ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦆꦧꦿꦤꦶ/11

꧋ꦥꦽꦕꦪ​ꦏꦸꦮꦶ​ꦲꦥ​ꦠꦼꦒꦼꦱ꧀ꦱꦺ​?꧉​

꧇​꧑꧑꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦲꦏꦸ​ꦮꦶꦱ꧀ꦔꦺꦴꦩꦺꦴꦁꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦏꦸꦢꦸ​ꦥꦽꦕꦪ​ꦠꦼꦫꦸꦱ꧀ꦩꦫꦁ​ꦒꦸꦱ꧀ꦠꦶ​꧈​ꦱꦼꦤꦗꦤ꧀ꦲꦧꦺꦴꦠ꧀ꦠꦺ​ꦭꦤ꧀ꦲꦔꦺꦭ꧀ꦭꦺ​ꦏꦪ​ꦔꦥ​꧉​ꦭꦃ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦲꦥ​ꦠ​ꦠꦼꦒꦼꦱ꧀ꦱꦺ​?ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦠꦼꦒꦼꦱ꧀ꦱꦺ​ꦩꦔꦼꦂꦠꦺꦤ꧀ꦤꦶꦠꦼꦤꦤ꧀ꦤꦺꦏ꧀ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦱꦶꦁ​ꦢꦶꦲꦉꦥ꧀ꦲꦉꦥ꧀ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦩꦼꦱ꧀ꦠꦶꦧꦏꦭ꧀ꦢꦶꦠꦸꦫꦸꦠ꧀ꦠꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦥꦽꦕꦪ​ꦏꦸꦮꦶ​ꦠꦼꦒꦼꦱ꧀ꦱꦺ​ꦩꦔꦼꦂꦠꦺꦤ꧀ꦤꦶꦤꦺꦏ꧀ꦱꦼꦩ꧀ꦧꦫꦁ​ꦱꦶꦁ​ꦮꦶꦱ꧀ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦤꦺꦏ꧀ꦧꦏꦭ꧀​ꦏ꧀ꦭꦏꦺꦴꦤ꧀ꦪ​ꦧꦏꦭ꧀​ꦏ꧀ꦭꦏꦺꦴꦤ꧀ꦠꦼꦤꦤ꧀ ꦱꦼꦤꦗꦤ꧀ꦩꦿꦶꦥꦠ꧀ꦢꦸꦫꦸꦁ​ꦮꦼꦫꦸꦃ​꧉​ ²ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦗꦭꦂꦫꦤ꧀ꦥꦢ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺꦲꦶꦁ​ꦗꦩꦤ꧀​ꦩ꧀ꦧꦶꦪꦺꦤ꧀ꦏꦼꦠꦩ꧀ꦥꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦥꦢ​ꦤ꧀ꦢꦢꦺꦏ꧀ꦏꦏꦺꦊꦒꦤꦺꦲꦠꦶꦤꦺ​꧉​

³꧋ꦱꦼꦩꦺꦴꦤꦺꦴ​ꦲꦸꦒ​꧈​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦭꦤ꧀ꦢꦼꦥ꧀ꦥꦺꦲꦶꦏꦶ​ꦲꦺꦤꦺꦁꦔꦺꦱꦁꦏꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦢꦶꦤꦺ​ꦱꦼꦩ꧀ꦧꦫꦁ​ꦱꦶꦁ​ꦲꦺꦤꦺꦁꦭꦤ꧀ꦱꦶꦁ​ꦏꦺꦠꦺꦴꦏ꧀ꦩꦿꦶꦥꦠ꧀ꦏꦸꦮꦶ​ꦏꦼꦥꦿꦶꦪꦺ​ꦠꦼꦏꦤꦺ​꧈​ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦢꦸꦤꦸꦁ꧈​ꦤꦩꦸꦁ​ꦔꦼꦂꦠꦶ​ꦤꦺꦏ꧀ꦠꦼꦏꦤꦺ​ꦱꦁꦏꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

⁴꧋ꦥꦫꦱꦼꦢꦸꦭꦸꦂ꧈​ꦏꦁꦒꦺꦴꦤ꧀ꦢꦸꦤꦸꦁꦔꦏꦺꦧꦧ꧀ꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦲꦶꦏꦶꦕꦺꦴꦤ꧀ꦠꦺꦴꦤꦺꦲꦺꦴꦏꦺꦃꦧꦔꦼꦠ꧀꧈​ꦏꦥꦶꦁꦥꦶꦱꦤ꧀ ꦢꦶꦥꦶꦏꦶꦂꦄꦧꦺꦭ꧀꧈​ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃ꧈​ꦢꦺꦏ꧀ꦤꦺꦔꦼꦂꦠꦶꦏꦉꦥ꧀ꦥꦺꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦧꦶꦱꦔ꧀ꦒꦮꦏꦸꦂꦧꦤ꧀ꦱꦶꦁꦢꦶꦱꦼꦤꦼꦁꦔꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃ꧈​ꦧꦺꦢꦏꦫꦺꦴꦏꦸꦂꦧꦤ꧀ꦤꦺꦏꦆꦤ꧀꧈​ꦭꦤ꧀ꦗꦭꦂꦫꦤ꧀ꦄꦧꦺꦭ꧀ꦥꦽꦕꦪꦩꦫꦁꦒꦸꦱ꧀ꦠꦶꦄꦭ꧀ꦭꦃꦢꦺꦏ꧀ꦤꦺꦢꦶꦱꦼꦤꦼꦁꦔꦶꦏꦫꦺꦴꦒꦸꦱ꧀ꦠꦶꦄꦭ꧀ꦭꦃꦭꦤ꧀ꦏꦸꦂꦧꦤ꧀ꦤꦺꦏꦼꦠꦩ꧀ꦥ꧉​ꦢꦢꦶꦤꦺꦱꦼꦤꦗꦤ꧀ꦱꦲꦶꦏꦶ ꦢꦺꦏ꧀ꦤꦺꦮꦶꦱ꧀ꦩꦠꦶꦏꦪꦏꦪꦱ꧀ꦮꦫꦤꦺꦄꦧꦺꦭ꧀ꦲꦶꦗꦶꦏ꧀ꦔꦺꦴꦩꦺꦴꦁꦔꦶꦲꦮꦏ꧀ꦏꦺꦢꦺꦮꦺꦏꦺꦴꦁꦏꦺꦴꦤ꧀​ꦔ꧀ꦭꦏꦺꦴꦤ꧀ꦤꦶꦏꦪꦢꦺꦏ꧀ꦤꦺ꧉​

⁵꧋ꦏꦥꦶꦁ​ꦥꦶꦤ꧀ꦢꦺꦴꦤꦺꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦲ꦳ꦺꦤꦺꦴꦏ꧀꧈​ꦗꦭꦂꦫꦤ꧀ꦲ꦳ꦺꦤꦺꦴꦏ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦏ꧀ꦤꦺꦢꦶꦗꦶꦏꦸꦏ꧀ꦲꦸꦫꦶꦥ꧀ꦲꦸꦫꦶꦥ꧀ꦥꦤ꧀ꦱꦁꦏꦧꦸꦩꦶ​ꦏꦺꦤꦺ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦤ꧀ꦥ​ꦩꦠꦶ​꧉​ꦢꦢꦶꦤꦺ​ꦢꦺꦏ꧀ꦤꦺꦪ​ꦲꦺꦴꦫ​ꦧꦶꦱ​ꦏꦼꦠꦼꦩꦸ​꧈​ꦲꦮꦶꦠ꧀ꦢꦺꦏ꧀ꦤꦺꦢꦶꦗꦶꦏꦸꦏ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦏꦶꦠꦧ꧀ꦔꦺꦴꦩꦺꦴꦁꦔꦶꦲꦮꦏ꧀ꦏꦺ​ꦢꦺꦮꦺꦤꦺꦏ꧀ꦲꦸꦫꦶꦥ꧀ꦥꦺꦲ꦳ꦺꦤꦺꦴꦏ꧀ ꦱꦏ꧀ꦢꦸꦫꦸꦁꦔꦺꦢꦺꦏ꧀ꦤꦺꦢꦶꦗꦶꦏꦸꦏ꧀ꦱꦁꦏꦧꦸꦩꦶ​ꦏꦺꦤꦺ​꧈​ꦤ꧀ꦢꦢꦺꦏ꧀ꦏꦏꦺꦱꦼꦤꦼꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ ⁶ꦢꦢꦶꦤꦺ​ꦲꦮꦏ꧀ꦏꦺ​ꦢꦺꦮꦺꦢꦸꦤꦸꦁꦤꦺꦏ꧀ꦮꦺꦴꦁ​ꦲꦺꦴꦫ​ꦧꦶꦱ​ꦤ꧀ꦢꦢꦺꦏ꧀ꦏꦏꦺꦱꦼꦤꦼꦁꦔꦺ​ꦲꦠꦶꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦺꦏ꧀ꦲꦺꦴꦫ​ꦥꦽꦕꦪ​ꦩꦫꦁ​ꦢꦺꦏ꧀ꦤꦺ꧉​ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦱꦥ​ꦱꦶꦁ​ꦏꦼꦥꦺꦔꦶꦤ꧀ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦢꦸ​ꦥꦽꦕꦪ​ꦤꦺꦏ꧀ꦢꦺꦏ꧀ꦤꦺꦲꦺꦤꦺꦁꦭꦤ꧀ꦏꦸꦢꦸ​ꦥꦽꦕꦪ​ꦲꦸꦒ​ꦤꦺꦏ꧀ꦢꦺꦏ꧀ꦤꦺꦔꦸꦥꦃꦲꦶꦮꦺꦴꦁ​ꦱꦶꦁ​ꦩꦫ​ꦔ꧀ꦒꦺꦴꦭꦺꦏ꧀ꦏꦶ​ꦢꦺꦏ꧀ꦤꦺꦏꦤ꧀ꦠꦶꦠꦼꦤꦤ꧀ꦤꦤ꧀꧈​

⁷꧋ꦏꦥꦶꦁ​ꦠꦼꦭꦸꦤꦺ​ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦏꦺꦭꦶꦁꦔꦤ꧀ꦤꦧꦶ​ꦟꦺꦴꦮꦃ꧉​ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦤꦸꦠ꧀ꦤꦸꦫꦸꦠ꧀ꦠꦶ​ꦲꦥ​ꦱꦶꦁ​ꦢꦶꦲꦺꦴꦩꦺꦴꦁꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦶꦤꦧꦶ​ꦟꦺꦴꦮꦃꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦔꦼꦢꦸꦤ꧀ꦤꦏꦺꦲꦸꦢꦤ꧀ꦒꦼꦢꦺꦱꦶꦁ​ꦧꦏꦭ꧀ꦔꦼꦊꦥ꧀ꦥꦏꦺꦧꦸꦩꦶ​ꦭꦤ꧀ꦩꦠꦺꦤ꧀ꦤꦶ​ꦱꦼꦩ꧀ꦧꦫꦁ​ꦱꦶꦁ​ꦲꦸꦫꦶꦥ꧀꧈​ꦩꦸꦭꦤꦺ​ꦤꦧꦶ​ꦟꦺꦴꦮꦃꦢꦶꦏꦺꦴꦁꦏꦺꦴꦤ꧀​ꦔ꧀ꦒꦮꦺ​ꦏꦥꦭ꧀ ꦱꦸꦥꦪ​ꦢꦺꦏ꧀ꦤꦺꦱꦏ꧀ꦧꦿꦪꦠ꧀ꦠꦺ​ꦧꦶꦱ​ꦱ꧀ꦭꦩꦼꦠ꧀꧈​ꦱꦼꦤꦗꦤ꧀ꦢꦸꦫꦸꦁ​ꦮꦼꦫꦸꦃ​ꦲꦸꦢꦤ꧀ꦤꦺ​꧈​ꦤꦧꦶ​ꦟꦺꦴꦮꦃꦥꦽꦕꦪ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀​ꦔ꧀ꦒꦮꦺ​ꦏꦥꦭ꧀ꦭꦺ​꧉​ꦢꦢꦶꦤꦺ​ꦮꦺꦴꦁꦮꦺꦴꦁ​ꦭꦶꦪꦤꦺ​ꦥꦢ​ꦩꦠꦶ​꧈​ꦗꦭꦂꦫꦤ꧀ꦱꦁꦏꦱꦭꦃꦲꦺ​ꦢꦺꦮꦺ꧈​ꦤꦁꦔꦶꦁ​ꦤꦧꦶ​ꦟꦺꦴꦮꦃꦢꦶꦲꦁꦒꦼꦥ꧀ꦧꦼꦤꦼꦂ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​꧉​

⁸꧋ꦏꦥꦶꦁ​ꦥꦥꦠ꧀ꦥꦫ​ꦱꦼꦢꦸꦭꦸꦂ​꧉​ꦏꦺꦴꦮꦺ​ꦏꦧꦺꦃ​ꦔꦼꦂꦠꦶ​ꦊꦭꦏꦺꦴꦤꦺ​ꦧꦥ​ꦄꦨꦿꦲꦩ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦩꦫꦁ​ꦧꦥ​ꦄꦨꦿꦲꦩ꧀ꦏꦺꦴꦁꦏꦺꦴꦤ꧀ꦤꦶꦁꦒꦭ꧀ꦲꦺꦴꦩꦃꦲꦺ​ꦭꦤ꧀ꦏꦸꦢꦸ​ꦭꦸꦔ​ꦤꦁꦭꦶꦪ​ꦤꦼꦒꦫ​꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦩꦫꦁ​ꦧꦥ​ꦄꦨꦿꦲꦩ꧀ꦤꦺꦏ꧀ꦲꦩ꧀ꦧꦺꦱꦸꦏ꧀ꦏꦺ​ꦤꦼꦒꦫ​ꦏꦸꦮꦶ​ꦧꦏꦭ꧀ꦢꦶꦏꦺꦏ꧀ꦏꦏꦺꦩꦫꦁ​ꦢꦺꦏ꧀ꦤꦺꦭꦤ꧀ꦠꦸꦫꦸꦤ꧀ꦠꦸꦫꦸꦤꦤ꧀ꦤꦺ꧉​ꦧꦥ​ꦄꦨꦿꦲꦩ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦢꦺꦏ꧀ꦤꦺꦩꦤꦸꦠ꧀ꦭꦤ꧀ꦧꦸꦢꦭ꧀ ꦱꦼꦤꦗꦤ꧀ꦢꦺꦏ꧀ꦤꦺꦲꦺꦴꦫ​ꦔꦼꦂꦠꦶ​ꦤꦁꦲꦼꦤ꧀ꦢꦶ​ꦥꦫꦤ꧀ꦤꦺ​꧉​ ⁹ꦗꦭꦂꦫꦤ꧀ꦧꦥ​ꦄꦨꦿꦲꦩ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦺꦏ꧀ꦤꦺꦧꦶꦱ​ꦩꦁꦒꦺꦴꦤ꧀ꦤꦁꦤꦼꦒꦫ​ꦏꦸꦮꦶ​ꦏꦪ​ꦮꦺꦴꦁ​ꦚ꧀ꦗꦧ​꧈​ꦱꦼꦤꦗꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦗꦚ꧀ꦗꦶ​ꦩꦫꦁ​ꦢꦺꦏ꧀ꦤꦺ꧈​ꦤꦺꦏ꧀ꦤꦼꦒꦫ​ꦏꦸꦮꦶ​ꦧꦏꦭ꧀ꦮꦺꦏ꧀ꦏꦺꦢꦺꦏ꧀ꦤꦺ꧉​ꦧꦥ​ꦄꦨꦿꦲꦩ꧀ꦩꦁꦒꦺꦴꦤ꧀ꦤꦁꦲꦺꦴꦩꦃ​ꦭꦸꦭꦁ​꧈​ꦱꦼꦩꦺꦴꦤꦺꦴ​ꦲꦸꦒ​ꦲꦤꦏ꧀ꦏꦺ​꧈​ꦪꦏꦸꦮꦶ​ꦆꦱꦏ꧀ꦭꦤ꧀ꦲꦸꦒ​ꦥꦸꦠꦸꦤꦺ​꧈​ꦪꦏꦸꦮꦶ​ꦪꦏꦸꦧ꧀ ꦲꦮꦶꦠ꧀ꦲꦸꦒ​ꦥꦢ​ꦤꦩ꧀ꦥ​ꦥꦽꦗꦚ꧀ꦗꦶꦪꦤ꧀ꦏꦸꦮꦶ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​ ¹⁰ꦧꦥ​ꦄꦨꦿꦲꦩ꧀ꦒꦼꦊꦩ꧀ꦩꦁꦒꦺꦴꦤ꧀ꦤꦁꦲꦺꦴꦩꦃ​ꦭꦸꦭꦁ​꧈​ꦗꦭꦂꦫꦤ꧀ꦢꦺꦏ꧀ꦤꦺꦔꦼꦂꦠꦶ​ꦤꦺꦏ꧀ꦲꦶꦁ​ꦠꦼꦩ꧀ꦧꦺ​ꦢꦺꦏ꧀ꦤꦺꦧꦏꦭ꧀ꦩꦁꦒꦺꦴꦤ꧀ꦤꦁꦏꦸꦠꦒꦮꦺꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧈​ꦏꦸꦠꦩꦶꦠꦸꦫꦸꦠ꧀ꦥꦶꦏꦶꦂꦫꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦭꦤ꧀ꦏꦸꦠꦱꦶꦁ​ꦥꦺꦴꦤ꧀ꦢꦱꦶꦤꦺꦲꦺꦴꦫ​ꦲ꦳ꦺꦴꦪꦏ꧀ꦱ꧀ꦭꦮꦱ꧀ꦭꦮꦱ꧀ꦱꦺ꧉​

^11-12꧋ꦏꦺꦴꦮꦺ​ꦲꦸꦒ​ꦔꦼꦂꦠꦶ​ꦊꦭꦏꦺꦴꦤꦺ​ꦧꦥ​ꦄꦨꦿꦲꦩ꧀ꦭꦤ꧀ꦲꦶꦧꦸ​ꦱꦫꦃ​꧉​ꦧꦥ​ꦄꦨꦿꦲꦩ꧀ꦮꦶꦱ꧀ꦠꦸꦮ​ꦧꦔꦼꦠ꧀ꦭꦤ꧀ꦲꦶꦧꦸ​ꦱꦫꦃ​ꦲꦺꦴꦫ​ꦧꦶꦱ​ꦤ꧀ꦢꦸꦮꦺꦲꦤꦏ꧀꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦗꦚ꧀ꦗꦶ​ꦩꦫꦁ​ꦧꦥ​ꦄꦨꦿꦲꦩ꧀ꦤꦺꦏ꧀ꦢꦺꦏ꧀ꦤꦺꦭꦤ꧀ꦲꦶꦧꦸ​ꦱꦫꦃ​ꦧꦏꦭ꧀​ꦤ꧀ꦢꦸꦮꦺꦲꦤꦏ꧀꧈​ꦧꦥ​ꦄꦨꦿꦲꦩ꧀ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦸꦫꦸꦠ꧀ꦠꦶ​ꦗꦚ꧀ꦗꦶꦤꦺ​꧈​ꦩꦸꦭꦤꦺ​ꦮꦺꦴꦁ​ꦱꦶꦗꦶ​ꦠꦼꦫꦸꦱ꧀ꦧꦶꦱ​ꦠꦸꦫꦸꦤ꧀ꦠꦸꦩꦸꦫꦸꦤ꧀ꦢꦢꦶ​ꦥꦶꦫꦁꦥꦶꦫꦁ​꧈​ꦲꦺꦴꦫ​ꦏꦼꦤꦺꦁꦢꦶꦲꦶꦠꦸꦁ꧈​ꦏꦪ​ꦭꦶꦤ꧀ꦠꦁꦭꦶꦤ꧀ꦠꦁ​ꦤꦁꦭꦔꦶꦠ꧀ꦭꦤ꧀ꦱꦤ꧀ꦠꦶꦤꦁꦥꦶꦁꦒꦶꦂ​ꦭꦫ꧈​ꦱꦼꦤꦗꦤ꧀ꦮꦺꦴꦁꦔꦺ​ꦮꦶꦱ꧀ꦠꦸꦮ​ꦭꦤ꧀ꦓꦫꦺꦏ꧀ꦩꦠꦶꦤꦺ​꧉​

¹³꧋ꦮꦺꦴꦁꦮꦺꦴꦁ​ꦱꦶꦁ​ꦥꦢ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​ꦪ​ꦥꦽꦕꦪ​ꦠꦼꦫꦸꦱ꧀ꦠꦼꦏꦤ꧀ꦥꦠꦶꦤꦺ​꧉​ꦢꦺꦴꦁꦔꦺꦩꦠꦶ​ꦪ​ꦢꦸꦫꦸꦁ​ꦤꦩ꧀ꦥ​ꦥꦽꦏꦫꦥꦽꦏꦫ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦤꦩꦸꦁ​ꦥꦢ​ꦚꦮꦁ​ꦱꦁꦏꦏꦢꦺꦴꦃꦲꦤ꧀ꦭꦤ꧀ꦔꦉꦥ꧀ꦲꦉꦥ꧀ꦏꦫꦺꦴ​ꦧꦸꦔꦃ​꧉​ꦮꦺꦴꦁꦮꦺꦴꦁ​ꦩꦲꦸ​ꦲꦺꦴꦫ​ꦲꦶꦱꦶꦤ꧀ꦔꦏꦺꦴꦤ꧀ꦤꦶ​ꦤꦺꦏ꧀ꦤꦁꦤꦼꦒꦫ​ꦏꦸꦮꦶ​ꦤꦩꦸꦁ​ꦏꦪ​ꦮꦺꦴꦁ​ꦚ꧀ꦗꦧ​꧈​ꦏꦪ​ꦮꦺꦴꦁ​ꦩꦩ꧀ꦥꦶꦂ​꧈​ꦲꦺꦴꦫ​ꦮꦺꦴꦁ​ꦱꦶꦁ​ꦩꦁꦒꦺꦴꦤ꧀ꦏꦺꦴꦤꦺꦴ​ꦱ꧀ꦭꦮꦱ꧀ꦱꦺ꧉​ ¹⁴ꦮꦺꦴꦁ​ꦱꦶꦁ​ꦔꦏꦺꦴꦤ꧀ꦤꦶ​ꦔꦺꦴꦤꦺꦴ​ꦏꦸꦮꦶ​ꦤ꧀ꦢꦸꦢꦸꦃꦲꦏꦺꦤꦺꦏ꧀ꦥꦢ​ꦔꦉꦥ꧀ꦲꦉꦥ꧀ꦩꦁꦒꦺꦴꦤ꧀ꦤꦁꦤꦼꦒꦫꦤꦺ​ꦢꦺꦮꦺ꧉​ ¹⁵ꦮꦺꦴꦁꦮꦺꦴꦁ​ꦩꦲꦸ​ꦲꦺꦴꦫ​ꦥꦢ​ꦏꦁꦔꦼꦤ꧀ꦩꦫꦁ​ꦤꦼꦒꦫ​ꦱꦶꦁ​ꦢꦶꦠꦶꦁꦒꦭ꧀ ꦲꦮꦶꦠ꧀ꦱꦼꦩꦸꦁꦒꦺꦴꦤ꧀ꦤꦺꦏꦁꦔꦼꦤ꧀ꦔꦺꦴꦤꦺꦴ​ꦩꦼꦱ꧀ꦠꦶꦪ​ꦮꦶꦱ꧀ꦧꦭꦶꦏ꧀ꦩꦼꦤꦺꦃ​ꦤꦁꦤꦼꦒꦫꦤꦺ​ꦩꦲꦸꦤꦺ​꧉​ ¹⁶ꦤꦁꦔꦶꦁꦮꦸꦗꦸꦠ꧀ꦠꦺꦲꦺꦴꦫꦔꦺꦴꦤꦺꦴ꧉​ꦮꦺꦴꦁꦮꦺꦴꦁꦩꦲꦸꦩꦭꦃꦥꦢꦔꦉꦥ꧀ꦲꦉꦥ꧀ꦩꦁꦒꦺꦴꦤ꧀ꦤꦁꦤꦼꦒꦫꦱꦶꦁꦭꦸꦮꦶꦃꦲꦥꦶꦏ꧀ ꦤꦼꦒꦫꦤꦁꦱ꧀ꦮꦂꦒ꧉​ꦩꦸꦭꦤꦺꦒꦸꦱ꧀ꦠꦶꦄꦭ꧀ꦭꦃ ꦪꦲꦺꦴꦫꦲꦶꦱꦶꦤ꧀ ꦩꦭꦃꦧꦸꦔꦃꦢꦶꦲꦫꦤ꧀ꦤꦶꦒꦸꦱ꧀ꦠꦶꦄꦭ꧀ꦭꦃꦲꦺꦮꦺꦴꦁꦮꦺꦴꦁꦩꦲꦸ꧈​ꦲꦮꦶꦠ꧀ꦒꦸꦱ꧀ꦠꦶꦄꦭ꧀ꦭꦃꦢꦺꦮꦺꦱꦶꦁꦔ꧀ꦒꦮꦺꦏ꧀ꦏꦏꦺꦏꦸꦠꦏꦁꦒꦺꦴꦮꦺꦴꦁꦮꦺꦴꦁꦩꦲꦸ꧉​

¹⁷꧋ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦢꦺꦴꦁꦔꦺꦧꦥ​ꦄꦨꦿꦲꦩ꧀ꦔꦸꦂꦧꦤ꧀ꦤꦏꦺꦲꦤꦏ꧀ꦏꦺ​꧈​ꦪꦏꦸꦮꦶ​ꦆꦱꦏ꧀꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀ꦗꦚ꧀ꦗꦶ​ꦩꦫꦁ​ꦧꦥ​ꦄꦨꦿꦲꦩ꧀ꦤꦺꦏ꧀ꦢꦺꦏ꧀ꦤꦺꦧꦏꦭ꧀ꦢꦶꦏꦺꦏ꧀ꦏꦶꦠꦸꦫꦸꦤ꧀ꦤꦤ꧀ꦱꦶꦁ​ꦲꦺꦴꦫ​ꦏꦼꦤꦺꦁꦢꦶꦲꦶꦠꦸꦁ꧈​ꦩꦸꦭꦤꦺ​ꦪ​ꦠꦼꦫꦸꦱ꧀ꦆꦱꦏ꧀ꦭꦲꦶꦂ​꧉​ꦭꦃ​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦏ꧀ꦠꦼꦫꦸꦱ꧀ꦔꦺꦴꦩꦺꦴꦁꦏꦫꦺꦴ​ꦧꦥ​ꦄꦨꦿꦲꦩ꧀ꦏꦺꦴꦁꦏꦺꦴꦤ꧀ꦩꦱꦿꦃꦲꦏꦺꦆꦱꦏ꧀ꦢꦢꦶ​ꦏꦸꦂꦧꦤ꧀?ꦩꦼꦏ꧀ꦱ​ꦧꦥ​ꦄꦨꦿꦲꦩ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦢꦺꦏ꧀ꦤꦺꦩꦱꦿꦃꦲꦏꦺꦲꦤꦏ꧀ꦏꦺ​ꦱꦶꦁ​ꦲꦺꦴꦫ​ꦲꦺꦤꦺꦁꦠꦸꦁꦒꦭ꧀ꦭꦺ​꧉​ ¹⁸ꦩꦁꦏ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦱꦶꦁ​ꦔꦺꦴꦩꦺꦴꦁꦏꦫꦺꦴ​ꦧꦥ​ꦄꦨꦿꦲꦩ꧀ ꦤꦺꦏ꧀ꦤꦩꦸꦁ​ꦠꦸꦫꦸꦤ꧀ꦤꦤ꧀ꦤꦺ​ꦆꦱꦏ꧀ꦱꦶꦁ​ꦢꦶꦲꦁꦒꦼꦥ꧀ꦢꦢꦶ​ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀꧈​ ¹⁹ꦤꦁꦔꦶꦁ​ꦧꦥ​ꦄꦨꦿꦲꦩ꧀ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦔꦸꦫꦶꦥ꧀ꦥꦏꦺꦆꦱꦏ꧀ꦱꦁꦏꦥꦠꦶ​꧉​ꦤꦺꦏ꧀ꦢꦶꦥꦶꦏꦶꦂ​ꦪ​ꦏꦼꦤꦺꦁꦢꦶꦲꦫꦤ꧀ꦤꦶ​꧈​ꦤꦺꦏ꧀ꦧꦥ​ꦄꦨꦿꦲꦩ꧀ꦤꦩ꧀ꦥ​ꦲꦤꦏ꧀ꦏꦺ​꧈​ꦪꦏꦸꦮꦶ​ꦆꦱꦏ꧀ ꦲꦸꦫꦶꦥ꧀ꦩꦼꦤꦺꦃ​ꦱꦁꦏꦥꦠꦶ​꧉​

²⁰꧋ꦏꦥꦶꦁ​ꦭꦶꦩꦤꦺ​ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦲꦼꦁꦒꦺꦴꦤꦺ​ꦆꦱꦏ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦆꦱꦏ꧀ꦲꦩ꧀ꦧꦼꦂꦏꦃꦲꦶ​ꦲꦤꦏ꧀ꦏꦺ​ꦫꦒꦶꦭ꧀ꦪꦏꦸꦧ꧀ꦭꦤ꧀ꦲꦤꦏ꧀ꦏꦺ​ꦲꦩ꧀ꦧꦉꦥ꧀ꦌꦱꦲꦸ​꧉​ꦆꦱꦏ꧀ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦧꦏꦭ꧀ꦲꦩ꧀ꦧꦼꦂꦏꦃꦲꦶ​ꦪꦏꦸꦧ꧀ꦭꦤ꧀ꦌꦱꦲꦸ​ꦭꦤ꧀ꦠꦸꦫꦸꦤ꧀ꦤꦤ꧀ꦤꦺ​ꦲꦶꦁ​ꦠꦼꦩ꧀ꦧꦺ​꧉​

²¹꧋ꦏꦥꦶꦁ​ꦤꦼꦤꦼꦩ꧀ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦧꦧ꧀ꦧꦼꦂꦏꦃꦲꦺ​ꦪꦏꦸꦧ꧀꧈​ꦢꦺꦴꦁꦔꦺꦲꦉꦥ꧀ꦩꦠꦶ​ꦢꦺꦏ꧀ꦤꦺꦲꦩ꧀ꦧꦼꦂꦏꦃꦲꦶ​ꦲꦤꦏ꧀ꦏꦺ​ꦪꦺꦴꦱꦺꦥ꦳꧀ꦏꦧꦺꦃ​ꦭꦺꦴꦫꦺꦴ​꧈​ꦲꦮꦶꦠ꧀ꦢꦺꦏ꧀ꦤꦺꦥꦽꦕꦪ​ꦲꦶꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦶꦁ​ꦮꦶꦱ꧀ꦗꦚ꧀ꦗꦶ​꧈​ꦤꦺꦏ꧀ꦠꦸꦫꦸꦤ꧀ꦤꦤ꧀ꦤꦺ​ꦧꦥ​ꦄꦨꦿꦲꦩ꧀ꦧꦏꦭ꧀ꦲꦺꦴꦫ​ꦏꦼꦤꦺꦁꦢꦶꦲꦶꦠꦸꦁ꧉​ꦪꦏꦸꦧ꧀ꦥꦽꦕꦪ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦤꦸꦫꦸꦠ꧀ꦠꦶ​ꦗꦚ꧀ꦗꦶ​ꦲꦶꦏꦶ​ꦲꦸꦒ​ꦭꦶꦮꦠ꧀ꦲꦤꦏ꧀ꦏꦺ​ꦪꦺꦴꦱꦺꦥ꦳꧀ ꦩꦸꦭꦤꦺ​ꦱꦼꦤꦗꦤ꧀ꦪꦏꦸꦧ꧀ꦮꦶꦱ꧀ꦠꦸꦮ​ꦧꦔꦼꦠ꧀ ꦢꦺꦏ꧀ꦤꦺꦔꦢꦼꦏ꧀ꦱꦼꦩꦺꦤ꧀ꦢꦺꦠꦼꦏꦼꦤꦺ​ꦭꦤ꧀ꦔꦧꦼꦏ꧀ꦠꦶ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

²²꧋ꦏꦥꦶꦁ​ꦥꦶꦠꦸꦤꦺ​ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦥꦼꦔꦤ꧀ꦢꦼꦭ꧀ꦭꦺ​ꦪꦺꦴꦱꦺꦥ꦳꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦏ꧀ꦢꦸꦫꦸꦁꦔꦺꦩꦠꦶ​ꦪꦺꦴꦱꦺꦥ꦳꧀ꦔꦺꦴꦩꦺꦴꦁꦔꦏꦺꦧꦧ꧀ꦭꦸꦔꦤꦺ​ꦧꦁꦱ​ꦆꦱꦿꦌꦭ꧀ꦱꦁꦏꦤꦼꦒꦫ​ꦌꦒꦶꦥ꧀ꦠꦼ꧉​ꦗꦭꦂꦫꦤ꧀ꦪꦺꦴꦱꦺꦥ꦳꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦢꦺꦏ꧀ꦤꦺꦤꦶꦁꦒꦭ꧀ꦮꦼꦏꦱ꧀ ꦏꦺꦴꦁꦏꦺꦴꦤ꧀​ꦔ꧀ꦒꦮ​ꦧꦢꦤ꧀ꦤꦺ​ꦢꦺꦏ꧀ꦤꦺ꧉​

²³꧋ꦏꦥꦶꦁ​ꦮꦺꦴꦭꦸꦤꦺ​ꦥꦫ​ꦱꦼꦢꦸꦭꦸꦂ​꧈​ꦢꦶꦲꦺꦭꦶꦁ​ꦥꦼꦔꦤ꧀ꦢꦼꦭ꧀ꦭꦺ​ꦮꦺꦴꦁ​ꦠꦸꦮꦤꦺ​ꦤꦧꦶ​ꦩꦺꦴꦱꦼꦱ꧀꧈​ꦏꦺꦴꦮꦺ​ꦔꦼꦂꦠꦶ​꧈​ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦫꦠꦸꦤꦺ​ꦤꦼꦒꦫ​ꦌꦒꦶꦥ꧀ꦠꦼꦔ꧀ꦒꦮꦺ​ꦮꦺꦠ꧀ꦤꦺꦏ꧀ꦏꦧꦺꦃ​ꦧꦺꦴꦕꦃ​ꦧꦪꦶ​ꦱꦶꦁ​ꦭꦤꦁ​ꦭꦲꦶꦂꦫꦤ꧀ꦮꦺꦴꦁ​ꦆꦱꦿꦌꦭ꧀ꦏꦸꦢꦸ​ꦢꦶꦥꦠꦺꦤ꧀ꦤꦶ​꧉​ꦤꦁꦔꦶꦁ​ꦏꦢꦸꦁ​ꦤꦧꦶ​ꦩꦺꦴꦱꦼꦱ꧀ꦭꦲꦶꦂ​꧈​ꦮꦺꦴꦁ​ꦠꦸꦮꦤꦺ​ꦮꦼꦫꦸꦃ​ꦤꦺꦏ꧀ꦧꦺꦴꦕꦃ​ꦧꦪꦶ​ꦲꦶꦏꦶ​ꦔ꧀ꦒꦤ꧀ꦠꦼꦁꦠꦼꦤꦤ꧀꧈​ꦮꦺꦴꦁ​ꦠꦸꦮꦤꦺ​ꦤꦧꦶ​ꦩꦺꦴꦱꦼꦱ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦲꦺꦴꦫ​ꦮꦼꦢꦶ​ꦔ꧀ꦭꦁꦒꦂ​ꦮꦺꦠ꧀ꦠꦺꦫꦠꦸꦤꦺ​ꦭꦤ꧀​ꦤ꧀ꦢꦼꦭꦶꦏ꧀ꦏꦏꦺꦤꦧꦶ​ꦩꦺꦴꦱꦼꦱ꧀ꦠꦼꦭꦸꦁ​ꦱꦱꦶ​ꦱꦸꦮꦺꦤꦺ​ꦱꦏ꧀ꦮꦶꦱ꧀ꦱꦺ​ꦭꦲꦶꦂ​꧉​

²⁴꧋ꦏꦥꦶꦁ​ꦱꦔꦤꦺ​ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦥꦼꦔꦤ꧀ꦢꦼꦭ꧀ꦭꦺ​ꦤꦧꦶ​ꦩꦺꦴꦱꦼꦱ꧀ꦢꦺꦮꦺ꧉​ꦱꦏ꧀ꦮꦶꦱ꧀ꦱꦺ​ꦢꦶꦮꦱ​ꦢꦺꦏ꧀ꦤꦺꦲꦺꦴꦫ​ꦒꦼꦊꦩ꧀ꦢꦶꦲꦁꦒꦼꦥ꧀ꦢꦢꦶ​ꦥꦸꦠꦸꦤꦺ​ꦫꦠꦸꦤꦺ​ꦤꦼꦒꦫ​ꦌꦒꦶꦥ꧀ꦠꦼ꧉​ ²⁵ꦢꦺꦏ꧀ꦤꦺꦩꦶꦭꦶꦃ​ꦩꦺꦭꦸ​ꦔꦿꦱꦏ꧀ꦏꦏꦺꦏꦔꦺꦭ꧀ꦭꦤ꧀ꦤꦺ​ꦲꦸꦩꦠ꧀ꦠꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦼꦤꦶꦩ꧀ꦧꦁꦔꦿꦱꦏ꧀ꦏꦏꦺꦏꦼꦥꦺꦤꦏ꧀ꦱꦁꦏꦠꦸꦩꦶꦤ꧀ꦢꦏ꧀ꦱꦶꦁ​ꦲꦭ​꧈​ꦗꦭꦂꦫꦤ꧀ꦏꦸꦮꦶ​ꦤꦩꦸꦁ​ꦱꦼꦢꦶꦭꦸꦠ꧀꧈​ ²⁶ꦤꦧꦶ​ꦩꦺꦴꦱꦼꦱ꧀ꦩꦶꦭꦶꦃ​ꦔ꧀ꦭꦏꦺꦴꦤ꧀ꦤꦶ​ꦏꦔꦺꦭ꧀ꦭꦤ꧀ꦏꦸꦮꦶ​꧈​ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦥꦽꦗꦚ꧀ꦗꦶꦪꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦩꦫꦁ​ꦧꦥ​ꦄꦨꦿꦲꦩ꧀꧈​ꦭꦤ꧀ꦥꦽꦗꦚ꧀ꦗꦶꦪꦤ꧀ꦲꦶꦏꦶ​ꦧꦶꦱꦤꦺ​ꦏꦼꦠꦸꦫꦸꦠ꧀ꦠꦤ꧀ꦭꦶꦮꦠ꧀ꦤꦧꦶ​ꦩꦺꦴꦱꦼꦱ꧀ꦭꦤ꧀ꦭꦶꦮꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦢꦺꦴꦁꦔꦺꦢꦺꦏ꧀ꦤꦺꦲꦸꦒ​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀꧈​ꦏꦸꦮꦶ​ꦱꦶꦁ​ꦩꦫꦏ꧀ꦏꦏꦺꦤꦧꦶ​ꦩꦺꦴꦱꦼꦱ꧀ꦲꦺꦴꦫ​ꦲꦺꦩꦤ꧀ꦤꦶꦁꦒꦭ꧀ꦱꦏ꧀ꦲꦺꦤꦺꦁꦔꦺꦏꦱꦸꦒꦶꦃꦲꦤ꧀ꦤꦁꦤꦼꦒꦫ​ꦌꦒꦶꦥ꧀ꦠꦼ꧉​ꦢꦺꦏ꧀ꦤꦺꦩꦶꦏꦶꦂꦫꦏꦺꦭꦤ꧀ꦔꦉꦥ꧀ꦲꦉꦥ꧀ꦤꦩ꧀ꦥ​ꦏꦱꦸꦒꦶꦃꦲꦤ꧀ꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦲꦩ꧀ꦧꦺꦱꦸꦏ꧀ꦏꦺ​꧉​

²⁷꧋ꦗꦭꦂꦫꦤ꧀ꦤꦧꦶ​ꦩꦺꦴꦱꦼꦱ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦏ꧀ꦤꦺꦭꦸꦔ​ꦱꦁꦏꦤꦼꦒꦫ​ꦌꦒꦶꦥ꧀ꦠꦼ꧈​ꦲꦺꦴꦫ​ꦗꦭꦂꦫꦤ꧀ꦢꦺꦏ꧀ꦤꦺꦮꦼꦢꦶ​ꦏꦫꦺꦴ​ꦫꦠꦸꦤꦺ​꧈​ꦲꦺꦴꦫ​꧈​ꦤꦁꦔꦶꦁ​ꦗꦭꦂꦫꦤ꧀ꦏꦪꦏꦪ​ꦢꦺꦏ꧀ꦤꦺꦮꦼꦫꦸꦃ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦲꦺꦴꦫ​ꦏꦺꦠꦺꦴꦏ꧀ ꦩꦸꦭꦤꦺ​ꦤꦧꦶ​ꦩꦺꦴꦱꦼꦱ꧀ꦩꦤ꧀ꦠꦼꦥ꧀ꦠꦼꦫꦸꦱ꧀ꦲꦼꦁꦒꦺꦴꦤꦺ​ꦥꦽꦕꦪ​꧉​ ²⁸ꦥꦫ​ꦱꦼꦢꦸꦭꦸꦂ​꧈​ꦏꦼꦥꦿꦶꦪꦺ​ꦮꦶꦮꦶꦠ꧀ꦠꦤ꧀ꦤꦺ​ꦫꦶꦪꦪꦥꦱ꧀ꦏꦃ​?ꦲꦥ​ꦲꦺꦴꦫ​ꦗꦭꦂꦫꦤ꧀ꦤꦧꦶ​ꦩꦺꦴꦱꦼꦱ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​?ꦩꦸꦭꦤꦺ​ꦢꦺꦏ꧀ꦤꦺꦔꦺꦴꦩꦺꦴꦁꦏꦫꦺꦴ​ꦮꦺꦴꦁ​ꦆꦱꦿꦌꦭ꧀ꦏꦺꦴꦁꦏꦺꦴꦤ꧀​ꦔ꧀ꦭꦺꦭꦺꦠ꧀ꦠꦶꦭꦮꦁꦔꦺ​ꦲꦺꦴꦩꦃ​ꦏꦫꦺꦴ​ꦒꦼꦠꦶꦃꦲꦺ​ꦮꦼꦢꦸꦱ꧀꧈​ꦏꦸꦮꦶ​ꦏꦁꦒꦺꦴ​ꦔꦭꦁꦔꦭꦁꦔꦶꦩꦸꦭꦺꦏꦠ꧀ꦠꦺꦥꦠꦶ​꧈​ꦱꦸꦥꦪ​ꦲꦺꦴꦫ​ꦩꦠꦺꦤ꧀ꦤꦶ​ꦲꦤꦏ꧀ꦲꦤꦏ꧀ꦏꦺ​ꦧꦁꦱ​ꦆꦱꦿꦌꦭ꧀ꦭꦤꦁ​ꦱꦶꦁ​ꦲꦩ꧀ꦧꦉꦥ꧀꧈​

²⁹꧋ꦏꦥꦶꦁ​ꦱꦼꦥꦸꦭꦸꦃ​ꦥꦫ​ꦱꦼꦢꦸꦭꦸꦂ​꧈​ꦢꦶꦥꦶꦏꦶꦂ​ꦥꦼꦔꦤ꧀ꦢꦼꦭ꧀ꦭꦺ​ꦧꦁꦱ​ꦆꦱꦿꦌꦭ꧀ꦢꦺꦴꦁꦔꦺꦥꦢ​ ꦩ꧀ꦭꦏꦸ​ꦭꦶꦮꦠ꧀ꦱꦼꦒꦫ​ꦲꦧꦁ​꧉​ꦗꦭꦂꦫꦤ꧀ꦥꦢ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁꦮꦺꦴꦁ​ꦭꦶꦮꦠ꧀ꦱꦼꦒꦫ​ꦲꦧꦁ​ꦏꦪ​ꦤꦺꦏ꧀​ꦩ꧀ꦭꦏꦸ​ꦤꦁꦢꦫꦠ꧀ꦠꦤ꧀ꦮꦲꦺ​꧉​ꦤꦁꦔꦶꦁ​ꦏꦢꦸꦁ​ꦧꦁꦱ​ꦌꦒꦶꦥ꧀ꦠꦼꦱꦶꦁ​ꦔꦺꦴꦪꦏ꧀ꦲꦉꦥ꧀ꦩꦺꦭꦸ​ꦭꦶꦮꦠ꧀ ꦏꦧꦺꦃ​ꦏꦼꦊꦥ꧀ꦠꦼꦫꦸꦱ꧀ꦩꦠꦶ​꧉​

³⁰꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦲꦸꦒ​ꦏꦺꦭꦶꦁꦔꦤ꧀ꦥꦼꦔꦤ꧀ꦢꦼꦭ꧀ꦭꦺ​ꦧꦁꦱ​ꦆꦱꦿꦌꦭ꧀ ꦢꦺꦴꦁꦔꦺꦥꦢ​ꦔꦩ꧀ꦧꦿꦸꦏ꧀ꦏꦏꦺꦠꦺꦩ꧀ꦧꦺꦴꦏ꧀ꦏꦺ​ꦏꦸꦠꦪꦺꦫꦶꦏꦺꦴꦱꦶꦁ​ꦒꦮꦺꦪꦤ꧀ꦮꦠꦸ​ꦱꦶꦁ​ꦏꦤ꧀ꦢꦼꦭ꧀ꦧꦔꦼꦠ꧀꧈​ꦗꦭꦂꦫꦤ꧀ꦧꦁꦱ​ꦆꦱꦿꦌꦭ꧀ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦥꦢ​ꦔꦸꦧꦼꦁꦔꦶ​ꦠꦺꦩ꧀ꦧꦺꦴꦏ꧀ꦏꦺ​ꦥꦶꦠꦸꦁ​ꦢꦶꦤ​ꦱꦸꦮꦺꦤꦺ​꧈​ꦔꦤ꧀ꦠꦶ​ꦲꦩ꧀ꦧꦿꦸꦏ꧀ꦏꦧꦺꦃ​꧉​ ³¹ꦔꦺꦴꦩꦺꦴꦁꦔꦏꦺꦧꦧ꧀ꦪꦺꦫꦶꦏꦺꦴꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦧꦧ꧀ꦭꦺꦴꦤ꧀ꦠꦺꦫꦲꦧ꧀꧈​ꦫꦲꦧ꧀ꦤꦩ꧀ꦥ​ꦭꦤ꧀​ꦤ꧀ꦢꦼꦭꦶꦏ꧀ꦏꦏꦺꦥꦫ​ꦠꦸꦏꦁ​ꦔꦶꦤ꧀ꦢꦶꦏ꧀ ꦗꦭꦂꦫꦤ꧀ꦢꦺꦏ꧀ꦤꦺꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦔꦼꦂꦠꦶ​ꦤꦺꦏ꧀ꦢꦺꦏ꧀ꦤꦺꦧꦶꦱ​ꦤꦩ꧀ꦥ​ꦥꦔꦥꦸꦫ​꧈​ꦤꦺꦏ꧀ꦤꦶꦁꦒꦭ꧀​ꦏ꧀ꦭꦏꦸꦮꦤ꧀ꦤꦺ​ꦱꦶꦁ​ꦲꦭ​꧉​ꦩꦸꦭꦤꦺ​ꦫꦲꦧ꧀ꦲꦺꦴꦫ​ꦏꦠꦸꦠ꧀ꦢꦶꦥꦠꦺꦤ꧀ꦤꦶ​ꦏꦫꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦲꦺꦴꦫ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

³²꧋ꦏꦺꦴꦁꦏꦺꦴꦤ꧀ꦠꦼꦫꦸꦱ꧀ꦲꦼꦁꦒꦺꦴꦤ꧀ꦏꦸ​ꦔ꧀ꦒꦩ꧀ꦧꦂꦫꦏꦺꦥꦼꦔꦤ꧀ꦢꦼꦭ꧀ꦭꦺ​ꦮꦺꦴꦁꦮꦺꦴꦁ​ꦢꦺꦏ꧀​ꦩ꧀ꦧꦶꦪꦺꦤ꧀?ꦧꦶꦱ​ꦲꦏꦸ​꧈​ꦤꦁꦔꦶꦁ​ꦮꦏ꧀ꦠꦸꦩꦸꦲꦺꦴꦫ​ꦲꦺꦤꦺꦁ꧈​ꦤꦺꦏ꧀ꦲꦏꦸ​ꦏꦸꦢꦸ​ꦔꦺꦴꦩꦺꦴꦁꦔꦏꦺꦧꦧ꧀ꦥꦼꦔꦤ꧀ꦢꦼꦭ꧀ꦭꦺ​ꦓꦶꦢꦶꦪꦺꦴꦤ꧀ ꦧꦫꦏ꧀ ꦱꦶꦩ꧀ꦱꦺꦴꦤ꧀ ꦪꦺꦥ꧀ꦠ꧈​ꦣꦮ꦳ꦼꦢ꧀ ꦱꦩꦸꦮꦺꦭ꧀ꦭꦤ꧀ꦤꦧꦶ​ꦭꦶꦪꦭꦶꦪꦤꦺ​꧉​ ^33-34ꦗꦭꦂꦫꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦮꦺꦴꦁꦮꦺꦴꦁ​ꦧꦶꦱ​ꦤꦼꦭꦸꦏ꧀ꦏꦏꦺꦤꦼꦒꦫꦤꦼꦒꦫ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦤꦶꦤ꧀ꦢꦏ꧀ꦏꦏꦺꦱꦶꦁ​ꦧꦼꦤꦼꦂ​꧈​ꦩꦸꦭꦤꦺ​ꦪ​ꦥꦢ​ꦢꦶꦠꦸꦭꦸꦁꦔꦶ​ꦏꦪ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦧꦶꦱ​ꦩ꧀ꦧꦶꦁꦏꦼꦩ꧀ꦕꦁꦏꦼꦩ꧀ꦩꦺ​ꦩꦕꦤ꧀ꦔꦼꦭꦶꦃ​ꦭꦤ꧀ꦧꦶꦱ​ꦩꦠꦺꦤ꧀ꦤꦶ​ꦒꦼꦤꦶ​ꦱꦶꦁ​ꦩꦸꦭꦏ꧀ꦩꦸꦭꦏ꧀꧈​ꦱꦭꦺꦴꦏ꧀ꦏꦺꦧꦶꦱ​ꦲꦸꦕꦸꦭ꧀ꦱꦁꦏꦭꦤꦁꦮꦺꦢꦺꦴꦏ꧀ꦥꦼꦢꦁꦱꦶꦁ​ꦲꦉꦥ꧀ꦩꦠꦺꦤ꧀ꦤꦶ​꧉​ꦱꦼꦤꦗꦤ꧀ꦫꦶꦁꦏꦶꦃ​ꦩꦭꦃ​ꦧꦶꦱ​ꦢꦢꦶ​ꦒꦒꦃ​ꦭꦤ꧀ꦫꦺꦴꦱ​꧉​ꦲꦶꦁ​ꦱꦏ꧀ꦗꦼꦫꦺꦴꦤꦺꦥꦺꦫꦁꦔꦤ꧀ꦮꦺꦴꦁꦮꦺꦴꦁ​ꦢꦢꦶ​ꦫꦺꦴꦱ​ꦭꦤ꧀ꦧꦶꦱ​ꦤꦼꦭꦸꦏ꧀ꦏꦏꦺꦩꦸꦁꦱꦸꦃꦩꦸꦁꦱꦸꦃꦲꦺ​ꦔꦤ꧀ꦠꦶ​ꦥꦢ​ꦩ꧀​ꦧ꧀ꦭꦪꦸꦩꦸꦭꦶꦃ​꧉​ ³⁵ꦗꦭꦂꦫꦤ꧀ꦥꦢ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦸꦒ​ꦮꦺꦴꦁ​ꦮꦺꦢꦺꦴꦏ꧀ꦮꦺꦢꦺꦴꦏ꧀ꦲꦺꦤꦺꦁꦱꦶꦁ​ꦥꦢ​ꦮꦼꦫꦸꦃ​ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ​ꦱꦶꦁ​ꦮꦶꦱ꧀ꦥꦢ​ꦩꦠꦶ​ꦠꦔꦶ​ꦲꦸꦫꦶꦥ꧀ꦩꦼꦤꦺꦃ​꧉​

꧋ꦤꦁꦔꦶꦁ​ꦲꦺꦴꦫ​ꦏꦧꦺꦃ​ꦔꦭꦩ꧀ꦩꦶ​ꦱꦶꦁ​ꦏꦪ​ꦔꦺꦴꦤꦺꦴ​꧉​ꦮꦸꦗꦸꦠ꧀ꦠꦺꦲꦺꦤꦺꦁꦮꦺꦴꦁ​ꦭꦤꦁ​ꦲꦺꦴꦏꦺꦃꦱꦶꦁ​ꦥꦢ​ꦢꦶꦥꦠꦺꦤ꧀ꦤꦶ​꧈​ꦗꦭꦂꦫꦤ꧀ꦥꦢ​ꦩꦤ꧀ꦠꦼꦥ꧀ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦮꦺꦴꦁꦮꦺꦴꦁ​ꦲꦶꦏꦶ​ꦥꦢ​ꦩꦶꦭꦶꦃ​ꦩꦠꦶ​ꦢꦶꦥꦶꦭꦂꦫ​ꦭꦤ꧀ꦲꦺꦴꦫ​ꦒꦼꦊꦩ꧀ꦢꦶ​ꦲꦺꦕꦸꦭ꧀ꦭꦏꦺ​꧈​ꦲꦮꦶꦠ꧀ꦥꦢ​ꦥꦽꦕꦪ​ꦤꦺꦏ꧀ꦲꦶꦁ​ꦲꦩ꧀ꦧꦺꦱꦸꦏ꧀ꦏꦺ​ꦧꦏꦭ꧀ꦥꦢ​ꦢꦶꦠꦔꦺꦏ꧀ꦏꦏꦺꦱꦁꦏꦥꦠꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦧꦶꦱ​ꦔꦭꦩ꧀ꦩꦶ​ꦲꦸꦫꦶꦥ꧀ꦱꦶꦁ​ꦭꦸꦮꦶꦃ​ꦲꦥꦶꦏ꧀꧈​ ³⁶ꦲꦺꦤꦺꦁꦭꦶꦪꦤꦺ​ꦩꦼꦤꦺꦃ​ꦱꦶꦁ​ꦢꦶꦥꦺꦴꦪꦺꦴꦏ꧀ꦏꦶ​ꦭꦤ꧀ꦢꦶꦥꦼꦤ꧀ꦠꦸꦁꦔꦶ꧉​ꦱꦭꦺꦴꦏ꧀ꦏꦺꦭꦸꦮꦶꦃ​ꦤꦼꦩꦼꦤ꧀ ꦲꦮꦶꦠ꧀ꦢꦶꦧꦤ꧀ꦢ​ꦭꦤ꧀ꦢꦶꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀꧈​ ³⁷ꦲꦺꦤꦺꦁꦲꦸꦒ​ꦱꦶꦁ​ꦢꦶꦧꦤ꧀ꦢꦼꦩ꧀ꦩꦶꦮꦠꦸ​ꦱꦩ꧀ꦥꦺꦏ꧀ꦩꦠꦶ​꧈​ꦱꦭꦺꦴꦏ꧀ꦏꦺꦢꦶꦒꦿꦗꦶ​ꦢꦢꦶ​ꦭꦺꦴꦫꦺꦴ​ꦲꦥ​ꦢꦶꦥꦠꦺꦤ꧀ꦤꦶ​ꦏꦫꦺꦴ​ꦥꦼꦢꦁ꧉​ꦲꦺꦤꦺꦁꦮꦺꦴꦁꦮꦺꦴꦁ​ꦱꦶꦁ​ꦢꦶꦲꦸꦱꦶꦂ​ꦭꦸꦔ​ꦱꦁꦏꦲꦺꦴꦩꦃꦲꦺ​꧈​ꦔꦤ꧀ꦠꦶ​ꦔ꧀ꦭꦩ꧀ꦧꦿꦁ​ꦱꦏ꧀ꦥꦫꦤ꧀ꦥꦫꦤ꧀ ꦤꦩꦸꦁ​ꦔꦁꦒꦺꦴ​ꦱꦭꦶꦤ꧀ꦭꦸꦭꦁ​ꦮꦼꦢꦸꦱ꧀ ꦏꦼꦏꦸꦫꦁꦔꦤ꧀ꦥꦔꦤ꧀ ꦢꦶꦱꦁꦱꦫ​ꦭꦤ꧀ꦢꦶꦥꦶꦭꦂꦫ​꧉​ ³⁸ꦮꦺꦴꦁꦮꦺꦴꦁ​ꦲꦶꦏꦶ​ꦏꦥꦶꦏ꧀ꦏꦼꦤ꧀ꦧꦔꦼꦠ꧀ꦏꦁꦒꦺꦴ​ꦢꦺꦴꦚ​ꦲꦶꦏꦶ​꧉​ꦥꦢ​ꦔ꧀ꦭꦩ꧀ꦧꦿꦁ​ꦫꦤꦫꦺꦤꦺ​ꦤꦁꦮꦸꦱ꧀ꦠꦺꦤ꧀ꦭꦤ꧀ꦒꦸꦤꦸꦁꦒꦸꦤꦸꦁ​꧉​ꦥꦢ​ꦩꦁꦒꦺꦴꦤ꧀ꦤꦁꦒꦸꦮꦒꦸꦮ​ꦭꦤ꧀ꦭꦺꦴꦮꦺꦴꦔꦤ꧀ꦭꦺꦴꦮꦺꦴꦔꦤ꧀ꦤꦺꦧꦸꦩꦶ​꧉​

³⁹꧋ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁꦮꦺꦴꦁ​ꦏꦸꦮꦶ​ꦏꦧꦺꦃ​ꦥꦽꦕꦪ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦤꦸꦭꦸꦁꦔꦶ​ꦭꦤ꧀ꦲꦩ꧀ꦧꦼꦂꦏꦃꦲꦶ​ꦮꦺꦴꦁꦮꦺꦴꦁ​ꦏꦸꦮꦶ​ꦏꦁꦒꦺꦴ​ꦔꦼꦠꦺꦴꦏ꧀ꦏꦏꦺꦤꦺꦏ꧀ꦢꦺꦏ꧀ꦤꦺꦊꦒ​꧉​ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦩꦼꦏ꧀ꦱ​ꦮꦺꦴꦁꦮꦺꦴꦁ​ꦲꦶꦏꦶ​ꦢꦸꦫꦸꦁ​ꦧꦶꦱ​ꦤꦩ꧀ꦥ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦁ​ꦱꦏ꧀ꦗꦼꦫꦺꦴꦤꦺꦥꦽꦗꦚ꧀ꦗꦶꦪꦤ꧀ꦱꦶꦁ​ꦲꦚꦂ​꧈​ꦪꦏꦸꦮꦶ​꧈​ꦤꦺꦏ꧀ꦏꦿꦶꦱ꧀ꦡꦸꦱ꧀ꦧꦏꦭ꧀ꦩꦠꦶ​ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦏꦧꦺꦃ​ꦩꦤꦸꦁꦱ​꧉​ ⁴⁰ꦏꦼꦤꦺꦁꦲꦥ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦺꦴꦏ꧀ꦲꦺꦴꦫ​ꦔ꧀ꦭꦶꦭꦤꦶ​ꦮꦺꦴꦁꦮꦺꦴꦁ​ꦲꦶꦏꦶ​ꦏꦮꦶꦠ꧀​ꦩ꧀ꦧꦶꦪꦺꦤ꧀ꦤꦩ꧀ꦥ​ꦥꦤꦼꦧꦸꦱ꧀ꦱꦺ​ꦢꦺꦴꦱ​ꦏꦪ​ꦱꦶꦁ​ꦮꦶꦱ꧀ꦢꦶꦗꦚ꧀ꦗꦶ?ꦗꦭꦂꦫꦤ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦮꦶꦱ꧀​ꦤ꧀ꦢꦸꦮꦺꦤ꧀ꦤꦶ​ꦒꦒꦱ꧀ꦱꦤ꧀ꦱꦶꦁ​ꦭꦸꦮꦶꦃ​ꦲꦥꦶꦏ꧀ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦪꦏꦸꦮꦶ​꧈​ꦏꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦶꦱ​ꦧꦉꦁ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺꦤꦩ꧀ꦥ​ꦥꦔꦥꦸꦫ​ꦱꦁꦏꦢꦺꦴꦱ​ꦱꦏ꧀ꦏꦧꦺꦃꦲꦺ꧈​ꦱꦸꦥꦪ​ꦧꦶꦱ​ꦥꦤ꧀ꦠꦼꦱ꧀ꦩꦫ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

↑ ↑ ↑

← ꧇​꧑꧐꧇​

꧇​꧑꧒꧇​ →