ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦪꦸꦢꦱ꧀

꧁꧋ꦭꦪꦁꦔꦺꦪꦸꦢꦱ꧀꧈​꧂

---

꧋ꦥꦼꦩ꧀ꦧꦸꦏꦏ꧀ꦏꦤ꧀ꦭꦤ꧀ꦥꦩꦸꦗꦶꦱ꧀ꦭꦩꦼꦠ꧀꧈​

꧇​꧑꧇​

¹꧋ꦭꦪꦁ​ꦱꦁꦏꦪꦸꦢꦱ꧀ ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦭꦤ꧀ꦱꦼꦢꦸꦭꦸꦂꦫꦺ​ꦪꦏꦺꦴꦧꦸꦱ꧀ ꦩꦫꦁ​ꦥꦫ​ꦱꦼꦢꦸꦭꦸꦂ​ꦱꦶꦁ​ꦢꦶꦠꦿꦺꦱ꧀ꦤꦤ꧀ꦤꦶꦭꦤ꧀ꦢꦶꦥꦁꦒꦶꦭ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦢꦶꦥꦒꦼꦂꦫꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

²꧋ꦩꦸꦒꦩꦸꦒ​ꦏꦠꦿꦺꦱ꧀ꦤꦤꦺ꧈​ꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦏꦠꦼꦤ꧀ꦠꦽꦩꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦧꦼꦏ꧀ꦏꦤꦲꦠꦶꦩꦸ​ꦏꦤ꧀ꦠꦶꦭꦸꦧꦺꦂ​꧉​

꧋ꦒꦸꦫꦸꦒꦸꦫꦸ​ꦥꦭ꧀ꦱꦸ​ꦧꦏꦭ꧀ꦤꦩ꧀ꦥ​ꦱꦼꦠꦿꦥꦤ꧀ꦤꦺ꧉​

³꧋ꦥꦫ​ꦱꦼꦢꦸꦭꦸꦂ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​ꦢꦺꦴꦁꦔꦺꦲꦏꦸ​ꦲꦉꦥ꧀ꦤꦸꦭꦶꦱ꧀ꦭꦪꦁ​ꦩꦫꦁ​ꦏꦺꦴꦮꦺ​ꦧꦧ꧀ꦏꦼꦱ꧀ꦭꦩꦼꦠ꧀ꦠꦤ꧀ꦱꦶꦁ​ꦮꦶꦱ꧀ꦢꦶꦲꦭꦩ꧀ꦩꦶ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦲꦏꦸ​ꦏꦿꦱ​ꦏꦼꦥꦼꦏ꧀ꦱ​ꦧꦔꦼꦠ꧀ꦔꦺꦭꦶꦁꦔꦏꦺꦩꦫꦁ​ꦏꦺꦴꦮꦺ​꧈​ꦱꦸꦥꦪ​ꦥꦢ​ꦩꦤ꧀ꦠꦼꦥ꧀ꦲꦩ꧀ꦧꦺꦭꦤꦶ​ꦥꦼꦔꦤ꧀ꦢꦼꦭ꧀ꦩꦸ​꧈​ꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦥꦫ​ꦲꦸꦩꦠ꧀ꦠꦺ​꧈​ꦱꦼꦥꦶꦱ꧀ꦱꦤ꧀ꦏꦁꦒꦺꦴ​ꦱ꧀ꦭꦮꦱ꧀ꦱꦺ꧉​ ⁴ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀ꦥꦼꦂꦭꦸ​ꦔꦺꦴꦩꦺꦴꦁꦔꦶꦏꦺꦴꦮꦺ​ꦧꦧ꧀ꦏꦸꦮꦶ​ꦥꦫ​ꦱꦼꦢꦸꦭꦸꦂ​?ꦲꦮꦶꦠ꧀ꦲꦺꦤꦺꦁꦮꦺꦴꦁ​ꦱꦶꦗꦶꦭꦺꦴꦫꦺꦴꦱꦶꦁ​ꦤ꧀ꦭꦸꦱꦸꦥ꧀ꦤꦁꦏꦸꦩ꧀ꦥꦸꦭ꧀ꦭꦤ꧀ꦩꦸ​꧉​ꦮꦺꦴꦁꦮꦺꦴꦁ​ꦲꦶꦏꦶ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦥꦶꦮꦸꦭꦁ​ꦧꦧ꧀ꦏꦮꦼꦭꦱ꧀ꦱꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦭꦃ​ꦢꦶꦮꦭꦶꦏ꧀꧈​ꦗꦫꦺꦤꦺ​ꦱꦼꦤꦗꦤ꧀​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦲꦺꦴꦫ​ꦲꦥꦲꦥ​꧈​ꦲꦺꦴꦫ​ꦧꦏꦭ꧀ꦤꦩ꧀ꦥ​ꦱꦼꦠꦿꦥꦤ꧀ꦤꦺ꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦲꦺꦤꦺꦁꦲꦼꦤ꧀ꦠꦺꦏ꧀ꦏꦺ​ꦏꦮꦼꦭꦱ꧀ꦱꦤ꧀ꦤꦺ​꧉​ꦢꦢꦶꦤꦺ​ꦮꦺꦴꦁꦮꦺꦴꦁ​ꦥꦢ​ꦢꦶꦮꦸꦭꦁꦔꦶꦤꦺꦏ꧀ꦏꦼꦤꦺꦁꦔꦸꦩ꧀ꦧꦂ​ꦱꦼꦤꦼꦁꦔꦺ​ꦏꦼꦢꦒꦶꦁꦔꦤ꧀ꦤꦺ​꧉​ꦮꦺꦴꦁꦮꦺꦴꦁ​ꦲꦶꦏꦶ​ꦥꦢ​ꦤꦩ꧀ꦥꦶꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦺꦴꦫ​ꦒꦼꦊꦩ꧀ꦢꦶꦏ꧀ꦮꦱꦤꦶ​ꦭꦤ꧀ꦲꦺꦴꦫ​ꦒꦼꦊꦩ꧀ꦔꦁꦒꦼꦥ꧀ꦢꦺꦏ꧀ꦤꦺꦢꦢꦶ​ꦒꦸꦱ꧀ꦠꦶꦤꦺ​꧉​

꧋ꦔꦼꦂꦠꦶꦪ​ꦥꦫ​ꦱꦼꦢꦸꦭꦸꦂ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦚꦮꦶꦱ꧀ꦱꦏꦺꦱꦼꦠꦿꦥꦤ꧀ꦏꦁꦒꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦩꦭꦃ​ꦮꦶꦱ꧀ꦱꦸꦮꦶꦱꦏ꧀ꦢꦸꦫꦸꦁꦔꦺ꧉​

⁵꧋ꦏꦺꦴꦮꦺ​ꦮꦶꦱ꧀ꦥꦢ​ꦔꦼꦂꦠꦶ​ꦧꦧ꧀ꦏꦸꦮꦶ​ꦩꦲꦸ​ꦏꦧꦺꦃ​꧈​ꦤꦁꦔꦶꦁ​ꦲꦉꦥ꧀ꦠꦏ꧀ꦲꦺꦭꦶꦁꦔꦏꦺꦩꦼꦤꦺꦃ​꧉​

꧋ꦏꦺꦴꦮꦺ​ꦩꦼꦱ꧀ꦠꦶꦥꦢ​ꦏꦺꦭꦶꦁꦔꦤ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦭꦸꦮꦂꦫꦶ​ꦧꦁꦱ​ꦆꦱꦿꦌꦭ꧀ꦱꦁꦏꦤꦼꦒꦫ​ꦌꦒꦶꦥ꧀ꦠꦼ꧉​ꦤꦁꦔꦶꦁ​ꦱꦶꦁ​ꦲꦺꦴꦫ​ꦒꦼꦊꦩ꧀ꦥꦽꦕꦪ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦢꦶꦥꦠꦺꦤ꧀ꦤꦶ​꧉​ ⁶ꦏꦺꦴꦮꦺ​ꦩꦼꦱ꧀ꦠꦶꦲꦸꦒ​ꦏꦺꦭꦶꦁꦔꦤ꧀ꦧꦧ꧀ꦥꦫ​ꦩꦸꦭꦺꦏꦠ꧀ꦱꦶꦁ​ꦲꦺꦴꦫ​ꦥꦢ​ꦠꦿꦶꦩ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦭꦃ​ꦥꦢ​ꦤꦶꦁꦒꦭ꧀ꦥꦁꦒꦺꦴꦤ꧀ꦤꦤ꧀ꦤꦺ​꧉​ꦩꦸꦭꦺꦏꦠ꧀ꦩꦸꦭꦺꦏꦠ꧀ꦏꦸꦮꦶ​ꦢꦶꦏꦥꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​?ꦏꦧꦺꦃ​ꦢꦶꦱꦼꦠꦿꦥ꧀ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦥꦼꦠꦼꦁ​ꦤ꧀ꦢꦼꦢꦼꦠ꧀꧈​ꦢꦶꦱꦼꦠꦿꦥ꧀ꦤꦁꦏꦺꦴꦤꦺꦴ​ꦠꦼꦏꦤ꧀ꦲꦩ꧀ꦧꦺꦱꦸꦏ꧀ꦲꦶꦁ​ꦢꦶꦤ​ꦏꦿꦸꦠꦺꦴꦤ꧀ꦱꦶꦁ​ꦩꦼꦢꦺꦤ꧀ꦤꦶ​꧉​ ⁷ꦏꦺꦴꦮꦺ​ꦲꦶꦗꦶꦏ꧀ꦏꦺꦭꦶꦁꦔꦤ꧀ꦊꦭꦏꦺꦴꦤꦺ​ꦮꦺꦴꦁꦮꦺꦴꦁ​ꦱꦶꦁ​ꦩꦁꦒꦺꦴꦤ꧀ꦤꦁꦏꦸꦠꦱꦺꦴꦢꦺꦴꦩ꧀ ꦏꦸꦠꦓꦺꦴꦩꦺꦴꦫꦃꦭꦤ꧀ꦏꦸꦠꦏꦸꦠꦱꦏ꧀ꦏꦶꦮꦠꦼꦔꦼꦤ꧀ꦤꦺ​?ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦭꦏꦸ​ꦧꦺꦢꦁꦭꦤ꧀ꦥꦢ​ꦤꦸꦫꦸꦠ꧀ꦠꦶ​ꦏꦼꦱꦼꦤꦼꦔꦤ꧀ꦤꦺꦏꦼꦢꦒꦶꦁꦔꦤ꧀ꦱꦶꦁ​ꦲꦺꦴꦫ​ꦭꦸꦩꦿꦃ​꧈​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦱꦶꦁ​ꦢꦶꦭꦏꦺꦴꦤ꧀ꦤꦶ​ꦏꦫꦺꦴ​ꦥꦫ​ꦩꦸꦭꦺꦏꦠ꧀ꦏꦸꦮꦶ​꧉​ꦏꦸꦠꦏꦸꦠꦩꦲꦸ​ꦱꦏ꧀ꦮꦺꦴꦁꦮꦺꦴꦁꦔꦺ​ꦠꦼꦫꦸꦱ꧀ꦢꦶꦠꦶꦧꦤꦶ​ꦒꦼꦤꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦏꦧꦺꦃ​ꦮꦺꦴꦁ​ꦱꦶꦁ​ꦏꦼꦥꦺꦔꦶꦤ꧀​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦧꦶꦱ​ꦔꦼꦂꦠꦶ​꧈​ꦤꦺꦏ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦧꦏꦭ꧀ꦢꦶꦧꦸꦮꦁ​ꦤꦁꦒꦼꦤꦶ​ꦱꦶꦁ​ꦩꦸꦫꦸꦥ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​

⁸꧋ꦱꦼꦩꦺꦴꦤꦺꦴ​ꦲꦸꦒ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦤ꧀ꦭꦸꦱꦸꦥ꧀ꦤꦁꦏꦸꦩ꧀ꦥꦸꦭ꧀ꦭꦤ꧀ꦩꦸ​ꦏꦸꦮꦶ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦔꦶꦩ꧀ꦥꦶꦲꦶꦩ꧀ꦥꦶ​ꦏꦼꦥꦺꦔꦶꦤ꧀​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​ꦱꦶꦁ​ꦔꦽꦒꦼꦠ꧀ꦠꦶꦲꦮꦏ꧀ꦲꦮꦏ꧀ꦏꦺꦢꦺꦮꦺꦭꦤ꧀ꦥꦢ​ꦚꦼꦥꦺꦭꦺꦏ꧀ꦏꦏꦺꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦩꦭꦃ​ꦥꦢ​ꦮꦤꦶ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦥꦔ꧀ꦮꦱꦥꦔ꧀ꦮꦱ​ꦱꦶꦁ​ꦤꦁꦱ꧀ꦮꦂꦒ​꧉​ ⁹ꦒꦺꦏ꧀ꦩꦶꦏꦌꦭ꧀ꦮꦲꦺ​꧈​ꦱꦶꦁ​ꦥꦼꦁꦒꦼꦢꦺꦤꦺꦥꦫ​ꦩꦸꦭꦺꦏꦠ꧀ ꦲꦺꦴꦫ​ꦮꦤꦶ​ꦔꦼꦭꦺꦴꦏ꧀ꦏꦏꦺꦱꦺꦠꦤ꧀꧈​ꦢꦺꦴꦁꦔꦺꦩꦶꦏꦌꦭ꧀ꦥꦢꦸ​ꦏꦫꦺꦴ​ꦱꦺꦠꦤ꧀ꦧꦧ꧀ꦱꦥ​ꦱꦶꦁ​ꦏꦸꦢꦸ​ꦤ꧀ꦢꦸꦮꦺꦤ꧀ꦤꦶ​ꦭꦪꦺꦴꦤꦺ​ꦤꦧꦶ​ꦩꦺꦴꦱꦼꦱ꧀ ꦩꦶꦏꦌꦭ꧀ꦤꦩꦸꦁ​ꦔꦺꦴꦩꦺꦴꦁꦔꦺꦤꦺ​:“ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦧꦏꦭ꧀ꦚꦼꦠꦿꦥ꧀ꦏꦺꦴꦮꦺ​!” ¹⁰ꦤꦁꦔꦶꦁꦮꦺꦴꦁꦮꦺꦴꦁꦏꦸꦮꦶꦩꦭꦃꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦩꦫꦁꦧꦫꦁꦧꦫꦁꦱꦶꦁꦮꦺꦴꦁꦮꦺꦴꦁꦢꦺꦮꦺꦲꦺꦴꦫꦔꦼꦂꦠꦶ꧉​ꦏꦺꦴꦏ꧀ꦲꦺꦭꦶꦁꦲꦺꦭꦶꦁꦏꦪ ꦏꦺꦮꦤ꧀ꦒꦭꦏ꧀ꦏꦲꦺꦱꦶꦁꦤꦩꦸꦁꦩꦤꦸꦠ꧀ꦫꦱ꧈​ꦠꦤ꧀ꦥꦥꦶꦏꦶꦂꦫꦤ꧀꧈​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺꦧꦏꦭ꧀ꦤꦼꦩꦺꦴꦤ꧀ꦤꦶꦏꦫꦸꦱꦏ꧀ꦏꦤ꧀꧈​ ¹¹ꦕꦶꦭꦏꦧꦔꦼꦠ꧀ꦮꦺꦴꦁꦮꦺꦴꦁꦏꦸꦮꦶ!ꦥꦢꦤꦶꦫꦸꦏ꧀ꦭꦏꦸꦮꦤ꧀ꦤꦺꦏꦆꦤ꧀ ꦱꦶꦁꦚꦼꦔꦶꦠ꧀ꦠꦶꦭꦤ꧀ꦩꦠꦺꦤ꧀ꦤꦶꦲꦢꦶꦏ꧀ꦏꦺ꧉​ꦮꦺꦴꦁꦮꦺꦴꦁꦏꦸꦮꦶꦏ꧀ꦭꦏꦸꦮꦤ꧀ꦤꦺꦏꦪꦧꦶꦭꦺꦪꦩ꧀ ꦤꦧꦶꦱꦶꦁꦩꦠꦢꦸꦮꦶꦠ꧀ꦠꦼꦤ꧀ꦭꦤ꧀ꦲꦸꦒꦏꦪꦏꦺꦴꦫꦃ꧈​ꦱꦶꦁꦲꦺꦴꦫꦒꦼꦊꦩ꧀ꦩꦤꦸꦠ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺꦮꦺꦴꦁꦮꦺꦴꦁꦲꦶꦏꦶꦧꦏꦭ꧀ꦢꦶꦫꦩ꧀ꦥꦸꦁꦔꦏꦺꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧈​ꦠꦸꦁꦒꦭ꧀ꦭꦺꦏꦫꦺꦴꦏꦺꦴꦫꦃ꧉​ ¹²ꦮꦺꦴꦁꦮꦺꦴꦁꦲꦶꦏꦶꦤꦩꦸꦁꦔꦽꦒꦼꦠ꧀ꦠꦶꦲꦼꦁꦒꦺꦴꦤ꧀ꦩꦸꦥꦢꦧꦼꦧꦉꦁꦔꦤ꧀ꦲꦶꦁꦱꦏ꧀ꦗꦼꦫꦺꦴꦤꦺꦏꦸꦩ꧀ꦥꦸꦭ꧀ꦭꦤ꧀ꦥꦺꦱ꧀ꦠꦏꦠꦿꦺꦱ꧀ꦤꦤ꧀꧈​ꦲꦮꦶꦠ꧀ꦲꦼꦁꦒꦺꦴꦤꦺꦥꦢꦩꦁꦔꦤ꧀ꦲꦺꦴꦫꦤ꧀ꦢꦸꦮꦺꦲꦶꦱꦶꦤ꧀ ꦤꦩꦸꦁꦩꦶꦏꦶꦂꦮꦼꦠꦼꦁꦔꦺꦢꦺꦮꦺ꧉​ꦲꦺꦭꦶꦁꦲꦺꦭꦶꦁꦮꦺꦴꦁꦮꦺꦴꦁꦏꦸꦮꦶꦏꦺꦴꦏ꧀ꦏꦪꦩꦺꦒꦱꦶꦁꦏꦠꦸꦠ꧀ꦲꦔꦶꦤ꧀ꦏꦲꦺ꧈​ꦤꦁꦔꦶꦁꦲꦺꦴꦫꦢꦢꦶꦲꦸꦢꦤ꧀ ꦲꦮꦶꦠ꧀ꦲꦺꦴꦫꦲꦺꦤꦺꦁꦧꦚꦸꦤꦺ꧉​ꦏꦪꦮꦶꦠ꧀ꦮꦶꦠ꧀ꦠꦤ꧀ꦱꦶꦁꦲꦺꦴꦫꦩꦼꦠꦸꦮꦺꦴꦃꦲꦺ꧈​ꦱꦼꦤꦗꦤ꧀ꦮꦶꦱ꧀ꦮꦪꦃꦲꦺ꧈​ꦩꦸꦭꦤꦺꦪꦩꦼꦱ꧀ꦠꦶꦧꦏꦭ꧀ꦢꦶꦠꦼꦒꦺꦴꦂꦭꦤ꧀ꦢꦶꦧꦸꦮꦁ꧈​ꦲꦮꦶꦠ꧀ꦮꦶꦱ꧀ꦒꦥꦸꦏ꧀꧈​ ¹³ꦏꦪ​ꦲꦺꦴꦩ꧀ꦧꦏ꧀ꦏꦺ​ꦱꦼꦒꦫ​ꦱꦶꦁ​ꦔꦼꦠꦺꦴꦏ꧀ꦏꦏꦺꦲꦸꦩ꧀ꦥ꧀ꦭꦸꦏ꧀ꦏꦺꦉꦉꦒꦼꦠ꧀ꦏꦲꦺ​꧈​ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦏꦼꦠꦫ​ꦏ꧀ꦭꦏꦸꦮꦤ꧀ꦤꦺ​ꦱꦶꦁ​ꦲꦺꦴꦫ​ꦥꦤ꧀ꦠꦼꦱ꧀꧈​ꦏꦪ​ꦭꦶꦤ꧀ꦠꦁ​ꦱꦶꦁ​ꦔ꧀ꦭꦩ꧀ꦧꦿꦁ​꧈​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦧꦏꦭ꧀ꦲꦶꦭꦁ​ꦱ꧀ꦭꦮꦱ꧀ꦱꦺꦲꦶꦁ​ꦥꦼꦥꦼꦠꦼꦁ​ꦱꦶꦁ​ꦗꦼꦫꦸ꧉​

¹⁴꧋ꦤꦧꦶ​ꦲ꦳ꦺꦤꦺꦴꦏ꧀ ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦢꦩ꧀ꦱꦶꦁ​ꦤꦺꦴꦩꦼꦂ​ꦥꦶꦠꦸ​꧈​ꦩꦭꦃ​ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦺꦤꦺ​ꦧꦧ꧀ꦮꦺꦴꦁꦮꦺꦴꦁ​ꦏꦸꦮꦶ​:“ꦢꦼꦭꦺꦴꦏ꧀ꦏꦼꦤ꧀ ꦒꦸꦱ꧀ꦠꦶ​ꦠꦼꦏ​ꦢꦶꦲꦫꦏ꧀ꦏꦫꦺꦴ​ꦥꦫ​ꦩꦸꦭꦺꦏꦠ꧀ꦱꦶꦁ​ꦱꦸꦕꦶ​꧈​ꦲꦺꦮꦺꦴꦤ꧀ꦤꦺꦮꦺꦴꦤ꧀ꦲꦺꦴꦏꦺꦃꦲꦺ꧉​ ¹⁵ꦒꦸꦱ꧀ꦠꦶ​ꦧꦏꦭ꧀ꦔꦿꦸꦠꦸꦭꦤ꧀ꦚꦼꦠꦿꦥ꧀ꦏꦧꦺꦃ​ꦮꦺꦴꦁ​ꦱꦶꦁ​ꦲꦺꦴꦫ​ꦒꦼꦊꦩ꧀ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧈​ꦲꦮꦶꦠ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦱꦏ꧀ꦮꦼꦂꦤꦤꦺ​ꦢꦺꦴꦱ​ꦭꦤ꧀ꦥꦢ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦱꦶꦁ​ꦲꦭ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

¹⁶꧋ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦱꦼꦤꦼꦁ​ꦔ꧀ꦒꦼꦱꦃ​ꦭꦤ꧀ꦱꦩ꧀ꦧꦠ꧀ ꦤꦩꦸꦁ​ꦚꦭꦃꦚꦭꦃꦲꦏꦺꦭꦶꦪꦤꦺ​꧈​ꦱꦼꦤꦗꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦢꦺꦮꦺꦲꦸꦫꦶꦥ꧀ꦥꦺꦤꦩꦸꦁ​ꦔꦸꦩ꧀ꦧꦂ​ꦱꦼꦤꦼꦁꦔꦺ​꧉​ꦱꦺꦴꦩ꧀ꦧꦺꦴꦁꦔꦺꦲꦺꦫꦩ꧀ꦩꦺꦫꦩ꧀ꦭꦤ꧀ꦱꦼꦤꦼꦁ​ꦔꦼꦊꦩ꧀ꦮꦺꦴꦁ​ꦭꦶꦪ​꧈​ꦱꦸꦥꦪ​ꦲꦺꦤ꧀ꦠꦸꦏ꧀ꦲꦸꦥꦃ꧉​

꧋ꦥꦼꦁꦔꦺꦭꦶꦁꦔꦺꦭꦶꦁ​ꦱꦸꦥꦪ​ꦩꦤ꧀ꦠꦼꦥ꧀ꦲꦶꦁ​ꦥꦽꦕꦪ​꧉​

¹⁷꧋ꦤꦁꦔꦶꦁ​ꦏꦁꦒꦺꦴ​ꦏꦺꦴꦮꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦲꦗ​ꦥꦢ​ꦭꦭꦶ​ꦩꦫꦁ​ꦠꦼꦩ꧀ꦧꦸꦁꦔꦺ​ꦥꦫ​ꦫꦱꦸꦭ꧀ꦭꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦢꦺꦏ꧀​ꦩ꧀ꦧꦶꦪꦺꦤ꧀꧈​ ¹⁸ꦥꦫ​ꦫꦱꦸꦭ꧀ꦏꦸꦮꦶ​ꦔꦺꦴꦩꦺꦴꦁꦔꦺꦤꦺ​:“ꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦶꦱ꧀ꦚꦼꦢꦼꦏ꧀ꦏꦶꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀ꦧꦏꦭ꧀ꦲꦺꦤꦺꦁꦮꦺꦴꦁꦮꦺꦴꦁ​ꦚ꧀ꦗꦼꦢꦸꦭ꧀ꦱꦶꦁ​ꦥꦢ​ꦩꦺꦴꦪꦺꦴꦏ꧀ꦏꦶ​ꦏꦺꦴꦮꦺ​꧉​ꦮꦺꦴꦁꦮꦺꦴꦁ​ꦲꦶꦏꦶ​ꦲꦸꦫꦶꦥ꧀ꦥꦺꦤꦩꦸꦁ​ꦔꦸꦩ꧀ꦧꦂ​ꦱꦼꦤꦼꦁꦔꦺ​ꦏꦼꦢꦒꦶꦁꦔꦤ꧀ꦤꦺ​꧉​” ¹⁹ꦪ​ꦮꦺꦴꦁꦮꦺꦴꦁ​ꦲꦶꦏꦶ​ꦱꦶꦁ​ꦔ꧀ꦒꦮꦺ​ꦕꦺꦴꦁ​ꦏꦿꦺꦃ​ꦤꦁꦚ꧀ꦗꦼꦫꦺꦴꦤꦺ​ꦥꦱꦩꦸꦮꦤ꧀꧈​ꦲꦸꦫꦶꦥ꧀ꦥꦺꦲꦺꦴꦫ​ꦲꦺꦤꦺꦁꦧꦺꦢꦤꦺ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦤꦸꦫꦸꦠ꧀ꦒꦸꦱ꧀ꦠꦶ​꧈​ꦲꦮꦶꦠ꧀ꦫꦺꦴꦃ​ꦱꦸꦕꦶ​ꦲꦺꦴꦫ​ꦩꦁꦒꦺꦴꦤ꧀ꦲꦶꦁ​ꦲꦠꦶꦤꦺ​꧉​ ²⁰ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦏꦪ​ꦔꦺꦴꦤꦺꦴ​ꦥꦫ​ꦱꦼꦢꦸꦭꦸꦂ​꧉​ꦥꦢ​ꦔꦢꦼꦏ꧀ꦏꦱꦶꦁ​ꦗꦼꦗꦼꦏ꧀ꦲꦶꦁ​ꦥꦠꦺꦴꦏꦤ꧀ꦩꦸ꧈​ꦪꦏꦸꦮꦶ​ꦥꦼꦔꦤ꧀ꦢꦼꦭ꧀ꦩꦸ​ꦱꦶꦁ​ꦱꦸꦕꦶ​ꦠꦼꦤꦤ꧀꧈​ꦥꦢ​ꦤ꧀ꦢꦼꦢꦺꦴꦔꦲ​ꦔꦁꦒꦺꦴ​ꦥꦔ꧀ꦮꦱꦤꦺ​ꦫꦺꦴꦃ​ꦱꦸꦕꦶ​꧉​ ²¹ꦱꦏ꧀ꦧꦉꦁꦔꦺꦏꦺꦴꦮꦺ​ꦥꦢ​ꦔꦉꦥ꧀ꦲꦉꦥ꧀ꦠꦼꦏꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦸꦫꦶꦥ꧀ꦩꦸ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦠꦿꦺꦱ꧀ꦤꦠꦼꦤꦤ꧀ꦩꦫꦁ​ꦏꦺꦴꦮꦺ​꧉​ꦤꦺꦏ꧀ꦏꦿꦶꦱ꧀ꦡꦸꦱ꧀ꦠꦼꦏ​꧈​ꦢꦺꦏ꧀ꦤꦺꦧꦏꦭ꧀ꦔꦼꦠꦺꦴꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀ꦤꦺ​ꦭꦤ꧀ꦧꦏꦭ꧀ꦔꦼꦏꦺꦏ꧀ꦏꦶꦲꦸꦫꦶꦥ꧀ꦭꦁꦒꦼꦁ​ꦩꦫꦁ​ꦏꦺꦴꦮꦺ​꧉​

²²꧋ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦥꦼꦔꦤ꧀ꦢꦼꦭ꧀ꦭꦺ​ꦲꦶꦗꦶꦏ꧀ꦩꦺꦴꦪꦏ꧀ꦩꦪꦶꦏ꧀ꦏꦸꦢꦸ​ꦲꦩ꧀ꦧꦺꦴꦏ꧀ꦠꦸꦭꦸꦁꦔꦶ​꧉​ ²³ꦢꦶꦠꦫꦶꦏ꧀ꦱꦸꦥꦪꦲꦺꦴꦫꦏꦠꦸꦠ꧀ꦠꦶꦧꦤꦁꦒꦼꦤꦶ꧉​ꦤꦁꦔꦶꦁꦤꦺꦏ꧀ꦤꦸꦭꦸꦁꦔꦶꦮꦺꦴꦁꦭꦶꦪꦤꦺꦏꦺꦴꦮꦺꦏꦸꦢꦸꦱꦶꦁꦲꦠꦶꦲꦠꦶꦏꦫꦺꦴꦲꦮꦏ꧀ꦩꦸꦢꦺꦮꦺ꧈​ꦲꦮꦶꦠ꧀ꦮꦺꦴꦁꦮꦺꦴꦁꦏꦸꦮꦶꦢꦺꦴꦱꦤꦺꦱꦩ꧀ꦥꦺꦏ꧀ꦩ꧀​ꦧ꧀ꦭꦸꦢꦏ꧀꧈​ꦱꦁꦏꦶꦁꦏꦼꦧꦕꦸꦠ꧀ꦠꦺꦮꦺꦴꦁꦮꦺꦴꦁꦏꦸꦮꦶꦮꦶꦱ꧀ꦲꦺꦴꦫꦧꦶꦱꦤꦸꦠꦸꦥ꧀ꦥꦶꦏ꧀ꦭꦏꦸꦮꦤ꧀ꦤꦺ꧈​ꦏꦪꦏꦪꦱꦭꦶꦤ꧀ꦤꦺꦏꦧꦺꦃꦮꦶꦱ꧀ꦒꦸꦥꦏ꧀ꦢꦺꦴꦱꦤꦺ꧉​ꦮꦺꦴꦁꦏꦪꦔꦺꦴꦤꦺꦴꦏꦸꦮꦶꦏꦸꦢꦸꦩ꧀ꦧꦺꦴꦏ꧀ꦲꦼꦢꦺꦴꦃꦲꦶ꧉​

꧋ꦥꦩꦸꦗꦶꦩꦫꦁꦒꦸꦱ꧀ꦠꦶꦄꦭ꧀ꦭꦃ꧉​

²⁴꧋ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦧꦶꦱ​ꦩꦒꦼꦂꦫꦶ​ꦏꦺꦴꦮꦺ​꧈​ꦱꦸꦥꦪ​ꦏꦺꦴꦮꦺ​ꦲꦺꦴꦫ​ꦔꦤ꧀ꦠꦶ​ꦠꦶꦧ​ꦲꦶꦁ​ꦢꦺꦴꦱ​꧈​ꦢꦺꦏ꧀ꦤꦺꦢꦺꦮꦺꦱꦶꦁ​ꦧꦏꦭ꧀ꦤꦸꦤ꧀ꦠꦸꦤ꧀ꦏꦺꦴꦮꦺ​꧉​ꦏꦫꦺꦴ​ꦧꦸꦔꦃ​ꦭꦤ꧀ꦥꦩꦸꦗꦶ​ꦭꦤ꧀ꦏꦫꦺꦴ​ꦲꦠꦶ​ꦱꦶꦁ​ꦮꦶꦱ꧀ꦢꦶꦉꦱꦶꦏ꧀ꦏꦶ​ꦱꦁꦏꦢꦺꦴꦱ​ꦏꦺꦴꦮꦺ​ꦧꦏꦭ꧀ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦏꦼꦧꦼꦏ꧀ꦏꦫꦺꦴ​ꦥꦔ꧀ꦮꦱꦤꦺ​꧉​ ²⁵ꦒꦸꦱ꧀ꦠꦶꦄꦭ꧀ꦭꦃꦱꦶꦁꦲꦺꦴꦫꦲꦺꦤꦺꦁꦭꦶꦪꦤꦺ꧈​ꦱꦶꦁꦔꦺꦴꦁꦏꦺꦴꦤ꧀ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦒꦸꦱ꧀ꦠꦶꦤꦺꦲꦮꦏ꧀ꦏꦺꦢꦺꦮꦺ꧈​ꦩꦼꦢꦸꦤ꧀ꦤꦁꦗꦒꦠ꧀ꦏꦁꦒꦺꦴꦔ꧀ꦭꦸꦮꦂꦫꦶꦲꦮꦏ꧀ꦏꦺꦢꦺꦮꦺꦱꦁꦏꦢꦺꦴꦱ꧉​ꦪꦒꦸꦱ꧀ꦠꦶꦄꦭ꧀ꦭꦃꦲꦶꦏꦶꦱꦶꦁꦏꦸꦢꦸꦢꦶꦥꦸꦗꦶꦥꦸꦗꦶ꧈​ꦲꦮꦶꦠ꧀ꦢꦺꦏ꧀ꦤꦺꦔ꧀ꦒꦸꦩꦸꦤ꧀ꦤꦏꦺꦠꦼꦤꦤ꧀ ꦒꦼꦢꦺꦏꦼꦏꦸꦮꦠ꧀ꦠꦤ꧀ꦤꦺꦭꦤ꧀ꦒꦼꦢꦺꦥꦔ꧀ꦮꦱꦤꦺ꧈​ꦏꦮꦶꦠ꧀​ꦩ꧀ꦧꦶꦪꦺꦤ꧀ꦱꦏ꧀ꦢꦸꦫꦸꦁꦔꦺꦗꦒꦠ꧀ꦲꦺꦤꦺꦁꦠꦼꦏꦤꦺꦱꦲꦶꦏꦶꦭꦤ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​ꦄꦩꦺꦤ꧀꧈​

ꦪꦸꦢꦱ꧀

↑ ↑ ↑

← ꧇꧓꧇ꦪꦺꦴꦲ꦳ꦤꦼꦱ꧀

ꦥꦩꦼꦢꦂꦫꦤ꧀ →