ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥꦫꦫꦱꦸꦭ꧀/20

꧋ꦫꦱꦸꦭ꧀ꦦꦈꦭꦸꦱ꧀ꦭꦸꦔ​ꦤꦁꦧꦮꦃꦩꦱꦼꦢꦺꦴꦤꦶꦪꦭꦤ꧀ꦤꦼꦒꦫ​ꦒꦿꦶꦏ꧀꧈​

꧇​꧒꧐꧇​ ¹꧋ꦏꦢꦸꦁ​ꦤꦁꦏꦸꦠꦌꦥ꦳ꦺꦱꦼꦮꦶꦱ꧀ꦠꦼꦤ꧀ꦠꦽꦩ꧀ꦩꦼꦤꦺꦃ​꧈​ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦔꦸꦩ꧀ꦥꦸꦭ꧀ꦭꦏꦺꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦁꦏꦥꦱꦩꦸꦮꦤ꧀ꦏꦺꦴꦤꦺꦴ​꧉​ꦫꦱꦸꦭ꧀ꦦꦈꦭꦸꦱ꧀ꦔꦼꦏꦺꦏ꧀ꦏꦶꦥꦶꦠꦸꦠꦸꦂ​ꦲꦺꦴꦏꦺꦃꦏꦁꦒꦺꦴ​ꦔꦤ꧀ꦠꦼꦥ꧀ꦥꦏꦺꦥꦼꦔꦤ꧀ꦢꦼꦭ꧀ꦭꦺ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦠꦼꦫꦸꦱ꧀ꦥꦩꦶꦠ꧀ꦠꦤ꧀ꦲꦉꦥ꧀ꦧꦸꦢꦭ꧀ꦤꦁꦩꦱꦼꦢꦺꦴꦤꦶꦪ꧉​ ²ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀​ꦤ꧀​ꦢ꧀ꦭꦗꦃꦲꦶ​ꦥꦁꦒꦺꦴꦤꦤ꧀ꦥꦁꦒꦺꦴꦤꦤ꧀ꦠꦸꦫꦸꦠ꧀ꦩꦱꦼꦢꦺꦴꦤꦶꦪꦏꦧꦺꦃ​ꦏꦫꦺꦴ​ꦩꦶꦠꦸꦠꦸꦂꦫꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦶꦁ​ꦤꦁꦏꦺꦴꦤꦺꦴ​꧉​ꦱꦁꦏ ꦩꦱꦼꦢꦺꦴꦤꦶꦪꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦧꦸꦢꦭ꧀ꦤꦁꦤꦼꦒꦫ​ꦒꦿꦶꦏ꧀꧈​ ³ꦱꦏ꧀ꦮꦶꦱ꧀ꦱꦺꦤꦁꦏꦺꦴꦤꦺꦴꦠꦼꦭꦸꦁꦱꦱꦶꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦠꦠꦠꦠꦲꦉꦥ꧀ꦤꦁꦯꦶꦫꦶꦪ꧉​ꦭꦃꦏꦺꦴꦏ꧀ꦠꦼꦫꦸꦱ꧀ꦢꦢꦏ꧀ꦏꦤ꧀ꦏꦿꦸꦔꦸꦤꦺꦏ꧀ꦮꦺꦴꦁꦙꦸꦥꦢꦔ꧀ꦒꦮꦺꦫꦚ꧀ꦕꦩ꧀ꦩꦤ꧀ꦲꦉꦥ꧀ꦩꦠꦺꦤ꧀ꦤꦶꦢꦺꦏ꧀ꦤꦺ꧉​ꦩꦸꦭꦤꦺꦫꦱꦸꦭ꧀ꦦꦈꦭꦸꦱ꧀ꦲꦉꦥ꧀ꦧꦭꦶꦏ꧀ꦩꦼꦠꦸꦩꦱꦼꦢꦺꦴꦤꦶꦪꦮꦲꦺ꧉​ ⁴ꦫꦱꦸꦭ꧀ꦦꦈꦭꦸꦱ꧀ꦭꦸꦔꦤꦺ​ꦢꦶꦏꦚ꧀ꦕꦤꦶ​ꦏꦫꦺꦴ​ꦯꦺꦴꦥꦠꦺꦂ꧈​ꦲꦤꦏ꧀ꦏꦺ​ꦥꦶꦫꦸꦱ꧀​꧈​ꦮꦺꦴꦁ​ꦱꦁꦏꦏꦸꦠꦧꦺꦫꦺꦪ​꧉​ꦱꦶꦁ​ꦩꦺꦭꦸ​ꦲꦸꦒ​ꦄꦫꦶꦱ꧀ꦠꦂꦏꦸꦱ꧀ꦭꦤ꧀ꦯꦼꦏꦸꦤ꧀ꦢꦸꦱ꧀ꦱꦁꦏꦏꦸꦠꦠꦺꦱꦴꦭꦺꦴꦤꦶꦏꦴ꧈​ꦒꦪꦸꦱ꧀ꦱꦁꦏꦏꦸꦠꦢꦺꦂꦧꦺ​꧈​ꦠꦶꦩꦺꦴꦠꦶꦪꦸꦱ꧀ꦭꦤ꧀ꦮꦺꦴꦁ​ꦭꦺꦴꦫꦺꦴ​ꦭꦶꦪꦤꦺ​ꦱꦁꦏꦧꦮꦃꦄꦱꦶꦪ​꧈​ꦪꦏꦸꦮꦶ​ꦡꦶꦏꦶꦏꦸꦱ꧀ꦭꦤ꧀ꦠꦿꦺꦴꦥ꦳ꦶꦩꦸꦱ꧀꧈​ ⁵ꦮꦺꦴꦁꦮꦺꦴꦁ​ꦩꦲꦸ​ꦥꦢ​ꦧꦸꦢꦭ꧀​ꦤ꧀ꦢꦶꦱꦶꦏ꧀ꦭꦤ꧀ꦲꦉꦥ꧀ꦔꦼꦤ꧀ꦠꦺꦤ꧀ꦤꦶ​ꦲꦮꦏ꧀ꦏꦺ​ꦢꦺꦮꦺꦤꦁꦏꦸꦠꦠꦿꦺꦴꦮꦱ꧀꧈​ ⁶ꦱꦏ꧀ꦫꦩ꧀ꦥꦸꦁꦔꦺ​ꦫꦶꦪꦪꦫꦺꦴꦠꦶ​ꦠꦤ꧀ꦥ​ꦫꦒꦶ​ꦲꦮꦏ꧀ꦏꦺ​ꦢꦺꦮꦺꦤꦸꦩ꧀ꦥꦏ꧀ꦥꦿꦲꦸ​ꦱꦁꦏꦏꦸꦠꦥ꦳ꦶꦭꦶꦥꦶ​꧉​ꦊꦠ꧀ꦤꦼꦩ꧀ꦢꦶꦤ​ꦲꦮꦏ꧀ꦏꦺ​ꦢꦺꦮꦺꦏꦼꦠꦼꦩꦸ​ꦏꦫꦺꦴ​ꦥꦫ​ꦱꦼꦢꦸꦭꦸꦂ​ꦩꦲꦸ​ꦤꦁꦏꦸꦠꦠꦿꦺꦴꦮꦱ꧀꧈​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦤꦁꦏꦺꦴꦤꦺꦴ​ꦱꦼꦩꦶꦁꦒꦸ​ꦱꦸꦮꦺꦤꦺ​꧉​

꧋ꦤꦁꦏꦸꦠꦠꦿꦺꦴꦮꦱ꧀꧈​

⁷꧋ꦲꦶꦁ​ꦢꦶꦤ​ꦩꦶꦁꦒꦸ​ꦲꦮꦏ꧀ꦏꦺ​ꦢꦺꦮꦺꦔꦸꦩ꧀ꦥꦸꦭ꧀ꦩꦁꦔꦤ꧀ꦧꦼꦧꦉꦁꦔꦤ꧀꧈​ꦗꦭꦂꦫꦤ꧀ꦫꦱꦸꦭ꧀ꦦꦈꦭꦸꦱ꧀ꦲꦺꦱꦸꦏ꧀ꦏꦺ​ꦲꦉꦥ꧀ꦭꦸꦔ​꧈​ꦩꦸꦭꦤꦺ​ꦢꦺꦏ꧀ꦤꦺꦩꦶꦠꦸꦠꦸꦂꦫꦶ​ꦱꦩ꧀ꦥꦺꦏ꧀ꦠꦼꦔꦃ​ꦮꦼꦔꦶ​꧉​ ⁸ꦤꦁꦏꦩꦂ​ꦤ꧀ꦢꦸꦮꦸꦂꦱꦶꦁ​ꦢꦶꦲꦼꦁꦒꦺꦴ​ꦏꦸꦩ꧀ꦥꦸꦭ꧀ꦭꦤ꧀ꦲꦮꦏ꧀ꦏꦺ​ꦢꦺꦮꦺꦲꦶꦗꦶꦏ꧀ꦲꦺꦤꦺꦁꦭꦩ꧀ꦥꦸꦤꦺ​ꦱꦶꦗꦶꦭꦺꦴꦫꦺꦴꦩꦸꦫꦸꦥ꧀꧈​ ⁹ꦭꦃ​ꦲꦺꦤꦺꦁꦱꦏ꧀ꦮꦶꦗꦶꦤꦺꦧꦺꦴꦕꦃ​ꦲꦼꦤꦺꦴꦩ꧀ ꦗꦼꦤꦼꦁꦔꦺ​ꦌꦠꦶꦏꦸꦱ꧀ ꦚ꧀ꦗꦒꦺꦴꦁꦤꦁꦗꦼꦤ꧀ꦢꦺꦭ꧉​ꦗꦭꦂꦫꦤ꧀ꦫꦱꦸꦭ꧀ꦦꦈꦭꦸꦱ꧀ꦱꦶꦁ​ꦔ꧀ꦒꦮ​ꦥꦶꦠꦸꦠꦸꦂ​ꦱꦸꦮꦶꦧꦔꦼꦠ꧀ꦠꦤ꧀ꦥ​ꦭꦺꦫꦺꦤ꧀ ꦧꦺꦴꦕꦃ​ꦲꦼꦤꦺꦴꦩ꧀ꦩꦲꦸ​ꦲꦺꦴꦫ​ꦏꦸꦮꦠ꧀ꦩꦼꦭꦺꦏ꧀ꦠꦼꦫꦸꦱ꧀ꦏꦼꦠꦸꦫꦺꦴꦤ꧀ꦤꦁꦗꦼꦤ꧀ꦢꦺꦭꦱꦩ꧀ꦥꦺꦏ꧀ꦠꦶꦧ​꧈​ꦠꦼꦭꦸꦁ​ꦲꦤ꧀ꦢꦢꦸꦮꦸꦂꦫꦺ꧉​ꦏꦢꦸꦁ​ꦢꦶꦗꦸꦚ꧀ꦗꦸꦁ​ꦧꦺꦴꦕꦃꦲꦺ​ꦮꦶꦱ꧀ꦩꦠꦶ​꧉​ ¹⁰ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦩꦼꦢꦸꦤ꧀ ꦔꦿꦸꦁꦏꦼꦥ꧀ꦥꦶꦧꦺꦴꦕꦃꦲꦺ​ꦠꦼꦫꦸꦱ꧀ꦢꦶꦫꦁꦏꦸꦭ꧀ꦏꦫꦺꦴ​ꦔꦺꦴꦩꦺꦴꦁ:“ꦲꦗ​ꦥꦢ​ꦮꦼꦢꦶ​꧈​ꦧꦺꦴꦕꦃꦲꦺ​ꦲꦶꦗꦶꦏ꧀ꦲꦸꦫꦶꦥ꧀!” ¹¹ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦧꦭꦶꦏ꧀ꦩꦼꦤꦺꦃ​ꦩꦸꦁꦒꦃ​ꦭꦤ꧀ꦩꦁꦔꦤ꧀ꦧꦼꦧꦉꦁꦔꦤ꧀꧈​ꦏꦢꦸꦁ​ꦮꦶꦱ꧀ꦫꦩ꧀ꦥꦸꦁ​ꦩꦁꦔꦤ꧀ ꦫꦱꦸꦭ꧀ꦦꦈꦭꦸꦱ꧀ꦤꦼꦫꦸꦱ꧀ꦱꦏꦺꦲꦼꦁꦒꦺꦴꦤꦺ​ꦔ꧀ꦒꦮ​ꦥꦶꦠꦸꦠꦸꦂ​꧈​ꦱꦩ꧀ꦥꦺꦏ꧀ꦱꦽꦔꦺꦔꦺ​ꦚ꧀ꦗꦼꦢꦸꦭ꧀꧈​ꦢꦺꦏ꧀ꦤꦺꦠꦼꦫꦸꦱ꧀ꦧꦸꦢꦭ꧀꧈​ ¹²ꦮꦺꦴꦁꦮꦺꦴꦁ​ꦥꦢ​ꦧꦸꦔꦃ​ꦤꦺꦏ꧀ꦌꦠꦶꦏꦸꦱ꧀ꦲꦺꦴꦫ​ꦱꦶꦢ​ꦩꦠꦶ​꧉​ꦧꦺꦴꦕꦃꦲꦺ​ꦠꦼꦫꦸꦱ꧀ꦢꦶꦲꦼꦠꦼꦂꦫꦏꦺꦩꦸꦭꦶꦃ​꧉​

꧋ꦱꦁꦏꦏꦸꦠꦠꦿꦺꦴꦮꦱ꧀ꦧꦸꦢꦭ꧀ꦤꦁꦏꦸꦠꦩꦶꦭꦺꦠꦸꦱ꧀꧈​

¹³꧋ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀​ꦤ꧀ꦢꦶꦱꦶꦏ꧀ꦏꦶ​ꦤꦸꦩ꧀ꦥꦏ꧀ꦥꦿꦲꦸ​ꦧꦸꦢꦭ꧀ꦤꦁꦏꦸꦠꦄꦱꦸꦱ꧀꧈​ꦤꦁꦄꦱꦸꦱ꧀ꦫꦱꦸꦭ꧀ꦦꦈꦭꦸꦱ꧀ꦲꦉꦥ꧀ꦩꦺꦭꦸ​ꦤꦸꦩ꧀ꦥꦏ꧀ꦥꦿꦲꦸꦤꦺ​꧉​ꦫꦱꦸꦭ꧀ꦦꦈꦭꦸꦱ꧀ꦔꦺꦴꦁꦏꦺꦴꦤ꧀ꦲꦮꦏ꧀ꦏꦺ​ꦢꦺꦮꦺꦧꦸꦢꦭ꧀​ꦤ꧀ꦢꦶꦱꦶꦏ꧀ ꦗꦭꦂꦫꦤ꧀ꦢꦺꦏ꧀ꦤꦺꦱꦶꦁ​ꦧꦸꦢꦭ꧀ꦤꦁꦄꦱꦸꦱ꧀ꦲꦉꦥ꧀​ꦩ꧀ꦭꦏꦸ​ꦮꦲꦺ​꧉​ ¹⁴ꦏꦢꦸꦁ​ꦮꦶꦱ꧀ꦠꦼꦏꦤ꧀ꦄꦱꦸꦱ꧀ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦤꦸꦩ꧀ꦥꦏ꧀ꦏꦥꦭ꧀ꦭꦺ​꧉​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦏꦫꦺꦴ​ꦏꦥꦭ꧀ꦭꦺ​ꦧꦸꦢꦭ꧀ꦤꦁꦏꦸꦠꦩꦶꦠꦶꦭꦺꦤꦺ​꧉​ ¹⁵ꦱꦁꦏꦏꦤ​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦤꦸꦩ꧀ꦥꦏ꧀ꦥꦿꦲꦸ​ꦩꦼꦤꦺꦃ​ꦭꦤ꧀ꦲꦺꦱꦸꦏ꧀ꦏꦺ​ꦠꦼꦏꦤ꧀ꦔꦉꦥ꧀ꦥꦺ​ꦥꦸꦭꦑꦶꦪꦺꦴꦱ꧀꧈​ꦭꦶꦪꦤꦺ​ꦢꦶꦤ​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦔꦧꦿꦃꦤꦁꦥꦸꦭꦱꦩꦺꦴꦱ꧀ꦭꦤ꧀ꦊꦠ꧀ꦱꦼꦢꦶꦤ​ꦩꦼꦤꦺꦃ​ꦲꦮꦏ꧀ꦏꦺ​ꦢꦺꦮꦺꦠꦼꦏꦤ꧀ꦏꦸꦠꦩꦶꦭꦺꦠꦸꦱ꧀꧈​ ¹⁶ꦫꦱꦸꦭ꧀ꦦꦈꦭꦸꦱ꧀ꦪ​ꦮꦶꦱ꧀ꦩꦶꦏꦶꦂ​ꦤꦺꦏ꧀ꦲꦺꦴꦫ​ꦲꦉꦥ꧀ꦩꦩ꧀ꦥꦶꦂ​ꦤꦁꦏꦸꦠꦌꦥ꦳ꦺꦱꦼ꧈​ꦱꦸꦥꦪ​ꦲꦺꦴꦫ​ꦏꦼꦱꦸꦮꦺꦤ꧀ꦤꦁꦄꦱꦶꦪ​ꦭꦤ꧀​ꦤ꧀ꦢꦁꦧꦶꦱ​ꦠꦼꦏꦤ꧀ꦪꦺꦫꦸꦱꦭꦺꦩ꧀ ꦤꦺꦏ꧀ꦧꦶꦱ​ꦱꦏ꧀ꦢꦸꦫꦸꦁꦔꦺꦫꦶꦪꦪꦦꦤ꧀ꦠꦺꦏꦺꦴꦱ꧀ꦠ꧉​

꧋ꦫꦱꦸꦭ꧀ꦦꦈꦭꦸꦱ꧀ꦥꦩꦶꦠ꧀ꦠꦤ꧀ꦩꦫꦁ​ꦥꦶꦤꦶꦠꦸꦮꦤꦺ​ꦥꦱꦩꦸꦮꦤ꧀ꦌꦥ꦳ꦺꦱꦼ꧉​

¹⁷꧋ꦩꦸꦭꦤꦺ​ꦱꦁꦏꦩꦶꦭꦺꦠꦸꦱ꧀ꦏꦺꦴꦤꦺꦴ​ꦫꦱꦸꦭ꧀ꦦꦈꦭꦸꦱ꧀ꦏꦺꦴꦁꦏꦺꦴꦤ꧀ꦤꦤ꧀ꦮꦺꦴꦁ​ꦔꦧꦂꦫꦶ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦏꦸꦠꦌꦥ꦳ꦺꦱꦼ꧈​ꦱꦸꦥꦪ​ꦥꦢ​ꦔꦸꦩ꧀ꦥꦸꦭ꧀ꦭꦏꦺꦥꦫ​ꦥꦶꦤꦶꦠꦸꦮꦤꦺ​ꦥꦱꦩꦸꦮꦤ꧀ꦤꦁꦩꦶꦭꦺꦠꦸꦱ꧀꧈​ ¹⁸ꦱꦏ꧀ꦮꦶꦱ꧀ꦱꦺ​ꦥꦫ​ꦥꦶꦤꦶꦠꦸꦮ​ꦩꦲꦸ​ꦠꦼꦏ​꧈​ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦔꦼꦏꦺꦏ꧀ꦏꦶꦥꦶꦠꦸꦠꦸꦂ​ꦔꦺꦤꦺ​:“ꦥꦫ​ꦱꦼꦢꦸꦭꦸꦂ​꧈​ꦏꦺꦴꦮꦺ​ꦮꦼꦫꦸꦃ​ꦢꦺꦮꦺꦲꦼꦁꦒꦺꦴꦤ꧀ꦏꦸ​ꦧꦼꦧꦉꦁꦔꦤ꧀ꦏꦫꦺꦴ​ꦏꦺꦴꦮꦺ​ꦱꦸꦮꦺꦤꦺ​ꦲꦏꦸ​ꦤꦁꦠꦼꦔꦃꦩꦸ​꧈​ꦮꦶꦮꦶꦠ꧀ꦲꦏꦸ​ꦠꦼꦏ​ꦤꦁꦧꦮꦃꦄꦱꦶꦪ​꧉​ ¹⁹ꦲꦼꦁꦒꦺꦴꦤ꧀ꦏꦸ​ꦔ꧀ꦭꦢꦺꦤ꧀ꦤꦶ​ꦒꦸꦱ꧀ꦠꦶ​ꦪ​ꦠꦏ꧀ꦭꦏꦺꦴꦤ꧀ꦤꦶ​ꦏꦫꦺꦴ​ꦲꦤ꧀ꦢꦥ꧀ꦥꦱꦺꦴꦂꦭꦤ꧀ꦠꦏ꧀ꦫꦺꦮꦁꦔꦶꦤꦔꦶꦱ꧀ꦤꦔꦶꦱ꧀ꦭꦤ꧀ꦔꦭꦩ꧀ꦩꦶ​ꦏꦱꦁꦱꦫꦤ꧀ ꦗꦭꦂꦫꦤ꧀ꦱꦁꦏꦥꦔꦤꦶꦪꦪ​ꦱꦶꦁ​ꦩꦼꦠꦸ​ꦱꦁꦏꦥꦫ​ꦮꦺꦴꦁ​ꦙꦸ꧉​ ²⁰ꦱꦼꦤꦗꦤ꧀ꦔꦺꦴꦤꦺꦴ​ꦲꦏꦸ​ꦲꦺꦴꦫ​ꦠꦲꦸ​ꦩꦁꦏꦶꦂꦤꦶꦤ꧀ꦢꦏ꧀ꦏꦏꦺꦲꦥ​ꦮꦲꦺ​ꦱꦶꦁ​ꦧꦼꦕꦶꦏ꧀ꦏꦁꦒꦺꦴ​ꦏꦺꦴꦮꦺ​꧉​ꦏꦧꦺꦃ​ꦮꦶꦱ꧀ꦠꦏ꧀ꦲꦺꦴꦩꦺꦴꦁꦔꦏꦺꦭꦤ꧀ꦠꦏ꧀ꦮꦸꦭꦁꦔꦏꦺꦩꦫꦁ​ꦏꦺꦴꦮꦺ​꧈​ꦪ​ꦤꦁꦔꦉꦥ꧀ꦥꦺ​ꦮꦺꦴꦁ​ꦲꦺꦴꦏꦺꦃ꧈​ꦪ​ꦤꦁꦏꦸꦩ꧀ꦥꦸꦭ꧀ꦭꦤ꧀ꦤꦁꦲꦺꦴꦩꦃꦲꦺꦴꦩꦃꦩꦸ​꧉​ ²¹ꦪ​ꦮꦺꦴꦁ​ꦙꦸ꧈​ꦪ​ꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦠꦤ꧀ꦱꦃ​ꦠꦏ꧀ꦲꦺꦭꦶꦁꦔꦏꦺ꧈​ꦱꦸꦥꦪ​ꦥꦢ​ꦤꦶꦁꦒꦭ꧀​ꦏ꧀ꦭꦏꦸꦮꦤ꧀ꦲꦭ​ꦭꦤ꧀ꦥꦢ​ꦥꦽꦕꦪ​ꦭꦤ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ ²²ꦭꦃ​ꦱꦲꦶꦏꦶ​꧈​ꦩꦤꦸꦠ꧀ꦏꦉꦥ꧀ꦥꦺ​ꦫꦺꦴꦃ​ꦱꦸꦕꦶ​꧈​ꦲꦏꦸ​ꦏꦸꦢꦸ​ꦭꦸꦔ​ꦤꦁꦪꦺꦫꦸꦱꦭꦺꦩ꧀꧈​ꦲꦏꦸ​ꦲꦺꦴꦫ​ꦔꦼꦂꦠꦶ​ꦲꦥ​ꦱꦶꦁ​ꦧꦏꦭ꧀ꦠꦏ꧀ꦲꦭꦩ꧀ꦩꦶ​ꦤꦁꦏꦤ​꧉​ ²³ꦲꦏꦸ​ꦤꦩꦸꦁ​ꦔꦼꦂꦠꦶ​ꦤꦺꦏ꧀ꦫꦺꦴꦃ​ꦱꦸꦕꦶ​ꦮꦶꦱ꧀ꦔꦺꦭꦶꦁꦔꦏꦺꦩꦫꦁ​ꦲꦏꦸ​꧈​ꦤꦺꦏ꧀ꦤꦁꦱꦧꦼꦤ꧀ꦏꦸꦠꦲꦏꦸ​ꦧꦏꦭ꧀ ꦤꦤ꧀ꦢꦁꦮꦼꦂꦤꦮꦼꦂꦤ​ꦱꦁꦱꦫ​ꦭꦤ꧀ꦲꦏꦸ​ꦧꦏꦭ꧀ꦢꦶꦱꦼꦠꦿꦥ꧀꧈​ ²⁴ꦱꦼꦤꦗꦤ꧀ꦔꦺꦴꦤꦺꦴ​ꦲꦏꦸ​ꦲꦺꦴꦫ​ꦥꦼꦂꦢꦸꦭꦶꦧꦧ꧀ꦲꦸꦫꦶꦥ꧀ꦏꦸ​꧈​ꦗꦚ꧀ꦗꦶ​ꦲꦏꦸ​ꦧꦶꦱ​ꦤꦼꦫꦸꦱ꧀ꦱꦏꦺꦥꦼꦁꦒꦮꦺꦤꦺꦭꦤ꧀ꦔꦿꦩ꧀ꦥꦸꦁꦔꦏꦺꦏꦸꦮꦗꦶꦧ꧀ꦧꦤ꧀ꦱꦶꦁ​ꦮꦶꦱ꧀ꦢꦶꦥꦱꦿꦃꦲꦏꦺꦩꦫꦁ​ꦲꦏꦸ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ ꦪꦏꦸꦮꦶ​꧈​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​

²⁵꧋“ꦤꦁꦠꦼꦔꦃꦩꦸ​ꦲꦏꦸ​ꦪ​ꦮꦶꦱ꧀ꦔꦧꦂꦫꦏꦺꦧꦧ꧀ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦱꦲꦶꦏꦶ​ꦲꦏꦸ​ꦏꦿꦱ​ꦤꦺꦏ꧀ꦲꦏꦸ​ꦲꦺꦴꦫ​ꦧꦏꦭ꧀ꦏꦼꦥꦼꦠꦸꦏ꧀ꦩꦼꦤꦺꦃ​ꦏꦫꦺꦴ​ꦏꦺꦴꦮꦺ​ꦏꦧꦺꦃ​꧉​ ²⁶ꦩꦸꦭꦤꦺ​ꦱꦲꦶꦏꦶ​ꦲꦏꦸ​ꦔꦺꦴꦩꦺꦴꦁꦱꦏ꧀ꦧꦼꦤꦼꦂꦫꦺ​ꦩꦫꦁ​ꦏꦺꦴꦮꦺ​:ꦤꦺꦏ꧀ꦤꦁꦠꦼꦔꦃꦩꦸ​ꦲꦺꦤꦺꦁꦮꦺꦴꦁ​ꦏꦼꦱꦱꦂ​꧈​ꦏꦸꦮꦶ​ꦢꦸꦢꦸ​ꦱꦭꦃꦏꦸ​꧉​ ²⁷ꦲꦮꦶꦠ꧀ꦲꦼꦁꦒꦺꦴꦤ꧀ꦏꦸ​ꦩꦸꦭꦁꦔꦶꦏꦺꦴꦮꦺ​ꦧꦧ꧀ꦏꦼꦏꦉꦥ꧀ꦥꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦪ​ꦮꦶꦱ꧀ꦱꦏ꧀ꦒꦼꦤꦼꦥ꧀ꦥꦺ꧉​ ²⁸ꦩꦸꦭꦤꦺ​꧈​ꦥꦢ​ꦔꦠꦶꦲꦠꦶ​ꦩꦫꦁ​ꦲꦮꦏ꧀ꦩꦸ​ꦢꦺꦮꦺꦭꦤ꧀ꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦢꦶꦥꦱꦿꦃꦲꦏꦺꦩꦫꦁ​ꦏꦺꦴꦮꦺ​ꦏꦫꦺꦴ​ꦫꦺꦴꦃ​ꦱꦸꦕꦶ​꧉​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​ꦄꦭ꧀ꦭꦃ​ꦥꦢ​ꦢꦶꦠꦸꦤ꧀ꦠꦸꦤ꧀ ꦲꦮꦶꦠ꧀ꦮꦶꦱ꧀ꦢꦶꦭꦧꦸꦃꦲꦶ​ꦩꦠꦶ​ꦏꦫꦺꦴ​ꦒꦸꦱ꧀ꦠꦶ​ꦪꦺꦯꦸꦱ꧀ꦢꦺꦮꦺ꧉​ ²⁹ꦲꦏꦸ​ꦔꦼꦂꦠꦶ​ꦤꦺꦏ꧀ꦱꦏ꧀ꦮꦶꦱ꧀ꦱꦺ​ꦲꦏꦸ​ꦭꦸꦔ​ꦧꦏꦭ꧀ꦲꦺꦤꦺꦁꦲꦱꦸ​ꦒꦭꦏ꧀ꦲꦺꦴꦏꦺꦃꦱꦶꦁ​ꦠꦼꦏ​ꦤꦁꦠꦼꦔꦃꦩꦸ​ꦭꦤ꧀ꦲꦺꦴꦫ​ꦧꦏꦭ꧀ꦔꦺꦩꦤ꧀ꦩꦫꦁ​ꦮꦼꦢꦸꦱ꧀ꦮꦼꦢꦸꦱ꧀ꦩꦲꦸ​꧉​ ³⁰ꦩꦭꦃ​ꦧꦏꦭ꧀ꦲꦺꦤꦺꦁꦮꦚ꧀ꦕꦶꦤꦺ​ꦤꦁꦠꦼꦔꦃꦩꦸ​ꦢꦺꦮꦺꦧꦏꦭ꧀ꦲꦺꦤꦺꦁꦮꦺꦴꦁ​ꦱꦶꦗꦶꦭꦺꦴꦫꦺꦴꦱꦶꦁ​ꦧꦏꦭ꧀ꦚꦶꦩ꧀ꦥꦁ​ꦱꦁꦏꦥꦶꦮꦸꦭꦁ​ꦱꦶꦁ​ꦧꦼꦤꦼꦂ​ꦭꦤ꧀ꦚꦤ꧀ꦢꦶꦁꦥꦱꦩꦸꦮꦤ꧀꧈​ ³¹ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​꧈​ꦥꦢ​ꦱꦶꦁ​ꦲꦠꦶꦲꦠꦶꦠꦼꦤꦤ꧀ꦭꦤ꧀ꦥꦢ​ꦲꦺꦭꦶꦁꦔ​ꦤꦺꦏ꧀ꦱꦩ꧀ꦥꦺꦏ꧀ꦠꦼꦭꦸꦁ​ꦠꦲꦸꦤ꧀ꦱꦸꦮꦺꦤꦺ​ꦲꦏꦸ​ꦮꦶꦱ꧀ꦩꦸꦭꦁꦔꦶꦏꦺꦴꦮꦺ​ꦱꦶꦗꦶꦱꦶꦗꦶ꧈​ꦄꦮꦤ꧀ꦮꦼꦔꦶꦲꦺꦴꦫ​ꦭꦺꦫꦺꦤ꧀ꦏꦫꦺꦴ​ꦔꦼꦠꦺꦴꦏ꧀ꦏꦏꦺꦲꦼꦭꦸꦃ​꧉​

³²꧋“ꦭꦃ​ꦱꦲꦶꦏꦶ​ꦏꦺꦴꦮꦺ​ꦠꦏ꧀ꦥꦱꦿꦃꦲꦏꦺꦩꦫꦁ​ꦏꦧꦼꦕꦶꦏ꧀ꦏꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦢꦺꦏ꧀ꦤꦺꦤ꧀ꦢꦸꦮꦺꦏ꧀ꦮꦱ​ꦧꦶꦱ​ꦔꦤ꧀ꦠꦼꦥ꧀ꦥꦏꦺꦥꦼꦔꦤ꧀ꦢꦼꦭ꧀ꦩꦸ​ꦭꦤ꧀ꦔꦼꦏꦺꦏ꧀ꦏꦶꦧꦼꦂꦏꦃ​ꦱꦶꦁ​ꦮꦶꦱ꧀ꦢꦶꦕꦮꦶꦱ꧀ꦱꦏꦺ​ꦏꦁꦒꦺꦴ​ꦥꦫ​ꦲꦸꦩꦠ꧀ꦠꦺ​꧉​ ³³ꦲꦏꦸ​ꦲꦺꦴꦫ​ꦠꦲꦸ​ꦏꦼꦥꦺꦔꦶꦤ꧀ꦤꦩ꧀ꦥ​ꦧꦤ꧀ꦢꦲꦥ​ꦱꦤ꧀ꦢꦁꦔꦤ꧀ꦱꦁꦏꦱꦥ​ꦮꦲꦺ​꧉​ ³⁴ꦏꦺꦴꦮꦺ​ꦥꦢ​ꦮꦼꦫꦸꦃ​ꦢꦺꦮꦺꦲꦼꦁꦒꦺꦴꦤ꧀ꦏꦸ​ꦔ꧀ꦒꦺꦴꦭꦺꦏ꧀ꦥꦔꦤ꧀ꦔꦁꦒꦺꦴ​ꦠꦔꦤ꧀ꦏꦸ​ꦢꦺꦮꦺ꧈​ꦏꦁꦒꦺꦴ​ꦚꦸꦏꦸꦥ꧀ꦥꦶ​ꦏꦧꦸꦠꦸꦲꦤ꧀ꦏꦸꦭꦤ꧀ꦏꦧꦸꦠꦸꦃꦲꦤ꧀ꦤꦺ​ꦏꦚ꧀ꦕꦏꦚ꧀ꦕꦏꦸ​꧉​ ³⁵ꦲꦏꦸ​ꦮꦶꦱ꧀​ꦤ꧀ꦢꦸꦢꦸꦃꦲꦏꦺꦩꦫꦁ​ꦏꦺꦴꦮꦺ​ꦔꦁꦒꦺꦴ​ꦥꦠꦿꦥ꧀ꦮꦼꦂꦤꦮꦼꦂꦤ​꧈​ꦤꦺꦏ꧀ꦲꦼꦁꦒꦺꦴꦤꦺ​ꦲꦮꦏ꧀ꦏꦺ​ꦢꦺꦮꦺꦩꦸꦭꦁ​ꦩꦫꦁ​ꦮꦺꦴꦁ​ꦱꦶꦁ​ꦲꦺꦴꦫ​ꦤ꧀ꦢꦸꦮꦺꦭꦤ꧀ꦮꦺꦴꦁ​ꦱꦶꦁ​ꦏꦼꦱꦸꦱꦃꦲꦤ꧀ꦏꦸꦮꦶ​ꦏꦸꦢꦸ​ꦏꦫꦺꦴ​ꦚꦩ꧀ꦧꦸꦠ꧀ꦠꦱꦶꦁ​ꦲꦧꦺꦴꦠ꧀꧈​ꦥꦢ​ꦲꦺꦭꦶꦁ​ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀:'ꦥꦮꦺꦃꦭꦸꦮꦶꦃ​ꦲꦥꦶꦏ꧀ꦠꦼꦤꦶꦩ꧀ꦧꦁꦤꦩ꧀ꦥ​꧉​’”

³⁶꧋ꦱꦏ꧀ꦮꦶꦱ꧀ꦱꦺ​ꦫꦩ꧀ꦥꦸꦁ​ꦩꦶꦠꦸꦠꦸꦂꦫꦶ​ꦮꦺꦴꦁꦮꦺꦴꦁ​ꦩꦲꦸ​꧈​ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦱꦼꦢꦼꦏꦸꦧꦼꦧꦉꦁꦔꦤ꧀ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦧꦺꦃ​ꦠꦼꦫꦸꦱ꧀ꦥꦢ​ꦤ꧀ꦢꦺꦴꦁꦔ꧉​ ³⁷ꦱꦼꦢꦸꦭꦸꦂꦱꦼꦢꦸꦭꦸꦂ​ꦥꦢ​ꦤꦔꦶꦱ꧀ꦏꦧꦺꦃ​꧈​ꦠꦼꦫꦸꦱ꧀ꦥꦢ​ꦔꦿꦁꦏꦸꦭ꧀ꦭꦶ​ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦢꦶꦲꦩ꧀ꦧꦸꦁꦔꦶ​ꦧꦺꦴꦭꦏ꧀ꦧꦭꦶꦏ꧀꧈​ ³⁸ꦏꦧꦺꦃ​ꦥꦢ​ꦱꦸꦱꦃ​꧈​ꦩꦭꦃꦩꦭꦃꦗꦭꦂꦫꦤ꧀ꦫꦱꦸꦭ꧀ꦦꦈꦭꦸꦱ꧀ꦔꦺꦴꦩꦺꦴꦁꦤꦺꦏ꧀ꦲꦺꦴꦫ​ꦧꦏꦭ꧀ꦏꦼꦥꦼꦠꦸꦏ꧀ꦩꦼꦤꦺꦃ​꧉​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦔꦼꦠꦼꦂꦫꦏꦺꦫꦱꦸꦭ꧀ꦦꦈꦭꦸꦱ꧀ꦠꦼꦏꦤ꧀ꦥꦿꦲꦸꦤꦺ​꧉​

↑ ↑ ↑

← ꧇​꧑꧙꧇​

꧇​꧒꧑꧇​ →