ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦪꦏꦺꦴꦧꦸꦱ꧀/3

꧋ꦲꦶꦭꦠ꧀ꦠꦺ​ꦩꦤꦸꦁꦱ​꧉​

꧇​꧓꧇​ ¹꧋ꦥꦫ​ꦱꦼꦢꦸꦭꦸꦂ​꧈​ꦤꦁꦠꦼꦔꦃꦩꦸ​ꦲꦗ​ꦱꦼꦢꦸꦭꦸꦂ​ꦲꦺꦴꦏꦺꦃꦲꦺꦴꦏꦺꦃꦱꦶꦁ​ꦏꦼꦥꦺꦔꦶꦤ꧀ꦢꦢꦶ​ꦒꦸꦫꦸ​꧈​ꦲꦮꦶꦠ꧀ꦏꦺꦴꦮꦺ​ꦏꦸꦢꦸ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦧꦏꦭ꧀ꦔꦿꦸꦠꦸꦲꦮꦏ꧀ꦏꦺ​ꦢꦺꦮꦺꦲꦶꦏꦶ​ꦱꦶꦁ​ꦢꦢꦶ​ꦒꦸꦫꦸ​ꦭꦸꦮꦶꦃ​ꦭꦤꦁꦠꦼꦤꦶꦩ꧀ꦧꦁꦮꦺꦴꦁꦮꦺꦴꦁ​ꦭꦶꦪꦤꦺ​꧉​ ²ꦲꦏꦸ​ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​ꦗꦭꦂꦫꦤ꧀ꦲꦮꦏ꧀ꦏꦺ​ꦢꦺꦮꦺꦏꦧꦺꦃ​ꦏꦼꦉꦥ꧀​ꦔ꧀ꦒꦮꦺ​ꦏ꧀ꦭꦺꦫꦸ​ꦏꦫꦺꦴ​ꦠꦼꦩ꧀ꦧꦸꦁꦔꦺ​ꦲꦮꦏ꧀ꦏꦺ​ꦢꦺꦮꦺ꧉​ꦮꦺꦴꦁ​ꦱꦶꦁ​ꦲꦺꦴꦫ​ꦠꦲꦸ​ꦔ꧀ꦒꦮꦺ​ꦏ꧀ꦭꦺꦫꦸ​ꦏꦫꦺꦴ​ꦠꦼꦩ꧀ꦧꦸꦁꦔꦺ​ꦏꦸꦮꦶ​ꦗꦤ꧀ꦮꦺꦴꦁ​ꦱꦶꦁ​ꦱꦩ꧀ꦥꦸꦂꦤ​ꦠꦼꦤꦤ꧀꧈​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦥꦚ꧀ꦕꦺꦤ꧀ꦮꦶꦱ꧀ꦧꦶꦱ​ꦤꦠ​ꦏꦉꦥ꧀ꦥꦺ​ꦲꦮꦏ꧀ꦏꦺ​꧉​ ³ꦲꦏꦸ​ꦲꦉꦥ꧀​ꦔ꧀ꦒꦩ꧀ꦧꦂꦫꦏꦺꦱꦶꦁ​ꦠꦏ꧀ꦲꦺꦴꦩꦺꦴꦁ​ꦲꦶꦏꦶ​꧉​ꦢꦼꦭꦺꦴꦏ꧀ꦏꦼꦤ꧀ꦗꦫꦤ꧀ꦏꦲꦺ​:ꦤꦺꦏ꧀ꦮꦶꦱ꧀ꦢꦶꦥꦱꦁ​ꦏꦼꦤ꧀ꦢꦭ꧀ꦭꦶꦕꦁꦏꦼꦩ꧀ꦩꦺ​꧈​ꦗꦫꦤ꧀ꦤꦺ​ꦩꦤꦸꦠ꧀ꦏꦉꦥ꧀ꦥꦺ​ꦲꦮꦏ꧀ꦏꦺ​ꦢꦺꦮꦺ꧉​ ⁴ꦏꦥꦭ꧀ꦏꦲꦺ​ꦪ​ꦔꦺꦴꦤꦺꦴ​:ꦱꦼꦤꦗꦤ꧀ꦒꦼꦢꦺꦧꦔꦼꦠ꧀ꦭꦤ꧀ꦢꦶꦱꦸꦫꦸꦁ​ꦲꦔꦶꦤ꧀ꦧꦤ꧀ꦠꦼꦂ​꧈​ꦤꦁꦔꦶꦁ​ꦱꦶꦁ​ ꦔꦺꦁꦒꦏ꧀ꦔꦺꦁꦒꦺꦴꦏ꧀ꦏꦏꦺꦏꦥꦭ꧀ꦭꦺ​ꦤꦩꦸꦁ​ꦏꦼꦩꦸꦢꦶꦤꦺꦱꦶꦁ​ꦕꦶꦭꦶꦏ꧀ꦧꦔꦼꦠ꧀ ꦩꦤꦸꦠ꧀ꦏꦉꦥ꧀ꦥꦺ​ꦱꦶꦁ​ꦔ꧀ꦭꦏꦺꦴꦏ꧀ꦏꦏꦺ꧉​ ⁵ꦥꦫ​ꦱꦼꦢꦸꦭꦸꦂ​꧈​ꦲꦶꦭꦠ꧀ꦠꦺ​ꦩꦤꦸꦁꦱ​ꦪ​ꦏꦪ​ꦔꦺꦴꦤꦺꦴ​:ꦱꦼꦤꦗꦤ꧀ꦕꦶꦭꦶꦏ꧀ ꦤꦁꦔꦶꦁ​ꦧꦶꦱ​ꦔꦼꦠꦺꦴꦏ꧀ꦏꦏꦺꦉꦩ꧀ꦧꦸꦏ꧀ꦏꦤ꧀ꦱꦶꦁ​ꦒꦼꦢꦺꦒꦼꦢꦺ꧉​

꧋ꦢꦶꦥꦶꦏꦶꦂ​ꦠ​꧈​ꦒꦼꦤꦶ​ꦱꦏ꧀ꦲꦶꦭꦠ꧀ꦮꦲꦺ​ꦧꦶꦱ​ꦔꦺꦴꦧꦺꦴꦁ​ꦲꦭꦱ꧀ꦒꦼꦢꦺ꧉​ ⁶ꦲꦶꦭꦠ꧀ꦠꦺ​ꦩꦤꦸꦁꦱ​ꦏꦸꦮꦶ​ꦪ​ꦏꦪ​ꦒꦼꦤꦶ​꧈​ꦱꦼꦤꦗꦤ꧀ꦕꦶꦭꦶꦏ꧀ꦧꦶꦱ​ꦤꦼꦏꦏ꧀ꦏꦏꦺꦏꦫꦸꦱꦏ꧀ꦏꦤ꧀ꦒꦼꦢꦺ꧉​ꦲꦶꦭꦠ꧀ꦏꦸꦮꦶ​ꦮꦶꦮꦶꦠ꧀ꦠꦤ꧀ꦤꦺ​ꦱꦏ꧀ꦮꦼꦂꦤꦤꦺ​ꦲꦭ​꧉​ꦭꦤ꧀ꦗꦭꦂꦫꦤ꧀ꦲꦶꦭꦠ꧀ꦏꦸꦮꦶ​ꦤꦁꦲꦮꦏ꧀ ꦩꦸꦭꦤꦺ​ꦱꦏ꧀ꦲꦮꦏ꧀ꦏꦧꦺꦃ​ꦧꦶꦱ​ꦏꦼꦠꦸꦭꦂꦫꦤ꧀ ꦩꦫꦏ꧀ꦏꦏꦺꦮꦺꦴꦁꦔꦺ​ꦲꦸꦒ​ꦢꦢꦶ​ꦲꦭ​ꦭꦤ꧀ꦱꦁꦱꦫ​ꦱ꧀ꦭꦮꦱ꧀ꦱꦺꦲꦸꦫꦶꦥ꧀ ꦲꦮꦶꦠ꧀ꦲꦶꦭꦠ꧀ꦏꦸꦮꦶ​ꦢꦶꦲꦺꦴꦧꦺꦴꦁꦔꦺꦴꦧꦺꦴꦁꦔꦶꦱꦁꦏꦤꦼꦫꦏ꧉​ ⁷ꦢꦶꦥꦶꦏꦶꦂ​ꦥꦫ​ꦱꦼꦢꦸꦭꦸꦂ​꧈​ꦩꦤꦸꦁꦱ​ꦮꦶꦱ꧀ꦧꦶꦱ​ꦤꦼꦭꦸꦏ꧀ꦏꦏꦺꦏꦺꦮꦤ꧀ꦏꦺꦮꦤ꧀ꦱꦶꦁ​ꦒꦭꦏ꧀ ꦩꦤꦸꦏ꧀ꦩꦤꦸꦏ꧀ ꦏꦺꦮꦤ꧀ꦏꦺꦮꦤ꧀ꦱꦶꦁ​ꦲꦩ꧀ꦧꦿꦁꦏꦁ​ꦭꦤ꧀ꦲꦸꦒ​ꦏꦺꦮꦤ꧀ꦏꦺꦮꦤ꧀ꦤꦁꦭꦫ꧉​ ⁸ꦤꦁꦔꦶꦁꦲꦶꦭꦠ꧀ꦠꦺꦢꦺꦮꦺꦩꦤꦸꦁꦱꦲꦺꦴꦫꦧꦶꦱꦤꦼꦭꦸꦏ꧀ꦏꦏꦺ꧉​ꦲꦶꦭꦠ꧀ꦏꦸꦮꦶꦱꦏ꧀ꦮꦶꦗꦶꦤꦺꦲꦭꦱꦶꦁꦲꦺꦴꦫꦏꦼꦤꦺꦁꦢꦶꦲꦼꦤ꧀ꦢꦼꦏ꧀ ꦏꦪꦫꦕꦸꦤ꧀ꦤꦺꦲꦸꦭꦱꦶꦁꦩꦠꦺꦤ꧀ꦤꦶ꧉​ ⁹ꦲꦮꦏ꧀ꦏꦺ​ꦢꦺꦮꦺꦩꦼꦩꦸꦗꦶ​ꦒꦸꦱ꧀ꦠꦶ​ꦄꦭ꧀ꦭꦃ​ꦧꦥꦏ꧀ꦏꦺꦲꦮꦏ꧀ꦏꦺ​ꦢꦺꦮꦺꦏꦫꦺꦴ​ꦲꦶꦭꦠ꧀ꦠꦺ​ꦲꦮꦏ꧀ꦏꦺ​ꦢꦺꦮꦺ꧈​ꦤꦁꦔꦶꦁ​ꦏꦫꦺꦴ​ꦲꦶꦭꦠ꧀ꦲꦶꦏꦶ​ꦲꦮꦏ꧀ꦏꦺ​ꦢꦺꦮꦺꦲꦸꦒ​ꦩꦸꦗꦺꦏ꧀ꦏꦏꦺꦲꦭ​ꦩꦫꦁ​ꦮꦺꦴꦁ​ꦭꦶꦪꦤꦺ​ꦱꦶꦁ​ꦢꦶꦒꦮꦺ​ꦤꦸꦫꦸꦠ꧀ꦒꦩ꧀ꦧꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺ꧉​ ¹⁰ꦥꦫ​ꦱꦼꦢꦸꦭꦸꦂ​꧈​ꦏꦸꦮꦶ​ꦏ꧀ꦭꦺꦫꦸ​ꦠꦼꦤꦤ꧀:ꦭꦃ​ꦥꦩꦸꦗꦶ​ꦲꦥꦶꦏ꧀ꦭꦤ꧀ꦥꦩꦸꦗꦶ​ꦲꦭ​ꦏꦺꦴꦏ꧀ꦩꦼꦠꦸ​ꦱꦁꦏꦕꦁꦏꦼꦩ꧀ꦱꦶꦗꦶ​? ¹¹ꦲꦥ​ꦱꦸꦩꦸꦂ​ꦱꦶꦗꦶ​ꦧꦶꦱ​ꦔꦼꦠꦺꦴꦏ꧀ꦏꦏꦺꦧꦚꦸ​ꦲꦺꦤꦏ꧀ꦧꦉꦁ​ꦏꦫꦺꦴ​ꦧꦚꦸ​ꦥꦲꦶꦠ꧀? ¹²ꦲꦥ​ꦮꦶꦠ꧀ꦲꦚ꧀ꦗꦶꦂ​ꦧꦶꦱ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦎꦭꦺꦥ꦳꧀ꦭꦤ꧀ꦮꦶꦠ꧀ꦢꦽꦲꦶꦥ꦳꧀ꦧꦶꦱ​ꦔꦼꦠꦺꦴꦏ꧀ꦏꦏꦺꦮꦺꦴꦃ​ꦲꦚ꧀ꦗꦶꦂ​?ꦲꦥ​ꦱꦸꦩꦸꦂ​ꦱꦶꦁ​ꦔꦼꦠꦺꦴꦏ꧀ꦏꦏꦺꦧꦚꦸ​ꦲꦱꦶꦤ꧀ꦲꦸꦒ​ꦧꦶꦱ​ꦔꦼꦠꦺꦴꦏ꧀ꦏꦏꦺꦧꦚꦸ​ꦲꦺꦤꦏ꧀?ꦩꦼꦱ꧀ꦠꦶꦲꦺꦴꦫ​ꦠ​?

꧋ꦏꦮꦼꦫꦸꦃꦱꦶꦁ​ꦠꦼꦏꦤꦺ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​꧉​

¹³꧋ꦥꦫ​ꦱꦼꦢꦸꦭꦸꦂ​꧈​ꦤꦺꦏ꧀ꦤꦁꦠꦼꦔꦃꦩꦸ​ꦲꦺꦤꦺꦁꦮꦺꦴꦁ​ꦱꦶꦁ​ꦫꦸꦩꦁꦱ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦫꦸꦃꦭꦤ꧀ꦏꦥꦶꦤ꧀ꦠꦼꦂꦫꦤ꧀ ꦮꦺꦴꦁ​ꦏꦸꦮꦶ​ꦏꦸꦢꦸ​ꦔꦼꦠꦺꦴꦏ꧀ꦏꦏꦺꦏꦮꦼꦫꦸꦃꦲꦺꦭꦤ꧀ꦏꦥꦶꦤ꧀ꦠꦼꦂꦫꦤ꧀ꦤꦺ​ꦔꦁꦒꦺꦴ​ꦲꦸꦫꦶꦥ꧀ꦱꦶꦁ​ꦲꦥꦶꦏ꧀ꦭꦤ꧀ꦥꦤ꧀ꦠꦼꦱ꧀ꦭꦤ꧀ꦠꦸꦩꦶꦤ꧀ꦢꦏ꧀ꦏꦺ​ꦩꦫꦁ​ꦭꦶꦪꦤꦺ​ꦏꦸꦢꦸ​ꦱꦶꦁ​ꦲꦭꦸꦱ꧀꧈​ ¹⁴ꦭꦃ​ꦤꦁꦔꦶꦁ​ꦤꦺꦏ꧀ꦲꦠꦶꦩꦸ​ꦏꦼꦧꦼꦏ꧀ꦏꦫꦺꦴ​ꦫꦱ​ꦱꦼꦔꦶꦠ꧀ꦭꦤ꧀ꦩꦺꦫꦶ​ꦭꦤ꧀ꦏꦺꦴꦮꦺ​ꦤꦩꦸꦁ​ꦥꦢ​ꦩꦶꦏꦶꦂ​ꦲꦸꦫꦶꦥ꧀ꦥꦺꦢꦺꦮꦺꦢꦺꦮꦺꦔꦺꦴꦤꦺꦴ​꧈​ꦠꦶꦧꦏꦺ​ꦲꦼꦁꦒꦺꦴꦤ꧀ꦩꦸ​ꦱꦺꦴꦩ꧀ꦧꦺꦴꦁꦲꦺꦴꦫ​ꦲꦺꦤꦺꦁꦮꦸꦗꦸꦠ꧀ꦠꦺꦧ꧀ꦭꦱ꧀꧈​ꦏꦺꦴꦮꦺ​ꦤꦩꦸꦁ​ꦒꦺꦴꦫꦺꦴꦃ​꧉​ ¹⁵ꦲꦗ​ꦩꦶꦏꦶꦂ​ꦤꦺꦏ꧀ꦱꦶꦁ​ꦲꦩ꧀ꦧꦺꦴꦏ꧀ꦲꦫꦤ꧀ꦤꦶꦏꦮꦼꦫꦸꦃꦏꦸꦮꦶ​ꦠꦼꦏꦤꦺ​ꦱꦁꦏꦤ꧀ꦢꦸꦮꦸꦂ!ꦧ꧀ꦭꦱ꧀ꦲꦺꦴꦫ​!ꦏꦸꦮꦶ​ꦏꦮꦼꦫꦸꦃꦱꦏ꧀ꦕꦫꦤꦺ​ꦢꦺꦴꦚ​꧈​ꦲꦺꦴꦫ​ꦩꦼꦠꦸ​ꦱꦁꦏꦫꦺꦴꦃꦲꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧈​ꦤꦁꦔꦶꦁ​ꦱꦁꦏꦥꦶꦏꦶꦂꦫꦤ꧀ꦤꦺ​ꦱꦺꦠꦤ꧀꧈​ ¹⁶ꦲꦮꦶꦠ꧀ꦤꦺꦏ꧀ꦏꦺꦴꦮꦺ​ꦥꦢ​ꦩꦼꦩꦺꦫꦺꦤ꧀ꦭꦤ꧀ꦤꦩꦸꦁ​ꦔ꧀ꦒꦺꦴꦭꦺꦏ꧀ꦏꦼꦩꦗꦸꦮꦤ꧀ꦤꦺꦢꦺꦮꦺꦢꦺꦮꦺꦔꦺꦴꦤꦺꦴ​꧈​ꦩꦼꦱ꧀ꦠꦶꦤꦁꦠꦼꦔꦃꦩꦸ​ꦲꦸꦒ​ꦲꦺꦤꦺꦁꦊꦭꦏꦺꦴꦤ꧀ꦫꦸꦱꦸꦭꦤ꧀ꦱꦏ꧀ꦮꦼꦂꦤꦤꦺ​ꦭꦏꦸ​ꦲꦭ​꧉​ ¹⁷ꦤꦁꦔꦶꦁ​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦫꦸꦃꦱꦶꦁ​ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦏꦸꦮꦶ​ꦏꦥꦶꦁ​ꦥꦶꦱꦤ꧀ꦉꦱꦶꦏ꧀ꦲꦠꦶꦤꦺ​꧈​ꦏꦥꦶꦁ​ꦥꦶꦤ꧀ꦢꦺꦴꦤꦺꦱꦼꦤꦼꦁ​ꦫꦸꦏꦸꦤ꧀ꦭꦤ꧀ꦲꦸꦒ​ꦤ꧀ꦢꦸꦮꦺꦤ꧀ꦤꦶ​ꦮꦫꦶꦱꦤ꧀ꦤꦺꦲꦭꦸꦱ꧀ꦭꦤ꧀ꦒꦼꦊꦩ꧀ꦩꦤ꧀꧈​ꦮꦺꦴꦁ​ꦱꦶꦁ​ꦤ꧀ꦢꦸꦮꦺꦤ꧀ꦤꦶ​ꦏꦮꦼꦫꦸꦃꦱꦁꦏꦱ꧀ꦮꦂꦒ​ꦏꦸꦮꦶ​ꦒꦼꦢꦺꦏꦮꦼꦭꦱ꧀ꦱꦤ꧀ꦤꦺ​ꦭꦤ꧀ꦲꦺꦴꦏꦺꦃꦏꦧꦼꦕꦶꦏ꧀ꦏꦤ꧀ꦤꦺ​ꦩꦫꦁ​ꦭꦶꦪꦤꦺ​꧉​ꦮꦺꦴꦁ​ꦏꦪ​ꦔꦺꦴꦤꦺꦴ​ꦏꦸꦮꦶ​ꦲꦺꦴꦫ​ꦥꦶꦭꦶꦃꦱꦶꦃꦭꦤ꧀ꦲꦺꦴꦫ​ꦲꦺꦠꦺꦴꦏ꧀ꦲꦺꦠꦺꦴꦏ꧀ꦏꦤ꧀꧈​ ¹⁸ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦮꦺꦴꦁ​ꦱꦶꦁ​ꦱꦼꦤꦼꦁ​ꦫꦸꦏꦸꦤ꧀ꦏꦸꦮꦶ​ꦩꦫꦏ꧀ꦏꦏꦺꦭꦶꦪꦭꦶꦪꦤꦺ​ꦤ꧀ꦢꦸꦮꦺꦲꦪꦼꦩ꧀ꦭꦤ꧀ꦏꦸꦮꦶ​ꦧꦏꦭ꧀ꦤꦼꦏꦏ꧀ꦏꦏꦺꦏꦧꦼꦕꦶꦏ꧀ꦏꦤ꧀꧈​

↑ ↑ ↑

← ꧇​꧒꧇​

꧇​꧔꧇​ →