ꦏꦶꦠꦧ꧀ꦱꦸꦕꦶꦥꦽꦗꦚ꧀ꦗꦶꦪꦤ꧀ꦲꦚꦂ/ꦥꦫꦫꦱꦸꦭ꧀/11

ꦥꦱꦭ꧀ ꧇​꧑꧇​ ꧇​꧒꧇​ ꧇​꧓꧇​ ꧇​꧔꧇​ ꧇​꧕꧇​ ꧇​꧖꧇​꧇​꧗꧇​ ꧇​꧘꧇​ ꧇​꧙꧇​ ꧇​꧑꧐꧇​ ꧇​꧑꧑꧇​ ꧇​꧑꧒꧇​ ꧇​꧑꧓꧇​꧇​꧑꧔꧇​ ꧇​꧑꧕꧇​ ꧇​꧑꧖꧇​꧇​꧑꧗꧇​ ꧇​꧑꧘꧇​ ꧇​꧑꧙꧇​ ꧇​꧒꧐꧇​ ꧇​꧒꧑꧇​꧇​꧒꧒꧇​꧇​꧒꧓꧇​ ꧇​꧒꧔꧇​꧇​꧒꧕꧇​ ꧇​꧒꧖꧇​ ꧇​꧒꧗꧇​ ꧇​꧒꧘꧇​

꧋ꦭꦥꦺꦴꦂꦫꦤ꧀ꦤꦺ​ꦫꦱꦸꦭ꧀ꦦꦺꦠꦿꦸꦱ꧀ꦩꦫꦁ​ꦥꦱꦩꦸꦮꦤ꧀ꦤꦁꦏꦸꦠꦪꦺꦫꦸꦱꦭꦺꦩ꧀꧈​

꧇​꧑꧑꧇​ 1꧋ꦥꦫ​ꦫꦱꦸꦭ꧀ꦭꦤ꧀ꦥꦫ​ꦱꦼꦢꦸꦭꦸꦂ​ꦱꦶꦁ​ꦤꦁꦪꦸꦢꦺꦪ​ꦥꦢ​ꦏꦿꦸꦔꦸ​ꦤꦺꦏ꧀ꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦲꦸꦒ​ꦥꦢ​ꦤꦩ꧀ꦥ​ꦥꦶꦠꦸꦠꦸꦂꦫꦺ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ 2ꦏꦢꦸꦁ​ꦫꦱꦸꦭ꧀ꦦꦺꦠꦿꦸꦱ꧀ꦠꦼꦏ​ꦤꦁꦏꦸꦠꦪꦺꦫꦸꦱꦭꦺꦩ꧀ ꦢꦺꦏ꧀ꦤꦺꦢꦶꦥꦲꦶꦢꦸꦃꦏꦫꦺꦴ​ꦮꦺꦴꦁꦮꦺꦴꦁ​ꦙꦸꦱꦶꦁ​ꦥꦽꦕꦪ​꧉​ꦥꦶꦤꦼꦩꦸꦤꦺꦮꦺꦴꦁꦮꦺꦴꦁ​ꦲꦶꦏꦶ​꧈​ꦮꦺꦴꦁ​ꦱꦶꦁ​ꦢꦸꦢꦸ​ꦙꦸꦱꦶꦁ​ꦩ꧀ꦊꦧꦸ​ꦢꦢꦶ​ꦮꦂꦒꦤꦺ​ꦥꦱꦩꦸꦮꦤ꧀ꦤꦺꦒꦸꦱ꧀ꦠꦶ​ꦪꦺꦯꦸꦱ꧀ꦏꦸꦢꦸ​ꦔ꧀ꦭꦏꦺꦴꦤ꧀ꦤꦶ​ꦱꦸꦤꦠ꧀꧈​ꦮꦺꦴꦁꦮꦺꦴꦁ​ꦲꦶꦏꦶ​ꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦫꦱꦸꦭ꧀ꦦꦺꦠꦿꦸꦱ꧀: 3“ꦏꦼꦤꦺꦁꦲꦥ​ꦏꦺꦴꦮꦺ​ꦏꦺꦴꦏ꧀ꦔꦶꦤꦼꦥ꧀ꦤꦁꦲꦺꦴꦩꦃꦲꦺ​ꦮꦺꦴꦁ​ꦱꦶꦁ​ꦲꦺꦴꦫ​ꦱꦸꦤꦠ꧀ ꦩꦭꦃ​ꦩꦁꦔꦤ꧀ꦧꦼꦧꦉꦁꦔꦤ꧀ꦏꦫꦺꦴ​ꦮꦺꦴꦁꦮꦺꦴꦁ​ꦏꦸꦮꦶ​ꦲꦩ꧀ꦧꦫꦁ​?ꦏꦸꦮꦶ​ꦭꦲꦸꦠ꧀ꦲꦺꦴꦫ​ꦲꦥꦶꦏ꧀ꦠ​?” 4ꦩꦸꦭꦤꦺ​ꦫꦱꦸꦭ꧀ꦦꦺꦠꦿꦸꦱ꧀ꦠꦼꦫꦸꦱ꧀ꦔꦼꦏꦺꦏ꧀ꦏꦶꦭꦥꦺꦴꦂꦫꦤ꧀ꦧꦧ꧀ꦥꦽꦏꦫꦥꦽꦏꦫ​ꦱꦶꦁ​ꦮꦶꦱ꧀​ꦏ꧀ꦭꦏꦺꦴꦤ꧀ꦏꦧꦺꦃ​꧉​

5-7꧋ꦢꦺꦏ꧀ꦤꦺꦩꦺꦴꦭꦃꦲꦶꦔꦺꦤꦺ​:“ꦢꦺꦴꦁꦔꦺꦲꦏꦸ​ꦤꦁꦏꦸꦠꦪꦺꦴꦥꦺ​꧈​ꦮꦪꦃꦲꦺ​ꦲꦏꦸ​ꦲꦶꦗꦶꦏ꧀​ꦤ꧀ꦢꦼꦢꦺꦴꦔ​꧈​ꦏꦺꦴꦏ꧀ꦲꦏꦸ​ꦤꦩ꧀ꦥ​ꦮꦼꦮꦼꦫꦸꦃ꧉​ꦲꦏꦸ​ꦮꦼꦫꦸꦃ​ꦏꦪ​ꦲꦺꦤꦺꦁꦭꦺꦩꦺꦏ꧀ꦲꦩ꧀ꦧ​ꦱꦶꦁ​ꦥꦺꦴꦗꦺꦴꦏ꧀ꦏꦤ꧀ꦤꦺ​ꦥꦥꦠ꧀ꦢꦶꦠꦭꦺꦤ꧀ꦤꦶ​꧉​ꦭꦺꦩꦺꦏ꧀ꦩꦲꦸ​ꦢꦶꦲꦼꦢꦸꦤ꧀ꦤꦏꦺꦱꦁꦏꦭꦔꦶꦠ꧀ꦠꦼꦫꦸꦱ꧀ꦩꦤ꧀ꦢꦼꦏ꧀ꦤꦁꦔꦉꦥ꧀ꦏꦸ​꧉​ꦏꦢꦸꦁ​ꦠꦏ꧀ꦲꦼꦩꦠ꧀ꦠꦏꦺꦲꦏꦸ​ꦮꦼꦫꦸꦃ​ꦤꦁꦚ꧀ꦗꦼꦫꦺꦴꦤꦺ​ꦭꦺꦩꦺꦏ꧀ꦏꦸꦮꦶ​ꦲꦺꦤꦺꦁꦏꦺꦮꦤ꧀ꦏꦺꦮꦤ꧀ꦱꦶꦁ​ꦱꦶꦏꦶꦭ꧀ꦭꦺ​ꦥꦥꦠ꧀ ꦏꦺꦮꦤ꧀ꦏꦺꦮꦤ꧀ꦒꦭꦏ꧀ꦭꦤ꧀ꦏꦺꦮꦤ꧀ꦏꦺꦮꦤ꧀ꦱꦶꦁ​ꦲꦩ꧀ꦧꦿꦁꦏꦁ​ꦭꦤ꧀ꦲꦸꦒ​ꦲꦺꦤꦺꦁꦩꦤꦸꦏ꧀ꦩꦤꦸꦏ꧀꧈​ꦲꦏꦸ​ꦠꦼꦫꦸꦱ꧀ꦏꦿꦸꦔꦸ​ꦱ꧀ꦮꦫ​ꦔꦺꦴꦩꦺꦴꦁꦩꦫꦁ​ꦲꦏꦸ​ꦔꦺꦤꦺ​:'ꦦꦺꦠꦿꦸꦱ꧀ ꦔꦢꦼꦏ꧀ꦏ꧈​ꦧꦼꦭꦺꦃꦲꦤꦭꦤ꧀ꦥꦔꦤ꧀ꦤꦼꦤ꧀!’ 8ꦤꦁꦔꦶꦁ​ꦲꦏꦸ​ꦠꦼꦫꦸꦱ꧀ꦱꦼꦩꦲꦸꦂ​:'ꦲꦺꦴꦫ​ꦒꦸꦱ꧀ꦠꦶ​꧈​ꦲꦺꦴꦫ​!ꦲꦏꦸ​ꦢꦸꦫꦸꦁ​ꦠꦲꦸ​ꦩꦁꦔꦤ꧀ꦥꦔꦤ꧀ꦱꦶꦁ​ꦲꦺꦴꦫ​ꦲꦥꦶꦏ꧀ꦭꦤ꧀ꦲꦺꦴꦫ​ꦲꦺꦤ꧀ꦠꦸꦏ꧀ꦢꦶꦥꦔꦤ꧀!’ 9ꦱ꧀ꦮꦫ​ꦱꦁꦏꦭꦔꦶꦠ꧀ꦩꦲꦸ​ꦠꦼꦫꦸꦱ꧀ꦔꦺꦴꦩꦺꦴꦁ:'ꦧꦫꦁ​ꦱꦶꦁ​ꦢꦶꦲꦁꦒꦼꦥ꧀ꦲꦥꦶꦏ꧀ꦭꦤ꧀ꦏꦼꦤꦺꦁꦢꦶꦥꦔꦤ꧀ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦗ​ꦲꦩ꧀ꦧꦺꦴꦏ꧀ꦠꦩ꧀ꦥꦶꦏ꧀!’ 10ꦥꦽꦏꦫ​ꦲꦶꦏꦶ​ꦱꦩ꧀ꦥꦺꦏ꧀​ꦏ꧀ꦭꦏꦺꦴꦤ꧀ꦥꦶꦁ​ꦠꦼꦭꦸ​꧉​ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦭꦺꦩꦺꦏ꧀ꦏꦺꦭꦤ꧀ꦱꦏ꧀ꦲꦶꦱꦶꦤꦺ​ꦢꦶꦲꦁꦏꦠ꧀ꦩꦸꦁꦒꦃ​ꦩꦼꦤꦺꦃ​ꦤꦁꦭꦔꦶꦠ꧀꧈​ 11ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦲꦺꦤꦺꦁꦮꦺꦴꦁ​ꦭꦤꦁ​ꦠꦼꦭꦸ​ꦠꦼꦏ​ꦤꦁꦲꦺꦴꦩꦃ​ꦱꦶꦁ​ꦠꦏ꧀ꦲꦶꦤꦼꦥ꧀ꦥꦶ꧉​ꦮꦺꦴꦁ​ꦠꦼꦭꦸ​ꦏꦸꦮꦶ​ꦏꦺꦴꦁꦏꦺꦴꦤ꧀ꦤꦤ꧀ꦱꦁꦏꦏꦸꦠꦯꦺꦱꦫꦺꦪ꧈​ꦏꦺꦴꦁꦏꦺꦴꦤ꧀​ꦔ꧀ꦒꦺꦴꦭꦺꦏ꧀ꦏꦶ​ꦲꦏꦸ​꧉​ 12ꦫꦺꦴꦃ​ꦱꦸꦕꦶ​ꦔꦺꦴꦩꦺꦴꦁꦩꦫꦁ​ꦲꦏꦸ​ꦥꦼꦔꦶꦁ​ꦮꦼꦢꦶ​꧈​ꦲꦏꦸ​ꦏꦼꦤꦺꦁꦩꦺꦭꦸ​ꦮꦺꦴꦁꦮꦺꦴꦁ​ꦏꦸꦮꦶ​ꦧꦸꦢꦭ꧀ꦤꦁꦏꦸꦠꦯꦺꦱꦫꦺꦪ꧉​ꦱꦁꦏꦏꦸꦠꦪꦺꦴꦥꦺ​ꦏꦺꦴꦤꦺꦴ​ꦲꦺꦤꦺꦁꦱꦼꦢꦸꦭꦸꦂ​ꦤꦼꦤꦼꦩ꧀ꦱꦶꦁ​ꦩꦺꦭꦸ​ꦲꦏꦸ​ꦤꦁꦏꦸꦠꦯꦺꦱꦫꦺꦪ꧉​ꦲꦮꦏ꧀ꦏꦺ​ꦢꦺꦮꦺꦠꦼꦫꦸꦱ꧀ꦤꦁꦔ꧀ꦒꦺꦴꦤ꧀ꦤꦺꦏꦸꦩꦼꦤ꧀ꦢꦤ꧀ꦑꦺꦴꦂꦤꦺꦭꦶꦪꦸꦱ꧀꧈​ 13-14ꦱꦏ꧀ꦠꦼꦏꦤꦺ​ꦲꦮꦏ꧀ꦏꦺ​ꦢꦺꦮꦺꦑꦺꦴꦂꦤꦺꦭꦶꦪꦸꦱ꧀ꦪ​ꦠꦼꦫꦸꦱ꧀ꦔꦺꦴꦩꦺꦴꦁꦩꦫꦁ​ꦲꦮꦏ꧀ꦏꦺ​ꦢꦺꦮꦺꦤꦺꦏ꧀ꦢꦺꦏ꧀ꦤꦺꦢꦶꦠꦼꦏꦤꦶ​ꦩꦸꦭꦺꦏꦠ꧀ꦤꦁꦲꦺꦴꦩꦃꦲꦺ​꧉​ꦩꦸꦭꦺꦏꦠ꧀ꦠꦺꦔꦺꦴꦩꦺꦴꦁꦔꦺꦤꦺ​ꦩꦫꦁ​ꦢꦺꦏ꧀ꦤꦺ:'ꦑꦺꦴꦂꦤꦺꦭꦶꦪꦸꦱ꧀ ꦏꦤ​ꦔꦺꦴꦁꦏꦺꦴꦤ꧀ꦮꦺꦴꦁ​ꦧꦸꦢꦭ꧀ꦤꦁꦏꦸꦠꦪꦺꦴꦥꦺ​ꦔ꧀ꦒꦺꦴꦭꦺꦏ꧀ꦏꦶ​ꦮꦺꦴꦁ​ꦱꦶꦁ​ꦗꦼꦤꦼꦁꦔꦺ​ꦱꦶꦩꦺꦴꦤ꧀ꦦꦺꦠꦿꦸꦱ꧀꧈​ꦦꦺꦠꦿꦸꦱ꧀ꦧꦏꦭ꧀ꦔꦺꦴꦩꦺꦴꦁꦔꦶꦏꦺꦴꦮꦺ​ꦏꦼꦥꦿꦶꦪꦺ​ꦏꦺꦴꦮꦺ​ꦱꦏ꧀ꦧꦿꦪꦠ꧀ꦩꦸ​ꦧꦶꦱꦤꦺ​ꦱ꧀ꦭꦩꦼꦠ꧀꧉'​ 15-16ꦤꦁꦲꦺꦴꦩꦃꦲꦺ​ꦑꦺꦴꦂꦤꦺꦭꦶꦪꦸꦱ꧀ꦏꦺꦴꦤꦺꦴ​ꦲꦏꦸ​ꦲꦼꦤ꧀ꦠꦱ꧀ꦩꦺꦴꦭꦃꦲꦶꦔꦺꦴꦩꦺꦴꦁ꧈​ꦏꦺꦴꦏ꧀ꦠꦼꦫꦸꦱ꧀ꦢꦢꦏ꧀ꦏꦤ꧀ꦮꦲꦺ​ꦫꦺꦴꦃ​ꦱꦸꦕꦶ​ꦩꦼꦢꦸꦤ꧀ꦩꦫꦁ​ꦮꦺꦴꦁꦮꦺꦴꦁ​꧈​ꦠꦸꦁꦒꦭ꧀ꦭꦺ​ꦏꦪ​ꦱꦶꦁ​ꦢꦶꦲꦭꦩ꧀ꦩꦶ​ꦲꦮꦏ꧀ꦏꦺ​ꦢꦺꦮꦺꦏꦲꦺ​ꦤ꧀ꦢꦶꦱꦶꦏ꧀​ꦤ꧀ꦢꦶꦱꦶꦏ꧀ꦏꦺ꧉​ꦲꦏꦸ​ꦠꦼꦫꦸꦱ꧀ꦏꦺꦭꦶꦁꦔꦤ꧀ꦩꦫꦁ​ꦠꦼꦩ꧀ꦧꦸꦁꦔꦺ​ꦒꦸꦱ꧀ꦠꦶ​ꦪꦺꦯꦸꦱ꧀ ꦢꦺꦴꦁꦔꦺꦢꦺꦏ꧀ꦤꦺꦔꦺꦴꦩꦺꦴꦁꦔꦺꦤꦺ​:'ꦪꦺꦴꦲꦤꦼꦱ꧀ꦲꦩ꧀ꦧꦥ꧀ꦠꦶꦱ꧀ꦏꦫꦺꦴ​ꦧꦚꦸ​꧈​ꦤꦁꦔꦶꦁ​ꦏꦺꦴꦮꦺ​ꦧꦏꦭ꧀ꦢꦶꦧꦥ꧀ꦠꦶꦱ꧀ꦔꦁꦒꦺꦴ​ꦫꦺꦴꦃ​ꦱꦸꦕꦶ​!’ 17ꦢꦢꦶꦤꦺ​ꦱꦲꦶꦏꦶ​ꦕꦼꦠ​ꦠꦼꦤꦤ꧀ꦤꦺꦏ꧀ꦒꦸꦱ꧀ꦠꦶ​ꦄꦭ꧀ꦭꦃ​ꦢꦺꦮꦺꦮꦶꦱ꧀ꦔꦼꦏꦺꦏ꧀ꦏꦶꦥꦮꦺꦃꦩꦫꦁ​ꦮꦺꦴꦁꦮꦺꦴꦁ​ꦱꦶꦁ​ꦢꦸꦢꦸ​ꦙꦸ꧈​ꦠꦸꦁꦒꦭ꧀ꦭꦺ​ꦮꦲꦺ​ꦏꦫꦺꦴ​ꦥꦮꦺꦃꦱꦶꦁ​ꦢꦶꦠꦩ꧀ꦥ​ꦏꦫꦺꦴ​ꦲꦮꦏ꧀ꦏꦺ​ꦢꦺꦮꦺ꧈​ꦢꦺꦴꦁꦔꦺꦲꦮꦏ꧀ꦏꦺ​ꦢꦺꦮꦺꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ꦭꦃ​ꦲꦏꦸ​ꦲꦶꦏꦶ​ꦱꦥ​ꦠ​꧈​ꦏꦺꦴꦏ꧀ꦮꦤꦶ​ꦔꦭꦁꦔꦭꦁꦔꦶꦒꦸꦱ꧀ꦠꦶ​ꦄꦭ꧀ꦭꦃ​?”

18꧋ꦱꦏ꧀ꦮꦶꦱ꧀ꦱꦺ​ꦏꦿꦸꦔꦸ​ꦠꦼꦩ꧀ꦧꦸꦁꦔꦺ​ꦫꦱꦸꦭ꧀ꦦꦺꦠꦿꦸꦱ꧀ꦏꦸꦮꦶ​ꦩꦲꦸ​꧈​ꦮꦺꦴꦁꦮꦺꦴꦁ​ꦠꦼꦫꦸꦱ꧀ꦲꦺꦴꦫ​ꦥꦢ​ꦩꦲꦶꦢꦺꦴ​ꦢꦺꦏ꧀ꦤꦺꦩꦼꦤꦺꦃ​꧈​ꦩꦭꦃ​ꦠꦼꦫꦸꦱ꧀ꦥꦢ​ꦩꦼꦩꦸꦗꦶ​ꦩꦫꦁ​ꦒꦸꦱ꧀ꦠꦶ​ꦄꦭ꧀ꦭꦃ​ꦔꦺꦴꦩꦺꦴꦁ:“ꦤꦺꦏ꧀ꦔꦺꦴꦤꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​ꦲꦸꦒ​ꦔꦼꦏꦺꦏ꧀ꦏꦶꦏꦼꦭꦸꦁꦒꦂꦫꦤ꧀ꦩꦫꦁ​ꦮꦺꦴꦁꦮꦺꦴꦁ​ꦭꦶꦪ​ꦧꦁꦱ​꧈​ꦱꦸꦥꦪ​ꦥꦢ​ꦤꦶꦁꦒꦭ꧀ꦭꦏꦸ​ꦱꦶꦁ​ꦲꦭ​ꦭꦤ꧀ꦩꦺꦴꦭꦃꦲꦶꦲꦸꦫꦶꦥ꧀ꦱꦶꦁ​ꦲꦚꦂ​꧉​”

꧋ꦥꦱꦩꦸꦮꦤ꧀ꦤꦁꦏꦸꦠꦄꦤ꧀ꦠꦶꦪꦺꦴꦏꦶ꧉​

19꧋ꦮꦺꦴꦁꦮꦺꦴꦁ​ꦱꦶꦁ​ꦥꦽꦕꦪ​ꦠꦼꦫꦸꦱ꧀ꦥꦢ​ꦧꦸꦪꦂ​꧈​ꦗꦭꦂꦫꦤ꧀ꦥꦢ​ꦢꦶꦲꦸꦱꦶꦂ​ꦭꦤ꧀ꦢꦶꦥꦶꦭꦂꦫ​꧈​ꦱꦏ꧀ꦮꦶꦱ꧀ꦱꦺ​ꦱ꧀ꦠꦺꦥ꦳ꦤꦸꦱ꧀ꦢꦶꦥꦠꦺꦤ꧀ꦤꦶ​꧉​ꦮꦺꦴꦁꦮꦺꦴꦁ​ꦥꦢ​ꦧꦸꦪꦂ​ꦱꦩ꧀ꦥꦺꦏ꧀ꦠꦼꦏꦤ꧀ꦧꦮꦃꦥ꦳ꦺꦤꦶꦱꦶꦪ​꧈​ꦠꦼꦏꦤ꧀ꦥꦸꦭꦱꦶꦥꦿꦸꦱ꧀ꦭꦤ꧀ꦲꦸꦒ​ꦠꦼꦏꦤ꧀ꦏꦸꦠ ꦄꦤ꧀ꦠꦶꦪꦺꦴꦏꦶ꧉​ꦮꦺꦴꦁꦮꦺꦴꦁ​ꦱꦶꦁ​ꦥꦽꦕꦪ​ꦱꦶꦁ​ꦥꦢ​ꦧꦸꦪꦂ​ꦏꦸꦮꦶ​ꦥꦢ​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦤꦁꦥꦁꦒꦺꦴꦤꦤ꧀ꦥꦁꦒꦺꦴꦤꦤ꧀ꦱꦶꦁ​ꦲꦚꦂ​꧈​ꦤꦁꦔꦶꦁ​ꦤꦩꦸꦁ​ꦩꦫꦁ​ꦮꦺꦴꦁ​ꦙꦸ꧉​ 20ꦤꦁꦔꦶꦁ​ꦲꦸꦒ​ꦲꦺꦤꦺꦁꦮꦺꦴꦁ​ꦥꦽꦕꦪ​ꦱꦶꦁ​ꦥꦢ​ꦠꦼꦏ​ꦤꦁꦥꦸꦭꦱꦶꦥꦿꦸꦱ꧀ꦭꦤ꧀ꦏꦸꦠꦯꦶꦫꦺꦤꦺ꧈​ꦠꦼꦫꦸꦱ꧀ꦱꦁꦏꦏꦺꦴꦤꦺꦴ​ꦭꦸꦔ​ꦤꦁꦏꦸꦠꦄꦤ꧀ꦠꦶꦪꦺꦴꦏꦶ꧉​ꦤꦁꦄꦤ꧀ꦠꦶꦪꦺꦴꦏꦶꦏꦺꦴꦤꦺꦴ​ꦮꦺꦴꦁꦮꦺꦴꦁ​ꦠꦼꦫꦸꦱ꧀​ꦔ꧀ꦒꦼꦭꦂꦫꦏꦺꦏꦧꦂ​ꦏꦧꦸꦔꦃꦲꦤ꧀ꦩꦫꦁ​ꦮꦺꦴꦁꦮꦺꦴꦁ​ꦧꦁꦱ​ꦭꦶꦪ​꧈​ꦏꦧꦂ​ꦏꦧꦸꦔꦃꦲꦤ꧀ꦧꦧ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀꧈​ 21ꦥꦔ꧀ꦮꦱꦤꦺ​ꦒꦸꦱ꧀ꦠꦶ​ꦪꦺꦯꦸꦱ꧀ꦔꦿꦺꦮꦁꦔꦶ​ꦮꦺꦴꦁꦮꦺꦴꦁ​ꦥꦽꦕꦪ​ꦏꦸꦮꦶ​꧈​ꦩꦸꦭꦤꦺ​ꦮꦺꦴꦁ​ꦥꦶꦫꦁꦥꦶꦫꦁ​ꦠꦼꦫꦸꦱ꧀ꦥꦢ​ꦥꦽꦕꦪ​ꦭꦤ꧀ꦩꦱꦿꦃꦲꦏꦺꦲꦸꦫꦶꦥ꧀ꦥꦺꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀꧈​

22꧋ꦏꦢꦸꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦤꦁꦥꦱꦩꦸꦮꦤ꧀ꦤꦁꦪꦺꦫꦸꦱꦭꦺꦩ꧀ꦏꦿꦸꦔꦸ​ꦏꦧꦂ​ꦧꦧ꧀ꦊꦭꦏꦺꦴꦤ꧀ꦤꦁꦥꦱꦩꦸꦮꦤ꧀ꦤꦁꦄꦤ꧀ꦠꦶꦪꦺꦴꦏꦶ꧈​ꦠꦼꦫꦸꦱ꧀ꦥꦢ​ꦔꦺꦴꦁꦏꦺꦴꦤ꧀ꦱꦼꦢꦸꦭꦸꦂ​ꦧꦂꦤꦧꦱ꧀ꦫꦤ꧉​ 23ꦱꦏ꧀ꦠꦼꦏꦤꦺ​ꦤꦁꦏꦺꦴꦤꦺꦴ​ꦧꦂꦤꦧꦱ꧀ꦮꦼꦫꦸꦃ​ꦮꦺꦴꦁꦮꦺꦴꦁ​ꦥꦽꦕꦪ​ꦱꦶꦁ​ꦤꦁꦏꦺꦴꦤꦺꦴ​ꦥꦢ​ꦢꦶꦧꦼꦂꦏꦃꦲꦶ​ꦏꦫꦺꦴ​ꦒꦸꦱ꧀ꦠꦶ​ꦄꦭ꧀ꦭꦃ​꧉​ꦧꦂꦤꦧꦱ꧀ꦧꦸꦔꦃ​ꦧꦔꦼꦠ꧀ꦭꦤ꧀ꦚꦸꦮꦸꦤ꧀ꦩꦫꦁ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦩꦲꦸ​꧈​ꦱꦸꦥꦪ​ꦥꦢ​ꦩꦤ꧀ꦠꦼꦥ꧀ꦭꦤ꧀ꦠꦼꦩꦼꦤ꧀ꦠꦼꦫꦸꦱ꧀ꦤꦸꦫꦸꦠ꧀ꦒꦸꦱ꧀ꦠꦶ​ꦱꦏ꧀ꦲꦠꦶꦤꦺ​꧉​ 24ꦧꦂꦤꦧꦱ꧀ꦏꦸꦮꦶ​ꦮꦺꦴꦁ​ꦲꦥꦶꦏ꧀ꦱꦶꦁ​ꦏꦼꦧꦼꦏ꧀ꦏꦫꦺꦴ​ꦫꦺꦴꦃ​ꦱꦸꦕꦶ​ꦭꦤ꧀ꦥꦼꦔꦤ꧀ꦢꦼꦭ꧀꧈​ꦲꦺꦴꦏꦺꦃꦮꦺꦴꦁ​ꦥꦢ​ꦥꦽꦕꦪ​ꦩꦫꦁ​ꦒꦸꦱ꧀ꦠꦶ​ꦪꦺꦯꦸꦱ꧀ ꦗꦭꦂꦫꦤ꧀ꦱꦁꦏꦥꦶꦮꦸꦭꦁꦔꦺ​ꦧꦂꦤꦧꦱ꧀꧈​

25꧋ꦱꦏ꧀ꦮꦶꦱ꧀ꦱꦺ​ꦏꦸꦮꦶ​ꦧꦂꦤꦧꦱ꧀ꦠꦼꦫꦸꦱ꧀ꦭꦸꦔ​ꦤꦁꦏꦸꦠꦠꦂꦱꦸꦱ꧀ ꦔ꧀ꦒꦺꦴꦭꦺꦏ꧀ꦏꦶ​ꦱꦼꦢꦸꦭꦸꦂ​ꦱꦲꦸꦭꦸꦱ꧀꧈​ 26ꦏꦢꦸꦁ​ꦮꦶꦱ꧀ꦏꦼꦠꦼꦩꦸ​꧈​ꦱꦲꦸꦭꦸꦱ꧀ꦠꦼꦫꦸꦱ꧀ꦢꦶꦲꦼꦗꦺꦏ꧀ꦤꦁꦏꦸꦠꦄꦤ꧀ꦠꦶꦪꦺꦴꦏꦶ꧉​ꦧꦂꦤꦧꦱ꧀ꦭꦤ꧀ꦱꦲꦸꦭꦸꦱ꧀ꦩꦸꦭꦁꦔꦶꦮꦺꦴꦁ​ꦲꦺꦴꦏꦺꦃꦤꦁꦥꦱꦩꦸꦮꦤ꧀ꦤꦁꦄꦤ꧀ꦠꦶꦪꦺꦴꦏꦶꦏꦺꦴꦤꦺꦴ​꧈​ꦔꦤ꧀ꦠꦶ​ꦱꦼꦠꦲꦸꦤ꧀ꦱꦸꦮꦺꦤꦺ​꧉​ꦪ​ꦤꦁꦄꦤ꧀ꦠꦶꦪꦺꦴꦏꦶꦏꦺꦴꦤꦺꦴ​ꦮꦺꦴꦁꦮꦺꦴꦁ​ꦱꦶꦁ​ꦤꦸꦫꦸꦠ꧀ꦒꦸꦱ꧀ꦠꦶ​ꦪꦺꦯꦸꦱ꧀ꦏꦿꦶꦱ꧀ꦡꦸꦱ꧀ꦩꦺꦴꦭꦃꦲꦶꦢꦶꦕꦼꦭꦸꦏ꧀​ꦮꦺꦴꦁ​ꦏꦿꦶꦱ꧀ꦠꦼꦤ꧀꧈​

27꧋ꦲꦶꦁ​ꦮꦏ꧀ꦠꦸ​ꦏꦸꦮꦶ​ꦠꦼꦫꦸꦱ꧀ꦲꦺꦤꦺꦁꦤꦧꦶ​ꦱꦶꦗꦶꦭꦺꦴꦫꦺꦴꦱꦁꦏꦪꦺꦫꦸꦱꦭꦺꦩ꧀ꦠꦼꦏ​ꦤꦁꦄꦤ꧀ꦠꦶꦪꦺꦴꦏꦶ꧉​ 28ꦲꦺꦤꦺꦁꦱꦶꦗꦶ​꧈​ꦗꦼꦤꦼꦁꦔꦺ​ꦄꦏꦧꦸꦱ꧀ ꦤꦩ꧀ꦥ​ꦏꦮꦼꦫꦸꦃꦱꦁꦏꦫꦺꦴꦃ​ꦱꦸꦕꦶ​ꦠꦼꦫꦸꦱ꧀ꦔꦺꦴꦩꦺꦴꦁꦤꦺꦏ꧀ꦧꦏꦭ꧀ꦲꦺꦤꦺꦁꦏꦼꦏꦸꦫꦁꦔꦤ꧀ꦥꦔꦤ꧀ꦒꦼꦢꦺꦤꦼꦏꦤꦶ​ꦱꦏ꧀ꦧꦸꦩꦶ​꧉​꧌ꦭꦤ꧀ꦲꦶꦏꦶ​ꦪ​ꦥꦚ꧀ꦕꦺꦤ꧀​ꦏ꧀ꦭꦏꦺꦴꦤ꧀ꦠꦼꦤꦤ꧀ꦢꦺꦴꦁꦔꦺꦏ꧀ꦭꦲꦸꦢꦶꦪꦸꦱ꧀ꦢꦢꦶ​ꦫꦠꦸ​꧉​) 29ꦩꦸꦭꦤꦺ​ꦥꦫ​ꦱꦼꦢꦸꦭꦸꦂ​ꦏꦿꦶꦱ꧀ꦠꦼꦤ꧀ꦤꦁꦏꦸꦠꦄꦤ꧀ꦠꦶꦪꦺꦴꦏꦶꦠꦼꦫꦸꦱ꧀ꦩꦺꦴꦭꦃꦲꦶꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦸꦫꦸꦤ꧀ꦤꦤ꧀ꦏꦁꦒꦺꦴ​ꦱꦼꦢꦸꦭꦸꦂꦱꦼꦢꦸꦭꦸꦂ​ꦏꦿꦶꦱ꧀ꦠꦼꦤ꧀ꦱꦶꦁ​ꦤꦁꦪꦸꦢꦺꦪ​꧉​ꦱꦧꦼꦤ꧀ꦮꦺꦴꦁ​ꦏꦸꦢꦸ​ꦔꦸꦫꦸꦤ꧀ꦤꦶ​ꦱꦏ꧀ꦧꦶꦱꦤꦺ​꧉​ 30ꦏꦢꦸꦁ​ꦮꦶꦱ꧀ꦫꦩ꧀ꦥꦸꦁ​ꦲꦼꦁꦒꦺꦴꦤꦺ​ꦔ꧀ꦭꦸꦩ꧀ꦥꦸꦏ꧀ꦏꦏꦺꦲꦸꦫꦸꦤꦤ꧀ꦤꦺ꧈​ꦱꦼꦢꦸꦭꦸꦂꦱꦼꦢꦸꦭꦸꦂ​ꦠꦼꦫꦸꦱ꧀ꦔꦺꦴꦁꦏꦺꦴꦤ꧀ꦧꦂꦤꦧꦱ꧀ꦭꦤ꧀ꦱꦲꦸꦭꦸꦱ꧀ꦔꦼꦠꦼꦂꦫꦏꦺꦢꦸꦮꦶꦠ꧀ꦠꦺꦩꦫꦁ​ꦥꦫ​ꦥꦼꦤꦸꦤ꧀ꦠꦸꦤꦺ​ꦥꦱꦩꦸꦮꦤ꧀ꦤꦁꦪꦺꦫꦸꦱꦭꦺꦩ꧀꧈​

↑ ↑ ↑

← ꧇​꧑꧐꧇​   ꧇​꧑꧒꧇​ →