Kajawen 031

[ Cover ] ꧋ꦎꦁ​ꦏ​ 31꧈​ ꧕꧇​ ꦱꦥꦂ꧈​ ​ꦠꦲꦸꦤ꧀ꦗꦶꦩꦏꦶꦂ​꧇ ꧑꧘꧕꧘꧇​꧉​ 4 ꦄꦒꦸꦱ꧀ꦠꦸꦱ꧀ 1927꧉​ ꦠꦲꦸꦤ꧀ II. ꧋ꦏꦗꦮꦺꦤ꧀꧈ ꦏꦮꦼꦢꦭ꧀ꦭꦏꦼꦤ꧀ꦱꦧꦼꦤ꧀ꦢꦶꦤ꧀ꦠꦼꦤ꧀ꦏꦼꦩꦶꦱ꧀꧉​ ꧋ꦉꦒꦶꦤꦶꦁꦱꦼꦫꦠ꧀ꦏꦧꦂꦥꦸꦤꦶꦏꦲꦶꦁꦢꦊꦩ꧀꧇ ꦠꦶꦒꦁꦮꦸꦭꦤ꧀ . . . . . . . . . f 1,50 ꦧꦪꦂꦫꦤ꧀ꦤꦶꦥꦸꦤ꧀ꦏꦱꦸꦮꦸꦤ꧀ꦫꦸꦩꦶꦪꦶꦤ꧀ ꦧꦺꦴꦠꦼꦤ꧀ꦏꦺꦔꦶꦁꦭꦁꦒꦤ꧀ꦤꦤ꧀ꦏꦶꦫꦁꦱꦏꦶꦁ 3 ꦮꦸꦭꦤ꧀꧈ ꧋ꦗꦸꦫꦸꦔꦫꦁ - ​ꦄꦢ꧀ꦩꦶꦤꦶꦱ꧀ꦠꦿꦱꦶ ꦧꦭꦺꦥꦸꦱ꧀ꦠꦏ꧈ ꦲꦶꦁꦱꦮꦶꦁꦏꦶꦔꦶꦁꦏꦤ꧀ꦠꦺꦴꦂꦥꦭꦶꦱ꧀꧈ ꦠꦶꦭ꧀ꦥꦸꦤ꧀ꦤꦺꦴꦩꦼꦂ 2791 - ꦮꦺꦭ꧀ꦠꦼꦥꦿꦺꦝꦼꦤ꧀꧉​ ꧋ꦩꦭꦏ꧀ꦏꦃ꧉ ꧋ꦏꦢꦺꦴꦱ꧀ꦥꦸꦤ꧀ꦢꦶ​ꦲꦱꦿꦶꦤꦶꦥꦸꦤ꧀ꦩꦱ꧀ꦗꦶꦢ꧀ꦲꦶꦁ​ꦔꦶꦁ​ꦒꦶꦭ꧀ꦥꦸꦤꦶꦏ꧈​ꦥꦫ​ꦩꦲꦺꦴꦱ꧀ꦱꦒꦼꦢ꧀ꦲꦤꦼꦏ꧀ꦱꦺꦤ꧀ꦤꦶ​ꦥꦶꦪꦩ꧀ꦧꦏ꧀꧈​ꦲꦶꦁ​ꦒꦶꦃ​ꦥꦸꦤꦶꦏ​ꦩꦱ꧀ꦗꦶꦢ꧀ꦲꦶꦁ​ꦏ꧀ꦮꦭꦑꦁ​ꦱꦂ꧉​ ​	Ăngka 31, 5 Sapar Taun Jimakir 1858, 4 Agustus 1927, Taun II. Kajawèn Kawêdalakên Sabên Dintên Kêmis. Rêgining sêrat kabar punika ing dalêm tigang wulan ... f 1.50, bayaranipun kasuwun rumiyin, botên kenging langganan kirang saking 3 wulan. Juru ngarang - administrasi Bale Pustaka, ing sawingkinging kantor palis, tilpun nomêr 2791 - Wèltêprèdhên. Malakah. [Grafik] Kadospundi asrinipun masjid ing nginggil punika, para maos sagêd anêksèni piyambak, inggih punika masjid ing Kwalakangsar.
[ 522 ]꧋ꦱꦩꦏ꧀ꦏꦶꦁꦏꦗꦮꦺꦤ꧀ ꧋ꦲꦶꦁꦏꦗꦮꦺꦤ꧀ꦲꦶꦁꦏꦁꦔꦼꦩꦺꦴꦠ꧀ꦉꦩ꧀ꦧꦒ꧀ꦒꦶꦥꦸꦤ꧀ꦥꦺꦠꦿꦸꦏ꧀ꦭꦤ꧀ꦒꦫꦺꦁ꧈​ꦫꦸꦩꦶꦪꦶꦤ꧀ꦱꦩ꧀ꦥꦸꦤ꧀ꦲꦚꦸꦏꦤ꧀ꦤꦶꦥꦿꦗꦁꦗꦶ꧈​ꦧꦶꦭꦶꦃꦱꦩꦏ꧀ꦏꦶꦁꦏꦭꦮꦂꦠꦶꦧꦝꦺꦏꦱꦤ꧀ꦠꦸꦤ꧀ꦤꦤ꧀ꦲꦶꦁꦏꦁꦲꦺꦢꦶ꧈​ꦲꦶꦁꦏꦁꦱꦒꦼꦢ꧀ꦲꦤꦼꦁꦱꦼꦩ꧀ꦩꦏꦼꦤ꧀ꦝꦠꦼꦁꦥꦫꦩꦲꦺꦴꦱ꧀꧉​ꦩꦼꦁꦒꦃꦱꦒꦼꦢ꧀ꦢꦶꦥꦸꦤ꧀ꦏꦊꦏ꧀ꦱꦤꦤ꧀ꦱꦼꦢꦾꦲꦶꦁꦏꦁꦩꦏꦠꦼꦤ꧀ꦮꦲꦸ꧈​ꦠꦩ꧀ꦠꦸꦲꦶꦁꦒꦶꦃꦱꦮꦠꦮꦶꦱ꧀ꦭꦩꦶ꧈​ꦲꦩꦂꦒꦶꦏꦼꦢꦃꦲꦧꦸꦢꦶꦢꦪꦫꦸꦩꦶꦪꦶꦤ꧀ꦱꦒꦼꦢ꧀ꦢꦶꦥꦸꦤ꧀ꦲꦁꦱꦭ꧀ꦒꦩ꧀ꦧꦂꦲꦶꦁꦏꦁꦏꦶꦤꦶꦤ꧀ꦠꦼꦤ꧀ꦥꦤ꧀ꦠꦼꦱ꧀ꦱꦲꦩꦛꦸꦏ꧀ꦏꦭꦶꦪꦤ꧀ꦤꦩꦤꦶꦁꦏꦭꦮꦂꦠꦶ꧉​ꦥꦸꦥꦸꦤ꧀ꦠꦺꦴꦤ꧀ꦤꦶꦁꦉꦩ꧀ꦧꦒ꧀꧈​ꦭꦗꦼꦁꦩꦼꦤ꧀ꦝꦼꦠ꧀ꦒꦩ꧀ꦧꦂꦏꦢꦺꦴꦱ꧀ꦲꦶꦁꦏꦁꦏꦕꦼꦛꦲꦶꦁꦱꦩꦏ꧀ꦥꦸꦤꦶꦏ꧈​ꦲꦶꦁꦒꦶꦃꦥꦸꦤꦶꦏꦠꦶꦪꦁꦩꦭꦸꦏꦸꦲꦶꦁꦱꦧꦶꦤ꧀ꦏꦠꦫꦶꦏ꧀ꦲꦶꦁꦩꦲꦺꦱ꧉​ꦢꦺꦤꦺꦥꦶꦏꦗꦼꦁꦔꦤ꧀ꦤꦶꦥꦸꦤ꧀ꦩꦏꦠꦼꦤ꧀꧇​ ꧋ꦭꦶꦩꦿꦃꦲꦶꦥꦸꦤ꧀ꦲꦶꦝꦩ꧀ꦲꦶꦝꦩ꧀ꦩꦤ꧀ꦤꦶꦁꦠꦶꦪꦁꦗꦮꦶ꧈​ꦭꦁꦏꦸꦁꦩꦭꦶꦃꦠꦸꦩꦿꦥ꧀ꦏꦲꦸꦩ꧀ꦠꦤꦶ꧈​ꦥꦸꦤꦶꦏꦱꦒꦼꦢ꧀ꦢꦲꦁꦒꦝꦃꦲꦶꦩꦲꦺꦱꦱꦥꦱꦁ꧈​ꦲꦶꦁꦏꦁꦲꦒꦼꦁꦱꦲꦱꦩꦶꦱꦤ꧀ꦠꦺꦴꦱ꧉​ꦲꦶꦁꦏꦁꦩꦏꦠꦼꦤ꧀ꦮꦲꦸꦲꦶꦁꦒꦶꦃꦭꦪꦏ꧀ꦏꦺꦩꦮꦺꦴꦤ꧀꧈​ꦲꦩꦂꦒꦶꦩꦲꦺꦱꦥꦸꦤꦶꦏꦢꦢꦺꦴꦱ꧀ꦏꦚ꧀ꦕꦤꦶꦥꦸꦤ꧀ꦚꦩ꧀ꦧꦸꦠ꧀ꦢꦩꦼꦭ꧀ꦱꦼꦱꦉꦁꦔꦤ꧀꧈​ꦲꦶꦁꦏꦁꦱꦒꦼꦢ꧀ꦲꦚ꧀ꦗꦭꦂꦫꦶꦮꦼꦢꦭ꧀ꦭꦶꦁꦉꦗꦼꦏꦶꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦲꦸꦭꦃꦠꦠꦤꦺꦤ꧀꧉​ꦲꦩꦶꦭꦲꦁꦒꦺꦤ꧀ꦤꦶꦥꦸꦤ꧀ꦠꦶꦪꦁꦠꦤꦶꦔꦺꦴꦥꦺꦤꦶꦝꦠꦼꦁꦩꦲꦺꦱꦤꦶꦥꦸꦤ꧀ꦲꦶꦁꦒꦶꦃꦧꦺꦴꦠꦼꦤ꧀ꦧꦺꦢꦏꦢꦺꦴꦱ꧀ꦔꦺꦴꦥꦺꦤꦶꦝꦠꦼꦁꦏꦸꦭꦮꦂꦒꦤꦶꦥꦸꦤ꧀꧈​ꦧꦺꦴꦠꦼꦤ꧀ꦤꦠꦺꦏꦼꦠꦤ꧀ꦝꦼꦒ꧀ꦒꦤ꧀ꦠꦼꦝꦠꦸꦮꦶꦤ꧀ꦱꦼꦩ꧀ꦧꦿꦤꦥꦔꦸꦥꦏꦫꦤꦶꦥꦸꦤ꧀꧉​ꦢꦭꦃꦔꦤ꧀ꦠꦺꦴꦱ꧀ꦢꦸꦩꦸꦒꦶꦤꦶꦁꦠꦶꦊꦩ꧀ꦠꦏ꧀ꦱꦶꦃꦢꦶꦥꦸꦤ꧀ꦩꦤꦃꦥꦿꦪꦺꦴꦒꦶꦤꦶꦥꦸꦤ꧀꧈​ꦱꦲꦢꦶꦥꦸꦤ꧀ꦗꦒꦶꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦕꦶꦤꦏꦺꦴꦠ꧀ꦲꦶꦁꦊꦩꦸꦠ꧀꧉​ꦠꦶꦪꦁꦠꦤꦶꦧꦺꦴꦠꦼꦤ꧀ꦥꦸꦫꦸꦤ꧀ꦔꦼꦕꦏ꧀ꦏꦏꦼꦤ꧀ꦲꦶꦁꦢꦩꦼꦭ꧀ꦝꦠꦼꦁꦩꦲꦺꦱꦲꦶꦁꦱꦥꦸꦫꦸꦤ꧀ꦥꦸꦫꦸꦤ꧀ꦤꦶꦥꦸꦤ꧀꧈​ꦱꦢꦪꦩꦮꦶꦮꦠꦼꦱ꧀꧉​ ꧋ꦩꦲꦺꦱꦥꦸꦤꦶꦏꦱꦮꦼꦤꦺꦃꦲꦶꦁꦏꦺꦮꦤ꧀ꦲꦶꦁꦏꦁꦲꦩ꧀ꦧꦔꦸꦤ꧀ꦠꦸꦫꦸꦠ꧀꧈​ꦩꦔꦽꦠꦺꦴꦱ꧀ꦝꦠꦼꦁꦱꦱ꧀ꦩꦶꦠ꧈​ꦩꦶꦭꦕꦫꦤꦶꦥꦸꦤ꧀ꦲꦔ꧀ꦭꦩ꧀ꦥꦃꦲꦏꦼꦤ꧀ꦲꦶꦁꦢꦩꦼꦭ꧀꧇​ꦱꦲꦸꦥꦩꦶꦏꦼꦢꦃꦩꦺꦁꦒꦺꦴꦏ꧀꧈​ꦩꦤ꧀ꦝꦼꦒ꧀꧈​ꦫꦶꦤ꧀ꦝꦶꦏ꧀ꦠꦸꦮꦶꦤ꧀ꦫꦶꦏꦠ꧀꧈​ꦤꦩꦸꦁꦱꦏꦶꦁꦱꦱ꧀ꦩꦶꦠꦤꦶꦁꦲꦸꦔꦼꦭ꧀꧉​ꦱꦏꦶꦁꦏꦼꦭꦢꦸꦏ꧀ꦏꦶꦁꦠꦶꦪꦁꦠꦤꦶꦲꦁꦒꦺꦤ꧀ꦤꦶꦁꦥꦏꦸꦭꦶꦤꦤ꧀ꦝꦠꦼꦁꦩꦲꦺꦱ꧈​ꦩꦲꦺꦱꦲꦱꦿꦶꦁꦢꦶꦥꦸꦤ꧀ꦱꦽꦔꦼꦤ꧀ꦤꦶꦏꦢꦺꦴꦱ꧀ꦲꦚꦽꦔꦼꦤ꧀ꦤꦶꦝꦠꦼꦁꦭꦫꦺ꧉​ꦱꦤꦢꦾꦤ꧀ꦩꦲꦺꦱꦧꦺꦴꦠꦼꦤ꧀ꦩꦔꦽꦠꦺꦴꦱ꧀ꦝꦠꦼꦁꦱꦽꦔꦼꦤ꧀꧈​ꦤꦔꦶꦁꦱꦼꦩꦸꦤꦶꦥꦸꦤ꧀ꦏꦠꦶꦔꦭ꧀ꦔꦿꦲꦺꦴꦱ꧀ꦱꦏꦼꦤ꧀꧈​ꦏꦧꦼꦏ꧀ꦠꦱꦏꦶꦁꦩꦶꦉꦁꦱꦼꦉꦁꦔꦶꦁꦲꦸꦔꦼꦭ꧀꧉​ ꧋ꦩꦲꦺꦱꦥꦸꦤꦶꦏꦱꦤꦢꦾꦤ꧀ꦏꦠꦶꦔꦭ꧀ꦭꦶꦥꦸꦤ꧀ꦏꦺꦮꦤ꧀ꦠꦸꦠꦸꦠ꧀꧈​ꦤꦔꦶꦁꦩꦤꦮꦶꦤꦼꦥ꧀ꦱꦸꦔꦤ꧀ꦠꦺꦴꦱ꧀ꦲꦢꦩꦼꦭ꧀ꦒꦶꦫꦶꦱ꧀ꦱꦶꦁꦠꦶꦪꦁ꧈​ꦩꦶꦭꦔꦤ꧀ꦠꦺꦴꦱ꧀ꦏꦒꦩ꧀ꦧꦂꦫꦏꦼꦤ꧀ꦢꦢꦺꦴꦱ꧀ꦤꦩꦤꦶꦁꦒꦼꦤ꧀ꦝꦶꦁ꧈​ꦲꦶꦁꦒꦶꦃꦥꦸꦤꦶꦏꦒꦼꦤ꧀ꦝꦶꦁꦏꦼꦧꦺꦴꦒꦶꦫꦺꦴ꧈​ꦠꦼꦒꦼꦱ꧀ꦱꦶꦥꦸꦤ꧀ꦏꦼꦧꦺꦴꦤꦼꦥ꧀ꦱꦸ꧉​ꦩꦼꦁꦒꦃꦠꦸꦩꦿꦥ꧀ꦥꦶꦁꦠꦶꦪꦁꦗꦮꦶ꧈​ꦩꦤꦮꦶꦩꦶꦉꦁꦒꦼꦤ꧀ꦝꦶꦁꦮꦲꦸ꧈​ꦩꦤꦃꦲꦶꦥꦸꦤ꧀ꦠꦩ꧀ꦠꦸꦒꦩ꧀ꦧꦶꦫ꧉​ ꧋ꦠꦤ꧀ꦝꦤꦶꦥꦸꦤ꧀ꦧꦶꦭꦶꦃꦩꦲꦺꦱꦥꦸꦤꦶꦏꦲꦶꦁꦒꦶꦃꦏꦺꦮꦤ꧀ꦭꦶꦤꦁꦏꦸꦁ꧈​ꦲꦶꦁꦗꦩꦤ꧀ꦏꦶꦤꦔꦤ꧀ꦠꦺꦴꦱ꧀ꦏꦁꦒꦺꦗꦼꦗꦸꦭꦸꦏ꧀ꦏꦶꦁꦫꦠꦸ꧈​ꦏꦢꦺꦴꦱ꧀ꦠ꧇​ꦩꦲꦺꦱꦠꦤ꧀ꦢꦽꦩꦤ꧀꧈​ꦭꦤ꧀ꦲꦸꦒꦶꦤꦩꦤꦶꦁꦢꦢꦩꦼꦭ꧀꧇​ꦝꦸꦮꦸꦁꦝꦥꦸꦂꦏꦼꦧꦺꦴꦭꦗꦼꦂ꧉​ ꧋ꦩꦶꦫꦶꦢ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦲꦶꦁꦔꦶꦁꦒꦶꦭ꧀ꦥꦸꦤꦶꦏ꧈​ꦠꦸꦩꦿꦥ꧀ꦥꦱꦼꦩꦺꦴꦤ꧀ꦤꦶꦁꦒꦩ꧀ꦧꦂꦲꦶꦁꦱꦩꦏ꧀ꦏꦶꦁꦏꦗꦮꦺꦤ꧀꧈​ꦲꦩꦼꦁꦏꦸꦫꦲꦺꦴꦱ꧀ꦗꦮꦶꦢꦼꦊꦱ꧀꧈​ꦲꦶꦁꦏꦁꦲꦠꦼꦒꦼꦱ꧀꧇​ꦮꦼꦏꦼꦭ꧀ꦲꦶꦁꦢꦩꦼꦭ꧀꧈​ꦚꦩ꧀ꦧꦸꦠ꧀ꦢꦩꦼꦭ꧀ꦱꦼꦱꦉꦁꦔꦤ꧀꧈​ꦔꦸꦢꦶꦱꦩ꧀ꦥꦸꦂꦤꦤ꧀ꦤꦶꦁꦒꦼꦱꦁ꧈​ꦲꦶꦁꦏꦁꦲꦶꦁꦧꦠꦺꦴꦱ꧀ꦲꦶꦱꦶ꧇​ꦔꦽꦠꦶ꧈​ꦠꦧꦼꦫꦶꦭꦤ꧀ꦮꦤꦶ꧉​ ꧋ꦲꦶꦁꦮꦸꦱꦤꦱꦩꦏ꧀ꦏꦶꦁꦏꦗꦮꦺꦤ꧀ꦲꦶꦁꦏꦁꦲꦺꦁꦒꦭ꧀ꦱꦲꦲꦶꦁꦏꦁꦥꦶꦏꦗꦼꦁꦔꦤ꧀ꦤꦶꦥꦸꦤ꧀ꦱꦩ꧀ꦥꦸꦤ꧀ꦏꦠꦼꦫꦁꦔꦏꦼꦤ꧀ꦲꦶꦁꦔꦶꦁꦒꦶꦭ꧀꧈​ꦩꦸꦒꦶꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦱꦸꦏꦥꦶꦉꦤꦱꦲꦲꦩꦼꦮꦃꦲꦤꦒꦽꦁꦱꦼꦁꦔꦶꦁꦥꦁꦒꦭꦶꦃꦲꦶꦥꦸꦤ꧀ꦥꦫꦩꦲꦺꦴꦱ꧀꧈​ꦱꦭꦗꦼꦁꦔꦶꦥꦸꦤ꧀ꦲꦤꦸꦤ꧀ꦠꦸꦤ꧀ꦤꦤꦝꦠꦼꦁꦏꦩꦗꦼꦁꦔꦤ꧀꧉​ꦄꦩꦶꦤ꧀꧉​	Samaking Kajawèn Ing Kajawèn ingkang ngêmot rêmbagipun Petruk lan Garèng, rumiyin sampun anyukani prajangji, bilih samaking kalawarti badhe kasantunan ingkang èdi, ingkang sagêd anêngsêmakên dhatêng para maos. Mênggah sagêdipun kalêksanan sêdya ingkang makatên wau, tamtu inggih sawatawis lami, amargi kêdah abudidaya rumiyin sagêdipun angsal gambar ingkang kinintên pantês saha mathuk kalihan namaning kalawarti. Pêpuntoning rêmbag, lajêng mêndhêt gambar kados ingkang kacêtha ing samak punika, inggih punika tiyang maluku ing sabin katarik ing maesa. Dene pikajênganipun makatên: Limrahipun idham-idhamaning tiyang Jawi, langkung malih tumrap kaum tani, punika sagêda anggadhahi maesa sapasang, ingkang agêng saha sami santosa. Ingkang makatên wau inggih layak kemawon, amargi maesa punika dados kăncanipun nyambut damêl sêsarêngan, ingkang sagêd anjalari wêdaling rêjêki saking anggènipun ulah têtanèn. Amila anggènipun tiyang tani ngopèni dhatêng maesanipun inggih botên beda kados ngopèni dhatêng kulawarganipun, botên nate kêtandhêgan têdha tuwin sêmbrana pangupakaranipun. Dalah ngantos dumugining tilêm taksih dipun manah prayoginipun, saha dipun jagi sampun ngantos cinakot ing lêmut. Tiyang tani botên purun ngêcakakên ing damêl dhatêng maesa ing sapurun-purunipun, sadaya mawi watês. Maesa punika sawênèhing kewan ingkang ambangun turut, mangrêtos dhatêng sasmita, mila caranipun anglampahakên ing damêl: saupami kêdah menggok, mandhêg, rindhik tuwin rikat, namung saking sasmitaning ungêl. Saking kêladuking tiyang tani anggèning pakulinan dhatêng maesa, maesa asring dipun srêngêni kados anyrêngêni dhatêng lare. Sanadyan maesa botên mangrêtos dhatêng srêngên, nanging sêmunipun katingal ngraosakên, kabêkta saking mirêng sêrênging ungêl. Maesa punika sanadyan katingalipun kewan tutut, nanging manawi nêpsu ngantos adamêl girising tiyang, mila ngantos kagambarakên dados namaning gêndhing, inggih punika gêndhing Kêbogiro, têgêsipun kêbo nêpsu. Mênggah tumraping tiyang Jawi, manawi mirêng gêndhing wau, manahipun tamtu gambira. Tandhanipun bilih maesa punika inggih kewan linangkung, ing jaman kina ngantos kangge jêjuluking ratu, kados ta: Maesa Tandrêman, lan ugi namaning dêdamêl: dhuwung dhapur Kêbolajêr. Mirid kawontênan ing nginggil punika, tumrap pasêmoning gambar ing samaking Kajawèn, amêngku raos Jawi dêlês, ingkang atêgês: wêkêl ing damêl, nyambut damêl sêsarêngan, ngudi sampurnaning gêsang, ingkang ing batos isi: ngrêti, tabêri lan wani. Ing wusana samaking Kajawèn ingkang enggal saha ingkang pikajênganipun sampun katêrangakên ing nginggil, mugi andadosakên suka pirêna saha amêwahana grêngsênging panggalihipun para maos, salajêngipun anuntunana dhatêng kamajêngan. Amin.
[ 523 ]꧋ꦱꦺꦢꦤꦶꦥꦸꦤ꧀ꦫꦗꦲꦶꦁꦫꦸꦩꦺꦤꦶ꧉​ ꧋ꦲꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦏꦢꦺꦴꦱ꧀ꦱꦩ꧀ꦥꦸꦤ꧀ꦱꦩꦶꦩꦂꦠꦺꦴꦱ꧀ꦱꦏꦼꦤ꧀꧈​ꦧꦶꦭꦶꦃꦫꦗꦲꦶꦁꦟꦒꦫꦶꦫꦸꦩꦺꦟꦶ꧈​ꦯꦁꦥꦿꦧꦸ Ferdinand I꧈​ ꦏꦭꦠꦁꦒꦭ꧀ꦏꦥꦶꦁ 20 ꦗꦸꦭꦶꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈​ꦱꦺꦢ꧉​ꦩꦼꦁꦒꦃꦒꦼꦫꦃꦲꦶꦥꦸꦤ꧀ꦱꦁꦤꦠꦥꦸꦤꦶꦏꦱꦩ꧀ꦥꦸꦤ꧀ꦱꦮꦠꦮꦶꦱ꧀ꦭꦩꦶ꧈​ꦏꦭꦥꦸꦤꦶꦏꦯꦁꦥꦿꦩꦺꦱ꧀ꦮꦫꦶꦱꦮꦼꦒ꧀ꦏꦊꦉꦱ꧀ꦠꦶꦤ꧀ꦢꦏ꧀ꦏꦤ꧀ꦝꦠꦼꦁꦠꦤꦃꦄꦩꦺꦫꦶꦏꦃ꧉​ꦯꦉꦁꦒꦼꦫꦃꦲꦶꦥꦸꦤ꧀ꦱꦁꦤꦠꦱꦪꦱꦔꦼꦠ꧀꧈​ꦱꦁꦥꦿꦩꦺꦱ꧀ꦮꦫꦶꦭꦗꦼꦁꦏꦥꦼꦏ꧀ꦱꦏꦝꦮꦸꦃꦲꦤ꧀ꦏꦺꦴꦤ꧀ꦢꦸꦂꦩꦭꦶꦃ꧉​ꦏꦭꦒꦼꦫꦃꦲꦶꦥꦸꦤ꧀ꦱꦁꦤꦠꦤꦼꦝꦼꦁꦱꦔꦼꦠ꧀ꦱꦔꦼꦠ꧀ꦠꦶꦥꦸꦤ꧀꧈​ꦲꦶꦁꦏꦁꦲꦔꦝꦼꦥ꧀ꦥꦶꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸ꧇​ꦯꦁꦥꦸꦠꦿꦶ Marie ꦲꦶꦁꦤꦒꦫꦶ Yoegoslavie꧈​ꦥꦸꦠꦿꦩꦤ꧀ꦠꦸꦤꦶꦥꦸꦤ꧀ꦱꦁꦥꦿꦧꦸ꧈​ꦥꦿꦩꦺꦱ꧀ꦮꦫꦶꦤꦶꦁꦫꦗꦲꦶꦁ Griekenland ꦱꦥꦸꦠꦿꦤꦶꦥꦸꦤ꧀ Prins Michael (ꦮꦪꦃꦲꦶꦥꦸꦤ꧀ꦱꦁꦥꦿꦧꦸ)꧈​ Prins Nicolaas ꦭꦤ꧀ꦥꦿꦶꦤ꧀ꦱꦺꦱ꧀ Ilena ꦲꦶꦁꦏꦁꦱꦮꦼꦒ꧀ꦪꦸꦱ꧀ꦮ 18 ꦠꦲꦸꦤ꧀꧉​ ꧋ꦱ꧀ꦮꦂꦒꦶ ꦥꦿꦧꦸ Ferdinand I. (foto) ꧋Prins Carol. (foto) ꧋ꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦱ꧀ꦧꦸꦠ꧀ꦔꦶꦁꦒꦶꦭ꧀꧈​ꦠꦁꦒꦭ꧀ 20 ꦗꦸꦭꦶꦯꦁꦥꦿꦧꦸꦱꦺꦢ꧉​ꦏꦭꦥꦸꦤꦶꦏꦯꦁꦤꦠꦲꦶꦁꦤꦒꦫꦶꦆꦁꦓꦿꦶꦱ꧀ꦲꦔꦶꦤ꧀ꦠꦸꦤ꧀ꦤꦏꦼꦤ꧀ꦱꦼꦫꦠ꧀ꦠꦶꦭ꧀ꦒꦩ꧀ꦝꦠꦼꦁꦯꦁꦥꦿꦩꦺꦱ꧀ꦮꦫꦶꦲꦶꦁꦫꦸꦩꦺꦟꦶ꧈​ꦲꦔꦠꦸꦂꦫꦏꦼꦤ꧀ꦧꦺꦭꦱꦸꦁꦏꦮꦤꦶꦥꦸꦤ꧀ꦤꦫꦺꦤ꧀ꦢꦿꦲꦶꦁꦆꦁꦓꦿꦶꦱ꧀꧉​ꦢꦺꦤꦺꦏꦭꦲꦚꦫꦺꦑꦏꦼꦤ꧀ꦭꦪꦺꦴꦤ꧀ꦤꦶꦁꦯꦁꦤꦠꦮꦲꦸ꧈​ꦲꦸꦠꦸꦱꦤ꧀ꦤꦒꦫꦶꦮꦭꦤ꧀ꦢꦶꦲꦶꦁ Boekarest, Baron van Nagell ꦲꦸꦒꦶꦝꦺꦫꦺꦏ꧀ꦲꦚ꧀ꦗꦼꦤꦼꦔꦶ꧉​ ꧋ꦩꦼꦁꦒꦃꦱꦺꦢꦤꦶꦥꦸꦤ꧀ꦱꦁꦤꦫꦺꦤ꧀ꦢꦿꦲꦶꦁꦫꦸꦩꦺꦟꦶꦮꦲꦸ꧈​ꦥꦩꦫꦺꦤ꧀ꦠꦃꦲꦶꦁꦔꦿꦶꦏꦸꦲꦺꦁꦒꦭ꧀ꦔꦠꦸꦂꦫꦶꦥꦮꦂꦠꦺꦴꦱ꧀ꦝꦠꦼꦁꦠꦶꦭꦱ꧀ꦥꦔꦺꦫꦤ꧀ꦥꦠꦶꦲꦶꦁꦤꦒꦫꦶꦫꦸꦩꦺꦟꦶ꧈​ꦩꦼꦁꦒꦃꦱꦺꦢꦤꦶꦥꦸꦤ꧀ꦱꦁꦤꦫꦺꦤ꧀ꦢꦿꦲꦶꦁꦫꦸꦩꦺꦟꦶꦮꦲꦸ꧈​ꦥꦩꦫꦺꦤ꧀ꦠꦃꦲꦶꦁꦔꦿꦶꦏꦸꦲꦺꦁꦒꦭ꧀ꦔꦠꦸꦂꦫꦶꦥꦮꦂꦠꦺꦴꦱ꧀ꦝꦠꦼꦁꦠꦶꦭꦱ꧀ꦥꦔꦺꦫꦤ꧀ꦥꦠꦶꦲꦶꦁꦤꦒꦫꦶꦫꦸꦩꦺꦟꦶ꧈​ [ 524 ]꧋Prins Carol ꦲꦶꦁꦏꦁꦱꦩꦁꦏꦺꦪꦸꦱ꧀ꦮ 34 ꦠꦲꦸꦤ꧀ꦱꦲꦢꦢꦊꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦶꦛꦦꦫꦶꦱ꧀꧉​ꦢꦺꦤꦺꦯꦁ Prins Carol ꦭꦗꦼꦁꦲꦥꦫꦶꦁꦥꦔꦸꦮꦱꦝꦠꦼꦁꦱꦼꦫꦠ꧀ꦏꦧꦂ Matin ꦲꦶꦁꦏꦁꦏꦮꦼꦢꦭ꧀ꦭꦏꦼꦤ꧀ꦲꦶꦁꦏꦶꦛꦦꦫꦶꦱ꧀꧈​ꦱꦸꦥꦢꦺꦴꦱ꧀ꦲꦔ꧀ꦭꦲꦶꦂꦫꦏꦼꦤ꧀ꦒꦼꦁꦔꦶꦁꦱꦸꦁꦏꦮꦤꦶꦥꦸꦤ꧀ꦱꦁꦥꦔꦺꦫꦤ꧀ꦗꦭꦂꦫꦤ꧀ꦱꦺꦢꦤꦶꦥꦸꦤ꧀ꦲꦶꦁꦏꦁꦫꦩꦮꦲꦸ꧉​ꦱꦭꦗꦼꦁꦔꦶꦥꦸꦤ꧀ꦱꦁꦥꦔꦺꦫꦤ꧀ꦭꦗꦼꦁꦔꦠꦸꦂꦫꦏꦼꦤ꧀ꦱꦼꦫꦠ꧀ꦥꦤꦸꦮꦸꦤ꧀ꦤꦤ꧀ꦝꦠꦼꦁꦥꦩꦫꦺꦤ꧀ꦠꦃ꧈​ꦏꦥꦉꦁꦔꦲꦚ꧀ꦗꦼꦤꦼꦁꦔꦶꦥꦩꦼꦠꦏ꧀ꦏꦶꦥꦸꦤ꧀ꦲꦶꦁꦏꦁꦫꦩ꧈​ꦲꦤꦔꦶꦁꦥꦤꦸꦮꦸꦤ꧀ꦤꦤ꧀ꦤꦶꦥꦸꦤ꧀ꦮꦲꦸꦧꦺꦴꦠꦼꦤ꧀ꦢꦶꦥꦸꦤ꧀ꦮꦁꦱꦸꦭ꧀ꦭꦶꦧꦧꦂꦥꦶꦱꦤ꧀꧉​ꦩꦼꦁꦒꦃꦱꦗꦠꦺꦴꦱ꧀ꦱꦶꦥꦸꦤ꧀ꦥꦔꦺꦫꦤ꧀ꦮꦲꦸꦧꦺꦴꦠꦼꦤ꧀ꦏꦺꦔꦶꦁꦭꦸꦩꦼꦧꦼꦠ꧀ꦲꦶꦁꦤꦒꦫꦶꦫꦸꦩꦺꦤꦶ꧈​ꦩꦤꦮꦶꦧꦺꦴꦠꦼꦤ꧀ꦏꦤ꧀ꦛꦶꦥꦭꦶꦭꦃꦲꦶꦁꦥꦩꦫꦺꦤ꧀ꦠꦃ꧉​ꦲꦶꦁꦔꦿꦶꦏꦸꦮꦺꦴꦤ꧀ꦠꦼꦤ꧀ꦱꦼꦫꦠ꧀ꦠꦶꦥꦸꦤ꧀ꦥꦩꦫꦺꦤ꧀ꦠꦃꦫꦸꦩꦺꦟꦶꦝꦠꦼꦁꦯꦁꦦꦔꦺꦫꦤ꧀꧈​ꦲꦶꦁꦏꦁꦲꦚꦼꦧꦸꦠ꧀ꦠꦏꦼꦤ꧀꧈​ꦧꦶꦭꦶꦃꦥꦸꦠꦸꦱ꧀ꦱꦤꦶꦁꦥꦩꦫꦺꦤ꧀ꦠꦃꦭꦸꦲꦸꦂꦏꦭꦠꦁꦒꦭ꧀ 4 ꦗꦤꦸꦮꦫꦶ 1926꧈​ꦠꦏ꧀ꦱꦶꦃꦏꦠꦼꦠꦼꦥ꧀ꦥꦏꦼꦤ꧀꧉​ꦩꦼꦁꦒꦃꦲꦶꦱꦶꦤꦶꦁꦥꦸꦠꦸꦱ꧀ꦱꦤ꧀ꦮꦲꦸ꧈​ꦲꦔꦼꦱꦃꦲꦏꦼꦤ꧀ꦲꦶꦁꦏꦁꦢꦢꦺꦴꦱ꧀ꦏꦂꦱꦠꦸꦮꦶꦤ꧀ꦗꦁꦗꦶꦗꦁꦗꦶꦤꦶꦥꦸꦤ꧀ Prins Carol꧈​ꦲꦤꦩ꧀ꦥꦶꦏ꧀ꦝꦠꦼꦁꦲꦑꦏ꧀ꦏꦶꦥꦸꦤ꧀ꦗꦸꦩꦼꦤꦼꦁꦢꦢꦺꦴꦱ꧀ꦥꦔꦺꦫꦤ꧀ꦥꦠꦶꦲꦸꦠꦮꦶꦢꦢꦺꦴꦱ꧀ꦫꦗꦲꦶꦁꦥꦿꦗꦫꦸꦩꦺꦟꦶ꧉​ꦩꦶꦠꦸꦫꦸꦠ꧀ꦥꦮꦂꦠꦺꦴꦱ꧀ꦱꦏꦶꦁꦦꦫꦶꦱ꧀꧈​ꦩꦶꦭꦪꦏꦶꦤ꧀꧈​ꦧꦶꦭꦶꦃꦱꦁꦥꦔꦺꦫꦤ꧀ꦧꦝꦺꦲꦤꦼꦠꦼꦥ꧀ꦥꦶꦗꦁꦗꦶꦤꦶꦥꦸꦤ꧀ꦱꦪꦼꦏ꧀ꦠꦺꦴꦱ꧀꧈​ꦱꦲꦧꦺꦴꦠꦼꦤ꧀ꦧꦝꦺꦏꦺꦴꦤ꧀ꦢꦸꦂꦝꦠꦼꦁꦤꦒꦫꦶꦫꦸꦩꦺꦟꦶꦩꦭꦶꦃꦲꦶꦁꦱꦊꦧꦼꦠ꧀ꦠꦶꦥꦸꦤ꧀ 10 ꦠꦲꦸꦤ꧀ꦥꦸꦤꦶꦏ꧉​ ꧋Prins Michael꧈​ꦫꦗꦲꦺꦁꦒꦭ꧀ꦲꦶꦁꦤꦒꦶꦫꦫꦸꦩꦺꦟꦶ꧉​ ꧋ ꦱꦱꦺꦢꦤꦶꦥꦸꦤ꧀ꦱꦁꦥꦿꦧꦸ Ferdinand I ꦭꦗꦼꦁꦏꦠꦼꦠꦼꦥ꧀ꦥꦏꦼꦤ꧀ꦧꦶꦭꦶꦃꦲꦶꦁꦏꦁꦲꦁꦒꦼꦤ꧀ꦠꦺꦴꦱ꧀ꦱꦶꦏꦥꦿꦧꦺꦴꦤ꧀꧈​ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦮꦪꦃ꧇​ Prins Michael ꦲꦶꦁꦏꦁꦱꦩꦁꦏꦺꦱꦮꦼꦒ꧀ꦪꦸꦱ꧀ꦮ 5 ꦠꦲꦸꦤ꧀꧉​ ꧋ꦏꦗꦮꦶꦥꦸꦤꦶꦏꦥꦩꦫꦺꦤ꧀ꦠꦃꦩꦼꦤ꧀ꦝꦼꦠ꧀ꦱꦠꦸꦁꦒꦶꦭ꧀ꦭꦶꦁꦥꦸꦠꦸꦱ꧀ꦱꦤ꧀꧈​ꦱꦸꦩꦼꦢꦾꦲꦚꦼꦒꦃꦱꦢꦪꦥꦤ꧀ꦢꦩꦼꦭ꧀ꦭꦶꦁꦠꦶꦠꦶꦪꦁꦲꦶꦁꦏꦁꦧꦏꦸꦉꦩꦼꦤ꧀ꦝꦠꦼꦁ Prins Carol꧈​ꦲꦤꦔꦶꦁꦲꦶꦁꦤꦒꦫꦶꦔꦿꦶꦏꦸꦠꦶꦔꦭ꧀ꦭꦶꦥꦸꦤ꧀ꦱꦼꦥꦼꦤ꧀꧈​ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦱꦸꦩꦼꦢꦾꦲꦔꦿꦶꦱꦏ꧀ꦏꦠꦼꦤ꧀ꦠꦽꦩ꧀ꦩꦤ꧀ꦤꦶꦁꦥꦿꦗ꧉​ꦩꦏꦠꦼꦤ꧀ꦲꦸꦒꦶꦥꦫꦥꦿꦗꦸꦫꦶꦠ꧀ꦱꦩ꧀ꦥꦸꦤ꧀ꦱꦩꦶꦱꦸꦩ꧀ꦥꦃꦱꦢꦪ꧈​ꦧꦶꦭꦶꦃꦱꦭꦩꦶꦤꦶꦥꦸꦤ꧀ꦠꦤ꧀ꦱꦃꦧꦝꦺꦱꦼꦠꦾꦝꦠꦼꦁꦯꦁꦫꦗ Michael ꦮꦲꦸ꧉​	Sedanipun Raja ing Rumèni. Ing sêrat-sêrat kabar kados sampun sami martosakên, bilih raja ing nagari Rumèni, Sang Prabu Ferdinand I, kala tanggal kaping 20 Juli ingkang kapêngkêr punika, seda. Mênggah gêrahipun sang nata punika sampun sawatawis lami, kala punika sang pramèswari sawêg kalêrês tindakan dhatêng tanah Amerikah. Sarêng gêrahipun sang nata saya sangêt, sang pramèswari lajêng kapêksa kadhawuhan kondur malih. Kala gêrahipun sang nata nêdhêng sangêt-sangêtipun, ingkang angadhêpi wontên ing ngriku: Sang Putri Marie ing nagari Yoegoslavie, putra mantunipun sang prabu, pramèswarining raja ing Griekenland saputranipun Prins Michael (wayahipun sang prabu), Prins Nicolaas lan prinsès Ilena ingkang sawêg yuswa 18 taun. [Grafik] Swargi Prabu Ferdinand I. [Grafik] Prins Carol. Kados ingkang sampun kasbut nginggil, tanggal 20 Juli sang prabu seda. Kala punika sang nata ing nagari Inggris angintunakên sêrat tilgram dhatêng sang pramèswari ing Rumèni, angaturakên belasungkawanipun narendra ing Inggris. Dene kala anyarèkakên layoning sang nata wau, utusan nagari Walandi ing Boekarest, Baron van Nagell ugi dhèrèk anjênêngi. Mênggah sedanipun sang narendra ing Rumèni wau, pamarentah ing ngriku enggal ngaturi pawartos dhatêng tilas pangeran Pati ing nagari Rumèni, Prins Carol ingkang samangke yuswa 34 taun saha dêdalêm wontên ing kitha Paris. Dene Sang Prins Carol lajêng aparing panguwasa dhatêng sêrat kabar Matin ingkang kawêdalakên ing kitha Paris, supados anglairakên gênging sungkawanipun sang pangeran jalaran sedanipun ingkang rama wau. Salajêngipun sang pangeran lajêng ngaturakên sêrat panuwunan dhatêng pamarentah, kaparênga anjênêngi pamêtakipun ingkang rama, ananging panuwunanipun wau botên dipun wangsuli babarpisan. Mênggah sajatosipun pangeran wau botên kenging lumêbêt ing nagari Rumèni, manawi botên kanthi palilahing pamarentah. Ing ngriku wontên sêratipun pamarentah Rumèni dhatêng sang pangeran, ingkang anyêbutakên, bilih putusaning pamarentah luhur kala tanggal 4 Januari 1926, taksih katêtêpakên. Mênggah isining putusan wau, angêsahakên ingkang dados karsa tuwin jangji-jangjinipun Prins Carol, anampik dhatêng hak-hakipun jumênêng dados pangeran Pati utawi dados raja ing praja Rumèni. Miturut pawartos saking Paris, mila yakin, bilih sang pangeran badhe anêtêpi jangjinipun sayêktos, saha botên badhe kondur dhatêng nagari Rumèni malih ing salêbêtipun 10 taun punika. [Grafik] Prins Michael, raja enggal ing nagari Rumèni. Sasedanipun Sang Prabu Ferdinand I lajêng katêtêpakên bilih ingkang anggêntosi kaprabon, inggih punika ingkang wayah: Prins Michael ingkang samangke sawêg yuswa 5 taun. Kajawi punika pamarentah mêndhêt satunggiling putusan, sumêdya anyêgah sadaya pandamêling têtiyang ingkang baku rêmên dhatêng Prins Carol, ananging ing nagari ngriku tingalipun sêpên, botên wontên ingkang sumêdya angrisak katêntrêmaning praja. Makatên ugi para prajurit sampun sami sumpah sadaya, bilih salaminipun tansah badhe sêtya dhatêng Sang Raja Michael wau.
[ 525 ]꧋ꦥꦢꦩꦼꦭ꧀ꦭꦤ꧀ꦲꦸꦠꦩꦶꦥꦸꦤꦶꦏꦏꦼꦢꦃꦢꦶꦥꦸꦤ꧀ꦄꦗꦺꦤꦶ꧉​ ꧋ꦱꦮꦼꦤꦺꦃꦲꦶꦁꦥꦫꦱꦂꦗꦤꦮꦺꦴꦤ꧀ꦠꦼꦤ꧀ꦲꦶꦁꦏꦁꦲꦱꦿꦶꦁꦥꦶꦠꦏꦺꦤ꧀ꦩꦏꦠꦼꦤ꧀꧇​ꦥꦸꦤꦥꦱꦮꦂꦤꦶꦤꦶꦁꦗꦗꦩ꧀ꦥꦶꦩꦶꦠꦸꦫꦸꦠ꧀ꦏꦮꦿꦸꦃꦏꦝꦺꦴꦏ꧀ꦠꦼꦂꦫꦤ꧀ꦥꦸꦤꦶꦏꦮꦺꦴꦤ꧀ꦠꦼꦤ꧀ꦥꦲꦺꦢꦃꦲꦶꦥꦸꦤ꧀ꦠꦸꦩꦿꦥ꧀ꦠꦶꦠꦶꦪꦁꦲꦶꦁꦠꦤꦃꦗꦮꦶꦔꦿꦶꦏꦶ꧉​ ꧋ꦠꦸꦮꦸꦃꦲꦶꦁꦥꦶꦠꦏꦺꦤ꧀ꦤꦤ꧀ꦏꦢꦺꦴꦱ꧀ꦲꦶꦁꦏꦁꦏꦱ꧀ꦧꦸꦠ꧀ꦲꦶꦁꦔꦶꦁꦒꦶꦭ꧀ꦥꦸꦤꦶꦏꦏꦢꦺꦴꦱ꧀ꦲꦶꦁꦒꦶꦃꦱꦩ꧀ꦥꦸꦤ꧀ꦭꦪꦏ꧀ꦏꦺꦩꦮꦺꦴꦤ꧀꧈​ꦲꦩꦂꦒꦶꦥꦩ꧀ꦧꦸꦢꦶꦢꦪꦤꦶꦁꦥꦩꦫꦺꦤ꧀ꦠꦃꦩꦸꦫꦶꦃꦠꦶꦠꦶꦪꦁꦲꦺꦁꦒꦭ꧀ꦚꦸꦮꦸꦤ꧀ꦤꦥꦶꦠꦸꦭꦸꦁꦔꦤ꧀ꦝꦠꦼꦁꦝꦺꦴꦏ꧀ꦠꦼꦂ꧈​ꦩꦤꦮꦶꦏꦊꦉꦱ꧀ꦏꦠꦩꦤ꧀ꦲꦶꦁꦱꦱꦏꦶꦠ꧀꧈​ꦥꦸꦤꦶꦏꦏꦢꦺꦴꦱ꧀ꦧꦺꦴꦠꦼꦤ꧀ꦏꦼꦤ꧀ꦝꦠ꧀ꦏꦼꦤ꧀ꦝꦠ꧀꧉​ꦥꦩ꧀ꦧꦸꦢꦶꦤꦶꦥꦸꦤ꧀ꦥꦩꦫꦺꦤ꧀ꦠꦃꦮꦲꦸꦲꦶꦁꦒꦶꦃꦩꦶꦭꦮꦺꦴꦤ꧀ꦠꦼꦤ꧀ꦮꦺꦴꦃꦲꦶꦥꦸꦤ꧀꧈​ꦠꦺꦴꦤ꧀ꦝꦪꦼꦏ꧀ꦠꦶꦤꦶꦥꦸꦤ꧀꧇​ꦱꦪꦢꦔꦸꦒꦿꦶꦪꦱꦏꦶꦠ꧀ꦲꦶꦁꦥꦸꦤ꧀ꦢꦶꦥꦸꦤ꧀ꦢꦶꦥꦁꦒꦺꦤ꧀ꦤꦤ꧀꧈​ꦱꦪꦏꦛꦃꦠꦶꦠꦶꦪꦁꦔꦶꦥꦸꦤ꧀ꦲꦶꦁꦏꦁꦱꦩꦶꦝꦠꦼꦁ꧈​ꦥꦽꦭꦸꦲꦗꦼꦗꦩ꧀ꦥꦶ꧉​ꦄꦮꦶꦠ꧀ꦱꦏꦶꦁꦥꦩ꧀ꦧꦸꦢꦶꦢꦪꦤꦶꦁꦥꦩꦫꦺꦤ꧀ꦠꦃꦱꦲꦱꦏꦶꦁꦱꦲꦺꦤꦶꦁꦥꦔꦸꦥꦏꦫꦤꦶꦥꦸꦤ꧀ꦥꦫꦝꦺꦴꦏ꧀ꦠꦼꦂꦝꦠꦼꦁꦠꦶꦠꦶꦪꦁꦲꦶꦁꦏꦁꦤꦤ꧀ꦝꦁꦱꦏꦶꦠ꧀꧈​ꦱꦠꦼꦩꦃꦱꦪꦢꦔꦸꦏꦸꦮꦠꦺꦴꦱ꧀ꦱꦶꦥꦸꦤ꧀ꦠꦶꦪꦁꦲꦗꦼꦗꦩ꧀ꦥꦶꦝꦠꦼꦁꦝꦺꦴꦏ꧀ꦠꦼꦂ꧈​ꦱꦪꦭꦗꦼꦁꦲꦶꦕꦭ꧀꧈​ꦱꦲꦠꦶꦠꦶꦪꦁꦮꦲꦸꦱꦩꦶꦩꦶꦤ꧀ꦝꦏ꧀ꦏꦥꦶꦠꦢꦺꦴꦱ꧀ꦱꦤ꧀ꦤꦶꦥꦸꦤ꧀ꦝꦠꦼꦁꦏꦱꦒꦼꦢ꧀ꦢꦤ꧀ꦤꦶꦁꦥꦫꦝꦺꦴꦏ꧀ꦠꦼꦂ꧉​ꦄꦤꦔꦶꦁꦏꦥꦶꦠꦢꦺꦴꦱ꧀ꦱꦤ꧀ꦝꦠꦼꦁꦝꦺꦴꦏ꧀ꦠꦼꦂꦮꦲꦸꦠꦶꦔꦭ꧀ꦭꦶꦥꦸꦤ꧀ꦠꦶꦥꦶꦱ꧀ꦱꦔꦼꦠ꧀꧈​ꦗꦭꦂꦫꦤ꧀ꦩꦤꦮꦶꦭꦗꦼꦁꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦏꦕꦫꦶꦪꦺꦴꦱ꧀ꦱꦏꦼꦤ꧀ꦱꦒꦼꦢ꧀꧈​ꦏꦢꦺꦴꦱ꧀ꦢꦺꦤꦺꦏꦾꦲꦶ ꦨꦼꦢꦺꦴꦂꦲꦸꦠꦮꦶꦏꦾꦲꦶꦦꦼꦤ꧀ꦛꦺꦠ꧀꧈​ꦭꦗꦼꦁꦏꦺꦩꦮꦺꦴꦤ꧀ꦲꦠꦸꦱꦤ꧀ꦲꦸꦠꦮꦶꦲꦺꦮꦺꦴꦤ꧀ꦠꦶꦪꦁꦲꦶꦁꦏꦁꦱꦩꦶꦝꦠꦼꦁꦲꦶꦁꦏꦾꦲꦶꦏꦾꦲꦶꦮꦲꦸꦥꦽꦭꦸꦱꦸꦩꦼꦢꦾꦲꦗꦼꦗꦩ꧀ꦥꦶ꧉​ꦱꦲꦭꦗꦼꦁꦏꦱꦸꦥꦺꦤ꧀ꦝꦠꦼꦁꦝꦺꦴꦏ꧀ꦠꦼꦂ꧉​ ꧋ꦔꦶꦁꦒꦶꦭ꧀ꦥꦸꦤꦶꦏꦒꦩ꧀ꦧꦂꦫꦶꦥꦸꦤ꧀ꦏꦾꦲꦶꦦꦼꦤ꧀ꦛꦺꦠ꧀ꦲꦶꦁꦏꦭꦏ꧀ꦱꦤ꧀꧉​ ꧋ꦲꦶꦁꦏꦁꦥꦸꦤꦶꦏꦥꦶꦠꦏꦺꦤ꧀ꦤꦤ꧀ꦤꦶꦥꦸꦤ꧀ꦥꦫꦱꦂꦗꦤꦏꦱ꧀ꦧꦸꦠ꧀ꦔꦶꦁꦒꦶꦭ꧀ꦩꦶꦭꦲꦶꦁꦒꦶꦃꦧꦺꦴꦠꦼꦤ꧀ꦒꦩ꧀ꦥꦶꦭ꧀ꦮꦁꦱꦸꦭꦤ꧀ꦤꦶꦥꦸꦤ꧀꧉​ꦄꦢꦩꦼꦭ꧀ꦮꦫꦱ꧀ꦱꦶꦁꦠꦶꦪꦁꦱꦏꦶꦠ꧀ꦥꦸꦤꦶꦏꦥꦚ꧀ꦕꦺꦤ꧀ꦥꦢꦩꦼꦭ꧀ꦭꦤ꧀ꦲꦶꦁꦏꦁꦱꦲꦺꦱꦪꦼꦏ꧀ꦠꦺꦴꦱ꧀꧉​ꦄꦔꦸꦢꦶꦝꦠꦼꦁꦏꦱꦫꦱ꧀ꦱꦤꦶꦁꦠꦶꦪꦁꦱꦢꦪꦥꦸꦤꦶꦏꦥꦚ꧀ꦕꦺꦤ꧀ꦲꦶꦁꦒꦶꦃꦲꦸꦠꦩꦶꦱꦔꦼꦠ꧀꧈​ꦲꦤꦔꦶꦁꦲꦺꦮꦼꦠ꧀ꦥꦏꦺꦮꦼꦠ꧀ꦠꦶꦥꦸꦤ꧀ꦲꦶꦁꦒꦶꦃꦏꦛꦃꦱꦔꦼꦠ꧀꧉​ꦏꦢꦺꦴꦱ꧀ꦠ꧇​ꦒꦸꦒꦺꦴꦤ꧀ꦠꦸꦲꦺꦴꦤ꧀ꦤꦶꦥꦸꦤ꧀ꦠꦶꦪꦁ꧈​ꦲꦗꦿꦶꦃ꧈​ꦏꦸꦮꦠꦺꦴꦱ꧀꧈​ꦧꦺꦴꦠꦼꦤ꧀ꦥꦶꦠꦢꦺꦴꦱ꧀꧈​ꦒꦼꦱꦁꦲꦶꦁꦏꦁꦧꦺꦴꦠꦼꦤ꧀ꦩꦶꦠꦸꦫꦸꦠ꧀ꦝꦠꦼꦁꦮꦺꦠ꧀ꦠꦶꦁꦏꦱꦫꦱ꧀ꦱꦤ꧀ꦧꦢꦤ꧀꧈​ꦭꦤ꧀ꦱꦱꦩꦶꦤꦶꦥꦸꦤ꧀꧈​ꦥꦸꦤꦶꦏꦱꦢꦪ꧈​ꦠꦩ꧀ꦠꦸꦢꦢꦺꦴꦱ꧀ꦱꦺꦴꦁꦒꦫꦸꦁꦒꦶꦤꦶꦥꦸꦤ꧀ꦥꦫꦝꦺꦴꦏ꧀ꦠꦼꦂꦲꦶꦁꦏꦁꦱꦸꦩꦼꦢꦾꦲꦠꦼꦠꦸꦭꦸꦁ꧉​ꦄꦤꦔꦶꦁꦮꦠꦏ꧀ꦮꦠꦏ꧀ꦲꦶꦁꦏꦁꦧꦺꦴꦠꦼꦤ꧀ꦥꦿꦪꦺꦴꦒꦶꦩꦏꦠꦼꦤ꧀ꦮꦲꦸ꧈​ꦏꦼꦢꦃꦢꦶꦥꦸꦤ꧀ꦲꦸꦢꦶꦲꦶꦕꦭ꧀ꦭꦶꦥꦸꦤ꧀꧈​ꦏꦢꦺꦴꦱ꧀ꦢꦺꦤꦺꦲꦁꦒꦺꦤ꧀ꦤꦶꦥꦸꦤ꧀ꦥꦫꦝꦺꦴꦏ꧀ꦠꦼꦂꦲꦔꦸꦢꦶꦲꦶꦕꦭ꧀ꦭꦶꦥꦸꦤ꧀ꦱꦱꦏꦶꦠ꧀ꦮꦂꦤꦶꦮꦂꦤꦶꦲꦶꦁꦏꦁꦠꦤ꧀ꦱꦃꦲꦔꦽꦫꦶꦝꦸꦝꦠꦼꦁꦏꦱꦫꦱ꧀ꦱꦤ꧀ꦤꦶꦁꦠꦶꦪꦁ꧈​ꦲꦩꦶꦭꦥꦫꦝꦺꦴꦏ꧀ꦠꦼꦂꦲꦶꦁꦒꦶꦃꦧꦺꦴꦠꦼꦤ꧀ꦮꦗꦶꦧ꧀ꦮꦼꦒꦃꦲꦸꦠꦮꦶꦒꦼꦭ꧈​ꦩꦤꦮꦶꦲꦩꦿꦁꦒꦸꦭ꧀ꦭꦶꦮꦠꦏ꧀ꦮꦠꦏ꧀ꦲꦶꦁꦏꦁꦱꦩ꧀ꦥꦸꦤ꧀ꦏ [ 526 ]ꦱꦼꦫꦠ꧀ꦲꦶꦁꦔꦶꦁꦒꦶꦭ꧀ꦮꦲꦸ꧈​ꦩꦏꦠꦼꦤ꧀ꦥꦸꦤꦶꦏꦩꦤꦮꦶꦱꦼꦢꦾꦤꦶꦁꦝꦺꦴꦏ꧀ꦠꦼꦂꦏꦤ꧀ꦛꦶꦩꦤꦃꦱꦸꦕꦶꦧꦝꦺꦲꦚꦫꦱ꧀ꦱꦏꦼꦤ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦏꦮꦸꦭꦲꦶꦁꦠꦤꦃꦲꦶꦤ꧀ꦢꦶꦪꦔꦿꦶꦏꦶ꧉​ ꧋ꦲꦶꦁꦏꦗꦮꦺꦤ꧀ꦏꦢꦺꦴꦱ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦮꦺꦴꦤ꧀ꦤꦶꦥꦸꦤ꧀ꦲꦸꦥꦩꦶꦲꦔꦼꦮꦿꦠ꧀ꦭꦭꦧꦼꦠ꧀ꦠꦤ꧀ꦤꦶꦥꦸꦤ꧀ꦱꦠꦸꦁꦒꦶꦭ꧀ꦭꦶꦁꦱꦂꦗꦤꦧꦺꦴꦁꦱꦌꦫꦺꦴꦥꦃ꧈​ꦲꦶꦁꦏꦁꦱꦸꦕꦶꦩꦤꦃꦲꦶꦥꦸꦤ꧀꧈​ꦱꦩ꧀ꦥꦸꦤ꧀ꦲꦤꦶꦭꦂꦱꦤꦏ꧀ꦱꦝꦺꦫꦺꦏ꧀ꦏꦶꦥꦸꦤ꧀꧈​ꦲꦤꦶꦭꦂꦏꦩꦸꦏ꧀ꦠꦺꦤ꧀ꦱꦲꦏꦱꦼꦤꦼꦁꦔꦤ꧀ꦤꦶꦥꦸꦤ꧀ꦲꦶꦁꦢꦺꦴꦚ꧈​ꦥꦽꦭꦸꦧꦶꦝꦭ꧀ꦝꦠꦼꦁꦠꦤꦃꦄꦥꦿꦶꦏꦃ꧈​ꦱꦸꦩꦼꦢꦾꦲꦔꦸꦱꦢꦤꦶꦠꦶꦠꦶꦪꦁꦲꦶꦁꦔꦿꦶꦏ꧈​ꦲꦶꦁꦏꦁꦏꦕꦫꦶꦪꦺꦴꦱ꧀ꦠꦏ꧀ꦱꦶꦃꦱꦔꦼꦠ꧀ꦧꦺꦴꦝꦺꦴꦤꦶꦥꦸꦤ꧀ꦱꦲꦤꦤ꧀ꦝꦁꦱꦏꦶꦠ꧀ꦮꦂꦤꦶꦮꦂꦤꦶ꧉​ꦢꦺꦤꦺꦲꦸꦱꦢꦲꦸꦱꦢꦲꦶꦁꦏꦁꦢꦶꦥꦸꦤ꧀ꦥꦶꦒꦸꦤꦏ꧀ꦏꦏꦼꦤ꧀ꦲꦶꦁꦠꦶꦠꦶꦪꦁꦮꦲꦸꦤꦩꦸꦁꦩꦼꦤ꧀ꦝꦼꦠ꧀ꦱꦏꦶꦁꦏꦥꦶꦠꦢꦺꦴꦱ꧀ꦱꦤ꧀ꦤꦶꦥꦸꦤ꧀ꦥꦶꦪꦩ꧀ꦧꦏ꧀ꦥꦶꦪꦩ꧀ꦧꦏ꧀ꦏꦺꦩꦮꦺꦴꦤ꧀꧈​ꦲꦶꦁꦏꦁꦏꦛꦃꦱꦩ꧀ꦥꦸꦤ꧀ꦠꦩ꧀ꦠꦸꦲꦶꦁꦒꦶꦃ꧇​ꦧꦺꦴꦠꦼꦤ꧀ꦩꦛꦸꦏ꧀ꦏꦭꦶꦪꦤ꧀ꦲꦁꦒꦼꦂꦲꦁꦒꦼꦂꦫꦶꦥꦸꦤ꧀ꦏꦱꦫꦱ꧀ꦱꦤ꧀ꦤꦶꦁꦧꦢꦤ꧀꧈​ꦲꦩꦶꦭꦲꦸꦱꦢꦲꦸꦱꦢꦤꦶꦥꦸꦤ꧀ꦮꦲꦸꦧꦺꦴꦠꦼꦤ꧀ꦏꦺꦴꦏ꧀ꦢꦩꦼꦭ꧀ꦮꦭꦸꦪꦤꦶꦁꦠꦶꦪꦁꦲꦶꦁꦏꦁꦱꦮꦼꦒ꧀ꦤꦤ꧀ꦝꦁꦱꦏꦶꦠ꧀꧈​ꦩꦭꦃꦩꦭꦃꦱꦱꦏꦶꦠ꧀ꦠꦶꦥꦸꦤ꧀ꦮꦲꦸꦱꦺꦴꦏ꧀ꦭꦗꦼꦁꦱꦪꦱꦔꦼꦠ꧀ꦠꦸꦮꦶꦤ꧀ꦩꦿꦺꦩꦺꦤ꧀꧉​ꦱꦤꦗꦤ꧀ꦱꦂꦗꦤꦏꦱ꧀ꦧꦸꦠ꧀ꦔꦶꦁꦒꦶꦭ꧀ꦱꦢꦺꦫꦺꦁꦢꦺꦫꦺꦁꦔꦶꦥꦸꦤ꧀ꦱꦩ꧀ꦥꦸꦤ꧀ꦲꦸꦤꦶꦔꦧꦶꦭꦶꦃꦲꦶꦁꦠꦤꦃꦔꦿꦶꦏꦸꦧꦝꦺꦲꦩꦁꦒꦶꦃꦲꦭꦔꦤ꧀ꦲꦸꦠꦮꦶꦒꦺꦴꦝꦉꦚ꧀ꦕꦤꦩꦮꦂꦤꦶꦮꦂꦤꦶ꧈​ꦲꦺꦮꦱꦩꦤ꧀ꦠꦼꦤ꧀ꦲꦶꦁꦒꦶꦃꦧꦺꦴꦠꦼꦤ꧀ꦲꦁꦒꦝꦃꦲꦶꦮꦼꦒꦃꦱꦼꦢꦾꦤꦶꦥꦸꦤ꧀ꦲꦶꦁꦏꦁꦛꦸꦏꦸꦭ꧀ꦱꦏꦶꦁꦩꦤꦃꦱꦸꦕꦶꦮꦲꦸꦧꦝꦺꦏꦠꦶꦤ꧀ꦢꦏ꧀ꦏꦏꦼꦤ꧀ꦏꦭꦪꦤ꧀ꦉꦤꦭꦤ꧀ꦲꦺꦏ꧀ꦭꦱ꧀ꦱꦶꦁꦩꦤꦃ꧉​ꦩꦼꦁꦒꦃꦲꦱ꧀ꦩꦤꦶꦁꦱꦂꦗꦤꦮꦲꦸꦠꦸꦮꦤ꧀ Albert Schweitêer꧈​ꦲꦶꦁꦏꦗꦮꦺꦤ꧀ꦲꦶꦁꦏꦁꦩꦼꦢꦭ꧀ꦲꦶꦁꦔꦗꦼꦁꦥꦸꦤꦶꦏ꧈​ꦧꦝꦺꦏꦕꦫꦶꦪꦺꦴꦱ꧀ꦱꦏꦼꦤ꧀ꦱꦮꦠꦮꦶꦱ꧀ꦏꦢꦺꦴꦱ꧀ꦥꦸꦤ꧀ꦢꦶꦧꦸꦢꦶꦢꦪꦤꦶꦥꦸꦤ꧀ꦠꦸꦮꦤ꧀ꦮꦲꦸ꧈​ꦲꦁꦒꦺꦤ꧀ꦤꦶꦥꦸꦤ꧀ꦱꦸꦏꦥꦶꦠꦸꦭꦸꦁꦔꦤ꧀ꦝꦠꦼꦁꦠꦶꦠꦶꦪꦁꦲꦶꦁꦠꦤꦃꦄꦥꦿꦶꦏꦃ꧉​ ꧋ꦱꦠꦸꦁꦒꦭ꧀ꦭꦶꦁꦱꦸꦢꦒꦂꦲꦶꦁꦏꦁꦩꦔꦽꦠꦺꦴꦱ꧀ꦝꦠꦼꦁꦈꦧꦠ꧀ꦲꦸꦧꦼꦠ꧀ꦠꦶꦁꦗꦩꦤ꧀꧉​ ꧋ꦕꦫꦶꦪꦺꦴꦱ꧀ꦲꦶꦁꦗꦼꦦꦁ꧉​ ꧋ꦲꦶꦁꦮꦼꦏ꧀ꦢꦭ꧀ꦱꦩꦤ꧀ꦠꦼꦤ꧀ꦥꦸꦤꦶꦏꦏꦊꦉꦱ꧀ꦲꦶꦁꦠꦲꦸꦤ꧀ 1865꧉​ Ippei Wakao꧈​ꦱꦠꦸꦁꦒꦶꦭ꧀ꦭꦶꦁꦱꦸꦢꦒꦂꦱꦸꦠꦿꦲꦶꦁꦑꦺꦥ꦳ꦸ (Kofu) ꦏꦭꦩꦲꦺꦴꦱ꧀ꦱꦼꦫꦠ꧀ꦱꦏꦶꦁꦏꦤ꧀ꦠꦺꦴꦂꦫꦶꦥꦸꦤ꧀ꦲꦶꦁꦪꦺꦴꦑꦺꦴꦲꦩ꧀ꦩꦃ (Yokohama) ꦭꦗꦼꦁꦲꦒꦫꦸꦤ꧀ꦢꦼꦭ꧀ꦭꦤ꧀꧉​ꦥꦔꦸꦤꦤ꧀ꦢꦶꦏꦤꦶꦥꦸꦤ꧀꧇​ꦌ꧈​ꦌ꧈​ꦢꦢꦶꦱꦲꦶꦏꦶꦒꦸꦥꦼꦂꦩꦺꦤ꧀ꦲꦔ꧀ꦭꦫꦁꦔꦶꦔꦶꦫꦶꦩ꧀ꦩꦏꦺꦱꦸꦠꦿꦏꦱꦂꦩꦼꦠꦸꦱꦏꦤꦒꦫ꧉​ ꧋ꦥꦫꦥꦸꦁꦒꦮꦤꦶꦥꦸꦤ꧀ꦱꦉꦁꦩꦶꦉꦁꦥꦁꦒꦫꦸꦤ꧀ꦢꦼꦭ꧀ꦭꦶꦁꦧꦤ꧀ꦢꦫꦤꦶꦥꦸꦤ꧀ꦮꦲꦸ꧈​ꦫꦲꦶꦤꦶꦥꦸꦤ꧀ꦭꦗꦼꦁꦱꦩꦶꦏꦠꦶꦔꦭ꧀ꦥꦸꦕꦼꦠ꧀꧉​ꦆꦁꦩꦺꦴꦁꦏꦱꦸꦠꦿꦏꦱꦂꦥꦸꦤꦶꦏꦥꦗꦼꦁꦔꦶꦥꦸꦤ꧀ꦲꦶꦁꦥꦢꦒꦁꦔꦤ꧀ꦫꦶꦏꦠ꧀ꦱꦔꦼꦠ꧀꧈​ꦱꦲꦉꦒꦶꦤꦶꦥꦸꦤ꧀ꦲꦸꦒꦶꦠꦤ꧀ꦱꦃꦩꦶꦤ꧀ꦝꦏ꧀ꦩꦶꦤ꧀ꦝꦏ꧀꧈​ꦲꦶꦁꦏꦁꦏꦛꦃꦥꦥꦗꦼꦁꦔꦤ꧀ꦤꦶꦥꦸꦤ꧀꧈​ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦏꦏꦶꦤ꧀ꦠꦸꦤ꧀ꦤꦏꦼꦤ꧀ꦩꦼꦢꦭ꧀ꦝꦠꦼꦁꦤꦒꦫꦶꦱꦤꦺꦱ꧀꧉​ꦩꦤꦮꦶꦲꦮꦶꦱ꧀ꦱꦤ꧀ꦮꦲꦸꦏꦠꦼꦠꦼꦥ꧀ꦥꦏꦼꦤ꧀꧈​ꦱꦩ꧀ꦥꦸꦤ꧀ꦠꦼꦩ꧀ꦠꦸꦲꦚ꧀ꦗꦭꦫꦶꦠꦤ꧀ꦝꦺꦴꦤꦶꦥꦸꦤ꧀ꦱꦸꦠꦿꦭꦁꦏꦸꦁꦱꦏꦶꦁꦏꦛꦃ꧈​ꦲꦶꦁꦮꦸꦱꦤꦉꦒꦶꦤꦶꦥꦸꦤ꧀ꦲꦶꦁꦒꦶꦃꦩꦸꦤ꧀ꦢꦸꦂꦱꦔꦼꦠ꧀꧉​ ꧋ꦏꦭꦥꦸꦤꦶꦏꦲꦶꦁꦒꦸꦝꦁꦔꦶꦥꦸꦤ꧀ꦠꦸꦮꦤ꧀ Wakao ꦏꦱ꧀ꦧꦸꦠ꧀ꦔꦶꦁꦒꦶꦭ꧀ꦱꦶꦩ꧀ꦥꦼꦤ꧀ꦱꦸꦠꦿꦏꦱꦂꦱꦏ꧀ꦭꦁꦏꦸꦁꦏꦛꦃꦲꦶꦁꦏꦁꦧꦝꦺꦏꦏꦶꦤ꧀ꦠꦸꦤ꧀ꦤꦏꦼꦤ꧀ꦱꦫꦤꦧꦲꦶꦠꦝꦠꦼꦁꦪꦺꦴꦑꦺꦴꦲꦩꦃ꧉​ꦥꦸꦤꦥꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦱꦒꦼꦢ꧀ꦏꦭꦩ꧀ꦥꦃꦲꦤ꧀ꦔꦭꦁꦲꦭꦁꦔꦶꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦢꦢꦺꦴꦱ꧀ꦧꦺꦴꦧꦿꦺꦴꦏ꧀꧈​ꦩꦤꦮꦶꦥꦔꦶꦤ꧀ꦠꦸꦤ꧀ꦤꦶꦥꦸꦤ꧀ꦱꦸꦠꦿꦲꦶꦁꦏꦁꦩꦼꦢꦭ꧀ꦝꦠꦼꦁꦱꦗꦮꦶꦤꦶꦁꦥꦿꦗꦮꦲꦸꦢꦶꦥꦸꦤ꧀ꦲꦮꦶꦱ꧀ꦱꦶꦢꦺꦤꦶꦁꦤꦒꦫꦶ꧉​ꦠꦶꦠꦶꦪꦁꦲꦶꦁꦏꦁꦱꦩꦶꦏꦒꦺꦠ꧀ꦮꦲꦸꦭꦗꦼꦁꦱꦩꦶꦲꦔ꧀ꦭꦶꦫꦶꦏ꧀ꦝꦠꦼꦁꦧꦤ꧀ꦢꦫꦤꦶ	Padamêlan Utami Punika Kêdah Dipun Ajèni Sawênèhing para sarjana wontên ingkang asring pitakèn makatên: punapa sawarnining jêjampi miturut kawruh kadhoktêran punika wontên paedahipun tumrap têtiyang ing tanah Jawi ngriki. Tuwuhing pitakenan kados ingkang kasbut ing nginggil punika kados inggih sampun layak kemawon, amargi pambudidayaning pamarentah murih têtiyang enggal nyuwuna pitulungan dhatêng dhoktêr, manawi kalêrês kataman ing sêsakit, punika kados botên kêndhat-kêndhat. Pambudinipun pamarentah wau inggih mila wontên wohipun, tăndha yêktinipun: saya dangu griya sakit ing pundi-pundi panggenan, saya kathah têtiyangipun ingkang sami dhatêng, prêlu ajêjampi. Awit saking pambudidayaning pamarentah saha saking saening pangupakaranipun para dhoktêr dhatêng têtiyang ingkang nandhang sakit, satêmah saya dangu kuwatosipun tiyang ajêjampi dhatêng dhoktêr, saya lajêng ical, saha têtiyang wau sami mindhak kapitadosanipun dhatêng kasagêdaning para dhoktêr. Ananging kapitadosan dhatêng dhoktêr wau tingalipun[2] tipis sangêt, jalaran manawi lajêng wontên tiyang ingkang kacariyosakên sagêd, kadosdene Kyai Bêdor utawi Kyai Pênthèt, lajêng kemawon atusan utawi ewon tiyang ingkang sami dhatêng ing kyai-kyai wau prêlu sumêdya ajêjampi. Saha lajêng kasupèn dhatêng dhoktêr. [Grafik] Nginggil punika gambaripun Kyai Pênthèt ing Kalasan. Ingkang punika pitakenanipun para sarjana kasbut nginggil mila inggih botên gampil wangsulanipun. Adamêl warasing tiyang sakit punika pancèn padamêlan ingkang sae sayêktos. Angudi dhatêng kasarasaning tiyang sadaya punika pancèn inggih utami sangêt, ananging èwêt pakèwêtipun inggih kathah sangêt. Kados ta: gugon tuhonipun tiyang, ajrih, kuwatos, botên pitados, gêsang ingkang botên miturut dhatêng wèting kasarasan badan, lan sasaminipun, punika sadaya, tamtu dados sănggarungginipun para dhoktêr ingkang sumêdya atêtulung. Ananging watak-watak ingkang botên prayogi makatên wau, kêdah dipun udi icalipun, kadosdene anggènipun para dhoktêr angudi icalipun sêsakit warni-warni ingkang tansah angrêridhu dhatêng kasarasaning tiyang, amila para dhoktêr inggih botên wajib wêgah utawi gêla, manawi amrangguli watak-watak ingkang sampun kasêrat ing nginggil wau, makatên punika manawi sêdyaning dhoktêr kanthi manah suci badhe anyarasakên kawontênanipun kawula ing tanah Indiya ngriki. Ing Kajawèn kados botên wontên awonipun upami angêwrat lêlabêtanipun satunggiling sarjana băngsa Eropah, ingkang suci manahipun, sampun anilar sanak sadhèrèkipun, anilar kamuktèn saha kasênênganipun ing donya, prêlu bidhal dhatêng tanah Aprikah, sumêdya angusadani têtiyang ing ngrika, ingkang kacariyos taksih sangêt bodhonipun saha nandhang sakit warni-warni. Dene usada-usada ingkang dipun pigunakakên ing têtiyang wau namung mêndhêt saking kapitadosanipun piyambak-piyambak kemawon, ingkang kathah sampun tamtu inggih: botên mathuk kalihan anggêr-anggêripun kasarasaning badan, amila usada-usadanipun wau botên kok damêl waluyaning tiyang ingkang sawêg nandhang sakit, malah-malah sêsakitipun wau sok lajêng saya sangêt tuwin mrèmèn. Sanajan sarjana kasbut nginggil sadèrèng-dèrèngipun sampun uninga bilih ing tanah ngriku badhe amanggih alangan utawi godha rêncana mawarni-warni, ewasamantên inggih botên anggadhahi wêgah sêdyanipun ingkang thukul saking manah suci wau badhe katindakakên kalayan rêna lan eklasing manah. Mênggah asmaning sarjana wau Tuwan Albert Schweitêer, ing Kajawèn ingkang mêdal ing ngajêng punika, badhe kacariyosakên sawatawis kadospundi budidayanipun tuwan wau, anggènipun suka pitulungan dhatêng têtiyang ing tanah Aprikah. Satunggaling Sudagar Ingkang Mangrêtos Dhatêng Ubat-ubêting Jaman.
[ 527 ]ꦥꦸꦤ꧀꧈​ꦧꦝꦺꦲꦚꦸꦩꦼꦉꦥ꧀ꦥꦶ꧇​ꦥꦸꦤꦥꦧꦤ꧀ꦢꦫꦤꦶꦥꦸꦤ꧀ꦗꦭꦂꦫꦤ꧀ꦱꦏꦶꦁꦥꦿꦏꦮꦶꦱ꧀ꦥꦸꦤꦶꦏꦏꦠꦶꦔꦭ꧀ꦏꦸꦮꦠꦺꦴꦱ꧀꧉​ꦲꦤꦔꦶꦁꦱꦼꦩꦸꦤꦶꦥꦸꦤ꧀ꦲꦶꦁꦒꦶꦃꦧꦺꦴꦠꦼꦤ꧀ꦏꦸꦮꦠꦺꦴꦱ꧀꧈​ꦏꦺꦴꦱꦺꦴꦏ꧀ꦮꦁꦱꦸꦭ꧀ꦭꦶꦥꦸꦤ꧀ꦩꦭꦃꦏꦠꦶꦔꦭ꧀ꦧꦶꦔꦃꦏꦺꦩꦮꦺꦴꦤ꧀꧉​ ꧋ꦱꦸꦢꦒꦂꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧇​ꦥꦿꦏꦫꦏꦶꦪꦶꦩꦭꦃꦲꦚꦼꦤꦼꦁꦔꦏꦺ꧈​ꦩꦫꦭꦪꦁꦲꦶꦏꦶꦮꦕꦤꦼꦤ꧀꧉​ꦱꦼꦫꦠ꧀ꦭꦗꦼꦁꦏꦱꦸꦏꦑꦏꦼꦤ꧀ꦝꦠꦼꦁꦠꦶꦠꦶꦪꦔꦶꦥꦸꦤ꧀ꦏꦭꦪꦤ꧀ꦝꦔꦤ꧀ꦤꦶꦁꦩꦤꦃꦱꦲꦭꦗꦼꦁꦒꦸꦩꦸꦗꦼꦁꦱꦗꦏ꧀ꦱꦼꦤꦼꦁ꧉​ꦲꦤꦔꦶꦁꦏꦭꦧꦤ꧀ꦢꦫꦤꦶꦥꦸꦤ꧀ꦒꦸꦩꦸꦗꦼꦁ꧈​ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦠꦸꦩꦸꦠ꧀ꦒꦸꦩꦸꦗꦼꦁ꧉​ꦧꦺꦢꦤꦶꦁꦲꦤ꧀ꦠꦮꦶꦱ꧀ꦱꦶꦥꦸꦤ꧀ꦧꦧꦪꦲꦶꦁꦏꦁꦧꦝꦺꦲꦤ꧀ꦝꦠꦼꦁꦔꦶꦏꦭꦶꦪꦤ꧀ꦱꦗꦏ꧀ꦧꦶꦔꦃꦲꦶꦥꦸꦤ꧀ꦱꦸꦢꦒꦂ꧈​ꦥꦸꦤꦶꦏꦲꦢꦩꦼꦭ꧀ꦏꦒꦺꦠ꧀ꦠꦶꦁꦠꦶꦠꦶꦪꦁꦮꦲꦸ꧈​ꦩꦶꦭꦭꦗꦼꦁꦱꦩꦶꦧꦺꦴꦠꦼꦤ꧀ꦱꦒꦼꦢ꧀ꦔꦸꦕꦥ꧀꧉​ ꧋ꦱꦸꦢꦒꦂꦥꦶꦠꦏꦺꦤ꧀ꦝꦠꦼꦁꦥꦫꦥꦸꦁꦒꦮꦤꦶꦥꦸꦤ꧀꧇​ꦏꦥꦿꦶꦪꦺꦩꦸꦁꦒꦸꦃꦥꦤꦼꦩꦸꦩꦸꦧꦧ꧀ꦏꦶꦪꦶ꧉​ꦲꦏꦸꦏꦧꦺꦃꦱꦲꦶꦏꦶꦲꦺꦴꦫꦩꦸꦁꦏꦸꦢꦸꦤꦸꦏꦺꦴꦤꦶꦱꦸꦠꦿꦲꦶꦁꦏꦺꦤꦺꦧꦲꦺ꧈​ꦲꦤꦔꦶꦁꦲꦸꦒꦏꦸꦢꦸꦠꦸꦏꦸꦲꦶꦁꦔꦼꦤ꧀ꦢꦶꦲꦼꦤ꧀ꦢꦶꦥꦁꦒꦺꦴꦤ꧀ꦤꦤ꧀꧉​ ꧋ꦲꦶꦁꦱꦭꦗꦼꦁꦔꦶꦥꦸꦤ꧀ꦱꦸꦢꦒꦂꦭꦗꦼꦁꦱꦸꦏꦥꦿꦺꦤ꧀ꦠꦃꦝꦠꦼꦁꦠꦶꦠꦶꦪꦁꦔꦶꦥꦸꦤ꧀ꦱꦸꦥꦢꦺꦴꦱ꧀ꦱꦝꦶꦪꦲꦏꦺꦱꦃꦤꦸꦩ꧀ꦧꦱꦶꦱꦸꦠꦿ꧉​ꦠꦶꦠꦶꦪꦁꦔꦶꦥꦸꦤ꧀ꦱꦩꦶꦏꦒꦺꦠ꧀ꦩꦭꦶꦃꦱꦲꦭꦗꦼꦁꦱꦩꦶꦤꦶꦔꦭ꧀ꦭꦶꦝꦠꦼꦁꦧꦤ꧀ꦢꦫꦤꦶꦥꦸꦤ꧀꧉​ꦮꦶꦕꦤ꧀ꦠꦼꦤꦶꦥꦸꦤ꧀꧇​ꦏꦢꦺꦴꦱ꧀ꦥꦸꦤ꧀ꦢꦶꦥꦔꦤ꧀ꦢꦶꦏꦥꦚ꧀ꦗꦼꦤꦼꦁꦔꦤ꧀꧈​ꦧꦤ꧀ꦢꦫ꧈​ꦥꦚ꧀ꦗꦼꦤꦼꦁꦔꦤ꧀ꦏꦂꦱꦧꦝꦺꦤꦸꦩ꧀ꦧꦱꦶꦱꦸꦠꦿꦩꦭꦶꦃ꧉​ꦱꦭꦩꦶꦤꦶꦥꦸꦤ꧀ꦲꦮꦶꦱ꧀ꦱꦤ꧀ꦤꦒꦫꦶꦔꦼꦢꦭ꧀ꦭꦏꦼꦤ꧀ꦱꦸꦠꦿꦝꦠꦼꦁꦗꦮꦶꦠꦏ꧀ꦱꦶꦃꦠꦼꦠꦼꦥ꧀꧈​ꦉꦒꦶꦤꦶꦁꦱꦸꦠꦿꦠꦩ꧀ꦠꦸꦠꦼꦫꦸꦱ꧀ꦲꦁꦒꦺꦤ꧀ꦤꦶꦥꦸꦤ꧀ꦩꦼꦝꦏ꧀꧈​ꦭꦤ꧀ꦧꦺꦴꦠꦼꦤ꧀ꦧꦝꦺꦮꦁꦱꦸꦭ꧀ꦏꦢꦺꦴꦱ꧀ꦲꦶꦁꦏꦁꦱꦸꦮꦲꦸꦮꦲꦸꦩꦭꦶꦃ꧉​ ꧋ꦧꦤ꧀ꦢꦫꦤꦶꦥꦸꦤ꧀ꦲꦩꦁꦱꦸꦭ꧀ꦭꦶ꧇​ꦪꦧꦼꦤꦼꦂ꧈​ꦪꦺꦤ꧀ꦉꦒꦤꦺꦧꦏꦭ꧀ꦱꦸꦢ꧈​ꦲꦤꦔꦶꦁꦱꦶꦁꦢꦏ꧀ꦢꦼꦊꦁ꧇​ꦲꦶꦁꦠꦼꦩ꧀ꦧꦺꦧꦸꦫꦶꦤꦺ꧈​ꦩꦸꦭꦤꦺꦲꦏꦸꦩꦿꦺꦤ꧀ꦠꦃꦱꦸꦥꦪꦤꦸꦏꦺꦴꦤꦤꦱꦸꦠꦿꦏꦧꦺꦃ꧉​ ꧋꧋ꦮꦁꦱꦸꦭ꧀ꦭꦤ꧀ꦤꦶꦁꦧꦤ꧀ꦢꦫꦤꦶꦥꦸꦤ꧀ꦲꦶꦁꦏꦁꦱꦗꦏ꧀ꦱꦧꦂꦥꦸꦤꦶꦏ꧈​ꦱꦪꦲꦤꦸꦮꦸꦃꦲꦏꦼꦤ꧀ꦒꦸꦩꦸꦤ꧀ꦤꦶꦁꦠꦶꦠꦶꦪꦁꦔꦶꦥꦸꦤ꧀꧉​ꦠꦶꦠꦶꦪꦁꦮꦲꦸꦱꦩꦶꦧꦺꦴꦠꦼꦤ꧀ꦩꦔꦽꦠꦺꦴꦱ꧀ꦱꦧꦧ꧀ꦧꦶꦥꦸꦤ꧀꧈​ꦢꦺꦤꦺꦧꦤ꧀ꦢꦫꦤꦶꦥꦸꦤ꧀ꦩꦼꦏ꧀ꦱꦧꦝꦺꦤꦸꦩ꧀ꦧꦱ꧀ꦱꦶꦱꦸꦠꦿ꧈​ꦲꦶꦁꦏꦁꦧꦺꦴꦠꦼꦤ꧀ꦏꦺꦔꦶꦁꦏꦠꦼꦩ꧀ꦠꦺꦴꦑꦏꦼꦤ꧀꧈​ꦧꦶꦭꦶꦃꦉꦒꦶꦤꦶꦁꦧꦫꦁꦧꦫꦁꦥꦸꦤꦶꦏꦧꦝꦺꦲꦺꦁꦒꦭ꧀ꦩꦶꦤ꧀ꦝꦏ꧀꧉​ꦱꦠꦼꦩꦃꦭꦗꦼꦁꦱꦩꦶꦏꦸꦮꦠꦺꦴꦱ꧀꧈​ꦩꦤꦮꦶꦧꦤ꧀ꦢꦫꦤꦶꦥꦸꦤ꧀ꦗꦭꦂꦫꦤ꧀ꦱꦏꦶꦁꦧꦧꦪ꧈​ꦲꦶꦁꦏꦁꦲꦤ꧀ꦝꦠꦼꦁꦔꦶꦥꦸꦤꦶꦏ꧈​ꦭꦗꦼꦁꦢꦢꦺꦴꦱ꧀ꦲꦺꦮꦃꦲꦺꦔꦼꦠ꧀ꦠꦤ꧀ꦤꦶꦥꦸꦤ꧀꧉​ ꧋ꦲꦤꦔꦶꦁ Wakao ꦧꦺꦴꦠꦼꦤ꧀ꦥꦶꦱꦤ꧀ꦥꦶꦱꦤ꧀ꦲꦺꦮꦃꦲꦺꦔꦼꦠ꧀ꦠꦤ꧀ꦤꦶꦥꦸꦤ꧀ꦏꦢꦺꦴꦱ꧀ꦢꦺꦤꦺꦲꦶꦁꦏꦁꦢꦶꦥꦸꦤ꧀ꦏꦸꦮꦠꦺꦴꦱ꧀ꦱꦏꦼꦤ꧀ꦢꦺꦤꦶꦁꦥꦫꦥꦸꦁꦒꦮꦤꦶꦥꦸꦤ꧀꧉​ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦱꦒꦼꦢ꧀ꦲꦚꦸꦩꦼꦉꦥ꧀ꦥꦶꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦱꦢꦪ꧈​ꦱꦲꦲꦩꦼꦱ꧀ꦛꦺꦑꦏꦼꦤ꧀꧈​ꦧꦶꦭꦶꦃꦲꦶꦁꦠꦼꦩ꧀ꦧꦺꦧꦝꦺꦲꦒꦼꦁꦏꦲꦸꦤ꧀ꦠꦸꦔꦤ꧀ꦤꦶꦥꦸꦤ꧀꧉​ꦩꦶꦠꦸꦫꦸꦠ꧀ꦥꦩꦁꦒꦶꦃꦲꦶꦥꦸꦤ꧀ Wakao꧈​ꦲꦁꦒꦺꦤ꧀ꦤꦶꦁꦒꦸꦥꦼꦂꦩꦺꦤ꧀ꦲꦔꦮꦶꦱ꧀ꦱꦶꦮꦼꦢꦭ꧀ꦭꦶꦁꦱꦸꦠꦿꦱꦏꦶꦁꦤꦒꦫꦶ꧈​ꦥꦸꦤꦶꦏꦲꦩꦂꦒꦶꦏꦠꦫꦶꦏ꧀ꦱꦏꦶꦁꦫꦲꦺꦴꦱ꧀ꦱꦼꦱꦼꦔꦶꦠ꧀ꦠꦤ꧀ꦝꦠꦼꦁꦱꦢꦪꦧꦺꦴꦁꦱꦲꦶꦁꦏꦁꦲꦱ꧀ꦭꦶꦩꦺꦴꦚ꧀ꦕꦲꦶꦁꦮꦼꦏ꧀ꦢꦭ꧀ꦥꦸꦤꦶꦏ꧈​ꦲꦶꦁꦏꦁꦮꦸꦱꦤꦤꦶꦥꦸꦤ꧀ꦧꦝꦺꦲꦢꦩꦼꦭ꧀ꦫꦶꦱꦏ꧀ꦏꦶꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦥꦚꦢꦺꦪꦤ꧀ꦲꦶꦁꦥꦼꦏꦼꦤ꧀ꦲꦩꦂꦒꦶꦲꦶꦤ꧀ꦝꦏ꧀ꦏꦶꦁꦉꦉꦒꦺꦤ꧀ꦮꦲꦸ꧉​ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦠꦩ꧀ꦠꦸꦲꦢꦩꦼꦭ꧀ꦱꦸꦱꦃꦱꦲꦏꦫꦸꦒꦶꦪꦤꦶꦥꦸꦤ꧀ꦥꦫꦱꦸꦢꦒꦂꦭꦤ꧀ꦥꦫꦲꦶꦁꦏꦁꦒꦝꦃꦥꦧꦿꦶꦏ꧀꧈​ꦥꦸꦁꦏꦱ꧀ꦱꦤ꧀ꦤꦶꦥꦸꦤ꧀ꦲꦢꦩꦼꦭ꧀ꦉꦏꦲꦺꦴꦱ꧀ꦲꦸꦠꦮꦶꦔꦸꦤ꧀ꦢꦸꦂꦫꦏꦼꦤ꧀ꦝꦠꦼꦁꦏꦩꦗꦼꦁꦔꦤ꧀ꦤꦶꦁꦏꦱꦸꦒꦶꦃꦲꦤ꧀ꦤꦶꦥꦸꦤ꧀ꦧꦺꦴꦁꦱꦗꦼꦦꦁ꧉​ꦗꦭꦂꦫꦤ꧀ꦱꦏꦶꦁꦥꦸꦤꦶꦏ꧈​Wakao ꦱꦒꦼꦢ꧀ꦲꦤꦼꦩ꧀ꦠꦺꦴꦑꦏꦼꦤ꧀꧈​ꦧꦶꦭꦶꦃꦲꦮꦶꦱ꧀ꦱꦤ꧀ꦮꦲꦸꦠꦩ꧀ꦠꦸꦧꦝꦺꦲꦺꦁꦒꦭ꧀ꦏꦕꦧꦸꦠ꧀꧈​ꦱꦸꦥꦢꦺꦴꦱ꧀ꦱꦒꦼꦢ꧀ꦢꦭꦗꦼꦁꦤꦸꦮꦸꦃꦲꦏꦼꦤ꧀ꦲꦶꦤ꧀ꦝꦏ꧀ꦏꦶꦁꦉꦒꦶꦤꦶꦥꦸꦤ꧀ꦱꦸꦠꦿ꧉​ꦲꦩꦶꦭꦲꦤꦸꦩ꧀ꦧꦱ꧀ꦱꦶꦱꦸꦠꦿꦱ [ 528 ]ꦩꦁꦏꦺꦥꦸꦤꦶꦏꦏꦢꦺꦴꦱ꧀ꦲꦶꦁꦒꦶꦃꦥꦼꦂꦭꦸꦱꦪꦼꦏ꧀ꦠꦺꦴꦱ꧀꧉​ ꧋ꦥꦩꦁꦒꦶꦃꦲꦶꦥꦸꦤ꧀ꦱꦸꦢꦒꦂꦮꦲꦸꦊꦉꦱ꧀꧈​ꦲꦮꦶꦠ꧀ꦱꦏꦶꦁꦠꦶꦤ꧀ꦢꦏ꧀ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏ꧈​ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦱꦒꦼꦢ꧀ꦲꦁꦱꦭ꧀ꦧꦼꦧꦛꦺꦤ꧀ꦱꦲꦺꦱꦔꦼꦠ꧀꧈​ꦲꦶꦁꦏꦁꦲꦚ꧀ꦗꦭꦂꦫꦶꦮꦶꦠ꧀ꦠꦶꦁꦢꦼꦂꦧꦭꦤꦶꦥꦸꦤ꧀꧉​ꦲꦶꦁꦱꦩꦁꦏꦺꦥꦢꦒꦁꦔꦤ꧀ꦒꦝꦃꦲꦤ꧀ꦤꦶꦥꦸꦤ꧀ꦱꦸꦢꦒꦂꦏꦱ꧀ꦧꦸꦠ꧀ꦔꦶꦁꦒꦶꦭ꧀꧈​ꦱꦩꦶꦱꦩꦶꦏꦧꦸꦢꦶꦢꦪꦤ꧀ꦠꦸꦩꦿꦥ꧀ꦲꦶꦁꦤꦒꦫꦶꦗꦼꦦꦁ꧈​ꦏꦊꦧꦼꦠ꧀ꦲꦶꦁꦏꦁꦲꦒꦼꦁꦥꦶꦪꦩ꧀ꦧꦏ꧀ꦥꦔꦸꦮꦱꦤꦶꦥꦸꦤ꧀꧉​ ꧋ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦲꦶꦁꦏꦫꦤ꧀ꦠꦶꦤꦎꦤꦽꦱ꧀꧉​ ꧋ꦠꦶꦪꦁꦲꦶꦁꦏꦁꦧꦝꦺꦤꦸꦩ꧀ꦥꦏ꧀ꦧꦲꦶꦠꦏꦥꦿꦶꦏ꧀ꦱꦩꦭꦶꦃꦕꦕꦂꦫꦤꦶꦥꦸꦤ꧀꧉​ ꧋ꦠꦶꦠꦶꦪꦁꦲꦗꦶꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦏꦥꦿꦶꦏ꧀ꦱꦕꦕꦂꦫꦤꦶꦥꦸꦤ꧀ꦥꦁꦏꦠ꧀ꦝꦠꦼꦁꦧꦲꦶꦠ꧉​ ꧋ꦥꦫꦠꦶꦠꦶꦪꦁꦲꦗꦶꦱꦩꦶꦩꦶꦁꦒꦃꦝꦠꦼꦁꦏꦥꦭ꧀ "Madioen". ꧋ꦏꦥ꧀ꦠꦶꦤ꧀ꦧꦲꦶꦠꦏꦥꦭ꧀ "Madioen" ꦏꦭꦶꦪꦤ꧀ Inspecteur Rott. Lloyd.	Cariyos ing Jêpang Ing wêkdal samantên punika kalêrês ing taun 1865. Ippei Wakao, satunggiling sudagar sutra ing Kefu (Kofu) kala maos sêrat saking kantoripun ing Yokohamah (Yokohama) lajêng agarundêlan. Pangunandikanipun: e, e, dadi saiki gupêrmèn anglarangi ngirimake sutra kasar mêtu saka nagara. Para punggawanipun sarêng mirêng panggarundêling bandaranipun wau, rainipun lajêng sami katingal pucêt. Ing măngka sutra kasar punika pajêngipun ing padagangan rikat sangêt, saha rêginipun ugi tansah mindhak-mindhak, ingkang kathah pêpajênganipun, inggih punika ingkang kakintunakên mêdal dhatêng nagari sanès. Manawi awisan wau katêtêpakên, sampun têmtu anjalari tandhonipun sutra langkung saking kathah, ing wusana rêginipun inggih mundur sangêt. Kala punika ing gudhangipun Tuwan Wakao kasbut nginggil simpên sutra kasar saklangkung kathah ingkang badhe kakintunakên sarana baita dhatêng Yokohamah. Punapa kintên-kintên sagêd kalampahan ngalang-alangi sampun ngantos dados bobrok, manawi pangintunipun sutra ingkang mêdal dhatêng sajawining praja wau dipun awisi dening nagari. Têtiyang ingkang sami kagèt wau lajêng sami anglirik dhatêng bandaranipun, badhe anyumêrêpi: punapa bandaranipun jalaran saking prakawis punika katingal kuwatos. Ananging sêmunipun inggih botên kuwatos, kosokwangsulipun malah katingal bingah kemawon. Sudagar wicantên makatên: prakara kiyi malah anyênêngake, mara layang iki wacanên. Sêrat lajêng kasukakakên dhatêng têtiyangipun kalayan dhanganing manah saha lajêng gumujêng sajak sênêng. Ananging kala bandaranipun gumujêng, botên wontên tiyang ingkang tumut gumujêng. Bedaning antawisipun bêbaya ingkang badhe andhatêngi kalihan sajak bingahipun sudagar, punika adamêl kagèting têtiyang wau, mila lajêng sami botên sagêd ngucap. Sudagar pitakèn dhatêng para punggawanipun: Kapriye mungguh panêmumu bab kiyi. Aku kabèh saiki ora mung kudu nukoni sutra ing kene bae, ananging uga kudu tuku ing ngêndi-êndi panggonan. Ing salajêngipun sudagar lajêng suka prentah dhatêng têtiyangipun supados sadhiyaa kesah numbasi sutra. Têtiyangipun sami kagèt malih saha lajêng sami ningali dhatêng bandaranipun. Wicantênipun: Kadospundi pangandika panjênêngan, bandara, panjênêngan karsa badhe numbasi sutra malih. Salaminipun awisan nagari ngêdalakên sutra dhatêng jawi taksih têtêp, rêgining sutra tamtu têrus anggènipun mêdhak, lan botên badhe wangsul kados ingkang suwau-wau malih. Bandaranipun amangsuli: Ya bênêr, yèn rêgane bakal suda, ananging sing dak dêlêng: ing têmbe burine, mulane aku mrentah supaya nukonana sutra kabèh. Wangsulaning bandaranipun ingkang sajak sabar punika, saya anuwuhakên gumuning têtiyangipun. Têtiyang wau sami botên mangrêtos sababipun, dene bandaranipun mêksa badhe numbasi sutra, ingkang botên kenging katêmtokakên, bilih rêgining barang-barang punika badhe enggal mindhak. Satêmah lajêng sami kuwatos, manawi bandaranipun jalaran saking bêbaya, ingkang andhatêngi punika, lajêng dados ewah èngêtanipun. Ananging Wakao botên pisan-pisan ewah èngêtanipun kadosdene ingkang dipun kuwatosakên dening para punggawanipun. Piyambakipun sagêd anyumêrêpi kawontênanipun sadaya, saha amêsthèkakên, bilih ing têmbe badhe agêng kauntunganipun. Miturut pamanggihipun Wakao, anggèning gupêrmèn angawisi wêdaling sutra saking nagari, punika amargi katarik saking raos sêsêngitan dhatêng sadaya băngsa ingkang asli mănca ing wêkdal punika, ingkang wusananipun badhe adamêl risaking kawontênaning panyadean ing pêkên amargi indhaking rêrêgèn wau. Ingkang makatên punika tamtu adamêl susah saha karugianipun para sudagar lan para ingkang gadhah pabrik, pungkasanipun adamêl rêkaos utawi ngundurakên dhatêng kamajênganing kasugihanipun băngsa Jêpang. Jalaran saking punika, Wakao sagêd anêmtokakên, bilih awisan wau tamtu badhe enggal kacabut, supados sagêda lajêng nuwuhakên indhaking rêginipun sutra. Amila anumbasi sutra samangke punika kados inggih pêrlu sayêktos. Pamanggihipun sudagar wau lêrês, awit saking tindak ingkang makatên punika, piyambakipun sagêd angsal bêbathèn sae sangêt, ingkang anjalari witing dêrbalanipun. Ing samangke padagangan gadhahanipun sudagar kasbut nginggil, sami-sami kabudidayan tumrap ing nagari Jêpang, kalêbêt ingkang agêng piyambak panguwasanipun.
[ 529 ]꧋ꦗꦒꦢ꧀ꦢꦶꦁꦱꦠꦺꦴꦏꦺꦮꦤ꧀꧉​ ꧋ ꦧꦧ꧀ ꦒꦗꦃ꧉​ ꧋​ꦒꦗꦃꦥꦸꦤꦶꦏꦱꦠꦸꦁꦒꦶꦭ꧀ꦭꦶꦁꦏꦺꦮꦤ꧀ꦲꦶꦁꦏꦁꦲꦒꦼꦁ꧈​ꦲꦶꦁꦒꦶꦭ꧀꧈​ꦒꦭꦏ꧀ꦲꦤꦔꦶꦁꦠꦸꦠꦸꦠ꧀ꦠꦤ꧀꧈​ꦱꦤꦢꦾꦤ꧀ꦏꦠꦶꦔꦭ꧀ꦭꦶꦥꦸꦤ꧀ꦱꦗꦏ꧀ꦏ꧀ꦭꦸꦭꦂꦏ꧀ꦭꦸꦭꦸꦂꦱꦲꦧꦺꦴꦝꦺꦴ꧈​ꦲꦤꦔꦶꦁꦒꦗꦃꦥꦸꦤꦶꦏꦱꦗꦠꦺꦴꦱ꧀ꦱꦶꦥꦸꦤ꧀ꦩꦿꦺꦴꦗꦺꦴꦭ꧀ꦱꦏꦶꦁꦥꦼꦛꦺꦏ꧀꧈​ꦲꦮꦶꦠ꧀ꦭꦤ꧀ꦠꦶꦥ꧀ꦥꦶꦁꦥꦁꦒꦿꦲꦶꦠ꧀ꦠꦲꦔ꧀ꦭꦁꦏꦸꦁꦔꦶꦏꦺꦮꦤ꧀ꦏꦺꦮꦤ꧀ꦱꦤꦺꦱ꧀ꦱꦶꦥꦸꦤ꧀꧉​ ꧋ꦒꦼꦱꦁꦔꦶꦁꦒꦗꦃꦮꦺꦴꦤ꧀ꦠꦼꦤ꧀ꦲꦶꦁꦱꦊꦧꦼꦠ꧀ꦠꦶꦁꦮꦤ꧉​ ꧋ꦏꦗꦮꦶꦥꦸꦤꦶꦏ꧈​ꦧꦶꦭꦶꦃꦩꦶꦫꦶꦢ꧀ꦥꦶꦫꦤ꧀ꦠꦺꦴꦱ꧀ꦥꦼꦥꦺꦫꦔꦤ꧀ꦤꦶꦁꦧꦢꦤ꧀ꦤꦶꦥꦸꦤ꧀꧈​ꦒꦗꦃꦥꦸꦤꦶꦏꦠꦩ꧀ꦠꦸꦧꦺꦴꦠꦼꦤ꧀ꦱꦒꦼꦢ꧀ꦠꦸꦩꦤ꧀ꦢꦁꦲꦶꦁꦢꦩꦼꦭ꧀ꦲꦩꦼꦩꦼꦤ꧀ꦝꦼꦠ꧀ꦧꦫꦁꦲꦶꦁꦏꦁꦲꦭꦸꦱ꧀ꦲꦭꦸꦱ꧀꧉​ꦥꦤꦶꦠꦶꦏ꧀ꦏꦤ꧀ꦲꦶꦁꦏꦁꦩꦏꦠꦼꦤ꧀ꦮꦲꦸ꧈​ꦱꦸꦭꦪꦏꦭꦶꦪꦤ꧀ꦚꦠꦤꦶꦥꦸꦤ꧀꧈​ꦗꦭꦂꦫꦤ꧀ꦒꦗꦃꦥꦸꦤꦶꦏꦲꦶꦁꦒꦶꦃꦱꦒꦼꦢ꧀ꦩꦼꦤ꧀ꦝꦼꦠ꧀ꦧꦫꦁꦧꦫꦁꦲꦶꦁꦏꦁꦲꦭꦸꦯꦭꦸꦱ꧀꧈​ꦲꦩꦂꦒꦶꦲꦶꦁꦥꦸꦕꦸꦏ꧀ꦏꦶꦁꦠꦼꦭꦭꦺꦮꦺꦴꦤ꧀ꦠꦼꦤ꧀ꦥꦶꦫꦤ꧀ꦠꦺꦴꦱ꧀ꦏꦢꦺꦴꦱ꧀ꦢꦺꦤꦺꦢꦫꦶꦗꦶꦤꦶꦁꦩꦤꦸꦱ꧉​ ꧋ꦩꦼꦁꦒꦃꦢꦸꦤꦸꦁꦔꦶꦥꦸꦤ꧀ꦒꦗꦃꦥꦸꦤꦶꦏ꧈​ꦮꦺꦴꦤ꧀ꦠꦼꦤ꧀ꦲꦶꦁꦮꦤꦲꦶꦁꦏꦁꦲꦒꦼꦁꦲꦶꦁꦠꦤꦃꦯꦸꦩꦠꦿꦃ꧈​ꦠꦤꦃꦄꦥꦿꦶꦏꦃ꧈​ꦠꦤꦃꦲꦶꦤ꧀ꦝꦸꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉​ꦢꦺꦤꦺꦒꦼꦱꦁꦔꦶꦥꦸꦤ꧀ꦱꦩꦶꦲꦒꦼꦒꦿꦺꦴꦩ꧀ꦧꦺꦴꦭ꧀ꦭꦤ꧀ꦏꦛꦃ꧈​ꦱꦲꦭꦶꦩꦿꦃꦲꦶꦥꦸꦤ꧀ꦲꦸꦒꦶꦱꦩꦶꦢꦶꦥꦸꦤ꧀ꦏꦼꦥꦭꦤ꧀ꦤꦶꦒꦗꦃꦲꦶꦁꦏꦁꦲꦸꦩꦸꦂꦫꦶꦥꦸꦤ꧀ꦱꦩ꧀ꦥꦸꦤ꧀ꦱꦼꦥꦸꦃꦱꦲꦲꦶꦁꦏꦁꦲꦒꦼꦁꦥꦶꦪꦩ꧀ꦧꦏ꧀ꦭꦤ꧀ꦏꦶꦪꦠ꧀꧉​ꦩꦤꦮꦶꦥꦶꦤꦸꦗꦸꦏꦊꦉꦱ꧀ꦱꦩꦶꦱꦧ꧈​ꦥꦸꦤꦶꦏꦭꦩ꧀ꦥꦃꦲꦶꦥꦸꦤ꧀ꦲꦶꦁꦒꦶꦃꦠꦤ꧀ꦱꦃꦒꦼꦒꦿꦺꦴꦩ꧀ꦧꦺꦴꦭ꧀ꦭꦤ꧀ꦧꦺꦴꦠꦼꦤ꧀ꦥꦸꦫꦸꦤ꧀ꦲꦥꦶꦱꦃꦥꦶꦱꦃ꧈​ꦢꦢꦺꦴꦱ꧀ꦲꦶꦁꦏꦁꦱꦩꦶꦏ꧀ꦭꦁꦏꦸꦁꦔꦤ꧀꧈​ꦲꦶꦁꦒꦶꦃꦭꦗꦼꦁꦏꦠꦶꦔꦭ꧀ꦕꦼꦛꦥꦠꦶꦭꦱ꧀ꦱꦤ꧀ꦤꦶꦥꦸꦤ꧀꧈​ꦲꦩꦂꦒꦶꦱꦲꦸꦥꦩꦶꦲꦶꦁꦏꦁꦢꦶꦥꦸꦤ꧀ꦠꦿꦗꦁꦭꦩ꧀ꦥꦃꦲꦶꦥꦸꦤ꧀ꦮꦲꦸꦮꦤꦧꦼꦧꦺꦴꦤ꧀ꦝꦺꦴꦠ꧀ꦠꦤ꧀꧈​ꦲꦶꦁꦔꦿꦶꦏꦸꦮꦶꦠ꧀ꦮꦶꦠ꧀ꦠꦤ꧀ꦤꦶꦥꦸꦤ꧀ꦱꦲꦛꦼꦛꦸꦏꦸꦭ꧀ꦭꦤ꧀ꦲꦶꦁꦏꦁꦲꦭꦶꦛꦭꦶꦠ꧀ꦱꦩꦶꦉꦧꦃꦥꦠꦶꦁꦱꦸꦭꦪꦃ꧈​ꦢꦢꦺꦴꦱ꧀ꦮꦫꦢꦶꦤ꧀ꦏꦢꦺꦴꦱ꧀ꦢꦺꦤꦺꦩꦂꦒꦶꦲꦒꦼꦁ꧈​ꦲꦩꦶꦭꦩꦤꦮꦶꦮꦺꦴꦤ꧀ꦠꦼꦤ꧀ꦠꦼꦠꦤꦼꦩ꧀ꦩꦤ꧀ꦤꦶꦥꦸꦤ꧀ꦠꦶꦠꦶꦪꦁꦲꦶꦁꦝꦸꦱꦸꦤ꧀ꦱꦕꦼꦭꦏ꧀ꦏꦶꦥꦸꦤ꧀ꦔꦿꦶꦏꦸꦏꦠꦿꦗꦁꦢꦺꦤꦶꦁ	Kawontênanipun ing Karantina Onrês. [Grafik] Tiyang ingkang badhe numpak baita kapriksa malih cacaranipun. [Grafik] Têtiyang haji sasampunipun kapriksa cacaranipun pangkat dhatêng baita. [Grafik] Para têtiyang haji sami minggah dhatêng kapal "Madioen". [Grafik] Kaptin baita kapal "Madioen" kalihan Inspecteur Rott. Lloyd.
[ 529 ]꧋ꦗꦒꦢ꧀ꦢꦶꦁꦱꦠꦺꦴꦏꦺꦮꦤ꧀꧉​ ꧋ ꦧꦧ꧀ ꦒꦗꦃ꧉​ ꧋​ꦒꦗꦃꦥꦸꦤꦶꦏꦱꦠꦸꦁꦒꦶꦭ꧀ꦭꦶꦁꦏꦺꦮꦤ꧀ꦲꦶꦁꦏꦁꦲꦒꦼꦁ꧈​ꦲꦶꦁꦒꦶꦭ꧀꧈​ꦒꦭꦏ꧀ꦲꦤꦔꦶꦁꦠꦸꦠꦸꦠ꧀ꦠꦤ꧀꧈​ꦱꦤꦢꦾꦤ꧀ꦏꦠꦶꦔꦭ꧀ꦭꦶꦥꦸꦤ꧀ꦱꦗꦏ꧀ꦏ꧀ꦭꦸꦭꦂꦏ꧀ꦭꦸꦭꦸꦂꦱꦲꦧꦺꦴꦝꦺꦴ꧈​ꦲꦤꦔꦶꦁꦒꦗꦃꦥꦸꦤꦶꦏꦱꦗꦠꦺꦴꦱ꧀ꦱꦶꦥꦸꦤ꧀ꦩꦿꦺꦴꦗꦺꦴꦭ꧀ꦱꦏꦶꦁꦥꦼꦛꦺꦏ꧀꧈​ꦲꦮꦶꦠ꧀ꦭꦤ꧀ꦠꦶꦥ꧀ꦥꦶꦁꦥꦁꦒꦿꦲꦶꦠ꧀ꦠꦲꦔ꧀ꦭꦁꦏꦸꦁꦔꦶꦏꦺꦮꦤ꧀ꦏꦺꦮꦤ꧀ꦱꦤꦺꦱ꧀ꦱꦶꦥꦸꦤ꧀꧉​ ꧋ꦒꦼꦱꦁꦔꦶꦁꦒꦗꦃꦮꦺꦴꦤ꧀ꦠꦼꦤ꧀ꦲꦶꦁꦱꦊꦧꦼꦠ꧀ꦠꦶꦁꦮꦤ꧉​ ꧋ꦏꦗꦮꦶꦥꦸꦤꦶꦏ꧈​ꦧꦶꦭꦶꦃꦩꦶꦫꦶꦢ꧀ꦥꦶꦫꦤ꧀ꦠꦺꦴꦱ꧀ꦥꦼꦥꦺꦫꦔꦤ꧀ꦤꦶꦁꦧꦢꦤ꧀ꦤꦶꦥꦸꦤ꧀꧈​ꦒꦗꦃꦥꦸꦤꦶꦏꦠꦩ꧀ꦠꦸꦧꦺꦴꦠꦼꦤ꧀ꦱꦒꦼꦢ꧀ꦠꦸꦩꦤ꧀ꦢꦁꦲꦶꦁꦢꦩꦼꦭ꧀ꦲꦩꦼꦩꦼꦤ꧀ꦝꦼꦠ꧀ꦧꦫꦁꦲꦶꦁꦏꦁꦲꦭꦸꦱ꧀ꦲꦭꦸꦱ꧀꧉​ꦥꦤꦶꦠꦶꦏ꧀ꦏꦤ꧀ꦲꦶꦁꦏꦁꦩꦏꦠꦼꦤ꧀ꦮꦲꦸ꧈​ꦱꦸꦭꦪꦏꦭꦶꦪꦤ꧀ꦚꦠꦤꦶꦥꦸꦤ꧀꧈​ꦗꦭꦂꦫꦤ꧀ꦒꦗꦃꦥꦸꦤꦶꦏꦲꦶꦁꦒꦶꦃꦱꦒꦼꦢ꧀ꦩꦼꦤ꧀ꦝꦼꦠ꧀ꦧꦫꦁꦧꦫꦁꦲꦶꦁꦏꦁꦲꦭꦸꦯꦭꦸꦱ꧀꧈​ꦲꦩꦂꦒꦶꦲꦶꦁꦥꦸꦕꦸꦏ꧀ꦏꦶꦁꦠꦼꦭꦭꦺꦮꦺꦴꦤ꧀ꦠꦼꦤ꧀ꦥꦶꦫꦤ꧀ꦠꦺꦴꦱ꧀ꦏꦢꦺꦴꦱ꧀ꦢꦺꦤꦺꦢꦫꦶꦗꦶꦤꦶꦁꦩꦤꦸꦱ꧉​ ꧋ꦩꦼꦁꦒꦃꦢꦸꦤꦸꦁꦔꦶꦥꦸꦤ꧀ꦒꦗꦃꦥꦸꦤꦶꦏ꧈​ꦮꦺꦴꦤ꧀ꦠꦼꦤ꧀ꦲꦶꦁꦮꦤꦲꦶꦁꦏꦁꦲꦒꦼꦁꦲꦶꦁꦠꦤꦃꦯꦸꦩꦠꦿꦃ꧈​ꦠꦤꦃꦄꦥꦿꦶꦏꦃ꧈​ꦠꦤꦃꦲꦶꦤ꧀ꦝꦸꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉​ꦢꦺꦤꦺꦒꦼꦱꦁꦔꦶꦥꦸꦤ꧀ꦱꦩꦶꦲꦒꦼꦒꦿꦺꦴꦩ꧀ꦧꦺꦴꦭ꧀ꦭꦤ꧀ꦏꦛꦃ꧈​ꦱꦲꦭꦶꦩꦿꦃꦲꦶꦥꦸꦤ꧀ꦲꦸꦒꦶꦱꦩꦶꦢꦶꦥꦸꦤ꧀ꦏꦼꦥꦭꦤ꧀ꦤꦶꦒꦗꦃꦲꦶꦁꦏꦁꦲꦸꦩꦸꦂꦫꦶꦥꦸꦤ꧀ꦱꦩ꧀ꦥꦸꦤ꧀ꦱꦼꦥꦸꦃꦱꦲꦲꦶꦁꦏꦁꦲꦒꦼꦁꦥꦶꦪꦩ꧀ꦧꦏ꧀ꦭꦤ꧀ꦏꦶꦪꦠ꧀꧉​ꦩꦤꦮꦶꦥꦶꦤꦸꦗꦸꦏꦊꦉꦱ꧀ꦱꦩꦶꦱꦧ꧈​ꦥꦸꦤꦶꦏꦭꦩ꧀ꦥꦃꦲꦶꦥꦸꦤ꧀ꦲꦶꦁꦒꦶꦃꦠꦤ꧀ꦱꦃꦒꦼꦒꦿꦺꦴꦩ꧀ꦧꦺꦴꦭ꧀ꦭꦤ꧀ꦧꦺꦴꦠꦼꦤ꧀ꦥꦸꦫꦸꦤ꧀ꦲꦥꦶꦱꦃꦥꦶꦱꦃ꧈​ꦢꦢꦺꦴꦱ꧀ꦲꦶꦁꦏꦁꦱꦩꦶꦏ꧀ꦭꦁꦏꦸꦁꦔꦤ꧀꧈​ꦲꦶꦁꦒꦶꦃꦭꦗꦼꦁꦏꦠꦶꦔꦭ꧀ꦕꦼꦛꦥꦠꦶꦭꦱ꧀ꦱꦤ꧀ꦤꦶꦥꦸꦤ꧀꧈​ꦲꦩꦂꦒꦶꦱꦲꦸꦥꦩꦶꦲꦶꦁꦏꦁꦢꦶꦥꦸꦤ꧀ꦠꦿꦗꦁꦭꦩ꧀ꦥꦃꦲꦶꦥꦸꦤ꧀ꦮꦲꦸꦮꦤꦧꦼꦧꦺꦴꦤ꧀ꦝꦺꦴꦠ꧀ꦠꦤ꧀꧈​ꦲꦶꦁꦔꦿꦶꦏꦸꦮꦶꦠ꧀ꦮꦶꦠ꧀ꦠꦤ꧀ꦤꦶꦥꦸꦤ꧀ꦱꦲꦛꦼꦛꦸꦏꦸꦭ꧀ꦭꦤ꧀ꦲꦶꦁꦏꦁꦲꦭꦶꦛꦭꦶꦠ꧀ꦱꦩꦶꦉꦧꦃꦥꦠꦶꦁꦱꦸꦭꦪꦃ꧈​ꦢꦢꦺꦴꦱ꧀ꦮꦫꦢꦶꦤ꧀ꦏꦢꦺꦴꦱ꧀ꦢꦺꦤꦺꦩꦂꦒꦶꦲꦒꦼꦁ꧈​ꦲꦩꦶꦭꦩꦤꦮꦶꦮꦺꦴꦤ꧀ꦠꦼꦤ꧀ꦠꦼꦠꦤꦼꦩ꧀ꦩꦤ꧀ꦤꦶꦥꦸꦤ꧀ꦠꦶꦠꦶꦪꦁꦲꦶꦁꦝꦸꦱꦸꦤ꧀ꦱꦕꦼꦭꦏ꧀ꦏꦶꦥꦸꦤ꧀ꦔꦿꦶꦏꦸꦏꦠꦿꦗꦁꦢꦺꦤꦶꦁ [ 530 ]꧋ꦒꦫꦺꦴꦩ꧀ꦧꦺꦴꦭ꧀ꦭꦤ꧀ꦤꦶꦁꦒꦗꦃꦮꦲꦸ꧈​ꦠꦩ꧀ꦠꦸꦭꦗꦼꦁꦊꦧꦸꦂꦠꦤ꧀ꦥꦏꦸꦏꦸꦧ꧀ꦧꦤ꧀꧉​ꦠꦸꦩꦿꦥ꧀ꦥꦫꦲꦶꦁꦏꦁꦱꦩꦶꦄꦃꦭꦶꦲꦩ꧀ꦧꦼꦧꦼꦝꦒ꧀ꦒꦗꦃ꧈​ꦥꦸꦤꦶꦏꦒꦩ꧀ꦥꦶꦭ꧀ꦱꦔꦼꦠ꧀ꦲꦁꦒꦺꦤ꧀ꦤꦶꦥꦸꦤ꧀ꦤꦶꦠꦶꦏ꧀ꦥꦸꦤ꧀ꦢꦶꦥꦁꦒꦺꦤ꧀ꦤꦤ꧀ꦤꦶꦥꦸꦤ꧀ꦒꦗꦃꦒꦗꦃꦮꦲꦸ꧉​ꦲꦤꦔꦶꦁꦠꦶꦠꦶꦪꦁꦲꦶꦁꦏꦁꦲꦧꦼꦧꦼꦝꦒ꧀ꦏꦼꦢꦃꦲꦔꦠꦺꦴꦱ꧀ꦲꦠꦺꦴꦱ꧀ꦱꦔꦼꦠ꧀ꦧꦺꦴꦠꦼꦤ꧀ꦏꦺꦔꦶꦁꦱꦼꦩ꧀ꦧꦿꦤ꧈​ꦲꦮꦶꦠ꧀ꦩꦤꦮꦶꦔꦤ꧀ꦠꦺꦴꦱ꧀ꦭꦺꦤ꧈​ꦧꦺꦴꦠꦼꦤ꧀ꦮꦤ꧀ꦢꦺꦢꦢꦺꦴꦱ꧀ꦢꦼꦢꦺꦴꦭꦤ꧀ꦤꦤ꧀ꦤꦶꦥꦸꦤ꧀ꦒꦗꦃꦒꦗꦃꦮꦲꦸꦔꦤ꧀ꦠꦺꦴꦱ꧀ꦲꦗꦸꦂꦩꦸꦩꦸꦂꦏ꧀ꦮꦤ꧀ꦝꦤꦶꦥꦸꦤ꧀꧉​ ꧋ꦒꦗꦃ​ꦏꦁꦒꦺ​ꦠꦸꦩ꧀ꦥꦏ꧀ꦏꦤ꧀ꦤꦶꦁ​ꦥꦿꦗꦸꦫꦶꦠ꧀​ꦲꦩꦁꦱꦃ​ꦥꦿꦁ꧉​ ꧋ꦏꦭꦲꦶꦁꦗꦩꦤ꧀ꦏꦶꦤ꧈​ꦱꦢꦺꦫꦺꦁꦔꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦥꦿꦃꦎꦠꦺꦴ꧈​ꦎꦠꦺꦴꦧꦶꦱ꧀ꦭꦤ꧀ꦱꦱꦩꦶꦤꦶꦥꦸꦤ꧀꧈​ꦲꦶꦁꦒꦶꦃꦒꦗꦃꦥꦸꦤꦶꦏꦲꦶꦁꦏꦁꦢꦶꦥꦸꦤ꧀ꦥꦶꦒꦸꦤꦑꦏꦼꦤ꧀ꦥꦿꦱꦱꦠ꧀ꦏꦢꦺꦴꦱ꧀ꦢꦺꦤꦺꦥꦿꦃꦎꦠꦺꦴꦭꦤ꧀ꦎꦠꦺꦴꦧꦶꦱ꧀꧉​ꦩꦭꦃꦔꦤ꧀ꦠꦺꦴꦱ꧀ꦢꦸꦩꦸꦒꦶꦱꦩꦁꦏꦺꦲꦶꦁꦠꦤꦃꦲꦶꦤ꧀ꦝꦸ꧈​ꦯꦶꦪꦼꦩ꧀ꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧈​ꦠꦏ꧀ꦱꦶꦃꦩꦶꦒꦸꦤꦑꦏꦼꦤ꧀ꦒꦗꦃꦏꦢꦺꦴꦱ꧀ꦩꦏꦠꦼꦤ꧀ꦮꦲꦸ꧉​ꦠꦸꦩꦿꦥ꧀ꦲꦶꦁꦤꦒꦫꦶꦯꦶꦪꦼꦩ꧀꧈​ꦥꦸꦤꦶꦏꦩꦤꦮꦶꦮꦺꦴꦤ꧀ꦠꦼꦤ꧀ꦒꦗꦃꦥꦼꦛꦏ꧀ꦭꦗꦼꦁꦏꦲꦗꦶꦲꦗꦶꦏꦢꦺꦴꦱ꧀ꦢꦺꦤꦺꦱꦠꦸꦁꦒꦶꦭ꧀ꦭꦶꦁꦢꦺꦮ꧈​ꦲꦩꦶꦭꦧꦤ꧀ꦢꦺꦫꦲꦶꦁꦏꦫꦗꦤ꧀ꦯꦶꦪꦼꦩ꧀ꦥꦸꦤꦶꦏꦲꦕꦶꦫꦶꦒꦗꦃꦱꦺꦠ꧉​ꦏꦗꦮꦶꦱꦏꦶꦁꦥꦸꦤꦶꦏ꧈​ꦲꦶꦁꦗꦩꦤ꧀ꦏꦶꦤꦒꦗꦃꦥꦸꦤꦶꦏꦲꦶꦁꦒꦶꦃꦢꦢꦺꦴꦱ꧀ꦠꦸꦩ꧀ꦥꦏ꧀ꦏꦤ꧀ꦤꦶꦁꦥꦿꦗꦸꦫꦶꦠ꧀ꦏꦁꦒꦺꦩꦁꦱꦃꦥꦼꦫꦁ꧈​ꦲꦸꦠꦮꦶꦲꦶꦁꦒꦶꦃꦢꦢꦺꦴꦱ꧀ꦠꦸꦩ꧀ꦥꦏ꧀ꦏꦤ꧀ꦤꦶꦁꦥꦫꦤꦠ꧉​ꦢꦺꦤꦺꦥꦫꦤꦫꦺꦤ꧀ꦢꦿꦗꦩꦤ꧀ꦱꦩꦁꦏꦺ꧈​ꦲꦶꦁꦏꦁꦠꦏ꧀ꦱꦶꦃꦲꦔ꧀ꦭꦼꦭꦸꦂꦫꦶꦲꦤꦶꦠꦶꦃꦢꦶꦥꦺꦴꦁꦒ꧈​ꦤꦩꦸꦁꦯꦁꦤꦠꦲꦶꦁꦯꦶꦪꦼꦩ꧀ꦭꦤ꧀ꦱꦮꦼꦤꦺꦃꦲꦶꦁꦤꦠꦲꦶꦁꦠꦤꦃꦲꦶꦤ꧀ꦝꦸ꧉​ꦢꦺꦤꦺꦠꦸꦩꦿꦥ꧀ꦤꦠꦗꦮꦶꦒꦗꦃꦥꦸꦤꦶꦏꦱꦩꦁꦏꦺꦤꦩꦸꦁꦏꦁꦒꦺꦏ꧀ꦭꦔꦼꦤ꧀ꦤꦤ꧀ꦏꦺꦩꦮꦺꦴꦤ꧀꧉​ ꧋ꦩꦶꦠꦸꦫꦸꦠ꧀ꦕꦫꦶꦪꦺꦴꦱ꧀ꦲꦶꦁꦫꦶꦁꦒꦶꦠ꧀ꦥꦸꦂꦮ꧈​ꦥꦫꦤꦠꦲꦶꦁꦏꦁꦱꦺꦴꦏ꧀ꦤꦶꦠꦶꦃꦭꦶꦩꦤ꧀꧈​ꦲꦶꦁꦒꦶꦃꦥꦸꦤꦶꦏ꧇​ꦤꦠꦲꦶꦁꦩꦤ꧀ꦢꦸꦫꦥꦿꦧꦸꦨꦭꦢꦺꦮ꧈​ꦭꦶꦩꦤ꧀ꦮꦲꦸꦢꦶꦥꦸꦤ꧀ꦤꦩꦑꦏꦼꦤ꧀꧇​ꦏꦾꦲꦶꦦꦸꦱ꧀ꦥꦢꦼꦢ꧀ꦠ꧈​ꦩꦼꦁꦒꦃꦲꦸꦊꦱ꧀ꦱꦶꦥꦸꦤ꧀ꦥꦼꦛꦏ꧀꧉​ꦩꦏꦠꦼꦤ꧀ꦲꦸꦒꦶꦠꦶꦠꦶꦃꦲꦤ꧀ꦤꦶꦥꦸꦤ꧀ꦤꦠꦲꦶꦁꦔꦱ꧀ꦠꦶꦟ꧈​ꦥꦿꦧꦸꦯꦸꦪꦸꦢꦤ꧈​ꦲꦸꦒꦶꦲꦮꦂꦤꦶꦒꦗꦃꦱꦺꦠ꧈​ꦤꦩ꧇​ꦲꦺꦱ꧀ꦛꦶꦠꦩ꧉​ꦏꦗꦮꦶꦥꦸꦤꦶꦏꦠꦏ꧀ꦱꦶꦃꦮꦺꦴꦤ꧀ꦠꦼꦤ꧀ꦒꦗꦃꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀ꦲꦶꦁꦏꦁꦏꦺꦴꦕꦥ꧀ꦲꦶꦁꦥꦝꦭꦁꦔꦤ꧀꧈​ꦏꦢꦺꦴꦱ꧀ꦠ꧇​ꦓꦗꦃꦯꦺꦤ꧈​ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦱꦒꦼꦢ꧀ꦲꦩ꧀ꦧꦼꦝꦃꦧꦸꦁꦏꦸꦱ꧀ꦱꦶꦥꦸꦤ꧀ꦲꦂꦪꦯꦺꦤꦱꦲꦲꦶꦁꦏꦁꦭꦗꦼꦁꦤꦶꦠꦶꦱ꧀ꦝꦠꦼꦁꦲꦂꦪꦯꦺꦤ꧈​ꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀ꦩꦭꦶꦃ꧉​ [ 531 ]꧋ꦲꦶꦁꦔꦶꦁꦒꦶꦭ꧀ꦱꦩ꧀ꦥꦸꦤ꧀ꦏꦕꦫꦶꦪꦺꦴꦱ꧀ꦱꦏꦼꦤ꧀꧈​ꦧꦶꦭꦶꦃꦒꦗꦃꦥꦸꦤꦶꦏꦱꦏ꧀ꦭꦁꦏꦸꦁꦭꦤ꧀ꦠꦶꦥ꧀ꦥꦁꦒꦿꦲꦶꦠꦤꦶꦥꦸꦤ꧀꧈​ꦔꦤ꧀ꦠꦺꦴꦱ꧀ꦮꦺꦴꦤ꧀ꦠꦼꦤ꧀ꦱꦠꦸꦁꦒꦶꦭ꧀ꦭꦶꦁꦱꦂꦗꦤꦧꦺꦴꦁꦱꦌꦫꦺꦴꦥꦃꦤꦩ꧇​ Judith Cartier ꦲꦶꦁꦧꦼꦧꦸꦏꦤꦶꦁꦏꦫꦁꦔꦤ꧀ꦤꦶꦥꦸꦤ꧀꧇​ꦭꦶꦩꦤ꧀ꦱꦺꦠꦠꦠꦗꦤ꧀ꦩ꧌ꦱꦠꦸꦁꦒꦶꦭ꧀ꦭꦶꦁꦢꦺꦴꦔꦺꦁꦲꦚꦫꦶꦪꦺꦴꦱ꧀ꦱꦏꦼꦤ꧀ꦭꦭꦩ꧀ꦥꦃꦲꦤ꧀ꦤꦶꦥꦸꦤ꧀ꦱꦠꦸꦁꦒꦶꦭ꧀ꦭꦶꦁꦒꦗꦃꦥꦼꦛꦏ꧀ꦤꦩ꧇​ꦆꦫꦮꦠꦱꦏ꧀ꦭꦁꦏꦸꦁꦱꦲꦺ꧈​ꦱꦶꦤ꧀ꦠꦼꦤ꧀ꦲꦶꦁꦏꦁꦏꦼꦥꦺꦔꦶꦤ꧀ꦩꦲꦺꦴꦱ꧀ꦱꦒꦼꦢ꧀ꦠꦸꦩ꧀ꦧꦱ꧀ꦝꦠꦼꦁꦏꦤ꧀ꦠꦺꦴꦂꦨꦭꦺꦥꦸꦱ꧀ꦠꦏꦲꦶꦁꦮꦺꦭ꧀ꦠꦼꦥꦿꦺꦝꦼꦤ꧀꧈​ꦉꦒꦶꦤꦶꦥꦸꦤ꧀ꦤꦩꦸꦁ f 0.70) ꦲꦩꦿꦠꦺꦭꦑꦏꦼꦤ꧀ꦧꦶꦭꦶꦃꦧꦺꦴꦁꦱꦪꦸꦟꦤꦶꦠꦸꦮꦶꦤ꧀ꦫꦸꦩ꧀ꦲꦚꦫꦶꦪꦺꦴꦱ꧀ꦱꦏꦼꦤ꧀꧈​ꦧꦶꦭꦶꦃꦤꦠꦺꦮꦺꦴꦤ꧀ꦠꦼꦤ꧀ꦭꦶꦩꦤ꧀ꦲꦶꦁꦏꦁꦚꦼꦫꦠ꧀ꦲꦶꦁꦧꦱꦪꦸꦤꦤꦶ꧈​ꦩꦭꦃꦱꦮꦼꦤꦺꦃꦮꦺꦴꦤ꧀ꦠꦼꦤ꧀ꦲꦶꦁꦏꦁꦱꦒꦼꦢ꧀ꦮꦶꦕꦤ꧀ꦠꦼꦤ꧀꧉​ ꧋ꦒꦗꦃꦮꦺꦴꦤ꧀ꦠꦼꦤ꧀ꦲꦶꦁꦏꦸꦩꦶꦝꦶꦏꦥꦭ꧀꧉​ ꧋ꦩꦼꦁꦒꦃꦧꦸꦏ꧀ꦠꦶꦧꦸꦏ꧀ꦠꦶꦲꦶꦁꦏꦁꦲꦤꦺꦭꦑꦏꦼꦤ꧀ꦏꦭꦤ꧀ꦠꦶꦥ꧀ꦥꦤ꧀ꦤꦶꦁꦒꦗꦃꦥꦸꦤꦶꦏꦏꦛꦃꦱꦔꦼꦠ꧀꧉​ꦏꦢꦺꦴꦱ꧀ꦠ꧇​ꦒꦗꦃꦲꦶꦁꦏꦁꦲꦱꦿꦶꦁꦩꦲꦶꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦸꦩꦶꦝꦶꦏꦥꦭ꧀꧈​ꦥꦫꦩꦲꦺꦴꦱ꧀ꦠꦩ꧀ꦠꦸꦤꦶꦥꦸꦤ꧀ꦱꦩ꧀ꦥꦸꦤ꧀ꦤꦠꦺꦲꦔꦸꦤꦶꦁꦔꦤ꧀ꦤꦶꦥꦶꦪꦩ꧀ꦧꦏ꧀ꦏꦢꦺꦴꦱ꧀ꦥꦸꦤ꧀ꦢꦶꦥꦩꦲꦶꦤ꧀ꦤꦶꦥꦸꦤ꧀ꦒꦗꦃꦮꦲꦸ꧈​ꦮꦺꦴꦤ꧀ꦠꦼꦤ꧀ꦲꦶꦁꦏꦁꦚꦸꦫꦸꦁꦠꦺꦴꦁꦩꦮꦶꦱꦸꦏꦸꦤꦶꦥꦸꦤ꧀ꦏꦏꦭꦶꦃ꧈​ꦮꦺꦴꦤ꧀ꦠꦼꦤ꧀ꦲꦶꦁꦏꦁꦭꦶꦁꦒꦶꦃꦏꦸꦂꦱꦶꦔꦝꦼꦥ꧀ꦥꦏꦼꦤ꧀ꦩꦼꦗꦱꦂꦮꦶꦔꦼꦔꦸꦚ꧀ꦗꦸꦏ꧀ꦭꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉​ ꧋ꦲꦶꦁꦕꦕꦿꦶꦪꦺꦴꦱ꧀ꦱꦤ꧀ꦗꦮꦶꦲꦸꦒꦶꦏꦛꦃꦲꦶꦁꦏꦁꦚꦫꦶꦪꦺꦴꦱ꧀ꦱꦏꦼꦤ꧀ꦏꦭꦤ꧀ꦠꦶꦥ꧀ꦥꦤꦶꦁꦒꦗꦃ꧈​ꦏꦢꦺꦴꦱ꧀ꦠ꧇​ꦲꦶꦁꦕꦫꦶꦪꦺꦴꦱ꧀ꦱꦶꦥꦸꦤ꧀ꦢꦺꦮꦶꦗꦸꦲꦂꦩꦟꦶꦏ꧀꧈​ꦏꦭꦲꦶꦁꦤꦒꦫꦶꦩꦼꦯꦶꦂꦏꦺꦴꦩ꧀ꦥ꧀ꦭꦁ꧈​ꦱꦲꦲꦶꦁꦤꦒꦫꦶꦔꦿꦶꦏꦸꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦥꦤ꧀ꦠꦼꦱ꧀ꦥꦶꦤꦶꦭꦶꦃꦗꦸꦩꦼꦤꦼꦁꦤꦠ꧈​ꦲꦶꦁꦏꦁꦥꦶꦤꦱꦿꦃꦲꦤ꧀ꦔꦸꦥꦢꦺꦴꦱ꧀ꦲꦶꦁꦏꦁꦏꦼꦢꦃꦏꦠꦼꦠꦼꦥ꧀ꦥꦏꦼꦤ꧀ꦗꦸꦩꦼꦤꦼꦁꦤꦠ꧈​ꦲꦶꦁꦒꦶꦃꦱꦠꦸꦁꦒꦶꦭ꧀ꦭꦶꦁꦒꦗꦃ꧈​ꦮꦸꦱꦤꦤꦶꦥꦸꦤ꧀ꦲꦶꦁꦏꦁꦏꦥꦶꦭꦶꦃꦢꦺꦤꦶꦁꦒꦗꦃꦗꦸꦩꦼꦤꦼꦁꦤꦠꦲꦶꦁꦤꦒꦫꦶꦩꦼꦯꦶꦂ꧈​ꦲꦶꦁꦒꦶꦃꦢꦺꦮꦶꦗꦸꦲꦂꦩꦤꦶꦏ꧀ꦏꦱ꧀ꦧꦸꦠ꧀ꦔꦶꦁꦒꦶꦭ꧀꧉​ ꧋ꦏꦗꦮꦶꦥꦸꦤꦶꦏꦠꦏ꧀ꦱꦶꦃꦏꦛꦃꦩꦭꦶꦃꦢꦼꦢꦺꦴꦔꦺꦁꦔꦤ꧀ꦢꦼꦢꦺꦴꦔꦺꦁꦔꦤ꧀ꦧꦧ꧀ꦒꦗꦃ꧈​ꦧꦝꦺꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦏꦫꦩ꧀ꦥꦸꦁꦔꦤ꧀ꦤꦶꦥꦸꦤ꧀ꦩꦤꦮꦶꦏꦕꦿꦶꦪꦺꦴꦱ꧀ꦤꦲꦶꦁꦔꦿꦶꦏꦶꦱꦢꦪ꧈​ꦲꦩꦶꦭꦕꦼꦏꦥ꧀ꦱꦩꦤ꧀ꦠꦼꦤ꧀ꦏꦺꦩꦮꦺꦴꦤ꧀꧉​	Jagading Sato Kewan. Bab Gajah. Gajah punika satunggiling kewan ingkang agêng, inggil, galak ananging tututan, sanadyan katingalipun sajak klular-klulur saha bodho, ananging gajah punika sajatosipun mrojol saking pêthèk, awit lantiping panggraita anglangkungi kewan-kewan sanèsipun. [Grafik] Gêsanging gajah wontên ing salêbêting wana. Kajawi punika, bilih mirid pirantos pêperanganing badanipun, gajah punika tamtu botên sagêd tumandang ing damêl amêmêndhêt barang ingkang alus-alus. Panitikan ingkang makatên wau, sulaya kalihan nyatanipun, jalaran gajah punika inggih sagêd mêndhêt barang-barang ingkang alus-alus, amargi ing pucuking têlale wontên pirantos kadosdene darijining manusa. Mênggah dunungipun gajah punika, wontên ing wana ingkang agêng ing tanah Sumatrah, tanah Aprikah, tanah Indhu lan sanès-sanèsipun. Dene gêsangipun sami agêgrombolan kathah, saha limrahipun ugi sami dipun kêpalani gajah ingkang umuripun sampun sêpuh saha ingkang agêng piyambak lan kiyat. Manawi pinuju kalêrês sami saba, punika lampahipun inggih tansah gêgrombolan botên purun apisah-pisah, dados ingkang sami klangkungan, inggih lajêng katingal cêtha patilasanipun, amargi saupami ingkang dipun trajang lampahipun wau wana bêbondhotan, ing ngriku wit-witanipun saha thêthukulan ingkang alit-alit sami rêbah pating sulayah, dados waradin kadosdene margi agêng, amila manawi wontên têtanêmanipun têtiyang ing dhusun sacêlakipun ngriku katrajang dening garombolaning gajah wau, tamtu lajêng lêbur tanpa kukuban. Tumrap para ingkang sami ahli ambêbêdhag gajah, punika gampil sangêt anggènipun nitik pundi panggenanipun gajah-gajah wau. Ananging têtiyang ingkang abêbêdhag kêdah angatos-atos sangêt botên kenging sêmbrana, awit manawi ngantos lena, botên wande dados dêdolananipun gajah-gajah wau ngantos ajur mumur kwandhanipun. [Grafik] Gajah kangge tumpakaning prajurit amangsah prang. Kala ing jaman kina, sadèrèngipun wontên praoto, otobis lan sasaminipun, inggih gajah punika ingkang dipun pigunakakên prasasat kadosdene praoto lan otobis. Malah ngantos dumugi samangke ing tanah Indhu, Siyêm lan sanès-sanèsipun, taksih migunakakên gajah kados makatên wau. Tumrap ing nagari Siyêm, punika manawi wontên gajah pêthak lajêng kaaji-aji kadosdene satunggiling dewa, amila bandera ing karajan Siyêm punika aciri gajah seta. Kajawi saking punika, ing jaman kina gajah punika inggih dados tumpakaning prajurit kangge mangsah pêrang, utawi inggih dados tumpakaning para nata. Dene para narendra jaman samangke, ingkang taksih anglêluri anitih dipăngga, namung sang nata ing Siyêm lan sawênèhing nata ing tanah Indhu. Dene tumrap nata Jawi gajah punika samangke namung kangge klangênan kemawon. Miturut cariyos ing ringgit purwa, para nata ingkang sok nitih liman, inggih punika: nata ing Mandura Prabu Baladewa, liman wau dipun namakakên: Kyai Puspadêdta,[3] mênggah ulêsipun pêthak. Makatên ugi titihanipun nata ing Ngastina, Prabu Suyudana, ugi awarni gajah seta, nama: Èsthitama. Kajawi punika taksih wontên gajah sanès-sanèsipun ingkang kocap ing padhalangan, kados ta: Gajah Sena, inggih punika ingkang sagêd ambêdhah bungkusipun Arya Sena saha ingkang lajêng nitis dhatêng Arya Sena, lan sanès-sanèsipun malih. Ing nginggil sampun kacariyosakên, bilih gajah punika saklangkung lantip panggraitanipun, ngantos wontên satunggiling sarjana băngsa Eropah nama: Judith Cartier ing bêbukaning karanganipun: liman seta tata janma (satunggiling dongèng anyariyosakên lêlampahanipun satunggiling gajah pêthak nama: Irawata saklangkung sae, sintên ingkang kêpengin maos sagêd tumbas dhatêng kantor Bale Pustaka ing Wèltêprèdhên, rêginipun namung f 0.70) amratelakakên bilih băngsa Yunani tuwin Rum anyariyosakên, bilih nate wontên liman ingkang nyêrat ing basa Yunani, malah sawênèh wontên ingkang sagêd wicantên. [Grafik] Gajah wontên ing kumidhi kapal. Mênggah bukti-bukti ingkang anelakakên kalantipaning gajah punika kathah sangêt. Kados ta: gajah ingkang asring main wontên ing kumidhi kapal, para maos tamtunipun sampun nate anguningani piyambak kadospundi pamainipun gajah wau, wontên ingkang nyurung tong mawi sukunipun kêkalih, wontên ingkang linggih kursi ngadhêpakên mêja sarwi ngêngunjuk lan sanès-sanèsipun. Ing cacriyosan Jawi ugi kathah ingkang nyariyosakên kalantipaning gajah, kados ta: ing cariyosipun Dèwi Juharmanik, kala ing nagari Mêsir komplang, saha ing nagari ngriku botên wontên ingkang pantês pinilih jumênêng nata, ingkang pinasrahan ngupados ingkang kêdah katêtêpakên jumênêng nata, inggih satunggiling gajah, wusananipun ingkang kapilih dening gajah jumênêng nata ing nagari Mêsir, inggih Dèwi Juharmanik kasbut nginggil. Kajawi punika taksih kathah malih dêdongengan-dêdongengan bab gajah, badhe botên wontên karampunganipun manawi kacriyosna ing ngriki sadaya, amila cêkap samantên kemawon.
[ 532 ]꧋ꦧꦧ꧀ꦝꦸꦮꦸꦁ​ ꧋ꦲꦮꦶꦠ꧀ꦗꦩꦤ꧀ꦏꦶꦤꦢꦸꦩꦸꦒꦶꦱꦥꦿꦶꦏꦶꦧꦺꦴꦁ​ꦱꦗꦮꦶꦲꦶꦁ​ꦏꦁ​ꦭꦶꦩꦿꦃ​ꦱꦩꦶꦉꦩꦼꦤ꧀ꦝꦠꦼꦁ​ꦝꦸꦮꦸꦁ​꧈ꦝꦸꦮꦸꦁ​ꦥꦸꦤꦶꦏꦠꦸꦩꦿꦥ꧀ꦧꦺꦴꦁ​ꦱꦗꦮꦶꦏꦲꦁ​ꦒꦼꦥ꧀ꦢꦼꦢꦩꦼꦭ꧀ꦲꦶꦁ​ꦏꦁ​ꦩꦲꦺꦢꦃ​ꦲꦶꦱꦔꦼꦠ꧀꧈ꦱꦧꦧ꧀ꦱꦏꦶꦁ​ꦮꦶꦫꦪꦠ꧀ꦲꦸꦠꦮꦶꦢꦼꦢꦺꦴꦔꦺꦁ​ꦔꦤ꧀ꦤꦶꦥꦸꦤ꧀ꦠꦶꦪꦁ​ꦱꦼꦥꦸꦃ​ꦱꦒꦼꦢ꧀ꦲꦤ꧀ꦝꦠꦼꦁ​ꦔꦏꦼꦤ꧀ꦏꦧꦼꦒ꧀ꦗꦤ꧀ꦲꦸꦠꦮꦶꦏꦕꦶꦭꦏꦤ꧀ꦠꦸꦩꦿꦥ꧀ꦠꦶꦪꦁ​ꦲꦶꦁ​ꦏꦁ​ꦲꦁ​ꦒꦝꦃ​ꦲꦶꦲꦸꦠꦮꦶꦲꦚꦶꦩ꧀ꦥꦼꦤ꧀꧉ꦢꦺꦤꦺꦮꦶꦫꦪꦠ꧀ꦲꦸꦠꦮꦶꦢꦼꦢꦺꦴꦔꦺꦁ​ꦔꦤ꧀ꦮꦲꦸꦲꦶꦁ​ꦱꦩꦁ​ꦏꦺꦏꦊꦧꦼꦠ꧀ꦥꦩꦁ​ꦒꦶꦃ​ꦒꦸꦒꦺꦴꦤ꧀ꦠꦸꦲꦺꦴꦤ꧀꧈ꦲꦤꦔꦶꦁ​ꦱꦫꦺꦃ​ꦤꦶꦁ​ꦥꦩꦁ​ꦒꦶꦃ​ꦮꦲꦸꦲꦶꦁ​ꦗꦩꦤ꧀ꦏꦶꦤꦱꦔꦼꦠ꧀ꦭꦸꦩꦺꦁ​ꦏꦺꦠ꧀ꦠꦶꦥꦸꦤ꧀ꦝꦠꦼꦁ​ꦧꦺꦴꦁ​ꦱꦗꦮꦶ꧈ꦥꦿꦩꦶꦭꦱꦲꦺꦁ​ꦒꦱꦩꦁ​ꦏꦺꦲꦸꦒꦶꦠꦏ꧀ꦱꦶꦃ​ꦏꦛꦃ​ꦧꦺꦴꦁ​ꦱꦗꦮꦶꦲꦶꦁ​ꦏꦁ​ꦔꦁ​ꦒꦺꦲꦸꦠꦮꦶꦥꦶꦠꦢꦺꦴꦱ꧀ꦝꦠꦼꦁ​ꦥꦩꦁ​ꦒꦶꦃ​ꦮꦲꦸ꧉ꦥꦫꦠꦶꦪꦁ​ꦗꦮꦶꦲꦶꦁ​ꦏꦁ​ꦏꦛꦃ​ꦧꦺꦴꦠꦼꦤ꧀ꦥꦸꦫꦸꦤ꧀ꦲꦚꦮꦶꦪꦃ​ꦝꦸꦮꦸꦁ​ꦥꦸꦤꦥꦩꦭꦶꦃ​ꦠꦸꦩꦿꦥ꧀ꦝꦠꦼꦁ​ꦝꦸꦮꦸꦁ​ꦲꦶꦁ​ꦏꦁ​ꦏꦮꦶꦕꦭ꧀ꦱꦲꦺꦲꦸꦠꦮꦶꦠꦼꦠꦶꦭꦂ​ꦫꦤ꧀ꦤꦶꦁ​ꦠꦶꦪꦁ​ꦱꦼꦥꦸꦃ​꧈ꦩꦤ꧀ꦢꦂ​ꦢꦶꦥꦸꦤ꧀ꦥꦸꦤ꧀ꦝꦶꦥꦸꦤ꧀ꦝꦶꦱꦧꦼꦤ꧀ꦲꦶꦁ​ꦩꦊꦩ꧀ꦗꦸꦩꦸꦔꦃ​ꦲꦸꦠꦮꦶꦱ꧀ꦭꦱꦏ꧀ꦭꦶꦮꦺꦴꦤ꧀ꦢꦶꦥꦸꦤ꧀ꦢꦸꦥꦤꦶꦲꦸꦠꦮꦶꦢꦶꦥꦸꦤ꧀ꦱꦗꦺꦤ꧀ꦤꦶꦲꦫꦸꦥꦶꦱꦼꦏꦂ​ꦧꦺꦴꦫꦺꦃ​ꦲꦸꦠꦮꦶꦭꦶꦱꦃ​ꦮꦔꦶ꧈​ꦲꦮꦶꦠ꧀ꦧꦶꦭꦶꦃ​ꦧꦺꦴꦠꦼꦤ꧀ꦩꦏꦠꦼꦤ꧀꧈​ꦏꦕꦫꦶꦪꦺꦴꦱ꧀ꦱꦺꦴꦏ꧀ꦥꦸꦫꦸꦤ꧀ꦲꦔꦿꦸꦧꦺꦢꦠꦸꦩꦿꦥ꧀ꦝꦠꦼꦁ​ꦲꦶꦁ​ꦏꦁ​ꦲꦁ​ꦒꦝꦃ​ꦲꦶꦲꦸꦠꦮꦶꦲꦶꦁ​ꦏꦁ​ꦚꦶꦩ꧀ꦥꦼꦤ꧀꧈​ꦲꦶꦁ​ꦱꦢꦺꦫꦺꦁ​ꦔꦶꦥꦸꦤ꧀ꦱꦢꦱꦠꦲꦸꦤ꧀ꦱꦥꦿꦶꦏꦶꦥꦫꦠꦶꦪꦁ​ꦗꦮꦶꦱꦩꦺꦴꦁ​ꦱꦱꦺꦴꦮꦤ꧀ꦲꦶꦁ​ꦥꦫꦭꦸꦲꦸꦂ​ꦲꦸꦠꦮꦶꦏꦼꦏꦺꦱꦃ​ꦲꦤ꧀꧈​ꦠꦏ꧀ꦱꦶꦃ​ꦱꦩꦶꦩꦼꦂ​ꦭꦺꦴꦑꦏꦼꦤ꧀ꦔꦁ​ꦒꦺꦝꦸꦮꦸꦁ​꧈​ꦱꦺꦧꦲꦶꦁ​ꦥꦫꦭꦸꦲꦸꦂ​ꦠꦤ꧀ꦥꦝꦸꦮꦸꦁ​ꦔꦤ꧀꧈​ꦏꦲꦁ​ꦒꦼꦥ꧀ꦩꦸꦫꦁ​ꦠꦠ꧉​ꦭꦫꦺꦲꦺꦱ꧀ꦠꦿꦶꦲꦸꦠꦮꦶꦥꦼꦔꦤ꧀ꦠꦺꦤ꧀ꦲꦺꦱ꧀ꦠꦿꦶꦱꦲꦺꦁ​ꦒꦱꦥꦿꦶꦏꦶꦲꦶꦁ​ꦏꦁ​ꦭꦶꦩꦿꦃ​ꦢꦶꦥꦸꦤ꧀ꦧꦼꦏ꧀ꦠꦤꦶꦝꦸꦮꦸꦁ​꧈​ꦩꦶꦤꦺꦴꦁ​ꦏꦥꦩꦼꦛꦸꦏ꧀ꦠꦸꦩꦿꦥ꧀ꦭꦫꦺꦲꦸꦠꦮꦶꦥꦼꦔꦤ꧀ꦠꦺꦤ꧀ꦗꦊꦂ​ꦢꦺꦤꦶꦁ​ꦠꦶꦪꦁ​ꦱꦼꦥꦸꦃ​ꦲꦶꦥꦸꦤ꧀꧉​ ꧋ꦩꦼꦁ​ꦒꦃ​ꦝꦸꦮꦸꦁ​ꦥꦸꦤꦶꦏꦩꦤꦸꦠ꧀ꦮꦶꦫꦪꦠ꧀ꦲꦸꦠꦮꦶꦢꦼꦢꦺꦴꦔꦺꦁ​ꦔꦤ꧀ꦤꦶꦥꦸꦤ꧀ꦥꦫꦱꦼꦥꦸꦃ​꧈​ꦱꦩꦶꦒꦝꦃ​ꦢꦪꦥꦶꦪꦩ꧀ꦧꦏ꧀ꦥꦶꦪꦩ꧀ꦧꦏ꧀꧈​ꦲꦮꦺꦴꦤ꧀ꦱꦲꦺꦤꦶꦁ​ꦢꦪꦮꦲꦸꦩꦤꦸꦠ꧀ꦝꦠꦼꦁ​ꦲꦺꦠꦁ​ꦔꦤ꧀꧈​ꦥꦩꦺꦴꦂ​ꦲꦸꦠꦮꦶꦮꦸꦗꦸꦢ꧀ꦢꦶꦁ​ꦠꦺꦴꦱ꧀ꦱꦤ꧀ꦤꦶꦥꦸꦤ꧀꧈​ꦥꦿꦩꦶꦭꦠꦶꦪꦁ​ꦠꦸꦩ꧀ꦧꦱ꧀ꦝꦸꦮꦸꦁ​ꦥꦸꦤꦶꦏꦱꦤꦺꦱ꧀ꦥꦿꦏꦮꦶꦱ꧀ꦒꦩ꧀ꦥꦶꦭ꧀꧈​ꦱꦥꦶꦱꦤ꧀ꦏꦼꦢꦃ​ꦱꦸꦩꦼꦉꦥ꧀ꦝꦠꦼꦁ​ꦲꦮꦺꦴꦤ꧀ꦱꦲꦺꦤꦶꦁ​ꦲꦺꦠꦁ​ꦔꦤ꧀꧈​ꦥꦩꦺꦴꦂ​ꦠꦸꦮꦶꦤ꧀ꦠꦺꦴꦱ꧀ꦱꦤ꧀ꦤꦶꦁ​ꦝꦸꦮꦸꦁ​ꦲꦶꦁ​ꦏꦁ​ꦧꦝꦺꦏꦠꦸꦩ꧀ꦧꦱ꧀꧈​ꦏꦥꦶꦁ​ꦏꦭꦶꦃ​ꦲꦶꦥꦸꦤ꧀ꦥꦸꦤꦥꦝꦸꦮꦸꦁ​ꦮꦲꦸꦥꦸꦫꦸꦤ꧀ꦏꦒꦝꦃ​ꦢꦺꦤꦶꦁ​ꦠꦶꦪꦁ​ꦲꦶꦁ​ꦏꦁ​ꦧꦝꦺꦠꦸꦩ꧀ꦧꦱ꧀ꦥꦸꦤꦥꦧꦺꦴꦠꦼꦤ꧀꧈​ꦲꦮꦶꦠ꧀ꦱꦤꦗꦤ꧀ꦲꦺꦠꦁ​ꦔꦤ꧀꧈​ꦥꦩꦺꦴꦂ​ꦠꦸꦮꦶꦤ꧀ꦠꦺꦴꦱ꧀ꦱꦤ꧀ꦤꦶꦥꦸꦤ꧀ꦱꦲꦺ꧈​ꦲꦤꦔꦶꦁ​ꦝꦸꦮꦸꦁ​ꦮꦲꦸꦧꦺꦴꦠꦼꦤ꧀ꦥꦸꦫꦸꦤ꧀ꦏꦒꦝꦃ​ꦢꦺꦤꦶꦁ​ꦠꦶꦪꦁ​ꦲꦶꦁ​ꦏꦁ​ꦧꦝꦺꦲꦁ​ꦒꦝꦃ​ꦲꦶꦲꦸꦠꦮꦶꦚꦶꦩ꧀ꦥꦼꦤ꧀꧈​ꦲꦸꦒꦶꦧꦝꦺꦲꦤ꧀ꦝꦠꦼꦁ​ꦔꦏꦼꦤ꧀ꦏꦱꦶꦱꦃ​ꦲꦤ꧀ꦫꦸꦥꦶꦫꦸꦥꦶ꧈​ꦥꦿꦩꦶꦭꦲꦶꦁ​ꦗꦩꦤ꧀ꦏꦶꦤꦱꦩꦺꦴꦁ​ꦱꦠꦶꦪꦁ​ꦧꦝꦺꦠꦸꦩ꧀ꦧꦱ꧀ꦝꦸꦮꦸꦁ​꧈​ꦝꦸꦮꦸꦁ​ꦲꦶꦁ​ꦏꦁ​ꦧꦝꦺꦏꦠꦸꦩ꧀ꦧꦱ꧀ꦮꦲꦸꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦢꦶꦥꦸꦤ꧀ꦥꦿꦶꦏ꧀ꦱꦩꦼꦁ​ꦒꦃ​ꦲꦮꦺꦴꦤ꧀ꦱꦲꦺꦤꦶꦁ​ꦲꦺꦠꦁ​ꦔꦤ꧀꧈​ꦥꦩꦺꦴꦂ​ꦠꦸꦮꦶꦤ꧀ꦠꦺꦴꦱ꧀ꦱꦤ꧀ꦤꦶꦥꦸꦤ꧀꧈​ꦭꦗꦼꦁ​ꦢꦶꦥꦸꦤ꧀ꦠꦶꦫꦏꦠ꧀ꦠꦶꦢꦶꦥꦸꦤ꧀ꦱꦤ꧀ꦝꦶꦁ​ꦠꦶꦊꦩ꧀꧈​ꦏꦕꦫꦶꦪꦺꦴꦱ꧀ꦩꦤꦮꦶꦝꦸꦮꦸꦁ​ꦲꦶꦁ​ꦏꦁ​ꦱꦲꦺꦱꦺꦴꦏ꧀ꦩꦁ​ꦒꦶꦃ​ꦲꦶꦮꦺꦴꦤ꧀ꦠꦼꦤ꧀ꦱꦊꦧꦼꦠ꧀ꦠꦶꦁ​ꦱꦸꦥꦼꦤꦩꦶꦤ꧀ꦝꦲꦫꦸꦥꦶꦗꦤ꧀ꦩ꧈​ꦱꦂ​ꦠꦲꦱꦸꦁ​ꦱꦱ꧀ꦩꦶꦠꦥꦸꦫꦸꦤ꧀ꦭꦤ꧀ꦧꦺꦴꦠꦼꦤ꧀ꦤꦶꦥꦸꦤ꧀ꦢꦶꦥꦸꦤ꧀ꦫꦮꦠ꧀ꦠꦶꦢꦺꦤꦶꦁ​ꦠꦶꦪꦁ​ꦲꦶꦁ​ꦏꦁ​ꦤꦼꦢꦾꦠꦸꦩ꧀ꦧꦱ꧀꧉​ꦩꦶꦫꦶꦠ꧀ꦱꦏꦶꦁ​ꦢꦼꦢꦺꦴꦔꦺꦁ​ꦔꦤ꧀ꦤꦶꦁ​ꦠꦶꦪꦁ​ꦱꦼꦥꦸꦃ​ꦧꦺꦴꦁ​ꦱꦗꦮꦶ꧈​ꦝꦸꦮꦸꦁ​ꦥꦸꦤꦶꦏꦏꦲꦁ​ꦒꦼꦥ꧀ꦒꦼꦱꦁ​ꦒꦝꦃ​ꦚꦮꦏꦢꦺꦴꦱ꧀ꦩꦤꦸꦁ​ꦱ꧉​ ꧋ꦲꦶꦁ​ꦏꦗꦮꦺꦤ꧀ꦲꦶꦁ​ꦔꦗꦼꦁ​ꦧꦝꦺꦲꦤꦼꦫꦁ​ꦔꦏꦼꦤ꧀ꦧꦧ꧀ꦏꦥꦶꦠꦢꦺꦴꦱ꧀ꦱꦤ꧀ꦤꦶꦥꦸꦤ꧀ꦠꦶꦪꦁ​ꦗꦮꦶꦠꦸꦩꦿꦥ꧀ꦥꦿꦠꦶꦏꦼꦭ꧀ꦭꦶꦥꦸꦤ꧀ꦥꦔꦺꦠꦁ​ꦔꦶꦁ​ꦝꦸꦮꦸꦁ​꧈​ꦠꦸꦮꦶꦤ꧀ꦮꦸꦗꦸꦢ꧀ꦢꦶꦁ​ꦥꦩꦺꦴꦂ​ꦲꦸꦠꦮꦶꦠꦺꦴꦱ꧀ꦱꦤ꧀ꦲꦶꦁ​ꦏꦁ​ꦲꦮꦺꦴꦤ꧀ꦠꦸꦮꦶꦤ꧀ꦲꦶꦁ​ꦏꦁ​ꦱꦲꦺꦠꦸꦩꦿꦥꦶꦁ​ꦝꦸꦮꦸꦁ​꧈​ꦲꦸꦒꦶꦩꦤꦸꦠ꧀ꦏꦠꦼꦫꦁ​ꦔꦤ꧀ꦱꦏꦶꦁ​ꦥꦫꦱꦼꦥꦸꦃ​ꦲꦶꦁ​ꦗꦩꦤ꧀ꦏꦶꦤ꧉​ Sal.	Bab Dhuwung Awit jaman kina dumugi sapriki băngsa Jawi ingkang limrah sami rêmên dhatêng dhuwung, dhuwung punika tumrap băngsa Jawi kaanggêp dêdamêl ingkang maedahi sangêt, sabab saking wirayat utawi dêdongenganipun tiyang sêpuh sagêd andhatêngakên kabêgjan utawi kacilakan tumrap tiyang ingkang anggadhahi utawi anyimpên. Dene wirayat utawi dêdongengan wau ing samangke kalêbêt pamanggih gugon tuhon, ananging sarèhning pamanggih wau ing jaman kina sangêt lumèngkètipun dhatêng băngsa Jawi, pramila saengga samangke ugi taksih kathah băngsa Jawi ingkang ngangge utawi pitados dhatêng pamanggih wau. Para tiyang Jawi ingkang kathah botên purun anyawiyah dhuwung punapa malih tumrap dhatêng dhuwung ingkang kawical sae utawi têtilaraning tiyang sêpuh, mandar dipun pundhi-pundhi sabên ing malêm Jumungah utawi Slasa Kliwon dipun dupani utawi dipun sajèni arupi sêkar borèh utawi lisah wangi, awit bilih botên makatên, kacariyos sok purun angrubeda tumrap dhatêng ingkang anggadhahi utawi ingkang nyimpên, ing sadèrèngipun sadasa taun sapriki para tiyang Jawi samăngsa sowan ing para luhur utawi kêkesahan, taksih sami mêrlokakên ngangge dhuwung, seba ing para luhur tanpa dhuwungan, kaanggêp murang tata. Lare èstri utawi pêngantèn èstri saengga sapriki ingkang limrah dipun bêktani dhuwung, minăngka pamêthuk tumrap lare utawi pêngantèn jalêr dening tiyang sêpuhipun. Mênggah dhuwung punika manut wirayat utawi dêdongenganipun para sêpuh, sami gadhah daya piyambak-piyambak, awon saening daya wau manut dhatêng etangan, pamor utawi wujuding tosanipun, pramila tiyang tumbas dhuwung punika sanès prakawis gampil, sapisan kêdah sumêrêp dhatêng awon saening etangan, pamor tuwin tosaning dhuwung ingkang badhe katumbas, kaping kalihipun punapa dhuwung wau purun kagadhah dening tiyang ingkang badhe tumbas punapa botên, awit sanajan etangan, pamor tuwin tosanipun sae, ananging dhuwung wau botên purun kagadhah dening tiyang ingkang badhe anggadhahi utawi nyimpên, ugi badhe andhatêngakên kasisahan rupi-rupi, pramila ing jaman kina samăngsa tiyang badhe tumbas dhuwung, dhuwung ingkang badhe katumbas wau sasampunipun dipun priksa mênggah awon saening etangan, pamor tuwin tosanipun, lajêng dipun tirakati dipun sandhing tilêm, kacariyos manawi dhuwung ingkang sae sok manggihi wontên salêbêting supêna mindha arupi janma, sarta asung sasmita purun lan botênipun dipun rawati dening tiyang ingkang nêdya tumbas. Mirit saking dêdongenganing tiyang sêpuh băngsa Jawi, dhuwung punika kaanggêp gêsang gadhah nyawa kados manungsa. Ing Kajawèn ing ngajêng badhe anêrangakên bab kapitadosanipun tiyang Jawi tumrap pratikêlipun pangetanging dhuwung, tuwin wujuding pamor utawi tosan ingkang awon tuwin ingkang sae tumraping dhuwung, ugi manut katêrangan saking para sêpuh ing jaman kina. Sal.
[ 533 ]꧋ꦉꦩ꧀ꦧꦒ꧀ꦒꦶꦥꦸꦤ꧀ꦦꦺꦠꦿꦸꦏ꧀ꦭꦤ꧀ꦓꦫꦺꦁꦧꦧ꧀ꦱꦠꦩꦸꦫꦸꦒ꧀ꦒꦏꦼꦤ꧀ꦱꦱꦏꦶꦠ꧀ꦗꦤ꧀ꦠꦸꦁ꧉​ ꧋ꦓꦫꦺꦁ꧇​ꦲꦪꦺꦴꦠꦿꦸꦏ꧀꧈​ꦱꦲꦶꦏꦶꦥꦝꦲꦩ꧀ꦧꦚ꧀ꦗꦸꦂꦫꦏꦺꦉꦩ꧀ꦧꦸꦒ꧀ꦒꦤ꧀ꦤꦺꦧꦧ꧀ꦧꦏꦺꦴ꧈​ꦏꦗꦼꦒ꧀ꦏꦗꦼꦒ꧀ꦒꦺꦢꦸꦫꦸꦁꦫꦩ꧀ꦥꦸꦁ꧉​ ꧋ꦦꦺꦠꦿꦸꦏ꧀꧇​ꦱꦧꦼꦤꦼꦂꦫꦺꦔꦺꦴꦤꦺꦴꦲꦏꦸꦮꦶꦱ꧀ꦗꦼꦭꦺꦃꦧꦺꦴꦱꦼꦤ꧀ꦲꦔꦽꦩ꧀ꦧꦸꦒ꧀ꦧꦧ꧀ꦧꦏꦺꦴꦏꦸꦮꦶ꧈​ꦮꦺꦴꦁꦢꦏ꧀ꦫꦱꦏꦿꦱꦑꦏꦺꦏꦺꦴꦏ꧀ꦲꦺꦴꦫꦲꦤꦱꦶꦁꦚꦼꦤꦼꦁꦔꦏꦺꦧꦧꦂꦥꦶꦱꦤ꧀꧈​ꦱꦁꦱꦶꦁꦱꦁꦱꦶꦁꦱꦶꦁꦔ꧀ꦭꦫꦤ꧀ꦤꦶꦲꦮꦏ꧀ꦛꦺꦴꦏ꧀ꦧꦲꦺ꧉​ꦧꦺꦴꦏ꧀ꦲꦶꦪꦮꦺꦴꦁꦲꦸꦢꦸꦢ꧀ꦏꦸꦮꦶꦧꦶꦱꦢꦢꦶꦗꦭꦂꦫꦤ꧀ꦧꦚ꧀ꦗꦸꦂꦏꦸꦮꦠ꧀ꦮꦪꦸꦃꦱꦭꦺꦴꦱꦶꦤ꧀ꦔꦺꦴꦤꦺꦴ꧈​ꦢꦢꦶꦏꦼꦤꦢꦶꦫꦱꦑꦏꦺ꧉​ꦭꦸꦮꦶꦃꦧꦼꦕꦶꦏ꧀ꦥꦝꦉꦩ꧀ꦧꦸꦒ꧀ꦒꦤ꧀ꦧꦧ꧀ꦔꦶꦔꦸꦲꦶꦮꦏ꧀꧈​ꦏꦪꦏꦪꦝꦺꦏ꧀ꦲꦤꦸꦏꦲꦺꦪꦢꦸꦫꦸꦁꦫꦩ꧀ꦥꦸꦁ꧉​ꦏꦼꦤꦢꦶꦫꦱꦑꦏꦺ꧈​ꦠꦸꦂꦩꦤꦮꦏꦧꦼꦤꦼꦂꦫꦤ꧀ꦧꦶꦱꦲꦫꦺꦴꦥꦾꦤꦿꦺꦴꦥꦾꦤ꧀꧉​ ꧋ꦓꦫꦺꦁ꧇​ꦏꦤ꧀ꦝꦩꦸꦏꦸꦮꦶꦩꦸꦭꦲꦤꦧꦼꦤꦼꦂꦫꦺ꧈​ꦮꦺꦴꦁꦏꦶꦤꦺꦏ꧀ꦉꦩ꧀ꦧꦸꦒ꧀ꦒꦤ꧀ꦧꦧ꧀ꦱꦶꦗꦶꦧꦲꦺꦱꦺꦴꦏ꧀ꦧꦚ꧀ꦗꦸꦂꦕ꧀ꦭꦔꦧ꧀ꦧꦤ꧀ꦏꦪꦮꦺꦴꦁꦏꦠꦒꦶꦃꦲꦤ꧀ꦫꦫꦲꦶꦉꦁ꧈​ꦩꦸꦭꦤꦺꦱꦶꦁꦢꦶꦪꦺꦴꦩꦺꦴꦁꦏꦶꦪꦶꦭꦸꦮꦶꦃꦧꦼꦕꦶꦏ꧀ꦒꦺꦴꦤ꧀ꦠꦒꦤ꧀ꦠꦶ꧈​ꦱꦫꦺꦃꦤꦶꦁꦱꦲꦶꦏꦶꦮꦶꦱ꧀ꦏꦧꦚ꧀ꦗꦸꦂꦥꦝꦔꦽꦩ꧀ꦧꦸꦒ꧀ꦧꦧ꧀ꦧꦏꦺꦴꦝꦶꦱꦶꦏ꧀꧈​ꦭꦶꦪꦢꦶꦤꦧꦧ꧀ꦥꦔꦶꦔꦸꦤꦶꦁꦲꦶꦮꦏ꧀꧉​ ꧋ꦦꦺꦠꦿꦸꦏ꧀꧇​ꦧꦒꦸꦱ꧀꧈​ꦥꦺꦴꦩꦭ꧀ꦲꦺꦴꦲꦗꦭꦭꦶꦗꦁꦗꦶꦩꦸꦏꦸꦮꦶ꧈​ꦮꦺꦴꦁꦲꦏꦸꦱꦼꦭꦏ꧀ꦲꦺꦁꦒꦭ꧀ꦲꦺꦁꦒꦭ꧀ꦏꦼꦥꦺꦔꦶꦤ꧀ꦔꦶꦔꦸꦲꦶꦮꦏ꧀ꦧꦚꦸ꧈​ꦤꦺꦏ꧀ꦤꦺꦏ꧀ꦏꦺꦲꦏꦸꦧꦺꦱꦸꦏ꧀ꦧꦶꦱꦔꦼꦱꦺꦴꦥ꧀ꦒꦿꦩꦺꦃ꧉​ ꧋ꦓꦫꦺꦁ꧇​ꦮꦶꦪꦃꦪꦲꦺꦴꦫꦩꦛꦸꦏ꧀꧈​ꦩꦱꦲꦶꦪꦒꦿꦩꦺꦃꦢꦶꦲꦼꦱꦺꦴꦥ꧀꧈​ꦱꦼꦠꦸꦤ꧀ꦱꦼꦠꦸꦤ꧀ꦢꦶꦱꦼꦩꦸꦂꦲꦸꦠꦮꦢꦶꦪꦕꦂ꧈​ꦭ꧀ꦲꦏꦸꦮꦶꦩꦼꦱ꧀ꦛꦶꦒꦤ꧀ꦢꦼꦩ꧀ꦩꦺ꧉​ꦮꦶꦱ꧀ꦮꦶꦱ꧀ꦧꦺꦱꦸꦏ꧀ꦧꦲꦺꦩꦤꦺꦃꦉꦩ꧀ꦧꦸꦒ꧀ꦒꦤ꧀ꦧꦧ꧀ꦲꦶꦮꦏ꧀꧈​ꦱꦲꦶꦏꦶꦥꦝꦤꦼꦫꦸꦱ꧀ꦱꦏꦺꦧꦧ꧀ꦧꦏꦺꦴꦝꦶꦱꦶꦏ꧀꧉​ꦒꦺꦏ꧀ꦲꦤꦸꦏꦲꦺꦲꦏꦸꦮꦶꦱ꧀ꦔꦺꦴꦩꦺꦴꦁ꧈​ꦪꦺꦤ꧀ꦗꦭꦂꦫꦤ꧀ꦱꦏꦧꦏꦺꦴ꧈​ꦏꦼꦧꦸꦏ꧀ꦏꦶꦁꦮꦺꦴꦁꦏꦸꦮꦶꦧꦶꦱꦫꦸꦱꦏ꧀꧉​ꦲꦶꦏꦸꦲꦺꦴꦫꦔꦼꦩꦸꦁꦔꦏꦺꦏꦼꦧꦸꦏ꧀ꦏꦺꦧꦲꦺ꧈​ꦢꦭꦱ꧀ꦱꦤ꧀ꦗꦤ꧀ꦠꦸꦁꦔꦺꦧꦶꦱꦫꦸꦱꦏ꧀꧉​ꦩꦭꦃꦏꦁꦏꦼꦤꦏꦁꦒꦺꦴꦥꦱꦼꦏ꧀ꦱꦺꦤ꧀ꦧꦧ꧀ꦮꦶꦱꦤꦶꦁꦧꦏꦺꦴ꧈​ꦏꦸꦮꦶꦏꦠꦶꦠꦶꦏ꧀ꦱꦏꦫꦸꦱꦏ꧀ꦏꦶꦁꦗꦤ꧀ꦠꦸꦁ꧉​ ꧋ꦦꦺꦠꦿꦸꦏ꧀꧇​ꦲꦫ꧈​ꦲꦥꦏꦸꦮꦶꦲꦺꦴꦫꦗꦼꦤꦼꦁꦔꦿꦸꦱꦑꦏꦺꦲꦒꦩꦠꦼꦩꦼꦤ꧀ꦤꦤ꧀꧈​ꦥꦶꦗꦼꦂꦥꦶꦗꦼꦂꦏꦺꦴꦏ꧀ꦲꦺꦴꦫꦏꦼꦥꦺꦤꦏ꧀ꦧꦲꦺ꧈​ꦝꦤ꧀ꦲꦶꦤꦶꦝꦤ꧀ꦲꦶꦠꦸ꧈​ꦱꦸꦮꦺꦱꦸꦮꦺꦏꦺꦴꦮꦺꦔꦤ꧀ꦝꦑꦏꦺꦪꦺꦤ꧀ꦲꦸꦢꦸꦢ꧀ꦏꦸꦮꦶꦧꦶꦱꦲꦒꦮꦺꦥꦼꦒꦠ꧀ꦠꦶꦁꦲꦏꦸꦏꦫꦺꦴꦧꦺꦴꦏ꧀ꦤꦺꦱꦶꦏꦩ꧀ꦥꦿꦺꦠ꧀꧈​ꦲꦥꦪꦲꦺꦴꦫꦧꦼꦝꦼꦒꦼꦭ꧀ꦤꦁꦲꦠꦶꦏꦸꦮꦶ꧉​ ꧋ꦓꦫꦺꦁ꧇​ꦭꦮꦺꦴꦁꦥꦤꦩ꧀ꦥꦩꦸꦫꦢꦏꦗꦼꦫꦺꦴꦤ꧀꧈​ꦲꦉꦥ꧀ꦥꦲꦺꦴꦫꦲꦸꦢꦸꦢ꧀ꦏꦲꦺ꧈​ꦩꦤꦮꦱꦼꦢꦾꦩꦸꦲꦉꦥ꧀ꦥꦼꦒꦠ꧀ꦠꦤ꧀꧈​ꦪꦧꦶꦱꦏ꧀ꦭꦏꦺꦴꦤ꧀ꦧꦲꦺ꧉​ꦲꦤꦱꦮꦼꦤꦺꦃꦲꦶꦁꦊꦭꦫꦏꦁꦢꦶꦪꦫꦤꦶꦊꦭꦫꦗꦤ꧀ꦠꦸꦁ꧈​ꦏꦸꦮꦶꦩꦂꦒꦱꦏꦮꦶꦱꦤꦶꦁꦧꦏꦺꦴ꧉​ꦩꦸꦭꦤꦺꦏꦧꦺꦃꦲꦸꦮꦺꦴꦁꦏꦁꦮꦸꦱ꧀ꦤꦝꦃ꧈​ꦠꦼꦩ꧀ꦠꦸꦢꦸꦮꦺꦊꦭꦫꦗꦤ꧀ꦠꦸꦁꦏꦁꦩꦁꦏꦺꦴꦤꦺꦴꦩꦲꦸ꧉​ ꧋ꦦꦺꦠꦿꦸꦏ꧀​꧇​​ꦫꦺꦁ꧈​​ꦩꦸꦁꦒꦸꦃ​ꦠꦼꦔꦼꦂꦫꦤ꧀ꦤꦺ​ꦮꦺꦴꦁ​ꦏꦁ​ꦲꦤ꧀ꦢꦸꦮꦺꦤꦶ​ꦊꦭꦫ​ꦗꦤ꧀ꦠꦸꦁ​ꦏꦸꦮꦶ​ꦏꦥꦿꦶꦪꦺ꧉​ ꧋ꦓꦫꦺꦁ​꧇​​ꦩꦸꦁꦒꦸꦃ​ꦠꦼꦔꦼꦂꦫꦤ꧀ꦤꦺ​ꦩꦁꦏꦺꦤꦺ꧇​​ꦏꦭꦏ [ 534 ]ꦭꦏꦼꦢꦸꦠ꧀ꦠꦶꦁꦗꦤ꧀ꦠꦸꦁꦏꦸꦮꦶꦫꦶꦏꦠ꧀ꦧꦔꦼꦠ꧀꧈​ꦢꦸꦩꦢꦏ꧀ꦏꦤ꧀ꦧꦚ꧀ꦗꦸꦂꦩꦤ꧀ꦝꦼꦒ꧀ꦒꦽꦒ꧀꧈​ꦮꦱꦤꦧꦚ꧀ꦗꦸꦂꦲꦺꦴꦧꦃꦩꦤꦺꦃꦭꦺꦴꦤ꧀ꦭꦺꦴꦤ꧀ꦤꦤ꧀꧉​ ꧋ꦦꦺꦠꦿꦸꦏ꧀꧇​ꦮꦺ꧈​ꦭ꧈​ꦏ꧀ꦭꦶꦫꦸꦥꦤꦺꦴꦩ꧀ꦥꦲꦏꦸ꧈​ꦠꦏ꧀ꦲꦫꦤ꧀ꦤꦶꦮꦺꦴꦁꦱꦶꦁꦗꦤ꧀ꦠꦸꦁꦔꦺꦏꦼꦢꦸꦠ꧀ꦠꦼꦤ꧀ꦤꦁꦏꦺꦴꦤꦺꦴꦏꦸꦮꦶ꧈​ꦱꦮꦶꦗꦶꦤꦶꦁꦱꦱ꧀ꦩꦶꦠꦪꦺꦤ꧀ꦧꦏꦭ꧀ꦤꦼꦩꦺꦴꦤ꧀ꦤꦶꦊꦭꦏꦺꦴꦤ꧀ꦏꦁꦲꦤꦺꦃꦲꦤꦺꦃ꧈​ꦲꦸꦠꦮꦢꦶꦫꦱꦤ꧀ꦤꦶꦫꦺꦴꦤ꧀ꦝꦱꦸꦒꦶꦃꦲꦉꦥ꧀ꦢꦶꦪꦸꦁꦒꦃꦲꦸꦁꦒꦃꦲꦶ꧉​ ꧋ꦓꦫꦺꦁ꧇​ꦮꦶꦪꦃ꧈​ꦔꦺꦴꦩꦺꦴꦁꦏꦺꦴꦏ꧀ꦏꦪꦮꦺꦴꦁꦔ꧀ꦭꦶꦤ꧀ꦢꦸꦂꦔꦺꦴꦤꦺꦴ꧉​ꦮꦺꦴꦁꦏꦁꦏꦭꦏꦭꦱꦺꦴꦏ꧀ꦏꦼꦢꦸꦠ꧀ꦠꦼꦤ꧀ꦏꦪꦱꦶꦁꦢꦏ꧀ꦕꦿꦶꦠꦑꦏꦺꦩꦲꦸ꧈​ꦤꦭꦶꦏꦥꦶꦤꦸꦗꦸꦏꦸꦩꦠ꧀꧈​ꦱꦤꦭꦶꦏꦧꦚ꧀ꦗꦸꦂꦲꦶꦭꦁꦤꦥꦱ꧀ꦱꦺ꧈​ꦲꦸꦠꦮꦲꦩ꧀ꦧꦼꦏ꧀ꦏꦤ꧀ꦤꦺꦲꦺꦴꦫꦲꦗꦼꦒ꧀꧉​ꦱꦧꦧ꧀ꦏꦁꦩꦁꦏꦺꦴꦤꦺꦴꦩꦲꦸꦏꦁꦲꦚ꧀ꦗꦭꦂꦫꦶꦮꦺꦴꦁꦱꦶꦁꦮꦶꦱ꧀ꦏꦸꦭꦶꦤꦲꦸꦢꦸꦠ꧀꧈​ꦲꦏꦺꦃꦏꦁꦏꦸꦫꦁꦮꦫꦱ꧀ꦱꦂꦠꦫꦶꦁꦏꦶꦃꦧꦢꦤ꧀ꦤꦺ꧉​ ꧋ꦦꦺꦠꦿꦸꦏ꧀꧇​ꦲꦫ꧈​ꦲꦥꦏꦸꦮꦶꦲꦺꦴꦫꦲꦫꦤ꧀ꦚꦶꦭꦶꦏ꧀ꦏꦏꦺꦲꦠꦶꦤꦶꦁꦮꦺꦴꦁꦧꦲꦺ꧈​ꦲꦶꦁꦩꦺꦴꦁꦏꦮꦺꦴꦁꦲꦸꦫꦶꦥ꧀ꦏꦸꦮꦶꦗꦫꦺꦤꦺꦤꦺꦏ꧀ꦠꦤ꧀ꦱꦃꦢꦶꦕꦶꦭꦶꦏ꧀ꦏꦏꦺꦲꦠꦶꦤꦺꦧꦲꦺ꧈​ꦱꦺꦴꦏ꧀ꦧꦚ꧀ꦗꦸꦂꦲꦺꦁꦒꦭ꧀ꦢꦶꦕꦼꦝꦏ꧀ꦏꦶꦏꦫꦺꦴꦲꦼꦩ꧀ꦧꦃꦲꦺꦗꦶꦨꦿꦶꦭ꧀꧉​ꦩꦸꦭꦤꦺꦧꦼꦤꦼꦂꦫꦺꦔꦺꦴꦤꦺꦴꦲꦏꦸꦲꦺꦴꦫꦥꦠꦶꦱꦺꦴꦤ꧀ꦢꦺꦭ꧀ꦧꦔꦼꦠ꧀ꦕꦠꦸꦂꦫꦤ꧀ꦧꦧ꧀ꦧꦏꦺꦴꦏꦸꦮꦶ꧉​ꦱꦺꦗꦺꦏꦫꦺꦴꦉꦩ꧀ꦧꦸꦒ꧀ꦒꦤ꧀ꦧꦧ꧀ꦲꦶꦮꦏ꧀ꦭꦺꦴꦃ꧈​ꦥꦶꦏꦶꦫꦤ꧀ꦤꦺꦧꦶꦱꦧꦚ꧀ꦗꦸꦂꦮꦂꦤꦮꦂꦤ꧇​ꦲꦺꦭꦶꦁꦩꦼꦚꦁꦩꦔꦸꦠ꧀ꦮꦢꦼꦂ꧈​ꦥꦼꦕꦼꦭ꧀ꦭꦺꦭꦺ꧈​ꦥꦺꦥꦺꦱ꧀ꦱꦤ꧀ꦧꦤ꧀ꦢꦼꦁ꧈​ꦉꦩ꧀ꦥꦃꦥꦼꦭꦸꦱ꧀꧈​ꦥꦼꦕꦏ꧀ꦒꦿꦩꦺꦃ꧉​ ꧋ꦓꦫꦺꦁ꧇​ꦭꦏꦺꦴꦏ꧀ꦧꦚ꧀ꦗꦸꦂꦔ꧀ꦭꦤ꧀ꦠꦸꦂꦔ꧀ꦭꦤ꧀ꦠꦸꦂꦚꦫꦶꦠꦑꦏꦺꦮꦂꦤꦤꦶꦁꦲꦺꦴꦭꦃꦲꦺꦴꦭꦃꦲꦤ꧀ꦲꦶꦮꦏ꧀ꦭꦺꦴꦃꦔꦤ꧀ꦠꦶꦲꦏꦸꦧꦚ꧀ꦗꦸꦂꦏꦥꦼꦏ꧀ꦱꦠꦤ꧀ꦱꦃꦔꦸꦭꦺꦴꦤ꧀ꦤꦶꦲꦶꦢꦸꦧꦲꦺ꧉​ ꧋ꦦꦺꦠꦿꦸꦏ꧀꧇​ꦲꦥꦏꦸꦮꦶꦲꦺꦴꦫꦭꦸꦮꦶꦃꦲꦸꦠꦩ꧈​ꦠꦶꦤꦶꦩ꧀ꦧꦁꦲꦠꦶꦤꦺꦠꦤ꧀ꦱꦃꦝꦼꦒ꧀ꦝꦼꦒ꧀ꦒꦤ꧀ꦧꦲꦺ꧈​ꦏꦺꦭꦶꦁꦔꦤ꧀ꦫꦸꦱꦏ꧀ꦏꦶꦁꦏꦼꦧꦸꦏ꧀꧈​ꦗꦤ꧀ꦠꦸꦁꦭꦤ꧀ꦱꦥꦶꦠꦸꦫꦸꦠ꧀ꦠꦺ꧈​ꦫꦏ꧀ꦲꦭꦸꦮꦸꦁꦏꦺꦭꦶꦁꦔꦤ꧀ꦱꦶꦁꦲꦺꦤꦑꦺꦤꦏ꧀ꦏꦤ꧀꧈​ꦲꦺꦮꦱꦩꦺꦴꦤꦺꦴꦲꦏꦸꦩꦼꦏ꧀ꦱꦢꦸꦮꦺꦥꦶꦠꦏꦺꦴꦤ꧀ꦚꦁꦏꦺꦴꦮꦺꦱꦛꦶꦛꦶꦏ꧀꧈​ꦥꦶꦫꦁꦥꦽꦱꦺꦤ꧀ꦕꦕꦃꦲꦺꦮꦺꦴꦁꦱꦶꦁꦥꦝꦲꦸꦢꦸꦠ꧀ꦱꦂꦠꦧꦚ꧀ꦗꦸꦂꦢꦸꦮꦺꦊꦭꦫꦩꦁꦏꦺꦴꦤꦺꦴꦩꦲꦸ꧉​ ꧋ꦓꦫꦺꦁ꧇​ꦏꦧꦺꦃꦮꦺꦴꦁꦱꦶꦁꦮꦶꦱ꧀ꦢꦸꦮꦺꦥꦏꦉꦩ꧀ꦩꦤ꧀ꦧꦏꦺꦴ꧈​ꦏꦼꦤꦏꦠꦩ꧀ꦠꦺꦴꦑꦏꦺꦢꦸꦮꦺꦊꦭꦫꦗꦤ꧀ꦠꦸꦁꦏꦁꦩꦁꦏꦺꦴꦤꦺꦴꦩꦲꦸ꧉​ꦢꦸꦫꦸꦁꦮꦠꦫꦭꦮꦱ꧀ꦏꦶꦪꦶ꧈​ꦦꦩꦫꦺꦤ꧀ꦠꦃꦲꦶꦁꦄꦩꦺꦫꦶꦏꦃꦤꦶꦤ꧀ꦢꦏ꧀ꦏꦏꦺꦥꦤꦶꦠꦶꦥꦿꦶꦏ꧀ꦱꦠꦸꦩꦿꦥ꧀ꦏꦧꦺꦃꦩꦸꦫꦶꦢ꧀ꦏꦁꦤꦼꦢꦾꦩꦊꦧꦸꦲꦶꦁꦥꦩꦸꦭꦁꦔꦤ꧀ꦭꦸꦲꦸꦂ꧈​ꦱꦏꦗꦶꦮ 412 ꦲꦸꦮꦺꦴꦁ꧈​ꦏꦁꦢꦶꦠꦺꦴꦭꦏ꧀ꦲꦤꦮꦺꦴꦁ 298 ꦲꦩꦂꦒꦮꦸꦱ꧀ꦫꦸꦱꦏ꧀ꦗꦤ꧀ꦠꦸꦁꦔꦺ꧉​	Rêmbagipun Petruk lan Garèng Garèng : Ayo Truk, saiki padha ambanjurake rêmbugane bab bako, kajêg-kajêge durung rampung. Petruk : Sabênêre ngono aku wis jêlèh bosên angrêmbug bab bako kuwi, wong dak rasak-rasakake kok ora ana sing nyênêngake babarpisan, sangsing sangsing sing nglarani awak thok bae. Bok iya wong udud kuwi bisa dadi jalaran banjur kuwat wayuh salosin ngono, dadi kêna dirasakake. Luwih bêcik padha rêmbugan bab ngingu iwak, kaya-kaya dhèk anu kae ya durung rampung. Kêna dirasakake, tur manawa kabênêran bisa aropyan-ropyan. Garèng : Kandhamu kuwi mula ana bênêre, wong ki nèk rêmbugan bab siji bae sok banjur clangaban kaya wong katagihan Rara Irêng, mulane sing diomong kiyi luwih bêcik gonta-ganti, sarèhning saiki wis kabanjur padha ngrêmbug bab bako dhisik, liya dina bab panginguning iwak. Petruk : Bagus, poma lho aja lali jangjimu kuwi, wong aku sêlak enggal-enggal kêpengin ngingu iwak banyu, nèk-nèke aku besuk bisa ngêsop gramèh. Garèng : Wiyah ya ora mathuk, masa iya gramèh di êsop, sêtun-sêtun disêmur utawa diacar, lha kuwi mêsthi gandême. Wis-wis besuk bae manèh rêmbugan bab iwak, saiki padha nêrusake bab bako dhisik. Gèk anu kae aku wis ngomong, yèn jalaran saka bako, kêbuking wong kuwi bisa rusak. Iku ora ngêmungake kêbuke bae, dalasan jantunge bisa rusak. Malah kang kêna kanggo pasêksèn bab wisaning bako, kuwi katitik saka rusaking jantung. Petruk : Hara, apa kuwi ora jênêng ngrusakake agama têmênan, pijêr-pijêr kok ora kêpenak bae, dhan ini dhan itu, suwe-suwe kowe ngandhakake yèn udud kuwi bisa agawe pêgating aku karo bokne Si Kamprèt, apa ya ora bêdhêgêl nang ati kuwi. Garèng : Lha wong panampamu rada kajêron, arêpa ora udud kae, manawa sêdyamu arêp pêgatan, ya bisa klakon bae. Ana sawênèhing lêlara kang diarani lêlara jantung, kuwi marga saka wisaning bako. Mulane kabèh uwong kang wus nadhah, têmtu duwe lêlara jantung kang mangkono mau. Petruk : Rèng, mungguh têngêrane wong kang anduwèni lêlara jantung kuwi kapriye. Garèng : Mungguh têngêrane mangkene: kala-kala kêduting jantung kuwi rikat bangêt, dumadakan banjur mandhêg grêg, wasana banjur obah manèh lon-lonan. Petruk : We, lha, kliru panămpa aku, tak arani wong sing jantunge kêdutên nang kono kuwi, sawijining sasmita yèn bakal nêmoni lêlakon kang anèh-anèh, utawa dirasani răndha sugih arêp diunggah-unggahi. Garèng : Wiyah, ngomong kok kaya wong nglindur ngono. Wong kang kala-kala sok kêdutên kaya sing dak critakake mau, nalika pinuju kumat, sanalika banjur ilang napase, utawa ambêkane ora ajêg. Sabab kang mangkono mau kang anjalari wong sing wis kulina udut, akèh kang kurang waras sarta ringkih badane. Petruk : Hara, apa kuwi ora aran nyilikake atining wong bae, ing măngka wong urip kuwi jarene nèk tansah dicilikake atine bae, sok banjur enggal dicêdhaki karo êmbahe Jibril. Mulane bênêre ngono aku ora pati sondèl bangêt caturan bab bako kuwi. Seje karo rêmbugan bab iwak loh, pikirane bisa banjur warna-warna: eling mênyang mangut wadêr, pêcêl lele, pepesan bandêng, rêmpah pêlus, pêcak gramèh. Garèng : Lha kok banjur nglantur-nglantur nyaritakake warnaning olah-olahan iwak loh nganti aku banjur kapêksa tansah nguloni idu bae. Petruk : Apa kuwi ora luwih utama, tinimbang atine tansah dhêg-dhêgan bae, kèlingan rusaking kêbuk, jantung lan sapiturute, rak aluwung kèlingan sing enak-enakan, ewasamono aku mêksa duwe pitakon nyang kowe sathithik, pirang prêsèn cacahe wong sing padha udut sarta banjur duwe lêlara mangkono mau. Garèng : Kabèh wong sing wis duwe pakarêman bako, kêna katamtokake duwe lêlara jantung kang mangkono mau. Durung watara lawas kiyi, pamarentah ing Amerikah nindakake panitipriksa tumrap kabèh murid kang nêdya malêbu ing pamulangan luhur, saka jiwa 412 uwong, kang ditolak ana wong 298 amarga wus rusak jantunge. [Iklan]
[ 535 ]꧋ꦗꦒꦢ꧀ꦢꦶꦁ​ꦮꦤꦶꦠ꧉​ ꧋ꦧꦧ꧀ꦢꦪꦤꦶꦁ​ꦱꦠꦺ​ꦠꦸꦮꦶꦤ꧀ꦱꦲꦺꦴꦠꦺꦴ​ꦩꦢꦸꦫ꧉ ꧋ꦱꦮꦼꦤꦺꦃꦲꦶꦁꦩꦶꦠꦿꦏꦸꦭꦱꦩꦶꦔꦔ꧀ꦭꦸꦃꦠꦸꦮꦶꦤ꧀ꦒꦫꦸꦤ꧀ꦢꦼꦭ꧀ꦭꦤ꧀꧈​ꦗꦭꦂꦫꦤ꧀ꦏꦏꦸꦁꦔꦶꦥꦸꦤ꧀ꦠꦤ꧀ꦱꦃꦏꦼꦏꦺꦱꦃꦲꦤ꧀ꦏꦺꦩꦮꦺꦴꦤ꧀꧈​ꦲꦶꦁꦏꦁꦲꦤꦺꦭꦑꦏꦼꦤ꧀ꦏꦢꦺꦴꦱ꧀ꦏꦢꦺꦴꦱ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦤꦶꦥꦸꦤ꧀ꦥꦶꦪꦩ꧀ꦧꦏ꧀ꦧꦺꦴꦠꦼꦤ꧀ꦏꦿꦲꦺꦴꦱ꧀꧉​ꦩꦼꦁꦒꦃꦠꦶꦤ꧀ꦢꦏ꧀ꦏꦶꦁꦏꦏꦸꦁꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦧꦺꦴꦠꦼꦤ꧀ꦠꦼꦩ꧀ꦠꦸꦊꦥꦠ꧀ꦠꦶꦁꦏꦏꦸꦁꦔꦶꦥꦸꦤ꧀꧈​ꦱꦒꦼꦢ꧀ꦲꦸꦒꦶꦊꦥꦠ꧀ꦠꦶꦥꦸꦤ꧀ꦧꦺꦴꦁꦱꦏꦸꦭꦥꦮꦺꦱ꧀ꦠꦿꦶꦥꦶꦪꦩ꧀ꦧꦏ꧀꧉​ꦏꦛꦃꦧꦧ꧀ꦧꦧ꧀ꦲꦶꦁꦏꦁꦭꦸꦒꦸꦊꦥꦠ꧀ꦠꦶꦁꦥꦮꦺꦱ꧀ꦠꦿꦶꦲꦶꦁꦏꦁꦲꦚ꧀ꦗꦭꦂꦫꦶꦏꦏꦸꦁꦔꦶꦥꦸꦤ꧀ꦧꦺꦴꦠꦼꦤ꧀ꦏꦿꦲꦺꦴꦱ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪ꧈​ꦏꦢꦺꦴꦱ꧀ꦠ꧇​ꦒꦿꦶꦪꦤꦶꦥꦸꦤ꧀ꦲꦚ꧀ꦗꦼꦩ꧀ꦧꦿꦸꦁ꧈​ꦲꦁꦒꦺꦤ꧀ꦤꦶꦥꦸꦤ꧀ꦱꦶꦩ꧀ꦥꦼꦤ꧀ꦧꦫꦁꦧꦫꦁꦏꦺꦩꦮꦺꦴꦤ꧀ꦧ꧀ꦭꦺꦴꦁꦏꦿꦃꦧ꧀ꦭꦁꦏꦿꦺꦃꦠꦤ꧀ꦥꦥꦿꦤꦠꦤ꧀꧈​ꦢꦭꦱꦤ꧀ꦩꦺꦗꦥꦚꦼꦫꦠ꧀ꦠꦤ꧀ꦤꦶꦁꦏꦏꦸꦁꦔꦶꦥꦸꦤ꧀ꦠꦼꦏꦢꦶꦥꦸꦤ꧀ꦱꦩ꧀ꦥꦶꦂꦫꦶꦥꦺꦴꦥꦺꦴꦏ꧀꧈​ꦱꦩ꧀ꦥꦸꦤ꧀ꦠꦩ꧀ꦠꦸꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦏꦏꦸꦁꦲꦶꦁꦒꦶꦃꦭꦗꦼꦁꦧꦺꦴꦠꦼꦤ꧀ꦉꦱꦼꦥ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪ꧉​ꦲꦸꦠꦮꦶꦩꦭꦶꦃꦩꦤꦮꦶꦱꦝꦶꦪꦤ꧀ꦤꦶꦥꦸꦤ꧀ꦝꦲꦂꦠꦤ꧀ꦱꦃꦧꦺꦴꦠꦼꦤ꧀ꦏꦊꦉꦱ꧀ꦱꦤ꧀꧈​ꦥꦸꦤꦶꦏꦲꦶꦁꦒꦶꦃꦩꦸꦫꦸꦒ꧀ꦒꦏꦼꦤ꧀ꦏꦏꦸꦁꦧꦺꦴꦠꦼꦤ꧀ꦏꦿꦲꦺꦴꦱ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪ꧈​ꦏꦢꦺꦴꦱ꧀ꦠ꧇​ꦝꦲꦂꦫꦶꦥꦸꦤ꧀ꦱꦧꦼꦤ꧀ꦢꦶꦤ꧀ꦠꦼꦤ꧀ꦠꦤ꧀ꦱꦃꦢꦶꦥꦸꦤ꧀ꦱꦝꦶꦪꦤ꧀ꦤꦶ꧇​ꦧꦼꦱꦼꦔꦺꦏ꧀ꦠꦺꦩ꧀ꦥꦺ꧈​ꦱꦩ꧀ꦧꦼꦭ꧀ꦒꦺꦴꦫꦺꦁꦠꦺꦩ꧀ꦥꦺ꧈​ꦭꦺꦴꦝꦺꦃꦠꦺꦩ꧀ꦥꦺ꧈​ꦱꦩ꧀ꦧꦼꦭ꧀ꦠꦺꦩ꧀ꦥꦺ꧈​ꦢꦔꦸꦢꦔꦸꦠꦩ꧀ꦠꦸꦭꦗꦼꦁꦧꦺꦴꦱꦼꦤ꧀꧈​ꦩꦶꦭꦱꦱꦒꦼꦢ꧀ꦱꦒꦼꦢ꧀ꦱꦧꦼꦤ꧀ꦢꦶꦤ꧀ꦠꦼꦤ꧀ꦤꦶꦥꦸꦤ꧀ꦏꦼꦢꦃꦒꦤ꧀ꦠꦺꦴꦱ꧀꧈​ꦧꦺꦴꦠꦼꦤ꧀ꦥꦼꦂꦭꦸꦲꦺꦴꦕꦭ꧀ꦲꦺꦴꦕꦭ꧀ꦭꦤ꧀ꦲꦶꦁꦏꦁꦲꦮꦶꦱ꧀ꦲꦮꦶꦱ꧀꧈​ꦲꦸꦥꦩꦶꦤꦶꦥꦸꦤ꧀꧇​ꦢꦶꦤ꧀ꦠꦼꦤ꧀ꦥꦸꦤꦶꦏꦢꦶꦥꦸꦤ꧀ꦲꦺꦴꦭꦃꦲꦏꦼꦤ꧀ꦭꦺꦴꦝꦺꦃꦏꦁꦏꦸꦁ꧈​ꦲꦺꦚ꧀ꦗꦶꦁꦔꦶꦥꦸꦤ꧀ꦢꦶꦥꦸꦤ꧀ꦥꦺꦭꦱ꧀ꦱꦏꦼꦤ꧀꧈​ꦲꦺꦚ꧀ꦗꦶꦁꦔꦶꦥꦸꦤ꧀ꦩꦭꦶꦃꦢꦶꦥꦸꦤ꧀ꦒꦼꦩ꧀ꦧꦿꦺꦴꦠ꧀ꦠꦏꦼꦤ꧀꧈​ꦩꦏꦠꦼꦤ꧀ꦱꦭꦗꦼꦁꦔꦶꦥꦸꦤ꧀ꦢꦢꦺꦴꦱ꧀ꦥꦸꦤ꧀ꦏꦏꦸꦁꦲꦶꦁꦒꦶꦃꦧꦺꦴꦠꦼꦤ꧀ꦭꦗꦼꦁꦧꦺꦴꦱꦼꦤ꧀ꦧꦺꦴꦱꦼꦤ꧀꧈​ꦲꦮꦶꦠ꧀ꦩꦤꦮꦶꦭꦗꦼꦁꦧꦺꦴꦱꦼꦤ꧀꧈​ꦮꦸꦱꦤꦤꦶꦥꦸꦤ꧀ꦭꦗꦼꦁꦉꦩꦼꦤ꧀ꦗꦗꦤ꧀꧉​ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦏꦸꦭꦥꦶꦪꦩ꧀ꦧꦏ꧀ꦱꦩ꧀ꦥꦸꦤ꧀ꦔꦭꦩꦶ꧈​ꦏꦭꦫꦸꦩꦶꦪꦶꦤ꧀ꦱꦺꦩꦃꦏꦸꦭꦥꦸꦤꦶꦏꦱꦧꦼꦤ꧀ꦱꦺꦴꦤ꧀ꦠꦼꦤ꧀ꦠꦤ꧀ꦱꦃꦏꦼꦏꦺꦱꦃꦲꦤ꧀ꦏꦺꦩꦮꦺꦴꦤ꧀꧈​ꦲꦁꦒꦺꦤ꧀ꦏꦸꦭꦔꦿꦲꦺꦴꦱ꧀ꦱꦏꦼꦤ꧀ꦔꦤ꧀ꦠꦺꦴꦱ꧀ꦗꦸꦝꦼꦒ꧀꧈​ꦩꦤꦮꦶꦏꦸꦭꦥꦶꦠꦏꦺꦤ꧀ꦤꦶꦝꦠꦼꦁꦥꦸꦤ꧀ꦢꦶꦏꦺꦱꦃꦲꦶꦥꦸꦤ꧀꧈​ꦧꦺꦴꦠꦼꦤ꧀ꦤꦠꦺꦥꦸꦫꦸꦤ꧀ꦔꦏꦼꦤ꧀꧈​ꦮꦸꦱꦤꦤꦶꦥꦸꦤ꧀ꦏꦸꦭꦭꦗꦼꦁꦔꦸꦥꦢꦺꦴꦱ꧀ꦏꦠꦿꦁꦔꦤ꧀꧈​ꦌ꧈​ꦗꦼꦧꦸꦭ꧀ꦏꦺꦱꦃꦲꦶꦥꦸꦤ꧀ꦱꦺꦩꦃꦏꦸꦭꦱꦧꦼꦤ꧀ꦱꦺꦴꦤ꧀ꦠꦼꦤ꧀ꦥꦸꦤꦶꦏꦝꦠꦼꦁꦥꦱꦂꦗꦺꦴꦲꦂ꧈​ꦥꦼꦂꦭꦸꦔꦶꦫꦱ꧀ꦱꦲꦺꦴꦠꦺꦴꦠꦸꦮꦶꦤ꧀ꦱꦠꦺꦩꦢꦸꦫ꧉​ꦲꦶꦁꦏꦁꦥꦸꦤꦶꦏꦏꦸꦭꦲꦶꦁꦒꦶꦃꦭꦗꦼꦁꦔꦸꦢꦶꦱꦒꦼꦢ꧀ꦢ [ 536 ]ꦲꦢꦩꦼꦭ꧀ꦱꦲꦺꦴꦠꦺꦴꦠꦸꦮꦶꦤ꧀ꦱꦠꦺꦩꦢꦸꦫ꧈​ꦥꦼꦂꦭꦸꦤꦶꦥꦸꦤ꧀ꦱꦺꦩꦃꦏꦸꦭꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦔꦶꦫꦱ꧀ꦩꦭꦶꦃꦝꦠꦼꦁꦥꦱꦂꦗꦺꦴꦲꦂ꧉​ꦌ꧈​ꦭꦏꦺꦴꦏ꧀ꦲꦶꦁꦒꦶꦃꦱꦪꦼꦏ꧀ꦠꦺꦴꦱ꧀꧈​ꦱꦉꦁꦏꦸꦭꦲꦺꦴꦕꦭ꧀ꦲꦺꦴꦕꦭ꧀ꦭꦏꦼꦤ꧀ꦱꦲꦺꦴꦠꦺꦴꦠꦸꦮꦶꦤ꧀ꦱꦠꦺꦩꦢꦸꦫꦥꦶꦪꦩ꧀ꦧꦏ꧀꧈​ꦱꦭꦗꦼꦁꦔꦶꦥꦸꦤ꧀ꦩꦤꦮꦶꦱꦺꦴꦤ꧀ꦠꦼꦤ꧀ꦲꦶꦁꦒꦶꦃꦧꦺꦴꦠꦼꦤ꧀ꦤꦠꦺꦏꦺꦱꦃ꧈​ꦏꦿꦲꦺꦴꦱ꧀ꦭꦤ꧀ꦗꦼꦚ꧀ꦗꦼꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪ꧉​ꦧꦺꦴꦏ꧀ꦩꦤꦮꦶꦲꦤ꧀ꦠꦮꦶꦱ꧀ꦱꦶꦥꦸꦤ꧀ꦥꦫꦩꦲꦺꦴꦱ꧀ꦧꦺꦴꦁꦱꦥꦸꦠꦿꦶ꧈​ꦮꦺꦴꦤ꧀ꦠꦼꦤ꧀ꦲꦶꦁꦏꦁꦏꦏꦸꦁꦔꦶꦥꦸꦤ꧀ꦏꦉꦩ꧀ꦱꦔꦼꦠ꧀ꦝꦠꦼꦁꦱꦠꦺꦠꦸꦮꦶꦤ꧀ꦱꦲꦺꦴꦠꦺꦴꦩꦢꦸꦫ꧈​ꦲꦶꦁꦔꦤ꧀ꦝꦥ꧀ꦥꦸꦤꦶꦏꦏꦸꦭꦲꦠꦸꦫꦶꦥꦿꦶꦏ꧀ꦱꦩꦁꦒꦃꦮꦢꦺꦴꦱ꧀ꦮꦢꦺꦴꦱ꧀ꦱꦶꦥꦸꦤ꧀ꦠꦶꦪꦁꦔꦺꦴꦭꦃꦱꦲꦺꦴꦠꦺꦴꦠꦸꦮꦶꦤ꧀ꦱꦠꦺꦩꦢꦸꦫ꧈​ꦲꦤꦔꦶꦁꦏꦸꦭꦗꦁꦗꦶꦭꦺꦴ꧈​ꦩꦤꦮꦶꦕꦼꦩ꧀ꦥ꧀ꦭꦁꦫꦲꦺꦴꦱ꧀ꦱꦶꦥꦸꦤ꧀ꦲꦸꦠꦮꦶꦧꦺꦴꦠꦼꦤ꧀ꦏꦊꦉꦱ꧀ꦱꦤ꧀ꦱꦩ꧀ꦥꦸꦤ꧀ꦤꦼꦠꦃꦝꦠꦼꦁꦏꦸꦭ꧉​ ꧋ꦩꦼꦁꦒꦃꦧꦸꦩ꧀ꦧꦸꦤꦶꦁꦱꦲꦺꦴꦠꦺꦴꦩꦢꦸꦫꦥꦸꦤꦶꦏꦩꦏꦠꦼꦤ꧀꧇​ꦭꦲꦺꦴꦱ꧀ 5 ꦲꦶꦫꦶꦱ꧀꧈​ꦧꦮꦁꦥꦼꦛꦏ꧀ 6 ꦱꦶꦪꦸꦁ꧈​ꦗꦲꦺ 4 ꦲꦶꦫꦶꦱ꧀꧈​ꦥꦸꦤꦶꦏꦱꦢꦪꦏꦤ꧀ꦛꦶꦲꦸꦊꦒ꧀ꦒꦤ꧀ꦠꦿꦲꦺꦴꦱ꧀ꦱꦮꦠꦮꦶꦱ꧀ꦏꦒꦺꦴꦫꦺꦁꦔꦩꦮꦶꦭꦶꦱꦃꦔꦤ꧀ꦠꦺꦴꦱ꧀ꦏꦼꦤ꧀ꦛꦼꦭ꧀꧈​ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦭꦗꦼꦁꦏꦕꦼꦩ꧀ꦥ꧀ꦭꦸꦁꦤꦲꦶꦁꦒꦺꦴꦝꦺꦴꦒ꧀ꦒꦤ꧀ꦲꦸꦭꦩ꧀ꦲꦪꦩ꧀ꦲꦶꦁꦏꦁꦊꦩ꧉​ꦩꦏꦠꦼꦤ꧀ꦲꦸꦒꦶꦲꦁꦒꦺꦴꦫꦺꦁꦔꦫꦺꦴꦤ꧀ꦧꦿꦩ꧀ꦧꦁꦱꦺꦴꦥ꧀꧈​ꦪꦺꦤ꧀ꦱꦩ꧀ꦥꦸꦤ꧀ꦗꦼꦤꦺꦏꦕꦼꦩ꧀ꦥ꧀ꦭꦸꦁꦤꦲꦶꦁꦒꦺꦴꦝꦺꦴꦒ꧀ꦒꦤ꧀ꦲꦪꦩ꧀ꦮꦲꦸ꧉​ꦢꦺꦤꦺꦥꦤ꧀ꦝꦲꦂꦫꦶꦥꦸꦤ꧀ꦩꦸꦒꦶꦏꦲꦧꦼꦤ꧀ꦤꦤ꧀ꦩꦮꦶꦱꦸꦲꦸꦤ꧀꧈​ꦱꦼꦭꦺꦢꦿꦶꦏꦫꦗꦁꦲꦭꦸꦱ꧀꧈​ꦒꦺꦴꦝꦺꦴꦒ꧀ꦒꦤ꧀ꦠꦶꦒꦤ꧀ꦲꦪꦩ꧀ꦏꦲꦶꦫꦶꦱ꧀ꦲꦶꦫꦶꦱ꧀꧈​ꦲꦸꦭꦩ꧀ꦩꦶꦥꦸꦤ꧀ꦲꦪꦩ꧀ꦮꦲꦸꦏꦕꦸꦮꦶꦭ꧀ꦕꦸꦮꦶꦭ꧀ꦭꦔꦤ꧀ꦠꦺꦴꦱ꧀ꦊꦩ꧀ꦧꦠ꧀꧈​ꦭꦗꦼꦁꦢꦶꦥꦸꦤ꧀ꦱꦸꦱꦸꦭ꧀ꦭꦤꦩꦿꦶꦕ꧈​ꦏꦺꦕꦥ꧀ꦗꦼꦫꦩ꧀ꦥꦼꦕꦼꦭ꧀꧉​ꦢꦺꦤꦺꦲꦧꦼꦤ꧀ꦤꦶꦥꦸꦤ꧀ꦱꦩ꧀ꦧꦼꦭ꧀꧈​ꦥꦸꦤꦶꦏꦥꦤ꧀ꦢꦩꦼꦭ꧀ꦭꦶꦥꦸꦤ꧀ꦧꦺꦢꦏꦭꦶꦪꦤ꧀ꦱꦩ꧀ꦧꦼꦭ꧀ꦱꦩ꧀ꦧꦼꦭ꧀ꦲꦶꦁꦏꦁꦭꦶꦩꦿꦃ꧈​ꦲꦶꦁꦒꦶꦃꦥꦸꦤꦶꦏ꧇​ꦲꦩ꧀ꦧꦏꦂꦏꦼꦩꦶꦫꦶꦫꦸꦩꦶꦪꦶꦤ꧀꧈​ꦭꦗꦼꦁꦲꦁꦒꦺꦴꦫꦺꦁꦔꦠꦿꦲꦺꦴꦱ꧀ꦠꦸꦮꦶꦤ꧀ꦭꦺꦴꦩ꧀ꦧꦺꦴꦏ꧀꧈​ꦠꦶꦒꦠꦶꦒꦤꦶꦥꦸꦤ꧀ꦭꦗꦼꦁꦏꦲꦸꦊꦒ꧀ꦒꦏꦢꦺꦴꦱ꧀ꦢꦺꦤꦺꦱꦩ꧀ꦧꦼꦭ꧀꧈​ꦩꦤꦮꦶꦧꦝꦺꦮꦶꦮꦶꦠ꧀ꦝꦲꦂ꧈​ꦱꦢꦪꦮꦲꦸꦏꦕꦩ꧀ꦥꦸꦂꦫꦏꦼꦤ꧀꧉​ꦩꦼꦁꦒꦃꦥꦤ꧀ꦝꦲꦂꦫꦶꦥꦸꦤ꧀ꦩꦮꦶꦭꦺꦴꦤ꧀ꦛꦺꦴꦁ꧉​ ꧋ꦢꦺꦤꦺꦥꦔꦺꦴꦭꦃꦲꦶꦥꦸꦤ꧀ꦱꦠꦺꦩꦢꦸꦫꦩꦏꦠꦼꦤ꧀꧇​ꦲꦸꦭꦩ꧀ꦲꦪꦩ꧀ꦲꦶꦁꦏꦁꦊꦩ꧈​ꦏꦲꦶꦫꦶꦱ꧀ꦲꦭꦶꦛꦭꦶꦠ꧀꧈​ꦭꦗꦼꦁꦏꦧꦸꦩ꧀ꦧꦺꦴꦤ꧀ꦤꦤ꧇​ꦏꦼꦩꦶꦫꦶ 3 ꦲꦶꦗꦶ꧈​ꦭꦲꦺꦴꦱ꧀ 2 ꦲꦶꦫꦶꦱ꧀꧈​ꦏꦼꦚ꧀ꦕꦸꦂ 1 ꦲꦶꦫꦶꦱ꧀꧈​ꦏꦸꦤꦶꦂꦱꦏꦼꦝꦶꦏ꧀꧈​ꦠꦿꦱꦶꦭꦤ꧀ꦒꦼꦤ꧀ꦝꦶꦱ꧀꧉​ꦱꦢꦪꦮꦲꦸꦏꦲꦸꦊꦒ꧀ꦒꦔꦤ꧀ꦠꦺꦴꦱ꧀ꦲꦭꦸꦱ꧀꧈​ꦭꦗꦼꦁꦢꦒꦶꦁꦲꦪꦩ꧀ꦲꦶꦫꦶꦱ꧀ꦲꦶꦫꦶꦱ꧀ꦱꦤ꧀ꦮꦲꦸꦏꦕꦫꦸꦥ꧀ꦥꦔꦤ꧀ꦠꦺꦴꦱ꧀ꦮꦿꦢꦶꦤ꧀꧈​ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦭꦗꦼꦁꦏꦱꦸꦏꦤ꧀ꦤꦤ꧀ꦱꦤ꧀ꦠꦼꦤ꧀ꦏꦼꦤ꧀ꦛꦼꦭ꧀ꦱꦏꦼꦝꦶꦏ꧀꧈​ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦚꦼꦩꦼꦏ꧀ꦤꦩꦼꦏ꧀꧈​ꦮꦸꦱꦤꦢꦒꦶꦁꦔꦶꦥꦸꦤ꧀ꦮꦲꦸꦏꦱꦸꦤ꧀ꦢꦸꦏ꧀ꦏꦤꦩꦮꦶꦱꦸꦗꦺꦤ꧀꧈​ꦩꦤꦮꦶꦧꦝꦺꦝꦲꦂꦱꦮꦼꦒ꧀ꦢꦶꦥꦸꦤ꧀ꦧꦏꦂ꧉​ ꧋ꦩꦏꦠꦼꦤ꧀ꦩꦼꦁꦒꦃꦮꦢꦺꦴꦱ꧀ꦮꦢꦺꦴꦱ꧀ꦱꦶꦥꦸꦤ꧀ꦠꦶꦪꦁꦲꦢꦩꦼꦭ꧀ꦱꦠꦺꦲꦸꦠꦮꦶꦱꦲꦺꦴꦠꦺꦴꦩꦢꦸꦫ꧈​ꦩꦺꦴꦁꦒꦥꦫꦮꦤꦶꦠꦏꦸꦭꦲꦠꦸꦫꦶꦚꦺꦴꦧꦶ꧈​ꦲꦤꦔꦶꦁꦗꦁꦗꦶꦏꦸꦭ꧈​ꦏꦸꦭꦥꦶꦁꦏꦭꦶꦃꦲꦶ꧈​ꦩꦤꦮꦶꦧꦺꦴꦠꦼꦤ꧀ꦏꦊꦉꦱ꧀ꦱꦤ꧀ꦱꦩ꧀ꦥꦸꦤ꧀ꦢꦸꦏꦝꦠꦼꦁꦏꦸꦭ꧉​ ꦯꦸꦩꦤ꧀ꦠꦿꦶꦪꦃ꧉​	Jagading Wanita Bab Dayaning Sate tuwin Saoto Madura. Sawênèhing mitra kula sami ngangluh tuwin garundêlan, jalaran kakungipun tansah kêkesahan kemawon, ingkang anelakakên kados-kados wontên ing griyanipun piyambak botên kraos. Mênggah tindaking kakung ingkang makatên punika botên têmtu lêpating kakungipun, sagêd ugi lêpatipun băngsa kula pawèstri piyambak. Kathah bab-bab ingkang lugu lêpating pawèstri ingkang anjalari kakungipun botên kraos wontên ing griya, kados ta: griyanipun anjêmbrung, anggènipun simpên barang-barang kemawon blongkrah-blangkrèh tanpa pranatan, dalasan meja panyêrataning kakungipun têka dipun sampiri popok, sampun tamtu ingkang makatên punika kakung inggih lajêng botên rêsêp wontên ing griya. Utawi malih manawi sadhiyanipun dhahar tansah botên kalêrêsan, punika inggih murugakên kakung botên kraos wontên ing griya, kados ta: dhaharipun sabên dintên tansah dipun sadhiyani: bêsêngèk tempe, sambêl gorèng tempe, lodhèh tempe, sambêl tempe, dangu-dangu tamtu lajêng bosên, mila sasagêd-sagêd sabên dintênipun kêdah gantos, botên pêrlu ocal-ocalan ingkang awis-awis, upaminipun: dintên punika dipun olahakên lodhèh kangkung, enjingipun dipun pelasakên, enjingipun malih dipun gêmbrotakên, makatên salajêngipun dados pun kakung inggih botên lajêng bosên-bosên, awit manawi lajêng bosên, wusananipun lajêng rêmên jajan. Ingkang makatên punika kula piyambak sampun ngalami, kala rumiyin semah kula punika sabên sontên tansah kêkesahan kemawon, anggèn kula ngraosakên ngantos judhêg, manawi kula pitakèni dhatêng pundi kesahipun, botên nate purun ngakên, wusananipun kula lajêng ngupados katrangan, e, jêbul kesahipun semah kula sabên sontên punika dhatêng pasar Johar, pêrlu ngiras saoto tuwin sate Madura. Ingkang punika kula inggih lajêng ngudi sagêda adamêl saoto tuwin sate Madura, pêrlunipun semah kula sampun ngantos ngiras malih dhatêng pasar Johar. E, lakok inggih sayêktos, sarêng kula ocal-ocalakên saoto tuwin sate Madura piyambak, salajêngipun manawi sontên inggih botên nate kesah, kraos lan jênjêm wontên ing griya. Bokmanawi antawisipun para maos băngsa putri, wontên ingkang kakungipun karêm sangêt dhatêng sate tuwin saoto Madura, ing ngandhap punika kula aturi priksa manggah wados-wadosipun tiyang ngolah saoto tuwin sate Madura, ananging kula jangji lho, manawi cêmplang raosipun utawi botên kalêrêsan sampun nêtah dhatêng kula. Mênggah bumbuning saoto Madura punika makatên: laos 5 iris, bawang pêthak 6 siyung, jae 4 iris, punika sadaya kanthi ulêgan traos sawatawis kagorènga mawi lisah ngantos kênthêl, sasampunipun lajêng kacêmplungna ing godhogan ulam ayam ingkang lêma. Makatên ugi anggorenga ron brambang sop, yèn sampun jêne kacêmplungna ing godhogan ayam wau. Dene pandhaharipun mugi kaabênan mawi suun, sêlèdri karajang alus, godhogan tigan ayam kairis-iris, ulamipun ayam wau kacuwil-cuwila ngantos lêmbat, lajêng dipun susulana mrica, kecap jêram pêcêl. Dene abênipun sambêl, punika pandamêlipun beda kalihan sambêl-sambêl ingkang limrah, inggih punika: ambakar kêmiri rumiyin, lajêng anggorenga traos tuwin lombok, tiga-tiganipun lajêng kaulêga kadosdene sambêl, manawi badhe wiwit dhahar, sadaya wau kacampurakên. Mênggah pandhaharipun mawi lonthong. Dene pangolahipun sate Madura makatên: ulam ayam ingkang lêma, kairis alit-alit, lajêng kabumbonana: kêmiri 3 iji, laos 2 iris, kêncur 1 iris, kunir sakêdhik, trasi lan gêndhis. Sadaya wau kaulêga ngantos alus, lajêng daging ayam iris-irisan wau kacarupa ngantos wradin, sasampunipun lajêng kasukanan santên kênthêl sakêdhik, kintên-kintên nyêmêk-nyêmêk, wusana dagingipun wau kasundukana mawi sujèn, manawi badhe dhahar sawêg dipun bakar. Makatên mênggah wados-wadosipun tiyang adamêl sate utawi saoto Madura, măngga para wanita kula aturi nyobi, ananging jangji kula, kula ping kalihi, manawi botên kalêrêsan sampun duka dhatêng kula. Sumantriyah. [Iklan]
[ 537 ]KRONIEK ꧋ꦏꦧꦂꦮꦂꦤꦶꦮꦂꦤꦶ꧉​ ꧋ꦥꦼꦛꦶꦏ꧀ꦏꦤ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦱꦤꦺꦱ꧀꧉​ ꧋ꦢꦺꦫꦺꦁꦢꦔꦸꦥꦸꦤꦶꦏꦲꦶꦁꦯꦸꦫꦏꦂꦠꦏꦮꦼꦢꦭ꧀ꦭꦏꦼꦤ꧀ꦱꦼꦫꦠ꧀ꦏꦭꦮꦂꦠꦶꦲꦺꦁꦒꦭ꧀ꦲꦶꦁꦏꦁꦏꦤꦩꦑꦏꦼꦤ꧀꧇​ꦨꦤ꧀ꦢꦺꦫꦗꦮꦶ꧈​ꦩꦼꦁꦒꦃꦮꦼꦢꦭ꧀ꦭꦶꦥꦸꦤ꧀ꦏꦭꦮꦂꦠꦶꦮꦲꦸꦱꦩꦶꦁꦒꦸꦱꦥꦶꦱꦤ꧀꧈​ꦲꦶꦁꦏꦁꦢꦢꦺꦴꦱ꧀ꦏꦥꦭꦤꦶꦁꦗꦸꦫꦸꦥꦔꦿꦶꦥ꧀ꦠ꧇​ꦠꦸꦮꦤ꧀ꦯꦱ꧀ꦠꦿꦱꦢꦂꦒ꧈​ꦏꦭꦫꦸꦩꦶꦪꦶꦤ꧀ꦗꦸꦫꦸꦥꦔꦿꦶꦥ꧀ꦠꦤꦶꦁꦏꦭꦮꦂꦠꦶꦓꦼꦤ꧀ꦛꦏꦼꦏꦼꦭꦺꦁ꧉​ꦥꦔꦼꦕꦥ꧀ꦥꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦤ꧀ꦠꦺꦴꦂꦥꦔꦼꦕꦥ꧀ꦥꦤ꧀ Mars ꦲꦶꦁꦏꦁꦢꦺꦫꦺꦁꦢꦔꦸꦥꦸꦤꦶꦏꦢꦶꦥꦸꦤ꧀ꦲꦼꦢꦼꦒ꧀ꦒꦏꦼꦤ꧀ꦢꦺꦤꦶꦁꦥꦫꦱꦸꦢꦒꦂꦥꦿꦶꦧꦸꦩꦶꦲꦶꦁꦏꦲꦸꦩꦤ꧀꧈​ꦢꦺꦤꦺꦱꦼꦢꦾꦤꦶꦁꦱꦼꦫꦠ꧀ꦏꦭꦮꦂꦠꦶꦥꦸꦤꦶꦏꦱꦩ꧀ꦥꦸꦤ꧀ꦕꦼꦛꦮꦺꦴꦤ꧀ꦠꦼꦤ꧀ꦲꦶꦁꦤꦩꦤꦶꦥꦸꦤ꧀꧈​ꦲꦶꦁꦒꦶꦃꦥꦸꦤꦶꦏꦲꦔꦸꦢꦶꦝꦠꦼꦁꦏꦧꦁꦱꦤ꧀ꦗꦮꦶ꧉​ ꧋ꦲꦶꦁꦏꦁꦲꦁꦱꦭ꧀ꦌꦏ꧀ꦱꦩꦼꦤ꧀ꦤꦶꦥꦸꦤ꧀ꦏꦤ꧀ꦝꦶꦝꦠ꧀ꦧꦒꦶꦪꦤ꧀ꦏꦼꦏꦭꦶꦃꦲꦶꦁꦥꦩꦸꦭꦁꦔꦤ꧀ꦥꦔꦢꦶꦭ꧀ꦭꦤ꧀ꦭꦸꦲꦸꦂꦲꦶꦁꦮꦺꦭ꧀ꦠꦼꦦꦿꦺꦝꦼꦤ꧀꧇​ꦠꦸꦮꦤ꧀ꦯꦸꦩꦂꦢꦶꦭꦤ꧀ꦠꦸꦮꦤ꧀ꦄꦧ꧀ꦢꦸꦭ꧀ꦭꦃ꧉​ꦲꦶꦁꦏꦁꦲꦁꦱꦭ꧀ꦌꦏ꧀ꦱꦩꦼꦤ꧀ꦤꦶꦥꦸꦤ꧀ꦏꦤ꧀ꦝꦶꦝꦠ꧀ꦧꦒꦶꦪꦤ꧀ꦏꦼꦏꦭꦶꦃꦲꦶꦁꦥꦩꦸꦭꦁꦔꦤ꧀ꦥꦔꦢꦶꦭ꧀ꦭꦤ꧀ꦭꦸꦲꦸꦂꦲꦶꦁꦮꦺꦭ꧀ꦠꦼꦦꦿꦺꦝꦼꦤ꧀꧇​ꦠꦸꦮꦤ꧀ꦯꦸꦩꦂꦢꦶꦭꦤ꧀ꦠꦸꦮꦤ꧀ꦄꦧ꧀ꦢꦸꦭ꧀ꦭꦃ꧉​ ꧋ꦮꦶꦮꦶꦠ꧀ꦠꦁꦒꦭ꧀ 15 ꦄꦒꦸꦱ꧀ꦠꦸꦱ꧀ꦲꦶꦁꦔꦗꦼꦁꦥꦸꦤꦶꦏ꧈​ꦩꦱ꧀ꦏꦥꦺ K.P.M. ꦧꦝꦺꦲꦩ꧀ꦧꦶꦏꦏ꧀ꦥꦭꦪꦂꦫꦤ꧀ꦲꦤ꧀ꦠꦮꦶꦱ꧀ꦱꦶꦥꦸꦤ꧀ꦩꦼꦫꦏ꧀(ꦨꦤ꧀ꦠꦼꦤ꧀)ꦭꦤ꧀ꦭꦩ꧀ꦥꦸꦁ꧉​ ꧋A.I.D. ꦩꦂꦠꦺꦴꦱ꧀ꦱꦏꦼꦤ꧀꧈​ꦧꦶꦭꦶꦃꦲꦶꦁꦏꦩ꧀ꦥꦸꦁꦫꦚ꧀ꦕꦧꦼꦉꦩ꧀꧈​ꦝꦸꦱꦸꦤ꧀ꦭꦶꦁꦒꦂ꧈​ꦱꦕꦼꦭꦏ꧀ꦏꦶꦥꦸꦤ꧀ꦕꦶꦕꦭꦺꦁꦏꦃ꧈​ꦮꦺꦴꦤ꧀ꦠꦼꦤ꧀ꦭꦫꦺꦏꦺꦴꦧꦺꦴꦁꦔꦤ꧀ꦠꦺꦴꦱ꧀ꦢꦢꦺꦴꦱ꧀ꦠꦶꦮꦱ꧀ꦱꦶꦥꦸꦤ꧀꧉​ꦩꦼꦁꦒꦃꦩꦸꦭꦧꦸꦏꦤꦶꦥꦸꦤ꧀ꦩꦏꦠꦼꦤ꧀꧇​ ꧋ꦮꦺꦴꦤ꧀ꦠꦼꦤ꧀ꦠꦶꦪꦁꦠꦤꦶꦏꦺꦱꦃꦝꦠꦼꦁꦱꦧꦶꦤ꧀ꦤꦶꦥꦸꦤ꧀ꦲꦩ꧀ꦧꦼꦏ꧀ꦠꦲꦤꦏ꧀ꦏꦶꦥꦸꦤ꧀ꦲꦶꦁꦏꦁꦱꦮꦼꦒ꧀ꦲꦸꦩꦸꦂ 2 ꦠꦲꦸꦤ꧀꧉​ꦢꦸꦩꦸꦒꦶꦲꦶꦁꦱꦧꦶꦤ꧀ꦠꦶꦪꦁꦮꦲꦸꦢꦩꦼꦭ꧀ꦧꦼꦝꦶꦪꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦏꦸꦧꦼꦁꦔꦶꦁꦒꦸꦧꦸꦒ꧀꧈​ꦭꦫꦺꦭꦗꦼꦁꦏꦱꦸꦏꦑꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦒꦸꦧꦸꦒ꧀꧈​ꦱꦲꦭꦗꦼꦁꦲꦤꦸꦮꦺꦤ꧀ꦤꦶꦠꦤꦼꦩꦤ꧀ꦤꦶꦥꦸꦤ꧀ꦠꦶꦩꦸꦤ꧀ꦲꦶꦁꦏꦁꦠꦤ꧀ꦱꦃꦢꦶꦥꦸꦤ꧀ꦱꦧꦲꦶꦁꦩꦲꦺꦱ꧉​ꦢꦶꦭꦭꦃꦏꦭꦥꦸꦤꦶꦏꦲꦶꦁꦒꦶꦃꦮꦺꦴꦤ꧀ꦠꦼꦤ꧀ꦩꦲꦺꦱꦲꦶꦁꦏꦁꦱꦮꦼꦒ꧀ꦔꦿꦶꦱꦏ꧀ꦠꦤꦼꦩꦤ꧀ꦤꦶꦥꦸꦤ꧀꧈​ꦥꦸꦤ꧀ꦠꦤꦶꦱꦏ꧀ꦭꦁꦏꦸꦁꦤꦼꦥ꧀ꦱꦸꦤꦶꦥꦸꦤ꧀ꦱꦲꦭꦗꦼꦁꦲꦩ꧀ꦧꦸꦫꦸꦝꦠꦼꦁꦩꦲꦺꦱꦮꦲꦸ꧈​ꦢꦺꦤꦺꦲꦤꦏ꧀ꦏꦶꦥꦸꦤ꧀ꦏꦠꦶꦭꦂꦮꦺꦴꦤ꧀ꦠꦼꦤ꧀ꦲꦶꦁꦒꦸꦧꦸꦒ꧀꧈​ꦏꦭꦥꦸꦤꦶꦏꦏꦊꦉꦱ꧀ꦗꦩ꧀ 11 ꦱꦶꦪꦁ꧈​ꦢꦢꦺꦴꦱ꧀ꦤꦼꦝꦼꦁꦧꦼꦤ꧀ꦠꦺꦂꦧꦼꦤ꧀ꦠꦺꦂꦫꦶꦥꦸꦤ꧀꧈​ꦧꦺꦴꦠꦼꦤ꧀ꦲꦤ꧀ꦠꦮꦶꦱ꧀ꦢꦔꦸꦭꦠꦸꦧꦼꦝꦶꦪꦤꦶꦥꦸꦤ꧀ꦲꦚꦭꦠ꧀ꦥꦪꦺꦴꦤ꧀ꦤꦶꦁꦒꦸꦧꦸꦒ꧀ꦲꦶꦁꦏꦁꦲꦚ꧀ꦗꦭꦂꦫꦶꦒꦸꦧꦸꦒ꧀ꦒꦶꦥꦸꦤ꧀ꦲꦸꦒꦶꦠꦸꦩꦸꦠ꧀ꦏꦺꦴꦧꦺꦴꦁ꧉​ꦠꦶꦪꦁꦠꦤꦶ꧈​ꦱꦉꦁꦱꦸꦩꦼꦉꦥ꧀ꦧꦶꦭꦶꦃꦒꦸꦧꦸꦒ꧀ꦒꦶꦥꦸꦤ꧀ꦏꦧꦼꦱ꧀ꦩꦶ꧈​ꦲꦺꦁꦒꦭ꧀ꦮꦁꦱꦸꦭ꧀ꦱꦸꦩꦼꦢꦾꦲꦩꦶꦠꦸꦭꦸꦁꦔꦶꦲꦤꦏ꧀ꦏꦶꦥꦸꦤ꧀ꦲꦶꦁꦏꦁꦏꦠꦶꦭꦂꦮꦲꦸ꧈​ꦲꦤꦔꦶꦁꦲꦤꦏ꧀ꦏꦶꦥꦸꦤ꧀ꦱꦩ꧀ꦥꦸꦤ꧀ꦥꦼꦗꦃ꧈​ꦢꦺꦤꦺꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦥꦶꦪꦩ꧀ꦧꦏ꧀ꦤꦤ꧀ꦝꦁꦠꦠꦸꦏꦛꦃ꧉​ ꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈​ꦧꦶꦭꦶꦃꦲꦶꦁꦱꦭꦃꦱꦠꦸꦁꦒꦶꦭ꧀ꦭꦶꦁꦝꦸꦱꦸꦤ꧀ꦧꦮꦃꦝꦶꦱ꧀ꦠꦿꦶꦏ꧀ꦩꦲꦎꦏ꧀(ꦡꦁꦒꦼꦫꦁ)ꦮꦺꦴꦤ꧀ꦠꦼꦤ꧀ꦠꦶꦪꦁꦒꦝꦃꦲꦤꦏ꧀ꦭꦲꦶꦂꦩꦼꦢꦭ꧀ꦠꦶꦒ꧉​ꦲꦶꦁꦏꦁꦔꦤꦺꦃꦲꦤꦺꦃꦲꦶꦱꦔꦼꦠ꧀꧈​ꦢꦺꦤꦺꦏꦼꦏꦸꦭꦶꦠ꧀ꦠꦤ꧀ꦤꦶꦥꦸꦤ꧀ꦭꦫꦺꦠꦶꦠꦶꦒꦮꦲꦸꦧꦺꦢꦧꦺꦢ꧈​ꦲꦶꦁꦒꦶꦃꦥꦸꦤꦶꦏꦲꦶꦁꦏꦁꦱꦠꦸꦁꦒꦭ꧀ꦥꦼꦛꦏ꧀꧈​ꦱꦠꦸꦁꦒꦶꦭ꧀ꦭꦶꦥꦸꦤ꧀ꦲꦧꦿꦶꦠ꧀꧈​ꦱꦠꦸꦁꦒꦶꦭ꧀ꦭꦶꦥꦸꦤ꧀ꦩꦭꦶꦃꦕꦼꦩꦼꦁ꧉​ꦠꦶꦒꦠꦶꦒꦤꦶꦥꦸꦤ꧀ꦱꦩꦁꦏꦺꦱꦩ꧀ꦥꦸꦤ꧀ꦱꦩꦶꦠꦶꦭꦂ꧉​ ꧋ꦲꦁꦱꦭ꧀ꦌꦏ꧀ꦱꦩꦼꦤ꧀ꦤꦶꦥꦸꦤ꧀ꦏꦤ꧀ꦝꦶꦝꦠ꧀ꦧꦒꦶꦪꦤ꧀ꦲꦶꦁꦏꦁꦏꦥꦶꦱ꧀ꦱꦤ꧀ꦲꦶꦁꦥꦩꦸꦭꦁꦔꦤ꧀ꦥꦔꦢꦶꦭ꧀ꦭꦤ꧀ꦭꦸꦲꦸꦂꦲꦶꦁꦮꦺꦭ꧀ꦠꦼꦥꦿꦺꦝꦼꦤ꧀꧇​ꦠꦸꦮꦤ꧀ Injo Beng Goat ꦭꦤ꧀꧈​ꦠꦸꦮꦤ꧀ R. ꦯꦶꦒꦶꦠ꧀꧉​ ꧋ ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈​ꦧꦶꦭꦶꦃꦠꦸꦮꦤ꧀ M. ꦯꦸꦂꦪꦢꦶ꧈​ꦄꦗꦸꦁꦏꦺꦴꦩꦶꦱ꧀ꦫꦺꦝꦏ꧀ꦠꦸꦂꦲꦶꦁꦝꦺꦥꦂꦠꦼꦩꦺꦤ꧀ꦪꦸꦱ꧀ꦠꦶꦱꦶꦱꦩꦁꦏꦺꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀꧇​ꦮꦏꦶꦭ꧀ꦏꦺꦴꦩꦶꦱ꧀ꦫꦺꦝꦏ꧀ꦠꦸꦂꦲꦶꦁꦏꦤ꧀ꦠꦺꦴꦂꦏꦱ꧀ꦧꦸꦠ꧀꧉​ ꧋ꦩꦶꦠꦸꦫꦸꦠ꧀ꦱꦼꦫꦠ꧀ꦏꦼꦏꦚ꧀ꦕꦶꦁꦔꦤ꧀ꦒꦸꦥꦼꦂꦩꦺꦤ꧀꧈​ꦢꦶꦤ꧀ꦠꦼꦤ꧀ꦲꦒꦼꦁꦲꦶꦁꦏꦁꦏꦠꦼꦩ꧀ꦠꦺꦴꦑꦏꦼꦤ꧀ꦲꦶꦁꦠꦲꦸꦤ꧀ 1928꧈​ꦲꦶꦁꦒꦶꦃꦥꦸꦤꦶꦏ꧇​ꦠꦲꦸꦤ꧀ꦧꦫꦸꦮꦭꦤ꧀ꦢꦶ 1 ꦗꦤꦸꦮꦫꦶ (ꦔꦲꦢ꧀) ꦩꦶꦏꦿꦢ꧀ꦢꦊꦩ꧀ꦏꦁꦗꦼꦁꦟꦧꦶꦩꦸꦲꦩꦂ 20 ꦗꦤꦸꦮꦫꦶ (ꦗꦸꦩꦸꦮꦃ) ꦠꦲꦸꦤ꧀ꦧꦫꦸꦡꦶꦪꦺꦴꦁꦲ꧀ꦮ 23 ꦗꦤꦸꦮꦫꦶ (ꦱꦼꦤꦺꦤ꧀) ꦱꦺꦢꦤꦶꦥꦸꦤ꧀ꦲꦶꦁꦏꦁꦩꦶꦤꦸꦭꦾ Kong Hoe Tjoe 9 ꦩꦉꦠ꧀ (ꦗꦸꦩꦸꦮꦃ) ꦒꦉꦧꦼꦒ꧀ꦥꦸꦮꦱ 23 - 24 ꦩꦉꦠ꧀ (ꦗꦸꦩꦸꦮꦃꦠꦸꦮꦶꦤ꧀ꦱꦧ꧀ꦠꦸ) ꦕꦶꦁꦧꦶꦁ 5 ꦄꦥꦿꦶꦭ꧀ (ꦏꦼꦩꦶꦱ꧀) ꦱꦺꦢꦤꦶꦥꦸꦤ꧀ꦏꦁꦗꦼꦁꦟꦧꦶꦔꦶꦯ 6 ꦄꦥꦿꦶꦭ꧀ (ꦗꦸꦩꦸꦮꦃ) ꦮꦸꦔꦸꦢꦊꦩ꧀ꦏꦁꦗꦼꦁꦟꦧꦶꦔꦶꦯ 8-9 ꦄꦥꦿꦶꦭ꧀ (ꦩꦶꦁꦒꦸꦭꦤ꧀ꦱꦼꦤꦺꦤ꧀) ꦮꦶꦪꦺꦴꦱ꧀ꦱꦤ꧀ꦢꦊꦩ꧀ꦠꦲꦸꦤꦤ꧀ꦲꦶꦁꦏꦁꦩꦶꦤꦸꦭꦾꦯꦁꦦꦔꦺꦫꦤ꧀ Hendrik 19 ꦄꦥꦿꦶꦭ꧀ (ꦏꦼꦩꦶꦱ꧀) ꦮꦶꦪꦺꦴꦱ꧀ꦱꦤ꧀ꦢꦊꦩ꧀ꦠꦲꦸꦤ꧀ꦤꦤ꧀ꦱꦁꦫꦶꦤꦗꦥꦸꦠꦿꦶ Juliana 30 ꦄꦥꦿꦶꦭ꧀(ꦱꦼꦤꦺꦤ꧀)ꦩꦶꦏꦿꦢ꧀ꦢꦊꦩ꧀ꦏꦁꦗꦼꦁꦟꦧꦶꦔꦶꦯ 17 ꦩꦺꦲꦆ(ꦏꦼꦩꦶꦱ꧀)ꦩꦼꦝꦏ꧀ꦏꦶꦥꦸꦤ꧀ꦫꦺꦴꦃꦄꦭ꧀ꦏꦸꦢꦸꦱ꧀ 27 -28 ꦩꦺꦲꦆ(ꦩꦶꦁꦒꦸ​ꦱꦼꦤꦺꦤ꧀)ꦒꦉꦧꦼꦒ꧀ꦧꦼꦱꦂ 29 ꦗꦸꦤꦶ(ꦗꦸꦩꦸꦮꦃ)ꦮꦶꦪꦺꦴꦱ꧀ꦱꦤ꧀ꦢꦊꦩ꧀ꦠꦲꦸꦤ꧀ꦤꦤ꧀ꦏꦁꦗꦼꦁꦯꦿꦶꦩꦲꦫꦗꦥꦸꦠꦿꦶ Emma 2 ꦄꦒꦸꦱ꧀ꦠꦸꦱ꧀(ꦏꦼꦩꦶꦱ꧀)ꦒꦉꦧꦼꦒ꧀ꦩꦸꦭꦸꦢ꧀ 29 ꦄꦒꦸꦱ꧀ꦠꦸꦱ꧀(ꦉꦧꦺꦴ)ꦮꦶꦪꦺꦴꦱ꧀ꦱꦤ꧀ꦢꦊꦩ꧀ꦠꦲꦸꦤ꧀ꦤꦤ꧀ꦏꦁꦗꦼꦁꦯꦿꦶꦩꦲꦫꦗꦥꦸꦠꦿꦶ Wilhelmina 31 ꦄꦒꦸꦱ꧀ꦠꦸꦱ꧀(ꦗꦸꦩꦸꦮꦃ)ꦠꦲꦸꦤ꧀ꦮꦶꦪꦺꦴꦱ꧀ꦱꦤ꧀ꦤꦶꦥꦸꦤ꧀ꦱꦁꦩꦶꦤꦸꦭꦾ Kong Hoe Tjoe 10 ꦎꦏ꧀ꦠꦺꦴꦧꦼꦂ(ꦉꦧꦺꦴ)ꦮꦶꦪꦺꦴꦱ꧀ꦱꦤ꧀ꦢꦊꦩ꧀ꦏꦁꦗꦼꦁꦟꦧꦶꦔꦶꦯ 23 -24 ꦝꦺꦯꦺꦩ꧀ꦧꦼꦂ(ꦱ꧀ꦭꦱ​ꦉꦧꦺꦴ)꧉​ ꧋ꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦥꦸꦂꦱꦶꦠꦼꦂꦭꦤ꧀ꦢꦿꦢ꧀ꦲꦶꦁꦑꦤ꧀ꦝꦁꦔꦤ꧀ (ꦨꦺꦴꦂꦤꦺꦪꦺꦴ)꧇​ꦠꦸꦮꦤ꧀ Mr. ꦯꦸꦱꦤ꧀ꦠꦡꦶꦂꦠꦥꦿꦗ꧉​ ꧋ꦏꦏꦺꦤ꧀ꦢꦼꦭ꧀ꦭꦏꦼꦤ꧀ꦲꦩꦂꦒꦶꦱꦏꦶꦁꦥꦚꦸꦮꦸꦤ꧀ꦤꦶꦥꦸꦤ꧀ꦥꦶꦪꦩ꧀ꦧꦏ꧀ꦢꦢꦺꦴꦱ꧀ꦲꦢ꧀ꦥꦺꦴꦏꦠ꧀ꦠꦸꦮꦶꦤ꧀ꦥꦺꦴꦏꦿꦸꦭ꧀ꦲꦶꦁꦥꦔꦢꦶꦭ꧀ꦭꦤ꧀ꦗꦸꦱ꧀ꦠꦶꦱꦶꦲꦶꦁꦯꦼꦩꦫꦁ꧇​ꦠꦸꦮꦤ꧀ Mr. ꦲꦸꦫꦶꦥ꧀ ꦑꦂꦠꦢꦶꦂꦗ꧉​ ꧋Aneta ꦩꦂꦠꦺꦴꦱ꧀ꦱꦏꦼꦤ꧀꧈​ꦧꦶꦭꦶꦃꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦲꦶꦁꦨꦚꦸꦩꦱ꧀ꦲꦤ꧀ꦝꦮꦃꦲꦏꦼꦤ꧀ꦲꦸꦏꦸꦩ꧀ꦩꦤ꧀ꦏꦸꦚ꧀ꦗꦫꦭꦩꦶꦤꦶꦥꦸꦤ꧀ 2 ꦠꦲꦸꦤ꧀ꦝꦠꦼꦁꦠꦸꦮꦤ꧀ꦯꦸꦗꦩꦤ꧀꧈​ꦠꦶꦭꦱ꧀ꦲꦼꦊꦥ꧀ꦥꦺꦴꦱ꧀ꦏꦺꦴꦩꦶꦱ꧀ꦲꦶꦁꦯꦸꦩ꧀ꦥꦾꦸꦃ꧈​ꦲꦩꦂꦒꦶꦏꦊꦥꦠ꧀ꦠꦤ꧀ꦲꦚꦭꦶꦁꦏꦸꦃꦲꦏꦼꦤ꧀ꦲꦂꦠꦤꦒꦫꦶꦏꦛꦃꦲꦶꦥꦸꦤ꧀ꦩꦂꦠꦺꦴꦱ꧀ꦱꦏꦼꦤ꧀꧈​ꦧꦶꦭꦶꦃꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦲꦶꦁꦨꦚꦸꦩꦱ꧀ꦲꦤ꧀ꦝꦮꦃꦲꦏꦼꦤ꧀ꦲꦸꦏꦸꦩ꧀ꦩꦤ꧀ꦏꦸꦚ꧀ꦗꦫꦭꦩꦶꦤꦶꦥꦸꦤ꧀꧇꧒꧇​ꦠꦲꦸꦤ꧀ꦝꦠꦼꦁꦠꦸꦮꦤ꧀ꦯꦸꦗꦩꦤ꧀꧈​ꦠꦶꦭꦱ꧀ꦲꦼꦊꦥ꧀ꦥꦺꦴꦱ꧀ꦏꦺꦴꦩꦶꦱ꧀ꦲꦶꦁꦯꦸꦩ꧀ꦥꦾꦸꦃ꧈​ꦲꦩꦂꦒꦶꦏꦊꦥꦠ꧀ꦠꦤ꧀ꦲꦚꦭꦶꦁꦏꦸꦃꦲꦏꦼꦤ꧀ꦲꦂꦠꦤꦒꦫꦶꦏꦛꦃꦲꦶꦥꦸꦤ꧀ f 24,000.-. ꧋ꦱꦏꦶꦁꦨꦤ꧀ꦝꦸꦁꦱꦏꦶꦁꦨꦤ꧀ꦝꦸꦁ Aneta ꦩꦂꦠꦺꦴꦱ꧀ꦱꦏꦼꦤ꧀꧈​ꦧꦶꦭꦶꦃꦥꦠꦶꦃꦲꦶꦁꦓꦫꦸꦠ꧀꧈​ꦫꦢꦺꦤ꧀꧈​ꦓꦺꦴꦤ꧀ꦢꦱꦶꦱ꧀ꦮꦫ꧈​ꦏꦭꦲꦶꦁꦢꦶꦤ꧀ꦠꦼꦤ꧀ꦏꦼꦩꦶꦱ꧀ꦥꦸꦤꦶꦏꦱꦺꦢ꧉​ [ 538 ]꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈​ꦧꦶꦭꦶꦃꦲꦶꦁꦝꦸꦱꦸꦤ꧀ꦧꦼꦗꦲꦶꦁꦧꦮꦃꦏꦧꦸꦥꦠꦺꦤ꧀ꦱ꧀ꦭꦺꦩꦤ꧀꧈​ꦮꦺꦴꦤ꧀ꦠꦼꦤ꧀ꦠꦶꦪꦁꦲꦶꦁꦏꦁꦏꦱꦒꦼꦢ꧀ꦢꦤ꧀ꦤꦶꦥꦸꦤ꧀ꦩꦺꦃꦱꦫꦸꦥ꧀ꦥꦶꦏꦭꦶꦪꦤ꧀ꦏꦾꦲꦶꦨꦼꦢꦺꦴꦂꦲꦶꦁꦯꦿꦒꦺꦤ꧀ꦲꦸꦠꦮꦶꦏꦾꦲꦶꦦꦼꦤ꧀ꦛꦺꦠ꧀ꦲꦶꦁꦏꦭꦱ꧀ꦱꦤ꧀꧈​ꦩꦼꦁꦒꦃꦤꦩꦤꦶꦥꦸꦤ꧀ꦏꦾꦲꦶꦲꦺꦁꦒꦭ꧀ꦥꦸꦤꦶꦏ꧇​ꦩꦸꦃꦲꦩꦠ꧀ꦱꦸꦂꦪꦩꦕ꧈​ꦏꦛꦃꦠꦶꦠꦶꦪꦁꦲꦶꦁꦏꦁꦱꦩꦶꦝꦠꦼꦁꦩꦿꦶꦏꦸꦥꦽꦭꦸꦲꦗꦼꦗꦩ꧀ꦥꦶ꧉​ꦧꦺꦢꦤꦶꦥꦸꦤ꧀ꦏꦭꦶꦪꦤ꧀ꦏꦾꦲꦶꦨꦼꦢꦺꦴꦂꦲꦸꦠꦮꦶꦏꦾꦲꦶꦦꦼꦤ꧀ꦛꦺꦠ꧀꧈​ꦏꦾꦲꦶꦲꦺꦁꦒꦭ꧀ꦥꦸꦤꦶꦏꦫꦒꦶꦏꦉꦩ꧀ꦝꦠꦼꦁꦲꦂꦠ꧈​ꦲꦩꦶꦭꦩꦤꦮꦶꦮꦺꦴꦤ꧀ꦠꦼꦤ꧀ꦠꦶꦪꦁꦝꦠꦼꦁꦥꦽꦭꦸꦲꦗꦼꦗꦩ꧀ꦥꦶ꧈​ꦱꦢꦺꦫꦺꦁꦢꦺꦫꦺꦁꦔꦶꦥꦸꦤ꧀ꦱꦩ꧀ꦥꦸꦤ꧀ꦢꦶꦥꦸꦤ꧀ꦠꦼꦝꦤ꧀ꦤꦶꦲꦂꦠ꧉​ꦏꦧꦂꦫꦶꦥꦸꦤ꧀ꦱꦩꦁꦏꦺꦩꦸꦃꦲꦩꦠ꧀ꦱꦸꦂꦪꦩꦕꦱꦩ꧀ꦥꦸꦤ꧀ꦩꦶꦫꦸꦢꦱꦏꦶꦁꦝꦸꦱꦸꦤ꧀ꦤꦶꦥꦸꦤ꧀꧈​ꦧꦺꦴꦏ꧀ꦩꦤꦮꦶꦏꦸꦮꦠꦺꦴꦱ꧀ꦧꦶꦭꦶꦃꦏꦕꦼꦥꦼꦁꦲꦶꦁꦥꦸꦭꦶꦱꦶ꧉​ ꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧇​ꦧꦺꦚ꧀ꦗꦶꦁꦠꦁꦒꦭ꧀ꦏꦥꦶꦁ꧇꧕꧇​ꦤꦺꦴꦥꦺꦩ꧀ꦧꦼꦂꦲꦶꦁꦔꦗꦼꦁꦥꦸꦤꦶꦏ꧈​ꦥꦢꦸꦏꦠꦸꦮꦤ꧀ Th. A. Meister꧈​ꦫꦺꦱꦶꦝꦺꦤ꧀ꦲꦶꦁꦦꦏꦭꦺꦴꦔꦤ꧀꧈​ꦧꦝꦺꦚꦸꦮꦸꦤ꧀ꦏꦺꦤ꧀ꦢꦼꦭ꧀ꦱꦏꦶꦁꦏꦊꦁꦒꦃꦲꦤ꧀ꦤꦶꦥꦸꦤ꧀꧉​ ꧋ꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦄꦱꦶꦱ꧀ꦠꦺꦤ꧀ꦫꦺꦱꦶꦝꦺꦤ꧀ꦲꦶꦁꦨꦪꦭꦭꦶ꧇​ꦥꦢꦸꦏꦠꦸꦮꦤ꧀ W.D.B.H. Mulder꧈​ꦄꦱꦶꦱ꧀ꦠꦺꦤ꧀ꦫꦺꦱꦶꦝꦺꦤ꧀ꦲꦶꦁꦨꦚꦸꦮꦔꦶ꧉​ ꧋ꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱꦄꦱꦶꦱ꧀ꦠꦺꦤ꧀ꦫꦺꦱꦶꦝꦺꦤ꧀ꦲꦶꦁꦨꦚꦸꦮꦔꦶ꧇​ꦥꦢꦸꦏꦠꦸꦮꦤ꧀ G.K.J.A. Oosthout꧈​​ꦄꦱꦶꦱ꧀ꦠꦺꦤ꧀ꦫꦺꦱꦶꦝꦺꦤ꧀ꦲꦶꦁꦔꦮꦶ꧉​ ꧋ꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦄꦱꦶꦱ꧀ꦠꦺꦤ꧀ꦫꦺꦱꦶꦝꦺꦤ꧀ꦲꦶꦁꦨ꧀ꦭꦺꦴꦫ꧇​ꦥꦢꦸꦏꦠꦸꦮꦤ꧀ W.F.D. Philips꧈​ꦄꦱꦶꦱ꧀ꦠꦺꦤ꧀ꦫꦺꦱꦶꦝꦺꦤ꧀ꦲꦶꦁꦯꦿꦒꦺꦤ꧀꧉​ ꧋ꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦄꦱꦶꦱ꧀ꦠꦺꦤ꧀ꦫꦺꦱꦶꦝꦺꦤ꧀ꦲꦶꦁꦯꦿꦒꦺꦤ꧀꧇​ꦥꦢꦸꦏꦠꦸꦮꦤ꧀ J.H. Johan꧈​ꦏꦺꦴꦤ꧀ꦠꦿꦺꦴꦭꦶꦂꦏ꧀ꦭꦱ꧀ 1 ꦒꦺꦴꦭꦺꦴꦔꦤ꧀ B.B. ꧋ꦲꦶꦁꦯꦸꦫꦏꦂꦠꦢꦺꦫꦺꦁꦢꦔꦸꦥꦸꦤꦶꦏꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦏꦺꦴꦩꦶꦠꦺ꧈​ꦲꦶꦁꦏꦁꦱꦼꦢꦾꦤꦶꦥꦸꦤ꧀ꦧꦝꦺꦲꦩ꧀ꦧꦤ꧀ꦠꦸꦝꦠꦼꦁꦥꦫꦱꦼꦠꦸꦝꦺꦤ꧀ꦲꦶꦁꦤꦒꦫꦶꦮꦭꦤ꧀ꦢꦶ꧈​ꦩꦼꦁꦒꦃꦲꦶꦁꦏꦁꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦥꦔꦿꦺꦃꦲꦶꦁꦏꦺꦴꦩꦶꦠꦺ꧈​ꦲꦶꦁꦒꦶꦃꦥꦸꦤꦶꦏ꧇​ Mr. ꦯꦶꦁꦒꦶꦃ꧈​ꦥꦔꦂꦱ꧈​ Dr. ꦯꦸꦫꦠ꧀ꦩꦤ꧀꧈​ꦥꦤꦶꦠꦿ꧈​ M. ꦄꦭꦶꦩꦤ꧀꧈ M. ꦩꦂꦠꦢꦶꦲꦂꦗ꧈​ M. ꦯꦱ꧀ꦠꦿꦠꦂꦪꦤ꧈​ R. ꦯꦫꦺꦴꦤ꧀ꦠꦏꦸꦱꦸꦩꦢꦶꦂꦗꦭꦤ꧀ꦮꦶꦂꦪꦥꦿꦱꦺꦴꦤ꧀ꦠ꧈​ꦱꦩꦶꦮꦂꦒꦫꦸꦩꦼꦏ꧀ꦱ꧉​ ꧋ꦲꦶꦁꦔꦭꦺꦒꦾꦏꦂꦠꦲꦶꦁꦏꦁꦤꦤ꧀ꦢꦁꦔꦶꦥꦏꦼꦩ꧀ꦥꦭ꧀ꦭꦤ꧀ꦥꦏꦼꦩ꧀ꦥꦭ꧀ꦭꦤ꧀ P.S.I. P.N.I. ꦭꦤ꧀ꦩꦸꦃꦲꦩꦢꦶꦪꦃ꧉​ ꧋ꦏꦧꦂꦫꦶꦥꦸꦤ꧀ꦱꦩꦁꦏꦺꦲꦶꦁꦯꦸꦫꦏꦂꦠꦮꦺꦴꦤ꧀ꦠꦼꦤ꧀ꦥꦱꦶꦤꦲꦺꦴꦤ꧀ꦲꦁꦒꦩ꧀ꦧꦂꦕꦺꦴꦫꦺꦏ꧀꧈​ꦩꦁꦒꦺꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦭꦃꦱꦠꦸꦁꦒꦶꦭ꧀ꦭꦶꦁꦏꦩꦂꦲꦶꦁꦏꦤ꧀ꦠꦺꦴꦂꦏꦥꦠꦶꦃꦲꦤ꧀꧈​ꦢꦺꦤꦺꦲꦶꦁꦏꦁꦏꦥꦶꦗꦶꦢꦢꦺꦴꦱ꧀ꦏꦥꦭꦤꦶꦥꦸꦤ꧀꧇​ꦩꦱ꧀ꦔꦧꦺꦲꦶꦮꦶꦒꦾꦯꦸꦮꦂꦤ꧈​ꦲꦧ꧀ꦢꦶꦢꦊꦩ꧀ꦩꦤ꧀ꦠꦿꦶꦒꦩ꧀ꦧꦂꦲꦶꦁꦯꦸꦫꦏꦂꦠ꧉​ꦩꦱ꧀ꦔꦧꦺꦲꦶꦮꦶꦒꦾꦯꦸꦮꦂꦤꦥꦸꦤꦶꦏꦏꦭꦫꦸꦩꦶꦪꦶꦤ꧀ꦱꦩ꧀ꦥꦸꦤ꧀ꦤꦠꦺꦲꦁꦱꦭ꧀ꦠꦸꦤ꧀ꦠꦸꦤ꧀ꦤꦤ꧀ꦲꦁꦒꦩ꧀ꦧꦂꦱꦏꦶꦁꦧꦺꦴꦁꦱꦌꦫꦺꦴꦥꦃ꧉​ꦧꦪꦂꦫꦤ꧀ꦤꦶꦥꦸꦤ꧀ꦥꦱꦶꦤꦲꦺꦴꦤ꧀ꦲꦺꦁꦒꦭ꧀ꦥꦸꦤꦶꦏꦏꦧꦂꦫꦶꦥꦸꦤ꧀ꦩꦶꦫꦃꦱꦔꦼꦠ꧀꧉​ ꧋Todong ꦒꦼꦭꦂꦯꦸꦠꦤ꧀ꦒꦸꦤꦸꦁꦩꦸꦫꦶꦪꦃ꧈​ꦒꦸꦫꦸꦮꦭꦤ꧀ꦢꦶꦎꦁꦏ 1 ꦠꦸꦩꦿꦥ꧀ꦥꦩꦸꦭꦔꦤ꧀ꦲꦤ꧀ꦝꦥ꧀꧈​ꦱꦩꦁꦏꦺꦏꦧꦶꦪꦤ꧀ꦠꦺꦴꦑꦏꦼꦤ꧀ꦝꦠꦼꦁꦥꦩꦸꦭꦁꦔꦤ꧀ꦤꦺꦴꦂꦩꦭ꧀ꦱꦼꦏꦸꦭ꧀ꦲꦶꦁꦩꦶꦱ꧀ꦠꦼꦂꦏꦺꦴꦂꦤꦺꦭꦶꦱ꧀꧈​ꦩꦶꦤꦺꦴꦁꦏꦢꦢꦺꦴꦱ꧀ꦮꦂꦒꦫꦢ꧀ꦥꦔꦗꦂꦫꦤ꧀꧉​ ꧋ꦩꦱ꧀ꦱꦸꦏꦶꦂꦤꦱꦂꦠꦫꦢꦺꦤ꧀ꦠꦶꦂꦡꦮꦶꦫꦠ꧈​ꦏꦭꦶꦃꦏꦭꦶꦃꦲꦶꦥꦸꦤ꧀ꦱꦼꦠꦸꦝꦺꦤ꧀ꦥꦩꦸꦭꦁꦔꦤ꧀ꦥꦔꦢꦶꦭ꧀ꦭꦤ꧀ꦭꦸꦲꦸꦂ꧈​ꦱꦩꦶꦲꦁꦱꦭ꧀ꦌꦏ꧀ꦱꦩꦼꦤ꧀ꦤꦶꦥꦸꦤ꧀ꦏꦤ꧀ꦝꦶꦝꦠ꧀ꦧꦒꦶꦪꦤ꧀ꦏꦭꦶꦃ꧉​ ꧋ꦏꦭꦠꦁꦒꦭ꧀ꦏꦥꦶꦁ 27 ꦗꦸꦭꦶꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈​ꦲꦶꦁꦨꦤ꧀ꦝꦸꦁꦩꦼꦤ꧀ꦠꦱ꧀ꦢꦶꦥꦸꦤ꧀ꦢꦼꦒ꧀ꦒꦶꦥꦔꦶꦥꦸꦤ꧀ꦥꦏꦼꦩ꧀ꦥꦭ꧀ꦭꦤ꧀ꦤꦶꦁꦒꦸꦫꦸꦒꦸꦫꦸ Mulo꧉​ ꧋ꦏꦭꦠꦁꦒꦭ꧀ꦏꦥꦶꦁ 28 ꦗꦸꦭꦶꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏ꧈​ꦱꦏꦶꦁꦨꦤ꧀ꦝꦸꦁꦏꦮꦂꦠꦺꦴꦱ꧀ꦱꦏꦼꦤ꧀꧈​ꦧꦶꦭꦶꦃꦥꦩꦼꦢꦭ꧀ꦭꦶꦥꦸꦤ꧀ꦥꦚꦢꦺꦪꦤ꧀ꦱꦉꦩ꧀ꦱꦊꦧꦼꦠ꧀ꦠꦶꦥꦸꦤ꧀ꦮꦸꦭꦤ꧀ꦗꦸꦤꦶ 1927 ꦮꦺꦴꦤ꧀ꦠꦼꦤ꧀ f 1.527.000.- ꦤꦭꦶꦏꦗꦸꦤꦶ 1926 ꦤꦩꦸꦁꦲꦁꦱꦭ꧀ f 1.345.000.- ꧋Aneta ꦩꦂꦠꦺꦴꦱ꧀ꦱꦏꦼꦤ꧀꧈​ꦧꦶꦭꦶꦃꦩꦶꦭꦶꦠꦺꦂꦕꦕꦃꦲꦶꦥꦸꦤ꧀ 25 ꦲꦶꦁꦏꦁꦏꦠꦲꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦨꦤ꧀ꦝꦸꦁ꧈​ꦗꦭꦂꦫꦤ꧀ꦏꦢꦏ꧀ꦮꦠꦸꦩꦸꦠ꧀ꦥꦏꦼꦩ꧀ꦥꦭ꧀ꦭꦤ꧀ꦏꦺꦴꦩ꧀ꦩꦸꦤꦶꦱ꧀꧈​ꦱꦥꦸꦤꦶꦏꦏꦤ꧀ꦠꦸꦤ꧀ 18꧈​ꦱꦤꦺꦱ꧀ꦱꦶꦥꦸꦤ꧀ꦱꦩꦶꦏꦭꦸꦮꦂꦫꦤ꧀꧈​ꦲꦩꦂꦒꦶꦢꦏ꧀ꦮꦤꦶꦥꦸꦤ꧀ꦏꦶꦫꦁꦠꦼꦫꦁ꧉​ꦩꦶꦭꦶꦠꦺꦂ 25 ꦮꦲꦸꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁꦔꦶꦥꦸꦤ꧀ꦲꦤ꧀ꦧꦺꦴꦤ꧀꧈​ꦱꦢꦪꦠꦶꦪꦁꦩꦼꦟꦝꦺꦴꦱꦂꦠꦠꦶꦠꦶꦪꦁꦱꦶꦠꦶꦠꦤꦃꦗꦮꦶ꧉​ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦲꦶꦁꦏꦁ 18 ꦮꦲꦸꦧꦝꦺꦏꦧꦸꦕꦭ꧀ꦝꦠꦼꦁꦝꦶꦓꦸꦭ꧀꧉​ ꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈​ꦦꦩꦫꦺꦤ꧀ꦠꦃꦩꦫꦶꦁꦔꦶꦧꦶꦪꦤ꧀ꦠꦸꦲꦂꦠꦝꦠꦼꦁꦥꦫꦺꦱꦶꦝꦺꦤ꧀ꦤꦤ꧀ꦦꦱꦸꦫꦸꦃꦲꦤ꧀ f 163.000.- ꦏꦁꦒꦺꦮꦫꦒꦢ꧀ꦪꦱꦤ꧀ꦩꦂꦒꦶꦲꦶꦁꦱꦸꦩ꧀ꦧꦼꦂꦱꦺꦮꦸꦱꦸꦩ꧀ꦧꦼꦫꦮ꧉​ ꧋Aneta ꦩꦶꦉꦁꦥꦮꦂꦠꦺꦴꦱ꧀꧈​ꦧꦶꦭꦶꦃꦒꦿꦶꦪꦱꦏꦶꦠ꧀ꦠꦸꦩꦿꦥ꧀ꦠꦶꦪꦁꦲꦺꦢꦤ꧀ꦲꦶꦁꦨꦺꦴꦒꦺꦴꦂꦧꦝꦺꦢꦶꦥꦸꦤ꧀ꦲꦒꦼꦁꦔꦏꦼꦤ꧀ꦱꦂꦠꦧꦝꦺꦱꦒꦼꦢ꧀ꦤꦩ꧀ꦥꦶꦠꦶꦪꦁꦱꦏꦶꦠ꧀ 400 ꦩꦭꦶꦃ꧉​ꦒꦿꦶꦪꦒꦿꦶꦪꦲꦶꦁꦏꦁꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦧꦝꦺꦏꦢꦩꦼꦭ꧀ꦥꦺꦴꦤ꧀ꦝꦺꦴꦏ꧀ꦏꦤ꧀ꦤꦶꦥꦸꦤ꧀ꦠꦶꦠꦶꦪꦁꦲꦺꦮꦃꦲꦶꦁꦏꦁꦔ꧀ꦭꦼꦤꦼꦁ꧈​ꦲꦶꦁꦏꦁꦧꦝꦺꦏꦝꦠꦼꦁꦔꦏꦼꦤ꧀ꦱꦏꦶꦁꦒꦿꦶꦱꦏꦶꦠ꧀ꦲꦶꦁꦱꦲꦶꦤ꧀ꦢꦼꦁꦔꦶꦁꦠꦤꦃꦗꦮꦶ꧉​ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦠꦶꦪꦁ 100 ꦱꦏꦶꦁꦒꦿꦶꦪꦱꦏꦶꦠ꧀ꦲꦶꦁꦨꦺꦴꦒꦺꦴꦂꦥꦶꦪꦩ꧀ꦧꦏ꧀꧈​ꦧꦝꦺꦢꦶꦥꦸꦤ꧀ꦲꦺꦴꦥꦺꦤꦶꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦲꦶꦁꦏꦁꦲꦺꦁꦒꦭ꧀ꦥꦸꦤꦶꦏ꧉​ꦏꦥꦭꦤꦶꦁꦒꦿꦶꦪꦱꦏꦶꦠ꧀ꦲꦶꦁꦒꦶꦃꦥꦸꦤꦶꦏꦠꦸꦮꦤ꧀ Dr. Travaglino ꦧꦺꦴꦠꦼꦤ꧀ꦢꦔꦸꦩꦭꦶꦃꦧꦝꦺꦏꦺꦴꦤ꧀ꦢꦸꦂꦝꦠꦼꦁꦤꦒꦫꦶꦮꦭꦤ꧀ꦢꦶ꧈​ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦲꦶꦁꦏꦁꦧꦝꦺꦲꦁꦒꦼꦤ꧀ꦠꦺꦴꦱ꧀ꦱꦶꦠꦸꦮꦤ꧀ Dr. Stigter꧈​ꦱꦩꦁꦏꦺꦥꦔꦒꦼꦁꦔꦶꦁꦒꦿꦶꦪꦱꦏꦶꦠ꧀ꦲꦶꦁꦓꦿꦺꦴꦒꦺꦴꦭ꧀꧉​ ꧋ꦱꦼꦫꦠ꧀ꦏꦧꦂ De Cour ꦩꦂꦠꦺꦴꦱ꧀ꦱꦏꦼꦤ꧀꧈​ꦧꦶꦭꦶꦃꦠꦸꦮꦤ꧀ De Jeer ꦲꦶꦁꦏꦁꦩꦼꦚ꧀ꦕꦂꦫꦏꦼꦤ꧀ꦧꦧ꧀ꦏꦺꦴꦩ꧀ꦩꦸꦤꦶꦱ꧀ꦩꦺꦮꦺꦴꦤ꧀ꦠꦼꦤ꧀ꦏꦭꦁꦔꦤ꧀ꦩꦶꦭꦶꦠꦺꦂ꧈​ꦧꦝꦺꦏꦏꦶꦤ꧀ꦠꦸꦤ꧀ꦤꦏꦼꦤ꧀ꦝꦠꦼꦁꦒꦿꦶꦪꦱꦏꦶꦠ꧀ꦠꦸꦩꦿꦥ꧀ꦠꦶꦪꦁꦲꦺꦢꦤ꧀ꦲꦶꦁꦨꦺꦴꦒꦺꦴꦂ꧈​ꦱꦸꦥꦢꦺꦴꦱ꧀ꦏꦥꦿꦶꦏ꧀ꦱ꧈​ꦲꦩꦂꦒꦶꦠꦤ꧀ꦱꦃꦔꦠꦶꦔꦭ꧀ꦭꦏꦼꦤ꧀ꦥꦠꦿꦥ꧀ꦏꦢꦺꦴꦱ꧀ꦠꦶꦪꦁꦲꦺꦮꦃ꧈​ꦚꦩꦫꦶꦪꦺꦤ꧀ꦥꦤ꧀ꦢꦩꦼꦭ꧀ꦭꦶꦥꦸꦤ꧀ꦔꦤ꧀ꦠꦺꦴꦱ꧀ꦧꦺꦴꦠꦼꦤ꧀ꦏꦺꦔꦶꦁꦏꦲꦸꦏꦸꦩ꧀꧉​ ꧋Aneta ꦩꦂꦠꦺꦴꦱ꧀ꦱꦏꦼꦤ꧀ꦱꦏꦶꦁꦦꦝꦁ꧈​ꦧꦶꦭꦶꦃꦏꦭꦢꦶꦤ꧀ꦠꦼꦤ꧀ꦱꦧ꧀ꦠꦸꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏꦲꦶꦁꦔꦿꦶꦏꦮꦺꦴꦤ꧀ꦠꦼꦤ꧀ꦒꦿꦶꦪꦠꦶꦪꦺꦴꦁꦲ꧀ꦮꦱꦲꦒꦿꦶꦪꦤꦶꦁꦠꦶꦪꦁꦥꦿꦶꦧꦸꦩꦶ 6 ꦏꦧꦼꦱ꧀ꦩꦶꦔꦤ꧀ꦠꦺꦴꦱ꧀ꦠꦼꦭꦱ꧀꧉​ꦩꦼꦁꦒꦃꦏꦫꦸꦒꦶꦪꦤ꧀ꦤꦶꦥꦸꦤ꧀ꦥꦶꦤ꧀ꦠꦼꦤ꧀꧈​ꦱꦩꦁꦏꦺꦢꦺꦫꦺꦁꦏꦱꦸꦩꦼꦉꦥ꧀ꦥꦤ꧀꧉​	KRONIEK Kabar Warni-warni Pêthikan saking sêrat-sêrat kabar sanès. Dèrèng dangu punika ing Surakarta kawêdalakên sêrat kalawarti enggal ingkang kanamakakên: Bandera Jawi, mênggah wêdalipun kalawarti wau saminggu sapisan, ingkang dados kapalaning juru pangripta: Tuwan Sastra Sadarga, kala rumiyin juru pangriptaning kalawarti Gêntha Kêkêlèng. Pangêcapipun wontên ing kantor pangêcapan Mars ingkang dèrèng dangu punika dipun êdêgakên dening para sudagar pribumi ing Kauman, dene sêdyaning sêrat kalawarti punika sampun cêtha wontên ing namanipun, inggih punika angudi dhatêng kabangsan Jawi. Ingkang angsal eksamênipun kandhidhat bagian kêkalih ing pamulangan pangadilan luhur ing Wèltêprèdhên: Tuwan Sumardi lan Tuwan Abdullah. Wiwit tanggal 15 Agustus ing ngajêng punika, maskape K.P.M. badhe ambikak palayaran antawisipun Mêrak (Bantên) lan Lampung. A.I.D. martosakên, bilih ing kampung Rancabêrêm, dhusun Linggar, sacêlakipun Cicalengkah, wontên lare kobong ngantos dados tiwasipun. Mênggah mula bukanipun makatên: Wontên tiyang tani kesah dhatêng sabinipun ambêkta anakipun ingkang sawêg umur 2 taun. Dumugi ing sabin tiyang wau damêl bêdhiyan wontên ing sakubênging gubug, lare lajêng kasukakakên wontên ing gubug, saha lajêng anuwèni tanêmanipun timun ingkang tansah dipun saba ing maesa. Dilalah kala punika inggih wontên maesa ingkang sawêg ngrisak tanêmanipun, pun tani saklangkung nêpsunipun saha lajêng amburu dhatêng maesa wau, dene anakipun katilar wontên ing gubug, kala punika kalêrês jam 11 siyang, dados nêdhêng bêntèr-bêntèripun, botên antawis dangu latu bêdhiyanipun anyalat payoning gubug ingkang anjalari gubugipun ugi tumut kobong. Tiyang tani, sarêng sumêrêp bilih gubugipun kabêsmi, enggal wangsul sumêdya amitulungi anakipun ingkang katilar wau, ananging anakipun sampun pêjah, dene piyambakipun piyambak nandhang tatu kathah. Wontên pawartos, bilih ing salah satunggiling dhusun bawah dhistrik Maok (Tanggêrang) wontên tiyang gadhah anak lair mêdal tiga. Ingkang nganèh-anèhi sangêt, dene kêkulitanipun lare têtiga wau beda-beda, inggih punika ingkang satunggal pêthak, satunggilipun abrit, satunggilipun malih cêmêng. Tiga-tiganipun samangke sampun sami tilar. Angsal eksamênipun kandhidhat bagian ingkang kapisan ing pamulangan pangadilan luhur ing Wèltêprèdhên: Tuwan Injo Beng Goat lan Tuwan R. Sigit. Wontên pawartos, bilih Tuwan M. Suryadi, ajung komis redhaktur ing dhepartêmèn yustisi samangke katêtêpakên dados: wakil komis redhaktur ing kantor kasbut. Miturut sêrat kêkancingan gupêrmèn, dintên agêng ingkang katêmtokakên ing taun 1928, inggih punika: taun baru Walandi 1 Januari (Ngahad) mikrad dalêm Kangjêng Nabi Muhamar[4] 20 Januari (Jumuwah) taun baru Tiyonghwa 23 Januari (Sênèn) sedanipun ingkang minulya Kong Hoe Tjoe 9 Marêt (Jumuwah) Garêbêg Puasa 23-24 Marêt (Jumuwah tuwin Sabtu) Cing Bing 5 April (Kêmis) sedanipun Kangjêng Nabi Ngisa 6 April (Jumuwah) wungu Dalêm Kangjêng Nabi Ngisa 8-9 April (Minggu lan Sênèn) wiyosan dalêm taunan ingkang minulya Sang Pangeran Hendrik 19 April (Kêmis) wiyosan dalêm taunan Sang Rinaja Putri Juliana 30 April (Sênèn) mikrad dalêm Kangjêng Nabi Ngisa 17 Mèi (Kêmis) mêdhakipun roh Alkudus 27-28 Mèi (Minggu-Sênèn) Garêbêg Bêsar 29 Juni (Jumuwah) wiyosan dalêm taunan Kangjêng Sri Maharaja Putri Emma 2 Agustus (Kêmis) Garêbêg Mulud 29 Agustus (Rêbo) wiyosan dalêm taunan Kangjêng Sri Maharaja Putri Wilhelmina 31 Agustus (Jumuwah) taun wiyosanipun sang minulya Kong Hoe Tjoe 10 Oktobêr (Rêbo) wiyosan dalêm Kangjêng Nabi Ngisa 23-24 Dhesèmbêr (Slasa-Rêbo). Katêtêpakên dados pursitêr landrad ing Kandhangan (Borneo): Tuwan Mr. Susanta Tirtapraja. Kakèndêlakên amargi saking panyuwunipun piyambak dados adpokat tuwin pokrul ing pangadilan justisi ing Sêmarang: Tuwan Mr. Urip Kartadirja. Aneta martosakên, bilih pangadilan landrad ing Banyumas andhawahakên ukuman kunjara laminipun 2 taun dhatêng Tuwan Sujaman, tilas êlêp poskomis ing Sumpyuh, amargi kalêpatan anyalingkuhakên arta nagari kathahipun f 24,000.-. Saking Bandhung Aneta martosakên, bilih patih ing Garut, Radèn Găndasiswara, kala ing dintên Kêmis punika seda. Wontên pawartos, bilih ing dhusun Bêja ing bawah kabupatèn Sleman, wontên tiyang ingkang kasagêdanipun mèh sarupi kalihan Kyai Bêdor ing Sragèn utawi Kyai Pênthèt ing Kalasan, mênggah namanipun kyai enggal punika: Muhamat Suryamaca, kathah têtiyang ingkang sami dhatêng mriku prêlu ajêjampi. Bedanipun kalihan Kyai Bêdor utawi Kyai Pênthèt, kyai enggal punika ragi karêm dhatêng arta, amila manawi wontên tiyang dhatêng prêlu ajêjampi, sadèrèng-dèrèngipun sampun dipun têdhani arta. Kabaripun samangke Muhamat Suryamaca sampun miruda saking dhusunipun, bokmanawi kuwatos bilih kacêpêng ing pulisi. Wontên pawartos: benjing tanggal kaping 5 Nopèmbêr ing ngajêng punika, paduka Tuwan Th. A. Meister, residhèn ing Pakalongan, badhe nyuwun kèndêl saking kalênggahanipun. Katêtêpakên dados asistèn residhèn ing Bayalali: Paduka Tuwan W.D.B.H. Mulder, asistèn residhèn ing Banyuwangi. Katêtêpakên dados asistèn residhèn ing Banyuwangi: Paduka Tuwan G.K.J.A. Oosthout, asistèn residhèn ing Ngawi. Katêtêpakên dados asistèn residhèn ing Blora: Paduka Tuwan W.F.D. Philips, asistèn residhèn ing Sragèn. Katêtêpakên dados asistèn residhèn ing Sragèn: Paduka Tuwan J.H. Johan, kontrolir klas 1 golongan B.B. Ing Surakarta dèrèng dangu punika dipun wontênakên komite, ingkang sêdyanipun badhe ambantu dhatêng para sêtudhèn ing nagari Walandi, mênggah ingkang katêtêpakên dados pangrèhing komite, inggih punika: Mr. Singgih, pangarsa, Dr. Suratman, panitra, M. Aliman, M. Martadiharja, M. Sastrataryana, R. Saronta Kusumadirja lan Wiryaprasonta, sami warga rumêksa. Ing Ngalegyakarta[5] ingkang nandangi pakêmpalan-pakêmpalan P.S.I. P.N.I. lan Muhamadiyah. Kabaripun samangke ing Surakarta wontên pasinaon anggambar corèk, manggèn wontên ing salah satunggiling kamar ing kantor kapatihan, dene ingkang kapiji dados kapalanipun: Mas Ngabèhi Wigyasuwarna, abdi dalêm mantri gambar ing Surakarta. Mas Ngabèhi Wigyasuwarna punika kala rumiyin sampun nate angsal tuntunan anggambar saking băngsa Eropah. Bayaranipun pasinaon enggal punika kabaripun mirah sangêt. Todong gêlar sutan gunung Muriyah, guru Walandi ăngka 1 tumrap pamulangan andhap, samangke kabiyantokakên dhatêng pamulangan normal sêkul ing mistêr kornèlis, minăngka dados warga rad pangajaran. Mas Sukirna sarta Radèn Tirta Wirata, kalih-kalihipun sêtudhèn pamulangan pangadilan luhur, sami angsal eksamênipun kandhidhat bagiyan kalih. Kala tanggal kaping 27 Juli ingkang kapêngkêr punika, ing Bandhung mêntas dipun dêgi pangipun pakêmpalaning guru-guru Mulo. Kala tanggal kaping 28 Juli ingkang kapêngkêr punika, saking Bandhung kawartosakên, bilih pamêdalipun panyadean sarêm salêbêtipun wulan Juni 1927 wontên f 1.527.000.- nalika Juni 1926 namung angsal f 1.345.000.- Aneta martosakên, bilih militèr cacahipun 25 ingkang katahan wontên ing Bandhung, jalaran kadakwa tumut pakêmpalan komunis, sapunika kantun 18, sanèsipun sami kaluwaran, amargi dakwanipun kirang têrang. Militèr 25 wau botên wontên tiyangipun Anbon,[6] sadaya tiyang Mênadho sarta têtiyang siti tanah Jawi. Kintên-kintên ingkang 18 wau badhe kabucal dhatêng Dhigul. Wontên pawartos, pamarentah maringi biyantu arta dhatêng paresidhenan Pasuruan f 163.000.- kangge waragad yasan margi ing Sumbêrsèwu - Sumbêrawa. Aneta mirêng pawartos, bilih griya sakit tumrap tiyang edan ing Bogor badhe dipun agêngakên sarta badhe sagêd nampi tiyang sakit 400 malih. Griya-griya ingkang sampun wontên badhe kadamêl pondhokanipun têtiyang ewah ingkang nglênêng, ingkang badhe kadhatêngakên saking gri[7] sakit ing saindênging tanah Jawi. Kintên-kintên tiyang 100 saking griya sakit ing Bogor piyambak, badhe dipun opèni wontên ing griya ingkang enggal punika. Kapalaning griya sakit inggih punika Tuwan Dr. Travaglino botên dangu malih badhe kondur dhatêng nagari Walandi, kintên-kintên ingkang badhe anggêntosi Tuwan Dr. Stigter, samangke pangagênging griya sakit ing Grogol. Sêrat kabar De Cour martosakên, bilih Tuwan De Jeer ingkang mêncarakên bab komunisme wontên kalangan militèr, badhe kakintunakên dhatêng griya sakit tumrap tiyang edan ing Bogor, supados kapriksa, amargi tansah ngatingalakên patrap kados tiyang ewah, nyamari yèn pandamêlipun ngantos botên kenging kaukum. Aneta martosakên saking Padhang, bilih kala dintên Sabtu ingkang kapêngkêr punika ing ngrika wontên griya Tiyonghwa saha griyaning tiyang pribumi 6 kabêsmi ngantos têlas. Mênggah karugiyanipun pintên, samangke dèrèng kasumêrêpan.
[ 539 ]FEUILLETON ꧋ꦭꦭꦩ꧀ꦥꦃ​ꦲꦤ꧀ꦤꦶꦥꦸꦤ꧀ꦦꦿꦧꦸ Tristan ꦭꦤ꧀ꦥꦸꦠꦿꦶ Isolde꧉​ 12 ꧋ꦏꦕꦫꦶꦪꦺꦴꦱ꧀꧈​ꦯꦁ​ꦦꦿꦧꦸ Marc ꦠꦤ꧀ꦱꦃ​ꦧꦺꦴꦠꦼꦤ꧀ꦱꦒꦼꦢ꧀ꦱꦸꦥꦺꦝꦠꦼꦁ​ꦲꦠꦸꦂ​ꦫꦶꦥꦸꦤ꧀ꦥꦫꦧꦫꦺꦴꦤ꧀ꦲꦶꦁ​ꦏꦁ​ꦲꦢꦩꦼꦭ꧀ꦱꦼꦏꦼꦭ꧀ꦭꦶꦁ​ꦒꦭꦶꦃ​ꦲꦶꦥꦸꦤ꧀ꦥꦸꦤꦶꦏ꧉​ꦱꦗꦏ꧀ꦧꦺꦴꦠꦼꦤ꧀ꦥꦤꦸꦗꦸꦏꦭꦶꦪꦤ꧀ꦥꦁ​ꦒꦭꦶꦃ​ꦲꦶꦥꦸꦤ꧀꧈​ꦲꦺꦮꦢꦺꦤꦺꦱꦁ​ꦤꦠꦭꦗꦼꦁ​ꦲꦔꦼꦔꦶꦤ꧀ꦠꦶꦥ꧀ꦭꦭꦩ꧀ꦥꦃ​ꦲꦤ꧀ꦤꦶꦥꦸꦤ꧀ꦦꦿꦧꦸ Tristan ꦠꦸꦮꦶꦤ꧀ꦱꦁ​ꦥꦿꦩꦺꦱ꧀ꦮꦫꦶ꧉​ꦫꦲꦪꦸꦤꦶꦥꦸꦤ꧀ Brangien ꦲꦺꦁ​ꦒꦭ꧀ꦩꦔꦼꦂ​ꦠꦺꦴꦱ꧀ꦝꦠꦼꦁ​ꦏꦂ​ꦱꦤꦶꦥꦸꦤ꧀ꦱꦁ​ꦤꦠ꧉​ꦱꦏꦶꦁ​ꦫꦺꦏꦢꦪꦤꦶꦥꦸꦤ꧀ Brꦯꦁ​ꦤꦠꦔꦤ꧀ꦠꦺꦴꦱ꧀ꦧꦺꦴꦠꦼꦤ꧀ꦱꦒꦼꦢ꧀ꦲꦔꦸꦤꦶꦁ​ꦔꦤ꧀ꦤꦶꦝꦠꦼꦁ​ꦭꦭꦩ꧀ꦥꦃ​ꦲꦤ꧀ꦤꦶꦥꦸꦤ꧀ꦦꦿꦧꦸ Tristan ꦏꦭꦶꦪꦤ꧀ꦱꦁ​ꦥꦿꦩꦺꦱ꧀ꦮꦫꦶꦏꦢꦺꦴꦱ꧀ꦲꦶꦁ​ꦏꦁ​ꦏꦲꦠꦸꦂ​ꦫꦏꦼꦤ꧀ꦢꦺꦤꦶꦁ​ꦧꦫꦺꦴꦤ꧀ꦱꦏꦮꦤ꧀ꦮꦲꦸ꧉​ꦮꦸꦱꦤꦱꦁ​ꦤꦠꦲꦁ​ꦒꦭꦶꦃ​꧈​ꦧꦶꦭꦶꦃ​ꦭꦭꦩ꧀ꦥꦃ​ꦲꦤ꧀ꦲꦶꦁ​ꦏꦁ​ꦩꦏꦠꦼꦤ꧀ꦥꦸꦤꦶꦏꦤꦶꦱ꧀ꦛꦱꦔꦼꦠ꧀꧈​ꦠꦸꦂ​ꦥꦚ꧀ꦗꦼꦤꦼꦁ​ꦔꦤ꧀ꦤꦶꦥꦸꦤ꧀ꦧꦺꦴꦠꦼꦤ꧀ꦱꦒꦼꦢ꧀ꦲꦚꦶꦂ​ꦤꦑꦏꦼꦤ꧀ꦥꦤ꧀ꦢꦏ꧀ꦮꦲꦮꦺꦴꦤ꧀ꦝꦠꦼꦁ​ꦦꦿꦧꦸ Tristan꧉​ ꦦꦿꦧꦸ Tristan ꦭꦗꦼꦁ​ꦢꦶꦥꦸꦤ꧀ꦠꦶꦩ꧀ꦧꦭꦶ꧉​ꦥꦔꦤ꧀ꦢꦶꦏꦤꦶꦥꦸꦤ꧀꧇​ Tristan ꦱꦶꦫꦏꦸꦢꦸꦭꦸꦔꦱꦏꦲꦶꦁ​ꦏꦫꦠꦺꦴꦤ꧀ꦲꦶꦏꦶ꧈​ꦱꦂ​ꦠꦲꦗꦮꦤꦶꦮꦤꦶꦧꦭꦶꦩꦤꦺꦃ​꧉​ꦮꦺꦴꦁ​ꦮꦺꦴꦁ​ꦏꦁ​ꦲꦭꦲꦠꦶꦤꦺꦥꦝꦲꦤ꧀ꦢꦏ꧀ꦮꦩꦫꦁ​ꦱꦶꦫꦪꦺꦤ꧀ꦱꦶꦫꦲꦔ꧀ꦭꦏꦺꦴꦤ꧀ꦤꦶꦥꦁ​ꦒꦮꦺꦲꦭ꧈​ꦤꦔꦶꦁ​ꦲꦶꦁ​ꦱꦸꦤ꧀ꦲꦺꦴꦫꦏꦂ​ꦱꦠꦸꦠꦸꦂ​ꦥꦤ꧀ꦢꦏ꧀ꦮꦲꦥꦏꦁ​ꦢꦶꦪꦠꦸꦂ​ꦫꦏꦺꦲꦶꦁ​ꦥꦚ꧀ꦗꦼꦤꦼꦁ​ꦔꦤ꧀ꦤꦶꦁ​ꦱꦸꦤ꧀꧈​ꦲꦮꦶꦠ꧀ꦩꦤꦮꦶꦲꦶꦁ​ꦱꦸꦤ꧀ꦕꦫꦶꦠꦑꦏꦺꦩꦼꦱ꧀ꦛꦶꦒꦮꦺꦮꦶꦫꦁ​ꦔꦶꦁ​ꦱꦸꦤ꧀ꦭꦤ꧀ꦱꦶꦫ꧉​ꦲꦗꦱꦶꦫꦚꦺꦴꦧꦲꦔ꧀ꦭꦼꦉꦥ꧀ꦥꦏꦺꦱꦼꦏꦼꦭ꧀ꦭꦶꦁ​ꦥꦁ​ꦒꦭꦶꦃ​ꦲꦶꦁ​ꦱꦸꦤ꧀ꦱꦫꦤꦠꦼꦩ꧀ꦧꦸꦁ​ꦩꦤꦸꦮꦫ꧈​ꦲꦮꦶꦠ꧀ꦧꦏꦭ꧀ꦠꦤ꧀ꦥꦒꦸꦤ꧉​ꦲꦺꦮꦢꦺꦤꦺꦲꦶꦁ​ꦱꦸꦤ꧀ꦲꦺꦴꦫꦥꦿꦕꦪꦩꦫꦁ​ꦲꦠꦸꦂ​ꦫꦶꦁ​ꦮꦺꦴꦁ​ꦮꦺꦴꦁ​ꦩꦲꦸ꧈​ꦱꦲꦸꦥꦩꦲꦶꦁ​ꦱꦸꦤ꧀ꦥꦿꦕꦪꦲꦱꦶꦫꦮꦶꦱ꧀ꦩꦼꦱ꧀ꦛꦶꦲꦶꦁ​ꦱꦸꦤ꧀ꦥꦠꦿꦥꦶꦲꦸꦏꦸꦩ꧀ꦩꦤ꧀ꦥꦠꦶ꧉​ꦲꦤꦔꦶꦁ​ꦲꦠꦸꦫꦺꦏꦁ​ꦲꦤꦠꦺꦴꦤ꧀ꦤꦶꦥꦁ​ꦒꦭꦶꦃ​ꦲꦶꦁ​ꦱꦸꦤ꧀ꦲꦶꦏꦸꦲꦚ꧀ꦗꦭꦂ​ꦫꦶꦱꦼꦏꦼꦭ꧀ꦭꦶꦁ​ꦥꦁ​ꦒꦭꦶꦃ​ꦲꦶꦁ​ꦱꦸꦤ꧀꧈​ꦧꦶꦱꦤꦺꦊꦗꦂ​ꦥꦁ​ꦒꦭꦶꦃ​ꦲꦶꦁ​ꦱꦸꦤ꧀ꦲꦶꦏꦸꦩꦸꦁ​ꦩꦤꦮꦶꦱꦶꦫꦭꦸꦔꦱꦏꦲꦶꦁ​ꦏꦫꦠꦺꦴꦤ꧀ꦲꦶꦏꦶ꧉​ꦮꦶꦱ꧀ꦧꦸꦝꦭ꧈​ꦒꦺꦂ​꧈​ꦮꦿꦸꦲꦤꦩꦸꦲꦶꦁ​ꦱꦸꦤ꧀ꦲꦶꦱꦶꦃ​ꦠꦽꦱ꧀ꦤꦩꦫꦁ​ꦱꦶꦫ꧉​ꦧꦺꦴꦏ꧀ꦩꦤꦮꦲꦶꦁ​ꦠꦼꦩ꧀ꦧꦺꦱꦶꦫꦲꦶꦁ​ꦱꦸꦤ꧀ꦠꦶꦩ꧀ꦧꦭ꧀ꦭꦶꦩꦤꦺꦃ​꧉​ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦤꦩ꧀ꦥꦶꦝꦮꦸꦃ​ꦲꦶꦥꦸꦤ꧀ꦱꦁ​ꦤꦠꦲꦶꦁ​ꦏꦁ​ꦩꦏꦠꦼꦤ꧀ꦥꦸꦤꦶꦏ꧈​ꦦꦿꦧꦸ Tristan ꦲꦶꦁ​ꦒꦶꦃ​ꦭꦗꦼꦁ​ꦩꦁ​ꦏꦠ꧀ꦲꦤꦶꦭꦂ​ꦏꦫꦠꦺꦴꦤ꧀ꦤꦶꦥꦸꦤ꧀ꦲꦶꦁ​ꦏꦁ​ꦫꦩꦥꦩꦤ꧀꧉​ ꧋ꦱꦉꦁ​ꦧꦫꦺꦴꦤ꧀ꦱꦏꦮꦤ꧀ꦩꦶꦉꦁ​ꦥꦮꦂ​ꦠꦺꦴꦱ꧀ꦏꦺꦱꦃ​ꦲꦶꦥꦸꦤ꧀ ꦱꦏꦶꦁ​ꦏꦫꦠꦺꦴꦤ꧀꧈​ꦠꦸꦩꦸꦤ꧀ꦠꦼꦤ꧀ꦱꦩꦶꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧇​ꦠꦸꦏꦁ​ꦱꦸꦭꦥ꧀ꦲꦶꦏꦸꦱꦲꦶꦏꦶꦮꦶꦱ꧀ꦭꦸꦔꦱꦏꦲꦶꦁ​ꦏꦫꦠꦺꦴꦤ꧀꧈​ꦭꦸꦔꦤꦺꦢꦶꦠꦸꦤ꧀ꦝꦸꦁ​ꦲꦶꦁ​ꦱꦁ​ꦤꦠꦏꦪꦢꦺꦤꦺꦲꦤꦸꦤ꧀ꦝꦸꦁ​ꦩꦭꦶꦁ​꧈​ꦏꦥꦿꦶꦪꦺꦧꦚ꧀ꦗꦸꦂ​ꦫꦶꦁ​ꦭꦭꦏꦺꦴꦤ꧀ꦤꦺ꧉​ꦧꦺꦴꦏ꧀ꦩꦤꦮꦧꦏꦭ꧀ꦩꦼꦚꦁ​ꦲꦶꦁ​ꦠꦤꦃ​ꦱꦧꦿꦁ​꧈​ꦱꦸꦮꦶꦠꦩꦫꦁ​ꦫꦠꦸꦏꦁ​ꦤꦒꦫꦤꦺꦲꦢꦺꦴꦃ​ꦱꦏꦲꦶꦁ​ꦏꦺꦤꦺ꧉​ꦏꦕꦫꦶꦪꦺꦴꦱ꧀ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦲꦤꦶꦭꦂ​ꦏꦫꦠꦺꦴꦤ꧀꧈​ꦦꦿꦧꦸ Tristan ꦧꦺꦴꦠꦼꦤ꧀ꦏꦢꦸꦒꦶꦲꦔ꧀ꦭꦗꦼꦁ​ꦔꦏꦼꦤ꧀ꦭꦩ꧀ꦥꦃ​ꦲꦶꦥꦸꦤ꧀꧈​ꦱꦂ​ꦠꦏꦺꦤ꧀ꦢꦼꦭ꧀ꦲꦶꦁ​ꦝꦸꦱꦸꦤ꧀ Tintagel ꦩꦺꦴꦤ꧀ꦝꦺꦴꦏ꧀ꦲꦶꦁ​ꦒꦿꦶꦪꦤꦶꦥꦸꦤ꧀ꦠꦶꦪꦁ​ꦝꦸꦱꦸꦤ꧀ꦔꦿꦶꦏꦸꦏꦝꦺꦫꦺꦑꦏꦼꦤ꧀ꦢꦺꦤꦶꦁ​ꦯꦁ​ Gorneval꧉​ꦱꦉꦁ​ꦮꦺꦴꦤ꧀ꦠꦼꦤ꧀ꦲꦶꦁ​ꦔꦿꦶꦏꦸꦦꦿꦧꦸ Tristan ꦒꦼꦫꦃ​ꦧꦼꦤ꧀ꦠꦺꦂ​꧉​ꦱꦏꦶꦁ​ꦱꦔꦼꦠ꧀ꦠꦶꦁ​ꦒꦼꦫꦃ​ꦲꦶꦥꦸꦤ꧀꧈​ꦔꦤ꧀ꦠꦺꦴꦱ꧀ꦲꦔꦸꦁ​ꦏꦸꦭ꧀ꦭꦶꦤꦭꦶꦏꦤꦤ꧀ꦝꦁ​ꦠꦠꦸꦏꦺꦔꦶꦁ​ꦢꦢꦩꦼꦭ꧀ꦭꦶꦥꦸꦤ꧀ ꦯꦁ​ Morhout ꦫꦸꦩꦶꦪꦶꦤ꧀꧈​ꦏꦭꦥꦚ꧀ꦗꦼꦤꦼꦁ​ꦔꦤ꧀ꦤꦶꦥꦸꦤ꧀ꦒꦼꦫꦃ​ꦱꦔꦼꦠ꧀ꦲꦠꦼꦠꦶꦫꦃ​ꦲꦶꦁ​ꦱꦥꦶꦁ​ꦒꦶꦫꦶꦁ​ꦱꦒꦤ꧀ꦠꦼꦤ꧀꧈​ꦱꦤꦗꦤ꧀ꦱꦫꦶꦫꦤꦶꦥꦸꦤ꧀ꦲꦁ​ꦒꦺꦴꦤ꧀ꦢꦲꦫꦸꦱ꧀꧈​ꦠꦏ꧀ꦱꦶꦃ​ꦮꦺꦴꦤ꧀ꦠꦼꦤ꧀ꦠꦶꦠꦶꦪꦁ​ꦲꦶꦁ​ꦏꦁ​ꦥꦸꦫꦸꦤ꧀ꦲꦚꦼꦭꦏ꧀ꦏꦶꦲꦶꦁ​ꦱꦫꦶꦫꦤꦶꦥꦸꦤ꧀꧈​ꦲꦶꦁ​ꦒꦶꦃ​ꦥꦸꦤꦶꦏ꧇​ꦯꦁ​ Gorneval꧈​ꦧꦫꦺꦴꦤ꧀ Dinas ꦲꦶꦁ​ Lidan ꦠꦸꦮꦶꦤ꧀ꦱꦁ​ꦦꦿꦧꦸ Marc꧉​ꦤꦔꦶꦁ​ꦱꦥꦸꦤꦶꦏꦲꦶꦁ​ꦏꦁ​ꦥꦸꦫꦸꦤ꧀ꦚꦼꦭꦏ꧀ꦏꦶꦤꦩꦸꦁ​ꦯꦁ​ Gorneval ꦏꦭꦶꦪꦤ꧀ꦧꦫꦺꦴꦤ꧀ Dinas ꦲꦶꦁ​ Lidan ꦏꦺꦩꦮꦺꦴꦤ꧀꧉​ꦦꦿꦧꦸ Tristan ꦱꦱꦩ꧀ꦧꦠ꧀꧇​ꦝꦸꦃ​꧈​ꦫꦩꦦꦿꦧꦸꦱꦥꦸꦤꦶꦏꦱꦏꦶꦠ꧀ꦏꦮꦸꦭꦭꦁ​ꦏꦸꦁ​ꦱꦔꦼꦠ꧀ꦠꦶꦤꦶꦩ꧀ꦧꦁ​ꦏꦭꦫꦸꦩꦶꦪꦶꦤ꧀꧉​ꦱꦔꦼꦠ꧀ꦠꦶꦁ​ꦥꦁ​ꦒꦭꦶꦃ​ꦥꦢꦸꦏꦱꦥꦸꦤꦶꦏꦲꦔ꧀ꦭꦁ​ꦏꦸꦁ​ꦔꦶꦏꦠꦽꦱ꧀ꦤꦤ꧀ꦥꦢꦸꦏꦝꦠꦼꦁ​ꦲꦶꦁ​ꦗꦱꦢ꧀ꦏꦮꦸꦭ꧉​ꦥꦶꦤꦸꦗꦸꦒꦼꦫꦃ​ꦲꦶꦥꦸꦤ꧀ꦲꦩ꧀ꦧꦼꦤ꧀ꦠꦺꦂ​ꦫꦶ꧈​ꦦꦿꦧꦸ Tristan ꦫꦸꦩꦲꦺꦴꦱ꧀ꦤꦶꦠꦶꦃ​ꦠꦶꦠꦶꦃ​ꦲꦤ꧀ꦲꦔꦼꦤꦼꦂ​ꦏꦫꦠꦺꦴꦤ꧀꧈​ꦏꦼꦥꦺꦔꦶꦤ꧀ꦩꦁ​ꦒꦶꦃ​ꦲꦶꦱꦁ​ꦥꦿꦩꦺꦱ꧀ꦮꦫꦶ꧈​ꦠꦶꦠꦶꦃ​ꦲꦤ꧀ꦤꦶꦥꦸꦤ꧀ꦲꦤꦿꦗꦁ​ꦥꦒꦼꦂ​ꦠꦺꦩ꧀ꦧꦺꦴꦏ꧀ꦏꦶꦁ​ꦏꦫꦠꦺꦴꦤ꧀ꦔꦤ꧀ꦠꦺꦴꦱ꧀ꦝꦮꦃ​꧈​ꦦꦿꦧꦸ Tristan ꦲꦸꦒꦶꦏꦠꦸꦠ꧀ꦝꦮꦃ​꧈​ꦤꦔꦶꦁ​ꦭꦗꦼꦁ​ꦥꦁ​ꦏꦠ꧀ꦩꦭꦶꦃ​ꦱꦲꦚꦤ꧀ꦢꦼꦂ​ꦫꦏꦼꦤ꧀ꦠꦶꦠꦶꦃ​ꦲꦤ꧀ꦤꦶꦥꦸꦤ꧀꧉​ ꧋ꦲꦶꦁ​ꦱꦊꦧꦼꦠ꧀ꦠꦶꦁ​ꦏꦫꦠꦺꦴꦤ꧀꧈​ꦯꦁ​ꦥꦸꦠꦿꦶ Isolde ꦲꦸꦒꦶꦲꦤꦤ꧀ꦝꦁ​ꦒꦼꦫꦃ​ꦮꦸꦪꦸꦁ​ꦱꦲꦫꦸꦩꦲꦺꦴꦱ꧀ꦏꦥꦼꦚ꧀ꦕꦶꦭ꧀꧉​ꦲꦶꦁ​ꦱꦢꦶꦤ꧀ꦠꦼꦤ꧀ꦢꦶꦤ꧀ꦠꦼꦤ꧀ꦤꦶꦥꦸꦤ꧀ꦏꦼꦢꦃ​ꦲꦥꦶꦲꦥꦶꦧꦶꦔꦃ​꧈​ꦩꦏꦠꦼꦤ꧀ꦲꦸꦒꦶꦩꦤꦮꦶꦥꦶꦤꦸꦗꦸꦥꦶꦪꦩ꧀ꦧꦏ꧀ꦏꦤ꧀ꦏꦭꦶꦪꦤ꧀ꦱꦁ​ꦤꦠ꧉​ꦯꦁ​ꦥꦸꦠꦿꦶꦏꦂ​ꦱꦭꦺꦴꦭꦺꦴꦱ꧀ꦲꦔꦸꦥꦢꦺꦴꦱ꧀ꦱꦶꦦꦿꦧꦸ Tristan꧉​ꦲꦶꦁ​ꦮꦚ꧀ꦕꦶꦢꦭꦸꦱꦸꦥꦼꦤ꧇​ꦫꦸꦩꦲꦺꦴꦱ꧀ꦱꦶꦥꦸꦤ꧀ꦱꦁ​ꦥꦸꦠꦿꦶꦏꦢꦺꦴꦱ꧀ꦱꦩ꧀ꦥꦸꦤ꧀ꦮꦸꦔꦸꦱꦏꦶꦁ​ꦥꦱꦫꦺꦪꦤ꧀ꦤꦶꦥꦸꦤ꧀ꦱꦲꦏꦢꦺꦴꦱ꧀ꦱꦩ꧀ꦥꦸꦤ꧀ꦠꦶꦤ꧀ꦢꦏ꧀ꦝꦠꦼꦁ​ꦲꦶꦁ​ꦏꦺꦴꦫꦶꦤꦶꦁ​ꦏꦩꦂ​꧈​ꦤꦔꦶꦁ​ꦲꦶꦁ​ꦠꦼꦔꦃ​ꦏꦺꦴꦫꦶꦒꦶꦤꦤ꧀ꦠꦸꦁ​ꦔꦤ꧀ꦢꦢꦩꦼꦭ꧀ꦭꦤ꧀ꦝꦼꦥ꧀ꦱꦔꦼꦠ꧀꧈​ꦢꦺꦤꦶꦁ​ꦠꦶꦠꦶꦪꦁ​ꦲꦮꦺꦴꦤ꧀ꦲꦤꦠꦺꦴꦤ꧀ꦤꦶꦗꦼꦗꦼꦁ​ꦏꦸꦤꦶꦥꦸꦤ꧀ꦱꦁ​ꦦꦿꦩꦺꦱ꧀ꦮꦫꦶ꧉​ꦫꦸꦩꦲꦺꦴꦱ꧀ꦱꦶꦥꦸꦤ꧀ꦱꦁ​ꦥꦸꦠꦿꦶꦠꦠꦸꦤꦶꦥꦸꦤ꧀ꦩꦼꦢꦭ꧀ꦫꦃ​ꦲꦶꦥꦸꦤ꧀ꦏꦛꦃ​ꦱꦔꦼꦠ꧀꧉​ ꧋ꦱꦲꦺꦱ꧀ꦠꦸꦤꦶꦥꦸꦤ꧀ꦲꦸꦥꦩꦶꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁ​ꦲꦶꦁ​ꦏꦁ​ꦲꦠꦼꦠꦸꦭꦸꦁ​ꦝꦠꦼꦁ​ꦧꦺꦴꦁ​ꦱꦭꦸꦲꦸꦂ​ꦏꦼꦏꦭꦶꦃ​ꦲꦶꦁ​ꦏꦁ​ꦱꦮꦼꦒ꧀ꦤꦤ꧀ꦝꦁ​ꦒꦼꦫꦃ​ꦧꦼꦤ꧀ꦠꦺꦂ​ꦱꦲꦲꦶꦁ​ꦏꦁ​ꦱꦩꦶꦤꦤ꧀ꦝꦁ​ꦮꦸꦪꦸꦁ​ꦮꦲꦸꦠꦩ꧀ꦠꦸꦱꦒꦼꦢ꧀ꦢꦢꦺꦴꦱ꧀ꦠꦶꦮꦱ꧀꧉​ꦢꦺꦤꦺꦲꦶꦁ​ꦏꦁ​ꦲꦠꦼꦠꦸꦭꦸꦁ​ꦥꦸꦤꦶꦏꦧꦺꦴꦠꦼꦤ꧀ꦱꦤꦺꦱ꧀ꦏꦗꦮꦶꦥꦸꦤ꧀ Brangien꧉​ꦱꦫꦤꦝꦼꦝꦼꦩꦶꦠ꧀ꦠꦤ꧀꧈​ Brangien ꦱꦒꦼꦢ꧀ꦩꦼꦢꦭ꧀ꦱꦏꦶꦁ​ꦲꦶꦁ​ꦏꦫꦠꦺꦴꦤ꧀꧈​ꦭꦗꦼꦁ​ꦝꦠꦼꦁ​ꦲꦶꦁ​ꦒꦿꦶꦪꦥꦺꦴꦤ꧀ꦝꦺꦴꦏ꧀ꦏꦤ꧀ꦤꦶꦥꦸꦤ꧀ꦦꦿꦧꦸ Tristan꧉​ꦯꦁ​ Gorneval ꦲꦩ꧀ꦧꦶꦏꦏ꧀ꦏꦺꦴꦫꦶꦏꦤ꧀ꦛꦶꦧꦶꦔꦃ​ꦲꦶꦁ​ꦩꦤꦃ​꧉​ Brangien ꦤꦸꦤ꧀ꦠꦼꦤ꧀ꦲꦔꦠꦸꦂ​ꦫꦶꦫꦺꦏꦢꦪꦝꦠꦼꦁ​ꦦꦿꦧꦸ Tristan ꦲꦩꦸꦫꦶꦃ​ꦱꦒꦼꦢ꧀ꦢꦶꦥꦸꦤ꧀ꦥꦼꦥꦁ​ꦒꦶꦃ​ꦲꦤ꧀ꦏꦭꦶꦪꦤ꧀ꦱꦁ​ꦦꦿꦩꦺꦱ꧀ꦮꦫꦶ꧉​ ꧋ꦲꦶꦁ​ꦱꦮꦶꦁ​ꦏꦶꦁ​ꦔꦶꦁ​ꦏꦫꦠꦺꦴꦤ꧀ Tintagel ꦮꦺꦴꦤ꧀ꦠꦼꦤ꧀ꦥꦏꦼꦧꦺꦴꦤ꧀ꦤꦤ꧀ꦮꦶꦪꦂ​ꦥꦶꦤꦒꦼꦂ​ꦫꦤ꧀ꦲꦶꦁ​ꦏꦗꦼꦁ​ꦭꦺꦴꦭꦺꦴꦚ꧀ꦗꦺꦴꦂ​ꦫꦤ꧀ꦏꦶꦪꦠ꧀ꦱꦔꦼꦠ꧀꧉​ꦏꦼꦧꦺꦴꦤ꧀ꦤꦤ꧀ꦮꦲꦸꦏꦠꦤꦼꦩ꧀ꦩꦤ꧀ꦏꦏꦗꦼꦁ​ꦔꦤ꧀ꦠꦸꦮꦶꦤ꧀ꦮꦺꦴꦃ​ꦮꦺꦴꦃ​ꦲꦤ꧀ꦮꦂ​ꦤꦶꦮꦂ​ꦤꦶ꧈​ꦱꦩꦶꦲꦮꦺꦴꦃ​ꦲꦩ꧀ꦧꦶꦪꦼꦏ꧀ꦲꦔꦼꦩꦺꦴꦃ​ꦲꦶ꧉​ꦱꦼꦏꦂ​ꦫꦶꦁ​ꦮꦶꦠ꧀ꦮꦶꦠ꧀ꦠꦤ꧀ꦱꦩꦶꦩꦂ​ꦧꦸꦏ꧀ꦮꦔꦶꦒꦤ꧀ꦢꦤꦶꦥꦸꦤ꧀꧉​ꦱ꧀ꦮꦫꦤꦶꦁ​ꦥꦼꦏ꧀ꦱꦶꦥꦠꦶꦁ​ꦕꦫꦸꦮꦺꦠ꧀ꦏꦢꦺꦴꦱ꧀ꦠꦠꦤꦶꦥꦸꦤ꧀ꦠꦶꦪꦁ​ꦲꦶꦁ​ꦏꦁ​ꦤꦼꦩ꧀ꦧꦺꦱꦸꦏꦤ꧀ꦱꦸꦏꦤ꧀꧉​ꦲꦶꦁ​ꦒꦶꦃ​ꦱꦥꦶꦁ​ꦒꦶꦂ​ꦫꦶꦁ​ꦏꦼꦧꦺꦴꦤ꧀ꦲꦶꦁ​ꦱꦕꦼꦭꦏ꧀ꦏꦶꦁ​ꦥꦒꦼꦂ​ꦏꦗꦼꦁ​ꦭꦺꦴꦭꦺꦴꦚ꧀ꦗꦺꦴꦂ​ꦫꦤ꧀ꦮꦲꦸ꧈​ꦥꦁ​ꦒꦺꦤ꧀ꦤꦤ꧀ꦲꦶꦁ​ꦏꦁ​ꦠꦼꦧꦶꦃ​ꦥꦶꦪꦩ꧀ꦧꦏ꧀ꦢꦸꦤꦸꦁ​ꦔꦶꦥꦸꦤ꧀ꦱꦏꦶꦁ​ꦲꦶꦁ​ꦏꦫꦠꦺꦴꦤ꧀꧈​ꦱꦂ​ꦠꦮꦺꦴꦤ꧀ꦠꦼꦤ꧀ꦏꦗꦼꦁ​ꦔꦶꦥꦸꦤ꧀ꦲꦒꦼꦁ​ꦱꦲꦲꦶꦁ​ꦒꦶꦭ꧀ꦱꦔꦼꦠ꧀꧈​ꦱꦲꦸꦮꦶꦠ꧀꧈​ꦧꦁ​ꦱꦤꦶꦥꦸꦤ꧀ꦏꦗꦼꦁ​ꦕꦼꦩꦫ꧈​ꦢꦼꦊꦒ꧀ꦒꦶꦥꦸꦤ꧀ꦲꦒꦼꦁ​ꦱꦂ​ꦠꦏꦶꦪꦠ꧀꧈​ꦥꦔꦶ [ 540 ]ꦥꦸꦤ꧀ꦏꦛꦃ꧉​ꦲꦶꦁꦱꦔꦤ꧀ꦝꦥ꧀ꦥꦶꦥ꧀ꦥꦸꦤ꧀ꦏꦗꦼꦁꦮꦲꦸꦮꦺꦴꦤ꧀ꦠꦼꦤ꧀ꦠꦭꦒꦤꦶꦥꦸꦤ꧀꧈​ꦠꦺꦴꦪꦤꦶꦥꦸꦤ꧀ꦧꦼꦤꦶꦁꦱꦔꦼꦠ꧀꧉​ꦥꦶꦁꦒꦶꦂꦠꦭꦒꦠꦶꦤꦺꦩ꧀ꦧꦺꦴꦏ꧀ꦲꦶꦁꦩꦂꦩꦼꦂꦩꦸꦧꦼꦁ꧈​ꦠꦺꦴꦪꦤꦶꦥꦸꦤ꧀ꦏꦲꦶꦭꦺꦑꦏꦼꦤ꧀ꦝꦠꦼꦁꦲꦶꦁꦱꦊꦧꦼꦠ꧀ꦠꦶꦁꦏꦫꦠꦺꦴꦤ꧀꧈​ꦲꦚ꧀ꦗꦺꦴꦒ꧀ꦲꦶꦁꦏꦥꦸꦠꦿꦺꦤ꧀꧈​ꦲꦔ꧀ꦭꦁꦏꦸꦁꦔꦶꦥꦏꦼꦧꦺꦴꦤ꧀ꦤꦤ꧀ꦮꦲꦸ꧉​ ꧋ꦏꦕꦫꦶꦪꦺꦴꦱ꧀꧈​ꦱꦧꦼꦤ꧀ꦱꦺꦴꦤ꧀ꦠꦼꦤ꧀ꦦꦿꦧꦸ Trꦲꦢꦩꦼꦭ꧀ꦠꦠꦭ꧀ꦲꦭꦶꦠ꧀ꦲꦭꦶꦠ꧀꧈​ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦥꦶꦏꦤ꧀ꦠꦸꦏ꧀ꦏꦛꦃꦭꦗꦼꦁꦠꦶꦤ꧀ꦢꦏ꧀ꦝꦠꦼꦁꦲꦶꦁꦥꦏꦼꦧꦺꦴꦤ꧀ꦤꦤ꧀ꦱꦮꦶꦁꦏꦶꦁꦔꦶꦁꦏꦫꦠꦺꦴꦤ꧀ꦮꦲꦸ꧉​ꦲꦶꦁꦔꦿꦶꦏꦸꦦꦿꦧꦸ Tristan ꦭꦸꦩꦸꦩ꧀ꦥꦠ꧀ꦲꦶꦁꦥꦒꦼꦂꦏꦗꦼꦁꦲꦶꦁꦏꦁꦭꦚ꧀ꦕꦶꦥ꧀ꦭꦚ꧀ꦕꦶꦥ꧀ꦥꦸꦕꦸꦏ꧀ꦏꦶꦥꦸꦤ꧀ꦥꦸꦤꦶꦏ꧉​ꦱꦢꦸꦩꦸꦒꦶꦤꦶꦥꦸꦤ꧀ꦲꦶꦁꦱꦔꦤ꧀ꦝꦥ꧀ꦥꦶꦥꦸꦤ꧀ꦏꦗꦼꦁꦲꦒꦼꦁꦮꦲꦸ꧈​ꦠꦠꦭ꧀ꦧꦼꦧꦼꦏ꧀ꦠꦤ꧀ꦤꦶꦥꦸꦤ꧀ꦱꦏꦶꦁꦒꦿꦶꦪꦥꦺꦴꦤ꧀ꦝꦺꦴꦏ꧀ꦏꦤ꧀ꦤꦶꦥꦸꦤ꧀ꦠꦸꦩꦸꦤ꧀ꦠꦼꦤ꧀ꦏꦏꦺꦤ꧀ꦠꦶꦂꦫꦏꦼꦤ꧀ꦲꦶꦁꦠꦭꦒ꧈​ꦏꦢꦺꦴꦱ꧀ꦲꦠꦸꦂꦫꦶꦥꦸꦤ꧀ Brangien ꦏꦭꦝꦠꦼꦁꦲꦶꦁꦝꦸꦱꦸꦤ꧀ꦲꦩꦁꦒꦶꦃꦲꦶꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀꧉​ꦠꦠꦭ꧀ꦮꦲꦸꦱꦩꦶꦏꦺꦤ꧀ꦠꦶꦂꦝꦠꦼꦁꦲꦶꦁꦏꦫꦠꦺꦴꦤ꧀꧈​ꦠꦼꦫꦸꦱ꧀ꦝꦠꦼꦁꦲꦶꦁꦏꦥꦸꦠꦿꦺꦤ꧀꧉​ꦏꦕꦫꦶꦪꦺꦴꦱ꧀ꦱꦁꦥꦸꦠꦿꦶi Isolde ꦠꦤ꧀ꦱꦃꦲꦔꦗꦼꦁꦲꦗꦼꦁꦝꦠꦼꦁꦔꦶꦁꦠꦠꦭ꧀꧉​ꦲꦤꦸꦗꦸꦲꦶꦁꦮꦚ꧀ꦕꦶꦱꦺꦴꦤ꧀ꦠꦼꦤ꧀꧈​ꦏꦊꦉꦱ꧀ꦱꦤ꧀ꦱꦁꦦꦿꦧꦸꦠꦼꦝꦏ꧀ꦲꦥꦼꦥꦫꦱꦮꦠꦮꦶꦱ꧀ꦢꦶꦤ꧀ꦠꦼꦤ꧀ꦭꦩꦶꦤꦶꦥꦸꦤ꧀꧈​ꦏꦝꦺꦫꦺꦏ꧀ꦏꦏꦼꦤ꧀ꦥꦫꦧꦫꦺꦴꦤ꧀꧉​ꦯꦁꦥꦸꦠꦿꦶꦤꦸꦤ꧀ꦠꦼꦤ꧀ꦩꦁꦒꦶꦃꦲꦶꦦꦿꦧꦸ Tristan ꦲꦶꦁꦏꦁꦲꦔꦼꦤ꧀ꦠꦺꦴꦱ꧀ꦱꦶꦲꦶꦁꦱꦔꦤ꧀ꦝꦥ꧀ꦥꦶꦁꦏꦗꦼꦁꦲꦒꦼꦁꦮꦲꦸ꧉​ꦠꦶꦤ꧀ꦢꦏ꧀ꦢꦶꦥꦸꦤ꧀ꦝꦼꦝꦼꦩ꧀ꦩꦶꦠ꧀ꦠꦤ꧀ꦱꦲꦱꦩꦂꦲꦩꦂꦒꦶꦠꦤ꧀ꦱꦃꦲꦩꦿꦶꦏ꧀ꦱꦤꦶꦏꦶꦮꦠꦼꦔꦼꦤ꧀ꦧꦺꦴꦏ꧀ꦩꦤꦮꦮꦺꦴꦤ꧀ꦠꦼꦤ꧀ꦲꦶꦁꦏꦁꦲꦔꦶꦤ꧀ꦠꦶꦥ꧀ꦲꦶꦁꦱꦫꦶꦫꦤꦶꦥꦸꦤ꧀꧉​ꦱꦉꦁꦦꦿꦧꦸ Tristan ꦤꦶꦔꦭ꧀ꦭꦶꦯꦁꦥꦸꦠꦿꦶꦫꦮꦸꦃꦲꦺꦁꦒꦭ꧀ꦢꦶꦥꦸꦤ꧀ꦥꦥꦒ꧀ꦒꦏꦼꦤ꧀ꦱꦂꦠꦢꦶꦥꦸꦤ꧀ꦫꦁꦏꦸꦭ꧀꧉​ꦲꦶꦁꦮꦚ꧀ꦕꦶꦥꦗꦂꦲꦺꦚ꧀ꦗꦶꦁꦯꦁꦥꦸꦠꦿꦶꦔꦤ꧀ꦢꦶꦏ꧇​ꦝꦸꦃ꧈​ Tristan ꦥꦸꦤꦥꦥꦫꦠꦸꦏꦁꦧꦲꦶꦠꦲꦶꦁꦱꦒꦤ꧀ꦠꦼꦤ꧀ꦧꦺꦴꦠꦼꦤ꧀ꦱꦩꦶꦲꦤ꧀ꦢꦺꦴꦔꦺꦁꦧꦶꦭꦶꦃꦏꦿꦠꦺꦴꦤ꧀ Tintagel ꦥꦸꦤꦶꦏꦏꦿꦠꦺꦴꦤ꧀ꦱꦸꦭꦥ꧀ꦥꦤ꧀ꦲꦸꦠꦮꦶꦕꦶꦥ꧀ꦠꦤ꧀꧉​ꦱꦂꦠꦲꦶꦁꦱꦊꦧꦼꦠ꧀ꦠꦶꦥꦸꦤ꧀ꦱꦠꦲꦸꦤ꧀ꦔꦤ꧀ꦠꦺꦴꦱ꧀ꦏꦥꦶꦁꦏꦭꦶꦃꦲꦩꦸꦱ꧀ꦤ꧈​ꦲꦶꦁꦒꦶꦃꦥꦸꦤꦶꦏꦲꦶꦁꦱꦊꦧꦼꦠ꧀ꦠꦶꦥꦸꦤ꧀ꦩꦺꦴꦁꦱꦲꦱꦽꦥ꧀ꦱꦥꦶꦱ꧀ꦱꦤ꧀꧈​ꦭꦤ꧀ꦏꦥꦶꦁꦏꦭꦶꦃꦲꦶꦥꦸꦤ꧀ꦲꦶꦁꦱꦊꦧꦼꦠ꧀ꦠꦶꦥꦸꦤ꧀ꦩꦺꦴꦁꦱꦧꦼꦤ꧀ꦠꦺꦂ꧉​ꦱꦊꦉꦱ꧀ꦱꦶꦥꦸꦤ꧀ꦲꦶꦁꦒꦶꦃꦱꦥꦸꦤꦶꦏꦥꦸꦤꦶꦏꦏꦫꦠꦺꦴꦤ꧀ꦮꦲꦸꦩꦸꦱ꧀ꦤ꧉​ꦥꦸꦤꦥꦥꦫꦠꦸꦏꦁꦕ꧀ꦭꦼꦩ꧀ꦥꦸꦁꦧꦺꦴꦠꦼꦤ꧀ꦚꦫꦶꦪꦺꦴꦱ꧀ꦱꦏꦼꦤ꧀ꦧꦶꦭꦶꦃꦏꦼꦧꦺꦴꦤ꧀ꦤꦤ꧀ꦥꦸꦤꦶꦏꦏꦼꦧꦺꦴꦤ꧀ꦤꦤ꧀ꦲꦶꦁꦏꦁꦲꦺꦭꦺꦴꦏ꧀꧉​ꦲꦶꦁꦏꦁꦏꦶꦤꦸꦧꦼꦁꦔꦤ꧀ꦲꦶꦁꦥꦒꦼꦂꦲꦮ꧉​ꦮꦶꦠ꧀ꦮꦶꦠ꧀ꦠꦤ꧀ꦤꦶꦥꦸꦤ꧀ꦱꦩꦶꦲꦱꦼꦏꦂꦱꦲꦺꦱꦲꦺꦠꦶꦤꦶꦔꦭ꧀ꦭꦤ꧀꧈​ꦱꦶꦠꦶꦤꦶꦥꦸꦤ꧀ꦲꦁꦒꦺꦴꦤ꧀ꦢꦮꦔꦶ꧉​ꦲꦶꦁꦱꦊꦧꦼꦠ꧀ꦠꦶꦁꦏꦼꦧꦺꦴꦤ꧀ꦤꦤ꧀ꦮꦲꦸꦮꦺꦴꦤ꧀ꦠꦼꦤ꧀ꦱꦠꦿꦶꦪꦏꦼꦤ꧀ꦢꦼꦭ꧀ꦱꦔꦼꦠ꧀ꦱꦮꦼꦒ꧀ꦱꦶꦃꦱꦶꦤꦶꦱꦶꦃꦲꦤ꧀ꦏꦭꦶꦪꦤ꧀ꦲꦶꦁꦏꦁꦱꦏꦭꦁꦏꦸꦁꦢꦶꦥꦸꦤ꧀ꦠꦽꦱ꧀ꦤꦤꦶ꧉​ꦱꦠꦿꦶꦪꦮꦲꦸꦧꦺꦴꦠꦼꦤ꧀ꦱꦼꦥꦸꦃꦱꦼꦥꦸꦃ꧈​ꦱꦭꦩꦶꦤꦶꦥꦸꦤ꧀ꦲꦼꦤꦺꦩ꧀ꦏꦺꦩꦮꦺꦴꦤ꧀꧈​ꦱꦂꦠꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦩꦼꦁꦱꦃꦲꦶꦁꦏꦁꦱꦒꦼꦤ꧀ꦲꦔꦿꦶꦱꦏ꧀ꦠꦺꦩ꧀ꦧꦺꦴꦏ꧀ꦲꦮꦮꦲꦸ꧉​ ꧋ꦏꦭꦱꦩꦤ꧀ꦠꦼꦤ꧀ꦥꦿꦗꦸꦫꦶꦠ꧀ꦲꦶꦁꦲꦁꦱꦩꦶꦲꦚ꧀ꦗꦒꦶꦏꦫꦠꦺꦴꦤ꧀ꦱꦩ꧀ꦥꦸꦤ꧀ꦱꦩꦶꦲꦔꦸꦔꦼꦭ꧀ꦭꦏꦼꦤ꧀ꦠꦫꦺꦴꦩ꧀ꦥꦺꦠ꧀ꦠꦶꦥꦸꦤ꧀꧈​ꦩꦿꦠꦤ꧀ꦝꦤ꧀ꦤꦶꦧꦶꦭꦶꦃꦱꦩ꧀ꦥꦸꦤ꧀ꦩꦺꦃꦫꦲꦶꦤ꧉​ ꧋ꦦꦿꦧꦸ Tristan ꦲꦩꦁꦱꦸꦭ꧀ꦭꦶꦥꦔꦤ꧀ꦢꦶꦏꦤ꧀ꦤꦶꦥꦸꦤ꧀ꦱꦁꦥꦸꦠꦿꦶ꧇​ꦠꦺꦩ꧀ꦧꦺꦴꦏ꧀ꦲꦮꦥꦸꦤꦶꦏꦱꦩ꧀ꦥꦸꦤ꧀ꦫꦶꦱꦏ꧀꧉​ꦏꦼꦧꦺꦴꦤ꧀ꦤꦤ꧀ꦥꦸꦤꦶꦏꦢꦺꦢꦺꦏꦼꦧꦺꦴꦤ꧀ꦤꦤ꧀ꦲꦶꦁꦏꦁꦲꦺꦭꦺꦴꦏ꧀꧉​ꦤꦔꦶꦁꦲꦶꦁꦠꦼꦩ꧀ꦧꦺ꧈​ꦱꦝꦺꦫꦺꦏ꧀꧈​ꦏꦶꦠꦧꦝꦺꦱꦩꦶꦝꦠꦼꦁꦲꦶꦁꦤꦒꦫꦶꦤꦶꦥꦸꦤ꧀ꦠꦶꦪꦁꦲꦶꦁꦏꦁꦒꦼꦱꦁꦔꦶꦥꦸꦤ꧀ꦩꦸꦏ꧀ꦠꦶꦮꦶꦧꦮꦱꦔꦼꦠ꧀꧉​ꦠꦶꦠꦶꦪꦁꦲꦶꦁꦏꦁꦱꦩ꧀ꦥꦸꦤ꧀ꦢꦸꦩꦸꦒꦶꦲꦶꦁꦔꦿꦶꦏꦸꦧꦺꦴꦠꦼꦤ꧀ꦧꦝꦺꦮꦁꦱꦸꦭ꧀ꦩꦭꦶꦃ꧉​ꦲꦶꦁꦔꦿꦶꦏꦸꦮꦺꦴꦤ꧀ꦠꦼꦤ꧀ꦏꦫꦠꦺꦴꦤ꧀ꦱꦏꦶꦁꦩꦂꦩꦼꦂ꧈​ꦮꦂꦤꦶꦤꦶꦥꦸꦤ꧀ꦥꦼꦛꦏ꧀ꦱꦔꦼꦠ꧀꧉​ꦗꦤ꧀ꦝꦺꦭꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦱꦠꦸꦱ꧀꧉​ꦱꦢꦪꦗꦤ꧀ꦝꦺꦭꦮꦺꦴꦤ꧀ꦠꦼꦤ꧀ꦭꦶꦭꦶꦤ꧀ꦤꦶꦥꦸꦤ꧀ꦚꦠꦸꦁꦒꦶꦭ꧀ꦲꦶꦁꦏꦁꦱꦩꦶꦩꦸꦫꦸꦧ꧀꧈​ꦱꦂꦠꦮꦺꦴꦤ꧀ꦠꦼꦤ꧀ꦠꦶꦪꦁꦠꦼꦠꦼꦩ꧀ꦧꦁꦔꦤ꧀*ꦲꦶꦁꦏꦁꦭꦒꦸꦤꦶꦥꦸꦤ꧀ꦧꦺꦴꦠꦼꦤ꧀ꦥꦼꦝꦺꦴꦠ꧀ꦥꦼꦝꦺꦴꦠ꧀꧉​ꦲꦶꦁꦤꦒꦫꦶꦮꦲꦸꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦱꦸꦂꦪ꧈​ꦤꦔꦶꦁꦠꦤ꧀ꦱꦃꦥꦝꦁ꧉​ꦱꦪꦼꦏ꧀ꦠꦺꦴꦱ꧀ꦱꦶꦥꦸꦤ꧀ꦲꦶꦁꦒꦶꦃꦤꦒꦫꦶꦥꦸꦤꦶꦏꦤꦒꦫꦶꦤꦶꦥꦸꦤ꧀ꦠꦶꦪꦁꦲꦶꦁꦏꦁꦒꦼꦱꦁꦔꦶꦥꦸꦤ꧀ꦩꦸꦭꦾꦱꦔꦼꦠ꧀꧉​ꦏꦭꦱꦩꦤ꧀ꦠꦼꦤ꧀ꦥꦸꦚ꧀ꦕꦏ꧀ꦥꦸꦚ꧀ꦕꦏ꧀ꦏꦶꦥꦸꦤ꧀ꦩꦤꦫꦤꦶꦁꦏꦫꦠꦺꦴꦤ꧀ꦱꦩ꧀ꦥꦸꦤ꧀ꦏꦱꦸꦤꦂꦫꦤ꧀ꦲꦶꦁꦱꦸꦂꦪ꧈​ꦲꦶꦁꦏꦁꦲꦩꦝꦁꦔꦶꦱꦺꦭꦱꦺꦭꦥꦱꦒꦶꦱꦏꦮꦤ꧀꧈​ꦮꦂꦤꦶꦤꦶꦥꦸꦤ꧀ꦲꦶꦗꦼꦩ꧀ꦭꦤ꧀ꦧꦶꦫꦸ꧉​ ꧋ꦏꦕꦫꦶꦪꦺꦴꦱ꧀꧈​ꦯꦁꦥꦿꦩꦺꦱ꧀ꦮꦫꦶꦧꦶꦔꦃꦩꦭꦶꦃꦥꦁꦒꦭꦶꦃꦲꦶꦥꦸꦤ꧀꧈​ꦩꦏꦠꦼꦤ꧀ꦲꦸꦒꦶꦯꦁꦤꦠꦲꦶꦁꦒꦶꦃꦧꦺꦴꦠꦼꦤ꧀ꦲꦁꦒꦭꦶꦃꦲꦮꦺꦴꦤ꧀ꦩꦭꦶꦃꦝꦠꦼꦁꦱꦫꦶꦫꦤꦶꦥꦸꦤ꧀꧉​ꦤꦔꦶꦁꦥꦫꦧꦫꦺꦴꦤ꧀ꦲꦶꦁꦏꦁꦱꦩꦶꦲꦮꦺꦴꦤ꧀ꦩꦤꦃꦲꦶꦥꦸꦤ꧀ꦮꦲꦸꦩꦔꦽꦠꦺꦴꦱ꧀ꦧꦶꦭꦶꦃꦦꦿꦧꦸ Tristan ꦭꦤ꧀ꦱꦁꦥꦸꦠꦿꦶꦱꦩ꧀ꦥꦸꦤ꧀ꦥꦼꦥꦁꦒꦶꦃꦲꦤ꧀ꦩꦭꦶꦃ꧈​ꦥꦿꦩꦶꦭꦯꦁꦥꦸꦠꦿꦶꦏꦠꦶꦔꦭ꧀ꦧꦺꦫꦒ꧀ꦱꦔꦼꦠ꧀꧉​ꦥꦿꦩꦶꦭꦧꦫꦺꦴꦤ꧀ꦱꦏꦮꦤ꧀ꦭꦗꦼꦁꦔꦶꦤ꧀ꦠꦶꦥ꧀ꦲꦶꦤ꧀ꦠꦶꦥ꧀ꦱꦁꦥꦸꦠꦿꦶ꧈​ꦤꦔꦶꦁꦠꦤ꧀ꦥꦢꦩꦼꦭ꧀꧈​ꦗꦭꦂꦫꦤ꧀ Brangien ꦠꦤ꧀ꦱꦃꦲꦚ꧀ꦗꦒꦶꦭꦭꦩ꧀ꦥꦃꦲꦤ꧀ꦤꦶꦁꦧꦼꦤ꧀ꦢꦫꦤꦶꦥꦸꦤ꧀ꦱꦸꦥꦢꦺꦴꦱ꧀ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦏꦱꦸꦩꦼꦉꦥ꧀ꦥꦤ꧀ꦲꦶꦁꦠꦶꦪꦁ꧉​ꦲꦤꦸꦗꦸꦱꦠꦸꦁꦒꦶꦭ꧀ꦭꦶꦁꦢꦶꦤ꧀ꦠꦼꦤ꧀ꦲꦺꦂꦠꦺꦴꦃ Andret ꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀ꦝꦠꦼꦁꦥꦫꦧꦫꦺꦴꦤ꧀ꦲꦶꦁꦏꦁꦱꦲꦺꦏꦥꦿꦪꦏꦭꦶꦪꦤ꧀ꦥꦶꦪꦩ꧀ꦧꦏ꧀ꦏꦶꦥꦸꦤ꧀꧇​ꦝꦸꦃ꧈​ꦱꦠꦿꦶꦪ꧈​ꦱꦸꦩꦺꦴꦁꦒꦱꦩꦶꦥꦶꦠꦏꦺꦤ꧀ꦝꦠꦼꦁ Frocin꧈​ꦠꦶꦪꦁꦧꦸꦕꦸꦲꦶꦁꦏꦁꦩꦔꦼꦂꦠꦺꦴꦱ꧀ꦝꦠꦼꦁꦔꦺꦭ꧀ꦩꦸꦥꦭꦶꦤ꧀ꦠꦁꦔꦤ꧀ꦠꦸꦮꦶꦤ꧀ꦱꦸꦭꦥ꧀ꦥꦤ꧀꧈​ꦥꦿꦏꦮꦶꦱ꧀ꦱꦶꦥꦸꦤ꧀ꦱꦁꦥꦸꦠꦿꦶ Isolde ꦠꦸꦮꦶꦤ꧀ Tristan ꦥꦸꦤꦶꦏ꧉​ꦩꦤꦮꦶꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦥꦸꦫꦸꦤ꧀꧈​ꦏꦸꦭꦭꦤ꧀ꦱꦩ꧀ꦥꦺꦪꦤ꧀ꦱꦩꦶꦧꦝꦺꦱꦸꦩꦼꦉꦥ꧀ꦏꦢꦺꦴꦱ꧀ꦥꦸꦤ꧀ꦢꦶꦲꦏꦭ꧀ꦭꦶꦥꦸꦤ꧀ Isolde ꦢꦺꦤꦺꦔꦤ꧀ꦠꦺꦴꦱ꧀ꦧꦺꦴꦠꦼꦤ꧀ꦱꦒꦼꦢ꧀ꦏꦱꦸꦩꦼꦉꦥ꧀ꦥꦤ꧀ꦲꦶꦁꦠꦶꦪꦁꦱꦤꦺꦱ꧀ꦭꦭꦩ꧀ꦥꦃꦲꦤ꧀ꦤꦶꦥꦸꦤ꧀꧉​ꦗꦭꦂꦫꦤ꧀ꦩꦤꦮꦶꦮꦺꦴꦤ꧀ꦠꦼꦤ꧀ꦭꦫꦺꦤꦼꦩ꧀ꦧꦺꦭꦲꦶꦂ꧈​ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦱꦒꦼꦢ꧀ꦲꦤꦼꦩ꧀ꦠꦺꦴꦑꦏꦼꦤ꧀ꦏꦢꦺꦴꦱ꧀ꦥꦸꦤ꧀ꦢꦶꦧꦝꦺꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦒꦼꦱꦁꦔꦶꦥꦸꦤ꧀ꦲꦶꦁꦠꦼꦩ꧀ꦧꦺꦮꦶꦁꦏꦶꦁ꧈​ꦲꦶꦁꦒꦶꦃꦥꦸꦤꦶꦏꦱꦫꦤꦤꦶꦔꦭ꧀ꦭꦶꦭꦩ꧀ꦥꦃꦲꦶꦥꦸꦤ꧀ꦭꦶꦤ꧀ꦠꦁꦭꦶꦤ꧀ꦠꦁ꧉​ ꧋ꦏꦕꦫꦶꦪꦺꦴꦱ꧀ꦥꦫꦧꦫꦺꦴꦤ꧀ꦮꦲꦸꦭꦗꦼꦁꦱꦩꦶꦩꦁꦒꦶꦃꦲꦶꦠꦶꦪꦁꦧꦸꦕꦸ꧉​ꦲꦶꦁꦱꦫꦺꦃꦤꦺꦠꦶꦪꦁꦧꦸꦕꦸꦮꦲꦸꦲꦸꦒꦶꦒꦼꦛꦶꦁꦝꦠꦼꦁꦠꦶꦪꦁꦲꦶꦁꦏꦁꦥꦶꦤꦸꦚ꧀ꦗꦸꦭ꧀ꦲꦶꦁꦮꦂꦤꦶ꧈​ꦱꦲꦝꦠꦼꦁꦠꦶꦪꦁꦲꦶꦁꦏꦁꦧꦺꦂꦲꦶꦁꦏꦮꦤꦺꦤ꧀꧈​ꦏꦢꦺꦴꦱ꧀ꦱꦁꦥꦸꦠꦿꦶ Isolde ꦠꦸꦮꦶꦤ꧀ ꦦꦿꦧꦸ Tristan꧈​ꦩꦶꦭꦲꦶꦁꦒꦶꦃꦭꦗꦼꦁꦲꦔꦼꦢꦭ꧀ꦭꦏꦼꦤ꧀ꦥꦶꦫꦤ꧀ꦠꦺꦴꦱ꧀ꦱꦏꦶꦁꦥꦤꦸꦗꦸꦩ꧀ꦩꦤ꧀ꦤꦶꦥꦸꦤ꧀꧈​ꦠꦸꦩꦸꦤ꧀ꦠꦼꦤ꧀ꦲꦤ꧀ꦢꦺꦴꦔꦱꦲꦲꦤꦶꦔꦭ꧀ꦭꦶꦭꦩ꧀ꦥꦃꦲꦶꦥꦸꦤ꧀ꦭꦶꦤ꧀ꦠꦁꦭꦸꦏꦸ꧈​ꦠꦸꦮꦶꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉​ꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀꧇​ꦝꦸꦃ꧈​ꦥꦫꦱꦠꦿꦶꦪ꧈​ꦩꦸꦒꦶꦱꦩ꧀ꦥꦸꦤ꧀ꦏꦸꦮꦠꦺꦴꦱ꧀꧉​ꦩꦁꦏꦺꦢꦭꦸꦏꦺꦩꦮꦺꦴꦤ꧀ꦱꦩ꧀ꦥꦺꦪꦤ꧀ꦱꦩꦶꦧꦝꦺꦱꦒꦼꦢ꧀ꦚꦼꦥꦼꦁꦠꦶꦪꦁꦏꦼꦏꦭꦶꦃꦥꦸꦤꦶꦏ꧉​ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦫꦩ꧀ꦥꦸꦁꦲꦁꦒꦺꦤ꧀ꦤꦶꦥꦸꦤ꧀ꦤꦶꦔꦭ꧀ꦭꦶꦥꦤꦸꦗꦸꦩ꧀ꦩꦤ꧀ꦤꦶꦥꦸꦤ꧀ꦠꦶꦪꦁꦧꦸꦕꦸꦥꦸꦤꦶꦏꦭꦗꦼꦁꦏꦧꦼꦏ꧀ꦠꦱꦺꦴꦮꦤ꧀ꦲꦶꦁꦔꦂꦱꦤꦶꦥꦸꦤ꧀ꦱꦁꦤꦠ꧉​ꦠꦸꦏꦁꦱꦸꦭꦥ꧀ꦭꦗꦼꦁꦩꦠꦸꦂ꧇​ꦓꦸꦱ꧀ꦡꦶ꧈​ꦩꦸꦒꦶꦥꦢꦸꦏꦏꦂꦱꦥꦫꦶꦁꦝꦮꦸꦃꦝꦠꦼꦁꦥꦫꦒꦼꦂꦩꦱꦸꦥꦢꦺꦴꦱ꧀ꦱꦩꦶꦲꦚꦮꦶꦪꦑꦏꦼꦤ꧀ꦏꦥꦭ꧀ꦠꦸꦮꦶꦤ꧀ꦱꦒꦮꦺꦴꦤ꧀ꦤꦶꦥꦸꦤ꧀꧈​ꦱꦲꦥꦫꦶꦁꦝꦮꦸꦃꦝꦠꦼꦁꦥꦫꦲꦧ꧀ꦢꦶꦢꦊꦩ꧀ꦱꦢꦪ꧈​ꦧꦶꦭꦶꦃꦥꦢꦸꦏꦧꦝꦺꦏꦂꦱꦠꦶꦤ꧀ꦢꦏ꧀ꦲꦩ꧀ꦧꦼꦧꦼꦢꦭ꧀ꦝꦠꦼꦁꦲꦶꦁꦮꦤꦥꦶꦠꦸꦁꦢꦶꦤ꧀ꦠꦼꦤ꧀ꦥꦶꦠꦸꦁꦢꦭꦸꦭꦩꦶꦤꦶꦥꦸꦤ꧀꧉​ꦲꦶꦁꦢꦭꦸꦥꦸꦤꦶꦏꦥꦢꦸꦏꦧꦝꦺꦱꦒꦼꦢ꧀ꦲꦔꦸꦤꦶꦁꦔꦤꦶꦥꦶꦪꦩ꧀ꦧꦏ꧀꧈​ꦥꦶꦠꦼꦥꦁꦔꦶꦥꦸꦤ꧀ Tristan ꦏꦭꦶꦪꦤ꧀ꦱꦁꦦꦿꦩꦺꦱ꧀ꦮꦫꦶ꧉​ꦩꦤꦮꦶꦲꦠꦸꦂꦏꦮꦸꦭꦥꦸꦤꦶꦏꦢꦺꦴꦫ꧈​ꦩꦸꦫꦶꦏꦂꦱꦲꦩꦠꦿꦥ꧀ꦥꦶꦲꦸꦏꦸꦩ꧀ꦩꦤ꧀ꦥꦼꦗꦃꦝꦠꦼꦁꦗꦱꦢ꧀ꦏꦮꦸꦭ꧈​ꦯꦁꦤꦠꦲꦶꦁꦒꦶꦃꦭꦗꦼꦁꦲꦔ꧀ꦭꦼꦏ꧀ꦱꦤꦤꦶꦱꦢꦪꦲꦠꦸꦂꦫꦶꦥꦸꦤ꧀ꦠꦶꦪꦁꦧꦸꦕꦸꦮꦲꦸ꧉​ꦲꦶꦁꦮꦚ꧀ꦕꦶꦱꦺꦴꦤ꧀ꦠꦼꦤ꧀ꦥꦫꦒꦼꦂꦩꦏꦠꦶꦭꦂꦮꦺꦴꦤ꧀ꦠꦼꦤ꧀ꦲꦶꦁꦮꦤ꧈​ꦯꦁꦤꦠꦏꦭꦶꦪꦤ꧀ꦠꦶꦪꦁꦧꦸꦕꦸꦮꦁꦱꦸꦭ꧀ꦝꦠꦼꦁꦲꦶꦁꦏꦫꦠꦺꦴꦤ꧀ꦲꦤꦶꦠꦶꦃꦠꦶꦠꦶꦃꦲꦤ꧀꧈​ꦩꦼꦢꦭ꧀ꦲꦶꦁꦩꦂꦒꦶꦲꦶꦁꦏꦁꦤꦩꦸꦁꦏꦲꦸꦤꦶꦁꦔꦤ꧀ꦲꦶꦁꦱꦁꦤꦠꦥꦶꦪꦩ꧀ꦧꦏ꧀꧈​ꦲꦚ꧀ꦗꦸꦗꦸꦒ꧀ꦲꦶꦁꦥꦠꦩꦤ꧀ꦤꦤ꧀ꦲꦶꦁꦱꦔꦤ꧀ꦝꦥ꧀ꦥꦶꦁꦏꦗꦼꦁꦲꦒꦼꦁꦲꦶꦁꦏꦁꦏꦱꦼꦧꦸꦠ꧀ꦲꦶꦁꦔꦶꦁꦒꦶꦭ꧀꧉​ ꧋(ꦧꦝꦺꦏꦱꦩ꧀ꦧꦼꦠꦤ꧀)	FEUILLETON Lêlampahanipun Prabu Tristan lan Putri Isolde. 12 Kacariyos, Sang Prabu Marc tansah botên sagêd supe dhatêng aturipun para baron ingkang adamêl sêkêling galihipun punika. Sajak botên panuju kalihan panggalihipun, ewadene sang nata lajêng angêngintip lêlampahanipun Prabu Tristan tuwin sang pramèswari. Rahayunipun Brangien enggal mangêrtos dhatêng karsanipun sang nata. Saking rekadayanipun Brangien sang nata ngantos botên sagêd anguningani dhatêng lêlampahanipun Prabu Tristan kalihan sang pramèswari kados ingkang kaaturakên dening baron sakawan wau. Wusana sang nata anggalih, bilih lêlampahan ingkang makatên punika nistha sangêt, tur panjênênganipun botên sagêd anyirnakakên pandakwa awon dhatêng Prabu Tristan. Prabu Tristan lajêng dipun timbali. Pangandikanipun: Tristan sira kudu lunga saka ing karaton iki, sarta aja wani-wani bali manèh. Wong-wong kang ala atine padha andakwa marang sira yèn sira anglakoni panggawe ala, nanging ingsun ora karsa tutur pandakwa apa kang diaturake ing panjênênganingsun, awit manawi ingsun caritakake mêsthi gawe wirangingsun lan sira. Aja sira nyoba anglêrêpake sêkêling panggalih ingsun sarana têmbung manuara, awit bakal tanpa guna. Ewadene ingsun ora pracaya marang aturing wong-wong mau, saupama ingsun pracayaa sira wis mêsthi ingsun patrapi ukuman pati. Ananging ature kang anatoni panggalih ingsun iku anjalari sêkêling panggalih ingsun, bisane lêjar panggalih ingsun iku mung manawi sira lunga saka ing karaton iki. Wis budhala, gèr, wruhanamu ingsun isih trêsna marang sira. Bokmanawa ing têmbe sira ingsun timbali manèh. Sasampunipun nampi dhawuhipun sang nata ingkang makatên punika, Prabu Tristan inggih lajêng mangkat anilar karatonipun ingkang rama paman. Sarêng baron sakawan mirêng pawartos kesahipun Tristan saking karaton, tumuntên sami wicantên makatên: tukang sulap iku saiki wis lunga saka ing karaton, lungane ditundhung ing sang nata kayadene anundhung maling, kapriye banjuring lêlakone. Bokmanawa bakal mênyang ing tanah sabrang, suwita marang ratu kang nagarane adoh saka ing kene. Kacariyos sasampunipun anilar karaton, Prabu Tristan botên kadugi anglajêngakên lampahipun, sarta kèndêl ing dhusun Tintagel mondhok ing griyanipun tiyang dhusun ngriku kadhèrèkakên dening sang Gorneval. Sarêng wontên ing ngriku Prabu Tristan gêrah bêntèr. Saking sangêting gêrahipun, ngantos angungkuli nalika nandhang tatu kenging dêdamêlipun sang Morhout rumiyin, kala panjênênganipun gêrah sangêt atêtirah ing sapinggiring sagantên, sanajan sariranipun anggănda arus, taksih wontên têtiyang ingkang purun anyêlaki ing sariranipun, inggih punika: Sang Gorneval, baron Dinas ing Lidan tuwin Sang Prabu Marc. Nanging sapunika ingkang purun nyêlaki namung sang Gorneval kalihan baron Dinas ing Lidan kemawon. Prabu Tristan sêsambat: Dhuh, rama prabu sapunika sakit kawula langkung sangêt tinimbang kala rumiyin. Sangêting panggalih paduka sapunika anglangkungi katrêsnan paduka dhatêng ing jasad kawula. Pinuju gêrahipun ambêntèri, Prabu Tristan rumaos nitih titihan angênêr karaton, kêpengin manggihi sang pramèswari, titihanipun anrajang pagêr temboking karaton ngantos dhawah, Prabu Tristan ugi katut dhawah, nanging lajêng pangkat malih saha nyandêrakên titihanipun. Ing salêbêting karaton, Sang Putri Isolde ugi anandhang gêrah wuyung saha rumaos kapêncil. Ing sadintên-dintênipun kêdah api-api bingah, makatên ugi manawi pinuju piyambakan kalihan sang nata. Sang putri karsa lolos angupadosi Prabu Tristan. Ing wanci dalu supêna: rumaosipun sang putri kados sampun wungu saking pasareyanipun saha kados sampun tindak dhatêng ing korining kamar, nanging ing têngah kori ginantungan dêdamêl landhêp sangêt, dening têtiyang awon anatoni jêjêngkunipun sang pramèswari. Rumaosipun sang putri tatunipun mêdal rahipun kathah sangêt. Saèstunipun upami botên wontên tiyang ingkang atêtulung dhatêng băngsa luhur kêkalih ingkang sawêg nandhang gêrah bêntèr saha ingkang sami nandhang wuyung wau tamtu sagêd dados tiwas. Dene ingkang atêtulung punika botên sanès kajawi pun Brangien. Sarana dhêdhêmitan, Brangien sagêd mêdal saking ing karaton, lajêng dhatêng ing griya pondhokanipun Prabu Tristan. Sang Gorneval ambikak kori kanthi bingahing manah. Brangien nuntên angaturi rekadaya dhatêng Prabu Tristan amurih sagêdipun pêpanggihan kalihan sang pramèswari. Ing sawingkinging karaton Tintagel wontên pakêbonan wiyar pinagêran ing kajêng lêlonjoran kiyat sangêt. Kêbonan wau katanêman kêkajêngan tuwin woh-wohan warni-warni, sami awoh ambiyêk angêmohi. Sêkaring wit-witan sami marbuk wangi gandanipun. Swaraning pêksi pating caruwèt kados tatanipun tiyang ingkang nêmbe sukan-sukan. Inggih sapinggiring kêbon ing sacêlaking pagêr kajêng lêlonjoran wau, panggenan ingkang têbih piyambak dunungipun saking ing karaton, sarta wontên kajêngipun agêng saha inggil sangêt, sauwit, bangsanipun kajêng cêmara, dêlêgipun agêng sarta kiyat, pangipun kathah. Ing sangandhapipun kajêng wau wontên talaganipun, toyanipun bêning sangêt. Pinggir talaga tinembok ing marmêr mubêng, toyanipun kailèkakên dhatêng ing salêbêting karaton, anjog ing kaputrèn, anglangkungi pakêbonan wau. Kacariyos, sabên sontên Prabu Tristan adamêl tatal alit-alit, sasampunipun pikantuk kathah lajêng tindak dhatêng ing pakêbonan sawingkinging karaton wau. Ing ngriku Prabu Tristan lumumpat ing pagêr kajêng ingkang lancip-lancip pucukipun punika. Sadumuginipun ing sangandhapipun kajêng agêng wau, tatal bêbêktanipun saking griya pondhokanipun tumuntên kakentirakên ing talaga, kados aturipun Brangien kala dhatêng ing dhusun amanggihi panjênênganipun. Tatal wau sami kentir dhatêng ing karaton, têrus dhatêng ing kaputrèn. Kacariyos Sang Putri Isolde tansah angajêng-ajêng dhatênging tatal. Anuju ing wanci sontên, kalêrêsan sang prabu têdhak apêpara sawatawis dintên laminipun, kadhèrèkakên para baron. Sang putri nuntên manggihi Prabu Tristan ingkang angêntosi ing sangandhaping kajêng agêng wau. Tindakdipun[8] dhêdhêmitan saha samar amargi tansah amriksani kiwa têngên bokmanawa wontên ingkang angintip ing sariranipun. Sarêng Prabu Tristan ningali sang putri rawuh enggal dipun papagakên sarta dipun rangkul. Ing wanci pajar enjing sang putri ngandika: Dhuh, Tristan punapa para tukang baita ing sagantên botên sami andongèng bilih kraton Tintagel punika kraton sulapan utawi ciptan. Sarta ing salêbêtipun sataun ngantos kaping kalih amusna, inggih punika ing salêbêtipun măngsa asrêp sapisan, lan kaping kalihipun ing salêbêtipun măngsa bêntèr. Salêrêsipun inggih sapunika punika karaton wau musna. Punapa para tukang clêmpung botên nyariyosakên bilih kêbonan punika kêbonan ingkang elok. Ingkang kinubêngan ing pagêr hawa. Wit-witanipun sami asêkar sae-sae tiningalan, sitinipun anggănda wangi. Ing salêbêting kêbonan wau wontên satriya kêndêl sangêt sawêg sih-sinisihan kalihan ingkang sakalangkung dipun trêsnani. Satriya wau botên sêpuh-sêpuh, salaminipun ênèm kemawon, sarta botên wontên mêngsah ingkang sagên[9] angrisak tembok hawa wau. Kala samantên prajurit inghang[10] sami anjagi karaton sampun sami angungêlakên tarompètipun, mratandhani bilih sampun mèh rahina. Prabu Tristan amangsuli pangandikanipun sang putri: Tembok hawa punika sampun risak. Kêbonan punika dede kêbonan ingkang elok. Nanging ing têmbe, sadhèrèk, kita badhe sami dhatêng ing nagarinipun tiyang ingkang gêsangipun mukti wibawa sangêt. Têtiyang ingkang sampun dumugi ing ngriku botên badhe wangsul malih. Ing ngriku wontên karaton saking marmêr, warninipun pêthak sangêt. Jandhelanipun wontên satus. Sadaya jandhela wontên lilinipun nyatunggil ingkang sami murub, sarta wontên tiyang têtêmbangan ingkang lagunipun botên pêdhot-pêdhot. Ing nagari wau botên wontên surya, nanging tansah padhang. Sayêktosipun inggih nagari punika nagarinipun tiyang ingkang gêsangipun mulya sangêt. Kala samantên puncak-puncakipun manaraning karaton sampun kasunaran ing surya, ingkang amadhangi sela-sela pasagi sakawan, warninipun ijêm lan biru. Kacariyos, sang pramèswari bingah malih panggalihipun, makatên ugi sang nata inggih botên anggalih awon malih dhatêng sariranipun. Nanging para baron ingkang sami awon manahipun wau mangrêtos bilih Prabu Tristan lan sang putri sampun pêpanggihan malih, pramila sang putri katingal berag sangêt. Pramila baron sakawan lajêng ngintip-intip sang putri, nanging tanpa damêl, jalaran Brangien tansah anjagi lêlampahaning bêndaranipun supados sampun ngantos kasumêrêpan ing tiyang. Anuju satunggiling dintên Ertoh Andret wicantên makatên dhatêng para baron ingkang saeka-praya kalihan piyambakipun: Dhuh, satriya, sumăngga sami pitakèn dhatêng Frocin, tiyang bucu ingkang mangêrtos dhatêng ngèlmu palintangan tuwin sulapan, prakawisipun Sang Putri Isolde tuwin Tristan punika. Manawi piyambakipun purun, kula lan sampeyan sami badhe sumêrêp kadospundi akalipun Isolde dene ngantos botên sagêd kasumêrêpan ing tiyang sanès lêlampahanipun. Jalaran manawi wontên lare nêmbe lair, piyambakipun sagêd anêmtokakên kadospundi badhe kawontênaning gêsangipun ing têmbe wingking, inggih punika sarana ningali lampahipun lintang-lintang. Kacariyos para baron wau lajêng sami manggihi tiyang bucu. Ing sarèhne tiyang bucu wau ugi gêthing dhatêng tiyang ingkang pinunjul ing warni, saha dhatêng tiyang ingkang bèr ing kawanèn, kados Sang Putri Isolde tuwin Prabu Tristan, mila inggih lajêng angêdalakên pirantos saking panujumanipun, tumuntên andonga saha aningali lampahipun lintang luku, tuwin sanès-sanèsipun. Wicantênipun: Dhuh, para satriya, mugi sampun kuwatos. Mangke dalu kemawon sampeyan sami badhe sagêd nyêpêng tiyang kêkalih punika. Sasampunipun rampung anggènipun ningali panujumanipun tiyang bucu punika lajêng kabêkta sowan ing ngarsanipun sang nata. Tukang sulap lajêng matur: Gusti, mugi paduka karsa paring dhawuh dhatêng para gêrma supados sami anyawiyakakên kapal tuwin sagawonipun, saha paring dhawuh dhatêng para abdi dalêm sadaya, bilih paduka badhe karsa tindak ambêbêdal[11] dhatêng ing wana pitung dintên pitung dalu laminipun. Ing dalu punika paduka badhe sagêd anguningani piyambak, pitêpangipun Tristan kalihan sang pramèswari. Manawi atur kawula punika dora, muri[12] karsaa matrapi ukuman pêjah dhatêng jasad kawula, sang nata inggih lajêng anglêksanani sadaya aturipun tiyang bucu wau. Ing wanci sontên para gêrma katilar wontên ing wana, sang nata kalihan tiyang bucu wangsul dhatêng ing karaton anitih titihan, mêdal ing margi ingkang namung kauningan ing sang nata piyambak, anjujug ing patamanan ing sangandhaping kajêng agêng ingkang kasêbut ing nginggil. (Badhe kasambêtan)

}}

Majalah Kajawen taun 1927

Kajawen 006 1927-02-10 (Index) Kalantipaning Lare Sapihan Kajawèn Paduka Tuwan Prof. Dr. C. SNOUCK HURGRONJE Ama Kopi Wangsul Dhatêng Basanipun Cina. Lêlampahanipun Abunawas Pawartos Warni-Warni saking Ijas Panglipur Manah Ewah-ewahan ing Karajan Turki Rêmbagipun Petruk lan Garèng Kabar warni-warni Sêrat Jayalêngkara Pawartos saking Administrasi	Kajawen 021 1927-05-26 (Index) Pambikakipun Parêpatan Polêksrad Sato Kewan Isining Sagantên Tataprunggu Wawasan Dalêm Kangjêng Tuwan Ingkang Wicaksana Gupêrnur Jendral, Bab Kawontênanipun ing Tanah Sumatrah Sisih Kilèn Panyuwunan Parêpatan Pakêmpalan Sêdyamulya Jagading Wanita Kabar warni-warni Lêlampahanipun Prabu Tristan lan Putri Isolde (2)	Kajawen 026 1927-06-30 (Index) Tiyang Lêlana Madosi Têlênging Panggayuh Lêlampahan Ringgit Tiyang ing Bali Cariyos Aslinipun Nênggala lan Alugora: Miturut cêcariyosan ing Madura. Jagading Sato Kewan: Nyariyosakên Bab Kêthèk. Pantês Sinudarsana Rêmbagipun Petruk lan Garèng: Bab Wisa ing Salêbêting Sata. Kabar Warni-warni Lêlampahanipun Prabu Tristan lan putri Isolde (7)	Kajawen 031 1927-08-04 (Index) Samaking Kajawèn Sedanipun Raja ing Rumèni Padamêlan Utami Punika Kêdah Dipun Ajèni Satunggaling Sudagar Ingkang Mangrêtos Dhatêng Ubat-ubêting Jaman Jagading Sato Kewan: Bab Gajah. Bab Dhuwung Rêmbagipun Petruk lan Garèng: Bab Sata Murugakên Sêsakit Jantung Jagading Wanita: Bab Dayaning Sate tuwin Saoto Madura. Kabar Warni-warni Lêlampahanipun Prabu Tristan lan putri Isolde (12)	Kajawen 034 1927-08-25 (Index) Wawasan Tumrap Sêrat-sêrat Anggitan Dalêm Swargi Kangjêng Gusti Pangeran Adipati Arya Mangkunagara IV Babadipun Tiyang Tani Pribumi Pralambang Jayabaya Bab Dhuwung Pambikakipun Pamulangan Dhoktêr Luhur Rêmbagipun Petruk lan Garèng: Bab Ngingah Gramèh. Jagading Wanita: Kasêtyanipun Wanita Jêpang dhatêng Lakinipun Kabar Warni-warni Lêlampahanipun Prabu Tristan lan Putri Isolde (15)	Kajawen 035 1927-09-01 (Index) Wawasan Tumrap Sêrat-sêrat Anggitan Dalêm Swargi Kangjêng Gusti Pangeran Adipati Arya Mangkunagara IV Pambikakipun Pamulangan Dhoktêr Luhur Bandera Kabangsan Jêpang Babadipun Tiyang Tani Pribumi Kêthoprak ing Ngayogyakarta Ingkang Bupati Enggal ing Batawi Radèn Tumênggung Ahmad Rêmbagipun Petruk lan Garèng: Bab Sata Murugakên Kunthing. Jagading Wanita: Kasêtyanipun Wanita Jêpang. Kabar Warni-warni Lêlampahanipun Prabu Tristan lan Putri Isolde (16)
Kajawen 037 1927-09-15 (Index)	Kajawen 040 1927-10-06 (Index)	Kajawen 041 1927-10-13 (Index)	Kajawen 043 1927-10-27 (Index)	Kajawen 050 1927-12-15 (Index)	Kajawen 052 1927-12-29 (Index)

{{#ifeq:1927|1927|