ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥꦫꦫꦱꦸꦭ꧀/12

꧋ꦫꦱꦸꦭ꧀ꦪꦏꦺꦴꦧꦸꦱ꧀ꦢꦶꦥꦠꦺꦤ꧀ꦤꦶ​ꦭꦤ꧀ꦫꦱꦸꦭ꧀ꦦꦺꦠꦿꦸꦱ꧀ꦢꦶꦕꦼꦏꦼꦭ꧀꧈​

꧇​꧑꧒꧇​ ¹꧋ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦩꦺꦴꦭꦃꦲꦶꦔꦺꦴꦁꦏꦺꦴꦤ꧀ꦚꦼꦏꦼꦭ꧀ꦭꦶ​ꦮꦺꦴꦁ​ꦥꦱꦩꦸꦮꦤ꧀꧈​ ²ꦢꦺꦏ꧀ꦤꦺꦔꦺꦴꦁꦏꦺꦴꦤ꧀ꦚꦼꦏꦼꦭ꧀ꦫꦱꦸꦭ꧀ꦪꦏꦺꦴꦧꦸꦱ꧀ ꦏꦏꦁꦔꦺꦫꦱꦸꦭ꧀ꦪꦺꦴꦲꦤꦼꦱ꧀꧈​ꦪꦏꦺꦴꦧꦸꦱ꧀ꦠꦼꦫꦸꦱ꧀ꦢꦶꦏꦼꦠꦺꦴꦏ꧀ꦒꦸꦭꦸꦤꦺ​꧉​ ³ꦏꦢꦸꦁ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦮꦼꦫꦸꦃ​ꦤꦺꦏ꧀ꦏꦸꦮꦶ​ꦤ꧀ꦢꦢꦺꦏ꧀ꦏꦏꦺꦱꦼꦤꦼꦁꦔꦺ​ꦮꦺꦴꦁ​ꦙꦸ꧈​ꦢꦺꦏ꧀ꦤꦺꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦚꦼꦏꦼꦭ꧀ꦫꦱꦸꦭ꧀ꦦꦺꦠꦿꦸꦱ꧀ꦲꦩ꧀ꦧꦫꦁ​꧉​ꦏꦸꦮꦶ​ꦠꦶꦧ​ꦮꦪꦃꦲꦺ​ꦫꦶꦪꦪꦫꦺꦴꦠꦶ​ꦠꦤ꧀ꦥ​ꦫꦒꦶ​꧉​ ⁴ꦫꦱꦸꦭ꧀ꦦꦺꦠꦿꦸꦱ꧀ꦢꦶꦕꦼꦏꦼꦭ꧀ꦠꦼꦫꦸꦱ꧀ꦢꦶꦊꦧꦺꦴꦏ꧀ꦏꦏꦺꦤꦁꦱꦼꦠꦿꦥꦤ꧀꧈​ꦱꦶꦁ​ꦢꦶꦏꦺꦴꦁꦏꦺꦴꦤ꧀​ꦚ꧀ꦗꦒ​ꦫꦱꦸꦭ꧀ꦦꦺꦠꦿꦸꦱ꧀ꦱꦺꦴꦭ꧀ꦢꦠ꧀ꦥꦠꦁ​ꦱꦾꦶꦥ꦳꧀ ꦱꦏ꧀ꦱꦾꦶꦥ꦳꧀ꦱꦺꦴꦭ꧀ꦢꦠ꧀ꦠꦺꦥꦥꦠ꧀꧈​ꦏꦉꦥ꧀ꦥꦺ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦫꦱꦸꦭ꧀ꦦꦺꦠꦿꦸꦱ꧀ꦲꦉꦥ꧀ꦢꦶꦏꦿꦸꦠꦸꦤꦁꦔꦉꦥ꧀ꦥꦺ​ꦮꦺꦴꦁ​ꦥꦶꦫꦁꦥꦶꦫꦁ​꧈​ꦱꦏ꧀ꦮꦶꦱ꧀ꦱꦺ​ꦫꦶꦪꦪꦥꦱ꧀ꦏꦃ​꧉​ ⁵ꦱꦸꦮꦺꦤꦺ​ꦫꦱꦸꦭ꧀ꦦꦺꦠꦿꦸꦱ꧀ꦤꦁꦱꦼꦠꦿꦥꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦱꦏ꧀ꦥꦱꦩꦸꦮꦤ꧀ꦥꦢ​ꦤ꧀ꦢꦺꦴꦁꦔꦠꦤ꧀ꦥ​ꦩꦤ꧀ꦢꦼꦏ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦏꦁꦒꦺꦴ​ꦢꦺꦏ꧀ꦤꦺ꧉​

꧋ꦫꦱꦸꦭ꧀ꦦꦺꦠꦿꦸꦱ꧀ꦩꦼꦠꦸ​ꦱꦁꦏꦱꦼꦠꦿꦥꦤ꧀꧈​

⁶꧋ꦲꦶꦁ​ꦮꦼꦔꦶ​ꦱꦏ꧀ꦢꦸꦫꦸꦁꦔꦺꦢꦶꦒꦮ​ꦤꦁꦔꦉꦥ꧀ꦥꦺ​ꦫꦠꦸ​ꦲ꦳ꦺꦫꦺꦴꦢꦺꦱ꧀ ꦫꦱꦸꦭ꧀ꦦꦺꦠꦿꦸꦱ꧀ꦠꦸꦫꦸ​꧈​ꦠꦔꦤ꧀ꦤꦺ​ꦢꦶꦫꦤ꧀ꦠꦺ​ꦒꦤ꧀ꦢꦺꦁꦏꦫꦺꦴ​ꦱꦺꦴꦭ꧀ꦢꦠ꧀ꦭꦺꦴꦫꦺꦴ​ꦤꦁꦏꦶꦮ​ꦭꦤ꧀ꦠꦼꦔꦼꦤꦺ​꧉​ꦭꦮꦁꦔꦺ​ꦱꦼꦠꦿꦥꦤ꧀ꦤꦺꦲꦩ꧀ꦧꦫꦁ​ꦢꦶꦗꦒ​ꦱꦺꦴꦭ꧀ꦢꦠ꧀꧈​ ⁷ꦠꦼꦫꦸꦱ꧀ꦢꦢꦏ꧀ꦏꦤ꧀ꦮꦲꦺ​ꦩꦸꦭꦺꦏꦠ꧀ꦠꦺꦒꦸꦱ꧀ꦠꦶ​ꦔꦢꦼꦏ꧀ꦤꦁꦱꦺꦭ꧀ꦏꦺꦴꦤꦺꦴ​꧈​ꦱꦼꦩ꧀ꦭꦺꦴꦫꦺꦴꦠ꧀ꦩꦢꦁꦔꦶꦱꦺꦭꦺ꧉​ꦩꦸꦭꦺꦏꦠ꧀ꦠꦺꦠꦼꦫꦸꦱ꧀​ꦔ꧀ꦒꦸꦒꦃ​ꦫꦱꦸꦭ꧀ꦦꦺꦠꦿꦸꦱ꧀:“ꦤ꧀ꦢꦁꦠꦔꦶ​!”ꦱꦏ꧀ꦮꦠ꧀ꦫꦤ꧀ꦠꦺꦤꦺ​ꦲꦸꦕꦸꦭ꧀ꦱꦁꦏꦠꦔꦤ꧀ꦤꦺ​꧉​ ⁸ꦩꦸꦭꦺꦏꦠ꧀ꦠꦺ​ꦠꦼꦫꦸꦱ꧀ꦔꦺꦴꦩꦺꦴꦁ:“ꦱꦧꦸꦏ꧀ꦩꦸ​ꦭꦤ꧀ꦱꦼꦥꦠꦸꦩꦸ​ꦤ꧀ꦢꦁꦢꦶꦲꦼꦁꦒꦺꦴ​!”ꦫꦱꦸꦭ꧀ꦦꦺꦠꦿꦸꦱ꧀ꦪ​ꦩꦤꦸꦠ꧀ꦲꦥ​ꦲꦺꦴꦩꦺꦴꦁꦔꦺ​ꦩꦸꦭꦺꦏꦠ꧀ꦠꦺ꧉​“ꦱꦭꦶꦤ꧀ꦩꦸ​ꦚ꧀ꦗꦧ​ꦢꦶꦲꦼꦁꦒꦺꦴ​ꦭꦤ꧀ꦲ꦳ꦪꦸꦏ꧀ꦩꦺꦭꦸ​ꦲꦏꦸ​꧉​” ⁹ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦼꦠꦸꦠ꧀ꦠꦏꦺꦩꦸꦭꦺꦏꦠ꧀ꦠꦺꦩꦼꦠꦸ​ꦱꦁꦏꦱꦼꦠꦿꦥꦤ꧀ ꦤꦁꦔꦶꦁ​ꦢꦺꦏ꧀ꦤꦺꦲꦺꦴꦫ​ꦔꦼꦂꦠꦶ​ꦩꦸꦭꦺꦏꦠ꧀ꦠꦺꦏꦸꦮꦶ​ꦲꦺꦤꦺꦁꦠꦼꦤꦤ꧀ꦲꦥ​ꦲꦺꦴꦫ​꧉​ꦩꦶꦏꦶꦫꦺꦢꦺꦏ꧀ꦤꦺꦏꦸꦮꦶ​ꦔꦶꦩ꧀ꦥꦶ​꧉​ ¹⁰ꦱꦩ꧀ꦥꦺꦏ꧀​ꦔ꧀ꦭꦶꦮꦠ꧀ꦠꦶ​ꦠꦸꦏꦁ​ꦗꦒ​ꦱꦶꦁ​ ꦱꦼꦥꦶꦱ꧀ꦱꦤ꧀ ꦠꦼꦫꦸꦱ꧀​ꦔ꧀ꦭꦶꦮꦠ꧀ꦠꦶ​ꦠꦸꦏꦁ​ꦗꦒ​ꦱꦶꦁ​ꦤꦺꦴꦩꦼꦂ​ꦭꦺꦴꦫꦺꦴ​꧈​ꦠꦼꦫꦸꦱ꧀ꦠꦼꦏꦤ꧀ꦭꦮꦁ​ꦮꦼꦱꦶ​꧈​ꦢꦭꦤ꧀ꦤꦺ​ꦩꦼꦠꦸ​ꦤꦁꦢꦭꦤ꧀ꦒꦼꦢꦺꦱꦶꦁ​ꦚ꧀ꦗꦸꦗꦸꦏ꧀ꦤꦁꦏꦸꦠ꧉​ꦭꦮꦁ​ꦮꦼꦱꦶ​ꦩꦲꦸ​ꦩꦼꦔ​ꦢꦺꦮꦺ꧈​ꦩꦸꦭꦺꦏꦠ꧀ꦠꦺꦭꦤ꧀ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦩꦼꦠꦸ​꧉​ꦏꦢꦸꦁ​ꦮꦶꦱ꧀ꦠꦼꦏꦤ꧀​ꦚ꧀ꦗꦧ​꧈​ꦩꦸꦭꦺꦏꦠ꧀ꦠꦺꦠꦼꦫꦸꦱ꧀​ꦩ꧀ꦭꦏꦸ​ꦱꦏ꧀ꦢꦭꦤ꧀ꦏꦫꦺꦴ​ꦫꦱꦸꦭ꧀ꦦꦺꦠꦿꦸꦱ꧀ ꦠꦼꦫꦸꦱ꧀ꦔꦶꦭꦁ​꧉​

¹¹꧋ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦢꦸꦤꦸꦁꦠꦼꦤꦤ꧀ ꦩꦸꦭꦤꦺ​ꦔꦺꦴꦩꦺꦴꦁ:“ꦱꦲꦶꦏꦶ​ꦲꦏꦸ​ꦔꦼꦂꦠꦶ​ꦤꦺꦏ꧀ꦒꦸꦱ꧀ꦠꦶ​ꦮꦶꦱ꧀ꦔꦺꦴꦁꦏꦺꦴꦤ꧀ꦩꦸꦭꦺꦏꦠ꧀ꦠꦺꦔ꧀ꦭꦸꦮꦂꦫꦶ​ꦲꦏꦸ​ꦱꦁꦏꦥꦔ꧀ꦮꦱꦤꦺ​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦭꦤ꧀ꦱꦁꦏꦏꦼꦏꦉꦥ꧀ꦥꦤ꧀ꦤꦺ​ꦮꦺꦴꦁ​ꦙꦸ꧉​”

¹²꧋ꦱꦏ꧀ꦮꦶꦱ꧀ꦱꦺ​ꦢꦸꦤꦸꦁꦊꦭꦏꦺꦴꦤ꧀ꦩꦲꦸ​꧈​ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦧꦸꦢꦭ꧀ꦤꦁꦲꦺꦴꦩꦃꦲꦺ​ꦩꦫꦶꦪ꧈​ꦲꦶꦧꦸꦤꦺ​ꦪꦺꦴꦲꦤꦼꦱ꧀ ꦱꦶꦁ​ꦲꦸꦒ​ꦏꦼꦕꦼꦭꦸꦏ꧀​ꦩꦂꦏꦸꦱ꧀꧈​ꦤꦁ​ꦲꦺꦴꦩꦃ​ꦏꦺꦴꦤꦺꦴ​ꦲꦺꦤꦺꦁꦮꦺꦴꦁ​ꦲꦺꦴꦏꦺꦃꦱꦶꦁ​ꦲꦶꦗꦶꦏ꧀ꦥꦢ​ꦔꦸꦩ꧀ꦥꦸꦭ꧀ꦭꦤ꧀​ꦤ꧀ꦢꦼꦢꦺꦴꦔ​꧉​ ¹³ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦠꦺꦴꦠꦺꦴꦏ꧀ꦠꦺꦴꦠꦺꦴꦏ꧀ꦤꦁꦭꦮꦁ​ꦚ꧀ꦗꦧ​꧉​ꦧꦺꦴꦕꦃ​ꦮꦺꦢꦺꦴꦏ꧀ ꦥꦼꦭꦢꦺꦤ꧀ꦤꦺ​꧈​ꦱꦶꦁ​ꦗꦼꦤꦼꦁꦔꦺ​ꦬꦺꦴꦢꦺꦠꦼꦫꦸꦱ꧀ꦤꦶꦭꦶꦏ꧀ꦏꦶ​ꦱꦥ​ꦱꦶꦁ​ꦠꦺꦴꦠꦺꦴꦏ꧀ꦠꦺꦴꦠꦺꦴꦏ꧀ꦭꦮꦁ​꧉​ ¹⁴ꦬꦺꦴꦢꦺꦲꦺꦴꦫ​ꦥꦔ꧀ꦭꦶꦁ​ꦏꦫꦺꦴ​ꦱ꧀ꦮꦫꦤꦺ​ꦫꦱꦸꦭ꧀ꦦꦺꦠꦿꦸꦱ꧀ ꦤꦁꦔꦶꦁ​ꦱꦁꦏꦶꦁꦧꦸꦔꦃꦲꦺ​ꦲꦺꦴꦫ​ꦩ꧀ꦧꦸꦏꦏ꧀ꦏꦏꦺꦭꦮꦁꦔꦺ​꧈​ꦩꦭꦃ​ꦧꦭꦶꦏ꧀​ꦩ꧀ꦊꦧꦸ​ꦩꦼꦤꦺꦃ​ꦔꦺꦴꦩꦺꦴꦁꦔꦶꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦤꦺꦏ꧀ꦫꦱꦸꦭ꧀ꦦꦺꦠꦿꦸꦱ꧀ꦤꦁꦔꦉꦥ꧀ꦭꦮꦁ​꧉​ ¹⁵ꦮꦺꦴꦁꦮꦺꦴꦁ​ꦩꦲꦸ​ꦱꦼꦩꦲꦸꦂ​:“ꦏꦺꦴꦮꦺ​ꦏꦸꦮꦶ​ꦒꦼꦤ꧀ꦢꦼꦁꦲꦥ​ꦏꦼꦥꦿꦶꦪꦺ​?”ꦤꦁꦔꦶꦁ​ꦬꦺꦴꦢꦺꦔꦼꦕꦼꦏ꧀​ꦠꦼꦫꦸꦱ꧀:“ꦥꦚ꧀ꦕꦺꦤ꧀​ꦫꦱꦸꦭ꧀ꦦꦺꦠꦿꦸꦱ꧀ꦠꦼꦤꦤ꧀ ꦲꦏꦸ​ꦲꦺꦴꦫ​ꦒꦺꦴꦫꦺꦴꦃ​!ꦢꦺꦏ꧀ꦤꦺ​ꦠꦼꦤꦤ꧀!”ꦭꦶꦪꦤꦺ​ꦠꦼꦫꦸꦱ꧀ꦱꦼꦩꦲꦸꦂ​:“ꦲꦺꦴ​꧈​ꦩꦼꦤꦮ​ꦏꦸꦮꦶ​ꦩꦸꦭꦺꦏꦠ꧀ꦱꦶꦁ​ꦔꦚ꧀ꦕꦤꦶ​ꦫꦱꦸꦭ꧀ꦦꦺꦠꦿꦸꦱ꧀!”

¹⁶꧋ꦤꦁꦔꦶꦁ​ꦫꦱꦸꦭ꧀ꦦꦺꦠꦿꦸꦱ꧀ꦠꦺꦴꦠꦺꦴꦏ꧀ꦠꦺꦴꦠꦺꦴꦏ꧀ꦭꦮꦁꦔꦺ​ꦠꦼꦫꦸꦱ꧀꧈​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦲꦩ꧀ꦧꦸꦏꦏ꧀ꦭꦮꦁꦔꦺ​꧉​ꦏꦢꦸꦁ​ꦮꦼꦫꦸꦃ​ꦫꦱꦸꦭ꧀ꦦꦺꦠꦿꦸꦱ꧀ ꦠꦼꦫꦸꦱ꧀ꦥꦢ​ꦏꦒꦺꦠ꧀ꦠꦼꦤꦤ꧀꧈​ ¹⁷ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦏꦫꦺꦴ​ꦠꦔꦤ꧀ꦤꦺ​ꦔꦺꦴꦁꦏꦺꦴꦤ꧀ꦮꦺꦴꦁꦮꦺꦴꦁ​ꦏꦺꦴꦁꦏꦺꦴꦤ꧀ꦥꦢ​ꦩꦼꦤꦼꦁ​꧉​ꦢꦺꦏ꧀ꦤꦺꦠꦼꦫꦸꦱ꧀ꦚꦿꦶꦠꦏ꧀ꦏꦏꦺꦲꦼꦁꦒꦺꦴꦤꦺ​ꦒꦸꦱ꧀ꦠꦶ​ꦔꦼꦠꦺꦴꦏ꧀ꦏꦏꦺꦢꦺꦏ꧀ꦤꦺꦱꦁꦏꦱꦼꦠꦿꦥꦤ꧀꧈​ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁ:“ꦏꦤ​ꦱꦼꦢꦸꦭꦸꦂ​ꦪꦏꦺꦴꦧꦸꦱ꧀ꦭꦤ꧀ꦱꦼꦢꦸꦭꦸꦂꦱꦼꦢꦸꦭꦸꦂ​ꦭꦶꦪꦤꦺ​ꦥꦢ​ꦢꦶꦲꦺꦴꦩꦺꦴꦁꦔꦶ!”ꦢꦺꦏ꧀ꦤꦺꦠꦼꦫꦸꦱ꧀ꦭꦸꦔ​ꦱꦁꦏꦏꦺꦴꦤꦺꦴ​ꦧꦸꦢꦭ꧀ꦤꦁꦭꦶꦪ​ꦥꦁꦒꦺꦴꦤ꧀ꦤꦤ꧀꧈​

¹⁸꧋ꦲꦶꦁ​ꦲꦺꦱꦸꦏ꧀ꦏꦺ​ꦥꦫ​ꦱꦺꦴꦭ꧀ꦢꦠ꧀ꦱꦶꦁ​ꦗꦒ​ꦱꦼꦠꦿꦥꦤ꧀ꦥꦢ​ꦒꦺꦒꦺꦂꦫꦤ꧀ ꦥꦢ​ꦧꦶꦔꦸꦁ​ꦗꦭꦂꦫꦤ꧀ꦲꦺꦴꦫ​ꦔꦼꦂꦠꦶ​ꦫꦱꦸꦭ꧀ꦦꦺꦠꦿꦸꦱ꧀ꦤꦁꦲꦼꦤ꧀ꦢꦶ​꧉​ ¹⁹ꦫꦠꦸ​ꦲ꦳ꦺꦫꦺꦴꦢꦺꦱ꧀ꦠꦼꦫꦸꦱ꧀ꦩꦿꦺꦤ꧀ꦠꦃ​ꦏꦺꦴꦁꦏꦺꦴꦤ꧀​ꦔ꧀ꦒꦺꦴꦭꦺꦏ꧀ꦏꦶ​꧈​ꦤꦁꦔꦶꦁ​ꦫꦱꦸꦭ꧀ꦦꦺꦠꦿꦸꦱ꧀ꦲꦺꦴꦫ​ꦏꦼꦠꦼꦩꦸ​꧉​ꦱꦶꦁ​ꦗꦒ​ꦱꦼꦠꦿꦥꦤ꧀ꦠꦼꦫꦸꦱ꧀ꦢꦶꦕꦼꦭꦸꦏ꧀​ꦭꦤ꧀ꦢꦶꦠꦏꦺꦴꦤ꧀ꦤꦶ​ꦭꦤ꧀ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦢꦶꦥꦠꦺꦤ꧀ꦤꦶ​꧉​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦠꦼꦫꦸꦱ꧀ꦭꦸꦔ​ꦱꦁꦏꦪꦸꦢꦺꦪ​ꦧꦸꦢꦭ꧀ꦤꦁꦏꦸꦠꦯꦺꦱꦫꦺꦪꦭꦤ꧀ꦩꦁꦒꦺꦴꦤ꧀ꦤꦁꦏꦺꦴꦤꦺꦴ​꧉​

꧋ꦥꦠꦶꦤꦺ​ꦫꦠꦸ​ꦲ꦳ꦺꦫꦺꦴꦢꦺꦱ꧀꧈​

²⁰꧋ꦢꦺꦴꦁꦔꦺꦫꦠꦸ​ꦲ꦳ꦺꦫꦺꦴꦢꦺꦱ꧀ꦤꦁꦏꦸꦠꦯꦺꦱꦫꦺꦪꦏꦺꦴꦤꦺꦴ​꧈​ꦮꦺꦴꦁꦮꦺꦴꦁ​ꦱꦁꦏꦏꦸꦠꦠꦶꦫꦸꦱ꧀ꦭꦤ꧀ꦏꦸꦠꦱꦶꦢꦺꦴꦤ꧀ꦧꦼꦧꦉꦁꦔꦤ꧀ꦥꦢ​ꦏꦺꦴꦁꦏꦺꦴꦤ꧀ꦤꦤ꧀ꦢꦺꦊꦒꦱꦶꦤꦁꦔ꧀ꦒꦺꦴꦤ꧀ꦤꦺꦫꦠꦸꦤꦺ​꧉​ꦲꦮꦶꦠ꧀ ꦪ​ꦲꦼꦩ꧀ꦧꦸꦃ​ꦲꦥ​ꦗꦭꦂꦫꦤ꧀ꦤꦺ​꧈​ꦮꦺꦴꦁꦮꦺꦴꦁ​ꦱꦶꦁ​ꦩꦁꦒꦺꦴꦤ꧀ꦤꦁꦏꦸꦠꦠꦶꦫꦸꦱ꧀ꦭꦤ꧀ꦱꦶꦢꦺꦴꦤ꧀ꦥꦢ​ꦩꦫꦏ꧀ꦏꦏꦺꦫꦠꦸ​ꦲ꦳ꦺꦫꦺꦴꦢꦺꦱ꧀ꦤꦼꦱꦸ​ꦧꦔꦼꦠ꧀꧈​ꦤꦁꦔꦶꦁ​꧈​ꦗꦭꦂꦫꦤ꧀ꦏꦸꦠꦠꦶꦫꦸꦱ꧀ꦭꦤ꧀ꦱꦶꦢꦺꦴꦤ꧀ꦏꦸꦮꦶ​ꦥꦔꦤ꧀ꦤꦺ​ꦠꦼꦏꦤꦺ​ꦱꦁꦏꦔ꧀ꦒꦺꦴꦤ꧀ꦤꦺꦫꦠꦸ​ꦲ꦳ꦺꦫꦺꦴꦢꦺꦱ꧀ ꦩꦸꦭꦤꦺ​ꦠꦼꦫꦸꦱ꧀ꦢꦺꦊꦒꦱꦶꦤꦺꦔ꧀ꦒꦼꦤꦶꦏ꧀​ꦧ꧀ꦭꦱ꧀ꦠꦸꦱ꧀ ꦱꦺꦏꦿꦺꦠꦫꦶꦱ꧀ꦱꦺꦲ꦳ꦺꦫꦺꦴꦢꦺꦱ꧀ ꦏꦺꦴꦁꦏꦺꦴꦤ꧀ꦤꦼꦩ꧀ꦧꦸꦁꦔꦏꦺꦫꦠꦸꦤꦺ​ꦚꦸꦮꦸꦤ꧀ꦏꦮꦼꦭꦱ꧀ꦱꦤ꧀ꦭꦤ꧀ꦧꦶꦱ​ꦫꦸꦏꦸꦤ꧀ꦩꦼꦤꦺꦃ​꧉​

²¹꧋ꦲꦶꦁ​ꦱꦏ꧀ꦮꦶꦗꦶꦤꦺꦢꦶꦤ​ꦱꦶꦁ​ꦮꦶꦱ꧀ꦢꦶꦫꦚ꧀ꦕꦩ꧀​ꦱꦏ꧀ꦢꦸꦫꦸꦁꦔꦺ꧈​ꦲ꦳ꦺꦫꦺꦴꦢꦺꦱ꧀ꦔꦁꦒꦺꦴ​ꦥꦼꦔꦁꦒꦺꦴꦤꦺ​ꦫꦠꦸ​ꦠꦼꦫꦸꦱ꧀​ꦚ꧀ꦗꦒꦺꦴꦁꦤꦁꦢꦩ꧀ꦥꦂꦫꦺꦏꦫꦺꦴ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦩꦫꦁ​ꦮꦺꦴꦁꦮꦺꦴꦁ​꧉​ ²²ꦲꦶꦁ​ꦱꦏ꧀ꦠꦼꦔꦃꦲꦺ​ꦔꦼꦠꦺꦴꦏ꧀ꦏꦏꦺꦠꦼꦩ꧀ꦧꦸꦁ​ꦏꦸꦮꦶ​ꦮꦺꦴꦁꦮꦺꦴꦁ​ꦥꦢ​ꦱꦸꦫꦏ꧀ꦱꦸꦫꦏ꧀ꦔꦺꦴꦩꦺꦴꦁ:“ꦏꦸꦮꦶ​ꦢꦸꦢꦸ​ꦩꦤꦸꦁꦱ​ꦱꦶꦁ​ꦔꦺꦴꦩꦺꦴꦁ꧈​ꦤꦁꦔꦶꦁ​ꦱꦏ꧀ꦮꦶꦗꦶꦤꦺꦒꦸꦱ꧀ꦠꦶ​ꦄꦭ꧀ꦭꦃ​!” ²³ꦱꦏ꧀ꦮꦠ꧀ꦩꦸꦭꦺꦏꦠ꧀ꦠꦺꦒꦸꦱ꧀ꦠꦶ​ꦄꦭ꧀ꦭꦃ​ꦔꦤ꧀ꦠꦼꦩ꧀ꦫꦠꦸ​ꦲ꦳ꦺꦫꦺꦴꦢꦺꦱ꧀ ꦲꦮꦶꦠ꧀ꦢꦺꦏ꧀ꦤꦺꦤꦩ꧀ꦥ​ꦥꦼꦔꦊꦩ꧀ꦩꦤ꧀ꦤꦺ​ꦩꦤꦸꦁꦱ​꧉​ꦏꦸꦢꦸꦤꦺ​ꦥꦼꦔꦊꦩ꧀ꦩꦤ꧀ꦏꦸꦮꦶ​ꦢꦶꦥꦱꦿꦃꦲꦏꦺꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦫꦠꦸ​ꦲ꦳ꦺꦫꦺꦴꦢꦺꦱ꧀ꦠꦼꦫꦸꦱ꧀​ꦔ꧀ꦒꦺꦠꦏ꧀ꦢꦶꦥꦔꦤ꧀ꦕꦕꦶꦁ​ꦠꦼꦫꦸꦱ꧀ꦩꦠꦶ​꧉​

²⁴꧋ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦠꦼꦫꦸꦱ꧀ꦩꦿꦺꦩꦺꦤ꧀ꦩꦿꦺꦩꦺꦤ꧀ꦠꦼꦫꦸꦱ꧀ꦭꦤ꧀ꦮꦺꦴꦁ​ꦥꦶꦫꦁꦥꦶꦫꦁ​ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​

²⁵꧋ꦱꦏ꧀ꦮꦶꦱ꧀ꦱꦺ​ꦧꦂꦤꦧꦱ꧀ꦭꦤ꧀ꦱꦲꦸꦭꦸꦱ꧀ꦩꦱꦿꦃꦲꦏꦺꦢꦸꦮꦶꦠ꧀ꦲꦸꦫꦸꦤ꧀ꦤꦤ꧀ꦩꦫꦁ​ꦥꦫ​ꦥꦼꦤꦸꦤ꧀ꦠꦸꦤ꧀ꦤꦁꦥꦱꦩꦸꦮꦤ꧀ꦤꦁꦪꦺꦫꦸꦱꦭꦺꦩ꧀ ꦠꦼꦫꦸꦱ꧀ꦥꦢ​ꦧꦭꦶꦏ꧀ꦩꦼꦤꦺꦃ​ꦤꦁꦏꦸꦠꦄꦤ꧀ꦠꦶꦪꦺꦴꦏꦶ꧈​ꦤꦁꦔꦶꦁ​ꦔꦼꦗꦺꦏ꧀ꦪꦺꦴꦲꦤꦼꦱ꧀ꦩꦂꦏꦸꦱ꧀ꦲꦩ꧀ꦧꦫꦁ​꧉​

↑ ↑ ↑

← ꧇​꧑꧑꧇​

꧇​꧑꧓꧇​ →