦧꦊꦱꦤ꧀ꦤꦺꦱꦶꦁꦚ꧀ꦗꦒꦺꦴꦁꦤꦁꦢꦩ꧀ꦥꦂꦭꦤ꧀ꦕꦼꦩ꧀ꦥꦺꦤꦺꦮꦶꦱ꧀ꦠꦼꦏ;ꦭꦃꦱꦥꦱꦶꦁꦧꦶꦱꦲꦸꦫꦶꦥ꧀?”

↑ ↑ ↑

꧋ꦮꦺꦴꦁꦱꦠꦸꦱ꧀ꦥꦠꦁꦥꦸꦭꦸꦃꦥꦥꦠ꧀ꦲꦺꦮꦸ꧉​

꧇​꧗꧇​ ¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦩꦸꦭꦺꦏꦠ꧀ꦥꦥꦠ꧀ꦔꦢꦼꦏ꧀ꦤꦁꦥꦺꦴꦗꦺꦴꦏ꧀ꦏꦺ​ꦧꦸꦩꦶ​ꦥꦥꦠ꧀ ꦥꦢ​ꦚꦼꦏꦼꦭ꧀ꦲꦔꦶꦤ꧀ꦤꦁꦧꦸꦩꦶ​ꦱꦁꦏꦏꦺꦧ꧀ꦭꦠ꧀ꦥꦥꦠ꧀꧈​ꦢꦢꦶꦤꦺ​ꦤꦁꦢꦫꦠ꧀ꦠꦤ꧀ ꦤꦁꦱꦼꦒꦫ​ꦭꦤ꧀ꦤꦁꦮꦶꦠ꧀ꦮꦶꦠ꧀ꦠꦤ꧀ꦲꦺꦴꦫ​ꦲꦺꦤꦺꦁꦲꦔꦶꦤ꧀ ꦲꦤ꧀ꦠꦼꦁ​ꦏꦧꦺꦃ​꧉​ ²ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦲꦺꦤꦺꦁꦩꦸꦭꦺꦏꦠ꧀ꦭꦶꦪꦤꦺ​ꦚ꧀ꦗꦼꦢꦸꦭ꧀ꦱꦁꦏꦮꦺꦠꦤ꧀ ꦔ꧀ꦒꦮ​ꦕꦥ꧀ꦕꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀꧈​ꦏꦫꦺꦴ​ꦱ꧀ꦮꦫ​ꦧꦤ꧀ꦠꦼꦂ​ꦩꦸꦭꦺꦏꦠ꧀ꦩꦲꦸ​ꦔꦺꦴꦩꦺꦴꦁꦩꦫꦁ​ꦩꦸꦭꦺꦏꦠ꧀ꦥꦥꦠ꧀ꦱꦶꦁ​ꦢꦶꦏꦺꦏ꧀ꦏꦶꦥꦔ꧀ꦮꦱ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦿꦸꦱꦏ꧀ꦢꦫꦠ꧀ꦠꦤ꧀ꦭꦤ꧀ꦱꦼꦒꦫ​꧉​ ³ꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦲꦗ​ꦔꦿꦸꦱꦏ꧀ꦢꦫꦠ꧀ꦠꦤ꧀ꦭꦤ꧀ꦱꦼꦒꦫ​ꦲꦥ​ꦮꦶꦠ꧀ꦮꦶꦠ꧀ꦠꦤ꧀ ꦱꦏ꧀ꦢꦸꦫꦸꦁꦔꦺꦲꦮꦏ꧀ꦏꦺ​ꦢꦺꦮꦺꦔꦼꦕꦥ꧀ꦧꦠꦸꦏ꧀ꦏꦺꦥꦫ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​” ⁴ꦲꦏꦸ​ꦠꦼꦫꦸꦱ꧀ꦢꦶꦲꦺꦴꦩꦺꦴꦁꦔꦶꦤꦺꦏ꧀ꦕꦕꦃꦲꦺ​ꦥꦫ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦢꦶꦲꦼꦕꦥ꧀ꦥꦶ​ꦧꦠꦸꦏ꧀ꦏꦺꦲꦺꦤꦺꦁꦱꦠꦸꦱ꧀ꦥꦠꦁ​ꦥꦸꦭꦸꦃ​ꦥꦥꦠ꧀ꦲꦺꦮꦸ​꧉​ ^5-8ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦏꦤꦺ​ꦱꦁꦏꦠꦊꦂꦫꦺ​ꦧꦁꦱ​ꦆꦱꦿꦌꦭ꧀ꦫꦺꦴꦭꦱ꧀ ꦱꦧꦼꦤ꧀ꦠꦊꦂ​ꦮꦺꦴꦁ​12.000꧉​ꦪꦏꦸꦮꦶ​ꦱꦁꦏꦠꦊꦂꦫꦺ​ꦪꦸꦢꦃ꧈​ꦫꦸꦧꦺꦤ꧀ ꦒꦢ꧀ ꦄꦱꦼꦂ꧈​ꦤꦥ꦳꧀ꦠꦭꦶ​꧈​ꦩꦤꦱꦺ꧈​ꦱꦶꦩꦺꦪꦺꦴꦤ꧀ ꦭꦺꦮ꦳ꦶ꧈​ꦆꦱꦏꦂ​꧈​ꦯꦺꦧꦸꦭꦺꦴꦤ꧀ ꦪꦺꦴꦱꦺꦥ꦳꧀ꦭꦤ꧀ꦧꦺꦚꦩꦶꦤ꧀꧈​

꧋ꦮꦺꦴꦁ​ꦲꦺꦴꦏꦺꦃꦲꦺꦴꦫ​ꦏꦼꦤꦺꦁꦢꦶꦲꦶꦠꦸꦁ꧉​

^9-10꧋ꦲꦏꦸꦠꦼꦫꦸꦱ꧀ꦮꦼꦫꦸꦃꦲꦺꦤꦺꦁꦮꦺꦴꦁꦲꦺꦴꦏꦺꦃꦧꦔꦼꦠ꧀ ꦲꦺꦴꦫꦏꦼꦤꦺꦁꦢꦶꦲꦶꦠꦸꦁꦱꦁꦏꦶꦁꦲꦺꦴꦏꦺꦃꦲꦺ꧉​ꦮꦺꦴꦁꦮꦺꦴꦁꦏꦸꦮꦶꦠꦼꦏꦤꦺꦱꦁꦏꦱꦏ꧀ꦏꦺꦃꦲꦺꦧꦁꦱ꧈​ꦠꦊꦂ꧈​ꦤꦼꦒꦫꦭꦤ꧀ꦧꦱꦭꦤ꧀ꦥꦢꦔꦢꦼꦏ꧀ꦤꦁꦔꦉꦥ꧀ꦥꦺꦢꦩ꧀ꦥꦂꦭꦤ꧀ꦤꦁꦔꦉꦥ꧀ꦥꦺꦕꦼꦩ꧀ꦥꦺꦤꦺ꧉​ꦮꦺꦴꦁꦮꦺꦴꦁꦔꦁꦒꦺꦴꦱꦭꦶꦤ꧀ꦥꦸꦠꦶꦃꦭꦤ꧀ꦚꦼꦏꦼꦭ꧀ꦥꦁꦔꦺꦥꦊꦩ꧀ꦏꦫꦺꦴꦚꦼꦧꦸꦠ꧀ꦔꦁꦒꦺꦴꦱ꧀ꦮꦫꦧꦤ꧀ꦠꦼꦂ꧈​ꦲꦸꦤꦶꦤꦺ:“ꦲꦮꦏ꧀ꦏꦺꦢꦺꦮꦺꦲꦶꦏꦶꦧꦶꦱꦤꦺꦱ꧀ꦭꦩꦼꦠ꧀ꦤꦩꦸꦁꦗꦭꦂꦫꦤ꧀ꦱꦁꦏꦒꦸꦱ꧀ꦠꦶꦄꦭ꧀ꦭꦃꦲꦺꦲꦮꦏ꧀ꦏꦺꦢꦺꦮꦺꦱꦶꦁꦚ꧀ꦗꦒꦺꦴꦁꦤꦁꦢꦩ꧀ꦥꦂꦫꦺꦭꦤ꧀ꦗꦭꦂꦫꦤ꧀ꦱꦁꦏꦕꦼꦩ꧀ꦥꦺꦤꦺ꧉​” ¹¹ꦥꦫ​ꦩꦸꦭꦺꦏꦠ꧀ꦥꦢ​ꦔꦢꦼꦏ꧀ꦔꦸꦧꦼꦁꦔꦶ​ꦢꦩ꧀ꦥꦂꦫꦺ꧈​ꦧꦉꦁ​ꦏꦫꦺꦴ​ꦥꦫ​ꦥꦶꦤꦶꦠꦸꦮ​ꦭꦤ꧀ꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦩꦲꦸ​꧉​ꦥꦫ​ꦩꦸꦭꦺꦏꦠ꧀ꦠꦼꦫꦸꦱ꧀ꦥꦢ​ꦩꦼꦁꦏꦸꦉꦥ꧀ꦱꦸꦗꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦔꦉꦥ꧀ꦥꦺ​ꦢꦩ꧀ꦥꦂꦩꦲꦸ​꧉​ ¹²ꦥꦢꦩꦼꦩꦸꦗꦶꦒꦸꦱ꧀ꦠꦶꦄꦭ꧀ꦭꦃꦠꦼꦩ꧀ꦧꦸꦁꦔꦺ:“ꦄꦩꦺꦤ꧀!ꦱꦏ꧀ꦏꦺꦃꦲꦺꦥꦩꦸꦗꦶꦢꦶꦲꦠꦸꦂꦫꦏꦺꦩꦫꦁꦒꦸꦱ꧀ꦠꦶꦄꦭ꧀ꦭꦃꦲꦺꦲꦮꦏ꧀ꦏꦺꦢꦺꦮꦺ꧈​ꦲꦸꦒꦱꦏ꧀ꦲꦺꦤꦺꦁꦔꦺꦏꦩꦸꦭꦾꦤ꧀ꦭꦤ꧀ꦏꦮꦼꦫꦸꦃ꧉​ꦥꦤ꧀ꦠꦼꦱ꧀ꦤꦺꦏ꧀ꦲꦮꦏ꧀ꦏꦺꦢꦺꦮꦺꦔꦠꦸꦂꦫꦏꦺꦥꦤꦸꦮꦸꦤ꧀ꦭꦤ꧀ꦏꦲꦸꦂꦩꦠ꧀ꦠꦤ꧀꧈​ꦥꦔ꧀ꦮꦱꦭꦤ꧀ꦏꦼꦏꦸꦮꦠ꧀ꦠꦤ꧀ꦤꦺꦭꦁꦒꦼꦁꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦄꦩꦺꦤ꧀!”

¹³꧋ꦠꦼꦫꦸꦱ꧀ꦲꦺꦤꦺꦁꦥꦶꦤꦶꦠꦸꦮ​ꦱꦶꦗꦶ​ꦠꦏꦺꦴꦤ꧀ꦩꦫꦁ​ꦲꦏꦸ​ꦔꦺꦤꦺ​:“ꦲꦥ​ꦏꦺꦴꦮꦺ​ꦔꦼꦂꦠꦶ​ꦱꦥ​ꦱꦶꦁ​ꦔꦁꦒꦺꦴ​ꦱꦭꦶꦤ꧀ꦥꦸꦠꦶꦃ​ꦏꦸꦮꦶ​ꦭꦤ꧀ꦱꦁꦏꦔꦼꦤ꧀ꦢꦶ​ꦠꦼꦏꦤꦺ​?”

¹⁴꧋ꦲꦏꦸ​ꦱꦼꦩꦲꦸꦂ​:“ꦧꦥꦏ꧀ ꦲꦏꦸ​ꦲꦺꦴꦫ​ꦔꦼꦂꦠꦶ​꧉​ꦩꦭꦃ​ꦧꦥꦏ꧀ꦱꦶꦁ​ꦔꦼꦂꦠꦶ​꧉​”

꧋ꦥꦶꦤꦶꦠꦸꦮ​ꦩꦲꦸ​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦲꦏꦸ​:“ꦏꦸꦮꦶ​ꦮꦺꦴꦁꦮꦺꦴꦁ​ꦱꦶꦁ​ꦩꦼꦠꦸ​ꦱꦁꦏꦏꦱꦁꦱꦫꦤ꧀ꦒꦼꦢꦺꦭꦤ꧀ꦱꦶꦁ​ꦮꦶꦱ꧀ꦥꦢ​ꦔꦸꦩ꧀ꦧꦃ​ꦱꦭꦶꦤ꧀ꦤꦺꦢꦢꦶ​ꦥꦸꦠꦶꦃ​ꦔꦁꦒꦺꦴ​ꦒꦼꦠꦶꦃꦲꦺ​ꦕꦼꦩ꧀ꦥꦺꦤꦺ​꧉​ ¹⁵ꦩꦸꦭꦤꦺ​ꦥꦢ​ꦔꦢꦼꦏ꧀ꦤꦁꦔꦉꦥ꧀ꦥꦺ​ꦢꦩ꧀ꦥꦂꦫꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦢ​ꦚꦼꦩ꧀ꦧꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦮꦤ꧀ꦭꦤ꧀ꦮꦼꦔꦶ​ꦤꦁꦲꦺꦴꦩꦃꦲꦺ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦏꦸꦮꦶ​ꦧꦏꦭ꧀ꦩꦁꦒꦺꦴꦤ꧀ꦤꦁꦠꦼꦔꦃꦲꦺ​ꦮꦺꦴꦁꦮꦺꦴꦁ​ꦏꦸꦮꦶ​꧉​ ¹⁶ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦴꦫ​ꦧꦏꦭ꧀ꦔꦿꦱꦏ꧀ꦏꦏꦺꦔꦼꦭꦶꦃ​ꦭꦤ꧀ꦔꦼꦭꦏ꧀ꦩꦼꦤꦺꦃ​ꦭꦤ꧀ꦲꦺꦴꦫ​ꦧꦏꦭ꧀ꦔꦿꦱꦏ꧀ꦏꦏꦺꦥꦤꦱ꧀ꦱꦺ​ꦱꦽꦔꦺꦔꦺ​ꦱꦶꦁ​ꦱꦸꦩꦼꦭꦺꦠ꧀꧈​ ¹⁷ꦲꦮꦶꦠ꧀ꦕꦼꦩ꧀ꦥꦺꦤꦺꦱꦶꦁꦚ꧀ꦗꦒꦺꦴꦁꦤꦁꦢꦩ꧀ꦥꦂꦧꦏꦭ꧀ꦢꦢꦶꦥꦔꦺꦴꦤ꧀ꦤꦺꦭꦤ꧀ꦧꦏꦭ꧀ꦤꦸꦤ꧀ꦠꦸꦤ꧀ꦮꦺꦴꦁꦮꦺꦴꦁꦤꦁꦲꦼꦠꦸꦏ꧀ꦏꦺꦧꦚꦸꦥꦔꦸꦫꦶꦥ꧀ꦥꦤ꧀ꦭꦤ꧀ꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦔꦸꦱꦥ꧀ꦥꦶꦌꦭꦸꦃꦲꦺꦩꦿꦶꦥꦠ꧀ꦠꦺ꧉​”

↑ ↑ ↑

꧋ꦱꦺꦒꦼꦭ꧀ꦱꦶꦁꦤꦺꦴꦩꦼꦂꦥꦶꦠꦸꦢꦶꦏ꧀ꦭꦺꦤ꧀ꦠꦺꦏ꧀꧈​

꧇​꧘꧇​ ¹꧋ꦏꦢꦸꦁ​ꦕꦼꦩ꧀ꦥꦺꦤꦺ​ꦔ꧀ꦭꦺꦤ꧀ꦠꦺꦏ꧀ꦱꦺꦒꦼꦭ꧀ꦱꦶꦁ​ꦤꦺꦴꦩꦼꦂ​ꦥꦶꦠꦸ​꧈​ꦤꦁꦱ꧀ꦮꦂꦒ​ꦠꦼꦫꦸꦱ꧀ꦱꦼꦥꦶ​ꦥꦼꦠ꧀ꦱꦼꦠꦼꦔꦃ​ꦗꦩ꧀ꦱꦸꦮꦺꦤꦺ​꧉​ ²ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦩꦸꦭꦺꦏꦠ꧀ꦥꦶꦠꦸ​ꦔꦢꦼꦏ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦥꦢ​ꦢꦶꦏꦺꦏ꧀ꦏꦶꦠꦿꦺꦴꦩ꧀ꦥꦺꦠ꧀ꦥꦶꦠꦸ​꧉​

³꧋ꦩꦸꦭꦺꦏꦠ꧀ꦭꦶꦪꦤꦺ​ꦱꦶꦁ​ꦔ꧀ꦒꦮ​ꦮꦢꦃꦩꦼꦚꦤ꧀ꦱꦶꦁ​ꦲꦼꦩꦱ꧀ꦚꦼꦢꦼꦏ꧀ꦏꦶꦲꦭ꧀ꦠꦂꦠꦼꦫꦸꦱ꧀ꦔꦢꦼꦏ꧀ꦤꦁꦔꦉꦥ꧀ꦥꦺ​ꦲꦭ꧀ꦠꦂꦩꦲꦸ​꧉​ꦩꦸꦭꦺꦏꦠ꧀ꦩꦲꦸ​ꦲꦺꦤ꧀ꦠꦸꦏ꧀ꦩꦼꦚꦤ꧀ꦲꦺꦴꦏꦺꦃꦱꦶꦁ​ꦏꦸꦢꦸ​ꦢꦶꦲꦺꦴꦧꦺꦴꦁ​ꦭꦤ꧀ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦧꦉꦁ​ꦏꦫꦺꦴ​ꦥꦤ꧀ꦢꦺꦴꦔꦤꦺ​ꦥꦫ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦧꦺꦃ​꧈​ꦤꦁꦲꦭ꧀ꦠꦂꦲꦼꦩꦱ꧀ꦤꦁꦔꦉꦥ꧀ꦥꦺ​ꦢꦩ꧀ꦥꦂ꧉​ ⁴ꦏꦼꦧꦸꦭ꧀ꦭꦺ​ꦩꦼꦚꦤ꧀ꦱꦶꦁ​ꦢꦶꦲꦺꦴꦧꦺꦴꦁ​ꦕꦩ꧀ꦥꦸꦂ​ꦏꦫꦺꦴ​ꦥꦤ꧀ꦢꦺꦴꦔꦤꦺ​ꦥꦫ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦸꦁꦒꦃ​ꦱꦁꦏꦠꦔꦤ꧀ꦤꦺ​ꦩꦸꦭꦺꦏꦠ꧀ꦩꦲꦸ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁵ꦩꦸꦭꦺꦏꦠ꧀ꦠꦺꦠꦼꦫꦸꦱ꧀​ꦔ꧀ꦒꦮ​ꦮꦢꦃꦩꦼꦚꦤ꧀ꦤꦺ​꧈​ꦠꦼꦫꦸꦱ꧀ꦢꦶꦲꦶꦱꦺꦤ꧀ꦤꦶ​ꦒꦼꦤꦶ​ꦱꦁꦏꦲꦭ꧀ꦠꦂ꧈​ꦠꦼꦫꦸꦱ꧀ꦢꦶꦧꦸꦮꦁ​ꦤꦁꦧꦸꦩꦶ​꧉​ꦠꦼꦫꦸꦱ꧀ꦲꦺꦤꦺꦁꦱ꧀ꦮꦫꦤꦺ​ꦒ꧀ꦭꦸꦢꦸꦏ꧀ꦒꦼꦩ꧀ꦭꦸꦢꦸꦏ꧀ꦧꦉꦁ​ꦏꦫꦺꦴ​ꦏ꧀ꦭꦺꦭꦥ꧀ꦥꦺꦧ꧀ꦊꦢꦺꦏ꧀ ꦲꦸꦒ​ꦲꦺꦤꦺꦁꦭꦶꦤ꧀ꦢꦸ꧉​

⁶꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦩꦸꦭꦺꦏꦠ꧀ꦥꦶꦠꦸ​ꦱꦶꦁ​ꦥꦢ​ꦚꦼꦏꦼꦭ꧀ꦠꦿꦺꦴꦩ꧀ꦥꦺꦠ꧀ꦩꦲꦸ​ꦠꦼꦫꦸꦱ꧀ꦥꦢ​ꦠꦠꦠꦠ​ꦲꦉꦥ꧀ꦢꦶꦲꦸꦤꦺꦏ꧀ꦏꦏꦺ꧉​

⁷꧋ꦏꦢꦸꦁ​ꦩꦸꦭꦺꦏꦠ꧀ꦱꦶꦁ​ꦤꦺꦴꦩꦼꦂ​ꦱꦶꦗꦶ​ꦔꦸꦤꦺꦏ꧀ꦏꦏꦺꦠꦿꦺꦴꦩ꧀ꦥꦺꦠ꧀ꦠꦺ꧈​ꦠꦼꦫꦸꦱ꧀ꦲꦺꦤꦺꦁꦲꦸꦢꦤ꧀ꦏꦿꦶꦏꦶꦭ꧀ꦲꦺꦱ꧀ꦭꦤ꧀ꦒꦼꦤꦶ​ꦕꦩ꧀ꦥꦸꦂ​ꦏꦫꦺꦴ​ꦒꦼꦠꦶꦃ​ꦠꦶꦧ​ꦤꦁꦧꦸꦩꦶ​꧉​ꦱꦏ꧀ꦥꦿꦠꦼꦭꦸꦤꦺꦧꦸꦩꦶ​ꦭꦤ꧀ꦱꦏ꧀ꦥꦿꦠꦼꦭꦸꦤꦺꦮꦶꦠ꧀ꦮꦶꦠ꧀ꦠꦤ꧀ꦏꦺꦴꦧꦺꦴꦁ​ꦏꦧꦺꦃ​꧈​ꦲꦸꦒ​ꦱꦏ꧀ꦏꦺꦃꦲꦺꦱꦸꦏꦼꦠ꧀꧈​

⁸꧋ꦩꦸꦭꦺꦏꦠ꧀ꦤꦺꦴꦩꦼꦂꦭꦺꦴꦫꦺꦴꦠꦼꦫꦸꦱ꧀ꦔꦸꦤꦺꦏ꧀ꦏꦏꦺꦠꦿꦺꦴꦩ꧀ꦥꦺꦠ꧀ꦠꦺ꧉​ꦠꦼꦫꦸꦱ꧀ꦲꦺꦤꦺꦁꦏꦪꦒꦸꦤꦸꦁꦒꦼꦢꦺꦩꦼꦠꦸꦒꦼꦤꦶꦤꦺꦢꦶ​ꦲꦸꦚ꧀ꦕꦭ꧀ꦭꦏꦺꦤꦁꦱꦼꦒꦫ꧉​ꦱꦏ꧀ꦥꦿꦠꦼꦭꦸꦤꦺꦱꦼꦒꦫꦠꦼꦫꦸꦱ꧀ꦩꦭꦶꦃꦢꦢꦶꦒꦼꦠꦶꦃ꧉​ ⁹ꦱꦏ꧀ꦥꦿꦠꦼꦭꦸꦤꦺꦏꦲꦸꦫꦶꦥ꧀ꦥꦤ꧀ꦤꦁꦱꦼꦒꦫ​ꦠꦼꦫꦸꦱ꧀ꦥꦢ​ꦩꦠꦶ​ꦭꦤ꧀ꦱꦏ꧀ꦥꦿꦠꦼꦭꦸꦤꦺꦏꦥꦭ꧀ꦏꦥꦭ꧀ꦏꦼꦊꦥ꧀ꦏꦧꦺꦃ​꧉​ ¹⁰ꦩꦸꦭꦺꦏꦠ꧀ꦤꦺꦴꦩꦼꦂ​ꦠꦼꦭꦸ​ꦠꦼꦫꦸꦱ꧀ꦔꦸꦤꦺꦏ꧀ꦏꦏꦺꦠꦿꦺꦴꦩ꧀ꦥꦺꦠ꧀ꦠꦺ꧈​ꦠꦼꦫꦸꦱ꧀ꦲꦺꦤꦺꦁꦭꦶꦤ꧀ꦠꦁ​ꦒꦼꦢꦺꦱꦶꦁ​ꦩꦸꦫꦸꦥ꧀ꦏꦪ​ꦲꦺꦴꦧꦺꦴꦂ​꧈​ꦠꦶꦧ​ꦱꦁꦏꦭꦔꦶꦠ꧀꧈​ꦭꦶꦤ꧀ꦠꦁ​ꦩꦸꦫꦸꦥ꧀ꦏꦸꦮꦶ​ꦤꦶꦧꦤꦶ​ꦱꦏ꧀ꦥꦿꦠꦼꦭꦸꦤꦺꦭꦫꦲꦤ꧀ꦤꦺꦭꦤ꧀ꦲꦼꦠꦸꦏ꧀ꦲꦼꦠꦸꦏ꧀ꦏꦺꦧꦚꦸ​꧉​ ¹¹ꦭꦶꦤ꧀ꦠꦁꦔꦺ​ꦗꦼꦤꦼꦁꦔꦺ​ꦄꦧ꧀ꦱꦶꦤ꧀ꦠꦸ꧈​ꦠꦼꦒꦼꦱ꧀ꦱꦺ​ꦥꦲꦶꦠ꧀꧈​ꦱꦏ꧀ꦥꦿꦠꦼꦭꦸꦤꦺꦱꦏ꧀ꦏꦺꦃꦲꦺꦧꦚꦸ​ꦠꦼꦫꦸꦱ꧀ꦩꦭꦶꦃ​ꦥꦲꦶꦠ꧀ ꦩꦫꦏ꧀ꦏꦏꦺꦲꦺꦴꦏꦺꦃꦮꦺꦴꦁ​ꦥꦢ​ꦩꦠꦶ​꧈​ꦗꦭꦂꦫꦤ꧀ꦔꦺꦴꦩ꧀ꦧꦺ​ꦧꦚꦸ​ꦥꦲꦶꦠ꧀ꦏꦸꦮꦶ​꧉​

¹²꧋ꦩꦸꦭꦺꦏꦠ꧀ꦤꦺꦴꦩꦼꦂ​ꦥꦥꦠ꧀ꦠꦼꦫꦸꦱ꧀ꦔꦸꦤꦺꦏ꧀ꦏꦏꦺꦠꦿꦺꦴꦩ꧀ꦥꦺꦠ꧀ꦠꦺ꧈​ꦠꦼꦫꦸꦱ꧀ꦱꦏ꧀ꦥꦿꦠꦼꦭꦸꦤꦺꦱꦽꦔꦺꦔꦺ​ꦭꦤ꧀ꦱꦏ꧀ꦥꦿꦠꦼꦭꦸꦤꦺꦩ꧀ꦧꦸꦭꦤ꧀ ꦲꦸꦒ​ꦱꦏ꧀ꦥꦿꦠꦼꦭꦸꦤꦺꦭꦶꦤ꧀ꦠꦁꦭꦶꦤ꧀ꦠꦁ​ꦲꦶꦭꦁ​ꦱ꧀ꦭꦺꦴꦫꦺꦴꦠ꧀ꦠꦺ꧈​ꦩꦫꦏ꧀ꦏꦏꦺꦱꦏ꧀ꦥꦿꦠꦼꦭꦸꦤꦺꦲꦮꦤ꧀ꦭꦤ꧀ꦱꦏ꧀ꦥꦿꦠꦼꦭꦸꦤꦺꦮꦼꦔꦶ​ꦲꦶꦭꦁ​ꦥꦢꦁꦔꦺ꧉​

¹³꧋ꦲꦏꦸꦠꦼꦫꦸꦱ꧀ꦮꦼꦫꦸꦃꦩꦤꦸꦏ꧀ꦒꦫꦸꦢꦩꦧꦸꦂꦢꦸꦮꦸꦂꦤꦁꦲꦮꦁꦔꦮꦁ꧉​ꦩꦤꦸꦏ꧀ꦩꦲꦸꦚꦸꦮꦫꦧꦤ꧀ꦠꦼꦂ꧉​“ꦕꦶꦭꦏ꧈​ꦕꦶꦭꦏ!ꦕꦶꦭꦏꦤꦼꦏꦤꦶꦱꦏ꧀ꦏꦺꦃꦲꦺꦮꦺꦴꦁꦤꦁꦧꦸꦩꦶ꧈​ꦤꦺꦏ꧀ꦩꦸꦭꦺꦏꦠ꧀ꦠꦼꦭꦸꦭꦶꦪꦤꦺꦔꦸꦤꦺꦏ꧀ꦏꦏꦺꦠꦿꦺꦴꦩ꧀ꦥꦺꦠ꧀ꦠꦺ꧉​”

↑ ↑ ↑

꧋ꦠꦿꦺꦴꦩ꧀ꦥꦺꦠ꧀ꦱꦶꦁꦭꦶꦩ꧉​

꧇​꧙꧇​ ¹꧋ꦩꦸꦭꦺꦏꦠ꧀ꦱꦶꦁ​ꦤꦺꦴꦩꦼꦂ​ꦭꦶꦩ​ꦠꦼꦫꦸꦱ꧀ꦔꦸꦤꦺꦏ꧀ꦏꦏꦺꦠꦿꦺꦴꦩ꧀ꦥꦺꦠ꧀ꦠꦺ꧉​ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦲꦺꦤꦺꦁꦭꦶꦤ꧀ꦠꦁ​ꦠꦶꦧ​ꦱꦁꦏꦭꦔꦶꦠ꧀ꦤꦶꦧꦤꦶ​ꦧꦸꦩꦶ​꧉​ꦭꦶꦤ꧀ꦠꦁ​ꦩꦲꦸ​ꦲꦺꦤ꧀ꦠꦸꦏ꧀ꦏꦸꦚ꧀ꦕꦶꦤꦺ​ꦭꦮꦁꦔꦺ​ꦗꦸꦫꦁ​꧉​ ²ꦏꦢꦸꦁ​ꦭꦮꦁꦔꦺ​ꦢꦶꦧꦸꦏꦏ꧀ ꦠꦼꦫꦸꦱ꧀ꦲꦺꦤꦺꦁꦏꦼꦧꦸꦭ꧀ꦩꦼꦠꦸ​ꦱꦁꦏꦗꦸꦫꦁ​ꦩꦲꦸ​꧈​ꦏꦪ​ꦏꦼꦧꦸꦭ꧀ꦭꦺ​ꦥꦮꦺꦴꦤ꧀ꦒꦼꦢꦺ꧉​ꦱ꧀ꦭꦺꦴꦫꦺꦴꦠ꧀ꦠꦺꦱꦽꦔꦺꦔꦺ​ꦭꦤ꧀ꦲꦮꦁꦔꦮꦁꦩꦭꦶꦃ​ꦥꦼꦠꦼꦁ​꧈​ꦗꦭꦂꦫꦤ꧀ꦱꦁꦏꦏꦼꦧꦸꦭ꧀ꦩꦲꦸ​꧉​ ³ꦱꦁꦏꦏꦼꦧꦸꦭ꧀ꦩꦲꦸ​ꦠꦼꦫꦸꦱ꧀ꦲꦺꦤꦺꦁꦮꦭꦁ​ꦲꦺꦴꦏꦺꦃꦥꦢ​ꦩꦼꦠꦸ​ꦭꦤ꧀ꦤꦶꦧ​ꦤꦁꦧꦸꦩꦶ​꧉​ꦮꦭꦁꦮꦭꦁ​ꦩꦲꦸ​ꦲꦺꦤ꧀ꦠꦸꦏ꧀ꦥꦔ꧀ꦮꦱ​꧈​ꦩꦭꦶꦃ​ꦧꦶꦱ​ꦔꦼꦤ꧀ꦠꦸꦥ꧀ꦏꦪ​ꦏꦭꦗꦼꦁꦏꦶꦁ​꧉​ ⁴ꦮꦭꦁꦮꦭꦁ​ꦩꦲꦸ​ꦥꦢ​ꦢꦶꦥꦼꦔꦶꦁ​ꦔꦿꦸꦱꦏ꧀ꦱꦸꦏꦼꦠ꧀ꦲꦥ​ꦮꦶꦠ꧀ꦮꦶꦠ꧀ꦠꦤ꧀ꦭꦤ꧀ꦠꦼꦠꦸꦏꦸꦭ꧀ꦭꦤ꧀ꦭꦶꦪꦭꦶꦪꦤꦺ​ꦤꦁꦧꦸꦩꦶ​꧈​ꦏꦼꦗꦧ​ꦤꦩꦸꦁ​ꦩꦤꦸꦁꦱ​ꦱꦶꦁ​ꦤꦁꦧꦠꦸꦏ꧀ꦏꦺꦲꦺꦴꦫ​ꦲꦺꦤꦺꦁꦕꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁵ꦮꦭꦁꦮꦭꦁ​ꦩꦲꦸ​ꦲꦺꦴꦫ​ꦢꦶꦭꦶꦭꦤꦶ​ꦩꦠꦺꦤ꧀ꦤꦶ​ꦩꦤꦸꦁꦱ​꧈​ꦤꦁꦔꦶꦁ​ꦤꦩꦸꦁ​ꦔꦗꦂ​ꦮꦲꦺ​ꦔꦁꦒꦺꦴ​ꦫꦱ​ꦭꦫ​꧉​ꦫꦱ​ꦭꦫ​ꦩꦲꦸ​ꦱꦸꦮꦺꦤꦺ​ꦭꦶꦩꦁ​ꦱꦱꦶ​ꦭꦤ꧀ꦫꦱꦤꦺ​ꦏꦪ​ꦤꦺꦏ꧀ꦢꦶꦲꦼꦤ꧀ꦠꦸꦥ꧀ꦏꦭꦗꦼꦁꦏꦶꦁ​꧉​ ⁶ꦱꦏ꧀ꦗꦼꦫꦺꦴꦤꦺꦭꦶꦩꦁ​ꦱꦱꦶ​ꦩꦲꦸ​ꦮꦺꦴꦁꦮꦺꦴꦁ​ꦚ꧀ꦗꦭꦸꦏ꧀ꦩꦠꦶ​ꦮꦲꦺ​ꦱꦁꦏꦶꦁꦭꦫꦤꦺ​꧈​ꦤꦁꦔꦶꦁ​ꦲꦺꦴꦫ​ꦧꦶꦱ​꧉​ꦥꦢ​ꦏꦼꦥꦺꦔꦶꦤ꧀ꦩꦠꦶ​꧈​ꦤꦁꦔꦶꦁ​ꦩꦭꦃ​ꦢꦶꦲꦼꦢꦺꦴꦃꦲꦶ​ꦏꦫꦺꦴ​ꦥꦠꦶ​꧉​

⁷꧋ꦫꦸꦥꦤꦺ​ꦮꦭꦁꦮꦭꦁ​ꦩꦲꦸ​ꦏꦪ​ꦗꦫꦤ꧀ꦱꦶꦁ​ꦠꦠꦠꦠ​ꦲꦉꦥ꧀ꦥꦼꦫꦁ​꧉​ꦤꦁꦲꦼꦤ꧀ꦢꦱ꧀ꦱꦺꦲꦺꦤꦺꦁꦏꦪ​ꦩꦏꦸꦠꦲꦼꦩꦱ꧀꧈​ꦫꦲꦶꦤꦺ​ꦏꦪ​ꦫꦲꦶ​ꦩꦤꦸꦁꦱ​꧉​ ⁸ꦮꦸꦭꦸꦤꦺ​ꦏꦪ​ꦫꦩ꧀ꦧꦸꦠ꧀ꦠꦺ​ꦮꦺꦴꦁ​ꦮꦺꦢꦺꦴꦏ꧀ꦭꦤ꧀ꦲꦸꦤ꧀ꦠꦸꦤꦺ​ꦏꦪ​ꦲꦸꦤ꧀ꦠꦸ​ꦱꦶꦔ​꧉​ ⁹ꦢꦢꦤꦺꦏꦪ​ꦢꦶꦠꦸꦠꦸꦥ꧀ꦥꦶ​ꦮꦼꦱꦶ​ꦭꦤ꧀ꦱ꧀ꦮꦫꦤꦺ​ꦱ꧀ꦮꦶꦮꦶꦤꦺ​ꦒꦼꦩꦿꦸꦢꦸꦏ꧀ꦏꦪ​ꦱ꧀ꦮꦫꦤꦺ​ꦒꦿꦺꦴꦧꦏ꧀ꦥꦼꦫꦁ​ꦢꦶꦠꦫꦶꦏ꧀ꦏꦫꦺꦴ​ꦗꦫꦤ꧀ꦥꦶꦫꦁꦥꦶꦫꦁ​꧉​

¹⁰꧋ꦮꦭꦁꦮꦭꦁ​ꦩꦲꦸ​ꦤ꧀ꦢꦸꦮꦺꦧꦸꦤ꧀ꦠꦸꦠ꧀ꦭꦤ꧀ꦲꦼꦤ꧀ꦠꦸꦥ꧀ꦏꦪ​ꦲꦼꦤ꧀ꦠꦸꦥ꧀ꦥꦺ​ꦏꦭꦗꦼꦁꦏꦶꦁ​꧉​ꦤꦁꦧꦸꦤ꧀ꦠꦸꦠ꧀ꦠꦺ​ꦲꦺꦤꦺꦁꦏꦼꦏꦸꦮꦠ꧀ꦠꦤ꧀ꦤꦺ​ꦏꦁꦒꦺꦴ​ꦔ꧀ꦭꦫꦏ꧀ꦏꦏꦺꦩꦤꦸꦁꦱ​ꦭꦶꦩꦁ​ꦱꦱꦶ​ꦱꦸꦮꦺꦤꦺ​꧉​ ¹¹ꦮꦭꦁꦮꦭꦁ​ꦩꦲꦸ​ꦤ꧀ꦢꦸꦮꦺꦫꦠꦸ​꧈​ꦪꦏꦸꦮꦶ​ꦩꦸꦭꦺꦏꦠ꧀ꦥꦼꦁꦒꦼꦢꦺꦤꦺꦗꦸꦫꦁ​ꦥꦼꦠꦼꦁ​꧉​ꦲꦶꦁ​ꦧꦱ​ꦆꦧꦿꦤꦶ​ꦗꦼꦤꦼꦁꦔꦺ​ꦄꦧꦢꦺꦴꦤ꧀ ꦲꦶꦁ​ꦧꦱ​ꦒꦿꦶꦏ꧀ꦄꦥꦺꦴꦭꦶꦪꦺꦴꦤ꧀ ꦠꦼꦒꦼꦱ꧀ꦱꦺ​ꦠꦸꦏꦁ​ꦔꦿꦸꦱꦏ꧀꧈​

¹²꧋ꦏꦱꦁꦱꦫꦤ꧀ꦱꦶꦁ​ꦱꦼꦥꦶꦱ꧀ꦱꦤ꧀ꦮꦶꦱ꧀​ꦏ꧀ꦭꦏꦺꦴꦤ꧀꧈​ꦲꦶꦗꦶꦏ꧀ꦲꦺꦤꦺꦁꦏꦱꦁꦱꦫꦤ꧀ꦭꦺꦴꦫꦺꦴ​ꦩꦼꦤꦺꦃ​꧉​

꧋ꦠꦿꦺꦴꦩ꧀ꦥꦺꦠ꧀ꦱꦶꦁ​ꦤꦼꦤꦼꦩ꧀꧈​

¹³꧋ꦩꦸꦭꦺꦏꦠ꧀ꦱꦶꦁ​ꦤꦺꦴꦩꦼꦂ​ꦤꦼꦤꦼꦩ꧀ꦠꦼꦫꦸꦱ꧀ꦔꦸꦤꦺꦏ꧀ꦏꦏꦺꦠꦿꦺꦴꦩ꧀ꦥꦺꦠ꧀ꦠꦺ꧉​ꦲꦏꦸ​ꦠꦼꦫꦸꦱ꧀ꦏꦿꦸꦔꦸ​ꦱ꧀ꦮꦫ​ꦱꦁꦏꦲꦭ꧀ꦠꦂꦲꦼꦩꦱ꧀ꦱꦶꦁ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁴ꦱꦁꦏꦥꦺꦴꦗꦺꦴꦏ꧀ꦏꦺ​ꦥꦥꦠ꧀ꦏꦸꦮꦶ​ꦲꦏꦸ​ꦏꦿꦸꦔꦸ​ꦱ꧀ꦮꦫ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦩꦸꦭꦺꦏꦠ꧀ꦱꦶꦁ​ꦤꦺꦴꦩꦼꦂ​ꦤꦼꦤꦼꦩ꧀ꦱꦶꦁ​ꦚꦼꦏꦼꦭ꧀ꦠꦿꦺꦴꦩ꧀ꦥꦺꦠ꧀ꦩꦲꦸ​:“ꦩꦸꦭꦺꦏꦠ꧀ꦥꦥꦠ꧀ꦱꦶꦁ​ꦥꦢ​ꦏꦼꦧꦤ꧀ꦢꦤꦁꦱꦏ꧀ꦕꦼꦢꦼꦏ꧀ꦏꦺ​ꦭꦫꦌꦥ꦳ꦿꦠ꧀ꦲꦸꦕꦸꦭ꧀ꦭꦤ​꧉​” ¹⁵ꦩꦸꦭꦺꦏꦠ꧀ꦥꦥꦠ꧀ꦩꦲꦸ​ꦠꦼꦫꦸꦱ꧀ꦢꦶꦲꦸꦕꦸꦭ꧀ꦭꦶ​꧉​ꦏꦸꦮꦶ​ꦩꦸꦭꦺꦏꦠ꧀ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦁꦒꦺꦴ​ꦩꦠꦺꦤ꧀ꦤꦶ​ꦱꦏ꧀ꦥꦿꦠꦼꦭꦸꦤꦺꦩꦤꦸꦁꦱ​ꦱꦶꦁ​ꦗꦩ꧀ꦩꦺ​꧈​ꦢꦶꦤꦤꦺ​꧈​ꦱꦱꦶꦤꦺ​ꦭꦤ꧀ꦠꦲꦸꦤ꧀ꦤꦺ​ꦮꦶꦱ꧀ꦢꦶꦠꦼꦔꦼꦂꦫꦶ​꧉​ ¹⁶ꦲꦏꦸ​ꦏꦿꦸꦔꦸ​ꦕꦕꦃꦲꦺ​ꦱꦺꦴꦭ꧀ꦢꦠ꧀ꦱꦶꦁ​ꦤꦸꦩ꧀ꦥꦏ꧀ꦗꦫꦤ꧀ ꦫꦺꦴꦁ​ꦲꦠꦸꦱ꧀​ꦩ꧀ꦭꦶꦪꦸꦤ꧀꧈​ ¹⁷ꦲꦶꦁ​ꦥꦩꦼꦢꦂꦫꦤ꧀ꦏꦸꦮꦶ​ꦲꦏꦸ​ꦮꦼꦫꦸꦃ​ꦗꦫꦤ꧀ꦗꦫꦤ꧀ꦭꦤ꧀ꦱꦶꦁ​ꦥꦢ​ꦤꦸꦩ꧀ꦥꦏ꧀ꦏꦶ​꧉​ꦱꦶꦁ​ꦥꦢ​ꦤꦸꦩ꧀ꦥꦏ꧀ꦩꦲꦸ​ꦔꦁꦒꦺꦴ​ꦱꦭꦶꦤ꧀ꦮꦼꦱꦶ​ꦱꦶꦁ​ꦫꦸꦥꦤꦺ​ꦲꦧꦁ​ꦲꦩ꧀ꦧꦿꦤꦁ​ꦭꦤ꧀ꦧꦶꦫꦸ​ꦏꦪ​ꦲ꦳ꦶꦪꦱꦶꦤ꧀ꦭꦤ꧀ꦏꦸꦤꦶꦁ​ꦏꦪ​ꦭꦶꦫꦁ​꧉​ꦲꦼꦤ꧀ꦢꦱ꧀ꦱꦺꦗꦫꦤ꧀ꦤꦺ​ꦏꦪ​ꦌꦤ꧀ꦢꦱ꧀ꦱꦶꦔ​ꦭꦤ꧀ꦕꦁꦏꦼꦩ꧀ꦩꦺ​ꦩꦼꦠꦸ​ꦒꦼꦤꦶꦤꦺ​꧈​ꦏꦼꦧꦸꦭ꧀ꦭꦤ꧀ꦭꦶꦫꦁ​꧉​ ¹⁸ꦱꦏ꧀ꦥꦿꦠꦼꦭꦸꦤꦺꦩꦤꦸꦁꦱ​ꦥꦢ​ꦢꦶꦥꦠꦺꦤ꧀ꦤꦶ​ꦏꦫꦺꦴ​ꦩꦼꦩꦭ​ꦠꦼꦭꦸ​꧈​ꦪꦏꦸꦮꦶ​ꦒꦼꦤꦶ​꧈​ꦏꦼꦧꦸꦭ꧀ꦭꦤ꧀ꦭꦶꦫꦁ​ꦱꦶꦁ​ꦩꦼꦠꦸ​ꦱꦁꦏꦕꦁꦏꦼꦩ꧀ꦩꦺ​ꦗꦫꦤ꧀ꦗꦫꦤ꧀ꦩꦲꦸ​꧉​ ¹⁹ꦏꦼꦏꦸꦮꦠ꧀ꦠꦤ꧀ꦤꦺ​ꦗꦫꦤ꧀ꦗꦫꦤ꧀ꦏꦸꦮꦶ​ꦤꦁꦕꦁꦏꦼꦩ꧀ꦩꦺ​ꦭꦤ꧀ꦤꦁꦧꦸꦤ꧀ꦠꦸꦠ꧀ꦠꦺ​꧈​ꦲꦮꦶꦠ꧀ꦧꦸꦤ꧀ꦠꦸꦠ꧀ꦠꦺ​ꦏꦪ​ꦲꦸꦭ​ꦲꦺꦤꦺꦁꦲꦼꦤ꧀ꦢꦱ꧀ꦱꦼꦤ꧀ꦢꦱ꧀ꦱꦺ꧉​ꦗꦫꦤ꧀ꦗꦫꦤ꧀ꦩꦲꦸ​ꦔꦿꦸꦱꦏ꧀ꦩꦤꦸꦁꦱ​ꦔꦁꦒꦺꦴ​ꦧꦸꦤ꧀ꦠꦸꦠ꧀ꦧꦸꦤ꧀ꦠꦸꦠ꧀ꦠꦺ​꧉​

²⁰꧋ꦤꦁꦔꦶꦁ​ꦠꦸꦫꦃꦲꦤ꧀ꦤꦺ​ꦩꦤꦸꦁꦱ​꧈​ꦱꦶꦁ​ꦲꦺꦴꦫ​ꦢꦶꦥꦠꦺꦤ꧀ꦤꦶ​ꦔꦁꦒꦺꦴ​ꦩꦼꦩꦭ​ꦠꦼꦭꦸ​ꦩꦲꦸ​꧈​ꦥꦢ​ꦲꦺꦴꦫ​ꦤꦶꦁꦒꦭ꧀ꦥꦼꦁꦒꦮꦺꦤꦺ​ꦲꦭ​꧉​ꦲꦺꦴꦫ​ꦥꦢ​ꦩꦫꦶ​ꦲꦼꦁꦒꦺꦴꦤꦺ​ꦚꦼꦩ꧀ꦧꦃ​ꦩꦫꦁ​ꦥꦫ​ꦢꦼꦩꦶꦠ꧀ꦭꦤ꧀ꦧꦿꦲꦭꦧꦿꦲꦭ​ꦒꦮꦺꦪꦤ꧀ꦲꦼꦩꦱ꧀ ꦱꦼꦭꦏ​꧈​ꦧꦿꦺꦴꦤ꧀ ꦮꦠꦸ​ꦲꦥ​ꦏꦪꦸ​ꦱꦶꦁ​ꦲꦺꦴꦫ​ꦧꦶꦱ​ꦮꦼꦫꦸꦃ​꧈​ꦏꦿꦸꦔꦸ​ꦲꦥ​ꦩ꧀ꦭꦏꦸ​꧉​ ²¹ꦲꦸꦒ​ꦲꦺꦴꦫ​ꦥꦢ​ꦩꦫꦶ​ꦲꦼꦁꦒꦺꦴꦤꦺ​ꦥꦢ​ꦩꦼꦩꦠꦺꦤ꧀ꦤꦶ​꧈​ꦔ꧀ꦭꦏꦺꦴꦤ꧀ꦤꦶ​ꦲꦺꦭ꧀ꦩꦸꦥꦼꦥꦼꦠꦼꦁ​꧈​ꦭꦏꦸ​ꦧꦺꦢꦁꦭꦤ꧀ꦚꦼꦚꦺꦴꦭꦺꦴꦁ​꧉​

↑ ↑ ↑

꧋ꦩꦸꦭꦺꦏꦠ꧀ꦭꦤ꧀ꦧꦸꦏꦸ​ꦒꦸꦭꦸꦁꦔꦤ꧀ꦕꦶꦭꦶꦏ꧀꧈​

꧇​꧑꧐꧇​ ¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦩꦸꦭꦺꦏꦠ꧀ꦭꦶꦪꦤꦺ​ꦱꦶꦁ​ꦒꦒꦃ​ꦭꦤ꧀ꦫꦺꦴꦱ​ꦩꦼꦢꦸꦤ꧀ꦱꦁꦏꦱ꧀ꦮꦂꦒ​꧉​ꦩꦸꦭꦺꦏꦠ꧀ꦩꦲꦸ​ꦏꦼꦩꦸꦭ꧀ꦭꦤ꧀ꦩꦺꦒ​ꦭꦤ꧀ꦤꦁꦱꦶꦫꦃꦲꦺ​ꦲꦺꦤꦺꦁꦏ꧀ꦭꦸꦮꦸꦁꦔꦺ​꧉​ꦫꦲꦶꦤꦺ​ꦱꦼꦩ꧀ꦭꦺꦴꦫꦺꦴꦠ꧀ꦏꦪ​ꦱꦽꦔꦺꦔꦺ​ꦭꦤ꧀ꦱꦶꦏꦶꦭ꧀ꦭꦺ​ꦏꦪ​ꦕꦒꦏ꧀ꦒꦼꦤꦶ​꧉​ ²ꦠꦔꦤ꧀ꦤꦺ​ꦩꦸꦭꦺꦏꦠ꧀ꦩꦲꦸ​ꦚꦼꦏꦼꦭ꧀ꦭꦶ​ꦧꦸꦏꦸ​ꦒꦸꦭꦸꦁꦔꦤ꧀ꦕꦶꦭꦶꦏ꧀ꦱꦶꦁ​ꦮꦶꦱ꧀ꦲꦩ꧀ꦧꦸꦏꦏ꧀꧈​ꦱꦶꦏꦶꦭ꧀ꦭꦺ​ꦱꦶꦁ​ꦠꦼꦔꦼꦤ꧀ꦔꦢꦼꦏ꧀ꦤꦁꦱꦼꦒꦫ​ꦭꦤ꧀ꦱꦶꦁ​ꦏꦶꦮ​ꦤꦁꦢꦫꦠ꧀ꦠꦤ꧀꧈​ ³ꦩꦸꦭꦺꦏꦠ꧀ꦩꦲꦸ​ꦲꦩ꧀ꦧꦼꦔꦺꦴꦏ꧀ꦱꦼꦫꦸ​ꦏꦪ​ꦔ꧀ꦒꦼꦉꦁꦔꦺꦱꦶꦔ​꧉​ꦱꦏ꧀ꦮꦶꦱ꧀ꦱꦺ​ꦲꦶꦏꦸ​ꦒ꧀ꦭꦸꦢꦸꦏ꧀ꦥꦶꦠꦸ​ꦚꦲꦸꦂꦫꦶ​ꦔꦁꦒꦺꦴ​ꦱ꧀ꦮꦫ​ꦱꦶꦁ​ꦥꦠꦶꦁ​ꦒ꧀ꦭꦸꦢꦸꦏ꧀꧈​ ⁴ꦲꦥ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒ꧀ꦭꦸꦢꦸꦏ꧀ꦥꦶꦠꦸ​ꦩꦲꦸ​ꦲꦶꦗꦶꦏ꧀ꦲꦉꦥ꧀ꦠꦏ꧀ꦠꦸꦭꦶꦱ꧀ ꦤꦁꦔꦶꦁ​ꦲꦏꦸ​ꦏꦿꦸꦔꦸ​ꦱ꧀ꦮꦫ​ꦱꦁꦏꦱ꧀ꦮꦂꦒ​ꦔꦺꦴꦩꦺꦴꦁ:“ꦲꦥ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒ꧀ꦭꦸꦢꦸꦏ꧀ꦥꦶꦠꦸ​ꦲꦶꦏꦸ​ꦮꦼꦮꦢꦶ​꧉​ꦲꦗ​ꦢꦶꦠꦸꦭꦶꦱ꧀!”

^5-6꧋ꦩꦸꦭꦺꦏꦠ꧀ꦱꦶꦁ​ꦲꦏꦸ​ꦮꦼꦫꦸꦃ​ꦔꦢꦼꦏ꧀ꦤꦁꦱꦼꦒꦫ​ꦭꦤ꧀ꦤꦁꦢꦫꦠ꧀ꦠꦤ꧀ꦩꦲꦸ​ꦠꦼꦫꦸꦱ꧀ꦔꦼꦠꦸꦁꦔꦏꦺꦠꦔꦤ꧀ꦤꦺ​ꦠꦼꦔꦼꦤ꧀ꦤꦁꦱ꧀ꦮꦂꦒ​꧉​ꦩꦸꦭꦺꦏꦠ꧀ꦠꦺꦠꦼꦫꦸꦱ꧀ꦱꦸꦩ꧀ꦥꦃ​ꦲꦶꦁ​ꦗꦼꦤꦼꦁꦔꦺ​ꦱꦶꦁ​ꦲꦸꦫꦶꦥ꧀ꦭꦁꦒꦼꦁ​ꦱ꧀ꦭꦮꦱ꧀ꦱꦺ꧈​ꦱꦶꦁ​ꦔ꧀ꦒꦮꦺ​ꦭꦔꦶꦠ꧀ ꦧꦸꦩꦶ​ꦭꦤ꧀ꦱꦼꦒꦫ​ꦱꦏ꧀ꦲꦶꦱꦶꦤꦺ​꧈​ꦠꦼꦩ꧀ꦧꦸꦁꦔꦺ​:“ꦢꦶꦤꦤꦺ​ꦲꦺꦴꦫ​ꦧꦏꦭ꧀ꦢꦶꦲꦸꦤ꧀ꦢꦸꦂꦫꦏꦺꦩꦼꦤꦺꦃ​꧉​ ⁷ꦤꦁꦔꦶꦁꦤꦺꦏ꧀ꦩꦸꦭꦺꦏꦠ꧀ꦱꦶꦁꦤꦺꦴꦩꦼꦂꦥꦶꦠꦸꦔꦸꦤꦺꦏ꧀ꦏꦏꦺꦠꦿꦺꦴꦩ꧀ꦥꦺꦠ꧀ꦠꦺ꧈​ꦒꦸꦱ꧀ꦠꦶꦄꦭ꧀ꦭꦃꦧꦏꦭ꧀ꦤꦶꦤ꧀ꦢꦏ꧀ꦏꦏꦺꦫꦚ꧀ꦕꦩ꧀ꦩꦤ꧀ꦤꦺ꧈​ꦏꦪꦱꦶꦁꦮꦶꦱ꧀ꦢꦶꦏꦧꦂꦫꦏꦺꦩꦫꦁꦥꦫꦥꦼꦭꦢꦺꦤ꧀ꦤꦺ꧈​ꦪꦏꦸꦮꦶꦥꦫꦤꦧꦶ꧉​”

⁸꧋ꦱ꧀ꦮꦫ​ꦱꦶꦁ​ꦲꦏꦸ​ꦮꦶꦱ꧀ꦏꦿꦸꦔꦸ​ꦱꦁꦏꦱ꧀ꦮꦂꦒ​ꦩꦲꦸ​ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:“ꦩꦗꦸꦮ​꧈​ꦧꦸꦏꦸ​ꦒꦸꦭꦸꦁꦔꦤ꧀ꦱꦶꦁ​ꦲꦩ꧀ꦧꦸꦏꦏ꧀ꦱꦶꦁ​ꦤꦁꦠꦔꦤ꧀ꦤꦺ​ꦩꦸꦭꦺꦏꦠ꧀ꦱꦶꦁ​ꦔꦢꦼꦏ꧀ꦤꦁꦱꦼꦒꦫ​ꦭꦤ꧀ꦤꦁꦢꦫꦠ꧀ꦠꦤ꧀ꦏꦸꦮꦶ​ꦠꦩ꧀ꦥꦤꦤ​꧉​”

⁹꧋ꦲꦏꦸ​ꦠꦼꦫꦸꦱ꧀ꦩꦫꦤꦶ​ꦩꦸꦭꦺꦏꦠ꧀ꦠꦺꦭꦤ꧀ꦤꦼꦩ꧀ꦧꦸꦁ​꧈​ꦱꦸꦥꦪ​ꦧꦸꦏꦸꦤꦺ​ꦢꦶꦏꦺꦏ꧀ꦏꦏꦺꦩꦫꦁ​ꦲꦏꦸ​꧉​ꦩꦸꦭꦺꦏꦠ꧀ꦠꦺꦔꦺꦴꦩꦺꦴꦁꦔꦺꦤꦺ​:“ꦠꦩ꧀ꦥꦤꦤ​ꦭꦤ꧀ꦥꦔꦤ꧀ꦤꦼꦤ꧀꧈​ꦤꦁꦮꦼꦠꦼꦁꦩꦸ​ꦫꦱꦤꦺ​ꦧꦏꦭ꧀ꦏꦼꦕꦸꦠ꧀ ꦤꦁꦔꦶꦁ​ꦤꦁꦕꦁꦏꦼꦩ꧀ꦩꦸ​ꦫꦱꦤꦺ​ꦊꦒꦶ​ꦏꦪ​ꦩꦢꦸ​꧉​”

¹⁰꧋ꦧꦸꦏꦸ​ꦕꦶꦭꦶꦏ꧀ꦩꦲꦸ​ꦠꦼꦫꦸꦱ꧀ꦠꦏ꧀ꦠꦩ꧀ꦥꦤꦶ​ꦭꦤ꧀ꦠꦏ꧀ꦥꦔꦤ꧀꧈​ꦤꦁꦕꦁꦏꦼꦩ꧀ꦫꦱꦤꦺ​ ꦏꦪ​ꦩꦢꦸ​꧈​ꦤꦁꦔꦶꦁ​ꦏꦢꦸꦁ​ꦮꦶꦱ꧀ꦠꦏ꧀ꦲꦺꦭꦺꦏ꧀ꦤꦁꦮꦼꦠꦼꦁ​ꦫꦱꦤꦺ​ꦏꦼꦕꦸꦠ꧀꧈​ ¹¹ꦲꦏꦸ​ꦠꦼꦫꦸꦱ꧀ꦢꦶꦥꦿꦺꦤ꧀ꦠꦃ​ꦏꦺꦴꦁꦏꦺꦴꦤ꧀ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦤꦺꦃ​ꦩꦫꦁ​ꦥꦫ​ꦧꦁꦱ​꧈​ꦤꦼꦒꦫꦤꦼꦒꦫ​꧈​ꦧꦱ​ꦭꦤ꧀ꦥꦫ​ꦫꦠꦸ​꧉​

↑ ↑ ↑

꧋ꦱꦼꦏ꧀ꦱꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦺꦴꦫꦺꦴ​꧉​

꧇​꧑꧑꧇​ ¹꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦲꦏꦸ​ꦠꦼꦫꦸꦱ꧀ꦢꦶꦏꦺꦏ꧀ꦏꦶꦏꦪꦸ​ꦲꦸꦏꦸꦂꦫꦤ꧀꧈​ꦲꦏꦸ​ꦢꦶꦲꦺꦴꦩꦺꦴꦁꦔꦶꦔꦺꦤꦺ​:“ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦭ꧀ꦠꦂꦫꦺꦢꦶꦲꦸꦏꦸꦂ​꧉​ꦢꦶꦲꦶꦠꦸꦁꦱꦼꦥꦶꦫ​ꦕꦕꦃꦲꦺ​ꦮꦺꦴꦁ​ꦱꦶꦁ​ꦚꦼꦩ꧀ꦧꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦏꦺꦴꦤꦺꦴ​꧉​ ²ꦤꦩꦸꦁ​ꦭꦠꦂ​ꦱꦏ꧀​ꦚ꧀ꦗꦧꦤꦺ​ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦗ​ꦢꦶꦲꦸꦏꦸꦂ​꧈​ꦲꦮꦶꦠ꧀ꦏꦸꦮꦶ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦧꦏꦭ꧀ꦔꦶꦢꦼꦏ꧀ꦲꦶꦢꦼꦏ꧀ꦏꦸꦠꦱꦸꦕꦶ​ꦏꦸꦮꦶ​ꦥꦠꦁ​ꦥꦸꦭꦸꦃ​ꦭꦺꦴꦫꦺꦴ​ꦱꦱꦶ​ꦱꦸꦮꦺꦤꦺ​꧉​ ³ꦲꦏꦸ​ꦧꦏꦭ꧀ꦔꦺꦴꦁꦏꦺꦴꦤ꧀ꦱꦼꦏ꧀ꦱꦶꦏꦸ​ꦭꦺꦴꦫꦺꦴ​ꦔꦁꦒꦺꦴ​ꦱꦤ꧀ꦢꦔꦤ꧀ꦤꦺꦮꦺꦴꦁ​ꦏꦼꦥꦠꦺꦤ꧀꧈​ꦠꦏ꧀ꦏꦺꦴꦁꦏꦺꦴꦤ꧀ꦔꦧꦂꦫꦏꦺꦥꦶꦠꦸꦠꦸꦂꦏꦸ​ꦫꦺꦴꦭꦱ꧀ꦲꦠꦸꦱ꧀ꦱ꧀ꦮꦶꦢꦏ꧀ꦢꦶꦤ​ꦱꦸꦮꦺꦤꦺ​꧉​”

⁴꧋ꦱꦼꦏ꧀ꦱꦶꦭꦺꦴꦫꦺꦴꦩꦲꦸꦪꦏꦸꦮꦶꦮꦶꦠ꧀ꦎꦭꦺꦥ꦳꧀ꦭꦺꦴꦫꦺꦴꦭꦤ꧀ꦮꦢꦃꦢꦶꦪꦤ꧀ꦭꦺꦴꦫꦺꦴꦱꦶꦁꦔꦢꦼꦏ꧀ꦤꦁꦔꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦲꦺꦗꦒꦠ꧀꧈​ ⁵ꦤꦺꦏ꧀ꦲꦺꦤꦺꦁꦮꦺꦴꦁ​ꦱꦶꦁ​ꦲꦉꦥ꧀ꦤꦶꦤ꧀ꦢꦏ꧀ꦏꦏꦺꦲꦭ​ꦩꦫꦁ​ꦱꦼꦏ꧀ꦱꦶ​ꦭꦺꦴꦫꦺꦴ​ꦏꦸꦮꦶ​꧈​ꦧꦏꦭ꧀ꦢꦶꦲꦼꦤ꧀ꦠꦺꦏ꧀ꦏꦏꦺꦏꦫꦺꦴ​ꦒꦼꦤꦶ​ꦱꦶꦁ​ꦩꦼꦠꦸ​ꦱꦁꦏꦕꦁꦏꦼꦩ꧀ꦩꦺ​ꦱꦼꦏ꧀ꦱꦶ​ꦭꦺꦴꦫꦺꦴ​ꦩꦲꦸ​꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦏꦧꦺꦃ​ꦮꦺꦴꦁ​ꦱꦶꦁ​ꦲꦉꦥ꧀​ꦔ꧀ꦒꦮꦺ​ꦱꦸꦱꦃꦲꦺ​ꦧꦏꦭ꧀ꦢꦶꦥꦠꦺꦤ꧀ꦤꦶ​꧉​ ⁶ꦱꦼꦏ꧀ꦱꦶ​ꦭꦺꦴꦫꦺꦴ​ꦩꦲꦸ​ꦢꦶꦏꦺꦏ꧀ꦏꦶꦥꦔ꧀ꦮꦱ​ꦔꦚ꧀ꦕꦶꦁ​ꦭꦔꦶꦠ꧀ ꦱꦸꦥꦪ​ꦲꦺꦴꦫ​ꦲꦺꦤꦺꦁꦲꦸꦢꦤ꧀ꦱꦸꦮꦺꦤꦺ​ꦥꦢ​ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦲꦸꦒ​ꦥꦢ​ꦲꦺꦤ꧀ꦠꦸꦏ꧀ꦥꦔ꧀ꦮꦱ​ꦔ꧀ꦒꦤ꧀ꦠꦶ​ꦱꦏ꧀ꦏꦺꦃꦲꦺꦧꦚꦸ​ꦢꦶꦢꦢꦺꦏ꧀ꦏꦏꦺꦒꦼꦠꦶꦃ​꧉​ꦩꦭꦃ​ꦲꦸꦒ​ꦤ꧀ꦢꦸꦮꦺꦥꦔ꧀ꦮꦱ​ꦔꦗꦂ​ꦧꦸꦩꦶ​ꦔꦁꦒꦺꦴ​ꦱꦏ꧀ꦮꦼꦂꦤꦤꦺ​ꦩꦼꦩꦭ​꧈​ꦱꦏ꧀ꦮꦠꦸꦱꦶꦁ​ꦢꦶꦏꦉꦥ꧀ꦥꦏꦺ꧉​

⁷꧋ꦤꦺꦏ꧀ꦮꦶꦱ꧀ꦫꦩ꧀ꦥꦸꦁ​ꦲꦼꦁꦒꦺꦴꦤꦺ​ꦥꦢ​ꦔꦼꦠꦺꦴꦏ꧀ꦏꦏꦺꦥꦱꦼꦏ꧀ꦱꦶꦤꦺ​꧈​ꦏꦺꦮꦤ꧀ꦱꦶꦁ​ꦩꦼꦠꦸ​ꦱꦁꦏꦗꦸꦫꦁ​ꦥꦼꦠꦼꦁ​ꦧꦏꦭ꧀​ꦔ꧀ꦭꦮꦤ꧀ ꦔꦭꦃꦲꦏꦺꦭꦤ꧀ꦩꦠꦺꦤ꧀ꦤꦶ​ꦱꦼꦏ꧀ꦱꦶ​ꦭꦺꦴꦫꦺꦴ​ꦩꦲꦸ​꧉​ ⁸ꦭꦪꦺꦴꦤꦺ​ꦧꦏꦭ꧀ꦒꦸꦩ꧀ꦭꦺꦠꦏ꧀ꦤꦁꦢꦭꦤ꧀ꦤꦁꦏꦸꦠꦒꦼꦢꦺ꧈​ꦥꦁꦒꦺꦴꦤ꧀ꦤꦤ꧀ꦥꦼꦤ꧀ꦠꦺꦔꦤ꧀ꦤꦺꦒꦸꦱ꧀ꦠꦶꦤꦺ​꧉​ꦏꦸꦠꦩꦲꦸ​ꦢꦶꦗꦼꦤꦼꦁꦔꦏꦺꦱꦺꦴꦢꦺꦴꦩ꧀ꦭꦤ꧀ꦌꦒꦶꦥ꧀ꦠꦼ꧈​ꦏꦸꦮꦶ​ꦠꦼꦩ꧀ꦧꦸꦁ​ꦏꦁꦒꦺꦴ​ꦔ꧀ꦒꦩ꧀ꦧꦂꦫꦏꦺ꧉​ ⁹ꦮꦺꦴꦁꦮꦺꦴꦁ​ꦱꦁꦏꦱꦏ꧀ꦏꦺꦃꦲꦺꦠꦊꦂ​꧈​ꦧꦁꦱ​꧈​ꦧꦱ​ꦭꦤ꧀ꦤꦼꦒꦫ​ꦧꦏꦭ꧀ꦤꦺꦴꦤ꧀ꦠꦺꦴꦤ꧀ꦭꦪꦺꦴꦤ꧀ꦩꦲꦸ​ꦱꦸꦮꦺꦤꦺ​ꦠꦼꦭꦸꦁ​ꦢꦶꦤ​ꦱꦼꦠꦼꦔꦃ​꧉​ꦭꦪꦺꦴꦤ꧀ꦩꦲꦸ​ꦲꦺꦴꦫ​ꦏꦼꦭꦶꦭ꧀ꦭꦤ꧀ꦢꦶꦏꦸꦧꦸꦂ​꧉​ ¹⁰ꦮꦺꦴꦁꦮꦺꦴꦁ​ꦤꦁꦧꦸꦩꦶ​ꦧꦏꦭ꧀ꦥꦢ​ꦧꦸꦔꦃ​ꦏꦫꦺꦴ​ꦥꦠꦶꦤꦺ​ꦱꦼꦏ꧀ꦱꦶ​ꦭꦺꦴꦫꦺꦴ​ꦩꦲꦸ​꧉​ꦠꦼꦫꦸꦱ꧀ꦥꦢ​ꦔꦤꦏ꧀ꦏꦏꦺꦏꦼꦫꦩꦺꦪꦤ꧀ꦭꦤ꧀ꦥꦢ​ꦏꦶꦫꦶꦩ꧀ꦏꦶꦫꦶꦩ꧀ꦩꦤ꧀ꦏꦢꦺꦴ꧈​ꦲꦮꦶꦠ꧀ꦤꦧꦶ​ꦭꦺꦴꦫꦺꦴ​ꦱꦶꦁ​ꦔ꧀ꦒꦮꦺ​ꦱꦸꦱꦃꦲꦺ​ꦮꦺꦴꦁ​ꦏꦧꦺꦃ​ꦮꦶꦱ꧀ꦩꦠꦶ​꧉​ ¹¹ꦤꦁꦔꦶꦁ​ꦱꦏ꧀ꦮꦶꦱ꧀ꦱꦺ​ꦠꦼꦭꦸꦁ​ꦢꦶꦤ​ꦱꦼꦠꦼꦔꦃ​ꦭꦪꦺꦴꦤ꧀ꦭꦺꦴꦫꦺꦴ​ꦩꦲꦸ​ꦠꦼꦫꦸꦱ꧀ꦤꦩ꧀ꦥ​ꦲꦩ꧀ꦧꦼꦏ꧀ꦏꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ꦠꦼꦫꦸꦱ꧀ꦥꦢ​ꦠꦔꦶ​ꦭꦤ꧀ꦏꦧꦺꦃ​ꦮꦺꦴꦁ​ꦱꦶꦁ​ꦮꦼꦫꦸꦃ​ꦥꦢ​ꦮꦼꦢꦶ​ꦧꦔꦼꦠ꧀꧈​ ¹²ꦤꦧꦶ​ꦭꦺꦴꦫꦺꦴ​ꦏꦸꦮꦶ​ꦠꦼꦫꦸꦱ꧀ꦥꦢ​ꦏꦿꦸꦔꦸ​ꦱ꧀ꦮꦫ​ꦧꦤ꧀ꦠꦼꦂ​ꦱꦁꦏꦱ꧀ꦮꦂꦒ​ꦚꦼꦭꦸꦏ꧀ꦔꦺꦤꦺ​:“ꦥꦢ​ꦩꦸꦁꦒꦃꦲ​ꦫꦺꦤꦺ!”ꦠꦼꦫꦸꦱ꧀ꦥꦢ​ꦩꦸꦁꦒꦃ​ꦤꦁꦱ꧀ꦮꦂꦒ​ꦏꦏꦼꦩꦸꦭ꧀ꦭꦤ꧀ꦩꦺꦒ​ꦭꦤ꧀ꦩꦸꦁꦱꦸꦃꦩꦸꦁꦱꦸꦃꦲꦺ​ꦥꦢ​ꦮꦼꦫꦸꦃ​ꦏꦧꦺꦃ​꧉​ ¹³ꦠꦼꦫꦸꦱ꧀ꦲꦺꦤꦺꦁꦭꦶꦤ꧀ꦢꦸꦒꦼꦢꦺꦔꦿꦸꦧꦸꦃꦲꦏꦺꦱꦏ꧀ꦥꦿꦱꦼꦥꦸꦭꦸꦃꦲꦺꦏꦸꦠꦭꦤ꧀ꦮꦺꦴꦁ​ꦥꦶꦠꦸꦁ​ꦲꦺꦮꦸ​ꦩꦠꦶ​꧉​ꦮꦺꦴꦁꦮꦺꦴꦁ​ꦱꦶꦁ​ꦲꦶꦗꦶꦏ꧀ꦲꦸꦫꦶꦥ꧀ꦥꦢ​ꦮꦼꦢꦶ​ꦧꦔꦼꦠ꧀ ꦠꦼꦫꦸꦱ꧀ꦥꦢ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​꧉​

¹⁴꧋ꦏꦱꦁꦱꦫꦤ꧀ꦱꦶꦁ​ꦥꦶꦤ꧀ꦢꦺꦴꦮꦶꦱ꧀​ꦏ꧀ꦭꦶꦮꦠ꧀꧈​ꦏꦱꦁꦱꦫꦤ꧀ꦱꦶꦁ​ꦤꦺꦴꦩꦼꦂ​ꦠꦼꦭꦸ​ꦤ꧀ꦢꦁꦤꦸꦱꦸꦭ꧀꧈​

꧋ꦠꦿꦺꦴꦩ꧀ꦥꦺꦠ꧀ꦤꦺꦴꦩꦼꦂ​ꦥꦶꦠꦸ​ꦢꦶꦲꦸꦤꦺꦏ꧀ꦏꦏꦺ꧉​

¹⁵꧋ꦏꦢꦸꦁ​ꦩꦸꦭꦺꦏꦠ꧀ꦤꦺꦴꦩꦼꦂ​ꦥꦶꦠꦸ​ꦔꦸꦤꦺꦏ꧀ꦏꦏꦺꦠꦿꦺꦴꦩ꧀ꦥꦺꦠ꧀ꦠꦺ꧈​ꦤꦁꦱ꧀ꦮꦂꦒ​ꦠꦼꦫꦸꦱ꧀ꦲꦺꦤꦺꦁꦱ꧀ꦮꦫꦱ꧀ꦮꦫ​ꦧꦤ꧀ꦠꦼꦂ​ꦲꦸꦤꦶꦤꦺ​ꦔꦺꦤꦺ​:“ꦥꦔ꧀ꦮꦱꦤꦺ​ꦢꦺꦴꦚ​ꦱꦲꦶꦏꦶ​ꦢꦶꦕꦼꦏꦼꦭ꧀ꦏꦫꦺꦴ​ꦒꦸꦱ꧀ꦠꦶꦤꦺ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦏꦿꦶꦱ꧀ꦡꦸꦱ꧀꧈​ꦢꦺꦏ꧀ꦤꦺꦧꦏꦭ꧀ꦢꦢꦶ​ꦫꦠꦸ​ꦭꦤ꧀ꦚꦼꦏꦼꦭ꧀ꦥꦔ꧀ꦮꦱ​ꦱ꧀ꦭꦮꦱ꧀ꦭꦮꦱ꧀ꦱꦺ꧉​” ¹⁶ꦥꦫ​ꦥꦶꦤꦶꦠꦸꦮ​ꦥꦠ꧀ꦭꦶꦏꦸꦂ​ꦱꦶꦁ​ꦥꦢ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦢꦩ꧀ꦥꦂꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ꦥꦢ​ꦱꦸꦗꦸꦠ꧀ꦩꦫꦁ​ꦢꦺꦏ꧀ꦤꦺ꧉​ ¹⁷ꦠꦼꦩ꧀ꦧꦸꦁꦔꦺ​:

“ꦢꦸꦃꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧈​
ꦱꦶꦁ​ꦲꦺꦤꦺꦁꦱꦲꦶꦏꦶ​ꦭꦤ꧀​ꦩ꧀ꦧꦶꦪꦺꦤ꧀
ꦲꦮꦏ꧀ꦏꦺ​ꦢꦺꦮꦺꦩꦠꦸꦂꦏꦼꦱꦸꦮꦸꦤ꧀
ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦒꦼꦊꦩ꧀ꦚꦼꦏꦼꦭ꧀ꦥꦔ꧀ꦮꦱꦤꦺ​ꦱꦶꦁ​ꦒꦼꦢꦺ
ꦭꦤ꧀ꦱꦲꦶꦏꦶ​ꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱ​ꦏꦸꦮꦶ​꧉​
¹⁸ꦮꦺꦴꦁꦮꦺꦴꦁꦱꦶꦁꦲꦺꦴꦫꦏꦼꦤꦭ꧀ꦩꦫꦁꦒꦸꦱ꧀ꦠꦶꦥꦢꦔꦩꦸꦏ꧀
ꦲꦮꦶꦠ꧀ꦮꦶꦱ꧀ꦠꦼꦏꦤ꧀ꦮꦚ꧀ꦕꦶꦤꦺꦲꦼꦁꦒꦺꦴꦤꦺꦒꦸꦱ꧀ꦠꦶꦧꦏꦭ꧀ꦔꦼꦠꦺꦴꦏ꧀ꦏꦏꦺꦤꦼꦱꦸꦤꦺ꧉​
ꦮꦚ꧀ꦕꦶꦤꦺꦲꦸꦒꦮꦶꦱ꧀ꦠꦼꦏꦤ꧀ꦲꦼꦁꦒꦺꦴꦤꦺꦒꦸꦱ꧀ꦠꦶꦧꦏꦭ꧀ꦔꦿꦸꦠꦸꦮꦺꦴꦁꦮꦺꦴꦁꦱꦶꦁꦮꦶꦱ꧀ꦩꦠꦶ꧉​
ꦮꦶꦱ꧀ꦠꦼꦏꦤ꧀ꦮꦚ꧀ꦕꦶꦤꦺ
ꦒꦸꦱ꧀ꦠꦶꦧꦏꦭ꧀ꦔꦸꦥꦃꦲꦶꦥꦫꦥꦼꦭꦢꦺꦤ꧀ꦤꦺ꧈​
ꦪꦏꦸꦮꦶꦥꦫꦤꦧꦶꦭꦤ꧀ꦏꦧꦺꦃꦲꦸꦩꦠ꧀ꦠꦺꦒꦸꦱ꧀ꦠꦶ꧈​
ꦪꦏꦸꦮꦶꦏꦧꦺꦃꦮꦺꦴꦁꦱꦶꦁꦔꦧꦼꦏ꧀ꦠꦶꦩꦫꦁꦒꦸꦱ꧀ꦠꦶ꧈​
ꦱꦶꦁꦕꦶꦭꦶꦏ꧀ꦭꦤ꧀ꦱꦶꦁꦒꦼꦢꦺ꧉​
ꦱꦲꦶꦏꦶꦮꦶꦱ꧀ꦮꦚ꧀ꦕꦶꦤꦺꦒꦸꦱ꧀ꦠꦶꦔꦿꦩ꧀ꦥꦸꦁꦔꦏꦺꦏꦧꦺꦃꦮꦺꦴꦁꦱꦶꦁꦔꦿꦸꦱꦏ꧀ꦧꦸꦩꦶ꧉​”

¹⁹꧋ꦲꦺꦴꦩꦃꦲꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦤꦁꦱ꧀ꦮꦂꦒꦠꦼꦫꦸꦱ꧀ꦩꦼꦔꦭꦤ꧀ꦏꦺꦴꦠꦏ꧀ꦮꦢꦃꦥꦽꦗꦚ꧀ꦗꦶꦪꦤ꧀ꦠꦼꦫꦸꦱ꧀ꦏꦺꦠꦺꦴꦏ꧀ꦤꦁꦏꦺꦴꦤꦺꦴ꧉​ꦠꦼꦫꦸꦱ꧀ꦲꦺꦤꦺꦁꦏ꧀ꦭꦺꦭꦥ꧀​ꦏ꧀ꦭꦺꦭꦥ꧀ ꦱ꧀ꦮꦫꦲ꦳ꦺꦴꦉꦏ꧀ꦭꦤ꧀ꦒꦸꦩ꧀ꦭꦸꦢꦸꦏ꧀ ꦲꦸꦒꦧꦸꦩꦶꦤꦺꦒꦺꦴꦪꦁꦒꦪꦶꦁꦭꦤ꧀ꦲꦸꦢꦤ꧀ꦲꦺꦱ꧀ꦱꦶꦁꦢꦼꦉꦱ꧀ꦧꦔꦼꦠ꧀꧈​

↑ ↑ ↑

꧋ꦮꦺꦴꦁꦮꦺꦢꦺꦴꦏ꧀ꦭꦤ꧀ꦤꦒ꧉​

꧇​꧑꧒꧇​ ¹꧋ꦤꦁꦭꦔꦶꦠ꧀ꦠꦼꦫꦸꦱ꧀ꦏꦺꦠꦺꦴꦏ꧀ꦲꦺꦤꦺꦁꦉꦫꦸꦥꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧉​ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦔꦁꦒꦺꦴ​ꦱꦭꦶꦤ꧀ꦱꦽꦔꦺꦔꦺ​ꦔꦢꦼꦏ꧀ ꦩ꧀ꦧꦸꦭꦤ꧀ꦤꦺꦤꦁꦔꦶꦱꦺꦴꦂꦫꦺ​ꦱꦶꦏꦶꦭ꧀ꦭꦺ​ꦭꦤ꧀ꦤꦁꦱꦶꦫꦃꦲꦺ​ꦔꦁꦒꦺꦴ​ꦩꦏꦸꦠꦱꦶꦁ​ꦲꦺꦤꦺꦁꦭꦶꦤ꧀ꦠꦁꦔꦺ​ꦫꦺꦴꦭꦱ꧀꧈​ ²ꦮꦺꦴꦁꦮꦺꦢꦺꦴꦏ꧀ꦩꦲꦸꦩꦼꦠꦼꦁꦭꦤ꧀ꦗꦭꦂꦫꦤ꧀ꦮꦶꦱ꧀ꦠꦼꦏꦤ꧀ꦮꦚ꧀ꦕꦶꦤꦺꦩ꧀ꦧꦪꦶ꧈​ꦩꦸꦭꦤꦺꦮꦺꦴꦁꦔꦺꦔ꧀ꦭꦫꦤꦶꦏꦫꦺꦴꦱꦩ꧀ꦧꦠ꧀꧈​

³꧋ꦤꦁꦭꦔꦶꦠ꧀ꦠꦼꦫꦸꦱ꧀ꦲꦺꦤꦺꦁꦉꦫꦸꦥꦲꦤꦺꦃ​ꦩꦼꦤꦺꦃ​ꦔꦺꦠꦺꦴꦏ꧀ ꦪꦏꦸꦮꦶ​ꦲꦺꦤꦺꦁꦤꦒ​ꦒꦼꦢꦺꦧꦔꦼꦠ꧀ ꦫꦸꦥꦤꦺ​ꦲꦧꦁ​ꦲꦩ꧀ꦧꦿꦤꦁ​꧈​ꦲꦼꦤ꧀ꦢꦱ꧀ꦱꦺꦥꦶꦠꦸ​ꦭꦤ꧀ꦱꦸꦔꦸꦤꦺ​ꦱꦼꦥꦸꦭꦸꦃ​ꦭꦤ꧀ꦱꦧꦼꦤ꧀ꦌꦤ꧀ꦢꦱ꧀ꦲꦺꦤꦺꦁꦢꦶꦲꦢꦶꦩ꧀ꦩꦺ꧉​ ⁴ꦏꦫꦺꦴ​ꦧꦸꦤ꧀ꦠꦸꦠ꧀ꦠꦺ​꧈​ꦤꦒ​ꦩꦲꦸ​ꦚꦺꦫꦺꦠ꧀ꦱꦏ꧀ꦥꦿꦠꦼꦭꦸꦤꦺꦭꦶꦤ꧀ꦠꦁꦭꦶꦤ꧀ꦠꦁ​ꦤꦁꦭꦔꦶꦠ꧀ ꦢꦶꦧꦸꦮꦁ​ꦤꦁꦧꦸꦩꦶ​꧉​ꦤꦒ​ꦩꦲꦸ​ꦩꦥꦤ꧀ꦤꦁꦔꦉꦥ꧀ꦥꦺ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦔ꧀ꦭꦫꦤꦶ​ꦩꦲꦸ​꧈​ꦲꦉꦥ꧀ꦔꦸꦤ꧀ꦠꦭ꧀ꦧꦪꦶꦤꦺ​ꦤꦺꦏ꧀ꦭꦲꦶꦂ​꧉​ ⁵ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦠꦼꦫꦸꦱ꧀​ꦔ꧀ꦭꦲꦶꦂꦫꦏꦺꦲꦤꦏ꧀ꦭꦤꦁ​꧈​ꦱꦶꦁ​ꦧꦏꦭ꧀ꦔ꧀ꦮꦱꦤꦶ​ꦥꦫ​ꦧꦁꦱ​ꦔꦁꦒꦺꦴ​ꦠꦼꦏꦼꦤ꧀ꦮꦼꦱꦶ​꧉​ꦤꦁꦔꦶꦁ​ꦢꦢꦏ꧀ꦏꦤ꧀ꦮꦲꦺ​ꦲꦤꦏ꧀ꦭꦤꦁ​ꦩꦲꦸ​ꦏꦉꦧꦸꦠ꧀ ꦠꦼꦫꦸꦱ꧀ꦢꦶꦒꦮ​ꦤꦁꦔꦉꦥ꧀ꦥꦺ​ꦢꦩ꧀ꦥꦂꦫꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁶ꦭꦃ​ꦮꦺꦴꦁ​ꦮꦺꦢꦺꦴꦏ꧀ꦏꦺꦠꦼꦫꦸꦱ꧀ꦲꦩ꧀​ꦧ꧀ꦭꦪꦸꦤꦁꦮꦸꦱ꧀ꦠꦺꦤ꧀ ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦏꦺꦴꦤꦺꦴ​ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦢꦶꦲꦺꦴꦥꦺꦤ꧀ꦤꦶ​ꦫꦺꦴꦭꦱ꧀ꦲꦠꦸꦱ꧀ꦱ꧀ꦮꦶꦢꦏ꧀ꦢꦶꦤ​ꦱꦸꦮꦺꦤꦺ​꧉​

꧋ꦤꦒ​ꦢꦶꦏꦭꦃꦲꦏꦺ꧉​

⁷꧋ꦤꦁꦱ꧀ꦮꦂꦒ​ꦠꦼꦫꦸꦱ꧀ꦲꦺꦤꦺꦁꦥꦼꦥꦼꦫꦁꦔꦤ꧀꧈​ꦩꦶꦏꦌꦭ꧀ꦭꦤ꧀ꦩꦸꦭꦺꦏꦠ꧀ꦩꦸꦭꦺꦏꦠ꧀ꦠꦺꦥꦢ​ꦥꦼꦥꦼꦫꦁꦔꦤ꧀​ꦔ꧀ꦭꦮꦤ꧀ꦤꦒ​ꦩꦲꦸ​꧉​ꦤꦒ​ꦩꦲꦸ​ꦲꦸꦒ​ꦢꦶꦫꦺꦮꦁꦔꦶ​ꦏꦫꦺꦴ​ꦥꦫ​ꦩꦸꦭꦺꦏꦠ꧀ꦠꦺ꧉​ ⁸ꦤꦁꦔꦶꦁ​ꦤꦒ​ꦏꦭꦃ​ꦥꦼꦥꦼꦫꦁꦔꦺ꧉​ꦩꦸꦭꦤꦺ​ꦤꦒ​ꦭꦤ꧀ꦥꦫ​ꦩꦸꦭꦺꦏꦠ꧀ꦠꦺꦲꦺꦴꦫ​ꦢꦶꦭꦶꦭꦤꦶ​ꦩꦁꦒꦺꦴꦤ꧀ꦤꦁꦱ꧀ꦮꦂꦒ​꧉​ ⁹ꦤꦒꦒꦼꦢꦺꦠꦼꦫꦸꦱ꧀ꦢꦶ​ꦲꦸꦚ꧀ꦕꦭ꧀ꦭꦏꦺꦩꦼꦠꦸ꧈​ꦪꦏꦸꦮꦶꦲꦸꦭꦱꦶꦁꦏꦸꦤ꧈​ꦱꦶꦁꦲꦸꦒꦢꦶꦲꦫꦤ꧀ꦤꦶꦆꦧ꧀ꦭꦶꦱ꧀ꦭꦤ꧀ꦱꦺꦠꦤ꧀ ꦱꦶꦁꦚꦤ꧀ꦢꦶꦁꦱꦏ꧀ꦲꦶꦱꦶꦤꦺꦗꦒꦠ꧀꧈​ꦧꦉꦁꦏꦫꦺꦴꦩꦸꦭꦺꦏꦠ꧀ꦩꦸꦭꦺꦏꦠ꧀ꦠꦺꦤꦒꦩꦲꦸꦢꦶ​ꦲꦸꦚ꧀ꦕꦭ꧀ꦭꦏꦺꦤꦁꦧꦸꦩꦶ꧉​

꧋ꦏꦶꦢꦸꦁꦏꦩꦼꦤꦁꦔꦤ꧀꧈​

¹⁰꧋ꦲꦏꦸꦠꦼꦫꦸꦱ꧀ꦏꦿꦸꦔꦸꦱ꧀ꦮꦫꦧꦤ꧀ꦠꦼꦂꦧꦔꦼꦠ꧀ꦤꦁꦱ꧀ꦮꦂꦒ꧈​ꦩꦸꦤꦶꦔꦺꦤꦺ:“ꦱꦲꦶꦏꦶꦮꦶꦱ꧀ꦠꦼꦏꦤ꧀ꦮꦏ꧀ꦠꦸꦩꦸꦒꦸꦱ꧀ꦠꦶꦄꦭ꧀ꦭꦃꦚ꧀ꦭꦩꦼꦠ꧀ꦠꦏꦺꦲꦸꦩꦠ꧀ꦠꦺ꧉​ꦱꦲꦶꦏꦶꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀​ꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱꦤꦺ꧉​ꦥꦔ꧀ꦮꦱꦤꦺꦏꦿꦶꦱ꧀ꦡꦸꦱ꧀ꦱꦲꦶꦏꦶꦮꦶꦱ꧀ꦠꦼꦏ꧉​ꦲꦮꦶꦠ꧀ꦱꦶꦁꦔꦼꦭꦃꦲꦏꦺꦥꦫꦱꦼꦢꦸꦭꦸꦂꦫꦺꦲꦮꦏ꧀ꦏꦺꦢꦺꦮꦺꦤꦁꦔꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃ꧈​ꦱꦶꦁꦔꦼꦭꦃꦲꦏꦺꦄꦮꦤ꧀ꦮꦼꦔꦶ꧈​ꦱꦲꦶꦏꦶꦮꦶꦱ꧀ꦢꦶ​ꦲꦸꦚ꧀ꦕꦭ꧀ꦭꦏꦺꦱꦁꦏꦱ꧀ꦮꦂꦒ꧉​ ¹¹ꦥꦫ​ꦱꦼꦢꦸꦭꦸꦂꦫꦺ​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦥꦢ​ꦔꦭꦃꦲꦏꦺꦤꦒ​ꦔꦁꦒꦺꦴ​ꦒꦼꦠꦶꦃꦲꦺ​ꦕꦼꦩ꧀ꦥꦺꦤꦺ​ꦭꦤ꧀ꦔꦁꦒꦺꦴ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦢꦶꦏꦧꦂꦫꦏꦺ꧉​ꦲꦮꦶꦠ꧀ꦲꦺꦴꦫ​ꦥꦢ​ꦲꦺꦩꦤ꧀ꦚꦮꦤꦺ​ꦢꦺꦮꦺ꧈​ꦤꦁꦔꦶꦁ​ꦥꦢ​ꦱꦒꦸꦃ​ꦩꦠꦶ​꧉​ ¹²ꦩꦸꦭꦤꦺ​꧈​ꦱ꧀ꦮꦂꦒ​ꦭꦤ꧀ꦱꦶꦁ​ꦩꦁꦒꦺꦴꦤ꧀ꦤꦁꦱ꧀ꦮꦂꦒ​ꦥꦢ​ꦧꦸꦔꦃꦧꦸꦔꦃꦲ​!ꦤꦁꦔꦶꦁ​ꦕꦶꦭꦏ​ꦠꦼꦤꦤ꧀ꦧꦸꦩꦶ​ꦭꦤ꧀ꦱꦼꦒꦫ​꧉​ꦲꦮꦶꦠ꧀ꦱꦺꦠꦤ꧀ꦮꦶꦱ꧀ꦩꦼꦢꦸꦤ꧀ꦤꦼꦏꦤꦶ​ꦏꦺꦴꦮꦺ​ꦏꦫꦺꦴ​ꦤꦼꦱꦸ​ꦧꦔꦼꦠ꧀ ꦩꦔꦼꦂꦠꦺꦤ꧀ꦤꦶꦤꦺꦏ꧀ꦮꦏ꧀ꦠꦸꦩꦸꦮꦶꦱ꧀ꦓꦫꦺꦏ꧀ꦱꦼꦢꦶꦭꦸꦠ꧀꧈​”

꧋ꦤꦒ​ꦔꦺꦴꦪꦏ꧀ꦮꦺꦴꦁ​ꦮꦺꦢꦺꦴꦏ꧀꧈​

¹³꧋ꦏꦢꦸꦁ​ꦤꦒ​ꦲꦺꦭꦶꦁ​ꦤꦺꦏ꧀ꦮꦶꦱ꧀ꦢꦶꦧꦸꦮꦁ​ꦤꦁꦧꦸꦩꦶ​꧈​ꦠꦼꦫꦸꦱ꧀ꦔꦺꦴꦪꦏ꧀ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦮꦶꦱ꧀​ꦔ꧀ꦭꦲꦶꦂꦫꦏꦺꦲꦤꦏ꧀ꦭꦤꦁ​ꦩꦲꦸ​꧉​ ¹⁴ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦱ꧀ꦮꦶꦮꦶꦤꦺ​ꦒꦫꦸꦢꦒꦼꦢꦺꦩꦫꦁ​ꦮꦺꦴꦁ​ꦮꦺꦢꦺꦴꦏ꧀ꦏꦺ꧈​ꦱꦸꦥꦪ​ꦧꦶꦱ​ꦩꦧꦸꦂ​ꦭꦸꦔ​ꦤꦁꦥꦁꦒꦺꦴꦤ꧀ꦤꦤ꧀ꦤꦺ​ꦤꦁꦮꦸꦱ꧀ꦠꦺꦤ꧀꧈​ꦤꦁꦮꦸꦱ꧀ꦠꦺꦤ꧀ꦏꦺꦴꦤꦺꦴ​ꦮꦺꦴꦁ​ꦮꦺꦢꦺꦴꦏ꧀ꦏꦺꦢꦶꦫꦸꦩꦠ꧀ꦠꦶ​ꦠꦼꦭꦸꦁ​ꦠꦲꦸꦤ꧀ꦱꦼꦠꦼꦔꦃ​ꦱꦸꦮꦺꦤꦺ​ꦭꦤ꧀ꦢꦶꦥꦒꦼꦂꦫꦶ​ꦱꦁꦏꦲꦸꦭꦤꦺ​꧉​ ¹⁵ꦤꦒ​ꦩꦲꦸ​ꦚꦼꦩ꧀ꦧꦸꦂꦫꦏꦺꦧꦚꦸ​ꦏꦪ​ꦭꦫꦱꦁꦏꦕꦁꦏꦼꦩ꧀ꦩꦺ​꧈​ꦱꦸꦥꦪ​ꦮꦺꦴꦁ​ꦮꦺꦢꦺꦴꦏ꧀ꦏꦺꦏꦠꦸꦠ꧀ꦏꦫꦺꦴ​ꦧꦚꦸꦤꦺ​꧉​ ¹⁶ꦤꦁꦔꦶꦁ​ꦧꦸꦩꦶ​ꦤꦸꦭꦸꦁꦔꦶ​ꦮꦺꦴꦁ​ꦮꦺꦢꦺꦴꦏ꧀ꦏꦺ꧉​ꦧꦸꦩꦶ​ꦩꦔꦥ꧀ꦥꦏꦺ ꦕꦁꦏꦼꦩ꧀ꦩꦺ​ꦭꦤ꧀ꦔꦸꦤ꧀ꦠꦭ꧀ꦧꦚꦸ​ꦱꦶꦁ​ꦢꦶꦱꦼꦩ꧀ꦧꦸꦂꦫꦏꦺꦏꦫꦺꦴ​ꦤꦒ​ꦩꦲꦸ​꧉​ ¹⁷ꦤꦒ​ꦤꦼꦱꦸ​ꦧꦔꦼꦠ꧀ꦩꦫꦁ​ꦮꦺꦴꦁ​ꦮꦺꦢꦺꦴꦏ꧀ꦏꦺ꧈​ꦠꦼꦫꦸꦱ꧀ꦭꦸꦔ​ꦲꦉꦥ꧀​ꦔ꧀ꦭꦮꦤ꧀ꦠꦸꦫꦸꦤ꧀ꦠꦸꦫꦸꦤꦤ꧀ꦤꦺꦮꦺꦴꦁ​ꦮꦺꦢꦺꦴꦏ꧀ꦏꦺ꧈​ꦪꦏꦸꦮꦶ​ꦏꦧꦺꦃ​ꦱꦶꦁ​ꦥꦢ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦠꦼꦩꦼꦤ꧀ꦤꦸꦫꦸꦠ꧀ꦩꦫꦁ​ꦥꦶꦮꦸꦭꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ¹⁸ꦤꦒ​ꦠꦼꦫꦸꦱ꧀ꦩꦥꦤ꧀ꦤꦁꦥꦶꦁꦒꦶꦂ​ꦱꦼꦒꦫ​꧉​

↑ ↑ ↑

꧋ꦏꦺꦮꦤ꧀ꦱꦶꦁ​ꦚ꧀ꦗꦼꦢꦸꦭ꧀ꦱꦁꦏꦱꦼꦒꦫ​꧉​

꧇​꧑꧓꧇​ ¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦏꦺꦮꦤ꧀​ꦚ꧀ꦗꦼꦢꦸꦭ꧀ꦱꦁꦏꦱꦼꦒꦫ​꧈​ꦱꦸꦔꦸꦤꦺ​ꦱꦼꦥꦸꦭꦸꦃ​ꦭꦤ꧀ꦲꦼꦤ꧀ꦢꦱ꧀ꦱꦺꦥꦶꦠꦸ​꧉​ꦱꦧꦼꦤ꧀ꦱꦸꦔꦸ​ꦲꦺꦤꦺꦁꦩꦏꦸꦠꦤ꧀ꦤꦺꦭꦤ꧀ꦤꦁꦱꦧꦼꦤ꧀ꦲꦼꦤ꧀ꦢꦱ꧀ꦱꦺꦲꦺꦤꦺꦁꦠꦸꦭꦶꦱ꧀ꦱꦤ꧀ꦱꦶꦁ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ²ꦏꦺꦮꦤ꧀ꦱꦶꦁ​ꦲꦏꦸ​ꦮꦼꦫꦸꦃ​ꦏꦸꦮꦶ​ꦫꦸꦥꦤꦺ​ꦏꦪ​ꦩꦕꦤ꧀ꦠꦸꦠꦸꦭ꧀ ꦱꦶꦏꦶꦭ꧀ꦭꦺ​ꦏꦪ​ꦱꦶꦏꦶꦭ꧀ꦧꦿꦸꦮꦁ​ꦭꦤ꧀ꦕꦁꦏꦼꦩ꧀ꦩꦺ​ꦏꦪ​ꦕꦁꦏꦼꦩ꧀ꦱꦶꦔ​꧉​ꦏꦺꦮꦤ꧀ꦩꦲꦸ​ꦢꦶꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦏꦫꦺꦴ​ꦤꦒ​꧈​ꦩꦭꦃ​ꦲꦸꦒ​ꦢꦶꦏꦺꦏ꧀ꦏꦶꦢꦩ꧀ꦥꦂꦫꦺꦭꦤ꧀ꦥꦔ꧀ꦮꦱꦤꦺ​ꦱꦶꦁ​ꦒꦼꦢꦺ꧉​ ^3-4ꦏꦺꦠꦺꦴꦏ꧀ꦏꦺ​ꦲꦼꦤ꧀ꦢꦱ꧀ꦱꦺꦏꦺꦮꦤ꧀ꦩꦲꦸ​ꦲꦺꦤꦺꦁꦱꦶꦗꦶ​ꦱꦶꦁ​ꦠꦠꦸ​ꦔ꧀ꦒꦼꦒꦶꦫꦶꦱꦶ​꧈​ꦤꦁꦔꦶꦁ​ꦠꦠꦸꦤꦺ​ꦮꦶꦱ꧀ꦥꦸꦭꦶꦃ​꧉​ꦮꦺꦴꦁ​ꦱꦏ꧀ꦗꦒꦠ꧀ꦠꦼꦫꦸꦱ꧀ꦥꦢ​ꦔꦼꦠꦸꦠ꧀ꦠꦏꦺꦏꦺꦮꦤ꧀ꦩꦲꦸ​ꦏꦫꦺꦴ​ꦔ꧀ꦒꦸꦩꦸꦤ꧀ꦭꦤ꧀ꦥꦢ​ꦚꦼꦩ꧀ꦧꦃ​ꦤꦒ​꧈​ꦲꦮꦶꦠ꧀ꦤꦒ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦏꦺꦮꦤ꧀꧈​ꦮꦺꦴꦁꦮꦺꦴꦁ​ꦩꦲꦸ​ꦥꦢ​ꦩꦼꦩꦸꦗꦶ​ꦩꦫꦁ​ꦏꦺꦮꦤ꧀ ꦠꦼꦩ꧀ꦧꦸꦁꦔꦺ​:“ꦱꦥ​ꦱꦶꦁ​ꦧꦶꦱ​ꦩꦢꦤ꧀ꦤꦶꦏꦺꦮꦤ꧀ꦲꦶꦏꦶ​ꦭꦤ꧀ꦱꦥ​ꦱꦶꦁ​ꦮꦤꦶ​ꦥꦼꦫꦁ​ꦏꦫꦺꦴ​ꦢꦺꦏ꧀ꦤꦺ?”

⁵꧋ꦏꦺꦮꦤ꧀ꦩꦲꦸ​ꦢꦶꦭꦶꦭꦤꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦒꦼꦩꦸꦁꦒꦸꦁ​ꦭꦤ꧀ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦥꦼꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦺꦮꦤ꧀ꦢꦶꦭꦶꦭꦤꦶ​ꦲꦸꦒ​ꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱ​꧈​ꦥꦠꦁ​ꦥꦸꦭꦸꦃ​ꦭꦺꦴꦫꦺꦴ​ꦱꦱꦶ​ꦱꦸꦮꦺꦤꦺ​꧉​ ⁶ꦏꦺꦮꦤ꧀ꦠꦼꦫꦸꦱ꧀ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦸꦒ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦗꦼꦤꦼꦁꦔꦺ​ꦭꦤ꧀ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦏꦧꦺꦃ​ꦱꦶꦁ​ꦩꦁꦒꦺꦴꦤ꧀ꦤꦁꦱ꧀ꦮꦂꦒ​꧉​ ⁷ꦏꦺꦮꦤ꧀ꦲꦸꦒ​ꦏꦼꦭꦶꦭ꧀ꦭꦤ꧀​ꦔ꧀ꦭꦮꦤ꧀ꦭꦤ꧀ꦔꦭꦃꦲꦏꦺꦏꦧꦺꦃ​ꦱꦶꦁ​ꦥꦢ​ꦤꦸꦫꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦭꦃ​ꦏꦼꦭꦶꦭ꧀ꦭꦤ꧀​ꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱ​ꦩꦫꦁ​ꦱꦧꦼꦤ꧀ꦠꦊꦂ​ꦭꦤ꧀ꦤꦼꦒꦫ​꧈​ꦧꦱ​ꦭꦤ꧀ꦧꦁꦱ​꧉​ ⁸ꦏꦧꦺꦃꦮꦺꦴꦁꦤꦁꦧꦸꦩꦶꦥꦢꦚꦼꦩ꧀ꦧꦃꦩꦫꦁꦏꦺꦮꦤ꧀ ꦪꦏꦸꦮꦶꦏꦧꦺꦃꦮꦺꦴꦁꦱꦶꦁꦏꦮꦶꦠ꧀ꦗꦒꦠ꧀ꦢꦶꦒꦮꦺꦗꦼꦤꦼꦁꦔꦺꦲꦺꦴꦫꦏꦼꦠꦸꦭꦶꦱ꧀ꦤꦁꦧꦸꦏꦸꦥꦔꦸꦫꦶꦥ꧀ꦥꦤ꧀ꦤꦺꦕꦼꦩ꧀ꦥꦺꦤꦺꦱꦶꦁꦮꦶꦱ꧀ꦏꦧꦼꦭꦺꦃ꧉​

⁹꧋“ꦱꦥ​ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧈​ꦢꦶꦫꦸꦔꦺꦴꦏ꧀ꦏꦏꦺ! ¹⁰ꦱꦥ​ꦮꦶꦱ꧀ꦥꦶꦤꦼꦱ꧀ꦠꦶꦢꦶꦱꦼꦠꦿꦥ꧀ꦪ​ꦧꦏꦭ꧀ꦢꦶꦊꦧꦺꦴꦏ꧀ꦏꦏꦺꦱꦼꦠꦿꦥꦤ꧀꧈​ꦱꦥ​ꦮꦶꦱ꧀ꦥꦶꦤꦼꦱ꧀ꦠꦶꦩꦠꦶ​ꦏꦫꦺꦴ​ꦥꦼꦢꦁꦪ​ꦧꦏꦭ꧀ꦢꦶꦥꦠꦺꦤ꧀ꦤꦶ​ꦏꦫꦺꦴ​ꦥꦼꦢꦁ꧉​ꦩꦸꦭꦤꦺ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦢꦸ​ꦱꦧꦂꦩꦤ꧀ꦠꦼꦥ꧀ꦭꦤ꧀ꦥꦽꦕꦪ​꧉​”

꧋ꦏꦺꦮꦤ꧀ꦱꦶꦁ​ꦩꦼꦠꦸ​ꦱꦁꦏꦢꦫꦠ꧀ꦠꦤ꧀꧈​

¹¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦏꦺꦮꦤ꧀ꦭꦶꦪꦤꦺ​ꦚ꧀ꦗꦼꦢꦸꦭ꧀ꦱꦁꦏꦢꦫꦠ꧀ꦠꦤ꧀꧈​ꦏꦺꦮꦤ꧀ꦲꦶꦏꦶ​ꦱꦸꦔꦸꦤꦺ​ꦭꦺꦴꦫꦺꦴ​ꦏꦪ​ꦱꦸꦔꦸꦤꦺ​ꦕꦼꦩ꧀ꦥꦺ​ꦭꦤ꧀ꦱ꧀ꦮꦫꦤꦺ​ꦏꦪ​ꦱ꧀ꦮꦫꦤꦺ​ꦤꦒ​꧉​ ¹²ꦏꦺꦮꦤ꧀ꦲꦶꦏꦶ​ꦔ꧀ꦭꦏꦺꦴꦏ꧀ꦏꦏꦺꦱꦏ꧀ꦏꦺꦃꦲꦺꦥꦔ꧀ꦮꦱꦤꦺ​ꦏꦺꦮꦤ꧀ꦱꦶꦁ​ꦤ꧀ꦢꦶꦱꦶꦏ꧀꧈​ꦗꦒꦠ꧀ꦭꦤ꧀ꦮꦺꦴꦁ​ꦏꦧꦺꦃ​ꦱꦶꦁ​ꦩꦁꦒꦺꦴꦤ꧀ꦤꦁꦏꦺꦴꦤꦺꦴ​ꦥꦢ​ꦢꦶꦥꦼꦏ꧀ꦱ​ꦚꦼꦩ꧀ꦧꦃ​ꦩꦫꦁ​ꦏꦺꦮꦤ꧀ꦱꦶꦁ​ꦤ꧀ꦢꦶꦱꦶꦏ꧀ ꦱꦶꦁ​ꦮꦶꦱ꧀ꦩꦫꦶ​ꦱꦁꦏꦠꦠꦸꦤꦺ​ꦱꦶꦁ​ꦩꦼꦢꦺꦤ꧀ꦤꦶ​꧉​ ¹³ꦏꦺꦮꦤ꧀ꦱꦶꦁ​ꦤꦺꦴꦩꦼꦂ​ꦭꦺꦴꦫꦺꦴ​ꦔꦤꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧉​ꦤꦁꦔꦉꦥ꧀ꦥꦺ​ꦮꦺꦴꦁ​ꦏꦧꦺꦃ​ꦏꦺꦮꦤ꧀ꦩꦲꦸ​ꦔꦼꦢꦸꦤ꧀ꦤꦏꦺꦒꦼꦤꦶ​ꦱꦁꦏꦭꦔꦶꦠ꧀꧈​ ¹⁴ꦏꦺꦮꦤ꧀ꦲꦶꦏꦶ​ꦥꦚ꧀ꦕꦺꦤ꧀ꦏꦼꦭꦶꦭ꧀ꦭꦤ꧀ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀ꦤꦁꦔꦉꦥ꧀ꦥꦺ​ꦏꦺꦮꦤ꧀ꦱꦶꦁ​ꦤ꧀ꦢꦶꦱꦶꦏ꧀꧈​ꦮꦺꦴꦁ​ꦏꦧꦺꦃ​ꦢꦶꦏꦺꦴꦁꦏꦺꦴꦤ꧀ꦏꦫꦺꦴ​ꦏꦺꦮꦤ꧀ꦱꦶꦁ​ꦤꦺꦴꦩꦼꦂ​ꦭꦺꦴꦫꦺꦴ​ꦱꦸꦥꦪ​ꦔꦼꦢꦼꦏ꧀ꦏꦏꦺꦉꦕ​ꦏꦁꦒꦺꦴ​ꦔꦸꦂꦩꦠ꧀ꦠꦶ​ꦏꦺꦮꦤ꧀ꦱꦶꦁ​ꦤ꧀ꦢꦶꦱꦶꦏ꧀ ꦱꦶꦁ​ꦮꦶꦱ꧀ꦠꦠꦸ​ꦏꦫꦺꦴ​ꦥꦼꦢꦁ꧈​ꦤꦁꦔꦶꦁ​ꦲꦶꦗꦶꦏ꧀ꦲꦸꦫꦶꦥ꧀꧈​ ¹⁵ꦏꦺꦮꦤ꧀ꦱꦶꦁ​ꦤꦺꦴꦩꦼꦂ​ꦭꦺꦴꦫꦺꦴ​ꦲꦺꦤ꧀ꦠꦸꦏ꧀ꦥꦔ꧀ꦮꦱ​ꦔꦼꦏꦺꦏ꧀ꦏꦶꦚꦮ​ꦩꦫꦁ​ꦉꦕ​ꦩꦲꦸ​꧈​ꦱꦸꦥꦪ​ꦉꦕꦤꦺ​ꦧꦶꦱ​ꦔꦺꦴꦩꦺꦴꦁꦭꦤ꧀ꦩꦠꦺꦤ꧀ꦤꦶ​ꦏꦧꦺꦃ​ꦮꦺꦴꦁ​ꦱꦶꦁ​ꦲꦺꦴꦫ​ꦒꦼꦊꦩ꧀ꦚꦼꦩ꧀ꦧꦃ​ꦩꦫꦁ​ꦢꦺꦏ꧀ꦤꦺ꧉​ ¹⁶ꦮꦺꦴꦁꦏꦧꦺꦃ꧈​ꦒꦼꦢꦺꦕꦶꦭꦶꦏ꧀ ꦱꦸꦒꦶꦃꦩ꧀ꦭꦫꦠ꧀ ꦱ꧀ꦭꦥ꦳꧀ꦭꦤ꧀ꦮꦺꦴꦁꦩꦼꦂꦢꦺꦏ꧈​ꦢꦶꦥꦼꦏ꧀ꦱꦏꦫꦺꦴꦏꦺꦮꦤ꧀ꦱꦶꦁꦤꦺꦴꦩꦼꦂꦭꦺꦴꦫꦺꦴꦩꦲꦸ꧈​ꦔ꧀ꦒꦮꦠꦼꦔꦼꦂꦤꦁꦠꦔꦤ꧀ꦤꦺꦠꦼꦔꦼꦤ꧀ꦭꦤ꧀ꦤꦁꦧꦠꦸꦏ꧀ꦏꦺ꧉​ ¹⁷ꦢꦢꦶꦤꦺ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦱꦶꦁ​ꦧꦶꦱ​ꦠꦸꦏꦸ​ꦲꦥ​ꦲꦢꦺꦴꦭ꧀ ꦤꦺꦏ꧀ꦲꦺꦴꦫ​ꦤ꧀ꦢꦸꦮꦺꦠꦼꦔꦼꦂꦫꦺꦏꦸꦮꦶ​꧈​ꦪꦏꦸꦮꦶ​ꦗꦼꦤꦼꦁꦔꦺ​ꦏꦺꦮꦤ꧀ꦲꦥ​ꦤꦺꦴꦩꦼꦫꦺꦗꦼꦤꦼꦁꦔꦺ​ꦏꦺꦮꦤ꧀ꦩꦲꦸ​꧉​

¹⁸꧋ꦲꦶꦏꦶꦩ꧀ꦧꦸꦠꦸꦃꦲꦏꦺꦏꦮꦼꦫꦸꦃ꧉​ꦮꦺꦴꦁꦱꦶꦁꦤ꧀ꦢꦸꦮꦺꦏꦮꦼꦫꦸꦃꦧꦶꦱꦔꦼꦂꦠꦶꦠꦼꦒꦼꦱ꧀ꦱꦺꦤꦺꦴꦩꦼꦫꦺꦏꦺꦮꦤ꧀ꦏꦸꦮꦶ꧈​ꦲꦮꦶꦠ꧀ꦤꦺꦴꦩꦼꦂꦏꦸꦮꦶꦔꦺꦴꦩꦺꦴꦁꦔꦏꦺꦩꦤꦸꦁꦱꦭꦤ꧀ꦤꦺꦴꦩꦼꦫꦺꦏꦸꦮꦶꦤꦼꦩ꧀ꦲꦠꦸꦱ꧀ꦱ꧀ꦮꦶꦢꦏ꧀ꦤꦼꦤꦼꦩ꧀꧈​

↑ ↑ ↑

꧋ꦥꦩꦸꦗꦶꦤꦺꦮꦺꦴꦁꦮꦺꦴꦁꦱꦶꦁꦮꦶꦱ꧀ꦤꦩ꧀ꦥꦏꦼꦱ꧀ꦭꦩꦼꦠ꧀ꦠꦤ꧀꧈​

꧇​꧑꧔꧇​ ¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦕꦼꦩ꧀ꦥꦺꦤꦺ​ꦔꦢꦼꦏ꧀ꦤꦁꦒꦸꦤꦸꦁ​ꦱꦶꦪꦺꦴꦤ꧀꧈​ꦏꦫꦺꦴ​ꦢꦺꦏ꧀ꦤꦺꦲꦺꦤꦺꦁꦮꦺꦴꦁ​ꦱꦠꦸꦱ꧀ꦥꦠꦁ​ꦥꦸꦭꦸꦃ​ꦥꦥꦠ꧀ꦲꦺꦮꦸ​꧉​ꦤꦁꦧꦠꦸꦏ꧀ꦏꦺꦮꦺꦴꦁꦮꦺꦴꦁ​ ꦩꦲꦸ​ꦏꦼꦠꦸꦭꦶꦱ꧀ꦗꦼꦤꦼꦁꦔꦺ​ꦕꦼꦩ꧀ꦥꦺꦤꦺ​ꦭꦤ꧀ꦗꦼꦤꦼꦁꦔꦺ​ꦧꦥꦏ꧀ꦏꦺ꧉​ ²ꦲꦏꦸ​ꦠꦼꦫꦸꦱ꧀ꦏꦿꦸꦔꦸ​ꦱ꧀ꦮꦫ​ꦱꦁꦏꦭꦔꦶꦠ꧀ꦏꦪ​ꦱ꧀ꦮꦫꦤꦺ​ꦧꦚꦸ​ꦲꦺꦴꦏꦺꦃꦒꦼꦩꦿꦺꦴꦗꦺꦴꦏ꧀ꦭꦤ꧀ꦏꦪ​ꦱ꧀ꦮꦫꦤꦺ​ꦒ꧀ꦭꦸꦢꦸꦏ꧀ꦱꦶꦁ​ꦩꦼꦢꦺꦤ꧀ꦤꦶ​꧈​ꦲꦸꦒ​ꦏꦪ​ꦱ꧀ꦮꦫꦤꦺ​ꦕꦼꦩ꧀ꦥ꧀ꦭꦸꦁ​​ꦱꦶꦁ​ꦢꦶꦠꦧꦸꦃꦏꦫꦺꦴ​ꦥꦫ​ꦥꦼꦤꦧꦸꦃ​꧉​ ³ꦤꦁꦔꦉꦥ꧀ꦥꦺ​ꦢꦩ꧀ꦥꦂꦭꦤ꧀ꦤꦁꦔꦉꦥ꧀ꦥꦺ​ꦏꦲꦸꦫꦶꦥ꧀ꦥꦤ꧀ꦥꦥꦠ꧀ ꦲꦸꦒ​ꦤꦁꦔꦉꦥ꧀ꦥꦺ​ꦥꦫ​ꦥꦶꦤꦶꦠꦸꦮ​ꦱꦶꦁ​ꦤꦁꦱꦏ꧀ꦲꦸꦧꦼꦁꦔꦺ​ꦢꦩ꧀ꦥꦂꦩꦲꦸ​ꦮꦺꦴꦁ​ꦱꦠꦸꦱ꧀ꦥꦠꦁ​ꦥꦸꦭꦸꦃ​ꦥꦥꦠ꧀ꦲꦺꦮꦸ​ꦥꦢ​ꦱꦶꦔꦶꦏꦶꦢꦸꦁ​ꦲꦚꦂ​꧉​ꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦧ꧀ꦭꦗꦂꦏꦶꦢꦸꦁ​ꦩꦲꦸ​꧈​ꦏꦼꦗꦧ​ꦤꦩꦸꦁ​ꦮꦺꦴꦁ​ꦱꦠꦸꦱ꧀ꦥꦠꦁ​ꦥꦸꦭꦸꦃ​ꦥꦥꦠ꧀ꦲꦺꦮꦸ​ꦱꦶꦁ​ꦮꦶꦱ꧀ꦢꦶꦱ꧀ꦭꦩꦼꦠ꧀ꦠꦏꦺꦱꦁꦏꦧꦸꦩꦶ​꧉​ ⁴ꦏꦸꦮꦶ​ꦮꦺꦴꦁ​ꦱꦶꦁ​ꦥꦢ​ꦚꦶꦩ꧀ꦥꦼꦤ꧀ꦲꦮꦏ꧀ꦏꦺ​ꦉꦱꦶꦏ꧀ ꦗꦭꦂꦫꦤ꧀ꦲꦺꦴꦫ​ꦕꦼꦕꦩ꧀ꦥꦸꦂꦫꦤ꧀​ꦏꦫꦺꦴ​ꦮꦺꦴꦁ​ꦮꦺꦢꦺꦴꦏ꧀꧈​ꦢꦢꦶꦤꦺ​ꦲꦺꦴꦫ​ꦤ꧀ꦢꦸꦮꦺꦧꦺꦴꦗꦺꦴ​꧉​ꦮꦺꦴꦁꦮꦺꦴꦁ​ꦲꦶꦏꦶ​ꦥꦢ​ꦔꦼꦠꦸꦠ꧀ꦠꦏꦺꦕꦼꦩ꧀ꦥꦺꦤꦺ​ꦤꦁꦲꦼꦤ꧀ꦢꦶ​ꦮꦲꦺ​꧉​ꦲꦶꦏꦶ​ꦱꦶꦁ​ꦥꦢ​ꦏꦠꦼꦧꦸꦱ꧀ꦱꦁꦏꦠꦼꦔꦃꦲꦺ​ꦩꦤꦸꦁꦱ​ꦏꦧꦺꦃ​꧈​ꦢꦢꦶ​ꦏꦸꦂꦧꦤ꧀ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦱꦶꦁ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦫꦁ​ꦕꦼꦩ꧀ꦥꦺꦤꦺ​꧉​ ⁵ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦴꦫ​ꦠꦲꦸ​ꦒꦺꦴꦫꦺꦴꦃ​ꦭꦤ꧀ꦲꦺꦴꦫ​ꦲꦺꦤꦺꦁꦉꦒꦼꦠ꧀ꦠꦺ꧉​

꧋ꦩꦸꦭꦺꦏꦠ꧀ꦠꦼꦭꦸ​꧉​

⁶꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦲꦺꦤꦺꦁꦩꦸꦭꦺꦏꦠ꧀ꦭꦶꦪꦤꦺ​ꦩꦧꦸꦂ​ꦤꦁꦲꦮꦁꦔꦮꦁ꧈​ꦔ꧀ꦒꦮ​ꦏꦧꦂ​ꦏꦧꦸꦔꦃꦲꦤ꧀ꦱꦶꦁ​ꦭꦁꦒꦼꦁ​꧈​ꦢꦶꦏꦧꦂꦫꦏꦺꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦩꦁꦒꦺꦴꦤ꧀ꦤꦁꦧꦸꦩꦶ​꧈​ꦱꦧꦼꦤ꧀ꦧꦁꦱ​꧈​ꦠꦊꦂ​꧈​ꦧꦱ​ꦭꦤ꧀ꦤꦼꦒꦫ​꧉​ ⁷ꦩꦸꦭꦺꦏꦠ꧀ꦩꦲꦸꦔꦺꦴꦩꦺꦴꦁꦔꦺꦏꦫꦺꦴꦱ꧀ꦮꦫꦧꦤ꧀ꦠꦼꦂ:“ꦥꦢꦮꦼꦢꦶꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦥꦢꦢꦶꦥꦸꦗꦶꦗꦼꦤꦼꦁꦔꦺ꧈​ꦲꦮꦶꦠ꧀ꦱꦲꦶꦏꦶꦮꦶꦱ꧀ꦠꦼꦏꦤ꧀ꦮꦚ꧀ꦕꦶꦤꦺꦲꦼꦁꦒꦺꦴꦤꦺꦢꦺꦏ꧀ꦤꦺꦧꦏꦭ꧀ꦔꦿꦸꦠꦸꦩꦤꦸꦁꦱ꧉​ꦥꦢꦱꦸꦗꦸꦠ꧀ꦠꦩꦫꦁꦢꦺꦏ꧀ꦤꦺꦱꦶꦁꦔ꧀ꦒꦮꦺꦭꦔꦶꦠ꧀ꦭꦤ꧀ꦧꦸꦩꦶ꧈​ꦱꦼꦒꦫꦭꦤ꧀ꦱꦏ꧀ꦏꦺꦃꦲꦺꦲꦼꦠꦸꦏ꧀ꦏꦺꦧꦚꦸ꧉​”

⁸꧋ꦩꦸꦭꦺꦏꦠ꧀ꦱꦶꦁ​ꦤ꧀ꦢꦶꦱꦶꦏ꧀ꦢꦶꦱꦸꦱꦸꦭ꧀ꦏꦫꦺꦴ​ꦩꦸꦭꦺꦏꦠ꧀ꦱꦶꦁ​ꦏꦺꦫꦶ​ꦱꦶꦁ​ꦔꦺꦴꦩꦺꦴꦁ:“ꦮꦶꦱ꧀ꦫꦸꦧꦸꦃ​!ꦏꦸꦠꦨꦧꦶꦭꦺꦴꦤ꧀ꦱꦶꦁ​ꦒꦼꦢꦺꦮꦶꦱ꧀ꦫꦸꦧꦸꦃ​!ꦪ​ꦏꦸꦠꦲꦶꦏꦶ​ꦱꦶꦁ​ꦩꦫꦏ꧀ꦏꦏꦺꦥꦫ​ꦧꦁꦱ​ꦥꦢ​ꦩꦼꦤ꧀ꦢꦼꦩ꧀ꦔꦺꦴꦩ꧀ꦧꦺ​ꦲꦭ​ꦭꦤ꧀ꦭꦏꦸ​ꦧꦺꦢꦁ꧉​”

^9-11꧋ꦠꦼꦫꦸꦱ꧀ꦲꦺꦤꦺꦁꦩꦸꦭꦺꦏꦠ꧀ꦤꦺꦴꦩꦼꦂ​ꦠꦼꦭꦸ​ꦤꦸꦱꦸꦭ꧀ ꦔꦺꦴꦩꦺꦴꦁꦧꦤ꧀ꦠꦼꦂ​:“ꦮꦺꦴꦁ​ꦱꦶꦁ​ꦚꦼꦩ꧀ꦧꦃ​ꦩꦫꦁ​ꦏꦺꦮꦤ꧀ꦭꦤ꧀ꦉꦕꦤꦺ​ꦭꦤ꧀ꦱꦶꦁ​ꦤꦩ꧀ꦥ​ꦠꦼꦔꦼꦂꦫꦺꦤꦁꦧꦠꦸꦏ꧀ꦏꦺꦲꦥ​ꦠꦔꦤ꧀ꦤꦺ​꧈​ꦮꦺꦴꦁ​ꦏꦸꦮꦶ​ꦧꦏꦭ꧀ꦔꦺꦴꦩ꧀ꦧꦺ​ꦲꦁꦒꦸꦂꦫꦺ​ꦤꦼꦱꦸꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦤꦁꦮꦢꦃꦲꦺ꧈​ꦠꦤ꧀ꦥ​ꦢꦶꦏꦸꦫꦁꦔꦶ​ꦱꦼꦠꦶꦪ꧉​ꦮꦺꦴꦁ​ꦏꦧꦺꦃ​ꦧꦏꦭ꧀ꦢꦶꦲꦗꦂ​ꦔꦁꦒꦺꦴ​ꦒꦼꦤꦶ​ꦭꦤ꧀ꦭꦶꦫꦁ​ꦤꦁꦔꦉꦥ꧀ꦥꦺ​ꦥꦫ​ꦩꦸꦭꦺꦏꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦤꦁꦔꦉꦥ꧀ꦥꦺ​ꦕꦼꦩ꧀ꦥꦺꦤꦺ​꧉​ꦏꦼꦧꦸꦭ꧀ꦭꦺ​ꦒꦼꦤꦶ​ꦱꦶꦁ​ꦔꦗꦂ​ꦮꦺꦴꦁꦮꦺꦴꦁ​ꦩꦲꦸ​ꦩꦸꦁꦒꦃ​ꦱꦭꦮꦱ꧀ꦭꦮꦱ꧀ꦱꦺ​꧉​ꦲꦗꦂꦫꦤ꧀ꦏꦸꦮꦶ​ꦲꦺꦴꦫ​ꦧꦏꦭ꧀ꦭꦺꦫꦺꦤ꧀ꦄꦮꦤ꧀ꦮꦼꦔꦶ꧈​ꦪꦏꦸꦮꦶ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦚꦼꦩ꧀ꦧꦃ​ꦩꦫꦁ​ꦏꦺꦮꦤ꧀ꦭꦤ꧀ꦉꦕꦤꦺ​ꦭꦤ꧀ꦏꦧꦺꦃ​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦠꦼꦔꦼꦂꦫꦺꦗꦼꦤꦼꦁꦔꦺ​ꦏꦺꦮꦤ꧀ꦩꦲꦸ​꧉​”

¹²꧋ꦲꦶꦁ​ꦏꦺꦤꦺ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦥꦢ​ꦩꦤꦸꦠ꧀ꦩꦫꦁ​ꦥꦶꦠꦸꦠꦸꦂꦫꦺ​ꦭꦤ꧀ꦱꦶꦁ​ꦥꦢ​ꦠꦼꦩꦼꦤ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ ꦏꦸꦢꦸ​ꦱꦧꦂꦩꦤ꧀ꦠꦼꦥ꧀꧈​

¹³꧋ꦲꦏꦸ​ꦠꦼꦫꦸꦱ꧀ꦏꦿꦸꦔꦸ​ꦱ꧀ꦮꦫ​ꦱꦁꦏꦱ꧀ꦮꦂꦒ​:“ꦢꦶꦠꦸꦭꦶꦱ꧀:ꦧꦼꦗꦮꦺꦴꦁ​ꦱꦶꦁ​ꦥꦢ​ꦩꦠꦶ​ꦩꦼꦤꦸꦁꦒꦭ꧀ꦏꦫꦺꦴ​ꦒꦸꦱ꧀ꦠꦶ​꧉”“ꦥꦚ꧀ꦕꦺꦤ꧀ꦔꦺꦴꦤꦺꦴ​꧈​”ꦠꦼꦩ꧀ꦧꦸꦁꦔꦺ​ꦫꦺꦴꦃꦲꦺ​ꦄꦭ꧀ꦭꦃ​꧉​“ꦱꦸꦥꦪ​ꦥꦢ​ꦭꦺꦫꦺꦤ꧀ꦱꦁꦏꦥꦼꦁꦒꦮꦺꦪꦤ꧀ꦏꦸꦱꦶꦁ​ꦉꦏꦱ​ꦭꦤ꧀ꦧꦶꦱ​ꦔꦿꦱꦏ꧀ꦏꦏꦺꦥꦩꦼꦠꦸꦤꦺ​ꦥꦼꦁꦒꦮꦺꦪꦤ꧀ꦏꦸ꧉​”

꧋ꦧꦸꦩꦶ​ꦢꦶꦲꦼꦤꦺꦤ꧀ꦤꦶ​꧉​

¹⁴꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦲꦺꦤꦺꦁꦩꦺꦒ​ꦥꦸꦠꦶꦃ​꧉​ꦤꦁꦩꦺꦒ​ꦏꦺꦴꦤꦺꦴ​ꦲꦺꦤꦺꦁꦱꦶꦁ​ꦚ꧀ꦗꦒꦺꦴꦁ꧈​ꦏꦺꦠꦺꦴꦏ꧀ꦏꦺ​ꦏꦪ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦤꦏ꧀ꦏꦺ​ꦩꦤꦸꦁꦱ​꧉​ꦱꦶꦫꦃꦲꦺ​ꦔꦁꦒꦺꦴ​ꦩꦏꦸꦠꦲꦼꦩꦱ꧀ꦭꦤ꧀ꦠꦔꦤ꧀ꦤꦺ​ꦚꦼꦏꦼꦭ꧀ꦲꦫꦶꦠ꧀ꦱꦶꦁ​ꦭꦤꦁ꧉​ ¹⁵ꦠꦼꦫꦸꦱ꧀ꦲꦺꦤꦺꦁꦩꦸꦭꦺꦏꦠ꧀ꦩꦼꦠꦸꦱꦁꦏꦲꦺꦴꦩꦃꦲꦺꦒꦸꦱ꧀ꦠꦶꦄꦭ꧀ꦭꦃ꧉​ꦩꦸꦭꦺꦏꦠ꧀ꦠꦺꦔꦺꦴꦩꦺꦴꦁꦱꦼꦫꦸꦩꦫꦁꦱꦶꦁꦚ꧀ꦗꦒꦺꦴꦁꦤꦁꦩꦺꦒꦩꦲꦸ꧈​ꦠꦼꦩ꧀ꦧꦸꦁꦔꦺ:“ꦲꦫꦶꦠ꧀ꦏꦸꦮꦶꦢꦶꦏꦁꦒꦺꦴꦏ꧀ꦏꦏꦺꦏꦁꦒꦺꦴꦥꦤꦺꦤ꧀ ꦲꦮꦶꦠ꧀ꦮꦶꦱ꧀ꦠꦼꦏꦤ꧀ꦮꦚ꧀ꦕꦶꦤꦺꦥꦤꦺꦤ꧀ ꦥꦤꦺꦤ꧀ꦤꦤ꧀ꦤꦺꦮꦶꦱ꧀ꦠꦸꦮ꧉​” ¹⁶ꦱꦶꦁ​ꦚ꧀ꦗꦒꦺꦴꦁꦤꦁꦩꦺꦒ​ꦠꦼꦫꦸꦱ꧀ꦔꦼꦠꦸꦁꦔꦏꦺꦲꦫꦶꦠ꧀ꦠꦺ​ꦤꦁꦧꦸꦩꦶ​ꦠꦼꦫꦸꦱ꧀ꦧꦸꦩꦶ​ꦢꦶꦲꦼꦤꦺꦤ꧀ꦤꦶ​꧉​

¹⁷꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦩꦸꦭꦺꦏꦠ꧀ꦭꦶꦪꦤꦺ​ꦩꦼꦠꦸ​ꦱꦁꦏꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​꧈​ꦚꦼꦏꦼꦭ꧀ꦲꦫꦶꦠ꧀ꦱꦶꦁ​ꦭꦤꦁ꧉​

¹⁸꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦩꦸꦭꦺꦏꦠ꧀ꦱꦶꦁ​ꦤꦺꦴꦩꦼꦂ​ꦠꦼꦭꦸ​ꦩꦼꦠꦸ​ꦱꦁꦏꦲꦭ꧀ꦠꦂ꧉​ꦩꦸꦭꦺꦏꦠ꧀ꦠꦺꦏꦸꦮꦶ​ꦔ꧀ꦮꦱꦤꦶ​ꦒꦼꦤꦶ​꧉​ꦩꦸꦭꦺꦏꦠ꧀ꦲꦶꦏꦶ​ꦠꦼꦫꦸꦱ꧀ꦲꦩ꧀ꦧꦼꦔꦺꦴꦏ꧀ꦩꦫꦁ​ꦩꦸꦭꦺꦏꦠ꧀ꦱꦶꦁ​ꦚꦼꦏꦼꦭ꧀ꦲꦫꦶꦠ꧀ꦭꦤꦁꦩꦲꦸ​꧈​ꦠꦼꦩ꧀ꦧꦸꦁꦔꦺ​:“ꦲꦫꦶꦠ꧀ꦩꦸ​ꦭꦤꦁꦏꦸꦮꦶ​ꦲꦼꦁꦒꦺꦴꦤ꧀ꦤꦼꦤ꧀ꦧꦧꦠ꧀ꦭꦤ꧀ꦢꦺꦴꦩ꧀ꦥꦺꦴꦭ꧀ꦢꦺꦴꦩ꧀ꦥꦺꦴꦭ꧀ꦭꦤ꧀ꦢꦽꦲꦶꦥ꦳꧀ꦱꦶꦁ​ꦤꦁꦏꦼꦧꦺꦴꦤ꧀ꦢꦽꦲꦶꦥ꦳꧀ꦤꦁꦧꦸꦩꦶ​ꦥꦢ​ꦢꦶꦲꦸꦤ꧀ꦢꦸꦃ꧈​ꦲꦮꦶꦠ꧀ ꦮꦶꦱ꧀ꦩꦠꦼꦁꦩꦠꦼꦁ​!” ¹⁹ꦩꦸꦭꦺꦏꦠ꧀ꦠꦺꦠꦼꦫꦸꦱ꧀ꦚꦧꦼꦠ꧀ꦠꦏꦺꦲꦫꦶꦠ꧀ꦠꦺꦭꦤ꧀ꦔꦸꦤ꧀ꦢꦸꦃꦲꦶꦢꦽꦲꦶꦥ꦳꧀ꦠꦼꦫꦸꦱ꧀ꦢꦶ​ꦲꦸꦚ꧀ꦕꦭ꧀ꦭꦏꦺꦤꦁꦗꦼꦢꦶꦁꦥꦼꦉꦱ꧀ꦱꦤ꧀ꦱꦶꦁꦒꦼꦢꦺ꧈​ꦪꦏꦸꦮꦶꦥꦁꦒꦺꦴꦤ꧀ꦤꦤ꧀ꦤꦺꦤꦼꦱꦸꦤꦺꦒꦸꦱ꧀ꦠꦶꦄꦭ꧀ꦭꦃ꧉​ ²⁰ꦢꦽꦲꦶꦥ꦳꧀ꦥ꦳ꦺꦠꦼꦫꦸꦱ꧀ꦢꦶꦥꦼꦉꦱ꧀ꦱꦶꦤꦁꦱꦏ꧀​ꦚ꧀ꦗꦧꦤꦺ​ꦏꦸꦠ꧉​ꦱꦁꦏꦥꦼꦉꦱ꧀ꦱꦤ꧀ꦩꦲꦸ​ꦠꦼꦫꦸꦱ꧀ꦩꦼꦠꦸ​ꦒꦼꦠꦶꦃꦲꦺ​꧈​ꦩꦶꦭꦶ​ꦠꦼꦫꦸꦱ꧀ ꦗꦼꦫꦸꦤꦺꦱꦩ꧀ꦥꦺꦏ꧀ꦲꦺꦤꦺꦁꦫꦺꦴꦁ​ꦩꦺꦠꦼꦂ​ꦭꦤ꧀ꦲꦢꦺꦴꦃꦲꦺ​ꦠꦼꦭꦸꦁ​ꦲꦠꦸꦱ꧀ꦏꦶꦭꦺꦴꦩꦺꦠꦼꦂ​꧉​

↑ ↑ ↑

꧋ꦥꦫ​ꦩꦸꦭꦺꦏꦠ꧀ꦱꦶꦁ​ꦔ꧀ꦒꦮ​ꦩꦼꦩꦭ​ꦱꦶꦁ​ꦏꦺꦫꦶ​꧉​

꧇​꧑꧕꧇​ ¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦉꦫꦸꦥꦱꦶꦁ​ꦲꦺꦭꦺꦴꦏ꧀ꦭꦤ꧀​ꦔ꧀ꦒꦸꦩꦸꦤ꧀ꦤꦏꦺ꧉​ꦲꦺꦤꦺꦁꦩꦸꦭꦺꦏꦠ꧀ꦥꦶꦠꦸ​ꦥꦢ​ꦔ꧀ꦒꦮ​ꦩꦼꦩꦭ​ꦥꦶꦠꦸ​ꦱꦶꦁ​ꦏꦺꦫꦶ​꧉​ꦲꦶꦏꦶ​ꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏꦺꦫꦶ​ꦢꦺꦮꦺ꧉​

²꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦉꦫꦸꦥꦏꦺꦠꦺꦴꦏ꧀ꦏꦺ​ꦏꦪ​ꦱꦼꦒꦫ​ꦏꦕ​ꦕꦩ꧀ꦥꦸꦂ​ꦏꦫꦺꦴ​ꦒꦼꦤꦶ​꧉​ꦲꦏꦸ​ꦲꦸꦒ​ꦮꦼꦫꦸꦃ​ꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦥꦢ​ꦩꦼꦤꦁ​ꦲꦼꦁꦒꦺꦴꦤꦺ​ꦥꦼꦫꦁ​ꦏꦫꦺꦴ​ꦏꦺꦮꦤ꧀ꦭꦤ꧀ꦉꦕꦤꦺ​ꦭꦤ꧀ꦩꦼꦤꦁꦔꦏꦺꦮꦺꦴꦁ​ꦱꦶꦁ​ꦗꦼꦤꦼꦁꦔꦺ​ꦢꦶꦒꦩ꧀ꦧꦂꦫꦏꦺꦔꦁꦒꦺꦴ​ꦤꦺꦴꦩꦼꦂ​꧉​ꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦥꦢ​ꦩꦼꦤꦁ​ꦏꦸꦮꦶ​ꦥꦢ​ꦔꦢꦼꦏ꧀ꦤꦁꦥꦶꦁꦒꦶꦂꦫꦺ​ꦱꦼꦒꦫ​ꦏꦕ​ꦩꦲꦸ​꧉​ꦥꦢ​ꦚꦼꦏꦼꦭ꧀​ꦕ꧀ꦊꦩ꧀ꦥꦸꦁ​ꦱꦶꦁ​ꦢꦶꦏꦺꦏ꧀ꦏꦶꦒꦸꦱ꧀ꦠꦶ​ꦄꦭ꧀ꦭꦃ​꧉​ ³ꦮꦺꦴꦁꦮꦺꦴꦁ​ꦥꦢ​ꦱꦶꦔꦶꦏꦶꦢꦸꦁꦔꦺ​ꦤꦧꦶ​ꦩꦺꦴꦱꦼꦱ꧀ ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦏꦶꦢꦸꦁꦔꦺ​ꦕꦼꦩ꧀ꦥꦺꦤꦺ​꧈​ꦠꦼꦩ꧀ꦧꦸꦁꦔꦺ​:

“ꦢꦸꦃꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧈​
ꦥꦚ꧀ꦕꦺꦤ꧀ꦒꦼꦢꦺꦭꦤ꧀​ꦔ꧀ꦒꦸꦩꦸꦤ꧀ꦤꦏꦺꦥꦼꦁꦒꦮꦺꦤꦺ​ꦒꦸꦱ꧀ꦠꦶ​꧈​
ꦢꦸꦃꦫꦠꦸꦤꦺ​ꦏꦧꦺꦃ​ꦧꦁꦱ​꧈​
ꦠꦸꦩꦶꦤ꧀ꦢꦏ꧀ꦏꦺ​ꦒꦸꦱ꧀ꦠꦶ​ꦥꦚ꧀ꦕꦺꦤ꧀ꦊꦩ꧀ꦥꦼꦁ​ꦭꦤ꧀ꦧꦼꦤꦼꦂ​꧉​
⁴ꦢꦸꦃꦒꦸꦱ꧀ꦠꦶ​꧈​ꦱꦥ​ꦱꦶꦁ​ꦲꦺꦴꦫ​ꦮꦼꦢꦶ​ꦩꦫꦁ​ꦏꦺꦴꦮꦺ​?ꦱꦥ​ꦱꦶꦁ​ꦲꦺꦴꦫ​ꦔ꧀ꦭꦸꦲꦸꦂꦫꦏꦺꦗꦼꦤꦼꦁꦔꦺ​ꦒꦸꦱ꧀ꦠꦶ​?ꦲꦮꦶꦠ꧀ꦤꦩꦸꦁ​ꦒꦸꦱ꧀ꦠꦶ​ꦢꦺꦮꦺꦱꦶꦁ​ꦱꦸꦕꦶ​꧉​
ꦏꦧꦺꦃ​ꦧꦁꦱ​ꦧꦏꦭ꧀ꦩꦫ​ꦭꦤ꧀ꦚꦼꦩ꧀ꦧꦃ​ꦩꦫꦁ​ꦒꦸꦱ꧀ꦠꦶ​꧈​
ꦲꦮꦶꦠ꧀ꦏꦧꦺꦃ​ꦮꦺꦴꦁ​ꦮꦶꦱ꧀ꦔꦼꦂꦠꦶ​ꦤꦺꦏ꧀ꦠꦤ꧀ꦢꦁꦔꦺꦒꦸꦱ꧀ꦠꦶ​ꦧꦼꦤꦼꦂ​꧉​”

⁵꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​ꦲꦩ꧀ꦧꦸꦏꦏ꧀ꦭꦤ꧀ꦤꦁꦚ꧀ꦗꦼꦫꦺꦴꦤꦺ​ꦲꦺꦤꦺꦁꦡꦫꦸꦥ꧀ꦥꦁꦒꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁶ꦩꦸꦭꦺꦏꦠ꧀ꦥꦶꦠꦸ​ꦱꦶꦁ​ꦔ꧀ꦒꦮ​ꦩꦼꦩꦭ​ꦥꦶꦠꦸ​ꦩꦲꦸ​ꦥꦢ​ꦩꦼꦠꦸ​ꦱꦁꦏꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦔꦁꦒꦺꦴ​ꦏ꧀ꦭꦩ꧀ꦧꦶ​ꦥꦸꦠꦶꦃ​ꦱꦸꦩꦼꦧ꧀ꦭꦏ꧀ꦭꦤ꧀ꦤꦁꦢꦢꦤꦺꦔꦁꦒꦺꦴ​ꦱꦧꦸꦏ꧀ꦲꦼꦩꦱ꧀꧈​ ⁷ꦱꦭꦃꦱꦏ꧀ꦮꦶꦗꦶꦤꦺꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦩꦲꦸ​ꦠꦼꦫꦸꦱ꧀ꦔꦼꦭꦸꦁꦔꦏꦺꦩꦁꦏꦺꦴꦏ꧀ꦲꦼꦩꦱ꧀ꦩꦫꦁ​ꦩꦸꦭꦺꦏꦠ꧀ꦥꦶꦠꦸ​ꦩꦲꦸ​꧈​ꦩꦁꦏꦺꦴꦏ꧀ꦏꦺꦏꦧꦺꦃ​ꦏꦼꦧꦼꦏ꧀ꦏꦫꦺꦴ​ꦤꦼꦱꦸꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀ꦭꦁꦒꦼꦁ​ꦱ꧀ꦭꦮꦱ꧀ꦱꦺ꧉​ ⁸ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ꦏꦼꦧꦼꦏ꧀ꦏꦫꦺꦴ​ꦏꦼꦧꦸꦭ꧀ꦱꦁꦏꦏꦭꦸꦲꦸꦂꦫꦤ꧀ꦤꦺ​ꦭꦤ꧀ꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦏ꧀ꦢꦸꦫꦸꦁꦔꦺꦩꦼꦩꦭ​ꦥꦶꦠꦸ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦩꦸꦭꦺꦏꦠ꧀ꦥꦶꦠꦸ​ꦫꦩ꧀ꦥꦸꦁ​꧈​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦱꦶꦁ​ꦲꦺꦤ꧀ꦠꦸꦏ꧀​ꦩ꧀ꦊꦧꦸ​ꦤꦁꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

↑ ↑ ↑

꧋ꦩꦼꦩꦭ​ꦥꦶꦠꦸ​꧉​

꧇​꧑꧖꧇​ ¹꧋ꦲꦏꦸ​ꦠꦼꦫꦸꦱ꧀ꦏꦿꦸꦔꦸ​ꦱ꧀ꦮꦫ​ꦧꦤ꧀ꦠꦼꦂ​ꦱꦁꦏꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦩꦫꦁ​ꦩꦸꦭꦺꦏꦠ꧀ꦥꦶꦠꦸ​ꦩꦲꦸ​ꦔꦺꦤꦺ​:“ꦥꦢ​ꦧꦸꦢꦭ꧀ꦭ!ꦩꦁꦏꦺꦴꦏ꧀ꦥꦶꦠꦸ​ꦲꦶꦱꦶꦤꦺ​ꦤꦼꦱꦸꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦥꦢ​ꦱꦸꦤ꧀ꦠꦏ꧀ꦏꦼꦤ꧀ꦤꦁꦧꦸꦩꦶ​!”

²꧋ꦩꦸꦭꦺꦏꦠ꧀ꦱꦶꦁ​ꦤꦺꦴꦩꦼꦂ​ꦱꦶꦗꦶ​ꦠꦼꦫꦸꦱ꧀ꦧꦸꦢꦭ꧀ꦭꦤ꧀ꦚꦸꦤ꧀ꦠꦏ꧀ꦩꦁꦏꦺꦴꦏ꧀ꦏꦺꦤꦁꦧꦸꦩꦶ​꧉​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦔꦁꦒꦺꦴ​ꦠꦼꦔꦼꦂꦫꦺꦏꦺꦮꦤꦺ​ꦭꦤ꧀ꦱꦶꦁ​ꦥꦢ​ꦚꦼꦩ꧀ꦧꦃ​ꦉꦕꦤꦺ​ꦠꦼꦫꦸꦱ꧀ꦥꦢ​ꦏꦼꦤꦺꦁꦭꦫ​ꦮꦸꦢꦸꦤ꧀ꦱꦶꦁ​ꦩꦼꦢꦺꦤ꧀ꦤꦶ​ꦭꦤ꧀​ꦔ꧀ꦒꦶꦭꦤ꧀ꦤꦶ꧉​

³꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦩꦸꦭꦺꦏꦠ꧀ꦱꦶꦁ​ꦤꦺꦴꦩꦼꦂ​ꦭꦺꦴꦫꦺꦴ​ꦚꦸꦤ꧀ꦠꦏ꧀ꦩꦁꦏꦺꦴꦏ꧀ꦏꦺꦤꦁꦱꦼꦒꦫ​꧉​ꦧꦚꦸꦤꦺ​ꦠꦼꦫꦸꦱ꧀ꦢꦢꦶ​ꦏꦪ​ꦒꦼꦠꦶꦃꦲꦺ​ꦮꦺꦴꦁ​ꦩꦠꦶ​꧈​ꦩꦫꦏ꧀ꦏꦏꦺꦱꦏ꧀ꦲꦺꦤꦺꦁꦔꦺꦏꦲꦸꦫꦶꦥ꧀ꦥꦤ꧀ꦤꦁꦱꦼꦒꦫ​ꦥꦢ​ꦩꦠꦶ​꧉​

⁴꧋ꦩꦸꦭꦺꦏꦠ꧀ꦱꦶꦁ​ꦤꦺꦴꦩꦼꦂ​ꦠꦼꦭꦸ​ꦠꦼꦫꦸꦱ꧀ꦚꦸꦤ꧀ꦠꦏ꧀ꦩꦁꦏꦺꦴꦏ꧀ꦏꦺꦤꦁꦭꦫꦲꦤ꧀ꦤꦺꦭꦤ꧀ꦲꦼꦠꦸꦏ꧀ꦲꦼꦠꦸꦏ꧀ꦏꦺꦧꦚꦸ​꧈​ꦩꦫꦏ꧀ꦏꦏꦺꦧꦚꦸꦤꦺ​ꦢꦢꦶ​ꦒꦼꦠꦶꦃ​꧉​ ⁵ꦲꦏꦸ​ꦠꦼꦫꦸꦱ꧀ꦏꦿꦸꦔꦸ​ꦩꦸꦭꦺꦏꦠ꧀ꦱꦶꦁ​ꦔ꧀ꦮꦱꦤꦶ​ꦧꦚꦸ​ꦔꦺꦴꦩꦺꦴꦁ:“ꦢꦸꦃꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦱꦸꦕꦶ​ꦢꦺꦮꦺ!ꦒꦸꦱ꧀ꦠꦶ​ꦥꦚ꧀ꦕꦺꦤ꧀ꦱꦶꦁ​ꦧꦼꦤꦼꦂ​ꦢꦺꦮꦺ꧈​ꦱꦶꦁ​ꦲꦺꦤꦺꦁꦱꦲꦶꦏꦶ​꧈​ꦲꦸꦒ​ꦲꦶꦁ​ꦗꦩꦤ꧀ꦱꦶꦁ​ꦏ꧀ꦭꦶꦮꦠ꧀꧈​ ⁶ꦗꦭꦂꦫꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦔꦸꦠꦃꦲꦏꦺꦒꦼꦠꦶꦃꦲꦺ​ꦥꦫ​ꦱꦸꦕꦶ​ꦭꦤ꧀ꦥꦫ​ꦤꦧꦶ​꧈​ꦩꦸꦭꦤꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦲꦩ꧀ꦧꦺꦴꦏ꧀ꦲꦺꦴꦩ꧀ꦧꦺꦤ꧀ꦤꦶ​ꦒꦼꦠꦶꦃ​꧉​ꦏꦸꦮꦶ​ꦥꦚ꧀ꦕꦺꦤ꧀ꦮꦶꦱ꧀ꦱꦏ꧀ꦩꦼꦱ꧀ꦠꦶꦤꦺ꧉​” ⁷ꦲꦏꦸ​ꦠꦼꦫꦸꦱ꧀ꦏꦿꦸꦔꦸ​ꦱ꧀ꦮꦫ​ꦱꦁꦏꦲꦭ꧀ꦠꦂ꧈​ꦲꦸꦤꦶꦤꦺ​:“ꦢꦸꦃꦒꦸꦱ꧀ꦠꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧈​ꦲꦼꦁꦒꦺꦴꦤ꧀ꦩꦸ​ꦔꦿꦸꦠꦸꦏꦸꦮꦶ​ꦥꦚ꧀ꦕꦺꦤ꧀ꦧꦼꦤꦼꦂ​ꦭꦤ꧀ꦲꦢꦶꦭ꧀꧈​”

⁸꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦩꦸꦭꦺꦏꦠ꧀ꦤꦺꦴꦩꦼꦂ​ꦥꦥꦠ꧀ꦚꦸꦤ꧀ꦠꦏ꧀ꦩꦁꦏꦺꦴꦏ꧀ꦏꦺꦤꦁꦱꦽꦔꦺꦔꦺ​꧉​ ꦱꦽꦔꦺꦔꦺ​ꦠꦼꦫꦸꦱ꧀ꦏꦼꦭꦶꦭ꧀ꦭꦤ꧀​ꦩ꧀ꦧꦿꦺꦴꦔꦺꦴꦱ꧀ꦩꦤꦸꦁꦱ​ꦔꦁꦒꦺꦴ​ꦥꦤꦱ꧀ꦱꦺ​ꦱꦶꦁ​ꦱꦸꦩꦼꦭꦺꦠ꧀꧈​ ⁹ꦩꦤꦸꦁꦱ​ꦠꦼꦫꦸꦱ꧀ꦥꦢ​ꦒꦺꦴꦱꦺꦴꦁ​꧈​ꦗꦭꦂꦫꦤ꧀ꦱꦁꦏꦱꦸꦩꦼꦭꦺꦠ꧀ꦠꦺꦥꦤꦱ꧀ꦱꦺ​꧉​ꦩꦤꦸꦁꦱ​ꦠꦼꦫꦸꦱ꧀ꦥꦢ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦼꦏꦏ꧀ꦏꦏꦺꦩꦼꦩꦭ​ꦩꦲꦸ​꧉​ꦤꦁꦔꦶꦁ​ꦩꦤꦸꦁꦱ​ꦩꦼꦏ꧀ꦱ​ꦲꦺꦴꦫ​ꦒꦼꦊꦩ꧀ꦩꦫꦺꦤ꧀ꦤꦶ​ꦢꦺꦴꦱꦢꦺꦴꦱꦤꦺ​ꦭꦤ꧀ꦲꦺꦴꦫ​ꦒꦼꦊꦩ꧀​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​

¹⁰꧋ꦩꦸꦭꦺꦏꦠ꧀ꦱꦶꦁ​ꦤꦺꦴꦩꦼꦂ​ꦭꦶꦩ​ꦠꦼꦫꦸꦱ꧀ꦚꦸꦤ꧀ꦠꦏ꧀ꦩꦁꦏꦺꦴꦏ꧀ꦏꦺꦤꦁꦢꦩ꧀ꦥꦂꦫꦺꦏꦺꦮꦤꦺ​꧉​ꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​ꦠꦼꦫꦸꦱ꧀ꦩꦭꦶꦃ​ꦥꦼꦠꦼꦁ​ꦏꦧꦺꦃ​ꦭꦤ꧀ꦮꦺꦴꦁꦮꦺꦴꦁ​ꦱꦩ꧀ꦥꦺꦏ꧀ꦥꦢ​ꦔ꧀ꦒꦼꦒꦼꦠ꧀ꦲꦶꦭꦠ꧀ꦠꦺ​ꦢꦺꦮꦺꦱꦁꦏꦶꦁꦔꦿꦱꦏ꧀ꦏꦏꦺꦭꦫꦤꦺ​꧉​ ¹¹ꦮꦺꦴꦁꦮꦺꦴꦁ​ꦩꦲꦸ​ꦠꦼꦫꦸꦱ꧀ꦥꦢ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦁꦱ꧀ꦮꦂꦒ​꧈​ꦲꦮꦶꦠ꧀ꦲꦺꦴꦫ​ꦧꦼꦠꦃ​ꦔꦿꦱꦏ꧀ꦏꦏꦺꦭꦫꦤꦺ​ꦭꦤ꧀ꦗꦭꦂꦫꦤ꧀ꦱꦁꦏꦮꦸꦢꦸꦤ꧀ꦮꦸꦢꦸꦤ꧀ꦤꦺ꧉​ꦤꦁꦔꦶꦁ​ꦮꦺꦴꦁꦮꦺꦴꦁ​ꦩꦼꦏ꧀ꦱ​ꦲꦺꦴꦫ​ꦒꦼꦊꦩ꧀ꦩꦫꦺꦤ꧀ꦤꦶ​ꦏ꧀ꦭꦏꦸꦮꦤ꧀ꦤꦺ​ꦱꦶꦁ​ꦲꦭ​꧉​

¹²꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦩꦸꦭꦺꦏꦠ꧀ꦱꦶꦁ​ꦤꦺꦴꦩꦼꦂ​ꦤꦼꦤꦼꦩ꧀ꦠꦼꦫꦸꦱ꧀ꦚꦸꦤ꧀ꦠꦏ꧀ꦩꦁꦏꦺꦴꦏ꧀ꦏꦺꦤꦁꦭꦫꦌꦥ꦳ꦿꦠ꧀꧈​ꦭꦠ꧀ꦠꦼꦫꦸꦱ꧀ꦲꦱꦠ꧀ ꦱꦩ꧀ꦥꦺꦏ꧀ꦏꦼꦤꦺꦁꦢꦶꦲꦼꦁꦒꦺꦴ​ꦭꦶꦮꦠ꧀ꦏꦫꦺꦴ​ꦫꦠꦸꦫꦠꦸ​ꦱꦁꦏꦧꦮꦃꦮꦺꦠꦤ꧀ꦤꦤ꧀꧈​ ¹³ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦲꦺꦤꦺꦁꦫꦺꦴꦃ​ꦉꦒꦼꦠ꧀ꦠꦼꦭꦸ​ꦫꦸꦥꦤꦺ​ꦏꦪ​ꦏꦺꦴꦢꦺꦴꦏ꧀꧈​ꦱꦶꦗꦶ​ꦩꦼꦠꦸ​ꦱꦁꦏꦕꦁꦏꦼꦩ꧀ꦩꦺ​ꦤꦒ​꧈​ꦱꦶꦗꦶ​ꦩꦼꦠꦸ​ꦱꦁꦏꦕꦁꦏꦼꦩ꧀ꦩꦺ​ꦏꦺꦮꦤꦺ​ꦭꦤ꧀ꦱꦶꦗꦶꦤꦺ​ꦩꦼꦠꦸ​ꦱꦁꦏꦕꦁꦏꦼꦩ꧀ꦩꦺ​ꦤꦧꦶ​ꦥꦭ꧀ꦱꦸ​꧉​ ¹⁴ꦏꦺꦴꦢꦺꦴꦏ꧀ꦠꦼꦭꦸꦏꦸꦮꦶꦫꦺꦴꦃꦫꦺꦴꦃꦲꦺꦱꦺꦠꦤ꧀ꦱꦶꦁꦥꦢꦔ꧀ꦒꦮꦺꦩꦸꦗꦶꦗꦠ꧀ꦩꦸꦗꦶꦗꦠ꧀꧈​ꦏꦺꦴꦢꦺꦴꦏ꧀ꦏꦺꦴꦢꦺꦴꦏ꧀ꦩꦲꦸꦠꦼꦫꦸꦱ꧀ꦤꦼꦏꦤꦶꦫꦠꦸꦫꦠꦸꦱꦏ꧀ꦗꦒꦠ꧀ꦏꦧꦺꦃ꧈​ꦥꦢꦢꦶꦭꦸꦩ꧀ꦥꦸꦏ꧀ꦏꦏꦺꦢꦶꦲꦼꦗꦺꦏ꧀ꦥꦼꦫꦁꦲꦶꦁꦢꦶꦤꦒꦼꦢꦺ꧈​ꦢꦶꦤꦤꦺꦒꦸꦱ꧀ꦠꦶꦄꦭ꧀ꦭꦃꦱꦶꦁꦏ꧀ꦮꦱꦢꦺꦮꦺ꧉​

¹⁵꧋“ꦏꦺꦴꦮꦺ​ꦠꦏ꧀ꦲꦺꦴꦩꦺꦴꦁꦔꦶꦤꦺꦏ꧀ꦲꦏꦸ​ꦧꦏꦭ꧀ꦠꦼꦏ​ꦏꦪ​ꦕꦫꦤꦺ​ꦩꦭꦶꦁ​꧉​ꦧꦼꦗꦮꦺꦴꦁ​ꦱꦶꦁ​ꦗꦒꦗꦒ​ꦭꦤ꧀ꦔꦁꦒꦺꦴ​ꦱꦤ꧀ꦢꦔꦤ꧀ꦤꦺ꧈​ꦱꦸꦥꦪ​ꦲꦺꦴꦫ​ꦮꦸꦢ​ꦭꦤ꧀ꦢꦶꦠꦺꦴꦤ꧀ꦠꦺꦴꦤ꧀ꦮꦺꦴꦁ​꧉​”

¹⁶꧋ꦫꦺꦴꦃꦫꦺꦴꦃ​ꦩꦲꦸ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦥꦫ​ꦫꦠꦸ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦶꦁ​ꦧꦱ​ꦆꦧꦿꦤꦶ​ꦗꦼꦤꦼꦁꦔꦺ​ꦄꦂꦩꦏꦺꦢꦺꦴꦤ꧀꧈​

¹⁷꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​꧈​ꦩꦸꦭꦺꦏꦠ꧀ꦱꦶꦁ​ꦤꦺꦴꦩꦼꦂ​ꦥꦶꦠꦸ​ꦚꦸꦤ꧀ꦠꦏ꧀ꦩꦁꦏꦺꦴꦏ꧀ꦏꦺꦤꦁꦲꦮꦁꦔꦮꦁ꧉​ꦱꦁꦏꦢꦩ꧀ꦥꦂꦫꦺꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​ꦠꦼꦫꦸꦱ꧀ꦲꦺꦤꦺꦁꦱ꧀ꦮꦫ​ꦧꦤ꧀ꦠꦼꦂ​ꦔꦺꦴꦩꦺꦴꦁ:“ꦮꦶꦱ꧀ꦫꦩ꧀ꦥꦸꦁ​!” ¹⁸ꦠꦼꦫꦸꦱ꧀ꦲꦺꦤꦺꦁꦏ꧀ꦭꦺꦭꦥ꧀​ꦏ꧀ꦭꦺꦭꦥ꧀ ꦒ꧀ꦭꦸꦢꦸꦏ꧀ꦭꦤ꧀ꦭꦶꦤ꧀ꦢꦸꦒꦼꦢꦺꦱꦶꦁ​ꦢꦸꦫꦸꦁ​ꦠꦲꦸ​ꦏ꧀ꦭꦏꦺꦴꦤ꧀ꦏꦮꦶꦠ꧀ꦧꦸꦩꦶ​ꦢꦶꦲꦼꦁꦒꦺꦴꦤ꧀ꦤꦶ​ꦩꦤꦸꦁꦱ​꧉​ ¹⁹ꦏꦸꦠꦱꦶꦁ​ꦒꦼꦢꦺꦥꦼꦕꦃ​ꦢꦢꦶ​ꦠꦼꦭꦸ​꧉​ꦱꦼꦩꦺꦴꦤꦺꦴ​ꦲꦸꦒ​ꦏꦸꦠꦏꦸꦠꦤꦺꦏꦧꦺꦃ​ꦧꦁꦱ​ꦱꦏ꧀ꦗꦒꦠ꧀ ꦏꦧꦺꦃ​ꦗꦸꦒꦿꦸꦏ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦭꦭꦶ​ꦩꦫꦁ​ꦏꦸꦠꦒꦼꦢꦺꦨꦧꦶꦭꦺꦴꦤ꧀꧈​ꦏꦸꦠꦲꦶꦏꦶ​ꦠꦼꦫꦸꦱ꧀ꦢꦶꦲꦺꦴꦩ꧀ꦧꦺꦤ꧀ꦤꦶ​ꦲꦁꦒꦸꦂ​ꦤꦼꦱꦸꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ ²⁰ꦱꦏ꧀ꦏꦺꦃꦲꦺꦥꦸꦭꦠꦼꦫꦸꦱ꧀ꦥꦢ​ꦲꦶꦭꦁ​ꦭꦤ꧀ꦒꦸꦤꦸꦁꦒꦸꦤꦸꦁ​ꦲꦸꦒ​ꦮꦶꦱ꧀ꦲꦺꦴꦫ​ꦏꦺꦠꦺꦴꦏ꧀꧈​ ²¹ꦠꦼꦫꦸꦱ꧀ꦲꦺꦤꦺꦁꦲꦸꦢꦤ꧀ꦲꦺꦱ꧀ꦥꦿꦺꦴꦁꦏꦺꦴꦭ꧀ꦭꦤ꧀ ꦱꦏ꧀ꦥꦿꦺꦴꦁꦏꦺꦴꦭ꧀ꦭꦤ꧀ꦧꦺꦴꦧꦺꦴꦠ꧀ꦠꦺ​ꦱꦺꦏꦼꦠ꧀ꦏꦶꦭꦺꦴ​꧈​ꦥꦢ​ꦠꦶꦧ​ꦱꦁꦏꦭꦔꦶꦠ꧀ ꦤꦶꦧꦤꦶ​ꦮꦺꦴꦁꦮꦺꦴꦁ​꧉​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦱꦁꦏꦩꦼꦩꦭ​ꦲꦸꦢꦤ꧀ꦲꦺꦱ꧀ꦱꦶꦁ​ꦔ꧀ꦒꦶꦭꦤ꧀ꦤꦶꦏꦸꦮꦶ​꧉​

↑ ↑ ↑

꧋ꦥꦸꦠꦸꦱ꧀ꦱꦤ꧀ꦧꦧ꧀ꦏꦸꦠꦨꦧꦶꦭꦺꦴꦤ꧀꧈​

꧇​꧑꧗꧇​ ¹꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦱꦭꦃꦱꦏ꧀ꦮꦶꦗꦶꦤꦺꦩꦸꦭꦺꦏꦠ꧀ꦥꦶꦠꦸ​ꦱꦶꦁ​ꦔ꧀ꦒꦮ​ꦩꦁꦏꦺꦴꦏ꧀ꦥꦶꦠꦸ​ꦩꦲꦸ​ꦩꦫꦤꦶ​ꦲꦏꦸ​ꦭꦤ꧀ꦔꦺꦴꦩꦺꦴꦁꦔꦶ:“ꦩ꧀ꦧꦿꦺꦤꦺꦪ꧈​ꦠꦏ꧀ꦢꦸꦢꦸꦃꦲꦶꦱꦼꦠꦿꦥꦤ꧀ꦤꦺꦭꦺꦴꦤ꧀ꦠꦺꦒꦼꦢꦺ꧈​ꦪꦏꦸꦮꦶ​ꦏꦸꦠꦒꦼꦢꦺꦱꦶꦁ​ꦢꦶꦢꦼꦏ꧀ꦤꦺꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦺꦴꦏꦺꦃꦧꦚꦸꦤꦺ​꧉​ ²ꦥꦫ​ꦫꦠꦸ​ꦥꦢ​ꦭꦏꦸ​ꦧꦺꦢꦁꦏꦫꦺꦴ​ꦭꦺꦴꦤ꧀ꦠꦺꦒꦼꦢꦺꦩꦲꦸ​꧈​ꦲꦸꦒ​ꦮꦺꦴꦁꦮꦺꦴꦁ​ꦱꦶꦁ​ꦩꦁꦒꦺꦴꦤ꧀ꦤꦁꦧꦸꦩꦶ​ꦮꦶꦱ꧀ꦥꦢ​ꦩꦼꦤ꧀ꦢꦼꦩ꧀ꦏꦫꦺꦴ​ꦲꦁꦒꦸꦂꦫꦺ​ꦧꦺꦢꦁꦔꦺ꧉​”

³꧋ꦲꦶꦁ​ꦥꦔ꧀ꦮꦱꦤꦺ​ꦫꦺꦴꦃ​ꦱꦸꦕꦶ​ꦲꦏꦸ​ꦢꦶꦒꦮ​ꦤꦁꦮꦸꦱ꧀ꦠꦺꦤ꧀ꦏꦫꦺꦴ​ꦩꦸꦭꦺꦏꦠ꧀ꦩꦲꦸ​꧉​ꦤꦁꦏꦺꦴꦤꦺꦴ​ꦲꦏꦸ​ꦮꦼꦫꦸꦃ​ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦤꦸꦩ꧀ꦥꦏ꧀ꦏꦺꦮꦤ꧀ꦱꦶꦁ​ꦫꦸꦥꦤꦺ​ꦲꦧꦁ​ꦲꦩ꧀ꦧꦿꦤꦁ​꧉​ꦏꦺꦮꦤ꧀ꦩꦲꦸ​ꦲꦮꦏ꧀ꦏꦺ​ꦱꦏ꧀ꦏꦸꦗꦸꦂꦏꦼꦧꦼꦏ꧀ꦏꦫꦺꦴ​ꦠꦸꦭꦶꦱ꧀ꦱꦤ꧀ꦱꦶꦁ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦺꦮꦤ꧀ꦏꦸꦮꦶ​ꦲꦼꦤ꧀ꦢꦱ꧀ꦱꦺꦥꦶꦠꦸ​ꦭꦤ꧀ꦱꦸꦔꦸꦤꦺ​ꦱꦼꦥꦸꦭꦸꦃ​꧉​ ⁴ꦮꦺꦴꦁ​ꦮꦺꦢꦺꦴꦏ꧀ꦏꦺꦔꦁꦒꦺꦴ​ꦏ꧀ꦭꦩ꧀ꦧꦶ​ꦥꦸꦂꦥꦼꦂꦭꦤ꧀ꦲꦧꦁ​ꦩꦠꦼꦁ​ꦱꦶꦁ​ꦲꦺꦤꦺꦁꦲꦼꦩꦱ꧀ ꦲꦶꦤ꧀ꦠꦼꦤ꧀ꦭꦤ꧀ꦩꦸꦠꦶꦪꦫꦤꦺ꧉​ꦠꦔꦤ꧀ꦤꦺ​ꦚꦼꦏꦼꦭ꧀ꦕꦁꦏꦶꦂ​ꦲꦼꦩꦱ꧀ꦱꦶꦁ​ꦏꦼꦧꦼꦏ꧀ꦏꦫꦺꦴ​ꦧꦫꦁꦧꦫꦁ​ꦉꦒꦼꦠ꧀ꦭꦤ꧀ꦗꦶꦗꦶꦏ꧀ ꦲꦺꦤ꧀ꦠꦸꦏ꧀ꦲꦺꦤ꧀ꦠꦸꦏ꧀ꦏꦺꦲꦼꦁꦒꦺꦴꦤꦺ​ꦭꦏꦸ​ꦧꦺꦢꦁ꧉​ ⁵ꦤꦁꦧꦠꦸꦏ꧀ꦏꦺꦮꦺꦴꦁ​ꦮꦺꦢꦺꦴꦏ꧀ꦏꦺꦲꦺꦤꦺꦁꦠꦸꦭꦶꦱ꧀ꦱꦤ꧀ꦤꦺ​ꦗꦼꦤꦼꦁ​ꦱꦶꦩ꧀ꦥꦼꦤ꧀ꦤꦤ꧀ ꦪꦏꦸꦮꦶ​:“ꦨꦧꦶꦭꦺꦴꦤ꧀ꦒꦼꦢꦺ꧈​ꦧꦧꦺꦴꦤ꧀ꦤꦺꦱꦏ꧀ꦏꦺꦃꦲꦺꦭꦺꦴꦤ꧀ꦠꦺꦭꦤ꧀ꦱꦏ꧀ꦏꦺꦃꦲꦺꦥꦼꦁꦒꦮꦺ​ꦲꦭ​ꦤꦁꦧꦸꦩꦶ​꧉​” ⁶ꦲꦏꦸ​ꦮꦼꦫꦸꦃ​ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦲꦶꦗꦶꦏ꧀ꦩꦼꦤ꧀ꦢꦼꦩ꧀ꦱꦁꦏꦒꦼꦠꦶꦃꦲꦺ​ꦥꦫ​ꦮꦺꦴꦁ​ꦥꦽꦕꦪ​ꦭꦤ꧀ꦒꦼꦠꦶꦃꦲꦺ​ꦮꦺꦴꦁ​ꦱꦶꦁ​ꦮꦶꦱ꧀ꦥꦢ​ꦗꦚ꧀ꦗꦶ​ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦏꦤ꧀ꦥꦠꦶ​꧉​

꧋ꦮꦼꦫꦸꦃ​ꦏꦸꦮꦶ​ꦩꦲꦸ​ꦏꦧꦺꦃ​ꦲꦏꦸ​ꦔ꧀ꦒꦸꦩꦸꦤ꧀ꦧꦔꦼꦠ꧀꧈​ ⁷ꦩꦸꦭꦺꦏꦠ꧀ꦠꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦲꦏꦸ​:“ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀​ꦔ꧀ꦒꦸꦩꦸꦤ꧀?ꦏꦺꦴꦮꦺ​ꦠꦏ꧀ꦲꦺꦴꦩꦺꦴꦁꦔꦶꦧꦧ꧀ ꦮꦼꦮꦢꦶꦤꦺ​ꦮꦺꦴꦁ​ꦮꦺꦢꦺꦴꦏ꧀ꦭꦤ꧀ꦮꦼꦮꦢꦶꦤꦺ​ꦏꦺꦮꦤ꧀ꦱꦶꦁ​ꦢꦶꦠꦸꦩ꧀ꦥꦏ꧀ꦏꦶ​꧈​ꦱꦶꦁ​ꦲꦼꦤ꧀ꦢꦱ꧀ꦱꦺꦥꦶꦠꦸ​ꦭꦤ꧀ꦱꦸꦔꦸꦤꦺ​ꦱꦼꦥꦸꦭꦸꦃ​ꦏꦸꦮꦶ​꧉​ ⁸ꦏꦺꦮꦤ꧀ꦱꦶꦁ​ꦲꦩ꧀ꦧꦺꦴꦏ꧀ꦱꦮꦁꦏꦸꦮꦶ​ꦩꦲꦸꦤꦺ​ꦲꦺꦤꦺꦁ꧈​ꦤꦁꦔꦶꦁ​ꦱꦲꦶꦏꦶ​ꦲꦺꦴꦫ​ꦲꦺꦤꦺꦁ꧉​ꦏꦺꦮꦤ꧀ꦏꦸꦮꦶ​ꦧꦏꦭ꧀​ꦚ꧀ꦗꦼꦢꦸꦭ꧀ꦱꦁꦏꦗꦸꦫꦁ​ꦥꦼꦠꦼꦁ​ꦭꦤ꧀ꦧꦏꦭ꧀ꦢꦶꦫꦩ꧀ꦥꦸꦁꦔꦏꦺ꧉​ꦭꦃ​ꦥꦫ​ꦩꦤꦸꦁꦱ​ꦱꦶꦁ​ꦩꦁꦒꦺꦴꦤ꧀ꦤꦁꦧꦸꦩꦶ​꧈​ꦱꦶꦁ​ꦗꦼꦤꦼꦁꦔꦺ​ꦲꦺꦴꦫ​ꦏꦼꦠꦸꦭꦶꦱ꧀ꦤꦁꦧꦸꦏꦸ​ꦥꦔꦸꦫꦶꦥ꧀ꦥꦤ꧀ꦱꦏ꧀ꦢꦸꦫꦸꦁꦔꦺꦗꦒꦠ꧀ꦢꦶꦒꦮꦺ​꧈​ꦤꦺꦏ꧀ꦥꦢ​ꦮꦼꦫꦸꦃ​ꦏꦺꦮꦤ꧀ꦩꦲꦸ​ꦧꦏꦭ꧀ꦥꦢ​ꦔ꧀ꦒꦸꦩꦸꦤ꧀꧈​ꦲꦮꦶꦠ꧀ꦏꦺꦮꦤ꧀ꦏꦸꦮꦶ​ꦩ꧀ꦧꦶꦪꦺꦤ꧀ꦲꦺꦤꦺꦁ꧈​ꦱꦲꦶꦏꦶ​ꦲꦺꦴꦫ​ꦲꦺꦤꦺꦁ꧈​ꦤꦁꦔꦶꦁ​ꦧꦏꦭ꧀​ꦚ꧀ꦗꦼꦢꦸꦭ꧀ꦩꦼꦤꦺꦃ​꧉​

⁹꧋“ꦥꦽꦏꦫ​ꦲꦶꦏꦶ​ꦥꦚ꧀ꦕꦺꦤ꧀​ꦩ꧀ꦧꦸꦠꦸꦃꦲꦏꦺꦏꦮꦼꦫꦸꦃꦭꦤ꧀ꦥꦔꦼꦂꦠꦶ​꧉​ꦌꦤ꧀ꦢꦱ꧀ꦥꦶꦠꦸ​ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦒꦸꦤꦸꦁ​ꦥꦶꦠꦸ​ꦱꦶꦁ​ꦢꦶꦗꦒꦺꦴꦁꦔꦶꦏꦫꦺꦴ​ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​꧉​ ¹⁰ꦏꦸꦮꦶ​ꦲꦸꦒ​ꦔ꧀ꦒꦩ꧀ꦧꦂꦫꦏꦺꦫꦠꦸ​ꦥꦶꦠꦸ​:ꦱꦶꦁ​ꦭꦶꦩ​ꦮꦶꦱ꧀ꦲꦩ꧀ꦧꦿꦸꦏ꧀ ꦱꦶꦁ​ꦱꦶꦗꦶ​ꦲꦶꦗꦶꦏ꧀ꦔꦢꦼꦏ꧀ꦭꦤ꧀ꦱꦶꦁ​ꦱꦶꦗꦶꦤꦺ​ꦩꦼꦤꦺꦃ​ꦢꦸꦫꦸꦁ​ꦠꦼꦏ​꧉​ꦤꦺꦏ꧀ꦏꦸꦮꦶ​ꦠꦼꦏ​꧈​ꦱꦶꦁ​ꦔꦢꦼꦏ꧀ꦲꦺꦴꦫ​ꦱꦸꦮꦶ꧉​ ¹¹ꦭꦃ​ꦏꦺꦮꦤꦺ​꧈​ꦱꦶꦁ​ꦩꦲꦸꦤꦺ​ꦲꦺꦤꦺꦁ꧈​ꦱꦲꦶꦏꦶ​ꦲꦺꦴꦫ​ꦲꦺꦤꦺꦁ꧈​ꦏꦸꦮꦶ​ꦫꦠꦸ​ꦱꦶꦁ​ꦤꦺꦴꦩꦼꦂ​ꦮꦺꦴꦭꦸ​꧉​ꦫꦠꦸ​ꦏꦸꦮꦶ​ꦠꦸꦁꦒꦭ꧀ꦭꦺ​ꦏꦫꦺꦴ​ꦫꦠꦸ​ꦥꦶꦠꦸ​ꦱꦶꦁ​ꦧꦏꦭ꧀ꦢꦶꦲꦩ꧀ꦧꦿꦸꦏ꧀ꦏꦏꦺꦩꦲꦸ​꧉​

¹²꧋“ꦭꦃ​ꦱꦸꦔꦸ​ꦱꦼꦥꦸꦭꦸꦃ​ꦱꦶꦁ​ꦲꦩ꧀ꦧꦺꦴꦏ꧀ꦱꦮꦁꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦫꦠꦸ​ꦱꦼꦥꦸꦭꦸꦃ​ꦱꦶꦁ​ꦢꦸꦫꦸꦁ​ꦩꦺꦴꦭꦃꦲꦶꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱ​꧉​ꦫꦠꦸꦫꦠꦸ​ꦏꦸꦮꦶ​ꦧꦏꦭ꧀ꦥꦢ​ꦤꦩ꧀ꦥꦤꦶ​ꦥꦔ꧀ꦮꦱꦤꦺ​ꦧꦼꦧꦉꦁꦔꦤ꧀ꦏꦫꦺꦴ​ꦏꦺꦮꦤꦺ​꧈​ꦱꦏ꧀ꦗꦩ꧀ꦱꦸꦮꦺꦤꦺ​꧉​ ¹³ꦫꦠꦸ​ꦱꦼꦥꦸꦭꦸꦃ​ꦏꦸꦮꦶ​ꦠꦸꦗꦸꦮꦤ꧀ꦤꦺꦠꦸꦁꦒꦭ꧀ꦭꦺ​꧈​ꦪꦏꦸꦮꦶ​꧈​ꦲꦉꦥ꧀ꦩꦱꦿꦃꦲꦏꦺꦥꦔ꧀ꦮꦱꦤꦺ​ꦭꦤ꧀ꦏꦼꦏꦸꦮꦠ꧀ꦠꦤ꧀ꦤꦺ​ꦩꦫꦁ​ꦏꦺꦮꦤ꧀꧈​ ¹⁴ꦫꦠꦸꦫꦠꦸ​ꦭꦤ꧀ꦏꦺꦮꦤꦺ​ꦧꦏꦭ꧀ꦢꦢꦶ​ꦱꦶꦗꦶ​ꦥꦼꦫꦁ​ꦏꦫꦺꦴ​ꦕꦼꦩ꧀ꦥꦺꦤꦺ​꧉​ꦤꦁꦔꦶꦁ​ꦧꦏꦭ꧀ꦢꦶꦏꦭꦃꦲꦏꦺꦏꦫꦺꦴ​ꦕꦼꦩ꧀ꦥꦺꦤꦺ​ꦭꦤ꧀ꦥꦫ​ꦱꦼꦢꦸꦭꦸꦂꦫꦺ​ꦱꦶꦁ​ꦮꦶꦱ꧀ꦢꦶꦥꦁꦒꦶꦭ꧀ꦭꦤ꧀ꦢꦶꦥꦶꦭꦶꦃ​ꦭꦤ꧀ꦱꦶꦁ​ꦥꦢ​ꦠꦼꦩꦼꦤ꧀ꦤꦸꦫꦸꦠ꧀ꦩꦫꦁ​ꦢꦺꦏ꧀ꦤꦺ꧉​ꦲꦮꦶꦠ꧀ꦢꦺꦏ꧀ꦤꦺꦏꦸꦮꦶ​ꦒꦸꦱ꧀ꦠꦶꦤꦺ​ꦥꦫ​ꦒꦸꦱ꧀ꦠꦶ​ꦭꦤ꧀ꦫꦠꦸꦤꦺ​ꦥꦫ​ꦫꦠꦸ​꧉​

¹⁵꧋“ꦩꦸꦭꦺꦏꦠ꧀ꦩꦲꦸ​ꦠꦼꦫꦸꦱ꧀ꦔꦺꦴꦩꦺꦴꦁꦔꦶꦲꦏꦸ​ꦔꦺꦤꦺ​:ꦧꦚꦸ​ꦱꦶꦁ​ꦲꦩ꧀ꦧꦺꦴꦏ꧀ꦱꦮꦁ꧈​ꦱꦶꦁ​ꦢꦶꦗꦒꦺꦴꦁꦔꦶꦭꦺꦴꦤ꧀ꦠꦺꦏꦸꦮꦶ​꧈​ꦔ꧀ꦒꦩ꧀ꦧꦂꦫꦏꦺꦤꦼꦒꦫꦤꦼꦒꦫ​ꦭꦤ꧀ꦒꦺꦴꦭꦺꦴꦔꦤ꧀ꦒꦺꦴꦭꦺꦴꦔꦤ꧀ꦤꦺ​ꦮꦺꦴꦁ​꧈​ꦥꦫ​ꦧꦁꦱ​ꦭꦤ꧀ꦧꦱ​꧉​ ¹⁶ꦱꦸꦔꦸ​ꦱꦼꦥꦸꦭꦸꦃ​ꦭꦤ꧀ꦏꦺꦮꦤꦺ​ꦏꦸꦮꦶ​ꦧꦏꦭ꧀ꦥꦢ​ꦱꦼꦔꦶꦠ꧀ꦩꦫꦁ​ꦭꦺꦴꦤ꧀ꦠꦺꦤꦺ꧉​ꦱꦼꦩ꧀ꦧꦫꦁ​ꦤ꧀ꦢꦸꦮꦺꦪꦭꦺꦴꦤ꧀ꦠꦺꦤꦺꦧꦏꦭ꧀ꦢꦶꦉꦧꦸꦠ꧀ꦭꦤ꧀ꦮꦺꦴꦁꦔꦺ​ꦧꦏꦭ꧀ꦢꦶꦲꦸꦢꦤ꧀ꦤꦶ​꧉​ꦢꦒꦶꦁꦔꦺ​ꦧꦏꦭ꧀ꦢꦶꦥꦔꦤ꧀ꦠꦼꦫꦸꦱ꧀ꦮꦺꦴꦁꦔꦺ​ꦢꦶꦲꦺꦴꦧꦺꦴꦁ​ꦤꦁꦒꦼꦤꦶ​꧉​ ¹⁷ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦤ꧀ꦢꦺꦏꦺꦏ꧀ꦲꦶꦁ​ꦲꦠꦶꦤꦺ​ꦮꦺꦴꦁꦮꦺꦴꦁ​꧈​ꦱꦸꦥꦪ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦥ​ꦱꦶꦁ​ꦮꦶꦱ꧀ꦢꦶꦠꦼꦠꦼꦥ꧀ꦥꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦩꦱꦿꦃꦲꦏꦺꦥꦔ꧀ꦮꦱꦤꦺ​ꦩꦫꦁ​ꦏꦺꦮꦤꦺ​꧉​ꦏꦺꦮꦤ꧀ꦧꦏꦭ꧀​ꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱꦤꦺ​ꦔꦤ꧀ꦠꦶ​ꦏꦧꦺꦃ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦼꦠꦸꦫꦸꦠ꧀ꦠꦤ꧀꧈​

¹⁸꧋“ꦮꦺꦴꦁꦮꦺꦢꦺꦴꦏ꧀ꦱꦶꦁꦩ꧀ꦧꦺꦴꦏ꧀ꦱꦮꦁꦏꦸꦮꦶꦔ꧀ꦒꦩ꧀ꦧꦂꦫꦏꦺꦏꦸꦠꦒꦼꦢꦺ꧈​ꦱꦶꦁꦔ꧀ꦮꦱꦤꦶꦥꦫꦫꦠꦸꦤꦁꦧꦸꦩꦶ꧉​”

↑ ↑ ↑

꧋ꦏꦸꦠꦨꦧꦶꦭꦺꦴꦤ꧀ꦫꦸꦧꦸꦃ꧉​

꧇​꧑꧘꧇​ ¹꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦩꦸꦭꦺꦏꦠ꧀ꦭꦶꦪꦤꦺ​ꦩꦼꦢꦸꦤ꧀ꦱꦁꦏꦱ꧀ꦮꦂꦒ​꧉​ꦩꦸꦭꦺꦏꦠ꧀ꦩꦲꦸ​ꦒꦼꦢꦺꦥꦔ꧀ꦮꦱꦤꦺ​ꦭꦤ꧀ꦧꦸꦩꦶ​ꦩꦭꦶꦃ​ꦥꦢꦁꦗꦭꦂꦫꦤ꧀ꦱꦁꦏꦏꦩꦸꦭꦾꦤꦺ​꧉​ ²ꦩꦸꦭꦺꦏꦠ꧀ꦩꦲꦸ​ꦔꦺꦴꦩꦺꦴꦁꦔꦁꦒꦺꦴ​ꦱ꧀ꦮꦫ​ꦧꦤ꧀ꦠꦼꦂ​:“ꦮꦶꦱ꧀ꦫꦸꦧꦸꦃ​!ꦨꦧꦶꦭꦺꦴꦤ꧀ ꦏꦸꦠꦒꦼꦢꦺꦏꦸꦮꦶ​ꦮꦶꦱ꧀ꦫꦸꦧꦸꦃ​꧉​ꦱꦲꦶꦏꦶ​ꦮꦶꦱ꧀ꦢꦶꦲꦼꦁꦒꦺꦴꦤ꧀ꦤꦶ​ꦫꦺꦴꦃꦫꦺꦴꦃ​ꦉꦒꦼꦠ꧀ꦭꦤ꧀ꦢꦢꦶ​ꦥꦁꦒꦺꦴꦤ꧀ꦤꦤ꧀ꦢꦼꦭꦶꦏꦤ꧀ꦤꦺꦫꦺꦴꦃꦫꦺꦴꦃ​ꦲꦸꦭ​ꦭꦤ꧀ꦱꦏ꧀ꦫꦸꦥꦤꦺ​ꦩꦤꦸꦏ꧀ꦱꦶꦁ​ꦲꦭ​ꦭꦤ꧀ꦱꦶꦁ​ꦢꦶꦱꦼꦔꦶꦠ꧀ꦠꦶ​ꦮꦺꦴꦁ​꧉​ ³ꦱꦏ꧀ꦏꦺꦃꦲꦺꦥꦫ​ꦧꦁꦱ​ꦮꦶꦱ꧀ꦥꦢ​ꦔꦺꦴꦩ꧀ꦧꦺ​ꦲꦁꦒꦸꦂ​ꦢꦺꦴꦱꦤꦺ​ꦭꦏꦸ​ꦧꦺꦢꦁ꧉​ꦥꦫ​ꦫꦠꦸ​ꦤꦁꦧꦸꦩꦶ​ꦮꦶꦱ꧀ꦥꦢ​ꦭꦏꦸ​ꦧꦺꦢꦁꦏꦫꦺꦴ​ꦨꦧꦶꦭꦺꦴꦤ꧀ꦭꦤ꧀ꦥꦫ​ꦱꦸꦢꦒꦂ​ꦤꦁꦧꦸꦩꦶ​ꦮꦶꦱ꧀ꦥꦢ​ꦢꦢꦶ​ꦱꦸꦒꦶꦃ​ꦱꦁꦏꦏꦱꦸꦒꦶꦃꦲꦤ꧀ꦤꦺ​ꦨꦧꦶꦭꦺꦴꦤ꧀ꦱꦶꦁ​ꦲꦺꦴꦫ​ꦲꦺꦤꦺꦁꦲꦼꦤ꧀ꦠꦺꦏ꧀ꦏꦺ​꧉​” ⁴ꦲꦏꦸꦠꦼꦫꦸꦱ꧀ꦏꦿꦸꦔꦸꦱ꧀ꦮꦫꦭꦶꦪꦤꦺꦱꦁꦏꦱ꧀ꦮꦂꦒꦲꦸꦤꦶꦤꦺ:

“ꦲꦺꦲꦸꦩꦠ꧀ꦏꦸ!ꦩꦼꦠꦸꦮꦱꦁꦏꦨꦧꦶꦭꦺꦴꦤ꧀ꦏꦸꦮꦶ!ꦱꦸꦥꦪꦏꦺꦴꦮꦺꦲꦺꦴꦫꦏꦼꦠꦸꦭꦂꦫꦤ꧀ꦏꦫꦺꦴꦢꦺꦴꦱꦢꦺꦴꦱꦤꦺ
ꦭꦤ꧀ꦲꦺꦴꦫꦩꦺꦭꦸꦏꦼꦤꦺꦁꦱꦼꦠꦿꦥꦤ꧀ꦤꦺ꧉​
⁵ꦲꦮꦶꦠ꧀ꦢꦺꦴꦱꦤꦺ​ꦮꦶꦱ꧀ꦠꦸꦩ꧀ꦥꦸꦏ꧀ꦲꦸꦤ꧀ꦢꦸꦁꦱꦩ꧀ꦥꦺꦏ꧀ꦱꦸꦤ꧀ꦢꦸꦭ꧀ꦭꦔꦶꦠ꧀
ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦭꦭꦶ​
ꦩꦫꦁ​ꦱꦏ꧀ꦲꦺꦤꦺꦁꦔꦺꦲꦭ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺ꧉​
⁶ꦨꦊꦱꦤꦏꦪ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦩꦫꦁ​ꦏꦺꦴꦮꦺ​꧈​
ꦩꦭꦃ​ꦢꦶꦢꦺꦴꦧꦼꦭ꧀ꦭꦏꦺꦥꦶꦱꦤ꧀꧈​
ꦕꦁ​ꦏꦶꦂꦫꦺ​ꦢꦶꦲꦶꦱꦺꦤ꧀ꦤꦶ​ꦲꦺꦴꦩ꧀ꦧꦺꦤ꧀ꦲꦺꦴꦩ꧀ꦧꦺꦤ꧀ꦱꦶꦁ​ꦏꦼꦫꦱ꧀ꦱꦺ​ꦢꦺꦴꦧꦼꦭ꧀
ꦔꦸꦁꦏꦸꦭ꧀ꦭꦶ​ꦱꦶꦁ​ꦢꦶꦱꦸꦒꦸꦃꦲꦏꦺꦩꦫꦁ​ꦏꦺꦴꦮꦺ​꧉​
⁷ꦢꦶꦠꦼꦏꦏ꧀ꦏꦏꦺꦱꦼꦠꦿꦥꦤ꧀ꦭꦤ꧀ꦏꦱꦁꦱꦫꦤ꧀
ꦱꦶꦁꦥꦢꦒꦼꦢꦺꦤꦺꦏꦫꦺꦴꦏꦭꦸꦲꦸꦂꦫꦤ꧀
ꦭꦤ꧀ꦏꦱꦸꦒꦶꦃꦲꦤ꧀ꦱꦶꦁꦮꦶꦱ꧀ꦢꦶꦫꦱꦏ꧀ꦏꦏꦺ꧉​
ꦲꦮꦶꦠ꧀ꦲꦶꦱꦶꦤꦺꦲꦠꦶꦤꦺꦱ꧀ꦭꦮꦱ꧀ꦱꦺꦔꦺꦤꦺ:
‘ꦲꦏꦸꦲꦶꦏꦶꦫꦠꦸꦱꦶꦁꦤꦶꦤ꧀ꦢꦏ꧀ꦏꦏꦺꦥꦔ꧀ꦮꦱ꧉​
ꦲꦏꦸꦢꦸꦢꦸꦫꦤ꧀ꦢꦭꦤ꧀ꦲꦺꦴꦫꦧꦏꦭ꧀ꦤꦤ꧀ꦢꦁꦱꦼꦢꦶ꧉'​
⁸ꦩꦸꦭꦤꦺ​ꦧꦉꦁ​ꦱꦼꦢꦶꦤ​ꦏꦸꦮꦶ​ꦲꦸꦒ​꧈​
ꦮꦺꦴꦁ​ꦏꦸꦮꦶ​ꦧꦏꦭ꧀ꦏꦠꦼꦏꦤ꧀ꦩꦼꦩꦭ​ꦥꦶꦫꦁꦥꦶꦫꦁ​:ꦥꦠꦶ​꧈​ꦱꦼꦢꦶ꧈​ꦔꦼꦭꦶꦃ​꧉​
ꦮꦺꦴꦁ​ꦩꦲꦸ​ꦧꦏꦭ꧀ꦢꦶꦲꦺꦴꦧꦺꦴꦁ​ꦤꦁꦒꦼꦤꦶ​꧈​
ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦿꦸꦠꦸꦏꦸꦮꦶ​ꦏ꧀ꦮꦱ​ꦢꦺꦮꦺ꧉​”

⁹꧋ꦥꦫ​ꦫꦠꦸ​ꦱꦶꦁ​ꦥꦢ​ꦭꦏꦸ​ꦧꦺꦢꦁꦏꦫꦺꦴ​ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦭꦤ꧀ꦲꦸꦒ​ꦢꦢꦶ​ꦱꦸꦒꦶꦃ​ꦗꦭꦂꦫꦤ꧀ꦒꦼꦒꦤ꧀ꦢꦺꦁꦔꦤ꧀ꦏꦫꦺꦴ​ꦨꦧꦶꦭꦺꦴꦤ꧀ ꦧꦏꦭ꧀ꦤꦔꦶꦱ꧀ꦱꦶ​ꦭꦤ꧀ꦱꦩ꧀ꦧꦠ꧀ꦤꦺꦏ꧀ꦮꦼꦫꦸꦃ​ꦏꦼꦧꦸꦭ꧀ꦩꦸꦁꦒꦃ​ꦱꦁꦏꦒꦼꦤꦶ​ꦱꦶꦁ​ꦔꦺꦴꦧꦺꦴꦁ​ꦨꦧꦶꦭꦺꦴꦤ꧀ꦩꦲꦸ​꧉​ ¹⁰ꦥꦫ​ꦫꦠꦸ​ꦱꦶꦁ​ꦔꦢꦼꦏ꧀ꦤꦁꦏꦢꦺꦴꦃꦲꦤ꧀ ꦱꦁꦏꦶꦁꦮꦼꦢꦶꦤꦺ​ꦏꦼꦤꦺꦁꦏꦱꦁꦱꦫꦤꦺ​ꦏꦸꦠꦩꦲꦸ​꧈​ꦲꦺꦴꦩꦺꦴꦁꦔꦺ​:“ꦄꦢꦸꦃ꧈​ꦏꦺꦴꦏ꧀ꦕꦶꦭꦏ​ꦠꦼꦩꦼꦤ꧀ꦏꦺꦴꦮꦺ​ꦨꦧꦶꦭꦺꦴꦤ꧀ ꦏꦸꦠꦱꦶꦁ​ꦏꦼꦱꦸꦮꦸꦂ​ꦒꦼꦢꦺꦤꦺ꧉​ꦏꦺꦴꦮꦺ​ꦏꦠꦸꦩ꧀ꦥꦼꦱ꧀ꦏꦫꦺꦴ​ꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀ꦗꦼꦫꦺꦴꦤꦺꦱꦏ꧀ꦗꦩ꧀꧈​”

¹¹꧋ꦥꦫ​ꦱꦸꦢꦒꦂ​ꦲꦸꦒ​ꦥꦢ​ꦤꦔꦶꦱ꧀ꦭꦤ꧀ꦱꦩ꧀ꦧꦠ꧀ ꦗꦭꦂꦫꦤ꧀ꦱꦁꦏꦮꦺꦴꦁ​ꦮꦺꦢꦺꦴꦏ꧀ꦩꦲꦸ​꧈​ꦲꦮꦶꦠ꧀ꦱꦲꦶꦏꦶ​ꦮꦶꦱ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦒꦼꦊꦩ꧀ꦤꦸꦏꦺꦴꦤ꧀ꦤꦶ​ꦢꦒꦁꦔꦤ꧀ꦤꦺ​ꦩꦼꦤꦺꦃ​꧉​ ^12-13ꦪꦏꦸꦮꦶ​ꦢꦒꦁꦔꦤ꧀ꦱꦶꦁ​ꦫꦸꦥ​ꦲꦼꦩꦱ꧀ꦭꦤ꧀ꦱꦼꦭꦏ​꧈​ꦮꦠꦸ​ꦭꦫꦁ​ꦭꦤ꧀ꦥꦉꦭ꧀ ꦩꦺꦴꦫꦶ​ꦲꦭꦸꦱ꧀ ꦩꦺꦴꦫꦶ​ꦥꦸꦂꦥꦼꦂ꧈​ꦱꦸꦠꦿ​ꦭꦤ꧀ꦩꦺꦴꦫꦶ​ꦲꦧꦁ​꧈​ꦫꦸꦥꦫꦸꦥ​ꦢꦩ꧀ꦢꦩ꧀ꦩꦤ꧀ꦱꦁꦏꦏꦪꦸ​ꦱꦶꦁ​ꦭꦁꦏ​꧈​ꦱꦁꦏꦒꦢꦶꦁꦭꦤ꧀ꦱꦁꦏꦏꦪꦸ​ꦱꦶꦁ​ꦭꦫꦁ​ꦉꦒꦤꦺ​꧈​ꦱꦁꦏꦧꦿꦺꦴꦤ꧀ ꦮꦼꦱꦶ​ꦭꦤ꧀ꦩꦂꦩꦼꦂ​꧈​ꦏꦤꦶꦭ꧀ ꦧꦸꦩ꧀ꦧꦸꦧꦸꦩ꧀ꦧꦸ​꧈​ꦊꦔꦮꦔꦶ꧈​ꦩꦼꦚꦤ꧀ ꦲꦁꦒꦸꦂ​ꦭꦤ꧀ꦊꦔ​꧈​ꦒ꧀ꦊꦥꦸꦁ​ꦭꦤ꧀ꦒꦤ꧀ꦢꦸꦩ꧀ ꦱꦥꦶ​ꦭꦤ꧀ꦮꦼꦢꦸꦱ꧀ ꦗꦫꦤ꧀ ꦏꦿꦺꦠ​꧈​ꦱ꧀ꦭꦥ꦳꧀ꦭꦤ꧀ꦲꦸꦒ​ꦩꦤꦸꦁꦱ​꧉​ ¹⁴ꦠꦼꦩ꧀ꦧꦸꦁꦔꦺ​ꦥꦫ​ꦱꦸꦢꦒꦂ​:“ꦱꦼꦩ꧀ꦧꦫꦁ​ꦱꦶꦁ​ꦢꦢꦶ​ꦥꦼꦥꦺꦔꦶꦤ꧀ꦤꦤ꧀ꦤꦺ​ꦲꦠꦶꦩꦸ​ꦮꦶꦱ꧀ꦲꦶꦭꦁ​ꦭꦤ꧀ꦱꦼꦩ꧀ꦧꦫꦁ​ꦏꦭꦸꦧꦺꦂꦫꦤ꧀ꦭꦤ꧀ꦲꦥꦶꦏ꧀ꦲꦥꦶꦏ꧀ꦏꦤ꧀ꦮꦶꦱ꧀ꦲꦺꦴꦫ​ꦲꦺꦤꦺꦁ꧈​ꦲꦺꦴꦫ​ꦧꦏꦭ꧀ꦏꦼꦠꦼꦩꦸ​ꦩꦼꦤꦺꦃ​꧉​” ¹⁵ꦥꦫ​ꦱꦸꦢꦒꦂ​ꦱꦶꦁ​ꦩꦭꦶꦃ​ꦱꦸꦒꦶꦃ​ꦗꦭꦂꦫꦤ꧀ꦥꦢ​ꦢꦼꦢꦒꦁꦔꦤ꧀ꦤꦁꦨꦧꦶꦭꦺꦴꦤ꧀ꦧꦏꦭ꧀ꦥꦢ​ꦔꦢꦼꦏ꧀ꦤꦁꦏꦢꦺꦴꦃꦲꦤ꧀ ꦲꦮꦶꦠ꧀ꦮꦼꦢꦶ​ꦤꦺꦏ꧀ꦩꦺꦭꦸ​ꦏꦼꦤꦺꦁꦱꦼꦠꦿꦥꦤ꧀ꦤꦺꦏꦸꦠꦩꦲꦸ​꧉​ꦮꦺꦴꦁꦮꦺꦴꦁ​ꦤꦩꦸꦁ​ꦥꦢ​ꦤꦔꦶꦱ꧀ꦭꦤ꧀ꦱꦩ꧀ꦧꦠ꧀ ꦠꦼꦩ꧀ꦧꦸꦁꦔꦺ​: ¹⁶“ꦄꦢꦸꦃ꧈​ꦏꦪ​ꦔꦥ​ꦕꦶꦭꦏꦤꦺ​ꦏꦸꦠꦒꦼꦢꦺꦱꦶꦁ​ꦏꦼꦱꦸꦮꦸꦂ​ꦏꦸꦮꦶ​꧉​ꦭꦸꦩꦿꦃꦲꦺ​ꦔꦁꦒꦺꦴ​ꦩꦺꦴꦫꦶ​ꦲꦭꦸꦱ꧀ ꦩꦺꦴꦫꦶ​ꦥꦸꦂꦥꦼꦂ꧈​ꦩꦺꦴꦫꦶ​ꦲꦧꦁ​ꦭꦤ꧀ꦔꦁꦒꦺꦴ​ꦲꦼꦩꦱ꧀ ꦮꦠꦸ​ꦭꦫꦁ​ꦭꦤ꧀ꦥꦉꦭ꧀꧈​ ¹⁷ꦤꦁꦔꦶꦁ​ꦱꦏ꧀ꦗꦼꦫꦺꦴꦤꦺꦱꦏ꧀ꦗꦩ꧀ꦮꦲꦺ​ꦏꦱꦸꦒꦶꦃꦲꦤ꧀ꦤꦺ​ꦱꦼꦩꦺꦴꦤꦺꦴ​ꦲꦺꦴꦏꦺꦃꦲꦺꦮꦶꦱ꧀ꦲꦶꦭꦁ​ꦏꦧꦺꦃ​꧉​”

꧋ꦱꦏ꧀ꦏꦺꦃꦲꦺꦏꦥꦶꦠꦺꦤ꧀ ꦮꦺꦴꦁ​ꦏꦥꦭ꧀ꦭꦪꦂꦭꦤ꧀ꦩꦠꦿꦸꦱ꧀ꦭꦤ꧀ꦏꦧꦺꦃ​ꦮꦺꦴꦁ​ꦱꦶꦁ​ꦏꦼꦂꦗꦤꦤ꧀ꦤꦺꦤꦁꦱꦼꦒꦫ​ꦥꦢ​ꦔꦢꦼꦏ꧀ꦤꦁꦏꦢꦺꦴꦃꦲꦤ꧀꧈​ ¹⁸ꦏꦢꦸꦁ​ꦥꦢ​ꦮꦼꦫꦸꦃ​ꦏꦼꦧꦸꦭ꧀ꦱꦁꦏꦒꦼꦤꦶ​ꦱꦶꦁ​ꦔꦺꦴꦧꦺꦴꦁ​ꦏꦸꦠꦩꦲꦸ​꧈​ꦠꦼꦫꦸꦱ꧀ꦥꦢ​ꦧꦼꦔꦺꦴꦏ꧀ꦧꦼꦔꦺꦴꦏ꧀ꦠꦼꦩ꧀ꦧꦸꦁꦔꦺ​:“ꦢꦸꦫꦸꦁ​ꦠꦲꦸ​ꦲꦺꦤꦺꦁꦏꦸꦠꦱꦶꦁ​ꦱꦼꦩꦺꦤꦺ​ꦒꦼꦢꦺꦤꦺ꧉​” ¹⁹ꦱꦶꦫꦃꦲꦺ​ꦠꦼꦫꦸꦱ꧀ꦢꦶꦱꦮꦸꦂꦫꦶ​ꦊꦩꦃ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦱꦸꦱꦃ​꧉​ꦠꦼꦫꦸꦱ꧀ꦥꦢ​ꦤꦔꦶꦱ꧀ꦭꦤ꧀ꦱꦩ꧀ꦧꦠ꧀:“ꦄꦢꦸꦃ꧈​ꦕꦶꦭꦏ​ꦠꦼꦩꦼꦤ꧀ꦏꦸꦠꦒꦼꦢꦺꦲꦶꦏꦶ​!ꦏꦱꦸꦒꦶꦃꦲꦤ꧀ꦤꦺ​ꦮꦶꦱ꧀​ꦔ꧀ꦒꦮꦺ​ꦱꦸꦒꦶꦃꦲꦺ​ꦱꦏ꧀ꦏꦺꦃꦲꦺꦗꦸꦫꦒꦤ꧀ꦏꦥꦭ꧀꧈​ꦤꦁꦔꦶꦁ​ꦱꦏ꧀ꦗꦼꦫꦺꦴꦤꦺꦱꦏ꧀ꦗꦩ꧀ꦮꦶꦱ꧀ꦲꦶꦭꦁ​ꦏꦧꦺꦃ​꧉​”

²⁰꧋ꦲꦺꦱ꧀ꦮꦂꦒ꧈​ꦥꦢꦧꦸꦔꦃꦲ꧈​ꦲꦮꦶꦠ꧀ꦏꦸꦠꦏꦸꦮꦶꦮꦶꦱ꧀ꦫꦸꦱꦏ꧀꧈​ꦲꦺꦥꦫꦲꦸꦩꦠ꧀ꦠꦺꦒꦸꦱ꧀ꦠꦶꦄꦭ꧀ꦭꦃ꧈​ꦫꦱꦸꦭ꧀ꦫꦱꦸꦭ꧀ꦭꦤ꧀ꦤꦧꦶꦤꦧꦶ꧈​ꦥꦢꦧꦸꦔꦃꦲ!ꦲꦮꦶꦠ꧀ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦔꦼꦢꦸꦤ꧀ꦤꦏꦺꦱꦼꦠꦿꦥꦤ꧀ꦩꦫꦁꦏꦸꦠꦏꦸꦮꦶꦏꦁꦒꦺꦴꦲꦥꦱꦶꦁꦮꦶꦱ꧀ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴꦏꦸꦠꦩꦲꦸꦩꦫꦁꦏꦺꦴꦮꦺꦏꦧꦺꦃ꧉​

²¹꧋ꦱꦏ꧀ꦮꦶꦱ꧀ꦱꦺꦏꦸꦮꦶꦠꦼꦫꦸꦱ꧀ꦲꦺꦤꦺꦁꦩꦸꦭꦺꦏꦠ꧀ꦫꦺꦴꦱꦔꦁꦏꦠ꧀ꦮꦠꦸ꧈​ꦒꦼꦢꦺꦤꦺꦱꦏ꧀ꦒꦶꦭꦶꦁꦔꦤ꧀ꦭꦤ꧀ꦔꦸꦚ꧀ꦕꦭ꧀ꦭꦏꦺꦮꦠꦸꦩꦲꦸꦤꦁꦱꦼꦒꦫ꧈​ꦏꦫꦺꦴꦔꦺꦴꦩꦺꦴꦁ:“ꦪꦏꦪꦔꦺꦤꦺꦲꦶꦏꦶꦲꦼꦁꦒꦺꦴꦤꦺꦏꦸꦠꦨꦧꦶꦭꦺꦴꦤ꧀ꦱꦶꦁꦏꦼꦱꦸꦮꦸꦂꦧꦏꦭ꧀ꦢꦶ​ꦲꦸꦚ꧀ꦕꦭ꧀ꦭꦏꦺꦔꦤ꧀ꦠꦶꦲꦺꦴꦫꦧꦏꦭ꧀ꦏꦼꦠꦼꦩꦸꦩꦼꦤꦺꦃ꧉​ ²²ꦱ꧀ꦮꦫꦤꦺ​ꦩꦸꦱꦶꦏ꧀ꦏꦺ​ꦠꦸꦏꦁ​ꦕ꧀ꦊꦩ꧀ꦥꦸꦁ​꧈​ꦠꦸꦏꦁ​ꦱꦶꦔꦶ꧈​ꦠꦸꦏꦁ​ꦱꦸꦭꦶꦁ​ꦭꦤ꧀ꦠꦸꦏꦁ​ꦠꦿꦺꦴꦩ꧀ꦥꦺꦠ꧀ꦲꦺꦴꦫ​ꦧꦏꦭ꧀ꦏꦿꦸꦔꦸ​ꦩꦼꦤꦺꦃ​ꦤꦁꦥꦁꦒꦺꦴꦤ꧀ꦤꦤ꧀ꦩꦸ​꧉​ꦮꦶꦱ꧀ꦧꦏꦭ꧀ꦲꦺꦴꦫ​ꦲꦺꦤꦺꦁꦏꦼꦱꦼꦤꦶꦪꦤ꧀ꦩꦼꦤꦺꦃ​ꦤꦁꦏꦺꦴꦤꦺꦴ​꧉​ ²³ꦲꦺꦴꦫ​ꦲꦺꦤꦺꦁꦱ꧀ꦭꦺꦴꦫꦺꦴꦠ꧀ꦠꦺꦢꦶꦪꦤ꧀ꦱꦶꦁ​ꦩꦢꦁꦔꦶꦏꦺꦴꦮꦺ​ꦩꦼꦤꦺꦃ​꧉​ꦱ꧀ꦮꦫꦤꦺ​ꦮꦺꦴꦁ​ꦤ꧀ꦢꦸꦮꦺꦒꦮꦺ​ꦲꦺꦴꦫ​ꦧꦏꦭ꧀ꦲꦺꦤꦺꦁꦩꦼꦤꦺꦃ​꧉​ꦥꦫ​ꦱꦸꦢꦒꦂꦩꦸ​ꦏꦸꦮꦶ​ꦮꦺꦴꦁ​ꦱꦶꦁ​ꦢꦶꦲꦗꦺꦤ꧀ꦤꦶ​ꦧꦔꦼꦠ꧀ꦤꦁꦱꦏ꧀ꦭꦸꦩꦃꦲꦺꦧꦸꦩꦶ​꧉​ꦭꦤ꧀ꦔꦁꦒꦺꦴ​ꦲꦺꦭ꧀ꦩꦸꦲꦺꦭ꧀ꦩꦸꦥꦼꦥꦼꦠꦼꦁ​ꦏꦺꦴꦮꦺ​ꦮꦶꦱ꧀ꦚꦤ꧀ꦢꦶꦁꦱꦏ꧀ꦏꦺꦃꦲꦺꦧꦁꦱ​ꦤꦁꦧꦸꦩꦶ​꧉​”

²⁴꧋ꦏꦸꦠꦨꦧꦶꦭꦺꦴꦤ꧀ꦮꦶꦱ꧀ꦢꦶꦱꦼꦠꦿꦥ꧀ ꦲꦮꦶꦠ꧀ꦤꦁꦏꦸꦠꦏꦺꦴꦤꦺꦴ​ꦲꦺꦴꦏꦺꦃꦒꦼꦠꦶꦃ​ꦮꦶꦱ꧀ꦮꦸꦠꦃ​꧈​ꦪꦏꦸꦮꦶ​ꦒꦼꦠꦶꦃꦲꦺ​ꦥꦫ​ꦤꦧꦶ​꧈​ꦒꦼꦠꦶꦃꦲꦺ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦕꦼꦏꦏ꧀ꦏꦺ​ꦉꦩ꧀ꦧꦸꦏ꧀:ꦒꦼꦠꦶꦃꦲꦺ​ꦏꦧꦺꦃ​ꦮꦺꦴꦁ​ꦱꦶꦁ​ꦢꦶꦥꦠꦺꦤ꧀ꦤꦶ​ꦤꦁꦧꦸꦩꦶ​ꦏꦺꦴꦤꦺꦴ​꧉​

↑ ↑ ↑

 

꧇​꧑꧙꧇​ ¹꧋ꦲꦏꦸꦠꦼꦫꦸꦱ꧀ꦏꦿꦸꦔꦸꦏꦪꦱ꧀ꦮꦫꦤꦺꦮꦺꦴꦁꦲꦺꦴꦏꦺꦃꦧꦔꦼꦠ꧀ꦤꦁꦱ꧀ꦮꦂꦒ꧈​ꦲꦸꦤꦶꦤꦺ:“ꦥꦸꦗꦶꦪꦒꦸꦱ꧀ꦠꦶꦄꦭ꧀ꦭꦃ!ꦏꦼꦱ꧀ꦭꦩꦼꦠ꧀ꦠꦤ꧀ ꦏꦩꦸꦭꦾꦤ꧀ꦭꦤ꧀ꦥꦔ꧀ꦮꦱꦲꦤꦲꦶꦁꦠꦔꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦲꦺꦲꦮꦏ꧀ꦏꦺꦢꦺꦮꦺ! ²ꦢꦺꦏ꧀ꦤꦺꦱꦶꦁ​ꦔꦿꦸꦠꦸꦧꦼꦤꦼꦂ​ꦭꦤ꧀ꦚꦠ​꧉​ꦢꦺꦏ꧀ꦤꦺꦮꦶꦱ꧀ꦔꦿꦸꦠꦸꦭꦺꦴꦤ꧀ꦠꦺꦒꦼꦢꦺ꧈​ꦱꦶꦁ​ꦔ꧀ꦒꦮꦺ​ꦫꦸꦱꦏ꧀ꦏꦺ​ꦧꦸꦩꦶ​ꦔꦁꦒꦺꦴ​ꦭꦏꦸ​ꦧꦺꦢꦁꦔꦺ꧉​ꦢꦺꦏ꧀ꦤꦺꦮꦶꦱ꧀​ꦩ꧀ꦧꦊꦱ꧀ꦩꦫꦁ​ꦮꦺꦴꦁ​ꦮꦺꦢꦺꦴꦏ꧀ꦏꦸꦮꦶ​꧈​ꦱꦶꦁ​ꦮꦶꦱ꧀ꦩꦠꦺꦤ꧀ꦤꦶ​ꦥꦫ​ꦥꦼꦭꦢꦺꦤ꧀ꦤꦺ​꧉​” ³ꦱ꧀ꦮꦫ​ꦩꦲꦸ​ꦠꦼꦫꦸꦱ꧀ꦔꦺꦴꦩꦺꦴꦁꦱꦼꦥꦶꦱ꧀ꦱꦤ꧀ꦩꦼꦤꦺꦃ​:“ꦥꦸꦗꦶꦪ​ꦒꦸꦱ꧀ꦠꦶ​ꦄꦭ꧀ꦭꦃ​!ꦏꦼꦧꦸꦭ꧀ꦱꦶꦁ​ꦩꦸꦁꦒꦃ​ꦱꦁꦏꦒꦼꦤꦶ​ꦱꦶꦁ​ꦔꦺꦴꦧꦺꦴꦁ​ꦏꦸꦠꦒꦼꦢꦺꦩꦲꦸ​ꦧꦏꦭ꧀ꦭꦁꦒꦼꦁ​ꦱ꧀ꦭꦮꦱ꧀ꦱꦺ!” ⁴ꦥꦫ​ꦥꦶꦤꦶꦠꦸꦮ​ꦥꦠ꧀ꦭꦶꦏꦸꦂ​ꦭꦤ꧀ꦏꦲꦸꦫꦶꦥ꧀ꦥꦤ꧀ꦥꦥꦠ꧀ꦏꦸꦮꦶ​ꦠꦼꦫꦸꦱ꧀ꦥꦢ​ꦱꦸꦗꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦠꦼꦫꦸꦱ꧀ꦔꦺꦴꦩꦺꦴꦁ:“ꦄꦩꦺꦤ꧀ ꦥꦸꦗꦶꦪ​ꦒꦸꦱ꧀ꦠꦶ​ꦄꦭ꧀ꦭꦃ​!”

⁵꧋ꦱꦁꦏꦢꦩ꧀ꦥꦂꦠꦼꦫꦸꦱ꧀ꦲꦺꦤꦺꦁꦱ꧀ꦮꦫꦔꦺꦴꦩꦺꦴꦁ:“ꦲꦺꦥꦫꦥꦼꦭꦢꦺꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦏꦧꦺꦃꦭꦤ꧀ꦱꦏ꧀ꦏꦺꦃꦲꦺꦮꦺꦴꦁꦱꦶꦁꦚꦼꦩ꧀ꦧꦃꦩꦫꦁꦒꦸꦱ꧀ꦠꦶꦄꦭ꧀ꦭꦃ꧈​ꦒꦼꦢꦺꦕꦶꦭꦶꦏ꧀ ꦥꦢꦩꦼꦩꦸꦗꦶꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦲꦺꦲꦮꦏ꧀ꦏꦺꦢꦺꦮꦺ! ⁶ꦱꦏ꧀ꦮꦶꦱ꧀ꦱꦺꦏꦸꦮꦶꦲꦏꦸꦠꦼꦫꦸꦱ꧀ꦏꦿꦸꦔꦸꦏꦪꦱ꧀ꦮꦫꦤꦺꦮꦺꦴꦁꦲꦺꦴꦏꦺꦃꦧꦔꦼꦠ꧀꧈​ꦱ꧀ꦮꦫꦤꦺꦏꦪꦱ꧀ꦮꦫꦤꦺꦧꦚꦸꦲꦺꦴꦏꦺꦃꦒꦼꦩꦿꦺꦴꦗꦺꦴꦏ꧀ꦭꦤ꧀ꦱ꧀ꦮꦫꦤꦺꦒ꧀ꦭꦸꦢꦸꦏ꧀ ꦠꦼꦩ꧀ꦧꦸꦁꦔꦺ:“ꦥꦸꦗꦶꦪꦒꦸꦱ꧀ꦠꦶꦄꦭ꧀ꦭꦃ!ꦲꦮꦶꦠ꧀ꦒꦸꦱ꧀ꦠꦶ꧈​ꦒꦸꦱ꧀ꦠꦶꦄꦭ꧀ꦭꦃꦲꦺꦲꦮꦏ꧀ꦏꦺꦢꦺꦮꦺꦱꦶꦁꦏ꧀ꦮꦱꦢꦺꦮꦺ꧈​ꦢꦺꦏ꧀ꦤꦺꦫꦠꦸ꧉​ ⁷ꦲ꦳ꦪꦸꦏ꧀ꦥꦢ​ꦫꦩꦺꦫꦩꦺ​ꦭꦤ꧀ꦧꦸꦔꦃꦧꦸꦔꦃ​ꦔ꧀ꦭꦸꦲꦸꦂꦫꦏꦺꦏꦩꦸꦭꦾꦤꦺ​꧉​ꦲꦮꦶꦠ꧀ꦮꦶꦱ꧀ꦠꦼꦏꦤ꧀ꦮꦏ꧀ꦠꦸꦩꦸꦏꦮꦶꦤꦺ​ꦕꦼꦩ꧀ꦥꦺꦤꦺ​꧉​ ⁸ꦩꦤ꧀ꦠꦺꦤ꧀ꦤꦺ​ꦮꦺꦢꦺꦴꦏ꧀ꦏꦼꦭꦶꦭ꧀ꦭꦤ꧀ꦔꦁꦒꦺꦴ​ꦩꦺꦴꦫꦶ​ꦲꦭꦸꦱ꧀ꦥꦸꦠꦶꦃ​ꦱꦶꦁ​ꦉꦱꦶꦏ꧀ꦒꦸꦩꦼꦭꦥ꧀!”ꦩꦺꦴꦫꦶ​ꦲꦭꦸꦱ꧀ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦥꦼꦁꦒꦮꦺ​ꦧꦼꦤꦼꦂ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦥꦫ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

⁹꧋ꦩꦸꦭꦺꦏꦠ꧀ꦠꦺꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦲꦏꦸ​:“ꦢꦶꦠꦸꦭꦶꦱ꧀ꦲꦶꦏꦶ​:ꦧꦼꦗꦮꦺꦴꦁꦮꦺꦴꦁ​ꦱꦶꦁ​ꦢꦶꦲꦸꦤ꧀ꦢꦁ​ꦏꦺꦴꦁꦏꦺꦴꦤ꧀ꦩꦺꦭꦸ​ꦥꦺꦱ꧀ꦠ​ꦏꦮꦶꦤꦺ​ꦕꦼꦩ꧀ꦥꦺꦤꦺ​꧉”ꦠꦼꦫꦸꦱ꧀ꦠꦼꦩ꧀ꦧꦸꦁꦔꦺ​ꦩꦼꦤꦺꦃ​:“ꦲꦶꦏꦶ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦩ꧀ꦧꦸꦁ​ꦱꦶꦁ​ꦚꦠ​!”

¹⁰꧋ꦲꦏꦸꦠꦼꦫꦸꦱ꧀ꦱꦸꦗꦸꦠ꧀ꦤꦁꦔꦉꦥ꧀ꦥꦺꦩꦸꦭꦺꦏꦠ꧀ꦠꦺꦲꦉꦥ꧀ꦚꦼꦩ꧀ꦧꦃ꧈​ꦤꦁꦔꦶꦁꦩꦸꦭꦺꦏꦠ꧀ꦠꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦗ!ꦲꦗꦚꦼꦩ꧀ꦧꦃꦲꦏꦸ!ꦚꦼꦩ꧀ꦧꦃꦲꦒꦸꦱ꧀ꦠꦶꦄꦭ꧀ꦭꦃ꧉​ꦲꦏꦸꦲꦶꦏꦶꦠꦸꦁꦒꦭ꧀ꦭꦺꦏꦫꦺꦴꦏꦺꦴꦮꦺꦭꦤ꧀ꦥꦫꦱꦼꦢꦸꦭꦸꦂꦩꦸꦏꦧꦺꦃꦱꦶꦁꦥꦽꦕꦪꦩꦫꦁꦒꦸꦱ꧀ꦠꦶꦪꦺꦯꦸꦱ꧀!”

꧋ꦲꦮꦶꦠ꧀ꦥꦱꦼꦏ꧀ꦱꦶꦤꦺꦒꦸꦱ꧀ꦠꦶꦪꦺꦯꦸꦱ꧀ꦏꦸꦮꦶꦱꦸꦩ꧀ꦧꦼꦂꦫꦺꦠꦼꦩ꧀ꦧꦸꦁꦔꦺꦥꦫꦤꦧꦶ꧉​

꧋ꦮꦺꦴꦁꦤꦸꦩ꧀ꦥꦏ꧀ꦗꦫꦤ꧀ꦥꦸꦠꦶꦃ꧉​

¹¹꧋ꦲꦏꦸꦠꦼꦫꦸꦱ꧀ꦮꦼꦫꦸꦃꦱ꧀ꦮꦂꦒꦩꦼꦔ꧉​ꦲꦺꦤꦺꦁꦗꦫꦤ꧀ꦥꦸꦠꦶꦃ꧈​ꦢꦶꦠꦸꦩ꧀ꦥꦏ꧀ꦏꦶꦏꦫꦺꦴꦱꦶꦁꦢꦶꦗꦼꦤꦼꦁꦔꦏꦺꦱꦼꦠꦶꦪꦭꦤ꧀ꦚꦠ꧉​ꦢꦺꦏ꧀ꦤꦺꦱꦶꦁꦔꦿꦸꦠꦸꦭꦤ꧀ꦥꦼꦫꦁꦱꦏ꧀ꦧꦼꦤꦼꦂꦫꦺ꧉​ ¹²ꦩꦿꦶꦥꦠ꧀ꦠꦺ​ꦏꦪ​ꦒꦼꦤꦶ​ꦩꦸꦫꦸꦥ꧀꧈​ꦱꦶꦫꦃꦲꦺ​ꦔꦁꦒꦺꦴ​ꦩꦏꦸꦠꦲꦺꦴꦏꦺꦃ꧉​ꦭꦃ​ꦗꦼꦤꦼꦁ​ꦱꦶꦁ​ꦏꦼꦠꦸꦭꦶꦱ꧀ꦲꦶꦁ​ꦢꦺꦏ꧀ꦤꦺꦲꦺꦴꦫ​ꦲꦺꦤꦺꦁꦱꦶꦁ​ꦔꦼꦂꦠꦶ​꧈​ꦏꦼꦗꦧ​ꦤꦩꦸꦁ​ꦢꦺꦏ꧀ꦤꦺꦢꦺꦮꦺ꧉​ ¹³ꦥꦼꦔꦁꦒꦺꦴꦤꦺ​ꦱꦭꦶꦤ꧀ꦏꦼꦧꦼꦏ꧀ꦒꦼꦠꦶꦃ​ꦭꦤ꧀ꦗꦼꦤꦼꦁꦔꦺ​:ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁴ꦥꦫ​ꦱꦺꦴꦭ꧀ꦢꦠ꧀ꦠꦺꦱ꧀ꦮꦂꦒ​ꦥꦢ​ꦔꦼꦠꦸꦠ꧀ꦠꦏꦺꦭꦏꦸꦤꦺꦏꦫꦺꦴ​ꦤꦸꦩ꧀ꦥꦏ꧀ꦗꦫꦤ꧀ꦥꦸꦠꦶꦃ​ꦭꦤ꧀ꦔꦁꦒꦺꦴ​ꦱꦭꦶꦤ꧀ꦩꦺꦴꦫꦶ​ꦲꦭꦸꦱ꧀ꦥꦸꦠꦶꦃ​ꦉꦱꦶꦏ꧀꧈​ ¹⁵ꦕꦁꦏꦼꦩ꧀ꦩꦺ​ꦔꦼꦠꦺꦴꦏ꧀ꦏꦏꦺꦥꦼꦢꦁꦭꦤꦁꦲꦉꦥ꧀ꦏꦁꦒꦺꦴ​ꦩꦼꦤꦁꦔꦏꦺꦧꦁꦱꦧꦁꦱ​ꦱꦶꦁ​ꦲꦺꦴꦫ​ꦥꦽꦕꦪ​꧉​ꦢꦺꦏ꧀ꦤꦺꦧꦏꦭ꧀ꦔ꧀ꦮꦱꦤꦶ​ꦧꦁꦱꦧꦁꦱ​ꦔꦁꦒꦺꦴ​ꦠꦼꦏꦼꦤ꧀ꦮꦼꦱꦶ​ꦭꦤ꧀ꦧꦏꦭ꧀ꦔꦶꦢꦼꦏ꧀ꦲꦶꦢꦼꦏ꧀ꦧꦁꦱꦧꦁꦱ​ꦏꦪ​ꦤꦺꦏ꧀ꦔꦶꦢꦼꦏ꧀ꦲꦶꦢꦼꦏ꧀ꦢꦽꦲꦶꦥ꦳꧀ꦤꦁꦥꦼꦉꦱ꧀ꦱꦤ꧀ ꦪꦏꦸꦮꦶ​ꦤꦼꦱꦸꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧈​ꦱꦶꦁ​ꦔ꧀ꦒꦶꦭꦤ꧀ꦤꦶ꧉​ ¹⁶ꦤꦁꦱꦭꦶꦤ꧀ꦤꦺꦭꦤ꧀ꦤꦁꦥꦸꦥꦸꦤꦺ​ꦲꦺꦤꦺꦁꦗꦼꦤꦼꦁ​ꦏꦼꦠꦸꦭꦶꦱ꧀ ꦪꦏꦸꦮꦶ​:ꦫꦠꦸꦤꦺ​ꦥꦫ​ꦫꦠꦸ​ꦭꦤ꧀ꦒꦸꦱ꧀ꦠꦶꦤꦺ​ꦥꦫ​ꦒꦸꦱ꧀ꦠꦶ​꧉​

꧋ꦏꦺꦮꦤ꧀ꦭꦤ꧀ꦤꦧꦶꦤꦺ​ꦢꦶꦏꦭꦃꦲꦏꦺ꧉​

¹⁷꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦩꦸꦭꦺꦏꦠ꧀ꦔꦢꦼꦏ꧀ꦤꦁꦱꦽꦔꦺꦔꦺ​ꦭꦤ꧀ꦲꦩ꧀ꦧꦼꦔꦺꦴꦏ꧀ꦧꦤ꧀ꦠꦼꦂ​ꦩꦫꦁ​ꦱꦏ꧀ꦏꦺꦃꦲꦺꦩꦤꦸꦏ꧀ꦱꦶꦁ​ꦩꦧꦸꦂ​ꦤꦁꦲꦮꦁꦔꦮꦁ꧈​ꦠꦼꦩ꧀ꦧꦸꦁꦔꦺ​:“ꦩ꧀ꦧꦿꦺꦤꦺꦪ꧈​ꦥꦢ​ꦔ꧀ꦭꦸꦩ꧀ꦥꦸꦏ꧀ꦫꦺꦤꦺꦔ꧀ꦒꦸꦪꦸꦥ꧀ꦥꦶꦥꦺꦱ꧀ꦠ​ꦒꦼꦢꦺ꧈​ꦱꦶꦁ​ꦢꦶꦲꦤꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁸ꦥꦢꦩꦁꦔꦤꦢꦒꦶꦁꦔꦺꦥꦫꦫꦠꦸ꧈​ꦢꦒꦶꦁꦔꦺꦥꦫꦥꦼꦁꦒꦼꦢꦺꦤꦺꦥꦼꦫꦁꦭꦤ꧀ꦥꦫꦱꦺꦴꦭ꧀ꦢꦠ꧀ ꦢꦒꦶꦁꦔꦺꦗꦫꦤ꧀ꦗꦫꦤ꧀ꦭꦤ꧀ꦱꦶꦁꦥꦢꦤꦸꦩ꧀ꦥꦏ꧀ꦏꦶ꧈​ꦢꦒꦶꦁꦔꦺꦱꦏ꧀ꦏꦺꦃꦲꦺꦩꦤꦸꦁꦱ꧈​ꦒꦼꦢꦺꦕꦶꦭꦶꦏ꧀ ꦱ꧀ꦭꦥ꦳꧀ꦭꦤ꧀ꦮꦺꦴꦁꦩꦼꦂꦢꦺꦏ꧉​”

¹⁹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦏꦺꦮꦤꦺ​ꦭꦤ꧀ꦥꦫ​ꦫꦠꦸ​ꦥꦼꦥꦏ꧀ꦱꦏ꧀ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦠꦺꦏꦧꦺꦃ​꧈​ꦥꦢ​ꦔ꧀ꦭꦸꦩ꧀ꦥꦸꦏ꧀ꦲꦉꦥ꧀ꦥꦼꦫꦁ​ꦏꦫꦺꦴ​ꦮꦺꦴꦁꦔꦺ​ꦱꦶꦁ​ꦤꦸꦩ꧀ꦥꦏ꧀ꦗꦫꦤ꧀ꦥꦸꦠꦶꦃ​ꦭꦤ꧀ꦱꦏ꧀ꦧꦭꦤꦺ​ꦩꦲꦸ​꧉​ ²⁰ꦏꦺꦮꦤꦺ​ꦠꦼꦫꦸꦱ꧀ꦢꦶꦕꦼꦏꦼꦭ꧀ ꦲꦸꦒ​ꦤꦧꦶ​ꦥꦭ꧀ꦱꦸ​ꦱꦶꦁ​ꦮꦶꦱ꧀ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀ꦤꦁꦔꦉꦥ꧀ꦥꦺ​ꦏꦺꦮꦤ꧀ꦩꦲꦸ​꧉​ꦪ​ꦔꦁꦒꦺꦴ​ꦩꦸꦗꦶꦗꦠ꧀ꦩꦸꦗꦶꦗꦠ꧀ꦏꦸꦮꦶ​ꦏꦺꦮꦤ꧀ꦚꦤ꧀ꦢꦶꦁꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦤꦩ꧀ꦥ​ꦠꦼꦔꦼꦂꦫꦺ ꦏꦺꦮꦤ꧀ꦏꦸꦮꦶ​ꦭꦤ꧀ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦱꦸꦗꦸꦠ꧀ꦚꦼꦩ꧀ꦧꦃ​ꦉꦕꦤꦺ​꧉​ꦏꦺꦮꦤ꧀ꦭꦤ꧀ꦤꦧꦶ​ꦥꦭ꧀ꦱꦸ​ꦠꦼꦫꦸꦱ꧀ꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦲꦸꦫꦶꦥ꧀ꦲꦸꦫꦶꦥ꧀ꦥꦤ꧀ꦤꦁꦱꦼꦒꦫ​ꦒꦼꦤꦶ​ꦭꦶꦫꦁ​꧉​ ²¹ꦧꦭꦤꦺ​ꦥꦢ​ꦢꦶꦥꦠꦺꦤ꧀ꦤꦶ​ꦔꦁꦒꦺꦴ​ꦥꦼꦢꦁꦱꦶꦁ​ꦩꦼꦠꦸ​ꦱꦁꦏꦕꦁꦏꦼꦩ꧀ꦩꦺ​ꦮꦺꦴꦁ​ꦱꦶꦁ​ꦤꦸꦩ꧀ꦥꦏ꧀ꦗꦫꦤ꧀ꦥꦸꦠꦶꦃ​ꦩꦲꦸ​꧉​ꦩꦤꦸꦏ꧀ꦩꦤꦸꦏ꧀ꦠꦼꦫꦸꦱ꧀ꦥꦢ​ꦠꦼꦏ​ꦭꦤ꧀ꦩꦁꦔꦤ꧀ꦢꦒꦶꦁꦔꦺ​ꦱꦩ꧀ꦥꦺꦏ꧀ꦮꦫꦱ꧀ꦩꦸ꧉​

↑ ↑ ↑

꧋ꦏꦿꦠꦺꦴꦤ꧀ꦱꦶꦁ​ꦱꦺꦮꦸ​ꦠꦲꦸꦤ꧀꧈​

꧇​꧒꧐꧇​ ¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦲꦺꦤꦺꦁꦩꦸꦭꦺꦏꦠ꧀ꦩꦼꦢꦸꦤ꧀ꦱꦁꦏꦱ꧀ꦮꦂꦒ​꧉​ꦠꦔꦤ꧀ꦤꦺ​ꦚꦼꦏꦼꦭ꧀ꦏꦸꦚ꧀ꦕꦶꦤꦺ​ꦗꦸꦫꦁ​ꦥꦼꦠꦼꦁ​ꦭꦤ꧀ꦫꦤ꧀ꦠꦺ​ꦒꦼꦢꦺ꧉​ ²ꦩꦸꦭꦺꦏꦠ꧀ꦠꦺꦠꦼꦫꦸꦱ꧀ꦚꦼꦏꦼꦭ꧀ꦤꦒ​꧈​ꦪꦏꦸꦮꦶ​ꦆꦧ꧀ꦭꦶꦱ꧀ꦲꦥ​ꦱꦺꦠꦤ꧀꧈​ꦤꦒ​ꦠꦼꦫꦸꦱ꧀ꦢꦶꦫꦤ꧀ꦠꦺ​ꦱꦺꦮꦸ​ꦠꦲꦸꦤ꧀ꦱꦸꦮꦺꦤꦺ​꧉​ ³ꦢꦺꦏ꧀ꦤꦺꦢꦶꦪꦸꦚ꧀ꦕꦭ꧀ꦭꦏꦺ​ꦤꦁꦗꦸꦫꦁ​ꦥꦼꦠꦼꦁ​꧈​ꦠꦼꦫꦸꦱ꧀ꦢꦶꦠꦸꦠꦸꦥ꧀ꦭꦤ꧀ꦢꦶꦱꦺꦒꦼꦭ꧀ ꦱꦸꦥꦪ​ꦲꦺꦴꦫ​ꦚꦤ꧀ꦢꦶꦁꦥꦫ​ꦧꦁꦱ​ꦩꦼꦤꦺꦃ​ꦱꦏ꧀ꦢꦸꦫꦸꦁꦔꦺꦱꦺꦮꦸ​ꦠꦲꦸꦤ꧀ꦩꦲꦸ​ꦲꦼꦤ꧀ꦠꦺꦏ꧀꧈​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦤꦒ​ꦧꦏꦭ꧀ꦢꦶ​ꦲꦺꦕꦸꦭ꧀ꦭꦏꦺ​ꦩꦼꦤꦺꦃ​ꦱꦏ꧀ꦲꦸꦤ꧀ꦠꦂꦫ꧉​

⁴꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦢꦩ꧀ꦥꦂꦢꦩ꧀ꦥꦂ꧉​ꦱꦶꦁ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦢꦩ꧀ꦥꦂꦩꦲꦸ​ꦲꦺꦤ꧀ꦠꦸꦏ꧀ꦥꦔ꧀ꦮꦱ​ꦔꦿꦸꦠꦸ꧉​ꦲꦏꦸ​ꦲꦸꦒ​ꦮꦼꦫꦸꦃ​ꦚꦮꦤꦺ​ꦮꦺꦴꦁꦮꦺꦴꦁ​ꦱꦶꦁ​ꦢꦶꦏꦼꦠꦺꦴꦏ꧀ꦒꦸꦭꦸꦤꦺ​꧈​ꦗꦭꦂꦫꦤ꧀ꦥꦢ​ꦚꦼꦏ꧀ꦱꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦥꦢ​ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦢꦸꦫꦸꦁ​ꦠꦲꦸ​ꦱꦼꦩ꧀ꦧꦃꦱꦸꦗꦸꦠ꧀ꦩꦫꦁ​ꦏꦺꦮꦤ꧀ꦭꦤ꧀ꦩꦫꦁ​ꦉꦕꦤꦺ​ꦭꦤ꧀ꦲꦸꦒ​ꦲꦺꦴꦫ​ꦤꦩ꧀ꦥꦤꦶ​ꦠꦼꦔꦼꦂꦫꦺꦏꦺꦮꦤ꧀ꦤꦁꦧꦠꦸꦏ꧀ꦏꦺꦭꦤ꧀ꦤꦁꦠꦔꦤ꧀ꦤꦺ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦏꦧꦺꦃ​ꦲꦸꦫꦶꦥ꧀ꦩꦼꦤꦺꦃ​ꦭꦤ꧀ꦥꦢ​ꦩꦺꦭꦸ​ꦢꦢꦶ​ꦫꦠꦸ​ꦏꦫꦺꦴ​ꦏꦿꦶꦱ꧀ꦡꦸꦱ꧀ꦱꦺꦮꦸ​ꦠꦲꦸꦤ꧀ꦱꦸꦮꦺꦤꦺ​꧉​ ⁵ꦲꦶꦏꦶ​ꦥꦼꦠꦔꦺꦤ꧀ꦱꦁꦏꦥꦠꦶ​ꦱꦶꦁ​ꦱꦼꦥꦶꦱꦤ꧀ꦤꦤ꧀꧈​ꦤꦁꦔꦶꦁ​ꦮꦺꦴꦁꦮꦺꦴꦁ​ꦩꦠꦶ​ꦭꦶꦪꦤꦺ​ꦥꦢ​ꦲꦺꦴꦫ​ꦲꦸꦫꦶꦥ꧀ꦩꦼꦤꦺꦃ​ꦱꦏ꧀ꦢꦸꦫꦸꦁꦔꦺꦱꦺꦮꦸ​ꦠꦲꦸꦤ꧀ꦩꦲꦸ​ꦲꦼꦤ꧀ꦠꦺꦏ꧀꧈​ ⁶ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦢꦶꦠꦔꦺꦏ꧀ꦏꦏꦺꦲꦶꦁ​ꦥꦼꦠꦔꦺꦤ꧀ꦱꦶꦁ​ꦱꦼꦥꦶꦱꦤ꧀ꦤꦤ꧀ꦥꦚ꧀ꦕꦺꦤ꧀ꦧꦼꦗꦭꦤ꧀ꦏꦧꦼꦂꦏꦃꦲꦤ꧀ꦠꦼꦤꦤ꧀꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦴꦫ​ꦧꦏꦭ꧀ꦢꦶꦏ꧀ꦮꦱꦤꦶ​ꦏꦫꦺꦴ​ꦥꦠꦶ​ꦱꦶꦁ​ꦏꦥꦶꦤ꧀ꦢꦺꦴ꧈​ꦤꦁꦔꦶꦁ​ꦧꦏꦭ꧀ꦢꦢꦶ​ꦲꦶꦩꦩ꧀ꦲꦶꦩꦩ꧀ꦩꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦶꦩꦩ꧀ꦲꦶꦩꦩ꧀ꦩꦺ​ꦏꦿꦶꦱ꧀ꦡꦸꦱ꧀꧈​ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦥꦢ​ꦩꦺꦭꦸ​ꦏꦿꦶꦱ꧀ꦡꦸꦱ꧀ꦢꦢꦶ​ꦫꦠꦸ​ꦱꦺꦮꦸ​ꦠꦲꦸꦤ꧀ꦱꦸꦮꦺꦤꦺ​꧉​

꧋ꦱꦺꦠꦤ꧀ꦢꦶꦫꦩ꧀ꦥꦸꦁꦔꦏꦺ꧉​

⁷꧋ꦤꦺꦏ꧀ꦮꦶꦱ꧀ꦒꦼꦤꦼꦥ꧀ꦱꦺꦮꦸ​ꦠꦲꦸꦤ꧀ ꦱꦺꦠꦤ꧀​ꦧꦏꦭ꧀ꦢꦶ​ꦲꦺꦕꦸꦭ꧀ꦭꦏꦺ​ꦩꦼꦤꦺꦃ​ꦱꦁꦏꦱꦼꦠꦿꦥꦤ꧀ꦤꦺ꧉​ ⁸ꦱꦺꦠꦤ꧀ꦧꦏꦭ꧀ꦩꦼꦠꦸ​ꦭꦤ꧀ꦚꦤ꧀ꦢꦶꦁꦥꦫ​ꦧꦁꦱ​ꦤꦁꦱꦏ꧀ꦭꦸꦩꦃꦲꦺꦧꦸꦩꦶ​꧈​ꦪꦏꦸꦮꦶ​ꦓꦺꦴꦏ꧀ꦭꦤ꧀ꦩꦒꦺꦴꦏ꧀꧈​ꦧꦁꦱꦧꦁꦱ​ꦏꦧꦺꦃ​꧈​ꦲꦺꦴꦫ​ꦏꦼꦤꦺꦁꦢꦶꦲꦶꦠꦸꦁꦲꦺꦴꦏꦺꦃꦲꦺ꧈​ꦧꦏꦭ꧀ꦢꦶꦭꦸꦩ꧀ꦥꦸꦏ꧀ꦏꦏꦺꦏꦫꦺꦴ​ꦱꦺꦠꦤ꧀ ꦢꦶꦲꦼꦗꦺꦏ꧀ꦥꦼꦫꦁ​꧉​ ⁹ꦠꦼꦫꦸꦱ꧀ꦥꦢꦥꦼꦚ꧀ꦕꦂꦔ꧀ꦭꦸꦫꦸꦏ꧀ꦥꦼꦫꦁꦤꦁꦱꦏ꧀ꦗꦒꦠ꧀ꦏꦧꦺꦃ꧈​ꦠꦼꦫꦸꦱ꧀ꦥꦢꦤꦼꦥꦸꦁꦥꦁꦒꦺꦴꦤ꧀ꦤꦤ꧀ꦤꦺꦥꦫꦲꦸꦩꦠ꧀ꦠꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦏꦸꦠꦱꦶꦁꦢꦶꦠꦿꦺꦱ꧀ꦤꦤ꧀ꦤꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧉​ꦤꦁꦔꦶꦁꦠꦼꦫꦸꦱ꧀ꦲꦺꦤꦺꦁꦒꦼꦤꦶꦩꦼꦢꦸꦤ꧀ꦱꦁꦏꦭꦔꦶꦠ꧀ ꦩꦠꦺꦤ꧀ꦤꦶꦮꦺꦴꦁꦮꦺꦴꦁꦏꦸꦮꦶ꧉​ ¹⁰ꦭꦃ​ꦱꦺꦠꦤ꧀​꧈​ꦱꦶꦁ​ꦚꦤ꧀ꦢꦶꦁꦮꦺꦴꦁꦮꦺꦴꦁ​꧈​ꦠꦼꦫꦸꦱ꧀ꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦱꦼꦒꦫ​ꦒꦼꦤꦶ​ꦭꦤ꧀ꦭꦶꦫꦁ​꧈​ꦪꦏꦸꦮꦶ​ꦥꦁꦒꦺꦴꦤ꧀ꦤꦤ꧀ꦤꦺ​ꦏꦺꦮꦤ꧀ꦭꦤ꧀ꦤꦧꦶ​ꦥꦭ꧀ꦱꦸ​꧉​ꦤꦁꦏꦺꦴꦤꦺꦴ​ꦧꦏꦭ꧀ꦥꦢ​ꦔꦿꦱꦏ꧀ꦏꦏꦺ​ꦭꦫ​ꦄꦮꦤ꧀ꦮꦼꦔꦶ꧈​ꦱꦭꦮꦱ꧀ꦭꦮꦱ꧀ꦱꦺ​꧉​

꧋ꦏꦿꦸꦠꦺꦴꦤ꧀ꦲꦶꦁ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀꧈​

¹¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦢꦩ꧀ꦥꦂꦒꦼꦢꦺꦥꦸꦠꦶꦃ​ꦭꦤ꧀ꦱꦶꦁ​ꦚ꧀ꦗꦒꦺꦴꦁꦔꦶꦢꦩ꧀ꦥꦂꦏꦸꦮꦶ​꧉​ꦧꦸꦩꦶ​ꦭꦤ꧀ꦭꦔꦶꦠ꧀ꦥꦢ​ꦲꦶꦭꦁ​ꦱꦁꦏꦔꦉꦥ꧀ꦥꦺ​ꦭꦤ꧀ꦮꦶꦱ꧀ꦲꦺꦴꦫ​ꦏꦺꦠꦺꦴꦏ꧀ꦩꦼꦤꦺꦃ​꧉​ ¹²ꦲꦏꦸꦠꦼꦫꦸꦱ꧀ꦮꦼꦫꦸꦃꦮꦺꦴꦁꦮꦺꦴꦁꦱꦶꦁꦮꦶꦱ꧀ꦥꦢꦩꦠꦶ꧈​ꦒꦼꦢꦺꦕꦶꦭꦶꦏ꧀ ꦥꦢꦔꦢꦼꦏ꧀ꦤꦁꦔꦉꦥ꧀ꦥꦺꦢꦩ꧀ꦥꦂꦫꦺ꧉​ꦤꦁꦏꦺꦴꦤꦺꦴꦲꦺꦤꦺꦁꦧꦸꦏꦸꦧꦸꦏꦸꦱꦶꦁꦮꦶꦱ꧀ꦏꦼꦧꦸꦏꦏ꧀ ꦠꦼꦫꦸꦱ꧀ꦲꦺꦤꦺꦁꦧꦸꦏꦸꦭꦶꦪꦤꦺꦢꦶꦧꦸꦏꦏ꧀ ꦪꦏꦸꦮꦶꦧꦸꦏꦸꦥꦔꦸꦫꦶꦥ꧀ꦥꦤ꧀꧈​ꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦢꦶꦏꦿꦸꦠꦸꦩꦶꦠꦸꦫꦸꦠ꧀ꦥꦼꦁꦒꦮꦺꦤꦺꦏꦪꦱꦶꦁꦏꦼꦠꦸꦭꦶꦱ꧀ꦤꦁꦧꦸꦏꦸꦧꦸꦏꦸꦩꦲꦸ꧉​ ¹³ꦱꦼꦒꦫ​ꦩꦱꦿꦃꦲꦏꦺꦮꦺꦴꦁꦮꦺꦴꦁ​ꦩꦠꦶ​ꦱꦶꦁ​ꦤꦁꦚ꧀ꦗꦼꦫꦺꦴꦤꦺ​꧉​ꦥꦼꦁꦒꦼꦢꦺꦤꦺꦥꦠꦶ​ꦭꦤ꧀ꦏꦿꦠꦺꦴꦤꦺ​ꦥꦠꦶ​ꦲꦸꦒ​ꦥꦢ​ꦩꦱꦿꦃꦲꦏꦺꦮꦺꦴꦁꦮꦺꦴꦁ​ꦩꦠꦶ​꧉​ꦮꦺꦴꦁꦮꦺꦴꦁ​ꦩꦲꦸ​ꦏꦧꦺꦃ​ꦥꦢ​ꦢꦶꦏꦿꦸꦠꦸꦩꦶꦠꦸꦫꦸꦠ꧀ꦥꦼꦁꦒꦮꦺꦤꦺ​ꦢꦺꦮꦺꦢꦺꦮꦺ꧉​ ¹⁴ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦥꦠꦶ​ꦭꦤ꧀ꦏꦿꦠꦺꦴꦤꦺ​ꦥꦠꦶ​ꦠꦼꦫꦸꦱ꧀ꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦱꦼꦒꦫ​ꦒꦼꦤꦶ​꧉​ꦱꦼꦒꦫ​ꦒꦼꦤꦶ​ꦏꦸꦮꦶ​ꦢꦶꦲꦫꦤ꧀ꦤꦶ​ꦥꦠꦶ​ꦱꦶꦁ​ꦏꦥꦶꦤ꧀ꦢꦺꦴ꧉​ ¹⁵ꦱꦥ​ꦱꦶꦁ​ꦗꦼꦤꦼꦁꦔꦺ​ꦲꦺꦴꦫ​ꦏꦼꦠꦸꦭꦶꦱ꧀ꦤꦁꦧꦸꦏꦸ​ꦥꦔꦸꦫꦶꦥ꧀ꦥꦤ꧀ꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦱꦼꦒꦫ​ꦒꦼꦤꦶ​ꦏꦸꦮꦶ​꧉​

↑ ↑ ↑

꧋ꦭꦔꦶꦠ꧀ꦲꦚꦂ​ꦭꦤ꧀ꦧꦸꦩꦶ​ꦲꦚꦂ​꧉​

꧇​꧒꧑꧇​ ¹꧋ꦲꦏꦸ​ꦠꦼꦫꦸꦱ꧀ꦮꦼꦫꦸꦃ​ꦭꦔꦶꦠ꧀ꦭꦤ꧀ꦧꦸꦩꦶ​ꦲꦚꦂ​꧉​ꦭꦔꦶꦠ꧀ꦱꦶꦁ​ꦤ꧀ꦢꦶꦱꦶꦏ꧀ꦭꦤ꧀ꦧꦸꦩꦶ​ꦱꦶꦁ​ꦤ꧀ꦢꦶꦱꦶꦏ꧀ꦮꦶꦱ꧀ꦲꦺꦴꦫ​ꦲꦺꦤꦺꦁꦭꦤ꧀ꦱꦼꦒꦫ​ꦪ​ꦮꦶꦱ꧀ꦲꦺꦴꦫ​ꦲꦺꦤꦺꦁ꧉​ ²ꦲꦏꦸꦲꦸꦒꦮꦼꦫꦸꦃꦏꦸꦠꦱꦸꦕꦶ꧈​ꦪꦺꦫꦸꦱꦭꦺꦩ꧀ꦱꦶꦁꦲꦚꦂ꧈​ꦩꦼꦢꦸꦤ꧀ꦱꦁꦏꦱ꧀ꦮꦂꦒ꧈​ꦱꦁꦏꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧉​ꦏꦸꦠꦩꦲꦸꦢꦶꦥꦕꦏ꧀ꦏꦶꦏꦪꦩꦤ꧀ꦠꦺꦤ꧀ꦮꦺꦢꦺꦴꦏ꧀ꦱꦶꦁꦢꦶꦥꦕꦏ꧀ꦏꦶꦲꦉꦥ꧀ꦢꦶꦠꦼꦩꦺꦴꦏ꧀ꦏꦏꦺꦏꦫꦺꦴꦩꦤ꧀ꦠꦺꦤ꧀ꦭꦤꦁ꧉​ ³ꦲꦏꦸꦠꦼꦫꦸꦱ꧀ꦏꦿꦸꦔꦸꦱ꧀ꦮꦫꦧꦤ꧀ꦠꦼꦂꦱꦁꦏꦢꦩ꧀ꦥꦂꦩꦲꦸ꧈​ꦠꦼꦩ꧀ꦧꦸꦁꦔꦺ:“ꦱꦲꦶꦏꦶꦒꦸꦱ꧀ꦠꦶꦄꦭ꧀ꦭꦃꦩꦁꦒꦺꦴꦤ꧀ꦤꦁꦠꦼꦔꦃꦲꦺꦩꦤꦸꦁꦱ!ꦢꦺꦏ꧀ꦤꦺꦧꦏꦭ꧀ꦩꦁꦒꦺꦴꦤ꧀ꦢꦢꦶꦱꦶꦗꦶꦏꦫꦺꦴꦩꦤꦸꦁꦱ꧉​ꦮꦺꦴꦁꦮꦺꦴꦁꦧꦏꦭ꧀ꦢꦢꦶꦲꦸꦩꦠ꧀ꦠꦺꦭꦤ꧀ꦢꦺꦏ꧀ꦤꦺꦢꦢꦶꦒꦸꦱ꧀ꦠꦶꦄꦭ꧀ꦭꦃꦲꦺ꧉​ ⁴ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦸꦱꦥ꧀ꦥꦶ​ꦱꦏ꧀ꦏꦺꦃꦲꦺꦲꦼꦭꦸꦃ​ꦱꦁꦏꦩꦿꦶꦥꦠ꧀ꦠꦺ​ꦲꦸꦩꦠ꧀ꦠꦺ​꧉​ꦥꦠꦶ​ꦮꦶꦱ꧀ꦧꦏꦭ꧀ꦲꦺꦴꦫ​ꦲꦺꦤꦺꦁꦩꦼꦤꦺꦃ​꧉​ꦏꦱꦸꦱꦃꦲꦤ꧀ ꦠꦔꦶꦱ꧀ꦭꦤ꧀ꦊꦭꦫ​ꦲꦸꦒ​ꦧꦏꦭ꧀ꦲꦺꦴꦫ​ꦲꦺꦤꦺꦁ꧉​ꦱꦼꦩ꧀ꦧꦫꦁ​ꦱꦶꦁ​ꦭꦮꦱ꧀ꦮꦶꦱ꧀ꦲꦶꦭꦁ​꧉​”

⁵꧋ꦱꦶꦁ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦠꦼꦫꦸꦱ꧀ꦔꦺꦴꦩꦺꦴꦁ:“ꦱꦼꦩ꧀ꦧꦫꦁ​ꦏꦧꦺꦃ​ꦠꦏ꧀ꦢꦢꦺꦏ꧀ꦏꦏꦺꦲꦚꦂ​!”ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦲꦏꦸ​:“ꦢꦶꦠꦸꦭꦶꦱ꧀ ꦲꦮꦶꦠ꧀ꦠꦼꦩ꧀ꦧꦸꦁ​ꦲꦶꦏꦶ​ꦚꦠ​ꦭꦤ꧀ꦏꦼꦤꦺꦁꦢꦶꦥꦽꦕꦪ​!” ⁶ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:“ꦱꦼꦩ꧀ꦧꦫꦁ​ꦏꦧꦺꦃ​ꦮꦶꦱ꧀​ꦏ꧀ꦭꦏꦺꦴꦤ꧀꧈​ꦲꦏꦸ​ꦲꦶꦏꦶ​ꦄꦭ꧀ꦥ꦳ꦃꦭꦤ꧀ꦎꦩꦺꦏꦃ꧈​ꦮꦶꦮꦶꦠ꧀ꦠꦤ꧀ꦤꦺ​ꦭꦤ꧀ꦥꦼꦤꦸꦠꦸꦥ꧀ꦥꦺ꧉​ꦮꦺꦴꦁ​ꦱꦶꦁ​ꦔꦼꦭꦏ꧀ꦧꦏꦭ꧀ꦠꦏ꧀ꦏꦺꦏ꧀ꦏꦶꦔꦺꦴꦩ꧀ꦧꦺ​ꦱꦁꦏꦲꦼꦠꦸꦏ꧀ꦏꦺ​ꦧꦚꦸ​ꦥꦔꦸꦫꦶꦥ꧀ꦥꦤ꧀ ꦠꦤ꧀ꦥ​ꦲꦩ꧀ꦧꦪꦂ​꧉​ ⁷ꦱꦥꦱꦶꦁꦩꦤ꧀ꦠꦼꦥ꧀ꦥꦼꦔꦤ꧀ꦢꦼꦭ꧀ꦭꦺꦧꦏꦭ꧀ꦤꦩ꧀ꦥꦏꦸꦮꦶꦏꦧꦺꦃꦱꦁꦏꦲꦏꦸꦭꦤ꧀ꦲꦏꦸꦧꦏꦭ꧀ꦢꦢꦶꦒꦸꦱ꧀ꦠꦶꦄꦭ꧀ꦭꦃꦲꦺꦭꦤ꧀ꦢꦺꦏ꧀ꦤꦺꦧꦏꦭ꧀ꦢꦢꦶꦲꦤꦏ꧀ꦏꦸ꧉​ ⁸ꦤꦁꦔꦶꦁ​ꦮꦺꦴꦁ​ꦱꦶꦁ​ꦮꦼꦢꦶ​꧈​ꦮꦺꦴꦁ​ꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦗꦒꦏ꧀ꦏꦏꦺ꧈​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦱꦶꦁ​ꦲꦭ​꧈​ꦱꦶꦁ​ꦠꦸꦏꦁ​ꦩꦠꦺꦤ꧀ꦤꦶ​ꦮꦺꦴꦁ​꧈​ꦱꦶꦁ​ꦭꦏꦸ​ꦧꦺꦢꦁ꧈​ꦱꦶꦁ​ꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱ​ꦥꦼꦥꦼꦠꦼꦁ​꧈​ꦱꦶꦁ​ꦚꦼꦩ꧀ꦧꦃ​ꦧꦿꦲꦭ​ꦭꦤ꧀ꦮꦺꦴꦁ​ꦏꦧꦺꦃ​ꦱꦶꦁ​ꦠꦸꦏꦁ​ꦔꦥꦸꦱ꧀ꦱꦶ​꧈​ꦏꦸꦮꦶ​ꦏꦧꦺꦃ​ꦧꦏꦭ꧀ꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦱꦼꦒꦫ​ꦒꦼꦤꦶ​ꦭꦤ꧀ꦭꦶꦫꦁ​ꦱꦶꦁ​ꦩꦸꦫꦸꦥ꧀꧈​ꦏꦸꦮꦶ​ꦥꦠꦶ​ꦱꦶꦁ​ꦏꦥꦶꦤ꧀ꦢꦺꦴ꧉​”

꧋ꦏꦸꦠꦪꦺꦫꦸꦱꦭꦺꦩ꧀ꦱꦶꦁ​ꦲꦚꦂ​꧉​

⁹꧋ꦱꦭꦃꦱꦏ꧀ꦮꦶꦗꦶꦤꦺꦩꦸꦭꦺꦏꦠ꧀ꦥꦶꦠꦸ​ꦱꦶꦁ​ꦔ꧀ꦒꦮ​ꦩꦁꦏꦺꦴꦏ꧀ꦱꦶꦁ​ꦏꦼꦧꦼꦏ꧀ꦏꦫꦺꦴ​ꦩꦼꦩꦭ​ꦥꦶꦠꦸ​ꦱꦶꦁ​ꦏꦺꦫꦶ​꧈​ꦠꦼꦏ​ꦭꦤ꧀ꦔꦺꦴꦩꦺꦴꦁꦩꦫꦁ​ꦲꦏꦸ​:“ꦩ꧀ꦧꦿꦺꦤꦺꦪ!ꦫꦺꦤꦺꦠꦏ꧀ꦢꦸꦢꦸꦃꦲꦶꦩꦤ꧀ꦠꦺꦤ꧀ꦮꦺꦢꦺꦴꦏ꧀ ꦧꦺꦴꦗꦺꦴꦤꦺ​ꦕꦼꦩ꧀ꦥꦺꦤꦺ​꧉​” ^10-11ꦲꦏꦸ​ꦠꦼꦫꦸꦱ꧀ꦢꦶꦏ꧀ꦮꦱꦤꦶ​ꦏꦫꦺꦴ​ꦫꦺꦴꦃꦲꦺ​ꦄꦭ꧀ꦭꦃ​꧈​ꦠꦼꦫꦸꦱ꧀ꦢꦶꦒꦮ​ꦏꦫꦺꦴ​ꦩꦸꦭꦺꦏꦠ꧀ꦩꦲꦸ​ꦤꦁꦥꦸꦕꦸꦏ꧀ꦏꦺ​ꦒꦸꦤꦸꦁ​ꦱꦶꦁ​ꦢꦸꦮꦸꦂꦧꦔꦼꦠ꧀꧈​ꦲꦏꦸ​ꦢꦶꦢꦸꦢꦸꦃꦲꦶꦏꦸꦠꦪꦺꦫꦸꦱꦭꦺꦩ꧀ꦱꦶꦁ​ꦱꦸꦕꦶ​ꦩꦼꦢꦸꦤ꧀ꦱꦁꦏꦱ꧀ꦮꦂꦒ​꧈​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦼꦧꦼꦏ꧀ꦏꦫꦺꦴ​ꦏꦭꦸꦲꦸꦂꦫꦤ꧀ꦭꦤ꧀ꦱ꧀ꦭꦺꦴꦫꦺꦴꦠ꧀ꦠꦺꦏꦩꦸꦭꦾꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦸꦠꦩꦲꦸ​ꦒꦶꦭꦥ꧀ꦥꦺꦏꦪ​ꦮꦠꦸ​ꦭꦫꦁ​ꦪꦱ꧀ꦥꦶꦱ꧀ꦭꦤ꧀ꦧꦼꦤꦶꦁ​ꦏꦪ​ꦏꦿꦶꦱ꧀ꦠꦭ꧀꧈​ ¹²ꦠꦺꦩ꧀ꦧꦺꦴꦏ꧀ꦏꦺ​ꦒꦼꦢꦺꦭꦤ꧀ꦢꦸꦮꦸꦂ꧈​ꦒꦥꦸꦫꦤꦺ​ꦫꦺꦴꦭꦱ꧀ꦭꦤ꧀ꦢꦶꦗꦒ​ꦩꦸꦭꦺꦏꦠ꧀ꦫꦺꦴꦭꦱ꧀꧈​ꦤꦁꦒꦥꦸꦫꦤꦺ​ꦏꦼꦠꦸꦭꦶꦱ꧀ꦗꦼꦤꦼꦁꦔꦺ​ꦠꦊꦂꦫꦺ​ꦧꦁꦱ​ꦆꦱꦿꦌꦭ꧀ꦫꦺꦴꦭꦱ꧀꧈​ ¹³ꦤꦁꦱꦼꦧꦼꦭꦃꦮꦺꦠꦤ꧀ꦲꦺꦤꦺꦁꦒꦥꦸꦫꦤꦺ​ꦠꦼꦭꦸ​꧈​ꦤꦁꦭꦺꦴꦂꦠꦼꦭꦸ​꧈​ꦤꦁꦏꦶꦢꦸꦭ꧀ꦠꦼꦭꦸ​ꦭꦤ꧀ꦤꦁꦏꦸꦭꦺꦴꦤ꧀ꦠꦼꦭꦸ​꧉​ ¹⁴ꦠꦺꦩ꧀ꦧꦺꦴꦏ꧀ꦏꦺ​ꦏꦸꦠꦏꦸꦮꦶ​ꦩꦸꦧꦼꦁ​ꦔꦁꦒꦺꦴ​ꦥꦺꦴꦤ꧀ꦢꦱꦶꦮꦠꦸ​ꦫꦺꦴꦭꦱ꧀꧈​ꦤꦁꦮꦠꦸꦮꦠꦸ​ꦩꦲꦸ​ꦏꦼꦠꦸꦭꦶꦱ꧀ꦗꦼꦤꦼꦁꦗꦼꦤꦼꦁꦔꦺ​ꦫꦱꦸꦭ꧀ꦫꦱꦸꦭ꧀ꦕꦼꦩ꧀ꦥꦺꦤꦺ​꧈​ꦕꦕꦃꦲꦺ​ꦫꦺꦴꦭꦱ꧀꧈​ ¹⁵ꦩꦸꦭꦺꦏꦠ꧀ꦱꦶꦁ​ꦔꦺꦴꦩꦺꦴꦁꦩꦫꦁ​ꦲꦏꦸ​ꦩꦲꦸ​ꦔ꧀ꦒꦮ​ꦲꦸꦏꦸꦂꦫꦤ꧀ꦲꦼꦩꦱ꧀ ꦏꦁꦒꦺꦴ​ꦔꦸꦏꦸꦂ​ꦏꦸꦠ꧈​ꦒꦥꦸꦫ​ꦭꦤ꧀ꦠꦺꦩ꧀ꦧꦺꦴꦏ꧀ꦏꦺ​ꦩꦸꦧꦼꦁ​꧉​ ¹⁶ꦏꦸꦠꦩꦲꦸ​ꦢꦮꦤꦺ​ꦥꦢ​ꦏꦫꦺꦴ​ꦲꦩ꧀ꦧꦤꦺ​ꦭꦤ꧀ꦢꦸꦮꦸꦂꦫꦺ꧉​ꦢꦮꦤꦺ​ꦏꦸꦠꦤꦺꦢꦶꦲꦸꦏꦸꦂ​ꦲꦺꦤꦺꦁ2.400ꦏꦶꦭꦺꦴꦩꦺꦠꦼꦂ​꧉​ꦲꦩ꧀ꦧꦤꦺ​ꦭꦤ꧀ꦢꦸꦮꦸꦂꦫꦺꦥꦢ​ꦏꦫꦺꦴ​ꦢꦮꦤꦺ​꧉​ ¹⁷ꦏꦢꦸꦁ​ꦔꦸꦏꦸꦂ​ꦠꦺꦩ꧀ꦧꦺꦴꦏ꧀ꦏꦺ​ꦩꦸꦧꦼꦁ​ꦢꦸꦮꦸꦂꦫꦺꦲꦺꦤꦺꦁ꧇꧖꧐꧇​ꦩꦺꦠꦼꦂ​꧉​ꦩꦸꦭꦺꦏꦠ꧀ꦠꦺꦔꦁꦒꦺꦴꦏ꧀ꦏꦏꦺꦲꦸꦏꦸꦂꦫꦤ꧀ꦤꦺ​ꦩꦤꦸꦁꦱ​꧉​ ¹⁸ꦠꦺꦩ꧀ꦧꦺꦴꦏ꧀ꦩꦸꦧꦼꦁ​ꦩꦲꦸ​ꦒꦮꦺꦪꦤ꧀ꦮꦠꦸ​ꦭꦫꦁ​ꦪꦱ꧀ꦥꦶꦱ꧀ ꦏꦸꦠꦤꦺꦲꦼꦩꦱ꧀ꦠꦸꦭꦺꦤ꧀ ꦧꦼꦤꦶꦁꦔꦺ​ꦏꦪ​ꦏꦕ​꧉​ ^19-20ꦥꦺꦴꦤ꧀ꦢꦱꦶꦤꦺꦠꦺꦩ꧀ꦧꦺꦴꦏ꧀ꦩꦸꦧꦼꦁ​ꦢꦶꦥꦱꦁꦔꦶ​ꦮꦠꦸ​ꦭꦫꦁ​ꦮꦼꦂꦤꦮꦼꦂꦤ​꧉​ꦥꦺꦴꦤ꧀ꦢꦱꦶꦱꦶꦁ​ꦱꦼꦥꦶꦱ꧀ꦱꦤ꧀ꦏꦸꦮꦶ​ꦪꦱ꧀ꦥꦶꦱ꧀ ꦱꦶꦁ​ꦥꦶꦤ꧀ꦢꦺꦴꦱꦥ꦳ꦶꦂ​꧈​ꦱꦶꦁ​ꦠꦼꦭꦸ​ꦲꦏꦠ꧀ ꦱꦶꦁ​ꦥꦥꦠ꧀ꦱ꧀ꦩꦫꦏ꧀ ꦱꦶꦁ​ꦭꦶꦩ​ꦲꦺꦴꦤꦶꦏ꧀ ꦱꦶꦁ​ꦤꦼꦤꦼꦩ꧀ꦏꦺꦴꦂꦤꦭꦶꦤ꧀ ꦱꦶꦁ​ꦥꦶꦠꦸ​ꦏꦿꦶꦱꦺꦴꦭꦶꦠ꧀ ꦱꦶꦁ​ꦮꦺꦴꦭꦸ​ꦲꦏ꧀ꦮꦩꦫꦶꦤ꧀ ꦱꦶꦁ​ꦱꦔ​ꦠꦺꦴꦥꦱ꧀ ꦱꦶꦁ​ꦱꦼꦥꦸꦭꦸꦃ​ꦏꦿꦶꦱꦺꦴꦥꦿꦱ꧀ ꦱꦶꦁ​ꦱꦼꦮꦼꦭꦱ꧀ꦠꦸꦂꦏꦶꦱ꧀ ꦱꦶꦁ​ꦫꦺꦴꦭꦱ꧀ꦲꦩꦼꦠꦶꦱ꧀꧈​ ²¹ꦒꦥꦸꦫ​ꦫꦺꦴꦭꦱ꧀ꦒꦮꦺꦪꦤ꧀ꦤꦺ​ꦱꦁꦏꦥꦉꦭ꧀ꦫꦺꦴꦭꦱ꧀꧈​ꦒꦥꦸꦫ​ꦱꦶꦗꦶ​ꦏꦸꦮꦶ​ꦮꦸꦗꦸꦠ꧀ꦥꦉꦭ꧀ꦱꦶꦗꦶ​꧉​ꦭꦃ​ꦢꦭꦤ꧀ꦢꦭꦤ꧀ꦤꦺ​ꦏꦸꦠꦒꦮꦺꦪꦤ꧀ꦱꦁꦏꦲꦼꦩꦱ꧀ꦠꦸꦭꦺꦤ꧀ ꦧꦼꦤꦶꦁꦔꦺ​ꦏꦪ​ꦏꦕ​꧉​

²²꧋ꦤꦁꦏꦸꦠꦏꦺꦴꦤꦺꦴ​ꦲꦏꦸ​ꦲꦺꦴꦫ​ꦮꦼꦫꦸꦃ​ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦪ​ꦒꦸꦱ꧀ꦠꦶ​ꦢꦺꦮꦺ꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺꦭꦤ꧀ꦕꦼꦩ꧀ꦥꦺꦤꦺ​꧉​ ²³ꦏꦸꦠꦏꦸꦮꦶ​ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦥꦼꦥꦢꦁꦔꦺꦱꦽꦔꦺꦔꦺ​ꦲꦥ​ꦩ꧀ꦧꦸꦭꦤ꧀ ꦲꦮꦶꦠ꧀ꦱꦶꦁ​ꦩꦢꦁꦔꦶꦱ꧀ꦭꦺꦴꦫꦺꦴꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦭꦤ꧀ꦕꦼꦩ꧀ꦥꦺꦤꦺ​ꦱꦶꦁ​ꦢꦢꦶ​ꦲꦺꦴꦧꦺꦴꦂꦫꦺ​꧉​ ²⁴ꦥꦫ​ꦧꦁꦱ​ꦤꦁꦧꦸꦩꦶ​ꦧꦏꦭ꧀ꦥꦢ​ꦩ꧀ꦭꦏꦸ​ꦤꦁꦥꦼꦥꦢꦁꦔꦺꦭꦤ꧀ꦥꦫ​ꦫꦠꦸꦤꦺ​ꦧꦸꦩꦶ​ꦧꦏꦭ꧀ꦥꦢ​ꦔ꧀ꦒꦮ​ꦏꦱꦸꦒꦶꦃꦲꦤ꧀ꦤꦺ​ꦤꦁꦏꦸꦠꦏꦺꦴꦤꦺꦴ​꧉​ ²⁵ꦒꦥꦸꦫꦤꦺ​ꦏꦸꦠꦤꦺꦧꦏꦭ꧀ꦩꦼꦔ​ꦠꦼꦫꦸꦱ꧀ꦲꦶꦁ​ꦮꦪꦃ​ꦲꦮꦤ꧀ꦭꦤ꧀ꦲꦺꦴꦫ​ ꦧꦏꦭ꧀ꦢꦶꦠꦸꦠꦸꦥ꧀ꦩꦼꦤꦺꦃ​꧈​ꦲꦮꦶꦠ꧀ꦲꦺꦴꦫ​ꦧꦏꦭ꧀ꦲꦺꦤꦺꦁꦮꦼꦔꦶ​ꦩꦼꦤꦺꦃ​꧉​ ²⁶ꦏꦩꦸꦭꦾꦤꦺ​ꦭꦤ꧀ꦏꦱꦸꦒꦶꦃꦲꦤ꧀ꦤꦺ​ꦧꦁꦱꦧꦁꦱ​ꦧꦏꦭ꧀ꦏꦒꦮ​ꦩ꧀ꦊꦧꦸ​ꦤꦁꦏꦸꦠꦏꦺꦴꦤꦺꦴ​꧉​ ²⁷ꦤꦁꦔꦶꦁ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦥꦼꦁꦒꦮꦺ​ꦲꦭ​ꦭꦤ꧀ꦮꦺꦴꦁ​ꦱꦶꦁ​ꦱꦼꦤꦼꦁ​ꦔꦥꦸꦱ꧀ꦱꦶ​ꦲꦺꦴꦫ​ꦲꦺꦤ꧀ꦠꦸꦏ꧀​ꦩ꧀ꦊꦧꦸ​ꦩ꧀ꦧꦿꦺꦴꦤꦺꦴ꧈​ꦠꦼꦒꦼꦱ꧀ꦱꦺ​ꦱꦼꦩ꧀ꦧꦫꦁ​ꦱꦶꦁ​ꦉꦒꦼꦠ꧀​ꦧ꧀ꦭꦱ꧀ꦲꦺꦴꦫ​ꦏꦼꦤꦺꦁꦢꦶꦒꦮ​ꦩ꧀ꦊꦧꦸ​ꦩ꧀ꦧꦿꦺꦴꦤꦺꦴ꧉​ꦤꦩꦸꦁ​ꦮꦺꦴꦁꦮꦺꦴꦁ​ꦱꦶꦁ​ꦗꦼꦤꦼꦁꦔꦺ​ꦏꦼꦠꦸꦭꦶꦱ꧀ꦤꦁꦧꦸꦏꦸ​ꦥꦔꦸꦫꦶꦥ꧀ꦥꦤ꧀ꦤꦺ​ꦕꦼꦩ꧀ꦥꦺꦤꦺ​ꦱꦶꦁ​ꦧꦶꦱ​ꦩ꧀ꦊꦧꦸ​꧉​

↑ ↑ ↑

 

꧇​꧒꧒꧇​ ¹꧋ꦩꦸꦭꦺꦏꦠ꧀ꦩꦲꦸ​ꦲꦸꦒ​ꦤ꧀ꦢꦸꦢꦸꦃꦲꦶꦲꦏꦸ​ꦭꦫꦱꦶꦁ​ꦧꦚꦸꦤꦺ​ꦧꦼꦤꦶꦁ​ꦏꦪ​ꦏꦿꦶꦱ꧀ꦠꦭ꧀ ꦪꦏꦸꦮꦶ​ꦧꦚꦸ​ꦥꦔꦸꦫꦶꦥ꧀ꦥꦤ꧀꧈​ꦭꦫꦩꦲꦸ​ꦩꦼꦠꦸ​ꦱꦁꦏꦢꦩ꧀ꦥꦂꦫꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦕꦼꦩ꧀ꦥꦺꦤꦺ​꧈​ꦠꦼꦫꦸꦱ꧀ꦩꦶꦭꦶ​ꦤꦁꦱꦏ꧀ꦠꦼꦔꦃꦲꦺ​ꦢꦭꦤ꧀ꦢꦭꦤ꧀ꦤꦁꦏꦸꦠꦏꦺꦴꦤꦺꦴ​꧉​ ²ꦤꦁꦱꦏ꧀ꦏꦶꦮꦠꦼꦔꦼꦤ꧀ꦤꦺ​ꦭꦠ꧀ꦲꦺꦤꦺꦁꦮꦶꦠ꧀ꦮꦶꦠ꧀ꦏꦲꦸꦫꦶꦥ꧀ꦥꦤ꧀ꦱꦶꦁ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦥꦶꦁ​ꦫꦺꦴꦭꦱ꧀ꦱꦏ꧀ꦗꦼꦫꦺꦴꦤꦺꦱꦼꦠꦲꦸꦤ꧀ ꦱꦼꦱꦱꦶ​ꦱꦼꦥꦶꦱ꧀ꦱꦤ꧀꧈​ꦒꦺꦴꦢꦺꦴꦁꦔꦺ​ꦢꦶꦲꦼꦁꦒꦺꦴ​ꦤꦩ꧀ꦧꦤꦶ​ꦥꦫ​ꦧꦁꦱ​꧉​ ³ꦤꦁꦏꦸꦠꦏꦺꦴꦤꦺꦴ​ꦲꦺꦴꦫ​ꦲꦺꦤꦺꦁꦧꦫꦁ​ꦱꦶꦁ​ꦏꦼꦤꦺꦁꦠꦼꦩ꧀ꦧꦸꦁ​ꦤꦼꦱꦸꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦢꦩ꧀ꦥꦂꦫꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦕꦼꦩ꧀ꦥꦺꦤꦺ​ꦧꦏꦭ꧀ꦤꦁꦠꦼꦔꦃꦲꦺ​ꦏꦸꦠꦏꦺꦴꦤꦺꦴ​꧉​ꦥꦫ​ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦥꦢ​ꦔꦧꦼꦏ꧀ꦠꦶ​ꦩꦫꦁ​ꦢꦺꦏ꧀ꦤꦺꦭꦤ꧀ꦧꦏꦭ꧀ꦥꦢ​ꦚꦮꦁ​ꦫꦲꦶꦤꦺ​꧉​ ⁴ꦧꦠꦸꦏ꧀ꦏꦺꦧꦏꦭ꧀ꦥꦢ​ꦢꦶꦲꦼꦕꦥ꧀ꦏꦫꦺꦴ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁵ꦤꦁꦏꦺꦴꦤꦺꦴ​ꦧꦏꦭ꧀ꦲꦺꦴꦫ​ꦲꦺꦤꦺꦁꦮꦪꦃ​ꦮꦼꦔꦶ​ꦩꦼꦤꦺꦃ​꧈​ꦩꦸꦭꦤꦺ​ꦮꦺꦴꦁꦮꦺꦴꦁ​ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦲꦺꦴꦧꦺꦴꦂ​ꦲꦥ​ꦱꦽꦔꦺꦔꦺ​꧈​ꦲꦮꦶꦠ꧀ꦒꦸꦱ꧀ꦠꦶ​ꦢꦺꦮꦺꦱꦶꦁ​ꦧꦏꦭ꧀ꦩꦢꦁꦔꦶ꧉​ꦮꦺꦴꦁꦮꦺꦴꦁ​ꦩꦲꦸ​ꦧꦏꦭ꧀ꦢꦢꦶ​ꦫꦠꦸ​ꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱ​ꦭꦁꦒꦼꦁ​ꦱ꧀ꦭꦮꦱ꧀ꦭꦮꦱ꧀ꦱꦺ꧉​

꧋ꦠꦼꦏꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

⁶꧋ꦩꦸꦭꦺꦏꦠ꧀ꦩꦲꦸ​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦲꦏꦸ​:“ꦠꦼꦩ꧀ꦧꦸꦁ​ꦲꦶꦏꦶ​ꦚꦠ​ꦭꦤ꧀ꦏꦼꦤꦺꦁꦢꦶꦥꦽꦕꦪ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦮꦶꦱ꧀ꦔꦼꦏꦺꦏ꧀ꦏꦏꦺꦫꦺꦴꦃꦲꦺ​ꦩꦫꦁ​ꦥꦫ​ꦤꦧꦶ​꧈​ꦮꦶꦱ꧀ꦔꦺꦴꦁꦏꦺꦴꦤ꧀ꦩꦸꦭꦺꦏꦠ꧀ꦠꦺ꧈​ꦱꦸꦥꦪ​ꦤ꧀ꦢꦸꦢꦸꦃꦲꦏꦺꦩꦫꦁ​ꦥꦫ​ꦥꦼꦭꦢꦺꦤ꧀ꦤꦺ​ꦲꦥ​ꦱꦶꦁ​ꦤ꧀ꦢꦁꦧꦏꦭ꧀​ꦏ꧀ꦭꦏꦺꦴꦤ꧀꧈​”

⁷꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦲꦏꦸ​ꦤ꧀ꦢꦁꦠꦼꦏ​꧉​ꦧꦼꦗꦮꦺꦴꦁ​ꦱꦶꦁ​ꦥꦢ​ꦔ꧀ꦒꦸꦒꦸ​ꦩꦫꦁ​ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦱꦶꦁ​ꦏꦼꦠꦸꦭꦶꦱ꧀ꦤꦁꦧꦸꦏꦸ​ꦲꦶꦏꦶ​꧉​”

⁸꧋ꦲꦏꦸ​꧈​ꦪꦺꦴꦲꦤꦼꦱ꧀ ꦮꦶꦱ꧀ꦮꦼꦫꦸꦃ​ꦭꦤ꧀ꦏꦿꦸꦔꦸ​ꦥꦽꦏꦫꦥꦽꦏꦫ​ꦩꦲꦸ​ꦏꦧꦺꦃ​꧉​ꦱꦏ꧀ꦮꦶꦱ꧀ꦱꦺ​ꦏꦿꦸꦔꦸ​ꦭꦤ꧀ꦮꦼꦫꦸꦃ​꧈​ꦲꦏꦸ​ꦠꦼꦫꦸꦱ꧀ꦲꦉꦥ꧀ꦱꦸꦗꦸꦠ꧀ꦤꦁꦔꦉꦥ꧀ꦥꦺ​ꦩꦸꦭꦺꦏꦠ꧀ꦠꦺꦱꦶꦁ​ꦤ꧀ꦢꦸꦢꦸꦃꦲꦏꦺꦏꦧꦺꦃ​ꦩꦲꦸ​ꦩꦫꦁ​ꦲꦏꦸ​꧉​ ⁹ꦤꦁꦔꦶꦁꦠꦼꦩ꧀ꦧꦸꦁꦔꦺꦩꦸꦭꦺꦏꦠ꧀ꦠꦺꦩꦫꦁꦲꦏꦸ:“ꦲꦗ!ꦲꦗꦚꦼꦩ꧀ꦧꦃꦲꦏꦸ꧉​ꦚꦼꦩ꧀ꦧꦃꦲꦒꦸꦱ꧀ꦠꦶꦄꦭ꧀ꦭꦃ꧉​ꦲꦏꦸꦪꦤꦩꦸꦁꦥꦼꦭꦢꦺꦤ꧀ꦏꦪꦏꦺꦴꦮꦺꦭꦤ꧀ꦏꦪꦱꦼꦢꦸꦭꦸꦂꦱꦼꦢꦸꦭꦸꦂꦩꦸꦥꦫꦤꦧꦶꦭꦤ꧀ꦏꦧꦺꦃꦮꦺꦴꦁꦱꦶꦁꦥꦢꦔ꧀ꦒꦸꦒꦸꦩꦫꦁꦠꦼꦩ꧀ꦧꦸꦁꦠꦼꦩ꧀ꦧꦸꦁꦤꦁꦧꦸꦏꦸꦲꦶꦏꦶ!” ¹⁰ꦠꦼꦩ꧀ꦧꦸꦁꦔꦺ​ꦩꦼꦤꦺꦃ​:“ꦥꦶꦠꦸꦠꦸꦂꦥꦶꦠꦸꦠꦸꦂꦱꦶꦁ​ꦤꦁꦧꦸꦏꦸ​ꦲꦶꦏꦶ​ꦲꦗ​ꦢꦶꦠꦸꦠꦸꦥ꧀ꦠꦸꦠꦸꦥ꧀ꦥꦶ​꧈​ꦲꦮꦶꦠ꧀ꦮꦼꦏ꧀ꦠꦸꦤꦺ​ꦮꦶꦱ꧀ꦕꦼꦢꦼꦏ꧀​ꦲꦼꦁꦒꦺꦴꦤꦺ​ꦏꦸꦮꦶ​ꦩꦲꦸ​ꦏꦧꦺꦃ​ꦧꦏꦭ꧀​ꦏ꧀ꦭꦏꦺꦴꦤ꧀꧈​ ¹¹ꦮꦺꦴꦁꦲꦭꦧꦺꦤ꧀ꦤꦼꦫꦸꦱ꧀ꦱꦏꦺꦲꦼꦁꦒꦺꦴꦤꦺꦔ꧀ꦒꦮꦺꦥꦶꦪꦭ꧈​ꦱꦶꦁꦉꦒꦼꦠ꧀ꦧꦺꦤ꧀ꦤꦼꦫꦸꦱ꧀ꦱꦏꦺꦲꦼꦁꦒꦺꦴꦤꦺꦔꦽꦒꦼꦠ꧀ꦠꦶꦲꦮꦏ꧀ꦏꦺ꧉​ꦱꦥꦱꦶꦁꦔ꧀ꦭꦏꦺꦴꦤ꧀ꦤꦶꦧꦼꦤꦼꦂꦧꦺꦤ꧀ꦤꦼꦫꦸꦱ꧀ꦱꦏꦺꦲꦼꦁꦒꦺꦴꦤꦺꦔ꧀ꦭꦏꦺꦴꦤ꧀ꦤꦶꦱꦶꦁꦧꦼꦤꦼꦂ꧉​ꦱꦥꦱꦶꦁꦱꦸꦕꦶꦧꦺꦤ꧀ꦤꦼꦫꦸꦱ꧀ꦱꦏꦺꦲꦼꦁꦒꦺꦴꦤꦺꦚꦸꦕꦺꦏ꧀ꦏꦏꦺꦲꦮꦏ꧀ꦏꦺ꧉​”

¹²꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦲꦏꦸ​ꦤ꧀ꦢꦁꦠꦼꦏ​꧉​ꦲꦏꦸ​ꦔ꧀ꦒꦮ​ꦱꦶꦁ​ꦮꦶꦱ꧀ꦠꦏ꧀ꦗꦚ꧀ꦗꦶ​꧉​ꦲꦏꦸ​ꦧꦏꦭ꧀ꦔꦸꦥꦃꦲꦶꦱꦧꦼꦤ꧀ꦮꦺꦴꦁ​ꦩꦶꦠꦸꦫꦸꦠ꧀ꦥꦼꦁꦒꦮꦺꦤꦺ​꧉​ ¹³ꦲꦏꦸ​ꦲꦶꦏꦶ​ꦄꦭ꧀ꦥ꦳ꦃꦭꦤ꧀ꦎꦩꦺꦏꦃ꧈​ꦱꦶꦁ​ꦤ꧀ꦢꦶꦱꦶꦏ꧀ꦭꦤ꧀ꦱꦶꦁ​ꦏꦺꦫꦶ​꧈​ꦮꦶꦮꦶꦠ꧀ꦠꦤ꧀ꦤꦺ​ꦭꦤ꧀ꦥꦼꦤꦸꦠꦸꦥ꧀ꦥꦺ꧉​”

¹⁴꧋ꦧꦼꦗꦮꦺꦴꦁ​ꦱꦶꦁ​ꦔꦸꦩ꧀ꦧꦃ​ꦱꦤ꧀ꦢꦔꦤ꧀ꦤꦺꦱꦩ꧀ꦥꦺꦏ꧀ꦉꦱꦶꦏ꧀꧈​ꦏꦸꦮꦶ​ꦱꦶꦁ​ꦧꦏꦭ꧀ꦏꦼꦭꦶꦭ꧀ꦭꦤ꧀ꦩꦁꦔꦤ꧀ꦮꦺꦴꦃꦲꦺ​ꦮꦶꦠ꧀ꦥꦔꦸꦫꦶꦥ꧀ꦥꦤ꧀ꦭꦤ꧀​ꦩ꧀ꦊꦧꦸ​ꦤꦁꦏꦸꦠ꧈​ꦭꦶꦮꦠ꧀ꦒꦥꦸꦫꦒꦥꦸꦫꦤꦺ​꧉​ ¹⁵ꦤꦁꦔꦶꦁ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦥꦼꦁꦒꦮꦺ​ꦲꦭ​꧈​ꦱꦶꦁ​ꦔ꧀ꦭꦏꦺꦴꦏ꧀ꦏꦏꦺꦥꦔ꧀ꦮꦱ​ꦥꦼꦥꦼꦠꦼꦁ​꧈​ꦮꦺꦴꦁ​ꦱꦶꦁ​ꦭꦏꦸ​ꦧꦺꦢꦁ꧈​ꦠꦸꦏꦁ​ꦩꦠꦺꦤ꧀ꦤꦶ​꧈​ꦮꦺꦴꦁ​ꦱꦶꦁ​ꦚꦼꦩ꧀ꦧꦃ​ꦧꦿꦲꦭ​ꦭꦤ꧀ꦮꦺꦴꦁ​ꦱꦶꦁ​ꦱꦼꦤꦼꦁ​ꦔꦥꦸꦱ꧀ꦱꦶ​ꦔꦁꦒꦺꦴ​ꦠꦼꦩ꧀ꦧꦸꦁ​ꦭꦤ꧀ꦠꦶꦤ꧀ꦢꦏ꧀ ꦏꦧꦺꦃ​ꦥꦁꦒꦺꦴꦤ꧀ꦤꦤ꧀ꦤꦺ​ꦤꦁꦱꦏ꧀​ꦚ꧀ꦗꦧꦤꦺ​ꦏꦸꦠꦩꦲꦸ​꧉​

¹⁶꧋“ꦲꦏꦸ​꧈​ꦪꦺꦯꦸꦱ꧀ ꦮꦶꦱ꧀ꦔꦺꦴꦁꦏꦺꦴꦤ꧀ꦩꦸꦭꦺꦏꦠ꧀ꦏꦸ꧈​ꦱꦸꦥꦪ​ꦔꦺꦴꦩꦺꦴꦁꦔꦏꦺꦥꦽꦏꦫ​ꦩꦲꦸ​ꦏꦧꦺꦃ​ꦩꦫꦁ​ꦥꦱꦩꦸꦮꦤ꧀ꦥꦱꦩꦸꦮꦤ꧀꧈​ꦲꦏꦸ​ꦲꦶꦏꦶ​ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ ꦭꦶꦤ꧀ꦠꦁ​ꦥꦚ꧀ꦗꦼꦂ​ꦲꦺꦱꦸꦏ꧀ꦱꦶꦁ​ꦱꦼꦩ꧀ꦭꦺꦴꦫꦺꦴꦠ꧀꧈​”

¹⁷꧋ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦤ꧀ꦠꦺꦤ꧀ꦮꦺꦢꦺꦴꦏ꧀ꦥꦢ​ꦔꦺꦴꦩꦺꦴꦁ:“ꦒꦸꦱ꧀ꦠꦶ​ꦲꦩ꧀ꦧꦺꦴꦏ꧀ꦠꦼꦏ​!”

꧋ꦭꦤ꧀ꦱꦥ​ꦱꦶꦁ​ꦏꦿꦸꦔꦸ​ꦏꦸꦢꦸ​ꦱꦼꦩꦲꦸꦂ​:“ꦲꦩ꧀ꦧꦺꦴꦏ꧀ꦠꦼꦏ​ꦒꦸꦱ꧀ꦠꦶ​!”

꧋ꦱꦥ​ꦱꦶꦁ​ꦔꦼꦭꦏ꧀ ꦩꦗꦸꦮ​꧉​ꦱꦥ​ꦱꦶꦁ​ꦏꦼꦥꦺꦔꦶꦤ꧀ ꦚ꧀ꦗꦶꦏꦸꦏꦧꦚꦸ​ꦥꦔꦸꦫꦶꦥ꧀ꦥꦤ꧀ꦠꦤ꧀ꦥ​ꦲꦩ꧀ꦧꦪꦂ​꧉​

꧋ꦥꦼꦤꦸꦠꦸꦥ꧀꧈​

¹⁸꧋ꦮꦺꦴꦁ​ꦱꦶꦁ​ꦔꦿꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦶꦁ​ꦏꦮꦼꦢꦂꦤꦁꦧꦸꦏꦸ​ꦲꦶꦏꦶ​ꦠꦏ꧀ꦥꦶꦠꦸꦠꦸꦂꦫꦶ​ꦔꦺꦤꦺ​:“ꦤꦺꦏ꧀ꦲꦺꦤꦺꦁꦮꦺꦴꦁ​ꦱꦶꦁ​ꦤꦩ꧀ꦧꦃꦲꦶ​ꦲꦥꦲꦥ​ꦤꦁꦧꦸꦏꦸ​ꦲꦶꦏꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦱ꧀ꦠꦶꦧꦏꦭ꧀ꦤꦼꦏꦏ꧀ꦏꦏꦺꦩꦼꦩꦭ​ꦩꦫꦁ​ꦮꦺꦴꦁ​ꦏꦸꦮꦶ​꧈​ꦥꦢ​ꦏꦫꦺꦴ​ꦱꦶꦁ​ꦏꦼꦠꦸꦭꦶꦱ꧀ꦤꦁꦧꦸꦏꦸ​ꦲꦶꦏꦶ​꧉​ ¹⁹ꦤꦺꦏ꧀ꦲꦺꦤꦺꦁꦮꦺꦴꦁ​ꦱꦶꦁ​ꦔꦼꦭꦺꦴꦁꦔꦶ​ꦠꦼꦩ꧀ꦧꦸꦁ​ꦱꦶꦁ​ꦏꦮꦼꦢꦂꦤꦁꦧꦸꦏꦸ​ꦲꦶꦏꦶ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦧꦏꦭ꧀​ꦚ꧀ꦗꦶꦏꦸꦏ꧀ꦥꦤ꧀ꦢꦸꦩ꧀ꦩꦤ꧀ꦤꦺ​ꦧꦼꦂꦏꦃ​ꦱꦁꦏꦮꦶꦠ꧀ꦥꦔꦸꦫꦶꦥ꧀ꦥꦤ꧀ꦭꦤ꧀ꦱꦁꦏꦏꦸꦠꦱꦸꦕꦶ​ꦏꦸꦮꦶ​꧈​ꦏꦪ​ꦱꦶꦁ​ꦏꦼꦠꦸꦭꦶꦱ꧀ꦤꦁꦧꦸꦏꦸ​ꦲꦶꦏꦶ​꧉​”

²⁰꧋ꦒꦸꦱ꧀ꦠꦶ​ꦱꦶꦁ​ꦔꦼꦏꦺꦏ꧀ꦏꦶꦠꦼꦩ꧀ꦧꦸꦁ​ꦩꦲꦸ​ꦏꦧꦺꦃ​ꦔꦺꦴꦩꦺꦴꦁꦔꦺꦤꦺ​:“ꦠꦼꦤꦤ꧀ ꦲꦏꦸ​ꦩꦼꦱ꧀ꦠꦶꦤ꧀ꦢꦁꦠꦼꦏ​!ꦄꦩꦺꦤ꧀꧈​”

꧋ꦪ​ꦒꦸꦱ꧀ꦠꦶ​ꦪꦺꦯꦸꦱ꧀ ꦒꦸꦱ꧀ꦠꦶ​꧈​ꦲꦩ꧀ꦧꦺꦴꦏ꧀​ꦤ꧀ꦢꦁꦠꦼꦏ​!

²⁰꧋ꦩꦸꦒꦩꦸꦒ​ꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦤꦲ​ꦲꦶꦁ​ꦏꦺꦴꦮꦺ​ꦏꦧꦺꦃ​!

ꦄꦩꦺꦤ꧀꧈​

↑ ↑ ↑

← ꦪꦸꦢꦱ꧀