ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦩꦠꦺꦪꦸꦱ꧀

꧁꧋ꦏꦧꦂ​ꦏꦧꦸꦔꦃꦲꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦠꦸꦫꦸꦠ꧀ꦩꦠꦺꦪꦸꦱ꧀꧈꧂


ꦥꦱꦭ꧀ ꧇​꧑꧇​ ꧇​꧒꧇​ ꧇​꧓꧇​ ꧇​꧔꧇​ ꧇​꧕꧇​ ꧇​꧖꧇​ ꧇​꧗꧇​ ꧇​꧘꧇​ ꧇​꧙꧇​ ꧇​꧑꧐꧇​ ꧇​꧑꧑꧇​ ꧇​꧑꧒꧇​ ꧇​꧑꧓꧇​ ꧇​꧑꧔꧇​ ꧇​꧑꧕꧇​ ꧇​꧑꧖꧇​ ꧇​꧑꧗꧇​ ꧇​꧑꧘꧇​ ꧇​꧑꧙꧇​ ꧇​꧒꧐꧇​ ꧇​꧒꧑꧇​ ꧇​꧒꧒꧇​ ꧇​꧒꧓꧇​ ꧇​꧒꧔꧇​ ꧇​꧒꧕꧇​ ꧇​꧒꧖꧇​ ꧇​꧒꧗꧇​ ꧇​꧒꧘꧇​

꧋ꦭꦪꦁ​ꦠꦸꦫꦸꦤ꧀ꦤꦤ꧀꧈​

꧇​꧑꧇​ 1꧋ꦲꦶꦏꦶ​ꦭꦪꦁ​ꦠꦸꦫꦸꦤ꧀ꦤꦤ꧀ꦤꦺ​ꦩ꧀ꦧꦃꦩ꧀ꦧꦲꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦑꦿꦶꦱ꧀ꦠꦸꦱ꧀꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦑꦿꦶꦱ꧀ꦠꦸꦱ꧀ꦏꦸꦮꦶ​ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ꦭꦤ꧀ꦫꦠꦸ​ꦣꦮ꦳ꦼꦢ꧀ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀꧈​

2꧋ꦧꦥ​ꦄꦨꦿꦲꦩ꧀ꦏꦸꦮꦶ​ꦧꦥꦏ꧀ꦏꦺꦆꦱꦏ꧀ ꦆꦱꦏ꧀ꦧꦥꦏ꧀ꦏꦺꦪꦏꦸꦧ꧀ ꦪꦏꦸꦧ꧀ꦧꦥꦏ꧀ꦏꦺꦪꦸꦢꦃꦱꦏ꧀ꦱꦼꦢꦸꦭꦸꦂꦫꦺ​꧉​ 3ꦪꦸꦢꦃꦧꦥꦏ꧀ꦏꦺꦥꦺꦫꦺꦱ꧀ꦭꦤ꧀ꦯꦺꦫꦏ꧀ ꦠꦩꦂ​ꦲꦶꦧꦸꦤꦺ​꧉​ꦥꦺꦫꦺꦱ꧀ꦧꦥꦏ꧀ꦏꦺꦑꦺꦱꦿꦺꦴꦩ꧀ꦭꦤ꧀ꦑꦺꦱꦿꦺꦴꦩ꧀ꦧꦥꦏ꧀ꦏꦺꦄꦫꦩ꧀꧈​ 4ꦄꦫꦩ꧀ꦧꦥꦏ꧀ꦏꦺꦄꦩꦶꦤꦢꦧ꧀ ꦄꦩꦶꦤꦢꦧ꧀ꦧꦥꦏ꧀ꦏꦺꦟꦏ꧀ꦱꦺꦴꦤ꧀ꦭꦤ꧀ꦟꦏ꧀ꦱꦺꦴꦤ꧀ꦧꦥꦏ꧀ꦏꦺꦱꦭ꧀ꦩꦺꦴꦤ꧀꧈​ 5-6ꦱꦭ꧀ꦩꦺꦴꦤ꧀ꦧꦥꦏ꧀ꦏꦺꦧꦺꦴꦮꦱ꧀ ꦫꦲꦧ꧀ꦲꦶꦧꦸꦤꦺ​꧉​ꦧꦺꦴꦮꦱ꧀ꦧꦥꦏ꧀ꦏꦺꦎꦧꦺꦢ꧀ ꦫꦸꦠ꧀ꦲꦶꦧꦸꦤꦺ​꧉​ꦎꦧꦺꦢ꧀ꦧꦥꦏ꧀ꦏꦺꦆꦱꦲꦶ​ꦭꦤ꧀ꦆꦱꦲꦶ​ꦧꦥꦏ꧀ꦏꦺꦫꦠꦸ​ꦣꦮ꦳ꦼꦢ꧀꧈​ꦣꦮ꦳ꦼꦢ꧀ꦧꦥꦏ꧀ꦏꦺꦯꦺꦴꦭꦺꦩꦤ꧀ ꦲꦶꦧꦸꦤꦺ​ꦠꦶꦭꦱꦤ꧀ꦤꦺꦈꦫꦶꦪꦃ꧉​ 7ꦯꦺꦴꦭꦺꦩꦤ꧀ꦧꦥꦏ꧀ꦏꦺꦬꦼꦏꦺꦴꦧꦺꦪꦩ꧀ ꦬꦼꦏꦺꦴꦧꦺꦪꦩ꧀ꦧꦥꦏ꧀ꦏꦺꦄꦧꦶꦪ​꧈​ꦄꦧꦶꦪ​ꦧꦥꦏ꧀ꦏꦺꦄꦱ​꧉​ 8ꦄꦱ​ꦧꦥꦏ꧀ꦏꦺꦪꦺꦴꦱꦥ꦳ꦠ꧀ ꦪꦺꦴꦱꦥ꦳ꦠ꧀ꦧꦥꦏ꧀ꦏꦺꦪꦺꦴꦫꦩ꧀ ꦪꦺꦴꦫꦩ꧀ꦧꦥꦏ꧀ꦏꦺꦈꦱꦶꦪ꧉​ 9ꦈꦱꦶꦪꦧꦥꦏ꧀ꦏꦺꦪꦺꦴꦠꦩ꧀ ꦪꦺꦴꦠꦩ꧀ꦧꦥꦏ꧀ꦏꦺꦲꦏꦱ꧀​ꦭꦤ꧀ꦲꦏꦱ꧀​ꦧꦥꦏ꧀ꦏꦺꦲ꦳ꦶꦱ꧀ꦏꦶꦪ꧉​ 10ꦲ꦳ꦶꦱ꧀ꦏꦶꦪꦧꦥꦏ꧀ꦏꦺꦩꦤꦱꦺ꧈​ꦩꦤꦱꦺꦧꦥꦏ꧀ꦏꦺꦄꦩꦺꦴꦤ꧀ ꦄꦩꦺꦴꦤ꧀ꦧꦥꦏ꧀ꦏꦺꦪꦺꦴꦱꦶꦪ​꧉​ 11ꦪꦺꦴꦱꦶꦪ​ꦧꦥꦏ꧀ꦏꦺꦪꦼꦏꦺꦴꦚꦱꦏ꧀ꦱꦼꦢꦸꦭꦸꦂꦫꦺ​꧉​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦧꦁꦱ​ꦆꦱꦿꦌꦭ꧀ꦢꦶꦧꦺꦴꦪꦺꦴꦁ​ꦤꦁꦠꦤꦃ​ꦨꦧꦶꦭꦺꦴꦤ꧀꧈​

12꧋ꦤꦁꦠꦤꦃ​ꦨꦧꦶꦭꦺꦴꦤ꧀ꦏꦺꦴꦤꦺꦴ​ꦭꦪꦁ​ꦠꦸꦫꦸꦤ꧀ꦤꦤ꧀ꦏꦸꦮꦶ​ꦠꦼꦫꦸꦱ꧀ꦱꦤ꧀ꦤꦺ​ꦔꦺꦤꦺ​:ꦪꦼꦏꦺꦴꦚꦧꦥꦏ꧀ꦏꦺꦱꦺꦪꦭ꧀ꦠꦶꦪꦺꦭ꧀ ꦱꦺꦪꦭ꧀ꦠꦶꦪꦺꦭ꧀ꦧꦥꦏ꧀ꦏꦺꦯꦺꦫꦸꦧꦧꦶꦭ꧀꧈​ 13ꦯꦺꦫꦸꦧꦧꦶꦭ꧀ꦧꦥꦏ꧀ꦏꦺꦄꦧꦶꦲꦸꦢ꧀ꦭꦤ꧀ꦄꦧꦶꦲꦸꦢ꧀ꦧꦥꦏ꧀ꦏꦺꦌꦭꦶꦄꦏꦶꦩ꧀꧈​ꦌꦭꦶꦄꦏꦶꦩ꧀ꦧꦥꦏ꧀ꦏꦺꦄꦱꦸꦂ꧉​ 14ꦄꦱꦸꦂꦧꦥꦏ꧀ꦏꦺꦯꦢꦺꦴꦏ꧀ ꦯꦢꦺꦴꦏ꧀ꦧꦥꦏ꧀ꦏꦺꦲꦏꦶꦩ꧀​ꦭꦤ꧀ꦲꦏꦶꦩ꧀​ꦧꦥꦏ꧀ꦏꦺꦌꦭꦶꦪꦸꦢ꧀꧈​ 15ꦌꦭꦶꦪꦸꦢ꧀ꦧꦥꦏ꧀ꦏꦺꦌꦭꦶꦄꦱꦂ꧈​ꦌꦭꦶꦄꦱꦂꦧꦥꦏ꧀ꦏꦺꦩꦠꦤ꧀ ꦩꦠꦤ꧀ꦧꦥꦏ꧀ꦏꦺꦪꦏꦸꦧ꧀꧈​ 16ꦪꦏꦸꦧ꧀ꦧꦥꦏ꧀ꦏꦺꦪꦺꦴꦱꦺꦥ꦳꧀ꦭꦤ꧀ꦪꦺꦴꦱꦺꦥ꦳꧀ꦏꦸꦮꦶ​ꦧꦺꦴꦗꦺꦴꦤꦺ​ꦩꦫꦶꦪ꧉​ꦩꦫꦶꦪꦏꦸꦮꦶ​ꦱꦶꦁ​ꦔ꧀ꦭꦲꦶꦂꦫꦏꦺꦒꦸꦱ꧀ꦠꦶ​ꦪꦺꦯꦸꦱ꧀ ꦱꦶꦁ​ꦢꦶꦲꦫꦤ꧀ꦤꦶ​ꦑꦿꦶꦱ꧀ꦠꦸꦱ꧀꧈​

17꧋ꦢꦢꦶ​ꦲꦺꦤꦺꦁꦠꦸꦫꦸꦤ꧀ꦤꦤ꧀ꦥꦠ꧀ꦧꦼꦭꦱ꧀ꦥꦶꦁ​ꦠꦼꦭꦸ​꧈​ꦪꦏꦸꦮꦶ​:ꦥꦠ꧀ꦧꦼꦭꦱ꧀ꦮꦶꦮꦶꦠ꧀ꦄꦨꦿꦲꦩ꧀ꦠꦼꦏꦤꦺ​ꦣꦮ꦳ꦼꦢ꧀ ꦥꦠ꧀ꦧꦼꦭꦱ꧀ꦮꦶꦮꦶꦠ꧀ꦣꦮ꦳ꦼꦢ꧀ꦠꦼꦏꦤꦺ​ꦧꦼꦧꦺꦴꦪꦺꦴꦁꦔꦤ꧀ꦤꦁꦠꦤꦃ​ꦨꦧꦶꦭꦺꦴꦤ꧀ꦭꦤ꧀ꦥꦠ꧀ꦧꦼꦭꦱ꧀ꦮꦶꦮꦶꦠ꧀ꦧꦼꦧꦺꦴꦪꦺꦴꦁꦔꦤ꧀ꦤꦁꦠꦤꦃ​ꦨꦧꦶꦭꦺꦴꦤ꧀ꦠꦼꦏꦤꦺ​ꦑꦿꦶꦱ꧀ꦠꦸꦱ꧀꧈​

꧋ꦭꦲꦶꦂꦫꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

18꧋ꦭꦲꦶꦂꦫꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦑꦿꦶꦱ꧀ꦠꦸꦱ꧀ꦏꦸꦮꦶ​ꦭꦏꦸꦤꦺꦔꦺꦤꦺ​:ꦩꦫꦶꦪ꧈​ꦲꦶꦧꦸꦤꦺ​꧈​ꦮꦶꦱ꧀ꦥꦕꦁꦔꦤ꧀ꦏꦫꦺꦴ​ꦪꦺꦴꦱꦺꦥ꦳꧀꧈​ꦤꦁꦔꦶꦁ​ꦱꦏ꧀ꦢꦸꦫꦸꦁꦔꦺꦏꦮꦶꦤ꧀ꦩꦫꦶꦪꦮꦶꦱ꧀ꦩꦼꦠꦼꦁ​ꦱꦁꦏꦫꦺꦴꦃ​ꦱꦸꦕꦶ​꧉​ 19ꦭꦃ​ꦗꦭꦂꦫꦤ꧀ꦪꦺꦴꦱꦺꦥ꦳꧀ꦏꦸꦮꦶ​ꦱꦏ꧀ꦮꦶꦗꦶꦤꦺꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦲꦺꦴꦫ​ꦒꦼꦊꦩ꧀​ꦔ꧀ꦒꦮꦺ​ꦮꦶꦫꦁꦔꦺ​ꦩꦫꦶꦪꦤꦁꦠꦼꦔꦃꦲꦺ​ꦮꦺꦴꦁ​ꦲꦺꦴꦏꦺꦃ꧉​ꦪꦺꦴꦱꦺꦥ꦳꧀ꦗꦮꦤꦺꦲꦉꦥ꧀ꦩꦼꦤꦼꦁꦩꦼꦤꦼꦁꦔꦤ꧀ꦮꦲꦺ​ꦩꦼꦢꦺꦴꦠ꧀ꦥꦼꦥꦕꦁ​ꦔꦤ꧀ꦤꦺ​ꦏꦫꦺꦴ​ꦩꦫꦶꦪ꧉​ 20ꦤꦁꦔꦶꦁ​ꦱꦏ꧀ꦧꦉꦁꦔꦺꦔ꧀ꦒꦒꦱ꧀​ꦔ꧀ꦒꦒꦱ꧀ꦧꦧ꧀ꦏꦸꦮꦶ​꧈​ꦢꦺꦏ꧀ꦤꦺꦲꦺꦤ꧀ꦠꦸꦏ꧀ꦲꦶꦩ꧀ꦥꦺꦤ꧀꧈​ꦲꦶꦁ​ꦱꦏ꧀ꦗꦼꦫꦺꦴꦤꦺꦲꦶꦩ꧀ꦥꦺꦤ꧀ꦏꦸꦮꦶ​ꦩꦸꦭꦺꦏꦠ꧀ꦠꦺꦒꦸꦱ꧀ꦠꦶ​ꦔꦺꦠꦺꦴꦏ꧀ꦩꦫꦁ​ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦤꦺ​:“ꦪꦺꦴꦱꦺꦥ꦳꧀ ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ ꦏꦺꦴꦮꦺ​ꦲꦗ​ꦮꦼꦢꦶ​ꦔꦼꦥꦺꦏ꧀ꦩꦫꦶꦪꦢꦢꦶ​ꦧꦺꦴꦗꦺꦴꦩꦸ​꧈​ꦲꦮꦶꦠ꧀ꦧꦪꦶ​ꦱꦶꦁ​ꦢꦶꦒꦺꦩ꧀ꦧꦺꦴꦭ꧀ꦏꦸꦮꦶ​ꦠꦼꦏꦤꦺ​ꦱꦁꦏꦫꦺꦴꦃ​ꦱꦸꦕꦶ​꧉​ 21ꦩꦫꦶꦪꦧꦏꦭ꧀​ꦔ꧀ꦭꦲꦶꦂꦫꦏꦺꦲꦤꦏ꧀ꦭꦤꦁ​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦗꦼꦤꦼꦁꦔꦏꦺꦪꦺꦯꦸꦱ꧀ ꦲꦮꦶꦠ꧀ꦢꦺꦏ꧀ꦤꦺꦧꦏꦭ꧀​ꦚ꧀ꦭꦩꦼꦠ꧀ꦠꦏꦺꦧꦁꦱꦤꦺ​ꦱꦁꦏꦢꦺꦴꦱꦤꦺ​꧉​”

22-23꧋ꦏꦸꦮꦶ​ꦩꦲꦸ​ꦏꦧꦺꦃ​ꦩꦫꦏ꧀ꦏꦏꦺꦏ꧀ꦭꦏꦺꦴꦤ꧀ꦱꦶꦁ​ꦮꦶꦱ꧀ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦢꦺꦏ꧀​ꦩ꧀ꦧꦶꦪꦺꦤ꧀ꦭꦶꦮꦠ꧀ꦤꦧꦶ​ꦪꦺꦱꦪ​꧈​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦲꦺꦤꦺꦁꦥꦿꦮꦤ꧀ꦧꦏꦭ꧀ꦩꦼꦠꦼꦁ​ꦭꦤ꧀​ꦔ꧀ꦭꦲꦶꦂꦫꦏꦺꦲꦤꦏ꧀ꦭꦤꦁ​꧈​ꦱꦶꦁ​ꦧꦏꦭ꧀ꦢꦶꦗꦼꦤꦼꦁꦔꦏꦺꦆꦩꦤꦸꦌꦭ꧀ ꦠꦼꦒꦼꦱ꧀ꦱꦺ​:ꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​” 24ꦏꦢꦸꦁ​ꦠꦔꦶ​꧈​ꦪꦺꦴꦱꦺꦥ꦳꧀ꦠꦼꦫꦸꦱ꧀ꦤꦸꦫꦸꦠ꧀ꦠꦶ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦩꦸꦭꦺꦏꦠ꧀ꦠꦺꦒꦸꦱ꧀ꦠꦶ​ꦩꦲꦸ​꧉​ꦢꦺꦏ꧀ꦤꦺꦠꦼꦫꦸꦱ꧀ꦏꦮꦶꦤ꧀ꦏꦫꦺꦴ​ꦩꦫꦶꦪ꧉​ 25ꦤꦁꦔꦶꦁ​ꦪꦺꦴꦱꦺꦥ꦳꧀ꦲꦺꦴꦫ​ꦠꦸꦫꦸ​ꦕꦩ꧀ꦥꦸꦂ​ꦏꦫꦺꦴ​ꦩꦫꦶꦪꦔꦤ꧀ꦠꦶ​ꦭꦲꦶꦂꦫꦺ​ꦲꦤꦏ꧀ꦏꦺ​ꦭꦤꦁ​꧉​ꦏꦢꦸꦁ​ꦮꦶꦱ꧀ꦭꦲꦶꦂ​ꦧꦺꦴꦕꦃꦲꦺ​ꦢꦶꦗꦼꦤꦼꦁꦔꦏꦺꦪꦺꦯꦸꦱ꧀ꦏꦫꦺꦴ​ꦪꦺꦴꦱꦺꦥ꦳꧀꧈​ ↑ ↑ ↑


꧋ꦭꦶꦤ꧀ꦠꦁ​ꦱꦁꦏꦮꦺꦠꦤ꧀꧈​

꧇​꧒꧇​ 1꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦲꦶꦂꦫꦺ​ꦤꦁꦏꦸꦠꦧꦺꦠ꧀ꦭꦺꦲꦺꦩ꧀ ꦤꦁꦢꦶꦱ꧀ꦠꦿꦶꦏ꧀ꦪꦸꦢꦺꦪ​꧉​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦲ꦳ꦺꦫꦺꦴꦢꦺꦱ꧀ꦱꦶꦁ​ꦢꦢꦶ​ꦫꦠꦸꦤꦺ​ꦏꦺꦴꦤꦺꦴ​꧉​ꦲꦺꦴꦫ​ꦊꦠ꧀ꦱꦸꦮꦶꦲꦺꦤꦺꦁꦮꦺꦴꦁ​ꦥꦶꦤ꧀ꦠꦼꦂ​ꦱꦶꦗꦶꦭꦺꦴꦫꦺꦴꦱꦁꦏꦧꦮꦃꦮꦺꦠꦤ꧀ꦤꦤ꧀ꦠꦼꦏ​ꦤꦁꦏꦸꦠꦪꦺꦫꦸꦱꦭꦺꦩ꧀꧈​ 2ꦮꦺꦴꦁꦮꦺꦴꦁ​ꦲꦶꦏꦸ​ꦠꦼꦫꦸꦱ꧀ꦥꦢ​ꦠꦏꦺꦴꦤ꧀:“ꦤꦁꦲꦼꦤ꧀ꦢꦶ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦤꦼꦩꦸ​ꦫꦠꦸꦤꦺ​ꦧꦁꦱ​ꦙꦸꦱꦶꦁ​ꦲꦼꦤ꧀ꦠꦱ꧀ꦭꦲꦶꦂ​?ꦲꦮꦏ꧀ꦏꦺ​ꦢꦺꦮꦺꦮꦼꦫꦸꦃ​ꦭꦶꦤ꧀ꦠꦁꦔꦺ​ꦤꦁꦮꦺꦠꦤ꧀ꦭꦤ꧀ꦲꦮꦏ꧀ꦏꦺ​ꦢꦺꦮꦺꦠꦼꦏ​ꦩ꧀ꦧꦿꦺꦤꦺꦲꦉꦥ꧀ꦚꦼꦩ꧀ꦧꦃ​ꦩꦫꦁ​ꦢꦺꦏ꧀ꦤꦺ꧉​”

3꧋ꦏꦢꦸꦁ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦏꦿꦸꦔꦸ​ꦧꦧ꧀ꦲꦶꦏꦶ​꧈​ꦢꦺꦏ꧀ꦤꦺꦠꦼꦫꦸꦱ꧀ꦏꦒꦺꦠ꧀ꦧꦔꦼꦠ꧀ ꦱꦼꦩꦺꦴꦤꦺꦴ​ꦲꦸꦒ​ꦮꦺꦴꦁ​ꦱꦏ꧀ꦏꦸꦠꦪꦺꦫꦸꦱꦭꦺꦩ꧀꧈​ 4ꦫꦠꦸ​ꦲ꦳ꦺꦫꦺꦴꦢꦺꦱ꧀ꦠꦼꦫꦸꦱ꧀ꦏꦺꦴꦁꦏꦺꦴꦤ꧀ꦤꦤ꧀ꦚꦼꦭꦸꦏ꧀ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀​ꦏꦧꦺꦃ​ꦠꦼꦫꦸꦱ꧀ꦢꦶꦠꦏꦺꦴꦤ꧀ꦤꦶ​꧈​ꦤꦁꦲꦼꦤ꧀ꦢꦶ​ꦧꦏꦭ꧀ꦭꦺ​ꦭꦲꦶꦂꦫꦺ​ꦑꦿꦶꦱ꧀ꦠꦸꦱ꧀꧈​

5-6꧋ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦫꦸꦱ꧀ꦥꦢ​ꦱꦼꦩꦲꦸꦂ​:“ꦤꦁꦏꦸꦠꦧꦺꦠ꧀ꦭꦺꦲꦺꦩ꧀ꦤꦁꦢꦶꦱ꧀ꦠꦿꦶꦏ꧀ꦪꦸꦢꦺꦪ​꧈​ꦲꦮꦶꦠ꧀ꦮꦶꦱ꧀ꦢꦶꦠꦸꦭꦶꦱ꧀ꦏꦫꦺꦴ​ꦤꦧꦶ​ꦩꦶꦏꦔꦺꦤꦺ​:

‘ꦏꦺꦴꦮꦺ​ꦧꦺꦠ꧀ꦭꦺꦲꦺꦩ꧀ꦤꦁꦠꦤꦃ​ꦪꦸꦢꦃ꧈​
ꦏꦺꦴꦮꦺ​ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦏꦸꦠꦱꦶꦁ​
ꦕꦶꦭꦶꦏ꧀ꦢꦺꦮꦺꦤꦁꦠꦤꦃ​ꦪꦸꦢꦃ꧈​
ꦲꦮꦶꦠ꧀ꦱꦁꦏꦏꦺꦴꦮꦺ​ꦧꦏꦭ꧀ꦩꦼꦠꦸ​
ꦥꦔꦺꦴꦤ꧀ꦱꦶꦁ​ꦧꦏꦭ꧀ꦤꦸꦤ꧀ꦠꦸꦤ꧀ꦲꦸꦩꦠ꧀ꦏꦸ​ꦆꦱꦿꦌꦭ꧀꧈​’”

7꧋ꦱꦏ꧀ꦮꦶꦱ꧀ꦱꦺ​ꦲꦺꦤ꧀ꦠꦸꦏ꧀ꦏꦠꦼꦫꦁꦔꦤ꧀ꦏꦸꦮꦶ​꧈​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦠꦼꦫꦸꦱ꧀ꦏꦺꦴꦁꦏꦺꦴꦤ꧀ꦤꦤ꧀ꦚꦼꦭꦸꦏ꧀ꦮꦺꦴꦁꦮꦺꦴꦁ​ꦥꦶꦤ꧀ꦠꦼꦂ​ꦱꦁꦏꦮꦺꦠꦤ꧀ꦤꦤ꧀ꦩꦲꦸ​꧈​ꦤꦁꦔꦶꦁ​ꦠꦤ꧀ꦥ​ꦮꦺꦴꦁ​ꦲꦺꦴꦏꦺꦃꦔꦼꦂꦠꦶ​꧉​ꦮꦺꦴꦁꦮꦺꦴꦁ​ꦥꦶꦤ꧀ꦠꦼꦂ​ꦏꦸꦮꦶ​ꦠꦼꦫꦸꦱ꧀ꦢꦶꦠꦏꦺꦴꦤ꧀ꦤꦶ​ꦲꦺꦴꦏꦺꦃꦲꦺꦴꦏꦺꦃ꧈​ꦏꦥꦤ꧀ꦭꦶꦤ꧀ꦠꦁꦔꦺ​ꦩꦺꦴꦭꦃꦲꦶꦏꦺꦠꦺꦴꦏ꧀꧈​ 8ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦮꦺꦴꦁꦮꦺꦴꦁ​ꦥꦶꦤ꧀ꦠꦼꦂ​ꦩꦲꦸ​ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦧꦸꦢꦭ꧀ꦤꦁꦏꦸꦠꦧꦺꦠ꧀ꦭꦺꦲꦺꦩ꧀꧈​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​:“ꦏꦤ​ꦥꦢ​ꦧꦸꦢꦭ꧀ꦭꦤ꧀ꦥꦢ​ꦔ꧀ꦒꦺꦴꦭꦺꦏ꧀ꦱꦏ꧀ꦲꦺꦤꦺꦁꦔꦺꦏꦧꦂ​ꦧꦧ꧀ꦧꦪꦶ​ꦏꦸꦮꦶ​꧉​ꦤꦺꦏ꧀ꦮꦶꦱ꧀ꦏꦼꦠꦼꦩꦸ​꧈​ꦲꦏꦸ​ꦢꦶꦲꦺꦴꦩꦺꦴꦁꦔꦶ꧈​ꦱꦸꦥꦪ​ꦲꦏꦸ​ꦲꦸꦒ​ꦧꦶꦱ​ꦚꦼꦩ꧀ꦧꦃ​ꦩꦫꦁ​ꦢꦺꦏ꧀ꦤꦺ꧉​”

9꧋ꦮꦺꦴꦁꦮꦺꦴꦁ​ꦥꦶꦤ꧀ꦠꦼꦂ​ꦩꦲꦸ​ꦠꦼꦫꦸꦱ꧀ꦥꦢ​ꦧꦸꦢꦭ꧀ ꦱꦏ꧀ꦮꦶꦱ꧀ꦱꦺ​ꦤꦩ꧀ꦥ​ꦠꦼꦩ꧀ꦧꦸꦁꦔꦺ​ꦫꦠꦸꦤꦺ​꧉​ꦱꦏ꧀ꦧꦉꦁꦔꦺꦥꦢ​ꦩ꧀ꦭꦏꦸ​꧈​ꦭꦶꦤ꧀ꦠꦁ​ꦱꦶꦁ​ꦏꦺꦠꦺꦴꦏ꧀ꦤꦁꦮꦺꦠꦤ꧀ꦔꦺꦠꦺꦴꦏ꧀ꦤꦁꦔꦉꦥ꧀ꦥꦺ​ꦭꦤ꧀​ꦩ꧀ꦭꦏꦸ​ꦠꦼꦏꦤ꧀​ꦤ꧀ꦢꦸꦮꦸꦂꦫꦺꦥꦁꦒꦺꦴꦤ꧀ꦤꦤ꧀ꦤꦺ​ꦧꦺꦴꦕꦃ​ꦧꦪꦶꦤꦺ​꧉​ꦠꦼꦏꦤ꧀ꦏꦺꦴꦤꦺꦴ​ꦭꦶꦤ꧀ꦠꦁꦔꦺ​ꦠꦼꦫꦸꦱ꧀ꦩꦤ꧀ꦢꦼꦏ꧀꧈​ 10ꦮꦼꦫꦸꦃ​ꦭꦶꦤ꧀ꦠꦁꦔꦺ​ꦩꦲꦸ​꧈​ꦮꦺꦴꦁꦮꦺꦴꦁ​ꦥꦶꦤ꧀ꦠꦼꦂ​ꦏꦸꦮꦶ​ꦠꦼꦫꦸꦱ꧀ꦥꦢ​ꦧꦸꦔꦃ​ꦧꦔꦼꦠ꧀꧈​ 11ꦠꦼꦫꦸꦱ꧀ꦥꦢ​ꦩ꧀ꦊꦧꦸ​ꦲꦺꦴꦩꦃꦲꦺ​ꦭꦤ꧀ꦮꦼꦫꦸꦃ​ꦧꦪꦶꦤꦺ​ꦭꦤ꧀ꦩꦫꦶꦪ꧈​ꦲꦶꦧꦸꦤꦺ​꧉​ꦮꦺꦴꦁꦮꦺꦴꦁ​ꦥꦶꦤ꧀ꦠꦼꦂ​ꦩꦲꦸ​ꦠꦼꦫꦸꦱ꧀ꦥꦢ​ꦱꦸꦗꦸꦠ꧀ꦭꦤ꧀ꦚꦼꦩ꧀ꦧꦃ​ꦩꦫꦁ​ꦧꦪꦶꦤꦺ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦥꦢ​ꦲꦩ꧀ꦧꦸꦏꦏ꧀ꦥꦭꦶꦱ꧀ꦱꦺꦮꦢꦃꦏꦱꦸꦒꦶꦃꦲꦤ꧀ꦤꦺ​ꦠꦼꦫꦸꦱ꧀ꦔꦼꦏꦺꦏ꧀ꦏꦶꦏꦢꦺꦴꦩꦫꦁ​ꦧꦪꦶꦤꦺ​꧈​ꦪꦏꦸꦮꦶ​ꦲꦼꦩꦱ꧀ ꦩꦼꦚꦤ꧀ꦭꦤ꧀ꦲꦼꦩꦸꦂ꧉​

12꧋ꦮꦺꦴꦁꦮꦺꦴꦁ​ꦥꦶꦤ꧀ꦠꦼꦂ​ꦩꦲꦸ​ꦩꦸꦭꦶꦃꦲꦺ​ꦲꦺꦴꦫ​ꦩ꧀ꦭꦏꦸ​ꦢꦭꦤ꧀ꦱꦶꦁ​ꦢꦶꦭꦶꦮꦠ꧀ꦠꦶ​ꦩꦲꦸꦤꦺ​꧉​ꦲꦮꦶꦠ꧀ꦲꦶꦁ​ꦲꦶꦩ꧀ꦥꦺꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦶꦮꦺꦴꦁꦮꦺꦴꦁ​ꦏꦸꦮꦶ​꧈​ꦢꦶꦥꦼꦔꦶꦁ​ꦧꦭꦶꦏ꧀ꦤꦁꦔ꧀ꦒꦺꦴꦤ꧀ꦤꦺꦫꦠꦸ​ꦲ꦳ꦺꦫꦺꦴꦢꦺꦱ꧀꧈​

꧋ꦭꦸꦔ​ꦤꦁꦤꦼꦒꦫ​ꦌꦒꦶꦥ꧀ꦠꦼ꧉​

13꧋ꦱꦏ꧀ꦮꦶꦱ꧀ꦱꦺ​ꦮꦺꦴꦁꦮꦺꦴꦁ​ꦥꦶꦤ꧀ꦠꦼꦂ​ꦩꦲꦸ​ꦥꦢ​ꦩꦸꦭꦶꦃ​꧈​ꦠꦼꦫꦸꦱ꧀ꦲꦺꦤꦺꦁꦩꦸꦭꦺꦏꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦠꦺꦴꦏ꧀ꦩꦫꦁ​ꦪꦺꦴꦱꦺꦥ꦳꧀ꦲꦶꦁ​ꦱꦏ꧀ꦗꦼꦫꦺꦴꦤꦺꦲꦶꦩ꧀ꦥꦺꦤ꧀꧈​ꦩꦸꦭꦺꦏꦠ꧀ꦠꦺꦩꦲꦸ​ꦔꦺꦴꦩꦺꦴꦁꦔꦺꦤꦺ​:“ꦪꦺꦴꦱꦺꦥ꦳꧀ ꦠꦔꦶ​!ꦧꦪꦶꦤꦺ​ꦭꦤ꧀ꦲꦶꦧꦸꦤꦺ​ꦒꦮꦤꦼꦤ꧀ꦭꦸꦔ​ꦤꦁꦤꦼꦒꦫ​ꦌꦒꦶꦥ꧀ꦠꦼ꧉​ꦥꦢ​ꦩꦁꦒꦺꦴꦤ​ꦤꦁꦏꦤ​ꦠꦼꦏꦤꦺ​ꦲꦏꦸ​ꦔꦺꦴꦩꦺꦴꦁꦔꦶꦏꦺꦴꦮꦺ​ꦩꦼꦤꦺꦃ​꧉​ꦲꦮꦶꦠ꧀ꦫꦠꦸ​ꦲ꦳ꦺꦫꦺꦴꦢꦺꦱ꧀ꦧꦏꦭ꧀​ꦔ꧀ꦒꦺꦴꦭꦺꦏ꧀ꦏꦶ​ꦧꦪꦶꦤꦺ​ꦲꦉꦥ꧀ꦢꦶꦥꦠꦺꦤ꧀ꦤꦶ​꧉​”

14꧋ꦲꦶꦁ​ꦠꦼꦔꦃ​ꦮꦼꦔꦶ​ꦪꦺꦴꦱꦺꦥ꦳꧀ꦠꦔꦶ​꧈​ꦠꦼꦫꦸꦱ꧀ꦧꦪꦶꦤꦺ​ꦭꦤ꧀ꦲꦶꦧꦸꦤꦺ​ꦢꦶꦒꦮ​ꦭꦸꦔ​ꦤꦁꦤꦼꦒꦫ​ꦌꦒꦶꦥ꧀ꦠꦼ꧉​ 15ꦪꦺꦴꦱꦺꦥ꦳꧀ꦠꦼꦫꦸꦱ꧀ꦩꦁꦒꦺꦴꦤ꧀ꦤꦁꦏꦺꦴꦤꦺꦴ​ꦠꦼꦏꦤ꧀ꦥꦠꦶꦤꦺ​ꦫꦠꦸ​ꦲ꦳ꦺꦫꦺꦴꦢꦺꦱ꧀꧈​ꦢꦢꦶꦤꦺ​ꦏ꧀ꦭꦏꦺꦴꦤ꧀ꦠꦼꦤꦤ꧀ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦏ꧀​ꦩ꧀ꦧꦶꦪꦺꦤ꧀ꦭꦶꦮꦠ꧀ꦤꦧꦶ​ꦲ꦳ꦺꦴꦱꦺꦪ​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦲꦏꦸ​ꦚꦼꦭꦸꦏ꧀ꦲꦤꦏ꧀ꦏꦸ​ꦱꦁꦏꦌꦒꦶꦥ꧀ꦠꦼ꧉​”

꧋ꦧꦺꦴꦕꦃꦧꦺꦴꦕꦃ​ꦢꦶꦥꦠꦺꦤ꧀ꦤꦶ​꧉​

16꧋ꦫꦠꦸ​ꦲ꦳ꦺꦫꦺꦴꦢꦺꦱ꧀ꦔꦼꦂꦠꦶ​ꦤꦺꦏ꧀ꦢꦶꦲꦥꦸꦱ꧀ꦱꦶ​ꦏꦫꦺꦴ​ꦮꦺꦴꦁꦮꦺꦴꦁ​ꦥꦶꦤ꧀ꦠꦼꦂ​ꦱꦁꦏꦮꦺꦠꦤ꧀ꦤꦤ꧀ ꦩꦸꦭꦤꦺ​ꦠꦼꦫꦸꦱ꧀ꦤꦼꦱꦸ​ꦧꦔꦼꦠ꧀꧈​ꦢꦺꦏ꧀ꦤꦺꦠꦼꦫꦸꦱ꧀ꦩꦿꦺꦤ꧀ꦠꦃ​ꦏꦺꦴꦁꦏꦺꦴꦤ꧀ꦩꦠꦺꦤ꧀ꦤꦶ​ꦧꦺꦴꦕꦃ​ꦏꦧꦺꦃ​ꦤꦁꦏꦸꦠꦧꦺꦠ꧀ꦭꦺꦲꦺꦩ꧀ꦭꦤ꧀ꦱꦏ꧀ꦏꦶꦮꦠꦼꦔꦼꦤ꧀ꦤꦺ​꧈​ꦱꦶꦁ​ꦲꦸꦩꦸꦂꦫꦺ​ꦫꦺꦴꦁ​ꦠꦲꦸꦤ꧀ꦩꦼꦢꦸꦤ꧀꧈​ꦲꦸꦩꦸꦂ​ꦏꦸꦮꦶ​ꦕꦺꦴꦕꦺꦴꦏ꧀​ꦏꦫꦺꦴ​ꦮꦏ꧀ꦠꦸꦩꦸꦢꦺꦴꦁꦔꦺ ꦫꦠꦸ​ꦲ꦳ꦺꦫꦺꦴꦢꦺꦱ꧀ꦠꦏꦺꦴꦤ꧀ꦩꦫꦁ​ꦮꦺꦴꦁꦮꦺꦴꦁ​ꦥꦶꦤ꧀ꦠꦼꦂ​꧉​

17꧋ꦢꦢꦶꦤꦺ​ꦏ꧀ꦭꦏꦺꦴꦤ꧀ꦠꦼꦤꦤ꧀ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦶꦮꦠ꧀ꦤꦧꦶ​ꦪꦺꦉꦩꦶꦪ꧈​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

18“ꦮꦺꦴꦁꦮꦺꦴꦁ​ꦥꦢ​ꦏꦿꦸꦔꦸ​
ꦱ꧀ꦮꦫ​ꦱꦼꦱꦩ꧀ꦧꦠ꧀
ꦭꦤ꧀ꦠꦔꦶꦱ꧀ꦱꦤ꧀ꦱꦼꦫꦸ​
ꦤꦁꦏꦸꦠꦬꦩꦃ;ꦲꦮꦶꦠ꧀ꦬꦏꦺꦭ꧀ꦤꦔꦶꦱ꧀ꦱꦶ​ꦲꦤꦏ꧀ꦲꦤꦏ꧀ꦏꦺ​;ꦲꦺꦴꦫ​ꦒꦼꦊꦩ꧀ꦢꦶꦭꦶꦥꦸꦂ​꧈​
ꦲꦮꦶꦠ꧀ꦲꦤꦏ꧀ꦲꦤꦏ꧀ꦏꦺ​ꦮꦶꦱ꧀ꦥꦢ​ꦩꦠꦶ​꧉​”

꧋ꦪꦺꦴꦱꦺꦥ꦳꧀ꦭꦤ꧀ꦩꦫꦶꦪꦩꦁꦒꦺꦴꦤ꧀ꦤꦁꦏꦸꦠꦟꦱꦫꦺꦠ꧀꧈​

19꧋ꦱꦏ꧀ꦮꦶꦱ꧀ꦱꦺ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦩꦠꦶ​꧈​ꦪꦺꦴꦱꦺꦥ꦳꧀ ꦱꦶꦁ​ꦲꦶꦗꦶꦏ꧀ꦩꦁꦒꦺꦴꦤ꧀ꦤꦁꦤꦼꦒꦫ​ꦌꦒꦶꦥ꧀ꦠꦼ꧈​ꦠꦼꦫꦸꦱ꧀ꦲꦺꦤ꧀ꦠꦸꦏ꧀ꦲꦶꦩ꧀ꦥꦺꦤ꧀ꦩꦼꦤꦺꦃ​꧉​ꦩꦸꦭꦺꦏꦠ꧀ꦠꦺꦒꦸꦱ꧀ꦠꦶ​ꦔꦺꦠꦺꦴꦏ꧀ꦲꦶꦁ​ꦲꦶꦩ꧀ꦥꦺꦤ꧀ꦏꦸꦮꦶ​꧈​ꦔꦺꦴꦩꦺꦴꦁꦔꦺꦤꦺ​: 20“ꦪꦺꦴꦱꦺꦥ꦳꧀ ꦏꦤ​ꦏꦺꦴꦮꦺ​ꦧꦭꦶꦏ꧀ꦩꦼꦤꦺꦃ​ꦤꦁꦆꦱꦿꦌꦭ꧀ꦏꦫꦺꦴ​ꦧꦪꦶꦤꦺ​ꦭꦤ꧀ꦲꦶꦧꦸꦤꦺ​꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦱꦶꦁ​ꦲꦉꦥ꧀ꦩꦠꦺꦤ꧀ꦤꦶ​ꦧꦪꦶꦤꦺ​ꦮꦶꦱ꧀ꦥꦢ​ꦩꦠꦶ​꧉​” 21ꦪꦺꦴꦱꦺꦥ꦳꧀ꦠꦼꦫꦸꦱ꧀ꦠꦔꦶ​꧈​ꦠꦼꦫꦸꦱ꧀ꦧꦪꦶꦤꦺ​ꦭꦤ꧀ꦲꦶꦧꦸꦤꦺ​ꦢꦶꦒꦮ​ꦧꦭꦶꦏ꧀ꦩꦼꦤꦺꦃ​ꦤꦁꦤꦼꦒꦫ​ꦆꦱꦿꦌꦭ꧀꧈​

22꧋ꦤꦁꦔꦶꦁ​ꦏꦢꦸꦁ​ꦪꦺꦴꦱꦺꦥ꦳꧀ꦏꦿꦸꦔꦸ​ꦤꦺꦏ꧀ꦄꦂꦏꦺꦭꦲꦸꦱ꧀ꦱꦶꦁ​ꦔ꧀ꦒꦤ꧀ꦠꦶ​ꦲ꦳ꦺꦫꦺꦴꦢꦺꦱ꧀ ꦧꦥꦏ꧀ꦏꦺ꧈​ꦢꦢꦶ​ꦫꦠꦸꦤꦺ​ꦢꦶꦱ꧀ꦠꦿꦶꦏ꧀ꦪꦸꦢꦺꦪ​꧈​ꦢꦺꦏ꧀ꦤꦺꦠꦼꦫꦸꦱ꧀ꦲꦺꦴꦫ​ꦒꦼꦊꦩ꧀ꦩꦁꦒꦺꦴꦤ꧀ꦤꦁꦏꦤ​꧉​ꦲꦶꦁ​ꦲꦶꦩ꧀ꦥꦺꦤ꧀ꦭꦶꦪꦤꦺ​ꦪꦺꦴꦱꦺꦥ꦳꧀ꦤꦩ꧀ꦥ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​꧈​ꦏꦺꦴꦁꦏꦺꦴꦤ꧀ꦭꦸꦔ​ꦤꦁꦧꦮꦃꦓꦭꦶꦭꦺꦪ​꧉​ 23ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦫꦤꦭꦤ꧀ꦩꦁꦒꦺꦴꦤ꧀ꦤꦁꦱꦏ꧀ꦮꦶꦗꦶꦤꦺꦏꦸꦠꦱꦶꦁ​ꦗꦼꦤꦼꦁꦔꦺ​ꦟꦱꦫꦺꦠ꧀꧈​ꦢꦢꦶꦤꦺ​ꦏ꧀ꦭꦏꦺꦴꦤ꧀ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦶꦮꦠ꧀ꦥꦫ​ꦤꦧꦶ​꧈​ꦱꦶꦁ​ꦔꦺꦴꦩꦺꦴꦁꦔꦏꦺꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦧꦏꦭ꧀ꦢꦶꦲꦫꦤ꧀ꦤꦶ​“ꦮꦺꦴꦁ​ꦟꦱꦫꦺꦠ꧀꧈​”

↑ ↑ ↑


꧋ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀꧈​

꧇​꧓꧇​ 1꧋ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦩꦺꦴꦭꦃꦲꦶꦔ꧀ꦒꦼꦭꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦮꦸꦱ꧀ꦠꦺꦤ꧀ꦤꦁꦧꦮꦃꦪꦸꦢꦺꦪ​꧉​ 2ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦤꦺ​:“ꦥꦢ​ꦤꦶꦁꦒꦭ꧀ꦭ​ꦲꦸꦫꦶꦥ꧀ꦱꦶꦁ​ꦢꦺꦴꦱ​꧈​ꦲꦮꦶꦠ꧀ꦲꦺꦴꦫ​ꦱꦸꦮꦶꦩꦼꦤꦺꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦼꦢꦼꦏ꧀ꦏꦏꦺꦏꦿꦠꦺꦴꦤꦺ​꧉​” 3ꦪ​ꦧꦧ꧀ꦪꦺꦴꦲꦤꦼꦱ꧀ꦲꦶꦏꦶ​ꦤꦧꦶ​ꦪꦺꦱꦪ​ꦢꦺꦏ꧀​ꦩ꧀ꦧꦶꦪꦺꦤ꧀ꦔꦺꦴꦩꦺꦴꦁꦔꦺꦤꦺ​:

“ꦤꦁꦮꦸꦱ꧀ꦠꦺꦤ꧀ꦲꦺꦤꦺꦁꦮꦺꦴꦁ​
ꦧꦼꦔꦺꦴꦏ꧀ꦧꦼꦔꦺꦴꦏ꧀ꦔꦺꦴꦩꦺꦴꦁ:
‘ꦒꦸꦱ꧀ꦠꦶ​ꦥꦢ​ꦢꦶꦒꦮꦺꦏ꧀ꦏꦏꦺꦢꦭꦤ꧀
ꦥꦢ​ꦢꦶꦊꦩ꧀ꦥꦼꦁꦔꦏꦺꦢꦭꦤ꧀
ꦱꦶꦁ​ꦲꦉꦥ꧀ꦢꦶꦲꦩ꧀ꦧꦃꦲꦶ꧉​’”

4꧋ꦪꦺꦴꦲꦤꦼꦱ꧀ꦔꦁꦒꦺꦴ​ꦱꦭꦶꦤ꧀ꦒꦮꦺꦪꦤ꧀ꦮꦸꦭꦸ​ꦲꦸꦤ꧀ꦠ​ꦭꦤ꧀ꦱꦧꦸꦏ꧀ꦏꦺ​ꦭꦸꦭꦁ​꧉​ꦥꦔꦤ꧀ꦏꦸ​ꦮꦭꦁ​ꦭꦤ꧀ꦩꦢꦸꦤꦺ​ꦠꦮꦺꦴꦤ꧀ꦲꦭꦱ꧀ꦱꦤ꧀꧈​ 5ꦮꦺꦴꦁ​ꦥꦶꦫꦁꦥꦶꦫꦁ​ꦱꦁꦏꦏꦸꦠꦪꦺꦫꦸꦱꦭꦺꦩ꧀ ꦱꦁꦏꦧꦮꦃꦪꦸꦢꦺꦪ​ꦭꦤ꧀ꦱꦏ꧀ꦏꦶꦮꦠꦼꦔꦼꦤ꧀ꦤꦺ​ꦭꦫꦪꦺꦴꦂꦢꦤ꧀ꦥꦢ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦪꦺꦴꦲꦤꦼꦱ꧀꧈​ 6ꦮꦺꦴꦁꦮꦺꦴꦁ​ꦥꦢ​ꦔꦏꦺꦴꦤ꧀ꦤꦶ​ꦢꦺꦴꦱꦢꦺꦴꦱꦤꦺ​ꦭꦤ꧀ꦥꦢ​ꦢꦶꦧꦥ꧀ꦠꦶꦱ꧀ꦤꦁꦭꦫꦪꦺꦴꦂꦢꦤ꧀꧈​

7꧋ꦲꦸꦒ​ꦮꦺꦴꦁ​ꦥ꦳ꦫꦶꦱꦶ​ꦭꦤ꧀ꦮꦺꦴꦁ​ꦱꦢꦸꦏꦶ​ꦲꦺꦴꦏꦺꦃꦥꦢ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦪꦺꦴꦲꦤꦼꦱ꧀​ꦚ꧀ꦗꦭꦸꦏ꧀ꦢꦶꦧꦥ꧀ꦠꦶꦱ꧀꧈​ꦪꦺꦴꦲꦤꦼꦱ꧀ꦮꦼꦫꦸꦃ​ꦮꦺꦴꦁꦮꦺꦴꦁ​ꦩꦲꦸ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦤꦏ꧀ꦏꦤ꧀ꦲꦸꦭ​!ꦱꦥ​ꦠ​ꦱꦶꦁ​ꦔꦺꦴꦩꦺꦴꦁꦔꦶꦏꦺꦴꦮꦺ​ꦤꦺꦏ꧀ꦧꦶꦱ​ꦚꦶꦩ꧀ꦥꦁꦔꦶꦱꦼꦠꦿꦥꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦧꦏꦭ꧀ꦠꦼꦏ​? 8ꦏꦺꦠꦺꦴꦏ꧀ꦤ​ꦔꦁꦒꦺꦴ​ꦠꦶꦤ꧀ꦢꦏ꧀ꦩꦸ​ꦤꦺꦏ꧀ꦠꦼꦤꦤ꧀ꦏꦺꦴꦮꦺ​ꦮꦶꦱ꧀ꦤꦶꦁꦒꦭ꧀​ꦏ꧀ꦭꦏꦸꦮꦤ꧀ꦩꦸꦱꦶꦁ​ꦢꦺꦴꦱ​ꦏꦸꦮꦶ​! 9ꦲꦗ​ꦩꦶꦏꦶꦂ​ꦢꦸꦩꦺꦃꦏꦺꦴꦮꦺ​ꦲꦤꦏ꧀ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦮꦲꦺ​꧈​ꦏꦸꦮꦶ​ꦮꦶꦱ꧀ꦕꦸꦏꦸꦥ꧀꧈​ꦔꦤ꧀ꦢꦼꦭ꧀ꦭ​ꦲꦺꦴꦩꦺꦴꦁꦏꦸꦲꦶꦏꦶ​:ꦒꦸꦱ꧀ꦠꦶ​ꦄꦭ꧀ꦭꦃ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦔꦼꦏꦺꦏ꧀ꦏꦶꦲꦤꦏ꧀ꦠꦸꦫꦸꦤ꧀ꦤꦤ꧀ꦩꦫꦁ​ꦧꦥ​ꦄꦨꦿꦲꦩ꧀ꦱꦁꦏꦮꦠꦸꦮꦠꦸ​ꦲꦶꦏꦶ​꧉​ 10ꦢꦼꦭꦺꦴꦏ꧀ꦏꦼꦤ꧀ ꦏꦩ꧀ꦥꦏ꧀ꦏꦺꦮꦶꦱ꧀ꦢꦶꦕꦼꦥꦏ꧀ꦏꦏꦺ​ꦏꦁꦒꦺꦴ​ꦤꦼꦒꦺꦴꦂ​ꦮꦶꦠ꧀ꦠꦺ​ꦤꦁꦥꦺꦴꦏ꧀ꦏꦺꦲꦺꦴꦪꦺꦴꦠ꧀ꦠꦺ꧉​ꦱꦧꦼꦤ꧀ꦮꦶꦠ꧀ꦱꦶꦁ​ꦲꦺꦴꦫ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦱꦶꦁ​ꦲꦥꦶꦏ꧀ꦧꦏꦭ꧀ꦢꦶꦠꦼꦒꦺꦴꦂ​ꦭꦤ꧀ꦢꦶꦧꦸꦮꦁ​ꦤꦁꦒꦼꦤꦶ​꧉​ 11ꦲꦏꦸ​ꦲꦩ꧀ꦧꦥ꧀ꦠꦶꦱ꧀ꦏꦺꦴꦮꦺ​ꦏꦫꦺꦴ​ꦧꦚꦸ​ꦏꦁꦒꦺꦴ​ꦠꦤ꧀ꦢꦤꦺꦏ꧀ꦏꦺꦴꦮꦺ​ꦮꦶꦱ꧀ꦤꦶꦁꦒꦭ꧀ꦲꦸꦫꦶꦥ꧀ꦢꦺꦴꦱ​꧈​ꦤꦁꦔꦶꦁ​ꦲꦺꦤꦺꦁꦮꦺꦴꦁ​ꦭꦶꦪꦤꦺ​ꦧꦏꦭ꧀ꦠꦼꦏ​꧉​ꦢꦺꦏ꧀ꦤꦺꦏ꧀ꦮꦱꦤꦺ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦲꦏꦸ​꧉​ꦏꦁꦒꦺꦴ​ꦔꦸꦕꦸꦭ꧀ꦭꦶ​ꦱꦼꦥꦠꦸꦤꦺꦮꦲꦺ​ꦲꦏꦸ​ꦢꦸꦫꦸꦁ​ꦥꦤ꧀ꦠꦼꦱ꧀꧈​ꦢꦺꦏ꧀ꦤꦺꦱꦶꦁ​ꦧꦏꦭ꧀ꦲꦩ꧀ꦧꦥ꧀ꦠꦶꦱ꧀ꦏꦺꦴꦮꦺ​ꦏꦫꦺꦴ​ꦫꦺꦴꦃ​ꦱꦸꦕꦶ​ꦭꦤ꧀ꦒꦼꦤꦶ​꧉​ 12ꦢꦺꦏ꧀ꦤꦺꦧꦏꦭ꧀ꦤꦥꦺꦤ꧀ꦤꦶ​ꦥꦫꦶꦤꦺ​ꦱꦶꦁ​ꦮꦶꦱ꧀ꦢꦶꦲꦶꦊꦱ꧀꧈​ꦒꦧꦃꦲꦺ​ꦧꦏꦭ꧀ꦢꦶꦊꦧꦺꦴꦏ꧀ꦏꦏꦺꦤꦁꦭꦸꦩ꧀ꦧꦸꦁ​꧈​ꦤꦁꦔꦶꦁ​ꦏꦥꦃꦲꦺꦧꦏꦭ꧀ꦢꦶꦲꦺꦴꦧꦺꦴꦁ​ꦤꦁꦒꦼꦤꦶ​ꦱꦶꦁ​ꦲꦺꦴꦫ​ꦧꦶꦱ​ꦩꦠꦶ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦧꦥ꧀ꦠꦶꦱ꧀꧈​

13꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦸꦔ​ꦱꦁꦏꦧꦮꦃꦓꦭꦶꦭꦺꦪ​꧈​ꦧꦸꦢꦭ꧀ꦤꦁꦭꦫꦪꦺꦴꦂꦢꦤ꧀ ꦱꦸꦥꦪ​ꦢꦶꦧꦥ꧀ꦠꦶꦱ꧀ꦏꦫꦺꦴ​ꦪꦺꦴꦲꦤꦼꦱ꧀꧈​ 14ꦤꦁꦔꦶꦁ​ꦪꦺꦴꦲꦤꦼꦱ꧀ꦲꦉꦥ꧀ꦩꦼꦁꦒꦏ꧀ꦢꦺꦏ꧀ꦤꦺꦔꦺꦴꦩꦺꦴꦁ:“ꦲꦏꦸ​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦧꦥ꧀ꦠꦶꦱ꧀ ꦭꦃ​ꦏꦺꦴꦏ꧀ꦩꦭꦃ​ꦏꦺꦴꦮꦺ​ꦱꦶꦁ​ꦚ꧀ꦗꦭꦸꦏ꧀ꦠꦏ꧀ꦧꦥ꧀ꦠꦶꦱ꧀?”

15꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦮꦶꦱ꧀ꦧꦺꦤ꧀ꦠ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ ꦲꦥ​ꦮꦲꦺ​ꦱꦶꦁ​ꦢꦶꦏꦉꦥ꧀ꦥꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉”ꦪꦺꦴꦲꦤꦼꦱ꧀ꦠꦼꦫꦸꦱ꧀ꦤꦸꦫꦸꦠ꧀ꦠꦶ​ꦲꦥ​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

16꧋ꦱꦏ꧀ꦮꦶꦱ꧀ꦱꦺ​ꦢꦶꦧꦥ꧀ꦠꦶꦱ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦼꦤ꧀ꦠꦱ꧀ꦱꦁꦏꦧꦚꦸ​꧉​ꦭꦔꦶꦠ꧀ꦠꦺ​ꦠꦼꦫꦸꦱ꧀ꦩꦼꦔ​ꦭꦤ꧀ꦢꦺꦏ꧀ꦤꦺꦮꦼꦫꦸꦃ​ꦫꦺꦴꦃ​ꦱꦸꦕꦶ​ꦩꦼꦢꦸꦤ꧀ꦏꦪ​ꦩꦤꦸꦏ꧀ꦢꦫ​꧈​ꦩꦺꦚ꧀​ꦕ꧀ꦭꦺꦴꦏ꧀ꦏꦶ​ꦢꦺꦏ꧀ꦤꦺ꧉​ 17ꦱꦁꦏꦭꦔꦶꦠ꧀ꦠꦼꦫꦸꦱ꧀ꦲꦺꦤꦺꦁꦱ꧀ꦮꦫ​ꦔꦺꦴꦩꦺꦴꦁ:“ꦲꦶꦏꦶ​ꦲꦤꦏ꧀ꦏꦸ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶꦭꦤ꧀ꦱꦶꦁ​ꦤ꧀ꦢꦢꦺꦏ꧀ꦏꦏꦺꦊꦒꦤꦺꦲꦠꦶꦏꦸ​꧉​”

↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦒꦺꦴꦢꦏꦫꦺꦴ​ꦱꦺꦠꦤ꧀​꧉​

꧇​꧔꧇​ 1꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦒꦮ​ꦏꦫꦺꦴ​ꦫꦺꦴꦃ​ꦱꦸꦕꦶ​ꦤꦁꦮꦸꦱ꧀ꦠꦺꦤ꧀ ꦱꦸꦥꦪ​ꦢꦶꦒꦺꦴꦢꦏꦫꦺꦴ​ꦱꦺꦠꦤ꧀​꧉​ 2ꦤꦁꦏꦺꦴꦤꦺꦴ​ꦢꦺꦏ꧀ꦤꦺꦥꦱ​ꦥꦠꦁ​ꦥꦸꦭꦸꦃ​ꦢꦶꦤ​ꦥꦠꦁ​ꦥꦸꦭꦸꦃ​ꦮꦼꦔꦶ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦏꦿꦱ​ꦔꦼꦭꦶꦃ​꧉​ 3ꦱꦺꦠꦤ꧀​ꦠꦼꦫꦸꦱ꧀ꦩꦫꦤꦶ​ꦢꦺꦏ꧀ꦤꦺꦔꦺꦴꦩꦺꦴꦁ:“ꦗꦫꦺꦤꦺ​ꦏꦺꦴꦮꦺ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​?ꦗꦗꦭ꧀ꦮꦠꦸ​ꦲꦶꦏꦶ​ꦢꦶꦥꦿꦺꦤ꧀ꦠꦃ​ꦏꦺꦴꦁꦏꦺꦴꦤ꧀ꦢꦢꦶ​ꦫꦺꦴꦠꦶ​!”

4꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦤꦁꦏꦶꦠꦧ꧀​ꦏꦼꦠꦸꦭꦶꦱ꧀ꦔꦺꦤꦺ​:'ꦩꦤꦸꦁꦱ​ꦲꦸꦫꦶꦥ꧀ꦥꦺꦲꦺꦴꦫ​ꦤꦩꦸꦁ​ꦱꦁꦏꦫꦺꦴꦠꦶ​ꦮꦲꦺ​꧈​ꦤꦁꦔꦶꦁ​ꦲꦸꦒ​ꦱꦁꦏꦱꦏ꧀ꦲꦺꦤꦺꦁꦔꦺꦠꦼꦩ꧀ꦧꦸꦁ​ꦱꦶꦁ​ꦩꦼꦠꦸ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​’”

5꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦱꦺꦠꦤ꧀​ꦠꦼꦫꦸꦱ꧀​ꦔ꧀ꦒꦮ​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦏꦸꦠꦱꦸꦕꦶ​ꦪꦺꦫꦸꦱꦭꦺꦩ꧀ ꦢꦶꦲꦼꦗꦺꦏ꧀ꦔꦢꦼꦏ꧀ꦤꦁꦥꦸꦕꦸꦏ꧀ꦏꦺ​ꦥꦪꦺꦴꦤ꧀ꦤꦺ​ꦒꦿꦺꦗ​ꦒꦼꦢꦺ​꧉​ 6ꦱꦺꦠꦤ꧀​ꦠꦼꦫꦸꦱ꧀ꦔꦺꦴꦩꦺꦴꦁ:“ꦤꦺꦏ꧀ꦏꦺꦴꦮꦺ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦤ​ꦲꦚ꧀​ꦗ꧀ꦭꦺꦴꦏ꧀ꦩꦼꦢꦸꦤ꧀!ꦤꦁꦏꦶꦠꦧ꧀​ꦭꦲꦸꦠ꧀ꦏꦼꦠꦸꦭꦶꦱ꧀ꦠ​:

‘ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦁꦏꦺꦴꦤ꧀
ꦥꦫ​ꦩꦸꦭꦺꦏꦠ꧀ꦠꦺꦩꦒꦼꦂꦫꦶ​ꦏꦺꦴꦮꦺ​꧉​
ꦏꦺꦴꦮꦺ​ꦧꦏꦭ꧀ꦢꦶꦠꦩ꧀ꦥꦤꦶ​ꦔꦁꦒꦺꦴ​ꦠꦔꦤ꧀ꦤꦺ​꧈​
ꦱꦸꦥꦪ​ꦱꦶꦏꦶꦭ꧀ꦩꦸ​ꦲꦺꦴꦫ​ꦏꦼꦤꦺꦁꦮꦠꦸ​!’”

7꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦤꦁꦏꦶꦠꦧ꧀​ꦲꦸꦒ​ꦏꦼꦠꦸꦭꦶꦱ꧀ꦔꦺꦤꦺ​:'ꦏꦺꦴꦮꦺ​ꦲꦗ​ꦚꦺꦴꦧ​ꦒꦸꦱ꧀ꦠꦶ​ꦄꦭ꧀ꦭꦃꦩꦸ꧉​’”

8꧋ꦱꦺꦠꦤ꧀​ꦠꦼꦫꦸꦱ꧀​ꦔ꧀ꦒꦮ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦸꦁꦒꦃ​ꦤꦁꦒꦸꦤꦸꦁ​ꦱꦶꦁ​ꦢꦸꦮꦸꦂꦧꦔꦼꦠ꧀꧈​ꦤꦁꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦏꦺꦴꦁꦏꦺꦴꦤ꧀​ꦤ꧀ꦢꦼꦭꦺꦴꦏ꧀ꦱꦏ꧀ꦏꦺꦃꦲꦺꦏꦿꦠꦺꦴꦤ꧀ꦲꦶꦁ​ꦢꦺꦴꦚ​ꦱꦏ꧀ꦲꦥꦶꦏ꧀ꦲꦥꦶꦏꦤ꧀ꦤꦺꦏꦧꦺꦃ​꧉​ 9ꦱꦺꦠꦤ꧀​ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦧꦺꦃ​ꦏꦸꦮꦶ​ꦧꦏꦭ꧀ꦠꦏ꧀ꦏꦺꦏ꧀ꦏꦏꦺꦏꦺꦴꦮꦺ​꧈​ꦤꦺꦏ꧀ꦏꦺꦴꦮꦺ​ꦒꦼꦊꦩ꧀ꦱꦸꦗꦸꦠ꧀ꦚꦼꦩ꧀ꦧꦃ​ꦩꦫꦁ​ꦲꦏꦸ​꧉​”

10꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦤ​ꦭꦸꦔ​ꦱꦺꦠꦤ꧀​!ꦤꦁꦏꦶꦠꦧ꧀​ꦏꦼꦠꦸꦭꦶꦱ꧀:'ꦚꦼꦩ꧀ꦧꦃꦲ​ꦩꦫꦁ​ꦒꦸꦱ꧀ꦠꦶ​꧈​ꦢꦺꦏ꧀ꦤꦺꦄꦭ꧀ꦭꦃꦩꦸ꧉​ꦤꦩꦸꦁ​ꦢꦺꦏ꧀ꦤꦺꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦭꦢꦺꦤ꧀ꦤꦶ꧉​’”

11꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦱꦺꦠꦤ꧀​ꦠꦼꦫꦸꦱ꧀ꦭꦸꦔ​꧉​ꦥꦫ​ꦩꦸꦭꦺꦏꦠ꧀ꦠꦼꦫꦸꦱ꧀ꦠꦼꦏ​ꦭꦤ꧀​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦺꦴꦭꦃꦲꦶꦥꦼꦁꦒꦮꦺꦪꦤ꧀ꦏꦸꦤꦁꦓꦭꦶꦭꦺꦪ​꧉​

12꧋ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦸꦔꦸ​ꦤꦺꦏ꧀ꦪꦺꦴꦲꦤꦼꦱ꧀ꦢꦶꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀ ꦢꦺꦏ꧀ꦤꦺꦠꦼꦫꦸꦱ꧀ꦭꦸꦔ​ꦤꦁꦧꦮꦃꦓꦭꦶꦭꦺꦪ​꧉​ 13ꦱꦁꦏꦟꦱꦫꦺꦠ꧀ꦢꦺꦏ꧀ꦤꦺꦩꦁꦒꦺꦴꦤ꧀ꦤꦁꦑꦥꦺꦂꦤꦏꦸꦩ꧀ ꦱꦏ꧀ꦮꦶꦗꦶꦤꦺꦏꦸꦠꦤꦁꦥꦶꦁꦒꦶꦂꦫꦺ​ꦩꦺꦂꦓꦭꦶꦭꦺꦪ​꧈​ꦤꦁꦧꦮꦃꦯꦺꦧꦸꦭꦺꦴꦤ꧀ꦭꦤ꧀ꦤꦥ꦳꧀ꦠꦭꦶ​꧉​ 14ꦢꦢꦶꦤꦺ​ꦏ꧀ꦭꦏꦺꦴꦤ꧀ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦶꦮꦠ꧀ꦤꦧꦶ​ꦪꦺꦱꦪ​꧈​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

15“ꦠꦤꦃ​ꦯꦺꦧꦸꦭꦺꦴꦤ꧀ꦭꦤ꧀ꦠꦤꦃ​ꦤꦥ꦳꧀ꦠꦭꦶ​꧈​
ꦠꦤꦃ​ꦱꦶꦁ​ꦤꦁꦱꦏ꧀ꦲꦸꦫꦸꦠ꧀ꦠꦺꦢꦭꦤ꧀ꦤꦁꦩꦺꦂ꧈​
ꦤꦁꦱꦧꦿꦁꦔꦺ​ꦭꦫꦪꦺꦴꦂꦢꦤ꧀
ꦠꦤꦃ​ꦓꦭꦶꦭꦺꦪ​ꦥꦁꦒꦺꦴꦤ꧀ꦤꦤ꧀ꦤꦺ​
ꦧꦁꦱꦧꦁꦱ​ꦭꦶꦪ​꧉​
16꧋ꦧꦁꦱ​ꦱꦶꦁ​ꦩꦁꦒꦺꦴꦤ꧀
ꦲꦶꦁ​ꦥꦼꦥꦼꦠꦼꦁ​ꦮꦶꦱ꧀ꦮꦼꦫꦸꦃ​ꦥꦼꦥꦢꦁꦒꦼꦢꦺ​꧉​
ꦱꦽꦔꦺꦔꦺ​ꦮꦶꦱ꧀​ꦚ꧀ꦗꦼꦢꦸꦭ꧀
ꦏꦁꦒꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦩꦁꦒꦺꦴꦤ꧀
ꦤꦁꦠꦤꦃ​ꦱꦶꦁ​ꦢꦶꦏ꧀ꦮꦱꦤꦶ​ꦥꦠꦶ​꧉​”

17꧋ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦺꦴꦭꦃꦲꦶꦩꦸꦭꦁ​꧈​ꦠꦼꦩ꧀ꦧꦸꦁꦔꦺ​:“ꦥꦢ​ꦤꦶꦁꦒꦭ꧀ꦭ​ꦲꦸꦫꦶꦥ꧀ꦢꦺꦴꦱ​꧈​ꦲꦮꦶꦠ꧀ꦲꦺꦴꦫ​ꦱꦸꦮꦶꦩꦼꦤꦺꦃ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦢꦶꦮꦶꦮꦶꦠ꧀ꦠꦶ​꧉​”

꧋ꦩꦸꦫꦶꦢ꧀ꦩꦸꦫꦶꦢ꧀ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺ꧉​

18꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦭꦏꦸ​ꦤꦁꦥꦶꦁꦒꦶꦂꦫꦺ​ꦩꦺꦂꦓꦭꦶꦭꦺꦪ​ꦏꦺꦴꦤꦺꦴ​꧈​ꦢꦺꦏ꧀ꦤꦺꦮꦼꦫꦸꦃ​ꦮꦺꦴꦁ​ꦭꦺꦴꦫꦺꦴ​ꦏꦏꦁꦔꦢꦶ꧈​ꦪꦏꦸꦮꦶ​ꦱꦶꦩꦺꦴꦤ꧀ꦱꦶꦁ​ꦲꦸꦒ​ꦢꦶꦕꦼꦭꦸꦏ꧀​ꦦꦺꦠꦿꦸꦱ꧀ꦭꦤ꧀ꦄꦤ꧀ꦢꦿꦺꦪꦱ꧀꧈​ꦮꦺꦴꦁ​ꦭꦺꦴꦫꦺꦴ​ꦲꦶꦏꦶ​ꦲꦶꦗꦶꦏ꧀ꦔꦸꦚ꧀ꦕꦭ꧀ꦭꦏꦺ​ꦗꦭꦤꦺ​꧈​ꦲꦮꦶꦠ꧀ꦏꦼꦂꦗꦤꦤ꧀ꦤꦺꦔ꧀ꦒꦺꦴꦭꦺꦏ꧀ꦲꦶꦮꦏ꧀꧈​ 19ꦒꦸꦱ꧀ꦠꦶ​ꦪꦺꦯꦸꦱ꧀ꦚꦼꦭꦸꦏ꧀:“ꦲ꦳ꦪꦸꦏ꧀ꦥꦢ​ꦩꦺꦭꦸ​ꦲꦏꦸ​꧉​ꦏꦺꦴꦮꦺ​ꦧꦏꦭ꧀ꦠꦏ꧀​ꦧ꧀ꦭꦗꦂꦫꦶꦢꦢꦶ​ꦠꦸꦏꦁ​ꦔ꧀ꦒꦺꦴꦭꦺꦏ꧀ꦮꦺꦴꦁ​꧉​” 20ꦱꦶꦩꦺꦴꦤ꧀ꦭꦤ꧀ꦄꦤ꧀ꦢꦿꦺꦪꦱ꧀ꦠꦼꦫꦸꦱ꧀ꦤꦶꦁꦒꦭ꧀ꦗꦭꦤꦺ​ꦭꦤ꧀ꦩꦺꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

21꧋ꦏꦢꦸꦁ​ꦩ꧀ꦭꦏꦸ​ꦱꦼꦢꦶꦭꦸꦠ꧀ꦩꦼꦤꦺꦃ​ꦠꦼꦫꦸꦱ꧀ꦤꦼꦩꦸ​ꦮꦺꦴꦁ​ꦭꦺꦴꦫꦺꦴ​ꦩꦼꦤꦺꦃ​꧈​ꦪꦏꦸꦮꦶ​ꦪꦏꦺꦴꦧꦸꦱ꧀ꦭꦤ꧀ꦪꦺꦴꦲꦤꦼꦱ꧀ ꦏꦧꦺꦃ​ꦭꦺꦴꦫꦺꦴ​ꦲꦤꦏ꧀ꦏꦺ​ꦯꦺꦧꦺꦢꦺꦪꦸꦱ꧀꧈​ ꦮꦺꦴꦁ​ꦭꦺꦴꦫꦺꦴ​ꦲꦶꦏꦶ​ꦏꦫꦺꦴ​ꦧꦥꦏ꧀ꦏꦺꦲꦶꦗꦶꦏ꧀ꦥꦢ​ꦤ꧀ꦢꦤ꧀ꦢꦤ꧀ꦤꦶ​ꦗꦭꦤꦺ​ꦤꦁꦥꦿꦲꦸꦤꦺ​꧈​ꦠꦼꦫꦸꦱ꧀ꦢꦶꦕꦼꦭꦸꦏ꧀​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 22ꦱꦏ꧀ꦮꦠ꧀ꦠꦼꦫꦸꦱ꧀ꦥꦢ​ꦩꦼꦢꦸꦤ꧀ꦱꦁꦏꦥꦿꦲꦸꦤꦺ​꧈​ꦠꦼꦫꦸꦱ꧀ꦩꦺꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀ ꦤꦶꦁꦒꦭ꧀ꦧꦥꦏ꧀ꦏꦺ꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦩꦸꦭꦁ​ꦭꦤ꧀ꦤꦩ꧀ꦧꦤꦶ​ꦮꦺꦴꦁ​ꦭꦫ​꧉​

23꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦤ꧀​ꦢ꧀ꦭꦗꦃꦲꦶ​ꦧꦮꦃꦓꦭꦶꦭꦺꦪ​꧉​ꦢꦺꦏ꧀ꦤꦺꦩꦼꦩꦸꦭꦁ​ꦤꦁꦱꦶꦤꦒꦸꦏ꧀ꦱꦶꦤꦒꦸꦏ꧀ꦭꦤ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦶꦁ​ꦭꦫ​ꦥꦢ​ꦢꦶꦠꦩ꧀ꦧꦤꦶ​ꦱꦁꦏꦥꦼꦂꦚꦏꦶꦠ꧀ꦠꦺꦭꦤ꧀ꦩꦼꦩꦭꦤ꧀ꦤꦺ꧉​ 24ꦏꦧꦂ​ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦱꦸꦩꦼꦧꦂ​ꦤꦁꦱꦼꦭꦸꦫꦸꦧꦮꦃꦯꦶꦫꦶꦪ​꧉​ꦮꦺꦴꦁꦮꦺꦴꦁ​ꦱꦶꦁ​ꦭꦫ​ꦭꦤ꧀ꦱꦶꦁ​ꦤ꧀ꦢꦸꦮꦺꦮꦼꦂꦤꦮꦼꦂꦤ​ꦥꦼꦂꦚꦏꦶꦠ꧀ ꦱꦶꦁ​ꦏꦼꦱꦸꦫꦸꦥ꧀ꦥꦤ꧀ꦢꦼꦩꦶꦠ꧀ ꦱꦶꦁ​ꦭꦫ​ꦲꦪꦤ꧀ꦤꦼꦤ꧀ꦭꦤ꧀ꦱꦶꦁ​ꦭꦸꦩ꧀ꦥꦸꦃ​ꦥꦢ​ꦢꦶꦒꦮ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦏꦧꦺꦃ​ꦢꦶꦠꦩ꧀ꦧꦤꦶ​꧉​ 25ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦩꦺꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦲꦺꦤꦺꦁꦱꦶꦁ​ꦱꦁꦏꦓꦭꦶꦭꦺꦪ​꧈​ꦱꦁꦏꦢꦺꦏꦥꦺꦴꦭꦶꦱ꧀ ꦱꦁꦏꦪꦺꦫꦸꦱꦭꦺꦩ꧀ ꦪꦸꦢꦺꦪ​ꦭꦤ꧀ꦱꦧꦿꦁꦔꦺ​ꦭꦫꦪꦺꦴꦂꦢꦤ꧀꧈​

↑ ↑ ↑


꧋ꦥꦶꦮꦸꦭꦁ​ꦤꦁꦒꦸꦤꦸꦁ​꧉​

꧇​꧕꧇​ 1꧋ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​ꦮꦺꦴꦁ​ꦥꦶꦫꦁꦥꦶꦫꦁ​ꦏꦸꦮꦶ​꧈​ꦢꦺꦏ꧀ꦤꦺꦠꦼꦫꦸꦱ꧀ꦩꦸꦁꦒꦃ​ꦤꦁꦒꦸꦤꦸꦁ​꧉​ꦱꦏ꧀ꦮꦶꦱ꧀ꦱꦺ​ꦢꦺꦏ꧀ꦤꦺꦚ꧀ꦗꦒꦺꦴꦁ꧈​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀​ꦚ꧀ꦗꦒꦺꦴꦁꦔꦸꦧꦼꦁꦔꦶ​ꦢꦺꦏ꧀ꦤꦺ꧉​ 2ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦺꦴꦭꦃꦲꦶꦩꦸꦭꦁꦔꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦔꦺꦤꦺ​:

3“ꦧꦼꦗꦮꦺꦴꦁ​ꦩ꧀ꦭꦫꦠ꧀ꦱꦶꦁ​ꦥꦢ​ꦚ꧀ꦗꦒꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦲꦮꦶꦠ꧀ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏꦿꦠꦺꦴꦤꦺ​ꦱ꧀ꦮꦂꦒ​꧉​
4ꦧꦼꦗꦮꦺꦴꦁ​ꦱꦶꦁ​ꦱꦼꦢꦶ꧈​
ꦲꦮꦶꦠ꧀ꦧꦏꦭ꧀ꦢꦶꦭꦶꦥꦸꦂ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​
5ꦧꦼꦗꦮꦺꦴꦁ​ꦱꦶꦁ​ꦲꦤ꧀ꦢꦥ꧀ꦥꦱꦺꦴꦂ꧈​
ꦲꦮꦶꦠ꧀ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​
ꦱꦶꦁ​ꦧꦏꦭ꧀ꦤꦩ꧀ꦥ​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​
6ꦧꦼꦗꦮꦺꦴꦁ​ꦱꦶꦁ​ꦏꦼꦥꦺꦔꦶꦤ꧀ꦧꦔꦼꦠ꧀
ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀​ꦔ꧀ꦒꦮꦺ​ꦩꦉꦩ꧀ꦩꦺ​ꦲꦠꦶꦤꦺ​꧉​
7ꦧꦼꦗꦮꦺꦴꦁ​ꦱꦶꦁ​ꦱꦼꦤꦼꦁ​ꦩꦼꦭꦱ꧀ꦱꦶ​ꦮꦺꦴꦁ​ꦭꦶꦪ​꧈​
ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦧꦏꦭ꧀ꦩꦼꦭꦱ꧀ꦱꦶ​ꦮꦺꦴꦁ​ꦏꦸꦮꦶ​꧉​
8ꦧꦼꦗꦮꦺꦴꦁ​ꦱꦶꦁ​ꦉꦱꦶꦏ꧀ꦲꦠꦶꦤꦺ​꧈​
ꦲꦮꦶꦠ꧀ꦧꦏꦭ꧀ꦮꦼꦫꦸꦃ​ꦒꦸꦱ꧀ꦠꦶ​ꦄꦭ꧀ꦭꦃ​꧉​
9ꦧꦼꦗꦮꦺꦴꦁ​ꦱꦶꦁ​ꦱꦼꦤꦼꦁ​ꦔꦿꦸꦏꦸꦤ꧀ꦤꦏꦺ꧈​
ꦲꦮꦶꦠ꧀ꦧꦏꦭ꧀ꦢꦶꦲꦫꦤ꧀ꦤꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​
10ꦧꦼꦗꦮꦺꦴꦁ​ꦱꦶꦁ​ꦢꦶꦱꦶꦪꦱꦶꦪ​ꦗꦭꦂꦫꦤ꧀​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦲꦮꦶꦠ꧀ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏꦿꦠꦺꦴꦤꦺ​ꦱ꧀ꦮꦂꦒ​꧉​

11꧋“ꦧꦼꦗꦏꦺꦴꦮꦺ​꧈​ꦤꦺꦏ꧀ꦏꦺꦴꦮꦺ​ꦢꦶꦲꦺꦴꦭꦺꦴꦏ꧀ꦲꦺꦴꦭꦺꦴꦏ꧀ ꦢꦶꦱꦶꦪꦱꦶꦪ​ꦭꦤ꧀ꦢꦶꦱꦭꦃꦱꦭꦃꦲꦏꦺꦱꦶꦁ​ꦲꦺꦴꦫꦲꦺꦴꦫ​꧈​ꦗꦭꦂꦫꦤ꧀ꦏꦺꦴꦮꦺ​ꦢꦢꦶ​ꦩꦸꦫꦶꦢ꧀ꦏꦸ​꧉​ 12ꦏꦺꦴꦮꦺ​ꦏꦸꦢꦸ​ꦧꦸꦔꦃ​ꦭꦤ꧀ꦱꦸꦏꦏ꧀ꦱꦸꦏꦏ꧀ ꦲꦮꦶꦠ꧀ꦏꦺꦴꦮꦺ​ꦧꦏꦭ꧀ꦤꦩ꧀ꦥ​ꦲꦸꦥꦃꦒꦼꦢꦺ​ꦤꦁꦱ꧀ꦮꦂꦒ​꧉​ꦥꦫ​ꦤꦧꦶ​ꦗꦩꦤ꧀​ꦩ꧀ꦧꦶꦪꦺꦤ꧀ꦲꦸꦒ​ꦥꦢ​ꦢꦶꦱꦶꦪꦱꦶꦪ​ꦏꦪ​ꦏꦺꦴꦮꦺ​꧉​”

꧋ꦲꦸꦪꦃꦲꦺ​ꦭꦤ꧀ꦥꦼꦥꦢꦁꦔꦺꦗꦒꦠ꧀꧈​

13꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦏꦺꦴꦮꦺ​ꦏꦸꦮꦶ​ꦲꦸꦪꦃꦲꦺ​ꦗꦒꦠ꧀꧈​ꦤꦺꦏ꧀ꦲꦸꦪꦃ​ꦲꦶꦭꦁ​ꦲꦱꦶꦤ꧀ꦤꦺ​꧈​ꦮꦶꦱ꧀ꦲꦺꦴꦫ​ꦲꦺꦤꦺꦁꦲꦥꦲꦥ​ꦩꦼꦤꦺꦃ​ꦱꦶꦁ​ꦏꦼꦤꦺꦁꦏꦁꦒꦺꦴ​ꦔꦱꦶꦤ꧀ꦤꦏꦺ꧉​ꦲꦸꦪꦃ​ꦏꦸꦮꦶ​ꦲꦺꦴꦫ​ꦏꦁꦒꦺꦴ​ꦒꦮꦺ​ꦲꦥꦲꦥ​ꦩꦼꦤꦺꦃ​꧈​ꦏꦼꦗꦧ​ꦤꦩꦸꦁ​ꦢꦶꦧꦸꦮꦁ​ꦤꦁꦢꦭꦤ꧀ꦭꦤ꧀ꦢꦶꦲꦶꦢꦼꦏ꧀ꦲꦶꦢꦼꦏ꧀ꦮꦺꦴꦁ​꧉​

14꧋“ꦏꦺꦴꦮꦺ​ꦏꦸꦮꦶ​ꦥꦼꦥꦢꦁꦔꦺꦗꦒꦠ꧀꧈​ꦏꦸꦠꦱꦶꦁ​ꦤꦁꦤ꧀ꦢꦸꦮꦸꦂꦒꦸꦤꦸꦁ​ꦲꦺꦴꦫ​ꦧꦶꦱ​ꦢꦶꦲꦭꦶꦁꦔꦭꦶꦁꦔꦶ꧉​ 15ꦏꦺꦴꦮꦺ​ꦩꦼꦱ꧀ꦠꦶꦲꦺꦴꦫ​ꦚꦸꦩꦼꦠ꧀ꦢꦶꦪꦤ꧀ꦠꦼꦫꦸꦱ꧀ꦢꦶꦠꦸꦠꦸꦥ꧀ꦥꦶ​ꦠꦺꦁꦒꦺꦴꦏ꧀ꦠ​?ꦲꦺꦴꦫ​꧈​ꦩꦼꦱ꧀ꦠꦶꦢꦶꦪꦤ꧀ꦤꦺꦠꦼꦫꦸꦱ꧀ꦢꦶꦢꦺꦏꦺꦏ꧀ꦱꦶꦁ​ꦢꦸꦮꦸꦂ꧈​ꦱꦸꦥꦪ​ꦧꦶꦱ​ꦩꦢꦁꦔꦶꦏꦧꦺꦃ​ꦮꦺꦴꦁ​ꦱꦶꦁ​ꦤꦁꦲꦺꦴꦩꦃ​ꦏꦺꦴꦤꦺꦴ​꧉​ 16ꦩꦸꦭꦤꦺ​꧈​ꦏꦺꦴꦮꦺ​ꦲꦸꦒ​ꦏꦸꦢꦸ​ꦚ꧀ꦭꦺꦴꦫꦺꦴꦠ꧀ꦠꦏꦺꦥꦢꦁꦩꦸꦩꦫꦁ​ꦮꦺꦴꦁꦮꦺꦴꦁ​꧈​ꦱꦸꦥꦪ​ꦥꦢ​ꦮꦼꦫꦸꦃ​ꦥꦼꦁꦒꦮꦺꦩꦸ​ꦱꦶꦁ​ꦧꦼꦕꦶꦏ꧀꧈​ꦢꦢꦶꦤꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦔ꧀ꦭꦸꦲꦸꦂꦫꦏꦺꦧꦥꦏ꧀ꦩꦸ​ꦱꦶꦁ​ꦤꦁꦱ꧀ꦮꦂꦒ​꧉​”

꧋ꦥꦶꦮꦸꦭꦁ​ꦧꦧ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​

17꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦏꦺꦴꦮꦺ​ꦲꦗ​ꦥꦢ​ꦩꦶꦏꦶꦂ​ꦤꦺꦏ꧀ꦲꦏꦸ​ꦲꦶꦏꦶ​ꦠꦼꦏ​ꦲꦉꦥ꧀ꦔꦿꦺꦴꦩ꧀ꦧꦏ꧀ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ꦠꦼꦏꦏꦸ​ꦲꦶꦏꦶ​ꦲꦺꦴꦫ​ꦲꦉꦥ꧀ꦔꦿꦺꦴꦩ꧀ꦧꦏ꧀ ꦲꦺꦴꦫ​꧈​ꦤꦁꦔꦶꦁ​ꦲꦏꦸ​ꦩꦭꦃ​ꦤꦼꦠꦼꦥ꧀ꦥꦏꦺ꧉​ 18ꦩꦸꦭꦤꦺ​꧈​ꦥꦢ​ꦔꦼꦂꦠꦶꦪ​꧈​ꦱꦸꦮꦺꦤꦺ​ꦭꦔꦶꦠ꧀ꦭꦤ꧀ꦧꦸꦩꦶ​ꦲꦶꦗꦶꦏ꧀ꦲꦺꦤꦺꦁ꧈​ꦲꦺꦴꦫ​ꦧꦏꦭ꧀ꦲꦺꦤꦺꦁꦲꦏ꧀ꦱꦫ​ꦱꦁꦏꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦢꦶꦕꦺꦴꦫꦺꦏ꧀​꧈​ꦱꦶꦗꦶ​ꦮꦲꦺ​ꦲꦺꦴꦫ​꧈​ꦔꦤ꧀ꦠꦶ​ꦠꦼꦏꦤ꧀ꦫꦩ꧀ꦥꦸꦁꦔꦺ​꧉​ 19ꦩꦸꦭꦤꦺ​꧈​ꦱꦥ​ꦱꦶꦁ​ꦤꦼꦫꦏ꧀ꦱꦭꦃꦱꦏ꧀ꦮꦶꦗꦶꦤꦺꦮꦺꦠ꧀ꦩꦲꦸ​꧈​ꦱꦼꦤꦗꦤ꧀ꦱꦶꦁ​ꦕꦶꦭꦶꦏ꧀ꦢꦺꦮꦺꦭꦤ꧀ꦩꦸꦭꦁꦔꦶ ꦮꦺꦴꦁ​ꦭꦶꦪ​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦏꦪ​ꦔꦺꦴꦤꦺꦴ​꧈​ꦮꦺꦴꦁ​ꦲꦶꦏꦸ​ꦧꦏꦭ꧀ꦲꦺꦤ꧀ꦠꦸꦏ꧀ꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦼꦤ꧀ꦢꦺꦏ꧀ꦢꦺꦮꦺꦲꦶꦁ​ꦏꦿꦠꦺꦴꦤꦺ​ꦱ꧀ꦮꦂꦒ​꧉​ꦤꦁꦔꦶꦁ​ꦱꦥ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦱꦏ꧀ꦏꦧꦺꦃꦲꦺꦭꦤ꧀ꦩꦸꦭꦁꦔꦶꦭꦶꦪꦤꦺ​ꦔ꧀ꦭꦏꦺꦴꦤ꧀ꦤꦶ​ꦏꦸꦮꦶ​ꦏꦧꦺꦃ​꧈​ꦮꦺꦴꦁ​ꦲꦶꦏꦸ​ꦱꦶꦁ​ꦧꦏꦭ꧀ꦲꦺꦤ꧀ꦠꦸꦏ꧀ꦥꦁꦒꦺꦴꦤ꧀ꦤꦤ꧀ꦱꦶꦁ​ꦢꦸꦮꦸꦂꦲꦶꦁ​ꦏꦿꦠꦺꦴꦤꦺ​ꦱ꧀ꦮꦂꦒ​꧉​ 20ꦩꦸꦭꦤꦺ​ꦫꦸꦔꦺꦴꦏ꧀ꦏꦏꦺꦠꦼꦩ꧀ꦧꦸꦁꦏꦸ​ꦲꦶꦏꦶ​:'ꦤꦺꦏ꧀ꦲꦼꦁꦒꦺꦴꦤ꧀ꦩꦸ​ꦔ꧀ꦭꦏꦺꦴꦤ꧀ꦤꦶ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦲꦺꦴꦫ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥ꦳ꦫꦶꦱꦶ​꧈​ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦧꦶꦱ​ꦩ꧀ꦊꦧꦸ​ꦲꦶꦁ​ꦏꦿꦠꦺꦴꦤꦺ​ꦱ꧀ꦮꦂꦒ​꧉​’”

꧋ꦧꦧ꧀ꦤꦼꦱꦸ​ꦏꦫꦺꦴ​ꦭꦶꦪꦤꦺ​꧉​

21꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦥꦶꦮꦸꦭꦁꦔꦺ​ꦔꦺꦤꦺ​:“ꦏꦺꦴꦮꦺ​ꦥꦢ​ꦔꦼꦂꦠꦶ​ꦤꦺꦏ꧀​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦢꦶꦮꦸꦭꦁꦔꦶꦔꦺꦤꦺ​:'ꦲꦗ​ꦩꦠꦺꦤ꧀ꦤꦶ​ꦮꦺꦴꦁ​;ꦱꦥ​ꦱꦶꦁ​ꦩꦠꦺꦤ꧀ꦤꦶ​ꦮꦺꦴꦁ​ꦏꦸꦢꦸ​ꦢꦶꦏꦿꦸꦠꦸ꧉'​ 22ꦤꦁꦔꦶꦁ​ꦲꦏꦸ​ꦩꦸꦭꦁꦔꦶꦏꦺꦴꦮꦺ​:ꦱꦥ​ꦱꦶꦁ​ꦤꦼꦱꦺꦴꦤ꧀ꦤꦶ​ꦭꦶꦪꦤꦺ​ꦏꦸꦢꦸ​ꦢꦶꦏꦿꦸꦠꦸ꧉​ꦭꦤ꧀ꦱꦥ​ꦱꦶꦁ​ꦔꦼꦭꦺꦴꦏ꧀ꦏꦏꦺꦭꦶꦪꦤꦺ​ꦏꦸꦢꦸ​ꦢꦶꦏꦿꦸꦠꦸꦏꦫꦺꦴ​ꦏꦿꦸꦠꦺꦴꦤ꧀ꦤꦺꦲꦒꦩ​꧉​ꦱꦥ​ꦱꦶꦁ​ꦔꦼꦭꦺꦴꦏ꧀ꦏꦏꦺꦭꦶꦪꦤꦺ​ꦔꦺꦴꦩꦺꦴꦁ'ꦒꦼꦩ꧀​ꦧ꧀ꦭꦸꦁ​꧈'​ꦮꦺꦴꦁ​ꦏꦸꦮꦶ​ꦏꦸꦢꦸ​ꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦒꦼꦤꦶꦤꦺ​ꦤꦼꦫꦏ꧉​ 23-24ꦩꦸꦭꦤꦺ​꧈​ꦤꦺꦏ꧀ꦏꦺꦴꦮꦺ​ꦲꦉꦥ꧀​ꦔ꧀ꦒꦮ​ꦥꦮꦺꦃꦩꦸꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦏꦺꦴꦮꦺ​ꦏꦺꦭꦶꦁꦔꦤ꧀ꦤꦺꦏ꧀ꦲꦺꦤꦺꦁꦱꦏ꧀ꦮꦶꦗꦶꦤꦺꦮꦺꦴꦁ​ꦤ꧀ꦢꦸꦮꦺꦤ꧀ꦤꦶ​ꦥꦽꦏꦫ​ꦏꦫꦺꦴ​ꦏꦺꦴꦮꦺ​꧈​ꦥꦮꦺꦃꦩꦸꦢꦶꦱꦺꦭꦺꦃꦲꦏꦺꦤꦁꦔꦉꦥ꧀ꦥꦺ​ꦲꦭ꧀ꦠꦂꦤ꧀ꦢꦶꦱꦶꦏ꧀ ꦠꦼꦫꦸꦱ꧀ꦮꦺꦴꦁꦔꦺ​ꦢꦶꦥꦫꦤ꧀ꦤꦶ​꧉​ꦔ꧀ꦒꦮꦺꦪ​ꦫꦸꦏꦸꦤ꧀ꦏꦫꦺꦴ​ꦮꦺꦴꦁꦔꦺ​ꦤ꧀ꦢꦶꦱꦶꦏ꧀ ꦠꦼꦫꦸꦱ꧀ꦧꦭꦶꦏ꧀ꦩꦼꦤꦺꦃ​ꦩꦱꦿꦃꦲꦏꦺꦥꦮꦺꦃꦩꦸꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

25꧋“ꦤꦺꦏ꧀ꦲꦺꦤꦺꦁꦮꦺꦴꦁ​ꦔ꧀ꦒꦮ​ꦏꦺꦴꦮꦺ​ꦤꦁꦏꦿꦸꦠꦺꦴꦤ꧀ ꦱꦏ꧀ꦗꦼꦫꦺꦴꦤꦺꦩ꧀ꦭꦏꦸ​ꦫꦤ꧈​ꦏꦺꦴꦮꦺ​ꦏꦸꦢꦸ​ꦔ꧀ꦭꦸꦩꦸꦃꦲꦶ꧈​ꦱꦸꦥꦪ​ꦧꦶꦱ​ꦲꦥꦶꦏ꧀ꦏꦫꦺꦴ​ꦮꦺꦴꦁꦔꦺ​꧉​ꦤꦺꦏ꧀ꦲꦺꦴꦫ​ꦢꦶꦲꦥꦶꦏ꧀ꦏꦶꦤ꧀ꦢꦶꦱꦶꦏ꧀ ꦩꦼꦁꦏꦺꦴ​ꦏꦺꦴꦮꦺ​ꦧꦏꦭ꧀ꦢꦶꦒꦮ​ꦤꦁꦔ꧀ꦒꦺꦴꦤ꧀ꦤꦺꦫꦺꦏ꧀ꦠꦼꦫꦺ꧉​ꦫꦺꦏ꧀ꦠꦼꦫꦺꦠꦼꦫꦸꦱ꧀ꦩꦱꦿꦃꦲꦏꦺꦏꦺꦴꦮꦺ​ꦩꦫꦁ​ꦱꦼꦏꦲꦸꦠ꧀ ꦠꦼꦫꦸꦱ꧀ꦏꦺꦴꦮꦺ​ꦢꦶꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀꧈​ 26ꦭꦤ꧀ꦔꦼꦂꦠꦶꦪ​꧈​ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦧꦶꦱ​ꦩꦼꦠꦸ​ꦱꦁꦏꦱꦼꦠꦿꦥꦤ꧀ꦏꦸꦮꦶ​꧈​ꦤꦺꦏ꧀ꦲꦸꦠꦁꦩꦸ​ꦢꦸꦫꦸꦁ​ꦲꦩ꧀ꦧꦺꦴꦏ꧀ꦧꦪꦂ​ꦱꦏ꧀ꦏꦧꦺꦃꦲꦺ꧉​”

꧋ꦧꦧ꧀ꦭꦏꦸ​ꦧꦺꦢꦁ꧉​

27꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:“ꦏꦺꦴꦮꦺ​ꦮꦶꦱ꧀ꦥꦢ​ꦔꦼꦂꦠꦶ​ꦥꦶꦮꦸꦭꦁ​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:'ꦏꦺꦴꦮꦺ​ꦲꦗ​ꦭꦏꦸ​ꦧꦺꦢꦁ!’ 28ꦤꦁꦔꦶꦁ​ꦲꦏꦸ​ꦔꦺꦴꦩꦺꦴꦁꦲꦶꦏꦶ​ꦩꦫꦁ​ꦏꦺꦴꦮꦺ​:ꦱꦥ​ꦱꦶꦁ​ꦚꦮꦁ​ꦮꦺꦴꦁ​ꦮꦺꦢꦺꦴꦏ꧀ꦏꦫꦺꦴ​ꦫꦱ​ꦱꦼꦤꦼꦁ​ꦲꦶꦁ​ꦲꦠꦶꦤꦺ​꧈​ꦮꦺꦴꦁ​ꦏꦸꦮꦶ​ꦮꦶꦱ꧀ꦭꦏꦸ​ꦧꦺꦢꦁꦏꦫꦺꦴ​ꦮꦺꦴꦁ​ꦮꦺꦢꦺꦴꦏ꧀ꦏꦸꦮꦶ​ꦲꦶꦁ​ꦲꦠꦶꦤꦺ​꧉​ 29ꦤꦺꦏ꧀ꦩꦿꦶꦥꦠ꧀ꦩꦸ​ꦠꦼꦔꦼꦤ꧀ꦩꦫꦏ꧀ꦏꦏꦺꦏꦺꦴꦮꦺ​ꦔ꧀ꦒꦮꦺ​ꦢꦺꦴꦱ​꧈​ꦢꦶꦕꦸꦏꦶꦭ꧀ꦮꦲꦺ​ꦭꦤ꧀ꦢꦶꦧꦸꦮꦁ​꧉​ꦭꦸꦮꦸꦁꦏꦺꦴꦮꦺ​ꦏꦺꦭꦁꦔꦤ꧀ꦩꦿꦶꦥꦠ꧀ꦱꦶꦗꦶ​꧈​ꦠꦼꦤꦶꦩ꧀ꦧꦁꦲꦮꦏ꧀ꦩꦸ​ꦱꦏ꧀ꦏꦸꦗꦸꦂꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦤꦼꦫꦏ꧉​ 30ꦤꦺꦏ꧀ꦠꦔꦤ꧀ꦩꦸ​ꦠꦼꦔꦼꦤ꧀ꦩꦫꦏ꧀ꦏꦏꦺꦏꦺꦴꦮꦺ​ꦔ꧀ꦒꦮꦺ​ꦢꦺꦴꦱ​꧈​ꦢꦶꦏꦼꦠꦺꦴꦏ꧀ꦮꦲꦺ​ꦠꦼꦫꦸꦱ꧀ꦢꦶꦧꦸꦮꦁ​꧉​ꦭꦸꦮꦸꦁꦏꦺꦴꦮꦺ​ꦏꦺꦭꦁꦔꦤ꧀ꦠꦔꦤ꧀ꦩꦸ​ꦱꦼꦧꦼꦭꦃ꧈​ꦠꦼꦤꦶꦩ꧀ꦧꦁꦏꦫꦺꦴ​ꦲꦮꦏ꧀ꦱꦏ꧀ꦏꦸꦗꦸꦂꦩ꧀ꦊꦧꦸ​ꦤꦁꦤꦼꦫꦏ꧉​”

꧋ꦧꦧ꧀ꦥꦼꦒꦠ꧀ꦠꦤ꧀꧈​

31꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦲꦸꦒ​ꦲꦺꦤꦺꦁꦥꦶꦮꦸꦭꦁ​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:'ꦱꦥ​ꦱꦶꦁ​ꦩꦼꦒꦠ꧀ꦧꦺꦴꦗꦺꦴꦤꦺ​ꦏꦸꦢꦸ​ꦔꦼꦏꦺꦏ꧀ꦏꦶꦭꦪꦁ​ꦥꦼꦒꦠ꧀꧉'​ 32ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦠꦏ꧀ꦲꦺꦴꦩꦺꦴꦁꦔꦶ:ꦱꦥ​ꦱꦶꦁ​ꦩꦼꦒꦠ꧀ꦧꦺꦴꦗꦺꦴꦤꦺ​꧈​ꦤꦁꦔꦶꦁ​ꦧꦺꦴꦗꦺꦴ​ꦏꦸꦮꦶ​ꦲꦺꦴꦫ​ꦭꦏꦸ​ꦧꦺꦢꦁ꧈​ꦭꦃ​ꦮꦺꦴꦁ​ꦏꦸꦮꦶ​ꦩꦫꦏ꧀ꦏꦏꦺꦧꦺꦴꦗꦺꦴꦤꦺ​ꦩꦲꦸ​ꦠꦼꦫꦸꦱ꧀ꦭꦏꦸ​ꦧꦺꦢꦁ꧈​ꦤꦺꦏ꧀ꦱꦶꦁ​ꦢꦶꦥꦼꦒꦠ꧀ꦩꦲꦸ​ꦠꦼꦫꦸꦱ꧀ꦏꦮꦶꦤ꧀ꦩꦼꦤꦺꦃ​꧉​ꦭꦃ​ꦮꦺꦴꦁ​ꦭꦤꦁ​ꦱꦶꦁ​ꦏꦮꦶꦤ꧀ꦏꦫꦺꦴ​ꦮꦺꦴꦁ​ꦱꦶꦁ​ꦢꦶꦥꦼꦒꦠ꧀ꦩꦲꦸ​ꦪ​ꦏꦠꦸꦠ꧀ꦩꦺꦭꦸ​ꦭꦏꦸ​ꦧꦺꦢꦁ꧉​”

꧋ꦧꦧ꧀ꦱꦸꦩ꧀ꦥꦃ​꧉​

33꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦥꦢ​ꦔꦼꦂꦠꦶ​ꦤꦺꦏ꧀​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦢꦶꦮꦸꦭꦁꦔꦶꦔꦺꦤꦺ​:'ꦏꦺꦴꦮꦺ​ꦲꦗ​ꦲꦩ꧀​ꦧ꧀ꦭꦺꦚ꧀ꦗꦤꦶ​ꦗꦚ꧀ꦗꦶ​꧉​ꦤꦺꦏ꧀ꦏꦺꦴꦮꦺ​ꦮꦶꦱ꧀ꦗꦚ꧀ꦗꦶ​ꦏꦫꦺꦴ​ꦮꦺꦴꦁ​ꦔꦁꦒꦺꦴ​ꦱꦸꦩ꧀ꦥꦃ​ꦏꦫꦺꦴ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦚ꧀ꦗꦶ​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦠꦼꦠꦼꦥ꧀ꦥꦶ​꧉'​ 34ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦠꦏ꧀ꦲꦺꦴꦩꦺꦴꦁꦔꦶ:ꦏꦺꦴꦮꦺ​ꦲꦗ​ꦥꦶꦱꦤ꧀ꦥꦶꦱꦤ꧀ꦱꦸꦩ꧀ꦥꦃ​꧉​ꦲꦗ​ꦱꦸꦩ꧀ꦥꦃ​ꦚꦼꦭꦸꦏ꧀ꦭꦔꦶꦠ꧀ ꦲꦮꦶꦠ꧀ꦭꦔꦶꦠ꧀ꦏꦸꦮꦶ​ꦗꦒꦺꦴꦔꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ 35ꦭꦤ꧀ꦲꦗ​ꦱꦸꦩ꧀ꦥꦃ​ꦚꦼꦭꦸꦏ꧀ꦧꦸꦩꦶ​꧈​ꦲꦮꦶꦠ꧀ꦧꦸꦩꦶ​ꦏꦸꦮꦶ​ꦲꦚ꧀ꦕꦶꦏ꧀ꦲꦚ꧀ꦕꦶꦏ꧀ꦏꦺ​ꦱꦶꦏꦶꦭ꧀ꦭꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦤ꧀ꦲꦗ​ꦱꦸꦩ꧀ꦥꦃ​ꦚꦼꦭꦸꦏ꧀ꦗꦼꦤꦼꦁꦔꦺ​ꦪꦺꦫꦸꦱꦭꦺꦩ꧀ ꦲꦮꦶꦠ꧀ꦏꦸꦮꦶ​ꦏꦸꦠꦥꦁꦒꦺꦴꦤ꧀ꦤꦤ꧀ꦤꦺ​ꦫꦠꦸꦤꦺ​꧉​ 36ꦲꦸꦒ​ꦲꦗ​ꦱꦸꦩ꧀ꦥꦃ​ꦚꦼꦭꦸꦏ꧀ꦱꦶꦫꦃꦩꦸ​꧈​ꦲꦮꦶꦠ꧀ꦏꦺꦴꦮꦺ​ꦢꦺꦮꦺꦲꦺꦴꦫ​ꦧꦶꦱ​ꦔ꧀ꦒꦮꦺ​ꦲꦸꦮꦤ꧀ ꦱꦏꦼꦊꦂꦮꦲꦺ​ꦲꦺꦴꦫ​ꦧꦶꦱ​꧉​ 37ꦤꦺꦏ꧀ꦪ​꧈​ꦔꦺꦴꦩꦺꦴꦁꦔꦪ​꧈​ꦤꦺꦏ꧀ꦲꦺꦴꦫ​꧈​ꦪ​ꦔꦺꦴꦩꦺꦴꦁꦲꦺꦴꦫ​꧉​ꦏ꧀ꦭꦶꦮꦠ꧀ꦱꦁꦏꦏꦸꦮꦶ​ꦩꦼꦠꦸꦤꦺ​ꦱꦁꦏꦱꦺꦠꦤ꧀​꧉​”

꧋ꦧꦧ꧀​ꦩ꧀ꦧꦊꦱ꧀꧈​

38꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦏꦺꦴꦮꦺ​ꦥꦢ​ꦔꦼꦂꦠꦶ​ꦤꦺꦏ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦔꦺꦴꦩꦺꦴꦁ ꦔꦺꦤꦺ​:'ꦱꦥ​ꦱꦶꦁ​ꦔꦿꦸꦱꦏ꧀ꦩꦿꦶꦥꦠ꧀ꦏꦸꦢꦸ​ꦒꦼꦤ꧀ꦠꦺꦤ꧀ꦢꦶꦫꦸꦱꦏ꧀ꦩꦿꦶꦥꦠ꧀ꦠꦺ​ꦭꦤ꧀ꦱꦥ​ꦱꦶꦁ​ꦔꦿꦸꦱꦏ꧀ꦲꦸꦤ꧀ꦠꦸ​ꦏꦸꦢꦸ​ꦒꦼꦤ꧀ꦠꦺꦤ꧀ꦢꦶꦫꦸꦱꦏ꧀ꦲꦸꦤ꧀ꦠꦸꦤꦺ​꧉'​ 39ꦤꦁꦔꦶꦁ​ꦱꦲꦶꦏꦶ​ꦲꦏꦸ​ꦔꦺꦴꦩꦺꦴꦁꦔꦶꦏꦺꦴꦮꦺ​:ꦲꦗ​ꦩ꧀ꦧꦊꦱ꧀ꦩꦫꦁ​ꦮꦺꦴꦁ​ꦱꦶꦁ​ꦔ꧀ꦒꦮꦺ​ꦲꦭ​ꦩꦫꦁ​ꦏꦺꦴꦮꦺ​꧉​ꦩꦭꦃ​ꦤꦺꦏ꧀ꦲꦺꦤꦺꦁꦮꦺꦴꦁ​ꦔꦼꦥ꧀ꦭꦏ꧀ꦥꦶꦥꦶꦩꦸ​ꦠꦼꦔꦼꦤ꧀ ꦧꦺꦤ꧀ꦔꦼꦥ꧀ꦭꦏ꧀ꦥꦶꦥꦶꦩꦸ​ꦱꦶꦁ​ꦏꦶꦮ​ꦥꦶꦱꦤ꧀꧈​ 40ꦭꦃ​ꦤꦺꦏ꧀ꦲꦺꦤꦺꦁꦮꦺꦴꦁ​ꦲꦉꦥ꧀​ꦔ꧀ꦒꦮ​ꦏꦺꦴꦮꦺ​ꦤꦁꦏꦿꦸꦠꦺꦴꦤ꧀ꦲꦮꦶꦠ꧀ꦲꦉꦥ꧀​ꦚ꧀ꦗꦭꦸꦏ꧀​ꦏ꧀ꦭꦩ꧀ꦧꦶꦩꦸ​꧈​ꦩꦭꦃ​ꦗꦱ꧀ꦩꦸ​ꦢꦶꦏꦺꦏ꧀ꦏꦏꦺꦥꦶꦱꦤ꧀꧈​ 41ꦭꦃ​ꦤꦺꦏ꧀ꦏꦺꦴꦮꦺ​ꦢꦶꦥꦼꦏ꧀ꦱ​ꦮꦺꦴꦁ​ꦏꦺꦴꦁꦏꦺꦴꦤ꧀​ꦔ꧀ꦒꦮꦏ꧀ꦏꦏꦺꦧꦫꦁꦔꦺ​ꦱꦏ꧀ꦏꦶꦭꦺꦴꦩꦺꦠꦼꦂ​꧈​ꦢꦶꦒꦮ​ꦫꦺꦴꦁ​ꦏꦶꦭꦺꦴꦩꦺꦠꦼꦂ​ꦥꦶꦱꦤ꧀꧈​ 42ꦤꦺꦏ꧀ꦲꦺꦤꦺꦁꦮꦺꦴꦁ​ꦚ꧀ꦗꦭꦸꦏ꧀ꦲꦥꦲꦥ​ꦩꦫꦁ​ꦏꦺꦴꦮꦺ​꧈​ꦢꦶꦏꦺꦏ꧀ꦏꦶꦭꦤ꧀ꦱꦶꦁ​ꦲꦉꦥ꧀ꦲꦸꦠꦁ​ꦩꦫꦁ​ꦏꦺꦴꦮꦺ​ꦪ​ꦢꦶꦲꦸꦠꦁꦔꦶ꧉​”

꧋ꦧꦧ꧀ꦠꦿꦺꦱ꧀ꦤꦩꦫꦁ​ꦩꦸꦁꦱꦸꦃ​꧉​

43꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦏꦺꦴꦮꦺ​ꦥꦢ​ꦔꦼꦂꦠꦶ​ꦥꦶꦮꦸꦭꦁ​ꦲꦶꦏꦶ​:'ꦏꦺꦴꦮꦺ​ꦥꦢ​ꦠꦿꦺꦱ꧀ꦤꦲꦩꦫꦁ​ꦏꦚ꧀ꦕꦏꦚ꧀ꦕꦩꦸ​ꦭꦤ꧀ꦥꦢ​ꦱꦼꦔꦶꦠ꧀ꦠ​ꦩꦫꦁ​ꦩꦸꦁꦱꦸꦃꦩꦸ​꧉'​ 44ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦠꦏ꧀ꦲꦺꦴꦩꦺꦴꦁꦔꦶ:ꦥꦢ​ꦠꦿꦺꦱ꧀ꦤꦲꦩꦫꦁ​ꦩꦸꦁꦱꦸꦃꦩꦸ​ꦭꦤ꧀ꦮꦺꦴꦁ​ꦱꦶꦁ​ꦔ꧀ꦒꦮꦺ​ꦲꦭ​ꦩꦫꦁ​ꦏꦺꦴꦮꦺ​ꦢꦶꦢꦺꦴꦔꦏ꧀ꦏꦏꦺ꧉​ 45ꦢꦢꦶꦤꦺ​ꦏꦼꦠꦫ​ꦤꦺꦏ꧀ꦏꦺꦴꦮꦺ​ꦏꦸꦮꦶ​ꦥꦚ꧀ꦕꦺꦤ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦩꦸ​ꦱꦶꦁ​ꦤꦁꦱ꧀ꦮꦂꦒ​꧉​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦩꦸ​ꦚ꧀ꦭꦺꦴꦫꦺꦴꦠ꧀ꦠꦏꦺꦥꦢꦁꦔꦺꦱꦽꦔꦺꦔꦺ​ꦩꦫꦁ​ꦮꦺꦴꦁ​ꦱꦶꦁ​ꦧꦼꦕꦶꦏ꧀ꦭꦤ꧀ꦱꦶꦁ​ꦲꦭ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦩꦸ​ꦲꦸꦒ​ꦔꦼꦏꦺꦏ꧀ꦏꦶꦲꦸꦢꦤ꧀ꦩꦫꦁ​ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦧꦼꦕꦶꦏ꧀ꦭꦤ꧀ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ 46ꦭꦃ​ꦤꦺꦏ꧀ꦏꦺꦴꦮꦺ​ꦤꦩꦸꦁ​ꦤꦿꦺꦱ꧀ꦤꦤ꧀ꦤꦶꦮꦺꦴꦁ​ꦱꦶꦁ​ꦠꦿꦺꦱ꧀ꦤꦩꦫꦁ​ꦏꦺꦴꦮꦺ​꧈​ꦲꦗ​ꦚ꧀ꦗꦒꦏ꧀ꦏꦏꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦸꦥꦃꦲꦶꦏꦺꦴꦮꦺ​꧈​ꦲꦮꦶꦠ꧀ꦮꦺꦴꦁ​ꦱꦶꦁ​ꦩꦠꦢꦸꦮꦶꦠ꧀ꦠꦼꦤ꧀ꦮꦲꦺ​ꦔ꧀ꦭꦏꦺꦴꦤ꧀ꦤꦶ​ꦏꦸꦮꦶ​꧉​ 47ꦭꦃ​ꦤꦺꦏ꧀ꦏꦺꦴꦮꦺ​ꦤꦩꦸꦁ​ꦩ꧀ꦧꦒꦺꦏ꧀ꦏꦏꦺꦏꦚ꧀ꦕꦏꦚ꧀ꦕꦩꦸ​꧈​ꦭꦃ​ꦏꦺꦴꦮꦺ​ꦲꦥ​ꦲꦺꦤꦺꦁꦧꦺꦢꦤꦺ​ꦏꦫꦺꦴ​ꦭꦶꦪꦤꦺ​?ꦮꦺꦴꦁ​ꦱꦶꦁ​ꦲꦺꦴꦫ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦥꦢ​ꦮꦲꦺ​ꦏꦪ​ꦔꦺꦴꦤꦺꦴ​꧉​ 48ꦩꦸꦭꦤꦺ​꧈​ꦏꦺꦴꦮꦺ​ꦏꦸꦢꦸ​ꦱꦩ꧀ꦥꦸꦂꦤ​꧈​ꦏꦪ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦩꦸ​ꦤꦁꦱ꧀ꦮꦂꦒ​ꦪ​ꦱꦩ꧀ꦥꦸꦂꦤ​꧉​”

↑ ↑ ↑


ꦧꦧ꧀ꦠꦼꦠꦸꦭꦸꦁ​'

꧇​꧖꧇​ 1꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦲꦼꦁꦒꦺꦴꦤ꧀ꦩꦸ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦥꦚꦼꦩ꧀ꦧꦃ​ꦏꦸꦮꦶ​ꦲꦗ​ꦏꦁꦒꦺꦴ​ꦥꦩꦺꦂꦫꦤ꧀ꦮꦺꦴꦁ​꧉​ꦩꦼꦁꦏꦺꦴ​ꦤ꧀ꦢꦏ꧀ꦧꦥꦏ꧀ꦩꦸ​ꦤꦁꦱ꧀ꦮꦂꦒ​ꦲꦺꦴꦫ​ꦲꦩ꧀ꦧꦼꦂꦏꦃꦲꦶ​ꦏꦺꦴꦮꦺ​꧉​

2꧋“ꦤꦺꦏ꧀ꦏꦺꦴꦮꦺ​ꦥꦮꦺꦃꦢꦸꦮꦶꦠ꧀ ꦲꦗ​ꦢꦶꦲꦺꦴꦩꦺꦴꦁꦔꦺꦴꦩꦺꦴꦁꦔꦏꦺ꧈​ꦏꦪ​ꦮꦺꦴꦁ​ꦭꦩꦶꦱ꧀ꦏꦲꦺ​꧉​ꦮꦺꦴꦁ​ꦭꦩꦶꦱ꧀ꦏꦸꦮꦶ​ꦭꦸꦩꦿꦃꦲꦺ​ꦔꦺꦴꦩꦺꦴꦁꦔꦺꦴꦩꦺꦴꦁꦔꦏꦺꦧꦧ꧀ꦧꦼꦕꦶꦏ꧀ꦏꦺ​꧈​ꦢꦶꦏꦧꦂꦏꦧꦂꦫꦏꦺꦤꦁꦱꦶꦤꦒꦸꦏ꧀ꦱꦶꦤꦒꦸꦏ꧀ꦭꦤ꧀ꦤꦁꦢꦭꦤ꧀ꦢꦭꦤ꧀ ꦱꦸꦥꦪ​ꦢꦶꦲꦼꦊꦩ꧀ꦮꦺꦴꦁ​꧉​ꦔꦼꦂꦠꦶꦪ​꧈​ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦮꦶꦱ꧀ꦤꦩ꧀ꦥ​ꦥꦼꦩ꧀ꦧꦊꦱꦤ꧀ꦤꦺꦥꦼꦁꦒꦮꦺꦪꦤ꧀ꦏꦸ꧉​ 3ꦤꦁꦔꦶꦁ​ꦏꦁꦒꦺꦴ​ꦏꦺꦴꦮꦺ​꧈​ꦤꦺꦏ꧀ꦏꦺꦴꦮꦺ​ꦥꦮꦺꦃ꧈​ꦲꦗ​ꦱꦩ꧀ꦥꦺꦏ꧀ꦮꦺꦴꦁ​ꦭꦶꦪ​ꦔꦼꦂꦠꦶ​꧉​ 4ꦢꦢꦶꦤꦺ​ꦥꦮꦺꦃꦩꦸꦲꦺꦴꦫ​ꦏꦺꦠꦺꦴꦏ꧀ꦮꦺꦴꦁ​꧈​ꦤꦁꦔꦶꦁ​ꦧꦥꦏ꧀ꦩꦸ​ꦤꦁꦱ꧀ꦮꦂꦒ​ꦔꦼꦂꦠꦶ​ꦧꦫꦁ​ꦱꦶꦁ​ꦲꦺꦴꦫ​ꦏꦺꦠꦺꦴꦏ꧀ ꦢꦺꦏ꧀ꦤꦺꦱꦶꦁ​ꦧꦏꦭ꧀ꦔꦸꦥꦃꦲꦶꦏꦺꦴꦮꦺ​꧉​”

꧋ꦧꦧ꧀​ꦤ꧀ꦢꦼꦢꦺꦴꦔ​꧉​

5꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦤꦺꦏ꧀ꦏꦺꦴꦮꦺ​ꦤ꧀ꦢꦼꦢꦺꦴꦔ​꧈​ꦲꦗ​ꦏꦪ​ꦮꦺꦴꦁ​ꦭꦩꦶꦱ꧀꧈​ꦮꦺꦴꦁ​ꦭꦩꦶꦱ꧀ꦏꦸꦮꦶ​ꦭꦸꦩꦿꦃꦲꦺ​ꦥꦢ​ꦤ꧀ꦢꦼꦢꦺꦴꦔ​ꦤꦁꦱꦶꦤꦒꦸꦏ꧀ꦱꦶꦤꦒꦸꦏ꧀ꦲꦥ​ꦤꦁꦢꦭꦤ꧀ꦢꦭꦤ꧀ ꦱꦸꦥꦪ​ꦏꦺꦠꦺꦴꦏ꧀ꦮꦺꦴꦁ​꧉​ꦔꦼꦂꦠꦶꦪ​꧈​ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦮꦶꦱ꧀ꦤꦩ꧀ꦥ​ꦲꦸꦥꦃꦲꦺ꧉​ 6ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦤ꧀ꦢꦼꦢꦺꦴꦔ​꧈​ꦩ꧀ꦊꦧꦸꦮ​ꦤꦁꦏꦩꦂ​ꦭꦤ꧀ꦭꦮꦁꦔꦺ​ꦢꦶꦏꦚ꧀ꦕꦶꦁ​꧈​ꦠꦼꦫꦸꦱ꧀​ꦤ꧀ꦢꦼꦢꦺꦴꦔꦲ​ꦩꦫꦁ​ꦧꦥꦏ꧀ꦩꦸ​ꦱꦶꦁ​ꦲꦺꦴꦫ​ꦏꦺꦠꦺꦴꦏ꧀꧈​ꦢꦺꦏ꧀ꦤꦺꦔꦼꦂꦠꦶ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺ꧈​ꦱꦼꦤꦗꦤ꧀ꦮꦺꦴꦁ​ꦭꦶꦪ​ꦲꦺꦴꦫ​ꦮꦼꦫꦸꦃ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦩꦸ​ꦧꦏꦭ꧀ꦔꦸꦥꦃꦲꦶꦏꦺꦴꦮꦺ​ꦏꦫꦺꦴ​ꦧꦼꦂꦏꦃ​꧉​

7꧋“ꦤꦺꦏ꧀ꦏꦺꦴꦮꦺ​ꦤ꧀ꦢꦼꦢꦺꦴꦔ​꧈​ꦲꦗ​ꦢꦮꦢꦮ​꧈​ꦏꦪ​ꦭꦸꦩꦿꦃꦲꦺ​ꦮꦺꦴꦁ​ꦱꦶꦁ​ꦲꦺꦴꦫ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦩꦶꦏꦶꦫꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦿꦸꦔꦺꦴꦏ꧀ꦏꦏꦺꦥꦤ꧀ꦢꦺꦴꦔꦤꦺ​꧈​ꦗꦭꦂꦫꦤ꧀ꦢꦮ​꧉​ 8ꦲꦗ​ꦥꦢ​ꦤꦶꦫꦸ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦩꦸ​ꦔꦼꦂꦠꦶ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦧꦸꦠꦸꦃꦲꦏꦺ꧈​ꦱꦏ꧀ꦢꦸꦫꦸꦁꦔꦺꦲꦩ꧀ꦧꦺꦴꦏ꧀ꦠꦼꦩ꧀ꦧꦸꦁ​ꦲꦶꦁ​ꦥꦤ꧀ꦢꦺꦴꦔ​꧉​ 9ꦩꦸꦭꦤꦺ​ꦤ꧀ꦢꦼꦢꦺꦴꦔꦲ​ꦔꦺꦤꦺ​:

‘ꦢꦸꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦤꦁꦱ꧀ꦮꦂꦒ​
ꦩꦸꦒ​ꦗꦼꦤꦼꦁꦩꦸ​ꦏꦱꦸꦕꦺꦏ꧀ꦤ​꧉​
10ꦩꦸꦒ​ꦏꦿꦠꦺꦴꦤ꧀ꦩꦸ​ꦠꦸꦩꦼꦏꦲ​
ꦭꦤ꧀ꦏꦼꦏꦉꦥ꧀ꦥꦤ꧀ꦩꦸ​ꦏ꧀ꦭꦏꦺꦴꦤꦤ
ꦲꦶꦁ​ꦢꦺꦴꦚ​ꦏꦪꦢꦺꦤꦺꦤꦁꦱ꧀ꦮꦂꦒ​꧉​
11ꦚꦸꦮꦸꦤ꧀ꦱꦤ꧀ꦢꦁꦥꦔꦤ꧀ꦱꦧꦼꦤ꧀ꦢꦶꦤ​
12ꦭꦤ꧀ꦥꦔꦥꦸꦫ​ꦱꦁꦏꦲꦶꦁ​ꦢꦺꦴꦱ​
꧋ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦪ​ꦔꦥꦸꦫ​ꦢꦺꦴꦱꦤꦺ​ꦮꦺꦴꦁ​ꦭꦶꦪ​꧉​
13ꦚꦸꦮꦸꦤ꧀ꦲꦗ​ꦱꦩ꧀ꦥꦺꦏ꧀ꦏꦼꦤꦺꦁꦒꦺꦴꦢ
ꦤꦁꦔꦶꦁ​ꦭꦸꦮꦂꦫꦤ​ꦱꦁꦏꦲꦭ​꧉​’

14꧋“ꦤꦺꦏ꧀ꦏꦺꦴꦮꦺ​ꦔꦥꦸꦫ​ꦩꦫꦁ​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦱꦭꦃ​ꦩꦫꦁ​ꦏꦺꦴꦮꦺ​꧈​ꦧꦥꦏ꧀ꦩꦸ​ꦤꦁꦱ꧀ꦮꦂꦒ​ꦪ​ꦧꦏꦭ꧀ꦔꦥꦸꦫ​ꦱꦭꦃꦩꦸ​꧉​ 15ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦔꦥꦸꦫ​ꦱꦭꦃꦲꦺ​ꦭꦶꦪꦤꦺ​꧈​ꦧꦥꦏ꧀ꦩꦸ​ꦤꦁꦱ꧀ꦮꦂꦒ​ꦪ​ꦲꦺꦴꦫ​ꦧꦏꦭ꧀ꦔꦥꦸꦫ​ꦱꦭꦃꦩꦸ​꧉​”

꧋ꦧꦧ꧀ꦥꦱ​꧉​

16꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦤꦺꦏ꧀ꦏꦺꦴꦮꦺ​ꦥꦱ​꧈​ꦲꦗ​ꦏꦺꦠꦺꦴꦏ꧀ꦱꦼꦢꦶꦏꦪ​ꦭꦸꦩꦿꦃꦲꦺ​ꦮꦺꦴꦁ​ꦭꦩꦶꦱ꧀꧈​ꦮꦺꦴꦁꦮꦺꦴꦁ​ꦏꦸꦮꦶ​ꦫꦸꦥꦤꦺ​ꦢꦶꦒꦮꦺꦒꦮꦺ​꧈​ꦱꦸꦥꦪ​ꦏꦺꦠꦺꦴꦏ꧀ꦱꦼꦢꦶ꧈​ꦢꦢꦶꦤꦺ​ꦮꦺꦴꦁ​ꦏꦧꦺꦃ​ꦔꦼꦂꦠꦶ​ꦤꦺꦏ꧀ꦲꦶꦗꦶꦏ꧀ꦥꦱ​꧉​ꦔꦼꦂꦠꦶꦪ​꧈​ꦮꦺꦴꦁ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦮꦶꦱ꧀ꦤꦩ꧀ꦥ​ꦲꦸꦥꦃꦲꦺꦏꦪ​ꦱꦏ꧀ꦩꦼꦱ꧀ꦠꦶꦤꦺ꧉​ 17ꦤꦁꦔꦶꦁ​ꦏꦺꦴꦮꦺ​꧈​ꦤꦺꦏ꧀ꦏꦺꦴꦮꦺ​ꦥꦱ​꧈​ꦏꦺꦴꦮꦺ​ꦫꦲꦸꦥ꧀ꦥ​ꦭꦤ꧀ꦫꦩ꧀ꦧꦸꦠ꧀ꦩꦸ​ꦢꦶꦗꦸꦁꦏꦠ꧀ꦠꦶ꧉​ 18ꦢꦢꦶꦤꦺ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦥꦱ​꧉​ꦤꦩꦸꦁ​ꦧꦥꦏ꧀ꦩꦸ​ꦤꦁꦱ꧀ꦮꦂꦒ​ꦱꦶꦁ​ꦲꦺꦴꦫ​ꦏꦺꦠꦺꦴꦏ꧀ꦱꦶꦁ​ꦔꦼꦂꦠꦶ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧉​ꦢꦺꦏ꧀ꦤꦺꦱꦶꦁ​ꦧꦏꦭ꧀ꦔꦸꦥꦃꦲꦶꦏꦺꦴꦮꦺ​꧉​”

꧋ꦧꦤ꧀ꦢꦤꦁꦱ꧀ꦮꦂꦒ​꧉​

19꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦥꦶꦮꦸꦭꦁꦔꦺ​ꦔꦺꦤꦺ​:“ꦲꦗ​ꦥꦢ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦧꦤ꧀ꦢꦲꦶꦁ​ꦢꦺꦴꦚ​꧈​ꦲꦮꦶꦠ꧀ꦧꦶꦱ​ꦫꦸꦱꦏ꧀ꦢꦶꦥꦔꦤ꧀ꦫꦪꦥ꧀ꦭꦤ꧀ꦉꦔꦼꦠ꧀ꦭꦤ꧀ꦧꦶꦱ​ꦢꦶꦕꦺꦴꦭꦺꦴꦁ​ꦩꦭꦶꦁ​꧉​ 20ꦭꦸꦮꦸꦁꦔ꧀ꦭꦸꦩ꧀ꦥꦸꦏ꧀ꦏꦏꦺꦧꦤ꧀ꦢꦤꦁꦱ꧀ꦮꦂꦒ​ꦮꦲꦺ​꧈​ꦲꦮꦶꦠ꧀ꦤꦁꦱ꧀ꦮꦂꦒ​ꦲꦺꦴꦫ​ꦲꦺꦤꦺꦁꦫꦪꦥ꧀ꦭꦤ꧀ꦉꦔꦼꦠ꧀ꦱꦶꦁ​ꦧꦶꦱ​ꦔꦿꦸꦱꦏ꧀ꦭꦤ꧀ꦩꦭꦶꦁ​ꦪ​ꦲꦺꦴꦫ​ꦧꦶꦱ​ꦚꦺꦴꦭꦺꦴꦁ​꧉​ 21ꦲꦮꦶꦠ꧀ꦤꦁꦲꦼꦤ꧀ꦢꦶ​ꦧꦤ꧀ꦢꦩꦸ꧈​ꦪ​ꦤꦁꦏꦺꦴꦤꦺꦴ​ꦲꦸꦒ​ꦲꦠꦶꦩꦸ​꧉​”

꧋ꦩꦿꦶꦥꦠ꧀ꦏꦸꦮꦶ​ꦢꦶꦪꦤ꧀ꦤꦺꦲꦮꦏ꧀꧈​

22꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦩꦿꦶꦥꦠ꧀ꦏꦸꦮꦶ​ꦢꦶꦪꦤ꧀ꦤꦺꦲꦮꦏ꧀꧈​ꦤꦺꦏ꧀ꦩꦿꦶꦥꦠ꧀ꦠꦺ​ꦥꦢꦁ꧈​ꦲꦮꦏ꧀ꦩꦸ​ꦱꦏ꧀ꦏꦸꦗꦸꦂꦪ​ꦥꦢꦁ꧉​ 23ꦤꦁꦔꦶꦁ​ꦤꦺꦏ꧀ꦩꦿꦶꦥꦠ꧀ꦩꦸ​ꦥꦼꦠꦼꦁ​꧈​ꦲꦮꦏ꧀ꦩꦸ​ꦱꦏ꧀ꦏꦸꦗꦸꦂꦪ​ꦥꦼꦠꦼꦁ​ꦲꦸꦒ​꧉​ꦢꦢꦶꦤꦺ​꧈​ꦤꦺꦏ꧀ꦢꦶꦪꦤ꧀ꦱꦶꦁ​ꦤꦁꦲꦮꦏ꧀ꦩꦸ​ꦏꦸꦮꦶ​ꦩꦭꦶꦃ​ꦥꦼꦠꦼꦁ​꧈​ꦭꦃ​ꦏꦪ​ꦔꦥ​ꦥꦼꦠꦼꦁꦔꦺ​!”

꧋ꦧꦧ꧀​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦭꦺꦴꦫꦺꦴ​꧉​

24꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦶꦱ​ꦔꦿꦁꦏꦼꦥ꧀​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦭꦺꦴꦫꦺꦴ​꧉​ꦲꦮꦶꦠ꧀ꦮꦺꦴꦁꦔꦺ​ꦧꦏꦭ꧀ꦱꦼꦔꦶꦠ꧀ꦏꦫꦺꦴ​ꦱꦶꦁ​ꦱꦶꦗꦶ​ꦭꦤ꧀ꦤꦿꦺꦱ꧀ꦤꦤ꧀ꦤꦶꦭꦶꦪꦤꦺ​꧈​ꦲꦥ​ꦔꦼꦊꦩ꧀ꦱꦶꦁ​ꦱꦶꦗꦶ​ꦭꦤ꧀ꦚꦼꦥꦺꦭꦺꦏ꧀ꦏꦏꦺꦱꦶꦁ​ꦭꦶꦪꦤꦺ​꧉​ꦱꦼꦩꦺꦴꦤꦺꦴ​ꦲꦸꦒ​ꦏꦺꦴꦮꦺ​꧈​ꦏꦺꦴꦮꦺ​ꦲꦺꦴꦫ​ꦧꦶꦱ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦲꦸꦒ​ꦔ꧀ꦭꦢꦺꦤ꧀ꦤꦶ​ꦢꦸꦮꦶꦠ꧀꧈​”

꧋ꦲꦗ​ꦱꦸꦩꦼꦭꦁ​꧉​

25꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦩꦸꦭꦤꦺ​ꦲꦏꦸ​ꦔꦺꦴꦩꦺꦴꦁ:ꦲꦗ​ꦥꦢ​ꦱꦸꦩꦼꦭꦁ​ꦧꦧ꧀ꦲꦸꦫꦶꦥ꧀ꦩꦸ​꧈​ꦧꦧ꧀ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦥꦔꦤ꧀ꦭꦤ꧀ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦲꦺꦴꦩ꧀ꦧꦺ​ꦭꦤ꧀ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦲꦼꦁꦒꦺꦴ​꧉​ꦲꦥ​ꦲꦸꦫꦶꦥ꧀ꦏꦸꦮꦶ​ꦲꦗꦶꦤꦺ​ꦲꦺꦴꦫ​ꦔꦸꦁꦏꦸꦭ꧀ꦭꦶ​ꦥꦔꦤ꧀ꦭꦤ꧀ꦲꦮꦏ꧀ꦏꦸꦮꦶ​ꦲꦗꦶꦤꦺ​ꦲꦥ​ꦲꦺꦴꦫ​ꦔꦸꦁꦏꦸꦭ꧀ꦭꦶ​ꦱꦤ꧀ꦢꦁꦔꦤ꧀? 26ꦲꦩ꧀ꦧꦺꦴꦏ꧀ꦢꦶꦱꦮꦁ​ꦩꦤꦸꦏ꧀ꦩꦤꦸꦏ꧀ꦱꦶꦁ​ꦩꦧꦸꦂ​ꦤꦁꦭꦔꦶꦠ꧀ꦏꦲꦺ​꧉​ꦭꦲꦸꦠ꧀ꦪ​ꦲꦺꦴꦫ​ꦥꦢ​ꦚꦼꦧꦂ​ꦭꦤ꧀ꦪ​ꦲꦺꦴꦫ​ꦥꦢ​ꦔꦸꦤ꧀ꦢꦸꦃꦭꦤ꧀ꦪ​ꦲꦺꦴꦫ​ꦥꦢ​ꦚꦶꦩ꧀ꦥꦼꦤ꧀ꦥꦤꦺꦤ꧀ꦤꦤ꧀ꦤꦺ​ꦤꦁꦭꦸꦩ꧀ꦧꦸꦁ​꧉​ꦤꦁꦔꦶꦁ​ꦧꦥꦏ꧀ꦩꦸ​ꦤꦁꦱ꧀ꦮꦂꦒ​ꦔꦺꦴꦥꦺꦤ꧀ꦤꦶ​ꦩꦤꦸꦏ꧀ꦩꦤꦸꦏ꧀ꦏꦸꦮꦶ​꧉​ꦲꦥ​ꦲꦗꦶꦤꦺ​ꦲꦸꦫꦶꦥ꧀ꦩꦸ​ꦲꦺꦴꦫ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦩꦤꦸꦏ꧀ꦩꦤꦸꦏ꧀ꦏꦸꦮꦶ​? 27ꦲꦥ​ꦤꦁꦠꦼꦔꦃꦩꦸ​ꦲꦺꦤꦺꦁꦱꦶꦁ​ꦧꦶꦱ​ꦚꦩ꧀ꦧꦸꦁ​ꦲꦸꦫꦶꦥ꧀ꦥꦺꦔꦁꦒꦺꦴ​ꦱꦸꦩꦼꦭꦁ​?

28꧋“ꦭꦃ​ꦏꦼꦤꦺꦁꦲꦥ​ꦏꦺꦴꦏ꧀ꦥꦢ​ꦱꦸꦩꦼꦭꦁ​ꦧꦧ꧀ꦱꦤ꧀ꦢꦁꦔꦤ꧀?ꦲꦩ꧀ꦧꦺꦴꦏ꧀ꦢꦶꦱꦮꦁ​ꦏꦼꦩ꧀ꦧꦁꦏꦼꦩ꧀ꦧꦁ​ꦱꦶꦁ​ꦠꦸꦏꦸꦭ꧀ꦤꦁꦏꦼꦧꦺꦴꦤ꧀ꦏꦲꦺ​꧉​ꦏꦼꦩ꧀ꦧꦁꦏꦼꦩ꧀ꦧꦁ​ꦏꦸꦮꦶ​ꦭꦲꦸꦠ꧀ꦪ​ꦲꦺꦴꦫ​ꦥꦢ​ꦚꦩ꧀ꦧꦸꦠ꧀ꦠꦲꦥ​ꦔ꧀ꦒꦮꦺ​ꦱꦭꦶꦤ꧀ꦠ​? 29ꦤꦁꦔꦶꦁ​ꦱꦮꦁꦔꦼꦤ꧀ꦢꦺꦮꦺ꧈​ꦒꦺꦏ꧀ꦫꦠꦸ​ꦯꦺꦴꦭꦺꦩꦤ꧀ꦮꦲꦺ​ꦱꦶꦁ​ꦱꦸꦒꦶꦃꦲꦺ​ꦏꦪ​ꦔꦺꦴꦤꦺꦴ​ꦲꦺꦴꦫ​ꦤ꧀ꦢꦸꦮꦺꦱꦭꦶꦤ꧀ꦱꦶꦁ​ꦲꦥꦶꦏ꧀ꦏꦺ​ꦏꦪ​ꦏꦼꦩ꧀ꦧꦁꦏꦼꦩ꧀ꦧꦁ​ꦏꦸꦮꦶ​꧉​ 30ꦱꦼꦩꦺꦴꦤꦺꦴ​ꦲꦸꦒ​ꦱꦸꦏꦼꦠ꧀ꦱꦸꦏꦼꦠ꧀ꦤꦁꦏꦼꦧꦺꦴꦤ꧀ ꦱꦶꦁ​ꦢꦶꦤ​ꦲꦶꦏꦶ​ꦠꦸꦏꦸꦭ꧀ꦭꦤ꧀ꦱꦺꦱꦸꦏ꧀ꦢꦶꦲꦺꦴꦧꦺꦴꦁ​꧉​ꦏꦸꦮꦶ​ꦮꦲꦺ​ꦢꦶꦲꦥꦶꦏ꧀ꦲꦥꦶꦏ꧀ꦠꦼꦤꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦃ​ꦏꦺꦴꦮꦺ​ꦩꦼꦤꦺꦃ​!ꦒꦸꦱ꧀ꦠꦶ​ꦄꦭ꧀ꦭꦃ​ꦩꦼꦱ꧀ꦠꦶꦧꦏꦭ꧀ꦚꦤ꧀ꦢꦏ꧀ꦏꦺꦴꦮꦺ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦱꦸꦏꦼꦠ꧀ꦱꦸꦏꦼꦠ꧀ꦏꦸꦮꦶ​꧉​ꦤꦁꦔꦶꦁ​ꦏꦺꦴꦮꦺ​ꦥꦢ​ꦕꦶꦭꦶꦏ꧀ꦥꦼꦔꦤ꧀ꦢꦼꦭ꧀ꦭꦺ​꧉​

31꧋“ꦩꦸꦭꦤꦺ​꧈​ꦲꦗ​ꦥꦢ​ꦱꦸꦩꦼꦭꦁ​ꦭꦤ꧀ꦲꦗ​ꦥꦢ​ꦧꦶꦔꦸꦁ​ꦧꦧ꧀ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦥꦔꦤ꧀ꦭꦤ꧀ꦲꦩ꧀ꦧꦺꦴꦏ꧀ꦲꦺꦴꦩ꧀ꦧꦺ​ꦭꦤ꧀ꦲꦩ꧀ꦧꦺꦴꦏ꧀ꦲꦼꦁꦒꦺꦴ​꧉​ 32ꦲꦮꦶꦠ꧀ꦏꦸꦮꦶ​ꦥꦽꦏꦫꦥꦽꦏꦫ​ꦱꦶꦁ​ꦢꦶꦥꦶꦏꦶꦂ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​꧉​ꦧꦥꦏ꧀ꦩꦸ​ꦤꦁꦱ꧀ꦮꦂꦒ​ꦭꦲꦸꦠ꧀ꦮꦶꦱ꧀ꦔꦼꦂꦠꦶ​ꦤꦺꦏ꧀ꦧꦫꦁꦧꦫꦁ​ꦏꦸꦮꦶ​ꦏꦧꦺꦃ​ꦲꦩ꧀ꦧꦺꦴꦏ꧀ꦧꦸꦠꦸꦃꦲꦏꦺ꧉​ 33ꦩꦸꦭꦤꦺ​꧈​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦥꦶꦏꦶꦂ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦏꦸꦢꦸꦤꦺ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦏꦼꦥꦿꦶꦪꦺ​ꦲꦼꦁꦒꦺꦴꦤ꧀ꦩꦸ​ꦧꦶꦱ​ ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​꧉​ꦩꦼꦁꦏꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦼꦏꦺꦏ꧀ꦏꦶꦏꦺꦴꦮꦺ​ꦧꦫꦁꦧꦫꦁ​ꦭꦶꦪꦤꦺ​ꦱꦶꦁ​ꦲꦩ꧀ꦧꦺꦴꦏ꧀ꦧꦸꦠꦸꦃꦲꦏꦺ꧉​ 34ꦩꦸꦭꦤꦺ​꧈​ꦲꦗ​ꦥꦢ​ꦱꦸꦩꦼꦭꦁ​ꦧꦧ꧀ꦢꦶꦤ​ꦱꦺꦱꦸꦏ꧀ ꦲꦮꦶꦠ꧀ꦢꦶꦤꦤꦺ​ꦱꦺꦱꦸꦏ꧀ꦲꦺꦤꦺꦁꦏꦫꦺꦥꦺꦴꦠ꧀ꦠꦤ꧀ꦤꦺ​ꦢꦺꦮꦺ꧉​ꦔꦿꦱꦏ꧀ꦏꦏꦺ​ꦏꦫꦺꦥꦺꦴꦠ꧀ꦠꦤ꧀ꦤꦺ​ꦢꦶꦤ​ꦲꦶꦏꦶ​ꦮꦲꦺ​ꦮꦶꦱ꧀ꦲꦧꦺꦴꦠ꧀ ꦲꦗ​ꦢꦶꦠꦩ꧀ꦧꦃꦲꦶ​ꦏꦫꦺꦴ​ꦏꦫꦺꦥꦺꦴꦠ꧀ꦠꦤ꧀ꦤꦺ​ꦢꦶꦤ​ꦱꦺꦱꦸꦏ꧀꧈​”

↑ ↑ ↑


꧋ꦧꦧ꧀ꦩꦲꦶꦢꦺꦴ​꧉​

꧇​꧗꧇​ 1꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦥꦶꦮꦸꦭꦁꦔꦺ​ꦔꦺꦤꦺ​:“ꦲꦗ​ꦥꦢ​ꦩꦲꦶꦢꦺꦴ​ꦭꦶꦪꦤꦺ​꧈​ꦱꦸꦥꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦩꦲꦶꦢꦺꦴ​ꦏꦺꦴꦮꦺ​꧉​ 2ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦩꦲꦶꦢꦺꦴ​ꦏꦺꦴꦮꦺ​ꦩꦤꦸꦠ꧀ꦕꦫꦤꦺ​ꦲꦼꦁꦒꦺꦴꦤ꧀ꦩꦸ​ꦩꦲꦶꦢꦺꦴ​ꦭꦶꦪꦤꦺ​꧉​ꦭꦤ꧀ꦢꦺꦏ꧀ꦤꦺꦧꦏꦭ꧀ꦔꦸꦏꦸꦂ​ꦏꦺꦴꦮꦺ​ꦔꦁꦒꦺꦴ​ꦲꦸꦏꦸꦂꦫꦤ꧀ꦱꦶꦁ​ꦲꦩ꧀ꦧꦺꦴꦏ꧀ꦏꦁꦒꦺꦴꦏ꧀ꦏꦏꦺꦏꦁꦒꦺꦴ​ꦔꦸꦏꦸꦂ​ꦭꦶꦪꦤꦺ​꧉​ 3ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀​ꦤ꧀ꦢꦼꦭꦺꦴꦏ꧀ꦏꦏꦺꦏ꧀ꦭꦶꦭꦶꦥ꧀ꦤꦁꦩꦿꦶꦥꦠ꧀ꦠꦺ​ꦭꦶꦪꦤꦺ​꧈​ꦤꦁꦔꦶꦁ​ꦧꦭꦺꦴꦏ꧀ꦤꦁꦩꦿꦶꦥꦠ꧀ꦩꦸ​ꦢꦺꦮꦺꦏꦺꦴꦮꦺ​ꦲꦺꦴꦫ​ꦮꦼꦫꦸꦃ​꧉​ 4ꦭꦃ​ꦏꦼꦥꦿꦶꦪꦺ​ꦏꦺꦴꦮꦺ​ꦏꦺꦴꦏ꧀ꦮꦤꦶ​ꦔꦺꦴꦩꦺꦴꦁꦏꦫꦺꦴ​ꦭꦶꦪꦤꦺ​:'ꦏꦺꦤꦺ​ꦏ꧀ꦭꦶꦭꦶꦥ꧀ꦱꦶꦁ​ꦤꦁꦩꦿꦶꦥꦠ꧀ꦩꦸ​ꦠꦏ꧀ꦧꦸꦮꦁꦔꦺ꧈'​ꦤꦁꦔꦶꦁ​ꦩꦿꦶꦥꦠ꧀ꦩꦸ​ꦢꦺꦮꦺꦲꦺꦤꦺꦁꦧꦭꦺꦴꦏ꧀ꦏꦺ​꧉​ 5ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦭꦩꦶꦱ꧀꧈​ꦧꦭꦺꦴꦏ꧀ꦱꦶꦁ​ꦤꦁꦩꦿꦶꦥꦠ꧀ꦩꦸ​ꦏꦸꦮꦶ​ꦢꦶꦧꦸꦮꦁ​ꦤ꧀ꦢꦶꦱꦶꦏ꧀ ꦢꦢꦶꦤꦺ​ꦏꦺꦴꦮꦺ​ꦧꦶꦱ​ꦮꦼꦫꦸꦃ​ꦩꦠ꧀ꦭꦤ꧀ꦧꦶꦱ​ꦲꦩ꧀ꦧꦸꦮꦁ​ꦏ꧀ꦭꦶꦭꦶꦥ꧀ꦱꦶꦁ​ꦤꦁꦩꦿꦶꦥꦠ꧀ꦠꦺ​ꦭꦶꦪꦤꦺ​꧉​

6꧋“ꦧꦫꦁ​ꦱꦶꦁ​ꦱꦸꦕꦶ​ꦲꦗ​ꦢꦶꦏꦺꦏ꧀ꦏꦏꦺꦲꦱꦸ​꧈​ꦩꦼꦁꦏꦺꦴ​ꦤ꧀ꦢꦏ꧀ꦲꦱꦸꦤꦺꦧꦭꦶꦏ꧀ꦚꦠꦼꦠ꧀ꦠꦏꦺꦏꦺꦴꦮꦺ​꧉​ꦭꦤ꧀ꦥꦉꦭ꧀ꦲꦗ​ꦢꦶꦏꦺꦏ꧀ꦏꦏꦺꦧꦧꦶ​꧈​ꦩꦼꦁꦏꦺꦴ​ꦤ꧀ꦢꦏ꧀ꦢꦶꦲꦶꦢꦼꦏ꧀ꦲꦶꦢꦼꦏ꧀ꦔꦁꦒꦸꦂ​꧉​”

꧋ꦥꦤ꧀ꦢꦺꦴꦔ​ꦩꦼꦱ꧀ꦠꦶꦏꦼꦠꦩ꧀ꦥ꧉​

7꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦤꦺꦏ꧀ꦏꦺꦴꦮꦺ​ꦚ꧀ꦗꦭꦸꦏ꧀ ꦏꦺꦴꦮꦺ​ꦩꦼꦱ꧀ꦠꦶꦧꦏꦭ꧀ꦢꦶꦏꦺꦏ꧀ꦏꦶ;ꦤꦺꦏ꧀ꦏꦺꦴꦮꦺ​ꦔ꧀ꦒꦺꦴꦭꦺꦏ꧀ ꦏꦺꦴꦮꦺ​ꦩꦼꦱ꧀ꦠꦶꦧꦏꦭ꧀ꦤꦼꦩꦸ​;ꦤꦺꦏ꧀ꦏꦺꦴꦮꦺ​ꦠꦺꦴꦠꦺꦴꦏ꧀ꦠꦺꦴꦠꦺꦴꦏ꧀ꦭꦮꦁ​꧈​ꦩꦼꦱ꧀ꦠꦶꦏꦺꦴꦮꦺ​ꦧꦏꦭ꧀ꦢꦶꦧꦸꦏꦏ꧀ꦏꦏꦺ꧉​ 8ꦲꦮꦶꦠ꧀ꦱꦥ​ꦱꦶꦁ​ꦚ꧀ꦗꦭꦸꦏ꧀ꦧꦏꦭ꧀ꦤꦩ꧀ꦥ​ꦭꦤ꧀ꦱꦥ​ꦱꦶꦁ​ꦔ꧀ꦒꦺꦴꦭꦺꦏ꧀ꦧꦏꦭ꧀ꦤꦼꦩꦸ​ꦭꦤ꧀ꦱꦥ​ꦱꦶꦁ​ꦠꦺꦴꦠꦺꦴꦏ꧀ꦭꦮꦁ​ꦧꦏꦭ꧀ꦢꦶꦧꦸꦏꦏ꧀ꦏꦏꦺ꧉​ 9ꦥꦫ​ꦧꦥꦏ꧀ꦱꦶꦁ​ꦤꦁꦏꦺꦤꦺ​ꦲꦶꦏꦶ​꧈​ꦩꦺꦴꦱꦺꦴꦏ꧀ꦤꦺꦏ꧀ꦲꦤꦏ꧀ꦩꦸ​ꦚ꧀ꦗꦭꦸꦏ꧀ꦫꦺꦴꦠꦶ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦮꦠꦸ​?ꦩꦼꦱ꧀ꦠꦶꦲꦺꦴꦫ​ꦠ​! 10ꦲꦥ​ꦤꦺꦏ꧀ꦲꦤꦏ꧀ꦩꦸ​ꦚ꧀ꦗꦭꦸꦏ꧀ꦲꦶꦮꦏ꧀ꦠꦼꦫꦸꦱ꧀ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦲꦸꦭ​?ꦩꦼꦱ꧀ꦠꦶꦲꦺꦴꦫ​ꦠ​! 11ꦭꦃ​ꦤꦺꦏ꧀ꦏꦺꦴꦮꦺ​ꦮꦲꦺ​꧈​ꦮꦺꦴꦁ​ꦱꦶꦁ​ꦲꦭ​꧈​ꦧꦶꦱ​ꦔꦼꦏꦺꦏ꧀ꦏꦶꦧꦫꦁ​ꦱꦶꦁ​ꦲꦥꦶꦏ꧀ꦩꦫꦁ​ꦲꦤꦏ꧀ꦲꦤꦏ꧀ꦩꦸ​꧈​ꦭꦃ​ꦧꦥꦏ꧀ꦩꦸ​ꦱꦶꦁ​ꦤꦁꦱ꧀ꦮꦂꦒ​ꦩꦼꦤꦺꦃ​?ꦩꦺꦴꦱꦺꦴꦏ꧀ꦢꦺꦏ꧀ꦤꦺꦲꦺꦴꦫ​ꦧꦏꦭ꧀ꦔꦼꦏꦺꦏ꧀ꦏꦶꦧꦫꦁ​ꦱꦶꦁ​ꦲꦥꦶꦏ꧀ꦩꦫꦁ​ꦱꦥ​ꦮꦲꦺ​ꦱꦶꦁ​ꦥꦢ​ꦚ꧀ꦗꦭꦸꦏ꧀ꦩꦫꦁ​ꦢꦺꦏ꧀ꦤꦺ꧉​

12꧋“ꦩꦸꦭꦤꦺ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦏꦉꦥ꧀ꦥꦏꦺꦱꦸꦥꦪ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦮꦺꦴꦁ​ꦭꦶꦪ​ꦩꦫꦁ​ꦏꦺꦴꦮꦺ​꧈​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦩꦫꦁ​ꦭꦶꦪꦤꦺ​꧉​ꦲꦮꦶꦠ꧀ꦏꦸꦮꦶ​ꦲꦶꦱꦶꦤꦺ​ꦲꦁꦒꦼꦂꦫꦁꦒꦼꦂ​ꦱꦶꦁ​ꦢꦶꦮꦸꦭꦁꦔꦏꦺꦏꦫꦺꦴ​ꦤꦧꦶ​ꦩꦺꦴꦱꦼꦱ꧀ꦭꦤ꧀ꦤꦧꦶ​ꦭꦶꦪꦭꦶꦪꦤꦺ​꧉​”

꧋ꦧꦧ꧀ꦭꦮꦁ​ꦱꦶꦁ​ꦲꦩ꧀ꦧ​ꦭꦤ꧀ꦭꦮꦁ​ꦱꦶꦁ​ꦕꦶꦪꦸꦠ꧀꧈​

13꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦸꦭꦁꦔꦶꦔꦺꦤꦺ​:“ꦥꦢ​ꦩ꧀ꦊꦧꦸꦮ​ꦭꦶꦮꦠ꧀ꦭꦮꦁ​ꦱꦶꦁ​ꦕꦶꦪꦸꦠ꧀ ꦲꦮꦶꦠ꧀ꦭꦮꦁ​ꦱꦶꦁ​ꦲꦩ꧀ꦧ​ꦭꦤ꧀ꦢꦭꦤ꧀ꦱꦶꦁ​ꦗꦼꦩ꧀ꦧꦂ​ꦏꦸꦮꦶ​ꦔ꧀ꦒꦮ​ꦏꦺꦴꦮꦺ​ꦤꦁꦏꦫꦸꦱꦏ꧀ꦏꦤ꧀ꦭꦤ꧀ꦮꦺꦴꦁ​ꦲꦺꦴꦏꦺꦃꦱꦶꦁ​ꦥꦢ​ꦩꦶꦭꦶꦃ​ꦢꦭꦤ꧀ꦲꦶꦏꦸ​꧉​ 14ꦤꦁꦔꦶꦁ​ꦭꦮꦁ​ꦱꦶꦁ​ꦕꦶꦪꦸꦠ꧀ꦭꦤ꧀ꦢꦭꦤ꧀ꦱꦶꦁ​ꦕꦶꦪꦸꦠ꧀ꦏꦸꦮꦶ​ꦔ꧀ꦒꦮ​ꦏꦺꦴꦮꦺ​ꦤꦁꦏꦲꦸꦫꦶꦥ꧀ꦥꦤ꧀ꦭꦤ꧀ꦤꦩꦸꦁ​ꦮꦺꦴꦁ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦥꦢ​ꦩꦶꦭꦶꦃ​ꦢꦭꦤ꧀ꦏꦸꦮꦶ​꧉​”

꧋ꦧꦧ꧀ꦤꦧꦶ​ꦱꦶꦁ​ꦥꦭ꧀ꦱꦸ​꧉​

15꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦥꦶꦮꦸꦭꦁꦔꦺ​ꦔꦺꦤꦺ​:“ꦥꦢ​ꦱꦶꦁ​ꦲꦠꦶꦲꦠꦶꦏꦫꦺꦴ​ꦤꦧꦶꦤꦧꦶ​ꦱꦶꦁ​ꦥꦭ꧀ꦱꦸ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦏꦤꦺ​ꦤꦁꦔ꧀ꦒꦺꦴꦤ꧀ꦩꦸ​ꦏꦪ​ꦮꦼꦢꦸꦱ꧀ꦩꦤꦸꦠ꧀ ꦤꦁꦔꦶꦁ​ꦮꦸꦗꦸꦠ꧀ꦠꦺꦧꦼꦧꦸꦫꦺꦴꦤ꧀ꦱꦶꦁ​ꦒꦭꦏ꧀꧈​ 16ꦮꦺꦴꦁꦮꦺꦴꦁ​ꦏꦸꦮꦶ​ꦏꦼꦠꦫꦤꦺꦱꦁꦏꦥꦼꦁꦒꦮꦺꦤꦺ​꧉​ꦩꦺꦴꦱꦺꦴꦏ꧀ꦠꦸꦏꦸꦭ꧀ꦭꦤ꧀ꦲꦼꦫꦶ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦢꦽꦲꦶꦥ꦳꧀ꦭꦤ꧀ꦉꦫꦸꦁꦏꦸꦠ꧀ꦠꦤ꧀ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦗꦩ꧀ꦧꦸ​?ꦩꦼꦱ꧀ꦠꦶꦲꦺꦴꦫ​ꦠ​! 17ꦮꦶꦠ꧀ꦱꦶꦁ​ꦲꦥꦶꦏ꧀ꦩꦼꦱ꧀ꦠꦶꦪ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦱꦶꦁ​ꦲꦥꦶꦏ꧀ꦭꦤ꧀ꦮꦶꦠ꧀ꦱꦶꦁ​ꦲꦺꦭꦺꦏ꧀ꦩꦼꦱ꧀ꦠꦶꦪ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦱꦶꦁ​ꦲꦺꦭꦺꦏ꧀꧈​ 18ꦮꦶꦠ꧀ꦱꦶꦁ​ꦲꦥꦶꦏ꧀ꦲꦺꦴꦫ​ꦧꦶꦱ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦱꦶꦁ​ꦲꦺꦭꦺꦏ꧀ꦭꦤ꧀ꦮꦶꦠ꧀ꦱꦶꦁ​ꦲꦺꦭꦺꦏ꧀ꦲꦺꦴꦫ​ꦧꦶꦱ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦱꦶꦁ​ꦲꦥꦶꦏ꧀꧈​ 19ꦱꦧꦼꦤ꧀ꦮꦶꦠ꧀ꦱꦶꦁ​ꦲꦺꦴꦫ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦱꦶꦁ​ꦲꦥꦶꦏ꧀ꦧꦏꦭ꧀ꦢꦶꦠꦼꦒꦺꦴꦂ​ꦭꦤ꧀ꦢꦶꦲꦺꦴꦧꦺꦴꦁ​꧉​ 20ꦩꦼꦁꦏꦺꦴꦤꦺꦴ​ꦏꦸꦮꦶ​ꦏꦺꦴꦮꦺ​ꦧꦶꦱ​ꦤꦶꦠꦺꦤ꧀ꦤꦶ​ꦤꦧꦶ​ꦱꦶꦁ​ꦥꦭ꧀ꦱꦸ​꧈​ꦱꦁꦏꦥꦼꦁꦒꦮꦺꦤꦺ​꧉​”

꧋ꦮꦺꦴꦁ​ꦱꦶꦁ​ꦔꦺꦴꦩꦺꦴꦁ:“ꦒꦸꦱ꧀ꦠꦶ​꧈​ꦒꦸꦱ꧀ꦠꦶ​”꧉​

21꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦱꦶꦁ​ꦩ꧀ꦊꦧꦸ​ꦲꦶꦁ​ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦸꦮꦶ​ꦲꦺꦴꦫ​ꦮꦺꦴꦁ​ꦱꦶꦁ​ꦔꦺꦴꦩꦺꦴꦁ'ꦒꦸꦱ꧀ꦠꦶ​꧈​ꦒꦸꦱ꧀ꦠꦶ​'​ꦩꦫꦁ​ꦲꦏꦸ​꧈​ꦲꦺꦴꦫ​꧈​ꦤꦁꦔꦶꦁ​ꦱꦧꦼꦤ꧀ꦮꦺꦴꦁ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦧꦥꦏ꧀ꦏꦸ​ꦤꦁꦱ꧀ꦮꦂꦒ​꧉​ 22ꦲꦶꦁ​ꦢꦶꦤ​ꦏꦿꦸꦠꦺꦴꦤ꧀ꦲꦺꦴꦏꦺꦃꦮꦺꦴꦁ​ꦧꦏꦭ꧀ꦔꦺꦴꦩꦺꦴꦁꦩꦫꦁ​ꦲꦏꦸ​:'ꦒꦸꦱ꧀ꦠꦶ​꧈​ꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺ ꦭꦲꦸꦠ꧀ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦗꦼꦤꦼꦁꦩꦸ​ꦠ​?ꦭꦤ꧀ꦲꦮꦏ꧀ꦏꦺ​ꦢꦺꦮꦺꦭꦲꦸꦠ꧀ꦤꦸꦤ꧀ꦢꦸꦁꦔꦶꦢꦼꦩꦶꦠ꧀ꦲꦶꦁ​ꦗꦼꦤꦼꦁꦩꦸ​ꦠ​ꦭꦤ꧀ꦲꦮꦏ꧀ꦏꦺ​ꦢꦺꦮꦺꦪ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦲꦶꦁ​ꦗꦼꦤꦼꦁꦩꦸ​ꦲꦸꦒ​?’ 23ꦤꦁꦔꦶꦁ​ꦲꦏꦸ​ꦧꦏꦭ꧀ꦱꦼꦩꦲꦸꦂ​:'ꦲꦏꦸ​ꦧ꧀ꦭꦱ꧀ꦲꦺꦴꦫ​ꦏꦼꦤꦭ꧀ꦩꦫꦁ​ꦏꦺꦴꦮꦺ​꧉​ꦥꦢ​ꦭꦸꦔꦲ​ꦱꦁꦏꦔꦉꦥ꧀ꦏꦸ​꧈​ꦏꦺꦴꦮꦺ​ꦮꦺꦴꦁ​ꦱꦶꦁ​ꦱꦼꦤꦼꦁ​ꦔ꧀ꦒꦮꦺ​ꦲꦭ​!’”

꧋ꦧꦧ꧀ꦔꦿꦸꦔꦺꦴꦏ꧀ꦏꦏꦺꦭꦤ꧀​ꦔ꧀ꦭꦏꦺꦴꦤ꧀ꦤꦶ​꧉​

24꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦥꦶꦮꦸꦭꦁꦔꦺ​ꦔꦺꦤꦺ​:“ꦮꦺꦴꦁ​ꦱꦶꦁ​ꦔꦿꦸꦔꦺꦴꦏ꧀ꦏꦏꦺꦭꦤ꧀​ꦔ꧀ꦭꦏꦺꦴꦤ꧀ꦤꦶ​ꦥꦶꦮꦸꦭꦁꦏꦸ​ꦏꦸꦮꦶ​ꦏꦼꦤꦺꦁꦠꦏ꧀ꦥꦢꦏ꧀ꦏꦏꦺꦏꦫꦺꦴ​ꦮꦺꦴꦁ​ꦥꦶꦤ꧀ꦠꦼꦂ​ꦱꦶꦁ​ꦔꦼꦢꦼꦏ꧀ꦏꦏꦺꦲꦺꦴꦩꦃꦲꦺ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦠꦺꦴꦱ꧀꧈​ 25ꦏꦢꦸꦁ​ꦲꦸꦢꦤ꧀ꦤꦺ​ꦢꦼꦉꦱ꧀ꦭꦤ꧀ꦧꦚꦸꦤꦺ​ꦭꦫꦩꦸꦁꦒꦃ​ꦔꦼꦊꦥ꧀ꦥꦏꦺꦥꦁꦒꦺꦴꦤ꧀ꦤꦤ꧀ꦤꦺ​ꦏꦧꦺꦃ​ꦭꦤ꧀ꦲꦔꦶꦤ꧀ꦒꦼꦢꦺ​ꦔꦤ꧀ꦠꦼꦩ꧀ꦩꦶ​ꦲꦺꦴꦩꦃꦲꦺ​꧈​ꦲꦺꦴꦩꦃꦲꦺ​ꦲꦺꦴꦫ​ꦫꦸꦧꦸꦃ​꧈​ꦲꦮꦶꦠ꧀ꦔꦢꦼꦏ꧀ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦠꦺꦴꦱ꧀꧈​

26꧋“ꦭꦃ​ꦮꦺꦴꦁ​ꦱꦶꦁ​ꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦏꦸ​꧈​ꦤꦁꦔꦶꦁ​ꦲꦺꦴꦫ​ꦢꦶꦭꦏꦺꦴꦤ꧀ꦤꦶ​꧈​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦮꦺꦴꦁ​ꦧꦺꦴꦢꦺꦴꦱꦶꦁ​ꦔꦼꦢꦼꦏ꧀ꦏꦏꦺꦲꦺꦴꦩꦃꦲꦺ​ꦤꦁꦊꦩꦃ​ꦱꦤ꧀ꦠꦶ꧉​ 27ꦏꦢꦸꦁ​ꦲꦺꦤꦺꦁꦲꦸꦢꦤ꧀ꦢꦼꦉꦱ꧀ꦭꦤ꧀ꦧꦚꦸꦤꦺ​ꦭꦫꦩꦸꦁꦒꦃ​ꦔꦼꦊꦥ꧀ꦥꦏꦺꦥꦁꦒꦺꦴꦤ꧀ꦤꦤ꧀ꦤꦺ​ꦭꦤ꧀ꦲꦔꦶꦤ꧀ꦒꦼꦢꦺ​ꦔꦤ꧀ꦠꦼꦩ꧀ꦩꦶ​ꦲꦺꦴꦩꦃꦲꦺ​꧈​ꦲꦺꦴꦩꦃꦲꦺ​ꦠꦼꦫꦸꦱ꧀ꦲꦩ꧀ꦧꦿꦸꦏ꧀ ꦫꦸꦱꦏ꧀ꦱꦏ꧀ꦏꦧꦺꦃꦲꦺ꧉​” 28ꦱꦏ꧀ꦮꦶꦱ꧀ꦱꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦫꦩ꧀ꦥꦸꦁ​ꦱꦶꦁ​ꦩꦼꦩꦸꦭꦁ​꧈​ꦮꦺꦴꦁ​ꦏꦧꦺꦃ​ꦥꦢ​ꦔ꧀ꦒꦸꦩꦸꦤ꧀ꦧꦔꦼꦠ꧀ꦩꦫꦁ​ꦥꦶꦮꦸꦭꦁꦔꦺ​꧉​ 29ꦲꦮꦶꦠ꧀ꦢꦺꦏ꧀ꦤꦺꦱꦶꦁ​ꦩꦸꦭꦁ​ꦔꦁꦒꦺꦴ​ꦥꦔ꧀ꦮꦱ​꧈​ꦱꦺꦗꦺ​ꦏꦫꦺꦴ​ꦒꦸꦫꦸ​ꦏꦶꦠꦧ꧀​꧉​

↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁ​ꦭꦫ​ꦭꦺꦥꦿ​꧉​

꧇​꧘꧇​ 1꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦢꦸꦤ꧀ꦱꦁꦏꦒꦸꦤꦸꦁ​꧈​ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦔꦼꦠꦸꦠ꧀ꦠꦏꦺꦢꦺꦏ꧀ꦤꦺ꧉​ 2ꦤꦁꦏꦺꦴꦤꦺꦴ​ꦲꦺꦤꦺꦁꦮꦺꦴꦁ​ꦭꦫ​ꦭꦺꦥꦿ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦫꦸꦱ꧀ꦱꦸꦗꦸꦠ꧀ꦤꦁꦔꦉꦥ꧀ꦥꦺ​꧉​ꦮꦺꦴꦁꦔꦺ​ꦔꦺꦴꦩꦺꦴꦁ:“ꦢꦸꦃ​ꦒꦸꦱ꧀ꦠꦶ​꧈​ꦤꦺꦏ꧀ꦏꦺꦴꦮꦺ​ꦒꦼꦊꦩ꧀ ꦩꦼꦱ꧀ꦠꦶꦏꦺꦴꦮꦺ​ꦧꦶꦱ​ꦤꦩ꧀ꦧꦤꦶ​ꦲꦏꦸ​꧉​”

3꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦼꦭꦸꦁꦔꦏꦺꦠꦔꦤ꧀ꦤꦺ​ꦭꦤ꧀​ꦤ꧀ꦢꦼꦩꦺꦏ꧀ꦮꦺꦴꦁꦔꦺ​ꦏꦫꦺꦴ​ꦔꦺꦴꦩꦺꦴꦁ:“ꦲꦏꦸ​ꦒꦼꦊꦩ꧀ ꦢꦢꦶꦪ​ꦮꦫꦱ꧀!”ꦱꦏ꧀ꦮꦠ꧀ꦮꦺꦴꦁꦔꦺ​ꦠꦼꦫꦸꦱ꧀ꦩꦫꦶ​ꦠꦼꦤꦤ꧀꧈​ 4ꦮꦺꦴꦁꦔꦺ​ꦠꦼꦫꦸꦱ꧀ꦢꦶꦥꦼꦔꦶꦁ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦺꦴꦫ​ꦲꦺꦤ꧀ꦠꦸꦏ꧀ꦔꦺꦴꦩꦺꦴꦁꦔꦺꦴꦩꦺꦴꦁꦔꦏꦺꦧꦧ꧀ꦊꦭꦏꦺꦴꦤ꧀ꦏꦸꦮꦶ​ꦩꦫꦁ​ꦮꦺꦴꦁ​ꦭꦶꦪꦤꦺ​꧈​ꦤꦁꦔꦶꦁ​ꦢꦶꦏꦺꦴꦁꦏꦺꦴꦤ꧀ꦤꦁꦔ꧀ꦒꦺꦴꦤ꧀ꦤꦺꦲꦶꦩꦩ꧀ꦩꦺ​꧈​ꦱꦸꦥꦪ​ꦮꦼꦫꦸꦃ​ꦤꦺꦏ꧀ꦢꦺꦏ꧀ꦤꦺꦮꦶꦱ꧀ꦩꦫꦶ​ꦠꦼꦤꦤ꧀꧈​ꦮꦺꦴꦁꦔꦺ​ꦲꦸꦒ​ꦢꦶꦏꦺꦴꦁꦏꦺꦴꦤ꧀ꦔꦼꦏꦺꦏ꧀ꦏꦶꦏꦸꦂꦧꦤ꧀ꦤꦺ​ꦩꦶꦠꦸꦫꦸꦠ꧀ꦥꦼꦂꦤꦠꦤ꧀ꦤꦺꦤꦧꦶ​ꦩꦺꦴꦱꦼꦱ꧀ꦏꦁꦒꦺꦴ​ꦠꦤ꧀ꦢꦤꦺꦏ꧀ꦮꦺꦴꦁꦔꦺ​ꦮꦶꦱ꧀ꦩꦫꦶ​ꦠꦼꦤꦤ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦥꦼꦭꦢꦺꦤ꧀ꦤꦺ​ꦲꦺꦴꦥ꦳ꦶꦱꦶꦂꦬꦸꦩ꧀꧈​

5꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦊꦧꦸ​ꦏꦸꦠꦑꦥꦺꦂꦤꦏꦸꦩ꧀ꦲꦺꦤꦺꦁꦲꦺꦴꦥ꦳ꦶꦱꦶꦂꦬꦸꦩ꧀ꦩꦫꦤꦶ​ꦢꦺꦏ꧀ꦤꦺ꧈​ꦚ꧀ꦗꦭꦸꦏ꧀ꦠꦸꦭꦸꦁ​ꦔꦺꦴꦩꦺꦴꦁ: 6“ꦒꦸꦱ꧀ꦠꦶ​꧈​ꦥꦼꦭꦢꦺꦤ꧀ꦏꦸꦭꦫ​ꦤꦁꦲꦺꦴꦩꦃ​꧉​ꦢꦺꦏ꧀ꦤꦺꦮꦶꦱ꧀ꦲꦺꦴꦫ​ꦧꦶꦱ​ꦲꦥꦲꦥ​꧈​ꦤꦩꦸꦁ​ꦔꦿꦱꦏ꧀ꦏꦏꦺ​ꦭꦫ​ꦠꦼꦤꦤ꧀꧈​”

7꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦪ​꧈​ꦲꦏꦸ​ꦲꦉꦥ꧀ꦠꦼꦏ​ꦤꦩ꧀ꦧꦤꦶ​ꦢꦺꦏ꧀ꦤꦺ꧉​”

8꧋ꦤꦁꦔꦶꦁ​ꦲꦺꦴꦥ꦳ꦶꦱꦶꦫꦺꦱꦼꦩꦲꦸꦂ​:“ꦢꦸꦃ​ꦒꦸꦱ꧀ꦠꦶ​꧈​ꦲꦏꦸ​ꦲꦶꦏꦶ​ꦲꦺꦴꦫ​ꦥꦤ꧀ꦠꦼꦱ꧀ꦢꦶꦢꦪꦺꦴꦃꦲꦶꦒꦸꦱ꧀ꦠꦶ​ꦤꦁꦲꦺꦴꦩꦃꦏꦸ​꧉​ꦲꦩ꧀ꦧꦺꦴꦏ꧀ꦒꦸꦱ꧀ꦠꦶ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦱꦏ꧀ꦏꦼꦕꦥ꧀​ꦮꦲꦺ​꧈​ꦩꦼꦁꦏꦺꦴ​ꦥꦼꦭꦢꦺꦤ꧀ꦏꦸꦩꦼꦱ꧀ꦠꦶꦧꦏꦭ꧀ꦩꦫꦶ​꧉​ 9ꦲꦮꦶꦠ꧀ꦲꦏꦸ​ꦢꦺꦮꦺꦪ​ꦲꦶꦁ​ꦱꦏ꧀ꦔꦶꦱꦺꦴꦂꦫꦺ​ꦥꦼꦁꦒꦼꦢꦺꦏꦸ꧈​ꦤꦁꦔꦶꦁ​ꦲꦏꦸ​ꦢꦺꦮꦺꦪ​ꦤ꧀ꦢꦸꦮꦺꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦲꦶꦁ​ꦱꦏ꧀ꦔꦶꦱꦺꦴꦂꦏꦸ​꧈​ꦱꦶꦁ​ꦏꦸꦢꦸ​ꦩꦤꦸꦠ꧀ꦩꦫꦁ​ꦲꦏꦸ​꧉​ꦤꦺꦏ꧀ꦲꦏꦸ​ꦩꦿꦺꦤ꧀ꦠꦃ​ꦱꦶꦁ​ꦱꦶꦗꦶ​ꦔꦺꦴꦩꦺꦴꦁ:'ꦏꦤ​ꦭꦸꦔ​꧈'​ꦮꦺꦴꦁꦔꦺ​ꦪ​ꦭꦸꦔ​ꦭꦤ꧀ꦤꦺꦏ꧀ꦭꦶꦪꦤꦺ​ꦠꦏ꧀ꦕꦼꦭꦸꦏ꧀​:'ꦫꦺꦤꦺ​꧈'​ꦮꦺꦴꦁꦔꦺ​ꦩꦼꦱ꧀ꦠꦶꦪ​ꦠꦼꦏ​꧉​ꦤꦺꦏ꧀ꦲꦏꦸ​ꦔꦺꦴꦩꦺꦴꦁꦏꦫꦺꦴ​ꦥꦼꦭꦢꦺꦤ꧀ꦏꦸ:'ꦲꦶꦏꦶ​ꦢꦶꦠꦤ꧀ꦢꦁꦔꦶ​꧈'​ꦩꦼꦱ꧀ꦠꦶꦪ​ꦢꦶꦠꦤ꧀ꦢꦁꦔꦶ​꧉​”

10꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦒꦸꦩꦸꦤ꧀ꦏꦿꦸꦔꦸ​ꦠꦼꦩ꧀ꦧꦸꦁꦔꦺ​ꦲꦺꦴꦥ꦳ꦶꦱꦶꦂꦏꦸꦮꦶ​꧉​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦩꦺꦭꦸ​:“ꦠꦼꦤꦤ꧀ ꦲꦏꦸ​ꦢꦸꦫꦸꦁ​ꦠꦲꦸ​ꦠꦸꦩꦺꦴꦤ꧀ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦥꦼꦔꦤ꧀ꦢꦼꦭ꧀ꦱꦼꦩꦺꦴꦤꦺꦴ​ꦒꦼꦢꦺꦤꦺꦤꦁꦠꦼꦔꦃꦲꦺ​ꦮꦺꦴꦁ​ꦆꦱꦿꦌꦭ꧀꧈​ 11ꦠꦶꦠꦺꦤ꧀ꦤꦤ꧀ꦤ​ꦠ​꧈​ꦮꦺꦴꦁ​ꦥꦶꦫꦁꦥꦶꦫꦁ​ꦧꦏꦭ꧀ꦠꦼꦏ​ꦱꦁꦏꦮꦺꦠꦤ꧀ꦭꦤ꧀ꦏꦸꦭꦺꦴꦤ꧀ꦭꦤ꧀ꦥꦢ​ꦥꦺꦱ꧀ꦠ​ꦧꦼꦧꦉꦁꦔꦤ꧀ꦏꦫꦺꦴ​ꦧꦥ​ꦄꦨꦿꦲꦩ꧀ ꦆꦱꦏ꧀ꦭꦤ꧀ꦪꦏꦸꦧ꧀ꦲꦶꦁ​ꦏꦿꦠꦺꦴꦤꦺ​ꦱ꧀ꦮꦂꦒ​꧉​ 12ꦤꦁꦔꦶꦁ​ꦮꦺꦴꦁꦮꦺꦴꦁ​ꦱꦶꦁ​ꦱꦏ꧀ꦩꦼꦱ꧀ꦠꦶꦤꦺꦏꦸꦢꦸ​ꦩꦁꦒꦺꦴꦤ꧀ꦲꦶꦁ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦭꦃ​ꦧꦏꦭ꧀ꦢꦶꦲꦸꦱꦶꦂ​ꦩꦼꦠꦸ​꧈​ꦢꦶꦊꦧꦺꦴꦏ꧀ꦏꦏꦺꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦥꦼꦠꦼꦁꦤ꧀ꦢꦼꦢꦼꦠ꧀꧈​ꦤꦁꦏꦺꦴꦤꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦤꦔꦶꦱ꧀ꦭꦤ꧀ꦏꦼꦫꦺꦴꦠ꧀ꦲꦸꦤ꧀ꦠꦸ​꧉​” 13ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦲꦺꦴꦥ꦳ꦶꦱꦶꦫꦺ:“ꦏꦤ​ꦩꦸꦭꦶꦃ​꧈​ꦧꦏꦭ꧀​ꦏ꧀ꦭꦏꦺꦴꦤ꧀ꦩꦤꦸꦠ꧀ꦥꦼꦔꦤ꧀ꦢꦼꦭ꧀ꦩꦸ​꧉​”

꧋ꦭꦤ꧀ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦲꦸꦒ​ꦥꦼꦭꦢꦺꦤ꧀ꦤꦺ​ꦩꦫꦶ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁ​ꦭꦶꦪꦭꦶꦪꦤꦺ​꧉​

14꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦏ​ꦤꦁꦲꦺꦴꦩꦃꦲꦺ​ꦦꦺꦠꦿꦸꦱ꧀ ꦢꦺꦏ꧀ꦤꦺꦮꦼꦫꦸꦃ​ꦤꦺꦏ꧀ꦲꦶꦧꦸꦩꦫꦠꦸꦮꦤꦺꦦꦺꦠꦿꦸꦱ꧀ꦭꦫ​ꦥꦤꦱ꧀ꦤꦁꦲꦩ꧀ꦧꦺꦤ꧀꧈​ 15ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦤ꧀ꦢꦼꦩꦺꦏ꧀ꦠꦔꦤ꧀ꦤꦺ​ꦮꦺꦴꦁꦔꦺ​꧈​ꦮꦺꦴꦁꦔꦺ​ꦠꦼꦫꦸꦱ꧀ꦩꦫꦶ​꧉​ꦮꦺꦴꦁꦔꦺ​ꦠꦼꦫꦸꦱ꧀ꦠꦔꦶ​ꦭꦤ꧀​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​꧉​

16꧋ꦏꦢꦸꦁ​ꦮꦶꦱ꧀ꦱꦸꦫꦸꦥ꧀ꦮꦺꦴꦁꦮꦺꦴꦁ​ꦱꦶꦁ​ꦏꦼꦱꦸꦫꦸꦥ꧀ꦥꦤ꧀ꦢꦼꦩꦶꦠ꧀ꦠꦼꦫꦸꦱ꧀ꦥꦢ​ꦢꦶꦒꦮ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦢꦼꦩꦶꦠ꧀​ꦢꦼꦩꦶꦠ꧀ꦠꦺ​ꦥꦢ​ꦢꦶꦠꦸꦤ꧀ꦢꦸꦁꦔꦶꦏꦫꦺꦴ​ꦠꦼꦩ꧀ꦧꦸꦁ​ꦱꦏ꧀ꦏꦼꦕꦥ꧀​ꦭꦤ꧀ꦱꦶꦁ​ꦭꦫ​ꦥꦢ​ꦢꦶꦮꦫꦱ꧀ꦱꦏꦺꦏꦧꦺꦃ​꧉​ 17ꦒꦸꦱ꧀ꦠꦶ​ꦪꦺꦯꦸꦱ꧀ꦤꦶꦤ꧀ꦢꦏ꧀ꦏꦏꦺꦏꦸꦮꦶ​ꦩꦲꦸ​ꦏꦧꦺꦃ​꧈​ꦱꦸꦥꦪ​ꦏ꧀ꦭꦏꦺꦴꦤ꧀ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦤꦧꦶ​ꦪꦺꦱꦪ​ꦢꦺꦏ꧀​ꦩ꧀ꦧꦶꦪꦺꦤ꧀ ꦱꦶꦁ​ꦲꦸꦤꦶꦤꦺ​ꦔꦺꦤꦺ​:“ꦢꦺꦏ꧀ꦤꦺꦮꦶꦱ꧀ꦚꦁꦒ​ꦏꦱꦁꦱꦫꦤꦺ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦊꦭꦫꦤꦺ​ꦲꦮꦏ꧀ꦏꦺ​ꦢꦺꦮꦺꦢꦺꦏ꧀ꦤꦺꦮꦶꦱ꧀ꦤꦩ꧀ꦧꦤꦶ​꧉​”

꧋ꦲꦥ​ꦠꦼꦒꦼꦱ꧀ꦱꦺ​ꦩꦺꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

18꧋ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​ꦤꦺꦏ꧀ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦔꦿꦸꦧꦸꦁ​ꦢꦺꦏ꧀ꦤꦺ꧈​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦔꦧꦿꦃꦩꦺꦂ꧉​ 19ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦲꦺꦤꦺꦁꦱꦏ꧀ꦮꦶꦗꦶꦤꦺꦒꦸꦫꦸ​ꦏꦶꦠꦧ꧀​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦒꦸꦫꦸ​꧈​ꦲꦏꦸ​ꦲꦉꦥ꧀ꦩꦺꦭꦸ​ꦏꦺꦴꦮꦺ​꧈​ꦤꦁꦲꦼꦤ꧀ꦢꦶ​ꦮꦲꦺ​ꦲꦏꦸ​ꦲꦉꦥ꧀ꦩꦺꦭꦸ​꧉​”

20꧋ꦒꦸꦱ꧀ꦠꦶ​ꦪꦺꦯꦸꦱ꧀ꦚꦲꦸꦂꦫꦶ​ꦮꦺꦴꦁꦔꦺ​ꦔꦺꦤꦺ​:“ꦲꦱꦸ​ꦲꦭꦱ꧀ꦱꦤ꧀​ꦤ꧀ꦢꦸꦮꦺꦫꦺꦴꦁ​ꦭꦤ꧀ꦩꦤꦸꦏ꧀​ꦤ꧀ꦢꦸꦮꦺꦱꦸꦱꦸꦏ꧀ ꦤꦁꦔꦶꦁ​ꦲꦤꦏ꧀ꦏꦺ​ꦩꦤꦸꦁꦱ​ꦲꦺꦴꦫ​ꦤ꧀ꦢꦸꦮꦺꦥꦁꦒꦺꦴꦤ꧀ꦤꦤ꧀ꦏꦁꦒꦺꦴ​ꦔ꧀ꦒꦺꦠꦏ꧀ꦭꦤ꧀ꦭꦺꦫꦺꦤ꧀꧈​”

21꧋ꦠꦼꦫꦸꦱ꧀ꦲꦺꦤꦺꦁꦩꦸꦫꦶꦢ꧀ꦭꦶꦪꦤꦺ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦒꦸꦱ꧀ꦠꦶ​꧈​ꦲꦏꦸ​ꦢꦶꦭꦶꦭꦤꦶ​ꦔꦸꦧꦸꦂ​ꦧꦥꦏ꧀ꦏꦸ​ꦤ꧀ꦢꦶꦱꦶꦏ꧀꧈​”

22꧋ꦒꦸꦱ꧀ꦠꦶ​ꦪꦺꦯꦸꦱ꧀ꦚꦲꦸꦂꦫꦶ​ꦔꦺꦤꦺ​:“ꦏꦺꦴꦮꦺ​ꦩꦺꦭꦸꦮ​ꦲꦏꦸ​꧈​ꦱꦶꦁ​ꦩꦠꦶ​ꦧꦺꦤ꧀ꦔꦸꦧꦸꦂ​ꦠꦸꦁꦒꦭ꧀ꦭꦺ​ꦱꦶꦁ​ꦥꦢ​ꦩꦠꦶ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦤ꧀ꦢꦼꦏ꧀ꦲꦺꦴꦩ꧀ꦧꦏ꧀ꦒꦼꦢꦺ​꧉​

23꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦩ꧀ꦊꦧꦸ​ꦤꦁꦥꦿꦲꦸ​ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦩꦺꦭꦸ​꧉​ 24ꦲꦺꦴꦫ​ꦊꦠ꧀ꦱꦸꦮꦶꦠꦼꦫꦸꦱ꧀ꦲꦺꦤꦺꦁꦲꦺꦴꦩ꧀ꦧꦏ꧀ꦒꦼꦢꦺ​ꦤꦁꦩꦺꦂꦏꦺꦴꦤꦺꦴ​ꦭꦤ꧀ꦲꦺꦴꦩ꧀ꦧꦏ꧀ꦏꦺ​ꦔꦺꦴꦤ꧀ꦠꦁꦔꦤ꧀ꦠꦶꦁꦔꦏꦺꦥꦿꦲꦸꦤꦺ​꧉​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦗꦶꦏ꧀ꦠꦸꦫꦸ​꧉​ 25ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦠꦼꦫꦸꦱ꧀ꦩꦫꦤꦶ​ꦭꦤ꧀​ꦔ꧀ꦒꦸꦒꦃ​ꦢꦺꦏ꧀ꦤꦺ​:“ꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦢꦶꦠꦸꦭꦸꦁꦔꦶ​꧉​ꦥꦿꦲꦸꦤꦺ​ꦏꦼꦊꦥ꧀꧈​”

26꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦥꦢ​ꦮꦼꦢꦶ​?ꦏꦺꦴꦏ꧀ꦕꦶꦭꦶꦏ꧀ꦥꦼꦔꦤ꧀ꦢꦼꦭ꧀ꦭꦺ​!”ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦔꦶ​ꦭꦤ꧀ꦩꦿꦺꦤ꧀ꦠꦃ​ꦲꦔꦶꦤ꧀ꦭꦤ꧀ꦲꦺꦴꦩ꧀ꦧꦏ꧀ꦏꦺꦴꦁꦏꦺꦴꦤ꧀ꦩꦤ꧀ꦢꦼꦏ꧀꧈​ꦲꦔꦶꦤ꧀ꦤꦺ​ꦭꦤ꧀ꦧꦚꦸꦤꦺ​ꦠꦼꦫꦸꦱ꧀ꦲꦤ꧀ꦠꦼꦁ​꧉​ 27ꦮꦺꦴꦁꦮꦺꦴꦁ​ꦱꦶꦁ​ꦤꦁꦏꦺꦴꦤꦺꦴ​ꦥꦢ​ꦔ꧀ꦒꦸꦩꦸꦤ꧀ꦭꦤ꧀ꦔꦺꦴꦩꦺꦴꦁ:“ꦮꦺꦴꦁ​ꦲꦶꦏꦶ​ꦱꦥ​ꦠ​?ꦲꦔꦶꦤ꧀ꦭꦤ꧀ꦲꦺꦴꦩ꧀ꦧꦏ꧀ꦏꦺꦴꦏ꧀ꦥꦢ​ꦩꦤꦸꦠ꧀ꦩꦫꦁ​ꦠꦼꦩ꧀ꦧꦸꦁꦔꦺ​?”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁ​ꦱꦶꦁ​ꦏꦼꦱꦸꦫꦸꦥ꧀ꦥꦤ꧀ꦢꦼꦩꦶꦠ꧀꧈​

28꧋ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦠꦼꦏꦤ꧀ꦲꦧꦿꦃꦲꦤ꧀ ꦤꦁꦧꦮꦃꦓꦢꦫꦃ꧈​ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦭꦺꦴꦫꦺꦴ​ꦩꦼꦠꦸꦮꦢꦺꦏ꧀ꦤꦺ꧉​ꦮꦺꦴꦁ​ꦭꦺꦴꦫꦺꦴ​ꦲꦶꦏꦶ​ꦏꦼꦱꦸꦫꦸꦥ꧀ꦥꦤ꧀ꦢꦼꦩꦶꦠ꧀ꦭꦤ꧀ꦠꦼꦏꦤꦺ​ꦱꦁꦏꦒꦸꦮꦒꦸꦮ​ꦏꦸꦧꦸꦂꦫꦤ꧀꧈​ꦮꦺꦴꦁꦮꦺꦴꦁ​ꦲꦶꦏꦶ​ꦩꦼꦢꦺꦤ꧀ꦤꦶ​ꦠꦼꦤꦤ꧀ ꦩꦸꦭꦤꦺ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦮꦤꦶ​ꦭꦶꦮꦠ꧀ꦢꦭꦤ꧀ꦏꦺꦴꦤꦺꦴ​꧉​ 29ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦫꦸꦱ꧀ꦥꦢ​ꦧꦼꦔꦺꦴꦏ꧀ꦧꦼꦔꦺꦴꦏ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦔꦺꦴꦩꦺꦴꦁ:“ꦢꦸꦃ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦲꦩ꧀ꦧꦺꦴꦏ꧀ꦏꦥꦏ꧀ꦏꦏꦺ?ꦲꦥ​ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦲꦩ꧀ꦧꦺꦴꦏ꧀ꦱꦼꦠꦿꦥ꧀?ꦱꦲꦶꦏꦶ​ꦭꦲꦸꦠ꧀ꦢꦸꦫꦸꦁ​ꦮꦏ꧀ꦠꦸꦩꦸꦠ​?”

30꧋ꦲꦺꦴꦫ​ꦲꦢꦺꦴꦃ​ꦱꦁꦏꦏꦺꦴꦤꦺꦴ​ꦲꦺꦤꦺꦁꦧꦧꦶ​ꦥꦶꦫꦁꦥꦶꦫꦁ​ꦲꦶꦗꦶꦏ꧀ꦥꦢ​ꦔ꧀ꦒꦺꦴꦭꦺꦏ꧀ꦥꦔꦤ꧀꧈​ꦢꦼꦩꦶꦠ꧀​ꦢꦼꦩꦶꦠ꧀ꦠꦺ​ꦩꦲꦸ​ꦠꦼꦫꦸꦱ꧀ꦥꦢ​ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦔꦺꦴꦩꦺꦴꦁ: 31“ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦤꦶꦪꦠ꧀ꦲꦉꦥ꧀ꦲꦩ꧀ꦧꦺꦴꦏ꧀ꦏꦺꦴꦁꦏꦺꦴꦤ꧀ꦩꦼꦠꦸ​꧈​ꦲꦮꦏ꧀ꦏꦺ​ꦢꦺꦮꦺꦢꦶꦭꦶꦭꦤꦶ​ꦩ꧀ꦊꦧꦸ​ꦤꦁꦧꦧꦶꦧꦧꦶ​ꦏꦲꦺ​!”

32꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦏꦤ​ꦥꦢ​ꦩꦼꦠꦸꦮ​!”ꦢꦼꦩꦶꦠ꧀ꦢꦼꦩꦶꦠ꧀ꦩꦲꦸ​ꦠꦼꦫꦸꦱ꧀ꦥꦢ​ꦩꦼꦠꦸ​ꦱꦁꦏꦮꦺꦴꦁ​ꦭꦺꦴꦫꦺꦴ​ꦏꦸꦮꦶ​꧈​ꦠꦼꦫꦸꦱ꧀ꦥꦢ​ꦩ꧀ꦊꦧꦸ​ꦤꦁꦧꦧꦶꦧꦧꦶꦤꦺ꧉​ꦧꦧꦶꦧꦧꦶ​ꦩꦲꦸ​ꦠꦼꦫꦸꦱ꧀ꦥꦢ​ꦩ꧀​ꦧ꧀ꦭꦪꦸꦱꦁꦏꦥꦶꦁꦒꦶꦂ​ꦒꦸꦤꦸꦁ​ꦏꦺꦴꦤꦺꦴ​꧈​ꦚ꧀ꦗꦼꦒꦸꦂ​ꦤꦁꦩꦺꦂꦠꦼꦫꦸꦱ꧀ꦥꦢ​ꦩꦠꦶ​ꦏꦼꦊꦥ꧀ꦏꦧꦺꦃ​꧉​

33꧋ꦮꦺꦴꦁꦮꦺꦴꦁ​ꦱꦶꦁ​ꦲꦔꦺꦴꦤ꧀ꦧꦧꦶꦧꦧꦶ​ꦩꦲꦸ​ꦠꦼꦫꦸꦱ꧀ꦥꦢ​ꦩ꧀​ꦧ꧀ꦭꦪꦸꦤꦁꦏꦸꦠ꧈​ꦔꦺꦴꦩꦺꦴꦁꦔꦏꦺꦧꦧ꧀ꦊꦭꦏꦺꦴꦤ꧀ꦏꦸꦮꦶ​ꦭꦤ꧀ꦲꦸꦒ​ꦧꦧ꧀ꦮꦺꦴꦁ​ꦭꦺꦴꦫꦺꦴ​ꦱꦶꦁ​ꦩꦲꦸꦤꦺ​ꦏꦼꦱꦸꦫꦸꦥ꧀ꦥꦤ꧀ꦢꦼꦩꦶꦠ꧀꧈​ 34ꦮꦺꦴꦁ​ꦱꦏ꧀ꦏꦸꦠꦏꦧꦺꦃ​ꦠꦼꦫꦸꦱ꧀ꦥꦢ​ꦠꦼꦏ​ꦩꦫꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦏꦢꦸꦁ​ꦏꦼꦠꦼꦩꦸ​ꦠꦼꦫꦸꦱ꧀ꦥꦢ​ꦚꦸꦮꦸꦤ꧀ꦠꦼꦤꦤ꧀ꦤꦤ꧀ꦩꦫꦁ​ꦢꦺꦏ꧀ꦤꦺ꧈​ꦱꦸꦥꦪ​ꦭꦸꦔ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​꧉​

↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁ​ꦭꦸꦩ꧀ꦥꦸꦃ​꧉​

꧇​꧙꧇​ 1꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦸꦁꦒꦃ​ꦤꦁꦥꦿꦲꦸ​ꦭꦤ꧀ꦔꦧꦿꦃꦧꦭꦶꦏ꧀ꦩꦼꦤꦺꦃ​ꦤꦁꦏꦸꦠꦥꦁꦒꦺꦴꦤ꧀ꦤꦤ꧀ꦤꦺ​꧈​ꦪꦏꦸꦮꦶ​ꦑꦥꦺꦂꦤꦏꦸꦩ꧀꧈​ 2ꦤꦁꦏꦺꦴꦤꦺꦴ​ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦥꦢ​ ꦠꦼꦏ​ꦔ꧀ꦒꦺꦴꦠꦺꦴꦁ​ꦮꦺꦴꦁ​ꦭꦸꦩ꧀ꦥꦸꦃ​ꦔꦁꦒꦺꦴ​ꦥꦼꦠꦸꦫꦺꦴꦤꦺ​꧉​ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​ꦒꦼꦢꦺꦤꦺꦥꦼꦔꦤ꧀ꦢꦼꦭ꧀ꦭꦺ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦔꦺ​ꦱꦶꦁ​ꦭꦸꦩ꧀ꦥꦸꦃ​:“ꦲꦗ​ꦮꦼꦢꦶ​꧈​ꦢꦺꦴꦱꦢꦺꦴꦱꦩꦸ​ꦮꦶꦱ꧀ꦢꦶꦔꦥꦸꦫ꧉​”

3꧋ꦤꦁꦏꦺꦴꦤꦺꦴ​ꦲꦺꦤꦺꦁꦒꦸꦫꦸꦒꦸꦫꦸ​ꦏꦶꦠꦧ꧀​ꦱꦶꦁ​ꦥꦢ​ꦲꦩ꧀ꦧꦠꦶꦤ꧀:“ꦮꦺꦴꦁ​ꦲꦶꦏꦶ​ꦚꦼꦥꦺꦭꦺꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​”

4꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦂꦠꦶ​ꦧꦠꦶꦤꦤ꧀ꦤꦺꦥꦫ​ꦒꦸꦫꦸ​ꦏꦶꦠꦧ꧀​ꦏꦸꦮꦶ​꧈​ꦩꦸꦭꦤꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦥꦢ​ꦤ꧀ꦢꦸꦮꦺꦤ꧀ꦤꦶ​ꦒꦒꦱ꧀ꦱꦤ꧀ꦱꦶꦁ​ꦲꦭ​? 5ꦒꦩ꧀ꦥꦁ​ꦱꦶꦁ​ꦲꦼꦤ꧀ꦢꦶ​꧈​ꦔꦺꦴꦩꦺꦴꦁ:'ꦢꦺꦴꦱꦩꦸ​ꦮꦶꦱ꧀ꦢꦶꦔꦥꦸꦫ꧈'​ꦲꦥ​:'ꦔꦢꦼꦏ꧀ꦭꦤ꧀​ꦩ꧀ꦭꦏꦸꦮ​?’ 6-7ꦤꦁꦔꦶꦁ​ꦲꦏꦸ​ꦲꦉꦥ꧀​ꦤ꧀ꦢꦸꦢꦸꦃꦲꦏꦺꦩꦫꦁ​ꦏꦺꦴꦮꦺ​꧈​ꦤꦺꦏ꧀ꦲꦤꦏ꧀ꦏꦺ​ꦩꦤꦸꦁꦱ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦔꦥꦸꦫ​ꦢꦺꦴꦱ​ꦤꦁꦗꦒꦠ꧀ꦏꦺꦤꦺ​꧉”ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁ​ꦱꦶꦁ​ꦭꦸꦩ꧀ꦥꦸꦃ​:“ꦔꦢꦼꦏ꧀ꦏ!ꦥꦼꦠꦸꦫꦺꦴꦤ꧀ꦩꦸ​ꦢꦶꦲꦁꦏꦠ꧀ꦭꦤ꧀ꦏꦤ​ꦩꦸꦭꦶꦃ​꧉”ꦮꦺꦴꦁꦔꦺ​ꦠꦼꦫꦸꦱ꧀ꦔꦢꦼꦏ꧀ꦭꦤ꧀​ꦩ꧀ꦭꦏꦸ​ꦩꦸꦭꦶꦃ​꧉​ 8ꦮꦺꦴꦁꦮꦺꦴꦁ​ꦱꦶꦁ​ꦮꦼꦫꦸꦃ​ꦊꦭꦏꦺꦴꦤ꧀ꦏꦸꦮꦶ​ꦩꦲꦸ​ꦥꦢ​ꦔ꧀ꦒꦸꦩꦸꦤ꧀ꦏꦧꦺꦃ​ꦭꦤ꧀ꦥꦢ​ꦩꦼꦩꦸꦗꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦒꦼꦊꦩ꧀ꦔꦼꦏꦺꦏ꧀ꦏꦶꦥꦔ꧀ꦮꦱ​ꦱꦼꦩꦺꦴꦤꦺꦴ​ꦒꦼꦢꦺꦤꦺꦩꦫꦁ​ꦩꦤꦸꦁꦱ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦁꦒꦶꦭ꧀ꦩꦠꦺꦪꦸꦱ꧀꧈​

9꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​꧉​ꦢꦺꦏ꧀ꦤꦺꦮꦼꦫꦸꦃ​ꦮꦺꦴꦁ​ꦧꦼꦭꦱ꧀ꦠꦶꦁꦲꦶꦗꦶꦏ꧀​ꦚ꧀ꦗꦒꦺꦴꦁꦤꦁꦏꦤ꧀ꦠꦺꦴꦂꦫꦺ​꧉​ꦮꦺꦴꦁ​ꦧꦼꦭꦱ꧀ꦠꦶꦁꦲꦶꦏꦶ​ꦗꦼꦤꦼꦁꦔꦺ​ꦩꦠꦺꦪꦸꦱ꧀꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁ​ꦩꦠꦺꦪꦸꦱ꧀:“ꦲ꦳ꦪꦸꦏ꧀ꦩꦺꦭꦸ​ꦲꦏꦸ​!”

꧋ꦩꦠꦺꦪꦸꦱ꧀ꦠꦼꦫꦸꦱ꧀ꦔꦢꦼꦏ꧀ ꦠꦼꦫꦸꦱ꧀ꦩꦺꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 10ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦗꦶꦏ꧀ꦩꦁꦔꦤ꧀ꦤꦁꦲꦺꦴꦩꦃꦲꦺ​ꦩꦠꦺꦪꦸꦱ꧀ ꦮꦺꦴꦁ​ꦧꦼꦭꦱ꧀ꦠꦶꦁꦥꦶꦫꦁꦥꦶꦫꦁ​ꦭꦤ꧀ꦮꦺꦴꦁꦮꦺꦴꦁ​ꦭꦶꦪꦤꦺ​ꦱꦶꦁ​ꦢꦶꦲꦁꦒꦼꦥ꧀ꦮꦺꦴꦁ​ꦲꦭ​꧈​ꦲꦸꦒ​ꦥꦢ​ꦠꦼꦏ​ꦭꦤ꧀ꦩꦁꦔꦤ꧀ꦧꦼꦧꦉꦁꦔꦤ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ 11ꦮꦺꦴꦁ​ꦥ꦳ꦫꦶꦱꦶ​ꦱꦶꦗꦶꦭꦺꦴꦫꦺꦴꦱꦶꦁ​ꦮꦼꦫꦸꦃ​ꦏꦸꦮꦶ​ꦠꦼꦫꦸꦱ꧀ꦥꦢ​ꦠꦏꦺꦴꦤ꧀ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦏꦼꦤꦺꦁꦲꦥ​ꦒꦸꦫꦸꦩꦸ​ꦏꦺꦴꦏ꧀ꦩꦁꦔꦤ꧀ꦧꦼꦧꦉꦁꦔꦤ꧀ꦏꦫꦺꦴ​ꦮꦺꦴꦁ​ꦧꦼꦭꦱ꧀ꦠꦶꦁꦭꦤ꧀ꦮꦺꦴꦁ​ꦲꦭ​?”

12꧋ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦸꦔꦸ​ꦏꦸꦮꦶ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦮꦺꦴꦁ​ꦱꦶꦁ​ꦮꦫꦱ꧀ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦢꦺꦴꦏ꧀ꦠꦼꦂ​꧈​ꦤꦁꦔꦶꦁ​ꦱꦶꦁ​ꦭꦫ​꧉​ 13ꦢꦶꦥꦶꦏꦶꦂ​ꦲꦥ​ꦠꦼꦒꦼꦱ꧀ꦱꦺ​ꦲꦪꦠ꧀ꦤꦁꦏꦶꦠꦧ꧀​ꦱꦶꦁ​ꦲꦸꦤꦶꦤꦺ​:'ꦱꦶꦁ​ꦠꦏ꧀ꦏꦉꦥ꧀ꦥꦏꦺꦲꦺꦴꦫ​ꦏꦸꦂꦧꦤ꧀ ꦤꦁꦔꦶꦁ​ꦠꦸꦩꦶꦤ꧀ꦢꦏ꧀ꦏꦠꦿꦺꦱ꧀ꦤꦤ꧀!’ꦲꦮꦶꦠ꧀ꦠꦼꦏꦏꦸ​ꦲꦶꦏꦶ​ꦲꦺꦴꦫ​ꦔ꧀ꦒꦺꦴꦭꦺꦏ꧀ꦏꦶ​ꦮꦺꦴꦁ​ꦱꦶꦁ​ꦔꦏꦸꦤꦺ​ꦮꦶꦱ꧀ꦲꦥꦶꦏ꧀ꦲꦸꦫꦶꦥ꧀ꦥꦺ꧈​ꦲꦺꦴꦫ​꧈​ꦤꦁꦔꦶꦁ​ꦲꦏꦸ​ꦔ꧀ꦒꦺꦴꦭꦺꦏ꧀ꦏꦶ​ꦮꦺꦴꦁ​ꦱꦶꦁ​ꦲꦭ​꧉​”

꧋ꦧꦧ꧀ꦥꦱ​꧉​

14꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦥꦢ​ꦠꦼꦏ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦫꦸꦱ꧀ꦠꦏꦺꦴꦤ꧀:“ꦲꦮꦏ꧀ꦏꦺ​ꦢꦺꦮꦺꦭꦤ꧀ꦥꦫ​ꦥ꦳ꦫꦶꦱꦶ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦥꦱ​꧈​ꦤꦁꦔꦶꦁ​ꦩꦸꦫꦶꦢ꧀ꦩꦸꦫꦶꦢ꧀ꦩꦸꦏꦺꦴꦏ꧀ꦲꦺꦴꦫ​?”

15꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​ꦔꦺꦤꦺ​:“ꦢꦶꦥꦶꦏꦶꦂ​!ꦩꦺꦴꦱꦺꦴꦏ꧀ꦢꦪꦺꦴꦃꦤꦁꦏꦮꦶꦤ꧀ꦤꦤ꧀ꦏꦲꦺ​ꦥꦢ​ꦱꦼꦢꦶꦤꦺꦏ꧀ꦩꦤ꧀ꦠꦺꦤ꧀ꦤꦺ​ꦭꦤꦁ​ꦲꦶꦗꦶꦏ꧀ꦤꦁꦏꦺꦴꦤꦺꦴ​?ꦩꦼꦱ꧀ꦠꦶꦲꦺꦴꦫ​ꦠ​?ꦤꦁꦔꦶꦁ​ꦲꦺꦤꦺꦁꦮꦏ꧀ꦠꦸꦩꦸꦩꦤ꧀ꦠꦺꦤ꧀ꦤꦺ​ꦭꦤꦁ​ꦢꦶꦒꦮ​ꦭꦸꦔ​ꦱꦁꦏꦏꦺꦴꦤꦺꦴ​꧉​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦢꦪꦺꦴꦃꦲꦺꦧꦏꦭ꧀ꦥꦢ​ꦥꦱ​꧉​

16꧋“ꦲꦺꦴꦫ​ꦲꦺꦤꦺꦁꦮꦺꦴꦁ​ꦤꦩ꧀ꦧꦭ꧀ꦱꦭꦶꦤ꧀ꦭꦮꦱ꧀ꦔꦁꦒꦺꦴ​ꦧꦏꦭ꧀ꦱꦶꦁ​ꦲꦚꦂ​꧉​ꦲꦮꦶꦠ꧀ꦠꦩ꧀ꦧꦭꦤ꧀ꦤꦺꦏꦸꦮꦶ​ꦧꦏꦭ꧀ꦩꦼꦁꦏꦼꦉꦠ꧀ꦭꦤ꧀ꦚꦸꦮꦺꦏ꧀ꦏꦏꦺꦱꦭꦶꦤ꧀ꦤꦺꦭꦸꦮꦶꦃ​ꦲꦩ꧀ꦧ​꧉​ 17ꦱꦼꦩꦺꦴꦤꦺꦴ​ꦲꦸꦒ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦚꦶꦩ꧀ꦥꦼꦤ꧀ꦲꦁꦒꦸꦂ​ꦱꦶꦁ​ꦲꦚꦂ​ꦤꦁꦏꦤ꧀ꦠꦺꦴꦁꦔꦤ꧀ꦭꦸꦭꦁ​ꦱꦶꦁ​ꦭꦮꦱ꧀ ꦲꦮꦶꦠ꧀ꦩꦼꦁꦏꦺꦴ​ꦏꦤ꧀ꦠꦺꦴꦔꦤ꧀ꦤꦺꦩꦼꦱ꧀ꦠꦶꦧꦏꦭ꧀ꦧꦼꦢꦃ꧉​ꦲꦁꦒꦸꦂꦫꦺ​ꦧꦏꦭ꧀ꦮꦸꦠꦃ​ꦭꦤ꧀ꦏꦤ꧀ꦠꦺꦴꦔꦤ꧀ꦤꦺꦧꦏꦭ꧀ꦲꦺꦴꦫ​ꦏꦁꦒꦺꦴ​ꦒꦮꦺ​ꦩꦼꦤꦺꦃ​꧉​ꦲꦥꦶꦏ꧀ꦏꦺ​꧈​ꦲꦁꦒꦸꦂ​ꦱꦶꦁ​ꦲꦚꦂ​ꦪ​ꦏꦸꦢꦸ​ꦢꦶꦱꦶꦩ꧀ꦥꦼꦤ꧀ꦤꦁꦏꦤ꧀ꦠꦺꦴꦁꦔꦤ꧀ꦱꦶꦁ​ꦲꦚꦂ​꧈​ꦱꦸꦥꦪ​ꦲꦁꦒꦸꦂꦫꦺ​ꦭꦤ꧀ꦏꦤ꧀ꦠꦺꦴꦔꦤ꧀ꦤꦺꦧꦶꦱ​ꦠꦼꦠꦼꦥ꧀ꦲꦥꦶꦏ꧀꧈​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦤꦁꦔꦏꦺꦭꦫ​ꦭꦤ꧀ꦥꦠꦶ​꧉​

18꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦗꦶꦏ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦩꦲꦸ​꧈​ꦠꦼꦫꦸꦱ꧀ꦲꦺꦤꦺꦁꦥꦼꦁꦒꦼꦢꦺꦤꦺꦱꦶꦤꦒꦸꦏ꧀ꦠꦼꦏ​ꦭꦤ꧀ꦤꦶꦧ​ꦤꦁꦔꦉꦥ꧀ꦥꦺ​꧈​ꦚꦸꦮꦸꦤ꧀:“ꦢꦸꦃ​ꦒꦸꦱ꧀ꦠꦶ​꧈​ꦲꦤꦏ꧀ꦏꦸ​ꦮꦺꦢꦺꦴꦏ꧀ꦲꦼꦤ꧀ꦠꦱ꧀ꦮꦲꦺ​ꦤꦶꦁꦒꦭ꧀ ꦤꦁꦔꦶꦁ​ꦤꦺꦏ꧀ꦒꦸꦱ꧀ꦠꦶ​ꦒꦼꦊꦩ꧀ꦠꦼꦏ​ꦭꦤ꧀​ꦤ꧀ꦢꦼꦩꦺꦏ꧀ꦢꦺꦏ꧀ꦤꦺ꧈​ꦩꦼꦱ꧀ꦠꦶꦢꦺꦏ꧀ꦤꦺꦧꦶꦱ​ꦲꦸꦫꦶꦥ꧀ꦩꦼꦤꦺꦃ​꧉​”

19꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦢꦼꦏ꧀ꦭꦤ꧀ꦩꦺꦭꦸ​ꦮꦺꦴꦁꦔꦺ​꧈​ꦧꦉꦁ​ꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦲꦸꦒ​꧉​

20꧋ꦤꦁꦔꦶꦁ​ꦤꦁꦏꦺꦴꦤꦺꦴ​ꦲꦸꦒ​ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦭꦫ​ꦔꦼꦠꦺꦴꦏ꧀ꦏꦏꦺꦒꦼꦠꦶꦃ​꧈​ꦮꦶꦱ꧀ꦫꦺꦴꦭꦱ꧀ꦠꦲꦸꦤ꧀ꦱꦸꦮꦺꦤꦺ​꧉​ꦮꦺꦴꦁꦔꦺ​ꦚꦼꦢꦼꦏ꧀ꦏꦶꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦲꦩ꧀ꦧꦸꦫꦶ​ꦠꦼꦫꦸꦱ꧀​ꦤ꧀ꦢꦼꦩꦺꦏ꧀ꦒꦺꦴꦩ꧀ꦧꦾꦺꦴꦏ꧀ꦏꦺꦱꦭꦶꦤ꧀ꦤꦺ꧉​ 21ꦲꦮꦶꦠ꧀ꦮꦺꦴꦁꦔꦺ​ꦩꦶꦏꦶꦂ​: “ꦤꦺꦏ꧀ꦲꦏꦸ​ꦧꦶꦱ​ꦤ꧀ꦢꦼꦩꦺꦏ꧀ꦱꦭꦶꦤ꧀ꦤꦺꦮꦲꦺ​꧈​ꦩꦼꦱ꧀ꦠꦶꦲꦏꦸ​ꦧꦶꦱ​ꦩꦫꦶ​꧉”ꦩꦸꦭꦤꦺ​ꦮꦺꦴꦁꦔꦺ​ꦠꦼꦫꦸꦱ꧀​ꦤ꧀ꦢꦼꦩꦺꦏ꧀ꦱꦭꦶꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​

22꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦶꦔꦼꦂ​꧉​ꦏꦢꦸꦁ​ꦮꦼꦫꦸꦃ​ꦮꦺꦴꦁ​ꦮꦺꦢꦺꦴꦏ꧀ꦏꦺ꧈​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦗ​ꦮꦼꦢꦶ​꧈​ꦥꦼꦔꦤ꧀ꦢꦼꦭ꧀ꦩꦸ​ꦱꦶꦁ​ꦤꦩ꧀ꦧꦤꦶ​ꦏꦺꦴꦮꦺ​꧉”ꦱꦏ꧀ꦮꦠ꧀ꦮꦺꦴꦁꦔꦺ​ꦠꦼꦫꦸꦱ꧀ꦩꦫꦶ​꧉​

23꧋ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦠꦼꦏꦤ꧀ꦲꦺꦴꦩꦃꦲꦺ​ꦥꦼꦁꦒꦼꦢꦺꦤꦺꦱꦶꦤꦒꦸꦏ꧀ ꦢꦺꦏ꧀ꦤꦺꦮꦼꦫꦸꦃ​ꦮꦺꦴꦁꦮꦺꦴꦁ​ꦱꦶꦁ​ꦔꦸꦤꦺꦏ꧀ꦏꦏꦺꦱꦸꦭꦶꦁ​ꦭꦤ꧀ꦮꦺꦴꦁ​ꦲꦺꦴꦏꦺꦃꦭꦶꦪꦤꦺ​ꦱꦶꦁ​ꦥꦢ​ꦠꦔꦶꦱ꧀ꦱꦤ꧀꧈​ 24ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦤ​ꦥꦢ​ꦩꦼꦠꦸ​!ꦧꦺꦴꦕꦃꦲꦺ​ꦲꦺꦴꦫ​ꦩꦠꦶ​꧈​ꦤꦩꦸꦁ​ꦠꦸꦫꦸ​꧉”ꦮꦺꦴꦁꦮꦺꦴꦁ​ꦥꦢ​ꦔ꧀ꦒꦸꦪꦸ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 25ꦏꦢꦸꦁ​ꦮꦺꦴꦁꦮꦺꦴꦁ​ꦮꦶꦱ꧀ꦥꦢ​ꦩꦼꦠꦸ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦩ꧀ꦊꦧꦸ​ꦤꦁꦏꦩꦂꦫꦺ​ꦧꦺꦴꦕꦃꦲꦺ​꧉​ꦠꦔꦤ꧀ꦤꦺ​ꦧꦺꦴꦕꦃꦲꦺ​ꦠꦼꦫꦸꦱ꧀ꦢꦶꦕꦼꦏꦼꦭ꧀ ꦧꦺꦴꦕꦃꦲꦺ​ꦠꦼꦫꦸꦱ꧀ꦱꦏ꧀ꦮꦠ꧀ꦠꦔꦶ​꧉​ 26ꦏꦧꦂ​ꦧꦧ꧀ꦊꦭꦏꦺꦴꦤ꧀ꦏꦸꦮꦶ​ꦠꦼꦫꦸꦱ꧀ꦱꦸꦩꦼꦧꦂ​ꦤꦁꦱꦏ꧀ꦧꦮꦃꦏꦺꦴꦤꦺꦴ​ꦏꦧꦺꦃ​꧉​

꧋ꦮꦺꦴꦁ​ꦭꦺꦴꦫꦺꦴ​ꦱꦶꦁ​ꦭꦩꦸꦂ​ꦧꦶꦱ​ꦮꦼꦫꦸꦃ​ꦩꦼꦤꦺꦃ​꧉​

27꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦭꦸꦔ​ꦱꦁꦏꦏꦺꦴꦤꦺꦴ​꧈​ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦭꦩꦸꦂ​ꦭꦺꦴꦫꦺꦴ​ꦤꦸꦠꦸꦠ꧀ꦠꦶ​ꦢꦺꦏ꧀ꦤꦺ꧉​ꦮꦺꦴꦁꦮꦺꦴꦁ​ꦏꦸꦮꦶ​ꦧꦼꦔꦺꦴꦏ꧀ꦧꦼꦔꦺꦴꦏ꧀:“ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ ꦲꦩ꧀ꦧꦺꦴꦏ꧀ꦩꦼꦭꦱ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ!” 28ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦠꦼꦏꦤ꧀ꦲꦺꦴꦩꦃꦲꦺ​ꦢꦺꦮꦺ꧈​ꦮꦺꦴꦁ​ꦭꦩꦸꦂ​ꦭꦺꦴꦫꦺꦴ​ꦩꦲꦸ​ꦠꦼꦫꦸꦱ꧀ꦩꦫ​ꦤꦁꦔ꧀ꦒꦺꦴꦤ꧀ꦤꦺꦢꦺꦏ꧀ꦤꦺ꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦮꦺꦴꦁ​ꦭꦺꦴꦫꦺꦴ​ꦩꦲꦸ​:“ꦲꦥ​ꦏꦺꦴꦮꦺ​ꦥꦽꦕꦪ​ꦤꦺꦏ꧀ꦲꦏꦸ​ꦧꦶꦱ​ꦤꦩ꧀ꦧꦤꦶ​ꦩꦿꦶꦥꦠ꧀ꦩꦸ​?”

꧋ꦮꦺꦴꦁ​ꦭꦺꦴꦫꦺꦴ​ꦩꦲꦸ​ꦱꦼꦩꦲꦸꦂ​:“ꦪ​ꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​!”

29꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦤ꧀ꦢꦼꦩꦺꦏ꧀ꦩꦿꦶꦥꦠ꧀ꦠꦺ​ꦮꦺꦴꦁꦔꦺ​ꦏꦫꦺꦴ​ꦔꦺꦴꦩꦺꦴꦁ:“ꦲꦥ​ꦥꦼꦔꦤ꧀ꦢꦼꦭ꧀ꦩꦸ​ꦧꦏꦭ꧀​ꦏ꧀ꦭꦏꦺꦴꦤ꧀!” 30ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦫꦸꦱ꧀ꦧꦶꦱ​ꦮꦼꦫꦸꦃ​ꦩꦼꦤꦺꦃ​꧉​ꦥꦢ​ꦢꦶꦥꦼꦔꦶꦁ​ꦠꦼꦤꦤ꧀ꦤꦤ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦺꦴꦫ​ꦲꦺꦤ꧀ꦠꦸꦏ꧀ꦔꦺꦴꦩꦺꦴꦁꦔꦺꦴꦩꦺꦴꦁꦔꦏꦺꦧꦧ꧀ꦏꦸꦮꦶ​ꦩꦫꦁ​ꦱꦥꦱꦥ​꧉​

31꧋ꦤꦁꦔꦶꦁ​ꦏꦢꦸꦁ​ꦮꦶꦱ꧀ꦭꦸꦔ​ꦱꦁꦏꦏꦺꦴꦤꦺꦴ​꧈​ꦮꦺꦴꦁ​ꦭꦺꦴꦫꦺꦴ​ꦩꦲꦸ​ꦩꦼꦏ꧀ꦱ​ꦔꦺꦴꦩꦺꦴꦁꦔꦺꦴꦩꦺꦴꦁꦔꦏꦺꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦩꦫꦁ​ꦱꦧꦼꦤ꧀ꦮꦺꦴꦁ​ꦤꦁꦧꦮꦃꦏꦺꦴꦤꦺꦴ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁ​ꦧꦶꦱꦸ​꧉​

32꧋ꦏꦢꦸꦁ​ꦮꦺꦴꦁ​ꦭꦺꦴꦫꦺꦴ​ꦩꦲꦸ​ꦮꦶꦱ꧀ꦭꦸꦔ​꧈​ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦧꦶꦱꦸ​ꦢꦶꦒꦮ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁꦔꦺ​ꦢꦶꦏ꧀ꦮꦱꦤꦶ​ꦢꦼꦩꦶꦠ꧀꧈​ 33ꦏꦢꦸꦁ​ꦢꦼꦩꦶꦠ꧀ꦠꦺꦮꦶꦱ꧀ꦢꦶꦲꦼꦠꦺꦴꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦮꦺꦴꦁꦔꦺ​ꦠꦼꦫꦸꦱ꧀ꦧꦶꦱ​ꦔꦺꦴꦩꦺꦴꦁꦩꦼꦤꦺꦃ​꧉​ꦮꦺꦴꦁꦮꦺꦴꦁ​ꦱꦶꦁ​ꦮꦼꦫꦸꦃ​ꦥꦢ​ꦔ꧀ꦒꦸꦩꦸꦤ꧀ꦏꦧꦺꦃ​ꦭꦤ꧀ꦔꦺꦴꦩꦺꦴꦁ:“ꦲꦮꦏ꧀ꦏꦺ​ꦢꦺꦮꦺꦢꦸꦫꦸꦁ​ꦠꦲꦸ​ꦮꦼꦫꦸꦃ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦤꦁꦤꦼꦒꦫ​ꦆꦱꦿꦌꦭ꧀ꦏꦺꦤꦺ​꧉​”

34꧋ꦤꦁꦔꦶꦁ​ꦥꦫ​ꦥ꦳ꦫꦶꦱꦶ​ꦔꦺꦴꦩꦺꦴꦁ:“ꦮꦺꦴꦁꦔꦺ​ꦧꦶꦱ​ꦔꦼꦠꦺꦴꦏ꧀ꦏꦏꦺꦢꦼꦩꦶꦠ꧀ꦏꦸꦮꦶ​ꦗꦭꦂꦫꦤ꧀ꦲꦺꦤ꧀ꦠꦸꦏ꧀ꦥꦔ꧀ꦮꦱ​ꦱꦁꦏꦥꦼꦁꦒꦼꦢꦺꦤꦺꦢꦼꦩꦶꦠ꧀꧈​”

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦭꦱ꧀ꦱꦤ꧀ꦒꦼꦢꦺ​ꦩꦫꦁ​ꦩꦤꦸꦁꦱ​꧉​

35꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ꦤ꧀​ꦢ꧀ꦭꦗꦃꦲꦶ​ꦏꦸꦠꦏꦸꦠꦭꦤ꧀ꦢꦺꦱꦢꦺꦱ​꧉​ꦢꦺꦏ꧀ꦤꦺꦩꦼꦩꦸꦭꦁ​ꦤꦁꦱꦶꦤꦒꦸꦏ꧀ꦱꦶꦤꦒꦸꦏ꧀ꦭꦤ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦒ​ꦤꦩ꧀ꦧꦤꦶ​ꦮꦺꦴꦁꦮꦺꦴꦁ​ꦱꦶꦁ​ꦤ꧀ꦢꦸꦮꦺꦮꦼꦂꦤꦮꦼꦂꦤ​ꦭꦫ​ꦭꦤ꧀ꦩꦼꦩꦭ​꧉​ 36ꦱꦧꦼꦤ꧀ꦱꦧꦼꦤ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​ꦮꦺꦴꦁ​ꦥꦶꦫꦁꦥꦶꦫꦁ​ꦏꦸꦮꦶ​꧈​ꦢꦺꦏ꧀ꦤꦺꦱꦼꦢꦶꦲꦠꦶꦤꦺ​꧈​ꦗꦭꦂꦫꦤ꧀ꦩꦼꦭꦱ꧀ꦧꦔꦼꦠ꧀꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦏꦺꦠꦺꦴꦏ꧀ꦏꦺ​ꦏꦼꦱꦼꦭ꧀ꦭꦤ꧀ꦲꦺꦴꦫ​ꦏꦺꦴꦥꦺꦤ꧀ ꦏꦪ​ꦮꦼꦢꦸꦱ꧀ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦥꦔꦺꦴꦤ꧀꧈​ 37ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦱꦶꦁ​ꦏꦸꦢꦸ​ꦢꦶꦲꦼꦤꦺꦤ꧀ꦤꦶ​ꦲꦺꦴꦏꦺꦃ꧈​ꦤꦁꦔꦶꦁ​ꦧꦲꦸꦤꦺ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧉​ 38ꦩꦸꦭꦤꦺ​ꦥꦢ​ꦚꦸꦮꦸꦤ​ꦩꦫꦁ​ꦱꦶꦁ​ꦤ꧀ꦢꦸꦮꦺꦥꦤꦺꦤ꧀ꦤꦤ꧀ꦤꦺ​꧈​ꦱꦸꦥꦪ​ꦤꦩ꧀ꦧꦃꦲꦶ​ꦮꦺꦴꦁꦔꦺ​ꦱꦶꦁ​ꦥꦤꦺꦤ꧀꧈​”

↑ ↑ ↑


꧋ꦫꦱꦸꦭ꧀ꦫꦺꦴꦭꦱ꧀꧈​

꧇​꧑꧐꧇​ 1꧋ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦭꦸꦩ꧀ꦥꦸꦏ꧀ꦏꦏꦺꦩꦸꦫꦶꦢ꧀ꦢꦺ​ꦫꦺꦴꦭꦱ꧀꧈​ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦲꦶꦏꦶ​ꦥꦢ​ꦢꦶꦏꦺꦏ꧀ꦏꦶꦥꦔ꧀ꦮꦱ​ꦔꦼꦠꦺꦴꦏ꧀ꦏꦏꦺꦢꦼꦩꦶꦠ꧀ꦭꦤ꧀ꦤꦩ꧀ꦧꦤꦶ​ꦱꦏ꧀ꦮꦼꦂꦤꦤꦺ​ꦭꦫ​ꦭꦤ꧀ꦩꦼꦩꦭ​꧉​ 2ꦗꦼꦤꦼꦁꦔꦺ​ꦫꦱꦸꦭ꧀ꦫꦺꦴꦭꦱ꧀ꦲꦶꦏꦶ​:ꦱꦶꦩꦺꦴꦤ꧀ ꦱꦶꦁ​ꦲꦸꦒ​ꦢꦶꦕꦼꦭꦸꦏ꧀​ꦦꦺꦠꦿꦸꦱ꧀ ꦄꦤ꧀ꦢꦿꦺꦪꦱ꧀ ꦱꦼꦢꦸꦭꦸꦂꦫꦺ​;ꦪꦏꦺꦴꦧꦸꦱ꧀ꦭꦤ꧀ꦪꦺꦴꦲꦤꦼꦱ꧀ ꦏꦧꦺꦃ​ꦭꦺꦴꦫꦺꦴ​ꦲꦤꦏ꧀ꦏꦺ​ꦯꦺꦧꦺꦢꦺꦪꦸꦱ꧀꧈​ 3ꦲꦸꦒ​ꦥ꦳ꦶꦭꦶꦥꦸꦱ꧀ꦭꦤ꧀ꦧꦂꦠꦺꦴꦭꦺꦴꦩꦺꦪꦸꦱ꧀ ꦠꦺꦴꦩꦱ꧀ꦭꦤ꧀ꦩꦠꦺꦪꦸꦱ꧀ ꦮꦺꦴꦁ​ꦧꦼꦭꦱ꧀ꦠꦶꦁ;ꦪꦏꦺꦴꦧꦸꦱ꧀ꦲꦤꦏ꧀ꦏꦺ​ꦄꦭ꧀ꦥ꦳ꦺꦪꦸꦱ꧀ ꦲꦸꦒ​ꦠꦢꦺꦪꦸꦱ꧀꧈​ 4ꦲꦸꦒ​ꦱꦶꦩꦺꦴꦤ꧀ ꦱꦶꦁ​ꦢꦶꦥꦫꦥ꧀ꦥꦶꦥꦠꦿꦶꦪꦺꦴꦠ꧀ꦭꦤ꧀ꦪꦸꦢꦱ꧀ꦆꦱ꧀ꦏꦫꦶꦪꦺꦴꦠ꧀꧈​ꦪꦸꦢꦱ꧀ꦲꦶꦏꦶ​ꦱꦶꦁ​ꦔꦼꦭꦸꦁꦔꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦩꦫꦁ​ꦩꦸꦁꦱꦸꦃꦲꦺ​꧉​

꧋ꦫꦱꦸꦭ꧀ꦫꦺꦴꦭꦱ꧀ꦢꦶꦏꦺꦴꦁꦏꦺꦴꦤ꧀ꦧꦸꦢꦭ꧀꧈​

5꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦫꦱꦸꦭ꧀ꦫꦺꦴꦭꦱ꧀ꦧꦸꦢꦭ꧀ꦔꦁꦒꦺꦴ​ꦠꦼꦩ꧀ꦧꦸꦁ​ ꦔꦺꦤꦺ​:“ꦲꦗ​ꦥꦢ​ꦤꦼꦏꦤꦶ​ꦥꦁꦒꦺꦴꦤ꧀ꦤꦤ꧀ꦤꦺ​ꦧꦁꦱ​ꦱꦶꦁ​ꦢꦸꦢꦸ​ꦙꦸꦭꦤ꧀ꦲꦗ​ꦩ꧀ꦊꦧꦸ​ꦏꦸꦠꦤꦺꦧꦁꦱ​ꦱꦩꦫꦶꦪ​꧉​ 6ꦱꦶꦁ​ꦲꦩ꧀ꦧꦺꦴꦏ꧀ꦥꦫꦤ꧀ꦤꦶꦤ꧀ꦢꦶꦱꦶꦏ꧀ꦏꦸꦢꦸꦤꦺ​ꦮꦺꦴꦁ​ꦆꦱꦿꦌꦭ꧀ꦱꦶꦁ​ꦏꦼꦠꦿꦶꦮꦭ꧀꧈​ 7ꦥꦢ​ꦢꦶꦏꦧꦂꦫꦶ​ꦤꦺꦏ꧀ꦱꦲꦶꦏꦶ​ꦏꦿꦠꦺꦴꦤꦺ​ꦱ꧀ꦮꦂꦒ​ꦮꦶꦱ꧀ꦢꦶꦮꦶꦮꦶꦠ꧀ꦠꦶ​꧉​ 8ꦮꦺꦴꦁ​ꦭꦫ​ꦥꦢ​ꦢꦶꦮꦫꦱ꧀ꦤꦭꦤ꧀ꦮꦺꦴꦁ​ꦩꦠꦶ​ꦥꦢ​ꦢꦶꦠꦔꦺꦏ꧀ꦤ꧉​ꦮꦺꦴꦁ​ꦭꦫ​ꦭꦺꦥꦿ​ꦥꦢ​ꦢꦶꦩꦫꦺꦏ꧀ꦤꦭꦤ꧀ꦢꦼꦩꦶꦠ꧀ꦢꦼꦩꦶꦠ꧀ꦥꦢ​ꦠꦸꦤ꧀ꦢꦸꦁꦔꦤ꧉​ꦏꦺꦴꦮꦺ​ꦥꦢ​ꦤꦩ꧀ꦥ​ꦥꦔ꧀ꦮꦱ​ꦠꦤ꧀ꦥ​ꦲꦩ꧀ꦧꦪꦂ​ꦲꦥꦲꦥ​꧈​ꦩꦸꦭꦤꦺ​ꦥꦔ꧀ꦮꦱ​ꦏꦸꦮꦶ​ꦢꦶꦏꦁꦒꦺꦴꦏ꧀ꦤꦠꦤ꧀ꦥ​ꦚ꧀ꦗꦭꦸꦏ꧀ꦧꦪꦂꦫꦤ꧀꧈​ 9ꦲꦗ​ꦥꦢ​ꦱꦔꦸꦢꦸꦮꦶꦠ꧀ ꦲꦺꦴꦫ​ꦢꦸꦮꦶꦠ꧀ꦲꦼꦩꦱ꧀ ꦲꦺꦴꦫ​ꦢꦸꦮꦶꦠ꧀ꦱꦼꦭꦏ​ꦲꦥ​ꦢꦸꦮꦶꦠ꧀ꦏꦺꦴꦥꦿꦺꦴ꧉​ 10ꦲꦗ​ꦔ꧀ꦒꦮ​ꦏꦤ꧀ꦠꦺꦴꦁꦔꦤ꧀ꦲꦥ​ꦱꦺꦉꦥ꧀ꦱꦭꦶꦤ꧀ꦭꦤ꧀ꦱꦼꦥꦠꦸ​ꦭꦤ꧀ꦲꦗ​ꦔ꧀ꦒꦮ​ꦠꦼꦏꦼꦤ꧀꧈​ꦲꦮꦶꦠ꧀ꦮꦺꦴꦁ​ꦚꦩ꧀ꦧꦸꦠ꧀ꦠꦏꦸꦮꦶ​ꦮꦶꦱ꧀ꦱꦏ꧀ꦩꦼꦱ꧀ꦠꦶꦤꦺꦢꦶꦕꦸꦏꦸꦥ꧀ꦥꦶ​ꦧꦸꦠꦸꦃꦲꦺ​꧉​

11꧋“ꦤꦺꦏ꧀ꦏꦺꦴꦮꦺ​ꦠꦼꦏ​ꦤꦁꦱꦏ꧀ꦮꦶꦗꦶꦤꦺꦏꦸꦠꦲꦥ​ꦢꦺꦱ​꧈​ꦔ꧀ꦒꦺꦴꦭꦺꦏ꧀ꦏ​ꦮꦺꦴꦁ​ꦱꦶꦁ​ꦒꦼꦊꦩ꧀ꦲꦩ꧀ꦧꦺꦴꦏ꧀ꦲꦶꦤꦼꦥ꧀ꦥꦶꦭꦤ꧀ꦔꦶꦤꦼꦥ꧀ꦥꦤꦁꦲꦺꦴꦩꦃ​ꦏꦸꦮꦶ​ꦔꦤ꧀ꦠꦶ​ꦭꦸꦔꦩꦸ​ꦱꦁꦏꦏꦺꦴꦤꦺꦴ​꧉​ 12ꦤꦺꦏ꧀ꦏꦺꦴꦮꦺ​ꦩ꧀ꦊꦧꦸ​ꦤꦁꦲꦺꦴꦩꦃꦲꦺ​ꦮꦺꦴꦁ​꧈​ꦮꦺꦴꦁꦔꦺ​ꦢꦶꦧꦒꦺꦏ꧀ꦏꦏꦺꦔꦺꦤꦺ​:'ꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦩ꧀ꦧꦼꦂꦏꦃꦲꦶ​ꦏꦺꦴꦮꦺ​ꦏꦧꦺꦃ​!’ 13ꦤꦺꦏ꧀ꦮꦺꦴꦁꦔꦺ​ꦒꦼꦊꦩ꧀ꦤꦩ꧀ꦥꦤꦶ​ꦏꦺꦴꦮꦺ​꧈​ꦥꦩꦸꦗꦶꦩꦸꦧꦼꦂꦏꦃ​ꦏꦸꦮꦶ​ꦧꦏꦭ꧀ꦤꦼꦏꦤꦶ​ꦧꦿꦪꦠ꧀ꦏꦸꦮꦶ​꧉​ꦤꦁꦔꦶꦁ​ꦤꦺꦏ꧀ꦮꦺꦴꦁꦔꦺ​ꦲꦺꦴꦫ​ꦒꦼꦊꦩ꧀ꦤꦩ꧀ꦥꦤꦶ​ꦏꦺꦴꦮꦺ​꧈​ꦥꦩꦸꦗꦶꦩꦸꦧꦼꦂꦏꦃ​ꦧꦏꦭ꧀ꦧꦭꦶꦏ꧀ꦩꦼꦤꦺꦃ​ꦩꦫꦁ​ꦏꦺꦴꦮꦺ​꧉​ 14ꦤꦺꦏ꧀ꦲꦺꦤꦺꦁꦲꦺꦴꦩꦃ​ꦲꦥ​ꦏꦸꦠꦱꦶꦁ​ꦲꦺꦴꦫ​ꦒꦼꦊꦩ꧀ꦤꦩ꧀ꦥꦤꦶ​ꦏꦺꦴꦮꦺ​ꦲꦥ​ꦲꦺꦴꦫ​ꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦩꦸ​꧈​ꦭꦸꦔꦲ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​ꦭꦤ꧀ꦊꦩꦃꦲꦺ​ꦢꦶꦏꦼꦠꦺꦴꦏ꧀ꦏꦼꦠꦺꦴꦏ꧀ꦏꦏꦺꦱꦁꦏꦱꦶꦏꦶꦭ꧀ꦩꦸ​꧉​ 15ꦥꦽꦕꦪꦲ​꧈​ꦲꦩ꧀ꦧꦺꦱꦸꦏ꧀ꦲꦶꦁ​ꦢꦶꦤ​ꦏꦿꦸꦠꦺꦴꦤ꧀ꦱꦼꦠꦿꦥꦤ꧀ꦤꦺꦮꦺꦴꦁ​ꦱꦶꦁ​ꦩꦁꦒꦺꦴꦤ꧀ꦤꦁꦏꦸꦠꦏꦸꦠꦏꦸꦮꦶ​ꦲꦧꦺꦴꦠ꧀ꦠꦺ​ꦧꦏꦭ꧀ꦭꦺ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦱꦼꦠꦿꦥꦤ꧀ꦤꦺꦏꦸꦠꦱꦺꦴꦢꦺꦴꦩ꧀ꦭꦤ꧀ꦓꦺꦴꦩꦺꦴꦫꦃ!”

꧋ꦧꦧ꧀ꦏꦔꦺꦭ꧀ꦭꦤ꧀ꦭꦤ꧀ꦏꦱꦁꦱꦫꦤ꧀꧈​

16꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​ꦩꦫꦁ​ꦫꦱꦸꦭ꧀ꦫꦺꦴꦭꦱ꧀ꦩꦲꦸ​:“ꦢꦶꦫꦸꦔꦺꦴꦏ꧀ꦏꦏꦺ​ꦱꦶꦁ​ꦲꦥꦶꦏ꧀!ꦏꦺꦴꦮꦺ​ꦠꦏ꧀ꦏꦺꦴꦁꦏꦺꦴꦤ꧀ꦧꦸꦢꦭ꧀ꦏꦪ​ꦮꦼꦢꦸꦱ꧀ꦱꦶꦁ​ꦢꦶ​ꦲꦺꦕꦸꦭ꧀ꦭꦏꦺ​ꦤꦁꦠꦼꦔꦃꦲꦺ​ꦲꦱꦸ​ꦲꦭꦱ꧀ꦱꦤ꧀꧈​ꦩꦸꦭꦤꦺ​ꦏꦺꦴꦮꦺ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦏꦪ​ꦲꦸꦭ​ꦭꦤ꧀ꦲꦠꦶꦩꦸ​ꦱꦶꦁ​ꦉꦱꦶꦏ꧀ꦏꦪ​ꦩꦤꦸꦏ꧀ꦢꦫ​꧉​ 17ꦱꦶꦁ​ꦲꦠꦶꦲꦠꦶꦲꦶꦁ​ꦲꦥ​ꦮꦲꦺ​꧈​ꦲꦮꦶꦠ꧀ꦏꦺꦴꦮꦺ​ꦧꦏꦭ꧀ꦢꦶꦕꦼꦏꦼꦭ꧀ꦭꦤ꧀ꦢꦶꦒꦮ​ꦤꦁꦔꦉꦥ꧀ꦥꦺ​ꦏꦿꦸꦠꦺꦴꦤ꧀ꦲꦒꦩ​꧉​ꦏꦺꦴꦮꦺ​ꦧꦏꦭ꧀ꦢꦶꦥꦼꦕꦸꦠ꧀ꦠꦶ​ꦤꦁꦱꦶꦤꦒꦸꦏ꧀ꦏꦺꦮꦺꦴꦁꦮꦺꦴꦁ​ꦏꦸꦮꦶ​꧉​ 18ꦏꦺꦴꦮꦺ​ꦧꦏꦭ꧀ꦢꦶꦒꦮ​ꦤꦁꦔꦉꦥ꧀ꦥꦺ​ꦥꦫ​ꦥꦔ꧀ꦮꦱ​ꦭꦤ꧀ꦥꦫ​ꦫꦠꦸ​꧈​ꦗꦭꦂꦫꦤ꧀ꦏꦺꦴꦮꦺ​ꦔ꧀ꦭꦧꦸꦃꦲꦶ​ꦲꦏꦸ​꧉​ꦏꦸꦮꦶ​ꦏꦼꦭꦸꦁꦒꦫꦤ꧀ꦩꦸꦏꦁꦒꦺꦴ​ꦔꦼꦏꦺꦏ꧀ꦏꦶꦥꦱꦼꦏ꧀ꦱꦶ​ꦧꦧ꧀ꦲꦏꦸ​ꦩꦫꦁ​ꦥꦫ​ꦥꦼꦁꦒꦼꦢꦺꦭꦤ꧀ꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 19ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ꦢꦶꦏꦺꦴꦁꦏꦺꦴꦤ꧀ꦩꦗꦸ​ꦤꦁꦔꦉꦥ꧀ꦥꦏꦺꦏꦿꦸꦠꦺꦴꦤ꧀ ꦲꦗ​ꦥꦢ​ꦮꦼꦢꦶ​ꦧꦧ꧀ꦏꦼꦥꦿꦶꦪꦺ​ꦱꦶꦁ​ꦔꦺꦴꦩꦺꦴꦁꦭꦤ꧀ꦲꦥ​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁ​꧉​ꦲꦮꦶꦠ꧀ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦼꦏꦺꦏ꧀ꦏꦶꦠꦼꦩ꧀ꦧꦸꦁꦔꦺ​ꦩꦫꦁ​ꦏꦺꦴꦮꦺ​꧉​ 20ꦲꦮꦶꦠ꧀ꦢꦸꦢꦸ​ꦏꦺꦴꦮꦺ​ꦱꦶꦁ​ꦧꦏꦭ꧀ꦔꦺꦴꦩꦺꦴꦁ꧈​ꦤꦁꦔꦶꦁ​ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦩꦸ​ꦱꦶꦁ​ꦧꦏꦭ꧀ꦔꦺꦴꦩꦺꦴꦁꦭꦤ꧀ꦠꦂꦫꦤ꧀ꦏꦺꦴꦮꦺ​꧉​

21꧋“ꦧꦏꦭ꧀​ꦏ꧀ꦭꦏꦺꦴꦤ꧀ꦲꦺꦤꦺꦁꦮꦺꦴꦁ​ꦩꦱꦿꦃꦲꦏꦺꦱꦼꦢꦸꦭꦸꦂꦫꦺ​ꦢꦺꦮꦺꦱꦸꦥꦪ​ꦢꦶꦥꦠꦺꦤ꧀ꦤꦶ​꧉​ꦱꦼꦩꦺꦴꦤꦺꦴ​ꦲꦸꦒ​ꦧꦥꦏ꧀ꦧꦏꦭ꧀ꦩꦱꦿꦃꦲꦏꦺꦲꦤꦏ꧀ꦏꦺ​ꦱꦸꦥꦪ​ꦢꦶꦥꦠꦺꦤ꧀ꦤꦶ​꧉​ꦲꦤꦏ꧀ꦲꦤꦏ꧀ꦧꦏꦭ꧀​ꦔ꧀ꦭꦮꦤ꧀ꦩꦫꦁ​ꦧꦥ​ꦭꦤ꧀ꦲꦶꦧꦸꦤꦺ​ꦭꦤ꧀ꦧꦏꦭ꧀ꦩꦱꦿꦃꦲꦏꦺꦮꦺꦴꦁ​ꦠꦸꦮꦤꦺ​ꦱꦸꦥꦪ​ꦢꦶꦥꦠꦺꦤ꧀ꦤꦶ​꧉​ 22ꦮꦺꦴꦁ​ꦏꦧꦺꦃ​ꦧꦏꦭ꧀ꦱꦼꦔꦶꦠ꧀ꦩꦫꦁ​ꦏꦺꦴꦮꦺ​꧈​ꦗꦭꦂꦫꦤ꧀ꦏꦺꦴꦮꦺ​ꦩꦺꦭꦸ​ꦲꦏꦸ​꧉​ꦤꦁꦔꦶꦁ​ꦱꦥ​ꦱꦶꦁ​ꦩꦤ꧀ꦠꦼꦥ꧀ꦠꦼꦏꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧈​ꦏꦸꦮꦶ​ꦱꦶꦁ​ꦧꦏꦭ꧀ꦱ꧀ꦭꦩꦼꦠ꧀꧈​ 23ꦤꦺꦏ꧀ꦏꦺꦴꦮꦺ​ꦢꦶꦏꦸꦪꦏꦸꦪ​ꦤꦁꦱꦏ꧀ꦮꦶꦗꦶꦤꦺꦏꦸꦠ꧈​ꦥꦢ​ꦭꦸꦔꦲ​ꦤꦁꦏꦸꦠꦭꦶꦪꦤꦺ​꧉​ꦥꦽꦕꦪꦲ​꧈​ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦠꦼꦏ​꧈​ꦱꦏ꧀ꦢꦸꦫꦸꦁꦔꦺꦏꦺꦴꦮꦺ​ꦏꦼꦩ꧀ꦥꦸꦠ꧀ꦲꦼꦁꦒꦺꦴꦤ꧀ꦩꦸ​ꦔ꧀ꦭꦏꦺꦴꦤ꧀ꦤꦶ​ꦏꦺꦴꦁꦏꦺꦴꦤ꧀ꦤꦤ꧀ꦩꦸ​ꦤꦁꦏꦸꦠꦏꦸꦠꦱꦏ꧀ꦆꦱꦿꦌꦭ꧀ꦏꦧꦺꦃ​꧉​

24꧋“ꦩꦸꦫꦶꦢ꧀ꦩꦼꦱ꧀ꦠꦶꦲꦺꦴꦫ​ꦔꦸꦁꦏꦸꦭ꧀ꦭꦶ​ꦒꦸꦫꦸꦤꦺ​ꦭꦤ꧀ꦱ꧀ꦭꦥ꦳꧀ꦩꦼꦱ꧀ꦠꦶꦲꦺꦴꦫ​ꦔꦸꦁꦏꦸꦭ꧀ꦭꦶ​ꦱꦶꦁ​ꦤ꧀ꦢꦸꦮꦺ꧉​ 25ꦏꦁꦒꦺꦴ​ꦩꦸꦫꦶꦢ꧀ꦩꦼꦱ꧀ꦠꦶꦪ​ꦮꦶꦱ꧀ꦕꦸꦏꦸꦥ꧀ꦤꦺꦏ꧀ꦧꦶꦱ​ꦏꦪ​ꦒꦸꦫꦸꦤꦺ​꧈​ꦱꦼꦩꦺꦴꦤꦺꦴ​ꦲꦸꦒ​ꦱ꧀ꦭꦥ꦳꧀ ꦪ​ꦮꦶꦱ꧀ꦕꦸꦏꦸꦥ꧀ꦤꦺꦏ꧀ꦧꦶꦱ​ꦏꦪ​ꦱꦶꦁ​ꦤ꧀ꦢꦸꦮꦺ꧉​ꦭꦃ​ꦤꦺꦏ꧀ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦮꦲꦺ​ꦢꦶꦲꦫꦤ꧀ꦤꦶ​ꦨꦺꦭ꧀ꦱꦼꦧꦸꦭ꧀ ꦭꦃ​ꦧꦿꦪꦠ꧀ꦠꦺ​ꦱꦏ꧀ꦲꦺꦴꦩꦃ​ꦩꦼꦤꦺꦃ​ꦲꦺꦴꦫ​ꦢꦶꦲꦫꦤ꧀ꦤꦶ​ꦏꦼꦥꦿꦶꦪꦺ​!”

꧋ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏꦸꦢꦸ​ꦢꦶꦮꦼꦢꦺꦤ꧀ꦤꦶ​꧉​

26꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦲꦗ​ꦥꦢ​ꦮꦼꦢꦶ​ꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​꧉​ꦲꦥ​ꦱꦶꦁ​ꦢꦶꦠꦸꦠꦸꦥ꧀ꦥꦶ​ꦧꦏꦭ꧀ꦏꦺꦠꦺꦴꦏ꧀ꦭꦤ꧀ꦲꦥ​ꦱꦶꦁ​ꦢꦶꦢꦼꦭꦶꦏ꧀ꦏꦏꦺꦧꦏꦭ꧀ꦏꦼꦧꦸꦏꦏ꧀꧈​ 27ꦲꦥ​ꦱꦶꦁ​ꦠꦏ꧀ꦲꦺꦴꦩꦺꦴꦁꦔꦏꦺꦩꦫꦁ​ꦏꦺꦴꦮꦺ​ꦲꦶꦁ​ꦥꦼꦠꦼꦁꦔꦤ꧀ꦏꦸꦢꦸ​ꦲꦩ꧀ꦧꦺꦴꦏ꧀ꦏꦧꦂꦫꦏꦺꦲꦶꦁ​ꦥꦢꦁꦔꦤ꧀꧈​ꦲꦥ​ꦱꦶꦁ​ ꦢꦶꦧꦶꦱꦶꦏ꧀ꦧꦶꦱꦶꦏ꧀ꦏꦏꦺꦤꦁꦏꦸꦥꦶꦁꦩꦸ​꧈​ꦏꦸꦮꦶ​ꦢꦶꦲꦺꦴꦩꦺꦴꦁꦔꦺꦴꦩꦺꦴꦁꦔꦏꦺꦤꦁꦲꦼꦤ꧀ꦢꦶꦲꦼꦤ꧀ꦢꦶ​꧉​ 28ꦲꦗ​ꦥꦢ​ꦮꦼꦢꦶ​ꦩꦫꦁ​ꦩꦤꦸꦁꦱ​꧈​ꦲꦮꦶꦠ꧀ꦩꦤꦸꦁꦱ​ꦤꦩꦸꦁ​ꦧꦶꦱ​ꦩꦠꦺꦤ꧀ꦤꦶ​ꦧꦢꦤ꧀ꦤꦺ​꧉​ꦥꦢ​ꦮꦼꦢꦶꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦧꦶꦱ​ꦩꦠꦺꦤ꧀ꦤꦶ​ꦧꦢꦤ꧀ꦭꦤ꧀ꦚꦮꦩꦸ​ꦥꦶꦱꦤ꧀ꦤꦁꦤꦼꦫꦏ꧉​ 29ꦩꦤꦸꦏ꧀ꦕꦶꦭꦶꦏ꧀ꦭꦺꦴꦫꦺꦴ​ꦭꦲꦸꦠ꧀ꦲꦺꦴꦫ​ꦲꦺꦤꦺꦁꦲꦗꦶꦤꦺ​ꦠ​ꦉꦒꦤꦺ​?ꦤꦁꦔꦶꦁ​ꦲꦺꦴꦫ​ꦲꦺꦤꦺꦁꦱꦶꦗꦶꦪꦠꦶꦧ​ꦤꦁꦊꦩꦃ​ꦠꦤ꧀ꦥ​ꦧꦥꦏ꧀ꦩꦸ​ꦔ꧀ꦭꦶꦭꦤꦶ​꧉​ 30ꦭꦃ​ꦏꦺꦴꦮꦺ​ꦩꦼꦤꦺꦃ​꧈​ꦒꦺꦏ꧀ꦫꦩ꧀ꦧꦸꦠ꧀ꦤꦁꦱꦶꦫꦃꦩꦸ​ꦮꦲꦺ​ꦮꦶꦱ꧀ꦢꦶꦲꦶꦠꦸꦁꦏꦧꦺꦃ​꧉​ 31ꦩꦸꦭꦤꦺ​ꦲꦗ​ꦥꦢ​ꦮꦼꦢꦶ​꧉​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦮꦺ​ꦏꦸꦮꦶ​ꦲꦗꦶꦤꦺ​ꦔꦸꦁꦏꦸꦭ꧀ꦭꦶ​ꦱꦏ꧀ꦲꦺꦤꦺꦁꦔꦺꦩꦤꦸꦏ꧀ꦕꦶꦭꦶꦏ꧀ꦏꦧꦺꦃ​꧉​”

꧋ꦔꦏꦺꦴꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦔꦉꦥ꧀ꦥꦺ​ꦮꦺꦴꦁ​꧉​

32꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦱꦥ​ꦱꦶꦁ​ꦔꦏꦺꦴꦤ꧀ꦤꦶ​ꦤꦺꦏ꧀ꦢꦢꦶ​ꦩꦸꦫꦶꦢ꧀ꦏꦸ​ꦤꦁꦔꦉꦥ꧀ꦥꦺ​ꦮꦺꦴꦁ​꧈​ꦲꦏꦸ​ꦪ​ꦧꦏꦭ꧀ꦔꦏꦺꦴꦤ꧀ꦤꦶ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​꧈​ꦤꦺꦏ꧀ꦮꦺꦴꦁ​ꦏꦸꦮꦶ​ꦥꦚ꧀ꦕꦺꦤ꧀ꦩꦸꦫꦶꦢ꧀ꦏꦸ​꧉​ 33ꦤꦁꦔꦶꦁ​ꦱꦥ​ꦱꦶꦁ​ꦮꦼꦢꦶ​ꦔꦏꦺꦴꦤ꧀ꦤꦶ​ꦤꦺꦏ꧀ꦢꦢꦶ​ꦩꦸꦫꦶꦢ꧀ꦏꦸ​ꦤꦁꦔꦉꦥ꧀ꦥꦺ​ꦮꦺꦴꦁ​꧈​ꦲꦏꦸ​ꦪ​ꦧꦏꦭ꧀ꦚꦺꦭꦏ꧀ꦏꦶ​ꦢꦺꦏ꧀ꦤꦺꦤꦁꦔꦉꦥ꧀ꦥꦺ​ꦧꦥꦏ꧀ꦏꦸ​ꦤꦁꦱ꧀ꦮꦂꦒ​꧉​”

꧋ꦲꦺꦴꦫ​ꦫꦸꦏꦸꦤ꧀ ꦩꦭꦃ​ꦥꦶꦱꦃ​꧉​

34꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦲꦗ​ꦩꦶꦏꦶꦂ​ꦤꦺꦏ꧀ꦠꦼꦏꦏꦸ​ꦔ꧀ꦒꦮ​ꦫꦸꦏꦸꦤ꧀ꦤꦁꦗꦒꦠ꧀꧈​ꦲꦺꦴꦫ​꧈​ꦠꦼꦏꦏꦸ​ꦲꦺꦴꦫ​ꦔ꧀ꦒꦮ​ꦫꦸꦏꦸꦤ꧀ ꦤꦁꦔꦶꦁ​ꦩꦭꦃ​ꦩꦶꦱꦃ​꧉​ 35ꦠꦼꦏꦏꦸ​ꦩꦭꦃ​ꦩꦶꦱꦃ​ꦲꦤꦏ꧀ꦭꦤꦁ​ꦱꦁꦏꦧꦥꦏ꧀ꦏꦺꦭꦤ꧀ꦲꦤꦏ꧀ꦮꦺꦢꦺꦴꦏ꧀ꦱꦁꦏꦲꦶꦧꦸꦤꦺ​꧈​ꦲꦸꦒ​ꦲꦤꦏ꧀ꦮꦺꦢꦺꦴꦏ꧀ꦩꦤ꧀ꦠꦸ​ꦱꦁꦏꦲꦶꦧꦸ​ꦩꦫꦠꦸꦮꦤꦺ​꧉​ 36ꦩꦭꦃ​ꦮꦺꦴꦁ​ꦱꦏ꧀ꦲꦺꦴꦩꦃ​ꦧꦏꦭ꧀ꦢꦢꦶ​ꦩꦸꦁꦱꦸꦃ​ꦩꦫꦁ​ꦱꦏ꧀ꦥꦢꦥꦢ꧉​”

꧋ꦱꦥ​ꦱꦶꦁ​ꦧꦶꦱ​ꦢꦢꦶ​ꦩꦸꦫꦶꦢ꧀꧈​

37꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦱꦥ​ꦱꦶꦁ​ꦤꦿꦺꦱ꧀ꦤꦤ꧀ꦤꦶꦧꦥ​ꦲꦥ​ꦧꦶꦪꦸꦁꦔꦺ​ꦔꦸꦁꦏꦸꦭ꧀ꦭꦶ​ꦲꦼꦁꦒꦺꦴꦤꦺ​ꦤꦿꦺꦱ꧀ꦤꦤ꧀ꦤꦶꦲꦏꦸ​꧈​ꦮꦺꦴꦁ​ꦏꦸꦮꦶ​ꦲꦺꦴꦫ​ꦥꦤ꧀ꦠꦼꦱ꧀ꦢꦢꦶ​ꦩꦸꦫꦶꦢ꧀ꦏꦸ​꧉​ꦲꦸꦒ​ꦮꦺꦴꦁ​ꦱꦶꦁ​ꦤꦿꦺꦱ꧀ꦤꦤ꧀ꦤꦶꦲꦤꦏ꧀ꦏꦺ​ꦭꦤꦁ​ꦲꦥ​ꦲꦤꦏ꧀ꦏꦺ​ꦮꦺꦢꦺꦴꦏ꧀ꦔꦸꦁꦏꦸꦭ꧀ꦭꦶ​ꦲꦼꦁꦒꦺꦴꦤꦺ​ꦤꦿꦺꦱ꧀ꦤꦤ꧀ꦤꦶꦲꦏꦸ​꧈​ꦮꦺꦴꦁ​ꦏꦸꦮꦶ​ꦲꦸꦒ​ꦲꦺꦴꦫ​ꦥꦤ꧀ꦠꦼꦱ꧀ꦢꦢꦶ​ꦩꦸꦫꦶꦢ꧀ꦏꦸ​꧉​ 38ꦱꦥ​ꦱꦶꦁ​ꦲꦺꦴꦫ​ꦒꦼꦊꦩ꧀ꦩꦁꦒꦸꦭ꧀ꦥꦼꦤ꧀ꦠꦺꦔꦤ꧀ꦤꦺꦭꦤ꧀ꦤꦸꦫꦸꦠ꧀ꦲꦏꦸ​꧈​ꦏꦸꦮꦶ​ꦲꦺꦴꦫ​ꦥꦤ꧀ꦠꦼꦱ꧀ꦢꦢꦶ​ꦩꦸꦫꦶꦢ꧀ꦏꦸ​꧉​ 39ꦱꦥ​ꦱꦶꦁ​ꦔꦺꦩꦤ꧀ꦲꦸꦫꦶꦥ꧀ꦥꦺ꧈​ꦏꦸꦮꦶ​ꦩꦭꦃ​ꦧꦏꦭ꧀ꦏꦺꦭꦁꦔꦤ꧀ꦲꦸꦫꦶꦥ꧀ꦥꦺ꧉​ꦤꦁꦔꦶꦁ​ꦱꦥ​ꦱꦶꦁ​ꦲꦺꦴꦫ​ꦮꦼꦢꦶ​ꦏꦺꦭꦁꦔꦤ꧀ꦲꦸꦫꦶꦥ꧀ꦥꦺꦏꦁꦒꦺꦴ​ꦲꦏꦸ​꧈​ꦲꦶꦏꦸ​ꦱꦶꦁ​ꦧꦏꦭ꧀ꦤꦼꦩꦸ​ꦲꦸꦫꦶꦥ꧀ꦥꦺ꧉​”

꧋ꦲꦸꦥꦃꦲꦺꦮꦺꦴꦁ​ꦱꦶꦁ​ꦔ꧀ꦒꦮꦺ​ꦧꦼꦕꦶꦏ꧀꧈​

40꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦿꦩ꧀ꦥꦸꦁꦔꦏꦺꦥꦶꦮꦸꦭꦁꦔꦺ​ꦩꦫꦁ​ꦫꦱꦸꦭ꧀ꦫꦺꦴꦭꦱ꧀ꦔꦺꦤꦺ​:“ꦱꦥ​ꦱꦶꦁ​ꦤꦩ꧀ꦥꦤꦶ​ꦏꦺꦴꦮꦺ​꧈​ꦏꦸꦮꦶ​ꦲꦸꦒ​ꦤꦩ꧀ꦥꦤꦶ​ꦲꦏꦸ​꧉​ꦭꦤ꧀ꦱꦥ​ꦱꦶꦁ​ꦤꦩ꧀ꦥꦤꦶ​ꦲꦏꦸ​꧈​ꦏꦸꦮꦶ​ꦪ​ꦤꦩ꧀ꦥꦤꦶ​ꦧꦥꦏ꧀ꦏꦸ​ꦤꦁꦱ꧀ꦮꦂꦒ​꧉​ 41ꦱꦥ​ꦱꦶꦁ​ꦤꦩ꧀ꦥꦤꦶ​ꦮꦺꦴꦁ​ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦮꦺꦴꦁꦔꦺ​ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁ​ꦏꦸꦮꦶ​ꦧꦏꦭ꧀ꦤꦩ꧀ꦥ​ꦲꦸꦥꦃꦱꦶꦁ​ꦧꦏꦭ꧀ꦢꦶꦏꦺꦏ꧀ꦏꦏꦺꦩꦫꦁ​ꦮꦺꦴꦁ​ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦲꦸ​꧉​ꦱꦥ​ꦱꦶꦁ​ꦤꦩ꧀ꦥꦤꦶ​ꦮꦺꦴꦁ​ꦧꦼꦕꦶꦏ꧀ ꦗꦭꦂꦫꦤ꧀ꦮꦺꦴꦁ​ꦧꦼꦕꦶꦏ꧀ ꦮꦺꦴꦁ​ꦏꦸꦮꦶ​ꦪ​ꦧꦏꦭ꧀ꦤꦩ꧀ꦥ​ꦲꦸꦥꦃꦲꦺꦮꦺꦴꦁ​ꦧꦼꦕꦶꦏ꧀ꦏꦸꦮꦶ​꧉​ 42ꦱꦥ​ꦱꦶꦁ​ꦔꦼꦏꦺꦏ꧀ꦏꦶꦔꦺꦴꦩ꧀ꦧꦺ​ꦩꦫꦁ​ꦱꦭꦃꦱꦏ꧀ꦮꦶꦗꦶꦤꦺꦩꦸꦫꦶꦢ꧀ꦏꦸ​ꦱꦶꦁ​ꦕꦶꦭꦶꦏ꧀ꦲꦶꦏꦶ​꧈​ꦗꦭꦂꦫꦤ꧀ꦩꦸꦫꦶꦢ꧀ꦏꦸ​꧈​ꦱꦼꦤꦗꦤ꧀ꦤꦩꦸꦁ​ꦧꦚꦸ​ꦲꦚꦼꦱ꧀ꦱꦏ꧀ꦒꦼꦭꦱ꧀ ꦥꦽꦕꦪꦲ​꧈​ꦮꦺꦴꦁ​ꦏꦸꦮꦶ​ꦧꦏꦭ꧀ꦤꦩ꧀ꦥ​ꦲꦸꦥꦃ꧉​”

↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀꧈​

꧇​꧑꧑꧇​ 1꧋ꦱꦏ꧀ꦮꦶꦱ꧀ꦱꦺ​ꦫꦩ꧀ꦥꦸꦁ​ꦲꦼꦁꦒꦺꦴꦤꦺ​ꦔꦼꦏꦺꦏ꧀ꦏꦶꦥꦶꦠꦸꦠꦸꦂ​ꦩꦫꦁ​ꦩꦸꦫꦶꦢ꧀ꦢꦺ​ꦫꦺꦴꦭꦱ꧀ ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​꧈​ꦲꦉꦥ꧀ꦩꦼꦩꦸꦭꦁ​ꦭꦤ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦁꦏꦸꦠꦏꦸꦠꦤꦺꦧꦁꦱ​ꦙꦸꦏꦺꦴꦤꦺꦴ​꧉​

2꧋ꦪꦺꦴꦲꦤꦼꦱ꧀ ꦱꦶꦁ​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦲꦶꦗꦶꦏ꧀ꦤꦁꦱꦼꦠꦿꦥꦤ꧀ ꦏꦿꦸꦔꦸ​ꦏꦧꦂ​ꦧꦧ꧀ꦥꦼꦁꦒꦮꦺꦤꦺ​ꦑꦿꦶꦱ꧀ꦠꦸꦱ꧀꧈​ꦢꦺꦏ꧀ꦤꦺꦠꦼꦫꦸꦱ꧀ꦏꦺꦴꦁꦏꦺꦴꦤ꧀ꦤꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦱꦶꦗꦶꦭꦺꦴꦫꦺꦴꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ ꦏꦺꦴꦁꦏꦺꦴꦤ꧀ꦠꦏꦺꦴꦤ꧀ꦔꦺꦤꦺ​: 3“ꦲꦥ​ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦱꦶꦁ​ꦏꦸꦢꦸ​ꦠꦼꦏ​꧈​ꦲꦥ​ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦔꦉꦥ꧀ꦲꦉꦥ꧀ꦮꦺꦴꦁ​ꦭꦶꦪꦤꦺ​?”

4꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​ꦔꦺꦤꦺ​:“ꦏꦤ​ꦥꦢ​ꦧꦭꦶꦏ꧀ꦏꦭꦤ꧀ꦪꦺꦴꦲꦤꦼꦱ꧀ꦢꦶꦲꦺꦴꦩꦺꦴꦁꦔꦶꦧꦧ꧀ꦲꦥ​ꦱꦶꦁ​ꦏꦺꦴꦮꦺ​ꦏꦿꦸꦔꦸ​ꦭꦤ꧀ꦲꦥ​ꦱꦶꦁ​ꦏꦺꦴꦮꦺ​ꦮꦼꦫꦸꦃ​꧉​ 5ꦏꦺꦴꦮꦺ​ꦥꦢ​ꦮꦼꦫꦸꦃ​ꦤꦺꦏ꧀ꦮꦺꦴꦁ​ꦭꦩꦸꦂ​ꦧꦶꦱ​ꦮꦼꦫꦸꦃ​ꦩꦼꦤꦺꦃ​꧈​ꦮꦺꦴꦁ​ꦭꦸꦩ꧀ꦥꦸꦃ​ꦧꦶꦱ​ꦩ꧀ꦭꦏꦸ​ꦩꦼꦤꦺꦃ​꧈​ꦱꦶꦁ​ꦭꦫ​ꦭꦺꦥꦿ​ꦲꦮꦏ꧀ꦏꦺ​ꦧꦶꦱ​ꦉꦱꦶꦏ꧀ꦩꦼꦤꦺꦃ​꧈​ ꦱꦶꦁ​ꦧꦸꦢꦼꦏ꧀ꦧꦶꦱ​ꦏꦿꦸꦔꦸ​꧈​ꦮꦺꦴꦁ​ꦩꦠꦶ​ꦥꦢ​ꦢꦶꦲꦸꦫꦶꦥ꧀ꦥꦏꦺꦩꦼꦤꦺꦃ​ꦭꦤ꧀ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦶꦒꦼꦭꦂꦫꦏꦺꦩꦫꦁ​ꦮꦺꦴꦁ​ꦩ꧀ꦭꦫꦠ꧀꧈​ 6ꦧꦼꦗꦮꦺꦴꦁ​ꦱꦶꦁ​ꦲꦺꦴꦫ​ꦩꦔꦸꦩꦔꦸ​ꦧꦧ꧀ꦲꦏꦸ​꧉​”

꧋ꦥꦱꦼꦏ꧀ꦱꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

7꧋ꦱꦏ꧀ꦮꦶꦱ꧀ꦱꦺ​ꦩꦸꦫꦶꦢ꧀ꦩꦸꦫꦶꦢ꧀ꦩꦲꦸ​ꦥꦢ​ꦧꦭꦶꦏ꧀ ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​ꦧꦧ꧀ꦪꦺꦴꦲꦤꦼꦱ꧀ꦩꦫꦁ​ꦮꦺꦴꦁꦮꦺꦴꦁ​:“ꦢꦺꦴꦁꦔꦺꦏꦺꦴꦮꦺ​ꦥꦢ​ꦩꦫꦤꦶ​ꦪꦺꦴꦲꦤꦼꦱ꧀ꦤꦁꦮꦸꦱ꧀ꦠꦺꦤ꧀ꦏꦲꦺ​꧈​ꦱꦏ꧀ꦗꦤꦺꦏꦺꦴꦮꦺ​ꦩꦶꦏꦶꦂ​ꦧꦏꦭ꧀ꦮꦼꦫꦸꦃ​ꦲꦥ​?ꦲꦥ​ꦤ꧀ꦢꦫꦤ꧀ꦤꦶꦏꦺꦴꦮꦺ​ꦧꦏꦭ꧀ꦮꦼꦫꦸꦃ​ꦢꦩꦺꦤ꧀ꦱꦶꦁ​ꦏꦼꦠꦼꦫꦏ꧀ꦲꦔꦶꦤ꧀ꦫꦤꦫꦺꦤꦺ​?ꦭꦲꦸꦠ꧀ꦪ​ꦲꦺꦴꦫ​ꦠ​? 8ꦭꦃ​ꦮꦼꦫꦸꦃ​ꦲꦥ​?ꦲꦥ​ꦮꦺꦴꦁ​ꦱꦶꦁ​ꦔꦁꦒꦺꦴ​ꦱꦭꦶꦤ꧀ꦱꦶꦁ​ꦭꦫꦁ​?ꦮꦺꦴꦁ​ꦱꦶꦁ​ꦔꦁꦒꦺꦴ​ꦱꦭꦶꦤ꧀ꦲꦥꦶꦏ꧀ꦲꦥꦶꦏ꧀ꦏꦸꦮꦶ​ꦩꦁꦒꦺꦴꦤꦺ​ꦤꦁꦥꦭꦺꦱ꧀꧈​ 9ꦭꦃ​ꦏꦺꦴꦮꦺ​ꦥꦢ​ꦤꦁꦮꦸꦱ꧀ꦠꦺꦤ꧀ꦏꦸꦮꦶ​ꦏꦼꦥꦺꦔꦶꦤ꧀ꦮꦼꦫꦸꦃ​ꦲꦥ​?ꦲꦥ​ꦏꦼꦥꦺꦔꦶꦤ꧀ꦮꦼꦫꦸꦃ​ꦤꦧꦶ​?ꦪ​ꦧꦼꦤꦼꦂ​꧈​ꦏꦺꦴꦮꦺ​ꦩꦭꦃ​ꦮꦼꦫꦸꦃ​ꦮꦺꦴꦁ​ꦱꦶꦁ​ꦔꦸꦁꦏꦸꦭ꧀ꦭꦶ​ꦤꦧꦶ​꧉​ 10ꦲꦮꦶꦠ꧀ꦪ​ꦧꦧ꧀ꦪꦺꦴꦲꦤꦼꦱ꧀ꦲꦶꦏꦶ​ꦱꦶꦁ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀​ꦔꦺꦤꦺ​:'ꦲꦶꦏꦶ​ꦏꦺꦴꦁꦏꦺꦴꦤꦤ꧀ꦏꦸ꧈​ꦱꦶꦁ​ꦠꦏ꧀ꦏꦺꦴꦁꦏꦺꦴꦤ꧀ꦧꦸꦢꦭ꧀​ꦤ꧀ꦢꦶꦱꦶꦏ꧀​ꦔ꧀ꦒꦮꦺꦏ꧀ꦏꦏꦺꦢꦭꦤ꧀ꦏꦺꦴꦮꦺ​!’ 11ꦥꦢ​ꦢꦶꦠꦶꦠꦺꦤ꧀ꦤꦶ​ꦠ​!ꦤꦁꦱꦏ꧀ꦗꦒꦠ꧀ꦲꦶꦏꦶ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦔꦸꦁꦏꦸꦭ꧀ꦭꦶ​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀꧈​ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦮꦺꦴꦁ​ꦱꦶꦁ​ꦕꦶꦭꦶꦏ꧀ꦢꦺꦮꦺꦲꦶꦁ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦗꦶꦏ꧀ꦔꦸꦁꦏꦸꦭ꧀ꦭꦶ​ꦢꦺꦏ꧀ꦤꦺꦒꦼꦢꦺꦤꦺ꧉​ 12ꦮꦶꦮꦶꦠ꧀ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦩꦼꦩꦸꦭꦁ​ꦠꦼꦏꦤ꧀ꦱꦼꦥꦿꦺꦤꦺ​꧈​ꦏꦿꦠꦺꦴꦤꦺ​ꦱ꧀ꦮꦂꦒ​ꦢꦶꦭꦮꦤ꧀ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦏꦉꦥ꧀ꦔ꧀ꦮꦱꦤꦶ​ꦔꦁꦒꦺꦴ​ꦥꦼꦏ꧀ꦱ​꧉​ 13ꦥꦶꦮꦸꦭꦁꦔꦺ​ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦭꦤ꧀ꦥꦫ​ꦤꦧꦶ​ꦭꦶꦪꦤꦺ​ꦔꦤ꧀ꦠꦶ​ꦱꦏ꧀ꦠꦼꦏꦤꦺ​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ ꦏꦧꦺꦃ​ꦥꦢ​ꦔꦺꦴꦩꦺꦴꦁꦔꦏꦺꦧꦧ꧀ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 14ꦤꦺꦏ꧀ꦏꦺꦴꦮꦺ​ꦒꦼꦊꦩ꧀ꦥꦽꦕꦪ​ꦩꦫꦁ​ꦥꦶꦮꦸꦭꦁ​ꦩꦲꦸ​꧈​ꦔꦼꦂꦠꦶꦪ​꧈​ꦤꦺꦏ꧀ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦏꦸꦮꦶ​ꦤꦧꦶ​ꦌꦭꦶꦪ​꧈​ꦱꦶꦁ​ꦮꦶꦱ꧀ꦢꦶꦲꦺꦴꦩꦺꦴꦁꦔꦏꦺꦤꦺꦏ꧀ꦧꦏꦭ꧀ꦠꦼꦏ​꧉​ 15ꦱꦥ​ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧈​ꦥꦢ​ꦫꦸꦔꦺꦴꦏ꧀ꦏꦏꦺ꧉​

16꧋“ꦮꦺꦴꦁꦮꦺꦴꦁ​ꦗꦩꦤ꧀ꦱꦲꦶꦏꦶ​ꦏꦼꦤꦺꦁꦠꦏ꧀ꦥꦢꦏ꧀ꦏꦏꦺꦏꦫꦺꦴ​ꦲꦥ​ꦪ​?ꦲꦺꦭꦶꦁ​​ꦲꦺꦭꦶꦁ​​ꦏꦪ​ꦧꦺꦴꦕꦃꦧꦺꦴꦕꦃ​ꦱꦶꦁ​ꦥꦢ​ꦢꦺꦴꦭꦤ꧀ꦤꦤ꧀ꦤꦁꦭꦠꦂꦫꦺ​ꦥꦱꦂ​ꦏꦲꦺ​;ꦱꦶꦁ​ꦱꦏ꧀ꦏꦿꦺꦴꦩ꧀ꦥꦺꦴꦭ꧀ꦕꦼꦭꦸꦏ꧀ꦕꦼꦭꦸꦏ꧀ꦩꦫꦁ​ꦏꦿꦺꦴꦩ꧀ꦥꦺꦴꦭ꧀ꦭꦤ꧀ꦭꦶꦪꦤꦺ​ꦔꦺꦴꦩꦺꦴꦁꦔꦺꦤꦺ​: 17‘ꦲꦮꦏ꧀ꦏꦺ​ꦢꦺꦮꦺꦩꦲꦶꦤ꧀ꦭꦒꦸ​ꦧꦸꦔꦃꦧꦸꦔꦃ​꧈​ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦒꦼꦊꦩ꧀​ꦚ꧀ꦗꦺꦴꦒꦺꦠ꧀꧈​ꦲꦮꦏ꧀ꦏꦺ​ꦢꦺꦮꦺꦱꦶꦔꦶꦭꦒꦸ​ꦱꦸꦱꦃ​꧈​ꦏꦺꦴꦮꦺ​ꦲꦺꦴꦫ​ꦤꦔꦶꦱ꧀꧉'​ 18ꦢꦺꦴꦁꦔꦺꦪꦺꦴꦲꦤꦼꦱ꧀ꦠꦼꦏ​꧈​ꦢꦺꦏ꧀ꦤꦺꦲꦺꦴꦫ​ꦩꦁꦔꦤ꧀ꦭꦤ꧀ꦔꦺꦴꦩ꧀ꦧꦺ​꧈​ꦏꦧꦺꦃ​ꦮꦺꦴꦁ​ꦔꦺꦴꦩꦺꦴꦁꦤꦺꦏ꧀ꦢꦺꦏ꧀ꦤꦺꦢꦶꦏ꧀ꦮꦱꦤꦶ​ꦢꦼꦩꦶꦠ꧀꧈​ 19ꦭꦃ​ꦢꦺꦴꦁꦔꦺꦲꦤꦏ꧀ꦏꦺ​ꦩꦤꦸꦁꦱ​ꦠꦼꦏ​꧈​ꦢꦺꦏ꧀ꦤꦺꦩꦁꦔꦤ꧀ꦭꦤ꧀ꦔꦺꦴꦩ꧀ꦧꦺ​꧈​ꦏꦧꦺꦃ​ꦮꦺꦴꦁ​ꦔꦺꦴꦩꦺꦴꦁ:'ꦢꦼꦭꦺꦴꦏ꧀ꦏꦼꦤ꧀ꦏꦲꦺ​꧈​ꦮꦺꦴꦁ​ꦩꦸꦂꦏꦭꦤ꧀ꦠꦸꦏꦁ​ꦔꦺꦴꦩ꧀ꦧꦺ​꧈​ꦏꦚ꧀ꦕꦤꦺ​ꦮꦺꦴꦁ​ꦧꦼꦭꦱ꧀ꦠꦶꦁꦭꦤ꧀ꦮꦺꦴꦁ​ꦲꦭ​꧉'​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦒꦼꦢꦺ​ꦏꦮꦼꦫꦸꦃꦲꦺꦭꦤ꧀ꦏꦮꦼꦫꦸꦃꦲꦺꦢꦶꦮꦸꦗꦸꦠ꧀ꦠꦏꦺꦔꦁꦒꦺꦴ​ꦥꦼꦁꦒꦮꦺꦤꦺ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦤ꧀ꦠꦶꦩꦤ꧀ꦠꦶ​ꦏꦸꦠꦏꦸꦠꦱꦶꦁ​ꦲꦺꦴꦫ​ꦒꦼꦊꦩ꧀ꦥꦽꦕꦪ​꧉​

20꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦲꦶꦢꦺꦴ​ꦏꦸꦠꦏꦸꦠꦱꦶꦁ​ꦲꦺꦴꦫ​ꦥꦢ​ꦒꦼꦊꦩ꧀ꦤꦶꦁꦒꦭ꧀ꦢꦺꦴꦱꦤꦺ​ꦭꦤ꧀ꦔꦚꦂꦫꦏꦺꦲꦸꦫꦶꦥ꧀ꦥꦺ꧈​ꦱꦼꦤꦗꦤ꧀ꦢꦺꦏ꧀ꦤꦺꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀ꦱꦶꦁ​ꦲꦺꦴꦏꦺꦃꦢꦺꦮꦺꦤꦁꦏꦸꦠꦏꦸꦠꦏꦸꦮꦶ​꧉​ 21ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦤꦺ​:“ꦕꦶꦭꦏ​ꦏꦺꦴꦮꦺ​꧈​ꦑꦺꦴꦫꦱꦶꦩ꧀!ꦕꦶꦭꦏ​ꦏꦺꦴꦮꦺ​ꦲꦸꦒ​꧈​ꦧꦺꦠ꧀ꦱꦲꦶꦢ​!ꦲꦮꦶꦠ꧀ꦱꦼꦩꦸꦁꦒꦺꦴꦤ꧀ꦤꦺꦤꦁꦏꦸꦠꦱꦶꦢꦺꦴꦤ꧀ꦭꦤ꧀ꦠꦶꦫꦸꦱ꧀ꦲꦺꦤꦺꦁꦩꦸꦗꦶꦗꦠ꧀ꦏꦪ​ꦱꦶꦁ​ꦲꦺꦤꦺꦁꦤꦁꦠꦼꦔꦃꦩꦸ​꧈​ꦮꦺꦴꦁꦮꦺꦴꦁ​ꦤꦁꦏꦺꦴꦤꦺꦴ​ꦩꦼꦱ꧀ꦠꦶꦮꦶꦱ꧀​ꦩ꧀ꦧꦶꦪꦺꦤ꧀​ꦩ꧀ꦧꦶꦪꦺꦤ꧀ꦥꦢ​ꦔꦏꦺꦴꦤ꧀ꦤꦶ​ꦱꦭꦃꦲꦺ​ꦭꦤ꧀ꦥꦢ​ꦔꦁꦒꦺꦴ​ꦱꦭꦶꦤ꧀ꦱꦏꦃꦭꦤ꧀ꦲꦸꦱꦥ꧀ꦥꦤ꧀ꦲꦮꦸ​ꦱꦶꦫꦃꦲꦺ​ꦏꦁꦒꦺꦴ​ꦔꦼꦠꦺꦴꦏ꧀ꦏꦏꦺꦏꦱꦸꦱꦃꦲꦤ꧀ꦤꦺ​꧉​ 22ꦥꦢ​ꦠꦶꦠꦺꦤ꧀ꦤꦤ꧀ꦤ​!ꦲꦩ꧀ꦧꦺꦱꦸꦏ꧀ꦲꦶꦁ​ꦢꦶꦤ​ꦏꦿꦸꦠꦺꦴꦤ꧀ꦏꦸꦠꦠꦶꦫꦸꦱ꧀ꦭꦤ꧀ꦱꦶꦢꦺꦴꦤ꧀ꦱꦼꦠꦿꦥꦤ꧀ꦤꦺꦧꦏꦭ꧀ꦭꦺ​ꦭꦸꦮꦶꦃ​ꦲꦺꦤ꧀ꦠꦺꦁꦤꦺꦏ꧀ꦢꦶꦥꦢꦏ꧀ꦏꦏꦺꦏꦫꦺꦴ​ꦱꦼꦠꦿꦥꦤ꧀ꦩꦸ꧉​ 23ꦲꦸꦒ​ꦏꦺꦴꦮꦺ​ꦱꦶꦁ​ꦩꦁꦒꦺꦴꦤ꧀ꦤꦁꦏꦸꦠꦑꦥꦺꦂꦤꦏꦸꦩ꧀꧈​ꦲꦥ​ꦏꦺꦴꦮꦺ​ꦧꦏꦭ꧀ꦢꦶꦗꦸꦚ꧀ꦗꦸꦁ​ꦩꦸꦁꦒꦃ​ꦱ꧀ꦮꦂꦒ​?ꦲꦺꦴꦫ​ꦧꦏꦭ꧀!ꦏꦺꦴꦮꦺ​ꦩꦭꦃ​ꦧꦏꦭ꧀ꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦤꦼꦫꦏ꧉​ꦲꦮꦶꦠ꧀ꦱꦼꦩꦸꦁꦒꦺꦴꦤ꧀ꦤꦺꦤꦁꦏꦸꦠꦱꦺꦴꦢꦺꦴꦩ꧀ꦲꦺꦤꦺꦁꦩꦸꦗꦶꦗꦠ꧀ꦩꦸꦗꦶꦗꦠ꧀ꦏꦪ​ꦱꦶꦁ​ꦲꦺꦤꦺꦁꦤꦁꦠꦼꦔꦃꦩꦸ​꧈​ꦏꦸꦠꦱꦺꦴꦢꦺꦴꦩ꧀ꦩꦼꦱ꧀ꦠꦶꦱꦲꦶꦏꦶ​ꦲꦶꦗꦶꦏ꧀ꦲꦺꦤꦺꦁ꧉​ 24ꦤꦁꦔꦶꦁ​ꦲꦏꦸ​ꦔꦺꦴꦩꦺꦴꦁꦩꦫꦁ​ꦏꦺꦴꦮꦺ​꧈​ꦲꦩ꧀ꦧꦺꦱꦸꦏ꧀ꦲꦶꦁ​ꦢꦶꦤ​ꦏꦿꦸꦠꦺꦴꦤ꧀ꦮꦺꦴꦁꦮꦺꦴꦁ​ꦤꦁꦏꦸꦠꦱꦺꦴꦢꦺꦴꦩ꧀ꦩꦭꦃ​ꦧꦏꦭ꧀ꦤꦩ꧀ꦥ​ꦏꦮꦼꦭꦱ꧀ꦱꦤ꧀ꦱꦶꦁ​ꦭꦸꦮꦶꦃ​ꦒꦼꦢꦺ​ꦠꦼꦤꦶꦩ꧀ꦧꦁꦏꦺꦴꦮꦺ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦚꦼꦭꦸꦏ꧀ꦱꦶꦁ​ꦥꦢ​ꦏꦔꦺꦭ꧀ꦭꦤ꧀꧈​

25꧋ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦩ꧀ꦧꦸꦁꦔꦺ​:“ꦢꦸꦃ​ꦄꦭ꧀ꦭꦃ​ꦧꦥꦏ꧀ꦏꦸ​꧈​ꦒꦸꦱ꧀ꦠꦶꦤꦺ​ꦭꦔꦶꦠ꧀ꦭꦤ꧀ꦧꦸꦩꦶ​꧈​ꦲꦏꦸ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦏꦺꦴꦮꦺ​꧈​ꦲꦮꦶꦠ꧀ꦏꦺꦴꦮꦺ​ꦚꦶꦩ꧀ꦥꦼꦤ꧀ꦥꦽꦏꦫꦥꦽꦏꦫ​ꦲꦶꦏꦶ​ꦏꦁꦒꦺꦴ​ꦮꦺꦴꦁ​ꦱꦶꦁ​ ꦥꦶꦤ꧀ꦠꦼꦂ​ꦭꦤ꧀ꦱꦶꦁ​ꦤ꧀ꦢꦸꦮꦺꦏꦮꦼꦫꦸꦃ꧈​ꦤꦁꦔꦶꦁ​ꦲꦩ꧀ꦧꦺꦴꦏ꧀ꦈꦢꦂꦫꦏꦺꦏꦁꦒꦺꦴ​ꦮꦺꦴꦁ​ꦱꦶꦁ​ꦕꦶꦭꦶꦏ꧀꧈​ 26ꦥꦚ꧀ꦕꦺꦤ꧀ꦪ​ꦔꦺꦴꦤꦺꦴ​ꦧꦥꦏ꧀ꦏꦸ​꧈​ꦲꦶꦏꦶ​ꦥꦚ꧀ꦕꦺꦤ꧀ꦮꦶꦱ꧀ꦢꦢꦶ​ꦏꦉꦥ꧀ꦭꦤ꧀ꦱꦼꦤꦼꦁꦩꦸ​꧉​”

27꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦧꦥꦏ꧀ꦏꦸ​ꦮꦶꦱ꧀ꦩꦱꦿꦃꦲꦏꦺꦱꦼꦩ꧀ꦧꦫꦁ​ꦩꦫꦁ​ꦲꦏꦸ​꧉​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦔꦼꦂꦠꦶ​ꦲꦤꦏ꧀ꦏꦺ​꧈​ꦏꦼꦗꦧ​ꦧꦥꦏ꧀ꦏꦺꦭꦤ꧀ꦲꦺꦴꦫ​ꦲꦺꦤꦺꦁꦱꦶꦁ​ꦔꦼꦂꦠꦶ​ꦧꦥꦏ꧀ꦏꦺ꧈​ꦏꦼꦗꦧ​ꦲꦤꦏ꧀ꦏꦺ​ꦭꦤ꧀ꦮꦺꦴꦁꦮꦺꦴꦁ​ꦱꦶꦁ​ꦢꦶꦏꦼꦤꦭ꧀ꦭꦏꦺꦏꦫꦺꦴ​ꦲꦤꦏ꧀ꦏꦺ​ꦩꦫꦁ​ꦧꦥꦏ꧀ꦏꦺ꧉​

28꧋“ꦏꦧꦺꦃ​ꦮꦺꦴꦁ​ꦱꦶꦁ​ꦏꦔꦺꦭ꧀ꦭꦤ꧀ꦭꦤ꧀ꦏꦧꦺꦴꦠ꧀ꦠꦤ꧀ ꦥꦢ​ꦩ꧀ꦧꦿꦺꦤꦺꦪꦤꦁꦔ꧀ꦒꦺꦴꦤ꧀ꦏꦸ​꧉​ꦲꦏꦸ​ꦧꦏꦭ꧀ꦔꦼꦏꦺꦏ꧀ꦏꦶꦲꦪꦼꦩ꧀ꦭꦤ꧀ꦠꦼꦤ꧀ꦠꦽꦩ꧀ꦩꦫꦁ​ꦏꦺꦴꦮꦺ​꧉​ 29ꦥꦶꦮꦸꦭꦁꦏꦸ​ꦢꦶꦭꦏꦺꦴꦤ꧀ꦤꦶ​ꦭꦤ꧀ꦥꦶꦠꦸꦠꦸꦂꦏꦸ​ꦢꦶꦒꦠꦺꦏ꧀ꦏꦏꦺ꧉​ꦲꦠꦶꦩꦸ​ꦩꦼꦱ꧀ꦠꦶꦧꦏꦭ꧀ꦲꦪꦼꦩ꧀ ꦲꦮꦶꦠ꧀ꦲꦏꦸ​ꦲꦶꦏꦶ​ꦲꦭꦸꦱ꧀ꦭꦤ꧀ꦲꦤ꧀ꦢꦥ꧀ꦥꦱꦺꦴꦂ꧉​ 30ꦥꦶꦮꦸꦭꦁꦏꦸ​ꦲꦺꦴꦫ​ꦲꦔꦺꦭ꧀ꦭꦤ꧀ꦩꦺꦴꦩꦺꦴꦠꦤ꧀ꦏꦸꦏꦸꦮꦶ​ꦲꦺꦤ꧀ꦠꦺꦁ꧉​”

↑ ↑ ↑


꧋ꦠꦸꦗꦸꦮꦤ꧀ꦤꦺ​ꦢꦶꦤ​ꦱꦧꦠ꧀꧈​

꧇​꧑꧒꧇​ 1꧋ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦱꦧꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦭꦏꦸ​ꦭꦶꦮꦠ꧀ꦏꦼꦧꦺꦴꦤ꧀ꦒꦤ꧀ꦢꦸꦩ꧀꧈​ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦏꦿꦱ​ꦔꦼꦭꦶꦃ​꧈​ꦩꦸꦭꦤꦺ​ꦥꦢ​ꦔꦼꦥꦺꦏ꧀ꦏꦶꦮꦺꦴꦃꦲꦺ​ꦒꦤ꧀ꦢꦸꦩ꧀ꦠꦼꦫꦸꦱ꧀ꦢꦶꦥꦔꦤ꧀꧈​ 2ꦏꦢꦸꦁ​ꦮꦺꦴꦁ​ꦥ꦳ꦫꦶꦱꦶ​ꦮꦼꦫꦸꦃ​ꦏꦸꦮꦶ​꧈​ꦠꦼꦫꦸꦱ꧀ꦥꦢ​ꦔꦺꦴꦩꦺꦴꦁꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦢꦼꦭꦺꦴꦏ꧀ꦏꦼꦤ꧀ꦏꦸꦮꦶ​꧈​ꦩꦸꦫꦶꦢ꧀ꦩꦸꦫꦶꦢ꧀ꦩꦸꦥꦢ​ꦤꦼꦫꦏ꧀ꦲꦁꦒꦼꦂꦫꦁꦒꦼꦂ​꧈​ꦲꦮꦶꦠ꧀ꦥꦢ​ꦔ꧀ꦭꦏꦺꦴꦤ꧀ꦤꦶ​ꦥꦽꦏꦫ​ꦱꦶꦁ​ꦢꦶꦭꦫꦁꦲꦶꦁ​ꦢꦶꦤ​ꦱꦧꦠ꧀꧈​”

3꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​ꦔꦺꦤꦺ​:“ꦲꦥ​ꦏꦺꦴꦮꦺ​ꦲꦺꦴꦫ​ꦥꦢ​ꦩꦕ​ꦤꦁꦏꦶꦠꦧ꧀​ꦧꦧ꧀ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦣꦮ꦳ꦼꦢ꧀ ꦢꦺꦴꦁꦔꦺꦢꦺꦏ꧀ꦤꦺꦭꦤ꧀ꦏꦚ꧀ꦕꦏꦚ꧀ꦕꦤꦺ​ꦥꦢ​ꦔꦼꦭꦶꦃ​? 4ꦢꦺꦏ꧀ꦤꦺꦩ꧀ꦊꦧꦸ​ꦤꦁꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ꦩꦁꦔꦤ꧀ꦫꦺꦴꦠꦶ​ꦱꦶꦁ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦸꦒ​ꦏꦚ꧀ꦕꦏꦚ꧀ꦕꦤꦺ​ꦱꦶꦁ​ꦩꦺꦭꦸ​ꦢꦺꦏ꧀ꦤꦺ꧉​ꦩꦁꦏ​ꦩꦶꦠꦸꦫꦸꦠ꧀ꦥꦼꦂꦤꦠꦤ꧀ꦤꦺꦲꦒꦩ​ꦙꦸꦤꦩꦸꦁ​ꦥꦫ​ꦲꦶꦩꦩ꧀ꦱꦶꦁ​ꦏꦼꦭꦶꦭ꧀ꦭꦤ꧀ꦩꦁꦔꦤ꧀ꦫꦺꦴꦠꦶ​ꦏꦸꦮꦶ​꧉​ 5ꦲꦥ​ꦏꦺꦴꦮꦺ​ꦲꦺꦴꦫ​ꦩꦕ​ꦤꦁꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦤꦺꦏ꧀ꦥꦫ​ꦲꦶꦩꦩ꧀ꦱꦶꦁ​ꦱꦧꦼꦤ꧀ꦢꦶꦤ​ꦱꦧꦠ꧀ꦭꦢꦺꦤ꧀ꦤꦁꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀ꦗꦤꦺꦥꦢ​ꦤꦼꦫꦏ꧀ꦥꦼꦂꦤꦠꦤ꧀ꦤꦺꦢꦶꦤ​ꦱꦧꦠ꧀ ꦤꦁꦔꦶꦁ​ꦲꦺꦴꦫ​ꦥꦢ​ꦢꦶꦲꦁꦒꦼꦥ꧀ꦱꦭꦃ​꧉​ 6ꦏꦺꦴꦮꦺ​ꦥꦢ​ꦠꦏ꧀ꦲꦺꦴꦩꦺꦴꦁꦔꦶ:ꦤꦁꦏꦺꦤꦺ​ꦲꦶꦏꦶ​ꦲꦺꦤꦺꦁꦱꦶꦁ​ꦔꦸꦁꦏꦸꦭ꧀ꦭꦶ​ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏ꧀ꦮꦱꦤꦺ​꧉​ 7ꦤꦁꦏꦶꦠꦧ꧀​ꦭꦲꦸꦠ꧀ꦲꦺꦤꦺꦁꦠꦸꦭꦶꦱ꧀ꦱꦤ꧀ꦔꦺꦤꦺ​ꦠ​:'ꦱꦶꦁ​ꦠꦏ꧀ꦏꦉꦥ꧀ꦥꦏꦺꦏꦸꦮꦶ​ꦏꦮꦼꦭꦱ꧀ꦱꦤ꧀ ꦲꦺꦴꦫ​ꦏꦸꦂꦧꦤ꧀꧉'​ꦤꦺꦏ꧀ꦏꦺꦴꦮꦺ​ꦢꦸꦤꦸꦁꦠꦼꦒꦼꦱ꧀ꦱꦺ​ꦠꦸꦭꦶꦱ꧀ꦱꦤ꧀ꦏꦸꦮꦶ​꧈​ꦏꦺꦴꦮꦺ​ꦩꦼꦱ꧀ꦠꦶꦲꦺꦴꦫ​ꦧꦏꦭ꧀ꦚꦭꦃꦚꦭꦃꦲꦏꦺꦮꦺꦴꦁꦮꦺꦴꦁ​ꦱꦶꦁ​ꦧꦼꦤꦼꦂ​꧉​ 8ꦲꦮꦶꦠ꧀ꦲꦤꦏ꧀ꦏꦺ​ꦩꦤꦸꦁꦱ​ꦱꦶꦁ​ꦏ꧀ꦮꦱ​ꦔꦫꦤ꧀ꦤꦶ​ꦲꦥ​ꦱꦶꦁ​ꦏꦼꦭꦶꦭ꧀ꦭꦤ꧀ꦭꦤ꧀ꦱꦶꦁ​ꦲꦺꦴꦫ​ꦏꦼꦭꦶꦭ꧀ꦭꦤ꧀ꦲꦶꦁ​ꦢꦶꦤ​ꦱꦧꦠ꧀꧈​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁ​ꦲꦶꦁ​ꦢꦶꦤ​ꦱꦧꦠ꧀꧈​

9꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ꦱꦁꦏꦏꦺꦴꦤꦺꦴ​ꦲꦉꦥ꧀ꦤꦁꦱꦶꦤꦒꦸꦏ꧀ꦏꦺꦮꦺꦴꦁꦮꦺꦴꦁ​ꦏꦸꦮꦶ​꧉​ 10ꦤꦁꦱꦶꦤꦒꦸꦏ꧀ꦏꦺꦴꦤꦺꦴ​ꦲꦺꦤꦺꦁꦮꦺꦴꦁ​ꦱꦶꦁ​ꦠꦔꦤ꧀ꦤꦺ​ꦭꦸꦩ꧀ꦥꦸꦃ​꧉​ꦲꦺꦤꦺꦁꦮꦺꦴꦁ​ꦱꦶꦗꦶꦭꦺꦴꦫꦺꦴꦱꦶꦁ​ꦥꦚ꧀ꦕꦺꦤ꧀ꦤꦸꦗꦸ​ꦲꦉꦥ꧀​ꦔ꧀ꦒꦺꦴꦭꦺꦏ꧀ꦏꦶ​ꦱꦭꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁꦮꦺꦴꦁ​ꦲꦶꦏꦶ​ꦠꦏꦺꦴꦤ꧀ꦩꦫꦁ​ꦢꦺꦏ꧀ꦤꦺ:“ꦲꦥ​ꦲꦺꦤ꧀ꦠꦸꦏ꧀ꦤꦩ꧀ꦧꦤꦶ​ꦮꦺꦴꦁ​ꦲꦶꦁ​ꦢꦶꦤ​ꦱꦧꦠ꧀?”

11꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ​:“ꦱꦼꦩꦸꦁꦒꦺꦴꦤ꧀ꦤꦺꦤꦁꦠꦼꦔꦃꦩꦸ​ꦲꦺꦤꦺꦁꦮꦺꦴꦁ​ꦱꦶꦁ​ꦤ꧀ꦢꦸꦮꦺꦮꦼꦢꦸꦱ꧀ꦱꦶꦗꦶ​꧈​ꦠꦼꦫꦸꦱ꧀ꦮꦼꦢꦸꦱ꧀ꦏꦸꦮꦶ​ꦏꦼꦕꦼꦩ꧀ꦥ꧀ꦭꦸꦁ​ꦤꦁꦭꦸꦮꦁꦔꦤ꧀ꦲꦶꦁ​ꦢꦶꦤ​ꦱꦧꦠ꧀꧈​ꦩꦺꦴꦱꦺꦴꦏ꧀ꦮꦺꦴꦁꦔꦺ​ꦲꦺꦴꦫ​ꦤ꧀ꦢꦁꦚꦩ꧀ꦥꦺꦤ꧀ꦤꦶꦮꦼꦢꦸꦱ꧀ꦱꦺꦢꦶꦠꦫꦶꦏ꧀ꦱꦁꦏꦭꦸꦮꦔꦤ꧀ꦤꦺ? 12ꦭꦃ​ꦩꦤꦸꦁꦱ​ꦲꦗꦶꦤꦺ​ꦲꦥ​ꦲꦺꦴꦫ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦮꦼꦢꦸꦱ꧀?ꦩꦸꦭꦤꦺ​ꦪ​ꦲꦺꦤ꧀ꦠꦸꦏ꧀ꦤꦸꦭꦸꦁꦔꦶ​ꦮꦺꦴꦁ​ꦲꦶꦁ​ꦢꦶꦤ​ꦱꦧꦠ꧀꧈​” 13ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁ​ꦱꦶꦁ​ꦭꦫ​ꦠꦔꦤ꧀ꦤꦺ​:“ꦠꦔꦤ꧀ꦩꦸ​ꦢꦶꦲꦼꦠꦸꦁꦔꦏꦺ!”

꧋ꦮꦺꦴꦁꦔꦺ​ꦠꦼꦫꦸꦱ꧀ꦔꦼꦠꦸꦁꦔꦏꦺꦠꦔꦤ꧀ꦤꦺ​ꦭꦤ꧀ꦱꦲꦶꦏꦶ​ꦠꦔꦤ꧀ꦏꦸꦮꦶ​ꦮꦶꦱ꧀ꦮꦫꦱ꧀ꦏꦪ​ꦠꦔꦤ꧀ꦱꦶꦁ​ꦭꦶꦪꦤꦺ​꧉​ 14ꦤꦁꦔꦶꦁ​ꦥꦫ​ꦥ꦳ꦫꦶꦱꦶ​ꦠꦼꦫꦸꦱ꧀ꦥꦢ​ꦩꦼꦠꦸ​ꦭꦤ꧀ꦥꦢ​ꦉꦩ꧀ꦧꦸꦏ꧀ꦏꦤ꧀ꦏꦼꦥꦿꦶꦪꦺ​ꦲꦼꦁꦒꦺꦴꦤꦺ​ꦲꦉꦥ꧀ꦩꦠꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦥꦼꦭꦢꦺꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦤꦸꦁꦱ​꧉​

15꧋ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦸꦔꦸ​ꦧꦧ꧀ꦏꦼꦏꦉꦥ꧀ꦥꦤ꧀ꦤꦺ​ꦥꦫ​ꦥ꦳ꦫꦶꦱꦶ​ꦩꦲꦸ​꧈​ꦢꦺꦏ꧀ꦤꦺꦠꦼꦫꦸꦱ꧀ꦭꦸꦔ​ꦱꦁꦏꦏꦺꦴꦤꦺꦴ​꧉​ꦮꦺꦴꦁ​ꦲꦺꦴꦏꦺꦃꦥꦢ​ꦩꦺꦭꦸ​ꦢꦺꦏ꧀ꦤꦺ꧉​ꦏꦧꦺꦃ​ꦮꦺꦴꦁ​ꦱꦶꦁ​ꦭꦫ​ꦥꦢ​ꦢꦶꦮꦫꦱ꧀ꦱꦏꦺ꧉​ 16ꦤꦁꦔꦶꦁ​ꦏꦧꦺꦃ​ꦥꦢ​ꦢꦶꦮꦤ꧀ꦠꦶꦮꦤ꧀ꦠꦶ​꧈​ꦢꦶꦥꦼꦔꦶꦁ​ꦔꦺꦴꦩꦺꦴꦁꦔꦺꦴꦩꦺꦴꦁꦔꦏꦺꦧꦧ꧀ꦢꦺꦏ꧀ꦤꦺ꧉​ 17ꦏꦸꦮꦶ​ꦩꦫꦏ꧀ꦏꦏꦺꦏ꧀ꦭꦏꦺꦴꦤ꧀ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦏ꧀​ꦩ꧀ꦧꦶꦪꦺꦤ꧀ꦭꦶꦮꦠ꧀ꦤꦧꦶ​ꦪꦺꦱꦪ​꧈​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

18“ꦲꦶꦏꦶ​ꦥꦼꦭꦢꦺꦤ꧀ꦏꦸ꧈​
ꦢꦺꦏ꧀ꦤꦺꦱꦶꦁ​ꦠꦏ꧀ꦥꦶꦭꦶꦃ​꧉​
ꦢꦺꦏ꧀ꦤꦺꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧈​
ꦱꦶꦁ​ꦤ꧀ꦢꦢꦺꦏ꧀ꦏꦏꦺꦱꦼꦤꦼꦁꦔꦺ​ꦲꦠꦶꦏꦸ​꧉​
ꦢꦺꦏ꧀ꦤꦺꦧꦏꦭ꧀ꦠꦏ꧀ꦏꦺꦏ꧀ꦏꦶꦫꦺꦴꦃꦏꦸ​꧉​
ꦢꦺꦏ꧀ꦤꦺꦧꦏꦭ꧀ꦔꦧꦂꦫꦏꦺ
ꦩꦫꦁ​ꦏꦧꦺꦃ​ꦧꦁꦱ​ꦧꦧ꧀ꦏꦧꦼꦤꦼꦫꦤ꧀ꦏꦸ꧉​
19ꦥꦼꦭꦢꦺꦤ꧀ꦏꦸꦲꦺꦴꦫ​ꦧꦏꦭ꧀ꦠꦸꦏꦂꦥꦢꦸ​
ꦲꦥ​ꦒꦼꦩ꧀ꦧꦂꦒꦼꦩ꧀ꦧꦺꦴꦂ​꧉​
ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦏꦭ꧀
ꦏꦿꦸꦔꦸ​ꦱ꧀ꦮꦫꦤꦺ​ꦤꦁꦢꦭꦤ꧀ꦢꦭꦤ꧀꧈​
20ꦢꦩꦺꦤ꧀ꦱꦶꦁ​ꦥꦼꦥꦼꦱ꧀
ꦲꦺꦴꦫ​ꦧꦏꦭ꧀ꦢꦶꦕꦺꦴꦏ꧀ꦭꦺꦏ꧀
ꦭꦤ꧀ꦱꦼꦤ꧀ꦠꦶꦂꦱꦶꦁ​ꦩꦸꦫꦸꦥ꧀ꦥꦺꦏꦼꦠꦶꦥ꧀ꦏꦼꦠꦶꦥ꧀
ꦲꦺꦴꦫ​ꦧꦏꦭ꧀ꦢꦶꦥꦠꦺꦤ꧀ꦤꦶ​꧉​
ꦥꦼꦭꦢꦺꦤ꧀ꦏꦸꦧꦏꦭ꧀ꦠꦼꦩꦼꦤ꧀
ꦠꦼꦫꦸꦱ꧀ꦔꦸꦢꦶ​ꦔꦤ꧀ꦠꦶ​ꦏꦧꦼꦤꦼꦂꦫꦤ꧀​ꦤ꧀ꦢꦸꦮꦺꦤ꧀ꦤꦶ​ꦏꦩꦼꦤꦁꦔꦤ꧀꧈​
21ꦪ​ꦥꦼꦭꦢꦺꦤ꧀ꦏꦸꦲꦶꦏꦶ​
ꦱꦶꦁ​ꦧꦏꦭ꧀ꦢꦢꦶ​ꦥꦼꦔꦉꦥ꧀ꦲꦉꦥ꧀ꦥꦺ​ꦏꦧꦺꦃ​ꦧꦁꦱ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦨꦺꦭ꧀ꦱꦼꦧꦸꦭ꧀꧈​

22꧋ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦔ꧀ꦒꦮ​ꦮꦺꦴꦁ​ꦭꦩꦸꦂ​ꦱꦶꦁ​ꦲꦸꦒ​ꦧꦶꦱꦸ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁꦔꦺ​ꦢꦶꦏ꧀ꦮꦱꦤꦶ​ꦢꦼꦩꦶꦠ꧀꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁꦔꦺ​ꦠꦼꦫꦸꦱ꧀ꦧꦶꦱ​ꦔꦺꦴꦩꦺꦴꦁꦭꦤ꧀ꦮꦼꦫꦸꦃ​ꦩꦼꦤꦺꦃ​꧉​ 23ꦮꦺꦴꦁ​ꦏꦧꦺꦃ​ꦥꦢ​ꦔ꧀ꦒꦸꦩꦸꦤ꧀ꦠꦼꦤꦤ꧀ꦭꦤ꧀ꦥꦢ​ꦔꦺꦴꦩꦺꦴꦁ:“ꦲꦥ​ꦲꦶꦏꦶ​ꦢꦸꦢꦸ​ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ꦪ​꧈​ꦱꦶꦁ​ꦮꦶꦱ꧀ꦢꦶꦲꦺꦴꦩꦺꦴꦁꦔꦏꦺꦤꦺꦏ꧀ꦧꦏꦭ꧀ꦠꦼꦏ​?”

24꧋ꦏꦢꦸꦁ​ꦥꦫ​ꦥ꦳ꦫꦶꦱꦶ​ꦏꦿꦸꦔꦸ​ꦮꦺꦴꦁꦮꦺꦴꦁ​ꦔꦺꦴꦩꦺꦴꦁꦔꦺꦴꦤꦺꦴ​꧈​ꦠꦼꦫꦸꦱ꧀ꦥꦢ​ꦱꦼꦩꦲꦸꦂ​:“ꦮꦺꦴꦁ​ꦏꦸꦮꦶ​ꦧꦶꦱ​ꦔꦼꦠꦺꦴꦏ꧀ꦏꦏꦺꦢꦼꦩꦶꦠ꧀ ꦲꦮꦶꦠ꧀ꦢꦶꦏꦺꦏ꧀ꦏꦶꦥꦔ꧀ꦮꦱ​ꦏꦫꦺꦴ​ꦨꦺꦭ꧀ꦱꦼꦧꦸꦭ꧀ ꦫꦠꦸꦤꦺ​ꦢꦼꦩꦶꦠ꧀ꦢꦼꦩꦶꦠ꧀꧈​”

25꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦂꦠꦶ​ꦥꦶꦏꦶꦂꦫꦤ꧀ꦤꦺ​ꦥꦫ​ꦥ꦳ꦫꦶꦱꦶ​ꦩꦲꦸ​꧈​ꦩꦸꦭꦤꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦤꦼꦒꦫ​ꦱꦶꦁ​ꦫꦪꦠ꧀ꦠꦺꦥꦢ​ꦕꦺꦴꦁ​ꦏꦿꦺꦃ​ꦩꦼꦱ꧀ꦠꦶꦧꦏꦭ꧀ꦲꦩ꧀ꦧꦿꦸꦏ꧀꧈​ꦱꦼꦩꦺꦴꦤꦺꦴ​ꦲꦸꦒ​ꦏꦸꦠꦲꦥ​ꦧꦿꦪꦠ꧀ ꦤꦺꦏ꧀ꦥꦢ​ꦩꦼꦩꦸꦁꦱꦸꦃꦲꦤ꧀ꦩꦫꦁ​ꦱꦏ꧀ꦥꦢꦥꦢ꧈​ꦩꦼꦱ꧀ꦠꦶꦧꦏꦭ꧀ꦧꦸꦧꦿꦃ​꧉​ 26ꦭꦃ​ꦤꦺꦏ꧀ꦢꦼꦩꦶꦠ꧀ꦤꦸꦤ꧀ꦢꦸꦁꦢꦼꦩꦶꦠ꧀ ꦠꦶꦧꦏꦺ​ꦏꦿꦠꦺꦴꦤꦺ​ꦱꦺꦠꦤ꧀​ꦪ​ꦕꦺꦴꦁ​ꦏꦿꦺꦃ​ꦭꦤ꧀ꦪ​ꦲꦺꦴꦫ​ꦧꦶꦱ​ꦔꦢꦼꦏ꧀? 27ꦏꦺꦴꦮꦺ​ꦔꦺꦴꦩꦺꦴꦁꦤꦺꦏ꧀ꦲꦏꦸ​ꦤꦸꦤ꧀ꦢꦸꦁꦢꦼꦩꦶꦠ꧀ ꦲꦮꦶꦠ꧀ꦨꦺꦭ꧀ꦱꦼꦧꦸꦭ꧀ꦱꦶꦁ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦲꦏꦸ​꧉​ꦤꦺꦏ꧀ꦔꦺꦴꦤꦺꦴ​꧈​ꦭꦃ​ꦩꦸꦫꦶꦢ꧀ꦩꦸꦫꦶꦢ꧀ꦩꦸꦏꦸꦮꦶ​ꦱꦶꦁ​ꦤꦸꦤ꧀ꦢꦸꦁꦔꦶꦢꦼꦩꦶꦠ꧀ꦲꦺꦤ꧀ꦠꦸꦏ꧀ꦥꦔ꧀ꦮꦱ​ꦱꦁꦏꦲꦼꦤ꧀ꦢꦶ​?ꦩꦸꦫꦶꦢ꧀ꦩꦸꦫꦶꦢ꧀ꦩꦸꦢꦺꦮꦺꦠꦤ꧀ꦢꦤꦺꦤꦺꦏ꧀ꦥꦶꦏꦶꦂꦫꦤ꧀ꦩꦸ​ꦏꦸꦮꦶ​ꦏ꧀ꦭꦺꦫꦸ​꧉​ 28ꦲꦏꦸ​ꦤꦸꦤ꧀ꦢꦸꦁꦔꦶꦢꦼꦩꦶꦠ꧀ꦏꦸꦮꦶ​ꦱꦁꦏꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦲꦏꦸ​꧉​ꦏꦸꦮꦶ​ꦠꦤ꧀ꦢꦤꦺꦤꦺꦏ꧀ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦼꦏꦤꦶ​ꦏꦺꦴꦮꦺ​꧉​

29꧋“ꦲꦥ​ꦲꦺꦤꦺꦁꦮꦺꦴꦁ​ꦧꦶꦱ​ꦔ꧀ꦊꦧꦺꦴꦤ꧀ꦤꦶꦲꦺꦴꦩꦃꦲꦺ​ꦮꦺꦴꦁ​ꦱꦶꦁ​ꦫꦺꦴꦱ​ꦲꦮꦏ꧀ꦏꦺ​ꦠꦼꦫꦸꦱ꧀ꦚꦺꦴꦭꦺꦴꦁ​ꦱꦼꦩ꧀ꦧꦫꦁꦔꦺ?ꦩꦼꦱ꧀ꦠꦶꦲꦺꦴꦫ​ꦧꦶꦱ​!ꦩꦭꦶꦁ​ꦔꦺ​ꦏꦸꦢꦸ​ꦧꦶꦱ​ꦲꦩ꧀ꦧꦤ꧀ꦢ​ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦤ꧀ꦢꦶꦱꦶꦏ꧀ ꦱꦏ꧀ꦢꦸꦫꦸꦁꦔꦺꦔꦸꦱꦸꦁꦔꦶ​ꦱꦼꦩ꧀ꦧꦫꦁꦔꦺ꧉​

30꧋“ꦮꦺꦴꦁ​ꦱꦶꦁ​ꦲꦺꦴꦫ​ꦔꦿꦸꦗꦸꦏ꧀ꦏꦶ​ꦲꦏꦸ​꧈​ꦏꦸꦮꦶ​ꦠꦼꦒꦼꦱ꧀ꦱꦺ​ꦔ꧀ꦭꦮꦤ꧀ꦲꦏꦸ​꧉​ꦭꦤ꧀ꦱꦥ​ꦱꦶꦁ​ꦲꦺꦴꦫ​ꦩꦺꦭꦸ​ꦲꦏꦸ​ꦔꦸꦩ꧀ꦥꦸꦭ꧀ꦭꦏꦺꦮꦺꦴꦁꦮꦺꦴꦁ​꧈​ꦏꦸꦮꦶ​ꦠꦼꦒꦼꦱ꧀ꦱꦺ​ꦩꦭꦃ​ꦩ꧀ꦧꦸꦪꦂꦫꦏꦺ꧉​ 31ꦩꦸꦭꦤꦺ​ꦏꦺꦴꦮꦺ​ꦠꦏ꧀ꦲꦺꦴꦩꦺꦴꦁꦔꦶ:ꦱꦏ꧀ꦏꦺꦃꦲꦺꦢꦺꦴꦱ​ꦭꦤ꧀ꦥꦼꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦢꦶꦔꦥꦸꦫ꧉​ꦤꦁꦔꦶꦁ​ꦱꦥ​ꦱꦶꦁ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦩꦫꦁ​ꦫꦺꦴꦃ​ꦱꦸꦕꦶ​ꦲꦺꦴꦫ​ꦧꦏꦭ꧀ꦢꦶꦔꦥꦸꦫ꧉​ 32ꦤꦺꦏ꧀ꦲꦺꦤꦺꦁꦮꦺꦴꦁ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦲꦤꦏ꧀ꦏꦺ​ꦩꦤꦸꦁꦱ​꧈​ꦮꦺꦴꦁ​ꦏꦸꦮꦶ​ꦧꦏꦭ꧀ꦢꦶꦔꦥꦸꦫ꧉​ꦤꦁꦔꦶꦁ​ꦮꦺꦴꦁ​ꦱꦶꦁ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦩꦫꦁ​ꦫꦺꦴꦃ​ꦱꦸꦕꦶ​꧈​ꦮꦺꦴꦁ​ꦏꦸꦮꦶ​ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦧꦏꦭ꧀ꦢꦶꦔꦥꦸꦫ꧈​ꦲꦺꦴꦫ​ꦧꦏꦭ꧀ꦢꦶꦔꦥꦸꦫꦲꦶꦁ​ꦗꦩꦤ꧀ꦱꦲꦶꦏꦶ​ꦭꦤ꧀ꦲꦸꦒ​ꦲꦺꦴꦫ​ꦢꦶꦔꦥꦸꦫꦲꦶꦁ​ꦗꦩꦤ꧀ꦱꦶꦁ​ꦧꦏꦭ꧀ꦠꦼꦏ​꧉​”

꧋ꦧꦧ꧀ꦮꦶꦠ꧀ꦭꦤ꧀ꦮꦺꦴꦃꦲꦺ​꧉​

33꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​:“ꦮꦶꦠ꧀ꦱꦶꦁ​ꦲꦥꦶꦏ꧀ꦩꦼꦱ꧀ꦠꦶꦪ​ꦔꦼꦠꦺꦴꦏ꧀ꦏꦏꦺꦮꦺꦴꦁ​ꦱꦶꦁ​ꦲꦥꦶꦏ꧀꧈​ꦤꦺꦏ꧀ꦮꦶꦠ꧀ꦠꦺ​ꦲꦭ​꧈​ꦮꦺꦴꦃꦲꦺ​ꦪ​ꦲꦭ​꧉​ꦲꦮꦶꦠ꧀ꦮꦺꦴꦃꦲꦺ​ꦏꦸꦮꦶ​ꦔꦼꦠꦺꦴꦏ꧀ꦏꦏꦺꦲꦥꦶꦏ꧀ꦲꦺꦭꦺꦏ꧀ꦏꦺꦮꦶꦠ꧀ꦠꦺ​꧉​ 34ꦏꦺꦴꦮꦺ​ꦏꦸꦮꦶ​ꦲꦤꦏ꧀ꦏꦤ꧀ꦲꦸꦭ​!ꦏꦼꦥꦿꦶꦪꦺ​ꦏꦺꦴꦮꦺ​ꦧꦶꦱꦤꦺ​ꦔꦺꦴꦩꦺꦴꦁꦔꦏꦺꦱꦶꦁ​ꦧꦼꦕꦶꦏ꧀ ꦤꦺꦏ꧀ꦲꦠꦶꦩꦸ​ꦢꦺꦮꦺꦲꦭ​?ꦲꦮꦶꦠ꧀ꦲꦥ​ꦱꦶꦁ​ꦩꦼꦠꦸ​ꦱꦁꦏꦭꦩ꧀ꦧꦺ​꧈​ꦏꦸꦮꦶ​ꦩꦼꦠꦸꦤꦺ​ꦱꦁꦏꦲꦠꦶ​꧉​ 35ꦮꦺꦴꦁ​ꦧꦼꦕꦶꦏ꧀ꦏꦸꦮꦶ​ꦲꦠꦶꦤꦺ​ꦪ​ꦩꦼꦱ꧀ꦠꦶꦧꦼꦕꦶꦏ꧀ꦭꦤ꧀ꦧꦏꦭ꧀ꦧꦶꦱ​ꦔꦼꦠꦺꦴꦏ꧀ꦏꦏꦺꦧꦫꦁ​ꦱꦶꦁ​ꦧꦼꦕꦶꦏ꧀ꦱꦁꦏꦱꦶꦩ꧀ꦥꦼꦤ꧀ꦤꦤ꧀ꦤꦺ​꧉​ꦤꦁꦔꦶꦁ​ꦮꦺꦴꦁ​ꦲꦭ​꧈​ꦲꦠꦶꦤꦺ​ꦪ​ꦲꦭ​ꦭꦤ꧀ꦪ​ꦔꦼꦠꦺꦴꦏ꧀ꦏꦏꦺꦧꦫꦁ​ꦱꦶꦁ​ꦲꦭ​ꦱꦁꦏꦱꦶꦩ꧀ꦥꦼꦤ꧀ꦤꦤ꧀ꦤꦺ​꧉​ 36“ꦩꦸꦭꦤꦺ​ꦥꦢ​ꦔꦼꦂꦠꦶꦪ​:ꦲꦶꦁ​ꦢꦶꦤ​ꦏꦿꦸꦠꦺꦴꦤ꧀ꦏꦧꦺꦃ​ꦮꦺꦴꦁ​ꦧꦏꦭ꧀ꦏꦸꦢꦸ​ꦲꦱꦺꦴꦏ꧀ꦥꦼꦚ꧀ꦗꦮꦧ꧀ꦧꦧ꧀ꦱꦧꦼꦤ꧀ꦠꦼꦩ꧀ꦧꦸꦁ​ꦱꦶꦁ​ꦔꦮꦸꦂ​ꦮꦲꦺ​꧉​ 37ꦲꦮꦶꦠ꧀ꦠꦼꦩ꧀ꦧꦸꦁꦠꦼꦩ꧀ꦧꦸꦁꦩꦸ​ꦢꦺꦮꦺꦱꦶꦁ​ꦧꦏꦭ꧀ꦔꦫꦤ꧀ꦤꦶ​ꦏꦺꦴꦮꦺ​ꦧꦼꦤꦼꦂ​ꦲꦥ​ꦱꦭꦃ​꧉​”

꧋ꦧꦧ꧀​ꦚ꧀ꦗꦭꦸꦏ꧀ꦠꦤ꧀ꦢ꧉​

38꧋ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦲꦺꦤꦺꦁꦒꦸꦫꦸ​ꦏꦶꦠꦧ꧀​ꦭꦤ꧀ꦮꦺꦴꦁ​ꦥ꦳ꦫꦶꦱꦶ​ꦱꦶꦗꦶꦭꦺꦴꦫꦺꦴꦱꦶꦁ​ꦔꦺꦴꦩꦺꦴꦁ ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦒꦸꦫꦸ​꧈​ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦮꦼꦫꦸꦃ​ꦠꦤ꧀ꦢꦤꦺꦱꦁꦏꦏꦺꦴꦮꦺ​꧉​”

39꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦥꦚ꧀ꦕꦺꦤ꧀ꦲꦭ​ꦠꦼꦤꦤ꧀ꦭꦤ꧀ꦒꦼꦢꦺ​ꦠꦼꦤꦤ꧀ꦢꦺꦴꦱꦤꦺ​ꦮꦺꦴꦁ​ꦗꦩꦤ꧀ꦱꦲꦶꦏꦶ​꧉​ꦥꦢ​ꦚ꧀ꦗꦭꦸꦏ꧀ꦠꦤ꧀ꦢꦥꦔ꧀ꦮꦱ​꧈​ꦤꦁꦔꦶꦁ​ꦲꦺꦴꦫ​ꦧꦏꦭ꧀ꦤꦩ꧀ꦥ​ꦠꦤ꧀ꦢ꧈​ꦏꦼꦗꦧ​ꦠꦤ꧀ꦢꦤꦺꦤꦧꦶ​ꦪꦺꦴꦤꦃ꧉​ 40ꦏꦪ​ꦲꦼꦁꦒꦺꦴꦤꦺ​ꦤꦧꦶ​ꦪꦺꦴꦤꦃꦤꦁꦮꦼꦠꦼꦁꦔꦺ​ꦲꦶꦮꦏ꧀ꦠꦼꦭꦸꦁ​ꦢꦶꦤ​ꦠꦼꦭꦸꦁ​ꦮꦼꦔꦶ​꧈​ꦩꦼꦁꦏꦺꦴꦤꦺꦴ​ꦲꦸꦒ​ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦤꦁꦏꦸꦧꦸꦂ​ꦠꦼꦭꦸꦁ​ꦢꦶꦤ​ꦠꦼꦭꦸꦁ​ꦮꦼꦔꦶ​꧉​ 41ꦲꦩ꧀ꦧꦺꦱꦸꦏ꧀ꦲꦶꦁ​ꦢꦶꦤ​ꦏꦿꦸꦠꦺꦴꦤ꧀ꦮꦺꦴꦁꦮꦺꦴꦁ​ꦏꦸꦠꦤꦶꦤꦺꦮꦺ​ꦧꦏꦭ꧀ꦥꦢ​ꦢꦶꦠꦔꦺꦏ꧀ꦏꦏꦺꦧꦉꦁ​ꦏꦫꦺꦴ​ꦮꦺꦴꦁꦮꦺꦴꦁ​ꦲꦶꦏꦶ​ꦭꦤ꧀ꦧꦏꦭ꧀ꦚꦭꦃꦚꦭꦃꦲꦏꦺꦮꦺꦴꦁꦮꦺꦴꦁ​ꦲꦶꦏꦶ​꧉​ꦲꦮꦶꦠ꧀ꦢꦺꦴꦁꦔꦺꦮꦺꦴꦁ​ꦤꦶꦤꦺꦮꦺ​ꦏꦿꦸꦔꦸ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦢꦶꦒꦼꦭꦂꦫꦏꦺꦏꦫꦺꦴ​ꦤꦧꦶ​ꦪꦺꦴꦤꦃ꧈​ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦫꦸꦱ꧀ꦥꦢ​ꦚ꧀ꦗꦭꦸꦏ꧀ꦔꦥꦸꦫ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦤꦶꦁꦒꦭ꧀ꦭꦏꦸ​ꦱꦶꦁ​ꦲꦭ​꧉​ꦭꦃ​ꦩꦁꦏ​ꦱꦶꦁ​ꦔꦢꦼꦏ꧀ꦤꦁꦏꦺꦤꦺ​ꦲꦶꦏꦶ​ꦒꦼꦢꦺꦤꦺꦔꦸꦁꦏꦸꦭ꧀ꦭꦶ​ꦤꦧꦶ​ꦪꦺꦴꦤꦃ꧉​ 42ꦲꦩ꧀ꦧꦺꦱꦸꦏ꧀ꦲꦶꦁ​ꦢꦶꦤ​ꦏꦿꦸꦠꦺꦴꦤ꧀ꦫꦠꦸ​ꦮꦺꦢꦺꦴꦏ꧀ꦱꦁꦏꦧꦮꦃꦏꦶꦢꦸꦭ꧀ꦧꦏꦭ꧀ꦩꦗꦸ​ꦭꦤ꧀ꦧꦏꦭ꧀ꦚꦭꦃꦚꦭꦃꦲꦏꦺꦮꦺꦴꦁꦮꦺꦴꦁ​ꦲꦶꦏꦶ​꧉​ꦲꦮꦶꦠ꧀ꦫꦠꦸ​ꦏꦸꦮꦶ​ꦠꦼꦏ​ꦱꦁꦏꦥꦺꦴꦗꦺꦴꦏ꧀ꦏꦺ​ꦧꦸꦩꦶ​꧈​ꦏꦼꦥꦺꦔꦶꦤ꧀ꦔꦿꦸꦔꦺꦴꦏ꧀ꦏꦏꦺꦏꦮꦼꦫꦸꦃꦲꦺꦫꦠꦸ​ꦯꦺꦴꦭꦺꦩꦤ꧀꧈​ꦭꦃ​ꦩꦁꦏ​ꦱꦶꦁ​ꦔꦢꦼꦏ꧀ꦤꦁꦏꦺꦤꦺ​ꦲꦶꦏꦶ​ꦔꦸꦁꦏꦸꦭ꧀ꦭꦶ​ꦫꦠꦸ​ꦯꦺꦴꦭꦺꦩꦤ꧀꧈​”

꧋ꦧꦭꦶꦏ꧀ꦏꦺ​ꦢꦼꦩꦶꦠ꧀꧈​

43꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦤꦺꦏ꧀ꦲꦺꦤꦺꦁꦢꦼꦩꦶꦠ꧀ꦩꦼꦠꦸ​ꦱꦁꦏꦱꦏ꧀ꦮꦶꦗꦶꦤꦺꦮꦺꦴꦁ​꧈​ꦢꦼꦩꦶꦠ꧀ꦩꦲꦸ​ꦠꦼꦫꦸꦱ꧀​ꦩ꧀ꦭꦏꦸꦩ꧀ꦭꦏꦸ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦺꦴꦫ​ꦏꦁꦒꦺꦴꦤ꧀ꦤꦤ꧀ꦮꦺꦴꦁ​꧈​ꦔ꧀ꦒꦺꦴꦭꦺꦏ꧀ꦥꦁꦒꦺꦴꦤ꧀ꦤꦤ꧀ꦏꦁꦒꦺꦴ​ꦭꦺꦫꦺꦤ꧀ ꦤꦁꦔꦶꦁ​ꦲꦺꦴꦫ​ꦤꦼꦩꦸ​꧉​ 44ꦢꦼꦩꦶꦠ꧀ꦠꦺꦠꦼꦫꦸꦱ꧀ꦩꦶꦏꦶꦂ​:'ꦌꦤꦏ꧀ꦏꦺꦠꦏ꧀ꦧꦭꦶꦏ꧀ꦮꦲꦺ​ꦤꦁꦲꦺꦴꦩꦃ​ꦱꦶꦁ​ꦮꦶꦱ꧀ꦠꦏ꧀ꦠꦶꦁꦒꦭ꧀꧉'​ꦢꦼꦩꦶꦠ꧀ꦠꦺꦠꦼꦫꦸꦱ꧀ꦧꦭꦶꦏ꧀ꦤꦁꦲꦺꦴꦩꦃꦲꦺ​ꦭꦤ꧀ꦮꦼꦫꦸꦃ​ꦤꦺꦏ꧀ꦱꦲꦶꦏꦶ​ꦮꦶꦱ꧀ꦉꦱꦶꦏ꧀ꦭꦤ꧀ꦢꦶꦠꦠ​ꦲꦥꦶꦏ꧀꧈​ 45ꦢꦼꦩꦶꦠ꧀ꦩꦲꦸ​ꦠꦼꦫꦸꦱ꧀ꦭꦸꦔ​ꦔ꧀ꦒꦺꦴꦭꦺꦏ꧀ꦏꦶ​ꦏꦚ꧀ꦕꦤꦺ​꧈​ꦠꦼꦫꦸꦱ꧀ꦧꦭꦶꦏ꧀​ꦔ꧀ꦒꦮ​ꦢꦼꦩꦶꦠ꧀ꦥꦶꦠꦸ​꧈​ꦱꦶꦁ​ꦲꦭꦤꦺ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦢꦺꦏ꧀ꦤꦺꦢꦺꦮꦺ꧉​ꦢꦼꦩꦶꦠ꧀ꦢꦼꦩꦶꦠ꧀ꦏꦸꦮꦶ​ꦠꦼꦫꦸꦱ꧀ꦩꦁꦒꦺꦴꦤ꧀ꦲꦶꦁ​ꦮꦺꦴꦁ​ꦩꦲꦸ​꧉​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦮꦺꦴꦁ​ꦏꦸꦮꦶ​ꦏꦱꦸꦱꦃꦲꦤ꧀ꦤꦺ​ꦩꦭꦃ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦩꦲꦸꦤꦺ​꧈​ꦢꦺꦴꦁꦔꦺꦤꦩꦸꦁ​ꦏꦁꦒꦺꦴꦤ꧀ꦤꦤ꧀ꦢꦼꦩꦶꦠ꧀ꦱꦶꦗꦶ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​꧉​

46꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦗꦶꦏ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦲꦶꦧꦸꦤꦺ​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​ꦥꦢ​ꦔꦼꦤ꧀ꦠꦺꦤ꧀ꦤꦶ​ꦤꦁꦚ꧀ꦗꦧ​꧈​ꦏꦼꦥꦺꦔꦶꦤ꧀ꦏꦼꦠꦼꦩꦸ​ꦏꦫꦺꦴ​ꦢꦺꦏ꧀ꦤꦺ꧉​ 47ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦔꦶꦢꦺꦏ꧀ꦤꦺ:“ꦒꦸꦫꦸ​꧈​ꦲꦶꦧꦸꦩꦸ​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦩꦸ​ꦥꦢ​ꦤꦁꦚ꧀ꦗꦧ​꧈​ꦏꦼꦥꦺꦔꦶꦤ꧀ꦩꦼꦠꦸꦮꦏꦺꦴꦮꦺ​꧉​”

48꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦲꦶꦧꦸꦏꦸ​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦏꦸꦮꦶ​ꦱꦥ​ꦠ​?” 49ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦤ꧀ꦢꦸꦢꦶꦁꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦫꦺꦴ​ꦔꦺꦴꦩꦺꦴꦁ:“ꦲꦶꦏꦸ​ꦲꦶꦧꦸꦏꦸ​ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​! 50ꦲꦮꦶꦠ꧀ꦱꦥ​ꦱꦶꦁ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦧꦥꦏ꧀ꦏꦸ​ꦱꦶꦁ​ꦤꦁꦱ꧀ꦮꦂꦒ​꧈​ꦪ​ꦲꦶꦏꦸ​ꦱꦼꦢꦸꦭꦸꦂꦏꦸ​ꦭꦤꦁ​ꦭꦤ꧀ꦱꦼꦢꦸꦭꦸꦂꦏꦸ​ꦮꦺꦢꦺꦴꦏ꧀ꦭꦤ꧀ꦲꦶꦧꦸꦏꦸ​꧉​”

↑ ↑ ↑


꧋ꦥꦶꦮꦸꦭꦁ​ꦧꦧ꧀ꦮꦺꦴꦁ​ꦚꦼꦧꦂ​꧉​

꧇​꧑꧓꧇​ 1꧋ꦲꦶꦁ​ꦢꦶꦤ​ꦏꦸꦮꦶ​ꦲꦸꦒ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦸꦔ​ꦱꦁꦏꦲꦺꦴꦩꦃꦲꦺ​꧈​ꦧꦸꦢꦭ꧀ꦤꦁꦥꦶꦁꦒꦶꦂ​ꦩꦺꦂꦠꦼꦫꦸꦱ꧀​ꦚ꧀ꦗꦒꦺꦴꦁꦤꦁꦏꦺꦴꦤꦺꦴ​꧉​ 2ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦠꦼꦏ​ꦔꦿꦸꦧꦸꦁ​ꦢꦺꦏ꧀ꦤꦺ꧈​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦩꦸꦁꦒꦃ​ꦤꦁꦥꦿꦲꦸ​ꦭꦤ꧀​ꦚ꧀ꦗꦒꦺꦴꦁꦤꦁꦏꦺꦴꦤꦺꦴ​꧉​ꦮꦺꦴꦁ​ꦲꦺꦴꦏꦺꦃꦩꦲꦸ​ꦥꦢ​ꦔꦢꦼꦏ꧀ꦤꦁꦥꦶꦁꦒꦶꦂ​ꦩꦺꦂ꧉​ 3ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦸꦭꦁꦔꦶꦮꦺꦴꦁꦮꦺꦴꦁ​ꦧꦧ꧀ꦮꦼꦂꦤꦮꦼꦂꦤ​ꦥꦽꦏꦫ​ꦔꦁꦒꦺꦴ​ꦒꦩ꧀ꦧꦂ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦲꦺꦤꦺꦁꦮꦺꦴꦁ​ꦧꦸꦢꦭ꧀ꦤꦁꦏꦼꦧꦺꦴꦤꦺ​ꦲꦉꦥ꧀ꦚꦼꦧꦂ​꧉​ 4ꦢꦺꦴꦁꦔꦺꦚꦼꦧꦂ​ꦮꦶꦗꦶꦤꦺ​ꦲꦺꦤꦺꦁꦱꦶꦁ​ꦠꦶꦧ​ꦤꦁꦥꦶꦁꦒꦶꦂ​ꦢꦭꦤ꧀꧈​ꦩꦤꦸꦏ꧀ꦏꦺ​ꦥꦢ​ꦠꦼꦏ​ꦠꦼꦫꦸꦱ꧀ꦩꦔꦤ꧀ꦤꦶ​ꦮꦶꦗꦶꦮꦶꦗꦶ​ꦩꦲꦸ​꧉​ 5ꦮꦶꦗꦶꦤꦺ​ꦲꦸꦒ​ꦲꦺꦤꦺꦁꦱꦶꦁ​ꦠꦶꦧ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦠꦺꦴꦱ꧀ ꦱꦶꦁ​ꦊꦩꦃꦲꦺ​ꦠꦶꦥꦶꦱ꧀꧈​ꦮꦶꦗꦶꦤꦺ​ꦪ​ꦒꦼꦭꦶꦱ꧀ꦠꦸꦏꦸꦭ꧀ꦭꦺ꧈​ꦲꦮꦶꦠ꧀ꦊꦩꦃꦲꦺ​ꦲꦺꦴꦫ​ꦗꦼꦫꦸ꧉​ 6ꦤꦁꦔꦶꦁ​ꦏꦢꦸꦁ​ꦥꦤꦱ꧀ꦱꦺ​ꦧꦤ꧀ꦠꦼꦂ​꧈​ꦮꦶꦤꦶꦩꦲꦸ​ꦲꦭꦸꦩ꧀ꦠꦼꦫꦸꦱ꧀ꦒꦫꦶꦁ​꧈​ꦲꦮꦶꦠ꧀ꦢꦸꦫꦸꦁ​ꦧꦶꦱ​ꦔꦺꦴꦪꦺꦴꦠ꧀꧈​ 7ꦲꦺꦤꦺꦁꦮꦶꦗꦶ​ꦭꦶꦪꦤꦺ​ꦠꦶꦧ​ꦤꦁꦠꦼꦔꦃꦲꦺ​ꦠꦸꦏꦸꦭ꧀ꦭꦤ꧀ꦲꦼꦫꦶ​꧉​ꦏꦢꦸꦁ​ꦠꦸꦏꦸꦭ꧀ꦭꦤ꧀ꦲꦼꦫꦶ​ꦩꦲꦸ​ꦩꦸꦤ꧀ꦢꦏ꧀ꦒꦼꦢꦺ​꧈​ꦮꦶꦤꦶꦃꦲꦺ​ꦠꦼꦫꦸꦱ꧀ꦏꦭꦃ​ꦏꦫꦺꦴ​ꦠꦸꦏꦸꦭꦤ꧀ꦤꦺꦲꦼꦫꦶ​꧈​ꦠꦼꦫꦸꦱ꧀ꦩꦠꦶ​꧉​ 8ꦤꦁꦔꦶꦁ​ꦲꦸꦒ​ꦲꦺꦤꦺꦁꦮꦶꦗꦶ​ꦱꦶꦁ​ꦠꦶꦧ​ꦤꦁꦊꦩꦃ​ꦱꦶꦁ​ꦱꦸꦧꦸꦂ​꧈​ꦠꦼꦫꦸꦱ꧀ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦲꦺꦴꦏꦺꦃ꧉​ꦲꦺꦤꦺꦁꦱꦶꦁ​ꦮꦶꦗꦶ​ꦱꦶꦗꦶ​ꦢꦢꦶ​ꦱꦠꦸꦱ꧀ ꦲꦺꦤꦺꦁꦱꦶꦁ​ꦢꦢꦶ​ꦱ꧀ꦮꦶꦢꦏ꧀ꦭꦤ꧀ꦲꦺꦤꦺꦁꦱꦶꦁ​ꦢꦢꦶ​ꦠꦼꦭꦸꦁ​ꦥꦸꦭꦸꦃ​꧉​”

9꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦸꦠꦸꦥ꧀ꦥꦶꦮꦸꦭꦁꦔꦺ​ꦔꦺꦴꦩꦺꦴꦁꦔꦺꦤꦺ​:“ꦱꦥ​ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧈​ꦫꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀ꦠꦼꦩ꧀ꦧꦸꦁꦏꦸ​ꦏꦸꦮꦶ​꧉​”

꧋ꦠꦸꦗꦸꦮꦤ꧀ꦤꦺ​ꦥꦶꦮꦸꦭꦁ​ꦔꦁꦒꦺꦴ​ꦒꦩ꧀ꦧꦂ​꧉​

10꧋ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦫ​ꦤꦁꦔ꧀ꦒꦺꦴꦤ꧀ꦤꦺꦢꦺꦏ꧀ꦤꦺ​꧈​ꦠꦏꦺꦴꦤ꧀:“ꦲꦥ​ꦗꦭꦂꦫꦤ꧀ꦤꦺ​ꦤꦺꦏ꧀ꦒꦸꦱ꧀ꦠꦶ​ꦩꦸꦭꦁꦔꦶꦮꦺꦴꦁꦮꦺꦴꦁ​ꦏꦺꦴꦏ꧀ꦔꦁꦒꦺꦴ​ꦒꦩ꧀ꦧꦂ​?”

11꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦤꦩꦸꦁ​ꦏꦺꦴꦮꦺ​ꦱꦶꦁ​ꦧꦶꦱ​ꦢꦸꦤꦸꦁꦮꦼꦮꦢꦶꦤꦺ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦮꦺꦴꦁ​ꦏꦧꦺꦃ​꧉​ 12ꦲꦮꦶꦠ꧀ꦮꦺꦴꦁ​ꦱꦶꦁ​ꦮꦶꦱ꧀​ꦤ꧀ꦢꦸꦮꦺꦏꦸꦮꦶ​ꦧꦏꦭ꧀ꦢꦶꦏꦺꦏ꧀ꦏꦶꦔꦤ꧀ꦠꦶ​ꦭꦸꦧꦺꦂ​꧉​ꦤꦁꦔꦶꦁ​ꦮꦺꦴꦁ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺ꧈​ꦲꦥ​ꦤ꧀ꦢꦸꦮꦺꦪꦩꦭꦃ​ꦧꦏꦭ꧀ꦏꦉꦧꦸꦠ꧀꧈​ 13ꦏꦸꦮꦶ​ꦗꦭꦂꦫꦤ꧀ꦤꦺ​ꦲꦏꦸ​ꦤꦺꦏ꧀ꦩꦸꦭꦁ​ꦮꦺꦴꦁ​ꦲꦺꦴꦏꦺꦃꦔꦁꦒꦺꦴ​ꦒꦩ꧀ꦧꦂ​꧉​ꦲꦮꦶꦠ꧀ꦱꦼꦤꦗꦤ꧀ꦩꦿꦶꦥꦠ꧀ꦠꦺ​ꦥꦢ​ꦤ꧀ꦢꦼꦊꦁ​꧈​ꦤꦁꦔꦶꦁ​ꦲꦺꦴꦫ​ꦮꦼꦫꦸꦃ​ꦭꦤ꧀ꦱꦼꦤꦗꦤ꧀ꦤ​ꦏꦸꦥꦶꦁꦔꦺ​ꦏꦿꦸꦔꦸ​꧈​ꦤꦁꦔꦶꦁ​ꦥꦢ​ꦲꦺꦴꦫ​ꦢꦸꦤꦸꦁ꧉​ 14ꦢꦢꦶꦤꦺ​ꦧꦶꦱ​ꦏ꧀ꦭꦏꦺꦴꦤ꧀ꦲꦥ​ꦱꦶꦁ​ꦮꦶꦱ꧀ꦢꦶꦲꦺꦴꦩꦺꦴꦁꦏꦫꦺꦴ​ꦤꦧꦶ​ꦪꦺꦱꦪ​ꦢꦺꦏ꧀​ꦩ꧀ꦧꦶꦪꦺꦤ꧀ ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

‘ꦏꦺꦴꦮꦺ​ꦧꦏꦭ꧀ꦧꦺꦴꦭꦏ꧀ꦧꦭꦶꦏ꧀ꦏꦿꦸꦔꦸ​꧈​
ꦤꦁꦔꦶꦁ​ꦲꦺꦴꦫ​ꦢꦸꦤꦸꦁ꧉​
ꦏꦺꦴꦮꦺ​ꦧꦏꦭ꧀ꦧꦺꦴꦭꦏ꧀ꦧꦭꦶꦏ꧀​ꦤ꧀ꦢꦼꦊꦁ​꧈​
ꦤꦁꦔꦶꦁ​ꦲꦺꦴꦫ​ꦮꦼꦫꦸꦃ​꧉​
15ꦲꦮꦶꦠ꧀ꦧꦁꦱ​ꦲꦶꦏꦶ​ꦤ꧀ꦢꦧ꧀ꦊꦏ꧀
ꦏꦸꦥꦶꦁꦔꦺ​ꦧꦸꦢꦼꦏ꧀ꦭꦤ꧀ꦩꦿꦶꦥꦠ꧀ꦠꦺ​ꦩꦼꦉꦩ꧀ꦫꦥꦼꦠ꧀꧈​
ꦲꦮꦶꦠ꧀ꦱꦼꦩꦸꦁꦒꦺꦴꦤ꧀ꦤꦺꦲꦺꦴꦫ​ꦔꦺꦴꦤꦺꦴ​꧈​
ꦩꦼꦱ꧀ꦠꦶꦩꦿꦶꦥꦠ꧀ꦠꦺ​ꦮꦼꦫꦸꦃ​ꦭꦤ꧀ꦏꦸꦥꦶꦁꦔꦺ​ꦏꦿꦸꦔꦸ​꧈​
ꦥꦶꦏꦶꦂꦫꦤ꧀ꦤꦺ​ꦧꦶꦱ​ꦢꦸꦤꦸꦁꦠꦼꦫꦸꦱ꧀ꦥꦢ​ꦠꦼꦏ​ꦩꦫꦤꦶ​ꦲꦏꦸ​
ꦭꦤ꧀ꦤꦶꦁꦒꦭ꧀ꦲꦸꦫꦶꦥ꧀ꦥꦺꦱꦶꦁ​ꦢꦺꦴꦱ​꧈​
ꦩꦼꦱ꧀ꦠꦶꦠꦼꦫꦸꦱ꧀ꦠꦏ꧀ꦮꦫꦱ꧀꧈​
ꦏꦸꦮꦶ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​’

16꧋“ꦤꦁꦔꦶꦁ​ꦧꦼꦗꦏꦺꦴꦮꦺ​꧈​ꦲꦮꦶꦠ꧀ꦩꦿꦶꦥꦠ꧀ꦩꦸ​ꦮꦼꦫꦸꦃ​ꦭꦤ꧀ꦏꦸꦥꦶꦁꦩꦸ​ꦏꦿꦸꦔꦸ​꧉​ 17ꦔꦼꦂꦠꦶꦪ​꧈​ꦲꦺꦴꦏꦺꦃꦤꦧꦶ​ꦭꦤ꧀ꦮꦺꦴꦁ​ꦧꦼꦕꦶꦏ꧀ꦱꦶꦁ​ꦥꦢ​ꦏꦼꦥꦺꦔꦶꦤ꧀​ꦤ꧀ꦢꦼꦊꦁ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦢꦼꦊꦁ​꧈​ꦤꦁꦔꦶꦁ​ꦲꦺꦴꦫ​ꦏ꧀ꦭꦏꦺꦴꦤ꧀​ꦤ꧀ꦢꦼꦊꦁ​꧉​ꦲꦸꦒ​ꦥꦢ​ꦏꦼꦥꦺꦔꦶꦤ꧀ꦏꦿꦸꦔꦸ​ꦲꦥ​ꦱꦶꦁ​ꦏꦺꦴꦮꦺ​ꦏꦿꦸꦔꦸ​꧈​ꦤꦁꦔꦶꦁ​ꦲꦺꦴꦫ​ꦏ꧀ꦭꦏꦺꦴꦤ꧀꧈​”

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦸꦤꦸꦁꦔꦏꦺꦒꦩ꧀ꦧꦂ​ꦧꦧ꧀ꦮꦺꦴꦁ​ꦚꦼꦧꦂ​꧉​

18꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦤ꧀ꦢꦸꦤꦸꦁꦔꦏꦺꦔꦺꦤꦺ​:“ꦥꦢ​ꦢꦶꦫꦸꦔꦺꦴꦏ꧀ꦏꦏꦺ​ꦠꦼꦒꦼꦱ꧀ꦱꦺ​ꦒꦩ꧀ꦧꦂ​ꦮꦺꦴꦁ​ꦚꦼꦧꦂ​ꦮꦶꦗꦶ​ꦩꦲꦸ​꧉​ 19ꦮꦺꦴꦁ​ꦱꦶꦁ​ꦏꦿꦸꦔꦸ​ꦥꦶꦮꦸꦭꦁ​ꦧꦧ꧀ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦲꦺꦴꦫ​ꦢꦸꦤꦸꦁ꧈​ꦏꦸꦮꦶ​ꦏꦪ​ꦮꦶꦗꦶ​ꦱꦶꦁ​ꦠꦶꦧ​ꦤꦁꦥꦶꦁꦒꦶꦂ​ꦢꦭꦤ꧀꧈​ꦱꦺꦠꦤ꧀​ꦠꦼꦏ​ꦠꦼꦫꦸꦱ꧀ꦔꦽꦧꦸꦠ꧀ꦥꦶꦮꦸꦭꦁ​ꦱꦶꦁ​ꦢꦶꦱꦼꦧꦂ​ꦲꦶꦁ​ꦲꦠꦶꦤꦺ​꧉​ 20ꦭꦃ​ꦮꦶꦗꦶ​ꦱꦶꦁ​ꦠꦶꦧ​ꦤꦁꦊꦩꦃ​ꦲꦠꦺꦴꦱ꧀ ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦮꦺꦴꦁ​ꦱꦶꦁ​ꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦔꦺ​ꦠꦼꦫꦸꦱ꧀ꦥꦽꦕꦪ​ꦏꦫꦺꦴ​ꦧꦸꦔꦃ​꧉​ 21ꦤꦁꦔꦶꦁ​ꦥꦶꦮꦸꦭꦁ​ꦩꦲꦸ​ꦢꦸꦫꦸꦁ​ꦩꦿꦱꦸꦏ꧀ꦗꦼꦫꦸꦲꦶꦁ​ꦲꦠꦶꦤꦺ​꧉​ꦏꦢꦸꦁ​ꦏꦠꦼꦏꦤ꧀ꦏꦱꦸꦱꦃꦲꦤ꧀ꦭꦤ꧀ꦏꦔꦺꦭ꧀ꦭꦤ꧀ꦗꦭꦂꦫꦤ꧀ꦱꦁꦏꦲꦼꦁꦒꦺꦴꦤꦺ​ꦥꦽꦕꦪ​꧈​ꦮꦺꦴꦁꦔꦺ​ꦱꦼꦩ꧀ꦥ꧀ꦭꦏ꧀ꦥꦼꦔꦤ꧀ꦢꦼꦭ꧀ꦭꦺ​꧉​ 22ꦭꦃ​ꦮꦶꦗꦶ​ꦱꦶꦁ​ꦠꦶꦧ​ꦤꦁꦠꦼꦔꦃꦲꦺ​ꦠꦸꦏꦸꦭ꧀ꦭꦤ꧀ꦲꦼꦫꦶ​꧈​ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦮꦺꦴꦁ​ꦱꦶꦁ​ꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦔꦺ​ꦠꦼꦫꦸꦱ꧀ꦥꦽꦕꦪ​꧈​ꦤꦁꦔꦶꦁ​ꦠꦼꦫꦸꦱ꧀ꦱꦸꦩꦼꦭꦁ​ꦧꦔꦼꦠ꧀꧈​ꦥꦶꦮꦸꦭꦁ​ꦩꦲꦸ​ꦲꦺꦴꦫ​ꦧꦶꦱ​ꦔꦼꦠꦺꦴꦏ꧀ꦏꦏꦺꦮꦺꦴꦃ​꧈​ꦗꦭꦂꦫꦤ꧀ꦏꦭꦃ​ꦏꦫꦺꦴ​ꦥꦶꦏꦶꦂꦫꦤ꧀ꦧꦧ꧀ꦏꦧꦸꦠꦸꦃꦲꦤ꧀ꦤꦺ​ꦲꦸꦫꦶꦥ꧀ꦭꦤ꧀ꦧꦤ꧀ꦢꦢꦺꦴꦚ​꧉​ 23ꦤꦁꦔꦶꦁ​ꦮꦶꦗꦶ​ꦱꦶꦁ​ꦠꦶꦧ​ꦤꦁꦊꦩꦃ​ꦱꦶꦁ​ꦱꦸꦧꦸꦂ​꧈​ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦮꦺꦴꦁ​ꦱꦶꦁ​ꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦔꦺ​ꦠꦼꦫꦸꦱ꧀ꦩꦤ꧀ꦠꦼꦥ꧀ꦥꦼꦔꦤ꧀ꦢꦼꦭ꧀ꦭꦺ​꧉​ꦮꦺꦴꦁ​ꦏꦸꦮꦶ​ꦠꦼꦫꦸꦱ꧀ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦲꦺꦴꦏꦺꦃ꧈​ꦥꦶꦁ​ꦱꦠꦸꦱ꧀ ꦥꦶꦁ​ꦱ꧀ꦮꦶꦢꦏ꧀ꦭꦤ꧀ꦥꦶꦁ​ꦠꦼꦭꦸꦁ​ꦥꦸꦭꦸꦃ​꧉​”

꧋ꦥꦶꦮꦸꦭꦁ​ꦧꦧ꧀ꦱꦸꦏꦼꦠ꧀ꦤꦁꦠꦼꦔꦃꦲꦺ​ꦠꦤ꧀ꦢꦸꦂꦫꦤ꧀ꦒꦤ꧀ꦢꦸꦩ꧀꧈​

24꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦼꦏꦺꦏ꧀ꦏꦶꦒꦩ꧀ꦧꦂ​ꦭꦶꦪꦤꦺ​ꦏꦁꦒꦺꦴ​ꦩꦸꦭꦁꦔꦶꦮꦺꦴꦁꦮꦺꦴꦁ​꧉​ꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦠꦸꦏꦁ​ꦠꦤ꧀ꦢꦸꦂ꧉​ꦮꦺꦴꦁꦔꦺ​ꦚꦼꦧꦂ​ꦮꦶꦗꦶ​ꦱꦶꦁ​ꦲꦥꦶꦏ꧀ꦤꦁꦏꦼꦧꦺꦴꦤꦺ​꧉​ 25ꦤꦁꦔꦶꦁ​ꦲꦶꦁ​ꦮꦪꦃ​ꦮꦼꦔꦶ​꧈​ꦤꦺꦏ꧀ꦮꦺꦴꦁꦮꦺꦴꦁ​ꦥꦢ​ꦠꦸꦫꦸ​꧈​ꦩꦸꦁꦱꦸꦃꦲꦺ​ꦮꦺꦴꦁ​ꦠꦤ꧀ꦢꦸꦂꦩꦲꦸ​ꦠꦼꦏ​ꦠꦼꦫꦸꦱ꧀ꦚꦼꦧꦂ​ꦮꦶꦗꦶ​ꦱꦸꦏꦼꦠ꧀ꦤꦁꦠꦼꦔꦃꦲꦺ​ꦠꦤ꧀ꦢꦸꦂꦫꦤ꧀ꦒꦤ꧀ꦢꦸꦩ꧀ꦩꦲꦸ​꧈​ꦠꦼꦫꦸꦱ꧀ꦭꦸꦔ​꧉​ 26ꦏꦢꦸꦁ​ꦮꦶꦗꦶ​ꦒꦤ꧀ꦢꦸꦩ꧀ꦩꦺ​ꦠꦸꦏꦸꦭ꧀ꦭꦤ꧀ꦔꦼꦠꦺꦴꦏ꧀ꦏꦏꦺꦮꦺꦴꦃ​꧈​ꦱꦸꦏꦼꦠ꧀ꦠꦺ​ꦠꦼꦫꦸꦱ꧀ꦏꦺꦠꦺꦴꦏ꧀꧈​ 27ꦮꦺꦴꦁꦮꦺꦴꦁ​ꦱꦶꦁ​ꦏꦼꦂꦗ​ꦠꦼꦫꦸꦱ꧀ꦩꦫ​ꦤꦁꦔ꧀ꦒꦺꦴꦤ꧀ꦤꦺꦱꦶꦁ​ꦠꦸꦏꦁ​ꦠꦤ꧀ꦢꦸꦂꦠꦼꦫꦸꦱ꧀ꦔꦺꦴꦩꦺꦴꦁ:'ꦭꦃ​ꦧꦥꦏ꧀ꦤꦤ꧀ꦢꦸꦂ​ꦮꦶꦗꦶ​ꦱꦶꦁ​ꦲꦥꦶꦏ꧀ꦤꦁꦏꦼꦧꦺꦴꦤꦺ​꧈​ꦭꦃ​ꦠꦸꦏꦸꦭ꧀ꦭꦤ꧀ꦱꦸꦏꦼꦠ꧀ꦏꦸꦮꦶ​ꦱꦁꦏꦲꦼꦤ꧀ꦢꦶ​?’ 28ꦱꦶꦁ​ꦠꦸꦏꦁ​ꦠꦤ꧀ꦢꦸꦂꦠꦼꦫꦸꦱ꧀ꦱꦼꦩꦲꦸꦂ​:'ꦏꦸꦮꦶ​ꦥꦼꦁꦒꦮꦺꦤꦺ​ꦩꦸꦁꦱꦸꦃ​꧉'​ꦱꦶꦁ​ꦏꦼꦂꦗ​ꦩꦲꦸ​ꦠꦼꦫꦸꦱ꧀ꦥꦢ​ꦔꦺꦴꦩꦺꦴꦁ:'ꦲꦥ​ꦏꦉꦥ꧀ꦥꦺ​ꦧꦥꦏ꧀ꦱꦸꦏꦼꦠ꧀ꦠꦺ​ꦢꦶꦗꦧꦸꦠ꧀ꦠꦶꦮꦲꦺ​?’ 29ꦤꦁꦔꦶꦁ​ꦮꦺꦴꦁꦔꦺ​ꦱꦼꦩꦲꦸꦂ​:'ꦲꦗ​꧈​ꦲꦮꦶꦠ꧀ꦤꦺꦏ꧀ꦱꦸꦏꦼꦠ꧀ꦠꦺ​ꦲꦩ꧀ꦧꦺꦴꦏ꧀ꦗꦧꦸꦠ꧀ꦠꦶ​꧈​ꦩꦼꦁꦏꦺꦴ​ꦠꦤ꧀ꦢꦸꦂꦫꦤ꧀ꦤꦺ​ꦒꦤ꧀ꦢꦸꦩ꧀ꦲꦸꦒ​ꦏꦠꦸꦠ꧀ꦏꦼꦗꦧꦸꦠ꧀꧉'​ 30ꦧꦺꦤ꧀​ꦱꦸꦏꦼꦠ꧀ꦠꦺ​ꦠꦸꦏꦸꦭ꧀ꦧꦉꦁ​ꦏꦫꦺꦴ​ꦒꦤ꧀ꦢꦸꦩ꧀ꦩꦺ​ꦠꦼꦏꦤ꧀ꦮꦪꦃꦲꦺ​ꦥꦤꦺꦤ꧀꧈​ꦩꦼꦁꦏꦺꦴ​ꦤꦺꦏ꧀ꦮꦪꦃꦲꦺ​ꦥꦤꦺꦤ꧀ꦲꦏꦸ​ꦧꦏꦭ꧀ꦔꦺꦴꦩꦺꦴꦁꦔꦶꦱꦶꦁ​ꦏꦼꦂꦗ​꧈​ꦱꦸꦥꦪ​ꦥꦢ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦱꦸꦏꦼꦠ꧀ꦠꦺ​ꦤ꧀ꦢꦶꦱꦶꦏ꧀ꦠꦼꦫꦸꦱ꧀ꦢꦶꦠꦭꦺꦤ꧀ꦤꦶ​ꦭꦤ꧀ꦢꦶꦲꦺꦴꦧꦺꦴꦁ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦒꦤ꧀ꦢꦸꦩ꧀ꦩꦺ​ꦱꦶꦁ​ꦢꦶꦲꦼꦤꦺꦤ꧀ꦤꦶ​ꦭꦤ꧀ꦢꦶꦱꦶꦩ꧀ꦥꦼꦤ꧀ꦤꦁꦭꦸꦩ꧀ꦧꦸꦁꦏꦸ​꧉​”

꧋ꦥꦶꦮꦸꦭꦁ​ꦧꦧ꧀ꦮꦶꦗꦶ​ꦱꦶꦁ​ꦕꦶꦭꦶꦏ꧀ꦧꦔꦼꦠ꧀꧈​

31-32꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦸꦭꦁꦔꦶꦮꦺꦴꦁꦮꦺꦴꦁ​ꦩꦼꦤꦺꦃ​ꦔꦁꦒꦺꦴ​ꦒꦩ꧀ꦧꦂ​ꦭꦶꦪꦤꦺ​꧉​ꦢꦺꦏ꧀ꦤꦺꦔꦺꦴꦩꦺꦴꦁꦔꦺꦤꦺ​:“ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦮꦶꦗꦶ​ꦱꦶꦁ​ꦕꦶꦭꦶꦏ꧀ꦧꦔꦼꦠ꧀ ꦱꦶꦁ​ꦢꦶꦠꦤ꧀ꦢꦸꦂ​ꦏꦫꦺꦴ​ꦮꦺꦴꦁ​ꦤꦁꦏꦼꦧꦺꦴꦤꦺ​꧉​ꦮꦶꦗꦶ​ꦏꦸꦮꦶ​ꦕꦶꦭꦶꦏ꧀ꦧꦔꦼꦠ꧀ ꦤꦁꦔꦶꦁ​ꦤꦺꦏ꧀ꦮꦶꦱ꧀ꦠꦸꦏꦸꦭ꧀ꦒꦼꦢꦺꦤꦺꦔꦸꦁꦏꦸꦭ꧀ꦭꦶ​ꦠꦤ꧀ꦢꦸꦂꦫꦤ꧀ꦭꦶꦪꦭꦶꦪꦤꦺ​꧉​ꦩꦭꦃ​ꦢꦢꦶ​ꦮꦶꦠ꧀ꦭꦤ꧀ꦩꦤꦸꦏ꧀ꦩꦤꦸꦏ꧀ꦠꦼꦫꦸꦱ꧀ꦥꦢ​ꦔ꧀ꦒꦮꦺ​ꦱꦸꦱꦸꦏ꧀ꦤꦁꦥꦁꦔꦺ​꧉​”

꧋ꦥꦶꦮꦸꦭꦁ​ꦧꦧ꧀ꦫꦒꦶ​꧉​

33꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦼꦏꦺꦏ꧀ꦏꦶꦒꦩ꧀ꦧꦂ​ꦭꦶꦪꦤꦺ​꧈​ꦲꦸꦤꦶꦤꦺ​ꦔꦺꦤꦺ​:“ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦫꦒꦶ​꧉​ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀​ꦚ꧀ꦗꦶꦏꦸꦏ꧀ꦫꦒꦶ​ꦩꦲꦸ​ꦠꦼꦫꦸꦱ꧀ꦢꦶꦕꦩ꧀ꦥꦸꦂꦫꦏꦺ​ꦒ꧀ꦊꦥꦸꦁ​ꦠꦼꦭꦸꦁ​ꦠꦏꦼꦂꦫꦤ꧀ ꦱꦩ꧀ꦥꦺꦏ꧀ꦫꦒꦶꦤꦺ​ꦩꦿꦱꦸꦏ꧀ꦤꦁꦒ꧀ꦊꦥꦸꦁꦔꦺ​ꦏꦧꦺꦃ​꧉​”

꧋ꦠꦸꦗꦸꦮꦤ꧀ꦤꦺ​ꦥꦶꦮꦸꦭꦁ​ꦔꦁꦒꦺꦴ​ꦒꦩ꧀ꦧꦂ​꧉​

34꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦸꦭꦁꦔꦶꦮꦺꦴꦁꦮꦺꦴꦁ​ꦧꦧ꧀ꦏꦸꦮꦶ​ꦩꦲꦸ​ꦏꦧꦺꦃ​ꦔꦁꦒꦺꦴ​ꦒꦩ꧀ꦧꦂ​꧉​ꦢꦺꦏ꧀ꦤꦺꦤꦺꦏ꧀ꦩꦸꦭꦁꦔꦶꦩꦼꦱ꧀ꦠꦶꦔꦁꦒꦺꦴꦏ꧀ꦏꦏꦺꦒꦩ꧀ꦧꦂ​ꦏꦁꦒꦺꦴ​ꦤ꧀ꦢꦸꦤꦸꦁꦔꦏꦺ꧉​ 35ꦢꦢꦶꦤꦺ​ꦏꦼꦠꦸꦫꦸꦠ꧀ꦠꦤ꧀ꦠꦼꦩ꧀ꦧꦸꦁꦔꦺ​ꦱꦏ꧀ꦮꦶꦗꦶꦤꦺꦤꦧꦶ​ꦢꦺꦏ꧀​ꦩ꧀ꦧꦶꦪꦺꦤ꧀ꦱꦶꦁ​ꦔꦺꦴꦩꦺꦴꦁ:

“ꦤꦺꦏ꧀ꦲꦏꦸ​ꦩꦸꦭꦁ​꧈​ꦲꦏꦸ​ꦔꦁꦒꦺꦴꦏ꧀ꦏꦏꦺꦒꦩ꧀ꦧꦂ​꧉​
ꦲꦏꦸ​ꦧꦏꦭ꧀​ꦤ꧀ꦢꦸꦤꦸꦁꦔꦏꦺꦥꦽꦏꦫꦥꦽꦏꦫ​
ꦱꦶꦁ​ꦏꦱꦶꦩ꧀ꦥꦼꦤ꧀ꦮꦶꦮꦶꦠ꧀ꦗꦒꦠ꧀ꦢꦶꦒꦮꦺ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦸꦤꦸꦁꦔꦏꦺꦒꦩ꧀ꦧꦂ​ꦠꦸꦏꦸꦭ꧀ꦭꦤ꧀ꦱꦸꦏꦼꦠ꧀꧈​

36꧋ꦱꦏ꧀ꦮꦶꦱ꧀ꦱꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦁꦏꦺꦴꦤ꧀ꦮꦺꦴꦁꦮꦺꦴꦁ​ꦭꦸꦔ​꧈​ꦢꦺꦏ꧀ꦤꦺ​ꦠꦼꦫꦸꦱ꧀ꦩꦸꦭꦶꦃ​꧉​ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦠꦼꦫꦸꦱ꧀ꦥꦢ​ꦩꦫ​ꦭꦤ꧀ꦠꦏꦺꦴꦤ꧀:“ꦒꦸꦱ꧀ꦠꦶ​꧈​ꦩ꧀ꦧꦺꦴꦏ꧀ꦲꦮꦏ꧀ꦏꦺ​ꦢꦺꦮꦺꦢꦶꦢꦸꦤꦸꦁꦔꦏꦺꦠꦼꦒꦼꦱ꧀ꦱꦺ​ꦒꦩ꧀ꦧꦂ​ꦠꦸꦏꦸꦭ꧀ꦭꦤ꧀ꦱꦸꦏꦼꦠ꧀꧈​”

37꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦮꦺꦴꦁ​ꦱꦶꦁ​ꦚꦼꦧꦂ​ꦮꦶꦗꦶ​ꦱꦶꦁ​ꦲꦥꦶꦏ꧀ꦏꦸꦮꦶ​ꦲꦤꦏ꧀ꦏꦺ​ꦩꦤꦸꦁꦱ​꧉​ 38ꦏꦼꦧꦺꦴꦤꦺ​ꦏꦸꦮꦶ​ꦪ​ꦗꦒꦠ꧀ꦲꦶꦏꦶ​꧉​ꦮꦶꦗꦶ​ꦱꦶꦁ​ꦲꦥꦶꦏ꧀ꦏꦸꦮꦶ​ꦮꦺꦴꦁꦮꦺꦴꦁ​ꦲꦸꦩꦠ꧀ꦠꦺ​ꦏꦿꦠꦺꦴꦤꦺ​ꦄꦭ꧀ꦭꦃ​꧉​ꦭꦃ​ꦠꦸꦏꦸꦭ꧀ꦭꦤ꧀ꦱꦸꦏꦼꦠ꧀ꦏꦸꦮꦶ​ꦮꦺꦴꦁꦮꦺꦴꦁ​ꦧꦭꦤꦺ​ꦱꦺꦠꦤ꧀​꧉​ 39ꦩꦸꦁꦱꦸꦃ​ꦱꦶꦁ​ꦚꦼꦧꦂ​ꦮꦶꦗꦶ​ꦱꦸꦏꦼꦠ꧀ꦏꦸꦮꦶ​ꦱꦺꦠꦤ꧀​ꦢꦺꦮꦺ꧉​ꦮꦪꦃ​ꦥꦤꦺꦤ꧀ꦏꦸꦮꦶ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀ꦭꦤ꧀ꦱꦶꦁ​ꦏꦼꦂꦗ​ꦥꦤꦺꦤ꧀ꦏꦸꦮꦶ​ꦥꦫ​ꦩꦸꦭꦺꦏꦠ꧀꧈​ 40ꦭꦃ​ꦏꦪ​ꦲꦼꦁꦒꦺꦴꦤꦺ​ꦠꦸꦏꦸꦭ꧀ꦭꦤ꧀ꦱꦸꦏꦼꦠ꧀ꦏꦸꦮꦶ​ꦢꦶꦭꦸꦩ꧀ꦥꦸꦏ꧀ꦏꦏꦺꦠꦼꦫꦸꦱ꧀ꦢꦶꦲꦺꦴꦧꦺꦴꦁ​ꦤꦁꦒꦼꦤꦶ​꧈​ꦪ​ꦔꦺꦴꦤꦺꦴ​ꦏꦸꦮꦶ​ꦲꦩ꧀ꦧꦺꦱꦸꦏ꧀ꦲꦶꦁ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀꧈​ 41ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦔꦺꦴꦁꦏꦺꦴꦤ꧀ꦩꦸꦭꦺꦏꦠ꧀ꦩꦸꦭꦺꦏꦠ꧀ꦠꦺꦔ꧀ꦭꦸꦩ꧀ꦥꦸꦏ꧀ꦏꦏꦺꦱꦼꦩ꧀ꦧꦫꦁ​ꦱꦶꦁ​ꦩꦫꦏ꧀ꦏꦏꦺꦔ꧀ꦒꦮꦺ​ꦲꦭ​ꦭꦤ꧀ꦏꦧꦺꦃ​ꦮꦺꦴꦁ​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧈​ꦢꦶꦥꦶꦱꦃ​ꦱꦁꦏꦏꦿꦠꦺꦴꦤꦺ​ꦄꦭ꧀ꦭꦃ​꧉​ 42ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦥꦮꦺꦴꦤ꧀ꦱꦶꦁ​ꦩꦸꦫꦸꦥ꧀꧈​ꦤꦁꦏꦺꦴꦤꦺꦴ​ꦧꦏꦭ꧀ꦥꦢ​ꦠꦔꦶꦱ꧀ꦱꦤ꧀ꦭꦤ꧀ꦏꦼꦫꦺꦴꦠ꧀ꦲꦸꦤ꧀ꦠꦸ​꧉​ 43ꦤꦁꦔꦶꦁ​ꦮꦺꦴꦁ​ꦱꦶꦁ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦱꦼꦩ꧀ꦭꦺꦴꦫꦺꦴꦠ꧀ꦏꦪ​ꦱꦽꦔꦺꦔꦺ​ꦲꦶꦁ​ꦏꦿꦠꦺꦴꦤꦺ​ꦧꦥꦏ꧀ꦏꦺ꧉​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧈​ꦥꦢ​ꦢꦶꦫꦸꦔꦺꦴꦏ꧀ꦏꦏꦺ​!”

꧋ꦥꦶꦮꦸꦭꦁ​ꦧꦧ꧀ꦏꦱꦸꦒꦶꦃꦲꦤ꧀ꦱꦶꦁ​ꦏꦥꦼꦤ꧀ꦢꦼꦩ꧀​꧉​

44꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦥꦶꦮꦸꦭꦁꦔꦺ​ꦔꦺꦤꦺ​:“ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦏꦱꦸꦒꦶꦃꦲꦤ꧀ꦱꦶꦁ​ꦢꦶꦥꦼꦤ꧀ꦢꦼꦩ꧀ꦤꦁꦊꦩꦃ​꧉​ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦱꦶꦁ​ꦤꦼꦩꦸ​꧈​ꦤꦁꦔꦶꦁ​ꦠꦼꦫꦸꦱ꧀ꦢꦶꦲꦸꦫꦸꦏ꧀ꦏꦶꦩꦼꦤꦺꦃ​꧉​ꦱꦁꦏꦶꦁꦧꦸꦔꦃꦲꦺ​꧈​ꦮꦺꦴꦁꦔꦺ​ꦠꦼꦫꦸꦱ꧀ꦔꦼꦢꦺꦴꦭ꧀ꦏꦧꦺꦃ​ꦲꦥ​ꦤ꧀ꦢꦸꦮꦺꦪ꧈​ꦠꦼꦫꦸꦱ꧀ꦧꦭꦶꦏ꧀ꦤꦸꦏꦸ​ꦏꦼꦧꦺꦴꦤꦺ​꧉​”

꧋ꦥꦶꦮꦸꦭꦁ​ꦧꦧ꧀ꦥꦉꦭ꧀꧈​

45꧋ꦥꦶꦮꦸꦭꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦭꦶꦪꦤꦺ​ꦲꦸꦤꦶꦤꦺ​ꦔꦺꦤꦺ​:“ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦱꦏ꧀ꦮꦶꦗꦶꦤꦺꦠꦸꦏꦁ​ꦢꦒꦁ​ꦱꦶꦁ​ꦔ꧀ꦒꦺꦴꦭꦺꦏ꧀ꦥꦉꦭ꧀ꦱꦶꦁ​ꦭꦫꦁ​ꦉꦒꦤꦺ​꧉​ 46ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦢꦺꦏ꧀ꦤꦺꦮꦼꦫꦸꦃ​ꦥꦉꦭ꧀ꦏꦸꦮꦶ​꧉​ꦮꦺꦴꦁꦔꦺ​ꦠꦼꦫꦸꦱ꧀ꦔꦼꦢꦺꦴꦭ꧀ꦱꦼꦩ꧀ꦧꦫꦁ​ꦤ꧀ꦢꦸꦮꦺꦪꦏꦁꦒꦺꦴ​ꦤꦸꦏꦸ​ꦥꦉꦭ꧀ꦱꦶꦁ​ꦭꦫꦁ​ꦉꦒꦤꦺ​ꦏꦸꦮꦶ​꧉​”

꧋ꦥꦶꦮꦸꦭꦁ​ꦧꦧ꧀ꦗꦭ​꧉​

47꧋ꦒꦸꦱ꧀ꦠꦶꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦥꦶꦮꦸꦭꦁꦔꦺꦔꦺꦤꦺ:“ꦏꦿꦠꦺꦴꦤ꧀ꦤꦺꦱ꧀ꦮꦂꦒꦏꦸꦮꦶꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴꦗꦭꦱꦶꦁꦢꦶ​ꦲꦸꦚ꧀ꦕꦭ꧀ꦭꦏꦺꦤꦁꦩꦺꦂꦭꦤ꧀ꦲꦺꦤ꧀ꦠꦸꦏ꧀ꦲꦶꦮꦏ꧀ꦮꦼꦂꦤꦮꦼꦂꦤ꧉​ 48ꦤꦺꦏ꧀ꦗꦭꦤꦺ​ꦮꦶꦱ꧀ꦏꦼꦧꦼꦏ꧀ꦠꦼꦫꦸꦱ꧀ꦢꦶꦠꦫꦶꦏ꧀ꦤꦁꦢꦫꦠ꧀ꦠꦤ꧀ꦏꦫꦺꦴ​ꦱꦶꦁ​ꦔ꧀ꦒꦺꦴꦭꦺꦏ꧀ꦲꦶꦮꦏ꧀꧈​ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦫꦸꦱ꧀​ꦚ꧀ꦗꦒꦺꦴꦁꦩꦶꦭꦶꦃꦲꦶ​ꦲꦶꦮꦏ꧀ꦲꦶꦮꦏ꧀ꦏꦺ꧉​ꦱꦶꦁ​ꦲꦥꦶꦏ꧀ꦢꦶꦮꦢꦃꦲꦶ꧈​ꦭꦃ​ꦱꦶꦁ​ꦲꦺꦭꦺꦏ꧀ꦢꦶꦧꦸꦮꦁ​꧉​ 49ꦪ​ꦔꦺꦴꦤꦺꦴ​ꦏꦸꦮꦶ​ ꦧꦏꦭ꧀ꦭꦺ​ꦲꦶꦁ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀꧈​ꦩꦸꦭꦺꦏꦠ꧀​ꦩꦸꦭꦺꦏꦠ꧀​ꦧꦏꦭ꧀ꦧꦸꦢꦭ꧀ꦭꦤ꧀ꦩꦶꦱꦃꦲꦏꦺꦮꦺꦴꦁ​ꦲꦭ​ꦱꦁꦏꦠꦼꦔꦃꦲꦺ​ꦮꦺꦴꦁ​ꦧꦼꦕꦶꦏ꧀꧈​ 50ꦮꦺꦴꦁꦮꦺꦴꦁ​ꦱꦶꦁ​ꦲꦭ​ꦩꦲꦸ​ꦠꦼꦫꦸꦱ꧀ꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦥꦮꦺꦴꦤ꧀ꦱꦶꦁ​ꦩꦸꦫꦸꦥ꧀꧈​ꦤꦁꦏꦺꦴꦤꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦠꦔꦶꦱ꧀ꦱꦤ꧀ꦭꦤ꧀ꦏꦼꦫꦺꦴꦠ꧀ꦲꦸꦤ꧀ꦠꦸ​꧉​”

꧋ꦧꦫꦁ​ꦲꦚꦂ​ꦭꦤ꧀ꦧꦫꦁ​ꦭꦮꦱ꧀꧈​

51꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦲꦥ​ꦏꦺꦴꦮꦺ​ꦥꦢ​ꦢꦸꦤꦸꦁꦏꦸꦮꦶ​ꦩꦲꦸ​ꦏꦧꦺꦃ​?”

꧋ꦱꦼꦩꦲꦸꦂꦫꦺ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦪ​ꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦢꦸꦤꦸꦁ꧉​”

52꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦩꦸꦭꦤꦺ​ꦱꦧꦼꦤ꧀ꦒꦸꦫꦸ​ꦏꦶꦠꦧ꧀​ꦱꦶꦁ​ꦢꦢꦶ​ꦲꦸꦩꦠ꧀ꦠꦺ​ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦥꦼꦩꦶꦩ꧀ꦥꦶꦤꦺ​ꦲꦺꦴꦩꦃ​ꦱꦶꦁ​ꦔꦼꦠꦺꦴꦏ꧀ꦏꦏꦺꦧꦫꦁ​ꦱꦶꦁ​ꦲꦚꦂ​ꦭꦤ꧀ꦱꦶꦁ​ꦭꦮꦱ꧀ꦱꦁꦏꦒꦺꦴꦢꦁꦔꦺ꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦢꦶꦲꦗꦺꦤ꧀ꦤꦶ​ꦤꦁꦏꦸꦠꦟꦱꦫꦺꦠ꧀꧈​

53꧋ꦱꦏ꧀ꦮꦶꦱ꧀ꦱꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦫꦩ꧀ꦥꦸꦁ​ꦲꦼꦁꦒꦺꦴꦤꦺ​ꦩꦸꦭꦁꦔꦶꦔꦁꦒꦺꦴ​ꦒꦩ꧀ꦧꦂꦒꦩ꧀ꦧꦂꦩꦲꦸ​꧈​ꦢꦺꦏ꧀ꦤꦺꦠꦼꦫꦸꦱ꧀ꦭꦸꦔ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​꧉​ 54ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦼꦏ​ꦤꦁꦏꦸꦠꦟꦱꦫꦺꦠ꧀ ꦥꦁꦒꦺꦴꦤ꧀ꦤꦤ꧀ꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​꧉​ꦤꦁꦏꦺꦴꦤꦺꦴ​ꦢꦺꦏ꧀ꦤꦺꦩꦸꦭꦁꦔꦶꦮꦺꦴꦁꦮꦺꦴꦁ​ꦤꦁꦱꦶꦤꦒꦸꦏ꧀꧈​ꦮꦺꦴꦁꦮꦺꦴꦁ​ꦱꦶꦁ​ꦔꦿꦸꦔꦺꦴꦏ꧀ꦏꦏꦺꦥꦢ​ꦔ꧀ꦒꦸꦩꦸꦤ꧀ꦧꦔꦼꦠ꧀ꦭꦤ꧀ꦫꦱꦤ꧀ꦫꦱꦤ꧀ꦩꦫꦁ​ꦱꦏ꧀ꦥꦢꦥꦢ:“ꦮꦺꦴꦁ​ꦲꦶꦏꦶ​ꦲꦺꦤ꧀ꦠꦸꦏ꧀ꦏꦮꦼꦫꦸꦃꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦱꦁꦏꦔꦼꦤ꧀ꦢꦶ​ꦪ​?ꦭꦤ꧀ꦱꦁꦏꦔꦼꦤ꧀ꦢꦶ​ꦢꦺꦏ꧀ꦤꦺꦲꦺꦤ꧀ꦠꦸꦏ꧀ꦥꦔ꧀ꦮꦱ​ꦏꦁꦒꦺꦴ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀ꦏꦸꦮꦶ​? 55ꦲꦥ​ꦢꦺꦏ꧀ꦤꦺꦢꦸꦢꦸ​ꦲꦤꦏ꧀ꦏꦺ​ꦱꦶꦁ​ꦠꦸꦏꦁ​ꦔ꧀ꦒꦮꦺ​ꦏꦿꦺꦴꦱꦶꦩꦺꦗꦏꦲꦺ​?ꦲꦥ​ꦢꦸꦢꦸ​ꦲꦤꦏ꧀ꦏꦺ​ꦩꦫꦶꦪ꧈​ꦠꦸꦁꦒꦭ꧀ꦭꦺ​ꦪꦏꦺꦴꦧꦸꦱ꧀ ꦪꦺꦴꦱꦺꦥ꦳꧀ ꦱꦶꦩꦺꦴꦤ꧀ꦭꦤ꧀ꦪꦸꦢꦱ꧀? 56ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​ꦮꦺꦢꦺꦴꦏ꧀ꦭꦲꦸꦠ꧀ꦏꦧꦺꦃ​ꦩꦁꦒꦺꦴꦤ꧀ꦤꦁꦏꦸꦠꦏꦺꦤꦺ​ꦠ​?ꦭꦃ​ꦱꦁꦏꦔꦼꦤ꧀ꦢꦶ​ꦏꦥꦶꦤ꧀ꦠꦼꦂꦫꦤ꧀ꦤꦺ​ꦏꦸꦮꦶ​ꦏꦧꦺꦃ​?” 57ꦮꦺꦴꦁꦮꦺꦴꦁ​ꦥꦢ​ꦤꦩ꧀ꦥꦶꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​:“ꦥꦚ꧀ꦕꦺꦤ꧀ ꦤꦧꦶ​ꦏꦸꦮꦶ​ꦤꦁꦲꦼꦤ꧀ꦢꦶ​ꦮꦲꦺ​ꦢꦶꦲꦗꦺꦤ꧀ꦤꦶ​꧈​ꦏꦼꦗꦧ​ꦤꦁꦥꦁꦒꦺꦴꦤ꧀ꦤꦤ꧀ꦤꦺ​ꦭꦤ꧀ꦲꦺꦴꦩꦃꦲꦺ​ꦢꦺꦮꦺ꧉​” 58ꦩꦸꦭꦤꦺ​ꦤꦁꦏꦸꦠꦟꦱꦫꦺꦠ꧀ꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦲꦺꦴꦏꦺꦃ꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦤꦁꦏꦺꦴꦤꦺꦴ​ꦲꦺꦴꦫ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​

↑ ↑ ↑


꧋ꦤꦶꦁ​ꦒꦭ꧀ꦭꦺ​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀꧈​

꧇​꧑꧔꧇​ 1꧋ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦲ꦳ꦺꦫꦺꦴꦢꦺꦱ꧀ꦢꦢꦶ​ꦫꦠꦸꦤꦺ​ꦢꦶꦱ꧀ꦠꦿꦶꦏ꧀ꦓꦭꦶꦭꦺꦪ​꧉​ꦢꦺꦏ꧀ꦤꦺꦲꦸꦒ​ꦏꦿꦸꦔꦸ​ꦏꦧꦂꦏꦧꦂꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀꧈​ 2ꦲ꦳ꦺꦫꦺꦴꦢꦺꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦥꦫ​ꦥꦼꦭꦢꦺꦤ꧀ꦤꦺ​:“ꦪꦺꦯꦸꦱ꧀ꦏꦸꦮꦶ​ꦲꦺꦴꦫ​ꦭꦶꦪ​꧈​ꦩꦼꦱ꧀ꦠꦶꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ ꦱꦶꦁ​ꦲꦸꦫꦶꦥ꧀ꦩꦼꦤꦺꦃ​꧉​ꦩꦸꦭꦤꦺ​ꦢꦺꦏ꧀ꦤꦺꦧꦶꦱ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀ꦏꦸꦮꦶ​꧉​”

3-4꧋ꦪ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦲꦶꦏꦶ​ꦱꦶꦁ​ꦩ꧀ꦧꦶꦪꦺꦤ꧀ꦔꦺꦴꦁꦏꦺꦴꦤ꧀ꦚꦼꦏꦼꦭ꧀ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ ꦠꦼꦫꦸꦱ꧀ꦢꦶꦏꦼꦕꦺꦏ꧀​ꦭꦤ꧀ꦢꦶꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀꧈​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦤꦶꦤ꧀ꦢꦏ꧀ꦏꦏꦺꦏꦸꦮꦶ​ꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦲ꦳ꦺꦫꦺꦴꦢꦶꦪꦱ꧀꧈​ꦲꦮꦶꦠ꧀ꦪꦺꦴꦲꦤꦼꦱ꧀ꦏꦼꦉꦥ꧀ꦔꦺꦴꦩꦺꦴꦁꦩꦫꦁ​ꦫꦠꦸ​ꦲ꦳ꦺꦫꦺꦴꦢꦺꦱ꧀ ꦤꦺꦏ꧀ꦢꦺꦏ꧀ꦤꦺꦲꦺꦴꦫ​ꦏꦼꦤꦺꦁꦔꦼꦥꦺꦏ꧀ꦲ꦳ꦺꦫꦺꦴꦢꦶꦪꦱ꧀ꦢꦢꦶ​ꦧꦺꦴꦗꦺꦴꦤꦺ​꧈​ꦲꦮꦶꦠ꧀ꦲ꦳ꦺꦫꦺꦴꦢꦶꦪꦱ꧀ꦏꦸꦮꦶ​ꦧꦺꦴꦗꦺꦴꦤꦺ​ꦥ꦳ꦶꦭꦶꦥꦸꦱ꧀ ꦱꦼꦢꦸꦭꦸꦂꦫꦺ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦢꦺꦮꦺ꧉​ 5ꦩꦸꦭꦤꦺ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦏꦼꦥꦺꦔꦶꦤ꧀ꦩꦠꦺꦤ꧀ꦤꦶ​ꦪꦺꦴꦲꦤꦼꦱ꧀ ꦤꦁꦔꦶꦁ​ꦢꦺꦏ꧀ꦤꦺꦮꦼꦢꦶ​ꦏꦫꦺꦴ​ꦮꦺꦴꦁꦮꦺꦴꦁ​꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦔꦁꦒꦼꦥ꧀ꦪꦺꦴꦲꦤꦼꦱ꧀ꦏꦸꦮꦶ​ꦤꦧꦶ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​

6꧋ꦤꦁꦔꦶꦁ​ꦢꦺꦴꦁꦔꦺꦲ꦳ꦺꦫꦺꦴꦢꦺꦱ꧀ꦔꦸꦂꦩꦠ꧀ꦠꦸꦠꦸꦥ꧀ꦠꦲꦸꦤ꧀ꦤꦺ​꧈​ꦲꦤꦏ꧀ꦏꦺ​ꦲ꦳ꦺꦫꦺꦴꦢꦶꦪꦱ꧀​ꦚ꧀ꦗꦺꦴꦒꦺꦠ꧀ꦏꦁꦒꦺꦴ​ꦥꦫ​ꦢꦪꦺꦴꦃꦲꦺ꧉​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦱꦼꦤꦼꦁ​ꦧꦔꦼꦠ꧀ꦏꦫꦺꦴ​ꦗꦺꦴꦒꦺꦠꦤ꧀ꦤꦺꦧꦺꦴꦕꦃ​ꦮꦺꦢꦺꦴꦏ꧀ꦩꦲꦸ​꧉​ 7ꦢꦺꦏ꧀ꦤꦺꦱꦩ꧀ꦥꦺꦏ꧀ꦔꦼꦠꦺꦴꦏ꧀ꦏꦏꦺꦗꦚ꧀ꦗꦶ​ꦔꦺꦤꦺ​ꦩꦫꦁ​ꦧꦺꦴꦕꦃꦲꦺ​:“ꦲꦥ​ꦮꦲꦺ​ꦱꦶꦁ​ꦲꦩ꧀ꦧꦺꦴꦏ꧀ꦗꦭꦸꦏ꧀ꦧꦏꦭ꧀ꦠꦏ꧀ꦠꦸꦫꦸꦠ꧀ꦠꦶ​꧉​”

8꧋ꦗꦭꦂꦫꦤ꧀ꦲꦶꦧꦸꦤꦺ​ꦧꦺꦴꦕꦃ​ꦮꦺꦢꦺꦴꦏ꧀ꦩꦲꦸ​ꦱꦶꦁ​ꦔꦗꦤ꧀ꦤꦶ​꧈​ꦧꦺꦴꦕꦃꦲꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦏꦸ​ꦚ꧀ꦗꦭꦸꦏ꧀ꦲꦼꦤ꧀ꦢꦱ꧀ꦱꦺꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦤꦁꦥꦶꦫꦶꦁ​꧉​”

9꧋ꦲ꦳ꦺꦫꦺꦴꦢꦺꦱ꧀ꦱꦼꦢꦶꦧꦔꦼꦠ꧀ꦏꦿꦸꦔꦸ​ꦥꦼꦚ꧀ꦗꦭꦸꦏ꧀ꦏꦺ​ꦧꦺꦴꦕꦃꦲꦺ​꧈​ꦤꦁꦔꦶꦁ​ꦗꦭꦂꦫꦤ꧀ꦢꦺꦏ꧀ꦤꦺꦮꦶꦱ꧀ꦏꦢꦸꦁ​ꦗꦚ꧀ꦗꦶ​ꦤꦁꦔꦉꦥ꧀ꦥꦺ​ꦮꦺꦴꦁ​ꦲꦺꦴꦏꦺꦃ꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦤꦸꦫꦸꦠ꧀ꦠꦶ​ꦲꦥ​ꦥꦼꦚ꧀ꦗꦭꦸꦏ꧀ꦏꦺ​ꦧꦺꦴꦕꦃ​ꦮꦺꦢꦺꦴꦏ꧀ꦩꦲꦸ​꧉​ 10ꦪꦺꦴꦲꦤꦼꦱ꧀ꦠꦼꦫꦸꦱ꧀ꦢꦶꦏꦼꦠꦺꦴꦏ꧀ꦒꦸꦭꦸꦤꦺ​ꦤꦁꦱꦼꦠꦿꦥꦤ꧀ꦏꦺꦴꦤꦺꦴ​꧉​ 11ꦲꦼꦤ꧀ꦢꦱ꧀ꦱꦺꦠꦼꦫꦸꦱ꧀ꦢꦶꦏꦺꦏ꧀ꦏꦏꦺꦧꦺꦴꦕꦃꦲꦺ​ꦤꦁꦥꦶꦫꦶꦁ​꧈​ꦠꦼꦫꦸꦱ꧀ꦢꦶꦥꦱꦿꦃꦲꦏꦺꦩꦫꦁ​ꦲꦶꦧꦸꦤꦺ​ꦏꦫꦺꦴ​ꦧꦺꦴꦕꦃꦲꦺ​꧉​ 12ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦪꦺꦴꦲꦤꦼꦱ꧀ꦠꦼꦫꦸꦱ꧀ꦠꦼꦏ​ꦤꦁꦱꦼꦠꦿꦥꦤ꧀​ꦚ꧀ꦗꦶꦏꦸꦏ꧀ꦭꦪꦺꦴꦤꦺ​ꦲꦉꦥ꧀ꦢꦶꦏꦸꦧꦸꦂ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦥꦢ​ꦔꦧꦂꦫꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦧ꧀ꦊꦭꦏꦺꦴꦤ꧀ꦏꦸꦮꦶ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦏꦺꦏ꧀ꦏꦶꦩꦁꦔꦤ꧀ꦩꦫꦁ​ꦮꦺꦴꦁ​ꦥꦶꦫꦁꦥꦶꦫꦁ​ꦲꦺꦮꦸ​꧉​

13꧋ꦱꦏ꧀ꦮꦶꦱ꧀ꦱꦺ​ꦏꦿꦸꦔꦸ​ꦏꦧꦂ​ꦧꦧ꧀ꦤꦶꦁ​ꦒꦭ꧀ꦭꦺ​ꦪꦺꦴꦲꦤꦼꦱ꧀ ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ ꦢꦺꦮꦺꦏ꧀ꦏꦤ꧀ꦱꦁꦏꦏꦺꦴꦤꦺꦴ​꧈​ꦤꦸꦩ꧀ꦥꦏ꧀ꦥꦿꦲꦸ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦱꦼꦥꦶ​꧉​ꦤꦁꦔꦶꦁ​ꦮꦺꦴꦁꦮꦺꦴꦁ​ꦔꦼꦂꦠꦶ​ꦥꦫꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦩꦸꦭꦤꦺ​ꦠꦼꦫꦸꦱ꧀ꦥꦢ​ꦩ꧀ꦭꦏꦸ​ꦤꦸꦱꦸꦭ꧀ꦢꦺꦏ꧀ꦤꦺ꧉​ 14ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦢꦸꦤ꧀ꦱꦁꦏꦥꦿꦲꦸꦤꦺ​꧈​ꦢꦺꦏ꧀ꦤꦺꦮꦼꦫꦸꦃ​ꦮꦺꦴꦁ​ꦲꦺꦴꦏꦺꦃꦩꦲꦸ​꧈​ꦠꦼꦫꦸꦱ꧀ꦏꦿꦱ​ꦩꦼꦭꦱ꧀ꦧꦔꦼꦠ꧀꧈​ꦮꦺꦴꦁꦮꦺꦴꦁ​ꦱꦶꦁ​ꦭꦫ​ꦠꦼꦫꦸꦱ꧀ꦥꦢ​ꦢꦶꦮꦫꦱ꧀ꦱꦏꦺ꧉​

15꧋ꦏꦢꦸꦁ​ꦮꦶꦱ꧀ꦱꦺꦴꦫꦺ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦱꦲꦶꦏꦶ​ꦮꦶꦱ꧀ꦱꦺꦴꦫꦺ​ꦭꦤ꧀ꦤꦁꦥꦁꦒꦺꦴꦤ꧀ꦤꦤ꧀ꦏꦺꦤꦺ​ꦲꦺꦴꦫ​ꦲꦺꦤꦺꦁꦲꦥꦲꦥ​꧉​ꦲꦩ꧀ꦧꦺꦴꦏ꧀ꦮꦺꦴꦁꦮꦺꦴꦁ​ꦥꦢ​ꦢꦶꦏꦺꦴꦁꦏꦺꦴꦤ꧀ꦭꦸꦔ​꧈​ꦧꦺꦤ꧀​ꦔ꧀ꦒꦺꦴꦭꦺꦏ꧀ꦩꦁꦔꦤ꧀ꦢꦺꦮꦺꦤꦁꦢꦺꦱꦢꦺꦱ​꧉​”

16꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦮꦺꦴꦁꦮꦺꦴꦁ​ꦲꦺꦴꦫ​ꦲꦸꦱꦃꦭꦸꦔ​꧈​ꦏꦺꦴꦮꦺ​ꦱꦶꦁ​ꦏꦸꦢꦸ​ꦔꦼꦏꦺꦏ꧀ꦏꦶꦩꦁꦔꦤ꧀ꦮꦺꦴꦁꦮꦺꦴꦁ​!”

17꧋ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦮꦏ꧀ꦏꦺ​ꦢꦺꦮꦺꦤꦩꦸꦁ​ꦤ꧀ꦢꦸꦮꦺꦫꦺꦴꦠꦶ​ꦭꦶꦩ​ꦭꦤ꧀ꦲꦶꦮꦏ꧀ꦭꦺꦴꦫꦺꦴ​!”

18꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦒꦮꦤꦼꦤ꧀​ꦩ꧀ꦧꦿꦺꦤꦺ!” 19ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀​ꦚ꧀ꦗꦒꦺꦴꦁꦤꦁꦱꦸꦏꦼꦠ꧀ꦠꦤ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦢꦺꦏ꧀ꦤꦺ​ꦠꦼꦫꦸꦱ꧀​ꦚ꧀ꦗꦶꦏꦸꦏ꧀ꦫꦺꦴꦠꦶ​ꦭꦶꦩ​ꦭꦤ꧀ꦲꦶꦮꦏ꧀ꦭꦺꦴꦫꦺꦴ​ꦩꦲꦸ​꧈​ꦠꦼꦫꦸꦱ꧀ꦚꦮꦁ​ꦤ꧀ꦢꦸꦮꦸꦂꦭꦤ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦫꦺꦴꦠꦶꦤꦺ​ꦠꦼꦫꦸꦱ꧀ꦢꦶꦕꦸꦮꦶꦭ꧀ꦕꦸꦮꦶꦭ꧀ ꦠꦼꦫꦸꦱ꧀ꦢꦶꦏꦺꦏ꧀ꦏꦏꦺꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦠꦼꦫꦸꦱ꧀ꦔꦼꦢꦸꦩ꧀ꦫꦺꦴꦠꦶꦤꦺ​ꦩꦫꦁ​ꦮꦺꦴꦁꦮꦺꦴꦁ​꧉​ 20ꦮꦺꦴꦁ​ꦏꦧꦺꦃ​ꦥꦢ​ꦩꦁꦔꦤ꧀ꦱꦩ꧀ꦥꦺꦏ꧀ꦮꦫꦱ꧀ꦩꦸ꧉​ꦱꦏ꧀ꦮꦶꦱ꧀ꦱꦺ​ꦩꦁꦔꦤ꧀ ꦠꦸꦫꦃꦲꦤ꧀ꦤꦺ​ꦫꦺꦴꦠꦶ​ꦭꦤ꧀ꦲꦶꦮꦏ꧀ꦩꦲꦸ​ꦢꦶꦭꦸꦩ꧀ꦥꦸꦏ꧀ꦏꦏꦺꦏꦫꦺꦴ​ꦥꦫ​ꦩꦸꦫꦶꦢ꧀ ꦲꦺꦤꦺꦁꦫꦺꦴꦭꦱ꧀ꦠꦺꦁꦒꦺꦴꦏ꧀ꦏꦼꦧꦼꦏ꧀꧈​ 21ꦱꦶꦁ​ꦩꦁꦔꦤ꧀ꦲꦺꦤꦺꦁꦮꦺꦴꦁ​ꦭꦶꦩꦁ​ꦲꦺꦮꦸ​꧈​ꦤꦩꦸꦁ​ꦮꦺꦴꦁ​ꦭꦩꦸꦂ꧈​ꦮꦺꦴꦁ​ꦮꦺꦢꦺꦴꦏ꧀ꦭꦤ꧀ꦧꦺꦴꦕꦃꦧꦺꦴꦕꦃ​ꦢꦸꦫꦸꦁ​ꦢꦶꦲꦶꦠꦸꦁ꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦭꦏꦸ​ꦤꦁꦩꦺꦂ꧉​

22꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦧꦸꦢꦭ꧀​ꦤ꧀ꦢꦶꦱꦶꦏ꧀ꦏꦫꦺꦴ​ꦥꦿꦲꦸꦤꦺ​ꦤꦁꦲꦧꦿꦃꦲꦤ꧀꧈​ꦮꦺꦴꦁ​ꦲꦺꦴꦏꦺꦃꦩꦲꦸ​ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦩꦸꦭꦶꦃ​꧉​ 23ꦏꦢꦸꦁ​ꦮꦺꦴꦁꦮꦺꦴꦁ​ꦮꦶꦱ꧀ꦭꦸꦔ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦸꦁꦒꦃ​ꦒꦸꦤꦸꦁ​ꦲꦉꦥ꧀​ꦤ꧀ꦢꦺꦴꦁꦔ꧈​ꦢꦺꦮꦺꦏ꧀ꦏꦤ꧀꧈​ꦩ꧀ꦧꦼꦔꦶꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦏꦺꦴꦤꦺꦴ​ꦢꦺꦮꦺ꧉​ 24ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦮꦶꦱ꧀ꦤꦁꦠꦼꦔꦃꦠꦼꦔꦃ​ꦩꦺꦂ꧉​ꦥꦿꦲꦸꦤꦺ​ꦢꦶꦲꦺꦴꦤ꧀ꦠꦁꦔꦤ꧀ꦠꦶꦁꦔꦏꦺꦏꦫꦺꦴ​ꦲꦺꦴꦩ꧀ꦧꦏ꧀ ꦲꦮꦶꦠ꧀ꦲꦔꦶꦤ꧀ꦤꦺ​ꦤꦩ꧀ꦥꦼꦏ꧀꧈​

25꧋ꦏꦶꦫꦏꦶꦫ​ꦗꦩ꧀ꦠꦼꦭꦸ​ꦩ꧀ꦧꦼꦔꦶꦒꦸꦱ꧀ꦠꦶ​ꦪꦺꦯꦸꦱ꧀ꦤꦸꦱꦸꦭ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧈​ꦢꦺꦏ꧀ꦤꦺꦩ꧀ꦭꦏꦸ​ꦤꦁꦧꦚꦸ​꧉​ 26ꦏꦢꦸꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦮꦼꦫꦸꦃ​ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦭꦏꦸ​ꦤꦁꦧꦚꦸ​꧈​ꦠꦼꦫꦸꦱ꧀ꦥꦢ​ꦮꦼꦢꦶ​ꦧꦔꦼꦠ꧀꧈​ꦱꦁꦏꦶꦁꦮꦼꦢꦶꦤꦺ​ꦠꦼꦫꦸꦱ꧀ꦥꦢ​ꦚ꧀ꦗꦼꦫꦶꦠ꧀:“ꦲꦺꦤꦺꦁꦩꦺꦴꦏ꧀ꦩꦼꦢꦶ!”

27꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦗ​ꦥꦢ​ꦏꦒꦺꦠ꧀꧈​ꦲꦶꦏꦶ​ꦲꦏꦸ​꧉​ꦮꦶꦱ꧀ꦲꦗ​ꦥꦢ​ꦮꦼꦢꦶ​!”

28꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ​꧈​ꦤꦺꦏ꧀ꦥꦚ꧀ꦕꦺꦤ꧀ꦏꦺꦴꦮꦺ​ꦠꦼꦤꦤ꧀ ꦲꦩ꧀ꦧꦺꦴꦏ꧀ꦲꦏꦸ​ꦢꦶꦕꦼꦭꦸꦏ꧀​ꦱꦸꦥꦪ​ꦩꦫꦤꦶ​ꦏꦺꦴꦮꦺ​ꦩ꧀ꦭꦏꦸ​ꦤꦁꦧꦚꦸ​!”

29꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦪ​꧈​ꦩ꧀ꦧꦿꦺꦤꦺꦪꦦꦺꦠꦿꦸꦱ꧀!”ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦩꦼꦠꦸ​ꦱꦁꦏꦥꦿꦲꦸꦤꦺ​ꦭꦤ꧀​ꦩ꧀ꦭꦏꦸ​ꦤꦁꦧꦚꦸ​꧈​ꦩꦫꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 30ꦤꦁꦔꦶꦁ​ꦏꦢꦸꦁ​ꦫꦱꦸꦭ꧀ꦦꦺꦠꦿꦸꦱ꧀ꦮꦼꦫꦸꦃ​ꦧꦤ꧀ꦠꦼꦂꦫꦺ​ꦲꦔꦶꦤ꧀ꦤꦺ​ꦤꦁꦩꦺꦂꦏꦺꦴꦤꦺꦴ​꧈​ꦢꦺꦏ꧀ꦤꦺꦠꦼꦫꦸꦱ꧀ꦮꦼꦢꦶ​ꦭꦤ꧀ꦩꦺꦴꦭꦃꦲꦶꦩꦼꦤ꧀ꦢꦼꦊꦥ꧀ꦏꦫꦺꦴ​ꦧꦼꦔꦺꦴꦏ꧀ꦧꦼꦔꦺꦴꦏ꧀:“ꦒꦸꦱ꧀ꦠꦶ​꧈​ꦲꦏꦸ​ꦢꦶꦠꦸꦭꦸꦁꦔꦶ​!”

31꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦒꦼꦭꦶꦱ꧀ꦒꦼꦭꦶꦱ꧀ꦔꦼꦭꦸꦁꦔꦏꦺꦠꦔꦤ꧀ꦤꦺ​ꦭꦤ꧀ꦚꦼꦏꦼꦭ꧀ꦫꦱꦸꦭ꧀ꦦꦺꦠꦿꦸꦱ꧀ ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦏ꧀ꦕꦶꦭꦶꦏ꧀ꦠꦼꦩꦼꦤ꧀ꦥꦼꦔꦤ꧀ꦢꦼꦭ꧀ꦩꦸ​?ꦏꦼꦤꦺꦁꦲꦥ​ꦏꦺꦴꦏ꧀ꦠꦼꦫꦸꦱ꧀ꦩꦔꦸꦩꦔꦸ​?”

32꧋ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦫꦱꦸꦭ꧀ꦦꦺꦠꦿꦸꦱ꧀ꦮꦶꦱ꧀ꦤꦁꦥꦿꦲꦸꦤꦺ​꧈​ꦲꦔꦶꦤ꧀ꦤꦺ​ꦠꦼꦫꦸꦱ꧀ꦩꦤ꧀ꦢꦼꦏ꧀꧈​ 33ꦩꦸꦫꦶꦢ꧀ꦩꦸꦫꦶꦢ꧀ꦱꦶꦁ​ꦤꦁꦥꦿꦲꦸ​ꦩꦲꦸ​ꦠꦼꦫꦸꦱ꧀ꦥꦢ​ꦱꦸꦗꦸꦠ꧀ꦭꦤ꧀ꦚꦼꦩ꧀ꦧꦃ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦩ꧀ꦧꦸꦁꦔꦺ​:“ꦒꦸꦱ꧀ꦠꦶ​꧈​ꦏꦺꦴꦮꦺ​ꦥꦚ꧀ꦕꦺꦤ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀!”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁꦮꦺꦴꦁ​ꦭꦫ​ꦤꦁꦧꦮꦃꦓꦼꦤꦺꦱꦫꦺꦠ꧀꧈​

34꧋ꦏꦢꦸꦁ​ꦮꦶꦱ꧀ꦥꦢ​ꦔꦧꦿꦃ꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦥꦢ​ꦠꦼꦏꦤ꧀ꦧꦮꦃꦓꦼꦤꦺꦱꦫꦺꦠ꧀꧈​ 35ꦮꦺꦴꦁꦮꦺꦴꦁ​ꦏꦺꦴꦤꦺꦴ​ꦥꦢ​ꦤꦶꦠꦺꦤ꧀ꦤꦶ​ꦤꦺꦏ꧀ꦱꦶꦁ​ꦠꦼꦏ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦫꦸꦱ꧀ꦥꦢ​ꦔꦧꦂꦫꦶ​ꦮꦺꦴꦁꦮꦺꦴꦁ​ꦱꦏ꧀ꦏꦶꦮꦠꦼꦔꦼꦤ꧀ꦤꦺ​ꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​ꦏꦧꦺꦃ​꧉​ꦮꦺꦴꦁꦮꦺꦴꦁ​ꦱꦶꦁ​ꦭꦫ​ꦠꦼꦫꦸꦱ꧀ꦥꦢ​ꦢꦶꦒꦮ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ 36ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦚꦸꦮꦸꦤ꧀ ꦱꦸꦥꦪ​ꦥꦢ​ꦏꦼꦭꦶꦭ꧀ꦭꦤ꧀​ꦤ꧀ꦢꦼꦩꦺꦏ꧀ꦒꦺꦴꦩ꧀ꦧꦾꦺꦴꦏ꧀ꦏꦺꦱꦭꦶꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦏꦧꦺꦃ​ꦱꦶꦁ​ꦤ꧀ꦢꦼꦩꦺꦏ꧀ꦩꦭꦶꦃ​ꦮꦫꦱ꧀꧈​

↑ ↑ ↑


꧋ꦲꦢꦠ꧀ꦥꦼꦂꦤꦠꦤ꧀​ꦒꦮꦺꦪꦤ꧀ꦤꦺ​ꦩꦤꦸꦁꦱ​꧉​

꧇​꧑꧕꧇​ 1-2ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦲꦺꦤꦺꦁꦮꦺꦴꦁ​ꦥ꦳ꦫꦶꦱꦶ​ꦭꦤ꧀ꦒꦸꦫꦸ​ꦏꦶꦠꦧ꧀​ ꦱꦁꦏꦏꦸꦠꦪꦺꦫꦸꦱꦭꦺꦩ꧀ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦔꦺꦤꦺ​:“ꦏꦼꦤꦺꦁꦲꦥ​ꦩꦸꦫꦶꦢ꧀ꦩꦸꦫꦶꦢ꧀ꦩꦸꦏꦺꦴꦏ꧀ꦤꦼꦫꦏ꧀ꦥꦼꦂꦤꦠꦤ꧀ꦤꦺꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ?ꦤꦺꦏ꧀ꦩꦁꦔꦤ꧀ꦏꦺꦴꦏ꧀ꦲꦺꦴꦫ​ꦥꦢ​ꦮꦶꦱꦸꦃ​ꦠꦔꦤ꧀​ꦤ꧀ꦢꦶꦱꦶꦏ꧀?”

3꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​ꦔꦺꦤꦺ​:“ꦭꦃ​ꦏꦺꦴꦮꦺ​ꦏꦺꦴꦏ꧀ꦥꦢ​ꦤꦼꦫꦏ꧀ꦲꦁꦒꦼꦂꦫꦁꦒꦼꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦤꦩꦸꦁ​ꦏꦼꦥꦺꦔꦶꦤ꧀ꦤꦼꦠꦼꦥ꧀ꦥꦶ​ꦲꦢꦠ꧀ꦥꦼꦂꦤꦠꦤ꧀ꦤꦺꦩ꧀ꦧꦃꦩ꧀ꦧꦲꦤ꧀ꦩꦸ? 4ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁ:'ꦔꦗꦺꦤ꧀ꦤꦤ​ꦩꦫꦁ​ꦧꦥ​ꦭꦤ꧀ꦧꦶꦪꦸꦁꦩꦸ​꧈'​ꦭꦤ꧀'ꦱꦥ​ꦱꦶꦁ​ꦩꦸꦗꦺꦏ꧀ꦏꦏꦺꦲꦭ​ꦩꦫꦁ​ꦧꦥ​ꦭꦤ꧀ꦧꦶꦪꦸꦁꦔꦺ​ꦏꦸꦢꦸ​ꦢꦶꦥꦠꦺꦤ꧀ꦤꦶ​꧉'​ 5ꦤꦁꦔꦶꦁ​ꦏꦺꦴꦮꦺ​ꦩꦸꦭꦁꦔꦶ:'ꦲꦸꦫꦸꦤ꧀ꦤꦤ꧀ꦏꦁꦒꦺꦴ​ꦔꦺꦴꦥꦺꦤ꧀ꦤꦶ​ꦮꦺꦴꦁ​ꦠꦸꦮꦩꦸ​ꦏꦼꦤꦺꦁꦲꦩ꧀ꦧꦺꦴꦏ꧀ꦏꦺꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦏꦺꦴꦮꦺ​ꦮꦶꦱ꧀ꦲꦺꦴꦫ​ꦲꦸꦱꦃꦔꦼꦏꦺꦏ꧀ꦏꦶꦲꦸꦫꦸꦤ꧀ꦤꦤ꧀ꦩꦫꦁ​ꦮꦺꦴꦁ​ꦠꦸꦮꦩꦸ​ꦩꦼꦤꦺꦃ​꧉'​ 6ꦠꦼꦒꦼꦱ꧀ꦱꦺ​꧈​ꦲꦁꦒꦼꦂꦫꦁꦒꦼꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦩ꧀ꦧꦺꦴꦏ꧀ꦲꦸꦤ꧀ꦢꦸꦂꦫꦏꦺꦏꦁꦒꦺꦴ​ꦔꦼꦗꦺꦴꦏ꧀ꦏꦏꦺꦥꦼꦂꦤꦠꦤ꧀ꦥꦼꦂꦤꦠꦤ꧀ꦩꦸꦢꦺꦮꦺ꧉​ 7ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦭꦩꦶꦱ꧀꧈​ꦕꦺꦴꦕꦺꦴꦏ꧀​ꦠꦼꦤꦤ꧀ꦠꦼꦩ꧀ꦧꦸꦁꦔꦺ​ꦤꦧꦶ​ꦪꦺꦱꦪ​ꦧꦧ꧀ꦏꦺꦴꦮꦺ​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

8‘ꦧꦁꦱ​ꦲꦶꦏꦶ​ꦲꦼꦁꦒꦺꦴꦤꦺ​ꦔꦼꦊꦩ꧀ꦲꦏꦸ​ꦤꦩꦸꦁ​ꦏꦫꦺꦴ​ꦭꦩ꧀ꦧꦺꦤꦺ​꧈​
ꦤꦁꦔꦶꦁ​ꦲꦠꦶꦤꦺ​ꦲꦢꦺꦴꦃ​ꦱꦁꦏꦲꦏꦸ​꧉​
9ꦠꦤ꧀ꦥ​ꦒꦸꦤ​ꦲꦼꦁꦒꦺꦴꦤꦺ​ꦥꦢ​ꦔꦧꦼꦏ꧀ꦠꦶ​ꦩꦫꦁ​ꦲꦏꦸ​꧈​
ꦲꦮꦶꦠ꧀ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦱꦶꦁ​ꦢꦶꦮꦸꦭꦁꦔꦏꦺ
ꦏꦸꦮꦶ​ꦤꦩꦸꦁ​ꦒꦮꦺꦪꦤ꧀ꦤꦺ​ꦩꦤꦸꦁꦱ​꧉​’”

꧋ꦱꦶꦁ​ꦩꦫꦏ꧀ꦏꦏꦺꦲꦠꦶꦤꦺ​ꦮꦺꦴꦁ​ꦲꦭ​꧉​

10꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦮꦺꦴꦁꦮꦺꦴꦁ​ꦏꦺꦴꦁꦏꦺꦴꦤ꧀ꦥꦢ​ꦩꦗꦸ​꧈​ꦠꦼꦫꦸꦱ꧀ꦢꦶꦲꦺꦴꦩꦺꦴꦁꦔꦶꦔꦺꦤꦺ​:“ꦲꦶꦏꦶ​ꦥꦢ​ꦢꦶꦫꦸꦔꦺꦴꦏ꧀ꦏꦏꦺ​ꦭꦤ꧀ꦢꦶꦊꦧꦺꦴꦏ꧀ꦏꦏꦺꦲꦶꦁ​ꦲꦠꦶꦩꦸ​! 11ꦱꦶꦁ​ꦩꦫꦏ꧀ꦏꦏꦺꦮꦺꦴꦁ​ꦲꦭ​ꦏꦸꦮꦶ​ꦲꦺꦴꦫ​ꦧꦫꦁ​ꦱꦶꦁ​ꦩ꧀ꦊꦧꦸ​ꦕꦁꦏꦼꦩ꧀ ꦲꦺꦴꦫ​꧈​ꦤꦁꦔꦶꦁ​ꦲꦥ​ꦱꦶꦁ​ꦩꦼꦠꦸ​ꦕꦁꦏꦼꦩ꧀꧈​”

12꧋ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦠꦼꦫꦸꦱ꧀ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ​꧈​ꦲꦥ​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦥꦫ​ꦥ꦳ꦫꦶꦱꦶ​ꦥꦢ​ꦥꦤꦱ꧀ꦲꦠꦶꦤꦺ​ꦢꦺꦴꦁꦔꦺꦏꦿꦸꦔꦸ​ꦠꦼꦩ꧀ꦧꦸꦁꦩꦸ​?”

13꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦱꦧꦼꦤ꧀ꦠꦤ꧀ꦢꦸꦂꦫꦤ꧀ꦱꦶꦁ​ꦲꦺꦴꦫ​ꦢꦶꦠꦤ꧀ꦢꦸꦂ​ꦏꦫꦺꦴ​ꦧꦥꦏ꧀ꦏꦸ​ꦤꦁꦱ꧀ꦮꦂꦒ​ꦧꦏꦭ꧀ꦢꦶꦧꦼꦢꦺꦴꦭ꧀꧈​ 14ꦮꦺꦴꦁ​ꦥ꦳ꦫꦶꦱꦶ​ꦏꦸꦮꦶ​ꦲꦺꦴꦫ​ꦲꦸꦱꦃꦢꦶꦫꦺꦮꦺꦱ꧀꧈​ꦏꦸꦮꦶ​ꦥꦼꦤꦸꦤ꧀ꦠꦸꦤ꧀ꦱꦶꦁ​ꦭꦩꦸꦂ​꧉​ꦭꦃ​ꦤꦺꦏ꧀ꦮꦺꦴꦁ​ꦭꦩꦸꦂ​ꦤꦸꦤ꧀ꦠꦸꦤ꧀ꦮꦺꦴꦁ​ꦭꦩꦸꦂ​ꦭꦶꦪꦤꦺ​꧈​ꦏꦧꦺꦃ​ꦭꦺꦴꦫꦺꦴ​ꦧꦏꦭ꧀ꦏꦼꦕꦼꦩ꧀ꦥ꧀ꦭꦸꦁ​ꦤꦁꦭꦸꦮꦁꦔꦤ꧀꧈​”

15꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦩ꧀ꦧꦺꦴꦏ꧀ꦲꦮꦏ꧀ꦏꦺ​ꦢꦺꦮꦺꦢꦶꦢꦸꦤꦸꦁꦔꦏꦺꦠꦼꦩ꧀ꦧꦸꦁꦩꦸ​ꦏꦸꦮꦶ​ꦒꦸꦱ꧀ꦠꦶ​!”

16꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​:“ꦩꦺꦴꦱꦺꦴꦏ꧀ꦏꦺꦴꦮꦺ​ꦲꦸꦒ​ꦢꦸꦫꦸꦁ​ꦢꦸꦤꦸꦁ? 17ꦩꦺꦴꦱꦺꦴꦏ꧀ꦏꦺꦴꦮꦺ​ꦲꦺꦴꦫ​ꦢꦸꦤꦸꦁꦤꦺꦏ꧀ꦱꦼꦩ꧀ꦧꦫꦁ​ꦱꦶꦁ​ꦩ꧀ꦊꦧꦸ​ꦕꦁꦏꦼꦩ꧀ꦏꦸꦮꦶ​ꦥꦫꦤ꧀ꦤꦺ​ꦪ​ꦤꦁꦮꦼꦠꦼꦁ​ꦠꦼꦫꦸꦱ꧀ꦢꦶꦲꦼꦠꦺꦴꦏ꧀ꦏꦏꦺꦩꦼꦤꦺꦃ​ꦱꦁꦏꦲꦮꦏ꧀? 18ꦤꦁꦔꦶꦁ​ꦲꦥ​ꦱꦶꦁ​ꦩꦼꦠꦸ​ꦱꦁꦏꦕꦁꦏꦼꦩ꧀ꦩꦺ​ꦮꦺꦴꦁ​ꦏꦸꦮꦶ​ꦩꦼꦠꦸꦤꦺ​ꦱꦁꦏꦲꦠꦶꦤꦺ​꧈​ꦏꦸꦮꦶ​ꦱꦶꦁ​ꦩꦫꦏ꧀ꦏꦏꦺꦮꦺꦴꦁ​ꦲꦭ​꧉​ 19ꦲꦮꦶꦠ꧀ꦱꦁꦏꦲꦶꦁ​ꦲꦠꦶ​ꦏꦸꦮꦶ​ꦠꦼꦏꦤꦺ​ꦥꦶꦏꦶꦫꦤ꧀ꦥꦶꦏꦶꦫꦤ꧀ꦱꦶꦁ​ꦲꦭ​꧈​ꦱꦶꦁ​ꦩꦫꦏ꧀ꦏꦏꦺꦮꦺꦴꦁ​ꦩꦠꦺꦤ꧀ꦤꦶ​꧈​ꦭꦏꦸ​ꦧꦺꦢꦁ꧈​ꦩꦼꦩꦺꦢꦺꦴꦏ꧀ ꦚꦼꦚꦺꦴꦭꦺꦴꦁ​꧈​ꦔꦥꦸꦱ꧀ꦱꦶ​ꦭꦤ꧀ꦚꦼꦚꦠꦸꦂ꧉​ 20ꦥꦽꦏꦫꦥꦽꦏꦫ​ꦏꦸꦮꦶ​ꦱꦶꦁ​ꦩꦫꦏ꧀ꦏꦏꦺꦩꦤꦸꦁꦱ​ꦲꦭ​꧉​ꦤꦁꦔꦶꦁ​ꦩꦁꦔꦤ꧀ꦠꦤ꧀ꦥ​ꦮꦶꦱꦸꦃ​ꦤ꧀ꦢꦶꦱꦶꦏ꧀ ꦏꦸꦮꦶ​ꦲꦺꦴꦫ​ꦩꦫꦏ꧀ꦏꦏꦺꦮꦺꦴꦁ​ꦲꦭ​꧉​”

꧋ꦥꦼꦔꦤ꧀ꦢꦼꦭ꧀ꦭꦺ​ꦮꦺꦴꦁ​ꦮꦺꦢꦺꦴꦏ꧀ꦧꦁꦱ​ꦑꦤꦄꦤ꧀꧈​

21꧋ꦱꦁꦏꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ꦤꦁꦧꦮꦃꦲꦺꦏꦸꦠꦱꦶꦢꦺꦴꦤ꧀ꦭꦤ꧀ꦏꦸꦠꦠꦶꦫꦸꦱ꧀꧈​ 22ꦤꦁꦏꦺꦴꦤꦺꦴ​ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦧꦁꦱ​ꦑꦤꦄꦤ꧀ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦕꦼꦭꦸꦏ꧀ꦕꦼꦭꦸꦏ꧀:“ꦒꦸꦱ꧀ꦠꦶ​꧈​ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ ꦲꦩ꧀ꦧꦺꦴꦏ꧀ꦲꦏꦸ​ꦢꦶꦩꦼꦭꦱ꧀ꦱꦶ!ꦲꦤꦏ꧀ꦏꦸ​ꦮꦺꦢꦺꦴꦏ꧀ꦏꦼꦱꦸꦫꦸꦥ꧀ꦥꦤ꧀ꦢꦼꦩꦶꦠ꧀ꦭꦤ꧀ꦩꦼꦭꦱ꧀ꦱꦏꦺꦠꦼꦤꦤ꧀!”

23꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦱꦼꦩꦲꦸꦂ​ꦧ꧀ꦭꦱ꧀꧈​ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦠꦼꦫꦸꦱ꧀ꦥꦢ​ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦒꦸꦱ꧀ꦠꦶ​꧈​ꦮꦺꦴꦁ​ꦏꦸꦮꦶ​ꦩ꧀ꦧꦺꦴꦏ꧀ꦢꦶꦏꦺꦴꦁꦏꦺꦴꦤ꧀ꦭꦸꦔ​ꦮꦲꦺ​꧈​ꦲꦮꦶꦠ꧀ꦮꦺꦴꦁꦔꦺ​ꦠꦼꦫꦸꦱ꧀ꦧꦼꦔꦏ꧀ꦧꦼꦔꦺꦴꦏ꧀ꦔꦼꦠꦸꦠ꧀ꦠꦏꦺꦲꦮꦏ꧀ꦏꦺ​ꦢꦺꦮꦺ꧉​”

24꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦏꦸ​ꦲꦶꦏꦶ​ꦢꦶꦏꦺꦴꦁꦏꦺꦴꦤ꧀ꦩꦫꦤꦶ​ꦧꦁꦱ​ꦆꦱꦿꦌꦭ꧀ꦱꦶꦁ​ꦏꦼꦠꦿꦶꦮꦭ꧀꧈​”

25꧋ꦤꦁꦔꦶꦁ​ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦩꦭꦃ​ꦱꦸꦗꦸꦠ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦫꦺꦴ​ꦚꦸꦮꦸꦤ꧀:“ꦒꦸꦱ꧀ꦠꦶ​꧈​ꦲꦩ꧀ꦧꦺꦴꦏ꧀ꦲꦏꦸ​ꦢꦶꦠꦸꦭꦸꦁꦔꦶ​ꦠ​!”

26꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦲꦺꦴꦫ​ꦲꦥꦶꦏ꧀ꦤꦺꦏ꧀ꦮꦺꦴꦁ​ꦚ꧀ꦗꦶꦏꦸꦏ꧀ꦥꦔꦤ꧀ꦏꦸ​ꦲꦤꦏ꧀ꦏꦺ​ꦠꦼꦫꦸꦱ꧀ꦢꦶꦏꦺꦏ꧀ꦏꦏꦺꦲꦱꦸ​꧉​”

27꧋ꦮꦺꦴꦁ​ꦮꦺꦢꦺꦴꦏ꧀ꦏꦺꦱꦼꦩꦲꦸꦂ​:“ꦥꦚ꧀ꦕꦺꦤ꧀ꦧꦼꦤꦼꦂ​꧈​ꦒꦸꦱ꧀ꦠꦶ​꧈​ꦤꦁꦔꦶꦁ​ꦲꦱꦸꦤꦺꦭꦲꦸꦠ꧀ꦪ​ ꦩꦁꦔꦤ꧀ꦠꦸꦫꦃꦲꦤ꧀ꦤꦺ​ꦥꦔꦤ꧀ꦏꦸ​ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦠ​!”

28꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦔꦺ​:“ꦲꦶꦧꦸ​꧈​ꦥꦚ꧀ꦕꦺꦤ꧀ꦒꦼꦢꦺ​ꦠꦼꦤꦤ꧀ꦥꦼꦔꦤ꧀ꦢꦼꦭ꧀ꦩꦸ​꧉​ꦏꦼꦏꦉꦥ꧀ꦥꦤ꧀ꦩꦸ​ꦧꦏꦭ꧀ꦏꦼꦠꦸꦫꦸꦠ꧀ꦠꦤ꧀꧉”ꦭꦤ꧀ꦮꦶꦮꦶꦠ꧀ꦮꦏ꧀ꦠꦸ​ꦏꦸꦮꦶ​ꦲꦤꦏ꧀ꦏꦺ​ꦮꦺꦴꦁꦔꦺ​ꦩꦭꦶꦃ​ꦮꦫꦱ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁ​ꦲꦺꦴꦏꦺꦃ꧉​

29꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​ꦭꦶꦮꦠ꧀ꦥꦶꦁꦒꦶꦂꦫꦺ​ꦩꦺꦂꦓꦭꦶꦭꦺꦪ​꧈​ꦠꦼꦫꦸꦱ꧀ꦩꦸꦁꦒꦃ​ꦒꦸꦤꦸꦁ​꧉​ꦒꦸꦱ꧀ꦠꦶ​ꦪꦺꦯꦸꦱ꧀​ꦚ꧀ꦗꦒꦺꦴꦁꦤꦁꦏꦺꦴꦤꦺꦴ​꧉​ 30ꦮꦺꦴꦁ​ꦥꦶꦫꦁꦥꦶꦫꦁ​ꦠꦼꦫꦸꦱ꧀ꦥꦢ​ꦠꦼꦏ​ꦔ꧀ꦒꦮ​ꦮꦺꦴꦁ​ꦭꦸꦩ꧀ꦥꦸꦃ​꧈​ꦮꦺꦴꦁ​ꦥꦶꦚ꧀ꦕꦁ​꧈​ꦮꦺꦴꦁ​ꦭꦩꦸꦂ​꧈​ꦮꦺꦴꦁ​ꦧꦶꦱꦸ​ꦭꦤ꧀ꦮꦺꦴꦁ​ꦭꦫ​ꦭꦶꦪꦭꦶꦪꦤꦺ​꧈​ꦢꦶꦲꦼꦠꦼꦂꦫꦏꦺꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ 31ꦮꦺꦴꦁꦮꦺꦴꦁ​ꦥꦢ​ꦔ꧀ꦒꦸꦩꦸꦤ꧀ꦮꦼꦫꦸꦃ​ꦱꦶꦁ​ꦧꦶꦱꦸ​ꦧꦶꦱ​ꦔꦺꦴꦩꦺꦴꦁ꧈​ꦱꦶꦁ​ꦥꦶꦚ꧀ꦕꦁ​ꦧꦶꦱ​ꦩꦫꦶ​ꦱꦶꦏꦶꦭ꧀ꦭꦺ​꧈​ꦱꦶꦁ​ꦭꦸꦩ꧀ꦥꦸꦃ​ꦧꦶꦱ​ꦩ꧀ꦭꦏꦸ​ꦭꦤ꧀ꦱꦶꦁ​ꦭꦩꦸꦂ​ꦧꦶꦱ​ꦮꦼꦫꦸꦃ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦫꦸꦱ꧀ꦥꦢ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦆꦱꦿꦌꦭ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦏꦺꦏ꧀ꦏꦶꦩꦁꦔꦤ꧀ꦩꦫꦁ​ꦮꦺꦴꦁ​ꦥꦶꦫꦁꦥꦶꦫꦁ​ꦲꦺꦮꦸ​꧉​

32꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦢꦶꦲꦺꦴꦩꦺꦴꦁꦔꦶꦔꦺꦤꦺ​:“ꦲꦏꦸ​ꦩꦼꦭꦱ꧀ꦱꦏꦺꦩꦫꦁ​ꦮꦺꦴꦁꦮꦺꦴꦁ​꧉​ꦮꦶꦱ꧀ꦠꦼꦭꦸꦁ​ꦢꦶꦤ​ꦲꦼꦁꦒꦺꦴꦤꦺ​ꦔꦼꦠꦸꦠ꧀ꦠꦏꦺꦲꦏꦸ​ꦭꦤ꧀ꦱꦲꦶꦏꦶ​ꦮꦶꦱ꧀ꦲꦺꦴꦫ​ꦲꦺꦤꦺꦁꦱꦶꦁ​ꦢꦶꦥꦔꦤ꧀꧈​ꦲꦏꦸ​ꦲꦺꦴꦫ​ꦧꦶꦱ​ꦔꦺꦴꦁꦏꦺꦴꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦩꦸꦭꦶꦃ​ꦏꦫꦺꦴ​ꦮꦼꦠꦼꦁ​ꦔꦼꦭꦶꦃ​꧈​ꦩꦼꦁꦏꦺꦴ​ꦤ꧀ꦢꦏ꧀ꦲꦩ꧀ꦧꦿꦸꦏ꧀ꦤꦁꦢꦭꦤ꧀꧈​”

33꧋ꦩꦸꦫꦶꦢ꧀ꦩꦸꦫꦶꦢ꧀ꦠꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦱꦼꦥꦶꦲꦶꦏꦶꦲꦮꦏ꧀ꦏꦺꦢꦺꦮꦺꦏꦺꦴꦁꦏꦺꦴꦤ꧀​ꦔ꧀ꦒꦺꦴꦭꦺꦏ꧀ꦫꦺꦴꦠꦶꦤꦁꦲꦼꦤ꧀ꦢꦶꦏꦁꦒꦺꦴꦔꦼꦏꦺꦏ꧀ꦏꦶꦩꦁꦔꦤ꧀ꦮꦺꦴꦁꦱꦼꦩꦺꦴꦤꦺꦴꦲꦺꦴꦏꦺꦃꦲꦺ?”

34꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦭꦃ​ꦏꦺꦴꦮꦺ​ꦤ꧀ꦢꦸꦮꦺꦫꦺꦴꦠꦶ​ꦥꦶꦫ​?”ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦱꦼꦩꦲꦸꦂ​:“ꦲꦺꦤꦺꦁꦫꦺꦴꦠꦶ​ꦥꦶꦠꦸ​ꦭꦤ꧀ꦲꦶꦮꦏ꧀ꦕꦶꦭꦶꦏ꧀ꦕꦶꦭꦶꦏ꧀ꦱꦶꦗꦶꦭꦺꦴꦫꦺꦴ꧉​”

35꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦮꦺꦴꦁꦮꦺꦴꦁ​ꦱꦸꦥꦪ​ꦥꦢ​ꦚ꧀ꦗꦒꦺꦴꦁꦤꦁꦊꦩꦃ​꧉​ 36ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦢꦺꦏ꧀ꦤꦺ​ꦠꦼꦫꦸꦱ꧀​ꦚ꧀ꦗꦶꦏꦸꦏ꧀ꦫꦺꦴꦠꦶ​ꦥꦶꦠꦸ​ꦏꦫꦺꦴ​ꦲꦶꦮꦏ꧀ꦏꦺ​ꦩꦲꦸ​ꦠꦼꦫꦸꦱ꧀​ꦤ꧀ꦢꦺꦴꦁꦔꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦫꦺꦴꦠꦶꦤꦺ​ꦭꦤ꧀ꦲꦶꦮꦏ꧀ꦏꦺ​ꦠꦼꦫꦸꦱ꧀ꦢꦶꦕꦸꦮꦶꦭ꧀ꦕꦸꦮꦶꦭ꧀ꦠꦼꦫꦸꦱ꧀ꦢꦶꦏꦺꦏ꧀ꦏꦏꦺꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦠꦼꦫꦸꦱ꧀ꦔꦼꦢꦸꦩ꧀ꦫꦺꦴꦠꦶ​ꦭꦤ꧀ꦲꦶꦮꦏ꧀ꦏꦺ​ꦩꦫꦁ​ꦮꦺꦴꦁꦮꦺꦴꦁ​꧉​ 37ꦮꦺꦴꦁ​ꦏꦧꦺꦃ​ꦥꦢ​ꦩꦁꦔꦤ꧀ꦱꦩ꧀ꦥꦺꦏ꧀ꦮꦫꦱ꧀ꦩꦸ꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀​ꦔ꧀ꦭꦸꦩ꧀ꦥꦸꦏ꧀ꦏꦏꦺꦠꦸꦫꦃꦲꦤ꧀ꦤꦺ​꧈​ꦲꦺꦤ꧀ꦠꦸꦏ꧀ꦥꦶꦠꦸꦁ​ꦠꦺꦁꦒꦺꦴꦏ꧀ꦏꦼꦧꦼꦏ꧀꧈​ 38ꦮꦺꦴꦁꦔꦺ​ꦭꦤꦁ​ꦱꦶꦁ​ꦩꦺꦭꦸ​ꦩꦁꦔꦤ꧀ꦲꦺꦤꦺꦁꦥꦠꦁ​ꦲꦺꦮꦸ​ꦲꦺꦴꦏꦺꦃꦲꦺ꧈​ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦭꦤ꧀ꦧꦺꦴꦕꦃꦧꦺꦴꦕꦃ​ꦢꦸꦫꦸꦁ​ꦢꦶꦲꦶꦠꦸꦁ꧉​

39꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦮꦺꦴꦁꦮꦺꦴꦁ​ꦩꦸꦭꦶꦃ​꧉​ꦢꦺꦏ꧀ꦤꦺꦠꦼꦫꦸꦱ꧀ꦤꦸꦩ꧀ꦥꦏ꧀ꦥꦿꦲꦸ​ꦲꦉꦥ꧀ꦤꦁꦧꦮꦃꦩꦏꦢꦤ꧀꧈​

↑ ↑ ↑


꧋ꦮꦺꦴꦁ​ꦥ꦳ꦫꦶꦱꦶ​ꦭꦤ꧀ꦮꦺꦴꦁ​ꦱꦢꦸꦏꦶ​ꦚ꧀ꦗꦭꦸꦏ꧀ꦠꦤ꧀ꦢ꧉​

꧇​꧑꧖꧇​ 1꧋ꦮꦺꦴꦁ​ꦥ꦳ꦫꦶꦱꦶ​ꦭꦤ꧀ꦮꦺꦴꦁ​ꦱꦢꦸꦏꦶ​ꦥꦢ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ ꦠꦸꦗꦸꦮꦤ꧀ꦤꦺ​ꦲꦉꦥ꧀ꦔꦼꦤꦺꦁꦢꦺꦏ꧀ꦤꦺ꧉​ꦩꦸꦭꦤꦺ​ꦥꦢ​ꦏꦼꦥꦺꦔꦶꦤ꧀ꦮꦼꦫꦸꦃ​ꦠꦤ꧀ꦢꦤꦺꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 2ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​ꦔꦺꦤꦺ​:(“ꦤꦺꦏ꧀ꦱꦺꦴꦫꦺ​ꦭꦔꦶꦠ꧀ꦠꦺ​ꦏꦺꦠꦺꦴꦏ꧀ꦲꦧꦁ​ꦩꦸꦫꦸꦥ꧀ ꦏꦺꦴꦮꦺ​ꦔꦺꦴꦩꦺꦴꦁꦤꦺꦏ꧀ꦲꦉꦥ꧀ꦠꦼꦫꦁ​꧉​ 3ꦤꦺꦏ꧀ꦲꦺꦱꦸꦏ꧀ꦭꦔꦶꦠ꧀ꦠꦺ​ꦏꦺꦠꦺꦴꦏ꧀ꦲꦧꦁ​ꦥꦼꦠꦼꦁ​꧈​ꦏꦺꦴꦮꦺ​ꦔꦺꦴꦩꦺꦴꦁꦤꦺꦏ꧀ꦲꦉꦥ꧀ꦲꦸꦢꦤ꧀꧈​ꦏꦺꦴꦮꦺ​ꦥꦢ​ꦧꦶꦱ​ꦤꦶꦠꦺꦤ꧀ꦤꦶ​ꦠꦤ꧀ꦢꦠꦤ꧀ꦢꦤꦺꦤꦺꦏ꧀ꦲꦉꦥ꧀ꦠꦼꦫꦁ​ꦲꦥ​ꦲꦸꦢꦤ꧀ ꦤꦁꦔꦶꦁ​ꦠꦤ꧀ꦢꦠꦤ꧀ꦢꦤꦺꦗꦩꦤ꧀ꦏꦺꦴꦮꦺ​ꦲꦺꦴꦫ​ꦢꦸꦤꦸꦁ꧉​) 4ꦏꦺꦴꦮꦺ​ꦮꦺꦴꦁ​ꦲꦭ​ꦭꦤ꧀ꦮꦺꦴꦁ​ꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦥꦽꦕꦪ​꧈​ꦏꦺꦴꦮꦺ​ꦥꦢ​ꦚ꧀ꦗꦭꦸꦏ꧀ꦠꦤ꧀ꦢ꧉​ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦲꦺꦤ꧀ꦠꦸꦏ꧀ꦠꦤ꧀ꦢꦏꦸꦮꦶ​꧈​ꦏꦼꦗꦧ​ꦤꦩꦸꦁ​ꦠꦤ꧀ꦢꦤꦺꦤꦧꦶ​ꦪꦺꦴꦤꦃ꧉​”

꧋ꦱꦏ꧀ꦮꦶꦱ꧀ꦱꦺ​ꦔꦺꦴꦩꦺꦴꦁꦔꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ꦱꦁꦏꦏꦺꦴꦤꦺꦴ​꧈​ꦤꦶꦁꦒꦭ꧀ꦮꦺꦴꦁꦮꦺꦴꦁ​ꦏꦸꦮꦶ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦚꦼꦤꦺꦤ꧀ꦤꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​

5꧋ꦢꦺꦴꦁꦔꦺꦥꦢ​ꦔꦧꦿꦃꦩꦺꦂ꧈​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦥꦢ​ꦭꦭꦶ​ꦔ꧀ꦒꦮ​ꦫꦺꦴꦠꦶ​꧉​ 6ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦩꦲꦸ​:“ꦏꦺꦴꦮꦺ​ꦥꦢ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦏꦫꦺꦴ​ꦫꦒꦶꦤꦺ​ꦮꦺꦴꦁ​ꦥ꦳ꦫꦶꦱꦶ​ꦭꦤ꧀ꦮꦺꦴꦁ​ꦱꦢꦸꦏꦶ​꧉​”

7꧋ꦩꦸꦫꦶꦢ꧀ꦩꦸꦫꦶꦢ꧀ꦩꦲꦸ​ꦠꦼꦫꦸꦱ꧀ꦥꦢ​ꦫꦱꦤ꧀ꦫꦱꦤ꧀:“ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦔ꧀ꦒꦮ​ꦫꦺꦴꦠꦶ​꧉​”

8꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦂꦠꦶ​ꦲꦥ​ꦱꦶꦁ​ꦢꦶꦉꦩ꧀ꦧꦸꦏ꧀ꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧈​ꦩꦸꦭꦤꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦥꦢ​ ꦔꦺꦴꦩꦺꦴꦁꦔꦏꦺꦧꦧ꧀ꦲꦺꦴꦫ​ꦔ꧀ꦒꦮ​ꦫꦺꦴꦠꦶ​?ꦏꦺꦴꦮꦺ​ꦏꦺꦴꦏ꧀ꦕꦶꦭꦶꦏ꧀ꦠꦼꦤꦤ꧀ꦥꦼꦔꦤ꧀ꦢꦼꦭ꧀ꦭꦺ​? 9ꦩꦺꦴꦱꦺꦴꦏ꧀ꦏꦺꦴꦮꦺ​ꦢꦸꦫꦸꦁ​ꦤꦶꦠꦺꦤ꧀ꦤꦶ​ꦭꦤ꧀ꦢꦸꦫꦸꦁ​ꦢꦸꦤꦸꦁ?ꦲꦥ​ꦏꦺꦴꦮꦺ​ꦮꦶꦱ꧀ꦥꦢ​ꦭꦭꦶ​ꦫꦺꦴꦠꦶ​ꦭꦶꦩ​ꦱꦶꦁ​ꦏꦁꦒꦺꦴ​ꦔꦼꦏꦺꦏ꧀ꦏꦶꦩꦁꦔꦤ꧀ꦮꦺꦴꦁ​ꦭꦶꦩꦁ​ꦲꦺꦮꦸ​ꦏꦲꦺ​꧉​ꦥꦶꦫꦁ​ꦠꦺꦁꦒꦺꦴꦏ꧀ꦠꦸꦫꦃꦲꦤ꧀ꦤꦺ​ꦱꦶꦁ​ꦲꦩ꧀ꦧꦺꦴꦏ꧀ꦭꦸꦩ꧀ꦥꦸꦏ꧀ꦏꦏꦺ? 10ꦭꦤ꧀ꦫꦺꦴꦠꦶ​ꦥꦶꦠꦸ​ꦱꦶꦁ​ꦏꦁꦒꦺꦴ​ꦔꦼꦏꦺꦏ꧀ꦏꦶꦩꦁꦔꦤ꧀ꦮꦺꦴꦁ​ꦥꦠꦁ​ꦲꦺꦮꦸ​ꦏꦲꦺ​?ꦲꦥ​ꦮꦶꦱ꧀ꦥꦢ​ꦭꦭꦶ​?ꦥꦶꦫꦁ​ꦠꦺꦁꦒꦺꦴꦏ꧀ꦠꦸꦫꦃꦲꦤ꧀ꦤꦺ​ꦱꦶꦁ​ꦲꦩ꧀ꦧꦺꦴꦏ꧀ꦭꦸꦩ꧀ꦥꦸꦏ꧀ꦏꦏꦺ? 11ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦲꦺꦴꦫ​ꦥꦢ​ꦔꦼꦂꦠꦶ​ꦤꦺꦏ꧀ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦏꦸꦮꦶ​ꦲꦺꦴꦫ​ꦧꦧ꧀ꦫꦺꦴꦠꦶ​?ꦲꦏꦸ​ꦔꦺꦴꦩꦺꦴꦁꦔꦶꦏꦺꦴꦮꦺ​ꦱꦸꦥꦪ​ꦥꦢ​ꦲꦠꦶꦲꦠꦶꦠꦼꦤꦤ꧀ꦏꦫꦺꦴ​ꦫꦒꦶꦤꦺ​ꦮꦺꦴꦁ​ꦥ꦳ꦫꦶꦱꦶ​ꦭꦤ꧀ꦮꦺꦴꦁ​ꦱꦢꦸꦏꦶ​꧉​”

12꧋ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦩꦸꦫꦶꦢ꧀ꦩꦸꦫꦶꦢ꧀ꦥꦢ​ꦢꦸꦤꦸꦁꦲꦥ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦢꦺꦏ꧀ꦤꦺꦲꦺꦴꦫ​ꦔꦺꦴꦩꦺꦴꦁꦔꦏꦺꦧꦧ꧀ꦫꦒꦶ​ꦱꦶꦁ​ꦢꦶꦲꦼꦁꦒꦺꦴ​ꦔ꧀ꦒꦮꦺ​ꦫꦺꦴꦠꦶ​꧈​ꦤꦁꦔꦶꦁ​ꦩꦸꦫꦶꦢ꧀ꦩꦸꦫꦶꦢ꧀ꦏꦸꦢꦸ​ꦱꦶꦁ​ꦲꦠꦶꦲꦠꦶꦏꦫꦺꦴ​ꦥꦶꦮꦸꦭꦁꦔꦺ​ꦮꦺꦴꦁ​ꦥ꦳ꦫꦶꦱꦶ​ꦭꦤ꧀ꦮꦺꦴꦁ​ꦱꦢꦸꦏꦶ​꧉​

꧋ꦫꦱꦸꦭ꧀ꦦꦺꦠꦿꦸꦱ꧀ꦔꦏꦺꦴꦤ꧀ꦤꦶ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦑꦿꦶꦱ꧀ꦠꦸꦱ꧀꧈​

13꧋ꦏꦢꦸꦁ​ꦮꦶꦱ꧀ꦠꦼꦏꦤ꧀ꦱꦏ꧀ꦕꦼꦢꦼꦏ꧀ꦏꦺ​ꦏꦸꦠꦯꦺꦱꦫꦺꦪꦥ꦳ꦶꦭꦶꦥꦶ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦩꦶꦠꦸꦫꦸꦠ꧀ꦲꦺꦴꦩꦺꦴꦁꦔꦤ꧀ꦤꦺ​ꦮꦺꦴꦁꦮꦺꦴꦁ​꧈​ꦲꦤꦏ꧀ꦏꦺ​ꦩꦤꦸꦁꦱ​ꦏꦸꦮꦶ​ꦱꦥ​?”

14꧋ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦱꦼꦩꦲꦸꦂ​:“ꦲꦺꦤꦺꦁꦱꦶꦁ​ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦏꦸꦮꦶ​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ ꦭꦶꦪꦤꦺ​ꦔꦺꦴꦩꦺꦴꦁꦗꦫꦺꦤꦺꦏꦺꦴꦮꦺ​ꦤꦧꦶ​ꦌꦭꦶꦪ​ꦭꦤ꧀ꦭꦶꦪꦤꦺ​ꦩꦼꦤꦺꦃ​ꦔꦫꦤ꧀ꦤꦶ​ꦏꦺꦴꦮꦺ​ꦤꦧꦶ​ꦪꦺꦉꦩꦶꦪꦲꦥ​ꦤꦧꦶ​ꦭꦶꦪꦤꦺ​꧉​”

15꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦭꦃ​ꦤꦺꦏ꧀ꦩꦶꦠꦸꦫꦸꦠ꧀ꦏꦺꦴꦮꦺ​ꦢꦺꦮꦺ꧈​ꦲꦏꦸ​ꦲꦶꦏꦶ​ꦱꦥ​?”

16꧋ꦫꦱꦸꦭ꧀ꦱꦶꦩꦺꦴꦤ꧀ꦦꦺꦠꦿꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦏꦸꦮꦶ​ꦑꦿꦶꦱ꧀ꦠꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀!”

17꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦧꦼꦗꦠꦼꦤꦤ꧀ꦏꦺꦴꦮꦺ​ꦱꦶꦩꦺꦴꦤ꧀ ꦲꦤꦏ꧀ꦏꦺ​ꦪꦺꦴꦤꦃ꧈​ꦲꦮꦶꦠ꧀ꦢꦸꦢꦸ​ꦩꦤꦸꦁꦱ​ꦱꦶꦁ​ꦤ꧀ꦢꦸꦤꦸꦁꦔꦏꦺꦏꦸꦮꦶ​ꦩꦫꦁ​ꦏꦺꦴꦮꦺ​꧈​ꦤꦁꦔꦶꦁ​ꦧꦥꦏ꧀ꦏꦸ​ꦤꦁꦱ꧀ꦮꦂꦒ​꧉​ 18ꦭꦤ꧀ꦲꦏꦸ​ꦔꦺꦴꦩꦺꦴꦁꦲꦶꦏꦶ​ꦩꦫꦁ​ꦏꦺꦴꦮꦺ​:ꦏꦺꦴꦮꦺ​ꦏꦸꦮꦶ​ꦦꦺꦠꦿꦸꦱ꧀ ꦮꦠꦸ​ꦭꦤ꧀ꦲꦶꦁ​ꦮꦠꦸ​ꦏꦸꦮꦶ​ꦲꦏꦸ​ꦧꦏꦭ꧀ꦔꦼꦢꦼꦏ꧀ꦏꦏꦺꦥꦱꦩꦸꦮꦤ꧀ꦏꦸꦭꦤ꧀ꦥꦔ꧀ꦮꦱꦤꦺ​ꦥꦠꦶ​ꦲꦺꦴꦫ​ꦧꦏꦭ꧀ꦧꦶꦱ​ꦔꦭꦃꦲꦏꦺ꧉​ 19ꦏꦺꦴꦮꦺ​ꦧꦏꦭ꧀ꦠꦏ꧀ꦥꦱꦿꦃꦲꦶ​ꦏꦸꦚ꧀ꦕꦶꦤꦺ​ꦏꦿꦠꦺꦴꦤꦺ​ꦱ꧀ꦮꦂꦒ​꧉​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦠꦭꦺꦤ꧀ꦤꦶꦤꦁꦧꦸꦩꦶ​ꦏꦺꦤꦺ​꧈​ꦧꦏꦭ꧀ꦢꦶꦠꦭꦺꦤ꧀ꦤꦶ​ꦲꦸꦒ​ꦤꦁꦱ꧀ꦮꦂꦒ​꧉​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦲꦸꦕꦸꦭ꧀ꦭꦶ​ꦤꦁꦧꦸꦩꦶ​ꦏꦺꦤꦺ​꧈​ꦏꦸꦮꦶ​ꦲꦸꦒ​ꦧꦏꦭ꧀ꦢꦶꦲꦸꦕꦸꦭ꧀ꦭꦶ​ꦤꦁꦱ꧀ꦮꦂꦒ​꧉​”

20꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧈​ꦢꦶꦥꦼꦔꦶꦁ​ꦔꦺꦴꦩꦺꦴꦁꦔꦏꦺꦩꦫꦁ​ꦱꦥꦱꦥ​ꦤꦺꦏ꧀ꦢꦺꦏ꧀ꦤꦺꦏꦸꦮꦶ​ꦑꦿꦶꦱ꧀ꦠꦸꦱ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦱꦁꦱꦫ​ꦭꦤ꧀ꦥꦠꦶꦤꦺ​ꦭꦤ꧀ꦠꦔꦶꦤꦺ​ꦱꦁꦏꦥꦠꦶ​꧉​

21꧋ꦮꦶꦮꦶꦠ꧀ꦮꦏ꧀ꦠꦸ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦤꦺꦏ꧀ꦢꦺꦏ꧀ꦤꦺꦏꦸꦢꦸ​ꦧꦸꦢꦭ꧀ꦤꦁꦏꦸꦠꦪꦺꦫꦸꦱꦭꦺꦩ꧀꧈​ꦤꦁꦏꦤ​ꦢꦺꦏ꧀ꦤꦺꦧꦏꦭ꧀​ꦔ꧀ꦭꦏꦺꦴꦤ꧀ꦤꦶ​ꦱꦁꦱꦫ​꧈​ꦗꦭꦂꦫꦤ꧀ꦱꦁꦏꦥꦫ​ꦥꦼꦤꦸꦤ꧀ꦠꦸꦤꦺ​ꦫꦪꦠ꧀ ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀​꧉​ꦢꦺꦏ꧀ꦤꦺꦧꦏꦭ꧀ꦢꦶꦥꦠꦺꦤ꧀ꦤꦶ​꧈​ꦤꦁꦔꦶꦁ​ꦲꦶꦁ​ꦠꦼꦭꦸꦁ​ꦢꦶꦤꦤꦺ​ꦧꦏꦭ꧀ꦠꦔꦶ​ꦱꦁꦏꦏꦸꦧꦸꦂꦫꦤ꧀꧈​

22꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦤꦫꦶꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦫꦢ​ꦲꦢꦺꦴꦃ​ꦱꦁꦏꦩꦸꦫꦶꦢ꧀ꦩꦸꦫꦶꦢ꧀ꦭꦶꦪꦤꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦩꦸꦒꦩꦸꦒ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦭꦁꦔꦭꦁꦔꦶ꧈​ꦱꦸꦥꦪ​ꦥꦽꦏꦫꦥꦽꦏꦫ​ꦏꦸꦮꦶ​ꦏꦧꦺꦃ​ꦲꦺꦴꦫ​ꦔꦤ꧀ꦠꦶ​ꦏ꧀ꦭꦏꦺꦴꦤ꧀꧈​”

23꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦶꦔꦼꦂ​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦫꦱꦸꦭ꧀ꦦꦺꦠꦿꦸꦱ꧀:“ꦭꦸꦔꦲ​ꦱꦁꦏꦔꦉꦥ꧀ꦏꦸ​꧈​ꦱꦺꦠꦤ꧀​!ꦏꦺꦴꦮꦺ​ꦔꦭꦁꦔꦭꦁꦔꦶꦲꦏꦸ​꧈​ꦲꦮꦶꦠ꧀ꦏꦺꦴꦮꦺ​ꦩꦤꦸꦠ꧀ꦏꦉꦥ꧀ꦥꦺ​ꦩꦤꦸꦁꦱ​꧈​ꦲꦺꦴꦫ​ꦩꦤꦸꦠ꧀ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

24꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦱꦥ​ꦱꦶꦁ​ꦏꦼꦥꦺꦔꦶꦤ꧀ꦩꦺꦭꦸ​ꦲꦏꦸ​ꦏꦸꦢꦸ​ꦔ꧀ꦭꦭꦺꦏ꧀ꦏꦏꦺꦲꦸꦫꦶꦥ꧀ꦥꦺꦢꦺꦮꦺ꧈​ꦩꦁꦒꦸꦭ꧀ꦥꦼꦤ꧀ꦠꦺꦔꦤ꧀ꦤꦺꦭꦤ꧀ꦔꦼꦠꦸꦠ꧀ꦠꦏꦺꦲꦏꦸ​꧉​ 25ꦲꦮꦶꦠ꧀ꦱꦥ​ꦱꦶꦁ​ꦔꦸꦢꦶ​ꦚ꧀ꦭꦩꦼꦠ꧀ꦠꦏꦺꦲꦸꦫꦶꦥ꧀ꦥꦺ꧈​ꦩꦭꦃ​ꦧꦏꦭ꧀ꦏꦺꦭꦁꦔꦤ꧀꧈​ꦤꦁꦔꦶꦁ​ꦱꦥ​ꦱꦶꦁ​ꦏꦺꦭꦁꦔꦤ꧀ꦲꦸꦫꦶꦥ꧀ꦥꦺꦗꦭꦂꦫꦤ꧀​ꦔ꧀ꦭꦧꦸꦃꦲꦶ​ꦲꦏꦸ​꧈​ꦏꦸꦮꦶ​ꦱꦶꦁ​ꦧꦏꦭ꧀ꦤꦼꦩꦸ​ꦲꦸꦫꦶꦥ꧀ꦥꦺ꧉​ 26ꦲꦮꦶꦠ꧀ꦲꦥ​ꦒꦸꦤꦤꦺ​ꦩꦤꦸꦁꦱ​ꦤ꧀ꦢꦸꦮꦺꦤ꧀ꦤꦶ​ꦢꦺꦴꦚ​ꦲꦶꦏꦶ​ꦱꦏ꧀ꦏꦧꦺꦃꦲꦺ꧈​ꦤꦁꦔꦶꦁ​ꦏꦺꦭꦁꦔꦤ꧀ꦚꦮꦤꦺ​?ꦲꦥ​ꦲꦸꦫꦶꦥ꧀ꦏꦸꦮꦶ​ꦲꦺꦤꦺꦁꦲꦶꦗꦺꦴꦭ꧀ꦭꦺ​? 27ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦠꦼꦏ​ꦧꦉꦁ​ꦏꦫꦺꦴ​ꦩꦸꦭꦺꦏꦠ꧀ꦩꦸꦭꦺꦏꦠ꧀ꦠꦺꦔꦁꦒꦺꦴ​ꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦭꦤ꧀ꦢꦺꦏ꧀ꦤꦺꦧꦏꦭ꧀ꦔꦸꦥꦃꦲꦶꦏꦧꦺꦃ​ꦩꦤꦸꦠ꧀ꦥꦼꦁꦒꦮꦺꦤꦺ​ꦢꦺꦮꦺꦢꦺꦮꦺ꧉​ 28ꦢꦶꦠꦶꦠꦺꦤ꧀ꦤꦶ​ꦲꦺꦴꦩꦺꦴꦁꦏꦸꦲꦶꦏꦶ​:ꦤꦁꦠꦼꦔꦃꦲꦺ​ꦮꦺꦴꦁ​ꦱꦶꦁ​ꦤꦁꦏꦺꦤꦺ​ꦲꦶꦏꦶ​ꦧꦏꦭ꧀ꦲꦺꦤꦺꦁꦱꦶꦁ​ꦲꦺꦴꦫ​ꦧꦏꦭ꧀ꦩꦠꦶ​ꦱꦏ꧀ꦢꦸꦫꦸꦁꦔꦺꦮꦼꦫꦸꦃ​ꦲꦤꦏ꧀ꦏꦺ​ꦩꦤꦸꦁꦱ​ꦠꦼꦏ​ꦲꦶꦁ​ꦏꦿꦠꦺꦴꦤꦺ​꧉​”

↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦒꦸꦤꦸꦁ​ꦏꦫꦺꦴ​ꦤꦧꦶ​ꦩꦺꦴꦱꦼꦱ꧀ꦭꦤ꧀ꦤꦧꦶ​ꦌꦭꦶꦪ​꧉​

꧇​꧑꧗꧇​ 1꧋ꦤꦼꦩ꧀ꦢꦶꦤ​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦗꦺꦏ꧀ꦫꦱꦸꦭ꧀ꦦꦺꦠꦿꦸꦱ꧀ ꦪꦺꦴꦲꦤꦼꦱ꧀ꦭꦤ꧀ꦪꦏꦺꦴꦧꦸꦱ꧀ ꦱꦼꦢꦸꦭꦸꦂꦫꦺ​ꦪꦺꦴꦲꦤꦼꦱ꧀ ꦩꦸꦁꦒꦃ​ꦤꦁꦒꦸꦤꦸꦁ​ꦱꦶꦁ​ꦢꦸꦮꦸꦂ꧉​ 2ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦭꦶꦃ​ꦫꦸꦥ​ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦱꦶꦁ​ꦩꦺꦭꦸ​ꦥꦢ​ꦮꦼꦫꦸꦃ​ꦏꦧꦺꦃ​꧉​ꦫꦲꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩ꧀ꦭꦺꦴꦫꦺꦴꦠ꧀ꦏꦪ​ꦱꦽꦔꦺꦔꦺ​ꦭꦤ꧀ꦱꦭꦶꦤ꧀ꦤꦺꦩꦭꦶꦃ​ꦥꦸꦠꦶꦃ​ꦏꦪ​ꦥꦼꦥꦢꦁ꧉​ 3ꦩꦸꦫꦶꦢ꧀ꦠꦼꦭꦸ​ꦩꦲꦸ​ꦠꦼꦫꦸꦱ꧀ꦮꦼꦫꦸꦃ​ꦤꦧꦶ​ꦩꦺꦴꦱꦼꦱ꧀ꦭꦤ꧀ꦤꦧꦶ​ꦌꦭꦶꦪ​ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 4ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ​꧈​ꦏꦺꦴꦏ꧀​ꦤ꧀ꦢꦶꦭꦭꦃꦠꦼꦩꦼꦤ꧀ꦲꦮꦏ꧀ꦏꦺ​ꦢꦺꦮꦺꦤꦁꦏꦺꦤꦺ​꧉​ꦤꦺꦏ꧀ꦒꦸꦱ꧀ꦠꦶ​ꦒꦼꦊꦩ꧀ ꦲꦏꦸ​ꦔꦼꦢꦼꦏ꧀ꦏꦏꦺꦒꦸꦧꦸꦏ꧀ꦠꦼꦭꦸ​꧈​ꦱꦶꦗꦶ​ꦏꦁꦒꦺꦴ​ꦒꦸꦱ꧀ꦠꦶ​꧈​ꦱꦶꦗꦶ​ꦏꦁꦒꦺꦴ​ꦤꦧꦶ​ꦩꦺꦴꦱꦼꦱ꧀ꦭꦤ꧀ꦱꦶꦗꦶ​ꦩꦼꦤꦺꦃ​ꦏꦁꦒꦺꦴ​ꦤꦧꦶ​ꦌꦭꦶꦪ​꧉​”

5꧋ꦢꦺꦴꦁꦔꦺꦫꦱꦸꦭ꧀ꦦꦺꦠꦿꦸꦱ꧀ꦲꦶꦗꦶꦏ꧀ꦔꦺꦴꦩꦺꦴꦁꦔꦺꦴꦤꦺꦴ​꧈​ꦠꦼꦫꦸꦱ꧀ꦲꦺꦤꦺꦁꦩꦺꦒ​ꦥꦢꦁꦔꦼꦩꦸꦭ꧀ꦭꦶ​ꦩꦸꦫꦶꦢ꧀ꦩꦸꦫꦶꦢ꧀ꦩꦲꦸ​꧈​ꦠꦼꦫꦸꦱ꧀ꦲꦺꦤꦺꦁꦱ꧀ꦮꦫ​ꦱꦁꦏꦩꦺꦒ​ꦩꦲꦸ​ꦔꦺꦴꦩꦺꦴꦁ:“ꦲꦶꦏꦶ​ꦲꦤꦏ꧀ꦏꦸ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ;ꦥꦢ​ꦔ꧀ꦒꦸꦒꦸꦮꦠꦼꦩ꧀ꦧꦸꦁꦔꦺ​!”

6꧋ꦏꦢꦸꦁ​ꦏꦿꦸꦔꦸ​ꦱ꧀ꦮꦫ​ꦏꦸꦮꦶ​ꦩꦸꦫꦶꦢ꧀ꦩꦸꦫꦶꦢ꧀ꦩꦲꦸ​ꦥꦢ​ꦏꦒꦺꦠ꧀ꦭꦤ꧀ꦮꦼꦢꦶ​꧈​ꦱꦩ꧀ꦥꦺꦏ꧀ꦥꦢ​ꦤꦶꦧ​ꦤꦁꦊꦩꦃ​꧉​ 7ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦢꦼꦏ꧀ꦏꦶꦭꦤ꧀​ꦤ꧀ꦢꦼꦩꦺꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦫꦺꦴ​ꦔꦺꦴꦩꦺꦴꦁ:“ꦥꦢ​ꦔꦢꦼꦏ꧀ꦏ!ꦲꦗ​ꦥꦢ​ꦮꦼꦢꦶ​!” 8ꦏꦢꦸꦁ​ꦮꦶꦱ꧀ꦔꦢꦼꦏ꧀ꦠꦼꦫꦸꦱ꧀ꦤꦩꦸꦁ​ꦮꦼꦫꦸꦃ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺ꧈​ꦲꦺꦴꦫ​ꦲꦺꦤꦺꦁꦭꦶꦪꦤꦺ​ꦩꦼꦤꦺꦃ​꧉​

9꧋ꦢꦺꦴꦁꦔꦺꦩꦼꦢꦸꦤ꧀ꦱꦁꦏꦒꦸꦤꦸꦁ​ꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦲꦗ​ꦔꦺꦴꦩꦺꦴꦁꦏꦫꦺꦴ​ꦱꦥꦱꦥ​ꦧꦧ꧀ꦲꦥ​ꦱꦶꦁ​ꦏꦺꦴꦮꦺ​ꦥꦢ​ꦮꦼꦫꦸꦃ​ꦩꦲꦸ​꧈​ꦱꦏ꧀ꦢꦸꦫꦸꦁꦔꦺꦲꦤꦏ꧀ꦏꦺ​ꦩꦤꦸꦁꦱ​ꦠꦔꦶ​ꦱꦁꦏꦥꦠꦶ​꧉​”

10꧋ꦩꦸꦫꦶꦢ꧀ꦩꦸꦫꦶꦢ꧀ꦩꦲꦸ​ꦠꦼꦫꦸꦱ꧀ꦠꦏꦺꦴꦤ꧀:“ꦭꦃ​ꦏꦼꦤꦺꦁꦲꦥ​ꦥꦫ​ꦒꦸꦫꦸ​ꦏꦶꦠꦧ꧀​ꦏꦺꦴꦏ꧀ꦔꦺꦴꦩꦺꦴꦁꦤꦺꦏ꧀ꦤꦧꦶ​ꦌꦭꦶꦪ​ꦏꦸꦢꦸ​ꦠꦼꦏ​ꦤ꧀ꦢꦶꦱꦶꦏ꧀?”

11꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦥꦚ꧀ꦕꦺꦤ꧀ ꦤꦧꦶ​ꦌꦭꦶꦪ​ꦠꦼꦏ​ꦤ꧀ꦢꦶꦱꦶꦏ꧀ꦭꦤ꧀ꦢꦺꦏ꧀ꦤꦺꦧꦏꦭ꧀ꦚꦮꦶꦱ꧀ꦱꦏꦺꦱꦼꦩ꧀ꦧꦫꦁ​ꦏꦧꦺꦃ​꧉​ 12ꦏꦺꦴꦮꦺ​ꦠꦏ꧀ꦲꦺꦴꦩꦺꦴꦁꦔꦶ:ꦤꦧꦶ​ꦌꦭꦶꦪ​ꦮꦶꦱ꧀ꦠꦼꦏ​꧈​ꦤꦁꦔꦶꦁ​ꦮꦺꦴꦁꦮꦺꦴꦁ​ꦲꦺꦴꦫ​ꦥꦢ​ꦤꦶꦠꦺꦤ꧀ꦤꦶ​ꦢꦺꦏ꧀ꦤꦺ꧉​ꦢꦺꦏ꧀ꦤꦺꦩꦭꦃ​ꦢꦶꦒꦮꦺ​ꦱꦏ꧀ꦏꦉꦥ꧀ꦥꦺ​꧉​ꦩꦼꦁꦏꦺꦴꦤꦺꦴ​ꦲꦸꦒ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦤꦶꦤ꧀ꦢꦏ꧀ꦏꦏꦺꦱꦏ꧀ꦏꦉꦥ꧀ꦥꦺ​ꦩꦫꦁ​ꦲꦤꦏ꧀ꦏꦺ​ꦩꦤꦸꦁꦱ​꧉​”

13꧋ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦩꦲꦸ​ꦠꦼꦫꦸꦱ꧀ꦥꦢ​ꦢꦸꦤꦸꦁꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦔꦺꦴꦩꦺꦴꦁꦔꦏꦺꦧꦧ꧀ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦧꦺꦴꦕꦃ​ꦭꦫ​ꦲꦪꦤ꧀ꦤꦼꦤ꧀꧈​

14꧋ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦮꦶꦱ꧀ꦕꦩ꧀ꦥꦸꦂ​ꦏꦫꦺꦴ​ꦮꦺꦴꦁ​ꦥꦶꦫꦁꦥꦶꦫꦁ​ꦩꦼꦤꦺꦃ​꧈​ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦩꦫ​ꦭꦤ꧀ꦤꦶꦧ​ꦤꦁꦔꦉꦥ꧀ꦥꦺ​ꦏꦫꦺꦴ​ꦚꦸꦮꦸꦤ꧀: 15“ꦢꦸꦃ​ꦒꦸꦱ꧀ꦠꦶ​꧈​ꦲꦩ꧀ꦧꦺꦴꦏ꧀ꦩꦼꦭꦱ꧀ꦩꦫꦁ​ꦲꦤꦏ꧀ꦏꦸ​ꦭꦤꦁ​꧉​ꦢꦺꦏ꧀ꦤꦺꦭꦫ​ꦲꦪꦤ꧀ꦤꦼꦤ꧀ꦭꦤ꧀ꦪ​ꦮꦶꦱ꧀ꦤꦼꦩꦼꦤ꧀꧈​ꦧꦺꦴꦕꦃꦲꦺ​ꦲꦗꦼꦏ꧀ꦠꦶꦧ​ꦤꦁꦒꦼꦤꦶ​ꦭꦤ꧀ꦤꦁꦧꦚꦸ​꧉​ 16ꦲꦏꦸ​ꦮꦶꦱ꧀​ꦔ꧀ꦒꦮ​ꦧꦺꦴꦕꦃꦲꦺ​ꦤꦁꦔ꧀ꦒꦺꦴꦤ꧀ꦤꦺꦩꦸꦫꦶꦢ꧀ꦩꦸꦫꦶꦢ꧀ꦩꦸ꧈​ꦤꦁꦔꦶꦁ​ꦲꦺꦴꦫ​ꦧꦶꦱ​ꦤꦸꦭꦸꦁꦔꦶ​꧉​”

17꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦏ꧀ꦏꦼꦧꦕꦸꦠ꧀ꦠꦼꦤꦤ꧀ꦲꦼꦁꦒꦺꦴꦤ꧀ꦩꦸ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦼꦥꦶꦫ​ꦩꦼꦤꦺꦃ​ꦱꦸꦮꦺꦤꦺ​ꦲꦼꦁꦒꦺꦴꦤ꧀ꦏꦸ​ꦏꦸꦢꦸ​ꦕꦩ꧀ꦥꦸꦂ​ꦭꦤ꧀ꦚꦧꦂꦫꦶ​ꦏꦺꦴꦮꦺ​?ꦧꦺꦴꦕꦃꦲꦺ​ꦒꦮꦤꦼꦤ꧀​ꦩ꧀ꦧꦿꦺꦤꦺ!” 18ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦸꦤ꧀ꦢꦸꦁꦢꦼꦩꦶꦠ꧀ꦠꦺꦱꦶꦁ​ꦔ꧀ꦮꦱꦤꦶ​ꦧꦺꦴꦕꦃꦲꦺ​꧉​ꦢꦼꦩꦶꦠ꧀ꦠꦺꦠꦼꦫꦸꦱ꧀ꦭꦸꦔ​ꦭꦤ꧀ꦧꦺꦴꦕꦃꦲꦺ​ꦱꦏ꧀ꦮꦠ꧀ꦠꦼꦫꦸꦱ꧀ꦩꦫꦶ​꧉​

19꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦥꦢ​ꦩꦫꦤꦶ​ꦢꦺꦏ꧀ꦤꦺ꧉​ꦏꦢꦸꦁ​ꦢꦺꦮꦺꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦥꦢ​ꦠꦏꦺꦴꦤ꧀:“ꦒꦸꦱ꧀ꦠꦶ​꧈​ꦏꦼꦤꦺꦁꦲꦥ​ꦲꦮꦏ꧀ꦏꦺ​ꦢꦺꦮꦺꦏꦺꦴꦏ꧀ꦲꦺꦴꦫ​ꦧꦶꦱ​ꦔꦼꦠꦺꦴꦏ꧀ꦏꦏꦺꦢꦼꦩꦶꦠ꧀ꦠꦺ?”

20꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦲꦮꦶꦠ꧀ꦥꦼꦔꦤ꧀ꦢꦼꦭ꧀ꦩꦸ​ꦕꦶꦭꦶꦏ꧀!ꦔꦼꦂꦠꦶꦪ​꧈​ꦤꦺꦏ꧀ꦏꦺꦴꦮꦺ​ꦤ꧀ꦢꦸꦮꦺꦥꦼꦔꦤ꧀ꦢꦼꦭ꧀ꦱꦶꦁ​ꦒꦼꦢꦺꦤꦺꦤꦩꦸꦁ​ꦱꦏ꧀ꦮꦶꦗꦶ​ꦱꦶꦁ​ꦕꦶꦭꦶꦏ꧀ꦢꦺꦮꦺꦮꦲꦺ​꧈​ꦏꦺꦴꦮꦺ​ꦧꦶꦱ​ꦔꦺꦴꦩꦺꦴꦁꦩꦫꦁ​ꦒꦸꦤꦸꦁ​ꦏꦸꦮꦶ​:'ꦔꦭꦶꦃꦲ​ꦩ꧀ꦧꦿꦤ꧈'​ꦩꦼꦱ꧀ꦠꦶꦒꦸꦤꦸꦁꦔꦺ​ꦩꦤꦸꦠ꧀꧈​ꦲꦺꦴꦫ​ꦧꦏꦭ꧀ꦲꦺꦤꦺꦁꦧꦫꦁ​ꦱꦶꦁ​ꦩꦺꦴꦏꦭ꧀ꦏꦁꦒꦺꦴ​ꦏꦺꦴꦮꦺ​꧉​ 21(ꦤꦁꦔꦶꦁ​ꦢꦼꦩꦶꦠ꧀ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦭꦸꦔꦤꦺ​ꦤꦩꦸꦁ​ꦔꦁꦒꦺꦴ​ꦥꦤ꧀ꦢꦺꦴꦔ​ꦭꦤ꧀ꦥꦱ​꧉)”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦏꦺꦥꦶꦁ​ꦥꦶꦤ꧀ꦢꦺꦴꦤꦺꦤꦺꦏ꧀ꦧꦏꦭ꧀​ꦔ꧀ꦭꦏꦺꦴꦤ꧀ꦤꦶ​ꦱꦁꦱꦫ​ꦭꦤ꧀ꦥꦠꦶ​꧉​

22꧋ꦢꦺꦴꦁꦔꦺꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦲꦶꦗꦶꦏ꧀ꦥꦢ​ꦔꦸꦩ꧀ꦥꦸꦭ꧀ꦤꦁꦧꦮꦃꦓꦭꦶꦭꦺꦪ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦢꦶꦲꦼꦭꦸꦁꦔꦏꦺꦩꦫꦁ​ ꦮꦺꦴꦁꦮꦺꦴꦁ​꧉​ 23ꦢꦺꦏ꧀ꦤꦺ​ꦧꦏꦭ꧀ꦢꦶꦥꦠꦺꦤ꧀ꦤꦶ​꧈​ꦤꦁꦔꦶꦁ​ꦲꦶꦁ​ꦠꦼꦭꦸꦁ​ꦢꦶꦤꦤꦺ​ꦢꦺꦏ꧀ꦤꦺ​ꦧꦏꦭ꧀ꦢꦶꦠꦔꦺꦏ꧀ꦏꦏꦺꦩꦼꦤꦺꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

꧋ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦠꦼꦫꦸꦱ꧀ꦥꦢ​ꦱꦼꦢꦶꦧꦔꦼꦠ꧀꧈​

꧋ꦧꦧ꧀ꦲꦩ꧀ꦧꦪꦂ​ꦧꦼꦭꦱ꧀ꦠꦶꦁꦏꦁꦒꦺꦴ​ꦒꦿꦺꦗ​ꦒꦼꦢꦺ​꧉​

24꧋ꦏꦢꦸꦁ​ꦥꦢ​ꦠꦼꦏ​ꦤꦁꦏꦸꦠꦑꦥꦺꦂꦤꦏꦸꦩ꧀ ꦮꦺꦴꦁꦮꦺꦴꦁ​ꦱꦶꦁ​ꦚ꧀ꦗꦭꦸꦏ꧀ꦏꦶꦧꦼꦭꦱ꧀ꦠꦶꦁꦏꦁꦒꦺꦴ​ꦒꦿꦺꦗ​ꦒꦼꦢꦺ​ꦥꦢ​ꦩꦫꦤꦶ​ꦫꦱꦸꦭ꧀ꦦꦺꦠꦿꦸꦱ꧀ꦭꦤ꧀ꦠꦏꦺꦴꦤ꧀:“ꦲꦥ​ꦒꦸꦫꦸꦩꦸ​ꦪ​ꦩꦺꦭꦸ​ꦲꦩ꧀ꦧꦪꦂ​ꦧꦼꦭꦱ꧀ꦠꦶꦁꦔꦺꦒꦿꦺꦗ​ꦒꦼꦢꦺ​?”

25꧋ꦫꦱꦸꦭ꧀ꦦꦺꦠꦿꦸꦱ꧀ꦱꦼꦩꦲꦸꦂ​:“ꦭꦃ​ꦏꦺꦴꦏ꧀ꦲꦺꦴꦫ​?”

꧋ꦏꦢꦸꦁ​ꦫꦱꦸꦭ꧀ꦦꦺꦠꦿꦸꦱ꧀ꦠꦼꦏꦤ꧀ꦲꦺꦴꦩꦃ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦏꦺꦴꦤ꧀ꦤꦶ​ꦢꦺꦏ꧀ꦤꦺ꧈​ꦱꦏ꧀ꦢꦸꦫꦸꦁꦔꦺꦫꦱꦸꦭ꧀ꦦꦺꦠꦿꦸꦱ꧀ꦢꦺꦮꦺꦔꦺꦴꦩꦺꦴꦁꦲꦥꦲꦥ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦏꦺꦴꦤ꧀:“ꦱꦶꦩꦺꦴꦤ꧀ ꦏꦼꦥꦿꦶꦪꦺ​ꦥꦶꦤꦼꦩꦸꦩꦸ?ꦱꦥ​ꦱꦶꦁ​ꦏꦸꦢꦸ​ꦲꦩ꧀ꦧꦪꦂ​ꦧꦼꦭꦱ꧀ꦠꦶꦁꦩꦫꦁ​ꦫꦠꦸ​ꦲꦶꦁ​ꦢꦺꦴꦚ​ꦏꦺꦤꦺ​:ꦮꦂꦒꦤꦺ​ꦤꦼꦒꦫ​ꦲꦥ​ꦮꦺꦴꦁ​ꦭꦶꦪ​?”

26꧋ꦫꦱꦸꦭ꧀ꦦꦺꦠꦿꦸꦱ꧀ꦱꦼꦩꦲꦸꦂ​:“ꦪ​ꦮꦺꦴꦁꦮꦺꦴꦁ​ꦭꦶꦪ​!”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦢꦢꦶꦤꦺ​ꦲꦤꦏ꧀ꦲꦤꦏꦤ꧀ꦤꦺꦤꦼꦒꦫ​ꦲꦺꦴꦫ​ꦲꦸꦱꦃꦲꦩ꧀ꦧꦪꦂ​꧉​ 27ꦤꦁꦔꦶꦁꦲꦮꦏ꧀ꦏꦺꦢꦺꦮꦺꦲꦗꦥꦢꦤ꧀ꦢꦢꦺꦏ꧀ꦏꦏꦺꦭꦫꦤꦺꦲꦠꦶꦤꦺꦮꦺꦴꦁꦮꦺꦴꦁꦏꦸꦮꦶ꧉​ꦏꦤꦧꦸꦢꦭ꧀ꦤꦁꦩꦺꦂꦭꦤ꧀ꦢꦶ​ꦲꦸꦚ꧀ꦕꦭ꧀ꦭꦏꦺꦥꦚ꧀ꦕꦶꦁꦩꦸ꧉​ꦲꦶꦮꦏ꧀ꦱꦶꦁꦩ꧀ꦧꦺꦴꦏ꧀ꦥꦚ꧀ꦕꦶꦁꦱꦶꦁꦤ꧀ꦢꦶꦱꦶꦏ꧀ꦢꦺꦮꦺꦏꦸꦮꦶꦢꦶꦕꦼꦏꦼꦭ꧀꧈​ꦤꦁꦚ꧀ꦗꦼꦫꦺꦴꦕꦁꦏꦼꦩ꧀ꦩꦺꦏꦺꦴꦮꦺꦧꦏꦭ꧀ꦤꦼꦩꦸꦢꦸꦮꦶꦠ꧀꧈​ꦢꦶꦗꦶꦏꦸꦏ꧀ꦢꦸꦮꦶꦠ꧀ꦏꦸꦮꦶꦏꦁꦒꦺꦴꦲꦩ꧀ꦧꦪꦂꦧꦼꦭꦱ꧀ꦠꦶꦁꦩꦫꦁꦮꦺꦴꦁꦮꦺꦴꦁꦏꦸꦮꦶ꧈​ꦲꦩ꧀ꦧꦪꦂꦏꦁꦒꦺꦴꦲꦏꦸꦭꦤ꧀ꦏꦺꦴꦮꦺ꧉​”

↑ ↑ ↑


꧋ꦥꦶꦮꦸꦭꦁꦧꦧ꧀ꦱꦥꦱꦶꦁꦒꦼꦢꦺꦢꦺꦮꦺ꧉​

꧇​꧑꧘꧇​ 1꧋ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦥꦫ​ꦩꦸꦫꦶꦢ꧀ꦥꦢ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦒꦸꦫꦸ​꧈​ꦱꦥ​ꦠ​ꦱꦶꦁ​ꦒꦼꦢꦺ​ꦢꦺꦮꦺꦲꦶꦁ​ꦏꦿꦠꦺꦴꦤꦺ​ꦱ꧀ꦮꦂꦒ​?”

2꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦧꦺꦴꦕꦃ​ꦕꦶꦭꦶꦏ꧀ꦱꦶꦗꦶ​ꦢꦶꦏꦺꦴꦁꦏꦺꦴꦤ꧀ꦔꦢꦼꦏ꧀ꦤꦁꦠꦼꦔꦃꦲꦺ​ꦥꦫ​ꦩꦸꦫꦶꦢ꧀ꦩꦲꦸ​꧉​ 3ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦥꦢ​ꦔꦼꦂꦠꦶꦪ​!ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦩꦭꦶꦃ​ꦲꦠꦶꦩꦸ​ꦭꦤ꧀ꦢꦢꦶ​ꦏꦪ​ꦧꦺꦴꦕꦃ​ꦕꦶꦭꦶꦏ꧀ꦲꦶꦏꦶ​꧈​ꦏꦺꦴꦮꦺ​ꦲꦺꦴꦫ​ꦧꦶꦱ​ꦩ꧀ꦊꦧꦸ​ꦏꦿꦠꦺꦴꦤꦺ​ꦱ꧀ꦮꦂꦒ​꧉​ 4ꦱꦶꦁ​ꦒꦼꦢꦺ​ꦢꦺꦮꦺꦲꦶꦁ​ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦸꦮꦶ​ꦮꦺꦴꦁ​ꦱꦶꦁ​ꦔꦱꦺꦴꦂꦫꦏꦺꦲꦮꦏ꧀ꦏꦺ​ꦭꦤ꧀ꦢꦢꦶ​ꦏꦪ​ꦧꦺꦴꦕꦃ​ꦕꦶꦭꦶꦏ꧀ꦲꦶꦏꦶ​꧉​ 5ꦭꦤ꧀ꦱꦥ​ꦱꦶꦁ​ꦤꦩ꧀ꦥꦤꦶ​ꦧꦺꦴꦕꦃ​ꦕꦶꦭꦶꦏ꧀ꦱꦶꦁ​ꦏꦪ​ꦔꦺꦤꦺ​ꦲꦶꦏꦶ​ꦗꦭꦂꦫꦤ꧀ꦱꦁꦏꦲꦏꦸ​꧈​ꦏꦸꦮꦶ​ꦱꦏ꧀ꦗꦤꦺꦤꦩ꧀ꦥꦤꦶ​ꦲꦏꦸ​꧉​”

꧋ꦱꦶꦁ​ꦩꦫꦏ꧀ꦏꦏꦺꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧉​

6꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦥꦶꦮꦸꦭꦁꦔꦺ​ꦔꦺꦤꦺ​:“ꦱꦥ​ꦱꦶꦁ​ꦩꦫꦏ꧀ꦏꦏꦺꦱꦭꦃꦱꦏ꧀ꦮꦶꦗꦶꦤꦺꦧꦺꦴꦕꦃ​ꦕꦶꦭꦶꦏ꧀ꦱꦶꦁ​ꦥꦽꦕꦪ​ꦩꦫꦁ​ꦲꦏꦸ​ꦱꦩ꧀ꦥꦺꦏ꧀ꦤꦶꦁꦒꦭ꧀ꦢꦭꦤ꧀ꦏꦸ​꧈​ꦲꦥꦶꦏ꧀ꦏꦺ​ꦤꦺꦏ꧀ꦮꦺꦴꦁ​ꦏꦸꦮꦶ​ꦒꦸꦭꦸꦤꦺ​ꦢꦶꦧꦤ꧀ꦢꦸꦭ꧀ꦭꦶꦮꦠꦸ​ꦒꦶꦭꦶꦁꦔꦤ꧀ꦠꦼꦫꦸꦱ꧀ꦢꦶꦗꦼꦒꦸꦂꦫꦏꦺꦤꦁꦱꦼꦒꦫ​ꦱꦶꦁ​ꦗꦼꦫꦸ꧉​ 7ꦕꦶꦭꦏ​ꦠꦼꦤꦤ꧀ꦗꦒꦠ꧀ꦲꦶꦏꦶ​꧈​ꦤꦺꦏ꧀ꦲꦺꦤꦺꦁꦥꦁꦒꦺꦴꦢꦲꦺꦴꦏꦺꦃꦱꦶꦁ​ꦩꦫꦏ꧀ꦏꦏꦺꦮꦺꦴꦁ​ꦔ꧀ꦭꦏꦺꦴꦤ꧀ꦤꦶ​ꦢꦺꦴꦱ​꧉​ꦥꦽꦏꦫꦥꦽꦏꦫ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦥꦚ꧀ꦕꦺꦤ꧀ꦱ꧀ꦭꦮꦱ꧀ꦱꦺꦪ​ꦧꦏꦭ꧀ꦲꦺꦤꦺꦁ꧈​ꦤꦁꦔꦶꦁ​ꦕꦶꦭꦏ​ꦠꦼꦤꦤ꧀ ꦮꦺꦴꦁ​ꦱꦶꦁ​ꦢꦢꦶ​ꦗꦭꦂꦫꦤ꧀ꦤꦺ​꧉​

8꧋“ꦩꦸꦭꦤꦺ​꧈​ꦤꦺꦏ꧀ꦠꦔꦤ꧀ꦩꦸ​ꦲꦥ​ꦱꦶꦏꦶꦭ꧀ꦩꦸ​ꦩꦫꦏ꧀ꦏꦏꦺꦏꦺꦴꦮꦺ​ꦔ꧀ꦒꦮꦺ​ꦢꦺꦴꦱ​꧈​ꦢꦶꦏꦼꦠꦺꦴꦏ꧀ꦮꦲꦺ​ꦭꦤ꧀ꦢꦶꦧꦸꦮꦁ​꧉​ꦲꦮꦶꦠ꧀ꦭꦸꦮꦶꦃ​ꦲꦥꦶꦏ꧀ꦏꦁꦒꦺꦴ​ꦏꦺꦴꦮꦺ​ꦲꦸꦫꦶꦥ꧀ꦩꦤꦸꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦏꦫꦺꦴ​ꦠꦔꦤ꧀ꦱꦼꦧꦼꦭꦃꦲꦥ​ꦤꦩꦸꦁ​ꦏꦫꦺꦴ​ꦱꦶꦏꦶꦭ꧀ꦱꦼꦧꦼꦭꦃ꧈​ꦠꦼꦤꦶꦩ꧀ꦧꦁꦏꦫꦺꦴ​ꦠꦔꦤ꧀ꦭꦤ꧀ꦱꦶꦏꦶꦭ꧀ꦒꦼꦤꦼꦥ꧀ꦭꦺꦴꦫꦺꦴ​꧈​ꦤꦁꦔꦶꦁ​ꦲꦮꦏ꧀ꦩꦸ​ꦱꦏ꧀ꦏꦸꦗꦸꦂꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦒꦼꦤꦶꦤꦺ​ꦤꦼꦫꦏ꧉​ 9ꦤꦺꦏ꧀ꦩꦿꦶꦥꦠ꧀ꦩꦸ​ꦩꦫꦏ꧀ꦏꦏꦺꦏꦺꦴꦮꦺ​ꦔ꧀ꦒꦮꦺ​ꦢꦺꦴꦱ​꧈​ꦢꦶꦕꦸꦏꦶꦭ꧀ꦭꦤ꧀ꦢꦶꦧꦸꦮꦁ​꧉​ꦭꦸꦮꦸꦁꦏꦺꦴꦮꦺ​ꦲꦸꦫꦶꦥ꧀ꦢꦢꦶ​ꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦁꦒꦺꦴ​ꦩꦿꦶꦥꦠ꧀ꦱꦶꦗꦶ​꧈​ꦠꦼꦤꦶꦩ꧀ꦧꦁꦩꦿꦶꦥꦠ꧀ꦠꦺ​ꦒꦼꦤꦼꦥ꧀ꦭꦺꦴꦫꦺꦴ​꧈​ꦤꦁꦔꦶꦁ​ꦢꦶꦧꦸꦮꦁ​ꦤꦁꦒꦼꦤꦶꦤꦺ​ꦤꦼꦫꦏ꧉​

10꧋“ꦲꦗ​ꦥꦢ​ꦚꦼꦥꦺꦭꦺꦏ꧀ꦏꦏꦺꦧꦺꦴꦕꦃꦧꦺꦴꦕꦃ​ꦕꦶꦭꦶꦏ꧀ꦲꦶꦏꦶ​꧉​ꦥꦢ​ꦔꦼꦂꦠꦶꦪ​꧈​ꦧꦺꦴꦕꦃꦧꦺꦴꦕꦃ​ꦕꦶꦭꦶꦏ꧀ꦲꦶꦏꦶ​ꦥꦢ​ꦤ꧀ꦢꦸꦮꦺꦩꦸꦭꦺꦏꦠ꧀ꦤꦁꦱ꧀ꦮꦂꦒ​ꦱꦶꦁ​ꦠꦤ꧀ꦱꦃ​ꦚꦼꦢꦼꦏ꧀ꦏꦶꦧꦥꦏ꧀ꦏꦸ​ꦤꦁꦱ꧀ꦮꦂꦒ​꧉​ 11(ꦲꦮꦶꦠ꧀ꦲꦤꦏ꧀ꦏꦺ​ꦩꦤꦸꦁꦱ​ꦏꦸꦮꦶ​ꦠꦼꦏꦤꦺ​ꦚ꧀ꦭꦩꦼꦠ꧀ꦠꦏꦺꦮꦺꦴꦁ​ꦱꦶꦁ​ꦏꦼꦱꦱꦂ​꧉)”

꧋ꦥꦶꦮꦸꦭꦁ​ꦧꦧ꧀ꦮꦼꦢꦸꦱ꧀ꦱꦶꦁ​ꦲꦶꦭꦁ​꧉​

12꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦏꦼꦥꦿꦶꦪꦺ​ꦥꦶꦤꦼꦩꦸꦩꦸ?ꦱꦼꦩꦸꦁꦒꦺꦴꦤ꧀ꦤꦺꦲꦺꦤꦺꦁꦮꦺꦴꦁ​ꦤ꧀ꦢꦸꦮꦺꦮꦼꦢꦸꦱ꧀ꦱꦠꦸꦱ꧀ꦠꦼꦫꦸꦱ꧀ꦲꦺꦤꦺꦁꦱꦶꦗꦶ​ꦱꦶꦁ​ꦲꦶꦭꦁ​꧉​ꦮꦺꦴꦁꦔꦺ​ꦠꦼꦫꦸꦱ꧀ꦔꦥ​?ꦲꦥ​ꦮꦺꦴꦁꦔꦺ​ꦲꦺꦴꦫ​ꦠꦼꦫꦸꦱ꧀ꦤꦶꦁꦒꦭ꧀ꦮꦼꦢꦸꦱ꧀ꦱꦺꦱꦶꦁ​ꦱꦔꦁ​ꦥꦸꦭꦸꦃ​ꦱꦔ​ꦤꦁꦥꦔꦺꦴꦤ꧀ꦤꦤ꧀ꦭꦤ꧀ꦧꦸꦢꦭ꧀​ꦔ꧀ꦒꦺꦴꦭꦺꦏ꧀ꦏꦶ​ꦮꦼꦢꦸꦱ꧀ꦱꦶꦗꦶ​ꦱꦶꦁ​ꦲꦶꦭꦁ​ꦩꦲꦸ​? 13ꦤꦺꦏ꧀ꦮꦺꦴꦁꦔꦺ​ꦮꦶꦱ꧀ꦤꦼꦩꦸ​ꦮꦼꦢꦸꦱ꧀ꦱꦺꦱꦶꦁ​ꦲꦶꦭꦁ​ꦩꦲꦸ​꧈​ꦩꦼꦱ꧀ꦠꦶꦢꦺꦏ꧀ꦤꦺꦧꦸꦔꦃꦲꦺ​ꦏꦫꦺꦴ​ꦮꦼꦢꦸꦱ꧀ꦱꦶꦁ​ꦱꦶꦗꦶ​ꦏꦸꦮꦶ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶ ꦧꦸꦔꦃꦲꦺ​ꦏꦫꦺꦴ​ꦱꦶꦁ​ꦱꦔꦁ​ꦥꦸꦭꦸꦃ​ꦱꦔ​ꦱꦶꦁ​ꦲꦺꦴꦫ​ꦲꦶꦭꦁ​꧉​ 14ꦩꦼꦁꦏꦺꦴꦤꦺꦴ​ꦲꦸꦒ​ꦧꦥꦏ꧀ꦩꦸ​ꦤꦁꦱ꧀ꦮꦂꦒ​꧈​ꦢꦺꦏ꧀ꦤꦺꦲꦺꦴꦫ​ꦒꦼꦊꦩ꧀ꦤꦺꦏ꧀ꦧꦺꦴꦕꦃꦧꦺꦴꦕꦃ​ꦕꦶꦭꦶꦏ꧀ꦏꦸꦮꦶ​ꦲꦺꦤꦺꦁꦱꦶꦗꦶ​ꦱꦶꦁ​ꦏꦼꦠꦿꦶꦮꦭ꧀꧈​”

꧋ꦧꦧ꧀ꦔꦺꦭꦶꦁꦔꦏꦺꦱꦼꦢꦸꦭꦸꦂ​ꦱꦶꦁ​ꦏ꧀ꦭꦺꦫꦸ​꧉​

15꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦥꦶꦮꦸꦭꦁꦔꦺ​ꦔꦺꦤꦺ​:“ꦤꦺꦏ꧀ꦏꦺꦴꦮꦺ​ꦮꦼꦫꦸꦃ​ꦱꦼꦢꦸꦭꦸꦂꦩꦸꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦏ꧀ꦭꦺꦫꦸ​꧈​ꦢꦶꦥꦫꦤ꧀ꦤꦶ​ꦭꦤ꧀ꦢꦶꦢꦸꦢꦸꦃꦲꦏꦺꦏ꧀ꦭꦺꦫꦸꦤꦺ꧈​ꦤꦁꦔꦶꦁ​ꦲꦶꦗꦺꦤ꧀ꦤꦤ꧀ ꦠꦤ꧀ꦥ​ꦮꦺꦴꦁ​ꦭꦶꦪꦤꦺ​ꦔꦼꦂꦠꦶ​꧉​ꦤꦺꦏ꧀ꦱꦼꦢꦸꦭꦸꦂ​ꦏꦸꦮꦶ​ꦔ꧀ꦒꦸꦒꦸ​ꦩꦫꦁ​ꦠꦼꦩ꧀ꦧꦸꦁꦩꦸ​꧈​ꦏꦺꦴꦮꦺ​ꦲꦺꦴꦫ​ꦏꦺꦭꦁꦔꦤ꧀ꦱꦼꦢꦸꦭꦸꦂ​꧉​ 16ꦭꦃ​ꦤꦁꦔꦶꦁ​ꦤꦺꦏ꧀ꦱꦼꦢꦸꦭꦸꦂ​ꦏꦸꦮꦶ​ꦲꦺꦴꦫ​ꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺꦲꦺꦴꦩꦺꦴꦁꦩꦸ꧈​ꦏꦺꦴꦮꦺ​ꦏꦸꦢꦸ​ꦔꦼꦗꦺꦏ꧀ꦱꦼꦢꦸꦭꦸꦂ​ꦭꦶꦪꦤꦺ​ꦱꦶꦗꦶ​ꦲꦥ​ꦭꦺꦴꦫꦺꦴ​꧉​ꦲꦮꦶꦠ꧀ꦤꦁꦏꦶꦠꦧ꧀​ꦏꦼꦠꦸꦭꦶꦱ꧀ꦤꦺꦏ꧀ꦱꦭꦃꦲꦺ​ꦮꦺꦴꦁ​ꦏꦸꦢꦸ​ꦢꦶꦠꦼꦠꦼꦥ꧀ꦥꦏꦺꦏꦫꦺꦴ​ꦱꦼꦏ꧀ꦱꦶ​ꦭꦺꦴꦫꦺꦴ​ꦲꦥ​ꦠꦼꦭꦸ​꧉​ 17ꦤꦺꦏ꧀ꦱꦼꦢꦸꦭꦸꦂ​ꦱꦶꦁ​ꦏ꧀ꦭꦺꦫꦸ​ꦏꦸꦮꦶ​ꦩꦼꦏ꧀ꦱ​ꦢꦸꦫꦸꦁ​ꦒꦼꦊꦩ꧀ꦩꦤꦸꦠ꧀ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦏꦸꦮꦶ​꧈​ꦥꦽꦏꦫ​ꦲꦶꦏꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦒꦮ​ꦤꦁꦔꦉꦥ꧀ꦥꦺ​ꦥꦱꦩꦸꦮꦤ꧀꧈​ꦤꦺꦏ꧀ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦮꦺꦴꦁꦔꦺ​ꦩꦼꦏ꧀ꦱ​ꦲꦺꦴꦫ​ꦒꦼꦊꦩ꧀ꦩꦤꦸꦠ꧀ꦩꦫꦁ​ꦥꦶꦠꦸꦠꦸꦂꦫꦺ​ꦥꦱꦩꦸꦮꦤ꧀ ꦮꦺꦴꦁꦔꦺ​ꦏꦸꦢꦸ​ꦢꦶꦲꦁꦒꦼꦥ꧀ꦏꦪ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦭꦤ꧀ꦮꦺꦴꦁ​ꦲꦭ​ꦮꦲꦺ​꧉​”

꧋ꦧꦧ꧀ꦱꦶꦁ​ꦢꦶꦠꦭꦺꦤ꧀ꦤꦶ​ꦭꦤ꧀ꦱꦶꦁ​ꦢꦶꦲꦸꦕꦸꦭ꧀ꦭꦶ​꧉​

18꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦤꦺ​:“ꦥꦢ​ꦔꦼꦂꦠꦶꦪ​!ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦠꦭꦺꦤ꧀ꦤꦶꦲꦶꦁ​ꦢꦺꦴꦚ​ꦏꦺꦤꦺ​ꦲꦸꦒ​ꦧꦏꦭ꧀ꦢꦶꦠꦭꦺꦤ꧀ꦤꦶ​ꦤꦁꦱ꧀ꦮꦂꦒ​꧉​ꦭꦤ꧀ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦲꦸꦕꦸꦭ꧀ꦭꦶ​ꦲꦶꦁ​ꦢꦺꦴꦚ​ꦏꦺꦤꦺ​ꦲꦸꦒ​ꦧꦏꦭ꧀ꦢꦶꦲꦸꦕꦸꦭ꧀ꦭꦶ​ꦤꦁꦱ꧀ꦮꦂꦒ​꧉​

19꧋“ꦥꦢ​ꦔꦼꦂꦠꦶꦪ​ꦲꦸꦒ​!ꦤꦺꦏ꧀ꦲꦺꦤꦺꦁꦮꦺꦴꦁ​ꦭꦺꦴꦫꦺꦴ​ꦲꦶꦁ​ꦢꦺꦴꦚ​ꦩꦼꦤꦸꦁꦒꦭ꧀ꦲꦶꦁ​ꦥꦤ꧀ꦢꦺꦴꦔ​ꦚ꧀ꦗꦭꦸꦏ꧀ꦲꦥ​ꦮꦲꦺ​꧈​ꦥꦤ꧀ꦢꦺꦴꦔ​ꦏꦸꦮꦶ​ꦧꦏꦭ꧀ꦢꦶꦧꦊꦱ꧀ꦏꦫꦺꦴ​ꦧꦥꦏ꧀ꦩꦸ​ꦤꦁꦱ꧀ꦮꦂꦒ​꧉​ 20ꦲꦮꦶꦠ꧀ꦤꦺꦏ꧀ꦲꦺꦤꦺꦁꦮꦺꦴꦁ​ꦭꦺꦴꦫꦺꦴ​ꦲꦥ​ꦠꦼꦭꦸ​ꦥꦢ​ꦔꦸꦩ꧀ꦥꦸꦭ꧀ꦧꦼꦧꦉꦁꦔꦤ꧀ꦭꦤ꧀ꦥꦢ​ꦚꦼꦧꦸꦠ꧀ꦗꦼꦤꦼꦁꦏꦸ​꧈​ꦲꦏꦸ​ꦲꦸꦒ​ꦤꦁꦏꦺꦴꦤꦺꦴ​꧉​”

꧋ꦥꦶꦮꦸꦭꦁ​ꦧꦧ꧀ꦔꦥꦸꦫ​ꦭꦶꦪꦤꦺ​꧉​

21꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦏꦺꦴꦤ꧀:“ꦒꦸꦱ꧀ꦠꦶ​꧈​ꦤꦺꦏ꧀ꦱꦼꦢꦸꦭꦸꦂꦏꦸ​ꦧꦺꦴꦭꦏ꧀ꦧꦭꦶꦏ꧀​ꦔ꧀ꦒꦮꦺ​ꦱꦭꦃ​ꦩꦫꦁ​ꦲꦏꦸ​꧈​ꦱꦩ꧀ꦥꦺꦏ꧀ꦥꦶꦁ​ꦥꦶꦫ​ꦲꦏꦸ​ꦏꦸꦢꦸ​ꦔꦥꦸꦫ​ꦱꦼꦢꦸꦭꦸꦂ​ꦏꦸꦮꦶ​?ꦲꦥ​ꦲꦺꦴꦫ​ꦠꦼꦏꦤ꧀ꦥꦶꦁ​ꦥꦶꦠꦸ​?”

22꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦲꦺꦴꦫ​ꦤꦩꦸꦁ​ꦥꦶꦁ​ꦥꦶꦠꦸ​꧈​ꦤꦁꦔꦶꦁ​ꦥꦶꦠꦸꦁ​ꦥꦸꦭꦸꦃ​ꦥꦶꦁ​ꦥꦶꦠꦸ​꧉​ 23ꦩꦸꦭꦤꦺ​꧈​ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦱꦏ꧀ꦮꦶꦗꦶꦤꦺꦫꦠꦸ​ꦱꦶꦁ​ꦤꦒꦶꦃ​ꦲꦸꦠꦁ​ꦩꦫꦁ​ꦥꦼꦭꦢꦺꦤ꧀ꦥꦼꦭꦢꦺꦤ꧀ꦤꦺ꧉​ 24ꦏꦢꦸꦁ​ꦫꦠꦸꦤꦺ​ꦩꦺꦴꦭꦃꦲꦶ꧈​ꦠꦼꦫꦸꦱ꧀ꦲꦺꦤꦺꦁꦱꦏ꧀ꦮꦶꦗꦶꦤꦺꦥꦼꦭꦢꦺꦤ꧀ꦢꦶꦒꦮ​ꦩꦗꦸ​꧉​ꦥꦼꦭꦢꦺꦤ꧀ꦲꦶꦏꦶ​ꦲꦸꦠꦁꦔꦺ​ꦥꦶꦫꦁꦥꦶꦫꦁ​ꦩ꧀ꦭꦶꦪꦸꦤ꧀꧈​ 25ꦤꦁꦔꦶꦁ​ꦮꦺꦴꦁꦔꦺ​ꦲꦺꦴꦫ​ꦧꦶꦱ​ꦚꦲꦸꦂ​꧈​ꦩꦸꦭꦤꦺ​ꦫꦠꦸꦤꦺ​ꦩꦲꦸ​ꦩꦿꦺꦤ꧀ꦠꦃ​ꦏꦺꦴꦁꦏꦺꦴꦤ꧀ꦔꦼꦢꦺꦴꦭ꧀ꦥꦼꦭꦢꦺꦤ꧀ꦩꦲꦸ​ꦢꦢꦶ​ꦥꦼꦭꦢꦺꦤ꧀ ꦱꦏ꧀ꦲꦤꦏ꧀ꦧꦺꦴꦗꦺꦴꦤꦺ​ꦭꦤ꧀ꦱꦼꦩ꧀ꦧꦫꦁ​ꦱꦏ꧀​ꦤ꧀ꦢꦸꦮꦺꦪ꧈​ꦏꦁꦒꦺꦴ​ꦲꦩ꧀ꦧꦪꦂ​ꦲꦸꦠꦁꦔꦺ​꧉​ 26ꦥꦼꦭꦢꦺꦤ꧀ꦩꦲꦸ​ꦠꦼꦫꦸꦱ꧀ꦤꦶꦧ​ꦭꦤ꧀ꦱꦸꦗꦸꦠ꧀ꦤꦁꦔꦉꦥ꧀ꦥꦺ​ꦫꦠꦸꦤꦺ​ꦔꦺꦴꦩꦺꦴꦁ:'ꦒꦸꦱ꧀ꦠꦶ​꧈​ꦲꦩ꧀ꦧꦺꦴꦏ꧀ꦲꦏꦸ​ꦢꦶꦱꦧꦂꦫꦶꦱꦼꦢꦶꦭꦸꦠ꧀ꦩꦼꦤꦺꦃ​꧉​ꦏꦧꦺꦃ​ꦲꦸꦠꦁꦏꦸꦧꦏꦭ꧀ꦠꦏ꧀ꦧꦪꦂ​꧉'​ 27ꦫꦠꦸꦤꦺ​ꦩꦼꦭꦱ꧀ꦏꦫꦺꦴ​ꦥꦼꦭꦢꦺꦤ꧀ꦩꦲꦸ​ꦭꦤ꧀ꦮꦺꦴꦁꦔꦺ​ꦢꦶꦏꦺꦴꦁꦏꦺꦴꦤ꧀ꦩꦸꦭꦶꦃ​꧈​ꦩꦭꦃ​ꦲꦸꦠꦁꦔꦺ​ꦏꦧꦺꦃ​ꦲꦺꦴꦫ​ꦲꦸꦱꦃꦢꦶꦧꦪꦂ​ꦩꦼꦤꦺꦃ​꧉​

28꧋“ꦤꦁꦔꦶꦁ​ꦱꦏ꧀ꦭꦸꦔꦤꦺ​ꦱꦁꦏꦏꦺꦴꦤꦺꦴ​꧈​ꦥꦼꦭꦢꦺꦤ꧀ꦩꦲꦸ​ꦏꦼꦥꦼꦠꦸꦏ꧀ꦏꦫꦺꦴ​ꦏꦚ꧀ꦕꦤꦺ​ꦠꦸꦁꦒꦭ꧀ꦥꦼꦭꦢꦺꦤ꧀ ꦱꦶꦁ​ꦤ꧀ꦢꦸꦮꦺꦲꦸꦠꦁ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦩꦫꦁ​ꦢꦺꦏ꧀ꦤꦺ꧉​ꦏꦚ꧀ꦕꦤꦺ​ꦩꦲꦸ​ꦠꦼꦫꦸꦱ꧀ꦢꦶꦕꦼꦏꦼꦭ꧀ꦭꦤ꧀ꦢꦶꦠꦼꦏꦼꦏ꧀ꦒꦸꦭꦸꦤꦺ​ꦏꦫꦺꦴ​ꦔꦺꦴꦩꦺꦴꦁ:'ꦧꦪꦂꦉꦤ꧀​ꦲꦸꦠꦁꦩꦸ​!’ 29ꦏꦚ꧀ꦕꦤꦺ​ꦩꦲꦸ​ꦠꦼꦫꦸꦱ꧀ꦤꦶꦧ​ꦚ꧀ꦗꦭꦸꦏ꧀ꦏꦮꦼꦭꦱ꧀ꦱꦤ꧀ꦔꦺꦴꦩꦺꦴꦁ:'ꦲꦩ꧀ꦧꦺꦴꦏ꧀ꦱꦧꦂ​ꦠ​!ꦲꦸꦠꦁꦏꦸꦧꦏꦭ꧀ꦠꦏ꧀ꦧꦪꦂ​ꦏꦧꦺꦃ​!’ 30ꦤꦁꦔꦶꦁ​ꦥꦼꦭꦢꦺꦤ꧀ꦩꦲꦸ​ꦲꦺꦴꦫ​ꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺꦱꦩ꧀ꦧꦠ꧀ꦠꦺ​ꦏꦚ꧀ꦕꦤꦺ​꧉​ꦩꦭꦃ​ꦏꦚ꧀ꦕꦤꦺ​ꦢꦶꦊꦧꦺꦴꦏ꧀ꦏꦏꦺꦱꦼꦠꦿꦥꦤ꧀ꦔꦤ꧀ꦠꦶ​ꦲꦸꦠꦁꦔꦺ​ꦢꦶꦱꦮꦸꦂ​ꦏꦧꦺꦃ​꧉​ 31ꦏꦢꦸꦁ​ꦥꦼꦭꦢꦺꦤ꧀ꦥꦼꦭꦢꦺꦤ꧀ꦭꦶꦪꦤꦺ​ꦮꦼꦫꦸꦃ​ꦊꦭꦏꦺꦴꦤ꧀ꦏꦸꦮꦶ​꧈​ꦏꦧꦺꦃ​ꦥꦢ​ꦏꦒꦺꦠ꧀ꦭꦤ꧀ꦱꦼꦢꦶꦧꦔꦼꦠ꧀ ꦩꦸꦭꦤꦺ​ꦠꦼꦫꦸꦱ꧀ꦥꦢ​ꦔꦺꦴꦩꦺꦴꦁꦔꦶꦫꦠꦸꦤꦺ​ꦧꦧ꧀ꦏꦸꦮꦶ​꧉​ 32ꦫꦠꦸꦤꦺ​ꦠꦼꦫꦸꦱ꧀ꦏꦺꦴꦁꦏꦺꦴꦤ꧀ꦤꦤ꧀ꦚꦼꦭꦸꦏ꧀ꦥꦼꦭꦢꦺꦤ꧀ꦱꦶꦁ​ꦲꦭ​ꦩꦲꦸ​ꦠꦼꦫꦸꦱ꧀ꦢꦶꦱꦼꦤꦺꦤ꧀ꦤꦶ:'ꦏꦺꦴꦮꦺ​ꦏꦸꦮꦶ​ꦥꦚ꧀ꦕꦺꦤ꧀ꦥꦼꦭꦢꦺꦤ꧀ꦱꦶꦁ​ꦲꦭ​ꦠꦼꦤꦤ꧀꧈​ꦲꦸꦠꦁꦩꦸ​ꦱꦼꦩꦺꦴꦤꦺꦴ​ꦲꦺꦴꦏꦺꦃꦲꦺꦏꦺꦴꦮꦺ​ꦮꦶꦱ꧀ꦲꦺꦴꦫ​ꦲꦸꦱꦃꦲꦩ꧀ꦧꦪꦂ​꧈​ꦗꦭꦂꦫꦤ꧀ꦏꦺꦴꦮꦺ​ꦚꦸꦮꦸꦤ꧀ꦠꦼꦤꦤ꧀ꦩꦫꦁ​ꦲꦏꦸ​꧉​ 33ꦲꦥ​ꦪ​ꦮꦶꦱ꧀ꦲꦺꦴꦫ​ꦱꦏ꧀ꦩꦼꦱ꧀ꦠꦶꦤꦺꦏꦺꦴꦮꦺ​ꦩꦼꦭꦱ꧀ꦱꦶ​ꦏꦚ꧀ꦕꦩꦸ​ꦠꦸꦁꦒꦭ꧀ꦥꦼꦭꦢꦺꦤ꧀ ꦏꦪ​ꦲꦼꦁꦒꦺꦴꦤ꧀ꦏꦸ​ꦮꦶꦱ꧀ꦩꦼꦭꦱ꧀ꦱꦶ​ꦏꦺꦴꦮꦺ​꧉'​ 34ꦫꦠꦸꦤꦺ​ꦠꦼꦫꦸꦱ꧀ꦤꦼꦱꦸ​ꦧꦔꦼꦠ꧀ꦭꦤ꧀ꦥꦼꦭꦢꦺꦤ꧀ꦱꦶꦁ​ꦲꦭ​ꦩꦲꦸ​ꦢꦶꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀ꦱꦸꦥꦪ​ꦢꦶꦲꦗꦂ​꧈​ꦔꦤ꧀ꦠꦶ​ꦲꦸꦠꦁꦔꦺ​ꦢꦶꦧꦪꦂ​ꦏꦧꦺꦃ​꧉​

35꧋“ꦧꦥꦏ꧀ꦏꦸ​ꦤꦁꦱ꧀ꦮꦂꦒ​ꦲꦸꦒ​ꦧꦏꦭ꧀ꦤꦶꦤ꧀ꦢꦏ꧀ꦏꦏꦺꦩꦼꦁꦏꦺꦴꦤꦺꦴ​ꦏꦸꦮꦶ​ꦩꦫꦁ​ꦏꦺꦴꦮꦺ​꧈​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦔꦥꦸꦫ​ꦩꦫꦁ​ꦱꦼꦢꦸꦭꦸꦂꦩꦸꦱꦏ꧀ꦲꦠꦶꦩꦸ​꧉​”

↑ ↑ ↑


꧋ꦧꦧ꧀ꦥꦼꦒꦠ꧀ꦠꦤ꧀꧈​

꧇​꧑꧙꧇​ 1꧋ꦱꦏ꧀ꦮꦶꦱ꧀ꦱꦺ​ꦔꦿꦩ꧀ꦥꦸꦁꦔꦏꦺꦥꦶꦮꦸꦭꦁꦔꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦶꦁꦒꦭ꧀ꦧꦮꦃꦓꦭꦶꦭꦺꦪ​ꦧꦸꦢꦭ꧀ꦤꦁꦧꦮꦃꦪꦸꦢꦺꦪ​꧈​ꦔꦧꦿꦃꦭꦫꦪꦺꦴꦂꦢꦤ꧀꧈​ 2ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦔꦼꦠꦸꦠ꧀ꦠꦏꦺꦢꦺꦏ꧀ꦤꦺꦭꦤ꧀ꦏꦧꦺꦃ​ꦥꦢ​ꦢꦶꦠꦩ꧀ꦧꦤꦶ​ꦭꦫꦤꦺ​꧉​

3꧋ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦥ꦳ꦫꦶꦱꦶ​ꦥꦢ​ꦠꦼꦏ​꧈​ꦗꦮꦤꦺꦲꦉꦥ꧀ꦔꦼꦤꦺꦁꦢꦺꦏ꧀ꦤꦺꦔꦁꦒꦺꦴ​ꦥꦶꦠꦏꦺꦴꦤ꧀ꦤꦤ꧀꧈​ꦩꦸꦭꦤꦺ​ꦠꦼꦫꦸꦱ꧀ꦥꦢ​ꦠꦏꦺꦴꦤ꧀ꦔꦺꦤꦺ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦲꦥ​ꦮꦺꦴꦁ​ꦭꦤꦁ​ꦲꦺꦤ꧀ꦠꦸꦏ꧀ꦩꦼꦒꦠ꧀ꦧꦺꦴꦗꦺꦴꦤꦺ​ꦩꦤꦸꦠ꧀ꦱꦏ꧀ꦏꦉꦥ꧀ꦥꦺ​ꦢꦺꦮꦺ?”

4꧋ꦱꦲꦸꦫꦤ꧀ꦏꦸ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦲꦥ​ꦏꦺꦴꦮꦺ​ꦲꦺꦴꦫ​ꦩꦕ​ꦤꦁꦏꦶꦠꦧ꧀​ꦱꦸꦕꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦼꦁꦒꦺꦴꦤꦺ​ꦔ꧀ꦒꦮꦺ​ꦩꦤꦸꦁꦱ​ꦏꦮꦶꦠ꧀ꦮꦶꦮꦶꦠ꧀ꦠꦤ꧀ꦤꦺ​ꦫꦸꦥ​ꦮꦺꦴꦁ​ꦭꦤꦁ​ꦭꦤ꧀ꦮꦺꦴꦁ​ꦮꦺꦢꦺꦴꦏ꧀? 5ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦔꦺꦴꦩꦺꦴꦁ:'ꦩꦸꦭꦤꦺ​ꦮꦺꦴꦁ​ꦭꦤꦁ​ꦏꦸꦢꦸ​ꦤꦶꦁꦒꦭ꧀ꦧꦥ​ꦭꦤ꧀ꦧꦶꦪꦸꦁꦔꦺ​ꦭꦤ꧀ꦢꦢꦶ​ꦱꦶꦗꦶ​ꦏꦫꦺꦴ​ꦧꦺꦴꦗꦺꦴꦤꦺ​꧈​ꦢꦢꦶꦤꦺ​ꦮꦺꦴꦁ​ꦭꦺꦴꦫꦺꦴ​ꦢꦢꦶ​ꦢꦒꦶꦁ​ꦱꦶꦗꦶ​꧉'​ 6ꦮꦺꦴꦁ​ꦭꦺꦴꦫꦺꦴ​ꦏꦸꦮꦶ​ꦮꦶꦱ꧀ꦲꦺꦴꦫ​ꦭꦺꦴꦫꦺꦴ​ꦩꦼꦤꦺꦃ​꧈​ꦤꦁꦔꦶꦁ​ꦤꦩꦸꦁ​ꦱꦶꦗꦶ​꧉​ꦭꦤ꧀ꦲꦥ​ꦱꦶꦁ​ꦮꦶꦱ꧀ꦢꦶꦢꦢꦺꦏ꧀ꦏꦏꦺꦱꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦤꦸꦁꦱ​ꦲꦺꦴꦫ​ꦏꦼꦤꦺꦁꦩꦶꦱꦃ​꧉​”

7꧋ꦥꦫ​ꦥ꦳ꦫꦶꦱꦶ​ꦠꦼꦫꦸꦱ꧀ꦥꦢ​ꦠꦏꦺꦴꦤ꧀:“ꦭꦃ​ꦤꦺꦏ꧀ꦔꦺꦴꦤꦺꦴ​꧈​ꦭꦃ​ꦏꦼꦤꦺꦁꦲꦥ​ꦤꦧꦶ​ꦩꦺꦴꦱꦼꦱ꧀ꦏꦺꦴꦏ꧀ꦔꦺꦴꦩꦺꦴꦁꦤꦺꦏ꧀ꦮꦺꦴꦁ​ꦭꦤꦁ​ꦏꦸꦢꦸ​ꦔꦼꦏꦺꦏ꧀ꦏꦶꦭꦪꦁ​ꦥꦼꦒꦠ꧀ꦩꦫꦁ​ꦧꦺꦴꦗꦺꦴꦤꦺ​ꦤꦺꦏ꧀ꦢꦶꦥꦼꦒꦠ꧀?ꦲꦥ​ꦏꦸꦮꦶ​ꦠꦼꦒꦼꦱ꧀ꦱꦺ​ꦲꦺꦴꦫ​ꦔ꧀ꦭꦶꦭꦤꦶ​ꦥꦼꦒꦠ꧀ꦠꦤ꧀?”

8꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦤꦧꦶ​ꦩꦺꦴꦱꦼꦱ꧀ꦲꦼꦁꦒꦺꦴꦤꦺ​ꦔ꧀ꦭꦶꦭꦤꦶ​ꦏꦺꦴꦮꦺ​ꦩꦼꦒꦠ꧀ꦧꦺꦴꦗꦺꦴꦩꦸ​ꦏꦸꦮꦶ​ꦗꦭꦂꦫꦤ꧀ꦏꦺꦴꦮꦺ​ꦲꦺꦴꦫ​ꦏꦼꦤꦺꦁꦢꦶꦏꦤ꧀ꦢꦤ꧀ꦤꦶ꧈​ꦤꦁꦔꦶꦁ​ꦲꦶꦁ​ꦮꦶꦮꦶꦠ꧀ꦠꦤ꧀ꦤꦺ​ꦲꦺꦴꦫ​ꦏꦪ​ꦔꦺꦴꦤꦺꦴ​! 9ꦏꦺꦴꦮꦺ​ꦥꦢ​ꦠꦏ꧀ꦏꦤ꧀ꦢꦤ꧀ꦤꦶ:ꦱꦥ​ꦩꦼꦒꦠ꧀ꦧꦺꦴꦗꦺꦴꦤꦺ​ꦠꦼꦫꦸꦱ꧀ꦏꦮꦶꦤ꧀ꦏꦫꦺꦴ​ꦮꦺꦴꦁ​ꦭꦶꦪꦤꦺ​꧈​ꦮꦺꦴꦁ​ꦏꦸꦮꦶ​ꦭꦏꦸ​ꦧꦺꦢꦁ꧈​ꦏꦼꦗꦧ​ꦤꦺꦏ꧀ꦧꦺꦴꦗꦺꦴꦤꦺ​ꦭꦏꦸ​ꦧꦺꦢꦁ꧉​”

10꧋ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃ​ꦤꦺꦏ꧀ꦮꦺꦴꦁ​ꦲꦺꦴꦩꦃꦲꦺꦴꦩꦃ​ꦏꦪ​ꦔꦺꦴꦤꦺꦴ​ꦭꦏꦸꦤꦺ꧈​ꦲꦥ​ꦲꦺꦴꦫ​ꦭꦸꦮꦶꦃ​ꦲꦥꦶꦏ꧀ꦤꦺꦏ꧀ꦲꦺꦴꦫ​ꦲꦺꦴꦩꦃꦲꦺꦴꦩꦃ​ꦮꦲꦺ​꧉​”

11꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦲꦺꦴꦫ​ꦱꦧꦼꦤ꧀ꦮꦺꦴꦁ​ꦧꦶꦱ​ꦔ꧀ꦭꦏꦺꦴꦤ꧀ꦤꦶ​ꦏꦸꦮꦶ​꧈​ꦤꦩꦸꦁ​ꦮꦺꦴꦁ​ꦱꦶꦁ​ꦢꦶꦥꦶꦗꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 12ꦲꦮꦶꦠ꧀ꦲꦺꦤꦺꦁꦮꦺꦴꦁ​ꦱꦶꦁ​ꦲꦺꦴꦫ​ꦧꦶꦱ​ꦲꦺꦴꦩꦃꦲꦺꦴꦩꦃ​꧈​ꦗꦭꦂꦫꦤ꧀ꦏꦮꦶꦠ꧀ꦭꦲꦶꦂ​ꦮꦶꦱ꧀ꦔꦺꦴꦤꦺꦴ​꧉​ꦲꦺꦤꦺꦁꦲꦸꦒ​ꦱꦶꦁ​ꦲꦺꦴꦫ​ꦧꦶꦱ​ꦲꦺꦴꦩꦃꦲꦺꦴꦩꦃ​꧈​ꦗꦭꦂꦫꦤ꧀ꦢꦶꦢꦢꦺꦏ꧀ꦏꦏꦺꦔꦺꦴꦤꦺꦴ​ꦏꦫꦺꦴ​ꦮꦺꦴꦁ​ꦭꦶꦪꦤꦺ​꧉​ꦭꦤ꧀ꦲꦺꦤꦺꦁꦭꦶꦪꦤꦺ​ꦩꦼꦤꦺꦃ​ꦱꦶꦁ​ꦩꦶꦭꦶꦃ​ꦲꦺꦴꦫ​ꦲꦺꦴꦩꦃꦲꦺꦴꦩꦃ​ꦱꦁꦏꦏꦉꦥ꧀ꦥꦺ​ꦢꦺꦮꦺ꧈​ꦗꦭꦂꦫꦤ꧀ꦤꦩꦸꦁ​ꦏꦼꦥꦺꦔꦶꦤ꧀ꦔꦸꦫꦸꦱ꧀ꦱꦶ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦥ​ꦱꦶꦁ​ꦧꦶꦱ​ꦔ꧀ꦭꦏꦺꦴꦤ꧀ꦤꦶ​꧈​ꦪ​ꦧꦺꦤ꧀​ꦔ꧀ꦭꦏꦺꦴꦤ꧀ꦤꦶ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦲꦩ꧀ꦧꦼꦂꦏꦃꦲꦶ​ꦧꦺꦴꦕꦃꦧꦺꦴꦕꦃ​꧉​

13꧋ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦮꦺꦴꦁꦮꦺꦴꦁ​ꦥꦢ​ꦔ꧀ꦒꦮ​ꦲꦤꦏ꧀ꦲꦤꦏ꧀ꦏꦺ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ ꦚꦸꦮꦸꦤ꧀ꦱꦸꦥꦪ​ꦥꦢ​ꦢꦶꦢꦺꦴꦔꦏ꧀ꦏꦏꦺꦭꦤ꧀ꦢꦶꦧꦼꦂꦏꦃꦲꦶ​꧉​ꦤꦁꦔꦶꦁ​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦢꦶꦱꦼꦤꦺꦤ꧀ꦤꦶꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ 14ꦒꦸꦱ꧀ꦠꦶ​ꦪꦺꦯꦸꦱ꧀ꦩꦭꦃ​ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦲꦩ꧀ꦧꦺꦴꦏ꧀ꦧꦺꦤ꧀ꦧꦺꦴꦕꦃꦧꦺꦴꦕꦃ​ꦏꦸꦮꦶ​ꦥꦢ​ꦩ꧀ꦧꦿꦺꦤꦺ꧈​ꦲꦗ​ꦢꦶꦲꦭꦁꦔꦭꦁꦔꦶ꧈​ꦲꦮꦶꦠ꧀ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦁꦒꦺꦴ​ꦮꦺꦴꦁ​ꦱꦶꦁ​ꦏꦪ​ꦧꦺꦴꦕꦃꦧꦺꦴꦕꦃ​ꦏꦸꦮꦶ​꧉​”

15꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦸꦩ꧀ꦥꦁꦔꦶ​ꦠꦔꦤ꧀ꦩꦫꦁ​ꦧꦺꦴꦕꦃꦧꦺꦴꦕꦃ​꧈​ꦠꦼꦫꦸꦱ꧀ꦭꦸꦔ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​꧉​

꧋ꦮꦺꦴꦁ​ꦲꦼꦤꦺꦴꦩ꧀ꦱꦶꦁ​ꦱꦸꦒꦶꦃ​꧉​

16꧋ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦲꦺꦤꦺꦁꦮꦺꦴꦁ​ꦲꦼꦤꦺꦴꦩ꧀ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ ꦠꦏꦺꦴꦤ꧀ꦔꦺꦤꦺ​:“ꦒꦸꦫꦸ​꧈​ꦱꦸꦥꦪꦤꦺ​ꦧꦶꦱ​ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​꧈​ꦲꦏꦸ​ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦥꦼꦁꦒꦮꦺ​ꦧꦼꦕꦶꦏ꧀ꦲꦥ​?”

17꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦠꦏꦺꦴꦤ꧀ꦩꦫꦁ​ꦲꦏꦸ​ꦧꦧ꧀ꦲꦥ​ꦱꦶꦁ​ꦧꦼꦕꦶꦏ꧀?ꦤꦩꦸꦁ​ꦱꦶꦗꦶ​ꦱꦶꦁ​ꦧꦼꦕꦶꦏ꧀ ꦪꦏꦸꦮꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦺꦏ꧀ꦏꦺꦴꦮꦺ​ꦏꦼꦥꦺꦔꦶꦤ꧀ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​꧈​ꦏꦺꦴꦮꦺ​ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦲꦁꦒꦼꦂꦫꦁꦒꦼꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦧꦺꦃ​꧉​”

18꧋ꦠꦼꦩ꧀ꦧꦸꦁꦔꦺ​ꦮꦺꦴꦁ​ꦲꦼꦤꦺꦴꦩ꧀ꦩꦲꦸ​:“ꦲꦁꦒꦼꦂꦫꦁꦒꦼꦂ​ꦱꦶꦁ​ꦲꦼꦤ꧀ꦢꦶ​?”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦲꦗ​ꦩꦼꦩꦠꦺꦤ꧀ꦤꦶ​꧈​ꦲꦗ​ꦭꦏꦸ​ꦧꦺꦢꦁ꧈​ꦲꦗ​ꦚꦺꦴꦭꦺꦴꦁ​꧈​ꦲꦗ​ꦔꦥꦸꦱ꧀ꦱꦶ​꧉​ 19ꦔꦗꦺꦤ꧀ꦤꦤ​ꦩꦫꦁ​ꦧꦥꦧꦶꦪꦸꦁꦩꦸ​ꦭꦤ꧀ꦠꦿꦺꦱ꧀ꦤꦲꦩꦫꦁ​ꦮꦺꦴꦁ​ꦭꦶꦪ​ꦏꦪ​ꦲꦼꦁꦒꦺꦴꦤ꧀ꦩꦸ​ꦠꦿꦺꦱ꧀ꦤꦩꦫꦁ​ꦲꦮꦏ꧀ꦩꦸ​ꦢꦺꦮꦺ꧉​”

20꧋ꦮꦺꦴꦁꦔꦺ​ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦲꦁꦒꦼꦂꦫꦁꦒꦼꦂ​ꦏꦧꦺꦃ​ꦏꦸꦮꦶ​ꦮꦶꦱ꧀ꦠꦏ꧀ꦭꦏꦺꦴꦤ꧀ꦤꦶ​꧉​ꦭꦃ​ꦲꦶꦗꦶꦏ꧀ꦏꦸꦫꦁ​ꦲꦥ​ꦩꦼꦤꦺꦃ​?”

21꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦤꦺ​:“ꦤꦺꦏ꧀ꦏꦺꦴꦮꦺ​ꦏꦼꦥꦺꦔꦶꦤ꧀ꦱꦩ꧀ꦥꦸꦂꦤ​꧈​ꦧꦫꦁꦧꦫꦁ​ꦤ꧀ꦢꦸꦮꦺꦤꦺꦢꦶꦲꦼꦢꦺꦴꦭ꧀ꦏꦧꦺꦃ​꧉​ꦱꦼꦥꦶꦫ​ ꦥꦪꦸꦤꦺꦢꦶꦏꦺꦏ꧀ꦏꦏꦺꦩꦫꦁ​ꦮꦺꦴꦁ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺ꧈​ꦱꦸꦥꦪ​ꦏꦺꦴꦮꦺ​ꦤ꧀ꦢꦸꦮꦺꦧꦤ꧀ꦢꦤꦁꦱ꧀ꦮꦂꦒ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀​ꦩ꧀ꦧꦿꦺꦤꦺꦪꦩꦺꦭꦸ​ꦲꦏꦸ​꧉​”

22꧋ꦏꦢꦸꦁ​ꦏꦿꦸꦔꦸ​ꦠꦼꦩ꧀ꦧꦸꦁ​ꦏꦸꦮꦶ​꧈​ꦮꦺꦴꦁ​ꦲꦼꦤꦺꦴꦩ꧀ꦩꦲꦸ​ꦠꦼꦫꦸꦱ꧀ꦭꦸꦔ​ꦏꦫꦺꦴ​ꦱꦼꦢꦶ꧈​ꦲꦮꦶꦠ꧀ꦢꦺꦏ꧀ꦤꦺꦱꦸꦒꦶꦃ​ꦧꦔꦼꦠ꧀꧈​

23꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦏꦺꦴꦮꦺ​ꦥꦢ​ꦠꦏ꧀ꦲꦺꦴꦩꦺꦴꦁꦔꦶ:ꦥꦚ꧀ꦕꦺꦤ꧀ꦲꦔꦺꦭ꧀ꦠꦼꦤꦤ꧀ꦏꦁꦒꦺꦴ​ꦮꦺꦴꦁ​ꦱꦸꦒꦶꦃ​ꦩ꧀ꦊꦧꦸ​ꦲꦶꦁ​ꦏꦿꦠꦺꦴꦤꦺ​ꦱ꧀ꦮꦂꦒ​꧉​ 24ꦠꦏ꧀ꦧꦭꦺꦤ꧀ꦤꦶꦩꦼꦤꦺꦃ​ꦠꦼꦩ꧀ꦧꦸꦁꦏꦸ​:ꦩꦭꦃ​ꦭꦸꦮꦶꦃ​ꦒꦩ꧀ꦥꦁ​ꦲꦸꦤ꧀ꦠ​ꦩ꧀ꦊꦧꦸ​ꦧꦺꦴꦭꦺꦴꦁꦔꦤ꧀ꦤꦺ​ꦢꦺꦴꦩ꧀ ꦠꦼꦤꦶꦩ꧀ꦧꦁꦮꦺꦴꦁ​ꦱꦸꦒꦶꦃ​ꦩ꧀ꦊꦧꦸ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

25꧋ꦏꦿꦸꦔꦸ​ꦠꦼꦩ꧀ꦧꦸꦁ​ꦏꦸꦮꦶ​ꦩꦲꦸ​ꦥꦫ​ꦩꦸꦫꦶꦢ꧀ꦏꦒꦺꦠ꧀ꦧꦔꦼꦠ꧀ ꦠꦼꦫꦸꦱ꧀ꦠꦏꦺꦴꦤ꧀:“ꦭꦃ​ꦤꦺꦏ꧀ꦔꦺꦴꦤꦺꦴ​꧈​ꦱꦥ​ꦱꦶꦁ​ꦧꦶꦱ​ꦱ꧀ꦭꦩꦼꦠ꧀?”

26꧋ꦒꦸꦱ꧀ꦠꦶ​ꦪꦺꦯꦸꦱ꧀ꦚꦮꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦁꦒꦺꦴ​ꦩꦤꦸꦁꦱ​ꦥꦽꦏꦫ​ꦏꦸꦮꦶ​ꦥꦚ꧀ꦕꦺꦤ꧀ꦩꦺꦴꦏꦭ꧀ ꦤꦁꦔꦶꦁ​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦲꦺꦤꦺꦁꦧꦫꦁ​ꦱꦶꦁ​ꦩꦺꦴꦏꦭ꧀꧈​”

꧋ꦲꦸꦥꦃꦲꦺꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

27꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦤꦶꦁꦒꦭ꧀ꦱꦼꦩ꧀ꦧꦫꦁꦔꦺꦲꦮꦏ꧀ꦏꦺ​ꦢꦺꦮꦺꦭꦤ꧀ꦱꦲꦶꦏꦶ​ꦩꦺꦭꦸ​ꦏꦺꦴꦮꦺ​!ꦲꦮꦏ꧀ꦏꦺ​ꦢꦺꦮꦺꦧꦏꦭ꧀ꦲꦺꦤ꧀ꦠꦸꦏ꧀ꦲꦥ​?”

28꧋ꦱꦲꦸꦫꦤ꧀ꦏꦸ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦏꦺꦴꦮꦺ​ꦥꦢ​ꦠꦏ꧀ꦲꦺꦴꦩꦺꦴꦁꦔꦶ꧈​ꦲꦩ꧀ꦧꦺꦱꦸꦏ꧀ꦲꦶꦁ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦥꦔ꧀ꦮꦱ​꧉​ꦲꦶꦁ​ꦮꦏ꧀ꦠꦸ​ꦲꦶꦏꦸ​ꦏꦺꦴꦮꦺ​ꦱꦶꦁ​ꦥꦢ​ꦩꦺꦭꦸ​ꦲꦏꦸ​ꦲꦸꦒ​ꦧꦏꦭ꧀ꦩꦺꦭꦸ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦭꦤ꧀ꦔꦿꦸꦠꦸꦠꦊꦂꦫꦺ​ꦆꦱꦿꦌꦭ꧀ꦫꦺꦴꦭꦱ꧀꧈​ 29ꦭꦤ꧀ꦱꦧꦼꦤ꧀ꦮꦺꦴꦁ​ꦱꦶꦁ​ꦤꦶꦁꦒꦭ꧀ꦲꦺꦴꦩꦃꦲꦺ​꧈​ꦱꦼꦢꦸꦭꦸꦂꦫꦺ​ꦭꦤꦁ​ꦲꦥ​ꦮꦺꦢꦺꦴꦏ꧀ ꦧꦥꦲꦶꦧꦸꦤꦺ꧈​ꦲꦤꦏ꧀ꦲꦤꦏ꧀ꦏꦺ​ꦭꦤ꧀ꦏꦼꦧꦺꦴꦤꦺ​꧈​ꦗꦭꦂꦫꦤ꧀​ꦔ꧀ꦭꦧꦸꦃꦲꦶ​ꦲꦏꦸ​꧈​ꦮꦺꦴꦁ​ꦏꦸꦮꦶ​ꦧꦏꦭ꧀ꦤꦩ꧀ꦥ​ꦲꦶꦗꦺꦴꦭ꧀ꦭꦺ​ꦥꦶꦁ​ꦱꦠꦸꦱ꧀ꦭꦤ꧀ꦲꦸꦒ​ꦧꦏꦭ꧀ꦲꦺꦤ꧀ꦠꦸꦏ꧀ꦲꦸꦫꦶꦥ꧀ꦭꦁꦒꦼꦁ​꧉​ 30ꦤꦁꦔꦶꦁ​ꦲꦺꦴꦏꦺꦃꦮꦺꦴꦁ​ꦱꦶꦁ​ꦠꦼꦏꦤꦺ​ꦤ꧀ꦢꦶꦱꦶꦏ꧀ꦧꦏꦭ꧀ꦢꦢꦶ​ꦏꦺꦫꦶ​ꦢꦺꦮꦺꦭꦤ꧀ꦲꦺꦴꦏꦺꦃꦮꦺꦴꦁ​ꦱꦶꦁ​ꦠꦼꦏꦤꦺ​ꦏꦺꦫꦶ​ꦧꦏꦭ꧀ꦢꦢꦶ​ꦤ꧀ꦢꦶꦱꦶꦏ꧀ꦢꦺꦮꦺ꧉​”

↑ ↑ ↑


꧋ꦥꦶꦮꦸꦭꦁ​ꦧꦧ꧀ꦮꦺꦴꦁꦮꦺꦴꦁ​ꦱꦶꦁ​ꦏꦼꦂꦗ​ꦤꦁꦏꦼꦧꦺꦴꦤ꧀ꦢꦽꦲꦶꦥ꦳꧀꧈​

꧇​꧒꧐꧇​ 1꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦸꦭꦁꦔꦶꦔꦺꦤꦺ​:“ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦢꦽꦲꦶꦥ꦳꧀꧈​ꦲꦺꦱꦸꦏ꧀ꦩꦿꦸꦥꦸꦠ꧀ꦮꦺꦴꦁꦔꦺ​ꦮꦶꦱ꧀ꦧꦸꦢꦭ꧀​ꦔ꧀ꦒꦺꦴꦭꦺꦏ꧀ꦮꦺꦴꦁ​ꦱꦶꦁ​ꦏꦸꦢꦸ​ꦔꦼꦂꦗꦤ꧀ꦤꦶꦏꦼꦧꦺꦴꦤꦺ​꧉​ 2ꦏꦢꦸꦁ​ꦮꦶꦱ꧀ꦥꦢ​ꦱꦼꦠꦸꦗꦸ​ꦧꦧ꧀ꦧꦪꦫꦤ꧀ꦤꦺꦱꦧꦼꦤ꧀ꦮꦺꦴꦁ​ꦱꦼꦢꦶꦤ​꧈​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦧꦸꦢꦭ꧀ꦚꦩ꧀ꦧꦸꦠ꧀ꦠꦤꦁꦏꦼꦧꦺꦴꦤꦺ​꧉​ 3ꦏꦶꦫꦏꦶꦫ​ꦗꦩ꧀ꦱꦔ​ꦲꦺꦱꦸꦏ꧀ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦭꦸꦔ​ꦩꦼꦤꦺꦃ​ꦠꦼꦫꦸꦱ꧀ꦮꦼꦫꦸꦃ​ꦮꦺꦴꦁ​ꦱꦶꦗꦶꦭꦺꦴꦫꦺꦴꦔꦁꦒꦸꦂ​ꦤꦁꦭꦠꦂꦫꦺ​ꦥꦱꦂ​꧉​ 4ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦩꦲꦸ​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦔꦁꦒꦸꦂ​ꦏꦸꦮꦶ​:'ꦲ꦳ꦪꦸꦏ꧀ꦥꦢ​ꦚꦩ꧀ꦧꦸꦠ꧀ꦠꦤꦁꦏꦼꦧꦺꦴꦤ꧀ꦏꦸ​꧈​ꦏꦺꦴꦮꦺ​ꦧꦏꦭ꧀ꦠꦏ꧀ꦧꦪꦂ​ꦱꦏ꧀ꦩꦼꦱ꧀ꦠꦶꦤꦺ!’ 5ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦧꦸꦢꦭ꧀꧈​ꦏꦶꦫꦏꦶꦫ​ꦗꦩ꧀ꦫꦺꦴꦭꦱ꧀ꦭꦤ꧀ꦗꦩ꧀ꦠꦼꦭꦸ​ꦲꦮꦤ꧀ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦭꦸꦔ​ꦩꦼꦤꦺꦃ​ꦔ꧀ꦒꦺꦴꦭꦺꦏ꧀ꦮꦺꦴꦁ​꧉​ 6ꦏꦶꦫꦏꦶꦫ​ꦗꦩ꧀ꦭꦶꦩ​ꦱꦺꦴꦫꦺ​ꦮꦺꦴꦁꦔꦺ​ꦲꦸꦒ​ꦧꦸꦢꦭ꧀ꦩꦼꦤꦺꦃ​꧈​ꦠꦼꦫꦸꦱ꧀ꦮꦼꦫꦸꦃ​ꦮꦺꦴꦁꦮꦺꦴꦁ​ꦥꦢ​ꦔꦁꦒꦸꦂ​꧈​ꦠꦼꦫꦸꦱ꧀ꦢꦶꦠꦏꦺꦴꦤ꧀ꦤꦶ​:'ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦥꦢ​ꦔꦁꦒꦸꦂ​ꦤꦁꦏꦺꦤꦺ​ꦱꦼꦢꦶꦤ​ꦩꦸꦥꦸꦠ꧀?’ 7ꦮꦺꦴꦁꦮꦺꦴꦁ​ꦱꦼꦩꦲꦸꦂ​:'ꦭꦃ​ꦲꦺꦴꦫ​ꦲꦺꦤꦺꦁꦱꦶꦁ​ꦔꦼꦏꦺꦏ꧀ꦏꦶꦏꦼꦂꦗꦤ꧀ꦤꦤ꧀ꦏꦺꦴꦏ꧀!’ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦠꦼꦫꦸꦱ꧀ꦔꦺꦴꦩꦺꦴꦁ:'ꦤꦺꦏ꧀ꦔꦺꦴꦤꦺꦴ​꧈​ꦲ꦳ꦪꦸꦏ꧀ꦚꦩ꧀ꦧꦸꦠ꧀ꦠꦤꦁꦏꦼꦧꦺꦴꦤ꧀ꦏꦸ​ꦮꦲꦺ​꧉​’

8꧋“ꦏꦢꦸꦁ​ꦮꦶꦱ꧀ꦱꦸꦫꦸꦥ꧀ ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦩꦤ꧀ꦢꦺꦴꦂꦫꦺ:'ꦏꦤ​ꦱꦶꦁ​ꦏꦼꦂꦗ​ꦥꦢ​ꦢꦶꦕꦼꦭꦸꦏ꧀​ꦭꦤ꧀ꦢꦶꦏꦺꦏ꧀ꦏꦶꦧꦪꦫꦤ꧀ꦤꦺ꧉​ꦩꦺꦴꦭꦃꦲꦶꦏꦫꦺꦴ​ꦱꦶꦁ​ꦠꦼꦏ​ꦏꦺꦫꦶ​ꦢꦺꦮꦺꦔꦤ꧀ꦠꦶ​ꦠꦼꦏꦤ꧀ꦱꦶꦁ​ꦠꦼꦏ​ꦤ꧀ꦢꦶꦱꦶꦏ꧀ꦢꦺꦮꦺ꧉'​ 9ꦮꦺꦴꦁꦮꦺꦴꦁ​ꦱꦶꦁ​ꦚꦩ꧀ꦧꦸꦠ꧀ꦠꦩꦺꦴꦭꦃꦲꦶꦏꦶꦫꦏꦶꦫ​ꦗꦩ꧀ꦭꦶꦩ​ꦠꦼꦫꦸꦱ꧀ꦥꦢ​ꦠꦼꦏ​ꦭꦤ꧀ꦤꦩ꧀ꦥ​ꦧꦪꦫꦤ꧀ꦤꦺꦮꦺꦴꦁ​ꦏꦼꦂꦗ​ꦱꦼꦢꦶꦤ​꧉​ 10ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦮꦺꦴꦁꦮꦺꦴꦁ​ꦱꦶꦁ​ꦩꦺꦴꦭꦃꦲꦶꦏꦼꦂꦗ​ꦏꦮꦶꦠ꧀ꦲꦺꦱꦸꦏ꧀ꦠꦼꦫꦸꦱ꧀ꦥꦢ​ꦩꦫ​꧈​ꦩꦶꦏꦶꦫꦺꦧꦏꦭ꧀ꦤꦩ꧀ꦥ​ꦧꦪꦂꦫꦤ꧀ꦭꦸꦮꦶꦃ​ꦲꦺꦴꦏꦺꦃ꧉​ꦤꦁꦔꦶꦁ​ꦮꦺꦴꦁꦮꦺꦴꦁ​ꦏꦸꦮꦶ​ꦲꦸꦒ​ꦤꦩ꧀ꦥ​ꦧꦪꦫꦤ꧀ꦤꦺꦮꦺꦴꦁ​ꦏꦼꦂꦗ​ꦱꦼꦢꦶꦤ​꧉​ 11ꦮꦺꦴꦁꦮꦺꦴꦁ​ꦤꦩ꧀ꦥꦤꦶ​ꦧꦪꦫꦤ꧀ꦤꦺꦏꦫꦺꦴ​ꦔ꧀ꦒꦼꦱꦃ​ꦩꦫꦁ​ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀꧈​ 12ꦠꦼꦩ꧀ꦧꦸꦁꦔꦺ​:'ꦭꦃ​ꦱꦶꦁ​ꦠꦼꦏ​ꦏꦺꦫꦶ​ꦏꦼꦂꦗꦤꦺꦤꦩꦸꦁ​ꦱꦏ꧀ꦗꦩ꧀ ꦭꦃ​ꦏꦺꦴꦏ꧀ꦢꦶꦧꦪꦂ​ꦠꦸꦁꦒꦭ꧀ꦭꦺ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦏꦼꦂꦗ​ꦏꦼꦥꦤꦱ꧀ꦱꦼꦤ꧀ꦱꦼꦢꦶꦤ​ꦩꦸꦥꦸꦠ꧀꧈​’

13꧋“ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦠꦼꦫꦸꦱ꧀ꦱꦼꦩꦲꦸꦂ​:'ꦭꦺꦴ​꧈​ꦲꦏꦸ​ꦲꦺꦴꦫ​ꦔꦥꦸꦱ꧀ꦱꦶ​ꦏꦺꦴꦮꦺ​!ꦏꦺꦴꦮꦺ​ꦭꦲꦸꦠ꧀ꦮꦶꦱ꧀ꦱꦼꦠꦸꦗꦸ​ꦠ​ꦤꦩ꧀ꦥ​ꦧꦪꦫꦤ꧀ꦤꦺꦮꦺꦴꦁ​ꦏꦼꦂꦗ​ꦱꦼꦢꦶꦤ​? 14ꦢꦶꦠꦩ꧀ꦥ​ꦧꦪꦫꦤ꧀ꦩꦸꦏꦸꦮꦶ​ꦭꦤ꧀ꦏꦤ​ꦭꦸꦔ​!ꦥꦚ꧀ꦕꦺꦤ꧀ꦲꦏꦸ​ꦏꦉꦥ꧀ ꦔꦼꦏꦺꦏ꧀ꦏꦶꦮꦺꦴꦁ​ꦱꦶꦁ​ꦠꦼꦏ​ꦏꦺꦫꦶ​ꦧꦪꦂꦫꦤ꧀ꦱꦶꦁ​ꦠꦸꦁꦒꦭ꧀ꦭꦺ​ꦏꦫꦺꦴ​ꦧꦪꦫꦤ꧀ꦩꦸ꧉​ 15ꦲꦥ​ꦲꦏꦸ​ꦲꦺꦴꦫ​ꦲꦺꦤ꧀ꦠꦸꦏ꧀ꦔꦁꦒꦺꦴꦏ꧀ꦏꦏꦺꦢꦸꦮꦶꦠ꧀ꦏꦸꦩꦤꦸꦠ꧀ꦏꦉꦥ꧀ꦏꦸ​ꦢꦺꦮꦺ?ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦩꦺꦫꦶ​ꦤꦺꦏ꧀ꦲꦏꦸ​ꦔ꧀ꦒꦮꦺ​ꦧꦼꦕꦶꦏ꧀ꦩꦫꦁ​ꦭꦶꦪꦤꦺ​?’”

16꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦥꦚ꧀ꦕꦺꦤ꧀ꦏꦪ​ꦔꦺꦴꦤꦺꦴ​꧈​ꦮꦺꦴꦁꦮꦺꦴꦁ​ꦱꦶꦁ​ꦠꦼꦏ​ꦏꦺꦫꦶ​ꦧꦏꦭ꧀ꦢꦢꦶ​ꦤ꧀ꦢꦶꦱꦶꦏ꧀ꦢꦺꦮꦺꦭꦤ꧀ꦮꦺꦴꦁꦮꦺꦴꦁ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦧꦏꦭ꧀ꦢꦢꦶ​ꦱꦶꦁ​ꦏꦺꦫꦶ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦏꦺꦥꦶꦁ​ꦠꦼꦭꦸꦤꦺ​ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦢꦶꦥꦠꦺꦤ꧀ꦤꦶ​꧉​

17꧋ꦢꦺꦴꦁꦔꦺꦥꦢ​ꦩ꧀ꦭꦏꦸ​ꦧꦸꦢꦭ꧀ꦤꦁꦏꦸꦠꦪꦺꦫꦸꦱꦭꦺꦩ꧀ ꦒꦸꦱ꧀ꦠꦶ​ꦪꦺꦯꦸꦱ꧀ꦚꦼꦭꦸꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦫꦺꦴꦭꦱ꧀ꦢꦶꦢꦺꦮꦺꦏ꧀ꦏꦏꦺ꧈​ꦠꦼꦫꦸꦱ꧀ꦔꦺꦴꦩꦺꦴꦁ: 18“ꦏꦺꦴꦮꦺ​ꦥꦢ​ꦔꦼꦂꦠꦶ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦱꦲꦶꦏꦶ​ꦧꦸꦢꦭ꧀ꦤꦁꦏꦸꦠꦪꦺꦫꦸꦱꦭꦺꦩ꧀꧈​ꦤꦁꦏꦤ​ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦢꦶꦥꦱꦿꦃꦲꦏꦺꦩꦫꦁ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦒꦸꦫꦸ​ꦏꦶꦠꦧ꧀​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦤꦼꦠꦼꦥ꧀ꦥꦏꦺꦱꦼꦠꦿꦥꦤ꧀ꦥꦠꦶ​ꦩꦫꦁ​ꦢꦺꦏ꧀ꦤꦺ꧉​ 19ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦮꦺꦴꦁꦮꦺꦴꦁ​ꦧꦏꦭ꧀ꦩꦱꦿꦃꦲꦏꦺꦢꦺꦏ꧀ꦤꦺꦩꦫꦁ​ꦧꦁꦱ​ꦬꦸꦩ꧀ ꦱꦸꦥꦪ​ꦢꦶꦥꦺꦴꦪꦺꦴꦏ꧀ꦏꦶ​꧈​ꦢꦶꦥꦼꦕꦸꦠ꧀ꦠꦶ​ꦠꦼꦫꦸꦱ꧀ꦢꦶꦥꦼꦤ꧀ꦠꦺꦁ꧉​ꦤꦁꦔꦶꦁ​ꦲꦶꦁ​ꦠꦼꦭꦸꦁ​ꦢꦶꦤꦤꦺ​ꦢꦺꦏ꧀ꦤꦺꦧꦏꦭ꧀ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

꧋ꦥꦼꦚ꧀ꦗꦭꦸꦏ꧀ꦏꦺ​ꦧꦺꦴꦗꦺꦴꦤꦺ​ꦯꦺꦧꦺꦢꦺꦪꦸꦱ꧀꧈​

20꧋ꦧꦺꦴꦗꦺꦴꦤꦺ​ꦯꦺꦧꦺꦢꦺꦪꦸꦱ꧀ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦫꦺꦴ​ꦲꦤꦏ꧀ꦏꦺ​ꦭꦤꦁ​ꦭꦺꦴꦫꦺꦴ​꧉​ꦮꦺꦴꦁꦔꦺ​ꦠꦼꦫꦸꦱ꧀ꦱꦸꦗꦸꦠ꧀ꦲꦉꦥ꧀​ꦤ꧀ꦢꦸꦮꦺꦤ꧀ꦤꦶ​ꦠꦼꦩ꧀ꦧꦸꦁ​꧉​

21꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦏꦉꦥ꧀ꦥꦏꦺ?”

꧋ꦧꦺꦴꦗꦺꦴꦤꦺ​ꦯꦺꦧꦺꦢꦺꦪꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ​꧈​ꦲꦩ꧀ꦧꦺꦴꦏ꧀ꦗꦚ꧀ꦗꦶ​ꦠ​꧈​ꦤꦺꦏ꧀ꦒꦸꦱ꧀ꦠꦶ​ꦲꦩ꧀ꦧꦺꦱꦸꦏ꧀ꦢꦢꦶ​ꦫꦠꦸ​꧈​ꦲꦤꦏ꧀ꦏꦸ​ꦏꦧꦺꦃ​ꦭꦺꦴꦫꦺꦴ​ꦏꦼꦭꦶꦭ꧀ꦭꦤ꧀​ꦚ꧀ꦗꦒꦺꦴꦁꦤꦁꦱꦼꦧꦼꦭꦃꦲꦺꦒꦸꦱ꧀ꦠꦶ​꧈​ꦱꦶꦁ​ꦱꦶꦗꦶ​ꦠꦼꦔꦼꦤ꧀ꦭꦤ꧀ꦭꦶꦪꦤꦺ​ꦏꦶꦮ​?”

22꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦏꦸꦮꦶ​ꦲꦺꦴꦫ​ꦔꦼꦂꦠꦶ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦗꦭꦸꦏ꧀꧈​ꦲꦥ​ꦏꦺꦴꦮꦺ​ꦮꦤꦶ​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀ꦱꦶꦁ​ꦧꦏꦭ꧀ꦠꦏ꧀ꦭꦏꦺꦴꦤ꧀ꦤꦶ​?”

꧋ꦱꦲꦸꦫꦤ꧀ꦏꦸ​:“ꦪ​ꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦮꦤꦶ​!”

23꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦥꦚ꧀ꦕꦺꦤ꧀ ꦏꦱꦁꦱꦫꦤ꧀ꦱꦶꦁ​ꦧꦏꦭ꧀ꦠꦏ꧀ꦭꦏꦺꦴꦤ꧀ꦤꦶ​ꦏꦺꦴꦮꦺ​ꦲꦸꦒ​ꦧꦏꦭ꧀​ꦔ꧀ꦭꦏꦺꦴꦤ꧀ꦤꦶ​꧉​ꦤꦁꦔꦶꦁ​ꦧꦧ꧀​ꦚ꧀ꦗꦒꦺꦴꦁꦤꦁꦱꦼꦧꦼꦭꦃꦠꦼꦔꦼꦤ꧀ꦲꦥ​ꦏꦶꦮꦏꦸ꧈​ꦏꦸꦮꦶ​ꦲꦏꦸ​ꦲꦺꦴꦫ​ꦤ꧀ꦢꦸꦮꦺꦏ꧀ꦮꦱ​ꦔꦫꦤ꧀ꦤꦶ​꧉​ꦗꦒꦺꦴꦁꦔꦤ꧀ꦏꦸꦮꦶ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦁꦒꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦢꦶꦥꦶꦭꦶꦃ​ꦏꦫꦺꦴ​ꦧꦥꦏ꧀ꦏꦸ​꧉​”

24꧋ꦏꦢꦸꦁ​ꦩꦸꦫꦶꦢ꧀ꦱꦼꦥꦸꦭꦸꦃ​ꦭꦶꦪꦤꦺ​ꦏꦿꦸꦔꦸ​ꦧꦧ꧀ꦏꦸꦮꦶ​꧈​ꦠꦼꦫꦸꦱ꧀ꦥꦢ​ꦤꦼꦱꦸ​ꦩꦫꦁ​ꦱꦼꦢꦸꦭꦸꦂ​ꦭꦺꦴꦫꦺꦴ​ꦩꦲꦸ​꧉​ 25ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦧꦺꦃ​ꦠꦼꦫꦸꦱ꧀ꦢꦶꦲꦺꦴꦩꦺꦴꦁꦔꦶꦔꦺꦤꦺ​:“ꦏꦺꦴꦮꦺ​ꦥꦢ​ꦔꦼꦂꦠꦶ​ꦢꦺꦮꦺꦤꦺꦏ꧀ꦥꦫ​ꦥꦼꦤꦸꦤ꧀ꦠꦸꦤ꧀ꦩꦭꦃ​ꦥꦢ​ꦔꦼꦫꦺꦃ​ꦧꦁꦱꦤꦺ​ꦭꦤ꧀ꦱꦼꦩꦺꦴꦤꦺꦴ​ꦲꦸꦒ​ꦥꦫ​ꦥꦼꦁꦒꦼꦢꦺ꧈​ꦏꦸꦮꦶ​ꦩꦭꦃ​ꦥꦢ​ꦤꦶꦤ꧀ꦢꦼꦱ꧀ꦧꦁꦱꦤꦺ​꧉​ 26ꦤꦁꦔꦶꦁ​ꦏꦺꦴꦮꦺ​ꦲꦗ​ꦏꦪ​ꦔꦺꦴꦤꦺꦴ​꧉​ꦱꦥ​ꦱꦶꦁ​ꦏꦼꦥꦺꦔꦶꦤ꧀ꦢꦢꦶ​ꦥꦼꦔꦉꦥ꧀ ꦏꦸꦮꦶ​ꦏꦸꦢꦸ​ꦔ꧀ꦭꦢꦺꦤ꧀ꦤꦶ​ꦏꦺꦴꦮꦺ​꧉​ 27ꦭꦤ꧀ꦱꦥ​ꦱꦶꦁ​ꦏꦼꦥꦺꦔꦶꦤ꧀ꦢꦶꦲꦁꦒꦼꦥ꧀ꦒꦼꦢꦺ​ꦢꦺꦮꦺ꧈​ꦏꦸꦮꦶ​ꦱꦶꦁ​ꦏꦸꦢꦸ​ꦢꦢꦶ​ꦥꦼꦭꦢꦺꦤ꧀ꦤꦺ​ꦭꦶꦪꦤꦺ​꧉​ 28ꦢꦶꦢꦼꦭꦺꦴꦏ꧀ꦏꦏꦺ​ꦠ​ꦲꦤꦏ꧀ꦏꦺ​ꦩꦤꦸꦁꦱ​꧈​ꦢꦺꦏ꧀ꦤꦺꦠꦼꦏꦤꦺ​ꦲꦺꦴꦫ​ꦱꦸꦥꦪ​ꦢꦶꦭꦢꦺꦤ꧀ꦤꦶ​꧈​ꦤꦁꦔꦶꦁ​ꦩꦭꦃ​ꦔ꧀ꦭꦢꦺꦤ꧀ꦤꦶ​ꦭꦤ꧀ꦩꦱꦿꦃꦲꦏꦺꦚꦮꦤꦺ​ꦏꦁꦒꦺꦴ​ꦚ꧀ꦭꦩꦼꦠ꧀ꦠꦏꦺꦮꦺꦴꦁ​ꦲꦺꦴꦏꦺꦃ꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁ​ꦭꦩꦸꦂ​ꦭꦺꦴꦫꦺꦴ​꧉​

29꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦤꦶꦁꦒꦭ꧀ꦏꦸꦠꦪꦺꦫꦶꦏꦺꦴ꧈​ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦔꦼꦠꦸꦠ꧀ꦠꦏꦺ꧉​ 30ꦤꦁꦥꦶꦁꦒꦶꦂ​ꦢꦭꦤ꧀ꦲꦺꦤꦺꦁꦮꦺꦴꦁ​ꦭꦩꦸꦂ​ꦭꦺꦴꦫꦺꦴ​ꦥꦢ​ꦚ꧀ꦗꦒꦺꦴꦁ꧉​ꦏꦢꦸꦁ​ꦏꦿꦸꦔꦸ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦭꦶꦮꦠ꧀ ꦮꦺꦴꦁ​ꦭꦩꦸꦂ​ꦭꦺꦴꦫꦺꦴ​ꦩꦲꦸ​ꦥꦢ​ꦧꦼꦔꦺꦴꦏ꧀ꦧꦼꦔꦺꦴꦏ꧀:“ꦒꦸꦱ꧀ꦠꦶ​꧈​ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ ꦲꦩ꧀ꦧꦺꦴꦏ꧀ꦩꦼꦭꦱ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ!”

31꧋ꦮꦺꦴꦁ​ꦲꦺꦴꦏꦺꦃꦱꦶꦁ​ꦤꦁꦏꦺꦴꦤꦺꦴ​ꦥꦢ​ꦚꦼꦤꦺꦤ꧀ꦤꦶꦮꦺꦴꦁ​ꦭꦺꦴꦫꦺꦴ​ꦏꦸꦮꦶ​ꦏꦺꦴꦁꦏꦺꦴꦤ꧀ꦩꦼꦤꦼꦁ​꧉​ꦤꦁꦔꦶꦁ​ꦩꦭꦃ​ꦠꦩ꧀ꦧꦃ​ꦧꦤ꧀ꦠꦼꦂ​ꦱꦶꦁ​ꦲꦩ꧀ꦧꦼꦔꦺꦴꦏ꧀:“ꦒꦸꦱ꧀ꦠꦶ​꧈​ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ ꦲꦩ꧀ꦧꦺꦴꦏ꧀ꦩꦼꦭꦱ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ!”

32꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦤ꧀ꦢꦼꦏ꧀ ꦠꦼꦫꦸꦱ꧀ꦮꦺꦴꦁ​ꦭꦺꦴꦫꦺꦴ​ꦩꦲꦸ​ꦢꦶꦕꦼꦭꦸꦏ꧀​꧉​ꦢꦺꦏ꧀ꦤꦺꦠꦏꦺꦴꦤ꧀:“ꦏꦺꦴꦮꦺ​ꦚ꧀ꦗꦭꦸꦏ꧀ꦲꦥ​?”

33꧋ꦱꦼꦩꦲꦸꦂꦫꦺ​:“ꦲꦮꦏ꧀ꦏꦺ​ꦢꦺꦮꦺꦚꦸꦮꦸꦤ꧀ꦧꦶꦱ​ꦮꦼꦫꦸꦃ​ꦩꦼꦤꦺꦃ​꧈​ꦒꦸꦱ꧀ꦠꦶ​!”

34꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦭꦱ꧀ꦩꦫꦁ​ꦮꦺꦴꦁ​ꦭꦺꦴꦫꦺꦴ​ꦏꦸꦮꦶ​꧈​ꦠꦼꦫꦸꦱ꧀ꦢꦶꦢꦼꦩꦺꦏ꧀ꦩꦿꦶꦥꦠ꧀ꦠꦺ​꧉​ꦱꦏ꧀ꦮꦠ꧀ꦠꦼꦫꦸꦱ꧀ꦥꦢ​ꦧꦶꦱ​ꦮꦼꦫꦸꦃ​ꦩꦼꦤꦺꦃ​꧈​ꦠꦼꦫꦸꦱ꧀ꦩꦺꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦊꦧꦸ​ꦏꦸꦠꦪꦺꦫꦸꦱꦭꦺꦩ꧀ꦢꦶꦲꦫꦏ꧀ꦲꦫꦏ꧀ꦮꦺꦴꦁ​ꦲꦺꦴꦏꦺꦃ꧉​

꧇​꧒꧑꧇​ 1꧋ꦏꦢꦸꦁ​ꦮꦶꦱ꧀ꦩꦺꦃ​ꦠꦼꦏꦤ꧀ꦏꦸꦠꦪꦺꦫꦸꦱꦭꦺꦩ꧀ ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦩꦩ꧀ꦥꦶꦂ​ꦤꦁꦢꦺꦱ​ꦨꦺꦠ꧀ꦥ꦳ꦏꦺ꧈​ꦕꦼꦢꦼꦏ꧀​ꦏꦫꦺꦴ​ꦒꦸꦤꦸꦁ​ꦎꦭꦺꦥ꦳꧀꧈​ꦤꦁꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦩꦸꦫꦶꦢ꧀ꦭꦺꦴꦫꦺꦴ​ꦏꦺꦴꦁꦏꦺꦴꦤ꧀ꦧꦸꦢꦭ꧀​ꦤ꧀ꦢꦶꦱꦶꦏ꧀꧈​ 2ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦏꦤ​ꦧꦸꦢꦭ꧀ꦤꦁꦢꦺꦱ​ꦤꦁꦔꦉꦥ꧀ꦏꦸꦮꦶ​꧉​ꦤꦁꦏꦺꦴꦤꦺꦴ​ꦏꦺꦴꦮꦺ​ꦧꦏꦭ꧀ꦮꦼꦫꦸꦃ​ꦏꦶꦩꦂꦮꦺꦢꦺꦴꦏ꧀ꦏꦫꦺꦴ​ꦲꦤꦏꦤ꧀ꦤꦺꦢꦶꦏꦼꦚ꧀ꦕꦁ​​꧉​ꦏꦶꦩꦂꦫꦺ​ꦢꦶꦲꦸꦕꦸꦭ꧀ꦭꦶ​ꦠꦼꦫꦸꦱ꧀ꦢꦶꦒꦮ​ꦩ꧀ꦧꦿꦺꦤꦺ꧉​ 3ꦤꦺꦏ꧀ꦲꦺꦤꦺꦁꦮꦺꦴꦁ​ꦠꦏꦺꦴꦤ꧀ꦲꦥꦲꦥ​꧈​ꦔꦺꦴꦩꦺꦴꦁꦔꦺꦤꦺ​ꦮꦲꦺ​:'ꦒꦸꦱ꧀ꦠꦶ​ꦩ꧀ꦧꦸꦠꦸꦃꦲꦏꦺ꧉​ꦤꦺꦏ꧀ꦮꦶꦱ꧀ꦫꦩ꧀ꦥꦸꦁ​꧈​ꦧꦏꦭ꧀ꦢꦶꦧꦭꦺꦏ꧀ꦏꦏꦺ꧉​’”

4꧋ꦢꦢꦶꦤꦺ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀ꦱꦶꦁ​ꦮꦶꦱ꧀ꦢꦶꦲꦺꦴꦩꦺꦴꦁꦏꦫꦺꦴ​ꦱꦏ꧀ꦮꦶꦗꦶꦤꦺꦤꦧꦶ​꧈​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

5“ꦢꦶꦏꦧꦂꦫꦏꦺ​ꦩꦫꦁ​ꦮꦺꦴꦁꦮꦺꦴꦁ​ꦤꦁꦱꦶꦪꦺꦴꦤ꧀:
ꦫꦠꦸꦩꦸ​ꦤꦼꦏꦤꦶ​ꦏꦺꦴꦮꦺ​꧈​
ꦢꦺꦏ꧀ꦤꦺꦲꦤ꧀ꦢꦥ꧀ꦥꦱꦺꦴꦂ
ꦭꦤ꧀ꦠꦼꦏꦤꦺ​ꦤꦸꦩ꧀ꦥꦏ꧀ꦲꦤꦏ꧀ꦏꦤ꧀ꦏꦶꦩꦂ꧉​”

6꧋ꦩꦸꦫꦶꦢ꧀ꦭꦺꦴꦫꦺꦴ​ꦩꦲꦸ​ꦠꦼꦫꦸꦱ꧀ꦧꦸꦢꦭ꧀ꦭꦤ꧀ꦤꦸꦫꦸꦠ꧀ꦠꦶ​ꦲꦥ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 7ꦏꦶꦩꦂꦭꦤ꧀ꦲꦤꦏꦤ꧀ꦤꦺꦠꦼꦫꦸꦱ꧀ꦢꦶꦒꦮ​꧉​ 8ꦩꦸꦫꦶꦢ꧀ꦩꦸꦫꦶꦢ꧀ꦥꦶꦫꦁꦥꦶꦫꦁ​ꦱꦶꦁ​ꦤꦁꦏꦺꦴꦤꦺꦴ​ꦠꦼꦫꦸꦱ꧀ꦥꦢ​ꦚ꧀ꦗꦺꦫꦺꦁ​ꦏ꧀ꦭꦩ꧀ꦧꦶꦤꦺ​ꦤꦁꦢꦭꦤ꧀ꦱꦶꦁ​ꦲꦉꦥ꧀ꦢꦶꦭꦶꦮꦠ꧀ꦠꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁꦮꦺꦴꦁ​ꦭꦶꦪꦤꦺ​ꦥꦢ​ꦔꦼꦥꦺꦏ꧀ꦥꦁꦔꦺ​ꦮꦶꦠ꧀ꦮꦶꦠ꧀ꦠꦤ꧀ꦠꦼꦫꦸꦱ꧀ꦢꦶꦱꦺꦭꦺꦃꦲꦏꦺꦤꦁꦢꦭꦤ꧀꧈​ 9ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦩ꧀ꦭꦏꦸ​ꦤꦁꦔꦉꦥ꧀ꦥꦺ​ꦭꦤ꧀ꦤꦁꦲꦩ꧀ꦧꦸꦫꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦫꦸꦱ꧀ꦥꦢ​ꦱꦸꦫꦏ꧀ꦱꦸꦫꦏ꧀:“ꦲ꦳ꦺꦴꦱꦤ꧈​ꦲ꦳ꦪꦸꦏ꧀ꦢꦶꦥꦸꦗꦶꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀꧈​ꦩꦸꦒ​ꦏꦧꦼꦂꦏꦃꦲꦤ꧀ꦱꦶꦁ​ꦠꦼꦏ​ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​꧉​ꦲ꦳ꦺꦴꦱꦤ꧈​ꦲ꦳ꦪꦸꦏ꧀ꦢꦶꦥꦸꦗꦶꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦤꦁꦱ꧀ꦮꦂꦒ​!”

10꧋ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀​ꦩ꧀ꦊꦧꦸ​ꦤꦁꦏꦸꦠꦪꦺꦫꦸꦱꦭꦺꦩ꧀ ꦮꦺꦴꦁ​ꦱꦏ꧀ꦏꦸꦠꦥꦢ​ꦒꦺꦒꦺꦂ​ꦭꦤ꧀ꦥꦢ​ꦠꦏꦺꦴꦤ꧀:“ꦱꦶꦁ​ꦠꦼꦏ​ꦏꦸꦮꦶ​ꦱꦥ​ꦠ​?”

11꧋ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦩꦺꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦸꦮꦶ​ꦤꦧꦶ​ꦪꦺꦯꦸꦱ꧀ ꦱꦁꦏꦏꦸꦠꦟꦱꦫꦺꦠ꧀ꦤꦁꦢꦶꦱ꧀ꦠꦿꦶꦏ꧀ꦓꦭꦶꦭꦺꦪ​!”

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦊꦧꦸ​ꦤꦁꦒꦿꦺꦗ​ꦒꦼꦢꦺ​꧉​

12꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦩ꧀ꦊꦧꦸ​ꦤꦁꦭꦠꦂꦫꦺ​ꦒꦿꦺꦗ​ꦒꦼꦢꦺ​꧉​ꦮꦺꦴꦁꦮꦺꦴꦁ​ꦱꦶꦁ​ꦢꦺꦴꦢꦺꦴꦭ꧀ꦭꦤ꧀ꦭꦤ꧀ꦠꦼꦠꦸꦏꦸ​ꦤꦁꦭꦠꦂꦫꦺ​ꦒꦿꦺꦗ​ꦒꦼꦢꦺ​ꦏꦺꦴꦤꦺꦴ​ꦥꦢ​ꦢꦶꦲꦸꦱꦶꦂ​ꦏꦺꦴꦁꦏꦺꦴꦤ꧀ꦭꦸꦔ​ꦏꦧꦺꦃ​꧉​ꦩꦺꦗ​ꦩꦺꦗꦤꦺ​ꦱꦶꦁ​ꦠꦸꦏꦁ​ꦔꦶꦗꦺꦴꦭ꧀ꦭꦶ​ꦢꦸꦮꦶꦠ꧀ꦭꦤ꧀ꦢꦶꦁꦏ꧀ꦭꦶꦏ꧀ꦢꦶꦁꦏ꧀ꦭꦶꦏ꧀ꦏꦺꦱꦶꦁ​ꦢꦺꦴꦢꦺꦴꦭ꧀ꦩꦤꦸꦏ꧀ꦢꦫ​ꦢꦶꦒ꧀ꦭꦺꦩ꧀ꦥꦁꦔꦏꦺꦏꦧꦺꦃ​꧉​ 13ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦢꦺꦴꦢꦺꦴꦭ꧀ꦭꦤ꧀:“ꦤꦁꦏꦶꦠꦧ꧀​ꦮꦶꦱ꧀ꦢꦶꦠꦸꦭꦶꦱ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁ:'ꦲꦺꦴꦩꦃꦏꦸ​ꦧꦏꦭ꧀ꦢꦶꦲꦫꦤ꧀ꦤꦶ​ꦥꦁꦒꦺꦴꦤ꧀ꦤꦤ꧀ꦏꦁꦒꦺꦴ​ꦥꦩꦸꦗꦶ​꧈'​ꦤꦁꦔꦶꦁ​ꦱꦲꦶꦏꦶ​ꦲꦩ꧀ꦧꦺꦴꦏ꧀ꦢꦢꦺꦏ꧀ꦏꦏꦺꦫꦺꦴꦁꦔꦺ​ꦩꦭꦶꦁ​꧉​”

14꧋ꦤꦁꦒꦿꦺꦗ​ꦒꦼꦢꦺ​ꦏꦺꦴꦤꦺꦴ​ꦲꦺꦤꦺꦁꦮꦺꦴꦁ​ꦭꦩꦸꦂ​ꦭꦤ꧀ꦮꦺꦴꦁ​ꦭꦸꦩ꧀ꦥꦸꦃ​ꦥꦢ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦏꦧꦺꦃ​ꦥꦢ​ꦢꦶꦮꦫꦱ꧀ꦱꦏꦺ꧉​ 15ꦤꦁꦔꦶꦁ​ꦏꦢꦸꦁ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀​ꦥꦢ​ꦮꦼꦫꦸꦃ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀ꦭꦤ꧀ꦧꦺꦴꦕꦃꦧꦺꦴꦕꦃ​ꦥꦢ​ꦱꦸꦫꦏ꧀ꦱꦸꦫꦏ꧀:“ꦢꦶꦥꦸꦗꦶꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ ”ꦠꦼꦫꦸꦱ꧀ꦥꦢ​ꦤꦼꦱꦸ​꧉​ 16ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦲꦥ​ꦏꦺꦴꦮꦺ​ꦲꦺꦴꦫ​ꦏꦿꦸꦔꦸ​ꦠꦼꦩ꧀ꦧꦸꦁꦔꦺ​ꦧꦺꦴꦕꦃꦧꦺꦴꦕꦃ​ꦏꦸꦮꦶ​?”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦪ​꧈​ꦲꦏꦸ​ꦏꦿꦸꦔꦸ​꧉​ꦤꦁꦔꦶꦁ​ꦲꦥ​ꦏꦺꦴꦮꦺ​ꦢꦸꦫꦸꦁ​ꦠꦲꦸ​ꦩꦕ​ꦤꦁꦏꦶꦠꦧ꧀​ꦱꦸꦕꦶ​꧈​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:'ꦧꦺꦴꦕꦃꦧꦺꦴꦕꦃ​ꦭꦤ꧀ꦧꦪꦶꦧꦪꦶ​ꦮꦶꦱ꧀ꦲꦩ꧀ꦧꦺꦴꦏ꧀​ꦧ꧀ꦭꦗꦂꦫꦶꦩꦼꦩꦸꦗꦶ​ꦗꦼꦤꦼꦁꦩꦸ​꧉​’”

17꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦶꦁꦒꦭ꧀ꦮꦺꦴꦁꦮꦺꦴꦁ​ꦏꦸꦮꦶ​꧈​ꦭꦸꦔ​ꦱꦁꦏꦏꦸꦠꦪꦺꦫꦸꦱꦭꦺꦩ꧀ ꦠꦼꦫꦸꦱ꧀ꦧꦸꦢꦭ꧀ꦤꦁꦢꦺꦱ​ꦨꦺꦠꦤꦶꦭꦤ꧀ꦔꦶꦤꦼꦥ꧀ꦤꦁꦏꦺꦴꦤꦺꦴ​꧉​

꧋ꦮꦶꦠ꧀ꦲꦚ꧀ꦗꦶꦂ​ꦱꦶꦁ​ꦲꦺꦴꦫ​ꦩꦼꦠꦸ​ꦮꦺꦴꦃꦲꦺ​꧉​

18꧋ꦲꦺꦱꦸꦏ꧀ꦏꦺ​꧈​ꦢꦺꦴꦁꦔꦺꦧꦭꦶꦏ꧀ꦤꦁꦏꦸꦠꦪꦺꦫꦸꦱꦭꦺꦩ꧀ ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦱ​ꦔꦼꦭꦶꦃ​ꦤꦁꦢꦭꦤ꧀꧈​ 19ꦢꦺꦏ꧀ꦤꦺꦮꦼꦫꦸꦃ​ꦮꦶꦠ꧀ꦲꦚ꧀ꦗꦶꦂ​ꦤꦁꦥꦶꦁꦒꦶꦂ​ꦢꦭꦤ꧀ ꦠꦼꦫꦸꦱ꧀ꦢꦶꦥꦫꦤ꧀ꦤꦶ​꧉​ꦤꦁꦔꦶꦁ​ꦲꦺꦴꦫ​ꦲꦺꦤꦺꦁꦮꦺꦴꦃꦲꦺ​ꦱꦶꦗꦶꦱꦶꦗꦶꦪ​꧈​ꦤꦩꦸꦁ​ꦒꦺꦴꦢꦺꦴꦁ꧉​ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦶꦠ꧀ꦠꦺ​:“ꦱꦭꦮꦱ꧀ꦭꦮꦱ꧀ꦱꦺ​ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦩꦼꦤꦺꦃ​!”ꦱꦏ꧀ꦮꦠ꧀ꦮꦶꦠ꧀ꦠꦺ​ꦠꦼꦫꦸꦱ꧀ꦒꦫꦶꦁ​꧉​

20꧋ꦏꦢꦸꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦮꦼꦫꦸꦃ​ꦊꦭꦏꦺꦴꦤ꧀ꦏꦸꦮꦶ​ꦩꦲꦸ​꧈​ꦠꦼꦫꦸꦱ꧀ꦥꦢ​ꦔ꧀ꦒꦸꦩꦸꦤ꧀ꦧꦔꦼꦠ꧀ ꦩꦸꦭꦤꦺ​ꦥꦢ​ꦠꦏꦺꦴꦤ꧀:“ꦭꦃ​ꦮꦶꦠ꧀ꦠꦺ​ꦲꦚ꧀ꦗꦶꦂ​ꦏꦺꦴꦏ꧀ꦢꦢꦶ​ꦒꦫꦶꦁ​ꦔꦺꦴꦤꦺꦴ​꧈​ꦒꦸꦱ꧀ꦠꦶ​?”

21꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦥꦢ​ꦔꦼꦂꦠꦶꦪ​꧈​ꦤꦺꦏ꧀ꦏꦺꦴꦮꦺ​ꦥꦽꦕꦪ​ꦭꦤ꧀ꦲꦺꦴꦫ​ꦩꦔꦸꦩꦔꦸ​꧈​ꦏꦺꦴꦮꦺ​ꦪ​ꦧꦶꦱ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦠꦏ꧀ꦠꦶꦤ꧀ꦢꦏ꧀ꦏꦏꦺꦩꦫꦁ​ꦮꦶꦠ꧀ꦲꦚ꧀ꦗꦶꦂ​ꦏꦸꦮꦶ​꧉​ꦩꦭꦃ​ꦲꦺꦴꦫ​ꦤꦩꦸꦁ​ꦏꦸꦮꦶ​ꦮꦲꦺ​꧈​ꦏꦺꦴꦮꦺ​ꦧꦶꦱ​ꦔꦺꦴꦁꦏꦺꦴꦤ꧀ꦒꦸꦤꦸꦁ​ꦏꦲꦺ​ꦔꦺꦴꦩꦺꦴꦁ: 'ꦩꦸꦩ꧀ꦧꦸꦭ꧀ꦭ​꧈​ꦚ꧀ꦗꦼꦒꦸꦂꦫ​ꦤꦁꦱꦼꦒꦫ​꧈'​ꦭꦤ꧀ꦏꦸꦮꦶ​ꦪ​ꦧꦏꦭ꧀​ꦏ꧀ꦭꦏꦺꦴꦤ꧀꧈​ 22ꦱꦼꦩ꧀ꦧꦫꦁ​ꦱꦶꦁ​ꦲꦩ꧀ꦧꦺꦴꦏ꧀ꦗꦭꦸꦏ꧀ꦲꦶꦁ​ꦥꦤ꧀ꦢꦺꦴꦔ​ꦧꦏꦭ꧀​ꦏ꧀ꦭꦏꦺꦴꦤ꧀ ꦗꦚ꧀ꦗꦶ​ꦏꦺꦴꦮꦺ​ꦥꦽꦕꦪ​꧉​”

꧋ꦥꦶꦠꦏꦺꦴꦤ꧀ꦤꦤ꧀ꦧꦧ꧀ꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

23꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦩ꧀ꦊꦧꦸ​ꦤꦁꦒꦿꦺꦗ​ꦒꦼꦢꦺ​ꦭꦤ꧀ꦩꦸꦭꦁꦔꦶꦤꦁꦏꦺꦴꦤꦺꦴ​꧉​ꦲꦶꦁ​ꦠꦼꦔꦃꦠꦼꦔꦃꦲꦺ​ꦩꦼꦩꦸꦭꦁ​ꦲꦺꦤꦺꦁꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦏꦺꦴꦤ꧀:“ꦒꦸꦫꦸ​꧈​ꦲꦼꦁꦒꦺꦴꦤ꧀ꦩꦸ​ꦤꦶꦤ꧀ꦢꦏ꧀ꦏꦏꦺꦥꦽꦏꦫ​ꦏꦸꦮꦶ​ꦏꦧꦺꦃ​ꦲꦺꦤ꧀ꦠꦸꦏ꧀ꦥꦔ꧀ꦮꦱ​ꦱꦁꦏꦔꦼꦤ꧀ꦢꦶ​?ꦱꦥ​ꦠ​ꦱꦶꦁ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦏꦺꦴꦮꦺ​?”

24꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​ꦔꦺꦤꦺ​:“ꦲꦏꦸ​ꦲꦉꦥ꧀ꦠꦏꦺꦴꦤ꧀ꦩꦫꦁ​ꦏꦺꦴꦮꦺ​ꦤ꧀ꦢꦶꦱꦶꦏ꧀꧈​ꦤꦺꦏ꧀ꦏꦺꦴꦮꦺ​ꦮꦶꦱ꧀ꦩꦁꦱꦸꦭ꧀ꦭꦶ​ꦥꦶꦠꦏꦺꦴꦤꦤ꧀ꦏꦸ꧈​ꦲꦏꦸ​ꦪ​ꦧꦏꦭ꧀ꦩꦁꦱꦸꦭ꧀ꦭꦶ​ꦥꦶꦠꦏꦺꦴꦤ꧀ꦤꦤ꧀ꦩꦸ​꧉​ 25ꦱꦥ​ꦱꦶꦁ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦤꦧꦶ​ꦪꦺꦴꦲꦤꦼꦱ꧀ꦏꦁꦒꦺꦴ​ꦲꦩ꧀ꦧꦥ꧀ꦠꦶꦱ꧀?ꦒꦸꦱ꧀ꦠꦶ​ꦄꦭ꧀ꦭꦃ​ꦲꦥ​ꦩꦤꦸꦁꦱ​?”

꧋ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀​ꦠꦼꦫꦸꦱ꧀ꦥꦢ​ꦉꦩ꧀ꦧꦸꦏ꧀ꦏꦤ꧀ꦢꦺꦮꦺ:“ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦔꦺꦴꦩꦺꦴꦁ:'ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧈'​ꦭꦃ​ꦩꦼꦁꦏꦺꦴ​ꦢꦺꦏ꧀ꦤꦺꦱꦼꦩꦲꦸꦂ​:'ꦭꦃ​ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦲꦺꦴꦫ​ꦥꦽꦕꦪ​ꦩꦫꦁ​ꦤꦧꦶ​ꦪꦺꦴꦲꦤꦼꦱ꧀?’ 26ꦭꦃ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦱꦼꦩꦲꦸꦂ​:'ꦱꦁꦏꦩꦤꦸꦁꦱ​꧈'​ꦲꦮꦏ꧀ꦏꦺ​ꦢꦺꦮꦺꦮꦼꦢꦶ​ꦏꦫꦺꦴ​ꦮꦺꦴꦁ​ꦲꦺꦴꦏꦺꦃꦲꦶꦏꦶ​꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦏꦧꦺꦃ​ꦔꦁꦒꦼꦥ꧀ꦪꦺꦴꦲꦤꦼꦱ꧀ꦏꦸꦮꦶ​ꦤꦧꦶ​꧉​” 27ꦢꦢꦶꦤꦺ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀​ꦥꦢ​ꦱꦼꦩꦲꦸꦂ​:“ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦔꦼꦂꦠꦶ​!”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ​:“ꦤꦺꦏ꧀ꦔꦺꦴꦤꦺꦴ​꧈​ꦏꦺꦴꦮꦺ​ꦪ​ꦲꦺꦴꦫ​ꦧꦏꦭ꧀ꦠꦏ꧀ꦲꦺꦴꦩꦺꦴꦁꦔꦶꦱꦥ​ꦱꦶꦁ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦲꦏꦸ​ꦏꦁꦒꦺꦴ​ꦤꦶꦤ꧀ꦢꦏ꧀ꦏꦏꦺꦥꦽꦏꦫ​ꦏꦸꦮꦶ​ꦩꦲꦸ​ꦏꦧꦺꦃ​꧉​”

꧋ꦥꦶꦮꦸꦭꦁ​ꦧꦧ꧀ꦲꦤꦏ꧀ꦭꦺꦴꦫꦺꦴ​꧉​

28꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦼꦥꦿꦶꦪꦺ​ꦥꦶꦤꦼꦩꦸꦩꦸꦧꦧ꧀ꦲꦶꦏꦶ​?ꦲꦺꦤꦺꦁꦮꦺꦴꦁ​ꦤ꧀ꦢꦸꦮꦺꦲꦤꦏ꧀ꦭꦺꦴꦫꦺꦴ​꧉​ꦮꦺꦴꦁꦔꦺ​ꦩꦫꦤꦶ​ꦲꦤꦏ꧀ꦏꦺ​ꦲꦩ꧀ꦧꦉꦥ꧀ꦠꦼꦫꦸꦱ꧀ꦔꦺꦴꦩꦺꦴꦁ:'ꦭꦶꦏ꧀​꧈​ꦢꦶꦤ​ꦲꦶꦏꦶ​ꦏꦤ​ꦏꦺꦴꦮꦺ​ꦚꦩ꧀ꦧꦸꦠ꧀ꦠꦤꦁꦏꦼꦧꦺꦴꦤ꧀ꦢꦽꦲꦶꦥ꦳꧀꧉'​ 29ꦲꦤꦏ꧀ꦏꦺ​ꦱꦼꦩꦲꦸꦂ​:'ꦪ​ꦥꦏ꧀​꧈'​ꦤꦁꦔꦶꦁ​ꦲꦺꦴꦫ​ꦧꦸꦢꦭ꧀꧈​ 30ꦧꦥꦏ꧀ꦏꦺꦠꦼꦫꦸꦱ꧀ꦩꦫꦤꦶ​ꦲꦤꦏ꧀ꦏꦺ​ꦱꦶꦁ​ꦲꦼꦤꦺꦴꦩ꧀ ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦚꦩ꧀ꦧꦸꦠ꧀ꦠꦤꦁꦏꦼꦧꦺꦴꦤꦺ​꧉​ꦲꦤꦏ꧀ꦏꦺ​ꦲꦼꦤꦺꦴꦩ꧀ꦱꦼꦩꦲꦸꦂ​:'ꦲꦏꦸ​ꦲꦼꦩꦺꦴꦃ​ꦥꦏ꧀​꧈'​ꦤꦁꦔꦶꦁ​ꦠꦼꦫꦸꦱ꧀ꦒꦼꦭ​꧈​ꦩꦸꦭꦤꦺ​ꦠꦼꦫꦸꦱ꧀ꦧꦸꦢꦭ꧀꧈​

31꧋ꦲꦤꦏ꧀ꦭꦺꦴꦫꦺꦴ​ꦩꦲꦸ​ꦱꦶꦁ​ꦲꦼꦤ꧀ꦢꦶ​ꦱꦶꦁ​ꦤꦶꦤ꧀ꦢꦏ꧀ꦏꦏꦺꦏꦉꦥ꧀ꦥꦺ​ꦧꦥꦏ꧀ꦏꦺ?”

꧋ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦱꦼꦩꦲꦸꦂ​:“ꦪ​ꦱꦶꦁ​ꦲꦼꦤꦺꦴꦩ꧀꧈​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦥꦢ​ꦠꦶꦠꦺꦤ꧀ꦤꦤ꧀ꦤ​꧈​ꦮꦺꦴꦁꦮꦺꦴꦁ​ꦧꦼꦭꦱ꧀ꦠꦶꦁꦭꦤ꧀ꦮꦺꦴꦁꦮꦺꦴꦁ​ꦭꦺꦴꦤ꧀ꦠꦺꦩꦭꦃ​ꦧꦏꦭ꧀​ꦩ꧀ꦊꦧꦸ​ꦤ꧀ꦢꦶꦱꦶꦏ꧀ꦲꦶꦁ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦶꦩ꧀ꦧꦁꦏꦺꦴꦮꦺ​꧉​ 32ꦲꦮꦶꦠ꧀ꦤꦧꦶ​ꦪꦺꦴꦲꦤꦼꦱ꧀ꦠꦼꦏ​ꦭꦤ꧀​ꦤ꧀ꦢꦸꦢꦸꦃꦲꦏꦺꦢꦭꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦺꦴꦮꦺ​꧈​ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦥꦢ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ꦮꦺꦴꦁꦮꦺꦴꦁ​ꦧꦼꦭꦱ꧀ꦠꦶꦁꦭꦤ꧀ꦮꦺꦴꦁꦮꦺꦴꦁ​ꦭꦺꦴꦤ꧀ꦠꦺꦩꦭꦃ​ꦥꦢ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ꦏꦺꦴꦮꦺ​ꦥꦢ​ꦮꦼꦫꦸꦃ​ꦏꦸꦮꦶ​꧈​ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦠꦼꦫꦸꦱ꧀ꦩꦭꦶꦃ​ꦥꦶꦏꦶꦂꦫꦤ꧀ꦤꦺ​ꦭꦤ꧀ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​”

꧋ꦥꦶꦮꦸꦭꦁ​ꦧꦧ꧀ꦮꦺꦴꦁ​ꦚꦺꦮ​ꦏꦼꦧꦺꦴꦤ꧀꧈​

33꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦥꦢ​ꦢꦶꦫꦸꦔꦺꦴꦏ꧀ꦏꦏꦺ​ꦥꦶꦮꦸꦭꦁ​ꦲꦶꦏꦶ​꧉​ꦲꦺꦤꦺꦁꦮꦺꦴꦁ​ꦱꦸꦒꦶꦃ​ꦤ꧀ꦢꦸꦮꦺꦏꦼꦧꦺꦴꦤ꧀ꦢꦽꦲꦶꦥ꦳꧀꧈​ꦏꦼꦧꦺꦴꦤꦺ​ꦢꦶꦥꦒꦼꦂꦫꦶ​ꦩꦸꦧꦼꦁ​ꦭꦤ꧀ꦢꦶꦒꦮꦺꦏ꧀ꦏꦏꦺꦥꦁꦒꦺꦴꦤ꧀ꦤꦤ꧀ꦏꦁꦒꦺꦴ​ꦩꦼꦉꦱ꧀ꦢꦽꦲꦶꦥ꦳꧀ꦥ꦳ꦺ꧉​ꦮꦺꦴꦁꦔꦺ​ꦲꦸꦒ​ꦔꦼꦢꦼꦏ꧀ꦏꦏꦺꦒꦸꦧꦸꦏ꧀ꦢꦸꦮꦸꦂꦏꦁꦒꦺꦴ​ꦚ꧀ꦗꦒ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦏꦼꦧꦺꦴꦤꦺ​ꦠꦼꦫꦸꦱ꧀ꦢꦶꦱꦺꦮꦏ꧀ꦏꦏꦺꦩꦫꦁ​ꦮꦺꦴꦁꦮꦺꦴꦁ​ꦭꦶꦪꦤꦺ​꧉​ꦮꦺꦴꦁꦔꦺ​ꦢꦺꦮꦺꦠꦼꦫꦸꦱ꧀ꦭꦸꦔ​ꦤꦁꦭꦶꦪ​ꦤꦼꦒꦫ​꧉​ 34ꦏꦢꦸꦁ​ꦮꦶꦱ꧀ꦮꦪꦃꦲꦺ​ꦥꦤꦺꦤ꧀ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦠꦼꦏ​ꦠꦼꦫꦸꦱ꧀ꦏꦺꦴꦁꦏꦺꦴꦤ꧀ꦤꦤ꧀ꦱꦶꦁ​ꦏꦼꦂꦗ​ꦱꦸꦥꦪ​ꦤꦁꦔ꧀ꦒꦺꦴꦤ꧀ꦤꦺꦮꦺꦴꦁꦮꦺꦴꦁ​ꦱꦶꦁ​ꦚꦺꦮ​ꦏꦼꦧꦺꦴꦤꦺ​꧉​ꦏꦺꦴꦁꦏꦺꦴꦤ꧀​ꦚ꧀ꦗꦭꦸꦏ꧀ꦧꦒꦺꦪꦤ꧀ꦤꦺꦢꦺꦏ꧀ꦤꦺꦱꦁꦏꦥꦩꦼꦠꦸꦤꦺ​ꦏꦼꦧꦺꦴꦤꦺ​꧉​ 35ꦤꦁꦔꦶꦁ​ꦮꦺꦴꦁꦮꦺꦴꦁ​ꦱꦶꦁ​ꦢꦶꦏꦺꦴꦁꦏꦺꦴꦤ꧀ꦩꦲꦸ​ꦩꦭꦃ​ꦢꦶꦕꦼꦏꦼꦭ꧀ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦚꦺꦮ​ꦏꦼꦧꦺꦴꦤ꧀꧈​ꦲꦺꦤꦺꦁꦱꦶꦁ​ꦢꦶꦒꦼꦧꦸꦏ꧀ꦏꦶ꧈​ꦲꦺꦤꦺꦁꦱꦶꦁ​ꦢꦶꦥꦠꦺꦤ꧀ꦤꦶ​ꦭꦤ꧀ꦲꦺꦤꦺꦁꦱꦶꦁ​ꦢꦶꦧꦤ꧀ꦢꦼꦩ꧀ꦩꦶꦮꦠꦸ​꧉​ 36ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦮꦺꦴꦁ​ꦭꦶꦪꦤꦺ​ꦩꦼꦤꦺꦃ​꧈​ꦲꦺꦴꦏꦺꦃꦲꦺꦔꦸꦁꦏꦸꦭ꧀ꦭꦶ​ꦱꦶꦁ​ꦤ꧀ꦢꦶꦱꦶꦏ꧀꧈​ꦤꦁꦔꦶꦁ​ꦏꦺꦴꦁꦏꦺꦴꦤ꧀ꦤꦤ꧀ꦱꦶꦁ​ꦲꦶꦏꦶ​ꦏꦧꦺꦃ​ꦥꦢ​ꦮꦲꦺ​ꦔꦭꦩ꧀ꦩꦶ​ꦏꦪ​ꦱꦶꦁ​ꦤ꧀ꦢꦶꦱꦶꦏ꧀꧈​ 37ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦔꦺꦴꦁꦏꦺꦴꦤ꧀ꦲꦤꦏ꧀ꦏꦺ​ꦢꦺꦮꦺ꧈​ꦩꦶꦏꦶꦫꦺꦮꦺꦴꦁꦮꦺꦴꦁ​ꦱꦶꦁ​ꦚꦺꦮ​ꦏꦼꦧꦺꦴꦤ꧀ꦔꦗꦺꦤ꧀ꦤꦶ​ꦩꦫꦁ​ꦲꦤꦏ꧀ꦏꦺ​ꦢꦺꦏ꧀ꦤꦺ꧉​ 38ꦤꦁꦔꦶꦁ​ꦏꦢꦸꦁ​ꦮꦺꦴꦁꦮꦺꦴꦁ​ꦱꦶꦁ​ꦚꦺꦮ​ꦏꦼꦧꦺꦴꦤ꧀ꦮꦼꦫꦸꦃ​ꦲꦤꦏ꧀ꦏꦺ​ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦠꦼꦏ​꧈​ꦠꦼꦫꦸꦱ꧀ꦥꦢ​ ꦉꦩ꧀ꦧꦸꦏ꧀ꦏꦤ꧀ꦔꦺꦤꦺ​:'ꦭꦃ​ꦲꦶꦏꦶ​ꦲꦤꦏ꧀ꦏꦺ​ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦠꦼꦏ​꧉​ꦲ꦳ꦪꦸꦏ꧀ꦢꦶꦥꦠꦺꦤ꧀ꦤꦶ​ꦮꦲꦺ​꧈​ꦱꦸꦥꦪ​ꦲꦮꦏ꧀ꦏꦺ​ꦢꦺꦮꦺꦲꦺꦤ꧀ꦠꦸꦏ꧀ꦮꦫꦶꦱ꧀ꦱꦤ꧀ꦤꦺ​꧉'​ 39ꦲꦤꦏ꧀ꦏꦺ​ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦩꦲꦸ​ꦠꦼꦫꦸꦱ꧀ꦢꦶꦕꦼꦏꦼꦭ꧀ ꦢꦶꦱꦺꦫꦺꦠ꧀ꦩꦼꦠꦸ​ꦱꦁꦏꦏꦼꦧꦺꦴꦤꦺ​ꦠꦼꦫꦸꦱ꧀ꦢꦶꦥꦠꦺꦤ꧀ꦤꦶ​꧉​”

40꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦤꦺꦏ꧀ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦠꦼꦏ​꧈​ꦮꦺꦴꦁꦮꦺꦴꦁ​ꦱꦶꦁ​ꦚꦺꦮ​ꦏꦼꦧꦺꦴꦤꦺ​ꦧꦏꦭ꧀ꦢꦶꦏꦥꦏ꧀ꦏꦏꦺ?”

41꧋ꦮꦺꦴꦁꦮꦺꦴꦁ​ꦱꦶꦁ​ꦢꦶꦠꦏꦺꦴꦤ꧀ꦤꦶ​ꦥꦢ​ꦱꦼꦩꦲꦸꦂ​:“ꦪ​ꦮꦶꦱ꧀ꦱꦏ꧀ꦩꦼꦱ꧀ꦠꦶꦤꦺꦤꦺꦏ꧀ꦮꦺꦴꦁꦮꦺꦴꦁ​ꦲꦭ​ꦏꦸꦮꦶ​ꦧꦏꦭ꧀ꦢꦶꦥꦠꦺꦤ꧀ꦤꦶ​ꦏꦧꦺꦃ​꧉​ꦭꦃ​ꦏꦼꦧꦺꦴꦤꦺ​ꦢꦽꦲꦶꦥ꦳꧀ꦩꦼꦱ꧀ꦠꦶꦧꦏꦭ꧀ꦢꦶꦱꦺꦮꦏ꧀ꦏꦏꦺꦩꦫꦁ​ꦮꦺꦴꦁ​ꦭꦶꦪꦭꦶꦪꦤꦺ​꧈​ꦱꦶꦁ​ꦥꦢ​ꦒꦼꦊꦩ꧀ꦔꦼꦏꦺꦏ꧀ꦏꦏꦺꦧꦒꦺꦪꦤ꧀ꦤꦺꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦥꦼꦤ꧀ꦢꦏ꧀ꦥꦤꦺꦤ꧀꧈​”

42꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦲꦥ​ꦏꦺꦴꦮꦺ​ꦥꦢ​ꦢꦸꦫꦸꦁ​ꦠꦲꦸ​ꦩꦕ​ꦠꦸꦭꦶꦱ꧀ꦱꦤ꧀ꦲꦶꦏꦶ​ꦤꦁꦏꦶꦠꦧ꧀​:

‘ꦮꦠꦸ​ꦱꦶꦁ​ꦲꦺꦴꦫ​ꦢꦶꦏꦁꦒꦺꦴꦏ꧀ꦏꦏꦺ
ꦏꦫꦺꦴ​ꦱꦶꦁ​ꦔ꧀ꦒꦮꦺ​ꦲꦺꦴꦩꦃ​꧈​
ꦏꦸꦮꦶ​ꦢꦢꦶ​ꦮꦠꦸ​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺ꧉​
ꦲꦶꦏꦶ​ꦥꦼꦁꦒꦮꦺꦤꦺ​ꦒꦸꦱ꧀ꦠꦶ​꧈​
ꦩꦸꦭꦤꦺ​ꦪ​ꦔ꧀ꦒꦸꦩꦸꦤ꧀ꦤꦏꦺꦠꦼꦤꦤ꧀꧈​’

43꧋ꦩꦸꦭꦤꦺ​ꦲꦏꦸ​ꦔꦺꦴꦩꦺꦴꦁꦩꦫꦁ​ꦏꦺꦴꦮꦺ​:ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦢꦶꦉꦧꦸꦠ꧀ꦱꦁꦏꦏꦺꦴꦮꦺ​ꦭꦤ꧀ꦢꦶꦏꦺꦏ꧀ꦏꦏꦺꦩꦫꦁ​ꦧꦁꦱ​ꦭꦶꦪ​꧈​ꦱꦶꦁ​ꦔ꧀ꦒꦸꦒꦸ​ꦩꦫꦁ​ꦠꦼꦩ꧀ꦧꦸꦁꦔꦺ​꧉​ 44(ꦱꦥ​ꦱꦶꦁ​ꦠꦶꦧ​ꦲꦶꦁ​ꦮꦠꦸ​ꦏꦸꦮꦶ​ꦧꦏꦭ꧀ꦲꦗꦸꦂ​ꦭꦤ꧀ꦱꦶꦁ​ꦏꦼꦠꦶꦧꦤ꧀ꦮꦠꦸ​ꦏꦸꦮꦶ​ꦧꦏꦭ꧀ꦉꦩꦸꦏ꧀꧉)”

45꧋ꦏꦢꦸꦁ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦥ꦳ꦫꦶꦱꦶ​ꦥꦢ​ꦏꦿꦸꦔꦸ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​꧈​ꦠꦼꦫꦸꦱ꧀ꦥꦢ​ꦫꦸꦩꦁꦱ​ꦤꦺꦏ꧀ꦮꦺꦴꦁꦮꦺꦴꦁ​ꦏꦸꦮꦶ​ꦢꦺꦮꦺꦱꦶꦁ​ꦢꦶꦱꦼꦩꦺꦴꦤ꧀ꦤꦶ​꧉​ 46ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦏꦼꦥꦺꦔꦶꦤ꧀ꦚꦼꦏꦼꦭ꧀ꦢꦺꦏ꧀ꦤꦺ꧈​ꦤꦁꦔꦶꦁ​ꦥꦢ​ꦮꦼꦢꦶ​ꦏꦫꦺꦴ​ꦫꦪꦠ꧀ꦠꦺ꧈​ꦱꦶꦁ​ꦔꦁꦒꦼꦥ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦤꦧꦶ​꧉​

↑ ↑ ↑


꧋ꦥꦶꦮꦸꦭꦁ​ꦧꦧ꧀ꦩꦤ꧀ꦠꦺꦤ꧀ꦤꦤ꧀ꦒꦼꦢꦺ​꧉​

꧇​꧒꧒꧇​ 1꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦩꦸꦭꦁ​ꦩꦼꦤꦺꦃ​ꦩꦫꦁ​ꦮꦺꦴꦁꦮꦺꦴꦁ​ꦔꦁꦒꦺꦴ​ꦱꦏ꧀ꦮꦶꦗꦶꦤꦺꦒꦩ꧀ꦧꦂ​꧉​ 2ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦤꦺ​:“ꦏꦿꦠꦺꦴꦤꦺ​ꦱ꧀ꦮꦂꦒ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦱꦏ꧀ꦮꦶꦗꦶꦤꦺꦫꦠꦸ​ꦱꦶꦁ​ꦲꦉꦥ꧀​ꦤ꧀ꦢꦸꦮꦺꦒꦮꦺ​ꦒꦼꦢꦺꦤ꧀ ꦗꦭꦂꦫꦤ꧀ꦲꦉꦥ꧀ꦔꦮꦶꦤ꧀ꦤꦏꦺꦲꦤꦏ꧀ꦏꦺ​ꦭꦤꦁ​꧉​ 3ꦫꦠꦸ​ꦩꦲꦸ​ꦔꦺꦴꦁꦏꦺꦴꦤ꧀ꦥꦫ​ꦥꦼꦭꦢꦺꦤ꧀ꦤꦺ​ꦔꦸꦤ꧀ꦢꦁꦔꦶ​ꦮꦺꦴꦁꦮꦺꦴꦁ​ꦱꦶꦁ​ꦢꦶꦲꦸꦊꦩ꧀ꦩꦶ​꧉​ꦤꦁꦔꦶꦁ​ꦮꦺꦴꦁꦮꦺꦴꦁ​ꦲꦺꦴꦫ​ꦒꦼꦊꦩ꧀ꦠꦼꦏ​꧉​ 4ꦫꦠꦸꦤꦺ​ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦥꦼꦭꦢꦺꦤ꧀ꦥꦼꦭꦢꦺꦤ꧀ꦭꦶꦪꦤꦺ​꧈​ꦢꦶꦲꦺꦴꦩꦺꦴꦁꦔꦶꦔꦺꦤꦺ​:'ꦏꦤ​ꦮꦺꦴꦁꦮꦺꦴꦁ​ꦱꦶꦁ​ꦢꦶꦲꦸꦊꦩ꧀ꦩꦶ​ꦢꦶꦲꦺꦴꦩꦺꦴꦁꦔꦶꦤꦺꦏ꧀ꦥꦺꦱ꧀ꦠꦤꦺ​ꦮꦶꦱ꧀ꦢꦶꦠꦠ​꧉​ꦱꦥꦶ​ꦭꦤꦁ​ꦭꦤ꧀ꦥꦼꦢꦺꦠ꧀ꦥꦼꦢꦺꦠ꧀ꦥꦶꦭꦶꦃꦲꦤ꧀ꦮꦶꦱ꧀ꦢꦶꦧꦼꦭꦺꦃ​꧉​ꦱꦼꦩ꧀ꦧꦫꦁ​ꦮꦶꦱ꧀ꦫꦩ꧀ꦥꦸꦁ​꧉​ꦏꦺꦴꦁꦏꦺꦴꦤ꧀​ꦤ꧀ꦢꦁꦥꦢ​ꦤꦼꦏꦤꦶ​ꦥꦺꦱ꧀ꦠꦤꦺ​!’ 5ꦤꦁꦔꦶꦁ​ꦮꦺꦴꦁꦮꦺꦴꦁ​ꦱꦶꦁ​ꦢꦶꦲꦸꦊꦩ꧀ꦩꦶ​ꦲꦺꦴꦫ​ꦠꦼꦏ​꧉​ꦩꦭꦃ​ꦥꦢ​ꦭꦸꦔ​ꦔꦸꦫꦸꦱ꧀ꦱꦶ​ꦥꦼꦁꦒꦮꦺꦪꦤ꧀ꦏꦸꦢꦺꦮꦺꦢꦺꦮꦺ꧉​ꦲꦺꦤꦺꦁꦱꦶꦁ​ꦤꦁꦏꦼꦧꦺꦴꦤ꧀ ꦭꦶꦪꦤꦺ​ꦔꦸꦫꦸꦱ꧀ꦱꦶ​ꦢꦒꦁꦔꦤ꧀ꦤꦺ​꧉​ 6ꦩꦭꦃ​ꦲꦺꦤꦺꦁꦱꦶꦁ​ꦥꦢ​ꦚꦼꦏꦼꦭ꧀ꦥꦼꦭꦢꦺꦤ꧀ꦤꦺ​ꦫꦠꦸꦤꦺ​꧈​ꦢꦶꦥꦶꦭꦂꦫ​ꦭꦤ꧀ꦢꦶꦥꦠꦺꦤ꧀ꦤꦶ​꧉​ 7ꦩꦸꦭꦤꦺ​ꦫꦠꦸꦤꦺ​ꦠꦼꦫꦸꦱ꧀ꦤꦼꦱꦸ​ꦧꦔꦼꦠ꧀꧈​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦠꦺ꧈​ꦏꦺꦴꦁꦏꦺꦴꦤ꧀ꦩꦠꦺꦤ꧀ꦤꦶ​ꦮꦺꦴꦁꦮꦺꦴꦁ​ꦱꦶꦁ​ꦩꦠꦺꦤ꧀ꦤꦶ​ꦥꦼꦭꦢꦺꦤ꧀ꦥꦼꦭꦢꦺꦤ꧀ꦤꦺꦭꦤ꧀ꦏꦺꦴꦁꦏꦺꦴꦤ꧀ꦔꦺꦴꦧꦺꦴꦁ​ꦏꦸꦠꦤꦺ꧉​ 8ꦫꦠꦸꦤꦺ​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦥꦫ​ꦥꦼꦭꦢꦺꦤ꧀ꦤꦺ​:'ꦥꦺꦱ꧀ꦠꦤꦺ​ꦩꦤ꧀ꦠꦺꦤ꧀ꦤꦤ꧀ꦮꦶꦱ꧀ꦢꦶꦠꦠ​꧈​ꦤꦁꦔꦶꦁ​ꦮꦺꦴꦁꦮꦺꦴꦁ​ꦱꦶꦁ​ꦢꦶꦲꦸꦊꦩ꧀ꦩꦶ​ꦥꦢ​ꦲꦺꦴꦫ​ꦥꦤ꧀ꦠꦼꦱ꧀꧈​ 9ꦩꦸꦭꦤꦺ​ꦏꦤ​ꦱꦲꦶꦏꦶ​ꦥꦢ​ꦤꦁꦥꦿꦥꦠꦤ꧀ꦥꦿꦥꦠꦤ꧀ꦭꦤ꧀ꦱꦥ​ꦮꦲꦺ​ꦱꦶꦁ​ꦏꦼꦠꦼꦩꦸ​ꦢꦶꦲꦸꦤ꧀ꦢꦁ​ꦏꦺꦴꦁꦏꦺꦴꦤ꧀ꦠꦼꦏ​ꦤꦁꦥꦺꦱ꧀ꦠꦤꦺ​ꦩꦤ꧀ꦠꦺꦤ꧀ꦤꦤ꧀꧉'​ 10ꦥꦫ​ꦥꦼꦭꦢꦺꦤ꧀ꦩꦲꦸ​ꦠꦼꦫꦸꦱ꧀ꦧꦸꦢꦭ꧀ꦤꦁꦥꦿꦥꦠꦤ꧀ꦥꦿꦥꦠꦤ꧀꧈​ꦏꦧꦺꦃ​ꦮꦺꦴꦁ​ꦱꦶꦁ​ꦏꦼꦠꦼꦩꦸ​꧈​ꦱꦶꦁ​ꦲꦭ​ꦭꦤ꧀ꦱꦶꦁ​ꦧꦼꦕꦶꦏ꧀ ꦠꦼꦫꦸꦱ꧀ꦥꦢ​ꦢꦶꦏꦸꦩ꧀ꦥꦸꦭ꧀ꦭꦏꦺ꧉​ꦥꦁꦒꦺꦴꦤ꧀ꦤꦤ꧀ꦥꦺꦱ꧀ꦠ​ꦱꦲꦶꦏꦶ​ꦏꦼꦧꦼꦏ꧀ꦏꦫꦺꦴ​ꦢꦪꦺꦴꦃ꧉​

11꧋“ꦏꦢꦸꦁ​ꦫꦠꦸꦤꦺ​ꦩ꧀ꦊꦧꦸ​ꦏꦼꦥꦺꦔꦶꦤ꧀ꦮꦼꦫꦸꦃ​ꦢꦪꦺꦴꦃꦢꦪꦺꦴꦃꦲꦺ꧈​ꦢꦺꦏ꧀ꦤꦺꦠꦼꦫꦸꦱ꧀ꦮꦼꦫꦸꦃ​ꦲꦺꦤꦺꦁꦱꦏ꧀ꦮꦶꦗꦶꦤꦺꦢꦪꦺꦴꦃꦲꦺꦴꦫ​ꦔꦁꦒꦺꦴ​ꦱꦭꦶꦤ꧀ꦥꦺꦱ꧀ꦠ​꧉​ 12ꦢꦪꦺꦴꦃꦏꦸꦮꦶ​ꦠꦼꦫꦸꦱ꧀ꦢꦶꦠꦏꦺꦴꦤ꧀ꦤꦶ​:'ꦱꦼꦢꦸꦭꦸꦂ​꧈​ꦭꦃ​ꦏꦺꦴꦮꦺ​ꦏꦺꦴꦏ꧀​ꦩ꧀ꦊꦧꦸ​ꦠꦤ꧀ꦥ​ꦔꦁꦒꦺꦴ​ꦱꦭꦶꦤ꧀ꦥꦺꦱ꧀ꦠ​?’ꦤꦁꦔꦶꦁ​ꦢꦪꦺꦴꦃꦲꦺꦲꦺꦴꦫ​ꦧꦶꦱ​ꦱꦼꦩꦲꦸꦂ​ꦲꦥ​? 13ꦫꦠꦸꦤꦺ​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦥꦫ​ꦥꦼꦭꦢꦺꦤ꧀ꦤꦺ​:'ꦮꦺꦴꦁ​ꦲꦶꦏꦶ​ꦢꦶꦧꦤ꧀ꦢ​ꦭꦤ꧀ꦢꦶꦲꦼꦠꦺꦴꦏ꧀ꦏꦏꦺꦱꦁꦏꦏꦺꦤꦺ​꧈​ꦢꦶꦧꦸꦮꦁ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦥꦼꦠꦼꦁ​꧉​ꦤꦁꦏꦺꦴꦤꦺꦴ​ꦢꦺꦏ꧀ꦤꦺꦧꦏꦭ꧀ꦠꦔꦶꦱ꧀ꦱꦤ꧀ꦭꦤ꧀ꦏꦼꦫꦺꦴꦠ꧀ꦲꦸꦤ꧀ꦠꦸ​꧉​’”

14꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦸꦠꦸꦥ꧀ꦥꦶꦮꦸꦭꦁꦔꦺ​ꦔꦺꦤꦺ​:“ꦥꦚ꧀ꦕꦺꦤ꧀ꦲꦺꦴꦏꦺꦃꦮꦺꦴꦁ​ꦱꦶꦁ​ꦢꦶꦥꦁꦒꦶꦭ꧀ ꦤꦁꦔꦶꦁ​ꦤꦩꦸꦁ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦱꦶꦁ​ꦥꦤ꧀ꦠꦼꦱ꧀ꦢꦶꦥꦶꦭꦶꦃ​꧉​”

꧋ꦥꦶꦠꦏꦺꦴꦤ꧀ꦤꦤ꧀ꦧꦧ꧀ꦲꦩ꧀ꦧꦪꦂ​ꦧꦼꦭꦱ꧀ꦠꦶꦁ꧉​

15꧋ꦥꦫ​ꦥ꦳ꦫꦶꦱꦶ​ꦠꦼꦫꦸꦱ꧀ꦭꦸꦔ​ꦭꦤ꧀ꦥꦢ​ꦉꦩ꧀ꦧꦸꦏ꧀ꦏꦤ꧀ꦏꦼꦥꦿꦶꦪꦺ​ꦧꦶꦱꦤꦺ​ꦔꦼꦤꦺꦁꦒꦸꦱ꧀ꦠꦶ​ꦪꦺꦯꦸꦱ꧀ꦔꦁꦒꦺꦴ​ꦥꦶꦠꦏꦺꦴꦤ꧀ꦤꦤ꧀꧈​ 16ꦠꦼꦫꦸꦱ꧀ꦥꦢ​ꦏꦺꦴꦁꦏꦺꦴꦤ꧀ꦤꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦺꦴꦤꦺꦴ​ꦧꦉꦁ​ꦏꦫꦺꦴ​ꦮꦺꦴꦁꦮꦺꦴꦁ​ꦒꦺꦴꦭꦺꦴꦁꦔꦤ꧀ꦤꦺ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦩꦫꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁꦮꦺꦴꦁ​ꦲꦶꦏꦶ​ꦠꦼꦫꦸꦱ꧀ꦠꦏꦺꦴꦤ꧀:“ꦒꦸꦫꦸ​꧈​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦮꦺꦴꦁ​ꦗꦸꦗꦸꦂ​ꦭꦤ꧀​ꦧ꧀ꦭꦏ​ꦲꦼꦁꦒꦺꦴꦤꦺ​ꦩꦸꦭꦁꦔꦏꦺꦧꦧ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦩꦤꦸꦁꦱ​꧉​ꦏꦺꦴꦮꦺ​ꦲꦺꦴꦫ​ꦮꦼꦢꦶ​ꦭꦤ꧀ꦲꦺꦴꦫ​ꦥꦼꦂꦢꦸꦭꦶꦏꦫꦺꦴ​ꦱꦥꦱꦥ​꧉​ 17ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦔꦼꦂꦠꦶ​ꦱꦁꦏꦏꦺꦴꦮꦺ​ꦧꦧ꧀ꦲꦶꦏꦶ​:ꦲꦩ꧀ꦧꦪꦂ​ꦧꦼꦭꦱ꧀ꦠꦶꦁꦩꦫꦁ​ꦫꦠꦸꦤꦺ​ꦬꦸꦩ꧀ꦏꦸꦮꦶ​ꦲꦺꦤ꧀ꦠꦸꦏ꧀ꦲꦥ​ꦲꦺꦴꦫ​?”

18꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦂꦠꦶ​ꦤꦺꦏ꧀ꦮꦺꦴꦁꦮꦺꦴꦁ​ꦏꦸꦮꦶ​ꦠꦸꦗꦸꦮꦤ꧀ꦤꦺ​ꦲꦭ​꧈​ꦩꦸꦭꦤꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦏꦸꦮꦶ​ꦭꦩꦶꦱ꧀꧈​ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦲꦉꦥ꧀ꦔꦼꦤꦺꦁꦲꦏꦸ​? 19ꦤ꧀ꦢꦼꦭꦺꦴꦏ꧀ꦏꦺꦤꦺ​ꦢꦸꦮꦶꦠ꧀ꦱꦶꦁ​ꦢꦶꦲꦼꦁꦒꦺꦴ​ꦲꦩ꧀ꦧꦪꦂ​ꦧꦼꦭꦱ꧀ꦠꦶꦁ꧉​”

꧋ꦠꦼꦫꦸꦱ꧀ꦲꦺꦤꦺꦁꦱꦶꦁ​ꦔ꧀ꦒꦮ​ꦢꦸꦮꦶꦠ꧀ꦥꦺꦫꦏ꧀ꦱꦶꦗꦶ​꧉​ 20ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦤꦁꦢꦸꦮꦶꦠ꧀ꦲꦶꦏꦶ​ꦲꦺꦤꦺꦁꦒꦩ꧀ꦧꦂꦫꦺ​ꦭꦤ꧀ꦗꦼꦤꦼꦁꦔꦺ​ꦱꦥ​?”

21꧋ꦮꦺꦴꦁꦮꦺꦴꦁ​ꦱꦼꦩꦲꦸꦂ​:“ꦒꦩ꧀ꦧꦂꦫꦺ​ꦭꦤ꧀ꦗꦼꦤꦼꦁꦔꦺ​ꦫꦠꦸꦤꦺ​ꦬꦸꦩ꧀!”

꧋ꦒꦸꦱ꧀ꦠꦶ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦤꦺꦏ꧀ꦔꦺꦴꦤꦺꦴ​꧈​ꦲꦥ​ꦱꦶꦁ​ꦮꦺꦏ꧀ꦏꦺꦫꦠꦸꦤꦺ​ꦪ​ꦢꦶꦏꦺꦏ꧀ꦏꦏꦺꦩꦫꦁ​ꦫꦠꦸꦤꦺ​ꦭꦤ꧀ꦲꦥ​ꦱꦶꦁ​ꦮꦺꦏ꧀ꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦏꦸꦢꦸ​ꦢꦶꦏꦺꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

22꧋ꦮꦺꦴꦁꦮꦺꦴꦁ​ꦥꦢ​ꦔ꧀ꦒꦸꦩꦸꦤ꧀ꦧꦔꦼꦠ꧀ꦏꦿꦸꦔꦸ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧉​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦲꦺꦴꦫ​ꦔꦿꦸꦱꦸꦃꦲꦶꦢꦺꦏ꧀ꦤꦺꦩꦼꦤꦺꦃ​꧈​ꦠꦼꦫꦸꦱ꧀ꦥꦢ​ꦭꦸꦔ​꧉​

꧋ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦮꦺꦴꦁ​ꦲꦸꦫꦶꦥ꧀꧈​

23꧋ꦲꦶꦁ​ꦢꦶꦤ​ꦏꦸꦮꦶ​ꦲꦸꦒ​ꦲꦺꦤꦺꦁꦮꦺꦴꦁ​ꦒꦺꦴꦭꦺꦴꦁꦔꦤ꧀ꦱꦢꦸꦏꦶ​ꦱꦶꦗꦶꦭꦺꦴꦫꦺꦴꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁ​ꦱꦢꦸꦏꦶ​ꦔꦁꦒꦼꦥ꧀ꦥꦺꦮꦺꦴꦁ​ꦩꦠꦶ​ꦲꦺꦴꦫ​ꦧꦏꦭ꧀ꦠꦔꦶ​ꦩꦼꦤꦺꦃ​꧉​ 24ꦩꦸꦭꦤꦺ​ꦥꦢ​ꦠꦏꦺꦴꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦒꦸꦫꦸ​꧈​ꦤꦧꦶ​ꦩꦺꦴꦱꦼꦱ꧀ꦩꦸꦭꦁꦔꦶꦔꦺꦤꦺ​:'ꦤꦺꦏ꧀ꦲꦺꦤꦺꦁꦮꦺꦴꦁ​ꦭꦤꦁ​ꦩꦠꦶ​ꦠꦤ꧀ꦥ​ꦤꦶꦁꦒꦭ꧀ꦠꦸꦫꦸꦤ꧀ꦤꦤ꧀ ꦱꦼꦢꦸꦭꦸꦂꦫꦺ​ꦭꦤꦁ​ꦏꦸꦢꦸ​ꦔꦼꦥꦺꦏ꧀ꦧꦺꦴꦗꦺꦴꦤꦺ​ꦱꦶꦁ​ꦢꦶꦠꦶꦁꦒꦭ꧀ꦩꦠꦶ​ꦏꦸꦮꦶ​꧈​ꦱꦸꦥꦪ​ꦧꦶꦱ​ꦔ꧀ꦒꦮꦺ​ꦠꦸꦫꦸꦤ꧀ꦤꦤ꧀꧉'​ 25ꦭꦃ​ꦱꦲꦶꦏꦶ​ꦲꦺꦤꦺꦁꦱꦼꦢꦸꦭꦸꦂ​ꦥꦶꦠꦸ​꧉​ꦱꦶꦁ​ꦲꦩ꧀ꦧꦉꦥ꧀ꦏꦮꦶꦤ꧀ ꦤꦁꦔꦶꦁ​ꦠꦼꦫꦸꦱ꧀ꦩꦠꦶ​ꦠꦤ꧀ꦥ​ꦤꦶꦁꦒꦭ꧀ꦲꦤꦏ꧀꧈​ꦧꦺꦴꦗꦺꦴꦤꦺ​ꦠꦼꦫꦸꦱ꧀ꦢꦶꦲꦼꦥꦺꦏ꧀ꦏꦫꦺꦴ​ꦲꦢꦶꦏ꧀ꦏꦺꦱꦶꦁ​ꦩꦠꦶ​꧉​ 26ꦲꦸꦒ​ꦲꦢꦶꦏ꧀ꦏꦺꦩꦠꦶ​ꦠꦤ꧀ꦥ​ꦤꦶꦁꦒꦭ꧀ꦲꦤꦏ꧀꧈​ꦩꦼꦁꦏꦺꦴꦤꦺꦴ​ꦊꦭꦏꦺꦴꦤꦺ​ꦏꦫꦺꦴ​ꦱꦼꦢꦸꦭꦸꦂ​ꦱꦶꦁ​ꦤꦺꦴꦩꦼꦂ​ꦠꦼꦭꦸ​ꦠꦸꦩꦼꦏꦤꦺ​ꦱꦼꦢꦸꦭꦸꦂ​ꦱꦶꦁ​ꦤꦺꦴꦩꦼꦂ​ꦥꦶꦠꦸ​꧈​ꦏꦧꦺꦃ​ꦩꦠꦶ​ꦠꦤ꧀ꦥ​ꦤꦶꦁꦒꦭ꧀ꦲꦤꦏ꧀꧈​ 27ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦮꦺꦴꦁ​ꦮꦺꦢꦺꦴꦏ꧀ꦏꦺꦩꦠꦶ​ꦥꦶꦱꦤ꧀꧈​ 28ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦠꦏꦺꦴꦤ꧀:ꦭꦃ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦺꦴꦁ​ꦩꦠꦶ​ꦥꦢ​ꦠꦔꦶ​꧈​ꦮꦺꦴꦁ​ꦮꦺꦢꦺꦴꦏ꧀ꦏꦸꦮꦶ​ꦢꦢꦶ​ꦧꦺꦴꦗꦺꦴꦤꦺ​ꦱꦼꦢꦸꦭꦸꦂ​ꦱꦶꦁ​ꦲꦼꦤ꧀ꦢꦶ​?ꦲꦮꦶꦠ꧀ꦱꦼꦢꦸꦭꦸꦂ​ꦥꦶꦠꦸ​ꦏꦸꦮꦶ​ꦏꦧꦺꦃ​ꦮꦶꦱ꧀ꦠꦲꦸ​ꦢꦢꦶ​ꦧꦺꦴꦗꦺꦴꦤꦺ​ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​?”

29꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦏꦸꦮꦶ​ꦏ꧀ꦭꦺꦫꦸ​ꦏꦧꦺꦃ​꧉​ꦏꦺꦴꦮꦺ​ꦏꦸꦮꦶ​ꦲꦺꦴꦫ​ꦢꦸꦤꦸꦁꦲꦶꦱꦶꦤꦺ​ꦏꦶꦠꦧ꧀​ꦭꦤ꧀ꦏꦺꦴꦮꦺ​ꦧ꧀ꦭꦱ꧀ꦲꦺꦴꦫ​ꦔꦼꦂꦠꦶ​ꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 30ꦲꦮꦶꦠ꧀ꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦺꦴꦁꦮꦺꦴꦁ​ꦠꦔꦶ​ꦱꦁꦏꦥꦠꦶ​ꦲꦸꦫꦶꦥ꧀ꦥꦺꦧꦏꦭ꧀ꦭꦺ​ꦏꦪ​ꦩꦸꦭꦺꦏꦠ꧀ꦤꦁꦱ꧀ꦮꦂꦒ​꧈​ꦲꦺꦴꦫ​ꦲꦺꦤꦺꦁꦕꦫꦤꦺ​ꦧꦼꦧꦺꦴꦗꦺꦴꦮꦤ꧀꧈​ 31-32ꦭꦤ꧀ꦧꦧ꧀ꦠꦔꦶ​ꦩꦼꦤꦺꦃ​ꦱꦁꦏꦥꦠꦶ​꧈​ꦲꦥ​ꦏꦺꦴꦮꦺ​ꦲꦺꦴꦫ​ꦠꦲꦸ​ꦩꦕ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦏꦺꦴꦮꦺ​꧈​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:'ꦲꦏꦸ​ꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦄꦨꦿꦲꦩ꧀ ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦆꦱꦏ꧀ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦪꦏꦸꦧ꧀!’ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦢꦸꦢꦸ​ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦮꦺꦴꦁ​ꦩꦠꦶ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦮꦺꦴꦁ​ꦲꦸꦫꦶꦥ꧀꧈​”

33꧋ꦱꦏ꧀ꦮꦶꦱ꧀ꦱꦺ​ꦮꦺꦴꦁꦮꦺꦴꦁ​ꦏꦿꦸꦔꦸ​ꦏꦠꦼꦫꦁꦔꦤ꧀ꦱꦶꦁ​ꦔꦺꦴꦤꦺꦴ​ꦏꦸꦮꦶ​꧈​ꦏꦧꦺꦃ​ꦥꦢ​ꦔ꧀ꦒꦸꦩꦸꦤ꧀ꦏꦫꦺꦴ​ꦥꦶꦮꦸꦭꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦮꦺꦠ꧀ꦱꦶꦁ​ꦒꦼꦢꦺ​ꦢꦺꦮꦺ꧉​

34꧋ꦏꦢꦸꦁ​ꦥꦫ​ꦥ꦳ꦫꦶꦱꦶ​ꦏꦿꦸꦔꦸ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀​ꦚ꧀ꦭꦏꦼꦥ꧀ꦥꦏꦺꦮꦺꦴꦁ​ꦱꦢꦸꦏꦶ​꧈​ꦠꦼꦫꦸꦱ꧀ꦥꦢ​ꦔ꧀ꦭꦸꦩ꧀ꦥꦸꦏ꧀꧈​ 35ꦲꦺꦤꦺꦁꦱꦶꦗꦶ​꧈​ꦱꦏ꧀ꦮꦶꦗꦶꦤꦺꦒꦸꦫꦸ​ꦏꦶꦠꦧ꧀​꧈​ꦲꦉꦥ꧀ꦔꦼꦤꦺꦁꦒꦸꦱ꧀ꦠꦶ​ꦪꦺꦯꦸꦱ꧀ꦔꦁꦒꦺꦴ​ꦥꦶꦠꦏꦺꦴꦤ꧀ꦤꦤ꧀ꦔꦺꦤꦺ​: 36“ꦒꦸꦫꦸ​꧈​ꦮꦺꦠ꧀ꦱꦶꦁ​ꦲꦼꦤ꧀ꦢꦶ​ꦤꦁꦏꦶꦠꦧ꧀​ꦱꦶꦁ​ꦒꦼꦢꦺ​ꦢꦺꦮꦺ?”

37꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦮꦺꦠ꧀ꦱꦶꦁ​ꦒꦼꦢꦺ​ꦢꦺꦮꦺꦪ​ꦲꦶꦏꦶ​:ꦏꦺꦴꦮꦺ​ꦏꦸꦢꦸ​ꦠꦿꦺꦱ꧀ꦤꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃꦩꦸꦱꦏ꧀ꦲꦠꦶꦩꦸ​꧈​ꦱꦏ꧀ꦚꦮꦩꦸ​ꦭꦤ꧀ꦔꦁꦒꦺꦴ​ꦱꦏ꧀ꦲꦺꦤꦺꦁꦔꦺꦥꦶꦏꦶꦂꦫꦤ꧀ꦩꦸ​꧉​ 38ꦲꦶꦏꦸ​ꦮꦺꦠ꧀ꦱꦶꦁ​ꦒꦼꦢꦺ​ꦢꦺꦮꦺꦭꦤ꧀ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺ꧉​ 39ꦮꦺꦠ꧀ꦭꦶꦪꦤꦺ​ꦱꦶꦁ​ꦲꦸꦒ​ꦥꦼꦤ꧀ꦠꦶꦁ​ꦏꦪ​ꦱꦶꦁ​ꦤ꧀ꦢꦶꦱꦶꦏ꧀ꦏꦸꦮꦶ​ꦪ​ꦲꦶꦏꦶ​:'ꦠꦿꦺꦱ꧀ꦤꦲꦩꦫꦁ​ꦥꦼꦥꦢꦩꦸꦏꦪ​ꦲꦼꦁꦒꦺꦴꦤ꧀ꦩꦸ​ꦤꦿꦺꦱ꧀ꦤꦤ꧀ꦤꦶꦲꦮꦏ꧀ꦩꦸ​ꦢꦺꦮꦺ꧉'​ 40ꦏꦧꦺꦃ​ꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦭꦤ꧀ꦱꦶꦁ​ꦢꦶꦮꦸꦭꦁꦔꦏꦺꦏꦫꦺꦴ​ꦥꦫ​ꦤꦧꦶ​ꦭꦶꦪꦤꦺ​ꦠꦶꦧꦤꦺ​ꦪ​ꦤꦁꦮꦺꦠ꧀ꦭꦺꦴꦫꦺꦴ​ꦏꦸꦮꦶ​꧉​”

꧋ꦥꦶꦠꦏꦺꦴꦤ꧀ꦤꦤ꧀ꦧꦧ꧀ꦑꦿꦶꦱ꧀ꦠꦸꦱ꧀ꦭꦤ꧀ꦧꦧ꧀ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀꧈​

41꧋ꦢꦺꦴꦁꦔꦺꦥꦫ​ꦥ꦳ꦫꦶꦱꦶ​ꦲꦶꦗꦶꦏ꧀​ꦔ꧀ꦭꦸꦩ꧀ꦥꦸꦏ꧀ꦤꦁꦏꦺꦴꦤꦺꦴ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ ꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​:“ꦏꦼꦥꦿꦶꦪꦺ​ꦥꦶꦤꦼꦩꦸꦩꦸꦧꦧ꧀ꦑꦿꦶꦱ꧀ꦠꦸꦱ꧀?ꦢꦺꦏ꧀ꦤꦺꦏꦸꦮꦶ​ꦠꦸꦫꦸꦤ꧀ꦤꦤ꧀ꦤꦺ​ꦱꦥ​ꦠ​?” 42ꦮꦺꦴꦁꦮꦺꦴꦁ​ꦱꦼꦩꦲꦸꦂ​:“ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀꧈​”

43꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃ​ꦤꦺꦏ꧀ꦔꦺꦴꦤꦺꦴ​꧈​ꦭꦃ​ꦫꦠꦸ​ꦣꦮ꦳ꦼꦢ꧀ꦏꦺꦴꦏ꧀ꦚꦼꦭꦸꦏ꧀ꦑꦿꦶꦱ꧀ꦠꦸꦱ꧀ꦏꦸꦮꦶ​ꦒꦸꦱ꧀ꦠꦶ​?ꦲꦮꦶꦠ꧀ꦏꦠꦸꦤ꧀ꦠꦸꦤ꧀ꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦫꦠꦸ​ꦣꦮ꦳ꦼꦢ꧀ꦭꦲꦸꦠ꧀ꦔꦺꦴꦩꦺꦴꦁꦔꦺꦤꦺ​ꦠ​: 44‘ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦺꦴꦩꦺꦴꦁꦩꦫꦁ​ꦒꦸꦱ꧀ꦠꦶꦏꦸ​:

ꦏꦺꦤꦺ​ꦚ꧀ꦗꦒꦺꦴꦁꦤꦁꦠꦼꦔꦼꦤ꧀ꦏꦸ​꧈​
ꦔꦤ꧀ꦠꦶ​ꦩꦸꦁꦱꦸꦃꦩꦸ​ꦱꦏ꧀ꦏꦧꦺꦃꦲꦺꦮꦶꦱ꧀
ꦠꦏ꧀ꦠꦼꦭꦸꦏ꧀ꦏꦏꦺꦩꦫꦁ​ꦏꦺꦴꦮꦺ​꧉​’

45ꦭꦃ​ꦤꦺꦏ꧀ꦫꦠꦸ​ꦣꦮ꦳ꦼꦢ꧀ꦚꦼꦭꦸꦏ꧀ꦑꦿꦶꦱ꧀ꦠꦸꦱ꧀ꦏꦸꦮꦶ​ꦒꦸꦱ꧀ꦠꦶ​꧈​ꦭꦃ​ꦩꦺꦴꦱꦺꦴꦏ꧀ꦑꦿꦶꦱ꧀ꦠꦸꦱ꧀ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀?”

46꧋ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦱꦶꦁ​ꦧꦶꦱ​ꦔꦺꦴꦩꦺꦴꦁꦲꦥꦲꦥ​꧉​ꦮꦶꦮꦶꦠ꧀ꦢꦶꦤ​ꦏꦸꦮꦶ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦮꦤꦶ​ꦠꦏꦺꦴꦤ꧀ꦠꦏꦺꦴꦤ꧀ꦩꦼꦤꦺꦃ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

↑ ↑ ↑


꧋ꦢꦶꦫꦸꦔꦺꦴꦏ꧀ꦏꦏꦺ​ꦥꦶꦮꦸꦭꦁꦔꦺ​꧈​ꦤꦁꦔꦶꦁ​ꦲꦗ​ꦢꦶꦠꦶꦫꦸ​ꦠꦸꦩꦶꦤ꧀ꦢꦏ꧀ꦏꦺ​꧉​

꧇​꧒꧓꧇​ 1꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦮꦺꦴꦁꦮꦺꦴꦁ​ꦭꦤ꧀ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​: 2“ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥ꦳ꦫꦶꦱꦶ​ꦏꦸꦮꦶ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦮꦺꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ 3ꦩꦸꦭꦤꦺ​ꦏꦸꦢꦸ​ꦢꦶꦭꦏꦺꦴꦤ꧀ꦤꦶ​ꦭꦤ꧀ꦏꦧꦺꦃ​ꦥꦶꦮꦸꦭꦁꦔꦺ​ꦏꦸꦢꦸ​ꦢꦶꦠꦸꦫꦸꦠ꧀ꦠꦶ​ꦱꦶꦁ​ꦱꦏ꧀ꦩꦼꦱ꧀ꦠꦶꦤꦺ꧉​ꦤꦁꦔꦶꦁ​ꦲꦗ​ꦥꦢ​ꦤꦶꦫꦸ​ꦏ꧀ꦭꦏꦸꦮꦤ꧀ꦤꦺ​꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦢꦺꦮꦺꦲꦺꦴꦫ​ꦥꦢ​ꦔ꧀ꦭꦏꦺꦴꦤ꧀ꦤꦶ​ꦲꦥ​ꦱꦶꦁ​ꦢꦶꦮꦸꦭꦁꦔꦏꦺ꧉​ 4ꦥꦢ​ꦔ꧀ꦒꦮꦺ​ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦱꦶꦁ​ꦲꦧꦺꦴꦠ꧀ꦏꦁꦒꦺꦴ​ꦮꦺꦴꦁ​ꦭꦶꦪꦤꦺ​꧈​ꦤꦁꦔꦶꦁ​ꦮꦺꦴꦁꦮꦺꦴꦁ​ꦏꦸꦮꦶ​ꦢꦺꦮꦺꦲꦺꦴꦫ​ꦥꦢ​ꦤꦶꦤ꧀ꦢꦏ꧀ꦏꦏꦺ꧉​ 5ꦱꦼꦩ꧀ꦧꦫꦁ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦤꦩꦸꦁ​ꦱꦸꦥꦪ​ꦏꦺꦠꦺꦴꦏ꧀ꦮꦺꦴꦁ​꧉​ꦏꦪꦢꦺꦤꦺ:ꦔꦁꦒꦺꦴ​ꦠꦭꦶ​ꦱꦼꦩ꧀ꦧꦪꦁꦲꦩ꧀ꦧ​ꦤꦁꦧꦠꦸꦏ꧀ꦏꦺꦭꦤ꧀ꦊꦔꦼꦤꦺ​꧈​ꦒꦺꦴꦩ꧀ꦧꦾꦺꦴꦏ꧀ꦏꦺꦱꦭꦶꦤ꧀ꦤꦺꦢꦶꦒꦮꦺ​ꦢꦮ​꧉​ 6ꦤꦺꦏ꧀ꦤꦁꦏꦸꦩ꧀ꦥꦸꦭ꧀ꦭꦤ꧀ꦥꦺꦱ꧀ꦠ​ꦱꦼꦤꦼꦁ​ꦚ꧀ꦗꦒꦺꦴꦁꦤꦁꦗꦒꦺꦴꦔꦤ꧀ꦤꦺꦮꦺꦴꦁ​ꦒꦼꦢꦺ​ꦭꦤ꧀ꦤꦺꦏ꧀ꦤꦁꦱꦶꦤꦒꦸꦏ꧀​ꦚ꧀ꦗꦭꦸꦏ꧀ꦏꦺꦚ꧀ꦗꦒꦺꦴꦁꦤꦁꦔꦉꦥ꧀ꦢꦺꦮꦺ꧉​ 7ꦤꦺꦏ꧀ꦤꦁꦥꦱꦂꦥꦱꦂ​ꦱꦼꦤꦼꦁ​ꦢꦶꦒꦠꦺꦏ꧀ꦏꦏꦺꦭꦤ꧀​ꦚ꧀ꦗꦭꦸꦏ꧀ꦏꦺꦢꦶꦕꦼꦭꦸꦏ꧀​'ꦒꦸꦫꦸ​’꧉​ 8ꦤꦁꦔꦶꦁ​ꦏꦺꦴꦮꦺ​ꦲꦗ​ꦱꦼꦤꦼꦁ​ꦢꦶꦕꦼꦭꦸꦏ꧀​'ꦒꦸꦫꦸ​’꧈​ꦲꦮꦶꦠ꧀ꦒꦸꦫꦸꦩꦸ​ꦤꦩꦸꦁ​ꦱꦶꦗꦶ​ꦭꦤ꧀ꦏꦺꦴꦮꦺ​ꦏꦧꦺꦃ​ꦥꦢ​ꦠꦸꦁꦒꦭ꧀ꦱꦼꦢꦸꦭꦸꦂ​꧉​ 9ꦏꦺꦴꦮꦺ​ꦲꦸꦒ​ꦲꦗ​ꦚꦼꦭꦸꦏ꧀ꦮꦺꦴꦁ​ꦲꦶꦁ​ꦢꦺꦴꦚ​ꦏꦺꦤꦺ​'ꦧꦥꦏ꧀’꧈​ꦲꦮꦶꦠ꧀ꦧꦥꦏ꧀ꦩꦸ​ꦤꦩꦸꦁ​ꦱꦶꦗꦶ​꧈​ꦪꦏꦸꦮꦶ​ꦱꦶꦁ​ꦤꦁꦱ꧀ꦮꦂꦒ​꧉​ 10ꦏꦺꦴꦮꦺ​ꦲꦸꦒ​ꦲꦗ​ꦒꦼꦊꦩ꧀ꦢꦶꦕꦼꦭꦸꦏ꧀​'ꦥꦼꦤꦸꦤ꧀ꦠꦸꦤ꧀’꧈​ꦲꦮꦶꦠ꧀ꦥꦼꦤꦸꦤ꧀ꦠꦸꦤ꧀ꦩꦸꦤꦩꦸꦁ​ꦱꦶꦗꦶ​꧈​ꦪꦏꦸꦮꦶ​ꦑꦿꦶꦱ꧀ꦠꦸꦱ꧀꧈​ 11ꦱꦶꦁ​ꦒꦼꦢꦺ​ꦢꦺꦮꦺꦤꦁꦠꦼꦔꦃꦩꦸ​ꦏꦸꦢꦸ​ꦔ꧀ꦭꦢꦺꦤ꧀ꦤꦶ​ꦭꦶꦪꦤꦺ​꧉​ 12ꦱꦥ​ꦱꦶꦁ​ꦔ꧀ꦭꦸꦲꦸꦂꦫꦏꦺꦲꦮꦏ꧀ꦏꦺ​ꦢꦺꦮꦺ꧈​ꦲꦶꦏꦸ​ꦧꦏꦭ꧀ꦢꦶꦲꦱꦺꦴꦂꦫꦏꦺ꧈​ꦩꦭꦃ​ꦱꦥ​ꦱꦶꦁ​ꦔꦱꦺꦴꦂꦫꦏꦺꦲꦮꦏ꧀ꦏꦺ​ꦢꦺꦮꦺ꧈​ꦲꦶꦏꦸ​ꦧꦏꦭ꧀ꦢꦶꦭꦸꦲꦸꦂꦫꦏꦺ꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦚꦼꦤꦺꦤ꧀ꦤꦶꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥ꦳ꦫꦶꦱꦶ​꧉​

13꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥ꦳ꦫꦶꦱꦶ​:“ꦕꦶꦭꦏ​ꦏꦺꦴꦮꦺ​꧈​ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥ꦳ꦫꦶꦱꦶ​!ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦭꦩꦶꦱ꧀!ꦏꦺꦴꦮꦺ​ꦥꦢ​ꦔꦭꦁꦔꦭꦁꦔꦶꦮꦺꦴꦁꦮꦺꦴꦁ​ꦱꦶꦁ​ꦲꦉꦥ꧀​ꦩ꧀ꦊꦧꦸ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦺꦴꦮꦺ​ꦢꦺꦮꦺꦥꦢ​ꦲꦺꦴꦫ​ꦒꦼꦊꦩ꧀ ꦤꦁꦔꦶꦁ​ꦮꦺꦴꦁ​ꦭꦶꦪ​ꦱꦶꦁ​ꦒꦼꦊꦩ꧀ꦩꦭꦃ​ꦲꦩ꧀ꦧꦺꦴꦏ꧀ꦲꦭꦁꦔꦭꦁꦔꦶ꧉​ 14(ꦕꦶꦭꦏ​ꦏꦺꦴꦮꦺ​꧈​ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥ꦳ꦫꦶꦱꦶ​!ꦏꦺꦴꦮꦺ​ꦮꦺꦴꦁ​ꦭꦩꦶꦱ꧀꧈​ꦏꦺꦴꦮꦺ​ꦥꦢ​ꦔ꧀ꦒꦺꦴꦭꦺꦏ꧀ꦲꦏꦭ꧀ꦮꦼꦂꦤꦮꦼꦂꦤ​ꦏꦁꦒꦺꦴ​ꦩꦼꦉꦱ꧀ꦫꦤ꧀ꦢꦫꦤ꧀ꦢꦭꦤ꧀ꦔꦿꦩ꧀ꦥꦺꦴꦏ꧀ꦲꦺꦴꦩꦃꦲꦺ​꧉​ꦠꦼꦫꦸꦱ꧀ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦺꦤ꧀ꦢꦺꦴꦁꦔꦱꦶꦁ​ꦢꦮ​꧉​ꦩꦸꦭꦤꦺ​ꦏꦺꦴꦮꦺ​ꦧꦏꦭ꧀ꦤꦩ꧀ꦥ​ꦱꦼꦠꦿꦥꦤ꧀ꦱꦶꦁ​ꦭꦸꦮꦶꦃ​ꦲꦧꦺꦴꦠ꧀꧈​)

15꧋“ꦕꦶꦭꦏ​ꦏꦺꦴꦮꦺ​꧈​ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥ꦳ꦫꦶꦱꦶ​!ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦭꦩꦶꦱ꧀!ꦏꦺꦴꦮꦺ​ꦥꦢ​ꦭꦸꦔ​ꦲꦢꦺꦴꦃ​꧈​ꦔꦤ꧀ꦠꦶ​ꦚꦧꦿꦁ​ꦱꦼꦒꦫ​ꦭꦤ꧀​ꦤ꧀​ꦢ꧀ꦭꦗꦃꦲꦶ​ꦢꦫꦠ꧀ꦠꦤ꧀ꦏꦼꦥꦺꦔꦶꦤ꧀ꦲꦺꦤ꧀ꦠꦸꦏ꧀ꦮꦺꦴꦁ​ꦱꦶꦗꦶ​ꦱꦶꦁ​ꦩꦺꦭꦸ​ꦲꦒꦩꦩꦸ​꧉​ꦤꦁꦔꦶꦁ​ꦤꦺꦏ꧀ꦮꦺꦴꦁꦔꦺ​ꦮꦶꦱ꧀ꦩꦺꦭꦸ​ꦲꦒꦩꦩꦸ​꧈​ꦮꦺꦴꦁꦔꦺ​ꦲꦩ꧀ꦧꦺꦴꦏ꧀ꦩꦠꦼꦁꦔꦏꦺꦏꦁꦒꦺꦴ​ꦤꦼꦫꦏ꧈​ꦩꦭꦃ​ꦲꦭꦤꦺ​ꦮꦺꦴꦁꦔꦺ​ꦥꦶꦁ​ꦥꦶꦤ꧀ꦢꦺꦴꦤꦺꦏꦺꦴꦮꦺ​ꦢꦺꦮꦺ꧉​

16꧋“ꦕꦶꦭꦏ​ꦏꦺꦴꦮꦺ​꧈​ꦥꦼꦤꦸꦤ꧀ꦠꦸꦤ꧀ꦥꦼꦤꦸꦤ꧀ꦠꦸꦤ꧀ꦱꦶꦁ​ꦥꦶꦕꦼꦏ꧀​꧉​ꦏꦺꦴꦮꦺ​ꦔꦺꦴꦩꦺꦴꦁ:'ꦱꦥ​ꦱꦸꦩ꧀ꦥꦃ​ꦚꦼꦧꦸꦠ꧀ꦒꦿꦺꦗ​ꦒꦼꦢꦺ​꧈​ꦮꦺꦴꦁ​ꦏꦸꦮꦶ​ꦲꦺꦴꦫ​ꦏꦼꦕꦼꦚ꧀ꦕꦁ​ꦱꦸꦩ꧀ꦥꦃꦲꦺ​꧉​ꦤꦁꦔꦶꦁ​ꦱꦥ​ꦱꦸꦩ꧀ꦥꦃ​ꦚꦼꦧꦸꦠ꧀ꦲꦼꦩꦱ꧀ꦱꦺ​ꦒꦿꦺꦗ​ꦒꦼꦢꦺ​꧈​ꦱꦸꦩ꧀ꦥꦃ​ꦏꦸꦮꦶ​ꦚꦼꦚ꧀ꦕꦁ​꧉'​ 17ꦏꦺꦴꦮꦺ​ꦏꦸꦮꦶ​ꦥꦚ꧀ꦕꦺꦤ꧀ꦮꦺꦴꦁ​ꦧꦺꦴꦢꦺꦴꦭꦤ꧀ꦥꦶꦕꦼꦏ꧀​꧉​ꦲꦮꦶꦠ꧀ ꦲꦥ​ꦱꦶꦁ​ꦭꦸꦮꦶꦃ​ꦒꦼꦢꦺ​ꦲꦗꦶꦤꦺ​:ꦲꦼꦩꦱ꧀ꦱꦺ​ꦲꦥ​ꦒꦿꦺꦗ​ꦒꦼꦢꦺ​꧈​ꦱꦶꦁ​ꦚꦸꦕꦺꦏ꧀ꦏꦏꦺ​ꦲꦼꦩꦱ꧀ꦱꦺ​? 18ꦏꦺꦴꦮꦺ​ꦲꦸꦒ​ꦩꦸꦭꦁ​ꦔꦺꦤꦺ​:'ꦱꦥ​ꦱꦸꦩ꧀ꦥꦃ​ꦚꦼꦧꦸꦠ꧀ꦲꦭ꧀ꦠꦂꦫꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁ​ꦏꦸꦮꦶ​ꦲꦺꦴꦫ​ꦏꦼꦕꦼꦚ꧀ꦕꦁ​ ꦱꦸꦩ꧀ꦥꦃꦲꦺ​꧉​ꦤꦁꦔꦶꦁ​ꦱꦥ​ꦱꦸꦩ꧀ꦥꦃ​ꦚꦼꦧꦸꦠ꧀ꦏꦸꦂꦧꦤ꧀ꦱꦶꦁ​ꦤꦁꦲꦭ꧀ꦠꦂ꧈​ꦮꦺꦴꦁ​ꦏꦸꦮꦶ​ꦏꦼꦕꦼꦚ꧀ꦕꦁ​ꦩꦫꦁ​ꦱꦸꦩ꧀ꦥꦃꦲꦺ​꧉'​ 19ꦏꦺꦴꦮꦺ​ꦥꦚ꧀ꦕꦺꦤ꧀ꦮꦺꦴꦁ​ꦥꦶꦕꦼꦏ꧀​ꦠꦼꦤꦤ꧀!ꦲꦥ​ꦱꦶꦁ​ꦭꦸꦮꦶꦃ​ꦒꦼꦢꦺ​ꦲꦗꦶꦤꦺ​:ꦏꦸꦂꦧꦤ꧀ꦤꦺ​ꦲꦥ​ꦲꦭ꧀ꦠꦂꦫꦺ꧈​ꦱꦶꦁ​ꦚꦸꦕꦺꦏ꧀ꦏꦏꦺ​ꦏꦸꦂꦧꦤ꧀ꦏꦸꦮꦶ​? 20ꦱꦥ​ꦱꦶꦁ​ꦱꦸꦩ꧀ꦥꦃ​ꦚꦼꦧꦸꦠ꧀ꦲꦭ꧀ꦠꦂꦫꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦸꦮꦶ​ꦱꦸꦩ꧀ꦥꦃꦲꦺ​ꦚꦼꦧꦸꦠ꧀ꦲꦭ꧀ꦠꦂꦫꦺꦭꦤ꧀ꦱꦼꦩ꧀ꦧꦫꦁ​ꦱꦶꦁ​ꦠꦼꦩꦸꦩ꧀ꦥꦁ​ꦤꦁꦲꦭ꧀ꦠꦂꦏꦺꦴꦤꦺꦴ​꧉​ 21ꦭꦤ꧀ꦱꦥ​ꦱꦶꦁ​ꦱꦸꦩ꧀ꦥꦃ​ꦚꦼꦧꦸꦠ꧀ꦒꦿꦺꦗ​ꦒꦼꦢꦺ​ꦏꦸꦮꦶ​ꦱꦸꦩ꧀ꦥꦃ​ꦚꦼꦧꦸꦠ꧀ꦒꦿꦺꦗ​ꦒꦼꦢꦺ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦁꦒꦺꦴꦤ꧀ꦤꦁꦏꦺꦴꦤꦺꦴ​꧉​ 22ꦱꦥ​ꦱꦶꦁ​ꦱꦸꦩ꧀ꦥꦃ​ꦚꦼꦧꦸꦠ꧀ꦱ꧀ꦮꦂꦒ​꧈​ꦏꦸꦮꦶ​ꦠꦼꦒꦼꦱ꧀ꦱꦺ​ꦱꦸꦩ꧀ꦥꦃ​ꦚꦼꦧꦸꦠ꧀ꦢꦩ꧀ꦥꦂꦫꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦏꦸꦮꦶ​꧉​

23꧋“ꦕꦶꦭꦏ​ꦏꦺꦴꦮꦺ​꧈​ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥ꦳ꦫꦶꦱꦶ​꧉​ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦭꦩꦶꦱ꧀꧈​ꦲꦮꦶꦠ꧀ꦏꦺꦴꦮꦺ​ꦲꦩ꧀ꦧꦪꦂ​ꦥꦿꦱꦼꦥꦸꦭꦸꦃꦲꦤ꧀ꦱꦁꦏꦧꦸꦩ꧀ꦧꦸ​ꦏꦪꦢꦺꦤꦺꦠꦼꦭꦱꦶꦃ​꧈​ꦲꦢꦱ꧀ꦭꦤ꧀ꦗꦶꦤ꧀ꦠꦼꦤ꧀ ꦤꦁꦔꦶꦁ​ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦱꦶꦁ​ꦭꦸꦮꦶꦃ​ꦥꦼꦤ꧀ꦠꦶꦁ​ꦲꦺꦴꦫ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​꧈​ꦏꦪꦢꦺꦤꦺꦏꦧꦼꦤꦼꦂꦫꦤ꧀ ꦏꦮꦼꦭꦱ꧀ꦱꦤ꧀ꦭꦤ꧀ꦏꦠꦼꦩꦼꦤ꧀ꦤꦤ꧀꧈​ꦧꦼꦤꦼꦂ​꧈​ꦱꦶꦁ​ꦱꦶꦗꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺ꧈​ꦤꦁꦔꦶꦁ​ꦭꦶꦪꦤꦺ​ꦲꦗ​ꦢꦶꦭꦶꦂꦮꦏ꧀ꦏꦏꦺ꧉​ 24ꦏꦺꦴꦮꦺ​ꦥꦚ꧀ꦕꦺꦤ꧀ꦥꦼꦤꦸꦤ꧀ꦠꦸꦤ꧀ꦥꦼꦤꦸꦤ꧀ꦠꦸꦤ꧀ꦱꦶꦁ​ꦥꦶꦕꦼꦏ꧀​꧉​ꦊꦩꦸꦠ꧀​ꦲꦩ꧀ꦧꦺꦴꦏ꧀ꦱꦫꦶꦁꦱꦁꦏꦲꦺꦴꦩ꧀ꦧꦺꦤ꧀ꦲꦺꦴꦩ꧀ꦧꦺꦤ꧀ꦩꦸ​꧈​ꦤꦁꦔꦶꦁ​ꦲꦸꦤ꧀ꦠ​ꦲꦩ꧀ꦧꦺꦴꦏ꧀ꦲꦺꦭꦺꦏ꧀꧈​

25꧋“ꦕꦶꦭꦏ​ꦏꦺꦴꦮꦺ​꧈​ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥ꦳ꦫꦶꦱꦶ​!ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦭꦩꦶꦱ꧀꧈​ꦲꦮꦶꦠ꧀ꦕꦁꦏꦶꦂ​ꦭꦤ꧀ꦥꦶꦫꦶꦁ​ꦲꦩ꧀ꦧꦺꦴꦏ꧀ꦉꦱꦶꦏ꧀ꦏꦶ​ꦚ꧀ꦗꦧꦤꦺ​꧈​ꦤꦁꦔꦶꦁ​ꦚ꧀ꦗꦼꦫꦺꦴꦤꦺ​ꦏꦼꦧꦼꦏ꧀ꦏꦫꦺꦴ​ꦉꦉꦒꦼꦠ꧀ꦱꦁꦏꦲꦼꦁꦒꦺꦴꦤ꧀ꦩꦸ​ꦔꦿꦩ꧀ꦥꦱ꧀ ꦗꦭꦂꦫꦤ꧀ꦱꦁꦏꦱꦿꦏꦃꦩꦸ​꧉​ 26ꦏꦺꦴꦮꦺ​ꦥꦚ꧀ꦕꦺꦤ꧀ꦮꦺꦴꦁ​ꦥ꦳ꦫꦶꦱꦶ​ꦱꦶꦁ​ꦥꦶꦕꦼꦏ꧀​꧉​ꦕꦁꦏꦶꦂ​ꦭꦤ꧀ꦥꦶꦫꦶꦁ​ꦏꦸꦮꦶ​ꦏꦸꦢꦸ​ꦲꦩ꧀ꦧꦺꦴꦏ꧀ꦉꦱꦶꦏ꧀ꦏꦶ​ꦚ꧀ꦗꦼꦫꦺꦴꦤꦺ​ꦤ꧀ꦢꦶꦱꦶꦏ꧀ ꦩꦼꦁꦏꦺꦴ​ꦚ꧀ꦗꦧꦤꦺ​ꦲꦸꦒ​ꦢꦢꦶ​ꦉꦱꦶꦏ꧀꧈​

27꧋“ꦕꦶꦭꦏ​ꦏꦺꦴꦮꦺ​꧈​ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥ꦳ꦫꦶꦱꦶ​!ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦭꦩꦶꦱ꧀꧈​ꦲꦮꦶꦠ꧀ꦏꦺꦴꦮꦺ​ꦏꦸꦮꦶ​ꦏꦪ​ꦏꦸꦧꦸꦂꦫꦤ꧀ꦱꦶꦁ​ꦢꦶꦲꦼꦕꦺꦠ꧀ꦥꦸꦠꦶꦃ​꧉​ꦱꦁꦏꦚ꧀ꦗꦧ​ꦥꦚ꧀ꦕꦺꦤ꧀ꦏꦺꦠꦺꦴꦏ꧀ꦏꦺ​ꦲꦥꦶꦏ꧀ ꦤꦁꦔꦶꦁ​ꦚ꧀ꦗꦼꦫꦺꦴꦤꦺ​ꦏꦼꦧꦼꦏ꧀ꦏꦫꦺꦴ​ꦧꦭꦸꦁꦔꦺ​ꦮꦺꦴꦁ​ꦩꦠꦶ​ꦱꦶꦁ​ꦮꦶꦱ꧀ꦧꦺꦴꦱꦺꦴꦏ꧀ꦏꦧꦺꦃ​꧉​ 28ꦏꦺꦴꦮꦺ​ꦥꦚ꧀ꦕꦺꦤ꧀ꦏꦪ​ꦔꦺꦴꦤꦺꦴ​ꦏꦸꦮꦶ​:ꦱꦁꦏꦚ꧀ꦗꦧ​ꦏꦺꦴꦮꦺ​ꦏꦺꦠꦺꦴꦏ꧀ꦲꦥꦶꦏ꧀ ꦤꦁꦔꦶꦁ​ꦚ꧀ꦗꦼꦫꦺꦴꦤꦺ​ꦧꦠꦶꦤ꧀ꦩꦸ​ꦏꦼꦧꦼꦏ꧀ꦊꦭꦩꦶꦱ꧀ꦭꦤ꧀ꦲꦭ​꧉​

29꧋“ꦕꦶꦭꦏ​ꦏꦺꦴꦮꦺ​꧈​ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥ꦳ꦫꦶꦱꦶ​꧉​ꦏꦺꦴꦮꦺ​ꦏꦸꦮꦶ​ꦥꦚ꧀ꦕꦺꦤ꧀ꦮꦺꦴꦁ​ꦭꦩꦶꦱ꧀꧈​ꦏꦺꦴꦮꦺ​ꦥꦢ​ꦔ꧀ꦒꦮꦺꦏ꧀ꦏꦏꦺꦏꦸꦧꦸꦂꦫꦤ꧀ꦏꦁꦒꦺꦴ​ꦥꦫ​ꦤꦧꦶ​ꦭꦤ꧀ꦔꦥꦶꦏ꧀ꦏꦥꦶꦏ꧀ꦏꦏꦺꦮꦠꦸ​ꦥꦼꦁꦔꦺꦭꦶꦁꦔꦺꦭꦶꦁꦔꦺ​ꦮꦺꦴꦁꦮꦺꦴꦁ​ꦱꦶꦁ​ꦲꦥꦶꦏ꧀ꦲꦸꦫꦶꦥ꧀ꦥꦺ꧉​ 30ꦏꦺꦴꦮꦺ​ꦥꦢ​ꦔꦺꦴꦩꦺꦴꦁ:'ꦱꦼꦩꦸꦁꦒꦺꦴꦤ꧀ꦤꦺꦲꦏꦸ​ꦲꦸꦫꦶꦥ꧀ꦲꦶꦁ​ꦗꦩꦤ꧀ꦤꦺ​ꦥꦫ​ꦩ꧀ꦧꦃꦩ꧀ꦧꦲꦤ꧀ꦏꦸ꧈​ꦲꦏꦸ​ꦩꦼꦱ꧀ꦠꦶꦲꦺꦴꦫ​ꦩꦠꦺꦤ꧀ꦤꦶ​ꦥꦫ​ꦤꦧꦶ​꧉'​ 31ꦢꦢꦶꦤꦺ​ꦏꦺꦴꦮꦺ​ꦢꦺꦮꦺꦥꦢ​ꦔꦏꦺꦴꦤ꧀ꦤꦶ​ꦤꦺꦏ꧀ꦏꦺꦴꦮꦺ​ꦏꦸꦮꦶ​ꦠꦸꦫꦸꦤ꧀ꦤꦤ꧀ꦤꦺ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦩꦠꦺꦤ꧀ꦤꦶ​ꦥꦫ​ꦤꦧꦶ​꧉​ 32ꦏꦺꦴꦤꦺꦴ​ꦢꦶꦠꦼꦫꦸꦱ꧀ꦱꦏꦺꦭꦤ꧀ꦢꦶꦠꦸꦠꦸꦏ꧀ꦏꦏꦺꦥꦶꦱꦤ꧀ꦢꦺꦴꦱꦢꦺꦴꦱꦤꦺ​ꦩ꧀ꦧꦃꦩ꧀ꦧꦲꦤ꧀ꦩꦸꦏꦸꦮꦶ​! 33ꦏꦺꦴꦮꦺ​ꦏꦸꦮꦶ​ꦲꦸꦭ​ꦭꦤ꧀ꦲꦤꦏ꧀ꦏꦤ꧀ꦲꦸꦭ​꧉​ꦏꦼꦥꦿꦶꦪꦺ​ꦲꦼꦁꦒꦺꦴꦤ꧀ꦩꦸ​ꦲꦉꦥ꧀ꦚꦶꦩ꧀ꦥꦁꦔꦶꦱꦼꦠꦿꦥꦤ꧀ꦩꦸꦤꦁꦤꦼꦫꦏ? 34ꦩꦸꦭꦤꦺ​ꦢꦶꦫꦸꦔꦺꦴꦏ꧀ꦏꦏꦺ​ꦱꦶꦁ​ꦲꦥꦶꦏ꧀꧈​ꦲꦏꦸ​ꦧꦏꦭ꧀ꦔꦺꦴꦁꦏꦺꦴꦤ꧀ꦤꦧꦶꦤꦧꦶ​꧈​ꦮꦺꦴꦁꦮꦺꦴꦁ​ꦱꦶꦁ​ꦤ꧀ꦢꦸꦮꦺꦏꦮꦼꦫꦸꦃꦭꦤ꧀ꦒꦸꦫꦸꦒꦸꦫꦸ​ꦠꦼꦏ​ꦤꦁꦔ꧀ꦒꦺꦴꦤ꧀ꦩꦸ​꧉​ꦱꦭꦺꦴꦏ꧀ꦏꦺ​ꦧꦏꦭ꧀ꦲꦩ꧀ꦧꦺꦴꦏ꧀ꦥꦠꦺꦤ꧀ꦤꦶ​ꦭꦤ꧀ꦲꦩ꧀ꦧꦺꦴꦏ꧀ꦥꦼꦤ꧀ꦠꦺꦁ꧈​ꦭꦶꦪꦤꦺ​ꦩꦼꦤꦺꦃ​ꦧꦏꦭ꧀ꦲꦩ꧀ꦧꦺꦴꦏ꧀ꦥꦼꦕꦸꦠ꧀ꦠꦶ​ꦤꦁꦱꦶꦤꦒꦸꦏ꧀ꦩꦸꦲꦥ​ꦲꦩ꧀ꦧꦺꦴꦏ꧀ꦲꦺꦴꦪꦏ꧀ꦲꦺꦴꦪꦏ꧀ꦱꦁꦏꦏꦸꦠꦱꦶꦗꦶꦤꦺ​ꦭꦸꦔ​ꦤꦁꦏꦸꦠꦭꦶꦪꦤꦺ​꧉​ 35ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦏꦺꦴꦮꦺ​ꦧꦏꦭ꧀ꦢꦶꦱꦼꦠꦿꦥ꧀ ꦗꦭꦂꦫꦤ꧀ꦏꦺꦴꦮꦺ​ꦥꦢ​ꦩꦠꦺꦤ꧀ꦤꦶ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦱꦭꦃ​꧈​ꦮꦶꦮꦶꦠ꧀ꦄꦧꦺꦭ꧀ꦠꦼꦏꦤꦺ​ꦯꦏꦫꦶꦪ꧈​ꦲꦤꦏ꧀ꦏꦺ​ꦧꦺꦫꦺꦏꦶꦪ​꧈​ꦱꦶꦁ​ꦲꦩ꧀ꦧꦺꦴꦏ꧀ꦥꦠꦺꦤ꧀ꦤꦶ​ꦤꦁꦠꦼꦔꦃꦲꦺ​ꦥꦁꦒꦺꦴꦤ꧀ꦤꦤ꧀ꦱꦸꦕꦶ​ꦭꦤ꧀ꦲꦭ꧀ꦠꦂ꧉​ 36ꦥꦢ​ꦔꦼꦂꦠꦶꦪ​:ꦏꦧꦺꦃ​ꦢꦺꦴꦱ​ꦏꦸꦮꦶ​ꦧꦏꦭ꧀ꦢꦶꦠꦶꦧꦏ꧀ꦏꦏꦺꦤꦁꦠꦔꦤ꧀ꦤꦺ​ꦮꦺꦴꦁꦮꦺꦴꦁ​ꦲꦶꦁ​ꦗꦩꦤ꧀ꦱꦲꦶꦏꦶ​꧉​”

꧋ꦏꦸꦠꦪꦺꦫꦸꦱꦭꦺꦩ꧀ꦧꦏꦭ꧀ꦢꦶꦫꦸꦱꦏ꧀꧈​

37꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​ꦧꦧ꧀ꦏꦸꦠꦪꦺꦫꦸꦱꦭꦺꦩ꧀:“ꦪꦺꦫꦸꦱꦭꦺꦩ꧀ ꦪꦺꦫꦸꦱꦭꦺꦩ꧀!ꦏꦺꦴꦮꦺ​ꦮꦶꦱ꧀ꦩꦠꦺꦤ꧀ꦤꦶ​ꦤꦧꦶꦤꦧꦶ​ꦭꦤ꧀​ꦩ꧀ꦧꦤ꧀ꦢꦼꦩ꧀ꦩꦶꦮꦠꦸ​ꦩꦫꦁ​ꦮꦺꦴꦁꦮꦺꦴꦁ​ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦶꦱ꧀ꦥꦶꦁ​ꦥꦶꦫ​ꦲꦼꦁꦒꦺꦴꦤ꧀ꦏꦸ​ꦏꦼꦥꦺꦔꦶꦤ꧀​ꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦤꦏ꧀ꦲꦤꦏ꧀ꦩꦸ​ꦏꦪ​ꦥꦶꦠꦶꦏ꧀ꦧꦧꦺꦴꦤ꧀ꦱꦶꦁ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦤꦏ꧀ꦲꦤꦏꦤ꧀ꦤꦺꦤꦁꦔꦶꦱꦺꦴꦂꦫꦺ​ꦱ꧀ꦮꦶꦮꦶꦤꦺ​꧉​ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦒꦼꦊꦩ꧀꧈​ 38ꦠꦶꦠꦺꦤ꧀ꦤꦤ꧀ꦤ​꧈​ꦲꦺꦴꦩꦃꦩꦸ​ꦧꦏꦭ꧀ꦢꦶꦠꦶꦁꦒꦭ꧀ꦱꦸꦮꦸꦁ​ꦭꦤ꧀ꦢꦢꦶ​ꦱꦼꦥꦶ​꧉​ 39ꦢꦶꦫꦸꦔꦺꦴꦏ꧀ꦏꦏꦺ​ꦲꦺꦴꦩꦺꦴꦁꦏꦸꦲꦶꦏꦶ​:ꦮꦶꦮꦶꦠ꧀ꦱꦲꦶꦏꦶ​ꦏꦺꦴꦮꦺ​ꦲꦺꦴꦫ​ꦧꦏꦭ꧀ꦮꦼꦫꦸꦃ​ꦲꦏꦸ​꧈​ꦔꦤ꧀ꦠꦶ​ꦏꦺꦴꦮꦺ​ꦧꦏꦭ꧀ꦔꦺꦴꦩꦺꦴꦁ:'ꦤꦩ꧀ꦥꦲ​ꦧꦼꦂꦏꦃ​ꦱꦶꦁ​ꦠꦼꦏ​ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​꧉​’”

↑ ↑ ↑


꧋ꦒꦿꦺꦗ​ꦒꦼꦢꦺ​ꦧꦏꦭ꧀ꦢꦶꦫꦸꦱꦏ꧀꧈​

꧇​꧒꧔꧇​ 1꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ꦱꦁꦏꦒꦿꦺꦗ​ꦒꦼꦢꦺ​ꦏꦺꦴꦤꦺꦴ​꧉​ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦠꦼꦫꦸꦱ꧀ꦥꦢ​ꦩꦫ​ꦭꦤ꧀​ꦤ꧀ꦢꦸꦢꦸꦃꦲꦏꦺꦒꦼꦢꦺꦴꦁꦒꦼꦢꦺꦴꦁꦔꦺꦒꦿꦺꦗ​ꦒꦼꦢꦺ​ꦩꦫꦁ​ꦢꦺꦏ꧀ꦤꦺ​꧉​ 2ꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦥꦢ​ꦔꦼꦩꦠ꧀ꦠꦏꦺꦒꦼꦢꦺꦴꦁꦒꦼꦢꦺꦴꦁꦏꦸꦮꦶ​꧈​ꦤꦁꦔꦶꦁ​ꦥꦢ​ꦔꦼꦂꦠꦶꦪ​꧈​ꦲꦩ꧀ꦧꦺꦱꦸꦏ꧀ꦧꦏꦭ꧀ꦲꦺꦴꦫ​ꦲꦺꦤꦺꦁꦮꦠꦸ​ꦱꦶꦗꦶ​ꦮꦲꦺ​ꦠꦼꦩꦸꦩ꧀ꦥꦁ​ꦭꦶꦪꦤꦺ​꧉​ꦏꦧꦺꦃ​ꦲꦩ꧀ꦧꦿꦸꦏ꧀ꦢꦢꦶ​ꦫꦠ​ꦏꦫꦺꦴ​ꦊꦩꦃꦲꦺ​꧉​”

꧋ꦧꦧ꧀ꦏꦫꦸꦱꦏ꧀ꦏꦤ꧀ꦭꦤ꧀ꦏꦱꦁꦱꦫꦤ꧀꧈​

3꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦸꦁꦒꦃ​ꦤꦁꦒꦸꦤꦸꦁ​ꦎꦭꦺꦥ꦳꧀ꦭꦤ꧀​ꦚ꧀ꦗꦒꦺꦴꦁꦤꦁꦏꦺꦴꦤꦺꦴ​꧉​ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦠꦼꦫꦸꦱ꧀ꦥꦢ​ꦩꦫ​꧉​ꦏꦼꦗꦧ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦭꦶꦪꦤꦺ​꧉​ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦢꦺꦏ꧀ꦤꦺ​:“ꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦔꦼꦂꦠꦶ​ꦏꦥꦤ꧀ꦏꦸꦮꦶ​ꦧꦏꦭ꧀ꦭꦺ​ꦏ꧀ꦭꦏꦺꦴꦤ꧀꧈​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦏꦼꦥꦺꦔꦶꦤ꧀ꦔꦼꦂꦠꦶ​ꦲꦥ​ꦠꦤ꧀ꦢꦠꦤ꧀ꦢꦤꦺꦠꦼꦏꦤꦺ​ꦒꦸꦱ꧀ꦠꦶ​ꦭꦤ꧀ꦲꦥ​ꦠꦤ꧀ꦢꦠꦤ꧀ꦢꦤꦺꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀?”

4꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦥꦢ​ꦱꦶꦁ​ꦲꦠꦶꦲꦠꦶ꧈​ꦲꦗ​ꦱꦩ꧀ꦥꦺꦏ꧀ꦏꦼꦤꦺꦁꦢꦶꦲꦥꦸꦱ꧀ꦱꦶ​ꦮꦺꦴꦁ​꧉​ 5ꦲꦮꦶꦠ꧀ꦲꦺꦴꦏꦺꦃꦮꦺꦴꦁ​ꦧꦏꦭ꧀ꦠꦼꦏ​ꦔꦁꦒꦺꦴ​ꦗꦼꦤꦼꦁꦏꦸ​ꦭꦤ꧀ꦔꦺꦴꦩꦺꦴꦁ:'ꦲꦏꦸ​ꦲꦶꦏꦶ​ꦑꦿꦶꦱ꧀ꦠꦸꦱ꧀!’ꦭꦤ꧀ꦩꦼꦁꦏꦺꦴꦤꦺꦴ​ꦏꦸꦮꦶ​ꦮꦺꦴꦁ​ꦥꦶꦫꦁꦥꦶꦫꦁ​ꦧꦏꦭ꧀ꦢꦶꦱꦱꦂꦫꦏꦺ꧉​ 6ꦏꦺꦴꦮꦺ​ꦧꦏꦭ꧀ꦏꦿꦸꦔꦸ​ꦏꦧꦂꦏꦧꦂꦧꦧ꧀ꦥꦼꦥꦼꦫꦁꦔꦤ꧀ꦭꦤ꧀ꦧꦧ꧀ꦥꦼꦥꦼꦫꦁꦔꦤ꧀ꦱꦶꦁ​ꦧꦏꦭ꧀ꦠꦼꦏ​꧉​ꦤꦁꦔꦶꦁ​ꦲꦗ​ꦥꦢ​ꦧꦶꦔꦸꦁ​꧈​ꦲꦮꦶꦠ꧀ꦏꦸꦮꦶ​ꦏꦧꦺꦃ​ꦏꦸꦢꦸ​ꦏ꧀ꦭꦏꦺꦴꦤ꧀꧈​ꦤꦁꦔꦶꦁ​ꦏꦸꦮꦶ​ꦢꦸꦫꦸꦁ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧉​ 7ꦲꦮꦶꦠ꧀ꦧꦁꦱ​ꦱꦶꦁ​ꦱꦶꦗꦶ​ꦧꦏꦭ꧀ꦥꦼꦫꦁ​ꦔ꧀ꦭꦮꦤ꧀ꦧꦁꦱ​ꦭꦶꦪꦤꦺ​ꦭꦤ꧀ꦤꦼꦒꦫ​ꦱꦶꦗꦶꦤꦺ​ꦧꦏꦭ꧀ꦥꦼꦫꦁ​ꦔ꧀ꦭꦮꦤ꧀ꦤꦼꦒꦫ​ꦭꦶꦪꦤꦺ​꧉​ꦤꦁꦲꦼꦤ꧀ꦢꦶꦲꦼꦤ꧀ꦢꦶ​ꦧꦏꦭ꧀ꦲꦺꦤꦺꦁꦏꦸꦫꦁ​ꦥꦔꦤ꧀ꦭꦤ꧀ꦭꦶꦤ꧀ꦢꦸ꧉​ 8ꦤꦁꦔꦶꦁ​ꦏꦸꦮꦶ​ꦩꦲꦸ​ꦏꦧꦺꦃ​ꦤꦩꦸꦁ​ꦮꦶꦮꦶꦠ꧀ꦠꦤ꧀ꦤꦺ​ꦏꦱꦁꦱꦫꦤ꧀ꦱꦏ꧀ꦢꦸꦫꦸꦁꦔꦺꦗꦩꦤ꧀ꦲꦚꦂ​ꦠꦼꦏ​꧈​ꦏꦪ​ꦮꦺꦴꦁ​ꦱꦶꦁ​ꦔ꧀ꦭꦫꦤꦶ​ꦏꦲꦺ​꧈​ꦱꦏ꧀ꦢꦸꦫꦸꦁꦔꦺꦩ꧀ꦧꦪꦶ꧉​

9꧋“ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦏꦺꦴꦮꦺ​ꦧꦏꦭ꧀ꦢꦶꦕꦼꦏꦼꦭ꧀ꦭꦤ꧀ꦢꦶꦥꦱꦿꦃꦲꦏꦺ꧈​ꦱꦸꦥꦪ​ꦢꦶꦥꦶꦭꦂꦫ​ꦭꦤ꧀ꦢꦶꦥꦠꦺꦤ꧀ꦤꦶ​꧉​ꦱꦏ꧀ꦏꦺꦃꦲꦺꦧꦁꦱ​ꦧꦏꦭ꧀ꦥꦢ​ꦱꦼꦔꦶꦠ꧀ꦏꦫꦺꦴ​ꦏꦺꦴꦮꦺ​꧈​ꦗꦭꦂꦫꦤ꧀ꦏꦺꦴꦮꦺ​ꦩꦸꦫꦶꦢ꧀ꦏꦸ​꧉​ 10ꦩꦸꦭꦤꦺ​ꦲꦺꦴꦏꦺꦃꦮꦺꦴꦁ​ꦲꦸꦒ​ꦱꦶꦁ​ꦲꦺꦴꦫ​ꦧꦏꦭ꧀ꦠꦼꦩꦼꦤ꧀ꦩꦺꦭꦸ​ꦲꦏꦸ​꧈​ꦤꦁꦔꦶꦁ​ꦥꦢ​ꦱꦼꦩ꧀ꦥ꧀ꦭꦏ꧀ꦥꦼꦔꦤ꧀ꦢꦼꦭ꧀ꦭꦺ​꧉​ꦱꦶꦁ​ꦱꦶꦗꦶ​ꦧꦏꦭ꧀ꦩꦱꦿꦃꦲꦏꦺꦭꦶꦪꦤꦺ​ꦱꦸꦥꦪ​ꦢꦶꦥꦶꦭꦂꦫ​ꦭꦤ꧀ꦱꦶꦁ​ꦱꦶꦗꦶ​ꦧꦏꦭ꧀ꦚꦼꦔꦶꦠ꧀ꦠꦶ​ꦭꦶꦪꦤꦺ​꧉​ 11ꦲꦺꦴꦏꦺꦃꦤꦧꦶ​ꦥꦭ꧀ꦱꦸ​ꦧꦏꦭ꧀​ꦚ꧀ꦗꦼꦢꦸꦭ꧀ꦭꦤ꧀ꦚꦤ꧀ꦢꦶꦁꦮꦺꦴꦁ​ꦲꦺꦴꦏꦺꦃ꧉​ 12ꦠꦸꦩꦶꦤ꧀ꦢꦏ꧀ꦲꦭ​ꦧꦏꦭ꧀ꦠꦩ꧀ꦧꦃ​ꦲꦺꦴꦏꦺꦃ꧈​ꦩꦸꦭꦤꦺ​ꦏꦠꦿꦺꦱ꧀ꦤꦤ꧀ꦧꦏꦭ꧀ꦱꦸꦢ​꧉​ 13ꦤꦁꦔꦶꦁ​ꦱꦥ​ꦱꦶꦁ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦠꦼꦏꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧈​ꦏꦸꦮꦶ​ꦱꦶꦁ​ꦧꦏꦭ꧀ꦱ꧀ꦭꦩꦼꦠ꧀꧈​ 14ꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦢꦶꦒꦼꦭꦂ​ꦤꦁꦱꦏ꧀ꦗꦒꦠ꧀ ꦱꦸꦥꦪ​ꦏꦧꦺꦃ​ꦧꦁꦱ​ꦥꦢ​ꦔꦼꦂꦠꦶ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦏ꧀ꦭꦏꦺꦴꦤ꧀ ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀ꦧꦏꦭ꧀ꦠꦼꦏ​꧉​”

꧋ꦠꦼꦏꦤꦺ​ꦱꦁꦱꦫ​ꦒꦼꦢꦺ​꧉​

15꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦏꦺꦴꦮꦺ​ꦧꦏꦭ꧀ꦮꦼꦫꦸꦃ​ꦔ꧀ꦒꦼꦒꦶꦭ꧀ꦭꦤ꧀ꦤꦺ​ꦏꦫꦸꦱꦏ꧀ꦏꦤ꧀ꦔꦢꦼꦏ꧀ꦤꦁꦥꦁꦒꦺꦴꦤ꧀ꦤꦤ꧀ꦱꦸꦕꦶ​꧉​ꦤꦧꦶ​ꦣꦤꦶꦌꦭ꧀ꦮꦶꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦲꦶꦏꦸ​꧉​ꦱꦥ​ꦱꦶꦁ​ꦩꦕ​ꦲꦶꦏꦸ​ꦩꦶꦏꦶꦂꦫ​ꦱꦶꦁ​ꦲꦥꦶꦏ꧀ ꦱꦸꦥꦪ​ꦧꦶꦱ​ꦢꦸꦤꦸꦁꦠꦼꦒꦼꦱ꧀ꦱꦺ​꧉​ 16ꦤꦺꦏ꧀ꦏꦸꦮꦶ​ꦏ꧀ꦭꦏꦺꦴꦤ꧀ ꦮꦺꦴꦁꦮꦺꦴꦁ​ꦱꦶꦁ​ꦤꦁꦧꦮꦃꦪꦸꦢꦺꦪ​ꦥꦢ​ꦩ꧀​ꦧ꧀ꦭꦪꦸꦤꦺꦤꦁꦒꦸꦤꦸꦁꦒꦸꦤꦸꦁꦔꦤ꧀꧈​ 17ꦮꦺꦴꦁꦮꦺꦴꦁ​ꦱꦶꦁ​ꦲꦶꦗꦶꦏ꧀ꦤꦁꦤ꧀ꦢꦸꦮꦸꦂꦲꦺꦴꦩꦃ​꧈​ꦲꦗ​ꦥꦢ​ꦩꦼꦢꦸꦤ꧀​ꦚ꧀ꦗꦶꦏꦸꦏ꧀ꦧꦫꦁꦧꦫꦁꦔꦺ​ꦲꦺꦴꦩꦃꦲꦺ​꧉​ 18ꦮꦺꦴꦁꦮꦺꦴꦁ​ꦱꦶꦁ​ꦲꦶꦗꦶꦏ꧀ꦤꦁꦏꦼꦧꦺꦴꦤ꧀ ꦲꦗ​ꦥꦢ​ꦩꦸꦭꦶꦃ​ꦚ꧀ꦗꦶꦏꦸꦏ꧀ꦱꦭꦶꦤ꧀ꦤꦺ꧉​ 19ꦩꦼꦭꦱ꧀ꦱꦏꦺꦧꦔꦼꦠ꧀ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦥꦢ​ꦩꦼꦠꦼꦁ​ꦭꦤ꧀ꦱꦶꦁ​ꦥꦢ​ꦚꦸꦱꦺꦴꦤ꧀ꦤꦶ​꧉​ 20ꦤ꧀ꦢꦼꦢꦺꦴꦔꦲ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦲꦼꦁꦒꦺꦴꦤ꧀ꦩꦸ​ꦭꦸꦔ​ꦲꦺꦴꦫ​ꦠꦶꦧ​ꦮꦪꦃ​ꦲꦢꦼꦩ꧀ꦲꦥ​ꦢꦶꦤ​ꦱꦧꦠ꧀꧈​ 21ꦲꦮꦶꦠ꧀ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦧꦏꦭ꧀ꦲꦺꦤꦺꦁꦏꦱꦸꦱꦃꦲꦤ꧀ꦒꦼꦢꦺ​ꦧꦔꦼꦠ꧀ ꦱꦶꦁ​ꦢꦸꦫꦸꦁ​ꦠꦲꦸ​ꦏ꧀ꦭꦏꦺꦴꦤ꧀ꦮꦶꦮꦶꦠ꧀ꦗꦒꦠ꧀ꦢꦶꦒꦮꦺ​ꦠꦼꦏꦤ꧀ꦱꦼꦥꦿꦺꦤꦺ​꧉​ꦭꦤ꧀ꦏꦱꦸꦱꦃꦲꦤ꧀ꦒꦼꦢꦺ​ꦱꦶꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦺꦴꦫ​ꦧꦏꦭ꧀​ꦏ꧀ꦭꦏꦺꦴꦤ꧀ꦩꦼꦤꦺꦃ​꧉​ 22ꦱꦼꦩꦸꦁꦒꦺꦴꦤ꧀ꦤꦺꦮꦏ꧀ꦠꦸꦩꦸꦏꦱꦸꦱꦃꦲꦤ꧀ꦏꦸꦮꦶ​ꦲꦺꦴꦫ​ꦢꦶꦕꦼꦏꦏ꧀ꦏꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦼꦱ꧀ꦠꦶꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦧꦶꦱ​ꦲꦸꦫꦶꦥ꧀꧈​ꦤꦁꦔꦶꦁ​ꦗꦭꦂꦫꦤ꧀ꦱꦁꦏꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦢꦶꦥꦶꦭꦶꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦏ꧀ꦠꦸ​ꦏꦸꦮꦶ​ꦢꦶꦕꦼꦏꦏ꧀ꦏꦏꦺ​꧉​

23꧋“ꦲꦶꦁ​ꦮꦏ꧀ꦠꦸ​ꦏꦸꦮꦶ​꧈​ꦤꦺꦏ꧀ꦲꦺꦤꦺꦁꦮꦺꦴꦁ​ꦔꦺꦴꦩꦺꦴꦁꦩꦫꦁ​ꦏꦺꦴꦮꦺ​:'ꦭꦃ​ꦲꦶꦏꦶ​ꦑꦿꦶꦱ꧀ꦠꦸꦱ꧀ꦤꦁꦏꦺꦤꦺ​꧈'​ꦲꦥ​'ꦭꦃ​ꦏꦲꦺ​ꦑꦿꦶꦱ꧀ꦠꦸꦱ꧀ꦤꦁꦏꦤ​꧈'​ꦲꦗ​ꦥꦢ​ꦔꦤ꧀ꦢꦼꦭ꧀꧈​ 24ꦲꦮꦶꦠ꧀ꦏꦿꦶꦱ꧀ꦡꦸꦱ꧀ꦏꦿꦶꦱ꧀ꦡꦸꦱ꧀ꦥꦭ꧀ꦱꦸ​ꦭꦤ꧀ꦤꦧꦶꦤꦧꦶ​ꦥꦭ꧀ꦱꦸ​ꦧꦏꦭ꧀ꦥꦢ​ꦚ꧀ꦗꦼꦢꦸꦭ꧀ꦭꦤ꧀ꦧꦏꦭ꧀ꦥꦢ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀ꦭꦤ꧀ꦠꦤ꧀ꦢꦠꦤ꧀ꦢꦱꦶꦁ​ꦔ꧀ꦒꦸꦩꦸꦤ꧀ꦤꦏꦺꦏꦁꦒꦺꦴ​ꦚꦤ꧀ꦢꦶꦁꦮꦺꦴꦁ​꧉​ꦩꦭꦃ​ꦱꦼꦩꦸꦁꦒꦺꦴꦤ꧀ꦤꦺꦧꦶꦱ​ꦔꦺꦴꦤꦺꦴ​ꦲꦉꦥ꧀ꦚꦤ꧀ꦢꦶꦁꦥꦫ​ꦥꦶꦭꦶꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 25ꦩꦸꦭꦤꦺ​ꦥꦢ​ꦢꦶꦲꦺꦭꦶꦁꦔꦺꦭꦶꦁ​!ꦲꦏꦸ​ꦮꦶꦱ꧀ꦔꦺꦴꦩꦺꦴꦁꦔꦶꦏꦺꦴꦮꦺ​ꦱꦏ꧀ꦢꦸꦫꦸꦁꦔꦺꦏꦸꦮꦶ​ꦩꦲꦸ​ꦏ꧀ꦭꦏꦺꦴꦤ꧀꧈​

26꧋“ꦤꦺꦏ꧀ꦲꦺꦤꦺꦁꦮꦺꦴꦁ​ꦔꦺꦴꦩꦺꦴꦁꦔꦶꦏꦺꦴꦮꦺ​:'ꦭꦃ​ꦏꦲꦺ​ꦑꦿꦶꦱ꧀ꦠꦸꦱ꧀ꦤꦁꦮꦸꦱ꧀ꦠꦺꦤ꧀꧈'​ꦏꦺꦴꦮꦺ​ꦲꦗ​ꦩ꧀ꦧꦿꦤ꧉​ꦲꦥ​ꦤꦺꦏ꧀ꦮꦺꦴꦁꦮꦺꦴꦁ​ꦔꦺꦴꦩꦺꦴꦁ:'ꦭꦃ​ꦏꦲꦺ​ꦢꦺꦏ꧀ꦤꦺꦤ꧀ꦢꦼꦭꦶꦏ꧀ꦤꦁꦏꦤ​꧈'​ꦏꦺꦴꦮꦺ​ꦲꦗ​ꦔꦤ꧀ꦢꦼꦭ꧀꧈​ 27ꦲꦮꦶꦠ꧀ꦏꦪ​ꦲꦼꦁꦒꦺꦴꦤꦺ​ꦏ꧀ꦭꦺꦭꦥ꧀ꦥꦺꦧ꧀ꦊꦢꦺꦏ꧀ꦔꦼꦧꦾꦂꦱꦁꦏꦮꦺꦠꦤ꧀ꦭꦤ꧀ꦥꦢꦁꦔꦺꦱꦼꦩ꧀ꦭꦺꦴꦫꦺꦴꦠ꧀ꦠꦼꦏꦤ꧀ꦏꦸꦭꦺꦴꦤ꧀ ꦩꦼꦁꦏꦺꦴꦤꦺꦴ​ꦲꦩ꧀ꦧꦺꦱꦸꦏ꧀ꦠꦼꦏꦤꦺ​ꦲꦤꦏ꧀ꦏꦺ​ꦩꦤꦸꦁꦱ​꧉​

28꧋“ꦤꦁꦲꦼꦤ꧀ꦢꦶ​ꦱꦶꦁ​ꦲꦺꦤꦺꦁꦧꦠꦁ꧈​ꦩꦼꦱ꧀ꦠꦶꦩꦤꦸꦏ꧀ꦒꦒꦏ꧀ꦥꦢ​ꦔ꧀ꦭꦸꦩ꧀ꦥꦸꦏ꧀꧈​”

꧋ꦠꦼꦏꦤꦺ​ꦲꦤꦏ꧀ꦏꦺ​ꦩꦤꦸꦁꦱ​꧉​

29꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:“ꦱꦏ꧀ꦮꦶꦱ꧀ꦱꦺ​ꦮꦪꦃ​ꦏꦱꦁꦱꦫꦤ꧀ꦏꦸꦮꦶ​꧈​ꦱꦽꦔꦺꦔꦺ​ꦧꦏꦭ꧀ꦢꦢꦶ​ꦥꦼꦠꦼꦁ​ꦭꦤ꧀​ꦩ꧀ꦧꦸꦭꦤ꧀ꦤꦺꦲꦺꦴꦫ​ꦧꦏꦭ꧀ꦱꦼꦩ꧀ꦭꦺꦴꦫꦺꦴꦠ꧀ꦩꦼꦤꦺꦃ​꧉​ꦭꦶꦤ꧀ꦠꦁꦭꦶꦤ꧀ꦠꦁ​ꦧꦏꦭ꧀ꦥꦢ​ꦠꦶꦧ​ꦱꦁꦏꦭꦔꦶꦠ꧀ꦭꦤ꧀ꦥꦔ꧀ꦮꦱꦥꦔ꧀ꦮꦱ​ꦤꦁꦭꦔꦶꦠ꧀ꦧꦏꦭ꧀ꦲ꦳ꦺꦴꦪꦏ꧀ꦏꦧꦺꦃ​꧉​ 30ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦤ꧀ꦢꦤꦺꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦏꦺꦠꦺꦴꦏ꧀ꦤꦁꦭꦔꦶꦠ꧀꧈​ꦱꦏ꧀ꦏꦺꦃꦲꦺꦧꦁꦱ​ꦤꦁꦧꦸꦩꦶ​ꦧꦏꦭ꧀ꦥꦢ​ꦤꦔꦶꦱ꧀ꦭꦤ꧀ꦱꦩ꧀ꦧꦠ꧀ꦭꦤ꧀ꦧꦏꦭ꧀ꦥꦢ​ꦮꦼꦫꦸꦃ​ꦲꦤꦏ꧀ꦏꦺ​ꦩꦤꦸꦁꦱ​ꦠꦼꦏ​ꦤꦁꦩꦺꦒꦤꦺ​ꦭꦔꦶꦠ꧀ ꦔꦁꦒꦺꦴ​ꦥꦔ꧀ꦮꦱ​ꦭꦤ꧀ꦏꦩꦸꦭꦾꦤ꧀ꦱꦶꦁ​ꦒꦼꦢꦺ​꧉​ 31ꦠꦿꦺꦴꦩ꧀ꦥꦺꦠ꧀ꦱꦶꦁ​ꦱ꧀ꦮꦫꦤꦺ​ꦧꦤ꧀ꦠꦼꦂ​ꦧꦔꦼꦠ꧀ꦧꦏꦭ꧀ꦢꦶꦲꦸꦤꦺꦏ꧀ꦏꦏꦺꦭꦤ꧀ꦥꦫ​ꦩꦸꦭꦺꦏꦠ꧀ꦧꦏꦭ꧀ꦢꦶꦏꦺꦴꦁꦏꦺꦴꦤ꧀ꦭꦸꦔ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦸꦩꦠ꧀ꦥꦶꦭꦶꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦁꦏꦮꦺꦠꦤ꧀ ꦏꦸꦭꦺꦴꦤ꧀ ꦭꦺꦴꦂꦭꦤ꧀ꦏꦶꦢꦸꦭ꧀ ꦱꦁꦏꦥꦺꦴꦗꦺꦴꦏ꧀ꦏꦺ​ꦧꦸꦩꦶ​ꦱꦶꦁ​ꦱꦶꦗꦶꦤꦺ​ꦠꦼꦏꦤ꧀ꦥꦺꦴꦗꦺꦴꦏ꧀ꦱꦶꦁ​ꦭꦶꦪꦤꦺ​꧉​”

꧋ꦥꦶꦮꦸꦭꦁ​ꦱꦁꦏꦮꦶꦠ꧀ꦲꦚ꧀ꦗꦶꦂ​꧉​

32꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦼꦏꦺꦏ꧀ꦏꦶꦥꦶꦮꦸꦭꦁ​ꦔꦺꦤꦺ​:“ꦲꦩ꧀ꦧꦺꦴꦏ꧀ꦢꦶꦠꦶꦠꦺꦤ꧀ꦤꦶ​ꦮꦶꦠ꧀ꦲꦚ꧀ꦗꦶꦂ​ꦏꦲꦺ​꧉​ꦤꦺꦏ꧀ꦥꦁꦔꦺ​ꦮꦶꦱ꧀ꦲꦶꦗꦺꦴ​ꦭꦤ꧀ꦩꦼꦩꦼꦱ꧀ꦭꦤ꧀ꦩꦺꦴꦭꦃꦲꦶꦩꦼꦠꦸ​ꦒꦺꦴꦢꦺꦴꦁꦔꦺ​꧈​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦮꦪꦃ​ꦥꦤꦱ꧀ꦮꦶꦱ꧀ꦕꦼꦢꦼꦏ꧀​꧉​ 33ꦩꦼꦁꦏꦺꦴꦤꦺꦴ​ꦲꦸꦒ​꧈​ꦤꦺꦏ꧀ꦏꦺꦴꦮꦺ​ꦮꦼꦫꦸꦃ​ꦱꦼꦩ꧀ꦧꦫꦁ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦩꦲꦸ​ꦏ꧀ꦭꦏꦺꦴꦤ꧀ ꦏꦸꦮꦶ​ꦠꦤ꧀ꦢꦤꦺꦤꦺꦏ꧀ꦠꦼꦏꦤꦺ​ꦲꦤꦏ꧀ꦏꦺ​ꦩꦤꦸꦁꦱ​ꦮꦶꦱ꧀ꦕꦼꦢꦼꦏ꧀​ꦧꦔꦼꦠ꧀꧈​ 34ꦥꦢ​ꦲꦺꦭꦶꦁꦔ​!ꦮꦺꦴꦁꦮꦺꦴꦁ​ꦱꦶꦁ​ꦲꦸꦫꦶꦥ꧀ꦲꦶꦁ​ꦗꦩꦤ꧀ꦲꦶꦏꦶ​ꦧꦏꦭ꧀ꦥꦢ​ꦩꦼꦤꦁꦔꦶ​ꦥꦽꦏꦫꦥꦽꦏꦫ​ꦏꦸꦮꦶ​ꦩꦲꦸ​ꦏꦧꦺꦃ​꧉​ 35ꦭꦔꦶꦠ꧀ꦭꦤ꧀ꦧꦸꦩꦶ​ꦧꦏꦭ꧀ꦲꦶꦭꦁ​꧈​ꦤꦁꦔꦶꦁ​ꦠꦼꦩ꧀ꦧꦸꦁꦏꦸ​ꦧꦏꦭ꧀ꦲꦺꦤꦺꦁꦠꦼꦫꦸꦱ꧀ꦱꦭꦮꦱ꧀ꦭꦮꦱ꧀ꦱꦺ​꧉​”

꧋ꦢꦶꦤꦤꦺ​ꦭꦤ꧀ꦗꦩ꧀ꦩꦺ​ꦲꦺꦴꦫ​ꦲꦺꦤꦺꦁꦱꦶꦁ​ꦔꦼꦂꦠꦶ​꧉​

36꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦧꦧ꧀ꦢꦶꦤꦤꦺ​ꦭꦤ꧀ꦗꦩ꧀ꦩꦺ​ꦠꦼꦏꦤꦺ​ꦲꦤꦏ꧀ꦏꦺ​ꦩꦤꦸꦁꦱ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦱꦶꦁ​ꦔꦼꦂꦠꦶ​꧉​ꦥꦫ​ꦩꦸꦭꦺꦏꦠ꧀ꦤꦁꦱ꧀ꦮꦂꦒ​ꦲꦺꦴꦫ​ꦔꦼꦂꦠꦶ​ꦭꦤ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦲꦺꦴꦫ​ꦔꦼꦂꦠꦶ​꧉​ꦱꦶꦁ​ꦔꦼꦂꦠꦶ​ꦤꦩꦸꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺ꧉​ 37ꦏꦪ​ꦗꦩꦤ꧀ꦤꦺ​ꦤꦧꦶ​ꦟꦺꦴꦮꦃ꧈​ꦩꦼꦁꦏꦺꦴꦤꦺꦴ​ꦲꦸꦒ​ꦲꦩ꧀ꦧꦺꦱꦸꦏ꧀ꦗꦩꦤ꧀ꦤꦺ​ꦠꦼꦏꦤꦺ​ꦲꦤꦏ꧀ꦏꦺ​ꦩꦤꦸꦁꦱ​꧉​ 38ꦲꦮꦶꦠ꧀ꦲꦶꦁ​ꦢꦶꦤꦢꦶꦤ​ꦱꦏ꧀ꦢꦸꦫꦸꦁꦔꦺꦲꦸꦢꦤ꧀ꦒꦼꦢꦺ​ꦠꦼꦏ​꧈​ꦮꦺꦴꦁꦮꦺꦴꦁ​ꦥꦢ​ꦩꦔꦤ꧀ꦔꦺꦴꦩ꧀ꦧꦺꦭꦤ꧀ꦏꦮꦶꦤ꧀ ꦔꦤ꧀ꦠꦶ​ꦢꦶꦤꦤꦺ​ꦲꦼꦁꦒꦺꦴꦤꦺ​ꦤꦧꦶ​ꦟꦺꦴꦮꦃꦩꦸꦁꦒꦃ​ꦤꦁꦏꦥꦭ꧀ꦭꦺ​꧉​ 39ꦮꦺꦴꦁꦮꦺꦴꦁ​ꦲꦺꦴꦫ​ꦥꦢ​ꦢꦸꦤꦸꦁꦲꦥ​ꦱꦶꦁ​ꦏ꧀ꦭꦏꦺꦴꦤ꧀ ꦔꦤ꧀ꦠꦶ​ꦠꦼꦏꦤꦺ​ꦲꦸꦢꦤ꧀ꦒꦼꦢꦺ​꧈​ꦠꦼꦫꦸꦱ꧀ꦥꦢ​ꦔꦼꦂꦠꦶ​꧉​ꦩꦼꦁꦏꦺꦴꦤꦺꦴ​ꦲꦸꦒ​ꦧꦏꦭ꧀ꦭꦺ​ꦊꦭꦏꦺꦴꦤꦺ​ꦤꦺꦏ꧀ꦲꦤꦏ꧀ꦏꦺ​ꦩꦤꦸꦁꦱ​ꦠꦼꦏ​꧉​ 40ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦧꦏꦭ꧀ꦲꦺꦤꦺꦁꦮꦺꦴꦁ​ꦭꦤꦁ​ꦭꦺꦴꦫꦺꦴ​ꦥꦢ​ꦚꦩ꧀ꦧꦸꦠ꧀ꦠꦤꦁꦏꦼꦧꦺꦴꦤ꧀ ꦱꦶꦁ​ꦱꦶꦗꦶ​ꦢꦶꦒꦮ​꧈​ꦱꦶꦁ​ꦭꦶꦪꦤꦺ​ꦢꦶꦠꦶꦁꦒꦭ꧀꧈​ 41ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦭꦺꦴꦫꦺꦴ​ꦲꦶꦗꦶꦏ꧀​ꦔ꧀ꦒꦶꦭꦶꦁ​ꦒꦤ꧀ꦢꦸꦩ꧀ ꦱꦶꦁ​ꦱꦶꦗꦶ​ꦢꦶꦒꦮ​꧈​ꦱꦶꦁ​ꦭꦶꦪꦤꦺ​ꦢꦶꦠꦶꦁꦒꦭ꧀꧈​

42꧋“ꦩꦸꦭꦤꦺ​꧈​ꦥꦢ​ꦱꦶꦁ​ꦲꦮꦱ꧀ꦭꦤ꧀ꦲꦠꦶꦲꦠꦶ꧈​ꦲꦮꦶꦠ꧀ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦏꦥꦤ꧀ꦠꦼꦏꦤꦺ​ꦒꦸꦱ꧀ꦠꦶꦩꦸ​꧉​ 43ꦲꦺꦭꦶꦁꦔ​ꦲꦶꦏꦶ​꧈​ꦱꦼꦩꦸꦁꦒꦺꦴꦤ꧀ꦤꦺꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦔꦼꦂꦠꦶ​ꦮꦏ꧀ꦠꦸꦩꦸꦠꦼꦏꦤꦺ​ꦩꦭꦶꦁ​ꦔꦺ​꧈​ꦢꦺꦏ꧀ꦤꦺꦩꦼꦱ꧀ꦠꦶꦲꦺꦴꦫ​ꦧꦏꦭ꧀ꦠꦸꦫꦸ​ꦭꦤ꧀ꦲꦺꦴꦫ​ꦧꦏꦭ꧀​ꦔ꧀ꦭꦶꦭꦤꦶ​ꦲꦺꦴꦩꦃꦲꦺ​ꦢꦶꦧꦺꦴꦧꦺꦴꦭ꧀꧈​ 44ꦩꦸꦭꦤꦺ​ꦥꦢ​ꦗꦒꦗꦒ​꧈​ꦲꦮꦶꦠ꧀ꦲꦤꦏ꧀ꦏꦺ​ꦩꦤꦸꦁꦱ​ꦠꦼꦏꦤꦺ​ꦲꦶꦁ​ꦮꦏ꧀ꦠꦸ​ꦱꦶꦁ​ꦲꦺꦴꦫ​ꦲꦩ꧀ꦧꦺꦴꦏ꧀ꦗꦒꦏ꧀ꦏꦏꦺ꧉​”

꧋ꦥꦶꦮꦸꦭꦁ​ꦧꦧ꧀ꦱ꧀ꦭꦥ꦳꧀ꦱꦶꦁ​ꦠꦼꦩꦼꦤ꧀꧈​

45꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦱ꧀ꦭꦥ꦳꧀ꦱꦶꦁ​ꦲꦼꦤ꧀ꦢꦶ​ꦱꦶꦁ​ꦠꦼꦩꦼꦤ꧀ꦭꦤ꧀ꦱꦶꦁ​ꦥꦶꦤ꧀ꦠꦼꦂ​꧈​ꦱꦶꦁ​ꦢꦶꦢꦢꦺꦏ꧀ꦏꦏꦺꦥꦼꦔꦉꦥ꧀ꦥꦺ​ꦱ꧀ꦭꦥ꦳꧀ꦱ꧀ꦭꦥ꦳꧀ꦭꦶꦪꦤꦺ​ꦭꦤ꧀ꦔꦼꦏꦺꦏ꧀ꦏꦶꦥꦔꦤ꧀ꦏꦸ​ꦩꦫꦁ​ꦱ꧀ꦭꦥ꦳꧀ꦱ꧀ꦭꦥ꦳꧀ꦏꦸꦮꦶ​ꦤꦺꦏ꧀ꦮꦶꦱ꧀ꦥꦼꦤꦼꦂꦮꦏ꧀ꦠꦸꦩꦸ? 46ꦧꦼꦗꦠꦼꦤꦤ꧀ꦱ꧀ꦭꦥ꦳꧀ꦱꦶꦁ​ꦏꦼꦠꦼꦩꦸ​ꦲꦶꦗꦶꦏ꧀ꦔꦼꦂꦗꦤ꧀ꦤꦶꦥꦼꦁꦒꦮꦺꦪꦤ꧀ꦏꦸꦤꦺꦏ꧀ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦠꦼꦏ​꧉​ 47ꦔꦤ꧀ꦢꦼꦭ꧀ꦭ​꧈​ꦱ꧀ꦭꦥ꦳꧀ꦏꦸꦮꦶ​ꦧꦏꦭ꧀ꦢꦶꦥꦱꦿꦃꦲꦶ​ꦔꦸꦫꦸꦱ꧀ꦱꦶ​ꦏꦧꦺꦃ​ꦧꦤ꧀ꦢꦤꦺ​ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​꧉​ 48ꦤꦁꦔꦶꦁ​ꦤꦺꦏ꧀ꦱ꧀ꦭꦥ꦳꧀ꦩꦲꦸ​ꦲꦭ​ꦲꦠꦶꦤꦺ​ꦭꦤ꧀​ꦤ꧀ꦢꦸꦮꦺꦒꦒꦱ꧀ꦱꦤ꧀ꦔꦺꦤꦺ​: 49‘ꦲꦃ꧈​ꦒꦸꦱ꧀ꦠꦶꦏꦸ​ꦧꦏꦭ꧀ꦭꦺ​ꦲꦺꦴꦫ​ꦤ꧀ꦢꦁꦠꦼꦏ​ꦏꦺꦴꦏ꧀꧈'​ꦠꦼꦫꦸꦱ꧀ꦢꦺꦏ꧀ꦤꦺꦩꦺꦴꦭꦃꦲꦶꦚꦶꦪꦚꦶꦪ​ꦱ꧀ꦭꦥ꦳꧀ꦱ꧀ꦭꦥ꦳꧀ꦭꦶꦪꦤꦺ​ꦭꦤ꧀ꦩꦭꦃ​ꦩꦁꦔꦤ꧀ꦭꦤ꧀ꦔꦺꦴꦩ꧀ꦧꦺ​ꦧꦼꦧꦉꦁꦔꦤ꧀ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦱꦼꦤꦼꦁ​ꦩꦧꦸꦏ꧀꧈​ 50ꦭꦃ​ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦠꦼꦫꦸꦱ꧀ꦠꦼꦏ​ꦲꦶꦁ​ꦢꦶꦤ​ꦱꦶꦁ​ꦲꦺꦴꦫ​ꦢꦶꦗꦒꦏ꧀ꦏꦏꦺꦭꦤ꧀ꦲꦶꦁ​ꦗꦩ꧀ꦱꦶꦁ​ꦲꦺꦴꦫ​ꦢꦶꦔꦼꦂꦠꦺꦤ꧀ꦤꦶ​ꦱꦏ꧀ꦢꦸꦫꦸꦁꦔꦺ꧉​ 51ꦱ꧀ꦭꦥ꦳꧀ꦏꦸꦮꦶ​ꦧꦏꦭ꧀ꦢꦶꦱꦼꦠꦿꦥ꧀ꦏꦫꦺꦴ​ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​꧈​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦱꦼꦠꦿꦥꦤ꧀ꦤꦺ ꦮꦺꦴꦁ​ꦭꦩꦶꦱ꧀꧈​ꦤꦁꦏꦺꦴꦤꦺꦴ​ꦱ꧀ꦭꦥ꦳꧀ꦩꦲꦸ​ꦧꦏꦭ꧀ꦠꦔꦶꦱ꧀ꦱꦤ꧀ꦭꦤ꧀ꦔꦼꦫꦺꦴꦠ꧀ꦲꦸꦤ꧀ꦠꦸ​꧉​”

↑ ↑ ↑


꧋ꦥꦿꦮꦤ꧀ꦱꦶꦁ​ꦥꦶꦤ꧀ꦠꦼꦂ​ꦭꦤ꧀ꦥꦿꦮꦤ꧀ꦱꦶꦁ​ꦒꦺꦴꦧ꧀ꦭꦺꦴꦏ꧀꧈​

꧇​꧒꧕꧇​ 1꧋ꦱꦲꦶꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦸꦭꦁꦔꦶꦔꦺꦤꦺ​:“ꦤꦺꦏ꧀ꦲꦤꦏ꧀ꦏꦺ​ꦩꦤꦸꦁꦱ​ꦠꦼꦏ​ꦭꦤ꧀ꦔ꧀ꦮꦱꦤꦶ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦸꦮꦶ​ꦏꦼꦤꦺꦁꦢꦶꦒꦩ꧀ꦧꦂꦫꦏꦺꦏꦫꦺꦴ​ꦥꦿꦮꦤ꧀ꦱꦼꦥꦸꦭꦸꦃ​ꦱꦶꦁ​ꦲꦉꦥ꧀ꦔꦶꦫꦶꦁ​ꦩꦤ꧀ꦠꦺꦤ꧀ꦭꦤ꧀ꦥꦢ​ꦔ꧀ꦒꦮ​ꦲꦺꦴꦚ꧀ꦕꦺꦴꦂ​ꦏꦲꦺ​꧈​ꦩꦼꦠꦸꦏ꧀ꦏꦶꦩꦤ꧀ꦠꦺꦤ꧀ꦭꦤꦁ​꧉​ 2ꦥꦿꦮꦤ꧀ꦱꦼꦥꦸꦭꦸꦃ​ꦏꦸꦮꦶ​ꦱꦶꦁ​ꦭꦶꦩ​ꦒꦺꦴꦧ꧀ꦭꦺꦴꦏ꧀ꦭꦤ꧀ꦱꦶꦁ​ꦭꦶꦩ​ꦥꦶꦤ꧀ꦠꦼꦂ​꧉​ 3ꦥꦿꦮꦤ꧀ꦭꦶꦩ​ꦱꦶꦁ​ꦒꦺꦴꦧ꧀ꦭꦺꦴꦏ꧀ꦥꦢ​ꦔ꧀ꦒꦮ​ꦲꦺꦴꦚ꧀ꦕꦺꦴꦂ​꧈​ꦤꦁꦔꦶꦁ​ꦲꦺꦴꦫ​ꦔ꧀ꦒꦮ​ꦊꦔ​ꦱꦺꦉꦥ꧀꧈​ 4ꦭꦃ​ꦥꦿꦮꦤ꧀ꦭꦶꦩ​ꦱꦶꦁ​ꦥꦶꦤ꧀ꦠꦼꦂ​ꦔ꧀ꦒꦮ​ꦲꦺꦴꦚ꧀ꦕꦺꦴꦂ​ꦭꦤ꧀​ꦔ꧀ꦒꦮ​ꦊꦔ​ꦱꦺꦉꦥ꧀꧈​ 5ꦏꦢꦸꦁ​ꦩꦤ꧀ꦠꦺꦤ꧀ꦤꦺ​ꦭꦤꦁ​ꦲꦺꦴꦫ​ꦠꦼꦏꦠꦼꦏ​꧈​ꦥꦿꦮꦤ꧀ꦥꦿꦮꦤ꧀ꦩꦲꦸ​ꦥꦢ​ꦔꦤ꧀ꦠꦸꦏ꧀ ꦱꦩ꧀ꦥꦺꦏ꧀ꦏꦼꦠꦸꦫꦺꦴꦤ꧀꧈​

6꧋“ꦤꦁꦠꦼꦔꦃꦲꦺ​ꦮꦼꦔꦶ​ꦲꦺꦤꦺꦁꦮꦺꦴꦁ​ꦕꦼꦭꦸꦏ꧀ꦕꦼꦭꦸꦏ꧀:'ꦩꦤ꧀ꦠꦺꦤ꧀ꦤꦺ​ꦠꦼꦏ​꧈​ꦲ꦳ꦪꦸꦏ꧀ꦥꦢ​ꦩꦼꦠꦸꦏ꧀ꦏꦶ!’ 7ꦥꦿꦮꦤ꧀ꦱꦼꦥꦸꦭꦸꦃ​ꦩꦲꦸ​ꦠꦼꦫꦸꦱ꧀ꦥꦢ​ꦠꦔꦶ​ꦭꦤ꧀​ꦚ꧀ꦗꦶꦏꦸꦏ꧀ꦲꦺꦴꦚ꧀ꦕꦺꦴꦂꦫꦺ​ꦢꦺꦮꦺꦢꦺꦮꦺ꧉​ 8ꦥꦿꦮꦤ꧀ꦭꦶꦩ​ꦱꦶꦁ​ꦒꦺꦴꦧ꧀ꦭꦺꦴꦏ꧀ꦠꦼꦫꦸꦱ꧀ꦤꦼꦩ꧀ꦧꦸꦁ​ꦩꦫꦁ​ꦥꦿꦮꦤ꧀ꦥꦿꦮꦤ꧀ꦱꦶꦁ​ꦥꦶꦤ꧀ꦠꦼꦂ​:'ꦲꦩ꧀ꦧꦺꦴꦏ꧀ꦲꦏꦸ​ꦢꦶꦏꦺꦏ꧀ꦏꦶꦊꦔꦩꦸ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧈​ꦲꦮꦶꦠ꧀ꦲꦺꦴꦚ꧀ꦕꦺꦴꦂꦏꦸ​ꦲꦉꦥ꧀ꦩꦠꦶ​꧉'​ 9ꦥꦿꦮꦤ꧀ꦥꦿꦮꦤ꧀ꦱꦶꦁ​ꦥꦶꦤ꧀ꦠꦼꦂ​ꦱꦼꦩꦲꦸꦂ​:'ꦲꦺꦴꦫ​꧈​ꦩꦼꦁꦏꦺꦴ​ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦤ꧀ꦢꦏ꧀ꦏꦼꦏꦸꦫꦁꦔꦤ꧀ꦊꦔ​꧉​ꦏꦤ​ꦔ꧀ꦒꦺꦴꦭꦺꦏ꧀ꦢꦺꦮꦺꦤꦁꦱꦼꦠꦸꦂꦤꦺꦏ꧀ꦧꦸꦠꦸꦃ​꧉'​ 10ꦏꦢꦸꦁ​ꦥꦿꦮꦤ꧀ꦥꦿꦮꦤ꧀ꦱꦶꦁ​ꦒꦺꦴꦧ꧀ꦭꦺꦴꦏ꧀ꦩꦲꦸ​ꦥꦢ​ꦧꦸꦢꦭ꧀ꦠꦸꦏꦸ​ꦊꦔ​꧈​ꦩꦤ꧀ꦠꦺꦤ꧀ꦤꦺ​ꦭꦤꦁ​ꦠꦼꦏ​꧉​ꦥꦿꦮꦤ꧀ꦥꦿꦮꦤ꧀ꦱꦶꦁ​ꦮꦶꦱ꧀ꦠꦠꦠꦠ​ꦩꦲꦸ​ꦠꦼꦫꦸꦱ꧀ꦥꦢ​ꦔꦶꦫꦶꦁ​ꦩꦤ꧀ꦠꦺꦤ꧀ꦤꦺ​ꦩ꧀ꦊꦧꦸ​ꦤꦁꦲꦺꦴꦩꦃꦲꦺ​ꦱꦶꦁ​ꦤ꧀ꦢꦸꦮꦺꦒꦮꦺ​꧉​ꦭꦮꦁꦔꦺ​ꦠꦼꦫꦸꦱ꧀ꦢꦶꦏꦚ꧀ꦕꦶꦁ​꧉​

11꧋“ꦲꦺꦴꦫ​ꦊꦠ꧀ꦱꦸꦮꦶꦥꦿꦮꦤ꧀ꦥꦿꦮꦤ꧀ꦱꦶꦁ​ꦠꦸꦏꦸ​ꦊꦔ​ꦩꦲꦸ​ꦥꦢ​ꦠꦼꦏ​ꦠꦼꦫꦸꦱ꧀ꦕꦼꦭꦸꦏ꧀ꦕꦼꦭꦸꦏ꧀:'ꦧꦥꦏ꧀ ꦧꦥꦏ꧀ ꦲꦩ꧀ꦧꦺꦴꦏ꧀ꦢꦶꦧꦸꦏꦏ꧀ꦭꦮꦁꦔꦺ​!’ 12ꦤꦁꦔꦶꦁ​ꦩꦤ꧀ꦠꦺꦤ꧀ꦭꦤꦁ​ꦩꦲꦸ​ꦱꦼꦩꦲꦸꦂ​:'ꦏꦺꦴꦮꦺ​ꦱꦥ​꧈​ꦲꦏꦸ​ꦲꦺꦴꦫ​ꦏꦼꦤꦭ꧀ꦏꦺꦴꦮꦺ​!’”

13꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦸꦠꦸꦥ꧀ꦥꦶꦮꦸꦭꦁꦔꦺ​ꦔꦺꦤꦺ​:“ꦩꦸꦭꦤꦺ​ꦥꦢ​ꦩꦼꦭꦺꦏ꧀ꦏ​꧈​ꦲꦮꦶꦠ꧀ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦢꦶꦤꦤꦺ​ꦲꦥ​ꦗꦩ꧀ꦩꦺ​ꦠꦼꦏꦤꦺ​ꦲꦤꦏ꧀ꦏꦺ​ꦩꦤꦸꦁꦱ​꧉​”

꧋ꦱ꧀ꦭꦥ꦳꧀ꦠꦼꦭꦸ​ꦱꦶꦁ​ꦢꦶꦥꦺꦴꦏꦺꦴꦏ꧀ꦏꦶ​꧉​

14꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦼꦏꦺꦏ꧀ꦏꦶꦒꦩ꧀ꦧꦂ​ꦭꦶꦪꦤꦺ​:“ꦤꦺꦏ꧀ꦲꦤꦏ꧀ꦏꦺ​ꦩꦤꦸꦁꦱ​ꦠꦼꦏ​ꦔ꧀ꦮꦱꦤꦶ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦸꦮꦶ​ꦏꦼꦤꦺꦁꦢꦶꦒꦩ꧀ꦧꦂꦫꦏꦺꦏꦫꦺꦴ​ꦱꦏ꧀ꦮꦶꦗꦶꦤꦺꦮꦺꦴꦁ​ꦱꦶꦁ​ꦲꦉꦥ꧀ꦭꦸꦔ​ꦤꦁꦤꦼꦒꦫ​ꦲꦢꦺꦴꦃ​꧉​ꦮꦺꦴꦁꦔꦺ​ꦚꦼꦭꦸꦏ꧀ꦱ꧀ꦭꦥ꦳꧀ꦱ꧀ꦭꦥ꦳꧀ꦥ꦳ꦺ꧈​ꦠꦼꦫꦸꦱ꧀ꦢꦶꦥꦱꦿꦃꦲꦶ​ꦧꦤ꧀ꦢꦤꦺ​꧉​ 15ꦱꦶꦁ​ꦱꦶꦗꦶ​ꦢꦶꦏꦺꦏ꧀ꦏꦶꦢꦸꦮꦶꦠ꧀ꦲꦼꦩꦱ꧀ꦭꦶꦩꦁ​ꦲꦺꦮꦸ​꧈​ꦱꦶꦁ​ꦭꦶꦪꦤꦺ​ꦫꦺꦴꦁ​ꦲꦺꦮꦸ​ꦭꦤ꧀ꦱꦶꦁ​ꦤꦺꦴꦩꦼꦂ​ꦠꦼꦭꦸ​ꦢꦶꦏꦺꦏ꧀ꦏꦶꦱꦺꦮꦸ​꧉​ꦱꦶꦗꦶ​ꦱꦶꦗꦶꦤꦺ​ꦢꦶꦏꦺꦏ꧀ꦏꦶꦢꦸꦮꦶꦠ꧀ꦩꦤꦸꦠ꧀ꦏꦥꦶꦤ꧀ꦠꦼꦂꦫꦤ꧀ꦤꦺ​ꦢꦺꦮꦺꦢꦺꦮꦺ꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦮꦺꦴꦁꦔꦺ​ꦠꦼꦫꦸꦱ꧀ꦧꦸꦢꦭ꧀꧈​ 16ꦱ꧀ꦭꦥ꦳꧀ꦱꦶꦁ​ꦤꦩ꧀ꦥ​ꦢꦸꦮꦶꦠ꧀ꦲꦼꦩꦱ꧀ꦭꦶꦩꦁ​ꦲꦺꦮꦸ​ꦠꦼꦫꦸꦱ꧀ꦧꦸꦢꦭ꧀​ꦔ꧀ꦭꦏꦺꦴꦏ꧀ꦏꦏꦺꦢꦸꦮꦶꦠ꧀ꦠꦺꦭꦤ꧀ꦲꦺꦤ꧀ꦠꦸꦏ꧀ꦧꦠꦶꦭꦶꦩꦁ​ꦲꦺꦮꦸ​ꦢꦸꦮꦶꦠ꧀ꦲꦼꦩꦱ꧀꧈​ 17ꦱꦼꦩꦺꦴꦤꦺꦴ​ꦲꦸꦒ​ꦱ꧀ꦭꦥ꦳꧀ꦱꦶꦁ​ꦤꦺꦴꦩꦼꦂ​ꦭꦺꦴꦫꦺꦴ​꧈​ꦢꦺꦏ꧀ꦤꦺꦲꦺꦤ꧀ꦠꦸꦏ꧀ꦧꦠꦶꦫꦺꦴꦁ​ꦲꦺꦮꦸ​꧉​ 18ꦤꦁꦔꦶꦁ​ꦱ꧀ꦭꦥ꦳꧀ꦱꦶꦁ​ꦤꦩ꧀ꦥ​ꦢꦸꦮꦶꦠ꧀ꦲꦼꦩꦱ꧀ꦱꦺꦮꦸ​ꦩꦭꦃ​ꦔꦼꦢꦸꦏ꧀ꦭꦸꦮꦁꦔꦤ꧀ꦭꦤ꧀ꦢꦸꦮꦶꦠ꧀ꦠꦺꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦢꦶꦥꦼꦤ꧀ꦢꦼꦩ꧀ꦤꦁꦏꦺꦴꦤꦺꦴ​꧉​

19꧋“ꦊꦠ꧀ꦱꦸꦮꦶꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦩꦸꦭꦶꦃ​꧈​ꦠꦼꦫꦸꦱ꧀ꦱ꧀ꦭꦥ꦳꧀ꦥ꦳ꦺꦢꦶꦏꦺꦴꦁꦏꦺꦴꦤ꧀ꦠꦼꦏ​ꦔꦼꦏꦺꦏ꧀ꦏꦶꦭꦥꦺꦴꦂꦫꦤ꧀꧈​ 20ꦱ꧀ꦭꦥ꦳꧀ꦱꦶꦁ​ꦤꦩ꧀ꦥ​ꦢꦸꦮꦶꦠ꧀ꦲꦼꦩꦱ꧀ꦭꦶꦩꦁ​ꦲꦺꦮꦸ​ꦩꦗꦸ​ꦠꦼꦫꦸꦱ꧀ꦩꦱꦿꦃꦲꦏꦺꦧꦠꦶꦤꦺ​ꦭꦶꦩꦁ​ꦲꦺꦮꦸ​ꦏꦫꦺꦴ​ꦔꦺꦴꦩꦺꦴꦁ:'ꦒꦸꦱ꧀ꦠꦶ​꧈​ꦲꦏꦸ​ꦲꦩ꧀ꦧꦺꦴꦏ꧀ꦥꦱꦿꦃꦲꦶ​ꦢꦸꦮꦶꦠ꧀ꦲꦼꦩꦱ꧀ꦭꦶꦩꦁ​ꦲꦺꦮꦸ​꧈​ꦭꦃ​ꦲꦶꦏꦶ​ꦢꦼꦭꦺꦴꦏ꧀ꦏꦼꦤ꧀ ꦲꦏꦸ​ꦲꦺꦤ꧀ꦠꦸꦏ꧀ꦧꦠꦶꦭꦶꦩꦁ​ꦲꦺꦮꦸ​꧉'​ 21ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦱꦼꦩꦲꦸꦂ​:'ꦲꦥꦶꦏ꧀ꦧꦔꦼꦠ꧀ ꦏꦺꦴꦮꦺ​ꦱ꧀ꦭꦥ꦳꧀ꦱꦶꦁ​ꦲꦥꦶꦏ꧀ꦭꦤ꧀ꦱꦶꦁ​ꦠꦼꦩꦼꦤ꧀꧈​ꦗꦭꦂꦫꦤ꧀ꦢꦸꦮꦶꦠ꧀ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦲꦩ꧀ꦧꦺꦴꦏ꧀ꦭꦲꦸꦠ꧀ꦭꦲꦸꦠ꧀ꦲꦥꦶꦏ꧀ ꦏꦺꦴꦮꦺ​ꦱꦲꦶꦏꦶ​ꦠꦏ꧀ꦥꦱꦿꦃꦲꦶ​ꦢꦸꦮꦶꦠ꧀ꦱꦶꦁ​ꦲꦺꦴꦏꦺꦃ꧉​ꦫꦺꦤꦺ​ꦩ꧀ꦊꦧꦸꦮ​ꦭꦤ꧀ꦩꦺꦭꦸꦮ​ꦔꦿꦱꦏ꧀ꦏꦏꦺ​ꦏꦧꦸꦔꦃꦲꦤ꧀ꦏꦸ​꧉​’

22꧋“ꦲꦸꦒ​ꦱ꧀ꦭꦥ꦳꧀ꦱꦶꦁ​ꦤꦩ꧀ꦥ​ꦢꦸꦮꦶꦠ꧀ꦲꦼꦩꦱ꧀ꦫꦺꦴꦁ​ꦲꦺꦮꦸ​ꦩꦗꦸ​꧉​ꦢꦺꦏ꧀ꦤꦺꦔꦺꦴꦩꦺꦴꦁ:'ꦒꦸꦱ꧀ꦠꦶ​꧈​ꦏꦺꦴꦮꦺ​ꦔꦼꦏꦺꦏ꧀ꦏꦶꦢꦸꦮꦶꦠ꧀ꦲꦼꦩꦱ꧀ꦫꦺꦴꦁ​ꦲꦺꦮꦸ​ꦩꦫꦁ​ꦲꦏꦸ​꧈​ꦭꦃ​ꦲꦶꦏꦶ​ꦢꦼꦭꦺꦴꦏ꧀ꦏꦼꦤ꧀ ꦠꦏ꧀ꦠꦩ꧀ꦧꦃꦲꦶꦫꦺꦴꦁ​ꦲꦺꦮꦸ​ꦧꦠꦶꦤꦺ​꧉'​ 23ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦱꦼꦩꦲꦸꦂ​:'ꦲꦥꦶꦏ꧀ꦧꦔꦼꦠ꧀꧈​ꦏꦺꦴꦮꦺ​ꦥꦚ꧀ꦕꦺꦤ꧀ꦱ꧀ꦭꦥ꦳꧀ꦱꦶꦁ​ꦲꦥꦶꦏ꧀ꦭꦤ꧀ꦱꦶꦁ​ꦠꦼꦩꦼꦤ꧀꧈​ꦢꦸꦮꦶꦠ꧀ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦲꦩ꧀ꦧꦺꦴꦏ꧀ꦭꦲꦸꦠ꧀ꦭꦲꦸꦠ꧀ꦲꦥꦶꦏ꧀ ꦩꦸꦭꦤꦺ​ꦏꦺꦴꦮꦺ​ꦱꦲꦶꦏꦶ​ꦠꦏ꧀ꦥꦱꦿꦃꦲꦶ​ꦢꦸꦮꦶꦠ꧀ꦱꦶꦁ​ꦲꦺꦴꦏꦺꦃ꧉​ꦫꦺꦤꦺ​ꦩ꧀ꦊꦧꦸꦮ​ꦭꦤ꧀ꦩꦺꦭꦸꦮ​ꦔꦿꦱꦏ꧀ꦏꦏꦺ​ꦏꦧꦸꦔꦃꦲꦤ꧀ꦏꦸ​꧉​’

24꧋“ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦱ꧀ꦭꦥ꦳꧀ꦱꦶꦁ​ꦤꦩ꧀ꦥ​ꦢꦸꦮꦶꦠ꧀ꦲꦼꦩꦱ꧀ꦱꦺꦮꦸ​ꦩꦗꦸ​꧉​ꦠꦼꦩ꧀ꦧꦸꦁꦔꦺ​ꦢꦺꦏ꧀ꦤꦺꦔꦺꦤꦺ​:'ꦒꦸꦱ꧀ꦠꦶ​꧈​ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦏꦼꦉꦁ​꧉​ꦲꦮꦶꦠ꧀ꦏꦺꦴꦮꦺ​ꦔꦸꦤ꧀ꦢꦸꦃꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦏꦺꦴꦮꦺ​ꦢꦺꦮꦺꦲꦺꦴꦫ​ꦚꦼꦧꦂ​ꦭꦤ꧀ꦏꦺꦴꦮꦺ​ꦤꦫꦶꦏ꧀ꦠꦤ꧀ꦥ​ꦩꦱꦁ​ꦢꦺꦮꦺ꧉​ 25ꦩꦸꦭꦤꦺ​ꦲꦏꦸ​ꦮꦼꦢꦶ​ꦭꦤ꧀ꦢꦸꦮꦶꦠ꧀ꦩꦸꦠꦏ꧀ꦥꦼꦤ꧀ꦢꦼꦩ꧀ꦤꦁꦊꦩꦃ​꧉​ꦭꦃ​ꦲꦶꦏꦶ​ꦢꦸꦮꦶꦠ꧀ꦩꦸꦠꦩ꧀ꦥꦤꦼꦤ꧀꧉'​ 26“ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦠꦼꦫꦸꦱ꧀ꦔꦺꦴꦩꦺꦴꦁ:'ꦏꦺꦴꦮꦺ​ꦏꦸꦮꦶ​ꦱ꧀ꦭꦥ꦳꧀ꦱꦶꦁ​ꦲꦭ​ꦭꦤ꧀ꦩꦊꦱ꧀꧈​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦏꦸ​ꦔꦸꦤ꧀ꦢꦸꦃꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦏꦸ​ꦢꦺꦮꦺꦲꦺꦴꦫ​ꦚꦼꦧꦂ​ꦭꦤ꧀ꦲꦏꦸ​ꦤꦫꦶꦏ꧀ꦧꦫꦁ​ꦱꦶꦁ​ꦲꦏꦸ​ꦢꦺꦮꦺꦲꦺꦴꦫ​ꦩꦱꦁ​꧉​ 27ꦄꦗꦸꦂꦫꦺꦢꦸꦮꦶꦠ꧀ꦏꦸꦲꦩ꧀ꦧꦺꦴꦏ꧀ꦢꦺꦏꦺꦏ꧀ꦤꦁꦧꦁ​꧈​ꦢꦢꦶꦤꦺ​ꦲꦏꦸ​ꦧꦶꦱ​ꦲꦺꦤ꧀ꦠꦸꦏ꧀ꦢꦸꦮꦶꦠ꧀ꦏꦸꦏꦫꦺꦴ​ꦫꦺꦤ꧀ꦠꦼꦤ꧀ꦤꦺ꧉​ 28ꦢꦸꦮꦶꦠ꧀ꦲꦼꦩꦱ꧀ꦱꦺꦮꦸ​ꦏꦸꦮꦶ​ꦢꦶꦗꦭꦸꦏ꧀ꦭꦤ꧀ꦢꦶꦏꦺꦏ꧀ꦏꦏꦺꦩꦫꦁ​ꦱ꧀ꦭꦥ꦳꧀ꦱꦶꦁ​ꦮꦶꦱ꧀​ꦤ꧀ꦢꦸꦮꦺꦱꦼꦥꦸꦭꦸꦃ​ꦲꦺꦮꦸ​꧉​ 29ꦲꦮꦶꦠ꧀ꦱꦥ​ꦱꦶꦁ​ꦮꦶꦱ꧀​ꦤ꧀ꦢꦸꦮꦺ꧈​ꦏꦸꦮꦶ​ꦧꦏꦭ꧀ꦢꦶꦏꦺꦏ꧀ꦏꦶꦭꦸꦮꦶꦃ​ꦲꦺꦴꦏꦺꦃꦩꦼꦤꦺꦃ​ꦱꦩ꧀ꦥꦺꦏ꧀ꦭꦸꦧꦺꦂ​꧉​ꦤꦁꦔꦶꦁ​ꦱꦥ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺ꧈​ꦧꦫꦁ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏꦱꦶꦁ​ꦢꦶꦢꦸꦮꦺꦤ꧀ꦤꦶ​ꦏꦸꦮꦶ​ꦩꦭꦃ​ꦧꦏꦭ꧀ꦢꦶꦗꦭꦸꦏ꧀ꦏꦧꦺꦃ​꧉​ 30ꦱꦲꦶꦏꦶ​꧈​ꦱ꧀ꦭꦥ꦳꧀ꦱꦶꦁ​ꦲꦺꦴꦫ​ꦲꦺꦤꦺꦁꦒꦸꦤꦤꦺ​ꦏꦸꦮꦶ​ꦢꦶꦕꦼꦏꦼꦭ꧀ꦭꦤ꧀ꦢꦶꦲꦼꦠꦺꦴꦏ꧀ꦏꦏꦺꦤꦁꦥꦼꦥꦼꦠꦼꦁ​꧉​ꦤꦁꦏꦺꦴꦤꦺꦴ​ꦧꦏꦭ꧀ꦠꦔꦶꦱ꧀ꦱꦤ꧀ꦭꦤ꧀ꦔꦼꦫꦺꦴꦠ꧀ꦲꦸꦤ꧀ꦠꦸ​꧉​’”

꧋ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦔꦿꦸꦠꦸꦏꦧꦺꦃ​ꦧꦁꦱ​꧉​

31꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦲꦩ꧀ꦧꦺꦱꦸꦏ꧀ꦤꦺꦏ꧀ꦲꦤꦏ꧀ꦏꦺ​ꦩꦤꦸꦁꦱ​ꦠꦼꦏ​ꦔꦁꦒꦺꦴ​ꦥꦔ꧀ꦮꦱꦤꦺ​ꦭꦤ꧀ꦢꦶꦲꦫꦏ꧀ꦲꦫꦏ꧀ꦏꦫꦺꦴ​ꦱꦏ꧀ꦏꦺꦃꦲꦺꦩꦸꦭꦺꦏꦠ꧀ꦠꦺ꧈​ꦢꦺꦏ꧀ꦤꦺꦧꦏꦭ꧀​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦫꦺꦏꦱ꧀ꦮꦂꦒꦤ꧀꧈​ 32ꦥꦫ​ꦩꦸꦭꦺꦏꦠ꧀ꦠꦺꦧꦏꦭ꧀​ꦔ꧀ꦭꦸꦩ꧀ꦥꦸꦏ꧀ꦏꦏꦺꦏꦧꦺꦃ​ꦧꦁꦱ​ꦤꦁꦔꦉꦥ꧀ꦥꦺ​ꦢꦩ꧀ꦥꦂꦫꦺ꧉​ꦢꦺꦏ꧀ꦤꦺꦧꦏꦭ꧀ꦩꦶꦱꦃ​ꦮꦺꦴꦁꦮꦺꦴꦁ​ꦩꦲꦸ​ꦢꦢꦶ​ꦭꦺꦴꦫꦺꦴ​꧈​ꦏꦪ​ꦲꦼꦁꦒꦺꦴꦤꦺ​ꦠꦸꦏꦁ​ꦲꦔꦺꦴꦤ꧀ꦏꦲꦺ​ꦩꦶꦱꦃ​ꦮꦼꦢꦸꦱ꧀ꦱꦺꦒꦺꦩ꧀ꦧꦺꦭ꧀ꦱꦁꦏꦮꦼꦢꦸꦱ꧀ꦧꦤ꧀ꦢꦺꦴꦠ꧀꧈​ 33ꦮꦼꦢꦸꦱ꧀ꦱꦺꦒꦺꦩ꧀ꦧꦺꦭ꧀ꦢꦶꦱꦶꦁꦏꦶꦂꦫꦏꦺꦤꦁꦠꦼꦔꦼꦤꦺ​ꦭꦤ꧀ꦮꦼꦢꦸꦱ꧀ꦱꦺꦧꦤ꧀ꦢꦺꦴꦠ꧀ꦤꦁꦏꦶꦮꦤꦺ​꧉​ 34ꦫꦠꦸꦤꦺ​ꦠꦼꦫꦸꦱ꧀ꦧꦏꦭ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦤꦁꦠꦼꦔꦼꦤꦺ​:'ꦧꦥꦏ꧀ꦏꦸ​ꦮꦶꦱ꧀ꦲꦩ꧀ꦧꦼꦂꦏꦃꦲꦶ​ꦏꦺꦴꦮꦺ​꧉​ꦥꦢ​ꦩ꧀ꦧꦿꦺꦤꦺꦪ꧉​ꦏꦺꦴꦮꦺ​ꦧꦏꦭ꧀ꦔꦿꦱꦏ꧀ꦏꦏꦺ​ꦧꦼꦂꦏꦃꦲꦺ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦁꦒꦺꦴ​ꦏꦺꦴꦮꦺ​ꦮꦶꦮꦶꦠ꧀ꦭꦲꦶꦂꦫꦺ​ꦗꦒꦠ꧀꧈​ 35ꦲꦮꦶꦠ꧀ꦢꦺꦴꦁꦔꦺꦲꦏꦸ​ꦔꦼꦭꦶꦃ​꧈​ꦲꦏꦸ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦩꦁꦔꦤ꧀꧈​ꦲꦏꦸ​ꦔꦼꦭꦏ꧀ ꦲꦏꦸ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦔꦺꦴꦩ꧀ꦧꦺ​꧉​ꦢꦺꦴꦁꦔꦺꦲꦏꦸ​ꦱꦁꦏꦥꦁꦒꦺꦴꦤ꧀ꦤꦤ꧀ꦲꦢꦺꦴꦃ​꧈​ꦲꦏꦸ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦲꦶꦤꦼꦥ꧀ꦥꦤ꧀꧈​ 36ꦢꦺꦴꦁꦔꦺꦲꦏꦸ​ꦲꦺꦴꦫ​ꦤ꧀ꦢꦸꦮꦺꦱꦭꦶꦤ꧀ ꦲꦏꦸ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦱꦭꦶꦤ꧀꧈​ꦢꦺꦴꦁꦔꦺꦲꦏꦸ​ꦭꦫ​꧈​ꦲꦏꦸ​ꦲꦩ꧀ꦧꦺꦴꦏ꧀ꦫꦸꦩꦠꦶ​꧉​ꦢꦺꦴꦁꦔꦺꦲꦏꦸ​ꦤꦁꦱꦼꦠꦿꦥꦤ꧀ ꦲꦏꦸ​ꦲꦩ꧀ꦧꦺꦴꦏ꧀ꦠꦶꦭꦶꦏ꧀ꦏꦶ꧉​’

37꧋“ꦤꦁꦏꦺꦴꦤꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦉꦱꦶꦏ꧀ꦲꦠꦶꦤꦺ​ꦧꦏꦭ꧀ꦥꦢ​ꦔꦺꦴꦩꦺꦴꦁ:'ꦒꦸꦱ꧀ꦠꦶ​꧈​ꦏꦥꦤ꧀ꦲꦮꦏ꧀ꦏꦺ​ꦢꦺꦮꦺꦮꦼꦫꦸꦃ​ꦏꦺꦴꦮꦺ​ꦔꦼꦭꦶꦃ​ꦠꦼꦫꦸꦱ꧀ꦔꦼꦏꦺꦏ꧀ꦏꦶꦩꦁꦔꦤ꧀ꦲꦥ​ꦮꦼꦫꦸꦃ​ꦏꦺꦴꦮꦺ​ꦔꦼꦭꦏ꧀ꦠꦼꦫꦸꦱ꧀ꦔꦼꦏꦺꦏ꧀ꦏꦶꦔꦺꦴꦩ꧀ꦧꦺ​ꦏꦺꦴꦮꦺ​? 38ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦠꦲꦸ​ꦮꦼꦫꦸꦃ​ꦏꦺꦴꦮꦺ​ꦏꦪ​ꦮꦺꦴꦁ​ꦱꦁꦏꦥꦁꦒꦺꦴꦤ꧀ꦤꦤ꧀ꦲꦢꦺꦴꦃ​ꦲꦥ​ꦲꦺꦴꦫ​ꦤ꧀ꦢꦸꦮꦺꦱꦭꦶꦤ꧀꧈​ꦭꦃ​ꦏꦥꦤ꧀ꦲꦮꦏ꧀ꦏꦺ​ꦢꦺꦮꦺꦔꦼꦏꦺꦏ꧀ꦏꦶꦲꦶꦤꦼꦥ꧀ꦥꦤ꧀ꦲꦥ​ꦔꦼꦏꦺꦏ꧀ꦏꦶꦱꦭꦶꦤ꧀ꦏꦺꦴꦮꦺ​? 39ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦠꦲꦸ​ꦮꦼꦫꦸꦃ​ꦏꦺꦴꦮꦺ​ꦭꦫ​ꦲꦥ​ꦤꦁꦱꦼꦠꦿꦥꦤ꧀꧈​ꦭꦃ​ꦏꦥꦤ꧀ꦲꦮꦏ꧀ꦏꦺ​ꦢꦺꦮꦺꦤꦶꦭꦶꦏ꧀ꦏꦶ​ꦏꦺꦴꦮꦺ​?’ 40ꦫꦠꦸꦤꦺ​ꦧꦏꦭ꧀ꦱꦼꦩꦲꦸꦂ​ꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦤꦁꦠꦼꦔꦼꦤꦺ​:'ꦥꦢ​ꦲꦺꦭꦶꦁꦔ​꧈​ꦲꦥ​ꦮꦲꦺ​ꦱꦶꦁ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦩꦫꦁ​ꦱꦭꦃꦱꦏ꧀ꦮꦶꦗꦶꦤꦺꦱꦼꦢꦸꦭꦸꦂꦏꦸ​ꦲꦶꦏꦶ​꧈​ꦱꦼꦤꦗꦤ꧀ꦤ​ꦩꦫꦁ​ꦱꦶꦁ​ꦕꦶꦭꦶꦏ꧀ꦢꦺꦮꦺ꧈​ꦏꦸꦮꦶ​ꦥꦢ​ꦮꦲꦺ​ꦏꦫꦺꦴ​ꦤꦺꦏ꧀ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦩꦫꦁ​ꦲꦏꦸ​꧉​’

41꧋“ꦫꦠꦸꦤꦺ​ꦲꦸꦒ​ꦧꦏꦭ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦤꦁꦱꦼꦧꦼꦭꦃꦏꦶꦮꦤꦺ​:'ꦥꦢ​ꦭꦸꦔ​ꦱꦁꦏꦔꦉꦥ꧀ꦏꦸ​!ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦤꦩ꧀ꦥꦶꦏ꧀ꦏꦺꦴꦮꦺ​꧉​ꦭꦸꦔꦲ​ꦤꦁꦒꦼꦤꦶ​ꦱꦶꦁ​ꦭꦁꦒꦼꦁ​꧈​ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦁꦒꦺꦴ​ꦱꦺꦠꦤ꧀​ꦭꦤ꧀ꦥꦫ​ꦩꦸꦭꦺꦏꦠ꧀ꦠꦺ꧉​ 42ꦲꦮꦶꦠ꧀ꦢꦺꦴꦁꦔꦺꦲꦏꦸ​ꦔꦼꦭꦶꦃ​꧈​ꦏꦺꦴꦮꦺ​ꦲꦺꦴꦫ​ꦔꦼꦏꦺꦏ꧀ꦏꦶꦩꦁꦔꦤ꧀ꦲꦏꦸ​꧉​ꦲꦏꦸ​ꦔꦼꦭꦏ꧀ ꦲꦏꦸ​ꦲꦺꦴꦫ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦔꦺꦴꦩ꧀ꦧꦺ​꧉​ 43ꦲꦏꦸ​ꦱꦁꦏꦥꦁꦒꦺꦴꦤ꧀ꦤꦤ꧀ꦲꦢꦺꦴꦃ​꧈​ꦲꦏꦸ​ꦲꦺꦴꦫ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦲꦶꦤꦼꦥ꧀ꦥꦤ꧀꧈​ꦲꦏꦸ​ꦲꦺꦴꦫ​ꦤ꧀ꦢꦸꦮꦺꦱꦭꦶꦤ꧀ ꦲꦏꦸ​ꦲꦺꦴꦫ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦶꦱꦭꦶꦤ꧀꧈​ꦢꦺꦴꦁꦔꦺꦲꦏꦸ​ꦭꦫ​ꦭꦤ꧀ꦢꦺꦴꦁꦔꦺꦲꦏꦸ​ꦤꦁꦱꦼꦠꦿꦥꦤ꧀ ꦏꦺꦴꦮꦺ​ꦲꦺꦴꦫ​ꦤꦶꦭꦶꦏ꧀ꦏꦶ​ꦲꦏꦸ​꧉​’

44꧋“ꦮꦺꦴꦁꦮꦺꦴꦁ​ꦏꦸꦮꦶ​ꦠꦼꦫꦸꦱ꧀ꦧꦏꦭ꧀ꦠꦏꦺꦴꦤ꧀:'ꦒꦸꦱ꧀ꦠꦶ​꧈​ꦏꦥꦤ꧀ꦲꦮꦏ꧀ꦏꦺ​ꦢꦺꦮꦺꦮꦼꦫꦸꦃ​ꦏꦺꦴꦮꦺ​ꦔꦼꦭꦶꦃ​ꦲꦥ​ꦔꦼꦭꦏ꧀?ꦭꦤ꧀ꦏꦥꦤ꧀ꦲꦮꦏ꧀ꦏꦺ​ꦢꦺꦮꦺꦮꦼꦫꦸꦃ​ꦏꦺꦴꦮꦺ​ꦏꦪ​ꦮꦺꦴꦁ​ꦱꦶꦁ​ꦱꦁꦏꦥꦁꦒꦺꦴꦤ꧀ꦤꦤ꧀ꦲꦢꦺꦴꦃ​?ꦭꦤ꧀ꦏꦥꦤ꧀ꦲꦮꦏ꧀ꦏꦺ​ꦢꦺꦮꦺꦮꦼꦫꦸꦃ​ꦏꦺꦴꦮꦺ​ꦭꦫ​ꦲꦥ​ꦤꦁꦱꦼꦠꦿꦥꦤ꧀?ꦲꦺꦴꦫ​ꦠꦲꦸ​!ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦲꦺꦴꦫ​ꦤꦸꦭꦸꦁꦔꦶ​!’ 45ꦫꦠꦸꦤꦺ​ꦧꦏꦭ꧀ꦱꦼꦩꦲꦸꦂ​:'ꦫꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀!ꦲꦥ​ꦮꦲꦺ​ꦱꦶꦁ​ꦲꦺꦴꦫ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦩꦫꦁ​ꦱꦭꦃꦱꦏ꧀ꦮꦶꦗꦶꦤꦺꦮꦺꦴꦁ​ꦱꦶꦁ​ꦕꦶꦭꦶꦏ꧀ꦢꦺꦮꦺꦲꦶꦏꦶ​꧈​ꦏꦸꦮꦶ​ꦪ​ꦲꦺꦴꦫ​ꦲꦩ꧀ꦧꦺꦴꦏ꧀ꦠꦶꦤ꧀ꦢꦏ꧀ꦏꦏꦺꦩꦫꦁ​ꦲꦏꦸ​꧉'​ 46ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦤꦩ꧀ꦥ​ꦱꦼꦠꦿꦥꦤ꧀ꦭꦁꦒꦼꦁ​꧈​ꦤꦁꦔꦶꦁ​ꦮꦺꦴꦁ​ꦱꦶꦁ​ꦉꦱꦶꦏ꧀ꦲꦠꦶꦤꦺ​ꦧꦏꦭ꧀ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​꧉​”

↑ ↑ ↑


꧋ꦏꦺꦴꦩ꧀ꦥ꧀ꦭꦺꦴꦠ꧀ꦲꦉꦥ꧀ꦩꦠꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧇​꧒꧖꧇​ 1꧋ꦱꦏ꧀ꦮꦶꦱ꧀ꦱꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦫꦩ꧀ꦥꦸꦁ​ꦲꦼꦁꦒꦺꦴꦤꦺ​ꦩꦸꦭꦁꦔꦏꦺꦧꦧ꧀ꦏꦸꦮꦶ​ꦩꦲꦸ​ꦏꦧꦺꦃ​꧈​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​: 2“ꦏꦺꦴꦮꦺ​ꦮꦶꦱ꧀ꦥꦢ​ꦔꦼꦂꦠꦶ​ꦤꦺꦏ꧀ꦫꦶꦪꦪꦥꦱ꧀ꦏꦃ​ꦮꦶꦱ꧀ꦏꦸꦫꦁ​ ꦫꦺꦴꦁ​ꦢꦶꦤ​ꦩꦼꦤꦺꦃ​ꦭꦤ꧀ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦢꦶꦕꦼꦏꦼꦭ꧀ꦭꦤ꧀ꦢꦶꦥꦼꦤ꧀ꦠꦺꦁ꧉​”

3꧋ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦥꦶꦤꦶꦠꦸꦮꦤꦺ​ꦧꦁꦱ​ꦙꦸꦥꦢ​ꦔ꧀ꦭꦸꦩ꧀ꦥꦸꦏ꧀ꦤꦁꦲꦺꦴꦩꦃꦲꦺ​ꦲꦶꦩꦩ꧀ꦒꦼꦢꦺ​ꦏꦪꦥ꦳ꦱ꧀꧈​ 4ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦥꦶꦤꦶꦠꦸꦮ​ꦩꦲꦸ​ꦥꦢ​ꦉꦩ꧀ꦧꦸꦏ꧀ꦏꦤ꧀ꦧꦧ꧀ꦏꦼꦥꦿꦶꦪꦺ​ꦲꦏꦭ꧀ꦭꦺ​ꦲꦼꦁꦒꦺꦴꦤꦺ​ꦲꦉꦥ꧀ꦚꦼꦏꦼꦭ꧀ꦭꦤ꧀ꦩꦠꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 5ꦤꦁꦔꦶꦁ​ꦥꦢ​ꦔꦺꦴꦩꦺꦴꦁ:“ꦱꦶꦁ​ꦚꦼꦏꦼꦭ꧀ꦲꦗ​ꦠꦶꦧ​ꦢꦶꦤ​ꦫꦶꦪꦪꦥꦱ꧀ꦏꦃ​ꦭꦺꦴ​꧈​ꦩꦼꦁꦏꦺꦴ​ꦤ꧀ꦢꦏ꧀ꦩꦫꦏ꧀ꦏꦏꦺꦫꦩꦺ​ꦭꦤ꧀ꦒꦺꦒꦺꦂꦫꦤ꧀꧈​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦲꦸꦱꦥ꧀ꦥꦶ​ꦊꦔ​ꦮꦔꦶ​꧉​

6꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦲꦶꦏꦶ​ꦤꦁꦢꦺꦱ​ꦨꦺꦠꦤꦶ꧉​ꦢꦺꦏ꧀ꦤꦺꦩꦼꦂꦢꦪꦺꦴꦃꦤꦁꦲꦺꦴꦩꦃꦲꦺ​ꦱꦶꦩꦺꦴꦤ꧀ꦱꦶꦁ​ꦩꦲꦸꦤꦺ​ꦭꦫ​ꦭꦺꦥꦿ​꧉​ 7ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦗꦶꦏ꧀ꦗꦒꦺꦴꦁꦔꦤ꧀ꦩꦁꦔꦤ꧀ ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦠꦼꦏ​꧈​ꦔ꧀ꦒꦮ​ꦧꦺꦴꦠꦺꦴꦭ꧀ꦲꦶꦱꦶꦤꦺ​ꦊꦔ​ꦮꦔꦶ​ꦱꦶꦁ​ꦭꦫꦁ​ꦧꦔꦼꦠ꧀꧈​ꦮꦺꦴꦁꦔꦺ​ꦠꦼꦫꦸꦱ꧀​ꦔ꧀ꦊꦔꦤꦶꦱꦶꦫꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 8ꦥꦫ​ꦩꦸꦫꦶꦢ꧀ꦮꦼꦫꦸꦃ​ꦏꦸꦮꦶ​ꦩꦲꦸ​ꦠꦼꦫꦸꦱ꧀ꦥꦢ​ꦤꦼꦱꦸ​ꦭꦤ꧀ꦥꦢ​ꦔꦺꦴꦩꦺꦴꦁꦩꦫꦁ​ꦱꦏ꧀ꦥꦢꦥꦢ:“ꦲꦥ​ꦏꦸꦮꦶ​ꦲꦺꦴꦫ​ꦔꦼꦕꦺꦃꦲꦼꦕꦺꦃ​ꦢꦸꦮꦶꦠ꧀? 9ꦊꦔ​ꦮꦔꦶ​ꦏꦸꦮꦶ​ꦤꦺꦏ꧀ꦢꦶꦲꦼꦢꦺꦴꦭ꧀ꦲꦥ​ꦲꦺꦴꦫ​ꦥꦪꦸ​ꦲꦺꦴꦏꦺꦃꦭꦤ꧀ꦢꦸꦮꦶꦠ꧀ꦠꦺꦲꦥ​ꦲꦺꦴꦫ​ꦏꦼꦤꦺꦁꦢꦶꦏꦺꦏ꧀ꦏꦏꦺꦮꦺꦴꦁ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺ?”

10꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦂꦠꦶ​ꦉꦩ꧀ꦧꦸꦏꦤ꧀ꦤꦺꦥꦫ​ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦥꦢ​ꦔꦿꦱꦤꦶ​ꦲꦭ​ꦩꦫꦁ​ꦮꦺꦴꦁ​ꦮꦺꦢꦺꦴꦏ꧀ꦲꦶꦏꦶ​꧉​ꦮꦺꦴꦁ​ꦲꦶꦏꦶ​ꦭꦲꦸꦠ꧀​ꦔ꧀ꦭꦏꦺꦴꦤ꧀ꦤꦶ​ꦧꦫꦁ​ꦱꦶꦁ​ꦧꦼꦕꦶꦏ꧀ꦩꦫꦁ​ꦲꦏꦸ​ꦠ​? 11ꦮꦺꦴꦁ​ꦲꦺꦴꦫ​ꦤ꧀ꦢꦸꦮꦺꦏꦸꦮꦶ​ꦱ꧀ꦭꦮꦱ꧀ꦱꦺꦪ​ꦧꦏꦭ꧀ꦲꦺꦤꦺꦁꦠꦼꦫꦸꦱ꧀ꦤꦁꦠꦼꦔꦃꦩꦸ​꧈​ꦤꦁꦔꦶꦁ​ꦲꦏꦸ​ꦲꦺꦴꦫ​ꦱ꧀ꦭꦮꦱ꧀ꦱꦺꦧꦏꦭ꧀ꦕꦩ꧀ꦥꦸꦂ​ꦏꦫꦺꦴ​ꦏꦺꦴꦮꦺ​꧉​ 12ꦮꦺꦴꦁ​ꦲꦶꦏꦶ​ꦲꦼꦁꦒꦺꦴꦤꦺ​ꦔꦼꦱꦺꦴꦏ꧀ꦏꦏꦺꦊꦔ​ꦤꦁꦲꦮꦏ꧀ꦏꦸ​ꦲꦶꦏꦶ​ꦏꦁꦒꦺꦴ​ꦕꦼꦕꦮꦶꦱ꧀ꦥꦼꦔꦸꦧꦸꦫꦤ꧀ꦏꦸ꧉​ 13ꦥꦢ​ꦠꦶꦠꦺꦤ꧀ꦤꦤ꧀ꦤ​!ꦤꦁꦲꦼꦤ꧀ꦢꦶ​ꦮꦲꦺ​ꦱꦶꦁ​ꦢꦶꦒꦼꦭꦂꦫꦶꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦥ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦮꦺꦴꦁ​ꦮꦺꦢꦺꦴꦏ꧀ꦲꦶꦏꦶ​ꦪ​ꦧꦏꦭ꧀ꦢꦶꦲꦺꦴꦩꦺꦴꦁꦔꦏꦺ꧈​ꦏꦁꦒꦺꦴ​ꦥꦼꦁꦔꦺꦭꦶꦁꦔꦺꦭꦶꦁ​ꦩꦫꦁ​ꦢꦺꦏ꧀ꦤꦺ꧉​”

꧋ꦪꦸꦢꦱ꧀ꦆꦱ꧀ꦏꦫꦶꦪꦺꦴꦠ꧀ꦱꦒꦸꦃ​ꦩꦱꦿꦃꦲꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦩꦫꦁ​ꦩꦸꦁꦱꦸꦃꦲꦺ​꧉​

14꧋ꦱꦁꦏꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦫꦺꦴꦭꦱ꧀ꦲꦺꦤꦺꦁꦱꦶꦗꦶ​꧈​ꦪꦏꦸꦮꦶ​ꦪꦸꦢꦱ꧀ꦆꦱ꧀ꦏꦫꦶꦪꦺꦴꦠ꧀ ꦱꦶꦁ​ꦭꦸꦔ​ꦤꦁꦔ꧀ꦒꦺꦴꦤ꧀ꦤꦺꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀꧈​ 15ꦪꦸꦢꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦥꦶꦫ​ꦲꦸꦥꦃꦲꦺꦤꦺꦏ꧀ꦲꦏꦸ​ꦩꦱꦿꦃꦲꦏꦺꦪꦺꦯꦸꦱ꧀ꦩꦫꦁ​ꦏꦺꦴꦮꦺ​?”ꦪꦸꦢꦱ꧀ꦠꦼꦫꦸꦱ꧀ꦢꦶꦏꦺꦏ꧀ꦏꦶꦢꦸꦮꦶꦠ꧀ꦱꦼꦭꦏ​ꦠꦼꦭꦸꦁ​ꦥꦸꦭꦸꦃ​꧉​ 16ꦮꦶꦮꦶꦠ꧀ꦮꦏ꧀ꦠꦸ​ꦏꦸꦮꦶ​ꦢꦺꦏ꧀ꦤꦺꦠꦼꦫꦸꦱ꧀​ꦔ꧀ꦒꦺꦴꦭꦺꦏ꧀ꦏꦼꦭꦸꦁꦒꦂꦫꦤ꧀ꦏꦁꦒꦺꦴ​ꦩꦱꦿꦃꦲꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦩꦫꦁ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀꧈​

꧋ꦕꦼꦕꦮꦶꦱ꧀ꦥꦺꦱ꧀ꦠ​ꦥꦱ꧀ꦏꦃ​꧉​

17꧋ꦱꦲꦶꦏꦶ​ꦮꦶꦱ꧀ꦢꦶꦤ​ꦮꦶꦮꦶꦠ꧀ꦠꦤ꧀ꦤꦺ​ꦫꦶꦪꦪꦥꦺꦱ꧀ꦠ​ꦫꦺꦴꦠꦶ​ꦠꦤ꧀ꦥ​ꦫꦒꦶ​꧉​ꦥꦫ​ꦩꦸꦫꦶꦢ꧀ꦥꦢ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦒꦸꦱ꧀ꦠꦶ​꧈​ꦏꦺꦴꦮꦺ​ꦚ꧀ꦗꦭꦸꦏ꧀ꦩꦁꦔꦤ꧀ꦥꦺꦱ꧀ꦠ​ꦥꦱ꧀ꦏꦃ​ꦤꦁꦲꦼꦤ꧀ꦢꦶ​?ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦕꦼꦕꦮꦶꦱ꧀꧈​”

18꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦗꦼꦤꦼꦁꦔꦺ​ꦱꦏ꧀ꦮꦶꦗꦶꦤꦺꦮꦺꦴꦁ​ꦤꦁꦏꦸꦠ:“ꦏꦤ​ꦤꦁꦲꦺꦴꦩꦃꦲꦺ​ꦮꦺꦴꦁ​ꦏꦸꦮꦶ​ꦭꦤ꧀ꦔꦺꦴꦩꦺꦴꦁ:'ꦒꦸꦫꦸꦤꦺ​ꦔꦺꦴꦩꦺꦴꦁ:ꦮꦏꦶꦭ꧀ꦏꦸꦮꦶꦱ꧀ꦠꦼꦏ​꧈​ꦲꦏꦸ​ꦏꦼꦥꦺꦔꦶꦤ꧀ꦩꦁꦔꦤ꧀ꦥꦺꦱ꧀ꦠ​ꦥꦱ꧀ꦏꦃ​ꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦏꦸ​ꦤꦁꦲꦺꦴꦩꦃꦩꦸ​꧉​’”

19꧋ꦩꦸꦫꦶꦢ꧀ꦩꦸꦫꦶꦢ꧀ꦩꦲꦸ​ꦠꦼꦫꦸꦱ꧀ꦧꦸꦢꦭ꧀ꦭꦤ꧀ꦤꦶꦤ꧀ꦢꦏ꧀ꦏꦏꦺꦲꦥ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦫꦸꦱ꧀ꦥꦢ​ꦚꦮꦶꦱ꧀ꦱꦏꦺꦥꦺꦱ꧀ꦠ​ꦥꦱ꧀ꦏꦃ​꧉​

20꧋ꦩ꧀ꦧꦼꦔꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦁꦔꦤ꧀ꦧꦼꦧꦉꦁꦔꦤ꧀ꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ 21ꦢꦺꦴꦁꦔꦺꦲꦶꦗꦶꦏ꧀ꦥꦢ​ꦩꦁꦔꦤ꧀ ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦲꦏꦸ​ꦔꦺꦴꦩꦺꦴꦁꦔꦶꦏꦺꦴꦮꦺ​ꦤꦺꦏ꧀ꦱꦶꦗꦶ​ꦱꦁꦏꦠꦼꦔꦃꦩꦸ​ꦧꦏꦭ꧀ꦔꦼꦭꦸꦁꦔꦏꦺꦲꦏꦸ​ꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦲꦉꦥ꧀ꦩꦠꦺꦤ꧀ꦤꦶ​ꦲꦏꦸ​꧉​”

22꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦱꦼꦢꦶꦧꦔꦼꦠ꧀ꦏꦿꦸꦔꦸ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦏꦸꦮꦶ​ꦩꦲꦸ​꧈​ꦠꦼꦫꦸꦱ꧀ꦒꦼꦤ꧀ꦠꦺꦤ꧀ꦤꦤ꧀ꦠꦏꦺꦴꦤ꧀:“ꦭꦲꦸꦠ꧀ꦢꦸꦢꦸ​ꦲꦏꦸ​ꦠ​ꦒꦸꦱ꧀ꦠꦶ​?”

23꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦮꦺꦴꦁ​ꦱꦶꦁ​ꦔꦼꦕ꧀ꦭꦸꦥ꧀ꦥꦏꦺ​ꦫꦺꦴꦠꦶꦤꦺ​ꦤꦁꦩꦁꦏꦺꦴꦏ꧀ꦧꦉꦁ​ꦏꦫꦺꦴ​ꦲꦏꦸ​꧈​ꦪꦏꦸꦮꦶ​ꦱꦶꦁ​ꦧꦏꦭ꧀ꦔꦼꦭꦸꦁꦔꦏꦺꦲꦏꦸ​꧉​ 24ꦲꦤꦏ꧀ꦏꦺ​ꦩꦤꦸꦁꦱ​ꦥꦚ꧀ꦕꦺꦤ꧀ꦏꦸꦢꦸ​ꦩꦠꦶ​꧈​ꦲꦮꦶꦠ꧀ꦤꦁꦏꦶꦠꦧ꧀​ꦮꦶꦱ꧀ꦏꦼꦠꦸꦭꦶꦱ꧀ꦧꦧ꧀ꦲꦼꦁꦒꦺꦴꦤꦺ​ꦢꦺꦏ꧀ꦤꦺꦧꦏꦭ꧀ꦩꦠꦶ​꧉​ꦤꦁꦔꦶꦁ​ꦕꦶꦭꦏ​ꦠꦼꦤꦤ꧀ꦮꦺꦴꦁ​ꦱꦶꦁ​ꦔꦼꦭꦸꦁꦔꦏꦺꦲꦤꦏ꧀ꦏꦺ​ꦩꦤꦸꦁꦱ​꧉​ꦭꦸꦮꦶꦃ​ꦲꦥꦶꦏ꧀ꦱꦼꦩꦸꦁꦒꦺꦴꦤ꧀ꦤꦺꦮꦺꦴꦁ​ꦏꦸꦮꦶ​ꦲꦺꦴꦫ​ꦭꦲꦶꦂ​ꦮꦲꦺ​꧉​”

25꧋ꦪꦸꦢꦱ꧀ ꦱꦶꦁ​ꦧꦏꦭ꧀ꦔꦼꦭꦸꦁꦔꦏꦺꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦫꦸꦱ꧀ꦠꦏꦺꦴꦤ꧀:“ꦲꦥ​ꦏꦺꦴꦮꦺ​ꦔꦺꦴꦩꦺꦴꦁꦔꦏꦺꦲꦏꦸ​ꦒꦸꦫꦸ​?”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦢꦺꦮꦺꦱꦶꦁ​ꦔꦺꦴꦩꦺꦴꦁ꧉​”

꧋ꦮꦶꦮꦶꦠ꧀ꦠꦤ꧀ꦤꦺ​ꦥꦺꦱ꧀ꦠ​ꦱꦸꦕꦶ​꧉​

26꧋ꦢꦺꦴꦁꦔꦺꦥꦢ​ꦩꦁꦔꦤ꧀ ꦒꦸꦱ꧀ꦠꦶ​ꦪꦺꦯꦸꦱ꧀​ꦚ꧀ꦗꦶꦏꦸꦏ꧀ꦫꦺꦴꦠꦶ​ꦠꦼꦫꦸꦱ꧀​ꦤ꧀ꦢꦺꦴꦁꦔ꧈​ꦩꦠꦸꦂꦏꦼꦱꦸꦮꦸꦤ꧀ ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦫꦺꦴꦠꦶꦤꦺ​ꦠꦼꦫꦸꦱ꧀ꦢꦶꦕꦸꦮꦶꦭ꧀ꦕꦸꦮꦶꦭ꧀ꦠꦼꦫꦸꦱ꧀ꦢꦶꦏꦺꦏ꧀ꦏꦏꦺꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧈​ꦠꦼꦩ꧀ꦧꦸꦁꦔꦺ​:“ꦥꦢ​ꦢꦶꦠꦩ꧀ꦥꦤꦶ​ꦭꦤ꧀ꦢꦶꦥꦔꦤ꧀ ꦲꦶꦏꦶ​ꦲꦮꦏ꧀ꦏꦸ​꧉​”

27꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦚ꧀ꦗꦶꦏꦸꦏ꧀ꦲꦺꦴꦩ꧀ꦧꦺꦤ꧀ꦤꦺ꧉​ꦱꦏ꧀ꦮꦶꦱ꧀ꦱꦺ​ꦢꦶꦢꦺꦴꦔꦏ꧀ꦏꦏꦺꦭꦤ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦺꦏ꧀ꦤꦺꦠꦼꦫꦸꦱ꧀ꦔꦼꦭꦸꦁꦔꦏꦺꦲꦺꦴꦩ꧀ꦧꦺꦤ꧀ꦤꦺꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦫꦺꦴ​ꦔꦺꦴꦩꦺꦴꦁ:“ꦥꦢ​ꦔꦺꦴꦩ꧀ꦧꦺꦪ​ꦏꦧꦺꦃ​꧉​ 28ꦲꦮꦶꦠ꧀ꦲꦶꦏꦶ​ꦒꦼꦠꦶꦃꦏꦸ​ꦏꦁꦒꦺꦴ​ꦤꦼꦠꦼꦥ꧀ꦥꦏꦺꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦼꦠꦶꦃꦏꦸ​ꦲꦶꦏꦶ​ꦩꦶꦭꦶ​ꦏꦁꦒꦺꦴ​ꦮꦺꦴꦁ​ꦲꦺꦴꦏꦺꦃ꧈​ꦱꦸꦥꦪ​ꦧꦶꦱ​ꦤꦩ꧀ꦥ​ꦥꦔꦥꦸꦫ​ꦱꦁꦏꦢꦺꦴꦱꦤꦺ​꧉​ 29ꦥꦢ​ꦔꦼꦂꦠꦶꦪ​꧈​ꦲꦏꦸ​ꦧꦏꦭ꧀ꦲꦺꦴꦫ​ꦔꦺꦴꦩ꧀ꦧꦺ​ꦲꦁꦒꦸꦂ​ꦲꦶꦏꦶ​ꦩꦼꦤꦺꦃ​ꦔꦤ꧀ꦠꦶ​ꦮꦏ꧀ꦠꦸꦩꦸꦲꦏꦸ​ꦧꦏꦭ꧀ꦔꦺꦴꦩ꧀ꦧꦺ​ꦲꦁꦒꦸꦂ​ꦲꦚꦂ​ꦏꦫꦺꦴ​ꦏꦺꦴꦮꦺ​ꦏꦧꦺꦃ​ꦲꦶꦁ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​꧉​”

30꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦥꦫ​ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦥꦢ​ꦩꦼꦚꦚꦶ​ꦭꦤ꧀ꦩꦼꦩꦸꦗꦶ​꧈​ꦠꦼꦫꦸꦱ꧀ꦧꦸꦢꦭ꧀ꦤꦁꦒꦸꦤꦸꦁ​ꦎꦭꦺꦥ꦳꧀꧈​

꧋ꦫꦱꦸꦭ꧀ꦦꦺꦠꦿꦸꦱ꧀ꦧꦏꦭ꧀ꦚꦺꦭꦏ꧀ꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

31꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦲꦶꦁ​ꦮꦼꦔꦶ​ꦲꦶꦏꦶ​ꦮꦲꦺ​ꦏꦺꦴꦮꦺ​ꦧꦏꦭ꧀ꦥꦢ​ꦩ꧀​ꦧ꧀ꦭꦪꦸꦤꦶꦁꦒꦭ꧀ꦲꦏꦸ​ꦲꦶꦗꦺꦤ꧀꧈​ꦲꦮꦶꦠ꧀ꦤꦁꦏꦶꦠꦧ꧀​ꦪ​ꦮꦶꦱ꧀ꦏꦼꦠꦸꦭꦶꦱ꧀ꦔꦺꦤꦺ​:'ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦩꦠꦺꦤ꧀ꦤꦶ​ꦥꦔꦺꦴꦤ꧀ꦤꦺ​ꦭꦤ꧀ꦮꦼꦢꦸꦱ꧀ꦮꦼꦢꦸꦱ꧀ꦱꦺꦧꦏꦭ꧀ꦧꦸꦪꦂ​꧉'​ 32ꦤꦁꦔꦶꦁ​ꦤꦺꦏ꧀ꦲꦏꦸ​ꦮꦶꦱ꧀ꦠꦔꦶ​ꦱꦁꦏꦥꦠꦶ​꧈​ꦲꦏꦸ​ꦧꦏꦭ꧀ꦧꦸꦢꦭ꧀ꦤꦁꦧꦮꦃꦓꦭꦶꦭꦺꦪ​꧈​ꦤ꧀ꦢꦶꦱꦶꦏ꧀ꦏꦶ​ꦏꦺꦴꦮꦺ​꧉​”

33꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦒꦸꦱ꧀ꦠꦶ​꧈​ꦱꦼꦤꦗꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦭꦶꦪꦤꦺ​ꦤꦶꦁꦒꦭ꧀ꦏꦺꦴꦮꦺ​꧈​ꦲꦏꦸ​ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦧꦏꦭ꧀ꦤꦶꦁꦒꦭ꧀ꦏꦺꦴꦮꦺ​!”

34꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​ꦔꦺꦤꦺ​:“ꦫꦸꦔꦺꦴꦏ꧀ꦏꦏꦺꦦꦺꦠꦿꦸꦱ꧀ ꦲꦶꦁ​ꦮꦼꦔꦶ​ꦲꦶꦏꦶ​ꦮꦲꦺ​꧈​ꦱꦏ꧀ꦢꦸꦫꦸꦁꦔꦺꦗꦒꦺꦴ​ꦏ꧀ꦭꦸꦫꦸꦏ꧀ ꦏꦺꦴꦮꦺ​ꦧꦏꦭ꧀ꦚꦺꦭꦏ꧀ꦏꦶ​ꦲꦏꦸ​ꦱꦩ꧀ꦥꦺꦏ꧀ꦥꦶꦁ​ꦠꦼꦭꦸ​꧉​”

35꧋ꦤꦁꦔꦶꦁ​ꦫꦱꦸꦭ꧀ꦦꦺꦠꦿꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ​꧈​ꦲꦏꦸ​ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦧꦏꦭ꧀ꦤꦶꦁꦒꦭ꧀ꦏꦺꦴꦮꦺ​꧈​ꦱꦼꦤꦗꦤ꧀ꦲꦏꦸ​ꦏꦸꦢꦸ​ꦩꦠꦶ​ꦧꦉꦁ​ꦏꦫꦺꦴ​ꦏꦺꦴꦮꦺ​꧉​”

꧋ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦭꦶꦪꦤꦺ​ꦲꦸꦒ​ꦏꦧꦺꦃ​ꦥꦢ​ꦔꦺꦴꦩꦺꦴꦁꦔꦺꦴꦤꦺꦴ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦺꦴꦁꦔꦤꦁꦒꦺꦠ꧀ꦱꦺꦩꦤꦺ​꧉​

36꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦧꦸꦢꦭ꧀ꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦗꦼꦤꦼꦁꦔꦺ​ꦒꦺꦠ꧀ꦱꦺꦩꦤꦺ​꧉​ꦤꦁꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦏꦺꦴꦮꦺ​ꦥꦢ​ꦚ꧀ꦗꦒꦺꦴꦁꦤꦁꦏꦺꦤꦺ​ꦮꦲꦺ​꧉​ꦲꦏꦸ​ꦲꦉꦥ꧀​ꦩ꧀ꦧꦿꦤꦤ꧀ꦢꦺꦴꦁꦔ꧉​” 37ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦼꦗꦺꦏ꧀ꦫꦱꦸꦭ꧀ꦦꦺꦠꦿꦸꦱ꧀ꦭꦤ꧀ꦲꦤꦏ꧀ꦏꦺ​ꦯꦺꦧꦺꦢꦺꦪꦸꦱ꧀ꦏꦧꦺꦃ​ꦭꦺꦴꦫꦺꦴ​꧉​ꦤꦁꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦏꦺꦠꦺꦴꦏ꧀ꦱꦼꦢꦶꦭꦤ꧀ꦮꦼꦢꦶ​ꦧꦔꦼꦠ꧀꧈​ 38ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦏꦸꦮꦶ​:“ꦲꦠꦶꦏꦸ​ꦗꦤ꧀ꦱꦼꦢꦶꦧꦔꦼꦠ꧀ ꦫꦱꦤꦺ​ꦏꦪ​ꦮꦺꦴꦁ​ꦲꦉꦥ꧀ꦩꦠꦶ​꧉​ꦥꦢ​ꦔꦼꦤ꧀ꦠꦺꦤ꧀ꦤꦶ​ꦤꦁꦏꦺꦤꦺ​ꦭꦤ꧀ꦲꦏꦸ​ꦢꦶꦫꦺꦮꦁꦔꦶ​ꦩꦼꦭꦺꦏ꧀꧈​”

39꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦩ꧀ꦭꦏꦸ​ꦫꦢ​ꦲꦢꦺꦴꦃ​꧈​ꦠꦼꦫꦸꦱ꧀ꦤꦶꦧ​ꦭꦤ꧀​ꦤ꧀ꦢꦺꦴꦁꦔ:“ꦢꦸꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​꧈​ꦤꦺꦏ꧀ꦏꦺꦴꦮꦺ​ꦒꦼꦊꦩ꧀ ꦲꦩ꧀ꦧꦺꦴꦏ꧀ꦏꦱꦁꦱꦫꦤ꧀ꦲꦶꦏꦶ​ꦢꦶꦱꦶꦩ꧀ꦥꦁꦔꦏꦺꦱꦁꦏꦲꦏꦸ​꧉​ꦤꦁꦔꦶꦁ​ꦲꦺꦴꦫ​ꦏꦼꦏꦉꦥꦤ꧀ꦏꦸ꧈​ꦩꦸꦁ​ꦏꦼꦏꦉꦥ꧀ꦥꦤ꧀ꦩꦸ​ꦱꦶꦁ​ꦏꦸꦢꦸ​ꦏ꧀ꦭꦏꦺꦴꦤ꧀꧈​”

40꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦧꦭꦶꦏ꧀ꦩꦼꦤꦺꦃ​ꦭꦤ꧀ꦤꦼꦩꦸ​ꦩꦸꦫꦶꦢ꧀ꦱꦶꦁ​ꦠꦼꦭꦸ​ꦩꦲꦸ​ꦥꦢ​ꦠꦸꦫꦸ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦫꦱꦸꦭ꧀ꦦꦺꦠꦿꦸꦱ꧀:“ꦩꦺꦴꦱꦺꦴꦏ꧀ꦏꦺꦴꦮꦺ​ꦏꦧꦺꦃ​ꦠꦼꦭꦸ​ꦲꦺꦴꦫ​ꦲꦺꦤꦺꦁꦱꦶꦁ​ꦧꦶꦱ​ꦔꦿꦺꦮꦁꦔꦶ​ꦲꦏꦸ​ꦩꦼꦭꦺꦏ꧀ꦤꦩꦸꦁ​ꦱꦏ꧀ꦗꦩ꧀ꦮꦲꦺ​? 41ꦥꦢ​ꦩꦼꦭꦺꦏ꧀ꦏ​ꦭꦤ꧀ꦥꦢ​ꦤ꧀ꦢꦼꦢꦺꦴꦔꦲ​꧈​ꦱꦸꦥꦪ​ꦲꦺꦴꦫ​ꦠꦶꦧ​ꦲꦶꦁ​ꦥꦁꦒꦺꦴꦢ꧉​ꦥꦚ꧀ꦕꦺꦤ꧀ ꦲꦠꦶꦤꦺ​ꦏꦼꦥꦺꦔꦶꦤ꧀​ꦔ꧀ꦭꦏꦺꦴꦤ꧀ꦤꦶ​ꦱꦶꦁ​ꦧꦼꦕꦶꦏ꧀ ꦤꦁꦔꦶꦁ​ꦲꦮꦏ꧀ꦏꦺ​ꦲꦺꦴꦫ​ꦏꦸꦮꦠ꧀꧈​”

42꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ꦩꦼꦤꦺꦃ​ꦥꦶꦁ​ꦥꦶꦤ꧀ꦢꦺꦴꦤꦺꦤ꧀ꦢꦼꦢꦺꦴꦔ​ꦔꦺꦤꦺ​:“ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦸ​꧈​ꦤꦺꦏ꧀ꦏꦱꦁꦱꦫꦤ꧀ꦲꦶꦏꦶ​ꦥꦚ꧀ꦕꦺꦤ꧀ꦲꦺꦴꦫ​ꦏꦼꦤꦺꦁꦢꦶꦱꦶꦩ꧀ꦥꦁꦔꦏꦺ꧈​ꦪ​ꦩꦺꦴꦱꦺꦴꦏ꧀ꦧꦺꦴꦢꦺꦴ꧈​ꦲꦥ​ꦏꦉꦥ꧀ꦩꦸ​ꦏꦸꦢꦸ​ꦏ꧀ꦭꦏꦺꦴꦤ꧀꧈​” 43ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦧꦭꦶꦏ꧀ꦩꦼꦤꦺꦃ​꧈​ꦤꦁꦔꦶꦁ​ꦤꦼꦩꦸ​ꦩꦸꦫꦶꦢ꧀ꦢꦺ​ꦠꦼꦭꦸ​ꦩꦲꦸ​ꦲꦶꦗꦶꦏ꧀ꦥꦢ​ꦠꦸꦫꦸ​ꦩꦼꦤꦺꦃ​꧈​ꦲꦮꦶꦠ꧀ꦩꦿꦶꦥꦠ꧀ꦠꦺ​ꦲꦺꦴꦫ​ꦏꦸꦮꦠ꧀ꦩꦼꦭꦺꦏ꧀꧈​

44꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦸꦮꦶ​ꦠꦼꦫꦸꦱ꧀ꦢꦶꦠꦶꦁꦒꦭ꧀ꦩꦼꦤꦺꦃ​ꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦤ꧀ꦢꦺꦴꦁꦔꦥꦶꦁ​ꦠꦼꦭꦸꦤꦺ​꧈​ꦪ​ꦏꦪ​ꦱꦶꦁ​ꦤ꧀ꦢꦶꦱꦶꦏ꧀꧈​ 45ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦢꦺꦏ꧀ꦤꦺꦠꦼꦫꦸꦱ꧀ꦩꦫꦤꦶ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ꦢꦺꦏ꧀ꦤꦺꦔꦺꦴꦩꦺꦴꦁ:“ꦲꦶꦗꦶꦏ꧀ꦥꦢ​ꦠꦸꦫꦸ​ꦭꦤ꧀ꦭꦺꦫꦺꦤ꧀?ꦱꦲꦶꦏꦶ​ꦮꦶꦱ꧀ꦮꦏ꧀ꦠꦸꦩꦸ꧈​ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦢꦶꦥꦱꦿꦃꦲꦏꦺꦩꦫꦁ​ꦮꦺꦴꦁ​ꦢꦺꦴꦱ​꧉​ 46ꦲ꦳ꦪꦸꦏ꧀ꦥꦢ​ꦠꦔꦶ​ꦭꦤ꧀ꦲ꦳ꦪꦸꦏ꧀ꦥꦢ​ꦭꦸꦔ​꧉​ꦢꦼꦭꦺꦴꦏ꧀ꦏꦼꦤ꧀ ꦮꦺꦴꦁ​ꦱꦶꦁ​ꦔꦼꦭꦸꦁꦔꦏꦺꦲꦏꦸ​ꦮꦶꦱ꧀ꦠꦼꦏ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦕꦼꦏꦼꦭ꧀꧈​

47꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦸꦫꦸꦁ​ꦱꦩ꧀ꦥꦺꦏ꧀ꦫꦩ꧀ꦥꦸꦁ​ꦱꦶꦁ​ꦔꦺꦴꦩꦺꦴꦁ꧈​ꦏꦺꦴꦏ꧀ꦪꦸꦢꦱ꧀ ꦱꦭꦃꦱꦏ꧀ꦮꦶꦗꦶꦤꦺꦩꦸꦫꦶꦢ꧀ꦱꦶꦁ​ꦫꦺꦴꦭꦱ꧀ ꦠꦼꦏ​꧉​ꦢꦺꦏ꧀ꦤꦺꦠꦼꦏ​ꦧꦉꦁ​ꦏꦫꦺꦴ​ꦮꦺꦴꦁ​ꦲꦺꦴꦏꦺꦃꦱꦶꦁ​ꦔ꧀ꦒꦮ​ꦥꦼꦢꦁꦭꦤ꧀ꦥꦼꦤ꧀ꦠꦸꦁ꧉​ꦮꦺꦴꦁꦮꦺꦴꦁ​ꦏꦸꦮꦶ​ꦢꦶꦏꦺꦴꦁꦏꦺꦴꦤ꧀ꦏꦫꦺꦴ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦥꦶꦤꦶꦠꦸꦮꦤꦺ​ꦧꦁꦱ​ꦙꦸ꧉​ 48ꦪꦸꦢꦱ꧀ꦮꦶꦱ꧀​ꦔ꧀ꦒꦮꦺ​ꦠꦼꦔꦼꦂꦫꦤ꧀ꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​ꦔꦺꦤꦺ​:“ꦮꦺꦴꦁ​ꦱꦶꦁ​ꦠꦏ꧀ꦲꦩ꧀ꦧꦸꦁ꧈​ꦪꦏꦸꦮꦶ​ꦮꦺꦴꦁꦔꦺ​꧉​ꦮꦺꦴꦁ​ꦏꦸꦮꦶ​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦕꦼꦏꦼꦭ꧀꧈​”

49꧋ꦪꦸꦢꦱ꧀ꦠꦼꦫꦸꦱ꧀ꦱꦤ꧀ꦩꦫꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦱ꧀ꦭꦩꦼꦠ꧀ꦒꦸꦫꦸ​꧈​”ꦠꦼꦫꦸꦱ꧀ꦔꦩ꧀ꦧꦸꦁ​ꦢꦺꦏ꧀ꦤꦺ꧉​

50꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ​:“ꦤ꧀ꦢꦁꦢꦶꦠꦶꦤ꧀ꦢꦏ꧀ꦏꦏꦺꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦏꦉꦥ꧀ꦥꦏꦺ!”

꧋ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦩꦗꦸ​ꦚꦼꦏꦼꦭ꧀ꦒꦸꦱ꧀ꦠꦶ​ꦪꦺꦯꦸꦱ꧀꧈​ 51ꦱꦭꦃꦱꦏ꧀ꦮꦶꦗꦶꦤꦺꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦫꦶꦏ꧀ꦥꦼꦢꦁꦔꦺꦢꦶꦲꦼꦁꦒꦺꦴ​ꦚꦧꦼꦠ꧀ꦏꦸꦥꦶꦁꦔꦺ​ꦱ꧀ꦭꦥ꦳꧀ꦥ꦳ꦺꦲꦶꦩꦩ꧀ꦒꦼꦢꦺ​꧉​ꦏꦸꦥꦶꦁꦔꦺ​ꦕꦼꦥꦺꦴꦭ꧀​꧉​ 52ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦥꦼꦢꦁ​ꦩꦸ​ꦊꦧꦺꦴꦏ꧀ꦏꦏꦺꦩꦼꦤꦺꦃ​!ꦲꦮꦶꦠ꧀ꦱꦥ​ꦮꦲꦺ​ꦱꦶꦁ​ꦔꦁꦒꦺꦴꦏ꧀ꦏꦏꦺꦥꦼꦢꦁꦔꦺ꧈​ꦧꦏꦭ꧀ꦩꦠꦶ​ꦏꦫꦺꦴ​ꦥꦼꦢꦁ꧉​ 53ꦲꦥ​ꦏꦺꦴꦮꦺ​ꦩꦶꦏꦶꦂ​ꦤꦺꦏ꧀ꦲꦏꦸ​ꦲꦺꦴꦫ​ꦧꦶꦱ​ꦚꦸꦮꦸꦤ꧀ꦩꦫꦁ​ꦧꦥꦏ꧀ꦏꦸ​꧉​ꦤꦺꦏ꧀ꦲꦏꦸ​ꦒꦼꦊꦩ꧀ ꦢꦺꦏ꧀ꦤꦺꦧꦶꦱ​ꦔꦺꦴꦁꦏꦺꦴꦤ꧀ꦩꦸꦭꦺꦏꦠ꧀ꦩꦸꦭꦺꦏꦠ꧀ꦠꦺꦠꦼꦏ​ꦱꦏ꧀ꦮꦠ꧀ ꦔꦸꦁꦏꦸꦭ꧀ꦭꦶ​ꦫꦺꦴꦭꦱ꧀ꦒꦺꦴꦭꦺꦴꦁꦔꦤ꧀꧈​

54꧋ꦭꦃ​ꦤꦁꦔꦶꦁ​ꦱꦼꦩꦸꦁꦒꦺꦴꦤ꧀ꦤꦺꦔꦺꦴꦤꦺꦴ​꧈​ꦭꦃ​ꦏꦼꦥꦿꦶꦪꦺ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀​ꦧꦶꦱꦤꦺ​ꦏꦼꦠꦸꦫꦸꦠ꧀ꦠꦤ꧀?ꦲꦮꦶꦠ꧀ꦤꦁꦏꦶꦠꦧ꧀​ꦮꦶꦱ꧀ꦏꦼꦠꦸꦭꦶꦱ꧀ꦤꦺꦏ꧀ꦏꦧꦺꦃ​ꦲꦶꦏꦶ​ꦏꦸꦢꦸ​ꦏꦼꦠꦸꦫꦸꦠ꧀ꦠꦤ꧀꧈​”

55꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦲꦶꦏꦶ​ꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​:“ꦲꦥ​ꦫꦸꦩꦁꦱꦩꦸ​ꦲꦏꦸ​ꦲꦶꦏꦶ​ꦮꦺꦴꦁ​ꦠꦸꦏꦁ​ꦔꦿꦩ꧀ꦥꦺꦴꦏ꧀ ꦏꦺꦴꦏ꧀ꦏꦺꦴꦮꦺ​ꦲꦉꦥ꧀ꦚꦼꦏꦼꦭ꧀ꦲꦏꦸ​ꦔꦁꦒꦺꦴ​ꦥꦼꦢꦁꦭꦤ꧀ꦥꦼꦤ꧀ꦠꦸꦁ?ꦱꦧꦼꦤ꧀ꦢꦶꦤ​ꦲꦏꦸ​ꦭꦲꦸꦠ꧀ꦩꦸꦭꦁꦔꦶꦤꦁꦒꦿꦺꦗ​ꦒꦼꦢꦺ​ꦠ​?ꦭꦃ​ꦏꦺꦴꦏ꧀ꦲꦺꦴꦫ​ꦲꦩ꧀ꦧꦺꦴꦏ꧀ꦕꦼꦏꦼꦭ꧀ꦲꦏꦸ​? 56ꦤꦁꦔꦶꦁ​ꦏꦧꦺꦃ​ꦲꦶꦏꦶ​ꦏꦸꦢꦸ​ꦏ꧀ꦭꦏꦺꦴꦤ꧀ꦔꦺꦤꦺ​꧈​ꦱꦸꦥꦪ​ꦲꦥ​ꦱꦶꦁ​ꦮꦶꦱ꧀ꦢꦶꦠꦸꦭꦶꦱ꧀ꦏꦫꦺꦴ​ꦥꦫ​ꦤꦧꦶ​ꦤꦁꦏꦶꦠꦧ꧀​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀꧉”ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦥꦫ​ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦶꦁꦒꦭ꧀ꦢꦺꦏ꧀ꦤꦺꦭꦤ꧀ꦥꦢ​ꦩ꧀​ꦧ꧀ꦭꦪꦸꦭꦸꦔ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦏꦿꦸꦠꦺꦴꦤ꧀ꦲꦒꦩ​꧉​

57꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦒꦮ​ꦤꦁꦲꦺꦴꦩꦃꦲꦺ​ꦲꦶꦩꦩ꧀ꦒꦼꦢꦺ​ꦏꦪꦥ꦳ꦱ꧀꧈​ꦤꦁꦏꦺꦴꦤꦺꦴ​ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦥꦫ​ꦥꦶꦤꦶꦠꦸꦮꦤꦺ​ꦧꦁꦱ​ꦙꦸꦮꦶꦱ꧀ꦥꦢ​ꦔ꧀ꦭꦸꦩ꧀ꦥꦸꦏ꧀꧈​ 58ꦫꦱꦸꦭ꧀ꦦꦺꦠꦿꦸꦱ꧀ꦔꦼꦠꦸꦠ꧀ꦠꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦏꦢꦺꦴꦃꦲꦤ꧀ ꦱꦩ꧀ꦥꦺꦏ꧀ꦠꦼꦏꦤ꧀ꦭꦠꦂꦫꦺ​ꦲꦺꦴꦩꦃꦲꦺ​ꦲꦶꦩꦩ꧀ꦒꦼꦢꦺ​꧉​ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀​ꦩ꧀ꦊꦧꦸ​꧈​ꦠꦼꦫꦸꦱ꧀​ꦚ꧀ꦗꦒꦺꦴꦁꦏꦺꦴꦤꦺꦴ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦗꦒ​꧉​ꦢꦺꦏ꧀ꦤꦺꦏꦼꦥꦺꦔꦶꦤ꧀ꦮꦼꦫꦸꦃ​ꦏꦼꦥꦿꦶꦪꦺ​ꦧꦏꦭ꧀ꦭꦺ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧉​ 59ꦲꦶꦩꦩ꧀ꦩꦺ​ꦒꦼꦢꦺ​ꦭꦤ꧀ꦥꦫ​ꦮꦂꦒꦤꦺ​ꦏꦿꦸꦠꦺꦴꦤ꧀ꦲꦒꦩ​ꦏꦧꦺꦃ​ꦥꦢ​ꦔ꧀ꦒꦺꦴꦭꦺꦏ꧀ꦲꦏꦭ꧀ꦲꦉꦥ꧀ꦚꦭꦃꦚꦭꦃꦲꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦔꦁꦒꦺꦴ​ꦱꦼꦏ꧀ꦱꦶꦱꦼꦏ꧀ꦱꦶ​ꦥꦭ꧀ꦱꦸ​꧈​ꦱꦸꦥꦪ​ꦢꦺꦏ꧀ꦤꦺꦲꦺꦤ꧀ꦠꦸꦏ꧀ꦱꦼꦠꦿꦥꦤ꧀ꦥꦠꦶ​꧉​ 60ꦤꦁꦔꦶꦁ​ꦱꦼꦤꦗꦤ꧀ꦲꦺꦴꦏꦺꦃꦮꦺꦴꦁ​ꦱꦶꦁ​ꦥꦢ​ꦩꦗꦸ​ꦭꦤ꧀ꦒꦼꦊꦩ꧀ꦢꦢꦶ​ꦱꦼꦏ꧀ꦱꦶ​꧈​ꦥꦱꦼꦏ꧀ꦱꦶꦤꦺ​ꦲꦺꦴꦫ​ꦲꦺꦤꦺꦁꦧꦸꦏ꧀ꦠꦶꦤꦺ​꧉​ 61ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦭꦺꦴꦫꦺꦴ​ꦩꦗꦸ​ꦔꦺꦴꦩꦺꦴꦁ:“ꦮꦺꦴꦁ​ꦏꦸꦮꦶ​ꦠꦲꦸ​ꦔꦺꦴꦩꦺꦴꦁ:'ꦲꦏꦸ​ꦧꦶꦱ​ꦲꦩ꧀ꦧꦸꦧꦿꦃ​ꦒꦿꦺꦗ​ꦒꦼꦢꦺ​ꦭꦤ꧀ꦧꦶꦱ​ꦔꦼꦢꦼꦏ꧀ꦏꦏꦺꦩꦼꦤꦺꦃ​ꦲꦶꦁ​ꦱꦏ꧀ꦗꦼꦫꦺꦴꦤꦺꦠꦼꦭꦸꦁ​ꦢꦶꦤ​꧉​’”

62꧋ꦲꦶꦩꦩ꧀ꦒꦼꦢꦺ​ꦠꦼꦫꦸꦱ꧀ꦔꦢꦼꦏ꧀ꦭꦤ꧀ꦠꦏꦺꦴꦤ꧀:“ꦲꦥ​ꦏꦺꦴꦮꦺ​ꦲꦺꦴꦫ​ꦲꦉꦥ꧀ꦱꦼꦩꦲꦸꦂ​ꦲꦥꦲꦥ​ꦲꦼꦁꦒꦺꦴꦤꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦚꦭꦃꦚꦭꦃꦲꦏꦺꦏꦺꦴꦮꦺ​?” 63ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦤꦼꦁ​ꦮꦲꦺ​꧉​ꦲꦶꦩꦩ꧀ꦒꦼꦢꦺ​ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:“ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦸꦫꦶꦥ꧀ ꦲꦥ​ꦏꦺꦴꦮꦺ​ꦔꦏꦸ​ꦤꦺꦏ꧀ꦏꦺꦴꦮꦺ​ꦑꦿꦶꦱ꧀ꦠꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​?”

64꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦥꦚ꧀ꦕꦺꦤ꧀ꦧꦼꦤꦼꦂ​꧉​ꦤꦁꦔꦶꦁ​ꦔꦼꦂꦠꦶꦪ​꧈​ꦮꦶꦮꦶꦠ꧀ꦱꦲꦶꦏꦶ​ꦏꦺꦴꦮꦺ​ꦧꦏꦭ꧀ꦮꦼꦫꦸꦃ​ꦲꦤꦏ꧀ꦏꦺ​ꦩꦤꦸꦁꦱ​ꦚ꧀ꦗꦒꦺꦴꦁꦤꦁꦠꦼꦔꦼꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧉​ꦏꦺꦴꦮꦺ​ꦧꦏꦭ꧀ꦮꦼꦫꦸꦃ​ꦢꦺꦏ꧀ꦤꦺꦠꦼꦏ​ꦤꦁꦩꦺꦒ​ꦤꦁꦭꦔꦶꦠ꧀꧈​”

65꧋ꦏꦿꦸꦔꦸ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦩꦲꦸ​꧈​ꦲꦶꦩꦩ꧀ꦒꦼꦢꦺ​ꦠꦼꦫꦸꦱ꧀ꦚꦸꦮꦺꦏ꧀ꦚꦸꦮꦺꦏ꧀ꦱꦭꦶꦤ꧀ꦤꦺꦏꦫꦺꦴ​ꦔꦺꦴꦩꦺꦴꦁ:“ꦮꦺꦴꦁ​ꦲꦶꦏꦶ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​!ꦮꦶꦱ꧀ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦱꦼꦏ꧀ꦱꦶ​ꦩꦼꦤꦺꦃ​!ꦏꦺꦴꦮꦺ​ꦏꦧꦺꦃ​ꦥꦢ​ꦏꦿꦸꦔꦸ​ꦢꦺꦮꦺꦲꦼꦁꦒꦺꦴꦤꦺ​ꦮꦺꦴꦁ​ꦏꦸꦮꦶ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​꧉​ 66ꦱꦲꦶꦏꦶ​ꦏꦼꦥꦿꦶꦪꦺ​ꦥꦶꦤꦼꦩꦸꦩꦸ?”

꧋ꦏꦧꦺꦃ​ꦠꦼꦫꦸꦱ꧀ꦱꦼꦩꦲꦸꦂ​:“ꦮꦺꦴꦁ​ꦏꦸꦮꦶ​ꦱꦭꦃ​꧈​ꦏꦸꦢꦸ​ꦢꦶꦥꦠꦺꦤ꧀ꦤꦶ​!”

67꧋ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦔꦶꦢꦺꦴꦤ꧀ꦤꦶ​ꦭꦤ꧀ꦔꦤ꧀ꦠꦼꦩ꧀ꦩꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 68ꦲꦺꦤꦺꦁꦭꦶꦪꦤꦺ​ꦱꦶꦁ​ꦔꦼꦥ꧀ꦭꦏ꧀ꦢꦺꦏ꧀ꦤꦺꦏꦫꦺꦴ​ꦔꦺꦴꦩꦺꦴꦁ:“ꦗꦗꦭ꧀ꦧꦼꦢꦺꦏ꧀ꦏꦼꦤ꧀ ꦑꦿꦶꦱ꧀ꦠꦸꦱ꧀ ꦱꦥ​ꦱꦶꦁ​ꦔꦼꦥ꧀ꦭꦏ꧀ꦏꦺꦴꦮꦺ​?”

꧋ꦫꦱꦸꦭ꧀ꦦꦺꦠꦿꦸꦱ꧀ꦚꦺꦭꦏ꧀ꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

69꧋ꦫꦱꦸꦭ꧀ꦦꦺꦠꦿꦸꦱ꧀ꦲꦶꦗꦶꦏ꧀​ꦚ꧀ꦗꦒꦺꦴꦁꦤꦁꦚ꧀ꦗꦧ​꧈​ꦤꦁꦭꦠꦂ​꧉​ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦱ꧀ꦭꦥ꦳꧀ꦥ꦳ꦺꦲꦶꦩꦩ꧀ꦒꦼꦢꦺ​ꦩꦫꦤꦶ​ꦢꦺꦏ꧀ꦤꦺꦏꦫꦺꦴ​ꦔꦺꦴꦩꦺꦴꦁ:“ꦭꦺꦴ​꧈​ꦏꦺꦴꦮꦺ​ꦭꦲꦸꦠ꧀ꦩꦺꦭꦸ​ꦪꦺꦯꦸꦱ꧀ꦠ​꧈​ꦮꦺꦴꦁ​ꦱꦁꦏꦓꦭꦶꦭꦺꦪ​ꦏꦲꦺ​?” 70ꦤꦁꦔꦶꦁ​ꦫꦱꦸꦭ꧀ꦦꦺꦠꦿꦸꦱ꧀ꦲꦺꦴꦫ​ꦔꦏꦸ​꧉​ꦤꦁꦔꦉꦥ꧀ꦥꦺ​ꦮꦺꦴꦁ​ꦲꦺꦴꦏꦺꦃꦏꦺꦴꦤꦺꦴ​ꦢꦺꦏ꧀ꦤꦺꦔꦺꦴꦩꦺꦴꦁ:“ꦲꦏꦸ​ꦲꦺꦴꦫ​ꦔꦼꦂꦠꦶ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁ​ꦏꦸꦮꦶ​꧉​” 71ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦭꦸꦔ​ꦱꦁꦏꦭꦠꦂꦫꦺ​ꦏꦺꦴꦤꦺꦴ​ꦠꦼꦫꦸꦱ꧀​ꦩ꧀ꦭꦏꦸ​ꦭꦮꦁ​ꦔꦉꦥ꧀꧈​ꦤꦁꦏꦺꦴꦤꦺꦴ​ꦲꦺꦤꦺꦁꦱ꧀ꦭꦥ꦳꧀ꦮꦺꦢꦺꦴꦏ꧀ꦭꦶꦪꦤꦺ​ꦱꦶꦁ​ꦮꦼꦫꦸꦃ​ꦢꦺꦏ꧀ꦤꦺ꧉​ꦮꦺꦴꦁꦔꦺ​ꦔꦺꦴꦩꦺꦴꦁꦏꦫꦺꦴ​ꦮꦺꦴꦁꦮꦺꦴꦁ​ꦭꦶꦪꦤꦺ​ꦱꦶꦁ​ꦤꦁꦏꦺꦴꦤꦺꦴ​:“ꦮꦺꦴꦁ​ꦲꦶꦏꦶ​ꦲꦸꦒ​ꦩꦺꦭꦸ​ꦪꦺꦯꦸꦱ꧀ꦱꦁꦏꦟꦱꦫꦺꦠ꧀ꦏꦲꦺ​!”

72꧋ꦤꦁꦔꦶꦁ​ꦱꦼꦥꦶꦱ꧀ꦱꦤ꧀ꦩꦼꦤꦺꦃ​ꦫꦱꦸꦭ꧀ꦦꦺꦠꦿꦸꦱ꧀ꦲꦺꦴꦫ​ꦔꦏꦸ​꧈​ꦩꦭꦃ​ꦮꦤꦶ​ꦱꦸꦩ꧀ꦥꦃ​ꦔꦺꦴꦩꦺꦴꦁ:“ꦲꦏꦸ​ꦧ꧀ꦭꦱ꧀ꦲꦺꦴꦫ​ꦏꦼꦤꦭ꧀ꦩꦫꦁ​ꦮꦺꦴꦁ​ꦏꦸꦮꦶ​!”

73꧋ꦲꦺꦴꦫ​ꦊꦠ꧀ꦱꦸꦮꦶꦮꦺꦴꦁꦮꦺꦴꦁ​ꦱꦶꦁ​ꦤꦁꦏꦺꦴꦤꦺꦴ​ꦥꦢ​ꦩꦫꦤꦶ​ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦥꦚ꧀ꦕꦺꦤ꧀ ꦏꦺꦴꦮꦺ​ꦲꦸꦒ​ꦩꦺꦭꦸ​ꦪꦺꦯꦸꦱ꧀ ꦲꦮꦶꦠ꧀ꦏꦼꦠꦫ​ꦲꦺꦴꦩꦺꦴꦔꦤ꧀ꦩꦸ!”

74꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦱꦸꦩ꧀ꦥꦃ​ꦩꦼꦤꦺꦃ​:“ꦲꦏꦸ​ꦮꦤꦶ​ꦩꦠꦶ​꧈​ꦲꦏꦸ​ꦗꦤ꧀ꦲꦺꦴꦫ​ꦏꦼꦤꦭ꧀ꦠꦼꦤꦤ꧀ꦏꦫꦺꦴ​ꦮꦺꦴꦁ​ꦏꦸꦮꦶ​꧉​” 75ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦠꦼꦫꦸꦱ꧀ꦲꦺꦤꦺꦁꦗꦒꦺꦴ​ꦏ꧀ꦭꦸꦫꦸꦏ꧀꧈​ꦫꦱꦸꦭ꧀ꦦꦺꦠꦿꦸꦱ꧀ꦱꦏ꧀ꦮꦠ꧀ꦏꦺꦭꦶꦁꦔꦤ꧀ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦢꦺꦴꦁꦔꦺꦢꦺꦏ꧀ꦤꦺꦔꦺꦴꦩꦺꦴꦁ:“ꦱꦏ꧀ꦢꦸꦫꦸꦁꦔꦺꦗꦒꦺꦴ​ꦏ꧀ꦭꦸꦫꦸꦏ꧀ ꦏꦺꦴꦮꦺ​ꦧꦏꦭ꧀ꦱꦺꦭꦏ꧀ꦔꦤ꧀ꦠꦶ​ꦥꦶꦁ​ꦠꦼꦭꦸ​꧈​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦏꦼꦤꦭ꧀ꦲꦏꦸ​꧉”ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦩꦼꦠꦸ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​ꦭꦤ꧀ꦤꦔꦶꦱ꧀ꦏꦼꦭꦫꦭꦫ​꧉​

↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦥꦱꦿꦃꦲꦏꦺꦩꦫꦁ​ꦒꦿꦩꦁꦥꦶꦭꦠꦸꦱ꧀꧈​

꧇​꧒꧗꧇​ 1꧋ꦲꦺꦱꦸꦏ꧀ꦏꦺ​ꦏꦧꦺꦃ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦥꦶꦤꦶꦠꦸꦮꦤꦺ​ꦧꦁꦱ​ꦙꦸꦥꦢ​ꦔ꧀ꦒꦮꦺ​ꦥꦸꦠꦸꦱ꧀ꦱꦤ꧀ꦲꦉꦥ꧀ꦩꦠꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 2ꦢꦺꦏ꧀ꦤꦺꦠꦼꦫꦸꦱ꧀ꦢꦶꦧꦤ꧀ꦢ​ꦭꦤ꧀ꦢꦶꦒꦮ​ꦭꦸꦔ​꧈​ꦲꦉꦥ꧀ꦢꦶꦥꦱꦿꦃꦲꦏꦺꦩꦫꦁ​ꦥꦶꦭꦠꦸꦱ꧀ ꦒꦿꦩꦁꦔꦺꦧꦮꦃꦏꦺꦴꦤꦺꦴ​꧉​

꧋ꦩꦠꦶꦤꦺ​ꦪꦸꦢꦱ꧀꧈​

3꧋ꦏꦢꦸꦁ​ꦪꦸꦢꦱ꧀ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦧꦏꦭ꧀ꦢꦶꦥꦠꦺꦤ꧀ꦤꦶ​꧈​ꦢꦺꦏ꧀ꦤꦺꦠꦼꦫꦸꦱ꧀ꦒꦼꦭ​ꦠꦼꦤꦤ꧀꧈​ꦪꦸꦢꦱ꧀ꦲꦶꦏꦶ​ꦱꦶꦁ​ꦔꦼꦭꦸꦁꦔꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦩꦫꦁ​ꦩꦸꦁꦱꦸꦃꦲꦺ​꧉​ꦢꦺꦏ꧀ꦤꦺꦠꦼꦫꦸꦱ꧀​ꦩ꧀ꦧꦭꦺꦏ꧀ꦏꦏꦺꦢꦸꦮꦶꦠ꧀ꦠꦺꦠꦼꦭꦸꦁ​ꦥꦸꦭꦸꦃ​ꦱꦺꦏꦼꦭ꧀ꦱꦼꦭꦏ​ꦩꦫꦁ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦥꦶꦤꦶꦠꦸꦮꦤꦺ​ꦧꦁꦱ​ꦙꦸ꧉​ 4ꦪꦸꦢꦱ꧀ꦔꦺꦴꦩꦺꦴꦁꦔꦺꦤꦺ​:“ꦲꦏꦸ​ꦔ꧀ꦒꦮꦺ​ꦢꦺꦴꦱ​꧈​ꦲꦮꦶꦠ꧀ꦲꦏꦸ​ꦔꦼꦭꦸꦁꦔꦏꦺꦮꦺꦴꦁ​ꦱꦶꦁ​ꦲꦺꦴꦫ​ꦱꦭꦃ​꧈​ꦩꦫꦏ꧀ꦏꦏꦺꦢꦺꦏ꧀ꦤꦺꦲꦺꦤ꧀ꦠꦸꦏ꧀ꦱꦼꦠꦿꦥꦤ꧀ꦥꦠꦶ​꧉​”

꧋ꦤꦁꦔꦶꦁ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦥꦶꦤꦶꦠꦸꦮ​ꦩꦲꦸ​ꦱꦼꦩꦲꦸꦂ​:“ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦔꦼꦂꦠꦶ​ꦗꦮꦤꦺ꧈​ꦲꦶꦏꦸ​ꦲꦸꦫꦸꦱ꧀ꦱꦤ꧀ꦩꦸ​ꦢꦺꦮꦺ꧉​”

5꧋ꦪꦸꦢꦱ꧀ꦠꦼꦫꦸꦱ꧀ꦔꦸꦚ꧀ꦕꦭ꧀ꦭꦏꦺ​ꦢꦸꦮꦶꦠ꧀ꦠꦺꦤꦁꦒꦿꦺꦗ​ꦒꦼꦢꦺ​꧈​ꦩ꧀ꦭꦏꦸ​ꦭꦸꦔ​ꦠꦼꦫꦸꦱ꧀​ꦔ꧀ꦒꦤ꧀ꦠꦸꦁ​꧉​

6꧋ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦠꦼꦫꦸꦱ꧀​ꦚ꧀ꦗꦶꦏꦸꦏ꧀ꦏꦶꦢꦸꦮꦶꦠ꧀ꦠꦺꦏꦫꦺꦴ​ꦔꦺꦴꦩꦺꦴꦁ:“ꦲꦶꦏꦶ​ꦢꦸꦮꦶꦠ꧀ꦱꦶꦁ​ꦒꦸꦥꦏ꧀ꦒꦼꦠꦶꦃ​꧈​ꦲꦺꦴꦫ​ꦏꦼꦤꦺꦁꦢꦶꦊꦧꦺꦴꦏ꧀ꦏꦏꦺꦤꦁꦮꦢꦃꦢꦸꦮꦶꦠ꧀ꦏꦸꦂꦧꦤ꧀꧈​” 7ꦠꦼꦫꦸꦱ꧀ꦥꦢ​ꦱꦼꦠꦸꦗꦸ​ꦤꦺꦏ꧀ꦢꦸꦮꦶꦠ꧀ꦠꦺꦢꦶꦲꦼꦁꦒꦺꦴ​ꦠꦸꦏꦸ​ꦏꦼꦧꦺꦴꦤꦺ​ꦮꦺꦴꦁ​ꦱꦶꦁ​ꦠꦸꦏꦁ​ꦔ꧀ꦒꦮꦺ​ꦏꦼꦤ꧀ꦢꦶ꧉​ꦏꦼꦧꦺꦴꦤ꧀ꦏꦸꦮꦶ​ꦲꦉꦥ꧀ꦢꦶꦲꦼꦁꦒꦺꦴ​ꦏꦸꦧꦸꦂꦫꦤ꧀ꦤꦺ​ꦮꦺꦴꦁ​ꦱꦁꦏꦭꦶꦪ​ꦤꦼꦒꦫ​ꦱꦶꦁ​ꦩꦠꦶ​ꦤꦁꦏꦺꦴꦤꦺꦴ​꧉​ 8ꦩꦸꦭꦤꦺ​ꦠꦼꦏꦤ꧀ꦱꦼꦥꦿꦺꦤꦺ​ꦏꦼꦧꦺꦴꦤ꧀ꦏꦸꦮꦶ​ꦢꦶꦗꦼꦤꦼꦁꦔꦏꦺꦄꦏꦺꦭ꧀ꦢꦩ​꧈​ꦠꦼꦒꦼꦱ꧀ꦱꦺ​:ꦏꦼꦧꦺꦴꦤ꧀ꦒꦸꦥꦏ꧀ꦒꦼꦠꦶꦃ​꧉​

9꧋ꦏꦸꦮꦶ​ꦩꦲꦸ​ꦏꦧꦺꦃ​ꦩꦫꦏ꧀ꦏꦏꦺꦏ꧀ꦭꦏꦺꦴꦤ꧀ꦲꦥ​ꦱꦶꦁ​ꦮꦶꦱ꧀ꦢꦶꦲꦺꦴꦩꦺꦴꦁꦏꦫꦺꦴ​ꦤꦧꦶ​ꦪꦺꦉꦩꦶꦪꦢꦺꦏ꧀​ꦩ꧀ꦧꦶꦪꦺꦤ꧀ ꦲꦸꦤꦶꦤꦺ​:“ꦥꦢ​ꦤꦩ꧀ꦥ​ꦢꦸꦮꦶꦠ꧀ꦠꦼꦭꦸꦁ​ꦥꦸꦭꦸꦃ​ꦱꦺꦏꦼꦭ꧀ꦱꦼꦭꦏ​꧈​ꦪꦏꦸꦮꦶ​ꦉꦒꦤꦺ​ꦮꦺꦴꦁ​ꦱꦶꦗꦶ​ꦩꦶꦠꦸꦫꦸꦠ꧀ꦠꦶꦩ꧀ꦧꦔꦤ꧀ꦤꦺꦮꦺꦴꦁ​ꦆꦱꦿꦌꦭ꧀꧈​ 10ꦢꦸꦮꦶꦠ꧀ꦩꦲꦸ​ꦢꦶꦲꦼꦁꦒꦺꦴ​ꦤꦸꦏꦸ​ꦏꦼꦧꦺꦴꦤꦺ​ꦠꦸꦏꦁ​ꦔ꧀ꦒꦮꦺ​ꦏꦼꦤ꧀ꦢꦶ꧉​ꦏꦸꦮꦶ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦩꦫꦁ​ꦲꦏꦸ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦔ꧀ꦒꦺꦴꦤ꧀ꦤꦺꦒꦿꦩꦁꦥꦶꦭꦠꦸꦱ꧀꧈​

11꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦠꦏꦺꦴꦤ꧀ꦠꦏꦺꦴꦤ꧀ꦤꦶꦏꦫꦺꦴ​ꦒꦿꦩꦁꦥꦶꦭꦠꦸꦱ꧀꧈​ꦥꦶꦠꦏꦺꦴꦤ꧀ꦤꦤ꧀ꦤꦺ​ꦔꦺꦤꦺ​:“ꦲꦥ​ꦏꦺꦴꦮꦺ​ꦫꦠꦸꦤꦺ​ꦮꦺꦴꦁ​ꦙꦸ?”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦪ​꧈​ꦏꦸꦮꦶ​ꦧꦼꦤꦼꦂ​꧉​” 12ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦥꦶꦤꦶꦠꦸꦮꦤꦺ​ꦧꦁꦱ​ꦙꦸꦠꦼꦫꦸꦱ꧀ꦥꦢ​ꦚꦲꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ ꦤꦁꦔꦶꦁ​ꦢꦺꦏ꧀ꦤꦺꦩꦼꦤꦼꦁ​ꦮꦲꦺ​꧉​

13꧋ꦒꦿꦩꦁꦥꦶꦭꦠꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦲꦥ​ꦏꦺꦴꦮꦺ​ꦲꦺꦴꦫ​ꦏꦿꦸꦔꦸ​ꦲꦼꦁꦒꦺꦴꦤꦺ​ꦮꦺꦴꦁꦮꦺꦴꦁ​ꦥꦢ​ꦚꦭꦃꦚꦭꦃꦲꦏꦺꦏꦺꦴꦮꦺ​ꦧꦧ꧀ꦮꦼꦂꦤꦮꦼꦂꦤ​ꦥꦽꦏꦫ​?”

14꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦱꦼꦩꦲꦸꦂ​ꦲꦥꦲꦥ​ꦧ꧀ꦭꦱ꧀ ꦩꦫꦏ꧀ꦏꦏꦺꦥꦶꦭꦠꦸꦱ꧀​ꦔ꧀ꦒꦸꦩꦸꦤ꧀ꦧꦔꦼꦠ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦥ​ꦱꦼꦠꦿꦥꦤ꧀ꦥꦠꦶ​꧉​

15꧋ꦭꦸꦩꦿꦃꦲꦺ​꧈​ꦱꦧꦼꦤ꧀ꦠꦲꦸꦤ꧀ꦤꦺꦏ꧀ꦮꦪꦃ​ꦢꦶꦤ​ꦥꦱ꧀ꦏꦃ​꧈​ꦥꦶꦭꦠꦸꦱ꧀ꦔꦼꦠꦺꦴꦏ꧀ꦏꦏꦺꦱꦼꦠꦿꦥꦤ꧀ꦱꦶꦗꦶ​꧈​ꦱꦶꦁ​ꦢꦶꦥꦶꦭꦶꦃ​ꦏꦫꦺꦴ​ꦮꦺꦴꦁ​ꦲꦺꦴꦏꦺꦃ꧉​ 16ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦲꦺꦤꦺꦁꦱꦼꦠꦿꦥꦤ꧀ꦱꦶꦁ​ꦗꦼꦤꦼꦁꦔꦺ​ꦨꦫꦧꦱ꧀꧈​ 17ꦏꦢꦸꦁ​ꦮꦺꦴꦁ​ꦱꦶꦁ​ꦥꦢ​ꦔ꧀ꦭꦸꦩ꧀ꦥꦸꦏ꧀ꦮꦶꦱ꧀ꦲꦺꦴꦏꦺꦃ꧈​ꦥꦶꦭꦠꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ ꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​:“ꦱꦥ​ꦱꦶꦁ​ꦲꦩ꧀ꦧꦺꦴꦏ꧀ꦗꦭꦸꦏ꧀ꦩꦼꦠꦸ​:ꦨꦫꦧꦱ꧀ꦲꦥ​ꦪꦺꦯꦸꦱ꧀ꦱꦶꦁ​ꦢꦶꦲꦫꦤ꧀ꦤꦶ​ꦑꦿꦶꦱ꧀ꦠꦸꦱ꧀?” 18ꦥꦶꦭꦠꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦲꦮꦶꦠ꧀ꦢꦺꦏ꧀ꦤꦺꦔꦼꦂꦠꦶ​ꦤꦺꦏ꧀ꦮꦺꦴꦁ​ꦙꦸꦱꦼꦔꦶꦠ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦩꦸꦭꦤꦺ​ꦢꦺꦏ꧀ꦤꦺꦢꦶꦥꦱꦿꦃꦲꦏꦺꦩꦫꦁ​ꦥꦶꦭꦠꦸꦱ꧀꧈​

19꧋ꦢꦺꦴꦁꦔꦺꦥꦶꦭꦠꦸꦱ꧀​ꦚ꧀ꦗꦒꦺꦴꦁꦤꦁꦏꦿꦺꦴꦱꦶꦏꦿꦸꦠꦺꦴꦤ꧀ ꦧꦺꦴꦗꦺꦴꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦏꦺꦴꦁꦏꦺꦴꦤ꧀ꦤꦤ꧀ꦔꦺꦴꦩꦺꦴꦁꦔꦶꦢꦺꦏ꧀ꦤꦺꦔꦺꦤꦺ​:“ꦲꦗ​ꦩꦺꦭꦸꦩꦺꦭꦸ​ꦔꦸꦫꦸꦱ꧀ꦱꦶ​ꦥꦽꦏꦫꦤꦺ​ꦮꦺꦴꦁ​ꦱꦶꦁ​ꦲꦺꦴꦫ​ꦱꦭꦃ​ꦏꦸꦮꦶ​꧉​ꦲꦮꦶꦠ꧀ꦩꦲꦸ​ꦩ꧀ꦧꦼꦔꦶꦲꦏꦸ​ꦔꦶꦩ꧀ꦥꦶ​ꦭꦤ꧀ꦏꦿꦱ​ꦱꦼꦢꦶꦠꦼꦤꦤ꧀ꦚꦮꦁ​ꦮꦺꦴꦁ​ꦏꦸꦮꦶ​꧉​”

20꧋ꦤꦁꦔꦶꦁ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦥꦶꦤꦶꦠꦸꦮꦤꦺ​ꦮꦺꦴꦁ​ꦙꦸꦥꦢ​ꦔꦺꦴꦗꦺꦴꦏ꧀ꦲꦺꦴꦗꦺꦴꦏ꧀ꦏꦶ​ꦮꦺꦴꦁꦮꦺꦴꦁ​ꦱꦶꦁ​ꦤꦁꦏꦺꦴꦤꦺꦴ​꧈​ꦥꦢ​ꦚ꧀ꦗꦭꦸꦏ꧀ꦱꦸꦥꦪ​ꦨꦫꦧꦱ꧀ꦢꦶꦲꦼꦠꦺꦴꦏ꧀ꦏꦏꦺꦭꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦥꦠꦺꦤ꧀ꦤꦶ​꧉​ 21ꦥꦶꦭꦠꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦮꦺꦴꦁꦮꦺꦴꦁ​:“ꦏꦉꦥ꧀ꦩꦸ​ꦮꦺꦴꦁ​ꦭꦺꦴꦫꦺꦴ​ꦏꦸꦮꦶ​꧈​ꦱꦶꦁ​ꦲꦼꦤ꧀ꦢꦶ​ꦱꦶꦁ​ꦏꦸꦢꦸ​ꦠꦏ꧀ꦲꦼꦠꦺꦴꦏ꧀ꦏꦏꦺ?”

꧋ꦮꦺꦴꦁꦮꦺꦴꦁ​ꦱꦼꦩꦲꦸꦂ​:“ꦨꦫꦧꦱ꧀!”

22꧋ꦥꦶꦭꦠꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃ​ꦤꦺꦏ꧀ꦨꦫꦧꦱ꧀ꦱꦶꦁ​ꦩꦼꦠꦸ​꧈​ꦭꦃ​ꦪꦺꦯꦸꦱ꧀ ꦱꦶꦁ​ꦢꦶꦕꦼꦭꦸꦏ꧀​ꦑꦿꦶꦱ꧀ꦠꦸꦱ꧀ ꦏꦸꦢꦸ​ꦠꦏ꧀ꦏꦥꦏ꧀ꦏꦏꦺ?”

꧋ꦮꦺꦴꦁꦮꦺꦴꦁ​ꦱꦼꦩꦲꦸꦂ​ꦧꦉꦁ​:“ꦢꦶꦥꦼꦤ꧀ꦠꦺꦁꦮꦲꦺ​!”

23꧋ꦥꦶꦭꦠꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦭꦃ​ꦲꦥ​ꦱꦭꦃꦲꦺ​ꦮꦺꦴꦁ​ꦲꦶꦏꦶ​?”

꧋ꦤꦁꦔꦶꦁ​ꦮꦺꦴꦁꦮꦺꦴꦁ​ꦩꦭꦃ​ꦠꦩ꧀ꦧꦃ​ꦧꦤ꧀ꦠꦼꦂ​ꦱꦶꦁ​ꦲꦩ꧀ꦧꦼꦔꦺꦴꦏ꧀:“ꦮꦺꦴꦁ​ꦏꦸꦮꦶ​ꦢꦶꦥꦼꦤ꧀ꦠꦺꦁꦮꦲꦺ​!”

24꧋ꦥꦶꦭꦠꦸꦱ꧀ꦮꦼꦫꦸꦃ​ꦤꦺꦏ꧀ꦔꦺꦴꦤꦺꦴ​ꦏꦸꦮꦶ​ꦢꦺꦏ꧀ꦤꦺꦲꦺꦴꦫ​ꦧꦶꦱ​ꦤꦼꦤ꧀ꦠꦽꦩꦏꦺꦮꦺꦴꦁꦮꦺꦴꦁ​꧈​ꦩꦭꦃ​ꦠꦩ꧀ꦧꦃ​ꦒꦼꦢꦺ​ꦫꦺꦕꦺꦴꦏ꧀ꦏꦺ​꧉​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦁꦏꦺꦴꦤ꧀​ꦚ꧀ꦗꦶꦏꦸꦏ꧀ꦏꦏꦺꦧꦚꦸ​ꦭꦤ꧀ꦤꦁꦔꦉꦥ꧀ꦥꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦢꦺꦏ꧀ꦤꦺꦩꦶꦱꦸꦃꦲꦶ​ꦠꦔꦤ꧀ꦤꦺ​ꦏꦫꦺꦴ​ꦔꦺꦴꦩꦺꦴꦁ:“ꦲꦏꦸ​ꦲꦺꦴꦫ​ꦤ꧀ꦢꦸꦮꦺꦱꦭꦃ​ꦲꦥꦲꦥ​ꦤꦺꦏ꧀ꦮꦺꦴꦁ​ꦲꦶꦏꦶ​ꦩꦠꦶ​꧉​ꦏꦸꦮꦶ​ꦲꦸꦫꦸꦱ꧀ꦱꦤ꧀ꦩꦸ​ꦢꦺꦮꦺ!”

25꧋ꦮꦺꦴꦁꦮꦺꦴꦁ​ꦱꦼꦩꦲꦸꦂ​ꦧꦉꦁ​:“ꦲꦺꦴꦫ​ꦢꦢꦶ​ꦲꦥ​꧈​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦲꦤꦏ꧀ꦲꦤꦏ꧀ꦏꦺ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦠꦁꦒꦸꦁ​ꦗꦮꦧ꧀ꦥꦠꦶꦤꦺ​ꦮꦺꦴꦁ​ꦏꦸꦮꦶ​!”

26꧋ꦥꦶꦭꦠꦸꦱ꧀ꦠꦼꦫꦸꦱ꧀ꦤꦸꦫꦸꦠ꧀ꦠꦶ​ꦏꦉꦥ꧀ꦥꦺ​ꦮꦺꦴꦁꦮꦺꦴꦁ​꧉​ꦨꦫꦧꦱ꧀ꦢꦶꦲꦼꦠꦺꦴꦏ꧀ꦏꦏꦺ꧈​ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦥꦼꦕꦸꦠ꧀ꦠꦶ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦥꦱꦿꦃꦲꦏꦺꦩꦫꦁ​ꦥꦫ​ꦱꦺꦴꦭ꧀ꦢꦠ꧀ꦱꦸꦥꦪ​ꦢꦶꦥꦼꦤ꧀ꦠꦺꦁ꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦒꦮꦺ​ꦱꦼꦩ꧀ꦧꦿꦤ​꧉​

27꧋ꦥꦫ​ꦱꦺꦴꦭ꧀ꦢꦠ꧀ꦠꦼꦫꦸꦱ꧀​ꦔ꧀ꦒꦮ​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦥꦭꦺꦱ꧀ꦱꦺꦥꦶꦭꦠꦸꦱ꧀ ꦠꦼꦫꦸꦱ꧀ꦥꦢ​ꦚꦼꦭꦸꦏ꧀ꦱꦺꦴꦭ꧀ꦢꦠ꧀ꦏꦧꦺꦃ​ꦱꦶꦁ​ꦤꦁꦏꦺꦴꦤꦺꦴ​꧈​ꦏꦺꦴꦁꦏꦺꦴꦤ꧀ꦥꦢ​ꦔ꧀ꦭꦸꦩ꧀ꦥꦸꦏ꧀ꦔꦸꦧꦼꦁꦔꦶ​ꦢꦺꦏ꧀ꦤꦺ꧉​ 28ꦱꦭꦶꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦕꦼꦥꦺꦴꦠ꧀​꧈​ꦢꦶꦒꦤ꧀ꦠꦶ​ꦱꦭꦶꦤ꧀ꦲꦧꦁ​ꦲꦩ꧀ꦧꦿꦤꦁ​ꦏꦪ​ꦫꦠꦸ​꧉​ 29ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦩꦲꦸ​ꦠꦼꦫꦸꦱ꧀ꦥꦢ​ꦔ꧀ꦒꦮꦺ​ꦩꦏꦸꦠꦏꦫꦺꦴ​ꦥꦁꦔꦺ​ꦲꦼꦫꦶꦲꦼꦫꦶ꧈​ꦠꦼꦫꦸꦱ꧀ꦢꦶꦥꦱꦁ​ꦤꦁꦱꦶꦫꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦠꦔꦤ꧀ꦤꦺ​ꦠꦼꦔꦼꦤ꧀ꦢꦶꦕꦼꦏꦼꦭ꧀ꦭꦶ​ꦠꦼꦏꦼꦤ꧀꧈​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦺꦥꦢ​ꦱꦸꦗꦸꦠ꧀ꦤꦁꦔꦉꦥ꧀ꦥꦺ​꧈​ꦔꦺꦴꦩꦺꦴꦁ:“ꦢꦶꦥꦸꦗꦶꦫꦠꦸꦤꦺ​ꦮꦺꦴꦁ​ꦙꦸ!” 30ꦥꦫ​ꦱꦺꦴꦭ꧀ꦢꦠ꧀ꦩꦲꦸ​ꦠꦼꦫꦸꦱ꧀ꦔꦶꦢꦺꦴꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦠꦼꦏꦼꦤ꧀ꦤꦺ​ꦠꦼꦫꦸꦱ꧀ꦢꦶꦗꦶꦏꦸꦏ꧀ꦱꦁꦏꦠꦔꦤ꧀ꦤꦺ​ꦠꦼꦫꦸꦱ꧀ꦢꦶꦲꦼꦁꦒꦺꦴ​ꦔꦤ꧀ꦠꦼꦩ꧀ꦩꦶ​ꦱꦶꦫꦃꦲꦺ​꧉​

31꧋ꦱꦏ꧀ꦮꦶꦱ꧀ꦱꦺ​ꦩꦺꦴꦪꦺꦴꦏ꧀ꦏꦶ​ꦏꦸꦮꦶ​꧈​ꦥꦫ​ꦱꦺꦴꦭ꧀ꦢꦠ꧀ꦠꦼꦫꦸꦱ꧀ꦚꦼꦥꦺꦴꦠ꧀ꦱꦭꦶꦤ꧀ꦤꦺꦱꦶꦁ​ꦲꦧꦁ​꧈​ꦠꦼꦫꦸꦱ꧀ꦢꦶꦲꦼꦁꦒꦺꦴꦤ꧀ꦤꦶ​ꦱꦭꦶꦤ꧀ꦤꦺꦢꦺꦮꦺꦩꦼꦤꦺꦃ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦒꦮ​ꦩꦼꦠꦸ​ꦲꦉꦥ꧀ꦢꦶꦥꦼꦤ꧀ꦠꦺꦁ꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦥꦼꦤ꧀ꦠꦺꦁ꧉​

32꧋ꦤꦁꦱꦏ꧀​ꦚ꧀ꦗꦧꦤꦺ​ꦏꦸꦠꦠꦼꦫꦸꦱ꧀ꦥꦢ​ꦩꦼꦠꦸꦮꦱꦏ꧀ꦮꦶꦗꦶꦤꦺꦮꦺꦴꦁ​ꦱꦁꦏꦏꦸꦠꦯꦶꦫꦺꦤꦺ꧉​ꦮꦺꦴꦁꦔꦺ​ꦗꦼꦤꦼꦁꦔꦺ​ꦱꦶꦩꦺꦴꦤ꧀꧈​ꦱꦶꦩꦺꦴꦤ꧀ꦢꦶꦥꦼꦏ꧀ꦱ​ꦏꦺꦴꦁꦏꦺꦴꦤ꧀​ꦔ꧀ꦒꦮ​ꦏꦪꦸꦤꦺ​ꦱꦶꦁ​ꦲꦉꦥ꧀ꦢꦶꦲꦼꦁꦒꦺꦴ​ꦩꦼꦤ꧀ꦠꦺꦁꦒꦸꦱ꧀ꦠꦶ​ꦪꦺꦯꦸꦱ꧀꧈​ 33ꦱꦶꦁ​ꦩ꧀ꦭꦏꦸ​ꦠꦼꦫꦸꦱ꧀ꦠꦼꦏꦤ꧀ꦥꦁꦒꦺꦴꦤ꧀ꦤꦤ꧀ꦱꦶꦁ​ꦗꦼꦤꦼꦁꦔꦺ​ꦒꦺꦴꦭ꧀ꦒꦺꦴꦠ​꧉​ꦒꦺꦴꦭ꧀ꦒꦺꦴꦠ​ꦏꦸꦮꦶ​ꦠꦼꦒꦼꦱ꧀ꦱꦺ​:ꦲꦼꦤ꧀ꦢꦱ꧀ꦱꦺꦮꦺꦴꦁ​ꦩꦠꦶ​꧉​ 34ꦤꦁꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦏꦺꦏ꧀ꦏꦶꦔꦺꦴꦩ꧀ꦧꦺ​ꦲꦁꦒꦸꦂ​ꦢꦶꦕꦩ꧀ꦥꦸꦂꦫꦶ​ꦫꦱ​ꦥꦲꦶꦠ꧀꧈​ꦏꦢꦸꦁ​ꦔꦶꦕꦶꦥ꧀ꦥꦶ​꧈​ꦢꦺꦏ꧀ꦤꦺꦠꦼꦫꦸꦱ꧀ꦲꦺꦴꦫ​ꦒꦼꦊꦩ꧀ꦔꦺꦴꦩ꧀ꦧꦺ​꧉​

35꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦥꦼꦤ꧀ꦠꦺꦁꦭꦤ꧀ꦱꦭꦶꦤ꧀ꦤꦺꦢꦶꦲꦼꦢꦸꦩ꧀ꦔꦁꦒꦺꦴ​ꦭꦺꦴꦠꦿꦺ​꧉​ 36ꦥꦫ​ꦱꦺꦴꦭ꧀ꦢꦠ꧀ꦠꦼꦫꦸꦱ꧀ꦥꦢ​ꦚ꧀ꦗꦒꦺꦴꦁꦤꦁꦏꦺꦴꦤꦺꦴ​ꦏꦫꦺꦴ​ꦚ꧀ꦗꦒ​꧉​ 37ꦤꦁꦤ꧀ꦢꦸꦮꦸꦂꦫꦺꦱꦶꦫꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦥꦱꦁ​ꦠꦸꦭꦶꦱ꧀ꦱꦤ꧀ꦱꦶꦁ​ꦔꦺꦴꦩꦺꦴꦁꦔꦏꦺꦲꦥ​ꦗꦭꦂꦫꦤ꧀ꦤꦺ​ꦢꦺꦏ꧀ꦤꦺꦢꦶꦥꦼꦤ꧀ꦠꦺꦁ꧉​ꦠꦸꦭꦶꦱ꧀ꦱꦤ꧀ꦤꦺ​ꦔꦺꦤꦺ​:“ꦲꦶꦏꦶ​ꦪꦺꦯꦸꦱ꧀ ꦮꦺꦴꦁ​ꦟꦱꦫꦺꦠ꧀ ꦫꦠꦸꦤꦺ​ꦮꦺꦴꦁ​ꦙꦸ꧉​” 38ꦧꦉꦁ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦒ​ꦲꦺꦤꦺꦁꦮꦺꦴꦁ​ꦤꦏꦭ꧀ꦭꦺꦴꦫꦺꦴ​ꦢꦶꦥꦼꦤ꧀ꦠꦺꦁ꧈​ꦱꦶꦗꦶ​ꦤꦁꦱꦼꦧꦼꦭꦃꦠꦼꦔꦼꦤ꧀ ꦭꦶꦪꦤꦺ​ꦤꦁꦱꦼꦧꦼꦭꦃꦏꦶꦮ​꧉​

39꧋ꦮꦺꦴꦁꦮꦺꦴꦁ​ꦱꦶꦁ​ꦭꦶꦮꦠ꧀ꦏꦺꦴꦤꦺꦴ​ꦥꦢ​ꦒꦺꦢꦺꦏ꧀ꦒꦺꦢꦺꦏ꧀ꦭꦤ꧀ꦩꦺꦴꦪꦺꦴꦏ꧀ꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 40ꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦏꦺꦴꦮꦺ​ꦗꦫꦺꦤꦺ​ꦲꦉꦥ꧀ꦲꦩ꧀ꦧꦸꦧꦿꦃ​ꦒꦿꦺꦗ​ꦒꦼꦢꦺ​ꦭꦤ꧀ꦲꦉꦥ꧀ꦔꦼꦢꦼꦏ꧀ꦏꦏꦺꦩꦼꦤꦺꦃ​ꦱꦏ꧀ꦗꦼꦫꦺꦴꦤꦺꦠꦼꦭꦸꦁ​ꦢꦶꦤ​꧉​ꦤꦺꦏ꧀ꦏꦺꦴꦮꦺ​ꦥꦚ꧀ꦕꦺꦤ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀ ꦗꦗꦭ꧀ꦲꦸꦕꦸꦭ꧀ꦭꦶ​ꦲꦮꦏ꧀ꦩꦸ​ꦢꦺꦮꦺꦭꦤ꧀ꦩꦼꦢꦸꦤ꧀ꦤꦱꦁꦏꦥꦼꦤ꧀ꦠꦺꦁꦔꦤ꧀!” 41ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀​ꦭꦤ꧀ꦲꦸꦒ​ꦥꦫ​ꦥꦶꦤꦶꦠꦸꦮꦤꦺ​ꦧꦁꦱ​ꦙꦸꦥꦢ​ꦩꦺꦭꦸ​ꦩꦺꦴꦪꦺꦴꦏ꧀ꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 42ꦥꦢ​ꦔꦺꦴꦩꦺꦴꦁꦔꦺꦤꦺ​:“ꦮꦺꦴꦁ​ꦭꦶꦪꦤꦺ​ꦢꦶꦠꦸꦭꦸꦁꦔꦶ​꧈​ꦭꦃ​ꦲꦮꦏ꧀ꦏꦺ​ꦢꦺꦏ꧀ꦤꦺꦢꦺꦮꦺꦲꦺꦴꦫ​ꦧꦶꦱ​ꦤꦸꦭꦸꦁꦔꦶ​!ꦤꦺꦏ꧀ꦮꦺꦴꦁ​ꦲꦶꦏꦶ​ꦥꦚ꧀ꦕꦺꦤ꧀ꦫꦠꦸꦤꦺ​ꦆꦱꦿꦌꦭ꧀ꦠꦼꦤꦤ꧀ ꦗꦗꦭ꧀ꦩꦼꦢꦸꦤ꧀ꦱꦁꦏꦥꦼꦤ꧀ꦠꦺꦁꦔꦤ꧀ ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦥꦽꦕꦪ​꧉​ 43ꦢꦺꦏ꧀ꦤꦺꦚ꧀ꦗꦒꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦔꦏꦸꦤꦺ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦠꦿꦺꦱ꧀ꦤꦩꦫꦁ​ꦢꦺꦏ꧀ꦤꦺ꧈​ꦢꦶꦠꦸꦭꦸꦁꦔꦶ​ꦏꦺꦴꦤꦺꦴ​!”

44꧋ꦮꦺꦴꦁ​ꦤꦏꦭ꧀ꦱꦶꦁ​ꦢꦶꦥꦼꦤ꧀ꦠꦺꦁꦧꦉꦁ​꧈​ꦲꦸꦒ​ꦥꦢ​ꦩꦺꦭꦸ​ꦩꦺꦴꦪꦺꦴꦏ꧀ꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦤꦶꦁ​ꦒꦭ꧀ꦭꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

45꧋ꦩꦺꦴꦭꦃꦲꦶꦗꦩ꧀ꦫꦺꦴꦭꦱ꧀ꦲꦮꦤ꧀ꦱꦏ꧀ꦤꦼꦒꦫ​ꦩꦭꦶꦃ​ꦥꦼꦠꦼꦁ​꧈​ꦏꦶꦫꦏꦶꦫ​ꦠꦼꦭꦸꦁ​ꦗꦩ꧀ꦱꦸꦮꦺꦤꦺ​꧉​ 46ꦏꦶꦫꦏꦶꦫ​ꦗꦩ꧀ꦠꦼꦭꦸ​ꦱꦺꦴꦫꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦲꦩ꧀ꦧꦼꦔꦺꦴꦏ꧀ꦧꦤ꧀ꦠꦼꦂ​:“ꦌꦭꦺꦴꦆ​꧈​ꦌꦭꦺꦴꦆ​꧈​ꦭꦩꦃꦱꦧꦏ꧀ꦠꦤꦶ!”ꦏꦸꦮꦶ​ꦠꦼꦒꦼꦱ꧀ꦱꦺ​:“ꦒꦸꦱ꧀ꦠꦶꦏꦸ​꧈​ꦒꦸꦱ꧀ꦠꦶꦏꦸ​꧈​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀​ꦩ꧀ꦧꦺꦴꦏ꧀ꦠꦶꦁꦒꦭ꧀?”

47꧋ꦮꦺꦴꦁꦮꦺꦴꦁ​ꦱꦶꦁ​ꦭꦶꦮꦠ꧀ꦏꦺꦴꦤꦺꦴ​ꦱꦶꦁ​ꦥꦢ​ꦏꦿꦸꦔꦸ​ꦏꦸꦮꦶ​ꦥꦢ​ꦔꦺꦴꦩꦺꦴꦁ:“ꦮꦺꦴꦁ​ꦏꦸꦮꦶ​ꦚꦼꦭꦸꦏ꧀ꦤꦧꦶ​ꦌꦭꦶꦪ​꧉​” 48ꦠꦼꦫꦸꦱ꧀ꦲꦺꦤꦺꦁꦱꦶꦗꦶ​ꦚ꧀ꦗꦶꦏꦸꦏ꧀ꦱ꧀ꦥꦺꦴꦤ꧀ꦢꦶꦲꦼꦕ꧀ꦭꦸꦥ꧀ꦏꦺꦤꦁꦲꦁꦒꦸꦂ​ꦏꦼꦕꦸꦠ꧀꧈​ꦱ꧀ꦥꦺꦴꦤ꧀ꦱ꧀​ꦱꦺ​ꦠꦼꦫꦸꦱ꧀ꦢꦶꦥꦱꦁ​ꦤꦁꦥꦸꦕꦸꦏ꧀ꦏꦺ​ꦒꦫꦤ꧀ꦏꦪꦸ​ꦠꦼꦫꦸꦱ꧀ꦢꦶꦏꦺꦏ꧀ꦏꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦺꦴꦁꦏꦺꦴꦤ꧀ꦚꦼꦱꦼꦥ꧀꧈​

49꧋ꦤꦁꦔꦶꦁ​ꦮꦺꦴꦁꦮꦺꦴꦁ​ꦭꦶꦪꦤꦺ​ꦔꦺꦴꦩꦺꦴꦁ:“ꦩꦼꦁꦏꦺꦴ​ꦤ꧀ꦢꦶꦱꦶꦏ꧀ ꦗꦗꦭ꧀ꦢꦶꦲꦼꦤ꧀ꦠꦺꦤ꧀ꦤꦶ​꧈​ꦤꦧꦶ​ꦌꦭꦶꦪ​ꦲꦉꦥ꧀ꦤꦸꦭꦸꦁꦔꦶ​ꦢꦺꦏ꧀ꦤꦺꦲꦥ​ꦲꦺꦴꦫ​!”

50꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦲꦩ꧀ꦧꦼꦔꦺꦴꦏ꧀ꦧꦤ꧀ꦠꦼꦂ​ꦱꦼꦥꦶꦱ꧀ꦱꦤ꧀ꦩꦼꦤꦺꦃ​꧈​ꦠꦼꦫꦸꦱ꧀ꦤꦶꦁꦒꦭ꧀꧈​

51꧋ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦏꦺꦴꦂꦢꦺꦤ꧀ꦤꦺꦒꦿꦺꦗ​ꦒꦼꦢꦺ​ꦱꦸꦮꦺꦏ꧀ꦢꦢꦶ​ꦭꦺꦴꦫꦺꦴ​꧈​ꦱꦁꦏꦤ꧀ꦢꦸꦮꦸꦂꦩꦼꦔꦶꦱꦺꦴꦂ​꧉​ꦠꦼꦫꦸꦱ꧀ꦲꦺꦤꦺꦁꦭꦶꦤ꧀ꦢꦸꦭꦤ꧀ꦒꦸꦤꦸꦁꦒꦸꦤꦸꦁ​ꦥꦢ​ꦩ꧀ꦧꦼꦁꦏꦏ꧀꧈​ 52ꦏꦸꦧꦸꦂꦫꦤ꧀ꦏꦸꦧꦸꦂꦫꦤ꧀​ꦥꦢ​ꦩꦼꦔ​ꦭꦤ꧀ꦲꦺꦴꦏꦺꦃꦮꦺꦴꦁ​ꦩꦠꦶ​ꦱꦶꦁ​ꦩꦲꦸꦤꦺ​ꦠꦼꦩꦼꦤ꧀ꦤꦸꦫꦸꦠ꧀ꦒꦸꦱ꧀ꦠꦶ​꧈​ꦥꦢ​ꦲꦸꦫꦶꦥ꧀ꦩꦼꦤꦺꦃ​꧉​ 53ꦮꦺꦴꦁꦮꦺꦴꦁ​ꦲꦶꦏꦶ​ꦥꦢ​ꦩꦼꦠꦸ​ꦱꦁꦏꦏꦸꦧꦸꦂꦫꦤ꧀ꦤꦺ​ꦭꦤ꧀ꦱꦏ꧀ꦮꦶꦱ꧀ꦱꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦔꦶ​ꦱꦁꦏꦥꦠꦶ​꧈​ꦮꦺꦴꦁꦮꦺꦴꦁ​ꦲꦶꦏꦶ​ꦩ꧀ꦊꦧꦸ​ꦤꦁꦏꦸꦠꦱꦸꦕꦶ​ꦪꦺꦫꦸꦱꦭꦺꦩ꧀꧈​ꦤꦁꦏꦺꦴꦤꦺꦴ​ꦮꦺꦴꦁ​ꦲꦺꦴꦏꦺꦃꦥꦢ​ꦮꦼꦫꦸꦃ​ꦮꦺꦴꦁꦮꦺꦴꦁ​ꦲꦶꦏꦶ​꧉​

54꧋ꦏꦸꦩꦼꦤ꧀ꦢꦤ꧀ꦏꦸꦩꦼꦤ꧀ꦢꦤ꧀​ꦭꦤ꧀ꦥꦫ​ꦱꦺꦴꦭ꧀ꦢꦠ꧀ꦠꦺꦱꦶꦁ​ꦚ꧀ꦗꦒ​ꦒꦸꦱ꧀ꦠꦶ​ꦪꦺꦯꦸꦱ꧀ꦥꦢ​ꦏꦿꦱ​ꦭꦶꦤ꧀ꦢꦸꦤꦺꦭꦤ꧀ꦲꦸꦒ​ꦥꦢ​ꦮꦼꦫꦸꦃ​ꦱꦼꦩ꧀ꦧꦫꦁ​ꦱꦶꦁ​ꦏ꧀ꦭꦏꦺꦴꦤ꧀ꦩꦲꦸ​꧉​ꦏꦧꦺꦃ​ꦥꦢ​ꦮꦼꦢꦶ​ꦠꦼꦤꦤ꧀ꦭꦤ꧀ꦥꦢ​ꦔꦺꦴꦩꦺꦴꦁ:“ꦮꦺꦴꦁ​ꦲꦶꦏꦶ​ꦥꦚ꧀ꦕꦺꦤ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀꧈​”

55꧋ꦤꦁꦏꦺꦴꦤꦺꦴ​ꦲꦺꦴꦏꦺꦃꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦚꦮꦁ​ꦱꦁꦏꦏꦢꦺꦴꦃꦲꦤ꧀꧈​ꦮꦺꦴꦁꦮꦺꦴꦁ​ꦲꦶꦏꦶ​ꦩꦲꦸꦤꦺ​ꦥꦢ​ꦩꦺꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦮꦶꦠ꧀ꦱꦁꦏꦧꦮꦃꦓꦭꦶꦭꦺꦪ​꧈​ꦠꦸꦗꦸꦮꦤ꧀ꦤꦺ​ꦔ꧀ꦭꦢꦺꦤ꧀ꦤꦶ​ꦢꦺꦏ꧀ꦤꦺ꧉​ 56ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦲꦶꦏꦶ​ꦏꦪꦢꦺꦤꦺ:ꦩꦫꦶꦪꦩꦏ꧀ꦢꦭꦺꦤ꧈​ꦩꦫꦶꦪꦲꦶꦧꦸꦤꦺ​ꦪꦏꦺꦴꦧꦸꦱ꧀ꦭꦤ꧀ꦪꦺꦴꦱꦺꦥ꦳꧀ꦭꦤ꧀ꦧꦺꦴꦗꦺꦴꦤꦺ​ꦯꦺꦧꦺꦢꦺꦪꦸꦱ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦏꦸꦧꦸꦂ​꧉​

57꧋ꦲꦶꦁ​ꦮꦪꦃ​ꦱꦺꦴꦫꦺ​ꦲꦺꦤꦺꦁꦮꦺꦴꦁ​ꦱꦸꦒꦶꦃ​ꦱꦁꦏꦏꦸꦠꦄꦫꦶꦩꦠꦺꦪ​ꦠꦼꦏ​꧉​ꦮꦺꦴꦁꦔꦺ​ꦗꦼꦤꦼꦁꦔꦺ​ꦪꦺꦴꦱꦺꦥ꦳꧀ꦭꦤ꧀ꦢꦺꦏ꧀ꦤꦺꦲꦸꦒ​ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 58ꦪꦺꦴꦱꦺꦥ꦳꧀ꦲꦶꦏꦶ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦥꦶꦭꦠꦸꦱ꧀ꦤꦼꦩ꧀ꦧꦸꦁ​ꦭꦪꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦥꦶꦭꦠꦸꦱ꧀ꦠꦼꦫꦸꦱ꧀ꦩꦿꦺꦤ꧀ꦠꦃ​ꦱꦸꦥꦪ​ꦭꦪꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦏꦺꦏ꧀ꦏꦏꦺꦩꦫꦁ​ꦪꦺꦴꦱꦺꦥ꦳꧀꧈​ 59ꦪꦺꦴꦱꦺꦥ꦳꧀ꦠꦼꦫꦸꦱ꧀ꦔꦼꦢꦸꦤ꧀ꦤꦏꦺꦭꦪꦺꦴꦤꦺ​ꦱꦁꦏꦥꦼꦤ꧀ꦠꦺꦁꦔꦤ꧀ ꦠꦼꦫꦸꦱ꧀ꦢꦶꦧꦸꦤ꧀ꦠꦼꦭ꧀ꦩꦺꦴꦫꦶ​ꦲꦚꦂ​꧉​ 60ꦭꦪꦺꦴꦤꦺ​ꦠꦼꦫꦸꦱ꧀ꦢꦶꦱꦺꦭꦺꦃꦲꦏꦺꦤꦁꦏꦸꦧꦸꦂꦫꦤ꧀ꦤꦺ​ꦪꦺꦴꦱꦺꦥ꦳꧀ꦢꦺꦮꦺꦱꦶꦁ​ꦲꦶꦗꦶꦏ꧀ꦲꦚꦂ​꧉​ꦏꦸꦧꦸꦂꦫꦤ꧀ꦲꦶꦏꦶ​ꦱꦏ꧀ꦮꦶꦗꦶꦤꦺꦒꦸꦮ​ꦱꦶꦁ​ꦢꦶꦒꦿꦺꦴꦮꦺꦴꦁ​ꦤꦁꦮꦠꦸ​꧉​ꦱꦏ꧀ꦮꦶꦱ꧀ꦱꦺ​ꦤꦸꦠꦸꦥ꧀ꦭꦮꦁꦔꦺ​ꦏꦸꦧꦸꦂꦫꦤ꧀ꦤꦺ​ꦏꦫꦺꦴ​ꦮꦠꦸ​ꦒꦼꦢꦺ​꧈​ꦪꦺꦴꦱꦺꦥ꦳꧀ꦠꦼꦫꦸꦱ꧀ꦭꦸꦔ​꧉​

61꧋ꦩꦫꦶꦪꦩꦏ꧀ꦢꦭꦺꦤꦭꦤ꧀ꦩꦫꦶꦪꦱꦶꦁ​ꦭꦶꦪꦤꦺ​ꦥꦢ​ꦏꦺꦫꦶ​ꦤꦁꦏꦺꦴꦤꦺꦴ​꧈​ꦚ꧀ꦗꦒꦺꦴꦁꦤꦁꦔꦉꦥ꧀ꦥꦺ​ꦏꦸꦧꦸꦂꦫꦤ꧀꧈​

꧋ꦏꦸꦧꦸꦂꦫꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦗꦒ​꧉​

62꧋ꦲꦺꦱꦸꦏ꧀ꦏꦺ​꧈​ꦲꦶꦁ​ꦢꦶꦤ​ꦱꦧꦠ꧀ ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦥ꦳ꦫꦶꦱꦶ​ꦥꦢ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦥꦶꦭꦠꦸꦱ꧀꧈​ 63ꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦧꦥꦏ꧀ꦒꦿꦩꦁ꧈​ꦲꦮꦏ꧀ꦏꦺ​ꦢꦺꦮꦺꦏꦺꦭꦶꦁꦔꦤ꧀ꦤꦺꦏ꧀ꦮꦺꦴꦁ​ꦠꦸꦏꦁ​ꦔꦥꦸꦱ꧀ꦱꦶ​ꦏꦸꦮꦶ​ꦠꦲꦸ​ꦔꦺꦴꦩꦺꦴꦁꦔꦺꦤꦺ​ꦢꦺꦴꦁꦔꦺꦲꦶꦗꦶꦏ꧀ꦲꦸꦫꦶꦥ꧀:'ꦱꦏ꧀ꦮꦶꦱ꧀ꦱꦺ​ꦠꦼꦭꦸꦁ​ꦢꦶꦤ​ꦲꦏꦸ​ꦧꦏꦭ꧀ꦲꦸꦫꦶꦥ꧀ꦩꦼꦤꦺꦃ​꧉'​ 64ꦩꦸꦭꦤꦺ​ꦲꦥꦶꦏ꧀ꦤꦺꦏ꧀ꦧꦥꦏ꧀ꦒꦿꦩꦁꦩꦿꦺꦤ꧀ꦠꦃ​ꦏꦺꦴꦁꦏꦺꦴꦤ꧀​ꦚ꧀ꦗꦒ​ꦏꦸꦧꦸꦂꦫꦤ꧀ꦤꦺ​ꦠꦼꦏꦤ꧀ꦠꦼꦭꦸꦁ​ꦢꦶꦤꦤꦺ​꧉​ꦲꦮꦶꦠ꧀ꦤꦺꦏ꧀ꦲꦺꦴꦫ​ꦔꦺꦴꦤꦺꦴ​꧈​ꦩꦼꦁꦏꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦧꦶꦱ​ꦚꦺꦴꦭꦺꦴꦁ​ꦭꦪꦺꦴꦤꦺ​꧈​ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​:'ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦫꦶꦥ꧀ꦩꦼꦤꦺꦃ​꧉'​ꦭꦃ​ꦲꦥꦸꦱ꧀ꦱꦤ꧀ꦱꦶꦁ​ꦲꦚꦂ​ꦲꦶꦏꦶ​ꦩꦼꦁꦏꦺꦴ​ꦚꦩꦂꦫꦶꦔꦸꦁꦏꦸꦭ꧀ꦭꦶ​ꦲꦥꦸꦱ꧀ꦱꦤ꧀ꦱꦶꦁ​ꦤ꧀ꦢꦶꦱꦶꦏ꧀꧈​”

65꧋ꦥꦶꦭꦠꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦤ​ꦔ꧀ꦒꦮ​ꦱꦺꦴꦭ꧀ꦢꦠ꧀ꦭꦤ꧀ꦏꦸꦧꦸꦂꦫꦤ꧀ꦤꦺ​ꦢꦶꦗꦒ​ꦱꦶꦁ​ꦲꦥꦶꦏ꧀꧈​” 66ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦧꦸꦢꦭ꧀ꦤꦁꦏꦸꦧꦸꦂꦫꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦭꦮꦁꦔꦺ​ꦏꦸꦧꦸꦂꦫꦤ꧀ꦤꦺ​ꦠꦼꦫꦸꦱ꧀ꦢꦶꦱꦺꦒꦼꦭ꧀ꦭꦤ꧀ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦠꦺꦢꦶꦏꦺꦴꦁꦏꦺꦴꦤ꧀​ꦚ꧀ꦗꦒ​ꦤꦁꦏꦺꦴꦤꦺꦴ​꧉​

↑ ↑ ↑


꧋ꦠꦔꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦥꦠꦶ​꧉​

꧇​꧒꧘꧇​ 1꧋ꦏꦢꦸꦁ​ꦢꦶꦤ​ꦱꦧꦠ꧀ꦮꦶꦱ꧀​ꦏ꧀ꦭꦶꦮꦠ꧀ ꦲꦶꦁ​ꦢꦶꦤ​ꦩꦶꦁꦒꦸ​ꦲꦺꦱꦸꦏ꧀ꦩꦿꦸꦥꦸꦠ꧀ ꦩꦫꦶꦪꦩꦏ꧀ꦢꦭꦺꦤꦭꦤ꧀ꦩꦫꦶꦪꦭꦶꦪꦤꦺ​ꦥꦢ​ꦭꦸꦔ​ꦤꦶꦭꦶꦏ꧀ꦏꦶ​ꦏꦸꦧꦸꦂꦫꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 2ꦢꦢꦏ꧀ꦏꦤ꧀ꦮꦲꦺ​ꦲꦺꦤꦺꦁꦭꦶꦤ꧀ꦢꦸꦱꦶꦁ​ꦒꦼꦢꦺ​ꦧꦔꦼꦠ꧀ ꦲꦮꦶꦠ꧀ꦲꦺꦤꦺꦁꦩꦸꦭꦺꦏꦠ꧀ꦩꦼꦢꦸꦤ꧀ꦱꦁꦏꦱ꧀ꦮꦂꦒ​꧉​ꦩꦸꦭꦺꦏꦠ꧀ꦠꦺꦠꦼꦫꦸꦱ꧀​ꦔ꧀ꦒꦸꦤ꧀ꦢꦸꦁꦔꦏꦺꦮꦠꦸ​ꦠꦸꦠꦸꦥ꧀ꦥꦺ​ꦏꦸꦧꦸꦂꦫꦤ꧀ ꦠꦼꦫꦸꦱ꧀​ꦚ꧀ꦗꦒꦺꦴꦁꦤꦁꦮꦠꦸ​ꦩꦲꦸ​꧉​ 3ꦩꦸꦭꦺꦏꦠ꧀ꦠꦺꦏꦺꦠꦺꦴꦏ꧀ꦏꦺ​ꦏꦪ​ꦏ꧀ꦭꦺꦭꦥ꧀ꦥꦺꦧ꧀ꦊꦢꦺꦏ꧀ꦭꦤ꧀ꦱꦭꦶꦤ꧀ꦤꦺꦥꦸꦠꦶꦃ​ꦱꦸꦩꦼꦧ꧀ꦭꦏ꧀꧈​ 4ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦱꦶꦁ​ꦗꦒ​ꦏꦺꦴꦤꦺꦴ​ꦥꦢ​ꦏꦒꦺꦠ꧀ꦠꦼꦤꦤ꧀ꦭꦤ꧀ꦱꦁꦏꦶꦁꦮꦼꦢꦶꦤꦺ​ꦱꦩ꧀ꦥꦺꦏ꧀ꦥꦢ​ꦏꦪ​ꦮꦺꦴꦁ​ꦩꦠꦶ​꧉​

5꧋ꦩꦸꦭꦺꦏꦠ꧀ꦠꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦩꦲꦸ​:“ꦲꦗ​ꦥꦢ​ꦮꦼꦢꦶ​!ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦥꦢ​ꦔ꧀ꦒꦺꦴꦭꦺꦏ꧀ꦏꦶ​ꦪꦺꦯꦸꦱ꧀ꦱꦶꦁ​ꦮꦶꦱ꧀ꦢꦶꦥꦼꦤ꧀ꦠꦺꦁ꧉​ 6ꦢꦺꦏ꧀ꦤꦺꦲꦺꦴꦫ​ꦤꦁꦏꦺꦤꦺ​꧈​ꦢꦺꦏ꧀ꦤꦺꦮꦶꦱ꧀ꦠꦔꦶ​꧈​ꦕꦺꦴꦕꦺꦴꦏ꧀​ꦏꦫꦺꦴ​ꦱꦶꦁ​ꦢꦶꦲꦺꦴꦩꦺꦴꦁꦔꦏꦺꦢꦺꦏ꧀​ꦩ꧀ꦧꦶꦪꦺꦤ꧀꧈​ꦲꦩ꧀ꦧꦺꦴꦏ꧀ꦗꦗꦭ꧀ꦢꦶꦢꦼꦭꦺꦴꦏ꧀ꦥꦁꦒꦺꦴꦤ꧀ꦤꦤ꧀ꦠꦶꦭꦱ꧀ꦱꦺ​꧉​ 7ꦩꦸꦭꦤꦺ​ꦏꦤ​ꦥꦢ​ꦤ꧀ꦢꦁꦧꦭꦶꦏ꧀ꦏꦔꦺꦴꦩꦺꦴꦁꦔꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦤꦺꦏ꧀ꦢꦺꦏ꧀ꦤꦺꦮꦶꦱ꧀ꦠꦔꦶ​ꦭꦤ꧀ꦧꦸꦢꦭ꧀​ꦤ꧀ꦢꦶꦱꦶꦏ꧀ꦏꦶ​ꦤꦁꦓꦭꦶꦭꦺꦪ​꧉​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦢꦶꦲꦺꦴꦩꦺꦴꦁꦔꦶꦤꦺꦏ꧀ꦧꦏꦭ꧀ꦩꦼꦠꦸꦮꦢꦺꦏ꧀ꦤꦺꦤꦁꦏꦤ​꧉​ꦪꦏꦸꦮꦶ​ꦱꦶꦁ​ꦏꦸꦢꦸ​ꦠꦏ꧀ꦲꦺꦴꦩꦺꦴꦁꦔꦏꦺꦩꦫꦁ​ꦏꦺꦴꦮꦺ​꧉​”

8꧋ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦩꦲꦸ​ꦠꦼꦫꦸꦱ꧀ꦒꦼꦭꦶꦱ꧀ꦒꦼꦭꦶꦱ꧀ꦭꦸꦔ​ꦱꦁꦏꦏꦸꦧꦸꦂꦫꦤ꧀ꦏꦺꦴꦤꦺꦴ​ꦏꦫꦺꦴ​ꦫꦱ​ꦮꦼꦢꦶ​ꦕꦩ꧀ꦥꦸꦂ​ꦧꦸꦔꦃ​꧉​ꦩ꧀ꦭꦏꦸꦤꦺ​ꦒꦼꦭꦶꦱ꧀ ꦲꦮꦶꦠ꧀​ꦤ꧀ꦢꦁꦏꦼꦥꦺꦔꦶꦤ꧀ꦔꦺꦴꦩꦺꦴꦁꦔꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦧ꧀ꦊꦭꦏꦺꦴꦤ꧀ꦏꦸꦮꦶ​ꦩꦲꦸ​꧉​

9꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦼꦠꦸꦮꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦩꦲꦸ​꧈​ꦔꦺꦴꦩꦺꦴꦁ:“ꦥꦢ​ꦱ꧀ꦭꦩꦼꦠ꧀ꦠ​!”ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦩꦲꦸ​ꦠꦼꦫꦸꦱ꧀ꦥꦢ​ꦚꦼꦢꦼꦏ꧀ꦏꦶꦭꦤ꧀ꦱꦸꦗꦸꦠ꧀ꦤꦁꦔꦉꦥ꧀ꦥꦺ​꧈​ꦠꦼꦫꦸꦱ꧀ꦥꦢ​ꦚꦼꦏꦼꦭ꧀ꦭꦶ​ꦱꦶꦏꦶꦭ꧀ꦭꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 10ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦲꦗ​ꦥꦢ​ꦮꦼꦢꦶ​!ꦏꦤ​ꦧꦭꦶꦏ꧀ꦏꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦏꦸ​ꦥꦢ​ꦢꦶꦲꦺꦴꦩꦺꦴꦁꦔꦶꦏꦺꦴꦁꦏꦺꦴꦤ꧀ꦥꦢ​ꦧꦸꦢꦭ꧀ꦤꦁꦓꦭꦶꦭꦺꦪ​꧉​ꦤꦁꦏꦤ​ꦩꦼꦁꦏꦺꦴ​ꦧꦏꦭ꧀ꦮꦼꦫꦸꦃ​ꦲꦏꦸ​!”

꧋ꦠꦼꦩ꧀ꦧꦸꦁꦔꦺ​ꦱꦶꦁ​ꦗꦒ​ꦏꦸꦧꦸꦂꦫꦤ꧀꧈​

11꧋ꦢꦺꦴꦁꦔꦺꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦲꦶꦗꦶꦏ꧀ꦥꦢ​ꦩ꧀ꦭꦏꦸ​꧈​ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦱꦶꦁ​ꦗꦒ​ꦏꦸꦧꦸꦂꦫꦤ꧀ꦠꦼꦫꦸꦱ꧀ꦥꦢ​ꦭꦸꦔ​ꦤꦁꦏꦸꦠꦪꦺꦫꦸꦱꦭꦺꦩ꧀ ꦲꦉꦥ꧀ꦔꦺꦴꦩꦺꦴꦁꦔꦶꦩꦫꦁ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦧꦧ꧀ꦲꦥ​ꦱꦶꦁ​ꦏ꧀ꦭꦏꦺꦴꦤ꧀ꦏꦧꦺꦃ​꧉​ 12ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦠꦼꦫꦸꦱ꧀ꦥꦢ​ꦉꦩ꧀ꦧꦸꦏ꧀ꦏꦤ꧀ꦏꦫꦺꦴ​ꦥꦫ​ꦥꦶꦤꦶꦠꦸꦮꦤꦺ​ꦧꦁꦱ​ꦙꦸ꧉​ꦮꦺꦴꦁꦮꦺꦴꦁ​ꦠꦼꦫꦸꦱ꧀​ꦔ꧀ꦒꦮꦺ​ꦥꦸꦠꦸꦱ꧀ꦱꦤ꧀ꦔꦼꦏꦺꦏ꧀ꦏꦶꦢꦸꦮꦶꦠ꧀ꦲꦺꦴꦏꦺꦃꦩꦫꦁ​ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦱꦶꦁ​ꦗꦒ​ꦏꦸꦧꦸꦂꦫꦤ꧀꧈​ 13ꦥꦫ​ꦱꦺꦴꦭ꧀ꦢꦠ꧀ꦱꦶꦁ​ꦗꦒ​ꦢꦶꦏꦺꦴꦁꦏꦺꦴꦤ꧀ꦔꦺꦴꦩꦺꦴꦁꦔꦺꦴꦩꦺꦴꦁꦔꦏꦺꦤꦺꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦏ​ꦲꦶꦁ​ꦮꦪꦃ​ꦮꦼꦔꦶ​ꦠꦼꦫꦸꦱ꧀ꦚꦺꦴꦭꦺꦴꦁ​ꦭꦪꦺꦴꦤꦺ​꧈​ꦢꦺꦴꦁꦔꦺꦱꦶꦁ​ꦗꦒ​ꦲꦶꦗꦶꦏ꧀ꦠꦸꦫꦸ​꧉​ 14ꦥꦫ​ꦱꦺꦴꦭ꧀ꦢꦠ꧀ꦱꦶꦁ​ꦗꦒ​ꦏꦸꦧꦸꦂꦫꦤ꧀ꦢꦶꦥꦼꦔꦶꦁ​ꦮꦼꦢꦶ​꧈​ꦱꦼꦤꦗꦤ꧀ꦒꦿꦩꦁꦔꦺꦏꦿꦸꦔꦸ​꧈​ꦲꦮꦶꦠ꧀ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦧꦏꦭ꧀ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴ​ꦢꦺꦏ꧀ꦤꦺ꧈​ꦱꦸꦥꦪ​ꦱꦶꦁ​ꦗꦒ​ꦏꦸꦧꦸꦂꦫꦤ꧀ꦲꦺꦴꦫ​ꦧꦏꦭ꧀ꦢꦶꦱꦼꦠꦿꦥ꧀꧈​

15꧋ꦥꦫ​ꦱꦺꦴꦭ꧀ꦢꦠ꧀ꦩꦲꦸ​ꦠꦼꦫꦸꦱ꧀ꦤꦩ꧀ꦥ​ꦢꦸꦮꦶꦠ꧀ꦠꦺꦭꦤ꧀ꦤꦸꦫꦸꦠ꧀ꦠꦶ​ꦲꦥ​ꦏꦉꦥ꧀ꦥꦺ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦶꦤꦶꦠꦸꦮꦤꦺ​ꦧꦁꦱ​ꦙꦸ꧉​ꦠꦼꦩ꧀ꦧꦸꦁꦔꦺ​ꦥꦫ​ꦱꦺꦴꦭ꧀ꦢꦠ꧀ꦩꦲꦸ​ꦠꦼꦫꦸꦱ꧀ꦏꦼꦱꦼꦧꦂꦤꦁꦠꦼꦔꦃꦲꦺ​ꦧꦁꦱ​ꦙꦸ꧈​ꦠꦼꦏꦤ꧀ꦱꦼꦥꦿꦺꦤꦺ​꧉​

꧋ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​

16꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦮꦼꦭꦱ꧀ꦥꦢ​ꦧꦸꦢꦭ꧀ꦤꦁꦓꦭꦶꦭꦺꦪ​꧈​ꦤꦁꦒꦸꦤꦸꦁ​ꦱꦶꦁ​ꦮꦶꦱ꧀ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 17ꦏꦢꦸꦁ​ꦥꦢ​ꦮꦼꦫꦸꦃ​ꦒꦸꦱ꧀ꦠꦶ​ꦪꦺꦯꦸꦱ꧀ ꦩꦸꦫꦶꦢ꧀ꦩꦸꦫꦶꦢ꧀ꦩꦲꦸ​ꦠꦼꦫꦸꦱ꧀ꦥꦢ​ꦱꦸꦗꦸꦠ꧀ꦤꦁꦔꦉꦥ꧀ꦥꦺ​꧉​ꦤꦁꦔꦶꦁ​ꦲꦺꦤꦺꦁꦩꦸꦫꦶꦢ꧀ꦱꦶꦗꦶꦭꦺꦴꦫꦺꦴꦱꦶꦁ​ꦢꦸꦫꦸꦁ​ꦥꦽꦕꦪ​꧉​ 18ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦢꦼꦏ꧀ꦏꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧈​ꦠꦼꦫꦸꦱ꧀ꦔꦺꦴꦩꦺꦴꦁ:“ꦱꦏ꧀ꦲꦺꦤꦺꦁꦔꦺꦥꦔ꧀ꦮꦱ​ꦤꦁꦱ꧀ꦮꦂꦒ​ꦭꦤ꧀ꦤꦁꦧꦸꦩꦶ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦲꦏꦸ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 19ꦩꦸꦭꦤꦺ​꧈​ꦏꦤ​ꦥꦢ​ꦧꦸꦢꦭ꧀ꦭ꧈​ꦧꦁꦱꦧꦁꦱ​ꦤꦁꦱꦏ꧀ꦭꦸꦩꦃꦲꦺꦧꦸꦩꦶ​ꦢꦶꦥꦫꦤ꧀ꦤꦶ​ꦏꦧꦺꦃ​ꦭꦤ꧀ꦢꦶꦢꦢꦺꦏ꧀ꦏꦏꦺꦩꦸꦫꦶꦢ꧀ꦏꦸ​꧉​ꦥꦢ​ꦢꦶꦧꦥ꧀ꦠꦶꦱ꧀ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺ꧈​ꦲꦤꦏ꧀ꦏꦺ​ꦭꦤ꧀ꦫꦺꦴꦃ​ꦱꦸꦕꦶ​꧉​ 20ꦥꦢ​ꦢꦶꦧ꧀ꦭꦗꦂꦫꦶꦤꦸꦫꦸꦠ꧀ꦠꦶ​ꦱꦏ꧀ꦏꦺꦃꦲꦺꦥꦶꦮꦸꦭꦁ​ꦱꦶꦁ​ꦮꦶꦱ꧀ꦠꦏ꧀ꦮꦸꦭꦁꦔꦏꦺꦩꦫꦁ​ꦏꦺꦴꦮꦺ​꧉​ꦭꦤ꧀ꦥꦢ​ꦠꦶꦠꦺꦤ꧀ꦤꦤ꧀ꦤ​꧈​ꦲꦏꦸ​ꦧꦏꦭ꧀ꦔꦚ꧀ꦕꦤꦶ​ꦏꦺꦴꦮꦺ​ꦠꦼꦫꦸꦱ꧀ꦠꦼꦏꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦗꦩꦤ꧀꧈​”

↑ ↑ ↑


  ꦩꦂꦏꦸꦱ꧀ →