ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥꦫꦫꦱꦸꦭ꧀/28

ꦥꦱꦭ꧀ ꧇​꧑꧇​ ꧇​꧒꧇​ ꧇​꧓꧇​ ꧇​꧔꧇​ ꧇​꧕꧇​ ꧇​꧖꧇​꧇​꧗꧇​ ꧇​꧘꧇​ ꧇​꧙꧇​ ꧇​꧑꧐꧇​ ꧇​꧑꧑꧇​ ꧇​꧑꧒꧇​ ꧇​꧑꧓꧇​꧇​꧑꧔꧇​ ꧇​꧑꧕꧇​ ꧇​꧑꧖꧇​꧇​꧑꧗꧇​ ꧇​꧑꧘꧇​ ꧇​꧑꧙꧇​ ꧇​꧒꧐꧇​ ꧇​꧒꧑꧇​꧇​꧒꧒꧇​꧇​꧒꧓꧇​ ꧇​꧒꧔꧇​꧇​꧒꧕꧇​ ꧇​꧒꧖꧇​ ꧇​꧒꧗꧇​ ꧇​꧒꧘꧇​

꧋ꦤꦁ​ꦥꦸꦭꦩꦭ꧀ꦠ​꧉​

꧇​꧒꧘꧇​ 1꧋ꦏꦢꦸꦁ​ꦲꦮꦏ꧀ꦏꦺ​ꦢꦺꦮꦺꦠꦼꦏꦤ꧀ꦢꦫꦠ꧀ꦠꦤ꧀ꦏꦤ꧀ꦠꦶꦱ꧀ꦭꦩꦼꦠ꧀ ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦥꦸꦭꦏꦸꦮꦶ​ꦥꦸꦭꦩꦭ꧀ꦠ​꧉​ 2ꦮꦺꦴꦁꦮꦺꦴꦁ​ꦱꦶꦁ​ꦩꦁꦒꦺꦴꦤ꧀ꦏꦺꦴꦤꦺꦴ​ꦲꦥꦶꦏ꧀ꦧꦔꦼꦠ꧀ꦲꦼꦁꦒꦺꦴꦤꦺ​ꦤꦩ꧀ꦥ​ꦲꦮꦏ꧀ꦏꦺ​ꦢꦺꦮꦺ꧉​ꦗꦭꦂꦫꦤ꧀ꦠꦼꦫꦸꦱ꧀ꦲꦸꦢꦤ꧀ꦭꦤ꧀ꦫꦱꦤꦺ​ꦲꦢꦼꦩ꧀ꦮꦺꦴꦁꦮꦺꦴꦁ​ꦠꦼꦫꦸꦱ꧀​ꦔ꧀ꦒꦮꦺ​ꦧꦼꦢꦶꦪꦁ꧉​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦢꦶꦲꦼꦗꦺꦏ꧀ꦫꦺꦴꦤꦺꦴ꧉​ 3ꦫꦱꦸꦭ꧀ꦦꦈꦭꦸꦱ꧀ꦩꦺꦭꦸ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦏꦪꦸꦏꦪꦸ​ꦢꦶꦠꦸꦩ꧀ꦥꦸꦏ꧀ꦤꦁꦒꦼꦤꦶꦤꦺ​꧉​ꦭꦃ​ꦏꦺꦴꦏ꧀ꦠꦼꦫꦸꦱ꧀ꦲꦺꦤꦺꦁꦲꦸꦭ​ꦩꦼꦠꦸ​ꦱꦁꦏꦏꦪꦸꦏꦪꦸ​ꦏꦸꦮꦶ​꧈​ꦗꦭꦂꦫꦤ꧀ꦏꦼꦥꦤꦱ꧀ꦱꦼꦤ꧀ꦒꦼꦤꦶꦤꦺ​꧉​ꦲꦸꦭꦤꦺ​ꦠꦼꦫꦸꦱ꧀ꦚꦺꦴꦏꦺꦴꦠ꧀ꦠꦔꦤ꧀ꦤꦺ​ꦫꦱꦸꦭ꧀ꦦꦈꦭꦸꦱ꧀꧈​ 4ꦏꦢꦸꦁ​ꦮꦺꦴꦁꦮꦺꦴꦁ​ꦏꦺꦴꦤꦺꦴ​ꦩꦲꦸ​ꦮꦼꦫꦸꦃ​ꦲꦸꦭꦤꦺ​ꦒꦸꦩꦤ꧀ꦢꦸꦭ꧀ꦤꦁꦠꦔꦤ꧀ꦤꦺ​ꦫꦱꦸꦭ꧀ꦦꦈꦭꦸꦱ꧀ ꦠꦼꦫꦸꦱ꧀ꦥꦢ​ꦫꦱꦤ꧀ꦫꦱꦤ꧀ꦩꦫꦁ​ꦱꦏ꧀ꦥꦢꦥꦢ:“ꦮꦺꦴꦁ​ꦏꦸꦮꦶ​ꦩꦼꦱ꧀ꦠꦶꦠꦸꦏꦁ​ꦩꦠꦺꦤ꧀ꦤꦶ​ꦮꦺꦴꦁ​꧈​ꦩꦸꦭꦤꦺ​ꦱꦼꦤꦗꦤ꧀ꦲꦺꦴꦫ​ꦩꦠꦶ​ꦤꦁꦭꦫꦏꦼꦥꦿꦶꦪꦺꦥꦿꦶꦪꦺꦪ​ꦧꦏꦭ꧀ꦩꦠꦶ​꧉​” 5ꦤꦁꦔꦶꦁ​ꦫꦱꦸꦭ꧀ꦦꦈꦭꦸꦱ꧀ꦔꦶꦥꦠ꧀ꦠꦏꦺꦲꦸꦭꦤꦺ​ꦠꦼꦫꦸꦱ꧀ꦠꦶꦧ​ꦤꦁꦚ꧀ꦗꦼꦫꦺꦴ​ꦒꦼꦤꦶ​꧉​ꦫꦱꦸꦭ꧀ꦦꦈꦭꦸꦱ꧀ꦲꦺꦴꦫ​ꦏꦿꦱ​ꦭꦫ​ꦧ꧀ꦭꦱ꧀꧈​ 6ꦮꦺꦴꦁꦮꦺꦴꦁ​ꦩꦶꦏꦶꦫꦺꦠꦔꦤ꧀ꦤꦺ​ꦫꦱꦸꦭ꧀ꦦꦈꦭꦸꦱ꧀ꦧꦏꦭ꧀ꦲꦧꦸꦃ​ꦭꦤ꧀ꦢꦺꦏ꧀ꦤꦺꦢꦺꦮꦺꦧꦏꦭ꧀ꦠꦶꦧ​ꦩꦠꦶ​꧉​ꦤꦁꦔꦶꦁ​ꦏꦢꦸꦁ​ꦢꦶꦲꦼꦤ꧀ꦠꦺꦤ꧀ꦤꦶ​ꦱꦩ꧀ꦥꦺꦏ꧀ꦱꦸꦮꦶꦮꦼꦫꦸꦃ​ꦤꦺꦏ꧀ꦫꦱꦸꦭ꧀ꦦꦈꦭꦸꦱ꧀ꦲꦺꦴꦫ​ꦏꦼꦤꦺꦁꦲꦥꦲꦥ​꧈​ꦮꦺꦴꦁꦮꦺꦴꦁ​ꦩꦲꦸ​ꦠꦼꦫꦸꦱ꧀ꦲꦩ꧀ꦧꦭꦶꦏ꧀ꦥꦶꦏꦶꦂꦫꦤ꧀ꦤꦺ​꧈​ꦔꦺꦴꦩꦺꦴꦁ:“ꦮꦺꦴꦁ​ꦏꦸꦮꦶ​ꦩꦼꦱ꧀ꦠꦶꦒꦸꦱ꧀ꦠꦶ​ꦄꦭ꧀ꦭꦃ​!”

7꧋ꦲꦺꦴꦫ​ꦲꦢꦺꦴꦃ​ꦱꦁꦏꦏꦺꦴꦤꦺꦴ​ꦲꦺꦤꦺꦁꦏꦼꦧꦺꦴꦤ꧀ ꦱꦶꦁ​ꦤ꧀ꦢꦸꦮꦺꦥꦸꦧ꧀ꦭꦶꦪꦸꦱ꧀ ꦥꦼꦁꦒꦼꦢꦺꦤꦺꦥꦸꦭꦏꦺꦴꦤꦺꦴ​꧉​ꦥꦸꦧ꧀ꦭꦶꦪꦸꦱ꧀ꦤꦩ꧀ꦥ​ꦲꦮꦏ꧀ꦏꦺ​ꦢꦺꦮꦺꦲꦥꦶꦏ꧀ꦭꦤ꧀ꦲꦮꦏ꧀ꦏꦺ​ꦢꦺꦮꦺꦢꦢꦶ​ꦢꦪꦺꦴꦃꦲꦺꦔꦶꦤꦼꦥ꧀ꦤꦁꦲꦺꦴꦩꦃꦲꦺ​ꦠꦼꦭꦸꦁ​ꦢꦶꦤ​ꦱꦸꦮꦺꦤꦺ​꧉​ 8ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦤꦁꦏꦺꦴꦤꦺꦴ​ꦧꦥꦏ꧀ꦏꦺꦥꦸꦧ꧀ꦭꦶꦪꦸꦱ꧀ꦭꦫ​ꦥꦤꦱ꧀ꦭꦤ꧀ꦭꦫ​ꦮꦼꦠꦼꦁ​꧉​ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀​ꦩ꧀ꦊꦧꦸ​ꦤꦁꦏꦩꦂꦫꦺ​ꦮꦺꦴꦁꦔꦺ​ꦠꦼꦫꦸꦱ꧀ꦤꦸꦩ꧀ꦥꦁꦔꦶ​ꦠꦔꦤ꧀​ꦤ꧀ꦢꦺꦴꦔꦏ꧀ꦏꦏꦺ꧉​ꦮꦺꦴꦁꦔꦺ​ꦱꦏ꧀ꦮꦠ꧀ꦩꦫꦶ​꧉​ 9ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦏꦿꦸꦔꦸ​ꦧꦧ꧀ꦊꦭꦏꦺꦴꦤ꧀ꦏꦸꦮꦶ​꧈​ꦩꦸꦭꦤꦺ​ꦮꦺꦴꦁꦮꦺꦴꦁ​ꦤꦁꦥꦸꦭꦏꦺꦴꦤꦺꦴ​ꦥꦢ​ꦔ꧀ꦒꦮ​ꦱꦶꦁ​ꦭꦫ​ꦏꦧꦺꦃ​ꦤꦁꦔ꧀ꦒꦺꦴꦤ꧀ꦤꦺꦫꦱꦸꦭ꧀ꦦꦈꦭꦸꦱ꧀꧈​ꦏꦧꦺꦃ​ꦠꦼꦫꦸꦱ꧀ꦩꦫꦶ​꧉​ 10ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦔꦼꦏꦺꦏ꧀ꦏꦶꦏꦢꦺꦴꦥꦶꦫꦁꦥꦶꦫꦁ​ꦩꦫꦁ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦲꦉꦥ꧀ꦧꦸꦢꦭ꧀ꦩꦼꦤꦺꦃ​꧈​ꦲꦮꦏ꧀ꦏꦺ​ꦢꦺꦮꦺꦢꦶꦱꦔꦺꦴꦤ꧀ꦤꦶ​ꦱꦼꦩ꧀ꦧꦫꦁ​ꦱꦶꦁ​ꦢꦶꦧꦸꦠꦸꦃꦲꦏꦺꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧉​

꧋ꦱꦁꦏꦥꦸꦭꦩꦭ꧀ꦠ​ꦧꦸꦢꦭ꧀ꦤꦁꦏꦸꦠꦬꦸꦩ꧀꧈​

11꧋ꦱꦏ꧀ꦮꦶꦱ꧀ꦱꦺ​ꦠꦼꦭꦸꦁ​ꦱꦱꦶ​ꦤꦁꦥꦸꦭꦏꦺꦴꦤꦺꦴ​꧈​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦤꦸꦩ꧀ꦥꦏ꧀ꦏꦥꦭ꧀ꦱꦶꦁ​ ꦠꦼꦏ​ꦱꦁꦏꦏꦸꦠꦄꦭꦺꦏ꧀ꦱꦤ꧀ꦢꦿꦶꦪ​꧈​ꦏꦥꦭ꧀ꦱꦶꦁ​ꦲꦼꦤ꧀ꦢꦱ꧀ꦱꦼꦤ꧀ꦢꦱꦤ꧀ꦤꦺꦒꦩ꧀ꦧꦂꦫꦺ​ꦢꦺꦮ​ꦏꦼꦩ꧀ꦧꦂ​ꦱꦶꦁ​ꦗꦼꦤꦼꦁꦔꦺ​ꦑꦱ꧀ꦠꦺꦴꦂꦭꦤ꧀ꦦꦺꦴꦭꦸꦱ꧀꧈​ꦏꦥꦭ꧀ꦏꦸꦮꦶ​ꦤꦁꦏꦺꦴꦤꦺꦴ​ꦱꦏ꧀ꦱꦸꦮꦺꦤꦺ​ꦮꦪꦃ​ꦲꦢꦼꦩ꧀꧈​ 12ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦩꦤ꧀ꦢꦼꦏ꧀ꦤꦁꦏꦸꦠꦯꦼꦫꦏꦸꦱ꧀ꦭꦤ꧀ꦩꦩ꧀ꦥꦶꦂ​ꦠꦼꦭꦸꦁ​ꦢꦶꦤ​ꦤꦁꦏꦺꦴꦤꦺꦴ​꧉​ 13ꦱꦁꦏꦏꦺꦴꦤꦺꦴ​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦧꦸꦢꦭ꧀ꦤꦁꦏꦸꦠꦫꦺꦒꦶꦪꦸꦩ꧀꧈​ꦲꦺꦱꦸꦏ꧀ꦏꦺ​ꦠꦼꦫꦸꦱ꧀ꦲꦺꦤꦺꦁꦲꦔꦶꦤ꧀ꦧꦤ꧀ꦠꦼꦂ​ꦱꦁꦏꦏꦶꦢꦸꦭ꧀ ꦩꦸꦭꦤꦺ​ꦊꦠ꧀ꦫꦺꦴꦁ​ꦢꦶꦤ​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦠꦼꦏꦤ꧀ꦏꦸꦠꦥꦸꦠꦶꦪꦺꦴꦭꦶ​꧉​ 14ꦤꦁꦏꦸꦠꦏꦺꦴꦤꦺꦴ​ꦲꦮꦏ꧀ꦏꦺ​ꦢꦺꦮꦺꦏꦼꦥꦼꦠꦸꦏ꧀ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦿꦶꦱ꧀ꦠꦼꦤ꧀꧈​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦢꦶꦏꦺꦴꦁꦏꦺꦴꦤ꧀ꦔꦶꦤꦼꦥ꧀ꦱꦩ꧀ꦥꦺꦏ꧀ꦱꦼꦩꦶꦁꦒꦸ​ꦤꦁꦏꦺꦴꦤꦺꦴ​꧉​ꦱꦁꦏꦏꦺꦴꦤꦺꦴ​ꦲꦮꦏ꧀ꦏꦺ​ꦢꦺꦮꦺꦧꦸꦢꦭ꧀ꦤꦁꦏꦸꦠꦬꦸꦩ꧀꧈​ 15ꦤꦁꦏꦸꦠꦬꦸꦩ꧀ꦏꦺꦴꦤꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦿꦶꦱ꧀ꦠꦼꦤ꧀ꦏꦿꦸꦔꦸ​ꦤꦺꦏ꧀ꦲꦮꦏ꧀ꦏꦺ​ꦢꦺꦮꦺꦠꦼꦏ​꧉​ꦮꦺꦴꦁꦮꦺꦴꦁ​ꦥꦢ​ꦩꦼꦠꦸꦏ꧀ꦏꦶꦲꦮꦏ꧀ꦏꦺ​ꦢꦺꦮꦺꦤꦁꦥꦱꦂ​ꦄꦥꦶꦪꦸꦱ꧀ꦭꦤ꧀ꦲꦸꦒ​ꦤꦁꦠꦿꦺꦱ꧀ꦡꦧꦼꦂꦤꦺ꧉​ꦏꦢꦸꦁ​ꦫꦱꦸꦭ꧀ꦦꦈꦭꦸꦱ꧀ꦏꦼꦥꦼꦠꦸꦏ꧀ꦏꦫꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦩꦲꦸ​꧈​ꦢꦺꦏ꧀ꦤꦺꦠꦼꦫꦸꦱ꧀ꦩꦠꦸꦂꦏꦼꦱꦸꦮꦸꦤ꧀ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦤꦩ꧀ꦥ​ꦏꦼꦏꦸꦮꦠ꧀ꦠꦤ꧀ꦲꦚꦂ​꧉​

꧋ꦤꦁꦏꦸꦠꦬꦸꦩ꧀꧈​

16꧋ꦤꦁꦏꦸꦠꦬꦸꦩ꧀ꦫꦱꦸꦭ꧀ꦦꦈꦭꦸꦱ꧀ꦲꦺꦤ꧀ꦠꦸꦏ꧀ꦩꦁꦒꦺꦴꦤ꧀ꦢꦺꦮꦺ꧈​ꦢꦶꦗꦒ​ꦱꦺꦴꦭ꧀ꦢꦠ꧀ꦱꦶꦗꦶ​꧉​

17꧋ꦱꦏ꧀ꦮꦶꦱ꧀ꦱꦺ​ꦏ꧀ꦭꦶꦮꦠ꧀ꦠꦼꦭꦸꦁ​ꦢꦶꦤ​ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦔꦸꦤ꧀ꦢꦁ​ꦥꦫ​ꦥꦼꦔꦉꦥ꧀ꦥꦺ​ꦮꦺꦴꦁ​ꦙꦸꦱꦶꦁ​ꦩꦁꦒꦺꦴꦤ꧀ꦤꦁꦏꦺꦴꦤꦺꦴ​꧉​ꦏꦢꦸꦁ​ꦮꦺꦴꦁꦮꦺꦴꦁ​ꦮꦶꦱ꧀ꦔꦸꦩ꧀ꦥꦸꦭ꧀ ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦥꦫ​ꦱꦼꦢꦸꦭꦸꦂ​꧈​ꦱꦼꦤꦗꦤ꧀ꦲꦏꦸ​ꦲꦺꦴꦫ​ꦤ꧀ꦢꦸꦮꦺꦱꦭꦃ​ꦲꦥꦲꦥ​ꦩꦫꦁ​ꦧꦁꦱꦤꦺ​ꦲꦮꦏ꧀ꦏꦺ​ꦢꦺꦮꦺꦭꦤ꧀ꦲꦏꦸ​ꦪ​ꦧ꧀ꦭꦱ꧀ꦲꦺꦴꦫ​ꦤꦼꦫꦏ꧀ꦲꦢꦠ꧀ꦠꦠꦕꦫ​ꦠꦶꦁꦒꦭꦤ꧀ꦤꦺꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧈​ꦤꦁꦔꦶꦁ​ꦲꦏꦸ​ꦩꦼꦏ꧀ꦱ​ꦢꦶꦕꦼꦏꦼꦭ꧀ꦤꦁꦏꦸꦠꦪꦺꦫꦸꦱꦭꦺꦩ꧀ꦭꦤ꧀ꦢꦶꦥꦱꦿꦃꦲꦏꦺꦩꦫꦁ​ꦮꦺꦴꦁ​ꦬꦸꦩ꧀꧈​ 18ꦱꦏ꧀ꦮꦶꦱ꧀ꦱꦺ​ꦮꦺꦴꦁ​ꦬꦸꦩ꧀ꦤꦏꦺꦴꦤ꧀ꦤꦏꦺꦴꦤ꧀ꦤꦶꦥꦽꦏꦫꦤꦺ​ꦭꦤ꧀ꦲꦺꦴꦫ​ꦤꦼꦩꦸ​ꦲꦥꦲꦥ​ꦱꦶꦁ​ꦧꦶꦱ​ꦩꦫꦏ꧀ꦏꦏꦺꦲꦏꦸ​ꦤꦩ꧀ꦥ​ꦱꦼꦠꦿꦥꦤ꧀ꦥꦠꦶ​꧈​ꦲꦏꦸ​ꦠꦼꦫꦸꦱ꧀ꦲꦉꦥ꧀ꦢꦶ​ꦲꦺꦕꦸꦭ꧀ꦭꦏꦺ​꧉​ 19ꦤꦁꦔꦶꦁ​ꦮꦺꦴꦁꦮꦺꦴꦁ​ꦙꦸꦤꦁꦏꦤ​ꦲꦺꦴꦫ​ꦠꦿꦶꦩ​ꦤꦺꦏ꧀ꦲꦏꦸ​ꦢꦶꦲꦼꦠꦺꦴꦏ꧀ꦏꦏꦺ꧈​ꦩꦸꦭꦤꦺ​ꦲꦏꦸ​ꦠꦼꦫꦸꦱ꧀ꦏꦼꦥꦼꦏ꧀ꦱ​ꦔ꧀ꦒꦮ​ꦥꦽꦏꦫ​ꦲꦶꦏꦶ​ꦤꦁꦏꦿꦸꦠꦺꦴꦤ꧀ꦒꦼꦢꦺ꧈​ꦏꦿꦸꦠꦺꦴꦤ꧀ꦤꦺꦫꦠꦸꦤꦺ​ꦤꦁꦬꦸꦩ꧀꧈​ꦲꦏꦸ​ꦢꦺꦮꦺꦲꦺꦴꦫ​ꦧꦏꦭ꧀​ꦔ꧀ꦒꦮ​ꦏꦼꦭꦃꦲꦤ꧀ꦲꦥꦲꦥ​ꦧꦧ꧀ꦧꦁꦱꦏꦸ​꧉​ 20ꦪ​ꦲꦶꦏꦸ​ꦗꦭꦂꦫꦤ꧀ꦤꦺ​ꦲꦼꦁꦒꦺꦴꦤ꧀ꦏꦸ​ꦔꦸꦩ꧀ꦥꦸꦭ꧀ꦭꦏꦺꦏꦺꦴꦮꦺ​ꦏꦧꦺꦃ​ꦤꦁꦏꦺꦤꦺ​꧈​ꦱꦸꦥꦪ​ꦲꦏꦸ​ꦧꦶꦱ​ꦔꦺꦴꦩꦺꦴꦁꦔꦶꦏꦺꦴꦮꦺ​ꦧꦧ꧀ꦲꦶꦏꦶ​꧉​ꦲꦏꦸ​ꦢꦶꦫꦤ꧀ꦠꦺ​ꦲꦶꦏꦶ​ꦗꦭꦂꦫꦤ꧀ꦲꦏꦸ​ꦥꦽꦕꦪ​ꦩꦫꦁ​ꦱꦶꦁ​ꦢꦶꦲꦉꦥ꧀ꦲꦉꦥ꧀ꦏꦫꦺꦴ​ꦧꦁꦱ​ꦆꦱꦿꦌꦭ꧀꧈​”

21꧋ꦮꦺꦴꦁꦮꦺꦴꦁ​ꦙꦸꦩꦲꦸ​ꦠꦼꦫꦸꦱ꧀ꦱꦼꦩꦲꦸꦂ​:“ꦲꦮꦏ꧀ꦏꦺ​ꦢꦺꦮꦺꦲꦺꦴꦫ​ꦤꦩ꧀ꦥ​ꦭꦪꦁ​ꦲꦥꦲꦥ​ꦱꦁꦏꦪꦸꦢꦺꦪ​ꦧꦧ꧀ꦏꦺꦴꦮꦺ​꧉​ꦲꦸꦒ​ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦥꦱꦥ​ꦱꦁꦏꦏꦤ​ꦱꦶꦁ​ꦢꦶꦏꦺꦴꦁꦏꦺꦴꦤ꧀​ꦔ꧀ꦒꦮ​ꦏꦧꦂ​ꦩ꧀ꦧꦿꦺꦤꦺꦧꦧ꧀ꦧꦼꦤꦼꦂ​ꦲꦺꦴꦫꦤꦺ​꧉​ 22ꦤꦁꦔꦶꦁ​ꦲꦮꦏ꧀ꦏꦺ​ꦢꦺꦮꦺꦏꦼꦥꦺꦔꦶꦤ꧀ꦏꦿꦸꦔꦸ​ꦥꦶꦤꦼꦩꦸꦩꦸꦧꦧ꧀ꦥꦶꦮꦸꦭꦁ​ꦱꦶꦁ​ꦲꦚꦂ​ꦲꦶꦏꦶ​꧈​ꦲꦮꦶꦠ꧀ꦲꦮꦏ꧀ꦏꦺ​ꦢꦺꦮꦺꦔꦼꦂꦠꦶ​ꦤꦺꦏ꧀ꦤꦁꦲꦼꦤ꧀ꦢꦶꦲꦼꦤ꧀ꦢꦶ​ꦥꦶꦮꦸꦭꦁ​ꦲꦶꦏꦶ​ꦢꦶꦩꦸꦁꦱꦸꦃ​꧉​”

23꧋ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦥꦢ​ꦔ꧀ꦒꦮꦺ​ꦏꦁꦱꦺꦤ꧀ꦤꦤ꧀ꦏꦫꦺꦴ​ꦫꦱꦸꦭ꧀ꦦꦈꦭꦸꦱ꧀ꦭꦤ꧀ꦏꦢꦸꦁ​ꦮꦶꦱ꧀ꦠꦼꦏꦤ꧀ꦢꦶꦤꦤꦺ​ꦮꦺꦴꦁꦮꦺꦴꦁ​ꦩꦲꦸ​ꦠꦼꦏ​ꦤꦁꦲꦺꦴꦩꦃꦲꦺ​ꦫꦱꦸꦭ꧀ꦦꦈꦭꦸꦱ꧀ ꦤꦁꦔꦶꦁ​ꦱꦲꦶꦏꦶ​ꦮꦺꦴꦁꦔꦺ​ꦲꦺꦴꦏꦺꦃꦲꦺꦔꦸꦁꦏꦸꦭ꧀ꦭꦶ​ꦱꦶꦁ​ꦤ꧀ꦢꦶꦱꦶꦏ꧀꧈​ꦮꦶꦮꦶꦠ꧀ꦲꦺꦱꦸꦏ꧀ꦠꦼꦏꦤꦺ​ꦱꦺꦴꦫꦺ​ꦫꦱꦸꦭ꧀ꦦꦈꦭꦸꦱ꧀ꦚꦿꦶꦠꦏ꧀ꦏꦏꦺꦭꦤ꧀​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦧꦧ꧀ꦏꦿꦠꦺꦴꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦔꦁꦒꦺꦴ​ꦲꦪꦠ꧀ꦲꦪꦠ꧀ꦱꦁꦏꦏꦶꦠꦧ꧀ꦧꦺ​ꦤꦧꦶ​ꦩꦺꦴꦱꦼꦱ꧀ꦭꦤ꧀ꦏꦶꦠꦧ꧀ꦏꦶꦠꦧ꧀ꦧꦺ​ꦥꦫ​ꦤꦧꦶ​꧈​ꦫꦱꦸꦭ꧀ꦦꦈꦭꦸꦱ꧀​ꦤ꧀ꦢꦸꦤꦸꦁꦤ꧀ꦢꦸꦤꦸꦁꦔꦏꦺꦩꦫꦁ​ꦮꦺꦴꦁꦮꦺꦴꦁ​ꦏꦸꦮꦶ​꧈​ꦱꦸꦥꦪ​ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​ 24ꦥꦚ꧀ꦕꦺꦤ꧀ꦪ​ꦲꦺꦤꦺꦁꦱꦶꦁ​ꦥꦽꦕꦪ​ꦭꦤ꧀ꦔꦏꦺꦴꦤ꧀ꦤꦶ​ꦤꦺꦏ꧀ꦱꦶꦁ​ꦢꦶꦮꦸꦭꦁꦔꦏꦺꦏꦫꦺꦴ​ꦫꦱꦸꦭ꧀ꦦꦈꦭꦸꦱ꧀ꦏꦸꦮꦶ​ꦧꦼꦤꦼꦂ​꧈​ꦤꦁꦔꦶꦁ​ꦲꦸꦒ​ꦲꦺꦤꦺꦁꦱꦶꦁ​ꦲꦺꦴꦫ​ꦒꦼꦊꦩ꧀ꦥꦽꦕꦪ​꧉​ 25ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦩꦸꦭꦶꦃ​ꦱꦁꦏꦏꦺꦴꦤꦺꦴ​ꦏꦫꦺꦴ​ꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀꧈​ꦏꦸꦮꦶ​ꦱꦏ꧀ꦮꦶꦱ꧀ꦱꦺ​ꦫꦱꦸꦭ꧀ꦦꦈꦭꦸꦱ꧀ꦔꦺꦴꦩꦺꦴꦁꦔꦺꦤꦺ​:“ꦥꦚ꧀ꦕꦺꦤ꧀ꦕꦺꦴꦕꦺꦴꦏ꧀​ꦧꦔꦼꦠ꧀ꦠꦼꦩ꧀ꦧꦸꦁꦔꦺ​ꦫꦺꦴꦃ​ꦱꦸꦕꦶ​ꦱꦶꦁ​ꦢꦶꦲꦼꦠꦺꦴꦏ꧀ꦏꦏꦺꦏꦫꦺꦴ​ꦤꦧꦶ​ꦪꦺꦱꦪ​ꦩꦫꦁ​ꦥꦫ​ꦩ꧀ꦧꦃꦩ꧀ꦧꦲꦤ꧀ꦤꦺꦲꦮꦏ꧀ꦏꦺ​ꦢꦺꦮꦺ꧉​ 26ꦠꦼꦩ꧀ꦧꦸꦁ​ꦏꦸꦮꦶ​ꦲꦸꦤꦶꦤꦺ​ꦔꦺꦤꦺ​:

‘ꦏꦤ​ꦧꦁꦱ​ꦲꦶꦏꦶ​ꦢꦶꦥꦫꦤ꧀ꦤꦶ​ꦭꦤ꧀ꦢꦶꦲꦺꦴꦩꦺꦴꦁꦔꦶꦤꦺꦏ꧀
ꦧꦏꦭ꧀ꦔꦿꦸꦔꦺꦴꦏ꧀ꦏꦏꦺ꧈​ꦤꦁꦔꦶꦁ​ꦲꦺꦴꦫ​ꦢꦸꦤꦸꦁ꧈​
ꦧꦏꦭ꧀​ꦤ꧀ꦢꦼꦊꦁ​꧈​ꦤꦁꦔꦶꦁ​ꦲꦺꦴꦫ​ꦮꦼꦫꦸꦃ​꧉​
27ꦲꦮꦶꦠ꧀ꦥꦶꦏꦶꦂꦫꦤ꧀ꦤꦺ​ꦮꦺꦴꦁꦮꦺꦴꦁ​ꦏꦸꦮꦶ​ꦏꦼꦠꦸꦭ꧀
ꦏꦸꦥꦶꦁꦔꦺ​ꦮꦶꦱ꧀ꦢꦶꦱꦸꦩ꧀ꦥꦼꦭ꧀ꦭꦶꦢꦢꦶ​ꦧꦸꦢꦼꦏ꧀
ꦭꦤ꧀ꦩꦿꦶꦥꦠ꧀ꦠꦺ​ꦢꦶꦲꦼꦉꦩꦏꦺꦢꦢꦶ​ꦭꦩꦸꦂ​꧉​
ꦱꦼꦩꦸꦁꦒꦺꦴꦤ꧀ꦤꦺꦲꦺꦴꦫ​ꦔꦺꦴꦤꦺꦴ​꧈​
ꦩꦼꦱ꧀ꦠꦶꦩꦿꦶꦥꦠ꧀ꦠꦺ​ꦧꦶꦱ​ꦮꦼꦫꦸꦃ​
ꦭꦤ꧀ꦏꦸꦥꦶꦁꦔꦺ​ꦧꦶꦱ​ꦏꦿꦸꦔꦸ​
ꦭꦤ꧀ꦥꦶꦏꦶꦂꦫꦤ꧀ꦤꦺ​ꦧꦶꦱ​ꦔꦼꦂꦠꦶ​꧈​
ꦩꦼꦱ꧀ꦠꦶꦠꦼꦫꦸꦱ꧀ꦥꦢ​ꦩꦫ​ꦤꦁꦔ꧀ꦒꦺꦴꦤ꧀ꦏꦸ​
ꦭꦤ꧀ꦠꦏ꧀ꦮꦫꦱ꧀!’”

28꧋ꦫꦱꦸꦭ꧀ꦦꦈꦭꦸꦱ꧀ꦠꦼꦫꦸꦱ꧀ꦔꦺꦴꦩꦺꦴꦁꦩꦼꦤꦺꦃ​:“ꦥꦫ​ꦱꦼꦢꦸꦭꦸꦂ​꧈​ꦥꦢ​ꦔꦼꦂꦠꦶꦪ​ꦤꦺꦏ꧀ꦏꦧꦂ​ꦏꦼꦱ꧀ꦭꦩꦼꦠ꧀ꦠꦤ꧀ꦱꦁꦏꦒꦸꦱ꧀ꦠꦶ​ꦄꦭ꧀ꦭꦃ​ꦲꦶꦏꦶ​ꦱꦲꦶꦏꦶ​ꦢꦶꦒꦼꦭꦂꦫꦏꦺꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦭꦤ꧀ꦮꦺꦴꦁꦮꦺꦴꦁ​ꦏꦸꦮꦶ​ꦥꦢ​ꦒꦼꦊꦩ꧀ꦔꦿꦸꦔꦺꦴꦏ꧀ꦏꦏꦺ꧉​” 29ꦱꦏ꧀ꦮꦶꦱ꧀ꦱꦺ​ꦫꦱꦸꦭ꧀ꦦꦈꦭꦸꦱ꧀ꦔꦺꦴꦩꦺꦴꦁꦔꦺꦴꦤꦺꦴ​ꦏꦸꦮꦶ​꧈​ꦮꦺꦴꦁꦮꦺꦴꦁ​ꦙꦸꦠꦼꦫꦸꦱ꧀ꦥꦢ​ꦭꦸꦔ​ꦏꦫꦺꦴ​ꦲꦺꦁꦏꦺꦭ꧀ꦭꦺꦁꦏꦺꦭ꧀ꦭꦤ꧀꧈​

30꧋ꦫꦺꦴꦁ​ꦠꦲꦸꦤ꧀ꦱꦸꦮꦺꦤꦺ​ꦫꦱꦸꦭ꧀ꦦꦈꦭꦸꦱ꧀ꦩꦁꦒꦺꦴꦤ꧀ꦤꦁꦏꦸꦠꦬꦸꦩ꧀ꦏꦺꦴꦤꦺꦴ​꧈​ꦤꦁꦲꦺꦴꦩꦃ​ꦱꦺꦮꦤ꧀꧈​ꦱꦥ​ꦮꦲꦺ​ꦱꦶꦁ​ꦠꦶꦭꦶꦏ꧀ꦢꦺꦏ꧀ꦤꦺꦤꦁꦏꦺꦴꦤꦺꦴ​ꦪ​ꦢꦶꦠꦩ꧀ꦥ​ꦲꦥꦶꦏ꧀꧈​ 31ꦫꦱꦸꦭ꧀ꦦꦈꦭꦸꦱ꧀ꦔꦧꦂꦫꦏꦺꦧꦧ꧀ꦏꦿꦠꦺꦴꦤ꧀ꦤꦺ​ꦒꦸꦱ꧀ꦠꦶ​ꦄꦭ꧀ꦭꦃ​ꦭꦤ꧀ꦩꦸꦭꦁ​ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦏꦫꦺꦴ​ꦏꦼꦤ꧀ꦢꦼꦭ꧀ꦭꦤ꧀ꦲꦺꦴꦫ​ꦲꦺꦤꦺꦁꦮꦺꦴꦁ​ꦱꦶꦁ​ꦔꦭꦁꦔꦭꦁꦔꦶꦢꦺꦏ꧀ꦤꦺ꧉​

↑ ↑ ↑

← ꧇​꧒꧗꧇​