ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥꦫꦫꦱꦸꦭ꧀/1
꧇꧑꧇
1-2꧋ꦱꦼꦢꦸꦭꦸꦂꦏꦸꦠꦺꦪꦺꦴꦥ꦳ꦶꦭꦸꦱ꧀ ꦲꦶꦏꦶꦭꦪꦁꦏꦸꦱꦶꦁꦤꦺꦴꦩꦼꦂꦭꦺꦴꦫꦺꦴ꧉ꦤꦁꦭꦪꦁꦱꦶꦁꦤ꧀ꦢꦶꦱꦶꦏ꧀ꦲꦏꦸꦮꦶꦱ꧀ꦤꦸꦭꦶꦱ꧀ꦲꦺꦴꦏꦺꦃꦧꦧ꧀ꦥꦼꦁꦒꦮꦺꦪꦤ꧀ꦏꦸꦭꦤ꧀ꦥꦶꦮꦸꦭꦁꦔꦺꦒꦸꦱ꧀ꦠꦶꦪꦺꦯꦸꦱ꧀ ꦮꦶꦮꦶꦠ꧀ꦢꦺꦏ꧀ꦤꦺꦩꦺꦴꦭꦃꦲꦶꦚꦩ꧀ꦧꦸꦠ꧀ꦠꦠꦼꦏꦤꦺꦢꦺꦏ꧀ꦤꦺꦩꦸꦁꦒꦃꦩꦼꦤꦺꦃꦤꦁꦱ꧀ꦮꦂꦒ꧉ꦱꦏ꧀ꦢꦸꦫꦸꦁꦔꦺꦩꦸꦁꦒꦃꦩꦼꦤꦺꦃꦔꦁꦒꦺꦴꦏ꧀ꦮꦱꦤꦺꦫꦺꦴꦃꦱꦸꦕꦶ꧈ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦶꦭꦤ꧀ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦤ꧀ꦢꦶꦱꦶꦏ꧀ꦩꦫꦁꦫꦱꦸꦭ꧀ꦫꦱꦸꦭ꧀ꦭꦺꦱꦶꦁꦮꦶꦱ꧀ꦢꦶꦥꦶꦭꦶꦃ꧈ꦧꦧ꧀ꦱꦼꦩ꧀ꦧꦫꦁꦩ꧀ꦧꦫꦁꦱꦶꦁꦏꦸꦢꦸꦢꦶꦭꦏꦺꦴꦤ꧀ꦤꦶ꧉ 3ꦱꦏ꧀ꦮꦶꦱ꧀ꦱꦺꦠꦔꦶꦩꦼꦤꦺꦃꦱꦁꦏꦥꦠꦶ꧈ꦒꦸꦱ꧀ꦠꦶꦪꦺꦯꦸꦱ꧀ꦔꦺꦠꦺꦴꦏ꧀ꦥꦶꦁꦲꦺꦴꦏꦺꦃꦩꦫꦁꦥꦫꦫꦱꦸꦭ꧀ ꦥꦠꦁꦥꦸꦭꦸꦃꦢꦶꦤꦱꦸꦮꦺꦤꦺ꧉ꦏꦸꦮꦶꦏꦁꦒꦺꦴꦠꦤ꧀ꦢꦱꦶꦁꦚꦠꦠꦼꦤꦤ꧀ꦤꦺꦏ꧀ꦢꦺꦏ꧀ꦤꦺꦲꦸꦫꦶꦥ꧀꧈ꦒꦸꦱ꧀ꦠꦶꦪꦺꦯꦸꦱ꧀ꦲꦸꦒꦩꦸꦭꦁꦔꦶꦩꦫꦁꦥꦫꦫꦱꦸꦭ꧀ꦧꦧ꧀ꦏꦿꦠꦺꦴꦤꦺꦒꦸꦱ꧀ꦠꦶꦄꦭ꧀ꦭꦃ꧉ 4ꦢꦺꦴꦁꦔꦺꦒꦸꦱ꧀ꦠꦶꦪꦺꦯꦸꦱ꧀ꦲꦶꦗꦶꦏ꧀ꦕꦩ꧀ꦥꦸꦂꦏꦫꦺꦴꦥꦫꦫꦱꦸꦭ꧀ ꦢꦺꦏ꧀ꦤꦺꦩꦼꦁꦔꦶꦁꦮꦺꦴꦁꦮꦺꦴꦁꦏꦸꦮꦶꦲꦺꦴꦫꦲꦺꦤ꧀ꦠꦸꦏ꧀ꦭꦸꦔꦤꦁꦲꦼꦤ꧀ꦢꦶꦲꦼꦤ꧀ꦢꦶꦤ꧀ꦢꦶꦱꦶꦏ꧀꧈ꦒꦸꦱ꧀ꦠꦶꦪꦺꦯꦸꦱ꧀ꦔꦺꦴꦩꦺꦴꦁꦔꦺꦤꦺꦩꦫꦁꦩꦸꦫꦶꦢ꧀ꦩꦸꦫꦶꦢ꧀ꦢꦺ:“ꦏꦺꦴꦮꦺꦲꦗꦥꦢꦭꦸꦔꦱꦁꦏꦏꦸꦠꦪꦺꦫꦸꦱꦭꦺꦩ꧀ꦤ꧀ꦢꦶꦱꦶꦏ꧀ ꦤꦁꦔꦶꦁꦥꦢꦲꦼꦤ꧀ꦠꦺꦤ꧀ꦤꦤꦲꦼꦁꦒꦺꦴꦤꦺꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦤꦸꦫꦸꦠ꧀ꦠꦶꦥꦽꦗꦚ꧀ꦗꦶꦪꦤ꧀ꦤꦺꦤ꧀ꦢꦶꦱꦶꦏ꧀ ꦏꦪꦱꦶꦁꦮꦶꦱ꧀ꦠꦏ꧀ꦲꦺꦴꦩꦺꦴꦁꦔꦏꦺꦩꦫꦁꦏꦺꦴꦮꦺꦏꦲꦺ꧉ 5ꦥꦚ꧀ꦕꦺꦤ꧀ꦪꦺꦴꦲꦤꦼꦱ꧀ꦲꦩ꧀ꦧꦥ꧀ꦠꦶꦱ꧀ꦏꦺꦴꦮꦺ꧈ꦤꦁꦔꦶꦁꦤꦩꦸꦁꦏꦫꦺꦴꦧꦚꦸ꧉ꦲꦺꦴꦫꦱꦸꦮꦶꦩꦼꦤꦺꦃꦏꦺꦴꦮꦺꦧꦏꦭ꧀ꦏꦼꦧꦥ꧀ꦠꦶꦱ꧀ꦏꦫꦺꦴꦫꦺꦴꦃꦱꦸꦕꦶ꧉”
6꧋ꦲꦶꦁꦱꦏ꧀ꦮꦶꦗꦶꦤꦺꦢꦶꦤ꧈ꦢꦺꦴꦁꦔꦺꦔꦸꦩ꧀ꦥꦸꦭ꧀ꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ ꦥꦫꦫꦱꦸꦭ꧀ꦠꦼꦫꦸꦱ꧀ꦥꦢꦠꦏꦺꦴꦤ꧀ꦔꦺꦤꦺ:“ꦒꦸꦱ꧀ꦠꦶ꧈ꦲꦥꦏꦺꦴꦮꦺꦧꦏꦭ꧀ꦢꦢꦶꦫꦠꦸꦤꦺꦧꦁꦱꦆꦱꦿꦌꦭ꧀ ꦱꦸꦥꦪꦧꦁꦱꦆꦱꦿꦌꦭ꧀ꦧꦶꦱꦔ꧀ꦮꦱꦤꦶꦧꦁꦱꦭꦶꦪꦭꦶꦪꦤꦺꦩꦼꦤꦺꦃꦏꦪꦩ꧀ꦧꦶꦪꦺꦤ꧀!”
7꧋ꦒꦸꦱ꧀ꦠꦶꦪꦺꦯꦸꦱ꧀ꦱꦼꦩꦲꦸꦂ:“ꦒꦸꦱ꧀ꦠꦶꦄꦭ꧀ꦭꦃꦧꦥꦏ꧀ꦏꦸꦲꦺꦴꦫꦔ꧀ꦭꦶꦭꦤꦶꦏꦺꦴꦮꦺꦔꦼꦂꦠꦶꦧꦧ꧀ꦲꦶꦏꦸ꧉ꦢꦺꦏ꧀ꦤꦺꦢꦺꦮꦺꦱꦶꦁꦔꦫꦤ꧀ꦤꦶꦏꦥꦤ꧀ꦏꦸꦮꦶꦏ꧀ꦭꦏꦺꦴꦤ꧀꧈ 8ꦤꦁꦔꦶꦁꦏꦺꦴꦮꦺꦧꦏꦭ꧀ꦤꦩ꧀ꦥꦏꦼꦏꦸꦮꦠ꧀ꦠꦤ꧀ꦤꦺꦏ꧀ꦫꦺꦴꦃꦱꦸꦕꦶꦩꦼꦢꦸꦤ꧀ꦭꦤ꧀ꦔ꧀ꦮꦱꦤꦶꦏꦺꦴꦮꦺ꧉ꦭꦤ꧀ꦤꦺꦏ꧀ꦏꦸꦮꦶꦮꦶꦱ꧀ꦏ꧀ꦭꦏꦺꦴꦤ꧀ ꦏꦺꦴꦮꦺꦧꦏꦭ꧀ꦢꦢꦶꦱꦼꦏ꧀ꦱꦶꦏꦸꦤꦁꦏꦸꦠꦪꦺꦫꦸꦱꦭꦺꦩ꧀ ꦤꦁꦧꦮꦃꦪꦸꦢꦺꦪꦏꦧꦺꦃꦭꦤ꧀ꦤꦁꦧꦮꦃꦱꦩꦫꦶꦪꦭꦤ꧀ꦤꦁꦱꦏ꧀ꦭꦸꦩꦃꦲꦺꦧꦸꦩꦶ꧉” 9ꦱꦏ꧀ꦮꦶꦱ꧀ꦱꦺꦔꦺꦴꦩꦺꦴꦁꦔꦺꦴꦤꦺꦴꦏꦸꦮꦶꦒꦸꦱ꧀ꦠꦶꦪꦺꦯꦸꦱ꧀ꦠꦼꦫꦸꦱ꧀ꦩꦸꦁꦒꦃꦤꦁꦱ꧀ꦮꦂꦒ꧉ꦥꦫꦫꦱꦸꦭ꧀ꦥꦢꦮꦼꦫꦸꦃꦩꦸꦁꦒꦃꦲꦺꦔꦤ꧀ꦠꦶꦲꦺꦴꦫꦏꦺꦠꦺꦴꦏ꧀ ꦲꦮꦶꦠ꧀ꦠꦼꦫꦸꦱ꧀ꦏꦼꦠꦸꦠꦸꦥ꧀ꦥꦤ꧀ꦩꦺꦒ꧉
10꧋ꦢꦺꦴꦁꦔꦺꦥꦫꦫꦱꦸꦭ꧀ꦲꦶꦗꦶꦏ꧀ꦥꦢꦚꦮꦁꦤ꧀ꦢꦸꦮꦸꦂꦠꦼꦫꦸꦱ꧀ꦢꦢꦏ꧀ꦏꦤ꧀ꦲꦺꦤꦺꦁꦮꦺꦴꦁꦭꦺꦴꦫꦺꦴꦔꦁꦒꦺꦴꦱꦭꦶꦤ꧀ꦥꦸꦠꦶꦃꦔꦢꦼꦏ꧀ꦤꦁꦗꦺꦗꦺꦂꦫꦺ꧉ 11ꦮꦺꦴꦁꦭꦺꦴꦫꦺꦴꦩꦲꦸꦠꦼꦫꦸꦱ꧀ꦔꦺꦴꦩꦺꦴꦁ:“ꦲꦺꦮꦺꦴꦁꦓꦭꦶꦭꦺꦪ꧈ꦭꦃꦏꦺꦴꦮꦺꦏꦺꦴꦏ꧀ꦥꦢꦔꦢꦼꦏ꧀ꦭꦤ꧀ꦥꦢꦤ꧀ꦢꦼꦭꦺꦴꦏ꧀ꦏꦏꦺꦤꦁꦭꦔꦶꦠ꧀ꦔꦺꦴꦤꦺꦴ?ꦏꦪꦲꦼꦁꦒꦺꦴꦤ꧀ꦩꦸꦥꦢꦮꦼꦫꦸꦃꦒꦸꦱ꧀ꦠꦶꦪꦺꦯꦸꦱ꧀ꦩꦸꦁꦒꦃꦤꦁꦱ꧀ꦮꦂꦒ꧈ꦪꦔꦺꦴꦤꦺꦴꦏꦸꦮꦶꦢꦺꦏ꧀ꦤꦺꦧꦏꦭ꧀ꦧꦭꦶꦏ꧀ꦩꦼꦤꦺꦃ꧉”
12꧋ꦱꦁꦏꦒꦸꦤꦸꦁꦎꦭꦺꦥ꦳꧀ꦏꦺꦴꦤꦺꦴꦥꦫꦫꦱꦸꦭ꧀ꦠꦼꦫꦸꦱ꧀ꦧꦭꦶꦏ꧀ꦤꦁꦏꦸꦠꦪꦺꦫꦸꦱꦭꦺꦩ꧀꧈ꦏꦸꦮꦶꦏꦶꦫꦏꦶꦫꦲꦺꦤꦺꦁꦱꦏ꧀ꦏꦶꦭꦺꦴꦩꦺꦠꦼꦂ꧉ 13ꦠꦼꦏꦤ꧀ꦪꦺꦫꦸꦱꦭꦺꦩ꧀ꦠꦼꦫꦸꦱ꧀ꦥꦢꦩꦸꦁꦒꦃꦤꦁꦏꦩꦂꦤ꧀ꦢꦸꦮꦸꦂꦤꦁꦲꦺꦴꦩꦃꦱꦶꦁꦢꦶꦲꦼꦁꦒꦺꦴꦤ꧀ꦤꦶꦏꦺꦴꦤꦺꦴ꧉ꦥꦫꦫꦱꦸꦭ꧀ꦭꦺꦒꦸꦱ꧀ꦠꦶꦪꦺꦯꦸꦱ꧀ꦏꦧꦺꦃꦪꦏꦸꦮꦶ:ꦦꦺꦠꦿꦸꦱ꧀ ꦪꦺꦴꦲꦤꦼꦱ꧀ ꦪꦏꦺꦴꦧꦸꦱ꧀ ꦄꦤ꧀ꦢꦿꦺꦪꦱ꧀ ꦥ꦳ꦶꦭꦶꦥꦸꦱ꧀ ꦠꦺꦴꦩꦱ꧀ ꦧꦂꦠꦺꦴꦭꦺꦴꦩꦺꦪꦸꦱ꧀ ꦩꦠꦺꦪꦸꦱ꧀ ꦪꦏꦺꦴꦧꦸꦱ꧀ꦲꦤꦏ꧀ꦏꦺꦄꦭ꧀ꦥ꦳ꦺꦪꦸꦱ꧀ ꦱꦶꦩꦺꦴꦤ꧀ꦮꦺꦴꦁꦥꦠꦿꦶꦪꦺꦴꦠ꧀ꦭꦤ꧀ꦪꦸꦢꦱ꧀ꦲꦤꦏ꧀ꦏꦺꦪꦏꦺꦴꦧꦸꦱ꧀꧈ 14ꦥꦫꦫꦱꦸꦭ꧀ꦩꦲꦸꦲꦉꦥ꧀ꦔꦤꦏ꧀ꦏꦏꦺꦏꦸꦩ꧀ꦥꦸꦭ꧀ꦭꦤ꧀ꦥꦤ꧀ꦢꦺꦴꦔꦧꦼꦧꦉꦁꦔꦤ꧀ꦏꦫꦺꦴꦮꦺꦴꦁꦮꦺꦢꦺꦴꦏ꧀ꦮꦺꦢꦺꦴꦏ꧀ ꦲꦸꦒꦩꦫꦶꦪ꧈ꦲꦶꦧꦸꦤꦺꦒꦸꦱ꧀ꦠꦶꦪꦺꦯꦸꦱ꧀ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂꦫꦺ꧉
15꧋ꦲꦺꦴꦫꦊꦠ꧀ꦱꦸꦮꦶ꧈ꦢꦺꦴꦁꦔꦺꦥꦫꦫꦱꦸꦭ꧀ꦲꦶꦗꦶꦏ꧀ꦔꦸꦩ꧀ꦥꦸꦭ꧀ ꦏꦧꦺꦃꦲꦺꦏꦶꦫꦏꦶꦫꦲꦺꦤꦺꦁꦮꦺꦴꦁ ꦱꦠꦸꦱ꧀ꦫꦺꦴꦁꦥꦸꦭꦸꦃ꧈ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦩꦗꦸꦔꦺꦴꦩꦺꦴꦁꦔꦺꦤꦺ: 16“ꦥꦫꦱꦼꦢꦸꦭꦸꦂ꧈ꦱꦶꦁꦮꦶꦱ꧀ꦏꦼꦠꦸꦭꦶꦱ꧀ꦤꦁꦏꦶꦠꦧ꧀ ꦱꦶꦁꦮꦶꦱ꧀ꦢꦶꦲꦺꦴꦩꦺꦴꦁꦏꦫꦺꦴꦫꦺꦴꦃꦱꦸꦕꦶꦭꦤ꧀ꦠꦂꦫꦤ꧀ꦫꦠꦸꦣꦮ꦳ꦼꦢ꧀ ꦏꦸꦢꦸꦏ꧀ꦭꦏꦺꦴꦤ꧀꧈ꦤꦁꦏꦶꦠꦧ꧀ꦏꦸꦮꦶꦔꦺꦴꦩꦺꦴꦁꦔꦏꦺꦧꦧ꧀ꦪꦸꦢꦱ꧀ ꦱꦶꦁꦔꦿꦺꦮꦁꦔꦶꦮꦺꦴꦁꦮꦺꦴꦁꦱꦶꦁꦚꦼꦏꦼꦭ꧀ꦒꦸꦱ꧀ꦠꦶꦪꦺꦯꦸꦱ꧀꧈ 17ꦪꦸꦢꦱ꧀ꦏꦸꦮꦶꦠꦸꦁꦒꦭ꧀ꦭꦺꦏꦫꦺꦴꦲꦮꦏ꧀ꦏꦺꦢꦺꦮꦺ꧈ꦲꦮꦶꦠ꧀ꦢꦺꦏ꧀ꦤꦺꦮꦶꦱ꧀ꦢꦶꦥꦶꦭꦶꦃꦏꦫꦺꦴꦒꦸꦱ꧀ꦠꦶꦪꦺꦯꦸꦱ꧀ꦩꦺꦭꦸꦔꦼꦂꦗꦤ꧀ꦤꦶꦥꦼꦁꦒꦮꦺꦪꦤ꧀ꦏꦸꦲꦮꦏ꧀ꦏꦺꦢꦺꦮꦺ꧉
18꧋“ꦏꦫꦺꦴꦢꦸꦮꦶꦠ꧀ꦲꦸꦥꦃꦲꦺꦲꦭꦱꦶꦁꦢꦶꦭꦏꦺꦴꦤ꧀ꦤꦶꦩꦲꦸꦪꦸꦢꦱ꧀ꦠꦼꦫꦸꦱ꧀ꦠꦸꦏꦸꦏꦼꦧꦺꦴꦤ꧀꧈ꦤꦁꦏꦺꦴꦤꦺꦴꦢꦺꦏ꧀ꦤꦺꦩꦠꦶ꧈ꦠꦶꦧꦩꦼꦁꦏꦸꦉꦥ꧀ ꦮꦼꦠꦼꦁꦔꦺꦚ꧀ꦗꦼꦧꦿꦺꦴꦠ꧀ꦱꦩ꧀ꦥꦺꦏ꧀ꦩ꧀ꦧꦿꦺꦴꦢꦺꦴꦭ꧀ꦲꦸꦱꦸꦱ꧀ꦱꦺ꧉ 19ꦮꦺꦴꦁꦮꦺꦴꦁꦤꦁꦪꦺꦫꦸꦱꦭꦺꦩ꧀ꦥꦢꦔꦼꦂꦠꦶꦏꦧꦺꦃꦧꦧ꧀ꦲꦶꦏꦶ꧈ꦩꦸꦭꦤꦺꦏꦼꦧꦺꦴꦤꦺꦏꦸꦮꦶꦢꦶꦗꦼꦤꦼꦁꦔꦏꦺ'ꦄꦏꦺꦭ꧀ꦢꦩ'ꦠꦼꦒꦼꦱ꧀ꦱꦺ:'ꦏꦼꦧꦺꦴꦤ꧀ꦒꦼꦠꦶꦃ꧉’”
20꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ:“ꦤꦁꦏꦶꦠꦧ꧀ꦩꦱ꧀ꦩꦸꦂꦲꦺꦤꦺꦁꦠꦸꦭꦶꦱ꧀ꦱꦤ꧀ꦔꦺꦤꦺ:
‘ꦲꦺꦴꦩꦃꦲꦺꦢꦢꦶꦪꦱꦸꦮꦸꦁ꧈
ꦲꦗꦱꦩ꧀ꦥꦺꦏ꧀ꦲꦺꦤꦺꦁꦱꦶꦁꦔꦼꦁꦒꦺꦴꦤ꧀ꦤꦶ꧉’
ꦲꦸꦒꦲꦺꦤꦺꦁꦠꦸꦭꦶꦱ꧀ꦱꦤ꧀ꦭꦶꦪꦤꦺꦔꦺꦤꦺ:
'ꦧꦺꦤ꧀ꦮꦺꦴꦁꦭꦶꦪꦤꦺꦔ꧀ꦒꦼꦤ꧀ꦠꦺꦤ꧀ꦤꦶꦥꦼꦁꦒꦮꦺꦪꦤ꧀ꦏꦸ꧉’
21-22꧋“ꦩꦸꦭꦤꦺꦥꦫꦱꦼꦢꦸꦭꦸꦂ꧈ꦱꦲꦶꦏꦶꦏꦸꦢꦸꦲꦺꦤꦺꦁꦮꦺꦴꦁꦱꦶꦗꦶꦱꦶꦁꦏꦸꦢꦸꦔ꧀ꦒꦼꦤꦼꦥ꧀ꦥꦶꦢꦢꦶꦫꦱꦸꦭ꧀ꦱꦶꦁꦢꦶꦥꦶꦭꦶꦃꦏꦫꦺꦴꦒꦸꦱ꧀ꦠꦶ꧈ꦮꦺꦴꦁꦱꦶꦁꦲꦸꦒꦩꦺꦭꦸꦚꦼꦏ꧀ꦱꦺꦤ꧀ꦤꦶꦲꦼꦁꦒꦺꦴꦤꦺꦒꦸꦱ꧀ꦠꦶꦪꦺꦯꦸꦱ꧀ꦠꦔꦶꦱꦁꦏꦥꦠꦶ꧉ꦮꦺꦴꦁꦲꦶꦏꦶꦏꦸꦢꦸꦢꦶꦥꦶꦭꦶꦃꦱꦁꦏꦠꦼꦔꦃꦲꦺꦱꦼꦢꦸꦭꦸꦂꦱꦼꦢꦸꦭꦸꦂꦱꦶꦁꦏꦮꦶꦠ꧀ꦮꦶꦮꦶꦠ꧀ꦠꦤ꧀ꦤꦺꦧꦼꦧꦉꦁꦔꦤ꧀ꦏꦫꦺꦴꦲꦮꦏ꧀ꦏꦺꦢꦺꦮꦺ꧈ꦱꦸꦮꦺꦤꦺꦲꦮꦏ꧀ꦏꦺꦢꦺꦮꦺꦩꦺꦭꦸꦒꦸꦱ꧀ꦠꦶꦪꦺꦯꦸꦱ꧀ ꦮꦶꦮꦶꦠ꧀ꦢꦺꦏ꧀ꦤꦺꦢꦶꦧꦥ꧀ꦠꦶꦱ꧀ꦏꦫꦺꦴꦪꦺꦴꦲꦤꦼꦱ꧀ꦔꦤ꧀ꦠꦶꦠꦼꦏꦤ꧀ꦧꦸꦢꦭ꧀ꦭꦺꦤꦁꦱ꧀ꦮꦂꦒ꧉”
23꧋ꦮꦺꦴꦁꦮꦺꦴꦁꦱꦶꦁꦏꦸꦩ꧀ꦥꦸꦭ꧀ꦭꦤ꧀ꦩꦲꦸꦠꦼꦫꦸꦱ꧀ꦥꦢꦩꦶꦭꦶꦃꦮꦺꦴꦁꦭꦺꦴꦫꦺꦴ꧈ꦪꦏꦸꦮꦶꦪꦺꦴꦱꦺꦥ꦳꧀ ꦱꦶꦁꦲꦸꦒꦗꦼꦤꦼꦁꦔꦺꦧꦂꦱꦧꦱ꧀꧌ꦲꦸꦒꦏꦕꦼꦭꦸꦏ꧀ꦪꦸꦱ꧀ꦠꦸꦱ꧀꧍ꦭꦤ꧀ꦮꦺꦴꦁꦱꦶꦁꦭꦶꦪꦤꦺꦗꦼꦤꦼꦁꦔꦺꦩꦠꦶꦪꦱ꧀꧈ 24-25ꦮꦺꦴꦁꦮꦺꦴꦁꦠꦼꦫꦸꦱ꧀ꦥꦢꦤ꧀ꦢꦼꦢꦺꦴꦔꦩꦫꦁꦒꦸꦱ꧀ꦠꦶꦔꦺꦴꦩꦺꦴꦁꦔꦺꦤꦺ:“ꦢꦸꦃꦒꦸꦱ꧀ꦠꦶ꧈ꦏꦺꦴꦮꦺꦱꦶꦁꦩꦔꦼꦂꦠꦺꦤ꧀ꦤꦶꦲꦠꦶꦤꦺꦏꦧꦺꦃꦩꦤꦸꦁꦱ꧉ꦩꦸꦭꦤꦺꦒꦸꦱ꧀ꦠꦶ꧈ꦲꦩ꧀ꦧꦺꦴꦏ꧀ꦢꦶꦥꦶꦭꦶꦃꦱꦁꦏꦮꦺꦴꦁꦭꦺꦴꦫꦺꦴꦲꦶꦏꦶ꧈ꦱꦥꦱꦶꦁꦏꦸꦢꦸꦔ꧀ꦒꦤ꧀ꦠꦶꦪꦸꦢꦱ꧀꧈ꦲꦮꦶꦠ꧀ꦪꦸꦢꦱ꧀ꦤꦶꦁꦒꦭ꧀ꦥꦼꦁꦒꦮꦺꦪꦤ꧀ꦏꦸꦭꦤ꧀ꦭꦸꦔꦤꦁꦥꦁꦒꦺꦴꦤ꧀ꦤꦤ꧀ꦱꦶꦁꦮꦶꦱ꧀ꦢꦶꦕꦮꦶꦱ꧀ꦱꦏꦺꦏꦁꦒꦺꦴꦢꦺꦏ꧀ꦤꦺ꧉” 26ꦱꦲꦶꦏꦶꦱꦶꦁꦩꦶꦭꦶꦃꦠꦼꦫꦸꦱ꧀ꦔꦁꦒꦺꦴꦭꦺꦴꦠꦿꦺꦭꦤ꧀ꦩꦠꦶꦪꦱ꧀ꦱꦶꦁꦏꦼꦥꦶꦭꦶꦃꦢꦢꦶꦫꦱꦸꦭ꧀ꦭꦺꦒꦸꦱ꧀ꦠꦶꦪꦺꦯꦸꦱ꧀ ꦏꦁꦒꦺꦴꦔ꧀ꦒꦼꦤꦼꦥ꧀ꦥꦶꦫꦱꦸꦭ꧀ꦱꦶꦁꦫꦺꦴꦭꦱ꧀꧈
| ꧇꧒꧇ → |