ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦩꦂꦏꦸꦱ꧀

꧁꧋ꦏꦧꦂ​ꦏꦧꦸꦔꦃꦲꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦠꦸꦫꦸꦠ꧀ꦩꦂꦏꦸꦱ꧀꧈꧂


ꦥꦱꦭ꧀ ꧇​꧑꧇​ ꧇​꧒꧇​ ꧇​꧓꧇​ ꧇​꧔꧇​ ꧇​꧕꧇​ ꧇​꧖꧇​ ꧇​꧗꧇​ ꧇​꧘꧇​ ꧇​꧙꧇​ ꧇​꧑꧐꧇​ ꧇​꧑꧑꧇​ ꧇​꧑꧒꧇​ ꧇​꧑꧓꧇​ ꧇​꧑꧔꧇​ ꧇​꧑꧕꧇​ ꧇​꧑꧖꧇​

꧋ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀꧈​

꧇​꧑꧇​

1꧋ꦲꦶꦏꦶ​ꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 2ꦏꦧꦂ​ꦏꦧꦸꦔꦃꦲꦤ꧀ꦲꦶꦏꦶ​ꦮꦶꦮꦶꦠ꧀ꦠꦤ꧀ꦤꦺ​ꦏꦪ​ꦱꦶꦁ​ꦮꦶꦱ꧀ꦢꦶꦠꦸꦭꦶꦱ꧀ꦏꦫꦺꦴ​ꦤꦧꦶ​ꦪꦺꦱꦪ​ꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀꧈​ꦏꦼꦠꦸꦭꦶꦱ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦲꦤꦏ꧀ꦏꦺ​:

“ꦪ​ꦮꦺꦴꦁ​ꦲꦶꦏꦶ​ꦱꦶꦁ​ꦠꦏ꧀ꦏꦺꦴꦁꦏꦺꦴꦤ꧀ꦠꦼꦏ​ꦤ꧀ꦢꦶꦱꦶꦏ꧀
ꦏꦺꦴꦁꦏꦺꦴꦤ꧀ꦤꦠ​ꦲꦠꦶꦤꦺ​ꦮꦺꦴꦁꦮꦺꦴꦁ​꧈​
ꦱꦸꦥꦪ​ꦥꦢ​ꦒꦼꦊꦩ꧀​ꦔ꧀ꦒꦸꦒꦸ​ꦩꦫꦁ​ꦏꦺꦴꦮꦺ​!”

3꧋ꦠꦼꦫꦸꦱ꧀ꦲꦺꦤꦺꦁꦠꦸꦭꦶꦱ꧀ꦱꦤ꧀ꦩꦼꦤꦺꦃ​ꦔꦺꦴꦩꦺꦴꦁꦔꦺꦤꦺ​:

“ꦤꦁꦮꦸꦱ꧀ꦠꦺꦤ꧀ꦲꦺꦤꦺꦁꦮꦺꦴꦁ​ꦧꦼꦔꦺꦴꦏ꧀ꦧꦼꦔꦺꦴꦏ꧀
ꦔꦺꦴꦩꦺꦴꦁꦔꦶꦮꦺꦴꦁꦮꦺꦴꦁ​ꦏꦺꦴꦁꦏꦺꦴꦤ꧀ꦥꦢ​ꦤꦠ​ꦲꦸꦫꦶꦥ꧀ꦥꦺ꧈​
ꦲꦮꦶꦠ꧀ꦒꦸꦱ꧀ꦠꦶ​ꦲꦉꦥ꧀ꦠꦼꦏ​꧉​”

4-6ꦏꦸꦮꦶ​ꦩꦲꦸ​ꦏꦧꦺꦃ​ꦔꦺꦴꦩꦺꦴꦁꦔꦏꦺꦪꦺꦴꦲꦤꦼꦱ꧀ꦱꦶꦁ​ꦩꦁꦒꦺꦴꦤ꧀ꦤꦁꦮꦸꦱ꧀ꦠꦺꦤ꧀꧈​ꦱꦭꦶꦤ꧀ꦤꦺꦪꦺꦴꦲꦤꦼꦱ꧀ꦮꦸꦭꦸ​ꦲꦸꦤ꧀ꦠ​ꦭꦤ꧀ꦱꦧꦸꦏ꧀ꦏꦺ​ꦭꦸꦭꦁ​꧉​ꦥꦔꦤ꧀ꦤꦺ​ꦤꦩꦸꦁ​ꦮꦭꦁ​ꦭꦤ꧀ꦩꦢꦸꦤꦺ​ꦠꦮꦺꦴꦤ꧀ꦲꦭꦱ꧀ꦱꦤ꧀꧈​ꦪꦺꦴꦲꦤꦼꦱ꧀ꦔꦺꦴꦩꦺꦴꦁꦔꦶꦮꦺꦴꦁꦮꦺꦴꦁ​ꦏꦺꦴꦁꦏꦺꦴꦤ꧀ꦥꦢ​ꦤꦶꦁꦒꦭ꧀​ꦏ꧀ꦭꦏꦸꦮꦤ꧀ꦲꦭ​ꦭꦤ꧀ꦥꦢ​ꦢꦶꦧꦥ꧀ꦠꦶꦱ꧀ ꦱꦸꦥꦪ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦥꦸꦫ​ꦱꦭꦃꦲꦺ​ꦏꦧꦺꦃ​꧉​ꦱꦁꦏꦧꦮꦃꦪꦸꦢꦺꦪ​ꦭꦤ꧀ꦱꦁꦏꦏꦸꦠꦪꦺꦫꦸꦱꦭꦺꦩ꧀ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦠꦼꦏ​ꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦔꦺ​ꦪꦺꦴꦲꦤꦼꦱ꧀꧈​ꦏꦧꦺꦃ​ꦥꦢ​ꦔꦏꦺꦴꦤ꧀ꦤꦶ​ꦱꦭꦃꦲꦺ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦢ​ꦢꦶꦧꦥ꧀ꦠꦶꦱ꧀ꦤꦁꦭꦫꦪꦺꦴꦂꦢꦤ꧀꧈​

7꧋ꦪꦺꦴꦲꦤꦼꦱ꧀ꦔꦺꦴꦩꦺꦴꦁꦔꦶꦮꦺꦴꦁꦮꦺꦴꦁ​ꦔꦺꦤꦺ​:“ꦧꦏꦭ꧀ꦲꦺꦤꦺꦁꦮꦺꦴꦁ​ꦭꦶꦪꦤꦺ​ꦠꦼꦏ​꧉​ꦮꦺꦴꦁ​ꦏꦸꦮꦶ​ꦏ꧀ꦮꦱꦤꦺ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦲꦏꦸ​꧉​ꦲꦏꦸ​ꦗꦤ꧀​ꦧ꧀ꦭꦱ꧀ꦲꦺꦴꦫ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦢꦺꦏ꧀ꦤꦺ! 8ꦲꦏꦸ​ꦲꦩ꧀ꦧꦥ꧀ꦠꦶꦱ꧀ꦏꦺꦴꦮꦺ​ꦤꦩꦸꦁ​ꦏꦫꦺꦴ​ꦧꦚꦸ​꧈​ꦤꦁꦔꦶꦁ​ꦢꦺꦏ꧀ꦤꦺꦧꦏꦭ꧀ꦲꦩ꧀ꦧꦥ꧀ꦠꦶꦱ꧀ꦏꦺꦴꦮꦺ​ꦏꦫꦺꦴ​ꦫꦺꦴꦃ​ꦱꦸꦕꦶ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦧꦥ꧀ꦠꦶꦱ꧀ꦏꦫꦺꦴ​ꦪꦺꦴꦲꦤꦼꦱ꧀꧈​

9꧋ꦲꦶꦁ​ꦮꦪꦃ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦸꦔ​ꦱꦁꦏꦏꦸꦠꦟꦱꦫꦺꦠ꧀ ꦱꦁꦏꦢꦶꦱ꧀ꦠꦿꦶꦏ꧀ꦓꦭꦶꦭꦺꦪ​꧉​ꦢꦺꦏ꧀ꦤꦺꦠꦼꦫꦸꦱ꧀ꦢꦶꦧꦥ꧀ꦠꦶꦱ꧀ꦏꦫꦺꦴ​ꦪꦺꦴꦲꦤꦼꦱ꧀ꦤꦁꦭꦫꦪꦺꦴꦂꦢꦤ꧀꧈​ 10ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦩꦼꦤ꧀ꦠꦱ꧀ꦱꦁꦏꦧꦚꦸ​꧈​ꦢꦺꦏ꧀ꦤꦺ​ꦠꦼꦫꦸꦱ꧀ꦮꦼꦫꦸꦃ​ꦭꦔꦶꦠ꧀ꦠꦺ​ꦩꦼꦔ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦫꦺꦴꦃ​ꦱꦸꦕꦶ​ꦩꦼꦢꦸꦤ꧀ꦏꦺꦠꦺꦴꦏ꧀ꦏꦺ​ꦏꦪ​ꦩꦤꦸꦏ꧀ꦢꦫ​꧈​ꦩꦺꦚ꧀​ꦕ꧀ꦭꦺꦴꦏ꧀ꦏꦶ​ꦢꦺꦏ꧀ꦤꦺ​꧉​ 11ꦠꦼꦫꦸꦱ꧀ꦲꦺꦤꦺꦁꦱ꧀ꦮꦫ​ꦱꦁꦏꦭꦔꦶꦠ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦲꦤꦏ꧀ꦏꦸ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧉​ꦲꦏꦸ​ꦗꦤ꧀ꦊꦒ​ꦧꦔꦼꦠ꧀ꦏꦫꦺꦴ​ꦏꦺꦴꦮꦺ​!”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦁꦮꦸꦱ꧀ꦠꦺꦤ꧀꧈​

12꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦫꦺꦴꦃ​ꦱꦸꦕꦶ​ꦠꦼꦫꦸꦱ꧀ꦤꦸꦤ꧀ꦠꦸꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦒꦮ​ꦤꦁꦮꦸꦱ꧀ꦠꦺꦤ꧀꧈​ 13ꦤꦁꦮꦸꦱ꧀ꦠꦺꦤ꧀ꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦥꦠꦁ​ꦥꦸꦭꦸꦃ​ꦢꦶꦤ​ꦱꦸꦮꦺꦤꦺ​꧉​ꦢꦺꦏ꧀ꦤꦺꦢꦶꦗꦗꦭ꧀ꦏꦫꦺꦴ​ꦱꦺꦠꦤ꧀ ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦥ​ꦲꦺꦴꦫ​꧉​ꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​ꦏꦸꦮꦶ​ꦲꦺꦴꦏꦺꦃꦏꦺꦮꦤꦺ​ꦒꦭꦏ꧀ ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦗꦒ​ꦭꦤ꧀ꦢꦶꦭꦢꦺꦤ꧀ꦤꦶ​ꦏꦫꦺꦴ​ꦩꦸꦭꦺꦏꦠ꧀ꦩꦸꦭꦺꦏꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦺꦴꦭꦃꦲꦶꦔ꧀ꦒꦼꦭꦂ​ꦏꦧꦂ​ꦏꦧꦸꦔꦃꦲꦤ꧀ꦭꦤ꧀​ꦔ꧀ꦒꦺꦴꦭꦺꦏ꧀ꦩꦸꦫꦶꦢ꧀꧈​

14꧋ꦱꦏ꧀ꦮꦶꦱ꧀ꦱꦺ​ꦪꦺꦴꦲꦤꦼꦱ꧀ꦢꦶꦕꦼꦏꦼꦭ꧀ꦭꦤ꧀ꦢꦶꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀ꦏꦫꦺꦴ​ꦫꦠꦸ​ꦲ꦳ꦺꦫꦺꦴꦢꦺꦱ꧀ ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦼꦏ​ꦤꦁꦓꦭꦶꦭꦺꦪ​꧉​ꦤꦁꦧꦮꦃꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦒꦼꦭꦂ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 15ꦢꦺꦏ꧀ꦤꦺ​ꦔꦺꦴꦩꦺꦴꦁꦔꦺꦤꦺ​:“ꦱꦲꦶꦏꦶ​ꦮꦚ꧀ꦕꦶꦤꦺ​ꦮꦶꦱ꧀ꦠꦼꦏ​ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦉꦥ꧀ꦔꦼꦢꦼꦏ꧀ꦏꦏꦺꦏꦿꦠꦺꦴꦤꦺ​꧉​ꦩꦸꦭꦤꦺ​ꦥꦢ​ꦥꦽꦕꦪꦲ​ꦩꦫꦁ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦢ​ꦤꦶꦁꦒꦭ꧀ꦭ​ꦏ꧀ꦭꦏꦸꦮꦤ꧀ꦲꦭ​!” 16ꦢꦺꦴꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦭꦏꦸ​ꦤꦁꦥꦶꦁꦒꦶꦂꦫꦺ​ꦩꦺꦂꦓꦭꦶꦭꦺꦪ​ꦏꦺꦴꦤꦺꦴ​꧈​ꦢꦺꦏ꧀ꦤꦺ​ꦮꦼꦫꦸꦃ​ꦱꦶꦩꦺꦴꦤ꧀ꦭꦤ꧀ꦄꦤ꧀ꦢꦿꦺꦪꦱ꧀ꦲꦶꦗꦶꦏ꧀ꦥꦢ​ꦔꦸꦚ꧀ꦕꦭ꧀ꦭꦏꦺ​ꦗꦭꦤꦺ​꧉​ꦮꦺꦴꦁ​ꦭꦺꦴꦫꦺꦴ​ꦏꦏꦁꦔꦢꦶꦲꦶꦏꦶ​ꦏꦼꦂꦗꦤꦤ꧀ꦤꦺꦔ꧀ꦒꦺꦴꦭꦺꦏ꧀ꦲꦶꦮꦏ꧀꧈​ 17ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦥꦢ​ꦩꦺꦭꦸꦮ​ꦲꦏꦸ​!ꦏꦺꦴꦮꦺ​ꦧꦏꦭ꧀ꦠꦏ꧀​ꦧ꧀ꦭꦗꦂꦫꦶꦢꦢꦶ​ꦠꦸꦏꦁ​ꦔ꧀ꦒꦺꦴꦭꦺꦏ꧀ꦮꦺꦴꦁ​꧉​” 18ꦱꦶꦩꦺꦴꦤ꧀ꦭꦤ꧀ꦄꦤ꧀ꦢꦿꦺꦪꦱ꧀ꦠꦼꦫꦸꦱ꧀ꦥꦢ​ꦤꦶꦁꦒꦭ꧀ꦗꦭꦤꦺ​ꦭꦤ꧀ꦔꦼꦠꦸꦠ꧀ꦠꦏꦺꦒꦸꦱ꧀ꦠꦶ​ꦪꦺꦯꦸꦱ꧀꧈​

19꧋ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦭꦏꦸ​ꦫꦢ​ꦲꦢꦺꦴꦃ​ꦩꦼꦤꦺꦃ​ꦠꦼꦫꦸꦱ꧀ꦮꦼꦫꦸꦃ​ꦪꦏꦺꦴꦧꦸꦱ꧀ꦭꦤ꧀ꦪꦺꦴꦲꦤꦼꦱ꧀ ꦏꦧꦺꦃ​ꦭꦺꦴꦫꦺꦴ​ꦲꦤꦏ꧀ꦏꦺ​ꦯꦺꦧꦺꦢꦺꦪꦸꦱ꧀꧈​ꦮꦺꦴꦁ​ꦭꦺꦴꦫꦺꦴ​ꦲꦶꦏꦶ​ꦲꦶꦗꦶꦏ꧀ꦥꦢ​ꦤ꧀ꦢꦤ꧀ꦢꦤ꧀ꦤꦶ​ꦗꦭꦤꦺ​ꦤꦁꦥꦿꦲꦸꦤꦺ​꧉​ 20ꦤꦁꦔꦶꦁ​ꦏꦢꦸꦁ​ꦢꦶꦕꦼꦭꦸꦏ꧀​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦥꦢ​ꦩꦺꦭꦸ​ꦢꦺꦏ꧀ꦤꦺ꧉​ꦧꦥꦏ꧀ꦏꦺꦭꦤ꧀ꦮꦺꦴꦁꦮꦺꦴꦁ​ꦱꦶꦁ​ꦔꦿꦺꦮꦁꦔꦶ​ꦔ꧀ꦒꦺꦴꦭꦺꦏ꧀ꦲꦶꦮꦏ꧀ꦥꦢ​ꦢꦶꦠꦶꦁꦒꦭ꧀ꦤꦁꦥꦿꦲꦸꦤꦺ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦠꦺꦴꦏ꧀ꦏꦏꦺꦢꦼꦩꦶꦠ꧀꧈​

21꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦠꦼꦏ​ꦤꦁꦏꦸꦠꦑꦥꦺꦂꦤꦏꦸꦩ꧀꧈​ꦲꦶꦁ​ꦢꦶꦤ​ꦱꦧꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦊꦧꦸ​ꦤꦁꦱꦶꦤꦒꦸꦏ꧀ꦭꦤ꧀ꦩꦸꦭꦁꦔꦶꦮꦺꦴꦁꦮꦺꦴꦁ​꧉​ 22ꦮꦺꦴꦁꦮꦺꦴꦁ​ꦏꦒꦺꦠ꧀ꦭꦤ꧀​ꦔ꧀ꦒꦸꦩꦸꦤ꧀ꦧꦧ꧀ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦸꦭꦁꦔꦶ꧈​ꦲꦮꦶꦠ꧀ꦢꦺꦏ꧀ꦤꦺꦩꦸꦭꦁꦔꦶꦔꦁꦒꦺꦴ​ꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦺꦴꦫ​ꦏꦪ​ꦒꦸꦫꦸꦒꦸꦫꦸ​ꦏꦶꦠꦧ꧀꧈​

23꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦗꦶꦏ꧀ꦩꦸꦭꦁꦔꦶ꧈​ꦠꦼꦫꦸꦱ꧀ꦢꦢꦏ꧀ꦏꦤ꧀ꦮꦲꦺ​ꦲꦺꦤꦺꦁꦮꦺꦴꦁ​ꦱꦶꦁ​ꦤꦁꦏꦺꦴꦤꦺꦴ​ꦧꦼꦔꦺꦴꦏ꧀ꦧꦼꦔꦺꦴꦏ꧀꧈​ꦮꦺꦴꦁ​ꦲꦶꦏꦶ​ꦢꦶꦏ꧀ꦮꦱꦤꦶ​ꦢꦼꦩꦶꦠ꧀꧈​ 24ꦮꦺꦴꦁꦔꦺ​ꦧꦼꦔꦺꦴꦏ꧀ꦧꦼꦔꦺꦴꦏ꧀ꦔꦺꦴꦩꦺꦴꦁ:“ꦪꦺꦯꦸꦱ꧀ꦮꦺꦴꦁ​ꦟꦱꦫꦺꦠ꧀ ꦲꦏꦸ​ꦲꦉꦥ꧀ꦲꦩ꧀ꦧꦺꦴꦏ꧀ꦏꦥꦏ꧀ꦏꦏꦺ?ꦲꦥ​ꦠꦼꦏꦩꦸ​ꦲꦶꦏꦶ​ꦲꦉꦥ꧀ꦩꦠꦺꦤ꧀ꦤꦶ​ꦲꦮꦏ꧀ꦏꦺ​ꦢꦺꦮꦺ?ꦲꦏꦸ​ꦔꦼꦂꦠꦶ​ꦏꦺꦴꦮꦺ​ꦏꦸꦮꦶ​ꦱꦥ​꧉​ꦏꦺꦴꦮꦺ​ꦏꦸꦮꦶ​ꦮꦺꦴꦁ​ꦱꦸꦕꦶ​꧈​ꦮꦺꦴꦁ​ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

25꧋ꦢꦼꦩꦶꦠ꧀ꦠꦺꦩꦲꦸ​ꦠꦼꦫꦸꦱ꧀ꦢꦶꦒꦼꦤ꧀ꦠꦏ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦢꦺꦏ꧀ꦤꦺꦔꦺꦴꦩꦺꦴꦁ:“ꦩꦼꦤꦼꦁ​!ꦩꦼꦠꦸꦮ​ꦱꦁꦏꦮꦺꦴꦁ​ꦏꦸꦮꦶ​!”

26꧋ꦢꦼꦩꦶꦠ꧀ꦠꦺꦠꦼꦫꦸꦱ꧀ꦔꦺꦴꦤ꧀ꦠꦁꦔꦤ꧀ꦠꦶꦁꦔꦏꦺꦮꦺꦴꦁꦔꦺ​꧈​ꦠꦼꦫꦸꦱ꧀ꦩꦼꦠꦸ​ꦏꦫꦺꦴ​ꦚ꧀ꦗꦼꦫꦶꦠ꧀​ꦚ꧀ꦗꦼꦫꦶꦠ꧀꧈​ 27ꦮꦺꦴꦁꦮꦺꦴꦁ​ꦔ꧀ꦒꦸꦩꦸꦤ꧀ꦏꦧꦺꦃ​ꦭꦤ꧀ꦥꦢ​ꦠꦏꦺꦴꦤ꧀ꦩꦫꦁ​ꦱꦏ꧀ꦥꦢꦥꦢ:“ꦲꦥ​ꦲꦶꦏꦸ​ꦪ​?ꦲꦶꦏꦶ​ꦮꦸꦭꦁꦔꦤ꧀ꦲꦚꦂ​ꦔꦁꦒꦺꦴ​ꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦏ꧀ꦤꦺꦮꦤꦶ​ꦩꦿꦺꦤ꧀ꦠꦃ​ꦢꦼꦩꦶꦠ꧀ꦏꦺꦴꦁꦏꦺꦴꦤ꧀ꦩꦼꦠꦸ​ꦭꦤ꧀ꦢꦼꦩꦶꦠ꧀ꦠꦺꦪ​ꦩꦤꦸꦠ꧀ꦠꦼꦤꦤ꧀꧈​”

28꧋ꦱꦏ꧀ꦮꦠ꧀ꦗꦼꦤꦼꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦼꦱꦸꦮꦸꦂ​ꦤꦁꦱꦏ꧀ꦧꦮꦃꦓꦭꦶꦭꦺꦪ​ꦏꦺꦴꦤꦺꦴ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦱꦶꦁ​ꦭꦫ​꧉​

29꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦼꦠꦸ​꧉​ꦢꦺꦏ꧀ꦤꦺꦠꦼꦫꦸꦱ꧀ꦧꦉꦁ​ꦏꦫꦺꦴ​ꦪꦏꦺꦴꦧꦸꦱ꧀ꦭꦤ꧀ꦪꦺꦴꦲꦤꦼꦱ꧀ꦧꦸꦢꦭ꧀ꦤꦁꦲꦺꦴꦩꦃꦲꦺ​ꦱꦶꦩꦺꦴꦤ꧀꧈​ꦄꦤ꧀ꦢꦿꦺꦪꦱ꧀ꦲꦩ꧀ꦧꦫꦁ​ꦪ​ꦩꦁꦒꦺꦴꦤ꧀ꦤꦁꦲꦺꦴꦩꦃ​ꦏꦸꦮꦶ​꧉​ 30ꦲꦶꦧꦸ​ꦩꦫꦠꦸꦮꦤꦺ​ꦱꦶꦩꦺꦴꦤ꧀ꦲꦶꦗꦶꦏ꧀​ꦔ꧀ꦒꦺꦠꦏ꧀ꦤꦁꦲꦩ꧀ꦧꦺꦤ꧀ ꦲꦮꦶꦠ꧀ꦭꦫ​ꦥꦤꦱ꧀꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦪ​ꦠꦼꦫꦸꦱ꧀ꦢꦶꦲꦺꦴꦩꦺꦴꦁꦔꦶꦤꦺꦏ꧀ꦮꦺꦴꦁꦔꦺ​ꦭꦫ​꧉​ 31ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦶꦭꦶꦏ꧀ꦏꦶ​ꦱꦶꦁ​ꦭꦫ​꧉​ꦮꦺꦴꦁꦔꦺ​ꦢꦶꦕꦼꦏꦼꦭ꧀ꦠꦔꦤ꧀ꦤꦺ​ꦭꦤ꧀ꦢꦶꦠꦔꦺꦏ꧀ꦏꦏꦺ꧉​ꦮꦺꦴꦁꦔꦺ​ꦠꦼꦫꦸꦱ꧀ꦩꦫꦶ​ꦭꦤ꧀​ꦔ꧀ꦭꦢꦺꦤ꧀ꦤꦶ​ꦢꦪꦺꦴꦃꦲꦺ꧉​

32꧋ꦲꦶꦁ​ꦮꦪꦃ​ꦮꦼꦔꦶ​꧈​ꦱꦏ꧀ꦮꦶꦱ꧀ꦱꦺ​ꦱꦽꦔꦺꦔꦺ​ꦮꦶꦱ꧀ꦩꦼꦢꦸꦤ꧀ ꦮꦺꦴꦁ​ꦱꦶꦁ​ꦭꦫ​ꦭꦤ꧀ꦱꦶꦁ​ꦢꦶꦏ꧀ꦮꦱꦤꦶ​ꦢꦼꦩꦶꦠ꧀ꦥꦢ​ꦢꦶꦒꦮ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ 33ꦮꦺꦴꦁ​ꦱꦏ꧀ꦏꦸꦠꦠꦼꦫꦸꦱ꧀ꦥꦢ​ꦔ꧀ꦭꦸꦩ꧀ꦥꦸꦏ꧀ꦤꦁꦭꦠꦂ​ꦤꦁꦔꦉꦥ꧀ꦥꦺ​ꦲꦺꦴꦩꦃ​꧉​ 34ꦮꦺꦴꦁ​ꦭꦫ​ꦮꦼꦂꦤꦮꦼꦂꦤ​ꦢꦶꦠꦩ꧀ꦧꦤꦶ​ꦏꦧꦺꦃ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦲꦸꦒ​ꦢꦼꦩꦶꦠ꧀ꦢꦼꦩꦶꦠ꧀ꦱꦶꦁ​ꦔ꧀ꦮꦱꦤꦶ​ꦲꦸꦫꦶꦥ꧀ꦥꦺꦮꦺꦴꦁ​ꦲꦺꦴꦏꦺꦃꦥꦢ​ꦢꦶꦲꦼꦠꦺꦴꦏ꧀ꦏꦏꦺꦏꦧꦺꦃ​꧉​ꦭꦤ꧀ꦢꦼꦩꦶꦠ꧀ꦢꦼꦩꦶꦠ꧀ꦩꦲꦸ​ꦥꦢ​ꦢꦶꦥꦼꦔꦶꦁ​ꦔꦺꦴꦩꦺꦴꦁꦲꦥꦲꦥ​ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ ꦱꦼꦤꦗꦤ꧀ꦤ​ꦢꦼꦩꦶꦠ꧀ꦠꦺꦥꦢ​ꦔꦼꦂꦠꦶ​ꦢꦺꦏ꧀ꦤꦺꦏꦸꦮꦶ​ꦱꦥ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦒꦼꦭꦂ​ꦏꦧꦂ​ꦏꦧꦸꦔꦃꦲꦤ꧀ꦤꦁꦢꦺꦱꦢꦺꦱ​ꦤꦁꦧꦮꦃꦓꦭꦶꦭꦺꦪ​꧉​

35꧋ꦲꦶꦁ​ꦮꦪꦃ​ꦲꦺꦱꦸꦏ꧀ꦩꦿꦸꦥꦸꦠ꧀ ꦢꦺꦴꦁꦔꦺꦲꦶꦗꦶꦏ꧀ꦥꦼꦠꦼꦁ​ꦤ꧀ꦢꦼꦢꦼꦠ꧀ ꦒꦸꦱ꧀ꦠꦶ​ꦪꦺꦯꦸꦱ꧀ꦠꦔꦶ​ꦠꦼꦫꦸꦱ꧀ꦭꦸꦔ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦱꦼꦥꦶ​꧉​ꦤꦁꦏꦺꦴꦤꦺꦴ​ꦢꦺꦏ꧀ꦤꦺꦤ꧀ꦢꦺꦴꦁꦔ꧉​ 36ꦱꦶꦩꦺꦴꦤ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦭꦶꦪꦤꦺ​ꦠꦼꦫꦸꦱ꧀ꦥꦢ​ꦔ꧀ꦒꦺꦴꦭꦺꦏ꧀ꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 37ꦏꦢꦸꦁ​ꦮꦶꦱ꧀ꦏꦼꦠꦼꦩꦸ​꧈​ꦩꦸꦫꦶꦢ꧀ꦩꦸꦫꦶꦢ꧀ꦩꦲꦸ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ​꧈​ꦮꦺꦴꦁꦮꦺꦴꦁ​ꦥꦢ​ꦔ꧀ꦒꦺꦴꦭꦺꦏ꧀ꦏꦶ​ꦏꦺꦴꦮꦺ​!”

38꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦭꦃ​ꦱꦼꦩꦲꦸꦂ​:“ꦲ꦳ꦪꦸꦏ꧀ꦲꦮꦏ꧀ꦏꦺ​ꦢꦺꦮꦺꦧꦸꦢꦭ꧀ꦤꦁꦢꦺꦱꦢꦺꦱ​ꦭꦶꦪꦤꦺ​ꦤꦁꦱꦏ꧀ꦏꦶꦮꦠꦼꦔꦼꦤ꧀ꦤꦺ​ꦏꦺꦤꦺ​꧉​ꦏꦤ​ꦲꦩ꧀ꦧꦫꦁ​ꦏꦸꦢꦸ​ꦠꦏ꧀ꦒꦮꦤ꧀ꦤꦶꦏꦧꦂ​ꦏꦧꦸꦔꦃꦲꦤ꧀ ꦲꦮꦶꦠ꧀ꦲꦼꦁꦒꦺꦴꦤ꧀ꦏꦸ​ꦠꦼꦏ​ꦩ꧀ꦧꦿꦺꦤꦺꦲꦶꦏꦶ​ꦥꦼꦂꦭꦸꦤꦺꦪ​ꦤꦩꦸꦁ​ꦏꦸꦮꦶ​꧉​”

39꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦩ꧀ꦭꦏꦸꦩ꧀ꦭꦏꦸ​ꦩꦫꦤꦶ​ꦢꦺꦱꦢꦺꦱ​ꦤꦁꦧꦮꦃꦓꦭꦶꦭꦺꦪ​ꦏꦫꦺꦴ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦁꦱꦶꦤꦒꦸꦏ꧀ꦱꦶꦤꦒꦸꦏ꧀꧈​ꦭꦤ꧀ꦢꦼꦩꦶꦠ꧀ꦢꦼꦩꦶꦠ꧀ꦱꦶꦁ​ꦔ꧀ꦮꦱꦤꦶ​ꦮꦺꦴꦁ​ꦥꦢ​ꦢꦶꦲꦼꦠꦺꦴꦏ꧀ꦏꦏꦺꦏꦧꦺꦃ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁ​ꦭꦫ​ꦭꦺꦥꦿ​꧉​

40꧋ꦲꦺꦤꦺꦁꦮꦺꦴꦁ​ꦭꦫ​ꦭꦺꦥꦿ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦫꦸꦱ꧀ꦤꦶꦧ​ꦤꦁꦔꦉꦥ꧀ꦥꦺ​ꦚ꧀ꦗꦭꦸꦏ꧀ꦠꦸꦭꦸꦁ​ꦔꦺꦴꦩꦺꦴꦁ:“ꦤꦺꦏ꧀ꦏꦺꦴꦮꦺ​ꦒꦼꦊꦩ꧀ ꦏꦺꦴꦮꦺ​ꦧꦶꦱ​ꦤꦩ꧀ꦧꦤꦶ​ꦲꦏꦸ​!”

41꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦭꦱ꧀ꦧꦔꦼꦠ꧀ ꦩꦸꦭꦤꦺ​ꦠꦼꦫꦸꦱ꧀​ꦤ꧀ꦢꦼꦩꦺꦏ꧀ꦮꦺꦴꦁꦔꦺ​ꦭꦤ꧀ꦔꦺꦴꦩꦺꦴꦁ:“ꦲꦏꦸ​ꦒꦼꦊꦩ꧀!ꦏꦺꦴꦮꦺ​ꦮꦶꦱ꧀ꦩꦫꦶ​ꦱꦲꦶꦏꦶ​!” 42ꦱꦏ꧀ꦮꦠ꧀ꦮꦺꦴꦁꦔꦺ​ꦪ​ꦠꦼꦫꦸꦱ꧀ꦩꦫꦶ​ꦠꦼꦤꦤ꧀꧈​ 43-44ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦮꦺꦴꦁꦔꦺ​ꦭꦸꦔ​꧈​ꦤꦁꦔꦶꦁ​ꦢꦶꦥꦼꦔꦶꦁ​ꦔꦺꦴꦩꦺꦴꦁꦔꦺꦴꦩꦺꦴꦁꦏꦫꦺꦴ​ꦮꦺꦴꦁꦮꦺꦴꦁ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦁꦏꦺꦴꦤ꧀ꦮꦺꦴꦁꦔꦺ​ꦔꦺꦤꦺ​:“ꦏꦤ​ꦏꦺꦴꦮꦺ​ꦩꦫꦲꦤꦁꦔ꧀ꦒꦺꦴꦤ꧀ꦤꦺꦲꦶꦩꦩ꧀ꦩꦺ​꧈​ꦱꦸꦥꦪ​ꦢꦺꦏ꧀ꦤꦺꦮꦼꦫꦸꦃ​ꦲꦮꦏ꧀ꦩꦸ​ꦭꦤ꧀ꦏꦺꦴꦮꦺ​ꦔꦼꦏꦺꦏ꧀ꦏꦤꦏꦸꦂꦧꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦶꦠꦸꦫꦸꦠ꧀ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀꧈​ꦢꦢꦶꦤꦺ​ꦮꦺꦴꦁꦮꦺꦴꦁ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦮꦶꦱ꧀ꦩꦫꦶ​ꦠꦼꦤꦤ꧀꧈​”

45꧋ꦤꦁꦔꦶꦁ​ꦏꦢꦸꦁ​ꦮꦺꦴꦁꦔꦺ​ꦭꦸꦔ​ꦱꦁꦏꦏꦺꦴꦤꦺꦴ​꧈​ꦢꦺꦏ꧀ꦤꦺꦠꦼꦫꦸꦱ꧀ꦩꦺꦴꦭꦃꦲꦶꦔꦺꦴꦩꦺꦴꦁꦔꦺꦴꦩꦺꦴꦁꦔꦶꦮꦺꦴꦁꦮꦺꦴꦁ​ꦤꦺꦏ꧀ꦢꦺꦏ꧀ꦤꦺꦮꦶꦱ꧀ꦢꦶꦠꦩ꧀ꦧꦤꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦱꦲꦶꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦧꦶꦱ​ꦔ꧀ꦊꦧꦺꦴꦤ꧀ꦤꦶꦏꦸꦠꦲꦥ​ꦢꦺꦱ​꧈​ꦠꦤ꧀ꦥ​ꦢꦶꦠꦶꦠꦺꦤ꧀ꦤꦶ​ꦏꦫꦺꦴ​ꦮꦺꦴꦁꦮꦺꦴꦁ​꧉​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦤꦁꦱꦏ꧀​ꦚ꧀ꦗꦧꦤꦺ​ꦏꦸꦠꦮꦲꦺ​꧈​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦺꦴꦫ​ꦲꦺꦤꦺꦁꦮꦺꦴꦁꦔꦺ​꧉​ꦤꦁꦔꦶꦁ​ꦮꦺꦴꦁꦮꦺꦴꦁ​ꦱꦁꦏꦲꦼꦤ꧀ꦢꦶꦲꦼꦤ꧀ꦢꦶ​ꦲꦶꦗꦶꦏ꧀ꦩꦼꦏ꧀ꦱ​ꦠꦼꦏ​ꦩꦫꦤꦶ​ꦢꦺꦏ꧀ꦤꦺ꧉​ ↑ ↑ ↑


꧋ꦮꦺꦴꦁ​ꦭꦸꦩ꧀ꦥꦸꦃ​ꦧꦶꦱ​ꦩ꧀ꦭꦏꦸ​ꦩꦼꦤꦺꦃ​꧉​

꧇​꧒꧇​ 1꧋ꦊꦠ꧀ꦏꦶꦫꦏꦶꦫ​ꦫꦺꦴꦁ​ꦢꦶꦤ​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦭꦶꦏ꧀ꦩꦼꦤꦺꦃ​ꦤꦁꦑꦥꦺꦂꦤꦏꦸꦩ꧀꧈​ꦮꦺꦴꦁꦮꦺꦴꦁ​ꦏꦿꦸꦔꦸ​ꦤꦺꦏ꧀ꦢꦺꦏ꧀ꦤꦺꦤꦁꦲꦺꦴꦩꦃ​꧉​ 2ꦮꦺꦴꦁ​ꦥꦶꦫꦁꦥꦶꦫꦁ​ꦠꦼꦫꦸꦱ꧀ꦥꦢ​ꦔꦸꦩ꧀ꦥꦸꦭ꧀ ꦱꦩ꧀ꦥꦺꦏ꧀ꦤꦁꦲꦺꦴꦩꦃꦲꦺ​ꦲꦺꦴꦫ​ꦲꦺꦤꦺꦁꦔ꧀ꦒꦺꦴꦤ꧀ꦤꦺꦩꦼꦤꦺꦃ​꧉​ꦤꦁꦔꦉꦥ꧀ꦭꦮꦁ​ꦲꦩ꧀ꦧꦫꦁ​ꦪ​ꦏꦼꦧꦼꦏ꧀ꦏꦫꦺꦴ​ꦮꦺꦴꦁ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦸꦭꦁꦔꦶꦮꦺꦴꦁꦮꦺꦴꦁ​ꦧꦧ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 3ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦠꦼꦏ​ꦲꦉꦥ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦒꦮ​ꦮꦺꦴꦁ​ꦭꦸꦩ꧀ꦥꦸꦃ​꧉​ꦮꦺꦴꦁ​ꦭꦸꦩ꧀ꦥꦸꦃ​ꦲꦶꦏꦶ​ꦢꦶꦒꦺꦴꦠꦺꦴꦁ​ꦮꦺꦴꦁ​ꦥꦥꦠ꧀꧈​ 4ꦤꦁꦔꦶꦁ​ꦱꦁꦏꦶꦁꦲꦺꦴꦏꦺꦃꦲꦺꦮꦺꦴꦁ​꧈​ꦱꦶꦁ​ꦔ꧀ꦒꦺꦴꦠꦺꦴꦁ​ꦮꦺꦴꦁ​ꦭꦸꦩ꧀ꦥꦸꦃ​ꦩꦲꦸ​ꦲꦺꦴꦫ​ꦧꦶꦱ​ꦠꦼꦏꦤ꧀​ꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦩꦸꦭꦤꦺ​ꦠꦼꦫꦸꦱ꧀ꦥꦢ​ꦚ꧀ꦗꦼꦧꦺꦴꦭ꧀ꦥꦪꦺꦴꦤ꧀ꦤꦺ​ꦲꦺꦴꦩꦃꦲꦺ​꧉​ꦏꦢꦸꦁ​ꦮꦶꦱ꧀​ꦔ꧀ꦒꦮꦺ​ꦧꦺꦴꦭꦺꦴꦁꦔꦤ꧀ꦤꦁꦥꦪꦺꦴꦤ꧀ꦤꦺ​꧈​ꦮꦺꦴꦁꦔꦺ​ꦱꦶꦁ​ꦭꦸꦩ꧀ꦥꦸꦃ​ꦠꦼꦫꦸꦱ꧀ꦢꦶꦲꦼꦢꦸꦤ꧀ꦤꦏꦺꦱꦏ꧀​ꦏ꧀ꦭꦱꦤꦺ​꧉​ 5ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​ꦥꦼꦔꦤ꧀ꦢꦼꦭ꧀ꦭꦺ​ꦮꦺꦴꦁꦮꦺꦴꦁ​ꦲꦶꦏꦶ​꧈​ꦩꦸꦭꦤꦺ​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦱꦶꦁ​ꦭꦸꦩ꧀ꦥꦸꦃ​:“ꦲꦤꦏ꧀ꦏꦸ​꧈​ꦲꦏꦸ​ꦔꦥꦸꦫ​ꦢꦺꦴꦱꦩꦸ​!”

6꧋ꦤꦁꦲꦺꦴꦩꦃ​ꦏꦺꦴꦤꦺꦴ​ꦲꦸꦒ​ꦲꦺꦤꦺꦁꦒꦸꦫꦸꦒꦸꦫꦸ​ꦏꦶꦠꦧ꧀ꦩꦺꦭꦸ​ꦔꦿꦸꦔꦺꦴꦏ꧀ꦏꦏꦺ꧉​ 7ꦒꦸꦫꦸꦒꦸꦫꦸ​ꦲꦶꦏꦶ​ꦥꦢ​ꦲꦩ꧀ꦧꦠꦶꦤ꧀:“ꦭꦃ​ꦮꦺꦴꦁ​ꦏꦸꦮꦶ​ꦏꦺꦴꦏ꧀ꦮꦤꦶꦮꦤꦶ​ꦔꦺꦴꦩꦺꦴꦁꦔꦺꦴꦤꦺꦴ​?ꦏꦸꦮꦶ​ꦭꦲꦸꦠ꧀ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦤꦩꦸꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦧꦶꦱ​ꦔꦥꦸꦫ​ꦢꦺꦴꦱꦤꦺ​ꦩꦤꦸꦁꦱ​!”

8꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​ꦥꦶꦏꦶꦂꦫꦤ꧀ꦤꦺ​ꦒꦸꦫꦸꦒꦸꦫꦸ​ꦩꦲꦸ​꧈​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦥꦢ​ꦤ꧀ꦢꦸꦮꦺꦥꦶꦏꦶꦂꦫꦤ꧀ꦏꦪ​ꦔꦺꦴꦤꦺꦴ​? 9ꦒꦩ꧀ꦥꦁ​ꦱꦶꦁ​ꦲꦼꦤ꧀ꦢꦶ​꧈​ꦔꦺꦴꦩꦺꦴꦁꦩꦫꦁ​ꦮꦺꦴꦁ​ꦭꦸꦩ꧀ꦥꦸꦃ​ꦲꦶꦏꦶ​:'ꦢꦺꦴꦱꦩꦸ​ꦮꦶꦱ꧀ꦢꦶꦔꦥꦸꦫ'​ꦲꦥ​ꦔꦺꦴꦩꦺꦴꦁ:'ꦔꦢꦼꦏ꧀ꦏ꧈​ꦏ꧀ꦭꦱꦩꦸ​ꦢꦶꦲꦁꦏꦠ꧀ꦭꦤ꧀​ꦩ꧀ꦭꦏꦸꦮ​!’ 10ꦲꦏꦸ​ꦤꦩꦸꦁ​ꦏꦼꦥꦺꦔꦶꦤ꧀​ꦤ꧀ꦢꦸꦢꦸꦃꦲꦏꦺꦩꦫꦁ​ꦏꦺꦴꦮꦺ​꧈​ꦤꦺꦏ꧀ꦲꦤꦏ꧀ꦏꦺ​ꦩꦤꦸꦁꦱ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦔꦥꦸꦫ​ꦢꦺꦴꦱ​ꦤꦁꦗꦒꦠ꧀ꦏꦺꦤꦺ​!”ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁ​ꦭꦸꦩ꧀ꦥꦸꦃ​ꦩꦲꦸ​: 11“ꦲꦏꦸ​ꦔꦺꦴꦁꦏꦺꦴꦤ꧀ꦏꦺꦴꦮꦺ​꧈​ꦔꦢꦼꦏ꧀ꦏ꧈​ꦏ꧀ꦭꦱꦩꦸ​ꦢꦶꦲꦁꦏꦠ꧀ꦭꦤ꧀ꦏꦤ​ꦩꦸꦭꦶꦃ​!”

12꧋ꦮꦺꦴꦁꦔꦺ​ꦠꦼꦫꦸꦱ꧀ꦔꦢꦼꦏ꧀ꦤꦁꦔꦉꦥ꧀ꦥꦺ​ꦮꦺꦴꦁ​ꦲꦺꦴꦏꦺꦃꦏꦺꦴꦤꦺꦴ​꧈​ꦚ꧀ꦗꦶꦏꦸꦏ꧀​ꦏ꧀ꦭꦱꦤꦺ​ꦠꦼꦫꦸꦱ꧀ꦭꦸꦔ​꧉​ꦮꦺꦴꦁ​ꦏꦧꦺꦃ​ꦥꦢ​ꦔ꧀ꦒꦸꦩꦸꦤ꧀ꦭꦤ꧀ꦥꦢ​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦔꦺꦴꦩꦺꦴꦁ:“ꦧꦫꦁ​ꦏꦪ​ꦔꦺꦤꦺ​ꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦢꦸꦫꦸꦁ​ꦠꦲꦸ​ꦮꦼꦫꦸꦃ​!”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦂꦢꦪꦺꦴꦃꦤꦁꦲꦺꦴꦩꦃꦲꦺ​ꦮꦺꦴꦁ​ꦧꦼꦭꦱ꧀ꦠꦶꦁ꧉​

13꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ꦩꦼꦤꦺꦃ​ꦱꦁꦏꦑꦥꦺꦂꦤꦏꦸꦩ꧀꧈​ꦱꦲꦶꦏꦶ​ꦢꦺꦏ꧀ꦤꦺꦩ꧀ꦭꦏꦸ​ꦤꦁꦥꦶꦁꦒꦶꦂ​ꦩꦺꦂ꧉​ꦮꦺꦴꦁ​ꦲꦺꦴꦏꦺꦃꦠꦼꦫꦸꦱ꧀ꦥꦢ​ꦠꦼꦏ​ꦩꦫꦤꦶ​ꦢꦺꦏ꧀ꦤꦺ꧉​ꦏꦧꦺꦃ​ꦠꦼꦫꦸꦱ꧀ꦥꦢ​ꦢꦶꦮꦸꦭꦁꦔꦶ꧉​ 14ꦢꦺꦴꦁꦔꦺꦭꦶꦮꦠ꧀ ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​ꦮꦺꦴꦁ​ꦧꦼꦭꦱ꧀ꦠꦶꦁ꧈​ꦱꦶꦁ​ꦗꦼꦤꦼꦁꦔꦺ​ꦭꦺꦮ꦳ꦶ꧈​ꦲꦶꦗꦶꦏ꧀​ꦚ꧀ꦗꦒꦺꦴꦁꦤꦁꦏꦤ꧀ꦠꦺꦴꦂꦫꦺ​꧉​ꦭꦺꦮ꦳ꦶꦏꦸꦮꦶ​ꦲꦤꦏ꧀ꦏꦺ​ꦄꦭ꧀ꦥ꦳ꦺꦪꦸꦱ꧀꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦭꦺꦮ꦳ꦶꦔꦺꦴꦩꦺꦴꦁ:“ꦲ꦳ꦪꦸꦏ꧀ꦩꦺꦭꦸ​ꦲꦏꦸ​!”ꦭꦺꦮ꦳ꦶꦠꦼꦫꦸꦱ꧀ꦔꦢꦼꦏ꧀ꦭꦤ꧀ꦩꦺꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

15꧋ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦗꦒꦺꦴꦁꦔꦤ꧀ꦤꦁꦲꦺꦴꦩꦃꦲꦺ​ꦭꦺꦮ꦳ꦶ꧈​ꦠꦸꦁꦒꦭ꧀ꦱꦏ꧀ꦩꦺꦗ​ꦏꦫꦺꦴ​ꦮꦺꦴꦁꦮꦺꦴꦁ​ꦧꦼꦭꦱ꧀ꦠꦶꦁꦭꦤ꧀ꦮꦺꦴꦁꦮꦺꦴꦁ​ꦭꦶꦪꦤꦺ​ꦱꦶꦁ​ꦢꦶꦲꦁꦒꦼꦥ꧀ꦢꦺꦴꦱ​꧉​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦺꦴꦏꦺꦃꦱꦶꦁ​ꦥꦢ​ꦩꦺꦭꦸ​ꦒꦸꦱ꧀ꦠꦶ​ ꦪꦺꦯꦸꦱ꧀꧈​ 16ꦲꦺꦤꦺꦁꦒꦸꦫꦸꦒꦸꦫꦸ​ꦏꦶꦠꦧ꧀ꦱꦁꦏꦒꦺꦴꦭꦺꦴꦁꦔꦤ꧀ꦤꦺ​ꦮꦺꦴꦁ​ꦥ꦳ꦫꦶꦱꦶ​ꦥꦢ​ꦮꦼꦫꦸꦃ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦩꦁꦔꦤ꧀ꦕꦩ꧀ꦥꦸꦂ​ꦏꦫꦺꦴ​ꦮꦺꦴꦁ​ꦧꦼꦭꦱ꧀ꦠꦶꦁꦭꦤ꧀ꦮꦺꦴꦁ​ꦢꦺꦴꦱ​꧉​ꦩꦸꦭꦤꦺ​ꦒꦸꦫꦸꦒꦸꦫꦸ​ꦏꦶꦠꦧ꧀ꦩꦲꦸ​ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦭꦃ​ꦪꦺꦯꦸꦱ꧀ꦏꦺꦴꦏ꧀ꦗꦒꦺꦴꦁꦔꦤ꧀ꦭꦤ꧀ꦩꦁꦔꦤ꧀ꦕꦩ꧀ꦥꦸꦂ​ꦏꦫꦺꦴ​ꦮꦺꦴꦁ​ꦏꦪ​ꦔꦺꦴꦤꦺꦴ​?”

17꧋ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦸꦔꦸ​ꦥꦶꦠꦏꦺꦴꦤ꧀ꦤꦤ꧀ꦤꦺ​ꦒꦸꦫꦸꦒꦸꦫꦸ​ꦏꦶꦠꦧ꧀ꦩꦲꦸ​꧈​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦱꦼꦩꦲꦸꦂ​:“ꦱꦶꦁ​ꦩ꧀ꦧꦸꦠꦸꦃꦲꦏꦺꦢꦺꦴꦏ꧀ꦠꦼꦂ​ꦏꦸꦮꦶ​ꦩꦼꦱ꧀ꦠꦶꦪ​ꦱꦶꦁ​ꦭꦫ​ꦠ​꧈​ꦩꦺꦴꦱꦺꦴꦏ꧀ꦱꦶꦁ​ꦮꦫꦱ꧀?ꦩꦸꦭꦤꦺ​꧈​ꦠꦼꦏꦏꦸ​ꦤꦁꦗꦒꦠ꧀ꦏꦺꦤꦺ​ꦲꦺꦴꦫ​ꦔ꧀ꦒꦺꦴꦭꦺꦏ꧀ꦏꦶ​ꦮꦺꦴꦁ​ꦱꦶꦁ​ꦔꦁꦒꦼꦥ꧀ꦤꦺꦏ꧀ꦲꦸꦫꦶꦥ꧀ꦥꦺꦮꦶꦱ꧀ꦧꦼꦤꦼꦂ​꧈​ꦤꦁꦔꦶꦁ​ꦔ꧀ꦒꦺꦴꦭꦺꦏ꧀ꦏꦶ​ꦮꦺꦴꦁ​ꦱꦶꦁ​ꦢꦺꦴꦱ​꧉​”

꧋ꦥꦶꦠꦏꦺꦴꦤ꧀ꦤꦤ꧀ꦧꦧ꧀ꦥꦱ​꧉​

18꧋ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦭꦤ꧀ꦥꦫ​ꦥ꦳ꦫꦶꦱꦶ​ꦥꦢ​ꦥꦱ​꧉​ꦲꦶꦁ​ꦢꦶꦤ​ꦏꦸꦮꦶ​ꦲꦺꦤꦺꦁꦮꦺꦴꦁ​ꦥꦢ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦏꦺꦴꦤ꧀:“ꦏꦼꦤꦺꦁꦲꦥ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦪꦺꦴꦲꦤꦼꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦫ​ꦥ꦳ꦫꦶꦱꦶ​ꦥꦢ​ꦥꦱ​꧈​ꦤꦁꦔꦶꦁ​ꦩꦸꦫꦶꦢ꧀ꦩꦸꦫꦶꦢ꧀ꦩꦸꦏꦺꦴꦏ꧀ꦲꦺꦴꦫ​?”

19꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ​:“ꦲꦥ​ꦢꦪꦺꦴꦃꦤꦁꦩꦤ꧀ꦠꦺꦤ꧀ꦤꦤ꧀ꦏꦲꦺ​ꦲꦺꦴꦫ​ꦥꦢ​ꦩꦁꦔꦤ꧀ꦲꦺꦤꦏ꧀ꦭꦤ꧀ꦥꦢ​ꦩꦺꦭꦸ​ꦧꦸꦔꦃ​꧉​ꦱꦸꦮꦺꦤꦺ​ꦲꦶꦗꦶꦏ꧀ꦕꦩ꧀ꦥꦸꦂ​ꦏꦫꦺꦴ​ꦩꦤ꧀ꦠꦺꦤ꧀ꦤꦺ​ꦩꦼꦱ꧀ꦠꦶꦪ​ꦲꦺꦴꦫ​ꦲꦺꦤꦺꦁꦱꦶꦁ​ꦱꦼꦢꦶ꧉​ 20ꦤꦁꦔꦶꦁ​ꦧꦏꦭ꧀ꦲꦺꦤꦺꦁꦮꦪꦃꦲꦺ​ꦩꦤ꧀ꦠꦺꦤ꧀ꦤꦺ​ꦭꦤꦁ​ꦏꦸꦮꦶ​ꦧꦏꦭ꧀ꦢꦶꦒꦮ​ꦭꦸꦔ​꧉​ꦲꦶꦁ​ꦮꦪꦃ​ꦏꦸꦮꦶ​ꦏꦚ꧀ꦕꦏꦚ꧀ꦕꦤꦺ​ꦧꦏꦭ꧀ꦥꦢ​ꦱꦼꦢꦶꦭꦤ꧀ꦲꦺꦴꦫ​ꦩꦁꦔꦤ꧀꧈​”

21꧋ꦩꦺꦴꦱꦺꦴꦏ꧀ꦱꦭꦶꦤ꧀ꦭꦮꦱ꧀ꦏꦼꦤꦺꦁꦢꦶꦠꦩ꧀ꦧꦭ꧀ꦏꦫꦺꦴ​ꦒꦺꦴꦩ꧀ꦧꦭ꧀ꦲꦚꦂ​ꦱꦶꦁ​ꦢꦸꦫꦸꦁ​ꦠꦲꦸ​ꦢꦶꦲꦸꦩ꧀ꦧꦃ?ꦪ​ꦲꦺꦴꦫ​ꦠ​꧉​ꦲꦮꦶꦠ꧀ꦤꦺꦏ꧀ꦢꦶꦲꦸꦩ꧀ꦧꦃꦠꦩ꧀ꦧꦭꦤ꧀ꦤꦺꦧꦶꦱ​ꦩꦼꦁꦏꦼꦉꦠ꧀ꦠꦼꦫꦸꦱ꧀ꦱꦸꦮꦺꦏ꧀ꦩꦼꦤꦺꦃ​꧈​ꦲꦩ꧀ꦧꦤꦺ​ꦔꦸꦁꦏꦸꦭ꧀ꦭꦶ​ꦩꦲꦸꦤꦺ​꧉​ 22ꦭꦤ꧀ꦩꦼꦤꦺꦃ​꧈​ꦩꦺꦴꦱꦺꦴꦏ꧀ꦲꦁꦒꦸꦂ​ꦲꦚꦂ​ꦢꦶꦮꦢꦃꦲꦶꦏꦤ꧀ꦠꦺꦴꦁꦔꦤ꧀ꦭꦸꦭꦁ​ꦭꦮꦱ꧀?ꦩꦼꦱ꧀ꦠꦶꦲꦺꦴꦫ​ꦠ​!ꦩꦼꦁꦏꦺꦴ​ꦤ꧀ꦢꦏ꧀ꦏꦤ꧀ꦠꦺꦴꦔꦤ꧀ꦤꦺꦧꦼꦢꦃꦭꦤ꧀ꦲꦁꦒꦸꦂꦫꦺ​ꦮꦸꦠꦃ​ꦔꦁꦒꦸꦂ​꧉​ꦲꦁꦒꦸꦂ​ꦲꦚꦂ​ꦏꦸꦢꦸꦤꦺ​ꦢꦶꦮꦢꦃꦲꦶꦏꦤ꧀ꦠꦺꦴꦁꦔꦤ꧀ꦲꦚꦂ​꧉​

꧋ꦠꦸꦗꦸꦮꦤ꧀ꦤꦺꦢꦶꦤ​ꦱꦧꦠ꧀ꦏꦁꦒꦺꦴ​ꦩꦤꦸꦁꦱ​꧉​

23꧋ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦱꦧꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦭꦏꦸ​ꦠꦸꦫꦸꦠ꧀ꦏꦼꦧꦺꦴꦤ꧀ꦒꦤ꧀ꦢꦸꦩ꧀ꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ꦱꦏ꧀ꦧꦉꦁꦔꦺꦩ꧀ꦭꦏꦸ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦔꦼꦥꦺꦏ꧀ꦏꦶꦮꦺꦴꦃꦲꦺ​ꦒꦤ꧀ꦢꦸꦩ꧀ꦢꦶꦥꦔꦤ꧀꧈​ 24ꦮꦺꦴꦁ​ꦥ꦳ꦫꦶꦱꦶ​ꦱꦶꦁ​ꦥꦢ​ꦮꦼꦫꦸꦃ​ꦏꦸꦮꦶ​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦭꦃ​ꦏꦼꦥꦿꦶꦪꦺ​ꦏꦸꦮꦶ​?ꦲꦶꦁ​ꦢꦶꦤ​ꦱꦧꦠ꧀ꦭꦲꦸꦠ꧀ꦲꦺꦴꦫ​ꦲꦺꦤ꧀ꦠꦸꦏ꧀ꦚꦩ꧀ꦧꦸꦠ꧀ꦠꦲꦥꦲꦥ​ꦠ​?ꦭꦃ​ꦩꦸꦫꦶꦢ꧀ꦩꦸꦫꦶꦢ꧀ꦩꦸꦏꦺꦴꦏ꧀ꦔꦼꦥꦺꦏ꧀ꦏꦶꦒꦤ꧀ꦢꦸꦩ꧀?”

25꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦲꦥ​ꦏꦺꦴꦮꦺ​ꦲꦺꦴꦫ​ꦠꦲꦸ​ꦩꦕ​ꦧꦧ꧀ꦫꦠꦸ​ꦣꦮ꦳ꦼꦢ꧀ ꦢꦺꦴꦁꦔꦺꦢꦺꦏ꧀ꦤꦺꦭꦤ꧀ꦏꦚ꧀ꦕꦏꦚ꧀ꦕꦤꦺ​ꦥꦢ​ꦔꦼꦭꦶꦃ​ꦧꦔꦼꦠ꧀ ꦤꦁꦔꦶꦁ​ꦲꦺꦴꦫ​ꦤ꧀ꦢꦸꦮꦺꦥꦔꦤ꧀ꦤꦤ꧀ꦲꦥꦲꦥ​? 26ꦲꦥ​ꦢꦺꦏ꧀ꦤꦺꦲꦺꦴꦫ​ꦠꦼꦫꦸꦱ꧀​ꦩ꧀ꦊꦧꦸ​ꦤꦁꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦁꦔꦤ꧀ꦫꦺꦴꦠꦶꦤꦺ​꧉​ꦢꦺꦏ꧀ꦤꦺꦭꦲꦸꦠ꧀ꦮꦶꦱ꧀ꦔꦼꦂꦠꦶ​ꦠ​ꦤꦺꦏ꧀ꦤꦩꦸꦁ​ꦥꦫ​ꦲꦶꦩꦩ꧀ꦱꦶꦁ​ꦲꦺꦤ꧀ꦠꦸꦏ꧀ꦩꦁꦔꦤ꧀ꦫꦺꦴꦠꦶ​ꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​꧉​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦱꦶꦁ​ꦢꦢꦶ​ꦲꦶꦩꦩ꧀ꦒꦼꦢꦺ​ꦄꦧꦶꦪꦠꦂ​꧉​ꦩꦭꦃ​ꦏꦚ꧀ꦕꦤꦺ​ꦲꦩ꧀ꦧꦫꦁ​ꦢꦶꦲꦼꦢꦸꦩ꧀ꦩꦶꦭꦤ꧀ꦥꦢ​ꦩꦺꦭꦸ​ꦩꦁꦔꦤ꧀ꦏꦫꦺꦴ​ꦣꦮ꦳ꦼꦢ꧀꧈​ꦭꦤ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦔꦺꦴꦩꦺꦴꦁꦤꦺꦏ꧀ꦢꦺꦏ꧀ꦤꦺꦏ꧀ꦭꦺꦫꦸ​꧉​”

27꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:“ꦒꦸꦱ꧀ꦠꦶ​ꦄꦭ꧀ꦭꦃ​ꦲꦼꦁꦒꦺꦴꦤꦺ​ꦔꦤꦏ꧀ꦏꦏꦺꦢꦶꦤ​ꦱꦧꦠ꧀ꦏꦸꦮꦶ​ꦲꦺꦴꦫ​ꦏꦁꦒꦺꦴ​ꦔꦔꦺꦭ꧀ꦭꦏꦺ꧈​ꦤꦁꦔꦶꦁ​ꦏꦁꦒꦺꦴ​ꦔꦼꦥꦺꦤꦏ꧀ꦏꦏꦺꦲꦸꦫꦶꦥ꧀ꦥꦺꦩꦤꦸꦁꦱ​꧉​ 28ꦩꦸꦭꦤꦺ​꧈​ꦲꦤꦏ꧀ꦏꦺ​ꦩꦤꦸꦁꦱ​ꦱꦶꦁ​ꦧꦶꦱ​ꦔꦫꦤ꧀ꦤꦶ​ꦧꦧ꧀ꦱꦶꦁ​ꦲꦺꦤ꧀ꦠꦸꦏ꧀ꦭꦤ꧀ꦱꦶꦁ​ꦲꦺꦴꦫ​ꦲꦺꦤ꧀ꦠꦸꦏ꧀ꦢꦶꦠꦤ꧀ꦢꦁꦔꦶ​ꦲꦶꦁ​ꦢꦶꦤ​ꦱꦧꦠ꧀꧈​” ↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁ​ꦲꦶꦁ​ꦢꦶꦤ​ꦱꦧꦠ꧀꧈​

꧇​꧓꧇​ 1꧋ꦲꦶꦁ​ꦢꦶꦤ​ꦱꦧꦠ꧀ꦭꦶꦪꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦊꦧꦸ​ꦤꦁꦱꦶꦤꦒꦸꦏ꧀ꦩꦼꦤꦺꦃ​꧉​ꦤꦁꦏꦺꦴꦤꦺꦴ​ꦲꦺꦤꦺꦁꦮꦺꦴꦁ​ꦱꦶꦁ​ꦠꦔꦤ꧀ꦤꦺ​ꦭꦸꦩ꧀ꦥꦸꦃ​ꦱꦼꦧꦼꦭꦃ꧉​ 2ꦤꦁꦏꦺꦴꦤꦺꦴ​ꦲꦸꦒ​ꦲꦺꦤꦺꦁꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦔ꧀ꦒꦺꦴꦭꦺꦏ꧀ꦗꦭꦂꦫꦤ꧀ꦏꦁꦒꦺꦴ​ꦔꦼꦭꦃꦲꦏꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁꦮꦺꦴꦁ​ꦲꦶꦏꦶ​ꦥꦢ​ꦤ꧀ꦢꦼꦭꦺꦴꦏ꧀ꦏꦏꦺ꧈​ꦲꦮꦶꦠ꧀ꦏꦼꦥꦺꦔꦶꦤ꧀ꦔꦼꦂꦠꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦩ꧀ꦧꦤꦶ​ꦮꦺꦴꦁꦔꦺ​ꦲꦥ​ꦲꦺꦴꦫ​ꦲꦶꦁ​ꦢꦶꦤ​ꦱꦧꦠ꧀ꦲꦶꦏꦶ​꧉​ 3ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦮꦺꦴꦁ​ꦱꦶꦁ​ꦭꦸꦩ꧀ꦥꦸꦃ​ꦠꦔꦤ꧀ꦤꦺ​ꦏꦺꦴꦁꦏꦺꦴꦤ꧀ꦩꦗꦸ​꧈​ꦱꦸꦥꦪ​ꦮꦺꦴꦁꦮꦺꦴꦁ​ꦧꦶꦱ​ꦮꦼꦫꦸꦃ​ꦢꦺꦏ꧀ꦤꦺ꧉​ 4ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦮꦺꦴꦁꦮꦺꦴꦁ​:“ꦲꦏꦸ​ꦏꦼꦥꦺꦔꦶꦤ꧀ꦏꦿꦸꦔꦸ​:ꦲꦶꦁ​ꦢꦶꦤ​ꦱꦧꦠ꧀ꦲꦥꦶꦏ꧀​ꦔ꧀ꦒꦮꦺ​ꦧꦼꦕꦶꦏ꧀ꦲꦥ​ꦲꦥꦶꦏ꧀​ꦔ꧀ꦒꦮꦺ​ꦲꦭ​?ꦲꦥꦶꦏ꧀ꦤꦸꦭꦸꦁꦔꦶ​ꦮꦺꦴꦁ​ꦲꦥ​ꦲꦥꦶꦏ꧀ꦩꦠꦺꦤ꧀ꦤꦶ​?”

꧋ꦮꦺꦴꦁꦮꦺꦴꦁ​ꦲꦩ꧀ꦊꦁꦏꦧꦺꦃ​꧈​ꦲꦺꦴꦫ​ꦲꦺꦤꦺꦁꦱꦶꦁ​ꦮꦤꦶ​ꦱꦼꦩꦲꦸꦂ​ꦲꦥꦲꦥ​꧉​ 5ꦒꦸꦱ꧀ꦠꦶ​ꦪꦺꦯꦸꦱ꧀ꦚꦮꦁ​ꦮꦺꦴꦁꦮꦺꦴꦁ​ꦏꦫꦺꦴ​ꦪ​ꦗꦺꦁꦏꦺꦭ꧀ꦪ​ ꦱꦼꦢꦶ꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦲꦺꦴꦫ​ꦒꦼꦊꦩ꧀ꦤꦶꦠꦺꦤ꧀ꦤꦶ​ꦧꦫꦁ​ꦱꦶꦁ​ꦧꦼꦤꦼꦂ​꧉​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁ​ꦱꦶꦁ​ꦭꦸꦩ꧀ꦥꦸꦃ​ꦠꦔꦤ꧀ꦤꦺ​:“ꦠꦔꦤ꧀ꦩꦸ​ꦢꦶꦲꦼꦠꦸꦁꦔꦏꦺ!”ꦮꦺꦴꦁꦔꦺ​ꦠꦼꦫꦸꦱ꧀ꦔꦼꦠꦸꦁꦔꦏꦺꦠꦔꦤ꧀ꦤꦺ​꧈​ꦲꦮꦶꦠ꧀ꦮꦶꦱ꧀ꦲꦺꦴꦫ​ꦭꦸꦩ꧀ꦥꦸꦃ​ꦩꦼꦤꦺꦃ​꧉​ꦱꦲꦶꦏꦶ​ꦮꦶꦱ꧀ꦩꦫꦶ​ꦏꦪ​ꦩꦲꦸꦤꦺ​꧉​ 6ꦮꦺꦴꦁ​ꦥ꦳ꦫꦶꦱꦶ​ꦱꦶꦁ​ꦤꦁꦏꦺꦴꦤꦺꦴ​ꦠꦼꦫꦸꦱ꧀ꦥꦢ​ꦭꦸꦔ​꧉​ꦠꦼꦫꦸꦱ꧀ꦥꦢ​ꦉꦩ꧀ꦧꦸꦏ꧀ꦏꦤ꧀ꦏꦫꦺꦴ​ꦮꦺꦴꦁꦮꦺꦴꦁ​ꦒꦺꦴꦭꦺꦴꦁꦔꦤ꧀ꦤꦺ​ꦲ꦳ꦺꦫꦺꦴꦢꦺꦱ꧀꧈​ꦧꦼꦧꦉꦁꦔꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦔ꧀ꦒꦮꦺ​ꦲꦏꦭ꧀ꦏꦼꦥꦿꦶꦪꦺ​ꦲꦼꦁꦒꦺꦴꦤꦺ​ꦲꦉꦥ꧀ꦩꦠꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦸꦭꦁꦔꦶꦱꦁꦏꦥꦿꦲꦸ​꧉​

7-8꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦭꦸꦔ​ꦤꦁꦥꦶꦁꦒꦶꦂ​ꦩꦺꦂꦓꦭꦶꦭꦺꦪ​꧉​ꦮꦺꦴꦁ​ꦲꦺꦴꦏꦺꦃꦧꦔꦼꦠ꧀ꦥꦢ​ꦔꦼꦠꦸꦠ꧀ꦠꦏꦺꦢꦺꦏ꧀ꦤꦺ꧉​ꦲꦺꦤꦺꦁꦱꦶꦁ​ꦱꦁꦏꦧꦮꦃꦓꦭꦶꦭꦺꦪ​ꦭꦤ꧀ꦪꦸꦢꦺꦪ​ꦭꦤ꧀ꦱꦁꦏꦏꦸꦠꦪꦺꦫꦸꦱꦭꦺꦩ꧀꧈​ꦲꦸꦒ​ꦲꦺꦤꦺꦁꦱꦶꦁ​ꦱꦁꦏꦧꦮꦃꦆꦢꦸꦩꦺꦪ꧈​ꦱꦁꦏꦲꦧꦿꦲꦤ꧀ꦤꦺꦭꦫꦪꦺꦴꦂꦢꦤ꧀ꦭꦤ꧀ꦱꦁꦏꦱꦏ꧀ꦏꦶꦮꦠꦼꦔꦼꦤ꧀ꦤꦺ​ꦏꦸꦠꦠꦶꦫꦸꦱ꧀ꦭꦤ꧀ꦱꦶꦢꦺꦴꦤ꧀꧈​ꦮꦺꦴꦁꦮꦺꦴꦁ​ꦲꦶꦏꦶ​ꦥꦢ​ꦒꦼꦩꦿꦸꦢꦸꦏ꧀ꦩꦫꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦮꦶꦠ꧀ꦏꦧꦺꦃ​ꦏꦿꦸꦔꦸ​ꦤꦺꦏ꧀ꦢꦺꦏ꧀ꦤꦺꦤꦶꦤ꧀ꦢꦏ꧀ꦏꦏꦺꦧꦫꦁ​ꦱꦶꦁ​ꦔ꧀ꦒꦸꦩꦸꦤ꧀​ꦔ꧀ꦒꦸꦩꦸꦤ꧀ꦤꦏꦺ꧉​ 9ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦺꦴꦁꦏꦺꦴꦤ꧀ꦥꦢ​ꦚꦮꦶꦱ꧀ꦱꦏꦺꦥꦿꦲꦸ​ꦱꦶꦗꦶ​꧉​ꦢꦢꦶꦤꦺ​ꦱꦼꦤꦗꦤ꧀ꦮꦺꦴꦁ​ꦲꦺꦴꦏꦺꦃꦥꦢ​ꦲꦼꦱꦸꦏ꧀ꦲꦼꦱꦸꦏ꧀ꦏꦤ꧀ꦏꦼꦥꦺꦔꦶꦤ꧀ꦩꦗꦸ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦲꦸꦱꦃꦢꦶꦲꦼꦱꦸꦏ꧀ꦲꦼꦱꦸꦏ꧀ꦮꦺꦴꦁ​꧈​ꦲꦮꦶꦠ꧀ꦢꦺꦏ꧀ꦤꦺꦧꦶꦱ​ꦚ꧀ꦗꦒꦺꦴꦁꦤꦁꦥꦿꦲꦸꦤꦺ​꧉​ 10ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦤꦩ꧀ꦧꦤꦶ​ꦮꦺꦴꦁ​ꦥꦶꦫꦁꦥꦶꦫꦁ​꧈​ꦩꦸꦭꦤꦺ​ꦮꦺꦴꦁꦮꦺꦴꦁ​ꦱꦶꦁ​ꦤ꧀ꦢꦸꦮꦺꦭꦫ​ꦥꦢ​ꦔꦼꦱꦸꦏ꧀ꦲꦼꦱꦸꦏ꧀ ꦏꦼꦥꦺꦔꦶꦤ꧀​ꦤ꧀ꦢꦼꦩꦺꦏ꧀ꦢꦺꦏ꧀ꦤꦺꦱꦸꦥꦪ​ꦧꦶꦱ​ꦩꦫꦶ​꧉​ 11ꦮꦺꦴꦁꦮꦺꦴꦁ​ꦱꦶꦁ​ꦢꦶꦏ꧀ꦮꦱꦤꦶ​ꦢꦼꦩꦶꦠ꧀ꦤꦺꦏ꧀ꦮꦼꦫꦸꦃ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦥꦢ​ꦤꦶꦧ​ꦤꦁꦔꦉꦥ꧀ꦥꦺ​꧉​ꦢꦼꦩꦶꦠ꧀ꦠꦺꦠꦼꦫꦸꦱ꧀ꦥꦢ​ꦧꦼꦔꦺꦴꦏ꧀ꦧꦼꦔꦺꦴꦏ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦏꦸꦮꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​!”

12꧋ꦤꦁꦔꦶꦁ​ꦢꦼꦩꦶꦠ꧀ꦢꦼꦩꦶꦠ꧀ꦩꦲꦸ​ꦢꦶꦱꦼꦤꦺꦤ꧀ꦤꦶꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦢꦶꦥꦼꦔꦶꦁ​ꦔꦺꦴꦩꦺꦴꦁꦔꦺꦴꦩꦺꦴꦁꦔꦏꦺꦢꦺꦏ꧀ꦤꦺꦏꦸꦮꦶ​ꦱꦥ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦶꦭꦶꦃ​ꦫꦱꦸꦭ꧀ꦫꦺꦴꦭꦱ꧀꧈​

13꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦲꦶꦏꦶ​ꦠꦼꦫꦸꦱ꧀ꦩꦸꦁꦒꦃ​ꦤꦁꦒꦸꦤꦸꦁ​꧉​ꦢꦺꦏ꧀ꦤꦺꦩꦶꦭꦶꦃ​ꦮꦺꦴꦁꦮꦺꦴꦁ​ꦱꦶꦁ​ꦏꦺꦴꦁꦏꦺꦴꦤ꧀ꦩꦺꦭꦸ​꧉​ꦮꦺꦴꦁꦮꦺꦴꦁ​ꦪ​ꦠꦼꦫꦸꦱ꧀ꦥꦢ​ꦠꦼꦏ​꧉​ 14-15ꦱꦁꦏꦠꦼꦔꦃꦲꦺ​ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦠꦼꦏ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦶꦭꦶꦃ​ꦮꦺꦴꦁ​ꦫꦺꦴꦭꦱ꧀ꦱꦶꦁ​ꦏꦸꦢꦸ​ꦩꦺꦭꦸ​ꦢꦺꦏ꧀ꦤꦺꦤꦁꦲꦼꦤ꧀ꦢꦶ​ꦮꦲꦺ​꧉​ꦲꦮꦶꦠ꧀ꦮꦺꦴꦁ​ꦫꦺꦴꦭꦱ꧀ꦲꦶꦏꦶ​ꦱꦶꦁ​ꦧꦏꦭ꧀​ꦔ꧀ꦒꦼꦭꦂ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦧꦏꦭ꧀​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦤꦸꦤ꧀ꦢꦸꦁꦔꦶꦢꦼꦩꦶꦠ꧀꧈​

16-17꧋ꦱꦶꦁ​ꦢꦶꦥꦶꦭꦶꦃ​ꦪ​ꦮꦺꦴꦁ​ꦫꦺꦴꦭꦱ꧀ꦲꦶꦏꦶ​:ꦱꦶꦩꦺꦴꦤ꧀ꦱꦶꦁ​ꦢꦶꦏꦺꦏ꧀ꦏꦶꦗꦼꦤꦼꦁ​ꦭꦶꦪꦤꦺ​꧈​ꦪꦏꦸꦮꦶ​ꦦꦺꦠꦿꦸꦱ꧀ ꦪꦏꦺꦴꦧꦸꦱ꧀ꦏꦫꦺꦴ​ꦪꦺꦴꦲꦤꦼꦱ꧀ꦱꦶꦁ​ꦏꦏꦁꦔꦢꦶ꧉​ꦏꦧꦺꦃ​ꦭꦺꦴꦫꦺꦴ​ꦲꦶꦏꦶ​ꦲꦤꦏ꧀ꦏꦺ​ꦯꦺꦧꦺꦢꦺꦪꦸꦱ꧀ꦭꦤ꧀ꦥꦢ​ꦢꦶꦲꦫꦤ꧀ꦤꦶ​ꦨꦺꦴꦄꦤꦺꦂꦒꦼꦱ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦒꦼꦱ꧀ꦱꦺ​:ꦲꦤꦏ꧀​ꦒ꧀ꦭꦸꦢꦸꦏ꧀꧈​ 18-19ꦱꦶꦁꦭꦶꦪꦭꦶꦪꦤꦺꦗꦼꦤꦼꦁꦔꦺꦄꦤ꧀ꦢꦿꦺꦪꦱ꧀ ꦥ꦳ꦶꦭꦶꦥꦸꦱ꧀ ꦧꦂꦠꦺꦴꦭꦺꦴꦩꦺꦪꦸꦱ꧀ ꦩꦠꦺꦪꦸꦱ꧀ ꦠꦺꦴꦩꦱ꧀ ꦪꦏꦺꦴꦧꦸꦱ꧀ꦲꦤꦏ꧀ꦏꦺꦄꦭ꧀ꦥ꦳ꦺꦪꦸꦱ꧀ ꦠꦢꦺꦪꦸꦱ꧀ ꦱꦶꦩꦺꦴꦤ꧀ꦱꦶꦁꦢꦶꦲꦫꦤ꧀ꦤꦶꦥꦠꦿꦶꦪꦺꦴꦠ꧀ꦭꦤ꧀ꦪꦸꦢꦱ꧀ꦱꦁꦏꦆꦱ꧀ꦏꦫꦶꦪꦺꦴꦠ꧀ ꦱꦶꦁꦲꦶꦁꦠꦼꦩ꧀ꦧꦺꦧꦏꦭ꧀ꦔꦼꦭꦸꦁꦔꦏꦺꦒꦸꦱ꧀ꦠꦶꦪꦺꦯꦸꦱ꧀ꦩꦫꦁꦩꦸꦁꦱꦸꦃꦲꦺ꧉​

꧋ꦒꦸꦱ꧀ꦠꦶꦪꦺꦯꦸꦱ꧀ꦭꦤ꧀ꦱꦺꦠꦤ꧀꧈​

20꧋ꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦧꦭꦶꦏ꧀ꦤꦁꦲꦺꦴꦩꦃ꧉​ꦤꦁꦔꦶꦁꦮꦺꦴꦁꦲꦺꦴꦏꦺꦃꦧꦔꦼꦠ꧀ꦥꦢꦠꦼꦏꦩꦼꦤꦺꦃꦩꦫꦤꦶꦢꦺꦏ꧀ꦤꦺ꧈​ꦱꦩ꧀ꦥꦺꦏ꧀ꦲꦺꦴꦫꦏꦺꦴꦧꦼꦂꦩꦁꦔꦤ꧀꧈​ 21ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦥꦢ​ꦏꦿꦸꦔꦸ​ꦧꦧ꧀ꦏꦸꦮꦶ​꧉​ꦭꦤ꧀ꦩꦼꦤꦺꦃ​ꦲꦺꦤꦺꦁꦱꦶꦁ​ꦔꦺꦴꦩꦺꦴꦁꦤꦺꦏ꧀ꦢꦺꦏ꧀ꦤꦺꦏꦸꦮꦶ​ꦲꦺꦴꦫ​ꦮꦫꦱ꧀꧈​ꦩꦸꦭꦤꦺ​ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​ꦩꦲꦸ​ꦠꦼꦫꦸꦱ꧀ꦧꦸꦢꦭ꧀ꦲꦉꦥ꧀ꦩꦫꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦲꦼꦗꦺꦏ꧀ꦩꦸꦭꦶꦃ​꧉​

22꧋ꦒꦸꦫꦸꦒꦸꦫꦸ​ꦏꦶꦠꦧ꧀ꦱꦶꦁ​ꦠꦼꦏ​ꦱꦁꦏꦪꦺꦫꦸꦱꦭꦺꦩ꧀ꦥꦢ​ꦔꦺꦴꦩꦺꦴꦁ:“ꦮꦺꦴꦁ​ꦏꦸꦮꦶ​ꦢꦶꦏ꧀ꦮꦱꦤꦶ​ꦨꦺꦭ꧀ꦱꦼꦧꦸꦭ꧀ ꦥꦼꦁꦒꦼꦢꦺꦤꦺꦢꦼꦩꦶꦠ꧀꧈​ꦩꦸꦭꦤꦺ​ꦢꦺꦏ꧀ꦤꦺꦧꦶꦱ​ꦔꦼꦠꦺꦴꦏ꧀ꦏꦏꦺꦢꦼꦩꦶꦠ꧀꧈​”

23꧋ꦮꦺꦴꦁꦮꦺꦴꦁ​ꦩꦲꦸ​ꦠꦼꦫꦸꦱ꧀ꦢꦶꦕꦼꦭꦸꦏ꧀​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦢꦶꦮꦸꦭꦁꦔꦶꦔꦁꦒꦺꦴ​ꦠꦼꦩ꧀ꦧꦸꦁ​ꦒꦩ꧀ꦧꦂ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦩꦺꦴꦱꦺꦴꦏ꧀ꦱꦺꦠꦤ꧀​ꦲꦉꦥ꧀​ꦔ꧀ꦭꦮꦤ꧀ꦧꦭꦤꦺ​ꦢꦺꦮꦺ?ꦩꦼꦱ꧀ꦠꦶꦲꦺꦴꦫ​ꦠ​! 24ꦱꦼꦩꦸꦁꦒꦺꦴꦤ꧀ꦤꦺꦲꦶꦁ​ꦱꦏ꧀ꦗꦼꦫꦺꦴꦤꦺꦤꦼꦒꦫ​ꦮꦺꦴꦁꦔꦺ​ꦥꦢ​ꦩꦼꦩꦸꦁꦱꦸꦃꦲꦤ꧀ꦩꦫꦁ​ꦱꦏ꧀ꦥꦢꦥꦢ꧈​ꦤꦼꦒꦫ​ꦏꦸꦮꦶ​ꦩꦼꦱ꧀ꦠꦶꦧꦏꦭ꧀ꦫꦸꦱꦏ꧀꧈​ 25ꦲꦸꦒ​ꦲꦶꦁ​ꦱꦏ꧀ꦗꦼꦫꦺꦴꦤꦺꦲꦺꦴꦩꦃꦲꦺꦴꦩꦃ​꧈​ꦤꦺꦏ꧀ꦮꦺꦴꦁꦔꦺ​ꦥꦢ​ꦤꦼꦁꦤꦼꦁꦔꦤ꧀ꦭꦤ꧀ꦩꦼꦩꦸꦁꦱꦸꦃꦲꦤ꧀ ꦧꦿꦪꦠ꧀ꦏꦸꦮꦶ​ꦩꦼꦱ꧀ꦠꦶꦤ꧀ꦢꦁꦧꦸꦧꦿꦃ​꧉​ 26ꦭꦃ​ꦱꦲꦶꦏꦶ​ꦢꦶꦥꦶꦏꦶꦂ​ꦢꦺꦮꦺꦱꦶꦁ​ꦲꦥꦶꦏ꧀:ꦤꦺꦏ꧀ꦱꦺꦠꦤ꧀​ꦔ꧀ꦭꦮꦤ꧀ꦧꦭꦤꦺ​ꦢꦺꦮꦺ꧈​ꦭꦃ​ꦒꦺꦏ꧀ꦏꦼꦥꦿꦶꦪꦺ​?ꦩꦼꦱ꧀ꦠꦶꦱꦺꦠꦤ꧀ꦪ​ꦮꦶꦱ꧀ꦲꦺꦴꦫ​ꦤ꧀ꦢꦸꦮꦺꦧꦭ​ꦩꦼꦤꦺꦃ​꧉​

27꧋“ꦲꦥ​ꦲꦺꦤꦺꦁꦮꦺꦴꦁ​ꦧꦶꦱ​ꦔ꧀ꦊꦧꦺꦴꦤ꧀ꦤꦶꦲꦺꦴꦩꦃꦲꦺ​ꦮꦺꦴꦁ​ꦱꦶꦁ​ꦒꦼꦢꦺ​ꦭꦤ꧀ꦫꦺꦴꦱ​ꦥꦮꦏ꧀ꦏꦤ꧀ꦤꦺ​꧈​ꦠꦼꦫꦸꦱ꧀ꦚꦺꦴꦭꦺꦴꦁꦔꦶ​ꦱꦼꦩ꧀ꦧꦫꦁ​ ꦱꦏ꧀ꦲꦺꦤꦺꦁꦔꦺ?ꦩꦼꦱ꧀ꦠꦶꦪ​ꦲꦺꦴꦫ​ꦧꦶꦱ​!ꦩꦭꦶꦁ​ꦔꦺ​ꦏꦸꦢꦸ​ꦧꦶꦱ​ꦲꦩ꧀ꦧꦤ꧀ꦢ​ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦤ꧀ꦢꦶꦱꦶꦏ꧀ ꦱꦏ꧀ꦢꦸꦫꦸꦁꦔꦺꦧꦶꦱ​ꦔꦸꦱꦸꦁꦔꦶ​ꦱꦼꦩ꧀ꦧꦫꦁꦔꦺ꧉​

28꧋“ꦲꦶꦏꦶ​ꦢꦶꦫꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦒꦼꦊꦩ꧀ꦔꦥꦸꦫ​ꦩꦤꦸꦁꦱ​꧈​ꦱꦼꦤꦗꦤ꧀ꦱꦭꦃꦲꦺ​ꦒꦼꦢꦺꦤꦺꦭꦤ꧀ꦲꦺꦴꦏꦺꦃꦲꦺꦏꦪ​ꦔꦥ​꧈​ꦲꦸꦒ​ꦤꦺꦏ꧀ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦮꦺꦴꦁ​ꦭꦶꦪꦤꦺ​꧉​ 29ꦤꦁꦔꦶꦁ​ꦱꦥ​ꦱꦶꦁ​ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦫꦺꦴꦃ​ꦱꦸꦕꦶ​ꦲꦺꦴꦫ​ꦧꦏꦭ꧀ꦢꦶꦔꦥꦸꦫꦱ꧀ꦭꦮꦱ꧀ꦭꦮꦱ꧀ꦱꦺ꧈​ꦤꦁꦔꦶꦁ​ꦧꦏꦭ꧀ꦚꦁꦒ​ꦱꦭꦃ​ꦲꦶꦏꦸ​ꦱꦏ꧀ꦠꦼꦫꦸꦱ꧀ꦱꦺ꧉​” 30ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦥꦢ​ꦔꦫꦤ꧀ꦤꦶ​ꦤꦺꦏ꧀ꦢꦺꦏ꧀ꦤꦺꦢꦶꦏ꧀ꦮꦱꦤꦶ​ꦢꦼꦩꦶꦠ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦱꦼꦢꦸꦭꦸꦂꦫꦺ​꧉​

31꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦲꦶꦧꦸꦤꦺ​ꦭꦤ꧀ꦲꦢꦶꦏ꧀ꦲꦢꦶꦏ꧀ꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦥꦢ​ꦠꦼꦏ​꧉​ꦮꦺꦴꦁꦮꦺꦴꦁ​ꦲꦶꦏꦶ​ꦥꦢ​ꦔꦼꦤ꧀ꦠꦺꦤ꧀ꦤꦶ​ꦤꦁꦚ꧀ꦗꦧ​ꦭꦤ꧀ꦏꦺꦴꦁꦏꦺꦴꦤ꧀ꦤꦤ꧀ꦚꦼꦭꦸꦏ꧀ꦏꦏꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ 32ꦮꦺꦴꦁ​ꦲꦺꦴꦏꦺꦃꦥꦢ​ꦗꦒꦺꦴꦁꦔꦤ꧀ꦔꦸꦧꦼꦁꦔꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ​꧈​ꦲꦶꦧꦸ​ꦭꦤ꧀ꦲꦢꦶꦏ꧀ꦩꦸꦥꦢ​ꦤꦁꦚ꧀ꦗꦧ​ꦤꦺꦏꦺꦴꦏ꧀ꦏꦏꦺꦏꦺꦴꦮꦺ​!”

33꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦲꦶꦧꦸꦏꦸ​ꦭꦤ꧀ꦲꦢꦶꦏ꧀ꦏꦸꦏꦸꦮꦶ​ꦱꦏ꧀ꦗꦤꦺꦱꦥ​ꦠ​?” 34-35ꦢꦺꦏ꧀ꦤꦺꦠꦼꦫꦸꦱ꧀ꦚꦮꦁꦮꦺꦴꦁꦮꦺꦴꦁꦱꦶꦁꦥꦢꦚ꧀ꦗꦒꦺꦴꦁꦔꦸꦧꦼꦁꦔꦶꦢꦺꦏ꧀ꦤꦺꦭꦤ꧀ꦔꦺꦴꦩꦺꦴꦁ:“ꦪꦲꦶꦏꦶꦲꦶꦧꦸꦏꦸꦭꦤ꧀ꦱꦼꦢꦸꦭꦸꦂꦏꦸ꧉​ꦱꦥꦮꦲꦺꦱꦶꦁꦩꦤꦸꦠ꧀ꦩꦫꦁꦒꦸꦱ꧀ꦠꦶꦄꦭ꧀ꦭꦃ꧈​ꦪꦏꦸꦮꦶꦱꦼꦢꦸꦭꦸꦂꦏꦸꦭꦤꦁꦭꦤ꧀ꦱꦼꦢꦸꦭꦸꦂꦏꦸꦮꦺꦢꦺꦴꦏ꧀ꦭꦤ꧀ꦲꦶꦧꦸꦏꦸꦠꦼꦤꦤ꧀꧈​” ↑ ↑ ↑


꧋ꦠꦼꦩ꧀ꦧꦸꦁꦒꦩ꧀ꦧꦂꦧꦧ꧀ꦮꦺꦴꦁꦚꦼꦧꦂ꧉​

꧇​꧔꧇​ 1꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦸꦭꦁꦔꦶꦮꦺꦴꦁꦮꦺꦴꦁ​ꦩꦼꦤꦺꦃ​ꦤꦁꦥꦶꦁꦒꦶꦂꦫꦺ​ꦩꦺꦂꦓꦭꦶꦭꦺꦪ​꧉​ꦤꦁꦔꦶꦁ​ꦱꦁꦏꦶꦁꦲꦺꦴꦏꦺꦃꦲꦺꦮꦺꦴꦁꦔꦺ​ꦱꦶꦁ​ꦥꦢ​ꦔꦿꦸꦔꦺꦴꦏ꧀ꦏꦏꦺ꧈​ꦢꦺꦏ꧀ꦤꦺꦠꦼꦫꦸꦱ꧀ꦩꦸꦁꦒꦃ​ꦤꦁꦥꦿꦲꦸ​ꦱꦶꦁ​ꦤꦁꦏꦺꦴꦤꦺꦴ​ꦠꦼꦫꦸꦱ꧀ꦩꦸꦭꦁꦔꦶꦱꦁꦏꦏꦺꦴꦤꦺꦴ​꧉​ꦮꦺꦴꦁꦮꦺꦴꦁ​ꦱꦶꦁ​ꦔꦿꦸꦔꦺꦴꦏ꧀ꦏꦏꦺꦥꦢ​ꦔꦢꦼꦏ꧀ꦤꦁꦥꦶꦁꦒꦶꦂ​꧉​ 2ꦥꦶꦫꦁꦥꦶꦫꦁ​ꦥꦽꦏꦫ​ꦱꦶꦁ​ꦢꦶꦉꦩ꧀ꦧꦸꦏ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦢꦺꦏ꧀ꦤꦺꦤꦺꦏ꧀ꦩꦸꦭꦁꦔꦶꦔꦁꦒꦺꦴ​ꦒꦩ꧀ꦧꦂ​꧉​

3꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦢꦶꦫꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀꧈​ꦲꦺꦤꦺꦁꦮꦺꦴꦁ​ꦧꦸꦢꦭ꧀ꦤꦁꦏꦼꦧꦺꦴꦤ꧀ꦲꦉꦥ꧀ꦚꦼꦧꦂ​꧉​ 4ꦢꦺꦴꦁꦔꦺꦚꦼꦧꦂ​꧈​ꦮꦶꦗꦶꦤꦺ​ꦲꦺꦤꦺꦁꦱꦶꦁ​ꦠꦶꦧ​ꦤꦁꦥꦶꦁꦒꦶꦂ​ꦢꦭꦤ꧀ꦠꦼꦫꦸꦱ꧀ꦢꦶꦥꦔꦤ꧀ꦩꦤꦸꦏ꧀꧈​ 5-6ꦱꦭꦺꦴꦏ꧀ꦏꦺꦠꦶꦧ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦠꦺꦴꦱ꧀ ꦱꦶꦁ​ꦠꦶꦥꦶꦱ꧀ꦊꦩꦃꦲꦺ​꧉​ꦪ​ꦒꦼꦭꦶꦱ꧀ꦠꦸꦏꦸꦭ꧀ ꦤꦁꦔꦶꦁ​ꦏꦢꦸꦁ​ꦥꦤꦱ꧀ꦧꦤ꧀ꦠꦼꦂ​ꦠꦼꦫꦸꦱ꧀ꦒꦫꦶꦁ​꧈​ꦲꦮꦶꦠ꧀ꦲꦺꦴꦫ​ꦲꦺꦤꦺꦁꦲꦺꦴꦪꦺꦴꦠ꧀ꦠꦺ꧉​ 7ꦭꦶꦪꦤꦺ​ꦠꦶꦧ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦺꦴꦏꦺꦃꦲꦼꦫꦶꦤꦺ​꧉​ꦮꦶꦗꦶꦤꦺ​ꦠꦸꦏꦸꦭ꧀ ꦤꦁꦔꦶꦁ​ꦏꦭꦃ​ꦏꦫꦺꦴ​ꦲꦼꦫꦶꦲꦼꦫꦶꦤꦺ꧈​ꦩꦸꦭꦤꦺ​ꦪ​ꦲꦺꦴꦫ​ꦧꦶꦱ​ꦩꦼꦠꦸ​ꦮꦺꦴꦃꦲꦺ​꧉​ 8ꦤꦁꦔꦶꦁ​ꦲꦸꦒ​ꦲꦺꦤꦺꦁꦮꦶꦗꦶ​ꦱꦶꦁ​ꦠꦶꦧ​ꦤꦁꦊꦩꦃ​ꦲꦥꦶꦏ꧀꧈​ꦮꦶꦗꦶ​ꦲꦶꦏꦶ​ꦠꦸꦏꦸꦭ꧀ꦱꦩ꧀ꦥꦺꦏ꧀ꦒꦼꦢꦺꦠꦼꦫꦸꦱ꧀ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦢꦢꦶ​ꦠꦼꦭꦸꦁ​ꦥꦸꦭꦸꦃ​꧈​ꦭꦶꦪꦤꦺ​ꦩꦭꦶꦃ​ꦱ꧀ꦮꦶꦢꦏ꧀ꦭꦤ꧀ꦲꦺꦤꦺꦁꦭꦶꦪꦤꦺ​ꦱꦶꦁ​ꦢꦢꦶ​ꦱꦠꦸꦱ꧀꧈​”

9꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦸꦠꦸꦥ꧀ꦥꦶꦮꦸꦭꦁꦔꦺ​ꦔꦺꦴꦩꦺꦴꦁ:“ꦱꦥ​ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧈​ꦢꦶꦫꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀!”

10꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀​ꦚ꧀ꦗꦒꦺꦴꦁꦢꦺꦮꦺ꧈​ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦱꦶꦁ​ꦩꦺꦭꦸ​ꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦔꦺ​ꦩꦲꦸ​ꦥꦢ​ꦠꦼꦏ​ꦧꦉꦁ​ꦏꦫꦺꦴ​ꦩꦸꦫꦶꦢ꧀ꦱꦶꦁ​ꦫꦺꦴꦭꦱ꧀꧈​ꦮꦺꦴꦁꦮꦺꦴꦁ​ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦸꦤꦸꦁꦔꦏꦺꦒꦩ꧀ꦧꦂ​ꦩꦲꦸ​꧉​ 11ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦧꦧ꧀ꦲꦶꦏꦶ​꧈​ꦤꦁꦔꦶꦁ​ꦱꦲꦶꦏꦶ​ꦏꦺꦴꦮꦺ​ꦮꦶꦱ꧀ꦥꦢ​ꦔꦼꦂꦠꦶ​ꦮꦼꦮꦢꦶꦤꦺ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦏꦁꦒꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦒꦼꦊꦩ꧀ꦥꦽꦕꦪ​꧈​ꦲꦏꦸ​ꦱꦶꦁ​ꦩꦸꦭꦁꦔꦶꦔꦁꦒꦺꦴ​ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦒꦩ꧀ꦧꦂ​꧉​ 12ꦢꦢꦶꦤꦺ​꧈​

‘ꦱꦼꦤꦗꦤ꧀ꦤ​ꦥꦢ​ꦮꦼꦫꦸꦃ​꧈​
ꦤꦁꦔꦶꦁ​ꦲꦺꦴꦫ​ꦧꦶꦱ​ꦤꦶꦠꦺꦤ꧀ꦤꦶ​
ꦭꦤ꧀ꦱꦼꦤꦗꦤ꧀ꦤ​ꦥꦢ​ꦔꦿꦸꦔꦺꦴꦏ꧀ꦏꦏꦺ
ꦲꦺꦴꦫ​ꦧꦶꦱ​ꦢꦸꦤꦸꦁ꧉​
ꦲꦮꦶꦠ꧀ꦤꦺꦏ꧀ꦥꦢ​ꦤꦶꦠꦺꦤ꧀ꦤꦶ​
ꦭꦤ꧀ꦥꦢ​ꦢꦸꦤꦸꦁ꧈​
ꦮꦺꦴꦁꦮꦺꦴꦁ​ꦏꦸꦮꦶ​ꦩꦼꦱ꧀ꦠꦶ
ꦠꦼꦫꦸꦱ꧀ꦥꦢ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​
ꦭꦤ꧀ꦱꦭꦃꦲꦺ​ꦲꦸꦒ​ꦧꦶꦱ​ꦢꦶꦔꦥꦸꦫ꧉​
ꦤꦁꦔꦶꦁ​ꦲꦺꦴꦫ​ꦥꦢ​ꦒꦼꦊꦩ꧀꧈​’”

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦸꦤꦸꦁꦔꦏꦺꦠꦼꦩ꧀ꦧꦸꦁꦔꦺ​꧉​

13꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​:“ꦩꦺꦴꦱꦺꦴꦏ꧀ꦏꦺꦴꦮꦺ​ꦲꦺꦴꦫ​ꦥꦢ​ꦢꦸꦤꦸꦁꦥꦶꦮꦸꦭꦁꦔꦺ​ꦱꦁꦏꦠꦼꦩ꧀ꦧꦸꦁ​ꦒꦩ꧀ꦧꦂ​ꦲꦶꦏꦶ​?ꦭꦃ​ꦏꦼꦥꦿꦶꦪꦺ​ꦏꦺꦴꦮꦺ​ꦧꦶꦱꦤꦺ​ꦢꦸꦤꦸꦁꦱꦶꦁ​ꦭꦶꦪꦭꦶꦪꦤꦺ​? 14ꦮꦺꦴꦁ​ꦱꦶꦁ​ꦚꦼꦧꦂ​ꦏꦸꦮꦶ​ꦮꦺꦴꦁ​ꦱꦶꦁ​ꦔꦧꦂꦫꦏꦺꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 15ꦮꦶꦗꦶꦮꦶꦗꦶ​ꦱꦶꦁ​ꦠꦶꦧ​ꦤꦁꦥꦶꦁꦒꦶꦂ​ꦢꦭꦤ꧀ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦮꦺꦴꦁꦮꦺꦴꦁ​ꦱꦶꦁ​ꦏꦿꦸꦔꦸ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦠꦼꦫꦸꦱ꧀ꦥꦢ​ꦭꦭꦶ​꧉​ꦱꦺꦠꦤ꧀ ꦲꦩ꧀ꦧꦸꦮꦁ​ꦥꦶꦠꦸꦠꦸꦂ​ꦩꦲꦸ​ꦱꦁꦏꦲꦠꦶꦤꦺ​꧉​ 16ꦮꦶꦗꦶꦮꦶꦗꦶ​ꦱꦶꦁ​ꦠꦶꦧ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦲꦠꦺꦴꦱ꧀ ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦮꦺꦴꦁꦮꦺꦴꦁ​ꦱꦶꦁ​ꦏꦿꦸꦔꦸ​ꦭꦤ꧀ꦒꦼꦊꦩ꧀ꦤꦩ꧀ꦥ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁꦮꦺꦴꦁ​ꦲꦶꦏꦶ​ꦠꦼꦫꦸꦱ꧀ꦥꦢ​ꦱꦼꦤꦼꦁ​ꦭꦤ꧀​ꦤ꧀ꦢꦸꦮꦺꦤ꧀ꦤꦶ​ꦏꦧꦸꦔꦃꦲꦤ꧀꧈​ 17ꦤꦁꦔꦶꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦔꦺꦴꦪꦺꦴꦠ꧀ꦲꦶꦁ​ꦲꦠꦶꦤꦺ​꧉​ꦩꦸꦁ​ꦢꦼꦩꦼꦤ꧀ꦲꦚꦂ​ꦮꦲꦺ​꧉​ꦤꦺꦏ꧀ꦏꦠꦼꦏꦤ꧀ꦏꦔꦺꦭ꧀ꦭꦤ꧀ꦭꦤ꧀ꦢꦶꦱꦼꦔꦶꦠ꧀ꦠꦶ​ꦏꦫꦺꦴ​ꦭꦶꦪꦤꦺ​꧈​ꦗꦭꦂꦫꦤ꧀ꦤꦸꦫꦸꦠ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁꦮꦺꦴꦁ​ꦲꦶꦏꦶ​ꦠꦼꦫꦸꦱ꧀ꦱꦼꦩ꧀ꦥ꧀ꦭꦏ꧀ꦥꦼꦔꦤ꧀ꦢꦼꦭ꧀ꦭꦺ​꧉​ 18ꦮꦶꦗꦶꦮꦶꦗꦶ​ꦱꦶꦁ​ꦠꦶꦧ​ꦤꦁꦠꦼꦔꦃꦲꦺ​ꦲꦼꦫꦶꦲꦼꦫꦶꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦮꦺꦴꦁꦮꦺꦴꦁ​ꦱꦶꦁ​ꦏꦿꦸꦔꦸ​ꦭꦤ꧀ꦤꦩ꧀ꦥ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 19ꦤꦁꦔꦶꦁ​ꦠꦼꦫꦸꦱ꧀ꦥꦢ​ꦧꦶꦔꦸꦁ​ꦧꦧ꧀ꦏꦲꦸꦫꦶꦥ꧀ꦥꦤ꧀ꦲꦶꦁ​ꦢꦺꦴꦚ​ꦭꦤ꧀ꦩꦸꦁ​ꦩꦶꦏꦶꦂꦫꦏꦺꦧꦫꦁ​ꦱꦶꦁ​ꦲꦺꦴꦫꦲꦺꦴꦫ​꧈​ꦲꦮꦶꦠ꧀ꦥꦢ​ꦏꦼꦥꦺꦔꦶꦤ꧀ꦱꦸꦒꦶꦃ​꧉​ꦩꦸꦭꦤꦺ​ꦠꦼꦫꦸꦱ꧀ꦥꦢ​ꦭꦭꦶ​ꦩꦫꦁ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 20ꦤꦁꦔꦶꦁ​ꦮꦶꦗꦶ​ꦱꦶꦁ​ꦠꦶꦧ​ꦤꦁꦊꦩꦃ​ꦱꦶꦁ​ꦲꦥꦶꦏ꧀ꦏꦸꦮꦶ​ꦔ꧀ꦒꦩ꧀ꦧꦂꦫꦏꦺꦮꦺꦴꦁꦮꦺꦴꦁ​ꦱꦶꦁ​ꦏꦿꦸꦔꦸ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦫꦸꦱ꧀ꦥꦢ​ꦥꦽꦕꦪ​ꦱꦏ꧀ꦲꦠꦶꦤꦺ​꧉​ꦢꦢꦶꦤꦺ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦲꦶꦁ​ꦲꦸꦫꦶꦥ꧀ꦥꦺꦮꦺꦴꦁ​ꦏꦸꦮꦶ​꧈​ꦥꦶꦁ​ꦠꦼꦭꦸꦁ​ꦥꦸꦭꦸꦃ​꧈​ꦭꦶꦪꦤꦺ​ꦱ꧀ꦮꦶꦢꦏ꧀ꦭꦤ꧀ꦭꦶꦪꦤꦺ​ꦩꦼꦤꦺꦃ​ꦥꦶꦁ​ꦱꦠꦸꦱ꧀꧈​”

꧋ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦢꦶꦪꦤ꧀꧈​

21꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦸꦭꦁꦔꦶꦩꦼꦤꦺꦃ​:“ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦢꦶꦪꦤ꧀꧈​ꦲꦥ​ꦲꦺꦤꦺꦁꦮꦺꦴꦁ​ꦚꦸꦩꦼꦠ꧀ꦢꦶꦪꦤ꧀ꦠꦼꦫꦸꦱ꧀ꦢꦶꦠꦸꦠꦸꦥ꧀ꦥꦶ​ꦠꦺꦁꦒꦺꦴꦏ꧀ꦲꦥ​ꦢꦶꦢꦺꦏꦺꦏ꧀ꦤꦁꦔꦶꦱꦺꦴꦂ​ꦏꦺꦴꦭꦺꦴꦁ?ꦪ​ꦲꦺꦴꦫ​ꦠ​!ꦢꦶꦪꦤ꧀ꦤꦺꦩꦼꦱ꧀ꦠꦶꦢꦶꦢꦺꦏꦺꦏ꧀ꦤꦁꦩꦺꦗ​ꦲꦥ​ꦢꦶꦕꦤ꧀ꦠꦺꦭ꧀ꦭꦏꦺ​ꦤꦁꦕꦒꦏ꧀ꦏꦺ​꧉​ 22ꦲꦮꦶꦠ꧀ꦲꦥ​ꦱꦶꦁ​ꦢꦶꦢꦼꦭꦶꦏ꧀ꦏꦏꦺꦏꦸꦮꦶ​ꦩꦼꦱ꧀ꦠꦶꦏꦥꦤ꧀ꦏꦥꦤ꧀ꦧꦏꦭ꧀ꦢꦶꦲꦼꦠꦺꦴꦏ꧀ꦏꦏꦺꦭꦤ꧀ꦲꦥ​ꦮꦲꦺ​ꦱꦶꦁ​ꦢꦶꦱꦶꦩ꧀ꦥꦼꦤ꧀ꦏꦸꦮꦶ​ꦩꦼꦱ꧀ꦠꦶꦪ​ꦱꦸꦥꦪ​ꦏꦥꦤ꧀ꦏꦥꦤ꧀ꦢꦶꦏꦺꦠꦺꦴꦏ꧀ꦏꦏꦺ꧉​ 23ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧈​ꦢꦶꦫꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀꧈​”

24꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦗ​ꦤꦩꦸꦁ​ꦔꦿꦸꦔꦺꦴꦏ꧀ꦏꦏꦺꦏꦫꦺꦴ​ꦏꦸꦥꦶꦁꦩꦸ​ꦮꦲꦺ​꧈​ꦤꦁꦔꦶꦁ​ꦱꦼꦩ꧀ꦧꦫꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦥꦶꦏꦶꦂ​ꦱꦶꦁ​ꦲꦥꦶꦏ꧀꧈​ꦤꦺꦏ꧀ꦏꦺꦴꦮꦺ​ꦔꦿꦸꦔꦺꦴꦏ꧀ꦏꦏꦺꦱꦶꦁ​ꦠꦼꦤꦤ꧀ꦤꦤ꧀ ꦩꦼꦱ꧀ꦠꦶꦏꦺꦴꦮꦺ​ꦪ​ꦧꦏꦭ꧀ꦢꦸꦤꦸꦁꦲꦺꦴꦏꦺꦃꦭꦤ꧀ꦥꦔꦼꦂꦠꦶꦩꦸ​ꦧꦏꦭ꧀ꦩꦸꦤ꧀ꦢꦏ꧀ꦠꦼꦫꦸꦱ꧀꧈​ 25ꦲꦮꦶꦠ꧀ꦱꦥ​ꦱꦶꦁ​ꦔ꧀ꦒꦠꦺꦏ꧀ꦏꦏꦺꦩꦫꦁ​ꦥꦶꦠꦸꦠꦸꦂꦏꦸ​ꦧꦏꦭ꧀ꦩꦸꦤ꧀ꦢꦏ꧀ꦲꦺꦴꦏꦺꦃꦏꦮꦼꦫꦸꦃꦲꦺ꧈​ꦤꦁꦔꦶꦁ​ꦱꦶꦁ​ꦲꦺꦴꦫ​ꦒꦼꦊꦩ꧀​ꦔ꧀ꦒꦸꦒꦸ​꧈​ꦱꦼꦤꦗꦤ꧀ꦤ​ꦔꦼꦂꦠꦶ​ꦤꦩꦸꦁ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧈​ꦏꦸꦮꦶ​ꦮꦲꦺ​ꦧꦏꦭ꧀ꦭꦭꦶ​꧉​”

꧋ꦠꦼꦩ꧀ꦧꦸꦁ​ꦒꦩ꧀ꦧꦂ​ꦧꦧ꧀ꦮꦶꦗꦶ​ꦱꦶꦁ​ꦠꦸꦏꦸꦭ꧀꧈​

26꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​:“ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦱꦏ꧀ꦮꦶꦗꦶꦤꦺꦮꦺꦴꦁ​ꦱꦶꦁ​ꦚꦼꦧꦂ​ꦮꦶꦗꦶ​ꦤꦁꦏꦼꦧꦺꦴꦤꦺ​꧉​ 27ꦱꦏ꧀ꦮꦶꦱ꧀ꦱꦺ​ꦚꦼꦧꦂ​ꦠꦼꦫꦸꦱ꧀ꦢꦶꦠꦶꦁꦒꦭ꧀ ꦩ꧀ꦧꦼꦔꦶꦠꦸꦫꦸ​꧈​ꦲꦺꦱꦸꦏ꧀ꦠꦔꦶ​꧈​ꦱꦸꦮꦶꦱꦸꦮꦶꦮꦶꦗꦶꦤꦺ​ꦠꦸꦏꦸꦭ꧀ꦢꦺꦮꦺꦱꦩ꧀ꦥꦺꦏ꧀ꦒꦼꦢꦺ꧈​ꦮꦺꦴꦁꦔꦺ​ꦢꦺꦮꦺꦲꦺꦴꦫ​ꦔꦼꦂꦠꦶ​ꦏꦼꦥꦿꦶꦪꦺ​ꦠꦸꦏꦸꦭ꧀ꦭꦺ! 28ꦊꦩꦃꦲꦺ​ꦱꦶꦁ​ꦤꦸꦏꦸꦭ꧀ꦭꦏꦺ꧈​ꦱꦩ꧀ꦥꦺꦏ꧀ꦩꦼꦠꦸ​ꦮꦺꦴꦃꦲꦺ​꧈​ꦤ꧀ꦢꦶꦱꦶꦏ꧀ꦏꦺꦒꦒꦁꦔꦺ​꧈​ꦠꦼꦫꦸꦱ꧀ꦔꦼꦩ꧀ꦧꦁꦭꦤ꧀ꦩꦼꦠꦸ​ꦮꦸꦭꦺꦤ꧀ꦤꦺ​꧉​ 29ꦤꦺꦏ꧀ꦥꦫꦶꦤꦺ​ꦮꦶꦱ꧀ꦠꦸꦮ​ꦠꦼꦫꦸꦱ꧀ꦢꦶꦲꦼꦫꦶꦠ꧀ ꦲꦮꦶꦠ꧀ꦮꦶꦱ꧀ꦮꦪꦃꦲꦺ​ꦥꦤꦺꦤ꧀꧈​”

꧋ꦠꦼꦩ꧀ꦧꦸꦁ​ꦒꦩ꧀ꦧꦂ​ꦧꦧ꧀ꦮꦶꦗꦶ​ꦱꦶꦁ​ꦕꦶꦭꦶꦏ꧀ꦢꦺꦮꦺ꧉​

30꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦲꦥ​ꦩꦼꦤꦺꦃ​? 31ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦮꦶꦗꦶ​ꦱꦶꦁ​ꦕꦶꦭꦶꦏ꧀ꦢꦺꦮꦺ꧉​ 32ꦤꦁꦔꦶꦁ​ꦤꦺꦏ꧀ꦢꦶꦱꦼꦧꦂ​ꦠꦼꦫꦸꦱ꧀ꦠꦸꦏꦸꦭ꧀ ꦒꦼꦢꦺꦤꦺꦔꦸꦁꦏꦸꦭ꧀ꦭꦶ​ꦠꦤ꧀ꦢꦸꦂꦫꦤ꧀ꦭꦶꦪꦤꦺ​꧉​ꦥꦁꦔꦺ​ꦒꦼꦢꦺꦒꦼꦢꦺ꧈​ꦩꦸꦭꦤꦺ​ꦩꦤꦸꦏ꧀ꦩꦤꦸꦏ꧀ꦱꦼꦤꦼꦁ​ꦔꦶꦪꦸꦥ꧀ꦭꦤ꧀​ꦔ꧀ꦒꦮꦺ​ꦱꦸꦱꦸꦏ꧀ꦤꦁꦏꦺꦴꦤꦺꦴ​꧉​” 33ꦒꦸꦱ꧀ꦠꦶ​ꦪꦺꦯꦸꦱ꧀ꦲꦼꦁꦒꦺꦴꦤꦺ​ꦩꦸꦭꦁꦔꦶꦮꦺꦴꦁꦮꦺꦴꦁ​ꦧꦧ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦔꦁꦒꦺꦴ​ꦠꦼꦩ꧀ꦧꦸꦁꦠꦼꦩ꧀ꦧꦸꦁ​ꦒꦩ꧀ꦧꦂ​ꦔꦺꦴꦤꦺꦴ​ꦏꦸꦮꦶ​꧈​ꦱꦏ꧀ꦏꦸꦮꦠ꧀ꦠꦺꦮꦺꦴꦁꦮꦺꦴꦁ​ꦱꦶꦁ​ꦔꦿꦸꦔꦺꦴꦏ꧀ꦏꦏꦺ꧉​ 34ꦢꦺꦏ꧀ꦤꦺꦲꦺꦴꦫ​ꦠꦲꦸ​ꦩꦸꦭꦁꦔꦶꦠꦤ꧀ꦥ​ꦔꦁꦒꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦒꦩ꧀ꦧꦂ​꧉​ꦤꦁꦔꦶꦁ​ꦤꦺꦏ꧀ꦢꦺꦏ꧀ꦤꦺꦢꦺꦮꦺꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧈​ꦱꦼꦩ꧀ꦧꦫꦁ​ꦢꦶꦢꦸꦤꦸꦁꦢꦸꦤꦸꦁꦔꦏꦺ꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦤ꧀ꦢꦼꦏ꧀ꦲꦺꦴꦩ꧀ꦧꦏ꧀ꦒꦼꦢꦺ꧉​

35꧋ꦢꦺꦴꦁꦔꦺꦮꦶꦱ꧀ꦱꦸꦫꦸꦥ꧀ꦲꦶꦁ​ꦢꦶꦤ​ꦏꦸꦮꦶ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦗꦺꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧈​ꦔꦺꦴꦩꦺꦴꦁ:“ꦲ꦳ꦪꦸꦏ꧀ꦥꦢ​ꦔꦧꦿꦃ!” 36ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦤꦁꦚ꧀ꦗꦼꦫꦺꦴꦤꦺ​ꦥꦿꦲꦸ​꧉​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦧꦸꦢꦭ꧀ꦤꦸꦩ꧀ꦥꦏ꧀ꦥꦿꦲꦸꦤꦺ​꧈​ꦮꦺꦴꦁꦮꦺꦴꦁ​ꦭꦶꦪꦤꦺ​ꦢꦶꦠꦶꦁꦒꦭ꧀ꦤꦁꦢꦫꦠ꧀ꦠꦤ꧀꧈​ꦲꦺꦤꦺꦁꦥꦿꦲꦸꦥꦿꦲꦸ​ꦭꦶꦪꦤꦺ​ꦲꦩ꧀ꦧꦫꦁ​ꦱꦶꦁ​ꦩꦺꦭꦸ​꧉​ 37ꦲꦺꦴꦫ​ꦊꦠ꧀ꦱꦸꦮꦶꦠꦼꦫꦸꦱ꧀ꦲꦺꦤꦺꦁꦲꦔꦶꦤ꧀ꦧꦤ꧀ꦠꦼꦂ​꧉​ꦲꦺꦴꦩ꧀ꦧꦏ꧀ꦏꦺ​ꦔꦤ꧀ꦠꦼꦩ꧀ꦩꦶ​ꦥꦿꦲꦸꦤꦺ​ꦱꦩ꧀ꦥꦺꦏ꧀ꦏꦼꦧꦼꦏ꧀ꦧꦚꦸ​ꦭꦤ꧀ꦩꦺꦃ​ꦏꦼꦊꦥ꧀꧈​ 38ꦒꦸꦱ꧀ꦠꦶ​ꦪꦺꦯꦸꦱ꧀ꦩꦭꦃ​ꦲꦶꦗꦶꦏ꧀ꦠꦸꦫꦸ​ꦤꦁꦲꦩ꧀ꦧꦸꦫꦶ​꧈​ꦧꦤ꧀ꦠꦭ꧀ꦭꦤ꧀꧈​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦥꦢ​ꦔ꧀ꦒꦸꦒꦃ​ꦢꦺꦏ꧀ꦤꦺꦔꦺꦴꦩꦺꦴꦁ:“ꦒꦸꦱ꧀ꦠꦶ​꧈​ꦲꦥ​ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦲꦩ꧀ꦧꦺꦴꦏ꧀ꦲꦼꦗꦂꦫꦏꦺꦧꦺꦤ꧀ꦏꦼꦊꦥ꧀?”

39꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦔꦶ​꧉​ꦲꦔꦶꦤ꧀ꦭꦤ꧀ꦲꦺꦴꦩ꧀ꦧꦏ꧀ꦢꦶꦥꦿꦺꦤ꧀ꦠꦃ​:“ꦩꦤ꧀ꦢꦼꦏ꧀ꦏ​!”ꦲꦔꦶꦤ꧀ꦤꦺ​ꦱꦏ꧀ꦮꦠ꧀ꦩꦤ꧀ꦢꦼꦏ꧀ꦭꦤ꧀ꦧꦚꦸꦤꦺ​ꦩꦭꦶꦃ​ꦲꦤ꧀ꦠꦼꦁ​꧉​ 40ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦤꦺꦤ꧀ꦤꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦥꦢ​ꦮꦼꦢꦶ​?ꦲꦥ​ꦏꦺꦴꦮꦺ​ꦢꦸꦫꦸꦁ​ꦥꦽꦕꦪ​ꦩꦫꦁ​ꦲꦏꦸ​?”

41꧋ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦥꦢ​ꦮꦼꦢꦶ​ꦧꦔꦼꦠ꧀ꦭꦤ꧀ꦠꦏꦺꦴꦤ꧀ꦩꦫꦁ​ꦱꦏ꧀ꦥꦢꦥꦢ:“ꦮꦺꦴꦁ​ꦲꦶꦏꦶ​ꦱꦥ​ꦠ​?ꦲꦔꦶꦤ꧀ꦭꦤ꧀ꦧꦚꦸ​ꦏꦺꦴꦏ꧀ꦩꦤꦸꦠ꧀ꦩꦫꦁ​ꦢꦺꦏ꧀ꦤꦺ​?” ↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦏꦼꦥꦼꦠꦸꦏ꧀ꦮꦺꦴꦁ​ꦱꦶꦁ​ꦢꦶꦏ꧀ꦮꦱꦤꦶ​ꦢꦼꦩꦶꦠ꧀꧈​

꧇​꧕꧇​ 1꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦮꦶꦱ꧀ꦔꦧꦿꦃꦭꦤ꧀ꦱꦲꦶꦏꦶ​ꦥꦢ​ꦠꦼꦏꦤ꧀ꦥꦁꦒꦺꦴꦤ꧀ꦤꦤ꧀ꦤꦺ​ꦧꦁꦱ​ꦓꦺꦫꦱ꧉​ 2ꦏꦢꦸꦁ​ꦩꦼꦢꦸꦤ꧀ꦱꦁꦏꦥꦿꦲꦸ​ꦢꦺꦏ꧀ꦤꦺꦠꦼꦫꦸꦱ꧀ꦏꦼꦥꦼꦠꦸꦏ꧀ꦮꦺꦴꦁ​ꦱꦶꦁ​ꦢꦶꦏ꧀ꦮꦱꦤꦶ​ꦢꦼꦩꦶꦠ꧀꧈​ꦮꦺꦴꦁ​ꦲꦶꦏꦶ​ꦠꦼꦏꦤꦺ​ꦱꦁꦏꦒꦸꦮꦒꦸꦮ​ꦏꦸꦧꦸꦂꦫꦤ꧀ꦤꦺ​ꦮꦺꦴꦁ​ꦏꦺꦴꦤꦺꦴ​꧉​ 3ꦥꦚ꧀ꦕꦺꦤ꧀ꦮꦺꦴꦁ​ꦲꦶꦏꦶ​ꦩꦁꦒꦺꦴꦤꦺ​ꦪ​ꦤꦁꦒꦸꦮꦒꦸꦮ​ꦏꦸꦧꦸꦂꦫꦤ꧀ꦏꦺꦴꦤꦺꦴ​꧉​ 4ꦮꦶꦱ꧀ꦧꦺꦴꦭꦏ꧀ꦧꦭꦶꦏ꧀ꦢꦺꦏ꧀ꦤꦺꦠꦔꦤ꧀ꦱꦶꦏꦶꦭ꧀ꦭꦺꦢꦶꦫꦤ꧀ꦠꦺ​꧈​ꦤꦁꦔꦶꦁ​ꦲꦗꦼꦏ꧀ꦢꦶꦥꦼꦢꦺꦴꦠ꧀꧈​ꦩꦸꦭꦤꦺ​ꦱꦲꦶꦏꦶ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦮꦤꦶ​ꦲꦩ꧀ꦧꦤ꧀ꦢ​ꦢꦺꦏ꧀ꦤꦺꦩꦼꦤꦺꦃ​꧉​ 5ꦄꦮꦤ꧀ꦮꦼꦔꦶꦮꦺꦴꦁ​ꦲꦶꦏꦶ​ꦏ꧀ꦭꦸꦪꦸꦂꦫꦤ꧀ꦤꦁꦏꦸꦧꦸꦂꦫꦤ꧀ꦭꦤ꧀ꦒꦸꦤꦸꦁꦒꦸꦤꦸꦁ​ꦏꦺꦴꦤꦺꦴ​꧈​ꦏꦫꦺꦴ​ꦧꦼꦔꦏ꧀ꦧꦼꦔꦺꦴꦏ꧀ꦭꦤ꧀ꦔꦤ꧀ꦠꦼꦩ꧀ꦩꦶ​ꦲꦮꦏ꧀ꦏꦺ​ꦏꦫꦺꦴ​ꦮꦠꦸ​꧉​

6꧋ꦲꦶꦁ​ꦢꦶꦤ​ꦏꦸꦮꦶ​꧈​ꦢꦺꦴꦁꦔꦺꦮꦺꦴꦁꦔꦺ​ꦮꦼꦫꦸꦃ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦏꦢꦺꦴꦃꦲꦤ꧀ ꦢꦺꦏ꧀ꦤꦺꦠꦼꦫꦸꦱ꧀ꦲꦩ꧀​ꦧ꧀ꦭꦪꦸꦩꦫꦤꦶ​ꦠꦼꦫꦸꦱ꧀ꦤꦶꦧ​ꦤꦁꦔꦉꦥ꧀ꦥꦺ​꧉​ 7-8ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦿꦺꦤ꧀ꦠꦃ​ꦢꦼꦩꦶꦠ꧀ꦠꦺ:“ꦢꦼꦩꦶꦠ꧀ ꦩꦼꦠꦸꦮ​ꦱꦁꦏꦮꦺꦴꦁ​ꦲꦶꦏꦶ​!”ꦢꦼꦩꦶꦠ꧀ꦠꦺꦠꦼꦫꦸꦱ꧀ꦲꦩ꧀ꦧꦼꦔꦺꦴꦏ꧀ꦧꦤ꧀ꦠꦼꦂ​ꦔꦺꦴꦩꦺꦴꦁ:“ꦢꦸꦃꦒꦸꦱ꧀ꦠꦶ​ꦪꦺꦯꦸꦱ꧀ ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧈​ꦏꦺꦴꦮꦺ​ꦏꦺꦴꦏ꧀ꦔꦸꦫꦸꦱ꧀ꦱꦶ​ꦲꦏꦸ​꧉​ꦲꦏꦸ​ꦚꦸꦮꦸꦤ꧀ ꦒꦸꦱ꧀ꦠꦶ​ꦄꦭ꧀ꦭꦃ​ꦢꦢꦶ​ꦱꦼꦏ꧀ꦱꦶ​꧈​ꦲꦏꦸ​ꦲꦩ꧀ꦧꦺꦴꦏ꧀ꦲꦗ​ꦢꦶꦱꦼꦠꦿꦥ꧀꧈​”

9꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦱꦥ​ꦗꦼꦤꦼꦁꦩꦸ​?”

꧋ꦢꦼꦩꦶꦠ꧀ꦠꦺ​ꦱꦼꦩꦲꦸꦂ​:“ꦲꦮꦏ꧀ꦏꦺ​ꦢꦺꦮꦺꦗꦼꦤꦼꦁꦔꦺ​ꦭꦺꦒꦶꦪꦸꦤ꧀​꧈​ꦲꦮꦏ꧀ꦏꦺ​ꦢꦺꦮꦺꦤꦁꦏꦺꦤꦺ​ꦲꦺꦴꦏꦺꦃꦧꦔꦼꦠ꧀꧈​” 10ꦢꦼꦩꦶꦠ꧀ꦠꦺꦠꦼꦫꦸꦱ꧀ꦚꦸꦮꦸꦤ꧀ꦧꦔꦼꦠ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦱꦸꦥꦪ​ꦲꦺꦴꦫ​ꦢꦶꦏꦺꦴꦁꦏꦺꦴꦤ꧀ꦭꦸꦔ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​꧉​

11꧋ꦱꦲꦶꦏꦶ​ꦤꦁꦒꦸꦤꦸꦔꦤ꧀ꦤꦺꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​ꦲꦺꦤꦺꦁꦧꦧꦶ​ꦥꦶꦫꦁꦥꦶꦫꦁ​ꦲꦶꦗꦶꦏ꧀ꦥꦢ​ꦔ꧀ꦒꦺꦴꦭꦺꦏ꧀ꦥꦔꦤ꧀꧈​ 12ꦢꦼꦩꦶꦠ꧀ꦢꦼꦩꦶꦠ꧀ꦠꦺ​ꦩꦲꦸ​ꦠꦼꦫꦸꦱ꧀ꦥꦢ​ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦲꦩ꧀ꦧꦺꦴꦏ꧀ꦲꦮꦏ꧀ꦏꦺ​ꦢꦺꦮꦺꦢꦶꦭꦶꦭꦤꦶ​ꦩ꧀ꦊꦧꦸ​ꦤꦁꦧꦧꦶꦧꦧꦶ​ꦏꦲꦺ​꧉​” 13ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦭꦶꦭꦤꦶ​꧉​ꦢꦼꦩꦶꦠ꧀ꦠꦺꦠꦼꦫꦸꦱ꧀ꦥꦢ​ꦩꦼꦠꦸ​ꦱꦁꦏꦮꦺꦴꦁꦔꦺ​ꦭꦤ꧀​ꦩ꧀ꦊꦧꦸ​ꦤꦁꦧꦧꦶꦧꦧꦶ​ꦩꦲꦸ​꧉​ꦏꦶꦫꦏꦶꦫ​ꦲꦺꦤꦺꦁꦧꦧꦶ​ꦫꦺꦴꦁ​ꦲꦺꦮꦸ​ꦲꦺꦴꦏꦺꦃꦲꦺ꧈​ꦏꦧꦺꦃ​ꦥꦢ​ꦥꦠꦶꦁ​ꦒꦿꦸꦢꦸꦏ꧀ꦩꦼꦢꦸꦤ꧀ꦱꦁꦏꦒꦸꦤꦸꦁꦔꦤ꧀ꦏꦺꦴꦤꦺꦴ​꧈​ꦠꦼꦫꦸꦱ꧀ꦩ꧀​ꦧ꧀ꦭꦤ꧀ꦢꦁꦤꦁꦩꦺꦂ꧉​ꦏꦧꦺꦃ​ꦏꦼꦊꦥ꧀꧈​

14꧋ꦱꦶꦁ​ꦠꦸꦏꦁ​ꦲꦔꦺꦴꦤ꧀ꦧꦧꦶꦤꦺꦠꦼꦫꦸꦱ꧀ꦥꦢ​ꦩ꧀​ꦧ꧀ꦭꦪꦸꦭꦸꦔ​꧈​ꦔꦺꦴꦩꦺꦴꦁꦔꦶꦮꦺꦴꦁꦮꦺꦴꦁ​ꦱꦶꦁ​ꦤꦁꦏꦸꦠꦧꦧ꧀ꦊꦭꦏꦺꦴꦤ꧀ꦏꦸꦮꦶ​꧉​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦠꦼꦏ​꧈​ꦲꦮꦶꦠ꧀ꦏꦼꦥꦺꦔꦶꦤ꧀ꦮꦼꦫꦸꦃ​ꦢꦺꦮꦺ꧉​ 15ꦏꦢꦸꦁ​ꦠꦼꦏꦤ꧀​ꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦫꦸꦱ꧀ꦥꦢ​ꦮꦼꦫꦸꦃ​ꦮꦺꦴꦁ​ꦱꦶꦁ​ꦩꦲꦸꦤꦺ​ꦢꦶꦏ꧀ꦮꦱꦤꦶ​ꦢꦼꦩꦶꦠ꧀​ꦚ꧀ꦗꦒꦺꦴꦁꦤꦁꦏꦺꦴꦤꦺꦴ​꧉​ꦮꦺꦴꦁꦔꦺ​ꦱꦲꦶꦏꦶ​ꦔꦁꦒꦺꦴ​ꦱꦭꦶꦤ꧀ꦭꦤ꧀ꦲꦔꦼꦤ꧀ꦤꦔꦼꦤ꧀ꦤꦺꦮꦶꦱ꧀ꦮꦫꦱ꧀꧈​ꦤꦁꦔꦶꦁ​ꦮꦺꦴꦁꦮꦺꦴꦁ​ꦲꦶꦗꦶꦏ꧀ꦥꦢ​ꦮꦼꦢꦶ​꧉​ 16ꦮꦺꦴꦁꦮꦺꦴꦁ​ꦱꦶꦁ​ꦮꦼꦫꦸꦃ​ꦊꦭꦏꦺꦴꦤꦺ​ꦮꦺꦴꦁ​ꦱꦶꦁ​ꦩꦲꦸꦤꦺ​ꦢꦶꦏ꧀ꦮꦱꦤꦶ​ꦢꦼꦩꦶꦠ꧀ꦭꦤ꧀ꦧꦧꦶꦧꦧꦶ​ꦩꦲꦸ​ꦠꦼꦫꦸꦱ꧀ꦥꦢ​ꦔꦺꦴꦩꦺꦴꦁꦔꦶꦮꦺꦴꦁꦮꦺꦴꦁ​ꦏꦸꦮꦶ​꧉​

17꧋ꦩꦸꦭꦤꦺ​ꦏꦧꦺꦃ​ꦠꦼꦫꦸꦱ꧀ꦥꦢ​ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦸꦥꦪ​ꦭꦸꦔ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​꧉​

18꧋ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦉꦥ꧀ꦩꦸꦁꦒꦃ​ꦤꦁꦥꦿꦲꦸꦤꦺ​꧈​ꦮꦺꦴꦁ​ꦱꦶꦁ​ꦩꦲꦸꦤꦺ​ꦢꦶꦏ꧀ꦮꦱꦤꦶ​ꦢꦼꦩꦶꦠ꧀ꦠꦼꦫꦸꦱ꧀ꦩꦫꦤꦶ​ꦢꦺꦏ꧀ꦤꦺ꧈​ꦤꦼꦩ꧀ꦧꦸꦁ​ꦲꦉꦥ꧀ꦩꦺꦭꦸ​꧉​

19-20꧋ꦤꦁꦔꦶꦁ​ꦲꦺꦴꦫ​ꦲꦺꦤ꧀ꦠꦸꦏ꧀꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦏꦤ​ꦏꦺꦴꦮꦺ​ꦩꦸꦭꦶꦃ​ꦮꦲꦺ​꧉​ꦢꦶꦲꦺꦴꦩꦺꦴꦁꦔꦏꦺꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂꦩꦸ​ꦲꦥ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦼꦥꦶꦫ​ꦒꦼꦢꦺꦤꦺꦏꦧꦼꦕꦶꦏ꧀ꦏꦤ꧀ꦤꦺ​ꦢꦺꦏ꧀ꦤꦺꦩꦫꦁ​ꦏꦺꦴꦮꦺ​꧉”ꦮꦺꦴꦁꦔꦺ​ꦠꦼꦫꦸꦱ꧀ꦭꦸꦔ​ꦭꦤ꧀ꦔꦧꦂꦔꦧꦂꦫꦏꦺꦤꦁꦱꦏ꧀ꦧꦮꦃꦢꦺꦏꦥꦺꦴꦭꦶꦱ꧀ꦧꦧ꧀ꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦤꦸꦭꦸꦁꦔꦶ​ꦢꦺꦏ꧀ꦤꦺ꧉​ꦮꦺꦴꦁꦮꦺꦴꦁ​ꦱꦶꦁ​ꦏꦿꦸꦔꦸ​ꦥꦢ​ꦔ꧀ꦒꦸꦩꦸꦤ꧀ꦏꦧꦺꦃ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦔꦺꦏ꧀ꦏꦺꦲꦤꦏ꧀ꦏꦺ​ꦙꦆꦫꦸꦱ꧀ꦭꦤ꧀ꦤꦩ꧀ꦧꦤꦶ​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦭꦫ​꧉​

21꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦧꦿꦃꦩꦼꦤꦺꦃ​ꦏꦫꦺꦴ​ꦥꦿꦲꦸꦤꦺ​꧉​ꦮꦺꦴꦁ​ꦥꦶꦫꦁꦥꦶꦫꦁ​ꦠꦼꦫꦸꦱ꧀ꦥꦢ​ꦔ꧀ꦭꦸꦩ꧀ꦥꦸꦏ꧀ꦩꦫꦤꦶ​ꦢꦺꦏ꧀ꦤꦺ꧉​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦤꦁꦥꦶꦁꦒꦶꦂ​ꦩꦺꦂꦏꦺꦴꦤꦺꦴ​ꦮꦲꦺ​꧉​ 22ꦲꦺꦴꦫ​ꦊꦠ꧀ꦱꦸꦮꦶꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁ​ꦲꦶꦏꦶ​ꦥꦼꦔꦉꦥ꧀ꦥꦺ​ꦱꦶꦤꦒꦸꦏ꧀ ꦗꦼꦤꦼꦁꦔꦺ​ꦙꦆꦫꦸꦱ꧀꧈​ꦠꦼꦏꦤ꧀​ꦔ꧀ꦒꦺꦴꦤ꧀ꦤꦺ ꦒꦸꦱ꧀ꦠꦶ​ꦪꦺꦯꦸꦱ꧀ꦙꦆꦫꦸꦱ꧀ꦠꦼꦫꦸꦱ꧀ꦤꦶꦧ​ꦤꦁꦔꦉꦥ꧀ꦥꦺ​꧉​ 23ꦢꦺꦏ꧀ꦤꦺꦚꦸꦮꦸꦤ꧀:“ꦢꦸꦃꦒꦸꦱ꧀ꦠꦶ​꧈​ꦲꦤꦏ꧀ꦏꦸ​ꦮꦺꦢꦺꦴꦏ꧀ꦭꦫ​ꦤꦼꦩꦼꦤ꧀ꦠꦼꦤꦤ꧀꧈​ꦲꦩ꧀ꦧꦺꦴꦏ꧀ꦲ꦳ꦪꦸꦏ꧀ꦤꦁꦔ꧀ꦒꦺꦴꦤ꧀ꦏꦸ​ꦠ​!ꦲꦤꦏ꧀ꦏꦸ​ꦲꦩ꧀ꦧꦺꦴꦏ꧀ꦢꦶꦠꦸꦩ꧀ꦥꦁꦔꦶ​ꦠꦔꦤ꧀ꦱꦸꦥꦪ​ꦧꦶꦱ​ꦮꦫꦱ꧀ꦭꦤ꧀ꦲꦸꦫꦶꦥ꧀ꦠꦼꦫꦸꦱ꧀꧈​”

24꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦺꦭꦸ​ꦙꦆꦫꦸꦱ꧀꧈​ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦩꦺꦭꦸ​꧈​ꦱꦩ꧀ꦥꦺꦏ꧀ꦥꦢ​ꦔꦼꦱꦸꦏ꧀ꦲꦼꦱꦸꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀꧈​

25꧋ꦤꦁꦠꦼꦔꦃꦲꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦱꦶꦗꦶ​ꦱꦶꦁ​ꦭꦫ​ꦔꦼꦠꦺꦴꦏ꧀ꦏꦏꦺꦒꦼꦠꦶꦃ​꧉​ꦮꦶꦱ꧀ꦫꦺꦴꦭꦱ꧀ꦠꦲꦸꦤ꧀ꦱꦸꦮꦺꦤꦺ​ꦮꦺꦴꦁꦔꦺ​ꦤ꧀ꦢꦸꦮꦺꦭꦫ​ꦏꦸꦮꦶ​꧉​ 26ꦥꦶꦫꦁꦥꦶꦫꦁ​ꦢꦺꦴꦏ꧀ꦠꦼꦂ​ꦮꦶꦱ꧀ꦢꦶꦥꦫꦤ꧀ꦤꦶ​꧈​ꦱꦩ꧀ꦥꦺꦏ꧀ꦢꦸꦮꦶꦠ꧀ꦠꦺꦭꦤ꧀ꦧꦤ꧀ꦢꦤꦺ​ꦲꦼꦤ꧀ꦠꦺꦏ꧀ꦏꦧꦺꦃ​꧈​ꦤꦁꦔꦶꦁ​ꦲꦺꦴꦫ​ꦧꦶꦱ​ꦩꦫꦶ​꧈​ꦩꦭꦃ​ꦩꦸꦤ꧀ꦢꦏ꧀ꦤꦼꦩꦼꦤ꧀꧈​ 27ꦱꦲꦶꦏꦶ​ꦮꦺꦴꦁꦔꦺ​ꦏꦿꦸꦔꦸ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦧꦶꦱ​ꦤꦩ꧀ꦧꦤꦶ​ꦮꦺꦴꦁ​ꦭꦫ​꧈​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦤꦺꦏꦠ꧀ꦩꦺꦭꦸ​ꦤꦿꦺꦴꦩ꧀ꦧꦺꦴꦭ꧀ꦤꦁꦲꦩ꧀ꦧꦸꦫꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 28ꦮꦺꦴꦁꦔꦺ​ꦥꦽꦕꦪ​ꦔꦺꦤꦺ​:“ꦤꦺꦏ꧀ꦲꦏꦸ​ꦧꦶꦱ​ꦤ꧀ꦢꦼꦩꦺꦏ꧀ꦱꦭꦶꦤ꧀ꦤꦺꦮꦲꦺ​꧈​ꦲꦏꦸ​ꦩꦼꦱ꧀ꦠꦶꦩꦫꦶ​꧉​”

꧋ꦩꦸꦭꦤꦺ​ꦮꦺꦴꦁꦔꦺ​ꦪ​ꦠꦼꦫꦸꦱ꧀​ꦤ꧀ꦢꦼꦩꦺꦏ꧀ꦱꦭꦶꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ 29ꦱꦏ꧀ꦮꦠ꧀ꦒꦼꦠꦶꦃꦲꦺ​ꦮꦺꦴꦁꦔꦺ​ꦩꦩ꧀ꦥꦼꦠ꧀ꦭꦤ꧀ꦮꦺꦴꦁꦔꦺ​ꦏꦿꦱ​ꦤꦺꦏ꧀ꦭꦫꦤꦺ​ꦮꦶꦱ꧀ꦲꦶꦭꦁ​ꦏꦧꦺꦃ​꧉​ 30ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦒ​ꦏꦿꦱ​ꦤꦺꦏ꧀ꦲꦺꦤꦺꦁꦏꦼꦏꦸꦮꦠ꧀ꦠꦤ꧀ꦩꦼꦠꦸ​ꦱꦁꦏꦲꦮꦏ꧀ꦏꦺ​꧉​ꦢꦺꦏ꧀ꦤꦺꦠꦼꦫꦸꦱ꧀ꦩꦶꦔꦼꦂ​ꦤ꧀ꦢꦼꦭꦺꦴꦏ꧀ꦏꦏꦺꦮꦺꦴꦁꦮꦺꦴꦁ​ꦤꦁꦲꦩ꧀ꦧꦸꦫꦶꦤꦺ​ꦭꦤ꧀ꦠꦏꦺꦴꦤ꧀:“ꦱꦥ​ꦱꦶꦁ​ꦤ꧀ꦢꦼꦩꦺꦏ꧀ꦱꦭꦶꦤ꧀ꦏꦸ?”

31꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦱꦼꦩꦲꦸꦂ​:“ꦒꦸꦱ꧀ꦠꦶ​꧈​ꦭꦃ​ꦱꦥ​ꦱꦶꦁ​ꦔꦼꦂꦠꦶ​!ꦮꦺꦴꦁ​ꦥꦶꦫꦁꦥꦶꦫꦁ​ꦏꦪ​ꦔꦺꦴꦤꦺꦴ​ꦥꦢ​ꦔꦼꦱꦸꦏ꧀ꦲꦼꦱꦸꦏ꧀ꦏꦺꦴꦮꦺ​꧈​ꦭꦃ​ꦏꦺꦴꦏ꧀ꦏꦺꦴꦮꦺ​ꦠꦏꦺꦴꦤ꧀:'ꦱꦥ​ꦱꦶꦁ​ꦤ꧀ꦢꦼꦩꦺꦏ꧀ꦱꦭꦶꦤ꧀ꦏꦸ?’”

32꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦚꦮꦁ​ꦮꦺꦴꦁꦮꦺꦴꦁ​꧈​ꦔ꧀ꦒꦺꦴꦭꦺꦏ꧀ꦏꦶ​ꦮꦺꦴꦁꦔꦺ​ꦱꦶꦁ​ꦤ꧀ꦢꦼꦩꦺꦏ꧀ꦱꦭꦶꦤ꧀ꦤꦺ꧉​ 33ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦫꦸꦩꦁꦱ​ꦱꦶꦁ​ꦤ꧀ꦢꦼꦩꦺꦏ꧀ꦭꦤ꧀ꦢꦺꦏ꧀ꦤꦺꦱꦲꦶꦏꦶ​ꦮꦶꦱ꧀ꦏꦿꦱ​ꦮꦫꦱ꧀ꦲꦮꦏ꧀ꦏꦺ​꧈​ꦩꦸꦭꦤꦺ​ꦠꦼꦫꦸꦱ꧀ꦩꦗꦸ​꧉​ꦏꦫꦺꦴ​ꦤ꧀ꦢꦽꦢꦼꦏ꧀ꦱꦁꦏꦶꦁꦮꦼꦢꦶꦤꦺ​꧈​ꦢꦺꦏ꧀ꦤꦺꦤꦶꦧ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦏꦸ​꧉​ 34ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁ:“ꦪꦸ꧈​ꦏꦺꦴꦮꦺꦱꦲꦶꦏꦶꦮꦶꦱ꧀ꦩꦫꦶ꧈​ꦲꦮꦶꦠ꧀ꦏꦺꦴꦮꦺꦥꦽꦕꦪ꧉​ꦏꦤꦩꦸꦭꦶꦃ꧉​ꦩ꧀ꦭꦏꦸꦱꦶꦁꦲꦥꦶꦏ꧀ꦲꦥꦶꦏ꧀꧈​ꦏꦺꦴꦮꦺꦮꦶꦱ꧀ꦩꦫꦶꦠꦼꦤꦤ꧀꧈​”

35꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦸꦫꦸꦁ​ꦫꦩ꧀ꦥꦸꦁ​ꦱꦶꦁ​ꦔꦺꦴꦩꦺꦴꦁ꧈​ꦏꦺꦴꦏ꧀ꦠꦼꦫꦸꦱ꧀ꦲꦺꦤꦺꦁꦏꦺꦴꦁꦏꦺꦴꦤ꧀ꦤꦤ꧀ꦱꦁꦏꦲꦺꦴꦩꦃꦲꦺ​ꦙꦆꦫꦸꦱ꧀ꦔꦺꦴꦩꦺꦴꦁꦤꦺꦏ꧀ꦲꦤꦏ꧀ꦏꦺ​ꦮꦶꦱ꧀ꦩꦠꦶ​꧉​ꦮꦺꦴꦁꦔꦺ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦙꦆꦫꦸꦱ꧀:“ꦲꦤꦏ꧀ꦩꦸ​ꦮꦶꦱ꧀ꦤꦶꦁꦒꦭ꧀꧈​ꦒꦸꦫꦸꦤꦺ​ꦮꦶꦱ꧀ꦲꦗ​ꦢꦶꦫꦸꦱꦸꦃꦲꦶ​!”

36꧋ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦸꦔꦸ​꧈​ꦤꦁꦔꦶꦁ​ꦲꦺꦴꦫ​ꦔꦿꦺꦮꦺꦱ꧀ꦲꦺꦴꦩꦺꦴꦁꦔꦤ꧀ꦤꦺ​ꦮꦺꦴꦁ​ꦏꦸꦮꦶ​ꦩꦲꦸ​꧈​ꦩꦭꦃ​ꦔꦺꦴꦩꦺꦴꦁ:“ꦲꦗ​ꦮꦼꦢꦶ​ꦙꦆꦫꦸꦱ꧀ ꦥꦽꦕꦪ​ꦮꦲꦺ​!” 37ꦮꦺꦴꦁꦮꦺꦴꦁ​ꦢꦶꦥꦼꦔꦶꦁ​ꦩꦺꦭꦸ​ꦤꦁꦲꦺꦴꦩꦃꦲꦺ​ꦙꦆꦫꦸꦱ꧀꧈​ꦱꦶꦁ​ꦢꦶꦲꦼꦗꦺꦏ꧀ꦤꦩꦸꦁ​ꦫꦱꦸꦭ꧀ꦦꦺꦠꦿꦸꦱ꧀ ꦪꦏꦺꦴꦧꦸꦱ꧀ꦭꦤ꧀ꦪꦺꦴꦲꦤꦼꦱ꧀꧈​ 38ꦏꦢꦸꦁ​ꦮꦶꦱ꧀ꦠꦼꦏꦤ꧀ꦲꦺꦴꦩꦃꦲꦺ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦸꦔꦸ​ꦮꦺꦴꦁ​ꦠꦔꦶꦱ꧀ꦱꦤ꧀ꦥꦠꦶꦁ​ꦗ꧀ꦊꦫꦶꦠ꧀꧈​ 39ꦢꦺꦏ꧀ꦤꦺꦩ꧀ꦊꦧꦸ​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​:“ꦏꦼꦤꦺꦁꦲꦥ​ꦏꦺꦴꦏ꧀ꦥꦢ​ꦤꦔꦶꦱ꧀ꦥꦠꦶꦁ​ꦗ꧀ꦊꦫꦶꦠ꧀?ꦧꦺꦴꦕꦃꦲꦺ​ꦲꦺꦴꦫ​ꦩꦠꦶ​꧈​ꦤꦩꦸꦁ​ꦠꦸꦫꦸ​!”

40꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦭꦃ​ꦢꦶꦒꦸꦪꦸ꧉​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦩꦼꦠꦸ​ꦏꦧꦺꦃ​꧉​ꦤꦩꦸꦁ​ꦮꦺꦴꦁ​ꦠꦸꦮꦤꦺ​ꦧꦺꦴꦕꦃꦲꦺ​ꦭꦤ꧀ꦩꦸꦫꦶꦢ꧀ꦠꦼꦭꦸ​ꦩꦲꦸ​ꦢꦶꦲꦼꦗꦺꦏ꧀​ꦩ꧀ꦊꦧꦸ​ꦤꦁꦏꦩꦂꦫꦺ​꧉​ 41ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦏꦼꦭ꧀ꦠꦔꦤ꧀ꦤꦺ​ꦧꦺꦴꦕꦃꦲꦺ​ꦏꦫꦺꦴ​ꦔꦺꦴꦩꦺꦴꦁ:“ꦠꦭꦶꦠ​ꦏꦸꦩ꧀!”ꦤꦺꦏ꧀ꦕꦫ​ꦗꦮ​:“ꦠꦔꦶ​ꦮꦸꦏ꧀!”

42꧋ꦱꦏ꧀ꦮꦠ꧀ꦧꦺꦴꦕꦃꦲꦺ​ꦠꦔꦶ​ꦠꦼꦫꦸꦱ꧀​ꦩ꧀ꦭꦏꦸ​꧉​꧌ꦧꦺꦴꦕꦃꦲꦺ​ꦲꦸꦩꦸꦂꦫꦺ​ꦫꦺꦴꦭꦱ꧀ꦠꦲꦸꦤ꧀꧈​)ꦮꦺꦴꦁ​ꦠꦸꦮꦤꦺ​ꦧꦺꦴꦕꦃꦲꦺ​ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦩꦲꦸ​ꦥꦢ​ꦔ꧀ꦒꦸꦩꦸꦤ꧀ꦧꦔꦼꦠ꧀꧈​ 43ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦗ​ꦱꦩ꧀ꦥꦺꦏ꧀ꦮꦺꦴꦁ​ꦭꦶꦪꦭꦶꦪꦤꦺ​ꦏꦿꦸꦔꦸ​ꦧꦧ꧀ꦲꦶꦏꦶ​꧉​”

꧋ꦮꦺꦴꦁ​ꦠꦸꦮꦤꦺ​ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦔꦼꦏꦺꦏ꧀ꦏꦶꦩꦁꦔꦤ꧀ꦧꦺꦴꦕꦃꦲꦺ​꧉​ ↑ ↑ ↑


꧋ꦤꦁꦥꦁꦒꦺꦴꦤ꧀ꦤꦤ꧀ꦤꦺ​ꦢꦺꦮꦺꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦢꦶꦲꦗꦺꦤ꧀ꦤꦶ​꧉​

꧇​꧖꧇​ 1꧋ꦱꦁꦏꦔ꧀ꦒꦺꦴꦤ꧀ꦤꦺꦙꦆꦫꦸꦱ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦸꦭꦶꦃ​ꦤꦁꦏꦸꦠꦥꦁꦒꦺꦴꦤ꧀ꦤꦤ꧀ꦤꦺ​꧉​ꦲꦶꦏꦸ​ꦏꦸꦠꦟꦱꦫꦺꦠ꧀꧈​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦲꦩ꧀ꦧꦫꦁ​ꦥꦢ​ꦩꦺꦭꦸ​꧉​ 2ꦲꦶꦁ​ꦢꦶꦤ​ꦱꦧꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦺꦴꦭꦃꦲꦶꦩꦸꦭꦁꦔꦶꦤꦁꦱꦶꦤꦒꦸꦏ꧀ꦏꦺꦴꦤꦺꦴ​꧉​ꦮꦺꦴꦁꦮꦺꦴꦁ​ꦱꦶꦁ​ꦔꦿꦸꦔꦺꦴꦏ꧀ꦏꦏꦺꦥꦢ​ꦔ꧀ꦒꦸꦩꦸꦤ꧀ꦏꦧꦺꦃ​꧉​ꦥꦢ​ꦔꦺꦴꦩꦺꦴꦁ:“ꦮꦺꦴꦁ​ꦲꦶꦏꦶ​ꦲꦺꦤ꧀ꦠꦸꦏ꧀ꦥꦶꦮꦸꦭꦁꦔꦤ꧀ꦱꦁꦏꦔꦼꦤ꧀ꦢꦶ​ꦪ​?ꦏꦺꦴꦏ꧀ꦥꦶꦤ꧀ꦠꦼꦂ​ꦠꦼꦩꦼꦤ꧀?ꦏꦺꦴꦏ꧀ꦧꦶꦱ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀ꦲꦩ꧀ꦧꦫꦁ​? 3ꦲꦶꦏꦶ​ꦭꦲꦸꦠ꧀ꦱꦶꦁ​ꦠꦸꦏꦁ​ꦔ꧀ꦒꦮꦺ​ꦏꦿꦺꦴꦱꦶꦩꦺꦗꦏꦲꦺ​ꦠ​?ꦲꦤꦏ꧀ꦏꦺ​ꦩꦫꦶꦪ꧈​ꦠꦸꦁꦒꦭ꧀ꦭꦺ​ꦪꦏꦺꦴꦧꦸꦱ꧀ ꦪꦺꦴꦱꦼꦱ꧀ ꦪꦸꦢꦱ꧀ꦭꦤ꧀ꦱꦶꦩꦺꦴꦤ꧀꧈​ꦲꦢꦶꦏ꧀ꦲꦢꦶꦏ꧀ꦏꦺꦱꦶꦁ​ꦮꦺꦢꦺꦴꦏ꧀ꦲꦩ꧀ꦧꦫꦁ​ꦭꦲꦸꦠ꧀ꦩꦁꦒꦺꦴꦤ꧀ꦤꦁꦏꦺꦤꦺ​ꦠ​?”ꦮꦺꦴꦁꦮꦺꦴꦁ​ꦥꦢ​ꦤꦩ꧀ꦥꦶꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀꧈​

4꧋ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​:“ꦤꦧꦶ​ꦏꦸꦮꦶ​ꦤꦁꦲꦼꦤ꧀ꦢꦶꦲꦼꦤ꧀ꦢꦶ​ ꦢꦶꦲꦗꦺꦤ꧀ꦤꦶ​꧈​ꦏꦼꦗꦧ​ꦤꦁꦥꦁꦒꦺꦴꦤ꧀ꦤꦤ꧀ꦤꦺ​ꦢꦺꦮꦺ꧉​ꦱꦼꦢꦸꦭꦸꦂꦫꦺ​ꦢꦺꦮꦺꦮꦲꦺ​ꦲꦺꦴꦫ​ꦔꦗꦺꦤ꧀ꦤꦶ​꧉​” 5ꦩꦸꦭꦤꦺ​ꦢꦺꦏ꧀ꦤꦺꦲꦺꦴꦫ​ꦧꦶꦱ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦩꦸꦗꦶꦗꦠ꧀ꦤꦁꦏꦺꦴꦤꦺꦴ​꧉​ꦤꦩꦸꦁ​ꦮꦺꦴꦁ​ꦭꦫ​ꦱꦶꦗꦶꦭꦺꦴꦫꦺꦴꦢꦶꦠꦸꦩ꧀ꦥꦁꦔꦶ​ꦠꦔꦤ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦫꦸꦱ꧀ꦥꦢ​ꦩꦫꦶ​꧉​ 6ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺꦪ​ꦔ꧀ꦒꦸꦩꦸꦤ꧀ ꦮꦺꦴꦁꦮꦺꦴꦁ​ꦏꦺꦴꦏ꧀ꦲꦺꦴꦫ​ꦒꦼꦊꦩ꧀ꦥꦽꦕꦪ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦁꦏꦺꦴꦤ꧀ꦩꦸꦫꦶꦢ꧀ꦫꦺꦴꦭꦱ꧀ꦧꦸꦢꦭ꧀꧈​

ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦧꦸꦢꦭ꧀ꦤꦁꦢꦺꦱꦢꦺꦱ​ꦤꦁꦏꦶꦮꦠꦼꦔꦼꦤ꧀ꦤꦺ​ꦏꦸꦠꦟꦱꦫꦺꦠ꧀ꦏꦺꦴꦤꦺꦴ​꧈​ꦩꦸꦭꦁꦔꦶꦮꦺꦴꦁꦮꦺꦴꦁ​ꦧꦧ꧀ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 7ꦢꦺꦏ꧀ꦤꦺꦲꦸꦒ​ꦩꦁꦒꦶꦭ꧀ꦩꦸꦫꦶꦢ꧀ꦱꦶꦁ​ꦫꦺꦴꦭꦱ꧀ꦢꦶꦏꦺꦴꦁꦏꦺꦴꦤ꧀ꦧꦸꦢꦭ꧀ꦭꦺꦴꦫꦺꦴꦭꦺꦴꦫꦺꦴ​ꦔ꧀ꦒꦼꦭꦂ​ꦏꦧꦂ​ꦏꦧꦸꦔꦃꦲꦤ꧀ꦭꦤ꧀ꦢꦶꦏꦺꦏ꧀ꦏꦶꦥꦔ꧀ꦮꦱ​ꦤꦸꦤ꧀ꦢꦸꦁꦔꦶꦢꦼꦩꦶꦠ꧀꧈​ 8ꦤꦁꦔꦶꦁ​ꦢꦶꦥꦼꦔꦶꦁ​ꦔ꧀ꦒꦮ​ꦲꦥꦲꦥ​꧈​ꦏꦼꦗꦧ​ꦠꦼꦏꦼꦤꦺ​꧉​ꦥꦔꦤ꧀ꦲꦺꦴꦫ​꧈​ꦢꦸꦮꦶꦠ꧀ꦪ​ꦲꦺꦴꦫ​꧉​ 9ꦏꦼꦤꦺꦁꦔꦁꦒꦺꦴ​ꦠꦺꦏ꧀ꦭꦺꦏ꧀ ꦤꦁꦔꦶꦁ​ꦲꦺꦴꦫ​ꦲꦺꦤ꧀ꦠꦸꦏ꧀​ꦔ꧀ꦒꦮ​ꦱꦭꦶꦤ꧀ꦢꦺꦴꦧꦼꦭ꧀꧈​ 10ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦤꦺꦏ꧀ꦏꦺꦴꦮꦺ​ꦩꦼꦂꦢꦪꦺꦴꦃꦤꦁꦲꦺꦴꦩꦃꦲꦺ​ꦱꦏ꧀ꦮꦶꦗꦶꦤꦺꦮꦺꦴꦁ​꧈​ꦔꦶꦤꦼꦥ꧀ꦥꦤꦁꦏꦺꦴꦤꦺꦴ​ꦮꦲꦺ​ꦔꦤ꧀ꦠꦶ​ꦏꦺꦴꦮꦺ​ꦭꦸꦔ​ꦩꦼꦤꦺꦃ​꧉​ 11ꦤꦺꦏ꧀ꦤꦁꦱꦏ꧀ꦮꦶꦗꦶꦤꦺꦥꦁꦒꦺꦴꦤ꧀ꦤꦤ꧀ꦮꦺꦴꦁꦔꦺ​ꦲꦺꦴꦫ​ꦒꦼꦊꦩ꧀ꦤꦩ꧀ꦥ​ꦭꦤ꧀ꦲꦺꦴꦫ​ꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺꦏꦺꦴꦮꦺ​꧈​ꦭꦸꦔꦲ​ꦮꦲꦺ​ꦱꦁꦏꦏꦺꦴꦤꦺꦴ​꧉​ꦤꦁꦔꦶꦁ​ꦊꦩꦃꦲꦺ​ꦢꦶꦏꦼꦠꦺꦴꦏ꧀ꦏꦏꦺ​ꦱꦁꦏꦱꦶꦏꦶꦭ꧀ꦩꦸ​꧈​ꦱꦸꦥꦪ​ꦥꦢ​ꦔꦼꦂꦠꦶ​ꦤꦺꦏ꧀ꦥꦢ​ꦤꦩ꧀ꦥꦶꦏ꧀ꦏꦺꦴꦮꦺ​꧉​”

12꧋ꦩꦸꦫꦶꦢ꧀ꦫꦺꦴꦭꦱ꧀ꦩꦲꦸ​ꦠꦼꦫꦸꦱ꧀ꦥꦢ​ꦧꦸꦢꦭ꧀ꦩꦶꦠꦸꦠꦸꦂꦫꦶ​ꦮꦺꦴꦁꦮꦺꦴꦁ​꧈​ꦏꦺꦴꦁꦏꦺꦴꦤ꧀ꦥꦢ​ꦤꦶꦁꦒꦭ꧀ꦲꦸꦫꦶꦥ꧀ꦲꦭ​ꦭꦤ꧀ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 13ꦢꦼꦩꦶꦠ꧀ꦥꦶꦫꦁꦥꦶꦫꦁ​ꦥꦢ​ꦢꦶꦠꦸꦤ꧀ꦢꦸꦁꦔꦶꦭꦤ꧀ꦲꦺꦴꦏꦺꦃꦮꦺꦴꦁ​ꦭꦫ​ꦥꦢ​ꦢꦶꦠꦩ꧀ꦧꦤꦶ​ꦔꦁꦒꦺꦴ​ꦲꦸꦱꦥ꧀ꦥꦤ꧀ꦊꦔ​꧉​

꧋ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦢꦶꦥꦠꦺꦤ꧀ꦤꦶ​꧉​

14꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦭꦺꦴꦠ꧀ꦱꦸꦮꦶꦱꦼꦭꦺꦴꦠ꧀ꦏꦼꦱꦸꦮꦸꦂ​ꦭꦤ꧀ꦤꦁꦲꦼꦤ꧀ꦢꦶꦲꦼꦤ꧀ꦢꦶ​ꦮꦺꦴꦁꦮꦺꦴꦁ​ꦥꦢ​ꦏꦿꦸꦔꦸ​ꦧꦧ꧀ꦢꦺꦏ꧀ꦤꦺ꧈​ꦲꦸꦒ​ꦫꦠꦸ​ꦲ꦳ꦺꦫꦺꦴꦢꦺꦱ꧀꧈​ꦲꦺꦤꦺꦁꦱꦶꦁ​ꦔꦺꦴꦩꦺꦴꦁ:“ꦪꦺꦯꦸꦱ꧀ꦲꦶꦏꦶ​ꦪ​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦱꦶꦁ​ꦲꦸꦫꦶꦥ꧀ꦩꦼꦤꦺꦃ​꧈​ꦩꦸꦭꦤꦺ​ꦢꦺꦏ꧀ꦤꦺꦧꦶꦱ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀꧈​”

15꧋ꦭꦶꦪꦤꦺ​ꦔꦺꦴꦩꦺꦴꦁ:“ꦪꦺꦯꦸꦱ꧀ꦲꦶꦏꦶ​ꦩꦼꦱ꧀ꦠꦶꦤꦧꦶ​ꦌꦭꦶꦪ​ꦱꦶꦁ​ꦲꦸꦫꦶꦥ꧀ꦩꦼꦤꦺꦃ​꧉​”

꧋ꦲꦺꦤꦺꦁꦭꦶꦪꦤꦺ​ꦩꦼꦤꦺꦃ​ꦱꦶꦁ​ꦔꦺꦴꦩꦺꦴꦁ:“ꦪꦺꦯꦸꦱ꧀ꦏꦸꦮꦶ​ꦤꦧꦶ​ꦠꦸꦁꦒꦭ꧀ꦭꦺ​ꦭꦶꦪꦭꦶꦪꦤꦺ​ꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀꧈​”

16꧋ꦏꦢꦸꦁ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦏꦿꦸꦔꦸ​꧈​ꦢꦺꦏ꧀ꦤꦺꦔꦺꦴꦩꦺꦴꦁ:“ꦪꦺꦯꦸꦱ꧀ꦲꦶꦏꦶ​ꦪꦺꦴꦲꦤꦼꦱ꧀ꦱꦶꦁ​ꦮꦶꦱ꧀ꦠꦏ꧀ꦏꦺꦠꦺꦴꦏ꧀ꦒꦸꦭꦸꦤꦺ​꧈​ꦤꦁꦔꦶꦁ​ꦲꦸꦫꦶꦥ꧀ꦩꦼꦤꦺꦃ​꧉​” 17ꦲꦮꦶꦠ꧀ꦩꦲꦸꦤꦺ​ꦪꦺꦴꦲꦤꦼꦱ꧀ꦮꦶꦱ꧀ꦢꦶꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀ꦏꦫꦺꦴ​ꦫꦠꦸ​ꦲ꦳ꦺꦫꦺꦴꦢꦺꦱ꧀ ꦤꦸꦫꦸꦠ꧀ꦠꦶ​ꦗꦭꦸꦏ꧀ꦏꦤ꧀ꦤꦺ​ꦲ꦳ꦺꦫꦺꦴꦢꦶꦪꦱ꧀꧈​ꦗꦭꦂꦫꦤ꧀ꦪꦺꦴꦲꦤꦼꦱ꧀ꦲꦗꦼꦏ꧀ꦔꦺꦴꦩꦺꦴꦁꦔꦶꦫꦠꦸꦤꦺ​ꦤꦺꦏ꧀​ꦏ꧀ꦭꦏꦸꦮꦤ꧀ꦤꦺ​ꦏꦼꦧꦕꦸꦠ꧀꧈​ꦲ꦳ꦺꦫꦺꦴꦢꦺꦱ꧀ꦔꦼꦥꦺꦏ꧀ꦲ꦳ꦺꦫꦺꦴꦢꦶꦪꦱ꧀ ꦧꦺꦴꦗꦺꦴꦤꦺ​ꦥ꦳ꦶꦭꦶꦥꦸꦱ꧀ ꦏꦏꦁꦔꦺꦢꦺꦮꦺ꧉​ 18ꦪꦺꦴꦲꦤꦼꦱ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦲꦺꦴꦫ​ꦏꦼꦤꦺꦁꦔꦼꦥꦺꦏ꧀ꦲꦶꦥꦺꦩꦸ​ꦢꦺꦮꦺꦤꦺꦏ꧀ꦧꦺꦴꦗꦺꦴꦤꦺ​ꦲꦶꦗꦶꦏ꧀ꦲꦸꦫꦶꦥ꧀!”

19꧋ꦩꦸꦭꦤꦺ​ꦲ꦳ꦺꦫꦺꦴꦢꦶꦪꦱ꧀ꦔꦶꦚ꧀ꦕꦶꦩ꧀ꦲꦶꦚ꧀ꦕꦶꦩ꧀ꦪꦺꦴꦲꦤꦼꦱ꧀ꦲꦉꦥ꧀ꦢꦶꦥꦠꦺꦤ꧀ꦤꦶ​꧈​ꦤꦁꦔꦶꦁ​ꦢꦸꦫꦸꦁ​ꦧꦶꦱ​꧈​ꦲꦮꦶꦠ꧀ꦲꦶꦗꦶꦏ꧀ꦢꦶꦲꦭꦁꦔꦭꦁꦔꦶꦏꦫꦺꦴ​ꦫꦠꦸ​ꦲ꦳ꦺꦫꦺꦴꦢꦺꦱ꧀꧈​ 20ꦲ꦳ꦺꦫꦺꦴꦢꦺꦱ꧀ꦢꦺꦮꦺꦮꦼꦢꦶ​ꦏꦫꦺꦴ​ꦪꦺꦴꦲꦤꦼꦱ꧀ ꦲꦮꦶꦠ꧀ꦔꦼꦂꦠꦶ​ꦤꦺꦏ꧀ꦪꦺꦴꦲꦤꦼꦱ꧀ꦏꦸꦮꦶ​ꦮꦺꦴꦁ​ꦧꦼꦤꦼꦂ​ꦭꦤ꧀ꦮꦺꦴꦁ​ꦱꦸꦕꦶ​꧈​ꦩꦸꦭꦤꦺ​ꦢꦺꦏ꧀ꦤꦺꦪ​ꦢꦶꦗꦒ​꧉​ꦲ꦳ꦺꦫꦺꦴꦢꦺꦱ꧀ꦱꦼꦤꦼꦁ​ꦔꦿꦸꦔꦺꦴꦏ꧀ꦏꦏꦺꦪꦺꦴꦲꦤꦼꦱ꧀ ꦱꦼꦤꦗꦤ꧀ꦠꦼꦩ꧀ꦧꦸꦁꦔꦺ​ꦩꦫꦏ꧀ꦏꦏꦺꦢꦺꦏ꧀ꦤꦺꦮꦼꦢꦶ​ꦭꦤ꧀ꦧꦶꦔꦸꦁ​꧉​

21꧋ꦤꦁꦔꦶꦁ​ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦲ꦳ꦺꦫꦺꦴꦢꦶꦪꦱ꧀ꦤꦼꦩꦸ​ꦏꦼꦭꦸꦁꦒꦂꦫꦤ꧀ꦏꦁꦒꦺꦴ​ꦩꦠꦺꦤ꧀ꦤꦶ​ꦪꦺꦴꦲꦤꦼꦱ꧀ ꦪꦏꦸꦮꦶ​꧈​ꦢꦺꦴꦁꦔꦺꦫꦠꦸ​ꦲ꦳ꦺꦫꦺꦴꦢꦺꦱ꧀ꦠꦸꦠꦸꦥ꧀ꦠꦲꦸꦤ꧀ꦭꦤ꧀ꦔꦤꦏ꧀ꦏꦏꦺꦥꦺꦱ꧀ꦠ​ꦒꦼꦢꦺ;ꦮꦺꦴꦁ​ꦒꦼꦢꦺꦒꦼꦢꦺ꧈​ꦲꦸꦒ​ꦥꦫ​ꦥꦼꦁꦒꦼꦢꦺꦤꦺꦩꦶꦭꦶꦠꦺꦂ​ꦭꦤ꧀ꦥꦫ​ꦥꦼꦁꦒꦼꦢꦺꦤꦺꦢꦶꦱ꧀ꦠꦿꦶꦏ꧀ꦓꦭꦶꦭꦺꦪ​ꦥꦢ​ꦠꦼꦏ​ꦏꦧꦺꦃ​꧉​ 22ꦏꦢꦸꦁ​ꦲꦤꦏ꧀ꦏꦺ​ꦲ꦳ꦺꦫꦺꦴꦢꦶꦪꦱ꧀ꦩꦺꦴꦭꦃꦲꦶꦚ꧀ꦗꦺꦴꦒꦺꦠ꧀ ꦫꦠꦸꦤꦺ​ꦭꦤ꧀ꦢꦪꦺꦴꦃꦢꦪꦺꦴꦃꦲꦺꦠꦼꦫꦸꦱ꧀ꦥꦢ​ꦱꦼꦤꦼꦁ​ꦠꦼꦤꦤ꧀ꦏꦫꦺꦴ​ꦧꦺꦴꦕꦃ​ꦮꦺꦢꦺꦴꦏ꧀ꦏꦸꦮꦶ​꧉​ꦩꦸꦭꦤꦺ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦧꦺꦴꦕꦃꦲꦺ​:“ꦏꦺꦴꦮꦺ​ꦏꦼꦥꦺꦔꦶꦤ꧀ꦲꦥ​ꦮꦸꦏ꧀ ꦱꦏ꧀​ꦚ꧀ꦗꦭꦸꦏ꧀ꦩꦸꦠꦏ꧀ꦏꦺꦏ꧀ꦏꦶ꧉​ 23ꦠꦼꦤꦤ꧀ ꦲꦏꦸ​ꦗꦚ꧀ꦗꦶ​ꦩꦫꦁ​ꦏꦺꦴꦮꦺ​꧈​ꦱꦼꦤꦗꦤ꧀ꦤ​ꦏꦺꦴꦮꦺ​ꦚ꧀ꦗꦭꦸꦏ꧀ꦱꦼꦥꦫꦺꦴꦤꦺ​ꦤꦼꦒꦫꦏꦸ​꧈​ꦧꦏꦭ꧀ꦠꦏ꧀ꦏꦺꦏ꧀ꦏꦏꦺ!”

24꧋ꦧꦺꦴꦕꦃꦲꦺ​ꦠꦼꦫꦸꦱ꧀ꦭꦸꦔ​ꦠꦏꦺꦴꦤ꧀ꦲꦶꦧꦸꦤꦺ​:“ꦧꦸ​꧈​ꦲꦏꦸ​ꦌꦤꦏ꧀ꦏꦺꦚ꧀ꦗꦭꦸꦏ꧀ꦲꦥ​ꦪ​?”ꦲꦶꦧꦸꦤꦺ​ꦱꦼꦩꦲꦸꦂ​:“ꦏꦤ​ꦏꦺꦴꦮꦺ​ꦚ꧀ꦗꦭꦸꦏ꧀ꦲꦼꦤ꧀ꦢꦱ꧀ꦱꦺꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀!”

25꧋ꦧꦺꦴꦕꦃꦲꦺ​ꦠꦼꦫꦸꦱ꧀ꦧꦭꦶꦏ꧀ꦩꦼꦤꦺꦃ​ꦤꦁꦔ꧀ꦒꦺꦴꦤ꧀ꦤꦺꦫꦠꦸꦤꦺ​ꦔꦺꦴꦩꦺꦴꦁ:“ꦲꦏꦸ​ꦚ꧀ꦗꦭꦸꦏ꧀ꦲꦼꦤ꧀ꦢꦱ꧀ꦱꦺꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀ꦤꦁꦥꦶꦫꦶꦁ​!”

26꧋ꦫꦠꦸ​ꦲ꦳ꦺꦫꦺꦴꦢꦺꦱ꧀ꦱꦼꦢꦶꦧꦔꦼꦠ꧀ꦏꦿꦸꦔꦸ​ꦥꦼꦚ꧀ꦗꦭꦸꦏ꧀ꦏꦤ꧀ꦏꦸꦮꦶ​꧉​ꦤꦁꦔꦶꦁ​ꦢꦺꦏ꧀ꦤꦺꦲꦺꦴꦫ​ꦧꦶꦱ​ꦲꦥꦲꦥ​꧈​ꦲꦮꦶꦠ꧀ꦮꦶꦱ꧀ꦏꦢꦸꦁ​ꦗꦚ꧀ꦗꦶ​꧉​ꦏꦫꦺꦴꦩꦼꦤꦺꦃ​ꦢꦪꦺꦴꦃꦲꦺꦥꦢ​ꦩꦺꦭꦸ​ꦚꦼꦏ꧀ꦱꦺꦤ꧀ꦤꦶ​ꦗꦚ꧀ꦗꦶꦤꦺ​꧉​ 27ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦱꦶꦁ​ꦠꦸꦏꦁ​ꦗꦒ​ꦏꦺꦴꦤꦺꦴ​ꦔꦺꦠꦺꦴꦏ꧀ꦒꦸꦭꦸꦤꦺ​ꦪꦺꦴꦲꦤꦼꦱ꧀ꦭꦤ꧀ꦏꦺꦴꦁꦏꦺꦴꦤ꧀ ꦔ꧀ꦒꦮꦏ꧀ꦏꦏꦺꦩ꧀ꦧꦿꦺꦴꦤꦺꦴ꧉​ꦮꦺꦴꦁꦔꦺ​ꦠꦼꦫꦸꦱ꧀ꦧꦸꦢꦭ꧀ꦭꦤ꧀ꦤꦁꦱꦼꦠꦿꦥꦤ꧀ꦏꦺꦴꦤꦺꦴ​ꦢꦺꦏ꧀ꦤꦺꦔꦺꦠꦺꦴꦏ꧀ꦒꦸꦭꦸꦤꦺ​ꦪꦺꦴꦲꦤꦼꦱ꧀꧈​ 28ꦲꦼꦤ꧀ꦢꦱ꧀ꦱꦺꦠꦼꦫꦸꦱ꧀ꦢꦶꦒꦮ​ꦤꦁꦥꦶꦫꦶꦁ​ꦢꦶꦏꦺꦏ꧀ꦏꦏꦺꦧꦺꦴꦕꦃꦲꦺ​꧉​ꦧꦺꦴꦕꦃꦲꦺ​ꦠꦼꦫꦸꦱ꧀ꦩꦱꦿꦃꦲꦏꦺꦲꦼꦤ꧀ꦢꦱ꧀ꦱꦺꦩꦫꦁ​ꦲꦶꦧꦸꦤꦺ​꧉​ 29ꦩꦸꦫꦶꦢ꧀ꦩꦸꦫꦶꦢ꧀ꦠꦺ​ꦪꦺꦴꦲꦤꦼꦱ꧀ꦏꦿꦸꦔꦸ​ꦤꦺꦏ꧀ꦢꦺꦏ꧀ꦤꦺꦮꦶꦱ꧀ꦤꦶꦁꦒꦭ꧀ ꦩꦸꦭꦤꦺ​ꦠꦼꦫꦸꦱ꧀ꦥꦢ​ꦚ꧀ꦗꦶꦏꦸꦏ꧀ꦭꦪꦺꦴꦤꦺ​ꦢꦶꦏꦸꦧꦸꦂ​꧉​

꧋ꦫꦁ​ꦱꦸꦩ꧀ꦩꦤ꧀ꦥꦔꦤ꧀ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧉​

30꧋ꦥꦫ​ꦫꦱꦸꦭ꧀ꦮꦶꦱ꧀ꦥꦢ​ꦧꦭꦶꦏ꧀ꦩꦼꦤꦺꦃ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦤꦁꦏꦺꦴꦤꦺꦴ​ꦥꦢ​ꦚꦿꦶꦠꦏ꧀ꦏꦏꦺꦧꦧ꧀ꦱꦼꦩ꧀ꦧꦫꦁ​ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦭꦤ꧀ꦢꦶꦮꦸꦭꦁꦔꦏꦺ꧉​ 31ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲ꦳ꦪꦸꦏ꧀ꦥꦢ​ꦔ꧀ꦒꦺꦴꦭꦺꦏ꧀ꦥꦁꦒꦺꦴꦤ꧀ꦤꦤ꧀ꦱꦶꦁ​ꦱꦼꦥꦶ​ꦏꦁꦒꦺꦴ​ꦭꦺꦫꦺꦤ꧀ꦱꦼꦢꦶꦭꦸꦠ꧀꧉”ꦲꦮꦶꦠ꧀ꦮꦺꦴꦁ​ꦲꦺꦴꦏꦺꦃꦥꦢ​ꦠꦼꦏꦭꦸꦔꦱꦩ꧀ꦥꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦲꦺꦴꦫ​ꦏꦺꦴꦧꦼꦂ​ꦩꦁꦔꦤ꧀꧈​ 32ꦩꦸꦭꦤꦺ​ꦠꦼꦫꦸꦱ꧀ꦤꦶꦁꦒꦭ꧀ꦮꦺꦴꦁꦮꦺꦴꦁ​ꦭꦸꦔ​ꦏꦫꦺꦴ​ꦥꦿꦲꦸꦤꦺ​ꦔ꧀ꦒꦺꦴꦭꦺꦏ꧀ꦥꦁꦒꦺꦴꦤ꧀ꦤꦤ꧀ꦱꦼꦥꦶ​꧉​

33꧋ꦤꦁꦔꦶꦁ​ꦮꦺꦴꦁ​ꦲꦺꦴꦏꦺꦃꦮꦼꦫꦸꦃ​ꦭꦸꦔꦤꦺ​ꦭꦤ꧀ꦤꦶꦠꦺꦤ꧀ꦤꦶ​ꦥꦫꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦱꦁꦏꦏꦸꦠꦏꦸꦠꦮꦺꦴꦁꦮꦺꦴꦁ​ꦥꦢ​ꦧꦸꦢꦭ꧀​ꦩ꧀ꦭꦏꦸ​ꦤ꧀ꦢꦶꦱꦶꦏ꧀ꦏꦶ​꧉​ 34ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦢꦸꦤ꧀ꦱꦁꦏꦥꦿꦲꦸꦤꦺ​꧈​ꦢꦺꦏ꧀ꦤꦺꦮꦼꦫꦸꦃ​ꦮꦺꦴꦁ​ꦲꦺꦴꦏꦺꦃꦮꦶꦱ꧀ꦤꦁꦏꦺꦴꦤꦺꦴ​꧉​ꦢꦺꦏ꧀ꦤꦺꦠꦼꦫꦸꦱ꧀ꦩꦼꦭꦱ꧀ꦧꦔꦼꦠ꧀ ꦲꦮꦶꦠ꧀ꦮꦺꦴꦁꦮꦺꦴꦁ​ꦏꦸꦮꦶ​ꦏꦪ​ꦮꦼꦢꦸꦱ꧀ꦱꦶꦁ​ꦲꦺꦴꦫ​ꦲꦺꦤꦺꦁꦱꦶꦁ​ꦔꦼꦔꦺꦴꦤ꧀꧈​ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦸꦭꦁꦔꦶꦮꦺꦴꦁꦮꦺꦴꦁ​ꦧꦧ꧀ꦮꦼꦂꦤꦮꦼꦂꦤ​ꦥꦽꦏꦫ​꧉​ 35ꦢꦺꦴꦁꦔꦺꦮꦶꦱ꧀ꦱꦺꦴꦫꦺ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦔꦺꦴꦩꦺꦴꦁꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦱꦲꦶꦏꦶ​ꦮꦶꦱ꧀ꦱꦺꦴꦫꦺ​ꦭꦤ꧀ꦤꦁꦥꦁꦒꦺꦴꦤ꧀ꦤꦤ꧀ꦏꦺꦤꦺ​ꦲꦺꦴꦫ​ꦲꦺꦤꦺꦁꦲꦥꦲꦥ​꧉​ 36ꦲꦩ꧀ꦧꦺꦴꦏ꧀ꦮꦺꦴꦁꦮꦺꦴꦁ​ꦢꦶꦏꦺꦴꦁꦏꦺꦴꦤ꧀ꦭꦸꦔ​ꦧꦺꦤ꧀ꦥꦢ​ꦔ꧀ꦒꦺꦴꦭꦺꦏ꧀ꦩꦁꦔꦤ꧀ꦢꦺꦮꦺꦢꦺꦮꦺꦤꦁꦢꦺꦱꦢꦺꦱ​꧉​”

37꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦱꦶꦁ​ꦏꦸꦢꦸ​ꦔꦼꦏꦺꦏ꧀ꦏꦶꦩꦁꦔꦤ꧀ꦮꦺꦴꦁꦮꦺꦴꦁ​꧉​”

꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦔꦺꦴꦩꦺꦴꦁ:“ꦭꦃ​ꦏꦸꦮꦶ​ꦥꦶꦫꦁ​ꦢꦸꦮꦶꦠ꧀ꦮꦲꦺ​?” 38ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦏꦤ​ꦢꦶꦢꦼꦭꦺꦴꦏ꧀ꦲꦺꦤꦺꦁꦫꦺꦴꦠꦶ​ꦥꦶꦫ​!”

꧋ꦏꦢꦸꦁ​ꦮꦶꦱ꧀ꦤꦶꦭꦶꦏ꧀ꦏꦶ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦺꦤꦺꦁꦫꦺꦴꦠꦶ​ꦭꦶꦩ​ꦭꦤ꧀ꦲꦶꦮꦏ꧀ꦭꦺꦴꦫꦺꦴ​!”

39꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦤꦠ​ꦮꦺꦴꦁꦮꦺꦴꦁ​꧈​ꦧꦺꦤ꧀ꦥꦢ​ꦚ꧀ꦗꦒꦺꦴꦁꦤꦁꦱꦸꦏꦼꦠ꧀ꦠꦤ꧀ ꦱꦏ꧀ꦏꦿꦺꦴꦩ꧀ꦥꦺꦴꦭ꧀ꦱꦏ꧀ꦏꦿꦺꦴꦩ꧀ꦥꦺꦴꦭ꧀꧈​ 40ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦚ꧀ꦗꦒꦺꦴꦁ;ꦲꦺꦤꦺꦁꦏꦿꦺꦴꦩ꧀ꦥꦺꦴꦭ꧀ꦭꦤ꧀ꦱꦶꦁ​ꦮꦺꦴꦁꦔꦺ​ꦱꦠꦸꦱ꧀ ꦲꦺꦤꦺꦁꦱꦶꦁ​ꦱꦺꦏꦼꦠ꧀꧈​ 41ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦚ꧀ꦗꦶꦏꦸꦏ꧀ꦫꦺꦴꦠꦶ​ꦭꦶꦩ​ꦭꦤ꧀ꦲꦶꦮꦏ꧀ꦭꦺꦴꦫꦺꦴ​ꦩꦲꦸ​꧉​ꦢꦺꦏ꧀ꦤꦺꦚꦮꦁ​ꦤ꧀ꦢꦸꦮꦸꦂꦏꦫꦺꦴ​ꦤ꧀ꦢꦺꦴꦁꦔ꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦫꦺꦴꦠꦶꦤꦺ​ꦠꦼꦫꦸꦱ꧀ꦢꦶꦕꦸꦮꦶꦭ꧀ꦕꦸꦮꦶꦭ꧀ꦭꦤ꧀ꦢꦶꦏꦺꦏ꧀ꦏꦏꦺꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦺꦴꦁꦏꦺꦴꦤ꧀ꦔꦼꦢꦸꦩ꧀ꦩꦫꦁ​ꦮꦺꦴꦁꦮꦺꦴꦁ​꧉​ꦲꦶꦮꦏ꧀ꦭꦺꦴꦫꦺꦴ​ꦩꦲꦸ​ꦲꦸꦒ​ꦢꦶꦕꦸꦮꦶꦭ꧀ꦕꦸꦮꦶꦭ꧀ꦠꦼꦫꦸꦱ꧀ꦢꦶꦲꦼꦢꦸꦩ꧀ꦩꦼꦢꦸꦩ꧀ꦩꦏꦺ꧉​ 42ꦮꦺꦴꦁ​ꦏꦧꦺꦃ​ꦥꦢ​ꦩꦁꦔꦤ꧀ꦱꦩ꧀ꦥꦺꦏ꧀ꦮꦫꦱ꧀ꦩꦸ꧉​ 43ꦠꦸꦫꦃꦲꦤ꧀ꦤꦺ​ꦫꦺꦴꦠꦶ​ꦭꦤ꧀ꦲꦶꦮꦏ꧀ꦱꦶꦁ​ꦲꦺꦴꦫ​ꦏꦼꦥꦁꦔꦤ꧀ꦢꦶꦭꦸꦩ꧀ꦥꦸꦏ꧀ꦏꦏꦺꦲꦺꦤꦺꦁꦫꦺꦴꦭꦱ꧀ꦠꦺꦁꦒꦺꦴꦏ꧀꧈​ 44ꦱꦶꦁ​ꦩꦁꦔꦤ꧀ꦲꦺꦤꦺꦁꦮꦺꦴꦁ​ꦭꦶꦩꦁ​ꦲꦺꦮꦸ​꧈​ꦏꦸꦮꦶ​ꦤꦩꦸꦁ​ꦮꦺꦴꦁ​ꦭꦩꦸꦂ꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦭꦏꦸ​ꦤꦁꦩꦺꦂ꧉​

45꧋ꦱꦏ꧀ꦮꦶꦱ꧀ꦱꦺ​ꦲꦶꦏꦸ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦤꦸꦩ꧀ꦥꦏ꧀ꦥꦿꦲꦸꦤꦺ​ꦤ꧀ꦢꦶꦱꦶꦏ꧀ꦤꦁꦢꦺꦱ​ꦧꦺꦠ꧀ꦱꦲꦶꦢ​꧈​ꦤꦁꦲꦧꦿꦃꦲꦤ꧀꧈​ꦮꦺꦴꦁꦮꦺꦴꦁ​ꦭꦶꦪꦤꦺ​ꦠꦼꦫꦸꦱ꧀ꦢꦶꦱꦸꦮꦸꦤ꧀ꦏꦺꦴꦁꦏꦺꦴꦤ꧀ꦩꦸꦭꦶꦃ​꧉​ 46ꦏꦢꦸꦁ​ꦮꦶꦱ꧀ꦥꦶꦱꦃ​ꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦸꦁꦒꦃ​ꦒꦸꦤꦸꦁ​ꦲꦉꦥ꧀​ꦤ꧀ꦢꦺꦴꦁꦔ꧉​ 47ꦢꦺꦴꦁꦔꦺꦱꦸꦫꦸꦥ꧀ꦥꦿꦲꦸꦤꦺ​ꦮꦶꦱ꧀ꦤꦁꦠꦼꦔꦃꦠꦼꦔꦃ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦗꦶꦏ꧀ꦤꦁꦢꦫꦠ꧀ꦠꦤ꧀ꦢꦺꦮꦺ꧉​ 48ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​ꦤꦺꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦔꦺꦭ꧀ꦭꦤ꧀ꦠꦼꦤꦤ꧀ꦱꦶꦁ​ꦤ꧀ꦢꦪꦸꦁ꧈​ꦲꦮꦶꦠ꧀ꦠꦠꦥ꧀ꦥꦤ꧀ꦲꦔꦶꦤ꧀꧈​ꦏꦶꦫꦏꦶꦫ​ꦗꦩ꧀ꦠꦼꦭꦸ​ꦠꦼꦏꦤꦺ​ꦗꦩ꧀ꦤꦼꦤꦼꦩ꧀ꦲꦺꦱꦸꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦸꦱꦸꦭ꧀ ꦩ꧀ꦭꦏꦸ​ꦤꦁꦩꦺꦂ꧉​ꦏꦺꦠꦺꦴꦏ꧀ꦏꦺ​ꦢꦺꦏ꧀ꦤꦺꦩ꧀ꦭꦏꦸ​ꦠꦼꦫꦸꦱ꧀ ꦏꦪ​ꦲꦉꦥ꧀​ꦔ꧀ꦭꦶꦮꦠ꧀ꦠꦶ​ꦥꦿꦲꦸꦤꦺ​꧉​ 49ꦏꦢꦸꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦮꦼꦫꦸꦃ​ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦭꦏꦸ​ꦤꦁꦧꦚꦸ​ꦠꦼꦫꦸꦱ꧀ꦥꦢ​ꦚ꧀ꦗꦼꦫꦶꦠ꧀꧈​ꦤ꧀ꦢꦫꦤ꧀ꦤꦶꦮꦼꦫꦸꦃ​ꦩꦺꦴꦏ꧀ꦩꦼꦢꦶ꧉​ 50ꦏꦧꦺꦃ​ꦮꦼꦫꦸꦃ​ꦢꦺꦏ꧀ꦤꦺꦠꦼꦫꦸꦱ꧀ꦥꦢ​ꦮꦼꦢꦶ​꧉​

꧋ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦲꦗ​ꦥꦢ​ꦏꦒꦺꦠ꧀!ꦲꦶꦏꦶ​ꦲꦏꦸ​!ꦮꦶꦱ꧀ꦲꦗ​ꦥꦢ​ꦮꦼꦢꦶ​ꦩꦼꦤꦺꦃ​!” 51ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦺꦭꦸ​ꦤꦸꦩ꧀ꦥꦏ꧀ꦥꦿꦲꦸꦤꦺ​ꦭꦤ꧀ꦲꦔꦶꦤ꧀ꦤꦺ​ꦠꦼꦫꦸꦱ꧀ꦩꦤ꧀ꦢꦼꦏ꧀꧈​ 52ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦢꦸꦫꦸꦁ​ꦥꦢ​ꦤꦶꦠꦺꦤ꧀ꦤꦶ​ꦏ꧀ꦮꦱꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦱꦼꦤꦗꦤ꧀ꦤ​ꦮꦼꦫꦸꦃ​ꦢꦺꦏ꧀ꦤꦺꦔꦼꦏꦺꦏ꧀ꦏꦶꦩꦁꦔꦤ꧀ꦮꦺꦴꦁ​ꦭꦶꦩꦁ​ꦲꦺꦮꦸ​꧉​

꧋ꦮꦺꦴꦁ​ꦭꦫ​ꦥꦢ​ꦩꦫꦶ​ꦩꦼꦤꦺꦃ​꧉​

53꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦔꦧꦿꦃꦩꦺꦂꦠꦼꦏꦤ꧀ꦧꦮꦃꦓꦼꦤꦺꦱꦫꦺꦠ꧀꧈​ꦤꦁꦏꦺꦴꦤꦺꦴ​ꦠꦼꦫꦸꦱ꧀ꦩꦼꦢꦸꦤ꧀ꦱꦁꦏꦥꦿꦲꦸꦤꦺ​꧉​ 54ꦮꦺꦴꦁꦮꦺꦴꦁ​ꦥꦢ​ꦤꦶꦠꦺꦤ꧀ꦤꦶ​ꦤꦺꦏ꧀ꦏꦸꦮꦶ​ ꦒꦸꦱ꧀ꦠꦶ​ꦪꦺꦯꦸꦱ꧀꧈​ 55ꦱꦏ꧀ꦮꦠ꧀ꦭꦶꦪꦭꦶꦪꦤꦺ​ꦱꦏ꧀ꦢꦺꦱ​ꦠꦼꦫꦸꦱ꧀ꦢꦶꦲꦺꦴꦩꦺꦴꦁꦔꦶꦏꦧꦺꦃ​꧉​ꦱꦶꦁ​ꦭꦫ​ꦠꦼꦫꦸꦱ꧀ꦢꦶꦒꦺꦴꦠꦺꦴꦁꦔꦶꦱꦏ꧀ꦭꦺꦩꦺꦏ꧀ꦏꦺ꧉​ 56ꦲꦼꦤ꧀ꦢꦶ​ꦮꦲꦺ​ꦱꦶꦁ​ꦢꦶꦠꦼꦏꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ ꦏꦼꦧꦺꦴꦤ꧀ꦤꦤ꧀ ꦢꦺꦱ​ꦲꦥ​ꦏꦸꦠ꧈​ꦮꦺꦴꦁꦮꦺꦴꦁ​ꦩꦼꦱ꧀ꦠꦶꦥꦢ​ꦠꦼꦏ​ꦔ꧀ꦒꦮ​ꦱꦶꦁ​ꦭꦫ​꧈​ꦠꦼꦫꦸꦱ꧀ꦢꦶꦒ꧀ꦭꦺꦠꦏ꧀ꦏꦏꦺꦤꦁꦭꦠꦂꦫꦺ​ꦥꦱꦂ​꧉​ꦮꦺꦴꦁꦮꦺꦴꦁ​ꦥꦢ​ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦭꦶꦭꦤꦶ​ꦱꦶꦁ​ꦭꦫ​ꦤ꧀ꦢꦼꦩꦺꦏ꧀ꦱꦭꦶꦤ꧀ꦤꦺꦢꦺꦏ꧀ꦤꦺ꧈​ꦱꦼꦤꦗꦤ꧀ꦤꦩꦸꦁ​ꦒꦺꦴꦩ꧀ꦧꦾꦺꦴꦏ꧀ꦏꦺ꧉​ꦱꦶꦁ​ꦤ꧀ꦢꦼꦩꦺꦏ꧀ꦠꦼꦫꦸꦱ꧀ꦥꦢ​ꦩꦫꦶ​꧉​ ↑ ↑ ↑


꧋ꦧꦧ꧀ꦥꦼꦂꦤꦠ꧀ꦠꦤ꧀ꦒꦮꦺꦪꦤ꧀ꦤꦺ​ꦩꦤꦸꦁꦱ​꧉​

꧇​꧗꧇​ 1꧋ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦲꦺꦤꦺꦁꦮꦺꦴꦁ​ꦥ꦳ꦫꦶꦱꦶ​ꦭꦤ꧀ꦒꦸꦫꦸ​ꦏꦶꦠꦧ꧀ꦱꦏ꧀ꦏꦿꦺꦴꦩ꧀ꦥꦺꦴꦭ꧀ꦱꦁꦏꦪꦺꦫꦸꦱꦭꦺꦩ꧀ꦠꦼꦏ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ 2ꦮꦺꦴꦁꦮꦺꦴꦁ​ꦲꦶꦏꦶ​ꦮꦼꦫꦸꦃ​ꦤꦺꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦤꦺꦁꦱꦶꦁ​ꦩꦁꦔꦤ꧀ꦠꦤ꧀ꦥ​ꦮꦶꦱꦸꦃ​ꦠꦔꦤ꧀ꦤꦺ​ꦤ꧀ꦢꦶꦱꦶꦏ꧀꧈​ 3ꦥꦫ​ꦥ꦳ꦫꦶꦱꦶ​ꦭꦤ꧀ꦱꦱꦠ꧀ꦠꦺꦮꦺꦴꦁ​ꦙꦸꦏꦧꦺꦃ​ꦭꦸꦩꦿꦃꦲꦺ​ꦮꦶꦱꦸꦃ​ꦤ꧀ꦢꦶꦱꦶꦏ꧀ꦤꦺꦏ꧀ꦲꦉꦥ꧀ꦩꦁꦔꦤ꧀ ꦩꦤꦸꦠ꧀ꦥꦼꦂꦤꦠꦤ꧀ꦤꦺꦩ꧀ꦧꦃꦩ꧀ꦧꦲꦤ꧀ꦤꦺꦩ꧀ꦧꦶꦪꦺꦤ꧀꧈​ 4ꦏꦪ​ꦤꦺꦏ꧀ꦠꦼꦏꦤ꧀ꦥꦱꦂ​ꦲꦩ꧀ꦧꦫꦁ​꧈​ꦩꦼꦱ꧀ꦠꦶꦮꦶꦱꦸꦃ​ꦤ꧀ꦢꦶꦱꦶꦏ꧀ꦱꦏ꧀ꦢꦸꦫꦸꦁꦔꦺꦩꦁꦔꦤ꧀ꦲꦥꦲꦥ​꧉​ꦭꦤ꧀ꦲꦶꦗꦶꦏ꧀ꦲꦺꦤꦺꦁꦥꦼꦂꦤꦠ꧀ꦠꦤ꧀ꦥꦶꦫꦁꦥꦶꦫꦁ​ꦩꦼꦤꦺꦃ​ꦱꦶꦁ​ꦏꦸꦢꦸ​ꦢꦶꦭꦏꦺꦴꦤ꧀ꦤꦶ​꧈​ꦏꦪ​ꦔꦸꦩ꧀ꦧꦃ​ꦩꦁꦏꦺꦴꦏ꧀ ꦕꦁꦏꦶꦂ​ꦭꦤ꧀ꦏꦼꦤ꧀ꦢꦶꦭ꧀꧈​ 5ꦩꦸꦭꦤꦺ​ꦥꦫ​ꦥ꦳ꦫꦶꦱꦶ​ꦭꦤ꧀ꦒꦸꦫꦸꦒꦸꦫꦸ​ꦏꦶꦠꦧ꧀ꦩꦲꦸ​ꦥꦢ​ꦩꦲꦶꦢꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦤꦺ​:“ꦏꦼꦤꦺꦁꦲꦥ​ꦏꦺꦴꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦩꦸꦲꦺꦴꦫ​ꦥꦢ​ꦤꦸꦫꦸꦠ꧀ꦥꦼꦂꦤꦠ꧀ꦠꦤ꧀ꦠꦶꦁꦒꦭꦤ꧀ꦤꦺꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ?ꦏꦺꦴꦏ꧀ꦥꦢ​ꦩꦁꦔꦤ꧀ꦠꦤ꧀ꦥ​ꦮꦶꦱꦸꦃ​ꦤ꧀ꦢꦶꦱꦶꦏ꧀?” 6ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦏꦸꦮꦶ​ꦤꦩꦸꦁ​ꦏꦺꦠꦺꦴꦏ꧀ꦲꦥꦶꦏ꧀​ꦚ꧀ꦗꦧꦤꦺ​꧉​ꦥꦚ꧀ꦕꦺꦤ꧀ꦕꦺꦴꦕꦺꦴꦏ꧀​ꦧꦔꦼꦠ꧀ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦤꦧꦶ​ꦪꦺꦱꦪ​ꦩ꧀ꦧꦶꦪꦺꦤ꧀ꦧꦧ꧀ꦏꦺꦴꦮꦺ​ꦏꦸꦮꦶ​꧈​ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

‘ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​:
ꦧꦁꦱ​ꦲꦶꦏꦶ​ꦲꦼꦁꦒꦺꦴꦤꦺ​ꦩꦼꦩꦸꦗꦶ​ꦲꦏꦸ​ꦤꦩꦸꦁ​ꦏꦫꦺꦴ​ꦭꦩ꧀ꦧꦺꦤꦺ​꧈​
ꦤꦁꦔꦶꦁ​ꦲꦠꦶꦤꦺ​ꦲꦢꦺꦴꦃ​ꦱꦁꦏꦲꦏꦸ​!’
7‘ꦲꦼꦁꦒꦺꦴꦤꦺ​ꦚꦼꦩ꧀ꦧꦃ​ꦩꦫꦁ​ꦲꦏꦸ​ꦲꦺꦴꦫ​ꦲꦺꦤꦺꦁꦒꦸꦤꦤꦺ​꧈​
ꦲꦮꦶꦠ꧀ꦥꦢ​ꦩꦸꦭꦁꦔꦶꦮꦺꦴꦁꦮꦺꦴꦁ​ꦏꦺꦴꦁꦏꦺꦴꦤ꧀​ꦔ꧀ꦭꦏꦺꦴꦤ꧀ꦤꦶ​
ꦥꦼꦂꦤꦠꦤ꧀ꦥꦼꦂꦤꦠ꧀ꦠꦤ꧀ꦒꦮꦺꦪꦤ꧀ꦤꦺ​ꦩꦤꦸꦁꦱ​꧉​’

8꧋“ꦏꦺꦴꦮꦺ​ꦤꦩꦸꦁ​ꦤꦸꦫꦸꦠ꧀ꦥꦼꦂꦤꦠꦤ꧀ꦤꦺꦩꦤꦸꦁꦱ​꧈​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦩꦭꦃ​ꦥꦢ​ꦲꦩ꧀ꦧꦺꦴꦏ꧀ꦱꦶꦁꦏꦶꦂꦫꦏꦺ꧉​

9꧋“ꦥꦚ꧀ꦕꦺꦤ꧀ꦥꦶꦤ꧀ꦠꦼꦂ​ꦔ꧀ꦒꦺꦴꦤ꧀ꦩꦸ​ꦥꦢ​ꦚꦶꦁꦏꦶꦂꦫꦶ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦧꦶꦱ​ꦤꦼꦫꦸꦱ꧀ꦱꦏꦺꦏꦉꦥ꧀ꦩꦸ​ꦢꦺꦮꦺ꧉​ 10ꦤꦧꦶ​ꦩꦺꦴꦱꦼꦱ꧀ꦭꦲꦸꦠ꧀ꦮꦶꦱ꧀ꦠꦲꦸ​ꦔꦺꦴꦩꦺꦴꦁꦔꦺꦤꦺ​ꦠ​:'ꦔꦗꦺꦤ꧀ꦤꦤ​ꦩꦫꦁ​ꦮꦺꦴꦁ​ꦠꦸꦮꦩꦸ​꧉​ꦱꦥ​ꦔꦺꦴꦭꦺꦴꦏ꧀ꦲꦺꦴꦭꦺꦴꦏ꧀ꦧꦥꦧꦶꦪꦸꦁꦔꦺ​ꦏꦸꦢꦸ​ꦢꦶꦥꦠꦺꦤ꧀ꦤꦶ​꧉'​ 11-12ꦤꦁꦔꦶꦁ​ꦏꦺꦴꦮꦺ​ꦩꦭꦃ​ꦥꦢ​ꦩꦸꦭꦁꦔꦶꦔꦺꦤꦺ​:ꦲꦸꦫꦸꦤ꧀ꦤꦤ꧀ꦱꦶꦁ​ꦲꦉꦥ꧀ꦲꦩ꧀ꦧꦺꦴꦏ꧀ꦏꦺꦏ꧀ꦏꦏꦺꦩꦫꦁ​ꦮꦺꦴꦁ​ꦠꦸꦮꦩꦸ​ꦏꦼꦤꦺꦁꦢꦶꦏꦺꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦏꦺꦴꦮꦺ​ꦲꦺꦴꦫ​ꦲꦸꦱꦃꦔꦼꦏꦺꦏ꧀ꦏꦶꦩꦫꦁ​ꦮꦺꦴꦁ​ꦠꦸꦮꦩꦸ​ꦩꦼꦤꦺꦃ​꧉​ 13ꦢꦢꦶꦤꦺ​ꦮꦺꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦲꦩ꧀ꦧꦺꦴꦏ꧀ꦱꦶꦁꦏꦶꦂꦫꦏꦺ꧈​ꦏꦺꦴꦮꦺ​ꦩꦭꦃ​ꦥꦢ​ꦔꦁꦒꦺꦴꦏ꧀ꦏꦏꦺꦥꦼꦂꦤꦠꦤ꧀ꦩꦸꦢꦺꦮꦺ꧉​ꦭꦤ꧀ꦲꦶꦗꦶꦏ꧀ꦲꦺꦤꦺꦁꦭꦶꦪꦭꦶꦪꦤꦺ​ꦩꦼꦤꦺꦃ​ꦧꦧ꧀ꦏꦪ​ꦔꦺꦴꦤꦺꦴ​ꦏꦸꦮꦶ​ꦱꦶꦁ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​!”

꧋ꦧꦫꦁ​ꦱꦶꦁ​ꦩꦫꦏ꧀ꦏꦏꦺꦲꦭ​꧉​

14-15꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦮꦺꦴꦁꦮꦺꦴꦁ​ꦏꦧꦺꦃ​ꦢꦶꦥꦶꦠꦸꦠꦸꦂꦫꦶ​ꦔꦺꦤꦺ​:“ꦠꦼꦩ꧀ꦧꦸꦁꦏꦸ​ꦲꦶꦏꦶ​ꦢꦶꦫꦸꦔꦺꦴꦏ꧀ꦏꦏꦺ​꧈​ꦱꦸꦥꦪ​ꦏꦧꦺꦃ​ꦧꦶꦱ​ꦢꦸꦤꦸꦁꦱꦶꦁ​ꦲꦥꦶꦏ꧀꧈​ꦧꦫꦁ​ꦱꦶꦁ​ꦩ꧀ꦊꦧꦸ​ꦤꦁꦮꦼꦠꦼꦁꦔꦺ​ꦩꦤꦸꦁꦱ​ꦏꦸꦮꦶ​ꦲꦺꦴꦫ​ꦧꦶꦱ​ꦩꦫꦏ꧀ꦏꦏꦺꦲꦭ​꧈​ꦤꦁꦔꦶꦁ​ꦧꦫꦁ​ꦱꦶꦁ​ꦩꦼꦠꦸ​ꦱꦁꦏꦥꦶꦏꦶꦂꦫꦤ꧀ꦤꦺ​꧈​ꦲꦶꦏꦸ​ꦱꦶꦁ​ꦩꦫꦏ꧀ꦏꦏꦺꦩꦤꦸꦁꦱ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​ 16(ꦩꦸꦭꦤꦺ​꧈​ꦢꦶꦫꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀ ꦏꦺꦴꦮꦺ​ꦱꦶꦁ​ꦤ꧀ꦢꦸꦮꦺꦏꦸꦥꦶꦁ​꧉”)

17꧋ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦢꦶꦠꦶꦁꦒꦭ꧀ ꦢꦺꦏ꧀ꦤꦺꦠꦼꦫꦸꦱ꧀​ꦩ꧀ꦊꦧꦸ​ꦲꦺꦴꦩꦃ​꧉​ꦤꦁꦚ꧀ꦗꦼꦫꦺꦴ​ꦲꦺꦴꦩꦃ​ꦏꦺꦴꦤꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦏꦺꦴꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦧ꧀ꦱꦶꦁ​ꦢꦶꦮꦸꦭꦁꦔꦏꦺꦩꦲꦸ​꧈​ꦲꦮꦶꦠ꧀ꦲꦺꦴꦫ​ꦥꦢ​ꦢꦸꦤꦸꦁ꧉​ 18-19ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦩꦺꦴꦱꦺꦴꦏ꧀ꦏꦺꦴꦮꦺ​ꦲꦩ꧀ꦧꦫꦁ​ꦲꦺꦴꦫ​ꦢꦸꦤꦸꦁ꧉​ꦲꦥ​ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦤꦺꦏ꧀ꦧꦫꦁ​ꦱꦶꦁ​ꦢꦶꦥꦔꦤ꧀ꦏꦸꦮꦶ​ꦲꦺꦴꦫ​ꦩ꧀ꦊꦧꦸ​ꦲꦠꦶꦤꦺ​꧈​ꦤꦁꦔꦶꦁ​ꦩ꧀ꦊꦧꦸ​ꦮꦼꦠꦼꦁꦔꦺ​ꦩꦤꦸꦁꦱ​ꦠꦼꦫꦸꦱ꧀ꦩꦼꦠꦸ​ꦩꦼꦤꦺꦃ​꧉​ꦩꦸꦭꦤꦺ​ꦥꦔꦤ꧀ꦤꦤ꧀ꦏꦸꦮꦶ​ꦲꦺꦴꦫ​ꦧꦶꦱ​ꦩꦫꦏ꧀ꦏꦏꦺꦩꦤꦸꦁꦱ​ꦲꦭ​꧉”꧌ꦤꦁꦏꦺꦤꦺ​ꦢꦺꦏ꧀ꦤꦺꦤ꧀ꦢꦸꦤꦸꦁꦔꦏꦺꦤꦺꦏ꧀ꦥꦔꦤ꧀ꦤꦤ꧀ꦲꦥ​ꦮꦲꦺ​ꦏꦼꦤꦺꦁꦢꦶꦥꦔꦤ꧀꧈​)

20꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:“ꦱꦶꦁ​ꦩꦫꦏ꧀ꦏꦏꦺꦩꦤꦸꦁꦱ​ꦔ꧀ꦭꦏꦺꦴꦤ꧀ꦤꦶ​ꦲꦭ​ꦏꦸꦮꦶ​ꦧꦫꦁ​ꦱꦶꦁ​ꦩꦼꦠꦸ​ꦱꦁꦏꦲꦠꦶꦤꦺ​꧈​ꦪꦏꦸꦮꦶ​ꦥꦶꦏꦶꦂꦫꦤ꧀ꦤꦺ​꧉​ 21-22ꦏꦪꦢꦺꦤꦺꦭꦏꦸ​ꦧꦺꦢꦁ꧈​ꦚꦼꦚꦺꦴꦭꦺꦴꦁ​꧈​ꦩꦼꦩꦠꦺꦤ꧀ꦤꦶ​꧈​ꦔꦿꦸꦱꦸꦃꦲꦶꦧꦺꦴꦗꦺꦴꦤꦺ​ꦭꦶꦪꦤꦺ​꧈​ꦩꦸꦂꦏ꧈​ꦱꦿꦏꦃ​꧈​ꦱꦏ꧀ꦮꦼꦂꦤꦤꦺ​ꦥꦼꦁꦒꦮꦺ​ꦲꦭ​꧈​ꦩꦼꦩꦺꦫꦺꦤ꧀ ꦩꦼꦩꦶꦱꦸꦃ​꧈​ꦱꦺꦴꦩ꧀ꦧꦺꦴꦁꦭꦤ꧀ꦱꦼꦩ꧀ꦧꦿꦤ​꧉​” 23ꦏꦸꦮꦶ​ꦏꦧꦺꦃ​ꦩꦼꦠꦸꦤꦺ​ꦱꦁꦏꦥꦶꦏꦶꦂꦫꦤ꧀ꦤꦺ​ ꦩꦤꦸꦁꦱ​꧉​ꦏꦸꦮꦶ​ꦱꦶꦁ​ꦩꦫꦏ꧀ꦏꦏꦺꦩꦤꦸꦁꦱ​ꦲꦭ​꧉​

꧋ꦥꦼꦔꦤ꧀ꦢꦼꦭ꧀ꦭꦺ​ꦮꦺꦴꦁ​ꦮꦺꦢꦺꦴꦏ꧀ꦱꦁꦏꦱꦶꦫꦺꦴ​ꦥ꦳ꦺꦤꦶꦱꦶꦪ​​꧉​

24꧋ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦭꦸꦔ​ꦤꦁꦧꦮꦃꦱꦶꦢꦺꦴꦤ꧀ꦭꦤ꧀ꦠꦶꦫꦸꦱ꧀꧈​ꦤꦁꦏꦺꦴꦤꦺꦴ​ꦢꦺꦏ꧀ꦤꦺꦠꦼꦫꦸꦱ꧀​ꦩ꧀ꦊꦧꦸ​ꦤꦁꦱꦏ꧀ꦮꦶꦗꦶꦤꦺꦲꦺꦴꦩꦃ​꧈​ꦱꦸꦥꦪ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦠꦼꦏ​꧉​ꦤꦁꦔꦶꦁ​ꦮꦺꦴꦁꦮꦺꦴꦁ​ꦩꦼꦏ꧀ꦱ​ꦔꦼꦂꦠꦶ​꧉​ 25-26ꦲꦺꦴꦫ​ꦊꦠ꧀ꦱꦸꦮꦶꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦠꦼꦏ​꧉​ꦮꦺꦴꦁꦔꦺ​ꦏꦿꦸꦔꦸ​ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁ​ꦲꦶꦏꦶ​ꦤ꧀ꦢꦸꦮꦺꦲꦤꦏ꧀ꦮꦺꦢꦺꦴꦏ꧀ꦱꦶꦁ​ꦏꦼꦊꦧꦺꦴꦤ꧀ꦢꦼꦩꦶꦠ꧀꧈​ꦮꦺꦴꦁꦔꦺ​ꦤꦶꦧ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦚꦸꦮꦸꦤ꧀ꦱꦸꦥꦪ​ꦔꦼꦠꦺꦴꦏ꧀ꦏꦏꦺꦢꦼꦩꦶꦠ꧀ꦱꦶꦁ​ꦔ꧀ꦮꦱꦤꦶ​ꦲꦤꦏ꧀ꦏꦺ​꧉​ꦤꦁꦔꦶꦁ​ꦮꦺꦴꦁ​ꦮꦺꦢꦺꦴꦏ꧀ꦲꦶꦏꦶ​ꦢꦸꦢꦸ​ꦮꦺꦴꦁ​ꦙꦸ꧈​ꦢꦺꦏ꧀ꦤꦺꦮꦺꦴꦁ​ꦭꦲꦶꦂꦫꦤ꧀ꦥ꦳ꦺꦤꦶꦱꦶꦪ​ꦤꦁꦤꦼꦒꦫ​ꦯꦶꦫꦺꦴ꧉​ 27ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦲꦃ꧈​ꦲꦩ꧀ꦧꦺꦴꦏ꧀ꦧꦺꦤ꧀ꦲꦤꦏ꧀ꦲꦤꦏ꧀ꦏꦺ​ꦢꦺꦮꦺꦥꦢ​ꦮꦫꦱ꧀ꦩꦸꦤ꧀ꦢꦶꦱꦶꦏ꧀꧈​ꦲꦺꦴꦫ​ꦭꦸꦩꦿꦃ​ꦤꦺꦏ꧀ꦥꦔꦤ꧀ꦤꦺ​ꦲꦤꦏ꧀ꦲꦤꦏ꧀ꦢꦶꦏꦺꦏ꧀ꦏꦏꦺꦲꦱꦸ​!”

28꧋ꦤꦁꦔꦶꦁ​ꦮꦺꦴꦁ​ꦮꦺꦢꦺꦴꦏ꧀ꦏꦺꦱꦼꦩꦲꦸꦂ​:“ꦧꦼꦤꦼꦂ​ꦒꦸꦱ꧀ꦠꦶ​꧈​ꦤꦁꦔꦶꦁ​ꦲꦱꦸꦤꦺꦭꦲꦸꦠ꧀ꦲꦺꦤ꧀ꦠꦸꦏ꧀ꦫꦺꦧꦺꦭꦤꦺꦲꦤꦏ꧀ꦲꦤꦏ꧀ꦠ​?”

29꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦮꦶꦱ꧀ ꦏꦤ​ꦩꦸꦭꦶꦃ​꧉​ꦲꦤꦏ꧀ꦩꦸ​ꦮꦶꦱ꧀ꦩꦫꦶ​꧉​ꦱꦁꦏꦠꦼꦩ꧀ꦧꦸꦁꦩꦸ​ꦏꦸꦮꦶ​ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦥꦽꦕꦪ​ꦩꦫꦁ​ꦲꦏꦸ​!”

30꧋ꦮꦺꦴꦁꦔꦺ​ꦠꦼꦫꦸꦱ꧀ꦩꦸꦭꦶꦃ​꧉​ꦠꦼꦏꦤ꧀ꦲꦺꦴꦩꦃ​ꦤꦼꦩꦸ​ꦲꦤꦏ꧀ꦏꦺ​ꦔ꧀ꦒꦺꦠꦏ꧀ꦲꦤ꧀ꦠꦼꦁ​ꦤꦁꦲꦩ꧀ꦧꦺꦤ꧀꧈​ꦢꦼꦩꦶꦠ꧀ꦠꦺꦮꦶꦱ꧀ꦭꦸꦔ​꧉​

꧋ꦒꦸꦱ꧀ꦠꦶ​ꦤꦩ꧀ꦧꦤꦶ​ꦮꦺꦴꦁ​ꦧꦸꦢꦼꦏ꧀ꦧꦶꦱꦸ꧉​

31꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦸꦔ​ꦱꦁꦏꦧꦮꦃꦠꦶꦫꦸꦱ꧀ꦧꦸꦢꦭ꧀ꦤꦁꦧꦮꦃꦩꦺꦂꦓꦭꦶꦭꦺꦪ​꧉​ꦤꦁꦔꦶꦁ​ꦩ꧀ꦭꦏꦸꦮꦔ꧀ꦭꦶꦮꦠ꧀ꦠꦶ​ꦏꦸꦠꦱꦶꦢꦺꦴꦤ꧀ꦭꦤ꧀ꦧꦮꦃꦢꦺꦏꦥꦺꦴꦭꦶꦱ꧀꧈​ 32ꦤꦁꦓꦭꦶꦭꦺꦪ​ꦏꦺꦴꦤꦺꦴ​ꦲꦺꦤꦺꦁꦮꦺꦴꦁ​ꦱꦶꦁ​ꦧꦸꦢꦼꦏ꧀ꦭꦤ꧀ꦧꦶꦱꦸ​ꦢꦶꦒꦮ​ꦤꦁꦔ꧀ꦒꦺꦴꦤ꧀ꦤꦺꦢꦺꦏ꧀ꦤꦺ꧉​ꦮꦺꦴꦁꦮꦺꦴꦁ​ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦸꦥꦪ​ꦤꦸꦩ꧀ꦥꦁꦔꦶ​ꦠꦔꦤ꧀ꦩꦫꦁ​ꦮꦺꦴꦁ​ꦭꦫ​ꦲꦶꦏꦶ​꧉​ 33ꦮꦺꦴꦁ​ꦧꦸꦢꦼꦏ꧀ꦧꦶꦱꦸꦲꦶꦏꦶ​ꦠꦼꦫꦸꦱ꧀ꦢꦶꦢꦺꦮꦺꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦲꦢꦺꦴꦃ​ꦏꦫꦺꦴ​ꦮꦺꦴꦁꦮꦺꦴꦁ​ꦭꦶꦪꦤꦺ​꧉​ꦏꦸꦥꦶꦁꦔꦺ​ꦮꦺꦴꦁꦔꦺ​ꦏꦧꦺꦃ​ꦭꦺꦴꦫꦺꦴ​ꦠꦼꦫꦸꦱ꧀ꦢꦶꦢꦸꦊꦏ꧀꧈​ꦱꦏ꧀ꦮꦶꦱ꧀ꦱꦺ​ꦔꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦲꦶꦢꦸ​ꦭꦤ꧀​ꦤ꧀ꦢꦼꦩꦺꦏ꧀ꦲꦶꦭꦠ꧀ꦠꦺ​ꦮꦺꦴꦁꦔꦺ​꧉​ 34ꦢꦺꦏ꧀ꦤꦺ​ꦠꦼꦫꦸꦱ꧀ꦚꦮꦁ​ꦤ꧀ꦢꦸꦮꦸꦂꦏꦫꦺꦴ​ꦔꦼꦕꦸꦭ꧀ꦭꦏꦺ​ꦲꦩ꧀ꦧꦼꦏ꧀ꦏꦤ꧀ ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦔꦺ​:“ꦌꦥ꦳ꦠ​!”ꦠꦼꦒꦼꦱ꧀ꦱꦺ​:“ꦩꦼꦔꦲ​!”

35꧋ꦏꦸꦥꦶꦁꦔꦺ​ꦮꦺꦴꦁꦔꦺ​ꦠꦼꦫꦸꦱ꧀ꦧꦶꦱ​ꦏꦿꦸꦔꦸ​ꦭꦤ꧀ꦲꦶꦭꦠ꧀ꦠꦺ​ꦩꦭꦶꦃ​ꦊꦩꦼꦱ꧀ ꦠꦼꦫꦸꦱ꧀ꦧꦶꦱ​ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦪ​ꦱꦏ꧀ꦭꦸꦩꦿꦃꦲꦺ​꧉​ 36ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦁꦔꦶꦁ​ꦮꦺꦴꦁꦮꦺꦴꦁ​ꦔꦧꦂꦔꦧꦂꦫꦏꦺꦊꦭꦏꦺꦴꦤ꧀ꦩꦲꦸ​꧈​ꦤꦁꦔꦶꦁ​ꦮꦺꦴꦁꦮꦺꦴꦁ​ꦩꦭꦃ​ꦥꦢ​ꦤ꧀ꦢꦢꦶ​ꦱꦶꦁ​ꦔꦺꦴꦩꦺꦴꦁꦔꦺꦴꦩꦺꦴꦁꦔꦶꦭꦶꦪꦭꦶꦪꦤꦺ​꧉​ 37ꦏꦧꦺꦃ​ꦥꦢ​ꦔ꧀ꦒꦸꦩꦸꦤ꧀ꦧꦔꦼꦠ꧀ꦭꦤ꧀ꦔꦺꦴꦩꦺꦴꦁ:“ꦮꦃ​꧈​ꦗꦤ꧀ꦚꦠ​ꦠꦼꦤꦤ꧀꧈​ꦢꦺꦏ꧀ꦤꦺ​ꦧꦶꦱ​ꦱꦼꦩ꧀ꦧꦫꦁ​꧉​ꦱꦶꦁ​ꦧꦸꦢꦼꦏ꧀ꦧꦶꦱ​ꦏꦿꦸꦔꦸ​ꦭꦤ꧀ꦱꦶꦁ​ꦧꦶꦱꦸ​ꦧꦶꦱ​ꦔꦺꦴꦩꦺꦴꦁ꧉​” ↑ ↑ ↑


꧋ꦫꦁ​ꦱꦸꦩ꧀ꦩꦤ꧀ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺ꧉​

꧇​꧘꧇​ 1꧋ꦲꦺꦴꦫ​ꦊꦠ꧀ꦱꦸꦮꦶꦮꦺꦴꦁꦮꦺꦴꦁ​ꦥꦢ​ꦔꦸꦩ꧀ꦥꦸꦭ꧀ꦩꦼꦤꦺꦃ​ꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦤꦁꦔꦶꦁ​ꦤꦁꦏꦺꦴꦤꦺꦴ​ꦲꦺꦴꦫ​ꦲꦺꦤꦺꦁꦥꦔꦤ꧀ꦤꦤ꧀ꦲꦥꦲꦥ​꧉​ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦔꦺꦴꦩꦺꦴꦁ: 2“ꦲꦏꦸ​ꦩꦼꦭꦱ꧀ꦩꦫꦁ​ꦮꦺꦴꦁꦮꦺꦴꦁ​!ꦮꦶꦱ꧀ꦠꦼꦭꦸꦁ​ꦢꦶꦤ​ꦱꦸꦮꦺꦤꦺ​ꦮꦺꦴꦁꦮꦺꦴꦁ​ꦥꦢ​ꦩꦺꦭꦸ​ꦲꦏꦸ​ꦭꦤ꧀ꦱꦲꦶꦏꦶ​ꦱꦶꦁ​ꦢꦶꦥꦔꦤ꧀ꦮꦶꦱ꧀ꦲꦼꦤ꧀ꦠꦺꦏ꧀꧈​ 3ꦩꦼꦁꦏꦺꦴ​ꦤꦺꦏ꧀ꦱꦏ꧀ꦢꦸꦫꦸꦁꦔꦺꦩꦁꦔꦤ꧀ꦮꦶꦱ꧀ꦠꦏ꧀ꦏꦺꦴꦁꦏꦺꦴꦤ꧀ꦩꦸꦭꦶꦃ​꧈​ꦩꦼꦤꦮ​ꦧꦶꦱ​ꦲꦩ꧀ꦧꦿꦸꦏ꧀ꦤꦁꦢꦭꦤ꧀꧈​ꦭꦃ​ꦏꦠꦶꦏ꧀ꦲꦺꦤꦺꦁꦱꦶꦁ​ꦲꦺꦴꦩꦃꦲꦺ​ꦲꦢꦺꦴꦃ​ꦥꦶꦱꦤ꧀꧈​”

4꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦱꦼꦩꦲꦸꦂ​:“ꦭꦃ​ꦲꦮꦏ꧀ꦏꦺ​ꦢꦺꦮꦺꦱꦶꦁ​ꦲꦉꦥ꧀ꦔꦼꦏꦺꦏ꧀ꦏꦶꦩꦁꦔꦤ꧀ꦮꦺꦴꦁ​ꦱꦼꦩꦺꦴꦤꦺꦴ​ꦲꦺꦴꦏꦺꦃꦲꦺꦒꦺꦏ꧀ꦏꦼꦥꦿꦶꦪꦺ​?ꦤꦁꦥꦁꦒꦺꦴꦤ꧀ꦤꦤ꧀ꦏꦺꦤꦺ​ꦲꦺꦴꦫ​ꦲꦺꦤꦺꦁꦥꦔꦤ꧀ꦤꦤ꧀ꦲꦥꦲꦥ​!”

5꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦏꦺꦴꦤ꧀:“ꦏꦺꦴꦮꦺ​ꦤ꧀ꦢꦸꦮꦺꦫꦺꦴꦠꦶ​ꦥꦶꦫ​?”

꧋ꦩꦸꦫꦶꦢ꧀ꦢꦺ​ꦱꦼꦩꦲꦸꦂ​:“ꦲꦺꦤꦺꦁꦥꦶꦠꦸ​!”

6꧋ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀​ꦚ꧀ꦗꦒꦺꦴꦁꦏꦧꦺꦃ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦚ꧀ꦗꦶꦏꦸꦏ꧀ꦫꦺꦴꦠꦶ​ꦥꦶꦠꦸ​ꦩꦲꦸ​꧉​ꦱꦏ꧀ꦮꦶꦱ꧀ꦱꦺ​ꦢꦶꦢꦺꦴꦔꦏ꧀ꦏꦏꦺꦠꦼꦫꦸꦱ꧀ꦢꦶꦕꦸꦮꦶꦭ꧀ꦕꦸꦮꦶꦭ꧀ꦢꦶꦏꦺꦏ꧀ꦏꦏꦺꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦺꦴꦁꦏꦺꦴꦤ꧀ꦔꦼꦢꦸꦩ꧀ꦩꦫꦁ​ꦮꦺꦴꦁꦮꦺꦴꦁ​꧉​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦢꦶꦲꦼꦢꦸꦩ꧀ꦩꦶ꧉​ 7ꦲꦺꦤꦺꦁꦱꦶꦁ​ꦤ꧀ꦢꦸꦮꦺꦲꦶꦮꦏ꧀ꦲꦩ꧀ꦧꦫꦁ​꧉​ꦲꦶꦮꦏ꧀ꦏꦺ​ꦠꦼꦫꦸꦱ꧀ꦢꦶꦢꦺꦴꦔꦏ꧀ꦏꦏꦺꦠꦼꦫꦸꦱ꧀ꦏꦺꦴꦁꦏꦺꦴꦤ꧀ꦔꦼꦢꦸꦩ꧀ꦲꦸꦒ​꧉​ 8ꦮꦺꦴꦁ​ꦏꦧꦺꦃ​ꦩꦁꦔꦤ꧀ꦱꦩ꧀ꦥꦺꦏ꧀ꦮꦫꦱ꧀ꦩꦸ꧉​ꦠꦸꦫꦃꦲꦤ꧀ꦤꦺ​ꦢꦶꦭꦸꦩ꧀ꦥꦸꦏ꧀ꦏꦏꦺꦲꦺꦤꦺꦁꦥꦶꦠꦸꦁ​ꦠꦺꦁꦒꦺꦴꦏ꧀꧈​ 9ꦱꦶꦁ​ꦩꦺꦭꦸ​ꦩꦁꦔꦤ꧀ꦏꦶꦫꦏꦶꦫ​ꦲꦺꦤꦺꦁꦮꦺꦴꦁ​ꦥꦠꦁ​ꦲꦺꦮꦸ​꧉​ 10ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦤꦸꦩ꧀ꦥꦏ꧀ꦥꦿꦲꦸ​ꦧꦸꦢꦭ꧀ꦤꦁꦧꦮꦃꦣꦭ꧀ꦩꦤꦸꦠꦃ꧉​

꧋ꦮꦺꦴꦁ​ꦥ꦳ꦫꦶꦱꦶ​ꦏꦼꦥꦺꦔꦶꦤ꧀ꦮꦼꦫꦸꦃ​ꦠꦤ꧀ꦢ꧉​

11꧋ꦲꦺꦤꦺꦁꦮꦺꦴꦁ​ꦥ꦳ꦫꦶꦱꦶ​ꦥꦢ​ꦩꦫꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦧꦤ꧀ꦠꦃꦧꦤ꧀ꦠꦃꦲꦤ꧀ꦏꦫꦺꦴ​ ꦢꦺꦏ꧀ꦤꦺ꧉​ꦮꦺꦴꦁ​ꦥ꦳ꦫꦶꦱꦶ​ꦩꦲꦸ​ꦲꦉꦥ꧀ꦔꦼꦤꦺꦁꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦥꦢ​ꦚ꧀ꦗꦭꦸꦏ꧀ꦠꦤ꧀ꦢꦤꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦢꦺꦏ꧀ꦤꦺ꧉​ 12ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦱꦩ꧀ꦧꦠ꧀ꦲꦶꦁ​ꦲꦠꦶ​ꦭꦤ꧀ꦔꦺꦴꦩꦺꦴꦁ:“ꦏꦼꦤꦺꦁꦲꦥ​ꦮꦺꦴꦁꦮꦺꦴꦁ​ꦲꦶꦏꦶ​ꦏꦺꦴꦏ꧀ꦥꦢ​ꦏꦼꦥꦺꦔꦶꦤ꧀ꦮꦼꦫꦸꦃ​ꦠꦤ꧀ꦢ?ꦲꦺꦴꦫ​꧈​ꦲꦺꦴꦫ​ꦧꦏꦭ꧀ꦠꦏ꧀ꦏꦺꦏ꧀ꦏꦶꦠꦤ꧀ꦢ!”

13꧋ꦮꦺꦴꦁꦮꦺꦴꦁ​ꦩꦲꦸ​ꦠꦼꦫꦸꦱ꧀ꦢꦶꦠꦶꦁꦒꦭ꧀꧈​ꦢꦺꦏ꧀ꦤꦺꦠꦼꦫꦸꦱ꧀ꦔꦧꦿꦃꦏꦫꦺꦴ​ꦥꦿꦲꦸꦤꦺ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦚꦼꦤꦺꦤ꧀ꦤꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​

14꧋ꦤꦁꦥꦿꦲꦸꦤꦺ​ꦤꦩꦸꦁ​ꦲꦺꦤꦺꦁꦫꦺꦴꦠꦶ​ꦱꦶꦗꦶ​꧈​ꦲꦮꦶꦠ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦭꦭꦶ​ꦔ꧀ꦒꦮ​ꦭꦶꦪꦤꦺ​꧉​ 15ꦏꦢꦸꦁ​ꦥꦿꦲꦸꦤꦺ​ꦮꦶꦱ꧀​ꦩ꧀ꦭꦏꦸ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦸꦭꦁꦔꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦔꦺꦴꦩꦺꦴꦁ:“ꦏꦺꦴꦮꦺ​ꦏꦸꦢꦸ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦏꦫꦺꦴ​ꦫꦒꦶꦤꦺ​ꦮꦺꦴꦁ​ꦥ꦳ꦫꦶꦱꦶ​ꦭꦤ꧀ꦫꦒꦶꦤꦺ​ꦲ꦳ꦺꦫꦺꦴꦢꦺꦱ꧀꧉”꧌ꦒꦸꦱ꧀ꦠꦶ​ꦪꦺꦯꦸꦱ꧀ꦱꦏ꧀ꦗꦤꦺꦔꦺꦴꦩꦺꦴꦁ:“ꦱꦶꦁ​ꦲꦠꦶꦲꦠꦶꦏꦫꦺꦴ​ꦥꦶꦮꦸꦭꦁꦔꦺ​ꦥꦫ​ꦥ꦳ꦫꦶꦱꦶ​ꦭꦤ꧀ꦥꦶꦮꦸꦭꦁꦔꦺ​ꦲ꦳ꦺꦫꦺꦴꦢꦺꦱ꧀꧉”)

16꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦲꦺꦴꦫ​ꦢꦸꦤꦸꦁꦲꦥ​ꦠꦼꦒꦼꦱ꧀ꦱꦺ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦩꦸꦭꦤꦺ​ꦥꦢ​ꦠꦏꦺꦴꦤ꧀ꦩꦫꦁ​ꦱꦏ꧀ꦥꦢꦥꦢ:“ꦒꦸꦱ꧀ꦠꦶ​ꦏꦸꦮꦶ​ꦱꦏ꧀ꦗꦤꦺꦔꦺꦴꦩꦺꦴꦁꦔꦏꦺꦧꦧ꧀ꦲꦥ​ꦪ​?ꦩꦼꦱ꧀ꦠꦶꦤꦺꦮꦲꦺ​ꦪ​ꦱꦁꦏꦶꦁꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦱꦔꦸꦫꦺꦴꦠꦶ​꧈​ꦩꦸꦭꦤꦺ​ꦒꦸꦱ꧀ꦠꦶ​ꦔꦺꦴꦩꦺꦴꦁꦔꦺꦴꦤꦺꦴ​!”

17꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦂꦠꦶ​ꦱꦶꦁ​ꦢꦶꦉꦩ꧀ꦧꦸꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦏꦺꦴꦏ꧀ꦥꦢ​ꦫꦩꦺ​ꦔꦺꦴꦩꦺꦴꦁꦔꦏꦺꦧꦧ꧀ꦫꦺꦴꦠꦶ​꧉​ꦩꦺꦴꦱꦺꦴꦏ꧀ꦏꦺꦴꦮꦺ​ꦢꦸꦫꦸꦁ​ꦥꦢ​ꦤꦶꦠꦺꦤ꧀ꦤꦶ​ꦭꦤ꧀ꦢꦸꦫꦸꦁ​ꦢꦸꦤꦸꦁ?ꦏꦺꦴꦮꦺ​ꦏꦺꦴꦏ꧀ꦲꦔꦺꦭ꧀ꦧꦔꦼꦠ꧀! 18ꦩꦺꦴꦱꦺꦴꦏ꧀ꦏꦺꦴꦮꦺ​ꦤ꧀ꦢꦸꦮꦺꦩꦿꦶꦥꦠ꧀ ꦤꦁꦔꦶꦁ​ꦲꦺꦴꦫ​ꦧꦶꦱ​ꦮꦼꦫꦸꦃ​꧉​ꦭꦤ꧀ꦏꦸꦥꦶꦁꦩꦸ​ꦏꦸꦮꦶ​ꦏꦁꦒꦺꦴ​ꦔꦥ​ꦏꦺꦴꦏ꧀ꦲꦺꦴꦫ​ꦥꦢ​ꦏꦿꦸꦔꦸ​?ꦲꦥ​ꦲꦺꦴꦫ​ꦲꦺꦤꦺꦁꦱꦶꦁ​ꦏꦺꦭꦶꦁꦔꦤ꧀? 19ꦢꦺꦴꦁꦔꦺꦲꦏꦸ​ꦚꦸꦮꦶꦭ꧀ꦚꦸꦮꦶꦭ꧀ꦫꦺꦴꦠꦶ​ꦭꦶꦩ​ꦏꦁꦒꦺꦴ​ꦔꦼꦏꦺꦏ꧀ꦏꦶꦩꦁꦔꦤ꧀ꦮꦺꦴꦁ​ꦭꦶꦩꦁ​ꦲꦺꦮꦸ​ꦏꦲꦺ​꧈​ꦥꦶꦫꦁ​ꦠꦺꦁꦒꦺꦴꦏ꧀ꦱꦶꦁ​ꦠꦸꦫꦃ​?ꦮꦶꦱ꧀ꦭꦭꦶ​?”

꧋ꦩꦸꦫꦶꦢ꧀ꦢꦺ​ꦥꦢ​ꦱꦼꦩꦲꦸꦂ​:“ꦫꦺꦴꦭꦱ꧀ꦠꦺꦁꦒꦺꦴꦏ꧀!”

20꧋“ꦭꦤ꧀ꦭꦶꦪꦤꦺ​ꦢꦶꦤ​ꦩꦼꦤꦺꦃ​꧈​ꦢꦺꦴꦁꦔꦺꦲꦏꦸ​ꦔꦼꦏꦺꦏ꧀ꦏꦶꦩꦁꦔꦤ꧀ꦮꦺꦴꦁ​ꦥꦠꦁ​ꦲꦺꦮꦸ​ꦏꦫꦺꦴ​ꦫꦺꦴꦠꦶ​ꦥꦶꦠꦸ​꧈​ꦥꦶꦫꦁ​ꦠꦺꦁꦒꦺꦴꦏ꧀ꦱꦶꦁ​ꦠꦸꦫꦃ​?”

꧋ꦩꦸꦫꦶꦢ꧀ꦢꦺ​ꦱꦼꦩꦲꦸꦂ​:“ꦥꦶꦠꦸꦁ​ꦠꦺꦁꦒꦺꦴꦏ꧀!” 21ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃ​ꦏꦺꦴꦮꦺ​ꦏꦺꦴꦏ꧀ꦢꦸꦫꦸꦁ​ꦢꦸꦤꦸꦁꦤꦺꦏ꧀ ꦏꦼꦏꦸꦫꦁꦔꦤ꧀ꦫꦺꦴꦠꦶ​ꦏꦸꦮꦶ​ꦲꦺꦴꦫ​ꦏꦼꦤꦺꦁꦤ꧀ꦢꦢꦺꦏ꧀ꦏꦏꦺꦧꦶꦔꦸꦁ​ꦭꦤ꧀ꦫꦺꦥꦺꦴꦠ꧀꧈​ꦩꦸꦭꦤꦺ​꧈​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦩꦲꦸ​ꦥꦽꦏꦫ​ꦭꦶꦪꦤꦺ​꧉​”

꧋ꦮꦺꦴꦁ​ꦭꦩꦸꦂ​ꦧꦶꦱ​ꦮꦼꦫꦸꦃ​ꦩꦼꦤꦺꦃ​꧉​

22꧋ꦱꦲꦶꦏꦶ​ꦥꦢ​ꦠꦼꦏꦤ꧀ꦢꦺꦱ​ꦧꦺꦠ꧀ꦱꦲꦶꦢ​꧉​ꦤꦁꦏꦺꦴꦤꦺꦴ​ꦲꦺꦤꦺꦁꦮꦺꦴꦁ​ꦭꦩꦸꦂ​ꦢꦶꦒꦮ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦱꦶꦁ​ꦔ꧀ꦒꦮ​ꦥꦢ​ꦚꦸꦮꦸꦤ꧀ꦩꦫꦁ​ꦢꦺꦏ꧀ꦤꦺꦤ꧀ꦢꦼꦩꦺꦏ꧀ꦮꦺꦴꦁ​ꦱꦶꦁ​ꦭꦩꦸꦂ​꧉​ 23ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦏꦼꦭ꧀ꦠꦔꦤ꧀ꦤꦺ​ꦮꦺꦴꦁꦔꦺ​ꦱꦶꦁ​ꦭꦩꦸꦂ​ꦠꦼꦫꦸꦱ꧀ꦢꦶꦒꦮ​ꦩꦼꦠꦸ​ꦤꦁꦚ꧀ꦗꦧꦤꦺ​ꦢꦺꦱ​꧉​ꦤꦁꦏꦺꦴꦤꦺꦴ​ꦩꦿꦶꦥꦠ꧀ꦠꦺ​ꦠꦼꦫꦸꦱ꧀ꦢꦶꦲꦶꦢꦺꦴꦤ꧀ꦤꦶ​꧉​ꦮꦺꦴꦁꦔꦺ​ꦢꦶꦠꦸꦩ꧀ꦥꦁꦔꦶ​ꦠꦔꦤ꧀ꦭꦤ꧀ꦢꦶꦠꦏꦺꦴꦤ꧀ꦤꦶ​:“ꦏꦺꦴꦮꦺ​ꦮꦼꦫꦸꦃ​ꦲꦥ​?”

24꧋ꦮꦺꦴꦁꦔꦺ​ꦠꦼꦫꦸꦱ꧀​ꦤ꧀ꦢꦼꦔꦺꦴꦔꦺꦴꦏ꧀ꦭꦤ꧀ꦱꦼꦩꦲꦸꦂ​:“ꦲꦏꦸ​ꦮꦼꦫꦸꦃ​ꦮꦺꦴꦁꦮꦺꦴꦁ​꧈​ꦤꦁꦔꦶꦁ​ꦏꦺꦠꦺꦴꦏ꧀ꦏꦺ​ꦏꦪ​ꦮꦶꦠ꧀ꦮꦶꦠ꧀ꦠꦤ꧀​ꦩ꧀ꦭꦏꦸ​꧉​”

25꧋ꦩꦿꦶꦥꦠ꧀ꦠꦺ​ꦠꦼꦫꦸꦱ꧀ꦢꦶꦢꦼꦩꦺꦏ꧀ꦱꦼꦥꦶꦱ꧀ꦱꦤ꧀ꦩꦼꦤꦺꦃ​꧉​ꦱꦲꦶꦏꦶ​ꦠꦼꦫꦸꦱ꧀ꦩꦫꦶ​ꦭꦤ꧀ꦮꦺꦴꦁꦔꦺ​ꦧꦶꦱ​ꦮꦼꦫꦸꦃ​ꦩꦠ꧀꧈​ 26ꦮꦺꦴꦁ​ꦔꦺ​ꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦩꦸꦭꦶꦃ​ꦭꦤ꧀ꦢꦶꦥꦼꦔꦶꦁ​ꦧꦭꦶꦏ꧀ꦩꦼꦤꦺꦃ​ꦤꦁꦢꦺꦱꦤꦺ​꧉​

꧋ꦥꦼꦔꦏꦺꦴꦤ꧀ꦤꦺ​ꦫꦱꦸꦭ꧀ꦦꦺꦠꦿꦸꦱ꧀꧈​

27꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦧꦸꦢꦭ꧀ꦤꦁꦢꦺꦱꦢꦺꦱ​ꦤꦁꦱꦏ꧀ꦏꦶꦮꦠꦼꦔꦼꦤ꧀ꦤꦺ​ꦏꦸꦠꦯꦺꦱꦫꦺꦪꦥ꦳ꦶꦭꦶꦥꦶ​꧉​ꦢꦺꦴꦁꦔꦺꦥꦢ​ꦩ꧀ꦭꦏꦸ​ꦢꦺꦏ꧀ꦤꦺꦠꦏꦺꦴꦤ꧀ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦮꦺꦴꦁꦮꦺꦴꦁ​ꦔꦫꦤ꧀ꦤꦶ​ꦲꦏꦸ​ꦲꦶꦏꦶ​ꦱꦥ​?” 28ꦩꦸꦫꦶꦢ꧀ꦢꦺ​ꦥꦢ​ꦱꦼꦩꦲꦸꦂ​:“ꦮꦃ​꧈​ꦮꦶꦱ꧀ꦮꦼꦂꦤꦮꦼꦂꦤ​!ꦲꦺꦤꦺꦁꦱꦶꦁ​ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦏꦸꦮꦶ​ꦪꦺꦴꦲꦤꦼꦱ꧀ꦥꦼꦩ꧀ꦧꦥ꧀ꦠꦶꦱ꧀꧈​ꦭꦶꦪꦤꦺ​ꦔꦫꦤ꧀ꦤꦶ​ꦏꦺꦴꦮꦺ​ꦏꦸꦮꦶ​ꦤꦧꦶ​ꦌꦭꦶꦪ​꧉​ꦲꦺꦤꦺꦁꦩꦼꦤꦺꦃ​ꦱꦶꦁ​ꦔꦺꦴꦩꦺꦴꦁꦤꦺꦏ꧀ꦏꦺꦴꦮꦺ​ꦏꦸꦮꦶ​ꦱꦏ꧀ꦮꦶꦗꦶꦤꦺꦤꦧꦶ​ꦗꦩꦤ꧀​ꦩ꧀ꦧꦶꦪꦺꦤ꧀ꦱꦶꦁ​ꦱꦲꦶꦏꦶ​ꦠꦼꦏ​ꦩꦼꦤꦺꦃ​꧉​”

29꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦭꦃ​ꦏꦺꦴꦮꦺ​ꦏꦼꦥꦿꦶꦪꦺ​?ꦲꦏꦸ​ꦲꦶꦏꦶ​ꦱꦥ​?”

꧋ꦫꦱꦸꦭ꧀ꦦꦺꦠꦿꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦏꦸꦮꦶ​ꦏꦿꦶꦱ꧀ꦡꦸꦱ꧀!”

30꧋ꦱꦏ꧀ꦮꦶꦱ꧀ꦱꦺ​ꦏꦿꦸꦔꦸ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦁꦔꦶꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦔꦧꦂꦔꦧꦂꦫꦏꦺꦤꦺꦏ꧀ꦢꦺꦏ꧀ꦤꦺꦏꦸꦮꦶ​ꦏꦿꦶꦱ꧀ꦡꦸꦱ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦏꦺꦧꦧ꧀ꦱꦁꦱꦫ​ꦭꦤ꧀ꦥꦠꦶꦤꦺ​꧉​

31꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦺꦴꦭꦃꦲꦶꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦤꦺꦏ꧀ꦢꦺꦏ꧀ꦤꦺꦏꦸꦮꦶ​ꦲꦤꦏ꧀ꦏꦺ​ꦩꦤꦸꦁꦱ​ꦱꦶꦁ​ꦧꦏꦭ꧀​ꦔ꧀ꦭꦏꦺꦴꦤ꧀ꦤꦶ​ꦱꦁꦱꦫ​ꦲꦺꦴꦏꦺꦃ꧉​ꦢꦺꦏ꧀ꦤꦺꦧꦏꦭ꧀ꦢꦶꦱꦼꦥꦺꦭꦺꦏ꧀ꦏꦏꦺꦏꦫꦺꦴ​ꦥꦫ​ꦥꦶꦤꦶꦠꦸꦮ​꧈​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦒꦸꦫꦸꦒꦸꦫꦸ​ ꦏꦶꦠꦧ꧀꧈​ꦢꦺꦏ꧀ꦤꦺꦧꦏꦭ꧀ꦢꦶꦥꦠꦺꦤ꧀ꦤꦶ​꧈​ꦤꦁꦔꦶꦁ​ꦧꦏꦭ꧀ꦠꦔꦶ​ꦩꦼꦤꦺꦃ​ꦲꦶꦁ​ꦠꦼꦭꦸꦁ​ꦢꦶꦤꦤꦺ​꧉​ 32ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦔꦺꦴꦩꦺꦴꦁꦔꦏꦺꦧꦧ꧀ꦏꦸꦮꦶ​ꦪ​ꦧ꧀ꦭꦏ​ꦮꦲꦺ​꧉​ꦏꦿꦸꦔꦸ​ꦏꦸꦮꦶ​ꦩꦲꦸ​ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦤꦁꦔꦶꦁ​ꦠꦤ꧀ꦥ​ꦭꦶꦪꦤꦺ​ꦏꦿꦸꦔꦸ​:“ꦒꦸꦱ꧀ꦠꦶ​꧈​ꦲꦩ꧀ꦧꦺꦴꦏ꧀ꦲꦗ​ꦔꦺꦴꦩꦺꦴꦁꦏꦪ​ꦔꦺꦴꦤꦺꦴ​!” 33ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦭꦃ​ꦩꦶꦔꦼꦂ​ꦤ꧀ꦢꦼꦭꦺꦴꦏ꧀ꦏꦏꦺꦩꦸꦫꦶꦢ꧀ꦩꦸꦫꦶꦢ꧀ꦭꦶꦪꦤꦺ​ꦠꦼꦫꦸꦱ꧀ꦚꦼꦤꦺꦤ꧀ꦤꦶꦫꦱꦸꦭ꧀ꦦꦺꦠꦿꦸꦱ꧀:“ꦭꦸꦔꦲ​ꦱꦁꦏꦔꦉꦥ꧀ꦏꦸ​ꦱꦺꦠꦤ꧀ ꦲꦮꦶꦠ꧀ꦏꦺꦴꦮꦺ​ꦲꦺꦴꦫ​ꦩꦤꦸꦠ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦩꦤꦸꦠ꧀ꦥꦶꦏꦶꦂꦫꦤ꧀ꦤꦺ​ꦩꦤꦸꦁꦱ​꧉​”

꧋ꦩꦸꦫꦶꦢ꧀ꦱꦶꦁ​ꦱꦼꦗꦠꦶ​꧉​

34꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦮꦺꦴꦁꦮꦺꦴꦁ​ꦱꦶꦁ​ꦤꦁꦏꦺꦴꦤꦺꦴ​ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦲꦩ꧀ꦧꦫꦁ​ꦢꦶꦲꦺꦴꦩꦺꦴꦁꦔꦶꦔꦺꦤꦺ​:“ꦱꦥ​ꦱꦶꦁ​ꦏꦼꦥꦺꦔꦶꦤ꧀ꦢꦢꦶ​ꦩꦸꦫꦶꦢ꧀ꦏꦸ​ꦏꦸꦢꦸ​ꦱꦒꦸꦃ​ꦤꦶꦁꦒꦭ꧀ꦏꦼꦏꦉꦥ꧀ꦥꦤ꧀ꦤꦺ​ꦢꦺꦮꦺ꧈​ꦩꦁꦒꦸꦭ꧀ꦥꦼꦤ꧀ꦠꦺꦔꦤ꧀ꦤꦺꦭꦤ꧀ꦩꦺꦭꦸ​ꦲꦏꦸ​꧉​ 35ꦲꦮꦶꦠ꧀ꦱꦥ​ꦱꦶꦁ​ꦲꦺꦩꦤ꧀ꦲꦸꦫꦶꦥ꧀ꦥꦺ꧈​ꦪꦏꦸꦮꦶ​ꦱꦶꦁ​ꦧꦏꦭ꧀ꦏꦺꦭꦁꦔꦤ꧀꧈​ꦤꦁꦔꦶꦁ​ꦱꦥ​ꦱꦶꦁ​ꦔ꧀ꦭꦧꦸꦃꦲꦶ​ꦲꦏꦸ​ꦭꦤ꧀ꦏꦧꦂ​ꦏꦧꦸꦔꦃꦲꦤ꧀ꦠꦼꦏꦤ꧀ꦥꦠꦶ​꧈​ꦮꦺꦴꦁ​ꦏꦸꦮꦶ​ꦚꦮꦤꦺ​ꦧꦏꦭ꧀ꦱ꧀ꦭꦩꦼꦠ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​ 36ꦭꦤ꧀ꦩꦼꦤꦺꦃ​꧈​ꦱꦼꦤꦗꦤ꧀ꦤ​ꦱꦼꦩ꧀ꦧꦫꦁ​ꦱꦶꦁ​ꦲꦩ꧀ꦧꦺꦴꦏ꧀ꦒꦺꦴꦭꦺꦏ꧀ꦏꦶꦭꦤ꧀ꦲꦩ꧀ꦧꦺꦴꦏ꧀ꦱꦼꦤꦼꦁꦔꦶ​ꦧꦶꦱ​ꦏꦼꦠꦸꦫꦸꦠ꧀ꦠꦤ꧀ꦏꦧꦺꦃ​꧈​ꦲꦥ​ꦒꦸꦤꦤꦺ​꧈​ꦤꦺꦏ꧀ꦏꦺꦴꦮꦺ​ꦏꦺꦭꦁꦔꦤ꧀ꦚꦮꦩꦸ​? 37ꦲꦥ​ꦲꦶꦁ​ꦢꦺꦴꦚ​ꦏꦺꦤꦺ​ꦱꦶꦁ​ꦏꦼꦤꦺꦁꦢꦢꦶ​ꦲꦶꦗꦺꦴꦭ꧀ꦭꦺ​ꦚꦮꦩꦸ​?ꦭꦲꦸꦠ꧀ꦲꦺꦴꦫ​ꦲꦺꦤꦺꦁꦠ​? 38ꦩꦸꦭꦤꦺ​꧈​ꦱꦥ​ꦱꦶꦁ​ꦲꦶꦱꦶꦤ꧀ꦔꦏꦺꦴꦤ꧀ꦤꦶ​ꦲꦏꦸ​ꦭꦤ꧀ꦥꦶꦮꦸꦭꦁꦏꦸ​ꦲꦶꦁ​ꦗꦩꦤ꧀ꦱꦶꦁ​ꦏꦼꦧꦼꦏ꧀ꦲꦭ​ꦲꦶꦏꦶ​꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦲꦤꦏ꧀ꦏꦺ​ꦩꦤꦸꦁꦱ​ꦠꦼꦏ​꧈​ꦧꦉꦁ​ꦏꦫꦺꦴ​ꦩꦸꦭꦺꦏꦠ꧀ꦩꦸꦭꦺꦏꦠ꧀ꦱꦶꦁ​ꦱꦸꦕꦶ​ꦔꦁꦒꦺꦴ​ꦏꦩꦸꦭꦾꦤꦺ​ꦧꦥꦏ꧀ꦏꦺ꧈​ꦢꦺꦏ꧀ꦤꦺꦪ​ꦲꦺꦴꦫ​ꦧꦏꦭ꧀ꦔꦏꦸ​ꦤꦺꦏ꧀ꦏꦼꦤꦭ꧀ꦮꦺꦴꦁ​ꦏꦸꦮꦶ​꧉​” ↑ ↑ ↑


 

꧇​꧙꧇​ 1꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:“ꦲꦩ꧀ꦧꦺꦴꦏ꧀ꦢꦶꦠꦶꦠꦺꦤ꧀ꦤꦶ​ꦠ​!ꦤꦁꦠꦼꦔꦃꦲꦺ​ꦮꦺꦴꦁꦮꦺꦴꦁ​ꦱꦶꦁ​ꦤꦁꦏꦺꦤꦺ​ꦲꦶꦏꦶ​ꦲꦺꦤꦺꦁꦱꦶꦁ​ꦧꦏꦭ꧀ꦲꦺꦴꦫ​ꦩꦠꦶ​꧈​ꦱꦏ꧀ꦢꦸꦫꦸꦁꦔꦺꦮꦼꦫꦸꦃ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦏ​ꦔꦁꦒꦺꦴ​ꦥꦔ꧀ꦮꦱ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦏꦫꦺꦴ​ꦤꦧꦶ​ꦩꦺꦴꦱꦼꦱ꧀ꦭꦤ꧀ꦤꦧꦶ​ꦌꦭꦶꦪ​꧉​

2꧋ꦤꦼꦩ꧀ꦢꦶꦤ​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦼꦗꦺꦏ꧀ꦫꦱꦸꦭ꧀ꦦꦺꦠꦿꦸꦱ꧀ ꦪꦺꦴꦲꦤꦼꦱ꧀ꦭꦤ꧀ꦪꦏꦺꦴꦧꦸꦱ꧀ꦩꦸꦁꦒꦃ​ꦤꦁꦒꦸꦤꦸꦁ​ꦢꦸꦮꦸꦂ꧉​ꦏꦼꦗꦧ​ꦮꦺꦴꦁ​ꦥꦥꦠ꧀ꦲꦶꦏꦶ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦭꦶꦪꦤꦺ​ꦩꦼꦤꦺꦃ​꧉​ꦤꦁꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦭꦶꦃ​꧉​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦮꦼꦫꦸꦃ​ꦏꦧꦺꦃ​꧉​ 3ꦱꦭꦶꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦩꦭꦶꦃ​ꦥꦸꦠꦶꦃ​ꦱꦸꦩꦼꦧ꧀ꦭꦏ꧀ ꦗꦤ꧀ꦥꦸꦠꦶꦠꦼꦤꦤ꧀꧈​ 4ꦫꦱꦸꦭ꧀ꦦꦺꦠꦿꦸꦱ꧀ ꦪꦺꦴꦲꦤꦼꦱ꧀ꦭꦤ꧀ꦪꦏꦺꦴꦧꦸꦱ꧀ꦠꦼꦫꦸꦱ꧀ꦮꦼꦫꦸꦃ​ꦤꦧꦶ​ꦩꦺꦴꦱꦼꦱ꧀ꦭꦤ꧀ꦤꦧꦶ​ꦌꦭꦶꦪ​ꦲꦺꦴꦩꦺꦴꦁꦔꦺꦴꦩꦺꦴꦁꦔꦤ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 5ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦒꦸꦱ꧀ꦠꦶ​꧈​ꦏꦺꦴꦏ꧀​ꦤ꧀ꦢꦶꦭꦭꦃꦠꦼꦩꦼꦤ꧀ꦲꦮꦏ꧀ꦏꦺ​ꦢꦺꦮꦺꦤꦁꦏꦺꦤꦺ​꧉​ꦲꦥꦶꦏ꧀ꦏꦺ​ꦲꦮꦏ꧀ꦏꦺ​ꦢꦺꦮꦺꦔ꧀ꦒꦮꦺ​ꦒꦸꦧꦸꦏ꧀ꦠꦼꦭꦸ​ꦮꦲꦺ​꧈​ꦱꦶꦗꦶ​ꦏꦁꦒꦺꦴ​ꦏꦺꦴꦮꦺ​꧈​ꦱꦶꦗꦶ​ꦏꦁꦒꦺꦴ​ꦤꦧꦶ​ꦩꦺꦴꦱꦼꦱ꧀ꦭꦤ꧀ꦱꦶꦗꦶ​ꦩꦼꦤꦺꦃ​ꦏꦁꦒꦺꦴ​ꦤꦧꦶ​ꦌꦭꦶꦪ​꧉​” 6ꦫꦱꦸꦭ꧀ꦦꦺꦠꦿꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦲꦮꦶꦠ꧀ꦲꦺꦴꦫ​ꦔꦼꦂꦠꦶ​ꦏꦸꦢꦸ​ꦔꦺꦴꦩꦺꦴꦁꦲꦥ​꧈​ꦱꦁꦏꦶꦁꦏꦒꦺꦠ꧀ꦠꦺ​꧉​

7꧋ꦠꦼꦫꦸꦱ꧀ꦲꦺꦤꦺꦁꦩꦺꦒ​ꦠꦼꦏ​꧈​ꦲꦪꦁꦔꦪꦁꦔꦺꦤꦸꦠꦸꦥ꧀ꦥꦶ​ꦮꦺꦴꦁꦮꦺꦴꦁ​꧉​ꦱꦁꦏꦩꦺꦒ​ꦩꦲꦸ​ꦠꦼꦫꦸꦱ꧀ꦲꦺꦤꦺꦁꦱ꧀ꦮꦫ​ꦔꦺꦴꦩꦺꦴꦁ:“ꦲꦶꦏꦶ​ꦲꦤꦏ꧀ꦏꦸ​ꦱꦶꦁ​ꦠꦏ꧀ꦠꦿꦺꦱ꧀ꦤꦤ꧀ꦤꦶ꧉​ꦢꦺꦏ꧀ꦤꦺꦏꦸꦢꦸ​ꦲꦩ꧀ꦧꦺꦴꦏ꧀ꦒꦸꦒꦸ꧉​” 8ꦏꦢꦸꦁ​ꦥꦫ​ꦫꦱꦸꦭ꧀ꦤꦺꦴꦭꦺꦃ​ꦏꦶꦮꦠꦼꦔꦼꦤ꧀ꦮꦶꦱ꧀ꦲꦺꦴꦫ​ꦮꦼꦫꦸꦃ​ꦱꦥꦱꦥ​ꦩꦼꦤꦺꦃ​꧈​ꦤꦩꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺ꧉​

꧋ꦥꦶꦠꦏꦺꦴꦤ꧀ꦤꦤ꧀ꦧꦧ꧀ꦠꦼꦏꦤꦺ​ꦤꦧꦶ​ꦌꦭꦶꦪ​꧉​

9꧋ꦢꦺꦴꦁꦔꦺꦥꦢ​ꦩ꧀ꦭꦏꦸ​ꦩꦼꦢꦸꦤ꧀ꦒꦸꦤꦸꦁ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦱꦼꦩ꧀ꦧꦫꦁ​ꦱꦶꦁ​ꦏꦺꦴꦮꦺ​ꦮꦼꦫꦸꦃ​ꦩꦲꦸ​ꦲꦗ​ꦢꦶꦲꦺꦴꦩꦺꦴꦁꦔꦏꦺꦱꦥꦱꦥ​ꦤ꧀ꦢꦶꦱꦶꦏ꧀꧈​ꦲꦩ꧀ꦧꦺꦱꦸꦏ꧀ꦤꦺꦏ꧀ꦲꦤꦏ꧀ꦏꦺ​ꦩꦤꦸꦁꦱ​ꦮꦶꦱ꧀ꦠꦔꦶ​ꦱꦁꦏꦥꦠꦶ​ꦏꦺꦴꦮꦺ​ꦏꦼꦤꦺꦁꦔꦺꦴꦩꦺꦴꦁꦔꦏꦺ꧉​”

10꧋ꦥꦚ꧀ꦕꦺꦤ꧀ꦩꦸꦫꦶꦢ꧀ꦠꦼꦭꦸ​ꦏꦸꦮꦶ​ꦪ​ꦲꦺꦴꦫ​ꦔꦺꦴꦩꦺꦴꦁꦏꦫꦺꦴ​ꦱꦥꦱꦥ​꧈​ꦤꦁꦔꦶꦁ​ꦧꦧ꧀“ꦠꦔꦶ​ꦱꦁꦏꦥꦠꦶ​”ꦱꦶꦁ​ꦢꦶꦉꦩ꧀ꦧꦸꦏ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦮꦺꦴꦁ​ꦠꦼꦭꦸ​ꦩꦲꦸ​ꦲꦺꦴꦫ​ꦥꦢ​ꦢꦸꦤꦸꦁ꧉​ꦥꦢ​ꦏꦼꦥꦺꦔꦶꦤ꧀ꦔꦼꦂꦠꦶ​ꦲꦥ​ꦠꦼꦒꦼꦱ꧀ꦱꦺ​꧉​ 11ꦩꦸꦭꦤꦺ​ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦭꦃ​ꦏꦼꦤꦺꦁꦲꦥ​ꦒꦸꦫꦸꦒꦸꦫꦸ​ꦏꦶꦠꦧ꧀ꦏꦺꦴꦏ꧀ꦔꦺꦴꦩꦺꦴꦁꦤꦺꦏ꧀ꦤꦧꦶ​ꦌꦭꦶꦪ​ꦏꦸꦢꦸ​ꦠꦼꦏ​ꦤ꧀ꦢꦶꦱꦶꦏ꧀?”

12꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦥꦚ꧀ꦕꦺꦤ꧀ ꦒꦸꦫꦸꦒꦸꦫꦸ​ꦏꦶꦠꦧ꧀ꦏꦸꦮꦶ​ꦧꦼꦤꦼꦂ​꧉​ꦤꦧꦶ​ꦌꦭꦶꦪ​ꦏꦸꦢꦸ​ꦠꦼꦏ​ꦔꦺꦭꦶꦁꦔꦏꦺꦮꦺꦴꦁꦮꦺꦴꦁ​ꦩꦼꦤꦺꦃ​ꦧꦧ꧀ꦢꦭꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦁꦔꦶꦁ​ꦧꦧ꧀ꦲꦤꦏ꧀ꦏꦺ​ꦩꦤꦸꦁꦱ​ꦏꦼꦠꦸꦭꦶꦱ꧀ꦤꦺꦏ꧀ꦢꦺꦏ꧀ꦤꦺꦧꦏꦭ꧀​ꦔ꧀ꦭꦏꦺꦴꦤ꧀ꦤꦶ​ꦱꦁꦱꦫ​ꦲꦺꦴꦏꦺꦃꦭꦤ꧀ꦧꦏꦭ꧀ꦢꦶꦱꦼꦥꦺꦭꦺꦏ꧀ꦏꦏꦺ꧉​ 13ꦩꦸꦭꦤꦺ​ꦲꦏꦸ​ꦔꦺꦴꦩꦺꦴꦁꦤꦺꦏ꧀ꦲꦺꦤꦺꦁꦤꦧꦶ​ꦏꦪ​ꦤꦧꦶ​ꦌꦭꦶꦪ​ꦮꦶꦱ꧀ꦠꦼꦏ​꧈​ꦏꦪ​ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀​꧉​ꦤꦁꦔꦶꦁ​ꦢꦺꦏ꧀ꦤꦺꦢꦶꦒꦮꦺ​ꦱꦏ꧀ꦒꦼꦊꦩ꧀ꦩꦺ꧈​ꦕꦺꦴꦕꦺꦴꦏ꧀​ꦏꦫꦺꦴ​ꦱꦶꦁ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀​ꦱꦸꦕꦶ​꧉​”

꧋ꦒꦸꦱ꧀ꦠꦶꦪꦺꦯꦸꦱ꧀ꦤꦩ꧀ꦧꦤꦶ​ꦧꦺꦴꦕꦃ​ꦱꦶꦁ​ꦏꦼꦊꦧꦺꦴꦤ꧀ꦢꦼꦩꦶꦠ꧀꧈​

14꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦫꦺꦴ​ꦩꦸꦫꦶꦢ꧀ꦠꦼꦭꦸ​ꦩꦲꦸ​ꦮꦶꦱ꧀ꦧꦭꦶꦏ꧀ꦩꦼꦤꦺꦃ​꧈​ꦠꦼꦫꦸꦱ꧀ꦥꦢ​ꦮꦼꦫꦸꦃ​ꦩꦸꦫꦶꦢ꧀ꦩꦸꦫꦶꦢ꧀ꦭꦶꦪꦤꦺ​ꦲꦶꦗꦶꦏ꧀ꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀ꦏꦫꦺꦴ​ꦒꦸꦫꦸꦒꦸꦫꦸ​ꦏꦶꦠꦧ꧀ ꦱꦩ꧀ꦥꦺꦏ꧀ꦢꦶꦫꦸꦧꦸꦁ​ꦮꦺꦴꦁ​ꦲꦺꦴꦏꦺꦃ꧉​ 15ꦏꦢꦸꦁ​ꦮꦼꦫꦸꦃ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦱꦏ꧀ꦮꦠ꧀ꦥꦢ​ꦧꦸꦔꦃ​ꦏꦧꦺꦃ​꧈​ꦠꦼꦫꦸꦱ꧀ꦩꦫꦤꦶ​ꦭꦤ꧀​ꦩ꧀ꦧꦒꦺꦏ꧀ꦏꦏꦺꦢꦺꦏ꧀ꦤꦺ꧉​ 16ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦉꦩ꧀ꦧꦸꦏ꧀ꦏꦫꦺꦴ​ꦒꦸꦫꦸꦒꦸꦫꦸ​ꦏꦸꦮꦶ​?”

17꧋ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦱꦶꦁ​ꦱꦼꦩꦲꦸꦂ​:“ꦒꦸꦱ꧀ꦠꦶ​꧈​ꦲꦏꦸ​ꦲꦉꦥ꧀​ꦔ꧀ꦒꦮ​ꦲꦤꦏ꧀ꦏꦸ​ꦤꦁꦔ꧀ꦒꦺꦴꦤ꧀ꦩꦸ​꧉​ꦧꦺꦴꦕꦃ​ꦲꦶꦏꦶ​ꦏꦼꦊꦧꦺꦴꦤ꧀ꦢꦼꦩꦶꦠ꧀ꦩꦭꦶꦃ​ꦧꦶꦱꦸ​꧉​ 18ꦤꦺꦏ꧀ꦏꦸꦩꦠ꧀ꦧꦺꦴꦕꦃ​ꦲꦶꦏꦶ​ꦤꦶꦧꦤꦶꦧꦤꦁꦊꦩꦃ​꧉​ꦕꦁꦏꦼꦩ꧀ꦩꦺ​ꦩꦼꦠꦸ​ꦲꦸꦩ꧀ꦥ꧀ꦭꦸꦏ꧀ꦏꦺꦭꦤ꧀ꦧꦺꦴꦕꦃꦲꦺ​ꦠꦼꦫꦸꦱ꧀ꦏꦼꦫꦺꦴꦠ꧀ꦏꦼꦫꦺꦴꦠ꧀ꦲꦸꦤ꧀ꦠꦸ​ꦭꦤ꧀ꦲꦮꦏ꧀ꦏꦺ​ꦠꦼꦫꦸꦱ꧀ꦏꦏꦸ​꧉​ꦩꦸꦭꦤꦺ​ꦲꦏꦸ​ꦚ꧀ꦗꦭꦸꦏ꧀ꦠꦸꦭꦸꦁ​ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦩꦸꦏꦸꦮꦶ​ꦏꦺꦴꦁꦏꦺꦴꦤ꧀ꦔꦼꦠꦺꦴꦏ꧀ꦏꦏꦺꦢꦼꦩꦶꦠ꧀ꦠꦺ꧈​ꦤꦁꦔꦶꦁ​ꦲꦺꦴꦫ​ꦧꦶꦱ​꧉​”

19꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦲꦺꦴꦫ​ꦤ꧀ꦢꦸꦮꦺꦥꦼꦔꦤ꧀ꦢꦼꦭ꧀?ꦱꦼꦥꦶꦫ​ꦩꦼꦤꦺꦃ​ꦱꦸꦮꦺꦤꦺ​ꦲꦏꦸ​ꦲꦶꦗꦶꦏ꧀ꦏꦸꦢꦸ​ꦤꦁꦠꦼꦔꦃꦩꦸ​ꦭꦤ꧀ꦱꦼꦥꦶꦫ​ꦩꦼꦤꦺꦃ​ꦱꦸꦮꦺꦤꦺ​ꦲꦏꦸ​ꦲꦶꦗꦶꦏ꧀ꦏꦺꦴꦁꦏꦺꦴꦤ꧀ꦚꦧꦂꦫꦶ​ꦏꦺꦴꦮꦺ​?ꦢꦶꦒꦮ​ꦩ꧀ꦧꦿꦺꦤꦺꦧꦺꦴꦕꦃꦲꦺ​!” 20ꦧꦺꦴꦕꦃꦲꦺ​ꦠꦼꦫꦸꦱ꧀ꦢꦶꦒꦮ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦏꦢꦸꦁ​ꦢꦼꦩꦶꦠ꧀ꦠꦺꦮꦼꦫꦸꦃ​ꦒꦸꦱ꧀ꦠꦶ​ꦪꦺꦯꦸꦱ꧀ ꦧꦺꦴꦕꦃꦲꦺ​ꦠꦼꦫꦸꦱ꧀ꦩꦼꦕꦶꦕꦶꦭ꧀ꦩꦼꦕꦶꦕꦶꦭ꧀​ꦤꦶꦧ​ꦤꦁꦊꦩꦃ​ꦠꦼꦫꦸꦱ꧀​ꦔ꧀ꦒꦸꦭꦸꦁꦔ꧀ꦒꦸꦭꦸꦁꦕꦁꦏꦼꦩ꧀ꦩꦺ​ꦩꦼꦠꦸ​ꦲꦸꦩ꧀ꦥ꧀ꦭꦸꦏ꧀ꦏꦺ꧉​ 21ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦧꦥꦏ꧀ꦏꦺ:“ꦧꦺꦴꦕꦃ​ꦲꦶꦏꦶ​ꦮꦶꦮꦶꦠ꧀ꦏꦥꦤ꧀ꦭꦫ​?”

22꧋ꦧꦥꦏ꧀ꦏꦺꦱꦼꦩꦲꦸꦂ​:“ꦮꦶꦱ꧀ꦮꦶꦮꦶꦠ꧀ꦕꦶꦭꦶꦏ꧀!ꦭꦤ꧀ꦮꦶꦱ꧀ꦥꦶꦁ​ꦲꦺꦴꦏꦺꦃꦢꦼꦩꦶꦠ꧀ꦠꦺꦚ꧀ꦗꦺꦴꦁꦏꦿꦺꦴꦏ꧀ꦏꦏꦺꦧꦺꦴꦕꦃꦲꦺ​ꦤꦁꦒꦼꦤꦶ​ꦲꦥ​ꦤꦁꦩ꧀ꦧꦚꦸꦧꦺꦤ꧀ꦩꦠꦶ​꧉​ꦩꦸꦭꦤꦺ​ꦲꦏꦸ​ꦚꦸꦮꦸꦤ꧀ ꦤꦺꦏ꧀ꦏꦺꦴꦮꦺ​ꦧꦶꦱ​꧈​ꦲꦩ꧀ꦧꦺꦴꦏ꧀ꦩꦼꦭꦱ꧀ ꦲꦏꦸ​ꦢꦶꦠꦸꦭꦸꦁꦔꦶ​!”

23꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦤꦺꦏ꧀ꦲꦏꦸ​ꦧꦶꦱ​?ꦱꦼꦩ꧀ꦧꦫꦁ​ꦧꦶꦱ​ꦤꦺꦏ꧀ꦏꦺꦴꦮꦺ​ꦥꦽꦕꦪ​!”

24꧋ꦧꦥꦏ꧀ꦏꦺꦧꦺꦴꦕꦃꦲꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦏꦸ​ꦥꦽꦕꦪ​꧈​ꦒꦸꦱ꧀ꦠꦶ​!ꦤꦁꦔꦶꦁ​ꦥꦼꦔꦤ꧀ꦢꦼꦭ꧀ꦏꦸ​ꦏꦸꦫꦁ​꧉​ꦲꦏꦸ​ꦲꦩ꧀ꦧꦺꦴꦏ꧀ꦢꦶꦫꦺꦮꦁꦔꦶ​ꦥꦽꦕꦪ​!”

25꧋ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​ꦤꦺꦏ꧀ꦮꦺꦴꦁꦮꦺꦴꦁ​ꦱꦶꦁ​ꦔꦿꦸꦧꦸꦁ​ꦩꦲꦸ​ꦠꦩ꧀ꦧꦃ​ꦲꦺꦴꦏꦺꦃ꧈​ꦩꦸꦭꦤꦺ​ꦢꦼꦩꦶꦠ꧀ꦠꦺꦠꦼꦫꦸꦱ꧀ꦢꦶꦠꦸꦤ꧀ꦢꦸꦁ꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦢꦼꦩꦶꦠ꧀ꦱꦶꦁ​ꦩꦫꦏ꧀ꦏꦏꦺꦧꦺꦴꦕꦃ​ꦲꦶꦏꦶ​ꦧꦸꦢꦼꦏ꧀ꦭꦤ꧀ꦧꦶꦱꦸ​꧈​ꦩꦼꦠꦸꦮ​ꦭꦤ꧀ꦲꦗ​ꦥꦶꦱꦤ꧀ꦥꦶꦱꦤ꧀ꦧꦭꦶꦏ꧀ꦩꦼꦤꦺꦃ​!”

26꧋ꦢꦼꦩꦶꦠ꧀ꦠꦺꦠꦼꦫꦸꦱ꧀ꦩꦼꦠꦸ​ꦏꦫꦺꦴ​ꦚ꧀ꦗꦼꦫꦶꦠ꧀​ꦚ꧀ꦗꦼꦫꦶꦠ꧀ꦭꦤ꧀ꦧꦺꦴꦕꦃꦲꦺ​ꦔꦼꦕꦼꦕꦼꦁꦔꦼꦕꦼꦕꦼꦁ​ꦠꦼꦫꦸꦱ꧀ꦤꦶꦧ​ꦏꦪ​ꦮꦺꦴꦁ​ꦩꦠꦶ​꧉​ꦮꦺꦴꦁꦮꦺꦴꦁ​ꦩꦶꦏꦶꦫꦺꦧꦺꦴꦕꦃꦲꦺ​ꦩꦠꦶ​ꦠꦼꦤꦤ꧀꧈​ 27ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦏꦼꦭ꧀ꦠꦔꦤ꧀ꦤꦺ​ꦧꦺꦴꦕꦃꦲꦺ​ꦢꦶꦠꦔꦺꦏ꧀ꦏꦏꦺ꧉​ꦧꦺꦴꦕꦃꦲꦺ​ꦠꦼꦫꦸꦱ꧀ꦔꦢꦼꦏ꧀꧈​

28꧋ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀​ꦩ꧀ꦊꦧꦸ​ꦤꦁꦲꦺꦴꦩꦃ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦠꦏꦺꦴꦤ꧀:“ꦒꦸꦱ꧀ꦠꦶ​꧈​ꦏꦼꦤꦺꦁꦲꦥ​ꦲꦮꦏ꧀ꦏꦺ​ꦢꦺꦮꦺꦏꦺꦴꦏ꧀ꦲꦺꦴꦫ​ꦧꦶꦱ​ꦔꦼꦠꦺꦴꦏ꧀ꦏꦏꦺꦢꦼꦩꦶꦠ꧀ꦠꦺ?”

29꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦢꦼꦩꦶꦠ꧀ꦏꦪ​ꦔꦺꦴꦤꦺꦴ​ꦏꦸꦮꦶ​ꦭꦸꦔꦤꦺ​ꦤꦩꦸꦁ​ꦏꦫꦺꦴ​ꦥꦤ꧀ꦢꦺꦴꦔ​!”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦏꦥꦶꦁ​ꦥꦶꦤ꧀ꦢꦺꦴꦤꦺꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦢꦶꦥꦠꦺꦤ꧀ꦤꦶ​꧉​

30꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦭꦸꦔ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​ꦠꦼꦫꦸꦱ꧀ꦥꦢ​ꦩ꧀ꦭꦏꦸ​ꦠꦼꦫꦸꦱ꧀​ꦔ꧀ꦭꦶꦮꦠ꧀ꦠꦶ​ꦓꦭꦶꦭꦺꦪ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦒꦼꦊꦩ꧀ꦤꦺꦏ꧀ꦮꦺꦴꦁꦮꦺꦴꦁ​ꦱꦩ꧀ꦥꦺꦏ꧀ꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦭꦶꦮꦠ꧀ꦏꦺꦴꦤꦺꦴ​꧈​ꦲꦮꦶꦠ꧀ꦢꦺꦏ꧀ꦤꦺꦲꦶꦗꦶꦏ꧀ꦩꦸꦭꦁꦔꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ 31ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦢꦶꦲꦼꦭꦸꦁꦔꦏꦺꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦧꦏꦭ꧀ꦩꦠꦺꦤ꧀ꦤꦶ​ꦢꦺꦏ꧀ꦤꦺ꧉​ꦤꦁꦔꦶꦁ​ꦲꦶꦁ​ꦠꦼꦭꦸꦁ​ꦢꦶꦤꦤꦺ​ꦢꦺꦏ꧀ꦤꦺꦧꦏꦭ꧀ꦠꦔꦶ​ꦩꦼꦤꦺꦃ​ꦱꦁꦏꦥꦠꦶ​꧉​”

32꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦱꦏ꧀ꦗꦤꦺꦲꦺꦴꦫ​ꦢꦸꦤꦸꦁꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦤꦁꦔꦶꦁ​ꦲꦺꦴꦫ​ꦲꦺꦤꦺꦁꦱꦶꦁ​ꦮꦤꦶ​ꦠꦏꦺꦴꦤ꧀ꦲꦥꦲꦥ​꧉​

꧋ꦥꦶꦮꦸꦭꦁ​ꦧꦧ꧀ꦱꦥ​ꦱꦶꦁ​ꦒꦼꦢꦺꦢꦺꦮꦺ꧉​

33꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦏ​ꦤꦁꦏꦸꦠꦑꦥꦺꦂꦤꦏꦸꦩ꧀꧈​ꦏꦢꦸꦁ​ꦮꦶꦱ꧀ꦤꦁꦲꦺꦴꦩꦃ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦏꦺꦴꦤ꧀:“ꦤꦁꦢꦭꦤ꧀ꦩꦲꦸ​ꦏꦺꦴꦮꦺ​ꦥꦢ​ꦔꦺꦴꦩꦺꦴꦁꦔꦏꦺꦲꦥ​ꦠ​?” 34ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦲꦺꦴꦫ​ꦲꦺꦤꦺꦁꦱꦶꦁ​ꦮꦤꦶ​ꦱꦼꦩꦲꦸꦂ​ꦲꦥꦲꦥ​꧈​ꦲꦮꦶꦠ꧀ꦤꦁꦢꦭꦤ꧀ꦩꦲꦸ​ꦥꦢ​ꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀ꦔꦺꦴꦩꦺꦴꦁꦔꦏꦺꦧꦧ꧀ꦱꦥ​ꦱꦶꦁ​ꦒꦼꦢꦺꦢꦺꦮꦺ꧉​ 35ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦚ꧀ꦗꦒꦺꦴꦁ꧈​ꦩꦸꦫꦶꦢ꧀ꦫꦺꦴꦭꦱ꧀ꦩꦲꦸ​ꦢꦶꦕꦼꦭꦸꦏ꧀​ꦏꦧꦺꦃ​ꦠꦼꦫꦸꦱ꧀ꦢꦶꦮꦸꦭꦁꦔꦶꦔꦺꦤꦺ​:“ꦮꦺꦴꦁ​ꦱꦶꦁ​ꦏꦼꦥꦺꦔꦶꦤ꧀ꦢꦶꦲꦗꦺꦤ꧀ꦤꦶ​ꦭꦤ꧀ꦢꦶꦲꦁꦒꦼꦥ꧀ꦒꦼꦢꦺ​ꦏꦸꦮꦶ​ꦮꦺꦴꦁ​ꦱꦶꦁ​ꦒꦼꦊꦩ꧀ꦔꦭꦃ​ꦭꦤ꧀ꦒꦼꦊꦩ꧀​ꦔ꧀ꦭꦢꦺꦤ꧀ꦤꦶ​ꦭꦶꦪꦤꦺ​!” 36ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦏꦼꦭ꧀ꦧꦺꦴꦕꦃ​ꦕꦶꦭꦶꦏ꧀ꦢꦶꦢꦺꦏꦺꦏ꧀ꦤꦁ ꦠꦼꦔꦃꦲꦺ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ꦢꦺꦏ꧀ꦤꦺꦔꦿꦁꦏꦸꦭ꧀ꦧꦺꦴꦕꦃꦲꦺ​ꦏꦫꦺꦴ​ꦔꦺꦴꦩꦺꦴꦁ: 37“ꦮꦺꦴꦁ​ꦱꦶꦁ​ꦤꦩ꧀ꦥꦤꦶ​ꦧꦺꦴꦕꦃ​ꦏꦪ​ꦔꦺꦤꦺ​ꦲꦶꦏꦶ​ꦲꦶꦁ​ꦗꦼꦤꦼꦁꦏꦸ​꧈​ꦮꦺꦴꦁ​ꦏꦸꦮꦶ​ꦤꦩ꧀ꦥꦤꦶ​ꦲꦏꦸ​꧉​ꦭꦤ꧀ꦩꦼꦤꦺꦃ​꧈​ꦮꦺꦴꦁ​ꦱꦶꦁ​ꦤꦩ꧀ꦥꦤꦶ​ꦲꦏꦸ​ꦏꦸꦮꦶ​ꦲꦺꦴꦫ​ꦤꦩꦸꦁ​ꦤꦩ꧀ꦥꦤꦶ​ꦲꦏꦸ​ꦢꦺꦮꦺ꧈​ꦲꦺꦴꦫ​꧈​ꦤꦁꦔꦶꦁ​ꦲꦸꦒ​ꦤꦩ꧀ꦥꦤꦶ​ꦱꦶꦁ​ꦔꦺꦴꦁꦏꦺꦴꦤ꧀ꦲꦏꦸ​꧉​”

꧋ꦧꦧ꧀ꦏꦚ꧀ꦕ​ꦭꦤ꧀ꦩꦸꦁꦱꦸꦃ​꧉​

38꧋ꦫꦱꦸꦭ꧀ꦪꦺꦴꦲꦤꦼꦱ꧀ꦔꦺꦴꦩꦺꦴꦁꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦮꦼꦫꦸꦃ​ꦲꦺꦤꦺꦁꦮꦺꦴꦁ​ꦔꦼꦠꦺꦴꦏ꧀ꦏꦏꦺꦢꦼꦩꦶꦠ꧀ꦔꦁꦒꦺꦴ​ꦗꦼꦤꦼꦁꦩꦸ​꧉​ꦤꦁꦔꦶꦁ​ꦮꦺꦴꦁ​ꦲꦶꦏꦸ​ꦢꦸꦢꦸ​ꦠꦸꦁꦒꦭ꧀ꦭꦺ​ꦲꦮꦏ꧀ꦏꦺ​ꦢꦺꦮꦺ꧈​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦪ​ꦩꦼꦁꦔꦶꦁ​ꦮꦺꦴꦁꦔꦺ​꧉​”

39꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦲꦗ​꧈​ꦮꦺꦴꦁꦔꦺ​ꦲꦗ​ꦲꦩ꧀ꦧꦺꦴꦏ꧀ꦥꦼꦔꦶꦁ​꧉​ꦲꦮꦶꦠ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦱꦲꦶꦏꦶ​ꦔꦁꦒꦺꦴꦏ꧀ꦏꦏꦺꦗꦼꦤꦼꦁꦏꦸ​ꦏꦁꦒꦺꦴ​ꦤꦶꦤ꧀ꦢꦏ꧀ꦏꦏꦺꦩꦸꦗꦶꦗꦠ꧀ꦠꦼꦫꦸꦱ꧀ꦱꦺꦱꦸꦏ꧀ꦏꦺꦮꦺꦴꦁꦔꦺ​ꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦲꦏꦸ​꧉​ 40ꦲꦮꦶꦠ꧀ꦱꦥ​ꦱꦶꦁ​ꦲꦺꦴꦫ​ꦔ꧀ꦭꦮꦤ꧀ꦲꦮꦏ꧀ꦏꦺ​ꦢꦺꦮꦺꦩꦼꦱ꧀ꦠꦶꦪ​ꦔꦿꦸꦗꦸꦏ꧀ꦏꦶ​ꦲꦮꦏ꧀ꦏꦺ​ꦢꦺꦮꦺ꧉​ 41ꦠꦼꦤꦤ꧀ ꦔꦤ꧀ꦢꦼꦭ꧀ꦭ​ꦠ​!ꦱꦥ​ꦱꦶꦁ​ꦔꦼꦏꦺꦏ꧀ꦏꦶꦔꦺꦴꦩ꧀ꦧꦺ​ꦩꦫꦁ​ꦏꦺꦴꦮꦺ​ꦗꦭꦂꦫꦤ꧀ꦮꦺꦴꦁꦔꦺ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦏꦸꦮꦶ​ꦩꦸꦫꦶꦢ꧀ꦢꦺ​ꦏꦿꦶꦱ꧀ꦡꦸꦱ꧀ ꦮꦺꦴꦁ​ꦏꦸꦮꦶ​ꦩꦼꦱ꧀ꦠꦶꦧꦏꦭ꧀ꦲꦺꦤ꧀ꦠꦸꦏ꧀ꦲꦸꦥꦃꦲꦺꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​”

꧋ꦧꦧ꧀ꦩꦫꦏ꧀ꦏꦏꦺꦭꦶꦪꦤꦺ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧉​

42꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦱꦥ​ꦱꦶꦁ​ꦩꦫꦏ꧀ꦏꦏꦺꦮꦺꦴꦁ​ꦱꦶꦁ​ꦲꦼꦤꦺꦴꦩ꧀ꦲꦶꦁ​ꦥꦼꦔꦤ꧀ꦢꦼꦭ꧀ꦤꦶꦁꦒꦭ꧀ꦢꦭꦤ꧀ꦏꦸ​꧈​ꦮꦺꦴꦁ​ꦏꦸꦮꦶ​ꦭꦸꦮꦸꦁꦢꦶꦧꦤ꧀ꦢꦸꦭ꧀ꦭꦶꦮꦠꦸ​ꦒꦶꦭꦶꦁꦔꦤ꧀ꦮꦲꦺ​ꦒꦸꦭꦸꦤꦺ​꧈​ꦠꦼꦫꦸꦱ꧀ꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦱꦼꦒꦫ​꧉​ 43ꦤꦺꦏ꧀ꦠꦔꦤ꧀ꦩꦸ​ꦩꦫꦏ꧀ꦏꦏꦺꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧈​ꦢꦶꦏꦼꦠꦺꦴꦏ꧀ꦮꦲꦺ​꧉​ꦭꦸꦮꦸꦁꦏꦺꦴꦮꦺ​ꦩ꧀ꦊꦧꦸ​ꦲꦸꦫꦶꦥ꧀ꦭꦁꦒꦼꦁ​ꦏꦫꦺꦴ​ꦠꦔꦤ꧀ꦱꦶꦗꦶ​꧈​ꦠꦼꦤꦶꦩ꧀ꦧꦁꦠꦔꦤ꧀ꦩꦸ​ꦒꦼꦤꦼꦥ꧀ꦭꦺꦴꦫꦺꦴ​꧈​ꦤꦁꦔꦶꦁ​ꦏꦺꦴꦮꦺ​ꦩ꧀ꦊꦧꦸ​ꦤꦁꦤꦼꦫꦏ꧈​ꦤꦁꦒꦼꦤꦶ​ꦱꦶꦁ​ꦲꦺꦴꦫ​ꦧꦶꦱ​ꦩꦠꦶ​꧉​ 44(ꦤꦁꦤꦼꦫꦏꦲꦸꦊꦫꦺꦲꦺꦴꦫ​ꦩꦠꦶ​ꦭꦤ꧀ꦒꦼꦤꦶꦤꦺ​ꦩꦸꦫꦸꦥ꧀ꦠꦼꦫꦸꦱ꧀꧈​) 45ꦤꦺꦏ꧀ꦱꦶꦏꦶꦭ꧀ꦩꦸ​ꦩꦫꦏ꧀ꦏꦏꦺꦏꦺꦴꦮꦺ​ꦩ꧀ꦭꦏꦸ​ꦤꦁꦢꦭꦤ꧀ꦲꦭ​꧈​ꦢꦶꦏꦼꦠꦺꦴꦏ꧀ꦮꦲꦺ​꧉​ꦭꦸꦮꦸꦁꦏꦺꦴꦮꦺ​ꦩ꧀ꦊꦧꦸ​ꦲꦸꦫꦶꦥ꧀ꦭꦁꦒꦼꦁ​ꦏꦫꦺꦴ​ꦱꦶꦏꦶꦭ꧀ꦱꦶꦗꦶ​꧈​ꦠꦼꦤꦶꦩ꧀ꦧꦁꦱꦶꦏꦶꦭ꧀ꦭꦺ​ꦒꦼꦤꦼꦥ꧀ꦭꦺꦴꦫꦺꦴ​꧈​ꦤꦁꦔꦶꦁ​ꦢꦶꦧꦸꦮꦁ​ꦤꦁꦤꦼꦫꦏ꧉​ 46(ꦤꦁꦤꦼꦫꦏꦲꦸꦊꦫꦺꦲꦺꦴꦫ​ꦩꦠꦶ​ꦭꦤ꧀ꦒꦼꦤꦶꦤꦺ​ꦩꦸꦫꦸꦥ꧀ꦠꦼꦫꦸꦱ꧀꧈​) 47ꦤꦺꦏ꧀ꦩꦿꦶꦥꦠ꧀ꦩꦸ​ꦩꦫꦏ꧀ꦏꦏꦺꦏꦺꦴꦮꦺ​ꦔ꧀ꦭꦏꦺꦴꦤ꧀ꦤꦶ​ꦲꦭ​꧈​ꦢꦶꦕꦼꦥꦺꦴꦭ꧀​ꦮꦲꦺ​꧉​ꦭꦸꦮꦸꦁꦩ꧀ꦊꦧꦸ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦩꦿꦶꦥꦠ꧀ꦱꦶꦗꦶ​꧈​ꦠꦼꦤꦶꦩ꧀ꦧꦁꦩꦿꦶꦥꦠ꧀ꦩꦸ​ꦒꦼꦤꦼꦥ꧀ꦭꦺꦴꦫꦺꦴ​꧈​ꦤꦁꦔꦶꦁ​ꦢꦶꦕꦼꦩ꧀ꦥ꧀ꦭꦸꦁ​ꦔꦏꦺ​ꦤꦁꦤꦼꦫꦏ꧉​ 48ꦤꦁꦤꦼꦫꦏꦏꦸꦮꦶ​ꦏꦺꦴꦮꦺ​ꦧꦏꦭ꧀ꦔꦭꦩ꧀ꦩꦶ​ꦱꦁꦱꦫ​ꦒꦼꦢꦺꦱ꧀ꦭꦮꦱ꧀ꦱꦺ꧉​

49꧋“ꦱꦧꦼꦤ꧀ꦮꦺꦴꦁ​ꦏꦸꦢꦸ​ꦢꦶꦗꦗꦭ꧀ꦥꦼꦔꦤ꧀ꦢꦼꦭ꧀ꦭꦺ​ꦱꦸꦥꦪ​ꦲꦺꦴꦫ​ꦭꦸꦤ꧀ꦠꦸꦂ​꧉​ꦏꦸꦮꦶ​ꦏꦼꦤꦺꦁꦢꦶꦥꦢꦏ꧀ꦏꦏꦺꦏꦫꦺꦴ​ꦤꦺꦏ꧀ꦔꦸꦪꦃꦲꦶ​ꦏꦲꦺ​꧈​ꦱꦸꦥꦪ​ꦲꦮꦺꦠ꧀꧈​

50꧋“ꦲꦸꦪꦃ​ꦏꦸꦮꦶ​ꦏꦁꦒꦺꦴ​ꦒꦮꦺ​ꦠꦼꦤꦤ꧀꧈​ꦤꦁꦔꦶꦁ​ꦤꦺꦏ꧀ꦲꦸꦪꦃꦲꦺ​ꦲꦶꦭꦁ​ꦲꦱꦶꦤ꧀ꦤꦺ​꧈​ꦲꦺꦴꦫ​ꦲꦺꦤꦺꦁꦲꦥꦲꦥ​ꦩꦼꦤꦺꦃ​ꦱꦶꦁ​ꦏꦼꦤꦺꦁꦢꦶꦲꦼꦁꦒꦺꦴ​ꦔꦱꦶꦤ꧀ꦤꦏꦺ?

꧋“ꦩꦸꦭꦤꦺ​꧈​ꦏꦺꦴꦮꦺ​ꦏꦸꦮꦶ​ꦏꦸꦢꦸ​ꦏꦪ​ꦮꦺꦴꦁ​ꦱꦶꦁ​ꦮꦶꦱ꧀ꦢꦶꦲꦸꦪꦃꦲꦶ​꧉​ꦥꦢ​ꦲꦸꦫꦶꦥ꧀ꦧꦼꦧꦉꦁꦔꦤ꧀ꦱꦶꦁ​ꦫꦸꦏꦸꦤ꧀꧈​” ↑ ↑ ↑


꧋ꦧꦧ꧀ꦥꦼꦒꦠ꧀ꦠꦤ꧀꧈​

꧇​꧑꧐꧇​ 1꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦸꦔ​ꦱꦁꦏꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​ꦠꦼꦫꦸꦱ꧀ꦧꦸꦢꦭ꧀ꦤꦁꦪꦸꦢꦺꦪ​꧈​ꦠꦼꦫꦸꦱ꧀ꦔꦧꦿꦃꦭꦫꦪꦺꦴꦂꦢꦤ꧀꧈​ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦔ꧀ꦭꦸꦩ꧀ꦥꦸꦏ꧀ꦔꦿꦸꦧꦸꦁ​ꦢꦺꦏ꧀ꦤꦺ꧈​ꦩꦸꦭꦤꦺ​ꦏꦪ​ꦭꦸꦩꦿꦃꦲꦺ​꧈​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦢꦶꦮꦸꦭꦁꦔꦶꦧꦧ꧀ꦒꦸꦱ꧀ꦠꦶ​ꦄꦭ꧀ꦭꦃ​꧉​

2꧋ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦥ꦳ꦫꦶꦱꦶ​ꦥꦢ​ꦠꦼꦏ​ꦲꦉꦥ꧀ꦔꦼꦤꦺꦁꦒꦸꦱ꧀ꦠꦶ​ꦪꦺꦯꦸꦱ꧀ꦔꦁꦒꦺꦴ​ꦥꦶꦠꦏꦺꦴꦤ꧀ꦤꦤ꧀꧈​ꦮꦺꦴꦁ​ꦥ꦳ꦫꦶꦱꦶ​ꦩꦲꦸ​ꦠꦏꦺꦴꦤ꧀ꦔꦺꦤꦺ​:“ꦲꦥ​ꦮꦺꦴꦁ​ꦭꦤꦁ​ꦲꦺꦤ꧀ꦠꦸꦏ꧀ꦩꦼꦒꦠ꧀ꦧꦺꦴꦗꦺꦴꦤꦺ​?”

3꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦭꦃ​ꦮꦺꦠ꧀ꦠꦺꦤꦧꦶ​ꦩꦺꦴꦱꦼꦱ꧀ꦩꦸꦭꦁꦔꦶꦏꦼꦥꦿꦶꦪꦺ​?”

4꧋“ꦲꦺꦤ꧀ꦠꦸꦏ꧀ ꦗꦚ꧀ꦗꦶ​ꦮꦺꦴꦁ​ꦭꦩꦸꦂꦒꦼꦊꦩ꧀ꦤꦸꦭꦶꦱ꧀ꦭꦪꦁ​ꦥꦼꦒꦠ꧀ꦠꦼꦫꦸꦱ꧀ꦢꦶꦏꦺꦏ꧀ꦏꦏꦺꦱꦶꦁ​ꦮꦺꦢꦺꦴꦏ꧀꧈​”

5꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦤꦧꦶ​ꦩꦺꦴꦱꦼꦱ꧀​ꦔ꧀ꦒꦮꦺ​ꦥꦼꦂꦤꦠ꧀ꦠꦤ꧀ꦔꦺꦴꦤꦺꦴ​ꦏꦸꦮꦶ​ꦗꦭꦂꦫꦤ꧀ꦱꦁꦏꦮꦁꦏꦭ꧀ꦭꦺꦲꦠꦶꦩꦸ​꧉​ 6ꦤꦁꦔꦶꦁ​ꦏꦮꦶꦠ꧀​ꦩ꧀ꦧꦶꦪꦺꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦒꦮꦺ​ꦮꦺꦴꦁ​ꦭꦤꦁ​ꦭꦤ꧀ꦮꦺꦴꦁ​ꦮꦺꦢꦺꦴꦏ꧀꧈​ 7ꦩꦸꦭꦤꦺ​ꦮꦺꦴꦁ​ꦭꦤꦁ​ꦏꦸꦮꦶ​ꦧꦏꦭ꧀ꦤꦶꦁꦒꦭ꧀ꦧꦥꦧꦶꦪꦸꦁꦔꦺ​ꦭꦤ꧀ꦢꦢꦶ​ꦱꦶꦗꦶ​ꦏꦫꦺꦴ​ꦧꦺꦴꦗꦺꦴꦤꦺ​꧉​ 8ꦲꦺꦴꦫ​ꦮꦺꦴꦁ​ꦭꦺꦴꦫꦺꦴ​ꦩꦼꦤꦺꦃ​꧈​ꦤꦁꦔꦶꦁ​ꦮꦺꦴꦁ​ꦭꦺꦴꦫꦺꦴ​ꦏꦸꦮꦶ​ꦮꦶꦱ꧀ꦢꦢꦶ​ꦱꦶꦗꦶ​꧉​ 9ꦢꦢꦶꦤꦺ​꧈​ꦲꦥ​ꦱꦶꦁ​ꦮꦶꦱ꧀ꦢꦶꦒꦠꦸꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦤꦸꦁꦱ​ꦲꦺꦴꦫ​ꦏꦼꦤꦺꦁꦩꦶꦱꦃ​꧉​”

10꧋ꦢꦺꦴꦁꦔꦺꦮꦶꦱ꧀ꦤꦁꦲꦺꦴꦩꦃ​ꦩꦼꦤꦺꦃ​꧈​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦧꦧ꧀ꦥꦼꦒꦠ꧀ꦠꦤ꧀ꦩꦲꦸ​꧉​ 11ꦒꦸꦱ꧀ꦠꦶ​ꦪꦺꦯꦸꦱ꧀ꦩꦸꦭꦁꦔꦶꦔꦺꦤꦺ​:“ꦤꦺꦏ꧀ꦮꦺꦴꦁ​ꦭꦤꦁ​ ꦩꦼꦒꦠ꧀ꦱꦶꦁ​ꦮꦺꦢꦺꦴꦏ꧀ꦠꦼꦫꦸꦱ꧀ꦔꦼꦥꦺꦏ꧀ꦮꦺꦴꦁ​ꦮꦺꦢꦺꦴꦏ꧀ꦭꦶꦪꦤꦺ​꧈​ꦮꦺꦴꦁ​ꦭꦤꦁ​ꦏꦸꦮꦶ​ꦭꦏꦸ​ꦧꦺꦢꦁ꧉​ 12ꦲꦸꦒ​ꦤꦺꦏ꧀ꦮꦺꦴꦁ​ꦮꦺꦢꦺꦴꦏ꧀ꦩꦼꦒꦠ꧀ꦱꦶꦁ​ꦭꦤꦁ​ꦠꦼꦫꦸꦱ꧀ꦔꦼꦥꦺꦏ꧀ꦮꦺꦴꦁ​ꦭꦤꦁ​ꦭꦶꦪꦤꦺ​꧈​ꦮꦺꦴꦁ​ꦮꦺꦢꦺꦴꦏ꧀ꦏꦸꦮꦶ​ꦪ​ꦥꦢ​ꦮꦲꦺ​ꦭꦏꦸ​ꦧꦺꦢꦁ꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦲꦩ꧀ꦧꦼꦂꦏꦃꦲꦶ​ꦧꦺꦴꦕꦃꦧꦺꦴꦕꦃ​꧉​

13꧋ꦮꦺꦴꦁꦮꦺꦴꦁ​ꦥꦢ​ꦔ꧀ꦒꦮ​ꦲꦤꦏ꧀ꦏꦺ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦱꦸꦥꦪ​ꦢꦶꦢꦺꦴꦔꦏ꧀ꦏꦏꦺꦭꦤ꧀ꦢꦶꦧꦼꦂꦏꦃꦲꦶ​꧉​ꦤꦁꦔꦶꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦚꦼꦤꦺꦤ꧀ꦤꦶꦮꦺꦴꦁꦮꦺꦴꦁ​ꦏꦸꦮꦶ​ꦢꦶꦥꦼꦔꦶꦁ​ꦔꦿꦸꦱꦸꦃꦲꦶꦒꦸꦱ꧀ꦠꦶ​ꦪꦺꦯꦸꦱ꧀꧈​ 14ꦏꦢꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​꧈​ꦢꦺꦏ꧀ꦤꦺꦠꦼꦫꦸꦱ꧀ꦗꦺꦁꦏꦺꦭ꧀꧈​ꦩꦸꦭꦤꦺ​ꦢꦺꦏ꧀ꦤꦺꦚꦼꦤꦺꦤ꧀ꦤꦶꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦔꦺꦤꦺ​:“ꦲꦩ꧀ꦧꦺꦴꦏ꧀ꦧꦺꦤ꧀!ꦧꦺꦴꦕꦃꦧꦺꦴꦕꦃ​ꦲꦗ​ꦢꦶꦲꦭꦁꦔꦭꦁꦔꦶ꧉​ꦧꦺꦤ꧀ꦥꦢ​ꦩ꧀ꦧꦿꦺꦤꦺꦤꦁꦔ꧀ꦒꦺꦴꦤ꧀ꦏꦸ​꧉​ꦲꦮꦶꦠ꧀ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦩꦸꦁ​ꦏꦁꦒꦺꦴ​ꦮꦺꦴꦁ​ꦱꦶꦁ​ꦲꦠꦶꦤꦺ​ꦏꦪ​ꦧꦺꦴꦕꦃꦧꦺꦴꦕꦃ​ꦲꦶꦏꦶ​꧉​ 15ꦥꦚ꧀ꦕꦺꦤ꧀ꦠꦼꦤꦤ꧀ ꦱꦥ​ꦱꦶꦁ​ꦲꦺꦴꦫ​ꦤꦩ꧀ꦥ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦪ​ꦧꦺꦴꦕꦃꦧꦺꦴꦕꦃ​ꦲꦶꦏꦶ​ꦲꦺꦴꦫ​ꦧꦏꦭ꧀ꦧꦶꦱ​ꦔ꧀ꦊꦧꦺꦴꦤ꧀ꦤꦶꦏꦿꦠꦺꦴꦤ꧀ꦲꦶꦏꦶ​꧉​” 16ꦧꦺꦴꦕꦃꦧꦺꦴꦕꦃ​ꦠꦼꦫꦸꦱ꧀ꦢꦶꦫꦁꦏꦸꦭ꧀ꦭꦶ꧈​ꦠꦼꦫꦸꦱ꧀ꦢꦶꦠꦸꦩ꧀ꦥꦁꦔꦶ​ꦠꦔꦤ꧀ꦭꦤ꧀ꦢꦶꦧꦼꦂꦏꦃꦲꦶ​ꦱꦶꦗꦶꦱꦶꦗꦶ꧉​

꧋ꦮꦺꦴꦁ​ꦲꦼꦤꦺꦴꦩ꧀ꦱꦶꦁ​ꦱꦸꦒꦶꦃ​꧉​

17꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦲꦉꦥ꧀ꦧꦸꦢꦭ꧀ꦩꦼꦤꦺꦃ​ꦠꦼꦫꦸꦱ꧀ꦲꦺꦤꦺꦁꦮꦺꦴꦁ​ꦩ꧀​ꦧ꧀ꦭꦪꦸꦩꦫꦤꦶ​ꦢꦺꦏ꧀ꦤꦺ꧉​ꦮꦺꦴꦁꦔꦺ​ꦱꦸꦗꦸꦠ꧀ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦒꦸꦫꦸ​꧈​ꦥꦚ꧀ꦕꦺꦤ꧀ꦏꦺꦴꦮꦺ​ꦧꦼꦕꦶꦏ꧀ꦠꦼꦤꦤ꧀꧈​ꦧꦶꦱꦤꦺ​ꦲꦺꦤ꧀ꦠꦸꦏ꧀ꦲꦸꦫꦶꦥ꧀ꦭꦁꦒꦼꦁ​ꦲꦏꦸ​ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦲꦥ​?”

18꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦏꦺꦴꦏ꧀ꦔꦫꦤ꧀ꦤꦶ​ꦲꦏꦸ​ꦧꦼꦕꦶꦏ꧀?ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦧꦼꦕꦶꦏ꧀ ꦲꦺꦴꦫ​ꦲꦺꦤꦺꦁꦭꦶꦪꦤꦺ​! 19ꦏꦺꦴꦮꦺ​ꦮꦶꦱ꧀ꦔꦼꦂꦠꦶ​ꦮꦺꦠ꧀ꦮꦺꦠ꧀ꦠꦺꦠ​?ꦲꦗ​ꦩꦠꦺꦤ꧀ꦤꦶ​ꦮꦺꦴꦁ​꧈​ꦲꦗ​ꦔꦿꦸꦱꦸꦃꦲꦶꦧꦺꦴꦗꦺꦴꦤꦺ​ꦭꦶꦪꦤꦺ​꧈​ꦲꦗ​ꦚꦺꦴꦭꦺꦴꦁ​꧈​ꦲꦗ​ꦒꦺꦴꦫꦺꦴꦃ​꧈​ꦲꦗ​ꦔꦥꦸꦱ꧀ꦱꦶ​ꦮꦺꦴꦁ​ꦭꦤ꧀ꦔꦗꦺꦤ꧀ꦤꦤ​ꦩꦫꦁ​ꦧꦥꦧꦶꦪꦸꦁꦩꦸ​꧉​”

20꧋ꦮꦺꦴꦁꦔꦺ​ꦱꦼꦩꦲꦸꦂ​:“ꦒꦸꦫꦸ​꧈​ꦏꦮꦶꦠ꧀ꦕꦶꦭꦶꦏ꧀ꦲꦏꦸ​ꦮꦶꦱ꧀ꦤꦸꦫꦸꦠ꧀ꦮꦺꦠ꧀ꦮꦺꦠ꧀ꦏꦧꦺꦃ​ꦏꦸꦮꦶ​꧉​”

21꧋ꦒꦸꦱ꧀ꦠꦶ​ꦪꦺꦯꦸꦱ꧀ꦚꦮꦁ​ꦮꦺꦴꦁꦔꦺ​ꦠꦼꦫꦸꦱ꧀ꦏꦿꦱ​ꦠꦿꦺꦱ꧀ꦤꦩꦫꦁ​ꦢꦺꦏ꧀ꦤꦺ꧈​ꦩꦸꦭꦤꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦧꦫꦁ​ꦱꦶꦗꦶ​ꦱꦶꦁ​ꦢꦸꦫꦸꦁ​ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​:ꦏꦤ​ꦩꦸꦭꦶꦃ​꧈​ꦲꦥ​ꦤ꧀ꦢꦸꦮꦺꦤꦺꦢꦶꦲꦼꦢꦺꦴꦭ꧀ꦏꦧꦺꦃ​꧉​ꦱꦼꦥꦶꦫ​ꦥꦪꦸꦤꦺꦢꦶꦏꦺꦏ꧀ꦏꦏꦺꦩꦫꦁ​ꦮꦺꦴꦁ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦱꦸꦥꦪ​ꦏꦺꦴꦮꦺ​ꦧꦶꦱ​ꦤ꧀ꦢꦸꦮꦺꦧꦤ꧀ꦢꦤꦁꦱ꧀ꦮꦂꦒ​꧉​ꦤꦺꦏ꧀ꦏꦸꦮꦶ​ꦮꦶꦱ꧀ꦲꦩ꧀ꦧꦺꦴꦏ꧀ꦭꦏꦺꦴꦤ꧀ꦤꦶ​ꦏꦺꦴꦮꦺ​ꦠꦼꦫꦸꦱ꧀​ꦩ꧀ꦧꦿꦺꦤꦺꦪꦩꦺꦭꦸ​ꦲꦏꦸ​!” 22ꦮꦺꦴꦁꦔꦺ​ꦏꦿꦸꦔꦸ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦠꦼꦫꦸꦱ꧀ꦲꦩ꧀ꦊꦁ꧉​ꦢꦺꦏ꧀ꦤꦺꦭꦸꦔ​ꦏꦫꦺꦴ​ꦱꦼꦢꦶ꧈​ꦲꦮꦶꦠ꧀ꦢꦺꦏ꧀ꦤꦺꦱꦸꦒꦶꦃ​ꦠꦼꦤꦤ꧀꧈​

23꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦮꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦔꦺꦴꦩꦺꦴꦁ:“ꦥꦚ꧀ꦕꦺꦤ꧀ꦲꦔꦺꦭ꧀ꦠꦼꦤꦤ꧀ꦏꦁꦒꦺꦴ​ꦮꦺꦴꦁ​ꦱꦸꦒꦶꦃ​ꦩ꧀ꦊꦧꦸ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

24꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦒꦺꦠ꧀ꦏꦿꦸꦔꦸ​ꦠꦼꦩ꧀ꦧꦸꦁ​ꦏꦸꦮꦶ​꧉​ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦤꦏ꧀ꦲꦤꦏ꧀ ꦥꦚ꧀ꦕꦺꦤ꧀ꦲꦔꦺꦭ꧀ꦧꦔꦼꦠ꧀​ꦩ꧀ꦊꦧꦸ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 25ꦭꦸꦮꦶꦃ​ꦒꦩ꧀ꦥꦁ​ꦲꦸꦤ꧀ꦠ​ꦩ꧀ꦊꦧꦸ​ꦧꦺꦴꦭꦺꦴꦁꦔꦤ꧀ꦢꦺꦴꦩ꧀ ꦠꦼꦤꦶꦩ꧀ꦧꦁꦮꦺꦴꦁ​ꦱꦸꦒꦶꦃ​ꦩ꧀ꦊꦧꦸ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

26꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦱꦲꦶꦏꦶ​ꦲꦺꦴꦫ​ꦢꦸꦤꦸꦁꦧ꧀ꦭꦱ꧀ ꦩꦸꦭꦤꦺ​ꦠꦏꦺꦴꦤ꧀:“ꦒꦸꦱ꧀ꦠꦶ​꧈​ꦭꦃ​ꦱꦥ​ꦱꦶꦁ​ꦧꦶꦱ​ꦱ꧀ꦭꦩꦼꦠ꧀?”

27꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦼꦭꦺꦴꦏ꧀ꦏꦏꦺꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦱꦼꦩꦲꦸꦂ​:“ꦥꦚ꧀ꦕꦺꦤ꧀ ꦲꦔꦺꦭ꧀ꦧꦔꦼꦠ꧀ꦏꦁꦒꦺꦴ​ꦩꦤꦸꦁꦱ​꧈​ꦤꦁꦔꦶꦁ​ꦲꦺꦴꦫ​ꦲꦔꦺꦭ꧀ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦼꦩ꧀ꦧꦫꦁ​ꦧꦶꦱ​ꦏ꧀ꦭꦏꦺꦴꦤ꧀꧈​”

꧋ꦲꦸꦥꦃꦲꦺꦮꦺꦴꦁ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀꧈​

28꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ​꧈​ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦤꦶꦁꦒꦭ꧀ꦱꦼꦩ꧀ꦧꦫꦁ​ꦠꦼꦫꦸꦱ꧀ꦩꦺꦭꦸ​ꦏꦺꦴꦮꦺ​!”

29꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦢꦶꦫꦸꦔꦺꦴꦏ꧀ꦏꦏꦺꦱꦶꦁ​ꦲꦥꦶꦏ꧀ꦲꦺꦴꦩꦺꦴꦁꦏꦸꦲꦶꦏꦶ​꧉​ꦱꦥ​ꦱꦶꦁ​ꦤꦶꦁꦒꦭ꧀ꦲꦺꦴꦩꦃ​ꦭꦤ꧀ꦏꦼꦧꦺꦴꦤꦺ​꧈​ꦤꦶꦁꦒꦭ꧀ꦮꦺꦴꦁ​ꦠꦸꦮ​꧈​ꦱꦼꦢꦸꦭꦸꦂ​ꦭꦤ꧀ꦲꦤꦏ꧀ꦏꦺ​ꦗꦭꦂꦫꦤ꧀​ꦔ꧀ꦭꦧꦸꦃꦲꦶ​ꦲꦏꦸ​ꦭꦤ꧀​ꦔ꧀ꦭꦧꦸꦃꦲꦶ​ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁ​ꦏꦸꦮꦶ​ꦱꦲꦶꦏꦶ​ꦩꦼꦱ꧀ꦠꦶꦤꦩ꧀ꦥ​ꦱꦼꦩ꧀ꦧꦫꦁ​ꦔꦸꦁꦏꦸꦭ꧀ꦭꦸꦁꦏꦸꦭ꧀ꦭꦶꦩꦲꦸꦤꦺ​꧉​ 30ꦧꦏꦭ꧀ꦤꦩ꧀ꦥ​ꦥꦶꦁ​ꦱꦠꦸꦱ꧀ ꦪ​ꦲꦺꦴꦩꦃ​꧈​ꦱꦼꦢꦸꦭꦸꦂ​꧈​ꦮꦺꦴꦁ​ꦠꦸꦮ​꧈​ꦲꦤꦏ꧀ꦭꦤ꧀ꦏꦼꦧꦺꦴꦤ꧀ ꦱꦼꦤꦗꦤ꧀ꦤ​ꦏꦫꦺꦴ​ꦔꦭꦩ꧀ꦩꦶ​ꦏꦱꦁꦱꦫꦤ꧀꧈​ꦭꦤ꧀ꦲꦶꦁ​ꦠꦼꦩ꧀ꦧꦺ​ꦧꦏꦭ꧀ꦤꦩ꧀ꦥ​ꦲꦸꦫꦶꦥ꧀ꦭꦁꦒꦼꦁ​꧉​ 31ꦤꦁꦔꦶꦁ​ꦲꦺꦴꦏꦺꦃꦱꦶꦁ​ꦤꦁꦔꦉꦥ꧀ꦧꦏꦭ꧀ꦭꦺ​ꦏꦺꦫꦶ​꧈​ꦩꦭꦃ​ꦱꦶꦁ​ꦠꦼꦏ​ꦏꦺꦫꦶ​ꦧꦏꦭ꧀ꦭꦺ​ꦤꦁꦔꦉꦥ꧀꧈​”

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦭꦩ꧀ꦧꦁꦔꦶꦩꦼꦤꦺꦃ​ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦱꦁꦱꦫ​꧉​

32꧋ꦱꦲꦶꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦩ꧀ꦭꦏꦸ​ꦧꦸꦢꦭ꧀ꦤꦁꦪꦺꦫꦸꦱꦭꦺꦩ꧀꧈​ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦭꦏꦸ​ꦤꦁꦔꦉꦥ꧀ꦢꦺꦮꦺ꧉​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦢꦸꦫꦸꦁ​ꦩꦫꦶ​ꦏꦒꦺꦠ꧀ꦠꦺ​ꦭꦤ꧀ꦮꦺꦴꦁꦮꦺꦴꦁ​ꦭꦶꦪꦤꦺ​ꦱꦶꦁ​ꦩꦺꦭꦸ​ꦲꦸꦒ​ ꦥꦢ​ꦮꦼꦢꦶ​꧉​ꦩꦸꦫꦶꦢ꧀ꦫꦺꦴꦭꦱ꧀ꦩꦲꦸ​ꦠꦼꦫꦸꦱ꧀ꦢꦶꦕꦼꦭꦸꦏ꧀​ꦢꦶꦢꦺꦮꦺꦏ꧀ꦏꦏꦺꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦲꦺꦴꦩꦺꦴꦁꦔꦶꦧꦧ꧀ꦱꦶꦁ​ꦧꦏꦭ꧀ꦢꦶꦲꦭꦩ꧀ꦩꦶ​ꦏꦫꦺꦴ​ꦢꦺꦏ꧀ꦤꦺ꧉​ 33ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦢꦶꦠꦶꦠꦺꦤ꧀ꦤꦶ​ꦢꦺꦮꦺ!ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦤꦁꦪꦺꦫꦸꦱꦭꦺꦩ꧀꧈​ꦤꦁꦏꦺꦴꦤꦺꦴ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀ꦧꦏꦭ꧀ꦚꦼꦏꦼꦭ꧀ꦲꦤꦏ꧀ꦏꦺ​ꦩꦤꦸꦁꦱ​꧉​ꦧꦏꦭ꧀ꦥꦢ​ꦚꦭꦃꦚꦭꦃꦲꦏꦺꦢꦺꦏ꧀ꦤꦺꦭꦤ꧀ꦩꦱꦿꦃꦲꦏꦺꦢꦺꦏ꧀ꦤꦺꦩꦫꦁ​ꦧꦁꦱ​ꦭꦶꦪ​ꦱꦶꦁ​ꦲꦺꦴꦫ​ꦏꦼꦤꦭ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦁꦏꦺꦴꦤ꧀ꦩꦠꦺꦤ꧀ꦤꦶ​꧉​ 34ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀ꦥꦢ​ꦩꦺꦴꦪꦺꦴꦏ꧀ꦏꦶ​꧈​ꦔꦶꦢꦺꦴꦤ꧀ꦤꦶ​ꦭꦤ꧀ꦩꦼꦕꦸꦠ꧀ꦠꦶ​ꦢꦺꦏ꧀ꦤꦺꦭꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦧꦏꦭ꧀ꦥꦢ​ꦩꦠꦺꦤ꧀ꦤꦶ​ꦢꦺꦏ꧀ꦤꦺ꧉​ꦤꦁꦔꦶꦁ​ꦲꦶꦁ​ꦠꦼꦭꦸꦁ​ꦢꦶꦤꦤꦺ​ꦢꦺꦏ꧀ꦤꦺꦧꦏꦭ꧀ꦠꦔꦶ​ꦱꦁꦏꦥꦠꦶ​꧉​”

꧋ꦧꦧ꧀​ꦔ꧀ꦭꦢꦺꦤ꧀ꦤꦶ​꧉​

35꧋ꦫꦱꦸꦭ꧀ꦪꦏꦺꦴꦧꦸꦱ꧀ꦭꦤ꧀ꦪꦺꦴꦲꦤꦼꦱ꧀ ꦏꦧꦺꦃ​ꦭꦺꦴꦫꦺꦴ​ꦲꦤꦏ꧀ꦏꦺ​ꦯꦺꦧꦺꦢꦺꦪꦸꦱ꧀ ꦠꦼꦫꦸꦱ꧀ꦩꦗꦸ​ꦭꦤ꧀ꦔꦺꦴꦩꦺꦴꦁꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦒꦸꦫꦸ​꧈​ꦲꦮꦏ꧀ꦏꦺ​ꦢꦺꦮꦺꦤ꧀ꦢꦸꦮꦺꦥꦶꦠꦏꦺꦴꦤ꧀ꦤꦤ꧀꧈​” 36“ꦲꦉꦥ꧀ꦠꦏꦺꦴꦤ꧀ꦲꦥ​?”ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​꧉​

37꧋“ꦒꦸꦱ꧀ꦠꦶ​꧈​ꦤꦺꦏ꧀ꦏꦺꦴꦮꦺ​ꦮꦶꦱ꧀ꦢꦢꦶ​ꦫꦠꦸ​꧈​ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦩꦺꦭꦸ​ꦚ꧀ꦗꦒꦺꦴꦁꦏꦪ​ꦫꦠꦸ​ꦤꦁꦱꦼꦧꦼꦭꦃꦩꦸ꧈​ꦱꦶꦗꦶ​ꦤꦁꦠꦼꦔꦼꦤ꧀ꦭꦤ꧀ꦱꦶꦗꦶ​ꦤꦁꦏꦶꦮ​꧉​”

38꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦗꦭꦸꦏ꧀!ꦲꦥ​ꦏꦺꦴꦮꦺ​ꦒꦼꦊꦩ꧀​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀ꦱꦶꦁ​ꦧꦏꦭ꧀ꦠꦏ꧀ꦲꦭꦩ꧀ꦩꦶ​?”

39꧋“ꦒꦼꦊꦩ꧀ꦒꦸꦱ꧀ꦠꦶ​!”ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦥꦚ꧀ꦕꦺꦤ꧀ ꦏꦱꦁꦱꦫꦤ꧀ꦱꦶꦁ​ꦧꦏꦭ꧀ꦠꦏ꧀ꦲꦭꦩ꧀ꦩꦶ​ꦏꦺꦴꦮꦺ​ꦲꦸꦒ​ꦧꦏꦭ꧀ꦩꦺꦭꦸ​ꦔꦭꦩ꧀ꦩꦶ​꧉​ 40ꦤꦁꦔꦶꦁ​ꦧꦧ꧀​ꦚ꧀ꦗꦒꦺꦴꦁꦤꦁꦠꦼꦔꦼꦤ꧀ꦲꦥ​ꦏꦶꦮꦏꦸꦲꦏꦸ​ꦲꦺꦴꦫ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦔꦫꦤ꧀ꦤꦶ​꧉​ꦲꦶꦏꦸ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦱꦶꦁ​ꦢꦶꦥꦶꦭꦶꦃ​ꦏꦫꦺꦴ​ꦢꦺꦏ꧀ꦤꦺꦢꦺꦮꦺ꧉​”

41꧋ꦏꦿꦸꦔꦸ​ꦏꦸꦮꦶ​ꦩꦸꦫꦶꦢ꧀ꦱꦶꦁ​ꦱꦼꦥꦸꦭꦸꦃ​ꦠꦼꦫꦸꦱ꧀ꦗꦺꦁꦏꦺꦭ꧀ꦏꦫꦺꦴ​ꦫꦱꦸꦭ꧀ꦪꦏꦺꦴꦧꦸꦱ꧀ꦭꦤ꧀ꦪꦺꦴꦲꦤꦼꦱ꧀꧈​ 42ꦩꦸꦭꦤꦺ​ꦏꦧꦺꦃ​ꦠꦼꦫꦸꦱ꧀ꦢꦶꦕꦼꦭꦸꦏ꧀​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦢꦶꦲꦺꦴꦩꦺꦴꦁꦔꦶꦔꦺꦤꦺ​:“ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦕꦫꦤꦺ​ꦮꦺꦴꦁ​ꦱꦶꦁ​ꦲꦺꦴꦫ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦥꦫ​ꦥꦼꦁꦒꦼꦢꦺꦱꦶꦁ​ꦏꦸꦢꦸ​ꦤꦠ​ꦧꦁꦱꦤꦺ​ꦩꦭꦃ​ꦥꦢ​ꦔ꧀ꦮꦱꦤꦶ​ꦭꦤ꧀ꦔꦼꦫꦺꦃ​꧉​ 43-44ꦤꦁꦔꦶꦁ​ꦏꦺꦴꦮꦺ​ꦲꦺꦴꦫ​ꦏꦼꦤꦺꦁꦏꦪ​ꦔꦺꦴꦤꦺꦴ​꧉​ꦱꦥ​ꦱꦶꦁ​ꦏꦼꦥꦺꦔꦶꦤ꧀ꦢꦢꦶ​ꦥꦼꦔꦉꦥ꧀ꦏꦸꦢꦸ​ꦔ꧀ꦭꦢꦺꦤ꧀ꦤꦶ​ꦭꦶꦪꦤꦺ​ꦭꦤ꧀ꦱꦥ​ꦱꦶꦁ​ꦏꦼꦥꦺꦔꦶꦤ꧀ꦢꦶꦲꦁꦒꦼꦥ꧀ꦒꦼꦢꦺꦢꦺꦮꦺꦏꦸꦢꦸ​ꦢꦢꦶ​ꦥꦼꦭꦢꦺꦤ꧀ꦤꦺ​ꦭꦶꦪꦭꦶꦪꦤꦺ​꧉​ 45ꦲꦮꦶꦠ꧀ꦲꦤꦏ꧀ꦏꦺ​ꦩꦤꦸꦁꦱ​ꦠꦼꦏꦤꦺ​ꦪ​ꦲꦺꦴꦫ​ꦚ꧀ꦗꦭꦸꦏ꧀ꦢꦶꦭꦢꦺꦤ꧀ꦤꦶ​꧈​ꦤꦁꦔꦶꦁ​ꦱꦸꦥꦪ​ꦔ꧀ꦭꦢꦺꦤ꧀ꦤꦶ​ꦭꦤ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦏꦁꦒꦺꦴ​ꦤꦼꦧꦸꦱ꧀ꦲꦸꦫꦶꦥ꧀ꦥꦺꦮꦺꦴꦁ​ꦲꦺꦴꦏꦺꦃ꧉​”

꧋ꦮꦺꦴꦁ​ꦭꦩꦸꦂ​ꦧꦶꦱ​ꦮꦼꦫꦸꦃ​ꦩꦼꦤꦺꦃ​꧉​

46꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦏ​ꦤꦁꦏꦸꦠꦪꦺꦫꦶꦏꦺꦴ꧉​ꦏꦢꦸꦁ​ꦧꦉꦁ​ꦏꦫꦺꦴ​ꦮꦺꦴꦁ​ꦥꦶꦫꦁꦥꦶꦫꦁ​ꦭꦸꦔ​ꦩꦼꦤꦺꦃ​ꦱꦁꦏꦪꦺꦫꦶꦏꦺꦴ꧈​ꦲꦺꦤꦺꦁꦮꦺꦴꦁ​ꦭꦩꦸꦂ​ꦔꦼꦩꦶꦱ꧀ꦤꦁꦥꦶꦁꦒꦶꦂ​ꦢꦭꦤ꧀꧈​ꦮꦺꦴꦁ​ꦲꦶꦏꦶ​ꦗꦼꦤꦼꦁꦔꦺ​ꦧꦂꦠꦶꦩꦺꦪꦸꦱ꧀ ꦲꦤꦏ꧀ꦏꦺ​ꦠꦶꦩꦺꦪꦸꦱ꧀꧈​ 47ꦧꦂꦠꦶꦩꦺꦪꦸꦱ꧀ꦏꦿꦸꦔꦸ​ꦤꦺꦏ꧀ꦱꦶꦁ​ꦭꦶꦮꦠ꧀ꦤꦁꦢꦭꦤ꧀ꦏꦺꦴꦤꦺꦴ​ꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦏꦸꦠꦟꦱꦫꦺꦠ꧀ ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦕꦼꦭꦸꦏ꧀ꦕꦼꦭꦸꦏ꧀:“ꦪꦺꦯꦸꦱ꧀ ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ ꦲꦩ꧀ꦧꦺꦴꦏ꧀ꦩꦼꦭꦱ꧀ꦩꦫꦁ​ꦲꦏꦸ​꧉​”

48꧋ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦚꦼꦤꦺꦤ꧀ꦤꦶꦧꦂꦠꦶꦩꦺꦪꦸꦱ꧀ꦏꦺꦴꦁꦏꦺꦴꦤ꧀ꦩꦼꦤꦼꦁ​꧉​ꦤꦁꦔꦶꦁ​ꦮꦺꦴꦁꦔꦺ​ꦩꦭꦃ​ꦠꦩ꧀ꦧꦃ​ꦱꦼꦫꦸ​ꦱꦶꦁ​ꦕꦼꦭꦸꦏ꧀ꦕꦼꦭꦸꦏ꧀:“ꦠꦸꦫꦸꦤ꧀ꦤꦤ꧀ꦤꦺ​ꦣꦮ꦳ꦼꦢ꧀ ꦲꦩ꧀ꦧꦺꦴꦏ꧀ꦩꦼꦭꦱ꧀ꦩꦫꦁ​ꦲꦏꦸ​!”

49꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦤ꧀ꦢꦼꦏ꧀ꦭꦤ꧀ꦔꦺꦴꦩꦺꦴꦁ:“ꦮꦺꦴꦁ​ꦏꦸꦮꦶ​ꦢꦶꦏꦺꦴꦁꦏꦺꦴꦤ꧀​ꦩ꧀ꦧꦿꦺꦤꦺ!”

꧋ꦮꦺꦴꦁ​ꦭꦩꦸꦂ​ꦩꦲꦸ​ꦠꦼꦫꦸꦱ꧀ꦢꦶꦕꦼꦭꦸꦏ꧀​ꦏꦫꦺꦴ​ꦮꦺꦴꦁꦮꦺꦴꦁ​:“ꦮꦶꦱ꧀ꦲꦗ​ꦮꦼꦢꦶ​꧈​ꦤ꧀ꦢꦁꦔꦢꦼꦏ꧀ꦏ꧉​ꦒꦸꦱ꧀ꦠꦶ​ꦚꦼꦭꦸꦏ꧀ꦏꦺꦴꦮꦺ​꧉​”

50꧋ꦧꦂꦠꦶꦩꦺꦪꦸꦱ꧀ꦠꦼꦫꦸꦱ꧀ꦲꦩ꧀ꦧꦸꦮꦁ​ꦱꦭꦶꦤ꧀ꦤꦺꦚ꧀ꦗꦧ​ꦱꦶꦁ​ꦚꦿꦶꦩ꧀ꦥꦼꦠ꧀ꦚꦿꦶꦩ꧀ꦥꦼꦠ꧀ꦠꦶꦠꦼꦫꦸꦱ꧀ꦒꦼꦭꦶꦱ꧀ꦒꦼꦭꦶꦱ꧀ꦩꦫꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

51꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀:“ꦲꦏꦸ​ꦲꦩ꧀ꦧꦺꦴꦏ꧀ꦏꦺꦴꦁꦏꦺꦴꦤ꧀ꦔꦥ​?”

꧋“ꦲꦏꦸ​ꦏꦼꦥꦺꦔꦶꦤ꧀ꦮꦼꦫꦸꦃ​꧈​ꦒꦸꦱ꧀ꦠꦶ​!”

52꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦪ​ꦮꦶꦱ꧀ ꦏꦤ​!ꦥꦼꦔꦤ꧀ꦢꦼꦭ꧀ꦩꦸ​ꦱꦶꦁ​ꦚ꧀ꦭꦩꦼꦠ꧀ꦠꦏꦺꦏꦺꦴꦮꦺ​꧉​”

꧋ꦱꦏ꧀ꦮꦠ꧀ꦧꦂꦠꦶꦩꦺꦪꦸꦱ꧀ꦧꦶꦱ​ꦮꦼꦫꦸꦃ​ꦠꦼꦫꦸꦱ꧀ꦩꦺꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦊꦧꦸ​ꦤꦁꦪꦺꦫꦸꦱꦭꦺꦩ꧀꧈​

꧇​꧑꧑꧇​ 1꧋ꦮꦺꦴꦁꦮꦺꦴꦁ​ꦱꦲꦶꦏꦶ​ꦮꦶꦱ꧀ꦕꦼꦢꦼꦏ꧀​ꦏꦫꦺꦴ​ꦪꦺꦫꦸꦱꦭꦺꦩ꧀ ꦮꦶꦱ꧀ꦠꦼꦏꦤ꧀ꦢꦺꦱ​ꦨꦺꦠ꧀ꦥ꦳ꦏꦺꦭꦤ꧀ꦢꦺꦱ​ꦨꦺꦠꦤꦶ꧈​ꦕꦼꦢꦼꦏ꧀​ꦏꦫꦺꦴ​ꦒꦸꦤꦸꦁ​ꦎꦭꦺꦥ꦳꧀꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦩꦸꦫꦶꦢ꧀ꦭꦺꦴꦫꦺꦴ​ꦔꦺꦴꦩꦺꦴꦁ: 2“ꦏꦤ​ꦩ꧀ꦊꦧꦸ​ꦤꦁꦢꦺꦱ​ꦱꦶꦁ​ꦤꦁꦔꦉꦥ꧀ꦏꦲꦺ​꧉​ꦤꦁꦏꦺꦴꦤꦺꦴ​ꦏꦺꦴꦮꦺ​ꦩꦼꦁꦏꦺꦴ​ꦧꦏꦭ꧀ꦤꦼꦩꦸ​ꦏꦶꦩꦂꦲꦼꦤꦺꦴꦩ꧀ꦱꦶꦁ​ꦢꦶꦏꦼꦚ꧀ꦕꦁ​​꧉​ꦏꦶꦩꦂꦏꦸꦮꦶ​ꦢꦸꦫꦸꦁ​ꦠꦲꦸ​ꦢꦶꦠꦸꦩ꧀ꦥꦏ꧀ꦏꦶ​ꦮꦺꦴꦁ​꧉​ꦢꦶꦲꦸꦕꦸꦭ꧀ꦭꦶ​ ꦠꦼꦫꦸꦱ꧀ꦢꦶꦒꦮ​ꦩ꧀ꦧꦿꦺꦤꦺ꧉​ 3ꦤꦺꦏ꧀ꦲꦺꦤꦺꦁꦮꦺꦴꦁ​ꦠꦏꦺꦴꦤ꧀ꦲꦥꦲꦥ​꧈​ꦔꦺꦴꦩꦺꦴꦁ:'ꦒꦸꦱ꧀ꦠꦶ​ꦱꦶꦁ​ꦔꦺꦴꦁꦏꦺꦴꦤ꧀ꦭꦤ꧀ꦒꦸꦱ꧀ꦠꦶ​ꦱꦶꦁ​ꦩ꧀ꦧꦸꦠꦸꦃꦲꦏꦺꦭꦤ꧀ꦧꦏꦭ꧀​ꦤ꧀ꦢꦁꦢꦶꦧꦭꦺꦏ꧀ꦏꦏꦺꦩꦼꦤꦺꦃ​꧉​’”

4꧋ꦩꦸꦫꦶꦢ꧀ꦭꦺꦴꦫꦺꦴ​ꦩꦲꦸ​ꦠꦼꦫꦸꦱ꧀ꦧꦸꦢꦭ꧀ꦭꦤ꧀ꦥꦢ​ꦤꦼꦩꦸ​ꦏꦶꦩꦂꦲꦼꦤꦺꦴꦩ꧀ꦱꦶꦁ​ꦢꦶꦏꦼꦚ꧀ꦕꦁ​​ꦤꦁꦭꦮꦁ​ꦤꦁꦥꦶꦁꦒꦶꦂ​ꦢꦭꦤ꧀꧈​ 5ꦮꦺꦴꦁꦮꦺꦴꦁ​ꦱꦶꦁ​ꦔꦢꦼꦏ꧀ꦤꦁꦏꦺꦴꦤꦺꦴ​ꦠꦼꦫꦸꦱ꧀ꦠꦏꦺꦴꦤ꧀:“ꦭꦃ​ꦏꦺꦴꦏ꧀ꦲꦩ꧀ꦧꦺꦴꦏ꧀ꦲꦸꦕꦸꦭ꧀ꦭꦶ​ꦏꦶꦩꦂꦫꦺ꧈​ꦧꦺꦤ꧀ꦔꦥ​?”

6꧋ꦩꦸꦫꦶꦢ꧀ꦭꦺꦴꦫꦺꦴ​ꦩꦲꦸ​ꦔꦺꦴꦩꦺꦴꦁꦤꦺꦏ꧀ꦒꦸꦱ꧀ꦠꦶ​ꦱꦶꦁ​ꦩ꧀ꦧꦸꦠꦸꦃꦲꦏꦺꦭꦤ꧀ꦧꦏꦭ꧀ꦢꦶꦧꦭꦺꦏ꧀ꦏꦏꦺꦩꦼꦤꦺꦃ​꧉​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦲꦺꦴꦫ​ꦔꦺꦴꦩꦺꦴꦁꦲꦥꦲꦥ​꧉​ 7ꦏꦶꦩꦂꦫꦺꦠꦼꦫꦸꦱ꧀ꦢꦶꦒꦮ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦒꦼꦒꦼꦂꦫꦺ​ꦢꦶꦭꦺꦩꦺꦏ꧀ꦏꦶꦏ꧀ꦭꦩ꧀ꦧꦶꦤꦺ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦸꦩ꧀ꦥꦏ꧀ꦏꦶꦩꦂꦫꦺ꧉​ 8ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦔ꧀ꦒꦼꦭꦂ​ꦏ꧀ꦭꦩ꧀ꦧꦶꦤꦺ​ꦤꦁꦢꦭꦤ꧀ꦭꦤ꧀ꦭꦶꦪꦤꦺ​ꦥꦢ​ꦔ꧀ꦒꦮ​ꦒꦺꦴꦢꦺꦴꦔꦤ꧀ꦒꦺꦴꦢꦺꦴꦁꦔꦤ꧀ꦱꦁꦏꦏꦼꦧꦺꦴꦤ꧀ꦠꦼꦫꦸꦱ꧀ꦢꦶꦱꦼꦧꦂ​ꦤꦁꦢꦭꦤ꧀꧈​ 9ꦮꦺꦴꦁꦮꦺꦴꦁ​ꦱꦶꦁ​ꦩ꧀ꦭꦏꦸ​ꦤꦁꦔꦉꦥ꧀ꦥꦺ​ꦭꦤ꧀ꦲꦩ꧀ꦧꦸꦫꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦥꦢ​ꦱꦸꦫꦏ꧀ꦱꦸꦫꦏ꧀ꦔꦺꦴꦩꦺꦴꦁ:“ꦲ꦳ꦺꦴꦱꦤ!ꦤꦩ꧀ꦥꦲ​ꦧꦼꦂꦏꦃ​ꦱꦶꦁ​ꦠꦼꦏ​ꦲꦶꦁ​ꦗꦼꦤꦼꦁꦔꦺ​ꦒꦸꦱ꧀ꦠꦶ​! 10ꦭꦁ​ꦒꦼꦁ​ꦔ​ꦏꦿꦠꦺꦴꦤꦺ​ꦫꦠꦸ​ꦣꦮ꦳ꦼꦢ꧀ ꦊꦭꦸꦲꦸꦂꦫꦺ​ꦲꦮꦏ꧀ꦏꦺ​ꦢꦺꦮꦺ꧉​ꦲ꦳ꦺꦴꦱꦤꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​꧉​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦩꦶꦱꦸꦃ​ꦮꦶꦠ꧀ꦲꦚ꧀ꦗꦶꦂ​꧉​

11꧋ꦠꦼꦏꦤ꧀ꦪꦺꦫꦸꦱꦭꦺꦩ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦩ꧀ꦊꦧꦸ​ꦤꦁꦒꦿꦺꦗ​ꦒꦼꦢꦺ​꧈​ꦚꦮꦁ​ꦱꦼꦩ꧀ꦧꦫꦁꦩ꧀ꦧꦫꦁꦤꦁꦏꦺꦴꦤꦺꦴ​꧉​ꦢꦺꦏ꧀ꦤꦺꦠꦼꦫꦸꦱ꧀ꦧꦸꦢꦭ꧀ꦏꦫꦺꦴ​ꦩꦸꦫꦶꦢ꧀ꦫꦺꦴꦭꦱ꧀ꦤꦁꦢꦺꦱ​ꦨꦺꦠꦤꦶ꧈​ꦲꦮꦶꦠ꧀ꦮꦶꦱ꧀ꦫꦢ​ꦱꦸꦫꦸꦥ꧀꧈​ 12ꦲꦺꦱꦸꦏ꧀ꦏꦺ​꧈​ꦢꦺꦴꦁꦔꦺꦭꦸꦔ​ꦱꦁꦏꦨꦺꦠꦤꦶ꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦱ​ꦔꦼꦭꦶꦃ​꧉​ 13ꦱꦁꦏꦏꦢꦺꦴꦃꦲꦤ꧀ꦢꦺꦏ꧀ꦤꦺꦮꦼꦫꦸꦃ​ꦮꦶꦠ꧀ꦲꦚ꧀ꦗꦶꦂ​ꦱꦶꦁ​ꦒꦺꦩ꧀ꦧꦺꦭ꧀ꦒꦺꦴꦢꦺꦴꦁꦔꦺ​ꦠꦼꦫꦸꦱ꧀ꦢꦶꦥꦫꦤ꧀ꦤꦶ​ꦲꦉꦥ꧀ꦢꦶꦠꦶꦭꦶꦏ꧀ꦏꦶꦲꦺꦤꦺꦁꦮꦺꦴꦃꦲꦺ​ꦲꦥ​ꦲꦺꦴꦫ​꧉​ꦏꦢꦸꦁ​ꦠꦼꦏꦤ꧀ꦮꦶꦠ꧀ꦠꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦺꦴꦫ​ꦤꦼꦩꦸ​ꦲꦥꦲꦥ​ꦧ꧀ꦭꦱ꧀꧈​ꦤꦩꦸꦁ​ꦲꦺꦤꦺꦁꦒꦺꦴꦢꦺꦴꦁꦔꦺ​꧈​ꦲꦮꦶꦠ꧀ꦢꦸꦫꦸꦁ​ꦲꦸꦁꦱꦸꦩ꧀ꦩꦺ​ꦮꦺꦴꦃ​꧉​ 14ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦏꦿꦸꦔꦸ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁ​ꦮꦶꦠ꧀ꦠꦺ​:“ꦮꦶꦮꦶꦠ꧀ꦱꦲꦶꦏꦶ​ꦠꦼꦏꦤ꧀ꦱ꧀ꦭꦮꦱ꧀ꦱꦺꦲꦺꦴꦫ​ꦧꦏꦭ꧀ꦲꦺꦤꦺꦁꦮꦺꦴꦁ​ꦱꦶꦁ​ꦩꦁꦔꦤ꧀ꦮꦺꦴꦃꦩꦸ​ꦩꦼꦤꦺꦃ​!”

꧋ꦲꦺꦴꦩꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦗ​ꦢꦶꦒꦮꦺ​ꦥꦱꦂ​꧉​

15꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦮꦶꦱ꧀ꦠꦼꦏꦤ꧀ꦪꦺꦫꦸꦱꦭꦺꦩ꧀꧈​ꦤꦁꦏꦺꦴꦤꦺꦴ​ꦢꦺꦏ꧀ꦤꦺꦲꦉꦥ꧀​ꦩ꧀ꦊꦧꦸ​ꦤꦁꦒꦿꦺꦗ​ꦒꦼꦢꦺ​꧉​ꦤꦁꦔꦶꦁ​ꦤꦁꦭꦠꦂꦫꦺ​ꦏꦺꦴꦤꦺꦴ​ꦲꦺꦴꦏꦺꦃꦮꦺꦴꦁ​ꦱꦶꦁ​ꦢꦺꦴꦢꦺꦴꦭ꧀ꦭꦤ꧀ꦭꦤ꧀ꦭꦶꦪꦤꦺ​ꦱꦶꦁ​ꦥꦢ​ꦠꦸꦏꦸ​꧉​ꦩꦸꦭꦤꦺ​ꦮꦺꦴꦁꦮꦺꦴꦁ​ꦲꦶꦏꦶ​ꦠꦼꦫꦸꦱ꧀ꦢꦶꦱꦼꦤꦺꦤ꧀ꦤꦶꦭꦤ꧀ꦢꦶꦏꦺꦴꦁꦏꦺꦴꦤ꧀ꦭꦸꦔ​ꦏꦧꦺꦃ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦩꦺꦗ​ꦩꦺꦗꦤꦺ​ꦱꦶꦁ​ꦠꦸꦏꦁ​ꦔꦶꦗꦺꦴꦭ꧀ꦭꦶ​ꦢꦸꦮꦶꦠ꧀ꦭꦤ꧀ꦢꦶꦁꦏ꧀ꦭꦶꦏ꧀ꦢꦶꦁꦏ꧀ꦭꦶꦏ꧀ꦏꦺꦱꦶꦁ​ꦠꦸꦏꦁ​ꦲꦢꦺꦴꦭ꧀ꦩꦤꦸꦏ꧀ꦢꦫ​ꦢꦶꦒ꧀ꦭꦺꦩ꧀ꦥꦁꦒ꧀ꦭꦺꦩ꧀ꦥꦁꦔꦏꦺꦏꦧꦺꦃ​꧉​ 16ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦠꦼꦏ​ꦔ꧀ꦒꦮ​ꦢꦒꦁꦔꦤ꧀ꦤꦺ​ꦢꦶꦲꦼꦤ꧀ꦢꦼꦏ꧀ ꦲꦺꦴꦫ​ꦲꦺꦤ꧀ꦠꦸꦏ꧀ꦭꦶꦮꦠ꧀ꦭꦠꦂꦫꦺ​ꦒꦿꦺꦗ​ꦩꦼꦤꦺꦃ​꧉​ 17ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦤꦁꦏꦶꦠꦧ꧀ꦭꦲꦸꦠ꧀ꦮꦶꦱ꧀ꦏꦼꦠꦸꦭꦶꦱ꧀ꦠ​!ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦔꦺꦴꦩꦺꦴꦁꦔꦺꦤꦺ​:'ꦲꦺꦴꦩꦃꦏꦸ​ꦲꦶꦏꦶ​ꦥꦥꦤ꧀ꦥꦤ꧀ꦢꦺꦴꦔ​ꦏꦁꦒꦺꦴ​ꦏꦧꦺꦃ​ꦧꦁꦱ​꧉'​ꦤꦁꦔꦶꦁ​ꦏꦺꦤꦺ​ꦱꦲꦶꦏꦶ​ꦲꦩ꧀ꦧꦺꦴꦏ꧀ꦢꦢꦺꦏ꧀ꦏꦏꦺꦢꦼꦭꦶꦏꦤ꧀ꦤꦺꦩꦭꦶꦁ​꧉​”

18꧋ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦒꦸꦫꦸ​ꦏꦶꦠꦧ꧀ꦏꦿꦸꦔꦸ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦥꦢ​ꦮꦼꦢꦶ​꧈​ꦲꦮꦶꦠ꧀ꦮꦺꦴꦁꦮꦺꦴꦁ​ꦭꦶꦪꦤꦺ​ꦏꦧꦺꦃ​ꦱꦼꦤꦼꦁ​ꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦩꦸꦭꦤꦺ​ꦥꦫ​ꦲꦶꦩꦩ꧀ꦭꦤ꧀ꦒꦸꦫꦸ​ꦏꦶꦠꦧ꧀ꦩꦲꦸ​ꦥꦢ​ꦩꦶꦏꦶꦂ​ꦭꦤ꧀​ꦔ꧀ꦒꦺꦴꦭꦺꦏ꧀ꦲꦏꦭ꧀ꦲꦉꦥ꧀ꦩꦠꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

19꧋ꦏꦢꦸꦁ​ꦮꦶꦱ꧀ꦱꦸꦫꦸꦥ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦭꦸꦔ​ꦱꦁꦏꦪꦺꦫꦸꦱꦭꦺꦩ꧀꧈​

꧋ꦧꦧ꧀ꦥꦼꦔꦤ꧀ꦢꦼꦭ꧀꧈​

20꧋ꦲꦺꦱꦸꦏ꧀ꦏꦺ​꧈​ꦢꦺꦴꦁꦔꦺꦭꦶꦮꦠ꧀ꦩꦼꦤꦺꦃ​꧈​ꦠꦼꦫꦸꦱ꧀ꦥꦢ​ꦮꦼꦫꦸꦃ​ꦤꦺꦏ꧀ꦮꦶꦠ꧀ꦠꦺ​ꦩꦭꦶꦃ​ꦒꦫꦶꦁ​ꦏꦧꦺꦃ​ꦱꦏ꧀ꦲꦺꦴꦪꦺꦴꦠ꧀ꦠꦺꦴꦪꦺꦴꦠ꧀ꦠꦺ꧉​ 21ꦫꦱꦸꦭ꧀ꦦꦺꦠꦿꦸꦱ꧀ꦏꦺꦭꦶꦁꦔꦤ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦩꦶꦱꦸꦃ​ꦮꦶꦠ꧀ꦠꦺ​꧈​ꦩꦸꦭꦤꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ​꧈​ꦢꦼꦭꦺꦴꦏ꧀ꦏꦼꦤ꧀ꦲꦶꦏꦸ​꧈​ꦮꦶꦠ꧀ꦠꦺ​ꦱꦶꦁ​ꦲꦩ꧀ꦧꦺꦴꦏ꧀ꦥꦶꦱꦸꦃꦮꦶꦔꦶ​ꦩꦭꦶꦃ​ꦒꦫꦶꦁ​꧉​”

22꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ​:“ꦥꦢ​ꦔꦤ꧀ꦢꦼꦭ꧀ꦭ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 23ꦠꦼꦤꦤ꧀ ꦔꦤ꧀ꦢꦼꦭ꧀ꦭ​ꦠ​!ꦤꦺꦏ꧀ꦏꦺꦴꦮꦺ​ꦩꦿꦺꦤ꧀ꦠꦃ​ꦒꦸꦤꦸꦁꦔꦤ꧀ꦲꦶꦏꦶ​ꦔꦺꦴꦩꦺꦴꦁ:'ꦩꦸꦩ꧀ꦧꦸꦭ꧀ꦭ​ꦭꦤ꧀ꦤꦶꦧꦲꦤꦁꦱꦼꦒꦫ​꧈'​ꦩꦼꦱ꧀ꦠꦶꦪ​ꦧꦏꦭ꧀​ꦏ꧀ꦭꦏꦺꦴꦤ꧀ꦠꦼꦤꦤ꧀ ꦲꦁꦒꦼꦂꦫꦺ​ꦏꦺꦴꦮꦺ​ꦧ꧀ꦭꦱ꧀ꦲꦺꦴꦫ​ꦩꦔꦸꦩꦔꦸ​꧈​ꦤꦁꦔꦶꦁ​ꦥꦽꦕꦪ​ꦤꦺꦏ꧀ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁ​ꦧꦏꦭ꧀​ꦏ꧀ꦭꦏꦺꦴꦤ꧀ꦠꦼꦤꦤ꧀꧈​ 24ꦩꦸꦭꦤꦺ​ꦲꦏꦸ​ꦔꦺꦴꦩꦺꦴꦁ:ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦗꦭꦸꦏ꧀ꦲꦶꦁ​ꦥꦤ꧀ꦢꦺꦴꦔ​꧈​ꦔꦤ꧀ꦢꦼꦭ꧀ꦭ​ꦤꦺꦏ꧀ꦏꦺꦴꦮꦺ​ꦮꦶꦱ꧀ꦤꦩ꧀ꦥ​ꦏꦸꦮꦶ​꧈​ꦠꦼꦤꦤ꧀ ꦩꦼꦱ꧀ꦠꦶꦧꦏꦭ꧀ꦏꦼꦠꦸꦫꦸꦠ꧀ꦠꦤ꧀꧈​ 25ꦭꦤ꧀ꦩꦼꦤꦺꦃ​꧈​ꦤꦺꦏ꧀ꦏꦺꦴꦮꦺ​ꦤ꧀ꦢꦺꦴꦁꦔ꧈​ꦱꦥ​ꦮꦲꦺ​ꦱꦶꦁ​ꦤ꧀ꦢꦸꦮꦺꦱꦭꦃ​ꦏꦫꦺꦴ​ꦏꦺꦴꦮꦺ​ꦢꦶꦔꦥꦸꦫ꧉​ꦢꦢꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​ꦪ​ꦧꦏꦭ꧀ꦔꦥꦸꦫ​ꦱꦭꦃꦩꦸ​꧉​ 26(ꦤꦁꦔꦶꦁ​ꦤꦺꦏ꧀ꦏꦺꦴꦮꦺ​ ꦲꦺꦴꦫ​ꦒꦼꦊꦩ꧀ꦔꦥꦸꦫ​ꦭꦶꦪꦤꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦁꦱ꧀ꦮꦂꦒ​ꦪ​ꦲꦺꦴꦫ​ꦧꦏꦭ꧀ꦔꦥꦸꦫ​ꦏꦺꦴꦮꦺ​꧉”)

꧋ꦥꦶꦠꦏꦺꦴꦤ꧀ꦤꦤ꧀ꦧꦧ꧀ꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

27꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦥꦢ​ꦠꦼꦏ​ꦤꦁꦪꦺꦫꦸꦱꦭꦺꦩ꧀ꦩꦼꦤꦺꦃ​꧉​ꦢꦺꦴꦁꦔꦺꦢꦺꦏ꧀ꦤꦺꦲꦶꦗꦶꦏ꧀​ꦩ꧀ꦭꦏꦸꦩ꧀ꦭꦏꦸ​ꦤꦁꦭꦠꦂꦫꦺ​ꦒꦿꦺꦗ​ꦒꦼꦢꦺꦠꦼꦫꦸꦱ꧀ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ ꦥꦫ​ꦒꦸꦫꦸ​ꦏꦶꦠꦧ꧀ꦭꦤ꧀ꦥꦫ​ꦥꦼꦤꦸꦤ꧀ꦠꦸꦤꦺ​ꦮꦺꦴꦁ​ꦙꦸꦩꦫꦤꦶ​ꦢꦺꦏ꧀ꦤꦺ꧉​ 28ꦮꦺꦴꦁꦮꦺꦴꦁ​ꦲꦶꦏꦶ​ꦠꦏꦺꦴꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦱꦥ​ꦱꦶꦁ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦏꦺꦴꦮꦺ​ꦏꦺꦴꦏ꧀ꦮꦤꦶ​ꦤꦶꦤ꧀ꦢꦏ꧀ꦏꦏꦺꦏꦪ​ꦔꦺꦴꦤꦺꦴ​?”

29꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦲꦭꦺꦴꦤ꧀​ꦤ꧀ꦢꦶꦱꦶꦏ꧀ ꦱꦏ꧀ꦢꦸꦫꦸꦁꦔꦺꦲꦏꦸ​ꦱꦼꦩꦲꦸꦂ​꧈​ꦲꦏꦸ​ꦤ꧀ꦢꦸꦮꦺꦤ꧀ꦤꦶ​ꦥꦶꦠꦏꦺꦴꦤ꧀ꦤꦤ꧀​ꦤ꧀ꦢꦶꦱꦶꦏ꧀ꦩꦫꦁ​ꦏꦺꦴꦮꦺ​꧉​ꦤꦺꦏ꧀ꦏꦺꦴꦮꦺ​ꦧꦶꦱ​ꦚꦲꦸꦂꦫꦶ​ꦲꦏꦸ​꧈​ꦏꦺꦴꦮꦺ​ꦪ​ꦧꦏꦭ꧀ꦠꦏ꧀ꦲꦺꦴꦩꦺꦴꦁꦔꦶꦱꦥ​ꦱꦶꦁ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦲꦏꦸ​! 30ꦱꦥ​ꦱꦶꦁ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦪꦺꦴꦲꦤꦼꦱ꧀ꦏꦁꦒꦺꦴ​ꦲꦩ꧀ꦧꦥ꧀ꦠꦶꦱ꧀?ꦒꦸꦱ꧀ꦠꦶ​ꦄꦭ꧀ꦭꦃ​ꦲꦥ​ꦩꦤꦸꦁꦱ​?”

31꧋ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦒꦸꦤꦼꦩ꧀ꦩꦤ꧀ꦏꦼꦥꦿꦶꦪꦺ​ꦲꦼꦁꦒꦺꦴꦤꦺ​ꦲꦉꦥ꧀ꦱꦼꦩꦲꦸꦂ​꧉​ꦲꦮꦶꦠ꧀ꦤꦺꦏ꧀ꦔꦺꦴꦩꦺꦴꦁ:“ꦒꦸꦱ꧀ꦠꦶ​ꦄꦭ꧀ꦭꦃ​꧈​”ꦮꦺꦴꦁꦮꦺꦴꦁ​ꦥꦢ​ꦮꦼꦢꦶ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦏꦺꦴꦤ꧀:“ꦭꦃ​ꦏꦼꦤꦺꦁꦲꦥ​ꦢꦺꦏ꧀ꦤꦺꦏꦺꦴꦏ꧀ꦲꦺꦴꦫ​ꦲꦩ꧀ꦧꦺꦴꦏ꧀ꦒꦸꦒꦸ?” 32ꦤꦺꦏ꧀ꦥꦢ​ꦱꦼꦩꦲꦸꦂ​:“ꦩꦤꦸꦁꦱ​꧈​”ꦭꦃ​ꦏꦼꦥꦿꦶꦪꦺ​꧈​ꦩꦼꦁꦏꦺꦴ​ꦮꦺꦴꦁꦮꦺꦴꦁ​ꦥꦢ​ꦤꦼꦱꦸ​꧈​ꦲꦮꦶꦠ꧀ꦏꦧꦺꦃ​ꦥꦽꦕꦪ​ꦤꦺꦏ꧀ꦪꦺꦴꦲꦤꦼꦱ꧀ꦏꦸꦮꦶ​ꦤꦧꦶ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ 33ꦩꦸꦭꦤꦺ​ꦠꦼꦫꦸꦱ꧀ꦥꦢ​ꦔꦺꦴꦩꦺꦴꦁ:“ꦲꦼꦩ꧀ꦧꦸꦃ​ꦪ​꧈​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦔꦼꦂꦠꦶ​!”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦪ​ꦲꦺꦴꦫ​ꦧꦏꦭ꧀ꦠꦏ꧀ꦲꦺꦴꦩꦺꦴꦁꦔꦶꦱꦥ​ꦱꦶꦁ​ꦔꦼꦏꦺꦏ꧀ꦏꦶꦥꦔ꧀ꦮꦱ​ꦩꦫꦁ​ꦲꦏꦸ​!” ↑ ↑ ↑


꧋ꦥꦶꦮꦸꦭꦁ​ꦧꦧ꧀ꦮꦺꦴꦁꦮꦺꦴꦁ​ꦱꦶꦁ​ꦚꦺꦮ​ꦏꦼꦧꦺꦴꦤ꧀꧈​

꧇​꧑꧒꧇​ 1꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦩꦸꦭꦁꦔꦶꦮꦺꦴꦁꦮꦺꦴꦁ​ꦩꦲꦸ​ꦔꦁꦒꦺꦴ​ꦠꦼꦩ꧀ꦧꦸꦁ​ꦒꦩ꧀ꦧꦂ​ꦔꦺꦤꦺ​:“ꦲꦺꦤꦺꦁꦱꦏ꧀ꦮꦶꦗꦶꦤꦺꦮꦺꦴꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦢꦶꦠꦤ꧀ꦢꦸꦂꦫꦶ​ꦢꦽꦲꦶꦥ꦳꧀꧈​ꦏꦼꦧꦺꦴꦤꦺ​ꦢꦶꦥꦒꦼꦂꦫꦶ​ꦩꦸꦧꦼꦁ​ꦠꦼꦫꦸꦱ꧀ꦮꦺꦴꦁꦔꦺ​ꦔ꧀ꦒꦮꦺ​ꦭꦸꦮꦁꦔꦤ꧀ꦏꦁꦒꦺꦴ​ꦩꦼꦉꦱ꧀ꦢꦽꦲꦶꦥ꦳꧀ꦥ꦳ꦺ꧉​ꦲꦸꦒ​ꦢꦶꦒꦮꦺꦏ꧀ꦏꦏꦺꦲꦺꦴꦩꦃꦲꦺꦴꦩꦃꦲꦤ꧀ꦱꦶꦁ​ꦫꦢ​ꦢꦸꦮꦸꦂꦏꦁꦒꦺꦴ​ꦚ꧀ꦗꦒ​ꦏꦼꦧꦺꦴꦤꦺ​꧉​ꦏꦼꦧꦺꦴꦤꦺ​ꦠꦼꦫꦸꦱ꧀ꦢꦶꦱꦺꦮꦏ꧀ꦏꦏꦺꦩꦫꦁ​ꦮꦺꦴꦁꦮꦺꦴꦁ​ꦭꦶꦪꦤꦺ​꧉​ꦮꦺꦴꦁꦔꦺ​ꦢꦺꦮꦺꦭꦸꦔ​ꦤꦁꦤꦼꦒꦫ​ꦭꦶꦪ​꧉​ 2ꦏꦢꦸꦁ​ꦮꦶꦱ꧀ꦮꦪꦃ​ꦥꦤꦺꦤ꧀ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦔꦺꦴꦁꦏꦺꦴꦤ꧀ꦱ꧀ꦭꦥ꦳꧀ꦥ꦳ꦺꦤꦁꦔ꧀ꦒꦺꦴꦤ꧀ꦤꦺꦮꦺꦴꦁꦮꦺꦴꦁ​ꦱꦶꦁ​ꦚꦺꦮ​ꦏꦼꦧꦺꦴꦤꦺ​꧈​ꦚ꧀ꦗꦭꦸꦏ꧀ꦧꦒꦺꦪꦤ꧀ꦤꦺ꧉​ 3ꦤꦁꦔꦶꦁ​ꦱ꧀ꦭꦥ꦳꧀ꦱꦶꦁ​ꦢꦶꦏꦺꦴꦁꦏꦺꦴꦤ꧀ꦩꦲꦸ​ꦩꦭꦃ​ꦢꦶꦕꦼꦏꦼꦭ꧀ꦏꦫꦺꦴ​ꦱꦶꦁ​ꦚꦺꦮ​ꦏꦼꦧꦺꦴꦤ꧀ꦠꦼꦫꦸꦱ꧀ꦢꦶꦒꦼꦧꦸꦏ꧀ꦏꦶ꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦱ꧀ꦭꦥ꦳꧀ꦥ꦳ꦺꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦭꦸꦔ​ꦔꦁꦒꦸꦂ​꧈​ꦲꦺꦴꦫ​ꦔ꧀ꦒꦮ​ꦲꦥꦲꦥ​꧉​

4꧋“ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦱ꧀ꦭꦥ꦳꧀ꦭꦶꦪꦤꦺ​꧈​ꦤꦁꦔꦶꦁ​ꦱꦶꦁ​ꦲꦶꦏꦶ​ꦲꦸꦒ​ꦢꦶꦥꦼꦤ꧀ꦠꦸꦁꦔꦶꦱꦶꦫꦃꦲꦺ​ꦭꦤ꧀ꦢꦶꦲꦼꦭꦺꦴꦏ꧀ꦲꦼꦭꦺꦴꦏ꧀ꦏꦏꦺꦱꦏ꧀ꦒꦼꦊꦩ꧀ꦩꦺ꧉​ 5ꦭꦶꦪꦤꦺ​ꦩꦼꦤꦺꦃ​ꦢꦶꦏꦺꦴꦁꦏꦺꦴꦤ꧀ ꦲꦶꦏꦶ​ꦩꦭꦃ​ꦢꦶꦥꦠꦺꦤ꧀ꦤꦶ​꧉​ꦏꦧꦺꦃ​ꦱꦶꦁ​ꦢꦶꦏꦺꦴꦁꦏꦺꦴꦤ꧀ꦤꦶꦩꦼꦤꦺꦃ​ꦤꦺꦏ꧀ꦲꦺꦴꦫ​ꦢꦶꦥꦠꦺꦤ꧀ꦤꦶ​ꦪ​ꦢꦶꦥꦼꦤ꧀ꦠꦸꦁꦔꦶ꧉​ 6ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦱꦲꦶꦏꦶ​ꦤꦩꦸꦁ​ꦤ꧀ꦢꦸꦮꦺꦮꦺꦴꦁ​ꦱꦶꦗꦶ​ꦱꦶꦁ​ꦏꦼꦤꦺꦁꦢꦶꦏꦺꦴꦁꦏꦺꦴꦤ꧀ ꦪꦏꦸꦮꦶ​ꦲꦤꦏ꧀ꦏꦺ​ꦢꦺꦮꦺ꧈​ꦱꦶꦁ​ꦢꦶꦠꦿꦺꦱ꧀ꦤꦤ꧀ꦤꦶ꧉​ꦮꦺꦴꦁꦔꦺ​ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦲꦤꦏ꧀ꦏꦺ​ꦔꦺꦴꦩꦺꦴꦁꦔꦺꦤꦺ​:'ꦩꦼꦤꦮ​ꦮꦲꦺ​ꦮꦺꦴꦁꦮꦺꦴꦁ​ꦮꦼꦢꦶ​ꦩꦫꦁ​ꦏꦺꦴꦮꦺ​꧈​ꦲꦮꦶꦠ꧀ꦏꦺꦴꦮꦺ​ꦲꦤꦏ꧀ꦏꦸ​ꦢꦺꦮꦺ!’ 7ꦤꦁꦔꦶꦁ​ꦮꦺꦴꦁꦮꦺꦴꦁ​ꦱꦶꦁ​ꦚꦺꦮ​ꦏꦼꦧꦺꦴꦤꦺ​ꦩꦭꦃ​ꦔꦺꦴꦩꦺꦴꦁꦩꦫꦁ​ꦱꦏ꧀ꦥꦢꦥꦢ:'ꦲꦶꦏꦶ​ꦲꦤꦏ꧀ꦏꦺ​ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀꧈​ꦲ꦳ꦪꦸꦏ꧀ꦢꦶꦥꦠꦺꦤ꧀ꦤꦶ​ꦮꦲꦺ​꧈​ꦢꦢꦶꦤꦺ​ꦏꦼꦧꦺꦴꦤꦺ​ꦮꦺꦏ꧀ꦏꦺꦲꦮꦏ꧀ꦏꦺ​ꦢꦺꦮꦺ꧉'​ 8ꦲꦤꦏ꧀ꦏꦺꦩꦲꦸꦠꦼꦫꦸꦱ꧀ꦢꦶꦕꦼꦏꦼꦭ꧀;ꦏꦢꦸꦁꦮꦶꦱ꧀ꦢꦶꦥꦠꦺꦤ꧀ꦤꦶꦠꦼꦫꦸꦱ꧀ꦢꦶ​ꦲꦸꦚ꧀ꦕꦭ꧀ꦭꦏꦺꦤꦁꦚ꧀ꦗꦧꦤꦺꦏꦼꦧꦺꦴꦤ꧀꧈​

9꧋“ꦢꦶꦥꦶꦏꦶꦂ​ꦢꦺꦮꦺꦗꦗꦭ꧀꧈​ꦱꦶꦁ​ꦤ꧀ꦢꦸꦮꦺꦏꦼꦧꦺꦴꦤ꧀ꦏꦸꦢꦸ​ꦔꦥ​ꦱꦲꦶꦏꦶ​?ꦢꦺꦏ꧀ꦤꦺꦩꦼꦱ꧀ꦠꦶꦧꦏꦭ꧀ꦧꦸꦢꦭ꧀ꦢꦺꦮꦺ꧉​ꦱꦶꦁ​ꦚꦺꦮ​ꦏꦼꦧꦺꦴꦤꦺ​ꦩꦼꦱ꧀ꦠꦶꦧꦏꦭ꧀ꦢꦶꦥꦠꦺꦤ꧀ꦤꦶ​ꦏꦧꦺꦃ​ꦭꦤ꧀ꦏꦼꦧꦺꦴꦤꦺ​ꦩꦼꦱ꧀ꦠꦶꦧꦏꦭ꧀ꦢꦶꦱꦺꦮꦏ꧀ꦏꦏꦺꦮꦺꦴꦁ​ꦭꦶꦪꦭꦶꦪꦤꦺ​? 10ꦲꦥ​ꦏꦺꦴꦮꦺ​ꦲꦺꦴꦫ​ꦠꦲꦸ​ꦩꦕ​ꦤꦁꦏꦶꦠꦧ꧀ ꦲꦪꦠ꧀ꦱꦶꦁ​ꦲꦸꦤꦶꦤꦺ​ꦔꦺꦤꦺ​:

‘ꦮꦠꦸ​ꦱꦶꦁ​ꦢꦶꦧꦸꦮꦁ​
ꦏꦫꦺꦴ​ꦱꦶꦁ​ꦠꦸꦏꦁ​ꦔ꧀ꦒꦮꦺ​ꦲꦺꦴꦩꦃ​꧈​
ꦩꦭꦃ​ꦮꦠꦸ​ꦏꦸꦮꦶ​
ꦱꦶꦁ​ꦢꦢꦶ​ꦮꦠꦸ​ꦮꦶꦮꦶꦠ꧀ꦠꦤ꧀꧈​
11ꦲꦶꦏꦶ​ꦥꦼꦁꦒꦮꦺꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​
ꦱꦶꦁ​ꦔ꧀ꦒꦸꦩꦸꦤ꧀ꦤꦏꦺꦧꦔꦼꦠ꧀꧈​’”

12꧋ꦥꦫ​ꦥꦼꦤꦸꦤ꧀ꦠꦸꦤꦺ​ꦮꦺꦴꦁ​ꦙꦸꦥꦢ​ꦫꦸꦩꦁꦱ​ꦢꦶꦱꦼꦩꦺꦴꦤ꧀ꦤꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦮꦶꦱ꧀ꦏꦸꦢꦸ​ꦚꦼꦏꦼꦭ꧀ꦢꦺꦏ꧀ꦤꦺ꧈​ꦤꦁꦔꦶꦁ​ꦥꦢ​ꦮꦼꦢꦶ​ꦏꦫꦺꦴ​ꦮꦺꦴꦁ​ꦲꦺꦴꦏꦺꦃꦭꦶꦪꦤꦺ​꧉​ꦩꦸꦭꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦲꦼꦗꦂꦫꦏꦺꦮꦲꦺ​꧈​ꦠꦼꦫꦸꦱ꧀ꦥꦢ​ꦭꦸꦔ​꧉​

꧋ꦧꦧ꧀ꦱꦶꦁ​ꦮꦺꦏ꧀ꦏꦺꦫꦠꦸꦤꦺ​ꦭꦤ꧀ꦱꦶꦁ​ꦮꦺꦏ꧀ꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​

13꧋ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦲꦺꦤꦺꦁꦱꦶꦁ​ꦔꦺꦴꦁꦏꦺꦴꦤ꧀ꦮꦺꦴꦁ​ꦥ꦳ꦫꦶꦱꦶ​ꦱꦶꦗꦶꦭꦺꦴꦫꦺꦴꦭꦤ꧀ꦮꦺꦴꦁ​ ꦱꦁꦏꦒꦺꦴꦭꦺꦴꦁꦔꦤ꧀ꦤꦺ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ ꦱꦸꦥꦪ​ꦔꦼꦤꦺꦁꦢꦺꦏ꧀ꦤꦺꦔꦁꦒꦺꦴ​ꦥꦶꦠꦏꦺꦴꦤꦤ꧀ꦥꦶꦠꦏꦺꦴꦤꦤ꧀꧈​ 14ꦏꦢꦸꦁ​ꦮꦶꦱ꧀ꦠꦼꦏꦤ꧀​ꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦮꦺꦴꦁꦮꦺꦴꦁ​ꦩꦲꦸ​ꦔꦺꦴꦩꦺꦴꦁ:“ꦒꦸꦫꦸ​꧈​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦥꦶꦮꦸꦭꦁꦩꦸ​ꦏꦸꦮꦶ​ꦧꦼꦤꦼꦂ​ꦠꦼꦤꦤ꧀꧈​ꦏꦫꦺꦴꦩꦼꦤꦺꦃ​ꦏꦺꦴꦮꦺ​ꦲꦺꦴꦫ​ꦮꦼꦢꦶ​ꦱꦥꦱꦥ​꧉​ꦏꦺꦴꦮꦺ​ꦤꦺꦏ꧀ꦩꦸꦭꦁꦔꦶꦧꦧ꧀ꦢꦭꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦼꦤꦼꦂ​ꦭꦤ꧀ꦲꦺꦤꦺꦁꦮꦸꦗꦸꦠ꧀ꦠꦺ꧈​ꦲꦮꦶꦠ꧀ꦏꦺꦴꦮꦺ​ꦲꦺꦴꦫ​ꦥꦼꦂꦢꦸꦭꦶꦏꦫꦺꦴ​ꦱꦥꦱꦥ​꧉​ꦩꦸꦭꦤꦺ​ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦠꦏꦺꦴꦤ꧀ꦩꦫꦁ​ꦏꦺꦴꦮꦺ​꧉​ꦤꦺꦏ꧀ꦩꦶꦠꦸꦫꦸꦠ꧀ꦲꦒꦩꦤꦺ​ꦲꦮꦏ꧀ꦏꦺ​ꦢꦺꦮꦺꦏꦼꦥꦿꦶꦪꦺ​?ꦏꦸꦢꦸ​ꦲꦩ꧀ꦧꦪꦂ​ꦧꦼꦭꦱ꧀ꦠꦶꦁꦩꦫꦁ​ꦫꦠꦸꦤꦺ​ꦲꦥ​ꦲꦺꦴꦫ​?”

15꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦔꦼꦂꦠꦶ​ꦤꦺꦏ꧀ꦮꦺꦴꦁꦮꦺꦴꦁ​ꦱꦶꦁ​ꦠꦏꦺꦴꦤ꧀ꦏꦸꦮꦶ​ꦤꦩꦸꦁ​ꦲꦺꦠꦺꦴꦏ꧀ꦲꦺꦠꦺꦴꦏ꧀꧈​ꦩꦸꦭꦤꦺ​ꦢꦺꦏ꧀ꦤꦺ​ꦔꦺꦴꦩꦺꦴꦁ:“ꦏꦼꦤꦺꦁ​​ꦲꦥ​ꦏꦺꦴꦮꦺ​ꦏꦺꦴꦏ꧀ꦏꦼꦥꦺꦔꦶꦤ꧀ꦔꦼꦤꦺꦁꦲꦏꦸ​?ꦗꦗꦭ꧀​ꦔ꧀ꦒꦮ​ꦢꦸꦮꦶꦠ꧀ꦫꦺꦕꦺꦃ​ꦱꦶꦗꦶ​ꦩ꧀ꦧꦿꦺꦤꦺꦠꦏ꧀ꦢꦼꦭꦺꦴꦏ꧀ꦏꦺ꧉​”

16꧋ꦠꦼꦫꦸꦱ꧀ꦲꦺꦤꦺꦁꦱꦶꦁ​ꦔ꧀ꦒꦮ​ꦢꦸꦮꦶꦠ꧀ꦫꦺꦕꦺꦃ​ꦱꦶꦗꦶ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦩꦫꦁ​ꦮꦺꦴꦁꦮꦺꦴꦁ​ꦩꦲꦸ​:“ꦢꦶꦢꦼꦭꦺꦴꦏ꧀ꦠ​!ꦤꦁ​ꦢꦸꦮꦶꦠ꧀ꦲꦶꦏꦶ​ꦲꦺꦤꦺꦁꦒꦩ꧀ꦧꦂꦫꦺ​ꦱꦥ​ꦭꦤ꧀ꦗꦼꦤꦼꦁꦔꦺ​ꦱꦥ​?”

꧋ꦮꦺꦴꦁꦮꦺꦴꦁ​ꦱꦼꦩꦲꦸꦂ​:“ꦒꦩ꧀ꦧꦂꦫꦺ​ꦭꦤ꧀ꦗꦼꦤꦼꦁꦔꦺ​ꦫꦠꦸꦤꦺ​ꦬꦸꦩ꧀!”

17꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦭꦃ​ꦪ​ꦮꦶꦱ꧀ꦠ​!ꦲꦥ​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦏꦺꦩꦫꦁ​ꦫꦠꦸꦤꦺ​ꦪ​ꦏꦺꦏ꧀ꦏꦏꦺꦩꦫꦁ​ꦫꦠꦸꦤꦺ​ꦭꦤ꧀ꦲꦥ​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦏꦺꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦏꦺꦏ꧀ꦏꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

꧋ꦮꦺꦴꦁꦮꦺꦴꦁ​ꦔ꧀ꦒꦸꦩꦸꦤ꧀ꦏꦿꦸꦔꦸ​ꦱꦮꦸꦫꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦧꦧ꧀ꦠꦔꦶ​ꦱꦁꦏꦥꦠꦶ​꧉​

18꧋ꦲꦺꦤꦺꦁꦮꦺꦴꦁ​ꦱꦢꦸꦏꦶ​ꦱꦶꦗꦶꦭꦺꦴꦫꦺꦴꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁ​ꦱꦢꦸꦏꦶ​ꦏꦸꦮꦶ​ꦲꦺꦴꦫ​ꦔꦤ꧀ꦢꦼꦭ꧀ꦤꦺꦏ꧀ꦮꦺꦴꦁ​ꦩꦠꦶ​ꦧꦏꦭ꧀ꦠꦔꦶ​ꦩꦼꦤꦺꦃ​꧉​ꦮꦺꦴꦁꦮꦺꦴꦁ​ꦲꦶꦏꦶ​ꦠꦏꦺꦴꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀: 19“ꦒꦸꦫꦸ​꧈​ꦤꦧꦶ​ꦩꦺꦴꦱꦼꦱ꧀ꦮꦶꦱ꧀​ꦔ꧀ꦒꦮꦺꦏ꧀ꦏꦏꦺꦥꦼꦂꦤꦠ꧀ꦠꦤ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦔꦺꦤꦺ​:'ꦤꦺꦏ꧀ꦲꦺꦤꦺꦁꦮꦺꦴꦁ​ꦭꦤꦁ​ꦩꦠꦶ​ꦤꦶꦁꦒꦭ꧀ꦫꦤ꧀ꦢꦠꦤ꧀ꦥ​ꦲꦤꦏ꧀ ꦱꦼꦢꦸꦭꦸꦂꦫꦺ​ꦮꦺꦴꦁ​ꦭꦤꦁ​ꦱꦶꦁ​ꦩꦠꦶ​ꦏꦸꦮꦶ​ꦏꦸꦢꦸ​ꦔꦼꦥꦺꦏ꧀ꦫꦤ꧀ꦢꦩꦲꦸ​ꦢꦢꦶ​ꦧꦺꦴꦗꦺꦴꦤꦺ​ꦭꦤ꧀​ꦔ꧀ꦒꦮꦺꦏ꧀ꦏꦏꦺꦠꦸꦫꦸꦤ꧀ꦤꦤ꧀ꦏꦁꦒꦺꦴ​ꦱꦼꦢꦸꦭꦸꦂꦫꦺ​ꦱꦶꦁ​ꦩꦠꦶ​꧉​’

20꧋“ꦭꦃ​ꦱꦲꦶꦏꦶ​ꦲꦺꦤꦺꦁꦱꦼꦢꦸꦭꦸꦂ​ꦭꦤꦁꦭꦤꦁ​ꦥꦶꦠꦸ​꧉​ꦱꦶꦁ​ꦲꦩ꧀ꦧꦉꦥ꧀ꦔꦼꦥꦺꦏ꧀ꦧꦺꦴꦗꦺꦴ​꧈​ꦤꦁꦔꦶꦁ​ꦏꦢꦸꦁ​ꦩꦠꦶ​ꦲꦺꦴꦫ​ꦤꦶꦁꦒꦭ꧀ꦲꦤꦏ꧀꧈​ 21ꦱꦶꦁ​ꦤꦺꦴꦩꦼꦂ​ꦭꦺꦴꦫꦺꦴ​ꦠꦼꦫꦸꦱ꧀ꦔꦼꦥꦺꦏ꧀ꦫꦤ꧀ꦢꦤꦺꦢꦢꦶ​ꦧꦺꦴꦗꦺꦴꦤꦺ​꧈​ꦤꦁꦔꦶꦁ​ꦱꦶꦁ​ꦲꦶꦏꦶ​ꦲꦸꦒ​ꦩꦠꦶ​ꦠꦤ꧀ꦥ​ꦤ꧀ꦢꦸꦮꦺꦲꦤꦏ꧀꧈​ꦏꦫꦺꦴ​ꦱꦶꦁ​ꦤꦺꦴꦩꦼꦂ​ꦠꦼꦭꦸ​ꦪ​ꦥꦢ​ꦮꦲꦺ​ꦔꦺꦴꦤꦺꦴ​꧉​ 22ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦺ​ꦱꦼꦢꦸꦭꦸꦂ​ꦥꦶꦠꦸ​ꦩꦲꦸ​ꦏꦧꦺꦃ​ꦩꦠꦶ​꧈​ꦠꦤ꧀ꦥ​ꦤꦶꦁꦒꦭ꧀ꦠꦸꦫꦸꦤ꧀ꦤꦤ꧀ꦱꦶꦗꦶꦱꦶꦗꦶꦪ​꧉​ꦲꦩ꧀ꦧꦺꦴꦏ꧀ꦫꦤ꧀ꦢꦤꦺꦪ​ꦠꦼꦫꦸꦱ꧀ꦩꦠꦶ​ꦥꦶꦱꦤ꧀꧈​ 23ꦱꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦠꦏꦺꦴꦤ꧀:ꦭꦃ​ꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦚ꧀ꦕꦶꦤꦺ​ꦮꦺꦴꦁ​ꦩꦠꦶ​ꦥꦢ​ꦠꦔꦶ​ꦩꦼꦤꦺꦃ​꧈​ꦮꦺꦴꦁ​ꦮꦺꦢꦺꦴꦏ꧀ꦩꦲꦸ​ꦧꦏꦭ꧀ꦢꦢꦶ​ꦧꦺꦴꦗꦺꦴꦤꦺ​ꦱꦶꦁ​ꦲꦼꦤ꧀ꦢꦶ​?ꦲꦮꦏ꧀ꦏꦺ​ꦢꦺꦮꦺꦠꦏꦺꦴꦤ꧀ ꦲꦮꦶꦠ꧀ꦮꦺꦴꦁ​ꦮꦺꦢꦺꦴꦏ꧀ꦲꦶꦏꦶ​ꦮꦶꦱ꧀ꦢꦢꦶ​ꦧꦺꦴꦗꦺꦴꦤꦺ​ꦱꦼꦢꦸꦭꦸꦂ​ꦏꦧꦺꦃ​ꦥꦶꦠꦸ​ꦩꦲꦸ​?”

24꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦏꦸꦮꦶ​ꦗꦤ꧀​ꦏ꧀ꦭꦺꦫꦸ​ꦧꦔꦼꦠ꧀꧈​ꦏꦺꦴꦮꦺ​ꦲꦺꦴꦫ​ꦢꦸꦤꦸꦁꦲꦶꦱꦶꦤꦺ​ꦏꦶꦠꦧ꧀ꦭꦤ꧀ꦏꦺꦴꦮꦺ​ꦧ꧀ꦭꦱ꧀ꦲꦺꦴꦫ​ꦔꦼꦂꦠꦶ​ꦏ꧀ꦮꦱꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 25ꦲꦮꦶꦠ꧀ꦲꦩ꧀ꦧꦺꦱꦸꦏ꧀ꦤꦺꦏ꧀ꦮꦺꦴꦁꦮꦺꦴꦁ​ꦠꦔꦶ​ꦱꦁꦏꦥꦠꦶ​ꦲꦸꦫꦶꦥ꧀ꦥꦺꦧꦏꦭ꧀ꦭꦺ​ꦏꦪ​ꦩꦸꦭꦺꦏꦠ꧀ꦱ꧀ꦮꦂꦒ​꧈​ꦲꦺꦴꦫ​ꦲꦺꦤꦺꦁꦕꦫꦤꦺ​ꦧꦼꦧꦺꦴꦗꦺꦴꦮꦤ꧀꧈​ 26ꦭꦤ꧀ꦧꦧ꧀ꦠꦔꦶ​ꦩꦼꦤꦺꦃ​ꦱꦁꦏꦥꦠꦶ​꧈​ꦲꦥ​ꦏꦺꦴꦮꦺ​ꦲꦺꦴꦫ​ꦩꦕ​ꦤꦁꦏꦶꦠꦧ꧀ꦧꦺ​ꦤꦧꦶ​ꦩꦺꦴꦱꦼꦱ꧀ꦧꦧ꧀ꦒꦿꦸꦩ꧀ꦧꦸꦭ꧀ꦭꦤ꧀ꦲꦼꦫꦶ​ꦱꦶꦁ​ꦩꦸꦫꦸꦥ꧀?ꦤꦁ​ꦏꦺꦴꦤꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦲꦸꦠ꧀ꦔꦺꦴꦩꦺꦴꦁꦠ​ꦩꦫꦁ​ꦤꦧꦶ​ꦩꦺꦴꦱꦼꦱ꧀:'ꦲꦏꦸ​ꦲꦶꦏꦶ​ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦄꦨꦿꦲꦩ꧀ ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦆꦱꦏ꧀ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦪꦏꦸꦧ꧀꧉'​ 27ꦠꦼꦒꦼꦱ꧀ꦱꦺ​ꦧꦥ​ꦄꦨꦿꦲꦩ꧀ ꦆꦱꦏ꧀ꦭꦤ꧀ꦪꦏꦸꦧ꧀ꦏꦸꦮꦶ​ꦱꦲꦶꦏꦶ​ꦔꦧꦼꦏ꧀ꦠꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦭꦃ​ꦮꦺꦴꦁ​ꦱꦶꦁ​ꦔꦧꦼꦏ꧀ꦠꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦭꦲꦸꦠ꧀ꦮꦺꦴꦁ​ꦲꦸꦫꦶꦥ꧀ꦠ​꧈​ꦩꦺꦴꦱꦺꦴꦏ꧀ꦮꦺꦴꦁ​ꦩꦠꦶ​?ꦢꦢꦶꦤꦺ​ꦧꦥ​ꦄꦨꦿꦲꦩ꧀ ꦆꦱꦏ꧀ꦭꦤ꧀ꦪꦏꦸꦧ꧀ꦏꦸꦮꦶ​ꦱꦲꦶꦏꦶ​ꦲꦸꦫꦶꦥ꧀ꦩꦼꦤꦺꦃ​꧉​ꦤꦺꦏ꧀ꦏꦺꦴꦮꦺ​ꦲꦺꦴꦫ​ꦥꦽꦕꦪ​ꦏꦸꦮꦶ​꧈​ꦏꦺꦴꦮꦺ​ꦗꦤ꧀​ꦏ꧀ꦭꦺꦫꦸ​ꦠꦼꦤꦤ꧀!”

꧋ꦮꦺꦠ꧀ꦱꦶꦁ​ꦒꦼꦢꦺꦢꦺꦮꦺ꧉​

28꧋ꦲꦺꦤꦺꦁꦒꦸꦫꦸ​ꦏꦶꦠꦧ꧀ꦏꦿꦸꦔꦸ​ꦲꦼꦁꦒꦺꦴꦤꦺ​ꦮꦺꦴꦁꦮꦺꦴꦁ​ꦥꦢ​ꦧꦤ꧀ꦠꦃꦧꦤ꧀ꦠꦃꦲꦤ꧀ꦭꦤ꧀ꦮꦺꦴꦁ​ꦲꦶꦏꦶ​ꦤꦶꦠꦺꦤ꧀ꦤꦶ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦚꦲꦸꦂꦫꦶ​ꦮꦺꦴꦁꦮꦺꦴꦁ​ꦪ​ꦧꦼꦤꦼꦂ​ꦠꦼꦤꦤ꧀꧈​ꦒꦸꦫꦸ​ꦏꦶꦠꦧ꧀ꦲꦶꦏꦶ​ꦩꦫ​ꦤꦁꦔ꧀ꦒꦺꦴꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦠꦏꦺꦴꦤ꧀ꦔꦺꦤꦺ​:“ꦮꦺꦠ꧀ꦱꦶꦁ​ꦲꦼꦤ꧀ꦢꦶ​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺ?”

29꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦮꦺꦠ꧀​ꦱꦶꦁ​ꦥꦼꦤ꧀ꦠꦶꦁ​ꦢꦺꦮꦺꦪ​ꦲꦶꦏꦶ​:'ꦫꦸꦔꦺꦴꦏ꧀ꦏꦏꦺ​ꦧꦁꦱ​ꦆꦱꦿꦌꦭ꧀ ꦒꦸꦱ꧀ꦠꦶ​ꦄꦭ꧀ꦭꦃꦲꦺ​ꦲꦮꦏ꧀ꦏꦺ​ꦢꦺꦮꦺꦏꦸꦮꦶ​ꦱꦶꦗꦶ​꧉​ 30ꦠꦿꦺꦱ꧀ꦤꦲꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀ꦲꦠꦶꦩꦸ​ꦭꦤ꧀ꦚꦮꦫꦒꦩꦸ꧈​ꦏꦥꦶꦤ꧀ꦠꦼꦂꦫꦤ꧀ꦩꦸ​ ꦭꦤ꧀ꦏꦼꦏꦸꦮꦠ꧀ꦠꦤ꧀ꦩꦸ​ꦢꦶꦏꦁꦒꦺꦴꦏ꧀ꦤꦏꦁꦒꦺꦴ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉'​ 31ꦮꦺꦠ꧀ꦭꦶꦪꦤꦺ​ꦱꦶꦁ​ꦥꦼꦤ꧀ꦠꦶꦁ​ꦪ​ꦲꦶꦏꦶ​:'ꦠꦿꦺꦱ꧀ꦤꦲꦩꦫꦁ​ꦠꦸꦁꦒꦭ꧀ꦩꦤꦸꦁꦱ​ꦏꦪ​ꦲꦼꦁꦒꦺꦴꦤ꧀ꦩꦸ​ꦤꦿꦺꦱ꧀ꦤꦤ꧀ꦤꦶꦲꦮꦏ꧀ꦩꦸ​ꦢꦺꦮꦺ꧉'​ꦲꦺꦴꦫ​ꦲꦺꦤꦺꦁꦮꦺꦠ꧀ꦭꦶꦪꦤꦺ​ꦱꦶꦁ​ꦒꦼꦢꦺꦤꦺꦔꦸꦁꦏꦸꦭ꧀ꦭꦶ​ꦮꦺꦠ꧀ꦭꦺꦴꦫꦺꦴ​ꦲꦶꦏꦶ​꧉​”

32꧋ꦒꦸꦫꦸ​ꦏꦶꦠꦧ꧀ꦩꦲꦸ​ꦱꦼꦩꦲꦸꦂ​:“ꦏꦺꦴꦮꦺ​ꦧꦼꦤꦼꦂ​꧈​ꦒꦸꦫꦸ​꧉​ꦥꦚ꧀ꦕꦺꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦩꦸꦁ​ꦱꦶꦗꦶ​꧈​ꦲꦺꦴꦫ​ꦲꦺꦤꦺꦁꦭꦶꦪꦤꦺ​꧉​ 33ꦥꦚ꧀ꦕꦺꦤ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦤꦿꦺꦱ꧀ꦤꦤ꧀ꦤꦶꦒꦸꦱ꧀ꦠꦶ​ꦄꦭ꧀ꦭꦃ​ꦱꦏ꧀ꦲꦠꦶꦤꦺ​꧈​ꦲꦶꦁ​ꦭꦲꦶꦂ​ꦭꦤ꧀ꦧꦠꦶꦤ꧀ꦭꦤ꧀ꦏꦫꦺꦴ​ꦱꦏ꧀ꦏꦺꦃꦲꦺꦏꦼꦏꦸꦮꦠ꧀ꦠꦤ꧀ꦤꦺ​꧉​ꦲꦸꦒ​ꦏꦸꦢꦸ​ꦠꦿꦺꦱ꧀ꦤꦩꦫꦁ​ꦭꦶꦪꦤꦺ​ꦏꦪ​ꦲꦼꦁꦒꦺꦴꦤꦺ​ꦤꦿꦺꦱ꧀ꦤꦤ꧀ꦤꦶꦲꦮꦏ꧀ꦏꦺ​ꦢꦺꦮꦺ꧉​ꦲꦶꦏꦸ​ꦥꦚ꧀ꦕꦺꦤ꧀ꦭꦸꦮꦶꦃ​ꦲꦥꦶꦏ꧀ꦠꦼꦤꦶꦩ꧀ꦧꦁꦲꦩ꧀ꦧꦼꦭꦺꦃ​ꦏꦺꦮꦤ꧀ꦭꦤ꧀ꦥꦮꦺꦃꦭꦶꦪꦭꦶꦪꦤꦺ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

34꧋ꦒꦸꦱ꧀ꦠꦶ​ꦪꦺꦯꦸꦱ꧀ꦮꦼꦫꦸꦃ​ꦤꦺꦏ꧀ꦒꦸꦫꦸ​ꦏꦶꦠꦧ꧀​ꦲꦶꦏꦶ​ꦱꦶꦁ​ꦱꦼꦩꦲꦸꦂ​ꦔ꧀ꦒꦼꦤꦃ​ꦭꦤ꧀ꦧꦼꦤꦼꦂ​꧈​ꦩꦸꦭꦤꦺ​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦔꦺ​:“ꦏꦺꦴꦮꦺ​ꦮꦶꦱ꧀ꦕꦼꦢꦼꦏ꧀​ꦏꦫꦺꦴ​ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​”

꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦲꦺꦴꦫ​ꦲꦺꦤꦺꦁꦱꦶꦁ​ꦮꦤꦶ​ꦠꦏꦺꦴꦤ꧀ꦲꦥꦲꦥ​ꦩꦼꦤꦺꦃ​꧉​

꧋ꦥꦶꦠꦏꦺꦴꦤ꧀ꦤꦤ꧀ꦧꦧ꧀ꦏꦿꦶꦱ꧀ꦡꦸꦱ꧀꧈​

35꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦴꦁꦔꦺꦩꦸꦭꦁꦔꦶꦤꦁꦒꦿꦺꦗ​ꦒꦼꦢꦺꦒꦼꦤ꧀ꦠꦺꦤ꧀ꦤꦤ꧀ꦠꦏꦺꦴꦤ꧀:“ꦭꦃ​ꦒꦸꦫꦸꦒꦸꦫꦸ​ꦏꦶꦠꦧ꧀ꦏꦺꦴꦏ꧀ꦔꦺꦴꦩꦺꦴꦁꦤꦺꦏ꧀ꦏꦿꦶꦱ꧀ꦡꦸꦱ꧀ꦤꦩꦸꦁ​ꦩꦤꦸꦁꦱ​ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀ ꦢꦸꦢꦸ​ꦒꦸꦱ꧀ꦠꦶ​ꦄꦭ꧀ꦭꦃ​? 36ꦫꦠꦸ​ꦣꦮ꦳ꦼꦢ꧀ꦢꦺꦮꦺꦭꦲꦸꦠ꧀ꦮꦶꦱ꧀ꦔꦺꦴꦩꦺꦴꦁꦔꦺꦤꦺ​ꦠ​꧈​ꦢꦺꦴꦁꦔꦺꦢꦺꦏ꧀ꦤꦺꦢꦶꦏ꧀ꦮꦱꦤꦶ​ꦏꦫꦺꦴ​ꦫꦺꦴꦃꦲꦺ​ꦄꦭ꧀ꦭꦃ​:

‘ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦒꦸꦱ꧀ꦠꦶꦏꦸ​:
ꦩ꧀ꦧꦿꦺꦤꦺꦪꦚ꧀ꦗꦒꦺꦴꦁꦤꦁꦠꦼꦔꦼꦤ꧀ꦏꦸ​꧈​
ꦔꦤ꧀ꦠꦶ​ꦩꦸꦁꦱꦸꦃꦩꦸ​ꦮꦶꦱ꧀ꦠꦏ꧀ꦠꦼꦭꦸꦏ꧀ꦏꦏꦺꦏꦧꦺꦃ​꧉​’

37ꦭꦃ​ꦫꦠꦸ​ꦣꦮ꦳ꦼꦢ꧀ꦢꦺꦮꦺꦔꦫꦤ꧀ꦤꦶ​ꦏꦿꦶꦱ꧀ꦡꦸꦱ꧀ꦏꦸꦮꦶ​ꦒꦸꦱ꧀ꦠꦶ​꧉​ꦩꦺꦴꦱꦺꦴꦏ꧀ꦏꦿꦶꦱ꧀ꦡꦸꦱ꧀ꦠꦸꦫꦸꦤ꧀ꦤꦤ꧀ꦤꦺ​ꦫꦠꦸ​ꦣꦮ꦳ꦼꦢ꧀?”

꧋ꦮꦺꦴꦁ​ꦲꦺꦴꦏꦺꦃꦱꦼꦤꦼꦁ​ꦔꦿꦸꦔꦺꦴꦏ꧀ꦏꦏꦺꦥꦶꦮꦸꦭꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 38ꦢꦺꦏ꧀ꦤꦺꦲꦸꦒ​ꦩꦸꦭꦁꦔꦶꦮꦺꦴꦁꦮꦺꦴꦁ​ꦔꦺꦤꦺ​:“ꦥꦢ​ꦱꦶꦁ​ꦲꦠꦶꦲꦠꦶꦏꦫꦺꦴ​ꦥꦫ​ꦒꦸꦫꦸ​ꦏꦶꦠꦧ꧀꧈​ꦮꦺꦴꦁꦮꦺꦴꦁ​ꦏꦸꦮꦶ​ꦤꦩꦸꦁ​ꦱꦼꦤꦼꦁ​ꦩ꧀ꦭꦏꦸꦩ꧀ꦭꦏꦸ​ꦔꦁꦒꦺꦴ​ꦱꦭꦶꦤ꧀ꦏꦪ​ꦮꦺꦴꦁ​ꦱꦶꦁ​ꦒꦼꦢꦺꦥꦁꦏꦠ꧀ꦠꦺ​꧉​ꦤꦺꦏ꧀ꦤꦁꦥꦱꦂ​ꦚ꧀ꦗꦭꦸꦏ꧀ꦢꦶꦒꦠꦺꦏ꧀ꦏꦏꦺꦭꦤ꧀ꦢꦶꦲꦗꦺꦤ꧀ꦤꦶ​ꦏꦫꦺꦴ​ꦮꦺꦴꦁ​ꦭꦶꦪꦤꦺ​꧉​ 39ꦤꦺꦏ꧀ꦤꦁꦱꦶꦤꦒꦸꦏ꧀ꦲꦥ​ꦤꦁꦏꦸꦩ꧀ꦥꦸꦭ꧀ꦭꦤ꧀ꦥꦺꦱ꧀ꦠ​ꦚ꧀ꦗꦒꦺꦴꦁꦔꦺꦤꦁꦔꦉꦥ꧀ꦢꦺꦮꦺ꧉​ 40ꦥꦢ​ꦱꦼꦤꦼꦁ​ꦭꦤ꧀ꦥꦶꦤ꧀ꦠꦼꦂ​ꦔꦿꦩ꧀ꦥꦱ꧀ꦱꦶ​ꦲꦺꦴꦩꦃꦲꦺ​ꦫꦤ꧀ꦢꦫꦤ꧀ꦢꦠꦼꦫꦸꦱ꧀ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦺꦤ꧀ꦢꦺꦴꦁꦔꦱꦸꦮꦶꦏꦁꦒꦺꦴ​ꦤꦸꦠꦸꦥ꧀ꦥꦶ​ꦏ꧀ꦭꦏꦸꦮꦤ꧀ꦤꦺ​꧉​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦧꦏꦭ꧀ꦲꦺꦤ꧀ꦠꦸꦏ꧀ꦱꦼꦠꦿꦥꦤ꧀ꦱꦶꦁ​ꦭꦸꦮꦶꦃ​ꦲꦧꦺꦴꦠ꧀꧈​”

꧋ꦥꦮꦺꦃꦲꦺ​ꦲꦩ꧀ꦧꦺꦴꦏ꧀ꦫꦤ꧀ꦢ꧉​

41꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦚ꧀ꦗꦒꦺꦴꦁꦤꦁꦔꦉꦥ꧀ꦥꦺ​ꦮꦢꦃꦢꦸꦮꦶꦠ꧀ꦤꦁꦒꦿꦺꦗ​ꦒꦼꦢꦺ​ꦏꦺꦴꦤꦺꦴ​꧉​ꦢꦺꦏ꧀ꦤꦺꦤ꧀ꦢꦼꦭꦺꦴꦏ꧀ꦏꦏꦺꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦔ꧀ꦊꦧꦺꦴꦏ꧀ꦏꦏꦺꦥꦮꦺꦃꦲꦺ​꧉​ꦲꦺꦴꦏꦺꦃꦮꦺꦴꦁ​ꦱꦸꦒꦶꦃ​ꦥꦢ​ꦔ꧀ꦊꦧꦺꦴꦏ꧀ꦏꦏꦺꦢꦸꦮꦶꦠ꧀ꦠꦺ꧉​ꦮꦺꦴꦁꦮꦺꦴꦁ​ꦲꦶꦏꦶ​ꦥꦮꦺꦃꦲꦺ​ꦪ​ꦲꦺꦴꦫ​ꦱꦼꦠꦶꦠꦶꦏ꧀ꦱꦼꦠꦶꦠꦶꦏ꧀ꦏ꧉​ 42ꦠꦼꦫꦸꦱ꧀ꦲꦺꦤꦺꦁꦫꦤ꧀ꦢꦩ꧀ꦭꦫꦠ꧀​ꦔ꧀ꦊꦧꦺꦴꦏ꧀ꦏꦏꦺꦫꦺꦕꦺꦃ​ꦭꦺꦴꦫꦺꦴ​ꦱꦶꦁ​ꦕꦶꦭꦶꦏ꧀ꦧꦔꦼꦠ꧀ꦲꦗꦶꦤꦺ​꧉​ 43ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦚꦼꦭꦸꦏ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦢꦶꦲꦺꦴꦩꦺꦴꦁꦔꦶꦔꦺꦤꦺ​:“ꦥꦢ​ꦔꦼꦂꦠꦶꦪ​꧈​ꦏꦁꦒꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦫꦤ꧀ꦢꦩ꧀ꦭꦫꦠ꧀ꦲꦶꦏꦸ​ꦥꦮꦺꦃꦱꦶꦁ​ꦲꦺꦴꦏꦺꦃꦢꦺꦮꦺꦠꦼꦤꦶꦩ꧀ꦧꦁꦭꦶꦪꦭꦶꦪꦤꦺ​꧉​ 44ꦲꦮꦶꦠ꧀ꦮꦺꦴꦁ​ꦱꦶꦁ​ꦱꦸꦒꦶꦃ​ꦔꦼꦏꦺꦏ꧀ꦏꦶꦱꦁꦏꦏꦱꦸꦒꦶꦃꦲꦤ꧀ꦤꦺ​꧈​ꦤꦁꦔꦶꦁ​ꦫꦤ꧀ꦢꦲꦶꦏꦸ​ꦔꦼꦏꦺꦏ꧀ꦏꦶꦱꦁꦏꦏꦼꦩ꧀ꦭꦫꦠ꧀ꦠꦤ꧀ꦤꦺ​꧉​” ↑ ↑ ↑


꧋ꦒꦿꦺꦗ​ꦒꦼꦢꦺ​ꦧꦏꦭ꧀ꦢꦶꦫꦸꦱꦏ꧀꧈​

꧇​꧑꧓꧇​ 1꧋ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦠꦸ​ꦱꦁꦏꦒꦿꦺꦗ​ꦒꦼꦢꦺ​ꦠꦼꦫꦸꦱ꧀ꦲꦺꦤꦺꦁꦩꦸꦫꦶꦢ꧀ꦱꦶꦁ​ꦔꦺꦴꦩꦺꦴꦁꦩꦫꦁ​ꦢꦺꦏ꧀ꦤꦺ:“ꦒꦸꦫꦸ​꧈​ꦢꦼꦭꦺꦴꦏ꧀ꦏꦼꦤ꧀ꦠ​꧈​ꦒꦿꦺꦗꦤꦺꦏꦸꦮꦶ​ꦗꦤ꧀​ꦔ꧀ꦒꦸꦩꦸꦤ꧀ꦤꦏꦺꦠꦼꦤꦤ꧀ꦲꦥꦶꦏ꧀ꦏꦺ​꧉​ꦢꦼꦭꦺꦴꦏ꧀ꦏꦼꦤ꧀ꦮꦠꦸꦮꦠꦸꦤꦺ​ꦒꦼꦢꦺꦤꦺ!”

2꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦏꦺꦴꦮꦺ​ꦮꦼꦫꦸꦃ​ꦒꦿꦺꦗ​ꦒꦼꦢꦺꦲꦶꦏꦶ​ꦠ​?ꦧꦏꦭ꧀ꦭꦺ​ꦲꦺꦴꦫ​ꦲꦺꦤꦺꦁꦮꦠꦸ​ꦱꦶꦗꦶ​ꦮꦲꦺ​ꦠꦼꦩꦸꦩ꧀ꦥꦁ​ꦭꦶꦪꦤꦺ​꧉​ꦏꦧꦺꦃ​ꦧꦏꦭ꧀ꦲꦩ꧀ꦧꦿꦸꦏ꧀ꦫꦠ​ꦊꦩꦃ​꧉​”

꧋ꦧꦧ꧀ꦱꦏ꧀ꦮꦼꦂꦤꦤꦺ​ꦏꦫꦸꦱꦏ꧀ꦏꦤ꧀ꦭꦤ꧀ꦏꦱꦁꦱꦫꦤ꧀ꦤꦁꦗꦒꦠ꧀꧈​

3꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦚ꧀ꦗꦒꦺꦴꦁꦤꦁꦒꦸꦤꦸꦁ​ꦎꦭꦺꦥ꦳꧀ ꦲꦢꦼꦥ꧀ꦥꦢꦼꦥ꧀ꦥꦤ꧀ꦏꦫꦺꦴ​ꦒꦿꦺꦗ​ꦒꦼꦢꦺ꧉​ꦤꦁꦏꦺꦴꦤꦺꦴ​ꦫꦱꦸꦭ꧀ꦦꦺꦠꦿꦸꦱ꧀ ꦪꦏꦺꦴꦧꦸꦱ꧀ ꦪꦺꦴꦲꦤꦼꦱ꧀ꦭꦤ꧀ꦄꦤ꧀ꦢꦿꦺꦪꦱ꧀ꦠꦼꦫꦸꦱ꧀ꦩꦫ​ꦭꦤ꧀ꦠꦏꦺꦴꦤ꧀: 4“ꦒꦸꦱ꧀ꦠꦶ​꧈​ꦏꦥꦤ꧀ꦱꦼꦩ꧀ꦧꦫꦁꦩ꧀ꦧꦫꦁꦏꦸꦮꦶ​ꦧꦏꦭ꧀​ꦏ꧀ꦭꦏꦺꦴꦤ꧀ꦭꦤ꧀ꦏꦼꦥꦿꦶꦪꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱꦤꦺ​ꦔꦼꦂꦠꦶ​ꦤꦺꦏ꧀ꦮꦶꦱ꧀ꦠꦼꦏꦤ꧀ꦮꦚ꧀ꦕꦶꦤꦺ​?ꦲꦥ​ꦠꦤ꧀ꦢꦤꦺ?”

5꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦥꦢ​ꦱꦶꦁ​ꦲꦠꦶꦲꦠꦶ꧉​ꦲꦗ​ꦱꦩ꧀ꦥꦺꦏ꧀ꦏꦺꦴꦮꦺ​ꦢꦶꦲꦥꦸꦱ꧀ꦱꦶ​ꦭꦤ꧀ꦢꦶꦱꦱꦂꦫꦏꦺꦮꦺꦴꦁ​꧉​ 6ꦲꦺꦴꦏꦺꦃꦮꦺꦴꦁ​ꦧꦏꦭ꧀ꦠꦼꦏ​ꦔꦁꦒꦺꦴ​ꦗꦼꦤꦼꦁꦏꦸ​ꦔꦺꦴꦩꦺꦴꦁ:'ꦪ​ꦲꦏꦸ​ꦲꦶꦏꦶ​ꦏꦿꦶꦱ꧀ꦡꦸꦱ꧀!’ꦲꦺꦴꦏꦺꦃꦮꦺꦴꦁ​ꦱꦶꦁ​ ꦧꦏꦭ꧀ꦢꦶꦲꦥꦸꦱ꧀ꦱꦶ​꧉​ 7ꦤꦺꦏ꧀ꦏꦺꦴꦮꦺ​ꦏꦿꦸꦔꦸ​ꦲꦺꦤꦺꦁꦥꦺꦫꦁꦔꦤ꧀ꦭꦤ꧀ꦏꦧꦂꦏꦧꦂꦤꦺꦏ꧀ꦧꦏꦭ꧀ꦲꦺꦤꦺꦁꦥꦺꦫꦁꦔꦤ꧀ ꦲꦗ​ꦥꦢ​ꦏꦒꦺꦠ꧀꧈​ꦏꦸꦮꦶ​ꦏꦧꦺꦃ​ꦏꦸꦢꦸ​ꦏ꧀ꦭꦏꦺꦴꦤ꧀ ꦤꦁꦔꦶꦁ​ꦲꦶꦏꦸ​ꦢꦸꦫꦸꦁ​ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧉​ 8ꦲꦮꦶꦠ꧀ꦧꦁꦱ​ꦱꦶꦁ​ꦱꦶꦗꦶ​ꦧꦏꦭ꧀​ꦔ꧀ꦭꦮꦤ꧀ꦧꦁꦱ​ꦭꦶꦪꦤꦺ​ꦭꦤ꧀ꦤꦼꦒꦫ​ꦱꦶꦁ​ꦱꦶꦗꦶ​ꦧꦏꦭ꧀ꦥꦼꦫꦁ​ꦔ꧀ꦭꦮꦤ꧀ꦤꦼꦒꦫ​ꦭꦶꦪꦤꦺ​꧉​ꦲꦸꦒ​ꦧꦏꦭ꧀ꦲꦺꦤꦺꦁꦭꦶꦤ꧀ꦢꦸꦭꦤ꧀ꦏꦼꦏꦸꦫꦁꦔꦤ꧀ꦥꦔꦤ꧀ꦤꦁꦥꦶꦫꦁꦥꦶꦫꦁ​ꦥꦁꦒꦺꦴꦤ꧀ꦤꦤ꧀꧈​ꦤꦁꦔꦶꦁ​ꦏꦸꦮꦶ​ꦲꦶꦗꦶꦏ꧀ꦮꦶꦮꦶꦠ꧀ꦠꦤ꧀ꦤꦺ​ꦮꦲꦺ​꧈​ꦏꦪ​ꦮꦺꦴꦁ​ꦮꦺꦢꦺꦴꦏ꧀ꦤꦺꦏ꧀​ꦔ꧀ꦭꦫꦤꦶ​ꦏꦲꦺ​ꦤꦺꦏ꧀ꦲꦉꦥ꧀​ꦩ꧀ꦧꦪꦶ꧉​

9꧋“ꦥꦢ​ꦱꦶꦁ​ꦲꦠꦶꦲꦠꦶ꧉​ꦲꦮꦶꦠ꧀ꦏꦺꦴꦮꦺ​ꦧꦏꦭ꧀ꦢꦶꦱꦺꦫꦺꦠ꧀ꦤꦁꦔꦉꦥ꧀ꦏꦿꦸꦠꦺꦴꦤ꧀ꦭꦤ꧀ꦧꦏꦭ꧀ꦢꦶꦥꦼꦤ꧀ꦠꦸꦁꦔꦶꦤꦁꦱꦶꦤꦒꦸꦏ꧀꧈​ꦏꦺꦴꦮꦺ​ꦧꦏꦭ꧀ꦢꦶꦒꦮ​ꦤꦁꦔꦉꦥ꧀ꦥꦺ​ꦒꦿꦩꦁꦭꦤ꧀ꦫꦠꦸ​ꦏꦺꦴꦁꦏꦺꦴꦤ꧀ꦔꦼꦏꦺꦏ꧀ꦏꦶꦥꦱꦼꦏ꧀ꦱꦶ​ꦏꦁꦒꦺꦴ​ꦲꦏꦸ​꧉​ 10ꦥꦚ꧀ꦕꦺꦤ꧀ ꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦢꦸ​ꦢꦶꦒꦼꦭꦂꦫꦏꦺꦤ꧀ꦢꦶꦱꦶꦏ꧀ꦩꦫꦁ​ꦱꦧꦼꦤ꧀ꦧꦁꦱ​꧉​ 11ꦤꦺꦏ꧀ꦏꦺꦴꦮꦺ​ꦢꦶꦕꦼꦏꦼꦭ꧀ꦭꦤ꧀ꦢꦶꦒꦮ​ꦤꦁꦔꦉꦥ꧀ꦏꦿꦸꦠꦺꦴꦤ꧀ ꦲꦗ​ꦥꦢ​ꦧꦶꦔꦸꦁ​ꦧꦧ꧀ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁ​;ꦫꦺꦴꦃ​ꦱꦸꦕꦶ​ꦢꦺꦮꦺꦱꦶꦁ​ꦧꦏꦭ꧀ꦔꦼꦏꦺꦏ꧀ꦏꦶꦠꦼꦩ꧀ꦧꦸꦁ​ꦲꦶꦁ​ꦲꦠꦶꦩꦸ​ꦲꦶꦁ​ꦮꦚ꧀ꦕꦶ​ꦏꦸꦮꦶ​꧉​ꦏꦸꦮꦶ​ꦱꦶꦁ​ꦏꦸꦢꦸ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁꦔꦏꦺ꧉​ 12ꦱꦼꦢꦸꦭꦸꦂ​ꦧꦏꦭ꧀ꦔꦤ꧀ꦢꦏ꧀ꦏꦏꦺꦱꦼꦢꦸꦭꦸꦂꦫꦺ​ꦢꦺꦮꦺꦭꦤ꧀ꦧꦥꦏ꧀ꦧꦏꦭ꧀ꦔꦤ꧀ꦢꦏ꧀ꦏꦏꦺꦲꦤꦏ꧀ꦏꦺ​ꦢꦺꦮꦺꦱꦸꦥꦪ​ꦢꦶꦥꦠꦺꦤ꧀ꦤꦶ​꧉​ꦲꦤꦏ꧀ꦲꦤꦏ꧀ꦧꦏꦭ꧀​ꦔ꧀ꦭꦮꦤ꧀ꦭꦤ꧀ꦔꦤ꧀ꦢꦏ꧀ꦏꦏꦺꦮꦺꦴꦁ​ꦠꦸꦮꦤꦺ​ꦱꦸꦥꦪ​ꦢꦶꦥꦠꦺꦤ꧀ꦤꦶ​꧉​ 13ꦮꦺꦴꦁ​ꦏꦧꦺꦃ​ꦧꦏꦭ꧀ꦚꦼꦔꦶꦠ꧀ꦠꦶ​ꦏꦺꦴꦮꦺ​ꦗꦭꦂꦫꦤ꧀ꦏꦺꦴꦮꦺ​ꦤꦸꦫꦸꦠ꧀ꦲꦏꦸ​꧉​ꦤꦁꦔꦶꦁ​ꦱꦥ​ꦱꦶꦁ​ꦩꦤ꧀ꦠꦼꦥ꧀ꦠꦼꦫꦸꦱ꧀ꦠꦼꦏꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺ꧈​ꦏꦸꦮꦶ​ꦱꦶꦁ​ꦧꦏꦭ꧀ꦱ꧀ꦭꦩꦼꦠ꧀꧈​”

꧋ꦧꦧ꧀ꦏꦱꦸꦱꦃꦲꦤ꧀ꦱꦶꦁ​ꦒꦼꦢꦺꦭꦤ꧀ꦏꦿꦶꦱ꧀ꦡꦸꦱ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦥꦭ꧀ꦱꦸ​꧉​

14꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦼꦫꦸꦱ꧀ꦱꦏꦺꦠꦼꦩ꧀ꦧꦸꦁꦔꦺ​:“ꦏꦺꦴꦮꦺ​ꦧꦏꦭ꧀ꦮꦼꦫꦸꦃ​ꦔ꧀ꦒꦼꦒꦶꦭꦤ꧀ꦤꦺꦏꦫꦸꦱꦏ꧀ꦏꦤ꧀ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦢꦸꦢꦸ​ꦥꦁꦒꦺꦴꦤ꧀ꦤꦤ꧀ꦤꦺ​꧉​꧌ꦱꦶꦁ​ꦥꦢ​ꦩꦕ​ꦲꦶꦏꦶ​ꦩꦶꦏꦶꦂꦫ​ꦱꦶꦁ​ꦲꦥꦶꦏ꧀ꦱꦸꦥꦪ​ꦧꦶꦱ​ꦢꦸꦤꦸꦁ꧉​)ꦮꦺꦴꦁꦮꦺꦴꦁ​ꦱꦶꦁ​ꦤꦁꦪꦸꦢꦺꦪ​ꦩ꧀​ꦧ꧀ꦭꦪꦸꦤꦺꦤꦁꦒꦸꦤꦸꦁꦒꦸꦤꦸꦁ​꧈​ꦱꦸꦥꦪ​ꦏꦺꦴꦮꦺ​ꦲꦗ​ꦱꦩ꧀ꦥꦺꦏ꧀ꦢꦶꦥꦠꦺꦤ꧀ꦤꦶ​꧉​ 15ꦮꦺꦴꦁꦮꦺꦴꦁ​ꦱꦶꦁ​ꦤꦁꦤ꧀ꦢꦸꦮꦸꦂꦲꦺꦴꦩꦃ​ꦲꦗ​ꦥꦢ​ꦩꦼꦢꦸꦤ꧀꧈​ꦲꦗ​ꦥꦢ​ꦩ꧀ꦊꦧꦸ​ꦚ꧀ꦗꦶꦏꦸꦏ꧀ꦲꦥꦲꦥ​꧉​ 16ꦱꦶꦁ​ꦲꦶꦗꦶꦏ꧀ꦤꦁꦏꦼꦧꦺꦴꦤ꧀ ꦲꦗ​ꦩꦸꦭꦶꦃ​ꦚ꧀ꦗꦶꦏꦸꦏ꧀ꦱꦭꦶꦤ꧀꧈​ 17ꦩꦼꦭꦱ꧀ꦱꦏꦺꦧꦔꦼꦠ꧀ꦧꦏꦭ꧀ꦭꦺ​ꦮꦪꦃ​ꦏꦸꦮꦶ​ꦏꦁꦒꦺꦴ​ꦮꦺꦴꦁ​ꦱꦶꦁ​ꦩꦼꦠꦼꦁ​ꦭꦤ꧀ꦱꦶꦁ​ꦤ꧀ꦢꦸꦮꦺꦧꦪꦶ​꧉​ 18ꦤ꧀ꦢꦺꦴꦔꦲ​ꦱꦸꦥꦪ​ꦱꦼꦩ꧀ꦧꦫꦁ​ꦲꦶꦏꦶ​ꦲꦗ​ꦱꦩ꧀ꦥꦺꦏ꧀ꦠꦶꦧ​ꦮꦪꦃꦲꦺ​ꦲꦢꦼꦩ꧀ꦒꦼꦢꦺ꧉​ 19ꦲꦮꦶꦠ꧀ꦧꦏꦭ꧀ꦲꦺꦤꦺꦁꦏꦱꦸꦱꦃꦲꦤ꧀ꦒꦼꦢꦺꦧꦔꦼꦠ꧀꧈​ꦏꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦒꦮꦺ​ꦗꦒꦠ꧀ꦲꦶꦏꦶ​ꦠꦼꦏꦤꦺ​ꦱꦲꦶꦏꦶ​ꦢꦸꦫꦸꦁ​ꦠꦲꦸ​ꦲꦺꦤꦺꦁꦏꦱꦁꦱꦫꦤ꧀ꦏꦪ​ꦔꦺꦴꦤꦺꦴ​ꦒꦼꦢꦺꦤꦺꦭꦤ꧀ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦪ​ꦲꦺꦴꦫ​ꦧꦏꦭ꧀ꦲꦺꦤꦺꦁꦭꦶꦪꦤꦺ​ꦱꦶꦁ​ꦔꦸꦁꦏꦸꦭ꧀ꦭꦶ​ꦏꦸꦮꦶ​ꦒꦼꦢꦺꦤꦺ꧉​ 20ꦱꦼꦩꦸꦁꦒꦺꦴꦤ꧀ꦤꦺꦏꦱꦸꦱꦃꦲꦤ꧀ꦏꦸꦮꦶ​ꦲꦺꦴꦫ​ꦢꦶꦕꦼꦏꦏ꧀ꦏꦏꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦼꦱ꧀ꦠꦶꦪ​ꦲꦺꦴꦫ​ꦧꦏꦭ꧀ꦲꦺꦤꦺꦁꦮꦺꦴꦁ​ꦱꦶꦗꦶ​ꦮꦲꦺ​ꦱꦶꦁ​ꦱ꧀ꦭꦩꦼꦠ꧀꧈​ꦤꦁꦔꦶꦁ​ꦗꦭꦂꦫꦤ꧀ꦩꦼꦭꦱ꧀ꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦢꦶꦥꦶꦭꦶꦃ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦚꦼꦏꦏ꧀ꦏꦏꦺꦮꦪꦃ​ꦏꦱꦁꦱꦫꦤ꧀ꦏꦸꦮꦶ​꧉​

21꧋“ꦭꦤ꧀ꦤꦺꦏ꧀ꦲꦺꦤꦺꦁꦮꦺꦴꦁ​ꦔꦺꦴꦩꦺꦴꦁ:'ꦪ​ꦲꦶꦏꦶ​ꦏꦿꦶꦱ꧀ꦡꦸꦱ꧀꧈'​ꦲꦥ​'ꦪ​ꦏꦲꦺ​ꦏꦿꦶꦱ꧀ꦡꦸꦱ꧀꧈'​ꦲꦗ​ꦥꦢ​ꦔꦤ꧀ꦢꦼꦭ꧀꧈​ 22ꦲꦮꦶꦠ꧀ꦲꦺꦴꦏꦺꦃꦮꦺꦴꦁ​ꦧꦏꦭ꧀ꦠꦼꦏ​ꦔꦺꦴꦩꦺꦴꦁ:'ꦲꦏꦸ​ꦲꦶꦏꦶ​ꦏꦿꦶꦱ꧀ꦡꦸꦱ꧀꧈'​ꦲꦥ​'ꦲꦏꦸ​ꦲꦶꦏꦶ​ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈'​ꦤꦁꦔꦶꦁ​ꦮꦸꦗꦸꦠ꧀ꦠꦺꦢꦸꦢꦸ​ꦭꦤ꧀ꦤꦩꦸꦁ​ꦔꦥꦸꦱ꧀ꦱꦶ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦧꦏꦭ꧀​ꦔ꧀ꦒꦮꦺ​ꦠꦤ꧀ꦢꦠꦤ꧀ꦢꦭꦤ꧀ꦩꦸꦗꦶꦗꦠ꧀ꦩꦸꦗꦶꦗꦠ꧀꧈​ꦠꦸꦗꦸꦮꦤ꧀ꦤꦺꦤꦩꦸꦁ​ꦏꦁꦒꦺꦴ​ꦚꦤ꧀ꦢꦶꦁꦏꦺꦴꦮꦺ​꧉​ꦱꦼꦩꦸꦁꦒꦺꦴꦤ꧀ꦤꦺꦧꦶꦱ​ꦔꦺꦴꦤꦺꦴ​ꦪ​ꦲꦉꦥ꧀ꦚꦤ꧀ꦢꦶꦁꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦢꦶꦥꦶꦭꦶꦃ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦩ꧀ꦧꦫꦁ​꧉​ꦤꦁꦔꦶꦁ​ꦲꦺꦴꦫ​ꦧꦶꦱ​꧉​ 23ꦩꦸꦭꦤꦺ​ꦥꦢ​ꦱꦶꦁ​ꦲꦮꦱ꧀ꦭꦤ꧀ꦲꦠꦶꦲꦠꦶ꧈​ꦲꦮꦶꦠ꧀ꦏꦺꦴꦮꦺ​ꦮꦶꦱ꧀ꦠꦏ꧀ꦲꦺꦴꦩꦺꦴꦁꦔꦶꦱꦏ꧀ꦢꦸꦫꦸꦁꦔꦺꦧꦧ꧀ꦱꦼꦩ꧀ꦧꦫꦁꦩ꧀ꦧꦫꦁꦏꦸꦮꦶ​꧉​”

꧋ꦠꦼꦏꦤꦺ​ꦲꦤꦏ꧀ꦏꦺ​ꦩꦤꦸꦁꦱ​꧉​

24꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦱꦏ꧀ꦮꦶꦱ꧀ꦱꦺ​ꦮꦏ꧀ꦠꦸ​ꦏꦱꦸꦱꦃꦲꦤ꧀ꦒꦼꦢꦺꦏꦸꦮꦶ​꧈​ꦱꦽꦔꦺꦔꦺ​ꦧꦏꦭ꧀ꦩꦭꦶꦃ​ꦥꦼꦠꦼꦁ​ꦭꦤ꧀​ꦩ꧀ꦧꦸꦭꦤ꧀ꦤꦺꦲꦺꦴꦫ​ꦧꦏꦭ꧀ꦱꦼꦩ꧀ꦭꦺꦴꦫꦺꦴꦠ꧀ꦩꦼꦤꦺꦃ​꧉​ 25ꦭꦶꦤ꧀ꦠꦁꦭꦶꦤ꧀ꦠꦁ​ꦧꦏꦭ꧀ꦠꦶꦧ​ꦱꦁꦏꦭꦔꦶꦠ꧀ꦭꦤ꧀ꦥꦔ꧀ꦮꦱꦥꦔ꧀ꦮꦱ​ꦤꦁꦭꦔꦶꦠ꧀ꦧꦏꦭ꧀ꦲ꦳ꦺꦴꦪꦏ꧀ꦏꦧꦺꦃ​꧉​ 26ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦏꦧꦺꦃ​ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦔꦺꦠꦺꦴꦏ꧀ꦤꦁꦩꦺꦒ​꧉​ꦏꦧꦺꦃ​ꦧꦏꦭ꧀ꦮꦼꦫꦸꦃ​ꦒꦼꦢꦺꦤꦺꦏ꧀ꦮꦱꦤꦺ​ꦱꦶꦁ​ꦱꦼꦩ꧀ꦭꦺꦴꦫꦺꦴꦠ꧀ꦔꦁꦒꦺꦴ​ꦥꦼꦥꦢꦁꦔꦺꦱ꧀ꦮꦂꦒ​꧉​ 27ꦢꦺꦏ꧀ꦤꦺꦧꦏꦭ꧀ꦔꦺꦴꦁꦏꦺꦴꦤ꧀ꦩꦸꦭꦺꦏꦠ꧀ꦩꦸꦭꦺꦏꦠ꧀ꦠꦺꦔ꧀ꦭꦸꦩ꧀ꦥꦸꦏ꧀ꦏꦏꦺꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦢꦶꦥꦶꦭꦶꦃ​꧈​ꦱꦁꦏꦮꦺꦠꦤ꧀ ꦏꦸꦭꦺꦴꦤ꧀ ꦭꦺꦴꦂꦭꦤ꧀ꦏꦶꦢꦸꦭ꧀ ꦱꦁꦏꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦧꦸꦩꦶ​ꦭꦤ꧀ꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏꦤ꧀ꦤꦺꦭꦔꦶꦠ꧀꧈​”

꧋ꦥꦶꦮꦸꦭꦁ​ꦱꦁꦏꦮꦶꦠ꧀ꦲꦚ꧀ꦗꦶꦂ​꧉​

28꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦸꦠꦸꦥ꧀ꦠꦼꦩ꧀ꦧꦸꦁꦔꦺ​ꦔꦺꦤꦺ​:“ꦲꦩ꧀ꦧꦺꦴꦏ꧀ꦢꦶꦠꦶꦠꦺꦤ꧀ꦤꦶ​ꦮꦶꦠ꧀ꦲꦚ꧀ꦗꦶꦂ​ꦏꦲꦺ​꧉​ꦤꦺꦏ꧀ꦥꦁꦔꦺ​ ꦩꦺꦴꦭꦃꦲꦶꦲꦶꦗꦺꦴ​ꦭꦤ꧀ꦩꦼꦩꦼꦱ꧀ꦭꦤ꧀ꦩꦼꦠꦸ​ꦒꦺꦴꦢꦺꦴꦁꦔꦺ​꧈​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦮꦪꦃ​ꦥꦤꦱ꧀ꦮꦶꦱ꧀ꦕꦼꦢꦼꦏ꧀​꧉​ 29ꦏꦪ​ꦔꦺꦴꦤꦺꦴ​ꦲꦸꦒ​꧈​ꦤꦺꦏ꧀ꦏꦺꦴꦮꦺ​ꦮꦼꦫꦸꦃ​ꦏꦧꦺꦃ​ꦱꦶꦁ​ꦠꦏ꧀ꦲꦺꦴꦩꦺꦴꦁ​ꦩꦲꦸ​ꦩꦺꦴꦭꦃꦲꦶꦏ꧀ꦭꦏꦺꦴꦤ꧀ ꦔꦼꦂꦠꦶꦪ​ꦤꦺꦏ꧀ꦮꦶꦱ꧀ꦕꦼꦢꦼꦏ꧀​ꦧꦔꦼꦠ꧀ꦮꦚ꧀ꦕꦶꦤꦺ​ꦲꦼꦁꦒꦺꦴꦤ꧀ꦏꦸ​ꦧꦏꦭ꧀ꦠꦼꦏ​꧉​ 30ꦥꦢ​ꦢꦶꦠꦶꦠꦺꦤ꧀ꦤꦶ​!ꦏꦺꦴꦮꦺ​ꦧꦏꦭ꧀ꦩꦼꦤꦁꦔꦶ​ꦏꦧꦺꦃ​ꦲꦶꦏꦶ​ꦏ꧀ꦭꦏꦺꦴꦤ꧀꧈​ 31ꦭꦔꦶꦠ꧀ꦭꦤ꧀ꦧꦸꦩꦶ​ꦲꦶꦏꦶ​ꦧꦏꦭ꧀ꦲꦶꦭꦁ​꧈​ꦤꦁꦔꦶꦁ​ꦠꦼꦩ꧀ꦧꦸꦁꦏꦸ​ꦧꦏꦭ꧀ꦲꦺꦤꦺꦁꦠꦼꦫꦸꦱ꧀ ꦱ꧀ꦭꦮꦱ꧀ꦭꦮꦱ꧀ꦱꦺ꧉​

32꧋“ꦤꦁꦔꦶꦁ​ꦪꦏꦸꦮꦶ​꧈​ꦧꦧ꧀ꦏꦥꦤ꧀ꦧꦏꦭ꧀ꦭꦺ​ꦏ꧀ꦭꦏꦺꦴꦤ꧀ ꦲꦺꦴꦫ​ꦲꦺꦤꦺꦁꦮꦺꦴꦁ​ꦔꦼꦂꦠꦶ​꧉​ꦩꦸꦭꦺꦏꦠ꧀ꦩꦸꦭꦺꦏꦠ꧀ꦤꦁꦱ꧀ꦮꦂꦒ​ꦪ​ꦲꦺꦴꦫ​ꦔꦼꦂꦠꦶ​ꦭꦤ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦲꦺꦴꦫ​ꦔꦼꦂꦠꦶ​꧉​ꦱꦶꦁ​ꦔꦼꦂꦠꦶ​ꦤꦩꦸꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺ꧉​ 33ꦩꦸꦭꦤꦺ​꧈​ꦥꦢ​ꦱꦶꦁ​ꦲꦮꦱ꧀ꦭꦤ꧀ꦱꦶꦁ​ꦲꦠꦶꦲꦠꦶ꧈​ꦲꦮꦶꦠ꧀ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦏꦥꦤ꧀ꦧꦏꦭ꧀ꦭꦺ​ꦏ꧀ꦭꦏꦺꦴꦤ꧀꧈​ 34ꦏꦼꦤꦺꦁꦠꦏ꧀ꦥꦢꦏ꧀ꦏꦏꦺꦏꦫꦺꦴ​ꦮꦺꦴꦁ​ꦤꦺꦏ꧀ꦲꦉꦥ꧀ꦭꦸꦔ​ꦲꦢꦺꦴꦃ​ꦏꦲꦺ​꧉​ꦢꦺꦏ꧀ꦤꦺꦭꦸꦔ​ꦭꦤ꧀ꦱꦼꦩ꧀ꦧꦫꦁꦔꦺꦢꦶꦥꦱꦿꦃꦲꦏꦺꦩꦫꦁ​ꦥꦫ​ꦥꦼꦭꦢꦺꦤ꧀ꦤꦺ​꧉​ꦏꦧꦺꦃ​ꦢꦶꦥꦿꦺꦤ꧀ꦠꦃ​ꦭꦤ꧀ꦢꦶꦏꦺꦏ꧀ꦏꦶꦧꦒꦺꦪꦤ꧀ꦢꦺꦮꦺꦢꦺꦮꦺ꧉​ꦲꦸꦒ​ꦱꦶꦁ​ꦗꦒ​ꦭꦮꦁ​ꦢꦶꦥꦿꦺꦤ꧀ꦠꦃ​ꦏꦺꦴꦁꦏꦺꦴꦤ꧀ꦩꦼꦭꦺꦏ꧀ꦲꦗ​ꦱꦩ꧀ꦥꦺꦏ꧀ꦔꦤ꧀ꦠꦸꦏ꧀꧈​ 35ꦩꦸꦭꦤꦺ​꧈​ꦥꦢ​ꦩꦼꦭꦺꦏ꧀ꦏ​ꦭꦤ꧀ꦱꦶꦁ​ꦲꦮꦱ꧀ ꦲꦮꦶꦠ꧀ꦏꦺꦴꦮꦺ​ꦲꦺꦴꦫ​ꦔꦼꦂꦠꦶ​ꦏꦥꦤ꧀ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦩꦲꦸ​ꦧꦏꦭ꧀ꦭꦺ​ꦠꦼꦏ​꧈​ꦮꦪꦃ​ꦱꦺꦴꦫꦺ​꧈​ꦠꦼꦔꦃ​ꦮꦼꦔꦶ​꧈​ꦮꦪꦃ​ꦗꦒꦺꦴ​ꦏ꧀ꦭꦸꦫꦸꦏ꧀ ꦲꦥ​ꦮꦪꦃ​ꦲꦺꦱꦸꦏ꧀꧈​ 36ꦲꦗ​ꦱꦩ꧀ꦥꦺꦏ꧀ ꦤꦺꦏ꧀ꦢꦺꦏ꧀ꦤꦺꦠꦼꦏ​ꦢꦢꦏ꧀ꦏꦤ꧀ ꦠꦼꦫꦸꦱ꧀ꦤꦼꦩꦸ​ꦏꦺꦴꦮꦺ​ꦲꦶꦗꦶꦏ꧀ꦠꦸꦫꦸ​꧉​ 37ꦩꦸꦭꦤꦺ​ꦱꦲꦶꦏꦶ​ꦲꦏꦸ​ꦔꦺꦴꦩꦺꦴꦁꦩꦫꦁ​ꦏꦺꦴꦮꦺ​ꦏꦧꦺꦃ​:'ꦥꦢ​ꦩꦼꦭꦺꦏ꧀ꦏ​ꦭꦤ꧀ꦱꦶꦁ​ꦗꦒꦗꦒ​꧉​’” ↑ ↑ ↑


꧋ꦥꦸꦠꦸꦱ꧀ꦱꦤ꧀ꦲꦉꦥ꧀ꦩꦠꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧇​꧑꧔꧇​ 1꧋ꦫꦺꦴꦁ​ꦢꦶꦤ​ꦩꦼꦤꦺꦃ​ꦮꦶꦱ꧀ꦮꦪꦃꦲꦺ​ꦥꦱ꧀ꦏꦃ​꧉​ꦲꦶꦁ​ꦢꦶꦤ​ꦥꦱ꧀ꦏꦃ​ꦏꦸꦮꦶ​ꦮꦺꦴꦁ​ꦙꦸꦥꦢ​ꦩꦁꦔꦤ꧀ꦫꦺꦴꦠꦶ​ꦱꦶꦁ​ꦲꦺꦴꦫ​ꦲꦺꦤꦺꦁꦫꦒꦶꦤꦺ​꧉​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀ꦥꦢ​ꦔ꧀ꦒꦺꦴꦭꦺꦏ꧀ꦲꦏꦭ꧀ꦲꦼꦁꦒꦺꦴꦤꦺ​ꦲꦉꦥ꧀ꦚꦼꦏꦼꦭ꧀ꦭꦤ꧀ꦩꦠꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ ꦠꦤ꧀ꦥ​ꦮꦺꦴꦁꦮꦺꦴꦁ​ꦔꦼꦂꦠꦶ​꧉​ 2ꦩꦸꦭꦤꦺ​ꦥꦢ​ꦔꦺꦴꦩꦺꦴꦁ:“ꦲꦗ​ꦮꦪꦃꦲꦺ​ꦥꦱ꧀ꦏꦃ​꧈​ꦩꦼꦁꦏꦺꦴ​ꦤ꧀ꦢꦏ꧀ꦩꦫꦏ꧀ꦏꦏꦺꦫꦩꦺ​ꦭꦤ꧀ꦒꦺꦒꦺꦂꦫꦤ꧀꧈​”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦲꦸꦱꦥ꧀ꦥꦶ​ꦊꦔ​ꦮꦔꦶ​ꦱꦶꦁ​ꦭꦫꦁ​꧉​

3꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦲꦶꦏꦶ​ꦤꦁꦢꦺꦱ​ꦨꦺꦠꦤꦶ꧈​ꦩꦼꦂꦢꦪꦺꦴꦃꦤꦁꦲꦺꦴꦩꦃꦲꦺ​ꦱꦶꦩꦺꦴꦤ꧀ꦱꦶꦁ​ꦩꦲꦸꦤꦺ​ꦭꦫ​ꦭꦺꦥꦿ​꧉​ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦲꦶꦗꦶꦏ꧀ꦗꦒꦺꦴꦁꦔꦤ꧀ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦠꦼꦏ​ꦔ꧀ꦒꦮ​ꦧꦺꦴꦠꦺꦴꦭ꧀ꦲꦶꦱꦶꦤꦺ​ꦊꦔ​ꦮꦔꦶ​ꦠꦸꦱ꧀ꦱꦶꦁ​ꦭꦫꦁ​ꦧꦔꦼꦠ꧀ꦉꦒꦤꦺ​꧉​ꦊꦔ​ꦮꦔꦶ​ꦲꦶꦏꦶ​ꦱꦶꦁ​ꦢꦶꦒꦮꦺ​ꦲꦺꦴꦪꦺꦴꦠ꧀ꦠꦺꦴꦪꦺꦴꦠ꧀ꦠꦺꦠꦤ꧀ꦢꦸꦂꦫꦤ꧀ꦤꦂꦢꦸꦱ꧀꧈​ꦧꦺꦴꦠꦺꦴꦭꦺ​ꦠꦼꦫꦸꦱ꧀ꦢꦶꦥꦼꦕꦃ​ꦒꦸꦭꦸꦤꦺ​ꦭꦤ꧀ꦲꦶꦱꦶꦤꦺ​ꦢꦶꦲꦼꦱꦺꦴꦏ꧀ꦏꦏꦺꦤꦁꦱꦶꦫꦃꦲꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 4ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦲꦺꦤꦺꦁꦱꦶꦁ​ꦫꦱꦤ꧀ꦫꦱꦤ꧀:“ꦭꦃ​ꦲꦥ​ꦗꦮꦤꦺꦊꦔ​ꦮꦔꦶ​ꦭꦫꦁꦭꦫꦁ​ꦏꦺꦴꦏ꧀ꦢꦶꦲꦼꦧꦿꦺꦃꦲꦼꦧꦿꦺꦃ​ꦔꦺꦴꦤꦺꦴ​? 5ꦱꦼꦩꦸꦁꦒꦺꦴꦤ꧀ꦤꦺꦢꦶꦲꦼꦢꦺꦴꦭ꧀ꦭꦲꦸꦠ꧀ꦥꦪꦸ​ꦲꦺꦴꦏꦺꦃꦠ​?ꦢꦸꦮꦶꦠ꧀ꦠꦺꦭꦲꦸꦠ꧀ꦪ​ꦏꦼꦤꦺꦁꦢꦶꦏꦺꦏ꧀ꦏꦏꦺꦮꦺꦴꦁ​ꦲꦺꦴꦫ​ꦤ꧀ꦢꦸꦮꦺꦠ​?”ꦮꦺꦴꦁꦮꦺꦴꦁ​ꦲꦶꦏꦶ​ꦠꦼꦫꦸꦱ꧀ꦚꦼꦤꦺꦤ꧀ꦤꦶꦮꦺꦴꦁ​ꦮꦺꦢꦺꦴꦏ꧀ꦏꦺ꧉​

6꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦧꦺꦤ꧀ ꦲꦩ꧀ꦧꦺꦴꦏ꧀ꦢꦶꦲꦼꦗꦂꦫꦏꦺ!ꦏꦼꦤꦺꦁꦲꦥ​ꦏꦺꦴꦏ꧀ꦲꦩ꧀ꦧꦺꦴꦏ꧀ꦥꦼꦔꦶꦁ​?ꦮꦺꦴꦁ​ꦮꦺꦢꦺꦴꦏ꧀ꦲꦶꦏꦶ​ꦤꦶꦤ꧀ꦢꦏ꧀ꦏꦏꦺꦧꦫꦁ​ꦱꦶꦁ​ꦲꦥꦶꦏ꧀ꦧꦔꦼꦠ꧀ꦩꦫꦁ​ꦲꦏꦸ​꧉​ 7ꦮꦺꦴꦁ​ꦩ꧀ꦭꦫꦠ꧀ꦱ꧀ꦭꦮꦱ꧀ꦱꦺꦲꦺꦤꦺꦁꦮꦲꦺ​ꦭꦤ꧀ꦱꦏ꧀ꦮꦚ꧀ꦕꦶ​ꦮꦚ꧀ꦕꦶ​ꦤꦺꦏ꧀ꦏꦺꦴꦮꦺ​ꦏꦼꦥꦺꦔꦶꦤ꧀ꦤꦸꦭꦸꦁꦔꦶ​ꦏꦺꦴꦮꦺ​ꦧꦶꦱ​꧉​ꦤꦁꦔꦶꦁ​ꦲꦏꦸ​ꦲꦶꦏꦶ​ꦲꦺꦴꦫ​ꦱ꧀ꦭꦮꦱ꧀ꦱꦺꦕꦩ꧀ꦥꦸꦂ​ꦏꦺꦴꦮꦺ​꧉​ 8ꦮꦺꦴꦁ​ꦮꦺꦢꦺꦴꦏ꧀ꦲꦶꦏꦶ​ꦤꦶꦤ꧀ꦢꦏ꧀ꦏꦏꦺꦱꦏ꧀ꦧꦶꦱꦤꦺ​ꦏꦁꦒꦺꦴ​ꦤ꧀ꦢꦸꦢꦸꦃꦲꦏꦺꦏꦠꦿꦺꦱ꧀ꦤꦤꦺꦩꦫꦁ​ꦲꦏꦸ​꧉​ꦢꦺꦏ꧀ꦤꦺꦲꦶꦤ꧀ꦠꦼꦫꦺꦤꦩꦸꦁ​ꦔ꧀ꦊꦔꦤꦶꦲꦮꦏ꧀ꦏꦸ​ꦏꦫꦺꦴ​ꦊꦔ​ꦮꦔꦶ​꧈​ꦱꦏ꧀ꦢꦸꦫꦸꦁꦔꦺꦲꦏꦸ​ꦢꦶꦏꦸꦧꦸꦂ​꧉​ 9ꦢꦶꦠꦶꦠꦺꦤ꧀ꦤꦶ​ꦠ​꧈​ꦤꦁꦲꦼꦤ꧀ꦢꦶ​ꦮꦲꦺ​ꦲꦶꦁ​ꦢꦺꦴꦚ​ꦏꦺꦤꦺ​ꦱꦶꦁ​ꦧꦏꦭ꧀ꦢꦶꦒꦼꦭꦂꦫꦶꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦏꦿꦸꦔꦸ​ꦲꦸꦒ​ꦧꦧ꧀ꦱꦶꦁ​ꦢꦶꦠꦶꦤ꧀ꦢꦏ꧀ꦏꦏꦺꦏꦫꦺꦴ​ꦮꦺꦴꦁ​ꦮꦺꦢꦺꦴꦏ꧀ꦲꦶꦏꦶ​꧈​ꦏꦁꦒꦺꦴ​ꦥꦼꦁꦔꦺꦭꦶꦁꦔꦺꦭꦶꦁ​ꦩꦫꦁ​ꦢꦺꦏ꧀ꦤꦺ꧉​”

꧋ꦪꦸꦢꦱ꧀ꦆꦱ꧀ꦏꦫꦶꦪꦺꦴꦠ꧀ꦔꦼꦭꦸꦁꦔꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦩꦫꦁ​ꦩꦸꦁꦱꦸꦃꦲꦺ​꧉​

10꧋ꦱꦁꦏꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦱꦶꦁ​ꦫꦺꦴꦭꦱ꧀ꦠꦼꦫꦸꦱ꧀ꦲꦺꦤꦺꦁꦱꦶꦗꦶ​ꦱꦶꦁ​ꦧꦸꦢꦭ꧀ꦤꦁꦔ꧀ꦒꦺꦴꦤ꧀ꦤꦺꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦲꦉꦥ꧀ꦔꦼꦭꦸꦁꦔꦏꦺꦢꦺꦏ꧀ꦤꦺꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦪꦏꦸꦮꦶ​ꦪꦸꦢꦱ꧀ꦆꦱ꧀ꦏꦫꦶꦪꦺꦴꦠ꧀꧈​ 11ꦮꦺꦴꦁꦮꦺꦴꦁ​ꦏꦢꦸꦁ​ꦏꦿꦸꦔꦸ​ꦏꦸꦮꦶ​ꦠꦼꦫꦸꦱ꧀ꦥꦢ​ꦧꦸꦔꦃ​ꦧꦔꦼꦠ꧀ꦭꦤ꧀ꦱꦒꦸꦃ​ꦔꦼꦏꦺꦏ꧀ꦏꦶꦢꦸꦮꦶꦠ꧀꧈​ꦱꦲꦶꦏꦶ​ꦪꦸꦢꦱ꧀ꦩꦺꦴꦭꦃꦲꦶꦔ꧀ꦒꦺꦴꦭꦺꦏ꧀ꦏꦼꦭꦸꦁꦒꦂꦫꦤ꧀ꦲꦼꦁꦒꦺꦴꦤꦺ​ꦲꦉꦥ꧀ꦔꦼꦭꦸꦁꦔꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦩꦫꦁ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦩꦲꦸ​꧉​

꧋ꦕꦼꦕꦮꦶꦱ꧀ꦏꦁꦒꦺꦴ​ꦩꦁꦔꦤ꧀ꦥꦱ꧀ꦏꦃ​꧉​

12꧋ꦱꦲꦶꦏꦶ​ꦮꦶꦱ꧀ꦮꦪꦃꦲꦺ​ꦫꦶꦪꦪꦫꦺꦴꦠꦶ​ꦠꦤ꧀ꦥ​ꦫꦒꦶ​꧉​ꦲꦶꦁ​ꦢꦶꦤ​ꦱꦶꦁ​ꦤ꧀ꦢꦶꦱꦶꦏ꧀ꦢꦺꦮꦺꦮꦺꦴꦁꦮꦺꦴꦁ​ꦭꦸꦩꦿꦃꦲꦺ​ꦲꦩ꧀ꦧꦼꦭꦺꦃ​ꦕꦼꦩ꧀ꦥꦺ​꧉​ꦲꦶꦁ​ꦢꦶꦤ​ꦲꦶꦏꦸ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦏꦺꦴꦤ꧀ꦩꦫꦁ​ ꦒꦸꦱ꧀ꦠꦶ​ꦪꦺꦯꦸꦱ꧀:“ꦒꦸꦱ꧀ꦠꦶ​꧈​ꦏꦺꦴꦮꦺ​ꦲꦉꦥ꧀ꦩꦁꦔꦤ꧀ꦥꦱ꧀ꦏꦃ​ꦤꦁꦲꦼꦤ꧀ꦢꦶ​?ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦠꦠꦠꦠ​!”

13꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦩꦸꦫꦶꦢ꧀ꦭꦺꦴꦫꦺꦴ​꧉​ꦢꦺꦏ꧀ꦤꦺꦔꦺꦴꦩꦺꦴꦁ:“ꦏꦤ​ꦩ꧀ꦊꦧꦸ​ꦤꦁꦪꦺꦫꦸꦱꦭꦺꦩ꧀꧈​ꦤꦁꦢꦭꦤ꧀ꦏꦺꦴꦮꦺ​ꦧꦏꦭ꧀ꦏꦼꦥꦼꦠꦸꦏ꧀ꦮꦺꦴꦁ​ꦭꦤꦁ​ꦔ꧀ꦒꦮ​ꦏꦼꦤ꧀ꦢꦶꦲꦶꦱꦶꦤꦺ​ꦧꦚꦸ​꧉​ꦏꦺꦴꦮꦺ​ꦥꦢ​ꦩꦺꦭꦸꦮ​ꦮꦺꦴꦁ​ꦏꦸꦮꦶ​꧉​ 14ꦤꦺꦏ꧀ꦏꦺꦴꦮꦺ​ꦮꦶꦱ꧀ꦠꦼꦏꦤ꧀ꦲꦺꦴꦩꦃꦲꦺ​꧈​ꦔꦺꦴꦩꦺꦴꦁꦏꦫꦺꦴ​ꦱꦶꦁ​ꦤ꧀ꦢꦸꦮꦺꦲꦺꦴꦩꦃ​ꦔꦺꦤꦺ​:'ꦒꦸꦫꦸꦤꦺ​ꦤꦏꦺꦴꦏ꧀ꦏꦏꦺꦏꦩꦂ​ꦱꦶꦁ​ꦲꦉꦥ꧀ꦢꦶꦲꦼꦁꦒꦺꦴ​ꦩꦁꦔꦤ꧀ꦥꦱ꧀ꦏꦃ​ꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉'​ 15ꦮꦺꦴꦁꦔꦺ​ꦩꦼꦁꦏꦺꦴ​ꦠꦼꦫꦸꦱ꧀​ꦔ꧀ꦒꦮ​ꦏꦺꦴꦮꦺ​ꦤꦁꦏꦩꦂ​ꦒꦼꦢꦺ​ꦤꦁꦤ꧀ꦢꦸꦮꦸꦂꦱꦶꦁ​ꦮꦶꦱ꧀ꦢꦶꦠꦠ​꧉​ꦏꦤ​ꦱꦶꦁ​ꦲꦉꦥ꧀ꦢꦶꦥꦔꦤ꧀ꦢꦶꦕꦮꦶꦱ꧀​ꦕꦮꦶꦱ꧀ꦏꦺ​ꦤꦁꦏꦺꦴꦤꦺꦴ​꧉​”

16꧋ꦩꦸꦫꦶꦢ꧀ꦢꦺ​ꦩꦲꦸ​ꦠꦼꦫꦸꦱ꧀ꦥꦢ​ꦧꦸꦢꦭ꧀ꦤꦁꦪꦺꦫꦸꦱꦭꦺꦩ꧀ ꦠꦼꦫꦸꦱ꧀ꦏꦼꦥꦼꦠꦸꦏ꧀ꦮꦺꦴꦁꦔꦺ​꧈​ꦏꦪ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦲꦸ​꧉​ꦤꦁꦏꦺꦴꦤꦺꦴ​ꦠꦼꦫꦸꦱ꧀ꦥꦢ​ꦚꦮꦶꦱ꧀ꦱꦏꦺꦥꦔꦤ꧀ꦤꦤ꧀ꦥꦱ꧀ꦏꦃ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦱꦥ​ꦱꦶꦁ​ꦲꦉꦥ꧀ꦔꦼꦭꦸꦁꦔꦏꦺꦢꦺꦏ꧀ꦤꦺꦩꦫꦁ​ꦩꦸꦁꦱꦸꦃꦲꦺ​꧉​

17꧋ꦩ꧀ꦧꦼꦔꦶꦤꦺꦏꦸꦮꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦏ​ꦏꦫꦺꦴ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ 18ꦢꦺꦴꦁꦔꦺꦥꦢ​ꦗꦼꦗꦒꦺꦴꦁꦔꦤ꧀ꦩꦁꦔꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦏꦸ​ꦔꦺꦴꦩꦺꦴꦁ꧈​ꦲꦺꦤꦺꦁꦱꦶꦗꦶ​ꦧꦏꦭ꧀ꦔꦼꦭꦸꦁꦔꦏꦺꦲꦏꦸ​ꦩꦫꦁ​ꦩꦸꦁꦱꦸꦃꦲꦺ​꧉​ꦱꦶꦗꦶ​ꦱꦶꦁ​ꦩꦁꦔꦤ꧀ꦕꦩ꧀ꦥꦸꦂ​ꦏꦫꦺꦴ​ꦲꦏꦸ​ꦲꦶꦏꦶ​꧉​”

19꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦏꦒꦺꦠ꧀ꦭꦤ꧀ꦱꦼꦢꦶ꧉​ꦠꦼꦫꦸꦱ꧀ꦥꦢ​ꦒꦼꦤ꧀ꦠꦺꦤ꧀ꦠꦏꦺꦴꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦩꦺꦴꦱꦺꦴꦏ꧀ꦲꦏꦸ​ꦠ​꧈​ꦒꦸꦱ꧀ꦠꦶ​?”

20꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦪ​ꦱꦶꦗꦶ​ꦠꦸꦁꦒꦭ꧀ꦭꦺ​ꦏꦺꦴꦮꦺ​ꦮꦺꦴꦁ​ꦫꦺꦴꦭꦱ꧀ꦏꦸꦮꦶ​ꦮꦲꦺ​꧈​ꦱꦶꦁ​ꦩꦺꦭꦸ​ꦚꦼꦭꦸꦥ꧀ꦥꦏꦺꦫꦺꦴꦠꦶꦤꦺ​ꦤꦁꦩꦁꦏꦺꦴꦏ꧀꧈​ 21ꦥꦚ꧀ꦕꦺꦤ꧀ ꦲꦤꦏ꧀ꦏꦺ​ꦩꦤꦸꦁꦱ​ꦏꦸꦢꦸ​ꦩꦠꦶ​꧉​ꦏꦸꦮꦶ​ꦮꦶꦱ꧀ꦏꦼꦠꦸꦭꦶꦱ꧀ꦏꦮꦶꦠ꧀ꦗꦩꦤ꧀​ꦩ꧀ꦧꦶꦪꦺꦤ꧀꧈​ꦤꦁꦔꦶꦁ​ꦕꦶꦭꦏ​ꦠꦼꦤꦤ꧀ꦮꦺꦴꦁ​ꦱꦶꦁ​ꦔꦼꦭꦸꦁꦔꦏꦺꦲꦤꦏ꧀ꦏꦺ​ꦩꦤꦸꦁꦱ​ꦩꦫꦁ​ꦩꦸꦁꦱꦸꦃꦲꦺ​꧉​ꦮꦺꦴꦁ​ꦏꦸꦮꦶ​ꦭꦸꦮꦸꦁꦲꦺꦴꦫ​ꦭꦲꦶꦂ​ꦮꦲꦺ​ꦩꦲꦸꦤꦺ​꧉​”

꧋ꦥꦺꦱ꧀ꦠ​ꦱꦸꦕꦶ​꧉​

22꧋ꦢꦺꦴꦁꦔꦺꦥꦢ​ꦗꦼꦗꦒꦺꦴꦁꦔꦤ꧀ꦩꦁꦔꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦚ꧀ꦗꦶꦏꦸꦏ꧀ꦫꦺꦴꦠꦶ​ꦭꦤ꧀ꦱꦏ꧀ꦮꦶꦱ꧀ꦱꦺ​ꦢꦶꦢꦺꦴꦔꦏ꧀ꦏꦏꦺꦠꦼꦫꦸꦱ꧀ꦢꦶꦕꦸꦮꦶꦭ꧀ꦕꦸꦮꦶꦭ꧀ꦢꦶꦏꦺꦏ꧀ꦏꦏꦺꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ꦢꦺꦏ꧀ꦤꦺꦔꦺꦴꦩꦺꦴꦁ:“ꦥꦢ​ꦢꦶꦥꦔꦤ꧀꧈​ꦫꦺꦴꦠꦶ​ꦲꦶꦏꦶ​ꦧꦢꦤ꧀ꦏꦸ​꧉​”

23꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀​ꦚ꧀ꦗꦶꦏꦸꦏ꧀ꦲꦺꦴꦩ꧀ꦧꦺꦤ꧀ꦤꦺ꧉​ꦱꦏ꧀ꦮꦶꦱ꧀ꦱꦺ​ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦩ꧀ꦧꦺꦤ꧀ꦤꦺꦠꦼꦫꦸꦱ꧀ꦢꦶꦲꦼꦭꦸꦁꦔꦏꦺꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​ꦏꦧꦺꦃ​ꦩꦺꦭꦸ​ꦔꦺꦴꦩ꧀ꦧꦺ​꧉​ 24ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦲꦶꦏꦶ​ꦒꦼꦠꦶꦃꦏꦸ​ꦱꦶꦁ​ꦩꦶꦭꦶ​ꦏꦁꦒꦺꦴ​ꦮꦺꦴꦁ​ꦲꦺꦴꦏꦺꦃ꧉​ꦒꦼꦠꦶꦃ​ꦲꦶꦏꦶ​ꦠꦤ꧀ꦢꦤꦺꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦔ꧀ꦒꦮꦺ​ꦥꦽꦗꦚ꧀ꦗꦶꦪꦤ꧀ꦲꦚꦂ​ꦏꦫꦺꦴ​ꦏꦺꦴꦮꦺ​꧉​ 25ꦠꦼꦤꦤ꧀ ꦲꦏꦸ​ꦔꦺꦴꦩꦺꦴꦁ꧈​ꦲꦏꦸ​ꦲꦺꦴꦫ​ꦧꦏꦭ꧀ꦔꦺꦴꦩ꧀ꦧꦺ​ꦲꦁꦒꦸꦂ​ꦲꦶꦏꦶ​ꦩꦼꦤꦺꦃ​ꦠꦼꦏꦤꦺ​ꦲꦏꦸ​ꦔꦺꦴꦩ꧀ꦧꦺ​ꦲꦁꦒꦸꦂ​ꦱꦶꦁ​ꦲꦚꦂ​ꦲꦩ꧀ꦧꦺꦱꦸꦏ꧀ꦤꦁꦱ꧀ꦮꦂꦒ​꧉​”

26꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦥꦢ​ꦱꦶꦔꦶꦱꦶꦔꦶꦩꦠꦸꦂꦏꦼꦱꦸꦮꦸꦤ꧀ꦭꦤ꧀​ꦔ꧀ꦭꦸꦲꦸꦂꦫꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦫꦸꦱ꧀ꦥꦢ​ꦧꦸꦢꦭ꧀ꦤꦁꦒꦸꦤꦸꦁ​ꦎꦭꦺꦥ꦳꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦤꦺꦏ꧀ꦫꦱꦸꦭ꧀ꦦꦺꦠꦿꦸꦱ꧀ꦧꦏꦭ꧀ꦚꦺꦭꦏ꧀ꦏꦶ​ꦢꦺꦏ꧀ꦤꦺ꧉​

27꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦏꦺꦴꦮꦺ​ꦧꦏꦭ꧀ꦥꦢ​ꦱꦼꦩ꧀ꦥ꧀ꦭꦏ꧀ꦥꦼꦔꦤ꧀ꦢꦼꦭ꧀ꦩꦸ​ꦭꦤ꧀ꦧꦏꦭ꧀ꦤꦶꦁꦒꦭ꧀ꦲꦏꦸ​꧈​ꦏꦪ​ꦱꦶꦁ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ꦧꦺ​ꦤꦧꦶ​ꦯꦏꦫꦶꦪꦱ꧀ ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦩꦠꦺꦤ꧀ꦤꦶ​ꦱꦶꦁ​ꦠꦸꦏꦁ​ꦲꦔꦺꦴꦤ꧀ꦭꦤ꧀ꦮꦼꦢꦸꦱ꧀ꦱꦺꦧꦏꦭ꧀ꦥꦢ​ꦧꦸꦪꦂ​ꦏꦧꦺꦃ​꧉​ 28ꦤꦁꦔꦶꦁ​ꦤꦺꦏ꧀ꦲꦏꦸ​ꦮꦶꦱ꧀ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​꧈​ꦲꦏꦸ​ꦧꦏꦭ꧀ꦧꦸꦢꦭ꧀ꦤꦁꦓꦭꦶꦭꦺꦪ​꧈​ꦤ꧀ꦢꦶꦱꦶꦏ꧀ꦏꦶ​ꦏꦺꦴꦮꦺ​꧉​”

29꧋ꦫꦱꦸꦭ꧀ꦦꦺꦠꦿꦸꦱ꧀ꦱꦼꦩꦲꦸꦂ​:“ꦲꦺꦴꦫ​ꦒꦸꦱ꧀ꦠꦶ​꧈​ꦱꦼꦤꦗꦤ꧀ꦭꦶꦪꦤꦺ​ꦤꦶꦁꦒꦭ꧀ꦏꦺꦴꦮꦺ​꧈​ꦲꦏꦸ​ꦲꦺꦴꦫ​ꦧꦏꦭ꧀ꦤꦶꦁꦒꦭ꧀ꦏꦺꦴꦮꦺ​꧉​”

30꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦫꦱꦸꦭ꧀ꦦꦺꦠꦿꦸꦱ꧀:“ꦠꦶꦠꦺꦤ꧀ꦤꦤ​ꦢꦺꦮꦺ꧈​ꦮꦼꦔꦶ​ꦲꦶꦏꦶ​ꦮꦲꦺ​꧈​ꦱꦏ꧀ꦢꦸꦫꦸꦁꦔꦺꦗꦒꦺꦴ​ꦏ꧀ꦭꦸꦫꦸꦏ꧀ꦥꦶꦁ​ꦥꦶꦤ꧀ꦢꦺꦴ꧈​ꦏꦺꦴꦮꦺ​ꦧꦏꦭ꧀ꦔꦼꦁꦏꦼꦁꦱꦩ꧀ꦥꦺꦏ꧀ꦥꦶꦁ​ꦠꦼꦭꦸ​ꦤꦺꦏ꧀ꦲꦺꦴꦫ​ꦏꦼꦤꦭ꧀ꦲꦏꦸ​꧉​”

31꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ​ꦩꦼꦤꦺꦃ​:“ꦲꦺꦴꦫ​ꦒꦸꦱ꧀ꦠꦶ​꧈​ꦠꦼꦤꦤ꧀ ꦲꦺꦴꦫ​ꦥꦶꦱꦤ꧀ꦥꦶꦱꦤ꧀ꦲꦏꦸ​ꦧꦏꦭ꧀​ꦔ꧀ꦭꦏꦺꦴꦤ꧀ꦤꦶ​ꦏꦪ​ꦔꦺꦴꦤꦺꦴ​꧉​ꦱꦼꦤꦗꦤ꧀ꦲꦏꦸ​ꦏꦸꦢꦸ​ꦩꦠꦶ​ꦧꦉꦁ​ꦏꦫꦺꦴ​ꦏꦺꦴꦮꦺ​꧈​ꦠꦏ꧀ꦭꦏꦺꦴꦤ꧀ꦤꦶ​꧈​ꦤꦁꦔꦶꦁ​ꦲꦏꦸ​ꦲꦺꦴꦫ​ꦧꦏꦭ꧀ꦚꦺꦭꦏ꧀ꦏꦶ​ꦏꦺꦴꦮꦺ​꧉”ꦩꦸꦫꦶꦢ꧀ꦩꦸꦫꦶꦢ꧀ꦭꦶꦪꦤꦺ​ꦲꦸꦒ​ꦔꦺꦴꦩꦺꦴꦁꦔꦺꦴꦤꦺꦴ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦺꦴꦁꦔꦤꦁꦒꦺꦠ꧀ꦱꦺꦩꦤꦺ​꧉​

32꧋ꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦧꦸꦢꦭ꧀ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦗꦼꦤꦼꦁꦔꦺ​ꦒꦺꦠ꧀ꦱꦺꦩꦤꦺ​꧉​ꦢꦺꦏ꧀ꦤꦺꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦏꦺꦴꦮꦺ​ꦔꦼꦤ꧀ꦠꦺꦤ꧀ꦤꦶ​ꦤꦁꦏꦺꦤꦺ​ꦮꦲꦺ​꧉​ꦲꦏꦸ​ꦲꦉꦥ꧀​ꦤ꧀ꦢꦺꦴꦁꦔ꧉​” 33ꦫꦱꦸꦭ꧀ꦦꦺꦠꦿꦸꦱ꧀ ꦪꦏꦺꦴꦧꦸꦱ꧀ꦭꦤ꧀ꦪꦺꦴꦲꦤꦼꦱ꧀ꦢꦶꦲꦼꦗꦺꦏ꧀ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦤꦁꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦺꦴꦭꦃꦲꦶꦏꦿꦱ​ꦮꦼꦢꦶ​ꦭꦤ꧀ꦱꦸꦱꦃ​ꦧꦔꦼꦠ꧀꧈​ 34ꦢꦺꦏ꧀ꦤꦺꦔꦺꦴꦩꦺꦴꦁ:“ꦲꦠꦶꦏꦸ​ꦗꦤ꧀ꦱꦼꦢꦶꦧꦔꦼꦠ꧀꧈​ꦫꦱꦤꦺ​ꦏꦪ​ꦲꦉꦥ꧀ꦩꦠꦶ​꧉​ꦏꦺꦴꦮꦺ​ꦤꦁꦏꦺꦤꦺ​ꦮꦲꦺ​ꦭꦤ꧀ꦲꦗ​ꦠꦸꦫꦸ​꧉​”

35꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦫꦢ​ꦔꦼꦢꦺꦴꦃꦲꦶ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦸꦮꦶ​꧈​ꦠꦼꦫꦸꦱ꧀ꦤꦶꦧ​ꦤꦁꦊꦩꦃ​ꦭꦤ꧀​ꦤ꧀ꦢꦺꦴꦁꦔꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦏ꧀ꦤꦺꦚꦸꦮꦸꦤ꧀ ꦤꦺꦏ꧀ꦧꦶꦱ​꧈​ꦢꦺꦏ꧀ꦤꦺꦲꦺꦴꦫ​ꦲꦸꦱꦃꦔꦭꦩ꧀ꦩꦶ​ꦮꦚ꧀ꦕꦶ​ꦏꦱꦁꦱꦫꦤ꧀ꦏꦸꦮꦶ​꧉​ 36ꦠꦼꦩ꧀ꦧꦸꦁꦔꦺ​:“ꦢꦸꦃꦧꦥꦏ꧀ꦏꦸ​꧈​ꦏꦺꦴꦮꦺ​ꦧꦶꦱ​ꦱꦼꦩ꧀ꦧꦫꦁ​꧉​ꦲꦩ꧀ꦧꦺꦴꦏ꧀ꦏꦱꦁꦱꦫꦤ꧀ꦲꦶꦏꦶ​ꦢꦶꦱꦶꦁꦏꦶꦂꦫꦏꦺꦱꦁꦏꦲꦏꦸ​!ꦤꦁꦔꦶꦁ​ꦱꦼꦤꦗꦤ꧀ꦲꦧꦺꦴꦠ꧀ ꦲꦏꦸ​ꦏꦼꦥꦺꦔꦶꦤ꧀​ꦔ꧀ꦭꦏꦺꦴꦤ꧀ꦤꦶ​ꦏꦉꦥ꧀ꦩꦸ​꧈​ꦲꦺꦴꦫ​ꦏꦉꦥ꧀ꦏꦸ​ꦢꦺꦮꦺ꧉​”

37꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦧꦭꦶꦏ꧀ꦩꦼꦤꦺꦃ​ꦭꦤ꧀ꦤꦼꦩꦸ​ꦩꦸꦫꦶꦢ꧀ꦢꦺ​ꦱꦶꦁ​ꦠꦼꦭꦸ​ꦩꦲꦸ​ꦲꦶꦗꦶꦏ꧀ꦠꦸꦫꦸ​꧉​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦫꦱꦸꦭ꧀ꦦꦺꦠꦿꦸꦱ꧀:“ꦱꦶꦩꦺꦴꦤ꧀ ꦭꦃ​ꦏꦺꦴꦮꦺ​ꦏꦺꦴꦏ꧀ꦠꦸꦫꦸ​꧉​ꦩꦺꦴꦱꦺꦴꦏ꧀ꦲꦺꦴꦫ​ꦧꦶꦱ​ꦩꦼꦭꦺꦏ꧀ꦱꦏ꧀ꦗꦩ꧀? 38ꦥꦢ​ꦩꦼꦭꦺꦏ꧀ꦏ​ꦭꦤ꧀ꦥꦢ​ꦤ꧀ꦢꦼꦢꦺꦴꦔꦲ​ꦱꦸꦥꦪ​ꦲꦺꦴꦫ​ꦥꦢ​ꦏꦭꦃ​ꦤꦺꦏ꧀ꦱꦺꦠꦤ꧀ꦚꦺꦴꦧ​꧉​ꦥꦚ꧀ꦕꦺꦤ꧀ ꦲꦠꦶꦤꦺ​ꦏꦉꦥ꧀ ꦤꦁꦔꦶꦁ​ꦲꦮꦏ꧀ꦏꦺ​ꦲꦺꦴꦫ​ꦏꦸꦮꦠ꧀꧈​”

39꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦤꦶꦁꦒꦭ꧀ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦧꦸꦢꦭ꧀​ꦤ꧀ꦢꦺꦴꦁꦔꦩꦼꦤꦺꦃ​꧉​ꦱꦶꦁ​ꦢꦶꦱꦸꦮꦸꦤ꧀ꦪ​ꦠꦸꦁꦒꦭ꧀ꦭꦺ​꧈​ꦏꦪ​ꦱꦶꦁ​ꦤ꧀ꦢꦶꦱꦶꦏ꧀꧈​ 40ꦏꦢꦸꦁ​ꦧꦭꦶꦏ꧀ꦩꦼꦤꦺꦃ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦲꦶꦗꦶꦏ꧀ꦠꦸꦫꦸ​꧈​ꦲꦮꦶꦠ꧀ꦥꦢ​ꦔꦤ꧀ꦠꦸꦏ꧀ꦠꦼꦤꦤ꧀꧈​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦏꦢꦸꦁ​ꦠꦔꦶ​ꦲꦺꦴꦫ​ꦮꦤꦶ​ꦔꦺꦴꦩꦺꦴꦁꦲꦥꦲꦥ​꧉​

41꧋ꦥꦶꦁ​ꦠꦼꦭꦸꦤꦺ​꧈​ꦢꦺꦴꦁꦔꦺꦒꦸꦱ꧀ꦠꦶ​ꦪꦺꦯꦸꦱ꧀ꦧꦭꦶꦏ꧀ꦩꦼꦤꦺꦃ​ꦱꦁꦏꦤ꧀ꦢꦼꦢꦺꦴꦔ​꧈​ꦢꦺꦏ꧀ꦤꦺ​ꦔꦺꦴꦩꦺꦴꦁꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​:“ꦲꦶꦗꦶꦏ꧀ꦥꦢ​ꦲꦺꦤꦏ꧀ꦲꦺꦤꦏ꧀ꦠꦸꦫꦸ​ꦮꦲꦺ​?ꦮꦶꦱ꧀ ꦱꦲꦶꦏꦶ​ꦮꦶꦱ꧀ꦠꦼꦏꦤ꧀ꦮꦚ꧀ꦕꦶꦤꦺ​ꦲꦼꦁꦒꦺꦴꦤꦺ​ꦲꦤꦏ꧀ꦏꦺ​ꦩꦤꦸꦁꦱ​ꦧꦏꦭ꧀ꦢꦶꦲꦼꦭꦸꦁꦔꦏꦺꦩꦫꦁ​ꦮꦺꦴꦁ​ꦲꦭ​꧉​ 42ꦥꦢ​ꦠꦔꦶ​꧈​ꦲ꦳ꦪꦸꦏ꧀ꦧꦸꦢꦭ꧀꧈​ꦢꦼꦭꦺꦴꦏ꧀ꦏꦼꦤ꧀ ꦱꦶꦁ​ꦲꦉꦥ꧀ꦔꦼꦭꦸꦁꦔꦏꦺꦲꦏꦸ​ꦩꦫꦁ​ꦩꦸꦁꦱꦸꦃꦲꦺ​ꦮꦶꦱ꧀ꦠꦼꦏ​!”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦕꦼꦏꦼꦭ꧀꧈​

43꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦸꦫꦸꦁ​ꦱꦩ꧀ꦥꦺꦏ꧀ꦫꦩ꧀ꦥꦸꦁ​ꦱꦶꦁ​ꦔꦺꦴꦩꦺꦴꦁꦏꦸꦮꦶ​ꦠꦼꦫꦸꦱ꧀ꦪꦸꦢꦱ꧀ꦠꦼꦏ​ꦏꦫꦺꦴ​ꦮꦺꦴꦁ​ꦲꦺꦴꦏꦺꦃ꧈​ꦥꦢ​ꦔ꧀ꦒꦮ​ꦥꦼꦢꦁꦭꦤ꧀ꦥꦼꦤ꧀ꦠꦸꦁ꧉​ꦪꦸꦢꦱ꧀ꦩꦸꦫꦶꦢ꧀ꦢꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺ꧈​ꦠꦸꦁꦒꦭ꧀ꦭꦺ​ꦩꦸꦫꦶꦢ꧀ꦱꦶꦁ​ꦫꦺꦴꦭꦱ꧀꧈​ꦪꦸꦢꦱ꧀ꦭꦤ꧀ꦮꦺꦴꦁꦮꦺꦴꦁ​ꦩꦲꦸ​ꦢꦶꦏꦺꦴꦁꦏꦺꦴꦤ꧀ꦏꦫꦺꦴ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ ꦒꦸꦫꦸ​ꦏꦶꦠꦧ꧀ꦭꦤ꧀ꦥꦼꦔꦉꦥ꧀ꦥꦺ​ꦮꦺꦴꦁ​ꦙꦸ꧉​ 44ꦪꦸꦢꦱ꧀ꦮꦶꦱ꧀​ꦔ꧀ꦒꦮꦺ​ꦠꦤ꧀ꦢꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​ꦔꦺꦴꦩꦺꦴꦁ:“ꦮꦺꦴꦁ​ꦱꦶꦁ​ꦠꦏ꧀ꦲꦩ꧀ꦧꦸꦁ꧈​ꦪꦏꦸꦮꦶ​ꦮꦺꦴꦁꦔꦺ​꧉​ꦢꦶꦕꦼꦏꦼꦭ꧀ꦠꦼꦫꦸꦱ꧀ꦢꦶꦒꦮ​ꦭꦸꦔ​ꦭꦤ꧀ꦢꦶꦗꦒ​ꦱꦶꦁ​ꦲꦥꦶꦏ꧀!”

45꧋ꦏꦢꦸꦁ​ꦮꦶꦱ꧀ꦠꦼꦏꦤ꧀ꦏꦺꦴꦤꦺꦴ​ꦪꦸꦢꦱ꧀ꦠꦼꦫꦸꦱ꧀ꦱꦤ꧀ꦩꦫꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ ꦠꦼꦫꦸꦱ꧀ꦔꦺꦴꦩꦺꦴꦁ:“ꦒꦸꦫꦸ​!”ꦱꦏ꧀ꦮꦶꦱ꧀ꦱꦺ​ꦔꦺꦴꦩꦺꦴꦁꦔꦺꦴꦤꦺꦴ​ꦢꦺꦏ꧀ꦤꦺꦠꦼꦫꦸꦱ꧀ꦔꦩ꧀ꦧꦸꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 46ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦕꦼꦏꦼꦭ꧀ꦏꦫꦺꦴ​ꦮꦺꦴꦁꦮꦺꦴꦁ​꧉​ 47ꦤꦁꦔꦶꦁ​ꦲꦺꦤꦺꦁꦩꦸꦫꦶꦢ꧀ꦱꦶꦗꦶ​ꦤꦫꦶꦏ꧀ꦥꦼꦢꦁꦔꦺꦭꦤ꧀ꦔꦤ꧀ꦠꦼꦩ꧀ꦏꦸꦥꦶꦁꦔꦺ​ꦱ꧀ꦭꦥ꦳꧀ꦥ꦳ꦺꦲꦶꦩꦩ꧀ꦒꦼꦢꦺ​ꦱꦩ꧀ꦥꦺꦏ꧀ꦕꦼꦥꦺꦴꦭ꧀​꧉​ 48ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦩꦫꦁ​ꦮꦺꦴꦁꦮꦺꦴꦁ​ꦩꦲꦸ​:“ꦲꦥ​ꦲꦏꦸ​ꦲꦶꦏꦶ​ꦮꦺꦴꦁ​ꦤꦏꦭ꧀ꦏꦺꦴꦏ꧀ꦏꦺꦴꦮꦺ​ꦩꦫꦤꦶ​ꦲꦏꦸ​ꦔ꧀ꦒꦮ​ꦥꦼꦢꦁꦭꦤ꧀ꦥꦼꦤ꧀ꦠꦸꦁ꧉​ 49ꦱꦧꦼꦤ꧀ꦢꦶꦤ​ꦲꦏꦸ​ꦕꦩ꧀ꦥꦸꦂ​ꦏꦫꦺꦴ​ꦏꦺꦴꦮꦺ​ꦤꦁꦒꦿꦺꦗ​ꦒꦼꦢꦺꦤꦺꦏ꧀ꦲꦏꦸ​ꦩꦸꦭꦁꦔꦶ꧉​ꦭꦃ​ꦏꦺꦴꦏ꧀ꦲꦺꦴꦫ​ꦥꦢ​ꦚꦼꦏꦼꦭ꧀ꦲꦏꦸ​?ꦤꦁꦔꦶꦁ​ꦥꦚ꧀ꦕꦺꦤ꧀ꦪ​ꦮꦶꦱ꧀ꦏꦸꦢꦸ​ꦏ꧀ꦭꦏꦺꦴꦤ꧀ꦔꦺꦤꦺ​꧈​ꦏꦪ​ꦱꦶꦁ​ꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀꧈​”

50꧋ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦠꦼꦫꦸꦱ꧀ꦥꦢ​ꦩ꧀​ꦧ꧀ꦭꦪꦸꦭꦸꦔ​꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦠꦶꦁꦒꦭ꧀ꦢꦺꦮꦺ꧉​

51-52꧋ꦲꦺꦤꦺꦁꦧꦺꦴꦕꦃ​ꦲꦼꦤꦺꦴꦩ꧀ꦩꦺꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦧꦺꦴꦕꦃ​ꦲꦼꦤꦺꦴꦩ꧀ꦲꦶꦏꦶ​ꦤꦩꦸꦁ​ꦔꦁꦒꦺꦴ​ꦱꦭꦶꦤ꧀ꦩꦺꦴꦫꦶ​꧉​ꦧꦺꦴꦕꦃ​ꦲꦶꦏꦶ​ꦢꦶꦕꦼꦏꦼꦭ꧀ꦏꦫꦺꦴ​ꦮꦺꦴꦁꦮꦺꦴꦁ​꧈​ꦤꦁꦔꦶꦁ​ꦤꦩꦸꦁ​ꦏꦼꦤꦺꦁꦱꦭꦶꦤ꧀ꦤꦺ꧈​ꦧꦺꦴꦕꦃꦲꦺ​ꦩ꧀​ꦧ꧀ꦭꦪꦸꦲꦺꦴꦫ​ꦔꦁꦒꦺꦴ​ꦲꦥꦲꦥ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦒꦮ​ꦤꦁꦏꦿꦸꦠꦺꦴꦤ꧀ꦲꦒꦩ​꧉​

53꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦒꦮ​ꦤꦁꦔꦉꦥ꧀ꦥꦺ​ꦲꦶꦩꦩ꧀ꦒꦼꦢꦺ꧉​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ ꦥꦫ​ꦒꦸꦫꦸ​ꦏꦶꦠꦧ꧀ꦭꦤ꧀ꦥꦫ​ꦥꦼꦔꦉꦥ꧀ꦥꦺ​ꦧꦁꦱ​ꦙꦸꦠꦼꦫꦸꦱ꧀ꦔꦸꦩ꧀ꦥꦸꦭ꧀ꦏꦧꦺꦃ​꧉​ 54ꦫꦱꦸꦭ꧀ꦦꦺꦠꦿꦸꦱ꧀ꦔꦼꦠꦸꦠ꧀ꦠꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦱꦁꦏꦏꦢꦺꦴꦃꦲꦤ꧀ꦱꦩ꧀ꦥꦺꦏ꧀​ꦩ꧀ꦊꦧꦸ​ꦠꦼꦏꦤ꧀ꦭꦠꦂꦫꦺ​ꦲꦺꦴꦩꦃꦲꦺ​ꦲꦶꦩꦩ꧀ꦒꦼꦢꦺ​꧉​ꦤꦁꦏꦺꦴꦤꦺꦴ​ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀​ꦚ꧀ꦗꦒꦺꦴꦁꦤꦁꦧꦼꦢꦶꦪꦁꦔꦤ꧀​ꦔ꧀ꦒꦺꦴꦭꦺꦏ꧀ꦲꦔꦼꦠ꧀ꦕꦩ꧀ꦥꦸꦂ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦚ꧀ꦗꦒ​ꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ​꧉​ 55ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦮꦺꦴꦁꦮꦺꦴꦁ​ꦱꦶꦁ​ꦠꦸꦏꦁ​ꦔꦿꦸꦠꦸꦥꦢ​ꦔ꧀ꦒꦺꦴꦭꦺꦏ꧀ꦱꦼꦏ꧀ꦱꦶ​꧈​ꦱꦸꦥꦪ​ꦧꦶꦱ​ꦤꦼꦩꦸ​ꦗꦭꦂꦫꦤ꧀ꦏꦁꦒꦺꦴ​ꦚꦭꦃꦚꦭꦃꦲꦏꦺꦭꦤ꧀ꦩꦠꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ ꦤꦁꦔꦶꦁ​ꦲꦺꦴꦫ​ꦤꦼꦩꦸ​ꦱꦶꦗꦶꦱꦶꦗꦶꦪ​꧉​ 56ꦥꦚ꧀ꦕꦺꦤ꧀ꦲꦺꦴꦏꦺꦃꦱꦶꦁ​ꦢꦢꦶ​ꦱꦼꦏ꧀ꦱꦶ​ꦚꦭꦃꦚꦭꦃꦲꦏꦺꦒꦸꦱ꧀ꦠꦶ​ꦪꦺꦯꦸꦱ꧀ ꦤꦁꦔꦶꦁ​ꦠꦼꦩ꧀ꦧꦸꦁꦔꦺ​ꦲꦺꦴꦫ​ꦕꦺꦴꦕꦺꦴꦏ꧀​꧉​ 57ꦲꦺꦤꦺꦁꦱꦶꦁ​ꦚꦭꦃꦚꦭꦃꦲꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦤꦺ​:

58꧋“ꦲꦮꦏ꧀ꦏꦺ​ꦢꦺꦮꦺꦏꦿꦸꦔꦸ​ꦢꦺꦏ꧀ꦤꦺ ꦔꦺꦴꦩꦺꦴꦁꦤꦺꦏ꧀ꦧꦏꦭ꧀ꦲꦩ꧀ꦧꦸꦧꦿꦃ​ꦒꦿꦺꦗ​ꦒꦼꦢꦺꦒꦮꦺꦪꦤ꧀ꦤꦺ​ꦩꦤꦸꦁꦱ​ꦲꦶꦏꦶ​ꦭꦤ꧀ꦲꦺꦴꦩꦺꦴꦁꦔꦺ​ꦢꦺꦏ꧀ꦤꦺꦧꦶꦱ​ꦔꦼꦢꦼꦏ꧀ꦏꦏꦺꦭꦶꦪꦤꦺ​ꦱꦏ꧀ꦗꦼꦫꦺꦴꦤꦺꦠꦼꦭꦸꦁ​ꦢꦶꦤ​꧈​ꦱꦶꦁ​ꦢꦸꦢꦸ​ꦒꦮꦺꦪꦤ꧀ꦤꦺ​ꦩꦤꦸꦁꦱ​꧉​ 59ꦤꦁꦔꦶꦁ​ꦱꦼꦏ꧀ꦱꦶ​ꦲꦶꦏꦶ​ꦪ​ꦥꦢ​ꦮꦲꦺ​ꦲꦺꦴꦫ​ꦕꦺꦴꦕꦺꦴꦏ꧀​ꦏꦫꦺꦴ​ꦭꦶꦪꦭꦶꦪꦤꦺ​꧉​”

60꧋ꦲꦶꦩꦩ꧀ꦒꦼꦢꦺꦠꦼꦫꦸꦱ꧀ꦔꦢꦼꦏ꧀ꦭꦤ꧀ꦩꦗꦸ​ꦤꦁꦠꦼꦔꦃꦲꦺ​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦤꦏꦺꦴꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦭꦃ​ꦏꦺꦴꦮꦺ​ꦱꦲꦶꦏꦶ​ꦲꦉꦥ꧀ꦔꦺꦴꦩꦺꦴꦁꦲꦥ​?ꦠꦼꦩ꧀ꦧꦸꦁꦔꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦼꦤꦼꦂ​ꦲꦥ​ꦲꦺꦴꦫ​?”

61꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦼꦤꦼꦁ​ꦮꦲꦺ​꧈​ꦲꦺꦴꦫ​ꦱꦼꦩꦲꦸꦂ​ꦲꦥꦲꦥ​꧉​ꦲꦶꦩꦩ꧀ꦩꦺ​ꦠꦼꦫꦸꦱ꧀ꦠꦏꦺꦴꦤ꧀ꦩꦼꦤꦺꦃ​:“ꦲꦥ​ꦏꦺꦴꦮꦺ​ꦏꦸꦮꦶ​ꦏꦿꦶꦱ꧀ꦡꦸꦱ꧀?ꦲꦥ​ꦏꦺꦴꦮꦺ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦱꦸꦕꦶ​ꦢꦺꦮꦺ?”

62꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦥꦚ꧀ꦕꦺꦤ꧀ ꦪ​ꦲꦏꦸ​ꦲꦶꦏꦶ​꧉​ꦏꦺꦴꦮꦺ​ꦧꦏꦭ꧀ꦮꦼꦫꦸꦃ​ꦲꦤꦏ꧀ꦏꦺ​ꦩꦤꦸꦁꦱ​ꦚ꧀ꦗꦒꦺꦴꦁꦤꦁꦠꦼꦔꦼꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦏ꧀ꦮꦱ​ꦢꦺꦮꦺ꧉​ꦏꦺꦴꦮꦺ​ꦧꦏꦭ꧀ꦮꦼꦫꦸꦃ​ꦢꦺꦏ꧀ꦤꦺꦠꦼꦏ​ꦤꦁꦩꦺꦒꦤꦺ​ꦭꦔꦶꦠ꧀꧈​”

63꧋ꦲꦶꦩꦩ꧀ꦒꦼꦢꦺꦏꦿꦸꦔꦸ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴ​ꦠꦼꦫꦸꦱ꧀ꦤꦼꦱꦸ​ꦭꦤ꧀ꦚꦸꦮꦺꦏ꧀ꦱꦭꦶꦤ꧀ꦤꦺꦔꦺꦴꦩꦺꦴꦁ:“ꦲꦮꦏ꧀ꦏꦺ​ꦢꦺꦮꦺꦮꦶꦱ꧀ꦲꦺꦴꦫ​ꦩ꧀ꦧꦸꦠꦸꦃꦲꦏꦺꦱꦼꦏ꧀ꦱꦶ​ꦩꦼꦤꦺꦃ​꧉​ 64ꦏꦺꦴꦮꦺ​ꦏꦧꦺꦃ​ꦮꦶꦱ꧀ꦏꦿꦸꦔꦸ​ꦢꦺꦮꦺꦢꦺꦏ꧀ꦤꦺꦔꦺꦭꦺꦏ꧀ꦲꦺꦭꦺꦏ꧀ꦏꦏꦺꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦼꦥꦿꦶꦪꦺ​ꦥꦶꦤꦼꦩꦸꦩꦸꦏꦧꦺꦃ​?”

꧋ꦏꦧꦺꦃ​ꦥꦢ​ꦚꦭꦃꦚꦭꦃꦲꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦭꦤ꧀ꦥꦢ​ꦱꦼꦠꦸꦗꦸ​ꦤꦺꦏ꧀ꦢꦺꦏ꧀ꦤꦺꦏꦸꦢꦸ​ꦢꦶꦥꦠꦺꦤ꧀ꦤꦶ​꧉​

65꧋ꦲꦺꦤꦺꦁꦱꦶꦁ​ꦥꦢ​ꦔꦶꦢꦺꦴꦤ꧀ꦤꦶ​ꦭꦤ꧀ꦤꦸꦠꦸꦥ꧀ꦥꦶ​ꦫꦲꦶꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦲꦤ꧀ꦠꦼꦩ꧀ꦩꦶ​ꦏꦫꦺꦴ​ꦔꦺꦴꦩꦺꦴꦁ:“ꦩ꧀ꦧꦼꦢꦺꦏ꧀​ꦗꦗꦭ꧀ ꦱꦥ​ꦱꦶꦁ​ꦔꦤ꧀ꦠꦼꦩ꧀ꦩꦶ​ꦏꦺꦴꦮꦺ​!”ꦱꦶꦁ​ꦗꦒ​ꦲꦩ꧀ꦧꦫꦁ​ꦩꦺꦭꦸ​ꦔꦤ꧀ꦠꦼꦩ꧀ꦩꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦫꦱꦸꦭ꧀ꦦꦺꦠꦿꦸꦱ꧀ꦚꦺꦭꦏ꧀ꦏꦶ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

66꧋ꦢꦺꦴꦁꦔꦺꦫꦱꦸꦭ꧀ꦦꦺꦠꦿꦸꦱ꧀ꦲꦶꦗꦶꦏ꧀ꦤꦁꦭꦠꦂꦫꦺ​ꦏꦺꦴꦤꦺꦴ​꧈​ꦤꦁꦔꦶꦱꦺꦴꦂ​꧈​ꦠꦼꦫꦸꦱ꧀ꦲꦺꦤꦺꦁꦱ꧀ꦭꦥ꦳꧀ꦮꦺꦢꦺꦴꦏ꧀ꦠꦼꦏ​꧈​ꦱ꧀ꦭꦥ꦳꧀ꦥ꦳ꦺꦲꦶꦩꦩ꧀ꦒꦼꦢꦺ꧉​ 67ꦢꦺꦏ꧀ꦤꦺꦮꦼꦫꦸꦃ​ꦫꦱꦸꦭ꧀ꦦꦺꦠꦿꦸꦱ꧀​ꦚ꧀ꦗꦒꦺꦴꦁꦤꦁꦧꦼꦢꦶꦪꦁꦔꦤ꧀ꦠꦼꦫꦸꦱ꧀ꦔꦼꦩꦠ꧀ꦠꦏꦺꦭꦤ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦲꦩ꧀ꦧꦫꦁ​ꦠꦲꦸ​ꦩꦺꦭꦸ​ꦪꦺꦯꦸꦱ꧀ ꦮꦺꦴꦁ​ꦟꦱꦫꦺꦠ꧀ꦏꦲꦺ​꧉​”

68꧋ꦤꦁꦔꦶꦁ​ꦫꦱꦸꦭ꧀ꦦꦺꦠꦿꦸꦱ꧀ꦲꦺꦴꦫ​ꦔꦏꦸ​꧈​ꦩꦭꦃ​ꦔꦺꦁꦏꦺꦭ꧀ꦔꦺꦴꦩꦺꦴꦁ:“ꦏꦺꦴꦮꦺ​ꦏꦸꦮꦶ​ꦔꦺꦴꦩꦺꦴꦁꦔꦏꦺꦲꦥ​ꦠ​?ꦲꦏꦸ​ꦲꦺꦴꦫ​ꦔꦼꦂꦠꦶ​ꦲꦥ​ꦱꦶꦁ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁ​ꦏꦸꦮꦶ​꧉”ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀​ꦩ꧀ꦭꦏꦸ​ꦩꦼꦠꦸ​ꦠꦼꦏꦤ꧀ꦭꦮꦁ​ꦚ꧀ꦗꦧ​꧉​꧌ꦠꦼꦫꦸꦱ꧀ꦲꦺꦤꦺꦁꦗꦒꦺꦴ​ꦏ꧀ꦭꦸꦫꦸꦏ꧀꧈​)

69꧋ꦤꦁꦏꦺꦴꦤꦺꦴ​ꦱ꧀ꦭꦥ꦳꧀ꦮꦺꦢꦺꦴꦏ꧀ꦩꦲꦸ​ꦮꦼꦫꦸꦃ​ꦢꦺꦏ꧀ꦤꦺꦩꦼꦤꦺꦃ​ꦠꦼꦫꦸꦱ꧀ꦔꦺꦴꦩꦺꦴꦁꦏꦫꦺꦴ​ꦮꦺꦴꦁ​ꦭꦶꦪꦭꦶꦪꦤꦺ​:“ꦮꦺꦴꦁ​ꦲꦶꦏꦶ​ꦠꦸꦁꦒꦭ꧀ꦭꦺ​ꦱꦶꦁ​ꦩꦺꦭꦸ​ꦪꦺꦯꦸꦱ꧀꧈​” 70ꦤꦁꦔꦶꦁ​ꦱꦼꦥꦶꦱ꧀ꦱꦤ꧀ꦩꦼꦤꦺꦃ​ꦫꦱꦸꦭ꧀ꦦꦺꦠꦿꦸꦱ꧀ꦲꦺꦴꦫ​ꦔꦏꦸ​꧉​

꧋ꦲꦺꦴꦫ​ꦊꦠ꧀ꦱꦸꦮꦶꦮꦺꦴꦁꦮꦺꦴꦁ​ꦱꦶꦁ​ꦤꦁꦏꦺꦴꦤꦺꦴ​ꦔꦺꦴꦩꦺꦴꦁꦩꦫꦁ​ꦫꦱꦸꦭ꧀ꦦꦺꦠꦿꦸꦱ꧀:“ꦥꦚ꧀ꦕꦺꦤ꧀ꦠꦼꦤꦤ꧀ ꦏꦺꦴꦮꦺ​ꦠꦸꦁꦒꦭ꧀ꦭꦺ​ꦩꦸꦫꦶꦢ꧀ꦢꦺ​ꦪꦺꦯꦸꦱ꧀ ꦲꦮꦶꦠ꧀ꦏꦼꦠꦫ​ꦤꦺꦏ꧀ꦏꦺꦴꦮꦺ​ꦮꦺꦴꦁ​ꦱꦁꦏꦓꦭꦶꦭꦺꦪ​꧉​”

71꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦱꦸꦩ꧀ꦥꦃ​:“ꦲꦏꦸ​ꦗꦤ꧀ꦲꦺꦴꦫ​ꦏꦼꦤꦭ꧀​ꦧ꧀ꦭꦱ꧀ꦏꦫꦺꦴ​ꦮꦺꦴꦁ​ꦱꦶꦁ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁꦔꦏꦺꦏꦸꦮꦶ​꧉​ꦤꦺꦏ꧀ꦲꦏꦸ​ꦒꦺꦴꦫꦺꦴꦃ​ꦲꦏꦸ​ꦒꦼꦊꦩ꧀ꦩꦠꦶ​꧉​”

72꧋ꦱꦏ꧀ꦮꦶꦱ꧀ꦱꦺ​ꦫꦱꦸꦭ꧀ꦦꦺꦠꦿꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦠꦼꦫꦸꦱ꧀ꦲꦺꦤꦺꦁꦗꦒꦺꦴ​ꦏ꧀ꦭꦸꦫꦸꦏ꧀ꦥꦶꦁ​ꦥꦶꦤ꧀ꦢꦺꦴꦤꦺ꧉​ꦫꦱꦸꦭ꧀ꦦꦺꦠꦿꦸꦱ꧀ꦱꦏ꧀ꦮꦠ꧀ꦏꦺꦭꦶꦁꦔꦤ꧀ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁ:“ꦱꦏ꧀ꦢꦸꦫꦸꦁꦔꦺꦗꦒꦺꦴꦤꦺꦏ꧀ꦭꦸꦫꦸꦏ꧀ꦥꦶꦁ​ꦥꦶꦤ꧀ꦢꦺꦴꦏꦺꦴꦮꦺ​ꦧꦏꦭ꧀ꦔꦺꦴꦩꦺꦴꦁꦥꦶꦁ​ꦠꦼꦭꦸ​ꦤꦺꦏ꧀ꦲꦺꦴꦫ​ꦏꦼꦤꦭ꧀ꦲꦏꦸ​꧉”ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦤꦔꦶꦱ꧀ꦏꦼꦭꦫꦭꦫ​꧉​ ↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦒꦮ​ꦤꦁꦔꦉꦥ꧀ꦥꦺ​ꦒꦿꦩꦁꦥꦶꦭꦠꦸꦱ꧀꧈​

꧇​꧑꧕꧇​ 1꧋ꦲꦺꦱꦸꦏ꧀ꦏꦺ​ꦩꦿꦸꦥꦸꦠ꧀ꦥꦫ​ꦮꦂꦒ​ꦏꦿꦸꦠꦺꦴꦤ꧀ꦲꦒꦩ​ꦥꦢ​ꦔꦸꦩ꧀ꦥꦸꦭ꧀​ꦔ꧀ꦒꦮꦺ​ꦥꦸꦠꦸꦱ꧀ꦱꦤ꧀;ꦏꦸꦮꦶ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ ꦥꦫ​ꦥꦼꦔꦉꦥ꧀ꦥꦺ​ꦧꦁꦱ​ꦙꦸꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀꧈​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦧꦤ꧀ꦢ​ꦢꦶꦒꦮ​ꦤꦁꦔ꧀ꦒꦺꦴꦤ꧀ꦤꦺꦒꦿꦩꦁꦥꦶꦭꦠꦸꦱ꧀꧈​ 2ꦥꦶꦭꦠꦸꦱ꧀ꦠꦏꦺꦴꦤ꧀ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀:“ꦲꦥ​ꦏꦺꦴꦮꦺ​ꦫꦠꦸꦤꦺ​ꦧꦁꦱ​ꦙꦸ?”

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦱꦼꦩꦲꦸꦂ​:“ꦥꦚ꧀ꦕꦺꦤ꧀ꦧꦼꦤꦼꦂ​ꦱꦶꦁ​ꦲꦩ꧀ꦧꦺꦴꦏ꧀ꦲꦺꦴꦩꦺꦴꦁ​ꦏꦸꦮꦶ​꧉​”

3꧋ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦠꦼꦫꦸꦱ꧀ꦥꦢ​ꦚꦭꦃꦚꦭꦃꦲꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦧꦧ꧀ꦥꦶꦫꦁꦥꦶꦫꦁ​ꦥꦽꦏꦫ​꧉​ 4ꦥꦶꦭꦠꦸꦱ꧀ꦠꦼꦫꦸꦱ꧀ꦠꦏꦺꦴꦤ꧀ꦩꦼꦤꦺꦃ​:“ꦩꦺꦴꦱꦺꦴꦏ꧀ꦏꦺꦴꦮꦺ​ꦲꦺꦴꦫ​ꦱꦼꦩꦲꦸꦂ​ꦲꦥꦲꦥ​?ꦢꦼꦭꦺꦴꦏ꧀ꦏꦼꦤ꧀ ꦮꦺꦴꦁꦮꦺꦴꦁ​ꦥꦢ​ꦚꦭꦃꦚꦭꦃꦲꦏꦺꦏꦺꦴꦮꦺ​꧉​ꦭꦃ​ꦏꦺꦴꦮꦺ​ꦔꦏꦸ​ꦲꦥ​ꦲꦺꦴꦫ​?”

5꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀​ꦧ꧀ꦭꦱ꧀ꦲꦺꦴꦫ​ꦱꦼꦩꦲꦸꦂ​ꦲꦥꦲꦥ​꧈​ꦩꦫꦏ꧀ꦏꦏꦺꦥꦶꦭꦠꦸꦱ꧀​ꦔ꧀ꦒꦸꦩꦸꦤ꧀ꦠꦼꦤꦤ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦲꦥ​ꦨꦫꦧꦱ꧀꧈​

6꧋ꦭꦸꦩꦿꦃꦲꦺ​ꦱꦧꦼꦤ꧀ꦠꦲꦸꦤ꧀ ꦤꦺꦏ꧀ꦮꦪꦃꦲꦺ​ꦫꦶꦪꦪꦥꦱ꧀ꦏꦃ​꧈​ꦒꦿꦩꦁꦥꦶꦭꦠꦸꦱ꧀ꦔꦼꦠꦺꦴꦏ꧀ꦏꦏꦺꦮꦺꦴꦁ​ꦱꦼꦠꦿꦥꦤ꧀ꦱꦶꦗꦶ​꧉​ꦮꦺꦴꦁꦮꦺꦴꦁ​ꦢꦶꦭꦶꦭꦤꦶ​ꦩꦶꦭꦶꦃ​ꦢꦺꦮꦺꦱꦥ​꧉​ 7ꦱꦲꦶꦏꦶ​ꦤꦁꦱꦼꦠꦿꦥꦤ꧀ꦏꦺꦴꦤꦺꦴ​ꦲꦺꦤꦺꦁꦮꦺꦴꦁ​ꦥꦼꦩ꧀ꦧꦿꦸꦤ꧀ꦠꦏ꧀ꦏꦤ꧀ꦱꦶꦁ​ꦥꦢ​ꦢꦶꦱꦼꦠꦿꦥ꧀꧈​ ꦲꦺꦤꦺꦁꦱꦶꦗꦶ​ꦱꦶꦁ​ꦗꦼꦤꦼꦁꦔꦺ​ꦨꦫꦧꦱ꧀ ꦱꦶꦁ​ꦩꦠꦺꦤ꧀ꦤꦶ​ꦮꦺꦴꦁ​ꦢꦺꦴꦁꦔꦺꦲꦺꦤꦺꦁꦉꦫꦸꦱꦸꦃ​꧉​ 8ꦮꦺꦴꦁ​ꦲꦺꦴꦏꦺꦃꦠꦼꦏ​ꦤꦁꦔ꧀ꦒꦺꦴꦤ꧀ꦤꦺꦒꦿꦩꦁꦥꦶꦭꦠꦸꦱ꧀​ꦚ꧀ꦗꦭꦸꦏ꧀ꦱꦼꦠꦿꦥꦤ꧀ꦱꦶꦗꦶ​ꦢꦶꦲꦼꦠꦺꦴꦏ꧀ꦏꦏꦺ꧉​ 9ꦥꦶꦭꦠꦸꦱ꧀ꦱꦼꦩꦲꦸꦂ​ꦩꦫꦁ​ꦮꦺꦴꦁꦮꦺꦴꦁ​:“ꦱꦼꦩꦸꦁꦒꦺꦴꦤ꧀ꦤꦺꦪꦺꦯꦸꦱ꧀ ꦫꦠꦸꦤꦺ​ꦧꦁꦱ​ꦙꦸ꧈​ꦠꦏ꧀ꦲꦼꦠꦺꦴꦏ꧀ꦏꦏꦺ꧈​ꦏꦺꦴꦮꦺ​ꦒꦼꦊꦩ꧀ꦲꦥ​ꦲꦺꦴꦫ​?” 10ꦥꦶꦭꦠꦸꦱ꧀ꦠꦏꦺꦴꦤ꧀ꦲꦶꦏꦶ​꧈​ꦲꦮꦶꦠ꧀ꦢꦺꦏ꧀ꦤꦺꦮꦶꦱ꧀ꦤꦶꦠꦺꦤ꧀ꦤꦶ​ꦤꦺꦏ꧀ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦏꦸꦮꦶ​ꦲꦺꦴꦫ​ꦱꦼꦤꦼꦁ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

11꧋ꦤꦁꦔꦶꦁ​ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦥꦢ​ꦔꦺꦴꦗꦺꦴꦏ꧀ꦲꦺꦴꦗꦺꦴꦏ꧀ꦏꦶ​ꦮꦺꦴꦁꦮꦺꦴꦁ​ꦱꦸꦥꦪ​ꦥꦢ​ꦚ꧀ꦗꦭꦸꦏ꧀ꦨꦫꦧꦱ꧀ꦱꦶꦁ​ꦢꦶꦲꦼꦠꦺꦴꦏ꧀ꦏꦏꦺ꧉​ 12ꦥꦶꦭꦠꦸꦱ꧀ꦠꦼꦫꦸꦱ꧀ꦱꦼꦩꦲꦸꦂ​ꦩꦼꦤꦺꦃ​:“ꦭꦃ​ꦲꦏꦸ​ꦏꦺꦴꦁꦏꦺꦴꦤ꧀ꦔꦥꦏ꧀ꦏꦏꦺꦏꦫꦺꦴ​ꦪꦺꦯꦸꦱ꧀ ꦱꦶꦁ​ꦲꦩ꧀ꦧꦺꦴꦏ꧀ꦲꦫꦤ꧀ꦤꦶꦫꦠꦸꦤꦺ​ꦧꦁꦱ​ꦙꦸ!”

13꧋ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦲꦩ꧀ꦧꦼꦔꦺꦴꦏ꧀:“ꦢꦶꦥꦼꦤ꧀ꦠꦺꦁ꧈​ꦪꦺꦯꦸꦱ꧀ꦏꦸꦢꦸ​ꦢꦶꦥꦼꦤ꧀ꦠꦺꦁ!”

14꧋ꦥꦶꦭꦠꦸꦱ꧀ꦠꦏꦺꦴꦤ꧀:“ꦭꦃ​ꦲꦥ​ꦱꦭꦃꦲꦺ​ꦢꦺꦏ꧀ꦤꦺ?”

꧋ꦤꦁꦔꦶꦁ​ꦮꦺꦴꦁꦮꦺꦴꦁ​ꦩꦭꦃ​ꦥꦢ​ꦲꦩ꧀ꦧꦼꦔꦺꦴꦏ꧀ꦭꦸꦮꦶꦃ​ꦧꦤ꧀ꦠꦼꦂ​:“ꦢꦶꦥꦼꦤ꧀ꦠꦺꦁ!”

15꧋ꦱꦸꦥꦪ​ꦮꦺꦴꦁꦮꦺꦴꦁ​ꦥꦢ​ꦊꦒ​꧈​ꦨꦫꦧꦱ꧀ꦠꦼꦫꦸꦱ꧀ꦢꦶꦲꦼꦠꦺꦴꦏ꧀ꦏꦏꦺ꧉​ꦥꦶꦭꦠꦸꦱ꧀ꦠꦼꦫꦸꦱ꧀ꦩꦿꦺꦤ꧀ꦠꦃ​ꦏꦺꦴꦁꦏꦺꦴꦤ꧀ꦩꦼꦕꦸꦠ꧀ꦠꦶ​ꦭꦤ꧀ꦩꦼꦤ꧀ꦠꦺꦁꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦒꦮꦺ​ꦱꦼꦩ꧀ꦧꦿꦤ​꧉​

16꧋ꦥꦫ​ꦱꦺꦴꦭ꧀ꦢꦠ꧀ꦠꦼꦫꦸꦱ꧀​ꦔ꧀ꦒꦮ​ꦒꦸꦱ꧀ꦠꦶ​ꦪꦺꦯꦸꦱ꧀​ꦩ꧀ꦊꦧꦸ​ꦤꦁꦭꦠꦂꦫꦺ​ꦏꦿꦸꦠꦺꦴꦤ꧀ꦠꦼꦫꦸꦱ꧀ꦚꦼꦭꦸꦏ꧀ꦭꦶꦪꦭꦶꦪꦤꦺ​ꦏꦺꦴꦁꦏꦺꦴꦤ꧀ꦥꦢ​ꦔ꧀ꦭꦸꦩ꧀ꦥꦸꦏ꧀꧈​ 17ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦲꦼꦁꦒꦺꦴꦤ꧀ꦤꦶ​ꦱꦭꦶꦤ꧀ꦲꦧꦁ​ꦭꦤ꧀ꦱꦶꦫꦃꦲꦺ​ꦢꦶꦥꦱꦁ​ꦩꦏꦸꦠꦒꦮꦺꦪꦤ꧀ꦲꦼꦫꦶ​꧉​ 18ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦠꦼꦫꦸꦱ꧀ꦥꦢ​ꦩ꧀ꦧꦒꦺꦏ꧀ꦏꦏꦺꦢꦺꦏ꧀ꦤꦺꦔꦺꦴꦩꦺꦴꦁ:“ꦱ꧀ꦭꦩꦼꦠ꧀ꦫꦠꦸꦤꦺ​ꦧꦁꦱ​ꦙꦸ!” 19ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦥꦼꦤ꧀ꦠꦸꦁꦔꦶꦱꦶꦫꦃꦲꦺ​ꦭꦤ꧀ꦢꦶꦲꦶꦢꦺꦴꦤ꧀ꦤꦶ​꧉​ꦱꦺꦴꦭ꧀ꦢꦠ꧀ꦱꦺꦴꦭ꧀ꦢꦠ꧀ꦩꦲꦸ​ꦠꦼꦫꦸꦱ꧀ꦱꦼꦢꦼꦏꦸ꧈​ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦺꦚꦼꦩ꧀ꦧꦃ​ꦢꦺꦏ꧀ꦤꦺ꧉​ 20ꦏꦢꦸꦁ​ꦮꦶꦱ꧀ꦩꦉꦩ꧀ꦲꦼꦁꦒꦺꦴꦤꦺ​ꦔ꧀ꦒꦮꦺ​ꦱꦼꦩ꧀ꦧꦿꦤ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦱꦭꦶꦤ꧀ꦤꦺꦲꦧꦁ​ꦩꦲꦸ​ꦠꦼꦫꦸꦱ꧀ꦢꦶꦕꦼꦥꦺꦴꦠ꧀​ꦩꦼꦤꦺꦃ​ꦭꦤ꧀ꦱꦭꦶꦤ꧀ꦤꦺꦢꦺꦮꦺꦢꦶꦲꦼꦁꦒꦺꦴꦏ꧀ꦏꦏꦺ꧈​ꦠꦼꦫꦸꦱ꧀ꦢꦶꦒꦮ​ꦭꦸꦔ​ꦲꦉꦥ꧀ꦢꦶꦥꦼꦤ꧀ꦠꦺꦁ꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦥꦼꦤ꧀ꦠꦺꦁ꧉​

21꧋ꦲꦶꦁ​ꦮꦚ꧀ꦕꦶ​ꦏꦸꦮꦶ​ꦲꦺꦤꦺꦁꦮꦺꦴꦁ​ꦩꦸꦭꦶꦃ​ꦱꦁꦏꦏꦼꦧꦺꦴꦤ꧀ꦭꦶꦮꦠ꧀ꦏꦺꦴꦤꦺꦴ​꧉​ꦮꦺꦴꦁ​ꦲꦶꦏꦶ​ꦗꦼꦤꦼꦁꦔꦺ​ꦱꦶꦩꦺꦴꦤ꧀ ꦧꦥꦏ꧀ꦏꦺꦄꦭꦺꦏ꧀ꦱꦤ꧀ꦢꦺꦂ​ꦭꦤ꧀ꦫꦸꦥ꦳ꦸꦱ꧀ ꦩ꧀ꦧꦶꦪꦺꦤ꧀ꦩꦁꦒꦺꦴꦤꦺ​ꦤꦁꦏꦸꦠꦯꦶꦫꦺꦤꦺ꧉​ꦱꦶꦩꦺꦴꦤ꧀ꦢꦶꦥꦼꦏ꧀ꦱ​ꦏꦺꦴꦁꦏꦺꦴꦤ꧀ꦩꦁꦒꦸꦭ꧀ꦏꦪꦸ​ꦱꦶꦁ​ꦲꦉꦥ꧀ꦢꦶꦲꦼꦁꦒꦺꦴ​ꦩꦼꦤ꧀ꦠꦺꦁꦒꦸꦱ꧀ꦠꦶ​ꦪꦺꦯꦸꦱ꧀꧈​ 22ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦒꦮ​ꦤꦁꦥꦁꦒꦺꦴꦤ꧀ꦤꦤ꧀ꦱꦶꦁ​ꦗꦼꦤꦼꦁꦔꦺ​ꦒꦺꦴꦭ꧀ꦒꦺꦴꦠ​꧉​ꦒꦺꦴꦭ꧀ꦒꦺꦴꦠ​ꦏꦸꦮꦶ​ꦠꦼꦒꦼꦱ꧀ꦱꦺ​:ꦲꦼꦤ꧀ꦢꦱ꧀ꦱꦺꦮꦺꦴꦁ​ꦩꦠꦶ​꧉​ 23ꦤꦁꦏꦺꦴꦤꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦏꦺꦏ꧀ꦏꦶꦲꦁꦒꦸꦂ​ꦢꦶꦕꦩ꧀ꦥꦸꦂ​ꦩꦸꦂ​ꦏꦺꦴꦁꦏꦺꦴꦤ꧀ꦔꦺꦴꦩ꧀ꦧꦺ​꧈​ꦤꦁꦔꦶꦁ​ꦢꦺꦏ꧀ꦤꦺꦲꦺꦴꦫ​ꦒꦼꦊꦩ꧀꧈​ 24ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦢꦶꦥꦼꦤ꧀ꦠꦺꦁꦭꦤ꧀ꦱꦭꦶꦤ꧀ꦤꦺꦢꦶꦲꦼꦢꦸꦩ꧀ꦔꦁꦒꦺꦴ​ꦭꦺꦴꦠꦿꦺ​꧈​ꦢꦢꦶꦤꦺ​ꦔꦼꦂꦠꦶ​ꦧꦒꦺꦪꦤ꧀ꦤꦺꦢꦺꦮꦺꦢꦺꦮꦺ꧉​ 25ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦥꦼꦤ꧀ꦠꦺꦁꦗꦩ꧀ꦱꦔ​ꦲꦺꦱꦸꦏ꧀꧈​ 26ꦏꦪꦸ​ꦱꦶꦁ​ꦢꦶꦲꦼꦁꦒꦺꦴ​ꦩꦼꦤ꧀ꦠꦺꦁꦢꦶꦏꦺꦏ꧀ꦏꦶꦠꦸꦭꦶꦱ꧀ꦱꦤ꧀ꦔꦺꦤꦺ​:“ꦫꦠꦸꦤꦺ​ꦧꦁꦱ​ꦙꦸ꧉”ꦪ​ꦠꦼꦩ꧀ꦧꦸꦁ​ꦲꦶꦏꦶ​ꦱꦶꦁ​ꦢꦶꦲꦼꦁꦒꦺꦴ​ꦚꦭꦃꦚꦭꦃꦲꦏꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ 27ꦧꦉꦁ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦒ​ꦲꦺꦤꦺꦁꦮꦺꦴꦁ​ꦲꦭ​ꦭꦺꦴꦫꦺꦴ​ꦢꦶꦥꦼꦤ꧀ꦠꦺꦁ꧉​ꦱꦶꦗꦶ​ꦤꦁꦱꦼꦧꦼꦭꦃꦠꦼꦔꦼꦤ꧀ꦭꦤ꧀ꦭꦶꦪꦤꦺ​ꦤꦁꦱꦼꦧꦼꦭꦃꦏꦶꦮ​꧉​ 28(ꦢꦢꦶꦤꦺ​ꦏꦼꦠꦸꦫꦸꦠ꧀ꦠꦤ꧀ꦠꦼꦤꦤ꧀ꦱꦶꦁ​ꦏꦼꦠꦸꦭꦶꦱ꧀ꦤꦁꦏꦶꦠꦧ꧀:“ꦢꦺꦏ꧀ꦤꦺꦢꦶꦢꦢꦺꦏ꧀ꦏꦏꦺꦱꦶꦗꦶ​ꦏꦫꦺꦴ​ꦮꦺꦴꦁ​ꦲꦭ​!”)

29꧋ꦮꦺꦴꦁꦮꦺꦴꦁ​ꦱꦶꦁ​ꦭꦶꦮꦠ꧀ꦏꦺꦴꦤꦺꦴ​ꦥꦢ​ꦩꦺꦴꦪꦺꦴꦏ꧀ꦏꦶ​ꦢꦺꦏ꧀ꦤꦺ​꧉​ꦥꦢ​ꦒꦺꦢꦺꦏ꧀ꦒꦺꦢꦺꦏ꧀ꦭꦤ꧀ꦩꦸꦤꦶ​:“ꦫꦱꦏ꧀ꦤ​ꦱꦲꦶꦏꦶ​!ꦗꦫꦺꦤꦺ​ꦏꦺꦴꦮꦺ​ꦲꦉꦥ꧀ꦲꦩ꧀ꦧꦸꦧꦿꦃ​ꦒꦿꦺꦗ​ꦒꦼꦢꦺ​ꦭꦤ꧀ꦲꦉꦥ꧀ꦲꦩ꧀ꦧꦺꦴꦏ꧀ꦢꦼꦏ꧀ꦤꦺꦩꦼꦤꦺꦃ​ꦱꦏ꧀ꦗꦼꦫꦺꦴꦤꦺꦠꦼꦭꦸꦁ​ꦢꦶꦤ​꧉​ 30ꦗꦗꦭ꧀ꦠꦸꦭꦸꦁꦔꦤ​ꦲꦮꦏ꧀ꦩꦸ​ꦢꦺꦮꦺ?ꦩꦼꦢꦸꦤ꧀ꦤꦱꦁꦏꦥꦼꦤ꧀ꦠꦺꦁꦔꦤ꧀ꦏꦸꦮꦶ​꧉​”

31꧋ꦥꦫ​ꦥꦼꦔꦉꦥ꧀ꦥꦺ​ꦲꦶꦩꦩ꧀ꦭꦤ꧀ꦥꦫ​ꦒꦸꦫꦸ​ꦏꦶꦠꦧ꧀ꦲꦸꦒ​ꦥꦢ​ꦩꦺꦴꦪꦺꦴꦏ꧀ꦏꦶ​ꦭꦤ꧀ꦔꦺꦴꦩꦺꦴꦁꦩꦫꦁ​ꦱꦏ꧀ꦥꦢꦥꦢ:“ꦗꦫꦺꦤꦺ​ꦧꦶꦱ​ꦤꦸꦭꦸꦁꦔꦶ​ꦮꦺꦴꦁ​ꦭꦶꦪꦤꦺ​꧈​ꦭꦃ​ꦲꦮꦏ꧀ꦏꦺ​ꦢꦺꦏ꧀ꦤꦺꦢꦺꦮꦺꦏꦺꦴꦏ꧀ꦲꦺꦴꦫ​ꦧꦶꦱ​ꦤꦸꦭꦸꦁꦔꦶ​? 32ꦗꦫꦺꦤꦺ​ꦢꦺꦏ꧀ꦤꦺꦏꦿꦶꦱ꧀ꦡꦸꦱ꧀ ꦫꦠꦸꦤꦺ​ꦆꦱꦿꦌꦭ꧀꧈​ꦗꦗꦭ꧀ꦩꦼꦢꦸꦤ꧀ꦱꦁꦏꦥꦼꦤ꧀ꦠꦺꦁꦔꦤ꧀ꦏꦺꦴꦤꦺꦴ​꧈​ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦧꦶꦱ​ꦮꦼꦫꦸꦃ​ꦭꦤ꧀ꦥꦽꦕꦪ​꧉​”

꧋ꦮꦺꦴꦁꦮꦺꦴꦁ​ꦱꦶꦁ​ꦢꦶꦱꦭꦶꦧ꧀ꦧꦉꦁ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦒ​ꦩꦺꦭꦸ​ꦩꦺꦴꦪꦺꦴꦏ꧀ꦏꦶ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦤꦶꦁꦒꦭ꧀꧈​

33꧋ꦮꦶꦮꦶꦠ꧀ꦗꦩ꧀ꦫꦺꦴꦭꦱ꧀ꦲꦮꦤ꧀ꦱꦏ꧀ꦤꦼꦒꦫ​ꦩꦭꦶꦃ​ꦥꦼꦠꦼꦁ​꧈​ꦠꦼꦭꦸꦁ​ꦗꦩ꧀ꦱꦸꦮꦺꦤꦺ​꧉​ 34ꦲꦶꦁ​ꦮꦪꦃ​ꦗꦩ꧀ꦠꦼꦭꦸ​ꦒꦸꦱ꧀ꦠꦶ​ꦪꦺꦯꦸꦱ꧀ꦲꦩ꧀ꦧꦼꦔꦺꦴꦏ꧀ꦧꦤ꧀ꦠꦼꦂ​:“ꦌꦭꦺꦴꦆ​꧈​ꦌꦭꦺꦴꦆ​꧈​ꦭꦩꦃꦱꦧꦏ꧀ꦠꦤꦶ?”ꦤꦺꦏ꧀ꦕꦫ​ꦗꦮ​:“ꦢꦸꦃ​ꦄꦭ꧀ꦭꦃꦏꦸ​꧈​ꦏꦼꦤꦺꦁꦲꦥ​ꦲꦏꦸ​ꦏꦺꦴꦏ꧀​ꦩ꧀ꦧꦺꦴꦏ꧀ꦠꦶꦁꦒꦭ꧀?”

35꧋ꦮꦺꦴꦁ​ꦭꦶꦮꦠ꧀ꦱꦶꦁ​ꦏꦿꦸꦔꦸ​ꦏꦸꦮꦶ​ꦔꦺꦴꦩꦺꦴꦁ:“ꦫꦸꦔꦺꦴꦏ꧀ꦏꦏꦺꦠ​꧈​ꦢꦺꦏ꧀ꦤꦺꦚꦼꦭꦸꦏ꧀ꦤꦧꦶ​ꦌꦭꦶꦪ​꧉​” 36ꦲꦺꦤꦺꦁꦱꦶꦗꦶ​ꦚ꧀ꦗꦶꦏꦸꦏ꧀ꦱ꧀ꦥꦺꦴꦤ꧀ꦢꦶꦲꦼꦕ꧀ꦭꦸꦥ꧀ꦏꦺꦤꦁꦲꦁꦒꦸꦂ​ꦠꦼꦫꦸꦱ꧀ꦢꦶꦱꦸꦤ꧀ꦢꦸꦏ꧀ꦏꦏꦺꦥꦸꦕꦸꦏ꧀ꦏꦺ​ꦏꦪꦸ​ꦢꦮ​ꦠꦼꦫꦸꦱ꧀ꦢꦶꦏꦺꦏ꧀ꦏꦏꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦺꦴꦁꦏꦺꦴꦤ꧀ꦚꦸꦕꦸꦥ꧀​꧉​ ꦮꦺꦴꦁꦔꦺ​ꦔꦺꦴꦩꦺꦴꦁ:“ꦲ꦳ꦪꦸꦏ꧀ꦢꦶꦲꦼꦤ꧀ꦠꦺꦤ꧀ꦤꦶ​꧉​ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦔꦼꦂꦠꦶ​ꦤꦧꦶ​ꦌꦭꦶꦪ​ꦤꦸꦭꦸꦁꦔꦶ​ꦢꦺꦏ꧀ꦤꦺꦲꦥ​ꦲꦺꦴꦫ​꧉​”

37꧋ꦤꦁꦔꦶꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦩꦭꦃ​ꦲꦩ꧀ꦧꦼꦔꦺꦴꦏ꧀ꦧꦤ꧀ꦠꦼꦂ​ꦠꦼꦫꦸꦱ꧀ꦤꦶꦁꦒꦭ꧀꧈​

38꧋ꦏꦺꦴꦂꦢꦺꦤ꧀ꦠꦸꦠꦸꦥ꧀ꦥꦺ​ꦏꦩꦂ​ꦱꦶꦁ​ꦱꦸꦕꦶ​ꦢꦺꦮꦺꦤꦁꦒꦿꦺꦗ​ꦒꦼꦢꦺꦠꦼꦫꦸꦱ꧀ꦱꦸꦮꦺꦏ꧀ꦢꦢꦶ​ꦭꦺꦴꦫꦺꦴ​꧈​ꦱꦁꦏꦤ꧀ꦢꦸꦮꦸꦂꦩꦼꦔꦶꦱꦺꦴꦂ​꧉​ 39ꦥꦼꦁꦒꦼꦢꦺꦤꦺꦱꦺꦴꦭ꧀ꦢꦠ꧀ꦱꦶꦁ​ꦗꦒ​ꦤꦁꦔꦉꦥ꧀ꦥꦺ​ꦏꦪꦸ​ꦥꦼꦤ꧀ꦠꦺꦁꦔꦤ꧀ꦏꦺꦴꦤꦺꦴ​ꦮꦼꦫꦸꦃ​ꦤꦶꦁꦒꦭ꧀ꦭꦺꦒꦸꦱ꧀ꦠꦶ​ꦪꦺꦯꦸꦱ꧀꧈​ꦢꦺꦏ꧀ꦤꦺꦔꦺꦴꦩꦺꦴꦁ:“ꦮꦺꦴꦁ​ꦲꦶꦏꦶ​ꦥꦚ꧀ꦕꦺꦤ꧀ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦠꦼꦤꦤ꧀꧈​”

40꧋ꦤꦁꦏꦺꦴꦤꦺꦴ​ꦲꦸꦒ​ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦱꦶꦁ​ꦚꦮꦁ​ꦊꦭꦏꦺꦴꦤ꧀ꦩꦲꦸ​ꦱꦁꦏꦏꦢꦺꦴꦃꦲꦤ꧀꧈​ꦏꦪꦢꦺꦤꦺꦩꦫꦶꦪꦩꦏ꧀ꦢꦭꦺꦤ꧈​ꦱꦭꦸꦩ꧀ꦭꦤ꧀ꦩꦫꦶꦪ꧈​ꦲꦶꦧꦸꦤꦺ​ꦪꦏꦺꦴꦧꦸꦱ꧀ꦕꦶꦭꦶꦏ꧀ꦭꦤ꧀ꦪꦺꦴꦱꦼꦱ꧀꧈​ 41ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦲꦶꦏꦶ​ꦥꦢ​ꦩꦺꦭꦸ​ꦭꦤ꧀​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦴꦁꦔꦺꦢꦺꦏ꧀ꦤꦺꦲꦶꦗꦶꦏ꧀ꦤꦁꦓꦭꦶꦭꦺꦪ​꧉​ꦤꦁꦔꦶꦁ​ꦲꦸꦒ​ꦲꦺꦤꦺꦁꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦭꦶꦪꦤꦺ​ꦱꦶꦁ​ꦠꦼꦏ​ꦤꦁꦪꦺꦫꦸꦱꦭꦺꦩ꧀ꦧꦉꦁ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦏꦸꦧꦸꦂ​꧉​

42-43꧋ꦲꦶꦁ​ꦢꦶꦤ​ꦏꦸꦮꦶ​꧈​ꦢꦶꦤ​ꦗꦼꦩꦸꦮꦃ꧈​ꦮꦺꦴꦁ​ꦙꦸꦥꦢ​ꦠꦠꦠꦠ​ꦏꦁꦒꦺꦴ​ꦢꦶꦤ​ꦱꦧꦠ꧀꧈​ꦱꦺꦴꦫꦺꦤꦺ​ꦏꦸꦮꦶ​ꦲꦺꦤꦺꦁꦮꦺꦴꦁ​ꦤꦁꦔ꧀ꦒꦺꦴꦤ꧀ꦤꦺꦒꦿꦩꦁꦥꦶꦭꦠꦸꦱ꧀ꦤꦼꦩ꧀ꦧꦸꦁ​ꦭꦪꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ꦮꦺꦴꦁ​ꦲꦶꦏꦶ​ꦗꦼꦤꦼꦁꦔꦺ​ꦪꦺꦴꦱꦺꦥ꦳꧀ ꦩ꧀ꦧꦶꦪꦺꦤ꧀ꦤꦺꦱꦁꦏꦏꦸꦠꦄꦫꦶꦩꦠꦺꦪ​꧉​ꦢꦺꦏ꧀ꦤꦺ​ꦮꦂꦒꦤꦺ​ꦏꦿꦸꦠꦺꦴꦤ꧀ꦲꦒꦩ​꧈​ꦩꦸꦭꦤꦺ​ꦪ​ꦢꦶꦲꦗꦺꦤ꧀ꦤꦶ​ꦧꦔꦼꦠ꧀ꦏꦫꦺꦴ​ꦮꦺꦴꦁ​ꦭꦶꦪꦤꦺ​꧉​ꦪꦺꦴꦱꦺꦥ꦳꧀ꦲꦸꦒ​ꦔꦉꦥ꧀ꦲꦉꦥ꧀ꦠꦼꦏꦤꦺ​ꦏꦿꦠꦺꦴꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 44ꦥꦶꦭꦠꦸꦱ꧀ꦢꦺꦮꦺꦔ꧀ꦒꦸꦩꦸꦤ꧀ꦏꦿꦸꦔꦸ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦤꦶꦁꦒꦭ꧀ ꦩꦸꦭꦤꦺ​ꦢꦺꦏ꧀ꦤꦺꦚꦼꦭꦸꦏ꧀ꦥꦼꦁꦒꦼꦢꦺꦤꦺꦱꦺꦴꦭ꧀ꦢꦠ꧀ꦱꦶꦁ​ꦗꦒ​ꦢꦶꦠꦏꦺꦴꦤ꧀ꦤꦶ​ꦲꦥ​ꦤꦶꦁꦒꦭ꧀ꦭꦺꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦱꦸꦮꦶ꧉​ 45ꦱꦏ꧀ꦮꦶꦱ꧀ꦱꦺ​ꦥꦶꦭꦠꦸꦱ꧀ꦏꦿꦸꦔꦸ​ꦢꦺꦮꦺꦱꦁꦏꦱꦺꦴꦭ꧀ꦢꦠ꧀ꦩꦲꦸ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦤꦶꦁꦒꦭ꧀ꦠꦼꦤꦤ꧀ ꦭꦪꦺꦴꦤꦺ​ꦠꦼꦫꦸꦱ꧀ꦢꦶꦥꦱꦿꦃꦲꦏꦺꦩꦫꦁ​ꦪꦺꦴꦱꦺꦥ꦳꧀꧈​ 46ꦪꦺꦴꦱꦺꦥ꦳꧀ꦠꦼꦫꦸꦱ꧀ꦠꦸꦏꦸ​ꦩꦺꦴꦫꦶ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦶꦲꦼꦢꦸꦤ꧀ꦤꦏꦺꦱꦁꦏꦏꦪꦸꦤꦺ​꧈​ꦠꦼꦫꦸꦱ꧀ꦢꦶꦧꦸꦤ꧀ꦠꦼꦭ꧀ꦩꦺꦴꦫꦶ​ꦢꦶꦢꦺꦏꦺꦏ꧀ꦤꦁꦏꦸꦧꦸꦂꦫꦤ꧀ꦤꦺ​꧉​ꦏꦸꦧꦸꦂꦫꦤ꧀ꦤꦺ​ꦏꦸꦮꦶ​ꦒꦸꦮ​ꦒꦮꦺꦪꦤ꧀ꦤꦁꦒꦸꦤꦸꦁꦔꦤ꧀ꦮꦠꦸ​꧉​ꦪꦺꦴꦱꦺꦥ꦳꧀ꦠꦼꦫꦸꦱ꧀​ꦔ꧀ꦒꦸꦤ꧀ꦢꦸꦁꦔꦏꦺꦮꦠꦸ​ꦏꦁꦒꦺꦴ​ꦤꦸꦠꦸꦥ꧀ꦭꦮꦁꦔꦺ​ꦒꦸꦮ​ꦏꦸꦮꦶ​꧉​ 47ꦩꦫꦶꦪꦩꦏ꧀ꦢꦭꦺꦤꦭꦤ꧀ꦩꦫꦶꦪꦲꦶꦧꦸꦤꦺ​ꦪꦺꦴꦱꦼꦱ꧀ꦲꦸꦒ​ꦮꦼꦫꦸꦃ​ꦥꦁꦒꦺꦴꦤ꧀ꦤꦤ꧀ꦤꦺ​ꦱꦶꦁ​ꦢꦶꦲꦼꦁꦒꦺꦴ​ꦔ꧀ꦒꦺꦠꦏ꧀ꦏꦏꦺꦭꦪꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ ↑ ↑ ↑


꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦔꦶ​ꦩꦼꦤꦺꦃ​꧉​

꧇​꧑꧖꧇​ 1꧋ꦏꦢꦸꦁ​ꦢꦶꦤ​ꦱꦧꦠ꧀ꦮꦶꦱ꧀​ꦏ꧀ꦭꦶꦮꦠ꧀ ꦩꦫꦶꦪꦩꦏ꧀ꦢꦭꦺꦤ꧈​ꦩꦫꦶꦪꦲꦶꦧꦸꦤꦺ​ꦪꦏꦺꦴꦧꦸꦱ꧀ꦭꦤ꧀ꦱꦭꦸꦩ꧀ꦥꦢ​ꦠꦸꦏꦸ​ꦊꦔ​ꦮꦔꦶ​ꦏꦁꦒꦺꦴ​ꦔ꧀ꦊꦔꦤꦶꦭꦪꦺꦴꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 2ꦢꦶꦤ​ꦩꦶꦁꦒꦸꦤꦺ꧈​ꦲꦺꦱꦸꦏ꧀ꦩꦿꦸꦥꦸꦠ꧀ ꦮꦪꦃꦲꦺ​ꦱꦽꦔꦺꦔꦺ​ꦚ꧀ꦗꦼꦢꦸꦭ꧀ ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦲꦶꦏꦶ​ꦠꦼꦫꦸꦱ꧀ꦧꦸꦢꦭ꧀ꦤꦁꦏꦸꦧꦸꦂꦫꦤ꧀꧈​ 3ꦤꦁꦢꦭꦤ꧀ꦥꦢ​ꦫꦱꦤ꧀ꦫꦱꦤ꧀:“ꦩꦼꦁꦏꦺꦴ​ꦱꦥ​ꦪ​ꦱꦶꦁ​ꦔꦿꦺꦮꦁꦔꦶ​ꦔ꧀ꦒꦸꦤ꧀ꦢꦸꦁꦔꦏꦺꦮꦠꦸ​ꦠꦸꦠꦸꦥ꧀ꦏꦸꦧꦸꦂꦫꦤ꧀ꦤꦺ​?”ꦲꦮꦶꦠ꧀ꦮꦠꦸꦤꦺ​ꦒꦼꦢꦺꦧꦔꦼꦠ꧀꧈​ 4ꦤꦁꦔꦶꦁ​ꦏꦢꦸꦁ​ꦮꦶꦱ꧀ꦠꦼꦏꦤ꧀ꦏꦸꦧꦸꦂꦫꦤ꧀ꦤꦺ​꧈​ꦮꦺꦴꦁꦮꦺꦴꦁ​ꦮꦼꦫꦸꦃ​ꦤꦺꦏ꧀ꦮꦠꦸꦤꦺ​ꦮꦶꦱ꧀ꦢꦶꦒ꧀ꦭꦸꦤ꧀ꦢꦸꦁꦔꦏꦺ꧉​ 5ꦮꦺꦴꦁꦮꦺꦴꦁ​ꦠꦼꦫꦸꦱ꧀​ꦩ꧀ꦊꦧꦸ​꧈​ꦤꦁꦔꦶꦁ​ꦥꦢ​ꦏꦒꦺꦠ꧀ ꦲꦮꦶꦠ꧀ꦮꦼꦫꦸꦃ​ꦮꦺꦴꦁ​ꦲꦼꦤꦺꦴꦩ꧀​ꦚ꧀ꦗꦒꦺꦴꦁꦤꦁꦱꦼꦧꦼꦭꦃꦠꦼꦔꦼꦤꦺ​꧉​ꦱꦭꦶꦤ꧀ꦤꦺꦮꦺꦴꦁꦔꦺ​ꦥꦸꦠꦶꦃ​꧉​

6꧋ꦮꦺꦴꦁꦔꦺ​ꦔꦺꦴꦩꦺꦴꦁ:“ꦲꦗ​ꦥꦢ​ꦏꦒꦺꦠ꧀꧈​ꦲꦏꦸ​ꦔꦼꦂꦠꦶ​ꦤꦺꦏ꧀ꦏꦺꦴꦮꦺ​ꦔ꧀ꦒꦺꦴꦭꦺꦏ꧀ꦏꦶ​ꦪꦺꦯꦸꦱ꧀ ꦮꦺꦴꦁ​ꦟꦱꦫꦺꦠ꧀ꦱꦶꦁ​ꦢꦶꦥꦼꦤ꧀ꦠꦺꦁ꧉​ꦢꦺꦏ꧀ꦤꦺꦮꦶꦱ꧀ꦲꦺꦴꦫ​ꦤꦁꦏꦺꦤꦺ​꧈​ꦲꦮꦶꦠ꧀ꦮꦶꦱ꧀ꦠꦔꦶ​꧉​ꦢꦼꦭꦺꦴꦏ꧀ꦏꦼꦤ꧀ꦢꦺꦮꦺ꧈​ꦩꦲꦸꦤꦺ​ꦮꦺꦴꦁꦔꦺ​ꦢꦶꦢꦺꦭꦺꦃꦤꦁꦏꦺꦤꦺ​ꦠ​? 7ꦏꦤ​ꦱꦲꦶꦏꦶ​ꦥꦢ​ꦧꦭꦶꦏ꧀ꦮꦲꦺ​꧉​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦢꦶꦲꦺꦴꦩꦺꦴꦁꦔꦶꦭꦤ꧀ꦲꦗ​ꦭꦭꦶ​ꦔꦺꦴꦩꦺꦴꦁꦔꦶꦫꦱꦸꦭ꧀ꦦꦺꦠꦿꦸꦱ꧀꧈​ꦢꦶꦲꦺꦴꦩꦺꦴꦁꦔꦶꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦮꦶꦱ꧀ꦧꦸꦢꦭ꧀​ꦤ꧀ꦢꦶꦱꦶꦏ꧀ꦤꦁꦓꦭꦶꦭꦺꦪ​꧉​ꦤꦁꦏꦤ​ꦧꦏꦭ꧀ꦥꦢ​ꦏꦼꦥꦼꦠꦸꦏ꧀ꦢꦺꦏ꧀ꦤꦺ꧈​ꦏꦪ​ꦱꦶꦁ​ꦮꦶꦱ꧀ꦢꦶꦲꦺꦴꦩꦺꦴꦁꦱꦏ꧀ꦢꦸꦫꦸꦁꦔꦺꦢꦺꦏ꧀ꦤꦺꦤꦶꦁꦒꦭ꧀꧈​”

8꧋ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦩꦲꦸ​ꦠꦼꦫꦸꦱ꧀ꦲꦩ꧀​ꦧ꧀ꦭꦪꦸꦩꦼꦠꦸ​ꦏꦫꦺꦴ​ꦤ꧀ꦢꦽꦢꦼꦏ꧀ꦭꦤ꧀ꦧꦶꦔꦸꦁ​꧉​ꦱꦁꦏꦶꦁꦮꦼꦢꦶꦤꦺ​ꦠꦼꦫꦸꦱ꧀ꦲꦺꦴꦫ​ꦔꦺꦴꦩꦺꦴꦁꦔꦶꦭꦶꦪꦭꦶꦪꦤꦺ​꧉​

꧋ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦠꦺꦴꦏ꧀ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧉​

9꧋(ꦱꦏ꧀ꦮꦶꦱ꧀ꦱꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦠꦔꦶ​ꦱꦁꦏꦥꦠꦶ​ꦲꦶꦁ​ꦢꦶꦤ​ꦩꦶꦁꦒꦸ​ꦲꦺꦱꦸꦏ꧀ ꦢꦺꦏ꧀ꦤꦺꦤ꧀ꦢꦶꦱꦶꦏ꧀ꦢꦺꦮꦺꦔꦺꦠꦺꦴꦏ꧀ꦩꦫꦁ​ꦩꦫꦶꦪꦩꦏ꧀ꦢꦭꦺꦤ꧈​ꦮꦺꦴꦁ​ꦮꦺꦢꦺꦴꦏ꧀ꦱꦶꦁ​ꦩꦲꦸꦤꦺ​ꦢꦶꦭꦸꦮꦂꦫꦶ​ꦱꦁꦏꦢꦼꦩꦶꦠ꧀ꦥꦶꦠꦸ​꧉​ 10ꦩꦫꦶꦪꦩꦏ꧀ꦢꦭꦺꦤꦠꦼꦫꦸꦱ꧀ꦔꦧꦂꦫꦶ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦱꦶꦁ​ꦲꦶꦗꦶꦏ꧀ꦥꦢ​ꦱꦼꦢꦶꦭꦤ꧀ꦥꦢ​ꦤꦔꦶꦱ꧀꧈​ 11ꦤꦁꦔꦶꦁ​ꦏꦢꦸꦁ​ꦢꦶꦲꦺꦴꦩꦺꦴꦁꦔꦶꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦲꦸꦫꦶꦥ꧀ꦩꦼꦤꦺꦃ​ꦭꦤ꧀ꦔꦺꦠꦺꦴꦏ꧀ꦩꦫꦁ​ꦢꦺꦏ꧀ꦤꦺ꧈​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦩꦭꦃ​ꦲꦺꦴꦫ​ꦥꦢ​ꦔꦤ꧀ꦢꦼꦭ꧀꧈​

12꧋ꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦠꦺꦴꦏ꧀ꦩꦫꦁ​ꦩꦸꦫꦶꦢ꧀ꦭꦺꦴꦫꦺꦴ​꧈​ꦢꦺꦴꦁꦔꦺꦲꦶꦗꦶꦏ꧀ꦥꦢ​ꦩ꧀ꦭꦏꦸ​ꦲꦉꦥ꧀ꦤꦁꦱꦏ꧀ꦮꦶꦗꦶꦤꦺꦢꦺꦱ​꧉​ꦒꦸꦱ꧀ꦠꦶ​ꦪꦺꦯꦸꦱ꧀ ꦔꦺꦠꦺꦴꦏ꧀ꦔꦁꦒꦺꦴ​ꦫꦸꦥ​ꦭꦶꦪ​꧉​ 13ꦩꦸꦫꦶꦢ꧀ꦭꦺꦴꦫꦺꦴ​ꦩꦲꦸ​ꦠꦼꦫꦸꦱ꧀ꦧꦭꦶꦏ꧀ꦔꦺꦴꦩꦺꦴꦁꦔꦶꦭꦶꦪꦭꦶꦪꦤꦺ​꧈​ꦤꦁꦔꦶꦁ​ꦲꦺꦴꦫ​ꦥꦢ​ꦔꦤ꧀ꦢꦼꦭ꧀꧈​

14꧋ꦲꦺꦴꦫ​ꦊꦠ꧀ꦱꦸꦮꦶꦒꦸꦱ꧀ꦠꦶ​ꦪꦺꦯꦸꦱ꧀ꦠꦼꦫꦸꦱ꧀ꦔꦺꦠꦺꦴꦏ꧀ꦩꦫꦁ​ꦩꦸꦫꦶꦢ꧀ꦱꦶꦁ​ꦱꦼꦮꦼꦭꦱ꧀ ꦢꦺꦴꦁꦔꦺꦲꦶꦗꦶꦏ꧀ꦥꦢ​ꦩꦁꦔꦤ꧀꧈​ꦢꦺꦏ꧀ꦤꦺꦚꦼꦤꦺꦤ꧀ꦤꦶꦩꦸꦫꦶꦢ꧀ꦩꦸꦫꦶꦢ꧀ꦩꦲꦸ​꧈​ꦲꦮꦶꦠ꧀ꦲꦺꦴꦫ​ꦥꦢ​ꦒꦼꦊꦩ꧀ꦔꦤ꧀ꦢꦼꦭ꧀ꦩꦫꦁ​ꦲꦺꦴꦩꦺꦴꦁꦔꦤ꧀ꦤꦺ​ꦮꦺꦴꦁꦮꦺꦴꦁ​ꦱꦶꦁ​ꦮꦶꦱ꧀ꦥꦢ​ꦮꦼꦫꦸꦃ​ꦢꦺꦏ꧀ꦤꦺ꧈​ꦱꦏ꧀ꦮꦶꦱ꧀ꦱꦺ​ꦠꦔꦶ​ꦩꦼꦤꦺꦃ​ꦱꦁꦏꦥꦠꦶ​꧉​ 15ꦒꦸꦱ꧀ꦠꦶ​ꦪꦺꦯꦸꦱ꧀ꦩꦿꦺꦤ꧀ꦠꦃ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​ꦔꦺꦤꦺ​:“ꦏꦤ​ꦥꦢ​ꦭꦸꦔ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦱꦧꦼꦤ꧀ꦮꦺꦴꦁ​ꦤꦁꦱꦏ꧀ꦭꦸꦩꦃꦲꦺꦗꦒꦠ꧀꧈​ 16ꦱꦥ​ꦱꦶꦁ​ꦥꦽꦕꦪ​ꦭꦤ꧀ꦢꦶꦧꦥ꧀ꦠꦶꦱ꧀ꦧꦏꦭ꧀ꦱ꧀ꦭꦩꦼꦠ꧀ ꦤꦁꦔꦶꦁ​ꦱꦶꦁ​ꦲꦺꦴꦫ​ꦒꦼꦊꦩ꧀ꦥꦽꦕꦪ​ꦧꦏꦭ꧀ꦢꦶꦱꦼꦠꦿꦥ꧀꧈​ 17ꦱꦶꦁ​ꦥꦢ​ꦥꦽꦕꦪ​ꦧꦏꦭ꧀ꦠꦏ꧀ꦏꦺꦏ꧀ꦏꦶꦠꦤ꧀ꦢ꧈​ꦪꦏꦸꦮꦶ​꧈​ꦧꦏꦭ꧀ꦧꦶꦱ​ꦔꦼꦠꦺꦴꦏ꧀ꦏꦏꦺꦢꦼꦩꦶꦠ꧀ꦔꦁꦒꦺꦴ​ꦗꦼꦤꦼꦁꦏꦸ​ꦭꦤ꧀ꦧꦏꦭ꧀ꦔꦼꦠꦺꦴꦏ꧀ꦏꦏꦺꦧꦱ​ꦲꦚꦂ​꧉​ 18ꦱꦼꦤꦗꦤ꧀ꦚꦼꦏꦼꦭ꧀ꦲꦸꦭ​ꦭꦤ꧀ꦱꦼꦤꦗꦤ꧀ꦔꦺꦴꦩ꧀ꦧꦺ​ꦫꦕꦸꦤ꧀ꦲꦺꦴꦫ​ꦧꦏꦭ꧀ꦩꦱꦃ꧉​ꦧꦏꦭ꧀ꦤꦸꦩ꧀ꦥꦁꦔꦶ​ꦠꦔꦤ꧀ꦩꦫꦁ​ꦮꦺꦴꦁ​ꦭꦫ​ꦭꦤ꧀ꦱꦶꦁ​ꦭꦫ​ꦧꦏꦭ꧀ꦩꦫꦶ​꧉​”

19꧋ꦱꦏ꧀ꦮꦶꦱ꧀ꦱꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦺꦴꦩꦺꦴꦁꦏꦸꦮꦶ​ꦏꦧꦺꦃ​ꦩꦫꦁ​ꦩꦸꦫꦶꦢ꧀ꦩꦸꦫꦶꦢ꧀ꦢꦺ​꧈​ꦢꦺꦏ꧀ꦤꦺꦠꦼꦫꦸꦱ꧀ꦩꦸꦩ꧀ꦧꦸꦭ꧀ꦩꦸꦁꦒꦃ​ꦤꦁꦱ꧀ꦮꦂꦒ​꧉​ꦤꦁꦏꦤ​ꦢꦺꦏ꧀ꦤꦺꦚ꧀ꦗꦒꦺꦴꦁꦤꦁꦠꦼꦔꦼꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 20ꦩꦸꦫꦶꦢ꧀ꦩꦸꦫꦶꦢ꧀ꦠꦺꦠꦼꦫꦸꦱ꧀ꦧꦸꦢꦭ꧀​ꦔ꧀ꦒꦼꦭꦂꦏꦧꦂꦏꦧꦸꦔꦃꦲꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃꦤꦁꦲꦼꦤ꧀ꦢꦶꦲꦼꦤ꧀ꦢꦶ꧉​ꦒꦸꦱ꧀ꦠꦶꦢꦺꦮꦺꦪꦔꦿꦺꦮꦁꦔꦶꦭꦤ꧀ꦔꦺꦠꦺꦴꦏ꧀ꦏꦏꦺꦏ꧀ꦮꦱꦤꦺꦔꦁꦒꦺꦴꦩꦸꦗꦶꦗꦠ꧀ꦩꦸꦗꦶꦗꦠ꧀꧈​ꦢꦢꦶꦤꦺꦮꦺꦴꦁꦮꦺꦴꦁꦤꦶꦠꦺꦤ꧀ꦤꦶꦢꦺꦮꦺꦤꦺꦏ꧀ꦠꦼꦩ꧀ꦧꦸꦁꦔꦺꦩꦸꦫꦶꦢ꧀ꦩꦸꦫꦶꦢ꧀ꦢꦺꦥꦚ꧀ꦕꦺꦤ꧀ꦥꦶꦠꦸꦠꦸꦂꦫꦺꦒꦸꦱ꧀ꦠꦶꦄꦭ꧀ꦭꦃꦠꦼꦤꦤ꧀꧈​) ↑ ↑ ↑


← ꦩꦠꦺꦪꦸꦱ꧀   ꦭꦸꦏꦱ꧀ →