ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦆꦧꦿꦤꦶ/5

 

꧇​꧕꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦤꦺꦏ꧀ꦲꦶꦩꦩ꧀ꦒꦼꦢꦺꦏꦸꦮꦶ​ꦏꦥꦶꦭꦶꦃ​ꦱꦁꦏꦠꦼꦔꦃꦲꦺ​ꦩꦤꦸꦁꦱ​꧈​ꦱꦸꦥꦪ​ꦢꦢꦶ​ꦮꦏꦶꦭ꧀ꦭꦺ​ꦩꦤꦸꦁꦱ​ꦤꦁꦔꦉꦥ꧀ꦥꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦏ꧀ꦤꦺꦱꦶꦁ​ꦏꦸꦢꦸ​ꦩꦱꦿꦃꦲꦏꦺꦥꦮꦺꦃꦲꦺ​ꦭꦤ꧀ꦲꦸꦒ​ꦏꦸꦂꦧꦤ꧀ꦏꦺꦮꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦏꦁꦒꦺꦴ​ꦥꦔꦥꦸꦫꦤꦺ​ꦢꦺꦴꦱ​꧉​ ²ꦭꦤ꧀ꦗꦭꦂꦫꦤ꧀ꦢꦺꦏ꧀ꦤꦺꦢꦺꦮꦺꦔꦭꦩ꧀ꦩꦶ​ꦱꦏ꧀ꦮꦼꦂꦤꦤꦺ​ꦏꦫꦶꦁꦏꦶꦃꦲꦤ꧀ ꦢꦺꦏ꧀ꦤꦺꦪ​ꦧꦶꦱ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦭꦱ꧀ꦱꦤ꧀ꦭꦤ꧀ꦏꦼꦱꦧꦂꦫꦤ꧀ꦩꦫꦁ​ꦮꦺꦴꦁ​ꦱꦶꦁ​ꦏ꧀ꦭꦺꦫꦸ​ꦭꦤ꧀ꦢꦸꦫꦸꦁ​ꦢꦸꦤꦸꦁ꧉​ ³ꦲꦸꦒ​꧈​ꦗꦭꦂꦫꦤ꧀ꦢꦺꦏ꧀ꦤꦺꦢꦺꦮꦺꦲꦺꦴꦏꦺꦃꦏꦫꦶꦁꦏꦶꦲꦤ꧀ꦤꦺ꧈​ꦩꦸꦭꦤꦺ​꧈​ꦤꦺꦏ꧀ꦢꦺꦏ꧀ꦤꦺꦩꦱꦿꦃꦲꦏꦺꦏꦸꦂꦧꦤ꧀ꦏꦺꦮꦤ꧀ ꦏꦸꦮꦶ​ꦲꦺꦴꦫ​ꦤꦩꦸꦁ​ꦏꦁꦒꦺꦴ​ꦥꦔꦥꦸꦫꦤꦺ​ꦢꦺꦴꦱꦤꦺ​ꦧꦁꦱꦤꦺ​꧈​ꦤꦁꦔꦶꦁ​ꦲꦸꦒ​ꦏꦁꦒꦺꦴ​ꦥꦔꦥꦸꦫꦤꦺ​ꦢꦺꦴꦱꦤꦺ​ꦢꦺꦏ꧀ꦤꦺꦢꦺꦮꦺꦲꦩ꧀ꦧꦫꦁ​꧉​ ⁴ꦏꦼꦗꦧ​ꦱꦁꦏꦏꦸꦮꦶ​꧈​ ꦲꦺꦴꦫ​ꦲꦺꦤꦺꦁꦮꦺꦴꦁ​ꦧꦶꦱ​ꦢꦢꦶ​ꦲꦶꦩꦩ꧀ꦒꦼꦢꦺꦱꦁꦏꦏꦼꦏꦉꦥ꧀ꦥꦤ꧀ꦤꦺ​ꦢꦺꦮꦺ꧈​ꦲꦺꦴꦫ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦶꦭꦶꦃ​ꦭꦤ꧀ꦩꦁꦒꦶꦭ꧀ꦮꦺꦴꦁ​ꦩꦸꦁꦒꦃ​ꦥꦁꦏꦠ꧀ꦏꦸꦮꦶ​꧈​ꦲꦺꦴꦫ​ꦧꦺꦢ​ꦏꦪ​ꦲꦶꦩꦩ꧀ꦒꦼꦢꦺꦄꦫꦺꦴꦤ꧀꧈​

⁵꧋ꦩꦼꦁꦏꦺꦴꦤꦺꦴ​ꦲꦸꦒ​ꦏꦿꦶꦱ꧀ꦡꦸꦱ꧀ ꦢꦺꦏ꧀ꦤꦺꦲꦺꦴꦫ​ꦔꦁꦏꦠ꧀ꦢꦺꦏ꧀ꦤꦺꦢꦺꦮꦺꦢꦢꦶ​ꦲꦶꦩꦩ꧀ꦒꦼꦢꦺ꧈​ꦲꦺꦴꦫ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦱꦶꦁ​ꦩꦶꦭꦶꦃ​ꦢꦺꦏ꧀ꦤꦺ꧉​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​:

“ꦏꦺꦴꦮꦺ​ꦭꦤ꧀ꦏꦺꦴꦮꦺ​ꦢꦺꦮꦺꦢꦢꦶ​ꦲꦤꦏ꧀ꦏꦸ​꧉​
ꦲꦶꦁ​ꦢꦶꦤ​ꦲꦶꦏꦶ​ꦲꦏꦸ​ꦤꦼꦠꦼꦥ꧀ꦥꦏꦺꦤꦁꦔꦉꦥ꧀ꦥꦺ​ꦗꦒꦠ꧀
ꦤꦺꦏ꧀ꦏꦺꦴꦮꦺ​ꦢꦢꦶ​ꦲꦤꦏ꧀ꦏꦸ​ꦱꦶꦁ​ꦔ꧀ꦮꦱꦤꦶ​ꦱꦼꦩ꧀ꦧꦫꦁ​꧉​”

⁶ꦭꦤ꧀ꦤꦁꦲꦪꦠ꧀ꦭꦶꦪꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁꦔꦺꦤꦺ​:

“ꦏꦺꦴꦮꦺ​ꦱ꧀ꦭꦮꦱ꧀ꦭꦮꦱ꧀ꦱꦺꦧꦏꦭ꧀ꦢꦢꦶ​ꦲꦶꦩꦩ꧀
ꦠꦸꦁꦒꦭ꧀ꦭꦺ​ꦏꦫꦺꦴ​ꦲꦶꦩꦩ꧀ꦩꦺꦭ꧀ꦏꦶꦱꦼꦢꦺꦏ꧀꧈​”

⁷꧋ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦔꦼꦂꦠꦶ​ꦢꦺꦮꦺꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ ꦢꦺꦴꦁꦔꦺꦢꦺꦏ꧀ꦤꦺꦲꦶꦗꦶꦏ꧀ꦤꦁꦗꦒꦠ꧀ꦏꦺꦤꦺ​꧈​ꦤ꧀ꦢꦺꦴꦁꦔꦭꦤ꧀ꦚꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦫꦺꦴ​ꦱꦩ꧀ꦧꦠ꧀ꦭꦤ꧀ꦤꦔꦶꦱ꧀ ꦲꦮꦶꦠ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦔ꧀ꦭꦸꦮꦂꦫꦶ​ꦢꦺꦏ꧀ꦤꦺꦱꦁꦏꦠꦔꦤ꧀ꦤꦺ​ꦮꦺꦴꦁꦮꦺꦴꦁ​ꦱꦶꦁ​ꦲꦉꦥ꧀ꦩꦠꦺꦤ꧀ꦤꦶ​ꦢꦺꦏ꧀ꦤꦺ꧉​ꦭꦤ꧀ꦗꦭꦂꦫꦤ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦔꦗꦺꦤ꧀ꦤꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦱꦏ꧀ꦏꦧꦺꦃꦲꦺꦏꦁꦒꦺꦴ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦩꦸꦭꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦤꦩ꧀ꦥ​ꦥꦤ꧀ꦢꦺꦴꦔꦤꦺ​ꦢꦺꦏ꧀ꦤꦺ꧉​ꦩꦸꦁ​ꦮꦲꦺ​꧈​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦺꦴꦫ​ꦔꦭꦁꦔꦭꦁꦔꦶꦢꦺꦏ꧀ꦤꦺꦢꦶꦥꦠꦺꦤ꧀ꦤꦶ​ꦮꦺꦴꦁ​꧈​ꦤꦁꦔꦶꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦼꦏꦺꦏ꧀ꦏꦶꦏꦼꦏꦸꦮꦠ꧀ꦠꦤ꧀ꦩꦫꦁ​ꦢꦺꦏ꧀ꦤꦺ꧈​ꦱꦸꦥꦪ​ꦏꦸꦮꦠ꧀​ꦔ꧀ꦭꦏꦺꦴꦤ꧀ꦤꦶ​ꦥꦠꦶ​ꦏꦁꦒꦺꦴ​ꦤꦼꦧꦸꦱ꧀ꦢꦺꦴꦱꦤꦺ​ꦲꦮꦏ꧀ꦏꦺ​ꦢꦺꦮꦺ꧉​ ⁸ꦥꦚ꧀ꦕꦺꦤ꧀ꦧꦼꦤꦼꦂ​ꦤꦺꦏ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦮꦶ​ꦲꦤꦏ꧀ꦏꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦱꦼꦤꦗꦤ꧀ꦔꦺꦴꦤꦺꦴ​꧈​ꦢꦺꦏ꧀ꦤꦺꦩꦭꦃ​ꦩꦶꦭꦶꦃ​ꦤꦸꦫꦸꦠ꧀ꦠꦶ​ꦏꦼꦏꦉꦥ꧀ꦥꦤ꧀ꦤꦺ​ꦭꦤ꧀ꦏꦺꦴꦁꦏꦺꦴꦤ꧀ꦤꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦱꦸꦥꦪ​ꦧꦶꦱ​ꦚ꧀ꦭꦩꦼꦠ꧀ꦠꦏꦺꦲꦮꦏ꧀ꦏꦺ​ꦢꦺꦮꦺ꧉​ꦩꦼꦁꦏꦺꦴꦤꦺꦴ​ꦏꦸꦮꦶ​ꦢꦺꦏ꧀ꦤꦺꦧꦶꦱ​ꦔꦿꦱꦏ꧀ꦏꦏꦺꦲꦥ​ꦠꦼꦒꦼꦱ꧀ꦱꦺ​ꦩꦤꦸꦠ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦲꦮꦶꦠ꧀ꦢꦺꦏ꧀ꦤꦺꦪ​ꦔ꧀ꦭꦏꦺꦴꦤ꧀ꦤꦶ​ꦏꦱꦁꦱꦫꦤ꧀ꦠꦼꦤꦤ꧀꧈​ ⁹ꦩꦸꦭꦤꦺ​꧈​ꦱꦏ꧀ꦮꦶꦱ꧀ꦱꦺ​ꦒꦸꦱ꧀ꦠꦶ​ꦪꦺꦯꦸꦱ꧀​ꦔ꧀ꦭꦏꦺꦴꦤ꧀ꦤꦶ​ꦏꦸꦮꦶ​ꦏꦧꦺꦃ​꧈​ꦢꦺꦏ꧀ꦤꦺꦢꦢꦶ​ꦱꦩ꧀ꦥꦸꦂꦤ​꧈​ꦲꦺꦴꦫ​ꦲꦺꦤꦺꦁꦏꦼꦏꦸꦫꦁꦔꦤ꧀ꦤꦺ​ꦲꦥꦲꦥ​꧉​ꦩꦸꦭꦤꦺ​ꦢꦺꦏ꧀ꦤꦺꦧꦶꦱ​ꦔꦼꦏꦺꦏ꧀ꦏꦶꦏꦼꦱ꧀ꦭꦩꦼꦠ꧀ꦠꦤ꧀ꦭꦁꦒꦼꦁ​ꦩꦫꦁ​ꦏꦧꦺꦃ​ꦮꦺꦴꦁ​ꦱꦶꦁ​ꦥꦢ​ꦩꦤꦸꦠ꧀ꦩꦫꦁ​ꦢꦺꦏ꧀ꦤꦺ꧉​ ¹⁰ꦒꦸꦱ꧀ꦠꦶ​ꦪꦺꦯꦸꦱ꧀​ꦤ꧀ꦢꦸꦮꦺꦤ꧀ꦤꦶ​ꦏ꧀ꦮꦱ​ꦏꦸꦮꦶ​꧈​ꦲꦮꦶꦠ꧀ꦢꦺꦏ꧀ꦤꦺꦢꦶꦢꦢꦺꦏ꧀ꦏꦏꦺꦲꦶꦩꦩ꧀ꦒꦼꦢꦺꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦲꦶꦩꦩ꧀ꦒꦼꦢꦺꦩꦺꦭ꧀ꦏꦶꦱꦼꦢꦺꦏ꧀꧈​

꧋ꦥꦼꦁꦔꦺꦭꦶꦁꦔꦺꦭꦶꦁ​ꦱꦸꦥꦪ​ꦲꦗ​ꦱꦩ꧀ꦥꦺꦏ꧀ꦧꦭꦶꦏ꧀ꦩꦼꦤꦺꦃ​ꦲꦶꦁ​ꦢꦺꦴꦱ​꧉​

¹¹꧋ꦥꦫ​ꦱꦼꦢꦸꦭꦸꦂ​꧈​ꦥꦚ꧀ꦕꦺꦤ꧀ ꦧꦧ꧀ꦏꦿꦶꦱ꧀ꦡꦸꦱ꧀ꦱꦶꦁ​ꦢꦢꦶ​ꦲꦶꦩꦩ꧀ꦒꦼꦢꦺ​ꦏꦁꦒꦺꦴ​ꦲꦮꦏ꧀ꦏꦺ​ꦢꦺꦮꦺꦏꦸꦮꦶ​ꦲꦶꦗꦶꦏ꧀ꦲꦺꦴꦏꦺꦃꦱꦶꦁ​ꦏꦸꦢꦸ​ꦠꦏ꧀ꦉꦩ꧀ꦧꦸꦏ꧀ꦏꦫꦺꦴ​ꦏꦺꦴꦮꦺ​꧉​ꦤꦁꦔꦶꦁ​ꦏꦔꦺꦭ꧀ꦭꦤ꧀ꦧꦔꦼꦠ꧀ꦲꦼꦁꦒꦺꦴꦤ꧀ꦏꦸ​ꦲꦉꦥ꧀​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦩꦫꦁ​ꦏꦺꦴꦮꦺ​꧉​ꦲꦥ​ꦠ​ꦱꦶꦁ​ꦩꦫꦏ꧀ꦏꦏꦺꦲꦔꦺꦭ꧀?ꦗꦭꦂꦫꦤ꧀ꦏꦺꦴꦮꦺ​ꦩꦭꦶꦃ​ꦩꦊꦱ꧀ꦭꦤ꧀​ꦔ꧀ꦊꦩꦼꦂꦲꦶꦁ​ꦥꦩꦶꦏꦶꦂ꧈​ꦲꦺꦴꦫ​ꦕꦼꦥꦼꦠ꧀꧈​ ¹²ꦤꦺꦏ꧀ꦢꦶꦥꦶꦏꦶꦂ​꧈​ꦱꦏ꧀ꦗꦤꦺꦭꦲꦸꦠ꧀ꦪ​ꦮꦶꦱ꧀ꦱꦸꦮꦶꦠ​ꦲꦼꦁꦒꦺꦴꦤ꧀ꦩꦸ​ꦢꦢꦶ​ꦮꦺꦴꦁ​ꦥꦽꦕꦪ​ꦭꦤ꧀ꦪ​ꦥꦤ꧀ꦠꦼꦱ꧀ꦱꦺ​ꦏꦺꦴꦮꦺ​ꦱꦲꦶꦏꦶ​ꦧꦶꦱ​ꦩꦸꦭꦁꦔꦶꦭꦶꦪꦤꦺ​꧉​ꦤꦁꦔꦶꦁ​ꦮꦸꦗꦸꦠ꧀ꦠꦺꦲꦺꦴꦫ​ꦔꦺꦴꦤꦺꦴ​꧈​ꦲꦮꦶꦠ꧀ꦠꦼꦏꦤ꧀ꦱꦼꦥꦿꦺꦤꦺ​ꦏꦺꦴꦮꦺ​ꦲꦶꦗꦶꦏ꧀ꦏꦸꦢꦸ​ꦢꦶꦧ꧀ꦭꦗꦂꦫꦶꦥꦶꦮꦸꦭꦁ​ꦱꦶꦁ​ꦮꦶꦮꦶꦠ꧀ꦠꦤ꧀꧈​ꦏꦺꦴꦮꦺ​ꦲꦶꦗꦶꦏ꧀ꦏꦪ​ꦧꦺꦴꦕꦃ​ꦕꦶꦭꦶꦏ꧀ꦔꦺꦴꦤꦺꦴ​꧈​ꦱꦶꦁ​ꦔꦺꦴꦩ꧀ꦧꦺ​ꦩꦺꦂꦏꦶ꧈​ꦢꦸꦫꦸꦁ​ꦏꦸꦮꦠ꧀ꦏꦫꦺꦴ​ꦥꦔꦤ꧀ꦱꦶꦁ​ꦲꦠꦺꦴꦱ꧀꧈​ ¹³ꦥꦫ​ꦱꦼꦢꦸꦭꦸꦂ​꧈​ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦠꦏ꧀ꦥꦢꦏ꧀ꦏꦏꦺꦏꦫꦺꦴ​ꦧꦺꦴꦕꦃ​ꦕꦶꦭꦶꦏ꧀?ꦗꦭꦂꦫꦤ꧀ꦏꦺꦴꦮꦺ​ꦢꦸꦫꦸꦁ​ꦔꦼꦂꦠꦶ​ꦧꦺꦢꦤꦺ​ꦧꦼꦤꦼꦂꦏ꧀ꦭꦺꦫꦸ꧈​ꦲꦭ​ꦭꦤ꧀ꦧꦼꦕꦶꦏ꧀꧈​ꦢꦢꦶꦤꦺ​ꦲꦶꦗꦶꦏ꧀ꦏꦪ​ꦧꦺꦴꦕꦃ​ꦕꦶꦭꦶꦏ꧀ꦱꦶꦁ​ꦲꦶꦗꦶꦏ꧀ꦔꦺꦴꦩ꧀ꦧꦺ​ꦩꦺꦂꦏꦶ꧈​ꦢꦸꦫꦸꦁ​ꦔꦼꦂꦠꦶ​ꦲꦥ​ꦱꦶꦁ​ꦢꦶꦲꦫꦤ꧀ꦤꦶ​ꦲꦭ​ꦭꦤ꧀ꦧꦼꦕꦶꦏ꧀꧈​ ¹⁴ꦤꦁꦔꦶꦁ​ꦮꦺꦴꦁ​ꦱꦶꦁ​ꦮꦶꦱ꧀ꦢꦶꦮꦱ​ꦏꦸꦮꦶ​ꦏꦸꦮꦠ꧀ꦏꦫꦺꦴ​ꦥꦔꦤ꧀ꦱꦶꦁ​ꦲꦠꦺꦴꦱ꧀ ꦠꦼꦒꦼꦱ꧀ꦱꦺ​꧈​ꦮꦶꦱ꧀ꦔꦿꦱꦏ꧀ꦏꦏꦺꦭꦤ꧀ꦧꦶꦱ​ꦩ꧀ꦧꦺꦢꦏ꧀​ꦩ꧀ꦧꦺꦢꦏ꧀ꦏꦏꦺꦲꦭ​ꦭꦤ꧀ꦧꦼꦕꦶꦏ꧀꧈​

↑ ↑ ↑

← ꧇​꧔꧇​

꧇​꧖꧇​ →